LUKA

LUKA

¹ Hinyah koei Tiofilas:

² He thaihu thli he acuekca veng kalawng aka hu tih awlthang aka phawng thli lawng mami tengah avan thui te ahimi lawng a thut u. ³ Tedawngah kai lawngkhaw he thaihu boeih he akungcuek kalawng ah acek aneh la ka rui ka hiim coengah Tongmang nang tengah ca thut ham theen ai tila ka poek. ⁴ Nang tengah avan thui u tangte soeprep boeih kawng te ataktang ni tila na mingna hamla kavan thut.

⁵ Judia ram ah Herod he sengpahrang la a awm vengah Abijah khawsoeih bu ah Zekhariah aka miingna khawsoeih pakhat awm. A yu tah Elizabet a miingna, ahih khaw khawsoeih imkhuikaw ah aka thuum van ni. ⁶ Ahih rawi tah Pathen mik huh ah thlaangdoeng la bok awm hih tih Bawipa kah phungawl oen awlpeek boeih te asoepcala a vai hih. ⁷ Elizabet tah a ca yaa tih ca-anau khueh hih nawh, ahih rawi tah patawng aih hih poen.

⁸ Hin at atah Zekhariah he khawhin roekk ah bii a sai ham koei te sai hamla atue a pha van tih Tempal bok-im khuiah khawsoeih biibi a sai koei te a sai. ⁹ Khawsoeih boeih lawng a vai u phung alam van angla bokna-thaang dawngah riimtuui huihthlut ham talcung a suh u tih a hih te a tuek u. Tedawngah Bawipa kah Tempal bok-im khuila te cet, ¹⁰ Tevengah riimtuui huihthlutna atue la awm tih rangpui thlaangping tah adauben ah thangthui u. ¹¹ Bawipa kah vanthlaang pakhat ahih tengah phumpho tih rimtuui huihthlutna bokna-thaang bantang ben ah te pai. ¹² Zekhariah lawng ahih te a huh vengah let uekcuek tih a rih. ¹³ Tede vanthlaang lawngah ahih nala te, “Zekhariah, rih boel! Nang kah thangthuina te Pathen lawng a yaak tih na yu Elizabet lawng na ca tawngpa avan cuun ai. Nang lawngah Johan tila miing na sak ai. ¹⁴ Ahih te a awm veng atah na kaw hoe tangkiik ai, thlaangtloe hue khaw awmngaih tangkiik u ai! ¹⁵ Ahih tah Bawipa mik huh ah aka lenduet la awm ai. Ahih lawngtah misurtui oen yuu khaw aw roe manawh. Ahih tah a thang pek kalawng Ciim Muithla oen be poen ai. ¹⁶ Ahih lawng Israel thlaangphun yahawh hlang te amami kah Bawipa Pathen tengla a mel puei koep ai. ¹⁷ Ahih tah Bawipa kah puencawn la awm vetih tawngha Elijah angla a tha awm vetih a tha ra ai. Ahih lawng ana pa oen ca-anau thli te koep a roep u sak ai; Ahih lawngah awl aka ngaai nawh thlaang thli te thlaangdoeng thli kah poekna lawngpui la te a mawt koep ai; Ahih lawngtah Bawipa kah thlaang thli te Bawipa amah ham oepsoeh la arueng aphong sak ai,” tila a thui pe. ¹⁸ Zekhariah lawng vanthlaang nala te, “Te tila awm tangtang ai tite metila ka ming ai? Kai tah ka patawng poen tih ka yu khaw hutawng van poen” a tina. ¹⁹ Vanthlaang lawngah, “Kai he Gabriel ni, he awlthang theen he nang tengah thui pe ham tuihkung Pathen haiah ka pai. ²⁰ Tede nang lawng ka awl he na tangna nawh, atue akhoek vengah atakla thoeng ai. Nang lawng na tangna nawh dawngah awl na cal thai manawh; ka awlkam he atakla na tengah a thoeng thlantoe awlmueh la na awm ai.” a tina. ²¹ Teveng khui puet ah te thlaangping lawng Zekhariah te a ring u tih n’tu ah ahih he Tempal bok-im khuiah atue san hlang adiw aih oh kai ti tih a kawpoek rai u. ²² A law veng atah ahimi tengah awl thui thai nawh, tedawngah Tempal bok-im khuiah huhthlaam a huh tila ahimi lawng a ming u. Awl kam at khaw thui thai nawh, ahimi tengah te a kut oen ah miknoekna te a sai pe. ²³ Tempal bok-im khuiah biibina atue te a boeih coeng atah Zekhariah te im la koep meel. ²⁴ Tecoeng adiw raih coeng atah a yu Elizabet te vawn tih thla ngaa khui im khuiah awm roep. ²⁵ Ahih lawng, “Tahe aboetna ah kai he Bawipa lawng n’bawm poen, thlaang rangpui haiah yaraula ka awm te avan lawh poen,” tila a thui.

²⁶ Elizabet te tattloella a awmna thla ruk vengah Pathen lawng vanthlaang Gabriel te Galili ram kah khawpui Nazaret la te a tuih. ²⁷ Sengpahrang Devid cadil la aka awm Josep aka miingna thlaang pakhat lawngah yuna hamla awl a khueh hulaa tengah awl thui pe ham a tuih. Te hulaa tah Meri a miingna. ²⁸ Vanthlaang lawng a tengla law tih, “Na tengah ngaimawngna awm seh! Bawipa tah na tengah awm tih yotheen kam-awmna yahawh hlang la m’peek!” a tina. ²⁹ Vanthlaang kah awlthui dawngah Meri tah a ngaai hang tih ahih kah awl he n’tu a thui ngaihna kai tila a kawpoek rai. ³⁰ Vanthlaang lawng, “Meri! Rih boel; Nang tah mik-hai theenna Pathen lawng m’peek poen. ³¹ Nang tah na vawn ai, capa pakhat na cuun vetih a miing tah Jesuh tila na sak ai. ³² Ahih tah bawilen vetih Tloeng Khoelh Pathen Capa ti u ai. Bawipa Pathen lawngah ahih te patuer Devid angla te sengpahrang la a khueh ai, ³³ ahih tah Jakob cadil thli kah dungyan sengpahrang la awm ai; ahih kah ram tah meveng khaw boet manawh!” a tina. ³⁴ Meri lawng vanthlaang nala te, “Kai tah hulaa cuem la ka awm. Metila he he acoengg thai ai? a tina. ³⁵ Vanthlaang lawng, “Ciim Muithla te na tengla law vetih Pathen kah huham tharana tah na sawah awm ai. Tedawngah aciim camaw te Pathen Capa ti u ai. ³⁶ Namah kah cakaw Elizabet te poek lah. Ahih lawngah ca ka cuun tlaih manawh tila a thui, ahih tah hutawng poen de tahe ah tattloella a awmna thla ruk awm poen. ³⁷ Metihtiah Pathen lawng a sai thai nawh khat khaw awm nawh.

³⁸ Meri lawngah, “Kai he Bawipa kah salnu ni; na thui angla ka sawah awm seh.” a tina. Tecoengah vanthlaang lawng Meri te a ceh taak.

³⁹ Tecoeng adiw thlan ah Meri tah kamthlah tih Judia ram tlaang ah aka awm khawpui pakhat la te cet. ⁴⁰ Meri lawng Zekhariah im la cet tih Elizabet te a toei. ⁴¹ Elizabet lawng Meri kah toeina awl te a yaak vengah a bung khuikah camoe te tat. Elizabet tah Ciim Muithla oen be tih, ⁴² Ahih lawng angaihhlangla, “Nang tah hutaa boeih lak ah yo aka theen koek hutaa ni, na cuun ham koei na ca te khaw a yo theen phoeih!

⁴³ He ang aka lentloe thaihu he n’tu kawngah ka teng avan pha tih ka Bawipa kah a manu he ka tengla a yingyawi kai? ⁴⁴ Metihtiah nan toeina awl ka yaak pahoei oen ah ka bung khuikah camoe yawngdiik he awmngaihna oen tat. ⁴⁵ Bawipa kah awlthang te na tengah ataktangla thoeng ai tila na tangna dawngah na yo theen phoeih,” tila a thui.

⁴⁶ Meri lawngah, “Ka lungbui lawng Bawipa a koeh; ⁴⁷ ka hingna khaw thlawnkung Pathen tengah awmngaih, ⁴⁸ Metihtiah huhsit koek kai a salnu he amah lawng n’hilh nawh! Tahe kalawng tah cadil nauha thlaang boeih lawng yotheen aka dawng hutaa ni ti u poen ai, ⁴⁹ metihtiah Thara koek Pathen lawng kai hamla alentloe thaihu avan sai poen. Ahih kah miing tah ciim; ⁵⁰ Amah te aka hinyah thlaang boeih tengah cadil nauha khat coeng khat toe reenna te a tueng sak. ⁵¹ Ahih lawngah a thara baan te a thueng a thleng tih amami kah ahuep khawkhanna oen aka oekk u thlaang boeih te a thek a yak boeih. ⁵² Ahih lawngtah thara sengpahrang thli te amami kah ngawlhcoen dawng kalawng adangla a thlaak boeih tih thlaang la a toeh u nawh thli te a pawmsang. ⁵³ Buh mueh buhpawng thli te caak awkk atuui tuui oen bung a hah sak tih kuirang thlaanglen thli te kut pingpuei oen atliingla a meel sak. ⁵⁴ Ahih lawngtah mami kah patuer thli tengah awlkamna a sai te thlauh nawh tih amah kah tuihyoeihthlaang Israel thlaangphun te bawmcem hamla law poen. ⁵⁵ Ahih lawngah Abraham oen a cadil nauha boeih tengah dungyan toela reenna tueng sak ham te hilh nawh!” tila a thui. ⁵⁶ Meri tah Elizabet tengah thla thum yunyan awm tih tecoengah amah im la koep meel.

⁵⁷ Elizabet tah camoe awm ham atue atang khoek tih capa pakhat a cuun. ⁵⁸ Bawipa lawng ahih sawah kawpoek raina atheen tangkiik a sai te a imbe lovaai oen a cakaw thli lawng a yaak vengah boeih a awmngaih puei u. ⁵⁹ Camawca te hinreet a cuung atah yahhuivuen rett pe ham law u tih ana pa miing Zekhariah miingna seh ti u. ⁶⁰ Tede a manu lawngah, “Nawh ni! Johan miingna seh” a tina. ⁶¹ Ahimi lawngah Elizabet nala, “Tetih atah na cakaw khuiah he ang miing he a awm moenih ta! a tina u. ⁶² Tecoengah ahimi lawng, camoe he ana pa lawng a-u miingna seh a ti kai ti u tih kut oen miknoekna a sai pe u tih a doet u. ⁶³ Zekhariah lawng cathutna lungpeel a bih tih, “A miing tah Johan ni,” tila a thut. Ahimi boeih tah a kawpoek rai u. ⁶⁴ Teveng ruetca maiah Zekhariah tah cal thai koep tih Pathen te a thangpawm pahoei poen. ⁶⁵ Imbe lovaai boeih lawngtah lakueng u, he thaihu kawng awlthang he Judia ram tlaang ah aka awm, khaaw boeih ah te thaang khok. ⁶⁶ He kawng he aka ya tih aka poek thlaang boeih lawng doet u the tih, “He camaw he metila nuem a awm lah ve!” ti u. Metihtiah Bawipa kah huham tharana tah a sawah awm tite atheenla tueng.

⁶⁷ Johan kah ana pa Zekhariah tah Ciim Muithla oen be tih Pathen awl te a thui: ⁶⁸ “Israel Pathen Bawipa te koeh u lah sih!

⁶⁹ Ahih lawngah amah kah tuihyoeihthlaang Devid cadil tha aka ra Thlawnkung avan tuih poen. ⁷⁰ Ahih lawng suenyan veng kalawng amah kah aciim tawngha thli oen awl a kam poen, ⁷¹ ahih lawngtah mami he raal kut khui kalawng ah, mami aka thina thlaang boeih kah tharana huham dawng kalawng n’thlawn ai. ⁷² Ahih lawng mami kah patuer thli tengah reenna ka tueng sak vetih amah kah aciim awlkam te ka hilh manawh” ti. ⁷³ - ⁷⁴ Mami he raal kut khui kalawng loeih sak ham oen ah rihsakna awm ohla amah bii te bi hamla mami kah patuer Abraham tengah awltaap oen awl a kam, ⁷⁵ te tah mami lawng hing khuiah amah haiah ciim acaih tih adoengla awmna ham ni. ⁷⁶ Ka ca, nang tah a Tloeng Khoelh Pathen kah tawngha ni ti u ai.

⁷⁷ A thlaang thli nala te nangmi kah thawlhna te khawdawp avan ngai vetih thlawnna na dang u ai tila na thui pe ai. ⁷⁸ Mami kah Pathen tah thlaang reenkung oen thintlawhnakung la awm. Ahih lawngah thlawnna khawse theen te mami sawah avan aang sak vetih, ⁷⁹ duekna thlip yiinna khuiah aka awm thlaang boeih te vaan kalawng avan thue ai, ngaimawngna lawngpui ah mami he m’mawt ai” tila a thui. ⁸⁰ Camaw te pumtaksa oen muithla ben ah puer tih roeng hang. Israel thlaang thli tengah langyala a pho thlan vengah ramhum huhang ah te awm.

¹ Tevengah te Sengpahrang sangluel Awkastas lawng Rom ram pum ah thlaangmi soep hamla awl a peek. ² He kah lamhacuek thlaangmi soepna a sai vengah Kuirinias tah Siria ram ukkung bawi la awm. ³ Tedawngah thlaang boeih lawng thlaangmi soepna ah miing peek hamla amami awmna khawpui la te rip cet u. ⁴ Josep tah Galili ram Nazaret khawpui kalawng ah Devid sengpahrang a cuunna huen Judia ram Bethlehem khawpui la te cet. Josep tah Devid cadil la a awm dawngah tela te cet. ⁵ Josep lawng yuna ham amah thlaang kang Meri oen te cet hih. Meri tah tattloel la awm tih, ⁶ Bethlehem ah a awm hih vengah te camoe awm ham atue te a pha. ⁷ Meri lawng a capa camiing awmthang te a cuun, ahih te poehlaa oen a yaawl tih awkkhawng dawngah te a helh, ahih rawi pahna ham kamyin pahna-im ah ahuen awm nawh.

⁸ Te ram khui pengpang yun kah tuudoen khatsut tah ramhum ah reh u tih amami kah tuu thli te a doen u. ⁹ Bawipa kah vanthlaang pakhat te ahimi tengah tueng tih Bawipa kah ruep-awmna lawng ahimi te a thue. Ahimi lawng caalla a rih u; ¹⁰ tede vanthlaang lawngah ahimi nala te, “Rih u boel! Nangmi ham awlthang theen kavan khuen, te awlthang theen lawngah thlaang boeih tengah awmngaihna abo hlang avan khuen ai. ¹¹ Tihin ah Devid khawpui khuiah nangmi kah thlawnkung Khrih Bawipa tah thang poen! ¹² Nangmi lawng na noekna ham tah he tila awm ai: camaw te poehlaa oen a yaawl vetih vaitaw buh beel awkkhawng dawngah a helh te na huh ai,” a tina. ¹³ Kawlkalhca maiah vaan kah vanthlaang raalkap bu tah vanthlaang thli oen va pho u tih Pathen te laa sak oen a thangpawm u: ¹⁴ “Vaan asang koek ah Pathen thangpawm u hawn seh, a lungna thlaang thli a awmna dilai dawngah roepna awm hawn seh,” tila a thui u. ¹⁵ Vanthlaang thli ahimi teng kalawng vaan la a mel koep u veng atah tuudoen hue lawng amami pakhat oen khat te “Bethlehem la cet u silang tah Bawipa lawng mami tengah avan thui thaihu aka thoeng te bueh u sih.” ti u. ¹⁶ Tedawngah aloela cet u tih vaitaw awkkhawng dawngah a helh camawca oen ah Meri oen Josep te a huh u. ¹⁷ Tuudoen thli lawng camaw te a huh u coeng atah vanthlaang thli lawng camaw kawng a thui pe te thlaang thli tengah a thui patoeng u. ¹⁸ Tuudoen thli lawng a thui te aka ya boeih tah a kawpoek rai u. ¹⁹ Meri lawng he thaihu boeih he hilh nawh tih te kawng te adung hlangla a poek. ²⁰ Tuudoen thli lawng meel koep u tih a yaak boeih oen a huhna boeih dawngah te Pathen thangpawmna laa a sak u; ahimi tengah vanthlaang lawng a thui pe angla te thoeng tak tak.

²¹ Hinreet cuung tih camaw te yahhuivuen reet ham atue apha veng atah, Jesuh tila miing a sak u. Te tah a manu bung khuiah a suen thlan vengah vanthlaang lawng a sak sut poen ni.

²² Mosi kah awlpeek Phungawl angla Josep oen Meri lawng Ciim-acaihna te sai hamla atue te a pha. Tedawngah ahih rawi lawng camaw te Bawipa tengah nawn ham Jerusalem la te a ceh puei. ²³ Bawipa kah phungawl dawng: “Camiing tawngpaca boeih tah Bawipa tengah na nawn ai,” tila a thut. ²⁴ Bawipa kah phung awl lawng a kuek angla akhuu bawh at tinawh tah imvuelh akhuu puer pek pheek hih te luciik la thawthueng ham ahih rawi tah cet hih. ²⁵ Tevengah te Simeon aka miingna thlaang pakhat te Jerusalem ah awm. Ahih tah thlaangdoeng, Pathen aka rih thlaang la awm tih Israel thlaangphun thlawn la a awmna tue te a ring khuep. Ahih te ciim muithla lawng a awm puei tih, ²⁶ Bawipa kah awlkam Messiah te na huh thlan atah na duek manawh tila Ciim Muithla lawng a thui pe rapcaat. ²⁷ Ciim Muithla kah mawtna rang oen Simeon tah Tempal bok-im la cet. Phungawl lawng a kuek te sai hamla a manu oen ana pa lawng camaw Jesuh te Tempal bok-im la avan khuen vengah, ²⁸ Simeon lawng camaw te a kut oen a pawm tih Pathen tengah awmngaih awl a thui: ²⁹ “Bawipa, tahe ah na awlkam te na soep sak poen tih na salpa he ngaimawng ngaitoe la nan ceh sak poen ai. ³⁰ Nang kah thlawnna te ka mik oen ka huh poen, ³¹ te tah thlaang boeih haiah namah kah roekbah te ni: ³² Gental thlaangphun tengah na kawngaihna aka tueng sak aangna la awm tih na thlaangphun Israel thlaang thli tengah ruep-awmna avan khuenkung la awm.” tila a thui. ³³ Simeon lawng ahih kawng te tila a thui dawngah te a manu oen ana pa tah a kawpoek rai hih. ³⁴ Simeon lawng ahimi te a phueh asawm tih a manu Meri nala te, “He camaw tah Israel thlaangphun khuiah thlaang yahawh lawng a rawkna ham oen thlawnna hamla Pathen lawng a tuek poen ni. Ahih tah Pathen kah miknoek la awm tih thlaang lawngah athela a thui u ai, ³⁵ te tila a thui u dawngah amami kah ahuepla poekna boeih te tueng ai. Tecoengah samsen aka hatt angla na kawthena lawng na lungbui te avan thun ai.” a tina. ³⁶ - ³⁷ Asher phun, Fanu-el canu, Anna aka miingna huhainu tawngha pakhat awm. Ahih tah kumsarih bueng a vaa oen awm haih hih tih tahe tah a kum sawmreet kumlii awm poen. Ahih lawng Tempal bok-im he nawng aner taak nawh; Khawyiin khawthaih Pathen a bok, buh a yeh tih thangthui yoeyah. ³⁸ Ahih khaw tevengah te avan pha van tih Pathen tengah awmngaih awl a thui, Pathen lawng Jerusalem a loeih sak ai tila aka lamtoen thlaang boeih tengah camawca kawng te a thui pe.

³⁹ Josep oen Meri lawng, Bawipa kah phungawl lawng akuek boeih a sai coeng atah a awmna Galili ram Nazaret khawpui la te meel koep hih. ⁴⁰ Camaw te roeng hang tih a tha awm hang; cuihna oen be tih Pathen yotheenna te a sawah awm.

⁴¹ Kaantaak Poei bur hamla Jesuh a manu oen ana pa he kum roekk ah Jerusalem la cet hih. ⁴² Jesuh he a kum kumha thlaihih vengah a ceh nooek u angla Poei bur ham cet u. ⁴³ Poei a boeih coeng atah amah khaw la voei u, tede camaw Jesuh tah Jerusalem ah te awm. Te tila a awm te a manu oen ana pa lawng ming hih nawh; ⁴⁴ ahih rawi lawngtah aka voei haih thlaang thli oen cet haih cawini tila a poek, tedawngah hin at puet lawngpueng cet u, tecoeng atah a cakaw thli oen a paya thli tim ah te a tlap hih. ⁴⁵ Ahih rawi lawng a huh nawh dawngah Jerusalem la meel koep hih tih a tlap hih. ⁴⁶ Athum hin atah ahih te Tempal bok-im khuiah a huh hih. Ahih tah Judah thlaang thli cangpueikung thli oen ngawl haih u, ahih kah awlthui te a hutung u tih awl a doet u. ⁴⁷ Ahih lawng cuihna oen awl a thung pe te aka ya thlaang boeih tah a kawpoek rai u. ⁴⁸ A manu oen ana pa lawngkhaw a huh hih vengah a kawpoek rai hih van tih a manu lawngah, “Ka ca, n’tu ah kai hih he tila nan sai? Na pa oen kai lawngtah lakueng lalapla nang he kan tlap hih ta.” a tina. ⁴⁹ Jesuh lawng ana pa yuvaa te, “N’tu ham kai he nan tlap hih! Kai he a Pa im ah ka awm ti he na ming hih nawh aw?” a tina. ⁵⁰ Tede ahih kah awlthungna te ahimi lawng yaakming u nawh. ⁵¹ Tecoengah Jesuh tah ana pa yuvaa oen haih Nazaret la te meel koep u, te ah te poe awm tih a manu oen ana pa awl te a ngaai pe. A manu lawngah he thaihu boeih he a kaw khuiah a khueh. ⁵² Jesuh tah pumtaksa oen cuihna ben ah roeng hang tih Pathen oen thlaanghing haiah mik-hai theen a dang.

¹ Sengpahrang sangluel Teberias lawng a ram a ukna kum thlaingaa a law vengah te Pontias Pilat tah Judia ram ukkung la awm, Herod tah Galili ram ukkung la awm tih a manau Filip tah Ituria oen Trakhonitis ram ukkung la awm; Lisanias tah Abilen ram ukkung la awm tih, ² Annas oen Kaiafas tah khawsoeih bawi la awm hih. Tevengah ramhum huhang ah aka awm Zekhariah capa Johan tengah Pathen awl te a pha. ³ Tedawngah Johan tah Jordan tuiva tengvaai kah ram tawm boeih ah cet tih, “Na thawlhna yut u langtah baptisma dang u lah, te ah ni na thawlhna te Pathen lawng khawdawp avan ngaai ai,” tila a thui. ⁴ Tawngha Isaiah kah cabu dawngah a thut angla, “Thlaang pakhat ramhum huhang ah paang tih: ‘Bawipa ham lawngpui te oepsoeh la roekbah u lah; a cehna lawngpui te adoengla sai uh! ⁵ Longhoi boeih te et uh, khawcung rammawl boeih te avan at la sai uh, cehkel lawngken te adoengla sai u lang lawngthe lawnghu te hal thlaula sai uh: ⁶ Thlaangphun boeih lawng Pathen kah thlawnna te a huh ai! tila a thui.” a tina te soep. ⁷ Thlaangping lawngah baptisma dang ham Johan tengla te law u. Johan lawng ahimi nala te, “Nangmi ruul hue, aka law ham koei Pathen kah dantatna kalawng na loeih u thai ai tila a-u lawng avan thui u? ⁸ Na thawlhna na yut u te thaihu theen saina oen tueng sak uh. Abraham tah mami cuunkung patuer ni tila nangmi lawng thui u mailai tlaih boel. Pathen lawngah he lungto he a lawh vetih Abraham kah cadil la a sai thai ti he kavan thui u! ⁹ Thingkung boeih te ayung ah vung hamla haica te a toen oepsoeh poen; Athaih theen aka thaih nawh thingkung boeih te a vung vetih hai dawngah a phuum ai.” a tina. ¹⁰ Thlaangping lawngah, “Te tih atah kaimi lawng n’tu ka sai ai?” tila a doet u. ¹¹ Ahih lawngah, “Angki yung hih aka khueh lawngah aka khueh nawh thlaang te yung at ah pe seh, caak awkk aka khueh lawngah aka khueh nawh thlaang thli te pe thoem seh.” a tina. ¹² Mangmu cawikung thli khatsut tah baptisma dang ham law u tih, “Saya, kaimi ta n’tu ka sai u ai?” a tina u. ¹³ Ahimi nala te, “Mangmu te cawi ham tuueng lak ah apuehla cawi boel,” a tina. ¹⁴ Raalkap khatsut lawngah khaw, “Kaimi ta, n’tu ka sai u ai?” tila ahih te a doet u. Ahih lawngah, “A-u tengkah khaw tangka te rot boel, a-u khaw asoeng nawh la ngah ngah thawlh peel boel. Namami kah thapang oen na ngaai tluep sak uh.” a tina. ¹⁵ Thlaang yahawh lawng Messiah a ngaiuepna te pho koep tih Johan amah he Messiah poen kai aw ti u tih a kawpoek rai u. ¹⁶ Tedawngah Johan lawng ahimi nala te, “Kai lawngtah tui oen ah baptisma kan peek u, tede thlaang pakhat kai lak ah aka lenduet te law ai. Kai tah ahih kah khawmuek rui Pateng thlam pe hamla ka mueinai nawh. Ahih lawngtah nangmi te Ciim Muithla oen hai oen ah baptisma m’peek ai. ¹⁷ Ahih lawngah caang yahna raa te a pawm, Caangthaih boeih te a yah vetih caangtak te thaidi khuiah a khueh ai; tede caanghii te tah aka duek tlaih nawh hai dawngah a phuum ai.” a tina. ¹⁸ Johan lawng aphunphun la Awlthang Theen te thlaangping tengah a phawng tih a thawlhna te yut u hamla a thuituen. ¹⁹ Tede ukkung bawi Herod lawngah a manau yu Herodias te a rot tih a yuna dawngah khawseh, atloe athe thaihu broela a sai dawngah Johan lawng ahih te a siim. ²⁰ Tecoengah Herod lawng athe-eep ngaai thaihu te a sai. Johan te thong ah a thlaak.

²¹ Thlaangping lawng baptisma a dang u coeng atah, Jesuh khaw baptisma a dang van. A thangthui vengah te ahih ham vaan te awng u tih, ²² Ciim Muithla tah pumtaksa la akhuu angla te ahih sawah va law thuk. Tecoengah vaan kah awl lawng, “Nang tah kan lungna ka Capa ni. Na sawah ka ngaai tluep ti.” tila a thui.

²³ Jesuh lawng amah kah bii a tong vengah te a kum sawm thum yunyan law poen. thlaang thli lawngtah ahih he Josep capa tila a poek u. Josep tah Heli capa la awm. ²⁴ Heli tah Matthat capa, Matthat tah Levi capa, Levi tah Melkhi capa, Melkhi tah Jannai capa, Jannai tah Josep capa, ²⁵ Josep tah Mattathias capa, Mattathias tah Amos capa, Amos tah Nahum Capa, Nahum tah Esli capa, Esli tah Nakkai capa, ²⁶ Nakkai tah Maath capa, Maath tah Mattathias capa, Mattathias tah Semin capa, Semin tah Josek capa, Josek tah Joda capa, ²⁷ Joda tah Joanan capa; Joanan tah Resa capa; Resa tah Jerubbabel capa; Jerubbabel tah Shealtiel capa; Shealtiel tah Neri capa; ²⁸ Neri tah Melkhi capa; Melkhi tah Addi capa, Addi tah Kosam capa, Kosam tah Elmadam capa, Elmadam tah Er capa, ²⁹ Er tah Joshua capa, Joshua tah Elizer capa, Elizer tah Jorim capa, Jorim tah Matthat capa, Matthat tah Levi capa; ³⁰ Levi tah Simeon capa, Simeon tah Judah capa, Judah tah Josep capa, Josep tah Jonam capa, Jonam tah Eliakim capa, ³¹ Eliakim tah Melia capa, Melia tah Menna capa, Menna tah Mattatha capa, Mattatha tah Nathan capa, Nathan tah Devid capa, ³² Devid tah Jesi capa, Jesi tah Obed capa, Obed tah Boaz capa, Boaz tah Salmon capa, Salmon tah Nashon capa, ³³ Nashon tah Amminadab capa, Amminadab tah Admin capa, Admin tah Arni capa, Arni tah Hezron capa, Hezron tah Perez capa, Perez tah Judah capa, ³⁴ Judah tah Jakob capa, Jakob tah Isak capa, Isak tah Abraham capa, Abraham tah Terah capa, Terah tah Nahor capa, ³⁵ Nahor tah Seruk capa, Seruk tah Riu capa, Riu tah Pelek capa, Pelek tah Eba capa, Eba tah Shelah capa, ³⁶ Shelah tah Kainan capa, Kainan tah Arpaksad capa, Arpaksad tah Shem capa, Shem tah Noah capa, Noah tah Lamek capa, ³⁷ Lamek tah Metuselah capa, Metuselah tah Enok capa, Enok tah Jared capa, Jared tah Mahalaleel capa, Mahalaleel tah Kenan capa, ³⁸ Kenan tah Enos capa, Enos tah Seth capa, Seth tah Adam capa, Adam tah Pathen Capa ni.

¹ Jesuh tah Ciim Muithla oen ah betoetla Jordan tuiva kalawng va meel, tecoengah Muithla lawng ramhum huhang la te a ceh puei, ² te ah te Raaibawi lawng khawhin sawmlii khui puet ah ahih te a suek ahalh. Teveng khui puet ah n’tu khaw ca nawh, tedawngah atloeih lam atah a bung pawng. ³ Raaibawi lawng ahih nala te, “Nang he Pathen Capa tangtang atah he lungto he takawi la a coenggna ham awl thlaw lah.” a tina. ⁴ Tede Jesuh lawngah, “Caciim lawngah, ‘Thlaanghing he buh bueng oen ah hing thai nawh?’ tila a thui” a tina. ⁵ Tecoengah Raaibawi lawng a ceh puei tih apabe atah dilai dawngkah ram boeih te a huh sak. ⁶ Raaibawi lawng, “Huham tharana boeih oen he kah bawi areng kuirangna boeih he nang kan pe ai, he ang thli boeih he ka kut dawngah peek la awm poen tih kai lawng ka tuek thlaang te ka peek thai. ⁷ Tedawngah nang lawng kai he nan bok atah he ang thli boeih he nang ham poen ni,” a tina. ⁸ Jesuh awng, “Caciim lawngah, “Bawipa na Pathen bueng te ni na bok vetih ahih bueng kah bii te ni na bi ai,’ tila a thui,” a tina. ⁹ Tecoengah Raaibawi lawng Jerusalem la te a ceh puei, Tempal bok-im kah imphu ah te a khueh tih, “Nang he Pathen Capa tang atah he kalawng ah sungpung thuk lah. ¹⁰ Metihtiah Caciim lawng, ‘Nang te khoemdoen hamla Pathen lawng amah kah vanthlaang thli te avan tuih ai,’ ti. ¹¹ ‘Na khow Pateng khaw lungto dawng na khuek nawh ham ahimi lawng a kut oen te m’pawm ai,’ tila a thui.” a tina. ¹² Tede Jesuh lawng, “Caciim lawngah, ‘Bawipa na Pathen te noekdak boel’ tila a thui,” a tina. ¹³ Jesuh te Raaibawi lawng soeprepla a suek a halh coeng atah kawlkalh tah a nawng taak.

¹⁴ Tecoengah Jesuh tah Galili la meel tih Ciim Muithla kah huham tharana tah ahih sawah awm. Ahih kawng awlthang te te kah pengpang boeih ah thaang khonghak. ¹⁵ Ahih lawng sinakok ah a cang puei tih thlaang boeih lawng a koeh u.

¹⁶ Tecoengah Jesuh te amah apuer ayawngna Nazaret khawpui la cet tih Sabbath hin atah a ceh nooek angla Sinakok la te cet. Caciim te tae hamla ahih te pai hang, ¹⁷ tawngha Isaiah kah cayaawl te a peek u, ahih lawng cayaawl te a thlam tih he tila a thutna hue te a huh, ¹⁸ “Bawipa kah Muithla tah ka sawah awm, metihtiah khawdeng lungma thli tengah awlthang theen thui hamla ahih lawng kai he n’tuek poen. Sal la a khawh khaklal thlaang thli tengah loeihna te thui hamla, mikpum haiying thli a mik a tueng koepna ham; Heemtekna patang khang thlaang thli a loeihna ham, ¹⁹ Bawipa lawng a thlaang thli a thlawnna tue tah avan pha poen, tila phawng hamla kai he n’tuek poen,” tila a thut te a tae. ²⁰ Jesuh lawng cayaawl te a yaawl tih aka khoemkung kut ah te a peek koep tih ngawl. Sinakok khuikah thlaang boeih lawng mikkhah ohla ahih te ringg a bueh u, ²¹ ahimi nala te, “Caciim dawngkah ka tae awl te tihin ah soep poen.” a tina. ²² Ahih kah awl thui lawng ahimi boeih kah thinkaw khuek adeng tih ahih lawng awl theen kaa theen a thui te a kawpoek la rai u tangkiik. Ahimi lawngah, “Ahih he Josep capa nawh aw?” ti u. ²³ Ahimi nala te, “Tatuk awl dawngah, ‘Siibawipa, namah oen namah te tuui-ahaai u lah,” tila a thui awl te kamah he nan tina u lettat ai tite ka ming. Kapernaum khaaw ah na sai tila ka yak u thaihu te ang van te kamah khaaw ah he sai van lah,’ tila nan tina u ai. ²⁴ He he kavan thui u, “Tawngha he amah a awmna khaaw ah do u nooek nawh. ²⁵ Ka thui he hutung u lah; Elijah dung vengah kum thum coengah kum vangg ah khaw kaang tih ram pum ah khawthe khawkha vengah te Israel ram khuiah huhai tumtee broela awm tang tang. ²⁶ Elijah he Israel ram kah a-u huhai khat tengah khaw tuih nawh, tede Sidon ram kah Zarefat khaaw ah aka awm huhai teng bueng ah ni a tuih. ²⁷ Tawngha Elisha dung vengah te Israel ram kah thlaang yahawh tah lungkiit haibe natna a khueh u; ahimi timkah a-u khat khaw hoeih nawh de Siria ram kah Naaman pakhat bueng tah hoeih.” a tina. ²⁸ Sinakok ah aka awm thlaang thli lawng a yaak vengah a thin toek u. ²⁹ Ahimi lawngah tho u tih Jesuh te khawpui khui kalawng adaubenla a mawt u tih pu-ngaw pathleng ah tulh voek ham khawpui a phuengna tlaangpoer la te a khuen u, ³⁰ tede ahih tah thlaangping tim ah te yingyelh tih cet vik.

³¹ Tecoengah Jesuh tah Galili ram, Kapernaum la te cet, te ah te Sabbath hin ah thlaangping te a cang puei. ³² Ahih lawng saithaina aana oen a thui dawngah ahih kah cangpueina te ahimi boeih a kawpoek la rai u. ³³ Sinakok khuiah te raaithe lawng a kuun thil thlaang pakhat awm; ahih lawng angaihhlangla paang tih, ³⁴ “Aah! Nazaret Jesuh, kaimi he metila kan tina ai na ti? Kaimi he phe ham aw na law? Nang he a-u tite kan ming: nang tah Pathen kah aciim laipai ni!” a tina. ³⁵ Jesuh lawng raaithe nala te, “Awl muehla te kah thlaang kaw khui kalawng cet loeih!” tila awl a peek. Raaithe lawngah te kah thlaang te ahimi haiah te a tlim sak tih nganbawh peek muehla ahih kah a kaw khui kalawng cet. ³⁶ Thlaang boeih te a kawpoek la rai tih pakhat oen pakhat, “He awl he me ang awl kai? He thlaang lawngah ahu-aham oen raaithe thli awl a peek tih ahimi tah cet khonghak u mai!” ti u. ³⁷ Tecoeng atah te kah pengpang ram pum ah Jesuh kawng te thaang khonghak poen.

³⁸ Jesuh tah sinakok kalawng suntla tih Simon im la te cet. Simon kah a mase hutaa te tlo malcal tih ahih kawng te Jesuh tengah a thui pe u. ³⁹ Jesuh lawng cet tih ahih tengah te pai tih tlawh anatna kalawng hoeih loeih a tina. Tevengah a sanat te hoeih, tho pahoei tih ahimi te a do adan. ⁴⁰ Khaw a tlaak thuk coeng atah tlawh natna soeprep oen aka tlo thli te a paya thli lawngah Jesuh tengla avan law puei u; ahimi pakhat rip sawah te a kut a tloeng pe tih ahimi boeih te a hoeih sak. ⁴¹ Raaithe thli lawngkhaw thlaang yahawh hlang kah a kaw khui kalawng co u tih, “Nang tah Pathen Capa ni,” tila paang u. Raaithe thli lawng ahih te Messiah ni tila a ming u dawngah ahimi te awl cal nawh ham Jesuh lawng awl a peek.

⁴² Khaw athaih khoeng atah ading apuekna huen benla te khawpui khui kalawng ah cet. Thlaangping lawng ahih te a tlap u tih a huh u veng atah ahimi te ceh taak nawh hamla a thlawh u. ⁴³ Tede ahimi nala te, “Pathen kah Ram kawng Awlthang Theen he atloe khawpui ah khaw ka phawng ham awm, te tila aka thui ham ni Pathen lawng Kai he n’tuih.” a tina. ⁴⁴ Tedawngah ram pum kah sinakok bok-im ah te phung a thui.

¹ Hin at ah Jesuh tah Kenisaret Tuilii-keeng ah a pai vengah te thlaangping lawng Pathen awl hutung hamla ahih tengah te toklekla la law u. ² Tevengah tuikeeng ah lowng pahih a kiing u te a huh; tuihawi thli lawng lowng te a ceh taak u tih amami kah lok thli te a suk u. ³ Jesuh lawng Simon kah lowng khuiah te kuun tih tuikeeng kalawng tuilii benla lowng te a thoeih sak. Jesuh te lowng khuiah ngawl tih thlaangping te a cang puei. ⁴ Ahih lawng awl a thui coeng atah Simon nala te, “Tuilii dung benla lowng te tulh langtah na paya thli oen lok te voei u lah.” a tina. ⁵ Simon lawng, “Bawipa, khawyiin puet ah lok ka heeng khiing u poen de nga khat khaw ka tu u nawh. Tede nang awl ah ka heeng u de lah ai,” a tina. ⁶ Lok te a heeng u atah nga yahawh khuengdeng te a tuuk u tih lok te thok pawn tawm. ⁷ Tedawngah atloe lowng dawngah aka awm a paya thli te a kut oen a yavaih u tih law u lang m’bawm uh a tina. Ahimi te law u tih lowng pahih dawngah nga te abetoet la a sang u tih tui dawngah lowng te buekk dalh. ⁸ Simon Piter lawng tete a huh vengah Jesuh haiah khuklu oen cuengkueng tih, “Bawipa, Kai he thlaangthawlh ni, n’ceh taak mai hawn!” a tina. ⁹ Nga te yahawh khuengdeng a tuuk u dawngah Piter amah oen aka awm haih thli tah a kaw poek rai u. ¹⁰ Simon oen nga aka tu haih Zebedi ca rawi Jeem oen Johan a puei rawi te khaw a kawpoek rai hih van. Jesuh lawng, “Rih boel; tahe kalawng tah thlaang tukung la na awm ai.” a tina. ¹¹ Ahimi lawngah lowng te tuikeeng la a doek u coeng atah soeprep boeih te a ceh tak u tih Jesuh hu ah bang u.

¹² Vaikhat ah Jesuh tah haibe natna lawng a caak kawlsawp thlaang pakhat a awmna khaw ah te awm. Ahih lawng Jesuh te a huh vengah dilai dawngah buekuep tih reenna a bih, “Bawipa na kawngaih atah haibe natna he navan ciing sak thai!” a tina. ¹³ Jesuh lawng a kut a thueng tih ahih te a tek, “Ka ngaih ta, hoeih hawn loeih.” a tina. Kawlkalh ah te thlaang te haibe natna hoeih pahoei. ¹⁴ Jesuh lawng ahih nala te, “A-u tengah khaw thui boel, tede khawsoeih tengla cet phaat langtah ahih lawng nang he n’yutt n’yam seh; tecoengah na hoeih poen tite thlaang boeih lawng a mingna ham Mosi kah awlpeek angla luciik thawthuengna te sai.” a tina. ¹⁵ Tede Jesuh kawng te tah thaang tare tih rangpui thlaangping lawng ahih kah awl thui te yaak hamla law u tih ahimi kah tlawhnatna te a hoeih pe sak. ¹⁶ Tede ahih tah ading asuekna huen la te cet tih te ah te thangthui.

¹⁷ Hin at ah Jesuh lawng a cang puei u lii vengah te Galili oen Judah ram kah khawpui boeih oen Jerusalem kalawng aka law Farasi thlaang khatsut oen phungawl cangpueikung thli te ngawl u. Thlaangtlo hoeih sakna hamla Bawipa kah huham tharana tah Jesuh tengah awm. ¹⁸ Thlaang khatsut lawngah aka khawn thlaang pakhat te a himbai phaih dawngah avan kawh u, ahih te Jesuh haiah khueh pe ham im khuila khuen hamla te a yawm u. ¹⁹ Thlaang ayahawh aih dawngah im khuila khuen u thai nawh. Tedawngah ahih te imphu la a khuen u tih imphu te a bauh u, tecoengah thlaangping lakli Jesuh haiah thlaangtlo te himbai phaih dawngah a thlaak thuk u. ²⁰ He tih aih la ahimi lawng oengna a khueh u te Jesuh lawng a huh vengah aka khawn thlaang nala te, “Ka puei, na thawlhna boeih khawdawp ngaai la awm poen.” a tina. ²¹ Phungawl cangpueikung thli oen Farasi thlaang thli lawng, “Pathen thekhana awl aka thui he kah thlaang he a-u? Pathen pakhat bueng lawng ni thawlhna khawdawp a ngaai thai ta!” tila ahimi lawng a poek u. ²² Jesuh lawng ahimi kah poekna te thiim a ming tih ahimi nala te, “N’tu ah te ang thaihu te na poek u? ²³ ‘Na thawlhna boeih khawdawp ngaai la awm poen,’ tihnawhtah, ‘Tho lang cet loeih’ tila thui he aw aka yoei bet kai? ²⁴ Tedawngah Thlaanghing Capa lawng dilai dawng thawlh khawdawp ngaai thaina aana a khueh tite nangmi kan ming sak u ai.” a tina. Tedawngah aka khawn thlaang te, “Tho loeih, namah kah himbaiphaih he lo langtah namah im la cet loeih, kan tina he!” a tina. ²⁵ Te thlaang lawngah ahimi boeih haiah pai pahoei, a ralhna himbai phaih te a lawh koeloe, Pathen te a koeh tih im la te cet. ²⁶ Ahimi boeih tah a kawpoek rai u tangkiik! Ahimi lawng rih oen thuen ruila Pathen te a thangpawm u, “Tihin atah kawpoek rai tangkiik thaihu te mami lawng n’huh u poen,” tila a thui u.

²⁷ He coengah te cet tih mangmu cawikung Levi aka miingna amah kah yung im ah aka ngawl te a huh. Jesuh lawng ahih nala te, “Ka hu ah baang lah” a tina. ²⁸ Levi lawng tho tih soeprep boeih te a ceh taak tih a hu ah koe a vai. ²⁹ Tecoengah Levi lawng amah im ah buh veelna poei Jesuh ham a sai pe tih kamyin kamlai tim ah mangmu cawikung thli oen atloe thlaang thli te awm u. ³⁰ Farasi thlaang khatsut oen amami bu khuiah aka thuum van Phungawl cangpueikung khatsut lawng Jesuh kah hubang thli tengah te caitoek u tih, “N’tu ah nangmi lawng mangmu cawikung hue oen thlaangthawlh thli oen ah buh te na caak na awkk haih u?” a tina u. ³¹ Jesuh lawng ahimi nala te, “Sading thlaang lawngah siibawi ngoe nawh, tede thlaangtlo bueng lawng ni angoe a tina. ³² Kai tah thlaangdoeng thli te khue ham oen ah thawlh yut sak ham ka law nawh tih thlaangthawlh thli te khue ham oen ah thawlh yut sak ham ni ka law.” a tina.

³³ Thlaang khatsut lawng Jesuh nala, “Johan kah hubang thli lawngtah buh a yeh u poepa tih thangthui u, tecoengah Farasi hue kah hubang thli lawngkhaw te tila te a sai u van; tede nang kah hubang thli lawngtah a caak a awkk u mai nawh pai he.” a tina u. ³⁴ Jesuh lawngah, “Yuluipoei ah poei aka bur thlaang thli te yulokung oen a awm haih khuiah ahimi te buh a yeh sak ai tila na poek u aw? Buh yeh sak manawh! ³⁵ Tede yulokung te ahimi teng kalawng athlala a khuenna khawhin te a pha ai, tevengah ahimi lawng buh a yeh u badai” a tina. ³⁶ Jesuh lawng ahimi tengah he kah thuidoetna he khaw a thui pe:

³⁷ A-u lawngkhaw misurtui athaai te saphaw yuukhap aruem dawngah thloen nooek nawh, metihtiah misurtui athaai lawngah saphaw yuukhap te a pawkk sak vetih misurtui khaw ceu thloep ai, saphaw te khaw pawn ai. ³⁸ Te lak atah misurtui athaai te saphaw yuukhap athaai thik dawngah thloen ham awm! ³⁹ A-u lawngkhaw misurtui aruem te a awkk coeng atah misurtui athaai te ngaih tlaih nawh. Misurtui aruem te tah tuui ngaai.” tila a thui pe.

¹ Sabbath khawhin ah Jesuh lawng loha lakli kalawng ah te cet. A hubang hue lawngah caangvui te a yuun u, a kut oen a nawi u tih a caak u. ² Farasi thlaang khatsut lawngah, “Mami kah Phungawl lawng Sabbath khawhin ah sai nawh hamla a thui te n’tu ah nangmi lawng na sai u?” tila a doet. ³ Jesuh lawng ahimi nala te, “Devid oen a thlaang thli lawng a bung a pawng u vengah n’tu a sai tite ca na tae nooek u nawh aw? ⁴ Ahih lawng Pathen im khuila cet tih, Pathen tengah a nawn u takawi te a lawh tih a caak, tecoengah amah kah thlaang thli te khaw a peek. Khawsoeih hue bueng lawng a caak thai takawi, ahimi lawng a caak te mami kah Phungawl oen kalh u teta!” a tina. ⁵ Tecoengah awlcuina ah Jesuh lawng, “Thlanghing capa tah Sabbath Bawi ni” a tina.

⁶ Atloe Sabbath khawhin ah Jesuh tah Sinakok bok-im la te cet tih a cang puei. Te ah te a bantang kut aka kheem thlaang pakhat awm. ⁷ Khatsut Phungawl cangpueikung thli oen Farasi thlaang vaang hue lawngah Jesuh kah a sai he soeng nawh tila thawlh peel ham a ngaih u, tedawngah Sabbath khawhin ah kut kheem te a hoeih sak lah ai nuem tite huh hamla rep a doen u. ⁸ Tede Jesuh lawng ahimi kah poekna te a ming tih kut kheem thlaang nala te, “Pai langtah hai benla he law lah,” a tina. Te thlaang lawng tho hang tih pai. ⁹ Tecoengah Jesuh lawng ahimi nala te, “Awl kan doet u lah ai: Mami kah Phungawl lawng Sabbath khawhin ah mami he n’tu sai sak ham a ngaih? Thlaang bawm ham aw, tihnawhtah nganbawh peek ham aw? Thlaang kah hingna thlawn ham aw, tihnawhtah phe ham aw?” a tina. ¹⁰ Jesuh lawng a teng-avai ah te mang tih a dan; tecoengah te thlaang nala te, “Na kut te thueng lah” a tina. A hih lawng a thui angla a sai tih a kut te koep theen. ¹¹ Ahimi te a thin sa soeh u tih Jesuh he metila n’sai lah ai tite a thui u.

¹² Tecoengah Jesuh te thangthui hamla tlaang la cet tih te ah te yiin at puet Pathen tengah thangthui. ¹³ Khaw athaih atah a hubang thli te a tengla a khue tih ahimi timkah paha thlaihih te a tuek, te thli te Celtuih tila miing a sak: ¹⁴ Ahimi hue kah a miing tah, Simon (Piter tila khaw a thui u) oen a manau Andru; Jeem oen Johan, Filip oen Bartalomiu; ¹⁵ Matthai oen Tawmas, Alfias capa Jeem oen Simon (Phunkuup a ti u te), ¹⁶ Jeem capa Judas oen paipi thleepkung Judas Iskariot, he hue he ni.

¹⁷ Jesuh tah celtuih thli oen tlaang kalawng rum thuk u tih dilai avan at na ah a hubang thlaang broe oen ah te pai u. Te kah thlaangping yahawh hlang te tah Judia peng pum oen Jerusalem kalawng ah, tuivakeeng kah khawpui Taiar oen Sidon kah aka law thlaang thli ni; ¹⁸ ahimi lawngah a awl thui te yaak ham oen ah a tlawhna te hoeih sak ham a ngaih u dawngah law u. Raaithe lawng khawdeng a peek thlaang thli khaw law u tih hoeih u. ¹⁹ Ahih kah huham tharana te a pum dawng kalawng pooeng tih ahimi te a hoeih sak dawngah thlaang boeih lawng ahih te tek ham a yawm u.

²⁰ Jesuh lawng a hubang thli te a bueh tih, “Nangmi khawdeng thlaang thli tah yotheen kam-awmna na dawng u; Pathen Ram tah nangmi ham ni! ²¹ “Tahe ah buh mueh buhpawng la aka awm thli tah yotheen kam-awmna na dawng u; Nangmi tah na bung hah ai! Tahe ah aka ruungrap nangmi hue tah yotheen kam-awmna na dawng u; nangmi nuihcalna te awm badai!

²² Thlaanghing Capa kawngah nangmi te thlaang lawngah n’thina u tih n’hoett sut u, n’sal aphaam tih athela n’thui u atah nangmi tah yotheen kam-awmna na dawng u! ²³ “Te tila n’sai u atah na kaw hoe sak lang awmngaih oen laam u lah, metihtiah vaan ah nangmi ham kutdo alentloe te avan khueh poen. Metihtiah tetih van la te ahimi kah patuer thli lawng tawngha thli te a sai u roe poen. ²⁴ “Tede tahe ah nangmi kuirang thlaanglen thli ham tah khawmap tangkiik mai mah aw; nangmi tah hingkhui awmtheenna na boenn u poen! ²⁵ Tahe ah bung aka hah thlaang thli ham tah khawmap tangkiik mai mah aw; nangmi tah buhmueh buhpawng la na van ai! Tahe ah nangmi aka nui aka cal thlaang thli ham khawmap tangkiik mah aw; nangmi tah lungnat yaak oen na rap u ai!

²⁶ Thlaang lawng nangmi te n’koeh u vengah te khawmap tangkiik mah aw; ahimi kah patuer thli lawng te tila ni tawngha rawlrap thli te a koeh u van.

²⁷ “Tede ka awl he aka hutung nangmi tengah kavan thui u: Na raal te lungna u lah, nangmi aka thina thlaang thli hamla theenna te sai pe uh, ²⁸ Nangmi aka tapvoep thli te yotheenna pe u langtah nangmi thekhana thlaang thli ham thangthui pe uh. ²⁹ Thlaang lawngah na beeng khatben te avan bel atah khatben te khaw bel sak baal; pakhat lawngah asawkah na buen angki te avan lawh atah adangkah na buen angki te khaw pe hawn. ³⁰ Na tengah thaihu aka bih thlaang te pe u langtah pakhat khat lawng na thaihu te a lawh atah bih koep boel. ³¹ Thlaang lawng na sawah van sai seh tila na ngaih van angla thlaangtloe sawah khaw sai van. ³² Nang aka lungna thlaang bueng te na lungna atah metila yotheen kam-awmna te dang hamla na poek? Thlaangthawlh thli lawngkhaw ahimi aka lungna te a lungna van ta! ³³ Tecoengah nang ham theenna aka sai thlaang bueng sawah theenna te na sai atah n’tu ah yotheen kam-awmna te dang ham na poek? Thlaangthawlh thli lawng Pateng te tila a sai u van ta! ³⁴ Aka sah thai koep ham na ngaaiuep thlaang bueng tengah thaihu te na pu atah n’tu ah yotheen kam-awmna te dang hamla na poek? Thlaangthawlh thli lawng Pateng ataring ah dang koep hamla thlaangthawlh thli te thaihu a pu van ta! ³⁵ Nangmi lawngtah te tila sai boel! Na raal thli te lungna langtah ahimi sawah theenna te sai peh; thaihu te pu u lah, dang koep ham ngaiuep hanlan tlaih boel. Nangmi lawng alentloe kutdo na dang u vetih Tloeng Khoelh Pathen kah ca anau la na awm u ai. Metihtiah ahih tah lungvatna aka ming nawh oen thlaangthaipalat thlaang thli sawah theenna te a sai pe. ³⁶ Nangmi kah na Pa lawng thlaang reenna kaw a poek van angla nangmi lawngkhaw thlaang reenna kaw te poek uh.

³⁷ “Thlaangtloe te awl cek boel, tetih atah Pathen lawng nangmi te awl n’cek van manawh; thlaangtloe te sal-aphaam boel, tetih atah Pathen lawng nangmi te n’sal-aphaam van manawh; thlaangtloe sawah khawdawp ngaai u lah, tetih atah Pathen lawng na sawah khawdawp a ngaai van ai. ³⁸ Thlaangtloe te do a dan u lah, Pathen lawng nangmi te n’dodan van ai: Atak tang ni, abetoet la avan loeng ai, apueh asawm la te na dang ai, na kut dawngah avan lun vetih na phueih tloel toela m’peek ai. Nang lawng thlaangtloe ham na hawna loengkhong te ang van te Pathen lawng nang ham a hawna van ai” a tina. ³⁹ Tecoengah Jesuh lawng he tila thuidoetna awl a thui pe: “Mikpum pakhat lawng atloe mikpum pakhat te mawt thai nawh; a mawt atah pahih bok la ungrawm khuiah tla ai. ⁴⁰ Sengcamoe he cangpueikung saya lak ah thoem soeh aih nawh; tede sengcamoe boeih lawng amami kah cangna te a coeng boeih atah a saya angla awm ai.

⁴¹ Namah mik khuiah thingboeng aka awm te poek ohla n’tu ah na boenhui thli mik dawngkah muenmawi te na bueh? ⁴² Namah mik khuiah aka awm thingboeng Pateng khaw na huh thai nawh maiah na maya manau nala te, ‘Na mik dawngkah muenmawi te kavan lo ai ne?’ na tina. Nangmi thlaangthaipalat hue! Lamhacuek la namah mik dawngkah thingboeng te lo, tecoengah na maya manau mik khuikah muenmawi te lawh pe ham atheenla na huh thai ai.” a tina.

⁴³ Thingkung theen lawng athaih the te thaih nawh, thingkung the lawngkhaw athaih theen te thaih nawh. ⁴⁴ Thingkung boeih he athaih apai oen ming thai la awm; nangmi lawngah thliingkung dawngkah thaidut thaih te na bit u nooek nawh, thliingkung dawng-kah misur thaih khaw na bit u nawh. ⁴⁵ Thlaang theen lawngtah a thinkaw lungbui khuikah thaihu theen a tung asep khui kalawng atheen thaihu te a thoeng sak; thlaangthe lawngtah thaihu the a tung asep te a thoeng sak. Metihtiah thinkaw khuiah abetoet te hui a kaa lawng a thui.

⁴⁶ “Kai lawng kavan thui te tah na sai u nawh maiah, n’tu ah nangmi lawng, ‘Bawipa, Bawipa’ nan tina u? ⁴⁷ A-u khaw ka tengah law tih ka awl thui a hutung tih aka vai tah n’tu oen a lawh u tite kan huh sak u ai. ⁴⁸ Ahih tah tuungrawm te adungla a to tih lungnu dawngah tuung acakla aka liing im sakung oen lo u. Tuivatui te alen atah te kah im te tui lawng a liw tih a linglok, tede im te acakla a sak dawngah im tah hinghuen nawh. ⁴⁹ Tede a-u khaw ka awl he a yaak tih aka vai nawh thlaang te tah tuungrawm te adungla to nawh tih imtuung acakla aka sut nawh, im aka sa coplap thlaang oen lo u; tuiliw lawngah te im te aningnoek vengah tlim pahoei; metihtlukla rih ham a awm!” a tina.

¹ Jesuh lawng he awl boeih he thlaangping tengah a thui boet coengah Kapernaum khaaw la te cet. ² Te kah aka awm Rom raalbawi lawngah a lungna tangkiik tuihyoeihthlaang pakhat a khueh. Te thlaang te tlo tih duek tawm. ³ Te kah raalbawi lawng Jesuh kawng te a yaak vengah Judah ahaamca thli te a tuih tih a tuihyoeihthlaang te hoeih sak hamla a ceel sak. ⁴ Ahimi te Jesuh tengla law u tih reenna te caalla a bih u, “He thlaang he na bawm roeroe hamla angoe. ⁵ Ahih lawngah mami phun he a lungna tih kaimi ham sinakok pakhat avan sak.” a tina u. ⁶ Tedawngah Jesuh te ahimi oen cet haih u tih, im te a pha tawm u atah raalbawipa lawngah a paya thli te avan tuih tih, “Bawipa, patang palai tlap boel. Ka im la nang na law ham ka koeih ka vaih nawh, ⁷ na tengla kamah law hamla khaw ka ting ka tawkk nawh tila ka poek u. Na awl mah thlaw doek mai, kai kah tuihyoeih-thlaang he hoeih mai badai. ⁸ Kai khaw ka sawkah bawi haam thli kut huiah ka awm tih kai kah kut huiah raalkap thli awm patoeng van baal. Kai lawngah pakhat khat te, “Cet lah!” ka tina atah cet tih atloe pakhat te, ‘Law lah!’ ka tina atah va law, ka salpa te he he sai lah ka tina atah a sai,” tila te a thui sak u. ⁹ Jesuh lawng he awl he a yaak vengah a kawpoek la rai, amah huvai thlaangping tengla te maang dak phai tih, “Ataktang kavan thui u, he ang oengna he Israel thlaang thli tim ah Pateng khaw ka hu thlan hun!” a tina. ¹⁰ A thlaangtuih thli te raalbawipa im la meel u tih a tuihyoeihthlaang sadingla a awm te a huh u.

¹¹ Tecoeng adiw thlan ah Jesuh te Nain a ti u khawpui la te cet, a hubang thli oen thlaangping lawngah a hu ah a vai u. ¹² Khawpui vawngka te a pha khoeng vengah rawkk aka thak thlaangping te law u. Aka duek thlaang te tah huhainu kah a capa pakhatca bueng la a awm dawngah khawpui khuikah thlaang yahawh hlang te huhainu oen haih law u. ¹³ Bawipa lawng te kah huhainu te a huh vengah a reen tangkiik tih ahih nala te, “Rap tlaih boel” a tina. ¹⁴ Tecoengah Jesuh te cet phai tih repp te a tek, tevengah rawkk aka kawt thlaang thli te cot pai u. Jesuh lawng, “Cadawng tawngpang! Tho hang lah, kan tina he!” a tina. ¹⁵ Thlaangduek te ngawl tih awl a thui, tecoengah Jesuh lawng ahih te a manu tengah koep a peek.

¹⁶ Ahimi boeih lawng rih ruila Pathen te a thangpawm u. “Aka lenduet tawngha tah mami tim ah thoeng poen, Pathen tah a thlaang thli thlawn hamla law poen!” tila te ahimi lawng a thui u. ¹⁷ He awlthang Jesuh kawng he Judah ram pum oen a teng-avai ram boeih ah thang khonghak.

¹⁸ He thaihu boeih kah akawng alam he a hubang thli lawng Johan tengah a thui pe u, tedawngah ahimi timkah laipai pahih te a khue tih, ¹⁹ Bawipa te doet sak hamla a tuih, “Nang he Johan lawngah aka law ham koei thlaang a tite nang poen aw, tihnawhtah kaimi lawng thlaangtloe te ka ngaiuep u hun ai aw?” tila te a doet sak.

²⁰ Jesuh teng apha hih vengah ahih rawi lawng, “Johan lawngah aka law ham koei thlaang a tite nang he poen aw, tihnawhtah kaimi lawng thlaangtloe ka ngaiuep u hun ai aw,’ tila doet sak hamla kaihih he n’tuih” a tina.

²¹ Tevengah te Jesuh lawng thlaang-thli kah a tlawhna, natna oen raaithe lawng a kuun thil thlaang thli te a hoeih sak tih mikpum thlaang broe te khaw mik a tueng sak koep. ²² Jesuh lawng Johan kah thlaangtuih laipai rawi nala te, “Cet koep hih langtah na huh boeih oen na yaak boeih he Johan tengah thui pe hih: mikpum thli a mik tueng poen, khowkheem khowbai thli cet thai poen, lungkiit haibe natna aka tlo thli anatna ciing boeih poen, haapang lailot thli lawng awl a yaak poen, thlaangduek tho koep poen, Awlthang Theen he khawdeng lungma thlaang thli tengah a thui u poen. ²³ Kai kah kawng alam dawngah ngaithliwhna aka khueh nawh tah yotheen aka dawng thlaang ni! tila thui pe” a tina. ²⁴ Johan kah laipai rawi te a mel koep coeng atah, Jesuh lawng Johan kawng te thlaang rangpui tengah a thui: “Nangmi lawng ramhum huhang ah Johan tengla na ceh u te, n’tu huh hamla na ngaiuep u? Yilh lawng a yawng mailai caapu thing te huh ham aw na ngaiuep u? ²⁵ Nangmi lawng n’tu huh hamla na ceh u? Hinaak himbai atheen theen oen aka thoekcau u te huh hamla aw? Te tila hi-acuu atheen theen phutlo oen thloeih cah u tih thayoeidoh la aka awm tah sengpahrang impui ah ni a awm u! ²⁶ Nangmi lawng n’tu huh ngaih ah na ceh u, van thui u lah? Tawngha te huh ngaih ah aw? Tetih tangtang pai ni, tede nangmi lawngah tawngha lak ah aka lenduet na huh u poen he ta. ²⁷ Metihtiah Johan he tah caciim lawngah, “Pathen lawng nang hamla lawngpui roekbahkung na haiah laipai kavan tuih ai,’ tila a thui thlaang te ni.” a tina. ²⁸ Jesuh lawng, “Johan lak ah aka lenduet a-u khat khaw awm nawh hun tila kavan thui u. Tede Pathen ram khuiah ayiit koek la aka awm thlaang te Johan lak ah lenduet ngai.” a tina. ²⁹ Te tila a thui te thlaang rangpui lawng a yaak u: ahimi oen ah, awlpui ngaaila mangmu cawikung thli tah Pathen lawng a kuek doengna te aka vai thlaang la awm u tih Johan lawng baptisma te a peek u. ³⁰ Tede Farasi thlaang thli oen Phungawl cangpueikung hue lawngtah ahimi ham Pathen kah kamthlahna te a hoett u tih Johan kah baptisma te dang hamla te a thana u.

³¹ Jesuh lawng a awlthui te a tom koep tih, “Tahe san kah thlaang thli he n’tu oen ah ni ka nuehtah lah ai? Ahimi he n’tu oen a lawh u? ³² Ahimi he tah thaihu yoeihna huen ah aka ngawl camaw thli oen lo u. Thloep at la aka awm hue lawngah atloe thloep at hue nala te, “Kaimi lawngah yuluina riingding kavan tum u, tede na laam u nawh! Kaimi lawng rawkktoetna laa khaw kavan sak u de na rap u nawh!’ aka ti u the camaw hue oen na lo u. ³³ Baptisma pekung Johan te law tih buh a yeh, misurtui khaw aw nawh, tevengah nangmi lawng, ‘Johan te raaithe lawng a kuun thil!’ na ti u. ³⁴ Thlaanghing Capa lawngah law tih a caak, a awkk, tevengah nangmi lawng, ‘He thlaang he bueh u lah! caruut aw lam thlaang ni, mangmu cawikung thli oen thlaangthawlh thli kah paya ni!’ na ti u. ³⁵ Tecakhaw, Pathen kah cuihna tah soeng tangtang tila aka do thlaang boeih lawng a tueng sak” a tina.

³⁶ Farasi thlaang pakhat lawng thlem buh veel haih hamla Jesuh te a khue, Jesuh te ahih im la cet tih buh caak hamla te ngawl thuk. ³⁷ Te kah khawpui khuiah te aka thawlh tangkiik hutaa pakhat awm. Te kah hutaa lawngah Farasi thlaang kah im ah Jesuh buh a caak tite a yaak, tedawngah alabasta um at dawngah riimtuui abepirla avan khuen tih, ³⁸ Jesuh kah a hu ben a khowkung ah te pai, rap tih a mikphitui te Jesuh khow dawngah a cip sak. Tecoengah a khow te a sam oen a thuut pe, a mok tih riimtuui oen a khow te a suep pe. ³⁹ Farasi thlaang lawng te kah hutaa lawng te tila a sai te a huh vengah a kaw khuiah te, “He thlaang he tawngha tangtang kawinih amah aka tek hutaa he a-u te ang thlaang ti te a ming vetih metila a thawlh ti khaw a ming ai,” tila a poek.

⁴⁰ Tevengah Jesuh lawng, “Simon, na tengah thui ham pakhat awm” a tina. Ahih lawngah, “Oeih, Saya, van thui lah,” a tina.

⁴¹ Jesuh lawngah, “Tangkapu thlahkung thlaang tengah tangka aka pu thlaang pahih awm. Pakhat lawngah ngun tangka ya-ngaa a ba tih atloe pakhat lawng ngun tangka sawm-ngaa a ba. ⁴² Te rawi lawng laiba te sah thai hih nawh, te rawi pahih bok kah laiba te a yoe pe sak. Te atah te rawi pahih khuiah a-u lawng tangkapu thlahkung te a lungna ngaai ai? tila a doet.

⁴³ Simon lawng, “Ka poekna maiah laiba yahawh hlang a yoe pe sak tih khawdawp a ngaai pe thlaang lawngah te a lungna ngaai ai,” tila a thui pe. Jesuh lawng, “Soeng tangtang” a tina. ⁴⁴ Tecoengah te kah hutaa benla te maang tih Simon nala te, “He hutaa he na huh aw? Na im la ka law de khow silhna tui nan pe nawh, tede he hutaa lawngtah mikphitui oen ka khow he avan silh tih a sam oen avan thuut. ⁴⁵ Nang lawngtah nan mok nawh, tede ahih lawngtah avan pha pek kalawng ka khow avan mok he toeng nawh. ⁴⁶ Nang lawngah ka luu suepna ham olif situi khaw nan pe nawh, tede ahih lawngtah riimtuui oen ka khow avan suep poen. ⁴⁷ Tedawngah, “Lungna aka lenduet lawng a thawlhna yahawh hlang te khawdawp a ngaai pe poen tite a tueng sakna ni. Tede a-u khaw a thawlhna tehca te khawdawp ngaai pe la aka awm thlaang lawngtah lungna tehca bueng te a tueng sak van” a tina.

⁴⁸ Tecoengah Jesuh lawng hutaa nala te, “Na thawlhna boeih te khawdawp ngaai la awm poen.” a tina.

⁴⁹ Caboi dawngah thlembuh aka veel haih thlaangtloe hue lawngah, “Thawlhna Pateng khawdawp aka ngaai thlaang he a-u kai? tila a thui u.

⁵⁰ Tecoengah Jesuh lawng hutaa nala te, “Na oengna lawng n’thlawn poen: ngaimawng ngaitoe la cet loeih” a tina.

¹ Tecoeng adiw raih atah Jesuh lawng vangpui oen vangca boeih te a hiil tih Pathen Ram kawng Awlthang Theen te a phawng. A hubang hue paha thlaihih khaw ahih oen cet haih u tih, ² tlawhnatna oen raaithe lawng a tuuk tih aka hoeih hutaa khatsut khaw a hu ah te bang u: a kaw khuikah raaithe pasarih co tih aka hoeih Meri (Makdalin a ti u te) oen ah ³ Herod sengpahrang kah imkhuikaw ukkung Khusa kah a yu Joanna; tecoengah Susanna oen atloe hutaa thli a hu ah bang u tih a khuehtoen thaihu oen ah Jesuh oen a hubang thli te a bawmcem u.

⁴ Khawpui pakhat coeng pakhat kah thlaang thli te Jesuh tengla law u tih a tun kueng u vengah te he kah thuidoetna awl he Jesuh lawng a thui pe:

⁵ “Voei khat ah thlaang pakhat tah caangti heh hamla cet. Lo khuiah caangti a heh vengah te caangti khatsut tah lawngpui ah tla, thlaang lawng a caawt tih va lawngah boeih a ruh. ⁶ Caangti khatsut tah lungrawng sawkah dilai apamna ah te tla tih caangti a po hang veng atah dilai te nuem poe nawh tih caangkung te reu boeih. ⁷ Caangti khatsut tah thliing ahaang tim ah tla, thliing te roeng hang tih caangkung te malh a diik. ⁸ Caangti khatsut tah dilai atheenna ah tla; caangkung te roeng hang tih let yakhat la a vui athaih te rip thaawn.” a tina. Tecoengah Jesuh lawng, “Yaakna haa na khueh u atah ya uh.” a tina.

⁹ A hubang hue lawngah, he thuidoetna awl thuingaihna te Jesuh a doet u tih, ¹⁰ Jesuh lawng, “Pathen Ram awlhuep mingna te nangmi m’peek poen, tede thlaangtloe hue lawngtah a bueh u de huh nawh ham, a hutung u de yaakming nawh ham thuidoetna oen ni thui pe ham a awm.” a tina.

¹¹ “Thuidoetna awl thuingaihna tah he tila awm: Caangti tah Pathen kah awl te ni. ¹² Lawngpui ah aka tla caangti tah Pathen awl aka ya thlaang thli te thuingaihna ni; ahimi lawng oengna oen thlawnna te a dangna nawh ham Seitan lawngah law tih ahimi thinkaw khuikah awlthang te a lawh pe. ¹³ Lungrawng sawah aka tla caangti te tah awlthang theen te a yaak tih awmngaih kawhoe la aka do thlaang te thuingaihna ni. Tede ahimi kaw khuiah ayung te caa khuek nawh. Kawlkalh ham bueng te a oeng u tih noekdakna tue a law veng atah tlim boeih u. ¹⁴ Thliing ahaang tim ah aka tla caangti te thuingaihna tah: Pathen awl te a yaak u de he dilai khawsakna kah lakueng raina oen kuirangna oen ah awmtheenna lawng a khuk tih ahinghoek dawngah a vui athaih ahii la aka awm thlaang thli te ni. ¹⁵ Lai theen dawngah aka tla caangti thuingaihna tah: awlthang theen te a yaak tih thinkaw khuiah hinyahna, doengna oen a khoem tih a vui athaih toela uehna oen aka awm thlaang thli te thuingaihna ni,” a tina.

¹⁶ “A-u lawngkhaw haiim te a vaang tih beeldung oen muek khoep nawh, ih-khun huiah khaw khueh nawh. Imkhui la thlaang a kuun vengah haiang te a huhna ham haivangna dawngah haiim te a khueh.

¹⁷ Thuh-elh la aka awm boeih te pho biit vetih muekdah la aka awm boeih te tueng pheng vetih huh thai la awm ai.

¹⁸ Tedawngah metila awl he na hutung tite ngaithuen uh; metihtiah, a-u khaw thaihu a khueh te a tawm athap pe ai, tede a-u khaw a khueh nawh te ayawl akaai tah ka khueh tila a poek te Pateng khaw a lawh pe ai.” a tina.

¹⁹ Jesuh kah a manu oen a manau thli te a tengla law u, tede thlaang ayahawh aih dawngah huh u thai nawh. ²⁰ Thlaang pakhat lawng Jesuh nala te, “Na nu oen na manau thli nang huh ham a ngaih u tih adauben ah pai u.” tila a thui pe.

²¹ Jesuh lawng ahimi boeih nala te, “Pathen awl te a yaak tih aka vai thlaang boeih tah ka manu oen ka manau la awm.” a tina.

²² Hin at ah Jesuh tah a hubang thli oen lowng dawngah ngawl u tih ahimi nala te, “Tuilii khatben rall la cet u sih.” a tina tih cet u. ²³ Lowng oen ah a ceh u phai vengah Jesuh tah ditdit ip. Kawlkalh maiah tuilii dawngah te khaw thlii tih lowng dawngah tui te be dalh poen, tedawngah ahimi boeih te lakueng u. ²⁴ A hubang thli te Jesuh tengla cet tih a thawh u, “Bawipa, Bawipa! Mami n’duek boeih u poen ai he!” a tina u. Jesuh lawng tho tih khawthlii oen tuilet te awl a peek; thlipui thliphoe te duem tih dipsiditla awm. ²⁵ Tecoengah a hubang thli nala te, “Na oengna te mela na khueh u?” a tina. Tede ahimi te a kawpoek rai u tih a rih u, amami khat oen khat te, “He kah thlaang he a-u kai? Ahih lawngtah khawthlii oen tuilet he awl a peek tih a awl khaw a ngai pe mai!” ti u.

²⁶ Jesuh oen a hubang thli tah Galili tuilii khatben rall ah aka awm Kerasa peng benla lowng oen ah cet u. ²⁷ Jesuh te lan a pha khoeng veng atah te khaaw kah thlaang raaithe lawng a kuun thil pakhat te a tengla va law. Ahih tah atliing ayaalla asanhlang awm puet poen, im ah khaw awm nawh tih thlaangduek a upna lungkaw khuiah te awm. ²⁸ Ahih lawng Jesuh te a huh vengah angaihhlangla paang tih a khowkung ah te a buekuep pe tih, “Tloeng Khoelh Pathen Capa Jesuh! Kai he metila sai ham na ngaih? Kai he dan n’tat mai boel, reenna kavan bih!” tila te paang. ²⁹ Jesuh lawng raaithe te ahih kaw khui kalawng ram la ceh ham awl a peek dawngah ni te tila a tina. Ahih kaw khuiah te raaithe kuun poepa tih a kut a khow te thiirui oen rap a piin tih a khawh khaklal u de thiirui te a bot tih ramhum huhang la raaithe lawng a viil puei. ³⁰ Jesuh lawng ahih te, “A-u na miingna? tila a doet. Ahih lawngah,

³¹ Raaithe thli lawngah Jesuh nala te kaimi he aboetna aka awm nawh ungrawm dung khuila te n’thlaak mai boel a tina u tih reenna a bih u.

³² Te kah tlaangthleep ah te awk piing hui at a vuelh u te awm. Tedawngah raaithe thli lawng ahimi te awk thli kah a kaw khuila kuun sak ham Jesuh tengah a bih u tih a kuun sak u. ³³ Ahimi tah te kah thlaang kaw khui kalawng co u tih awk thli kah a kaw khuila te kuun u. Tevengah awk hui at te apum boeih la cehthleeng ah plit dingkang, tuilii ah tla tih duek boeih. ³⁴ Awkdoen hue lawng te tila a awm te a huh u dawngah heeng u tih khawpui khui oen vangca boeih ah te kah awlthang te a thui u. ³⁵ Thlaangping lawngah te tila a awm te huh hamla cet u tih Jesuh teng a pha u atah raaithe lawng a ceh taak thlaang lawngah te hinaak himbai a buen a naak tih lungcuih la Jesuh khow kungah a ngawlh te ahimi lawng a huh u vengah te a rih u. ³⁶ Te tila a awm te aka hu thlaang thli lawngah te kah thlaang te metila hoeihna a dang tite thlaangping hue tengah patoeng a thui pe u. ³⁷ Tecoeng atah te kah peng paang ah aka awm thlaang boeih lawngah te a rih tangkiik u tih ahimi boeih lawng Jesuh nala te atloela cet mai hawn a tina u. Tedawngah Jesuh tah lowng dawngah luui hang tih atloela cet. ³⁸ Raaithe lawng a ceh taak thlaang lawngah te, “Na hu ah m’bang sak van.” a tina tih reenna a bih.

³⁹ “Im la cet koep langtah Pathen lawng nang ham avan sai he thui,” a tina. Te thlaang lawngah khawpui khuila te cet tih Jesuh lawng ahih sawah a sai pe te a thui.

⁴⁰ Jesuh te thlaang broe lawngah a ring khiing u poen dawngah tuilii khatben rall kalawng a meel phai veng atah thlaangping lawng ahih te a do u. ⁴¹ Tevengah Jairu aka miingna thlaang pakhat te khaw va law, ahih tah te kah sinakok bok-im ukkung pakhat van ni. Ahih lawng Jesuh kah a khow kungah te buekuep tih amah im ah law van hamla Jesuh tengah reenna a bih, ⁴² metihtiah a canu khatca bueng kum thlaihih aka law te a duek tawmca dawngah ni.

⁴³ Te kah thlaangping tim ah te kum ha thlaihih khui puet ah thisuntlaak tlawhna aka tlo hutaa pakhat te awm; ahih lawng a khuehtoen boeih thapang la siibawi te a peek tih a tuui ahaai u van de a-u khat lawngkhaw hoeih sak thai nawh. ⁴⁴ Ahih lawngah thlaangping lakli ah Jesuh kah a hu ben ah te law tih ahih kah himbaidung ahmoi te duem a tek, tevengah thisuntlaak tlawhna te hoeih pahoei. ⁴⁵ Jesuh lawng, “Kai he a-u lawngah n’tek?” tila a doet u. Thlaang boeih lawng kan tek nawh a tina u, Piter lawngah, “Bawipa, thlaangping lawngah khatben khat bang kalawng n’veel khoep tih n’yaawl u he ta” a tina.

⁴⁶ Tede Jesuh lawng, “Thlaang pakhat lawngah kai he n’tek, metihtiah ka pum dawngkah huham tharana a thoeng te ka ming.” a tina. ⁴⁷ Te kah hutaa lawngah kai lawng ka tek te a ming poen a ti dawngah thuen ruila law tih Jesuh kah a khow kungah te a buekuep pe. Te kah thlaang boeih haiah te n’tu kawngah ahih te a tek tih metila a hoeih pahoei tite biit a thui. ⁴⁸ Jesuh lawng ahih te, “Ka canu, na oengna lawng n’hoeih sak poen. Ngaimawng la cet loeih” a tina.

⁴⁹ Jesuh lawng awl a thui lii vengah te Jairu im kalawng thlaang pakhat rawkk-thenn va law tih, “Na canu duek poen, saya he kawhuet cakbat la khueh khiing tlaih boel,” tila Jairu tengah a thui pe.

⁵⁰ Tede Jesuh lawng tete a yaak vengah Jairu nala, “Lakueng boel; oeng mah oeng doek mai lah, ahih te theen badai,” a tina.

⁵¹ Im te a pha u veng atah, Piter, Johan, Jeem oen ah camaw kah a manu oen ana pa bueng nawh atah amah oen haih a-u khaw im khuila kuun sak nawh. ⁵² Te kah aka awm thlaang boeih lawng camaw te a rah u tih reeng u. Jesuh lawng, “Rap u boel, camaw he a duek moenih, aka ip mai ni!” a tina.

⁵³ Ahimi lawngah camaw te duek tila a ming u dawngah Jesuh te a nuihna u. ⁵⁴ Tede Jesuh lawng a kut ah camaw te a phoeih tih, “Ka canu, tho lah!” a tina. ⁵⁵ Hutaaca te hing koep tih pahoei tho hang, Jesuh lawng ahimi nala te ‘Caak koei pakhat khat pe uh’ a tina. ⁵⁶ Ana pa oen a manu tah a kawpoek rai tangkiik hih, tede Jesuh lawng he tila aka awm thaihu he a-u tengah khaw thui nawh ham awl a uen.

¹ Jesuh lawng a hubang thlaihih te a khue tun tih, ahimi lawng raaithe boeih te hekna ham, tlawhnatna te hoeih sak hamla huham tharana oen saithaina aana te a peek. ² Tecoengah Pathen ram kawng thui ham oen ah thlaangtlo hoeih sak hamla ahimi te a tuih. ³ Ahimi nala te, “Kamyin la na cehna ah n’tu khaw khuen u boel; cawnghol khaw, sawngsa khaw, caak awkk khaw, tangka khaw, angki ahoei yung at khaw khuen u boel. ⁴ Nangmi na pahna im ah te khawpui khui kalawng na ceh thlantoe ah awm uh; ⁵ Nangmi impahna aka pe nawh khaaw te ceh taak u langtah ahimi te ngaithuen peekna la na khow dawngkah laidiik te van khoek pe uh.” a tina.

⁶ A hubang hue lawngah cet u tih vangca vangnau boeih te a hiil u, Awlthang Theen te a phawng u tih khaaw tawm ah thlaangtlo te a hoeih sak u.

⁷ Galili ram ukkung Herod lawngah he tila thaihu aka thoeng hang kawng he a yaak vengah, thlaang khatsut lawng Baptisma pekung Johan he hing koep tila a thui u dawngah a ngaai hang sut. ⁸ Thlaangtloe hue lawngtah Elijah ni aka pho koep tila a thui u tih thlaangtloe lawngtah yan vengkah tawngha pakhat khat ni aka hing koep ti u. ⁹ Herod lawngah, “Kai lawng Johan kah a luu te ka tloek pe poen, tede he kah thaihu thli akawng alam, ka yaak thlaang he a-u kai?” tila a thui. Tedawngah Jesuh te huh hamla a yawm.

¹⁰ A hubang thli te va meel koep u tih amami kah a sai boeih te Jesuh tengah a thui pe u. Jesuh lawng ahimi te a khue tih amami bueng Betsaida khawpui la te cet u. ¹¹ Te kawng te rangpui lawng a yaak vengah a hu ah bung a vai u. Jesuh lawng ahimi te a uem tangkiik tih Pathen Ram kawng te a thui pe, sadingna aka ngoe thlaang thli te sa a ding sak.

¹² Thlemben khaw a tlaak tawm atah hubang thlaihih hue te a tengla law u tih, “Thlaangping he tuih loeih, he hue yunyan kah khaaw oen lo ah he cet u selang tah caak awkk oen pahna tlap u seh, he kah ahuen amawl he ramhum rammawl ni,” a tina u.

¹³ Tede Jesuh lawng ahimi nala te, “Nangmi lawngah he kah thlaang thli he caak awkk pe uh a tina.

¹⁴ (Te ah te thlaang tawngpataang hawng ah thong ngaa yun awm.) Jesuh lawng a hubang hue nala, “Thlaangping sawm ngaa yun maiah athloepla rip ngawlh sak.” a tina.

¹⁵ Te tila a hubang hue lawng a sai coengah, ¹⁶ Jesuh lawng takawi cuun ngaa oen nga pahih te a lawh tih vaan la maang hang; Pathen tengah awmngaih awl a thui, takawi oen nga te a eh tih a hubang thli tengah te a peek tih thlaangping hue tengah takawi te a ree pe u. ¹⁷ Ahimi boeih lawng a hah khuek la a caak u, acoeih aphe te a hubang hue lawng a cawi u tih vawhphueih paha thlaihih dawngah te betoet.

¹⁸ Hin at ah Jesuh amah bueng a thangthui vengah a hubang thli te ahih tengla law u. Jesuh lawng ahimi te, “thlaang thli lawng kai he a-u a ti u?” tila a doet.

¹⁹ Ahimi lawngah, “Khatsut lawngtah nang he Baptisma pekung Johan ti u. Thlaangtloe khatsut lawngtah Elijah ni ti u tih atloe khatsut lawngtah yan veng kah tawngha pakhat khat aka hing koep ni, ti u” tila a thui pe.

²⁰ Jesuh lawng ahimi nala te, “Nangmi lawng ta, Kai he a-u na ti u?” tila a doet. Piter lawngah, “Nang tah Pathen kah Messiah ni,” a tina.

²¹ Tecoengah he kawng he ahimi lawngah a-u tengah khaw thui nawh ham Jesuh lawng a khang pe. ²² Jesuh lawng, “Thlaang hing capa lawng patang palai a khang doetthloet vetih Judah ahaamca thli, khawsoeih haam thli oen Phungawl Cangpueikung thli lawngah te a hoett u ai. Ahih te a ngawn u ai, tede hin thum coengah tho koep ai.” tila a thui pe.

²³ Tecoengah ahimi boeih tengah te, “A-u khaw ka hu ah baang ham a ngaih atah, amah kawngaih te hoett seh, amah kah thinglam te hin roekk ah kawt selang tah ka hu ah bang seh. ²⁴ Metihtiah a-u khaw amah kah hingna te thlawn ham aka ngaih tah a hingna te a thlawng ai, tede a-u khaw kai kawngah a hingna te a thlawng atah a hingna te a thlawn ai. ²⁵ Thlaanghing lawng dilai pum he amah koe la khueh mai cakhaw a hingna te a thlawng tih a sung atah n’tu nuem hoeikhangna a awm? Hoeikhangna roe awm nawh! ²⁶ Kai he khaw seh, kan cang puei he khaw seh a-u lawngkhaw a yah puei atah Thlaanghing Capa lawng a ruep-awmna oen, ana Pa oen aciim vanthlaang thli kah ruep-awmna oen a law vengah ahih te khaw a yah puei van ai. ²⁷ Atak tang kavan thui u, he kah aka awm thlaang khatsut lawngah Pathen Ram te na huh thlantoe na duek u manawh” a tina.

²⁸ He kah awl he a thui coeng yarh khat yunyan a awm atah Piter, Johan, oen Jeem mi te Jesuh lawng a ceh puei tih thangthui u ham tlaang la luui u. ²⁹ A thangthui lii vengah a mik-hai te thawleng u tih alakloe la awm, a hinaak himbai te bawk rawngtheng. ³⁰ Kawlkalh maiah thlaang pahih te ahih oen awl a thui. Ahih rawi te tah Mosi oen Elijah ni. ³¹ Ahih rawi tah vaan ruep-awmna oen law hih tih Jerusalem ah Jesuh kah duekna rang oen Pathen kawngaihna adiw thlaan ah asoep ham kawng te Jesuh oen a thui u. ³² Piter oen a paya rawi tah ip muelh u, tede a hinghang u veng atah Jesuh kah ruep-awmna te khaw, a tengah thlaang pahih aka pai te khaw a huh u. ³³ Te kah thlaang pahih lawng Jesuh te ka ceh taak hih ai a ti veng atah Piter lawng Jesuh nala te, “Bawipa, he ah mami n’awm u he theen tangkiik! Kaimi lawng riim-im pathum ah ka sa u ai, pakhat te nang ham seh, pakhat te Mosi hamla, pakhat te tah Elijah ham seh.” a tina. (Ahih lawng n’tu ka thui tite ming heet nawh.)

³⁴ Ahih lawng awl a thui lii vengah muui va yaal tih ahimi te a yaawl khoep; ahimi muui lawng a thiing khoep vengah te a hubang hue lawngtah caalla a rih u. ³⁵ Muui dawngkah awl pakhat lawngah, “Ahih he tah Ka Capa ni, Kai lawngah ka tuek te ni, a awl thui te ngaai pe uh!” tila a thui.

³⁶ Te kah awl te a thui boet atah Jesuh te amah bueng la awm. Hubang hue lawng he kah akawng alam boeih te a phah u tih te vengkah ahimi lawng thaihu a huh u te a-u tengah khaw thui u nawh.

³⁷ Avuen khawhin atah Jesuh oen a hubang pathum hue te tlaang kalawng a rum thuk u vengah thlaangping lawng Jesuh te avan pan u. ³⁸ Thlaangping tim kah thlaang pakhat te paang tih, “Saya! Reenna kavan bih, ka capa khueh duen he van bueh lah! ³⁹ Raaithe lawng a tuuk tih ploeng ploeng paang, a thuen sak tih tlup tlup a tlim sak, a kaa dawngah tilhawm khaw nomnom a peem; a ngawn a theh poepa tih thlah tlaih nawh! ⁴⁰ Na hubang thli tengah raaithe hek hamla reenna ka bih de ahimi lawng hek u thai nawh” a tina. ⁴¹ Jesuh lawngah, “Nangmi oengna khueh nawh thlaang oen lawnghang thlaang thli! Meveng toe nangmi he kan awm puei ai? Meveng toe nuem kan ruemm khiing u lah ai?” a tina. Tecoengah te kah thlaang nala te, “Na capa te he la van law puei lah.” a tina.

⁴² Tawngpaca te a law phai vengah raaithe lawng ahih te a thuen sak tih dilai dawng tlup a tlim sak. Jesuh lawng raaithe te awl a peek, tawngpaca te a hoeih sak coengah ana pa tengah koep a peek. ⁴³ Thlaang boeih tah Pathen kah lenna huham tharana dawngah te a kawpoek rai u.

⁴⁴ Kai lawng kavan thui he hilh u boel! Thlaanghing Capa he aana aka khueh thlaang thli kut ah a peek u ai,” a tina ⁴⁵ Tede a hubang hue lawngah a thui ngaihna te ming u nawh. Ahimi lawng a yaakmingna nawh ham thuingaihna te awlpaveel oen a thui pe. Te kawng alam te doet ham khaw birih sut u.

⁴⁶ A hubang thli lawngah amami khuiah te a-u nuem aka lenduet ti u tih awl puung u. ⁴⁷ Ahimi lawng te tila a poek u te Jesuh lawng a ming, tedawngah camaw pakhat te a khue tih amah tengah a pai sak, ⁴⁸ a hubang hue nala te, “A-u khaw he camaw he ka miing oen ah a do atah kai he ni n’do; a-u khaw kai he aka do tah kai aka tuihkung te a do. Metihtiah nangmi tim kah ayiit koek te aka lenduet la awm.” a tina.

⁴⁹ Johan lawngah, “Bawipa, nang kah miing oen ah raaithe aka hek thlaang pakhat ka huh u tih mami timkah thlaang nawh dawngah sai tlaih nawh ham ka khang pe u.” a tina. ⁵⁰ Jesuh lawng Johan oen atloe hubang hue nala te, “Khaang pe u boel, metihtiah nangmi te aka oelhtaih nawh thlaang te tah na puei na paw ni.” a tina.

⁵¹ Jesuh te vaan la luui ham atue a khoek tawm poen dawngah Jerusalem la ceh ham kaw a poek tih kamthlah. ⁵² Samaria khaaw ah soeprep boeih oepsoeh la aka sai ham ahih lawng thlaang a tuih. ⁵³ Tede Jerusalem la te ceh poe ham a kamthlah u dawngah te khaw kah thlaang thli lawng Jesuh te pah sak u nawh. ⁵⁴ He tila a awm te hubang Jeem oen Johan lawng a huh vengah ahih rawi lawng Jesuh te, “Bawipa he kah thlaang thli he phe hamla vaan kah hai te kaimi lawng tlaak sak ham na ngaih aw?” tila a doet hih.

⁵⁵ Jesuh lawng maang dak tih ahih rawi te a ho. ⁵⁶ Tecoengah Jesuh oen a hubang thli tah khaw tloe la cet u.

⁵⁷ Ahimi te lawngpueng a ceh u vengah thlaang pakhat lawng Jesuh nala, “Na cehna roekk ah na hu ah ka baang van ai.” a tina.

⁵⁸ Jesuh lawng ahih nala te, “Metaang lawngkhaw a awm na lungkaw thingkaw a khueh tih va lawngkhaw a bu a khueh, tede Thlaanghing Capa lawngtah duemdawngna oen ihna ahuen kangna khaw khueh nawh.” a tina.

⁵⁹ Jesuh lawng thlaangtloe pakhat nala te, “Ka hu ah baang lah.” a tina. Tede te thlaang lawngah, “Bawipa, im la ka cet de silang a pa rawkk te ka kuem lamha de ai.” a tina.

⁶⁰ Jesuh lawng, “Thlaangduek lawng amami thlaangduek te vui u noen seh. Nang tah cet langtah Pathen Ram kawng te thui lah.” a tina.

⁶¹ Thlaangtloe pakhat lawngah te, “Bawipa na hu ah ka baang van ai, tede ka cet silang tah ka cakaw thli te ka phih ka ra de ai,” a tina.

⁶² Jesuh lawng ahih nala te, “A-u khaw laithawl sai ham a tongnan tih a hu benla aka maang khiing te tah Pathen Ram oen ah tingtawkk nawh.” a tina.

¹ He coengah Bawipa lawng thlaang sawmsarih pahih te a tuek, ahimi te pahih pahih ah a bok u sak tih amah a cehna koei khaaw oen ahuen amawl boeih ah te a tuih. ² Jesuh lawng ahimi nala te, “Caang ah hamla tah yahawh tangkiik mai de, aka aat ham biibikung tah yawlca. Lo khui-kah caang aka aat la biibikung thlaang yahawh avan tuihna ham lokhuehkung tengah thangthui uh. ³ Nangmi va cet u lah! Metaang timkah tuuca angla nangmi he kan tuih u. ⁴ Nangmi lawng tangka bawm khawseh, sawngsa khawseh, khawmuek khaw khuen u boel; a-u thlaang khaw voemtoei hamla lawngpueng ah cot pai boel. ⁵ Nangmi lawng im khui pakhat ah na kuun veng roekk ah lamhacuekla, “He im khuiah he ngaimawngna awm hawn seh.” tina uh. ⁶ Te kah im khuiah ngaimawngna aka ngaih thlaang te a awm atah nangmi kah ngaimawng toeina te ahih sawah awm seh; a awm u nawh atah namami tengah va meel koep ai. ⁷ Te kah im ah te awm u langtah ahimi lawng m’peek boeih te ca uh, metihtiah bii aka bi lawngtah a bi phu te a dang ham awm. Imlui te khat coeng khat pong thiikthuek u boel. ⁸ Khawpui pakhat khuila na kuun veng roekk ah nangmi te n’do u atah na haiah avan toen te ca uh, ⁹ te khawpui khuikah thlaangtlo thli te hoeih sak uh, te kah aka awm thlaang thli nala te, ‘Pathen Ram tah nangmi tengah avan pha poen’ tila thui pe uh. ¹⁰ Tede khawpui pakhat khuila na kuun veng roekk ah nangmi te n’do u nawh atah lawngpui tawm ah cet u langtah, ¹¹ ‘Kaimi kah ka khow dawngah aka kap na khaw khuikah laidiik nangmi ngaithuen he peekna hamla kavan khoek u poen. Tede he tah van hilh u boel, ‘Pathen Ram tah nangmi tengah avan pha poen!’ tila thui pe uh. ¹² Atak tang kavan thui u, Awlcekna Khawhin ah te kah khaaw lak ah Sodom khaaw te Pathen lawng a reen ngaai bet ai!” a tina.

¹³ “Nang Korazin khawpui, nang hamla khawmap tangkiik mah aw! Nang Betsaida nang hamla khawmap sut! nangmi tengah kawpoek raina ka sai he Taiar oen Sidon ah ka sai kawinih n’cui vengah ni te kah thlaang thli lawng amami kah thawlh yutna te tueng sak hamla ngawl u vetih tlamhi oen a khuk u coengah amah oen amah te haiphu oen a phull u poen ai! ¹⁴ Awlcekna Khawhin ah te nangmi lak ah Taiar oen Sidon khaw te Pathen lawng a reen ngaai bet ai. ¹⁵ Nang Kapernaum! Namah oen namah te vaan la pawmsang u ham na ngaih aw? Hell ah thlaak thuk la na awm ai!” a tina.

¹⁶ Jesuh lawng a hubang thli nala te, “A-u khaw nangmi kah awl a hutung u atah kai kah awl ni a hutung u; a-u khaw nangmi kah awl te a hutung nawh atah kai kah awl ni a hutung nawh poen; a-u khaw kai he aka hoett tah kai tuihkung te ni a hoett poen.” a tina.

¹⁷ A thlaangtuih sawmsarih pahih hue te awmngaih kawhoe la va meel koep u tih ahimi lawngah, “Bawipa, kaimi lawng nang kah miing oen ah awl ka peek u vengah raaithe thli lawng Pateng khaw awl a ngaai u!” a tina.

¹⁸ Jesuh lawng ahimi nala te, “Khaw thlap apha angla vaan kalawng Seitan a tlaak thuk te ka huh. ¹⁹ Hutung u lah! Nangmi lawng ruul oen celkhui ta-ai tim ah na ceh thaina ham, Raal kah huham tharana te taana thai ham, nangmi te thaihu khat lawngkhaw nganbawh peek nawh ham saithaina aana te kan peek u poen. ²⁰ Tede raaithe thli lawng nangmi awl te a ngaai u dawngah awmngaih u boel; vaan ah nangmi kah miing a thut u dawngah te awmngaih uh.” a tina.

²¹ Tevengah te Ciim Muithla lawng Jesuh te awmngaihna oen a betoet sak tih, “A Pa, vaan oen dilai kah Bawipa! Nang lawng thlaangcuih oen thoemthaina aka khueh thlaang thli tengah na tueng sak nawh tih na thuh te thoemthaina aka khueh nawh thlaang thli tengah na tueng sak poen dawngah kan uem tangkiik. A Pa, he tila coengg sak ham namah lawng na ngaih roe ni.” tila a thui.

²² “A Pa lawng thaihu soeprep boeih m’peek poen. Capa he a-u ti khaw Pa nawh atah a-u lawngkhaw ming nawh. Amah te tueng sak hamla Capa lawng a tuek thlaang oen Capa amah lawng nawh atah Pa te a-u lawngkhaw ming u nawh.

²³ Tecoengah Jesuh tah a hubang hue benla te maang tih ahimi nala te, “Nangmi lawng na huh u thaihu he na huh thloem u dawngah na yo theen phoeih u! ²⁴ Nangmi tengah kavan thui he tawngha yahawh hlang oen sengpahrang thli lawngah nangmi lawng na huh u he huh hamla a ngaih u de hu u thai nawh, nangmi lawng na yaak u he yaak ham a ngaih u de ya u thai nawh.” a tina.

²⁵ Phungawl cangpueikung pakhat law tih Jesuh kah a thawlhna tuuk pe ham a yawm. Ahih lawngah, “Saya, dungyan hingna ka dangna ham n’tu ka sai ai?” tila a doet.

²⁶ Jesuh lawng ahih nala te, “Caciim lawng n’tu a thui? Avan thui thli te metila nang lawng na yaakmingna a awm?” a tina.

²⁷ Te kah thlaang lawngah, “Na Bawipa Pathen te na thinkaw lungbui boeih oen na hingna boeih oen, na tharana boeih oen, na kawpoek boeih oen ah lungna lah,’ ti. Tecoengah ‘namah oen namah te na lungna u van angla na imbe lovaai te khaw lungna van’ ti” a tina.

²⁸ Jesuh lawng ahih nala te, “Awl navan thung he tah soeng poen, te tila te sai, te tih atah na hing ai.” a tina.

²⁹ Tede Phungawl cangpueikung lawng amah oen amah te thlaangdoeng la a poek u dawngah, “Ka imbe lovaai te a-u nuem?” tila Jesuh te a doet.

³⁰ Jesuh lawngah, “Voei khat ah thlaang pakhat tah Jerusalem kalawng Jeriko khaw la a ceh thuk vengah ahih te thlaanghuen thli lawng a bawh u, hinaak himbai te a pit pe u, a bawh doetthloet u tih a duek dalh la a ceh taak sut u. ³¹ Te tila a awmna kah lawngpui ah te khawsoeih pakhat te cet thuk van; tede ahih lawng te kah thlaang te a huh vengah khatben kalawng a reel aram tih a ceh taak. ³² Te tih van la te Levi thlaang pakhat khaw te kah lawngpui ah poe cet thuk van tih te kah thlaang te a huh, ahih lawngkhaw khatben kalawng areel aram tih a ceh taak van. ³³ Tede Samaria thlaang pakhat, te kah lawngpui kalawng ah kamyin la aka cet lawng atah te kah thlaang tengla te a pha tih a huh vengah a reen tangkiik. ³⁴ A tengla te cet tih boengha te situi oen misurtui oen ah a thluk pe tih boengha thli te a yeen pe; tecoengah te kah thlaang te amah kah lacano dawngah a ngawlh sak tih yinpahna im la te a ceh puei; te ah te ahih lawng te kah thlaangtlo te a buul athlawng. ³⁵ Avuen ah ka cet ai a ti veng atah ngun tangka pheek hih te a lawh tih yinpahna imtoetkung te a peek tih ahih nala te, “Nang lawngah ahih he khuutcem mai de, ahih hamla na hawna avak asah boeih te ka meel koep vengah kan pe ai,’ a tina.” tila te a thui pe.

³⁶ Tecoengah Jesuh lawng awlcuina ah, “He kah thlaang pathum khuiah he thlaanghuuen thli lawng a bawh thlaang kah imbe lovaai te a-u tila na poek?” tila te a doet.

³⁷ Phungawl cangpueikung lawngah, “Ahih aka reen thlaang te a imbe lovaai la awm.” a tina. Jesuh lawng, “Te atah nang khaw cet langtah te tila te sai van.” a tina.

³⁸ Jesuh oen a hubang thli te kamyin la cet u tih khaw pakhat a pha u, te ah te Marta aka miingna hutaa pakhat lawng a im ah a pah sak. ³⁹ Meri aka miingna a manau pakhat awm. Ahih lawngtah Bawipa kah a khow kungah ngawl tih a hih kah cangpueina te a hutung. ⁴⁰ Marta tah bii toklek tih hoeng atoeih nawh, tedawngah law tih, “Bawipa, kamah bueng pawng athawh ham ka manau lawng n’ceh taak sut he, n’tula khaw na ngaai nawh aw? Kai he bawm hamla van thui pe lah!” a tina.

⁴¹ Bawipa lawng, ahih nala te, “Marta! Nang lawngtah thaihu yahawh hlang dawngah na lakueng tih na patang, ⁴² tede angoe tangtang tah pakhat bueng ni. Meri lawngtah asoeng thaihu te a tuek poen tih ahih tengkah te a-u lawngkhaw rot pe tlaih manawh.” a tina.

¹ Hin at vengah Jesuh tah ahuen pakhat ah thangthui. A thangthui coeng atah a hubang pakhat a tengla law tih, “Bawipa, Johan lawng a hubang thli a cang puei van angla thangthuina te kaimi n’cang puei u van lah,” a tina.

² Jesuh lawng ahimi nala te, “Nangmi lawng na thangthui u vengah tila thui uh: ‘A Pa: Na miing ciim tah hinyahna awm hawn seh; na Ram va pai hawn seh. ³ Kaimi lawng ka ngoe caak awkk te hin at coeng hin at m’pe lah. ⁴ Kaimi sawah thawlhpalhna aka sai boeih te khawdawp ka ngaai u van angla kaimi kah thawlhna he khawdawp van ngaai van lah. Aka rai tangkiik noekdakna te kaimi tengah van pha sak boel’ tila thangthui uh.” a tina.

⁵ Tecoengah Jesuh lawng a hubang thli tengah, “Thuina maiah, nangmi pakhat khat lawng yiinthuem ah na paya im la na cet tih ahih nala te, Anaang nang, takawi cuun thum ah m’pe de lah. ⁶ Ka paya pakhat khawlawng cet tih tapekca ah ka im avan pha tih ka cah ka awh ham caak koei khat khaw ka khueh nawh!’ na tina. ⁷ Tevengah na paya lawngah im khui kalawng, ‘Thlaang kawhuet cakbat la khueh boel! Thawh ka khaih poen, ka ca thli oen ka ip u poen. Nang te thaihu peek ham ka tho thai tlaih manawh.’ ti. ⁸ Te atah metila a awm ai? Kavan thui u, ahih te na paya la a awm dawngah tho nawh tih takawi te m’pe nawh de nang lawng yah ohla na bih mangkhak atah ahih lawng tho vetih na ngoe thaihu boeih te m’peek ai. ⁹ Tedawngah he he kavan thui u: Bih u lah, m’peek ai; tlap u lah na dang ai, Thawh te khooek u lah, nang ham avan awng ai. ¹⁰ Metihtiah aka bih boeih te a peek ai, aka tlap boeih lawng adang ai, thawh aka khooek boeih ham a awng pe ai. ¹¹ Na ca lawng nga avan bih vengah ruul aka pe papa nangmi khuiah khat khaw na awm u aw? ¹² Aaidui avan bih vengah celkhuita-ai na peek ai aw? ¹³ Thlaangthe la na awm u de ta, na ca thli te thaihu theen peek ham na ming u. Te atah vaan ah aka awm Pa lawng atah Ciim Muithla te aka bih boeih tengah a peek tare ai ta!” a tina.

¹⁴ Raaithe lawng akuun tih awl aka mueh thlaang pakhat kah a kaw khui kalawng raaithe te Jesuh lawngah a hek tih te thlaang te raaithe lawng a ceh taak coeng atah awl cal. Thlaangping tah a kawpoek la rai sut u, ¹⁵ tede, thlaang khatsut lawngtah, “Raaithe thli hek thai hamla huham tharana he raaithe thli kah a bawipa Beelzebul lawng ni a peek,” ti u.

¹⁶ Thlaangtloe lawngtah Jesuh kah a thawlhna te tuuk ham a ngaih u dawngah ahih kah a sai te Pathen ben-kah aka law ni tite tuengsakna ham kawpoek raina sai ham te a bih u. ¹⁷ Tede Jesuh lawng ahimi kah poekna te thiim a ming tih ahimi nala te, “Ram pakhat he amah oen amah athloekla pek u the tih thek u kawinih asan pai thai manawh; imkhuikaw khaw pek u the tih a roep u nawh atah khawsak paw. ¹⁸ Tedawngah Seitan kah ram khaw pakhat oen khat raal u the kawinih metila asan a pai thai ai? Nangmi lawng atah kai lawngah raaithe ka hek he Beelzebul lawngah raaithe hek thaina te kai he a peek na ti u. ¹⁹ Kai lawng Beelzebul rang oen raaithe ka hek atah nangmi kah hubang thli lawng ta metila a hek u? Nangmi na soeng u nawh tite namami kah hubang thli lawng a tueng sak! ²⁰ Tetih nawh ni, kai lawngah Pathen kah huham tharana oen raaithe ka hek tih, te lawngah te Pathen Ram nangmi teng avan pha poen tite a tueng sak.

²¹ Thara thlaang pakhat lawng amah kah aw-vaa boeih oen a im te a toet atah a khueh a toen boeih te sueng. ²² Tede tha aka ra ngaai bet pakhat lawng a teek tih a taa atah ahih lawng a uepna awva boeih te a lawh pe vetih thaihu thaiha te a rek a ra pe ai.

²³ A-u khaw kai he aka pai puei nawh tah kai he aka raalna thlaang ni; a-u khaw thlaang ka cawitun vengah kai he aka bawmcem nawh tah thlaang aka thekyak thlaang ni.” a tina.

²⁴ “Raaithe pakhat, thlaang pakhat kah a kaw khui kalawng co tih a ceh vengah, ramhum huhang te a hiil tih a awmna ham ahuen amawl te a tlap. Pakhat khaw a huh nawh veng atah, ‘Ka ceh taak kamah im la te ka meel koep hawn ai.’ tila a poek. ²⁵ Tedawngah meel koep tih im te aciimbiit la awm tih thaihu thaiha atheenla a kuem heet u te a huh. ²⁶ Tecoengah cet tih amah lak ah athe eep ngaai atloe raaithe pasarih te avan law puei tih te ah te awm u. Tedawngah te thlaang te tah acuek veng kah lak ah nauh tare ngaai.” a tina.

²⁷ Jesuh lawng tila a thui coengah thlaang tim kah hutaa pakhat lawngah paang tih ahih nala te, “Nang he aka cuunkung oen cawmcahkung tah metihtlukla a awmngaih ai te!” a tina.

²⁸ Tede Jesuh lawngah, “Pathen awl te a yaak tih aka vai tah metihtlukla a awmngaih tare ai!” a tina.

²⁹ Thlaangping lawngah Jesuh te a veel khoep u vengah te Jesuh lawng, “Tihin hang kah thlaang thli he the-akk tangkiik! Ahimi lawng kawpoekraina te a bih u, tede Jonah kah kawpoekraina nawh atah atloe khat khaw ka sai manawh. ³⁰ Nineveh khaaw kah thlaang thli hamla tawngha Jonah te noekna la a awm van angla Thlaanghing Capa he khaw tihin hang kah thlaang thli ham miknoek la awm van ai. ³¹ Sheba sengpahrang Nu lawng Solomon kah cuihna awl hutung ham athla hlang amah ram kalawng va law; Awlcekna Khawhin ah ahih lawng pai vetih tihin hang kah thlaang thli he thawlh a peel poen ai; ataktang kavan thui u, Solomon lak ah aka lenduet ngaai he ah he awm. ³² Nineveh khaaw kah thlaang thli lawng Jonah kah phung thui awl a yaak u dawngah a thawlhna yut u, Awlcekna khawhin ah ahimi lawng pai vetih nangmi te thawlh m’peel poen ai; ataktang kavan thui u, Jonah lak ah aka lenduet ngaai he ah he awm.” a tina.

³³ A-u lawng haiim te a vaang tih thlip khoep nawh, beeldung oen khaw dah khoep nawh; im khuila aka law thlaang thli lawng aangna te a huh thaina ham haivangna dawngah te a khueh. ³⁴ Pum hamla tah mik he haiim angla awm. Na mik rawi te acaih vengah na pum te aangna oen be; tede na mik rawi te atheen nawh veng atah na pum te yiinna khuiah awm. ³⁵ Tedawngah na pum dawngah aka awm aangna te yiinna la a coengg nawh ham ngaithuen uh. ³⁶ Haiim a aangna oen nang te n’thue vengah na pum te aangna oen be tih ame huen maiah khaw yiinna a awm nawh angla na pum boeih te aang ai.” a tina.

³⁷ Jesuh te awl a thui coeng atah Farasi thlaang pakhat lawng buh ca la ahih te a khue; tedawngah cet tih buh caak hamla te ngawl. ³⁸ Jesuh lawng buh caak thlan ah kut a silh nawh te Farasi thlaang lawng a huh u vengah a kawpoek rai. ³⁹ Tedawngah Bawipa lawng ahih nala te, “Nangmi Farasi thlaang thli lawngtah boengloeng oen beel te adauben tah na silh u, tede akhui ben tah tluung-athangna, athe thaihu oen betoet. ⁴⁰ Nangmi thlaangngau paathuu thli! Adauben aka sai Pathen lawngah akhuiben te khaw sai nawh aw? ⁴¹ Tede nangmi kah boengloeng oen beel dawngah aka awm te khawdeng thlaang thli te pe u lah, tetih atah soeprep boeih te nangmi ham ciim ai.

⁴² Nangmi Farasi thlaang thli ham khawmap tangkiik! Nangmi lawng cuenruek-an, sawngsing oen tawitlim anno Pateng khaw paha ah pakhat te Pathen na peek u, tede nangmi lawngah doengna, Pathen lungna te tah na hadalhna u. He ang thli he na sai hamla awm tih atloe te khaw dalrana ohla sai ham awm.

⁴³ Nangmi Farasi thlaang thli ham khawmap tangkiik! Nangmi lawng sinakok bok-im ah athloekla ahooep atlaang ngawlhcoen dawngah ngawlh ham oen ah thaihu yoeihna huen ah thlaang kah hinyahna oen voemtoeina te na ngaih u. ⁴⁴ Nangmi ham khawmap tangkiik mah aw! Nangmi tah thlaang lawng ming nawh tih asawah a cehna miknoekna aka awm nawh thlam oen na la u.” a tina.

⁴⁵ Phungawl cangpueikung pakhat lawng ahih nala te, “Saya he tila na thui he kaimi khaw nan sal nan phaam haih poen!” a tina.

⁴⁶ Jesuh lawng, “Nangmi Phungawl cangpueikung thli ham khaw khawmap tangkiik! Nangmi lawngah phueih ham aka rai tangkiik thalrih te thlaang na phueih sak u, tede namami lawngtah thalrih te na kutdawn oen Pateng na tek nawh. ⁴⁷ Nangmi ham khawmap tangkiik mah aw! Nangmi lawngah tawngha thli ham thlann te atheen theenla na sai pe u, te kah tawngha thli te namami kah patuer thli lawng a ngawn u te ni. ⁴⁸ Tedawngah nangmi lawng namami kah patuer thli lawngah a sai te na kawtlaak puei u tite na tueng sak u; ahimi lawng tawngha thli te a ngawn u tih nangmi lawng thlann te na sai pe u. ⁴⁹ He kawngah he Pathen kah Cuihna lawng, ‘Ahimi tengah tawngha thli oen laipai thli te ka tuih ai; ahimi lawngah khatsut te a ngawn u vetih atloe hue te tah a heem a tek u ai? tila a thui. ⁵⁰ - ⁵¹ Tedawngah Abel a ngawn u veng kalawng boknathaang oen Huen Ciim laklaw ah a ngawn u Zekhariah toe ah, dilai suen cuek veng kalawng tawngha boeih te a ngawn u dawngah tahe san kah thlaang thli he dan a tat ai. Teveng kah thlaang thli boeih ham te tahe san kah thlaang thli he dan a tat ai tila kavan thui u!

⁵² Nangmi Phungawl cangpueikung thli ham khawmap tangkiik! Nangmi lawng cuihna im kah thawhka awngna caabi te na kuem khak u; namami khaw na kuun u nawh, kuun ham aka yawm thlaang thli ham khaw na khang pe u!” a tina.

⁵³ Te kalawng Jesuh te a ceh coeng atah, Phungawl cangpueikung thli oen Farasi thli lawng ah teveng kalawng tah ahih te a huhhuett tangkiik u poen tih, ⁵⁴ a cal thawlhna oen awl a thuina dawngah a thawlhna te tuuk pe ham thaihu kawng alam yahawh hlang te a doet u.

¹ Tevengah thlaangping toeklek nawh te tun u tih amami pakhat oen pakhat te tiil u the; tevengah Jesuh lawng lamhacuekla a hubang hue nala te, ‘Farasi thlaang thli kah tawlru te atheenla ngaithuen uh, ka thui ngaihna tah ahimi kah thailatna te ni. ² Muekdah khoep la aka awm thaihu boeih te pho vetih ahuep ahel boeih te a ming sak ai. ³ Tedawngah yiinna khuiah na thui u te hingthun khawthaih ah a yaak u ai, thawh na khaih khoep u tih ahuepla im khuiah awltuemm na thui u te imphu kalawng a paang puei u ai.” a tina.

⁴ “Ka puei thli, kavan thui u, pum bueng he a ngawn thai doek tih atloe athe-eep khat khaw aka sai thai nawh thlaang thli te rih boel. ⁵ Nangmi lawng a-u rih ham a awm tite kavan tueng sak ai; Pum he a ngawn coengah hell khuiah thlaak thaina aana aka khueh Pathen te rih uh. Nangmi lawng ahih te ni na rih u ham a awm, kai lawng kavan thui he tangna u lah! ⁶ Variit pa-ngaa te pheksaseen pahih la yooei u nawh aw? Pathen lawngtah variit te pakhat khaw hilh nawh. ⁷ Na luu dawngkah sam Pateng a toek boeih. Tedawngah rih u boel; nangmi tah variit yahawh hlang lak ah na phu awm ngaai!” a tina.

⁸ “Atak tang kavan thui u, a-u khaw kai kah thlaang la ka awm tila langya ah aka thui tah, Thlaanghing Capa lawng ahih te Pathen kah vanthlaang thli haiah ka thlaang ni a tina van ai. ⁹ Tede a-u khaw seh langya ah kai he aka hoett tah Thlaanghing Capa lawngah ahih te Pathen kah vanthlaang thli haiah a hoett van ai.

¹⁰ A-u khaw Thlaanghing Capa te oelhtaihna awl aka thui te khawdawp a ngaai pe ai, tede a-u khaw Ciim Muithla te a oelh ataih tih athela aka thui tah khawdawp ngaai pe manawh.

¹¹ Ahimi lawngah nangmi te sinakok ah khaw, ram ukbawi oen ukkung thli haiah khaw n’khuen u vengah namah oen namah te metila ka phungtu u vetih me ang awl ka thui ai ti khaw lakueng a boel. ¹² Metihtiah nangmi lawng na thui ham koei te Ciim Muithla lawng n’cang puei ai.” a tina.

¹³ Thlaangping tim kah thlaang pakhat lawng Jesuh nala te, “Saya, a pa lawng kaihih boeinau hamla avan ceh taak ro te kai ham thoem avan pek van ham ka maya tengah thui pe lah” a tina.

¹⁴ Jesuh lawng ahih nala te, “Ka puei, nanghih te awl cek ham oen ah ro pek pe hamla a-u lawng kai he n’khueh?” a tina. ¹⁵ Tecoengah ahimi boeih nala te, “Apueh ngaihna soeprep dawngah kuemsuem u lang tloeng u lah; metihtiah thlaang kah hingna tak tak he bawirengna, khueh toen thaihu dawngah pangtung nawh.” a tina.

¹⁶ Tecoengah Jesuh lawng ahimi teng ah he kah thuidoetna he a thui pe: “Voei khat ah kuirang pakhat lawng lo pakhat a toen tih caang theen tangkiik. ¹⁷ Ahih lawngah tila a poek, ‘Caang ka khuehna ham awm tlaih nawh. Me tih ni ka ti lah ai?’ ti. ¹⁸ Tecoengah tila a poek tih, ‘He tila ka sai ai, thaidi boeih te ka phe silang pakhat la kang abo ngaai la ka sai ai, tecoengah te kah thaidi dawngah te caang oen atloe thaihu boeih te ka khueh ai. ¹⁹ Tecoengah kamah oen kamah te nang yotheen kam-awm thlaang! Kum san hlang ham na ngoe thaihu theen boeih te na khueh poen! Thayoeidoh la awm lah, Ca langtah aw lah, ngaimawng ngaitoe la awm lah, ka ti ai’ ti. ²⁰ Tede Pathen lawng ahih nala te, ‘Nang thlaangngau paathuu! N’tu yiin ah na hingna te boet poen ai; tedawngah namah ham na tung na sep thaihu thli he a-u lawng a paang ai?” a tina.

²¹ Tecoengah awlcuina ah Jesuh lawng, “Amah hamla kaawn aka tung aka sep thlaang tah Pathen kah mik huh atah kuirang la awm nawh.” a tina.

²² Tecoengah Jesuh lawng a hubang hue nala te, “Tedawngah nangmi lawng na hingna ham angoe caak awkk khaw, na pum ham angoe hinaak himbai khaw lakueng u boel kan tina u. ²³ Hingna he caak awkk lak ah awlpui ngaai tih pum he khaw hinaak himbai lak ah awlpui ngaai ni. ²⁴ Vang-aak thli ke bueh u lah; ahimi lawng ruk khaw tuh u nawh tih caang khaw aat u nawh. Ahimi lawng khaai khaw khueh u nawh tih caangpai khaw holh u nawh; Tede Pathen lawng a cah a awh! Nangmi he va lak ah na phu tlo ngaai! ²⁵ Nangmi timkah a-u lawng mai khaw lakuengna rang oen a hingna te bet a cot sak thai ai aw? ²⁶ He ang thaihu tehca mai Pateng khaw na sai thai u nawh atah, n’tu ham ah atloe thaihu kawngah na lakueng u? ²⁷ Ramhum kah raipai thli lawng metila a roeng hang tite bueh u lah: ahimi lawng bii khaw bi nawh, amami ham hinaak himbai khaw tak u nawh. Tede nangmi tengah kavan thui tah Solomon sengpahrang Pateng khaw a bawilen hi-acuu a khueh moek de, raipai angla aka theen khat khaw khueh nawh. ²⁸ Tihin ah hing tih thangvuen ah aka duek pahoei, hai dawngah phuum hamla aka awm sul-aram Pateng khaw Pathen lawng a thoei acaam. Ahih lawngah nangmi te thoei acaam tare nawh ai aw? Nangmi na oengna yawl tangkiik nawh pai he!

²⁹ Tedawngah nangmi lawng caak awkk kawng te poek khuep oen lakueng u boel. ³⁰ (Metihtiah Pathen aka ming nawh dilai thlaang thli lawng ni he ang thaihu thli he a thoeh a tham.) Nangmi kah na Pa lawng he ang thaihu na ngoe boeih te a ming. ³¹ Amah kah a Ram te awlpuila poek u lah, te atah he thaihu boeih he nangmi m’peek ai.” a tina.

³² “ Rih u boel, metihtiah nangmi te na Pa lawng Vaan Ram peek ham a ngaih. ³³ Nangmi lawng na khueh na toen te yooei u langtah tangka te khawdeng thlaang thli pe uh. Aka pawn thai nawh tangkabawm te namami ham khueh u langtah vaan ah namami ham kaawn te tung asep uh, te huen atah thlaanghuuen lawngkhaw huuen thai nawh tih kuum-akett lawngkhaw a caak thai nawh dawngah metuek khaw boeih manawh. ³⁴ Metihtiah na thaihu a awmna huen ah te na thinkaw khaw awm yoeyah van ai.” a tina.

³⁵ “Me ang thaihu a thoeng veng-kah ham khaw oepsoehla awm uh, hinaak himbai te oepsoehla bai-ana u langtah haiim te oepsoehla vaang uh, ³⁶ yuluipoei kalawng aka meel koep ham koei a bawipa lawng thawh a khooek pe vengah thawhka te pahoei awng pe ham aka ring oepsoeh tuihyoeihthlaang thli angla huertuela awm uh. ³⁷ A bawipa a law koep vengah huertuela a toet tih oepsoehla aka ring tuihyoeihthlaang thli te tah a yo theen phoeih! Atak tang kavan thui u, ahih lawng amah angki te a pit vetih a tuihyoeihthlaang thli te a ngawlh sak coengah ahimi te a do adan ai. ³⁸ Yiinthuemtaang ah a law ah khaw, cinghue ah a law ah khaw, ahimi oepsoeh la a awm te a huh atah a yo theen phoeih u! ³⁹ Tecoengah he he ming u lah, Im khuehkung lawng thlaanghuuen a lawna atue te ming kawinih a im te thlaanghuuen muk sak manawh. ⁴⁰ Tedawngah nangmi khaw oepsoehla awm uh, metihtiah nangmi lawng na ngaiuep nawh vengah Thlaanghing Capa tah law ai.” a tina.

⁴¹ Piter lawngah, “Bawipa, he thuidoetna he kaimi ham aw na van thui, tihnawhtah thlaang boeih ham aw?” tila a doet.

⁴² Bawipa lawngah, “Tetih atah, a-u nuem uep-awm tih aka cuih tuihyoeihthlaang la aka awm? Ahih tah a bawi lawng tuihyoeihthlaang thli cawmcah ham, atue atang vengah ahimi caak awkk pekung la a khueh te ueppang koei aka cuih tuihyoeihthlaang la awm ai. ⁴³ A bawipa a law vengah te tila bii a bi te a huh atah te kah tuih-yoeih thlaang te tah a yotheen phoeih! ⁴⁴ Atak tang kavan thui u, te kah tuihyoeihthlaang te amah kah khuehtoen boeih uktemkung la a bawipa lawng a khueh ai. ⁴⁵ Tede ‘ka bawipa he law yue tang manawh’ tila a poek tih atloe tuihyoeih-thlaang hutaa khaw, tawngpa khaw a bawh apai tih a caak a awkk tih yuu a ruui atah, ⁴⁶ ahih lawng a ngaiuep nawh tih a ming nawh atue atang hin at veng atah a bawipa te a law pe ai. A bawipa lawng ahih te pat a tloek vetih awl ngaai nawh thlaang thli kah paang koei te a paang sak van ai.

⁴⁷ A bawipa lawng sai sak ham a ngaih te a ming de aka sai nawh tih oepsoehla aka awm nawh tuihyoeihthlaang te tah dan a tat vetih a bawh doetthloet ai. ⁴⁸ Tede a bawipa kah kawngaih ming nawh tih bawh ham koei te aka sai tuihyoeihthlaang tah adoem aphoe ngaai la a bawh ai. Yahawh hlang a peek thlaang tengkah te yahawh hlang a bih van ai; apueh ngaai la a peek thlaang tengkah te apueh la a bih van ai.” a tina.

⁴⁹ “Kai tah dilai he hai oen ung sak ham ni ka law, tahe vengah khaw ung poen kawinih ka ngaih! ⁵⁰ Kai lawng ka dang ham koei baptisma pakhat awm hun, tete ka coeng thlantoe tah ka kawpoek patang tangkiik mah aw! ⁵¹ Nangmi lawngah kai he dilai dawngah roepna peek hamla va law tila na poek u aw? Nawh ni, roepna nawh tih pekbona peek ham ni ka law. ⁵² Tahe kalawng tah imkhuikaw pakhat ah aka awm thlaang pa-ngaa te pek u ai, pathum lawng pahih te a raalna vetih pahih te lawngah pathum te a raalna van ai. ⁵³ Ana pa thli lawng a capa thli te a raalna vetih a capa thli lawng ana pa thli te a raalna van ai; a manu thli lawng a canu thli te a raalna vetih a canu thli lawngkhaw a manu thli te a raalna van ai; a manii lawng a la-nga te a raalna vetih a la-nga lawngah a manii te a raalna van ai.” a tina.

⁵⁴ Jesuh lawng thlaangping tengah tila a thui pe, “Nangmi lawng khawtlaak ben kalawng ah muui a yaal hang te na huh u vengah khawtlan ai tila pahoei na thui u tih tlan khoet. ⁵⁵ Tecoengah ahot ben-kah yilh a law atah khaw ling ai na ti u tih ling tangtang. ⁵⁶ Thlaangthaipalat hue! Nangmi lawng vaan oen dilai he na dan u tih khawtue tah na thui thai u; tetih atah, n’tu ah tahe vengkah atue he tah na ming u thai nawh?” a tina.

⁵⁷ Asoeng thaihu te sai ham n’tu ah namami lawngkhaw kaw na poek u nawh?

⁵⁸ Thlaang pakhat khat lawng nang te tayacawi ham a ngaih tih awlcekna yungim la n’ceh puei atah, awlcekna yungim na pha thlan vengah ahih oen roeproeina sai. Te tila na sai nawh atah ahih lawng nang te awlcek bawi haiah m’mawt poen ai, awlcekbawi lawng nang te palik kut ah m’peek vetih thongim ah n’thlaak ai. ⁵⁹ Ataktang ni kavan thui u, laiba te na sah boeih thlantoe thongim khuiah na awm ai” a tina.

¹ Tevengah te kah aka awm thlaang khatsut lawng Galili thlaang thli Pathen tengah Luciik thawthuengna a sai u vengah Pilat bawi lawng a ngawn kawng te a thui pe u. ² Jesuh lawng ahimi nala, “Te kah Galili thlaang thli, te tila a ngawn u te atloe Galili thlaang thli lak ah aka thawlh ngaai ni tila na poek u aw? ³ Thawlh koek aih nawh! Atak tang kavan thui u, nangmi khaw na thawlhna te na yut u nawh atah nangmi boeih khaw ahimi angla na duek u van ai. ⁴ Siloam kah imtloensang a tlim vengah thlaang paha thlaireet a namm darek tih aka duek hue te ta? Jerusalem ah aka awm thlaangtloe boeih lak ah the koek tila nangmi lawng na poek u aw? ⁵ The koek aih nawh! Atak tang kavan thui u, nangmi khaw na thawlhna te na yut u nawh atah nangmi boeih khaw ahimi angla na duek u van ai.” a tina.

⁶ Tecoengah Jesuh lawng he kah thuidoetna he ahimi tengah a thui pe: “Thlaang pakhat lawngah misurdum khuiah thaidut thing kung at a liing. Ahih lawng cet tih thaidut te thaih aw, thaih nawh aw ti tih a bueh de athaih pakhat khaw hu nawh. ⁷ Tedawngah ahih lawng amah kah dumtoetkung nala te, ‘Bueh lah, kum thum puet ah he la he ka law tih thaidut thing he ka bueh de a thaih khat khaw ka hu nawh. Vung hawn loeih! N’tu ah laitheen apoei apit la a vak asah sak?” a tina. ⁸ Tede dumtoetkung lawng, “Bawipa kum at tah awm mai de seh; a teng-avai he dilai ka voe pe silang tah laimeen oen ka vui de lah ai. ⁹ Cangthok ah a thaih atah theen badai; athaih nawh atah vung mai hawn; a tina.” tila a thui pe.

¹⁰ Sabbath khawhin hin at vengah Jesuh lawng sinakok bok-im ah a cang puei. ¹¹ Teah te kum ha thlaireet khuiah raaithe lawng a tlawh sak hutaa pakhat te awm; ahih te a uen khuun roepsoet tih doeng sak thai tlaih nawh. ¹² Jesuh lawng ahih te a huh vengah a khue tih, “Hutaa nang, na tlawhna hoeih poen!” a tina. ¹³ Ahih lawng a kut te hutaa sawah a tloeng tih hutaa te amah poek ah yauh doeng pahoei tih Pathen te a thangpawm.

¹⁴ Sabbath khawhin ah Jesuh lawng thlaangtlo a hoeih sak dawngah sinakok bok-im ukkung te a thin sa; tedawngah thlaangping nala te, “Mami lawng bii bina ham khawhin hinruk awm; te khawhin ah te law u langtah thlaangtlo hoeih sak uh, tede Sabbath khawhin atah sai u boel!” a tina.

¹⁵ Bawipa lawng ahih nala te, “Nangmi thlaangthaipalat hue! Nangmi lawng Sabbath khawhin ah na vaitaw khaw, lacano khaw seh, a kiingna rui te na thlam pe u tih tui awkk sak ham na mawt u de lah koen. ¹⁶ Tahe ah Seitan lawng kum ha thlaireet khui a piin tih a khawh mangkhak Abraham cadil he ah awm he ta; Sabbath khawhin ah ahih he piin ayeenna kalawng n’loeih sak nawh ai aw? a tina. ¹⁷ Ahih kah awl thungna lawng a raal thli te a yah sak, thlaangping tah ahih kah kawpoekrai thaihu a saina dawngah te awmngaih u.

¹⁸ Jesuh lawngah tila a doet, “Pathen kah Ram he n’tu oen a lawh u? N’tu oen ah ka nuehtah lah ai? ¹⁹ Te tah he oen lo u. Thlaang pakhat lawng antammu te a lawh tih amah dum ah te a heh. Antammu te roeng hang tih thingkung la pai, te atah va thli te law u tih abeek thli dawngah a bu a tuk u.” a tina.

²⁰ Jesuh lawng “Pathen Ram he n’tu oen ah ka nuehtah lah ai? tila koep a doet. ²¹ Te tah he oen lo u. Hutaa pakhat lawng tawlru te a lawh tih ta-ekk hawl thum oen a thoekk haih tih ta-ekk te a rawi sak boeih.” a tina.

²² Jesuh lawng Jerusalem la a ceh vengah te khawpui boeih oen vangca vangnau ah te cet tih thlaang thli te a cang puei. ²³ Thlaang pakhat lawng ahih nala, “Bawipa, thlaang a yawlca lawng aw thlawnna he a dang ai?” tila a doet. ²⁴ Jesuh lawng ahimi nala, “Thawhka ceek ah te kuun ham yawm u lah; thlaang yahawh lawng kuun ham a yawm u ai, tede kuun thai u manawh. ²⁵ Imkung lawng tho vetih thawh a khaih ai; tevengah adauben ah na pai u vetih thawh te na khooek u ai, “Bawipa, thawh van awng de lah!’ na tina u ai. Ahih lawngah, “Ame kalawng nangmi na law u, kan ming kan tung u moenih.’ ti ai. ²⁶ Tevengah nangmi lawng, ‘Kaimi he nang oen ah buh aka ca haih ni; kaimi khaw ah nan cang puei u teta!? na tina u ai. ²⁷ Tede tila koep a thui ai, ‘Nangmi he ame kalawng na law, kan ming nawh. Nangmi thlaangthe thli; atloela cet uh’ n’tina ai. ²⁸ Nangmi lawng Pathen Ram khuiah Abraham, Isak, Jakob oen tawngha thli te na huh u ai. Nangmi tah adauben ah na rap vetih na naw te cakcak na rueng u ai! ²⁹ Khawcuuk, khawtlaak, aluen ben akakk ben kalawng thlaang law u vetih Pathen Ram khuiah poei buh a veel haih u ai. ³⁰ Tevengah te tahe ah hukhueng la aka awm he lamhacuekla awm vetih tahe ah lamhacuekla aka awm he hukhueng la awm ai.” tila a thui pe.

³¹ Tevengah te Farasi thlaang khatsut a tengla law u tih Jesuh nala te, “Herod lawng nang he ngawn ham a ngaih dawngah he kalawng atloela cet loeih” a tina u.

³² Jesuh lawng ahimi nala te, “Tihin ah khaw, thangvuen ah khaw, kai lawng raaithe thli te ka hek vetih thlaangtlo te ka hoeih sak hun ai, a thum hin ah bii ka coeng ai.” tila cet u langtah metaang tengah te thui pe uh.” a tina. ³³ Me tih khaw seh, kai ngoen tah tihin ah khaw, thangvuen ah khaw, awmvai ah khaw ka sai nooek te ka sai toengtoeng hun ai; metihtiah tawngha pakhat he Jerusalem khawpui khui nawh atah atloe ame huen ah khaw ngawn ham theen nawh.

³⁴ “Jerusalem, Jerusalem! Nang lawng tawngha thli te na ngawn, Pathen lawng na tengah avan tuih laipai thli te khaw lungto oen na de u! Aainu lawng a ca thli te a phe oen a khuk adah angla na thlaang thli te ka pooem hamla voei yahawh hlang ka ngaih de nang lawng ah na thana. ³⁵ Tedawngah nangmi kah Tempal bok-im te a hoett poen ai. Atak tang kavan thui u, ‘Bawipa miing oen aka law te Pathen lawng yotheenna pe hawn seh’ tila nangmi lawng na thuina atue te apha thlantoe kai he nan hu u tlaih manawh.” a tina.

¹ Sabbath khawhin hin at vengah Jesuh tah Farasi thlaang thli mawtkung pakhat im la te buh pan la cet; tevengah thlaang thli lawng Jesuh te rep a doen u. ² Thlaang pakhat a kut a khaw aka phiing te Jesuh tengla va law, ³ tevengah Jesuh lawng Phungawl cangpueikung thli oen Farasi thlaang thli te, “Mami kah Phungawl lawng Sabbath khawhin ah thlaangtlo hoeih sak ham a ngaih aw, ngaih nawh aw?” tila a doet.

⁴ Tede ahimi te awlmueh la awm u. Jesuh lawng thlaangtlo te a khue, a hoeih sak tih a tuih. ⁵ Tecoengah ahimi nala te, “Nangmi timkah thlaang pakhat kah a ca mai khaw, tihnawhtah vaitaw khaw, Sabbath khawhin ah ungrawmdung ah tla kawinih nangmi lawng doek pahoei ohla na awm ai aw?” a tina.

⁶ Tede he kawngah he ahimi lawng awl thung pe u nawh.

⁷ Kamyin khatsut lawngah huen theen koek a tuek u te Jesuh lawng a huh, tedawngah he kah thuidoetna he ahimi boeih tengah a thui pe: ⁸ ‘Thlaang pakhat khat lawng yuluina poei ah n’ceel vengah huen theen koek ah ngawl u boel. Nang lak ah awlpuila aka awm hinyah koei ngaai thlaang khaw a ceel thai mai, ⁹ tevengah nang hih te aka ceelkung lawngah na tengla law vetih nang nala te, ‘He ah he ahih ngawl seh.’ n’tina ai. Tevengah nang tah yah laat la ahemkoek huen ah te na ngawl ai. ¹⁰ Tedawngah nang te thlaang lawng n’khue vengah cet langtah ahemkoek huen ah te ngawl mai hawn, te atah nang te imkung lawng na tengla law vetih, ‘Ka puei, huen theen ngaai dawngah ngawl.’ ti ai. He tila te nang tah atloe kamyin boeih haiah hinyahna na dang ai. ¹¹ A-u khaw amah oen amah a pawm sang u atah adangla tla ai, a-u khaw amah oen amah adangla aka awm tah a pawmsang u ai.

¹² Tecoengah Jesuh lawng imkung nala te, “Nang lawngah hingthun buh khaw, thlembuh khaw, buh pan la thlaang na khue vengah na paya thli khaw, na imbe kuirang thlaanglen thli khaw khue boel. Metihtiah ahimi lawng nang te n’khue u van vetih te tila nang lawng na sai te avan thung van ai. ¹³ Nang lawng poei na sai vengah khawdeng thlaang, kut ngun khaw-ngun thlaang thli, kutkheem khowkheem thlaang thli oen mikpum thlaang thli te khue; ¹⁴ ahimi lawngtah nang te n’thung koep thai nawh vetih nang lawng yotheenna na dawng ai. Thlaangdoeng thli duekna kalawng a thawhna khawhin ah Pathen lawng nang te n’thung badai.” a tina.

¹⁵ Te kah buh veelna ah aka ngawl thlaang pakhat lawng he awl he a yaak vengah Jesuh nala te, “Pathen Ram khuikah buhlawi poei ah aka thuum van tah yotheen aka dawng ni!” a tina.

¹⁶ Jesuh lawng ahih nala te, “Thlaang pakhat lawng buhlawi a thawng tih thlaang yahawh thlaang te a ceel. ¹⁷ Buhlawi tel ham atue te a khoek veng atah kamyin thli te khue hamla amah kah tuihyoeihthlaang te a tuih tih, “Law u loeih, soeprep boeih te coekroek la awm poen!” a tina. ¹⁸ Tede ahimi boeih pakhat coeng pakhat lawngah peelnangna awl te a thui u. Lamhacuek kah thlaang lawngah tuihyoeihthlaang te tila a thui pe, “Lo ka lai tih ka cet silang ka bueh de ai; ka law thai manawh n’reen mai hawn.” a tina. ¹⁹ Thlaang pakhat lawngah, ‘Vaitaw bawh ngaa ka lai tih ka phep hamla awm; ka law thai manawh, n’reen mai hawn.’ a tina. ²⁰ Thlaangtloe pakhat lawngtah, ‘Ka yu ka lawh pek tih ka law thai manawh.’ a tina. ²¹ “Tuihyoeihthlaang te meel koep tih he ang thli boeih he a bawi manghai tengah a thui pe. Bawi manghai tah a thin sa tih a tuihyoeihthlaang nala te, ‘Khawpui khuikah lawngpui boeih oen imkep imvaai ah aloela cet langtah khawdeng thli, mikpum haaiying thli, kutngun, khowngun thli, kut kheem khow kheem thli te van law puei.’ a tina. ²² Bawt a awm atah tuihyoeihthlaang lawngah, ‘Bawipa, na awlpeek angla ka sai poen, tede awmna ham ahuen hoeng hun.’ a tina. ²³ Tedawngah a bawi manghai lawng a tuihyoeihthlaang nala te, ‘Ka im khuiah thlaang abetoetna ham manglai lawngpui oen lawnglak boeih ah cet langtah thlaang boeih te van law puei. ²⁴ Atak tang kavan thui, acuek kah thlaangceel thli a-u khat lawngkhaw ka buh ka aan he teng alai manawh.’ a tina” tila a thui pe.

²⁵ Voei khat vengah thlaangping yahawh hlang lawng Jesuh oen a ceh haih u vengah ahimi benla te maang tih tila a thui pe. ²⁶ “A-u khaw ka tengla aka law thlaang thli lawngah a manu oen ana pa te a lungna lak ah khaw, a yu oen a ca thli te a lungna lak ah khaw, a maya manau thli oen a ngannu thli te a lungna lak ah khaw, amah oen amah te a lungna u lak ah khaw kai he aka lungna ngaai nawh tah ka hubang la awm thai ma-nawh. ²⁷ A-u khaw amah kah thinglam te kawh ruila ka hu ah aka law nawh tah ka hubang la coengg thai manawh. ²⁸ Nangmi tim kah thlaang pakhat lawng imtloensang sak ham a kamthlah atah, bii coengna hamla tangka khoek ai aw tite ming ham lamhala ngawl vetih me yoeh aboeih ai tite a nai anawng ai. ²⁹ Te tila a nai anawng lamha nawh atah bii a tong tih lungdang a suem coengah imtloensang a sak te coeng thai nawh vetih thlaang lawngah a nuihna ai. ³⁰ ‘He thlaang lawngah he imtloensang tah a sak de bii khaw coeng thai nawh!’ ti u ai. ³¹ Sengpahrang pakhat ahih te teek ham raalkap thongkul oen aka law atloe sengpahrang pakhat te a raalkap thong ha oen kah hamla a ceh atah ahih lawng ngawl lamha vetih te sengpahrang te ka taa thai ai aw tite a poek ai. ³² A taa thai koei nawh atah ahih te teek ham aka law sengpahrang te athla hlangla a awm vengah laipai a tuih vetih roeproeina awl te a thui sak ai.” tila a thui pe. ³³ Jesuh lawng awlcuina ah, “Tetih van angla nangmi timkah pakhat lawngah soeprep boeih te a hoett nawh atah ka hubang la coengg thai manawh.” a tina.

³⁴ “Lungkeh tah theen, tede a aalna te a moelh atah aal sak koep ham sai thai la awm tlaih nawh. ³⁵ Laitheen la khaw, laimeen la khaw sai ham theen tlaih nawh; voeih ham ni a awm poen. Yaakna haa aka khueh lawngtah ya seh!” a tina.

¹ Hin at ah mangmu cawikung thli oen thlaangthawlh thli tah Jesuh kah awl thui hutung hamla law u, ² Farasi thlaang thli oen Phungawl cangpueikung thli tah caitoek u tih, “He thlaang lawngah he thlaangthawlh thli khaw a do tih ahimi oen buh Pateng khaw a caak haih u nawh pai he!” ti u. ³ Tedawngah Jesuh lawng ahimi tengah he kah thuidoetna he a thui pe;

⁴ Nangmi khuikah thlaang pakhat lawngah tuu yakhat khueh mai tih tuuping timkah pakhat te auh mai kawinih n’tu a sai ai? Ahih lawng tuu sawmkua pakua te ramtliim saino a awmna ramhum ah te a ceh taak vetih tuu aka auh te a dang thlantoe a tlap. ⁵ A dang koep veng atah awmngaih tangkiik tih a lengpang dawngah a kawh tih im la meel. ⁶ Tecoengah a paya thli oen a imbe kah thlaang thli te a khue tun tih ahimi nala te, “Ka awmngaih tangkiik, tuu aka auh vik te ka dang koep poen, n’awmngaih puei u lah!’ a tina. ⁷ Atak tang kavan thui u, tetih van angla thawlhna yut ham aka ngaih nawh thlaangdoeng sawmkua pakua lak ah thlaangthawlh pakhat lawng thawlhna a yut dawngah vaan ah awmngaihna yahawh ngaai awm ai.” a tina.

⁸ “Hutaa pakhat lawngah ngun tangka pheek ha a khueh ti mai lah sih, te khuikah pakhat te a auh atah n’tu a sai ai? Ahih lawng haiim te a vaang coengah im te a tell tih a huh thlantoe im khui tawm ah a tlap. ⁹ A huh koep veng atah a paya thli oen a imbe kah thlaang thli te a khue tun tih ahimi nala te, ‘Ka awmngaih tangkiik, ngun tangka aka auh te ka dang koep poen, ng’awmngaih puei u lah! a tina. ¹⁰ Atak tang kavan thui u, tetih van angla thlaangthawlh pakhat lawng a thawlhna a yut dawngah Pathen kah vanthlaang thli tah awmngaih u.” a tina.

¹¹ Jesuh lawng awl thui a tom koep tih, “Voei khat ah capa pahih aka khueh thlaang pakhat awm. ¹² A capa anoca lawngah te, ‘A Pa, ka paang ham koei ro te tahe ah m’pe mai hawn’ a tina. Tedawngah te kah thlaang lawngah a capa pahih ham ro te a pek pe. ¹³ Hin hih, hin thum coeng atah a capa anoca lawng te amah kah thaihu thli te a yoeih, tangka te a khuen tih atloela te cet. Ahih tah athlahlang ram la cet, te ah te awmtheen awmyaal aboen tih tangka a pooek ayak. ¹⁴ A khueh boeih te thloep a hawna. Tecoeng atah te kah ram pum ah te khawthe khawkha tih te vengah te ahih tah n’tu khat khaw khueh tlaih nawh. ¹⁵ Tedawngah te ram kah thlaang pakhat tengah bii bi hamla te cet, te kah thlaang lawng ahih te lo la a tuih tih awk a doen sak. ¹⁶ Ahih te a-u khat lawngkhaw caak koei a peek nawh dawngah awkbuh dawngkah maicik maidawn cang te a naai poen. ¹⁷ Hukhueng atah a lungcuih pan tih tila ti, ‘A pa kah bii aka bi thlaang thli lawng caak lek awkknaa nawh la buh a khueh u, kai tah he ah he ka lamlum tawm poen! ¹⁸ Ka tho silang a pa tengla ka cet ai, tecoengah tila ka tina ai, ‘A pa, Pathen oen nang sawah ka thawlh tangkiik poen. ¹⁹ Na ca ti hamla ka koeih tlaih nawh; namah kah bii aka bi thlaang la khaw n’khueh mai hawn, ka tina ai, tila a poek. ²⁰ Tecoengah tho tih ana pa tengla te koep meel. “Im kalawng athlana ah a law vengah te ana pa lawng a huh dinn tih a reen tangkiik, heeng phai tih a capa te koe a kop tih a mok. ²¹ A capa lawng, ‘A pa, Pathen oen nang sawah ka thawlh tangkiik oh poen. Na capa ti ham ka koeih tlaih nawh.’ a tina. ²² Tede ana pa lawng a tuihyoeihthlaang thli te a khue tih, ‘Angki theen koek te aloela van khuen u lang buen sak uh. Kutcabuen te buen sak u langtah khawmuek te khaw muek sak uh. ²³ Tecoengah cet u langtah vaitaw sak-awm paduuk te van khuen u langtah ngawn uh, poei sai u sih! ²⁴ Metihtiah ka capa he duek poen de tahe ah hing koep; ahih tah vi vik poen de tahe ah phumpho koep.’ a tina. Tecoeng atah poei te a sai u.

²⁵ “Te veng ah te a capa ahaamca te lo ah awm. Lawngpueng a law phai veng im a pha tawm atah riingding tum awl oen laa sak laam awl te a yaak. ²⁶ Ahih lawngah a tuihyoeihthlaang pakhat te a khue tih a doet, ‘N’tu a sai u?’ a tina. ²⁷ Tuihyoeihthlaang lawng ah, ‘Na nau te im la law koep tih sading ngaimawng la avan pha koep dawngah na pa lawng vaitaw sak-awm paduuk te a bawh pe.’ a tina. ²⁸ A capa ahaam te a thin sa soeh tih im khuila kuun nawh; Te atah ana pa te law tih im khuila kuun ham a capa te a thloep ahoelh. ²⁹ Tede a capa lawng ana pa nala te, “Bueh lah, kum san hlang sal angla nang ham bii ka bi, na awl te ngaai ohla vai khat khaw ka awm nawh. Kai ta n’tu nan peek? Ka paya thli oen awmtheenna poei sai ham me-ee pum at Pateng khaw nan pe nawh! ³⁰ Tede nang kah koe-ava te poeihcaih mai la thlaanghalhnu oen aka hawna na capa he im la a law koep atah vaitawca sak-awm te na bawh pe!’ a tina. ³¹ Ana pa lawng, ‘Ka ca, nang tah kamah tengah na awm tih ka toen thaihu boeih he nang kah thaihu ni. ³² Tede na nau he tah duek poen de tahe ah hing koep; ahih tah vi poen de tahe ah phumpho koep, tedawngah ka awmngaih tih poei ka sai u,’ tila a thui pe.” a tina.

¹ Jesuh lawng a hubang hue tengah, “Vai khat ah kuirang pakhat awm tih thaihu kuemkung tuihyoeihthlaang pakhat a khueh. Thaihu kuemkung lawngah a bawipa kah tangka apoei-oepla a hawna tila kuirang tengah a thui pe u, ² Tedawngah ahih te a khue tih, ‘Nang kah kawng alam ka yaak he metila a awmna? Ka thaihu boeih na kuemna cayin te m’pe loeih, nang tah thaihu kuemkung la na awm tlaih manawh.’ a tina. ³ Te kah tuihyoeihthlaang lawng a kaw khuiah, ‘Ka bawipa lawng kai he bii n’toeng sak poen ai. Metila ka ti lah ai? Tuilong to ham khaw ka tha lawng noeng koek nawh, Buh bih kutduen ham tah ka yak. ⁴ N’tu ka sai ai tite ka ming poen! Te tila ka sai atah ka bii he aboet ah khaw a im ah aka awm sak ham paya thli ka khueh poen ai.’ ti. ⁵ Tedawngah a bawipa kah laiba aka khueh thli te a khue. Lamhacuek kah thlaang te, ‘Ka bawipa kah lai meyoeh na ba pe?’ tila a doet. ⁶ Ahih lawngah, ‘Olif situi pung yakhat ka ba pe’ a tina. Thaihu kuemkung lawng, ‘He he nang kah cayin seh, ngawl thuk, sawm ngaa la mah thut mai hawn.’ a tina. ⁷ Tecoengah atloe pakhat te, ‘Nang ta, lai meyoeh na ba?’ tila a doet. Ahih lawngah, ‘Caanghum suum thong khat ka ba,’ a tina. Thaihu kuemkung lawng, ‘He he nang kah cayin seh, yareet la thut mai.’ a tina. ⁸ Te kah thaihu kuemkung lawng cuihna oen te tila thaihu a sai dawngah a bawipa lawng a koeh; metihtiah he dilai thlaang thli lawng amami kah thaihu a sai vengah aangna khuiah aka awm thlaang thli lak ah cuih u ngai.” a tina.

⁹ Tecoengah Jesuh lawng, “Tedawngah kavan thui u: dilai bawilenna koeva oen paya laikoei sai uh, bawilenna koeva aboeih coeng dengah ni dungyan im ah nangmi te n’khueh ai. ¹⁰ A-u khaw thaihu tehca dawngah uep-awm la a awm atah thaihu bo hlang dawngah khaw uep-awm la awm van ai; a-u khaw thaihu tehca dawngah uep-awm nawh atah thaihu bohlang dawngkhaw uep-awm van manawh. ¹¹ Tecoengah dilai bawilenna koeva khoembelna dawngah uep-awm nawh atah metila bawilenna koeva tang tang te nangmi m’peek ai? ¹² Tecoengah thlaang kah koeva thaihu dawngah uep-awm nawh atah namami kah thaihu te a-u lawng m’peek tang ai?

¹³ “Me ang tuihyoeihthlaang lawngkhaw bawi manghai pahih kah sal la awm thai manawh, ahih lawng pakhat te a thina vetih a khat te a lungna ai; pakhat teng atah a ciil cak vetih a khat te tah a hel acal ai. Nangmi lawng Pathen oen tangka kah bii te pahih bok la na bi renten thai manawh” a tina.

¹⁴ Tangka aka ngaih soeh Farasi thlaang thli lawng he kah awl boeih he a yaak u vengah Jesuh te a nuihna u. ¹⁵ Jesuh lawng ahimi nala te, “Nangmi lawng thlaangtloe kah mik huh atah thlaangdoeng la na sa u, tede nangmi kah thinkaw lungbui te Pathen lawng a ming. Metihtiah thlaang lawngah phutlo tangkiik la a poek thaihu thli he Pathen mik huh atah a phu awm nawh.

¹⁶ Mosi kah Phungawl oen tawngha thli kah cathut te tah Baptisma pekung Johan dung toe ah ni a cak; tecoeng kalawng tah Pathen Ram kawng Awlthang Theen te a phawng u tih thlaang boeih lawng toklekla kuun u. ¹⁷ Phungawl dawngkah a yitt koek a dek yet te a auh lak atah vaan oen dilai a auh te yoei ngaai.

¹⁸ “A-u lawngkhaw a yu te a ma tih yu tloe a lawh atah samphaih poen; tecoengah yu thlaak hutaa te khaw aka yuna thlaang tah samphaih poen ni,” a tina.

¹⁹ Voei khat tah kuirang thlaang pakhat awm tih hinaak himbai phutlo oen thoekcau u tih hin roekk ah awmtheen a boenn. ²⁰ Khawdeng thlaang pakhat Lazaruh aka miingna te awm van tih apum araw boeih ah vueihacang-ing lawng a yaawl, kuirang thlaang kah thawhka toela te avan law puei u, ²¹ kuirang thlaang kah caboi dawng kalawng aka tla buhdik anhaai te caak hamla a ngaiuep. Ui Pateng khaw law tih ahih kah vueihacang-ing te a leh pe. ²² “Khawdeng thlaang te a duek atah vaan kah poeipui ah Abraham tengah ngawlh sak hamla vanthlaang thli lawng a ceh puei u. Kuirang thlaang te khaw duek van tih a up u. ²³ Ahih tah Hell khuiah patang a khang, athlahlangla a dan hang vengah Abraham tengah Lazaruh aka ngawl te a huh. ²⁴ Te atah paang tih a khue, ‘A pa, Abraham! Kai he n’reen mai langtah Lazaruh te van tuih lah, a kutpue te tui dawngah nuemm selang ka daang he van suul lah seh, he kah hai khuiah he patang ka khang sut oh poen!’ a tina. ²⁵ Tede Abraham lawngah, ‘Ka capa, na hing khui puet ah thaihu theen boeih te m’peek poen, Lazaruh lawngtah athe thaihu boeih adang te ming lah saw. Tede, tahe ah ahih tah he ah he awmtheen a boenn tih nang tah patang na khang poen. ²⁶ Tecoengah mami kah laklaw ah longhoi dung pakhat awm, tedawngah he kalawng ah he nang na awmna benla laan hamla aka ngaih thli khaw laan thai nawh, nang na awmna kalawng kaimi benla he a-u khatca khaw laan thai nawh? a tina. ²⁷ Kuirang thlaang lawngah, ‘Tetih atah, A pa Abraham, reenna kavan bih, Lazaruh te a pa im la tuih lah, ²⁸ te ah te ka manau thli pa ngaa awm hun. Lazaruh te tuih langtah ahimi khat lawngah khaw he kah patang khangna ahuen he avan phana u nawh ham ahimi tengah ngaithuenna awl van thui pe lah seh.’ a tina. ²⁹ Abraham lawngah, ‘Na manau hue te ngaithuen awl thui pe ham Mosi oen tawngha thli awm ta,’ ahimi kah awl thui te na nau hue lawng hutung ngoen seh,” a tina. ³⁰ Kuirang thlaang lawngah, ‘A pa Abraham, tete khoek nawh! Thlaang pakhat khat he duekna kalawng tho tih cet kawinih ahimi lawngah a thawlhna te yut ai,’ a tina. ³¹ Tede Abraham lawngah, ‘Ahimi lawngah Mosi oen tawngha thli kah awl te a hutung u nawh atah thlaang pakhat khat duekna kalawng tho mai cakhaw ahimi lawng tangna manawh,’ tila a thui pe,” a tina.

¹ Jesuh lawng a hubang hue tengah, “Thawlhna khuiah thlaang aka tlaak sak thaihu thli awm ngai khoek ai, tede te ang tlaakna te aka sai thlaang thli ham tah khawmap tangkiik! ² He camaw tim kah pakhat mai khaw thawlh sak lak atah caang neetna lungto bohlang a rawn a awi tih tuitunlii khuiah tla kawinih ahih ham theen bet ai. ³ Tedawngah na sai ham koei te ngaithuen uh! Na boenhui te a thawlh atah ahih te toel athaam, a yut alawi atah a sawah khawdawp ngaai peh. ⁴ Ahih lawng hin at ah voei sarih na sawah thawlhna a sai tih voei sarih van na tengah law tih, ‘Ka yut oh poen,’ a ti atah a sawah khawdawp van ngaai peh,” a tina.

⁵ Celtuih thli lawng Bawipa nala, “Kaimi kah oengna he van roeng sak lah,” a tina u.

⁶ Bawipa lawngah, “Nangmi lawng antammu teh mai mah oengna te na khueh u atah he kah songlet thing he, ‘Na yung oen haih ah namah poek ah phuk u langtah tuitunlii ah namah poek ah liing u lah,’ na tina atah nangmi awl te avan ngaai ai,” a tina.

⁷ “Nangmi tim kah thlaang pakhat lawngah laithawl aka sai mai khaw, tuudoen mai khaw seh tuihyoeihthlaang pakhat na khueh ti mai lah sih. Ahih te lo kalawng law tih a paipuek ah, ‘Aloela buh ca loeih’ na tina u ai aw? ⁸ Na tina u manawh! Te tila na tina lak ah nang lawng, ‘Kai hamla thlembuh van lo de lah, tecoengah rangkhukna angki te buen langtah buh ka caak vengah kai he n’toet de lah; tecoengah buh te na caak badai,’ na tina ai. ⁹ Te kah tuihyoeihthlaang lawng awl a ngaai dawngah te awmngaih awl thui pe ham ngoe nawh de lah koen? ¹⁰ Nangmi khaw te tila na awm u van, sai hamla avan thui boeih te na sai u coengah, ‘Kaimi tah tuihyoeihthlaang mai ni; kamami kah sai ham koei te ni ka sai u’ ti u mai hawn,” tila a thui pe.

¹¹ Jerusalem khaw benla Jesuh a ceh phai vengah Samaria oen Galili laklaw ramri ah te cet. ¹² Vangca pakhat la ahih te a kuun vengah haibe aka na thlaang paha a tengla law u. Ahimi lawngah athlala hoer pai u tih, ¹³ “Bawipa Jesuh! Kaimi he n’reen lah!” tila paang u.

¹⁴ Jesuh lawng ahimi te a huh vengah, “Cet u langtah nangmi te khawsoeih thli lawngah n’yutt n’yam u seh.” a tina. Lawngpueng a ceh phai u vengah ahimi tah boeih hoeih u. ¹⁵ Ahimi tim kah pakhat lawngah ka hoeih poen tila a ming vengah, meel koep tih angaihhlangla Pathen te a koeh. ¹⁶ Jesuh kah a khowkungah dilai dawng buekuep tih Jesuh tengah uemna awl a thui. Te thlaang te tah Samaria thlaang ni. ¹⁷ Jesuh lawng, “Thlaang paha hoeih u de lah koen ni, atloe pakua hue teta mela oh kai? ¹⁸ N’tu ah he kah thlaangphun tloe pakhat bueng lawngah Pathen thangpawm ham a va meel koep?” a tina. ¹⁹ Jesuh lawng ahih nala te, “Tho lang cet loeih; na oengna lawng n’hoeih sak poen,” a tina.

²⁰ Farasi thlaang khatsut lawng Jesuh nala te, “Pathen Ram he mevengah avan pha ai,’ tila a doet u. Ahih lawng awl a thung pe tih, ‘Pathen Ram he tah huh thai koeila law manawh. ²¹ A-u lawngkhaw, ‘Bueh lah he ah awm he! tihnawhtah, te ah awm te!’ tila thui thai manawh, metihtiah Pathen Ram tah namami khuiah ni a awm.” a tina.

²² Tecoengah a hubang hue te, “Thlaanghing Capa kah Khawhin hin at te nangmi lawng huh hamla na ngaihna atue law ai, tede nangmi lawng na hu u manawh. ²³ Nangmi tengah, ‘Bueh lah, ke ah awm ke!’ tihnawhtah, ‘Bueh lah, he ah awm he!’ tila aka thui thlaang awm ai. Tede tlap hamla cet u boel. ²⁴ Thlaanghing Capa kah khawhin tah khaw thlap apha vengah khawhi-mikboet akhatben kalawng khatben toe ah a aangna lawng a thue rawngtheng angla te awm ai. ²⁵ Tede ahih lawngah lamhala patang palai a khang vetih tihin hang kah thlaang thli lawng ahih te a hoett u ai. ²⁶ Noah dung vengkah a awm angla te Thlaanghing Capa kah khawhin vengah khaw awm van ai. ²⁷ Noah te lowng khuila a kuun khawhin toe ah thlaang thli lawng a caak a awkk u tih hutaa tawngpa lawng yu a lawh u tih vaa a sak u, tuiliwpui law khuengdeng tih ahimi te boeih a khuk. ²⁸ Lot dung vengah a awm angla te awm van ai. Thlaang boeih lawng a caak a awkk u, thaihu a lai u tih a yoeih u, thingkung rawkung a liing u tih im a sak u. ²⁹ Lot lawng Sodom khaaw te a thawh taak hin vengah vaan kalawng hai oen kat hai te, khaw angla tlan tih ahimi boeih te a ngawn. ³⁰ Thlaanghing Capa kah khawhin a thoeng vengah khaw te tila awm van ai.

³¹ Te khawhin ah amah kah imphu ah aka awm lawng a thaihu thli te lawh hamla im khuila kuun re tlaih boel seh; te tila te lo ah aka awm thlaang lawngkhaw im la meel koep tlaih boel seh. ³² Lot kah a yu te hilh u boel! ³³ A-u khaw a hingna te thlawn hamla a yawm atah a hingna te sung ai; A hingna te a sung atah hingna te a dang ai. ³⁴ Nangmi tengah kavan thui u, te kah khawhin ah ihkhun dawngah aka ip haih thlaang pahih khuiah pakhat te a lawh vetih a khat te a ceh taak ai, ³⁵ Sum deeng haih hutaa pahih khuiah pakhat te a lawh vetih pakhat te a ceh taak ai. ³⁶ Lo ah bii aka bi haih thlaang pahih khuiah pakhat te a lawh vetih pakhat te a ceh taak ai.” a tina.

³⁷ A hubang hue lawng ahih te, “Bawipa, te tila te me tuek ah a awm ai?” tila a doet u. Jesuh lawngah, “Duek rawkk a awmna roekk ah langta thli tun ai,” a tina.

¹ Tecoengah Jesuh lawng a hubang hue te thathe muehla thangthui poepa ham awm tite cangpueina hamla thuidoetna pakhat ahimi tengah a thui pe. ² Ahih lawngah, “Khawpui pakhat ah Pathen khaw rih nawh tih thlaang khaw aka hinyah nawh awlcekbawi pakhat awm. ³ Te kah khawpui khuiah te huhai pakhat awm van, ahih lawngah awlcekbawi tengla law tih, ‘Ka raal te a dokna ham n’bawm de lah!’ tila a bih poepa. ⁴ Awlcekbawi lawng a thana khiing de aboet lam atah, ‘Kai lawng Pathen Pateng ka rih nawh tih thlaang khaw ka hinyah nawh, ⁵ he kah huhainu lawng he n’lawn khiing aih poen dawngah awl ka tloek pe mai poen ai. Te tih nawh kawinih law poepa vetih hukhueng atah kamah he patang m’peek lat ai!? ti.” a tina.

⁶ Tecoengah Bawipa lawng, “Adoengla awl aka cek nawh awlcekbawi kah awl te hutung u lah. ⁷ Te atah amah tengah khawyiin khawdaai paang tih bawmna aka bih thlaang thli ham ah Pathen lawng adoengla awl te cek nawh ai aw? Ahimi te bawm hamla a tat loe nawh ai aw? ⁸ Nangmi tengah kavan thui, ahih lawngah ahimi kah ngaihna angla awl a cek vetih aloela a sai pe ai. Tede Thlaanghing Capa lawng a Law vengah dilai sawah he oengna te a huh ai aw?” a tina.

⁹ Amah kah theenna te a uepna tih thlaang boeih te tula aka sak nawh thlaang thli tengah he kah thuidoetna he Jesuh lawng a thui pe. ¹⁰ “Voei khat ah thlaang pahih tah thangthui hamla Tempal bok-im la cet hih: Pakhat te tah Farasi thlaang la awm tih a khat te tah mangmu cawikung la awm. ¹¹ Farasi thlaang lawngtah amah bueng pai tih, “Aw, Pathen, kai tah ngaihmoekna aka khueh thlaang, hoem thui thlaang, samphaih thlaang, he ang thlaang thli angla ka awm nawh dawngah kan uem tangkiik. He kah mangmu cawikung angla khaw ka awm nawh dawngah kan uem baal ¹² Kai tah yarh khat ah hin hih buh ka yeh tih, tangka ka dang boeih khuikah paha ah pakhat te nang kan peek.” tila thangthui. ¹³ Tede mangmu cawikung tah athlala pai tih vaan benla Pateng maang ha nawh, a raang te a tum tih, ‘Aw Pathen, kai thlaangthawlh he n’reen lah,’ tila thangthui. ¹⁴ Nangmi tengah kavan thui u, mangmu cawikung lawng Pathen haiah doengna te a huh tih im la meel. Farasi thlaang lawng atah doengna te hu nawh. A-u khaw amah oen amah a pawmsang u atah adangla tla vetih a-u khaw amah oen amah te adangla aka awm tah a pawmsang u ai.

¹⁵ Thlaang khatsut lawng a ca camaw thli te Jesuh lawngah a sawah a kut tloeng pe selang tah thangthui pe seh a ti u dawngah Jesuh tengla avan law puei u. A hubang hue lawng a huh u tih ahimi te a ho u, ¹⁶ tede Jesuh lawng camaw thli te amah tengla a khue tih, “Camaw thli te ka tengla law seh, ahimi te kanghalh u boel, metihtiah Pathen Ram tah he ang camaw thli kah ni. ¹⁷ He he hilh u boel! A-u lawngkhaw Pathen Ram te camaw angla a do nawh atah te Ram ah kuun manawh.” a tina.

¹⁸ Judah thlaang mawtkung pakhat lawng Jesuh te, “Cangpueikung Saya Theen, dungyan hingna ka dangna ham n’tu ka sai ai? tila a doet.

¹⁹ Jesuh lawng ahih te, “N’tu ah kai he thlaang theen nan tina? Pathen pakhat bueng nawh atah a-u khat khaw theen nawh.” a tina. ²⁰ Awlpeek thli te na ming te ta: ‘Hutaa tawngpa thawlhna sai boel; thlaang ngawn boel; huuen boel; asoeng nawh la thlaang te thawlh peel boel; na nu oen na pe te hinyah;’ ti de lah koen.” a tina.

²¹ Te thlaang lawngah, “He kah awlpeek boeih he ka camaw veng kalawng ka vai boeih poen.” a tina.

²² Jesuh lawng he awl he a yaak vengah ahih nala te, “Nang lawng na sai ham pakhat a ngoe toengtoeng hun. Na khueh boeih te yooei langtah tangka te khawdeng thli te peh, te atah nang lawng vaan ram ah koeva thaihu na dang ai; tecoengah law langtah ka hu ah bang lah.” a tina. ²³ Tede te kah thlaang lawng he awl he a yaak vengah a kaw la the malcal, metihtiah ahih tah broela a bawi alen dawngah ni.

²⁴ Jesuh lawng ahih kah kawthe te a huh vengah, “Kuirang thlaanglen ham tah Pathen Ram khuiah kuun hamla rai tangkiik oh he! ²⁵ Kala-uk pakhat phaimeet khuiah a kuun lak ah kuirang thlaang pakhat lawng Pathen Ram khuiah kuun ham rai tangkiik,” a tina.

²⁶ Ahih kah awlthui te aka ya boeih lawngah, “Tetih atah a-u lawng thlawnna te a dang ai,” tila a doet.

²⁷ Jesuh lawng, “Thlaanghing ham aka coengg thai tlaih nawh te Pathen ham tah coengg thai.” tila a thui pe.

²⁸ Tecoengah Piter lawng, “Bueh lah! Na hu ah bang hamla kaimi lawngtah ka im khaw ka ceh taak u poen he.” a tina.

²⁹ Jesuh lawng ahimi nala te, “Oeih, atak tang kavan thui u, a-u khaw Pathen Ram kawngah a im khaw, a yu a ca thli khaw, maya manau khaw, a manu oen ana pa khaw, ca-anau thli khaw aka ceh taak tah, ³⁰ tahe san ah khaw, a pueh alawila a dang vetih aka law ham koei san ah khaw dungyan hingna te a dang ai.” a tina.

³¹ Jesuh lawng hubang thlaihih te ahuep ahelna ah a ceh puei tih, “Hutung u lah! Mami he Jerusalem la n’cet u ai, te ah te tawngha thli lawng Thlaanghing Capa kawng a thut oepsoeh boeih te soep ai. ³² Ahih te Gental thlaang thli kut ah a peek u vetih nuihbu la a sai u ai, a sal aphaam u vetih a tumthoeih u ai. ³³ Ahimi lawngah a bawh u vetih a ngawn ai, tede athum hin ah tho koep ai.” tila a thui pe.

³⁴ Tede a hubang hue lawng he ang thli he khat khaw yaakming u nawh; ahimi ham tah he kah awl thuingaihna he thuhphah la awm tih Jesuh lawng a thui pe akawng alam he ming u nawh.

³⁵ Jesuh tah Jeriko khaaw te a pha tawm, tevengah lawngteng ah mikpum thlaang pakhat ngawl, kut a duen tih buh a bih. ³⁶ Ahih lawngah thlaangping kah ceh tuen awl te a yaak vengah, “He he n’tu muuem ca?” tila thlaang thli te a doet.

³⁷ Ahimi lawngah, “Nazaret khaaw kah Jesuh va law” a tina u.

³⁸ Ahih lawngah paang tih, “Devid capa, Jesuh! Kai he n’reen lah.” a tina.

³⁹ Hai ben kah aka cet thlaangping lawngah ahih te a tlung u tih duem awm ham a thui pe u. Tede ahih lawngah angaihhlangla paang tare tih, “Devid capa, kai he n’reen lah!” a tina.

⁴⁰ Tevengah Jesuh te cot pai tih te kah mikpum te a tengla te van law puei uh a tina. A teng avan pha atah Jesuh lawngah, ⁴¹ “Nang hamla n’tu kavan sai ai?” tila a doet. Ahih lawng, “Bawipa, ka mik he a tueng koep ham ka ngaih.” a tina.

⁴² Jesuh lawng, “Na mik tueng koep seh! Na oengna lawng na mik avan tueng sak poen.” a tina.

⁴³ Ahih te a mik tueng pahoei, Jesuh hu ah bang tih Pathen tengah awmngaih awl a thui. Te tila a awm te thlaangping lawng a huh vengah ahimi boeih lawng Pathen te a thangpawm u.

¹ Jesuh tah Jeriko khaw la kuun tih te kalawng poe cet. ² Te ah te Zakia aka miingna mangmu cawikung bawi pakhat awm tih ahih tah bawireng tangkiik. ³ Jesuh he a-u kai ti tih huh hamla a yawm, tede ahih tah thlaang hemm la awm tih thlaangping lawng a thlip khoep dawngah Jesuh te hu thai nawh. ⁴ Tedawngah Jesuh a cehna koei ben ah thlaangping kah hai benla heeng phai tih ahih te a huhna ham thaihba thing dawngah luui. ⁵ Jesuh lawng te huen te a pha atah asaw benla maang hang tih Zakia nala te, “Zakia, aloela rum thuk, tihin ah nang im ah ka pah ai.” a tina.

⁶ Zakia tah aloela rum thuk tih awmngaih cala ahih te a pah sak. ⁷ Te tila a awm te thlaang thli lawng a huh u vengah, “He kah thlaang he thlaang-thawlh im ah pah hamla a ceh maica!” ti tih caitoek u.

⁸ Zakia lawng pai hang tih Bawipa nala te, “Bawipa, hutung lah! Ka khueh thaihu avaang athal ah khawdeng thlaang thli ka pe ai, thlaang ka thai ka latna tih thaihu ka lawh pe atah apueh asawm let lii la ka sah ai.” a tina.

⁹ Ahih te Jesuh lawng, “He kah im ah thlawnna ti hin ah a pha poen, metihtiah ahih khaw Abraham kah cadil van ni. ¹⁰ Thlaanghing Capa tah thlaangha paataam tlap ham oen ah thlawn ham ni a law.” a tina.

¹¹ Thlaangping hue lawng awl a hutung u lii vengah he kah thuidoetna pakhat he a thui pe. Jerusalem te a pha tawm u poen tih ahimi lawngtah Pathen Ram he tueng pahoei poen ai tila a poek u. ¹² Tedawngah tila a thui pe, “Voei khat ah areng aka sang thlaang pakhat awm tih sengpahrang la coengg ham khaw thla la cet, tecoeng atah im la meel koep hamla te kamthlah. ¹³ A ceh thlan ah tuihyoeihthlaang paha te a khue, ahimi te sui tangka pheek at rip a peek tih, “Khawlawng la ka ceh ruet ah, he kah tangka oen thaihu thaiha yooei uh.” a tina. ¹⁴ Tede ahih te a ram khuikah thlaang thli lawng a thina u dawngah laipai a tuih u tih, “He kah thlaang he kaimi lawngah sengpahrang la ka ngaih u nawh.” tila te a thui sak u.

¹⁵ Te kah thlaang te sengpahrang la a awm coeng atah koep meel. A tuihyoeihthlaang thli lawng tangka apuung ataai meyoeh a dang kai tite ming a ngaih tih ahimi te pahoei a khue. ¹⁶ Lamhacuek kah thlaang te law tih, ‘Bawipa! Nang lawng nan peek tangka pheek at oen thaihu thaiha ka yoeih tih apuung ataai sui tangka pheek ha ka dang,’ a tina. ¹⁷ Tevengah ahih lawng, ‘Theen! Nang tah aka theen tuihyoeihthlaang ni! Nang tah thaihu tehca dawngah uep-awm la na awm tih khawpui paha ukkung la kan khueh ai.’ a tina. ¹⁸ Tecoengah a pahihna tuihyoeihthlaang te law tih, ‘Bawipa, nang lawng nan peek tangka pheek at oen thaihu thaiha ka yoeih tih apuung ataai sui tangka pheek ngaa ka dang,’ a tina. ¹⁹ Ahih te khawpui pa-ngaa ukkung la na awm ai,’ a tina. ²⁰ Atloe tuihyoeihthlaang te law tih, ‘Bawipa, nang kah tangka te awm ngoen he; baipeen oen ka cuun tih ka kuem mangkhak ta.’ a tina. ²¹ Nang tah amangkhak thlaang la na awm tih kan rih tangkiik. Nang lawngtah namah kah thaihu nawh khaw na lawh tih caangti na tuh nawh te khaw na ah mai? a tina. ²² Ahih nala te, ‘Nang thlaangthe tuihyoeihthlaang! Na awlthui te namah awlcekna ham ka hawna ai! Kai he amangkhak thlaang, kamah kah thaihu nawh khaw ka lawh tih caangti ka tuh nawh te khaw ka ah te na ming ta. ²³ Theen, te atah, n’tu ah tangka kuemna bengh ah ka tangka te na khueh nawh? Ka meel koep vengah tangkaca oen acingrang la ka dang ai ta.’ a tina. ²⁴ Tecoengah te kah aka pai thlaang thli nala te, “Ahih tengkah sui tangka te lo u langtah tangka pheek ha aka khueh tuihyoeihthlaang te pe uh.’ a tina. ²⁵ Tede ahimi lawng, ‘Bawipa, ahih tah tangka pheek ha a khueh poen ta!’ a tina u. ²⁶ Ahih lawng awl a thung pe tih, ‘Kavan thui u, yahawh hlang aka khueh te yahawh ngaai a peek ai; tede aka khueh nawh te a khueh duen Pateng khaw a lawh pe ai. ²⁷ Kai he amami kah sengpahrang la awm sak ham aka ngaih nawh ka raal thli te van law puei u langtah ahimi te ka hai ah ngawn uh!’ a tina” tila a thui pe.

²⁸ Jesuh lawng he kah thuidoetna awl he a thui coengah ahimi haiah Jerusalem la te cet. ²⁹ Olif Tlaang tengkah Betfat oen Bethani khaaw te a pha u tawm atah a hubang pahih te hai la a tuih tih tila awl a uen: ³⁰ ‘Na hai kah khaaw la ke an cet hih langtah khaaw khuila na kuun hih vengah a-u lawngkhaw a cit thlan lacano pakhat a kiing u te na huh pahoei hih ai. A kiingna rui te thlam hih langtah he la he van khuen. ³¹ Thlaang pakhat khat lawngah n’tu ham rui te na thlam a ti atah, Bawipa lawng a ngoe tila thui peh.” a tina.

³² Ahih rawi lawng cet hih tih Jesuh lawng a thui pe angla soeprep boeih te a huh. ³³ Ahih rawi lawng lacano a khihna rui te a thlam hih lii vengah la khuehkung lawngah ahih rawi nala te, “N’tu hamla rui te na thlam hih?” a tina.

³⁴ Te rawi lawngah, “Bawipa lawng a ngoe,” a tina hih tih, ³⁵ Jesuh tengla lacano te a khuen pe. Tecoengah ahimi lawngah amami kah himbai te lacano kah a uen dawngah a phaih u tih Jesuh te a ngawlh sak u. ³⁶ Jesuh lawng lacano te a cit tih a ceh phai vengah thlaangping lawng amami kah himbai te lawngpui ah a phaih u.

³⁷ Jerusalem te a pha tawm tih Olif Tlaang tengkah singlingla lawngpui a rum thukna ahuen kalawng tah a hubang thli thlaangping lawngah kawpoek rai thaihu thli te a huhna dawngah Pathen te a uem u tih angaih-hlangla a thangpawm u: ³⁸ “Bawipa miing oen aka law sengpahrang tah Pathen lawng yotheen kam-awmna pe hawn seh! Vaan ah roepna awm selang Pathen tengah ruep-awmna awm hawn seh!” tila paang u.

³⁹ Tevengah thlaangping timkah Farasi thlaang khatsut lawng Jesuh nala te, “Saya, na hubang thli he awl a phahna ham thui pe lah,” a tina u.

⁴⁰ Jesuh lawngah, “Kavan thui u, ahimi lawng awl phah sap kawinih lungto thli lawng amah poek ah paang ai ta.” a tina.

⁴¹ Jerusalem khawpui te a pha tawm tih, Jerusalem te a huh atah rap. ⁴² “Tihin ah ngaimawngna hamla n’tu angoe ti bueng mah te na ming u mai kawinih! Tede nang lawng tahe ah na hu thai nawh! ⁴³ Nang he na raal thli lawngah raalvawng oen ceemraal oen ah n’duum khoep vetih khatben khatbang kalawng n’khaih khoepna khawhin te a pha ai. ⁴⁴ Ahimi lawngah nang te m’phe phengvel vetih na vawngup khuiah na thlaang thli te a ngawn dingkang poen ai. Ahimi lawng lungto khatca khaw khupthal ohla awmna huen ah ceh taak u manawh, metihtiah nang thlawn hamla Pathen a lawna atue atang te na ming nawh dawngah ni!” a tina.

⁴⁵ Tecoengah Jesuh tah Tempal bok-im khuila kuun tih thaihu aka yooei thlaang thli te pheng a vai, ⁴⁶ ahimi nala te, “Caciim dawngah, Pathen lawng, ‘Kai kah Tempal bok-im tah thangthuina im tila a thui u ai.’ tila a thut te ta. Tede nangmi lawngtah thlaanghuuen pa caan thli kuepyingna la na sai u poen.” a tina.

⁴⁷ Jesuh lawng khawhin roekk ah Tempal bok-im khuiah a cang puei u. Khawsoeih ahaamca thli, Phung-awl cangpueikung thli oen thlaangping mawtkung thli lawng ahih te ngawn ham a ngaih u, ⁴⁸ tede thlaang boeih lawng ahih awl te a thung u tih lung at khaw thlauh ham a ngaih u nawh dawngah ahimi lawng te tila te sai ham along a-im hu u nawh.

¹ Hin at ah Jesuh lawng Tempal bok-im khuiah thlaang thli te a cang puei tih Awlthang Theen te a phawng, khawsoeih ahaamca thli oen Phungawl cangpueikung thli, bokna ben kah ahaamca thli thik at la haih law u tih, ² ahih nala te, “He thaihu thli sai hamla ame ang saithaina na khueh? Saithaina aana he a-u lawng m’peek? van thui lah” a tina u.

³ Jesuh lawng ahimi nala, “Nangmi he tahe ah awl khat ah kan doet u van lah ai. ⁴ Johan lawng baptisma peek ham saithaina aana he Pathen tengkah a huh aw, tihnawhtah thlaanghing tengkah aw? Van thui u lah,” a tina.

⁵ Ahimi lawngah amami oen amami te oelhtaih khiing u tih, “Metila n’thui u lah ai? ‘Pathen tengkah a dang,’ tila n’thui pe kawinih ahih lawngah, ‘N’tu ah Johan te na tangna u nawh ti ai ta. ⁶ Tede mami lawng, “Thlaanghing tengkah ni,’ n’tina u kawinih he kah thlaang boeih lawngah Johan he tawngha tangtang ni tila a oeng u dawngah lungto oen n’de ai,” ti u. ⁷ Tedawngah ahimi lawng, “Ame kah nuem ka ming u nawh.” a tina u.

⁸ Te atah Jesuh lawng ahimi te, “Tetih atah kai lawngkhaw he kah thaihu thli he ame kah saithaina aana oen ka sai ti he ka thui van manawh” a tina.

⁹ Tecoengah Jesuh lawng thlaangping hue te he kah thuidoetna awl he a thui pe: “Thlaang pakhat lawngah misurdum a sai tih dum te thlaang a vat, tecoengah amah tah khawlawng thla la cet tih asan hlang awm. ¹⁰ Misur thaih bit tue a pha veng atah a salpa pakhat te dum vat thlaang thli tengla a tuih tih amah lawng ahimi tengkah dang ham koei te a lawh sak. Tede dum aka vat thlaang hue lawng a salpa te a tam doetthloet u tih atliing saloella a meel sak u. ¹¹ Tecoengah atloe a salpa pakhat te a tuih koep; tede dum aka vat thlaang thli lawng ahih te khaw a bawh doetthloet u tih athe akhana u, yah a bai u tih atliing saloella te a meel sak u. ¹² Tecoengah a pathumna a salpa te a tuih; dumvat thlaang thli lawngah ahih te khaw boengha a caak sak u tih dum adaubenla a voeih u. ¹³ Tecoeng atah dumkhuehkung lawng, ‘Metila ka sai lah ai? Ka lungna duet ka capa he man nih ka tuih mai poen sui, ahih ngoen tah a hinyah u ngai badai!’ ti. ¹⁴ Tede dum vat thlaang thli lawng ahih te a huh u vengah, ‘Ahih he tah dum khuehkung kah a capa ni. Ngawn u sih, ahih lawng a paang ham koei ro he mami ham awm seh!’ tila a thui u. ¹⁵ Tedawngah ahimi lawng a capa te dum adaubenla a khuen u tih a ngawn u.

¹⁶ Ahih te law vetih te kah thlaang thli te a ngawn coeng atah misurdum te thlaangtloe a vat ai.” tila a thui pe. Thlaangping lawng he awl he a yaak u vengah, “Te tila te awm roe mai boel seh!” ti u.

¹⁷ Jesuh lawng ahimi te he tila a doet, “Caciim dawngah, im aka sa thlaang thli lawng aphu aka awm nawh angla a hoett u lungto te atloe boeih lak ah awlpui koek la coengg,’ tila a thui te ta n’tu a thuingaihna? ¹⁸ A-u khaw te kah lungto dawngah aka tla boeih tah adiik anuui la rek vetih te kah lungto lawng a tlaak thil thlaang te khaw adiik avaai la a neet ai.” a tina.

¹⁹ Phungawl cangpueikung thli oen khawsoeih ahaamca hue lawng he kah thuidoetna awl he amami ni a thuingaihna tite a ming u dawngah Jesuh te tuuk pahoei ham a ngaih u; tede ahimi lawngah thlaangping te a rih u. ²⁰ Tedawngah ahimi lawng atue theen te a ring u. Tedawngah saithaina aana aka khueh Rom acoyah kah ram ukbawi kut ah Jesuh te peek thai ham, thlaang khatsut te thlaangdoeng la aka sa u ham tangka kutsuh a peek u tih Jesuh te awl kaa doetdapna oen thawlhna te thuep aka doen la a tuih u. ²¹ He kah raalyam thlaang hue lawngah Jesuh nala te, “Saya, nang lawng na thui tih na cang puei thli he soeng tila ka ming u. Nang lawngtah thlaang mik-hai khaw dan muehla Pathen kah kawngaihna akawng awltak te na cang puei tila ka ming u. ²² Kaimi lawngah Rom sengpahrang sangluel tengah mangmu peek hamla mami kah Phungawl oen kalh u the aw, kalh u nawh aw? van thui lah.” a tina u.

²³ Tede Jesuh lawng ahimi kah thailatna te thiim a ming tih, ²⁴ “Ngun tangka pakhat ah n’huh sak u lah. Tangka dawngah a-u kah muei-ame oen a miing a awm?” a tina. Ahimi lawngah, “Sengpahrang sang-luel kah mueime oen a miing awm,” a tina u.

²⁵ Tedawngah Jesuh lawng, “Tetih atah Sengpahrang sangluel kah koe te sengpahrang sangluel te pe uh, Pathen kah koe te Pathen pe uh” a tina.

²⁶ Ahimi lawng thlaangping hai ah te a thawlhna khat khaw tu u thai nawh, ahih kah awlthungna te a kawpoek la rai u tih awl mueh thuep la awm u.

²⁷ Tecoeng atah, thlaang he duekna kalawng ah tho koep nawh tila aka thui Sadusi thlaang khatsut te Jesuh tengla law u tih ahimi lawng, ²⁸ “Saya, Mosi lawngtah kaimi ham phungawl tila avan thut: ‘Thlaang pakhat lawng a ca sak muehla a yu te a duek taak atah a manau lawng a maya yu te paang seh, ca-anau cuun selang tah aka duek a maya kah ca-anau ti u seh,’ tila a thut. ²⁹ Voei khat ah boenhui pasarih awm; ahaam koek lawng te yu a lawh de ca sak muehla duek. ³⁰ Tecoengah apabena lawngah te kah hutaa te a yuna tih ca sak muehla a duek taak van. ³¹ Tecoengah apathumna a manau lawng a yuna de ca sak muehla a duek taak baal. Te tila te boenhui pasarih lawng ca sak muehla boeih a duek taak u. ³² Hukhueng atah te kah hutaa khaw duek van. ³³ Boenhui thlaang pasarih lawng ahih te a yuna u, tetih atah thlaangduek thawhkoepna khawhin ah a-u kah a yu la a awm ai?” tila a doet u.

³⁴ Jesuh lawng ahimi te, “Hutaa oen tawngpa lawngah hingkhui vengah ni yu vaa la a awm ai, ³⁵ tede duekna kalawng aka tho ham koei hutaa oen tawngpa hue tah aka law ham koei hingna dawngah yuvaa la awm tlaih manawh. ³⁶ Ahimi tah vanthlaang angla awm u vetih duek thai manawh. Ahimi tah duekna kalawng tho koep u poen tih Pathen kah ca-anau la ni a awm u poen. ³⁷ Thlaangduek tho koep ai ti he Mosi lawng aciimphanla a thui. A boeih tangte tangpuem ungna kawng a thuina dawngah Bawipa te, ‘Abraham Pathen, Isak Pathen oen Jakob kah Pathen,’ tila a thui. ³⁸ Ahih tah aka hing hue kah Pathen la awm tih aka duek thli kah Pathen nawh ni, ahih dawngah thlaang boeih tah hing.” tila a thui pe.

³⁹ Phungawl cangpueikung khatsut hue lawngah, “Saya, awl na thung pe he theen!” a tina u. ⁴⁰ Tedawngah ahimi lawng Jesuh te awl kam at khaw doet ha u tlaih nawh.

⁴¹ Jesuh lawng ahimi nala te, “Messiah tah Devid cadil la awm ai tila te metila a thui thai u kai? ⁴² Metihtiah Devid amah lawng Saam cabu dawngah, ‘Bawipa lawng ka Bawipa tengah, ⁴³ Na raal thli te na khowtloeng la ka sai thlantoe Ka bantang ben ah he ngawl lah,’ tila a thui. ⁴⁴ Devid lawng ahih te, ‘Bawipa’ a ti atah metila Messiah te Devid cadil la a awm thai ai?” tila a doet.

⁴⁵ Thlaangping lawngah ahih kah awl te a hutung u lii vengah Jesuh lawng a hubang hue te, ⁴⁶ “Phungawl cangpueikung thli tengah he ngaithuen u lah, ahimi lawngah himbaidung bai oen yingyawi ham a ngaih u, thaihu yoeihna huen ah thlaang kah voemtoeina oen hinyahna te a ngaih u; sinakok ah ngawlhna athloekla a hooep u te a tuek u tih poei saina ah ngawlhna atheen koek te a tuek u; ⁴⁷ huhai tumtee kah thaihu oen a im te a rot pe u tih thlaang kah yaak ngaih la asanhlangla thangthui u! Ahimi lawngah athekoek dantatna te a dang u ai!” a tina.

¹ Jesuh lawng maang tih a teng avai te a dan vengah Tempal bok-im kah tangkakong khuiah kuirang thli lawng tangka a sang u te a huh, ² Khawdeng tangkiik huhai pakhat lawng ruhum pheksa pahih a sang te khaw a huh. ³ Tevengah ahih lawng, “Atak tang kavan thui u, thlaangtloe boeih lak ah he kah khawdeng koek huhai lawng yahawh ngaai te a sang poen. ⁴ Metihtiah thlaangtloe hue lawngtah amami kah khuehtoen bawi alenna dawngkah acoeih aphe te ni a peek u, tede he hutaa he tah khawdeng de amah kah hingna ham a khueh duen te a peek kik poen” a tina.

⁵ A hubang khatsut hue lawngah Tempal bok-im lungto theen theen oen dan ngaih danthluela thoekcauna oen Pathen tengah kutdo peekna akawng te a thui u. ⁶ Tevengah Jesuh lawngah, “He kah na huh boeih he, lungto khatca khaw ceh taak ohla apum boeih la a voeih dingkangna atue te avan pha ai.” a tina.

⁷ Ahimi lawngah, “Saya, metuek vengah he tila a awm ai? Atue apha poen tite noekna ham n’tu aka thoeng ai?” tila a doet u.

⁸ Jesuh lawng, “Ngaithuen uh; a-u lawngkhaw n’thaina boel seh. Thlaang broe lawngah ka miing oen law ai, ‘Kai tah ahih poen ni! Atue a pha poen!’ ti ai. Tede ahimi hu ah te bang u boel. ⁹ Nangmi lawng raal thawhna oen ceemtloekna te na yaak u vengah rih u boel; te ang thaihu te lamhacuek ah va thoeng ai, te ang thli te aboetna tah yoeii poen ti ngaihna nawh ni.” a tina.

¹⁰ Tecoengah a awl thui te a tom tih, “Ram pakhat oen khat kaap u the ai; thlaangphun khat oen khat thekyak u the ai. ¹¹ Khaaw yat ram yat ah rih-awm likluei hinghuen ai; khawthe khawkha oen tlawhtahaw awm ai; vaan kalawng miknoekna oen rih-awm thaihu thoeng ai. ¹² He kah thaihu boeih he a thoeng thlan ah nangmi te n’tuuk u vetih n’heemtek u ai; nangmi te sinakok ah awlcek ham n’ceh puei u vetih thongim ah n’thlaak ai; kai kawngah sengpahrang thli oen ukkung bawi thli haiah n’khuen ai. ¹³ He tah Awlthang Theen phawngna ham ah nangmi hamla atue theen la awm ai. ¹⁴ Namah oen namah te metila ka phungtu u ai tite lakueng u boel, thincak la awm oepsoeh uh, ¹⁵ metihtiah na raal thli a-u khatca lawngkhaw oelhtaih thai nawh tih taa thai nawh hamla nangmi lawng na thui ham koei awl oen cuihna te kan peek ai. ¹⁶ Nangmi te na nu oen na pa lawngkhaw, na boenhui lawngkhaw, na paya lawng-khaw raal kut ah m’peek u vetih nangmi timkah khatsut te tah a ngawn u ai. ¹⁷ Kai kawngah nangmi te thlaang boeih lawng n’thina ai. ¹⁸ Tede na luu dawngkah sam te thaam at mai khaw ha ata manawh. ¹⁹ Acakla pai lah, tetih atah namah oen namah te na thlawn u ai.

²⁰ “Jerusalem khawpui te raal thli lawng a veel khoep te na huh u vengah adiw thlan ah rawk poen ai tila te ming uh. ²¹ Tevengah Judia ram khuiah aka awm thlaang thli lawng tlaang sawm la heeng u seh; khawpui khuiah aka awm thlaang thli lawng khawpui te co taak u seh, khaaw teng khaaw vai ah aka awm thlaang thli lawng khawpui khuila kuun u boel seh. ²² Metihtiah te hin te tah, ‘Dantatna Khawhin’ la a awm dawngah Caciim lawng a thui te soep ai. ²³ Te khawhin tah bungpum vawn-um oen cacuun naukem hutaa thli ham tah khawmap sut maimah aw! He kah ram khuiah rih-awm mueirihtamyiin te thoeng vetih he kah thlaang thli sawah Pathen kah dantatna te thoeng ai. ²⁴ Thlaang khatsut te samsen oen a ngawn u vetih atloe hue te tah ram tawm ah saltamnaa la a khuen ai; thlaangphun tloe lawng amami kah atue atang te aboet thlantoe Jerusalem te a khow huiah a khueh ai.

²⁵ “Te atah khawmik, thla oen aisi thli dawngah, noekna alakloe te thoeng ai. Dilai sawkah ram boeih lawng tuitunlii kah tuisambaak awl oen tuilet thawh awl te a rih u vetih ngaihang khawbing la awm ai. ²⁶ Dilai pum ah aka law ham koei te thlaang thli lawng a poek doen u vengah a rih u vetih thuen ai, metihtiah vaan kah huham tharana te hinghuen ai. ²⁷ Tecoengah thlaanghing capa tah ruep-awmna oen bawilen tharana oen muui dawngah a rum thuk te a huh u ai. ²⁸ He thaihu thli a thoengna ham atong poen atah pai u langtah na luu te thawh u lah, metihtiah nangmi thlawnna ham tah yoeii poen” a tina.

²⁹ Tecoengah Jesuh lawng ahimi tengah he kah thuidoetna he a thui pe: “Thaidut thing oen atloe thingthaih boeih te poek u lah. ³⁰ A dawn thaai a cawn hang te nangmi lawng na huh u vengah khawhaal hungkang tue tah yoeii poen tila na ming u. ³¹ Tetih van angla he kah thaihu thli a thoeng te nangmi lawng na huh u vengah Pathen Ram tah law poen ai tila ming uh.

³² He he hilh u boel, tahe ah aka hing thlaang thli he a duek boeih thlan ah he kah thaihu thli he va thoeng ai. ³³ Vaan oen dilai tah khum ai, tede ka awl he tah mevengah khaw khum manawh.

³⁴ “Ngaithuen u lah! Nangmi lawng awmtheen awmyaal poeibuh caak awkk oen dilai han khawsak lakuengna te poek u aih boel, te tila na awm u veng bawtbet khawlai ah te kah Khawhin lawng nangmi teng avan pha ai. ³⁵ Metihtiah te tah dilai saw khaaw tawm ah aka awm thlaang boeih sawah thoeng ai. ³⁶ He kah aka law ham koei thaihu thli he ading asuekla pooeng ahana ham, tharana khueh tih Thlaanghing Capa haiah paina thai ham ahuertuela awm u langtah thangthui yoeyah uh.” a tina.

³⁷ Jesuh lawng khawdaai atah Tempal bok-im ah thlaang thli te a cang puei, thlemben atah Olif Tlaang la cet tih khawyiin atah te ah te ip yoeyah. ³⁸ Thlaang boeih lawngah ahih awl te hutung hamla mincanghi ah Tempal bok-im la te cet u.

¹ Kaantaakpoei, Tawlru aka thuum nawh Takawi Poei tah atue yoeii poen. ² Khawsoeih ahaamca thli oen Phungawl cangpueikung thli lawng thlaangping te a rih u dawngah Jesuh te ahuepla ngawn ham along a-im tlap hamla a yawm u.

³ Tevengah hubang paha thlaihih khuiah aka thuum Iskariot a ti u Judas kaw khuila Seitan te kuun. ⁴ Tedawngah Judas tah khawsoeih ahaamca thli oen tempal bok-im aka toet raal bawi thli tengla cet tih Jesuh te ahimi kut ah peek thaina ham koei akawng te a thui u. ⁵ Ahimi tah a kaw hoe soeh u tih ahih te tangka peek ham awl a khueh u. ⁶ Te tila te Judas khaw a kaw tla van tih thlaangping lawng he kawng he ming ohla Jesuh te ahimi kut ah peek ham atue theen te tlap ham a tong.

⁷ Tawlru thuum mueh Takawi Poei vengkah Kaantaak poeibuh hamla tuuca ngawn ham khawhin te a pha. ⁸ Jesuh lawng Piter oen Johan te he tila awl a uen tih a tuih: “Cet hih langtah mami kah caak ham Kaantaak Poei te roekbah hih” a tina.

⁹ Ahih rawi lawngah, “Ame huen ah roekbah sak ham na ngaih?” tila a doet.

¹⁰ Ahih lawng, “Nanghih lawng khawpui khuila na kuun vengah tuithaan thlaang pakhat oen na hum u ai. Ahih a kuunna im khuila te vai poe hih langtah, ¹¹ Imkung nala te, ‘Saya lawng, me kah akhann khuiah nuem Kaantaak Poei buh te ka hubang hue oen ka caak ai?’ ti, tila thui peh. ¹² Ahih lawngah im han kah akhann kau hlang thaihu a cungkuem la aka awm te n’huh sak ai, te ah te thaihu soeprep te roekbah hih,” a tina.

¹³ Ahih rawi tah cet hih tih Jesuh lawng a thui pe angla soeprep te a huh tih Kaantaak Poei buh te a roekbah hih.

¹⁴ Atue a khoek vengah Jesuh lawng caboi te a hubang hue oen haih a veel u. ¹⁵ Ahimi nala te, “Kai lawngah patang palai ka khang thlan ah Kaantaak Poei buh he nangmi oen veel haih hamla ka ngaih tangkiik! ¹⁶ Nangmi tengah kavan thui u, metihtiah Pathen Ram khuiah he kah poei buh lawng thuingaihna tangtang te a tueng sak thlantoe tah ka ca tlaih manawh.” a tina.

¹⁷ Tecoengah Jesuh lawng boengloeng te a lawh tih Pathen tengah awmngaih awl a thui, “He he lo u langtah nangmi khat oen khat rekra u lang aw uh. ¹⁸ Kavan thui u, tahe kalawng ah Pathen Ram a pai thlantoe misurtui he ka aw tlaih manawh.” a tina.

¹⁹ Tecoengah takawi te a lawh tih Pathen tengah awmngaih awl a thui coeng atah takawi te a eh tih ahimi te a peek, “He tah ka pum ni, nangmi ham kan peek te ni. Nangmi lawng kai he nan poek khuepna ham he tila sai uh.” a tina. ²⁰ Tetih toengtoeng la thlembuh caak coengah boengloeng te ahimi a peek tih, “He kah boengloeng he tah nangmi ham ka hok ka thi oen ah ka cak sak Pathen kah awlkam thaai ni.

²¹ Tede, bueh lah! Ka sawah paipi aka thleepkung tah caboi tengah ka awm haih. ²² Pathen kah awltloek angla Thlaanghing Capa tah duek ai, tede ka sawah paipi aka thleep thlaang ham tah khawmap tangkiik mah aw!” a tina.

²³ Tecoeng atah ahimi khat oen khat te a-u lawngah he kah thaihu he a sai ai tila doet u.

²⁴ A hubang hue lawng amami tim ah a-u nuem aka lenduet la poek ham aka awm ti u tih awl puung u. ²⁵ Jesuh lawng ahimi te, “Pathen aka oeng nawh sengpahrang thli lawng thlaang rangpui sawah aana a khueh u tih ukkung bawi thli lawngkhaw amami te ‘Thlaang rangpui te aka lungvatkung ni’ ti u. ²⁶ Tede nangmi tah te tila awm ham nawh ni; nangmi timkah aka lenduet lawngtah anoca koek angla awm ham ni, mawtkung lawngah tuihyoeihthlaang angla awm ham ni. ²⁷ A-u aka lenduet, buh caak ham aka ngawl thlaang aw, tihnawhtah buhteemkung aw? Aka ngawl thlaang te lenduet ta. Tede, kai tah nangmi tim ah buh teem an teem angla ka awm.

²⁸ “Nangmi lawngtah suek-halhna ka tawngna boeih ah nan awm puei u; ²⁹ a Pa lawng ka tengah ukna aana m’peek van angla nangmi khaw kan pe van ai. ³⁰ Nangmi lawngtah ka Ram khuiah kamah kah caboi dawng na caak na awkk u vetih Israel phun paha thlaihih te uk hamla bawi ngawlhcoen dawngah na ngawl u ai.

³¹ Jesuh lawng, ‘Simon, Simon! Hutung lah! Lotoenkung lawng caangtak oen caanghii a pekthlee angla athe khui kalawng atheen te thloeng ham, nangmi boeih te noekdak hamla Seitan lawng saithaina nawl a dang poen. ³² Tede Simon, na oengna te a tlaakna nawh ham ah nang ham ka thangthui. Tecoengah ka tengla koep na maang phai vengah na maya manau thli te tha van ra sak.” a tina.

³³ Piter lawng, “Bawipa, nang oen thong tlaak haih ham khaw, duek haih ham khaw oepsoeh la ka awm poen” a tina.

³⁴ Jesuh lawngah, “Piter, kavan thui, n’tu yiin ah, kai he ka ming ka tung nawh tila voei thum toe na thui thlan atah aai khawk manawh.” a tina.

³⁵ Tecoengah Jesuh lawng a hubang thli nala te, “Kai lawng nangmi te tangkabawm, sawngsa oen khowmuek khaw khuen sak ohla kan tuih u vengah te avoetna awm aw?” tila a doet. Ahimi lawngah, “Khat khaw voet mai nawh” a tina u.

³⁶ Jesuh lawng, “Tede, tahe atah tangkabawm khaw, sawngsa khaw khuen uh, a-u khaw samsen te a khueh nawh atah angki te yooei selang lai seh. ³⁷ Kavan thui u, metihtiah caciim lawngah, ‘Ahih tah thlaangthawlh la a toek haih poen’ tila kai kah kawng alam a thut te asoep ham awm, metihtiah kai kah kawng alam a thut sut te noenoe soep poen.

³⁸ A hubang hue lawng, “Bawipa, bueh lah! He ah samsen pahih awm!” a tina u. Ahih lawngah, “Te mah khoek poen” a tina.

³⁹ Jesuh lawng a sai nooek angla khawpui te a thawh taak tih Olif Tlaang la te cet, a hubang hue khaw ahih oen haih cet u. ⁴⁰ Te huen ah a pha u veng atah ahimi nala te, “Suek-halhna khuiah na tlaak thawlh nawh ham thangthui uh.” a tina.

⁴¹ Tecoengah ahimi teng kalawng lungto kutdi daawng khoek athlana ah cet tih khuklu oen cuengkueng tih thang-thui. ⁴² “A Pa, na kawngaih atah he kah patang khangna boengloeng he ka teng kalawng khoe hawn. Tede kai kah kawngaihna boel selang na kaw-ngaih angla sai hawn.” tila thangthui. ⁴³ Vaan kah vanthlaang pakhat a tengah phumpho tih ahih te tha a peek. ⁴⁴ Thin thiip uett ah kawsi dung tangkiik la thangthui tih a sotui te thisen angla dilai ah cip.

⁴⁵ A thangthuina kalawng tho hang tih a hubang hue tengla te cet phai, ahimi tah kawthe uett ah tawnba sut u tih a ih muelh u te a huh. ⁴⁶ Ahimi nala te, “N’tu ah na ih muelh u? Suekna khuiah na tlaak thawlh nawh ham tho lang thangthui u lah.” a tina.

⁴⁷ Jesuh te awl a thui lii vengah thlaangping te avan pha, hubang thlaihih khuiah aka thuum Judas lawngah te avan law puei. Ahih lawng Jesuh te mok hamla a tengla tang va law. ⁴⁸ Tede Jesuh lawng, “Judas, nang lawngah mokna oen aw Thlaanghing Capa he na thak ai? a tina.

⁴⁹ Jesuh tengah aka awm a hubang hue lawngah te tila thaihu aka thoeng te a huh u vengah ahimi lawng, “Bawipa, samsen oen ka tloek u ai aw?” a tina. ⁵⁰ Ahimi timkah thlaang pakhat lawng Khawsoeih Bawi kah a sal te a bantang haa pat a tloek pe.

⁵¹ Tevengah Jesuh lawng, “Yoeh mah seh!” a tina. Ahih lawng te thlaang kah a haa te a tek tih a hoeih pe sak.

⁵² Tecoengah Jesuh lawng khawsoeih ahaamca thli oen tempal bok-im aka toet thli kah a bawi hue oen ah a tengla aka law ahaamca boeih nala te, “Kai he thlaanghuuen la ka awm dawngah aw nangmi lawng samsen oen boelhoen oen ah nan law thil u? ⁵³ Kai he khawhin roekk ah Tempal bok-im ah nangmi oen n’awm u ta, tevengah te nan tu u nawh. Tede yiin tharana lawng a uk lii tahe vengah he nangmi kah saina hamla a tue theen ni.” a tina.

⁵⁴ Ahimi lawng Jesuh te a tuuk u tih Khawsoeih Bawi im la te a ceh puei u; Piter lawngah athla ngaai kalawng soei soei a vai. ⁵⁵ Talawng luung ah hai a toeih u, hai te a aawm u tih ngawl u, Piter khaw te ah te ngawl van.

⁵⁶ Hai kungah Piter a ngawlh te tuih-yoeihthlaang hutaa pakhat lawng a huh vengah a bueh rang patang tih, “He kah thlaang he khaw Jesuh oen aka awm haih ni!” ti.

⁵⁷ Tede Piter lawng a oelh tih, “Hutaa nang, ahih te ka ming moenih” a tina.

⁵⁸ Tecoeng a awm bawt ah thlaang pakhat lawng Piter te a huh nooek dawngah, “Nang khaw, ahimi timkah thlaang pakhat van ni” a tina. Tede Piter lawng, “Kai he ahimi timkah thlaang nawh ni” a tina.

⁵⁹ Tecoengah khawnoek pakhat yunyan a diw raih coeng atah thlaangtloe pakhat lawng, “Ahih he khaw Jesuh oen aka awm haih ni, uepvoetna tehca khaw awm nawh, metihtiah ahih he Galili thlaang la khaw awm!” tila rapcaat la a thui.

⁶⁰ Tevengah Piter lawng, “Nang lawng na thui akawng alam he ka ming moenih!” a tina. Awl a thui lii vengah aai te khawk pahoei. ⁶¹ Bawipa tah dak maang tih Piter te rangpatang la a bueh heet, tevengah Piter lawng, “N’tu yiin aai a khaawk thlan ah kai he kan ming nawh tila voei thum toe na basa ai” tila Bawipa lawng a thui pe te lot a poek. ⁶² Piter te adaubenla cet, a kawsi la dung tih rap.

⁶³ Jesuh amah te aka toet raalkap thli lawngah thekha la a sai u tih a bawh u. ⁶⁴ Ahimi lawngah a mik te khoep a yeen pe u tih a doet u, “A-u lawng nang n’bawh? Thui lah!” a tina u. ⁶⁵ Te tila te ahimi lawngah thekhana awl tloe broela a thui u.

⁶⁶ Khaw a daai veng atah Judah thlaang ahaamca thli, khawsoeih haam thli oen Phungawl cangpueikung thli te tun huh u tih Jesuh te awlcekkung thli khonsil haiah avan law puei u. ⁶⁷ Ahimi lawngah, “Nang he Messiah aw, van thui lah?” a tina u. Ahih lawngah, “Kai lawngah ka thui cakhaw na tangna u manawh; ⁶⁸ awl kan doet u cakhaw navan thung tang u manawh. ⁶⁹ Tede tahe kalawng tah Thlaanghing Capa he Thara koek Pathen bantang ben ah ka ngawl poen ai.” a tina.

⁷⁰ Ahimi boeih lawngah, “Te atah nang he Pathen Capa aw?” tila a doet u. Ahih lawng ahimi nala, “Na thui u angla Pathen Capa ni.” a tina.

⁷¹ Tevengah ahimi lawngah, “Aka mingkung sausi khat khaw ngoe tlaih nawh! Amah awlthui te mami lawng n’yaak rep poen!” ti u.

¹ Ahimi boeih lawng tho u tih Pilat haiah Jesuh te a khuen u, ² Te ah te ahimi lawng thawlh a peel u, “He kah thlaang lawngah thlaangping he a mawt thawlh, Sengpahrang sangluel tengah mangmu peek nawh ham a thui pe tih amah oen amah te Messiah a ti u sengpahrang ni tila a thui.” a tina u. ³ Pilat lawngah, “Nang he Judah sengpahrang aw?” tila a doet. Jesuh lawng, “Na thui angla ka awm.” a tina.

⁴ Tecoengah Pilat lawng khawsoeih ahaamca thli oen thlaangping te, “He thlaang he a thawlhna ka hu nawh.” a tina.

⁵ Tede ahimi lawngah anauh ngaai la awl a huer u tih, “He kah thlaang lawngah amah kah cangpueina oen awlpuungna a sai. Ahih lawng Galili kalawng a tong tih tahe ah he la he avan pha.” tila thawlh a pup u.

⁶ He awl he Pilat lawng a yaak vengah, “Ahih he Galili thlaang aw?” tila a doet. ⁷ Jesuh te Herod uk khuikah thlaang ni tila a ming vengah Herod tengla te a tuih, te vengah Herod khaw Jerusalem ah awm. ⁸ Herod lawng Jesuh te a huh vengah a kaw hoe tangkiik, metihtiah ahih kawng te a yaak poen tih huh hamla a ngaih te san poen. Jesuh lawng kawpoek rai a sai te huh hamla a ngaiuep. ⁹ Tedawngah Herod lawng Jesuh te awl yahawh hlang a doet de Jesuh lawng thung pe nawh. ¹⁰ Khawsoeih ahaamca thli oen Phungawl cangpueikung thli lawng hai benla cawh u tih anauh ngaai la Jesuh te thawlh a pup u. ¹¹ Herod oen a raalkap thli lawng Jesuh te nuihbu la a sai u tih tula sak ohla a nuihna u; tecoengah ahimi lawng himbaidung atheen te a bai sak u tih Pilat tengla koep a tuih. ¹² Te khawhin ah te Herod oen Pilat he koep roep hih, he veng thlan atah ahih rawi he raal la awm hih.

¹³ Pilat lawng khawsoeih ahaamca thli, mawtkung thli oen thlaangping te a khue tun tih, ¹⁴ ahimi nala te, “Nangmi lawng he kah thlaang lawngah thlaang a mawt thawlh na ti u dawngah ka tengla navan law puei u. Tahe nangmi haiah ahih he awl ka khee poen, nangmi lawng thawlh na pup angla ahih lawng lumlai a thawh sak te khat khaw ka hu nawh. ¹⁵ Herod lawngkhaw a thawlhna hu nawh, tedawngah namami tengla avan tuih koep. He kah thlaang lawng duekna yawkk ham koei a sai te awm nawh. ¹⁶ Tedawngah cungpoelh oen ka tam silang ka thlah hawn ai.” a tina. ¹⁷ (Kaantaak Poei veng roekk ah thongtla thlaang pakhat te Pilat lawng a thlah pe ham awm.)

¹⁸ Thlaangping rangpui lawngah, “Ahih te ngawn! Barabbas te van thlah!” tila paang u. ¹⁹ (Barabbas tah khawpui khuiah thlaang a ngawn tih kawsi a pawkk sak dawngah thongim ah a thlaak u.)

²⁰ Pilat lawngtah Jesuh te a hoerpoengla thlah ham a ngaih dawng-ah thlaangping tengah lunghoeih awl koep a thui. ²¹ Tede ahimi lawngah, “Thinglam dawngah ngawn! Thinglam dawngah ngawn!” tila koep paang u.

²² Pilat lawng a pathumna atah ahimi nala te, “Tetih atah n’tu thawlhna ahih lawngah a sai? Duekna yawkk ham koei a sai khat khaw ka hu nawh! Cungpoelh oen ka tam silang ka thlah hawn ai.” a tina.

²³ Tede ahimi lawngah Jesuh te thinglam dawng ngawn ham ah awl ue la paang tare u tih aboetna atah ahimi kah paang awl lawng a taa. ²⁴ Tedawngah ahimi lawng a bih khiing u awltloekna te Jesuh sawah Pilat lawng a sai pe. ²⁵ Ahimi kah a ngaih, thlaang a ngawn tih kawsi aka pawkk sak thongtla te a thlah pe tih Jesuh te amami kawngaih la sai ham ahimi kut ah a peek.

²⁶ Jesuh te raalkap thli lawng a khuen tih a ceh u vengah te vangca vangnau ben kalawng khawpui khuila aka law Sairin khaaw kah Simon aka miingna te a hum u tih ahimi lawng ahih te a tuuk u, thinglam te amangkhak la a kawh sak u tih Jesuh hu ah te a ceh sak u.

²⁷ Rangpui thlaangping lawngah a hu ah a vai u, ahimi timkah khatsut hutaa thli lawng a raang te a tum u tih ahih te aka rah hutaa khaw awm. ²⁸ Jesuh lawng ahimi benla maang tih, ‘Jerusalem kah hutaa thli! Kai ham rap u boel, namami ham oen ah na ca na nau thli ham mah rap uh. ²⁹ Metihtiah thlaang lawngah, “ca-anau aka khueh nooek nawh, camoe aka cuun nooek nawh, suuktui aka tuul nooek nawh hutaa thli tah a yo theen tih a kam awm phoeih” tila a thuina khawhin te avan pha ai! ³⁰ Thlaang lawngah tlaang sang nala te, ‘Kaimi sawah tlim rup lah!’ khawcung nala te, ‘Kaimi he n’thuh lah!’ tila a thuina tue te a pha ai. ³¹ Metihtiah thing he a hing vengah he ang thaihu he, he tila a sai u atah thing he a koh atah metila nuem a awm lah ve?” a tina.

³² Thlaangtloe pahih thlaangthawlh rawi te khaw Jesuh oen ngawn haih ham a ceh puei u. ³³ Ahimi lawngah “Luu Ruh” huen a ti u te a pha u vengah Jesuh te thinglam dawng a tai u tih thlaangthawlh pahih te a bantang ben ah pakhat, a banvoei ben ah pakhat a tai u. ³⁴ Jesuh lawng, “A Pa, Ahimi sawah khawdawp ngaai hawn! Ahimi lawng a sai he a ming u nawh dawngah ni.” a tina. Ahimi lawng talcung a yueh u tih ahih kah hi-acuu thli te a rek ara u. ³⁵ Judah thlaang mawtkung thli lawng: “Ahih lawng thlaangtloe tah a thlawn; Pathen lawng a tuek Messiah tang tang atah amah oen amah thlawn u seh!” tila a nuih ariingna u vengah te thlaangping lawngah pai tih a dan u.

³⁶ Raalkap thli lawngkhaw a nuihna u, ahimi te law u tih misurtui thuii te a tuul u tih, ³⁷ “Nang he Judah sengpahrang atah namah oen namah thlawn u lah,” a tina u.

³⁸ Asawkah ca a tai tah: “Ahih tah Judah sengpahrang ni.” tila a thut u.

³⁹ Te kah a tai u thlaangthawlh pakhat lawngah ahih te asal aphaam tih: “Nang he Messiah nawh aw? Namah oen namah thlawn u langtah kaihih he khaw n’thlawn lah saw!” a tina.

⁴⁰ Tede atloe pakhat te lawngtah ahih te a siim tih, “Pathen na rih nawh aw? Nang lawng ahih angla awlkhuengna avan at te na dang. ⁴¹ Tecakhaw mahih ham tah awlkhuengna he aka soeng ni, metihtiah mahih lawngtah n’sai phu yawkk ham koei te ni n’yawkk; tede ahih tah thawlhpalhna sai nawh.” a tina. ⁴² Tecoengah Jesuh nala te, “Jesuh, Sengpahrang la na law vengah kai he n’hilh boel ne!” a tina.

⁴³ Jesuh lawng ahih nala te, “Na sawah awl ka kam, Paradis ah kai oen haih tihin ah na awm ai.” a tina.

⁴⁴ Hingthun khawnoek paha thlaihih yun vengah khawmik lawng aang tlaih nawh tih yiinna lawngah ram pum te thlemben khawnoek pathum toe a khuk; ⁴⁵ Tempal bok-im kah baiyaan te pahih la poet pheuh u. ⁴⁶ Jesuh lawng angaihhlangla paang tih, “A Pa! Na kut dawngah ka muithla kavan tloeng!” tila a thui coengah te duek.

⁴⁷ Te tila a awm te raalbawi lawng a huh vengah Pathen te a thangpawm tih, “Ahih he tah thlaangdoeng tangtang ni!” tila te a thui.

⁴⁸ Te tila thaihu aka thoeng hang te huh hamla te ah aka tun thlaang thli lawng te tila thaihu a awm te a huh u vengah kawthe uett ah a raang a tum u tih im la meel u. ⁴⁹ Jesuh te pumpak la aka ming boeih oen Galili kalawng ahih hu ah aka baang hutaa thli lawngkhaw athla la soei pai u tih a dan u.

⁵⁰ Judah peng Arimatia khaaw kah Josep aka miingna thlaang pakhat awm. Ahih tah hinyah koei thlaangdoeng pakhat la awm tih Pathen Ram a lawna tue te a ring. ⁵¹ Ahih tah awlcekna khonsil ah aka thuum thlaang pakhat van de ahih lawngah amami khonsil kah awltloekna oen thaihu sai te ngaih nawh. ⁵² Ahih lawng Pilat tengla cet tih Jesuh rawkk te a bih. ⁵³ Tecoengah a rawkk te a lawh tih himbai athaaithik oen a yaawl, lungkaw thuk tangte, vai khat khaw hawna nooek nawh thlann khuiah te a up. ⁵⁴ Te khawhin te Huet hin la awm tih Sabbath khawhin te a pha tawmca poen.

⁵⁵ Jesuh hu ah aka bang Galili kah hutaa hue lawng Josep oen haih cet u tih thlann te khaw, akhuiah Jesuh rawkk te metila a khueh tite khaw ahimi lawng a huh u. ⁵⁶ Tecoeng atah ahimi te im la meel u tih riimtuui oen baw aka tuui thaihu thli te rawkk hamla a roek a bah u. Ahimi tah Phungawl dawngkah awlpeek angla Sabbath khawhin ah te duem u.

¹ Khawhin hin rih khuikah lamhacuek khawhin mincanghi ah hutaa thli lawng amami kah roek abah riimtuui te a khuen u tih phuel la cet u. ² Thlann thawhka kah lungto atloela a thoeih te a huh u tih akhuila te kuun u, ³ tede ahimi lawng Bawipa Jesuh kah a rawkk te tah hu u nawh. ⁴ He kawngah ngaihangla a pai sut u vengah te himbai bawk aka bai thlaang pahih te ahimi tengah parak a pai pe. ⁵ Hutaa hue lawng a rih soeh u tih dilai ah buekuep u, te kah thlaang rawi lawng ahimi nala te, “N’tu ah nangmi lawng aka hing thlaang te thlaangduek tim ah na tlap u? ⁶ Ahih tah he ah awm tlaih nawh! tho poen. Galili a awm vengah nangmi tengah avan thui awl te poek uh: ⁷ ‘Thlaanghing Capa he thlaangthawlh thli kut ah a peek u vetih thinglam dawng a ngawn u ai, athum hin ah tho koep ai.’ tila a thui teta” a tina.

⁸ Tecoeng atah hutaa hue lawng Jesuh awl thui te lot a poek u, ⁹ phuel kalawng meel u tih a hubang thlaikhat oen atloe hue tengah he kah thaihu boeih he a thui pe u. ¹⁰ Te kah hutaa hue tah Meri Makdalin, Joanna oen Jeem manu Meri, he hue he ni; te kah aka awm haih atloe hutaa hue lawngkhaw, he thaihu he celtuih hue tengah a thui pe u. ¹¹ Tede celtuih hue lawngah hutaa thli kah a thui te ahong la a poek u tih tangna u nawh. ¹² Tede Piter tah tho thlat tih poe heeng; ahih lawng buekuep thuk tih thlann khui te a bueh vengah rawkk yaawlna himbai tah a huh de atloe n’tu khaw hu nawh. Tecoeng atah he tila aka awm thaihu dawngah te a kawpoek rai tih im la koep meel.

¹³ Te hin vengah te Jesuh kah hubang rawi pahih tah Emmau a ti u khaw la te cet hih. Te khaw tah Jerusalem khawpui kalawng meng sarih yun thla. ¹⁴ Ahih rawi lawngah thaihu aka thoeng hang kawng alam te a thui hih. ¹⁵ Ahih rawi lawng te tila a thui hih veng te ah, Jesuh lawng te rawi te a kee tih ahih rawi oen haih cet; ¹⁶ ahih rawi lawng a huh de metila nuem noek hih nawh. ¹⁷ Jesuh lawng ahih rawi nala te, “Nanghih lawng lawngpueng puet ah n’tu kawng nuem na thui hih” a tina. Te rawi te haithe-latt la pai hih. ¹⁸ Kleopas aka miingna thlaang pakhat lawng, “Jerusalem la aka law kamyin khuiah thlemvai pekca ah te kah aka thoeng hang thaihu te aka ming nawh he tah nang bueng mai kai aw?” a tina.

¹⁹ Ahih lawng, “N’tu thaihu muuem?” tila a doet. Ahih rawi lawngah, “Nazaret khaaw kah Jesuh tengah aka thoeng teta. Ahih tah tawngha pakhat la awm tih Pathen oen thlaang boeih haiah a thuina oen a saina thaihu boeih dawngah ahu aham awm tila a poek u. ²⁰ Mami kah khawsoeih ahaamca thli oen ukkung bawi hue lawng ngawn hamla awl a khueng u tih thinglam dawng a ngawn u. ²¹ Kaimi lawngtah ahih lawng ni Israel thlaangphun he a loeih sak ai tila ka ngaiuep u! Te tila a awmna kalawng tihin he tah a thum hin poen ni. ²² Kaimi timkah hutaa khatsut lawngtah kaimi he kawpoek avan rai sak u; Ahimi lawngah mincanghi ah cet u tih thlann te a bueh u de a rawkk te hu u nawh. ²³ Ahimi te va meel koep u tih ahih tah tho poen tila aka thui vanthlaang te khaw ka huh u tila a thui u. ²⁴ Kaimi timkah thlaang khatsut khaw phuel la cet u tih hutaa hue kah a thui angla boelh a huh u, tede ahih te tah hu u nawh.” tila a thui pe hih.

²⁵ Tevengah Jesuh lawng te rawi nala te, “Metila na ngau hih aih! Tawngha thli lawng a thui boeih te tangna hamla na kawpoek yaai hih aih he! ²⁶ Messiah lawng amah kah ruep-awmna ah a kuun thlan ah he ang thli he a yawkk hamla ngoe nawh aw?” a tina. ²⁷ Tecoengah Jesuh lawng Mosi kah cabu dawng kalawng a tong tih tawngha boeih kah cathut toe ah Caciim boeih dawngah amah kah kawng alam a thut te a hih rawi tengah a thuicaih pe.

²⁸ A cehna koei khaw te ahimi lawng a pha tawm atah Jesuh lawng ka cet phaat ai a ti angla te a sa pe; ²⁹ tede terawi lawng ahih te a tuuk tih, “Kaihih tengah pah van mai; khaw tla thuk poen tih khaw yiin tawm poen.” a tina. Tedawngah te rawi oen pah haih hamla te cet. ³⁰ Ahih lawngah te rawi oen buh caak haih hamla ngawl, takawi te a lawh tih awmngaih awl a thui, tecoengah takawi te a eh tih te rawi te a peek. ³¹ Tecoeng atah te rawi kah a mik te tueng pan tih ahih te a noek, tede ahih rawi kah mik huh ah pahoei a auh pe poen. ³² Ahih rawi lawngah te, “Lawngpueng ah ahih lawng awl avan thui tih Caciim te a thuicaih vengah mahih kah lungbui ah hai aka alh angla awm ta?” tila a thui hih.

³³ Ahih rawi te tho pahoei hih tih Jerusalem la meel koep hih, te ah te hubang thlaikhat oen thlaangtloe thli a tun haih u te a huh tih, ³⁴ “Bawipa tah tho tangtang poen! Ahih tah Simon tengah phumpho poen!” tila te a thui u.

³⁵ Tecoengah te kah thlaang pahih lawngkhaw lawngpueng ah thaihu aka thoeng te oen Bawipa lawng takawi a eh vengah a noekna kawng te a thui hih.

³⁶ He kawng he ahimi tengah a thui hih lii vengah Bawipa amah te ahimi tengah pai parak tih ahimi nala te, “Nangmi sawah ngaimawngna awm hawn seh,” a tina.

³⁷ Ahimi lawngah muithla ni ka huh tila a poek u tih a rih u. ³⁸ Tede ahimi nala te, “N’tu kawngah na lakueng u akcak aih? N’tu kawngah he ang uepvoetna he nangmi kaw khuiah a law? ³⁹ Bueh lah, ka kut rawi oen ka khaw rawi he, Kamah ni nan huh u. N’tek u lah nan ming u badai, metihtiah muithla lawngtah thi-asa oen ruh te khueh nawh, nan huh u angla kai ngoen tah ka khueh ta.” a tina.

⁴⁰ Te tila a thui coengah a kut oen a khow te ahimi a huh sak. ⁴¹ Ahimi tah awmngaih tih kawpoek rai oen awm u de ahimi lawng tangna u thlan hun, tedawngah ahimi nala te, “Nangmi lawng caak koei khat mai khaw na khueh aw?” a tina. ⁴² Ahimi lawng nga haai tangte keekvaang te a peek u, ⁴³ a lawh tih ahimi mik huh ah a caak pe.

⁴⁴ Tecoengah ahimi tengah, “Mosi kah Phungawl khuiah khaw, tawngha thli kah ca thut dawngah khaw, Saam laabu dawngah kai kah kawng alam a thut boeih te asoep ham awm tila nangmi teng ka awm vengah kavan thui u te he kah thaihu thli he ni.” tila a thui pe.

⁴⁵ Tecoeng atah caciim te a yaak ming thaina ham ahimi kah thinkaw te a awng pe tih, ⁴⁶ Ahimi te, “He tila a thut sut te awm: Messiah lawng patang a khang vetih a thum hin ah duekna kalawng tho koep ai, ⁴⁷ amah miing oen thawlh yutna kawng thawlh khawdawp ngaaina kawng awlthang te Jerusalem kalawng a tong vetih thlaangphun boeih tengah a phawng ai. ⁴⁸ Nangmi tah he kah thaihu he aka mingkung sausi la na awm u. ⁴⁹ Kamah roe lawngah a Pa lawng avan kam te nangmi tengah kavan tuih ai. Tede asawben kah tharana te nangmi tengah a law thlantoe tah khawpui khuiah te ring uh.” a tina.

⁵⁰ Tecoengah Jesuh lawng a hubang hue te khawpui adauben athla hlang Bethani khaw la te a ceh puei, te ah te a kut a thueng tih ahimi te a phueh a sawm. ⁵¹ Ahimi te aphueh asawm tih yotheenna a peek veng te ah ahimi teng kalawng hooep u tih vaan benla te pawm u hang. ⁵² Ahimi lawng ahih te a bok u tih awmngaih tangkiik la Jerusalem la te koep meel u, ⁵³ ahimi lawng atue atang khueh boeih te Tempal bok-im khuiah Pathen thangpawmna hamla a hawna u.