GALATI

GALATI

¹ - ² Galati peng kah khrihcabu boeih tengah kai Pawl lawngah ca kavan pat. He kah ka tengah aka awm maya manau boeih lawngah kan toei u. Kai he celtuih la awm ham khuena he tah thlaanghing teng kalawng law nawh tih thlaanghing kah tuih nawh ni; tede Jesuh Khrih amah te duekna kalawng aka thawh sak Pa Pathen tengkah khuena ni. ³ Mami kah Pa Pathen oen Bawipa Jesuh lawngah lungvatna, ngaimawngna te nangmi m’pe hawn seh. ⁴ Mami he tahe vengkah atue the khui kalawng loeih sak ham mami kah Pa Pathen kawngaihna te a vai tih mami kah thawlh dawngah Khrih lawng amah oen amah te pe u. ⁵ Pathen tengah dungyan toela ruep-awmna tah awm hawn seh! Amen.

⁶ Ka kawpoek rai tangkiik mah aw! Khrih kah lungvatna oen nangmi khuekung te bawtbet khawlai kawl-kalhca maiah na hoett u tih awlthang theen atloe te na do u. ⁷ Ataktang atah, “awlthang theen atloe” awm nawh, tede he tila ka thui he tah, nangmi te ngaihangtum la n’khueh tih Khrih kah awlthang theen te thawveel hamla aka yawm thlaang khatsut a awm dawngah ni. ⁸ Tede kaimi lawngkhaw, vaan kah vanthlaang lawngkhaw, nangmi tengah awlthang theen te van thui u mai cakhaw kaimi lawng ka thui tangte oen aka lo u nawh awlthang theen te aka thui tah hell ah kawsi yawkk seh! ⁹ Kaimi lawng kavan thui u poen de tahe ah ka thui koep ai: nangmi lawng na do tangte awlthang theen oen aka lo u nawh awlthang theen te aka thui tah hell ah kawsi yawkk seh! ¹⁰ He tila ka thui he thlaanghing kawkhuekna dang ham aka yawm angla ka awm aw? Te tila dang ham ka yawm nawh! Pathen kah kawkhuekna te ni ka ngaih. Thlaanghing teng kah mik-hai theen te dang ham ka yawm aw? kai lawng te tila dang ham ka yawm khiing atah kai he Khrih kah tuihyoeihthlaang la ka awm manawh.

¹¹ Maya manau thli, nangmi teng-ah kavan thui awlthang theen he thlaanghing teng kalawng akung tong la awm nawh tite kavan thui u ai. ¹² Te awlthang theen te kai lawngah thlaanghing tengkah ka dang nawh tih a-u lawngkhaw kai he n’cang puei nawh. Te tah Jesuh Khrih amah lawng ka tengah avan phawng ni. ¹³ Kai lawng Judah bokna dawngah ka tlungmu veng kah ka hingna te nangmi lawng na ming u poen, kai lawng reenna khueh muehla Pathen kah khrihcabu te ka heem ka tek tih amilh amoeng hamla ka sai. ¹⁴ Judah bokna phung-alam vaina ben ah ka thawnpuei Judah hue lak ah ka cawh ngaai tih mami patuer thli kah awlro te khaw alawnla ka vai ngaai. ¹⁵ Tede Pathen lawng a lungvatna oen ah ka thang thlan veng kalawng n’tuek poen tih amah kah bii bi hamla n’khue. ¹⁶ Gental thlaangphun tengah amah kawng Awlthang Theen phawng hamla amah capa te kai tengah avan tueng sak vengah te a-u tengah khaw poekna bih ham ka cet nawh. ¹⁷ Kai he celtuih la ka awm thlan ah lamhala aka awm thli te huh ham Jerusalem la ka cet nawh. Arabia la te ka cet pahoei tih tecoengah Damaskas la koep ka law. ¹⁸ Kum thum coeng dengah Piter tengah hin ha thlai-ngaa ka awm. ¹⁹ Bawipa amah kah a manau Jeem bueng te ka huh tih atloe celtuih a-u khaw ka hu nawh. ²⁰ Ka thut boeih he aka soeng ni. Hoem ka thui nawh he Pathen lawng a ming! ²¹ Tecoengah Siria oen Cilicia la te ka cet. ²² Tevengah te Judia ram kah khrihcabu thlaang thli lawng kai he pumpakla m’ming u nawh. ²³ Ahimi lawngah a ming u tah, “Mami heemtekkung thlaang lawngah te n’cui ah phe ham a yawm oengna te ni tahe atah a thui poen!” tila thlaangtloe thli kah awlthui te ni a ming u. ²⁴ Tedawngah ahimi lawng kai kawngah te Pathen a thangpawm u.

¹ Kum ha thlailii coengah Barnabas oen Jerusalem la koep ka cet, Titas khaw ka ceh puei. ² Pathen lawngah na ceh ham awm tila avan thui dawngah ka cet. Mawtkung thli oen pumpakla ka huh u vengah te Gental thlaangphun thli tengah awlthang theen ka phawngna kawng te ka thui pe. N’hu veng kah bii ka bi te khaw, tahe ah bii ka bi he khaw apoeila coengg sak ham ka ngaih nawh. ³ Kai oen bii bi haih Titas he Krik thlaangphun la a awm dawngah thlaang khatsut lawngtah yahhuivuen reet sak ham a ngaih u de, a-u lawngkhaw amangkhakla kuek nawh. ⁴ Khrih Jesuh oen pumkhatla mami awmna rang oen loeihna n’khueh u te ming hamla thlaang khatsut tah aka oeng tangtang van angla sa u tih raalyam angla mami bu khuiah ahuepla va kuun u. Ahimi lawngah mami he saltamnaa la te sai ham a ngaih u. ⁵ Tede, nangmi hamla awlthang theen awltak te a sa sueng tih acakna yoeyah ham kaimi lawngah ahimi te kawlkalhca khaw ka thlahphaam u nawh.

⁶ Tede mawtkung ni tila ka poek thlaang hue lawngah te poekna atheen kai he m’pe u thloei nawh. Mawtkung la ka poek thlaang thli te metila awm u mai cakhaw kai ham tah awlpui mai nawh. Metihtiah Pathen lawngtah thlaang he asaw ahan kah huhna oen awl khueng nawh. ⁷ Poekna atheen peek ohla Piter te Judah thlaangphun tengah awlthang theen phawng ham bii a peek van angla te Gental thlaangphun tengah kai lawng awlthang theen phawng hamla Pathen lawng bii m’peek te a huh u dai. ⁸ Piter te Judah thlaangphun ham celtuih la a sai van angla kai khaw Pathen lawngah amah kah tharana oen Gental thlaangphun ham celtuih la n’sai van. ⁹ Mawtkung la ka poek Jeem, Piter oen Johan mi lawngah Pathen lawng biitungpui kai m’peek te acak sak u; tedawngah ahimi lawng mami boeih he biibipuei ni tila noekna la kai oen Barnabas te kut n’tuuk u. Barnabas oen kai tah Gental thlaangphun tim ah bii bi ham tih amami tah Judah thlaangphun tim ah bii bi hamla ka kaw vai u. ¹⁰ Ahimi boeih lawng kai tengah reenna avan bih u tah khawdeng thlaang thli te hilh nawh ham ni. Te thaihu te ni sai hamla kai khaw thinkaw a thluembuek van.

¹¹ Antiok khaw la Piter a law vengah, rangpui haiah ahih te ka kaana, metihtiah ahih tah aciimphanla a palhna awm. ¹² Jeem lawngah avan tuih thlaang thli te avan pha thlan veng atah Piter lawng Gental maya manau thli oen ah buh haih a caak u. Tede te thlaang thli te avan pha coeng atah, Gental thlaang thli te yahhuivuen reet sak ham aka ngaih thlaang thli te a rih u dawngah nawng tih Gental thlaang thli oen buh ca haih tlaih nawh. ¹³ Atloe Judah phun maya manau thli khaw riyawp u van tih Piter oen ahula poei nawng u van poen. ¹⁴ Awlthang theen awltak lawngdoeng ah cet u nawh tila ka ming vengah Piter te rangpui haiah, “Nang he Judah thlaang balboel tah Gental thlaang angla khaw na sak tih Judah thlaang angla khaw na sa nawh. Tetih atah, metila Gental thlaang thli he Judah thlaangphun angla khaw a sakna ham na yawm mangkhak thai ai?” ka tina.

¹⁵ Mami tah n’cuunna roe ah Judah thlaangphun tangtang tih, “Gental thlaangthawlh phun” a ti u te nawh ni. ¹⁶ Tede thlaanghing he Jesuh Khrih oengna bueng oen ah Pathen oen roeproeina awm tih Phungawl lawng a kuek te saina oen nawh ni tite mami lawng m’ming u. Mami khaw Phungawl lawng a kuek te saina rang oen nawh tih mami lawng Khrih oengna rang oen Pathen oen ah roeproeina a awmna ham Jesuh Khrih te n’oeng u. ¹⁷ Tecoengah mami lawng Khrih oen pumkhatla awmna rang oen ah Pathen oen roeproeina a awmna ham mami lawng n’yawm vengah he Gental thlaangphun angla thlaangthawlh la n’awm tite n’huh u, tete Khrih khaw thawlh saina ah thuum van ti ngaihna aw? Te tila ti ngaihna nawh ni! ¹⁸ Kai lawng ka phe tangte Phungawl kah alawng-a im te ka sak koep atah Phungawl phekung tah kamah ni tite ka tueng sak. ¹⁹ Tecakhaw Phungawl ben atah Phungawl amah lawng n’ngawn tih ka duek, te tah Pathen hamla te ka hing thaina ham ni. Amah kah thinglam dawngah Khrih oen kai tah ngawn haih la ka awm poen, ²⁰ tedawngah aka hing he tah kai tlaih nawh tih ka khuiah aka hing tah Khrih poen ni. Tahe kah hingna he tah kai n’lungna tih hingna pekung Pathen Capa oengna rang oen ka hing. ²¹ Pathen kah lungvatna te hoett hamla ka ngaih nawh. Tede thlaanghing oen Pathen he Phungawl rang oen roeproeina awm kawinih Khrih kah duekna tah apoei ni tila thui ngaihna ni.

¹ Nangmi Galati thlaangngau hue! Nangmi te a-u lawng a sii oen n’phueng u? Thinglam dawngah Jesuh Khrih kah a duekna te na mikthlaam ah aciimphanla tueng poen! ² He thaihu khat he van thui u lah: Nangmi lawng Pathen Muithla te Phungawl lawng a kuek te na sai u dawngah aw na dang u, tih nawh atah awlthang theen te na yaak tih na oeng dawngah aw na dang u? ³ Metila tila he na ngau u tangkiik aih mai! Nangmi lawng Pathen Muithla oen na tongnan u tih tahe ah namami kah tharana oen boet sak ham na ngaih u aw? ⁴ Nangmi lawng na huh na tawng boeih te ahong-ahii la aw a awm kang aih poen? Ahong-ahii la tah awm boeih nawh! ⁵ Pathen lawng nangmi te Muithla m’peek u tih nangmi tim ah kawpoek rai a sai te, Phungawl lawng a kuek te na sai u dawngah aw, te tihnawhtah awlthang theen te na yaak u tih na tangna u dawngah aw?

⁶ Abraham lawng a huh a tawng thli boeih te poek u lah; caciim lawngah, “Abraham lawng Pathen te a tangna tih Pathen te a oeng dawngah ahih te thlaangdoeng la a khueh” tila a thui. ⁷ Tedawngah oengna aka khueh thlaang thli he ni Abraham cadil tangtang la a awm ti he nangmi lawng na ming u ham awm. ⁸ Gental thlaangphun he a oengna rang oen ah Pathen amah oen roeproei u poen ai tila a thui sut poen. Tedawngah caciim lawng Abraham tengah Awlthang Theen te a phawng pe poen: Caciim lawngah, “Thlaangphun boeih he nang rang oen ah Pathen lawng yotheen kam-awmna a peek ai,” ti. ⁹ Abraham lawng a oeng dawngah yotheenna te a dang; tedawngah aka oeng boeih tah Abraham angla yotheenna a dang.

¹⁰ Phungawl vaina dawngah aka pangtung u boeih tah tapvoepna huiah awm u. Caciim lawngah, “Phungawl cabu dawngah a thut boeih te a-u lawngkhaw a vai nawh atah Pathen kah tapvoepna huiah awm!” tila a thui. ¹¹ Caciim lawng, “Thlaang he oengna oen ah Pathen oen roeproeina aka khueh bueng te ni a hing ai,” a ti dawngah, tahe atah a-u khaw Phungawl vaina rang oen ah Pathen oen roeproeina awm nawh tite aciimla tueng poen. ¹² Tede Phungawl oen oengna tah tuhkaina awm nawh. Caciim lawngah, “Phungawl lawng akuek boeih te aka sai boeih tah hing ai” ti.

¹³ Caciim lawng, “Thing dawngah a tai thlaang te tah Pathen kah tapvoepna huiah awm,” tila a thui angla Khrih tah mami hamla tapvoepna kawsi aka yawkk thaang la va coengg tih Phungawl lawng avan thoeng puei tapvoepna dawng kalawng mami he n’tlang poen. ¹⁴ Khrih lawng tila a sai he tah, Pathen amah lawng Abraham tengah a awlkam yotheenna te Khrih Jesuh rang oen Gental thlaangphun tengah peek ham oen ah mami lawngkhaw oengna rang oen Pathen lawng peek ham awl a kam Muithla te dang van ham ni.

¹⁵ Maya manau hue, khawhin roekk khawsakna dawngkah nuehtahna khat ah ka thui lah ai, lumlai pakhat dawngah thlaang pahih lawng kawvaina awlkam te a sai hih vengah thlaang pakhat lawng te kah awlkamna te phe thai nawh tih tawm athap thai nawh. ¹⁶ Pathen lawng awl a kam te tah Abraham oen a cadil tengah ni awl a kam. Caciim lawngah thlaang yahawh thuingaihna awl “Cadil nauha thli” tila thui nawh, tede thlaang pakhat bueng thuingaihna awl, “Cadil nauha” tila ni a thui tih te tah Khrih ni. ¹⁷ Ka thuingaihna tah Pathen lawng Abraham oen paipi a sai tih te paipi te vai hamla awl a kam. Kum yalii sawmthum coengah Phungawl he peek la awm tih te lawngah paipi te phe thai nawh tih Pathen awlkam te khaw hoett thai nawh. ¹⁸ Metihtiah Pathen kah kutdo he Phungawl dawngah pangtung kawinih amah kah awlkam dawngah pangtung thai manawh. Tecakhaw Pathen lawng Abraham te kutdo a peek te tah amah lawng awl a kam dawngah ni.

¹⁹ Tetih atah Phungawl kah kam-thlahna he ta n’tu kai? He tah thawlhna he ame ang kai tite tueng sak ham a tawm athap tih te tah awlkamna aka dang Abraham cadil a law thlantoe ah aka cak ham mai ni. Phungawl he tah vanthlaang lawngah laipai thlaang pakhat tengah patoeng avan peek. ²⁰ Tede thlaang pakhat bueng lawng bii a bi atah laipai ngoe nawh; metihtiah Pathen tah pakhat bueng ni.

²¹ Tetih atah Phungawl lawngah he Pathen awlkam te a oelh a taih ti ngaihna aw? Nawh ni, oelhtaih nawh! Metihtiah hingna aka pe thai phungawl te thlaanghing lawng dang kawinih te phungawl te vaina rang oen ah Pathen oen thlaanghing boeih he roeproeina awm ai. ²² Tede Caciim lawngah, ‘dilai pumpui he thawlh tharana huiah awm; tedawngah Jesuh Khrih oengna dawngah akung asut awlkam kutdo te aka oeng thlaang tengah a peek’ tila a thui. ²³ Tede, oengna atue atang te avan pha thlan vengah Phungawl lawngah te thongtla thlaang angla ng’uup khak tih n’khawh roep; te tah oengna te a tueng thlantoe ni. ²⁴ Tedawngah oengna rang oen ah Pathen oen mami roeproeina hamla Khrih a law thlantoe Phungawl he mami phungtukung la awm. ²⁵ Tahe tah oengna atue atang te avan pha poen dawngah Phungawl he mami phungtukung la awm tlaih nawh. ²⁶ Khrih Jesuh ah pumkhatla awmna dawngah nangmi boeih lawng Pathen kah ca-anau la na awm u he tah oengna rang oen ni. ²⁷ Nangmi tah Khrih oen pumkhatla awmna dawngah baptisma na dang u poen tih tahe atah Khrih amah hingna oen na khuk na dah u poen. ²⁸ Tedawngah Judah oen Gental laklaw ah khaw, saltamnaa oen thlaangcuem laklaw ah khaw, hutaa oen tawngpa laklaw ah khaw pekbona awm tlaih nawh; nangmi boeih tah Khrih Jesuh oen pumkhatla awmna dawngah pakhatla na awm u poen. ²⁹ Nangmi lawng Khrih kah thlaang la na awm u atah nangmi tah Abraham kah cadil nauha la na awm u tih Pathen awlkam te na paang u ai.

¹ Tede tahe ah ka thui de lah ai; Capa pakhat, ana Pa kah kaawn-ava ro thaihu aka pang koei te thaihu boeih khuehkung la awm mai cakhaw camaw la a awm veng atah saltamnaa angla ni a awm. ² Camaw la a awm vengah ana pa lawng atue-atang anuen te apha thlantoe atah ahih te doenkung thli oen kaawn-ava oen ah thaihu boeih khoemdoenkung thli lawngah te a tahu tabem u. ³ Tetih van angla mami khaw muithla ben ah kawpoeksoepna n’khueh thlan vengah te khawhipuempa aka uk muithla kah saltamnaa la n’awm u. ⁴ Tede aboetna ah atue atang anuen te apha khuek vengah tah Pathen lawng a Capa te avan tuih. Thlaanghing hutaa kah capa angla te law tih Judah Phungawl huiah te khaw a sak, ⁵ te tah Phungawl huiah aka awm thlaang thli te tlang ham oen ah mami he Pathen kah ca-anau la coengg sak ham ni.

⁶ Amah kah a ca-anau la awmna te a tuengna ham Pathen lawng a Capa kah Muithla te mami kah thinkaw lungbui khuiah avan tuih tih te Muithla lawngah, “Apa, Apa” tila paang. ⁷ Tedawngah nangmi tah saltamnaa la na awm u tlaih nawh tih a ca la ni na awm poen. Nangmi tah a ca la na awm u poen dawngah Pathen lawng amah kah ca-anau thli hamla a khueh pe boeih te nangmi m’peek ai.

⁸ N’hu veng atah nangmi lawng Pathen te na ming u nawh tih pathen rawlrap hue kah saltamnaa la na awm u. ⁹ Tede tahe atah nangmi lawng Pathen te na ming u poen, tihnawhtah he tila ka ti ai ta, Pathen lawng nangmi te m’ming u poen, tetih atah n’tu hamla tha aka awm nawh tih tula khaw aka coengg nawh muithla benla te mel koep ham na ngaih u? N’tu hamla ahimi kah saltamnaa la te awm koep ham na ngaih u? ¹⁰ Nangmi lawng khatsut khawhin oen thla, atue-atang oen kum te awlpuila na khueh tih na yeh u. ¹¹ Nangmi ham ka lakueng tangkiik mah aw? Kai lawng nangmi ham ka bi boeih te apoeila awm poen ai aw?

¹² Maya manau thli, kai angla na awm u van ham reenna kavan bih u. Kai khaw nangmi angla ni ka awm. Nangmi lawng ka sawah thawlhpalhna na sai u nawh. ¹³ Nangmi tengah awlthang theen ka thui cuek vengah te sading nawh la ka awm tite na ming u. ¹⁴ Tede kai kah pumsa sadingna nawh te nangmi ham noekdakna la awm cakhaw kai he tula khaw poek ohla na awm u nawh tih nan hoett sut u nawh. Kai he Pathen kah vanthlaang pakhat angla te nan do u tih Khrih Jesuh angla te nan do u. ¹⁵ Te vengah te nangmi na awmngaih tangkiik u! Tahe ah me tih na ti u? Coengg thai kawinih na mik pateng khaw koeih pak tih kai he peek hamla na ngaih u tite ka thui thai. ¹⁶ Nangmi tengah awltak he kavan thui dawngah tahe tah na raal la ka awm oh poen aw?

¹⁷ Thlaangtloe hue lawngah nangmi sawah te thinkaw thluembuek tangkiik u mai, tede ahimi kah poekna te tah theen nawh. Ahimi lawng nangmi sawah thinkaw a thluembuek angla nangmi lawngkhaw ahimi sawah thinkaw thluembuek van ham ah nangmi oen kai he pekbo hamla ahimi boeih lawng a ngaih u. ¹⁸ Poekna theen oen thinkaw a thluembuek u atah theen khoet ai. Te ang thinkaw thluembuekna te nangmi tengah ka awm bueng vengah nawh tih khueh poepa ham theen. ¹⁹ Ka lungna ka ca ka nau thli! Nangmi kah thinkaw ah Khrih moeiboe a awm thlantoe tah hutaa lawng camoe a awm vengah tlawhna a ming angla te ka ming koep hun ai. ²⁰ Nangmi sawah kawpoek khaw ka thloet thaina ham tahe vengah he nangmi oen n’awm haih kawinih ka ngaih de ta. Nangmi ham ka lakueng tangkiik mai.

²¹ Phungawl huiah awm ham aka ngaih nangmi te kan doet lah ai: Phungawl lawng a thui te na ya u nawh aw? ²² Phungawl lawng a thui tah Abraham lawng a capa pahih a sak tih pakhat te tah a salnu oen ah a cuun, akhat te tah thlaangcuem hutaa oen a cuun tila a thui. ²³ A salnu oen a cuun a capa te tah awmthoet kah ca sak mailai la awm, tede thlaangcuem nu oen a cuun a capa te tah Pathen awlkamna rang oen ni a cuun. ²⁴ He thaihu he nuehtahna ah yaakming koei la awm: hutaa pahih rawi he awlkam paipi pahih yuengla awm. Hutaa pakhat, Hagar lawngtah a ca thli te saltamnaa la a cuun tih Sinai Tlaang ah a sai paipi nuehtahna yuengah Hagar te awm. ²⁵ Hagar tah Arabia ram kah Sinai Tlaang yuengla awm tih ahih tah tahe veng Jerusalem Khawpui khuikah thlaang boeih oen saltamnaa thli nuehtahna la awm. ²⁶ Tede vaan benkah Jerusalem khawpui tah ahoerpoengla awm tih ahih tah mami kah nuhaam la awm. ²⁷ Caciim lawngah, “Ca aka yaaw hutaa nang, awmngaih lah! Nang ca awm tlawhna aka ming nooek nawh, awmngaihna oen vupaang lah! Metihtiah, a vaa lawng a lunghoel hutaa lawngah a vaa oen aka awm haih hutaa lak ah a ca anau yahawh ngaai a khueh ai” tila a thui. ²⁸ Maya manau thli, Isak angla te nangmi khaw Pathen awlkamna rang oen tahe tah a ca la na awm u. ²⁹ Tevengah te thlaanghing siing angla a cuun a capa te lawngah Pathen kah Muithla rang oen a cuun Capa te a heem atek. Tahe khaw te tila ni a awm. ³⁰ Tede caciim lawng metila a thui? “Salnu oen a capa te ceh sak; metihtiah, salnu kah capa lawngah thlaangcuem nu kah capa oen ah ana pa te paang haih manawh.” tila a thui. ³¹ Tedawngah maya manau thli, mami tah salnu kah a ca-anau nawh tih thlaangcuem nu kah a ca-anau thli ni.

¹ Mami tah n’loeih poen, Khrih lawng n’loeih sak poen! Tedawngah aka loeih thlaang la na awm u van angla acakla pai u langtah namah oen namah te saltamnaa la coengg koep u boel.

² Hutung u lah! Kai Pawl lawng kavan thui tah nangmi lawngah na yahhuivuen te reet ham na ngaih u atah nangmi boeih hamla Khrih tah aphu awm nawh ti ngaihna ni. ³ A-u lawngkhaw yahhuivuen te a reet atah Phungawl te a pum boeih la a vai ham awm tite ngaithuenna kan peek koep u. ⁴ Phungawl vaina oen ah Pathen oen roeproei hamla aka yawm thli tah namah oen namah Khrih oen na pek u poen. Nangmi tah Pathen kah lungvatna adau benla ni na awm poen. ⁵ Mami lawngah ngaiuep u tah Pathen lawng mami he amah oen roeproeina avan sai ai, mami kah oengna rang oen ah Pathen Muithla kah tharana oen a sai ai tite n’lamtoen u. ⁶ Khrih Jesuh oen mami pumkhatla ng’awm u atah yahhuivuen reet khaw, reet nawh khaw athloeina awm nawh; awlpui tah lungna oen bii aka bi oengna te ni.

⁷ Nangmi lawng atheenla na sai u ngoen ta! Nangmi lawng awltak na vai u te a-u lawng n’toeng sak u? ⁸ Nangmi khuekung Pathen lawngah a sai nawh ni. ⁹ “Tawlru ayawlca lawng ta-ekk hawl at a rawi sak” tila a thui u te soeng tangtang. ¹⁰ Tede nangmi kawngah te tahetoe ka ngaitluep hun. Mami kah hingna Bawipa oen pumkhatla awmna lawngah he nangmi te poekna tloe n’khueh sak tang manawh tila ka ngai a tluep sak tih a-u khawseh nangmi te khup pletla aka sai te tah Pathen lawng dan a tat ai.

¹¹ Tede maya manau thli, kai lawngah yahhuivuen reet he angoe khaklal tila ka thui hun atah n’tu hamla thekha heemtekna patang he ka khang khiing kai? Tete asoeng tangtang atah Khrih kah thinglam kawng ka thuina lawng he raina m’pe manawh. ¹² Nangmi te akhupplet la aka sai thlaang thli lawngah aboet toela lawngpui te a vai phaat ham ka ngaih de ta; vai poe u selang tah a til tleh ngala u seh!

¹³ Maya manau thli, nangmi te loeih sak hamla ni n’khue u. Tede, te loeihna te namami kah pumsa hue-ngaihna a dipna ham hawna u boel. Te lak atah lungna oen ah nangmi khat oen khat bawmcem uh. ¹⁴ Metihtiah Phungawl boeih he, “Namah oen namah te na lungna u van angla na imbe lovaai te lungna lah” tila a thui awlpeek pakhat dawngah cui boeih poen. ¹⁵ Tede nangmi lawngah ramsa aka sann angla na awm u tih khat oen khat te na ngeet u tih na khoelh u atah, an noek mai lah, namami oen namami te na phe u kang poen ai.

¹⁶ He tila kavan thui u: Na hingna te Muithla lawngah thuinuet selang tah thlaanghing pumsa kah hue-ngaihna dawngah ngaikhuek thindeeng la awm u boel. ¹⁷ Metihtiah, mami thlaanghing pumsa ngaihna tah Muithla kah ngaihna lawng a oel tih Muithla kah ngaihna te khaw mami kah thlaanghing pumsa ngaihna lawng a oel van. He rawi pahih he tah raal hih tih thui ngaihna tah sai ham na ngaih te na sai thai nawh tina ni. ¹⁸ Nangmi te Muithla lawng m’mawt atah nangmi tah Phungawl huiah na awm u tlaih nawh.

¹⁹ Thlaanghing pumsa kah a sai tah tuengkoer mai. Te ang thli te tah hutaa tawngpa thawlhna, tuiilehkap oen boethe halang na; ²⁰ Kutsaimuei bokna oen runkhuenna, thlaang ruunna, khat oen khat thina, tawhsina; uett-eena, thinsana, loehlangna, athloekla phengterna, bu pekbona; ²¹ Lung-oena, yuuruuina, yuuruui buh hah oen hutaa tawngpa thawlhna; oen ah he ang atloe athe thaihu boeih te ni. N’hu vengah kavan thui u poen angla tahe ah koep kavan thui u: he ang thaihu aka sai te tah Pathen kah Ram te pang thai manawh.

²² Tede Muithla lawng a thoeng sak tah lungna, awmngaihna, ngaimawngna, kawdawna, reenna, theenna, uep-awmna, ²³ boe-ngaaina oen mah oen mah kuemsuemna he ni. He ang thaihu thli oen a kalh u Phungawl awm nawh. ²⁴ Tecoengah Khrih Jesuh kah thlaang la aka awm lawngtah amami kah thlaanghing coenggna dawngkah athe ngaihsoehna oen pumsa hue-ngaihna boeih te thinglam dawngah a ngawn poen. ²⁵ Muithla lawngah mami he hingna n’peek poen; ahih lawng mami kah hingna he khaw a mawt ham awm. ²⁶ Mami lawngah oekthloen ham awm nawh, khat oen khat te thinsa sak ham awm nawh, khat oen khat uett-ee u ham awm nawh.

¹ Maya manau thli, thlaang pakhat lawngah thawlhpalhna pakhat te a sai hau atah, nangmi Muithla ah aka awm thlaang thli lawng lawngpui doeng ah na khueh koep ham awm; te tila na sai vengah te kawdaw thinsan oen na sai u ham awm. Namami khaw suek-halhna ah na thuum u van nawh ham ngaithuen uh. ² Pakhat oen pakhat thalrih phueih te talawng takai u langtah, te tila te Khrih kah phungawl te vai uh. ³ A-u khaw, me tih khaw a ti aih tang nawh maiah amah oen amah te asangluepla aka poek u tah amah oen amah ni athailat u khoeng mai. ⁴ Thlaang pakhat rip lawng amah kah saina te noem-acai ham awm. Bii a sai te atheen atah thlaangtloe kah saina oen nuehtah tlaih ohla amah kah saina dawngah oekthloen u thai ai. ⁵ Metihtiah thlaang boeih lawng amah kah thalrih te a phueih rip ai. ⁶ Khrih kah awlthang aka cang thlaang pakhat lawngah thaihu theen a khueh toen boeih te ahih cangpueikung saya te pe lem seh. ⁷ Namah oen namah mai te thailat u boel; Pathen te a-u lawngkhaw thailatna thai nawh. Thlaang lawngah a tuh van angla a ah ca-ngai ai. ⁸ Thlaanghing lawng amah pumsa ngaihna lo ah caangti te a tuh atah ahih lawng duekna te a ah van ai; Muithla lo ah caangti te a tuh atah dungyan hingna te a ah van ai. ⁹ Tedawngah theenna te saina ben ah tha the sak u boel sih; toeng ohla n’sai u atah caangthaih yuunna atue te avan pha badai. ¹⁰ Tedawngah atue theen n’dang veng roekk ah thlaang boeih tengah theenna te sai u silang tah awlpui ngaaila oengna ben ah mami kah imkhuikaw la aka awm tengah sai u sih.

¹¹ Kamah kut roeroe oen calung abohlangla nangmi tengah ca kavan thut he bueh u lah! ¹² Nangmi te yahhuivuen reet sak ham mangkhakla aka yawm thli te tah asaw ahan kah akawng-alam dawngah oekthloenna tueng sak ham aka ngaih hue mai ni. Tede he tila a sai u he tah ahimi lawngah Khrih thinglam kawngkah heem-atek patang khangna te ahimi lawng khang van nawh ham mai ah ni. ¹³ Yahhuivuen aka reet thlaang thli lawng pateng khaw Phungawl te vai u nawh; ahimi lawngah yahhuivuen reet sak ham a ngaih u te tah, nangmi lawngah pumsa dawngah noekna a ngaih u tite ahimi lawng oekthloenna thaai ham mai ni. ¹⁴ Tede, kai tah mami Bawipa Jesuh Khrih kah thinglam bueng ni ka oekthloenna ai; metihtiah kai ham tah Khrih thinglam rang oen ah dilai he duek poen; kai khaw dilai ham tah ka duek poen. ¹⁵ Thlaang pakhat lawng yahhuivuen reet oen reet nawh he awlpui tlaih nawh ni; thlaang thaai la awm he ni awlpui poen. ¹⁶ Amami kah hingna dawngah he phung-alam aka vai thlaang thli tengah ngaimawngna oen reenna te awm hawn seh, Pathen thlaang thli boeih tengah khaw awm seh. ¹⁷ Awlcuina ah: a-u khatca lawngkhaw kai he raina m’pe u tlaih boel, metihtiah ka pum dawngkah boengha-ngaw lawng Jesuh kah saltamnaa la ka awm he a tueng sak poen. ¹⁸ Maya manau thli, mami Bawipa Jesuh Khrih kah lungvatna tah nangmi boeih sawah awm hawn seh. Amen.