KOLOSA

KOLOSA

¹ Pathen kah kawngaihna oen Khrih Jesuh kah celtuih pakhat la aka awm kai Pawl oen mami kah manau Timote lawng- ² Khrih oen pumkhatla awmna ah uep-awm maya manau Kolosa khaw kah Pathen thlaang thli tengah ca kavan pat: Mami kah Pa Pathen lawng lungvatna ngaimawngna te nangmi m’pe hawn seh.

³ Nangmi ham ka thangthui u vengah mami kah Bawipa Jesuh Khrih kah ana Pa tengah awmngaih ciil ka thui u poepa. ⁴ Metihtiah Khrih Jesuh ah nangmi kah oengna Pathen kah thlaang boeih na lungna u te ka yaak u dawngah ni. ⁵ Awlthang Theen asoeng taktak te nangmi teng avan pha cuek vengah ngaiuepna m’peek kawng te nangmi lawng na yaak u. Tedawngah nangmi kah oengna oen lungna tah vaan ram ah nangmi ham a khueh ngaiuepna dawngah akung asut. ⁶ Nangmi lawng Pathen kah lungvatna kawng na yaak cuekca kalawng te lungvatna te ataktangla na ming u veng atah nangmi tim ah apuung ataai van angla te awlthang theen tah dilai pum ah puung khonghak tih yotheen kam-awmna te m’peek. ⁷ Nangmi lawng Epafras teng kalawng Pathen kah lungvatna te na ming u, Ahih tah kaimi lawng ka lungna biibipuei haih kaimi yuengah uep-awm la Khrih kah biibikung ni. ⁸ Muithla lawngah nangmi lungna m’peek te ahih lawng kaimi tengah avan thui. ⁹ Tedawngah nangmi kawng ka yaak cuek veng kalawng nangmi ham ka thangthui poepa u. Amah Muithla lawng m’peek cuihna boeih oen yaakmingna, amah kawngaih mingna oen nangmi na betoetna u ham Pathen tengah ka bih u. ¹⁰ Tedawngah Bawipa kah ngaihna angla nangmi lawng na ming thai vetih amah kawhoena te na sai poepa u thai ai. Nangmi kah hingna lawng thaihu theen soeprep boeih a sai vetih Pathen mingna dawngah te na roeng u ai. ¹¹ Soeprep boeih te thinsan kawdaw oen na ueh thaina ham Pathen ruep-awmna huham dawng kalawng aka law tharana boeih oen n’cak sak u seh. ¹² Tedawngah a aangna ram ukna khuiah Pathen lawng a thlaang thli ham oepsoehla a khueh thaihu te nang lawng paang thai koei la saikung Pa te awmngaih oen koeh uh. ¹³ Amah lawng mami he yiinna thara huham khui kalawng n’thlawn tih a lungna a Capa ram khuiah ngaimawngla te n’kuun poen; ¹⁴ a Capa rang oen mami tah n’loeih u tih mami thawlhna boeih te khawdawp avan ngaai poen.

¹⁵ Khrih tah huh thai nawh Pathen kah huh thai mueisam ni. Ahih tah a Capa camiing la awm tih a sai thaihu boeih lak ah asangluet la awm. ¹⁶ Metihtiah Khrih rang oen Pathen lawng vaan oen dilai dawngah aka awm thaihu boeih he a sai, huh thai oen huh thai nawh thaihu boeih, Muithla ben ah tharana thli, bawi thli, ukkung thli oen saithaina aana khuehkung boeih te a sai. Pathen lawng khawhipuempa dawngah aka awm boeih Khrih rang oen Khrih amah ham a sai. ¹⁷ Khrih tah thaihu soeprep boeih a awm thlan ah awm poen tih amah oen pumkhatla awmna ah thaihu soeprep boeih lawng amami awmna huen te rip a khueh. ¹⁸ Khrih tah amah kah pum la aka awm khrihcabu kah a luu ni; Ahih tah pum kah hingna kungpui la awm. Ahih tah camiing la awm tih thaihu boeih dawngah ahih bueng lawng lamhacuekla awmna huen a khuehna ham duekna kalawng a thawh sak poen. ¹⁹ A Capa lawng amah khuiah Pathen pumsa soepbir a khueh he Pathen amah kah awltloekna rang oen ni. ²⁰ Tecoengah Pathen lawng a Capa rang oen khawhipuempa boeih he amah tengla doek koep hamla a ngaih. Pathen lawng a Capa thinglam dawngah a duekna rang oen roeproeina a sai tih vaan oen dilai ah aka awm thaihu boeih te amah tengah a doek koep. ²¹ N’cuiveng atah nangmi lawng athe thaihu thli na sai u tih, na poek u dawngah Pathen oen na thla u. ²² Tede tahe tah a Capa kah thlaanghing pumsa la a duekna rang oen Pathen lawng amah paya theen la n’sai poen. Te tila a sai he tah amah haiah nangmi te ciimcaih tih cawttbauh aka kap nawh la lawh ham ni. ²³ Tedawngah, nangmi lawng thincak oen ayung na pengnelna dawngah te oengna oen acakla pai uh, awlthang theen na yaak vengkah na khueh u ngaiuepna dawng kalawng namah oen namah te thoeihnawng tlaih boel. He awlthang theen he dilai pum kah thlaang boeih tengah a phawng u tih he awlthang theen hamla Kai, Pawl khaw tuihyoeihthlaang la ka awm.

²⁴ Tahe ah nangmi ham patang palai ka khangna dawngah he ka awmngaih, metihtiah Khrih lawng amah kah pum la aka awm khrihcabu ham patang khang hamla aka awm hun te asoepna ham ka pumsa patang khangna oen a yueng ka theng pe. ²⁵ Tedawngah, Pathen lawng Khrihcabu kah tuihyoeihthlaang la kai he n’khueh poen tih bii m’peek he tah nangmi theenna ham ni. Te bii tah amah kah awlthang asoepla phawng ham te ni; ²⁶ te awlthang te yan veng atah thlaangphun boeih tengah phawng ohla a thuh, tede tahe tah a thlaang thli tengah a phawng poen. ²⁷ Pathen kah mengtengna tah thlaang boeih hamla a khueh pe lenna oen ruep-awm tangkiik awlhuep te a thlaang boeih tengah phawng hamla ni. Te awlhuep tah nangmi khuiah aka awm Khrih te ni, thuingaihna tah Pathen kah ruep-awmna te nangmi lawng na khueh u van ai tina ni. ²⁸ Tedawngah kaimi lawng thlaang boeih tengah Khrih kawng he ka thui u. Thlaang boeih lawng Khrih oen pumkhatla awmna ah pakhat rip te thlaangsoep la Pathen haiah pha puei ham cuihna boeih oen ngaithuenna ka peek u tih ka cang puei u. ²⁹ He bii ka bi vengah he Khrih kah peek, ka khuiah bii aka bi tha-awm tharana te hawna oen ka tho ka tat tih bii rai he ngah ngah ka bi.

¹ Nangmi ham khaw Laudisia khaaw kah thlaang thli ham khaw, kai he pumpakla aka ming nawh thlaang boeih ham khaw patang palai ruila metila bii ka bi he nangmi lawng na ming u ham ka ngaih. ² He tila ka bi he nangmi lawng raltheenna oen na betoet u vetih lungna dawngah pakhat oen khat beroep u ham, aka soeng yaakmingna lawng a thoeng sak ngaitluep ngaimawngna aka soep te na khuehna u thai ham ka ngaih dawngah ni. He tila nangmi lawngah Pathen kah awlhuep te na ming u thai ai, te awlhuep tah Khrih amah he ni. ³ Khrih tah Pathen kah cuihna oen mingna kaawn thuh la aka awm boeih te awngna caabi ni. ⁴ Tecoengah he he kavan thui u, metila asoeng tangkiik angla awm mai cakhaw, aka soeng nawh cal thai oelhtaihna oen nangmi te a-u lawngkhaw n’thaina u boel seh. ⁵ Kai he ka pum tah nangmi oen athlahlangla ka awm de Muithla atah nangmi oen haih ka awm tih nangmi lawng Khrih na oengna dawngah thinkaw melh tih thin at kaw at oen thik at la na pai u te ka huh vengah ka awmngaih. ⁶ Khrih Jesuh te Bawipa la na pawm u poen dawngah amah oen pumkhatla awm uh. ⁷ Amah khuiah na yung te adungla thlaak langtah amah dawngah na hingna te im angla sa u lang nangmi te n’cang puei u poen angla na oengna te cak sak u lah. Tecoengah awmngaih ciil thuina oen betoet uh. ⁸ Tecoengah Khrih tengkah ohla thlaang kah cangpueina patoeng oen khawhipuempa ukkung Muithla teng kalawng ah aka law, aphu aka awm nawh thlaanghing kah cuihna oen a-u lawngkhaw nangmi te sal la n’sai u nawh ham ngaithuen uh. ⁹ Metihtiah Khrih thlaanghing pumsa dawngah Pathen kah pumsa asoepbirla awm tih, ¹⁰ amah oen pumkhatla awmna dawngah hingna aka soep te nangmi m’peek u poen. Ahih tah muithla boeih ukkung oen saithaina aana aka khueh boeih sawah sawsang koek la awm. ¹¹ Khrih oen pumkhatla awmna dawngah nangmi lawng yahhuivuen-reetna u, thlaanghing kah sai yahhuivuen na reet u nawh tih Khrih kah sai yahhuivuen-reetna oen ni. Te tah he pumsa kah thawlh tharana kalawng loeihna te ni. ¹² Metihtiah nangmi lawng Baptisma na dang u vengah te Khrih oen haih up la na awm u poen tih duekna kalawng Khrih thawhsakkung Pathen kah huham tharana te nangmi lawng na oengna rang oen ah Khrih oen na tho haih u van poen. ¹³ Yan atah nangmi he phungawl khueh nawh Gental thlaang la na awm u tih namami kah thawlhna dawngah Muithla ben ah na duek u. Tede tahe tah Pathen lawng nangmi te Khrih oen haih ng’hing sak poen. Pathen lawng mami kah thawlhna boeih te khawdawp a ngaai poen. ¹⁴ Mami kah laiba thutna cabu oen a khuiah aka awm piinna phung te thinglam dawngah biit a hen tih aphe boeih poen. ¹⁵ Tecoengah Khrih lawng Muithla ukkung hue oen saithaina aana khuehkung hue kah tharana te thinglam dawng a hen boeih tih, rangpui kah huh la a sai, taana oen laam-eetna ah raalkhuen sal angla a mawt. ¹⁶ Tedawngah nangmi kah na caak oen na awkk kawngah khaw seh, khawhin ciim oen Thla Thaai Poei oen ah Sabbath kawngah khaw seh, a-u lawngkhaw phung-alam van sai boel seh. ¹⁷ Te ang thaihu thli boeih tah hai ben ah aka thoeng koei mueithlip mai ni; ataktang tah Khrih ni. ¹⁸ Huhthlaam sangthloei ka huh ti u tih thlaangtloe lak ah asangla aka ngaai u thlaang thli, asoeng nawh komyomna, m’mah kah pum he phep hamla awm aka ti thlaang thli a-u lawngkhaw nangmi te n’sal’phaam boel seh. Te ang thlaang thli tah thuingaihna tangtang aka awm nawh thlaanghing poekna angla a poek te oen ah oekthloen u. ¹⁹ Pum kah luu la aka awm Khrih phoeih mangkhak te a toeng u. (Khrih kah khoemdoenna oen pum lawngah cawmcah u tih ruh-rawng dakda oen tharui lawng a tawm malh coengah Pathen lawng roeng sak ham a ngaih angla te coengg.)

²⁰ Nangmi tah Khrih oen na duek haih u tih khawhipuempa kah muithla boeih ukkung teng kalawng na loeih u poen. Teahtah, n’tu ah he dilai hingna angla na hing khuep u? ²¹ N’tu hamla nangmi lawng “He he tek boel, tete teng-alai boel, atloe te nen boel,” aka ti phung alam te na vai u? ²² Te ang phung boeih te tah vai-at hawna coeng atah tula khaw thuumhawm tlaih nawh poen; te ang thli te thlaanghing kah sai phung alam oen cangpueina ni. ²³ Vanthlaang amangkhakla bokna, asoeng nawh komyom kawdawna, atlawhhlangla pum patang peekna, he ang phung alam thli he cuihna dawng kalawng aka thoeng angla awm mai ai; tede pumsa ngaihna te taana hamla tah hoeikhangna tangtang awm nawh.

¹ Nangmi tah Khrih oen hingna benla na tho haih u poen, tedawngah Pathen bantang ben ah Khrih lawng a bawi ngawlhcoen dawng a ngawlhna huen, vaan ram kah thaihu dawngah na lungbui te khueh uh. ² He dilai sawkah thaihu dawngah thinkaw khueh ohla vaan ah aka awm thaihu dawngah na thinkaw te arapcatla khueh uh. ³ Metihtiah nangmi tah na duek u poen tih nangmi kah hingna tah Khrih oen haih Pathen dawngah thuh u poen. ⁴ Nangmi kah hingna tangtang tah Khrih ni, amah a law veng atah nangmi khaw amah oen haih na phumpho u vetih amah kah ruep-awmna te na dang u van ai.

⁵ Tecoengah dilai pumsa ngaihna nangmi kaw khuiah bii aka bi hutaa tawngpa thawlhna, ciimcaih nawh khawsakna, halhna, athe ngaihsoehna, apueh ngaihna, he ang thli boeih he na duek sak ham awm. (Metihtiah apueh ngaihna he kutsaimuei bokna pakhat van ni) ⁶ He ang thaihu the aka sai tih Pathen awl aka ngaai nawh sawah te Pathen kah thinsana pai ai. ⁷ Anoekbuet ah nangmi kah hingna khaw pumsa ngaihna lawng uktem la a awm vengah namami khaw he ang pumsa ngaihna angla khaw na sak u. ⁸ Tede tahe tah he ang thaihu thli thinsana, thinthena oen thlaang thina boeih te nangmi lawng na hoett boeih ham awm. Thlaang thekhana awl, tapvoepna awlthe awlkha he na hui na kaa dawng kalawng thoeng boel seh. ⁹ Nangmi lawng thlaangruem hingna oen thlaangruem moeiboe te na dul u tih thlaang thaai hingna oen na khuk u poen dawngah pakhat oen khat te thailat u patoeng boel. ¹⁰ He thlaang thaai hingna saikung Pathen lawng amah mueime oen aka lo u tare ham boet ohla athaai sak poepa. Te tila athai sak he tah nangmi lawng amah te atheenla na mingna ham ni. ¹¹ Te tila mingna dawng atah Gental oen Judah, yahhuivuen reet oen reet nawh, thlaangngau paathuu, n’tu khaw aka ming nawh thlaang, sal oen thlaangcuem tila ahimi laklaw ah pekbona awm tlaih nawh; Khrih tah soeprep tih soeprep dawngah Khrih tah awm. ¹² Nangmi tah Pathen thlaang la na awm u; amah lawng nangmi te n’lungna tih amah hamla nangmi te n’tuek. Tedawngah thlaang kah hailam poekna, reenna, komyomna, boe-ngaaina, kawdawna oen ah khukdah u lah. ¹³ Nangmi pakhat oen khat kawlawna nawh a awm atah khat oen khat reen u langtah khawdawp ngaai uh. Bawipa lawng nangmi sawah khawdawp a ngaai van angla nangmi khaw thlaangtloe sawah khawdawp ngaai u van. ¹⁴ Tecoengah he thaihu boeih sawah lungna oen thap uh, metihtiah lungna lawngtah thaihu boeih he asoepcala pakhatla kang a tingtun tih a roep u sak. ¹⁵ Khrih kah peek ngaimawngna tah nangmi lawng awltloekna na saina ah nangmi te lawngpui aka tueng sak ham ni; metihtiah he ngaimawngna khuiah awm haih hamla Pathen lawng pum pakhat dawngah nangmi te n’khue u. Tedawngah awmngaih uh. ¹⁶ Khrih kah awl acungkuem ah aka soep te nangmi kaw khuiah awm seh. Cuihna aka awm boeih oen nangmi khat oen khat tuukkiik u lang toelthaam uh. Saam laa, Koehna laa oen laa ciim te sa uh; Na kaw khuikah awmngaihna laa oen Pathen te koeh uh; ¹⁷ Pathen tengah Khrih rang oen awmngaihna na thui u angla soeprep boeih na sai khaw, na thui khaw Bawipa Jesuh miing oen sai uh.

¹⁸ Yu-aca thli na vaa thli kah awl te ngaai uh, te tah Khrih thlaang la na awm u dawngah na sai ham koei ni. ¹⁹ Vaa-aca thli na yu ruk-awm thli te lungna u lang ahimi te awltlawh oen voemtoei u boel. ²⁰ Ca-anau thli, Khrih thlaang la na awm u dawngah na nu oen na pa te yoeyahla hinyah uh, te tah Pathen kah kawngaih ni. ²¹ Nu-apa thli, na ca thli te a thin sa sak u boel, tetih atah ahimi te a kaw boet u hau ai. ²² Sal thli aw, soeprep boeih ah dilai hankah na manghai bawi hue kah awl te ngaai pe uh. Nangmi lawng ahimi kah kawtlaakna te na ngaih dawngah a mik-huh bueng ah a awl te ngaai mai ohla Bawipa hinyahna oen ah na thinkaw tangtang oen a awl ngaai pe uh. ²³ Bii na sai roekk ah thlaanghing ham nawh tih Bawipa ham ni ka bi ti u langtah na thinkaw tangtang oen bi uh. ²⁴ A thlaang thli ham a khueh pe kutdo te Bawipa lawng nangmi m’peek ai tite hilh u boel. Bii na bi pe Manghai Bawi tangtang tah Khrih ni. ²⁵ Tedawngah a-u khaw athe aka sai boeih tah athe thaihu sai phu te a dang van ai, metihtiah Pathen lawngtah thlaang boeih te avanpila awl a cek dawngah ni.

¹ Manghai Bawi hue, na sal thli te asoengla, adoengla aphangla, voemtoei uh. Nangmi khaw vaan ram ah Manghai Bawi na khueh u van te hilh u boel.

² Thangthuina dawngah tlungmu u lang, na thangthui u vengah huertuela awm uh. Pathen tengah awmngaih ciil thui uh. ³ Te tila na thangthui u vengah Khrih awlhuep phawngthaina ham, Pathen tengkah atue theen ka dang thaina u hamla kaimi ham khaw thangthui u van. Tahe thong ah ka tlaak he khaw awlhuep ka phawng dawngah ni. ⁴ Tedawngah awlthang ka phawng ham koei te aciimphanla ka phawng thaina ham thangthui uh. ⁵ Aka oeng nawh thlaang thli tengah cuihna oen tho tat u lang atue theen na khueh boeih te hawna uh. ⁶ Nangmi kah awlthui boeih te yaak ngaih koei oen thinkaw thluembuek koeila awm selang thlaang boeih kah awl doetna te metila ka thung pe ai tite na ming u ham awm.

⁷ Kaimi lawng ka lungna ka manau, Bawipa kah bii dawngah uep-awm bii bikung, bii aka bi puei Taikhikas lawng kai kah kawng awlthang boeih he avan thui ai. ⁸ Tedawngah nangmi thathluena ham, kaimi kah khawsakna boeih aka thui hamla ahih te nangmi tengla kavan tuih. ⁹ Ahih oen haih Onisimas khaw va law van ai. Onisimas he ka lungna tih ka uepna ka manau, nangmi tim ah aka thuum van ni. He kah thaihu boeih aka coengg hang he ahih rawi lawng avan thui ai. ¹⁰ Kai oen thong ka tla haih Aristarkas lawngkhaw nangmi te n’toei u; tecoengah Barnabas kah nganca Mark lawngkhaw nangmi te n’toei u. (Mark he nangmi tengla a law atah anepla dodan ham kan uenna te na huh u poen) ¹¹ Jastas aka miingna Joshua lawngkhaw nangmi te n’toei u. He kah thlaang pathum hue he Judah thlaang, thinkaw a thaw u tih Pathen ram ham kai oen bii aka bi haih thlaang la awm u tih ahimi lawng kai he yahawh hlang n’bawm u. ¹² Khrih Jesuh kah tuihyoeihthlaang, namami kah paya laikoei Epafras lawng n’toei u. Ahih lawngah thinkaw tak oen nangmi ham thangthui poepa tih nangmi acakla na paina u ham, Khrihca thlaangsoep la na awmna u ham oen ah na oengna te aciimphanla na mingna u ham, Pathen kawngaih te asoepla na vaina u hamla a bih poepa. ¹³ Ahih lawngah nangmi ham khaw Laudisia oen Herapolish khaw kah thlaang thli ham khaw biirai a bi te kamah roe he aka mingkung la ka awm. ¹⁴ Mami lawng n’lungna Siibawi Luka oen Demas lawngkhaw nangmi te n’toei u. ¹⁵ Laudisia khaw kah maya manau thli oen Nimfa oen a im ah aka tun Khrihcabu tengah kaimi lawng n’toei u tila van thui pe uh. ¹⁶ He capat he na tae u coengah Laudisia khaw kah Khrihcabu hue khaw tae sak u van. Tetih van la nangmi lawng na tae ham capat te Laudisia khaw kah maya manau thli lawng nangmi ham avan pat van ai. ¹⁷ Tecoengah, Arkhipas te, “Bawipa kah bii dawngah nang m’peek bii te a coeng toe van bi seh tila van thui pe uh.” ¹⁸ Pawl lawng kan toei u ti he kamah kut roe oen he capat he ka thut. Thiirui oen n’khih u he van hilh u boel! Pathen lungvatna nangmi sawah awm hawn seh.