1 KAWRIN

1 KAWRIN

¹ Pathen kawngaihna oen Khrih Jesuh kah celtuih la awm ham khue la aka awm Kai Pawl oen mami kah manau Sostenes lawng - ² Pathen kah thlaangciim la awm ham khue la aka awm tih Jesuh Khrih oen tuhkaina rang oen ah amah kah a koe la aka awm Kawrin khaaw kah Pathen Khrihcabu, mami oen ahimi kah Bawipa la aka awm Jesuh Khrih te a bok tih khaaw tawm ram tawm ah aka awm thlaang thli tengah khaw, naangmi tengah khaw ca kavan pat u:

³ Mami kah Pa Pathen oen Bawi-pa Jesuh Khrih lawng lungvatna, ngaimawngna te nangmi m’pe u hawn seh.

⁴ Khrih Jesuh rang oen lungvatna te nangmi m’peek dawngah Pathen tengah awmngaih awl ka thui poepa. ⁵ Metihtiah Khrih oen pumkhatla awmna rang oen ah awlcal thingkaa oen thoemthai cuihna boeih ah khaw soeprep boeih ah na bawireng soeh u poen. ⁶ Khrih kawng awlthang te nangmi kaw khuiah acakla awm poen tih, ⁷ mami kah Bawipa Jesuh Khrih te na lamtoen u vengah he yotheen kam-awmna pakhatca khaw avoetna na khueh nawh. ⁸ Mami Bawipa Jesuh Khrih khawhin ah cawttbauh kap awm nawh hamla amah lawng aboet toela nangmi te n’cak sak ai. ⁹ A Capa Jesuh Khrih mami Bawipa oen pawlneeng haih hamla khuekung Pathen tah uep-awm ni.

¹⁰ Maya manau thli, mami Bawipa Jesuh Khrih kah saithaina aana oen nangmi boeih tengah reenna kavan bih u, nangmi tim ah pekbona a awmna nawh ham awlthui kaalai dawngah na kaw vai u sak. Poekna pakhat, mengtengna pakhat oen ah awm uh. ¹¹ Maya manau thli nangmi tim ah tawhsina awm tih Khloe kah imkhuikaw thlaang pakhat lawng avan thui. ¹² Ka thui ngaih tah he ni: Nangmi pakhat rip lawngah athloek athloekla na thui u. Pakhat lawngah “Kai tah Pawl kah hubang ni” ti tih atloe khat lawngah, “Kai tah Apollos kah hubang ni,” ti, atloe khat lawngah, “Kai tah Piter hubang ni,” ti tih atloe khat lawng, “Kai tah Khrih hubang ni.” tila a thui u ti he ni. ¹³ Khrih he bu la pekbo u aw! Nang ham thinglam dawngah Pawl aw aka duek! Nangmi he Pawl kah hubang la awm ham aw baptisma na dang u?

¹⁴ Krispas oen Kaias bueng nawh atah nangmi tim kah a-u khat khaw baptisma ka peek nawh dawngah Pathen te ka uem tangkiik. ¹⁵ Tedawngah kamah kah hubang la awm ham baptisma ka dang tila a-u khat lawngkhaw thui thai manawh. ¹⁶ (Aw, Stetanas oen a imkhuikaw te baptisma ka peek; tede atloe baptisma ka peek te ka ming nawh.) ¹⁷ Khrih lawngah kai he baptisma aka pe hamla n’tuih nawh. Thinglam dawngah Khrih kah duekna te ahongla a coenggna nawh ham thlaanghing kah cuihna te hawna ohla Awlthang Theen thui hamla ni n’tuih.

¹⁸ Metihtiah thinglam dawngah Khrih kah duekna kawng awlthang he ha-ata lii thlaang thli hamla tah awlpoei la awm de, mami thlawn la aka awm lii hue ham tah Pathen kah tharana ni. ¹⁹ Caciim lawngah, “Thlaangcuih thli kah Cuihna te ka phe vetih thoemthaina aka khueh thlaang thli kah mingna te khaw ka hoett pe bangtlang ai.” tila a thui.

²⁰ Tedawngah thlaangcuih thli te mela a awm ai? Thoemthaina aka khueh thlaang thli te mela a awm u? He dilai han kah calthai thli mela a awm u? He dilai dawngkah cuihna he tah ngau-athuuna ni tite Pathen lawng a tueng sak poen!

²¹ Thlaanghing lawng amah kah cuihna oen Pathen te a ming thaina nawh ham amah lawng a cuihna oen a sai poen. Kaimi lawng ka phawng, “ngau-athuuna” a ti u awlthang he aka tangna thlaang te thlawn hamla Pathen lawng awl a khueng. ²² Judah thlaang thli lawng kawpoek rai miknoekna te a ngaih u tih Krik thlaang thli lawngtah cuihna te a tlap u. ²³ Kaimi lawngah thinglam dawngkah a ngawn u Khrih te ka phawng u tih te awlthang te Judah thlaang thli ham tah tlimna lungto la awm tih Gental thlaang thli ham tah awlpoei la awm; ²⁴ tede Gental thlaang khaw, Judah thlaang khaw seh Pathen lawng a khue thlaang thli ham tah te awlthang te tah Pathen kah cuihna oen tharana la aka awm Khrih te ni. ²⁵ Metihtiah Pathen kah ngau-athuuna tah thlaanghing cuihna lak ah apuehla cuih ngaai tih Pathen kah thayokna he tah thlaanghing kah tharana lak ah a tha ra ngaai. ²⁶ Maya manau thli, Pathen lawng nangmi n’khue vengah metila na awm u tite tahe ah poek u lah. Thlaanghing kah huhna atah nangmi he thlaangcuih khaw, huham tharana aka awm thlaang khaw, hinyah koei thlaang khaw yoehca mai ni na awm u. ²⁷ Thlaangcuih thli te yah pawh sak ham dilai lawngah n’tu tamu nawh la a poek te Pathen lawng a tuek tih huham tharana aka khueh thlaang thli te yah phueih sak ham dilai lawng tha aka ra nawh thlaang la a poek te a tuek. ²⁸ Dilai lawng awlpuila a poek te phe hamla dilai lawng dapsitla a huh thlaang, thlaangnuih pariing la aka awm, thlaang la khaw a toehtham nawh thlaang te Pathen lawngtah a tuek noeng roe ni. ²⁹ He ngoen tah Pathen haiah a-u khaw oekthloen u thai nawh ti ngaihna ni. ³⁰ Tede nangmi tah Pathen lawng Khrih Jesuh oen pumkhatla n’awm sak poen tih Pathen lawng Khrih he mami kah cuihna la avan sai poen. Ahih rang oen ah mami tah Pathen oen roeproeina awm poen; mami tah Pathen kah a thlaangciim la n’coengg u tih mami he n’loeih sak poen. ³¹ Tedawngah Caciim lawng, “A-u khaw oekthloen u ham a ngaih atah Bawipa kah thaihu sai dawngah oekthloen u seh,” tila a thui.

¹ Maya manau thli, nangmi tengah Pathen kah awlhuep awltak te phawng hamla ka law vengah te yaakming ham aka rai awllung thli oen cuihna awl te ka hawna nawh. ² Metihtiah nangmi oen n’awm haih u vengah te awlpuila thinglam dawngah Jesuh Khrih kah a duekna kawng nawh atah soeprep boeih te hilh bangtlang tih thui tlaih nawh ham thinkaw ka melh rap poen. ³ Tedawngah nangmi teng ka law vengah te ka tha yoek sut tih rihna oen ka thuen, ⁴ Nangmi kan cangpueina oen awlthuina dawngah thlaanghing kah cuihna calthaina oen ka phawng nawh tih Pathen Muithla kah tharana oen ni ka phawng. ⁵ Tecoengah nangmi kah oengna he thlaanghing cuihna dawngah akung te sut u nawh tih Pathen tharana dawngah ni akung te a sut u.

⁶ Te cakhaw muithla ben ah poekna aka soep thlaang thli teng atah cuihna awl te ka thui pe. Tede te awl te tah he dilai dawngkah cuihna nawh ni, he dilai ukkung thli kah aka khum tharana te nawh ni. ⁷ Kai lawng ka phawng cuihna te tah Pathen kah cuihna awlhuep thlaanghing tengah pho sak ohla thuh khak la aka awm tih dilai a suen thlan veng kalawng mami kah ruep-awmna ham avan khueh tangte cuihna te ni. ⁸ He dilai ukkung thli a-u khat lawngkhaw cuihna he ming u nawh. Ahimi lawng ming u kawinih ruep-awmna Bawipa te thinglam dawngah ngawn u manawh. ⁹ Tede Caciim lawng a thui angla, “A-u lawng vaikhat khaw hu nawh tih ayaak nooek nawh, a-u lawngkhaw coengg thai ai tila poek nooek nawh te amah aka lungna thlaang thli hamla soeprep te Pathen lawng a roek a bah pe poen,” tila a thui.

¹⁰ Tede a awlhuep te amah Muithla rang oen ah mami he Pathen lawng m’ming sak poen. Muithla lawngtah soeprep boeih Pathen kah kamthlahna adungkoek thuh elh la aka awm te pateng khaw pheng a tlap. ¹¹ Thlaang pakhat kah a kawng alam he amah khuiah aka awm a muithla bueng lawng ni a ming; tetih van angla Pathen kawng he khaw Pathen Muithla bueng lawng ni a ming. ¹² Mami lawng he dilai dawngkah muithla te n’dang u moenih; Pathen lawng mami m’peek boeih te mingna ham Pathen lawng avan tuih Muithla te ni mami lawng n’dang u. ¹³ Tedawngah Muithla aka khueh thlaang thli tengah muithla ben awltak ka thuicaih u vengah he thlaanghing cangpueina awl oen te thui thai la awm nawh tih Muithla kah cangpueina awl oen ni ka thui. ¹⁴ A-u khaw Muithla aka khueh nawh te tah Pathen Muithla dawng kalawng aka law kutdo te dang thai manawh. Te ang thlaang lawngtah yaakming thai tang manawh; ahih hamla tah apoeila ni a awm, metihtiah Muithla ben kah kutdo thli te tah Muithla bueng oen ni ming thai la a awm. ¹⁵ Muithla aka khueh thlaang lawng atah soeprep boeih kah aphu te apek abo thai, tede ahih te tah a-u khat lawngkhaw pekbo thai nawh.

¹⁶ Caciim lawngah, “Bawipa thinkaw te a-u lawng a ming? A-u lawngah ahih te poekna a peek thai ai?” tila a thui. Tecakhaw kaimi tah khrih kah thinkaw te ka khueh u.

¹ Maya manau thli, atak tang atah Muithla aka khueh thlaang thli tengah awl ka thui angla nangmi teng atah ka thui thai nawh; he dilai thlaang thli angla Khrihca oengna dawngah camaw angla ni nangmi tengah awl kavan thui. ² Nangmi lawng buh haam na caak u thai thlan dawngah suuktui ni kan tuul u hun ai. Tahe ah pateng khaw buh haam na ca u thai thlan hun, ³ metihtiah nangmi tah tahe toe he dilai thlaang thli angla ni khaw na sak u hun. Nangmi tim ah uett-eena awm tih khat oen khat na tawh na thaam u vengah te nangmi tah dilai thlaang la na awm u tih dilai phung la khaw na sak u tite tueng sak nawh aw? ⁴ Nangmi lawngtah, “Kai tah Pawl kah hubang ni na ti u tih akhat lawngah, “Kai tah Apollos kah hubang ni,” tila na thui u te he dilai thlaang angla na sai u nawh aw?

⁵ Ataktang atah Apollos he a-u? Pawl he ta a-u? Kaimi he tah nangmi lawng Pathen te na tangna u hamla mawtkung Pathen kah thlaang thli mai ni. Kaimi lawngah Bawipa lawng sai hamla m’peek bii te ni ka bi u. ⁶ Kai lawngah ati-amu te ka tue tih Apollos lawng tui a suep, tede athing aka po sak tah Pathen ni. ⁷ Amu-ati tuekung oen tuisuepkung te awlpui nawh ni. Athing aka posakkung Pathen ni awlpui. ⁸ Amu-ati tuekung oen tuisuepkung tah alakloena awm nawh; A bina taring ah Pathen lawng kutdo rip a peek ai. ⁹ Metihtiah kaimi he tah Pathen ham bii aka bi haih la ka awm u tih nangmi te tah Pathen kah lo la ni na awm u.

¹⁰ Pathen kah peek kutdo te ka hawna tih im sak aka thoem tangkiik angla bii ka bi tih lungdang ka suem, te sawah te thlaangtloe lawng im a sak. Tede metila ka sak u tite a-u khaw ngaithuen rip u seh. ¹¹ Metihtiah Pathen lawngtah Jesuh Khrih pakhat bueng te ni lungdang la a suem tih atloe lungdang te suem thai koei la awm tlaih nawh. ¹² Thlaang khatsut lawngtah te kah lungdangsuem sawah sui oen khaw, ngun oen khaw, lungto phutlo oen khaw impui te a sak u mai ai; thlaangtloe hue lawngtah thing oen khaw, khawpawl oen khaw, caangying oen khaw a sak mai ai. ¹³ Ahimi pakhat rip kah biibi thoemthaina te tah Khrih Khawhin ah tueng peng vetih n’huh ai. Metihtiah te Khawhin atah thlaang boeih kah biibi te hai oen ah a tueng sak ai; hai oen ah a noek adak vetih thoemthaina taktak te tueng ai. ¹⁴ Lungdangsuem sawah a sak im lawngah hai te a khoeng atah imsakung lawng kutdo a dang ai. ¹⁵ Tede a-u khaw im a sak te a ung thloep atah ahih tah sung ai; tede amah ngoen tah hai dawngkah aloeih atah thlawn la awm ai.

¹⁶ Nangmi tah Pathen tempal bok-im la na awm u tih Pathen Muithla nangmi kaw khuiah a awm te ataktang la na ming u! ¹⁷ Tedawngah a-u lawngkhaw Pathen kah tempal bok-im te a phe atah Pathen lawng ahih te a phe van ai. Metihtiah Pathen kah tempal bok-im tah ciimcaih tih nangmi roeroe he ahih kah tempal bok-im la na awm u.

¹⁸ A-u khaw amah oen amah te thai alat u boel seh. Nangmi tim kah a-u lawngkhaw amah oen amah te he dilai siing angla thlaangcuih la a poek u atah thlaangcuih tang tang la a awm thaina ham thlaangngau-paathuu la coengg seh. ¹⁹ Metihtiah he dilai lawng cuihna tila a poek te Pathen mik huh atah a poei-oep mai ni. Caciim lawngah “Pathen lawngtah thlaangcuih thli te amami kah dongtung dawngah a man sak.” tila a thui, ²⁰ tecoengah atloe caciim lawngah, “Bawipa lawngtah thlaangcuih thli kah poekna he apoeioep ni tila a ming” tila te a thui baal. ²¹ Tedawngah a-u khaw thlaanghing kah saithaina akawng alam dawngah oekthloen u ham awm nawh. Ataktang atah soeprep boeih he nangmi kah koe-ava la ni a awm: ²² Pawl, Apollos oen Piter khaw, he dilai khaw, duekna oen hingna khaw, tahe san he khaw, hai ben kah aka law koei san khaw seh he thli boeih he nangmi kah koe-ava ni, ²³ Nangmi tah Khrih kah koe-ava la na awm u tih Khrih tah Pathen koe la awm.

¹ Nangmi lawngah kaimi he Pathen kah awlhuep awltak khoembelkung, Khrih kah tuihyoeih-thlaang la nan poek u ham awm. ² Te ang tuihyoeih-thlaang ham awlpui pakhat tah a bawipa tengah uep-awm la awm ham te ni. ³ Tahe ah nangmi lawngkhaw, thlaangtloe lawngkhaw kai kah kawng he thlaanghing siing angla na thui u atah n’tu la khaw ka ngaai mai nawh; kamah lawng pateng khaw ka thui thai nawh. ⁴ Ka kawpoek tah ciim acaih ngoen ta, tede te tila ka thui te ka thawlh nawh tila thuingaihna nawh ni. Bawipa khat bueng lawng ni ka sawah awl a cek thai ai. ⁵ Tedawngah atue a pha thlan ah nangmi lawng a-u khaw awl cek u boel. Hukhueng awlcekna tah Bawipa a law vengah ni a awm hun ai; ahih lawngtah thlaanghing thinkaw ah ahuepla a poek thli te a pho sak vetih yiinna khuikah awlhuep thli te aangna dawngah a tueng sak ai. Teveng atah thlaang boeih lawng amah kah a taring ah Pathen kah koehna te a dang ai.

⁶ Maya manau thli, nangmi kah theenna hamla he ang boeih he Apollos oen kamah he nuehtahna la ka hawna tih kavan thui. He tila ka thui he tah, “Phung-alam te pooeng voelh boel” tila a thui te nangmi lawng na mingna ham ni. Nangmi a-u khat lawngkhaw pakhat te tah koeh pakcal boel langtah atloe pakhat te tah thuitheet soeh aih boel. ⁷ Nangmi te thlaangtloe lak ah asangluelh la a-u lawng n’sai? Na khueh soeprep boeih he Pathen peek nawh aw? Na khueh na toen u te ayoe peek kutdo nawh angla metila na oekthloen u thai?

⁸ Nangmi lawng na ngoe soeprep boeih te na khueh tang tang u poen aw? Na bawi na len u tangtang aw? Kaimi tah sengpahrang la ka coengg u nawh de nangmi ta sengpahrang la na coengg u poen aw? Nangmi oen haih kaimi khaw sengpahrang la coengg thaina ham nangmi te sengpahrang la na coengg u tangtang ham ka ngaih. ⁹ Metihtiah kaimi celtuih thli he rangpui haiah ngawn ham koei thlaang, dilai oen vaan kah vanthlaang thli oen thlaangphun boeih lawng dan mailai ham a hukhueng koek la Pathen lawng n’khueh tila ni ka poek poen. ¹⁰ Kaimi he Khrih hamla thlaangngau la ka awm u; tede nangmi tah Khrih oen pumkhatla awmna rang oen ah thlaangcuih la na awm u! Kaimi tah ka tha yoek sut, tede nangmi tah na tha ra u! Kaimi tah thlaang kah hep-ahap la ka awm u, nangmi tah hinyah koei la na awm u! ¹¹ Tahe vengah khaw buhpawng tuihalh oen ka rera u; hinaak himbai pawn sawi ka buen ka naak u; thlaang lawngah kaimi n’tam u; ahuen atloe tloe la ka pooeng reroe u; ¹² thatlawh thaboep la bii ka bi u tih ka buen ka naak u. Thlaang lawng n’tap-voep vengah yotheen kam-awmna oen ka phuehsawm u; thlaang lawng n’heemtek vengah sut ka duen pe u; ¹³ Thlaang lawng thekha la n’sai vengah awlding oen ka thung pe u. Kaimi tah he dilai kah kawhnot vaiking la ka awm u; Tahe toe khaw he dilai ah thlaang kah tuiilehkap thlaang la ka awm u!

¹⁴ Nangmi he yah sak hamla ka ngaih dawngah nawh tih ka lungna ca-anau angla toelthaam ham ka ngaih dawngah ni kavan thut. ¹⁵ Metihtiah nangmi kah Khrihca khawsakna dawngah doenkung thli thongha na khueh u mai cakhaw na Pa tah pakhat bueng ni na khueh u. Metihtiah Khrih Jesuh oen pumkhatla na hingna dawngah Khrih Awlthang Theen nangmi tengah kavan khuenna rang oen na pa tah kai ni. ¹⁶ Tedawngah kai kah khawboe ramlang he na oett u hamla kan ceel u. ¹⁷ He tila ka kamthlah u dawngah ni Timote he kavan tuih, ahih tah Khrihca khawsakna dawngah ka lungna uep-awm ka capa ni. Ahih lawng atah kai lawng ka vai tih peng tawm khrihcabu tengah ka cang puei Khrih Jesuh oen pumkhatla awmna dawngah hingna athaai atungpui te avan thui koep ai.

¹⁸ Thlaang khatsut lawngtah kai lawng nangmi te n’hill adawng tlaih manawh tila na poek u tih na oekk u. ¹⁹ Tecakhaw Bawipa lawng a ngaih atah nangmi tengla yue ka law vetih te kah aka oekthloen u thlaang thli lawng a thui awl bueng muehla huham tharana a khueh u te khaw kamah lawng ka huh ai. ²⁰ Metihtiah Pathen Ram he tah awlhong paikaa mai nawh tih huham tharana ni. ²¹ Nangmi tengah cungpoelh oen aw ka law ai? tih nawh atah lungna, kawdawna oen aw ka law ai? Ame ang na ngaih u?

¹ Nangmi tim ah te lukih thlaang thli lawng pateng khaw a yahna koei rih awm tangkiik mai hutaa tawngpa thawlhna awm tila ka yaak. Thlaang pakhat lawngtah a manuthawn oen ip haih tila avan thui u! ² Tedawngah metila nangmi na oekk u thai dai lauh mai? Tetih ohla nangmi tah na kaw the u vetih te ang thaihu aka sai thlaang thli te namami kah bu khui kalawng na hek u ham awm de ta. ³ - ⁴ Kai he ka pum ngoen tah nangmi oen ah athla hlang la ka awm de thinkaw oen tah nangmi tengah ka awm; tedawngah nangmi tengah aka awm angla rih awm thaihu aka sai thlaang thli sawah mami kah Bawipa Jesuh Khrih miing oen ah awl ka cek poen. Nangmi thik at la na pum u vengah te mami oen aka awm haih Bawipa Jesuh kah tharana rang oen ah ka thinkaw oen nangmi tengah ka awm. ⁵ Bawipa khawhin ah a muithla lawng thlawnna a dangna ham a pum te phe hamla te thlaang te Seitan kut ah pe uh.

⁶ Nangmi lawngah na oekthloen u ham awm roe nawh! Nangmi lawngah, “Tawlru yoehca lawng ta-ekk hawl at te a rawi sak.” a ti awl te na ming u. ⁷ Nangmi lawngah aciimthlaula na awmna u ham thawlhna tawlru ruem te hoett uh. Te atah tawlru aka thuum nawh takawi thaaithikla na awm u ai, te tila nangmi na awm tangtang tite ataktangla ka ming. Metihtiah mami kah Kaantaak Poei te oepsoeh la awm poen, mami kah Kaantaak Poei tuuca Khrih te Luciik la thawthueng u poen tih mami kah Kaantaak Poei sai ham oepsoeh la awm poen. ⁸ Tedawngah mami kah Kaantaak Poei te thawlhna tawlru ruem oen athe-arana te thuum ohla tawlru aka thuum nawh takawi, aciim acaih awltak takawi oen ah sai u sih.

⁹ Nangmi tengah kavan thut ca-pat dawngah te thlaanghalh paadak thlaang thli oen pawlneeng nawh ham kavan thui poen. ¹⁰ Te tila ka thui te thlaanghalh paadak thlaang, apueh asawm aka ngaih thlaang, thlaanghuuen paacaan thlaang thli, kutsaimuei aka bok thlaang thli oen pawlneeng u boel tila ka thuingaihna nawh ni. Te ang thlaang thli teng kalawng thloeng u sih ti mai kawinih he dilai he ceh taak ngala ham ni a awm poen ai. ¹¹ Ka thuingaihna tah khrihca la ka awm ti van de thlaanghalh paadak, apueh asawm aka ngaih moek, kutsaimuei aka bok, thlaang thuitheet thlaang, yuuruui thlaang, thlaanghuuen paacaan thlaang la aka awm hue oen ah pawlneeng haih u boel tila ka thuingaihna ni. Te ang thlaang oen tah caak awkk ham pateng ngawl haih u roe boel.

¹² - ¹³ Ataktang atah Khrihcabu khuiah aka awm nawh thlaang thli awlcek ham te kai kah biibi nawh ni. Ahimi te Pathen lawng awl a cek ai. Tede namami bu khuikah thlaang thli te tah nangmi lawng awl na cek ham koei nawh aw? Caciim lawngah, “Namami bu khuikah thlaangthe thli te hek uh.” tila a thui de lah koen.

¹ Nangmi khat oen khat Khrihca paya oen awlpuungna a awm vengah lumlai te Pathen thlaang thli thui sak ohla metila lukih thlaang awlcekkung thli tengla na ceh u? ² Pathen thlaang thli lawngah dilai he awl a cek ai tite na ming u nawh aw? Te tila te dilai he awl cek hamla na awm u maiah lumca laaica mai te awl na tloek thai u nawh aw? ³ Mami lawng vanthlaang thli te awl cek ham awm tite na ming u nawh aw? Tedawngah he dilai hing khuikah thaihu tah awlcek tare ham awm ta! ⁴ Te ang lumlai te a awm atah Khrihcabu oen aka betpha u nawh thlaang tengla te na cet u vetih na thui sak u ai aw? ⁵ Na yak u nawh aw! Khrihca pueipaw khat oen khat laklaw ah awlpuungna a awm vengah lumlai aka thui thai namami bu khuiah thlaangcuih pakhat tah awm macawi. ⁶ Khrihca khat oen khat taya na cawi u tih oengca la aka awm nawh thlaang te lumlai na tloek sak u aroeh mai!

⁷ Nangmi lawng upadi oen tuhkaina ben ah awlpuungna na khueh u dawngah te na dok dingri poen tite a tueng sak. Ka dok poen na ti u mai kawinih namami ham theen nawh ai aw? Na thaihu van rot batt u cakhaw nangmi ham theen bet nawh ai aw? ⁸ Tetih ohla nangmi lawngtah namami kah maya manau pakhat teng mai ah khaw athe ara te lat na sai u tih pakhat kah thaihu te na rot pe u! ⁹ Pathen Ram te thlaangthe lawngtah paang manawh tite ataktangla na ming u ta. Namami oen namami te thailat u khoeng boel: Thlaanghalh paadak thli, kutsaimuei aka bok thlaang thli, samphaih thlaang thli, hutaa puei oen tawngpa puei oen ah aka thawlh thlaang thli, ¹⁰ thlaang kah thaihu aka rot thli, apueh asawm aka ngaih moek thlaang thli, yuu aka ruui thlaang thli, thlaang aka theet thli, thlaanghuen thli tah a-u khaw Pathen Ram te pang manawh. ¹¹ Thlaang khatsut tah te tila te thoem na awm u. Tede nangmi tah na thawlhna avan ciim sak poen; Nangmi ngoen tah Pathen tengah na tlungmu u poen; Bawipa Jesuh Khrih rang oen Pathen kah Muithla rang oen ah nangmi tah Pathen oen na roeproei u poen.

¹² Thlaang khatsut lawngah, “Kai lawngtah me ang thaihu khaw ka sai thai” na ti u. Na sai thai u ngoen ta, tede nangmi hamla soeprep boeih he theen luem nawh. Kai lawng me ang thaihu khaw ka sai thai tila ka thui thai van ta, tede kai tah me ang thaihu lawngkhaw sal la n’sai thai manawh. ¹³ Thlaang khatsut lawng atah “Caak awkk he bungpui hamla awm tih bungpui he tah caak awkk hamla ni.” na ti u. Soeng mai ngoen ta; tede Pathen lawngtah aboetna te a pha sak bok ai. Thlaanghing pum he cuk-halh thawlhna ah hawna ham nawh ni, Bawipa biibina ah hawna ham ni, Bawipa lawng ni pum he a cawm acah. ¹⁴ Pathen lawng Bawipa te duekna kalawng a thawh sak tih mami khaw amah kah huham tharana oen n’thawh sak van ai.

¹⁵ Nangmi kah pum he tah Khrih kah pum vangg ni tite na ming u. Kai lawngah Khrih kah pum vangg te ka lawh vetih pum yooei thlaanghalhnu la ka sai ai aw? Ka sai roe manawh! ¹⁶ Pum yooei thlaanghalhnu tengah tabaw thlaang te tah ahih oen pumtaksa pakhatla awm tite na ming u nawh aw? Caciim lawngah, “Ahih rawi tah pumtaksa pakhat la awm ai,” tila aciimphanla a thui. ¹⁷ Tede Bawipa oen aka tuhkai u thlaang tah muithla ben ah Bawipa oen pumkhatla awm.

¹⁸ Cuk-halh thawlhna te kuemsuem uh. Atloe thawlhna lawngtah thlaang kah a pum te rawk sak aih nawh; tede cuk-halh thawlhna aka sai thlaang lawngtah amah pum roe te a thawlh sak poen. ¹⁹ Nangmi kah pum te tah namami kaw khuiah aka awm Pathen kah peek Ciim Muithla a awmna tempal bok-im ni tite na ming u nawh aw? Nangmi tah namami kah koe la na awm u nawh tih Pathen kah koe la ni na awm u; ²⁰ nangmi te aphu oen ni n’lai u. Tedawngah na pum te Pathen kah ruep-awmna ham hawna uh.

¹ Ka tengah capat oen nan doet u akawng alam te tahe ah kavan thui ai. Tawngpa pakhat he yu lawh muehla a awm te theen. ² Tede cuk-halh thawlhsaina ayahawh aih dawngah tawngpa boeih lawng yu a khueh ham theen tih hutaa boeih lawngkhaw vaa a khueh ham theen. ³ Tawngpa lawng vaa pakhat la a awmna te soep sak selangtah hutaa lawngah yu pakhat la awmna te soep sak seh, te tila te pakhat kah ngoena dawngah pakhat lawng ngai-khuekna pe seh. ⁴ A yu lawngah amah pum kah bawi la awm nawh, tede a pum kah bawi tah a vaa te ni; tetih van angla a vaa lawngah amah pum kah bawi la awm nawh tih a pum kah bawi tah a yu te ni. ⁵ Nangmi lawng kawlkalh thangthuina ham ah kawvaina na khueh u atue bueng te nawh atah namami khat oen khat kah ngaihna te thana u boel; tecoeng atah na awm nooek la te awm koep uh. Te atah na kuemsuem thai u vetih Seitan kah suek-halhna te na taa u thai ai.

⁶ He tila kavan thui he awlpeek aana angla ka thui nawh, tede nangmi kawngaihna vai angtoekla ni ka thui. ⁷ Atak tang atah nangmi boeih he kai angla na awm u atah ka ngaih ngaai; tede thlaang boeih lawngah Pathen tengkah kutdo lakloe te rip a khueh u.

⁸ Tahe ah a yu, a vaa aka khueh nawh thlaang thli oen huhai patal la aka awm thlaang thli tengah kavan thui tah kai angla namah bueng poe na awm u atah namami ham theen bet ai. ⁹ Tede namami kah ngaihna te na kuemsuem thai u nawh atah na yu lo u lang vaa sa uh. Cuk-halh hurthok la awm lak atah yu lawh vaa sak te theen bet.

¹⁰ Yu khueh, vaa khueh thlaang thli ham thui hamla awlpeek ka khueh, te tah kamah tengkah nawh tih Bawipa kah awlpeek ni: A yu lawngah a vaa te maa boel seh; ¹¹ tede a vaa te a maa atah vaa sak tlaih ohla poe awm seh, tetih nawh atah a vaa oen ah roep hih koep seh; a vaa lawngkhaw a yu te thlaak roe boel seh.

¹² Thlaangtloe hue tengah kavan thui tah (kamah lawng ni ka thui, Bawipa lawng nawh ni): Khrihca tawngpa pakhat lawng oengca la aka awm nawh a yu te a khueh tih a yu lawngah ahih oen awm poe ham a ngaih atah thlaak boel seh. ¹³ Tecoengah Khrihca hutaa pakhat lawng oengca la aka awm nawh thlaang te a vaana tih a vaa lawngah ahih oen awm poe ham a ngaih atah maa boel seh. ¹⁴ Metihtiah oengca la aka awm nawh a vaa te a yu oen tuhkaina rang oen ah Pathen lawng a do tih oengca la aka awm nawh a yu te Khrihca a vaa oen tuhkaina rang oen ah Pathen lawng a do. Tetih nawh kawinih a ca thli te lukih ca anau thli angla awm u hau ai; tede te tila a awm u dawngah ahimi te Pathen lawng a do poen. ¹⁵ Te cakhaw oengca la aka awm nawh thlaang pakhat lawngah Khrihca a yu mai khaw, a vaa mai khaw maa ham a ngaih atah maa mai seh. He ang kawng atah Khrihca a yu lawng mai khaw, a vaa lawng mai khaw yalpawla sai seh. Nangmi ngaimawng ngaitoe la awm ham ni Pathen lawng n’khue u. ¹⁶ Khrihca la aka awm hutaa nang, ka vaa he ka thlawn thai manawh tite metila na thui thai? Khrihca la aka awm tawngpa nang ka yu he ka thlawn thai tlaih manawh tite metila na thui thai?

¹⁷ A-u khaw Bawipa lawng kutdo a peek tih Pathen lawng a khue vengkah angla te a awm u ham awm. He tah Khrihcabu boeih ah ka cang puei phung-alam ni. ¹⁸ Yahhuivuen aka reet thlaang te Pathen lawng a khue atah yahhuivuen reet la a awmna miknoekna te hoett boel seh; yahhui-vuen aka reet nawh thlaang te Pathen lawng a khue atah yahhui vuen te reet han boel seh. ¹⁹ Metihtiah yahhuivuen reet oen reet nawh te n’tu la khaw coengg nawh; Pathen kah awlpeek vai he ni awlpui la a awm. ²⁰ Thlaang boeih lawngah Pathen lawng n’khue u vengkah angla te awm uh. ²¹ Pathen lawng nang n’khue vengah sal la aw na awm? N’tu poei aih nawh; tede loeih ham atawng aleeng atah loeih ham sai. ²² Metihtiah Bawipa lawng a khue Sal pakhat he Bawipa kah thlaangcuem la awm poen; tetih van angla thlaangcuem a-u khaw Khrih lawng a khue atah ahih kah saltamnaa la ni a awm. ²³ Pathen lawng nangmi te aphu oen n’lai poen dawngah thlaanghing kah saltamnaa la te awm u boel. ²⁴ Maya manau thli, nangmi te amah lawng n’khue coeng vengkah na awm u angla te pakhat rip lawng Pathen oen pawlneeng uh.

²⁵ Tahe ah thlaanghoeng la aka awm thli kawng ca thut oen nan doet u te kavan thui ai. Bawipa tengkah awlpeek tah ka khueh nawh, tede Bawipa kah reenna rang oen uep-awm thlaang pakhat la ka awm van angla ka poekna he kan peek u.

²⁶ Tihin hang kah raina he poek vengah tawngpa hue ham tah tahe veng-kah angla a awm u atah theen bet tila ka poek. ²⁷ Na yu na lawh poen aw? Tetih atah na yu oen te pek hih boel. Na yu na lawh thlan atah na yu tlap hanlan boel. ²⁸ Tede na yu na lo mai cakhaw thawlhna na sai moenih; hutaa thlaanghoeng lawng vaa sa mai cakhaw thawlhna a sai moenih. Tede yu aka lo, vaa aka sa thlaang thli lawng hin roekk ah a tawng u patang raina dawng kalawng nangmi te loeih sak hamla ka ngaih dawngah ni.

²⁹ Maya manau thli, ka thuingaihna tah he tila ni: atue san hlang awm hang tlaih manawh, tedawngah tahe kalawng tah yu khueh thlaang lawngah yu khueh nawh thlaang angla awm seh; ³⁰ aka rap thlaang thli lawng kawthe nawh thlaang angla awm seh; aka nui thlaang thli te kawhoe nawh thlaang angla awm seh; thaihu aka lai thlaang thli lawng a lai thaihu te ka koe nawh ni a ti angla te awm seh; ³¹ dilai thaihu aka hawna thlaang thli lawngah aka hawna nawh angla awm u seh. Metihtiah he dilai he tahe vengkah angla asan awm tlaih manawh.

³² Nangmi he lakuengna kalawng loeih sak hamla ka ngaih. Yu aka lo nawh thlaang pakhat lawngtah Bawipa kah kawhoe bueng te a yawm dawngah Bawipa bii dawngah te ngaithuen. ³³ Tede yu aka lo thlaang lawngtah a yu te awmngaih sak ham a ngaih tih dilai thaihu dawngah nguenthuen; ³⁴ Tedawngah ahih te kawngaihna pahih lawngah a doek. Vaa aka sa nawh hutaa, tihnawhtah hulaa cuem lawngtah a pum oen muithla pahih bok la peek ham a ngaih dawngah Bawipa kah bii dawngah nguenthuen; tede vaa aka khueh hutaa tah a vaa te kawhoe sak ham a ngaih dawngah dilai thaihu dawng nguenthuen.

³⁵ Nangmi te bawm ham ka ngaih dawngah ni he he kavan thui. Kai lawng nangmi te khaang khak hamla ka yawm nawh. Te lak ah aka doeng tih aka soeng te nangmi sai sak ham ka ngaih tih atloe-abang awm tlaih ohla Bawipa kah bii dawngah namah oen namah te na peek u ngala ham ni.

³⁶ Yuvaa hih hamla a kang tangte te yuvaa nawh ham a poek atah he tila awm seh: tawngpa lawng hutaa te yuna ham tuueng aleng nawh tila a poek de, te kah hulaa a ngaihna te tlo aih tih yuna ham a poek atah a ngaihna angla yuvaa hih seh. He dawngah thawlhna awm nawh. ³⁷ Tede te tila sai ham ngah ngah tongnolh muehla tawngpa lawng yu lawh nawh ham a kaw a melh rap tih a ngaihna a thinkaw te a taa thai tih sai ham koei te anepla a poek heet ngoen poen atah te hutaa te a yuna nawh ah theen. ³⁸ Tedawngah a kang tangte hutaa te aka yuna thlaang lawngah thaihu theen ni a sai, tede akang tangte te aka yuna nawh thlaang lawng atheen ngaai te a sai.

³⁹ Vaa aka sa hutaa pakhat he a vaa te a hing khui atah hoerpoengla awm nawh; tede a vaa te a duek atah amah kawngaih tawngpa te ahoerpoengla a vaana thai, tede ca tah a vaa te Khrihca la a awm atah theen. ⁴⁰ Tecakhaw a awm noek angla amah bueng a awm atah awmngaih bet ai. Te tah kamah kah poekna ni, kai khaw Pathen Muithla ka khueh tila ka poek.

¹ Kutsaimuei tengah a nawn u caak awkk kawng cathut oen nan doet u te tahe ah kavan thui ai.

² A-u khaw ‘Ka ming van poen’ tila aka poek u lawngah a ming ham koei te ming tangtang nawh. ³ Tede Pathen aka lungna thlaang te tah Pathen lawng a ming.

⁴ Tedawngah kutsaimuei tengah a nawn caak awkk kawngah te: kutsaimuei he tah aka awm tangtang nawh thaihu yuengah a khueh u tite mami lawng m’ming u; Pathen pakhat bueng ni a awm tite mami lawng m’ming u. ⁵ Vaan ah khaw dilai ah khaw “pathen thli,” a ti u te awm mai cakhaw, tecoengah “pathen thli” oen “bawipa thli,” awm moen mai cakhaw, ⁶ mami ham tah Pathen pakhat bueng ni a awm, ahih tah soeprep boeih saikung la awm tih ahih hamla mami tah n’hing u; tecoengah Jesuh Khrih Bawipa pakhat bueng te awm, ahih rang oen ah soeprep tah sai la awm tih ahih rang oen mami he n’hing u.

⁷ Tede thlaang boeih lawng awltak he ming u nawh. Thlaang khatsut tah tihin toe ah kutsaimuei bokna lawng a ceeng khak poen dawngah te ang caak awkk te a caak u vengah kutsaimuei kah buh, an la te ahimi lawng tahe toe ah a poek mangkhak u hun; ahimi kah athe athetheen mingna thinkaw te a tha yoek sut tih te kah caak awkk lawng ahimi te ciim acaih sak nawh tila a poek u. ⁸ Tecakhaw caak awkk lawngah Pathen oen mami tuhkaina te roeng sak nawh; mami lawng n’ca nawh cakhaw mami kah sungna khat khaw awm nawh, mami lawng n’ca oe cakhaw mami ham athawnna khat khaw awm nawh.

⁹ Tede nangmi kah yalpawna lawng oengna tha aka yoek thlaang thli te thawlhna khuiah a tlimna la a coeng hau nawh ham ngaithuen uh. ¹⁰ Thuina mai ah athe atheen pekbona thinkaw tha aka yoek thlaang pakhat lawngah nangmi ‘Cuihhoena’ aka khueh hue lawng kutsaimuei bokna tempal khuiah na caak na awkk u te hu kawinih kutsaimuei tengah a nawn u caak awkk te caak ham thapeek angla awm nawh ai aw? ¹¹ Tedawngah tha aka yoek thlaang na maya manau, Khrih lawng a duek thil thlaang thli te nangmi kah ‘Cuihhoena’ lawngah te a rawk sak poen ai! ¹² He tila te Khrihca maya manau thli sawah thawlhna na sai u tih athe-theen pekbona thinkaw tha aka yoek thlaang thli te boengha na caak sakna rang oen Khrih sawah thawlhna na sai la awm. ¹³ Tedawngah caak awkk lawng maya manau thli te a thawlh sak atah maya manau thli thawlhna dawngah a tlim u nawh ham luciik sa te metuek ah khaw ka ca koep tlaih manawh.

¹ Kai he yalpaw thlaang nawh aw? Kai lawngah mami kah Bawipa Jesuh te ka hu nawh aw? Nangmi he ta, Bawipa dawngah kai kah biibi phu athaih apaai thli nawh aw? ² Thlaangtloe lawng atah kai he celtuih pakhat la poek u nawh mai cakhaw nangmi lawngtah celtuih la nan poek u. Metihtiah Bawipa oen pum-khatla na hing u dawngah kai he celtuih pakhat van ni tite nangmi lawngah na tueng sak u.

³ Kai he thlaang kah coel-acaa la ka awm vengah kamah oen kamah ka phungtuna tah he ni: ⁴ Bii ka bi dawngah he caak awkk te ka dang van ham tuueng nawh aw? ⁵ Kai lawngah atloe celtuih thli oen Bawipa kah a manau oen ah Piter mi angla yin ka cehna ah Khrihca la aka awm yu-aca te ka ceh puei thai van nawh ai aw? ⁶ Barnabas oen kai bueng lawngah aw ka hingna ham bii ka bi hih ai? ⁷ A-u lawng nuem amah tangka oen raalkap bii a bi? Lotoen thlaang a-u nuem a lo khuikah misur thaih te caak ohla aka awm? Tuudoen a-u nuem amah kah tuu suuktui te awkk muehla aka awm?

⁸ Kai lawngah he ang thli he hin roekk kah huhna oen nuehtahna ka thui nawh, metihtiah Phungawl lawngkhaw hetih toeng toeng la ni a thui. ⁹ Mosi kah Phungawl dawngah, “Vaitaw taal pakhat te caang na tiil sak vengah a kaa te khuem pe rap boel” tila a thui. Pathen lawng vaitaw taal kawng aw a thui? ¹⁰ Te tila a thui te kaimi he thuingaihna tang tang nawh aw? Kaimi ham ni a thut. Laithawl aka sai thlaang oen caang aka aat thlaang lawngah a huh ham tuueng caangthaih te a ngaiuep tih a bi u. ¹¹ Kai hih lawngah muithla caangti te nangmi tim ah ka tuh poen. Nangmi tengkah thaihu apuung ataai te kaimi lawng ka ah u te yahawh aih aw? ¹² Thlaangtloe lawng nangmi tengkah te ang thaihu te dang hamla a ngaiuep u atah kaihih lawngah yahawh ngaai te ka ngaiuep nawh ai aw?

¹³ Tempal bok-im khuiah bii aka bi lawng Tempal bok-im kah caak awkk te a dang u van tih bokna-thaang dawngah luciik buulna aka nawn thlaang lawngkhaw luciik sa te thoem a bawn van tite na ming u. ¹⁴ Tetih van angla awlthang theen aka thui thlaang thli lawngkhaw awlthang theen phawngna dawng kalawng bung-khuutna dang hamla Bawipa lawng a khueh.

¹⁵ Tede he saithaina he khatca khaw kai lawng ka hawna nawh, te ang sai thaina te kamah ham tahe ah ka ngaih dawngah ca kavan thut moenih. Te lak atah duek lamha ka ngaih ngaai! Ka thangpawmna u he a-u lawngkhaw awl poeila a sai ham te ka ngaih nawh! ¹⁶ Awlthang Theen ka thui dawng maiah ka thangpawm u ham awm nawh. Atak tang atah awlthang theen phawng ham roe la ni awl m’peek. Kai lawng awlthang theen ka phawng nawh kawinih metihtlukla kai ham mueirihtamyiin la a awm! ¹⁷ Kamah lawngah bii he ka tuek tih ka bi kawinih aphu dang hamla ka ngaiuep suide; he bii he bi hamla Pathen lawng m’peek dawngah ka bi ham koei roe la ka bi. ¹⁸ Te atah thapang n’tu ka dang? Ka bii phu te tah thapang lawh ohla Awlthang Theen ka phawng thaina oen awlthang theen bii ka bi dawngah kamah ham dang koei te ka bih nawh he ni.

¹⁹ Kai tah a-u kah saltamnaa la khaw ka awm nawh, kai tah thlaangcuem ni; tede thlaang yahawh te ka doek thaina ham kamah oen kamah thlaang boeih kah sal la ka awm. ²⁰ Judah thlaang thli tengah bii ka bi vengah ahimi te lawh thaina ham Judah thlaang angla ka awm; tecoengah Mosi kah Phungawl huiah aka awm thlaang thli tengah bii ka bi vengah ahimi te lawh thaina ham, Phungawl huiah ka awm tlaih nawh de aka awm angla te ka awm van. ²¹ Tetih van la te Judah thlaang thli kah Phungawl dau ah aka awm Gental thlaang thli te lawh thai ham ahimi angla ka awm. He tila ka awm he Pathen kah phungawl te ka vai nawh ka tila thuingaihna moenih; ataktangla Khrih kah phung awl huiah ka awm. ²² Oengna tha aka yoek thlaang thli tengah bii ka bi vengah ahimi te lawh thaina ham ahimi tha aka yoek sut angla ka awm. Metila khaw acoengg thai khoem atah avaang athal mai khaw thoem ka thlawn ai nuem ka ti dawngah thlaang boeih tengah ahimi angla ka awm van.

²³ He ang thli boeih he awlthang theen kawngah ni ka sai, awlthang theen dawngkah yotheen kam-awmna te rek-ara thaina ham ni. ²⁴ Loehlang heengna poei ah thlaang yahawh lawngah loeh u de pakhat lawng ni kutdo a dang tite na ming u. Tedawngah kutdo huh hamla heeng u lah. ²⁵ Loehlangna hengna poei ah thuum ham aka ngaih boeih lawngah atlawh hlangla amah oen amah phep u, aka cak poe nawh raipai lumuek te dang hamla te tila a sai u; tede mami lawngtah tlumtloei thai nawh dungyan aka cak poe te dang hamla ni n’sai u. ²⁶ Tedawngah kai tah mengtengna lansak te pha ham adoengla ka heeng phaat; thoekna poei ah kut thluem oen thlaang phak phak aka thoek thlaang angla ni ka awm. ²⁷ Thlaangtloe te loehlangna ah thuum ham ka ceel coengah loehlangna ah kamah he n’thoek hau nawh ham ka pum he atlawhla ka phep oepsoeh.

¹ Maya manau thli, Mosi hu aka vai mami kah patuer thli tengah thaihu aka thoeng te na poek u hamla ka ngaih. Ahimi boeih te muui lawngah a thiing khoep tih Tuitunlii Seen ah te ading asuekla kaa u thai. ² Ahimi lawngah Mosi kah hubang la muui oen ah tuitunlii khuiah baptisma a dang u. ³ Ahimi boeih lawng muithla takawi te a caak u tih, ⁴ muithla tui te a awkk u. Ahimi oen haih aka cet muithla lungnu dawngkah tui te a awkk u; te lungnu te tah Khrih amah te ni. ⁵ Tede ahimi tim kah thlaang yahawh sawah Pathen tah a kaw hoe nawh, tedawngah ahimi kah rawkk te divinlangre ah a darh u khonghak.

⁶ Te ang thli boeih te tahe ah mingna miknoek la awm. Ahimi lawng thaihu the te a ngaih u angla mami lawngtah ngaih nawh ham; ⁷ ahimi timkah thlaang vaang lawng kutsaimuei te a bok u angla mami lawngtah bok nawh ham ngaithuen sakna ni. Caciim lawngah, “thlaang thli lawng caak awkk hamla poei ah te ngawl u tih yuu awkkna, cuk-halh thawlhna poei la te a coengg sak u.” tila a thui. ⁸ Ahimi timkah thlaang vangg lawng hutaa tawngpa thawlhna a sai u van angla mami lawngtah sai ham awm nawh, te tila a sai u dawngah thlaang thongkul thongthum hin at ah duek drek u. ⁹ Mami lawng Bawipa te noekdak hamla awm nawh, thlaang vangg lawng te tila a sai u dawngah ruul lawngah a tuk dingkang tih duek u. ¹⁰ Thlaangvaang lawng angla te mami lawng a caitoek ham awm nawh, te tila a caitoek u dawngah ahimi te Duekna Vanthlaang lawng a ngawn u. ¹¹ Te kah thaihu boeih ahimi tengah aka thoeng te thlaangtloe thli kah noekna ham oen mami kah ngaithuenna ham ni ahimi lawng a thut. Metihtiah atue aboet tawm vengah he mami n’hing u dawngah ni.

¹² A-u khaw acakla ka pai ngoen tila aka poek thlaang lawngah a tlim thawlh nawh ham ngaithuen seh. ¹³ Nangmi sawah aka law noekna te thlaang boeih tengah aka thoeng noekdakna van mai ni. Tede Pathen tah awlkam cak tih nangmi lawng na taa thai nawh toe atah noekna te van thoeng sak aih manawh; nangmi tengah noekdakna avan pha vengah ueh thaina ham tharana te m’peek vetih loeihna hamla lawngpui avan roek ai.

¹⁴ Tedawngah ka lungna ka puei thli, kutsaimuei te bok u boel; ¹⁵ Nangmi tah kaw aka poek thai thlaang la na awm u dawngah ni kavan thui u; kavan thui he namami lawng pekthlee uh. ¹⁶ Mami lawng Pathen tengah awmngaih ciil n’thui tih Bawipa Thlembuh veelna ah boengloeng n’hawna tih te khui-kah misurtui n’awkk te Khrih thisen dawngah mami n’cuutna ni. Tecoengah mami lawng takawi te n’eh tih n’caak u te mami lawng Khrih pum dawngah cuutna ni. ¹⁷ Takawi thluem at awm tih, te takawi thluem at te n’cuut u dawngah mami he thlaangmi la tah yahawh mai cakhaw pumkhatla ni n’awm u. ¹⁸ Israel thli te poek u lah; Luciik la a nawn te aka ca boeih tah Pathen kah bokna-thaang dawngah biibina ah te thuum u. ¹⁹ He tila ka thui he kutsaimuei, tihnawhtah kutsaimuei tengah a nawn caak awkk te atheenna khaw awm van tila ka thuingaihna aw? ²⁰ Tetih nawh ni! Kai lawng ka thui ngaihna tah he ni. Lukih thli kah bokna-thaang dawngah Luciik thawthuengna te tah raai thli tengah a nawn u ni, Pathen tengah a nawn nawh ni. Nangmi te raai thli oen tuhkai sak ham te ka ngaih nawh. ²¹ Nangmi lawngah Bawipa kah boengloeng oen raai kah boengloeng te khaw na aw renten thai nawh vetih Bawipa kah caboi oen raai thli kah caboi te khaw vai at la na veel thai manawh. ²² Mami lawng Bawipa te thatlai sak ham n’ngaih u aw? Ahih lak ah tha-awm thara ngaai la aw m’mah oen m’mah he m’poek u?

²³ Ahimi lawngah, “Me ang thaihu khaw kaimi lawng sai thai koei ni,” ti u. Soeng ngoen ta, tede soeprep boeih sai he tah theen luem nawh. “me ang thaihu khaw kaimi lawng sai thai koei ni.” ti u, tede soeprep boeih he hoeikhangna awm luem nawh. ²⁴ A-u khaw amah kah theenna ham bueng te tlap boel selang thlaangtloe kah theenna te khaw tlap seh.

²⁵ Athetheen mingna kawpoek cawm-aam dawngah awl doet re muehla meh dawr kah a yoeih meh boeih te badipla ca u hawn. ²⁶ Metihtiah Caciim lawngah, “Dilai oen dilai dawng aka awm thaihu boeih he Bawipa koe ni.” tila a thui.

²⁷ Oengca la aka awm nawh thlaang lawng buh pan la n’khue tih na ceh atah awl kaa doet muehla na haiah avan toen boeih te kammueh la ca hawn. ²⁸ Tede thlaang pakhat khat lawngah, “He tah kutsaimuei tengah a nawn u luciik thawthueng sa ni,” a ti atah aka thuikung kah athetheen mingna kawpoek acaihna ham te kah caak awkk te ca mai boel, ²⁹ Athe atheen mingna kawpoek ka ti te nangmi kah kawpoek nawh tih thlaang kah kawpoek ni ka ti. Thlaang khatsut lawngah, “Te tih atah thlaangtloe kah athe atheen pekbona kawpoek lawng ka yalpawna he n’tu hamla avan kang khak ai? ³⁰ Kai lawng caak awkk, hamla Pathen tengah awmngaih awl ka thui tih te kah awm ngaih awl ka thuina caak awkk kawngah te a-u lawng kai he athela a thui ai? tila nan doet u mai ai.

³¹ Theen ngoen ta, na sai boeih te khaw, na caak na awkk te khaw seh apum boeih la Pathen ruep-awmna ham sai uh. ³² Judah thlaang khaw, Gental thlaang khaw, Pathen Khrihcabu khaw, awlpuung kaacaan thuitheetna a awmna nawh ham te tila te na khawsakna te awm sak uh. ³³ Ka sai angla sai u van; ka sai boeih he thlaang boeih kah kawhoena ham ni ka yawm, kamah ham theenna te ka poek nawh tih thlawnna te a dangna u thai ham thlaang boeih kah theenna te ni ka poek.

¹ Tedawngah kai lawng Khrih kah khawboe ramlang te ka oett van angla nangmi lawngkhaw kai kah khawboe ramlang he oett u van lah.

² Nangmi lawng kai he nan poek khuep u tih na kut dawngah kan peek cangpueina te na vai u dawngah kan koeh u. ³ Tede nangmi te ming sak ham ka ngaih tah Khrih tah tawngpa boeih kah a luu la awm, a vaa he tah a yu kah a luu la awm tih Pathen tah Khrih kah a luu la awm ti he ni. ⁴ Tedawngah tawngpa lawngah rangpui lawng Pathen a bokna ah a thangthui vengah khaw, Pathen awlthang a phawng vengah khaw a luu te a muui atah Khrih te thaang a the sak. ⁵ Tecoengah hutaa pakhat lawngah rangpui lawng Pathen a bokna ah a thangthui vengah khaw, Pathen awlthang a phawng vengah khaw a luu te a muui nawh atah a vaa te thang a the sak; te ang te tah luu-ngong hutaa oen atloe-abangna awm nawh. ⁶ Hutaa lawng a luu te a muui nawh atah a sam te luu-ngawng la vawkk ngala seh. Hutaa ham tah sam vawkk khaw, luu-ngawng khaw yahna koei la a awm dawngah hutaa lawng a luu muui seh. ⁷ Tawngpa he tah Pathen kah muei-asam oen ruep-awmna te tuengsakkung la a awm dawngah tawngpa lawng a luu muui hamla ngoe nawh. ⁸ Metihtiah tawngpa he hutaa pum dawngkah sai nawh tih hutaa ni tawngpa pum dawngkah a sai. ⁹ Tawngpa he hutaa hamla sai nawh tih hutaa he ni tawngpa hamla a sai. ¹⁰ Tedawngah vanthlaang thli te hinyahna la hutaa he a vaa kah ukna aana khuiah awm tite tuengsakna ham hutaa lawng a luu te muui seh. ¹¹ Tecakhaw Bawipa ah mami hingna dawngah hutaa he amah poek ah tawngpa ohla awm thai nawh tih tawngpa khaw amah poek ah hutaa mueh la tah awm thai nawh. ¹² Metihtiah hutaa he tawngpa dawngkah a sai, tetih van angla tawngpa khaw hutaa lawng ni a cuun van; soeprep boeih he a sai tih aka awmsakkung tah Pathen ni.

¹³ Hutaa he rangpui lawng Pathen a bokna ah a luu a muui muehla Pathen tengah a thangthui te hutaa pakhat ham roeproei aw tite namami lawng poek uh. ¹⁴ Dilai khawsakna dawngah tawngpa lawng asanla sam a thlung te; yaraula awm tih, ¹⁵ tede hutaa lawng sam asanla a thlung te a thlaang theenna la awm. A sam sanhlang te a luu muina ham ni a peek. ¹⁶ Tede a-u lawngkhaw he kawngah awl oelh ham a ngaih atah kaimi lawngkhaw, Pathen Khrihcabu thli lawngkhaw, Pathen bokna ah phung alam atloe khueh thloei nawh.

¹⁷ He tila kavan thui u vengah he nangmi te kan koeh thai nawh, metihtiah nangmi lawng Pathen bok ham na pum u te atheenna lak ah athe ni a thoeng sak ngaai. ¹⁸ Lamhacuek ah nangmi lawngah Pathen bok ham na pum u vengah te bu la pekbona awm tila te ka yaak tih te tah soeng mai cawini ka ti. ¹⁹ (Asoengna ben ah aka awm thlaang thli te aciimla huhna ham ah nangmi tim ah pekbona a awm te soeng mai.) ²⁰ Nangmi lawngah thik at la na pum u vengah nangmi lawng na caak na awkk u te Bawipa Thlembuh nawh ni. ²¹ Metihtiah na caak u vengah te namah kah buh an te na caak na awkk u tih khatsut tah a bung a pawng vengah khatsut tah yuu te ruui u poen. ²² Nangmi lawng na caak na awkk na ham im na khueh u nawh aw? Te tila na awm u te Pathen kah Khrihcabu te yah bai ham na ngaih u tih voetna aka awm thlaang thli te yahpawh sak ham na ngaih u aw? He kawngah he nangmi tengah kai lawng n’tu avan thui ai tila na ngaiuep u? Nangmi te kan koeh ai aw? Kan koeh roeroe nawh mue!

²³ Metihtiah Bawipa teng kah ka huh te ni nangmi te patoeng kan cang puei u. Thlaang kut ah a peekna yiin ah te Bawipa Jesuh lawng takawi te a lawh tih, ²⁴ Pathen tengah awmngaih awl a thui coengah takawi te a eh tih, “He tah ka pum ni, nangmi ham ni. Kai he poe nan mingna poepa u ham he tila sai uh.” tila a thui. ²⁵ Te tih van angla thlembuh a caak u coeng khoeng ah boengloeng te a lawh tih, “He boengloeng he tah ka thisen oen ka cak sak Pathen kah awlkam paipi athaai ni. Nangmi lawng na awkk u veng roekk ah kai he nan ming poena ham sai uh.” tila a thui.

²⁶ He kah thuingaihna tah takawi te na caak u veng roekk ah, boengloeng dawngkah te na awkk u veng roekk ah amah a law thlantoe Bawipa kah duekna te na phawng u tila thuingaihna ni. ²⁷ Tedawngah amah te hinyahna ohla pakhat khat lawng Bawipa kah takawi te a caak tih a boengloeng dawngkah te a awkk atah Bawipa kah pum oen a thisen sawah thawlhna ni a sai. ²⁸ Tedawngah thlaang boeih lawng lamhala amah oen amah te noem acai u seh, tecoengah takawi te ca selang tah boengloeng dawngkah te khaw aw seh. ²⁹ Metihtiah takawi te a caak tih boengloeng dawng-kah te a awkk vengah Bawipa kah pum a thuingaihna te a ming nawh atah amah sawah awlcekna te a caak a awkk haih. ³⁰ Tedawngah ni nangmi thlaang yahawh tengah tlawhnat la thoeng tih thlaang yahawh hlangla na duek u lawt. ³¹ Mami lawng m’mah oen mah te lamhala n’noem acai u atah Pathen kah awlcekna mami sawah van pha manawh. ³² Tede mami tah he dilai oen phe haih nawh hamla Bawipa lawng mami he awl n’cek tih dan m’peek u.

³³ Tedawngah maya manau thli, nangmi lawng Bawipa Thlembuh veel hamla thik at la na pum u vengah pakhat oen khat riing uh. ³⁴ Tecoengah te tila na pum u vengah te Pathen kah awlcekna ah na phana u nawh ham bungpawng thlaang a awm atah amah im ah buh ca seh. Atloe abang thli ngoen tah kamah ka law vengah kavan thui u badai.

¹ Ciim Muithla kutdo kawng cathut oen nan doet u te tahe ah kavan thui ai.

² Nangmi lukih la na awm u vengah te hingna aka khueh nawh kutsaimuei bokna lawnghang na vai u te na ming. ³ Nangmi ming sak hamla ka ngaih tah Pathen Muithla lawng a mawt thlaang a-u khat lawngkhaw “Jesuh te kawsi yawkk seh.” ti nawh vetih Ciim Muithla lawng a mawt thlaang nawh atah a-u khat lawngkhaw “Jesuh tah Bawipa ni,” tila thui tang manawh.

⁴ Muithla benkah kutdo he aphun atloetloela awm, tede te kutdo te Muithla pakhat lawng ni a peek. ⁵ Biibina he lawngpui atloetloela awm, tede Bawipa pakhat kah bii te ni m’bi u. ⁶ Bii bina ham thoemthaina atloetloela awm, tede ating atawkk la bii bina ham thoemthaina te Pathen lawng ni a peek. ⁷ Thlaang pakhat rip kaw khuiah Muithla a awm te lawngpui atloetloela tueng tih te tah thlaang boeih kah theenna ham ni. ⁸ Muithla lawng thlaang pakhat te cuihna oen aka betoet awlthang te a peek tih thlaang pakhat te tah mingna oen abetoet awlthang te Muithla lawng a peek. ⁹ Te kah Muithla pakhat te lawng ni thlaang pakhat tengah oengna a peek tih atloe pakhat teng atah thlaangtlo hoeih sak thaina huham tharana te a peek. ¹⁰ Thlaang pakhat teng atah kawpoek rai saithaina huham tharana te Muithla lawng a peek tih atloe teng atah Pathen awlthang thui thaina kutdo te a peek; tecoengah atloe khat teng atah kutdo thli he Muithla ben kah aka law aw, Muithla ben kah aka law nawh aw tite pekbona ham thoemthaina te a peek. Thlaang pakhat teng atah mingnawh awl cal hamla thoemthaina te a peek tih atloe pakhat teng atah mingnawh awl te thuicaih thaina te a peek. ¹¹ Tede he thaihu boeih he aka saikung tah Muithla pakhat lawng ni a sai; amah kawngaih la thlaang pakhat rip te kutdo atloetloe a peek.

¹² Khrih tah pum dawngah a beek thli moen aka awm pum pakhat oen lo u. Pum te a beek thli atloetloe moen awm de pum tah pakhat ni. ¹³ Tetih van angla mami boeih he tah Judah oen Gental thlaang khaw, sal oen thlaangcuem khaw, Muithla pakhat lawng pum pakhat dawngah baptisma m’peek tih awkk koeila Muithla pakhat te ni mami m’peek u.

¹⁴ Pum he a beek pakhat bueng oen sai nawh tih a beek yahawh hlang oen a sai. ¹⁵ Khow lawngah, “Kai tah kut la ka awm nawh tih pum dawngah ka thuum nawh,” ti kawinih, te tila a ti dawngah pum dawngkah a beek la a awmna te toeng sak manawh. ¹⁶ Tecoengah haa lawngah, “Kai tah mik la ka awm nawh tih pum dawngah ka thuum nawh” ti kawinih te tila a thui dawngah pum dawngkah a beek la a awmna te toeng sak manawh. ¹⁷ Pum boeih he mik la awm biit kawinih metila awl te n’yaak thai ai? Tecoengah haa bueng la awm boeih kawinih abaw-ava te metila huuem thai ai? ¹⁸ Tede Pathen lawngtah pum dawngkah a beek thli he amah lawng a khueh ngaihna ah atloetloela a khueh. ¹⁹ Pum he a beek pakhat bueng la awm kawinih pum la te awm thai manawh! ²⁰ Te tila te a beek tah awm moen mai de pum tah pakhat ni.

²¹ Tedawngah kut lawngah mik te, “Nang he kan ngoe nawh” tina thai nawh. Luu lawngah khaw khow nala te, “Nang he kan ngoe nawh.” tina thai nawh. ²² Atak tang atah tha aka khueh nawh angla aka awm pum dawngkah a beek thli muehla tah coengg thai nawh; ²³ Mami lawng a phu aka awm nawh la m’poek u a beek thli te mami lawng awlpuila thabuei thabahna ngaai u; pum dawngkah huh theen nawh a beek thli te n’thoei n’caam u, ²⁴ aka theen tangte a beek thli te tah thoei acaam hamla ngoe nawh. Te kah a beek thli lawng hinyahna te a dang tarena ham te tila te Pathen amah lawng pum he te tila a sai. ²⁵ Tedawngah pum dawngah he pekbona awm nawh, a beek atloetloe lawngah khat oen khat kah theenna te a sai u. ²⁶ Pum dawngkah a beek pakhat lawng nganbawh a yaak atah a beek boeih nganbawh a yaak puei u; a beek pakhat te thangpawm la a awm atah atloe boeih lawng a awmngaih puei u.

²⁷ Nangmi boeih tah Khrih kah pum la na awm u tih a beek la rip na awm u. ²⁸ Khrihcabu khuiah he ang thli boeih he Pathen lawng a khueh; lamhacuek ah celtuih he a khueh, pahihna ah tawngha thli a khueh tih a pathumna ah cangpueikung thli te a khueh; tecoengah kawpoek rai aka sai thlaang thli te a khueh tih thlaangtlo hoeih sak thaina aka dang thlaang thli, thlaang aka bawmcemkung thli, thlaang uktemkung thli oen ming nawh awl aka cal thlaang thli lawng a thoei u. ²⁹ Ahimi te celtuih la awm boeih nawh, tawngha la khaw awm boeih nawh tih cangpueikung la khaw awm boeih u nawh. Thlaang boeih lawng huham tharana khaw khueh rip nawh tih ³⁰ thlaangtlo hoeihsakna khaw, ming nawh awl cal khaw, ming nawh awl te thuicaih thaina khaw khueh rip u nawh. ³¹ Tedawngah awlpui ngaai kutdo dawngah na thinkaw te khueh uh. Te ang thli boeih lak ah atheen koek te kavan thui ai.

¹ Kai lawngah thlaanghing kah awlcawm awlcee oen vanthlaang awl pateng ka cal thai cakhaw lungna ka khueh nawh atah ka awl-thui he curumngang la awl aka riing mong oen tlaklak awl angla ni a awm mai. ² Kai lawngah thlaang kawthawhna awl te thui thaina kutdo te ka khueh cakhaw; kai lawngah cuihna boeih ka khueh tih awlhuep boeih te yaakming thaina ka khueh cakhaw, kai lawngah tlaang sawm thoeih sak thaina oengna boeih te ka khueh cakhaw lungna ka khueh nawh atah kai he ahong la ni ka awm. ³ Kai lawngah ka khueh thaihu boeih he khawdeng harah te ka rek ka ra boeih mai tih ka pum he luciik la thawthueng ham ka pe mai cakhaw lungna ka khueh nawh atah kai dawngah atheenna roe awm nawh.

⁴ Lungna lawngtah khawdawp a ngaai tih reenna a khueh; lungna lawngtah uett-eena khaw, halangna khaw, Oekthloenna khaw khueh nawh; ⁵ lungna tah khawboe the nawh, amah ham bueng poek nawh, a thin toi nawh; lungna lawngtah thlaang kah thawlhpalhna te poek khuep nawh; ⁶ lungna tah athe dawngah awmngaih nawh tih awltak dawngah awmngaih. ⁷ Lungna tah a kaw boet nawh tih oengna, ngaiuepna a khueh, a thin san tih a kaw daw.

⁸ Lungna tah dungyan toela cak. Tawngha awl te thui thaina awm cakhaw kawlkalh ah boeih ai; ming nawh awl cal thaina awm cakhaw boet ai; cuihhoena awm cakhaw khum kang ai. ⁹ Metihtiah mami kah cuihhoena kutdo oen tawngha awl thui thaina he avaang athal mai ni; ¹⁰ tede asoepbirna te avan pha veng atah avaang athal la aka awm boeih he tah ha-ata boeih ai.

¹¹ Camaw la ka awm veng atah camaw angla awl ka thui, camaw angla ka kaw thlawp tih camaw angla kaw ka poek; tahe atah tawngpataang la ka awm poen tih camaw moeiboe te ka hawna tlaih nawh. ¹² Tahe ah mami lawng thaihu n’huh u he tah thlalang dawngah arui araila muei ame aka tueng angla ni a awm; vuenvai ah ngoen tah haitang heet la n’hu poen ai. Tahe ah kai lawng ka ming he avaang athal mai ni; Pathen lawng kai m’mingna he asoepbir van angla vuenvai ah ngoen tah asoepcala ka ming van ai.

¹³ Awlpui thaihu pathum awm: te tah oengna, ngaiuepna oen lungna he ni, he thli boeih khuiah lungna he abokoek ni.

¹ Tecoengah lungna he hawna ham yawm u lah. Muithla ben kah kutdo dawngah na thinkaw te khueh uh, awlpuila Pathen awlthang phawngna kutdo te khueh hamla yawm uh. ² Ming nawh awl aka cal thlaang pakhat lawngah thlaangtloe tengah awl thui nawh tih Pathen tengah ni a thui, metihtiah ahih awl te a-u lawngkhaw yaakming pe nawh. Ahih lawng Muithla kah huham tharana rang oen awlhuep awltak te ni a thui. ³ Tede Pathen kah awlthang te aka phawng lawngtah thlaangping tengah bawmcemna awl, thapeekna awl, thloepthloeina awl te a thui. ⁴ Ming nawh awl la a cal te tah amah bueng lawng ni a hoeikhangna, tede Pathen awlthang a thui te tah khrihcabu boeih lawng a hoeikhangna.

⁵ Nangmi boeih he ming nawh awl la cal sak ham ka ngaih; tede Pathen awl phawngna te na khueh u ham ka ngaih ngaai. Metihtiah Pathen awlthang aka phawngkung tah ming nawh awl aka cal lak ah aphu awm ngaai. Khrihcabu kah hoeikhangna hamla a awl thui te aka letkung a awm nawh atah aphu awm nawh. ⁶ Tedawngah maya manau thli, nangmi tengla ka law vengah mingnawh awl la ka cal kawinih nangmi hamla kai he hoeikhangna awm ai aw? Awm tang manawh! Pathen tengkah awlphawng pakhat mai khaw, cuihna mai khaw, tawngha kah awlthang mai khaw, cangpueina mai khaw kavan khuen nawh atah nangmi ham hoeikhangna awm nawh. ⁷ Hingna aka khueh nawh riingding thaihu phiviit khaw, tingtoeng khaw a awl te atheenla a thoeng nawh atah lum-alaa te me ang a tum u tite metila thlaang lawng a ming thai ai? ⁸ Pengsara aka tum lawngkhaw acairaula a tum nawh atah a-u ceem tloek ham a kamthlah ai? ⁹ Tetih van angla ming nawh awl oen ah mingtungplau nawh la awlthang na thui u te a-u lawngah nangmi kah awl thui akawng alam te a yaakming ai? Nangmi kah awl te yilh dawngah ni a ha-ata mai ai! ¹⁰ Dilai dawngah awl lakloe moen awm tih te awl boeih te a thuingaihna aka awm nawh awl khat khaw awm nawh. ¹¹ Tede kai lawng ka yaakming nawh awl thuikung thlaang te kai ham tah thlaangphun tloe la awm tih kai khaw ahih ham tah thlaangphun tloe la ka awm van. ¹² Nangmi lawngah muithla kutdo te khueh hamla na thinkaw a thluembuek u van angla atloe boeih lak ah khrihcabu roengna aka bawm thai ngaai te khueh ham yawm uh.

¹³ Tedawngah ming nawh awl aka cal thlaang lawngah amah kah awl thui kutdo te thuicaih thaina ham thangthui seh. ¹⁴ Metihtiah he tila ka thangthui vengah ka muithla tah thangthui ngoen de ka thinkaw tah te dawngah te awm nawh. ¹⁵ Tetih atah me tih ka ti ai? Kai lawng ka muithla oen ka thangthui vetih ka thinkaw oen khaw ka thangthui ai; ka muithla oen laa ka sak vetih ka thinkaw oen khaw laa ka sak ai. ¹⁶ Nang lawng muithla bueng oen Pathen teng awmngaih awl na thui vengah nangmi kah pumna ah aka thuum van thlaang thoet mailai lawngah nangmi kah awmngaih ciil thui thangthuina ah te metila “Amen” tila a thui thai ai? Nangmi kah awl thui te ahih lawng a ming moenih ta. ¹⁷ Nangmi kah awmngaih ciil thui thangthuina te theen hlang cakhaw thlaangtloe hamla hoeikhangna awm nawh.

¹⁸ Nangmi boeih lak ah ming nawh awl la yahawh ngaai ka cal dawngah Pathen ka uem tangkiik. ¹⁹ Tede khrihcabu lawng Pathen a bokna ah ming nawh awl oen athong asang thui lak ah thlaangtloe cangpueina ham tah yaakming thai awllung lung ngaa te ka thui bet dai ai. ²⁰ Maya manau thli, kawpoekna dawngah camaw angla awm u boel; the-arana nawh ben atah camaw la awm uh, kawpoekna ben atah poekna aka soep lungcuih thlaang la awm uh. ²¹ Caciim dawngah, “Awl lakloe aka cal thlaang thli rang oen ah, ka thlaangphun thli tengah awl ka thui ai. Thlaangphun tloe thli kah hui-kaa oen ah awl ka thui pe ai, te pateng khaw ka thlaangphun thli lawng ka awl he hutung u nawh baal hun ai, tila Bawipa lawng a thui.” tila te a thut.

²² Tedawngah ming nawh awlcal kutdo he tah oengca la aka awm nawh thlaang thli ham noekna ni, oengca la aka awm thlaang thli ham nawh ni, Pathen awlthang phawngna kutdo he tah oengca thli kah noekna ni, oengca la aka awm nawh thlaang thli ham nawh ni.

²³ Tecoengah khrihcabu lawng khat la kang na pum u tih thlaang boeih lawng ming nawh awl la na cal pluep vengah te thlaang thoet mailai khaw tihnawhtah oengca la aka awm nawh thlaang te va kuun mai kawinih nangmi te cuih taal thlaang thli ni ti nawh ai aw? ²⁴ Tede nangmi boeih lawng Pathen kah awlthang na phawng u vengah oengca la aka awm thlaang khaw, thlaang thoet mailai khaw pakhat khat te va kuun mai kawinih awl a yaakna rang oen a thawlhna te ahih lawng a ming ai. A yaak awl boeih lawng a thinkaw te a phoel pe vetih, ²⁵ ahuepla a poek boeih te a tueng pe pheng ai, tecoeng atah buekuep vetih Pathen te a bok van vetih, “Nangmi tim ah he Pathen awm tangtang!” tila te a thui van ai.

²⁶ Maya manau thli ka thuingaihna tah he tila ni. Nangmi lawngah Pathen bok hamla na pum u vengah te pakhat lawngtah laa sak hamla na khueh, pakhat lawngtah cang puei ham na khueh, pakhat lawngtah Pathen tengkah awlphawng thui ham na khueh, pakhat lawngtah ming nawh awl oen awlthang thui ham na khueh tih pakhat lawngtah ming nawh awl thuicaih thaina te na khueh u mai ai. Soeprep boeih te Khrihcabu hoeikhangna ham sai uh. ²⁷ Mingnawh awl oen thui ham aka ngaih te a awm atah yahawh koek ah pahih lawng aw, tih nawh atah pathum lawngah pakhat coeng pakhat thui u selang tah pakhat khat lawngah awl te thuicaih pe seh. ²⁸ Tede te ah te awl aka let thai thlaang pakhat khaw a awm nawh atah ming nawh awl la aka cal thlaang te awm duem mai selang tah amah bueng Pathen tengah thui mai seh. ²⁹ Thlaang pahih lawng aw, nawh atah pathum lawng aw Pathen awlthang te a thui vetih ahimi kah awl thui te atloe hue lawngah asoeng oen asoeng nawh khaw nai-anawng u seh. ³⁰ Tede pumna ah aka ngawl thlaang pakhat lawngah Pathen tengkah awlthang a dang te thui ham a khueh atah awl aka thui lii te toeng sak ham awm. ³¹ Thlaang boeih lawng thuituenna awl te a yaak tih tharana te a dangna ham nangmi boeih lawng pakhat coeng pakhat Pathen awlthang te phawng uh. ³² Pathen awlthang phawng ham kutdo aka dang awlthuikung lawngah a kuemsuem u ham awm. ³³ Metihtiah mami he khawpaw rang-au la awm ham Pathen lawng ngaih nawh, roeproeina oen ding asuek la awm sak ham ni a ngaih.

³⁴ Khrihcabu boeih ah Pathen thlaang thli kah awm ih van angla pumna ah te hutaa lawng ading asuekla awm u seh. Ahimi te awl thui sak boel; Judah thlaang thli kah Phungawl lawngah a thui angla ahimi te teemkung la awm u boel seh. ³⁵ Ahimi lawngah thaihu pakhat khat kawng te ming ham a ngaih u atah a vaa thli te im ah doet adap u seh. Khrihcabu pumna ah hutaa pakhat lawng awl a thui he yaraula awm.

³⁶ Pathen kah awl he nangmi teng kalawng aw a law? Nangmi teng bueng ah aw avan pha? ³⁷ Thlaang pakhat lawngah amah oen amah Pathen kah laipai la ka awm tila khaw, muithla ben kah kutdo ka khueh tila khaw a poek atah nangmi tengah ca kavan thut he Bawipa kah awlpeek ni tite ming seh. ³⁸ Tede ca kavan thut he n’tula a sak nawh atah ahih te n’tula khaw ngaai u van boel.

³⁹ Tedawngah maya manau thli, Pathen awlthang phawng ham te ngaih ngaai u lah, tede ming nawh awl cal te khaw khang u boel. ⁴⁰ Thaihu soeprep boeih he along a-im ah anep-anoeila sai ham awm.

¹ Maya manau thli, Nangmi tengah kavan phawng Awlthang Theen, nangmi lawng na do u tih oengna ah acakla na paina u te tahe ah nangmi ming sak koep ham ka ngaih. ² Te tah nangmi tengah kavan phawng awlthang theen te ni. Nangmi lawng acakla na phoeih khak u atah te kah awlthang theen rang oen nangmi thlawnna na dang u, te tih nawh atah nangmi kah oengna te ahong la ni a awm.

³ Kai lawng ka dang tih nangmi kan peek patoeng he tah awlpui tangkiik ni, te tah Caciim dawngah a thut angla Khrih tah mami kah thawlhna dawngah ni a duek; ⁴ tecoengah a up u tih Caciim dawngah a thut angla athum hin ah tho koep; ⁵ Piter tengah te phumpho tih tecoengah celtuih paha thlaihih tengah te a phumpho pe. ⁶ Tecoengah a hubang thli ya-ngaa thlai tengah vai at a phumpho pe, thlaang vangg tah duek u poen, akuum ngaai tah hing u hun. ⁷ Tecoengah Jeem tengah a phumpho coengah celtuih boeih tengah te a phumpho pe.

⁸ Hukhueng atah thangyah angla aka awm kai thlaangtueng thlaangtaa nawh tengah khaw phumpho van. ⁹ Metihtiah celtuih boeih khuiah kai tah cawmthawk nawh koek la ka awm, kai lawng Pathen khrihcabu te ka heem ka tek dawngah celtuih ti ham pateng ka koeih nawh. ¹⁰ Tede Pathen lungvatna rang oen tahe kah ka awm angla he ka awm tih lungvatna m’peek te khaw apoei-oepla ka khueh van nawh. Atloe celtuih hue lak ah kai tah apuehla bii ka bi ngaai, tede kai lawng ka bi ti ham awm nawh tih ka tengkah Pathen lungvatna lawng ni a bi. ¹¹ Tedawngah kai teng kalawng aka law te khaw, ahimi teng kalawng aka law te khaw, he ni kaimi boeih lawng ka phawng u tih he ni nangmi lawng na tangna u.

¹² Tahe vengah he Khrih tah duekna kalawng tho koep tite kaimi lawng kavan phawng u lal maiah nangmi timkah thlaang khatsut lawng thlaangduek he tho koep tang manawh na ti u thai? ¹³ Tete asoeng tangtang atah Khrih he tho nawh ti ngaihna ni. ¹⁴ Khrih he duekna kalawng a thawh koep nawh atah kaimi lawng phawng ham koei n’tu khaw ka khueh u nawh vetih nangmi lawngkhaw tangna ham koei n’tu khaw awm van manawh. ¹⁵ Thlaangduek thli thawhkoepna awm nawh tite soeng taktak kawinih Khrih he thawh sak koep manawh, Khrih he duekna kalawng tho koep tite kaimi lawng ka thui u dawngah kaimi tah Pathen kawng hoempaw aka thui la ni ka awm u poen ai. ¹⁶ Metihtiah thlaangduek he tho nawh kawinih Khrih khaw tho manawh. ¹⁷ Tecoengah Khrih a thawh koep nawh atah nangmi kah oengna te khaw thailatna mailai la awm vetih tahe toe ah nangmi thawlhna khuiah na ha na taa lii u hun. ¹⁸ Tecoengah Khrih ah aka duek oengca thli khaw ha-ata boeih ti ngaihna poen ni. ¹⁹ Khrih ah mami kah ngaiuepna he tihin hang hingkhui bueng hamla theen doek kawinih vawva mai poen ni, dilai dawngah mami lak ah he tamreen tamvaih thlaang a-u khaw awm tlaih nawh. ²⁰ Tede awltak tah duekna kalawng Khrih a thawh he tah duekna khuiah aka ip muelh thlaang thli ham khaw thawhkoepna aamahkhan la awm. ²¹ Metihtiah thlaang pakhat rang oen duekna he va law, tetih van angla duekna kalawng thawhkoepna he khaw thlaang pakhat rang oen va law. ²² Metihtiah Adam oen tuhkaina rang oen ah thlaang boeih he duekna lawng a khuk dulh, tetih van angla Khrih oen tuhkaina rang oen thlaang boeih he hingna ah tho koep ai. ²³ Tede thlaang boeih he amah kah aitleng lawng a pha vengah tho rip ai; lamhacuek ah Khrih he tho poen, tecoengah amah a law vengah amah kah thlaang thli te tho ai. ²⁴ Tecoeng atah atue boetna te a pha poen ai; Khrih lawngah ukkung muithla the boeih, ukna aana khuehkung thli oen huham tharana boeih te a taa vetih Pa Pathen tengah Ram ukna te a peek ai. ²⁵ Metihtiah raal boeih te a taa tih amah khowtang ah a khueh thlanatah Khrih lawngah a uk ai. ²⁶ Hukhueng koek taa ham raal te tah duekna ni. ²⁷ Metihtiah Caciim lawng, “Pathen lawng soeprep boeih he amah khowtang ah a khueh” tila a thui. “Thaihu boeih” ti vengah Khrih khowtang ah soeprep khuehkung Pathen amah he tah thuum nawh ti he tah ciim ngoen. ²⁸ Tede soeprep boeih he Khrih kah ukna huiah a khueh coeng atah soeprep boeih ahih khowtang ah khuekung Pathen kah ukna huiah a Capa amah he awm van vetih thaihu cungkuem soeprep boeih te Pathen lawng a uk poen ai.

²⁹ Tetih atah thlaangduek yuengla baptisma aka dang thlaang thli te ta metila a awm ai? Ahimi lawng n’tu a ngaiuep u tih a sai u? Thlaangduek thli he tho nawh tite khatsut hue kah thui angla asoeng tangtang atah n’tu hamla ahimi lawngah thlaangduek hamla baptisma te a sai u kai? ³⁰ Te atah, mami lawng ta, n’tu ham khawhin roekk ah rih awm patang raina he n’khang khiing u? ³¹ Maya manau thli, kai tah khawhin roekk ah pacil pahaai duek thlipit la ka awm poepa! Nangmi he tah mami kah Bawipa Khrih Jesuh oen pum khat la awmna ah ka pawmsangna la na awm u dawngah he tila ka thui ni. ³² Kai lawngah thlaanghing pumsa ngaihna ben oen ah he Efesa khaaw ah “Satluung thli” oen ka khoelh u mai kawinih n’tu ka dang ai? Tede thlaangduek thli he hingna ah a thawh pai atah, “Thangvuen ah n’duek u poen ai, ca u silang tah aw u sih,” tila a thui angla te awm u van sih aw!

³³ Ngau-athuu u boel, “Thlaangthe lawng thlaang theen a poeih” ti de lah koen. ³⁴ Na thinkaw te caihpan sak u langtah thawlhna te toeng u loeih. Khatsut lawngtah Pathen khaw na ming u nawh tih yak uh ka ti dawngah ni tila ka thui.

³⁵ Thlaang pakhat lawngah, “Metila thlaangduek he hingna ah a thawh koep ai? Me ang pum araw la a awm ai? tila awldoetna awm mai ai. ³⁶ Nangmi thlaangngau hue! Nang lawng dilai dawngah caangti na tuh vengah a duek nawh atah a thing po thai nawh. ³⁷ Nang lawngah caangti mai khaw, khatsut atloe amu-ati mai khaw na tuh vengah amu-ati ni na tuh, athing aka roeng hang tangte na tuh moenih ta. ³⁸ Pathen lawng te kah amu-ati te amah kawngaih la akung te acoeng sak; ati-amu boeih te amami kah akung te rip a peek.

³⁹ Tecoengah aka hing boeih kah asa-ataai he vai u rip nawh; thlaanghing lawng asa-ataai phun tloe a khueh, ram sa lawng phuntloe a khueh, va lawng phun tloe a khueh tih nga lawngkhaw phun tloe a khueh.

⁴⁰ Tecoengah vaan benkah pum awm tih dilai benkah pum khaw awm; vaan benkah pum lawng a khueh a thlaang theenna te atloela awm tih dilai ben kah pum lawng a khueh a thlaang theenna te atloela awm. ⁴¹ Khawmik lawng amah kah a thlaang theenna a khueh, thla lawngkhaw a thlaang theenna atloe a khueh tih aisi thli lawng a thlaang theenna alakloe a khueh; tecoengah aisi khuiah pateng khaw a thlaang theenna a phunphun alakloe rip a khueh u.

⁴² Thlaangduek thli khaw hingna ah a thawh koep u vengah he tila ni a awm van ai. Pum he up la a awm vengah aka duek thai la awm tih, a thawh koep vengah aka duek thai nawh la awm. ⁴³ Pum he vui la a awm vengah te a thlaangthe tih a tha khueh nawh, a thawh koep vengah tah a thlaang theen tih a tha ra. ⁴⁴ Pum he vui la a awm vengah dilai pumsa la awm tih a thawh koep veng atah muithla benkah pumsa la awm ai. Dilai, pumsa khaw awm tih muithla ben kah pumsa khaw awm. ⁴⁵ Metihtiah Caciim lawngah, “Lamhacuek tawngpa Adam te thlaanghing la a sai.” ti, tede hukhueng Adam te tah hingna pekung Muithla ni. ⁴⁶ Muithla benkah pum he lamhacuek la law nawh tih dilai ben kah pum he ni aka law, tecoengah ni muithla ben kah pum he a law hun. ⁴⁷ Adam lamhacuek te dilai a sai tih dilai dawng kalawng va law; Adam apabena tah vaan kalawng ni a law. ⁴⁸ Dilai koe la aka awm thlaang tah dilai oen a sai thlaang te oen ah lo u tih vaan kah thlaang tah vaan kalawng aka law thlaang oen ah lo u. ⁴⁹ Dilai oen a sai thlaang kah muei asam oen ah mami n’khuk adah u van angla vaan ben thlaang kah muei-asam oen ah te mami n’khuk adah u van ai.

⁵⁰ Maya manau thli ka thuingaihna tah thi-asa oen a sai pum lawngah he Pathen Ram te paang thai manawh, tecoengah aka duek thai lawngah aka duek thai nawh te khueh thai manawh.

⁵¹ Awlhuep awltak he hutung u lah: Mami he boeih n’duek u manawh, tede hukhueng koek pengsara te a tum vengah kawlkalh mikkhah palap ah n’thaw u poen ai. ⁵² Metihtiah pengsara te a tum veng atah thlaang thli te tho u vetih metuek ah khaw duek u tlaih manawh, mami boeih he n’thaw pan u poen ai. ⁵³ Metihtiah a rong-ing la aka awm thai he rong-ing thai nawh la thaw u pan vetih aka duek thaihe aka duek thai nawh la pan thaw u poen ai. ⁵⁴ Tedawngah rong-ing thai koei la aka awm te rong-ing thai koei nawh la pan thaw u vetih duek thai la aka awm te duek thai nawh la a thaw u pan veng atah,” Duekna te a phe poen; Taana tah soepbir poen!” ⁵⁵ “Duekna, mela muem na taana te a awm? Duekna, mela nuem na tharana sue te a awm?” tila caciim lawng a thui te atak tang la thoeng poen ai.

⁵⁶ Duekna lawng tharana sue te thawlhna dawng kalawng a dang tih thawlhna lawngah tharana te Phungawl dawngkah a dang. ⁵⁷ Tede mami kah Bawipa Jesuh Khrih rang oen mami taana pekung Pathen tengah thangtheenna awm hawn seh!

⁵⁸ Tedawngah ka lungna maya manau thli, paihuen net lang acakla pai uh. Bawipa kah bii na bi u te metuek ah khaw apoei-oepla awm nawh tih ahong-ahii nawh ni tite na ming u dawngah Bawipa bii na bina dawngah te tokthlue poepa uh.

¹ Judia ram ah aka awm Pathen thlaang thli bawmna hamla tangka cawi ham kawng ca navan thut te tah: Galati peng kah khrihcabu thli tengah ka thui pe angla te sai u van. ² Yarh roekk kah lamhacuek khawhin ah nangmi pakhat rip lawngah tangka na dang taring ah ayawl ayet khaw tungsep uh; te atah kai ka law vengah tangka cawi ham ngoe tlaih manawh. ³ Kai ka law coengah nangmi lawng na tuek thlaang thli te awl uenna ca ka peek vetih ahimi te nangmi kah kutdo thak hamla Jerusalem la ka tuih ai. ⁴ Kai khaw ceh van hamla angoena a awm atah ahimi oen kamah he haih ka cet u ai.

⁵ Macidonia ram he hiil-adawng ham a awm dawngah Macidonia ram hiil-adawng coengah ni nangmi tengla ka law hun ai. ⁶ Nangmi tengah te ka awm khiing la koeih mai, sikca khui puet tah ka awm maila koeih, tecoengah ka ceh ngaihna ah yin la koekthoek ka cehna ham te nan bawm u thai ai tila ka ngaiuep. ⁷ Nangmi tengah kawlkalh ah pah tih nangmi te huh doek ham mai tah ka ngaih nawh; Bawipa lawngkhaw akhan atah nangmi tengah asan hlang awm ham ka ngaiuep.

⁸ Efesa khaaw ah he pentikos khawhin toe ah ka awm ai. ⁹ Kai he aka oelhtaih thlaang yahawh awm de, he ah he bii bi thaina atue theen awm.

¹⁰ Nangmi tengla Timote he avan pha vengah a awmdamna nawh hamla nangmi lawng atheenla ngawlh pai puei uh, ahih he kai angla Bawipa kah bii ni a bi.

¹¹ Nangmi a-u khat lawngkhaw ahih te dapsit la van hu u boel, ngaimawng ngaitoela yin la thoeng thoeng cet tih ka teng avan pha koep thaina hamla bawmcem uh, kai oen maya manau thli lawng ahih avan pha koep ham te ka ngaiuep u. ¹² Tecoengah manau Apollos kawng tah: atloe maya manau thli oen haih nangmi tengah ceh hamla ka thui pe poepa de tahe veng atah coengg thai thlan ai tila a poek. Te cakhaw a hoeng atoeih vengah law badai.

¹³ Ngaithuen huertue uh, oengna dawngah acakla pai uh, na thin cak sak uh, na tha thloet u boel. ¹⁴ Na sai boeih te lungna oen sai uh. ¹⁵ Nangmi lawngah Stefanas oen a imkhuikaw te na ming u; Ahimi tah Akhaia khaw ah lamhacuek khrihca la awm u tih Pathen thlaang thli ham bii bina dawngah tlungmu u, ¹⁶ he ang thlaang thli kah mawtna te vai u lang bii aka bi thlaang boeih oen bawng-yawng u langtah bii bi uh. ¹⁷ Stefanas, Fotunatas oen Akhaikas mi he a law u dawngah ka awmngaih. Nangmi na awm u nawh ah khaw ahimi lawng n’hilh u sak. ¹⁸ Nangmi te na kaw avan hoe sak u van angla te kai khaw ka kaw avan hoe sak u. He ang thlaang thli he tah koeh ham awm. ¹⁹ Asia ram khuikah khrihcabu thli lawng nangmi te n’toei u; Akuila, Priscilla oen ahimi im ah aka pum khrihcabu lawng nangmi te n’toei u. ²⁰ He kah aka awm maya manau boeih lawng n’toei u.

²¹ Kai Pawl lawngah voemtoeina ca he kamah kut roeroe oen kavan thut. ²² Bawipa te aka lungna nawh thlaang tah kawsi yawkk seh!

²³ Bawipa Jesuh kah lungvatna tah nangmi boeih sawah awm hawn seh. ²⁴ Kai kah lungna he Khrih Jesuh ah aka awm nangmi boeih sawah awm seh.