CELTUIH

CELTUIH

¹ Ka Lungna Tiofilas; Lamhacuek kah cabu dawngah Jesuh lawng thaihu a sai boeih oen bii a tong cuek vengkah a cangpueina kalawng ah vaan la a luuina khawhin toe kah akawng alam te ka thut poen. ² Vaan la a luui thlan vengah a thlaangtuek hubang hue te Ciim Muithla tharana oen a uen a tawn. ³ A duek coengah khawhin sawmlii khui puet ahimi tengah a phumpho pe tih ahih tah hing tite uepvoetna awm tlaih nawh. ⁴ Tecoengah ahimi a tun u vengah he tila awl a thui pe: “Jerusalem he ceh taak u boel, a Pa awlkam akawng alam kavan thui kutdo te ring uh. ⁵ Johan lawngtah tui oen baptisma te a peek, tede khawhin meyoeh khaw a awm aih thlan ah Ciim Muithla oen baptisma te na dang u poen ai.” tila a thui pe.

⁶ Jesuh oen a hubang thli a tun u vengah te ahimi lawng, “Bawipa, tahe vengah aw Israel thlaangphun thli he a Ram na peek koep ai? tila a doet u.

⁷ Jesuh lawng ahimi nala te, “A Pa lawng atue atang oen ari amawng a helh te nangmi lawng na ming ham ngoe mai nawh. ⁸ Tede nangmi sawah Ciim Muithla a law vengah nangmi tah tharana oen na betoet u vetih Jerusalem ah, Judia peng boeih oen ah Samaria peng ah, tecoengah dilai aboetna kheng toela kai kah sausi la na awm u ai. ⁹ He awl he a thui coengah ahimi kah mik huh roe ah te vaan la luui hang, muui lawng a yaawl khoep tih ahimi lawng hu u thai tlaih nawh.

¹⁰ Te tila vaan la a luui hang te ahimi lawng mik khah muehla vaan benla poe a dan u, tevengah himbai bawk aka bai thlaang pahih ahimi tengah a pai pe tih, ¹¹ ahih rawi lawngah, “Galili thlaang thli, n’tu ah te ah te na pai u tih vaan benla na dan khiing u? Jesuh he nangmi teng kalawng vaan la luui poen, vaan la a luui hang na huh u van angla te a rum thuk koep te na huh u ai.” a tina.

¹² Tecoengah a hubang thli tah Olif Tlaang kalawng Jerusalem la te koep meel u. Te tlaang te khawpui kalawng ah meng tentan yunyan ni a thla mai. ¹³ Ahimi tah khawpui khuila kuun u tih amami a awmna huen la te cet u: Ahimi hue te tah; Piter, Johan, Jeem oen Andru, Filip oen Tawmas, Bartalomiu oen Matthai, Alfias capa Jeem, Phunkuup Simon; oen ah Jeem capa Judas, he hue ni. ¹⁴ Ahimi tah Jesuh kah a manu Meri oen khaw, hutaa thli oen khaw, Jesuh kah a manu thli oen khaw huh u poepa tih thangthui u.

¹⁵ Khawhin meyoeh yun nuem a awm coeng atah oengca thli huhtunna awm tih thlaangmi te a pum boeih la ya pakul yun awm, Piter lawng pai tih awl a thui. ¹⁶ Ahih lawngah, “Maya manau thli, ‘Jesuh aka tu thlaang thli te lawngnuehkung Judas kawng Ciim Muithla lawng Devid kaa khui kalawng a thui oepsoeh tih Caciim khuiah a thut te asoep ham awm. ¹⁷ Judas tah mami bu khuiah aka thuum thlaang pakhat van tih mami oen bii aka bi haih hamla a tuek thlaang van ni,” tila a thui.

¹⁸ (Judas lawngah amah kah athe ara, saina oen a dang tangka te oen ah lo huen pakhat a lai, te ah te amah duek. A bung te pawkk phut tih a riil khaw boeih thoeng. ¹⁹ Jerusalem ah aka awm thlaang boeih lawng te kawng te a yaak u, tedawngah te kah lo huen te amami awl la ‘Akeldama’ tila a thui u, thuingaihna tah “Thisen lo huen.” ti ngaihna ni.).

²⁰ “Saam cabu dawngah, ‘A im te imrongg dingratt la awm selang tah im khuiah a-u khaw awm boel seh’ tila a thut. Tecoengah, ‘Ahih kah bi yueng te thlaangtloe lawng bi seh’ tila a thut te khaw awm.

²¹ Tedawngah Bawipa Jesuh kah thawhkoepna te aka thui haih hamla thlaang pakhat khat lawng mami he bawngyawng ham awm. ²² Te thlaang te tah Bawipa Jesuh he mami oen ah khawlawng ceh poepa vengah te mami tengah aka thuum van tih Johan lawng baptisma awlthang a thui veng kalawng ah, mami teng kalawng Jesuh vaan la a luui toe ah mami tengah aka awm thlaang seh” tila a thui.

²³ Tedawngah ahimi lawng thlaang pahih Josep a ti u Barsabbas (Jastas tila khaw a miingna) oen Mattias te a nuen u. ²⁴ Tecoengah ahimi lawng thangthui u tih, “Bawipa, nang lawng thlaang boeih kah kawpoek te na ming. ²⁵ Tedawngah Judas lawng a ceh taak Celtuih bii te ahih yuengla aka bi ham he kah thlaang pahih khuiah nang lawng na tuek te van tueng sak lah.” tila thangthui u. ²⁶ Tecoengah ahimi lawng te thlaang pahih khuiah te tuek hamla talcung a yueh u tih Mattias te a tuek u, ahih te celtuih thlaikhat tim ah te a thuum sak u.

¹ Pentikos hin a pha vengah oengca thli boeih te ahuen pakhat ah kang tun u. ² Tevengah thlipui khawthlii tuen awl oen aka lo u awl te vaan kalawng bawtbet ah law tih ahimi a ngawlhna im khui te a hu thulh. ³ Tevengah ahimi lawng hailai oen ah aka lo u te a huh u, te kah hailai te pek u phang tih te kah aka awm thlaang pakhat rip sawah te awm. ⁴ Ahimi tah Ciim Muithla oen betoet u tih Muithla lawngah a thui sak angla awl tloe la cal u.

⁵ Tevengah te dilai saw ram tawm kah aka law, bokna ben ah thinkaw aka pe Judah thlaang thli te Jerusalem ah awm u. ⁶ He kah tuen apau awl he a yaak u vengah thlaangping te kueng tun u. Oengca thli lawng amah awl la a cal u te ahimi lawng amah awl la rip a yaak u vengah ahimi tah a kawpoek la rai u. ⁷ Ahimi lawng ngaihang kawpoek rai oen, “He tila awl aka thui hue he Galili thlaang boeih de lah koen! ⁸ Tetih atah metila ahimi awl thui he mami lawng mah awl mah kaa la rip n’yaak kai? ⁹ Mami he Patia ram, Media ram oen Elan ram kah aka law; Mesopotamia ram, Judia ram oen Kappadocia ram kah aka law; Pontias oen Asia ram kah aka law, ¹⁰ Frikia ram oen Pamfilia ram kalawng, Iyipt ram oen Sairin khaaw teng khaaw vai Libia ram khuikah aka law thlaang ni; khatsut tah Rom ram kalawng aka law; ¹¹ Judah thlaangphun oen Judah phung aka vai Gental thlaang ni; Mami timkah khatsut tah Krik ram oen Arabia ram kah aka law thlaang ni; Pathen kah kawpoek rai thaihu sai kawng, ahimi lawng a thui u te mami lawng n’mah awl la n’yaak rip u mai!” tila a thui u. ¹² Ahimi tah ngaihang cawm-am sut u tih amami khat oen khat te, “He he n’tu a thuingaihna kai?” tila doet u.

¹³ Tede thlaangtloe lawngtah oengca thli te a nuihna u tih, “He kah thlaang thli he yuu aka ruui thlaang hue ni!” tila a thui u.

¹⁴ Tevengah Piter te celtuih paha thlaihih oen pai haih u, angaih hlang la awl a huer tih thlaangping rangpui tengah awl a thui: “Ka puei - Judah thlaangphun thli oen Jerusalem ah aka awm boeih, he kah thuingaihna he kavan thui ai, hutung u lah. ¹⁵ He kah thlaang thli he nangmi kah poek angla yuu a ruui u moenih; Tahe ah mincang khawnoek pakua ni a pha hun. ¹⁶ He tah tawngha Jo-el lawng akawng alam a thui te ni. ¹⁷ Ahih lawngah, ‘Khawhin aboetna a pha atah, Pathen lawng: Thlaang boeih he ka Muithla oen ka toi ai. Na capa thli oen na canu thli lawngah ka awl he a phawng u ai; Thlaangno roeng thaai thli lawng huhthlaam a huh u vetih Ciya patawng hue lawngah mang a man ai. ¹⁸ Te khawhin ah kamah kah tuihyoeihthlaang thli hutaa oen tawngpa sawah ka Muithla ka toi vetih ahimi lawng ka awl te a phawng ai. ¹⁹ Vaan khawhi sawah kawpoek rai miknoek ka sai vetih dilai adang ben ah khaw kawpoek rai thaihu ka sai ai. Te tah thisen, hai-alh, aka thah muepkuep haikhu oen ah ka tueng sak ai; ²⁰ Bawipa kah khawhin, ruep-awm oen alenduet te a pha thlan ah khawmik te yiin khup vetih thla lawngkhaw thisen angla lingduuk la awm ai. ²¹ Tevengah Bawipa te a khue tih reenna aka bih tah thlawnna a dang ai,’ tila a thui.

²² Ka puei Israel thlaangphun thli, ka awl he hutung u lah! Nazaret khaaw kah Jesuh lawng Pathen kah saithaina aana a khueh tite ahih rang oen Pathen lawng a sai kawpoekrai miknoekna oen kawpoekrai thaihu oen ah aciimphanla a tueng sak poen. Te ang thli te namami mik huh ah a sai dawngah nangmi lawng na ming u. ²³ Pathen lawngah amah khawkhanna angla Jesuh te nangmi kut ah peek hamla awl a khueng oepsoeh poen; ahih te thinglam dawng na tai u tih thlaangthawlh thli kah kut oen na ngawn u poen. ²⁴ Tede, Pathen lawngah ahih te duekna thara khui kalawng a loeih sak tih a thawh sak poen, metihtiah ahih te duekna lawngah thongtla angla tu khaklal thai nawh. ²⁵ Devid lawngah ahih kawng te, ‘Bawipa te ka haiah ka huh poepa; Ahih tah ka tengah awm tih ka lakueng nawh ²⁶ Tedawngah kawhoena oen ka betoet tih ka awl tah awmngaihna oen becoeih. Kai tah duek koei la ka awm de ngaiuepna oen ngaikhuek thindeeng la ka awm ai, ²⁷ metihtiah nang lawngah celkhui-khaaw ah nan voei sut nawh vetih; namah kah uep-awm tuihyoeihthlaang te thlann khuiah rong athaang sak ham na ngaih nawh. ²⁸ Nang lawngah hingna benla aka mawt lawngpui te nan huh sak poen, nan awm puei tih awmngaihna oen ka betoet.’ tila a thui.

²⁹ Maya manau boeih, mami kah patuer miingthang Devid Sengpahrang kawng he acaihpanla kavan thui ai. Ahih tah duek tih a up u poen, ahih kah thlann te tahe toe mami mik huh ah awm hun. ³⁰ Ahih tah tawngha la awm tih Pathen lawng ahih tengah awl a kam te a ming: Pathen lawng awl a kam tah Devid cadil pakhat te Devid amah angla sengpahrang la a khueh ai a ti te ni. ³¹ Pathen lawng hailam ben ah a sai ham koei te Devid lawng a ming tih tedawngah Messiah kah thawhkoepna kawng te a thui oepsoeh poen. Ahih lawngah, ‘Ahih tah celkhuikhaaw ah voei sut manawh; ahih kah a pum te thlann khuiah rong sut manawh.” tila a thui. ³² Pathen lawng Jesuh te duekna kalawng a thawh sak tite aka mingkung tah kaimi ni. ³³ Ahih tah ana Pa Pathen kah bantang ben ah a ngawlh sak poen tih ana Pa kah awlkam angla Muithla te a dang poen. Tahe ah nangmi lawng na huh u tih na yaak he tah kaimi sawah avan toi amah kutdo ni. ³⁴ - ³⁵ Devid amah he vaan la luui nawh; Ahih lawng a thui tah, ‘Bawipa lawngah ka Bawipa tengah: Na raal thli te na khowtang ah khowtloeng la ka khueh thlantoe, ka bantang ben ah ngawl lah.” tila a thui.

³⁶ Tedawngah Israel thlaang thli boeih, nangmi lawng thinglam dawng na ngawn Jesuh te Pathen lawngah Bawipa oen Messiah la a sai ni tite atak tang la ming u lah!” a tina.

³⁷ He awl he thlaang thli lawng a yaak u vengah lakueng u tangkiik tih Piter oen atloe celtuih hue nala te, “‘Maya manau thli, kaimi lawng n’tu ka sai u ai?’ tila a doet u.

³⁸ Piter lawng ahimi nala te, “Nangmi boeih lawngah na thawlhna yut u langtah na thawlhna boeih khawdawp ngaaina hamla Jesuh Khrih miing oen ah baptisma hu u lah; te atah Pathen kah kutdo Ciim Muithla te na dang u ai. ³⁹ Te kutdo te peek ham Pathen kah awlkam tah namami oen na cadil thli ham khaw, athla hlang kah thlaang boeih ham khaw, Bawipa Pathen amah lawng a khue boeih thlaang thli ham ni.” a tina.

⁴⁰ Piter lawng ahimi te awltloe khaw moen a thui pe tih, ‘He kah thlaangthe thli sawah aka law ham koei dantatna kalawng namami oen namami thlawn u lah!” a tina. ⁴¹ Ahih kah awl thui te thlaang broe lawngah a tangna u tih baptisma a huh u, te kah khawhin ah te ahimi bu khuiah thlaang thong thum yunyan lawngah a tawm a thap u. ⁴² Ahimi lawngah celtuih hue tengah cangna, khat oen khat pawlneengna, beroep lopaang buh veelna, thangthuina ah amami kah atue te a hawna u.

⁴³ Celtuih hue lawngah kawpoek rai miknoekna oen kawpoek raina thli te broela a sai u tih thlaang boeih tah lakueng u. ⁴⁴ Oengca boeih te khat la huui u tih a khueh thaihu thli te pakhat oen khat rek ara patoeng u. ⁴⁵ Ahimi lawng amami kah thaihu khuehtoen thli te a yoeih u tih a voetna aka awm thlaang thli te a ngoena angla tangka te arek ara u. ⁴⁶ Khawhin roekk ah Tempal bok-im ah te pum u, amami im ah buh veel haihna te a sai u tih lunghoeih lungpaih la awmngaihna thinkaw oen a caak u. ⁴⁷ Pathen te a thangpawm u tih ahimi te thlaang boeih lawng a hinyah u. Tecoengah thlawnna aka dang thlaang thli te Bawipa lawngah khawhin roekk ah ahimi bu khuiah te a kuun pe sak.

¹ Hin at ah Piter oen Johan tah thangthuina tue thlemben khawnoek pathum ah Tempal bok-im la te cet hih. ² Te ah te Atheen Thawhka a ti u te awm tih a thangpek kalawng khow aka kheem thlaang pakhat te ah te awm. Tempal bok-im la aka cet thlaang thli tengah tangka bih hamla ahih te hin roekk ah te kah thawhka la te avan khuen u. ³ Ahih lawngah Piter oen Johan a law hih te a huh vengah tangka a bih. ⁴ Ahih rawi lawng a bueh rang patang tih Piter lawng, “Kai hih he n’bueh lah!” a tina. ⁵ Tevengah thaihu pakhat khat m’peek ai tite a ngaiuep tih ahih rawi te a bueh. ⁶ Tede Piter lawng ahih nala, “Tangka ka khueh thamhalh nawh, tede ka khueh te kan peek: Nazaret Jesuh miing oen ah awl kan peek, tho langtah cet lah!” a tina. ⁷ Tecoengah ahih te a bantang kut ah a phoeih tih a thawh hang. Te thlaang kah a khow oen khowcih te cak pahoei; ⁸ Ahih tah sawi tih pet, pai hang tih yingyawi. Tecoengah ahih rawi oen Tempal bok-im khuila te kuun, sawipet ruila cet tih Pathen te a thangpawm. ⁹ Ahih lawng ceh ruila sawipet tih Pathen a thangpawm te te kah thlaang thli lawng a huh u; ¹⁰ Ahih te Atheen Thawhka ah aka ngawl buh bih kutduen thlaang ni tite a ming u vengah ahih sawah thaihu aka thoeng dawngah te kawpoek la rai tih a ngaai hang u.

¹¹ Te thlaang lawngah Piter oen Johan te a phoeih khak, thlaangping tah a kawpoek la rai u tih Solomon imthloeih a ti u te ah te ahimi tengla heeng u phai. ¹² Piter lawng thlaangping te a huh vengah ahimi nala, “Ka puei Israel thlaang thli, n’tu kawngah he thaihu dawngah he na kawpoek a rai u tih kaihih he alet uekcuekla nan bueh u? Kaihih lawngah kamahih kah huham tharana oen Pathen haiah theenna oen ah he kah thlaang he a ceh sak tila na poek u aw? ¹³ Abraham, Isak oen Jakob Pathen, mami patuer hue kah Pathen lawngah amah kah tuihyoeih-thlaang Jesuh te aciim ruep-awmna te a peek poen. Tede nangmi lawng aana khuehkung thli kut ah na peek tih Pilat lawng ka thlah silang tah ka loeih sak ai tila awl a khueh coengah Pateng khaw Pilat haiah nangmi lawng na thana u. ¹⁴ Ahih tah thlaangciim, thlaangdoeng la awm de, ahih te nangmi lawng na hoett u tih thlaang aka ngawn dai te thlah sak ham Pilat tengah na bih u. ¹⁵ Nangmi lawngah hingna benla aka ceh puei thlaang te na ngawn u, tede Pathen lawng ahih te duekna kalawng a thawh sak poen, tite aka mingkung tah kaimi ni. ¹⁶ Ahih kah a miing huham tharana lawng he kah khowkheem thlaang he tharana te a peek. Nangmi lawng na huh tih na ming u he tah ahih kah a miing oengna rang oen ni sai la a awm; nangmi boeih lawng na huh u angla Jesuh oengna lawng ni ahih he a sa ading sak.

¹⁷ Tedawngah maya manau thli, nangmi boeih oen namami kah mawtkung thli lawng Jesuh sawah na sai u te na ming u nawh dawngah na sai u tite ka ming u. ¹⁸ Yan vengah Pathen lawng tawngha boeih tengah, amah kah Messiah lawngah patang a khang ai tila a thui oepsoeh te amah lawng te tila asoep sak. ¹⁹ Tedawngah nangmi kah thawlhna te khawdawp a ngaaina ham thawlhna yut u langtah Pathen tengla meel u lah. ²⁰ Te tila na sai u atah, Bawipa teng kalawng muithla ben tharana a lawna tue te a pha vetih nangmi ham a tuek oepsoeh Messiah Jesuh te avan tuih ai. ²¹ Yan vengkah aciim tawngha thli hawna oen Pathen lawng a thui poen angla soeprep boeih he athaaila saina atue te a pha thlantoe ahih te vaan ah awm hun ai. ²² Mosi lawngah, ‘Bawipa na Pathen lawng nangmi khuikah thlaang kai angla tawngha pakhat te nangmi ham avan tuih ai. Nangmi lawng na sai u ham koei soeprep boeih avan thui te na hutung pe u ai. ²³ A-u khaw tawngha lawng a thui te a ngaai nawh atah Pathen thlaang thli teng kalawng a thloeng vetih a phe boeih ai’ tila a thui. ²⁴ Samu-el oen ahih coeng kah aka law tawngha boeih lawngkhaw tahe vengah aka thoeng ham koei thaihu thli he a thui u. ²⁵ Pathen lawng amah kah tawngha thli rang oen ah awl a kam te tah nangmi ham ni, Pathen lawng namami kah patuer thli tengah awlkamna a sai te nangmi lawngkhaw na paang u van. Abraham tengah te, ‘Nang kah cadil nauha thli rang oen ah dilai thlaang boeih te yotheenna oen ka phueh ka sawm ai’ tila a thui. ²⁶ Tedawngah Pathen lawng a Tuihyoeih-thlaang te a tuek tih nangmi lawng thawlhna te na ceh taak u tih nangmi boeih te yotheenna peek hamla nangmi tengah lamhacuekla avan tuih.” a tina.

¹ Piter oen Johan lawng thlaangping tengah awl a thui hih lii vengah te khawsoeih khatsut thli oen tempal bok-im aka toet raalkapbawi thli oen ah Sadusi khatsut hue te avan pha u. ² Celtuih pahih rawi lawngah thlaangping hue te duekna kalawng Jesuh tho koep tila a cang puei he tah thlaangduek thli tho koep tite a cak sak dawngah Sadusi hue tah a thin sa u. ³ Tedawngah ahimi lawng ahih rawi te a tuuk u, khaw athlem thuk poen dawngah avuen khawhin toe thong ah a thlaak u. ⁴ Tede ahih rawi kah awl thui te aka ya thlaang broe lawng a tangna u tih thlaang thong ngaa yun toela puung hang.

⁵ Avuen khawhin atah Judah thlaangphun mawtkung thli, ahaamca thli oen Phungawl cangpueikung thli te Jerusalem ah tun u. ⁶ Ahimi te Khawsoeih Bawi Annas oen Kaiafas, Johan, Alekzandar oen ah Khawsoeih Bawi kah atloe imkhuikaw thli oen huh u. ⁷ Ahimi lawngah celtuih rawi te amami haiah a pai sak tih a-u kah a miing na hawna? tila a doet u.

⁸ Tevengah Ciim Muithla oen aka betoet Piter lawng, “Thlaangping aka mawt thli oen ahaamca thli: ⁹ Khowkheem thlaang pakhat sawah thaihu theen saina kawng ahih he metila a hoeih tite tihin ah nan doet u, ¹⁰ Nangmi boeih oen ah Israel thlaang boeih lawng a ming ham tah he kah thlaang lawngah hoeih heet tih nangmi haiah a pai he tah, nangmi lawng thinglam dawngah na ngawn u tih duekna kalawng Pathen lawngah a thawh sak koep, Nazaret khaaw kah Jesuh Khrih kah a miing tharana rang oen ni. ¹¹ Caciim lawngah, “Imsakung thli lawng a hoett sut lungto te awlpui koek lungto la coengg,’ tila a thui te tah Jesuh he ni. ¹² Ahih rang bueng oen ni thlawnna he huh thai la a awm; dilai pum ah he Pathen kah peek ahih nawh atah mami aka thlawn thai a-u khat khaw awm nawh.

¹³ Awlcekna khonsil ah aka thuum thlaang thli lawngah Piter oen Johan he thoemthai cuihna aka khueh nawh thlaang mailai ni tite a ming u, tede ahih rawi lawng tong-aa ohla awl a thui te a huh u vengah a kawpoek rai u. Tede ahih rawi he tah Jesuh kah a paya beroep ni tite ahimi lawng a ming u. ¹⁴ Tede Piter oen Johan tengah khow-kheem thlaang aka hoeih te ahimi lawng a huh u dawngah n’tu khaw thui u thai nawh. ¹⁵ Tedawngah awlcekna khonsil im khui kalawng ahih rawi te kawlkalh a ceh sak u, tecoeng atah amami poek ah doet u tih awl a thui u. ¹⁶ Ahimi lawngah, “He rawi he metila n’sai lah ai? Jerusalem ah aka awm thlaang boeih lawngah ahih rawi kah miknoekna alakloe a sai he a ming u boeih poen tih mami lawngkhaw oelh thai la awm nawh. ¹⁷ Tede he thaihu he thlaangping tim ah apuung tare nawh ham, ahih rawi lawngah a-u tengah khaw Jesuh miing oen awl thui nawh ham khaang pe sih.” tila a thui u.

¹⁸ Tecoeng atah ahimi lawng te rawi te a khue koep u tih Jesuh miing oen a-u khaw cang puei nawh ham, a-u tengah khaw Jesuh miing oen awl thui nawh hamla a khaang pe u. ¹⁹ Tede Piter oen Johan lawng ahimi nala te, “Pathen haiah nangmi kah awl ngaai he aw aka soeng, tihnawhtah Pathen awl ngaai he aw aka soeng tite namami lawngah awl tloek uh. ²⁰ Metihtiah kai hih lawngtah kamah mik oen ka huh tih ka haa oen ka yaak te thui hamla ka toeng manawh.” tila a thui hih. ²¹ Tedawngah awlcekna khonsil thlaang thli lawng ahih rawi te anauh ngaai la ngaithuenna a peek tih a tuih hih. He tila thaihu aka awm dawngah he thlaang broe lawng Pathen te a thangpawm u tih ahih rawi te dan peek hamla coengg thai nawh. ²² He kah kawpoekrai miknoekna a sai pe thlaang he tah a kum sawmlii thlai law poen.

²³ Piter oen Johan he a thlah pahoei oen a paya hue tengla meel hih tih khawsoeih ahaamca thli oen Judah thlaang ahaamca thli kah awl thui te ahimi tengah a thui pe. ²⁴ Te awl te oengca thli boeih lawng a yaak u vengah ahimi boeih lawng thik at la haawl u tih Pathen tengah thangthui u: “Vaan oen dilai, tuitunlii oen ah a khuiah aka awm boeih saikung Bawipa! ²⁵ Nang kah tuihyoeihthlaang, kaimi kah patuer Devid teng kalawng Ciim Muithla oen awl na thui tih, ‘Gental thlaang thli lawng n’tu ah a thin a sa u tih, n’tu ah thlaang thli lawng ahuep khawkhanna te a sai u? ²⁶ Bawipa oen Messiah te oelhtaih hamla, dilai saw kah sengpahrang thli lawng kamthlah u tih, ukkung thli lawng tun u.’ tila na thui. ²⁷ Metihtiah Herod oen Pontias Pilat tah he khawpui khuiah Gental thlaang thli oen Israel thlaang thli oen ah nang kah aciim Tuihyoeihthlaang Messiah la na sai Jesuh te oel khak hamla tun u tangtang. ²⁸ Nang lawngah namah kah huham tharana oen aka awm ham koei na thui sut soeprep boeih te sai hamla ahimi tah tun u. ²⁹ Tedawngah tahe ah he Bawipa, ahimi kah helcalna he van poek lang namah kah tuihyoeihthlaang kaimi he namah kah awl te thin awm tangkiik la n’thui sak lah. ³⁰ Thlaang tlo thli lawng a sa a dingna ham na kut te van thueng langtah aciim Tuihyoeihthlaang Jesuh miing oen ah kawpoekraina oen kawpoekrai miknoekna te sai lah.” tila thangthui u.

³¹ Ahimi lawng a thangthui coeng boet atah ahimi a tunna ahuen te hinghuen. Ahimi tah Ciim Muithla oen betoet u tih Pathen awl te thin awm tangkiik la a thui u.

³² Oengca thli lawngah thinkaw oen lungbui khat la kang a khueh u. A-u lawngkhaw a khueh thaihu te kamah kah thaihu ni ti u tlaih nawh tih ahimi lawng a khueh thaihu boeih te khat oen khat avanpila ree u. ³³ Celtuih thli lawng Bawipa Jesuh kah thawhkoepna te huham tharana oen a phawng u tih Pathen lawng ahimi boeih sawah yotheen kam-awmna te yahawh hlang la a lun pe. ³⁴ Ahimi kah bu ah te thlaang khat khaw a voetna awm nawh. Im khaw, lo khaw aka khueh hue lawngah boeih a yoeih u tih a huh tangka boeih te, ³⁵ Celtuih hue kah kut ah kang a peek u; te tangka te pakhat rip tengah a voetna taring ah arek ara pe u.

³⁶ Te ah te Caipras tuisanglak kah Levi thlaangphun Josep aka miingna thlaang pakhat awm tih Celtuih hue lawng Barnabas a tina u. (thuingaihna tah, “Thaphawhkung” tina ni.), ³⁷ ahih lawngah amah lo huen te a yoeih, tangka te avan khuen tih celtuih hue kah kut dawngah te a tloeng pe.

¹ Ananias aka miingna thlaang pakhat te awm tih a yu tah Safira a miingna, ahih rawi lawng a khueh thaihu te thoem a yoeih hih. ² Tede a yu lawngkhaw a ngaih van tih tangka avaang athal te amahih ham a paih hih tih a paih coeih te celtuih hue kah kut ah te a peek. ³ Piter lawng ahih nala, “Ananias, n’tu ah na thinkaw te Seitan na uk sak, na khueh toen na yoeih thaihu phu te namah ham na paih thoem tih Ciim Muithla te na thai na lat na? ⁴ Na thaihu te na yoeih thlan ah namah thaihu la awm tih na yoeih coengah khaw tangka te namah koe la ni a awm. N’tu ham he ang thaihu he sai hamla thinkaw na poek? Thlaang na thai na latna nawh tih Pathen ni na thai na lat na!” a tina. ⁵ He awl he Ananias lawng a yaak pahoei oen tlim tih duek; he kawng he aka ya boeih lawngtah ⁶ Cadawng caloe thli law u tih a rawkk te himbai oen a yaawl u, a khuen u tih a up u.

⁷ Tecoeng khawnoek pathum yunyan a awm coengah a yu te va law, ahih lawngah te tila thaihu aka awm te ming nawh. ⁸ Piter lawng ahih te, “Nanghih yuvaa lawng na yoeih thaihu phu na dang te he yoeh poen aw, van thui lah?” a tina. Ahih lawngah, “Oeih, he yoeh poen ni.” a tina.

⁹ Tedawngah Piter lawng, “N’tu ah nanghih yuvaa lawng Bawipa kah Muithla he noekdak ham kaw na poek hih? Na vaa kah rawkk aka kuem thli thawhka ah tahe pai u te, ahimi lawng nang khaw n’khuen u van ai!” a tina. ¹⁰ Kawlkalh ah ahih te Piter kah a khowkung ah tlim pahoei tih duek. Cadawng caloe thli law u tih ahih te a rawkk la a thoel u, ahimi lawng a khuen u tih a vaa tengah te a up u. ¹¹ He kawng he aka ya khrihcabu oen thlaangtloe boeih lawng atah caalla a rih u tangkiik.

¹² Celtuih hue lawngah thlaangping tim ah kawpoekrai miknoekna oen kawpoekrai thaihu te broela a sai u. Oengca thli boeih tah Solomon Imthloeih ah te kueng tun u. ¹³ thlaang thli lawng ahimi te a koeh u de, amami bu khuikah thlaang nawh lawngtah ahimi oen tuhkai u ham te tong-aa haitawk u. ¹⁴ Tede, Bawipa te aka tangna hutaa, tawngpa thlaang broe lawngah ahimi bu te a tawm athap tare u. ¹⁵ Celtuih hue kah biibina rang oen a dang phu tah Piter te a law phai vengah a mueithlip lawngah thlaangtlo pakhat mai khaw thlipdah seh ti u tih, thlaangtlo thli te lawngpui la avan khuen u tih ihkhun dawngah khaw, phak dawngah khaw a ralh sak u. ¹⁶ Tecoengah Jerusalem khaawteng khaawvai kah thlaangping broe lawngah thlaangtlo thli khaw, a kaw khuiah raaithe aka awm thli te khaw avan khuen u; ahimi boeih te biit hoeih u.

¹⁷ Tecoengah Khawsoeih Bawi oen a paya boeih, te kah aka awm Sadusi thlaang boeih lawng celtuih thli te a uett aham u; tedawngah ahimi lawng thaihu pakhat khat sai hamla awl a khueng u. ¹⁸ Ahimi lawngah celtuih hue te a tuuk u tih rangpui kah thongim ah te athlaak u. ¹⁹ Tede khawyiin ah Bawipa kah vanthlaang lawng thongim thawh te a awng pe, celtuih thli te a ceh puei tih ahimi nala te, ²⁰ “Cet u langtah Tempal bok-im khuiah te pai u lang he kah hingna a thaai kawng he thlaang boeih tengah thui uh” a tina. ²¹ Celtuih hue lawng ahih awl te a ngaai pe u, khaw a thaih atah Tempal bok-im khuila kuun u tih a cang puei u. Khawsoeih Bawi oen a paya thli lawngah awlcekna khonsil huhtunna sai hamla Judah thlaang ahaamca thli te a khue; te coengah celtuih thli te ahimi haiah van law puei ham thongim la thlaang a tuih u. ²² Tede a thlaangtuih thli lawng thongim a pha u vengah thongim khuiah celtuih thli te hu u tlaih nawh, tedawngah awlcekna khonsil thlaang thli tengla te meel u tih a thui pe u, ²³ ‘Kaimi thongim ka pha u vengah thong thawhka a kalh khak tih a piin rap te khaw, aka toet thli thong thawhka ah a awm u te khaw ka huh u; tede thawhka te ka awng u vengah a khuiah a-u khat khaw ka hu u nawh!” ti u. ²⁴ Khawsoeih ahaamca thli oen tempal bok-im aka toet raalkap bawi thli lawng te awl te a yaak u vengah celtuih thli he me tih ni a ti oh kai tite a kawpoek rai u. ²⁵ Tevengah thlaang pakhat law tih ahimi nala te, “Hutung u lah! thong ah na thlaak u thlaang thli lawng Tempal bok-im ah thlaang thli te a cang puei!” a tina. ²⁶ Tevengah tempal bok-im aka toet bawi lawng amah kah thlaang thli te a ceh puei tih celtuih hue te avan khuen koep u. Tede amami te thlaangping lawngah lungto oen n’de hau ai tite a rih u tih a mangkhakla tah sai u nawh.

²⁷ Ahimi lawng celtuih thli te im khuila a kuun puei u tih khonsil thlaang thli hai ah te a pai sak u tih Khawsoeih Bawi lawng ahimi te awl a doet. ²⁸ Ahimi lawngah, “Nangmi lawngah te kah thlaang miing oen ah cang puei nawh hamla kavan khaang khak u poen, tede na sai he bueh u lah! Nangmi lawng Jerusalem pum ah na cang puei u tih puung khonghak poen, ahih te kaimi lawng a duek sak tila sai hamla na ngaih u!” a tina u.

²⁹ Piter oen atloe celtuih thli lawng awl a thung pe u tih, “Kaimi lawng Pathen awl ni ka ngaai u, thlaanghing awl ka ngaai u nawh. ³⁰ Nangmi lawng ahih te thinglam dawng na tai u tih na ngawn u coengah mami patuer thli kah Pathen lawng Jesuh te duekna kalawng ah a thawh sak poen. ³¹ Israel thlaang thli te a thawlhna yut sak ham oen ahimi kah thawlhna te khawdawp ngaai pe ham ahih tah Pathen lawngah a bantang ben ah Mawtkung oen Thlawnkung la a pawmsang poen. ³² Kaimi tah he thaihu boeih he aka mingkung la ka awm u, Pathen lawngah amah awl aka ngaai thli kutdo la a peek Ciim Muithla te khaw mingkung sausi la awm” a tina u.

³³ Awlcekna Khonsil ah aka thuum thlaang boeih lawng he awl he a yaak u vengah a thin sa soeh u tih celtuih thli te duek sak ham a ngaih u. ³⁴ Tede ahimi timkah Farasi thlaang pakhat, thlaang boeih lawng a hinyah tangkiik, Phungawl cangpueikung Gamaliel aka miingna te awlcekna Khonsil ah pai tih, celtuih thli te adaubenla khuen kawlkalh ham awl a peek tih, ³⁵ tecoengah awlcekna Khonsil kah thlaang thli nala te, “Ka puei Israel thlaang thli, he kah thlaang thli sawah na sai u he atheenla ngaithuen uh. ³⁶ N’hu vengah Tudas aka miingna thlaang pakhat awm tih amah oen amah te thlaangtang van ni tila a hoe soeh tih thlaang yalii yunyan lawngah a hu ah bang u. Tede ahih te a ngawn u coeng atah a hubang thli te yan khonghak tih ahih kah biibi te khaw a duek roep te na ming u. ³⁷ Tecoengah thlaangmi soepna atue vengah te Galili thlaang Judas te khaw awm tih ahih lawng thlaangping a hu ah a bang sak van, tede ahih te a ngawn u tih a hubang thli khaw pal u boeih. ³⁸ Tedawngah kavan thui u, he kah thaihu dawngah, he kah thlaang thli he metila khaw sai u mai boel. Amami awm la te awm u mai seh! Ahimi kah khawkhanna oen biibi he thlaanghing benkah sai la a awm atah pal badai; ³⁹ tede Pathen benkah biibina atah na taa u thai tang manawh. Nangmi lawng Pathen te ee-lena la awm hau ai!” a tina. Awlcekna Khonsil thlaang thli lawngah Gamaliel kah poekna te a vai u. ⁴⁰ Ahimi lawng celtuih thli te a khuila a khue koep u tih cungpoelh oen a tam u, Jesuh miing oen awl thui tlaih nawh ham awl a peek u tih tecoengah ahimi te a thlah u. ⁴¹ Celtuih hue tah awlcekna Khonsil kalawng a ceh u vengah awmngaih u tangkiik, metihtiah ahimi te Jesuh kawngah yarau ming ham tueng roe la Pathen lawng a poek dawngah ni. ⁴² Khawhin roekk ah Tempal bok-im khuiah khaw, im ah khaw, Messiah Jesuh kawng Awlthang Theen te ahimi lawng a thui u tih a cang puei yoeyah u.

¹ Teveng tue kalawng a awm raih coeng atah a hubang thli thlaangmi khaw puung tare hang tih Krik awl la aka cal Judah thlaang oen Judah awl la aka cal Judah thlaang thli te awlpuungna awm. Krik awl aka cal Judah thlaang thli lawng khawhin roekk bawmna fann tangka rekrana ah ahimi tengkah huhai tumtee thli tah navan thloeng bet u ti tih caitoek u. ² Tedawngah celtuih paha thlaihih lawng oengca thli te a pum boeih la a khue tun tih, “Kaimi lawng tangka kawng thuikhanna dawngah Pathen kah awl thui ham thlahphaam sut atah soeng nawh. ³ Tedawngah maya manau thli, Cuihna oen Ciim Muithla oen ah aka betoet namami timkah thlaang pasarih ah tuek uh, ahimi te he kah thaihu kawng khawkhankung la ka khueh u ai. ⁴ Kaimi ngoen tah thangthuina oen Pathen awl thui biibina dawngah atue boeih he ka hawna u ai.” a tina u.

⁵ Celtuih hue kah awl thui te ahimi boeih a kaw tla u, tedawngah ahimi lawng Ciim Muithla oen oengna oen ah aka betoet Stefen, Filip, Prokoras, Nikanor, Timon, Parmenas, Antiok khaaw kah Gental thlaang, acuek ah Judah phung aka vai Nikolas te a tuek u. ⁶ Celtuih hue tengla a tuek thlaang thli te a ceh puei u tih ahimi sawah kut a tloeng pe u tih a thangthui pe u.

⁷ Te tila te Pathen kah awl tah puung tare hang Jerusalem khawpui khuiah a hubang thli khaw puung van tih khawsoeih thli broe lawngkhaw oengna te a do u van.

⁸ Pathen lawng yotheenna oen aphueh asawm tih huham tharana oen aka betoet Stefen lawng thlaang rangpui tim ah aka lentloe miknoekna oen kawpoekraina te a sai. ⁹ Tede ahih te thlaang khatsut lawngah a oelh ataih u, ahimi te tah Sairin oen Alekzandria khaaw kah Judah thlaang thli lawngkhaw a tunna van Sal loeih thli kah sinakok bok-im ah aka thuum thlaang thli van ni. Stefen he ahimi oen khaw, Asia oen Silicia peng kah atloe Judah thlaang thli oen khaw awl oelhtaih u. ¹⁰ Tede Stefen lawngah Muithla kah peek cuihna oen awl a thui dawngah ahimi lawng taa u thai nawh. ¹¹ Tedawngah thlaang khatsut te, “Mosi oen Pathen thangthena awl ahih lawng a thui te kaimi lawng ka yaak u!” tila aka thui ham kutsuh a peek u tih a thui sak u. ¹² Te tila te ahimi lawng thlaang rangpui oen ahaamca thli oen ah Phungawl cangpueikung thli te thinkaw a phawh pe u. Ahimi lawng Stefen te a tuuk u tih awlcekna Khonsil haiah a khuen u. ¹³ Tecoengah ahih kawng te ahong ahii la aka thui ham thlaang khatsut te avan law puei u. Ahimi lawngah, “Ahih lawng he mami kah aciim Tempal bok-im oen Mosi kah Phungawl te athela a thui poepa. ¹⁴ Nazaret khaaw kah Jesuh lawngah Tempal bok-im he a phe vetih Mosi kah peek phung boeih te a thaw pan ai tila a thui te kaimi lawng ka yaak u!” tila a thui u. ¹⁵ Awlcekna Khonsil ah aka ngawl thlaang boeih lawng Stefen te a bueh rangpatang u vengah ahih kah mik hai tah vanthlaang kah mik-hai angla a awm te a huh u.

¹ Khawsoeih Bawi lawngah Stefen nala te, “Ahih lawng a thui he soeng aw?” tila a doet.

² Stefen lawngah, “Maya manau oen a pa thli, ka awl thui he hutung u lah! Mami kah patuer Abraham he Haran ah awm hamla a ceh thlan ah Mesopotemia khaaw ah a awm vengah te ruep-awm Pathen te a tueng pe tih, ³ ahih nala te, ‘Na imkhuikaw oen na ram he ceh taak langtah kai lawngah kan nueh ham koei ram la te cet lah’ a tina. ⁴ Tedawngah ahih lawng amah ram te a ceh taak tih Haran khaaw ah awm hamla te cet. Abraham te ana pa a duek coeng atah tahe ah na awmna u ram la he Pathen lawng a pooeng sak. ⁵ Tevengah te Pathen lawng Abraham te amah hamla ram te avaang athal khaw pe nawh, pae khat mai khaw pe nawh, tede Pathen lawngtah te ram te ahih peek hamla amah oen a cadil nauha kah ram la awm ham awl a kam. Pathen lawng awl a kam vengah te Abraham tah ca-anau khueh nawh. ⁶ Ahih tengah Pathen lawng a thui tah: ‘Na cadil thli te ram tloe ah saltamnaa la awm u vetih kum yalii khuiah patang palai heemtekna te a ming u ai. ⁷ Tede sal la ahimi aka hawna thlaang thli te kai lawng awl ka cek ai; tecoeng atah ahimi lawng te kah ram kalawng law u vetih he kah ahuen ah kai he n’bok u ai.” tila a thui. ⁸ Tecoengah Pathen lawng Abraham te awlkam noekna hamla yahhuivuen reetna phung alam te a peek. Tedawngah Abraham lawng Isak te a cuun coeng yarh khat a awm atah yahhuivuen a reet pe; Isak lawngkhaw a capa Jakob te yahhuivuen a reet pe tih Jakob lawngkhaw mami phun miing thang patuer thli a capa paha thlaihih te yahhuivuen a reet pe.

⁹ Jakob ca thli lawng a manau Josep te a uett u tih Iyipt ram ah sal la a yoeih u. Tede Pathen lawng a awm puei tih, ¹⁰ patang raina boeih dawng kalawng ahih te a ding apuekla a loeih sak. Iyipt sengpahrang tengah Josep a pha vengah Pathen lawng mik-hai thlampaanna oen cuihna te a peek, tedawngah sengpahrang lawng Josep te ram ukkung oen sengpahrang im khui ukkung la a khueh. ¹¹ Tecoengah Iyipt ram pum oen Kanaan ram ah khawthe khawkha tih khawdeng raina te awm. Mami kah patuer thli te caak awkk khueh u nawh, ¹² Iyipt ram atah khawbuh ram sai tite Jakob lawng a yaak vengah mami kah patuer a ca thli te lamhacuek la tela te a tuih. ¹³ Apabe ah a ceh u veng atah Josep lawngah amah te a-u tite a maya hue tengah a thui pe, tecoeng atah Iyipt sengpahrang lawng Josep cakaw kawng te a ming. ¹⁴ Tedawngah Josep lawng ana pa Jakob tengah awl a tah tih a cakaw boeih thlaang sawm sarih pa-ngaa te Iyipt ram la law ham a thui pe. ¹⁵ Tecoengah Jakob tah Iyipt ram la cet tih amah oen a ca thli tah te ah te duek u. ¹⁶ Ahimi kah a rawkk thli te Shekhem la a khuen u tih Abraham lawng Hamor thlaangphun tengkah tangka oen a lai phuel ah te a up u.

¹⁷ Pathen lawng Abraham tengkah awlkamna te sai hamla atue ayoeii veng atah Iyipt ram ah te mami phun khaw puung khuengdeng poen. ¹⁸ Hukhueng atah Josep kawng aka ming nawh sengpahrang lawng Iyipt ram te a uk. ¹⁹ Ahih lawng mami kah patuer hue te a thai alatna tih ahimi te athe akhana u, a ca thli te amilh amoengna ham im adauben ah te amangkhakla ngah ngah a khueh sak u. ²⁰ Te kah atue atang vengah a thlaang aka theen camaw Mosi te a cuun. Ahih te im ah thla thum bueng a poeh a pawm u tih, ²¹ amah im adauben ah a khueh u vengah sengpahrang canu lawng amah kah cacah la a lawh tih a cuun a cah. ²² Ahih lawng Iyipt thlaang thli kah cuihna boeih te a cang tih awlcal thingkaa ah khaw, thaihu saina ben ah khaw miing thaang thlaang la coengg hang.

²³ Mosi he a kum sawmlii a law veng atah amah thlaang phun Israel thlaang thli te metihtlukla thekha hepna patang a khang u tite bueh hamla kamthlah. ²⁴ Iyipt thlaang pakhat lawng thlaang pakhat a heem atek te a huh, cet tih a runn, Iyipt thlaang te a ngawn tih kut a thung. ²⁵ (Ahimi te loeih sak hamla Pathen lawng ahih te a hawna ai tite a thlaangphun thli lawng a ming ai tila a poek, tede ahimi lawngah ming u nawh.) ²⁶ Avuen khawhin atah Israel thlaang pahih a tawh asi hih te a huh tih ahih rawi te roeproei sak hamla a yawm. Ahih lawngah, “Hutung hih lah, nanghih he Israel thlaang ni; n’tu ah tila he na tawh na si hih?” a tina. ²⁷ Tede atloe pakhat sawah khawboe aka the soeh thlaang te lawngah, Mosi te a tulh tih, “Kaimi he uk ham oen awl cek hamla a-u lawng nang he n’khueh? ²⁸ Iyipt thlaang pakhat n’thlem ah na ngawn angla te kai hih he ngawn van ham na ngaih aw?” a tina. ²⁹ Mosi lawng he awl he a yaak vengah Iyipt ram kalawng heeng vik, cet tih Midian ram ah te awm. Te ah te a ca pahih a cuun.

³⁰ Kum sawmlii a awm coeng atah Sinai Tlaang tengkah ramhum huhang ah tangpuem aka ung hairawng haialh khui kalawng vanthlaang pakhat Mosi tengah a phumpho pe. ³¹ Mosi tah te kah a huh te a kawpoek rai tih atheen heet la huh rep ham tangpuem tengla te cet. Tede Bawipa awl te a yaak tih, ³² ‘Kai tah na patuer hue kah Pathen, Abraham, Isak oen Jakob mi kah Pathen ni.’ a tina. Mosi lawng a rih uuet ah thuen tih bueh ha nawh. ³³ Bawipa lawng, “Na khowmuek te dul lah, nang lawng na paina ahuen te huen ciim ni. ³⁴ Iyipt ram ah ka thlaang thli lawng khawdeng patang a khang u te ka huh poen. Ahimi kah khaw khah laise awl te ka yaak tih ahimi te thlah hamla ka law poen. Tahe ah law lah; Iyipt ram la kan tuih ai.’ a tina.

³⁵ “Mosi he Israel thlaang pahih lawng a ngaih nawh thlaang te ni. Ahih rawi lawng, “A-u lawng nang he kaimi kah ukkung oen awlcekkung la n’khueh?” a tina. Ahih tah tangpuem aka ung hairawng haialh dawngah aka thoeng vanthlaang bawmna rang oen ahimi te loeih sak ham oen uk hamla Pathen kah thlaangtuih ni. ³⁶ Ahih lawngah a thlaangphun thli te Iyipt ram kalawng a mawt tih, Iyipt ram ah khaw, Tuitunlii Seen ah khaw, ramhum huhang ah khaw kum sawmlii khui puet ah miknoekna oen kawpoek raina te a sai. ³⁷ ‘Pathen lawngah namami khuikah thlaang tawngha pakhat te kai angla avan tuih ai’ tila Israel thlaang thli tengah aka thuikung te tah Mosi ni. ³⁸ Ahih tah ramhum huhang ah Israel thlaang thli te aka tunsakkung, mami kah patuer hue oen khaw, Sinai Tlaang ah awl aka thui pe vanthlaang oen khaw awm haih tih Pathen kah hingna awl te mami tengah van phasakkung la awm.

³⁹ “Tede mami kah patuer hue lawng ahih awl te ngaai u nawh; ahimi lawngah ahih te hoett sut tih Iyipt ram la mel koep ham te a ngaih u. ⁴⁰ Tedawngah ahimi lawng Aaron nala, “Kaimi he aka mawt hamla pathen thli te kaimi ham van sai loeih. Iyipt ram kalawng mami mawtkung Mosi he metila a awm ti khaw m’ming u tlaih nawh poen.” a tina u. ⁴¹ Tecoeng atah ahimi lawng vaitaw ataalca muei asam te a sai u tih amami kah kutsaimuei tengah thaw a thueng u tih luciik a nawn u, amami kah kutsaimuei te hinyah peekna poei khaw a sai u. ⁴² Tedawngah Pathen lawng ahimi te a mangthawng taak tih vaan kah aisi thli te a bok sak u. Tawngha thli kah cabu dawngah a thut tah: ‘Israel thlaang thli; ramhum huhang ah kum sawmlii khui puet boiava na ngawn u tih thaw na thueng u te kai ham nawh ni. ⁴³ Nangmi lawng na khuen u te tah, Molek pathen bokna-thaang ni, namami kah aisi pathen Rephan kah muei asam, namami lawng bok hamla na sai u kutsaimuei ni. Tedawngah nangmi he Babilon ram voel la te kan hek poen ai.’ tila a thut.

⁴⁴ “Mami kah patuer hue lawng ramhum huhang ah Pathen tah ahimi tengah awm tite mingna hamla Pathen a awmna Riim-im te a khueh u. Mosi tengah Pathen lawng a thui pe angla a sak u tih Mosi tengah a huh sak amaw-aka angla te a sak u. ⁴⁵ Hukhueng atah mami kah patuer hue lawng ana pa hue tengkah riim-im te a paang u tih Pathen lawng a hek thlaang thli kah ram te Joshua mi oen a lawh pe u vengah riim-im te a khuen u tih te ah te Devid dung toe awm. ⁴⁶ Ahih tah Pathen haiah mik-hai theen a dang tih Jakob Pathen a awmna im te sak hamla Pathen tengah a bih. ⁴⁷ Tede ahih ham imsakung tah Solomon ni.

⁴⁸ Tede Tloeng Khoelh Pathen tah thlaanghing lawng a sak im dawngah te awm nawh; tawngha lawng a thui angla, ⁴⁹ Bawipa lawngah, ‘Vaan tah Ka ngawlhcoen la awm tih, dilai he tah ka khowtloeng la awm. Nangmi lawng kai ham ah me ang im nuem navan sak ai? Kai lawng ka awmna ham ahuen te mela nuem? ⁵⁰ He kah thaihu boeih he kamah lawng ka sai thaihu nawh aw?’ tila a thui.

⁵¹ Tecoengah Stefen lawng, “Nangmi he na thin thah tangkiik mai mah aw! Na kaw talh sut u tih Pathen awl yaak hamla na haa khaw pang malhtalh u! Nangmi he na patuer hue angla ni na awm u: Nangmi lawngkhaw Ciim Muithla te na hek khaklal poepa u! ⁵² Na patuer hue lawngah aheem atek nawh tawngha khat khaw awm aw? Amah kah thlaangdoeng Tuih-yoeih thlaang a lawna kawng, yan veng kalawng aka thui Pathen kah laipai thli te ahimi lawng a ngawn u. Tahe ah khaw nangmi lawng paipi na thleep u tih ahih te na ngawn u poen. ⁵³ Vanthlaang teng kalawng peek patoeng Pathen kah phungawl te aka dang tah nangmi ni, te kah phungawl te nangmi lawng na vai u nawh!” a tina.

⁵⁴ Awlcekna Khonsil ah aka thuum thlaang boeih lawng Stefen kah awl thui te a yaak u vengah a thin sa soeh u tih thinsa uuet ah a naw te cakcak a rueng u. ⁵⁵ Tede Ciim Muithla oen aka betoet Stefen tah vaan a dan hang tih Pathen kah bantang ben ah aka pai Jesuh oen Pathen kah ruep-awmna te a huh. ⁵⁶ Ahih lawngah, “Bueh lah! Vaan ke awng u tih Pathen kah bantang ben ah Thlaanghing Capa aka pai ke ka huh!” tila a thui.

⁵⁷ Khonsil kah thlaang thli lawng angaihhlangla paang u tih a haa te khoep a buem u. Tecoengah ahimi boeih lawng pahoei a cuuk thil u tih, ⁵⁸ ahih te khawpui adaubenla akhup athalla a mawt u tih lungto oen mat a de u. Sausi la aka awm thlaang thli lawngah amami kah himbaidung thli te cadawng pakhat Sawl aka miingna te a kuem sak u. ⁵⁹ Ahimi lawng lungto oen a de u lii vengah te Stefen lawng Bawipa tengah, “Bawipa Jesuh, ka muithla he nang lawng lo mai loeih!” a tina. ⁶⁰ Ahih lawngah khuklu oen cuengkueng tih, “Bawipa! He thli lawngah thawlhna a sai he van thung pe boel!” tila te angaihhlangla paang. He awl a thui coeng atah duek poen.

¹ Ahih a ngawn u te Sawl lawngkhaw a kaw tlaak puei van.

² Bokna ben ah tlungmu thlaang khatsut lawngah Stefen rawkk te a kuem u, a kaw the u tih rap u.

³ Tede Sawl lawngtah khrihcabu te phe ham a yawm; im pakhat coeng pakhat ah cet tih oengca thli te hutaa khaw, tawngpa khaw akhup athalla a mawt tih ahimi te thongim ah a thlaak.

⁴ Aka yan khonghak oengca thli lawngah peng tawm ah cet u tih awlthang a thui u. ⁵ Filip tah Samaria ram kah khawpui la te cet tih te kah aka awm thlaang thli tengah Messiah kawng te a thui pe. ⁶ Filip kah awl thui dawngah thlaangping te a kaw thluembuek u, ahih lawng kawpoekrai a sai te a huh u tih atheenla awl te a hutung u. ⁷ Raaithe lawng a kuun thlaang thli kah a kaw khui kalawng raaithe thli te vupaang ruila co u tih, aka khawn thlaang thli oen khowkheem thlaang thli broela hoeih u. ⁸ Tedawngah khawpui khuikah thlaang thli tah awmngaih u.

⁹ Te khawpui khuiah Simon aka miingna thlaang pakhat awm tih amah kah caam thoemthaina oen Samaria thlaang thli te kawpoek a rai sak poepa. Ahih lawng amah te thlaang mailai nawh ni tila a thui tih, ¹⁰ te khawpui kah thlaangcawm thlaangcee, ahem asang boeih lawng ahih awl te a ngaai pe u tih ahimi lawng, “Ahih tah ‘Alen Duet Huham Tharana’ a ti u Pathen kah tharana ni” tila te a thui u. ¹¹ Ahih lawngah amah kah caam thoemthaina oen asanhlangla ahimi te a thai alatna poen dawngah a thinkaw thluembuek u tih awl a ngaai pe u. ¹² Tede Jesuh Khrih kawng oen Pathen Ram kawng awlthang theen Filip lawng awlthang a phawng te a tangna u tih hutaa tawngpa lawngkhaw baptisma te a dang u. ¹³ Simon lawngkhaw a tangna van tih baptisma a dang coeng atah Filip tengah te awm roep poen, ahih lawngah alentloe miknoekna oen kawpoekraina te a huh vengah a ngaai hang sut.

¹⁴ Jerusalem ah aka awm celtuih thli lawng Samaria khaaw kah thlaang thli lawngkhaw Pathen awl te a tangna u van poen tite a yaak u vengah Piter oen Johan te ahimi tengla a tuih u. ¹⁵ Ahih rawi lawng a pha atah ahimi lawngah Ciim Muithla te a dangna u hamla oengca thli ham te a thangthui pe hih. ¹⁶ Metihtiah Ciim Muithla te ahimi timkah a-u pakhat tengah khaw law thlan hun; ahimi lawngah Bawipa Jesuh miing bueng oen ah baptisma te a huh u hun dawngah ni. ¹⁷ Tecoengah Piter oen Johan lawng ahimi sawah a kut te a thueng hih tih Ciim Muithla te a dang u.

¹⁸ Celtuih rawi lawngah ahimi sawah kut a thueng tih oengca thli lawng Ciim Muithla a dang u tite Simon lawng a huh. Tedawngah ahih lawng Piter oen Johan te tangka a peek tih, ¹⁹ “A sawah ka kut ka thueng pe thlaang boeih lawng Ciim Muithla te a huhna u ham, huham tharana te kai m’pe van lah,” a tina.

²⁰ Tede Piter lawng ahih nala te, “Pathen kah kutdo he tangka oen ka lai thai ai tila na poek dawngah namah oen na tangka te hell ah tla hih! ²¹ Pathen mik huh ah na thinkaw lungbui a doeng nawh dawngah kaihih kah biibina dawngah na thuumna ham koei avaang athal khaw awm nawh. ²² Tedawngah he ang na kamthlahna athe dawng kalawng yut langtah he ang thaihu na poek dawngah na sawah khawdawp avan ngaaina ham Bawipa tengah thangthui lah. ²³ Metihtiah nang he uett-eena oen na betoet tih thawlh thongtla la na awm tite kan huh.” a tina.

²⁴ Simon lawng Piter oen Johan nala te, “Nanghih lawng na thui te ka sawah pakhat khaw a thoengna nawh ham reenna oen Bawipa tengah thangthui hih lah” a tina.

²⁵ Piter oen Johan lawng Bawipa kawng a mik huh thli te a thui hih tih Bawipa awl te a phawng hih coeng atah Jerusalem la koep meel hih. A meel lam ah Samaria peng kah vangca vangnau yahawh hlang ah te Awlthang Theen a phawng hih.

²⁶ Bawipa kah vanthlaang pakhat lawng Filip nala te, “Tho lang kamthlah lah, akaak ben Jerusalem kalawng Gaza la cehna lawngpui ah cet lah.” a tina. (He kah lawngpui he tahe ah hawna u tlaih nawh.) ²⁷ - ²⁸ Tedawngah Filip tah tho tih cet. Lawngpueng ah im la aka meel Etiopia sengpahrang nu kah kaawn-ava kuemkung, awlpui koek bawi la aka awm Etiopia thlaang tiltleh a ti u pakhat te a hum. Ahih te Pathen bok hamla Jerusalem la cet tih amah kah maranglengg oen im la koep meel. Maranglengg a cit tih im la a meel vengah tawngha Isaiah cabu te a tae. ²⁹ Ciim Muithla lawng Filip nala, “Maranglengg tengah ayoeii-repla cet lah.” a tina. ³⁰ Filip lawngah heeng phai tih ayoeii rep veng atah ahih lawngah tawngha Isaiah kah cabu a tae awl te a yaak. Ahih nala te, “Nang lawng na tae te na yaakming aw?” tila a doet.

³¹ Te kah bawi lawng, “A-u lawng-khaw a thuicaih nawh maiah metila ka yaakming thai ai?” a tina. Te atah ahih lawng Filip te maranglengg dawngah luui ham oen ngawlh haih hamla te a ceel. ³² Ahih lawngah caciim awl a tae te tah: “Ngawn hamla a khuen tuuca angla a mawt u tih, a mul te a vawkk pe vengah awl kaa aka law nawh tuucano angla awm, ahih tah awl kam at khaw thui nawh. ³³ Ahih te yaraula a sai u tih, asoeng akam nawh la awl a cek u, dilai dawngah a hingna aboet poen dawngah ahih kah cadil nauha kawng te a-u khat lawngkhaw thui thai u manawh.” tila a thut te ni.

³⁴ Te kah bawi lawng Filip nala te, “Tawngha lawngah a-u kawng a thui kai? Amah kawng aw a thui, tihnawhtah thlaangtloe kawng aw a thui kai, van thui lah?” a tina. ³⁵ Tecoeng atah Filip lawngah te kah caciim awl kalawng ah a tong pe tih Jesuh kawng Awlthang Theen te ahih tengah a thui pe. ³⁶ Ahih rawi tah poe cet thuk hih, tui a awmna te a pha hih veng atah te kah bawi lawng, “He ah tui awm he. Baptisma dang ham n’tu lawng kai he n’kang khak ai?” tila a thui. ³⁷ (Filip lawngah, “Na thinkaw lungbui boeih oen na tangna atah baptisma na dang ai ta” a tina. Ahih lawngah, “Jesuh Khrih tah Pathen Capa ni tite ka tangna” a tina.

³⁸ Te kah bawi lawngah maranglengg te a pai sak, Filip oen te kah bawi te tui dawngla bok cet thuk hih tih Filip lawng ahih te baptisma a peek. ³⁹ Ahih rawi te tui dawngkah a law hang hih vengah Bawipa kah Muithla lawng Filip te vik a ceh puei. Te kah bawi lawngah ahih te koep hu tlaih nawh, tede awmngaihna oen poe cet. ⁴⁰ Filip lawng Asdod khaw ka pha tite a ming; ahih tah Sisaria la cet tih a pha thlantoe lawngpueng kah khaw roekk ah te Awlthang Theen a thui.

¹ Teveng yun ah te Sawl lawngah Bawipa kah a huvai thli te heem-atek tih ngawn hamla a teeng mangkhak. Ahih lawng Khawsoeih Bawi tengla cet tih, ² Bawipa kah lawngpui aka vai thlaang thli te a huh atah hutaa khaw, tawngpa khaw ahimi boeih te tuuk thaina ham, a tuuk thlaang thli te Jerusalem la avan khuen koep thaina hamla Damaskas khawpui kah sinakok bok-im kah ahaamca thli tengah a yaak sakna ca te a bih.

³ Sawl tah cet tih Damaskas khawpui te a pha tawm atah, vaan kah aangna pakhat lawng mikpatap ah a thue ploeng tih a teng-avai te aang rawngtheng. ⁴ Ahih te dilai ah tlim tih, “Sawl, Sawl! N’tu ah kai he nan heem nan tek aih?” tila awl kam at te a yaak.

⁵ Ahih lawngah, “Bawipa, nang te a-u?” tila a doet.

⁶ Tede tho langtah khawpui khuila te cet lah, te ah te na sai ham koei te avan thui ai.” a tina.

⁷ Sawl oen aka cet haih thlaang thli te pai ngangtang u, awl kam at khaw cal u nawh; ahimi lawng awl tah a yaak u de a-u khat khaw hu u nawh. ⁸ Sawl tah dilai dawng kalawng tho hang tih a mik te a daai, tede thaihu khat khaw hu nawh. Tedawngah ahimi lawng a kut ah a phoeih u tih Damaskas khawpui khuila a mawt u. ⁹ Khawhin hin thum khuiah ahih te a mik tueng nawh, teveng khuiah te caak awkk khaw ca nawh tih tui khaw aw nawh.

¹⁰ Damaskas khawpui ah Ananias aka miingna Khrihca pakhat awm. Ahih lawngah huhthlaam a huh tih te kah huhthlaam dawngah Bawipa lawng ahih te, “Ananias!” tila a khue. Ahih lawngah, “Bawipa he ah ka awm,” a tina.

¹¹ Bawipa lawng ahih nala te, “Tho langtah Lawng Doeng ah aka awm Judas im la te cet lah, te ah te Tarsas khaw kah Sawl aka miingna thlaang pakhat te tlap lah. Ahih tah thangthui lii hun tih, ¹² ahih lawng a mik a tueng koep na ham Ananias aka miingna thlaang pakhat law tih a sawah kut a tloeng pe te huhthlaam a huh poen.” a tina.

¹³ Ananias lawng, “Bawipa, thlaang yahawh lawngah he kah thlaang kawng khaw, Jerusalem kah na thlaang thli tengah rih-awm thaihu a sai boeih kawng te khaw avan thui u. ¹⁴ Tecoengah nang aka bok thlaang boeih tuuk hamla khawsoeih ahaamca thli tengkah aana oen ni a law.” a tina.

¹⁵ Bawipa lawng ahih nala te, “Cet mai hawn, metihtiah kamah kah bii aka bi hamla, Gental thlaang thli, sengpahrang thli oen Israel thlaang thli tengah ka miing aka tueng sak ham ahih te ka tuek poen. ¹⁶ Tecoengah kamah roeroe lawngah kamah kawngah patang a khang ham koei boeih te ka huh sak ai.” a tina.

¹⁷ Tedawngah Ananias lawng cet tih Sawl a awmna im khuila te kuun tih a sawah kut a tloeng pe. Ahih lawng, “Ka manau Sawl, he la na law vengah lawngpueng ah te namah tengah aka phumpho Bawipa Jesuh amah lawng kai he n’tuih. Na mik te a tueng koep na ham Ciim Muithla oen na betoet na hamla ni kai he n’tuih.” a tina. ¹⁸ Kawlkalhca maiah Sawl kah a mik dawng kalawng thaihu pakhat ngakher angla tla tih a mik te tueng koep. Ahih lawng tho tih baptisma te a dang; ¹⁹ tecoengah caak awkk te a caak coeng atah a tha awm koep.

²⁰ Ahih lawng sinakok bok-im boeih ah te cet tih Jesuh tah Pathen Capa ni tite a thui.

²¹ Ahih kah awl thui te aka ya thlaang boeih tah a kawpoek rai u tih, “Ahih he Jerusalem ah Jesuh aka bok thlaang boeih aka ngawn te nawh aw he? Ahimi te tuuk hamla kamthlah tih khawsoeih ahaamca thli tengah khuen hamla ni he la a law de ca?” tila te doet u.

²² Tede Pawl kah awl thui tah huham tharana awm tare tih Jesuh tah Messiah ni tila a thui rapcaat tih Damaskas ah aka awm Judah thlaang thli lawng a awl te thung pe u thai nawh.

²³ Khawhin yahawh thlaang a awm hang coeng atah Judah thlaang thli te tun huh u tih, Sawl te ngawn hamla khaw a khan u, ²⁴ tede ahimi kah khawkhan te Sawl tengah a thui pe u. Ahimi lawng Sawl te ngawn a ngaih u dawngah khawpui kah vawng thawhka te khawyiin khawdaai a toet u. ²⁵ Tede yiin at atah Sawl te a hubang hue lawng a khuen u tih pahaang dawng a sang u, vawngkulh bangbuerh kalawng duem a thlaak u.

²⁶ Sawl tah Jerusalem la cet tih hubang thli tengah pawlneeng hamla a yawm. Tede ahih te hubang pakhat van ni tite tangna u nawh tih ahimi lawng a rih u. ²⁷ Te atah Barnabas te ahih bawm ham law tih celtuih hue tengla a ceh puei. Ahih lawngah Sawl lawng lawngpueng ah Bawipa te a huh tih awl a thui pe kawng te ahimi tengah a thui pe. Sawl lawngah Jesuh miing oen raltheenla awl a thui te khaw ahimi tengah te a thui pe. ²⁸ Tecoeng atah Sawl te ahimi oen awm haih u tih Jerusalem te a hiil adawng, Bawipa miing oen raltheenla awl a thui. ²⁹ Krik awl la aka cal Judah thlaangphun hue oen khaw awl a thui u tih oelhtaih u, tede ahimi lawngkhaw ahih te ngawn ham a yawm u. ³⁰ Oengca thli lawng te kawng te a ming u vengah Sawl te Sisaria la a ceh puei u tih Tarsas khaaw la te a tuih u.

³¹ Judia Tecoeng atah ram, Galili ram oen Samaria ram kah khrihcabu tah ngaimawngla awm u. Bawipa te hinyahna oen khaw a sak u tih Ciim Muithla kah bawmna rang oen a tha ra u tih puung tare u.

³² Piter tah khaw tawm ah yin la cet tih voei khat atah Lidda ah aka awm Pathen thlaang thli te hip hamla te cet. ³³ Te ah te kum reet khuiah khawn roep tih ihkhun dawng kalawng aka tho thai nawh Anias aka miingna thlaang pakhat te awm. ³⁴ Piter lawng ahih nala te, “Anias, Jesuh Khrih lawng na sa avan ding sak poen. Tho langtah na ihphah te yaawl.” a tina tih Anias te pahoei tho. ³⁵ Lidda oen Sharon ah aka awm thlaang lawng a hih te a huh u tih Pathen ben ah kaw a thaw u.

³⁶ Joppa khaaw ah Tabita aka miingna oengca pakhat awm. (Ahih te Krik awl la Dorkas a miingna tih thuingaihna tah, “Sayuk” ti ngaihna ni.) Ahih lawng thaihu theen saina oen khawdeng bawmna ah atue atang boeih te a hawna. ³⁷ Tevengah te ahih tah tlo tih duek. A rawkk te tui a thluk u tih asaw dawtt im han ah te a helh u. ³⁸ Joppa khaaw he Lidda khaaw kalawng thla aih nawh tih Lidda ah Piter awm tite Joppa khaaw kah oengca thli lawng a yaak u vengah thlaang pahih a tuih u tih, “Reenna oen kaimi tengah aloela law de lah.” tila awl a uen u. ³⁹ Tedawngah Piter te kamthlah pahoei tih ahih rawi oen cet u. A pha veng atah asaw dawtt im han la te a luui puei u. Huhai thli lawng Piter te a veel khoep u tih rap u, Dorkas lawng a hing vengah a sai pe angki oen hinaak himbai thli te a huh sak u. ⁴⁰ Piter lawng ahimi boeih te im han kalawng ram la a ceh sak coengah khuklu oen cuengkueng tih thangthui; tecoengah rawkk benla maang tih, “Tabita, tho lah!” a tina. A mik a daai tih Piter te a huh vengah tho tih ngawl. ⁴¹ Piter lawng a phoeih tih ahih te a thawh hang. Tecoengah Oengca boeih oen huhai thli te a khue tih ahimi tengah te a hing la a tloeng pe. ⁴² Te kawng awlthang te Joppa khaaw ah thaang khok tih thlaang broe lawng Bawipa te a tangna u. ⁴³ Piter tah Joppa khaaw kah Simon aka miingna saphaw oen haw-apai thaihu aka sai thlaang oen ah khawhin yahawh hlang haih awm.

¹ Sisaria khaaw ah Kornilias aka miingna thlaang pakhat awm. Ahih tah, “Itali Raalkapbu” a ti u Rom raalkapbu pakhat kah raalbawi ni. ² Ahih tah bokna ben ah a tlungmu thlaang pakhat la awm tih amah oen a imkhuikaw boeih lawng Pathen a bok u. Ahih lawngkhaw Judah thlaang khawdeng thli te a bawm acem poepa tih Pathen tengah thangthui yoeyah. ³ Hin at atah khawvaang ben khawnoek pathum yunyan ah ahih lawng huhthlaam a huh tih te kah huhthlaam dawngah Pathen vanthlaang pakhat law tih “Kornilias!” tila khuekung te aciimphanla a huh.

⁴ Ahih lawng vanthlaang te rih doe ah a dan heet tih “N’tu nuem, Bawipa?” a tina.

⁵ Piter aka miingna thlaang pakhat tengah te tahe ah Joppa khaaw la thlaang tuih lah. ⁶ Ahih tah tuitunlii tengah aka awm saphaw thaihu aka sai Simon im ah pah.” a tina. ⁷ Tecoeng atah vanthlaang te cet. Kornilias lawng amah im kah tuihyoeihthlaang pahih oen bokna ben ah tlungmu tih amah te pumpakla doenkung raalkap pakhat te a khue. ⁸ Ahimi tengah amah lawng a huh boeih te a thui pe tih Joppa khaaw la ahimi te a tuih.

⁹ Ahimi te cet u tih avuen khawhin Joppa a pha tawm vengah te, Piter tah thangthui hamla hingthun ah imphu la luui hang. ¹⁰ Ahih te a bung pawng tih pakhat khat caak hamla a ngaih; caak awkk te aroek abah pe u vengah ahih lawng huhthlaam pakhat a huh. ¹¹ Te kah huhthlaam dawngah te, vaan awng u tih thaihu pakhat aka law thuk, a kil palii a thlingthlui tih himbai bohlang oen aka lo u, dilai la avan thlaak thuk te a huh. ¹² Te kah a khuiah te ramsa phun soeprep boeih, aka colh aka vaan thai ramsa boeih oen va phun soeprep boeih te awm. ¹³ Awl pakhat lawngah, “Piter, tho lah; ngawn langtah ca lah!” a tina awl te a yaak.

¹⁴ Tede Piter lawng, “Ka ca nawh mue, Bawipa! phung alam ben ah aka acaih nawh tih aka ciim nawh thaihu te khatca khaw ka ca nooek nawh.” a tina.

¹⁵ Te kah awl lawng koep a thui pe tah, “Pathen lawng Ciim a ti coengthloeih te pakhatca khaw aciim nawh la poek boel.” a tina. ¹⁶ He tila voei thum toe awm tih tecoeng atah te kah thaihu te vaan la koep a doek hang poen.

¹⁷ Piter lawng he kah huhthlaam thuingaihna a kawng te a poek lii vengah, Kornilias kah thlaangtuih hue lawng Simon im te a pha u tih vawng thawhka haiah ahimi te pai u. ¹⁸ Ahimi lawngah, “Simon Piter aka miingna kamyin te awm aw?” tila a khue tih a doet u.

¹⁹ Piter lawng huhthlaam thuingaihna te yaakming ham a poek lii veng-ah Muithla lawngah, “Hutung lah! Thlaang pathum lawng nang he n’tlap u. ²⁰ Tedawngah tho langtah rum thuk, ahimi oen haih cet, uelh boel, ahimi te kai lawng ni kavan tuih.” a tina. ²¹ Tedawngah Piter tah ahimi tengla cet thuk tih, “Nangmi lawng na tlap u te kai poen ni. N’tu navan lawh u?” a tina.

²² Ahimi lawng, “Raalbawi Kornilias lawng n’tuih u. Ahih tah Pathen aka bok thlaang theen pakhat la awm tih Judah thlaang boeih lawngah a hinyah tangkiik u. Nang lawng na thui thli te ahih lawng a yaakna hamla Pathen kah vanthlaang pakhat lawng nang te amah im ah ceh puei ham a thui pe.” a tina u. ²³ Piter lawng ahimi te im khuila a khue tih yiin at tah ip u de a tina tih te ah te pah u.

²⁴ Avuen khawhin ah Piter tah Sisaria khaaw te a pha, te ah te Kornilias lawng amah cakaw thli oen paya laikoei a ceel thlaang thli oen ahih te a ring u. ²⁵ Piter te a law phai vengah Kornilias lawng a do tih a khowkung ah a buekuep pe. ²⁶ Tede Piter lawng a thawh tih, “Pai hang lah, kai khaw thlaang mailai van ni” a tina. ²⁷ Piter oen Kornilias tah awl noenoe a thui hih tih im khuila a kuun phai hih vengah thlaang broela a tun kueng te a huh. ²⁸ Tevengah ahimi nala te, “Judah thlaang pakhat he Gental thlaang phun oen yingyawi paithle tih pawlneeng haih hamla a bokna phung lawng ngaih nawh tite atheencala namami lawngkhaw na ming u. Tede a-u khat khaw phung alam ben ah caih nawh tih ciim nawh tila poek nawh ham Pathen lawng n’huh sak poen. ²⁹ Tedawngah nang lawng nan khue sak vengah oelhtaih tlaih ohla ka law poen. Tetih atah van thui u lah, n’tu hamla nan khue u?” a tina.

³⁰ Kornilias lawng, “N’thlem vai vuen, he veng tue yunyan ah, khawvaang khawnoek pathum ah te kamah im khuiah ka thangthui. Kawlkalhca maiah himbai a bawk likthik aka bai thlaang pakhat ka haiah va pai tih, ³¹ ahih lawng: ‘Kornilias! Pathen lawng na thangthuina te a yaak tih reenna oen bawmcemna na sai te a ming poen. ³² Joppa khaaw la thlaang tuih langtah Simon Piter aka miingna thlaang te khue sak. Ahih tah tuitunlii tengah aka awm saphaw aka sai Simon im ah te pah” tila te a thui. ³³ Tedawngah nang te pahoei kan khue sak, na law tih theen poen. Tahe ah Bawipa lawng nang n’thui sak awl te hutung hamla he ah he kaimi boeih Pathen haiah ka awm u.” a tina.

³⁴ Tevengah Piter lawng awl a thui tih, “Pathen lawngah thlaang boeih he avan at la a khueh ti he tah soeng tangtang tila tahe atah ka ming poen. ³⁵ A-u khaw amah te a bok tih doengna te aka sai boeih tah me ang thlaangphun khaw a hih lawng a do. ³⁶ Thlaang boeih kah Bawipa la aka awm Jesuh Khrih rang oen ngaimawngna Awlthang Theen a thui tih Israel thlaang thli tengah Pathen lawng a peek te na ming u. ³⁷ Johan lawng baptisma a peekna kawng awl te a thui coengah Galili kalawng a tong tih Israel ram pum ah thaihu alentloe aka thoeng te a ming u. ³⁸ Nangmi lawng Nazaret khaaw kah Jesuh kawng oen ah ahih sawah Ciim Muithla oen tharana te metila Pathen lawng a lun pe tite a ming u. Ahih tah Pathen lawng a awm puei dawngah peng tawm ah te cet, theenna te a sai tih Raaithe bawi kah huham tharana kut khuiah aka awm boeih te a hoeih sak. ³⁹ Israel ram pum oen Jerusalem khaaw ah ahih lawng a sai boeih te aka mingkung sausi la kaimi he ka awm u. Tecoengah ahih te thinglam dawng a tai u tih a ngawn u. ⁴⁰ Tede hin thum coengah ahih te Pathen lawng a thawh sak koep tih a phumpho sak, ⁴¹ thlaang boeih tengah phumpho sak nawh tih Pathen lawng a tuek oepsoeh mingpueikung sausi la aka awm, duekna kalawng a thawh coengah amah oen caak awkk te aka ca, aka aw haih kaimi teng bueng ah ni a phumpho sak. ⁴² Thlaang boeih tengah awlthang theen thui hamla, thlaangduek oen thlaanghing awlcekkung la Pathen lawng ahih te a khueh te aka mingkung sausi la kaimi he awl m’peek u. ⁴³ A-u khaw ahih te aka tangna boeih tah a miing huham tharana oen ah a thawlhna te khawdawp a ngaai pe ai tila tawngha boeih lawng ahih kawng te a thui u.” a tina.

⁴⁴ Piter lawng awl a thui lii vengah te ahih kah awl thui aka hutung thlaang boeih sawah Ciim Muithla te va rum thuk. ⁴⁵ Gental thlaangphun thli sawah khaw, amah kutdo Ciim Muithla te Pathen lawng a lun pe dawngah Joppa khaw kah Piter oen aka law haih Judah thlaangphun oengca thli tah a kawpoek rai u. ⁴⁶ Metihtiah ahimi lawngah ming nawh awl la cal u tih Pathen kah bawilenna a thangpawm te a yaak u dawngah ni. Piter lawngah: ⁴⁷ “Mami angla he kah thlaang thli lawngkhaw Ciim Muithla a dang u van. Te tih atah he thli he tui oen baptisma peek ham a-u lawng a khaang khak ai?” tila a thui. ⁴⁸ Tedawngah ahimi te Jesuh Khrih miing oen ah baptisma dang hamla awl a peek. Tecoengah Piter te ahimi tengah khawhin ayawl khaw cam hamla a ceel u.

¹ Judia ram pum kah atloe oengca thli boeih oen celtuih boeih lawng Gental thlaang thli lawngkhaw Piter te a do u van tite a yaak u. ² Piter te Jerusalem la a ceh vengah Gental thlaang thli te yahhuivuen reet sak ham aka ngaih thlaang thli lawngah a cawtt-abauh u tih, ³ “Yahhuivuen aka reet nawh Gental thlaang im ah na pah tih caak awkk khaw na caak haih roe mai!” a tina u. ⁴ Tedawngah Piter lawng acuekca veng kalawng thaihu aka thoeng hang te asoepbirla biit a thui pe:

⁵ “Joppa khawpui ah ka thangthui lii vengah huhthlaam pakhat ka huh. Vaan kalawng thaihu pakhat aka law, a kil palii a thlingthlui himbai bo hlang oen aka lo u dilai la avan thlaak thuk te ka huh tih ka teng avan pha dengah a toeng. ⁶ Akhuiben te ka bueh heet vengah imvuelh boiava oen ramsa phun soeprep aka colh aka vaan thai ramsa boeih oen va phun soeprep boeih te ka huh. ⁷ Tecoengah awl pakhat ka tengah avan thui te ka yaak tih, ‘Piter, tho lah; ngawn langtah ca lah!’ tila avan thui. ⁸ Tede, kai lawngah, ‘Bawipa, ka ca nawh mue! Phung alam ben ah caih nawh tih aka ciim nawh caak awkk te ka kaa khuiah kuun nooek nawh” ka tina. ⁹ Vaan kalawng awl avan thui koep tih, ‘Pathen lawng ciim a ti coengthloeih te nang lawngah khatca khaw aciim nawh la poek boel,’ tila avan thui. ¹⁰ He tila voei thum toe awm tih tecoeng atah te kah thaihu boeih te vaan la koep a doek hang poen. ¹¹ Teveng tue ca roe ah Sisaria khaaw kalawng avan tuih thlaang pathum te ka awmna im la te avan pha u. ¹² Uelh re tlaih ohla ahimi oen ceh haih pahoei ham Muithla lawng avan thui. He kah ka puei oengca paruk hue khaw Joppa kalawng Sisaria la kai oen haih ka law u tih kaimi boeih he Kornilias im la ka cet u. ¹³ Ahih lawngah, amah im ah vanthlaang pakhat pai tih, ‘Joppa khaaw la thlaang tuih lang atah Simon Piter aka miingna thlaang te khue sak. ¹⁴ Ahih lawngtah nangmi tengah awl avan thui vetih te awl rang oen ah namah oen na imkhuikaw lawng thlawnna na dang u ai.’ tila a thui pe te kaimi tengah avan thui. ¹⁵ Tecoengah, awl ka thui pe vengah te acuek vengah mami sawah a awm van angla ahimi sawah khaw Ciim Muithla te va rum. ¹⁶ Tevengah Bawipa lawng, ‘Johan lawngtah tui oen ah baptisma te m’peek u, tede nangmi tah Ciim Muithla oen baptisma m’peek ai.’ tila a thui te lot ka poek. ¹⁷ Mami lawng Bawipa Jesuh te n’tangna vengah mami m’peek kutdo te ang van te Gental thlaang thli khaw Pathen lawng a peek van ti he tah ciim mai poen; tedawngah kai he a-u la ka awm aih tih Pathen te ka oel khak lal thai ai!’ tila a thui pe.

¹⁸ He awl he ahimi lawng a yaak u vengah cawttbauh awl te a toeng u, Pathen te a thangpawm u tih, “Pathen lawng, Gental thlaangphun thli khaw thawlh yut u tih hing van hamla atue theen a peek van poen!” ti u.

¹⁹ Stefen a ngawn u coeng kah heemtekna aka thoeng hang dawngah te oengca thli khatsut tah yan khonghak tih khatsut tah Fonicia, Saipras oen Antiok toela a pha u tih Judah thlaangphun thli bueng tengah awlthang te a thui u. ²⁰ Tede Saipras oen Sairi khaw kah thlaang, atloe oengca thli te Antiok la cet u tih Gental thlaangphun thli tengah khaw, awlthang te a phawng pe u tih Bawipa Jesuh kawng Awlthang Theen te a thui pe u. ²¹ Bawipa kah huham tharana tah ahimi tengah awm tih thlaang toek lek nawh lawng a tangna u tih Bawipa benla a kaw a thaw u.

²² He kawng awlthang he Jerusalem kah khrihcabu teng a pha, tedawngah Barnabas te Antiok la a tuih u. ²³ Ahih lawng a pha vengah Pathen lawng thlaang thli te metihtlukla yotheen a peek tite a huh vengah awmngaih tangkiik tih thinkaw lungbui tak oen Bawipa tengah thincak la a awmna u ham, uep-awm la a awmna u hamla ahimi te a thaphawh. ²⁴ Barnabas tah thlaangdoeng pakhat la awm, Ciim Muithla oen oengna oen ah betoet tih thlaang yahawh hlang te Bawipa tengla avan law puei.

²⁵ Tecoengah Barnabas tah Sawl te tlap hamla cet. ²⁶ Ahih te a huh tih Antiok la avan law puei tih ahih rawi lawng kum at puet khrihcabu kah thlaang thli oen huh u tih thlaang boehoeng mai te a cang puei. Oengca thli he lamhacuek la Antiok ah Khrihca tila a thui cuek u.

²⁷ Teveng yunyan ah tawngha khatsut te Jerusalem kalawng Antiok la cet u. ²⁸ Akabas aka miingna ahimi timkah thlaang pakhat te pai tih dilai pum ah he khawthe khawkha awm ai tila Muithla kah huham tharana oen oepsoehla a thui. (Klaudias te sengpahrang sangluel la a awm vengah khawthe khawkhana te awm.) ²⁹ A hubang thli lawngah amami kah sai thai khoek ah Judia ram ah aka awm oengca thli te bawmcemna peek hamla awl a thui u. ³⁰ Ahimi lawng te tila a sai u coeng atah tangka te khrihcabu ahaamca thli tengah peek ham Sawl oen Barnabas kut ah a pat pe u.

¹ He veng yunyan ah Herod seng-pahrang lawng khrihcabu khui-kah thlaang khatsut te heemtek hamla a tong poen. ² Ahih lawngah Johan kah a manau Jeem samsen oen a ngawn sak. ³ He tila a ngawn dawngah Judah thlaang thli a ngaai khuek a ti u te a huh vengah Piter te khaw a tuuk sak u. (Te veng te tah Tawlru thuum mueh Takawi Poei ni). ⁴ Piter te a tuuk u coeng atah thongim ah a thlaak tih bu khat ah raalkap palii aka awm raalkap bu lii te a toet sak u. Herod lawngtah Kaantaak Poei a boeih coengah rangpui haiah awl cek ham kamthlah. ⁵ Tedawngah ni Piter te thong ah a thlaak, tede khrihcabu khuikah thlaang thli lawng ahih hamla te Pathen tengah thinkaw thluembuek tang oen thangthui u.

⁶ Herod lawng ahih te thlaangping haiah awl cek ham a pha tawm yiin ah Piter te raalkap pahih laklaw ah te ip. Ahih te thiirui pahih oen a khih tih thong thawhka ah khaw raaltoeng thli pai u. ⁷ Bawipa kah vanthlaang te bawtbet khawlai ah te ah te pai parak tih thongim te a thue pheng. Vanthlaang lawng Piter te a lengpang ah a hinghuek tih a thawh, “Aloela tho!” a tina. Tevengah Piter kut dawngkah thiirui te pahoei tla. ⁸ Tecoengah vanthlaang lawng, “Na cihin te na langtah na khawmuek te muek lah” a tina. A thui pe angla Piter lawng a sai coeng atah vanthlaang lawng, “Na himbai te bai langtah ka hu ah law lah.” a tina. ⁹ Piter lawng thongim adauben toela a vai. Tede vanthlaang lawng a sai te ataktang ni tila ming nawh; ahih lawng huhthlaam ni ka huh tila a poek. ¹⁰ Ahih rawi lawng lamhacuek raaltoeng a paina oen a pabena te a pooeng hih coeng atah khawpui khuila cehna thii thawhka te a pha hih. Thawhka te amah poek ah te rawi hamla awng u tih te kalawng ah te cet hih. Lawngpui ah poe a ceh hih vengah te bawtbet maiah Piter te vanthlaang lawng a ceh taak.

¹¹ Tevengah Piter lawng a tengah aka thoeng boeih te a ming vengah cuih pan tih, “He tah ataktang ni tila ka ming poen! Bawipa lawng kai he Herod kah tharana oen Judah thlaang thli lawng ka sawah a sai thaihu boeih dawng kalawng loeih sak ham vanthlaang avan tuih.” tila a thui.

¹² Amah kah awm ih boeih te a kaw a puk heet coeng atah Johan Mark kah a manu Meri im la te cet, te ah te thlaang broela tun u tih thangthui u. ¹³ Piter lawng adauben kalawng ah thawh te a khooek tih Roda aka miingna tuihyoeihthlaang hutaaca lawngah thawhka te awng hamla cet. ¹⁴ Ahih lawngah Piter awl te a noek tih awmngaih uett ah thawh te awng ohla im khuila cet koep tih thlaang thli tengah te ‘thawhka adauben ah Piter awm’ a tina. ¹⁵ Ahimi lawngah, “Na ngau aw!” a tina u. Tede ahih lawng atak tang ni tila a thui mang khak. Tedawngah ahimi lawng, “Ahih kah vanthlaang macawi.” a tina u.

¹⁶ Teveng ah Piter lawng thawhka te a khooek khiing. Ahukhueng ah ahimi lawng thawh a awng u tih Piter te a huh u veng atah a ngaai hang sut u. ¹⁷ Piter lawng ahimi te awm duem hamla a kut oen noekna a peek tih thongim khui kalawng ah metila Bawipa lawng a loeih sak tite ahimi tengah a thui pe. Ahih lawngah, “He he Jeem oen atloe oengca thli tengah thui pe uh.” a tina tih ahimi te a ceh taak coeng atah atloela poe cet.

¹⁸ Khaw athaih atah Piter he me tih ni a ti oh kai ti u tih raaltoeng thli tah ngaihangtalh la awm u. ¹⁹ Herod lawng Piter te tlap hamla awl a peek tih a tlap u de dang u nawh. Tedawngah raaltoeng thli te doet adap coengah ngawn hamla awl a peek. He coeng atah Herod he Judia ram kalawng cet tih Sisaria khaaw ah te kawlkalh awm.

²⁰ Herod tah Turi oen Sidon khaaw kah thlaang thli sawah a thin sa tangkiik, tedawngah ahimi lawng tun huh u tih ahih oen huh u hamla te cet u. Lamhacuek ah ahimi lawng sengpahrang impui ukkung Blastas te ahimi pai puei ham a ceel u. Tecoengah ahimi tah Herod tengla cet u tih roeproei u hamla a bih u, metihtiah ahimi ram kah caak awkk dangna tah Herod sengpahrang kah ram uk khuiah a awm dawngah ni.

²¹ Awl tuentahna khawhin te a pha atah Herod lawng amah kah sengpahrang phawlip oen thoekcau u, a bawi ngawlhcoen dawngah te ngawl tih thlaangping tengah awl a thui pe. ²² Ahimi lawngah, “Awl aka thui he thlaang nawh ni, Pathen ni!” tila te paang u. ²³ Herod lawng Pathen te a hinyah nawh dawngah Bawipa kah vanthlaang lawng ahih te a bawhtaal pahoei, yunghuut lawng a keuh tih duek.

²⁴ Teveng ruetrat ah te Pathen awl tah puung tare tih roeng hang.

²⁵ Barnabas oen Sawl tah amami kah biibi te a coeng hih tih Jerusalem la koep meel hih, Johan Mark te khaw a ceh puei hih.

¹ Antiok khaaw kah khrihcabu khuiah tawngha thli oen cangpueikung thli khatsut tah thoem awm u: Te thli te tah, Barnabas, Simeon (Thlaangmuuem a ti u te), Lucias (Sairin khaw kah), Manaen (ukkungbawi Herod kah thawnpuei) oen ah Sawl, he hue ni. ² Ahimi lawngah Pathen a bok u tih buh a yeh u vengah te Ciim Muithla lawngah ahimi nala te, “Kai lawng bii ka hoel ka paai te aka bi hamla ka khue Barnabas oen Sawl te kai ham van thloeng uh” a tina.

³ Ahimi lawng buh a yeh u tih thangthui u, ahih rawi sawah kut a tloeng pe u tih tecoeng atah ahih rawi te a tuih u.

⁴ Barnabas oen Sawl tah Ciim Muithla lawng a tuih van angla Silukia khaaw la cet hih tih te kalawng ah Saipras tuisanglak la te tuisangphaw oen cet hih. ⁵ Ahih rawi lawng Salamis khaaw a pha hih veng atah Pathen awl te sinakok bok-im ah a phawng hih. Ahih rawi lawng bii aka bawmkung la Johan Mark te a ceh puei.

⁶ Ahimi tah te kah tuisanglak kalawng cet poe u tih Paphos khaaw te a pha u, te ah te caam aka thoem Bar-Jesuh aka miingna thlaang te a huh u, ahih tah amah oen amah te tawngha ni tila aka thui soeh Judah thlaang pakhat van ni. ⁷ Ahih tah tuisanglak ukkung, Serkias Pawlas thlaangcuih kah paya la awm. Ukkungbawi lawng Pathen awl te yaak ham a ngaih dawngah Barnabas oen Sawl te amah tengla a khue. ⁸ Tede ahimi te caam aka thoem Elimas (he tah Krik miing ni) lawng a oelh ataih tih ukkung bawi lawngah oengna khueh boel seh tila a yawm mangkhak. ⁹ Tevengah Pawl a ti u Ciim Muithla oen aka betoet Sawl lawngah; caam aka thoem thlaang te a bueh rangpatang tih, ¹⁰ “Nang, Raaibawi capa! Nang tah doengna boeih boeih kah thunkha la na awm. Nang he thailatna soeprep oen na betoet tih Bawipa kah awltak he hoem awl la thawvel ham na yawm poepa! ¹¹ Bawipa kut te na sawah tahe avan pha ai; na mik te pum khoep vetih kawlkalh khui atah khawthaih khawse te na hu manawh,” a tina.

¹² Ukkung bawi lawng he tila thaihu aka thoeng te a huh vengah a tangna tih Bawipa kawng a cang puei te a kawpoek la rai tangkiik.

¹³ Pawl oen a paya thli tah Paphos kalawng tuisangphaw oen cet u tih Pamfilia ram kah Perka khawpui te a pha u, te ah te Johan Mark te a ceh taak u tih Jerusalem la amami tah koep meel u. ¹⁴ Ahih tah Perka kalawng poe cet tih Pisidia ram khui Antiok khaaw te a pha u. Sabbath khawhin atah sinakok bok-im la cet u tih ngawl u. ¹⁵ Mosi Phungawl oen tawngha thli kah cathut te a tae coeng atah sinakok bok-im ukkung thli lawngah ahimi nala te: “Maya manau thli, thlaang yahawh ham thaphawhna awl thui ham a awm atah na thui u ham ka ngaih u de” a tina u. ¹⁶ Pawl lawng pai tih a kut oen noekna a peek tih awl a thui:

¹⁷ Israel thlaangphun kah Pathen lawngah mami kah patuer thli te a tuek tih Iyipt ram ah ram tloe thlaang angla a awm u vengah thlaangphun bo la te a sai. Pathen lawng amah kah alentloe huham tharana oen ahimi te Iyipt ram kalawng avan law puei tih, ¹⁸ ahimi lawngah khawkum Sawmlii khui puet ramhum huhang ah patang a kha ang u. ¹⁹ Ahih lawngah Kanaan ram kah thlaangphun phun sarih te a taa tih te ram kah hunkung huenmah la a thlaang thli te a sai. ²⁰ He tila a awm khui boeih te kum yalii sawm ngaa yunyan awm.

²¹ Tecoengah ahimi lawng sengpahrang a bih u tih kum sawmlii khuiah ahimi kah sengpahrang la awm hamla Pathen lawngah Benjamin phun, Kish capa Sawl te a peek. ²² Pathen lawng ahih te a khoe pe coeng atah Devid te ahimi kah sengpahrang la a khueh pe. Pathen lawng ahih kawng a thui te tah: ‘Jesi capa Devid tah ka kaw aka tawng thlaang, kai lawng sai sak ham ka ngaih boeih te aka sai ham thlaang te ka huh poen” tila a thui. ²³ Pathen lawngah amah awlkam angla Devid cadil Jesuh te Israel thlaang thli kah Thlawnkung la a sai poen. ²⁴ Jesuh lawng amah kah bii te a tong thlan ah Johan lawngah Israel thlaangphun thli te na thawlhna yut u langtah baptisma dang u lah, a tina. ²⁵ Tecoengah Johan lawng amah kah bii te a coeng tawm vengah thlaang rangpui nala te, ‘Kai he a-u tila na poek u? Kai tah nangmi lawng na ring oel khiing thlaang te nawh ni. Tede hutung u lah! Ahih tah kai hu ah va law tih kai tah ahih kah khowmuek te dul pe ham Pateng khaw ka koeih nawh.’ tila a thui.

²⁶ “Abraham cadil, ka puei Israel thlaangphun thli oen Pathen aka bok Gental thlaangphun thli; thlawnna awlthang he mami tengah m’peek! ²⁷ Metihtiah Jerusalem ah aka awm thlaang thli oen ahimi mawtkung thli lawngah ahih te Thlawnkung ni tila ming u nawh tih Sabbath khawhin roekk ah a tae u tawngha thli kah awl te khaw ahimi lawng yaakming u nawh. Tede Jesuh te a ngawn u tih tawngha thli kah awl thui te a soep sak u. ²⁸ Ahimi lawngah ahih te ngawn hamla akawng alam hu u nawh de ahih te ngawn ham Pilat tengah a bih u. ²⁹ Te tila ahih kawng Caciim lawng a thui boeih te a sai u coengah thinglam dawngkah a rawkk te ahimi lawng a lawh u tih thlann ah a up u. ³⁰ Tede Pathen lawng ahih te duekna kalawng a thawh sak poen tih, ³¹ Galili kalawng Jerusalem la amah oen khawlawng aka cet haih nooek thli tengah khawhin broe nawh la a phumpho pe. Tahe ah ahimi te Israel thlaang phun ham aka mingkung sausi la awm u. ³² - ³³ Tedawngah te Awlthang Theen te nangmi tengah thui hamla he la he ka law u: mami kah patuer thli tengah sai hamla Pathen lawng awl a kam te mami a cadil thli tengah Jesuh kah thawhkoepna rang oen tahe ah avan sai poen. Saam laa raawl hihna dawngah, Nang tah ka capa la na awm; tihin ah kai tah na Pa la ka awm poen,’ tila a thut. ³⁴ Tecoengah thlann khuiah metuek khaw rong sut ohla duekna kalawng a thawhkoepna kawng te Pathen lawng a thui tah: ‘Devid teng awl ka kam tangte, aka ciim tih uepna koei tangtang yotheen kam-awmna te kan pe ai.’ tila a thui. ³⁵ Tecoengah Saam laa atloe dawngah khaw, ‘Namah kah a congmang heet tuihyoeihthlaang te thlann khuiah na rong sak sut manawh.’ tila a thui. ³⁶ Devid lawng a hing khuiah Pathen kawngaihna te a sai, tecoengah duek tih an patuer thli oen haih a up u de phuel khuiah a rawkk te rong. ³⁷ Tede Pathen lawng duekna kalawng a thawh sak thlaang te tah he tila awm nawh. ³⁸ - ³⁹ Ka puei Israel thlaangphun thli, kaimi lawng ming sak hamla ka ngaih u tah, Jesuh rang oen ni thawlh khawdawp ngaaina kawng awl te nangmi tengah avan thui u; Ahih te aka tangna thlaang boeih tah Mosi kah Phungawl lawng a loeih sak thai nawh thawlhna kalawng a loeih sak tite ming u lah. ⁴⁰ Tedawngah tawngha thli lawng a thui te nangmi sawah a thoeng nawh ham ngaithuen uh: ⁴¹ ‘Hutung u lah! Nangmi nuihbu la thlaang aka sai hue! Lakueng uekcuek lang duek uh! metihtiah tihin ah ka sai ham koei he thlaang pakhat lawng van thui u cakhaw, na tangna u roe manawh!’ tila a thui” a tina.

⁴² Sinakok bok-im kalawng Pawl oen Barnabas a ceh hih vengah te, Sabbath khawhin ah law koep hih langtah he kawng he yahawh la van thui de a tina u. ⁴³ Thlaangping te sinakok bok-im kalawng a ceh boeih u coengah Pawl oen Barnabas te Judah thlaang thli oen Judah phung la aka kuun Gental thlaang broe lawngah a hu ah bung a vai u. Celtuih rawi lawng ahimi te Pathen lungvatna dawngah awm poe hamla thathluena awl a thui pe.

⁴⁴ Tecoeng Sabbath khawhin atah te khawpui khuikah thlaang boeih lawng Bawipa awl te hutung hamla law u. ⁴⁵ Judah thlaang thli lawngah thlaangping te a huh u vengah ahimi lawng uett-eena thinkaw a khueh u; Pawl lawng a thui te khaw a oelh ataih u tih amah te khaw aphawh akhah u. ⁴⁶ Tede Pawl oen Barnabas lawng raltheenla a thui tare hih tih: “Nangmi tengah Pathen awl he lamhacuekla thui ham ngoe tangtang. Tede nangmi lawng na hoett u tih namah oen namah te dungyan hingna oen a tingtawkk nawh la na poek u atah kan ceh taak u vetih Gental thlaangphun tengla ka cet hih ai. ⁴⁷ Metihtiah kai hih tengah Bawipa kah awlpeek tah: ‘Dilai pum lawng thlawnna a dangna ham nang hih tah Gental thlaang thli kah aangna la kan khueh poen.’ tila a thui” a tina hih.

⁴⁸ Gental thlaang thli lawng he awl he a yaak u vengah, awmngaih u tangkiik tih Bawipa kah awlthang te a thangpawm u; dungyan hingna paang hamla a tuek thlaang thli te oengca la awm u.

⁴⁹ Bawipa kah awl tah te kah ram pum ah te puung khuengdeng. ⁵⁰ Tede Judah thlaang thli lawngah khawpui khuikah mawtkung thlaang thli oen Pathen aka bok hinyah koei Gental hutaa thli te a ceemtuh u tih Pawl oen Barnabas te heemtek ham a tong u, ahih rawi te a ram khui kalawng a vai u. ⁵¹ Celtuih rawi lawngah ahimi sawah a kawlawna nawh te ming sak nala a khow dawngkah laidiik te a khoek hih tih Ikoniam khaaw la poe cet hih. ⁵² Antiok khaw kah oengca thli tah awmngaihna oen Ciim Muithla oen ah betoet u.

¹ Tetih toengtoeng la te Ikoniam ah khaw Pawl oen Barnabas tah sinakok bok-im la cet tih awl a thui hih, Judah thlaang thli oen Gental thlaang thli yahawh hlang te oengca la coengg u. ² Tede aka tangna nawh Judah thlaang thli lawng Gental thlaang thli te a ceemtuh u tih oengca thli te a oelh a taih sak u. ³ Celtuih rawi tah te ah te asan hlang awm tih Bawipa kawng te raltheenla a thui hih, ahih rawi lawng a thui lungvatna kawng awlthang te soeng tila tueng sakna ham kawpoek rai miknoekna oen kawpoek rai sai thaina huham tharana te a peek. ⁴ Te khawpui khuikah thlaangping tah pek u tih khatsut lawng Judah thlaang te a bawngyawng u tih khatsut lawng celtuih rawi te a bawngyawng u.

⁵ Tecoengah Judah thlaang thli oen Gental thlaang thli lawngah celtuih rawi te thekhana tih lungto oen de hamla a thui u. ⁶ Celtuih rawi lawng he kawng he a ming tih Likonia ram khuiah aka awm Listra oen khaawteng khaawvai la te heeng hih. ⁷ Te ah te ahih rawi lawng Awlthang Theen te a thui hih.

⁸ Listra khaaw ah a thang pek kalawng a khow kheem tih aka cet thai nawh thlaang pakhat awm. ⁹ Ahih tah te ah te ngawl tih Pawl kah awl thui te a hutung. Pawl lawngah, ahih lawngtah a tangna dawngah hoeih thai ai tite a huh, tedawngah rangpatangla a bueh heet tih, ¹⁰ angaih hlang la ahih nala te, “Tho lang pai hang lah!” a tina. Te thlaang lawng cungpet tih yingyawi. ¹¹ Pawl lawng a sai te thlaangping lawng a huh vengah, “Thlaanghing angla pathen thli he va thoeng tih mami tengah va law poen!” tila amami Likonia awl la te paang u. ¹² Ahimi lawngah Barnabas te Zias tila miing a sak u tih Pawl tah awl thuikung la a awm dawngah Harmas tila miing a sak u. ¹³ Te khawpui kah adauben ah tempal bok-im awm tih Zias pathen khawsoeih lawng vaitaw taal thli oen raipai thli te khawpui vawng thawhka la te avan khuen, ahih oen thlaangping hue lawngah celtuih rawi tengah luciik thawthuengna te nawn ham a ngaih u.

¹⁴ Ahimi lawngah te tila ka sai ai a ti u te Pawl oen Barnabas lawng a yaak hih vengah amahih kah himbai te a pheuh hih, thlaangping tim ah heeng hih tih paang, ¹⁵ “N’tu ham he he na sai u? Kaihih khaw nangmi angla thlaanghing van ni! Nangmi lawng he ang aphu aka awm nawh te na hoettna u ham, vaan, dilai oen tuitunlii oen ah a khuiah aka awm boeih saikung aka hing Pathen tengla na maang u hamla kaihih lawng Awlthang Theen he phawng hamla ka law hih. ¹⁶ N’cui veng atah thlaang boeih he amami kah ngaihna angla a ceh sak. ¹⁷ Tede ahih tah thaihu theen saina oen ah awm tite a tueng sak poepa: vaan kalawng ah khaw a tlan sak tih atue atang vengah thing thaih rampu te m’peek u; caak awkk te m’peek u tih na kaw avan hoe sak u.” tila a thui pe hih. ¹⁸ He tila awl a thui pe hih ah Pateng khaw thlaangping lawngah ahih rawi tengah luciik thawthuengna te nawn nawh ham celtuih rawi lawng a khaang pe tloel hih.

¹⁹ Pisidia ram khuikah Antiok khaaw oen Ikoniam khaaw kalawng Judah thlaang khatsut te law u tih thlaangping te amami benla a doek u thai, Pawl te lungto oen a de u, duek poen tila a poek u tih khawpui adaubenla te a mawt u. ²⁰ Tede oengca thli lawng ahih te a veel khoep u vengah tho tih khawpui khuila te koep cet. Avuen khawhin atah Barnabas oen Derbe khaaw la te cet hih.

²¹ Pawl oen Barnabas lawng Derbe ah Awlthang Theen te a phawng hih tih thlaang broe te hubang la coengg. Tecoengah Listra, Ikoniam, Pisidia ram kah Antiok khaaw la te cet hih koep. ²² Ahih rawi lawngah oengca thli te tha a peek hih tih oengna dawngah cak poe hamla thathluena awl a thui pe hih. Ahih rawi lawngah, “Mami lawng Pathen ram khuiah kuun ham ah khawdeng patang broela khang ham roe ni,” tila te a cang puei hih. ²³ Ahih rawi lawng khrihcabu roekk ah ahaamca thli te a khueh pe, ahih rawi lawngah buhyeh thangthuina oen ahimi te a uepna Pathen tengah a nawn.

²⁴ Pisidia ram te a pooeng hih coengah Pamfilia ram te a pha hih. ²⁵ Perka khaaw ah awlthang a phawng hih tih tecoengah Attalia khaw la te cet hih. ²⁶ Bii a coeng hih poen dawngah te kalawng ah Antiok la tuisangphaw oen koep cet hih. Antiok khaaw he tah biibi tong hamla Pathen kah lungvatna dawngah pum a peekna hih khaw ni.

²⁷ Antiok khaaw te a pha hih veng atah khrihcabu kah thlaang thli te thik at la a tun sak hih tih ahih rawi rang oen Pathen lawng a sai thli oen Gental thlaang thli lawng a tangna thai ham lawngpui a awng pe kawng te ahimi tengah a thui pe hih. ²⁸ Ahih rawi tah te ah te atue san hlang oengca thli oen awm u.

¹ Thlaang khatsut tah Judia kalawng Antiok la law u tih, “Nangmi lawngah Mosi kah Phungawl lawng a kuek angla yahhuivuen na reet u nawh atah thlawnna na dang thai manawh.” tila a cang puei u. ² Pawl oen Barnabas tah he kawngah ahimi oen oelh ataih u tih awl puung u. Tedawngah Pawl oen Barnabas he Antiok kah thlaang khatsut oen Jerusalem la cet u selang tah he kawng he celtuih thli oen ahaamca thli te doet u seh tila awl a thui u.

³ Khrihcabu lawng ahimi te yawh a thak u; Fonicia oen Samaria ram ben kalawng poe cet u tih Pathen ben ah Gental thlaangphun thli kah kawthawna kawng te ahimi lawng a thui u tih he kah awlthang lawngah oengca boeih te a awmngaih sak. ⁴ Jerusalem te ahimi a pha veng atah khrihcabu oen celtuih thli oen ah ahaamca thli lawng ahimi te a do u tih ahimi rang oen Pathen lawng thaihu a sai boeih te a thui pe u. ⁵ Tede Farasi benla aka awm oengca thli khatsut lawng pai u tih, “Gental thlaangphun lawng yahhuivuen reet u selang tah Mosi kah Phungawl he vai u seh tila thui pe ham awm” tila a thui u.

⁶ Celtuih thli oen ahaamca thli tah he kah awldoetna he poek hamla tun huh u. ⁷ Asan hlang a thui khiing u coengah Piter lawng pai tih, “Maya manau thli, Gental thlaangphun lawng Awlthang Theen te a yaak u tih a tangna u thai ham n’hu vengah Pathen lawng nangmi timkah kai he aka thuikung la n’tuek te nangmi lawng na ming u. ⁸ Thlaang boeih kah poekna mingkung Pathen lawngah Ciim Muithla te mami m’peek van angla Gental thlaang thli khaw a peek van tih ahimi te a do poen tite a tueng sak. ⁹ Ahih lawngah mami oen ahimi laklaw ah pekbona sai nawh; ahimi lawng a tangna u dawngah ahimi kah thawlhna te khawdawp a ngaai pe. ¹⁰ Tedawngah, n’tu hamla nangmi kah patuer thli lawngkhaw, mami nawn lawngkhaw phueih thai nawh thalrih te oengca thli na phueih sak rang oen tahe ah Pathen te noekdak ham na ngaih u? ¹¹ Tetih moenih ta! Ahimi angla mami lawngkhaw n’tangna u van tih Bawipa Jesuh kah lungvatna rang oen thlawnna n’dang u.” a tina.

¹² Barnabas oen Pawl lawng, ahih rawi rang oen Gental thlaangphun tengah Pathen lawng kawpoekrai miknoekna oen kawpoekrai thaihu a sai kawng te a thui hih vengah thlaangping lawng sap a hutung u. ¹³ Ahimi lawng awl a thui boeih u coeng atah Jeem lawng ah: “Maya manau thli, ka awl hutung u lah! ¹⁴ Simon lawng a thui angla Pathen lawng Gental thlaang thli te amah hamla a lawhna rang oen metihtluk la ahimi a thintlawhna tite lamhala a tueng sak poen. ¹⁵ Tawngha thli kah awl thui khaw he kah awl oen vai u. Caciim lawng a thui angla, ¹⁶ ‘Bawipa lawngah, he coengah koep kava meel vetih Devid kah ram te ka thawh koep ai. Aka rawk thli te ka sak koep vetih acakla ka pai sak koep ai. ¹⁷ Tecoengah thlaangphun boeih lawng ka tengla law u vetih kamah kah thlaang la awm hamla ka khue Gental thlaang thli khaw law u ai. ¹⁸ Te tila yan veng kalawng he awl aka mingsakkung Bawipa lawng a thui.’ a tina.

¹⁹ Jeem lawngkhaw a thui pe tih, ‘Pathen benla kaw aka thaw Gental thlaang thli he mami lawng raina peek ham awm nawh tila ka poek. ²⁰ Te lak atah, kutsaimuei bokna ah a nawn u dawngah phung alam ben ah aka caih nawh caak awkk te caak nawh ham; hutaa oen tawngpa thawlhna dawngah kuemsuem ham, rawn khak ramsa te caak nawh ham, sathi khaw caak nawh hamla ca mah pat pe u sih. ²¹ Metihtiah sinakok bok-im ah n’cui veng kalawng Mosi kah Phung awl te Sabbath khawhin roekk ah a tae poepa u tih khaw tawm ah ahih awl te khaw a phawng u poen.” a tina.

²² Tecoengah celtuih thli, ahaamca thli oen khrihcabu lawng Pawl oen Barnabas oen ah Antiok khaaw la tuih haih ham amami bu khuikah thlaang khatsut te tuek hamla awl a tloek u. Ahimi lawngah oengca boeih lawng a hinyah u thlaang pahih Barnabbas a ti u Judas oen ah Silas te a tuek u. ²³ Ahih rawi kut ah te a dangkah angla ca a pat pe u: “Nangmi kah maya manau la aka awm kaimi celtuih thli oen ahaamca thli lawng Antiok, Siria oen Cilicia ah aka awm Gental phun maya manau thli te kan toei u. ²⁴ Kaimi tim-kah thlaang khatsut aka law lawngah nangmi te raina m’peek u tih ahimi kah awlthui lawngah ngaihangtum la nangmi te n’khueh u tite ka yaak u. Tede ahimi te kaimi kah mingpueina awm nawh. ²⁵ Tedawngah kaimi tun ka huh u tih laipai tuek u silang tah mami lawng n’lungna Barnabas oen Pawl oen ah nangmi tengla tuih haih sih tila boeih ka kaw vai u. ²⁶ Pawl oen Barnabas tah Bawipa Jesuh Khrih kah bii dawngah duek oen hing khaw aka maa nawh thlaang ni. ²⁷ Tedawngah ca oen kavan thut u he nangmi tengah thui pe hamla Judas oen Silas he kavan tuih u. ²⁸ He kah angoe phung alam coengah atloe thalrih khatca khaw nangmi sawah tloeng nawh hamla Ciim Muithla oen kaimi ka kaw vai u poen: ²⁹ kutsaimuei tengah a nawn caak awkk te ca u boel; sathi ca u boel; rawn khak ramsa te ca u boel; hutaa oen tawngpa thawlh u boel. He ang thaihu boeih he nangmi lawng sai nawh ham na kuemsuem u atah theen mai poen. Na sa ding u seh.” tila a thut pe u.

³⁰ Laipai thli te a tuih u tih Antiok khaaw la te cet u, tela te a pha u atah oengca thli te vai at la a tun sak tih capat te ahimi kut ah a peek u. ³¹ Ahimi lawng ca te a tae u vengah thathlue thakawna awl dawngah te a kaw hoe u tangkiik. ³² Judas oen Silas khaw tawngha la a awm hih dawngah ahimi tengah thathluena awl oen thapeekna awl asanhlangla a thui pe hih. ³³ Ahih rawi tah te ah te akhoek anoen a awm hih coeng atah oengca thli lawng sading ngaimawng la a thak u tih aka tuihkung thli tengla koep meel hih. ³⁴ (Tede Silas tah te ah te awm hamla kamthlah.)

³⁵ Pawl oen Barnabas tah Antiok khaaw ah asanhlang awm hih tih thlaangtloe hue oen Bawipa awl te a phawng u tih a cang puei u.

³⁶ Te ah te a awm ran hih coeng atah Pawl lawng Barnabas nala te, “Bawipa awl mahih lawng n’thuina khaaw boeih ah te cet silang tah maya manau thli te hip lah sih, metila nuem a awm kai, hiil-adawng lah sih.” a tina. ³⁷ Barnabas lawngtah Johan Mark te ceh puei ham a ngaih, ³⁸ Tede ahih tah te rawi kah biibina aboet toe ah baang poe nawh tih ahih rawi te Pamfilia ah a ceh taak tih a meel koep dawngah Pawl lawngtah ahih te ceh puei hamla theen nawh tila a poek. ³⁹ Te kawngah awl puung hih tih ahih rawi tah pek ahih: Barnabas lawng Mark te a khue tih Saipras la tuisangphaw oen cet hih. ⁴⁰ Pawl lawngah Silas te a tuek tih oengca thli lawng Pathen kah lungvatna dawngah a nawn u coengah cet hih van. ⁴¹ Ahih tah Siria oen Cilicia ben kalawng poe cet tih khrihcabu thli te tha a thlue sak.

¹ Pawl tah Derbe kalawng Listra khaaw la te cet, te ah te khrihca thlaang pakhat Timote aka miingna te awm. A manu tah khrihca van tih Judah thlaangphun la awm, tede ana pa tah Krik thlaangphun ni. ² Listra oen Ikoniam kah oengca boeih lawng Timote te a koeh u. ³ Pawl lawng Timote te ceh puei a ngaih dawngah yahhuivuen a reet sak. Ahih lawng te tila a sai sak te tah te kah aka awm Judah thlaang boeih lawng Timote kah ana pa te Krik thlaang phun tila a ming u dawngah ni. ⁴ Ahimi lawng a cehna khaaw tawm ah te Jerusalem ah Celtuih thli oen ahaamca thli kah awltloekna phung alam a sai u te a thuicaih pe tih te kah phung te ahimi lawng vai hamla a thui pe u. ⁵ Tedawngah khrihcabu thli tah oengna ben ah a tha ra u tih khawhin roekk ah puung tare hang.

⁶ Ahimi te Ciim Muithla lawng Asia ram khuiah awlthang a phawng sak nawh dawngah Frikia ram oen Galati ram la te poe cet u. ⁷ Misia ramri a pha u veng atah Bitinia ram khuila ceh ham a yawm u, tede Jesuh kah Muithla lawng ahimi te ceh sak u nawh. ⁸ Tedawngah Misia ram kalawng Troas khaaw la poe cet u. ⁹ Khaw yiin atah Pawl lawng huhthlaam pakhat a huh tih te kah a huh na dawngah te Macidonia thlaang pakhat pai tih, “Macidonia ram la law u langtah kaimi he m’bawm u lah!” tila a bih. ¹⁰ He kah huhthlaam he Pawl lawng a huh coeng atah Macidonia ram la ceh ham pahoei ka kamthlah u, metihtiah te kah aka awm thlaang thli tengah Awlthang Theen thui hamla Pathen lawng n’khue ka ti u dawngah ka kamthlah pahoei u.

¹¹ Kaimi tah Troas kalawng Samotarek la tuisangphaw oen ka cet u tih avuen ah Neapolis ka pha u. ¹² Te kalawng ah Macidonia peng, lamhacuek khawpui Filipi la te lan lawngpui kalawng ah ka cet u. Te kah khawpui te tah Rom ram uk khuiah awm. Te ah te khawhin sanhlang ka awm u. ¹³ Sabbath khawhin ah khawpui avooel ben-kah tuivakeeng la ka cet u, te ah te Judah thlaang thli kah thangthui tunna ahuen awm ai tila ka poek u. Kaimi ka ngawl u tih te ah aka tun hutaa thli tengah awl ka thui pe u. ¹⁴ Ahimi timkah hutaa pakhat himbai lingdiik aka yoeikung Tiatira khaaw kah Lidia lawngah kaimi awl te a hutung. Ahih tah Pathen aka bok hutaa pakhat la awm tih Pawl kah awl thui te hutung nguenthuen ham Pathen lawng a thinkaw a awng pe. ¹⁵ Amah oen a imkhuikaw thlaang boeih lawng baptisma a huh u coeng atah, “Kai he Bawipa ah oengca taktak la nan poek u atah law u lang ka im ah pah uh.” tila n’ceel u. Tecoeng atah a im la ceh ham kaimi te n’tongnolh u.

¹⁶ Hin at atah thangthuina huen la kaimi ka ceh u vengah raaithe aka khueh sal hutaaca khat oen ka huh u. Ahih te raaithe lawngah hailamben ah aka thoeng ham koei te a thui sak thai. Ahih lawng hailamben thaihu kawng thuina rang oen a bawi thli ham tangka moen a dang pe. ¹⁷ Ahih te kaimi oen Pawl hu ah law tih, “He kah thlaang thli he tah Tloeng Khoelh Pathen kah tuihyoeihthlaang thli ni! Nangmi lawngah thlawnna te metila na dang u thai ai tite ahimi lawng avan thui ai!” tila paang. ¹⁸ Te tila te khawhin sanhlang ahih tah paang khiing, Pawl te thinsabat la a khueh aih dawngah a hu la maang dak tih raaithe nala te, “Jesuh Khrih miing oen ah ahih kaw khui kalawng co loeih kan tina he!” a tina. Tevengca roe ah ahih kaw khui kalawng raaithe te co pahoei. ¹⁹ Hutaaca kah a bawi thli lawng ahimi kah tangka dangna tah awm tlaih nawh tite a ming u veng atah Pawl oen Silas te a tuuk u tih rangpui a tunna huen ah aana khuehkung thli tengla te a mawt u. ²⁰ Ahimi lawngah te rawi te Rom ram ukbawi thli tengla a khuen u tih, “He rawi he Judah thlaangphun ni, mami kah khawpui khuiah awlpuungna a sai hih. ²¹ Ahih rawi lawngah mami kah phung oen aka kalh u phung te a cang puei hih; kaimi tah Rom thlaang la ka awm u dawngah he ang phung he ka do u nawh vetih ka vai u manawh.” tila a thui u. ²² Tevengah thlaangping hue lawngkhaw Pawl oen Silas te sulh a cuuk thil u.

²³ A bawh doetthloet u coeng atah ahih rawi te thongim khuiah a uup u, ahih rawi te longkhon buen sak tih piin rap hamla thongim toetkung thli te awl a peek. ²⁴ Awlpeek te a dang coeng atah thong ukbawi lawng te rawi te thongim a khuicok la a uup u tih longkhon a rih khuethluek te a khow dawngah a buen u.

²⁵ Yiinthuem tang yunyan atah Pawl oen Silas lawng thangthui hih tih Pathen koehna laa a sak hih, atloe thongtla thli lawng ahih rawi kah laa sak awl te a hutung u. ²⁶ Tevengah bawtbet khawlai maiah likluei law khuengdeng tih thongim te lungdangsuem toela hinghuen. Kawlkalh maiah thawhka boeih te awng u phengvel tih thongtla thli a khihna thiirui te thlam u boeih. ²⁷ Thong ukbawi te tho hang tih thong thawhka boeih a awng u te a huh vengah thongtla boeih tah co boeih poen cawini tila a poek; tedawngah a samsen te a suh tih amah oen amah te ka ngawn u ai ti. ²⁸ Tede Pawl te paang khalau tih, ‘Namah oen namah nganbawh pe u boel! Kaimi boeih he ah ka awm u!” a tina.

²⁹ Thong ukbawi lawng haithoei a tawh sak coengah thongim khuila te toklek la kuun phai tih Pawl oen Silas kah a khowkung ah rih oen thuen ruila te buekuep. ³⁰ Tecoengah ahih rawi te adaubenla a ceh puei tih, “Ka bawipa rawi, thlawnna ka dangna ham n’tu ka sai ai?” tila a doet.

³¹ Ahih rawi lawngah, “Bawipa Jesuh te tangna lah, namah oen na imkhuikaw lawng thlawnna na dang u ai.” a tina. ³² Ahih rawi lawngah Bawipa awl te ahih oen a im kah thlaangtloe boeih tengah a thui pe hih. ³³ Amah yiin vengah te thong ukbawi lawng ahih rawi te a ceh puei tih a boengha thli te a silh pe; ahih oen a imkhuikaw boeih lawng baptisma te pahoei a dang u. ³⁴ Tecoengah thong ukbawi lawng amah im la Pawl oen Silas te a ceh puei tih caak awkk te a do adan. Tahe atah ahimi lawng Pathen te a tangna u poen dawngah amah oen a imkhuikaw boeih tah awmngaih tangkiik u.

³⁵ Avuen mincang ah Rom thlaang aana khuehkung thli lawng palik bawi thli te awl a peek tih a tuih, “Te rawi te ceh sak loeih” a tina.

³⁶ Tevengah thong ukbawi lawng Pawl nala te, “Bawi thli lawngah nang oen Silas te thlah hamla thlaang avan tuih poen. Tedawngah na cet thai hih poen, ngaimawng ngaitoe la cet hih loeih.” a tina.

³⁷ Tede Pawl lawngah palik bawi nala te, “Kai hih kah thawlhpalhna te hu u nawh de rangpui haiah cungpoelh oen n’bawh u, kaihih he Rom thlaang de lah koen! Tecoengah thong n’thlaak u. Tahe ah ahimi lawng kaihih he ahuepla tuih ham a ngaih u. He tila sai ham tuueng nawh! Rom ram ukbawi thli amami te he la law selang kaihih he n’thlah seh.” a tina.

³⁸ Palik bawi thli lawng he awl he Rom ram ukbawi thli tengah a thui pe u; Pawl oen Silas te Rom thlaang ni tila a yaak u veng atah a rih u. ³⁹ Tedawngah ahih rawi tengla ahimi te cet u tih reenna a bih u, tecoeng ahimi lawngah te rawi te thongim khui kalawng a thlah u tih khawpui khui kalawng ceh loeih hamla reenna a bih u. ⁴⁰ Pawl oen Silas lawng thongim te a thawh taak hih tih Lidia im la cet hih. Te ah te ahih rawi lawng oengca thli oen huh u tih ahimi tengah thathluena awl a thui pe coengah a ceh taak.

¹ Pawl oen Silas te Amfipolis oen Apollonia kalawng poe cet hih tih Tesalon khaaw te a pha, te ah te sinakok bok-im pakhat awm. ² Pawl lawng a ceh nooek angla sinakok la te cet. Te ah te Sabbath khawhin hin thum khuiah thlaangping oen awl a thui, ³ Caciim dawngkah awl te a thoel alang u tih a thui ngawng u, Messiah tah khawdeng patang a khang vetih duekna kalawng tho koep ai tite a thui caih pe. Pawl lawngah, “Nangmi tengah kavan phawng Jesuh he tah Messiah poen ni.” tila a thui pe. ⁴ Ahimi timkah khatsut lawngtah a yaakming u tih Pawl oen Silas te a bawngyawng u; tedawngah nu mawtkung thli oen Pathen aka bok Krik thlaang thli broe lawngkhaw a bawngyawng u van.

⁵ Tede Judah thlaang thli lawngtah a uett a ee u tih lawngteng lawngvai kah boethe halang thlaang thli te a cawi tun tih thlaangping la a tingtun sak. Ahimi lawngah khawpui khuiah cumplaam la tho u, Jason kah im te a muk u tih Pawl oen Silas te thlaangping tengah khuen hamla a tlap u. ⁶ Tede ahih rawi te a huh u nawh veng atah ahimi lawng Jason oen atloe oengca thli khatsut te akhup athalla avan mawt u tih te khawpui kah aana khuehkung thli tengah, “Khaaw tawm ah rai-acangna aka thoeng sak thlaang rawi te tahe tah mami khaw khuila avan pha poen! ⁷ tede Jason lawng te rawi te a im ah a thuh. Ahih rawi lawngah sengpahrang sangluel kah phung boeih khaw a phe hih, sengpahrang atloe awm tih Jesuh a miingna tila a thui.” tila paang u. ⁸ Te tila ahimi lawng a paang u dawngah thlaangping oen khawpui khuiah aana khuehkung thli kah thinkaw a phawh. ⁹ Aana khuehkung thli lawng Jason oen atloe hue te thlahna ham aamahkhanna tangka ahimi tengah a lawh u, tecoengah a thlah u.

¹⁰ Khaw a yiin thuk atah oengca thli lawng Pawl oen Silas te Berea khaaw la pahoei a tuih u. Ahih rawi lawng a pha atah sinakok bok-im la cet hih. ¹¹ Te kah thlaang thli tah Tesalon ah aka awm thlaang thli lak ah a poekna kau bet. Ahimi lawng thinkaw thluembuek oen awl te a hutung u tih Pawl lawng a thui te soeng tang kai nuem ti u tih hin roekk ah Caciim te ahimi lawng athoel alang u. ¹² Ahimi timkah thlaang broe lawngah a tangna u tih hinyah koei Krik hutaa thli oen Krik thlaang tawngpa broe lawngkhaw a tangna u. ¹³ Tede Tesalon ah aka awm Judah thlaang thli lawng Pawl lawngah Berea ah khaw Pathen awl a phawng tite a yaak u vengah tela te law u tih thlaangping te a ceemtuh u tih awl puungna a sai sak u. ¹⁴ Tedawngah oengca thli lawng Pawl te tuitunlii keeng la te pahoei a tuih u; tede Silas oen Timote tah Berea khaw ah te awm hih. ¹⁵ Pawl aka thak thlaang thli te Aaten khaw toela haih cet u tih Berea khaaw la a meel koep u vengah Silas oen Timote te Pawl amah tengla law yue seh tila awl a uen.

¹⁶ Pawl lawng Silas oen Timote te Aaten khaaw ah a ring vengah te kah khawpui tah kutsaimuei oen abehuepla a awm te a huh tih a kaw the tangkiik. ¹⁷ Tedawngah Judah thlaang thli oen khawseh, Pathen aka bok Gental thlaang thli oen khaw sinakok ah awl a thui u poepa tih, rangpui tunna huen ah khaw, cet thuk cet hang thlaang thli oen khawhin roekk ah awl a thui u. ¹⁸ Epikuras kah cangpueina aka vai thli kah cangpueikung hue oen khaw, Stoik a ti u cuihna te aka cangpueikung hue oen khaw ahih tah oelhtaih u. Ahimi tim-kah khatsut lawngah, “He kah thlaang koeih pavaih nawh lawng he n’tu nuem a thui van ca?” ti u.

¹⁹ Tedawngah ahimi lawng Pawl te Areopakas a ti u awlcekna khonsil ah a ceh puei u tih, “Nang lawng akawng alam na thui cangpueina a thaai te ming hamla ka ngaih u. ²⁰ Na thui thaihu thli he kaimi haa yaak atah alakloela awm tih te ang thli thui ngaihna te ming ham ka ngaih u.” a tina. ²¹ (Aaten khaaw kah thlaang thli oen te ah aka awm kamyin kamlai thli lawngah hukhueng la a yaak u thaihu thaai kawng te doet adap tih awl hutungna la atue atang te a hawna u.)

²² Pawl lawngah te khawpui kah awlcekna khonsil bawi thli haiah pai tih, “Nangmi Aaten thlaang thli he bokna ben ah na tlungmu u tite ka ming. ²³ Metihtiah na vang khuiah ka yingyawi tih nangmi lawng na bokna ahuen boeih te ka bueh vengah asawah, “Ming Nawh Pathen Hamla” tila na thut u bokna-thaang pakhat te ka huh. Nangmi lawng ming heet muehla na bok u te ni tahe ah nangmi teng kavan thui. ²⁴ Dilai oen a khuiah aka awm thaihu soeprep saikung, vaan oen dilai kah Bawipa te tah thlaanghing kut oen a sak tempal bok-im ah awm nawh. ²⁵ Ahih tah thlaang boeih tengah hingna oen hillsang yilh oen ah thaihu cungkuem pekung la a awm dawngah mami lawngah ahih ham bii te bi pe tih do adan hamla khatca khaw ngoe mai nawh. ²⁶ Thlaang pakhat dawng kalawng thlaangphun boeih te a sai tih dilai pumpui ah a awm sak. Amah lawngah ahimi kah atue atang oen a awmna ham ahuen amawl te oepsoehla a nuen pe sut poen. ²⁷ Ahih lawng tila a sai he tah ahimi lawng angaai ahuett u tih amah te a tlap u atah a huh thaina ham ni. Ataktang atah Pathen he mami a-u khat oen khaw thla aih nawh. ²⁸ Thlaang pakhat lawng, ‘Amah dawngah mami n’hing u, amah dawngah n’awm u tih n’tatvuet u.’ tila a thui angla te awm. Namami kah tingtoenglung aka thlaak hue lawngkhaw, ‘Mami khaw ahih kah cadil van ni’ tila a thui angla te awm. ²⁹ Mami tah Pathen kah ca-anau la n’awm u dawngah thlaanghing kah cuihna, thoemthaina oen a sai muei asam sui, ngun, lungto kutsaimueime oen ah Pathen he lo u tila mami lawng poek ham awm nawh. ³⁰ Pathen amah te thlaanghing lawng a ming nawh vengkah atue atang te n’tu la khaw poek asam nawh, tede tahe atah khaaw tawm ram tawm kah thlaang boeih kah the-arana boeih te mangthawng taak hamla awl a peek poen. ³¹ Metihtiah amah lawng a tuek oepsoeh thlaang pakhat rang oen ah dilai pumpui he doengna oen awlcek hamla atue khawhin a nuen poen. Ahih lawng te thlaang te duekna kalawng a thawh sak rang oen thlaang boeih tengah asoengna te a tueng sak!” tila a thui.

³² Duekna kalawng thawhkoepna kawng Pawl lawng a thui te ahimi lawng a yaak u vengah thlaang khatsut lawng ahih te a nuihna u, tede thlaangtloe lawngtah, “He kah akawng alam na thui he yaak koep ham ka ngaih u.” a tina. ³³ Tecoeng atah tunna kalawng Pawl te cet poen. ³⁴ Thlaang khatsut tah Pawl oen te bawngyawng u, khonsil ah aka thuum van, ahimi khuikah thlaang pakhat Dionisias lawngkhaw Damaris aka miingna hutaa pakhat oen thlaang-tloe khatsut hue lawngtah a tangna u.

¹ He coeng atah Aaten khaaw te Pawl lawng a thawh taak tih Kawrin khaaw la cet. ² Sengpahrang sangluel Klaudias lawng Rom kalawng ah Judah thlaang boeih te a hek dawngah Itali ram kalawng a yu Priscilla oen haih aka law pek Pontas ram kah Akuila aka miingna Judah thlaang pakhat oen te ah te huh u. Pawl te ahih rawi yuvaa tengah te laiawm, ³ Pawl khaw ahih rawi yuvaa angla saphaw riim-im saina oen tangka a dang van dawngah ahih rawi yuvaa tengah awm tih bii haih a bi u. ⁴ Ahih lawngah Sabbath khawhin roekk ah sinakok bok-im ah te awl a thui poepa, Judah thlaang oen Krik thlaang thli lawng a yaakming tih a tangna thai hamla te a yawm.

⁵ Macidonia kalawng Silas oen Timote avan pha hih atah Pawl lawng atue atang boeih te awlthang phawngna ham a hawna tih Jesuh tah Messiah ni tila Judah thlaang thli teng ah acairaula a thui pe. ⁶ Pawl te ahimi lawng a oel khaklal u tih ahih kawng te athela a thui u vengah a himbai dawngkah laidiik te a khoek thil tih, “Nangmi lawng na ha-ata u atah namami kah thebuh la awm seh! Ka sawah thoeng boel seh. Tahe kalawng tah Gental thlaang thli tengla ka cet poen ai.” a tina. ⁷ Tedawngah ahimi te a ceh taak tih Pathen aka bok Gental thlaang pakhat Titias Jastas aka miingna im ah awm hamla cet; ahih im tah sinakok bok-im a huben ah te awm. ⁸ Sinakok bok-im uktemkung Krispas oen a imkhuikaw boeih lawng-tah Bawipa te a tangna u; Kawrin khaaw kah thlaangtloe thli lawngkhaw awlthang te a yaak u, a tangna u tih baptisma te a dang u.

⁹ Yiin at atah Pawl lawng huhthlaam a huh tih te kah huhthlaam dawngah Bawipa lawng, “Rih boel, toeng tlaih ohla awlthang te poe thui, ¹⁰ metihtiah kai lawng kan awm puei dawngah a-u lawngkhaw nang te nganbawh n’yawkk sak manawh, he khawpui khuikah yahawh ngaai he tah kamah kah thlaang la ni a awm u.” a tina. ¹¹ Tedawngah Pawl tah kum at coeng kum vaang te ah te awm tih thlaangping te Pathen awl a cang puei.

¹² Akhaia ah Kallio te Rom ram ukbawi la a awm veng atah Judah thlaang thli lawng cawitun u tih Pawl te a tuuk u coeng atah awlcekna yungim la te a khuen u. ¹³ Ahimi lawngah, “He kah thlaang lawngah phungawl oen a kalh u la Pathen bok ham thlaangping te a suek ahalh!” a tina u.

¹⁴ Pawl lawng awl ka thui ai a ti vengah Kallio lawngah Judah thlaang thli nala te, “He he athe ara lumlai pakhat mai aw, tinawh atah thawlhpalhna lumlai pakhat mai kawinih nangmi Judah thlaang thli sawah kawdaw thinsanna oen kaw ka poek ham theen. ¹⁵ Tede he tah awllung thli, miing thli oen namami kah phungawl kawngah awlpuungna la a awm dawngah namami lawng thui uh. Kai lawng he ang thaihu thli dawngah awl ka cek manawh!” a tina. ¹⁶ Tecoeng atah awlcekna yungim kalawng ahimi te a hek poen. ¹⁷ Ahimi boeih lawng sinakok uktemkung Sostenes te a tuuk u tih awlcekna yungim haiah te a bawh u. Tede Kallio lawngtah tete n’tu la khaw ngaai pe nawh.

¹⁸ Pawl he Kawrin khaaw ah khawhin sanhlang oengca thli oen a awm coengah ahimi te a ceh taak u tih Priscilla oen Akuila oen ah Siria khaaw la tuisangphaw oen cet haih u. Kenkhria khaaw kalawng tuisangphaw oen a ceh thlan ah awlkamna a sai dawngah a luu te bithliingla a vawkk. ¹⁹ Efesa khaaw te a pha u atah Pawl lawngah te ah te Priscilla oen Akuila te a ceh taak. Amah tah sinakok bok-im khuila cet tih Judah thlaang thli oen awl a thui u. ²⁰ Te kah thlaang thli lawngtah asan hlang awm hamla a thlawh u de ahih lawng a thana. ²¹ Aceh tawm atah, “Pathen lawng angaih atah nangmi tengla ka law koep ai.” a tina. Tecoeng atah Efesa khaaw kalawng tuisangphaw oen cet.

²² Sisaria khaaw te a pha coeng atah Jerusalem la phaat cet tih khrihcabu te a voem a toei, tecoengah Antiok la poe cet. ²³ Te ah te asanhlang a awm coeng atah te kalawng Galati peng oen Frikia peng la cet tih oengca boeih te thathluena awl a thui pe.

²⁴ Tevengah te Alekzandria khaaw kah Apollos aka miingna Judah thlaang pakhat te Efesa khaaw la va law. Ahih tah awlthui a thoem tangkiik tih Caciim dawngkah awl te acek aneh la a ming. ²⁵ Ahih lawngah Bawipa kah Lawngpui thuinuetna te a cang heet poen dawngah Jesuh kawng te asoeng akamla a cang puei tih thathluela a thui. Tede ahih lawngah Johan kah baptisma bueng te ni a ming. ²⁶ Sinakok bok-im ah raltheenla awl a thui. Priscilla oen Akuila lawng ahih awlthui te a yaak hih vengah ahih te im la a ceh puei tih Bawipa kah Lawngpui te asoeng tare la a thuicaih pe hih. ²⁷ Tecoengah Apollos tah Akhaia la ceh ham kamthlah, tedawngah Efesa kah oengca thli lawng Akhaia kah oengca thli tengah ca a thut pe u tih ahih he uem u langtah dodan uh a tina. Ahih te a pha veng atah Pathen kah lungvatna rang oen oengca la aka awm hue ham ah bawmcemkung theen koek la awm. ²⁸ Rangpui haiah awl a oelh u vengah Caciim dawngkah awl te ahih lawng a thoel tih Jesuh tah Messiah ni tila a oelh tangtang atah Judah thlaang thli te a taa.

¹ Kawrin khaaw ah Apollos a awm veng te ah, te kah peng te a hiil adawng tih Efesa khaaw te a pha. Te ah te hubang thli khatsut te a huh tih, ² Te atah, ‘Nangmi lawng oengca la na coengg u vengah te Ciim Muithla na dang u poen aw? tila ahimi te a doet. Tevengah ahimi lawng, “Ciim Muithla awm tite a yaak pateng khaw ka yaak u moenih.” ti u.

³ Tevengah Pawl lawngah, “Tetih atah nangmi lawng me ang baptisma na dang u?” a tina. Ahimi lawngah, “Johan kah baptisma ni ka dang u.” a tina.

⁴ Pawl lawngah, “Johan kah baptisma tah thawlhna aka yut thlaang thli ham ni, ahih lawng Israel thlaang thli tengah, ‘Ka hu ah aka law te na tangna u ham awm’ tila a thui te tah, Jesuh te ni.” a tina.

⁵ Ahih lawng he awl he a yaak vengah Bawipa Jesuh miing ah baptisma te a dang u. ⁶ Pawl lawng ahimi sawah a kut a tloeng atah Ciim Muithla te ahimi sawah va law; ahimi lawngah ming nawh awl la cal u tih Pathen awl te khaw a phawng u. ⁷ Ahimi tah a pum boeih la thlaang paha thlaihih yun tah awm u.

⁸ Pawl tah sinakok bok-im la te cet tih thla thum khui puet ah raltheenla thlaangping tengah awl a thui, ahimi oen ah awl a thui u pakcal tih Pathen Ram kawng te ahimi lawng a yaakmingna thai ham a yawm. ⁹ Tede khatsut tah amangkhak thlaang la a awm u dawngah tangna u nawh tih thlaang rangpui haiah Pathen kah Lawngpui along a-im te athela a thui u. Tedawngah ahimi te a ceh taak tih oengca thli te a ceh puei, hin roekk ah Tirannas cacangna im ah awl a thui pe. ¹⁰ He tila te kum hih khui a sai tih Asia ram ah aka awm thlaang boeih Judah oen Gental thlaang thli lawng Bawipa awl te a yaak u.

¹¹ Pathen lawng Pawl rang oen ah aka awm nooek nawh kawpoekrai miknoekna te a sai. ¹² Ahih kah a hawna kut thuutna baaipeen oen a raang dahna himbaica thli pateng khaw thlaangtlo thli tengla a khuen u vengah ahimi kah tlawhnatna hoeih tih raaithe aka khueh thlaang thli kah a kaw khui kalawng raaithe thli te co u. ¹³ Judah thlaang khatsut raaithe hek hamla aka yingyo thlaang thli lawngkhaw Jesuh miing te hawna ham a yawm u. Ahimi lawng raaithe thli nala te, “Pawl lawng a phawng Jesuh miing oen ah awl kan peek, co u loeih,” a tina. ¹⁴ Judah thlaang Khawsoeih Bawi Skeva capa thli pasarih lawngah he tila a sai u.

¹⁵ Tede raaithe lawng ahimi nala te, “Jesuh te ka ming, Pawl khaw ka ming; tede, nangmi he a-u?” a tina.

¹⁶ A kaw khuiah raaithe aka awm thlaang te lawngah ahimi te a hah doet thloet tih boeih a taa. Boengha a caak u tih hinaak himbai pawnsawi la ahih im kalawng heeng u. ¹⁷ Efesa ah aka awm Judah thlaang oen Gental thlaang boeih lawng he kawng he a yaak u vengah a rih tangkiik u tih Bawipa Jesuh miing te a hinyah tare u. ¹⁸ Oengca thli khuikah thlaang broe lawngah law tih ahimi lawng a sai thli te rangpui haiah a phawng u. ¹⁹ Caam thoemthaina te aka hawna thlaang broe lawngah amami kah cabu thli te avan khuen tih rangpui haiah te hai dawngah a phum u. Ahimi lawng cabu phu te atoek asam u vengah apum boeih la ngun tangka thong sawm ngaa a pha. ²⁰ He tila te Bawipa awl tah puung tare tih roeng hang.

²¹ He ang thaihu thli a awm hang coengah Pawl lawngah Macidonia ram oen Akhaia ram kalawng Jerusalem la ceh poe hamla kamthlah. Ahih lawngah, “Tela te ka ceh coengah Rom khawpui la ka cet ai.” ti. ²² Tedawngah amah bawmcemkung thlaang pahih Timote oen Erastas te Macidonia la a tuih, amah tah Asia ram khuiah atue san hlang a hawna.

²³ Tevengah te Bawipa kah Lawngpui kawng dawngah Efesa khaaw ah awl puungna awm. ²⁴ Demetrias aka miingna ngun thiidekung lawng rai pathennu Artimis kah tempal bok-im muei-ame thli te ngun oen a sai, ahih kah biibina oen ah biibikung thli lawng tangka a dang u. ²⁵ Tedawngah amah kah bii aka bi thlaang thli oen amah angla bii tloe aka sai thli te khaw a khue tun tih ahimi nala te, “Nangmi u, mami kah khuehtoen thaihu tah he kah biibina dawng kalawng ni n’dang u tite na ming u. ²⁶ Tahe ah Pawl lawng a sai te nangmi lawng na huh thai tih na yaak thai u. Ahih lawngah, ‘Thlaanghing lawng a sai pathen thli he pathen tangtang nawh ni’ tila a thui tih Efesa khaaw oen Asia ram pum kah thlaang boeih te a yaakming sak poen. ²⁷ Tedawngah mami kah biibina he miingthe a dang poen ai tite lakueng ham awm. Te bueng nawh tih Asia ram oen dilai pumpui kah thlaang lawng a bok rai pathennu Artimis kah bawilenna khaw yok vetih ahih kah tempal bok-im khaw apoeila awm poen ai tite lakueng ham awm!” a tina.

²⁸ He awl he thlaangping lawng a yaak u vengah a thin sa soeh u tih, “Efesa khaaw kah Artimis tah bawilen duet ni” tila te paang u. ²⁹ Te tila te khawpui khuiah cumplaam la tho u. Thlaangping lawngah Pawl oen yin aka cet haih Macidonia nam thlaang pahih Kaia oen Aristarkas te a tuuk u tih poei sai laamna-im la te aathamala a mawt u. ³⁰ Pawl amah khaw thlaangping haiah te ceh ham a ngaih de oengca thli lawng ceh sak nawh. ³¹ Te peng kah aana khuehkung a paya khatsut hue lawngkhaw poei sai laamna-im la te ceh nawh hamla awl a tah u. ³² Te kah thlaangping thli te ngaihangtum luukiil haven la awm u: ahimi timkah thlaang yahawh ngaai lawngtah n’tu kawngah he tila ka tun u ti khaw a ming u nawh dawngah thlaang vaang lawng atloela paang u, atloe thlaangvaang lawng athloekla paang u. ³³ Judah thlaang thli lawng Alekzandar te thlaangping hai la a ceh sak tih thlaang khatsut lawngtah ahih lawng ni awlpuungna he a thoeng sak cawini tila a poek u. Tecoeng atah Alekzandar lawng thlaangping te sap duem hamla a kut oen noekna a sai pe tih amah phungtuna awl te thui ham a yawm. ³⁴ Tede ahimi lawng ahih te Judah thlaang ni tila a noek u vengah: “Efesa khaaw kah Artimis tah bawilen duet ni!” tila te khawnoek pahih khui puet ah ruek ruek paang u.

³⁵ Hukhueng atah te kah khawpui ah aana aka khueh cathutkung lawng thlaangping te a duem sak thai. Ahih lawng, “Ka puei, Efesa thlaang thli, Efesa khaaw he tah alenduet Artimis tempal bok-im oen vaan kalawng aka tla thuk lungto cuem te doenkung la na awm u tite thlaang boeih lawng a ming u. ³⁶ A-u lawngkhaw he tah oelh thai manawh. Tedawngah nangmi lawng duem na awm u ham awm tih poek muehla thaihu khat khaw sai ham awm nawh. ³⁷ He rawi lawngah he tempal bok-im te khaw rot nawh tih mami kah pathennu kawng khaw athela thui nawh de ahih rawi he nangmi lawng he la navan khuen u. ³⁸ Demetrias oen bii aka bi haih thlaang hue lawng a-u khaw tayacawi ham a khueh atah, aana khuehkung thli oen awlcekna yung oen ah awlcekna khawhin khaw mami lawng n’khueh u dawngah taya na cawi u thai ta. ³⁹ Tede, apuehla na ngaih u atah pilnam rangpui tunna ah awl cek ham awm. ⁴⁰ Tihin ah aka thoeng thaihu dawngah he, mami lawng ni awl puungna a thoeng sak tila m’peel hau ai ti he rih ham awm tih he tila a awm he akawng alam khaw atheenla n’thui u tang manawh.” a tina. ⁴¹ He awl he a thui coeng atah thlaangping te a meel sak.

¹ Awlpuungna te aboet coeng atah Pawl lawng oengca thli te a khue tun tih thathluena awl a thui pe coeng atah sading ngaimawngla an awm uh a tina. Tecoeng atah Makedonia ram la te cet. ² Ahih lawngah te kah peng te a hiil adawng tih thathluena awl a thui pe, tecoeng atah Akhaia ram la te cet tih te ah te thla thum awm. ³ Siria ram la ceh ham cai de, Judah thlaang thli lawng ahuepla ngawn ham a teeng u tite a ming tih Macidonia ram benla ceh koep hamla te kamthlah. ⁴ Berea khaaw kah Piras capa Sopatar, Tesalon khaaw kah Aristarkas oen Sekunda; Derbe khaaw kah Kaia; Asia ram kah Tukhikas oen Trofimas mi te Timote lawng a ceh puei u. ⁵ Ahimi te lamhala cet u tih Troas khaaw ah kaimi te n’ring u. ⁶ Tawlru thuum nawh Takawi Poei a boeih coengah Filipi kalawng Kaimi khaw tuisangphaw oen ka cet u tih hin ngaa coengah ahimi oen Troas ah ka huh u, te ah te khawhin hin rih ka cam u.

⁷ Yarh khat khuikah lamhacuek khawhin ah beroep lopaangna thlembuh veel haih hamla ka tun u. Avuen hin ah ceh ham a kamthlah u dawngah Pawl lawng thlaangping tengah yiinthuem toe ah awl a thui. ⁸ Kaimi ka tunna asaw im han ah haiim te moen a vaang u. ⁹ Cadawng pakhat Jutikas aka miingna te bangbuerh ah ngawl, Pawl lawng awl a thui lii vengah te ahih tah a mik kuu tih ngaam, ahula tah ip muelh tih im han apathumna kalawng dilai la tla thuk. Ahimi lawngah duek rawkk la a ruh u. ¹⁰ Tede Pawl te rum thuk tih ahih te koe a sambai, ayuh ayam tih a pooem. Ahih lawngah, “Lakueng u boel, hing hun he!” a tina. ¹¹ Tecoengah im han la koep cet, takawi a eh tih a caak u. Ahimi oen mincang khawthaih toe asanhlang awl a thui u coengah Pawl te cet. ¹² Ahimi lawngah cadawng te sading la amah im la te a ceh puei u tih ahimi boeih tah a ngaimawng u.

¹³ Kaimi te tuisangphaw oen lamhala Asos khaaw la te ka cet u, te kalawng tuisangphaw oen Pawl oen ah ceh haih hamla ka kamthlah u. Amah tah lan lawngpui kalawng a law dawngah te tila sai ham avan thui. ¹⁴ Asos khaaw ah kaimi oen ka huh u tih tuisangphaw dawngah ka luui sak u, tecoengah Mitilin khaw la ka cet u. ¹⁵ Te kalawng ah tuisangphaw oen ka cet u tih avuen hin ah Khios tuisanglak ka pha u. Tecoeng awmvai hin atah Samos tuisanglak ka pha u tih awmvaivuen hin atah Militas khaaw te ka pha u. ¹⁶ Pawl lawngah Asia ram khuiah poei-apah ham ngaih nawh tih Efesa khaaw te kaan tih tuisangphaw oen ceh phaat ham kamthlah. Acoeng thai atah Pentikos khawhin vengah Jerusalem te aloela pha ham a ngaih.

¹⁷ Pawl lawngah Militas kalawng Efesa la thlaang a tuih tih khrihcabu ahaamca thli te ahih oen huh u hamla law u lah seh, tila awl a tah. ¹⁸ Ahimi te avan pha u veng atah Pawl lawng, “Asia ram kavan pha peek kalawng nangmi teng ka awm khui puet ah atue khawhin metila ka hawna tite na ming u. ¹⁹ Judah thlaang thli lawng ngawn hamla n’teeng poepa u dawngah rai-acangna ka teng ah a pai vengah khaw, Bawipa kah tuihyoeihthlaang la ka awm van angla kawdaw thinsan oen ah bii ka bi. ²⁰ Thlaang rangpui haiah khaw, namami im ah khaw, nangmi kah hoeikhangna koei te khatca khaw thuh phah muehla ka thui tih kan cang puei u te na ming u. ²¹ Pathen haiah na thawlhna yut tih mami kah Bawipa Jesuh te na tangna u ham Judah thlaang oen Gental thlaang khaw avan at la ngaithuenna rep kan peek u poen. ²² Tahe atah Ciim Muithla kah awl te ka ngaai tih Jerusalem la ka cet ai, te ah te ka sawah n’tu thaihu aka thoeng ai tite ka ming nawh. ²³ Ka phana boeih khaaw roekk ah Ciim Muithla lawng ah ngaithuenna m’peek tih thongtlaak oen raina lawng kai he n’ring khuep ti bueng he ni ka ming. ²⁴ Tede ka hingna he n’tu la khaw ka ngaai mai nawh; kai ham avan thloem bii oen ah kai lawng sai hamla Bawipa Jesuh lawng m’peek bii te coeng ham bueng ni ka ngaih. Te tah Pathen kah lungvatna kawng Awlthang Theen phawng ham he ni.

²⁵ Kai lawngah nangmi boeih te khok kan hiil tih Pathen ram kawng te kavan thui u. Tede tahe kalawng tah a-u khat lawngkhaw kai he koep nan hu u tlaih manawh tite ka ming. ²⁶ Tedawngah tihin nangmi tengah ataktang kavan thui; nangmi timkah pakhat khat khaw na ha-ata u mai atah ka sawah tla boel seh. ²⁷ Metihtiah Pathen kah a kamthlahna te thuh phah muehla apum boeih la nangmi tengah biit kavan thui poen. ²⁸ Tedawngah namah oen namah te ngaithuen u langtah nangmi lawng na doen hamla Ciim Muithla lawng m’peek tuu thli te doen-acaang u lah. Pathen lawng amah Capa duekna rang oen amah koe la a khueh Pathen Khrihcabu tuudoen la te awm u lah. ²⁹ Kai ka ceh coeng atah nangmi tim ah metaang tluung thli te law u vetih ahimi lawng tuuca thli te a sa sueng sak manawh tite ka ming. ³⁰ Namami tim kah thlaang khatsut lawngah oengca thli te amami ben la mawt ham a ngaih dawngah hoem awl a thuina atue te a pha ai. ³¹ Tedawngah ngaithuen uh, kum thum khui puet ah khawyiin khawdaai mikphi oen kan cang puei u te hilh u boel.

³² Tahe tah nangmi he Pathen kah doencangna oen amah kah lungvatna awlthang khuiah kan peek u poen, te lawngah nangmi te n’roeng sak vetih amah kah thlaang boeih hamla a toen oepsoeh yotheen kam-awmna te m’peek ai. ³³ Kai lawngah a-u kah sui khaw, ngun khaw, hinaak himbai khaw ka naai nawh. ³⁴ Ka paya laikoei thli oen kamah kah ngoe ngaihna boeih te dang hamla kamah lawng ka kut oen bii ka bi te nangmi lawng na ming u. ³⁵ Mami lawng voetna aka awm thlaang thli te bawmcemna ham bii te bi ham awm tite soeprep boeih ah kan huh sak poen. Bawipa Jesuh amah lawng, ‘Dangna lak ah peekna he yo-akam awm ngaai’ tila a thui awl te hilh u boel.” a tina.

³⁶ Pawl lawng awl a thui coeng atah ahimi oen haih khuklu oen cuengkueng u tih thangthui u. ³⁷ Ahimi boeih lawng rap u tih Pawl te khak a kawp u, a mok u tih sadingla cet ne, a tina u. ³⁸ Pawl lawng ahimi nala te, ‘Kai he koep nan hu u tlaih manawh’ a tina dawngah a kaw the u. Tecoeng atah Pawl te tuisangphaw a awmna la a thak u.

¹ Kaimi lawngkhaw ahimi nala te sadingla awm uh ka tina coeng atah ka cet u. Tuisangphaw oen phaat ka cet u tih Kos tuisanglak te ka pha u; avuen hin atah Rodis tuisanglak ka pha u; te kalawng Patara la ka cet u. ² Te ah te Fonicia la aka cet tuisangphaw pakhat ka huh u tih te oen ah te ka cet u. ³ Saipras tuisanglak a tuengna huen te ka pha u atah adang ben kalawng ka reel u tih Siria la te ka cet u. Turon khaaw atah lan la ka rum u, te ah te tuisangphaw dawngah thaihu a phueih te a sat u. ⁴ Te ah te oengca thli thlaang khatsut ka huh u tih ahimi tengah hin rih ka awm u. Pawl te Jerusalem la ceh nawh hamla ahimi lawng Muithla kah huham tharana oen a thui pe u. ⁵ Tede ahimi tengah khawhin hih rih ka awm u coeng atah ka cet u. Ahimi boeih oen a yu a ca thli lawng khawpui adauben tuikeeng toe la n’thak u, te ah te khuklu oen ka cuengkueng u tih ka thangthui u. ⁶ Tecoeng atah khat oen khat kut ka tuuk u coeng atah kaimi tah tuisangphaw dawng ka luui u, ahimi tah im la koep meel u.

⁷ Turon kalawng ka cet u tih Tolimas te ka pha u. Te ah te oengca thli oen ka voem ka toei u tih ahimi tengah hin at ka cam u. ⁸ Avuen khawhin ah ka cet u tih Sisaria khaaw te ka pha u. Te ah te, Jerusalem ah bawmkung la a tuek u thlaang pasarih khuiah aka thuum van awlthang phawngkung Filip im ah ka pah u. ⁹ Ahih lawng Pathen awl aka phawng a canu hulaa palii a khueh. ¹⁰ Te ah te asanhlang ka cam u coengah Akabas aka miingna tawngha te Judia ram kalawng avan pha. ¹¹ Ahih te kaimi tengla law tih Pawl kah cihin te a lawh, a kut oen a khow te a piin tih, “Ciim Muithla lawng tila avan thui: He kah cihin khuehkung he Jerusalem ah Judah thlaang thli lawng he tila a piin vetih Gental thlaang thli kut ah a peek ai.” tila a thui.

¹² He awl he kaimi lawng ka yaak u veng atah kaimi oen te kah aka awm thlaangtloe hue lawng Jerusalem la ceh nawh ham Pawl te ka thlawh u. ¹³ Tede ahih lawng, “Me tih na ti u, he tila na rah u he ka thin navan hoepp sak u! Jerusalem ah piin ayeen ham bueng oepsoehla ka awm nawh, te ah te Bawipa Jesuh kawngah duek ham pateng khaw oepsoehla ka awm poen.” a tina.

¹⁴ Kaimi lawng ahih te ka thlawh u thai tlaih nawh, ka toeng u tih, “Bawipa kawngaih hawn seh.” ka tina u.

¹⁵ Te ah te kawlkalh ka cam u coeng atah kamami kah thaihu te ka roek ka bah u tih Jerusalem la te ka cet u. ¹⁶ Sisaria khaaw kah hubang thli khatsut khaw kaimi oen ka cet haih u tih kaimi lawng ka pahna koei Manason im la te n’ceh puei u. Ahih tah Saipras khaaw kah thlaang, acuekca kalawng oengca la aka awm poen ni.

¹⁷ Jerusalem la te kaimi ka pha u atah oengca thli lawng awmngaihcala n’do u. ¹⁸ Avuen atah Jeem te huh hamla Pawl oen kaimi haih ka cet u; Khrihcabu ahaamca boeih khaw te ah te awm u. ¹⁹ Pawl lawng ahimi te kut a tuuk tih amah kah biibina rang oen Gental thlaang tim ah Pathen lawng a sai thaihu boeih te biit a thui pe ²⁰ Ahih awl te a hutung u coeng atah ahimi boeih lawng Pathen te a thangpawm u. Tecoengah ahimi lawng, “Maya Pawl, Judah thlaangphun toeklek nawh oengca la awm u poen tih ahimi lawng Phungawl a thintlawhna mangkhak te na ming poen. ²¹ Gental ram ah aka awm Judah thlaang boeih te Mosi kah Phungawl te hoett hamla, a ca thli te yahhuivuen reet nawh ham khaw, Judah phung alam te khaw vai tlaih nawh hamla nang lawng na cang puei tila ahimi lawng a thui u. ²² He la nang navan pha khaw a ming u poen cawini. Te tih atah me tih ni n’ti u lah ai? ²³ Kaimi lawngtah he tila na sai ham ka ngaih u. He ah he awlkamna aka sai thlaang palii awm. ²⁴ Ahimi he ceh puei langtah bokna benkah ciimcaihna siing te sai puei van, nang lawngah tangka te kawnn peh, te atah ahimi lawng a luu te a vawkk bling thai ai. He tila na sai atah ahimi lawng nang kawng a thui u te atak tang nawh ni tila thlaang boeih lawng a ming u vetih namah khaw Mosi kah Phung awl angla ni khaw a sak van tite a ming u ai. ²⁵ Tede oengca la aka awm Gental thlaang thli ham tah ahimi lawng kutsaimuei bokna ah a nawn u khatsut caak awkk te caak nawh ham, sathi caak nawh ham, ramsa rawn khak sa te caak nawh ham, ahimi lawngah hutaa tawngpa thawlhna te kuemsuem hamla mami kah awl tloekna ca te ahimi tengah m’pat pe u poen.” a tina u.

²⁶ Tedawngah avuen atah te kah thlaang thli te Pawl lawng a ceh puei tih ahimi oen bokna siing angla ciimcaihna te a sai u. Tecoengah Pawl te Tempal bok-im la cet tih ciimcaihna atue atang he aboet toe ah khawhin meyoeh a awm ai, ahimi pakhat rip ham luciik nawnna atue te mevengah n’sai ai tite oepsoehla a thui pe.

²⁷ Tede khawhin hin rih te aboet tawm veng atah Asia ram kalawng aka law Judah thlaang thli lawng Tempal bok-im khuiah Pawl te a huh u. Ahimi lawngah thlaangping te a ceemtuh u tih Pawl te a tuuk u. ²⁸ Ahimi lawngah, “Israel thlaang thli, n’bawm u lah! Ahih he khaaw tawm ah cet tih Israel thlaang thli khaw, Mosi kah Phungawl oen Tempal bok-im he khaw Oelhtaih hamla thlaang boeih te a cang puei. Tecoengah tahe ah Gental thlaang khatsut te Tempal bok-im khuila avan law puei tih he huen ciim he a hok a aih” tila paang u. ²⁹ (Efesa khaaw kah Trofimas oen Pawl te khawpui khuiah a huh haih u tih Pawl lawng ahih te Tempal bok-im khuila avan law puei tila a poek u dawngah te tila paang u.)

³⁰ Khawpui pum te tokcaliik la tho u, thlaang boeih lawng heeng u, Pawl te a tuuk u tih Tempal bok-im adaubenla aathamala a mawt u. Tempal bok-im thawhka te pahoei a khaih u. ³¹ Tokcaliik la aka tho thlaangping lawng Pawl te ngawn ham kamthlah u, Jerusalem khawpui pum ah cumplaam la tho khuengdeng u poen tite Rom raalbawipa lawng a yaak. ³² Raalbawipa lawng raalkap bawi oen raalkap thli oen ah aathamala pahoei cet u. Thlaangping lawng raal bawipa oen raalkap thli te a huh u vengah Pawl a bawh u te a toeng u. ³³ Raalbawipa te Pawl tengla cet, a tuuk tih thiirui pahih oen a khih sak. Tecoengah ahih lawng, “He kah thlaang he a-u, n’tu thawlhna a sai?” tila a doet u. ³⁴ Thlaangping khatsut lawng atloela paang u tih, khatsut lawng athloekla paang u van. Thlaangping kah paang awl dawngah awlpuungna taktak te Raalbawipa lawng a ming thai nawh dawngah Pawl te raaltoetna vawngup khuila khuen hamla raalkap thli te awl a peek. ³⁵ Thlakkung te a pha tawm u atah thlaangping te tlungsa soeh aih tih raalkap thli lawng Pawl te a pawm hang u. ³⁶ Thlaangping lawng a hu ah avan vai u tih, “Ngawn uh.” tila te ruek paang u.

³⁷ Raalkap thli lawng Pawl te raaltoetna vawngup khuila a khuen tawm u atah Raalbawipa nala te, “Na tengah awl ka thui thai ai aw?” a tina.

³⁸ “Tetih atah n’hu vengah thlaang thonglii awva oen ceem la a thawh puei tih ramhum rammawl la aka ceh puei Iyipt thlaang te nang nawh macawi?” a tina.

³⁹ Pawl lawng awl a thung pe tih, “Kai tah Judah thlaang ni, Cilicia ram, Tarsas khawpui miing thaang kah thlaang ni. Reenna oen thlaangping tengah awl n’thui sak lah.” a tina.

⁴⁰ Raalbawipa lawng awl a thui sak. Te atah Pawl te thlakk dawng pai tih thlaangping te sap duem ham a kut oen noekna a peek. Thlaangping lawng awl a phah sap u coeng atah ahimi tengah Hebru awl la Pawl lawng awl a thui pe.

¹ “Maya manau thli oen a pa hue, nangmi haiah kamah ka phungtuna awl he hutung u lah!” a tina. ² Ahimi tengah Hebru awl la a thui pe te a yaak u vengah awl a phah dingri u; Pawl lawngah:

³ “Kai he Cilicia ram Tarsas khaaw kah Judah thlaang ni, tede, Jerusalem ah he ka roeng hang tih Gamaliel kah sengcamoe la ka awm. Kai lawng mami patuer hue kah Phungawl oen thuituen-na te ka dang tih tihin ah he kah aka awm nangmi boeih angla Pathen tengah ka tlungmu van. ⁴ Kai lawngah he kah lawngpui aka vai thlaang thli te ka heem ka tek tih ka ngawn. Kai lawng hutaa khaw tawngpa khaw ka tuuk tih thong ah ka thlaak. ⁵ Kai lawng awltak ka thui tite Khawsoeih Bawi oen awlcekna Khonsil ah aka thuum boeih aka mingkung sausi la awm. Ahimi lawngah Damaskas khaw kah Judah thlaang thli tengah a thut pe u ca te khaw kai lawng ka lawh, tecoeng atah te kah thlaang thli te tuuk hamla, ahimi te thiirui oen khih tih dan tat ham Jerusalem la koep van khuen hamla te ka cet.” a tina.

⁶ Damaskas khaaw la ka cet tih ka pha tawm veng hingthun ah te vaan kah aangna pakhat lawng n’thue ploeng tih ka teng ka vaai te aang rawngtheng. ⁷ Dilai ah ka tlim tih awl pakhat lawng, ‘Sawl, Sawl! N’tu ah kai he nan heem nan tek aih?’ tila a thui awl te ka yaak. ⁸ Kai lawngah, ‘Bawipa, nang te a-u?’ ka tina. Ahih lawngah, ‘Kai tah nang lawng nan heem nan tek Nazaret khaaw kah Jesuh ni’ tila avan thui. ⁹ Kai oen ka cet haih thlaang thli lawng aangna te a huh u de ka tengah awl aka thuikung kah awl te tah ya u nawh. ¹⁰ Tevengah kai lawng, ‘N’tu ka sai ai, Bawipa!’ tila ka doet tih Bawipa lawngah, ‘Tho langtah Damaskas la cet, te ah te nang lawng na sai ham koei Pathen lawng avan khueh thaihu boeih te avan thui ai.’ tila avan thui. ¹¹ Te kah aangna lawng ka mik avan tueng sak tlaih nawh dawngah ka cet haih ka puei thli lawng Damaskas khaaw la te a kut oen m’mawt u.

¹² Te khawpui khuiah Ananias aka miingna thlaang pakhat awm, ahih tah bokna ben ah tlungmu tih mami kah Phungawl te a vai, te ah aka awm Judah thlaang boeih lawng a hinyah tangkiik u. ¹³ Ahih te law tih ka tengah pai, ‘Ka manau Sawl, na mik tueng loeih seh!’ n’tina. Teveng roe te ah ka mik tueng pahoei tih ahih te ka huh. ¹⁴ Ahih lawng, ‘Mami patuer hue kah Pathen lawng amah kawngaih te ming hamla amah kah aka doeng tuihyoeihthlaang te huh sak ham oen ah amah awl roe oen a thui awl te yaak hamla nang he n’tuek poen. ¹⁵ Metihtiah nang lawng na huh tih na yaak boeih te thlaang boeih tengah thui hamla nang he a hih ham aka mingkung sausi la na awm ai. ¹⁶ Tahe ah n’tu na ring khiing? Tho langtah baptisma te dang loeih, amah tengah thangthuina rang oen na thawlhna boeih te sil loeih’ tila avan thui.

¹⁷ “Jerusalem la te koep ka cet tih Tempal bok-im khuiah ka thangthui vengah huhthlaam pakhat ka huh, ¹⁸ te kah huhthlaam dawngah Bawipa te ka huh tih ahih lawngah, ‘He kah aka awm thlaang thli lawng kai kah kawng alam na thui he a do u nawh dawngah Jerusalem he ceh taak loeih, uelh tlaih boel.’ tila avan thui. ¹⁹ Tevengah kai lawng, ‘Bawipa, Sinakok boeih ah ka cet tih nang aka tangna thlaang thli te ka tuuk tih ka bawh te ahimi lawng atheenla a ming u. ²⁰ Tecoengah nang kah sausi la aka awm Stefen te a ngawn u vengah te kamah khaw ka awm, ahih te ngawn ham ka ngaih puei van tih ahih aka ngawnkung thli kah hi-acuu te ka khoem pe.’ ka tina. ²¹ Bawipa lawngah, ‘Cet loeih, athla hlang la aka awm Gental thlaang thli tengla nang he kan tuih ai.’ n’tina” tila a thui pe.

²² He toe ah Pawl lawng awl a thui te tah thlaangping lawng a hutung u de, tecoeng atah awl a huer u tare tih, “Te kah thlaang te thip uh! Ngawn loeih! Ahih te hing paa nawh ni!” tila paang u. ²³ Ahimi lawngah paang u, a him-bai thli te a thlek u tih laidiik te vaan la a heh u. ²⁴ Judah thlaang thli lawng paang u tih a oel khaklal u te ming ham ah ahih te raaltoetna vawngup la khuen ham oen ah cungpoelh oen tam hamla a raalkap thli te awl a peek. ²⁵ Tede ahih te cungpoelh oen bawh hamla ahimi lawng a piin u vengah te Pawl lawng te kah aka pai raalkapbawi nala te, “Rom thlaang pakhat he awl na cek thlan ah na bawh praap he upadi phung poen aw?” a tina.

²⁶ He awl he raalkapbawi lawng a yaak vengah raalbawipa tengla cet tih, “Ahih he Rom thlaang ni! Metila ka sai ai na ti?” tila a doet.

²⁷ Te atah raalbawipa lawng Pawl tengla cet tih a doet, “Nang he Rom thlaang aw? Van thui lah.” a tina. Pawl lawngah, “Oeih, kai tah Rom thlaang ni” a tina.

²⁸ Raalbawipa lawng, “Kai lawngtah tangka ka peek tih Rom thlaang la ka coengg” a tina. Pawl lawngah, “Kai tah Rom thlaang roe la ka thang” a tina.

²⁹ Tevengah Pawl te awl ka doet ai aka ti thlaang thli te pahoei nawng u; Pawl he Rom thlaang ni tite raalbawipa lawng a ming vengah thiirui oen a khih hau te caalla lakueng.

³⁰ Judah thlaang thli lawng Pawl he thawlh a peel u te acek aneh la raalbawipa lawng ming ham a ngaih; tedawngah avuen hin atah Pawl a piinna thiirui te a thlam pe, khawsoeih ahaamca thli oen Khonsil ah aka thuum thlaang thli te ngawlh tun ham awl a peek. Tecoeng atah Pawl te ahimi haiah a pai sak.

¹ Pawl lawng Khonsil ah aka thuum thlaang thli te a bueh rangpatang tih, “Ka puei, Israel thlaang thli! Kai tah tahe toe ah khaw ka sakna dawngah athe atheen mingna thinkaw he Pathen haiah ciim.” a tina. ² Khawsoeih bawi Ananias lawng Pawl tengah aka pai thlaang thli nala te, ‘Pawl te a kaa ah bel pingmal uh,’ a tina. ³ Tevengah Pawl lawng ahih nala te, “Nang, abawk vuut vawngpui, Pathen lawng namah te m’bel malcal seh! Nang lawngah kai he Phungawl angla awl cek hamla te ah te na ngawl van de kai he bel hamla awl na peek dawngah Phungawl te na phe poen!” a tina.

⁴ Pawl tengah aka pai thlaang thli lawng ah te, “Nang lawngah Pathen kah Khawsoeih Bawi na sal na phaam!” a tina u.

⁵ Pawl lawng, “Ka puei, Israel thlaang thli, ahih he Khawsoeih Bawi ni tite ka ming nawh dawngah ni. Caciim lawngah, ‘Na thlaang phun ukkung te athela thui boel,’ tila a thui ta” a tina.

⁶ Te kah thlaangvaang te Sadusi thlaang tih thlaang vaang te tah Farasi thlaang ni tite Pawl lawng a huh vengah awlcekna Khonsil ah te paang tih, “Ka puei, Israel thli, Kai he Farasi thlaang pakhat ni, Farasi thlaang thli kah capa ni. Thlaang duek thli tho koep ai tite ngaiuepna ka khueh dawngah ni he ah he awl n’khee u.” tila a thui.

⁷ He tila a thui coeng khoeng atah Farasi thlaang thli oen Sadusi thli te awl puung u tih pahih la pek u. ⁸ (Sadusi thlaang thli lawngtah thlaang duek thli he koep tho tlaih nawh tih vanthlaang khaw, muithla khaw awm nawh tila a thui u; tede Farasi thlaang thli lawngtah te ang thli boeih te awm tangtang tila a tangna u.) ⁹ Ahimi kah awlpuungna awl te san tare hang tih Farasi thlaang timkah cangpueikung khatsut te pai u tih: “He kah thlaang dawngah he a thawlhna khat khaw ka hu u nawh! Muithla pakhat lawngkhaw, vanthlaang lawngkhaw a thui pe thai mai ta” tila a oelh khaklal u.

¹⁰ Awlpuungna te solaan tare hang tih Pawl te petpet a doek u hau mai ai ti tih lakueng u. Tedawngah raalkap thli te thlaangping tengla a tuih tih, ‘Pawl te ceh puei u langtah raaltoetna vawngup la khuen uh’ a tina.

¹¹ Te kah khawyiin ah te Bawipa tah Pawl tengah pai tih, “Rih boel! Jerusalem ah he kai ham sausi la na pai angla Rom khawpui ah khaw he tila na pai hun ai.” a tina.

¹² Avuen mincang atah Judah thlaang khatsut te tun huh u tih, khaw a khaan u. Ahimi lawngah Pawl te ngawn thlan roekk atah caak awkk khaw caak nawh hamla awl a taap u. ¹³ He tila khaw aka khaan thlaang thli te sawmlii thlai awm u. ¹⁴ Tecoengah ahimi lawng khawsoeih ahaamca thli oen Judah thlaang ahaamca thli tengla cet u tih, “Kaimi lawng Pawl he ka ngawn u thlan khui roekk tah thaihu khat khaw caak nawh ham athe ka phoei u tih awl ka taap u poen. ¹⁵ Tedawngah nangmi oen Khonsil ahaamca thli lawng ahih kawng te acek aneh la doet tare ham aka ngaih angla te sa u langtah nangmi tengah Pawl te avan khuen u thai ham Rom raalbawipa te yaak sak uh. He la he avan pha thlan ah ngawn hamla oepsoehla ka awm u ai” tila a thui pe u.

¹⁶ Tede Pawl ngannu kah a capa lawng te tila a teeng u kawng te a yaak; raaltoetna vawngup la cet tih Pawl tengah a thui pe. ¹⁷ Tecoengah Pawl lawng raalbawi pakhat te a khue tih, “Raalbawipa tengla cadawng he cet puei, pakhat khat thui pe ham a khueh cawini” a tina. ¹⁸ Raalbawi lawng ahih te raalbawipa tengla a ceh puei tih, “Thongtla Pawl lawng, ‘he kah cadawng lawng he nang tengah awl thui ham a khueh, ceh puei,’ a ti dawngah kavan law puei” a tina.

¹⁹ Raalbawipa lawng a kut ah a mawt tih atloela a ceh puei, “Kai tengah n’tu awl thui ham na khueh?” a tina.

²⁰ Ahih lawngah, “Khonsil ah aka thuum thlaang thli lawng, Pawl kawng he acek aneh la ming heet ham aka ngaih angla te sa u silang Pawl te Khonsil ah van khuen thuk ham thangvuen ah bih hamla Judah aana khuehkung thli a kaw vai u poen. ²¹ Ahimi awl te ngaai pe boel; metihtiah thlaang sawmlii thlai lawng thuh u tih ahih te a mah u. Ahimi lawng Pawl te a ngawn thlan khui caak awkk khaw caak nawh ham awl a taap u poen. Ahimi lawng sai hamla oepsoehla awm u poen tih nang kah awl ni doek a lamtoen u poen” a tina.

²² Raalbawipa lawng, “Ka tengah navan thui he a-u khat tengah khaw thui boel.” a tina tih cadawng te koep a tuih.

²³ Tecoengah raalbawipa lawng raalkapbawi pahih te a khue tih, “Raalkap yahnih, marang raalkap sawmsarih, cai aka pawm raalkap yahnih te khue langtah n’tu yiin khawnoek pakua ah Sisaria la ceh ham kamthlah oepsoeh uh. ²⁴ Pawl lawng a cit ham marang pakhat ah roekbah pe langtah ram ukbawi Filik tengla ading asuekla pha sak uh” a tina. ²⁵ Tecoengah raalbawipa lawng adangkah angla ca a thut tih a pat: ²⁶ “Klaudias Lisias lawng Hinyah koei ram ukbawi Filip tengah ca kavan pat: ²⁷ Judah thlaang thli lawng he kah thlaang he a tuuk u tih a ngawn dalh u. Ahih he Rom thlaang ni tila ka ming u dawngah raalkap thli oen ka cet u tih ka thlawn u. ²⁸ Ahimi lawng thawlh a peel u te ming ham ka ngaih tih amami kah awlcekna Khonsil la ka ceh puei. ²⁹ Ahih lawngah duekna koei oen thongtlaakna koei khat khaw sai nawh tite ka huh; ahih he thawlh a peel u tah amami kah phungawl kawng alam ni. ³⁰ Ahih he ngawn hamla a teeng u tite ka yaak vengah, nang tengah tuih pahoei ham ka poek. Ahih he taya aka cawi hue te nang tengah taya cawi ham ka thui pe poen. Na sa ding seh.” tila a thut pe.

³¹ Raalkap thli lawng a thui pe angla te a sai u. Ahimi lawngah te yiin ah te Antipatris toela Pawl te a ceh puei u. ³² Avuen hin atah cai aka pawm raalkap thli oen raalkap yahnih te tah raaltoetna vawng up la meel u tih marangcit raalkap thli lawng Pawl te poe a ceh puei u. ³³ Ahimi lawngah Sisaria te a pha u atah ram ukbawi te ca a peek u tih ahih kut ah Pawl te a tloeng pe u. ³⁴ Ram ukbawi lawng ca te a tae coeng atah Pawl nala te, ‘Nang he ame ram kah’ tila a doet. Cilicia ram kah thlaang ni tite a ming coeng atah, ³⁵ Ahih lawngah, “Nang te taya aka cawikung thli avan pha u vengah nang kah lumlai he kavan thui badai” a tina. Tecoengah Pawl te ram ukbawi amah kah yungimpui ah khueh tih raalkap thli lawng toet hamla awl a peek.

¹ Khawhin hin ngaa a awm coeng atah Khawsoeih Bawi Ananias tah Judah thlaang khatsut hue oen thlaangcal Tertullas oen haih Sisaria la cet u. Ahimi te ram ukbawi Filik tengla cet u tih Pawl te taya a cawi u. ² Pawl te a khue u tih thlaangcal Tertullas lawng adangkah angla thawlhpeelna te a thui:

³ Ame huen ah khaw te tila na sai dawngah kaimi ka awmngaih tih kan uem u tangkiik. ⁴ Nang kah atue atang te asan-hlang hawna ham ka ngaih nawh, tede atoila ka thui he na hutung hamla reenna kavan bih. ⁵ Kaimi lawng he kah thlaang he thlaang teekyaakkung la ka huh u: ahih lawng he dilai pum kah Judah thlaang thli tengah awlpuungna a sai tih Nazarin bu kah mawtkung la awm, ⁶ Tempal bok-im khaw hok-aih hamla a yawm vengah te ka tuuk u. (Kaimi lawng kamami kah Phungawl angla awl cek ham ka kamthlah u, ⁷ tede raalbawipa Lisias law tih ahih he kaimi kut dawngkah a rot. ⁸ Tecoengah ahih he taya aka cawikung thli te nang tengla law ham awl a peek.) He kah thlaang he nang lawng awl na doet atah kaimi lawng thawlh ka peel boeih te namah lawng na ming badai.” a tina. ⁹ Judah thlaang thli lawng-khaw ruek kawhuui u tih thawlh a peel he asoeng tang tang ni tila a thui u.

¹⁰ Ram ukbawi lawng Pawl te awl thui ham noekna a peek tih Pawl lawngah, “Nang tah he thlaangphun sawah kum san hlang awlcekkung la na awm poen tite ka ming, kamah phungtuna awl he na haiah nan thui sak dawngah ka awmngaih. ¹¹ Jerusalem la Pathen bok ham ka cet, hin ha thlaihih pateng awm nawh hun tite nang lawng na ming thai ai. ¹² Tempal bok-im khuiah thlaang pakhat khat oen ka tawh ka thaam u khaw, khawpui khui ame ang huen ah khaw, Sinakok bok-im khuiah khaw, kai lawng thlaangping ka ceemtuh tite Judah thlaang thli lawng hu manawh. ¹³ Tahe ah ahimi lawng ka sawah thawlhpeelna he asoengna tangtang te nang tengah van thui u tang manawh. ¹⁴ Ka sai tangtang tila nang tengah ka thui tah he ni: Ahimi lawng soeng nawh a ti u, Lawngpui te ka vai tih kamami patuer hue kah Pathen te ka bok. Tede kai lawngkhaw Mosi kah Phungawl oen tawngha thli kah cabu dawng a thut boeih te ka tangna. Thlaangthe khaw, thlaang theen khaw, duekna kalawng tho koep ai tite ahimi angla kai lawngkhaw ka ngaiuep van. ¹⁵ Ahimi lawngah thlaang boeih he thlaangdoeng oen thlaangthawlh khaw duekna kalawng tho ai tila Pathen ah ngaiuepna a khueh u te ang van ni kai lawngkhaw ka khueh van. ¹⁶ Tedawngah Pathen oen thlaanghing haiah athetheen mingna kawpoek ciim khueh hamla ka sai thai khui tah ka sai poepa.

¹⁷ Kum san hlang Jerusalem kalawng athlana la awm coengah ka thlaangphun thli hamla tangka thak ham, luciik nawn hamla te la te ka cet. ¹⁸ Bokna siing angla ciimcaihna te ka sai boet coengah Tempal bok-im khuiah luciik thawthuengna ka sai vengah kai he ahimi lawng n’huh u. Tevengah te ka tengah thlaangping khaw awm nawh, awlpuungna khaw awm nawh. ¹⁹ Tede, te ah te Asia ram kalawng aka law Judah thlaang khatsut tah awm; ahimi lawng kai he oelhtaih ham a ngaih u atah tayacawi hamla amami man nang tengah a law u ham awm de ta. ²⁰ Tetih atah he kah aka awm thlaang hue lawngah Khonsil ahaamca thli haiah ka pai vengah kai lawng ka sai thawlh a huh u te van thui u seh. ²¹ Kai lawng ahimi haiah ka pai vengah: ‘Thlaangduek thli he tho koep ai tila ka tangna dawngah tihin ah nangmi lawng taya nan cawi u he.’ tila ka thui pakhat bueng he nawh atah atloe a awm atah van thui u seh.” a tina.

²² Filik lawngtah lawngpui a ti u te a ming heet dawngah awl thuina te a toeng sak tih, ahimi nala, ‘Raalbawipa Lisias avan pha vengah nangmi kah Lumlai he kavan tloek badai.” a tina. ²³ Ahih lawng Pawl aka toet raalkapbawi te ahih he atheenla toet, tede ahoerpoengla awm sak langtah angoe angaih thli te khaw a paya thli lawng pe seh.’ a tina.

²⁴ Khawhin meyoeh yun nuem a awm coeng atah Filik he a yu Judah nu Drusilla oen va law hih. Ahih lawng Pawl te a khue tih Pawl lawng Jesuh Khrih ah oengna kawng a thui te a hutung hih. ²⁵ Tede Pawl lawngah theenna kawng, mah oen mah kuemsuemna kawng oen Awlcekna Khawhin a lawna kawng te a thui vengah Filik lawng caalla a rih tih, “Tahe tah cet de ne. Ka hoeng vengah kan khue sak koep badai.” a tina. ²⁶ Te ah te ahih lawngah Pawl lawng he tangka m’peek ai tila a ngaiuep, tedawngah ni ahih lawng Pawl te a khue sak poepa tih awl a thui puei.

²⁷ Khaw kum hih a awm coeng atah Filik te Porcias Fitas lawng avan thaw tih ram ukbawi la awm. Filik lawng Judah thlaang thli te a kaw hoe sak ham a ngaih dawngah Pawl te thong khuiah poe a khueh.

¹ Fitas te hin thum a awm coeng atah te ram la te avan pha tih Sisaria kalawng Jerusalem la cet, ² te ah te khawsoeih ahaamca thli oen Judah thlaang mawtkung thli lawng Pawl thawlh a peelna te a thui u. ³ Pawl te lawngpueng ah ngawn ham khawkhanna a khueh u dawngah ahih te Jerusalem la khuen pe ham Fitas tengah reenna a bih u. ⁴ Fitas lawng, “Pawl he Sisaria thong khuiah awm, kai khaw tela te yue ka meel koep ai. ⁵ Namami kah mawtkung thli he kai ka ceh vengah law u selang tah te kah thlaang lawng te thawlhpalhna a sai atah taya cawi u seh” a tina.

⁶ Fitas te ahimi tengah khawhin reet nuem, hin ha nuem awm tih tecoengah Sisaria la te cet. Avuen hin atah awlcekna ah ngawl tih Pawl te van law puei uh a tina. ⁷ Pawl te avan pha atah Jerusalem kalawng aka law Judah thlaang thli lawng Pawl te a veel khoep u tih thawlh broela a pup u, te tila thawlh a pup u te soeng tang tang tila ahimi lawng thui u thai nawh. ⁸ Tecoengah Pawl lawng amah phungtuna awl te a thui: “Kai lawngah Judah thlaang thli kah Phungawl te khaw Tempal bok-im khaw, Rom sengpahrang sangluel sawah khaw thawlhpalhna ka sai nawh.” a tina.

⁹ Tede Fitas lawng Judah thlaang thli kah haitheen peek te a ngaih dawngah Pawl nala te, “Jerusalem la cet tih he kah lumlai he ka haiah thui ham na ngaih aw?” a tina.

¹⁰ Tevengah Pawl lawng, “Sengpahrang sangluel kah awlcekna yungim ah ni thui ham ka ngaih. Namah lawng na ming angla Judah thlaang sawah thawlhpalhna ka sai nawh. ¹¹ Kai lawng phungawl te ka phe tih pakhat khat ka sai dawngah duekna koei dantatna te awm kawinih loeih hamla kavan bih manawh. Tede ahimi kah thawlh peelna he asoeng nawh atah a-u lawngkhaw kai he ahimi kut ah pe thai manawh. Sengpahrang sangluel tengah ayuu ka khaan ai.” a tina.

¹² Tecoeng atah Fitas lawng amah kah khawkhankung thli oen a doet u coeng atah, “Sengpahrang sangluel tengah ayuu khaan ham na ngaih dawngah ahih tengla na cet ai.” a tina.

¹³ Te kalawng a awm khueng coeng atah Sengpahrang Akrippa oen Berni tah Fitas tengah uemna awl thui pe ham Sisaria la cet hih. ¹⁴ Te ah te khawhin san hlang a awm hih coeng atah Fitas lawng Pawl kawng te sengpahrang tengah a thui pe: “He ah he Filik lawng thong a thlaak pakhat awm, ¹⁵ Jerusalem la ka ceh veng te ah Judah thli kah khawsoeih ahaamca thli oen Judah thlaang ahaamca thli lawng thawlh a peel u tih ahih te dan tat ham ka tengah avan bih u. ¹⁶ Tede kai lawngah, taya a cawi u thlaang pakhat te taya cawikung thli oen haitang u tih thawlh a peelna boeih dawngah amah oen amah phungtuna awl a thui thlan atah a-u khat khaw thlaang kut ah peek hamla Rom thlaang thli kah phung alam nawh ni ka tina. ¹⁷ Tecoengah he la he ahimi a law u vengah uelh muehla avuen hin ah awlcekna yungim ah ka ngawl tih te thlaang te ka khue sak. ¹⁸ Ahih taya aka cawi hue te pai u tih a thui u, tede ka poekna angla athe arana khat khaw peel u tangtang nawh. ¹⁹ Ahimi boeih lawng awlpuungna a thui he tah amami kah bokna kawng oen aka duek tangte Jesuh aka miingna thlaang kawng te mai ni; tede Pawl lawngtah ahih te hing tila a thui. ²⁰ He kah awlpuungna kawng he metila awlceet ka yaak thai lah ai tite ka ming nawh, tedawngah Pawl te Jerusalem la cet tih thawlhpeelna thli he te ah te thui sak ham na ngaih aw ka tina. ²¹ Tede Pawl lawng ayuu akhaan; ahih lawngah amah te atheenla toet ham oen ah amah kah lumlai te Sengpahrang sangluel lawng awl van tloek seh tila a bih. Tedawngah Sengpahrang sangluel tengla tuih thlantoe ahih te atheenla toet ham awl ka peek.” a tina.

²² Akrippas lawng Fitas nala te, “Ahih kah awl thui te kamah lawng yaak rep ham ka ngaih a tina. Fitas lawngah, “Thangvuen ah na yaak badai” a tina.

²³ Avuen khawhin atah Akrippa oen Berni tah a bawilen phawlip oen ruep-awm tangkiik la thoekcau u heet tih raalbawi thli oen khawpui khuikah mawtkung ahaamca thli oen ah rangpui tunna impui la te haih kuun u. Fitas lawng awl a thlaw a peek tih Pawl te avan law puei u. ²⁴ Fitas lawng, “Akrippa Sengpahrang oen he ah aka awm boeih Judah thlaang boeih boeih, he kah aka awm lawngkhaw, Jerusalem ah aka awm lawngkhaw, he kah na huh u thlaang he kai tengah taya a cawi u. Ahimi lawng, ahih he hingpaa nawh ni tila paang u. ²⁵ Tede ahih lawngah duekna koei dantat ham tangtang a sai khat khaw ka hu nawh. Tede amah lawngah Sengpahrang sangluel tengah ayuukhaan ham a ngaih tih te la te tuih hamla ka poek poen. ²⁶ Tede ahih kawng he Sengpahrang sangluel tengah acek aneh la ca thut ham ka khueh nawh. Tedawngah he ah he nangmi boeih oen awlpui la Sengpahrang Akrippa haiah kavan law puei! Ahih kah lumlai he thuikhaan coeng atah cathut koei khat khaw awm ai aw ka ti mai dawngah ni. ²⁷ Metihtiah thongtla thlaang pakhat taya a cawina akawng alam te atheenla tueng sak ohla tuih ham tah alawng-ala awm nawh.” tila a thui.

¹ Akrippa lawng Pawl nala te, “Namah kawng te na thui thai poen.” a tina. Pawl lawng a kut te a phawh, tecoengah adangkah angla amah oen amah phungtuna awl te a thui:

² “Sengpahrang Akrippa! Tihin na haiah, Judah thlaang thli kah thawlh peelna boeih dawngah kamah oen kamah ka phungtu u he yotheen tang poen ni tila ka poek. ³ He tila ka poek he nang lawngtah Judah thlaang thli kah phung oen awlpuungna te atheenla na ming dawngah ni. Tedawngah lunghoeihla ka awl thui he na hutung ham reenna kavan bih.

⁴ Kai he ka camaw veng kalawng metila ka awm ka ih ti he Judah thlaang boeih lawng a ming u. Kai he lamhacuek ah kamah ram khuiah khaw ka sak tih tecoengah Jerusalem ah ka awm te ahimi lawng a ming u. ⁵ Ahimi lawng kai he asan hlang m’ming u poen, acuekca veng kalawng kai tah kamami kah bokna ben ah arai koek Farasi thlaang pakhat la ka awm te a ngaih u atah a thui u thai. ⁶ Tahe veng awlcek ham he ah ka pai he tah Pathen lawng kamami kah patuer hue tengah awlkamna a sai ngaiuepna te ka khueh van dawngah ni. ⁷ Te ngaiuepna te tah kamami thlaangphun paha thlaihih lawng yiin, daai Pathen a bok u vengah dang hamla a ngaiuep u te ni. Hinyah kap Bawipa, te kah ngaiuepna kawngah ni Judah thlaang thli lawng kai he taya n’cawi u! ⁸ Pathen lawng thlaangduek a thawh sak ti he he kah aka awm thlaang thli lawng n’tu kawngah tangna ham awm nawh na ti u?

⁹ Nazaret khaaw kah Jesuh kawng te oelhtaih thai khui tah ka sai ai tila kamah roe lawngah kaw ka poek. ¹⁰ Jerusalem ah te tila te ka sai. Kai lawng khawsoeih ahaamca thli tengkah saithaina aana te ka dang tih Pathen kah thlaang yahawh hlang mai te thong ah ka thlaak; Ahimi te a ngawn u vengah khaw ngawn ham roe la kai lawng ka ngaih puei van. ¹¹ Sinakok bok-im ah khaw ahimi te dan ka tat sak u tih amami kah oengna te hoett sak hamla ka yawm. Ahimi sawah ka thin sa soeh tih ahimi te heemtek hamla ram tloe kah khawpui toela ka pan.

¹² “Te tila ka kamthlah dawngah khawsoeih ahaamca thli tengkah awlpeekna aana oen Damaskas khaaw la te ka cet. ¹³ Hinyah kap Bawipa, te tila hingthuntaang lawngpueng ka ceh vengah, khawmik lak ah aka aang ngaai aangna pakhat lawngah kamah khaw, ka cet haih thlaang thli khaw vaan kalawng n’thue rawngtheng u. ¹⁴ Kaimi boeih te dilai ah ka tlim drek u tih, ‘Sawl, Sawl! N’tu kawngah kai he nan heem nan tek aih ca? Vaitaw taal lawngah amah khuehkung kah cungpoelh te a peh atah a tam doetthloet angla namah oen namah te nganbawh na pe u khoeng’ tila Hebru awl la avan thui te ka yaak. ¹⁵ Kai lawngah, ‘Bawipa, nang te a-u?’ ka tina. Tevengah Bawipa lawng, ‘Kai tah nang kah heem atek Jesuh ni. ¹⁶ Tede tho langtah pai hang lah. Nang he kamah kah tuihyoeihthlaang la khueh ham na tengah ka phumpho. Tihin ah kai nan huh he khaw hailamben kah kan huh sak ham koei te khaw thlaangtloe tengah aka thui ham ni. ¹⁷ Kai lawngah nang he Israel thlaang thli kut dawng kalawng khaw, Gental thlaang tengah khaw kan tuih vetih ahimi kut dawng kalawng khaw kan thlawn ai. ¹⁸ Nang lawng ahimi te a mik na daai sak vetih yiinna kalawng aangna la, Seitan kah tharana khui kalawng Pathen tengla na mang sak ai, te dengah ni ahimi lawng kai he oengna rang oen ah thawlh khawdawp ngaaina te a khueh u vetih Pathen kah thlaangtuek thli tim ah ahuen amawl a dang u van ai’ tila avan thui” a tina.

¹⁹ “Tedawngah, Sengpahrang Akrippa, vaan kah huhthlaam ka huh te ngailaakna muehla ka awm ma-nawh. ²⁰ Lamhacuek la Damaskas oen Jerusalem ah, tecoengah Judia ram pum oen Gental thlaang boeih tengah ahimi lawng thawlhna te yut u tih Pathen benla a mang u hamla, ahimi lawng a thawlh yutna te tueng sakna thaihu sai hamla ka phawng pe. ²¹ He kawng dawngah ni Judah thlaang thli lawng Tempal bok-im ah ka awm vengah te n’tuuk u tih ngawn hamla a yawm u. ²² Tede tihin toe ah Pathen lawng n’bawm, tedawngah thlaang yitt thlaangbo nangmi boeih haiah he ka pai tih awl ka thui. Tawngha thli oen Mosi lawng a thui oepsoeh aka thoeng ham koei thaihu te ni kai lawng ka thui: ²³ te tah Judah thlaang thli oen Gental thlaang thli tengah thlawnna aangna te phawng hamla, Messiah lawng patang a khang coengah duekna kalawng lamhacuek aka tho koep thlaang la awm ai a ti te ni ka thui.” a tina.

²⁴ Te tila Pawl te amah oen amah a phungtu u vengah Fitas lawng, “Pawl na cuih taal poen! Cuihna asangsang na cangna lawng ng’ngau sak poen.” a tina.

²⁵ Pawl lawngah, “Bawipa, ka ngau moenih! Aka soeng awltak ni ka thui. ²⁶ Sengpahrang Akrippa! Nang lawng he kah thaihu kawng he na ming dawngah ni na tengah tong-aa ohla ka thui. He tah ahuep ahel, akel acawng ah aka thoeng thaihu nawh tih he ang thli boeih he nang lawng na ming tangte poen ni tite ka tangna. ²⁷ Sengpahrang Akrippa, tawngha thli kah ca thut te na tangna aw? Nang lawng na tangna tite ka ming!” a tina.

²⁸ Akrippa lawng Pawl nala te, “Kai he atue soetca khuiah khrihca la ka coengg sak thai ai tila na poek aw?” a tina.

²⁹ Pawl lawngah, “Atue soetca ah khaw, asan hlang ah khaw, he kah thiirui he tah thui muehla nang oen tihin ah ka awlthui aka hutung nangmi boeih he kai angla awm van ham Pathen tengah ka thangthui!” a tina.

³⁰ Tecoeng atah sengpahrang khaw, ram ukbawi khaw, Berni oen atloe boeih te tho u tih, ³¹ a ceh u coeng atah ahimi khat oen khat lawngah, “He kah thlaang lawng he duekna koei oen thongtlaakna koei khat khaw sai nawh de ni.” tila a thui u. ³² Te atah Akrippa lawng Fitas nala, “Sengpahrang sangluel tengah ayuukhaan nawh kawinih he thlaang he thlah hamla awm de ni.” a tina.

¹ Kaimi he Itali ram la tuisangphaw oen ceh ham awl a khueng u coeng atah, “Sengpahrang sangluel kah Raalkapbu” a ti u Rom raalkapbu kah raalbawi Julias kut ah Pawl oen atloe thongtla khat sut te a peek u. ² Asia ram kah tuisangphaw duemdawngna roekk ah aka cet tawm Adramitiam khaaw kah tuisangphaw pakhat dawngah ka luui u tih te oen ah ka cet u. Macidonia ram Tesalon khaaw kah Aristarkas khaw kaimi oen haih ka cet u. ³ Avuen atah Sidon ka pha u. Julias lawng Pawl te a reen dawngah a paya thli tengla a ceh sak tih angoe te avan peek u. ⁴ Te kalawng kaimi ka cet u de khawthlii lawng n’haang khoep u dawngah yilh uepna ben Saipras tuisanglak ben ka lawng ka cet u. ⁵ Tecoengah Cilicia oen Pamfilia ayaawnna tuueng tuitunlii ah te ka law u phai tih Licia peng kah Mira khaaw te ka pha u. ⁶ Te ah te Alekzandria kalawng aka law Itali ram la aka cet ham koei tuisangphaw pakhat te raalbawi lawng a huh tih te dawngah te n’luui sak u.

⁷ Khawhin sanhlang ahiing ayaaila ka cet u tih aboetna atah ahar abat la Nidas khaaw te ka pha u. Te ben kalawng ah ceh hamla yilh lawng m’maam khoep u tih yilh uepna ben Krit tuisanglak ben kalawng ka cet u tih Salmon Ngocou tengah te poet ka cet u. ⁸ Tuikeeng ah te poe ka cet u tih Tuisangphaw duemna Huen theen a ti u te ahar abat la ka pha u. Te tah Lasea khawpui kalawng thla aih tlaih nawh.

⁹ Te ah te asan hlang ka cam u tih Thawlh thlamna Khawhin khaw athloei poen dawngah tuisangphaw oen khawlawng thla ceh ham arih awm poen. Tedawngah Pawl lawng ahimi te ngaithuenna awl a thui pe: ¹⁰ “Nangmi u, he kalawng ah mami khawlawng ceh he arih ham awm tangkiik tila ka huh; thaihu thaiha khaw, tuisangphaw khaw, hingna toe khaw sungduehna awm khuengdeng ai.” a tina. ¹¹ Tede raalbawi lawng tuisangphaw kungmah oen aka mongkung kah awl te a ngaai tih Pawl kah awlthui tah tula khaw toeh pe nawh. ¹² Te kah tuisangphaw duemna huen te sikding khui puet ah awm ham theen nawh; tedawngah thlaang yahawh lawngah a coeng thai atah Finik la te cet ngala tih te ah te sikding khui puet awm ham a ngaih u. Finik he tah Krit tuisanglak kah tuisangphaw duemna huen la awm tih khawtlaak akakk ben oen khawtlaak aluen ben la te maang.

¹³ Akakk ben kalawng yilh te hiip hiip law tih amami kah kamthlahna angla coeng thai ai a ti u dawngah thiilungdue te a doek u tih Krit tuisanglak te ayoeii rep la poe ka hawng u tih ka cet u. ¹⁴ Tede raih a awm coeng atah, “Khawcuuk Aluen ben khawthlii” a ti u te tuisanglak ben kalawng ah thlii khuengdeng. ¹⁵ Tuisangphaw te khawthlii lawng avan haang tih khawthlii tim ah tuisangphaw te hoei tloel la awm poen, tedawngah ka thlah sut u tih khawthlii lawng a yawng aroeh mai poen. ¹⁶ Kauda tuisanglak ayiitca akaak ben te ka pha u atah khawthlii te avan oel tih hoeikhang. Te ah te tuisangphaw dawngkah lowng te ahar abat la ka soem ka sai u. ¹⁷ Ahimi lawngah lowng te ahanla a thooeng u coeng atah tuisangphaw dawngah rui oen a ven haih tih rap a piin u. Libia tuikeeng tuidang kah divin langdai te a tawh moek hau ai a ti u dawngah baiyaan te a doek u tih tuisangphaw te khawthlii lawng a khuenna roekk ah a ceh sak u. ¹⁸ Thlipui te a thawh toengtoeng dawngah avuen atah tuisangphaw dawngkah thaihu te thoem a voeih u. ¹⁹ Athum hin atah tuisangphaw dawngkah a hawna pawmcunghaiha thli te khaw thoem a voeih u. ²⁰ Khawhin sanhlang khawmik khaw, aisi thli khaw, ka hu u tlaih nawh, khawthlii te duem nawh tih atlawhla thlii toengtoeng. Aboetna atah ka deem u hun ai tila ka ngaiuep u tlaih nawh poen.

²¹ Te kah thlaang thli te caak awkk khaw caak mueh la asanhlang a awm khiing u poen dawngah Pawl lawng ahimi nala te, “Nangmi u, ka awl thui te nangmi lawng navan ngaai u kawinih Krit tuisanglak kalawng ah te n’cet u nawh vetih he tila sung adeuhna oen arai asa he n’tawng u nawh sui. ²² Tede tahe ah na kaw boet sak u boel! Nangmi khuikah a-u khat khaw ha-ata manawh; tuisangphaw bueng ni n’sung ai. ²³ Metihtiah n’thlem yiin ah kai he a thlaang la khuehkung, kai lawng ka bok Pathen kah vanthlaang te ka tengla law tih, ²⁴ ‘Pawl, lakueng boel! Sengpahrang sangluel haiah na pai ngaikhoek ai. Pathen he na sawah atheen dawngah nang oen aka cet haih thlaang boeih kah hingna te a thlung poen’ tila avan thui. ²⁵ Tedawngah nangmi lawng na kaw boet sak u boel! Metihtiah kai tah Pathen te ka uepna khak tih a thui angla te coengg ngai ai. ²⁶ Tede tuisanglak pakhat khat kah tuikeeng ah ngoen tah n’khoe ngai badai” a tina.

²⁷ Hin ha thlailiina yiin atah kaimi te Meditarenian tuitunlii yunyan ah thlipui lawng n’yawng u. Yiinthuem tang yun atah tuisangphaw dawngkah biibikung thli lawng lan benla voehvoeh yoeii poen tite a ming u. ²⁸ Tedawngah ahimi lawng tuitahna dawngah thaihu rih te a baang u tih a thlaak thuk vengah tuilii te pe yakhat pakul dung tila a ming u; a awm bawt coengah ahimi lawng a tah koep u vengah pe sawmkua dung tila a ming u. ²⁹ Tuisangphaw lawng lungsong a sut hau ai a ti u dawngah tuisangphaw kah ahu ben kalawng thiilungdue palii te a thlaak thuk u tih thangthuina oen khawthaih ka ring u. ³⁰ Te vengah te tuisangphaw dawngkah biibikung thli lawng tuisangphaw te ceh taak sut ham a yawm u; ahimi lawngah a hai ben kalawng thiilungdue aka thlaak angla te sa u tih lowng te tui dawng la a thlaak u. ³¹ Tede Pawl lawngah raalbawi oen raalkap thli tengah a thui pe tih, “Tuisangphaw dawngah biibikung thli a awm nawh atah na loeih u tang manawh” a tina. ³² Tedawngah raalkap thli lawng lowng piinna rui te a tloek tih lowng te tuidang la a thlaak dingkang.

³³ Khaw thaih tawm atah ahimi boeih te caak awkk te caak hamla a thui pe tih, “Nangmi buhmueh buhpawng la na awm u te tahe tah hin ha thlailii law poen, he veng khui puet ah n’tu khat khaw na ca u nawh. ³⁴ Na hinglung thloetna ham caak awkk ca u de. Na luu dawngkah samthaam pakhat pateng ha-ata manawh.” a tina. ³⁵ He tila a thui pe coengah Pawl lawng takawi te thoem a lawh tih ahimi haiah Pathen tengah awmngaih awl a thui, takawi te a eh tih a caak. ³⁶ Ahimi tah a ngaai mawng u tih caak awkk khaw a caak u. ³⁷ Tuisangphaw dawng aka awm boeih te thlaang yahnih sawm sarih paruk ka awm u. ³⁸ Thlaang boeih lawng caak awkk te ahahla a caak u coeng atah tuisangphaw te a yaanghoep betna ham sangvut cang boeih te tuitunlii ah batt a voeih u.

³⁹ Khaw athaih hang atah tuisangphaw dawngkah bii aka bi thlaang thli lawngah ame hue kah tuitunlii keeng ti khaw ming u nawh de tuitunlii acaawng ben ah langdai te a huh u tih acoengg thai atah te ah te tui aboenna ah tuisangphaw te duem sak ham a poek u. ⁴⁰ Tedawngah thiilungdue a kiingna rui thli te a tloek u tih tuilii ah a thlaak u, tecoengah tuisangphaw hoei-alena tapaih piinna rui te a thlam u. Tecoengah tuisangphaw te yilh lawng a khuen thaina ham tuisangphaw a hai ben ah baiyaan te a tai u tih langdai benla te cet u. ⁴¹ Tede tuisangphaw lawng divin langdai a tawh tih tingtai sut; tuisangphaw a hai ben tah divin a tawh moek tih a tat thai tlaih nawh vengah te ahu ben te tah tuiphu tuilet lawng avan deng tih rek phawngg poen.

⁴² Thongtla thlaang thli te tui yo vetih lan la heeng boeih ai a ti dawngah raalkap thli lawng ngawn hamla kamthlah u. ⁴³ Tede raalbawi lawng Pawl te deem sak ham a ngaih tih te tila sai nawh ham a khaang pe. Lamhacuek ah tui aka yo thai hue te tuisangphaw dawng kalawng sungpung tih lan la tui yo ham awl a peek; ⁴⁴ Thlaangtloe hue lawngtah thingdeep khaw, tuisangphaw dawng-kah aka tlot thingboeng thingdeep te khaw ka tuuk u tih ahimi hu ah te ka yo u. He tila he kaimi boeih tah ading apuek la lan ka pha u.

¹ Kaimi boeih asuengcala lan ka pha u atah te kah tuisanglak te Malta tuisanglak tila ka ming u. ² Te kah aka awm khawkung thlaang thli lawng kaimi te n’reen tangkiik u. Khaw tlan tih khaw sik, ahimi lawng hai avan toeih u tih hai ka aawm u. ³ Pawl lawng thing pok at a lawh tih a toeih, tevengah hailing a yaak tih ruul pakhat te co, a kut te a lengven pe tih hoer bat. ⁴ Te kah khawsakung thlaang thli lawng Pawl kut ah ruul a bat te a huh u vengah, “Ahih he thlaang aka ngawn cawi ni, tuitunlii dawng kalawng loeih de Khaw lawngah hing sak manawh” tila a thui u. ⁵ Tede Pawl lawng ruul te hai dawngah a khek tih nganbawh khaw ya nawh. ⁶ Ahimi lawngtah phiing kueng ai, tihnawhtah tlim pahoei vetih duek ai tite ni a ring u mai poen. Tede asanhlang a ring u coeng atah ngan bawh tehca khaw a yaak nawh te a huh u veng atah ahimi te a kawpoek thawleng u tih, “Ahih he pathen ni” tila a thui u.

⁷ Te kalawng ayoeica ah tuisanglak ukkungbawi Pubilia kah lo te awm. Ahih lawng kaimi te beroep lopaangla n’khue u tih khawhin hin thum khui kaimi te buh n’kok u. ⁸ Pubilia kah ana pa te tlo tih ral, thimthe khaw tlo. Pawl te ahih a awmna la te cet, a kut te a sawah a tloeng pe coeng atah hoeih. ⁹ He tila a awm te a yaak u veng atah tuisanglak kah thlaangtlo te law u tih boeih hoeih u. ¹⁰ Ahimi lawng kutdo moen m’peek u, ka ceh u vengah khaw lawngpueng ah kaimi kah angoe koei thaihu te tuisangphaw dawng avan khueh u.

¹¹ Thla thum coeng atah, Alekzandria kalawng aka law, te kah tuisanglak ah sikding khui puet aka awm “Pathen Caphee” a ti u tuisangphaw oen ka cet u. ¹² Sirakas khawpui te ka pha u tih hin thum ka cam u. ¹³ Te kalawng ka cet u tih Rekium khawpui te ka pha u. Avuen hin atah akakk ben kalawng khaw thlii tih hin hih khuiah Puteoli khawpui ka pha u. ¹⁴ Te ah te oengca thli awm u tih ahimi te yarh khat tah awm puei hamla n’ceel u. Te kalawng tah Rom khawpui la ka cet u. ¹⁵ Rom khawpui kah oengca thli lawng kaimi kawng te a yaak u vengah Appias khawpui kah Thaihu yoeihna oen Reh-im Pathum a ti u khawpui toe ah te n’do u. Pawl lawng ahimi te a huh vengah Pathen tengah awmngaih ciil a thui tih a tha la khuek awm.

¹⁶ Rom khawpui te kaimi ka pha u atah Pawl te raalkap pakhat lawngah a toet tih amah poek ah awm thai na te a peek u.

¹⁷ Hin thum a awm coengah Pawl lawng te kah aka awm Judah thlaang mawtkung thli te tun a khue. Ahimi te a tun u atah, Pawl lawng ahimi nala te, “Ka puei Israel thlaang thli, kai lawngah mami Judah thlaang puei khaw, mami kah patuer hue teng kalawng n’dang u phung khaw ka oelh ka taih nawh de Jerusalem thongim ah n’thlaak u tih Rom thlaang thli kah kut dawngah m’peek u. ¹⁸ Kai he Rom thlaang thli lawngah awldoetna a khueh u coeng atah kai lawngah duekna koei thaihu khat khaw ka sai nawh te a huh u tih thlah ham a ngaih u. ¹⁹ Tede Judah thlaang thli lawngah kai he thlah ham te ngaih u nawh, ka thlaangphun thli te thawlh peel ham nawh de, sengpahrang sangluel tengah thui khaan nawh atah coeng thai nawh. ²⁰ He dawng mai ah ni nangmi oen huh u tih thui hamla kan khue u. Kai he thiirui oen he tila n’khih u he tah Israel thlaang thli lawng a ngaiuep u tih a ring oel u thlaang kawng dawngah ni.” a tina.

²¹ Ahimi lawngah, “Nang kah kawng alam he Judia ram benkah capat khat khaw ka hu u nawh, te ben kalawng awlthang aka van khuen khaw, nang kawng te athela aka thui boenhui khat khaw law nawh. ²² Tede peng tawm ah he bu he athela a thui u dawngah namah kah poekna te kaimi lawng yaak ham ka ngaih u.” a tina.

²³ Tedawngah ahimi lawng Pawl oen khawhin a tuntah u tih thlaang broe te tuntahna khawhin ah Pawl a pahna im la te cet u. Mincang kalawng thlemben toe Pathen ram kawng awlthang te a thui pe, tecoengah tawngha thli kah cathut oen Mosi Phungawl khuikah te athoel alaang pe tih Jesuh kawng te ahimi lawng a yaakming na ham a thui pe. ²⁴ Thlaang khatsut lawngtah ahih kah awl thui rang oen a yaakming u de thlaangtloe hue lawngtah tangna nawh. ²⁵ Ahimi te oelh u khiing tih Pawl lawng he awl pakhat he a thui pe coeng atah meel u; a thui pe awl tah: “Ciim Muithla lawng tawngha Isaiah rang oen ah na patuer hue tengah a thui te soeng tangtang! ²⁶ Ahih lawng a thui tah, “Cet langtah he kah thlaang thli he thui pe lah: Na yaak u vetih na hutung u suide, na yaakming u tangtang manawh; Nangmi lawng na bueh u vetih na dan u suide na hu u tang manawh, ²⁷ metihtiah he thlaangphun thli kah thinkaw lungbui tah mong sut tih ahimi lawng a haa te a buem khoep tih a mik khaw a yiin khoep u. Te tila sai u nawh kawinih ahimi kah mik lawng a huh sui tih a haa thli lawng a yaak sui, ahimi kah thinkaw lawng a yaakming sui tih Ka tengla va meel koep u sui, ahimi te ka hoeih sak sui,’ tila Pathen lawng a thui te ni” a tina.

²⁸ Pawl lawng awlcuina la a thui tah: “Tedawngah Pathen kah thlawnna awlthang tah Gental thlaang thli te a peek poen tite ming uh. Ahimi lawng a hutung u ai!” a tina. ²⁹ (Pawl lawng he awl he a thui coeng atah Judah thlaang thli te awlpuung kaa caan doe ah meel u.)

³⁰ Pawl lawng im a vat tih kum hih khui te ah te awm. Amah tengla aka law boeih te atheenla a do. ³¹ Ahih lawng thincakna oen yalpawla Pathen Ram kawng te a thui tih Bawipa Jesuh Khrih kawng te a cang puei.