ZEKHARIAH

ZEKHARIAH

¹ Siangpahrang Darius a bawi kum hnih kum, thla riat thla ah, Bawipa bia cu profet Zekhariah sinah a phan; Zekhariah cu Berekhiah fapa a si, Berekhiah cu lddo fapa a si: ² - ³ Cu bia cu, Bawipa cu nan pupa hna cungah a thin a hung ngaingai, ti a si. Mizapi cu chim hna law, mah hihi Bawipa bia a si tiah ti hna: "Ka sinah ra kir u law nan sinah ka ra kir ṭhan ve lai, tiah ralkapbu Bawipa nih a ti. ⁴ Nan pupa hna bantuk kha si hlah u. Hlanlio profet hna nih, ’Mah hihi Bawipa bia a si: Nan ziaza ṭhalo le nan tuahmi thilṭhalo khan i mer u,’ an rak ti hna. Sihmanhsehlaw ka bia an ngai lo i zei ah an ka rel fawn lo, tiah Bawipa nih a ti. Atu ah tah nan pupa hna cu khuazei ah dah an um kun? ⁵ Profet hna cu tah a zungzal in an nung maw? ⁶ Sihmanhsehlaw ka profet hna sinah ralrinnak bia le biachahnak bia ka pekmi hna nih khan nan pupa hna cu a phak hna a si lo maw? Khi tikah annih nih i ngaihchih in, ’Ralkapbu Bawipa nih aa timhning bantukin kan cungah a tuah cang; kan nunning le kan tuahsernak he aa tlakning in kan cungah a tuah,’ tiah an ti lo maw?" tiah a ti. ⁷ Darius a bawi kum hnihnak, thla hleikhat thla, Shebat timi thla, a ni kul le ni li ni ah, Bawipa bia cu profet Zekhariah sinah khan a phan: Zekhariah cu Berekhiah fapa a si, Berekhiah cu Iddo fapa a si. ⁸ Zahan ah langhnak pakhat ka hmuh. Kuar pakhat ah hin mipa pakhat ka hmuh i cu pa cu lenhmui thingkung lakah a dir i rangtum sen aa cit; cun a hnuah cun rang dang a nak le a pawl le a rang kha an um. ⁹ "Mah hihi zei dah an si, bawipa?" tiah ka ti i bia a ka ruahtu vancungmi nih khan a ka leh i, "Zeidah an si kha kan hmuhsak lai," a ka ti. ¹⁰ Cun lenhmui kung lak i a dirmipa nih cun a ka thawh i, "Annih cu vawlei cung vialte cul dih awkah Bawipa nih a thlahmi an si," tiah a ti. ¹¹ Bawipa vancungmi sinah cun, lenhmui lak i a dir lioah khan an va kal i, "Vawleicung cu kan cul dih; vawlei cu daite le hnangam tein a um ko," an ti. ¹² Khi tikah Bawipa vancungmi nih cun aa thawh i, "Maw ralkapbu Bawipa, hi kum sawm sarih chung na thinhunnak na chuahhnawhmi Jerusalem khua le Judah ram khua hna hi, zei can dah zaangfah loin na um rih hna lai?" tiah a ti. ¹³ Khi tikah Bawipa nih a ka chawntu vancungmi sinah cun bianem le hnemhnak bia a chim i vancungmi nih cun a ka thawh i, ¹⁴ Va thanh tuah, hihi Bawipa bia a si: Jerusalem le Zion hi ka ham ngaingai hna; ¹⁵ sihmanhsehlaw zaang awl ngaiin a um komi miphun hna an cungah hin ka thin a hung, zeicahtiah ka thinhunnak cu a nemte a si ko lioah khan, annih nih ṭhat lonak kha pakhat hnu pakhat an chap chin lengmang. ¹⁶ Cucaah mah hihi Bawipa bia a si: Jerusalem cu zaangfahnak he ka kirhnawh ṭhan cang i a chungah ka inn kha sak a si ṭhan lai, tahnak hri in tah a si ṭhan lai, tiah Bawipa nih a ti. ¹⁷ Ralkapbu Bawipa bia cu mah hihi a si kha voi khat in chim ṭhan rih tuah: Ka khuapi hna cu thil ṭhaṭha in an khat ṭhan lai; Zion cu Bawipa nih a hnemh ṭhan lai, Jerusalem cu aa thimmi khua ah a ser ṭhan lai. ¹⁸ Cunglei kha ka hun zoh i ki pali kha ka hmuh hna. A ka chawntu vancungmi kha hi ki pali cu zeidah an sullam a si, tiah ka hal i, "Judah le Jerusalem a ṭhiotu ki an si," tiah a ka leh. ²⁰ Cun Bawipa nih soser pali a ka hmuhsak. ²¹ Annih cu zei tuah awkah dah an rat ti kha ka hal i, "Khi ki hna nih khin Judah le Jerusalem cu ṭhalo tuk in an ṭhio hna caah ahohmanh nih an lu an tung kho ti lo. Sihmanhsehlaw hi soser pali hna nih hin annih cu an fonh ṭhan hna lai i Judah ram le a chung i a ummi minung a dohtu hna miphun hna ki kha an hlonh hna lai, cu tuah awkah cun an ra," tiah a ti.

¹ Cunglei ka hun zoh i mipa pakhat tahnak hri aa putmi kha ka hmuh. ² Khuazei ah dah na kal lai, tiah ka hal i, "Jerusalem khua kha ka va tah lai i zei kauh dah a si awk a si ti le zei can dah a si awk a si ti kha ka va zoh lai," a ti. ³ Cun bia a ka ruahtu vancungmi cu a kal tikah khan, ⁴ a dang vancungmi pakhat amah ton awkah cun a hung chuak i, "Va tli law tlangvalpa khi va chim law, Jerusalem khua cu kulhnak a ngei lomi khua a si lai i a chung i a ummi minung le saṭil cu an tam tuk hringhran lai. ⁵ Bawipa nih, Keimah cu a velchum in mei vampang ka si lai i a laifang ah a sunparnak ka si lai, a ti, tiah va chim," tiah a ti. ⁶ Tho u, tho u, chaklei ram in zam u, tiah Bawipa nih a ti; zeicahtiah vancung thlitu pali hna bantuk khin nan thla kan zamter hna lai, tiah Bawipa nih a ti. ⁷ Tho u, Babilon ram i a ummi Zion mi hna, zam u, ⁸ Nanmah an ramhtu hna miphun hna sinah khan ralkapbu Bawipa nih rian a ka fial tikah a chimmi bia cu hihi a si, nanmah an tawngtu hna cu anmah an mit falai aa tawngmi an si. ⁹ An cungah ka kut ka hler cang, annih cu an sal hna caah khan hranchaw an si lai. ¹⁰ Cucaah nannih nih ralkapbu Bawipa nih a ka thlah kha nan hngalh lai. Fak piin au law i lawm tuah, maw Zion fanu, ka ra lio, nanmah lakah ka um lai, tiah Bawipa nih a ti. ¹¹ Khi ni ah Bawipa sinah miphun tampi an ra lai i a mi an si lai i nannih lakah amah cu a um lai. ¹² Khi tikah nannih nih keimah cu ralkapbu Bawipa nih a ka thlah ti kha nan hngalh lai. Ram thiang chungah Judah cu Bawipa nih amah ta si awkah a lak ṭhan lai i Jerusalem cu aa thimmi a khuapi ah a ser ṭhan lai. ¹³ Miphun vialte hna, Bawipa hmaiah dai tein um tuah u! Zeicahtiah amah cu a umnak hmun thiang khan aa thawh cang.

¹ Cun Bawipa vancungmi hmai i a dirmi Tlangbawi Ngan Joshua le amah cu sualphawt awkah a orhlei kam in a dirhnawhtu Satan kha ka hmuh. ² Bawipa nih Satan cu a thawh i, "Satan, nangmah cu Bawipa nih kan sik, Jerusalem khua a thimtu Bawipa nih kan sik. Hi mipa hi mei chungin chuahmi mei thingthu a si lo maw?" tiah a ti. ³ Joshua cu vancungmi hmai i a dir ah khan a thurhnawmmi thilpuan aa hruk; ⁴ cun vancungmi cu aa mer i a tuammuaitu hna kha, "A thilpuan a thurhnawmmi kha phoih u," tiah a ti hna. Cun aa mer i amah cu a thawh i, "Zeitindah na sualnak kan lakpiak cang kha zohhmanh, nangmah cu thilpuan ṭha in kan thuamh," tiah a ti. ⁵ Cun aa thawh ṭhan i, "A lu ah lupawng thiang ponh u," tiah a ti. Cucaah Bawipa vancungmi a dir ko lioah cun a lu ah lupawng thiang kha an ponh i thilpuan thiang kha an hrukter. ⁶ Cun Bawipa vancungmi nih hi bia kha fek tein Joshua kha a pek: ⁷ "Mah hihi ralkapbu Bawipa bia a si. Ka lam kha na zulh hna i ka rian kha na ṭuan hna ahcun, ka inn chungah khuakhang laireltu na si lai i ka biaceihnak inn hna cu na uk hna lai, cun hika i rian a ṭuantu hna lakah hin luhnak nawl le chuahnak nawl na ngei lai. ⁸ Tlangbawi Ngan Joshua, ngai hmanh, nangmah le na hmaiah a ṭhumi na hawile hna cu, nan dihlak in thil a tlung ding chingchiahnak nan si: atu cu ka sal Thing Nge kha ka ratpi lai. ⁹ Ni khat ah ram chung sualnak kha ka thianh lai. Joshua hmai i ka chiahmi lung kha hika ah hin a um ko, a chung i mit mit sarih a ummi lung kha. ¹⁰ Khi ni ah cun nan dihlak in mahle mitsur ruang toi cio le theipi kung tang cio i ṭhut awk kha nan i sawm lai, tiah ralkapbu Bawipa nih a ti.

¹ Bia a ka ruahtu vancungmi kha a ra kir ṭhan i i hngilhnak i vun hlauh bantuk khin a ka hlauh. ² "Zeidah na hmuh?" tiah a ka hal i, "Sui in sermi meiinn tung pakhat," ka ti. "Cu meiinn tung cu a lu ah chiti chiahnak kheng pakhat a um. Cun meiinn tung ah cun meiinn pasarih an um i pakhat nih meica pasarih cio an ngei. ³ Meiinn tung pawngah cun kam khat ah pakhat veve in oliv kung pahnih an um. ⁴ Cun vancungmi cu, "Hi thil hna hi an sullam zeidah a si, bawipa?" tiah ka ti. ⁵ Cun a ka leh i, "Na hngal lo maw? a ka ti i, "Ka hngal lo, bawipa," ka ti. ⁶ Vancungmi nih cun Zerubbabel kha hi bia Bawipa sinin a rami hi va chimh awk a ka fial: Na tei ko lai, sihmanhsehlaw ralkap ṭhawnnak in a si lai lo, nangmah ṭhawnnak zongin a si lai lo, ka thlarau tu in a si lai. ⁷ Dawntu, tlang tia pipi kha na hmai in an lo lai. Biakinn cu na sak ṭhan lai i lung hmanung bik na vun khin ah khin mizapi nih, "Aa dawh, aa dawh," tiah an au lai. ⁸ Bawipa sinin bia dang pakhat a ra ṭhan: ⁹ Zerubbabel nih Biakinn hram cu a bunh cang. Mah hihi a si tikah ka mi hna nih an sinah nangmah aan thlahtu cu keimah ka si kha an hngalh lai. ¹⁰ Rian kha a kal khawh lo caah an hnabei a rak dong; sihmanhsehlaw Zerubbabel nih Biakinn cu a sak peng ko ti kha an hmuh lai i an lung aa lawm lai. Vancungmi nih cun, "Meiinn pasarih hna cu vawlei vialte a zoh dihtu Bawipa mit pasarih an si," tiah a ti. ¹¹ Cun ka hal ṭhan i, "Meiinn tung kap veve i a ummi oliv kung pahnih hna hi tah zeidah an sullam a si?" ka ti. ¹² Cun oliv nge pahnih, oliv chiti toihnak peng pahnih hna pawng i a ummi hna hi tah zeidah an sullam a si?" ka ti. ¹³ "Na hngal lo maw?" tiah a ka hal. "Ka hngal lo, bawipa," tiah ka leh. ¹⁴ Cun a ka thawh i, "Vawlei dihlak Bawipa a simi Pathian nih a thimmi hna pahnih an si," tiah a ti.

¹ Cunglei kha ka hun zoh ṭhan i a zuangmi cazual kha ka hmuh. ² "Zeidah na hmuh," tiah a ka hal i, "A zuangmi cazual, dong kul a sau i dong hra a kaumi," tiah ka leh. ³ "Mah hihi ram pumpi a cultu chiatserhnak a si; khattelei kam i ṭialmi hin mifir vialte kha hloh dih an si lai i khattelei kam i aa ṭialmi hin lih in chiat a sermi vialte kha hloh dih an si lai. ⁴ Ralkapbu Bawipa nih, ’Ka thlah cang i mifir hna inn kip ah le ka min in lih in chiat a sermi vialte hna inn kip ah a lut lai, khi inn chungah a um lai i a thing he a lung he a hrawh dih hna lai,’ a ti," tiah a ti. ⁵ Bia a ka ruahtu vancungmi cu a hung chuak i a ka thawh i, "A hung chuakmi thil khi hei zohhmanh," tiah a ti. ⁶ Zeidah a si? tiah ka hal i, "Bawm nganpi," a ti; A sullam cu, ram chung dihlak sualnak, ti a si. ⁷ Bawm cu suan i sermi chin a ngei i ka zoh ko lioah cun a chin cu an hun i a chungah cun minu pakhat kha a ṭhu ko. ⁸ Cun vancungmi nih cun aa thawh i, "Hi nu sullam cu ṭhat lonak a si," a ti i minu cu bawm chungah khan a vun nam chih i suan tlap cu bawmka ah khan a chinh. ⁹ Cun khua ka hei zoh ṭhan i nu pahnih an ra chuak i khulrang in an zuan kha ka hmuh, vaca bantukin thla an ngei i bawm kha van le vawlei karah an zuanpi. ¹⁰ Bia a ka ruahtu vanmi kha, khuazei ah dah bawm cu an kalpi lai, tiah ka hal i, ¹¹ "Shinar ram ah an kalpi i cuka ah cun a caah inn pakhat an sak lai i cu inn cu lim a si tikah a chungah cun bawm cu an chiah lai i an biak lai," tiah a ka leh.

¹ Cunglei ka hun zoh ṭhan i tlang pahnih karlak in rangleng pali an chuah kha ka hmuh i tlang cu dar sen in sermi tlang an si. ² Rangleng pakhatnak nih cun rangtum sen a ngeih hna, pahnihnak nih rangtum nak a ngeih hna, ³ pathumnak nih rangtum rang a ngeih hna i palinak nih rangtum pawl a ngeih hna. ⁴ Bia a ka chimtu vanmi cu, "Bawipa, mah hihi zeidah an si?" tiah ka hal i, ⁵ Mah hna hi vawlei cung dihlak Bawipa a tuammuaitu vancung thlitu pali cu an si i atu cu chuah an i zal cang. ⁶ Rangtum nak a ngeimi rangleng hi chaklei ram ah a kal lai, rangtum rang a ngeimi hi nitlaklei ah a kal lai, rangtum pawl a ngeimi hi thlanglei ah a kal lai i rangtum sen a ngeimi hi nichuahlei ah a kal lai," tiah a ka leh. ⁷ Kal i vawlei cung dihlak cul kha an duh tuk hringhran i cucaah, "Va kal u law vawlei kha va cul dih u," tiah a ti i cu bang cun rangleng hna nih cun an tuah. ⁸ Cun hei zohhmanh, tiah a ka auh i, "Chaklei ram i a kalmi hna nih khin chaklei ram ah ka thlarau cu dinhnak an pek," tiah a ti. ⁹ Bawipa bia cu ka sinah a ra i, ¹⁰ "Babilon in a ra kir ṭhanmi raltang hna Heldai, Tobiah, Jedaiah le Zefaniah fapa Josiah sin khan sui le ngun la hna. ¹¹ La hna law bawiluchin pakhat in ser law Jehozadak fapa Tlangbawi Ngan Joshua lu ah khan chin tuah. ¹² Cun amah cu na thawh lai i, ’Mah hihi ralkapbu Bawipa bia a si: Hi pa hi Thing Nge timi cu a si lai; a umnak vawlei khan a hung ṭhang lai i Bawipa biakinn kha a sak lai. ¹³ Bawipa biakinn a satu ding cu amah a si lai, siangpahrang sunparnak a hmu ding cu amah cu a si lai, a bawiṭhutdan cungah a ṭhu i a orhlei kamah tlangbawi he a uktu ding cu amah a si lai; cun an karlak ah remnak a um lai,’ na ti lai," tiah a ti. ¹⁴ Bawiluchin cu Heldai, Tobiah, Jedaiah le Zefaniah fapa Josiah nih an zohkhenh lai i biakinn chungah khan hngalh camcinnak thil ah an um lai. ¹⁵ Ram hlapi i a ummi hna kha an ra lai i Bawipa biakinn saknak ah cun rian an ra ṭuan lai, cucaah ralkapbu Bawipa nih keimah cu nan sinah a ka thlah ti kha nan hngalh lai. Bawipa nan Pathian cu a nawl nan ngaih ahcun hi thil cu a tlung ko lai!

¹ Siangpahrang Darius a bawi kum li kum, Kislev thla timi thla kua thla a ni li ni ah Bawipa bia cu Zekhariah sinah a phan. ² Bethel-Sharezer nih Regem-melek cu a mi hna he khan Bawipa nawl awkah a hun thlah hna. ³ Bawipa inn chung i a ummi tlangbawi hna sinah khan le profet hna sinah khan, "Kum hi zat chung riangruang ka tuah tawn bangin, thla nganak thla ah hin ngaihchia le i sum in maw um awk ka si ko rih lai?" tiah an ti awk a si lai. ⁴ Cun ralkapbu Bawipa bia cu ka sinah a ra i, ⁵ "Ram chung i a ummi mi vialte hna le tlangbawi hna cu, ’Hi Kum sawm sarih chung, thla nganak thla le thla sarihnak thla i rawl nan ulh i nan ṭah tawn tikah hin, nan rawl ulhnak hi keimah upatnak ca taktak ah maw a si? ⁶ Nannih nih nan ei i nan din tikah hin nanmah nuamhnak caah a si ko lo maw? ⁷ Jerusalem cu dai tein a um i a chungah mi tampi an rak um i cu bantukin a pawngkam khua hna zong an rak si i Negeb le Shefelah zong an rak si lio i Bawipa nih hlan lio profet hna sinin a thanhmi kha mah hihi a si lo maw?’ tiah na chimh hna lai," tiah a ti. ⁸ Bawipa bia cu Zekhariah sinah a phan. ⁹ Ralkapbu Bawipa bia cu hihi a si: Dinnak taktak kha biaceihnak ah hmang u, pakhat le pakhat zumhawktlak tein um u law i zaangfah u, ¹⁰ ngakṭah le nuhmei, ramdangmi le sifakmi kha serhsat hna hlah u, pakhat le pakhat nan cungah ṭhat lonak kha i tlunter hlah u," a ti. ¹¹ Sihmanhsehlaw ngaih an duh lo, zeirello in keimah kha an ka hnuhoih, an hna kha an i phih i theih an duh lo. ¹² An lungthin cu lung bantukin a hak: hlanlio profet hna thawngin a thlarau in ralkapbu Bawipa nih a cawnpiaknak hna kha i lak an duh lo; cucaah ralkapbu Bawipa thinhunnak ruangah cun fahnak kha an in. ¹³ Ka auh tik hna ah an ngaih lo caah kei zong nih an ka auh tikah ka ngai ve lo, tiah Ralkapbu Bawipa nih a ti; ¹⁴ Cucaah an hngalh bal lomi miphun hna lakah ka dawi hna i an ram cu ṭiao relrul in an kaltak i pakhat hmanh an i chawk an i let ti lo. Cuticun an ram a nuam ngaimi cu pakpalawng ah an ser.

¹ Ralkapbu Bawipa bia cu ka sinah a phan. Ralkapbu Bawipa bia cu hihi a si: ² "Zion cu ka ham ngaingai i ṭihnung tiangin ka ham," tiah a ti. ³ Cun Bawipa nih, "Atu cu Zion ah khan ka ra kir ṭhan cang i Jerusalem ah khan ka um lai. Jerusalem cu Zumhtlak Khualipi ti a si lai i ralkapbu Bawipa tlang cu Tlang Thiang ti a si lai." tiah a ti. ⁴ Mah hihi ralkapbu Bawipa bia cu a si: "Jerusalem khua chung lam hna ah cun nutar le patar hna kha an ṭhu ṭhan lai, an kum a upat caah ṭhiangṭhunh kha an i hngauhchan cio lai; ⁵ cun khuapi chung lam cu ngakchia an khat lai i lam ah cun lente an i celh dulmal hna lai," tiah a ti. ⁶ Mah hihi ralkapbu Bawipa bia cu a si: "Hi miphun chungin a tangmi hna caah, cucu cu ni ah cun a si kho lomi thil lo hmanh seh law, ka caah tah a si kho lomi thil a lo ve hnga maw?" ti hi ralkapbu Bawipa bia hrimhrim a si. ⁷ Hihi ralkapbu Bawipa bia a si: ⁸ "Zohhmanh, ka mi hna cu nichuahlei ram le nitlaklei ram in ka chuah hna lai i Jerusalem khua chung i um awkah ka kirpi hna lai. Annih cu ka mi an si lai i biatak le dinnak in kei cu an Pathian ka si lai," tiah a ti. ⁹ Mah hihi ralkapbu Bawipa bia a si: Biakinn cu sak a si ṭhan lai, tiin profet hna nih, ralkapbu Bawipa inn kha a hram dirh a si lio in atu tiang an chim lengmangmi biakamnak, atu chan ah a theimi nannih nih lung ṭhawng in um tuah u. ¹⁰ Zeicahtiah cu caan tiangah cun mi kha an ṭuan man an pe hna lo i saram man zong kha pek an si fawn lo, ral an um caah ahohmanh an rian ṭuan awkah khan him tein an um kho lo, keimah nih pakhat le pakhat kha ka dohter hna. ¹¹ Sihmanhsehlaw hi mi hna chung hin a tangmi hna cungah hin cun hlan lio i ka rak si bang khan cun atu cu ka si ti lo, tiah ralkapbu Bawipa nih a ti. ¹² Hnangam tein thlaici kha an thlak cang lai; mitsur ruang nih a thei kha a tlai lai i vawlei nih theipar a chuahter lai, van nih dap cu an surter lai; hi thil vialte hi hi miphun chungin a tangmi hna cu ka pek hna lai. ¹³ Judah innchungkhar le Israel innchungkhar hna, nannih cu miphun vialte hna sinah chiatserhnak hmelchunhnak kha nan rak si; sihmanhsehlaw atu cu kan khamh hna lai i thluachuahnak hmelchunhnak nan si cang lai. Lung ṭhawng in um u, nan thin phang hlah u! ¹⁴ Mah hihi ralkapbu Bawipa bia a si: Nan pupa hna nih ka thin an ka phawh i nannih cu hrawh awkah ka ruah tikah khan ka thin ka ṭhumh lo bantukin, ¹⁵ atu zongah hin Jerusalem cung le Judah innchungkhar cungah ṭhatnak tuah awkah khan ka ruah ṭhan; nan thinphang hlah u. ¹⁶ Mah hihi nan tuah awk hnga cu a si: pakhat le pakhat biatak i chim u, khuapi hauka, biaceihnak hmun ah khan ahmaanmi le a ṭhami biading kha biaceihnak ah hmang u. ¹⁷ Pakhat le pakhat cungah ṭhat lonak i tuah kha duh hlah u, lih in tehte khang hlah u, zeicahtiah hi vialte hi ka huatmi thil an si, ti hi Bawipa bia hrimhrim a si. ¹⁸ Ralkapbu Bawipa bia cu ka sinah a ra. Hihi ralkapbu Bawipa bia cu a si. ¹⁹ "Thla linak thla, thla nganak thla, thla sarihnak thla le thla hranak thla i rawl ulhnak hna cu Judah innchungkhar caah lawmhnak le nuamhnak puai ah an cang lai. Biatak le daihnak cu duh ko u," a ti. ²⁰ Ralkapbu Bawipa bia cu hihi a si. Miphun dangdang hna le khuapi chung i a ummi hna kha an ra lai; ²¹ Khuapi pakhat i a ummi hna kha a dang khuapi pakhat ah an kal lai i, "Kal u si law Bawipa kha va nawl u sih, ralkapbu Bawipa kha va fuh u sih; kei zong ka ra ve lai," an i ti lai. ²² Cuticun miphun nganngan hna mi ṭhawngṭhawng hna nih khan ralkapbu Bawipa cu Jerusalem ah an fuh lai i a zaangfahnak kha an hal lai. ²³ Mah hihi ralkapbu Bawipa bia cu a si: Khi caan ah cun holh phun kip a hmangmi miphun kip chungin mi pahra nih Judah mi pakhat kha a puan in an i tlaih lai i, "Pathian cu na sinah a um ti kha kan theih caah na sinah kan kal ko lai," tiah an ti lai.

¹ Hihi Bawipa bia a si. Hadrak ram le Damaskas khua dantatnak caah Bawipa chimmi bia a si. Israel mi lawng si loin Siria khuapi bik Damaskas zong Bawipa ta a si, ² Hadrak ramri i a ummi Hamath khua zong amah ta a si; Tair le Sidon zong, an zungthiamnak vialte he amah ta an si. ³ Tair nih ralhruang kha aa ser hna i Ngun le sui kha tam tuk a hman hna caah lung tekem bantuk men an si. ⁴ Asinain Bawipa nih a ngeihmi vialte kha a lakpiak dih lai. A chawhlawn kha rili ah a paih hna lai i a khuapi kha mei in a khangh lai. ⁵ Ashkelon nih hmu seh law ṭih seh; Gaza cu a thinphan tuk ah a ngerh in i ngerh seh; Ekron nih aa ruahchannak cu a mit lai. Gaza in siangpahrang hna kha an lo lai i Ashkelon cu mi an ṭhing lai. ⁶ Ashdod ah cun kahpia pawl an um lai i Filistin porhlawtnak cu ka phawi lai. ⁷ Sa cu a chung thisen he an ei lai lo. Fih a nungmi rawl dang zong an ei lai lo. Cun cu mi hna lakin a tangmi cu kan Pathian ta ah an i cang lai i, Judah chung phun khat an si lai. Jebus mi hna an rak si bang khan Ekron cu ka mi hna chung bu khat an si lai. ⁸ Ka ram cu ka ven lai i a chungin ralkap kha ka kalter hna lai lo, Cun mi hrem hmangmi hna kha ka mi cu hrem ka sianh ti hna lai lo. Ka mi hna nih nganfahnak an in kha ka mit hrimhrim in ka hmuh cang. ⁹ I lawm tuah, i lawm tuah, Zion fanu, Fak piin au tuah, Jerusalem fanu, Zeicahtiah zohhmanh na siangpahrang cu na sinah a ra lio, Amah cu teitu a si, teinak cu amah ta a si, Toidor tein laa cungin, laa fa note cungah i cit in a ra. ¹⁰ Efraim in rangleng kha a dawi dih hna lai i Jerusalem in raltuknak rangtum kha a dawi dih hna lai; Ralkap likuk kha hlonh dih an si lai. Miphun kip sinah khan daihnak in bia a chim lai i A pennak cu rili in rili tiang a phan lai. Zufrates tiva in vanhramdeng tiang a phan lai. ¹¹ Nang tu cu, ka sin i bia naa kamnak, thisen in na fehtermi na biakamnak thawng khan, Vawlei tang thonginn chungin na thongtla hna cu ka chuah hna. ¹² Ruahchannak he a hngak komi thongtla hna, Ralhruang chungah cun ra kir ṭhan u. Nannih kha phun hnih in kan cham hna lai ni cu atu hi thanh a si cang. ¹³ Zeicahtiah ka likuk cu a za ka sih cang, maw Judah, A thal kha ka hmanh cang, maw Efraim; Na fapa hna kha ka ṭhangh cang hna, maw Zion, Ralkap vainam ah kan ser cang hna. ¹⁴ Bawipa cu an cungah a lang lai i A thal cu nimtlau bangin aa lek lai; Bawipa Pathian nih muko kha a tum lai i Thlanglei ṭotho he khan an kal ṭi lai. ¹⁵ Ralkapbu Bawipa cu an phaw a si lai; Annih nih an ral kha an tei hna lai, lung herh chehnak lung kha an lamh hna lai; Zuri bantukin an au cukmak lai i kheng bantukin an khat lai i biakṭheng kil bantukin cin cikcek in an um lai. ¹⁶ Cucaah cu ni ah cun Bawipa an Pathian nih a mi cu tuu bantukin a khamh hna lai. A ram chungah khan an dihlak in a chiah hna lai i Bawiluchin cung i tleu seh tiah an chiahmi lungvar bantukin a chiah hna lai. ¹⁷ An rumnak cu zeitluk in a rummi dah a si, an i dawhnak cu zeitluk in aa dawhmi dah a si! Rawl nih tlangval cu an thazang a ṭhawnter hna lai i Mitsur hang thlum nih ngaknu au a ṭhawnter hna lai.

¹ Bawipa cu fur caan ah ruah hal u law ṭhal caan ah ruah hal tuah u, Ṭotho khuadawm a sertu Bawipa nih nannih cu ruah kha an pek hna lai i Nan lo cio ah ramhring kha an pek hna lai; ² Innchungkhar khuazing hna nih cun pakpalawng biakamnak kha an chim i, Litinthiam hna nih cun ahmaan lomi hmelchunhnak kha an hmuh, Mangihthiam minu hna nih khan hlennak mang an manh i pakpalawng bia kha an chim. Mi cu tuu bantukin an vak, tuukhal a um lo caah harnak kha an in. ³ Tuukhal hna cungah cun ka thin a hung, tuurun a hruitu hna cungah cun ka dantatnak kha ka tlunter lai; Sihmanhsehlaw ralkapbu Bawipa nih a tuurun, Judah innchungkhar kha a len hna lai i raltuknak rangtum ah a ser hna lai. ⁴ Annih cu innkil lung le thlam hrennak khenhfial an si lai, Annih cu raltuk awk i timh cia in a ummi likuk an si lai, Haotu paohpaoh cu anmah chungin a chuakmi an si lai. ⁵ Annih cu ralkap bantuk an si lai i raltuk hmun lam cet lak i aa nang lenmi bantuk an si lai; Bawipa cu an sinah a um caah an ral kha an tuk hna lai i Rangcung ralkap hna kha ningzak in an hloh hna lai. ⁶ Judah innchungkhar cu ṭhawnnak ka pek hna lai i Josef innchungkhar cu teinak ka pek hna lai; Annih cu ka zaangfah hna caah ka kirpi ṭhan hna lai i, Rak hlonh bal hna hlah ning law, cu bantuk cu an si lai; Zeicahtiah keimah cu Bawipa an Pathian ka si i an ka halnak cu ka leh hna lai. ⁷ Cucaah Efraim mi cu ralkap bantuk an si lai, Mitsur hang a ding i aa lawmmi bantuk an si lai, An fapa hna nih cun an hmuh lai i an i lawm lai; Cucaah an lung cu Bawipa ah i lawm ko seh. ⁸ Annih cu ka tlanh cang hna caah fifik in ka kawh hna lai i, Hlan lio i an rak tam bantuk khan an tam ṭhan lai. ⁹ Miphun dangdang hna sinah ka ṭhek hna, Asinain ram hlapi ah cun an ka hngalh ṭhiamṭhiam ko lai i An fale kha an cawm hna lai i an ra kir lai. ¹⁰ Khi tikah Izipt ram in ka lak hna lai i Assiria ram in ka pumh hna lai; Gilead ram le Lebanon ah ka luhpi hna lai, an ca i hmun a um ti lo tiangin. ¹¹ Zufrates tiva cungah a fakmi harnak a tlung lai i a ṭhawngmi a ti kha a tuk hna lai; Nail tiva a thuknak vialte cu an kao dih lai. Assiria ruamkainak cu ṭhumh a si lai i Izipt bawifung cu a lo lai; ¹² Sihmanhsehlaw Israel ṭhawnnak cu Bawipa chungah a si lai i A min in sunglawi ngaiin an kal lai. Mah hihi Bawipa bia hrimhrim a si.

¹ Maw Lebanon, na sidar thing kha mei nih a kangh hna nakhnga na kutka kha hung tuah hna. ² Far kung vialte hna, ṭap tuah u, zeicahtiah sidar thing cu an tlu cang i thingkung ngan pipi cu an rawk cang. Bashan i a ummi kuhthing vialte hna, ṭap tuah u, Zeicahtiah a hmawng tukmi tupi cu ṭhiam dih a si cang. ³ Tuukhal hna an ṭah thawng cu ngai hmanh u, Zeicahtiah saṭil tlonnak ram cu a rawk dih cang. Chiandeih no an huk thawng cu ngai hmanh u, Zeicahtiah Jordan tupi cu a rawk dih cang. ⁴ Bawipa kan Pathian bia cu mah hihi a si: Tuurun kha thah awkah thauter hna u. ⁵ A cawtu hna nih khan an thah hna lai i mawhchiatnak zeihmanh an hmu lai lo; cun a zuartu hna nih khan, "Bawipa cu thangṭhat si ko seh, kan rum cang!" an ti lai. A khaltu tuukhal hna nih khan an cungah zaangfahnak an ngei lai lo. ⁶ Zeicahtiah vawlei cung i khua a sami hna cungah hin zaangfahnak zeitikhmanh ah ka ngei ti lai lo, tiah Bawipa nih a ti. Mi kip kha an innpa le an siangpahrang hna kut tangah ka chiah hna lai i ram cu pakhat hnu pakhat in a rawk lengmang tikah annih cu an kut chung khan ka chanh hna lai lo. ⁷ Cucaah tuurun cu thah awkah a cawtu hna caah cun ka thauter hna. Fung pahnih ka lak hna i pakhat cu a min ah Lawmhnak ka sak i a dang pakhat cu Fonhnak ka sak; cuticun tuurun cu ka thauter hna. ⁸ Thla khat chungah tuukhal pathum cu ka hlawt hna, zeicahtiah an cungah ka lung a sau kho ti lo i annih nih an ka huat. ⁹ Cun tuurun cu ka thawh hna i, "Nannih cu kan cawng ti hna lai lo, a thi ding cu thi ko u, a tlau ding cu tlau ko u, cun a tangmi cu pakhat le pakhat i ei dih ko u," ka ti. ¹⁰ Ka fung, Lawmhnak, timi kha ka lak i tan hnih ah ka tan i Bawipa nih miphun vialte he biakamnak a tuahmi kha ka hrawh. ¹¹ Cucaah cu ni ah cun hrawh a si i a ka zohtu, thil cawtu hna nih khan mah hihi Bawipa bia a si kha an hngalh. ¹² Annih cu ka thawh hna i, "A rem nan ti ahcun ka rianṭuan man kha ka pe u; asilole zei poi hlah, nanmah nih i chiah u," ka ti. Cun ka rianṭuan man kha an thlai i ngun phar sawm thum a si. ¹³ Bawipa nih a ka thawh i, "Tangka chiahnak chungah khan hlonh tuah hna," a ka ti. Cun ka man caah a za ti i an tuakmi tangka ngun phar sawm thum cu ka lak i Bawipa inn chungah khan, tangka chiahnak chungah khan ka hlonh hna, cu tangka cu na man lo, tiah an ka hlawt. ¹⁴ Khi tikah ka fung a pahnihnak Fonhnak timi kha tan hnih ah ka tan i Judah le Israel karlak i unau sinak a ummi kha ka hrawh. ¹⁵ Cun Bawipa nih a ka thawh i, "Tuukhal bantukin i thuam ṭhan tuah, santlai lomi tuukhal bantukin; ¹⁶ zeicahtiah ram chungah hin tuukhal pakhat ka chiah lai i a tlaumi kha zei ah a rel hna lai lo i lam a pialmi kha a kawl zong a kawl fawn hna lai lo, hma a ingmi kha a thlop hna lai lo i a zawmi kha a cawnghram hna lai lo, sihmanhsehlaw a thaumi sa kha a ei hna lai i an ruh a kiakmi cu a hlonh hna lai," tiah a ti. ¹⁷ A tuu a zamtakmi tuukhal, zeiruaramlo cu a caah ngaihchia a va si dah! A baan cungah le a orhlei mit ah vainam nih a tlak lai; A baan cu a car lai i a orhlei mit cu a caw lai.

¹ Chimmi bia: Mah hihi Israel kongah Bawipa nih a chimmi bia cu a si, Bawipa cu van kha a samh i vawlei kha a ser i minung chungah thlarau a sertu kha a si. ² Zohhmanh, Jerusalem cu a pawngkam miphun hna caah ritnak hrai ah ka ser, Judah zong kha an kulh chih ve lai i Jerusalem kha an kulh tikah, ³ Vawlei cung miphun vialte nih Jerusalem le Judah kha an kulh hna tikah, cu ni ah cun Jerusalem cu aho ca hmanh i ṭhial awkah a rit tukmi lungtum ah ka ser lai i cawi aa zuammi paoh cu anmah tu kha an i hliam lai. ⁴ Khi ni ah cun rangtum vialte kha ka lauter hna lai i an cung i aa citmi kha ka molhter hna lai, Judah kha cu ka zohkhenh lai, sihmanhsehlaw miphun dang rangtum vialte kha cu an mit ka cawtter hna lai, tiah Bawipa nih a ti. ⁵ Khi tikah Judah phun hna nih khan, "Jerusalem khua chung i a ummi hna nih cun ralkapbu Bawipa an Pathian sin khan thazang an hmu," an ti lai. ⁶ Khi ni ah cun Judah phun hna cu ramlak i meipung bantuk le facang phal a khang dihtu meizik tom bantuk ah ka ser hna lai. Annih nih an pawngkam i a ummi miphun vialte kha, keh he orh he, an khangh dih hna lai i Jerusalem mi tu cu an khua chungah him tein an um lai. ⁷ David tefa sunparnak le Jerusalem khua chung ummi hna sunparnak nih khan Judah sunparnak cu a lonh nakhnga lo, Bawipa nih Judah chungkhar hna kha a luatter hmasa bik hna lai. ⁸ Khi ni ah cun Bawipa nih Jerusalem khuami hna cu phaw a chonkanh hna lai; khi ni ah cun an lak i a der bik kha David tluk a si lai i David tefa hna kha Pathian bantuk an si lai, an hmai i a kalmi Bawipa vanmi tluk an si lai. ⁹ Khi ni ah cun Jerusalem doh awk i a rami miphun vialte hna hrawh awkah khan kaa thawh lai; ¹⁰ sihmanhsehlaw David ciruang hna le Jerusalem khua i a ummi hna cungah cun zaangfahnak le zawnruahnak thlarau kha ka thlet lai. Khi tikah An rak ka chunhmi keimah kha an ka zoh lai i Mi nih an fa ngeih chunte an ṭah bang le an fater an ṭah bangin an ka ṭah lai. ¹¹ Khi ni ah cun Jerusalem khua chung i ṭahnak cu Megiddo nelrawn i a ummi hmun Hadad-rimmon i an ṭahnak tluk khan a ngan lai. ¹² Ram cu a ṭap lai i innchungkhar hna cu anmah le an innchungkhar ning cio ah an ṭap lai: David innchungkhar cu amahte in a ṭap lai i an nupi hna cu anmahte in an ṭap cio lai; Nathan innchungkhar cu amahte in a ṭap lai i an nupi hna cu anmahte in an ṭap cio lai. ¹³ Levi innchungkhar cu amahte in a ṭap lai i an nupi hna cu anmahte in an ṭap cio lai; ¹⁴ Shimei innchungkhar cu amahte in a ṭap lai i a nu hna cu anmahte in an ṭap cio lai; a tangmi innchungkhar vialte cu anmahte in an ṭap cio lai i an nupi hna cu anmahte in an ṭap cio lai.

¹ Khi ni ah cun David tefa hna le Jerusalem khuami hna cu an sualnak le an thurnak vialte tlenghnak caah cerhti pakhat a put lai. ² Khi ni ah cun ram chung khan siasal min kha ka hloh hna lai i an ruat ti hna lai lo, tiah Bawipa nih a ti; profet hna le thlarau thianglo zong kha ram chung cun ka hloh hna lai. ³ Cun profet kha an chuah ṭhan ahcun, an nu le an pa hrimhrim hna nih khan an thawh hna lai i, "Bawipa min in ahmaan lomi bia nan chim caah nan nung ti lai lo," an ti hna lai. Anmah nih bia kha an chim peng ko ahcun, an nu le an pa hrimhrim nih khan, tleng lakin an chunh hna lai. ⁴ Khi ni ah cun profet nih bia an chim tikah langhnak an hmuhmi kha an i zahpi cang lai, cuhleiah mi hlennak ah sahmul hrat angki fual kha an i hruk ti lai lo. ⁵ Annih nih an i thawh lai i, "Kannih cu profet kan si lo, lothlo kan si ko, kan ngakchiat tein atu tiang kan pawcawmnak cu vawlei hin a si," an ti lai. ⁶ Sihmanhsehlaw pakhatkhat nih, "Na ṭang i a ummi hma hna kha tah zeidah an si kun?" tiah a hal hna lai i cu tikah anih nih, "Mah hihi cu ka hawikom hna inn ah ka hmuhmi hna an si," tiah a ti lai. ⁷ Mah hihi ralkapbu Bawipa bia hrimhrim a si: "Maw vainam, ka tuukhal le keimah he rian a ṭuan ṭimi doh awkah i hlau tuah. Tuukhal kha tu law tuu cu i ṭhek hna seh, an fale kha ka kut ka lekhnawh hna lai," a ti. ⁸ Mah zong hi Bawipa bia hrimhrim a si ṭhan: "Ram chungah hitihin thil a um lai, Mi kha cheu thum cheu hnih tuk an si lai i an thi lai, Cun cheu thum cheu khat cu cuka ah cun nganh an si lai. ⁹ Cun hi cheu thum cheu khat cu mei chungah ka kalter hna lai i ngun an thianh bantukin ka thianh hna lai i sui an hneksak bantukin ka hneksak hna lai. Khi tikah ka min in thla an cam lai i keimah hrimhrim nih ka leh hna lai. Kei nih, "Annih cu ka mi an si," ka ti hna lai i annih nih, "Bawipa cu kan Pathian a si," an ka ti lai.

¹ Bawipa nih thil a tuah lai ni a ra lio, nan sinin lakmi hranchaw hna cu nan dir ko lioah khan i phawt an si lai. ² Jerusalem doh awkah mi vialte kha ka pumh hna lai; khua cu an lak lai, inn cu an ramh hna lai i nu cu an tlaihhrem hna lai. Khuapi cheu hnih cheu khat cu saltannak chungah a kal lai, sihmanhsehlaw khua chung i a ummi, hi miphun chungin a tangmi hna cu, hloh an si lai lo. ³ Bawipa cu a ra chuak lai i ral dohnak hmun i a ralṭhatnak a rak chuah ni bantuk khan cu miphun hna cu a doh hna lai. ⁴ Khi ni ah cun a ke cu Oliv Tlang cungah an dir lai, cu tlang cu Jerusalem in nichuahlei ah ral-enh in a ummi a si, cun cu tlang cu nichuahlei in nitlaklei ah a kalmi horkuang thukpi nih cheu hnih ah a cheu lai; tlang cheu pakhat cu chaklei ah aa thawn lai i a dang a cheu pakhat cu thlanglei ah aa thawn lai. ⁵ Tlang hna karlak i nelrawn cu phih a si lai, zeicahtiah an karlak i horkuang thar cu Azal tiang a phan lai. Judah siangpahrang Uzziah chan ah lihnin nih a rak phih bantuk khan phih a si lai i Bawipa ka Pathian cu a mithiang vialte hna he khan an lang lai. ⁶ Khi ni ah cun lumnak, kihnak, hawhra ti a um ti lai lo. ⁷ A dihlak in ni khat a si dih ko lai i cu ni a rat lai ding cu Bawipa lawnglawng nih a hngalhmi a si, chun zan ti zeihmanh a um lai lo, zan ah ceunak a um ko lai. ⁸ Khi ni ah cun Jerusalem in ti nung a chuak lai i a cheu cu nichuahlei rili ah a luang lai i a cheu cu nitlaklei rili ah a luang lai; ṭhal le khuasik i dang loin a luang lai. ⁹ Cun Bawipa cu vawlei cung vialte siangpahrang a si lai; khi ni ah cun Bawipa lawnglawng cu Bawipa a si lai i a min lawnglawng cu min a si lai. ¹⁰ Ram cu a ning piin Geba in Timmon thlanglei tiang a rawnmi Arabah ram bantukin a rawn lai; sihmanhsehlaw Jerusalem cu amah a hmunte ah khan sang piin a dir ko lai, Benjamin Kutka in A Kil Kutka timi tiang cucu hmasa deuh kutka a rak dirnak hmun kha a si. Hananel Innsang in Siangpahrang mitsur nennak tiang, a chungah mi an khat lai. ¹¹ Jerusalem khua chungah khan mi an um lai i a chungah mi um hlah u ti thlauhnak kha zeitikhmanh ah chiah a si ti lai lo; khika ah mi cu hnangam tein an um lai. ¹² Jerusalem a dohtu miphun vialte kha Bawipa nih a tuk lai i rai an in dingmi cu hihi a si lai; an dir ko lioah an sa kha a tlol lai, an mitkuak chungah an mit kha an thu lai, an kaa chungah an lei kha an tlol lai, ¹³ Khi ni ah Bawipa nih a thlahmi ṭihnak nganpi nih a tlunhnawh hna lai i, mi nih a hawipa kha lung ṭhawnnak a hun pek liote ah khin amah tuk awk caah cun a kut kha a hun hler colh ko lai. ¹⁴ Cu ti i Jerusalem khua chung i i siknak ah cun Judah zong aa tel ve lai i a pawngkam i a ummi miphun hna rumnak cu hloh dih a si lai — sui le ngun le hnipuan tampi hna cu hloh dih an si lai. ¹⁵ Cun rang le khacer le kalauk le laa hna le cu ralkapbu hna nih an hmanmi saram vialte cu thah an si dih lai. ¹⁶ Jerusalem a dotu miphun hna chungin a tangmi vialte hna cu kum fate in Siangpahrang, ralkapbu Bawipa biak awkah le Deu Puai tuah awkah cun an ra lengmang lai. ¹⁷ Siangpahrang, ralkapbu Bawipa biak awkah Jerusalem i a hung kal lomi vawleicung innchungkhar hna lakah an um ahcun, cu hna cungah cun ruah a sur lai lo. ¹⁸ Izipt ram chung i a ummi innchungkhar hna lakah a hung kal lo i khuapi chungah a lut lomi an um ahcun, puai tuah awkah a hung kal lomi miphun cungah Bawipa nih rawhralnak a tluntermi bantuk nih khan a tlunhnawh ve hna lai. ¹⁹ Deu Puai tuah awkah a hung kal lomi miphun hna le Izipt cungah dantatnak a tlung ding cu hihi a si lai. ²⁰ Khi ni ah cun raltuknak rangtum cung i dar khi-ing kha, "Bawipa caah a thiang," tiin ṭialmi pakhat hmanh a um ti lai lo i Bawipa inn chung i a ummi um hna cu biakṭheng hmai i khengkuar bantuk an si lai. ²¹ Jerusalem le Judah ram chung i a ummi um vialte cu ralkapbu Bawipa caah an thiang dih lai i raithawitu vialte kha an ra lai i tlawmpal kha an lak hna lai i an chungah sa kha an chuan hna lai. Cucaah cu caan a phak tikah cun, ralkapbu Bawipa inn chungah khan chawlet-chawhrawl pakhat hmanh hmuh an si ti lai lo.