2 TESALON

¹ Pawl, Silas oen Timote lawngah mami kah Pa Pathen oen Bawipa Jesuh kah thlaang thli, Tesalon khaw kah khrihcabu tengah ca kavan pat u. ² Mami kah Pa Pathen oen Bawipa Jesuh Khrih lawngah nangmi te lungvatna, ngaimawngna m’pe hawn seh.

³ Maya manau thli, nangmi hamla Pathen tengah awmngaih ciil ka thui u poepa. Te tila awmngaih ciil thui te aka soeng ni, metihtiah nangmi kah oengna tah roeng hang tangkiik tih nangmi pakhat oen khat na lung u te a roeng hang tare dawngah ni. ⁴ Tedawngah nangmi kawng te Pathen kah khrihcabu thli tengah kamami roe lawng ka thangpawmna u. Nangmi lawng heemtekna oen patangraina na khang tangkiik u de na ueh thai u tih na oeng u dawngah kaimi lawng ka thangpawmna u. ⁵ He ang thli boeih lawngah Pathen kah awlcekna tah doeng tila a tueng sak tih nangmi tah Pathen Ram oen ah aphu ating-atawkk thlaang la na coengg u ai. Te ham ni nangmi lawng patangraina na khang u. ⁶ Pathen lawngtah asoeng ni a sai; nangmi patangraina aka pe thli te patangraina a peek van ai. ⁷ nangmi patangraina aka khang thli oen kaimi he khaw hoeikhangna te m’peek ai. He patangraina tah Bawipa Jesuh lawng amah kah thara vanthlaang thli oen ah, ⁸ hairawng haialh oen a law vengah, Pathen aka hoett thlaang thli oen mami kah Bawipa Jesuh Khrih kawng Awlthang Theen aka vai nawh thli te dan a tat ai. ⁹ Ahimi lawng dungyan rawkna, dantat patangna te a khang u ai, Bawipa lawng amah kah thlaang boeih teng kah ruep-awmna oen ah amah aka oeng thlaang boeih tengkah hinyahna te dang ham, ¹⁰ a lawna khawhin ah ahimi tah Bawipa teng kalawng ah thek u boeih ai. Nangmi tah kaimi lawng ka phawng awlthang te na tangna u dawngah Bawipa te ruep-awmna oen hinyahna aka pe thlaang thli tim ah na thuum u ai. ¹¹ Te kawngah ni nangmi ham kaimi ka thangthui u poepa. Amah lawng nangmi n’khuena oen ating atawkk la na hingna u thai ham kaimi lawng mami kah Pathen tengah ka bih u. Pathen lawng amah kah huham tharana oen ah nangmi lawng na ngaih boeih theenna te van soep sak selangtah oengna oen bii na sai te van tluep sak seh. ¹² He tila te mami Bawipa Jesuh miing lawngah nangmi rang oen ah ruep-awmna te a dang vetih, mami kah Pathen oen Bawipa Jesuh Khrih kah lungvatna rang oen nangmi lawngkhaw amah teng kah ruep-awmna te na dang u van ai.

¹ Maya manau thli, mami Bawipa Jesuh Khrih a lawna oen amah oen thik at la tun haihna kawngah; ² yoeikooek doek la na kawpoek thumhang sak u boel, Bawipa kah Khawhin tah law coeng poen tila aka thui thli kah awl lawngkhaw nangmi te khup plet la n’sai u boel seh tila kan uen u. Te tila a thui awl te thlaang khatsut lawng kaimi kah thuisut awl angla khaw seh, kaimi kah cathut awl angla khawseh a poek u mai ai. ³ Nangmi te a-u lawngkhaw n’thaina u boel seh. Metihtiah aboetna koek Raal kahna apha thlantoe, hell ah aka tla ham Thlaang The Pui te avan pha thlan khui tah te Khawhin te van pha manawh. ⁴ Ahih lawngah pathen a ti boeihboeih oen bokna thaihu boeih te a oel khak vetih amah oen amah te, te thli boeih sawah awm ai. Ahih lawngah Pathen kah Tempal bok-im khuila pateng kuun vetih ngawl ai, ‘kai tah Pathen ni,’ ti ai.

⁵ Nangmi lawng na hilh poen aw? Nangmi tengah ka awm vengah he ang thli boeih he kavan thui poen de ta. ⁶ Tahe ah he he a thoeng nawh ham ah kanghalhkung pakhat awm, te tah ame ang tite nangmi lawng na ming u. Tecoengah atue apha vengah Thlaangthe Pui tah va thoeng ai. ⁷ Ahuepla Thena lawngah bii a bi poen, tede kanghalhkung te khoe la a awm thlan atah Thlaangthe Pui te va thoeng thlan ai. ⁸ Tecoengah Thlaangthe Pui te phumpho ai, Tede Bawipa Jesuh a law vengah a kaa khuikah a hill oen Thlaangthe Pui te a ngawn vetih amah kah ruep-awm aangna oen a phe ai. ⁹ Thlaangthe Pui lawng Seitan kah huham tharana oen law vetih asoeng nawh kawpoekraina oen kawpoekrai-miknoekna phun soeprep a sai vetih, ¹⁰ aka rawk tih ha-ata ham koei thlaang thli sawah athe soeprep thai alatna te a hawna ai. Ahimi lawngah thlawnna hamla awltak te do u nawh tih a lungna u nawh dawngah ahimi boeih tah ha-ata boeih ai. ¹¹ Tedawngah asoeng nawh te ahimi lawng a tangna u hamla ahimi tim ah bii aka sai la Pathen lawngah thawlhpalhna huham tharana te a tuih pe tih asoeng nawh te ahimi lawng a tangna u. ¹² Awltak aka tangna nawh tih thawlhna dawngah awmtheen aka boenn thlaang boeih tah awlcekna te a dang ai.

¹³ Bawipa lawng a lungna maya manau thli, nangmi kawngah kaimi lawng Bawipa tengah awmngaih awl thui poepa ham awm. Metihtiah Muithla kah huham tharana rang oen Pathen kah aciim thlaanghing la coeng ham oen ah nangmi lawng awltak te na oengna rang oen thlawnna te na dangna u ham Pathen lawng nangmi te lamhacuekla n’tuek u. ¹⁴ He tila thlawnna dang ham kaimi lawng kavan thui Awlthang Theen oen ah nangmi te Pathen lawng n’khue u; mami Bawipa Jesuh Khrih kah ruep-awmna te dang ham oen paang van ham ni n’khue. ¹⁵ Tedawngah maya manau thli, kaimi kah phungthuina dawngah khawseh, capat dawngah khawseh pahih bok dawngkah awltak kan cang puei u te phoeih mangkhak u langtah acakla pai uh.

¹⁶ Mami he n’lungna tih aboet nawh thincakna oen acak ngaiuepna te a lungvatna oen pekung mami kah Bawipa Jesuh Khrih amah oen mami kah Pa Pathen lawngah, ¹⁷ atheen te na sai u tih awltheen te thui poepa ham thincakna oen ah tharana te m’pe hawn seh.

¹ Aboetna ah maya manau thli, nangmi tim ah Pathen awlthang te apuung ataai van angla, aloela apuungna ham thangthui uh. ² Thlaang boeih lawng awlthang te a tangna u nawh dawngah, thlaangthawlh oen thlaangthe thli kut khui kalawng kaimi he Pathen lawng n’loeih sakna ham khaw thangthui uh.

³ Tede Bawipa tah uep-awm thlaang la a awm dawngah nangmi te tha avan ra sak vetih Thlaang The Pui kah kut khui kalawng n’phungtu ai. ⁴ Bawipa lawng kaimi he nangmi te ueppangna ham m’peek tih kan uepna, kaimi lawng kavan thui te tahe ah na sai u angla hailam ben ah khaw na sai poe u poen ai tila ka tangna.

⁵ Nangmi lawng Pathen kah lungna te khawseh, Khrih kah peek uehthaina te khawseh yaakming tare ham ah Bawipa lawng nangmi te m’mawt hawn seh.

⁶ Maya manau thli, kaimi kah thuituenna awl te aka vai nawh tih thayong tha-ngak la aka awm maya manau boeih te nangmi lawngah relram hamla mami Bawipa Jesuh Khrih miing oen ah kaimi lawng awl kan peek u. ⁷ Kaimi lawng bii ka bi u van angla nangmi lawng na bi u van ham awm tite namami lawng atheenla na ming u. Nangmi tengah kaimi ka awm vengah te ka tha yong sut nawh. ⁸ Kaimi lawng aphu peek ohla bawmcemna te ayoela ka lo u nawh. Thatlawh thaboepla bii ka bi u; kaimi he nangmi pakhat khat kah thalrih la awm nawh ham khawyiin khawthaih bii ka bi u. ⁹ Kaimi lawng te tila ka bi u te nangmi tengah bawmna bih thaina te ka khueh u nawh dawngah moenih ta; kaimi lawng te tila ka bi u te tah nangmi lawng oett ham oen vai hamla ni. ¹⁰ Nangmi teng ka awm u vengah te kaimi lawngah, “A-u khaw bii aka bi nawh tah buh cah u boel,” kan tina u.

¹¹ Te tila kan tina u te tah nangmi timkah thlaang khatsut tah thayong tha-ngak la awm u tih bii khaw sai ohla thlaangtloe kah biibi te rawlraak thlaang la awm khoeng tite ka yaak u dawngah ni. ¹² Te tila aka awm thlaang thli te acuep amueihla awm ham oen ah amami kah bungkhutna bii te bi ham Bawipa Jesuh Khrih miing oen ah ngaithuenna awl ka peek.

¹³ Tede, maya manau thli, nangmi lawngtah atheen thaihu sai te ngak u boel. ¹⁴ He kah capat khuiah aka awm awl he aka vai nawh thlaang khaw awm mai ai. Te ang thlaang te a awm atah noek u langtah ayah laat la a awmna ham ahih oen te benbaw benpang u boel. ¹⁵ Tede, ahih te raal angla tah van ngaai u aih boel; maya manau pakhat van angla te thuituen uh.

¹⁶ Ngaimawngna kungpui Bawipa amah lawngah metuek tue vengah khawseh along a-im phun soeprep oen ah ngaimawngna m’pe hawn seh.

¹⁷ He capat he kamah kut roe oen kavan thut: Kai Pawl lawngah kan toei u. Ka capat roekk dawngah he tila mik-noekna ka thut; he tah kamah kah cathut phung poen ni.

¹⁸ Mami Bawipa Jesuh Khrih kah lungvatna tah nangmi boeih sawah awm hawn seh.