HEBRU

HEBRU

¹ Yan veng atah Pathen lawng patuer thli tengah voei yahawh hlang aphunphun la tawngha thli teng kalawng awl a thui. ² Tede, tahe atue boetna ben atah a capa rang oen mami tengah awl avan thui. A Capa rang oen ah khawhipuempa he Pathen lawng a sai tih aboet lam ah thaihu soeprep khuehkung la ahih te Pathen lawng a tuek. ³ Ahih tah Pathen kah ruep-awmna aangna aka tueng sak tih Pathen amah coenggna oen aka lo u taktak ni. Huham tharana aka awm awl oen khawhipuempa he a khawl acuui tih a cak sak. Thlaanghing ham thawlh khawdawp ngaaina oen thawlh ciimna a sai coengah, vaan ah Huham Thara sangkoek Pathen kah bantang ben ah te ngawl.

⁴ Pathen lawng a Capa miing a sak he tah vanthlaang thli kah miing lak ah asang van angla a capa khaw vanthlaang thli lak ah bawilen ngai. ⁵ Pathen lawngah a vanthlaang a-u khat khaw, “Nang tah ka Ca la na awm tih tihin ah Kai tah nang kah na Pa la ka awm poen” tina vai nawh. Tecoengah me ang vanthlaang khaw “Kai tah ahimi kah ana Pa la, ka awm vetih ahimi tah ka Ca la awm ai,” tina vai nawh. ⁶ Tede Pathen lawng a Capa camiing awmthang dilai dawng avan tuih vengah, “Pathen kah vanthlaang boeih lawng ahih te a bok u ai” tila a thui.

⁷ Tede vanthlaang kawng tah, “Pathen lawng amah kah vanthlaang thli te yilh la a sai tih, a tuihyoeihthlaang thli te haialh angla a sai,” tila a thui. ⁸ A Capa kawng tah Pathen lawng: “Aw Pathen, namah kah ram tah dungyan toe cak ai! Nang lawngtah na thlaang thli te doengna oen na uk ai. ⁹ Nang lawngtah adoeng te na ngaih tih aka soeng nawh te na thina. Tedawngah nang kah Pathen la aka awm Pathen lawng nang te n’tuek tih na paya laikoei thli a peek lak ah hinyahna oen awmngaihna te nang m’peek tila a thui. ¹⁰ Tecoengah Ahih lawng “Bawipa, nang lawng acuekca ah dilai he na suen tih namah kut oen vaan khaw na sai. ¹¹ Te thaihu tah khum boeih cakhaw, nang tah na cak yoeyah ai; Te thli boeih tah himbai angla pawn boeih ai. ¹² Nang lawngah te thli te angki angla na tliim vetih himbai angla te thli tah thawleng u boeih ai. Tede nang tah amah moepoela na awm tih Na hinglung khaw boet tlaih nawh” tila a thui. ¹³ Pathen lawng a vanthlaang thli te: “Na raal thli he na khowpha huiah khowtloengna la ka khueh thlantoe ka bantang ben ah ngawl” tina vai nawh.

¹⁴ Tetih atah, vanthlaang thli he a-u te ang kai? Ahimi tah Pathen kah bii aka bi muithla la awm tih thlawnna aka dang ham koei thli te bawm hamla Pathen kah a tuih thlaang thli ni.

¹ Tedawngah atloe abang la mami lawng m’phelh nawh ham n’yaak tangte awltak te acak tare la phoeih mangkhak ham awm. ² Vanthlaang teng kalawng mami kah patuer thli tengah a peek awlthang te tah aka soeng awl ni tite tueng tih, te awl te ngaai nawh tih aka vai nawh boeih tah ating atawkk la dantatna te a dang ai. ³ Te atah hetih aihla aka lenduet thlawnna he mami lawng n’tu la n’sak nawh atah metila mami he sa a sueng ai? Bawipa amah lawng he thlawnna he lamhacuekla a phawng tih aka ya boeih lawngah soeng tila mami tengah a tueng sak poen. ⁴ Te tila te ahimi kah sausi te soeng tila a tuengna ham Pathen lawngah miknoekna oen kawpoekrai phun soeprep te a sai tih Ciim Muithla kah kutdo thli te amah kawngaih angla a rek ara.

⁵ Mami lawngah n’thui u dilai, hailam ben ah aka law ham koei dilai thaai te uk hamla Pathen lawng vanthlaang he khueh nawh. ⁶ Caciim dawngah ahuen pakhat ah, “Aw, Pathen thlaanghing he metih nuem a ti aih tih na poek khuep; Thlaang mailai he metila nuem a awm tih na doen na cang? ⁷ Vanthlaang thli lak ah aheem bet la kawlkalh ah na khueh; ruep-awmna oen hinyahna lumuek te na muek sak, ⁸ thaihu boeih sawah ukkung la na sai” tila a thui lat. Pathen lawng thlaanghing he, “thaihu boeih ukkung la a sai” tila awm. Thaihu boeih ti vengah me ang thaihu khaw thuum poen. Tede tahe ah thlaanghing lawng thaihu boeih ukkung la awm nawh ti he huh thai la awm. ⁹ Tede mami lawngah Pathen kah lungvatna oen thlaang boeih ham duek hamla vanthlaang thli lak ah ahem bet la aka awm Jesuh te n’huh u. Te tila te duekna patang a khangna rang oen tahe atah ruep-awmna oen hinyahna lumuek te a muek poen tite n’huh u. ¹⁰ Thaihu soeprep boeih a sai tih doenkung Pathen lawng amah kah ruep-awmna te a ca thli lawng a paangna hamla Jesuh te patang khangna oen thlaangsoep la a sai te tah tueng tang tang. Metihtiah Jesuh tah thlawnna dang ham aka mawtkung ni.

¹¹ Jesuh lawngtah thlaang kah thawlh-na te a ciing sak tih thawlhna ciingsakkung oen amah lawng thawlhna a ciing pe sak thlaang boeih te lawng ana Pa pakhat ni a khueh u. Tedawngah Jesuh lawng te thli te amah kah maya manau tila khue hamla yak nawh. ¹² Ahih lawng Pathen tengah, “Nang lawng na sai te maya manau thli tengah ka thui ai, Ahimi a tunna ah nang te kan thangpawm ai,” tila a thui. ¹³ Tecoengah ahih lawng, “Pathen te ka uepna ai” ti. Tecoeng baal ah, “Pathen kah peek ca-anau thli oen he ah he haih ka awm” tila khaw a thui.

¹⁴ Te tila ca-anau a tina thlaang thli te tah thi-asa oen aka awm thlaang thli ni. Jesuh amah khaw ahimi angla thi-asa oen awm tih ahimi kah thlaanghing pumsa coenggna angla awm van. Te tila a awm te tah amah kah duekna rang oen duekna sawah huham tharana khuehkung Raaibawi te phe ham tih, ¹⁵ duekna te a rih u dawngah hingkhui puet ah sal la aka awm thli te a loeih sak. ¹⁶ Te tila te ahih lawng vanthlaang thli te bawmcem nawh tite aciimphanla a tueng sak. Caciim lawngah, “Abraham kah cadil thli te a bawm,” tila a thui lat. ¹⁷ Tedawngah soeprep boeih ah maya manau angla awm ham roe la angoe tih te tila a awm te tah thlaang boeih kah thawlhna te khawdawp ngaai hamla Pathen bii a bina ah uep-awmna oen reenna aka khueh Khawsoeih Bawi la awm ham ni. ¹⁸ Amah roeroe lawng suek-halhna oen patang khangna te a tawng poen dawngah tahe ah suek-halhna aka tawng thli te a bawm thai.

¹ Pathen kah thlaangkhue, Khrihca thlaangciim maya manau thli! Mami kah bokna phung ben ah Khawsoeih Bawi la awm ham Pathen lawng avan tuih Jesuh kawng te poek u lah. ² Mosi lawng Pathen kah im ah amah kah bii bina dawngah uep-awm la a awm van angla Jesuh khaw he bii he bi hamla tuekkung Pathen tengah uep-awm la awm. ³ Imsakung lawng im lak ah hinyahna te a huh. Te tila te Mosi lak ah Jesuh lawngah asang ngaai hinyahna te a dang ham tuueng. ⁴ Im boeih he tah thlaang lawng a sak, thaihu boeih he tah Pathen lawng a sak. ⁵ Mosi tah tuihyoeihthlaang la a awm van angla Pathen im khuiah uep-awm biibikung la awm tih Pathen lawng hailam ben ah a thui ham te khaw a thui thai. ⁶ Tede Khrih tah Pathen im khuiah ukkung uep-awm a Capa la awm. Mami lawng ngaiuepna dawngah thincakna n’khueh tih uepvoetna a awm nawh atah mami tah amah kah im ni.

⁷ Tedawngah Ciim Muithla lawng avan thui angla, “Te hin ah Pathen awl te, na yaak u atah, na thin thah sak u boel; ⁸ Na patuer hue lawngah Pathen te a oelh ataih u tih Ramhum huhang ah a noek adak u van angla te awm u boel; ⁹ Pathen lawng, “Kum sawm lii khui puet ah ka sai thaihu thli te a huh u de, teah te kai n’noekdak u tih n’oelhtaih u; ¹⁰ Tedawngah ahimi sawah ka thinsa tih, ‘Ahimi tah, a awl cak u nawh tih ka awlpeek khaw vai hamla a thana. ¹¹ Kai tah ka thin a sa dawngah awl ka taap tih: “Ahimi lawng mevengah khaw kai lawng ka peek duemna ram la te kuun manawh!’ ka tina” tila a thui.

¹² Oengca maya manau hue, nangmi tim ah aka hing Pathen te mangthawng taak ngaihna thinkaw lungbui the khueh nawh ham oen tangna hamla aka ngaih nawh thlaang khatca khaw na awm hau nawh ham ngaithuen uh. ¹³ Te lak atah, nangmi te thawlhna lawng thai a latna nawh ham, thinthah la na awm u nawh hamla, caciim lawngah, “Tihin,” a ti te mami oen tuhkaina a awm khui atah hin roekk ah pakhat oen khat bawmcem yoeyah uh. ¹⁴ Metihtiah mami lawng acuekca veng kah ngaikhuekna n’khueh te aboettoe acakla m’phoeih rapsaat atah mami boeih tah Khrih oen bii bi haih la ng’ awm u.

¹⁵ Caciim lawngah, “Tihin ah Pathen awl te na yaak u atah na thin thah sak u boel, Na patuer hue lawngah Pathen awl a eek u van angla awm u boel” ti.

¹⁶ A-u lawng Pathen awl te a yaak coengah ahih awl te a eek kai? Ahimi tah Iyipt ram kah Mosi lawng a mawt thlaang thli te ni. ¹⁷ A-u sawah Pathen he kum sawmlii khui a thin a sa? Thawlhna a sai u tih ramhum huhang ah aka duek thli sawah ni. ¹⁸ Pathen lawngah awl a taap tih. “Kai lawng ka peek ham koei duemna ram la te ahimi lawngah meveng khaw kuun u manawh” a tina vengah te a-u hue a tina kai? Awl aka ngaai nawh hue te ni a tina. ¹⁹ Tedawngah ahimi lawng duemna ram khuiah a kuun thai nawh he tah ahimi lawng a tangna u nawh dawngah ni tila m’miing u.

¹ Tahe atah, Pathen lawng duemna huen a thui te pha thaina ham awlkamna m’peek poen. Te kah awlkam sut duemna khuiah te pha ohla awm hau nawh ham ngaithuen u sih. ² Metihtiah ahimi lawng a yaak u angla, mami lawng Awlthang Then te n’yaak u poen. Tede, Ahimi lawng a yaak u awlthang te oengna oen a do u nawh dawngah ahimi ham hoeikhangna awm nawh. ³ Tede mami lawngtah n’tangna tih Pathen lawng a kam duemna te n’huh u. Pathen lawng, “Ka thin sa tih, ‘kai lawng ka peek ham koei duemna ram ah te ahimi lawng meveng khaw kuun manawh!’ tila awl ka taap tih ka thui.” a ti angla te awm tangtang. Dilai a suen cuek vengah bii a coeng boeih poen de ahih lawng te tila te a thui. ⁴ Metihtiah Caciim dawng ahuen pakhat ah khawhin hin rihna kawng te “Arih hin ah Pathen tah bii boeih te a coeng tih duem” tila a thui. ⁵ Asawkah akawng angla a thui koep tah: Kai lawng ka peek ham koei duemna ram ah te meveng khaw kuun manawh” ti. ⁶ Awlthang Theen te lamhala aka ya hue lawng a tangna u nawh dawngah duemna te dang u nawh. Tede, thlaangtloe aka dang hamla thlaang awm. ⁷ He kawngah Pathen lawng, “Tihin” tila a thui te, khawhin tloe pakhat a khueng pe tite a tueng sak. Kum yahawh a awm coengah asawkah thui la aka awm te caciim dawngah a awm van angla Pathen lawng Devid hawna oen, “Tihin ah Pathen awl na yaak u atah, na thin thah sak mangkhak u boel,” tila a thui.

⁸ Pathen kah awlkam duemna te Joshua lawng thlaangping te pe kawinih Pathen lawng atloe khawhin kawng te thui manawh. ⁹ Tedawngah, Pathen tah arih hin ah a duem van angla Pathen thlaang thli hamla duemna khawhin, hin at awm hun. ¹⁰ Pathen tah amah bii bina kalawng a duem van angla te Pathen awlkam duemna te aka dang boeih tah amah kah bii bina kalawng duem van ai. ¹¹ Tedawngah awlkam duemna te dang thaina ham atlawh ngaaila tha huer u sih. Ahimi lawng oengna a khueh u nawh dawngah duemna a dang nawh angla te mami tah pakhat khaw te tila awm u boel sih.

¹² Pathen kah awl tah hing tih bii a bi, voeivaang aka hatt samsen lak ah khaw hatt ngaai. Hingna oen muithla a humna toe, ruhcong oen thling athawkk a humna toela a pek abo thai. Thlaanghing lungbui kah ngaihna oen poekna boeih te khaw a ming thai. ¹³ Pathen haiah thuh phah thai thaihu khat khaw awm nawh; Pathen thaihu sai boeih lawng amah mik huh ah daih u vetih tueng pheng ai. Mami lawng m’mah kah sai boeih te a tengah n’thui ai.

¹⁴ Tedawngah mami lawng oengna te acakla phoeih rap u sih. Metihtiah, Pathen Capa Jesuh tah mami kah aka lenduet Khawsoeih Bawi la awm tih Pathen a awmna la te cet poen. ¹⁵ Mami kah Khawsoeih Bawi he mami kah tharana nawh dawngah reenna aka khueh thai nawh khawsoeih aih moenih ta. Mami kah khawsoeih Bawi he mami angla suekna phun soeprep aka tawng van ni, tede thawlhna tehca khaw sai nawh. ¹⁶ Tedawngah, lungvatna a awmna huen Pathen kah bawingawlh coen tengla cawh u sih. Te huen atah n’ngoe vengah mami bawm ham lungna oen lungvatna te n’dang ai.

¹ Khawsoeih Bawi boeih he tah a tawngpa puei timkah a tuek tih amami yuengah Pathen bii bikung la a khueh. Ahih lawng thawthuengna oen thawlh huihthlutna te a sai. ² Amah khaw asoepna nawh a phun phun a awm van dawngah cuihhoena aka khueh nawh thlaang thli oen thawlhpalhna aka sai thlaang thli sawah kawdawna a khueh thai. ³ Te tila te amah khaw voetna a khueh van dawngah thlaangping kah thawlhna bueng ham ohla amah kah thawlhna dawngah khaw luciik buulna thawthueng ham angoe. ⁴ A-u khaw amah oen amah te hinyah koei khawsoeih bawi la tuek u thai nawh. Aaron te Pathen lawng a khue tih Khawsoeih Bawi la a awm van angla Pathen kah khuena bueng oen ni khawsoeih bawi la a coengg thai.

⁵ Tetih van la te Khrih lawngkhaw amah ngaih ah hinyah koei khawsoeih bawi la coengg nawh. Pathen lawng ahih nala te, “Nang tah ka Capa la na awm; tihin ah Kai tah na Pa la ka awm poen” a tina. ⁶ Tecoeng huentloe pakhat ah, “Nang tah Melkhizedek kah bii te tomthlepkung dungyan khawsoeih la na awm ai” a tina.

⁷ Jesuh lawng dilai dawng a hing veng-ah duekna kalawng amah aka thlawn-thaikung Pathen tengah rung-arap tih mikphi haapcang ruila thangthuina oen a bih. Ahih tah boe a ngaai tih pum a peek dawngah a thangthuina te Pathen lawng a yaak. ⁸ Tecakhaw Pathen Capa la awm de, Pathen awl aka ngaai thlaang la coengg ham ah patang khangna oen a cang. ⁹ Ahih lawngah thlaangsoep la a awm coengah amah awl aka vai thlaang boeih ham dungyan thlawnna a kungpui la awm tih, ¹⁰ Pathen lawng, “Melkhizedek kah bii tomthlepkung khawsoeih bawi la na awm poen,” a tina.

¹¹ He kawng he thui hamla yahawh hlang awm mai de, nangmi lawng yaakming thaina na khueh u nawh tih thuicaih ham rai tangkiik. ¹² Nangmi he tahe vengah cangpueikung saya la pateng na awm u ham khoek thlai poen de, Pathen kah awl te akungcuek kalawng nangmi cang puei ham thlaangtloe te tahe toe na ngoe u hun. Nangmi lawngah buh tangtang te na caak u thai ham awm poen de tahe toe ah suuktui na awkk u khaak hun. ¹³ A-u khaw suuktui aka aw hun te tah camoe la awm hun tih asoeng oen asoeng nawh mingna khueh thai thlan hun. ¹⁴ Buh aka haam te tah kum haam thlaangsoep ham ni; ahimi lawngtah tuukkiik u tih athe atheen te a pek abo thai.

¹ Tedawngah haila cawh u sih, lamhacuek kah khrihca kawng cangna te ceh taak u poen silang tah aka soep cangna ben la te cawh u sih. Aphu aka awm nawh bii ceh taak tangte te khaw, Pathen oengna te khaw, akung kalawng tong koep tlaih boel sih; ² baptisma kawng cangna oen kuttloengna kawng, thlaang-duek thawhkoepna kawng oen dungyan awlcekna kawng thli te akung kalawng tong koep tlaih boel sih. ³ Haila cawh u sih! Pathen lawng sai a ti atah: te ang boeih te n’sai badai. ⁴ Amami kah oengna aka hoett thli te metila thawlhna a yut koep ai? Ahimi tah Pathen kah aangna khuiah awm u poen, vaan kutdo te khaw ateng alai u poen tih ahimi lawng a huh koei Ciim Muithla khaw a dang u poen; ⁵ Ahimi lawngah Pathen awl a tuui-athlim khaw a ming tih aka law ham koei atue atang san kah tharana te khaw a ming u poen. ⁶ Te tila a ming u lal maiah ahimi lawng oengna te a hoett u! Ahimi te thawlh yut sak koep ham coengg thai tlaih nawh, metihtiah ahimi lawng Pathen capa te thinglam dawng a ngawn koep u tih thlaangtim paalak ah yah a pawh sak u.

⁷ Rawtui khawtlan a yawn tih lotoen thlaang thli hamla aphu aka awm cangphung aka tawi sak dilai te tah Pathen lawng yotheen kam-awmna a peek. ⁸ Tede, thliing-ahang oen bel hawng aka po sak dilai te tah aphu awm nawh; Pathen lawng a tap avoep vetih hai dawngah a phum ai.

⁹ Ka paya thli he tila nangmi tengah awl kavan thui de nangmi kawngah ka ngai mawng, nangmi lawng yotheen kam-awmna atheen ngaai thlawnna na khueh u te kaimi lawng ka ming. ¹⁰ Pathen he atuueng aleeng nawh Pathen aih nawh ni. Nangmi lawng bii na bi u te khaw, amah na lungna u te tueng sak ham Khrihca na puei na paw bawmna na peek u tih tahe toe ah na do na dan u te khaw Pathen lawng hilh manawh. ¹¹ Nangmi lawng na ngaiuep u te ataktang la acoenggna ham nangmi lawng bawmcem ngaihna thinkaw thluembuekna te aboettoe khueh poe uh tila ka ngaih. ¹² Thayong thlaang la na awm u ham ka ngaih nawh, tede oengna, reenna a khueh tih Pathen lawng a kam pe te aka dang thlaang thli angla ni awm sak ham ka ngaih u.

¹³ Pathen lawng Abraham tengah awlkamna a sai vengah amah awlkam te sai hamla awl a taap. Te tila awl a taap vengah te amah lak ah alenduet khat khaw a awm nawh dawngah amah miing te a hawna. ¹⁴ Ahih lawngah Abraham nala, “Nang tengah awl ka kam, yotheen kam-awmna kan peek vetih na cadil nauha ka puung ka daw sak ai” a tina. ¹⁵ Abraham lawng kawdaw thinsan oen a ring tih Pathen lawng awl a kam te a dang. ¹⁶ Thlaang pakhat lawng awl a taap vengah amah lak ah aka lenduet thlaang pakhat khat kah miing te a hawna atah te awltaapna lawng awlpuungna boeih te a dip a der sak. ¹⁷ Pathen lawng a mengtengna te thlauh tlaih nawh tite amah kah awlkamna aka dang ham koei thlaang thli tengah aciimphanla tueng sak ham a ngaih, tedawngah a awlkam te awltaap oen a cak sak. ¹⁸ Tecoengah, he thaihu pahih awlkamna oen awltaap he tah thlauh thai koei nawh tih he kawngah Pathen lawng a hoem thui thai nawh. Tedawngah amah tengah ngaimawng ngaitoela aka awm mami lawng, mami haiah avan toen ngaiuepna te acakla phoeih ham n’tha thlue u. ¹⁹ He ngaiuepna tah mami lawng hingna hamla thiilungdue angla awm. Te ngaiuepna tah mami ham kuepyingna oen ngaimawngna la a awm dawngah vaan tempal bok-im kah baiyaan te a pooengvoelh tih huen ciim koek alungkir la te kuun. ²⁰ Te kah huen ciim koek te mami m’pha thlan ah mami yuengla Jesuh lawng a pha poen tih Melkhizedek kah bii tomthlepkung la dungyan khawsoeih bawi la awm poen.

¹ Melkhizedek he tah Salem seng-pahrang la awm tih Tloeng Khoelh Pathen kah khawsoeih la khaw awm. Abraham lawng raal a teek tih sengpahrang palii hue te a taana huen kalawng a law koep vengah Melkhizedek lawng a do tih ahih te yotheenna oen a phueh a sawm. ² Abraham lawng raal kut kah avan khuen boeih thaihu paha ah pakhat te ahih a peek (Melkhizedek kah a miing, lamhacuek thuingaihna tah, “Doengna Sengpahrang,” ti ngaihna tih ahih tah Salem kah sengpahrang la khaw a awm dawngah ahih kah miing he “Roepna Sengpahrang,” tila khaw a thuingaihna ni.) ³ Melkhizedek kah a manu oen ana pa oen ah an patuer hue kah akawng alam cathut khaw awm nawh; ahih kah a cuunna oen a duekna akawng alam cathut khaw awm nawh. Ahih tah Pathen Capa angtoekla awm tih; dungyan khawsoeih la poe awm.

⁴ Tedawngah ahih he metihtlukla a lenduet tite nangmi lawng na ming u. Mami kah patuer miingthang Abraham lawng pateng raal kut dawngkah a lawh boeih thaihu paha ah pakhat te ahih a peek. ⁵ Levi cadil thli khawsoeih la aka awm hue lawng Israel thlaangphun tengah paha ah pakhat te Phungawl angla a cawi thai. Te tah amami nam, amami thlaangphun Abraham cadil thli van ni. ⁶ Melkhizedek he Levi cadil nawh ni, tede Abraham tengkah paha ah pakhat te a lawh tih Pathen kah awlkam aka dang Abraham te yotheen kam-awm oen a phueh asawm. ⁷ Yotheen kam-awmna pekung tah yotheen kam-awm peek la aka awm thlaang lak ah aka lenduet ni tite ngaithliwhna awm nawh. ⁸ Khawsoeih hue kah akawng atah, paha ah pakhat te aka duek thai thlaang lawng a cawi, tede Melkhizedek kawng atah caciim lawng a thui angla aka hing thlaang lawngah paha ah pakhat te a cawi. ⁹ Tecoengah Abraham lawng paha ah pakhat a peek vengah (Levi cadil thli lawngkhaw paha ah pakhat a peek) Levi lawngkhaw a peek tila n’thui thai. ¹⁰ Metihtiah Levi te cuun thlan de ahih kah patuer Abraham tah Melkhizedek oen a huh hih vengah te Abraham pum khuiah awm poen tila n’thui thai.

¹¹ Israel thlaang phun tengah Phung-awl te a peek vengah Levi thlaang phun khawsoeih hue te akung la asut tih a peek. Tahe ah Levi phun khawsoeih hue kah bii bi te soep kawinih, Aaron phun thui ohla Melkhizedek kah bii te tomthlepkung la khawsoeih phun tloe a law ham ngoe manawh. ¹² Khawsoeih la awmna te a thaw aleng u atah phungawl te khaw thawleng ham a ngoe. ¹³ He thaihu kawng a thui awl lawng a tueng sak tah mami kah bawipa he Levi phun nawh ni, thlaangphun tloe la awm tih ahih phun khuikah a-u khat khaw khawsoeih bii bi nawh. ¹⁴ Ahih tah Judah phun kalawng va law tite thlaang boeih lawng a ming, tede Mosi lawng khawsoeih kawng a thui vengah Judah phun kawng he thui nawh.

¹⁵ Melkhizedek angla atloe khawsoeih pakhat va pho ti he caih tare. ¹⁶ Ahih tah thlaanghing kah sai phung alam oen phung angla khawsoeih la coengg nawh, tede aboetna aka awm nawh hingna tharana rang oen ni a coengg. ¹⁷ Metihtiah caciim lawngah, “Nang tah Melkhizedek kah bii tomthlepkung dungyan khawsoeih la na awm poen ai,” tila a thui. ¹⁸ Phung-alam aruem te tah tharana khueh nawh tih hoeikhangna a awm nawh dawngah hoett la awm poen. ¹⁹ Metihtiah Mosi kah Phungawl lawng thaihu khat khaw asoepla sai thai nawh. Tahe atah mami lawng Pathen oen yoeiina ham atheen ngai ngaiuepna te m’peek poen.

²⁰ Tecoengah Pathen kah awltaap khaw awm hun. Thlaangtloe hue tah khawsoeih la a awm u vengah te ang awltaap te awm nawh. ²¹ Tede Jesuh he awltaapna oen khawsoeih la a awm vengah Pathen lawng ahih te, “Bawipa lawng awltaapna a sai poen tih a kawpoek thaw-aleng tlaih manawh: ‘Nang tah dungyan khawsoeih la na awm poen ai” a tina. ²² He tila alakloela a awm he tah Jesuh te atheen ngaai paipi aka caksakkung la te a sai.

²³ Tecoengah atloe alakloena awm hun; khawsoeih tloe yahawh awm maide ahimi tah a duek u dawngah amami kah bii te poe bi u thai nawh. ²⁴ Tede Jesuh tah dungyan a hing dawngah amah bii khawsoeih la awmna te thlaangtloe kut ah pe nawh. ²⁵ Tedawngah amah teng kalawng Pathen teng aka law hue te tahe ah khaw, yoeyahla a thlawn thai, metihtiah ahih tah dungyan hing tih ahimi ham Pathen tengah reenna aka bih pe hamla awm.

²⁶ Tedawngah Jesuh tah mami kah ngoena aka soep sak Khawsoeih Bawi ni. Ahih tah ciim; thawlhpalhna khueh nawh tih thawlhna khaw ahih dawngah awm nawh; ahih te thlaangthawlh tim kalawng a thloeng tih vaan khawhi sawah a pawmsang hang poen.

²⁷ Ahih tah atloe khawsoeih bawi hue oen lo u nawh; Ahih lawngah lamhacuekla amah kah thawlhna oen thlaangping kah thawlhna dawngah khawhin roekk ah thawthueng ham ngoe nawh. Ahih lawngah amah oen amah te vai at ah akhoekkoengla dungyan ham thawthuengna pakhat a sai poen. ²⁸ Mosi kah Phungawl lawngtah aka soep nawh thlaang te khawsoeih bawi la awm ham a sai; tede Phungawl coengah aka law, Pathen lawng awl a taap tih a sai awlkam te lawngtah dungyan aka soep khawsoeih la a Capa te a khueh poen.

¹ Kaimi lawng awlpui la ka thui u tah vaan ah Huham tharakoek Pathen kah ngawlhcoen bantang ben ah aka ngawl Khawsoeih Bawi pakhat mami lawng n’khueh u ti he ni ka thui u. ² Ahih lawngtah Huen Ciim Koek khuiah Khawsoeih Bawi angla bii a bi tih, te huen te tah thlaanghing lawng a sak nawh Pathen lawng a sak riim-im tangtang ni. ³ Khawsoeih Bawi boeih boeih tah thaihu peek thli oen boiava thawthuengna te Pathen tengah nawn hamla a khueh, tetih van la te mami kah Khawsoeih Bawi lawngkhaw thaihu nawn hamla a khueh van. ⁴ Dilai dawngah he awm kawinih khawsoeih la awm poe manawh, metihtiah Judah Phungawl lawng a kuek angla kutdo thli nawnkung la khawsoeih thli awm. ⁵ Ahimi kah khawsoeih bii te tah vaan ah ataktangla aka awm thaihu kah muei asam oen mueithlip mueithla bueng mai ni. Mosi lawngkhaw te tila ni a sai. Ahih lawngah Riim-im te ka sa ai a ti vengah Pathen lawng, “Tlaangsawm ah kan huh sak muei-asam angla te thaihu soeprep te sai hamla hilh boel” a tina. ⁶ Tede tahe ah ahimi kah bii lak ah asangduet khawsoeih bii te Jesuh a peek poen. Pathen oen thlaanghing laklaw ah Jesuh lawng a sai paipi tah atheen ngaai van angla, awlkam dawngah akung asut tih khawsoeih la a awm te khaw sangduet.

⁷ Lamhacuek kah paipi te avoet-na awm nawh kawinih apabena paipi te sai ham ngoe manawh. ⁸ Tede Pathen lawng a thlaang thli kah thawlhna te a huh tih, “Bawipa lawng he tila a thui, Israel thlaangphun oen Judah thlaangphun oen ah paipi thaai ka saina khawhin te a pha ai. ⁹ Te kah paipi te tah ahimi kah patuer thli a kut ah ka tuuk tih Iyipt ram kalawng kavan mawt vengkah ahimi oen ka sai paipi angla awm manawh. Ahimi oen ka sai paipi dawngah uep-awm la a awm nawh dawngah, ahimi te ka mangthawng taak; tila Bawipa lawng a thui. ¹⁰ Tecoengah Bawipa lawng, “Aka law ham koei khawhin ah Israel thlaangphun oen he tila paipi te ka sai ai; Kai lawngah kamah kah phungawl thli te a thinkaw ah Ka khueh pe vetih a lungbui ah ka thut pe ai. Kai tah ahimi kah Pathen la ka awm vetih ahimi tah ka thlaangphun la awm ai. ¹¹ A-u lawngkhaw a pilnam tengah khawseh, ram khuikah thlaang tengah khawseh, “Bawipa te ming uh’ tila cang puei nawh vetih thui pe tlaih manawh. Metihtiah camaw oen patawng ahimi boeih lawng kai he m’ming u poen ai. ¹² Ahimi kah thawlhna te khawdawp ka ngaai vetih a sai thawlh boeih te ka hilh pe poen ai” tila a thui. ¹³ Te tila awlkam thaai kawng a thui dawngah lamhacuek awlkam te Pathen lawng aruem araw la a coengg sak tih aruem araw oen apawn apit thaihu te tah kawlkalh ah ha-ata poen ai.

¹ Lamhacuek kah paipi lawngtah bokna phung alam a khueh tih thlaanghing lawng a sak bokna huen te khaw a khueh. ² Riim-im te a sak u tih adauben kah pakhat te Huen Ciim ti u. Te kah a khuiah te haivangna awm tih Pathen tengah takawi a nawnna caboi khaw awm. ³ Baiyaan apahihna a hu ben ah te Huen Ciim Koek a ti u Riim-im te awm. ⁴ Te kah a khuiah riimtuui huihthlutna sui oen a sai boknathaang, sui oen a prang heet Awlkamna Kong te awm. Te kong khuiah manna takawi a khuehna sui tui-um, aramno aka cawn Aaron kah cawnghol oen ah awlpeek thutna lungpeel pahih te a khueh u. ⁵ Te kah Kong sawah te phe aka phuer cherubim kutsaimuei te awm. Te tah Pathen he ah awm tila tuengsakna ni. Te kah cherubim lawng te thawlh khawdawp-ngaaina ahuen sawah phe a phuer. Tede tahe ah te ang thaihu te asoepbirla thuina atue nawh ni.

⁶ Te kah bokna phung-alam thaihu tah he tila awm. Khawsoeih hue tah amami kah bi ham koei te sai ham la hin roekk ah Riim-im adauben la te cet u. ⁷ Tede, Khawsoeih Bawi bueng te Riim-im khuila kuun tih, te tila te kum khat ah vai-at bueng ni a kuun. Ahih lawngah thisen te a khuen tih amah ham khaw, ming ohla thawlhna aka sai thlaangping ham khaw Pathen tengah a nawn. ⁸ He tila phung-alam oen saina dawng kalawng Ciim Muithla lawng aciimphanla n’cang puei tah adauben Riim-im te a awm hun roekk atah Huen Ciim Koek khuila kuunna lawngpui te awng u thlan hun ti he ni. ⁹ He tah nuehtahna tih tahe veng kah atue atang he a khi ngaihna ni. A thuingaihna tah Pathen tengah a nawn u kutdo thaihu oen boiava oen thawthuengna lawng Pathen aka bok thlaang thli kah thinkaw te ciim sak thai nawh tila thuingaihna ni. ¹⁰ Te ang thli te caak awkk oen ciimcaihna poei bueng oen ni a sai mai. He ang thli tah asaw ahan kah phung-alam boeih ni, Pathen lawng phung-alam athaai a sai thlantoe ah a hawna mai ni. ¹¹ Tede he kah aka awm tangte phung-alam thaihu theen sawah Khrih tah Khawsoeih Bawi la law poen. Ahih lawng bii a bina riim-im te tah bo ngaai tih soep; te tah thlaanghing kut oen a sak riim-im nawh tih he kah sai la aka awm dilai oen khaw tuhkai u nawh. ¹² Jesuh lawngah riim-im Huen Ciim Koek khuila vai khat ah dungyan ham akhoekkoengla a kuun vengah me-ee thi oen vaitaw thi te luciik la nawn ham khuen nawh; amah kah thisen te ni a khuen tih mami ham dungyan hingna te avan sai. ¹³ Phung-alam lawng a kuek angla aka ciim nawh thlaangping sawah, me-ee thi, vaitaw taal thi oen vaitaw a canaica kah athloi te a heh u tih, te lawng atah phung-alam ben ah aka ciim nawh ahimi te acaih sak.

¹⁴ He tila ciimna te a awm tangtang atah, Khrih thisen lawngtah metihtlukla he lak ah aciim acaih sak ngaai ai! Dungyan Muithla rang oen ah aka soep luciik la amah oen amah te Pathen tengah nawn u poen. Aka hing Pathen kah bii te mami lawng bi thaina ham hoeikhangna aka awm nawh phung-alam vaina rang oen ciim acaih nawh athe atheen mingna thinkaw te a thisen oen a ciim sak ai. ¹⁵ Tedawngah Pathen kah a thlaangkhue thli lawngah dungyan yotheen kam-awmna Pathen lawng awl akam sut te a dangna ham Khrih lawngah paipi athaai te a sai. Te tila a dang he tah, ahimi lawng lamhacuek paipi khuiah a awm u vengkah a sai thawlhna boeih kalawng thlaangping te a duekna oen a loeih sak dawngah ni.

¹⁶ Ropangna awl he tah ropangna awl aka thuikung te a duek coengah ni a hawna. ¹⁷ Metihtiah ropangna awl he aka thuikung a hing vengah tah cak nawh; ahih te a duek coengah ni a cak. ¹⁸ Tedawngah ni lamhacuek kah paipi te khaw thisen oen a cak sak. ¹⁹ Mosi lawng lamhacuek ah Phungawl khuiah aka awm awlpeek boeih te thlaangping tengah a phawng pe. Tecoengah vaitaw oen me-ee kah a thi te a lawh tih tui oen a thoekk, hissop thingpe dawngah paangpawn a piin te a hawna tih Phungawl cabu oen rangpui sawah a heh. ²⁰ Mosi lawng, “He tah, nangmi lawng na vai hamla Pathen kah peek paipi acakna thisen ni” a tina. ²¹ Tetih van toeng toeng la thisen te Riim-im oen bokna ben ah a hawna thaihu boeih sawah Mosi lawng a heh. ²² Ataktang atah Phungawl lawng a kuek angla thaihu cungkuem he thisen oen ciim tih thisen bueng oen ni thawlh khawdawp ngaaina a awm.

²³ Vaan ah ataktang la aka awm thaihu thli kah mueithlip lawng te tila ciim sak ham angoe. Tede, vaan kah thaihu atak tang amah roe lawngah te atheen ngaai luciik thawthuengna a kuek. ²⁴ Metihtiah vaan ah ataktangla aka awm kah mueithlip, thlaang kah sai Huen Ciim khuila te Khrih tah kuun nawh. Ahih tah vaan roe la te cet tih tahe ah te ah te mami yuengla Pathen haiah te a pha. ²⁵ Judah thlaangphun hue kah Khawsoeih Bawi lawngtah ramsa thisen oen khawkum roekk ah Huen Ciim Koek khuila kuun. Tede Khrih tah amah oen amah te nawn u hamla voei yahawh cet nawh, ²⁶ te tila te sai ham ngoe kawinih dilai suen cuek veng kalawng voei yahawh hlang patang a khang poen ai. Ahih lawng amah oen amah te luciik la thawthuengna rang oen thawlhna aciingna ham san boeih kah aboetna atue a pha tawm veng he ah vaikhat ah akhoek koeng la ahih tah va law. ²⁷ Thlaang boeih he vai at tah duek ai, tecoengah Pathen lawng awl a cek ai. ²⁸ Tetih toengtoeng la thlaang yahawh kah thawlhna aciingna ham Khrih lawngkhaw vaikhat tah luciik la nawn u. Ahih tah apabela law koep ai, te ngoen tah thawlhna ciing sak ham tlaih nawh tih amah aka lamtoen hue te thlawn ham poen ni.

¹ Judah hue kah Phungawl he tah ataktang thaihu kah aka soep tih uepna koei muei-asam nawh ni; te tah aka law ham koei atheen thaihu kah mueithlip mai ni. A sai u nooek thawthuengna te khawkum khawhaal a nawn u yoeyah. Te tih atah, metila Phungawl lawngah te, he ang thawthuengna oen ah Pathen tengla aka law thlaang thli te thlaangsoep la a sai thai ai? ² Pathen aka bok thlaang thli te amami kah thawlhna kalawng ciim sak taktak kawinih, ahimi lawng thawlhna ka khueh tila te poek nawh vetih, luciik thawthuengna boeih te a toeng poen ai. ³ Te cakhaw, he tila khawkum khawhaal luciik thawthuengna lawng atah thlaang thli te a thawlhna ming sak ham mai ni. ⁴ Metihtiah vaitaw thi oen me-ee thi lawngah thawlhna he ciing sak thai tangtang nawh.

⁵ Tedawngah he kawngah he Khrih lawng dilai la ka law ai a ti vengah te Pathen tengah: “Nang lawngah luciik oen thaihu nawn te na kuek nawh, tede kai hamla thlaangpum ni navan hoel sut poen. ⁶ Nang tah bokna-thaang sawah boiava oen huihthlutna te na ngaai khuek ti nawh tih thawlh ciingna ham thawthuengna khaw ngaikhuek thindeeng la awm nawh. ⁷ Tedawngah kai lawng, Phungawl cabu dawngah kamah kawng-alam a thut angla te, “Aw Pathen, na kawngaih te sai hamla he ah ka awm; ka tina,” tila a thui. ⁸ Lamhacuek ah a thui tah, “Nang lawngah luciik khaw, nawn thaihu khaw, bokna-thaang dawngah boiava huihthlutna khaw, thawlhthlamna luciik thawthuengna khaw na ngaih luem nawh tih na kaw khaw hoe baal nawh” ti. He luciik thawthuengna boeih he Phungawl lawng a kuek angla a nawn de he tila a thui toengtoeng ni. ⁹ Tecoengah ahih lawng, “Aw Pathen, na kawngaih te sai ham he ah ka awm” a tina. Tedawngah thawthuengna aruem boeih te a hoett tih Khrih thawthuengna oen ayueng a theng poen. ¹⁰ Pathen lawng sai sak a ngaih te Khrih lawng a sai tih vaikhat ah akhoek koengla amah pum te a nawnna rang oen mami boeih tah thawlhna kalawng n’ciim poen.

¹¹ Judah khawsoeih boeih lawng khawhin roekk ah amami kah bii te a bi u tih a sai nooek luciik te voei yahawh hlang a nawn u; te luciik thawthuengna lawng metuek khaw thawlhna te ciim sak thai nawh. ¹² Tede Khrih lawngtah thawlh-thlamna ham luciik thawthuengna vai at a nawn tih te tah dungyan ham khoek poen. Tecoeng atah Pathen kah bantang ben ah te ahih tah ngawl poen. ¹³ Pathen lawng ahih kah a raal thli te a khowtang ah khowtloengna la a khueh thlantoe tah te huen kalawng tahe ah a ring. ¹⁴ Te tila te vai at thawthuengna oen thawlhna aka ciim thlaang thli te dungyan ham thlaangsoep la a sai poen.

¹⁵ Tecoengah Ciim Muithla lawngkhaw amah kah sausi te mami tengah avan tueng sak. Ahih lawng lamhacuek ah, ¹⁶ “Hai ben atah ahimi oen he tila paipi ka sai ai, Kamah kah Phungawl te a lungbui ah ka khueh pe vetih a thinkaw ah ka thut pe ai” tila a thui. ¹⁷ Tecoengah a thui koep baal tah, “Ahimi kah thawlhna oen athe a sai te ka hilh pe poen ai” ti. ¹⁸ Tedawngah he tila khawdawp ngaaina a awm coeng atah thawlh aciimna ham luciik thawthuengna te ngoe tlaih nawh.

¹⁹ Tedawngah maya manau hue, Jesuh kah duekna rang oen Huen Ciim Koek khuila te mami lawng yalpawla n’kuun thai poen. ²⁰ Ahih lawngah lawngpui thai, aka hing lawngpui te baiyaan khui kalawng mami ham avan awng poen, te kah baiyaan tah amah pum te ni. ²¹ Mami lawngah Pathen im ukkung khawsoeih alenduet te n’khueh u. ²² Tedawngah mami lawng tuiciil oen silh la aka awm “pum” mami pum oen ah, thawlhna kalawng aka ciim athetheen mingna kawpoek lungbui oen ah, thinkaw tak oen oengcakna oen ah Pathen tengla yoeii u lah sih. ²³ Awlkam aka cak Pathen tah uep-awm la a awm dawngah mami lawng ngaiuepna n’khueh u te acakla phoeih mangkhak u sih. ²⁴ Mami lawngah theenna te sai ham oen ah lungna te tueng sak ham pakhat oen khat bawmcem u silang pakhat oen khat thintlo u sih. Te lak atah, nangmi lawng Bawipa Khawhin tah yoeii poen tila na ming u dawngah pakhat oen khat thaphawh u tare sih. ²⁵ Thik at la huhtun pumna sai nooek te thlaangtloe hue lawngah a hoett u angla mami lawngtah hoett boel sih. Te lak atah, nangmi lawng Bawipa Khawhin tah yoeii tare poen tila na ming u dawngah khat oen khat thaphawh u sih.

²⁶ Mami lawng awltak te ming coengah mengtengna oen thawlhna te n’sai u khuep atah luciik thawthuengna khatca khaw awm tlaih nawh. ²⁷ Te lak ah aka awm tah, aka law ham koei Awlcekna oen Pathen aka raalna thli ungna ham koei rih-awm haialh te ni rih oen thuen ruila ring ham a awm mai poen. ²⁸ A-u khaw Mosi kah Phungawl aka vai nawh te tah, thlaang pahih tihnawhtah pathum kah thuina rang oen thawlhna awm tila awl a tloek atah reen ohla a ngawn u. ²⁹ Te pateng khaw te tila a awm atah Pathen Capa tula aka sak nawh tih ahih te thawlhna kalawng aka ciim sak Pathen kah lungvatna khuehkung Muithla te athe akhana atah te thlaang te metila a sai ai? Ahih lawng a yawkk ham koei dantatna tah metihtlukla athe-eep ai tite poek u hawn! ³⁰ Metihtiah, “Kai lawngah luu ka lo ai, kai lawngah kut ka thung ai,” tila khaw seh, “Bawipa lawng a thlaang thli te awl a cek ai” tila aka thui te mami lawngah m’ming u. ³¹ Aka hing Pathen kut khuiah tlaak ham tah arih awm tangkiik mai poen!

³² N’hu vengah thaihu metila a awm tite poek u lah. Pathen kah aangna nangmi teng avan pha pek vengah te raina phun soeprep na tawng u de, te raina lawng nangmi te n’taa nawh. ³³ Nangmi lawng alakvai atah rangpui haiah thekhana oen heemtekna te na tawng u. Alakvai vengah thlaangtloe hue tetih van la thekha heemtekna a tawng u vengah nangmi lawngkhaw thekhana tawng van ham oepsoehla na kamtoen u. ³⁴ Nangmi lawng thongtla thli te patang na khang puei tih na khueh thaihu boeih te avan rot u vengah na sung na deuh te awmngaih oen na ueh u. Metihtiah te ang thli lak ah atheen ngaai dungyan thaihu awm tila na ming u dawngah ni. ³⁵ Tedawngah na thin hoepp sak boel, thincak thin-awmna lawngah kutdo bo hlang n’huh sak ai. ³⁶ Pathen kah kawngaih te na sai thaina ham oen ah amah awlkam thaihu te na dangna u ham thinsan kawdaw oen awm uh. ³⁷ Metihtiah Caciim lawng, “Kawlkalh bawtbet coengah aka law ham koei lawngah law ai; Ahih tah uelh manawh. ³⁸ Tede, ka thlaangdoeng thli tah oengna oen hing ai; A-u khaw hu benla aka nawng tah, ahih tengah ka kaw hoe manawh” tila a thui. ³⁹ Mami tah hu benla aka nawng koep thlaangpal paathaam nawh ni. Mami tah oengna aka khueh tih thlawn la aka awm thlaang ni.

¹ Oengna khueh ti he tah, mami lawngah ngaiuep thaihu te awm tangtang tih mik huh nawh thaihu te ataktang la awm tila tangna he ni. ² Yan vengkah thlaang thli lawng oengna oen ni Pathen kaw a tawng u. ³ Pathen awl lawng huh thai nawh khui kalawng huh thai he a sai tih Pathen kah awl lawng khawhipuempa he a sai tila mami lawng yaakming he tah oengna oen ni. ⁴ Abel lawngah Kain lak ah atheen ngaai Pathen teng thaw a thueng he oengna oen ni. Oengna rang oen ahih te Pathen lawng thlaangdoeng la a pawm, metihtiah Pathen lawng ahih kah kutdo te a do pe dawngah ni. Abel tah duek coeng poen de a oengna lawng tahetoe awl a thui.

⁵ Enok he duek ohla, Pathen tengla aka pawm hang he tah oengna ni. Pathen lawng ahih te a pawm hang poen dawngah a-u lawngkhaw ahih te hu tlaih nawh. Caciim lawngah, Enok he vaan la a pawm hang thlan vengah Pathen kaw a tawng poen, tila a thui. ⁶ A-u lawngkhaw oengna oen nawh atah Pathen kaw te tawng thai nawh; metihtiah a-u khaw Pathen tengla aka law lawng Pathen tah awm tih amah aka tlap boeih te kutdo a peek tite a oeng ham awm.

⁷ Noah lawng a huh thai nawh hailam ben kah thaihu kawng Pathen lawng ngaithuenna a peek awl te aka yaak sak tah oengna ni. Ahih lawngah Pathen awl te a ngaai tih amah oen a imkhuikaw thlawnna hamla lowng pakhat te a sai. Tedawngah dilai te dan tat la a awm vengah Noah lawngtah oengna rang oen aka law doengna te Pathen tengkah a huh.

⁸ Pathen lawng Abraham te a khue vengah awl a ngaai tih Pathen lawng kan pe ai a tina awlkam ram la te aka ceh sak tah oengna ni. Ahih lawngah mela ka ceh tite ming ohla amah kah ram te a ceh taak. ⁹ Pathen kah awlkam ram ah te oengna oen ram tloe thlaang angla khaw a sak. Pathen tengkah awlkam aka dang van Isak oen Jakob angla riim-im a sak tih awm. ¹⁰ Metihtiah Abraham lawng yoeyahla aka cak khawpui, Pathen lawng anuen ataak tih a sai khawpui te a lamtoen.

¹¹ Abraham tah patawng aih poen tih Sarah khaw ca-anau khueh thai nawh koeila awm poen de, Abraham he pahaam la aka sai tah oengna ni. Pathen lawngtah a awlkam te a sai ai tila a oeng mangkhak. ¹² Abraham tah thlaangduek angtoekla awm poen de ahih pakhat dawng kalawng cadil nauha vaan kah aisi yoeh la, tuitunlii keeng kah divinlai yoeh la yahawh. ¹³ Ahimi boeih lawngah oengna oen duek u. Ahimi lawngah Pathen kah awlkam thaihu thli te paang u nawh. Tede athla kalawng a dan u tih a uem u. Ahimi lawng dilai sawah ram tloe thlaang angla, thlaangpoeng angla ka awm ti u. ¹⁴ Te tila aka thui hue lawngah amami kah ram pakhat a tlap ti te a tueng sak. ¹⁵ Ahimi lawng a ceh taak ram te poek khuep u tlaih nawh; A ceh taak ram te poek u kawinih mel koep hamla atue theen khaw a dang u ngoen. ¹⁶ Ahimi lawng atheen ngaai ram, vaan benkah ram te ni a ngaai u. Pathen lawng ahimi ham ram pakhat te a roekbah pe dawngah ahimi lawng Pathen te a Pa tila a khue u vengah Pathen tah yak nawh.

¹⁷ Pathen lawngah Abraham te a noek adak vengah a capa Isak te luciik la aka nawn sak te tah oengna ni. Pathen lawng Abraham tengah ni awl a kam, tede a capa khueh duen pakhat te luciik la nawn ham kamtoen oepsoeh. ¹⁸ Pathen lawng Abraham nala te, “Kai lawng peek hamla awl ka kam cadil nauha te tah Isak dawng kalawng ni apuung ataai ai” a tina. ¹⁹ Abraham lawngtah Pathen lawng Isak he duekna kalawng a thawh sak thai tila a poek tih a peek angla Abraham lawng a capa Isak te duekna kalawng a dang koep tila n’thui thai.

²⁰ Isak lawngah Jakob oen Esau nala te avoel avai ah yotheenna na dang hih ai tila oengna oen awl a kam.

²¹ Jakob lawng a duek thlan ah Josep kah a ca thli te oengna oen yotheenna rip a peek. Ahih lawngah a cawnghol dawngah kuituung tih Pathen te a bok.

²² Josep lawng a duek tawm ah, Iyipt ram kalawng Israel thlaang thli a pooengna te a thui tih amah kah rawkk kuemkawl ham a thuinuet te oengna oen ni.

²³ Mosi he a cuun coengah a manu oen ana pa lawng thla thum khui puet ah oengna oen a thuh a elh. Ahih rawi lawng lungna aka kap camaw te a huh hih vengah sengpahrang kah aana eek ham te rih hih tlaih nawh.

²⁴ Mosi lawng a roeng hang atah sengpahrang canu kah capa tila khue hamla aka ngaih sak nawh te tah oengna ni. ²⁵ Ahih lawng thawlhna dawngah kawlkalhca awmtheen boenn lak ah Pathen thlaang thli oen patang khang ham te a ngaih dai. ²⁶ Messiah ham khawdeng patang khang he tah Iyipt ram kah kaawn-ava, khawh-rang boeih lak ah aphu awm ngaai tila a poek. Metihtiah ahih lawngah hailam ben kah kutdo te a mikloeh na.

²⁷ Mosi lawng sengpahrang kah thinsana te rih tlaih ohla Iyipt ram a pooeng taak te tah oengna rang oen ni. Huh nawh Pathen te ahih lawng hu nooek ang a ti maila mel koep ham a thana. ²⁸ Israel thlaang thli kah a camiing hue te Thlaangngawn Vanthlaang lawng ngawn nawh hamla thawhka dawngah thisen a thluk tih a Kaantaak te oengna oen ni.

²⁹ Israel thlaang thli te lanhak ah aka cet angla Tuitunlii Seen ah a kat sak te tah oengna ni. Iyipt thlaang thli lawng a kat u van veng atah ahimi te tui lawng a liw boeih tih duek.

³⁰ Israel thlaang thli lawng Jeriko khaw te khawhin hin rih khui laam-eet tih a cungvel u coengah vawngkulh thli a tlim boeih te tah oengna oen ni. ³¹ Thlaanghalhnu Rahab lawngah Israel thlaang raalyam thli te beroepna oen a do dawngah Pathen awl aka ngaai nawh thlaang thli oen ngawn haih ohla sa a sueng he oengna oen ni.

³² Ka thui hun ai aw? Kideon, Barak, Samson, Jepta, Devid, Samu-el mi oen tawngha thli kawng te thui ham atue khoek nawh. ³³ Oengna oen ah ram tawm te a teek u tih a taa u. Ahimi lawng asoeng thaihu te a sai u tih Pathen kah awlkam te a dang u. Sathueng thli kah a kaa te a khuem rap u tih, ³⁴ rih-awm tangkiik hairawng haialh te a thih u tih samsen oen tloekna kalawng loeih u. Ahimi tah a tha yoek sut de a tha ra u; Ahimi tah ceem thawhna ah tluung-athang u tih ram tloe kah raal thli te a padauh boeih. ³⁵ Oengna rang oen ah hutaa thli kah a cakaw thlaang duek thli te hing koep u.

³⁶ Khatsut hue te nuihbu kamring la a sai u tih cungpoelh oen a bawh u, khatsut hue te thiirui oen a khih u tih thong ah a thlaak u. ³⁷ Ahimi te lunghawh oen a de u, thlawh oen pahih la a ah poet u tih khatsut te samsen oen a tloek u. Ahimi tah a khawdeng u dawngah tuu phaw oen me-ee phaw te a bai a naak u tih rera u, thekha heemtekna oen a ngawn u. ³⁸ Dilai he ahimi hamla atheenna roe awm nawh! Thlaangpooeng poedoe thli angla ramhum huhang oen tlaangsawm ah cet awm u tih lungkaw khuiah, longhoi dung ah, ungrawm khuiah rera u.

³⁹ He kah thlaang boeih he amami kah oengna dawngah metihtlukla thangpawm ham a awm! Tede ahimi lawngah Pathen awlkam te dang u nawh. ⁴⁰ Metihtiah Pathen lawng mami hamla khawkhanna atheen ngaai avan poek dawngah ni. A mengtengna tah ahimi lawngah mami oen thik at la ng’awm u dengah asoepna te a dang u thai ai ti he ni.

¹ Tedawngah he yoeh aih la sausi yahawh lawng mami he n’yaawl khoep poen dawngah mami cehna lawngpui ah kanghalhkung thaihu soeprep boeih oen mami pum ah aka bat mangkhak thawlhna boeih te dul u silang tah mami haiah avan khueh lansak benla te loehlang u silang heng u sih. ² Mami kah oengna atongna kalawng aboetna toe apangtungna thinglam dawng duekna te rih nawh! Te thinglam dawng duekna voel ah awmngaihna lawng a ring poen dawngah thinglam dawng duekna te yahpawhna tila poek nawh tih tahe ah Pathen kah bawi ngawlhcoen bantang ben ah te ngawl poen.

³ Patang a khangna boeih te poek u lah; Thlaangthawlh thli kah thina a ueh roe te mah! Tedawngah nangmi lawng kawboetna oen thathepak la awm u tlaih boel. ⁴ Metihtiah nangmi lawng thawlhna oen na khoelh u vengah he tahe toe atah duekna tangtang oen tah na maneng u thlan. ⁵ Pathen lawng a ca-anau thli nangmi tengah thapeekna awl avan thui te na hilh u poen aw? “Ka ca, Bawipa lawng nang n’siim vengah ngaithuen lah, nang te n’toelthaam vengah na kaw boet sak boel. ⁶ Metihtiah Bawipa lawngtah a lungna boeih te a siim tih a ca la a pawm boeih te tah dan a peek.” tila a thui. ⁷ Nangmi lawng patang na khang te na Pa kah dantatna tila poek hawn; nangmi kah patang khangna lawng nangmi te Pathen lawng a ca thli la a poek poen tite a tueng sak. Ana pa lawng dan a peek nawh a ca khat khaw awm kai aw? ⁸ A ca-anau boeih te dan a peek tih nangmi te dan m’peek nawh atah nangmi tah a ca tangtang nawh tih halhca ni tila thuingaihna awm. ⁹ Mami kah thlaanghing m’pa kawng te poek u lah; ahimi lawng mami te m’phep u de mami lawng n’hinyah u, tedawngah mami kah muithla ben ah m’ Pa te metihtlukla a awl ngaai pe tare tih hinyah ham a awm! ¹⁰ Mami kah thlaanghing m’pa lawngtah amami lawngah soeng a ti angla mami te kawlkalhca ah dan m’peek u; tede Pathen lawngtah mami theenna ham oen amah kah ciimna te mami lawng dang van hamla ni dan m’peek. ¹¹ Mami he dan n’tat tih patang khang vengah te kawhoena ohla mami te kaw avan the sak. Te cakhaw dantatna oen thuituen la aka awm thli lawng ahu la tah thlaangdoeng la hingna dawngkah ngaimawngna kutdo te a dang u.

¹² Tedawngah ayaihoella aka awm na baan thli te asaw la thueng hang langtah thloet aka thuen na tankhuk thli te cak sak u lah! ¹³ Lawngpui doeng ah cet poe u lah, te atah na khow aka yuei te kheem poe nawh vetih hoeih lat poen ai. ¹⁴ Thlaang boeih oen roeproeicala awm ham yawm u lang aciim hingna oen hing hamla yawm uh, metihtiah aciim hingna nawh atah a-u lawngkhaw Bawipa te hu manawh. ¹⁵ Pathen kah lungvatna te a-u lawngkhaw mangthawng taak nawh ham ngaithuen uh. Thingkha thing lawng roeng hang tih asue oen thlaang te raina boehoengla a peek angla a-u khatca khaw awm u boel. ¹⁶ A-u khaw hutaa tawngpa thawlhna sai u boel. Muithla ben te n’tu la aka sak nawh Esau angla awm u boel; Ahih lawngtah amah kah camiing la a awmna te buh vai at caak la a yoeih mai poen. ¹⁷ Na ming u angla hu-aha la ngoen tah ana pa kah yotheenna te paang koep ham a ngaih; tede paang tlaih nawh poen. Metihtiah ahih lawng mikphi baw ruila tlap cakhaw a sai tangte te thawleng thai tlaih nawh.

¹⁸ Israel thlaang thli a law u angla nangmi lawng kut oen tek thai Sinai Tlaang la te na law u nawh. Te tlaang te tah hairawng haialhna, yiin samangting oen muui a yiin riit la yaalna, thlipui thliphoe thawhna oen, ¹⁹ pengsara tum awl oen ah tuen apauna awl yaakna tlaang ni. Te kah tuenpau awl te Israel thlaang thli lawng a yaak u vengah te awl te yaak koep tlaih nawh ham a bih u, ²⁰ metihtiah, “Ramsa khaw, te tlaang te aka caawt sarui tah lungto oen de mat la awm ai” tila a thui awlthlaw te ahimi lawng a ueh thai tlaih nawh dawngah ni. ²¹ Te kah a huh u te tah saringrup la a awm dawngah Mosi lawng, “Ka rih uuet ah ka thuen!” tila a thui.

²² Tede nangmi ngoen tah Zaion Tlaang vanthlaang toeklek toekna oen a awmna, vaan Jerusalem aka hing Pathen kah khawpui la te na law u. ²³ Vaan ah miing thut la aka awm Pathen kah a ca camiing hue awmngaih kawhoe la a tunna ah nangmi tah na law u. Thlaang boeih awlcekkung oen thlaangdoeng thli kah muithla thlaangsoep la aka sai Pathen tengla te na law u. ²⁴ Abel thisen kah sai lak ah thaihu theen ngaai te a thisen dueina oen aka sai, awlkam thaai roekbahkung Jesuh tengla nangmi tah na law u.

²⁵ Tedawngah nangmi tengah awl thuikung hue kah awl te oelhtaih nawh ham ngaithuen uh. Dilai dawngah awlthang thuikung hue kah awl te hutung ham aka ngaih nawh tah loeih u nawh. Vaan kah awl aka thui te mami lawng mangthawng taak atah metila mami n’loeih pai ai! ²⁶ Tevengah te a awl lawng dilai te a hinghuen sak, tede tahe ah awl a kam tah, “Dilai bueng nawh tih vaan te khaw ka hinghuen sak koep ai,” ti. ²⁷ “Ka hinghuen sak koep ai,” tila a thui awl lawngah a tueng sak tah amah lawng a sai thaihu boeih tah hinghuen vetih thoeih kang ai, hinghuen thai nawh thaihu thli te tah cak vetih awm poe ai tite aciimphanla a tueng sak.

²⁸ Tedawngah awmngaih u lah sih, metihtiah mami lawng hinghuen thai nawh ram te m’pang u poen. Mami lawng uem u silang tah amah kawhoena koei hinyahna oen rihsakna oen ah Pathen te bok u sih; ²⁹ metihtiah mami kah Pathen tah thlaang aka phe thai tangtang hai ni.

¹ Khrihca maya manau la na awm u van angla pakhat oen khat lung u poe lah. ² Na im ah kamyin kamlai pah sak u lang dodan ham hilh u boel. Te tila kamyin te a im ah aka pah sak lawngah ming mai ohla vanthlaang te a pah sak u. ³ Thong ah aka tla thli te van hilh u boel, namami te ahimi oen thong aka tla haih angla te poek uh. Patang aka khang thli te van hilh u boel, namami te ahimi angla patang aka khang van angla te poek uh.

⁴ Yu lawh vaa sakna he thlaang boeih lawng hinyah ham awm. Yuvaa lawngah khat oen khat uep-awm la awm ham awm. Pathen lawngah hutaa tawngpa thawlhna aka sai oen samphaih thlaang boeih te awl a cek ai.

⁵ Tangka he ngaih moek aih u boel lang na khueh duen oen te haan u mai hawn. Metihtiah Pathen lawng “Nang te kan ceh taak sut nawh vetih kan khueh sut manawh” ti. ⁶ Tedawngah mami lawng thincakna oen ah, “Bawipa tah kai aka bawmkung ni, Lakuengna roe ka khueh nawh. Thlaangtloe lawng ka sawah n’tu a sai thai ai? tila thui u sih.

⁷ Nangmi tengah Pathen awl aka thui lamhacuek mawtkung thli te hilh u boel. Ahimi kah hingna oen a duekna te poek u langtah ahimi kah oengna te oett u lah. ⁸ Jesuh Khrih tah n’thlem, tihin, dungyan toe amah moepoe la awm. ⁹ Cangpueina alakloe phun soeprep lawng nangmi te lawngpui doeng kalawng atloe abang la m’phelh sak boel seh. Thinkaw tharana he caak awkk kawng phung-alam vaina oen dang ohla Pathen kah lungvatna dawng kalawng dang ham theen; he ang phung-alam aka vai thli te amami kah a vai phung-alam lawng bawmcem nawh.

¹⁰ Judah thlaangphun kah bokna huen ah bii aka bi khawsoeih hue lawng mami kah bokna-thaang dawngah a nawn u luciik sa te khatca khaw ca thai nawh. ¹¹ Judahthlaang Khawsoeih Bawi lawngah ramsa thisen te thawlh-thlahna luciik la Huen Ciim Koek ah nawn ham a khuen; tede bawi-ava pum te tah rehbukk kah adauben ah hai oen a tih. ¹² Te tila a awm dawngah Jesuh lawngkhaw amah thisen oen thlaang boeih ciimna hamla khawpui adauben la te duek. ¹³ Tedawngah rehbukk adauben ah amah tengla te cet u silang ahih kah yarau a phueih te phuei u van sih. ¹⁴ Metihtiah he dilai han ah mami hamla huencak khawpui awm nawh; mami lawng aka law ham koei khawpui te ni n’lamtoen u. ¹⁵ Tedawngah amah thangpawmna te mami kah luciik angla Jesuh rang oen Pathen tengah nawn poepa u sih. Te thangpawmna tah huikaa oen ah thawthuengna tih ahih tah Bawipa ni tila phawngna ni. ¹⁶ Nangmi lawng pakhat oen khat bawmcemna oen atheen sai hamla te hilh u boel, metihtiah he ang he tah Pathen te kaw aka hoe sak thawthuengna ni.

¹⁷ Nangmi aka mawtkung thli kah awl te ngaai u lang ahimi kah awl thui te vai uh. Ahimi lawngah amami kah biibina kawng te Pathen tengah thui ham koei la a awm dawngah duemdawng ohla nangmi kah hingna te a doen a cang u. Nangmi lawng a awl na ngaai pe u atah ahimi lawngah awmngaih kawhoe la bii te a bi u ai; a awl te na ngaai pe u nawh atah ahimi lawng kawthe ruila bii te a bi u vetih nangmi ham hoeikhangna awm manawh.

¹⁸ Kaimi ham thangthui yoeyah uh. Asoeng thaihu te sai hamla ka ngaih yoeyah u dawngah athe atheen pekbona thinkaw ciim te ka khueh u tila ka ming. ¹⁹ Pathen lawngah nangmi tengla kai he ayuela n’tuih koep ham ah thinkaw thluembuekcala thangthui ham kan ceel u.

²⁰ Tuudoen Bo la aka awm mami kah Bawipa Jesuh lawngah amah kah thawthueng duekna rang oen dungyan la awlkamna te a cak sak poen dawngah Pathen lawng ahih te duekna kalawng a thawh sak poen. ²¹ Nangmi lawngah ngaimawngna akung Pathen kah kawngaih te na sai u thai ham thaihu theen na ngoe boeih te m’pe hawn seh; Jesuh Khrih rang oen amah kawngaih te mami kaw khuiah sai hawn seh. Jesuh tengah ruep-awmna tah dungyan toe ayoeyahla awm hawn seh! Amen.

²² Maya manau thli, thathluena awl ka thui he na vai u hamla kan ceel u. He capat kavan thut he san aih nawh. ²³ Mami kah manau Timote te thong khui kalawng a thlah u poen tite nangmi ming sak ham ka ngaih. Ka tengla avan pha yue atah nangmi kan hip vengah ahih te kavan law puei ai.

²⁴ Nangmi kah mawtkung boeih oen Pathen kah thlaang boeih te kaimi kah toeina awl he van thui peh. Itali ram kah maya manau hue lawngkhaw nangmi te n’toei u.

²⁵ Pathen lungvatna nangmi boeih sawah awm hawn seh.