1 JOHAN

¹ Acuekca veng kalawng aka awm tangte hingna Awl kawng te nangmi tengah ca oen kavan thut u. Te kawng te kaimi lawng ka yaak u, mik oen ka huh u tih ka kut oen ka tek u. ² He hingna he huh thai la ava coengg vengah kaimi lawng ka huh u, tedawngah Pa oen aka awm haih tih mami tengah avan tueng sak dungyan hingna kawng te nangmi tengah kavan thui u. ³ Kaimi lawng ka huh u tih ka yaak u te nangmi tengah khaw kavan phawng u. Pathen oen a Capa Jesuh Khrih oen ah kaimi lawng ka khueh pawlneengna dawngah nangmi khaw na thuum thaina ham kaimi lawng ka huh tih ka yaak te nangmi tengah khaw kavan phawng u. ⁴ Kaimi kah awmngaih asoepna hamla he ca he kaimi lawng kavan thut u.

⁵ Tahe ah, a Capa teng kalawng ka yaak u tih nangmi tengah kavan phawng u awl tah he ni: Pathen tah aangna la awm tih ahih dawngah yiinna roeroe awm nawh. ⁶ Tecoengah mami lawng ahih oen pawlneengna ka khueh n’ti u tih yiinna khuiah ng’awm u atah mami tah awlkaa oen khawseh, saina oen khawseh, hoem awl ni n’thui u. ⁷ Tede ahih tah aangna la a awm angla mami lawng aangna ah ng’awm u atah pakhat oen pakhat pawlneengna mami lawng n’khueh u tih a Capa Jesuh thisen oen soeprep thawlhna kalawng mami n’silh poen.

⁸ Mami lawng thawlhna ka khueh nawh n’ti u atah m’mah oen mah he, thailatna u tih mami khuiah awltak awm nawh. ⁹ Tede mami lawng thawlhna boeih te Pathen tengah m’phawng u atah ahih tah a awlkam cak tih thaihu doeng a sai dawngah mami thawlhna boeih te khawdawp a ngaai vetih mami kah sai thawlh boeih te avan ciim sak ai. ¹⁰ Mami lawng ka thawlh nawh n’ti u atah Pathen te hoem thui la n’sai u tih amah awl te khaw mami khuiah awm nawh.

¹ Ka ca ka nau thli nangmi lawng thawlhna na sai u nawh hamla he ca he kavan thut; tede pakhat khat lawng thawlhna a sai hau atah, Pa, tengah mami yuengla aka bih ham thlaangdoeng Jesuh Khrih n’khueh u. ² Metihtiah, Khrih amah roe he mami kah thawlh khawdawp ngaaina Luciik la awm tih mami kah thawlhna bueng nawh tih thlaang boeih kah thawlhna te khawdawp a ngaai. ³ Mami lawng Pathen kah awlpeek te n’vai atah amah te m’ming u tite aciimla m’ming. ⁴ Thlaang pakhat khat lawng ahih te ka ming ti de, a awlpeek te a vai nawh atah te ang thlaang tah hoem aka thui tih ahih dawngah awltak awm nawh. ⁵ Tede, a-u khaw a awl te a vai atah Pathen kah lungna oen ahih te soep tangtang poen. Pathen oen mami pumkhatla ng’awm tite mingna tah he tila ni, ⁶ a-u lawngkhaw Pathen oen pumkhatla ka awm a ti atah Jesuh Khrih angla awm van ham awm.

⁷ Ka lungna ka paya thli, nangmi tengah kavan thut awlpeek he athaai nawh ni; acuekca kalawng nangmi lawng na khueh tangte awlpeek ruem te ni. Te awlpeek ruem te tah na yaak tangte awl te ni. ⁸ Tede nangmi tengla kavan thut awlpeek he athaai ni; metihtiah he tah athaai ni tila asoengna tah Khrih ah huh la awm tih nangmi dawngah khaw huh la awm. Metihtiah yiinna tah khum tih aangna tangtang te aang poen.

⁹ A-u khaw aangna khuiah ka awm ti tih, a maya manau te a thina atah tahe toe ah yiinna khuiah awm hun. ¹⁰ A-u khaw a maya manau te a lungna atah aangna khuiah awm tih thlaangtloe thawlh sak ham ahih khuiah tu tehca khaw awm nawh. ¹¹ Tede a-u khaw a maya manau te a thina atah yiinna khuiah awm hun; yiinna khuiah yingyawi tih te yiinna lawng mik a pum pe sak dawngah meben la ka ceh ti khaw ming nawh. ¹² Ka ca ka nau thli Khrih rang oen nangmi kah thawlhna te khawdawp a ngaai poen dawngah nangmi tengah he ca he kavan thut. ¹³ Papa thli aw, acuekca kalawng aka awm ahih te na ming u dawngah nangmi tengah he ca he kavan thut. Cadawng caloe thli nangmi lawng Raaibawi te na taa u poen dawngah nangmi tengah he ca he kavan thut.

¹⁴ Ka ca ka nau thli nangmi lawng Pa te na ming u poen dawngah nangmi tengah he ca he kavan thut. Papa thli, acuekca kalawng aka awm ahih te na ming u dawngah nangmi tengah he ca he kavan pat. Cadawng caloe thli nangmi tah na tha a ra u dawngah nangmi tengah he ca he kavan pat. Pathen awl te nangmi khuiah awm tih Raaibawi te na taa poen.

¹⁵ Dilai oen dilai thaihu he khat khaw thintlawhna u boel. Dilai he na thintlawhna u atah Pa te na thintlawhna u nawh. ¹⁶ Dilai thaihu soeprep, pumsa ngaihna, thlaang lawng a huh tih a ngaih thaihu, he dilai dawngkah thaihu soeprep thlaang lawng a phoekthloerna khatca mai khaw Pa teng kah aka law thaihu nawh ni. ¹⁷ Dilai oen dilai thaihu thlaanghing lawng a ngaih he tah khumpel boeih, tede Pathen kawngaih aka sai tah dungyan hing ai.

¹⁸ Ka ca ka nau thli atue boetna yoeii poen! Khrih kah raal law ai tila na yaak u; tahe ah Khrih kah raal thli yahawh hlang thoeng poen, tedawngah atue boetna yoeii poen tila mami lawng m’ming u. ¹⁹ He thlaang thli he mami kah pawlneengna khuiah aka awm tangtang nawh ni, tedawngah mami he ahimi lawng n’ceh taak u poen; ahimi te mami pawlneengna khuikah tangtang kawinih mami tengah awm poe van ai. Tede ahimi tah khatca khaw mami pawlneengna ah aka awm tangtang nawh ni tite aciimphanna ham mami he n’ceh tak u. ²⁰ Tecakhaw nangmi tah Khrih lawngah Ciim Muithla te na sawah avan toi u poen, tedawngah nangmi boeih lawng awltak te na ming u. ²¹ Tedawngah nangmi tengah ca kavan thut he awltak te na ming u nawh dawngah nawh tih, nangmi lawng awltak te na ming u tih awltak dawng kalawng hoem awl va thoeng vai nawh tite nangmi lawngkhaw na ming u van dawngah ni.

²² Tetih atah a-u nuem hoem-thuikung? Jesuh tah Messiah nawh ni tila aka thui te hoemthuikung la awm. Te ang thlaang te tah Khrih kah raal ni, Pa oen Capa te aka hoett thlaang ni. ²³ A-u khaw Capa aka hoett tah Pa te khaw a hoett: A-u khaw Capa te aka do tah Pa te khaw a do. ²⁴ Tedawngah nangmi lawng acuekca kalawng na yaak u awl te na kaw khuiah khueh uh. Te awl te na khueh u atah Capa oen Pa oen ah pumkhatla nangmi poe na awm u ai. ²⁵ He tah Khrih amah roe lawng mami peek ham awl a kam dungyan hingna he ni.

²⁶ Nangmi thailatna ham aka yawm hue kah akawng te nangmi tengah kavan thut. ²⁷ Tede nangmi ham tah Khrih lawngah a Muithla te nangmi sawah avan toi poen. Nangmi kaw khuiah a Muithla te a awm atah, nangmi cang puei ham a-u khat khaw na ngoe u tlaih nawh. Metihtiah amah Muithla lawngah soeprep boeih kawng te nangmi n’cang puei u tih te cangpueina tah soeng taktak, aka thawlh nawh ni.

²⁸ Ka ca thli, amah oen pumkhatla awm uh, metihtiah amah a tueng vengah mami tah raltheenna oen m’be u vetih amah a lawna Khawhin ah ayahtoela a teng kalawng thuh-elh u ham ngoe tlaih manawh. ²⁹ Nangmi lawng Khrih tah thlaangdoeng tila na ming u; tedawngah a-u khaw thaihu doeng aka sai tah Pathen kah a ca thli ni tite na ming u ham awm.

¹ Pathen lawng ningmi n’lungna tangkiik he poek u lah! A lungna tah bo tangkiik tih mami he Pathen amah kah Ca-anau ti poen, te tila te awm tangtang. He kawng ah ni dilai lawng mami he m’ming u nawh: Pathen khaw ming u nawh. ² Ka lungna ka paya thli, tahe ah mami tah Pathen kah ca-anau la ng’awm u poen, tede hai ben ah mami he n’tu oen n’lawh u ai ti he tah m’ming thlan hun. Tede Khrih a law vengah Khrih amah oen n’lo u ai tila m’ming u, metihtiah ahih tah amah roeroe la te mami lawng n’huh ai. ³ A-u khaw Khrih ah he ang ngaiuepna aka khueh lawngtah Khrih aciimcaih van angla amah oen amah te aciimcaihla awm van. ⁴ A-u khaw thawlhna aka sai tah Pathen kah phungawl te a phe, metihtiah thawlhna tah phungawl phena he ni. ⁵ Khrih tah thawlhna ciim sak hamla law tite na ming u, ahih dawngah thawlhna roe awm nawh. ⁶ Tedawngah Khrih oen pumkhatla aka awm thlaang boeih lawngtah thawlhna sai taitu nawh; tede a-u khaw thawlhna aka sai poepa lawngtah ahih te hu nawh tih aka ming nawh ni.

⁷ Ka ca thli, nangmi te a-u khat lawngkhaw n’thaina boel seh! Khrih tah thlaangdoeng la a awm angla a-u khaw doengna aka sai boeih tah thlaangdoeng van ni. ⁸ A-u khaw thawlhna aka sai poepa tah Seitan thlaang ni, metihtiah Seitan tah acuek veng kalawng thawlhna a sai roe poen. He kawng ah he Seitan kah sai boeih te phe ham ni Pathen Capa tah a law.

⁹ A-u khaw Pathen kah ca-anau la aka awm tengah Pathen kah pumsa tah ahimi dawngah awm tih thawlhna te sai poepa nawh. Metihtiah Pathen tah ahimi kah ana Pa la a awm dawngah ahih lawng thawlhna sai taitu nawh. ¹⁰ Pathen kah ca-anau thli oen Seitan kah ca-anau thli a lawhna hih nawh noekna tah he tila ni: a-u khaw asoeng thaihu aka sai nawh boeih, thlaangtloe te aka lungna nawh boeih tah Pathen kah ca-anau thli nawh ni.

¹¹ Acuekca veng kalawng na yaak u awl te tah he ni: mami pakhat oen khat lung u sih ti he ni. ¹² Mami he Kain angla awm ham nawh ni; ahih tah Raaibawi kah thlaang la awm tih a manau kheet Abel te a ngawn. N’tu ah Abel te Kain lawng a ngawn? Metihtiah ahih lawng thaihu te athawlhla a sai, tede a manau lawngtah thaihu te adoengla a sai dawngah ni.

¹³ Tedawngah maya manau thli dilai thlaang lawng nangmi te n’thina u atah na kawpoek rai sak u boel. ¹⁴ Mami tah duekna n’ceh taak u poen tih hingna khuila n’kuun poen tite m’ming u; te tila m’mingna tah mami lawng maya manau n’lungna dawngah ni. A-u khaw lungna aka khueh nawh tah duekna khuiah ni a awm hun. ¹⁵ A-u khaw a maya manau te a thina atah thlaang aka ngawn ni, thlaang aka ngawn thli tah a khuiah dungyan hingna awm nawh tite na ming u. ¹⁶ Lungna he me ang nuem tila m’mingna tah he tila ni: Khrih lawng mami hamla a hingna te a peek. Tedawngah mami lawngkhaw maya manau thli hamla hingna he peek van hamla awm! ¹⁷ Thlaanglen kuirang lawng a maya manau kah a voetna te a huh vengah a thinkaw a khaih khoep atah metila Pathen ka lungna a ti thai ai? ¹⁸ Ka ca ka nau thli mami kah lungna he tah awlkaa hong mai ohla bii lawh thawhtatna dawngah aka tueng lungna taktak la a awm ham awm.

¹⁹ Tedawngah mami lawng awltak dawngah ka awm tite he tila m’ming u ai. Pathen haiah khaw ngaitluepla n’awm u ai. ²⁰ Mami kah athetheen mingna thinkaw lawng mami te n’salphaam mai cakhaw Pathen tah mami kah athetheen mingna thinkaw lak ah bo ngaai tih ahih lawngtah soeprep boeih a ming tite mami lawng m’ming u. ²¹ Tedawngah ka lungna ka paya thli, mami he m’mah kah athetheen mingna thinkaw lawng n’salphaam nawh kawinih mami tah Pathen haiah raltheenna n’khueh u. ²² Mami lawng amah kah awlpeek te n’vai tih a kawngaih te n’sai dawngah mami lawng amah tengkah m’bih boeih te n’dang u. ²³ Te a awlpeek tah a Capa Jesuh Khrih te mami lawng n’tangna tih mami tengah Khrih amah awlpeek angla pakhat oen khat n’lung u he ni. ²⁴ A-u khaw Pathen kah awlpeek te aka vai tah Pathen oen pumkhatla awm tih Pathen khaw ahih oen ah pumkhatla awm. Te tila mami tengah Pathen kah peek Muithla rang oen ah Pathen tah mami oen pumkhatla awm tite m’ming u.

¹ Ka lungna ka paya thli, Muithla ka khueh tila aka thui boeih te tangna u boel, tede ahimi kah Muithla khueh te Pathen tengkah aka law tang aw tite noekdak uh. Metihtiah, tawngha rawlrap thli, yahawh hlang dilai han ah yingyo u poen. ² Pathen benkah Muithla ni tila ming thaina ham tah he tila ni; a-u khaw Jesuh Khrih tah thlaanghing pumsa la va law tila aka ti boeih lawngtah Pathen tengkah aka law Muithla te a khueh. ³ Tede, a-u khaw Jesuh kawngah te tila aka pawm nawh tah Pathen tengkah Muithla te khueh nawh. Ahih kah khueh muithla te tah Khrih raal tengkah ni; nangmi lawng te ang te va law ai tila na yaak u poen tih tahe dilai dawngah awm poen. ⁴ Tede ka ca ka nau thli nangmi tah Pathen thlaang la na awm u tih tawngha rawlrap thli te na taa u poen, metihtiah nangmi khuiah aka awm Muithla tah dilai koeva la aka awm thlaang thli kah muithla lak ah ahu-aham a awm ngaai dawngah ni. ⁵ Te kah tawngha rawlrap thli lawngtah dilai thaihu thli kawng he a thui u tih dilai koeva la a awm u dawngah dilai lawng a awl te a hutung. ⁶ Tede mami tah Pathen thlaang ni. A-u khaw Pathen aka ming lawngtah kaimi awl he a hutung u, a-u khaw Pathen thlaang la aka awm nawh lawngtah kaimi awl he hutung u nawh. He tila he awltak Muithla oen thawlhpalhna muithla laklaw kah alakloena te mami lawng n’thui thai u.

⁷ Ka lungna paya thli, lungna tah Pathen teng kalawng a law dawngah mami pakhat oen pakhat lung u sih. A-u khaw lungna aka khueh tah Pathen kah a ca la awm tih Pathen te a ming u. ⁸ A-u khaw lungna aka khueh nawhtah Pathen te ming nawh, metihtiah Pathen tah lungna ni. ⁹ Pathen lawng a Capa khueh duen khat bueng te mami ham dilai la avan tuihna rang oen a lungna te a tueng sak tih ahih rang oen mami lawng hingna khuehna ham ni. ¹⁰ Lungna ti he tah he tila ni: mami lawng Pathen n’lungna te nawh ni, tede amah lawng mami he n’lungna tih mami kah thawlhna khawdawp ngaaina ham a Capa avan tuih he ni. ¹¹ Ka lungna ka paya thli, he tih aih la mami he Pathen lawng n’lungna atah mami khaw pakhat oen khat lung u van ham awm. ¹² Pathen te a-u lawngkhaw hu noek nawh, tede pakhat oen khat n’lung u atah Pathen tah mami oen pumkhatla awm tih a lungna tah mami dawngah soep.

¹³ A Muithla te mami m’peek poen dawngah mami tah Pathen oen pumkhatla ng’awm u tih amah khaw mami oen pumkhatla awm tite aciimphanla m’ming u. ¹⁴ Ana Pa lawngah a Capa te dilai thlawnkung la avan tuih te hukung oen thlaangtloe tengah thuikung tah kaimi ni. ¹⁵ A-u khaw Jesuh tah Pathen Capa ni tila a phawng atah ahih te Pathen oen pumkhatla awm tih Pathen khaw ahih oen ah pumkhatla awm. ¹⁶ Te tila Pathen lawng mami n’lungna te kamami roeroe lawng ka ming u tih ka tangna u. Pathen tah lungna ni, a-u khaw lungna dawngah aka awm tah Pathen oen pumkhatla awm tih Pathen khaw ahih oen pumkhatla awm. ¹⁷ Awlcekna Khawhin ah mami lawng raltheenna khueh thaina hamla lungna tah mami dawngah avan soep sak poen; he dilai ah mami hingna tah Jesuh kah hingna oen avai u dawngah te raltheenna te ng’khueh ai. ¹⁸ Lungna dawngah rihsakna awm nawh. Aka soep lungna lawngtah rihna boeih te biit aha-ata sak. Tedawngah rihsakna aka khueh thlaang tah lungna asoepbir te khueh thlan hun. Metihtiah rihna lawngtah dantatna oen bawngyawng haih.

¹⁹ Pathen lawng mami n’lungna lamha dawngah mami lawngkhaw n’lungna van. ²⁰ A-u lawngkhaw Pathen ka lungna ti de a maya manau te a thina mangkhak atah hoem aka thui thlaang ni. Amik oen a huh maya manau pateng khaw a lungna nawh maiah ahih lawng a huh thai nawh Pathen te lungna thai manawh. ²¹ Khrih lawng mami tengah m’peek a awlpeek tah “A-u khaw Pathen te a lungna atah a maya manau te lungna seh” a ti te ni.

¹ A-u khaw Jesuh Khrih tah Messiah ni tila aka tangna tah Pathen kah a ca ni. A-u lawngkhaw ana Pa te a lungna atah, ana Pa kah a ca thli te khaw a lungna. ² Mami lawng Pathen kah ca-anau thli n’lungna tite mingna tah he tila ni; mami lawng Pathen amah te n’lungna tih a awlpeek n’vai he ni. ³ Metihtiah mami lawng Pathen n’lungna tila thuingaihna tah a awlpeek thli n’vai he ni. Ahih kah awlpeek te tah mami ham rai aih mai nawh, ⁴ metihtiah Pathen kah ca-anau boeih lawngtah dilai a taa thai. Mami lawng oengna rang oen dilai n’taa u. ⁵ A-u lawng dilai a taa thai? Jesuh tah Pathen Capa ni tila aka tangna thlaang bueng lawngah a taa thai.

⁶ Jesuh Khrih tah amah kah Baptisma huhna tui oen a duekna thisen oen ah aka law ni. Ahih tah tui bueng oen law nawh tih pahih bok la tui oen thisen oen ah va law. He tah soeng tangtang tila Muithla amah roe lawng sausi a deeng, metihtiah Muithla tah awltak la a awm dawngah ni. ⁷ He kawngah sausi pathum awm. ⁸ Te tah Muithla, tui oen thisen he hue ni. He pathum hue lawng avan at rip la sausi a deeng u. ⁹ Mami lawngtah thlaang kah sausi deeng te n’tangna u; tede Pathen kah sausi deeng tah a tha ra ngaai tih a Capa kawng te Pathen amah lawng sausi a deeng poen. ¹⁰ A-u khaw Pathen Capa aka tangna boeih lawngtah he sausi he lungbui khuiah a khueh; tede a-u khaw Pathen te aka tangna nawh lawngtah Pathen lawng a Capa kawng a thui te a tangna nawh dawngah Pathen te hoemthuikung la a coengg sak. ¹¹ Te sausi tah he ni: Pathen lawng mami he dungyan hingna m’peek poen tih te hingna tah a Capa dawngah awm. ¹² A-u khaw a Capa te aka khueh lawngtah hingna te a khueh; a-u khaw Pathen Capa te aka khueh nawh tah hingna te khueh nawh.

¹³ Pathen Capa aka tangna nangmi lawng dungyan hingna na khueh u te na mingna u ham he kah ca he nangmi tengah kavan thut. ¹⁴ Mami lawng amah kawngaih angla me ang thaihu khaw m’bih u atah a hutung tite aciimphanla m’ming u dawngah Pathen haiah raltheenna mami lawng n’khueh u. ¹⁵ Mami lawng amah tengah m’bih vengah a hutung tangtang tila m’ming u veng kalawng tah amah tengah m’bih boeih te khaw m’peek tila m’ming u baal. ¹⁶ Na maya manau lawng duekna toe aka mawt nawh koei thawlhna a sai te na huh u atah nangmi lawng Pathen tengah thangthui pe uh. Pathen lawng ahih te hingna a peek ai. He tah duekna toe aka pha sak nawh thawlhna aka sai thli ham ni. Tede duekna toe aka pha sak thawlhna awm, te kawngah te nangmi lawng Pathen tengah thangthui uh ka ti nawh. ¹⁷ Sai thawlh boeih he thawlhna ni, tede duekna toe aka pha sak nawh thawlhna awm. ¹⁸ Pathen kah ca-anau la aka awm lawngtah thawlhna sai poepa nawh tite m’ming u, metihtiah Pathen Capa lawng a hih te ading asuekla a khueh tih Raai Bawi lawngah raina pe thai nawh. ¹⁹ Dilai pum he Seitan kah ukna khuiah awm de mami tah Pathen kah thlaang la ng’awm tite m’ming u. ²⁰ Pathen Capa tah va law tih Pathen tangtang te mami lawng mingna hamla mami tengah yaakmingna te m’peek poen tite m’ming u. A Capa Jesuh Khrih oen pumkhatla awmna dawngah Pathen taktak oen mami pumkhatla m’awm u. Ahih tah aka soeng Pathen taktak la awm tih dungyan hingna la awm.

²¹ Ka ca ka nau thli aka soeng nawh pathen thli teng kalawng tloeng u lah.