2 PITER

¹ Jesuh Khrih kah tuihyoeihthlaang oen celtuih Simon Piter lawng mami kah Pathen oen Thlawnkung Jesuh Khrih kah doengna rang oen kaimi angla aphu aka tlo oengna aka dang van nangmi tengah: ² Pathen oen mami kah Bawipa Jesuh te na mingna rang oen ah lungvatna oen ngaimawngna tah asoepla nangmi tengah awm hawn seh.

³ Pathen amah kah ruep-awmna oen atheenna pang van hamla mami khuekung Jesuh Khrih mingna rang oen Pathen hinyahna oen ah hing hamla mami kah ngoe soeprep boeih te Pathen kah tharana huham oen m’peek poen. ⁴ Te tila amah lawng peek ham awlkam aka bo hlang tih aphu aka tlo kutdo te mami m’peek poen. He kutdo rang oen mami aka phe thai dilai pumsa ngaihna kalawng na loeih u thai vetih Pathen pumsa te na cuut u thai van ai. ⁵ Tedawngah he kawngah he na oengna dawngah theenna te thap u lang, na theenna dawngah mingna oen thap uh; ⁶ na mingna dawngah te mah oen mah kuemsuemna oen thap uh; mah oen mah kuemsuemna dawngah uehna oen thap uh, uehna dawngah Pathen hinyahna oen thap uh; ⁷ Pathen hinyahna dawngah te boenhui angla thintlawhna oen thap uh, boenhui angla thintlawhna dawngah lungna oen thap uh. ⁸ He thli he nangmi lawng na ngoe thaihu ni, he ang he yahawh ngaai na khueh u atah mami kah Bawipa Jesuh Khrih na mingna dawngah tha avan thlue sak vetih theenna avan thoeng sak ai. ⁹ Tede a-u khaw te thaihu aka khueh nawh tah a huhna aka toica tangkiik mikpum thlaang ni; ahih lawngah aruem kah thawlhna boeih kalawng n’ciim sak tite a hilh ni.

¹⁰ Tedawngah maya manau hue, Pathen kah khuena oen tuekna te acakna poe ham tha huer tare uh; te tila tha na huer u atah thawlhna dawngah na tlim u manawh. ¹¹ He tila te mami kah Bawipa oen Thlawnkung Jesuh Khrih kah dungyan ram ah nangmi kuun thaina te m’peek u ai.

¹² Tedawngah nangmi lawng he kawng he na ming u tangte poen tih awltak na dang u dawngah acakla na pengnel u poen de he kawng he kan yaak sak poepa hun ai. ¹³ Ka hing khui roekk atah he kawng he nangmi kan yaak sak poepa hamla aka soeng ni tila ka poek. ¹⁴ Mami kah Bawipa Jesuh Khrih lawng aciimphanla ka tengah avan thui poen angla he aka duek thai pum he tah ka dul yue poen ai tila ka ming. ¹⁵ Tedawngah Kai ka duek coengah he thaihu thli he na ming u poepa hamla ka sai thai khui tah nangmi ham lawngpui ka roek ai.

¹⁶ Mami kah Bawipa Jesuh Khrih tharana huham oen a lawna te kavan thui u vengah thlaang lawng a suen coplap ciil awl te kavan thui nawh. Kaimi lawng a bawilenna te ka mik roeroe oen ka huh u. ¹⁷ Ruep-awm Sawsangkoek teng kalawng “Ahih he ka lungna ka Capa ni, ahih sawah ka kaw hoe tangkiik tila ahih tengah awl va law tih Pa Pathen lawng hinyahna oen ruep-awmna a peek vengah te kaimi khaw te huen ah te ka awm u. ¹⁸ Amah oen aciim tlaangsawm ah ka awm u vengah vaan kalawng awl a law te kamami roe lawng ka yaak u.

¹⁹ Tedawngah tawngha thli lawng a thui u awl te kaimi lawng ka tangna tare u. Nangmi lawng te awl te atheenla na khuui na ciing u ham awm, metihtiah khawthai tih aisi tumpa nangmi thinkaw khuiah a aang thlantoe yiinna khuiah aka vang hai-im oen lo u. ²⁰ Tecakhaw he thli boeih coengah caciim dawng tawngha thli kah thuisut awl te a-u lawngkhaw amah poek ah thuicaih thai nawh tite ming uh. ²¹ Metihtiah tawngha thli kah thui oepsoeh awl he thlaanghing kawngaih-na oen law mailai nawh, tede thlaang he Ciim Muithla lawng a ceemtuh dawngah ahimi lawng Pathen tengkah awl aka law te a phawng u.

¹ Yan veng Israel thlaang thli tim ah asoeng nawh tawngha thli pho. Tetih van angla nangmi tim ah asoeng nawh cangpueikung thli va thoeng ai. Ahimi lawng thlaang thek-yakna asoeng nawh oengnakungpui te avan khuen u vetih ahimi aka tlangkung Manghai Bawi te a hoett u ai, te tila amami sawah kawlkalhca ah rawkna te a pha sak ai. ² Te tila a awm u lal maiah pateng ahimi kah athe khawboe ramlang te thlaang yahawh lawng a oett u vetih ahimi lawng athe a sai u dawngah awltak lawngpui te thlaangtloe lawng athela a thui ai. ³ Aka soeng nawh cangpueikung hue lawngtah amami kah apueh ngaih soeh te dang ham a ngaih u dawngah a suen coplap ciil te nangmi tengah avan thui ai. Aruem veng kalawng tahe toe ahimi Awlcekna te awm oepsoeh poen tih ahimi aka Phekung tah huertuela hak!

⁴ Pathen lawngtah thawlhna aka sai vanthlaang thli te thlung nawh tih ahimi te hell khuila a voeih, yiinna khuiah ahimi te thiirui oen a khih tih awlcekna khawhin te a ring u. ⁵ Pathen lawngtah yan kah dilai khaw thlung nawh tih Pathen tula aka sak nawh thlaang kawngah dilai dawng tuiliw a law sak, doengna aka thui Noah oen thlaangtloe pasarih hue bueng te a thlawn. ⁶ Pathen lawng Sodom oen Gomorrah khawpui te dan a peek tih hai oen a phe. Te tah Pathen tula aka sak nawh thli hamla miknoekna a sai. ⁷ Khawboe ramlang the tih phung aka khueh nawh thlaang thli lawngah a thekhana thlaangdoeng Lot te tah a loeih sak. ⁸ Te thlaangdoeng tah thlaangthe thli tim ah khawhin roekk khaw a sak tih ahimi kah athe moeiboe oen saina te a huh tih a yaak vengah a kaw the tih a thin phat. ⁹ Tedawngah Bawipa lawngtah amah aka ming thlaang thli te ahimi kah patang khangna kalawng loeih sak ham khaw, thlaangthe thli te Awlcekna Khawhin ah metila dan tat ham ti khaw a ming, ¹⁰ awlpui la tah amami kah tuiilehkap pumsa cuk-halhna oen Pathen kah aana n’tu la aka sak nawh hue te ni. He kah asoeng nawh cangpueikung thli he a thin cak u tih halang u, sawben vaan ah aka awm ruep-awm te khaw hinyah u nawh, ahimi lawng te thli te asal aphaam dai. ¹¹ He kah asoeng nawh cangpuei-thawlhkung thli lak ah tha awm thara ngaai vanthlaang thli pateng Pathen haiah ahimi te thawlh a peel vengah tapvoep awl thui u nawh. ¹² Tede, he thlaang thli lawngtah, tuuk tih ngawn doek ham aka thang ramsa sann angla poekna mailai oen thaihu a sai u; ahimi lawng a ming u nawh thaihu khat mai dawngah khaw tapvoep awlkha a thui u. Ahimi tah ramsa sann angla ngawn la awm ai. ¹³ Ahimi lawng thlaangtloe sawah raina a thoeng sak angla amami sawah raina oen a thung pe van ai. Ahimi ham tah nawmna ti he hingthuntaang ah pumsa kah hue-ngaihna soeprep sai he ni. Amami kah thailatna lawngpui ah te awmtheen u tih nangmi oen buh a veel haih u vengah khaw, haithelatt oen yarau aka thoeng sak la awm u. ¹⁴ Ahimi lawng thlaanghalhnu nawhtah atloe te bueh hamla ngaih u nawh; amami kah thawlh saina dawngah a kaw riim u nawh. Ahimi lawng oengna tha aka yoek thlaang thli te thawlhna dong dawngah a man sak. A thinkaw tah apuehngaihna oen betoet. Ahimi tah Pathen kah kawsi aka yawkk thlaang poen ni. ¹⁵ Ahimi lawng lawngdoeng te a ceh taak u tih lawngpui a hang u poen; ahimi lawngah Beor Capa Balaam lawngpui te a vai u, Ahih tah athe saina oen tangka huh ham a ngaih tih, ¹⁶ amah te a thawlh dawngah toelthaam la awm. Amah kah marang lawng thlaanghing awl la cal tih te tawngha kah a ngau avawk oen a sai te a toeng sak.

¹⁷ He ang thlaang thli tah tui aka kak sawkca angla awm, thlipui lawng a yawng mailai tuikhu oen lo u; Pathen lawng ahimi ham adungkoek yiinna khuiah huen a khueh pe sut poen. ¹⁸ Ahimi lawng oekthloenna oen awlpoei awlpit te a thui u tih, thawlhpalhna aka ceh taak pek thlaang thli te tuukna ham asoeng nawh pumsa hue-ngaihna te a hawna. ¹⁹ Ahimi lawng te thlaang thli te loeihna a dang ai tila awl akam pe u de, amami pateng rawkna moeiboe kah sal la awm u, thlaang he ahih aka taa thaihu kah sal la awm. ²⁰ Thlaang he mami Bawipa oen thlawnkung Jesuh Khrih a mingna rang oen dilai tuiilehkap kalawng a loeih u coengah te dilai tuiilehna lawng a tuuk koep tih a taa atah te thlaang te lamhacuek kah lak ah ahukhueng ah the-eep ngai. ²¹ Doengna lawngpui te ming coengah ahimi a peek u aciim awlpeek te mel taak koep lak atah doengna lawngpui te ming nawh ngala kawinih ahimi ham theen ngaai sui de. ²² “Ui lawngah a lawkk a caak koep” tina awl oen “Awk lawngah tui thluk coengah nawng a nelh koep” tila a thui tatuk-awl soeng tangtang ti he ahimi lawng a tueng sak.

¹ Ka lungna ka paya thli, tahe nangmi tengah ca kavan pat he voeihihna capat poen ni. Capat pahih bok dawngah ka ngaihna tah nangmi thinkaw khuiah poekna ciim awm sak hamla ni, tedawngah nangmi tengah he thaihu he kavan thui u. ² Yan vengkah tawngha thlaangciim thli lawng a thui awl te oen nangmi kah celtuih hue teng kalawng nangmi teng peek la aka awm Bawipa oen thlawnkung tengkah awlpeek te na ming khuep u ham ka ngaih. ³ Lamhacuek ah nangmi lawng na ming u ham tah atue khawhin aboet ben ah ngoen tah a hingna te amami kah pumsa ngaihna lawng a uk thlaang khatsut law ai. Ahimi lawng nangmi te n’nuihna u vetih, ⁴ “Ka law koep ai” tila awl a khueh de lah koen? mela a awm kai? mami kah Pahaam thli khaw duek boeih poen, tede soeprep boeih he dilai suen cuek veng kah a awm nooek angla ni a awm!” ti u ai. ⁵ Pathen lawng yan vengah a awl oen ah vaan oen dilai a suen ti he ahimi lawng aka ming nawh angla awm u. Dilai he tui khui kalawng tui oen a sai tih, ⁶ te dilai ruem te tui toengtoeng tuiliw tui oen a phe. ⁷ Tede tahe ah aka awm vaan oen dilai he hai oen phe hamla Pathen lawng a awl oen a thlung hun ni. Pathen tula aka sak nawh thlaang thli awlcek tih phena khawhin veng ham te thli te a thlung hun.

⁸ Tede ka lungna ka paya thli, he thaihu pakhat he hilh u boel! Bawipa huh atah hin at he kum thong khat angla awm tih kum thong khat he hin at angla awm. ⁹ Thlaang khatsut lawng a poek angla Bawipa he amah awlkamna soep sak ham a tat a hiing aih moenih, Nangmi te amah lawng n’reen u dawngah ni. Metihtiah ahih lawngtah khatca khaw phe ham ngaih nawh tih thlaang boeih lawng a thawlhna yut u seh ti he a ngaih.

¹⁰ Tecakhaw Bawipa Khawhin tah thlaanghuuen angla law ai. Te Khawhin atah vaan lawng vupaang awl oen auh ai, vaan khawhi kah aka awm boeih khaw ung vetih a phe boeih ai, dilai oen dilai dawng aka awm boeih te kawlkalh ah auh poen ai. ¹¹ He tila thaihu boeih he phe ham a awm dawngah nangmi lawng me ang thlaang la na awm u lah ai? Nangmi tah hingna aka ciim tih Pathen tengah pum aka pe thlaang la na awm u ham awm. ¹² Vaan te ung tih phe la a awmna oen vaan khawhi te a lingsona oen atui la atleena khawhin Pathen Khawhin te ayuela law ai tila nangmi lawng na lamtoen u vengah he te tila awm hamla na yawm u ham awm. ¹³ Tede mami lawngtah Pathen awlkam vaan thaai oen dilai thaai doengna a awmna im te n’lamtoen u.

¹⁴ Tedawngah ka paya thli, te Khawhin te na lamtoen u vengah Pathen huh ah aka ciim tih cawttbauh kap ohla awm ham yawm u lang amah oen roeproeicala awm uh. ¹⁵ Mami lawng n’lungna maya Pawl lawng, Pathen kah peek cuihna te hawna oen nangmi tengah ca avan pat angla Bawipa lawng mami sawah kawdawna a khueh he tah mami he thlawn ham a ngaih dawngah atue atang avan soeng ni tila poek uh. ¹⁶ He kawng he a thut roekk ah a capat boeih boeih dawngah te he ni a thui. Ahih kah capat dawngah akawng alam khatsut tah yaakming ham rai tih cuihhoena aka khueh nawh oen kawthlawp thlaang thli lawngtah, Caciim dawngkah awl te atloetloe la a thui u angla te asoeng akam nawh la a thuicaih u. Tedawngah ahimi lawngah amami kah rawkna te a thoeng sak u.

¹⁷ Tede ka paya thli, nangmi lawngtah he kawng he na ming u poen. Tedawngah phung awl tula aka sak nawh thli kah thawlhpalhna lawng nangmi te m’mawt thawlh nawh ham oen ah namami kah aka cak paihuen dawng kalawng na thoeih na nawng u nawh ham ngaithuen uh. ¹⁸ Mami kah Bawipa Jesuh Khrih lungvatna oen mingna dawngah roeng hang uh. Amah tengah ruep-awmna tah tahe kalawng ayoeyah awm hawn seh. Amen.