MARK

MARK

¹ He tah Pathen Capa Jesuh Khrih kawng Awlthang theen ni. ² A tongcuek vengah tawngha Isaiah lawng: “Pathen lawng ‘Nang hamla lawngpui tukkung Kamah kah laipai na haiah kavan tuih ai, ti.’

³ Thlaang pakhat tah ramhum huhang ah paang tih, “Bawipa ham lawngpui te roekbah uh, a cehna ham lawngpui te doeng sak uh,” tila a thut.

⁴ Tedawngah Johan tah ramhum huhang ah va law, baptisma a peek tih phung a thui. Thlaangping thli te, “Na thawlhna yut u langtah baptisma dang uh. Te dengah ni Pathen lawng na thawlhna sawah khawdawp avan ngai u ai.” a tina. ⁵ Judia peng oen Jerusalem kah thlaang thli lawng Johan kah phungthui te hutung hamla cet u. A thawlhna a phawng u tih Jordan tuiva ah ahimi te Johan lawng baptisma a peek u. ⁶ Johan lawng Kala-uk mul oen a tah himbai te a baai tih a hingcen ah saphaw cihin a naak. Ahih lawngah khaurang oen khawitui te buh la a caak. ⁷ Ahih lawng thlaangping nala te, “Kai coengah aka law ham koei thlaang te tah kai lak ah aka lenduet ni. Kai tah ahih kah khowmuek rui thlam ham Pateng ka ting ka tawkk nawh. ⁸ Kai lawngtah nangmi he tui oen ni baptisma kan peek u. Tede ahih lawngtah Ciim Muithla oen baptisma m’peek ai,” a tina.

⁹ Tecoeng kalawng a awm raih thlan ah Jesuh tah Galili peng Nazaret khaaw kalawng va law tih Jordan tuiva ah Johan lawng baptisma a peek. ¹⁰ Jesuh te tui dawng kalawng a thawh hang khoeng vengah vaan te awng u tih ahih sawah Muithla akhuu angla a cuuk te a huh. ¹¹ Vaan kalawng aka law awl lawngah, “Nang tah kan thintlawhna ka Capa ni, na sawah ka kaw tluep, tangkiik” a tina.

¹² Tecoeng atah Muithla lawng ahih te ramhum huhang la a tuih pahoei tih, ¹³ Te ah te khawhin sawmlii awm tih Seitan lawng a suek a halh. Ramsatlung thli khaw te ah te awm, tede vanthlaang thli law u tih Jesuh te a bawm acem u.

¹⁴ Johan te thong a tlaak coengah Jesuh tah Galili ram la cet tih Pathen tengkah Awlthang Theen te a phawng. ¹⁵ “Atue atang tah avan pha khuek poen! Pathen ukna tah yoeii poen! Na thawlhna yut u langtah Awlthang Theen he tangna uh!” tila a thui. ¹⁶ Galili tuikeeng ah Jesuh a ceh phai vengah tuihawi thlaang pahih Simon oen a manau Andru lok a heeng hih te a huh. ¹⁷ Jesuh lawng ahih rawi nala, “Ka hu ah bang hih lah, thlaang tukung la kan coengg sak hih ai,” a tina. ¹⁸ Tevengah lok te pak a tloeng hih tih Jesuh hu ah bang hih pahoei. ¹⁹ Ahih tah cet hot phai tih Zebedi ca rawi Jeem oen Johan boeinau te a huh. Ahih rawi tah lowng khuiah lok te a baw hih. ²⁰ Jesuh lawng a huh pahoei oen te rawi te a khue. Ahih rawi lawng ana pa Zebedi oen a bii aka bi pe thlaang thli te lowng khuiah a ceh taak hih tih Jesuh hu ah bang hih pahoei.

²¹ Jesuh oen a hubang hue Kapernaum khawpui la law u tih Sabbath hin ah Jesuh te Sinakok la cet tih cang puei ham a tong. ²² Jesuh lawngtah Phungawl cangpueikung hue angla cang puei nawh tih sai thaina aana aka khueh angla a cang puei dawngah ahih kah cangpueina aka ya boeih lawngtah a kawpoek rai u. ²³ Tevengah te a kaw khuiah raaithe aka awm thlaang pakhat sinakok bok-im khuila law tih rih oen thuen ruila paang, ²⁴ “Nazaret Jesuh, kaimi he metila sai ham na ngaih? Kaimi he phe ham aw na law? Nang he me ang thlaang ti he kan ming: Nang tah Pathen kah laipai thlaang ciim ni” a tina. ²⁵ Jesuh lawng raaithe te, “Awm duem lah, te thlaang kaw khui kalawng co loeih!” tila awl a peek.

²⁶ Raaithe lawng te thlaang te a ngaih hlang la a thuen sak, rih oen thuenn doe ah paang tih te thlaang kah a kaw khui kalawng co. ²⁷ Thlaang boeih te a kawpoek rai u tih khat oen khat te, “He he me ang kai? Cangpueina a thaai phun tloe kai aw? He thlaang lawng raaithe te aana oen awl a peek tih ahimi lawng awl a ngaai pe,” ti u.

²⁸ Tedawngah Jesuh kawng awlthang te kawlkalh maiah Galili peng khaaw tawm ah thaang khonghak.

²⁹ Jesuh oen a hubang hue, Jeem oen Johan mi khaw, sinakok kalawng tho u tih Simon oen Andru im la poe cet u. ³⁰ Simon kah a mase hutaa te tlo tih ral. Jesuh te a paipuek ah ahih kah sading nawh kawng te a thui pe u. ³¹ Jesuh lawng a tengla cet tih ahih te a kut ah a phoeih tih a thawh hang. A sa ding pahoei tih ahimi te a do a dan.

³² Khaw a tlaak coeng thlem khup atah thlaangping lawngah thlaangtlo boeih oen raaithe aka khueh thli te Jesuh tengla avan law puei u. ³³ Te khawpui khuikah thlaang boeih tah im haiah tun u boeih. ³⁴ Jesuh lawng tlawhnatna soeprep boeih oen aka tlo thli te a hoeih sak tih raaithe thli khaw boeih a hek. Jesuh he me ang thlaang tite raaithe thli lawng a ming u dawngah Jesuh lawng raaithe thli te awl kam at khaw thui sak u nawh.

³⁵ Avuen khawhin mincanghi khaw a thaih thlan ah Jesuh tah tho tih khawpui adauben ading asuekna huen la te cet tih te ah te thangthui. ³⁶ Simon oen a paya thli lawng ahih te a tlap tih, ³⁷ a huh u vengah, “Thlaang boeih lawng nang he n’tlap u ta,” a tina u. ³⁸ Tede Jesuh lawngah, “He kah atloe khaaw teng khaaw vai la cet u sih. Ahimi tengah khaw phung ka thui ham awm. Te ham ni kai ka law roe ta,” a tina.

³⁹ Tedawngah Jesuh tah Galili peng tawm ah cet, sinakok bok-im boeih ah te phung a thui tih raaithe thli khaw a hek.

⁴⁰ Haibe aka tlo thlaang pakhat Jesuh tengla law tih khuklu oen cuengkueng ruila, “Na kawngaih atah nan hoeih sak thai,” tila reenna a bih. ⁴¹ Jesuh lawng a reen tangkiik dawngah a kut a thueng tih a tek, “Hoeih sak ham ka ngaih ta, hoeih loeih,” a tina.

⁴² Kawlkalh ah haibe natna te hoeih tih ciim pahoei. ⁴³ Tecoengah Jesuh lawng ahih te he tila awl ceet ceet a uen tih a tuih pahoei.

⁴⁴ Hutung lah! He kawng he a-u tengah khaw thui boel. Tede khawsoeih tengla cet phaat langtah na pum te nueh lah; tecoengah nang na hoeih poen tite thlaang boeih lawng a mingna ham Mosi kah awlpeek angla thawthuengna te sai,” a tina.

⁴⁵ Tede te kah thlaang lawng cet tih amah aciimna kawng te a thui tih khaaw tawm ah thaang khonghak. Ahih lawng he kawng he yahawh la a thui lat dawngah Jesuh tah khawpui khuila langya ah cet thai tlaih nawh poen. Khawpui adauben adingruena huen ah awm tih te la te khaw tawm kah thlaang thli te a tengla law u.

¹ Khawhin yahawh hlang a awm raih thlan ah Jesuh te Kapernaum khaaw la meel koep tih im ah awm tila awlthang a yaak u. ² Tedawngah thlaang yahawh hlang va tun u tih im khuiah ahoengna roe awm muehla thawhka keeng adauben ah Pateng khaw be khawk. Ahimi tengah te Jesuh lawng phung a thui pe. ³ Tevengah thlaang palii lawng aka khawn thlaang pakhat te Jesuh tengla avan kawh u. ⁴ Tede thlaang yahawh aih tih Jesuh tengla te pha puei u thai nawh. Tedawngah Jesuh a awmna tuueng kah imphu te a phe u, thlaangtlo te a himbai dawngah a ralh sak tih a thlaak thuk u. ⁵ Ahimi kah oengna te Jesuh lawng a huh vengah aka khawn thlaangtlo te, “Ka ca, na thawlhna boeih te khawdawp kavan ngaai poen,” a tina.

⁶ Te kah aka ngawl Phungawl cangpueikung khatsut lawng, ⁷ “N’tu ah he tila a thui ngam kai? Pathen thekhana poen ni, Pathen bueng nawh atah a-u lawng thawlhna khawdawp a ngaai thai! tila a kaw khuiah a poek u.

⁸ Ahimi kah kawpoek te Jesuh lawng a ming tih ahimi nala te, “N’tu kawng ah he ang thaihu he na poek u? ⁹ He kah aka khawn thlaang he, ‘Na thawlhna khawdawp ngaai la awm poen,’ tina aw aka yoei bet, tihnawhtah ‘Tho loeih, na himbai te lo langtah cet loeih,’ tina aw aka yoei bet? ¹⁰ Thlaanghing Capa lawng dilai han ah thawlhna khawdawp ngaai thaina aana a khueh ti he nangmi tengah ka tueng sak ai,” a tina. Tedawngah aka khawn thlaang nala. ¹¹ “Tho lah, na himbai te lo langtah im la cet loeih kan tina he!” a tina. ¹² Ahimi boeih kah mik huh ah te thlaang lawng tho hang, a himbai te a lawh tih aloela cet. Ahimi boeih tah a kawpoek rai u tih, “He ang thaihu he n’hu vai u nawh!” ti u tih Pathen te a thangpawm u.

¹³ Jesuh tah Galili tuiliikeeng la cet koep. Thlaangping broe lawngah a tengla a law u dawngah Jesuh lawng ahimi te a cang puei. ¹⁴ Jesuh lawng a ceh phai vengah Alfias capa mangmu cawikung amah yungim ah aka ngawl Levi te a huh. Jesuh lawng ahih nala, “Ka hu ah va bang lah,” a tina. Levi lawng tho tih a hu ah bang pahoei.

¹⁵ Tecoeng atah Jesuh te Levi im ah buh a caak. Mangmu cawikung thli oen atloe thlaangthawlh thli lawng Jesuh te a hu ah bung a vai u tih khatsut lawngah Jesuh oen a hubang hue te buh a veel puei u. ¹⁶ Te tila Jesuh lawng thlaangthawlh thli oen mangmu cawikung hue oen ah buh a veel haih u te Phungawl cangpueikung khatsut oen Farasi thli lawng a huh u vengah, “N’tu dawngah he ang thlaang thli oen ahih lawng buh haih a caak u?” tila a hubang hue te a doet u.

¹⁷ Jesuh lawng ahimi kah awldoet te a yaak tih, “Sading thlaang lawng Siibawi ngoe nawh tih thlaangtlo bueng lawng ni a ngoe. Hinyah koei thlaangdoeng khue ham ka law nawh tih thlaang thawlh khue ham ni ka law” a tina.

¹⁸ Hin at atah Baptisma pekung Johan kah hubang hue oen Farasi thli buh a yeh u. Thlaang khatsut Jesuh tengla law u tih “Baptisma pekung Johan kah a hubang hue oen Farasi thli lawng buh a yeh u, nang kah hubang hue lawngtah n’tu kawngah buh a yeh u van nawh?” tila a doet u.

¹⁹ Jesuh lawng, “Yului poei ah a khue kamyin thli lawng buh a yeh u ai tila na poek aw? Yeh u manawh! Yulokung a awm vengah ahimi lawng buh yeh u manawh. ²⁰ Tede ahimi teng kalawng yulokung a khuena khawhin a pha ai, tevengah ahimi lawng buh a yeh u badai. ²¹ A-u lawngkhaw a himbai ruem te bawna ham hisa athaai te hawna nawh; a bawna atah hisa athaai lawng aruem te a doek vetih a puut kau tare ai. ²² A-u lawngkhaw misurtui athaai te saphaw-yuukhap athaai dawngah thloen nooek nawh, thloen kawinih misurtui lawng saphaw-yuukhap te a pawkk sak vetih pahih bok la misurtui te yut boeih ai, saphaw-yuukhap te khaw paw poen ai. Tedawngah misurtui athaai te saphaw-yuukhap athaai dawngah thloen ham awm,” a tina.

²³ Sabbath khawhin ah Jesuh te caangthliw kalawng cet. A hubang hue khaw amah oen cet haih u tih ahimi lawng ceh doe ah caangvui a yuun u. ²⁴ Tedawngah Farasi hue lawng Jesuh nala, “Bueh lah! na hubang hue lawng Sabbath khawhin ah he ang thaihu a sai u he mami kah Phungawl lawng ngaih nawh” a tina u. ²⁵ Jesuh lawng ahimi nala te, “Devid lawngah caak koei khat khaw a khueh nawh vengah n’tu a sai tite na tae u vai nawh aw? Amah oen a paya thli a bung pawng u tangkiik, ²⁶ Devid lawng Pathen im khuila kuun phaat tih Pathen tengah a nawn u takawi te a caak. Khawsoeih bawi Abiatha dung vengah te tila a sai. Mami kah Phungawl angla kawinih Khawsoeih hue bueng lawng ni te takawi te a caak. Tede Devid lawng a caak tih a puei thli Pateng khaw a peek” a tina.

²⁷ Tecoengah Jesuh lawng awlcuina ah, “Thlaanghing theenna hamla ni Sabbath he a sai; Sabbath hamla thlaanghing he sai nawh.

²⁸ Tedawngah Thlaanghing Capa he Sabbath Bawi la khaw awm” a tina.

¹ Tecoengah Jesuh tah sinakok bok-im la te cet koep. Te ah te kut kheem thlaang pakhat awm. ² Jesuh kah sai thawlhna dawngah thawlh peel ham aka ngaih thlaang khatsut te ah te awm u; tedawngah Sabbath khawhin ah Jesuh lawng thlaang a hoeih sak ai aw, hoeih sak nawh ai aw ti u tih ahimi lawng ayoeirepla huh ham a doen u. ³ Jesuh lawng te kah kut kheem thlaang te, “Hai benla law lah,” a tina. ⁴ Tecoengah thlaangping te, “Mami kah Phungawl lawng Sabbath hin ah n’tu sai sak ham a ngaih? Thlaang bawmcem ham aw, tihnawhtah patang khang sak ham aw?” tila a doet. Tede ahimi lawng awl kam at khaw thui u nawh. ⁵ Jesuh te a thin sa, a teng avai ah te maang tih ahimi te a bueh, ahimi a thin len tih a thawlh u te a huh vengah khatvaang atah a kaw khaw the. Tecoengah kut kheem thlaang nala te, “Na kut te yueng lah” a tina. A kut te a yueng tih theen koep. ⁶ Tecoengah Farasi hue tah Sinakok bok-im kalawng cet u tih Herod kah a thlaang thli oen huh u pahoei tih ahimi lawng Jesuh te ngawn ham khawkhanna a khueh u.

⁷ Jesuh oen a hubang hue tah Galili Tuilii la cet u. Thlaangping broe lawngah a hu ah bung a vai u. Te kah thlaangping te tah Galili peng, Judia peng, ⁸ Jerusalem khawpui, Idumia peng, Jordan tuiva khawcuuk ben ramri kah Taiar oen Sidon khawpui teng kalawng aka law thlaang thli ni. Jesuh kah thaihu sai te a yaak u tih ahimi boeih lawng a tengla te law u. ⁹ Thlaang a yahawh aih dawngah thlaangping lawng a tiil hau nawh ham lowng pakhat te amah hamla roekbah oepsoeh ham a hubang hue te a thui pe. ¹⁰ Thlaangtlo yahawh hlang te a hoeih sak dawngah thlaangtlo boeih lawng Jesuh te tek hamla tulh u the. ¹¹ Raaithe aka khueh thlaang boeih lawng ahih te a huh u vengah a haiah buekuep u tih thuen ruila, “Nang tah Pathen Capa ni.” tila paang u. ¹² Jesuh lawng amah te me ang thlaang tite a-u tengah khaw thui nawh ham raaithe thli te awl a peek.

¹³ Tecoengah Jesuh tah tlaangsawm la luui hang tih amah kah a ngaih thlaang thli te a khue. Ahimi lawng ahih tengla law u, ¹⁴ thlaang thlaihih a tuek tih ahimi te, “Celtuih” tila miing a sak. “Ka tengah awm ham kan tuek u, phung aka thui la kan tuih u vetih, ¹⁵ Nangmi lawng raaithe hek thaina aana khaw na khueh u ai,” a tina.

¹⁶ Celtuih thlaihih a tuek hue te tah, Simon (Piter a ti u te), ¹⁷ Zebedi ca rawi Jeem oen a manau Johan (Jesuh lawng he rawi he Boanerzi tila miing a sak, a thuingaihna tah khawhumm ca rawi tina ni). ¹⁸ Andru, Filip, Bartalomiu, Matthai, Tawmas, Alfias capa Jeem, Taddias, Phunkuup Simon oen ¹⁹ Jesuh sawah paipi thleepkung Judas Iskariot, he hue ni.

²⁰ Tecoengah Jesuh te im la meel. Thlaangping lawng tun u koep tih Jesuh oen a hubang hue tah buh caak ham atue Pateng awm nawh. ²¹ Te kawng te a cakaw hue lawng a yaak u tih ahih te khuutcem ham cet u. Metihtiah thlaang thli lawng “Jesuh tah ngau poen” tila a thui u dawngah ni.

²² Jerusalem kalawng aka law Phung-awl cangpueikung khatsut lawng, “A kaw khuiah Beelzebul awm! te tah raaithe hek thaina huham aka pe rai bawi ni” tila a thui u. ²³ Tedawngah Jesuh lawng ahimi te amah tengah a khue tih thuidoetna awl oen a thui pe: “Metila Seitan lawng Seitan te a hek thai ai? ²⁴ Ram pakhat ah amah oen amah athloekla pek u tih pakhat oen pakhat kaap u the kawinih te kah imkhuikaw tah pai thai manawh. ²⁵ Imkhuikaw pakhat ah amah oen amah athloekla pek u tih pakhat oen pakhat raal u the kawinih te kah imkhuikaw tah pai thai manawh. ²⁶ Tetih van angla Seitan kah ram khaw athloekla pek u kawinih aboet toe caak manawh, thek yak u vetih boet poen ai.

²⁷ Thlaang a tha aka ra te a piin lamha nawh atah a-u lawngkhaw a im te muk tih a kaawn-ava te lawh pe thai manawh; amah te a piin coengah ni a kaawn-ava te a lawh pe thai ai.

²⁸ Ataktang kavan thui u, thlaang he a thawlhna boeih oen awlthe awlkha a thui boeih te khawdawp a ngaai pe thai ai.

²⁹ Tede a-u khaw Ciim Muithla te thekhana awlthe aka thui tah mevengah khaw khawdawp ngaai pe thai manawh, metihtiah dungyan thawlhna te a sai poen.” a tina. ³⁰ (Thlaang khatsut lawng, “Raaithe te Jesuh kaw khuiah kuun” a ti u dawngah Jesuh lawng he tila a thui pe ni.)

³¹ Tevengah Jesuh kah a manu oen a manau thli avan pha u. Im adauben ah pai u tih im khuila thlaang a tuih tih ahih te a khue sak. ³² Thlaangping lawng Jesuh te a veel u tih ngawl u. Ahimi lawng, “Bueh lah, na manu oen na manau thli oen ah na ngannu thli lawng nang n’tlap u tih adauben ah awm.” a tina u. ³³ Jesuh lawng, “A-u nuem ka manu? Ka manau hue te a-u nuem?” a tina. ³⁴ A tengah amah aka veel tih aka ngawl thlaangping te a bueh tih, “Bueh lah! He ah he ka manu oen ka manau thli tah awm! ³⁵ A-u khaw Pathen lawng sai sak ham a ngaih te aka sai boeih tah ka manau, ka ngannu oen a nu ni.” tila a thui pe.

¹ Jesuh lawng Galili Tuilii keeng ah te cang puei koep ham a tong. A tengah aka tun thlaangping te ayahawh aih dawngah lowng khuila kuun tih te ah te ngawl. Lowng te tuiluung ah awm tih thlaangping tah tuiliikeeng tui tengah pai u. ² Ahimi te thaihu yahawh hlang cang puei ham thuidoetna te a hawna tih ahimi nala te;

³ “Hutung u lah! Voei khat ah lo khuehkung thlaang pakhat tah caangti tuh hamla cet. ⁴ Ahih lawng lo khuiah caangti te a tuh vengah khatsut tah lawngpui ah tla, va thli law tih kang a ruh boeih. ⁵ Caangti khatsut tah Lungrawng sawkah dilai a pamna ah tla, dilai a pam dawngah kawlkalh ah caangti te po. ⁶ Tede khaw a ling hang atah caangkung te khawling lawng a kaang, a yung a phooeng dawngah kawlkalh ah yai tih reu. ⁷ Caangti khatsut tah thliing tim ah tla, thliingkung te roeng hang, caangkung te a diik khoep tih a vui athaih awm nawh. ⁸ Tede caangti khatsut tah laitheen dawngah tla tih po, roeng hang tih a vui athaih thawn. Khatsut tah a pueh sawmthum, atloe hue te tah sawmruk, yakhat toela puung. ⁹ Jesuh lawng awlcuina ah, “Hutung uh, yaakna haa aka khueh lawngtah ya seh” a tina.

¹⁰ Jesuh te amah bueng a awm vengah a awlthui aka ya thlaang khatsut lawng a hubang thlaihih hue oen a tengla haih law u tih thuidoetna awl te thuicaih pe ham a ceel u. ¹¹ Jesuh lawng, “Pathen Ram kah awlhuep tah nangmi tengah m’peek poen. Tede adauben ah aka awm thlaangtloe lawngtah thuidoetna awl bueng oen ni thaihu he a yaak u, ¹² tedawngah, ‘Ahimi lawngah a bueh khing u de hu u nawh; Ahimi lawngah a hutung khiing u de yaakming u nawh. Metihtiah ahimi lawng hu tih yaakming u kawinih Pathen tengla meel u vetih khawdawp a ngaai pe ai.” tila a thui angla awm ai” a tina.

¹³ Tecoengah Jesuh lawng ahimi nala te, “He kah thuidoetna awl he na yaakming u nawh aw? Te tih atah metila atloe thuidoetna thli te na yaakming u thai ai? ¹⁴ Caangti tuhkung lawng Pathen awl te a tuh, ¹⁵ Thlaang khatsut tah lawngpui ah aka tla caangti oen lo u; Ahimi lawng awl a yaak pek vengah te Seitan lawng law tih a kaw khuiah a tuh awl te a rot pe. ¹⁶ Atloe thlaang thli tah dilai a pamna lungrawng sawah aka tla caangti oen lo u. Pathen awl te a yaak u vengah awmngaih la pahoei a do u. ¹⁷ Tede ahimi kah thinkaw lungbui ah a thlengyung a thlaak nawh dawngah asan hlang awm nawh. Tedawngah Pathen awl kawng dawngah thekha raina oen heemtekna soeprep a law vengah ahimi lawng kawlkalh ah a hoett pahoei u. ¹⁸ Atloe thlaang thli tah thliing tim ah aka tla caangti oen lo u. He thli lawng Pathen awl te a yaak u, ¹⁹ tede he dilai khawsakna dawngah lakuengna, bawireng ham ngaihna soeprep lawng kuun tih Pathen awl te a tleng khoep dawngah ahimi tah a vui athaih awm nawh. ²⁰ Tede atloe thlaang thli tah lai theen dawngah a tuh caangti oen lo u. Ahimi lawng Pathen awl te a yaak u vengah a do u tih a vui athaih thawn. Khatsut tah a pueh sawmthum, khatsut tah a pueh sawmruk, khatsut tah a pueh yakhat toela thawn.” a tina.

²¹ Jesuh lawngah, “A-u lawngkhaw haiim te a khuen tih beeldung oen a muek khoep aw? Tih nawh atah ihkhun huiah khaw a khueh u aw? ²² Ahuep ahel ah a thuh boeih te a tuengna huen ah pho boeih vetih muek dah la aka awm boeih te khaw a daih boeih ai. ²³ Tedawngah yaakna haa na khueh u atah ya uh” a tina. ²⁴ Tecoengah Jesuh lawng ahimi nala, “Na yaak u te anepla poek uh! Thlaangtloe awlcekna ham na hawna a taring van te nang awlcekna ham Pathen lawng a hawna van ai, te lak ah anauh ngaai la a hawna tare ai. ²⁵ A-u khaw aka khueh moek te a tawm athap pe vetih aka khueh nawh te a khueh duen Pateng khaw a lawh pe ai.” a tina.

²⁶ Tecoengah Jesuh lawng, “Pathen Ram tah he oen lo u. Thlaang pakhat lawng a lo khuiah caangti a heh. ²⁷ Khaw a yiin atah ip, mincang ah tho tih hingthun ah bii a bi, tevengah caangti tah po tih roeng hang. Tede caangti te metila a po hang tih a roeng hang tite ming nawh. ²⁸ Dilai lawng akung te a roeng sak tih a thaih sak. Lamhacuek-la a raaidueng thoeng, tecoengah caangvui te thoeng tih hukhueng ah caangvui dawngah a cang te a awm sak. ²⁹ Caang te hiin tih caang ah tue apha vengah thlaang lawng vin oen caang te a ah,” tila a thui pe.

³⁰ Jesuh lawng, “Pathen Ram he n’tu oen a lawh u tila n’thui lah ai? Thuicaihna ham me ang thuidoetna n’hawna u lah ai? ³¹ Te tah he oen lo u. Thlaang pakhat lawng dilai dawngkah amu-ati boeih lak ah aka yiit koek antammu thaam at te a lawh tih a tue. ³² Tecoengah po tih a roeng hang atah tawitlim anno thing boeih lak ah aka bo koek la awm. A beek thli te abo hlang la cawn, va thli law u tih a khuup ah bu a tuk u,” a tina. ³³ Jesuh lawng ahimi kah yaakming thai khoek ah he ang thuidoetna atloe khaw a hawna tih Pathen awl a thui pe. ³⁴ Ahih lawng thuidoetna hawna muehla ahimi tengah awl thui pe nawh, tede Jesuh he a hubang hue oen amami bueng a awm u vengah soeprep thaihu boeih te a thuicaih pe.

³⁵ Te khawhin thlemben ah Jesuh lawng a hubang hue nala, “Tuilii khatben rall la cet u sih,” a tina. ³⁶ Tedawngah ahimi lawng thlaangping te a ceh taak u tih Jesuh a ngawlhna lowng khuila a hubang hue te kuun u tih Jesuh te a ceh puei u. Lowng atloe thli khaw teah te awm. ³⁷ Poek mueh maila, thlipui tho khuengdeng tih tuiphu te lowng khuila a kuun dawngah lowng khuiah tui be tawm. ³⁸ Jesuh tah lowng a mai ben ah te awm tih luudoelh dawngah te muelh ip. A hubang hue lawng a thawh u tih, “Saya, mami n’duek boeih poen ai he, n’tu la na sak nawh aw?” a tina u. ³⁹ Jesuh lawng tho hang tih thlipui te awl a peek, “Thli tlaih boel, duem loeih!” a tina. Tevengah thlipui lawngkhaw duem tih dipsiditla awm. ⁴⁰ Tecoengah Jesuh lawng a hubang hue nala te, “N’tu ah he tila na rih u aih? Tahe toe oengna na khueh u nawh hun aw?” a tina.

⁴¹ Tevengah ahimi lawng caalla a rih u tih, “He thlaang he a-u kai? Thlipui oen tuilet lawng Pateng awl a ngaai pe mai!” tila khat oen khat ti u.

¹ Jesuh oen a hubang hue tah Galili tuilii khatben rall ah aka awm Kerasa peng te a pha u. ² Jesuh te lowng dawng kalawng a suntlaak khoeng vengah te kah phuel lungkaw khuikah thlaang pakhat lawngah Jesuh te avan pan. Te thlaang te tah a kaw ah raaithe kuun tih, phuel ah aka awm roe ni.

³ A-u lawngkhaw thiirui oen khit u thai tlaih nawh. ⁴ A kut a khow ah a khih taitu u poen de a piin u vengah thiirui te khaw a bot tih a thlam. Ahih tah a tha ra soeh tih a-u lawngkhaw taa thai nawh. ⁵ Yiin daai phuel oen tlaangsawm yun ah yingyo, paang tih amah oen amah te lungto hatt oen phom u tih aat u. ⁶ Ahih lawng Jesuh te a huh vengah te ahih tah athlala awm; tedawngah heeng tih Jesuh haiah khuklu oen a cuengkueng pe, ⁷ angaihhlangla paang tih, “Sawsang Koek Pathen Capa Jesuh, kai he metila sai ham na ngaih? Pathen rang oen reenna kavan bih, dan n’tat mai boel!” a tina. ⁸ Jesuh lawng, “Nang Raaithe, he thlaang kah a kaw khui kalawng co loeih!” a tina dawngah ni he tila a paang. ⁹ Tedawngah Jesuh lawng, “A-u na miingna?” tila a doet. Te kah thlaang lawngah, “Kaimi tah ka piing aih u dawngah, ‘Mob’ ka miingna” tila a thui.

¹⁰ Te kah ram kalawng te tila raaithe thli te hek nawh hamla Jesuh tengah a bih mangkhak. ¹¹ Te kalawng ayoeiina tlaangthleep ah awk hui at a vuelh u te awm. ¹² Raaithe thli lawng Jesuh tengah, “Kaimi he awk thli tengla n’ceh sak langtah te thli kah a kaw khuila n’kuun sak u lah!” tila a bih u.

¹³ Jesuh lawng ahimi te a ceh sak, raaithe thli tah te kah thlaang kaw khui kalawng co u tih awk kaw khuila kuun u. Te kah awk thli te apum boeih la thong hih yun awm. Awk thli te cehthleeng ah plit u tih tuilii ah buekk dingkang. ¹⁴ Awk aka vuelh hue lawng heng u tih khawpui oen lo yun ah te kah awlthang te a thui soeh u. Thlaangping lawng te tila aka awm te huh hamla cet u. ¹⁵ Jesuh teng a pha u vengah Mob raaithe thli aka khueh thlaang lawngah himbai a bai tih lungcuih la teah a ngawlh te a huh u tih ahimi boeih lawng a rih u. ¹⁶ Te kah thaihu aka hu boeih lawngah raaithe lawng a tuuk thlaang tengah aka thoeng thaihu oen awk thli kawng te thlaang thli tengah a thui pe u.

¹⁷ Tedawngah ahimi ram te Jesuh lawng a ceh taak na ham Jesuh tengah reenna a bih u. ¹⁸ Jesuh te lowng khuila a kuun vengah te raaithe aka khueh thlaang lawngah, “Na hu ah ka bang van ai” a tina. ¹⁹ Tede, Jesuh lawng bang sak nawh. “Im la cet koep langtah na cakaw thli tengah Bawipa lawng nang ham metila thaihu avan sai tih metila reenna avan khueh tite thui peh,” a tina. ²⁰ Tedawngah te thlaang lawng cet tih Khawpui Paha a ti u te a hiil tih Jesuh lawng a sai pe thaihu te a thui. Tedawngah aka ya thlaang boeih tah a kawpoek rai u.

²¹ Jesuh te tuilii khatben rall la koep cet. Tuilii keeng ah thlaangping te tun u tih ahih te a veel khoep u. ²² Sinakok bok-im kah bawi pakhat Jairu te law tih Jesuh te a huh vengah a khow kungah khuklu oen cuengkueng tih, ²³ lunghoeih la reenna a bih, “Ka canu tlo tih nauh tangkiik. Reenna oen law langtah a sawah na kut tloeng pe lah, te atah hoeih vetih a sa ding ai,” a tina. ²⁴ Jesuh te ahih oen haih cet. Thlaang ping lawng Jesuh te a hu ah a vai u tih khatben khat bang kalawng Jesuh te a nen u. ²⁵ Te ah te kum thlaihih khui thisuntlaak tlawhna a ka tlo hutaa pakhat awm.

²⁶ Siibawi yahawh hlang lawng a tuui ahai tih a khueh tangka boeih khaw a khok poen de hoeikhang nawh tih nauh tare. ²⁷ Ahih lawng Jesuh kawng te a yaak van, tedawngah ahih lawng thlaangping tim ah Jesuh kah a hu benla te law tih, ²⁸ “A himbai mah ka tek mai kawinih ka hoeih ngai suide,” tila a poek. ²⁹ Ahih lawng Jesuh kah himbai te a tek, tevengah thisuntlaak te khap dip pahoei tih a tlawhna hoeih poen tila a kaw khuiah a ming.

³⁰ Jesuh lawng a pum dawngkah huham tharana thoeng tite a ming pahoei vengah thlaangping tengla te maang dak tih, “A-u lawng ka himbai a tek?” tila ahimi te a doet. ³¹ A hubang hue lawng, “Thlaangping lawng nang n’nen u te na huh lal maiah n’tu ah ‘A-u lawng n’tek na ti?” a tina u. ³² Tede Jesuh lawngtah a himbai a-u lawng a tek tite ming hamla a teng-avai te a bueh. ³³ Te hutaa lawng ahih sawah thaihu aka thoeng te a ming, tedawngah rih oen thuen ruila law tih Jesuh khow kungah khuklu oen cuengkueng tih asoengla boeih a thui pe. ³⁴ Jesuh lawng, “Ka canu, na oengna lawng n’hoeih sak poen. Ngaimawng la cet loeih, na tlawhna hoeih loeih seh.” a tina.

³⁵ Jesuh lawng te tila awl a thui lii vengah te, Jairu im kalawng puencawn thli law u tih Jairu nala te, “Na canu duek poen. N’tu ah saya he kawhuet cakbat la na khueh khiing?” a tina u. ³⁶ Jesuh lawng ahimi kah awl thui te n’tu la khaw sak nawh, Jairu nala te, “Lakueng boel, oeng mah oeng mai lah” a tina. ³⁷ Tecoeng atah Piter, Jeem oen a manau Johan te a ceh puei tih thlaangtloe tah a-u khaw ceh puei nawh. ³⁸ Jairu im te a pha u atah curumngang la awm u tih lungphit laithai oen aka rungrap thli te Jesuh lawng a huh.

³⁹ Im khuila Jesuh te kuun tih ahimi nala te, “N’tu ah curumngang la na awm u? N’tu ah na rung na rah u? Camaw he a duek moenih, aka ip mai ni!” a tina. ⁴⁰ Ahimi lawng Jesuh te a nuihna u. Te kah aka awm thlaang thli te adauben la a ceh sak u. Camaw kah a manu oen ana pa oen ah a hubang hue pathum te a ceh puei tih camaw a helhna akhann khuila te kuun u.

⁴¹ Camaw te a kut ah a phoeih tih, “Talitha, koum” a tina. A thuingaihna tah, “Hutaaca tho lah! kan tina.” tina ni. ⁴² Hutaaca te tho pahoei tih yingyawi. (Te kah hutaaca tah kumha thlaihih law). Te kah aka awm boeih te a kawpoek rai u tangkiik. ⁴³ Tede a-u tengah khaw thui nawh ham ahimi te Jesuh lawng awl ceet ceet a uen tih, “Caak awkk pe uh,” a tina.

¹ Jesuh lawng te huen te a ceh taak tih amah khaaw la te meel koep. A hubang hue lawng a hu ah a vai u. ² Sabbath khawhin ah sinakok bok-im ah te cang puei ham a tong. Te ah te thlaang yahawh hlang awm tih ahih kah awlthui aka ya boeih tah a kawpoek rai u tangkiik. “He ang thli boeih he ame kah a dang kai? Ahih lawng a dang cuihna he me ang cuihna kai? metila kawpoek-raina he a sai kai? ³ Ahih he Meri capa, Jeem, Josep, Judas oen Simon kah a maya lettama te nawh aw? A ngannu thli khaw he ah aka awm u te nawh aw?” ti u. Tedawngah ahimi lawng Jesuh te hinyah u nawh tih n’tu la sak u nawh.

⁴ Jesuh lawng ahimi nala, “Tawngha he amah awmna khawpui oen amah kah huiakaw oen ah amah imkhuikaw thui muehla huen tloe boeih atah a hinyah u” a tina. ⁵ Te ah te thlaangtlo ayawl sawah kut a tloeng tih a hoeih sak, te bueng nawh atah atloe kawpoek raina n’tu khaw sai nawh. ⁶ Thlaangping lawngah Oengna a khueh u nawh dawngah Jesuh tah a kawpoek rai sut.

⁷ A hubang thlaihih te a khue tun tih pahih, pahih ah a bok u sak tih a tuih u. Ahimi te raaithe hek thaina aana te a peek, ⁸ “Yin cehna ah cawnghol bueng nawh tah atloe n’tu khaw khuen u boel; caak awkk khaw, sawngsa khaw, na angki thlep ah khaw keel u boel. ⁹ Khowmuek tah muek uh, tede angki a hoei khuen u boel.” a tina. ¹⁰ Tecoengah ahimi nala te, “Nang aka pah sak im ah te khaaw tloe la na ceh thlantoe te ah te awm uh. ¹¹ Na phana khaaw pakhat ah pahna im m’pe u nawh tih na awlthui khaw a hutung u nawh atah na khow dawngkah laidiik te khoek pe uh. Te tah ahimi hamla ngaithuen peekna la awm ai,” a tina.

¹² Tedawngah ahimi lawng cet u tih thlaang boeih lawng a thawlhna kalawng a meel koepna ham phung a thui pe u. ¹³ Raaithe thli te a hek u, thlaangtlo thli te Olif situi a koelh u tih boeih a hoeih sak u.

¹⁴ Jesuh kawng awlthang te ram pum ah thaang khok tih Herod sengpahrang lawngkhaw te kawng te boeih a yaak. Thlaang khatsut lawngah, “Baptisma pekung Johan ni aka hing koep! Tedawngah he tila kawpoek rai saithaina he a khueh,” ti u.

¹⁵ Thlaangtloe hue lawngtah, “Elijah ni,” ti u. Thlaang vang lawngtah yan veng kah tawngha thli angla tawngha pakhat van ni,” ti u. ¹⁶ Te awl te Herod lawng a yaak vengah, “Ahih te baptisma pekung Johan ni! A luu ka tloek pe poen de hing koep!” tila a thui. ¹⁷ Herod amah roe lawngah tuuk sak tih thiirui oen khih coengah thongim ah thlaak ham awl a peek. He tila a sai he tah Herod lawng a manau Filip yu Herodias te a rot pe dawngah ni. ¹⁸ Baptisma pekung Johan lawng Herod nala, “Na manau yu na rot pe he soeng nawh,” a tina. ¹⁹ Tedawngah Herodias lawng Johan te a huhhuett tih ngawn ham a ngaih. Tede Herod lawng a oelh ataih tih ngawn thai nawh. ²⁰ Herod lawngtah Johan te thlaangdoeng oen thlaang ciim ni tila a ming dawngah a rih tih ading apuek cala a khueh. Herod lawng ahih kah awlthui te hutung ham a ngaih. Tede a awlthui te a yaak veng roekk ah awmngaih thai nawh. ²¹ Hukhueng atah Herod a cuunna khawhin ah atue theen te Herodias lawng a dang. Herod lawng amah a awmna khawhin ah ukkung bawi thli, raalbawi thli oen Galili ram kah hinyah koei ahaamca thli hamla poei a sai pe. ²² Herodias canu lawng kuun tih laam, Herod oen a ceel bawi thli oen kamyin thli tah a kaw hoe u tangkiik. Tedawngah sengpahrang lawng hutaaca nala, “N’tu na ngaih? Na ngaih boeih te kan pe ai,” a tina. ²³ “Navan bih boeih te kan pe ai, ka ram he keekvaang Pateng kan pe ai,” tila awl a kam.

²⁴ Tedawngah hutaaca lawng cet tih a manu nala te, “N’tu ka bih ai?” tila a doet. A manu lawng, ‘Baptisma pekung Johan luu te bih.” a tina.

²⁵ Hutaaca lawng sengpahrang tengla te aloela meel koep phai tih, “Baptisma pekung Johan luu te tahe roe ah beelphai dawngah nan peek ham ka ngaih.” a tina.

²⁶ Sengpahrang te a kaw caalla the, tede a kamyin thli haiah awl a kam poen dawngah hutaaca lawng a bih te oelh tlaih nawh.

²⁷ Tedawngah raltoeng aka pai raalkap pakhat te a tuih pahoei tih Johan kah luu te tloek tih avan khuen hamla awl a peek. ²⁸ Tecoengah beel phai dawngah Johan luu te avan khuen tih hutaaca te a peek, hutaaca lawng a manu te a peek patoeng van. ²⁹ Johan kah a hubang thli lawng he kawng he a yaak u vengah law u, a rawkk te a lawh u tih phuel ah a up u.

³⁰ Celtuih hue te koep va meel u tih Jesuh oen huh u, ahimi lawng a saina oen a cangpueina boeih te a thui pe u. ³¹ Te ah te aka cet oen aka law thlaang ayahawh aih dawngah Jesuh oen a hubang hue te buh caak ham atue Pateng khaw khueh u nawh. Tedawngah ahimi nala te, “Ading asuekna huen la cet u silang tah mami bueng awm u lah sih, te ah te kawlkalh khaw na duem u thai ai,” a tina. ³² Tedawngah ading asuekna huen la amami bueng lowng oen cet u.

³³ Ahimi a ceh u te thlaangping lawng a huh u tih Jesuh oen a hubang hue ni tila a ming u, tedawngah khawpui boeih kah thlaang cet u tih lanloeih kalawng anna khall u, Jesuh oen a hubang hue a phana koei a huen te ahimi haiah anna pha doen u. ³⁴ Lowng khui kalawng Jesuh a suntlaak vengah thlaangping te a huh, ahimi te doenkung aka awm nawh tuu angla a awm u te a huh vengah a reen tangkiik. Tedawngah thaihu yahawh hlang a cang puei. ³⁵ Khaw athlem veng atah a hubang hue a tengla law u tih, “Khaw thlem poen, he huen he thlaang a awmna ahuen nawh ni. ³⁶ Thlaangping he tuih langtah he kah a teng-avai lo yun ah khaw, vang khuiah khaw amami ham caak awkk lai u seh,” a tina u.

³⁷ Jesuh lawng, “Nangmi lawngah ahimi te caak awkk pe uh,” a tina. A hubang hue lawngah, “Tangka yahnih phu caak koei ka lai u silang tah ahimi he ka kok u ai aw?” tila a doet u.

³⁸ Tedawngah Jesuh lawng ahimi nala te, “Takawi meyoeh na khueh u? Cet langtah bueh u lah” a tina. Ahimi lawng cet tih a huh u tah, “Takawi cuun ngaa oen nga phih awm,” a tina u.

³⁹ Tecoengah Jesuh lawng a hubang hue nala, thlaangping te athloep athloepla pompih saihiim dawngah ngawlh sak ham a thui pe. ⁴⁰ Tedawngah thlaangping hue te yakhat ah thloep at, sawmngaa ah thloep at athaanla khok ngawl u. ⁴¹ Tecoengah Jesuh lawng takawi cuun ngaa oen nga pahih te a lawh, vaan la maang hang tih Pathen tengah awmngaih awl a thui. Takawi te a eh tih thlaangping te rek ra ham a hubang hue tengah a peek. Nga lunghih te khaw ahimi tengah a ree pe. ⁴² Thlaang boeih lawng ahahcala a caak u. ⁴³ Tecoengah takawi oen nga a caak coeih te a hubang hue lawng vawhphueih paha thlaihih dawngah abetoetla a cawi u. ⁴⁴ Takawi aka ca te tawngpataang mah thlaang thong ngaa law u.

⁴⁵ Jesuh lawng thlaangping te a ceh sak veng te ah a hubang hue te lowng khuila a kuun sak pahoei tih tuilii khatben rall kah Betsaida khaaw la te lamhala a tuih. ⁴⁶ Thlaangping te sadingla meel uh a tina coengah amah tah thangthui hamla tlaang la cet. ⁴⁷ Khaw athlem vengah a hubang hue kah lowng te tuiluung ah te awm, tevengah Jesuh tah amah bueng lan ah awm hun. ⁴⁸ Yilh lawng a maam khak tih lowng te a hubang hue lawng a kaih tloel u te Jesuh lawng a huh. Tedawngah mincang khawnoek pathum oen paruk laklaw yun atah ahimi tengla te tui sawah cet tih ahimi te a khall tawm, ⁴⁹ tevengah tui sawah Jesuh a law te ahimi lawng a huh u. Ahimi lawngtah, “Muithla ni tila a poek u dawngah lakueng u tih paang u. ⁵⁰ Ahimi boeih lawng ahih te a huh u vengah a rih u. Jesuh lawng ahimi te a voem pahoei tih, “Lakueng u boel! Kai ni, rih u boel.” a tina. ⁵¹ Tecoengah ahimi tengah lowng khuila kuun, teveng dengah yilh law te dip. A hubang hue tah a kawpoek la rai u tangkiik, ⁵² thlaang thong ngaa Jesuh lawng buh a kok te a thuingaihna tangtang te yaakming u nawh, a kawpoek lawngkhaw pha u thai nawh.

⁵³ Tuilii khatben rall la te cet u tih Gennesaret khaaw te a pha u tih te ah te lowng te a kiing u. ⁵⁴ Lowng dawng kalawng a suntlaak u vengah thlaangping lawng Jesuh te a noek u. ⁵⁵ Tedawngah te kah ram pum ah aloela cet u tih thlaangtlo thli te paa dawngah a kawh u tih Jesuh a awmna ah avan law puei u.

⁵⁶ Tecoengah Jesuh a cehna ahuen roekk ah vangca oen vangpui kah khaw, lo yun kah khaw, dawr yun kah khaw thlaangtlo thli te avan law puei u tih a himbai mah tek sak hamla reenna a bih u, aka tek boeih tah hoeih u.

¹ Jerusalem kalawng aka law Farasi khatsut oen Phungawl cangpueikung khatsut te Jesuh tengah tun u. ² A hubang khatsut lawng kut muen la buh a caak u te ahimi lawng a huh u; a thuingaihna tah Farasi thlaang thli lawng amami siing ah kut silh ham awm a ti angla te a kut sil u nawh tina ni.

³ Farasi boeih oen Judah thlaang boeih lawng patuer hue kah cangpueina te a vai u; amami kah siing angla kut a silh u nawh atah buh ca u nawh; ⁴ dawr kah a lai thaihu khaw a silh lamha nawh atah ca u nawh. Te tila te patuer hue kah cangpueina siing atloe tloe, boengloeng, um-am oen ruhum beel oen ah ihkhun silhna boeih khaw a vai u.

⁵ Tedawngah Farasi thli oen Phungawl cangpueikung hue lawngah Jesuh nala te, “N’tu kawngah na hubang hue lawng patuer hue kah cang puei patoeng te a vai u nawh tih kutmuen la buh a caak u?” tila a doet.

⁶ Jesuh lawng ahimi nala te, “Nangmi kawng he Isaiah lawng a thui oepsoeh te soeng tangtang! Nangmi thlaang-thaipalat kawng he he tila a thut: Pathen lawngah, he kah thlaang thli lawng a awl hong oen kai n’hinyah u, tede ahimi kah thinkaw lungbui tah kai oen ah thla tangkiik. ⁷ Kai m’bok u he apoei mai ni, metihtiah ahimi lawng thlaanghing kah sai Coplap phung alam te Pathen kah phungawl angla a cang puei u!’

⁸ Pathen kah awlpeek te nangmi lawng na hoett u tih thlaanghing kah cangpueina te na vai u.” a tina.

⁹ Tecoengah Jesuh lawng, “Namami kah cangpueina acak thaina ham Pathen kah Phungawl hoett ham tah na thoem u lauh! ¹⁰ Mosi kah awlpeek dawngah, “Na nu oen na pa te hinyah uh’ ti oen ah, ‘A-u khaw a manu oen ana pa te aka tapvoep boeih tah ngawn ham awm’ tila awm. ¹¹ Tede nangmi lawngtah ‘Thlaang pakhat lawngah a manu oen ana pa bawmcemna ham hawna thai koei thaihu a khueh te Korban a ti atah ¹² te thlaang te a manu khaw, ana pa khaw bawmcemna kalawng loeih poen, tila na cang puei u. ¹³ He tila nangmi lawng thlaangtloe te na cang puei patoeng dawngah Pathen awl te a hoett u. Tecoengah te ang thaihu tloe na sai u yahawh hlang awm hun,” a tina.

¹⁴ Tecoengah Jesuh lawng thlaangping te amah tengla a khue koep tih ahimi nala, “Nangmi boeih lawng ka awlthui he hutung u langtah yaakming u lah! ¹⁵ Thlaanghing he adauben kah aka kuun thuk thaihu lawngah bokna phung ah aciim acaih nawh la a sai moenih, akhuiben kah aka thoeng hang thaihu lawng ni thlaang he aciim acaih sak nawh dai. ¹⁶ (A-u khaw yaakna haa aka khueh lawngtah ya u seh),” a tina.

¹⁷ Jesuh lawng thlaangping te a ceh taak tih im khuila a kuun vengah a thui awl te thuicaih pe hamla a hubang hue lawng a ceel u. ¹⁸ Jesuh lawng ahimi nala te, “Thlaangtloe lak ah na cuih thloei u nawh den he! Na yaakming u roe nawh aw? Adauben kalawng akhuila aka kuun thuk thaihu lawng thlaanghing he ataktang la aciim acaih sak nawh moenih, ¹⁹ n’tu ah ti atah te thaihu te a thinkaw khuiah kuun nawh tih a bungpui khuila a kuun dawngah pum khui kalawng naatceh la thoeng,” a tina. (He tila Jesuh lawng a thui he me ang caak awkk khaw caak koei boeih tila a thuingaihna ni.

²⁰ Jesuh lawng koep a thui pe tih, “Thlaanghing kaw khuikah aka thoeng hang thaihu lawng ni thlaang he aciim acaih sak nawh. ²¹ Thlaang kah thinkaw lungbui khui kalawng athe-arana aka sai sak athe poekna thaihu thli, huencaanna, thlaang ngawnna, ²² Cuk-halhna, apueh ngaihna, boethena, thailatna, asoeng nawh saina, uett-eena, thlaang thuitheetna, oekthloenna oen ngau-athuuna, ²³ he ang athe thaihu boeih he thlaang kaw khui kalawng thoeng tih thlaang he ciimcaih sak nawh,” a tina.

²⁴ Tecoengah Jesuh lawng te huen te a thawh taak tih Taiar ram la te cet. Im pakhat ah kuun tih teah ahih a awm te a-u khaw ming sak ham ngaih nawh, tede thuh u thai nawh. ²⁵ A canu raaithe lawng a tuuk pe hutaa pakhat lawng Jesuh kawng te a yaak, a tengla law pahoei tih a khowkung ah a buekuep pe. ²⁶ Ahih tah Gental nu la awm tih Siria ram Fonicia peng ah a cuun thlaang ni. A canu pum dawngkah raaithe te hek pe hamla Jesuh tengah a bih. ²⁷ Tede Jesuh lawng, “Lamhala camaw thli te buh cah u sih. Camaw thli kah buh te lawh pe tih ui peek vik he soeng nawh,” a tina.

²⁸ Ahih lawng, “Bawipa, tetih de mah ta! Camaw thli kah caakdik caboi huikah te ui lawngkhaw a caak van de ta!” a tina.

²⁹ Tedawngah Jesuh lawng ahih nala te, “Te tila awl na thung dawngah im la meel loeih, na canu raaithe lawng a co taak te na huh ai,” a tina. ³⁰ Ahih tah im la meel tih ihkhun dawngah a canu aka ral te a huh; raaithe lawng ahih te a co taak tangtang poen.

³¹ Tecoengah Jesuh lawng Taiar peng te a ceh taak, Dekapolis peng ah pat cet tih Sidon kalawng ah Galili Tuilii la te cet. ³² Thlaang khatsut lawng haapang awlmueh thlaang pakhat te a tengla avan law puei u tih ahih sawah kut tloeng pe ham Jesuh tengah reenna a bih u. ³³ Tedawngah Jesuh lawng ahih bueng te thlaangping tim kalawng atloe la a ceh puei tih te thlaang kah a haa khui te a kutdawn oen a pueih pe, tumtui a tha tih a laai te khaw a koelh pe. ³⁴ Tecoengah Jesuh te vaan la maang hang, adung hlang la hill a sang tih te thlaang nala te, “Effatha,” a tina. A thuingaihna tah, “Awng u loeih.” tina ni.

³⁵ Kawlkalh ah te thlaang lawng awl a yaak thai, ahih kah awlthui kanghalhna te khaw ha-ata tih raina khat khaw awm muehla awl cal. ³⁶ Tecoengah a-u tengah khaw thui nawh ham thlaangping te Jesuh lawng awl a uen; tede te thli tengah a khang pe tare vengah ahimi lawng a thui u tare ngaai. ³⁷ Tecakhaw aka ya boeih tah a kawpoek rai u. Ahimi lawngah, “A sai thaihu soeprep boeih he theen tangkiik mah aw! Haapang khaw haa a khui sak tih awlmueh khaw awl a cal sak!” tila a thui u.

¹ Tecoeng adiw thlan ah atloe thlaangping te khaw tun u. Thlaangping hue te caak ham a khueh u nawh dawngah Jesuh lawng a hubang hue te a khue tih, ² “He kah thlaang thli he kai oen hin thum awm puet u poen tih tahe ah caak ham n’tu khaw khueh u tlaih nawh, he kah thlaangping hue he ka reen tangkiik aih poen. ³ Ahimi he buh cah ohla im la ka tuih u kawinih thlaang khatsut tah khaw thla kalawng a law u dawngah lawngpueng ah tawnba u hau ai,” a tina. ⁴ A hubang hue lawng, “He kah ramhum huhang ah thlaang he yoeh ham caak khoek a-u lawng a dang thai ai?” a tina u.

⁵ Jesuh lawng, “Takawi meyoeh na khueh u?” a tila. Ahimi lawng, “Takawi cuun rih tah awm,” a tina u.

⁶ Jesuh lawng thlaangping te dilai dawngah ngawlh ham awl a peek. Tecoengah takawi cuun rih te a lawh tih Pathen tengah awmngaih awl a thui coengah takawi te a eh tih thlaangping tengah rek ra pe hamla a hubang hue te a peek, a hubang hue lawng patoeng arek ara u. ⁷ Ahimi lawng nga a yawl a khueh u baal. Jesuh lawng Pathen tengah awmngaih awl a thui coengah nga te khaw a hubang hue te arek ara sak. ⁸ Thlaang boeih lawng a caak tih hah u. Aka ca boeih tah thlaang thong lii yun awm. ⁹ A caak coeih te vawh phueih pasarih dawngah abela a hubang hue lawng a cawi u. Jesuh lawng thlaangping te a ceh sak tih, ¹⁰ amah khaw a hubang hue oen lowng khuila kuun u pahoei tih Dalmanutha peng la te cet u.

¹¹ Farasi thlaang khatsut Jesuh tengla law u tih Jesuh oen oelhtaih u. Ahimi lawng a thawlhna tuuk pe ham a ngaih u dawngah, “Pathen kah thlaang tuih la na awm tang aw, na awm nawh aw tite mingna hamla kawpoekrai-miknoek pakhat ah sai lah,” a tina u. ¹² Tede Jesuh lawng adung hlang la a hill a sang tih, “N’tu ah tihin hang kah thlaang lawng he kawpoekrai-miknoek a kuek u kai aw? Ka sai manawh, atak tang kavan thui u! Te ang te tihin hang kah thlaang thli tengah ka sai manawh,” a tina.

¹³ Ahimi te a ceh taak tih lowng khuila te a kuun coengah tuilii khatben rall la te cet.

¹⁴ A hubang hue lawng takawi te amami ham khoek khuen hamla a hilh u tih lowng khuiah ahimi tengah takawi cuun at bueng a khueh u. ¹⁵ Jesuh lawng ahimi nala, “Farasi thlaang thli kah tawlru oen Herod kah tawlru dawngah ngaithuen uh,” a tina.

¹⁶ Ahimi lawng, “Mami lawngah takawi n’khueh u nawh dawngah ni ahih lawng he tila a thui,” ti u.

¹⁷ Ahimi lawng te tila a thui u te Jesuh lawng a ming tih ahimi nala te, “N’tu ah takawi khat khaw na khueh u nawh kawng te na thui khiing u? Na ming u nawh tih na yaakming u thlan hun aw? Na kaw hang sut u aw? ¹⁸ Mik na khueh u lal maiah na hu u nawh aw? Haa na khueh u lal maiah na ya u nawh aw? ¹⁹ Thlaang thong ngaa ham takawi cuun ngaa ka eh pe te na hilh u poen aw? Acoeih te vawhphueih meyoeh dawngah abela na cawi u te?” a tina. Ahimi lawng, “Vawh phueih paha thlaihih,” a tina u.

²⁰ Tecoengah Jesuh lawng, “Thlaang thong lii ham takawi cuun rih ka eh pe vengah acoeih te vawhphueih meyoeh dawngah abecala na cawi u?” tila a doet.

²¹ Jesuh lawng ahimi nala, “Tahe toe na yaakming u nawh hun aw?” a tina.

²² Ahimi tah Betsaida khaaw te a pha u, teah te thlaang khatsut lawng mikpum thlaang pakhat Jesuh tengla avan law puei u tih ahih te tek hamla Jesuh tengah reenna a bih u. ²³ Jesuh lawng mikpum te a kut ah a mawt tih te khaaw kah adauben la a ceh puei. Te thlaang kah a mik te tumtui oen a phuh pe coengah ahih sawah Jesuh lawng a kut te a tloeng pe tih, “Thaihu khat mai khaw na huh thai aw?” tila a doet.

²⁴ Te thlaang lawng maang hang tih, “Oeih, thlaang thli ka huh thai, tede ahimi tah thingkung thli aka cet angla awm,” a tina.

²⁵ Jesuh lawng te thlaang kah a mik dawngah a kut te koep a tloeng. Tevengah ahih lawng a mik a daai heet tih a bueh vengah a tueng pe koep tih soeprep boeih te aciimphanla a huh. ²⁶ Jesuh lawng ahih nala, “Vang khuila cet koep tlaih boel,” a tina tih im la a tuih.

²⁷ Tecoengah Jesuh oen a hubang hue tah Sisaria Filipi tengvaai kah vangca vangnau la te cet u. Lawngpueng ah ahimi nala te, “thlaang thli lawng kai he a-u a ti u, van thui u lah?” tila a doet.

²⁸ Ahimi lawngah, “Khatsut lawng nang he Baptisma pekung Johan ni ti u, atloe hue lawngtah nang he Elijah ni, ti u tih thlaang vang lawngtah nang he tawngha pakhat khat ni ti u,” tila a thui pe u.

²⁹ Jesuh lawng ahimi nala te, “Nangmi ta, kai he a-u na ti u?” tila a doet. Piter lawngah, “Nang tah Messiah ni,” a tina.

³⁰ Jesuh lawng ahimi nala te, “Kai kah kawng he a-u tengah khaw thui u boel.” tila te awl a uen.

³¹ Tecoengah Jesuh lawng a hubang hue te cang puei ham a tong: “Thlaang-hing Capa lawng patang a khang vetih ahaamca thli, khawsoeih ahaamca thli oen Phungawl cangpueikung thli lawngah a hoett u ai. Ahih te a ngawn u ai, tede hin thum coengah tho koep ai a tina. ³² Jesuh lawng he kawng he ahimi tengah acairaula a thui pe. Tedawngah Piter lawng ahih te atloe ngaai bet la a ceh puei tih a siim. ³³ Tede Jesuh lawng maang dak tih a hubang hue te a bueh, Piter te a tlung tih, “Seitan, ka teng kalawng cet lah. Na poekna he Pathen benkah nawh ni, thlaanghing benkah poekna ni!” a tina.

³⁴ Tecoengah Jesuh lawngah thlaangping oen a hubang hue te amah tengla a khue tih ahimi nala te, “A-u khaw ka hu ah bang hamla aka ngaih tah amah kaw ngaih te hoett selang amah kah thinglam te kawt selang tah ka hu ah bang seh. ³⁵ A-u khaw a hingna thlawn ham aka ngaih tah a hingna te sung ai, tede a-u khaw awlthang theen oen kai kawng dawngah a hingna te a sung atah a hingna a thlawn ai.

³⁶ Thlaang pakhat lawng dilai pum he amah koe la khueh mai cakhaw a hingna te a sung atah aphu awm aw? Aphu awm tlaih nawh! ³⁷ A hingna te dang koep ham a peek thai n’tu khaw awm nawh. ³⁸ Thlaang pakhat lawng tihin hang kah Pathen n’tu la aka sak nawh san the vengah he kai kah cangpueina oen kai aka yahna tah, Thlaanghing Capa lawngkhaw ana Pa kah ruep-awmna oen aciim vanthlaang thli oen a law thuk vengah a yah puei van ai.

¹ Tecoengah Jesuh lawng awl a thui pe koep tih, “Ataktang kavan thui u, he kah aka awm thlaang khatsut hue he Pathen Ram huham tharana oen a law te a huh u thlantoe duek u manawh,” a tina.

² Hinruk a awm coengah Jesuh lawng Piter, Jeem oen Johan mi te a ceh puei, tlaangsawm la a luui puei tih te ah te amami bueng awm u. Ahimi kah mik huh ah Jesuh kah a mueime te thawleng u, ³ a himbai te abawkla aang rawngtheng tih tetih aihla abawk ham tah dilai dawngkah a-u lawngkhaw suk thai manawh. ⁴ Tecoengah Elijah, Mosi oen Jesuh mi awl a thui u te a hubang hue lawng a huh. ⁵ Piter lawng Jesuh nala, “Saya, he ah mami ng’awm u he theen tangkiik! Riim-im pathum ah ka sa u silang tah pakhat te nang ham seh, pakhat te Mosi ham seh, akhat te tah Elijah ham seh,” a tina u. ⁶ Ahih oen atloe rawi lawngah a rih tangkiik u tih thui ham koei khaw ahih lawng ming sut nawh. ⁷ Tecoengah muui yaal tih ahimi te a thiing khoep. Muui dawng kalawng ah, “He tah ka thintlawhna Ka Capa ni, a awl hutung pe uh!” tila awl kam at va law. ⁸ Ahimi lawng a teng avai ah a bueh u de a-u khat khaw hu u nawh tih Jesuh bueng te ahimi tengah awm.

⁹ Tlaangsawm kalawng a rum thuk u vengah Jesuh lawng ahimi nala te, “Thlaanghing Capa he duekna kalawng a thawh koep thlantoe na huh u thaihu he a-u tengah khaw thui u boel,” tila awl a uen.

¹⁰ Ahimi lawng te awl uen te a vai u, tede amami oen amami mai te, “Duekna kalawng thawhkoepna ti he n’tu kai?” tila he kawng he a thui khiing u. ¹¹ Tecoengah ahimi lawng Jesuh te, “N’tu ah Phungawl cangpueikung thli lawng ‘Elijah he lamhala law ai’ a ti u kai?” tila a doet u.

¹² Jesuh lawng, “Soeprep boeih he roekbah oepsoeh hamla Elijah tah law tangtang ai. Te tih atah n’tu ah Caciim lawngah Thlaanghing Capa lawng patang a khang vetih ahih te a hoett u ai tila a thui kai? ¹³ Tede kavan thui u, Elijah tah law poen tih Caciim lawng ahih kawng te a thui angla thlaang thli lawng amami ngaih la a sawah a sai u poen,” a tina.

¹⁴ Ahimi lawng atloe a hubang hue tengah a pha vengah thlaangping lawng te thli te a veel khoep u tih Phungawl cangpueikung thli khatsut oen a hubang hue a oelh u te a huh. ¹⁵ Thlaangping lawng Jesuh te a huh u vengah a kawpoek rai tangkiik, a tengla cet u tih a voemtoei u. ¹⁶ Jesuh lawng a hubang hue te, “Nangmi he ahimi oen ah n’tu kawng na oelh u khiing te?” tila a doet.

¹⁷ Thlaangping tim kah thlaang pakhat lawng, “Saya, ka capa raaithe lawng a tuuk tih awl khaw a cal thai nawh dawngah nang tengla kavan law puei. ¹⁸ Raaithe lawng a tuuk vengah dilai dawngah tlim kut tih a kaa dawng kalawng a tilhawm thoeng, a naw te a tah tih a pum boeih keuhkhang la awm. Na hubang hue tengah raaithe hek hamla reenna ka bih de hek u thai nawh. ¹⁹ Jesuh lawng ahimi nala te, “Nangmi oengna aka khueh nawh thlaang hue! Nangmi he metuek toe kan awm puei ai? Nangmi he meyoeh toe nuem kan reen u lah ai? Camaw te ka tengla van law puei uh,” a tina. ²⁰ Ahimi lawngah camaw te Jesuh tengla avan law puei u. Raaithe lawng Jesuh te a huh pahoei vengah camaw te rap rap a doek, dilai dawngah tlim tih savaih, a kaa dawngah tilhawm a peem.

²¹ Jesuh lawng, “Meveng kalawng he tila a awm?” tila ana pa te a doet. Ana pa lawng, “A camoe veng kalawng awm poen.

²² Raaithe lawng camaw he ngawn hamla a teeng tih hai dawngkhaw, tui khuiah khaw a tulh poepa. Na sai thai koeila a awm atah n’reen langtah m’bawm lah,” a tina. ²³ Jesuh lawngah, “Na sai thai koei la a awm atah na ti aw!, Oeih! Oengna aka khueh thlaang ham tah soeprep boeih he coengg thai ta,” a tina.

²⁴ Tevengah camaw kah ana pa lawng, “Oengna ka khueh ta, tede khoek nawh, m’bawm lah!” tila angaih hlang la paang.

²⁵ Jesuh lawng thlaangping amah tengla voeh ava yoeii phai te a huh vengah raaithe nala, “Awlmueh oen haapang raaithe nang awl kan peek, Camaw kaw khui kalawng co langtah mevengah khaw kuun koep tlaih boel!” a tina. ²⁶ Raaithe te angaihhlangla paang tih Camaw te langlang a thuen sak tih co. Camaw te duek rawkk angla awm tih thlaang boeih lawngah, “Duek poen” ti u. ²⁷ Tede Jesuh lawng camaw te a kut ah a phoeih tih a thawh vengah ahih te pai hang.

²⁸ Jesuh te im khuila a kuun coeng atah a hubang hue lawng ahuepla, “N’tu kawngah kaimi lawngtah raaithe ka hek thai u nawh kai?” tila a doet u. ²⁹ Jesuh lawngah, “Thangthuina bueng oen ni he ang he hek thaina a awm, atloe hek thaina tah awm nawh!” a tina.

³⁰ Jesuh oen a hubang hue tah te huen kalawng tho u tih Galili peng kalawng poe cet u. Jesuh lawng a hubang hue te a cang puei hun dawngah amah a awmna te a-u khaw ming sak hamla ngaih nawh, ³¹ A cangpueina tah, “Thlaanghing Capa he thlaang kut ah a peek u vetih a ngawn u ai. Tede hin thum coengah tho koep ai,” a tina. ³² Tede ahih kah cangpueina te a hubang hue lawng a thuingaihna yaakming u nawh. Ahih te doetdap ham khaw birih u.

³³ Ahimi tah Kapernaum khaaw te a pha u tih im khuila a kuun u coengah Jesuh lawng a hubang hue te, “Lawngpueng ah n’tu kawng na oelh u khiing te?” tila a doet. ³⁴ Tede ahimi lawng, mami tim ah a-u nuem bawilen koek tila lawngpueng ah a oelh u khiing dawngah ahih kah awl doet te thung pe u nawh. ³⁵ Jesuh lawng ngawl tih a hubang paha thlaihih te a khue tih ahimi nala, “A-u khaw asangkoek la awm ham aka ngaih tah nangmi boeih lak ah aheem koek oen tuihyoeihthlaang la awm seh,” a tina. ³⁶ Tecoengah camaw pakhat te a khue tih ahimi haiah a pai sak. Camaw te a lengawi tih ahimi nala te, ³⁷ “A-u khaw he ang camaw thli he ka miing oen pakhat khaw aka do tah kai aka do ni; a-u khaw kai aka do tah kai bueng he n’do nawh tih kai tuihkung te khaw a do,” a tina.

³⁸ Johan lawng, “Saya, Nang kah miing oen raaithe aka hek thlaang pakhat ka huh u tih mami tim kah thlaang nawh dawngah sai tlaih nawh ham ka khang pe u,” a tina. ³⁹ Jesuh lawng ahimi nala te, “Khang pe u boel! ka miing oen kawpoekrai-miknoek aka sai thlaang lawngah kai he athela aka thui pahoei a-u khaw awm nawh. ⁴⁰ A-u khaw mami aka oelhtaih nawh tah mami ben ah aka awm ni. ⁴¹ Atak tang kavan thui u: Kai kah thlaang la na awm u dawngah nangmi te tuiding boengloeng khui at khaw aka tuul tah kutdo a dang ngaikhoek ai,” a tina.

⁴² “A-u khaw he ang camaw thli timkah pakhat mai te khaw, kai a oengna te phelh sak ham aka suek tah caang neetna sum lungto te a rawn ah a awi tih tuiliidung ah sungpung kawinih ahih ham theen bet ai. ⁴³ Tedawngah na kut lawng na oengna te a phelh sak atah tloek poet hawn! Na kut pahih oen aka duek tlaih nawh hell hai khuiah na tlaak lak atah na kut pakhat bueng oen hingna khuiah na kuun te theen ngai. ⁴⁴ Te huen atah ahimi aka ca ami te khaw duek tlaih nawh tih ahimi aka ung sak hai te khaw duek tlaih nawh. ⁴⁵ Na khow lawng na oengna te a phelh sak atah na khaw te tloek poet hawn! Na khow pahih oen hell khuiah na tlaak lak atah na khow pakhat bueng oen hingna khuiah na kuun te theen ngaai. ⁴⁶ Te huen atah ahimi aka ca ami te khaw duek tlaih nawh tih ahimi aka ung sak hai te khaw duek tlaih nawh. ⁴⁷ Na mik lawng na oengna te a phelh sak atah na mik te koeih pak hawn! Mik pahih oen hell khuiah ne tlaak lak atah mik pakhat bueng oen Pathen Ram ah na kuun te theen ngaai. ⁴⁸ Te huen atah ahimi aka ca ami khaw duek tlaih nawh tih ahimi aka ung sak hai khaw duek tlaih nawh. ⁴⁹ Luciik sa boeih te lungkeh oen aciim sak boeih angla thlaang boeih he hai oen aciim sak van ai. ⁵⁰ Lungkeh tah theen; tede a aalna te a moelh atah metila na aal sak koep thai ai? Nangmi lawng paya laikoeina lungkeh te khueh u langtah pakhat oen khat roeproeicala awm uh” a tina.

¹ Tecoengah Jesuh lawng te huen te a thawh taak, Judia peng la cet tih Jordan tuiva ah te kat. Thlaangping te a tengah tun koep baal tih a cang puei nooek angla ahimi te a cang puei.

² Farasi thlaang khatsut hue lawng a thawlhna tuuk pe ham a tengla law u tih, “Mami kah Phungawl lawngah thlaang pakhat lawng a yu te thlaak hamla lawngpui a awng pe aw? tila a doet u.

³ Jesuh lawng, “Mosi lawng me ang phungawl nangmi te m’peek u?” tila a doet.

⁴ Ahimi lawngah, “Mosi lawngtah, ’thlaang pakhat lawng a yu te pekna ca a peek atah a maa thai’ ti,” tila a thui pe u.

⁵ Jesuh lawng ahimi nala te, “Nangmi he cang puei ham na rai u tangkiik dawngah nangmi ham he phungawl he Mosi lawng a thut. ⁶ Tede acuekca ah dilai a suen vengah te caciim lawng a thui angla Pathen lawng tawngpa oen hutaa a sai. ⁷ Tedawngah tawngpa lawng a manu oen ana pa te a ceh taak vetih a yu oen ah awm haih ai, ⁸ ahih rawi tah pakhat la coengg poen ai. Tedawngah ahih rawi tah pahih tlaih nawh tih pakhat poen ni. ⁹ Tedawngah Pathen lawng a mulbet poen te tah thlaanghing lawng pek boel seh,” a tina.

¹⁰ Im khuila a kuun koep u vengah he kawng he a hubang hue lawng Jesuh te a doet u. ¹¹ Jesuh lawngah ahimi nala te, “A yu aka thlaak thlaang lawngah hutaa tloe te a yuna atah a yu sawah samphaih. ¹² Tetih van angla a vaa aka maa hutaa lawngah tawngpa tloe te a vaana atah ahih khaw samphaih,” a tina.

¹³ Thlaang khatsut lawngah, camaw hue kah a luu dawngah Jesuh lawng a kut tloeng pe tih yotheen peek sak ham a tengla avan law puei u, tede a hubang hue lawng thlaangping te a ho u. ¹⁴ Tete Jesuh lawng a ming vengah a thinsa tih a hubang hue nala, “Camaw hue te ka tengla law u seh, ahimi te kanghalh u boel, metihtiah Pathen Ram tah he ang thlaang hue kah ni. ¹⁵ Ataktang kavan thui u, a-u khaw Pathen Ram he camaw angla aka do nawh tah te ah te kuun thai manawh” a tina. ¹⁶ Tecoengah camaw te a lawh tih a pawm, ahimi pakhat rip sawah a kut te a tloeng tih ahimi te yotheen kam-awmna te a peek.

¹⁷ Jesuh tah khawlawng la yin ceh ham a ceh khoeng vengah te thlaang pakhat a tengla law tih a haiah khuklu oen cuengkueng ruila, “Aka theen saya, dungyan hingna ka dangna ham n’tu ka sai ai,” tila a doet.

¹⁸ Jesuh lawng ahih te, “N’tu dawngah kai he saya theen nan tina? Pathen bueng nawh tah aka theen a-u khaw awm nawh. ¹⁹ Awlpeek boeih te na ming ta: “Thlaang ngawn boel; hutaa tawngpa thawlh boel; huen acaan boel; thlaang te thawlh peel boel; Thlaang thai-alatna boel, na nu oen na pa te hinyah, a ti teta” a tina.

²⁰ Te thlaang lawng, “Saya, he awlpeek boeih he ka camaw veng kalawng ka vai boeih poen,” a tina.

²¹ Jesuh lawng ahih te a lungna tih a bueh rangpatang, “Thaihu khat bueng ni na voet. Cet langtah na khuehtoen boeih te yooei lang tangka te khawdeng harah thli van peh, te atah vaan ram ah ro thaihu na khueh ai, tecoengah law langtah ka hu ah va baang,” a tina. ²² Te thlaang lawng he awl he a yaak vengah a mik-haai muelh a khueh tih kawthe ruila te cet. Metihtiah ahih tah a kuirang tangkiik dawngah ni.

²³ Jesuh lawng a hubang hue tengla maang tih, “Kuirang thli ham Pathen ram khuiah kuun hamla rai tangkiik mah aw! a tina.

²⁴ He awl dawngah a hubang hue tah a ngaihang u, tede Jesuh lawng, “Ka ca ka nau thli, Pathen Ram khuiah kuun hamla rai tangkiik! ²⁵ Kuirang thli Pathen Ram ah kuun lak ah phaimeet haa khuiah kala-uk a kuun te yoei bet ai,” a tina.

²⁶ A hubang hue lawng he awl he a yaak u vengah a kawpoek rai u tangkiik tih, “Te atah a-u thlawn la aka awm thai ai?” tila khat oen khat doet u.

²⁷ Jesuh lawng ahimi te a haitang heet hih “He he thlaanghing ham tah coengg thai nawh, tede Pathen hamla tah soeprep boeih he coengg thai” a tina.

²⁸ Tevengah Piter lawng, “Kaimi lawng soeprep boeih ka ceh taak u tih na hu ah ka bang u poen” a tina.

²⁹ Jesuh lawng ahimi nala te, “Oeih, ataktang kavan thui u, a-u khaw a im a lo, a maya manau, ngannu nganca, a manu oen ana pa, ca anau khaw awlthang theen oen kai kawng dawngah aka ceh taak tah, ³⁰ tahe san roeroe ah a yahawh ngaaila a dang ai. Im khaw, maya manau khaw, ngannu khaw, a manu khaw, ca anau oen lo khaw a pueh yakhat la a dang ai, tecoegah heemtekna khaw a dang van ai. tecoengah aka law ham koei san ah dungyan hingna te a dang ai. ³¹ Tede tahe kah lamhacuek thlaang thli he hukhueng la awm u vetih tahe ah hukhueng la aka awm thlaang thli he lamha u dai ai.” a tina.

³² Jesuh oen a hubang hue tah Jerusalem benla cet u. A hubang hue kah a haiah Jesuh te lamhala cet; a hubang hue tah lakueng u; a hu ah aka vai thlaang thli lawngkhaw a rih u. Jesuh lawng a hubang thlaangha thlaihih hue te atloela koep a ceh puei tih amah sawah aka thoeng ham koei te a thui pe. ³³ Ahimi nala te, “Hutung u lah! Jerusalem khaw te m’pha u vetih te ah te Thlaanghing Capa he khawsoeih ahaamca thli oen Phungawl cangpueikung thli kut ah peek la awm ai. Ahimi lawngah ahih te duek sak hamla awl a tloek u vetih tecoengah Gental thli kut ah a peek ai, ³⁴ nuihbu kamring la a sai u ai, a tumthoeih u ai, a bawh u vetih a ngawn u ai; tede athum hin ah tho koep ai,” a tina.

³⁵ Tecoengah Zebedi ca rawi Jeem oen Johan te Jesuh tengla law hih tih, “Saya, thaihu pakhat navan sai hamla ka ngaih,” a tina.

³⁶ Jesuh lawng ahih rawi te, “N’tu kavan sai ai?” tila a doet.

³⁷ Ahih rawi lawngah, “Na bawilenna Ram ah na bawi ngawlhcoen dawng na ngawlh vengah kai hih he banvoei ben ah pakhat, bantang ben ah pakhat namah oen haih nan ngawlh sak ham ka ngaih hih,” a tina.

³⁸ Jesuh lawng ahih rawi nala, “Navan bih he na ming hih nawh. Ka awkk ham koei patang khangna boengloeng he na awkk thai hih ai aw? Kai lawng ka dang ham koei baptisma angla te nanghih lawng baptisma na dang thai ai aw?” a tina.

³⁹ Ahih rawi lawng, “Ka sai thai hih ai,” a tina. Jesuh lawng te rawi boeinau te, “Kai lawng ka awkk ham boengloeng khaw na awkk thai hih vetih ka dang ham koei baptisma te khaw na dang thai hih tangtang ai. ⁴⁰ Tede ka bantang ben ah ahih ngawl seh, ka banvoei ben ah ahih ngawl seh tila kai lawng ka tuek thai nawh. He huen tah Pathen lawng a hooep a tlaang tangte thlaang hue te a peek ai,” a tina.

⁴¹ He kawng he atloe hubang paha hue lawng a yaak u vengah Jeem oen Johan sawah a thinsa u. ⁴² Tedawngah Jesuh lawng ahimi te amah tengla boeih a khue tun tih, “Pathen aka ming nawh ukkung bawi hue lawng a uk thlaang thli sawah huham tharana a khueh u tih mawtkung hue lawngkhaw anauh ngaai la aana a khueh u. ⁴³ Tede nangmi tah te tila na awm u manawh. Nangmi timkah pakhat lawng aka lenduet la awm ham a ngaih atah nangmi boeih kah tuihyoeihthlaang la awm seh; ⁴⁴ Nangmi timkah pakhat lawng lamhacuek la awm a ngaih atah nangmi boeih kah sal la awm seh. ⁴⁵ Metihtiah Thlaanghing Capa lawng Pateng khaw a bii te thlaang bi sak ham law nawh; thlaang kah bii te bi ham tih thlaang yahawh hlang hamla a hingna te peek ham ni a law” a tina.

⁴⁶ Jesuh oen a hubang hue oen ah thlaangping hue tah Jeriko khaaw te a pha u. Jeriko kalawng a law vengah Timas capa kutduen buh bih mikpum pakhat Bartimias te lawngteng ah ngawl. ⁴⁷ Nazaret khaaw kah Jesuh va law tila a yaak vengah, “Devid Capa Jesuh! Kai he n’reen lah! tila paang.

⁴⁸ Thlaangping lawng a ho u tih duem awm, a tina u. Tede angaihhlangla paang tare tih, “Devid Capa, kai he n’reen lah!” a tina.

⁴⁹ Jesuh te cot pai tih, “Ahih te khue u lah,” a tina. Tedawngah ahimi lawng mikpum thlaang te a khue u tih, “Na tha thlue sak, tho loeih! nang n’khue poen te” a tina u.

⁵⁰ Tedawngah himbai te a voeih pak tih cungpet ruila Jesuh tengla te va law.

⁵¹ Jesuh lawng, “Nang ham n’tu sai sak na ngaih?” tila a doet. Ahih lawng, “Saya, ka mik a tueng koep ham ka ngaih,” a tina.

⁵² Jesuh lawng, “Cet loeih, na oengna lawng avan tueng sak poen,” a tina. Kawlkalh maiah ah a mik tueng koep tih te lawngpui ah te Jesuh hu ah baang pahoei.

¹ Jesuh oen a hubang hue tah Jerusalem a pha tawm u tih Betfat oen Bethani khaaw teng kah Olif tlaang te a pha u atah Jesuh lawng a hubang pahih te hai la a tuih tih. ² he tila awl a uen: “Na hai kah khaw khuila cet hih. Na pha hih khoeng ah a-u lawngkhaw a cit nooek thlan lacano a kiing u te na huh hih ai. Thlam hih langtah he la van khuen hih. ³ A-u lawng mai khaw, n’tu hamla te tila na sai hih tila n’doet atah, Bawipa lawng a ngoe, kavan thak koep badai tina hih,” tila awl a uen.

⁴ Tedawngah cet hih tih lawngteng kah im pakhat vawng thawhka tengah lacano a kiing u te a huh. Rui a thlam hih vengah te, ⁵ a tengah aka pai thlaang khatsut lawngah te, “N’tu ham lacano a khihna rui te na thlam hih?” tila a doet u.

⁶ Ahih rawi lawng Jesuh kah awl uen angla a thui pe tih, te kah thlaang thli lawng lacano te ahi rawi a khuen sak u. ⁷ Lacano te Jesuh tengla avan khuen hih tih la te amami kah himbai oen a khuk u tih Jesuh te a cit sak u. ⁸ Thlaangping lawng amami kah himbai te lawngpui ah a phaih u, thlaangvaang lawngtah lawngteng lawngvai kah thingbuuk te a kawi u tih lawngpui ah thinghu a phaih pe u. ⁹ Jesuh kah a haiah aka cet hue oen a hu ah aka cet thli lawng, “Hosanna! Bawipa miing oen aka law te Pathen lawng yotheenna pe hawn seh! ¹⁰ Pahaam Devid kah ukna aka law lii te yotheenna awm hawn seh! Asangkoek vaan ah ke Pathen tah thangtheenna awm hawn seh! Hosanna!” tila pang u.

¹¹ Jesuh tah Jerusalem khaaw la te cet, Tempal bok-im khuila kuun tih thaihu thli te boeih a bueh. Tede khaw a thlem poen dawngah a hubang thlaihih oen Bethani khaaw la te cet koep u.

¹² Avuen khawhin ah Bethani khaw kalawng a mel u koep vengah Jesuh te a bung pawng. ¹³ Athla hlang kalawng, thaidut thing kung at a ram lawng a diik khoep te a huh tih, athaih awm mai kai aw a ti dawngah a kung la te a pan; Tede a pha vengah, thaidut te a thaih tue nawh dawngah a ram hawng la a awm te a huh. ¹⁴ Jesuh lawng thaidut thing te, “Na thaih he a-u lawngkhaw ca koep tlaih boel seh!” a tina. Te tila a tina te a hubang hue lawngkhaw a yaak u.

¹⁵ Jerusalem te a pha u vengah, Jesuh tah Tempal bok-im la cet tih thaihu aka yooei thli oen aka lai thli te boeih a hek. Tangka thawlengkung thli kah caboi oen akhuu aka yooei thli kah ngawlhna te a plet boeih tih, ¹⁶ A-u khaw Tempal bok-im talawng vawngup khui kalawng thaihu khat khaw khuen sak tlaih nawh. ¹⁷ Tecoengah thlaangping te a cang puei tih, “Caciim khuiah Pathen lawng, “Kai kah Tempal bok-im he thlaangphun boeih kah thangthuina im ni ti ai,” tila a thut. Tede nangmi lawngtah thlaanghuuen thli kah thuh-elhna lungkaw la na sai u poen,” a tina.

¹⁸ Khawsoeih ahaamca thli oen Phung-awl cangpueikung hue lawng he awl he a yaak u tih Jesuh te ngawn hamla along a-im a tlap u. Jesuh kah cangpueina te thlaangping rangpui tah a kawpoek rai u tih ahimi lawng Jesuh te a rih u.

¹⁹ Thlemben atah Jesuh oen a hubang hue khawpui khui kalawng atloela cet u.

²⁰ Avuen mincanghi ah Jesuh oen a hubang hue lawngpueng a ceh u vengah thaidut thing te a huh u. Te thaidut thing te athingpum la ayung toe duek rup. ²¹ Piter lawng thaidut thing Jesuh lawngah a taap te a poek lot vengah Jesuh nala te, ’Saya, bueh lah, nang lawng na taap thaidut thing te duek rup poen!“ a tina.

²² Jesuh lawng ahimi nala te, “Pathen te mah oeng u lah. ²³ Atak tang kavan thui u, a-u lawngkhaw a kaw khuiah uepvoetna khueh muehla amah kah a thui angla coengg ngai ai tila a oeng atah he tlaang he, ‘thoeih langtah tuitunlii khuila tla lah,’ a tina atah a thui angla ahih ham coengg vetih a sai pe ai. ²⁴ Tedawngah ka van thui u: Nangmi lawng thangthuina oen na bih thaihu pakhat khat te ka dang poen tila tangna uh, te atah na bih sarui te m’peek ai. ²⁵ Nangmi lawng na pai tih na thangthui u vengah thlaangtloe sawah na kaw a lawna nawh na khueh te khawdawp ngaai pe uh, te atah vaan ah aka awm nangmi na Pa lawng na sai thawlh te khawdawp avan ngaai van ai. ²⁶ Nang lawng thlaangtloe sawah khawdawp na ngaai nawh atah vaan kah na Pa lawngah na sai thawlhna dawngah khawdawp van ngaai van manawh”. a tina.

²⁷ Ahimi lawngah Jerusalem te koep a pha u. Tempal bok-im ah Jesuh a yingyawi vengah te khawsoeih ahaamca thli oen Phungawl cangpueikung hue oen ahaamca thli a tengla law u tih, ²⁸ “Ame kah saithaina aana oen he thaihu he na sai? A-u lawng sai thaina aana he m’peek?” tila a doet u.

²⁹ Jesuh lawng ahimi awl te a thung pe tih, “Nangmi he kam at ah awl kan doet u lah ai, awl navan thung u atah he thaihu he ame kah saithaina aana oen ka sai tite kavan thui van ai. ³⁰ Johan kah baptisma peek saithaina aana he ame kalawng a law: Pathen teng kalawng aw? tih nawh atah thlaanghing teng kalawng aw a law?” tila a doet.

³¹ Amami oen amami mai te oelh u khiing tih: “Metila n’ti u lah ai? Pathen teng kalawng ni a law n’ti kawinih, n’tu ah Johan te na oeng u nawh? ti ai. ³² Tede, ‘Thlaanghing teng kalawng ni a law n’ti kawinih thlaangping he rih ham awm” ti u. (Metihtiah thlaang boeih lawng Johan he tawngha tila a ming u.) ³³ Tedawngah ahimi lawng Jesuh nala, “Ka ming u nawh” a tina u. Jesuh lawng ahimi nala te, “Kai lawngkhaw ame kah saithaina aana oen he ang thaihu ka sai he kavan thui u manawh” a tina.

¹ Jesuh lawng ahimi te thuidoetna oen a thui pe. Jesuh lawngah, ‘Vaikhat ah misur dum aka sai thlaang pakhat awm tih dum te vawng oen khoep a thung, misurtui suina ham ungrawm a to tih a toetna ham paw a sak. Tecoengah dum te thlaang a vat tih amah tah khawlawng thla la te cet. ² Misur thaih bit tue veng atah dum aka vat thlaang thli tengah a sal pakhat te a tuih tih a dang ham koei dum khang te a lawh sak. ³ Dum aka vat hue lawng a salpa te a tuuk tih a bawh u, thaihu khat khaw peek ohla atliingla a mel sak u. ⁴ Tecoengah dum khuehkung lawng atloe sal pakhat te a tuih; dum aka vat hue lawng a luu ah a bawh u tih yarau yahdeng la a khueh sut u. ⁵ Dum khuehkung lawng atloe sal pakhat te a tuih koep de a ngawn pe u; atloe sal thli te khaw te tila a sai u, khatsut te a bawh u tih atloe hue te a ngawn u. ⁶ Dum khuehkung lawng a tuih ham tah a lungduet amah capa khat bueng te ni a awm poen. Hukhueng atah, ka capa he tah dum aka vat hue lawng a hinyah ai a ti dawngah a capa te a tuih. ⁷ Tede dum vat hue lawng, ‘Ahih he dum khuehkung kah a capa ni. Law uh, ngawn u sih, ahih kah ro thaihu he mami kah koeva la awm ai,” ti u. ⁸ Tedawngah ahimi lawng a capa te a tuuk u, a ngawn u tih a rawkk te misur dum adau benla a voeih u.

⁹ “Tetih atah dum khuehkung lawng ahimi te metila a tina ai?” tila Jesuh lawng a doet. “Ahih lawng law vetih dum aka vat hue te a ngawn ai, misur dum te thlaangtloe a vat ai. ¹⁰ “Caciim lawng: Imsakung thli lawng aphu aka awm nawh angla a hoett u lungto te atloe boeih lak ah aphu aka awm koek Lungto la awm. ¹¹ He tah Bawipa lawng a sai ni. Mami mik huh ah kawpoek rai la awm’, tila a thui te na tae noek u nawh aw?” a tina.

¹² Judah ahaamca hue lawng he thuidoetna he amami te ni a thui ee-tla thil tite a ming u dawngah Jesuh te tuuk hamla kamthlah u, tede thlaang rangpui te a rih u dawngah a ceh taak u.

¹³ Farasi khatsut hue oen Herod kah thlaang khatsut hue Jesuh te awl doet tih a awl thui dawng teah a thawlhna tuuk pe hamla te a tuih u. ¹⁴ A tengla te law u tih, “Saya, nang tah awltak na thui yoeyah, thlaang kah poekna khaw n’tu la na ngaai nawh. Nang lawngtah thlaang mik-hai khaw na dan nawh tih Pathen kawngaih awltak te thlaang na cang puei tite ka ming u. Rom Sengpahrang Sangluel tengah mangmu peek he mami kah Phungawl oen kalh u kai aw? Ahimi he mangmu peek ham tueng aw, peek tueng nawh aw? van thui lah,” a tina u.

¹⁵ Tede Jesuh lawng ahimi kah thailatna te a ming tih, “Me tih ti kawngah kai he kamah awl thui dawngah thawlhna tuuk ham na ngaih u? Ngun tangka pheek at ah van khuen u lah, ka bueh lah ai,” a tina.

¹⁶ Ahimi lawng ngun tangka pheek at avan khuen pe u tih, “A-u kah muei-ame oen miing aka awm?” tila Jesuh lawng a doet. Ahimi lawng, “Rom Sengpahrang Sangluel kah muei-ame oen a miing awm,” a tina u.

¹⁷ Tedawngah Jesuh lawng, “Tetih atah Sengpahrang kah koeva te Sengpahrang pe u langtah Pathen koe te Pathen pe uh,” a tina. Te tila te ahimi tah Jesuh sawah a kawpoek rai sut u.

¹⁸ Tecoengah Sadusi thlaang khatsut, duek coengah thawhkoepna awm nawh aka ti hue te Jesuh tengla law u tih, ¹⁹ “Saya, kaimi ham Mosi lawngah he tila phungawl a thut: ”Thlaang pakhat lawng a ca cuun muehla duek tih a yu te a ro sut oh atah, aka duek kah ca anau la a ca sak pe ham huhainu te a manau lawng yuna seh,’ ti. ²⁰ Vai at tah boenhui thlaang pasarih awm u; ahaam koek lawngah a yu a lawh de a ca sak mueh la duek. ²¹ Tecoengah apabena lawngah a maya yu te a pang de ahih khaw a ca sak muehla duek. Te tila te apathumna te khaw awm tih, ²² atloe hue khaw te tila awm u boeih. Boenhui pasarih lawng te hutaa te a yuna u de a ca sak ohla duek boeih u. Hukhueng atah te hutaa khaw duek. ²³ Te hutaa te boenhui boeih lawng a yuna u dawngah thawhkoepna khawhin, thlaangduek boeih a thawh vengah, te hutaa te a-u kah yu la a awm ai?” tila a doet u.

²⁴ Jesuh lawng ahimi nala te, “Na poek thawlh u nawh pai he! N’tu ah ka poek thawlh u ti he na ming u aw? Nangmi lawng Caciim khaw, Pathen kah tharana khaw na ming u nawh dawngah ni. ²⁵ Metihtiah thlaangduek a thawh koep veng atah vaan kah vanthlaang thli angla awm u vetih yuvaa ti he awm manawh. ²⁶ Thlaangduek thawhkoepna kawng: Mosi kah cabu dawngah tangpuem a ungna kawng awl te na tae noek u nawh aw? Te cabu dawngah a thut tah Pathen lawng Mosi nala, “Kai tah Abraham Pathen, Isak Pathen, oen Jakob Pathen la ka awm,” a tina te ta. ²⁷ Ahih tah aka hing thlaang thli kah Pathen la awm tih aka duek thlaang thli kah Pathen nawh ni. Nangmi lawng na poek thawlh u tangkiik” a tina.

²⁸ Te tila awl a thui u te aka ya Phungawl cangpueikung pakhat teah te awm. Jesuh lawng Sadusi hue kah awldoetna atheencala a thung pe te a huh vengah awl doet ham a tengla law tih, “Awlpeek boeih boeih ah ame ang awlpeek nuem awlpui koek?” tila a doet.

²⁹ Jesuh lawng, “Awlpui koek pakhatna tah he ni: “Israel thlaang thli hutung u lah! Mami kah Bawipa Pathen bueng ni Bawipa la a awm. ³⁰ Bawipa na Pathen te na thinkaw lungbui boeih oen na hingna boeih oen, na kawpoek boeih oen, na tharana boeih oen ah lungnah”. ³¹ A pabena awlpui koek awlpeek tah, “Namah oen namah te na lungna van angla na imbe te lungnah” a ti he ni. He rawi pahih lak-ah awlpui ngai atloe awlpeek awm tlaih nawh”. a tina.

³² Phungawl, cangpueikung lawng Jesuh nala te, “Saya, Boehoeng theen! Bawipa bueng he Pathen la awm tih ahih bueng nawh tah Pathen tloe awm nawh. ³³ Tedawngah thlaanghing lawng Pathen te thinkaw lungbui boeih oen kawpoek boeih oen tharana boeih oen ah lungna ham awm tih m’mah kah pum n’lungna van angla imbe te khaw lungna ham awm. He awlpeek pahih n’vai he tah Pathen tengah boknathaang dawngah boiava thawthuengna oen atloe thawthuengna lak-ah awlpui ngaai la awm” a tina.

³⁴ Ahih lawng cuihna oen awl a thung pe te Jesuh lawng a yaak vengah ahih nala te, “Nang tah Pathen ram oen na thla nawh”, a tina. He coeng kalawng tah Jesuh he a-u lawngkhaw awl doet ha tlaih nawh.

³⁵ Jesuh Lawng Tempal bok-im khuiah a cang puei vengah he tila awl a doet, “Metila Phungawl cangpueikung hue lawng Messiah tah Devid kah cadil nauha la awm ai tila a thui u thai kai? ³⁶ Aciim Muithla kah bawnghorhna rang oen Devid amah lawng: “Bawipa lawng ka Bawipa tengah: Na raal thli te na khowpha huiah ka khueh thlantoe ka bantang ben ah ngawl” a tina.

³⁷ Devid amah lawng ahih te, “Bawi-pa”; tila a khue atah metila Messiah te Devid kah cadil nauha la a awm thai ai?” a tina.

³⁸ Jesuh lawng te tila a cang puei vengah te, “Phungawl cangpueikung hue he ngaithuen uh, ahimi lawng himbai dunghlang oen yingyawi a ngaih u tih dawr yun ah khaw thlaang lawng hinyahna oen n’voem n’toei lah sui tila a ngaih u, ³⁹ sinakok bok-im ah athloekla ahooep atlaang ngawlhna oen poei saina ah huen theen ngawlhna te a tuek u. ⁴⁰ Huhai tumtee thli kah a ruemm thaihu ralring capau te a lawh pe u tih ahimi kah a im thli te a rot pe u, tecoengah thlaang kah yaak theen la asanhlangla thangthui u. Ahimi te a the-eepla dan a tat ai.

⁴¹ Jesuh tah tempal bok-im kah tangka bawm tengah te ngawl tih thlaang thli kah tangka a sang u te a doen. Kuirang thlaanglen thli lawng tangka yahawh hlang a sang u te a huh; ⁴² Tevengah te huhainu khawdeng pakhat law van tih ruhum tangka pheksaseen pahih te a sang. ⁴³ Tecoeng atah a hubang hue te a khue tih, “Atak tang kavan thui u, he kah huhainu khawdeng lawng thlaangtloe boeih lak ah tangka bawm khuiah yahawh ngaai a sang poen. ⁴⁴ Metihtiah atloe hue lawngtah a khuehtoen khuikah acoeih aphe te ni a sang u; tede he huhainu tah khawdeng de a khueh duen te a peek kik poen,” tila a thui pe.

¹ Tempal bok-im kalawng Jesuh a suntlaak vengah a hubang pakhat lawng, “Saya, Bueh lah! he lungto oen impui he metihtlukla kawpoek rai ham a awm!” a tina.

² Tevengah Jesuh lawng, “He kah impui imlen thli he na huh aw? He kah lungto thli he pakhat maikhaw a awmna huen ah awm manawh; a pum boeih la a dawng kang ai,” a tina.

³ Jesuh tah Olif Tlaangsawm ah amah bueng ngawl tih Tempal bok-im benla te mang phai, tevengah Piter, Jeem, Johan oen Andru mi ahuepla ahih tengla te law u. ⁴ Ahimi lawngah, “He ang thli he metuek vengah a thoeng ai? He thaihu boeih he thoeng poen ai tila miknoekna awm ai aw, van thui lah,” tila a doet u.

⁵ Jesuh lawng ahimi nala te, “Nangmi he a-u lawngkhaw thai-alatna nawh ham ngaithuen uh. ⁶ Thlaang yahawh lawng ka miing oen law u vetih, “Kai tah ahih poen ni,” ti ai, thlaang yahawh te a thai alatna ai. ⁷ Nangmi lawng ayoeica kah raalkahna awl na yaak u ah khaw, athlathloei kah raalkahna awlthang na yaak u ah khaw lakueng u boel. Te ang thli te awm ai, tede aboetna a pha poen ti ngaihna nawh ni. ⁸ Ram pakhat oen khat kap u vetih, peng pakhat oen khat teek u ai. Dilai peng boeih ah likluei hinghuen vetih khawthe khawkhana awm ai. He ang thli boeih he tah camoe awm tawm tamtuen cuek bungtlawh angla awm ai.

⁹ Nangmi lawng ngaithuen oen awm uh. Metihtiah nangmi te n’tuuk u vetih awlcekna yung la n’khuen u ai. Sinakok bok-im ah nangmi te m’bawh u ai; Nangmi lawng kai kawng dawngah ukkung thli oen sengpahrang thli haiah ahimi te Awlthang Theen thui pe hamla na pai u ai. ¹⁰ Tede atue boetna a pha thlan ah awlthang theen te thlaang boeih tengah phawng la awm ai. ¹¹ Nangmi te n’tuuk tih awlcekna yung la n’khuen u atah n’tu nuem ka thui ai tila lakueng oepsoeh u boel; atue a pha vengah thui hamla m’peek te thui hawn. Metihtiah nangmi lawng na thui ham awl te tah nang kah awl nawh ni, Ciim Muithla teng kah awl ni. ¹² Thlaang lawngah amah kah maya manau kheet te duek sak ham a peek ai, tetih van angla ana pa lawngkhaw ca anau thli te a sai u van ai. Ca anau thli lawngkhaw a manu oen ana pa te a raalna u vetih a ngawn sak ai. ¹³ Kai kah kawng dawng maiah nangmi te thlaang boeih lawng n’thina ai. Tede a-u khaw aboet toe aka cak tah thlawn la awm ai.

¹⁴ “Rih koei tuiileh kap lawngah a awmna nawh koei a huen ah a awm te nangmi lawng na huh u ai,” (ca aka tae thli lawng thuingaihna he ming uh) “Tevengah Judia ram ah aka awm lawng tlaangsawm la te heng u seh. ¹⁵ Imphu ah aka awm lawng a khuen ham koei thaihu te lawh ham im khuila kuun re tlaih boel seh; ¹⁶ Lo ah aka awm lawngkhaw hi-acuu lawh hamla im la cet re tlaih boel seh. ¹⁷ Te kah atue khawhin te hutaa vawn-um oen cacuun naukem thli hamla metihtlukla mueirihtamyiin la a awm ai. ¹⁸ He thaihu thli he sikding tue ah avan pha nawh ham Pathen tengah thangthui uh! ¹⁹ Metihtiah te khawhin kah patangraina te tah Pathen lawng dilai a suen tih a tongcuek veng kalawng tahe toe ah khaw ming noek nawh athe koek raina poen ni. Hailam ah te ang te awm koep tlaih manawh. ²⁰ Bawipa lawng te kah atue khawhin te toi sak nawh kawinih; a-u khaw loeih deem manawh. Tede, amah kah a thlaang tuek hue hamla tah te atue khawhin te a toi sak poen.

²¹ “Tedawngah thlaang pakhat khat lawng, ‘Bueh u lah! he ah Messiah awm a ti ah khawseh,’ ‘Bueh lah! ke ah Messiah awm,’ a ti ah khaw ahimi te tangna u boel. ²² Metihtiah Messiah rawlrap thli oen tawngha rawlrap thli va thoeng ai. Ahimi lawngah a coengg thai atah Pathen thlaangtuek thli Pateng khaw thailatna ham kawpoekrai miknoekna oen kawpoek rai thaihu broela a sai ai. ²³ Ngaithuen uh! Te kah atue atang te apha thlan ah thaihu soeprep te nangmi tengah kavan thui oepsoeh poen he” a tina.

²⁴ “Te kah patang raina atue khawhin coeng atah khawmik lawng yiin khoep ai, thla lawngkhaw vang tlaih manawh. ²⁵ Vaan kalawng aisi tla vetih khawhi ah aka awm aisicumrii lawng amami kah huham tharana along a-im te a thawveel boeih ai. ²⁶ Tevengah thlaang capa lawng va pho vetih huham tharana oen ruep-awmna oen ah muui khui kalawng va law ai. ²⁷ Ahih lawngah dilai atoe khit kalawng khatben atoe kah Pathen thlaangtuek thli te cawi hamla dilai a kil palii ah vanthlaang thli te a tuih ai.

²⁸ Thaidut thing dawngah cuihna cang u lah, Thaidut thing kah a beek-athleeng thli te hingsuepla awm tih a dawn a voeih, a ramno a cawn hang atah nangmi lawng khawhaal tue yoeii poen tila na ming u. ²⁹ Tetih van angla he ang thaihu thli a thoeng hang atah atue yoeii poen, law tawm poen tila ming uh. ³⁰ Tahe ah aka hing thlaang hue he a duek boeih thlan ah he thaihu boeih he va thoeng ai ti he hilh u boel. ³¹ Vaan oen dilai tah auh ai, tede kai kah awl tah mevengah khaw ha-ata manawh.

³² “Te cakhaw te kah atue oen khawhin te mevengah a thoeng ai tite a-u lawngkhaw ming nawh; vaan kah vanthlaang lawngkhaw ming nawh; Pa bueng lawng ni a ming. ³³ Te kah atue te mevengah avan pha ai tite na ming u nawh dawngah a huertue la awm u lang ring oepsoeh uh. ³⁴ N’tu oen a lawh u ti atah, thlaang pakhat tah khawlawng thla la yin cet tih a tuihyoeihthlaang thli te bii a peek, ahimi pakhat rip te a sai ham koei bii te a peek coengah thawhka toetkung te khaw ngaithuen cala a toet ham a uen a tawn heet oen lo u. ³⁵ Imkung manghai bawi te mevengah a law ai tite nangmi lawng na ming u nawh dawngah ngaithuen lang ring uh. Thlemhah ah khaw, yiinthuem ah khaw, tihnawhtah cinghue ah khaw, khawthaih ben ah khaw law thai mai. ³⁶ Poek muehla ahih te a law parak atah nangmi ih siing ih rawi la na awm u te n’hu boel seh. ³⁷ Nangmi teng ka thui he thlaang boeih teng khaw ka thui: Ngaithuen oen ring uh!” a tina.

¹ Kaantaak Poei oen Tawlru thuum nawh Takawi poei te pha ham hin hih angaih vengah khawsoeih ahaamca hue oen Phungawl cangpueikung thli lawng Jesuh te ahuepla tuuk tih ngawn ham lawngpui a tlap u. ² Ahimi lawngah, “Mami lawng poei hin veng atah sai u boel sih, thlaangping he cumplaam la tho ai,” ti u.

³ Jesuh tah Bethani khaaw ah aka awm haibe natna aka tlo noek Simon im ah te awm. Jesuh te buh a caak lii vengah, hutaa pakhat riimtuui phutlo alabasta um dawngah abepirla avan khuen tih va law. Te hutaa lawng alabasta um te a bawh ngoelh tih riimtuui oen Jesuh luu te a suep. ⁴ Te kah aka awm thlaang khatsut tah a thinsa u tih, “N’tu la riimtuui ke a poeih a lak kai? ⁵ Riimtuui he ngun tangka yathum lak ah yahawhla yoeih tih khawdeng thli te tangka m’pe kawinih theen ai ta!” ti u tih a theet soeh u.

⁶ Tecoengah Jesuh lawng, “Toeng u loeih! N’tu ham ahih te na lawl na la u? Ahih lawng kai hamla thaihu theen aroep acap la avan sai poen. ⁷ Khawdeng thli tah nangmi tengah awm poepa ai ta, nangmi lawng na ngaih veng roekk ah ahimi te na bawm thai. Tede kai tah nangmi tengah ka awm poe manawh. ⁸ Ahih lawng a sai thai khoek te a sai poen; Ka pum dawngah riimtuui avan suep he tah ka rawkk vuina ham a kamthlah oepsoehna ni. ⁹ Tahe ah ataktang kavan thui, dilai peng tawm ah awlthang theen a thuina huen roekk ah amah hilhna nawh ham a sai thaihu he a thui poepa u van ai.

¹⁰ Tecoengah a hubang thlaihih khuiah aka thuum van Judas Iskariot lawngah Jesuh te a raal thli kut ah peek ham khawsoeih ahaamca thli tengla te cet. ¹¹ Ahimi lawngah ahih kah awl thui te a yaak u vengah a kaw hoe tangkiik u tih tangka peek ham awl a kam u. Tedawngah Judas lawng Jesuh te ahimi kut ah peek ham atue theen te a tlap.

¹² Tawlru phull nawh Takawi Poei hin at na, Kaantaak poei buhkokna ham tuuca ngawnna khawhin ah Jesuh te a hubang hue lawng, “Nang hamla Kaantaak poei buhkokna te ame huen ah kaimi sai sak ham na ngaih?” tila Jesuh te a doet u.

¹³ Tecoengah Jesuh lawng ahimi tim kah a hubang pahih te he tila awl a uen tih a tuih: “Khawpui khuila cet hih langtah tuium dawng tui aka thaan thlaang pakhat lawng nanghih te n’hum ai. ¹⁴ Ahih te a kuunna im toe la a hu ah vai hih langtah te imkung nala: “Saya lawng, ka hubang hue oen Kaantaak poeibuh caakna akhann te ame ah nuem? ti’ ti nah. ¹⁵ Tecoeng atah ahih lawng im han kah akhann kau hlang, anep anoeila soeprep aroek abah heet te n’nueh hih ai, te huen ah te thlembuh veel ham sai hih,” a tina.

¹⁶ A hubang rawi lawng khawpui khuila cet hih tih Jesuh lawng a thui pe angla soeprep boeih te a huh tih Kaantaak poeibuh te a roek abah hih.

¹⁷ Thlemhah atah Jesuh oen a hubang paha thlaihih te va law u. ¹⁸ Caboi dawng buh a caak u lii vengah Jesuh lawng, “Ataktang kavan thui u, Nangmi timkah kai oen buh aka ca haih pakhat lawng kai sawah paipi a thleep ai,” a tina u.

¹⁹ A hubang hue tah a kaw caalla the u tih, “Kai nan ti ngaihna ngoen nawh macawi?” tila pakhat coeng pakhat lawng Jesuh te a doet u.

²⁰ Jesuh lawng, “Nangmi thlaihih tim kah pakhat van tih kai oen beel dawngah takawi aka nok haih ni. ²¹ Thlaanghing Capa tah duek ai tila Caciim lawng a thui angla duek ai; tede Thlaanghing Capa sawah paipi aka thleepkung ham tah khawmap tangkiik! Te thlaang te cuun ohla awm kawinih ahih ham theen bet sui de ta,” a tina.

²² Ahimi lawng thlembuh a caak u lii vengah te Jesuh lawng takawi a lawh tih awmngaih thangthuina a khueh coengah takawi te a eh tih a hubang hue te a peek. “Lo uh, he tah ka pum ni” a tina.

²³ Tecoengah boengloeng te a lawh tih Pathen tengah awmngaih ciil a thui coengah a hubang hue te a peek tih ahimi boeih lawng a awkk u. ²⁴ Jesuh lawng, “He tah thlaang yahawh hamla ka hok ka thi ni, Pathen awlkam acakna ka thi ni. ²⁵ Ataktang kavan thui u, Pathen ukna khuiah misurtui athaai awkk ham khawhin apha thlantoe he misurtui he ka aw koep tlaih manawh’, a tina.

²⁶ Tecoengah ahimi lawng laa raawl at a sak u tih Olif Tlaangsawm la te luui u.

²⁷ Jesuh lawng ahimi nala te, “Caciim dawngah, “Pathen lawng tuudoen te a ngawn vetih tuu boeih tah thek u khonghak ai,” a ti angla nangmi boeih lawng kai he nan heng taak vetih nan ceh taak sut ai. ²⁸ Tede, duekna kalawng thawh sak koep la ka awm coengah nangmi haiah Galili la kan cet ai.” a tina.

²⁹ Piter lawngah, “Thlaangtloe hue lawng nang te n’ceh taak cakhaw, kai lawng tah nang he kan ceh taak sut roe manawh,” a tina.

³⁰ Jesuh lawng Piter nala te, “A taktang kavan thui, n’tuu yiin aai voeihih a khaawk thlan ah nang lawngah kai he voeithum toe ka ming roe nawh tila na basa khak ai,” a tina.

³¹ Piter lawng, ”Nang oen ah duek haih koeila awm cakhaw nang he kan ming roe nawh tila ka thui manawh,” a tina. Atloe a hubang hue lawngkhaw te tila te a thui u van.

³² Ahimi tah ketsaman a ti u a huen te a pha u tih, Jesuh lawng a hubang hue nala te, “Kai ka thangthui ruet vengah he ah he an ngawl u de,” a tina. ³³ Piter, Jeem oen Johan te a ceh puei. Jesuh tah lakueng malcal tih a kaw moet sut; ³⁴ ahimi nala te, kawthena lawng thinkaw lungbui avan yaawl khoep tih ka peeng phuk ai a ti angla awm. He ah he awm u lang ih mueh la n’ring uh” a tina.

³⁵ Ahih lawng cet hot tih, dilai ah buekuep tih acoengg thai atah patang khangna kalawng loeihna ham thangthui. ³⁶ “A Pa, a Pa! Nang ham tah soeprep boeih he coeng thai. Kai tengkah patang khangna boengloeng he lo hawn lah. Tede kai kah kawngaih angla awm boel seh, namah kah kawngaih angla coengg hawn seh”. tila thangthui.

³⁷ Tecoengah va meel tih a hubang pathum a ih muelh u te a huh. Piter nala te, “Simon, na ip muelh aw? Nang lawngah khawnoek pakhat mai khaw na hak thai nawh aw?” a tina. ³⁸ Tecoengah ahimi te, “Nangmi lawng suek-halhna khuiah na tlim u nawh ham thangthui langtah hak u lah. Na thinkaw lawngtah a ngaih de na pumsa tah a tha yoek sut.” a tina.

³⁹ Ahih tah cet koep tih acuek kah angla koep thangthui. ⁴⁰ Tecoengah a hubang hue tengla meel koep tih ahimi a ih muelh u te a huh; a mik khaw daai u thai nawh tih n’tu thui ham khaw ming u nawh.

⁴¹ A pathumna a meel koep veng atah, ahimi nala te, “Tahe toe ah na ip tih na duem u hun aw? Khoek poen seh! Atue a pha poen! Bueh lah, tahe ah Thlaanghing Capa tah thlaang thawlh thli kut ah a peek poen. ⁴² Tho uh, cet u sih. Bueh lah, kai sawah paipi thleepkung te he ah avan pha poen!” a tina.

⁴³ Te tila Jesuh lawng awl a thui lii vengah te Judas avan pha. Ahih lawng-ah Khawsoeih ahaamca thli, Phungawl cangpueikung thli, Judah thlaang ahaamca thli kah thlaang tuih, samsen oen boelhoen aka pawm thlaangping te avan law puei. ⁴⁴ Paipi thleepkung lawng thlaangping te miknoekna a peek oepsoeh: “Kai lawng ka mok thlaang te tah nangmi lawng na ngaih u thlaang te ni. Ahih te tu u langtah anepla rep tamena lang khuen uh”. a tina.

⁴⁵ Judas lawng a paipuek ah Jesuh tengla cet pahoei tih, “Saya!” a tina tih a hih te a mok. ⁴⁶ Te atah ahimi lawng Jesuh te a tuuk u tih a khih u. ⁴⁷ Tevengah te kah aka pai thlaang pakhat lawng a samsen te a phong tih Khawsoeih Bawi kah sal te a bawh tih a haa pat a tloek pe. ⁴⁸ Tevengah Jesuh lawng ahimi te a voem tih, “Kai he thlaanghuuen la ka awm dawngah aw tuuk hamla samsen oen boelhoen oen ah nangmi lawng na law u? ⁴⁹ Khawhin roekk ah nangmi tengah ka awm tih Tempal bok-im ah kan cang puei u yoeyah ta, nan tu u nawh. Tede Caciim lawng a thui te tah asoep ham awm” a tina.

⁵⁰ Tevengah a hubang hue boeih lawng a ceh taak sut u tih a heng taak khongphaat u.

⁵¹ Tlamhi himbai aka bai cadawng tawngpang pakhat lawng Jesuh te a hu ah a vai. Ahih te khaw ka tu ai ti u, ⁵² Tede a himbai te a pit sut tih atliing ayaalla heng phaat.

⁵³ Tecoeng atah Jesuh te Khawsoeih Bawi impui la te a ceh puei u, te huen ah khawsoeih ahaamca boeih, Judah ahaamca thli oen Phungawl cangpueikung thli tun u. ⁵⁴ Piter lawngah athla ngaai bet kalawng a hu yut tih Khawsoeih Bawi kah impui vawngup khuila te cet. Teah te raaltoeng thli oen haih ngawl u tih hai a aawm. ⁵⁵ Khawsoeih ahaamca boeih, awlcekna khonsil ah aka thuum boeih lawng Jesuh te ngawn thaina ham a thawlhna te a tlap u, tede ahimi lawng khatca khaw dang u nawh. ⁵⁶ Sausi la aka pai thlaang broe lawngah Jesuh te hoem a pup u de ahimi kah awl thui te khat khaw tuhkai u nawh.

⁵⁷ Tecoeng atah thlaang khatsut lawng pai tih Jesuh te he tila hoem a peel u: ⁵⁸ “Ahih lawngah, ‘He Tempal bok-im thlaanghing kah a sak he ka phe vetih, thlaanghing lawng a sak nawh pakhat te hin thum khuiah ka sak ai,’ tila a thui te ka yaak u”, ti. ⁵⁹ Tede ahimi kah awl thui khaw tuhkai u nawh.

⁶⁰ Ahimi boeih kah a haiah te Khawsoeih Bawi tah pai tih Jesuh nala te, “He kah thlaang thli lawngah hoem awl a thui u tih nang thawlh n’peel te awl thung ham koei awm nawh aw?” tila a doet.

⁶¹ Tede Jesuh lawng a hill a phah duem tih awl kam at khaw thui nawh. Khawsoeih Bawi lawngah, “Nang he Theenduet Pathen Capa Messiah aw?” tila koep a doet.

⁶² Jesuh lawng, ’Kai tah Messiah ni, Thlaanghing Capa lawng Thara koek kah bantang ben ah ka ngawlh te khaw, vaan kah muui dawngah ka law te khaw nangmi lawng na huh u ai!” tila awl a thung pe.

⁶³ Khawsoeih Bawi lawngah a himbaidung te a doek thok tih, “Mami ham atloe sausi angoe hun baal aw!. ⁶⁴ Pathen a sal aphaamna awl a thui te nangmi lawng na yaak u poen. Metila awltloekna na khueh u ai?” tila a doet. Ahimi boeih lawngah: ahih tah thlaangthawlh ni, ngawn ham awm tila awl a khueng u.

⁶⁵ Thlaang khatsut lawng Jesuh te a tumthoeih, a mik te a yeen pe khoep tih a tam u, “Nang he a-u lawng m’bawh thui lah,” a tina u. Raalkap thli lawng a khuen u tih a bel u.

⁶⁶ Khawsoeih Bawi kah talawng vawng-up khuiah Piter a awm vengah te, Khawsoeih Bawi kah tuihyoeihthlaang hutaa pakhat te va law. ⁶⁷ Piter hai a aawm te a huh vengah a bueh rangpatang tih, “Nang khaw Nazaret khaaw kah Jesuh oen aka awm haih thlaang van ni”. a tina.

⁶⁸ Tede Piter lawng basa tih, “Ka ming nawh; Nang lawng na thui akawng-alam he ka yaakming moenih,” a tina tih vawngup thawhka la te cet. Teveng roe ah te aai khaawk pahoei.

⁶⁹ Tuihyoeihthlaang hutaa lawng Piter te a huh koep tih a tengah aka pai thli te, “Ahih he ahimi timkah pakhat van ni” toekloek a tina. ⁷⁰ Tede Piter tah basa toengtoeng. Kawlkalh a awm bawt atah, a teng kah aka pai thlaang thli lawng Piter te, “Nang lawng ahimi tim ah aka thuum van ti he na basa thai manawh, nang khaw Galili thlaang van ni.” a tina u.

⁷¹ Tede Piter lawng, “Awl ka taap tih awltak ka thui! Kai lawng awltak ka thui nawh atah Pathen lawng dan n’tat seh! Nangmi lawng na thui u thlaang te ka ming nawh!” a tina.

⁷² Tecoeng khoeng ah apabe la aai khaawk tih Piter lawng Jesuh awl “Aai voeihih a khaawk thlan ah, kai he kan ming roe nawh, voei thum toe na ti ai” a tina awl te a poek lot tih rap.

¹ Mincanghi ah khawsoeih ahaamca thli tah Judah ahaamca thli, Phungawl cangpueikung thli, awlcekna khonsil ah aka thuum boeih oen ah tun huh u tih khaw a khan u. Jesuh te thiirui oen a khih u, a ceh puei u tih Pilat kut ah a peek u. ² Pilat lawngah, “Nang he Judah sengpahrang tang aw?” tila awl a doet. Jesuh lawng, “Na thui angla soeng,” a tina.

³ Khawsoeih ahaamca thli lawngah Jesuh te thawlh broela a peel u. ⁴ Tedawngah a doet koep tih, “Awl na thung pe nawh ai aw? Ahimi kah thawlh peel boeih he hutung lah!” a tina.

⁵ Jesuh lawng awl kam at khaw thui nawh toeng toeng tih Pilat tah a kawpoek la rai.

⁶ Kaantaak Poei apha veng roekk ah thawngtla pakhat rangpui lawng a bih te Pilat lawng a thlah poepa. ⁷ Tevengah raal la aka tho thli oen thong haih aka tla, raal la a thawh u vengah thlaang aka ngawn Barabbas a miingna thongtla thlaang pakhat te awm. ⁸ Thlaangping lawngah law u tih poei vengah thongtla pakhat thlah noek angla te thlah sak ham Pilat tengah a bih u. ⁹ Pilat lawng ahimi te, “Nangmi lawngah Judah sengpahrang he thlah sak ham na ngaih u aw?” tila a doet. ¹⁰ Pilat lawng, ka kut dawngah Jesuh avan pha sak u he khawsoeih ahaamca thli lawng a uett u dawngah ni tite atheencala a ming.

¹¹ Tede khawsoeih ahaamca thli lawng thlaangping te a ceemtuh tih Barabbas dai lat te thlah sak ham Pilat tengah a bih u. ¹² Pilat lawng thlaangping te, “Tetih atah Judah sengpahrang he ta metila sai sak ham na ngaih u?” tila koep a doet.

¹³ Ahimi lawngah, “Thinglam dawng-ah ngawn!” tila paang u.

¹⁴ Pilat lawng, “Ahih lawngah n’tu thawlhna a sai?” tila a doet. Ahimi lawngah, “Thinglam dawngah ngawn!” tila angaihhlangla paang tare u.

¹⁵ Pilat lawng thlaangping te ngaitluep sak ham a ngaih dawngah Barabbas te a thlah pe. Tecoengah Jesuh te cungpoelh oen a bawh tih ngawn hamla ahimi kut ah a peek.

¹⁶ Raalkap thli lawngah Jesuh te ram ukbawi kah impui talawng vawngup khuila te a ceh puei u tih raalkap bu khat te a khue tih tun kueng u. ¹⁷ Ahimi lawng Jesuh te himbaidung lingduuk te a bai sak u tih thliing oen a veh bawilen lumuek te a muek sak u. ¹⁸ Tecoengah thekha thangpawmna la: “Judah Sengpahrang a hinglung vaang hawn seh!” ti u. ¹⁹ A luu ah cungpoelh oen a bawh u tih a tumthoeih u, a haiah khuklu oen cuengkueng u, a luu a khun u tih a bok u. ²⁰ Te tila nuihbu kamring la a sai u coengah himbailing te a dul pe u tih amah kah himbai te a bai sak koep u. Tecoengah ahimi lawng thinglam dawngah ngawn hamla te a khuen u.

²¹ Lawngpueng ah khaawte ben kalawng khawpui la aka law Simon aka miingna thlaang pakhat a hum u tih raalkap thli lawng Jesuh kah thinglam te amangkhak la a kawh sak u. (Simon he Sairin khaaw kah Alekzandar oen Rutas kah ana pa ni.) ²² Jesuh te Golkota huen ben la te a ceh puei u. Golkota ti he tah “Luuruh huen” ti ngaihna ni. ²³ Te huen ah te mura oen a pawlh haih misurtui te a tuul u, tede Jesuh lawng aw nawh. ²⁴ Tecoengah ahimi lawng Jesuh te thinglam dawng a tai u, ahimi lawngah talcung a suh u tih a himbai te rek ara u. ²⁵ Ahimi lawng mincang khawnoek pakua vengah Jesuh te thinglam dawng a tai u. ²⁶ Ahih thawlh peelna thinglam dawng a tai u te tah, “Judah sengpahrang” tila a thut. ²⁷ Ahih oen thlaanghuuen pahih khaw a bantang ben ah pakhat, a banvoei ben ah pakhat a tai haih u. ²⁸ He tila te caciim lawngah, “Thlaangthawlh tim ah ahih te a thuum sak” a ti awl te soep.

²⁹ Te kah aka cet paitai thli lawngkhaw, a luu te halh a voeih u tih Jesuh te a tamdeng kawkhahna u: “Aw! Nang aw, Tempal bok-im te ka phe vetih hin thum khuiah ka sak koep ai na ti!. ³⁰ Thinglam dawng kalawng tahe ah rum thuk langtah namah oen namah thlawn u lah! ” a tina u.

³¹ Tetih van la te khawsoeih ahaamca hue oen Phungawl Cangpueikung hue lawngkhaw Jesuh te a nuihna u, “Thlaangtloe tah a thlawn de amah oen amah tah thlawn u thai nawh he ta!. ³² Israel sengpahrang Messiah te thinglam dawngkah a rum thuk te tahe ah hu u lah sih, te atah mami lawng n’tangna ai ta! ti u. Jesuh amah oen a tai haih thlaang pahih te lawngkhaw ahih te athe akhana hih van.

³³ Hingthuntaang ah ram pum boeih te khawnoek pathum khui yiinna lawng a thiing khoep. ³⁴ Thlemben khawnoek pathum tue vengah Jesuh lawng, “Eloi, Eloi, Lama sabaktani?” tila angaih hlang la paang. A thuingaihna tah, “Ka Pathen, ka Pathen, n’tu kawngah nan hoett sut?” ti ngaihna ni.

³⁵ A teng kah aka pai thlaang khatsut lawng ahih kah paang awl te a yaak vengah, “Hutung lah! Ahih lawng Elijah a khue! ti u. ³⁶ Ahimi tim kah thlaang pakhat lawng palh cet tih him baipeen te a lawh, misurtui thuii dawngah a nuem tih rawkuih dawngah a piin. Jesuh te a kaa ah a tuh tih “Ring de lah! thinglam dawngkah thlawn hamla Elijah va rum ai nuem, bueh u lah sih,” ti u.

³⁷ Jesuh lawng angaihhlangla paang, tecoengah duek.

³⁸ Tevengah Tempal bok-im khuikah baiyaan te asaw kalawng adang toe pahih la poet pheuh u. ³⁹ Thinglam haiah aka pai raalbawipa lawng metila Jesuh a duek tite a huh vengah, “He thlaang he tah Pathen Capa tangtang ni!” tila a thui.

⁴⁰ Te kah aka awm hutaa khatsut lawngtah athla kalawng a dan u. Ahimi tim ah Meri Makdalin, anoca Jeem oen Josep kah a manu Meri oen ah Salome mi khaw thuum u. ⁴¹ Galili ah Jesuh a awm vengah ahimi lawng a hu ah baang u tih a bawm a ceem u. Atloe hutaa hue lawngkhaw Jerusalem la te law u tih ahimi oen ah te awm u van.

⁴² - ⁴³ Khaw a thlem atah Arimatia khaaw kah Josep te va law. (Ahih avan pha vengah te khawthlem poen.) Ahih tah awlcekna Khonsil ah aka thuum hinyah koei thlaang pakhat van tih Pathen a law te aka ring thlaang ni (Te Khawhin tah rueng-aphongna Huet hin, Sabbath pha thlan khawhin ni.) Tedawngah Josep lawng tawng-aa ohla Pilat tengla cet tih Jesuh rawkk te a bih. ⁴⁴ Pilat lawng Jesuh duek poen tila a yaak vengah a kawpoek la rai. Ahih lawng raalbawi te a khue tih Jesuh a duekna san poen aw tila a doet. ⁴⁵ Raalkap bawi kah awl thui te a yaak coeng atah, Pilat lawng Jesuh rawkk te Josep a lawh sak. ⁴⁶ Josep lawng rawkk yaawlna himbai a lai, a rawkk te thinglam dawngkah a lawh tih himbai oen te a yaawl coengah thel a thuk heet thlann lungkaw khuiah te a up. Tecoengah lungto bohlang a plet u tih phuel thawhka te a tleng. ⁴⁷ Meri Makdalin oen Josep manu Meri mi khaw awm van tih Jesuh kah a rawkk upna huen te a huh hih.

¹ Sabbath hin aboeih coengah Meri Makdalin, Jeem manu Meri oen Salome mi lawng Jesuh rawkk a thlukna hamla riimtuui a lai u. ² Hin rih khuiah lamhacuek khawhin, khaw a thoeng cuek ah ahimi tah phuel la cet u. ³ - ⁴ Lawngpueng a ceh u vengah ahimi lawng, “Thlann thawhka kah lungto te a-u lawng a plet ai?” ti u. (Te tah lungto bo hlang ni.) Tecoengah ahimi lawng a bueh vengah, te lungto plet tangte la a awm te a huh u. ⁵ Ahimi lawng thlann khuila a kuun u vengah cadawng tawngpang pakhat himbai bawk a bai tih bantang ben ah aka ngawl te a huh tih let u.

⁶ Ahih lawngah, “Let u boel, nangmi lawngah thinglam dawng a ngawn u Nazaret khaw kah Jesuh na tlap u te ka ming. Ahih tah he ah awm tlaih nawh, tho poen! Ahih a khuehna huen he bueh lah. ⁷ Tahe ah cet u langtah a hubang hue oen Piter te, he awlthang he thui pe uh: “Ahih tah nangmi haiah Galili la cet; nangmi tengah avan thui angla te ah te na huh u ai,” tila van thui pe uh,” a tina.

⁸ Tedawngah ahimi tah cet tih lakueng oen thuen ruila heng u. Ahimi lawng a rih u tangkiik dawngah a-u tengah khaw thui u nawh.

⁹ Hin rih khuiah lamhacuek khawhin mincanghi ah duekna kalawng Jesuh a thawh coengah, raaithe pasarih a kaw khuikah a hek pe Meri Makdalin tengah lamhacuek la phumpho. ¹⁰ Meri Makdalin lawng cet tih a paya thli te a thui pe. Ahimi tah a kaw the u tih rap u; ¹¹ “Jesuh tah hing koep tih ka huh poen tila a thui te ahimi lawngah tangna u nawh.

¹² He coengah hubang pahih vangca la a ceh vengah Jesuh lawng muei ame phuntloe ngai bet la ahih rawi tengah a phumpho pe. ¹³ Ahih rawi lawng meel koep hih tih atloe hue tengah a thui pe hih de ahimi lawng tangna u nawh.

¹⁴ Hukhueng koek ah a hubang paha thlaikhat buh a caak u lii vengah Jesuh te a phumpho pe. Ahimi lawng oengna khueh nawh tih Jesuh te a hing la aka hu thli kah awlthui khaw tangna ham thinkaw aniing khaklal u dawngah ahimi te a siim. ¹⁵ Jesuh lawng ahimi nala te, “Dilai peng tawm ah cet u lang thlaangphun boeih tengah, awlthang theen he thui pe uh. ¹⁶ A-u lawngkhaw a tangna tih baptisma a huh atah thlawn la awm ai; A-u khaw a tangna nawh atah awlcekna a dang ai. ¹⁷ Aka oeng thli tah kawpoek rai saina huham te a peek ai; ahimi lawngah ka miing oen raaithe thli te a hek ai; awl thaai la cal u ai; ¹⁸ ahimi lawng asue aka awm ruul tu cakhaw, duekna sue aw cakhaw nganbawh ya manawh, ahimi lawng thlaangtlo thlaangnaa thli sawah kut a tloeng atah te thli lawng hoeih ai.” a tina.

¹⁹ Bawipa Jesuh lawng ahimi te awl a thui pe coengah vaan la luui tih Pathen bantang ben ah te ngawl. ²⁰ A hubang thli lawng cet u tih peng tawm ah awlthang a thui u, Bawipa tah ahimi tengah bii a bi tih ahimi lawng a thui he soeng tite kawpoekrai saina oen a tueng sak u.