2 TIMOTE

¹ Khrih Jesuh oen pumkhatla awmna rang oen awl avan kam hingna mami lawng n’khueh te phawng hamla tuih la aka awm, Pathen kah kawngaihna oen Khrih Jesuh kah celtuih la aka awm kai Pawl lawngah,

² Ka lungna ka capa Timote nang tengah ca kavan pat: Pa Pathen oen mami Bawipa Khrih Jesuh lawngah nang te lungvatna, reenna, oen ngaimawngna te m’pe hawn seh.

³ Patuer thli lawngah bii a bi pe angla kai lawngkhaw thinkaw ciim oen ka bi pe van Pathen tengah awmngaih awl ka thui. Yiin oen daai ka thangthuina dawngah nang te kan poek yoeyah tih awmngaih ciil ka thui. ⁴ Nang kah mikphi te ka hilh nawh tih awmngaihna oen ka betoet thaina ham nang te huh ham ka ngaih tangkiik. ⁵ Na nuhaam Loisi oen na nu Yunis lawng a khueh oengna tangtang te ang van te nang lawngkhaw na khueh van tila ka poek, tahe ah khaw na khueh tite ka tangna. ⁶ Tedawngah, na sawah kut kavan tloeng vengah Pathen kah peek kutdo te na hing sak poe hamla koep kavan thui. ⁷ Metihtiah Pathen kah peek Muithla lawngah mami he riyawp thlaang la n’sai nawh; ahih kah Muithla lawngtah mami he huham tharana, lungna, mah oen mah kuemsuemna oen ah m’betoet sak dai.

⁸ Tecoengah mami kah Bawipa kawng te thui hamla yak boel; Khrih kawngah thong aka tla kai kah kawngah khaw yak boel. Pathen lawng tharana m’peek angla te Awlthang Theen hamla khawdeng patang khang hawn. ⁹ Pathen lawng mami he amah thlaang la awm ham n’thlawn tih n’khue u, te tah mami kah saina dawngah nawh tih, a lungvatna tah atue a tong thlan veng kalawng Khrih Jesuh rang oen m’peek poen, ¹⁰ tede tahe tah, mami Thlawnkung Khrih Jesuh a lawna rang oen te lungvatna te avan tueng sak poen. Ahih lawng ah duekna tharana te aboet sak poen tih aka duek thai nawh hingna te awlthang theen rang oen avan tueng sak poen.

¹¹ Pathen lawng Awlthang Theen phawngkung la kai he celtuih la khaw, cangpueikung la khaw n’khueh poen, ¹² te dawngah ni kai lawngah he ang khawdeng patang he ka khang. Tede kai tah ka ngaai mawng, metihtiah kai lawngah a-u ka uepna tite ka ming tih ka kut dawngah avan tloeng thaihu te tah te Khawhin toe ah amah lawngah anepla avan kuem ai tite ka tangna. ¹³ Kai lawng kan cang puei aka soeng awl te acakla phoeih lang nang lawng na vai ham oen oett ham koeila te khueh, Khrih Jesuh oen pumkhatla awmna dawngah mami kah thaihu la aka awm oengna oen lungna dawngah te acakla awm. ¹⁴ Mami khuiah aka hing Ciim Muithla kah tharana rang oen ah nang tengah avan tloeng thaihu theen te anepla kuem-akawl. ¹⁵ Asia ram khuiah aka awm thlaang boeih lawngah, Fikela oen Hamokin lawngkhaw kai he n’thlah sut u poen tite nangmi lawng na ming u. ¹⁶ Onisiforas lawngah boehoengla ka kaw avan hoe sak dawngah Bawipa lawng a imkhuikaw te reen hawn seh. Ahih lawngtah thong ka tlaak khaw yah puei nawh, ¹⁷ Rom khaaw la avan pha tih a paipuek ah kai he n’huh thlantoe n’tlap khiing. ¹⁸ Te khawhin ah Bawipa lawng ahih te reen hawn seh! Efesa khaaw ah kai ham metihtlukla bii a bi tite nangmi lawng atheenla na ming u.

¹ Ka capa nang tah Khrih Jesuh oen pumkhat la awmna rang oen n’dang u lungvatna dawngah acakla awm lah. ² Mingpueikung Sausi boehoeng kah haiah ka thui cangpueina te na yaak poen. Thlaangtloe te patoeng aka cang puei thai van ueppangkoei thlaang tengah te thui peh.

³ Khrih Jesuh kah thincak raalkap la na awm van angla khawdeng patang te khang hawn. ⁴ Raalkap bii aka bi lawngtah raalbawi te a kaw hoe sak ham a ngaih tih raalkap la aka awm nawh thlaangthoet kah bii dawngah te poei apah tawmban nawh. ⁵ Loehlangna poei ah aka loeh u thlaang pakhat lawng loehlangna phung-alam te a vai nawh atah kutdo dang thai nawh. ⁶ Thatlawh thaboep la bii aka bi lotoen thlaang lawngah amah lo kah caangthaih te a caak lamha ham awm. ⁷ Awl kavan thui he atheenla poek, metihtiah he awl he boeih yaakming thaina te Bawipa lawng m’peek ai.

⁸ Awlthang theen dawngkah ka thui angla Devid cadil duekna kalawng aka tho koep Jesuh te hilh boel. ⁹ Metihtiah kai lawng Awlthang Theen ka phawng dawngah patang ka khang tih lumlai aka hu thlaanghuuen angla thiirui oen n’khih u. Tede Pathen kah awl tah thiirui oen khit thai nawh. ¹⁰ Tedawngah Pathen kah thlaangtuek thli lawngtah Khrih Jesuh teng kalawng aka law thlawnna te a dang u tih dungyan ruep-awmna te a pangna u ham patang raina boeih boeih he ka ueh. ¹¹ Adangkah awl he aka soeng ni: “Amah oen n’duek haih atah amah oen n’hing haih van ai. ¹² Mami lawng ueh thai mangkhak atah mami khaw amah oen haih ukkung la n’awm ai. Amah te n’hoett atah mami he n’hoett van ai. ¹³ Mami lawng uep-awm la n’awm nawh cakhaw Ahih tah uep-awm la awm yoeyah, metihtiah ahih tah amah oen amah te thai-alat u thai nawh.”

¹⁴ He he na thlaang thli tengah thui pe langtah awllung awllep mailai ah oelh u khiing nawh ham Pathen haiah ngaithuenna te peh. Tede atheen thaihu nawh ni, awl a hutung thlaang thli te ni a rawk sak khoeng. ¹⁵ Nang tah bii aka yah puei nawh, Pathen kah awltak te asoengla aka cangpueikung la na awm van angla Pathen kawtlaakna te na dangna ham yawm lah. ¹⁶ Pathen hinyahna aka awm nawh tih ngau-athuu awl oelhna te reel-aram lah, te ang awlkaa lawngah te Pathen teng kalawng athlathloeila ni thlaang a thak khoeng mai. ¹⁷ Te ang cangpueina te tah thi-asa aka rong sak vueihacang-ing oen ah lo u. Te ang thaihu aka cang puei thlaang pahih rawi te tah Himenia oen Filitas ni. ¹⁸ Ahih rawi lawng awltak lawngpui te a ceh taak hih tih, thawhkoepna tah awm coeng poen, tila a thui hih dawngah thlaang khatsut kah oengna te plet-plawng la a sai hih. ¹⁹ Tede Pathen lawng lungdang a suem te tah cak khak tih hinghuen thai nawh, te sawah te he awl he a thut: “Bawipa lawng amah kah thlaang la aka awm te a ming” tila khaw, “Bawipa kah thlaang la ka awm a ti lawngtah athe saina te a toeng ham awm,” tila te a thut.

²⁰ lmpui phulum khuiah um, am thaihu acungkuem awm: khatsut te tah sui, ngun oen a sai tih atloe te tah thing oen a sai khaw awm tih amlai oen a sai khaw awm; khatsut tah khawniingtuikaa ah hawna ham tih atloe te tah awmthoet awmroelh ah hawna ham ni. ²¹ A-u khaw athe thaihu boeih te a ceh taak tih aciim acaihla aka awm tah bii phutlo dawngah a hawna ai, metihtiah ahih tah thloeng u tih thaihu theen sai ham oepsoehla aka toen u tih a bawipa kah hawna koeila a awm dawngah ni. ²² Roengthaai thawhthuem kah pumsa ngaihna te vai boel langtah thinkaw ciim oen Bawipa a khue tih bawmna aka bih thlaang thli oen ah thik at la doengna, oengna, lungna oen ngaimawngna dang hamla yawm lah. ²³ Tede ngau-athuuna oen mingtung plau nawh awlpuungna te reel-aram hawn; te ang lawngtah tawhsina ni a thoeng sak tite nang lawng na ming. ²⁴ Bawipa kah tuihyoeihthlaang tah tawhsi u ham awm nawh. Ahih tah thlaang boeih aka reen, kawdaw thlaang, cangpueikung saya theen la awm ham ni, ²⁵ amah aka ngaih nawh thlaang thli te lunghoeih lungpaih la toelthaam ham awm. Tetih atah ahimi te Pathen lawngah thawlh yutna atue theen a peek vetih awltak te a ming u ai. ²⁶ Tecoeng atah ahimi lawng a cuih a khueh u vetih ahimi te aka tu khak tih amah kah kawngaih vai sak ham aka saikung Seitan kah dong dawngah man nawh vetih loeih ai.

¹ Hukhueng koek khawhin tah raina atue poen ni tite hilh boel. ² Thlaang lawngah he, amah ham bueng poekna, ngaihmoekna, a khueh u vetih oekthloenna oen amah oen amah pawmsang u ai; ahimi tah thlaang thekhana, a manu oen ana pa awl aka ngaai nawh, lungvatna aka ming nawh tih bokna ben tula aka ngaai nawh thlaang la awm u ai; ³ ahimi tah reenna aka khueh nawh, thlaangtlung-pathang, thlaang thuitheet thlaang, boethe halang thlaang, halang cingpoh thlaang la awm u vetih ahimi lawng thaihu theen te a thina ai; ⁴ ahimi tah awl aka cak nawh thlaang, maru-marat thintoi thlaang, kawpoek sang oen aka hoell u thlaang la awm u vetih; Pathen te lungna lak ah awmtheen awmyaal boenn-atlaak te a lungna ngaai ai, ⁵ ahimi lawngah bokna phung he asaw ahan ah a phoeih u, tede akhuiben kah tharana tangtang te tah a hoett u. Te ang thlaang thli te tah reel-aram hawn. ⁶ Ahimi khatsut lawngah thlaang im thlaang lo ah kuun u tih a kaw aka cak nawh hutaa-tumphai, amami kah thawlhna thalrih lawng a namm tih pumsa ngaihna phun soeprep lawng a mawt hutaa hue te tah doelh a thloeih tih a tuuk u thai, ⁷ te hutaa hue lawng awltak te cang hamla a yawm poepa u, tede ahimi tah awltak te metuek khaw aka ming thai tlaih nawh poen ni. ⁸ Janni oen Jambri lawng Mosi te a oelh a taih hih angla he thlaang thli lawngkhaw awltak te a oelh a taih u, ahimi tah a kawpoek lawng bii aka bi tlaih nawh lungmong thlaang la awm u tih oengna ben ah dok u poen. ⁹ Tecakhaw ahimi kah saina te tah athlathloeila pha manawh, metihtiah thlaang boeih lawngah ahimi metihtlukla a ngau-athuu u tite a ming ai. Janni oen Jambri khaw te tila ni a awm hih van.

¹⁰ Tede nang lawngtah kai kah cangpueina, khawboe ramlang oen ka hingna dawngah ka mengtengna te na vai poen. Nang lawngtah ka oengna, kawdawna, lungna, uehthaina, ¹¹ heem-atek la ka awmna oen patang ka khangna boeih te na ming poen. Antiok, Ikoniam oen Listra khaaw ah mueirihtamyiin, khawdeng patang heemtekna ka sawah aka thoeng te nang lawngah boeih na ming. Tede Bawipa lawng te ang thli boeih dawng kalawng n’loeih sak. ¹² A-u khaw Khrih Jesuh oen pumkhatla awmna rang oen Pathen kawngaih la hing ham aka ngaih tah heemtekna patang te a khang ai; ¹³ tede thlaang the thli oen thlaangthaipalat thli kah the-arana tah khuet la khuet ai; thlaangtloe te athai alatna vetih amah te khaw a thai alatna u van ai. ¹⁴ Tede nang tah, na cang tangte tih acakla na oeng awltak dawngah te awm poe lah. Nang cangpueikung thli a-u tite namah lawng na ming; ¹⁵ Na camaw veng kalawng ah Aciim Baibal awl na ming poen tite hilh boel. Te Caciim lawngah Khrih Jesuh oengna rang oen thlawnna benla mawtkung cuihna te m’peek thai. ¹⁶ Caciim boeih he Pathen hillsang la awm tih awltak cangpueina ham, toelthaamna ham, thawlhpalhna te tlaihvawngna ham, asoengla khawsakna ham ah thuituenna la aphu awm, ¹⁷ te ah ni Pathen bii aka bi thlaang lawngah thoemthaina soep vetih thaihu theen phun soeprep sai hamla phawlip te asoepcala a khueh ai.

¹ Thlaangduek oen thlaanghing awl aka cek ham koei Khrih Jesuh oen Pathen haiah awl ceetceet kan uen. Metihtiah ahih tah Sengpahrang angla uk ham law koep ai. ² Tedawngah awlthang te thui lah, (atue atang alawlh amaih ah khaw, alawlh amaih nawh ah khaw) awlthang te thui ngaikhoek. A yaakming thaina ham thui peh, toel-thaam ham angoe atah siim langtah, thaphawh ham angoe atah thathluena awl thui peh, kawdaw thinsan oen cang puei. ³ Thlaang rangpui lawngah asoeng oengnakungpui cangpueina te hutung ngaih nawh la a awmna atue atang te apha ai, tede amami kah ngaihna te a vai vetih amami kah yaak ngaih bueng te aka thui hamla cangpueikung yahawh hlang te amami ham a cawi ai. ⁴ Ahimi lawng awltak te hutung ohla a mangthawng taak vetih ciil awl mailai te hutung ham a ngaih u ai. ⁵ Tede nang tah me ang akawng alam dawngah khawseh namah oen namah te kuemsuem uh, patang palai te ueh hawn, Awlthang Theen phawngkung la na awmna bii te bi langtah Pathen kah tuihyoeihthlaang la na awm van angla na bi koei boeih te sai.

⁶ Kai ham tah ka hingna he luciik la thawthueng ham atue apha poen; he dilai hingna he ceh taak ham tahe ah atue khoek poen. ⁷ Loehlangna poei ah khaw ka tha khueh boeih oen ka yawm poen, athla hlang aboet kheng toela ka heeng poen; oengna te ka phoeih rapsaat poen. ⁸ Tahe tah, adoengla aka hing thli a peek taana kutdo lawng te kai he n’ring poen, te kutdo te tah, Bawipa lawngah, te Khawhin ah te m’peek ai, kai bueng he m’pe manawh, amah a lawna te lungna oen a lamtoen thlaang boeih te a peek ai.

⁹ Ka tengah ayuela law ham van yawm. ¹⁰ Dema lawngtah dilai he a thintlawhna dawngah kai he n’ceh taak tih Tesalon khaw la cet poen. Kresen tah Galati ram la cet tih Titas tah Dalmatia ram la cet. ¹¹ Luka bueng he ka tengah awm. Mark te van law puei, ahih tah kai he bii aka bawmkung ni. ¹² Taikhikas tah Efesa khaaw la ka tuih. ¹³ Na law vengah Troas khaaw kah Karpas im ah ka ceh taak angki dung te van khuen; cabu thli te khaw van khuen, awlpuila saphaw oen a sai te van khuen.

¹⁴ Thiide Alekzandar lawngah ka sawah raina avan sai; amah kah a saina angla Bawipa lawng kutdo a peek ai. ¹⁵ Ahih tengah te namah oen namah ngaithuen uh, metihtiah ahih lawngah mami kah awlthang te a oelh khaklal.

¹⁶ Lamhacuek awlcekna ah kamah oen kamah ka phungtu u vengah te a-u khat lawngkhaw m’pai puei nawh; n’ceh taak boeih u. Ahimi sawah athela Pathen lawng poek mai boel seh! ¹⁷ Tede kai lawngah awlthang asoepla ka phawng thaina ham oen ah Gental thlaang boeih lawng a yaakna ham Bawipa lawng n’awm puei tih tharana m’peek, tedawngah duekna dawng kalawng ka loeih. ¹⁸ Bawipa lawng athe-arana boeih kalawng n’loeih sak tih amah kah vaan Ram ah te adingsuekla n’ceh puei ai. Amah tengah ruep-awmna dungyan toe awm hawn seh! Amen.

¹⁹ Priscilla oen Akuila khaw, Onisitoras cakaw khaw kan toei u. ²⁰ Erastas tah Kawrin khaaw ah awm tih Trofimas tah atlawh dawngah Militas khaaw ah ka ceh taak. ²¹ Sikding a pha thlan ah law hamla van yawm. Jubulas, Puden, Linu oen Klaudia mi lawngkhaw atloe khrihca boenhui boeih lawng nang te n’toei u.

²² Bawipa tah na thinkaw lungbui ah awm seh. Pathen lungvatna nangmi boeih sawah awm seh.