SOLOMON HLA

SOLOMON HLA

¹ Solomon hla iang dawh bia hna: ² Ra ka hnam law duh ai ing, Na dawtnak nih mitsur hang thlum hluan, ³ Naa thuh chiti rimhmui nih zam ai kaw Na len min chiti bungh ko lo ai ri, Cucah leng duh raan cuang na si. ⁴ Zaṭial kut in ka hruai law kal hawl si, Mangbawi phunsang na suan run remh dal, chungchin ah ka luhpi ai law. Nang hnen ah cun kan meremte le lungriam in, Na vel ṭha cu mitsur hang nakin hei thangṭhat deuh sih, Ai! nang cu leng duhran cem na si. ⁵ Nak hmanh ning law iangngei ngai ka si ko ve cu, Maw Jerusalem leng rual hna; Keimah cang ah Kedar thlam le maw Solomon dumdang puanzar hna bangin. ⁶ Ka me hlah u ka cuar dum ruangah hin, lai ninu laak ka si fom cu ta; Ka chuah sempi ṭa nih an thin linh in ka fial hna, mitsur dum ven cu, Cu ruangah maw kei mitsur dum ven loin ka um ko ai hi. ⁷ Hei ka chim law lungkil ka tum aw, Khoi zawn ah maw na tuurun na tlonter hna, Ni lin chun zawn ah cun thingdem tang khoi ah zau hna maw? Zei ah dah maw na val hawi mi tuurun hna kiangah, Nang kawl in ka vaih len ko tawn hnga. ⁸ Lengnu vialte lak i hmel ṭha cem, Khoi zawn ah ti hngal hlah kun ci kaw, Zul law tuurun neh sul nem hna khi Na hmuh ko lai meheh note ca, ram hno tuukhal thlam hril ah. ⁹ Kan tahchunh tawn dahkaw ka duh cem, Mangbawi Faro lenghnuk rangla he; ¹⁰ Na bel nih i dawh kaw na liang cung sam sawm-ai phiar he, Na lungvar ceu tleu le na sui ṭhi, rual nih duum hna na hngawng velchum tiang zong in. ¹¹ Ngun hri tenhmi sui hlawn thil dawh cu, Nang caah hei ser u si. ¹² Mangbawi doṭhiang cungpar ṭhu lio khi, Ka zihmui rim thaw hlei nih nang an zeel. ¹³ Ka ṭang cung i ka pom ka bihzun lioah, Rim thaw mura zihmui thawl a hluan. ¹⁴ Lungkil ka tum kei ka caah cun, En-gedi mitsur dum khomi henna par borh bang. ¹⁵ In zoh rih lang ka dawt na muisam a ṭha, Naa dawh tuk ah zei na lo dah maw, Na mitte zong ṭhuro mit lo ai hna dah ngai. ¹⁶ Zoh cim loin naa dawh ka dawt aw, Nang rei pawng ṭhut awi loin! ¹⁷ Zeitluk dawh in tling khan dang cung le kan zaunak hmun hring dildel, Sidar thing in remh hlei kan run inn A liang le maw an khaan far thing in.

¹ Kei cu Sharon bingbir le maw Nelrawn lili pangpar ngai ka si. ² Lungthli ka tum a leng hawi lakah, Lili pangpar iang ngei hling lak een. ³ Ka duh dah ngai a val hawi lakah hnak thlai rem, Hung lang ai ngai thing ṭha hmawng lakin epalte khi bang, Hei ei ning law a thladem tangah thlum riangmang tein. ⁴ A ka hruai i mitsur dum chungah, Ka veeng dah ngai mitsir thli tein. ⁵ Zuun in ka zaw nang vang hraam ah cun Rak ka hnem law epal thei le mitsur tlai thlum in. ⁶ Kehlei na baan ka tlinh tawn rih law, Hei ka kup na orhlei kut in. ⁷ Maw Jerusalem leng rual hna, Ram hlum sazuk le maw saza min cem chih in chiat an ser bang, Ka dawtte cu tho law i hlau ko tiin, Ṭhangh lai ka senh hna lo cu. ⁸ Lungthli ka tum a anka thawng cu ngai ai u, Fing le tlang sang cungin her liaimai rung ai cang. ⁹ Ka tum lung duhte nih saza le neng note ko khi lo ai, Cuan cio u law pang leng dir hrat in, Thlalang awng le thing kharvar lakin Inn chung run bih ai. ¹⁰ Lungkil ka nawl nih ee, "Tho in run rih law sam thlai rem dawhte, ¹¹ Fur nih aa lim, lungrawn khuate nih pau ai cang, Ramlak thingtian par ṭha nih a en; ¹² Khua pawngkap ah a een cang pangpar, Kaileng va zaihla tin an remh cu ai cang, Kan lai lungrawn khua zel in. ¹³ Theipi kung nih a thei hmin aa zal, Mitsur ruang nih rimhmui thaw he zel chialmal in par ai hna, Tho in rung law dawh hlei ka pawngah, Khei nawn rem dawh te," a ti. ¹⁴ Dai zirziar in lungpang kua a hlum, nang ka ṭhuro, Na hmel dawh cu ka hmuhter rih law, na anka thlum zong, Na awte nih i zel ngiaimai in na mui zong dawh ai. ¹⁵ Par ṭha en lio kan mitsur dum kha, A hrawk tawntu hngartlaitum le maw a fano rual cu tlai u. ¹⁶ Ka dawtte aw nang ka ta si i kei zong nang ta si ve ci, Lenter hna law na tuurun hna cu lili pangpar hna lakah. ¹⁷ Ni nih liam lai aa zal, thlizil nih hrang siarmar, Ka dawtte aw nakzik fing thuk hlum, Saza le maw nengno bang lang ṭhan ai law.

¹ Zan khuamawt ah tlingkhan dang cungin, ka dawtte cu nawl len lang, Nawl len hmanh ning hmuhton um ṭung lo, Au zong lehrul um ri lo. ² Tho in kan lai lungrawn khua chung cu vel ning law, Zatlang lam le nuamh hmun zongah khin hei kawl hmanh ning, Lungthli ka tum ka kawl cu ee ka hmu kho ti lo, Ka dawt nunnem au len ko hmanh ah, anka lehrul um ri lo. ³ Khuachung ralveng thlanghnun val nih an ka ton, Ka dawt nunnem ka tum valpa cu, khuazei tal ah nan hmu maw ka ti. ⁴ Cu hna sin cun tlawm ka liam hnuah, Tong ai ing ee ka tum valpa cu. Zaṭial tlaih in sunghno ka nu sakhnem run toiah, Luhpi lang ṭian ti loin, Semnak ka nu sakhnem run inn dal chungah khin. ⁵ Maw Jerusalem leng rual hna, Ram hlum sazuk le maw saza min cem chih in chiat an ser bang. Ka dawtte cu tho law i hlau ko tiin, Ṭhangh lai ka senh hna lo cu. ⁶ Zei hna dah maw fing le tlang lakin ra ai cu, Frankinsen zihmui le maw mura khu khi bang, Chawlet nih maw an zuar tawn zihmui khu a hluan. ⁷ Hei zohhmanh u, mang bawi Solomon zawnhnak doṭhiang Israel mi chungin val ṭha cem thim hna kaw, Kam lo ralṭha sawm ruk nih veng hna ⁸ Cu hna nih cun kingthang nam put in, raltuk thiam ngai ko si hna; Zan khuamawt i ral nih an nam zawn ah Ralring camcin vainam khel thlaih in dah an um tawn zungzal. ⁹ Mangbawi Solomon nih amah zonhnak doṭhiang cu, Remhchun dah kaw Lebanon thing tian phel ṭha in. ¹⁰ A remh dah ngai a tung hna khi zong, Ngun hut thing ṭial rem chuan in; A khuh cin ṭial sui ser tangdo ṭhutnak cu, Maimaw puan cawi dawh hlei in dah ngai, An ṭamh Jerusalem leng rual nih. ¹¹ Khun a torh le a sunlawi ni ah A chinh cang maw sunghno a nu nih sunpar luchin rem dawh hlei, Cuan cio u law Solomon mangbawi cu, A suiluchin rem he in, Zion ngaknu leng rual hna.

¹ Hei zoh tuah lang mui sung ka dawt khi, Mui sung tak si ko ai hrim; Hmai khuh dumdang puanzar khuh toiah, Na mitfang nih ṭial ririai tein ṭhuro mitfang bang, Sawm-ai sam zong Gilead tlangpar ṭum, meheh run ko lo ai hna. ² Na hatian nih rem kaw hmul riamka tuute bangin, Zoh rem loin pakhat hmanh um lo, kem cingceng tein. ³ Na hmurte nih sen sirsiar in maanla te khi bang, Aan dawh nunnem iang ngei hmurka ṭha, Hmaikhuh dumdang puanzar phen na bel, taleti cheute vun iang. ⁴ Na hngawng nih cun David mangbawi i, khua kil vennak innsanghlei lo ai, A cun dahkaw ralhriam an chiah i Kam lo val hna phaw thong khat an bah. ⁵ Na hnukte pahnih cu ee, Lili pangpar dawh lak tlong sazuk, semno khuah khi iang ai hna. ⁶ Khua nih dei lai aa zal, thlizil nih hrang siarmar, Mura umnak tlangpar sang ah le frankinsen umnak mual ah cun kal ai lang. ⁷ Soinak um lo samthlai rem dawh tling, Lungkil ka dawt ṭha hlei cem si ci. ⁸ Kal u si law ka thaisung nu aw, Lebanon tlang le maw Lebanon tlangpar in, Kaltak ko hna Amana tlang hna le Senir tlang, Hermon tupi chiandeih umnak le pawlai keiṭial sahrang umnak cu. ⁹ Ka dawt far can mitsirthli ka ven cang zongah, Ka lung mawl in ka hlo ai dah kaw, Na mitfang le na hromhreng lungvar rual zong nih. ¹⁰ Zei bangin dawh maw far can ka thainu, Mitsur hang thaw le maw na sathau rimhmui ṭha, lo ai na ka dawtnak sung cem cu. ¹¹ Ka thainu aw na hmurka nih khuaihliti bangin thlum ai, Na lei tangin cawhnuk le maw khuaihliti an luang, Na thil hlawn nih hmui ai hna ee Lebanon rim khi bang. ¹² Aanka tiam cia le maw ka dawt cu Cerhti put le kulh dum tikhor bang. ¹³ Na bel hna cu taleti duum bang si ai, A chungah cun theitlai rim ṭha cem, Henna kung le ṭha hlei rim zihmui an zel. ¹⁴ Phun sang rimhmui spaik-nard le maw Saffron, kalamus, nakzik thing hna he, Frankinsen, mura, aloes rimhmui phun zakip an tling. ¹⁵ Lebanon tlang in maw a puut tivate hna le Cerhti thawngin hring dildel. ¹⁶ Chim thli tho in zo thli rung hrang law, Kei ka dum chung thei ṭha rimhmui cu, Kalpi ko hna i zel chialmal in; Lungthli ka tum val nih dum ah i chawk in, ei seh thei ṭha cem hna cu.

¹ Aanka tiam cia far can ka dawt aw, dum chungah ka ra ai cang, Ka mura le zihmui ka khawmh hna, khuaihliti le fu thlum zong ka ei; Ka mitsur thlum le cawhnuk ka din hna. ² Ka ih le maw tlingkhandang cung ka zau zawn ah merem thiam loin, Lungkil ka tum dawh hlei valpa nih, king maw remh hlei run innkhar; "Rung lut ai lang na reikiang pawngah, ṭhuro dawhte nang hnen ah, Ka lu le maw sam sawm-ai hna cu, zan dap dor tlak bang an cin," a ti. ³ Chun ka thuam cu ka chiah cang hnu in, zeitin aih len ser nolh hnga? Thiang cia ka ketan cawi rem dawh cu, zeitinhen thur ṭhan ai hnga? ⁴ Ka dawtte nih innkhar hrenh tlaih in dir ai kaw, Ka lung tiang vun cul hrianman. ⁵ Tho rih ning kaw ka tum valpa cu, innkhar hrenh hunh lang, Ka zaṭial kut in mura zihmui luang hna ai, innkhar hrenh tung tiang. ⁶ Ka dawtte cu innkhar hunpiak tuan kar hlanah, A khoi ah hen hnulei hertak in, lam dang a tlai cang ai rua. Tuar kho hlah ing kan ṭian zawn ah cun, kawl len hmanh ning ka hmu kho ti lo, Au len zong nih lehrul um ti lo. ⁷ Lungrawn khua vengtu hna nih kei ka hmu hna, Tukden le maw hliamhma pu in Hnemrang chuh tiang tong ai ing. ⁸ Maw Jerusalem ngaknu leng rual hna, Ka dawt nunnem nan hmuh zawn ah cun, Zuun in a zaw ti in vung chim tawn ai u. ⁹ Nu vial lak i a vun iangtu um lo mui ṭha sung, Kan nawl hlah law na tum sang bik cu, val dang nakin zei hlei maw? Hi bang na anka tam cu. ¹⁰ Ka dawtte cu vang virverte le sen zilzel, Kan minung hawi thong hra vial lakah, a iangtu an um ri lo. ¹¹ A lu ah cun sui thiang bik si ai, Sawm-ai nak le a sam ker hna nih Nak zingzeng in vazun bawi a hluan. ¹² A mit hna nih cerhti kam pawng um ṭhurote khi bang, Cawhnuk chung kholh ṭhuro mitfang rikrekte lo ai hna. ¹³ A bel hna cu rimhmui kung ciinnak si maw rimhmui an chuahter; A hmur hna nih mura rimhmui dor in tla, Lili par dawh bang si ai. ¹⁴ A ban bom nih sui thluan pum le lungvar ṭamh khi bang, A tungtai nih vui ho le maw lapis lazuli lungvar ṭamh lo ai. ¹⁵ A mar hna nih sui kheng chung dir lungvar tung khi bang, Muisam zongin Lebanon tlang lo ai ngai dahkaw, Sidar thing dawh a ṭhawng ṭha hlei cuang ai ri. ¹⁶ A anka nih thlum hliarmar tein, Duhcuang ṭhahlei si ai hrim dahkaw, Ka dawtte cu duh nun ṭha si ai, Jerusalem leng rual hna.

¹ Khoi ah dah maw lengnu vial lak i mui ṭha cem, Khuazei ah dah aa herh ṭhan hoi kun, na dawt duh bik sung cem cu; Amah kawl lai awkin bawm rih sih. ² Ka dawtte cu a dum chungin kal ai kaw, zihmui hmun ah cun, A dum chungah lili par ṭawh le tuurun rual hna khalh pah in. ³ Ka dawtte aw kei ta na si i, kei zong nang ta ka si ve, Lenter hna ai a tuurun rual cu, lili pangpar hna lakah. ⁴ Ka dawtte aw naa dawh tuk ah Tirzah khua na bang, Duhtlai tuk ci Jerusalem khua bangin; Cu hna khua hnih bangin i dawh ko ai ri. ⁵ Ka zoh hlah law nang mit nih ee tang koin ka tlai, Na sawm-ai nih Gilead tlang cungin a ṭum me runrual hna bang. ⁶ Na ha tian rem hna nih ee tuurun dairial tikholh kaa khi lo ai hna, Zoh rem lomi fang khat hmanh um lo, rem cingceng tein. ⁷ Hmaikhuh dumdang puanzar phen na bel, taleti cheu lo ai ri. ⁸ Ṭuanchawng a thainu sawm riat hna le mang bawinu sawm ruk hna lengah, Rel cawk lo leng ngaknu zong um hna. ⁹ Ka zohzun lengnu le ka ṭhuro semte, pakhat lawng um ai ri, Sunghno a nu dawt khun ṭhai si ai, soisel awk zei um loin; An hoi zawn ah ngaknu lengmi nih thluachuak nu an ti hleiah, Thangṭhat hna maw mangbawi nu hna le ṭuanchawng a thainu rual nih. ¹⁰ Khuadei fingrei cat bang ahodah rung lang ci, Thlatangpa bang dawh i a ceu cin ninu bang, Vanlai arfi ceu cin hna a hluan. ¹¹ Va kal rih ning zohzun hoi rih lang, dum hmun nelrawn chungah cun, Mitsur hnah note corh cang hna maw tiin, taleti par mom hna zong. ¹² Ka hngal lo nain lung ka tum lengnu nih, Ka ruahter maw mi thong sang uktu, mangbawi cungchin sanghlei ah. ¹³ Rung kir rih law Shullam lengno nu, kannih bihzun lai dingah. Zei ah dah maw nan hei hoi rih lai Shullam miphun lengnu cu, Milaam bu hna karlak ah.

¹ Mangbawi fanu na mar hna nih cun kedan he rem tuk ai! Na taipum nih rem ciuceo tein, Zungthiam lungvar ṭhihlawn an thlet te bangin. ² Na laite nih mitsur thlum cia chiahnak khengkuar bial khi bang, Lili par dawh kulhmi fahum tlunte khi, lo ai dah kaw nang paw nih. ³ Na hnuk pahnih cu ee, sazuk nochuan faphir dawhte lo ai hna dah kaw, ⁴ Na hngawng nih sang kaw saiho sakmi run innsang khi bang; Na mitte nih Heshbon khua i Bathrabbim kutka pawng um tibual te lo maw, Na hnar zong nih Damaskas khua lei hoi Lebanon ral vennak run innsang khi bang; ⁵ Na lu nih cun Karmel tlang bangin cuang ai kaw, Na lu cung um na sawm-ai samthlai tiang zong nih sendung te bang ti ai hna, Mangbawi lung tiang hreng ai ci. ⁶ Nu raan vun haih khawh lo maw mui sung dawh cem, Ka dawt nunnem tikheirem dawh te, Nang lawng nih kei ka lung hnem dah ngai. ⁷ Na tungtai nih lo ai ngai dah kaw, ramlak tumkung hna zong khi, Na hnuk hna nih tumtlai theibor khi lo ai hna. ⁸ Tumkung ah cun kai ning law ee a thei lo rih ning. Aw na hnuk hna nih mitsur bor lo ai hna dah kaw, Na thaw rim nih epal rim a hluan. ⁹ Na mi hnamh nih mitsur hang thaw bang, Nal ziahmah in hmur le ha cungah a lan kho bikcem. ¹⁰ Kei cu nang ta si ai ing ee, Cia loin ee ruahzun len ka si. ¹¹ I thawh ka dawt kan pilmim lo ah kal hawl si, Mitsur lo ah ka dawt aw kan cam hna lai. ¹² Tuan in tho law mitsur lo ah cun kal u si, Mitsur par hna a no mom le taleti par sarh cang hna maw kan hoi hawl lai, Khika ah khin kei zuun rim cu zaa in chan lang. ¹³ Ṭhing thar chonh in kan chumtual kot ah Dimṭial pangpar dawh cem rimhmui le thei ṭha phun tling hna, Ka dawt nang ca tlem ai ing.

¹ Sunghno ka nu hnuk a ding le maw ka chuah sempi ṭa can va si law, Zatlang lam i kan ton zawn ah khin, Kan hnamh hnga mi phai ral hmanh veng loin. ² In hruai ning law ka nu run inn ah tanchuan rem, Sunghno ka nu a suan run inn khaan, chungah hei ka pom ai law, Taleti ser mitsur hang thlum, hei in din hnik lang. ³ Kehlei ban hei ka tlinh tawn rih law, Hei ka kup tuah na orhlei kut in. ⁴ Maw Jerusalem leng rual hna, Ka dawtte cu tho law i hlau ko tiin, Ṭhangh lai kan senh hna ri lo. ⁵ Ho lengnu maw ramlak in rung lang, Lung a tum cia thlanghnun valpa he zaṭial tlaih in um ai hna. Semnak na nu nganfah tuar buin na chuahnak hmun Epal kung toiah in ṭhang ai ing, ⁶ Na lung chungah ca bangin ka khenh ko ai law Val dang pom ser loin keimah lawng ka pom ai ko. Dawtnak cu ee thihnak tluk ṭhawng ve, Nahchuahnak nih thli bang a hrang tuk ai! Dawtnak nih cun mei bangin hlio kaw meizik nakin ṭhawng deuh ai. ⁷ Dawtnak mei cu tidai rial nih hmit kho ri lo, Run tilian zong nih phum kho lai lo. Dawtnak can ah zeizong phun kip le, rothil hmanh hei kam seh law, A khi hna cu zei ah hen, ka hei rel hna hnga. ⁸ Farte fang khat hnuk bom lo kan ngei, Thai ngenh duh i kan daang kai ni ah, zeitin aan kan leh hna hnga? ⁹ Amah cu ee vampang va si seh, ngun hau in kan kulh hnga, Run innkhar zong va si ko ah khin, sidar thing in kan hrenh hnga. ¹⁰ Keimah cu ee ralhruang ngai ka si, Ka hnuk zong nih ral vennak Cu vang ah ee ka dawt nih cun hnangam phortu ka si hngal dah ngai. ¹¹ Solomon nih Baal-hamon ah mitsur dum a ngei, A khi dum ah dum cawngtu chia hna, Theitlai man ah ngun thong khat cio pe ding si hna, ¹² Sihmanhsehlaw kei ka mitsur dum te cu keimah ta si ko ai, Solomon aw nang nih ngun thong khat cu i lak law Thei cawng hna nih za hnih cu i lak hna seh. ¹³ Ka thaisung in ka dum chung i a ṭhumi aw, Ka val hawi nih na aw theih an ngai, kei zong ka theihter ve law. ¹⁴ Ka dawtte aw ra lang cang tuah law, Rimhmui tlang i sazuk le maw saza nochuan bang, Ra lang ko sawh law.