1 TESALON

¹ Pawl, Silas oen Timote lawngah Pa Pathen oen Bawipa Jesuh Khrih kah thlaang la aka awm Tesalon khaw kah khrihcabu tengah ca kavan pat u. A lungvatna, ngaimawngna tah nangmi tengah awm hawn seh.

² Nangmi boeih ham Pathen tengah awmngaih ciil ka thui u poepa tih ka thangthuina u vengah khaw nangmi te kan poek u yoeyah. ³ Metihtiah, nangmi lawng na oengna te biibina dawngah na tuengsakna, namami kah lungna lawngah bii ruh m’bi sakna, mami Bawipa Jesuh Khrih ah aka cak ngaiuepna na khueh u te Pa Pathen haiah ka hilh u nawh. ⁴ Maya manau thli, Pathen lawng nangmi n’lungna tih amah kah thlaang la awm ham n’tuek u poen. ⁵ Metihtiah Awlthang Theen te nangmi tengla kavan khuen u vengah awl bueng nawh tih huham tharana oen Ciim Muithla khaw, awltak asoengna te asoepa kavan khuen haih poen. Nangmi tengah ka awm u vengkah kaimi kah khawsakna te na ming u poen; te tah nangmi lawng na theenna ham ni. ⁶ Nangmi lawng kaimi oen Bawipa kah moeiboe te na oett u, patangraina yahawh hlang na tawng u vengah khaw, Ciim Muithla tengkah aka law awlthang te awmngaih oen na do u. ⁷ Tedawngah nangmi tah Macidonia oen Akhaia khaw kah aka oeng thlaang boeih ham oett koeila na awm u poen. ⁸ Metihtiah nangmi teng kalawng aka cet Bawipa kawng awlthang te Macidonia oen Akhaia ram pum bueng ah nawh tih nangmi lawng Pathen na oengna kawng awlthang lawng te peng tawm ah cet khok poen. Tedawngah kaimi lawng thui ham ngoe tlaih nawh. ⁹ Nangmi tengah kamyin la ka law u vengkah kaimi metila nan do nan dan u kawng te khaw, kutsaimuei te na hoett u tih Pathen te metila na pan u tite khaw, aka soeng tih aka hing Pathen kah bii te bi ham oen ah, ¹⁰ Vaan kalawng aka law ham a Capa na lamtoen u te khaw ahimi boeih lawng a thui u. A Capa Jesuh tah duekna kalawng a thawh sak tih aka law ham koei Pathen thinsana kalawng mami loeihsakkung ni.

¹ Maya manau thli, nangmi tengah yin la ka law te apoei-oep nawh ni tite namami lawng na ming u. ² Tesalon khaaw ah nangmi tengla ka law thlan vengah kaimi he Filipi khaaw ah metihtlukla n’thena u tih raina mai awm cakhaw, amah teng kalawng aka law Awlthang Theen te nangmi tengah thui hamla Pathen lawng kaimi he thincakna m’peek u. ³ Nangmi tengah kaimi lawng reenna kavan bih u he asoeng nawh oen kawpoek ciimna nawh oen nawh tih, a-u khaw thailatna ham te ka ngaih u nawh dawngah ni. ⁴ Pathen lawng kaimi he n’noemcai tih ueppang koei, tueng-aleng a ti dawngah Awlthang Theen thui ham bii m’peek u tih amah lawng thui sak ham a ngaih angla te ka thui u. Kaimi lawng thlaang kah kawtawngna te ka yawm u nawh tih kaimi kah poekna noekdakkung Pathen kaw te tawng ham ni ka yawm u. ⁵ Nangmi lawng na ming u angla kaimi lawngah nangmi te koehna awl ka thui u nawh, apueh ngaihmoekna te dahkhoepna awl khaw ka thui u nawh, Pathen tah kaimi kah sausi la awm! ⁶ Kaimi lawng nangmi tengkah khaw, thlaangtloe tengkah khawseh koehna te dang ham ka yawm u nawh. ⁷ Khrih kah celtuih la ka awm u dawngah te ang te nangmi tengah ka thoehtham thai ngoen ta, tede nangmi tengah ka awm u vengah te a manu lawng a ca a nau thli a dawm athlai angla nangmi te kawdaw boe-ngaaina oen kan dawm u. ⁸ Kaimi lawngah nangmi te kan lungduetna dawngah Pathen tengkah Awlthang Theen bueng ohla kamami kah hingna pateng khaw peek hamla te oepsoehla ka awm u. Nangmi te kan lungduetna tangkiik u mai! ⁹ Maya manau thli, kaimi lawng thatlawh thaboepla bii ka bi u te na hilh nawh cawini! Pathen tengkah Awlthang Theen nangmi teng ka thui vengah te nangmi kah thalrih la ka awm nawh ham yiin, daai bii ka bi u.

¹⁰ Nangmi oengca thli oen kaimi kah benbaw benpangna he aka ciim, aka doeng tih thawlhpalhna a awm nawh te nangmi khawseh, Pathen khawseh kaimi kah sausi la na awm u. ¹¹ Ana pa lawng a ca thli te a dawm a thlai angla nangmi pakhat rip te kaimi lawng kan dawm kan thlai u te na ming u. ¹² Kaimi lawng nangmi te thathluena awl, ngaimawngna awl kavan thui u tih amah Ram oen ah ruep-awmna te paang hamla nangmi khuekung Pathen awmngaihna koei la na hingna u ham kan thuituen u. ¹³ Kaimi lawngah Pathen tengah awmngaih ciil ka thuina kawng atloe awm hun. Kaimi lawng Pathen awl te nangmi tengla kavan khuen vengah thlaanghing kah awl angla nawh tih, Pathen kah awl angla te na hutung u tih na do u, te tah ataktang ni. Metihtiah aka oeng nangmi tengah Pathen lawng bii a bi. ¹⁴ Maya manau thli, Judia ram kah Pathen khrihcabu boeih oen Khrih Jesuh kah thlaang thli lawng a tawng u te ang van te, Judah thlaangphun lawng ahimi te a heem a tek van angla nangmi khaw namami ram khui thlaang thli kah heemtekna patang te na khang u. ¹⁵ Judah thlaang thli tah Bawipa Jesuh oen tawngha thli te a ngawn u tih mami heemtekkung la khaw awm u. Ahimi lawng metihtlukla kaw a the sak! Thlaang boeih kah raal la awm u. ¹⁶ Kaimi lawngah thlawnna awl Gental thlaang thli tengah ka thui u te toeng sak hamla ahimi lawng a yawm u. He tila te ahimi lawng thawlh poepa u tih amami kah thawlhna boeih te asoep sak u.

¹⁷ Maya manau thli, thinkaw lungbui oen tah m’pekbo u nawh de pumtaksa oen kawlkalh ah m’pek u vengah he kan ngaai tangkiik u tih nangmi oen huh u koep ham te ka yawm u! ¹⁸ Nangmi tengah law koep ham ka ngaih u. Kamah he law koep ham vaikhat cang nawh ka yawm de Seitan lawng n’kang mangkhak. ¹⁹ Ataktang la, a-u thlaangtloe ohla Bawipa Jesuh a law koep vengah amah haiah taana oen m’pai u vengah tah nangmi he ni kaimi kah ngaiuepna, awmngaihna oen thangpawmna la na awm u ai. ²⁰ Kaimi kah ruep-awmna oen awmngaihna tangtang tah nangmi ni!

¹ Aboetna atah ka kaw tamte u tlaih nawh tih mami bueng he Aaten khaaw ah awm u mai sih tila awl ka khueng u coengah, ² Khrih kawng Awlthang Theen thuina ah kaimi oen Pathen bii aka bi haih van, mami kah manau Timote te kavan tuih u. ³ He ang heemtekna patang na khang u dawngah nangmi a-u khatca khaw hu benla mel koep nawh ham, nangmi te tha thlue sak ham oen ah nangmi kah oengna te cak sak hamla ahih te kavan tuih u. Mami lawng heemtekna patang n’khang he Pathen kah kawngaihna avaang athal van ni tite namami lawng na ming u. ⁴ Nangmi tengah ka awm u vengah te mami lawng heemtekna patang n’khang ai tite kavan thui oepsoeh poen; ka thui angla thoeng khoet tangtang tite na ming u. ⁵ Tedawngah ni Timote kavan tuih. Ka kaw tamte tlaih nawh tih nangmi kah oengna kawng te ming ham ka ngaih dawngah ahih te kavan tuih. Nangmi te Seitan lawng n’suek u vetih kaimi kah bii boeih te apoeila coengg hau ai tite ka lakueng.

⁶ Tahe ah Timote tah va meel koep poen tih nangmi kah oengna oen lungna kawng awlthang te avan khuen. Kaimi he atheen benla na poek poepa u tih kaimi lawng nangmi te huh kan ngaih u van angla nangmi lawngkhaw kaimi he huh ham na ngaih u van tite avan thui. ⁷ Tedawngah maya manau thli, kaimi lawng raina oen thekhana ka tawng cakhaw nangmi kah kawng lawngah ka tha avan thlue sak, ⁸ metihtiah nangmi lawngah Bawipa oen pumkhatla hingna dawngah acakla na pai u poen tih tahe ah mami he n’hing tangtang poen. ⁹ Tahe atah nangmi kawngah Pathen tengah awmngaih ciil n’thui thai poen. Nangmi kawngah awmngaihna amah haiah n’huh u dawngah amah tengah awmngaih awl ka thui. ¹⁰ Nangmi te pumpakla kan huh thai tih na oengna dawngah angoena te tawm athap hamla thinkaw tang oen yiin daai ka bih poepa.

¹¹ Nangmi tengah kaimi ka law thaina ham mami kah Pa Pathen oen Bawipa Jesuh lawngah lawngpui van roek hawn seh! ¹² Nangmi khat oen khat khawseh, thlaang boeih na lungna u te khawseh kaimi lawng nangmi kan lungna abo van angla Pathen lawng van roeng sak tare seh. ¹³ He tila nangmi te amah lawng tha avan ra sak vetih Bawipa Jesuh amah kah thlaang boeih oen a law vengah nangmi tah Pa Pathen haiah thlaangsoep thlaangciim la na awm u ai.

¹ Aboetna ah maya manau thli, Pathen kawhoena ham metila na hing u ham a awm tite kaimi tengah na cang u poen. Kaimi tengkah na cang u angla te na hing u hamla awm tih yahawh ngaaila na hingna tare ham Bawipa Jesuh miing oen ah kan ceel u. ² Bawipa Jesuh kah saithaina aana oen thuituenna kan peek u te na ming u. ³ Pathen lawng nangmi te ciim sak ham oen ah hutaa tawngpa thawlhna cipp muelmang sak ham a ngaih. ⁴ Nangmi tawngpa boeih lawngah aka ciim tih hinyah koei la na yu oen benbaw benpang ham te ming uh, ⁵ Pathen aka ming nawh thlaang hurthok angla pumsa hue-ngaihna oen hing u boel. ⁶ Tecoengah he kawngah he a-u lawngkhaw khrihca paya laikoei sawah thawlhpalhna sai boel seh, koeih vaih nawh la proeih mak boel seh. Te tila aka sai boeih tah Pathen lawng dan a peek ai tite kavan thui u tih nangmi te ngaithuenna kan peek u poen. ⁷ Pathen lawng mami he cuk-halhna dawngah bawlneeng sak hamla n’khue nawh tih aciim acaihla awm ham ni n’khue u. ⁸ Tedawngah a-u khaw he kah cangpueina he aka vai nawh tah thlaanghing te hoett nawh, tede amah kah Ciim Muithla pekung Pathen te ni a hoett poen.

⁹ Nangmi lawng aka oeng na paya laikoei thli lungna ham a kawng te capat kavan thut ham ngoe nawh. Nangmi khat oen khat lung u ham Pathen lawng namami te n’cang puei u poen. ¹⁰ Nangmi lawngah ataktangla Macidonia rampum kah maya manau boeih te na lungna u poen. Tedawngah maya manau thli, te tila na lungna u tare ham kan coep kan ceel u. ¹¹ Kavan thui u poen angla acuep amueihla khawsak ramsak ham poek uh, namami kah bungkhutna dang ham na bii na lawh te tluep ngaithuen uh. ¹² Te atah aka oeng nawh thlaang thli lawngah n’hinyah u vetih na ngoena boeih ah te thlaangtloe sawah pangtung ham ngoe manawh.

¹³ Maya manau thli ngaiuepna aka khueh nawh thlaang thli angla nangmi na kaw a the nawh ham aka duek thli kawng awltak te nangmi ming sak hamla ka ngaih. ¹⁴ Jesuh tah duek tih tho koep tite mami lawng n’tangna u, tedawngah amah te oeng ruila a ka duek boeih tah Jesuh oen haih ah Pathen lawng avan khuen koep ai tite mami lawng n’tangna.

¹⁵ Tahe ah nangmi kan cang puei u he tah Bawipa kah cangpueina ni. Bawipa a lawna khawhin ah mami aka hing hue lawngah he aka duek thli te n’khall lettat manawh. ¹⁶ Metihtiah, awlpeekna paang awl, vanthlaang ukkung kah paang awl, Pathen kah pengsara awl oen Bawipa amah te vaan kalawng va rum thuk ai Khrih oeng ruila aka duek thli te lamhala tho u vetih, ¹⁷ tecoengah teveng tue ah aka hing mami tah khawhi ah Bawipa oen huh u hamla muui dawngah ahimi oen n’tun haih ai. Te tila te mami tah Bawipa oen n’awm haih poe poen ai. ¹⁸ Tedawngah he awl oen ah he nangmi pakhat oen khat thaphawh uh.

¹ Maya manau thli, he ang thaihu a thoengna ham atue atang oen khawhin kawng he nangmi tengah ca thut ham ngoe nawh. ² Metihtiah Bawipa a lawna Khawhin tah khawyiin ah thlaanghuuen angla law ai tite nangmi lawng atheenla na ming u. ³ thlaang thli lawngah, “Soeprep boeih tah ding asuek tih ngaimawng ngaitoela awm,” a ti u vengah bawtbet khawlai maiah raina lawng ahimi te a tlaak thil ai! Tattloel hutaa ca-awm tlawhna lawng kawlkalh ah a pha angla te awm vetih a-u thlaang khaw deem manawh. ⁴ Tede, maya manau thli, nangmi tah yiinna khuiah na awm u nawh dawngah te khawhin lawngah nangmi te thlaanghuuen angla n’let sak manawh. ⁵ Nangmi boeih tah aangna dawngkah thlaang, khawthaih thlaang la na awm u. Mami he tah khawyiin thlaang, yiinna thlaang nawh ni. ⁶ Tedawngah mami tah thlaangtloe angla ihdut ham awm nawh, mami lawng hinghang u silang huertuela awm u sih. ⁷ Thlaang he tah khawyiin ah ni a ih u, khawyiin ah ni ahimi yuu a ruui u. ⁸ Tede mami tah khawthaih thlaang ni, huertuela awm u sih. Mami lawng oengna oen lungna te kahkawng rangphaw la daan u silang tah mami kah ngaiuep thlawnna te thiilumuek la muek u sih. ⁹ Pathen lawng amah kah thinsana patang khang sak hamla mami he n’tuek nawh, mami kah Bawipa Jesuh Khrih rang oen thlawnna te paang ham ni n’tuek u; ¹⁰ amah a law vengah mami lawng duek ah khaw-seh, hing ah khaw seh amah oen hing haih ham ahih tah mami ham duek. ¹¹ Tedawngah nangmi lawng tahe ah na sai u angla te khat oen khat thaphawh u langtah khat oen khat bawmcem uh.

¹² Maya manau thli, khrihca hingna oen nangmi thuituen tih lawngpui aka nueh, nangmi tim ah bii aka bi thlaang thli te na hinyah u ham reenna kavan bih. ¹³ Ahimi kah biibina dawngah te asangla hinyahna lang lungna uh. Nangmi khat oen khat roeproeicala awm uh.

¹⁴ Maya manau thli, nangmi lawngah thayong thlaang te ngaithuenna pe uh, riyawp thlaang te thincakna pe uh, tha aka yoek thlaang te bawmcem uh, thlaang boeih tengah na kaw daw sak ham kan uen u. ¹⁵ A-u lawngkhaw athe te athe van oen thung u boel, khat oen khat sawah khawseh, thlaang boeih sawah khaw seh theenna te sai hamla poek yoeyah uh.

¹⁶ Awmngaih poepa u lah, ¹⁷ boet ohla thangthui uh, ¹⁸ soeprep boeih ah awmngaih ciil thui uh, Khrih Jesuh oen pumkhatla na hingna dawngah he tila hing hamla Pathen lawng a ngaih. ¹⁹ Ciim Muithla te kanghalh u boel; ²⁰ Muithla kah bawnghorhna oen a thui awl te ngaai lakna ohla awm boel. ²¹ Soeprep boeih te noekdak uh, atheen te lo uh, ²² athe thaihu boeih te reel-aram uh.

²³ Ngaimawngna pekung Pathen lawng soeprep ah n’ciim sak u hawn seh, mami kah Bawipa Jesuh Khrih a law vengah nangmi kah pum boeih, na muithla, na hingna, oen pumtaksa te amah lawng kuem selang tah thawlhpalhna boeih kalawng n’loeih sak seh. ²⁴ Nangmi khuekung te tah uep-awm la a awm dawngah te tila avan sai ai.

²⁵ Maya manau thli, kaimi ham khaw thangthui uh.

²⁶ Aka oeng boeih te boenhui angla lungna oen toei uh.

²⁷ Bawipa kah saithaina aana oen ah he capat he aka oeng thlaang boeih tengah tae pe ham reenna kavan bih.

²⁸ Bawipa Jesuh Khrih kah lungvatna tah nangmi boeih sawah awm hawn seh.