ROM

ROM

¹ Khrih Jesuh sal le Pathian nih a Thawngṭha chim awkah a thim i a auhmi lamkaltu keimah Paul nih ca kan kuat hna. ² Cu Thawngṭha cu Pathian nih hlanpi in a profet hna sinin a rak kan kamh i Cathiang chung i a rak i ṭialmi kha a si i ³ cucu a Fapa kan Bawipa Jesuh Khrih kong kha a si. Minung lei in ti ahcun David hrinsor a si, ⁴ thlarau lei in le a thiannak kong in ti ahcun, ṭhawnnak nganpi in thihnak in thawhter a sinak nih khan Pathian Fapa a si kha a langhter. ⁵ Amah thawngin Pathian nih lamkaltu sinak kha a ka pek i miphun kip chungmi kha zumhnak le Pathian nawlngaihnak i phakter awkah a ka fial; ⁶ cu hna lakah cun nannih, Rom khua ah a um i Pathian nih Jesuh Khrih ta si dingin an kawhmi hna zong nan i tel ve. ⁷ Cucaah Pathian nih a dawt i amah mi si dingah an kawhmi hna, Rom khua i a ummi nan dihlak in ca kan kuat hna: Pathian kan Pa le Bawipa Jesuh Khrih nih vel le daihnak cu in pe ko hna seh. ⁸ A hmasa bik ah, nan dihlak ruangah ka Pathian cu Jesuh Khrih thawngin ka lawmh; zeicahtiah vawlei khuazakip ah nan zumhnak thawng hi an rak theih dih cang. ⁹ Ka chimmi bia hi ahmaan tiah Pathian cu tehte ah kaa lak ngam — cu Pathian rian, a Fapa kong Thawngṭha chim hi ka lungthin dihlak in ka ṭuanmi cu a si. ¹⁰ Thla ka cam fate nannih kan hngalh zungzal hna cu Pathian nih a hngalh ko. Cun Pathian sinah cun, annih cu zei maw ti tal in ka hmuhter ko hna, tiin thla ka cam lengmang. ¹¹ Zeicahtiah nanmah hmuh cu kaa ngaih hringhran i nanmah he thlarau thluachuahnak i hrawm i nanmah thazang pek cu ka duh ngaingaimi a si. ¹² Ka chim duhmi cu, pakhat le pakhat kan i bawm cio hnga; ka zumhnak nih nannih an bawmh hna hnga i nan zumhnak nih kei zong a ka bawmh ve hnga, ti hi a si. ¹³ Ka u le ka nau hna, hihi rak ka hngalhpiak u ti kan duh hna: nanmah tlawn hi voi tampi kaa tim tawn, sihmanhsehlaw zei nih dik a ka donh zungzal. Jentail mi a dang hna lak i lungthlengmi ka umter hna bantukin nannih lak zong i lungthlengmi umter ve cu ka duh hringhranmi a si. ¹⁴ Miphun vialte hna sinah leiba ka ngei, a fimmi si hna seh, a hrutmi si hna seh, cathiammi si hna seh, cathiam lomi si hna seh, an dihlak cungah leiba ka ngei. ¹⁵ Cucaah cun nannih Rom khua i a ummi sin zong i Thawngṭha chim ka duhnak cu a si. ¹⁶ Thawngṭha hi ka zahpi lo, zeicahtiah a zummi vialte hna caah Pathian khamhnak hmual a si, Judah mi hna caah a si hmasa i cun Jentail mi hna ca zongah a hung si. ¹⁷ Cucu zeitindah a hung si ti ahcun, Thawngṭha nih cun Pathian nih zeitindah minung kha Amah he aa remter hna ti kha a langhter i Cathiang nih, "Zumhnak thawngin Pathian he aa remmi cu an nung lai," a ti bang khan, Pathian he i remnak cu a hram in a dong tiang zumhnak thawngin a si. ¹⁸ Sihmanhsehlaw Pathian thinhunnak cu vancung in a rung lang i minung sualnak le ṭhat lonak dihlak cungah khan a rung tlung; cu an ṭhat lonak cu biatak kha lang kho loin a dawntu an ṭhat lonak kha a si. ¹⁹ Minung cu Pathian kong hngalh khawh a simi thil hna kha Pathian hrimhrim nih fiang tein a hmuhsak ko hna nain ²⁰ an hmu duh lo, cucaah dan a tat hna. Vawlei a ser hramthawkte khan Pathian nih cun, hmuh khawh a si lomi a sining, zungzal hmunmi a ṭhawnnak le a Pathian sinak kha, fiang tein a langhter ko. Cucaah i silhnalh khawhnak zeihmanh an ngei lo! ²¹ Pathian cu hngalh cu an hngalh ko, sihmanhsehlaw pek awk a simi upatnak kha an pe duh lo; a lawmh zong an lawm duh fawn lo. An ruahnak kha pakpalawng tu ah a cang i an lungthin kawlawngpi cu muihnak in a khat. ²² Annih nih cun, kan fim, an ti, sihmanhsehlaw mihrut an si; ²³ thih a thiam lomi Pathian tu kha bia loin thih a thiammi minung le va le saram le a lawn in a lawnmi thilnung he aa loin sermi milem tu kha an biak hna. ²⁴ Cuticun minung cu, cu bantuk mihrut cu an si caah, Pathian nih khan, an lungthin nih tuah a duhmi thil fihnung kha a tuahter ko hna i pakhat le pakhat cungah ningzak thil kha an tuah. ²⁵ Pathian kong i biatak kha lih ah an thlen; Sertu kha bia loin sermi thil tu kha an biak hna, Sertu cu pei zungzal in thangṭhat awk a simi cu a si cu! Amen. ²⁶ Cuti an tuah caah cun, minung cu Pathian nih ningzak a simi pumsa duhnak ah khan a thlah hna. Nu hmanh nih khan ningcang tein hman awk a simi an nu sinak cu ningcang lo piin an hman i pakhat le pakhat kha an sual. ²⁷ Cu bantuk ṭhiamṭhiam in pa zong nih khan ningcang tein nu he um awk cu an hlawt riangmang i anmah le anmah kha an sual. Cu bantuk ningzah awk thil cu pa nih khan an tuah caah cu bantuk thil ṭhalo nih hmuh awk a tlakmi dantatnak cu an hmuh. ²⁸ Pathian kong hngalh taktak cu minung nih khan an lung chung i chiah an duh lo caah a thurhnawmmi lungthin ngeih awkah khan a thlah hna i cucaah cun tuah awk a si lomi thil kha an tuah. ²⁹ Annih cu ṭhat lonak a phunphun le duhfahnak le puarnak le nahchuahnak in an khat i an lungthin cu lainawnnak le i dohnak le i hlennak le ziarngeihnak in a liam in a liam. Pakhat le pakhat an i congoih, ³⁰ an i thangchiat, Pathian kha zei ah an rel lo, an lung a puam, tla ngialngual in an um, an i porhlaw, ṭhat lo tuahnak lam kha an ruat, nu le pa nawl an ngai lo; ³¹ an ziaza a ṭhalo, an biakam kha an let lengmang, midang cungah zaangfahnak le zawnruahnak zeihmanh an ngei lo. ³² Hi bantukin a nunning a simi cu thih awk a tlakmi a si, tiah Pathian nawlbia nih a timi kha an hngalh ko. Asinain hi bantuk thil cu anmah nih an tuah lengmang lawng si loin midang a tuah vemi zong kha an hnatlakpi hna.

¹ Cucaah aho na si hmanh ah silhnalh khawhnak lam zeihmanh na ngei lo, zeicahtiah midang kha sual na phawt hna tikah, an tuahmi kha na tuah ve ko ṭung caah, nangmah lila sual naa phawt a si ko. ² "Hi bantuk thil a tuahmi hna cu Pathian nih sual a phawt hna tikah Pathian cu ahmaan ko ti kha kan hngalh," na ti. ³ Sihmanhsehlaw nangmah nih, cu sual na phawtmi hna thil hrimhrim kha na tuah ve ko hna caah, Pathian sualphawtnak cu ka luat lai, tiah i ruat hlah. ⁴ A zaangfahnak a nganmi le a lungsaunak le a thinfualnak zong zeirello in um hlah. Pathian nih na cung i zaangfahnak a ngeih cu, i ngaichih seh ti aan duh caah a si ti cu na hngalh ko ṭung. ⁵ Asinain na lung cu a hak i a ṭhawng. Cucaah Pathian nih a thinhunnak le ding tein bia a ceihnak a phuan ni i na in laimi dantatnak cu na nganter chin men ko. ⁶ Pathian nih cun aho paoh kha an tuahmi ningin a rulh hna lai. ⁷ Micheu nih thil ṭha kha an tuah lengmang i sunparnak le upatnak le zungzal nunnak kha an kawl; cu hna cu Pathian nih zungzal nunnak kha a pek ko hna lai. ⁸ Cun mi a cheu cu anmah zawn lawng kha an i ruat i ahmaanmi kha an duh lo i ahmaan lomi tu kha an zulh; cu hna cu Pathian nih a thinhunnak le a thinlinhnak kha a toih hna lai. ⁹ Ṭhat lonak a tuahmi nih an dihlak in nganfahnak le temhinnak kha an hmuh lai, a ing hmasatu cu Judah mi an si lai i cun Jentail mi an si ve lai. ¹⁰ Sihmanhsehlaw ṭhatnak a tuahmi vialte cu Pathian nih sunparnak, upatnak le daihnak kha a pek hna lai; pek hmasami cu Judah mi kha an si lai i cun Jentail mi kha an si ve lai. ¹¹ Pathian nih cun ahopaoh kha duhdanh lo tein an bia a ceih hna lai. ¹² Jentail mi nih Moses nawlbia kha an ngei lo, cucaah an sual tikah Nawlbia loin an tlau; Judah mi nih cun Nawlbia kha an ngei, cucaah an sual tikah Nawlbia ningin sualphawt an si. ¹³ Zeicahtiah cun minung cu Pathian he remter a sinak cu Nawlbia theih thawngin si loin Nawlbia nih tuah u a timi tuah thawngin a si. ¹⁴ Jentail mi nih Nawlbia cu an ngei lo, sihmanhsehlaw Nawlbia nih, tuah u, a timi kha anmah lungtho tein an tuah chel paoh ah, Moses Nawlbia cu ngei hmanh hna hlah seh law, cu hna cu an caah nawlbia an si ko. ¹⁵ Nawlbia nih, tuah u, a timi cu an lung chungah aa ṭial ko ti kha an ziaza in an langhter. Cun anmah lungthin lila nih a zeimaw caan ah sual a phawt hna i a zeimaw caan ah thiam a coh hna caah, an lung chungah aa ṭial ko ti cu an chiaṭha thleidannak nih khan a langhter ko. ¹⁶ Cucaah Pathian nih Jesuh Khrih thawngin minung lungthli ruahnak kha bia a ceih Ni ah cun hi bantuk hin a si te lai ti hi ka chimmi Thawngṭha nih a chimning cu a si. ¹⁷ A si ah nannih Judah mi tah? Judah mi nan i ti; Nawlbia kha nan i bochan i nan Pathian kha nan i uang; ¹⁸ Pathian nih tuah hna seh ti an duhmi hna kha nan hngalh i ahmaanmi thil i thim awk kha Nawlbia thawngin nan hngalh; ¹⁹ mitcaw lam hruaitu kan si i mui lak i a ummi hna caah ceunak kan si nan ti; ²⁰ a hrutmi cawnpiaktu le a nomi hna saya kan si nan ti; cun Nawlbia chungah hin hngalhnak le biatak cu tling tein kan hmuh nan ti. ²¹ Nannih midang a cawnpiaktu saya hna, zeicahdah nanmah cu nan i cawnpiak kun lo? "Fir hlah u," tiah phung a chimtu hna, zeicahdah nan fir kun? ²² "Va cungin pa i duh hlah u," a titu hna, zeicahdah nan i duh kun? Siasal a fihmi hna, zeicahdah siasal biakinn cu nan ramh kun hna? ²³ Pathian nawlbia a chor in aa chormi hna, zeicahdah a nawlbia cu nan buar i Pathian cungah ningzahnak nan tlunter kun? ²⁴ Cathiang nih, "Nanmah Judah mi ruangah Jentail mi nih Pathian kha an thangchiat," a ti. ²⁵ Nawlbia cu nan ngaih ahcun, nan cuarpar tannak cu san a tlai, sihmanhsehlaw nan ngaih ṭung lo ahcun i tan lo lawlaw in rak um u law a ṭha deuh hnga. ²⁶ Cuarpar aa tan lomi Jentail mi nih Nawlbia kha a zulh ahcun, Pathian nih aa tan tluk ah a rel hnga lo maw? ²⁷ Cucaah nannih Judah mi cu, Nawlbia kha nan i ṭial i nan cuarpar nan i tan nain, nawlbia kha nan buar caah Jentail mi nih, an pum in cuarpar tannak an ngei lo nain, Nawlbia kha an zulh caah, sual an in phawt hna lai. ²⁸ A ngaingai ti ahcun, ahodah Judah mi taktak, a cuarpar aa tan taktakmi cu a si? Lenglei in Judah mi a si i a cuarpar aa tannak cu pumsa in a simi si loin ²⁹ chunglei in Judah mi a si i a lung chungin cuarpar aa tanmi kha Judah mi taktak cu a si. Cucu ṭialmi Nawlbia rian ṭuannak kha si loin Pathian Thlarau rianṭuannak kha a si. Cu bantuk mipa cu minung sinin si loin Pathian sinin thangṭhatnak kha a hmu.

¹ A si ahcun Judah mi nih cun Jentail mi hna nakin ṭhatnak zeital an hmu deuh kun maw? Cuarpartan cu santlaihnak zeital a ngei kun maw? ² A phunphun in tampi a um ko! Cu hna lak i a hmasa bik cu, Pathian nih a bia Judah mi a kenter hna kha a si. ³ Asinain a cheu kha zumh awk tlak lo an rak si si kaw, zeitindah a si kun lai? Cu ruangah cun Pathian zong cu zumh awk tlak lo a si ve lai tinak a si maw? ⁴ Si hrimhrim hlah. Minung hi kan dihlak in lihchim si hmanh u sih law Pathian cu zumh awk tlak a si ṭhiamṭhiam ko. Cathiang nih, "Bia na chim tikah na chimmi cu ahmaan ti kha a lang lai i tazacuai na si tikah na bia cu na tei lai," tiah a ti bang khan a si. ⁵ Ahmaan lomi thil kan tuahmi nih ahmaanmi thil Pathian nih a tuahnak fiang chinchin in a langhter ah tah, zeitin? Zeidah kan chim khawh lai? Pathian nih kannih cu dan a kan tat tikah a palh a si maw? (Minung biachim in hei chim ko ning law.) ⁶ Si hrimhrim hlah. Pathian cu a din lo ahcun, zeitindah vawlei cu bia a ceih khawh lai? ⁷ Asinain ka lihchimnak nih Pathian biatak cu fiang chinchin in a langhternak thawngin Pathian cu sunparnak ngan deuh a pek ahcun, zeicahdah kei cu misual na si tiah sualphawt ka si kun? ⁸ "Ṭhatnak a chuah nakhnga ṭhat lonak kha tuah u sih," tiah zeicaah kan ti ko kun lo? Cu hrimhrim cu a chimmi a si, tiin mi cheukhat nih an ka thangchiat. Cu bantuk mi pawl cu sualphawt awk tlak an si bantukin sualphawt an si ko lai. ⁹ A si ahcun, kannih Judah mi hi tah, Jentail mi hna nakin kan dirhmun a ṭha deuh hlei kun maw? Ṭha deuh hlei nemmam hlah. Ka langhter cang bang khan Judah mi he Jentail mi he kan dihlak in sualnak ṭhawnnak tang i a ummi kan si. ¹⁰ Cathiang nih, "A dingmi ahohmanh an um lo, ¹¹ Pathian a hngalmi ahohmanh an um lo, Pathian a kawlmi ahohmanh an um lo. ¹² Minung nih an dihlak in Pathian kha an pialtak i a pingah an kal dih; Ṭhatnak a tuahmi ahohmanh an um lo, pakhat hmanh an um lo, ¹³ An kaa cu khar lomi thlan bantuk a si, An hmur in thihnak bia, rul sivai bantuk kha cat loin a chuak; ¹⁴ An kaa cu bia chiakha in a khat. ¹⁵ Mi va tuk le va thah ah cun an khul a rang ko; ¹⁶ An kalnak paoh ah rawhnak le nganfahnak kha an va tuah lengmang. ¹⁷ Daihnak lam kha an hngal lo i ¹⁸ Pathian hmaizah zong kha an hngal lo," tiah a ti bang khan a si. ¹⁹ Nawlbia chung bia cu Nawlbia tang i a ummi hna caah khan a si ti kha kan hngalh; cu tiin a sinak cu mi nih silhnalh khawhnak zeihmanh an ngeih khawh nakhnga lo le vawlei cu a ningpi in Pathian biaceihnak hmai i a dir ding a si kha a langh nakhnga caah a si. ²⁰ Nawlbia zulhnak thawngin ahohmanh Pathian hmai i thiam a co khomi an um lo. Nawlbia nih a tuahmi cu, an sualnak hngalhter kha a si ko. ²¹ Sihmanhsehlaw atu cu nawlbia he i pehtlaihnak thawngin si hleng lo tein Pathian he i pehtlaihnak lam kha kan caah a hung awng i cu lam cu nawlbia le profet hna nih ahmaan tiin tehte an khaanmi lam kha a si. ²² Cu lam, Pathian he i remnak lam cu Jesuh Khrih zumhnak thawngin a si i Jesuh Khrih a zummi ca paoh ah a si dih. Ahohmanh i thleidan ding a si lo, ²³ zeicahtiah mi vialte cu kan sual dih cio ko i Pathian sunparnak kha kan bau dih cio ko. ²⁴ Sihmanhsehlaw kannih a kan tlantu Jesuh Khrih thawngin Pathian nih a vel cu a lak tein a kan pek i amah Pathian he cun a kan remter. ²⁵ Jesuh Khrih cu Pathian nih a thi in ngaihthiamnak sertu ah a tinhmi a si i cu ngaihthiamnak cu Jesuh Khrih zumhnak thawngin hmuh ding a si. Pathian nih cu bantukin minung he remnak a tuah cu a dinnak kha langhter a duh caah a si. Cu a langhterning cu hitihin a si: hlan lioah cun a lung a sau caah mi nih an tuahmi sualnak kha i hmuhter duh loin a um; ²⁶ cun atu caan ah cun Pathian ding a si kha aa langhter i Jesuh Khrih a zummi paoh kha a luatter hna. ²⁷ A si kun ahcun, kan i uan khawh awk zeital a um maw? Um hlah. Zei ruangah dah? Nawlbia kan zulh ruangah maw? Si hlah. Sihmanhsehlaw kan zumh ruangah a si. ²⁸ Zeicahtiah minung cu Pathian he remter a sinak cu zumhnak thawng lawnglawng in a si, Nawlbia nih, tuah u, a timi tuahnak thawngin a si lo, tiah pei kan ti cang kha. ²⁹ Asiloah, Pathian cu Judah mi hna Pathian lawng maw a si? Jentail mi hna Pathian tah a si ve lo maw? Si hen ta! ³⁰ Pathian cu pakhat pei a si cu, Judah mi cu an zumhnak thawngin amah he cun a remter hna lai i Jentail mi zong cu an zumhnak thawng in a si ṭhiamṭhiam ve ko lai. ³¹ Cu ti kan ti tikah cun Nawlbia kha zumhnak in kan hlawt tinak a si maw? Si hrimhrim hlah, Nawlbia cu kan dirhṭhoh lehlam a si.

¹ A kan hringsortu kan pu Abraham kong kha tah zeitindah kan ti kun lai. Zeitindah a rak si kha? ² A tuahmi thil hna thawngin Pathian he remnak a hmuh a si ahcun, i porhlawt awk a ngei hnga. Sihmanhsehlaw Pathian hmaiah cun zeihmanh i uan awk a ngei lo. ³ Cathiang nih, "Abraham nih khan Pathian a zumh i cu a zumhnak ruangah cun Pathian nih miding bantukin a cohlan," tiah a ti. ⁴ Rian a ṭuanmi cu ṭuan man pek a si tawn; a nihlawh cu laksawng a si tiah tipiak a si bal lo, a ṭuan man i a hmuhmi a si. ⁵ Sihmanhsehlaw rianṭuannak si loin zumhnak tu a ngeimi nih cun, Pathian nih a sualmi cu a sual lo ah a chiah hna tiah a zumh i cu a zumhnak cu Pathian nih amah he remternak caah a lakpiakmi cu a si. ⁶ Pathian nih rianṭuannak tel loin, miding bantuk ah a cohlanmipa aa lawmhnak kong David nih a chim tikah, hihi pei a sullam a chim duhmi cu a rak si cu: ⁷ "Pathian nih an ṭhat lonak a ngaihthiam i an sualnak a khuhpiakmi hna cu an vaa lawm dah! ⁸ Pathian nih sualnak a tuahmipa, a sualnak sual i a relpiak lomipa cu a vaa lawm dah!" ⁹ David nih a chimmi lunglawmhnak hi cuarpar tanmi hna ca lawngah maw a si? Si hlah. Cuarpar tan lomi hna ca zongah a si ko. "Abraham nih Pathian a zumh i cu a zumhnak ruangah cun Pathian nih miding bantukin a cohlan," ka timi kha ka nolh rih lai. ¹⁰ Cucu zeitik ah dah a rak si? Abraham kha cuarpar aa tan hlanah maw aa tan hnuah dah? Aa tan hlanah a si, aa tan hnuah a si lo. ¹¹ A cuarpar aa tan cu a hnuah a si, Abraham nih a cuarpar aa tannak cu a zumhnak ruangah Pathian nih cuarpar aa tan hlan in miding in a cohlan cang ti hmelchunhnak caah a si. Cucaah Abraham cu, Pathian a zum i an cuarpar an i tan lo nain Pathian nih miding in a cohlanmi vialte hna, thlarau lei an pa a si. ¹² Cun cuarpar tanmi hna pa zong a si ve ko, cuarpar an i tan ruangah si loin kan pu Abraham nih cuarpar aa tan hlan i a zulhmi nunning, zumhnak nunning khan an nun ve caah a si. ¹³ Pathian nih Abraham le a tefa hna cu, vawlei hi Abraham ta a si lai, tiin bia a kamh hna. Hiti in bia a kamh hna cu Abraham nih khan Nawlbia kha a rak zulh caah a si lo, sihmanhsehlaw Pathian kha a zumh i Pathian nih miding in a cohlan ca tu ah khan a si. ¹⁴ Zeicahtiah Nawlbia a zulmi lawng kha rocotu cu an si ahcun zumhnak cu pakpalawng a si ko hnga i biakamhmi thil cu pakpalawng men a si ko hnga, ¹⁵ Nawlbia nih cun Pathian thinhunnak lawng kha a chuahpi ko; nawlbia a um lonak hmun ah cun nawlbia buar zong a um ve lo. ¹⁶ Cu biakamnak cu velngeihnak thawng lawnglawng in a si i Abraham tefa vialte hna caah khan a si, Nawlbia a zulmi hna ca lawngah khan si loin Abraham zumh bantukin a zummi hna dihlak caah khan a si ti hngalhnak caah zumhnak cungah khan a hram cu bunh a si. ¹⁷ Zeicahtiah Cathiang nih, " ’Nangmah cu miphun tampi hna pa ah kan ser cang,’ a ti," tiah a ti bantuk khan, Abraham cu kan dihlak pa a si. Cucaah hi biakamnak cu Pathian hmaiah khan a fek i cu Pathian cu a zumhmi Pathian cu a si; mithi kha a nunter i a um lomi thil a bia in a umtertu kha a si. ¹⁸ Ruahchan ding zeihmanh a um lo zongah hnabeisei ngaiin a rak zumh ṭhiamṭhiam caah khan Cathiang nih, "Na tefa hna cu arfi zat an si lai," tiah a ti bang khan "Miphun tampi hna pa" ah khan a cang. ¹⁹ Abraham cu kum za khat dengmang a si cang, sihmanhsehlaw mithi bantuk a si ko cangmi a pum le Sarah nih fa a hrin khawh lonak kha a ruah tikah a zumhnak cu a der hlei lo. ²⁰ Pathian biakamhmi kha zum loin a um hlei lo, a zumhnak nih cun ṭhawnnak in a khahter i Pathian kha a thangṭhat ko. ²¹ Pathian nih bia a ka kamhmi cu a tuah khawh hrimhrim lai ti kha fiang tein a zumh. ²² Cucaah cun Abraham cu zumhnak thawngin "Pathian nih miding in a cohlan". ²³ "Miding in a cohlan" ti bia hi Abraham ca lawngah ṭial a si lo. ²⁴ Jesuh kan Bawipa thihnak in a thawhtertu a zummi, miding in cohlan ding kanmah ca zongah hin ṭial a si ve. ²⁵ Amah cu kan sual ruangah thihnak phakter a si i Pathian he kan i remnak hnga dingah nunnak ah thawhter a si.

¹ Atu cu zumhnak thawngin thiamcoter kan si caah kan Bawipa Jesuh Khrih thawngin Pathian he kan i rem. ² Jesuh Khrih nih cun kan zumhnak thawngin Pathian velngeihnak chungah cun a kan luhpi i cu chungah cun atu hi kan um. Cucaah Pathian sunparnak kan i hrawm ve lai ti kan i ruahchan i kan tha a nuam. ³ Cun harnak kan inmi zongah hin kan i lawm ko, zeicahtiah harnak nih cun in khawhnak kha a kan ngeihter i ⁴ in khawhnak nih cun ziaza a kan ngeihter i ziaza nih cun ruahchannak kha a kan ngeihter; ruahchannak nih cun a kan deuh lo, ⁵ zeicahtiah a kan pekmi Thiang Thlarau thawngin kan lung chungah Pathian nih a dawtnak cu a toih in a kan toih. ⁶ Zeihmanh a tuah kho lomi kan si ko lioah khan, cu caan thengte ah cun mi ṭha lomi kan caah Khrih kha a thi. ⁷ Mi ṭha caah cun thih ngamh zong an um phum hnga nain a dingmi ca i thih cu a harmi thil a si. ⁸ Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi. ⁹ A thihnak hmanh nih Pathian he a kan remter ahcun zeitluk in dah Pathian thinhunnak chung cun amah nih cun a kan khamh chinchin lai. ¹⁰ Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan ser cang. Atu cu Pathian hawikom kan si cang caah Khrih nunnak nih cun zeitluk in dah a kan khamh chinchin lai. ¹¹ Cu lawng cu a si rih lo, kannih cu Pathian hawikom i a kan sertu kan Bawipa Jesuh Khrih thawngin Pathian ah cun kan i lawm. ¹² Sualnak cu mipa pakhat thawngin vawlei cungah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna. ¹³ Nawlbia a um hlanah khan vawlei cungah hin sualnak a rak um ko, sihmanhsehlaw nawlbia a rak um lonak hmun ah khan cun sualnak cu sual ah relpiak an si lo. ¹⁴ Asinain Adam caan in Moses caan tiang thihnak nih mi vialte kha a uk dih hna; Adam nih Pathian nawlbia a buarnak thawngin a tuahmi sualnak bantuk a tuah lomi zong kha a uk ko hna. Adam cu a ra lai dingmi hmanthlak a rak si. ¹⁵ Sihmanhsehlaw cu hna pahnih cu an i khat lo, zeicahtiah Pathian laksawng cu Adam sualnak bantuk kha a si lo. Kha mipa pakhat sualnak ruangah khan mi tampi an thi taktak ko. Sihmanhsehlaw kha pa ṭhat lonak nakkhan Pathian vel cu tam piin a ngan deuh i cu bantuk ṭhiamṭhiam cun mipa pakhat Jesuh Khrih vel thawngin mi tampi cungah a tlungmi Pathian laksawng cu a ngan deuh. ¹⁶ Cun Pathian laksawng le mipa pakhat sualnak kha an i lo lo. Kha sualnak a hun zultu kha cu, "Na sual," ti biakhiahnak a si; sihmanhsehlaw sualnak hi zat riamruam a hun zultu cu, kan phu kan tawk lopi a simi laksawng, "Na sual lo," ti biakhiahnak hi a si. ¹⁷ Mipa pakhat sualnak thawngin, cu mipa ruangah cun, thihnak nih khan minung cu uk hram a hun thawk hna. Sihmanhsehlaw mipa pakhat, Jesuh Khrih tuahmi chungin a chuakmi cu zeitluk in dah a ngan deuh! Mipa pakhat thawngin thihnak cu a um a si ahcun, Pathian velngeihnak duhdim le dinnak a laksawng a hmumi vialte hna cu, mipa pakhat Jesuh Khrih thawngin thlarau nunnak a ṭhawng chinchinmi an ngei lai. ¹⁸ Cucaah cun sualnak pakhat tuahmi nih mi vialte kha sual a phawt hna bantukin dinnak pakhat tuahmi nih mi vialte kha a luatter hna i nunnak a pek hna. ¹⁹ Mipa pakhat nawlngaih lo ruangah mi tampi kha misual i ser an si bantukin mipa pakhat nawlngaih ruangah mi tampi cu miding ah ser an si lai. ²⁰ Nawlbia cu a rung um i palhnak kha a karh chinchin, sihmanhsehlaw sualnak a karhnak hmun ah khan Pathian vel cu a karh chinchin ve. ²¹ Cucaah sualnak nih cun thihnak kha hmang in a kan uk bantukin Pathian vel nih cun dinnak kha hmang in a kan uk i Jesuh Khrih kan Bawipa thawngin zungzal nunnak ah a kan kalpi.

¹ A si ahcun zeitindah kan ti lai? Pathian vel cu karh chinchin seh tiah sualnak cu kan tuah chin lengmang lai maw? ² Tuah naisai hlah. Sualnak ah cun kan thi cang, zeitindah cu chungah cun kan um peng khawh lai? ³ Khrih Jesuh he pehtlaihnak chung i tipil kan in ah khan a thihnak he i pehtlaihnak chungah kan i hnim ti kha nan philh dahra? ⁴ Cucaah tichung i tipilnak kan vung in ah khan amah he vui ṭi kan si i a thihnak ah khan kan thi ve; cu bantuk ṭhiamṭhiam in Khrih cu Pa sunparnak ṭhawnnak nih a thawhter bang khan kannih zong nunnak thar ah kan nung ve lai. ⁵ A thihnak ah amah he kan thih ṭi ahcun, nunnak i thawhter a sinak ah kannih zong thawh ṭiter kan si ve lai. ⁶ Kan minung hlun cu Khrih he vailam cungah thah a si cang ti kha kan hngalh. A sualmi kan minung hlun cu zeicahdah thah a si ti ahcun, sualnak sal kan si tinak hnga lo caah a si. ⁷ Cucu zeitindah a si ti ahcun minung cu a thih tikah cun sual ṭhawnnak chung khan a luat. ⁸ Kannih cu Khrih he kan thih ṭi cang ahcun, amah he kan nung ṭi lai ti zong kha kan zumh. ⁹ Zeicahtiah Khrih cu thihnak in thawhter a si cang i a thi ti lai lo ti kha kan hngalh — thihnak nih a cungah nawl ngeihnak zeihmanh a ngei ti lo. ¹⁰ A inmi thihnak cu voi khat ah za lakin sualnak ruang i a thih kha a si; cun atu i a nunmi nunnak cu Pathian ca nunnak a si. ¹¹ Cu bantukin nannih zong nih, kannih cu sualnak ah kan thi cang i asinain Khrih Jesuh he i pehtlaihnak thawngin Pathian ah kan nung tiah nan i ruah awk a si. ¹² Cucaah thih a hmangmi nan pum kha sualnak nih uk ti hlah seh law, pumsa duhnak kha in zulhter ti hna hlah seh. ¹³ Cun nan pum a zeihmanh kha thil ṭhalo tuahnak ding caah sualnak kha pe ti hlah u. Thihnak in nunnak ah thawhter ṭhanmi bantukin Pathian sin tu ah i pe u law dinnak tuahnak ding caah nan pum cu a ningpi in Pathian cu pe ko u. ¹⁴ Sualnak nih cun in uk hrimhrim ti hna hlah seh, zeicahtiah nawlbia tangah nan um ti ṭung lo, Pathian vel tangah pei nan um cang cu. ¹⁵ A si kun ahcun zeitin? Nawlbia tangah um ti loin Pathian vel tangah kan um cang caah kan sual awk a si lai maw? Si hrimhrim hlah. ¹⁶ Bawi pakhatkhat sinah na nawl kan ngaih lai, tiin nan i pek ahcun nannih cu cu bawi a nawl nan zulhmi sal cu nan si — cu bantukin sualnak cu a nawl nan zulh ahcun, sualnak sal cu nan si i sualnak nih a chuahpimi cu thihnak a si; cun cu bantuk ṭhiamṭhiam cun Pathian cu a nawl nan zulh ahcun, cu nawlngaihnak nih a chuahpimi cu Pathian he i remnak kha a si. ¹⁷ Sihmanhsehlaw Pathian cu lawm cio ko u sih. Zeicahtiah nannih cu sualnak sal nan rak si nain cawnpiaknak nan hmuhmi chung i a ummi biatak kha nan lungthin dihlak in nan zulh cang. ¹⁸ Sualnak chungin luatter nan si cang i dinnak sal ah khan nan i cang cang. ¹⁹ Hi bantukin tahchunhnak bia ka hman hi, nannih nih nan hngalh khawh deuh nakhnga ka duh caah a si. Hlanah cun a ṭha lomi thil tuah awkah thurhnawmhnak le ṭhat lonak sal nan rak si. Cu bantuk ṭhiamṭhiam in atu cu a thiangmi thil tuah awkah dinnak sal nan si awk a si. ²⁰ Sualnak sal nan rak si ah khan dinnak chungin nan rak luat; ²¹ asinain zeital a miak nan hmu maw? Atu i nan i zahpimi thil hna dah ti lo hi cu, zeihmanh nan hmu lo. Cu hna an donghnak cu thihnak a si. ²² Sihmanhsehlaw atu cu sualnak chung khan luatter nan si cang i Pathian sal nan si cang; nan miakmi cu Pathian sinah pekchanhmi nunning a si i cu nih a chuahpimi cu zungzal nunnak a si. ²³ Zeicahtiah sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.

¹ Ka u le ka nau hna, nannih nih phung kha nan dihlak in nan hngalh ko caah chim ka duhmi hi nan hngalh khawh ko lai. Phung nih hin minung cu a nun chung lawngah a uk. ² Tahchunhnak ah, va a ngeimi nu cu a va a nun chung lawngah phung nih cun a uk, a va a thih ahcun a va sin i a ṭem chihtu phung khan a luat. ³ Cucaah a va a nun lioah pa dang he an um ahcun va cung pa duh a si, sihmanhsehlaw a va a thih ahcun amah cu a luat i pa dang he an i ṭhit ahcun va cung pa duh a si ti lo. ⁴ Cu bantuk cu nannih zong nan si ve, ka naule hna. Nawlbia lei in ti ahcun nannih cu a thimi nan si cang, zeicahtiah Khrih pum chungah nan i tel cang; cun Pathian rian ah santlaimi kan si nakhnga, atu cu thihnak in thawhtermipa ta kha nan si cang. ⁵ Kan minung sining in kan rak nun lioah khan Nawlbia nih a cawlcanghtermi kan pumsa duhnak hna kha kan pum chungah hin rian an rak ṭuan i an theitlai cu thihnak a si. ⁶ Sihmanhsehlaw thong chungah a rak kan hrengtu Nawlbia ah khan kan thih cang caah Nawlbia khan kan luat cang. Cucaah ning hlun, ṭialmi nawlbia lam zulh khan Pathian rian cu ṭuan ti loin ning thar, Thlarau lam zulh in kan ṭuan cang. ⁷ A si ah zeitindah kan ti lai? Nawlbia cu a sual hnga maw? Sual hlah. Sihmanhsehlaw sualnak cu sual a si kha a kan hngalhtertu cu Nawlbia cu a si. Nawlbia nih, "Mi thil na mit va thi hlah," tiah ti hlah seh law, mi thil mitthit cu zeidah a si ti kha ka hngal hnga lo. ⁸ Nawlbia kha hmang riangmang in sualnak nih cun ka chungah mi thil mitthitnak a phunphun kha a chuahter. Zeicahtiah nawlbia um lo ahcun sualnak cu a thi ko. ⁹ Keimah hrimhrim zong hi hlanah cun nawlbia loin ka rak nung, sihmanhsehlaw nawlbia kha a rat tikah sualnak cu a tho i ka thi. ¹⁰ Cun nunnak chuahpitu ding i ruahmi nawlbia cu ka caah thihnak chuahpitu lehlam a si. ¹¹ Sualnak nih ṭuannak caan ṭha kha aa hmuh i nawlbia cu i hman riangmang in a ka hlen; nawlbia thawng cun sualnak nih cun a ka thah. ¹² Cucaah Nawlbia cu a thiang i tuah awk timi cu a thiang ahmaan i a ṭha ko. ¹³ Cuti ti tikah cun a ṭhami nih ka thihnak a tlunter ti a si hnga maw? Si hlah. Thihnak a tluntertu cu sualnak a si. Sualnak nih cun, sualnak a sining taktak kha a langh nakhnga ṭhatnak kha i hman riangmang in ka cungah thihnak kha a tlunter. Cucaah nawlbia thawng khan sualnak a sual zia cu a lang chinchin. ¹⁴ Nawlbia cu thlarau lei thil a si, cucu kan hngalh ko. Sihmanhsehlaw kei cu titsa mi ka si, sualnak sal ah a zuarh in zuarhmi ka si. ¹⁵ Ka tuahmi hi a sullam ka hngal kho hna lo, zeicahtiah tuah ka duhmi kha ka tuah hna lo i tuah ka duh lomi tu kha ka tuah hna. ¹⁶ Tuah ka duh lomi ka tuah tikah hin, cu nih cun Nawlbia cu ahmaan ko ka ti ve, ti kha ka langhter. ¹⁷ Cucaah cu thil a tuahtu ngaingai cu keimah kha si loin ka chung i a ummi sualnak tu kha a si. ¹⁸ Ka chungah hin — ka minung sining ah hin — ṭhatnak a um lo ti kha ka hngalh. Zeicahtiah ṭhatnak tuah duhnak kha ka chungah um hmanh seh law ṭhatnak cu ka tuah kho lo. ¹⁹ Tuah ka duhmi ṭhatnak kha tuah loin tuah ka duh lomi ṭhat lonak tu kha ka tuah tawn. ²⁰ Tuah ka duh lomi kha ka tuah ahcun, cu nih cun cu thil a tuahtu cu keimah kha si loin ka chung i a ummi sualnak tu kha a si, ti kha a langhter. ²¹ Cucaah thil umtuning cu hitihin a si ti kha ka hngah: a ṭhami thil tuah ka duh tikah khan ṭhat lonak kha ka pawngte ah a rak um ko. ²² Ka chunglei mi cu Pathian phung ah khan aa lawm; ²³ sihmanhsehlaw ka chung i phung dang a rak um ve kha ka hngalh — cu phung cu ka lung nih a ṭha a timi phung a rak dohtu kha a si. Cu phung nih cun, ka pum chung i rian a ṭuanmi sualnak phung sal ah khan a ka ser. ²⁴ Mi lungrethei ka va si dah! Thihnak i a ka kalpitu pum chung hin aho nih dah a ka khamh lai? Pathian lawnglawng nih kan Bawipa Jesuh Khrih thawngin a ka khamh lai; ²⁵ Pathian cu lawm ko u sih. Cucaah ka sining cu hihi a si ko: keimah lawngin ti ahcun, ka lung lawng in Pathian nawl cu ka zulh khawh, ka minung sining tu cu sualnak phung kha a zul ko.

¹ Atu cu Khrih Jesuh he i pehtlai in a nungmi hna caah cun sualphawtnak a um ti lo. ² Zeicahtiah Khrih Jesuh he aa pehtlaimi nunnak a kan petu Thlarau phung nih cun sualnak le thihnak phung chung khan a ka luatter cang. ³ Minung kan sining kha a der ruang i Nawlbia nih a tuah khawh lomi kha Pathian nih a tuah. Minung kan sining chung i a ummi sualnak cu Pathian nih a Fapa a run thlahnak thawng khan sual a phawt cang. Sualnak teinak ding caah cun minung kan sining a sualmi bantuk sining he hin a ra. ⁴ Pathian nih hihi zeicahdah a tuah ti ahcun, minung kan sining zulh in si loin Thlarau hruainak zulh in a nungmi kan nunning ah hin Nawlbia cu; tuah u, tiah a timi vialte ah khan a lungawih a si nakhnga caah a si. ⁵ An minung sining nih tuah u a ti hna ning paoh in a nungmi cu minung sining nih a duhmi nih khan an lungthin cu a uk hna. Thlarau nih a chimh hna ningin a nungmi cu Thlarau nih a duhmi nih khan an lungthin cu a uk hna. ⁶ Nan lungthin cu minung sining nih a uk ahcun a phichuak cu thihnak a si; nan lungthin cu Thlarau nih a uk ahcun a phichuak cu nunnak le daihnak a si. ⁷ Cucaah minung cu a lungthin kha minung sining nih a uk ahcun Pathian ral a si; zeicahtiah Pathian nawl kha a zul lo, a ngaingai ti ahcun a zulh in a zul kho lo. ⁸ An minung sining duhnak a zulmi nih cun Pathian kha an lawmhter kho lo. ⁹ Sihmanhsehlaw nannih cu cuticun nan nung lo; Thlarau hruaining tu in nan nung deuh — Pathian Thlarau a ngei lomi cu Khrih ta an si lo. ¹⁰ Sihmanhsehlaw Khrih cu nan chung i a nun ahcun sualnak ruangah nan pum cu thi hmanh hna seh law nannih cu Pathian he nan i rem cang caah Thlarau cu nan caah nunnak a si. ¹¹ Jesuh kha thihnak in a thotu Pathian Thlarau cu nan chungah a um ahcun, Khrih cu thihnak in a thawhtertu Pathian nih khan a Thlarau cu nan chungah a umter caah nannih zong thih hmangmi nan pum kha nunnak an pekpiak ve hna lai. ¹² Cucaah ka u le ka nau hna, kan mihring sining in kan nun awk a si lo. ¹³ Nan mihring sining in nan nun ahcun nan thi ko lai; sihmanhsehlaw sualnak nan tuahmi kha Thlarau in nan thah ahcun nan nung lai. ¹⁴ Pathian Thlarau nih a hruaimi hna cu Pathian fale an si. ¹⁵ Pathian nih an pekmi hna Thlarau cu sal i an canter ṭhantu hna ding thlarau a si lo, ther lengmang le phang lengmang i nan rak nunning ah an kalpi ṭhantu hna ding zong a si fawn lo. Pathian fa ah a kan sertu ding tu kha a si i amah nih cun Pathian kha, "Ka Pa, ka Pa," tiah a kan auhter khawh. ¹⁶ Cu ti kan aunak ah cun Pathian Thlarau le kan thlarau cu hmunkhat ah an i fon i Pathian fa kan si kha tehte an khan; fa kan si ahcun rocotu zong kan si colh. ¹⁷ Kannih cu Pathian rocotu kan si, Khrih roco-hawi kan si; zeicahtiah Khrih temhinnak kha kan i hrawm ahcun a sunparnak zong kan i hrawm ve lai. ¹⁸ Atu caan i kan inmi temhinnak hi cu hmailei i kan sin i phuan a si te laimi sunparnak he cun tahchunh awk tlak ah ka rel lo. ¹⁹ Pathian nih a fale a phuan hna lai cu sermi thil vialte nih ngangngan ngaiin an hngak ko. ²⁰ Sermi thil vialte cu anmah duh caah si loin Pathian nih si u a ti hna thawngin santlailo pakpalawng ah an cang dih, a si nain ruahchannak cu a um zungzal ve ko. ²¹ Cu ruahchannak cu zeidah a si tiah, ni khatkhat cu sermi thil vialte hi thutnak sal sinak khan luatter an si lai i Pathian fale hna luatnak a sunglawimi kha an i hrawm te lai. ²² Atu caan tiangah hin cun sermi thil vialte cu nau nganfah bantukin an hrum an ai. ²³ Cu ti a hrum a aimi cu sermi thil lawng an si lo, Thlarau cu Pathian laksawng hmasater caah a hmumi kanmah zong hi, Pathian nih a fa ah ser i kan pum hi a ning piin luatter ding kan hngah lioah hin kan hrum kan ai ve ko. ²⁴ Zeicahtiah ruahchannak in pei khamh kan si cu; sihmanhsehlaw kan i ruahchanmi cu kan mit in kan hmuh ahcun, cucu ruahchannak taktak cu a si hnga lo. Mit in hmuh komi cu aho nih dah an i ruahchan bal? ²⁵ Sihmanhsehlaw kan mit in kan hmuh lomi kha kan i ruahchan ahcun, cucu lungsau in kan hngah a langhnak a si. ²⁶ Cu bantuk ṭhiamṭhiam cun, a der ngaingaimi kan si caah, Thlarau zong cu kanmah bawmh awkah khan a ra. Zeiti hin dah thla kan cam awk a si ti hmanh kan hngalh lo caah bia in chim khawh lomi hram-ainak in Thlarau nih Pathian cu a kan nawlpiak. ²⁷ Thlarau nih cun Pathian cu a mi hna aiawh le amah Pathian duhning khan a nawl caah, minung lungchung a hmutu Pathian nih cun Thlarau ruahnak cu zeidah a si ti kha a hngalh. ²⁸ Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh. ²⁹ Pathian nih a thim ciami hna cu a Fapa bantuk kha an si naklai, a dang tein a thleidan hna, cucu unau rual tampi lakah a Fapa cu an upa bik a si nakhnga caah a si. ³⁰ Cucaah a thleidanmi hna cu Pathian nih a kawh hna i a kawhmi hna cu Amah he khan a remter hna; cun amah he a remtermi hna cu a sunparnak zong kha a hrawmh hna. ³¹ Hi vialte hi kan lung chungah i chiah in zeitindah kan ti lai? Pathian cu kanmah lei i a ṭan ahcun aho nih dah an kan doh khawh lai? ³² A Fapa hrimhrim hmanh kha a zuah ṭung lo, kan dihlak caah pei a pek kha! A Fapa kha a kan pek — thil vialte zong hi a lak in a kan pe hnga lo maw? ³³ Pathian thimmi cu aho nih dah sual an puh khawh hna lai? Amah Pathian hrimhrim nih pei, nan sual lo, tiah a ti hna cu. ³⁴ Cucaah annih cu aho tal nih sual an phaw kho hna lai maw? Khrih hmanh nih sual a phaw hna hnga lo; zeicahtiah an ca i a thimi kha Khrih Jesuh kha pei a si cu, cu nak hmanh cun, thihnak in thawhter a si i Pathian orhlei kamah a um i kan ca i a kan nawlpiaktu cu amah cu pei a si cu. ³⁵ Cucaah aho nih dah Khrih dawtnak he cun a kan ṭhen khawh lai? Harnak nih maw, temhinnak nih maw, hremnak nih maw, rawlṭamnak nih maw, pamnak nih maw thil ṭihnung nih maw, thihnak nih maw, zeital nih an kan ṭhen kho hnga maw? ³⁶ Cathiang nih, "Nangmah ruangah chun nitlak thah hrulh lengmang in kan um; thah awk i kalpimi tuu bantukin an kan tuah," ³⁷ Zeihmanh nih an kan ṭhen kho lai lo, hi thil vialte hna chung hin a kan dawtu thawngin kannih cu teitu hna nakin teitu kan si deuh. ³⁸ Zeicahtiah a kan dawtnak he cun zeihmanh nih a kan ṭhen kho lo ti kha fiang tein ka hngalh: thihnak nih siseh, nunnak nih siseh, vancung i a ummi vanmi nih si hna seh, uktu le ṭhawnnak nih si hna seh, atu caan nih siseh, hmailei caan nih siseh, ³⁹ cunglei vawlei nih siseh, tanglei vawlei nih hin siseh, an kan ṭhen kho lai lo — kan Bawipa Khrih Jesuh thawngin kan ta a simi Pathian dawtnak he a kan ṭhen khotu ding cu sermi thil dihlak ah hin zeihmanh a um lo.

¹ Ka chimmi hi ahmaanmi bia a si: Khrih ta ka si i ka lih ka chim lo. Thiang Thlarau nih a ukmi ka chiaṭha thleidannak zong nih lih ka chim lo kha a hngalh. ² Ka miphun, ka thi le ka sa a simi hna caah ka ngaih a chia hringhran ko i ka lung chung fahnak cu a dong lo. ³ Anmah ca i a ṭha ding a si ahcun keimah hi Pathian chiatserhnak in i Khrih he i ṭhen hmanh kha ka duh deuh. ⁴ Annih cu Pathian thimmi an si: a fa ah a ser hna i sunparnak kha a hrawmh hna. Anmah sinah a biakamnak kha a tuah hna i Nawlbia kha a pek hna, biaknak taktak cu anmah nih khan an ngeih, Pathian biakamnak kha an hmuh, ⁵ Hebru mi a kan hringsortu hna tefa kha an si, cun Khrih zong kha minung lei cun anmah phun a si. Zeizong vialte a uktu Pathian cu zungzal in thangṭhat si ko seh! Amen. ⁶ Israel mi kha an dihlak in Pathian thimmi an si dih lem lo caah Pathian biakamnak cu pakpalawng ah a cang ka ti duhnak a si lo. Zeicahtiah Israel mi vialte kha Israel tefa an si lem lo, ⁷ Abraham fale hna zong an dihlak in Abraham tefa an si dih lem lo. Pathian nih Abraham cu a thawh i, "Isak tefa hna cu nangmah tefa ah rel an si lai," a ti. ⁸ Cu a sullam cu, minung sining phung sawhsawh in hrinmi cu Pathian fa an si lem lo, Pathian biakamning in hrinmi lawng tefa taktak i ruahmi cu an si, tinak a si. ⁹ Zeicahtiah Pathian biakam cu hitihin, "A caan a cut tikah ka ra kir ṭhan lai i Sarah nih fapa a hrin lai," ti kha a si. ¹⁰ Cun cu lawng cu a si lo. Rebekka fapa pahnih hna zong nih khan pa pakhat lawng an ngei ko; a hringtu hna Isak kha an pa cu a si ko. ¹¹ - ¹² Sihmanhsehlaw pakhat u a thim kha Pathian tinhning lawnglawng in a si nakhnga caah Pathian nih Rebekka cu, "A u nih a nau kha a rianh lai," tiah a chimh. Hi bia a chim hi an chuah hlanah a si, a ṭha siseh, a ṭhalo siseh, zeihmanh an tuah hlan ah a si; cucaah Pathian nih pakhat a thim cu anmah an tuahmi ruangah khan a si lo, amah nih a kawh ruang tu ah khan a si ko. ¹³ Cathiang nih, "Jakob cu ka dawt i Esau cu ka huat," a ti bang khan a si. ¹⁴ A si ahcun Pathian cu a ding lo kan ti kho lai maw? Ti kho hlah. ¹⁵ Zeicahtiah Moses sinah pei, "Zaangfah ka duhmi cu ka zaangfah ko hna lai i zawnruah ka duhmi cu ka zawnruah ko hna lai," a ti kha. ¹⁶ Cucaah mi nih an duhmi thawng le an tuahmi thawngin si loin Pathian zaangfahnak thawng lawngin a si ko. ¹⁷ Cathiang nih Faro kong ah a thawh i, " ’Ka ṭhawnnak langhnak caah le ka min cu vawlei cung dihlak i thanternak caah, hi ca hrimhrim ah hin, nangmah cu siangpahrang ah kan ser,’ tiah Pathian nih a ti," tiah a ti. ¹⁸ Cucaah Pathian nih cun zaangfah a duhmi kha a zaangfah ko hna i an lung ṭhawnter a duhmi kha an lung cu a ṭhawnter ko hna. ¹⁹ Nan lak i pakhatkhat nih nan ka thawh lai i, "Hi bantukin thil a si kun ahcun, zeitindah Pathian nih minung cu sual a phawt khawh kun? Pathian duhnak cu aho nih dah a donh khawh?" nan ti lai. ²⁰ Sihmanhsehlaw ka kawi, nangmah cu Pathian bia a let lakmaktu dingah ahodah na si? Tlak um nih a sertu cu, "Zeicahdah hi bantuk hin na rak ka ser," tiah a hal lo. ²¹ A ngaingai ti ahcun um a sertu nih khan tlak cu a duhduh in hmannak nawl a ngei ko, tlak hlum hlum khat chung khan um pahnih a ser khawh ko hna, pakhat cu sawhsawh men i hman lo dingah a ser i pakhat cu sawhsawh men i hman awkah a ser ko. ²² Cu bantuk ṭhiamṭhiam in Pathian tuahmi zong cu a si ko. A thinhunnak le a ṭhawnnak kha langhter a duh. Sihmanhsehlaw a thin a huntertu hna, hrawh awk a simi hna cungah khan lungsaunak a ngei. ²³ Cun a sunglawimi a sunparnak zong kha langhter a duh i a kan zaangfahmi kannih cungah khan cu a sunparnak cu a kan toih, kannih cu a sunparnak hmu dingin a kan timhmi cu kan si. ²⁴ - ²⁵ Cucu Hosea cauk chung i rak chimmi kha a si. Zeitindah a ti tiah: "Ka mi a rak si lomi kha, ’Ka mi,’ ka ti hna lai. Ka rak dawt lomi miphun kha, ’Ka dawtmi,’ ka ti hna lai. ²⁶ ’Nannih cu ka mi nan si lo,’ tiah an rak tinak hna hmun thengte ah khan Annih cu a nungmi Pathian fa, ti an si lai." ²⁷ Cun Isaiah nih Israel kong ah, "Israel mi cu rili kam thetse zat in tam hmanh hna seh law tlawmte lawnglawng khamh an si lai, ²⁸ zeicahtiah Bawipa nih vawlei cu a dihlak in bia a ceih lai," a rak ti. ²⁹ Isaiah ṭhiamṭhiam nih, "Bawipa, a Lianngan Bik Pathian nih tefa tlawmpal kan nganh hlah seh law cu, Sodom bantuk kan si diam cang hnga i Gomorrah bantukin kan um diam cang hnga," a rak ti bantuk khan a si. ³⁰ A si ahcun zeitindah kan chim kun lai? Hitihin kan ti lai: Pathian he rem a rak i zuam lomi Jentail mi kha an zumhnak thawngin Pathian he an i rem cang; ³¹ sihmanhsehlaw thimmi miphun, Pathian he remnak ding caah phung a kawlmi hna nih khan cucu an hmu lo. ³² Zeicahdah an hmuh lo? Zumhnak kha i bochan loin tuahnak tu kha an i bochan caah a si. Cucaah "rilhnak lung" ah khan a ril i ³³ Cathiang nih, "Zohhmanh, Zion ah mi a tluktertu ding lung pakhat ka chiah, Cu lung nih cun a rilhter hna lai. Sihmanhsehlaw amah a zummi cu ningzahnak an phan lai lo," tiah a rak chimmi bang khan a si.

¹ Ka u le ka nau hna, ka phun hawi mi hi khamh si hna seh ti cu ka lungthin dihlak in ka duh hringhran ko. An caah Pathian sinah thla ka cam lengmang. ² Pathian a ṭanh ngaingaimi an si cu tehte ka khan khawh, sihmanhsehlaw cu an ṭanhning cu palh ṭanh a rak si. ³ Pathian nih zei lam in dah minung cu Amah he a remter hna ti kha an hngal lo i anmah tu nih khan cu lam cu an i ser; cucaah Pathian nih minung cu Amah he a remter hnanak lam kha an cohlang duh lo. ⁴ Zeicahtiah Khrih nih Nawlbia cu a donghnak a phakter cang i cucaah a zummi paoh nih cun Pathian he remnak kha an hmuh. ⁵ Moses nih Nawlbia zulhnak thawngin Pathian he remnak hmuhnak kong ah a chimmi cu hitihin a si: "Nawlbia nih tuah u a timi a tuahmi paoh cu, cu an tuahnak thawng cun an nung lai," a ti. ⁶ Asinain zumhnak thawngin Pathian he i remnak kong ah cun hitihin ti a si: "Nangmah le nangmah cu, Ahodah vancung ah khin a hung kai lai?" i ti hlah (cu a sullam cu Khrih kha run ṭumpi awkah ti a si). ⁷ Cun, "Ahodah mithi khua ah a vung ṭum lai," ti zongah i ti fawn hlah (cu sullam cu Khrih kha mithi hna sinin hun kaipi awkah ti a si). ⁸ Zumhnak thawngin Pathian he i remnak kong ah chimmi cu hiti tu hin a si. "Pathian bia cu nan pawngte ah a um ko, nan lei cung le nan lung chungah a um ko," — hi bia hi zumhnak bia a si kan timi bia cu a si. ⁹ Nan kaa in, "Jesuh cu Bawipa a si," tiah nan ti i "amah cu Pathian nih mithi hna sinin a thawhter" tiah nan lung in nan zumh ahcun, khamh nan si lai. ¹⁰ Zeicahtiah kan lung in kan zumh i Pathian he i remnak kan hmuh; kan kaa in kan chim i khamh kan si. ¹¹ Cathiang nih, "Amah a zummi paoh cu ningzahnak an ing lai lo," tiah a ti. ¹² A zummi paoh, a ti, zeicahtiah Judah mi le Jentail mi tiin i thleidannak zeihmanh a um lo; Pathian cu kan dihlak Bawipa a si i amah a zummi paoh cu thluachuahnak tampi in a pek ko hna. ¹³ Cathiang nih, "Bawipa min a aumi paoh cu khamh an si lai," a ti bangin a si taktak ko. ¹⁴ Asinain, an zumh lo ahcun zeitindah a min cu an auh khawh lai? Cun bia kha an theih lo ahcun zeitindah an zumh khawh lai? Cun bia cu chimh an si lo ahcun zeitindah an theih khawh lai? ¹⁵ Cun lamkaltu kha an thlah hna lo ahcun zeitindah bia cu thanh a si khawh lai? Cathiang nih, "Thawngṭha a chimtu hna ke cu a vaa dawh dah," a ti bantuk khan a si taktak. ¹⁶ Sihmanhsehlaw annih nih an dihlak cun Thawngṭha cu an pom lo. Isaiah hrimhrim nih khan, "Bawipa, ahodah kan bia cu a zum?" a rak ti. ¹⁷ Cucaah zumhnak cu bia theihnak thawng khan a um i bia cu Khrih kong chimnak thawng khan a um. ¹⁸ Sihmanhsehlaw biahalnak tuah ka duhmi cu: Bia cu an thei bal taktak lo maw, ti hi a si. A theih cu an theih ko — Cathiang nih a chim bantuk tu khan a si i a si ko. Zeitindah a chim tiah: "An aw thawng cu vawleicung khuazakip ah a thang dih; An bia cu vanhramdeng tiang a phan," a ti. ¹⁹ Biahalnak tuah ka duh rihmi cu: Israel mi nih an hngal lo maw, ti hi a si. A let hmasa biktu ding cu Moses kha a si. Zeitindah a chim tiah: "Nannih cu miphun taktak a tling lomi kha kaan nahchuahter hna lai; Nannih cu mihrut miphun cungah khan nan thin kan hunter hna lai," a ti. ²⁰ Cun Isaiah nih ralṭha deuh vak in: "A ka kawl lomi nih khan an ka hmuh, A ka hlam lomi sinah khan ka lang," a ti fawn. ²¹ Sihmanhsehlaw Israel kong ah cun, "Nawl ngai lomi le ral ser hmangmi kha, chunnitlak in ka za ka chanh hna," a ti.

¹ A si kun ahcun, Pathian nih a mi cu a hlawt hna a si maw? Si hrimhrim hlah. Keimah zong hi Israel mi, Abraham tefa, Benjamin phun chungmi ka si. ² Pathian nih cun a hramthawk tein a rak thimmi a mi cu a hlaw hna lo. Cathiang chungah a ummi, Israel kong ah Elijah nih Pathian sinah, ³ "Bawipa, na profet kha an thah hna i na biakṭheng kha an hrawh hna; keimah lawnglawng hi ka tang i cu hmanh cu thah an ka zalh," tiah a timi kha nan hngalh a si lo mei? ⁴ Pathian nih zeitindah a leh kha? "Keimah caah mi thong sarih, Pathian deu Baal a bia lomi kaa chiah ko hna," tiah a ti a si lo mei? ⁵ Cu bantuk ṭhiamṭhiam cun atu zongah hin a si: Pathian nih a zaangfah hna ruang i a thimmi tlawmte cu an um ve ko. ⁶ A thim hna cu a zaangfah hna ruangah a si ko, anmah tuahmi ruangah a si lo. Zeicahtiah Pathian nih a thimmi hna cu anmah tuahmi ruangah a si ahcun a zaangfahnak cu zaangfahnak taktak a tling lomi pei a si hnga cu. ⁷ Cun tah zeitin? Israel mi nih an kawlmi kha an hmu lo, sihmanhsehlaw Pathian thimmi mi tlawmte tu nih khan an hmuh; a dang nih khan cun Pathian auhnak kha an hna an i cheh i ⁸ Cathiang nih, "Pathian nih an lung a pinter hna; nihin ni tiang hrimhrim hin an mit in an hmu kho lo i an hna in an thei kho lo," a ti bang khan a si taktak. ⁹ Cun David zong nih: "An puai ah rap ah i foih hna seh law tlu hna seh law dantatnak ing hna seh. ¹⁰ Khua an hmuh khawh nakhnga lo an mit cu caw seh law Harnak an inmi thilrit tangah kun thluangthluan ko hna seh," a ti fawn. ¹¹ Judah mi cu an rilh tikah an rawk taktak maw? Rawk taktak hlah. An sual caah cun pei khamhnak cu Jentail mi sin a phak cu, Judah mi nahchuahter awkah cun. ¹² Judah mi sualnak nih hin vawlei cungah thluachuahnak tampi a tlunter i thlarau lei in mipam an sinak nih Jentail mi cu thluachuahnak tampi a phorh hna ahcun Judah mi cu tling tein an i tel ve tikah cun thluachuahnak cu zeitluk in dik a ngan chinchin lai! ¹³ Atu cu nannih Jentail mi kha kan chimh hna: Jentail mi sin lamkaltu ka si chung paoh cu ka rian cu kaa chor ko lai. ¹⁴ Ka phun hawimi kha an nahchuahter kaa zuam i cuticun tlawmpal tal ka khamh kho phum hna hnga maw ka ti. ¹⁵ Zeicahtiah annih cu hlawt an si hmanh ah pei vawlei cu Pathian hawikom i ser a si cu. Cucaah cun annih cu cohlan an si tikah cun zeidah a si chinchin lai? Mithi hna caah nunnak a si lai. ¹⁶ Changreu hlum chung i a dar hmasa bik cu Pathian sinah pek a si ahcun, changreu cu a hlum ningin amah ta a si; cun thingkung a hram hna cu Pathian sinah pek an si ahcun a nge zong amah ta an si. ¹⁷ Cinmi oliv kung a nge cheukhat cu tan an si i ramlak oliv kung a nge kha cinmi kung ah cun peh a si. Cu bantuk cu nannih Jentail mi hi nan si; atu cu oliv kung a hrampi kha nan i hrawm ve cang. ¹⁸ Cucaah khiahmi nge bantuk a simi kha porhlawthnawh hna hlah u. Zeitindah nan lung a puam ngam? A nge pei nan si ko cu; a hram cu nanmah nih nan cawm ṭung lo, a hram nih pei an cawm hna cu. ¹⁹ Sihmanhsehlaw nan i thawh hnga i, "Kanmah umnak serpiak awkah pei a nge cu khiah an si fom cu," nan ti hnga. ²⁰ Cucu ahmaan ko. Annih cu an zumh lo ruangah khiah an si, nannih cu nan zumh ruangah nan umnak hmun ah nan um. Sihmanhsehlaw cu kong ah nan lung puam sual hlah u; a ṭih in ṭih lehlam u. ²¹ Thingkung nge taktak bantuk a simi Judah mi cu Pathian nih a zuah hna lo ahcun nannih tah a kan zuah hlei hnga tiah nan i ruat maw? ²² Hika ah hin zeitluk in dah Pathian nih mi a zaangfah hna ti le zeitluk in dah Pathian cu ṭih a nun ti kha kan hmuh. A tlumi hna caah cun ṭih a nung ngaingai ko, sihmanhsehlaw nannih cungah cun zaangfahnak a ngei — a zaangfahnak chung i nan um paoh ahcun an zaangfah ko hna lai, sihmanhsehlaw nan um lo ahcun nannih zong khiah nan si ve ko lai. ²³ Cun Judah mi hna cu, an zumh lonak kha an chuahtak ahcun hmasa i an rak umnak hmun ah khan a chiah ṭhan ko hna lai, zeicahtiah Pathian nih cun a chiah ṭhan khawh ko hna. ²⁴ Nannih Jentail mi cu ramlak oliv kung, a nge khiah i cu nge cu a phung a si lo nain cinmi oliv kung i pehmi bantuk cu nan si ahcun a kungpi nge taktak a rak simi peh ṭhan kha cu Pathian caah a fawi deuh ngaingai lai. ²⁵ Ka u le ka nau hna, biathli pakhat nan hngalh awk i ka duhmi a um. Cu nih cun ka fim tiah i ruat loin an umter hna lai. Cu biathli cu hihi a si: Israel mi lung khohkhal i an um hi zungzal ca in a si lo, Jentail mi an dihlak in Pathian sin i an rat caan tiang ca lawng a si lai. ²⁶ Cun Israel mi vialte khamh an si lai cu hitihin a si lai: Cathiang nih, "Zion in Khamhtu cu a ra lai i Jakob tefa hna chungin ṭhat lonak vialte kha a hloh lai. ²⁷ An sualnak kha ka lakpiak hna tikah Hi biakamnak hi anmah he ka tuah lai," tiah a ti bang khan a si lai. ²⁸ Thawngṭha kong in ti ahcun, annih cu Pathian ral an si; Thawngṭha an cohlan duh lo caah — cucu nanmah Jentail mi ṭhatnak caah a si. Sihmanhsehlaw thimnak lei in ti ahcun annih cu an pupa hna ruangah khan Pathian hawikom an si, ²⁹ zeicahtiah Pathian nih cun a auhnak hna le laksawng a pekmi hna kongah a lung a let ṭhan bal lo. ³⁰ Nannih Jentail mi nih a hlanah cun Pathian kha a nawl nan rak zul lo; sihmanhsehlaw atu ah cun Judah mi nih khan a nawl kha an zulh lo caah nannih nih a zaangfahnak kha nan hmuh. ³¹ Cu bantuk ṭhiamṭhiam in nannih nih nan hmuhmi a zaangfahnak kha annih zong nih an hmuh ve nakhnga atu ahcun a nawl kha zul loin an um. ³² Pathian nih mi vialte kha nawlngaih lonak chung thongtla i a ser hna cu an dihlak in zaangfah a duh hna caah a si. ³³ Pathian hi a va rum hringhran dah! A fimnak le a hngalhnak hi an va thuk hringhran dah! Biakhiahnak a tuahmi hi aho nih dah a sullam an purh khawh lai? A thil tining hi aho nih dah an hngalh khawh lai? ³⁴ Cathiang nih, "Bawipa cu aho nih dah a lungthin an hngalh? Aho nih khin dah ruahnak an cheuh khawh? ³⁵ Cham ṭhan dingin aho nih dah zeital an pek bal?" tiah a ti bang khan a si. ³⁶ Zeicahtiah zeizong vialte hi amah nih a sermi an si i zeizong vialte hi amah thawngin a ummi an si, amah caah an si dih. Pathian cungah sunparnak cu zungzal in um ko seh! Amen.

¹ Cucaah ka u le ka nau hna, Pathian nih a kan zaangfahnak a nganmi ruangah hin, Pathian sinah a nung in pekchanhmi raithawinak bantukin i pe tuah u; a rian ah aa pumpemi le cohlan awk tlakmi si tuah u; cucu biaknak taktak Pathian nan pek awk biaknak cu a si. ² Hi vawlei kalning hin kal ve lengmang ti hlah u, sihmanhsehlaw chunglei in Pathian nih nan lungthin kha a dihumnak in in thleng hna seh. Cu tikah a ṭhami thil le Pathian nih a lawmhmi thil le a tlingmi thil kha nan hngalh khawh lai, cucu Pathian duhmi an si. ³ Pathian nih vel a ka ngeih caah a ka pekmi laksawng ka hmuhmi thawngin hi bia hi nan dihlak sinah ka chim: Nanmah le nanmah kha a sang tuk ah i ruat hlah u. Nan siningte tu kha i hngal u law Pathian nih zumhnak an pekmi hna ning cio ah nanmah le nanmah nan i ruah cio ning cu si seh. ⁴ Kan pum cungah hin nge tampi kan ngei i hi nge vialte hi rian dangdang an ngei cio. ⁵ Cu bantuk cun, kannih zong hi mi tampi kan si nain Khrih he kan i pehtlaihnak thawngin pum khat kan si i pum nge dangdang cu pakhat le pakhat an i pehtlaih dih bantukin kannih zong pakhat le pakhat kan i pehtlai dih ve. ⁶ Cucaah laksawng phun dangdang kan hmuh ciomi cu Pathian nih a kan pekmi vel kan hmuh ning cio ah hmang hna u sih. Laksawng kan hmuhmi cu Pathian bia chim thiamnak a si ahcun, zumhnak kan ngeihmi ning khan kan hman awk a si; ⁷ midang ca rianṭuan kha a si ahcun, cuticun kan ṭuan awk a si; cawnpiak kha a si ahcun kan cawnpiak hna awk a si; ⁸ midang thazang pek kha a si ahcun kan pek hna awk a si, kan ngeihmi thil midang hrawm ve kha a si ahcun siang tein kan hrawm hna awk a si, nawl ngeihnak kha kan laksawng hmuhmi a si ahcun, fak piin rian kan ṭuan awk a si; midang zaangfah kha a si ahcun lunglawm tein kan zaangfah hna awk a si. ⁹ Kan i dawtnak hi lungthin taktak in si awk a si. Thil ṭhalo kha hua hna u law thil ṭha kha i tlaih peng hna u. ¹⁰ Pakhat le pakhat kha Khrih ah u le nau bantukin i daw cikcek u law pakhat le pakhat kha i hmaizah u. ¹¹ Fak piin rian ṭuan u, nan thathu hlah u. Bawipa cu nan lungthin taktak tein a rian ṭuan u. ¹² Nan i ruahchanmi thawng khan nan tha nuam ko u; harnak nan in tikah lungsau thinfual in um u law thla cam zungzal u. ¹³ Nan u nan nau a si a fakmi kha nan thil hrawm hna u law khual kha tluninn onh hna u. ¹⁴ Nanmah an hremtu hna kha Pathian sinah thluachuah halpiak hna u; asi, thluachuahnak kha halpiak hna u, chiatserhnak si loin. ¹⁵ Aa lawmmi sinah vaa lawm ve u, a ṭapmi sinah va ṭap ve u. ¹⁶ Pakhat le pakhat nan zawn i ruat dih u. Lungpuam in um hlah u, rian hme tete ṭuan duhnak lungthin kha ngei u. Ka fim tiah vaa ruat hlah u. ¹⁷ Mi nih nan cungah ṭhat lonak an tuah ahcun ṭhat lonak in va lehrul hna hlah u. Mi vialte nih a ṭha tiah an ruahmi kha tuah i zuam u. ¹⁸ Mi vialte he i rem awk kha nan i zuam khawh chungin i zuam u. ¹⁹ Phuhlam hmang hlah u, ka naule hna; Pathian thinhunnak tu nih khan cucu tuah deuh ko seh. Zeicahtiah Cathiang nih pei, "Phuhlam cu keimah rian a si, keimah nih ka lehrulh hna lai, tiah Bawipa nih a ti," a ti kha. ²⁰ Cucaah Cathiang nih, "Na ral cu a rawl a ṭam ahcun rawl va pe, A ti a hal ahcun ti va pe, Cu ti na tuahnak nih cun a lu cungah meiṭil na chonh a si lai," a ti bang khan va tuah u. ²¹ Ṭhat lonak kha i teiter hlah u, ṭhatnak tu in ṭhat lonak kha tei i zuam u.

¹ Ram uktu bawi kha an nawl va ngai hna u, zeicahtiah Pa-thian hnatlaknak tel loin nawl ngeitu ahohmanh an um lo i nawl ngei liomi hna hi Pathian nih a chiahmi hna an si. ² Nawl a ngei liomi hna a dohtu cu Pathian nih si seh tiah a timi a dotu an si i cu bantukin a tuahmi nih cun an cungah biaceihnak an i tlunter lai. ³ Uktu bawi hi ṭhatnak a tuahmi nih cun ṭih awk an si lo i ṭhat lonak a tuahmi lawng nih ṭih awk an si. Nawl ngeitu ṭih loin um na duh ahcun, ṭhatnak tuah law an thangṭhat ko lai. ⁴ Zeicahtiah amah cu Pathian sal, na ca ṭhatnak a tuahtu a si. Sihmanhsehlaw ṭhat lonak na tuah ahcun amah cu ṭih ko, zeicahtiah dantat khawhnak a ngeihmi cu a si taktakmi a si. Amah cu Pathian sal a si i ṭhat lonak a tuahtu cungah khan Pathian thinhunnak cu a phakter. ⁵ Hi caah hin nawl ngeimi cu an nawl va ngai hna u — Pathian thinhunnak ruang lawngah khan si loin nan chiaṭha thleidannak ruang zongah khan an nawl cu va ngai hna u. ⁶ Ngunkhuai nan thawhnak cu hi ruang zongah hin a si: nawl ngeitu hna nih khan an rian an ṭuan tikah Pathian ca rian an ṭuan a si. ⁷ Cucaah nan pek awk a simi kha va pe hna u, nan pumpak ngunkhuai siseh, nan thilri ngunkhuai siseh, pe hna u; hmaizah awk cu hmaizah hna u, upat awk cu upat hna u. ⁸ Ahohmanh lei i ba hlah u — nan i batmi cu pakhat le pakhat i dawt lawng kha si ko seh. A minung hawi a dawmi paoh nih cun Nawlbia kha a zulh a si ko. ⁹ Nawlbia nih cun, "Va cungin pa i duh hlah, lai nawng hlah, fir hlah, mi thil na mit va thi hlah," a ti. Hi vialte le hi hlei i a dang a um rihmi nawlbia hna cu, "Na innpa kha nangmah naa dawt bangin va daw," timi nawlbia ah hin an i fun dih. ¹⁰ A innpa a dawmi nih cun a innpa cungah ṭhat lonak a tuah bal lo. Cucaah Nawlbia tling tein zulh cu dawt hi a si ko. ¹¹ Atu caan hi zei caan dah a si cang ti kha nan hngalh caah hihi nan tuah awk a si. Atu cu nan i hlauh awk caan a si cang, zeicahtiah khamh kan si lai caan cu kan rak zumh ka nakkhan atu ah cun kan naih deuh cang. ¹² Zan cu a dih dengmang cang, khua a ceu dengmang cang. Muihnak thil a simi tuah kha ngol cang u si law ceunak chung i raldoh awkah hriamnam kha i lak u sih. ¹³ Chun ceu i a ummi bantukin nuncan dawh in nung u sih, aukhuang cercur in um hlah u sih, rihai in um hlah u sih, nu le pa sualnak tuah hlah u sih, zah hngal loin um hlah u sih, i si hlah u sih, i nahchuah hlah u sih. ¹⁴ Bawi Jesuh ziaza tu kha i lak u law pumsa duhnak tuah kha ngol u.

¹ Zumhnak lei i thazang a dermi kha nan bu chungah rak cohlang ko hna u, an pumpak ruahnak kha rak al len hna hlah u. ² Mipa pakhat cu a zumhnak nih zei ei paoh a onh ko, sihmanhsehlaw zumhnak a dermi nih cun anhringso lawng kha a ei. ³ Zeipaoh a eimi nih khan cu bantukin a ei ve lomi kha a zawmhtaih awk a si lo, cun zeipaoh a eimi kha anhringso lawng a eimi nih a soi awk a si ve lo, zeicahtiah Pathian nih cun a cohlan veve ko hna cu ta. ⁴ Midang sal biaceihtu dingah nangmah cu ahodah na si? A tuah khawh le khawh lo cu a Bawipa nih pei a khiah ko lai cu. Cun a tuah zong a tuah khawh ko lai, zeicahtiah Bawipa nih cun tlamtling lakin a tuahter khawh ko. ⁵ Mi pakhat nih, ni pakhat cu ni dang nakin a biapi deuh tiah a ruah, cun a dang pakhat nih, ni cu an i khat cio ko, tiah a ruah ve. Anmah le an ruahning cio kha fiang tein an ruah awk a si ko. ⁶ Ni pakhat cu sung khun in a ruatmi nih khan cu ti i a ruah cu Bawipa upatnak in a ruah caah a si; zeipaoh a eimi nih khan cu ti i a ei cu Bawipa upatnak in a si ve ko, zeicahtiah a eimi rawl caah khan Pathian pei a lawmh cu. ⁷ Ahohmanh mah ca lawngah kan nung lo, ahohmanh mah ca lawngah kan thi lo; ⁸ kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si. ⁹ Zeicahtiah Khrih a thih i a thawh ṭhan cu a nungmi he a thimi he an Bawi si awkah a si. ¹⁰ A si ahcun, nannih anhringso lawng a eimi nih zeicahdah nan unau hna cu nan soi kun hna? Cun nannih anhringso ei lo pawl zong nih zeicahdah nan unau cu nan zawmhtaih ve hna? Kan dihlak in Pathian hmaiah biaceih awkah kan chuak cio ko lai. ¹¹ Zeicahtiah Cathiang nih, "Ka nun bangin, mi vialte nih ka hmaiah an khuk an i bil lai i Mi vialte nih keimah cu Pathian a si an ka ti lai, tiah Bawipa nih a ti," a ti bang khan a si lai. ¹² Cucaah kan dihlak hin Pathian hmaiah kan kong kan i chim cio a herh lai. ¹³ Cucaah pakhat le pakhat i soi lengmang kha ngol u sih. Nan unau tlukrilhternak le sualnak chung i tlakternak ding caah zeihmanh tuah lo ding tu kha i zuam u. ¹⁴ Bawipa Jesuh he kan i pehtlaihnak nih fiang tein a ka hngalhtermi cu hihi a si: zei thil hmanh hi anmahte in a thurhnawmmi an si lo, sihmanhsehlaw pakhatkhat nih thil pakhatkhat cu a thurhnawm in a ruah ahcun cu thil cu a caah cun a thurhnawm ah a cang taktak ko. ¹⁵ Zeilo na ei ruangah na unau kha a lung na fahter ahcun, cu na tuahmi cu dawtnak chungin a chuakmi tuahnak a si ti lo. Na eimi rawl cu Khrih nih a thihhnawhmipa rawhnak ah canter hlah. ¹⁶ Na ca i a ṭhami thil kha congoihnak phortu ah canter hlah. ¹⁷ Zeicahtiah Pathian Pennak cu ei le din menmen hi a si lo, Thiang Thlarau pekmi dinnak le daihnak le lawmhnak tu hi a si deuh. ¹⁸ Cu bantukin Khrih rian a ṭuanmi paoh cu Pathian nih a lawmh hna i minung nih an thangṭhat hna. ¹⁹ Cucaah daihnak a chuahtertu thil le pakhat le pakhat thazang i peknak a bawmtu thil kha kan i tinh awk an si. ²⁰ Rawl ruang menmen ah Pathian thil tuahmi kha rawk hlah u. Rawl vialte hi ei awk an si ko lai, sihmanhsehlaw midang kha sualnak chungah a tlukrilhtertu rawl ei cu zei rawl a si hmanh ah sual a si. ²¹ Cucaah sa ei i sum tehna, zu din i sum tehna, nan unau a tlukrilhtertu a si ding paohpaoh tuah i sum tehna kha ahmaanmi thil a si. ²² Cu kong ah cun nangmah nih na ruahning tein va ruat ko, Pathian le nangmah lawnglawng nih va hngal ko uh. Tuah awk a si ti i a ruahmi thil a tuah tikah a lung nih sual a phawt lomi cu lunglawmmi a si. ²³ Sihmanhsehlaw a eimi kha a ei tikah lungawṭawm in a ummi cu Pathian nih sual a phawt, zeicah tiah a tuahmi cu zumhnak thawngin a si lo. Cun thil zeipaoh zumhnak thawngin tuah a si lomi cu sual a si.

¹ Zumhnak ah thazang a ṭhawngmi kannih nih a dermi kha an thilrit phorh kan bawmh hna awk a si. Kanmah duhnak kha kan kawl awk a si lo. ² Kan unau hna cu an ṭhatnak ding kha kan tuah awk a si, zumhnak ah an ṭhan khawh nakhnga kan ruah awk a si. ³ Zeicahtiah Khrih zong nih khan amah zawn lawng a rak i ruat lo. Cathiang nih, "Nangmah an vawlpamtu hna biachia cu keimah cungah a tla," a ti bantuk khan a si lehlam. ⁴ Cathiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si. ⁵ Khrih Jesuh lam hmuhsakmi nan zulhnak thawngin nannih lakah lungthin khahnak a um khawh nakhnga, lungsaunak le lungthin ṭhawnnak hram Pathian nih in bawm ko hna seh. ⁶ Cuticun lungkhat tein kan Bawipa Jesuh Khrih i a Pa Pathian cu nan thangṭhat khawh lai. ⁷ Khrih nih an cohlan hna bangin, Pathian nih sunparnak a hmuh nakhnga pakhat le pakhat i cohlang cio u. ⁸ Ka chim duhmi cu hihi a si: Khrih kha Judah mi hna ṭuankan i a can cu, Pathian nih an pupa hna sinah a tuahmi biakamnak kha fehter a si nakhnga caah a si i cu nih cun Pathian nih a bia a let lo ti kha a langhter. ⁹ Cu lawng si loin, Pathian cu mi cungah zaangfahnak a ngeih caah Jentail mi hna nih an thangṭhat lai ti duhnak a si fawn. Cucu Cathiang nih, "Jentail mi hna lak hmanh ah nangmah cu kan lawmh lai i Na min cu hla in ka thangṭhat lai," a ti bantuk le ¹⁰ "Jentail mi hna, Pathian thimmi miphun he cun i lawm u," a ti bantuk le ¹¹ "Bawipa cu thangṭhat u, Jentail mi vialte hna, Mi vialte hna, Bawipa cu thangṭhat u," a ti bang khan a si. ¹² Isaiah nih khan aa thawh ṭhan i, "Jesse tefa pakhat a ra lai i Jentail mi hna uktu ah ser a si lai, Cun annih nih amah cu an i bochan lai," a ti bang khan a si. ¹³ Thiang Thlarau ṭhawnnak thawngin nan i ruahchannak cu a ṭhan lengmang nakhnga, ruahchannak hram Pathian nih cun, amah nan zumhnak thawngin lunglawmhnak le daihnak he in khahter ko hna seh. ¹⁴ Ka u le ka nau hna, Keimah hrimhrim nih ṭhatnak le hngalhnak in nan khat i nan i cawnpiak kho ko ti kha fiang tein ka hngalh. ¹⁵ Sihmanhsehlaw hi cakuat i kan theihter ṭhanmi hna ah hin, ka ral a ṭha nawn ko. Ka ralṭhatnak cu Pathian nih Jentail mi hna ca rian ṭuan awk i ¹⁶ Khrih Jesuh sal sinak nawl a ka pekmi ruangah hin a si. Jentail mi cu Pathian cohlan awk tlakmi raithawinak an si nakhnga le Thiang Thlarau thawngin Pathian sin pekmi an si nakhnga, Pathian sin i a rami Thawngṭha ka chimnak ah hin tlangbawi bantuk ka si. ¹⁷ Cucaah cun Khrih Jesuh he kan i pehtlaihnak thawngin Pathian rian ka ṭuanmi cu ka hmai a hngal. ¹⁸ Pathian nawl ngaihnak i Jentail mi hna cu kalpi awkah, bia in siseh, tuahnak in siseh, hmelchunhnak le khuaruahhar ṭhawnnak in siseh, ¹⁹ Thiang Thlarau ṭhawnnak in siseh, Khrih nih keimah hi hmang in a tuahmi lawng cu ka chim ko lai. Cucaah Jerusalem in Illirikum tiang khual ka rak tlawn tawn ah khan Khrih kong Thawngṭha kha tlamtling tein ka chim. ²⁰ Ka saduhthah cu Khrih an theih bal lonak hmun i Thawngṭha chim kha a si zungzal, zeicahtiah midang i a hram an rak thawk cianak hmun i va sak cu ka duh lo; ²¹ Cathiang nih, "Amah kong an chimh hna lomi nih khan an hmuh lai i a hngal lomi nih khan an hngalh lai," a ti bang khan a si. ²² Hi ruangah hin nan sin i rat voi tampi dawnh ka sinak cu a si. ²³ Sihmanhsehlaw hika hrawng ram i ka rian cu ka lim cang i nanmah hmuh ka duhnak kha kum tampi a si cang caah ²⁴ atu cu kan tlawng kho cang rua hna lai tiah ruahchannak ka ngei. Spain ram i ka kalpah ah hin in hmu hna ning law ti cu ka duh i nan sinah tlawmpal ka cam hnuah cuka kal cu ka bawm te u law ka ti. ²⁵ Sihmanhsehlaw atu hi cu Jerusalem khua ah ka va ka ta lai, khika i a ummi Pathian mi hna rian ka va ṭuanpiak ta hna lai. ²⁶ Cucu zeidah a si tiah, Masidonia ram le Grik ram i a ummi Khrihfabu hna nih Jerusalem khua i a ummi Pathian mi hna lak i sifakmi hna bawmhnak ah anmah lungtho tein an thawhmi thawhlawm a um. ²⁷ Cucu anmah hrimhrim nih kan tuah lai an timi te a si. Asinain, a ngaingai ti ahcun, cu misifak hna bawmh cu an rian zong a si ve ko; Judah mi nih hin thlarau lei in an hmuhmi thluachuahnak cu Jentail mi kha an hrawm ve hna bantukin Jentail mi zong nih Judah mi cu thilri lei i thluachuahnak an hmuhmi kha an hrawm ve hna awk a si ko. ²⁸ Cu rian cu ka dih i anmah caah an thawhmi phaisa cu a dihlak in anmah sin i ka chiah dih hnuah, Spain ram kal ahcun kaa thawh lai i kan tlawngpah hna lai. ²⁹ Nan sin ka rat tikah Khrih thluachuahnak kha tlamtling tein kan phorh hna lai ti kha ka hngalh. ³⁰ Kan Bawipa Jesuh Khrih le Thiang Thlarau pekmi dawtnak in kan nawl hna: keimah caah Pathian sinah thla rak cam lengmang ve u. ³¹ Judea ram i a ummi, Khrih a zum lomi hna kut chungin ka him nakhnga le Jerusalem khua i ka rian ṭuan dingmi hi Pathian mi hna caah cohlan awk tlak a si nakhnga thla rak cam u. ³² Cuticun, Pathian duhnak a si ahcun, lawmhnak he nan sin ka phan lai i nanmah tlawn cu ka caah thazang thar laknak a si lai. ³³ Cun kan daihnak tihna Pathian cu nan dihlak sinah um ko seh. Amen.

¹ Kenkhria khua Khrihfabu chung i rian a ṭuanmi kan far Fibi hi nan sinah theihhngalhter ka duh. ² Pathian mi cu pakhat le pakhat nan i cohlan awk a si bantukin nannih nih amah cu Bawipa min in rak cohlang u law bawmhnak a herhmi paoh ah khan rak bawm u; amah cu mi tampi caah hawikom ṭha a si, keimah ca zongah a si ve. ³ Prisilla le Akuila kha nan kut kan tlaih hna. Annih cu Khrih Jesuh rian ah ka ṭuan hawi an si i ⁴ ka ca i thih hmanh a ngamhmi an si. An cungah ka lung aa lawm — keimah lawng si loin Jentail Khrihfabu zong an i lawm. ⁵ An inn i aa pummi Khrihfabu zong nan kut kan tlaih hna. Ka hawikom dawtmi Epenetas zong na kut kan tlaih, amah cu Asia ram ah Khrih a zum hmasa bikmi a si. ⁶ Nan ca i rian fak piin a ṭuanmi Mary kha na kut kan tlaih. ⁷ Andronikas le Junias kha an kut ka tlaih hna, annih cu kan Judah phun hawi keimah he thongtla ṭimi an si. Anmah cu lamkaltu pawl nih khan ṭha tein an theihmi hna an si i ka hlan i Khrihfa a cangmi an si. ⁸ Bawipa he i hawikomhnak chungah a ummi ka hawi dawt Ampliatas kha na kut kan tlaih. ⁹ Khrih rianṭuannak ah ka rian ṭuan hawi Urbanas le ka dawtmi ka hawi Stakhis zong kha nan kut kan tlaih hna. ¹⁰ Khrih zumhnak ah a fel ngaingaimi Apelles kha na kut kan tlaih. Aristobulus innchungkhar kha nan kut kan tlaih hna. ¹¹ Judah mi a simi ka phun hawi Herodion le Narsissas innchungkhar Khrihfa kan unau hna kha nan kut kan tlaih hna. ¹² Bawipa rian a ṭuanmi Trifana le Trifosa le Bawipa caah rian tampi a ṭuanmi ka dawtmi ka hawi Persis kha nan kut kan tlaih hna. ¹³ Bawipa rian ah hawi hlei in a ṭuanmi Rufas le a fa bantukin a ka zoh zungzaltu a nu kha nan kut kan tlaih hna. ¹⁴ Asinkritas, Flegon, Hermes, Patrobas, Hermas le an sin i a ummi Khrihfa unau vialte kha nan kut kan tlaih hna. ¹⁵ Filologas le Julia, cun Nereus le a far le Olimpas le an sinah a ummi Pathian mi vialte kha nan kut kan tlaih hna. ¹⁶ Nannih cu unau dawtnak in pakhat le pakhat i biachawn u. Khrih ta a simi Khrihfabu vialte nih nan kut an in tlaih hna. ¹⁷ Cheunak a chuahtertu hna le zumhnak a tuaitertu, nannih nih nan hmuh ciami cawnpiaknak a ralchanhmi hna kha i ralring hna u tiah kan forh hna; annih cu hrial ko hna u. ¹⁸ Zeicahtiah cu bantuk rian a ṭuanmi cu kan Bawipa Khrih rian an ṭuan kha a si lo i anmah duhnak tu an tuah kha a si deuh. An hmurka ṭha le an mi hloi thiamnak in lungmawng zaran vialte kha an hlen hna. ¹⁹ Thawngṭha kong i zumhawktlak nan si kha a mi kip nih an theih i cucaah cun nan kongah hin ka lung aa lawm. Ṭhatnak leiah cun mifim si u ti kan duh hna, sihmanhsehlaw chiatnak leiah cun ngakchia cuampual si ko u ti kan duh hna. ²⁰ Cun Pathian, kan daihnak tihna nih cun, Satan kha nan ke tangah a rial tuan lai. Kan Bawipa Jesuh vel cu nan sinah um ko seh. ²¹ Ka rianṭuan hawi Timote nih nan kut an tlaih hna; cun Judah mi ka phun hawi Lusias, Jason le Sosipater zong nih nan kut an in tlaih hna. ²² Hi cakuat a ṭialtu keimah Tertias nih Khrihfa kuttlaihnak in nan kut kan tlaih hna. ²³ Ka tluninn pa Gaius, Khrihfabu an i pumhnak inn a ngeitu nih hin nan kut an tlaih hna. Hi khua tangka kengtu Erastas le kan unau Kuartas nih nan kut an in tlaih hna. ²⁴ Kan Bawipa Jesuh vel cu nan dihlak sinah um ko seh. ²⁵ Pathian cu sunparnak pe u sih. Ka chimmi Khrih kong Thawngṭha le kan hnulei chan tampi chung aa thupmi biathli kha phuan a sining in, Pathian nih cun nan zumhnak ah fek tein an dirter khawh hna lai. ²⁶ Atu cu kha biatak kha profet hna ṭial bang khan phuan a si cang i zungzal hmunmi Pathian nawl bangin, mi vialte nih an zumh i a nawl cu an ngaih nakhnga, miphun dihlak sinah chim a si cang. ²⁷ Amah lawnglawng Pathian a si i Amah lawnglawng zeizong vialte a hngal dihtu a simi cu, Jesuh Khrih thawngin zungzal in zungzal tiang thangṭhat si ko seh. Amen.