TITAS

TITAS

¹ Zumhnak kan i hrawmmi chung i ka fa taktak a simi Tias, hi ca hi kan kuat. Pathian kan Pa le Khrih Jesuh kan Khamhtu nih vel le daihnak in pe ko hna seh. ² - ⁴ Pathian sal le Khrih Jesuh sal ka sinak a langhtertu cu zumhnak le hngalhnak le ruahchannak an si, zumhnak cu Pathian nih a thimmi hna chung i a hung thomi zumhnak, hngalhnak cu kan biaknak phung nih a kan cawnpiakmi biatak hngalhnak, ruahchannak cu zungzal nunnak i ruahchannak. Cu zungzal nunnak cu lih a chim kho lomi Pathian nih caan hramthawk hlan in a kan kamh cangmi nunnak kha a si i atu ah amah nih a caan a rem a timi caan ah a phuan cang. Cu bia a phuanmi rian cu keimah kha ṭuan awkah a ka fial i kan Khamhtu Pathian nawl in cu bia cu ka chim. ⁵ Krit tikulh i kan chiahtak ah khan ka rak i tinhmi cu, kan ṭuannak i kan nganh tami kha a ningcang tein na hun sersiam hna lai i khua kip ah Khrihfa upa kha na hun chiah hna lai, ti a si. Na hun zulh awkah tiin cawnpiaknak kan chiahtami kha philh hna hlah. ⁶ Cu hna cu: Khrihfa upa cu mawhchiat awk a um lomi an si lai, nupi pakhat lawng a ngeimi an si lai, an fale kha a zumtu a simi an si lai i puarhran lei le nawlngaih lo leiah minthang lomi an si lai, ti kha an si. ⁷ Khrihfabu hruaitu cu Pathian rian ṭuantu a si caah mawhchiat awk a um lomi a si lai. Miruamkai a si lai lo, mithintawi a si lai lo, zurit hmang a si lai lo, mi-aukhuan hmang a si lai lo, mihakkau a si lai lo. ⁸ Khualtlung a dawmi a si lai i thil ṭha a duhmi a si lai. Amah le amah aa uk khomi, a dingmi, a thiangmi le aa sum khomi a si lai. ⁹ Cawnpiaknak ahmaanmi aa tlaih pengmi a si lai, cuticun a bia a ngaitu pawl kha cawnpiaknak ṭha in an lung a thawhter khawh hna lai i cawnpiaknak ṭha a altu pawl kha an palhnak a langhter khawh lai. ¹⁰ Uk khawh lomi tam tuk an um i Judah phung in Khrihfa phung i a hung lutmi hna lakah hin an tam khun; an duhduh in bia an chim i mi ruahnak kha a ping a pang ah an kalter. ¹¹ Kha hna pawl kha kham an hau, zeicahtiah an chim awk a si lomi thil an chimmi nih khan innchungkhar hna an dihlak in a tuaiter hna i cu zong cu ningzah awk tlak a simi thil, tangka hmuh duh men caah khan a si. ¹² "Krit mi cu milihchim, saram bantuk, mithathu, mi-orkhu," tiah anmah Krit mi lila nih a rak ti hna i ¹³ a chimmi cu a hmaanmi a si. Cucaah cun fak piin na chimhhrin hna lai. Cuticun a ngan a dammi zumhnak kha an ngei kho lai i ¹⁴ Judah mi hna tuanbia ṭukṭak le biatak a hlawmi hna nih an chuahpimi minung nawlbia kha zeihmanh ah an rel ti hna lai lo. ¹⁵ A thiangmi caah cun zeizong vialte hi a thiang dih ko, sihmanhsehlaw a hnawmtammi hna le a zum duh lomi hna caah cun, an lungthin le an chiaṭha thleidannak kha a thur caah, zeihmanh a thiangmi a um lo. ¹⁶ Pathian kan hngalh ti cu an ti, sihmanhsehlaw an tuahnak nih an chimmi cu a si lo ti kha a langhter. Mi huat awkin an um, nawl ngai loin khua an sa i thil ṭha tuah dingah an i tlak lo.

¹ Sihmanhsehlaw nang nih cun cawnpiaknak a ṭhami kha na cawnpiak hna lai. ² Tar deuh pawl kha, rihai hlah u, lungfim in um u, mah le mah aa uk khomi si u; zumhnak le dawtnak le in khawhnak fek a ngeimi si u, tiah na chimh hna lai. ³ Nutar deuh pawl kha, nan umtuning ah mi hmaizah a thiammi nan si awk a si, na ti hna lai. Mi congoih hmangmi le mizuram an si awk a si lo. ⁴ Nu no deuh pawl kha, an vale le an fale dawt an thiam nakhnga le, ⁵ mah le mah aa uk khomi an si nakhnga le a thiangmi an si nakhnga le innchungkhar khuasak ṭha tein a zohkhenh khomi an si nakhnga le an vale bia a ngaimi an si nakhnga, thil ṭha nan cawnpiak hna lai, tiah nutar deuh pawl cu na chimh hna lai. Cuti an tuah ahcun Thawngṭha cu mi nih an thangchiat kho lai lo. ⁶ Cu bantuk ṭhiamṭhiam in, tlangval pawl zong kha, mah le mah aa uk khomi si u, tiah forh hna. ⁷ Cun nangmah hrimhrim zong, thil ṭha tuahnak lei paohpaoh ah, an i zohchun awk tlak na si lai. Na cawnpiak hna tikah lungtak te le biatak tein cawnpiak hna. ⁸ Soi khawh lo ding bia ṭha kha hmang hna law, na ral pawl kha kan thangchiatnak zeihmanh chim awk an ngeih lai lo caah an ning tu zak seh. ⁹ Sal hna kha, nan bawile cu an nawl ngai hna u law an lung lawmhter hna u, tiah chim hna. An bia an leh lakmak hna awk a si lo i an thil zong an fir awk a si lo. ¹⁰ Thil zeipaoh an tuahnak ah khan kan Khamhtu Pathian kha a thang an ṭhat nakhnga ṭha te le zumh awk tlak tein an tuah awk a si. ¹¹ Zeicahtiah Pathian nih a vel cu mi vialte khamhnak caah a phuan cang. ¹² Cu Pathian vel nih cun pathian zeirello in kan nun tawnnak le hi vawlei cung pumsa duhnak hlawt kha a kan cawnpiak i hi vawlei cungah hin mah le mah aa uk khomi si awk le ding tein nun le Pathian ṭihzah in um kha a kan forh. ¹³ A liannganmi kan Pathian le kan Khamhtu Khrih Jesuh sunparnak kha a langh tikah kan i ruahchanmi cu a tling lai, cu a tlin lai Ni cu ngangngan ngaiin kan hngak ko. ¹⁴ Kannih cu ṭhat lonak chungin chanh awkah le amah ta a simi mithiang si awkah le ṭhatnak tuah a duhmi siter awkah, kan caah a nunnak kha a pek. ¹⁵ Hihi cawnpiak hna law thazang na pek hna le na chimhhrin hna tikah na nawlngeihnak kha fak piin hmang. Ahohmanh i zohchukter hna hlah.

¹ Bawi le nawl ngeitu pawl kha, an nawl nan ngaih hna lai i thil ṭha tuah kha nan i tim zungzal lai, tiah na mi pawl kha chim ṭhan hna. ² Ahohmanh i congoih hlah u, pakhat le pakhat i rem le i daw le lungnem cio tu in nan um lai, tiah na chimh hna lai. ³ Zeitintiah kanmah hrimhrim zong kha kan rak hrut, nawl ngai loin khua kan rak sa i kan rak palh. Pumsa duhnak le nuamhnak sal kan rak si. Mi kha kan rak nahchuah hna i ziar kan rak ngeih hna; mi nih an rak kan huat i kannih zong nih kan rak huat hna. ⁴ Sihmanhsehlaw kan Khamhtu Pathian dawtnak le zaangfahnak cu vawlei cungah a hung langh tikah, thil ṭha kan tuahmi ruangah si hin loin amah nih a kan zaangfah ca lawnglawng ah kannih cu a kan khamh i ⁵ cu a kan khamhnak cu hrinṭhannak ti thawng le Thiang Thlarau nih mi tharter khawhnak a ngeihmi ṭhawnnak thawngin a si. ⁶ Jesuh Khrih kan khamhtu thawngin Pathian nih Thiang Thlarau cu tampi in a kan toih i ⁷ cucaah a vel ruangah Pathian he cun kan i rem i kan i ruahchanmi zungzal nunnak kha kan hmuh. ⁸ Hi bia hi biatak a si. Hi bia hi biapi in na rak lak hna awkah ka duh. Pathian a biami nih cun hmaizah awk tlak a simi rian kha ṭuan hna seh law, cu rian cu anmah caah hmaizah awk tlakmi rian a si ti lawng si loin an minung hawi ca zong i a ṭhahnemmi rian a simi kha si hna seh. ⁹ Asinain bia i al lengmangnak le thawhkehnak min ṭialnak cazin sau pipi le i sik le Phungbia kong i alnak kha cu hrial i zuam ko hna. Cu bantuk cu santlai lomi thil, pakpalawng men an si. ¹⁰ Bu chung ṭhennak a chuahtertu kha, a tlawm bik ah voi hnih tal ralrinnak pe hna, cu hnuah cun chuah ko hna. ¹¹ Cu bantuk mi cu an ruahnak ahmaan ti lo ti kha na hngalh i an palh ti cu an sualnak nih khan fiang tein a langhter ko. ¹² Na sinah Artemas maw asiloah Atikhikas maw ka ratter hna tikah, ka sinah Nikapolis ah ra te law ka duh, zeicahtiah khika ah khuasik chung um kaa tim. ¹³ Sihni Zenas le Apollos kha an khual tlawnnak dingah na bawmh khawh chungin rak bawm hna law an herhmi paoh kha rak damhpiak hna. ¹⁴ Kan mi hna cu rian ṭha ṭuan kha cawnpiak hna; an nunnak ca i a herh taktakmi hmuh khawhnak kha chim hna; pakpalawng in um men hna hlah seh. ¹⁵ Ka sin i a ummi vialte nih na kut an in tlaih. Zumhnak i kan hawi hna kha, kan biakchawnhnak kut kan tlaihpiak hna. Nannih dihlak sinah Pathian vel cu um ko seh.