EFESA

EFESA

¹ Pathen kawngaihna oen Khrih kah celtuih pakhat la aka awm kai Pawl lawngah, Khrih Jesuh oen pumkhatla awmna dawngah aka hing tih uep-awm la khaw aka sa Efesa khaaw kah Pathen thlaang thli nangmi tengah ca kavan pat u.

² Mami kah Pa Pathen oen Bawipa Jesuh Khrih lawngah nangmi te lungvatna, ngaimawngna te m’pe hawn seh.

³ Mami Bawipa Jesuh Khrih kah ana Pa oen Pathen te koeh u lah sih! Metihtiah Khrih oen pumkhatla awmna ah vaan ben kah Muithla yotheen kam-awmna soeprep peekna oen mami he yotheenna m’peek u. ⁴ Mami he amah haiah aka ciim tih cawttbauh kap nawh la awm ham, Khrih oen mami pumkhatla awmna rang oen ah amah koe la awm ham ah dilai he a suen thlan vengah,

⁵ Jesuh Khrih rang oen mami he a ca la sai ham Pathen tah cai oepsoeh poen, te tah amah kah awmngaihna oen a kamthlahna ni. ⁶ Amah kah ruep-awm lungvatna oen a lungna a Capa dawng kalawng mami he ayoela kutdo m’peek dawngah Pathen te thangpawm u sih! ⁷ Metihtiah Khrih kah duekna rang oen mami n’loeih u, te tah mami kah thawlhna boeih khawdawp a ngaai poen tina ni. Pathen lungvatna tah metihtlukla a bo, ⁸ ahih lawng mami m’peek te tah lentloe maimah aw; ⁹ Pathen lawng a cuihna boeih oen a ming athaina oen ah a kamthlahna te a sai tih Khrih rang oen soep sak ham a ngaih ahuep khawkhanna te mami m’ming sak poen. ¹⁰ Pathen lawng atue akhoek vengah soep sak ham a ngaih tah vaan oen dilai dawngah aka awm soeprep a sai boeih te thik at la cawitun tih Khrih te a luu la khueh sak ham te ni.

¹¹ Thaihu soeprep boeih he Pathen kah khawkhana oen awltloekna angla ni boeih a awm; Khrih oen pumkhatla awmna rang oen ah Pathen lawng amah kah a thlaang la awm ham mami he n’tuek poen, te tah a cuekca veng kalawng amah kah kamthlahna khawkhannna poen ni. ¹² Tedawngah Khrih ah ngaiuepna lamhacuekla aka khueh mami lawngah Pathen ruep-awmna te thangpawm u sih!

¹³ Te tila te nangmi khaw thlawnna avan khuenkung Awlthang Theen awltak awlthang te na yaak u vengah Pathen thlaang la na awm u poen. Nangmi lawngah Khrih te na oeng u tih amah thlaang la na awmna miknoekna te Pathen lawng nangmi sawah thawhcang a heen poen; te tah amah lawng awl a kam tangte Ciim Muithla te nangmi m’peekna rang oen ni. ¹⁴ Muithla he tah Pathen lawng a thlaang thli tengah awl a kam te mami lawng n’dang ngai ai tila aamahkhan la awm tih amah kah thlaang thli tengah loeihna aka soep te Pathen lawng a peek ai tila mami kah ngaitluepna la khaw awm. Mami lawngah amah kah ruep-awmna te thangpawm u lah sih!

¹⁵ Nangmi lawng Bawipa Jesuh na oengna, Pathen kah thlaang boeih na lungna u kawng te ka yaak cuek veng kalawng, ¹⁶ Pathen tengah nangmi ham awmngaih ciil thui he ka toeng nawh. Ka thangthuina dawngah nangmi te kan hilh nawh, ¹⁷ mami Bawipa Jesuh Khrih kah Pathen, mami kah ruep-awm m’Pa tengah nangmi te Muithla m’peekna hamla ka bih poepa, te Muithla lawngtah nangmi te n’cuih sak vetih Pathen te nangmi tengah avan tueng sak ai, te atah Pathen te na ming u ai. ¹⁸ Nangmi te me ang ngaiuep sak ham n’khue tih a thlaang thli hamla a kam pe kawpoek rai yotheen kam-awmna te metihtlukla a yahawh tih, ¹⁹ aka oeng mami khuiah bii aka bi a tharana te metihtlukla a bo tite na mingna thai hamla nangmi kah thinkaw te avan awng tih amah kah aangna te na dangna hamla ka bih. Mami kah akhui ben ah bii aka bi tharana he tah, ²⁰ Khrih te duekna kalawng a thawh sak tih vaan ram ah amah kah bantang ben ah a ngawlh sak vengah Pathen lawng a hawna huham tharana te ni. ²¹ Te huen atah vaan kah ukkung boeih, saithaina aana aka khueh boeih, huham tharana boeih oen ah bawi boeih sawah te Khrih lawng a uk. He dilai oen aka law ham koei dilai ah khaw saithaina aana aka khueh miing boeih sawah ahih kah miing tah miinglue koek la awm. ²² Pathen lawng soeprep boeih he Khrih kah khowtang ah a khueh tih Khrih tah khrihcabu kah a luu la te a sai, thaihu boeih sawah sawsangkoek Bawi la awm. ²³ Khrihcabu he tah soeprep boeih aka soepsakkung amah roe te asoepbirna Khrih kah a pum ni.

¹ Anoekbuet atah nangmi lawng awl na ngaai u nawh tih na thawlh u dawngah muithla ben ah na duek u. ² Te veng tue ah te nangmi lawng dilai han kah athe lawngpui te na vai u; khawhi dawngah aka awm muithla benkah tharana ukkung awl te na ngaai pe u; te muithla lawngah te Pathen awl aka ngaai nawh thli te tahe ah a uk. ³ Ataktang atah mami boeih he ahimi angla ni ng’awm u van tih mami lawng pumsa ngaihna angla khaw n’sak u, mami thinkaw oen pumsa lawng ahue angaih boeih te n’sai u. Mami khaw m’mah kah awm ih angla te thlaangtloe angla Pathen thinsana aka yawkk ham koei ni.

⁴ Tede Pathen kah reenna tah yahawh tih mami n’lungna te tah abo tangkiik dawngah, ⁵ Mami lawng awl n’ngaai nawh dawngah muithla ben ah n’duek vengah te Khrih oen haih mami he n’hing sak. Nangmi thlawn la na awm u he tah Pathen kah lungvatna rang oen ni. ⁶ Mami lawng Khrih Jesuh oen pumkhatla awmna rang oen ah vaan ram ah te amah oen haih uktem van hamla mami he amah oen n’thawh sak haih poen. ⁷ He tila a sai he tah Khrih Jesuh dawngah mami ham a lungna avan tueng sak lungvatna tah atloe boeih lak ah bo ngai tite yoeyahla tueng sak a ngaih dawngah ni. ⁸ - ⁹ Pathen kah lungvatna rang oen ah oengna oen nangmi tah thlawn la na awm u. te tah mami kah yawmna oen nawh ni, Pathen kah kutdo ni. Tedawngah a-u khat ca khaw he kawngah oekthloen u ham awm nawh. ¹⁰ Mami Khrih Jesuh ah pumkhatla awmna rang oen ah thaihu theen sai hamla mami he n’sai poen. Mami lawng sai hamla aroek abah oepsoeh thaihu theen saina oen hing hamla mami he n’sai koep poen.

¹¹ Nangmi Gental thlaangphun te Judah thlaangphun lawngah, “yahhuivuen aka reet nawh thlaang” ti u. Judah phun lawng amami tah, “Yahhuivuen aka reet thlaang” ti u. (Yahhuivuen reet tite tah pumsa dawngah tueng sak na mai ni). N’hu vengah nangmi metila na awm u tite poek uh. ¹² Tevengah te nangmi tah Khrih oen na thla u. Nangmi tah thlaangphun tloe la na awm u tih Pathen kah thlaangtuek khuiah na thuum u thai nawh. Pathen lawng a thlaang thli tengah a awlkamna dawngah akung asut awlkam paipi oen ah te na bet na pha u nawh tih he dilai dawngah ngaiuepna aka khueh nawh oen Pathen khueh nawh la khaw na sak u. ¹³ Tede tahe tah Khrih Jesuh oen pumkhatla awmna dawngah athlathloeila aka awm nangmi te Khrih kah duekna rang oen amah teng na pha u poen. ¹⁴ Judah oen Gental thlaangphun he pumkhatla a saina rang oen ah Khrih amah he mami kah roeproeina la awm. Ahimi te a pek abo tih raal la aka coeng sak vawngkulh te amah pum oen a phe poen. ¹⁵ Judah Phungawl te awlpeek thli oen phung-alam thli te khaw boeih a phe; te tila a sai te tah amah oen pumkhat la awmna ah thlaangphun pahih te thlaangphun thaai pakhatla sai tih roeproeina te awm sak ham a ngaih dawngah ni. ¹⁶ Khrih lawngah thinglam dawng a duekna oen ahimi khat oen khat a raal u the te a phe pe; thinglam oen ah thlaangphun pahih te pumkhat la a sai tih ahimi te Pathen tengla avan law puei koep. ¹⁷ Tedawngah Khrih tah va law tih Pathen oen athlathloeila aka awm nangmi Gental hue tengah khaw, thlaang boeih tengah ngaimawngna Awlthang Theen te a thui. ¹⁸ Khrih rang oen ah Judah thlaang khaw, Gental thlaang khaw mami boeih lawngah Muithla pakhat dawng kalawng Pathen haiah m’pha thai u.

¹⁹ Tedawngah nangmi Gental thlaangphun tah thlaangphun tloe tlaih nawh tih khawlawng thlaang la na awm u tlaih nawh; tahe ah nangmi tah Pathen thlaang thli oen haih ah ram khui thlaang la na awm u poen tih Pathen imkhuikaw kah thlaang poen ni. ²⁰ Nangmi khaw celtuih thli oen tawngha thli lawng lungdang a suem tangte dawngah a sak im la te na awm u van poen tih Khrih Jesuh amah te imkil lungto la awm. ²¹ Ahih tah im pumpui te haih aka caksakkung la awm tih Bawipa tengah nawn la aka awm aciim tempal bok-im la aka roeng sak ni. ²² Amah oen pumkhatla awmna rang oen ah nangmi khaw thlaangtloe hue boeih oen a sak haih Pathen lawng amah Muithla oen a awmna im la na coengg u poen.

¹ He kawngah ni Khrih Jesuh kah thongtla Kai Pawl lawng nangmi Gental thlaangphun ham Pathen tengah ka thangthui. ² Nangmi kah theenna hamla Pathen lawng a lungvatna oen he bii he bi hamla kai m’peek tite ataktangla nangmi lawng na yaak u poen. ³ Pathen lawng ahuep ahella khawkhanna a sai te a tueng sak tih kai he m’ming sak poen. (He kawng he atoila ka thut poen tih, ⁴ Kai lawng ca ka thut te na tae u atah Khrih kah awlhuep kai lawng ka ming tite nangmi lawng na yaakming u thai ai.) ⁵ Yan veng atah he awlhuep he thlaang thli te ming sak nawh, tede tahe tah Pathen lawng amah Muithla oen amah kah aciim celtuih thli oen tawngha thli tengah a tueng sak poen. ⁶ Te awlhuep tah awlthang theen rang oen Gental thlaangphun lawng Judah thlaangphun oen haih Pathen kah yotheen kam awmna te a dang poen; ahimi tah pumkhat dawngah aka thuum haih van poen tih Jesuh Khrih rang oen ah Pathen kah awlkam te a dang poen.

⁷ Awlthang theen biibikung la ka awm he Pathen kah kutdo ni, he tah amah kah huham tharana oen a sai tih m’peek ni. ⁸ Kai tah Pathen kah thlaang boeih lak ah huhsit koek la ka awm de, Khrih kah thuilek thuina nawh a bawilenna kawng Awlthang Theen te Gental thlaangphun tengah thui hamla, ⁹ Pathen lawng ahuepla khaw akhan te metila ataktangla a thoeng hang tite thlaang boeih ming sak ham biitungpui te kai m’peek. Thaihu soeprep Suenkung Pathen lawng n’hu veng atah amah kah awlhuep te a thuh a elh, ¹⁰ te tila a thuh te tah khrihcabu rang oen ah vanthlaang ukkung thli oen vaan kah huham tharana boeih lawng Pathen kah cuihna soeprep cungkuem te a mingna ham ni. ¹¹ Pathen lawng amah kah dungyan kamthlahna angla a sai tih mami kah Bawipa Khrih Jesuh rang oen a coeng poen. ¹² Khrih oen pumkhatla awmna dawngah mami lawng oengna oen ah Pathen tengla uepna oen tong-aa ohla n’cet u. ¹³ Tedawngah nangmi ham patang ka khang dawngah na kaw boet sak u mai boel tila reenna kavan bih; he ang thli he nangmi kah theenna ham boeih ni.

¹⁴ He kawngah he Pathen haiah khuklu oen ka cuengkueng tih ka buekuep yoeyah, ¹⁵ ahih teng kalawng dilai oen vaan ah aka awm imkhuikaw boeih lawng amami kah miing tak te a dang u. ¹⁶ Nangmi kah akhuiben thinkaw tharana ham amah Muithla rang oen ah a ruep-awm bawilenna dawngkah tharana te nangmi m’peekna ham ka bih tih, ¹⁷ oengna rang oen ah nangmi kah thinkaw lungbui ah Khrih lawng a im te sa seh tila ka thangthui. Nangmi lawng lungna dawngah akung na liing tih thlengyung na thlaakna ham khaw ka thangthui, ¹⁸ te atah Pathen thlaang thli oen thik at la Khrih kah lungna metihtlukla adung tih asang, akau tih asan tite nangmi lawng na ming u ai. ¹⁹ Ahih kah lungna te meveng khaw asoepla ming thai koeila awm nawh de, nangmi lawng a lungna te na ming u ngai ai, tedawngah Pathen pumsa soepna boeih oen nangmi na betoet u ham ka thangthui.

²⁰ Mami kaw khuiah biibikung a huham tharana rang oen mami kah bihna oen poekna lak ah yahawh ngaai aka sai, ²¹ Pathen tengah khrihcabu rang oen Khrih Jesuh rang oen ah yoeyahla dungyan toe ruep-awmna awm hawn seh! Amen.

¹ Tedawngah, Bawipa bii ka bi dawngah thongtla kai lawngah awl kan uen u: nangmi te Pathen lawng n’khue veng kah a taring van ah te adoengla khaw sa uh. ² Boe ngaai yoeyah uh, amueltuett la awm uh, na kaw daw sak uh. Nangmi lawng lungna te khat oen khat reenna oen tueng sak uh. ³ Nangmi te pakhatla aka piin roeproeina oen ah Muithla kah peek pumkhatla awmna te phoeih mangkhak uh. ⁴ Pathen lawng nangmi n’khue vengah te ngaiuepna pakhat a awm van angla pum pakhat oen Muithla pakhat ni a awm. ⁵ Bawipa pakhat, oengna pakhat, baptisma pakhat awm: ⁶ thlaang boeih kah ana Pa oen Pathen pakhat awm tih soeprep boeih kah Bawi, soeprep boeih dawng kalawng bii a bi tih soeprep boeih dawngah awm.

⁷ Mami pakhat rip lawngah Khrih kah peek alakloe kutdo te ating-atawk la ng’khueh u. ⁸ Caciim lawngah, “Ahih lawng asangna huen la a luui hang vengah, raal lawng a khawh khak thlaang thli te a ceh puei; thlaang thli te kutdo a peek” tila a thui. ⁹ Tahe ah “luui hang” a ti he n’tu a thuingaihna kai? Thuingaihna tah lamhacuekla dilai ahemna koek ah law thuk ti he ni. ¹⁰ Tedawngah aka rum thuk oen aka luui hang te tah vai ahih tih vaan asawben avooel la luui hang a ti he tah amah he khawhipuempa ah betoetna ham ni. ¹¹ Thlaang he kutdo aka pe khaw amah ni; Ahih lawngah khatsut te celtuih la a khueh; khatsut te tawngha la a khueh; khatsut te awlthang theen thuikung la a khueh; khatsut te pastor oen cangpueikung la khueh. ¹² He tila a sai he tah Khrih kah pum te a roengna ham Pathen kah thlaang boeih lawngah Khrihca bii te bi hamla roekbahna ni. ¹³ Tedawngah mami boeih lawng oengna dawngah khaw, Pathen capa mingna dawngah khaw pakhatla te avan-at la ng’awm u ai; mami lawng poekna aka soep thlaang la ng’awm vetih Khrih kah asoepna tangtang asang koek te m’pha van ai. ¹⁴ Te atah thlaangtloe te thawlhpalhna benla aka mawt, thlaang thailatna ham suen coplap hoem awl oen ah thlaangthaipalat thli kah cangpueina tuiphu lawng a khuen tih thlihueng lawng a yawng camoe angla te ng’awm u tlaih manawh. ¹⁵ Mami lawng lungna thinkaw oen awltak thuina oen ah luu la aka awm Khrih dawngah te soeprep ah roeng ham awm. ¹⁶ Ahih kah khawl-acuuina oen pum dawngkah atloe boeih te a bawlcawm kang tih ruhcong boeih oen pum te tuhkai u haih tih bawmcem u. Tedawngah pum dawngkah atloe boeih lawng a bi ham koei te a sai u tih pum lawngah lungna oen roeng hang.

¹⁷ Tedawngah Bawipa miing oen nangmi te ngaithuenna kan peek u: nangmi lawng Pathen aka bok nawh lukih thlaang thli angla awm u tlaih boel, ahimi kah poekna tah apoei-oepla awm tih a thinkaw tah khawyiin khoep. ¹⁸ Ahimi lawngah mingna tehca khaw khueh u nawh tih a thin a haam khaklal dawngah Pathen kah peek hingna te dang ham koei la awm nawh. ¹⁹ Ahimi lawngah yahna roe khaw khueh u nawh; thawlhna dawngah amami oen amami te bawl-aneeng u tih kuemsuem u tlaih ohla soeprep te a sai u.

²⁰ Khrih kawng na cang u te te tila nawh ni! ²¹ Nangmi lawng ahih kawng te na yaak tangtang u poen tih amah kah hubang la na awm u van angla Jesuh dawngah aka awm awltak te nangmi lawng na cang u poen. ²² Tedawngah pumsa ngaihna lawng thailatna oen phe la aka awm na hing ruem te tah hoett u loeih. ²³ Nangmi kah thinkaw oen lungbui te tah athaai, sai pan la awm ham awm. ²⁴ Nangmi lawngah hingna athaai oen ah thoekcau uh, te tah Pathen kah mueisam oen aka lo u la a sai tih aka doeng tih aciim hingna tangtang a tuengna ni.

²⁵ Tedawngah hoemthui thlaang awm tlaih boel seh! Thlaang boeih lawng aka oeng paya laikoei tengah awltak tang te thui seh; metihtiah mami boeih tah Khrih pum dawngah thik at la aka thuum boeih ni. ²⁶ Nangmi na thin a sa atah na thinsana lawng thawlhna khuila m’mawt boel seh, khawyungkhun na thin sa sak boel. ²⁷ Seitan te atue theen pe u boel. ²⁸ Aka huen lawngah huen-caanna te toeng loeih selang tah amah kah hingna ham adoengla bungkhutna te a dangna ham oen ah khawdeng thlaang te bawmcem thaina ham bii bi seh. ²⁹ Awl na thui u vengah awlthe te thui u boel; thlaang hamla hoeikhangna aka awm tih angoena ah theenna aka thoeng sak, nangmi kah awlthui aka ya hue lawng theenna te a saina ham awltheen te thui uh. ³⁰ Pathen kah Ciim Muithla te a kaw the sak u boel; Metihtiah Muithla te tah, nangmi te Pathen kah thlaang la na awm u tite miknoekna la awm tih Pathen lawng nangmi loeih sakna Khawhin a pha ai tina kah aamahkhan ni. ³¹ Thunkha-thunthlimna, thinso-kawsana, thinsana te hoett u loeih. Pakhat oen khat tlungna oen sal-aphaamna, khat oen khat thina thinkaw awm tlaih boel seh. ³² Te ang thli lak atah pakhat oen khat reenna oen komyomna kawpoek te khueh u langtah Pathen lawng Khrih rang oen ah nangmi sawah khawdawp a ngaai van angla te khat oen khat sawah khawdawp ngaai uh.

¹ Nangmi tah Pathen lawng a lungna a ca anau la na awm u dawngah amah oen lawh u van ham yawm u lah. ² Khrih lawng mami he n’lungna tih a hingna te mami ham abaw aka tuui huihthlutna oen Pathen kawhoena luciik la a nawn u van angla nangmi kah hingna te lungna lawng uk seh.

³ Nangmi tah Pathen kah thlaang la na awm u dawngah hutaa tawngpa thawlhna, apueh ngaihna, tuiilehkap aka ciim nawh kawng te nangmi tim ah thui ham pateng khaw awm nawh. ⁴ Yahna koei awl, awlhang kaahang phawhna, awlthe awlkha te nangmi lawng na thui ham koeih tlaih nawh ni. Te lak atah nangmi lawng awmngaihna awl te Pathen tengah na thui u ham awm. ⁵ Nangmi lawng na ming ceet ham tah a-u khaw hutaa tawngpa thawlhna aka sai, tuiilehkap aciim nawh awl aka thui, apueh aka ngaih tah Khrih oen Pathen kah Ram ah adang ham koei te dang manawh tite ming uh (apueh asawm ngaihna he kutsaimuei bokna pakhat van ni).

⁶ Nangmi te awlpoei awlpit oen a-u lawngkhaw n’thailatna boel seh; he ang kawngah he amah awl te aka ngaai nawh tah Pathen thinsana te a yawkk ai. ⁷ Tedawngah te ang thlaang oen te pawl u roe boel. ⁸ Namami roe khaw n’hu vengah yiinna khui khawsakna ah na hing u poen, tede nangmi lawng Bawipa kah thlaang la na awm u coeng kalawng tah aangna khuiah na awm u poen. Tedawngah aangna khuiah aka awm thlaang angla te khaw sa uh. ⁹ Metihtiah te tila khawsakna lawngtah athaih-apai theenna phun soeprep, doengna phun soeprep oen awltak phun soeprep te a thoeng sak. ¹⁰ Bawipa kah kawhoena te sai hamla yawm u lah. ¹¹ Yiinna khuiah aka awm thlaang thli lawng a sai thaihu, aphu aka awm nawh thaihu te sai u boel. Te ang thaihu te aangna dawngah daih lang tueng sak uh. ¹² (Ahimi lawngah ahuep-ahella thaihu a sai kawng te thui ham pateng yah ham awm tangkiik). ¹³ Thaihu boeih te aangna ah pho sak la a awm veng atah te thli kah acoenggna tangtang te aciimphanla tueng; ¹⁴ Metihtiah aciimphanla aka tueng thaihu boeih tah aangna la te thoeng hang. Tedawngah, “Aka ip thli tho u loeih, duekna dawng kalawng tho uh, Khrih tah na sawah aang poen ai” tila a thui.

¹⁵ Tedawngah nangmi lawng khawsak ramsakna dawngah atheenla ngaithuen uh. Tu khaw aka ming nawh thlaang angla awm u boel, thlaangcuih angla awm uh. ¹⁶ Tahe kah atue khawhin he tah san the la a awm dawngah nangmi lawng atue theen na khueh boeih te atheenla hawna uh. ¹⁷ Nangmi lawngah thlaangcuih nawh angla awm u boel, Bawipa lawng nangmi sai sak ham a ngaih te dang hamla yawm uh.

¹⁸ Yuu te ruui u boel, yuu tah nangmi te aka rawk sak khoeng ni, te lak atah Muithla oen betoet u lah. ¹⁹ Nangmi pakhat oen khat te saam laa dawngkah awl, koehna laa dawngkah awl, laa ciim dawngkah awl oen ah voemtoei uh. Bawipa te na thinkaw tang oen koehna laa, saam laa oen ah thangpawm uh. ²⁰ Mami kah Bawipa Jesuh Khrih miing oen ah soeprep boeih dawngah Pa Pathen tengah awmngaih ciil thui yoeyah uh.

²¹ Nangmi lawng Jesuh Khrih te na hinyah u dawngah nangmi pakhat oen khat awl ngaai u lah.

²² Yu-aca thli, Bawipa awl te na ngaai u van angla na vaa thli kah awl te ngaai u lah. ²³ Khrih lawngah khrihcabu sawah aana a khueh angla vaa-aca lawng khaw yu-aca sawah aana a khueh tih Khrih tah amah pum la aka awm khrihcabu kah thlawnkung la awm. ²⁴ Tedawngah khrihcabu lawng Khrih kah awl a ngaai angla yu-aca thli lawngah ataktang la a vaa-aca thli kah awl te ngaai seh.

²⁵ Vaa-aca thli, Khrih lawngah khrih-cabu te a lungna tih a hingna te a peek angla yuu-aca thli te lungna uh. ²⁶ Ahih lawngah he tila a sai, khrihcabu te tui oen aciimla a silh coengah a awl oen Pathen tengah a peek. ²⁷ Te tila khrihcabu tah atheenna boeih boeih oen aka awm tih thawlhna aka awm nawh, atloe soepna nawh oen angaw-aha, aru-arii oen cawttbauh aka awm nawh la te amah tengah peek ham angaih dawngah ni. ²⁸ Tawngpa hue lawngah amami pum te a lungna u van angla a yu-aca thli te a lungna ham awm. A yu te aka lungna tawngpa tah amah pum te aka lungna thlaang ni. ²⁹ A-u lawngkhaw amah pum te thina nawh. Khrih lawngah khrihcabu te a doen acaang tih a cawm acah angla amah pum te thina ohla a doen acaang tih a cawm acah van. ³⁰ Metihtiah mami tah amah pum dawngah aka thuum van ni. ³¹ Caciim lawngah “Tedawngah tawngpa lawng a manu oen ana pa te a ceh taak vetih a yu oen pumkhatla awm ai, ahih rawi tah pakhatla coengg ai” tila a thui. ³² He caciim dawngah aka tueng ataktang awlhuep aka dung te awm tih te tah Khrih oen khrihcabu he thuinuetna ni tila ka yaakming. ³³ Tede nangmi oen khaw tuhkai u: vaa-aca boeih lawng amah pum te a lungna angla a yu-aca te lungna selang tah yu-aca boeih lawngkhaw a vaa-aca te hinyah van seh.

¹ Ca-anau thli, na nu oen na pa awl te ngaai uh, te tah nangmi khrihca thli lawng na vai ham koei aka soeng thaihu ni. ² “Na nu oen na pa te hinyah uh” a ti he tah lamhacuek awlpeek la awm tih, ³ “te tila na vai atah nangmi ham soeprep te theen vetih dilai han ah na hinglung vaang ai” tila a thap.

⁴ Nu-apa thli, nangmi lawng na ca na nau thli te a thinsa sak boel. Te lak atah khrihca moeiboe oen thuituen uh.

⁵ Nangmi sal thli, namami kah thlaanghing bawi thli te birih haitawk oen a awl ngaai pe uh; Nangmi lawng Khrih kah bii aka bi angla thinkaw tak oen a bii te bi pe uh. ⁶ Ahimi lawng nangmi te bii a bi ti seh tila na ngaih u dawngah ahimi kah mik huh bueng ah te bii sai u boel, tede Khrih kah sal la na awm u van angla Pathen kawngaih la na thinkaw lungbui boeih oen sai uh. ⁷ Thlaanghing kah bii ni ka bi tila poek ohla Bawipa kah bii aka bi angla thathlue thakaw oen bi pe uh. ⁸ Bawipa lawngah thlaang boeih he sal khawseh, thlaangcuem khawseh, amami kah atheen saina dawngah kutdo a peek ai tite poek uh.

⁹ Bawi thli, tetih van la te na sal thli tengah sai u van langtah hih-ahuut oen tluung-athangna te toeng u loeih. Nang oen sal thli lawng vaan ah aka awm, thlaang boeih te avanpila awlcekkung bawi kah thlaang la ka awm tite ming uh.

¹⁰ Aboetna ah amah kah tha-awm tharana rang oen ah Bawipa oen pumkhatla awmna dawngah na tharana te cak sak uh. ¹¹ Seitan kah athe thailatna te padauh thaina ham Pathen kah peek phawlip acungkuem oen ah thoekcau u lah. ¹² Metihtiah mami lawng thlaanghing te n’teek u nawh tih vaan benkah muithla the kah tharana, ukkung thli, saithaina aana khuehkung thli, tahe yiinna san kah khawhipuempa tharana huham oen ni n’teek u. ¹³ Tedawngah Pathen kah phawlip oen tahe ah thoekcau u lah! Te ah ni athe khawhin te avan pha vengah nangmi lawng ceemraal thli kah teek-ayakkna kalawng na deem u vetih ceemraal tloekna aboet toe ah acakla na pai poe u ai.

¹⁴ Tedawngah ngaithuen oepsoeh uh, awltak te cihin angla na hingcen dawng-ah acakla na lah, doengna te kahkawng angla daan langtah, ¹⁵ roepna Awlthang Theen phawng hamla ngaithuen oepsoehna te khawmuek angla muek uh. ¹⁶ Oengna te phring angla pawm yoeyah uh; metihtiah te phawlip oen Seitan kah kahna haialh pla boeih te na thih u thai ai. ¹⁷ Thlawnna te thiilumuek angla muek u langtah muithla kah peek, Pathen awl te samsen angla pawm uh. ¹⁸ He ang boeih he thangthuina oen sai u lang Pathen kah bawmcemna te bih uh. Muithla kah mawtna angla me ang atue atang vengah khaw thangthui uh. Tedawngah ahuertuela awm uh, thathepakla awm u boel; Pathen thlaang boeih ham thangthui yoeyah uh. ¹⁹ Kai khaw awl thui hamla oepsoehla ka awm vengah ka thui ham koei awl te Pathen lawng m’peekna ham khaw, raltheenna oen ka thuina ham khaw, awlthang theen kah awlhuep te tueng sak thaina ham ah kai ham khaw thangthui uh. ²⁰ Tahe ah kai he thong khuiah ka awm de, he awlthang theen ham laipai la ka awm. Ka thui ham tuueng awlthang theen kawng te raltheen oen ka thuina ham thangthui uh.

²¹ Mami lawng n’lungna manau, Bawipa kah bii kawngah uep-awm la aka awm Taikhikas lawng metila ka awm tite nangmi lawng na mingna u hamla kamah kawng-alam awlthang boeih te avan thui ai. ²² Kaimi boeih metila ka awm u tite thui ham oen ah nangmi te tha thlue sak hamla ahih te nangmi tengla kavan tuih.

²³ Pa Pathen oen Bawipa Jesuh Khrih lawngah khrihca maya manau boeih tengah ngaimawngna oen lungna, oengna te m’pe hawn seh. ²⁴ Mami kah Bawipa Jesuh Khrih te aka duek nawh lungna oen ah aka lungna boeih sawah Pathen lungvatna awm hawn seh.