1 PITER

1 PITER

¹ Jesuh Khrih kah celtuih kai Piter lawngah--

² Jesuh Khrih awl te na ngaai tih amah kah thisen oen ciim sak hamla Pathen kah mengtengna angla nangmi tah tuek la na awm u tih amah Muithla lawng thlaangciim la n’sai u. Lungvatna oen ngaimawngna tah nangmi tengah asoepbirla awm hawn seh.

³ Mami Bawipa Jesuh Khrih kah ana Pa oen Pathen te mami lawng uem u lah sih! Metihtiah aka lenduet a lungna lawngah Jesuh Khrih te duekna kalawng a thawh sakna rang oen mami he hingna a thaai m’peek poen. Tedawngah mami tah aka hing ngaiuepna oen m’betoet u, ⁴ Pathen lawng a thlaang thli hamla a khueh pe yotheen kam-awmna yahawh hlang te pang van hamla n’ngaiuep u. Te yotheen kam-awmna te tah amah lawng nangmi ham vaan ram ah avan kuem tih te huen atah honn thai nawh, rong-athaang thai nawh tih muingen thai nawh. ⁵ Atue boetna apha vengah tueng sak hamla a khueh oepsoeh thlawnna te oengna rang oen ah Pathen kah huham tharana lawng akhoem abeel tih nangmi ham vaan ah avan khueh ro na pang ham koei ni.

⁶ Nangmi lawng khawdeng patang phun soeprep te na khang u dawngah tahe veng kawlkalhca tah na kaw the u de, thlawnna kawngah he awmngaih u lah. ⁷ He ang raina na tawng u he nangmi kah oengna te ataktang oen ataktang nawh te noekdakna ham ni. Phe thai koei la aka awm sui pateng khaw hai oen ah anoekdak ta; tedawngah sui lak ah aphu aka awm ngaai nangmi kah oengna lawng raina he ueh thai ham ah noekdak la awm. Te dengah ni Jesuh Khrih a tuengna Khawhin ah nangmi lawng thangpawmna, ruep-awmna oen hinyahna te na dang u ai. ⁸ Nangmi lawng amah te na hu u nawh de na lungna u, tahe ah na hu u nawh de na tangna u. Tedawngah awl oen thui thai nawh awmngaihna alentloe oen asang koek kawhoena te na khueh u, ⁹ Metihtiah nangmi lawng amah oengna dawngah mengtengna muithla thlawnna te na dang u poen dawngah ni.

¹⁰ He thlawnna kawng he tawngha thli lawng acek-aneh la a doet adap tih a tlap u. Pathen lawng nangmi peek ham a ngaih kutdo kawng te a thui oepsoeh. ¹¹ Ahimi lawngah, te kutdo te meveng tue ah a awm vetih metuek tue ah a law ai tite ming hamla a yawm u tih tahe veng atue he ahimi kaw khuiah aka awm Khrih Muithla lawngah a khi pe. Muithla lawngtah Khrih lawng patang khang ham koei oen ah, te tila patang a khang dawngah dang ham koei ruep-awmna te a thui oepsoeh poen. ¹² Tawngha thli lawng bii a bi u he tah amami kah hoeikhangna ham nawh tih nangmi kah hoeikhangna ham ni tite Pathen lawng a thui pe. Nangmi tengah awlthang aka thui laipai thli oen tawngha thli lawngah a thui oepsoeh a kawng alam te vaan kah avan tuih Ciim Muithla tharana huham oen ah avan phawng poen tih tahe ah nangmi lawng na yaak u poen. He kah thaihu kawng he vanthlaang thli lawng pateng khaw yaakming ham a ngaih u.

¹³ Tedawngah bii bi hamla na thinkaw te roekbah oepsoeh uh. Ahuertuela awm u lang, Jesuh Khrih a tueng vengah na dang ham koei lungvatna kutdo dawngah na ngaiuepna te khueh uh. ¹⁴ Pathen awl te ngaai uh, nangmi lawng n’tu khaw na ming u nawh vengah namami kawngaih la na hing u angla te hing u tlaih boel. ¹⁵ Nangmi khuekung Pathen te aciim van angla nangmi khaw na saina boeih dawngah aciimla awm uh. ¹⁶ Caciim lawngah, “Kai tah ka ciim dawngah nangmi khaw aciimla awm uh,” tila a thui.

¹⁷ Nangmi lawng Pathen tengah na thangthui u vengah ahih te a Pa tila na khue u, ahih lawng atah thlaang boeih te a saina taring ah pekbona awm ohla awl a cek. Tedawngah he dilai dawng na hing khuiah he amah te hinyahna langtah hing u lah. ¹⁸ Nangmi lawng na patuer hue tengkah na pang patoeng hoeikhangna aka awm nawh hingna kalawng aphu a peek tih n’loeih sak te nangmi lawng na ming u. Te tah sui, ngun angla mui-angen thai koei thaihu nawh ni. ¹⁹ Te thaihu tah angaw aha awm nawh tih cawttbauh kap nawh tuuca oen aka lo u aphu aka tlo Khrih kah luciik thawthuengna te ni. ²⁰ Ahih te tah dilai suen thlan vengah Pathen lawng a tuek poen tih he kah atue khawhin aboetna tue vengah nangmi ham avan tueng sak. ²¹ Amah rang oen Pathen te nangmi lawng na oeng u tih, Pathen lawng amah te duekna kalawng a thawh sak tih ruep-awmna te a peek; tedawngah nangmi kah oengna oen ngaiuepna tah Pathen dawngah cak khak.

²² Tahe ah nangmi lawng awltak te na vaina rang oen nangmi tah na ciim u poen tih oengca na puei na paw thli te lungna taktak oen na lungna u poen, tedawngah nangmi khat oen khat thinkaw tak oen lung u tare lah. ²³ Tedawngah aka hing tih dungyan aka cak Pathen awl rang oen nangmi tah na thangthaai u poen; aka duek thai nu oen pa kah ca-anau angla nawh tih aka duek thai nawh kah ca-anau la na awm u. ²⁴ Caciim lawngah, “Thlaang boeih he sul-aram angla ni a awm, ahimi kah ruep-awmna boeih tah raipai angla awm, sul-aram khaw au tih reu, raipai khaw tlumtloei, ²⁵ tede Bawipa kah awl tah yoeyahla cak” tila a thui. Nangmi tengah avan phawng u awlthang theen tah he poen ni.

¹ Tedawngah namami kah the-arana boeih, hoem awl thuina, thai-alatna, uett-eena, awlthe awlkha te hoett u loeih. ² Camoe thangpek angla awm u langtah muithla ben kah suuktui ciim te hall yoeyah uh, muithla ben suuktui ciim te na awkk u atah na roeng hang vetih thlawn la na awm u ai. ³ Caciim lawngah, “Bawipa tah thlaang reenkung ni tite namami roe lawng na ming u poen” a ti angla te awm.

⁴ Bawipa tengah law u lah, ahih tah aka hing lunghiim thlaanghing lawng aphu aka awm nawh angla a hoett de Pathen lawng aphu aka tlo lunghiim la a tuek poen. ⁵ Nangmi khaw aka hing lunghiim angla law u langtah, namami roe te muithla ben kah tempal bok-im sakna la sai u lah. Te huen ah te aciim khawsoeih angla bii na bi u vetih Pathen lawng a do ham koei muithla ben kah luciik te Jesuh Khrih rang oen Pathen tengah na nawn u ai. ⁶ Tedawngah caciim lawng, “Kai lawngah lunghiim phutlo pakhat ka tuek, te lunghiim te Zaion ah imkil lungdang suemna la ka khueh; a-u khaw ahih te aka oeng tah metuek veng khaw a kaw boet manawh,” tila a thui. ⁷ He Lunghiim he aka tangna mami ham tah phutlo tangkiik la awm, tede aka tangna nawh thlaang thli ham tah; “Imsakung hue lawng aphu aka awm nawh angla a hoett u lunghiim tah, te thli boeih lak ah awlpui koek lunghiim la awm poen.” tila a thui. ⁸ Caciim atloe pakhat lawngah, “He lunghiim tah thlaang a ploengna lunghiim la awm ai, he lunghiim lawng ahimi te a tlim sak ai.” tila a thui. Ahimi lawngah awl te a tangna u nawh dawngah ploeng u; he tah ahimi hamla Pathen kah kawngaih roe ni. ⁹ Tede nangmi tah a tuek thlaangphun, seng-pahrang kah khawsoeih, thlaangphun ciim, Pathen kah thlaangphun la na awm u. Yiinna khui kalawng amah kah aangna khuila nangmi khuekung Pathen lawng kawpoekrai a sai te thui sak ham nangmi te n’tuek u. ¹⁰ N’hu veng atah nangmi he Pathen kah thlaang la na awm u nawh de tahe atah nangmi he amah kah thlaang la na awm u poen; anoekbuet atah Pathen kah reenna te na ming u nawh de tahe atah a reenna te na dang u poen.

¹¹ Ka lungna paya thli, he dilai han ah kamyin kamlai oen thlaangpoeng poedoe angla aka awm nangmi tengah reenna kavan bih! Muithla oen aka raal u poepa pumsa ngaihna lawngah nangmi te n’taa u hau boel seh. ¹² Nangmi kah khawboe ramlang he Pathen aka ming nawh thlaang thli tim ah atheen soeh ham awm, ahimi lawng nangmi te athe saikung la m’peel mai cakhaw nangmi kah moeiboe theen te a huh u vetih Pathen a lawna Khawhin ah amah te a thangpawm u badai.

¹³ Bawipa te na hinyah u van angla saithaina aana aka khueh ukkung thlaang boeih kah a awl te ngaai pe uh: saithaina aana sangkoek khuehkung sengpahrang sangluel kah awl te ngaai pe uh, ¹⁴ athe saikung thli dan tat ham oen theenna aka sai thli koeh hamla a khueh ram uk-bawi hue kah awl khaw ngaai pe uh. ¹⁵ Metihtiah amah ngaih la awl sah sah aka cal thlaangngau paathuu hue te nangmi kah thaihu theen saina lawng a awl phah sak seh tila Pathen lawng a ngaih ni. ¹⁶ Nangmi lawngah ahoeng ahoett la aka awm thlaang angla khaw sa uh; tede nangmi lawng ahoeng ahoett la na awmna te athe-ara thlipdahna ham hawna u boel, Pathen kah sal angla khaw sa uh. ¹⁷ Thlaang boeih te hinyah uh, aka oeng na puei na paw te lungna uh, Pathen te rih u lang sengpahrang sangluel te khaw hinyah uh.

¹⁸ Nangmi tuihyoeihthlaang thli aw, namami kah bawi manghai awl te ngaai u langtah ahimi tengah hinyahna te tueng sak uh. Reenna a khueh tih kaw aka poek thai bawi manghai hue bueng ohla tluunghuel bawi manghai hue te khaw hinyah uh. ¹⁹ Nangmi lawngah Pathen kawngaih te na ming u dawngah patang khang koei nawh te awl puung muehla na ueh u atah Pathen lawng nangmi te yotheen kam-awmna m’peek ai. ²⁰ Nangmi lawng namami kah saithawlhna dawngah patang khang koei bawh-apaina patang te na khang u atah metila koeh ham koeila a awm ai? Tede asoeng thaihu na sai lal maiah nangmi lawng patang na khang oh atah Pathen lawng yotheenna m’peek ai. ²¹ He tila awm ham ah Pathen lawng nangmi te n’khue u, metihtiah Khrih amah roe lawngah nangmi ham patang a khang tih amah khowleh thuih ham te nangmi kah oett koeila avan ceh taak. ²² Ahih tah thawlhna khat khaw sai nawh, me veng khaw hoem awl thui vai nawh. ²³ Awlthe awlkha oen asal aphaam u vengah te ahih lawng awlthe awlkha oen thung nawh; patang a khang vengah thlaang te hih-ahuut nawh, tede adoengla awl cekkung Pathen te ni a uepna. ²⁴ Mami lawng thawlhna ah duek tih doengna ah hing hamla Khrih amah lawng a pum dawngah mami thawlhna te thinglam dawng a phueih poen. Ahih kah boengha ngaw oen nangmi tah na hoeih u poen. ²⁵ Nangmi tah lawngpui aka hang tuu oen na lo u, tede tahe tah nangmi kah hingna Doenkung Tuudoen hu ah bang hamla nangmi te m’mel sak koep poen.

¹ Tetih van angla nangmi yu-aca hue lawngah na vaa thli kah awl te na ngaai ham awm. Te dengah ni na vaa thli tim ah Pathen awl aka tangna nawh pakhat khat te a awm atah nangmi kah moeiboe lawng a taa vetih a oeng ai. Nangmi lawng awl kam at khaw thui ham ngoe manawh, ² metihtiah nangmi kah khawboe ramlang te metila a ciim tih hinyah koei la a awm te ahimi lawng a huh u ai. ³ Nangmi kah na thlaang theenna te asaw ahan kah cawng acahna, na sam thloeih-thlam te ang thli, khawh-arang oen thoekcauna te ang thli, hi-acuu buen anaakna oen thoeicamna te ang thli dawngah awm ham nawh ni. ⁴ Te lak ah Pathen mik huh ah phutlo koek thlaangtheenna tangtang tah nangmi kah thinkaw khuiah aka awm boe-ngaaina oen kawdawna dawngah ni a awm. ⁵ Metihtiah yan veng kah Pathen aka uepna hutaa thli kah a thlaang theenna tah a vaa thli kah awlngaaina dawngah awm. ⁶ Sarah tah te tila awm; Ahih lawng Abraham kah awl a ngaai tih ahih te bawipa a tina. Nangmi lawng theenna te na sai u tih rihna tu khaw na khueh u nawh atah ahih kah canu la tahe ah na awm u.

⁷ Tetih van angla nangmi tawngpa hue lawng yu-aca oen thik-at la awm haih u lang ahimi te tha aka ra nawh ni tite yaakming uh. Ahimi te hinyahna oen voemtoei uh, metihtiah ahimi lawngkhaw Pathen kah hingna kutdo te nangmi oen thik-at la dang haih van ham ni. Na thangthuina te kanghalhna khat khaw a awmna nawh ham te tila te sai uh.

⁸ Hukhueng ah awl uen hamla ka ngaih tah; Nangmi boeih lawng thinkaw lungbui poekna te khat la kang khueh uh, maya manau angla khat oen khat lung u langtah reenna oen boe-ngaaina oen ah awm uh. ⁹ Nangmi lawng athe te athe van oen ah, tapvoepna te tapvoepna van oen ah thung u boel; te lak atah yotheen kam-awm peekna oen thung uh, metihtiah Pathen kah awlkam yotheen kam-awmna te nangmi peek hamla ni amah lawng n’khue u. ¹⁰ Caciim dawngah, “A-u khaw hing khuiah awmngaih hamla a ngaih tih atue theen huh ham aka ngaih tah, awlthe thui te kuemsuem selang hoem awl thui te toeng loeih seh. ¹¹ Ahih lawngah athe te mangthawng taak selang atheen te sai lah seh; ahih lawngah thinkaw lungbui boeih oen roeproeina te tlap seh. ¹² Metihtiah Pathen lawng thlaangdoeng te a doen-acaang tih ahimi kah thangthuina te a hutung; tede athe-ara te aka sai te tah Pathen lawng a mangthawng taak” tila a thui.

¹³ Nangmi lawng theenna te sai ham thinkaw a thluembuek tang atah a-u lawng nuem patang raina te m’peek tang ai? ¹⁴ Tede nangmi lawngah doengna na sai u lal maiah patang na khang u atah nangmi tah yotheenna aka dawng thlaang ni! A-u khaw rih u boel, lakueng khaw lakueng u boel. ¹⁵ Tede na thinkaw lungbui oen Khrih hinyah uh, na Bawipa la khueh langtah hinyah u lah. Nangmi lawng na kaw khuiah ngaiuepna na khueh u te thuicaih hamla pakhat khat lawng nangmi te n’doet u atah meveng tue ah khaw ahimi kah awldoet te thung hamla oepsoehla awm uh. ¹⁶ Tede awldoetna te kawdaw awlding oen hinyahna oen ah thung pe uh. Khrih kah hubang la na awm u dawngah nangmi kah khawboe ramlang theen te athela aka thui thli lawng amami kah awlthui han ah ayah toe la a awmna u ham thinkaw te ciim sak uh. ¹⁷ Athe sai dawngah patang khang lak ah Pathen kawngaih la a awm atah theenna sai dawngah patang khang te theen ngaai. ¹⁸ Metihtiah Khrih tah thlaangthawlh boeih yuengla vai at ah akhoek koeng la duek poen, nangmi te Pathen teng ceh puei ham thlaangthawlh yueng la thlaangdoeng te duek. Ahih te pumsa ben atah duek de, muithla ben atah hing koep tih, ¹⁹ muithla ben kah amah hingna oen muithla thongtla thli tengla cet tih awlthang a phawng pe. ²⁰ He muithla thli tah Noah lawng tuisangphaw a sai vengah Pathen lawng thinsan kawdaw oen a ring khiing de awl aka ngaai tlaih nawh hue te ni. Tuisangphaw khuila aka kuun thlaang a yawlca, apum boeih la pareet hue te tui dawngkah a thlawn, ²¹ te tah tahe ah nangmi kah thlawnna baptisma miknoekna te a thuinuetna ni. He baptisma he tah pum dawngkah ciimcaih nawh te silhna nawh tih athe atheen pekbona kawpoek theen oen Pathen tengah awlkam saina ni. Jesuh Khrih thawhkoepna rang oen ah nangmi tah te baptisma oen n’thlawn u. ²² Ahih tah vaan la luui tih Pathen bantang ben ah te awm tih vanthlaang boeih oen vaan ah saithaina aana khuehkung boeih oen ah huham tharana boeih te a uk.

¹ Khrih lawng amah pum dawngah patang a khang poen dawngah nangmi lawngkhaw ahih kah thinkaw a khueh te ang te khueh u van lang na tha thlue sak u lah; metihtiah a-u khaw pumsa dawngah patang aka khang tah thawlhna oen bawl-aneeng u tlaih nawh. ² Tedawngah tahe kalawng tah dilai dawngah hingna na khueh khui roekk tah thlaanghing kah kawngaihna ohla Pathen kah kawngaihna lawng nangmi te n’ uk u seh. ³ Pathen aka ming nawh thlaang thli lawng a sai u angla te nangmi lawng sai van hamla atue atang akhoek anoen te n’hu vengah na hawna u poen. Nangmi lawng na hingna te sai koei nawh yahpawhna, cuk-halhna, yuu ruuina, yuukung tai la ah so-atena, cingdoek halangna, tuiilehkap kutsaimuei bokna dawngah na hawna u poen. ⁴ Tahe atah nangmi lawng Pathen aka ming nawh thlaang thli kah khawpaw rang-au la a hingna dawngah te na thuum pe u tlaih nawh dawngah a kawpoek rai u tih tedawngah nangmi te n’thui theet u. ⁵ Tede thlaangduek oen thlaanghing awlcek ham oepsoeh la aka awm Pathen tengah ahimi lawng a hingna oen a saina boeih te a thui u ai. ⁶ Tedawngah ni Awlthang Theen he thlaangduek thli tengah khaw a thui pe. Thlaang boeih awl a cek van angla ahimi khaw pumsa la a hing vengah te awl cek la awm poen; te cakhaw ahimi tengah awlthang theen a thui pe he tah muithla ben kah a hingna lawngah te Pathen a hing van angla ahimi hingna hamla ni.

⁷ Thaihu boeih kah aboetna tah yoeii poen. Tedawngah thangthuina khueh thaina ham ah mah oen mah kuemsuem u langtah a huertuela awm uh. ⁸ Atloe boeih lak ah pakhat oen khat thinkaw tak oen lung uh, metihtiah lungna lawngtah thawlhna boeih te a khuk a dah dawngah ni. ⁹ Kawhuet cakbat ohla pakhat oen khat im yin luui sak uh. ¹⁰ Nangmi pakhat rip he Pathen kutdo atloetloe kuemkung theen la na awm u van angla Pathen teng kah na dang kutdo te thlaangtloe kah theenna hamla hawna uh. ¹¹ Thaihu soeprep dawngah Jesuh Khrih rang oen Pathen lawng thangpawmna te a dang thaina ham a-u lawngkhaw awl a thui atah Pathen awlthang te thui seh; A-u lawngkhaw bii a bi atah Pathen lawng a peek tha-awm tharana oen bi seh, ruep-awmna oen huham tharana tah dungyan toela amah tengah awm hawn seh. Amen.

¹² Ka lungna ka paya thli, aka tlo tangkiik noekdakna patang na khang u dawngah nangmi sawah aka awm noek nawh thaihu va thoeng tila na kawpoek rai sak u boel. ¹³ Te lak atah Khrih kah patang khangna te na khang u van dawngah awmngaih u lah. Te ah ni ahih kah ruep-awmna a tueng vengah nangmi lawng awmngaihna oen na betoet ai. ¹⁴ Khrih hubang la na awm u dawngah nangmi te n’thui theet u atah na kaw hoe sak u lah; he tah Pathen Muithla ruep-awmna oen aka be muithla te nangmi sawah awm ti ngaihna ni. ¹⁵ Nangmi pakhat khat lawngah patang raina na khang u te, thlaang ngawnna, huen-acanna, lumlai huhna, thlaangtloe kah kawng-alam rawlraakna dawngah patang khang u boel. ¹⁶ Tede khrihca la na awm u dawngah patang na khang u oh atah yak u roe boel, nangmi lawng Khrih miing te na lengkoena u dawngah Pathen te koeh u lah.

¹⁷ Awlcekna tongnan hamla atue khoek poen tih Pathen kah thlaang thli te lamhacuekla awl a cek ai. Mami tengah lamhacuek la awlcekna a tongnan oh atah Pathen tengkah Awlthang Theen aka oeng nawh thlaang thli tare metila aboetna a awm ai te? ¹⁸ Caciim lawngah, “Thlaangdoeng ham pateng thlawnna te a rai atah; Pathen khueh nawh thlaangthawlh ham tah metihtlukla a rai ai te,” tila a thui. ¹⁹ Tedawngah Pathen kah kawngaih la a awm dawngah khawdeng patang aka khang hue lawng awlkam aka thlauh nawh ahimi saikung Pathen tengah amah oen amah te nawn u ngala seh.

¹ Khrihcabu ahaamca thli kai khaw ahaamca pakhat la ka awm van angla nangmi tengah reenna kavan bih u. Kai tah Khrih kah patang khangna te hukung la ka awm tih aka law ham koei ruep-awmna te khaw pang van hamla ka awm dawngah nangmi tengah reenna kavan bih. ² Pathen peek tuuping te aka khaal tuudoen la awm u lah, thathe huut la awm ohla, Pathen kawngaih angla thathlue thakaw la tuu te doen uh. Bii bi phu dang ngaih maiah bi mailai ohla bi ngaihna thinkaw tang oen ah bi uh. ³ Nangmi kut dawngah avan khueh tuu thli te uk khangrang aih boel langtah tuuping kah oett koei la te awm ham yawm uh. ⁴ Tedawngah Tuudoen Ahaam koek te a tueng vengah a aangna aka duek yum thai tlaih nawh ruep-awmna bawilumuek te nangmi lawng na dang u ai.

⁵ Te tih van la te nangmi roengthaai kumno hue lawng ahaamca thli kah awl te na ngaai u ham awm. Nangmi boeih lawngah boe-ngaaina himbai te bai u langtah pakhat oen khat bawmcem u lah; metihtiah caciim lawngah, “Pathen lawng aka oekthloen u te tah amah khak tih boe-ngaai thlaang teng atah mik-hai a thlampaan sak,” tila a thui. ⁶ Tedawngah atue akhoek vengah Pathen lawng nangmi te pawmsangna ham namah oen namah boe-ngaai lang amah kah huham thara kut dawngah tloeng u hawn. ⁷ Nangmi te amah lawng n’doencang poen dawngah nangmi kah lakuengna boeih te amah pum ah hal u hawn.

⁸ Huertue la awm uh, ngaithuen lang awm uh! Nangmi kah raal, Raaibawi Seitan tah ngeh hamla sa aka tlap tih aka kaawk soeh sathueng angla yingyo soeh poen. ⁹ Nangmi lawng na oengna dawngah te acakla awm u lang Seitan te balkhawng uh. Metihtiah na ming u angla dilai pum ah aka awm oengca pueipaw thli khaw he ang khawdeng patang he a khang u van. ¹⁰ Tede nangmi lawng atue soetca ah patang na khang u kawlkalh coeng atah lungvatna boeih kah Pathen, Khrih ah pumkhat la awmna rang oen amah kah dungyan ruep-awmna te paang van hamla nangmi khuekung Pathen amah lawng nangmi te thlaangdoeng la n’khueh vetih acakla pai thaina oen tha-awm tharana te m’peek ai. ¹¹ Amah tengah huham tharana tah yoeyahla awm hawn seh! Amen.

¹² He capat atoica he Silas kah bawmna rang oen nangmi tengah kavan thut, ahih he uep-awm khrihca maya manau la ka poek ni. Nangmi tengah thaphawhna awl thui ham ka ngaih tih nangmi lawng na dang u lungvatna tah Pathen tengkah tangtang ni tila aka mingkung la ka awm. Te lungvatna dawngah acakla pai uh.

¹³ Pathen lawng a tuek Babilon khaaw kah khrihcabu lawngkhaw, ka capa Mark lawngkhaw nangmi te n’toei u. ¹⁴ Nangmi khat oen khat khrihca lungna oen mok u langtah voemtoei u lah. Khrih ah aka awm nangmi boeih sawah ngaimawngna awm hawn seh.