1 TIMOTE

1 TIMOTE

¹ Mami kah Thlawnkung Pathen oen mami kah ngaiuepna Khrih Jesuh rang oen ah Khrih Jesuh kah celtuih la aka awm Kai Pawl lawngah: ² Oengna ah ka capa tangtang la aka awm Timote nang hamla ca kavan pat. Pa Pathen oen Bawipa Jesuh Khrih lawngah lungvatna, reenna oen ngaimawngna te m’pe hawn seh.

³ Macidonia ram la ka ceh vengkah awl kan uen angla te Efesa khaaw ah na awm hamla ka ngaih. Thlaang khatsut lawng Efesa khaaw ah asoeng nawh oengna a cang puei u tih ahimi te na toeng sak ham awm. ⁴ Awlpuungna bueng aka thoeng sak ciil awl thli oen aka boet nawh nukaw pakaw patuer thli thoepna te ang thli te a toengna u ham thui peh; te ang thli oen ah te oengna oen ming ham koei la aka awm Pathen khawkhanna te n’sai thai nawh. ⁵ He tila awl kan peek he mengtengna tah athetheen mingna kawpoek ciim oen oengna tangtang oen ah thinkaw ciim dawng kalawng lungna te a thoengna ham thaphawhna ni. ⁶ Thlaang khatsut lawngtah he he a hoett u tih alawng ala nawh awlpuungna benla cet u. ⁷ Ahimi lawngah Pathen kah phungawl cangpueikung la coengg ham tah a ngaih u, tede ahimi lawngah amami kah awl-thui te khaw yaakming u nawh tih aka ming ceet angla a thui thaihu kawng te khaw ming u nawh.

⁸ Phungawl he atawng aleengla hawna koei ah n’hawna atah theen tite mami lawng m’ming u. ⁹ Ming ham tah phungawl he thlaang theen thli hamla sai nawh tih phungawl phekung thli oen lumlai aka hu thli, Pathen aka ming nawh thli oen thlaangthawlh thli ham, bokna ben oen muithla ben tu la aka sak nawh thli ham, a manu oen ana pa aka ngawn thlaang thli ham, thlaang aka ngawn thli ham, ¹⁰ Khawboe the thlaang thli ham, hutaa tawngpa thawlhna aka sai thlaang thli ham, tlangsum caak ngaih ah thlaang aka tu thli ham, hoem thui thli oen asoeng nawh sausi la aka pai thli ham, asoeng oengnakungpui te aka kalh thlaang thli ham ni a sai pe. ¹¹ Te ang cangpueina te tah kai lawng ka thui ham koei la m’peek awlthang theen dawngah te awm tih, ruep-awm oen theenduet Pathen tengkah Awlthang Theen ni.

¹² Bii ka bina dawngah tharana pekung Khrih Jesuh mami kah Bawipa tengah awmngaih ciil ka thui. Kai he amah kah bii bi hamla tueng aleng tila a poek tih bii m’peek dawngah ka uem tangkiik. ¹³ N’cui vengah ahih te kai lawng athela ka thui, ka heem ka tek tih thekha la ka sai, kai lawng oengna ka khueh nawh dawngah n’tu ka sai ti khaw ka ming nawh, tede Pathen lawngtah kai he n’reen. ¹⁴ Mami kah bawipa lawngah amah kah lungvatna te yahawh hlang la ka sawah avan lun tih oengna oen lungvatna te m’peek. Khrih Jesuh oen pumkhat la awmna rang oen ah te ang thli te mami kah koe-ava la awm poen. ¹⁵ Khrih Jesuh tah thlaangthawlh thlawn ham dilai la va law ti he tah aka soeng tangtang awl la awm tih lawh koeloe ham koei oen tangna koei ni. Kai tah thlaangthawlh boeih lak ah athe khuet ni; ¹⁶ tede Pathen lawng kai he n’reen tih thlaangthawlh boeih lak ah kai aka the khuet sawah kawdawna a khueh he tah hailam ben ah amah aka oeng tih dungyan hingna aka dang ham koei thlaang boeih kah miknoekna ham ni. ¹⁷ Dungyan Sengpahrang, aka duek thai nawh oen mik oen huh thai nawh pakhat bueng la aka awm Pathen tengah hinyahna oen ruep-awmna tah ayoeyah la awm hawn seh! Amen.

¹⁸ Ka ca Timote, n’hu vengah tawngha lawng nang kah kawng a thui angla te na tengah awl kan peek. Te awl te atheenla raal kahna ham awva la hawna lang na oengna, athetheen mingna kawpoek ciim te cak sak. ¹⁹ Thlaang khatsut lawng athetheen mingna kawpoek te n’tu la sak u nawh tih amami kah a oengna te a phe u. ²⁰ Te thlaang thli tim ah te Himanias oen Alekzandar khaw thuum hih van tih te rawi te Seitan kut ah ka tloeng tih dan ka peek poen; te tila te ahih rawi lawng Pathen thangthe la a thui te toeng hamla a cang hih ai.

¹ Tedawngah lamhacuek la reenna oen awl kan uen tah, thlaang boeih ham thangthuina, reenbihna, awmngaih awl thuina te Pathen tengah sai uh. ² Mami lawng ading asuekla awmna ham, Pathen hinyahna oen ngaimawngla khaw sak tih khawboe ramlang theenna oen awm thaina ham ah sengpahrang thli oen saithaina aana aka khueh boeih ham thangthui uh. ³ He tah aka theen tih mami Thlawnkung Pathen kah kawhoena ni. ⁴ Thlaang boeih he thlawn la awm sak ham oen ah awltak te ming sak hamla a ngaih. ⁵ Metihtiah Pathen tah pakhat bueng awm tih Pathen oen thlaanghing laklaw ah roeproeina saikung thlaanghing boeih tlang ham hingna pekung thlaang Khrih Jesuh pakhat bueng awm. ⁶ Te tah atue atang apha khuek vengah Pathen lawng thlaang boeih thlawn ham a ngaih te tueng sakna ni. ⁷ Tedawngah ni oengna oen awltak kawng awlthang te phawng ham oen ah Gental thlaangphun te cangpueikung celtuih la kai he n’tuih.

⁸ Pathen bokna huen roekk ah tawngpa hue lawng a thangthui u ham ka ngaih. Pathen tengah pum aka pe tawngpa hue lawngah thinsanna oen awlpuungna awm ohla thangthui vengah amami kut te a thueng u thai. ⁹ Hutaa hue lawngkhaw akhoek anoen atheen khoeng la hinaak himbai te a buen anaak u ham ka ngaih; samtoel samveh te khaw alawnha aihla thloeih athlam ohla, sui kaawntheen oen khaw, latha kaawntheen oen khaw, phutlo hi-acuu oen khaw thoekcau u aih boel seh. ¹⁰ Tede bokna ben ah thinkaw pengnel hutaa hue lawng a sai ham tueng angla te thaihu theen saina oen thoekcau u seh. ¹¹ Hutaa hue lawng awm duem selang tah awlngaaina oen cang u seh. ¹² Ahimi te cangpueikung la awm ham oen ah tawngpa sawah ukna aana khueh ham khaw ka ngaih nawh; Ahimi te dipsipla awm duem seh. ¹³ Metihtiah Adam te a sai lamha coengah ni Evi te a sai. ¹⁴ Tedawngah thailatna la aka awm te Adam nawh ni; hutaa ni thailatna la awm tih Pathen Phungawl te a phe. ¹⁵ Tede hutaa lawngah acuep amueih la oengna, lungna oen ciimna dawngah acakla a awm atah camoe cuunna rang oen ah thlawnna a dang ai.

¹ Thlaang pakhat lawng khrihca mawtkung la awm ham a ngaih atah ahih lawng biibi theen a ngaih ni tila a thui te soeng tangtang. ² Khrihcabu mawtkung tah thawlhpalhna aka awm nawh tih a yu khat bueng aka khueh thlaang, mah oen mah aka uk u thai thlaang, mah oen mah kuemsuem thai thlaang, adoengla khaw aka sa thlaang, hinyah koei thlaang; kamyin kamlai aka lungna thlaang, thlaangtloe te riingtuuk thaihoen thai thlaang seh. ³ Ahih tah yuu aka ruui nawh tih boethe halang nawh thlaang, boe-ngaai kawdaw thlaang, tangka aka ngaih soeh nawh thlaang seh, ⁴ amah imkhuikaw ham atheenla khawkhanna aka sai thai oen a ca anau thli lawng hinyahna oen awl a ngaai pe thlaang seh. ⁵ Metihtiah amah imkhuikaw ham khawkhanna metila ka sai ai tite a ming nawh atah Pathen kah khrihcabu te metila a doen acaang thai ai? ⁶ Ahih tah oengna dawngah kawpoeksoepna aka khueh thlaang seh, tetih atah Seitan angla ahih tah oekthloen u nawh vetih awlcek la awm manawh. ⁷ Ahih tah khrihcabu khuiah aka awm nawh thlaang lawngkhaw a hinyah thlaang seh, te atah a thang the nawh vetih seitan kah dong dawngah te man manawh.

⁸ Khrihcabu khuikah bawmkung thli khawseh khawboe ramlang aka theen tih kawpoek ciim aka khueh thlaang seh; ahimi tah yuu aka aw nawh tih tangka ngaihmoekna aka khueh nawh thlaang seh; ⁹ Ahimi tah athetheen pekbo thaina kawpoek ciim oen oengna awltak aka dung te acakla aka phoeih thlaang la a awm ham awm. ¹⁰ Ahimi te lamhacuek ah noekdak la awm vetih cawttbauh koei a awm nawh atah bi u seh. ¹¹ A yu thli khaw khawboe ramlang aka theen, thlaang theet awl aka thui nawh, mah oen mah aka uk u thai, soeprep ah thlaangdoeng la aka awm thlaang seh. ¹² Khrihcabu bawmkung tah a yu khat bueng aka khueh tih a ca anau thli oen imkhuikaw ham atheenla khawkhanna aka sai thai thlaang seh. ¹³ Amami kah bii te atheenla aka bi bawmkung thli tah a hinyah u vetih Khrih Jesuh a oengna kawng te raltheenla a thui thai ai.

¹⁴ Nangmi ham capat kavan thut vengah he nangmi tengah ayuela law ham oen nangmi te huh hamla ka ngaiuep. ¹⁵ Tede ka law haai nawh oh atah aka hing Pathen kah khrihcabu, tuungtang la aka pai tih awltak aka hing puei, Pathen imkhuikaw ah mami lawng metila khaw n’sak ai tite he capat lawngah avan thui ai. ¹⁶ Mami kah bokna dawngah aka awm alenduet awlhuep he a-u lawngkhaw oelhtaih thai manawh; Ahih tah thlaanghing pumsa la va thoeng, soeng tangtang tite muithla lawng a tueng sak, vanthlaang thli lawng a huh u, Ahih kawng te thlaangphun boeih tengah a thui u tih dilai peng tawm thlaang lawng a oeng u, tecoengah ahih tah vaan la luui hang poen.

¹ Hailam ben atah thlaang khatsut lawngah oengna te a hoett u ai tila Muithla lawng aciimphanla a thui; ahimi lawngah hoem thui muithla awl te a ngaai u vetih raaithe kah cangpueina te a vai u poen ai. ² Te ang cangpueina te tah thiiling haialh oen a ung sak angla athetheen pekbona kawpoek aka duek moelh sut thlaangthaipalat hoem thui hue lawngah a puung adaw sak u. ³ Te ang thlaang thli lawngah yu lawh vaa sak nawh ham oen khatsut caak awkk te yeh ham a cang puei u. Tede aka oeng thlaang thli oen awltak aka ming tangte thlaang thli lawngtah awmngaih oen thangthui coengah caak hamla caak awkk thli te Pathen lawng a sai. ⁴ Soeprep boeih Pathen lawng a sai he tah theen; khat khaw hoett ham awm nawh, tede soeprep boeih he awmngaih thangthuina oen do ham awm, ⁵ metihtiah Pathen awl lawngkhaw, thangthuina lawngkhaw Pathen kah do ham koeila te a sai.

⁶ He kah thuituenna thli he maya manau thli tengah na thui pe atah nang tah Khrih Jesuh kah atheen tuihyoeihthlaang la na awm ai; namah oen namah muithla ben na cawm na cah u van angla te oengna awl oen aka soeng cangpueina namah lawng na vai te hawna lah. ⁷ Tede Pathen kawng alam aka awm nawh tih thui ham koeihvaih nawh ciil awl te tah reel-aram hawn. Pathen kawngaih la hing ham namah oen namah te phep uh. ⁸ Pumsa oen cangna he aphu tah awm thoem van, tede muithla ben cangna lawngtah soeprep ah aphu awm, metihtiah, tahe veng hingna ham khaw, hailam ben hingna ham khaw pahih bok hamla awl a kam. ⁹ He tah aka soeng tangtang awl la awm tih do koeloe ham oen ah tangna khaklal ham awm.

¹⁰ Mami lawngah he thlaang boeih thlawnkung, awlpuila aka oeng thlaang thli kah thlawnkung aka hing Pathen dawngah ngaiuepna te n’khueh u tih mami lawng patangplai oen arai acaangla bii m’bi u.

¹¹ He thuituenna oen cangpueina thli he thui peh. ¹² Roengthaai kum no la na awm dawngah nang te a-u lawngkhaw dapsit la n’hu boel seh; tede na awlthui thingkaa khaw, na khawboe ramlang khaw, lungna, oengna oen ciimcaihna khaw aka oeng thlaang thli ham oett koei la awm seh. ¹³ Kai ka law thlantoe tah rangpui tengah Caciim teena, phungthuina oen cangpueina te yawm langtah atue na khueh boeih te hawna lah. ¹⁴ Tawngha thli lawng awl avan thui tih ahaamca thli lawng na sawah kut avan tloeng vengah nang lawng na dang muithla ben kutdo te dalra thlothlamna boel. ¹⁵ Thlaang boeih lawng nang kah na bi na lawh a roeng hang te a huhna u thai ham hawna langtah thathluela te thli te sai lah. ¹⁶ Namah oen namah te ngaithuen lang na cang puei te khaw ngaithuen lah. He thaihu boeih he toeng ohla sai, metihtiah nang lawng na sai atah namah oen namah khaw, na awl-thui hutung thlaang thli te khaw pahih bok la na thlawn thai ai.

¹ Kum haam tawngpa thli te ho boel, ahimi te na pa angla hoelh amaihla voemtoei lah. Kum no tawngpa te na nau angla thloep-hoelh lang, ² kum haam hutaa thli te na nu angla ngaai langtah, kum no hutaa thli te kawpoek ciim oen na ngannu angla ngaai lang voemtoei lah.

³ Amah bueng ah khaw aka sa huhai thli te van hinyah. ⁴ Tede huhainu pakhat khat lawng a ca thli khawseh, tihnawhtah a ca kah ca-anau thli khaw a khueh atah amami kah imkhuikaw te bokna phung angla cawmcah ham lamhacuekla cang u seh, te tila te a manu oen ana pa khaw, nu haam pahaam thli kah cuun acahna te khaw a thung pe thai ai. Metihtiah he tah Pathen kah kawhoena ni. ⁵ Amah bueng aka awm tih ahih te cawmcah hamla aka khueh nawh huhai tumtee lawngtah a ngaiuepna te Pathen ah kang a khueh tih yiin daai thangthui tih bawmna a bih. ⁶ Tede pumsa awmtheen awmyaalna aka boenn huhai tumtee thli tah hing van ruung mai de aka duek poen ni. ⁷ Ahimi te a-u lawngkhaw a thuitheet nawh ham he kah thuituenna he thui peh. ⁸ Tede thlaang pakhat khat lawng amah kah a cakaw te awlpuila amah imkhuikaw te a cawm acah nawh atah oengna te aka hoett thlaang la awm tih aka oeng nawh thlaang lak ah pateng khaw the-eep ngaai.

⁹ Huhai pakhat te a kum sawmruk a kuep thlan atah huhai tumtee thli kah cayin cabu dawngah thuum sak boel. Cayin cabu dawngah aka thuum ham tah vai khat bueng vaa aka sa huhainu te thuum seh. ¹⁰ Thaihu theen saina, ca-anau thli atheenla cawm-acahna, kamyin kam lai lungna, khrihca paya laikoei thli ham bii aka yawm, khawdeng lungma thlaang aka bawm, thaihu theen saina dawngah miing theenna aka dang huhainu te thuum seh.

¹¹ Tede kumno huhainu thli te cayin cabu dawngah thuum sak boel; metihtiah ahimi tah amami kah pumsa ngaihna dawngah vaa sak ham a ngaih tih Khrih te a mangthawng taak u tih, ¹² Khrih tengah amami kah awlkamcuek te a phe u. ¹³ Ahimi lawngah im khat coeng im khat yingyawi paithle u tih atue atang te a poeih alak u; te lak ah athe-eep ngaai tah thlaang a thuitheet u tih thlaang alawl ala u, thui koei nawh te a thui u. ¹⁴ Tedawngah mami aka raalna thlaang thli lawng mami kawng he athela thuina tue khaw a dang nawh ham kumno huhai tumtee hue lawng vaa a sak tih ca-anau khueh ham, amami kah imkhuikaw te a cawm acah u ham ka ngaih. ¹⁵ Metihtiah khatsut huhai tumtee lawngtah meel koep u tih Seitan hu ah bang u poen. ¹⁶ Tede khrihca hutaa pakhat lawng imkhuikaw ah huhai tumtee pakhat a khueh atah amah lawng cawm a cah selang tah khrihcabu kah thalrih la khueh boel seh; tetih dengah ni amah bueng aka awm huhai tumtee thli te khrihcabu lawng a tu-acaa thai ai.

¹⁷ Mawtkung angla bii atheenla aka bi ahaamca lawngtah thapang te arepla a dang ham awm, awlpuila phungthuina oen cangpueina aka yawm lawng thapang a dang ngaai ham awm. ¹⁸ Metihtiah caciim lawngah, “vaitaw te caang a tiil lii vengah a kaa cuett pe boel, ti tih bii aka bi lawng thapang te a dang ham awm, tila a thui. ¹⁹ Ahaamca thawlh a peel u te aka mingkung sausi pahih, pathum a awm nawh atah hutung pe boel. ²⁰ Thlaangtloe hue lawngkhaw thawlh sai a rihna van ham thawlhna aka sai boeih te rangpui haiah toelthaam peh.

²¹ Na saina boeih dawngah a-u tengah khaw pekbona oen mik-hai dan muehla na sai ham, thuituenna he nang lawng na vai hamla Pathen oen Khrih Jesuh oen ah aciim vanthlaang haiah ceetceet kan uen. ²² Bawipa kah biibina ah pumpeekna sai ham a-u tengah khaw tot-alet la na kut van tloeng praap boel. Thlaangtloe kah thawlh saina dawngah thuum boel; nang tah acuemsuekla va awm lah.

²³ Nang tah na sa a ding nawh taitu dawngah tui bueng te aw boel lang na bung a raawina ham misurtui te ayawl akaai tah bet ah aw mai hawn.

²⁴ Thlaang khatsut kah thawlhna tah tueng pheng tih amami haiah a thawlhna lawng awlcekna ah cet doen poen; tede thlaangtloe khatsut kah thawlhna tah hu-aha dengah tueng. ²⁵ Tetihvan angla thaihu theen sai he khaw tueng pheng tih huh thai koeila aka awm thlan te khaw thuh thai la awm manawh.

¹ Sal tamnaa la aka awm thli lawngah namami kah bawimanghai thli te hinyah peek tueng koeila a poek u ham awm, te dengah ni a-u lawngkhaw Pathen miing oen kaimi kah cangpueina te athela a thui nawh ai. ² Bawimanghai thli te khrihca la a awm u atah ahimi khaw mami kah maya manau la awm van poen ti u boel selang sal thli lawngah te hinyah ohla awm u boel seh. Ahimi kah bii te atheenla a bi pe tare ham awm. Metihtiah ahimi kah biibina rang oen hoeikhangna aka dang te tah ahimi lawng a lungna khrihca thli van ni.

³ He thaihu thli he nang lawng cang puei langtah thui peh. A-u khaw mami Bawipa Jesuh Khrih kah aka soeng awl oen mami kah bokna phung cangpueina oen ah aka vai u nawh oengnakungpui alakloe te aka cang puei tah, ⁴ Oekk-thloen u tih n’tu khaw aka ming nawh thlaang ni. Ahih lawngah awllung kawngah oelhtaih u ham oen tawhsi ngaihna kawpoek theen nawh te a khueh tih, he lawngah uett-eena, awlpuungna, thekhana, atheen nawh uepvoetna, aboet tlaih nawh awlpuungna te a thoeng sak, ⁵ he tila aka awm thli tah kawpoek soeng tlaih nawh tih awltak te aka khueh tlaih nawh thlaang poen ni. Ahimi lawngah bokna he kuirang la coenggna lawngpui la a poek u.

⁶ Thlaang lawngah amah kah a khueh duen oen ah ngaikhuekna te a awm atah bokna lawngah thlaang he kuirang thlaanglen la a coengg sak tangtang. ⁷ Mami lawng dilai dawngla n’van khuen u khat khaw awm nawh! Dilai dawngkah n’tu n’khuen thai ai? Khat khaw n’khuen thai manawh! ⁸ Tedawngah mami lawng caak awkk oen hinaak himbai n’khueh atah tete mami ham khoek mai poen. ⁹ Tede kuirang la coengg ham aka ngaih thli tah suek-halhna khuiah tla u, ngau-athuuna soeprep oen rih awm hue-ngaihna dong dawngah man u tih te lawngah ahimi te sungna oen rawkna benla te a ceh puei. ¹⁰ Metihtiah tangka ngaih soeh aih he tah athe phun soeprep a thoengna kungpui ni. Thlaang khatsut tah tangka khueh moek a ngaih dawngah oengna te a ceh taak u tih kawthena acungkuem oen a thinkaw lungbui a rek sak u.

¹¹ Tede nang tah Pathen kah thlaang la na awm dawngah he thaihu thli boeih he rel-aram hawn. Doengna, Pathen hinyahna, oengna, lungna, uehthaina oen kawdawna te khueh hamla yawm lah. ¹² Oengna loeh-lang taana poei ah na tha khueh boeih oen heng lang dungyan hingna te namah ham lo lah; Pathen lawng nang n’khue tih mingpueikung sausi thlaang yahawh haiah na oengna te acakcala na phawng te tah dungyan hingna te huh sak ham ni. ¹³ Thaihu boeih hingna pekung Pathen haiah khaw, Pontias Pilat haiah a oengna acakcala aka phawng Jesuh haiah nang he awl kan uen. ¹⁴ Mami Bawipa Jesuh Khrih kah Khawhin te a pha thlantoe awl kan peek he atheenla vai. ¹⁵ Amah a lawkoepna tah bawi boeih kah Bawi, sengpahrang boeih kah Sengpahrang, aka theenduet tih pakhat bueng ukkung la aka awm Pathen lawngah atue atang a khoek tluep vengah avan pha sak ai. ¹⁶ Ahih bueng he ni aka duek thai nawh; a-u lawngkhaw a tengah yoeii mare thai nawh aangna khuiah te awm. Ahih te a-u lawngkhaw hu vai nawh; a-u lawngkhaw hu thai manawh. Amah tengah hinyahna oen dungyan ukna aana tah awm hawn seh! Amen.

¹⁷ He hing khuiah thaihu thaiha khuehtoenna oen aka len muep thli te oekthloen nawh ham van thui peh. Te ang ueptapna aka awm nawh thaihu khuehtoenna dawngah ngaiuepna khueh u boel seh. Tede mami awmngaihna ham haih muehla soeprep pekung Pathen dawngah te ngaiuepna khueh u seh. ¹⁸ Ahimi lawngah atheen thaihu sai ham, bii theen te bina oen kuirang la awmna u ham, moeihoeihla thlaangtloe a do adan thaina u ham van thui peh. ¹⁹ He tila te ahimi lawngah kaawntheen te amami ham a tung asep u vetih te tah hailam ben ham akung cak ai. Te tila ahimi lawng hingna te a dang thai vetih te tah hingna tangtang la awm ai.

²⁰ Timote, nang lawng khoem abeel ham na kut dawngah avan tloeng boeih te atheenla kuem. Pathen hinyahna aka awm nawh awlthuina oen ngau-athuu awlpuungna, thlaang khatsut lawng asoeng nawh la, “Cuihna” a ti u te reel-aram hawn. ²¹ Thlaang khatsut lawng atah te ang cuihna te ka khueh ti u tih oengna lawngpui te a hang u poen. Pathen kah lungvatna nangmi boeih sawah awm hawn seh.