JEEM

JEEM

¹ Pathen oen Bawipa Jesuh Khrih kah tuihyoeihthlaang Jeem lawngah dilai peng tawm ah aka yan khonghak Pathen thlaang thli te kan toei u.

² Ka maya manau thli, nangmi tengah raina soeprep a law vengah te yotheenna ni tila poek mai hawn; ³ Metihtiah te ang noekdakna te na oengna oen na taa u vengah tah uehthaina te na khueh u. ⁴ Nangmi lawng voetna awm ohla aka soep tangtang thlaangsoep la na awm u thai ham, na tlim hau nawh ham aboet toela ueh u hawn. ⁵ Tede nangmi tim ah cuihna aka voet te a awm atah Pathen tengah thangthui seh, Pathen lawng ahih te a peek ai, metihtiah Pathen lawngtah thlaang boeih te moeihoeihna oen reenna oen ah a peek. ⁶ Tede nangmi lawngah uepvoetna khueh muehla oengna oen thangthui uh. Uepvoetna aka khueh thlaang tah yilh lawng a yawng tih aka tat mailai tuitunlii kah tuisambaak oen lo u. ⁷ - ⁸ Te ang thlaang lawngtah a thinkaw melh rap nawh tih a saina boeih ah kawpoek a thlumthle dawngah Pathen tengkah thaihu khatca khaw ka dang ai tila a poek ham awm nawh.

⁹ Khrihca khawdeng thlaang pakhat te Pathen lawng a pawmsang hang atah awmngaih selang, ¹⁰ Khrihca kuirang thlaang pakhat te Pathen lawng a dangla a thlaak thuk atah awmngaih seh. Metihtiah kuirang thli tah ramhum kah raipai angla tlumtloei ai. ¹¹ Khaw a thoeng hang atah raipaikung te khawling lawng a kaang tih yai, a pai khaw reem, tlumtloei tih atheenna khaw ha-ata. Tetih van la kuirang thli lawng bii a tok athlue u lii vengah pal atham ai.

¹² Noekdakna a tawng vengah acak rap uep-awm la aka pai tah yotheen a dawng u, metihtiah te ang noekdakna te a taa thai tih Pathen lawng amah aka lungna thlaang thli ham awl a kam hingna te kutdo la a dang ai. ¹³ Te ang noekdakna te thlaang lawng a tawng vengah, “Suekna he Pathen tengkah va law” tila thui boel seh. Metihtiah Pathen tah athe lawngah suek thai nawh tih a-u khaw Pathen lawngah suek nawh. ¹⁴ Tede thlaang pakhat lawng suekna a tawng ti he tah amah kah athe ngaihna lawng a mawt tih dong dawngah a man sak ni. ¹⁵ Tecoengah amah kah athe ngaihna te a kaw khuiah suen tih thawlhna te a cuun; te thawlhna tah roeng hang tih duekna te a cuun. ¹⁶ Ka lungna maya manau thli, poek thawlh u boel! ¹⁷ Kutdo theen boeih oen aka soep kutdo ayoe peek boeih he vaan kalawng aka law ni: vaan kah aangna Saikung Pathen teng kalawng ni a law, ahih tah thawleng u nawh, hoei-athal u nawh tih yiinna khaw thoeng sak nawh. ¹⁸ Pathen lawng amah kah thaihu sai aka hing boeih khuiah lamhacuek huen ah awm ham awltak awl oen ah amah kawngaih angla mami he n’sai poen.

¹⁹ Ka lungna maya manau thli, he he hilh u boel! Thlaang boeih lawngah awl hutung ham a tat loe sak seh, tede awl thui ham tah a tat hiing sak selang thinsana ben atah a tat yaai u seh. ²⁰ Thlaanghing kah thinsana lawng Pathen kah a mengteng doengna te thoeng sak thai nawh. ²¹ Tedawngah nangmi lawng tuiilehkap moeiboe boeih oen athe khawboe ramlang boeih te hoett u loeih. Pathen tengah te nawn u langtah nangmi aka thlawn thai na lungbui khuiah avan ling awl te do u lah. ²² A awl te hutung doek hong mai oen namah oen namah te thai-alat u boel. A awl te ataktangla hawna lah. ²³ A-u khaw a awl te hutung hong la hutung doek tih ataktangla aka hawna nawh tah thlalang dawngah dan u tih amah muei te aka hu thlaang oen ni a lawh u. ²⁴ Ahih lawngah atheenla dan u tih a ceh coeng atah metila ka awm tite a hilh pahoei. ²⁵ Tede a-u khaw thlaang aka loeih sak aka soep phungawl dawngah te anepla dan u tih a harukna, hutung hong la hutung doek tih hilh pahoei mai ohla ataktangla a hawna atah te thlaang te a saina boeih ah Pathen lawng yotheenna a peek ai. ²⁶ Bokna ben ah ka tlungmu tangkiik mai tila aka poek thlaang awm aw? Ahih lawng a laai te a khoem thai nawh atah ahih kah bokna te aphu awm nawh tih amah oen amah te ni athai-alat u khoeng mai. ²⁷ Pa Pathen lawngah aciim acaih bokna oen bokna tangtang la a poek tah, khawdeng lungma aka khang cadah harah thli oen huhai tumtee thli cawm acahna oen ah he dilai thawlhna tuiilehkap dawng kalawng mah oen mah kuemsuemna he ni.

¹ Ka maya manau thli, ruep-awmna akung, mami kah Bawipa Jesuh Khrih te aka oeng thlaang la na awm u dawngah, thlaang he asaw ahan kah na huhna dawngah meveng khaw nangmi lawng voemtoei u boel. ² Thuina maiah kuirang thlaang pakhat lawng sui kutcabuen te a buen tih bainaak theen oen nangmi na tunna ah va law, khawdeng thlaang pakhat khaw bainaak pawn apit oen va law. ³ Nangmi lawngah bainaak theen oen aka law te na hinyah u tih ahih nala te, “He kah ngawlhcoen theen dawngah ngawl,” na tina u tih khawdeng thlaang te tah, “Teah te pai hawn, tihnawhtah cirawng ah ka khaw tengah he ngawl mai,” na tina u atah, ⁴ nangmi he mami tim ah pekthlena aka sai tih athe poekna oen awltloekna aka sai la na awm u.

⁵ Maya manau thli aw, hutung u lah! Pathen lawngah he dilai dawngkah khawdeng thlaang thli he oengna ah kuirang la awm ham, amah aka lungna thlaang thli ham a kam pe vaan ram te pang hamla a tuek. ⁶ Tede nangmi lawngtah khawdeng thlaang te haithelatt la na khueh u ! A-u lawngah nangmi te thekha la awlcekkung hai la te raat m’mawt u? Kuirang thlaang thli de lah koen! ⁷ Nangmi m’peek u miing theen te ahimi lawngah athela a thui u.

⁸ Caciim dawngah aka awm Vaan Ram kah phungawl, “Namah oen namah na lungna u van angla na imbe te lungnah,” a ti te na vai atah thaihu doeng te nangmi lawng na sai. ⁹ Tede nangmi lawngah thlaang te asaw ahan kah a tuengna angla pekthlena na khueh u atah nangmi tah na thawlh u tih phungawl lawngah nangmi te phungawl phekung la ni n’huh poen. ¹⁰ A-u lawngkhaw phungawl pakhat te a phe atah apum boeih la phungawl te a phe poen ni. ¹¹ Metihtiah, “Samphaih boel” tila aka thuikung lawng ni, “Thlaang ngawn boel,” tila te a thui. Nang lawngah na samphaih nawh de thlaang na ngawn atah phungawl phekung la nang tah na awm poen. ¹² Mami loeihna pekung phungawl lawng awl a cek ham koei thlaang angla te awl thui u lang bii te bi uh. ¹³ Metihtiah reenna aka khueh nawh thlaang te Pathen lawng awl a cek vengah reen van manawh; tede awlcekna te tah reenna lawng a taa.

¹⁴ Maya manau thli, thlaang pakhat lawng oengna ka khueh ti de saina oen a tueng sak nawh atah atheenna awm aw? Te oengna lawng ahih te a thlawn thai aw? ¹⁵ Thuina maiah maya manau hutaa khaw, tawngpa khaw, hinaak himbai angoe tih caak awkk aka khueh nawh ti mai lah sih. ¹⁶ Ahimi lawng a hingna hamla angoe te na peek nawh maiah, “Pathen lawng yotheen kam-awmna m’pe seh! Lum-up la awm langtah ahah la ca uh!” tila nangmi lawng ahimi na tina te n’tu theenna a awm? ¹⁷ Te tila te oengna khaw awm van: Tedawngah oengna bueng awm tih saina athum nawh atah aka duek ni.

¹⁸ Tede thlaang khatsut lawng, “Thlaang pakhat lawngah oengna a khueh tih atloe pakhat lawng saina a khueh,” ti ai. Awl ka thungna tah, “Saina awm ohla thlaang lawng oengna a khueh thaina te van tueng sak lah. Kai lawngtah ka oengna te saina oen kavan tueng sak ai,” ti he ni. ¹⁹ Nangmi lawngah Pathen pakhat bueng awm ti he na tangna u. Theen ngoen! Raai thli lawngkhaw a tangna u tih rihna oen thuen u. ²⁰ Nangmi thlaangngau hue! Saina aka awm nawh oengna he apoei ni tite kavan tueng sak ham aw na ngaih u? ²¹ Mami kah patuer Abraham he metila Pathen oen roeproeina te a dang? A capa Isak te boknathaang dawngah Pathen tengah luciik la a nawn tih te kah a saina rang oen ni roeproeina te a dang. ²² Nangmi lawng na ming thai nawh aw? Ahih kah oengna oen saina lawng thik at la bii a bi; ahih kah oengna te a saina lawngah asoep sak. ²³ Tedawngah caciim lawng, “Abraham lawng Pathen te a tangna tih te a oengna rang oen ah Pathen lawng ahih te thlaangdoeng la a do,” tila a thui te soep tangtang. ²⁴ Tedawngah thlaanghing he oengna bueng oen nawh tih saina rang oen ah Pathen oen roeproeina a dang ti he nangmi lawng na ming u.

²⁵ Thlaanghalhnu Rahab khaw te tila te awm. Ahih lawngah Israel thlaang raalyam thli te a do tih lawngpui tloe kalawng ceh hamla ahimi te a bawm, te tila a saina rang oen ah ahih tah Pathen oen roeproeina te a dang.

²⁶ Tedawngah muithla a awm nawh atah pum he duek, tetih van angla saina aka awm nawh oengna tah duek.

¹ Maya manau thli, nangmi thlaang yahawh lawngah cangpueikung la na awm u ham awm nawh. Metihtiah kaimi cangpueikung hue he thlaangtloe lak ah atlawh ngaaila awlcekna ka dang u ai ti he nangmi lawng na ming u. ² Mami boeih lawngah thawlhpalhna te hau n’sai poepa. Awlcal thingkaa ah aka cal thawlh nawh tah thlaangsoep la awm tih a pum araw boeih te aka uk thai thlaang la awm. ³ Marang lawngah mami awl te a ngaaina hamla a kaa te rui oen n’cuett pe tih mami kah ngaihna benla te n’ceh sak. ⁴ Tecoengah tuisangphaw ke poek u lah: bo khuengdeng tih tha aka ra yilh lawng ni a ceh sak thai, tede tapaih tehca mai oen ah a hoei thai tih aka mongkung kah a ngaihna ahuen la te cet. ⁵ Te tila te hui-alaai he khaw awm van: tehca mai de khuengding khuengdeng la te oekthloen thai.

⁶ Te tila te laai he hai oen lo u. Thawlhpalhna dilai la khaw laai he awm. Mami kah pum dawngah ahuen a neet tih mami kah pum-araw boeih ah athe-ara te a puung sak. Mami kah hingna he hai oen a tih boeih, te kah hai te tah hell khui kalawng aka law nawn hai te ni. ⁷ Thlaanghing lawngah ramsa hing atloe boeih he a phep thai, ramsa aka sann thli oen va boeih khaw, aka cawlh ramsa boeih oen nga boeih khaw a phep thai. ⁸ Tede laai he aka phep thai a-u khat khaw awm nawh. Laai he tah athe thaihu, uk thai la aka awm nawh duekna sue oen ah betoet. ⁹ Mami lawngah laai he Bawipa oen Pathen te koehna ham khawseh, Pathen mueisam oen aka lo u mami kah thlaangpuei khaw tapvoepna hamla n’hawna u. ¹⁰ Kaa pakhat khui kalawng ah koehna awl oen tapvoepna runkhuen pansi awl te thoeng. Maya manau thli aw, te tila a awm ham nawh ni ! ¹¹ Tuibaap pakhat dawng kalawng tui aka tuui oen tuikha thoeng haih nawh. ¹² Maya manau thli, thaidut-thing dawngah olif te thaih nooek nawh; misur thing dawngah khaw thaidut te thaih nooek nawh, tui aal lawngkhaw tui aka tuui te thoeng sak thai nawh.

¹³ Nangmi tim ah mingna aka khueh thlaangcuih pakhat mai khaw awm aw? A awm atah atheen hingna oen ah tueng sak seh. Cuihna, boe-ngaaina, atheen a saina oen ah tueng sak seh. ¹⁴ Tede, na kaw khuiah thlaang uett-eena, thlaang thina, namah ham bueng poekna te na khueh u atah namami kah cuihna dawngah oekthloenna oen ah awltak te oelhtaih u boel. ¹⁵ Te ang cuihna te tah vaan kah aka law nawh ni; te ang te dilai cuihna ni, te tah muithla ben kah nawh tih raaithe ben kah cuihna ni. ¹⁶ Uett-eena oen mah ham bueng poekna te a awmna roekk atah roeproeina nawh oen athe phun soeprep khaw awm van. ¹⁷ Tede saw benkah cuihna tah atloe boeih lak ah ciim, te tah ngaimawngna, boe-ngaaina oen beroepna la awm, te tah reenna oen betoet tih atheen saina athaih theen te a thaih sak; te lawngtah thlaang pekthlena khueh nawh tih thlaang theen la khaw sa u nawh. ¹⁸ Roepna saikung thli lawng roepna oen a tuh amu-ati dawngkah athaih apai tah theenna te ni.

¹ Nangmi tim kah tawhsina oen bawh-apaina he ame kalawng a law? Namami kah pumsa awmtheen awmyaal ngaihna dawng kalawng law tih, te thli te nangmi kaw khuiah boet ohla raal u poepa. ² Nangmi lawng thaihu na ngaih u, tede na ngaih thaihu te na khueh thai nawh, tedawngah thlaang ngawn ham oepsoehla na kamtoen u; nangmi lawng thaihu khueh toen ham na ngaih tangkiik u, te ang thli te na dang u nawh, tedawngah na tawh na thaam u tih na bawpp u the. Nangmi lawng na ngaih thaihu na khueh u thai nawh he tah Pathen tengah na bih u nawh dawngah ni. ³ Nangmi lawng na bih u van de na dang u nawh, metihtiah nangmi lawngah namami kah pumsa awmtheen awmyaalna ah hawna hamla thaihu te na bih u tih nangmi kah poekna thinkaw te atheen nawh dawngah ni na dang u nawh. ⁴ Nangmi uep-awm nawh thlaang hue! Dilai oen ah beroep u he Pathen kah raal la awm tite na ming u nawh aw? A-u khaw dilai kah paya beroep la awm ham aka ngaih tah amah oen amah te Pathen kah raal la sai u. ⁵ Caciim lawngah, “Pathen lawng mami kaw khuiah avan khueh muithla tah rih-awm hue-angaihna oen betoet,” tila a thui te a thui ngaihna tangtang awm nawh tila poek hau u boel. ⁶ Tede Pathen kah peek lungvatna tah a tha ra tare ngaai. Caciim lawngah, “Pathen lawngtah aka oekthloen u thlaang thli te a oel tih boe-ngaai thlaang thli te a reen,” tila a thui angla ni a awm. ⁷ Tedawngah Pathen kawngaih te vai u lah. Raaibawi te hek u lah, tetih atah nangmi teng kalawng atloela heeng badai. ⁸ Pathen tengah yoeii u lah, ahih tah nangmi tengla law vetih va yoeii van ai. Nangmi thlaangthawlh hue na kut te sil u lah! nangmi thlaangdoeng la aka sa u thli, na lungbui thinkaw te ciim sak u lah! ⁹ Kawthe oen awm uh, ko-paang u langtah rap uh; nangmi kah nuih calna te rahna oen thawvel u lah, na awmngaihna te kawthe ngaihangna la coengg sak uh! ¹⁰ Nangmi lawngah namah oen namah te Bawipa haiah boe-ngai u lah, tetih atah nangmi te amah lawngah m’pawmsang badai.

¹¹ Maya manau thli, nangmi pakhat oen khat thuitheet u boel. A-u khaw khrihca maya manau te a thuitheet tih awl aka cek tah Phungawl te a thuitheet tih awl a cek poen ni. Nang lawngah Phungawl te awl na cek atah, nang tah Phungawl te aka vai thlaang pakhat la na awm tlaih nawh tih awlcekkung la ni na awm poen. ¹² Pathen bueng ni phungawl pekung oen awlcekkung la a awm. Ahih bueng lawng ni thlaang he a thlawn thai tih a phe thai. Nang ta a-u la na ngaai u railai aih tih na thlaangpuei te awl na cek?

¹³ “Tihin ah nuem, thangvuen ah nuem, khawpui pakhat ah yin cet u sih, te ah te kum khat mai khaw awm u silang tah tangthung tangleng silang tangka yahawh dang u sih,” aka ti nangmi hue tahe ah ka awl he hutung u lah. ¹⁴ Thangvuen ah na hingna metila a awm ai ti pateng khaw nangmi lawng na ming u nawh! Nangmi tah kawlkalh ah thoeng hang tih kawlkalh ah aka auh mai tuikhu oen ni na lawh u. ¹⁵ Nangmi lawngah: “Bawipa lawng a kawngaih tih mami n’hing u atah tete sai sih, he he sai sih.” tila ni na thui u ham a awm. ¹⁶ Tede tahe ah nangmi lawngtah na hal-auh u tih na oekk na thloen u; he ang oekthloenna boeih te tah aka soeng nawh ni. ¹⁷ Tedawngah, atheen thaihu te sai ham ni tila aka ming thlaang lawngah sai ohla a awm he tah thawlhna ni.

¹ Kuirang thlaang len thli, tahe ah awl kavan thui he hutung u lah! Nangmi sawah aka law koei raina dawngah te rap u lah! ² Nangmi kah kaawn-ava boeih te khaw honn kang poen tih hinaak himbai khaw kuum-akeet lawng a caak boeih poen. ³ Nangmi kah sui oen ngun te a ekk lawng a caak tih, te kah a ekk thli te tah nangmi oelhtaihkung sausi la awm vetih nangmi kah thi asa te hai-alh lawng a caak angla te avan caak ai. Nangmi lawngah khawhin aboetna ben ah ni kaawn-ava te na tung na sep u poen he! ⁴ Nangmi kah lo khuiah bii aka bi te thapang na pe u nawh. Ahimi kah laise awl te hutung lah! Nangmi kah caang aka att thli paang awl te Bawilen koek Bawipa Pathen lawng a yaak poen. ⁵ Nangmi tah he dilai dawngah kawngaih soepna oen awmngaihna oen ah na hing u. Meh-ngawnna khawhin ah sak-awm paduukla ngawn ham namah oen namah te purh athaula na cawm na cah u. ⁶ Nangmi lawngah thawlhna aka awm nawh thlaang thli te thawlh na peel u tih na ngawn u, ahimi lawngtah nangmi te n’tu khaw n’thung nawh.

⁷ Tedawngah maya manau thli, Bawi-pa a law thlantoe thinsan kawdaw oen awm uh. Lotoen thlaang pakhat lawngah a lo khuikah caangthaih yuun hamla meveng toe kawdaw oen a lamtoen puet tite poek u lah. Ahih lawngah rawtui a law cuek veng kalawng khawcui boet toe kawdaw thinsan oen a lamtoen. ⁸ Nangmi khaw na kaw te daw sak u van lah. Bawipa a lawna khawhin te ayoeica poen dawngah na ngaiuepna te cak sak uh.

⁹ Maya manau thli, Pathen lawng nangmi te awl cek nawh hamla nangmi khat oen khat thuitheet u boel. Awlcekkung tah va yoeii poen, oepsoehla awm poen. ¹⁰ Maya manau thli, Bawipa miing oen awl kavan thui, nangmi lawng tawngha thli te hilh u boel, Ahimi lawng kawdaw thinsan oen patang a khang u te nangmi lawng oett u lah. ¹¹ Ahimi lawngah patang a khang u thai dawngah yotheenna aka dang thlaang ni ka ti u. Jobah kah kawdaw thinsanna te na yaak u poen tih aboet ben ah Pathen lawng ahih a peek te khaw na ming u. Metihtiah Bawipa tah reenna oen thlaang kah hailam ben poekna oen ah betoet.

¹² Maya manau thli, atloe boeih lak ah awlkamna na sai u vengah awl taap u boel. Nangmi lawngah vaan phoei oen khawseh, dilai phoei oen khawseh, atloe tloe phoei oen khawseh awl taap u boel. “Oeih” tila thui na ngaih atah, “Oeih” ti bueng te mah thui mai hawn; “Moenih” tila thui na ngaih atah “Moenih,” ti bueng mah thui mai hawn. Te tila na thui u atah Pathen kah awlcekna dawng kalawng na loeih ai.

¹³ Nangmi tim ah raina aka tawng na awm aw? A awm atah thangthui seh. Awmngaih thlaang ta, awm aw? A awm atah ahih lawng koehna laa te sa seh. ¹⁴ Nangmi tim ah thlaangtlo awm aw? A awm atah ahih lawng khrihcabu kah ahaamca thli te khue seh, Bawipa miing oen olif situi te van koelh selang tah thangthui seh. ¹⁵ Oengna oen thangthuina lawng thlaangtlo te a hoeih sak ai, Bawipa lawng ahih te sa a ding sak vetih thawlhna a sai te khaw khawdawp a ngaai pe ai. ¹⁶ Tedawngah nangmi lawng na thawlhna te pakhat oen khat tengah phawng u lang khat oen khat hamla te thangthui uh, te atah nangmi na hoeih u ai. Thlaangdoeng kah thangthuina tah huham tharana awm. ¹⁷ Elijah he mami angla thlaang pakhat van ni. Ahih lawngah khaw akaangna ham thinkaw tak oen a thangthui vengah kumthum coengah kum vangg dilai dawng khawkaang. ¹⁸ Elijah lawngah a thangthui koep vengah tah khawtlan tih dilai lawngah khaw abuh ram a saai sak.

¹⁹ Maya manau thli, nangmi tim ah thlaang pakhat lawng awltak lawngpui te ahang tih aka phell te thlaangtloe pakhat lawng avan law puei koep atah; ²⁰ he he hilh u boel: a-u khaw thlaang-thawlh pakhat te lawngpui a hangna kalawng aka mel puei tah, thlaangthawlh kah muithla te duekna kalawng a thlawn tih thawlhna toeklek nawh dawng kalawng khawdawp-ngaaina aka saikung la awm.