MATTHAI

MATTHAI

¹ He tah Jesuh Khrih kah Patuer thli thoepna ni. Ahih tah Devid cadil la awm tih Devid tah Abraham cadil la awm. ² (2-6a) Abraham capa Isak, Isak capa Jakob, Jakob capa Judah oen a boenhui, Judah capa Perez oen Zerah (a manu tah Tamar), Perez capa Hezron, Hezron capa Ram, Ram capa Amminadab, Amminadab capa Nahshon, Nahshon capa Salmon, Salmon capa Boaz (a manu Rahab), Boaz capa Obed (a manu Ruth), Obed capa Jesi, Jesi capa Devid Sengpahrang.

⁶ (6b-11) Devid dung kalawng Israel thlaangphun Babilon ram ah tamnaa la a khuen toe Patuer hue tah adangkah angla awm: Devid capa Solomon (a manu tah Uriah kah a yu te), Solomon capa Rehoboam, Rehoboam capa Abijah, Abijah capa Asa, Asa capa Jehoshafat, Jehoshafat capa Joram, Joram capa Uzziah, Uzziah capa Jotham, Jotham capa Ahaz, Ahaz capa Hezekiah, Hezekiah capa Manasseh, Manasseh capa Amon, Amon capa Josiah, Josiah capa Jehoiakhin oen a boenhui.

¹² - ¹⁶ Babilon ah tamnaa la a awm coeng kalawng Jesuh a cuun toe tah adangkah angla awm. Jehoiakhin capa Shealtiel, Shealtiel capa Zerubbabel, Jerubbabel capa Abiud, Abiud capa Eliakim, Eliakim capa Azor, Azor capa Zadok, Zadok capa Akhim, Akhim capa Eliud, Eliud capa Eliazar, Eliazar capa Matthan, Matthan capa Jakob, Jakob capa Josep, Josep lawng Meri a yuna tih Meri lawng Messiah a ti u Jesuh te a cuun.

¹⁷ Tedawngah Abraham kalawng Devid toe dung thlailii, Devid kalawng Babilon ah tamnaa la a awm toe dung thlailii, tamnaa la a awmna kalawng Messiah a cuun toe ah dung thlailii awm.

¹⁸ Jesuh Khrih a cuunna tah hetila ni. A manu Meri te Josep ham a kang pe, tede yuvaa la a awm haih hih thlan ah Ciim Muithla rang oen camaw ka cuun ai tila a ming, ¹⁹ Josep tah thaihu adoengla aka sai thlaang la awm tih Meri te thlaang lak ah yah lawh sak ham ngaih nawh tih ahuepla toeng ham kamthlah. ²⁰ He kawng he a poek lii vengah Bawipa kah vanthlaang pakhat lawng ahih tengla a mang ah a pho pe tih “Devid cadil Josep, Meri te yuna ham rih boel, Metihtiah a bung a vawn he Ciim Muithla rang oen ni. ²¹ Ahih lawng capa a cuun vetih a miing ah Jesuh tila na sak ai, metihtiah a thlaang thli te a thawlhna kalawng a thlawn ai.” a tina.

²² Bawipa lawng tawngha hawna oen a thui oepsoeh te a soepna hamla he thaihu boeih he va thoeng hang. ²³ Hulaa cuem pakhat tah vawn vetih capa a cuun ai, a miing tah Immanu-el a sak u ai” (Immanu-el thuingaihna tah “Pathen mami tengah awm” tina ni.)

²⁴ Josep tah a ihna kalawng tho tih Bawipa kah vanthlaang lawng a thui pe angla Meri te a yuna. ²⁵ Tede a capa a cuun thlan ah tengcehna nawh. Josep lawng a capa te Jesuh tila miing a sak.

¹ Herod he Sengpahrang la a awm vengah Judia ram Bethlehem khawpui ah Jesuh tah thang, Adiw raih thlan ah aisi aka noek thai thlaang khatsut khawlaw ben kalawng Jerusalem la law u tih. ² “Judah sengpahrang la aka awm ham camawca te meah a awm? Ahih kah aisi khawlaw ben ah a thoeng te ka huh u tih ahih te bok hamla ka law” tila a doet u.

³ Herod sengpahrang lawng he awl he a yaak vengah lakueng tangkiik, Jerusalem khaw kah thlaang boeih khaw lakueng u. ⁴ Herod lawng khawsoeih ahaamca boeih oen phungawl cangpueikung boeih te a khue tun tih, “me ah nuem Messiah te a thang?” tila ahimi te a doet.

⁵ Ahimi lawng, “Judia ram Bethlehem khawpui ah thang ai “tila a thui pe u.” Tawngha lawng a thut oepsoeh tah he tila awm. ⁶ “Judah ram kah Bethlehem khawpui, nang tah Judah ram khawpui thli la kah ayiit koek la na awm roe nawh, na khui kalawng uktemkung pakhat law vetih ka thlaang Israel thli te a uk ai,” ti.

⁷ Tedawngah Herod lawng khawlaw thlaangcuih thli te ahuepla a khue tih aisi a thoengna atue atang te acek aneh la a doet. ⁸ Tecoengah Herod lawng ahimi te Bethlehem la a tuih tih, “Cet u lang camawca te atheenla tlap uh, na huh u atah van thui uh, kai khaw ka cet silang ahih te ka bok van ai,” tila awl a uen.

⁹ - ¹⁰ Herod lawng a tina angla cet u tih khawlaw benkah a huh u aisi te a huh koep u vengah awmngaih u tangkiik. Ahimi haiah aisi lawng cet tih camawca a awmna huen a pha ah duem. ¹¹ Im khuila kuun u tih camawca oen a manu Meri te a huh u vengah khuklu oen cuengkueng u tih buekuep ruila ahih te a bok u. A khuen u kutdo khawhbu te a awng u tih sui, frankinsen oen mura te a peek u.

¹² Pathen lawng ahimi te Herod tengla mel koep nawh ham a mang ah ngaithuen awl a thui pe dawngah lawngpui tloe kalawng amah ram la voei koep u.

¹³ Ahimi a ceh coengah, Bawipa kah vanthlaang pakhat Josep mang ah a tueng pe tih, “Herod lawng camawca te ngawn hamla a tlap poen ai. Tedawngah tho lang camawca oen a manu te lo langtah Iyipt ram la pooeng puei loeih, kai lawng mel koep ham kavan thui thlantoe te ah awm uh,” a tina.

¹⁴ Josep lawng tho tih camawca oen a manu te a lawh tih yiinthuem ah Iyipt ram la a pooeng puei, ¹⁵ Herod a duek thlantoe Iyipt ram ah awm u. He tila a awmna he tah, Bawipa lawng tawngha hawna oen a thui oepsoeh, “Ka Capa te Iyipt ram kalawng ka khue koep” a ti te asoepna ham ni.

¹⁶ Khawlaw thlaangcuih thli lawng a thai a latna te Herod lawng a ming vengah caalla a thin sa. Khawlaw thlaangcuih thli lawng a thui aisi a thoengna tue kalawng a tuemtang heet tih Bethlehem khawpui oen khaaw teng khaaw vai kah camaw tawngpaca kumhih hui boeih te ngawn hamla awl a peek.

¹⁷ He tila tawngha Jeremiah lawng a thui oepsoeh awl te soep. A thui oepsoeh awl tah,: ¹⁸ “Ramah khaaw ah awl a yaak u, thinphat lungnat rungrahna awl ni. Rachel lawng a ca thli te a rah, A ca thli a duek boeih poen dawngah rap tih a reemhalna ham thloepthloei thai la awm tlaih nawh.”

¹⁹ Herod a duek coengah, Bawipa kah vanthlaang pakhat tah Iyipt ram ah aka awm Josep mang ah a tueng pe tih, ²⁰ “Tho langtah camaw oen a manu te Israel ram la meel puei koep loeih, camaw ngawn ham aka tlap hue te duek boeih poen,” a tina. ²¹ Tedawngah Josep lawng tho tih Camaw oen a manu te a lawh tih Israel ram la a mel puei.

²² Tede Arkhelas lawng ana pa Herod yuengla Judia ram ah Sengpahrang a bi tite Josep lawng a yaak vengah te huen la ceh ham a rih. A mang ah a thuituen angla Galili peng la te cet, ²³ Nazaret a ti u khawpui ah te poe awm. “Ahih te Nazaret thlaang ti u ai,” tila tawngha thli lawng a thui oepsoeh te soep.

¹ Teveng tue ah Baptisma pekung Johan tah Judia ram ramhum huhang la law tih phungthui a tong. ² “Vaan ram ayoeii poen dawngah na thawlhna yut u loeih,” tila a thui. ³ Tawngha Isaiah lawng, “Thlaang pakhat lawng ramhum huhang ah paang tih, ‘Bawipa hamla lawngpui te roekbah uh, A cehna ham lawngpui te adoengla sai uh,” tila a thui. oepsoeh te tah Johan he poen ni.

⁴ Johan lawng kala-uk mul oen a tah hiacuu te a buen a naak tih, a hingcen ah saphaw cihin a naak, khaurang oen khawitui te buh la a caak. ⁵ Jerusalem kah thlaang thli Judia ram tawm kah thlaang thli oen Jordan tuiva tengvaai ram tawm kah thlaang thli a tengla law u. ⁶ Ahimi lawng a thawlhna boeih te a phawng u tih, Jordan tuiva ah ahimi te Johan lawng Baptisma a peek.

⁷ Farasi thlaang oen Sadusi thlaang thli Baptisma dang ham a law u te Johan lawng a huh vengah ahimi te, “Ruul hue, aka law ham koei Pathen kah dantatna kalawng na loeih u thai ai tila a-u lawng avan thui u? ⁸ Na thawlhna na yut u te athaih theen oen tueng sak uh. ⁹ Abraham tah cuunkung patuer ni tila thui mailai oen dantatna kalawng ka loeih ai tila poek hau u boel. Pathen lawng he kah lungto thli he a lawh vetih Abraham cadil la a sai thai ti he kavan thui u. ¹⁰ Thingkung boeih te ayung ah vungna hamla haica tah a toen sut poen. Thaih theen aka thaih nawh thingkung boeih te a vung vetih hai dawngah a phuum ai. ¹¹ Thawlhna na yut poen tite tuengna ham kai lawngtah tui oen Baptisma kan peek u. Tede kai hu ah aka law thlaang lawngtah Ciim Muithla oen hai oen ah Baptisma m’peek u ai. Ahih tah kai lak ah lenduet tih kai tah ahih kah khawmuek pawm ham pateng ka koeih nawh. ¹² A kut dawngah caang yahna raa a pawm vetih caang te aciimla a yah ai, caangtak te thaidi dawng a khueh ai, tede caanghii te tah aka duek thai tlaih nawh hai dawngah a phuum ai,” a tina.

¹³ Teveng tue ah Jesuh tah Jordan tuiva ah Baptisma dang hamla Galili kalawng Johan tengla va law. ¹⁴ Tede Johan lawng a thana tih, “Kai he man nang lawng Baptisma nan peek sui, kai tengla nang na law lat oh kai,” a tina.

¹⁵ Tede Jesuh lawngah, “tahe ah sai hawn, “Pathen lawng khuek te sai hawn sih,” a tina. Tedawngah Johan lawng a roei.

¹⁶ Jesuh tah Baptisma a huh coeng khoeng ah tui dawng kalawng tho hang. Tevengah ahih ham vaan te awng u tih, Pathen kah Muithla tah akhuu angla rum thuk tih ahih sawah a cuuk te a huh. ¹⁷ Tecoengah vaan kah awl lawng, “He tah ka lungvatna ka Capa ni, ahih sawah ka kaw hoe tangkiik.” tila a thui.

¹ Tecoengah Muithla lawng Jesuh te Seitan kah suek-halhna tawng ham ramhum huhang la a ceh puei. ² Khawhin sawmlii yiin daai buh a mueh dawngah Jesuh tah a bung pawng poen. ³ Tecoengah Seitan lawng ahih tengla law tih, “Nang he Pathen Capa tangtang la na awm atah, lungto thli he buh la coeng sak lah” a tina.

⁴ Tede Jesuh lawng, “Caciim lawngah, ‘thlaang he buh bueng oen hing thai nawh, tede Pathen huikaa khui kalawng aka thoeng awl oen ni a hing’ ti;” a tina.

⁵ Tecoengah Seitan lawng Jesuh te aciim Jerusalem khawpui kah Tempal bok-im imphu ah a ceh puei tih. ⁶ Ahih tengah, “Nang he Pathen Capa la na awm tang atah sungpung thuk lah, metihtiah Caciim dawngah, ‘Pathen lawng amah kah vanthlaang hue te nang ham awl a peek vetih na khow pateng lungto dawngah na khuek nawh ham nang te a kut oen n’dawm u ai,’ tila awm” a tina.

⁷ Jesuh lawngah, “Caciim lawng, ‘Bawipa na Pathen te noekdak boel, ti de lah koen,’ a tina.

⁸ Tecoengah Seitan lawng Jesuh te a sanghlang tlaangsawm pakhat la a luui puei tih, dilai dawngkah ram boeih oen te ram kah a bawilenna boeih te a huh sak. ⁹ Seitan lawngah, “Khuklu oen na cuengkueng tih kai he nan bok atah he thli boeih he kan pe ai,” a tina.

¹⁰ Tevengah Jesuh lawng, “Seitan, atloela cet! Caciim lawngah, ‘Na Bawipa Pathen bueng te bok lang, amah kah bii bueng te bi peh,’ ti” a tina.

¹¹ Tecoengah Seitan lawng Jesuh te a ceh taak, vanthlaang thli law-u tih Jesuh te a bawm a ceem u.

¹² Johan thawngim ah a thlaak u tite Jesuh lawng a yaak vengah Galili peng la cet. ¹³ Ahih lawng Nazaret ah awm ohla Kapernaum khaaw ah awm hamla cet. Kapernaum khaaw tah Zebulun oen Naptali thlaangphun kah ram khui Galili tuilii keeng ah awm. ¹⁴ He tila a awm he tah Tawngha Isaiah lawng a thui oepsoeh te asoepna ham ni. A thui oepsoeh tah, ¹⁵ “Zebulun oen Naptali ram Tuitunlii la cehna lawngpui, Jordan tuiva khatben rall, Gental thli kah ram Galili! ¹⁶ Yiinna khuiah aka awm thlaang boeih lawng aang abohlang a huh u ai. Duekna yiin khuiah aka awm thlaang boeih sawah aangna va pai ai,” tila a thui te ni.

¹⁷ Teveng tue kalawng ah Jesuh lawng, “Vaan ram tah ayoeica poen dawngah, na thawlhna yut u loeih,” tila phungthuina a tong cuek.

¹⁸ Jesuh lawng Galili tuiliikeeng ah a yingyawi vengah tui aka hawi boeinau rawi Simon (Piter a ti u te) oen a manau Andru, tuilii ah lok oen nga a heeng hih te a huh. ¹⁹ Jesuh lawng te rawi te, “Ka hu ah bang hih lah, thlaang tukung la kan coengg sak hih ai,” a tina. ²⁰ Ahih rawi lawng lok te a voeih pak tih a hu ah bang pahoei hih.

²¹ Te kalawng cet phai tih thlaangtloe boeinau rawi Zebedi capa Jeem oen Johan te a huh. Te rawi boeinau tah ana pa Zebedi oen lowng khuiah awm haih tih lok a baw u. Te rawi te Jesuh lawng a khue; ²² Te rawi lawng ana pa oen lowng te a ceh tak tih a hu ah bang pahoei hih.

²³ Jesuh tah Galili peng tawm ah cet tih Sinakok bok-im ah a cang puei, Vaan ram kawng Awlthang Theen a thui, thlaangtlo oen natna soeprep aka tlo thli te a hoeih sak. ²⁴ Ahih kawng awlthang te Siria ram pum ah thaang khok tih aka tlo thli, tlawhnatna oen patang raina soeprep aka khang, raaithe lawng a kuun thil thlaang thli, raaihum tlawhna aka tlo, aka khawn thli boeih te avan law puei u tih Jesuh lawng a hoeih sak boeih. ²⁵ Galili peng oen Dekapolis peng (khaaw paha a ti u peng), Jerusalem Judia peng oen Jordan tuiva khatben rall kah thlaangping broe lawng ahih hu ah bang u.

¹ Jesuh lawng thlaangping hue te a huh vengah, tlaangsawm la luui hang tih te ah te ngawl. A hubang hue lawng ahih te a veel u. ² Tecoengah ahimi te riingtuuk thaihoen hamla a tong: ³ “Thlaang soep nawh la ka awm tila aka ming tah yotheen kam-awmna aka dawng thlaang la awm; Vaan ram tah ahimi kah ni! ⁴ “Kawthe oen aka rung aka rap thli tah yotheen kam-awmna aka dawng thlaang la awm; Pathen lawng ahimi te a thloep a hoelh ai! ⁵ “A kaw aka daw thlaang tah yotheen kam-awmna aka dawng thlaang la awm; Pathen lawng a kam pe tangte te a paang ai! ⁶ “Pathen kawngaih te amami ngaihna bo koek la sai ham aka khueh tah yotheen kam-awmna aka dawng thlaang la awm; Pathen lawng ahimi kah kawngaihna te a soep pe sak ai! ⁷ “Thlaang reenna kaw aka poek tah yotheen kam-awmna aka dawng thlaang la awm; Pathen lawng ahimi te a reen van ai! ⁸ “Thinkaw lungbui aka ciim tah yotheen kam-awmna aka lawng thlaang la awm; Ahimi lawng Pathen te a huh u ai! ⁹ “Roeproeina aka sai tah yotheen kam-awmna aka dawng thlaang la awm; Pathen lawng ahimi te ka ca a tina ai! ¹⁰ “Pathen kawngaihna a sai dawngah heemtekna aka ming thli tah yotheen kam-awmna aka dawng thlaang la awm; Vaan ram tah ahimi kah ni!

¹¹ “Kai kah hubang la na awm u dawngah nangmi te thlaang lawng thuitheetna, heemtekna, athe thaihu soeprep oen hoem awl n’peel u vengah yotheen kam-awmna na dawng u. ¹² “Awmngaih u langtah na kaw hoe sak uh, nangmi ham vaan ah kutdo abohlang awm, he tila ni nangmi na awm thlan vengkah tawngha thli khaw aheem atek u roe poen.

¹³ “Nangmi tah thlaangphun boeih ham lungkeh la na awm u. Tede lungkeh he a aalna a moelh atah aal sak koep ham coengg thai tlaih nawh, apoeila awm poen, tedawngah ram la voeih tih thlaang lawng a caawt mailai ham ni a awm poen.

¹⁴ “Nangmi tah dilai pum boeih ham aangna la na awm u. Tlaangsawm ah a phueng u khawpui tah n’tu lawngkhaw thlipdah thai nawh. ¹⁵ A-u lawngkhaw hai a vaang vengah beelphai oen muek khoep vai nawh, haivangna dawngah a vaang tih im khuiah aka awm boeih te a thue. ¹⁶ Tetihvan la nangmi kah aangna te thlaang haiah aang sak ham awm, te tila thaihu theen na sai u te ahimi lawng a huh u vetih vaan ah aka awm nangmi na Pa te a thangpawm u thai ai.

¹⁷ “Mosi kah phungawl oen tawngha thli kah cangpueina te phe hamla kai he va law tila poek u boel. Te thli te phe hamla ka law nawh tih soep sak ham ni ka law. ¹⁸ He he poek khuep uh. Vaan oen Dilai aboet thlantoe phungawl dawngah ayiitkoek awllung pakhat mai te khaw ha-ata manawh. Te phungawl dawngah aka awm boeih te soep ai. ¹⁹ Tedawngah a-u khaw phungawl dawngkah ayiitkoek te khaw vai ohla awm tih thlaangtloe te khaw vai nawh ham a cang puei atah Vaan Ram ah ayiitkoek la awm van ai. Tede a-u khaw Phungawl te a vai tih thlaangtloe te khaw vai hamla a cang puei atah Vaan Ram ah abokoek la awm van ai. ²⁰ Tecoengah kavan thui u, Pathen kawngaih saina dawngah phungawl cangpueikung thli oen Farasi thli lak ah uep-awm ngaai la na awm u nawh atah Vaan ram khuiah na kuun thai manawh.

²¹ “Thlaang ngawn boel, na ngawn atah awlcekbawi haiah na pha ai,” tila yan vengkah awl te na yaak u poen. ²² Tede tahe ah kavan thui u, “A-u khaw a maya manau tengah a thin a sa atah awlcekna ah a pha ai. A-u khaw a maya manau te tula na thuum nawh a tina atah awlcekna yung a pha ai, a-u khaw a maya manau te thlaangngau paathuu a tina atah rih awmna hell hai khuiah a thlaak ai. ²³ Tedawngah Pathen tengla bokna-thaang dawngah na kutdo te ka pe ai na ti vengah na maya manau pakhat khat lawng na sawah thinsana a khueh te na ming atah, ²⁴ Bokna-thaang haiah na kutdo te khueh de langtah, aloela cet lang na maya manau oen roeproeina sai, tecoengah law koep langtah na kutdo te Pathen tengah peh.

²⁵ “Thlaang pakhat khat lawng taya n’cawi tih awlcekna yung la n’ceh puei atah yung na pha thlan atue a awm vengah ahih oen roepna sai. Te huen na pha atah nang te awlcekbawi tengah m’peek vetih awlcekbawi lawng palik tengah patoeng m’peek vetih thong ah n’thlaak ai. ²⁶ Atak tang kavan thui u, sah ham koei laiba na sah boeih thlantoe thong khuiah na awm ai.

²⁷ “Hutaa tawngpa thawlhna sai boel tila a thui te na yaak u poen;’ ²⁸ Tede kai lawng tahe kavan thui u, A-u khaw hutaa te samphaih ngaihna mik oen a dan atah a thinkaw oen hutaa te a samphaih puei poen. ²⁹ Tedawngah na bantang mik lawng n’thawlh sak atah koeih lang voei hawn! na pum boeih hell la atlaak lak atah na mik na taal te nang hamla theen ngaai. ³⁰ Na bantang kut lawng n’thawlh sak atah, tloek poet lang voei hawn! na pum boeih hell la a tlaak lak atah na kut na khow pakhat khat a taal te nang hamla theen ngaai.

³¹ “A-u lawngkhaw a yu te a thlaak atah yu thlaakna ca te pe seh! tila a thui te na yaak u poen,” ³² Tede tahe ah kavan thui u, a-u lawngkhaw a yu te acuk ahalh nawh maiah a thlaak tih te hutaa lawng vaa a sak koep atah ahih lawng a yu te a samphaih sak. Te hutaa aka yuna thlaang te khaw thlaang yu sawah samphaih poen.

³³ “Na awlkam te phe boel, Tede Bawipa tengah na awlkam angla sai uh, tila yan vengkah thlaang thli lawng a thui te na yaak u poen. ³⁴ Tede tahe ah kavan thui u, awl na kam u vengah tapvoepna oen awl kam u boel, vaan phoei oen tapvoep boel. Metihtiah vaan tah Pathen kah ngawlhcoen ni. ³⁵ Dilai miing phoei oen khaw tapvoep boel,’ dilai tah Pathen kah khowtloengna huen ni. Jerusalem phoei oen khaw tapvoep boel, metihtiah aka lenduet Sengpahrang kah khawpui ni. ³⁶ Na luu phoei oen khaw tapvoep boel, metihtiah na luu dawngkah samthaam pakhat pateng abawk oen amuuem la na sai thai u nawh. ³⁷ Soeng, soeng nawh ti bueng mah te thui uh, te voel tah Seitan tengkah awl poen ni.

³⁸ “Mik yuengah mik van, naw yuengah naw van,” a ti te na yaak u poen. ³⁹ Tede tahe ah kavan thui u, “Nangmi sawah athe aka sai te thung u boel. Thlaang pakhat khat lawng bantang ben na beeng te avan bel atah banvoei ben na beeng te khaw bel sak. ⁴⁰ Thlaang pakhat khat lawng na angki te lawh ham a ngaih tih awlcekna yung ah m’pha puei atah, na khawtt-angki oen tawm pe baal de. ⁴¹ Thlaang pakhat khat lawng nang te amangkhak la thalrih te meng khat m’phueih sak atah meng hih toe phueih pe hawn uh. ⁴² Thlaang lawng thaihu avan bih atah pe uh, thaihu pu ham aka ngaih te pu uh.

⁴³ “Na paya thli lungna uh, na raal thli thina uh! a ti awl te na yaak u poen. ⁴⁴ Tede kavan thui u, Na raal thli te lungna lang nangmi aka thekhana thlaang thli ham thangthui pe uh. ⁴⁵ Te atah Vaan ram ah aka awm na Pa kah a ca la na awm u ai. Ahih lawng atah thlaangthe thlaang theen sawah avan at la khaw a see sak, atheen aka sai oen athe aka sai sawah avan at la khaw a tlan sak. ⁴⁶ Nang aka lungna bueng te na lungna atah metila Pathen lawng kutdo m’peek ai? Mangmu cawikung hue lawng pateng te tila a sai u van! ⁴⁷ “Nang lawng na paya bueng te na voemtoei atah thlaang mailai lak ah athloeila na sai n’tu aka awm? Pathen aka bok nawh thlaang thli lawng pateng te ang te a sai van! ⁴⁸ Vaan kah na Pa a soep van angla nangmi khaw na soep u van ham awm.”

¹ “Thaihu theen na sai u boeih te thlaang yahawh lawng hu seh tila rangpui haiah sai nawh ham ngaithuen uh. He ang thli he rangpui haiah na sai u atah vaan ah aka awm na Pa tengkah kutdo n’tu khaw na dang u manawh. ² Tedawngah thlaang kah angoe angaih thaihu te na do na dan vengah thlaangthaipalat hue lawng sinakok oen lawngpui cumruum ah oekthloen ruila a sai u angla nangmi lawng na sai boeih te tueng sak u boel. Ahimi lawng thlaang kah koeh ngaih ah a sai ni. Atak tang kavan thui u, ahimi lawng a ngaih te asoepla a dang poen. ³ Tede thlaang lawng angoe angaih te nangmi lawng na peek u vengah na paya theenkoek lawng pateng te kawng te ming boel seh. ⁴ Namah bueng lawng ming ham sai u lang, te tila ahuepla na sai boeih aka hukung na Pa lawng kutdo m’peek u badai.

⁵ “Na thangthui u vengah thlaangthai-palat hue angla thangthui u boel! Ahimi lawng thlaang boeih kah huhna koei sinakok oen lawngpui cumruum ah pai tih thangthui ham a ngaih u tangkiik. Atak tang kavan thui u, a sai phu dang ham koei te asoepla a dang u poen. ⁶ Tede nangmi lawng na thangthui u vengah im khuila kuun uh, thawh khai u lang mik oen huh nawh na Pa tengah thangthui uh. Ahuepla na sai boeih hukung na Pa lawng kutdo m’peek u badai.

⁷ “Na thangthui u vengah Pathen aka ming nawh hue angla awl mailai yahawh thui u boel, ahimi lawngtah asanhlang thangthui dengah Pathen lawng a yaak ai” tila a poek u. ⁸ Ahimi angla sai u boel; Nangmi lawng na ngoe boeih te na bih thlan ah na Pa lawng a ming boeih poen. ⁹ Tedawngah na thangthui u vengah: ‘Vaan ah aka awm kaimi na Pa, Na miing ciim tah hinyah la awm hawn seh; ¹⁰ Na ram va pai hawn seh! Vaan ah na kawngaih a sai u angla dilai dawngah na kawngaih sai u van hawn seh, ¹¹ Tihin kah angoe caak awkk te kaimi m’pe lah. ¹² Thlaangtloe lawng kaimi sawah a saithawlh te khawdawp ka ngaai u angla, Kaimi kah saithawlh he khawdawp van ngaai lah. ¹³ Noekdakna aka rai hlang kaimi sawah pha sak ohla, Seitan kut khui kalawng n’deem sak u lah, tila thangthui uh.’

¹⁴ “Nangmi sawah thlaangtloe lawng a sai thawlh te khawdawp na ngaai u atah vaan ah aka awm na Pa lawng na saithawlh te khawdawp avan ngaai van ai. ¹⁵ Tede thlaangtloe kah saithawlh te khawdawp na ngaai nawh atah vaan kah na Pa lawng na saithawlh te khawdawp van ngaai manawh.

¹⁶ “Buh na yeh u vengah thlaang-thaipalat hue angla haithelatt la awm u boel. Ahimi lawng buh a yeh u te thlaang lawng ming seh a ti u dawngah haithelatt la awm u. Atak tang kavan thui u, ahimi lawng kutdo te asoepla a dang poen. ¹⁷ Buh na yeh u vengah na mik-hai khaw sil u lang na sam khaw thiik uh, ¹⁸ Te tila buh na yeh u te a-u lawngkhaw ming nawh vetih mik huh nawh na Pa bueng lawng a ming ai. Ahuepla saina boeih hukung na Pa lawng kutdo m’peek u badai.

¹⁹ “Kuum-akett oen thii-ekk lawng a caak thai; thlaanghuuen lawng a muk tih a huen thaina dilai ah na kaawn tung u boel; ²⁰ Kuum-akett oen thii-eek lawng a caak thaina nawh thlaanghuuen lawng a muk tih a huuen thaina nawh vaan ah na kaawn te tung uh. ²¹ Na kaawn a awmna huen ah na kawpoek khaw awm van ai.

²² “Mik he tah pum boeih kah haithoei la awm. Na mik acaih atah na pum boeih aangna oen be ai; ²³ Tede na mik a theen nawh atah na pum boeih yiinna khuiah awm ai. Tedawngah na khuikah aangna lawng a yiin khoep boeih atah te yiinna tah metila rih ham a awm tangkiik ai.

²⁴ “A-u lawngkhaw bawi pahih kah bii te bi thai manawh. Pakhat te a thina vetih pakhat te a lungna ai. Pakhat te a hinyah vetih pakhat te a huhsit ai. Pathen oen tangka kah bii te pahih bokla na bi thai manawh. ²⁵ Tedawngah kavan thui u; Na hingna ham caak awkk oen na pum ham himbai hinaak poek oen lakueng u boel. Atak tang atah; caak awkk lak ah hingna he awlpui ngaai nawh aw? Himbai hinaak lak ah pum he awlpui ngaai nawh aw? ²⁶ Vaan ah aka sawng va thli ke bueh u lah! ati amu khaw tue u nawh; caang khaw aat nawh tih thaidi khuiah khaw tung u nawh. Tede vaan ah aka awm nangmi na Pa lawng te thli te a cawm acah! Va lak ah nangmi he awlpuila na awm u nawh aw? ²⁷ Nangmi lawng lakuengna oen na hingna na cot sak u thai bet aw?

²⁸ “N’tu ah himbai hinaak kawngah na lakueng u? Bueh u lah! ramhum kah raipai ke metila a roeng hang: bii khaw bi u nawh; Himbai hinaak khaw tak u nawh. ²⁹ Tede, kavan thui u, bawilenkoek Solomon sengpahrang kah a bawilenna oen himbai hinaak lawngah raipai pakhat kah a theenna te pha nawh. ³⁰ Tihin ah po tih thangvuen ah tlumtloei, hai dawngah phuum ham aka awm ramhum ah aka po mailai sul-aram Pateng khaw thoekcaukung tah Pathen ni; Ahih lawng nangmi tare te thoekcau muehla awm ai aw? Na oengna yawl tangkiik u nawh pai he!

³¹ “Tedawngah n’tu nuem ka caak vetih n’tu nuem ka awkk ai, n’tu ka bai ka naak ai tila lakueng u boel? ³² He ang thaihu he Pathen aka bok nawh hue kah thoehtham thaihu ni, he ang thaihu na ngoe boeih te vaan kah nangmi na Pa lawng a ming boeih. ³³ Tedawngah thaihu tloe boeih lak ah Pathen Ram oen Pathen lawng sai sak ham a ngaih te lamhacuekla tlap u lang tecoengah na ngoe thaihu tloe boeih te Pathen lawng avan tawm badai. ³⁴ Tedawngah thangvuen ham lakueng u boel; thangvuen lawng amah ham khoekla lakueng badai. Hin at kah arai acaangna sawah atloe thap patoeng ngoe nawh.

¹ “Pathen lawng awl n’cekna nawh hamla thlaangtloe te awl cek boel, ² Thlaangtloe awl na cek van angla Pathen lawng nang te awl n’cek van ai, Thlaangtloe sawah nuehtahna na hawna van angla na sawah Pathen lawng a hawna van ai. ³ N’tu ah namah mik ah thingboeng aka awm te huh ohla na maya manau mik ah aka awm muenmawi adiikca mai te na huh. ⁴ Namah mik ah thingboeng a awm lal maiah metila na maya manau mik ah aka awm muenmawi te kavan lo ai na tina mai lauh? ⁵ Nang thlaangthaipalat Namah mik kah thingboeng te lamhala lo de langtah tecoengah na maya manau mik kah muenmawi adiik te aciimcala na huh vetih na lawh pe thai ai.

⁶ “Aciim thaihu te ui pe boel. Te thli lawng va meel vetkat vetih namah te ng’ngeh ai. Awk haiah latha te tloeng pe boel. A khow oen ni a caawt mailai poen ai.

⁷ “Bih lah m’peek ai, tlap lah na huh ai, khooek lah thawhka avan awng ai. ⁸ A-u khaw aka bih tah a peek ai, aka tlap lawngtah a huh vetih thawhka aka khooek tah a awng pe ai. ⁹ Na ca lawng buh avan bih vengah lungto aka pe thlaang pakhat mai khaw na awm ai aw? ¹⁰ Nga avan bih vengah ruul na peek ai aw? ¹¹ Thlaangthe la na awm u de na ca thli te thaihu theen peek ham na ming u atah van ah aka awm nangmi na Pa lawng aka bih thli tengah metihtlukla thaihu theen te a peek tare ai.

¹² “Thlaangtloe lawng na sawah thaihu theen sai seh tila na ngaih van angla thlaangtloe tengah sai van lah; He tah Mosi Phungawl oen tawngha thli kah thuituen ngaihna tangtang ni.

¹³ “Thawhka ceek khuiah kuun u lah, metihtiah hell thawhka tah kau tih cehna lawngpui khaw yoei koek doek la a awm dawngah thlaang yahawh lawng a vai u. ¹⁴ Tede hingna thawhka tah ceek tih a cehna lawngpui khaw rai tangkiik tih thlaang ayawlca bueng lawng a huh.

¹⁵ “Tawngha rawlrap hue te ngaithuen uh; Ahimi lawngah nangmi tengla te ahan huhna atah tuu angla law u vetih a thinkaw khui atah metaang tluung angla awm u ai. ¹⁶ Nangmi lawng ahimi te athaih oen na noek ai. Thliingkung lawng misur thaih nooek nawh tih thliingkung dawngah thaidut khaw thaih nooek nawh. ¹⁷ Thingkung theen lawng athaih theen thaih tih thingkung the lawng athaih the thaih van. ¹⁸ Thingkung theen lawng athaih the thaih nooek nawh tih thingkung the lawngkhaw athaih theen thaih nawh. ¹⁹ Athaih theen aka thaih nawh thingkung boeih te a vung tih hai dawngah a phuum u. ²⁰ Tedawngah nangmi lawng tawngha rawlrap hue te a saina oen na noek u ai.

²¹ “Bawipa, Bawipa tila ka tengah aka ti thlaang boeih lawng Vaan ram khuiah kuun boeih manawh, tede Vaan ah aka awm a Pa kawngaih aka sai thli bueng lawngah kuun ai. ²² Awlcekna Khawhin apha vengah thlaang yahawh lawng ka tengah Bawipa, Bawipa! na miing oen ah Pathen awl ka thui u, na miing oen ah raaithe thli ka hek u tih kawpoekraina ka sai u! ti ai. ²³ Tevengah ahimi te, “kan ming nawh, atloela cet uh, thlaangthe thli!” ka tina ai.

²⁴ “Tedawngah a-u khaw ka awl a yaak tih aka vai tah lungnu dawngah im aka sa thlaangcuih oen lo u. ²⁵ Rawnu tlanthiim, tuiphu tho tih thlipui lawng im te a linglok, tede im te lungnu dawng acakla a sak tih tlim nawh.

²⁶ “Tede a-u khaw ka awl a yaak tih aka vai nawh tah divin dawngah im aka sa thlaangngau oen lo u. ²⁷ Rawnu tlanthiim, tuilet tho tih thlipui lawng im te a linglok vengah tlim. Te kah im a tlim te metila rih ham a awm tangkiik.

²⁸ Jesuh lawng he awl ha thui boeih coengah thlaang yahawh tah a cangpueina dawngah a kawpoek rai u. ²⁹ Ahih lawng phungawl cangpueikung hue angla cang puei nawh tih saithaina aana aka khueh hue angla a cang puei.

¹ Tlaangsawm kalawng Jesuh a rum thuk vengah, thlaangping yahawh lawng a hu ah a vai u. ² Tevengah haibe aka na thlaang pakhat a tengla law tih khuklu oen cuengkueng tih buekuep ruila, “Bawipa, na kawngaih atah nan hoeih sak thai.” a tina. ³ Jesuh lawng a kut a phawh tih a tek coengah, “Ka kaw tla; Ciim hawn loeih!” a tina. Kawlkalh ah haibe natna hoeih pahoei. ⁴ Tecoengah Jesuh lawng ahih nala te, “Hutung lah! a-u tengah khaw thui boel, khawsoeih tengla cet phaat langtah na pum te nueh, tecoengah thlaang rangpui tengah ka hoeih poen tila tuengsakna ham Mosi phungawl angla luciik thawthuengna te nawn lah” a tina.

⁵ Jesuh tah Kapernaum khaw a pha vengah Rom raalbawi pakhat lawng a tengah reenna a bih. ⁶ “Bawipa, ka tuihyoeihthlaang tah tlo tih im ah ral sut, a tlawh nauh tangkiik tih tat khaw tat thai nawh” a tina.

⁷ Jesuh lawng, “ka law silang ka hoeih sak ai” a tina.

⁸ Raalbawi lawng, ‘Bawipa, tih mai boel seh; Kai tah thlaangkoeih pavaih nawh dawngah ka im la nang na law ham tah ka koeih nawh. Awl bueng mah m’pe mai, ka tuihyoeihthlaang te hoeih badai” a tina. ⁹ “Kai khaw ka sawkah Bawihaam thli kut huiah ka awm tih kai kut huiah raalkap thli awm patoeng van baal. Pakhat khat te kai lawng cet lah! ka tina atah cet tih atloe pakhat te law lah’ ka tina atah va law, ka tamnaa te he he sai lah ka tina atah a sai.” a tina.

¹⁰ He awl he Jesuh lawng a yaak vengah, a kawpoek la rai tih a hu ah aka vai thlaangping hue tengah, “Atak tang kavan thui u, he ang oengcakna he Israel thlaang tim ah khaw ka hu nawh hun” a tina. ¹¹ Nangmi tengah kavan thui u, khawlaw khawtlaak ben kalawng thlaang yahawh law u vetih, Abraham, Isak, Jakob mi oen Vaan ram kah poei buh veelna ah ngawl u haih ai. ¹² Tede Vaan ram aka paang ham koei thlaang hue te Vaan adau ben rungrahna oen naw tahna huen yiinna khuila a voeih ai. ¹³ Tecoengah Jesuh lawng raalbawi te, “im la meel loeih,” na oengna angla coengg hawn seh” a tina. Raalbawi kah tuihyoeihthlaang tah teveng tue roe ah hoeih pahoei.

¹⁴ Piter im la Jesuh a ceh vengah Piter mase hutaa te tlo tih ihkhun dawngah a ralh te a huh. ¹⁵ Jesuh lawng a kut ah a phoeih tih a tlawhna hoeih pahoei. Tho hang tih Jesuh te a do a dan.

¹⁶ Thlemben tue a pha vengah, a kaw ah raaithe oen aka be thlaang thli te Jesuh tengla avan law puei u. Jesuh lawng a awl kam-at oen raaithe thli te a hek tih thlaangtlo boeih te khaw a hoeih sak. ¹⁷ Ahih lawng tila a sai he tah, “Amah lawng mami kah natna te a lawh tih mami kah tlawhthe te a phueih” tila tawngha Isaiah lawng a thui oepsoeh awl te asoepna ham ni.

¹⁸ Jesuh lawng a teng-avai kah thlaangping te a huh vengah Galili tuilii khatben rall la ceh ham a hubang hue te awl a peek. ¹⁹ Phungawl cangpueikung pakhat a tengla law tih, ‘Saya,’ na cehna roekk ah ka law van ai” a tina.

²⁰ Jesuh lawng, “Metaang lawngkhaw a awmna ham ungrawm a khueh tih, va lawngkhaw bu a khueh, tede Thlaanghing Capa lawngtah ihna huen oen duemdawngna kangna khaw khueh nawh.” a tina.

²¹ Atloe hubang pakhat lawng atah, “Bawipa, im la ka cet de silang tah a pa rawkk te ka kuem de ai,” a tina.

²² Jesuh lawng, “Ka hu ah bang hawn, thlaangduek lawng amami thlaangduek puei te kuem noen seh,” a tina.

²³ Jesuh tah lowng khuila kuun tih, a hubang hue khaw ahih oen cet haih u. ²⁴ Kawlkalh ah tuilii dawngah thlipui tho tih lowng te tuilet lawng a khup dalh. Tede Jesuh tah ditdit ip. ²⁵ A hubang hue a tengla cet u tih a thawh u. Bawipa, kaimi he, n’thlawn lah, ka duek u poen ai he, a tina u.

²⁶ Jesuh lawng, “N’tu ah tila na rih u aih? Na oengna yawl tangkiik u nawh pai he!” a tina. Tecoengah ahih lawng tho tih thlipui oen tuilet te duem ham awl a peek; kawlkalh ah thlipui oen tuilet te duem tih tuilii te dipsipla awm.

²⁷ Thlaang boeih lawng a kawpoek la rai u tih, “He thlaang he me ang thlaang kai? khawthlii oen tuilet lawngkhaw a awl a ngaai pe mai!” ti u.

²⁸ Jesuh tah tuilii khatben rall kah Gadara ram la a law vengah thlaang a upna lungkaw khui kalawng raaithe oen aka be thlaang pahih Jesuh tengla va law. Te rawi tah a kaw khuiah raaithe awm tih a tluung thakbat dawngah te kah lawngpui benla a-u lawngkhaw ceh ham a rih. ²⁹ Ahih rawi lawng, “Nang Pathen Capa, kaihih sawah n’tu sai ham na ngaih? Atue akhoek thlan ah kaihih he dantat hamla na law aw?” tila paang hih.

³⁰ Te huen kalawng ceh hot athlana ah awk yahawh a vuelh u. ³¹ Raaithe hue lawng Jesuh tengah, “Kaimi he kan hek ai na ti oh atah awk kaw khuiah n’kuun sak u hawn” tila a bih u.

³² Jesuh lawng, “Cet uh,” a tina. Tedawngah ahimi lawng co u tih awk kaw khuila kuun u. Awk boeih te cehthleeng ah plit tih tuilii ah tla tih duek boeih.

³³ Awkdoen hue lawng aloela heeng u tih khawpui khuila kuun u, raaithe aka be thlaang pahih kawng oen a huh thli boeih te a thui u. ³⁴ Tedawngah khawpui khuikah thlaang boeih tah Jesuh te huh ham cet u; Jesuh te a huh u veng atah te ram kalawng atloela ceh ham reenna a bih u.

¹ Jesuh te lowng khuila kuun, tuilii ah kat tih khatben tuirall amah khaw la te meel koep phai. ² Te huen ah aka khawn thlaangtlo pakhat te ihphah dawngah avan kawh u tih Jesuh tengla avan khuen u. Jesuh lawng ahimi kah oengna te a huh vengah, aka khawn thlaang te, “Ka capa, na ngai mawng sak! na thawlhna boeih khawdawpngaai la awm poen” a tina.

³ Tevengah Mosi phungawl cangpueikung khatsut hue lawng amami kaw khuiah, “He kah thlaang lawng Pathen thekhana awl a thui nawh pai he!” ti u.

⁴ Jesuh lawng ahimi kah kawpoek te a ming tih, “N’tu kawngah te ang thaihu the te na poek u? ⁵ Na thawlhna boeih khawdawp ngaai la awm poen ti he aw aka yoeii bet, tihnawhtah, tho lang cet loeih! ti he aw aka yoeii bet? ⁶ Thlaanghing Capa lawng dilai sawah thawlh khawdawp ngaai thaina a khueh ti he kan ming sak u ai,” a tina tih aka khawn thlaang te “Tho lah, na himbai te lo lang im la cet loeih!” a tina.

⁷ Te thlaang lawng tho tih im la cet. ⁸ Thlaangping lawng te tila a sai te a huh vengah a ngai hang u tih te ang saithaina thlaanghing tengah aka pe Pathen te a thangpawm u.

⁹ Te huen kalawng Jesuh te cet phai tih Matthai a ti u mangmu cawikung amah yungim ah aka ngawl te a huh. Jesuh lawng, “Ka hu ah va bang lah” a tina. Matthai lawng tho tih a hu ah bang.

¹⁰ Jesuh te Matthai im ah buh a caak vengah mangmu cawikung thli oen atloe thlaangthawlh broe lawng Jesuh oen a hubang hue te buh haih a veel puei u. ¹¹ Farasi khatsut lawng te tila buh a veel haih u te a huh vengah a hubang hue te, “N’tu ah na saya lawng mangmu cawikung oen thlaangthawlh hue oen ah buh haih a caak? tila a doet.

¹² Jesuh lawng ahimi kah awldoetna te a yaak tih, “Sading thlaang lawng sibawi ngoe nawh, tede thlaangtlo bueng lawng ni angoe,” a tina. ¹³ Va cet u lang, “Ramsa oen thawthuengna lak ah reenna lungbui te ni ka ngaih,” tila caciim lawng a thuingaihna te poek u lah! Thlaangdoeng khue ham ka law nawh tih thlaangthawlh khue ham ni ka law” a tina.

¹⁴ Tecoengah Baptisma pekung Johan kah hubang hue Jesuh tengla law u tih, “N’tu ah kaimi oen Farasi hue lawng atah buh ka yeh u tih nang kah hubang hue lawngtah buh a yeh u nawh?” tila a doet u.

¹⁵ Jesuh lawng, “Yuluipoei ah yulokung a awm khuiah poei aka bur kamyin thli te a kaw the u ai aw? Tede ahimi teng kalawng yulokung te athlala a khuenna khawhin apha vengah ahimi lawng buh a yeh u badai.

¹⁶ A-u lawngkhaw angki pawn te hisa athaai oen baw vai nawh, hisa athaai oen a baw atah angki ruem te a doek vetih a puut kau tare ai. ¹⁷ Te tih van angla a-u lawngkhaw, misurtui athaai te saphaw yuukhap ruem dawngah thloen nawh, athloen atah saphaw te puut ai, misurtui khaw ceu thloep vetih saphaw te khaw pawn ai. Tedawngah misurtui athaai te saphaw yuukhap athaai dawngah a thloen, te atah pahih bok la sueng ai, a tina.

¹⁸ He awl he Jesuh lawng a thui lii vengah Judah bawi pakhat te a tengla va law, a haiah khuklu oen cuengkueng tih, “Ka canu tapekca roe ah duek; va law lang a sawah na kut tloeng pe lah, ahih tah hing koep badai,” a tina.

¹⁹ Tedawngah Jesuh lawng tho tih a hu ah a vai, a hubang hue khaw ahih oen cet haih u.

²⁰ Kum thlaihih khui thi suntlaak tlawhna oen aka tlo hutaa pakhat Jesuh kah a hu ben kalawng va law tih ahih kah baidung te a tek. ²¹ Te hutaa lawng, “A baidung hmoi bueng mah ka tek mai kawinih ka hoeih sui de,” tila a thinkaw ah a poek.

²² Jesuh lawng a hu benla mang tih hutaa te a huh vengah, “Ka canu na ngaai mawng sak; na oengna lawng n’hoeih sak poen,” a tina. Teveng tue roe ah hutaa te hoeih pahoei.

²³ Tecoengah Jesuh lawng Judah bawi im khuila kuun. Rawkk im ah riingding aka tum hue oen curumngang la aka awm hue te a huh vengah, ²⁴ “Cet u lah! hutaaca he a duek moenih, aka ip ni!” a tina. Ahimi lawng Jesuh te a nuihna u. ²⁵ Thlaangping te a ceh boeih coeng khoeng ah Jesuh lawng hutaaca kah akhann khuila kuun, a kut ah a phoeih tih a thawh vengah hutaaca te tho. ²⁶ He awlthang he a teng avaai kah ram pum boeih ah thaang khok.

²⁷ Jesuh lawng te huen te a thawh taak tih a ceh phai vengah mikpum thlaang pahih lawng a hu ah a vai hih tih, “Devid Capa, kaihih he n’reen lah!” tila paang hih.

²⁸ Jesuh te im khuila a kuun vengah mikpum rawi te a tengla va law hih. Jesuh lawng. “Kai lawng kan hoeih sak thai ti he na oeng hih aw?” tila a doet. “Oeih, Bawipa! kan oeng” a tina hih.

²⁹ Tecoengah Jesuh lawng ahih rawi kah mik te a tek pe tih, “Na oeng hih angla coengg hawn seh,” a tina. ³⁰ Ahih rawi kah mik tah tueng koep. Jesuh lawng te rawi te “He he a-u tengah khaw thui roe roe boel,” a tina.

³¹ Tede te rawi lawng cet hih tih Jesuh kah awlthang te ram pum boeih ah a heh khonghak.

³² Te kah thlaang pahih te a mel vengah, thlaangvaang hue lawng raaithe aka khueh awlmueh thlaang pakhat te Jesuh tengla avan law puei u. ³³ Jesuh lawng raaithe te a hek pe coeng khoeng ah te thlaang lawng cal thai koep tih te kah thlaang boeih tah a kawpoek rai u. “Israel thlaang tim ah he ang he n’hu vai u nawh” ti u.

³⁴ Tede Farasi hue lawngtah, “Raaithe hek thaina huham Jesuh aka pekung he Raaibawi ni,” ti u.

³⁵ Jesuh lawng khawpui oen vangca boeih la cet tih a hiil. Sinakok bok-im ah a cang puei. Vaan ram kawng Awlthang Theen a phawng, tlawhnatna soeprep oen ah aka tlo thlaang boeih te a hoeih sak. ³⁶ Jesuh lawng thlaang yahawh te a huh vengah doenkung aka awm nawh tuu angla, bawmkung taal tih lakueng rihna oen khawdeng ming ruila a awm u te a huh vengah a reen tangkiik. ³⁷ Tedawngah a hubang hue tengah tila a thui, “Caang ah ham yahawh hlang de aka aat ham thlaang yawlca, ³⁸ Caang aka aat thlaang yahawh avan tuihna ham lotoenkung tengah thangthui uh,” a tina.

¹ Jesuh lawng a hubang paha thlaihih hue te a khue tun tih, raaithe hek thaina, tlawhna oen natna soeprep hoeih sak thaina te a peek. ² A hubang paha thlaihih hue kah a miing tah, “lamhacuekla Simon (Piter a ti u te) oen a manau Andru; Zebedi ca rawi Jeem oen a manau Johan; ³ Filip oen Bartalomiu, Tawmas oen mangmu cawikung Matthai, Alfias capa Jeem, oen Tadias; ⁴ Phunkuup Simon oen Jesuh sawah paipi thleepkung Judah Iskariot, he hue ni.

⁵ Jesuh lawng a hubang paha thlaihih hue te he tila awl a uen tih a tuih u; “Gental ram oen Samaria ram khawpui boeih ah cet u boel. ⁶ Te lak ah Israel thlaangphun aka auh tuu tengah cet uh.” ⁷ Cet u lang, “Vaan ram tah yoeiica poen” tila phawng uh. ⁸ Thlaangtlo hoeih sak uh, thlaangduek thawh sak koep uh, haibe natna hoeih sak u lang raaithe thli te hek uh. Ayoela na dang u te ayoela pe u van. ⁹ Sui, ngun oen ruhum tangka khaw na angkithlep dawngah khuen u boel; ¹⁰ Yin cehna sawngsa khaw, Angki, khawmuek oen cawnghol khaw ahoei khuen u boel. Bii aka bi tah angoe boeih te peek la awm badai.

¹¹ Khawpui khaw vangca vangnau khaw na pha u vengah awmngaihcala n’do tih aka pah sak ham koei im te tlap u lang na voei thlantoe te im ah cam uh. ¹² Im khuila na kuun u vengah, “Nangmi tengah ngaimawngna awm hawn seh,” tina uh. ¹³ Te imkhuikaw lawng nang te n’do tih m’pah sak atah na voemtoeina awl ngaimawngna tah te im khuiah awm hawn seh!; tede nangmi te n’do nawh tih m’pah sak nawh atah na voemtoeina awl ngaimawngna te lat koep uh. ¹⁴ Khatsut imkhuikaw, tihnawhtah khaaw pakhat khat lawngah nangmi te n’do nawh tih na awl thui te khaw a hutung nawh atah ceh taak lang na khow dawngkah laidiik te khoek pe uh, ¹⁵ Atak tang kavan thui u, “Awlcekna khawhin ah te khaaw kah thlaang thli lak ah Sodom oen Gomorrah khaaw kah thlaang thli te Pathen lawng a reen ngaai ai,” a tina.

¹⁶ “Hutung u lah! metaang tim ah tuu angla nangmi he kan tuih u. Tedawngah ruul angla na cuih khueh u lang akhuu angla na kaw daw sak uh. ¹⁷ Ngaithuen uh, nangmi te tuuk hamla thlaang va law ai, awlcekna yung la n’khuen u vetih sinakok bok-im ah khaw m’bawh u ai. ¹⁸ Kai kawng dawngah awlcek ham ukkung thli oen sengpahrang haiah n’khuen u vetih ahimi oen Gental hue tengah Awlthang Theen na phawng u ai. ¹⁹ Nangmi te awlcek ham n’khuen u vengah n’tu ka thui ai, metila ka thui ai tila lakueng u boel, atue a pha vengah na thui ham koei te m’peek badai. ²⁰ Na thui ham koei awl te tah nangmi awl nawh ni. Te awl tah Pa Pathen Muithla lawng nangmi dawng kalawng a thui ai.

²¹ “Thlaang lawngah a maya manau te duek sak hamla thlaang kut ah a peek u ai, te tih van angla ana pa lawng a ca thli tengah a sai van ai; a ca thli lawngkhaw a manu oen ana pa te a raalna vetih ngawn sak hamla thlaangtloe kut ah a peek u ai. ²² Kai kawng dawngah thlaang boeih lawng nangmi te n’thina ai; tede a-u khaw aboettoe ueh atah Pathen lawng a thlawn ai. ²³ Khaaw pakhat ah nangmi te n’heemtek tih ng’ngawn u atah khaw tloe la heeng uh. Atak tang kavan thui u! Thlaanghing Capa a law thlan ah Israel ram boeih ah bii na coeng u manawh.

²⁴ “Sengcamoe lawng saya sawah awm nawh. Bawi sawah tamnaa lawngkhaw awm nawh. ²⁵ Tedawngah sengcamoe lawng saya angla, tamnaa lawng a bawi angla a awm atah a kaw a tluep ham awm mai. Imkhuikaw kah a luu koek te Beelzebul tila a khue u atah, a cakaw hue tare tah te lak ah anauh ngaai miingthe oen a khue u ai!” a tina.

²⁶ Tedawngah thlaang te rih u boel. Tahe ah thuh elh la aka awm boeih he phumpho vetih awlhuep boeih te ming la awm ai. ²⁷ Yiin samangting ah kavan thui he hingthun khawse ah thui koep uh; ahuepla na yaak te imphu kalawng phawng uh. ²⁸ Pum bueng a ngawn thai tih muithla aka ngawn thai nawh thlaang te rih u boel. Pum oen muithla pahih bokla hell khuiah aka ngawn thai Pathen te rih uh. ²⁹ Pheksa seen pakhat oen variit pahih na lai thai. Tede variit pakhat Pateng na Pa lawng ming ohla dilai ah tla tih duek nawh. ³⁰ Nangmi tare tah na luu dawngkah samthaam Pateng khaw a toek boeih. ³¹ Tedawngah rih u boel, nangmi tah variit yahawh lak ah na phu awm ngaai.”

³² “A-u khaw kai kah thlaang la a awmna te thlaangping haiah a pai puei khak atah vaan kah a Pa haiah ahih te ka pai puei van ai. ³³ Tede a-u khaw thlaangping haiah kai aka hoett tah vaan kah a Pa haiah ahih te ka hoett van ai.

³⁴ “Kai he dilai dawngah roepna awm sak hamla va law tila poek u boel, roepna awm sak ham ka law nawh, samsen ni kavan khuen. ³⁵ Kai tah a capa oen ana pa, a canu oen a manu, a la-nga oen a manii raal u sak ham ni ka law. ³⁶ Thlaang pakhat ham aka nauh koek raal tah amah cakaw ni.

³⁷ “A-u khaw kai lak ah a manu oen ana pa te a thintlawhna ngaai atah kai kah hubang la koeih nawh: A-u khaw kai lak ah a capa oen a canu te a thintlawhna ngaai atah kai kah hubang la koeih nawh. ³⁸ A-u khaw amah kah thinglam te a kawh tih ka hu aka vai nawh tah kai kah hubang la koeih nawh. ³⁹ A-u khaw a hingna dang ham aka yawm tah a hingna a thlawng ai; a-u khaw kai kawng dawngah a hingna te a thlawng atah hingna te a dang ai.

⁴⁰ “A-u khaw nangmi aka do thlaang tah kai aka do thlaang la awm tih a-u khaw kai aka do tah kai aka tuihkung te a do. ⁴¹ A-u khaw Pathen kah celtuih aka do tah Pathen kah celtuih a do dawngah celtuih hue kah kutdo te a dang van ai. A-u khaw thlaangdoeng pakhat te thlaangdoeng la a awm dawngah a do atah ahih kah kutdo te a dang van ai. ⁴² Atak tang kavan thui u; A-u lawngkhaw ka hubang thli yingkah huhsitkoek pakhat te kai kah hubang la a awm dawngah tuiding boengloeng khui at mai khaw a tuul atah kutdo a dang ngaai ai” a tina.

¹ Jesuh lawng a hubang thlaangha thlaihih tengah he awl he a thui pe coengah te huen kalawng tho tih cang puei ham oen awlthang phawng ham a teng-avai kah khawpui boeih ah cet.

² Baptisma pekung Johan lawng Jesuh Khrih kah thaihu a sai kawng te thongim kalawng a yaak vengah a hubang khatsut hue te Jesuh tengla a tuih. ³ “Aka law ham koei thlaang he nang poen aw? tih nawh atah thlaangtloe aw ka lamtoen u huen ai? van thui lah!” tila Jesuh te a doet sak.

⁴ Jesuh lawng, “Meel koep u lang, na yaak boeih oen na huh boeih te Johan tengah thui pe uh: ⁵ Mikpum lawng a mik tueng poen, Khawkheem lawng cet thai poen, haibe aka na lawng hoeih poen, haapang lawng awl a yaak, thlaangduek thli lawng tho tih khawdeng harah thli tengah Awlthang Theen phawng la awm poen. ⁶ Kai kawng dawngah uepvoetna aka khueh nawh tah yotheen kam-awmna aka dawng thlaang la awm!”

⁷ Johan kah a hubang hue a ceh coengah, Johan kawng he Jesuh lawng thlaangping tengah a thui pe: “Ramhum huhang Johan tengla na ceh u vengah n’tu huh ham na ngaiuep u? Yilh lawng a yawng tih aka tat mailai capuu aw huh na ngaih u? ⁸ N’tu bueh hamla na ceh u? Bai-naak theen oen aka thoeicam u thlaang te huh ham aw? Te ang bai-naak aka buen te sengpahrang im ah ni a awm! ⁹ Van thui u lah, n’tu huh ham na ceh u? Tawngha aw? Oeih! tawngha na huh u; tede na bueh u te tawngha lak ah aka lenduet ni. ¹⁰ Johan he tah caciim dawngah: ‘Pathen lawng, nangmi hamla lawngpui roekbahkung ka laipai nangmi haiah kavan tuih ai,’ tila a thui te ni. ¹¹ Atak tang kavan thui u, hutaa lawng a cuun thlaang tim ah Baptisma pekung Johan lak ah aka lenduet a-u khaw awm nawh. Tede Vaan ram ah huhsit koekla aka awm te Johan lak ah lenduet. ¹² Johan lawng phungthui a tongcuek veng kalawng tihin toe Vaan Ram he raalna oen thekhana angaihhlangla a ming tih aka raalna thli lawng taa hamla tha a huer u. ¹³ Johan dung toe tawngha boeih oen Mosi kah Phungawl lawng Vaan ram kawng te a thui u. ¹⁴ Nangmi lawngah ahimi kah awl te tangna ham na ngaih u atah Johan he tah va law ai tila a thui oepsoeh u Elijah poen ni. ¹⁵ Tedawngah yaakna haa aka khueh lawng ya u hawn seh!

¹⁶ “Tahe san kah thlaang thli he n’tu oen nuem ka nuehtah lah ai? Ahimi tah thaihu yoeihna huen ah aka ngawl camaw thli oen lo u. ¹⁷ ‘Thlaangvaang lawngah a tloe hue te, nangmi hamla yuluina riingding kavan tum u, tede na laam u nawh! duek laa kavan sak u, tede na rap u nawh! tila a paang thil u.’ ¹⁸ Johan a law vengah, ahih lawng buh a yeh tih misurtui khaw a awkk nawh dawngah thlaang boeih lawng ahih tah raaithe oen be!’ na ti u. ¹⁹ Thlaanghing Capa a law vengah ahih lawng a caak a awkk dawngah thlaang boeih lawng, “He thlaang he bueh u lah! caruut awlam thlaang ni, mangmu cawikung hue oen thlaangthawlh hue kah a paya ni” na ti u. Tede Pathen cuihna tah soeng tila a saina oen a tueng sak” a tina.

²⁰ Jesuh lawng kawpoekraina yahawh hlang a saina khawpui thli kah thlaang hue lawng thawlhna a yut u nawh dawngah te khawpui thli te a toel atham. ²¹ Korazin, nang hamla khawmap tangkiik nawh pai he! Betsaida, nang ham khaw khawmap tangkiik nawh pai he! nangmi tengkah kawpoekraina ka sai thli he Taiar oen Sidon ah ka sai kawinih te kah thlaang hue lawng a thawlh yutna tueng sakna ham tlamhi oen a thiing u coengah amah oen amah haiphu oen phull u vetih a thawlhna yut u poen sui de. ²² Atak tang kavan thui u; Awlcekna Hin ah Pathen lawng nangmi lak ah Taiar oen Sidon khaaw kah thlaang hue te a reen bet ai. ²³ Nang Kapernaum namah oen namah vaan la pawmsang u ham na ngaih aw? Hell ah thlaak la na awm ai! Nangmi khaaw kah kawpoekraina ka sai he Sidon khaaw ah ka sai kawinih tihin toe ah te khaaw te awm hun sui de! ²⁴ Atheenla ming uh! Awlcekna Hin ah Pathen lawng nang lak ah Sidon khaaw te a reen bet ai!” a tina.

²⁵ Tevengah Jesuh lawng, “Apa, dilai oen vaan kah Bawipa! Thlaangcuih oen aka thoemthai hue tengah na thuh te aka thoemthai nawh hue tengah na tueng sak dawngah kan uem tangkiik. ²⁶ Oeih, Apa, he ang he nang lawng coengg sak hamla na ngaih roe ni.” tila a thui.

²⁷ “Apa lawng thaihu soeprep boeih m’peek poen. Apa nawh tah a-u lawngkhaw Capa te ming nawh. Capa oen amah te m’ming seh tila Capa lawng a tueng sak thlaang thli teng bueng nawh atah a-u lawngkhaw a Pa te ming u manawh.

²⁸ “Thalrih aka phuei tih tha aka hoengg thli boeih ka tengla law u lah, kai lawngah duemdawngna kan pe u ai. ²⁹ Kai kah hawphueih he lo lang phuei u lah, kai tah kawdaw oen boe-ngaaina thinkaw ka khueh dawngah kai tengah cang u lah; ngaimawngna kan pe ai. ³⁰ Kai lawng kan phueih sak hawphueih tah a phueih khaw nep tih thalrih khaw yaanghoep,” a tina.

¹ Tecoeng adiw aih thlan ah Jesuh tah sabbath hin ah lo lak kalawng pat cet. A hubang thli buh a pawng u dawngah caangvui te a yuun u tih a caak u. ² Farasi thli lawng a huh vengah, Jesuh nala “Bueh lah, na hubang hue lawng sabbath hin ah he tila a sai u he kaimi kah Phungawl a phe,” a tina u.

³ Jesuh lawng, “Devid oen a thlaang hue lawng a bung a pawng u vengah n’tu a sai tite na tae u nooek nawh aw? ⁴ Devid lawng Pathen im khuila kuun tih, Pathen tengah a peek u takawi, khawsoeih hue bueng lawng a caak koei takawi te Devid oen a thlaang hue lawng a caak u teta ahimi lawng Mosi phungawl eek u nawh aw? ⁵ Te bueng ohla sabbath hin takuem ah khawsoeih hue lawng Tempal khuiah sabbath phung a eek u poepa de thawlhna la awm nawh tite na tae u nawh aw? ⁶ Tempal lak ah aka lenduet he ah awm.” ⁷ Caciim lawng, “Kai tah boiava oen thawthueng lak ah reenna te ka ngaih ngaai a tite a thuingaihna awltak na ming u kawinih aka thawlh nawh thlaang thli te thawlh na peel u nawh sui de. ⁸ Metihtiah Thlaanghing Capa tah Sabbath Bawi ni” a tina.

⁹ Jesuh tah te huen kalawng cet tih sinakok bok-im la kuun. ¹⁰ Te kah sinakok bok-im ah kutkheem thlaang pakhat awm. Te ah te Jesuh thawlh peel ham aka ngaih thlaang khatsut awm. Ahimi lawng Jesuh te, “Sabbath hin ah thlaang hoeih sak ham mami kah Phungawl lawng a ngaih kai aw?” tila a doet u.

¹¹ Jesuh lawng, “Nangmi timkah thlaang pakhat lawng tuu pakhat a khueh tih Sabbath hin ah ungrawm dung khuila tla kawinih tuu te doek tih lawh ohla na awm ai aw? ¹² Thlaanghing he tuu lak ah a phu tlo. Tedawngah Sabbath hin ah thlaang bawmcem ham mami kah Phungawl lawng a ngaih” a tina. ¹³ Tecoengah te kah kutkheem thlaang te, “na kut yueng lah” a tina. Ahih lawng a kut te a yueng vengah khatben kut angla theen koep. ¹⁴ Tecoengah Farasi hue lawng cet u tih Jesuh te ngawn hamla a teeng u.

¹⁵ Jesuh amah ngawn ham a teeng u te a yaak vengah te huen kalawng ah cet. Tevengah thlaangping lawng a hu ah bung a vai u. Jesuh lawng thlaangtlo boeih te a hoeih sak. ¹⁶ Amah kawng te thlaangtloe tengah thui nawh ham a khaang pe. ¹⁷ He tila a sai he tah Pathen lawng tawngha Isaiah hawna oen: a thui oepsoeh te asoepna ham ni. ¹⁸ Isaiah lawng “He tah ka lungna, ka thinkaw aka deng ka tuihyoeihthlaang ka tuek te ni. Ahih sawah ka Muithla te ka khueh vetih, doengna phung te thlaangphun boeih tengah a phawng ai. ¹⁹ Ahih lawngtah thlaang te oelhtaih nawh vetih paang manawh. Lawngpui ah a awl a kaa te a-u lawngkhaw ya manawh. ²⁰ Doengna lawng taana te a khueh thlantoe toeng ohla a sai ai. Ahih lawngtah aka tlot tawm caapu thing te khaw khemtlot nawh vetih aka duek tawm hai-im te khaw thih yip manawh.

²¹ Ahih te thlaangphun boeih lawng a uepna ai,” tila a thui te a soepna ham ni.

²² Tecoengah thlaang khatsut lawng raaithe a khueh dawngah a mik pum tih awl aka mueh thlaang pakhat te Jesuh tengla avan law puei u. Jesuh lawng te thlaang te a hoeih sak dawngah awl khaw a thui thai tih a mik khaw tueng koep. ²³ Jesuh kah a saina dawngah thlaang broe lawng a kawpoek rai u tih, “Ahih he Devid Capa tangtang cawini!” ti u.

²⁴ Farasi hue lawng he awl he a yaak vengah ahimi lawng;” Ahih lawngah raaithe a hek thai he tah ahimi ukkung Beelzebul lawng raaithe hek thaina huham tharana a peek dawngah ni,” a tina u.

²⁵ Ahimi kah poekna te Jesuh lawng a ming tih ahimi tengah, “Ram pakhat ah a kawpoek vai u nawh tih athloekla pek u tih raal u kawinih asanhlang cak manawh. Tih van angla khawpui pakhat tihnawhtah imkhuikaw pakhat ah pek bo u tih raal u kawinih pai thai manawh. ²⁶ Tedawngah Seitan ram khuiah bu pakhat oen pakhat raal u kawinih te ram te bu la pek u poen dawngah kawlkalh ah rawk ai. ²⁷ Nangmi lawngah Beelzebul lawng huham tharana a peek dawngah kai lawng raaithe a hek thai na ti u. Tetih atah nangmi kah hubang hue te raaithe hek thaina huham tharana a-u lawng a peek kai? Nangmi kah sai thawlh he namami kah hubang hue lawng a tueng sak! ²⁸ Raaithe hek thaina huham he Beelzebul kah nawh ni, tede kai he raaithe hek thaina huham tharana pekung tah Pathen Muithla ni, raaithe hek thaina lawng he nangmi sawah Pathen ram avan pha poen tite a tueng sak.

²⁹ “A tha aka ra thlaang te a piin lamha nawh atah a-u lawngkhaw a im te a muk tih a kaawn te lawh pe thai nawh; amah te a piin coengah a kaawn te a lawh pe thai ai.

³⁰ A-u khaw kai aka pai puei nawh tah kai aka raalna thlaang ni. A-u khaw kai lawng thlaang ka caawi vengah aka caawi puei nawh tah pekbokung ni. ³¹ Tedawngah kavan thui u, thlaanghing lawng me ang thawlhna khaw a sai tih Pathen thekhana awlthe awlkha phoei mai cakhaw a sawah khawdawp a ngaai pe ai, tede a-u khaw Ciim Muithla thekhana awl a thui atah a sawah khawdawp ngaai pe manawh. ³² A-u khaw thlaanghing Capa raalna awlthe thui mai cakhaw a sawah khawdawp a ngai ai, tede a-u khaw Ciim Muithla raalna awlthe aka thui tah tahe ah khaw, hailam ben toe meveng khaw a sawah khawdawp ngaai pe tlaih manawh.” a tina.

³³ “Athaih theen dang ham thingkung theen khueh a ngoe. Thingkung the na khueh atah athaih the van ai. Ame ang thingkung tite athaih rang oen m’ming thai ai. ³⁴ Nangmi ruul hue; Na the u lal maiah metila awltheen na thui u thai ai? Lungbui khuiah aka awm te kaa dawng kalawng va thoeng. ³⁵ Thlaangdoeng lawngtah thaihu theen a kuem khuikah thaihu theen te a pho sak; Thlaangthe lawngtah thaihu the a kuem khuikah thaihu the te a pho sak van.

³⁶ Atak tang kavan thui u; “Awlcekna Hin atah thlaang boeih lawng awlpoei a thuina dawngah awlcekna a yawkk ai. ³⁷ Na dok oen na tangna te mingna ham namah kah awlthui te awlcekna ham a hawna ai.”

³⁸ Tecoengah Phungawl cangpueikung khatsut oen Farasi khatsut hue lawng,” Saya! kawpoekraina na sai te huh ham ka ngaih u” a tina.

³⁹ Jesuh lawng “Tahe san kah thlaangthe oen Pathen n’tu la aka sak nawh thlaang hue nangmi lawng kawpoekraina sai ham nan ceel u? Ka sai manawh! Atloe kawpoekraina nawh tih Tawngha Jonah kah kawpoek-raina bueng te ni na huh u ai. ⁴⁰ Jonah tah nga bung khuiah yiin daai hin thum a awm angla Thlaanghing Capa khaw yiin daai hin thum dilai khuiah awm van ai. ⁴¹ Nineveh khawpui kah thlaang thli lawng Jonah kah phungthui awl a yaak u dawngah a thawlhna yut u, Awlcekna Hin ah ahimi lawng pai vetih nangmi te thawlh n’peel u ai. Atak tang kavan thui u, Jonah lak ah aka lenduet he ah awm. ⁴² Sheba sengpahrang Nu lawng Solomon kah cuihna awl hutung ham athlahlang amah ram kalawng va law; Awlcekna Hin ah ahih lawng pai vetih nangmi te thawlh n’pup ai. Atak tang kavan thui u, Solomon lak ah aka lenduet he ah awm” a tina.

⁴³ “Thlaang pakhat kaw khui kalawng raaithe te a co vengah, ramhum huhang a hiil tih a awmna huen a tlap: a awmna huen a dang nawh vengah, ⁴⁴ Ka im la ka meel koep ai, tila a poek. Tedawngah a meel koep phai vengah im aciimbiitla awm tih atheenla thaihu akuem te a huh. ⁴⁵ Tecoengah cet koep tih amah lak ah aka the ngaai raaithe pasarih te avan law puei tih te im ah awm u. Tedawngah a hukhueng ah te thlaang tah acuek veng lak ah nauh tare. He tih van angla tahe san kah thlaangthe thli tengah awm van ai” a tina.

⁴⁶ Jesuh lawng thlaangping tim ah awl a thui lii vengah, a manu nucahui law u tih ahih oen awl thui a ngaih u dawngah im adau ben ah pai u. ⁴⁷ Tedawngah thlaangping timkah thlaang pakhat lawng Jesuh te “Bueh lah! na nu nucahui nang oen awl thui a ngaih u tih adau ben ah pai u” a tina.

⁴⁸ Jesuh lawng, “A nu te a-u nuem? ka manau hue te a-u nuem?” a tina. ⁴⁹ Tecoengah a hubang hue te a khi tih, “Bueh u lah! a nu oen ka manau hue tah ahimi he ni! ⁵⁰ A-u khaw vaan ah aka awm a Pa kawngaih aka sai tah ka maya, ka manau, ka ngannu oen a nu ni,” a tina.

¹ Te hin ah Jesuh lawng te im te a thawh taak tih Galili tuiliikeeng la cet; cang puei ham te ah te ngawl. ² Ahih aka veel thlaangping a yahawh aih dawngah Jesuh tah lowng khuila kuun tih ngawl; thlaangping hue tah tuilii-keeng ah pai u. ³ Jesuh lawng thuidoetna awl oen ahimi te thaihu moen a thui pe.

⁴ Ahih lawng caangti te lo khuiah a heh vengah khatsut tah lawngpui ah tla tih va lawng a ruh boeih. ⁵ Caangti khatsut tah lungrawng sawkah dilai ah tla, dilai apam dawngah kawlkalh ah caangti tah po. ⁶ Tede khaw a ling hang atah caangpawk te khawling lawng a kaang, a yung te a dung la a thlak nawh dawngah kawlkalh ah yai tih reu. ⁷ Caangti khatsut tah thliing tim ah tla, thliingkung tah roeng hang tih caang te malh a telh. ⁸ Tede caangti khatsut tah laitheen dawngah tla tih a vui a thaih thaawn. Khatsut tah apueh yakhat, sawmruk, sawm thum toe la nawl.”

⁹ Jesuh lawng, “Yaakna haa aka khueh lawng ya hawn seh” a tina.

¹⁰ Tecoengah a hubang hue Jesuh tengla law u tih, “Thlaangping tengah awl na thui vengah n’tu hamla thuidoetna awl na hawna?” tila a doet u.

¹¹ Jesuh lawng, “Vaan ram kawng awlhuep mingna te nangmi tengah kan peek poen, tede ahimi tah ka pe thlan. ¹² A-u khaw aka khueh te tah a taawm pe vetih a ngoena lak ah a khueh tare ai; tede aka khueh nawh te tah a khueh duen te a lawh pe ai. ¹³ Ahimi tengah awl ka thui vengah thuidoetna ka hawna he tah ahimi lawng a bueh u, tede hu u nawh, a hutung u, tede ya u nawh, yaakming khaw yaakming u nawh. ¹⁴ Tedawngah Tawngha Isaiah lawng a thui oepsoeh awl te ahimi tengah soep. Te awl tah: “He thlaang hue lawng a hutung tah a hutung u de, yaakming u nawh; a bueh tah a bueh u de hu u nawh, ¹⁵ Metihtiah a kawpoek biing sut tih a haa a buem khoep u, a mik te a yiin khoep u, tih nawh kawinih ahimi mik lawng a huh vetih a haa lawng a yaak coengah a thinkaw lawng a yaakming vetih ka tengla va meel u ai, ahimi te kai lawng ka hoeih sak sui de” tila Pathen lawng a thui te ni.

¹⁶ “Nangmi tah na yotheen phoeih. Na mik lawng a huh tih na haa lawng a yaak u. ¹⁷ Atak tang kavan thui u, nangmi lawng na huh u he tawngha hue oen Pathen kah thlaang hue lawng huh ham a ngaih u tangkiik de hu u thai nawh; nangmi lawng na yaak te yaak ham a ngaih de ya u nawh,” a tina.

¹⁸ Tedawngah caangti hehkung thuidoetna awl thuicaihna he hutung u lang yaakming u lah. ¹⁹ A-u khaw Vaan ram kawng awlthang a yaak de aka yaakming nawh te tah lawngpui ah aka tla caangti oen lo u. Ahimi thinkaw ah a heh u caangti te Seitan lawng law tih a rot pe. ²⁰ Lungrawng sawkah dilai apamna ah aka tla caangti tah Vaan ram kawng a yaak vengah awmngaihcala aka do koeloe thlaang oen lo u. ²¹ Tede, ahimi kah thinkaw lungbui ah Vaan ram kawng a thlengyung a thlaak nawh dawngah asan hlang hing nawh. Tedawngah Vaan ram kawng dawngah thekha raina oen heemtekna soeprep a law vengah ahimi lawng kawlkalh ah a hoett pahoei. ²² Thliing tim ah aka tla caangti thui-ngaihna tah Vaan ram kawng tah a yaak de dilai khawsakna dawngah lakueng tih dilai han bawilen ngaihna lawng akang ahalh khoep tih caangvui caangthaih aka thaawn nawh oen lo u. ²³ Laitheen dawngah aka tla caangti tah Vaan ram kawng te a yaak tih aka yaakming thlaang te a thuingaihna, ahimi tah a vui athaih thaawn tih apueh yakhat, apueh sawmruk, apueh sawmthum la thaawn.

²⁴ Jesuh lawng ahimi tengah atloe thuidoetna pakhat a thui pe: “Vaan ram tah amah lo ah caangti theen aka heh thlaang pakhat oen lo u. ²⁵ Yiin at atah, thlaang boeih a ih coengah raal pakhat law tih caang tim ah varaamcaang a heh tih a ceh taak. ²⁶ Caangkung tah roeng tih avui arai hang atah varaamcaang khaw pho van. ²⁷ Lokhuehkung kah a tuihyoeihthlaang hue lawng a tengla law u tih, Bawipa! na lo khuiah caangti theen ni na heh de, ame kah varaamcaang he a po oh kai?” a tina u. ²⁸ Ahih lawngah, “Te ngoen tah raal thli lawng a heh ni,” a tina. Ahimi lawng, “Ka cet u silang varaamcaang te ka phuk u ai aw?” tila a doet u. ²⁹ Lokhuehkung lawng “Phuk u boel,” varaamcaang te na phuk u kawinih caangkung oen na phuk renten u hau ai” a tina. ³⁰ Caang ah tue a pha thlantoe caangkung oen varaamcaang te roeng haih hawn seh. Caang ah tue a pha vengah cang-aat hue te lamhala varaamcaang te phuk, tuum u langtah hai dawngah phuum uh, te coengah caang te aat uh! caawi u langtah ka thaidi khuiah sang uh, ka tina badai.” a tina.

³¹ Jesuh lawng atloe thuidoetna pakhat ahimi tengah a thui pe: “Vaan ram tah he tila awm. Thlaang pakhat lawng antammu a lawh tih a lo khuiah a heh. ³² Antammu tah amu-ati boeih lak ah a yiitkoek la awm. Tede po tih a roeng hang atah akung boeih lak ah aka bo koek la awm. Thingkung pakhat la pai, va thli law tih a beek dawngah bu a tuk.”

³³ Jesuh lawng ahimi tengah atloe thuidoetna pakhat a thui pe baal: “Vaan ram tah he tila awm. Hutaa pakhat lawng tawlru a lawh tih taa-eek hawl at dawng a phull atah a raawi sak boeih oen lo u” tila Jesuh lawng a tina.

³⁴ Jesuh lawng he thaihu boeih thlaangping tengah a thui vengah thuidoetna a hawna. Thuidoetna hawna ohla n’tu khaw thui nawh. ³⁵ He tila a thui he tah Tawngha lawng, “Ahimi tengah awl ka thui vengah thuidoetna ka hawna ai; Dilai a suen cuek kalawng ming nooek nawh awlhuep te ka thui ai,” tila a thui te a soepna ham ni.

³⁶ Jesuh lawng thlaangping te a ceh taak tih im khuila a kuun vengah a hubang hue a tengla law u tih, “Lo khuikah varaamcaang thuidoetna te acaihla van thui lah” a tina u.

³⁷ Jesuh lawng, “Caangti theen aka heh tah Thlaanghing Capa ni; ³⁸ Lo tah he dilai ni; caangti theen tah Vaan ram aka paang thlaang hue ni; varaamcaang tah Seitan kah thlaang hue ni; ³⁹ Varaamcaang aka heh raal tah Seitan ni; caang ah tue tah dilai a boetna; caangaatkung tah vanthlaang hue ni. ⁴⁰ Varaamcaang te a caawi tih hai dawng a phuum angla dilai aboet tue atah te tila awm van ai. ⁴¹ Thlaanghing Capa lawng vanthlaang thli te avan tuih vetih thawlhna ben la thlaang aka ceh sak boeih oen thaihu the aka sai boeih te amah Ram khuiah a caawi sak vetih, ⁴² Vanthlaang lawng ahimi te haialh dawngah a phuum ai, te huen ah rap vetih a naw a rueng u ai. ⁴³ Tevengah thlaangdoeng thli tah ana pa Pathen kah Ram ah khaw angla see u ai. Tedawngah yaakna haa aka khueh lawng ya u lah!” a tina.

⁴⁴ “Vaan ram tah he oen lo u. Thlaang pakhat lawng lo ah khawh-arang a thuh te a huh. Ahih lawng atheenla a up koep tih awmngaihla im la cet. A khueh thaihu boeih te a yoeih coengah meel koep tih te kah lohuen te a lai.

⁴⁵ “Tecoengah Vaan ram tah he oen lo u. Thlaang pakhat lawng latha theen a tlap, ⁴⁶ A hih lawng latha theen te a huh vengah cet tih a khueh thaihu boeih te a yoeih coengah te kah latha te a lai.

⁴⁷ “Tecoengah Vaan ram tah he oen lo u. Tui aka hawi khatsut hue lawng tuilii khuiah lok te a heeng u tih nga phun soeprep te a tuuk u. ⁴⁸ Lok dawngah nga a be atah lan la a doek u tih nga te pekbo hamla ngawl u: nga atheen te busui dawngah a sang u tih nga athe te tah a voeih u. ⁴⁹ Dilai aboet tue atah he tila awm van ai: vanthlaang lawng law vetih thlaang theen timkah thlaangthe te a tuek coengah, ⁵⁰ Ahimi te haialh dawngah a phuum ai. Te huen ah ahimi lawng rap vetih a naw a rueng u ai,” tila a thui pe u.

⁵¹ Jesuh lawng, “He thaihu boeih he na yaakming u aw?” tila ahimi te a doet. Ahimi lawngah, “Oeih! ka yaakming u poen” a tina.

⁵² Tedawngah Jesuh lawng, “Phung-awl cangpueikung timkah thlaang pakhat, Vaan ram ah hubang pakhat la aka awm tah kaawn a khuehna im khui-kah thaihu aruem oen athaai aka sat oen lo u,” a tina.

⁵³ Jesuh lawng thuidoetna he a thui boeih coengah, te huen te a ceh taak tih, ⁵⁴ Amah awmna Nazaret la meel koep. Sinakok ah a cang puei tih ahih kah awl aka ya thlaang boeih a kawpoek rai u. “He ang cuihna he me kah a huh kai? He ang kawpoekraina he metila a sai thai kai?” tila te doet u patoeng. ⁵⁵ “Ahih he lettama capa nawh aw? Meri he ahih kah a manu nawh aw? Jeem, Josep, Simon oen Judah he ahih kah a manau thli nawh aw? ⁵⁶ He kah aka awm he a ngannu thli nawh aw? He ang thaihu boeih he me kah a dang kai?” ti u. ⁵⁷ Tedawngah ahimi lawng Jesuh te hinyah u nawh. Jesuh lawng ahimi te, “Tawngha tah amah awmna khawpui oen a imkhuikaw nawh atah huen tloe boeih ah a hinyah u,” a tina.

⁵⁸ Metihtiah ahimi lawng oengna a khueh nawh dawngah Jesuh lawng te huen ah kawpoekraina yahawh sai nawh.

¹ Teveng tue ah Galili peng ukkung Herod lawng Jesuh kawng te a yaak. ² Herod lawng, “Ahih tah aka hing koep baptisma pekung Johan tang tang ni, tedawngah kawpoekrai saithaina huham a khueh,” tila a kut hui kah bawi hue te a thui pe.

³ Teveng thlan ah Herod lawng Johan te a tuuk sak tih thong khuiah a thlaak. Ahih lawng tila a sai he tah a manau Filip kah a yu Herodias kawng dawngah ni. ⁴ Voei khat ah Baptisma pekung Johan lawng Herod te, “Herodias he na yuna ham tuueng nawh,” a tina. ⁵ Herod lawng ahih te ngawn ham a ngaih. Tede, Judah thlaang thli lawng Johan te tawngha pakhat ni a ti u dawngah ahimi te a rih.

⁶ Herod a cuunna hin ah Herodias canu lawng kamyin thlaang yahawh haiah laam. Herod tah a kaw hoe tangkiik tih, ⁷ Hutaaca tengah, “Na van bih boeih te kan pe ai,” tila a taap tih awl a kam.

⁸ Hutaaca lawng a manu kah ceemtuh angla a bih tih, “Baptisma pekung Johan kah a luu te beelphai dawngah tahe ah m’peh,” a tina.

⁹ Sengpahrang tah a kawthe, tede ahih lawng kamyin boeih haiah awl a kam poen dawngah hutaaca kah a bihna angla peek ham Herod lawng awl a peek. ¹⁰ Tedawngah thongim khuikah Johan luu te a tloek sak. ¹¹ A luu te beelphai dawngah avan khuen u tih hutaaca te a peek u, hutaaca lawng a manu tengla a khuen. ¹² Johan kah hubang thli law u, a rawkk te a khuen u tih a up u, tecoengah ahimi lawng cet u tih Jesuh tengah a thui pe u.

¹³ Jesuh lawng Johan kawng awlthang te a yaak vengah te huen kalawng thlaang a awmna nawh a dingruena huen la lowng oen amah bueng cet. Te kawng te thlaang yahawh lawng a yaak. Tedawngah a awmna khaaw roekk kalawng law u tih lanloeih lawngpui kalawng Jesuh te a hu ah a vai u. ¹⁴ Jesuh te lowng dawng kalawng lan la rum tih thlaangping te a huh vengah ahimi te caalla a reen tih thlaangtlo boeih te a hoeih sak.

¹⁵ Thlemben tue apha veng atah a hubang hue a tengla law u tih, “Khaw thlem poen, he huen tah thlaang a awmna nawh huen la awm, thlaangping he khaaw khui la tuih lang a mami ham caak awkk lai u seh,” a tina.

¹⁶ Jesuh lawng, “Ahimi ceh ham ngoe nawh,’ “Nangmi lawng caak koei pe uh,” a tina.

¹⁷ A hubang hue lawng, “Takawi cuun ngaa oen nga pahih bueng ni ka khueh u,” a tina.

¹⁸ Jesuh lawng, “Ka tengla van khuen u lah,” a tina. ¹⁹ Thlaangping te pompih dawngah ngawlh ham awl a peek; tecoengah takawi cuun ngaa oen nga pahih te a lawh, vaan la maang tih Pathen tengah awmngaih awl a thui. Jesuh lawng takawi te a eh coengah a hubang hue te a peek tih a hubang hue lawng thlaangping tengah a ree pe. ²⁰ Thlaang boeih lawng a caak tih a bung hah. Tecoengah a caak coeih te a hubang hue lawng vawhphueih paha thlaihih la a caawi u. ²¹ Buh aka ca boeih tah hutaa oen camaw toek ohla tawngpataang hawng ah thlaang thong ngaa yunyan awm ai.

²² Jesuh lawng thlaangping te a mel sak veng te ah a hubang hue te lowng khuila a kuun sak tih lamhala tuilii khatben rall la a tuih. ²³ Thlaangping te a tuih boeih coengah Jesuh tah thangthui ham amah bueng tlaang la luui. Khaw athlem atah Jesuh amah bueng te huen ah awm. ²⁴ Lowng te tuirall kalawng athlana tuiluung a pha vengah thlipui tho tih lowng te a maam khak dawngah, tuilet lawng dalh a khup. ²⁵ Cinghuetaang atah Jesuh lawng a hubang hue tengla tui sawah cet. ²⁶ Tui sawah a ceh te ahimi lawng a huh u vengah let u tih, “Muithla ni,” ti u tih paang u.

²⁷ Jesuh lawng ahimi te a voem pahoei tih, “Lakueng u boel! Kai ni; rih u boel,” a tina.

²⁸ Tecoengah Piter lawng, “Bawipa, nang tang tang atah na teng la tui sawah ka lawna ham awl m’pe lah,” a tina.

²⁹ Jesuh lawng, “Va law lah!” a tina. Tedawngah Piter te lowng khui kalawng rum tih Jesuh tengla tui sawah cet. ³⁰ Tede Piter lawng khawthlii a tlawh hlang te a huh vengah a rih tih tui khuiah dalh buekk. “Bawipa n’thlawn lah!” tila paang.

³¹ Jesuh lawng a kut a phawng pahoei tih ahih te a phoeih coengah, “Na oengna yawl tangkiik! n’tu dawngah uepvoetna na khueh?” a tina. ³² Ahih rawi te lowng khuila a kuun hih coeng atah khawthlii dip. ³³ Tecoengah lowng khuiah a hubang hue lawng Jesuh te a bok u. Ahimi lawng, “Nang tah Pathen Capa tang tang ni!” a tina u.

³⁴ Ahimi lawng tuilii ah te kat u tih Gennesaret ram te a pha u. ³⁵ Te kah thlaang hue lawng Jesuh te a noek u. Tedawngah a teng-avai kah thlaangtlo boeih te a khue u tih Jesuh tengla avan law puei u. ³⁶ Thlaangtlo thli lawng Jesuh kah himbai hmoi te tek ham a bih u tih aka tek boeih tah hoeih u.

¹ Tecoengah Farasi khatsut oen Phungawl cangpueikung khatsut te Jesuh tengla Jerusalem kalawng law u tih, ² “N’tu dawngah na hubang hue lawng mami patuer thli kah cang puei awl te a eek u? Ahimi lawng buh caak thlan ah kut sil u nawh!” tila a doet.

³ Jesuh lawng, “N’tu dawngah, Pathen kah awlpeek te na vai u nawh tih namami kah cang puei bueng na vai u?” a tina. ⁴ Pathen lawng, na nu oen na pa te hinyah uh! a-u khaw a manu oen ana pa te a tap avoep atah duek sak ham awm” ti. ⁵ Tede nangmi kah cang puei tah thlaang pakhat mai lawngah a manu oen ana pa bawmna hamla thaihu pakhat mai khaw a khueh te, “He tah Pathen koe ni,” a ti atah, ⁶ ‘A manu oen ana pa te hinyah ham ngoe tlaih nawh,” na ti u. He tila namami kah cangpueina bueng te na vai u tih Pathen kah awlpeek te n’tu la na sak u nawh. ⁷ Nangmi thlaangthaipalat hue! Isaiah lawng nangmi kawng a thui oepsoeh te soeng tang tang! ⁸ Isaiah lawng, “He thlaang hue lawng awlhong oen kai ng’hinyah u, tede a thinkaw lungbui tah kai oen thla tangkiik. ⁹ Ahimi lawng thlaanghing kah sai coplap phung te kai kah awlpeek angla a cang puei dawngah, kai m’bok u he khaw a poei ni; tila Pathen lawng ti,” a tina.

¹⁰ Tecoengah Jesuh lawng thlaangping hue te a tengla a khue tih ahimi te, “Hutung u lang yaakming u lah! ¹¹ Thlaang aka ciimcaih sak nawh thaihu he tah kaa khui kalawng aka kuun he nawh ni, kaa khuikah aka thoeng lawng ni thlaang he a ciimcaih sak nawh” a tina.

¹² Tecoengah a hubang hue ahih tengla law u tih, “Na awlthui lawngah Farasi hue a thin a sa sak he na ming aw?” a tina.

¹³ Jesuh lawng, “Vaan a Pa kah thingliing nawh thingkung boeih tah a phuk ai; ¹⁴ “Ahimi kawngah lakueng u boel! ahimi tah mikpum aka mawt mikpum hue ni, mikpum pakhat lawng atloe mikpum te a mawt atah ungrawm khuila bok tla hih ai,” a tina.

¹⁵ Piter lawng, “Te thuidoetna awl te kaimi tengah aciimla van thui lah!” a tina.

¹⁶ Jesuh lawng ahimi tengah, “Nangmi he tahe toe thlaangtloe lak ah na cuih u thlan nawh pai he! ¹⁷ “Na yaakming u nawh aw? Thlaang kaa khuiah aka kuun thaihu boeih tah a bung khui a pha tih te kalawng naatceh la thoeng. ¹⁸ Tede kaa khuikah aka thoeng hang thaihu tah thinkaw lungbui khui kalawng law tih te thaihu lawng thlaang ciimcaih sak nawh. ¹⁹ Thlaang ngawnna, samphaihna, hutaa tawngpa thawlhna, atheen nawh thaihu saina, huuenna, hoemna, thlaang thaang the sakna, poekna atloe boeih he tah lungbui khui kalawng ni a law. ²⁰ He ang thli lawng thlaang a hawt a aih, tede ahimi kah a thui angla kut silh ohla buh caakna lawng thlaang he a hawt a aih moenih,” a tina.

²¹ Jesuh lawng te huen te a thawh taak tih Taiar oen Sidon peng la cet. ²² Te peng kah aka awm Kanaan nu pakhat a tengla law tih, “Devid Capa!” Kai he n’reen lah, ka canu tah raaithe lawng a tuuk tih nauh tangkiik,” tila angaihhlangla paang.

²³ Tede Jesuh lawng kam at khaw voem nawh. A hubang thli a tengla law u tih, “Ahih he tuih loeih, mami hu ah bang tih thlaangngeu palaawn la paang khiing,” a tina u.

²⁴ Tecoengah Jesuh lawng, “Israel thlaang aka auh tuuca ham bueng ni ka law,” a tina.

²⁵ Tevengah te kah hutaa lawng Jesuh khow kungah buekuep tih, “Bawipa! kai he n’reen mai hawn lah,” a tina.

²⁶ Jesuh lawng, “Camaw kah buh te lawh tih ui m’peek pe atah soeng nawh,” a tina.

²⁷ Te hutaa lawng, “Bawipa, na thui te soeng tak tak, tede ui lawngkhaw a Bawipa kah caboi dawng kalawng aka tla buhdik anhaai te a caak van ta,” a tina.

²⁸ Tedawngah Jesuh lawng, “Nang tah oengcakna aka khueh hutaa ni! na ngaihna angla coengg hawn seh,” a tina. Teveng tue roe ah a canu te hoeih pahoei.

²⁹ Jesuh lawng te huen te a thawh taak tih, Galili tuiliikeeng ah cet. Tecoengah tlaang la luui hang tih ngawl. ³⁰ Thlaangping lawng ah khawkheem thli, mikpum thli, aka khawn thli, awlmueh oen atloe thlaangtlo te avan law puei u tih, Jesuh kah a khow kungah a khueh u tih ahimi boeih te Jesuh lawng a hoeih sak. ³¹ Awlmueh lawng cal thai, aka khawn thli lawng theen, khawkheem lawng cet thai, mikpum lawng a mik a tueng koep te thlaangping lawng a huh u vengah a kawpoek rai u tih Israel Pathen te a thangpawm u.

³² Jesuh lawng a hubang hue te a tengla a khue tih, “Thlaangping he kai oen hin thum ka awm haih u poen tih tahe ah buh caak ham a khueh u tlaih nawh dawngah ka reen tangkiik, lawngpueng ah tawnba u hau ai ka ti dawngah ahimi he buh cah ohla im la tuih ham ka ngaih nawh,” a tina.

³³ A hubang hue lawng, “He thlaangping he yoeh kok ham he ramhum ah ame kah buh caak khoek kaimi lawng ka dang ai?” tila Jesuh te a doet u.

³⁴ Jesuh lawng, “Takawi meyoeh na khueh u?” a tina. Ahimi lawng “Takawi cuun rih oen nga ayawlca tah awm,” a tina u.

³⁵ Jesuh lawng thlaangping hue te dilai dawngah a ngawlh sak. ³⁶ Tecoengah takawi cuun rih oen nga te a lawh tih Pathen tengah uemna awl a thui coengah takawi oen nga te a eh tih a hubang hue te a peek. A hubang hue lawng thlaangping tengah a ree pe. ³⁷ Ahimi lawng ahah la a caak u. A caak coeih te a hubang hue lawng vawh phueih pasarih dawngah abecala a kawh u. ³⁸ Aka ca boeih te hutaa oen camaw toek ohla tawngpataang hawng ah thawnglii law.

³⁹ Jesuh lawng thlaangping hue te a tuih coengah lowng oen Makadan ram la cet.

¹ Farasi oen Sadusi khatsut te Jesuh tengla law u tih a thawlhna tlap ham a ngaih u dawngah, Pathen kah thlaangtuih la na awm ti he mingna ham kawpoekraina van sai lah tila a ceel u. ² Tede Jesuh lawng, “thlemben ah khaw a pang yuuk atah, khaw theen ai na ti u! ³ ‘Mincang ah khaw pang tih khaw a mai atah khaw tlan ai na ti u.’ Nangmi lawng vaan na dan u rang oen khaw theen ai, khaw tlan ai, tila na thui u thai, tede tahe kah atue noekna he tah na ming u thai nawh! ⁴ Tihin hang kah thlaang hue he me tih aihla na the tangkiik u tih Pathen khaw na ming u nawh! Nangmi lawng kawpoekraina na van bih u? Ka sai manawh! Nangmi ham kawpoekraina tah Jonah kah kawpoekraina bueng te ni na huh u ai,” a tina. Tedawngah ahimi te a thawh taak tih atloela cet.

⁵ A hubang hue lawng tuilii khatben ral la a kat phai u vengah ahimi lawng buh khuen ham a hilh u. ⁶ Jesuh lawng ahimi tengah, “Dalra u boel; Farasi oen Sadusi hue kah tawlru te anepla ngaithuen uh,” a tina.

⁷ Tevengah amami pakhat oen khat te, “Mami lawng buh ng’khuen u nawh tih he awl he a thui cawini,” ti u.

⁸ Jesuh lawng ahimi kah awl thui te a ming tih ahimi te, “Buh na khuen u nawh kawng te n’tu la na thui khiing u? Na oengna yawl tangkiik u nawh pai he! ⁹ Tahe toe ah na yaakming u thlan aw? Kai lawng takawi cuun ngaa ka eh tih thlaang thong ngaa ka cah te na hilh u poen aw? Acoeih te vawh meyoeh dawngah a be? ¹⁰ Tecoengah takawi cuun rih thlaang thong lii ka cah te na hilh u poen aw? Acoeih te vawh meyoeh dawngah a be? ¹¹ Nangmi tengah kavan thui he buh kawng nawh ni ti he n’tu ah na yaakming u nawh? Farasi oen Sadusi hue kah tawlru te ngaithuen uh,” a tina.

¹² Tevengah a hubang hue lawng, ngaithuen uh, ati he takawi dawngah a hawna tawlru nawh tih Farasi oen Sadusi hue kah cangpueina ni tila a yaakming u.

¹³ Jesuh lawng Sisaria Filipi khawpui tengvaai ah cet tih te huen ah a hubang hue te, “Thlaang thli lawng Thlaanghing Capa he a-u a ti u? tila a doet.

¹⁴ Ahimi lawng, “Khatsut lawng Baptisma pekung Johan,” ti u, atloe hue lawng, “Elijah,” ti u, atloe khatsut lawng, “Jeremiah nawh atah atloe tawngha pakhat khat cawini ti u,” a tina.

¹⁵ Jesuh lawng, “Nangmi lawng ta, kai he a-u na ti u?” tila a doet.

¹⁶ Simon Piter lawng, “Nang tah aka hing Pathen Capa Messiah ni,” a tina.

¹⁷ Jesuh lawng, “Johan capa Simon, na yo theen phoeih,” He awltak he thlaanghing teng kalawng na tengla law nawh, tede vaan ah aka awm a Pa kah peek ni. ¹⁸ Tedawngah na tengah kavan thui, Piter: nang tah lungto ni! He lunghiim lungdangsuem dawngah ka Khrihcabu ka pai sak ai, duekna lawng Pateng taa thai manawh. ¹⁹ Vaan ram caabi na tengah kan pe ai; dilai dawngah thawhka na khaih boeih te tah vaan ah khaw khaih la awm van ai, dilai dawngah thawh na awng pe te tah vaan ah khaw a awng pe van ai,” a tina.

²⁰ Tecoengah Jesuh lawng a hubang hue tengah amah te Messiah ni tila a-u tengah khaw thui nawh ham awl a uen u.

²¹ Teveng tue kalawng ah Jesuh lawng a hubang hue tengah, “Jerusalem la ka cet vetih Judah ahaamca thli oen khawsoeih ahaamca thli oen ah phungawl cangpueikung thli lawng patang n’khang sak ai, kai he ng’ngawn u ai, tede athum hin ah thawh sak koep la ka awm vetih ka hing ai,” tila acairaula a thui pe.

²² Piter lawng Jesuh te atloela yawp a ceh puei tih a siim. “Bawipa he ang thaihu he Pathen lawng thoeng sak boel seh, te ang te mevengah khaw na sawah van pha roe boel seh,” a tina.

²³ Jesuh lawng Piter te a mang thil ket tih, “Seitan! Ka teng kalawng cet lah, na poekna he Pathen teng kah law nawh tih thlaanghing ben kalawng a law dawngah, ka cehna lawngpui kanghalhkung la na awm,” a tina.

²⁴ Tecoengah Jesuh lawng a hubang hue te, “A-u khaw ka hu ah law ham a ngaih atah amah kawngaih te hoett selang amah kah thinglam kawh ruila ka hu ah bang seh. ²⁵ A-u khaw a hingna thlawn ham aka ngaih tah a hingna te a thlawng ai. Tede a-u khaw kai kawng dawngah a hingna te a sung atah hingna a dang ai. ²⁶ Thlaang pakhat lawng dilai pum he pang mai cakhaw a hingna a thlawng atah n’tu nuem aphu aka awm? Aphu awm nawh! A hingna dang koep ham n’tu oen khaw thaw thai manawh. ²⁷ Thlaanghing Capa tah ana Pa kah ruep-awmna oen amah kah vanthlaang thli oen ah va rum thuk vetih thlaang boeih te bii a bina taring ah kutdo a peek ai. ²⁸ Atak tang kavan thui u, Thlaanghing Capa lawng Sengpahrang angla a law te na huh u thlantoe aka duek nawh ham koei thlaang khatsut tah he ah na awm u,” a tina.

¹ Hinruk a diw raih coengah Jesuh lawng Piter, Jeem oen Johan te tlaangsawm la a luui puei tih amami bueng te huen ah awm u, ² Tevengah ahimi mik huh ah Jesuh kah a muei te thawleng u: a mik-hai tah khawmik angla aang tih a bai a naak khaw bawk tih aang rawngtheng. ³ Tecoengah Mosi oen Elijah tah Jesuh oen ah awl a thui u te a hubang pathum hue lawng a huh. ⁴ Tedawngah Piter lawng Jesuh nala “Bawipa, he huen ah mami awm ham theen tangkiik. Na kawngaih atah im pathum: nang ham pakhat, Mosi ham pakhat, Elijah ham pakhat he ah ka sa u ai,” a tina.

⁵ Piter lawng awl a thui lii vengah ahimi te aka bawk tangkiik muui lawng a thiing khoep u tih muui khuikah awl lawng, “He tah ka lungvatna ka Capa ni, ahih sawah ka kaw hoe, a awl ngaai pe uh,” tila a thui.

⁶ Te awl te a hubang hue lawng a yaak vengah a rih tangkiik u dawngah dilai ah a mik-hai a buengkhuem tih kawpp u. ⁷ Jesuh lawng ahimi tengla law tih ahimi te a tek. “Tho u loeih, rih u boel!” a tina. ⁸ Tedawngah ahimi lawng a bueh vengah, Jesuh bueng nawh tah a-u khaw hu u tlaih nawh.

⁹ Tlaangsawm kalawng a rum thuk u vengah, ahimi te, “He kah na huh u huhthlaam he Thlaanghing Capa duekna kalawng a thawh thlantoe thui u boel,” tila awl a uen.

¹⁰ Tecoengah a hubang hue lawngah, “N’tu dawngah phungawl cangpueikung thli lawng Elijah he lamhacuekla law ai a ti u kai? tila Jesuh te a doet u.

¹¹ Jesuh lawng, “Elijah tah lamhacuekla law tangtang vetih soeprep boeih te aroek abah oepsoeh ai. ¹² Tede kavan thui u, Elijah tah law coeng poen de thlaang lawng a ming u nawh dawngah amami ngaikhuekla ahih te a thena u. Tetih van angla Thlaanghing Capa he khaw a thekhana u ai,” a tina.

¹³ Tecoengah a hubang hue lawng Baptisma pekung Johan kawng ni ahimi tengah avan thui tila a yaakming u.

¹⁴ Ahimi lawng thlaangping tengla a mel koep u vengah, Jesuh tengla thlaang pakhat law tih a haiah khuklu oen cuengkueng tih, ¹⁵ “Bawipa, ka capa he van reen lah! Ahih tah raaihum tlawhna a khueh tih patang a khang tangkiik. Hai dawngah khaw, tui dawngah khaw tlim taitu. ¹⁶ Na hubang hue tengah ka khuen de, ahimi lawng hoeih sak thai u nawh,” a tina.

¹⁷ Jesuh lawng, “Oengna aka khueh nawh nangmi thlaangthe hue! Metuek toe nangmi he kan awm puei u hun ai? Meveng tue toe kan nueh u hun ai? Camaw te ka tengla van khuen u lah,” a tina. ¹⁸ Jesuh lawng raaithe te awl a peek tih camaw kaw khui kalawng raaithe te co, kawlkalh ah ahih tah hoeih pahoei.

¹⁹ Tecoengah a hubang hue amami bueng Jesuh tengla law u tih, “N’tu dawngah kaimi lawng raaithe ka hek thai u nawh?” tila a doet u.

²⁰ Jesuh lawng, “Nangmi lawng oengcakna na khueh u nawh dawngah ni, Atak tang kavan thui u, antammu teh maimah oengna na khueh u kawinih nangmi lawng he tlaang he, he kalawng ke la thoeih lah na tina u a tah thoeih ai, nang mi lawng soeprep boeih na sai u thai ai. ²¹ Tede, he ang raaithe tah thangthuina oen buh yehna bueng nawh atah atloe n’tu oen khaw hek thai la awm nawh,” a tina.

²² A hubang hue Galili la a law boeih u vengah Jesuh lawng ahimi tengah, “Thlaanghing Capa he thlaang kut dawngah a peek u ai. ²³ Ahih te a ngawn u ai, tede athum hin ah tho koep ai,” tila a thui. A hubang hue tah a kaw the u tangkiik.

²⁴ Jesuh oen a hubang hue Kapernaum a pha u vengah, Tempal bok-im kah mangmu cawikung hue Piter tengla law u tih, “Na saya lawng Tempal bok-im kah mangmu a peek van aw? tila a doet u.

²⁵ Piter lawng, “Oeih, a peek,” a tina. Piter te im khuila a kuun vengah Jesuh lawng a voem lamha tih, “Simon, metila na poek? A-u lawng he dilai sengpahrang tengah ram tloe kah thaihu khuen phu oen mangmu a peek? Ram khuikah thlaang lawng aw? Tihnawhtah ram tloe thlaang lawng aw?” a tina.

²⁶ Piter lawng, “Ram tloe thlaang lawng a peek ai,” a tina. Jesuh lawng, “Theen, ram khuikah thlaang lawngtah peek ham ngoe nawh,” a tina. ²⁷ Tede he thlaang hue he a thinsa sak ham ka ngaih nawh. Tedawngah tuilii la cet lang nga vaih lah. Lamhacuek la na tuuk nga kah a kaa khuiah nang oen kai ham Tempal mangmu peek khoek tangka na dang ai. Te tangka te lo langtah mahih kah mangmu la ahimi te pe hawn, a tina.

¹ Teveng tue ah a hubang hue Jesuh tengla law u tih, “Vaan ram ah a-u aka lenduet?” tila a doet u.

² Tedawngah Jesuh lawng camaw pakhat te a khue, ahimi haiah a pai sak tih, ³ “Atak tang kavan thui u, nangmi lawng na kaw na thaw tih camaw hue angla na awm u nawh atah Vaan ram khuiah na kuun u thai manawh,” a tina. ⁴ Vaan ram ah aka lenduet ham thlaang tah boe a ngaai tih he camaw angla kawpoek aka khueh he ni. ⁵ A-u khaw ka miing oen he ang camaw pakhat he a do atah kai aka do thlaang ni.

⁶ “Kai aka oeng camaw pakhat kah a oengna te a phelhna ham a-u lawng-khaw a suek atah caang neetna lungto sum bohlang a awi tih tuilii ah tla kawinih ahih ham theen bet ai. ⁷ Dilai dawngah thlaanghing kah oengna aka phelh sak thaihu yahawh hlang a awm dawngah rih ham awm tangkiik. Te ang thaihu te awm ngaikhoek ai, tede te tila thlaang kah oengna aka phelh sak thlaang ham tah caalla khawmap tangkiik!

⁸ “Na kut tihnawhtah na khow lawng na oengna te avan phelh sak atah tloek langtah voei vik hawn! Kut soep khow soep oen dungyan hai khuila na tlaak lak ah kut oen khow muehla hingna khuiah na kuun te theen ngaai. ⁹ Tecoengah na mik lawng na oengna te avan phelh sak atah na mik te koeih lang voei hawn! Mik pahih oen hell hai khuiah na tlaak atah mik pakhat bueng oen hingna khuila na kuun te theen ngaai.

¹⁰ “Nangmi lawng he ang camaw pakhat Pateng khaw huhsit nawh ham ngaithuen uh. Atak tang kavan thui u, ahimi doenkung vanthlaang tah Vaan kah a Pa haiah awm yoeyah u.

¹¹ (Metihtiah Thlaanghing Capa tah aka auh thlawn ham va law.) ¹² “Tuu yakhat aka khueh thlaang lawng tuu pakhat a auh atah n’tu a sai ai tila na poek? Ahih lawng ramtliim saino a awmna tlaangsawm ah atloe sawmkua pakua hue te a ceh taak vetih aka auh tuu pakhat te tlap ham cet ai. ¹³ Atak tang kavan thui u, aka auh tuu te a dang vengah, aka auh nawh tuu sawmkua pakua lak ah aka auh tuu pakhat te a uem ngaai. ¹⁴ Tih van angla vaan kah nangmi na Pa lawng he ang camaw pakhat Pateng khaw auh sak ham ngaih nawh,” a tina.

¹⁵ “Na boenhui pakhat lawng na sawah a thawlh atah a tengla cet lang a thawlhna te thui peh. Tede ahuepla namahih bueng thui hih. Na awl a ngaai atah na boenhui oen na roep hih poen. ¹⁶ Tede na awl te a ngaai nah atah, Caciim lawng,” thawlh peelna boeih te aka mingpueikung pahih tihnawhtah te lak ah yahawh awm seh! ati angla thlaangtloe pakhat khaw, pahih khaw ceh puei. ¹⁷ Tecoengah ahimi kah awl te a ngaai nawh atah, awlkaa boeih te khrihcabu tengah thui uh. Aboetna ah khrihcabu awl te a ngaai nawh toeng toeng atah ahih te lukih thlaang tihnawhtah mangmu cawikung hue angla poek uh.

¹⁸ “Tedawngah nangmi tengah kavan thui u, dilai dawngah na piin boeih te vaan ah khaw a piin vetih dilai dawngah na thlam boeih te vaan ah khaw a thlam pe van ai. ¹⁹ Tecoengah atloe pakhat kavan thui u: Dilai dawngah nangmi tim kah thlaang pahih lawng me ang thaihu dawngah khaw thin-at kaw-at la na thangthui hih atah vaan kah a Pa lawng nangmi ham avan sai ai. ²⁰ Thlaang pahih, pathum kai kah miing oen a tunna huen ah ahimi oen kai ka awm haih,” a tina.

²¹ Tecoengah Piter lawng Jesuh tengla law tih, “Bawipa, ka boenhui thli lawng ka sawah a thawlh atah, voei meyoeh toe ahih sawah khawdawp ka ngai ai? Voei sarih toe aw? tila a doet.

²² Jesuh lawng, “Nawh ni, voei sarih bueng nawh ni, voei sawmsarih let sarih khawdawp na ngaai ai. ²³ Metihtiah vaan ram tah he tila awm. Voei khat ah sengpahrang lawng a tuihyoeihthlaang kah biibina te soepsa ham a ngaih. ²⁴ Atong cuek vengah, ahih kah tangka laiba aka khueh thli khuikah tangka athong asang aka ba te a tengla avan law puei u. ²⁵ A tuihyoeihthlaang lawng laiba sahna khoek tangka khueh nawh, tedawngah sengpahrang lawng amah oen a yu, a ca oen a khueh thaihu boeih laiba sahna ham yooei seh! tila awl a peek. ²⁶ Te kah tuihyoeihthlaang lawng sengpahrang haiah khuklu oen cuengkueng ruila a bok tih, “N’reen hawn de! Laiba boeih te kan sah badai,” a tina. ²⁷ Sengpahrang lawng a reen dawngah ahih kah laiba boeih te a yoe pe sak tih a tuih.

²⁸ Tecoengah te kah tuihyoeihthlaang lawng cet tih ahih kah tangka ayawlca aka ba tuihyoeihthlaang a paya te a huh. Te thlaang te a tuuk tih a khak. Laiba te, “N’sah loeih!” a tina. ²⁹ A tuihyoeihthlaang a paya lawng khuklu oen cuengkueng ruila, “N’reen hawn de, kan sah badai,” a tina. ³⁰ Tede ahih lawng a thana. Laiba a sah boeih thlantoe a paya te thong ah a thlaak. ³¹ Atloe tuihyoeihthlaang hue lawng te tila a sai te a huh vengah a reen u tangkiik tih Sengpahrang tengah cet u tih te tila thaihu a sai thli boeih te a thui pe u. ³² Tedawngah Sengpahrang lawng a tuihyoeihthlaang te a khue tih, “Nang tuihyoeihthlaang, thlaangthe koek! Ka tengah reenna navan bih dawngah na laiba boeih te kavan yoe sak. ³³ Kai lawng kan reen van angla tuihyoeihthlaang na paya te na reen van ham awm,” a tina. ³⁴ Sengpahrang tah a thinsa tangkiik tih te kah tuihyoeihthlaang lawng laiba boeih a sah thlantoe thong ah a thlaak.

³⁵ Tecoengah Jesuh lawng, “Nangmi lawng thinkaw lungbui tang oen na maya manau tengah khawdawp na ngaai u nawh atah vaan kah a Pa lawng nangmi sawah khawdawp ngaai van manawh,” tila a boetna ah a thui pe.

¹ Jesuh lawng he awl boeih he a thui boet coengah, Galili te a thawh taak tih Jordan tuiva khatben ral Judia ram la cet. ² Thlaangping yahawh hlang lawng a hu ah a vai u tih ahih lawng te huen ah thlaangtlo boeih te a hoeih sak.

³ Farasi khatsut lawng a tengla law u tih a thawlhna tuuk pe ham a ngaih u dawngah, “A me ang kawng dawng maiah a khaw tawngpa pakhat lawng a yu thlaak ham mami kah phungawl lawng a ngaih aw?” tila a doet u.

⁴ Jesuh lawng, “Acuekca ah Saikung lawng thlaang hutaa oen tawngpa a sai,” tila caciim lawng a thui te na tae u nawh aw? ⁵ Tedawngah Pathen lawng, “He kawng dawngah tawngpa lawng a manu oen ana pa te a ceh taak vetih a yu oen awm haih ai, ahih rawi tah pumsa pakhat la coeng ai,” ti. ⁶ Tedawngah ahih rawi tah pahih tlaih nawh ni, pumsa pakhat poen ni. Pathen lawng a tun sak haih poen te tah thlaanghing lawng pek boel seh,” a tina.

⁷ Farasi thli lawng, “Te atah n’tu dawngah Mosi lawng thlaang pakhat lawng a yu te thlaakna ca pe selang tuih seh, tila phungawl a peek kai?” tila Jesuh te a doet u.

⁸ Jesuh lawng, “Nangmi tah thuituen ham na rai u tangkiik dawngah Mosi lawng na yu thlaak ham awl m’peek u. Tede acuekca vengah te tila awm nawh. ⁹ Tedawngah atak tang kavan thui u, “A-u lawngkhaw a yu te thlaangtloe oen a samphaih nawh maiah a thlaak tih yu tloe a lawh atah te thlaang lawng a yu han ah samphaih poen,” a tina.

¹⁰ A hubang hue lawng, “Yuvaa laklaw ah he tila a awm ham koei atah a yuvaa hih nawh ah theen ngaai ai,” tila Jesuh te a tina u.

¹¹ Jesuh lawng, “He kah kan cang puei he thlaang boeih ham nawh ni. Tede Pathen lawng a peek thlaang hue bueng ham ni. ¹² Thlaang lawng a yu a lawh thai nawh he akawng atloetloe la awm: khatsut tah a yu lawh thai nawh ham a thang puei, atloe thlaang khatsut tah yu lawh thai nawh ham a sai u tih atloe khatsut hue tah Vaan Ram kawng dawngah a yu lo u nawh. He cangpueina he aka yaakming lawngtah vai hawn seh!” tila a thui pe u.

¹³ Thlaang khatsut lawngah camaw hue kah a luu dawngah Jesuh lawng a kut tloeng tih thangthui pe ham a tengla avan law puei u. Tede a hubang hue lawng thlaangping te a tlung. ¹⁴ Jesuh lawng, “Camaw hue te kanghalh u boel, ka tengla law u seh! metihtiah Vaan ram tah he ang thlaang thli kah ni,” a tina.

¹⁵ Jesuh lawng ahimi kah luu sawah a kut a tloeng coengah atloela cet.

¹⁶ Voeikhat ah thlaang pakhat Jesuh tengla law tih, “Saya! Dungyan hingna dang hamla me ang thaihu theen ka sai ai?” tila a doet.

¹⁷ Jesuh lawng, “Me ang thaihu theen ti he n’tu dawngah nan doet? Thlaang-theen pakhat bueng ni a awm. Dungyan hingna dang ham na ngaih atah awlpeek te vai,” a tina.

¹⁸ Ahih lawng, “Me ang awlpeek,” a tina. Jesuh lawng, “Thlaang ngawn boel, hutaa tawngpa thawlhna sai boel, huen boel, a soeng nawh la thlaang thawlh peel boel, ¹⁹ Na nu oen na pa te hinyah lang, namah pum na lungna angla na imbe te lungnah,” a tina.

²⁰ Cadawng lawng, “He awlpeek thli he ka vai boeih poen, n’tu sai ham a ngoe hun?” tila a doet.

²¹ Jesuh lawng, “Thlaang soep la awm ham na ngaih atah cet lang na koeva thli te yooei boeih langtah tangka te khawdeng harah thli van peh. Te atah vaan ah kaawn theen na khueh badai, tecoengah law lang ka hu ah va bang,” a tina.

²² Te cadawng tah kuirang la a awm dawngah te awl a yaak vengah a kawthe tih meel.

²³ Tevengah Jesuh lawng a hubang hue tengah, “Atak tang kavan thui u: Kuirang ham tah Vaan ram ah kuun ham rai tangkiik. ²⁴ Kavan thui koep he; Kala-uk pakhat phaimeet khui a kuun lak ah kuirang pakhat lawng Pathen Ram khuiah kuun ham rai bet!” a tina.

²⁵ A hubang hue lawng te awl a yaak u vengah a kawpoek rai tangkiik u tih. “Te atah a-u lawng thlawnna a dang ai,” tila a doet u.

²⁶ Jesuh lawng ahimi te ahaitang heet tih, “He ang he thlaanghing ham coeng thai nawh, tede Pathen ham tah thaihu boeih he coeng thai,” a tina.

²⁷ Tevengah Piter lawng, “Bueh lah! Kaimi lawng thaihu boeih ka ceh taak u tih na hu ah ka bang u poen, n’tu ka dang u ai?” tila a doet.

²⁸ Jesuh lawng ahimi tengah, “Atak tang kavan thui u; San thai a pha tih Thlaanghing Capa lawng Bawi ngawlhcoen dawngah Ruep-awmna oen a ngawlh vengah nangmi ka hubang thlaihih hue nang khaw Israel thlaangphun thlaihih te uk ham bawi-ngawlhcoen dawngah na ngawl u van ai. ²⁹ Tecoengah a-u khaw kai kawng dawngah a im oen a lo, a maya manau, ngannu nganca, a manu ana pa oen a ca te aka ceh taak thlaang tah te yueng te a pueh yakhat la a dang u vetih dungyan hingna te a dang baal ai. ³⁰ Tede tahe ah lamhacuekla aka awm hue he hukhuengla awm lat vetih tahe ah hukhuengla aka awm hue he lamhacuekla awm dai ai,” a tina.

¹ Jesuh lawng, “Vaan ram tah he tila awm. Dumkhuehkung pakhat lawng misur dum ah bii bi sak ham thlaang aka tlap hamla mincanghi ah cet. ² Thapang a peek nooek angla hin-at kutphu ngun tangka pheek at peek ham biibithlaang thli oen a kaw vai u tih ahimi te dum la a tuih. ³ Mincang khawnoek pakua ah dawr la cet koep tih n’tu khaw bi ohla aka pai thlaang khatsut te a huh. ⁴ Tevengah ahimi te, “Nangmi khaw misur dum la cet u langtah bii bi uh, na thapang te ating atawkk la kan pe ai,” a tina.

⁵ Tedawngah ahimi tah cet u. Te-coengah hingthun khawnoek thlaihih vengah khaw, khawnoek pathum vengah khaw a sawkah angla a sai. ⁶ Thlemben khawnoek pa-ngaa tawm ah ahih lawng dawr la a ceh koep vengah thlaangtloe khatsut te huen ah a pai hun te a huh. “Ahimi te n’tu ah biibi ohla khawyung khun he ah na pai u?” tila a doet. ⁷ Ahimi lawng, “Kaimi he a-u lawngkhaw bii m’bi sak u nawh dawngah ni,” a tina u. Dumkhuehkung lawng, “Theen, nangmi khaw misur dum la cet u lang bii bi uh,” a tina.

⁸ Thlemben tue apha vengah dumkhuehkung lawng dumtoetkung tengah, “Bii aka bi thli te khue u lang a thapang te pe uh. Hukhueng koek bii aka bi kalawng tong langtah lamhacuek bii aka bi toe a thapang kutphu te peh,” a tina. ⁹ Thlemben khawnoek pa-ngaa kalawng bii aka bi thli te thapang ngun tangka pheek at rip a peek. ¹⁰ Lamhacuek la bii aka bi thli thapang lawh ham a law u vengah thapang yahawh ka dang ai, tila a poek u. Tede ahimi khaw thapang ngun tangka pheek at rip a dang u. ¹¹ Tangka te a lawh u tih dumkhuehkung tengah caitoek u. ¹² Ahimi lawng, “Hukhueng koek la bii aka bi thlaang thli he tah khawnoek pakhat khui bueng a bi u. Kaimi tah khawyungkhun khawling khawlai khuiah ka bi u. Tede ahimi na peek yoeh van te kaimi nan peek u,” a tina u. ¹³ Tevengah dumkhuehkung lawng ahimi timkah thlaang pakhat te, “Ka puei, hutung lah! Kan thaina moenih, hin at kutphu ngun tangka pheek at peek ham awl n’thui u nawh aw? ¹⁴ Na tangka te lo langtah im la cet loeih! A hukhueng koek aka bi he khaw nangmi kah dang yoeh van te peek ham ka ngaih. ¹⁵ Ka mah tangka te ka kawngaih angla ka hawna thai nawh aw? Kai ka moeihoeih dawngah nang na lungoe aw?” a tina.

¹⁶ Tecoengah Jesuh lawng, “Tedawng-ah hukhueng koek te lamhacuekla awm vetih lamhacuek te hukhueng koek la awm ai,” a tina.

¹⁷ Jesuh lawng Jerusalem la a ceh vengah a hubang thlaihih te ahuep ahelna ah a ceh puei tih amami bueng noenoe ceh ruila ahimi tengah awl a thui pe. ¹⁸ “Hutung u lah,” “Mami tah Jerusalem khawpui la n’cet u ai. Te huen ah Thlaanghing Capa tah khawsoeih ahaamca hue oen Phungawl cangpueikung hue kut ah peek la awm ai. Ahimi lawng Thlaanghing Capa te ngawn hamla thawlh a peel u vetih, ¹⁹ thlaangphun tloe kut dawngah a peek u ai. Thlaangphun tloe hue lawng ahih te nuihbu kamring la a khueh u ai, athe akhana u ai, a bawh u coengah a ngawn u ai. Tede athum hin ah tho koep ai,” a tina.

²⁰ Tecoengah Zebedi kah a yu te a capa rawi oen Jesuh tengla va law. Jesuh haiah khuklu oen cuengkueng tih buekuep ruila a tengah a kawngaih te a bih.

²¹ Jesuh lawng ahih te, “N’tu na ngaih,” tila a doet. Ahih lawng, “Sengpahrang la na law vengah ka ca rawi he na bantang ben ah pakhat, na banvoei ben ah pakhat a ngawlh hih thaina hamla awl van pe lah.” a tina. ²² Jesuh lawng, “Na van bih he na ming hih nawh! Kai lawng ka awkk ham koei patang khangna boengloeng he na awkk thai hih ai aw? tila te rawi boeinau te a doet. A hih rawi lawng, “ka awkk thai hih ai,” a tina.

²³ Jesuh lawng, “Nanghih lawng ka boengloeng dawngkah na awkk thai tang tang ai. Tede ka bantang ben ah ahih ngawl seh, ka banvoei ben ah ahih ngawl seh tila kai lawng ka tuek thai nawh tih te huen tah a Pa lawng a nuuen tangte thlaang hue ham ni,” a tina.

²⁴ He kawng he atloe hubang paha hue lawng a yaak u vengah te rawi boeinau sawah a thin sa u tangkiik. ²⁵ Tedawngah Jesuh lawng a khue tun u tih, “Pathen aka ming nawh ukkung bawi hue lawng a uk thlaang thli sawah huham a khueh u tih mawtkung ahaamca hue lawngkhaw atlawh ngaaila aana a khueh u. ²⁶ Tede nangmi tah tila na awm u manawh. Nangmi timkah pakhat lawng alenduet la awm a ngaih atah nangmi boeih kah tuihyoeihthlaang la awm seh; ²⁷ nangmi timkah thlaang pakhat lawng pakhatna ah awm ham a ngaih atah nangmi kah sal la awm seh. ²⁸ Te tila ni Thlaanghing Capa khaw thlaangtloe te bii bi sak ham law nawh tih thlaang kah bii bi ham oen thlaang yahawh te tlang ham oen ah hingna peek ham ni a law,” a tina.

²⁹ Jesuh oen a hubang hue tah Jeriko khaaw kalawng a ceh u vengah thlaangping yahawh hlang lawng a hu ah a vai u. ³⁰ Lawngteng ah aka ngawl mikpum pahih lawng Jesuh kah a ceh tuen awl te a yaak hih vengah, “Devid Capa! Kai hih he n’reen lah, Bawipa!” tila paang hih.

³¹ Thlaangping lawng te rawi te a ho u tih duem awm hih a tina u, Tede ahih rawi lawng, “Devid Capa! n’reen lah, Bawipa!” tila angaihla paang tare hih.

³² Jesuh lawng pai tih te kah mikpum rawi te a tengla a khue tih, “Nanghih ham n’tu sai sak na ngaih?” tila a doet.

³³ Ahih rawi lawng, “Bawipa! Ka mik na van tueng sak ham ka ngaih hih” a tina.

³⁴ Jesuh lawng mikpum rawi te a reen tangkiik tih a mik te a tek pe. Teveng roe ah a mik tueng pahoei hih tih Jesuh te a hu ah a vai hih.

¹ Jesuh oen a hubang hue tah Jerusalem pha tawm kah Olif tlaang tengah aka awm Betfat khaaw te a pha u atah Jesuh lawng a hubang pahih te a tuih tih, ² he tila awl a uen, “Na hai kah khaaw la cet hih langtah la pakhat a kiing te na huh hih pahoei vetih a tengah a ca awm ai. Rui te thlam pe hih lang la te ka tengla bok van mawt hih. ³ A-u lawngkhaw n’kaana atah, ‘Bawipa lawng angoe’ tina hih. Te atah ahih lawng avan thlah pahoei badai” a tina.

⁴ - ⁵ He awl tah tawngha Isaiah lawng, Zaion khawpui te thui pe uh, Bueh lah, na sengpahrang tah law lii poen! Ahih tah boe-ngaaina oen Lacano pakhat te a cit vetih law ai” tila a thui oepsoeh te asoepna ham ni.

⁶ Tedawngah a hubang rawi lawng cet hih tih Jesuh kah a thui angla a sai. ⁷ La oen a cano te avan khuen hih tih la pum ah a himbai te a dawk u tih Jesuh te a cit sak u. ⁸ Thlaangping lawng lawngpui ah a himbai a phaih pe u tih thlaangtloe khatsut lawngtah thingbuuk te a kawi u tih lawngpui ah thinghu a phaih pe u. ⁹ Jesuh kah a haiah aka cet hue oen a hu ah aka vai thli lawng, “Devid capa te thangpawm uh! Bawipa miing oen aka law te Pathen lawng yotheenna pe hawn seh! Pathen te thangpawm uh,” tila paang u.

¹⁰ Jerusalem khawpui la Jesuh a kuun phai vengah a khaaw pum hinghuen tih “He thlaang he a-u kai,” tila a doet u.

¹¹ Tevengah thlaangping lawng, “He thlaang he tah Galili ram Nazaret khaaw kah tawngha Jesuh ni,” a tina u.

¹² Jesuh lawng Tempal khuila kuun tih te huen kah thaihu aka yooei oen aka lai thli te boeih a hek. Tangka aka thaw thli oen akhuu aka yooei hue kah caboi oen ngawlhna boeih te a plet pe tih, ¹³ ahimi tengah, “Caciim dawngah Pathen lawng, ‘Ka Tempal bok-im he thangthuina im ni ti u ai’ tila a thui. Tede nangmi lawng thlaanghuuen yingreelna a huen la na hawn u.” a tina.

¹⁴ Mikpum oen khawkheem Tempal khuiah Jesuh tengla law u tih ahimi te a hoeih sak. ¹⁵ Kawpoekrai thaihu a saina thli oen Tempal khuiah camaw thli lawng, “Devid capa tah thangtheen sak uh!” tila a paang u te khawsoeih ahaamca thli oen Phungawl cangpueikung hue lawng a yaak a vengah a thin sa tangkiik u. ¹⁶ Tedawngah Jesuh te, ahimi kah a paang awl he na yaak aw? tila a doet u. Jesuh lawng, “Ka yaak ta, Caciim dawngah ‘Camaw oen nauseen hue teng kalawng thangtheenna awl na thoeng sak’ tila a thut u te na tae vai nawh aw?” a tina.

¹⁷ Jesuh lawng ahimi te a ceh taak tih Jerusalem kalawng Bethani la cet tih te ah te ip.

¹⁸ Avuen mincanghi ah Jesuh tah Jerusalem khawpui ben la a mel koep vengah lawngpueng ah a bung pawng. ¹⁹ Lawngteng kah thaidut thing te a huh tih a kung la cet, a thing dawngah a ram hawng te a huh. Tedawngah thaidut thing te. “Meveng khaw na thaih koep thaih manawh,” tila a tap. Kawlkalh ah thaidut thing te duek rup tih reu pahoei.

²⁰ Te tila a awm te a hubang hue lawng a huh u vengah a kawpoek rai tangkiik u tih, “Metila kawlkalh ah thaidut thing a duek rup tih a reu pahoei mai?” tila a doet u.

²¹ Jesuh lawng, “Atak tang kavan thui u, uepvoetna khueh ohla, na oeng u tang tang atah he thaidut thing sawah ka sai he nangmi lawngkhaw na sai thai u van ai. He bueng ohla he kah tlaang Pateng, ‘Thoeih lang tuilii khuila tla lah,’ na tina atah tla thai ai. ²² Na oeng u tangtang atah thangthuina rang oen na bih u boeih te na dang u ai,” a tina.

²³ Jesuh te Tempal bok-im la law koep tih a cang puei lii vengah khawsoeih ahaamca thli oen Judah ahaamca thli a tengla law u tih, “Mekah saithaina aana oen he ang he na sai? A-u lawng saithaina aana he m’peek?” tila a doet u.

²⁴ Jesuh lawng ahimi te, “Awl pakhat kan doet u vetih awl nan thung thai u atah ame kah saithaina aana oen he ang thaihu ka sai tite kavan thui u ai,” a tina. ²⁵ “Johan lawng Baptisma a peek te ame kalawng a law! Pathen ben kalawng aw? Thlaanghing ben kalawng aw? tila a doet. Ahimi lawng, ‘Pathen ben kalawng va law n’ti kawinih n’tu ah Johan te na oeng u nawh,’ ti ai. ²⁶ “Thlanghing ben kalawng ni a law n’ti kawinih Johan te thlaang boeih lawng tawngha ni a ti u dawngah thlaangping he mami lawng rih ham awm,” ti u. ²⁷ Tedawngah, “Ka ming u nawh,” a tina u. Tedawngah Jesuh lawng, “Te atah kai lawngkhaw ame kah saithaina aana oen he ang thaihu ka sai ti he kavan thui van manawh,” a tina.

²⁸ Jesuh lawng, “Metila na poek u? Thlaang pakhat lawng capa pahih a khueh. A capa ahaamca tengla cet tih, Ka ca! tihin ah misur dum la cet langtah bii bi lah’ a tina. ²⁹ A capa ahaamca lawng, ‘Ka ngaih nawh, ka cet manawh’ a tina tih a thana de a kaw a poek koep tih dum la cet. ³⁰ Tecoengah a capa ano tengla cet tih misur dum ah bii bi ham a tuih. A capa lawng, ‘Oeih, a pa! ka cet ai’ a tina. Tede cet nawh. ³¹ He kah a capa pahih khuiah a-u lawng ana pa kah awl a ngaai?” tila a doet. Ahimi lawng, “A capa ahaamca lawng,” a tina u. Tedawngah Jesuh lawng ahimi tengah, “Atak tang kavan thui, mangmu cawikung thli oen thlaanghalhnu thli lawng nangmi te n’khall vetih Vaan ram la ng’kuun taak u poen ai,” a tina. ³² Metihtiah Baptisma pekung Johan tah nangmi tengla law tih lawngdoeng te n’huh sak u poen de nangmi lawng na tangna u nawh. Tede mangmu cawikung thli oen thlaanghalhnu thli lawngtah a tangna u. Te te nangmi lawng na huh u poen de na kawpoek khaw na thaw u nawh, ahih te na tangna u nawh,” a tina.

³³ Jesuh lawng “Atloe thuidoetna he hutung u lah, misur dum khuehkung pakhat awm tih dum te vawng khoep a thung, misurtui a suina ham ungrawm a to, misurdum toetna ham paw a sak. Tecoengah misur dum te tah bii aka bi thli te a vat tih amah tah khawlawng thla la cet. ³⁴ Misur thaih bit tue veng atah dum aka vat thli tengah a tamnaa thli a tuih tih a dang ham koei dum khang la misur thaih te a bih sak. ³⁵ Dum aka vat thli lawng dum khuehkung kah a tamnaa thli te a tuuk u tih pakhat te a bawh u, pakhat te a ngawn u tih pakhat te tah lungto oen a de u. ³⁶ Dum khuehkung lawng lamha kah lak ah a tamnaa yahawh ngai a tuih koep. Dum vatkung thli lawng ahimi te lamhacuek vengkah angla a sai u. ³⁷ A hukhueng ah dum khuehkung lawng a capa te ahimi tengla a tuih ‘Ka capa he tah a hinyah u ngai badai’ tila a poek. ³⁸ Tede dum aka vat hue lawng a capa te a huh u vengah “He tah dum khuehkung kah capa, ro aka pang ham ni. Law uh, ngawn silang a ro thaihu lawh pe u sih.” ti u. ³⁹ Tedawngah a tuuk u tih dum adaubenla a khuen u tih a ngawn u.

⁴⁰ Jesuh lawng, “Tetih atah dum khuehkung a law vengah dum aka vat thli te metila a tina ai?” tila a doet u.

⁴¹ Ahimi lawng, “Te ang thlaangthe thli te a ngawn vetih misur thaih bit tue a pha vengah dum khang atheenla aka pe thai te a vat ai,” a tina u.

⁴² Jesuh lawng ahimi te, “Caciim lawng: ‘Imsakung thli lawng aphu aka awm nawh angla a hoett u lungto te, aphu aka awm koek imkil lungto la awm, he tah Bawipa lawng a sai tih mami mik huh ah kawpoekrai la awm,’ tila a thui te na tae vai u nawh aw?” a tina.

⁴³ Tedawngah atak tang kavan thui u, “Pathen Ram tah nangmi teng kalawng a lawh vetih thaih theen aka thaih sak koei thlaangphun tloe tengah a peek ai,” a tina. ⁴⁴ “A-u khaw he lungto dawngah aka tla tah adiik anuui la rek vetih he lungto lawng a neet te tah adiik avaai la coengg ai,” a tina.

⁴⁵ Jesuh kah thuidoetna awl he khawsoeih ahaamca thli oen Farasi thli lawng a yaak vengah ahimi kawng ni a thui tila a ming u. ⁴⁶ Tedawngah Jesuh te tuuk ham kamthlah u. Tede thlaangping lawng Jesuh he tawngha ni a ti u dawngah thlaangping te a rih u.

¹ Jesuh lawng thlaangping te thuidoetna awl koep a thui pe. ² “Vaan ram tah he tila awm. Voeikhat ah Sengpahrang pakhat lawng a capa kah yului poei sai ham kamthlah. ³ A hih lawng a ceel thlaang thli te poei ah law ham a tuihyoeihthlaang thli te a tuih tih a khue sak. Tede ahimi lawng law ham ngaih u nawh. ⁴ Tecoengah poei bur ham a ceel thlaang thli te khue ham atloe tuihyoeihthlaang thli te koep a tuih tih, “Poei buh veel ham coekroek la awm poen; vaitawtaal thli oen boiava a thau thau thli khaw ka ngawn boeih poen, thaihu soeprep khaw coekroek la ka sai poen. Yului poei la law u loeih, tina uh,” a tina. ⁵ Tede a ceel thlaang hue lawng n’tu la sak ohla amami ngaih la cet u. Khatsut tah lo la cet u, khatsut tah dawr la cet u tih, ⁶ khatsut lawng a tuihyoeihthlaang thli te a tuuk tih a bawh u, a ngawn u. ⁷ Sengpahrang tah a thin sa soeh tih a raalkap thli te a tuih tih thlaang aka ngawn thli te a thup sak boeih coengah khaaw te hai oen a dawi sak. ⁸ Tecoengah a tuihyoeihthlaang hue te a khue tih, “Yului poei tah coekroek la awm poen de ka thlaangceel thli he hinyahna dang ham koeih u nawh. ⁹ Tahe ah lawngpui cumruum ah cet u lang poei ah thlaang a yahawhna ham na huh thlaang boeih te van ceel uh,” a tina. ¹⁰ Tecoengah a tuihyoeihthlaang hue lawng lawngpui boeih ah cet u tih a huh sarui thlaangthe thlaang theen boeih te a cawi tih yuluina im ah thlaang be-toet sut.

¹¹ A ceel thlaang thli te bueh ham sengpahrang lawng a law vengah yului poei himbai bai ohla aka awm thlaang pakhat te a huh. ¹² Sengpahrang lawng, “Ka puei, yului poei himbai bai ohla metila he poei khuiah na kuun thai? tila a doet. Tede ahih lawng n’tu khaw thui thai nawh. ¹³ Tecoengah sengpahrang lawng a tuihyoeihthlaang thli te, ‘Ahih he a kut, a khow te piin pe u lang adau ben yiinna khuila voei uh. Te huen ah rap vetih a naw a tah ai,’ ti” tila a thui pe u.

¹⁴ Tecoengah Jesuh lawng, “A thlaangceel tah yahawh de a tuek thlaang tah yawlca,” tila hukhueng koek ah a thut.

¹⁵ Farasi hue lawng Jesuh tengla cet u tih awldoetna oen a thawlhna tuuk pe ham kamthlah u. ¹⁶ Tecoengah amami kah hubang khatsut hue oen Herod kah thlaang khatsut hue te Jesuh tengla a tuih u tih, ahimi lawng,” Saya, nang lawngtah awl doeng na thui tila ka ming u. Pathen kah kawngaihna a kawng he khaw thlaang lawng metila a poek ti khaw rih ohla na cang puei tih a-u kah mik-hai khaw na bueh nawh. ¹⁷ Tedawngah na poekna van thui lah, Rom Sengpahrang tengah mangmu peek he mami kah Phungawl lawng a ngaih aw, ngaih nawh aw?” tila a doet u.

¹⁸ Ahimi kah kamthlahna athe khawkhan te Jesuh lawng a ming dawngah ahimi te, “Thlaangthaipalat hue, n’tu dawngah kai he kamah awl dawngah tuuk ham na ngaih u? ¹⁹ Mangmu peek ham tangka te n’nueh u lah,” a tina. Ahimi lawng tangka te a tengla a khuen u tih Jesuh lawng,

²⁰ “A-u kah a mueime oen a miing aka awm?” tila a doet u.

²¹ Ahimi lawng, “Sengpahrang kah a muei oen a miing awm,” ti u. Tedawngah Jesuh lawng, “Tetih atah sengpahrang koe te sengpahrang pe u langtah Pathen koe te Pathen pe uh,” a tina.

²² Te awl te a yaak u vengah a kawpoek rai tangkiik u tih Jesuh teng kalawng atloela cet u.

²³ Te khawhin vengah te duek coengah thawhkoepna awm tlaih nawh aka ti Sadusi thlaang khatsut Jesuh tengla law u tih awl a doet u. (Ahimi lawngtah thawhkoepna awm nawh ti u).

²⁴ Ahimi lawng, “Saya, Mosi kah cangpueina dawngah thlaang pakhat a ca cuun ohla a duek atah a manau lawng a yu te a yuna roe roe ai. Te tila a yuna tih a ca a cuun hih atah aka duek tangte a maya kah a ca la awm ai,” ti. ²⁵ Tahe ah boenhui pasarih awm u. Aham koek lawng a yu a lawh de a ca cuun ohla duek, a yu te a manau lawng a paang. ²⁶ A manau pabe khaw, a pathumna te khaw duek. Te tila boenhui pasarih te duek boeih. ²⁷ Ahukhueng atah te hutaa khaw duek van. ²⁸ Boenhui pasarih lawng a yuna dawngah thawhkoepna hin ah a-u kah a yu la a awm ai?” tila a doet u.

²⁹ Jesuh lawng, “Na poek thawlh u! Nangmi lawng Caciim oen Pathen kah huham tharana na ming u nawh dawngah ni. ³⁰ Metihtiah thlaangduek a thawh koep vengah tah vaan ah aka awm vanthlaang angla awm vetih yuvaa tila awm tlaih manawh. ³¹ Thlaangduek thawhkoepna kawngah Pathen lawng a thui awl te vai khat khaw na tae u nawh aw? ³² Pathen lawng, ‘Kai tah Abraham Pathen, Isak Pathen, Jakob kah Pathen la ka awm! ti. Aka hing thli kah Pathen la awm tih aka duek thli kah Pathen nawh ni,’ tila a thui.

³³ Te awl te thlaangping hue lawng a yaak vengah ahih kah cangpueina dawngah te a kawpoek rai u tangkiik.

³⁴ Sadusi thlaang hue awl thui thai nawh la Jesuh lawng a voem te Farasi hue lawng a yaak vengah ngawl tun u tih, ³⁵ Ahimi timkah Phungawl aka ming thlaang pakhat lawng Jesuh kah a thawlhna tuuk pe a ngaih dawngah, ³⁶ “Saya, Phungawl dawngah me ang awlpeek he aka lenduet?” tila a doet.

³⁷ Jesuh lawng, “Na Bawipa Pathen te na thinkaw lungbui boeih, na hingna boeih oen na thoemna, na tharana boeih oen ah lungnah.’ ³⁸ Tete aka lenduet oen awlpuikoek awlpeek mi.

³⁹ Pahihna awlpeek aka lenduet tah pakhatna angla, “Na imbe te namah pum na lungna angla na lungna ai.’ ⁴⁰ Mosi kah Phungawl boeih oen tawngha hue kah cangpueina thli boeih te he awlpeek pahih dawngah cui boeih poen” a tina.

⁴¹ Farasi hue thik-at la a ngawlh tun u vengah Jesuh lawng. ⁴² “Messiah kawng he metila na poek u? A-u kah cadil la a awm? tila ahimi te a doet. Ahimi lawng, “Devid cadil ni,” ti u.

⁴³ Tecoengah Jesuh lawng, “Tetih atah n’tu dawngah Ciim Muithla lawng Devid nala Messiah te ka Bawipa ni,” tila na thui ai, a tina kai?” Devid lawng, ⁴⁴ “Bawipa lawng ka Bawipa tengah, Na raal thli na khowtang ah ka khueh thlantoe Ka bantang ben ah ngawl lah,” a tina, ti.

⁴⁵ Devid lawng, “Bawipa” a tina atah metila Messiah te Devid cadil la a awm thai ai? tila a doet u.

⁴⁶ Jesuh kah awl doet te a-u lawng-khaw a thung u thai nawh dawngah te hin kalawng a-u lawngkhaw awl doet ha u tlaih nawh.

¹ Tecoengah Jesuh lawng thlaangping hue oen a hubang hue tengah awl a thui. ² “Phungawl cangpueikung oen Farasi hue he tah Mosi kah Phungawl aka thuicaih thlaang hue ni. ³ Tedawngah avan thui boeih tah na sai u ham oen na vai u ham koei ni, tede ahimi kah sai te oett u boel, ahimi lawng a thui angla te sai u nawh. ⁴ Thlaangtloe ham tah thalrih te a tloeng pe u tih arih tangkiik la a phueih sak u, tede amami lawngtah thlaangtloe kah thalrih bawm ham a kutdawn oen Pateng dawm u nawh. ⁵ Thlaang kah huh theenna ham bueng thaihu soeprep a sai u. A luu oen a baan dawngah a yeen u Caciim bu ke bueh u lah! metihtlukla a bo tih a himbai hmoi metila a san. ⁶ Poei saina oen sinakok atah atheenkoek huen ah ngawlh a ngaih u tih ngawlhna te a kam oepsoeh u. ⁷ Thlaang yahawh a awmna dawr ah thlaang kah hinyahna oen koehna te a ngaih u tih ‘Saya’ tila khue ham a ngaih u. ⁸ Tede nangmi tah, ‘Saya’ tila khue ham ngaih u boel, nangmi tah boenhui la na awm u dawngah, ‘Saya’ tila khue ham pakhat bueng ni na khueh u. ⁹ Tecoengah Vaan ah aka awm Pa pakhat bueng na khueh u dawngah he dilai han ah a-u khaw ‘Apa’ tila khue u boel. ¹⁰ Nangmi lawng ‘Ukkung’ tila khue khaw ngaih u boel. Ukkung pakhat bueng na khueh u te tah Messiah ni. ¹¹ Nangmi timkah aka lenduet te nangmi kah tuihyoeihthlaang la awm ai. ¹² A-u khaw amah oen amah aka pawmsang u tah adangla a thlaak vetih a-u khaw boe ngai la aka awm tah aka lenduet la a pawmsang ai,” a tina.

¹³ “Phungawl cangpueikung hue oen Farasi hue! nangmi ham khawmap tangkiik! Nangmi thlaangthaipalat hue, nangmi lawng Vaan ram thawhka te thlaang kuun thai nawh ham na khaih khoep u tih namami khaw na kuun u nawh; kuun aka ngaih thli ham khaw awng ham na ngaih u nawh. ¹⁴ (“Nangmi Phungawl cangpueikung oen Farasi hue, nangmi ham khawmap tangkiik! Nangmi thlaangthaipalat hue, huhai thli te na thai na latna u tih a im te na lawh pe u. Thlaang huh atah asanhlangla na thangthui u. He tila na awm u dawngah Pathen kah dantatna a tlawh ngaai la na dang u ai.”)

¹⁵ “Phungawl cangpueikung hue oen Farasi hue! Nangmi ham khawmap tangkiik. Nangmi thlaangthaipalat hue! Thlaang pakhat thinkaw thaw sak hamla tuitunlii ah lowng oen na cet u tih ram pum na hiil u. Thlaang pakhat na dang u vengah namami angla hell ah arepla patang khang ham na sai u.

¹⁶ “Nangmi mawtkung mikpum hue! Nangmi ham khawmap tangkiik. Nangmi lawng, ‘Thlaang pakhat lawng Tempal bok-im a phoei tih awl a taap atah ahih kah awltaap te cak nawh, tede Tempal bok-im khuikah sui te a phoei tih awl a taap atah a awl taap te cak.’ tila na cang puei u. ¹⁷ Mikpum thlaangngau hue! N’tu awlpui ngaai? Sui aw! Tihnawhtah sui aka ciim sak Tempal bok-im aw? ¹⁸ Tecoengah nangmi lawng, ‘Thlaang pakhat lawng bokna a phoei tih awl a taap atah ahih kah awltaap te cak nawh; tede thaang dawngkah kutdo te a phoei tih awl a taap atah cak,’ tila na cang puei u. ¹⁹ Na mik pum u tangkiik nawh pai he! N’tu awlpui ngaai? Kutdo aw, kutdo aka ciim sak bokna te aw? ²⁰ Tedawngah a-u khaw boknathaang te a phoei tih awl a taap poen atah boknathaang dawngkah kutdo te khaw a phoei haih poen tih, ²¹ Tempal bok-im te a phoei tih awl a taap poen atah Tempal bok-im oen a khuiah aka awm Pathen te khaw a phoei haih poen. ²² Tecoengah thlaang pakhat lawng vaan te aphoei tih awl a taap atah Pathen kah ngawlhcoen oen te ngawlhcoen dawngah aka ngawl te khaw a phoei haih poen.

²³ “Phungawl cangpueikung hue oen Farasi hue! Nangmi thlaangthaipalat hue! Nangmi ham khawmap tangkiik. Nangmi lawng cuenruek-an, sawngsing, sungii, oen tawian thli Pateng Pathen te paha ah pakhat na peek u; tede Phungawl lawng awlpui la n’cang puei doengna, thlaang reenna oen ueppang, koei la awmna te tah na hadalhna u. He ang thli he na sai hamla awm tih atloe te khaw dalrana ohla sai ham awm. ²⁴ Nangmi mawtkung mikpum hue! Nangmi lawng pildiik pakhat mai Pateng awkk hau nawh ham tui te na cii u, tede kala-uk tah na doelh u.

²⁵ “Phungawl cangpueikung oen Farasi hue, nangmi ham khawmap tangkiik. Nangmi thlaangthaipalat hue! Nangmi lawng boengloeng oen beel te asaw ahan tah na silh u tih akhui tah athe thaihu, mah kawngaih saina oen betoet. ²⁶ Mikpum Farasi hue! Boengloeng te akhuiben sil lamha uh, te atah adauben khaw ciim badai.

²⁷ “Phungawl cangpueikung oen Farasi hue! Nangmi ham khawmap tangkiik. Nangmi thlaangthaipalat hue! Nangmi tah ahan kah a bawk oen a thluk u thlann oen na lo u; ahan ben atah dan theen tangkiik, tede akhuiben atah arong athaang duekrawkk oen ah betoet. ²⁸ Tih van angla nangmi khaw asaw ahan atah thlaangdoeng angla na awm u, tede na kaw khui atah thailatna, thawlna soeprep oen ah na betoet u.

²⁹ “Phungawl cangpueikung oen Farasi hue! Nangmi ham khawmap tangkiik! Nangmi thlaangthaipalat hue! Tawngha hue ham thlann te atheen theen la na sai pe u tih thlaangdoeng thlaangciim hue kah lungsuem te atheenla na thoei na cam pe u. ³⁰ Tecoengah nangmi lawng ‘Yan kah nu haam pahaam thli san vengah mami ng’awm u kawinih ahimi kah a sai angla n’sai u nawh vetih tawngha thli khaw ng’ngawn u nawh sui de,’ na ti u. ³¹ Tedawngah namami roe lawng tawngha thli aka ngawn hue kah cadil la na awm te na tueng sak u poen. ³² Tedawngah na patuer hue kah a sai thaihu thli te nangmi lawng sai langtah coeng ngala u hawn. ³³ Nangmi ruul hue, ruul kah cadil hue! Metila hell khui tlaakna kalawng ka loeih u thai ai tila na ngaiuep u? ³⁴ Tedawngah kavan thui u: nangmi tengah tawngha oen thlaangcuih hue oen ah cangpueikung kavan tuih ai; nangmi lawng khatsut te na ngawn u ai, khatsut te sinakok bok-im khuiah na bawh u vetih ahimi te khaaw tloe la na vai reroe u ai. ³⁵ Tedawngah, thawlhna aka khueh nawh hue na ngawn u dawngah dantatna nangmi tengah avan pha ai. Thlaangdoeng Abel kalawng Tempal bok-im oen bokna-thaang laklaw ah na ngawn u Berikhiah capa Zekhariah toe te na ngawn u dawngah thisen phu dantatna nangmi tengah avan pha ai. ³⁶ Atak tang kavan thui u: thlaangdoeng hue na ngawn u dawngah thisen phu dantatna te tahe san kah thlaang hue tengah avan pha ai.

³⁷ Jesuh lawng, “Aw, Jerusalem, Jerusalem! Tawngha hue te na ngawn u tih nangmi tengla Pathen lawng avan tuih celtuih hue te lungto oen na de u, Aainu lawng a ca thli a phe thlip ah a yiing sak angla kan thlip kan dah ham ka cai de na ngaih u nawh. ³⁸ Tedawngah na Tempal bok-im te a hoett vetih ahong ahii dingrak la awm ai. ³⁹ Kavan thui u: tahe kalawng hailam toe, ‘Bawipa miing oen aka law te Pathen lawng yotheenna pe hawn seh,’ na ti u thlantoe kai he nan hu koep u tlaih manawh,” a tina.

¹ Jesuh lawng tho tih Tempal bok-im kalawng a ceh vengah a hubang hue a tengla law u tih Tempal bok-im oen ah tuhkai u la a sak thli te a nueh u. ² Jesuh lawng, “Oeih, nangmi lawng he ang thli boeih he na huh u. Atak tang kavan thui u; he Tempal bok-im kah lungto pakhat maikhaw a awmna huen ah awm manawh; apum boeih la a dawng u ai,” a tina.

³ Jesuh lawng amah bueng Olif tlaangsawm ah a ngawlh vengah a hubang hue amami bueng ahuepla a tengah law u tih, “He ang thli he metuek vengah a thoeng ai? Van thui lah!” Na lawna ham atue oen tahe kah san a boetna yoeii poen ti he mingna ham me ang miknoekna a awm ai?” tila a doet u.

⁴ Jesuh lawng, “A-u lawngkhaw n’thaina u nawh ham ngaithuen uh. ⁵ Thlaang yahawh lawng ka miing oen law u vetih ‘Kai he Messiah ni,’ ti ai, thlaangping yahawh hlang te a thai alatna ai. ⁶ Ayoeica kah raal kahna awl oen athla hlang kah ceemraal thawhna awlthang te na yaak u ai, tede lakueng u boel. Te ang thaihu thli te a thoeng ham roe ni, tede aboetna a pha poen tila thuingaihna nawh ni. ⁷ Ram pakhat oen pakhat kaap u ai, thlaangphun pakhat oen pakhat thekyak u ai. Dilai pum ah khawkha vetih likluei hinghuen ai. ⁸ He ang thli boeih he camoe awm tawm tamtuencuek bung-tlawh angla ni a awm.

⁹ “Tecoengah nangmi te thekhana ham oen ngawn hamla n’tuuk u vetih thlaangtloe kut ah nangmi te n’peek ai. Kai kawng dawngah thlaang boeih lawng n’thina u ai. ¹⁰ Tevengah thlaang broe lawng a oengna te a hoett u ai. Ahimi lawng pakhat oen pakhat sawah paipi a thleep u vetih pakhat oen pakhat thi u patoeng ai. ¹¹ Tecoengah tawngha rawlrap thli yahawh hlang pho vetih thlaang thli te a thai alatna u ai. ¹² Thawlhna puung tare vetih thlaang yahawh kah lungna thinkaw khaw dingreel poen ai. ¹³ Tede a-u khaw aboettoe acakla aka pai tah thlawn la awm ai. ¹⁴ Tecoengah thlaangphun boeih kah sausi la a awmna ham Vaan Ram kawng Awlthang Theen he dilai pum kah thlaangphun boeih tengah a phawng u vetih tecoengah aboetna te a pha ai ti.

¹⁵ “Tawngha Deniel lawng a thui oepsoeh ‘Rih koei tuiilehkap thaihu,’ lawng huenciim ah a pai te na huh u ai. (Caciim aka tae lawng he kah a thuingaihna he yaakming uh) ¹⁶ Tevengah Judia ram kah thlaang thli lawng tlaangsawm la heeng u seh. ¹⁷ Imphu ah aka awm lawng im khuikah thaihu thli lawh ham rum boel seh. ¹⁸ Lo ah aka awm lawng himbai hinaak lawh ham im la meel re boel seh. ¹⁹ Te kah atue khawhin tah hutaa bungpum tattloel oen cacuun naukem thli ham metila khaw amap sut ai. ²⁰ Nangmi lawng na heengna atue he sikding tue oen Sabbath khawhin ah a thoengna nawh ham Pathen tengah thangthui uh! ²¹ Metihtiah dilai suen cuek kalawng tihin toe ah aka awm, me ang patangraina boeih lak ah teveng tue ah aka awm te rih ham awm ngaai. Te ang patangraina te a awm khaw awm koep tlaih manawh. ²² Tede Pathen lawng te kah atue te a toi sak poen; te tila atue toi sak nawh kawinih a-u khaw deem manawh. Tede Pathen lawng a thlaang tuek hue hamla atue a toi sak ai.

²³ “Tevengah a-u lawngkhaw nangmi te ‘Bueh lah, Messiah tah he ah awm, ke ah Messiah awm,’ a ti vengah tangna u boel. ²⁴ Metihtiah Messiah rawlrap oen tawngha rawlrap thli pho u vetih a coengg thai atah Pathen kah thlaangtuek Pateng thailatna ham kawpoekrai miknoekna oen kawpoekrai thaihu a lentloe a sai u ai. ²⁵ Hutung u lah! Atue atang a pha thlan ah kavan thui oepsoeh u poen he.

²⁶ “Thlaang lawng ‘Bueh lah, Messiah tah ramhum huhang ah awm,’ a ti u vengah cet u boel. ‘Bueh lah, he huen ah thuh u,’ a ti vengah khaw tangna u boel. ²⁷ Metihtiah khawlaw ben kalawng khawtlaak toe mik patap ah khaw thlap apha angla Thlaanghing Capa tah law ai.

²⁸ “Duek rawkk awmna huen roekk ah langta lawng tun van ai.

²⁹ “Te tila raina khawhin akhum coeng khoeng atah khaw yiin khoep ai, thla lawngkhaw hop ai, vaan kalawng aisi tla ai, vaan kah huham tharana thli boeih lawng hinghuen ai. ³⁰ Tevengah Thlaanghing Capa kah miknoekna vaan ah tueng ai; Thlaanghing Capa lawng tharana huham “oen ruep-awmna oen ah” muui dawng a rum thuk te a huh u vengah dilai thlaang boeih lawng rap ai. ³¹ Pengsara angaihhlangla a tum vetih dilai a kil palii ah vanthlaang thli te a tuih ai, dilai a boetna kalawng khatben toe kah a thlaangtuek thli te ahimi lawng a cawi ai.

³² “Thaidut thing dawngah cuihna lo uh. Thaidut thing tah a ke hingsuep tih a ram thaai a cawn hang vengah khawhaal tue yoeii poen tila na ming u. ³³ Te tih van angla he thaihu boeih na huh u vengah a lawna atue tah yoei poen tila ming uh. ³⁴ He he hilh u boel: tahe kah aka hing hue a duek boeih thlan ah he kah thaihu boeih he thoeng ai. ³⁵ Vaan oen dilai tah khum boeih ai, tede ka awl tah meveng khaw khum manawh.

³⁶ “Te khawhin oen atue te a-u lawng-khaw ming nawh; vaan kah aka awm vanthlaang oen a Capa lawngkhaw ming nawh; A Pa bueng lawng ni a ming, ³⁷ Noah dung vengkah angla Thlaanghing Capa a law vengah awm van ai. ³⁸ Tuiliw a law thlan, Noah te lowng khuila a kuun hin toe thlaang thli lawng a caak a awkk u tih awmtheen a boenn u. ³⁹ Te tila tuiliw lawng a khuk u thlantoe n’tu aka thoeng ai tite ahimi lawng ming u nawh. Tetih van la Thlaanghing Capa a law vengah awm van ai. ⁴⁰ Teveng tue ah lo ah thlaang pahih lawng bii a bi hih ai. Tevengah pakhat te a lawh vetih pakhat te a ceh taak ai. ⁴¹ Hutaa pahih lawng sum a deng hih ai. Pakhat te a lawh vetih pakhat te a ceh taak ai. ⁴² “Bawipa a lawna atue khawhin te na ming u nawh dawngah ngaithuen oepsoeh uh. ⁴³ Imkung lawng thlaanghuuen a lawna atue te ming kawinih atheenla a toet huertue vetih thlaanghuuen lawng im te muk thai manawh tite na ming u. ⁴⁴ Tedawngah nangmi lawng ngaithuen oepsoeh uh, metihtiah nangmi lawng na poek nawh atue vengah Thlaanghing Capa tah law ai.

⁴⁵ “Te tih atah a-u uep-awm tih aka cuih tuihyoeihthlaang la aka awm ai? Te tah a bawi lawng a tuihyoeihthlaang thli cawmcah ham oen ah atue atang vengah ahimi caak awkk pekung la a khueh te ueppang koei aka cuih tuihyoeihthlaang la awm ai. ⁴⁶ Ahih lawngah bii atheenla a bi lii te a bawi lawng a law vengah a huh atah metihtlukla te tuihyoeihthlaang tah a awmngaih ai? ⁴⁷ Tedawngah atak tang kavan thui u: te kah tuihyoeihthlaang te a bawi lawng a koeva boeih te khoembelkung la a khueh ai. ⁴⁸ Tede ahih lawng uepvoet koei tuihyoeihthlaang la a awm atah, ka bawi he law yue thlan hun ai ti vetih, ⁴⁹ atloe tuihyoeihthlaang te a bawh apai vetih, yuuruui buh hah hue oen a caak a awkk haih u ai. ⁵⁰ Tecoengah ahih lawng a poek a sam nawh khawhin oen a ming a tung nawh atue ah a bawi tah law koep ai. ⁵¹ A bawi lawng ahih te ram la a voeih vetih thlaangthaipalat thli lawng a dang koei te a dang sak van ai. Te huen ah rap vetih a naw a rueng ai.

¹ “Vaan ram tah yulokung cadawng do hamla haiim a khuen tih aka cet hulaa paha oen lo u. ² Te thli timkah hulaa pa-ngaa hue tah cuih tih pa-ngaa hue tah cuih nawh. ³ Aka cuih nawh hutaa pa-ngaa he lawng haiim tah a khuen u de haitui ahoei akai khuen u nawh. ⁴ Aka cuih hulaa hue lawngtah hai-im dawngah haitui abepirla a thloen u coengah haitui ahoei akai a khuen u. ⁵ Yulokung cadawng te a law yue nawh dawngah hulaa hue tah ip muelh u.

⁶ “Yiinthuem veng atah ‘Yulokung cadawng law poen! Tho u lang do uh,’ tila paang awl a yaak. ⁷ Hulaa paha hue te tho u tih haiim vaang ham kamthlah u. ⁸ Tevengah hulaa aka cuih nawh hue lawng aka cuih hulaa hue tengah ‘Kaimi kah hai duek poen ai, haitui van thloen thoem u lah,’ a tina u. ⁹ Hulaa aka cuih he lawng ‘Coengg thai manawh, kaimi ham oen ah nangmi ham haih tah haitui khoek manawh. Dawr la cet u lang namami ham lai uh,’ a tina u. ¹⁰ Tedawngah hulaa aka cuih nawh hue lawng haitui lai ham dawr la a cehna ruet ah yulokung tah va pai parak. Ngaithuen oepsoeh la aka awm hulaa hue lawngtah yulokung oen yului poei khuila kuun u tih thawh a khaih khoep u.

¹¹ Tecoengah hulaa atloe hue te avan pha u tih ‘Bawipa, Bawipa kaimi ham thawh van awng u de lah!’ a tina u. ¹² Yulokung lawng ‘Kavan awng manawh, nangmi te kan ming nawh,’ a tina.

¹³ Jesuh lawng, “Te tila khawhin oen atue te na ming u nawh dawngah ngaithuen oepsoeh lang ring uh,” tila ahukhueng ah a tina.

¹⁴ Jesuh lawng “Vaan ram tah he tila awm. Thlaang pakhat lawng athlahlang la yin ceh ham kamthlah tih a ceh thlan vengah a tuihyoeihthlaang thli te a khue tih a thaihu boeih te a kuem sak u. ¹⁵ Amami kah sai thai khoek ah pakhat rip te tangka thong ngaa a peek, atloe pakhat te thong hih a peek, atloe pakhat te thong khat a peek tih yin la a ceh taak. ¹⁶ Tangka thong ngaa aka dang tuihyoeihthlaang lawngtah cet pahoei tih tangka te bii a bina tih apueh thong ngaa a dang. ¹⁷ Tih van angla tangka thong hih aka dang lawngkhaw apueh thong hih a dang. ¹⁸ Tede tangka thong khat aka dang te lawngtah dilai a to tih a bawi kah tangka te a up.

¹⁹ “Atue sanhlang a awm coeng atah a bawi te va meel koep tih ahimi kah tangka hawna te cayin a sai u. ²⁰ Tangka thong ngaa aka dang te va kuun tih apueh thong ngaa a peek. ‘Bawipa tangka thong ngaa nan peek. Bueh lah! Apueh thong ngaa ka dang tih kan peek,’ a tina. ²¹ A bawi lawng ‘Nang tah, ueppangna koei tuihyoeihthlaang la na awm! Thaihu yoehca dawngah ueppang koei la na awm dawngah thaihu yahawh kuemkung la kan khueh ai. Law langtah ka awmngaihna khuiah kuun van,’ a tina. ²² Tecoengah tangka thong hih aka dang tuihyoeihthlaang lawng law tih ‘Bawipa nang lawng tangka thong hih nan peek. Bueh lah! Tahe ah apueh thong hih ka dang tih kan peek,’ a tina. ²³ A bawi lawng ‘Theen tangkiik, Nang khaw tuihyoeihthlaang ueppang koei la na awm. Thaihu yoehca dawngah ueppang koei la na awm dawngah thaihu yahawh kuemkung la kan khueh ai. Law lang ka awmngaihna khuiah kuun van lah,’ a tina. ²⁴ Tecoengah tangka thong khat aka dang te kuun tih ‘Bawipa nang tah amangkhak thlaang la na awm tite kan ming; na tuhna nawh huen ah na ah tih na hehna nawh huen ah na cawi tite kan ming. ²⁵ Tedawngah kan rih tangkiik tih tangka te dilai khuiah ka up. Bueh lah! He he namah koe tangka ni,’ a tina. ²⁶ Tevengah a bawi lawng ‘Nang aka thekoek tuihyoeihthlaang thayong bi ngak! Caangti ka tuhna nawh huen ah ka ah tih ka hehna nawh huen ah a thaih ka yuun tite na ming tang tang aw? ²⁷ Na ming atah n’tu dawngah ka tangka te ka meel koep vengah apuehla dangna ham tangka khuehna bengh ah na khueh nawh? ²⁸ Tahe ah ahih tengkah tangka te lo u lang tangka thong ha aka khueh te pe uh. ²⁹ Metihtiah aka khueh moek thlaang tengah a tawm athap pe vetih apueh la a khueh ai. Tede aka khueh nawh thlaang tengkah a khueh duen te a lawh pe ai. ³⁰ He kah tuihyoeihthlaang n’tu la aka thuum nawh he adauben yiinna khuila daawng u langtah te huen ah rap selang a naw cak cak rueng seh,’ a tina.

³¹ Jesuh lawng “Thlaanghing Capa tah Sengpahrang angla vanthlaang thli boeih oen law vetih a bawi ngawlhcoen dawngah ngawl ai. ³² Thlaangphun boeih lawng a haiah tun u ai. Tecoengah tuudoen lawng me-ee timkah tuu te a pekthlee angla ahih lawngkhaw thlaang thli te bu hih la a pek abo ai. ³³ Ahih lawng thlaangdoeng hue te a bantang ben ah a khueh vetih thlaangthawlh hue te a banvoei ben ah a khueh ai. ³⁴ Tecoengah Sengpahrang lawng a bantang ben ah aka awm hue te, ‘Law uh, nangmi a Pa kah yotheenna aka paang hue! Law u lang dilai suen cuek veng kalawng nangmi ham a roek abah sut Vaan ram te paang u lah. ³⁵ Metihtiah ka bung a pawng vengah buh nan cah u; tui ka halh vengah tuiding nan tuul u; kamyin la ka awm vengah na im ah nan luui sak u; ³⁶ hinaak himbai ka taal vengah nan bai nan naak sak u; Ka tlawh ka nat vengah nan khuut nan ceem u; thongim ka tlaak vengah nan hip u;’ a tina ai. ³⁷ Tevengah thlaangdoeng hue lawng, ‘Bawipa, mevengah na bung a pawng te kan huh u tih buh kan cah u; tui na halh te mevengah kan huh u tih tui kan tuul u? ³⁸ Mevengah kamyin la na law tih im ah kan pah sak u; mevengah hinaak himbai na taal te kan huh u tih kan naak kan bai sak u? ³⁹ Mevengah na tlawh na nat, mevengah thongim ah na awm te kan huh u tih kan hip u?’ tila a tina u ai. ⁴⁰ Sengpahrang lawng, ‘Atak tang kavan thui u; He kah ka boenhui huhsit koek pakhat tengah na sai u te ka sawah na sai u poen ni,’ a tina ai.

⁴¹ “Tecoengah Sengpahrang lawng a banvoei benkah aka awm hue tengah ‘Nangmi Pathen lawng a kawsina’ thlaang thli ka teng kalawng atloela cet uh. Seitan oen a hubang hue ham aroek abah pe sut dungyan haialh khuila cet uh. ⁴² Metihtiah ka bung a pawng vengah buh nan cah u nawh; tui ka halh vengah tui nan tuul u nawh; ⁴³ Kamyin la ka awm vengah na im ah nan pah sak u nawh; hinaak himbai ka taal vengah nan bai nan naak sak u nawh; ka tlawh ka nat vengah khaw, thongim ka tlaak vengah khaw nan khuut nan ceem u nawh,’ a tina ai. ⁴⁴ Tevengah ahimi lawng ‘Bawipa, mevengah na bung a pawng, tui na halh, kamyin la na awm, hinaak himbai na taal, na tlawh na nat tih thongim ah na awm tih atliingla na awm te kan huh u tih kan khuut kan ceem u nawh,’ a tina u ai. ⁴⁵ Sengpahrang lawng ‘Atak tang kavan thui u: He thlaang huhsit koek timkah pakhat bawm ham na ngaih u nawh te kai nan bawm nan ceem u nawh poen ni,’ a tina ai. ⁴⁶ Tecoengah ahimi te dungyan patang raina huen ah a tuih vetih thlaangdoeng hue te tah dungyan hingna ah cet u ai,” a tina.

¹ Jesuh lawng he awl a thui boeih coengah a hubang hue tengah, ² “Na ming u angla he coeng kalawng hin hih ah Kaantaak Poei awm vetih Thlaanghing Capa te thinglam dawngah ngawn hamla thlaang kut ah a peek ai,” a tina.

³ Tecoengah khawsoeih ahaamca hue oen Judah ahaamca hue lawng Khawsoeih Bawi Kaiafas kah impui ah tun u tih, ⁴ Jesuh te ahuepla tuuk tih ngawn ham khaw a khan u. ⁵ “Poei khawhin khui atah tu boel sih, thlaangping lawng awl puung vetih cumplaam la tho ai,” tila ahimi lawng a thui u.

⁶ Jesuh tah Bethani khaaw kah haibe aka na Simon im ah te awm. ⁷ Buh a caak lii vengah hutaa pakhat Jesuh tengla law tih riimtuui phutlo alabasta uum dawngah abepirla avan khuen tih Jesuh te a luu ah a suep. ⁸ Te tila a sai te a hubang hue lawng a huh u vengah a thinsa u tih, “N’tu ham he tila apoeih alak he! ⁹ He riimtuui he tangka yahawhla a yoeih vetih khawdeng harah a peek makawi!” ti u.

¹⁰ Te tila a hubang hue lawng a thui u te Jesuh lawng a yaak vengah ahimi nala “N’tu hamla he hutaa he na lawl na la u? Ka sawah ahih lawng thaihu theen a sai poen ni, ¹¹ Khawdeng harah thli tah nangmi tengah awm poepa ai, tede kai tah nangmi tengah ka awm poe manawh. ¹² He kah hutaa lawng ka pum riimtuui oen avan suep he ka rawkk kuem ham a kamthlahna ni. ¹³ Atak tang kavan thui u: dilai saw peng tawm ah he awlthang a thuina huen roekk atah ahih kah thaihu sai he amah hilhna nawh ham a thui yoeyah u van ai.

¹⁴ Tecoengah a hubang thlaihih tim kah Judas Iskariot aka miingna te khawsoeih ahaamca hue tengla cet tih, ¹⁵ “Jesuh he a sawah paipi ka thleep tih nangmi kut ah kan pe kawinih n’tu nan peek u ai?” tila a doet. Ahimi lawng tangka sawmthum te a toek u tih Judas te a peek u. ¹⁶ Teveng kalawng Judas lawng Jesuh te ahimi kut ah peek thai ham atue theen a ring.

¹⁷ Tawlru thuum mueh Takawi Poei acuek hin ah a hubang hue Jesuh tengla law u tih, “Nang hamla Kaantaak buh he ame huen ah ka sai u ai? tila a doet u.

¹⁸ Jesuh lawng, “Khawpui khuikah thlaang pakhat im la cet u lang ‘Saya lawng: Kai ham atue a pha poen; ka hubang hue oen na im ah Kaantaak buh veelna ka sai u ai, ti’ tila thui pe uh,” a tina.

¹⁹ A hubang hue lawng Jesuh kah a thui angla Kaantaak buh te aroek abah u.

²⁰ Khaw a thlem veng atah Jesuh oen a hubang thlaihih hue buh a veel u. ²¹ Thlem buh a caak u lii vengah Jesuh lawng, “Atak tang kavan thui u: nangmi timkah pakhat lawngah ka sawah paipi a thleep ai,” a tina.

²² A hubang hue tah a kawthe u tangkiik tih pakhat coengah pakhat lawng, “Bawipa, kai aw?” tila a doet u.

²³ Jesuh lawng, “Kai oen buh beel aka puei haih lawng ka sawah paipi a thleep ai. ²⁴ Thlaanghing Capa tah duek ai tila Caciim lawng a thui angla ahih tah duek ai, tede Thlaanghing Capa sawah paipi’ aka thleep thlaang ham tah khawmap! Te thlaang te cuun ohla awm kawinih ahih ham theen bet sui de!” a tina.

²⁵ Paipi thleepkung Judah lawng, “Saya, kai aw” tila a doet. Tevengah Jesuh lawng, “Na thui angla soeng,” a tina.

²⁶ Buh a caak u lii vengah Jesuh lawng takawi pheel at te a lawh tih a thangthui coengah takawi te a eh tih a hubang hue te a peek. “He tah ka pum ni; lo u langtah ca uh,” a tina.

²⁷ Tecoengah boengloeng te a lawh tih Pathen teng awmngaih ciil a thui coengah a hubang hue te a peek. “Nangmi boeih lawng aw uh,” a tina. ²⁸ “He tah ka thi ni. Pathen kah awlkhueh thaai acakna oen thlaang boeih kah thawlh khawdawp ngaaina hamla ka hok ka thisen ni. ²⁹ Atak tang kavan thui u: A Pa Ram ah nangmi oen haih misurtui a thaai awkk ham khawhin a pha thlantoe tahe kalawng misurtui he ka aw koep tlaih manawh,” a tina.

³⁰ Tecoengah laa raawl at a sak u tih Olif tlaang la luui u.

³¹ Tecoengah Jesuh lawng ahimi te, “Caciim lawngah, ‘Pathen lawng tuudoen te a ngawn vetih tuu boeih tah pathengg payaangla awm ai’ tila a thui angla, ‘N’tu yiin roe ah nangmi lawng kai he nan heng taak u vetih nan ceh taak u ai.’ ³² Tede duekna kalawng ka thawh koep coengah Galili la nangmi haiah ka cet ai,” a tina.

³³ Piter lawng, “Thlaangtloe boeih lawng nang te n’hoett sut tih ng’heng taak cakhaw kai lawngtah kan heng taak roe manawh,” tila Jesuh te a tina.

³⁴ Jesuh lawng Piter tengah “Atak tang kavan thui: n’tuu yiin ah aai a khaawk thlan vengah nang lawng kai he ka ming nawh’ tila voeithum toe na basa ai,” a tina.

³⁵ Piter lawng, “Nang oen duek haih ham toe awm mai cakhaw kan ming nawh tila ka thui roe manawh,” a tina. A hubang atloe hue lawngkhaw te tila a thui u van.

³⁶ Tecoengah Jesuh tah a hubang hue oen Ketsaman a ti u ahuen la cet u tih ahimi te, “Ke huen la ke ka cet silang ka thangthuina ruet ah he ah he anna ngawl uh!” a tina. ³⁷ Jesuh lawng Piter oen Zebedi capa rawi te a ceh puei. A kaw caalla the tih lakueng sut. ³⁸ Tecoengah ahimi nala “Ka kaw a the uett ah ka duek kaw la hut. He ah awm u lang n’hak puei’ u lah,” a tina.

³⁹ Jesuh lawng ahimi oen athla betna huen la cet, dilai ah buekuep tih “A Pa, acoengg thai atah he kah patang khangna boengloeng he van khoe mai hawn! Tede kai kah kawngaih angla awm boel selang nang kah kawngaih angla awm hawn seh,” tila thangthui.

⁴⁰ Tecoengah a hubang pathum tengla ava mel vengah ahimi a ih muelh u te a huh tih Piter tengah, “Metila nangmi pathum hue he khawnoek pakhat khui maikhaw na hak u thai nawh aw? ⁴¹ Suek-halhna na taa thaina ham hak u lang thangthui uh.Thinkaw lawngtah a ngaih de pumsa tah a tha yoek sut” a tina.

⁴² Jesuh tah cet koep tih “A Pa, he kah patang khangna boengloeng he awkk ohla khoe thai koeila a awm nawh atah, na kawngaih angla awm hawn seh,” tila thangthui. ⁴³ A hubang hue tengla Jesuh a mel koep vengah ahimi a ih muelh te a huh; a mik khaw daai u thai nawh.

⁴⁴ Jesuh lawng ahimi te a ceh taak tih apathumna ah a thangthui nooek angla thangthui koep. ⁴⁵ Tecoengah a hubang hue tengla mel koep tih “Na ip tih na duem u huen aw? Bueh u lah! Thlaanghing Capa tah thlaangthawlh thli kut ah peekna atue tah a pha poen. ⁴⁶ Tho uh, Cet u poen sih. Bueh lah, ka sawah paipi aka thleep thlaang te avan pha poen he,” a tina.

⁴⁷ Jesuh lawng awl a thui pe vengah te a hubang paha thlaihih tim ah aka thuum van Judas te avan pha. Ahih lawngah khawsoeih ahaamca hue oen Judah ahaamca hue lawng a tuih u thlaangping, samsen oen boelhoen aka pawm thli te avan law puei. ⁴⁸ Paipi thleepkung lawng thlaangping tengah miknoekna te a thui pe oepsoeh tih, “Kai lawng ka mok thlaang te nangmi lawng tuuk ham na ngaih thlaang te ni, ahih te tu uh,” a tina.

⁴⁹ Judas lawng a paipuek ah Jesuh tengla cet pahoei tih “Saya, na sawah ngaimawngna awm seh,” a tina tih a mok.

⁵⁰ Jesuh lawng, “Ka puei, na sai ham koei te aloela sai hawn,” a tina. Tecoengah ahimi lawng Jesuh te a tuuk tih a khih u. ⁵¹ Jesuh oen aka awm haih thlaang pakhat lawng a samsen te tiingim dawngkah a suh tih Khawsoeih Bawi kah a tamnaa haa te pat a tloek. ⁵² Jesuh lawng, “Na samsen te tiingim khuila sang koep. Samsen aka hawna tah samsen oen duek van ai. ⁵³ Kai lawng a Pa tengah bawmna ka bih kawinih raalkapbu paha thlaihih lak ah yahawh ngaai vanthlaang te ka tengla avan tuih pahoei ai ti he na ming nawh aw? ⁵⁴ Tede te tila awm kawinih, he ang thaihu a awm ham Caciim lawng a thui te metila a soep thai ai?” a tina.

⁵⁵ Tecoengah Jesuh lawng thlaangping hue te, “Nangmi lawng kai he thlaanghuuen angla tuuk ham pawmcunghaiha, samsen oen boelhoen na pawm u tih na law u? Khawhin roekk Tempal bok-im ah ka ngawl tih kan cang puei u vengah a-u lawngkhaw nan tu u nawh. ⁵⁶ Tede he tila thaihu boeih a awm he tah tawngha hue lawng Caciim dawngah a thut te asoepna ham ni,” a tina u. Tevengah a hubang boeih lawng Jesuh te a ceh taak tih a heeng taak u.

⁵⁷ Jesuh aka tu thlaangping lawng Jesuh te Khawsoeih Bawi Kaiafas im la a ceh puei u. Te huen ah Phungawl cangpueikung hue oen Judah ahaamca boeih tun u. ⁵⁸ Piter lawngah a thla bet ngai kalawng Khawsoeih Bawi kah a talawng vawng-up khui toela Jesuh te a hu yut tih a vai. Metila nuem a sai u lah ve tite ming ham a ngaih dawngah ahih lawng talawng vawng-up khuila kuun tih raaltoeng thli oen haih ngawl. ⁵⁹ Khawsoeih ahaamca hue oen Khonsil ah aka thuum boeih lawng Jesuh te ngawn thai ham a thawlhna a tlap pe u; ⁶⁰ tede a thawlhna pakhat khaw hu u nawh. Hoem awl oen thawlh aka peel tah awm moen mai de a thawlhna tehca khaw hu thai nawh. Ahukhueng atah thlaang pahih law hih tih. ⁶¹ “He thlaang lawng ‘Pathen kah Tempal bok-im te ka phe vetih hin thum ah ka sak koep ai,’ ti” tila a thui hih.

⁶² Khawsoeih Bawi lawng pai hang tih, “He rawi lawng thawlh n’peel he na oelh ham koei awm nawh aw?” tila Jesuh te a doet. ⁶³ Tede Jesuh lawng n’tu khaw thui nawh. Khawsoeih Bawi lawng pai koep tih, “Aka hing Pathen miing ka phoei tih kan doet: Nang he Pathen Capa Messiah tang aw thui lah?” a tina.

⁶⁴ Jesuh lawng, “Na thui angla soeng! Tede nangmi boeih tengah kavan thui u; tahe kalawng Thlaanghing Capa tah Thara koek bantang ben ah ngawl vetih vaan kah muui dawngah a rum thuk te na huh u ai,” a tina.

⁶⁵ Tevengah Khawsoeih Bawi lawng a himbai te a pheuh tih, “Pathen thekhana poen ni! Atloe sausi ngoe tlaih nawh. Pathen thekhana awl na yaak u boeih poen! ⁶⁶ Metila na poek u?” tila a doet. Ahimi lawng, “A thawlh dawngah duek ham awm,” ti u.

⁶⁷ Tecoengah ahimi lawng Jesuh te a mik-hai ah a tumthoeih u tih a bawh u; a bel u. Tecoengah aka bel hue lawng, ⁶⁸ “Messiah! Nang a-u lawng m’bel; van thui lah,” a tina u.

⁶⁹ Piter lawng talawng adauben vawng-up khuiah a ngawlh vengah Khawsoeih Bawi im kah tuihyoeihnu pakhat a tengla law tih, “Nang khaw Galili thlaang Jesuh oen aka awm haih van ni,” a tina.

⁷⁰ Tede Piter lawng ahimi boeih haiah basa tih, “N’tu kawng nuem na thui, ka ming moenih,” a tina. ⁷¹ Tecoengah Piter tah talawng thawhka ben la te cet. Atloe tuihyoeihnu pakhat lawng a huh tih te kah thlaang thli tengah, “He thlaang he Nazaret khaaw kah Jesuh oen aka awm haih thlaang ni,” a tina u.

⁷² Piter lawng basa koep tih, “Awl ka taap, te thlaang te ka ming nawh,” a tina.

⁷³ Raih a awm coengah te huen kah aka pai thlaang hue lawng Piter tengla law u tih “Nang khaw ahimi timkah thlaang van ni, na awlcal thingkaa dawngah ming u poen,” a tina u.

⁷⁴ Tecoengah Piter lawng “Awl ka taap tih awltak ka thui. Ka thui awl he a soeng nawh atah Pathen lawng dan m’pe seh! Te thlaang te ka ming roeroe nawh,” a tina. Te tila a thui coeng khoeng atah aai khawk pahoei. ⁷⁵ Jesuh lawng, “Aai a khawk thlan vengah voeithum toe kan ming nawh nan tina ai,” a tina awl te Peter lawng a poek lot vengah adaubenla te cet, a kawsi la dung tih rap.

¹ Mincanghi atah Khawsoeih ahaamca hue oen Judah ahaamca hue boeih lawng Jesuh te ngawn ham khaw a khan u. ² Ahih te thiirui oen a khih coengah a ceh puei u tih Rom ram ukbawi Pilat kut ah a peek u.

³ Paipi thleepkung Judas lawngah, Jesuh te ngawn hamla khaw a khan u te a yaak vengah yut tih tangka sawmthum te Khawsoeih ahaamca hue oen Judah ahaamca hue tengah a baal koep. ⁴ “Ka thawlh tangkiik, thawlhna aka khueh nawh te duek sak hamla a sawah paipi ka thleep hau poen,” a tina. Ahimi lawng, “Kaimi lawng n’tu ka tina ai? Namah ngaih poen ni,” a tina u.

⁵ Judas lawng tangka sawmthum te Tempal bok-im khuiah a voeih sut tih cet, te coengah kaiawk tih duek.

⁶ Khawsoeih ahaamca hue lawng tangka te a ruh u tih, “He kah tangka he thisen phu tangka la a awm dawngah Tempal bok-im kah tangkakong khuiah khueh ham mami kah Phungawl lawng ngaih nawh,” ti u. ⁷ Te kah tangka kawng te a thui u tih kawtlaakna a khueh coeng atah thlaangphun tloe kah phuel la khueh ham ah Ambawpkung kah Lohuen te laina ham tangka te a hawna u. ⁸ Tedawngah te lohuen te, “Thisen huen” tila tihin toe ah a thui u.

⁹ Te tila tawngha Jeremiah lawng a thuisut awl te soep poen. Tawngha Jeremiah lawng, “Israel thlaang thli lawng ahih kah phu ting la kawtlaakna oen aphu a kheh u tangka sawmthum te ahimi lawng a lawh u tih, Bawipa lawng awl n’peek angla, ¹⁰ Ambawpkung kah lohuen te laina ham tangka te a hawna u,” tila a thui te ni.

¹¹ Rom ram ukbawi haiah Jesuh a pai vengah ram ukbawi lawng, “nang he Judah sengpahrang tang aw?” tila a doet. Jesuh lawng, “Na thui angla ka awm,” a tina. ¹² Tede Khawsoeih ahaamca hue oen Judah ahaamca hue lawng thawlh a peel u te Jesuh lawng khat khaw thung pe nawh.

¹³ Tedawngah Pilat lawng, “Nang he ahimi lawng thawlh he yoeh m’peel u he na ya nawh aw?” tila a doet.

¹⁴ Tede Jesuh lawng kaam at khaw a thung pe nawh dawngah ram ukbawi tah a kawpoek rai tangkiik.

¹⁵ Rom ram ukbawi lawng Kaantaak Poei veng roekk ah rangpui lawng loeih sak ham a ngaih thongtla pakhat te a thlah pe. ¹⁶ Tevengah a thaang aka the soeh thlaangthe Jesuh Barabbas aka miingna thongtla pakhat awm. ¹⁷ Thlaang rangpui a tun soep vengah Pilat lawng, “A-u thlah sak ham na ngaih u? Jesuh Barabbas aw, tih nawh atah Messiah a ti u Jesuh aw?” tila a doet. ¹⁸ Ahimi lawng Jesuh he a uett u dawngah aana aka khueh Judah hue lawng ka kut ah avan pha sak u tite ahih lawng atheenla a ming.

¹⁹ Awlcekna yung ah Pilat a ngawlh vengah a yu lawng, “Thawlhna aka khueh nawh te kah thlaangdoeng sawah n’tu khaw sai boel. Ahih kawngah tiyiin ka mang ah ka patang tangkiik,” tila awl a tah.

²⁰ Khawsoeih ahaamca hue oen Judah ahaamca hue lawng Barabbas te thlah tih Jesuh te ngawn hamla Pilat tengah bih ham ah rangpui te a ceemtuh. ²¹ Pilat lawng “He rawi pahih khuiah a-u thlah sak ham na ngaih u?” tila rangpui te a doet. Ahimi lawngah, “Barabbas” ti u.

²² Pilat lawng ahimi te, “Te atah Messiah a ti u Jesuh he metila ka sai ai?” tila a doet. Ahimi boeih lawng, “Thinglam dawngah ngawn” a tina u.

²³ Tede Pilat lawng, “N’tu thawlhna a sai?” tila a doet koep u. Tevengah te thli lawng, “Thinglam dawngah ngawn!” tila angaihhlangla paang u.

²⁴ Pilat lawng he tila awl doett khiing he coeng thai manawh, cumplaam la tho tih so tare poen ai tite a huh vengah tui a lawh tih rangpui haiah a kut te a silh. “He thlaangdoeng kah duekna kawngah kai ka thuum nawh! Namami kah sai ni!” a tina.

²⁵ Tevengah rangpui lawngah, “Ahih kah duekna kawngah dantatna tah kamami oen ka cadil thli sawah tla hawn seh,” ti u.

²⁶ Tecoengah Pilat lawng ahimi ham Barabbas te a thlah pe tih; Jesuh te cungpoelh oen a bawh sak u tih thinglam dawngah ngawn ham ahimi kut ah a peek.

²⁷ Tecoengah Pilat kah raalkap hue lawng Jesuh te ram ukbawi kah impui la a khuen u tih raalkap bu khat lawng a voel khoep. ²⁸ Ahimi lawng a himbai te a pit pe u tih himbai ling a bai sak u. ²⁹ Tecoengah thliing lumuek te a muek sak u, a bantang kut ah cawnghol a pawm sak u; tecoengah a haiah buekuep u tih a the akhana u, “Judah sengpahrang na hinglung vaang seh,” tila a the akhana u. ³⁰ Ahimi lawng Jesuh te a tumthoeih u, cawnghol te a lawh pe u tih a luu ah a bawh u. ³¹ He tila a thena u coengah himbai ling te a pit pe tih amah kah himbai te a bai sak koep tih thinglam dawngah ngawn ham a ceh puei u.

³² Te tila a ceh u vengah Sairin khaaw kah Simon te a huh u tih raalkap hue lawng amangkhakla Jesuh kah thinglam te a kawh sak u. ³³ Golgota a ti u huen te a pha u. Golgota ti he tah, “Luuruh Huen,” ti ngaihna ni. ³⁴ Te huen ah Jesuh te misurtui oen tuikha a pawlh te a tuul u. Jesuh lawng a teng doek tih aw nawh.

³⁵ Jesuh te thinglam dawngah a tai u, tecoengah talcung a suh u tih a hinaak himbai te rek ra u. ³⁶ Tecoengah ngawl u tih Jesuh te a toet u. ³⁷ Thawlh a peel te a thut u tih a luu sawah a tai pe u. “He tah Judah Sengpahrang Jesuh ni,” tila a thut pe u. ³⁸ Tevengah thlaanghuen pahih khaw Jesuh oen haih bantang ben ah pakhat, banvoei ben ah pakhat thinglam dawngah a tai u.

³⁹ Te kah aka cet paitai thli lawng a luu halh a voeih u tih a tamdeng kawkhahna u. ⁴⁰ Tempal bok-im te aka phe tih hin thum ah aka sa koep ham koei! Pathen Capa la na awm atah namah oen namah thlawn u lah saw! Thinglam dawng kalawng rum thuk lah!” a tina u.

⁴¹ Tetih van angla khawsoeih ahaamca hue oen Phungawl cangpueikung hue oen ah Judah ahaamca hue lawngkhaw a tamdeng u van tih, ⁴² “Ahih lawng thlaangtloe tah a thlawn thai de, amah oen amah tah thlawn u thai nawh! Israel sengpahrang la awm nawh aw? Tahe roe ah thinglam dawng kalawng a rum atah mami lawng ahih he n’tangna ai ta! ⁴³ Pathen a uepna tih Pathen Capa la ka awm ti, Pathen lawng tahe ah a thlawn ai aw bueh u lah sih!” ti u.

⁴⁴ Jesuh oen thinglam dawngah a tai haih thlaanghuen rawi lawng pateng khaw ahimi angla a tamdeng hih van.

⁴⁵ Hingthun ah ram pum boeih te yiinna lawng a thiing khoep tih khawnoek pathum khui yiin khoep. ⁴⁶ Khawvaang ben khawnoek pathum yun atah Jesuh lawng, “Eli, Eli, Lama sabaktani?” tila angaihhlangla paang. A thuingaihna tah, “Ka Pathen, Ka Pathen, n’tu ah kai nan hoett sut?” ti ngaihna ni.

⁴⁷ Te huen kah aka pai thlaang khatsut lawng a yaak u vengah, “Ahih lawng Elijah ni a khue,” ti u. ⁴⁸ Ahimi tim kah thlaang pakhat lawng thlat cet tih himbaipeen te a lawh, misurtui ah a nuem tih cungkui dawngah a piin tih Jesuh te awkk sak ham kamthlah.

⁴⁹ Tede atloe hue lawng, “Awm de lah! ahih thlawn hamla Elijah law ai nuem, bueh de lah sih,” ti u.

⁵⁰ Jesuh lawng angaihhlangla paang, tecoengah a mal pat yip.

⁵¹ Tevengah Tempal bok-im khuikah himbaiyan te asaw kalawng adang toe pahih la poet pheuh u. Dilai hinghuen tih lungnu thli boeih rek. ⁵² Thlann thawhka boeih awng u tih aka duek tangte Pathen thlaang thli boehoeng mai te tho u. ⁵³ Phuel te a ceh taak u tih duekna kalawng Jesuh a thawh koep coengah Aciim Khawpui khuila kuun u tih thlaang broe haiah tueng u.

⁵⁴ Raalbawi oen Jesuh aka toet raalkap hue lawng likluei hinghuen tih atloe thaihu thli te tila a awm te a huh u vengah lakueng rih oen thuen u tih, “Ahih he Pathen Capa tang tang ni” ti u.

⁵⁵ Galili kalawng Jesuh hu ah aka bang tih amah te aka bawmcem hutaa broe nawh te ah te awm u tih ahih te athla kalawng a toet tih a dan u. ⁵⁶ Ahimi tim-ah Meri Makdalin, Jeem oen Josep manu Meri oen Zebedi yu khaw awm u.

⁵⁷ Thlemben apha atah Arimatia khaaw kah kuirang pakhat Josep aka miingna te avan pha. Ahih khaw Jesuh kah a hubang pakhat la awm van. ⁵⁸ Ahih lawng Pilat tengla cet tih Jesuh kah a rawkk te a bih. Jesuh kah a rawkk te Josep kut ah peek ham Pilat lawng awl a peek. ⁵⁹ Josep lawng Jesuh rawkk te a lawh tih himbai bawk athaithik oen a yaawl tih, ⁶⁰ amah ham lungkaw a thuk heet thlann thaai ah te a up. Tecoengah lungto bo hlang oen thlann thawhka te a khaih tih a ceh taak. ⁶¹ Meri Makdalin oen atloe Meri mi khaw te ah te thlaan ben la mang tih ngawl u.

⁶² Avuen Sabbath hin ah khawsoeih ahaamca hue oen Farasi thlaang thli tah Pilat oen huh u tih, ⁶³ “Bawipa hoem thui thlaang ahih lawng te a hing vengah, ‘Kai tah duekna kalawng ka tho koep ai’ tila a thui te ka ming u. ⁶⁴ Tedawngah athum hin toe thlann te atheenla a khaih tih a toet u ham awl van pe lah, te nawh kawinih a hubang hue lawng cet u vetih a rawkk te a huuen u coengah ahih tah duekna kalawng tho koep poen tila thlaang tengah a thui u ai. Hukhueng kah thailatna he acuek kah thailatna lak ah the-eep ngaai ai,” tila a thui pe u.

⁶⁵ Pilat lawng “Raalkap bu khat aka toet la na khueh u te ta: cet u langtah thlann te a toet thai khui anepla toet sak uh,” a tina.

⁶⁶ Tecoeng atah ahimi lawng cet u tih thlann khaihna lungto dawngah miknoekna a khueh u tih thlann te anepla a toet sak.

¹ Sabbath hin boeih tih yarh khat khuikah lamhacuek khawhin khawthaih tawm ah Meri Makdalin oen atloe Meri te thlann bueh hamla cet. ² Tevengah te bawtbet khawlai ah likluei tho tih angaihhlangla hinghuen. Bawipa kah vanthlaang pakhat te vaan kalawng va rum tih thlann khaihna lungto te a thoeih tih a sawah ngawl. ³ Ahih kah a muei asam tah khawpha angla awm tih a himbai tah rawsawng angla bawk. ⁴ Thlann aka toet raalkap thli let u tih a rih u dawngah thuen u tih thlaang duek angla awm u.

⁵ Vanthlaang lawng hutaa rawi nala “Rih boel; thinglam dawngah a ngawn u Jesuh te na tlap te ka ming. ⁶ Ahih tah he ah awm tlaih nawh; a thui angla tho poen. Law langtah a ralhna huen te bueh lah. ⁷ Tahe ah aloela cet langtah a hubang hue tengah, ‘Ahih tah duekna kalawng tho koep poen; nangmi haiah Galili la cet vetih te ah ahih te na huh u ai!” tila thui pe uh. Kavan thui he hilh boel,” a tina.

⁸ Hutaa rawi lawng a rih hih de awmngaihna oen phuel kalawng ah aloela cet tih a hubang hue tengah thui pe ham heeng.

⁹ Tevengah Jesuh te ahih rawi tengah law parak tih “Nanghih sawah ngaimawngna awm hawn seh.” a tina. Ahih rawi lawng a tengla cet, a khow ah a phoeih tih a bok. ¹⁰ Jesuh lawng ahih rawi nala te “Rih boel, cet langtah ka maya manau thli te Galili la ceh ham thui pe hih, te ah te ahimi lawng kai he n’huh u ai” a tina.

¹¹ Hutaa hue Phuel kalawng a meel u vengah, thlann toet raalkap khatsut lawng khawpui khuila cet u tih khawsoeih ahaamca hue tengah thlann kah a huh boeih te a thui pe u. ¹² Khawsoeih ahaamca hue lawng Judah ahaamca hue oen huh tun u tih khaw a poek u; ahimi lawng raalkap thli te tangka yahawh a peek u tih, ¹³ “A hubang hue khawyiin ah law u tih kaimi ka ihna ruet ah a rawkk te a huuen u tila thui uh. ¹⁴ He kawng he ram ukbawi lawng a yaak atah kaimi lawng ka thloep u vetih nangmi te he kawngah lakueng ham awm manawh,” a tina u.

¹⁵ Thlanntoet raalkap hue lawng tangka te a lawh u tih ahimi lawng a uen angla a thui u. Raalkap hue kah a thui awl te tahe toe Judah hue lawng a thui khuep u.

¹⁶ A hubang paha thlaikhat hue tah Galili ram la cet u tih Jesuh lawng a thui pe tlaang la te luui u. ¹⁷ Ahimi lawng Jesuh te a huh u vengah a bok u, tede ahimi timkah khatsut lawngtah tangna u nawh. ¹⁸ Jesuh lawng ahimi tengla cet phai tih. “Dilai oen vaan kah saithaina aana boeih kai m’peek poen. ¹⁹ Tedawngah dilai dawngkah thlaangphun boeih tengah cet u langtah ahimi te ka hubang la van coeng sak uh; Pa, Capa, Ciim Muithla miing ah baptisma pe uh. ²⁰ Kai lawng awl kan peek boeih te a vaina u ham cang puei uh. Dilai tue aboettoe nangmi oen haih ka awm poe ai,” a tina.