SALM

SALM

¹ Miṭhalo hna khuakhannak ah aa tel lo i Misual hna lam zong a zul lo i Pathian a nihsawhmi hna sinah a ṭhu lomi cu Thluachuakmi an si. ² An i lawmhnak cu Bawipa nawlbia tu ah khan a si i cu nawlbia cu chunzan in an ruat. ³ Tiva kamah a khomi thingkung, a caan hmaan tein a thei a tlai i a hnah a uai bal lomi bantuk an si. An tuahmi thil kip ah khua awng an tong. ⁴ Sihmanhsehlaw miṭhalo cu hi bangin an si lo, Thli nih a chawihmi favai bantuk an si. ⁵ Cucaah miṭhalo hna cu Pathian nih sual a phawt hna lai, misual mi cu miding mi bu chungah an i tel kho lai lo. ⁶ Bawipa nih miding cu an lam kha a hngalh, Sihmanhsehlaw miṭhalo cu an lam kha a rawk lai.

¹ Zeicahdah miphun hna nih ral thawhnak khua an khan i An mi hna nih thil ṭhahnem lo dohnak khua an ruah? ² An siangpahrang hna le an uktu bawi hna nih Bawipa le Bawipa nih a thimmi siangpahrang doh awk khua an khan. ³ An i thawh i, "An kan ṭemnak hri kha chat u si law hlonh u sih," an ti. ⁴ Bawipa nih vancung i a bawiṭhutdan cung khin a run nih hna i capo ah a saih hna. ⁵ Thinhung ngaiin an sinah bia a chim i a thinhunnak nih cun an thin a phanter hna. ⁶ Aa thawh i, "Zion ka tlang thiang cungah ka siangpahrang cu ka chiah cang," a ti. ⁷ "Bawipa nih a chimmi cu ka thanh lai," tiah siangpahrang nih a ti. Cu a chimmi cu hihi a si: "Bawipa nih a ka thawh i, ’Nangmah cu ka fapa na si, nihin ni ah hin kan hrin. ⁸ Ka hal law, miphun vialte hi nangmah kan pek dih lai; vawlei hi a dihlak in nangmah ta a si lai. ⁹ Thirfung in na uk hna lai i tlak um bangin na khuai dih hna lai," a ti. ¹⁰ Cucaah siangpahrang hna, ka bia ngai tuah u, uktu bawi hna, hngal cang tuah u. ¹¹ Bawipa cu ṭih bu tein a rian ṭuan tuah u, therphang in um u law ¹² a hmaiah kun tuah u. Cu ti a si lo ahcun, a thinhunnak kha khulrang in a alhmi a si caah, a thin a hung lai i nan thi sual lai. Amah chungah aa dormi cu thluachuakmi an si.

¹ Maw Bawipa, ka ral an tam tuk hringhran, a ka dohtu an tam tuk hringhran. ² An ka thangchiat i, "Pathian nih a bawm lai lo," an ka ti. ³ Sihmanhsehlaw Bawipa, nangmah nih phaw bantukin na ka huhphenh zungzal i teinak kha na ka pek i ka lung na ka ṭhawnter ṭhan. ⁴ Bawipa kha ka auh i a tlang thiang cungin a ka leh. ⁵ Bawipa nih a ka thlim i kaa hngilh, Bawipa nih a ka ven caah him tein kaa hlau ṭhan. ⁶ A ka kulhtu ka ral thong tampi hi ka ṭih hna lo. ⁷ Bawipa, ra ko sawh! Ka Pathian, ka khamh ko! Ka ral vialte cu na tei dih hna i miṭhalo vialte cu na hrawh dih hna. ⁸ Khamhnak cu Bawipa sinin a rami a si, Bawipa nih a mi cu thluachuah pe ko hna seh."

¹ Ka au tikah ka let tuah, maw Pathian a ka chanhtu, Harnak chung i ka um tikah nangmah nih na ka bawmh tawn. Atu zong ka zaangfah law ka thlacamnak hi ka theihpiak tuah. ² Nannih minung hna, zei can dah na ka serhsat lai? Zei can dah santlailo thil kha nan duh lai i lihbia kha nan dawi lai? Selah ³ Bawipa nih amah ta si awkah a ka thim i ka auh tikah a ka theih ti kha philh hlah u. ⁴ Ṭihnak ngei u law nan sualnak kha ngol hna u; hi thil hi nanmah lawng tein nan inn khaan chungah thuk piin ruat tuah u. Selah ⁵ Bawipa cu a hmaanmi raithawinak kha pe u law amah cu i bochan tuah u. ⁶ "Thluachuahnak hmu u si law kan hei duh hringhran dah," a timi tampi an um. Maw Bawipa, kan cungah zaangfahnak run ngei ko. ⁷ Nangmah nih lawmhnak na ka pekmi cu, din awk zu tampi a ngeimi le ei awk rawl tampi a ngeimi hna an i lawmhnak nakin a ngan deuh. ⁸ Hnangam tein ka it lai i kaa hngilh fawn lai, Bawipa, nangmah lawnglawng nih him tein na ka umter.

¹ Maw Bawipa, ka bia hi ka ngaihpiak hna law ka aihramnak hi ka theihpiak tuah hna. ² Ka Siangpahrang le ka Pathian, ka thlacamnak hi ka ngaihpiak tuah. Bawipa nangmah sinah thla ka cam lai; ³ Zinglei ah ka aw kha na ka theihpiak: nichuak kate ah na sinah thla ka cam tawn i na ka lehnak kha ka hngah tawn. ⁴ Nang cu ṭhat lonak tuahnak ah aa lawmmi Pathian na si lo i na hmaika ah ṭhat lonak umter kha na duh lo. ⁵ Miporhlaw cu na ing kho hna lo i miṭhalo cu na huat hna. ⁶ Lihchim mi cu na hrawh dih hna i mipuarhrang le mihlenhmang cu na nautat hna. ⁷ Sihmanhsehlaw kei cu na dawtnak a nganmi thawngin na inn chungah ka ra lut kho; a thiangmi na biakinn chungah nangmah kan bia kho i na hmaiah ka kun kho. ⁸ Bawipa, ral tampi ka ngei, na duhnak tuah awkah ka hruai law na lam cu ka zulh khawh nakhnga ka hmaiah na lam cu pheiter ko. ⁹ Ka ral nih an chimmi bia cu zeitikhmanh ah zumh khawhmi bia an si lo, Zeicahtiah annih cu mi hrawh lawnglawng kha an duh; an kaa cu chilh lomi thlan bantuk a si i an bia cu hlennak bia le nal bia lawnglawng an si. ¹⁰ Maw Pathian, annih cu sual phaw hna law dantat hna, an i timhmi thil ṭhalo cu tlinter hlah. An sualnak a tam ca le nangmah an in doh caah annih cu na hmaika in ṭhawl hna. ¹¹ Nangmah ah himnak a hmumi cu an i lawm lai i lawmhnak in hla an sa zungzal lai. Nangmah an dawmi cu na huhphenh hna, nangmah thawngin lawmhnak taktak an hmu. ¹² Bawipa, na nawl a ngaimi cu thluachuah na pek hna, na zaangfahnak nih phaw bantukin a huhphenh hna.

¹ Bawipa, na thinhung hlah law, ka si hlah! Na thinhun in dan ka tat hlah. ² ka baat cang caah ka cungah zaangfahnak ngei ko, ka tha a dih cang caah thazang thar ka pe ko sawh, ³ ka nunnak hi a ning piin a fak, zei can dah hitihin ka um lai, maw Bawipa ⁴ Maw Bawipa, ka khamh tuah; na ka dawt caah thihnak chungin ka khamh tuah. ⁵ Mithi khua ah ahohmanh nih an in hngal lo, Sheol ah ahohmanh nih an in thangṭhat kho lo. ⁶ Lungfahnak in ka baa tuk hringhran cang; zanfate ka ṭahnak ah ka ihkhun cu a cin dih i ka chantling cu ka mitthli nih a ciah. ⁷ ka ṭah tuk caah ka mit an phing dih i khua hmanh ṭha tein ka hmu kho ti lo — hi ti i ka umnak cu ka ral hna ruangah a si. ⁸ Nannih ṭhat lonak a tuahmi hna, ka kaltak ko u, Bawipa nih ka ṭahnak kha a theih cang; ⁹ bawmh hal in ka aunak kha a theih i ka thlacamnak kha a ka leh. ¹⁰ Ka ral cu an sung lai i vansang au in an um lai, lungmit in chikkhatte ah an zam lai.

¹ Maw Bawipa ka Pathian, nangmah cu ka himnak na si; a ka dawitu vialte hna sin hin ka khamh law ka chanh tuah. ² Cu ti na ka khamh lo ahcun ahohmanh khamhtu ngei loin, chiandeih bantukin an ka hnuh lai i an ka thleh an ka baoh dih ko lai. ³ Bawipa ka Pathian, mi cungah ṭhat lonak tuah le ⁴ hawikom rawi le zei ruangah ti awk um set loin ral cungah ṭhat lonak tuah hi, hi hna lakah hin pakhatkhat ka tuah a si ahcun, ⁵ Ka ral nih ka dawi hna seh law ka tlai hna seh, ka tu hna seh law ka that hna seh, vawlei ah nunnak ngei loin ka hril ta hna seh! Selah ⁶ Na thinhun in tho tuah, maw Bawipa, ka ral hna thinhunnak kha doh awkah dir tuah. I hlau law ka bawm tuah, zeicahtiah na duhmi cu ding tein biaceih kha a si. ⁷ Mi vialte kha na velchum ah pumhter hna law annih cu cunglei khan run uk hna. ⁸ Bawipa, nangmah cu mi vialte biaceihtu bawi na si. Kei cu miṭha le a sual lomi ka si caah keimah lei ṭanh in biakhiahnak kha tuah ko. ⁹ Miṭhalo hna ṭhat lonak cu kham law miṭha cu laksawng in lehrul ko hna. Nang cu a dingmi Pathian na si i minung lungthin le duhnak vialte a hngal dihtu na si. ¹⁰ A ka hupphengtu cu Pathian a si, amah nawl a ngaimi cu a khamh hna. ¹¹ Pathian cu a dingmi biaceihtu a si, miṭhalo kha sual a phawt zungzal hna. ¹² Mi cu an i ngaihchih lo ahcun Pathian nih a nam aa tat lai. A likuk kha aa hruai i kah colh dingin aa tim; ¹³ A hmual a fak ngaimi a hriam kha aa lak hna i meialh bantuk a simi a cantiang kha aa tinh hna. ¹⁴ Miṭhalo nih thil ṭhalo a tuaktanning kha ruat hmanh; harnak chuahter ding kha khua a khan i hlennak kha a tuah. ¹⁵ Vawlei ah khan khor thukpi a cawh i amah lila kha a cawhmi khor ah cun a tla. ¹⁶ Cuticun amah ṭhat lonak lila nih khan harnak a pek i amah puarhrannak lila nih khan fahnak a pek. ¹⁷ Bawipa cu dinnak a tuahmi ruangah ka lawmh lai, Cung Nung Bik Bawipa cu hla in ka thangṭhat lai.

¹ Maw Bawipa, kan Bawipa, Na lianhngannak cu vawleicung dihlak ah hin a lang ko! Nangmah thangṭhatnak hi van tiang a phan i; ² ngakchia le bawhte nih hla in an sak. Na ral hna khamkanhnak ah ralhruang na ser i, na ral le nangmah an huatu hna rak donhnak ah ralhau na ser. ³ Nangmah na sermi van le an hmun ciote ah na chiahmi thlapa le arfi hna khi ka zoh tikah, ⁴ minung hi zeidah a si i na hnakkar ah na tenh? Minung menmen a simi hi zeidah a si i a zawn na ruah? ti hi ka ruat. ⁵ Nangmah lawnglawng hi a cungah a ummi na si i sunparnak le upatnak cu a lu ah na chinh. ⁶ Na sermi thil vialte a uktu ah na ser i zeizong vialte hna dihlak cungah khan na chiah: ⁷ tuu le caw le ramlak saram hna, ⁸ va le nga le rili chung thilnung vialte zong, an dihlak in a tangah na chiah hna. ⁹ Maw Bawipa, kan Bawipa, na lianhngannak cu vawleicung dihlak ah hin a lang ko!

¹ Bawipa, ka lungthin dihlak in nangmah cu kan thangṭhat lai, nangmah nih khuaruahhar thil na tuahmi vialte cu ka chim lai. ² Nangmah thawngin lunglawm in hla ka sa lai, maw Cung Nung Bik, nangmah cu kan thangṭhat lai. ³ Nangmah na langh tikah ka ral cu an i let, an tlu i an thi. ⁴ A dingmi biaceihtu bawi bantukin na bawiṭhutdan cungah na ṭhu i keimah lei ṭanh in biakhiahnak kha na tuah cang. ⁵ Lawkihmi kha sual na phawt hna i miṭhalo kha na hrawh hna, annih cu hngalh ṭhan, ti a um ti lai lo. ⁶ Kan ral cu an dih cang, an khua cu na hrawh cang hna i a philh in philh an si dipdep cang. ⁷ Sihmanhsehlaw Bawipa cu zungzal in siangpahrang a si ko; biaceihnak tuah awkah a bawiṭhutdan cungah cun a ṭhu. ⁸ Dinnak in vawlei kha a uk i biading in mi kha an bia a ceih hna. ⁹ Hremnak a ingmi hna caah Bawipa cu himnak hmun a si i harnak caan ah ralhruang fek a si. ¹⁰ Maw Bawipa, nangmah an hngalmi nih cun an in bochan lai, nangmah sinah a rami cu ahohmanh na dawn bal hna lo. ¹¹ Zion ah a ummi Bawipa cu hla in thangṭhat u, a tuahmi thil kha miphun kip chim hna u. ¹² Pathian nih hremnak a ingmi kha a philh hna lo i an aunak kha a philh lo: an cung i ṭhat lonak a tuahtu kha dan a tat hna. ¹³ Maw Bawipa, ka zaangfah ko! A ka huatu nih zeitluk in dah ka cungah ṭhat lonak an tuah kha ka hmuhpiak tuah. Bawipa, thihnak chungin ka chuah law ¹⁴ Jerusalem khuami hna hmaiah ka dir lai i nangmah kha zei ruangah dah kan thangṭhat ti vialte kha ka chimh hna lai. Nangmah nih na ka chuah caah ka lung aa lawm lai. ¹⁵ Lawkihmi nih khor an cawh i anmah an tla; rap an chiah i anmah an i foih. ¹⁶ Ding tein bia a ceihnak ah khan Bawipa cu amah le amah aa phuang i miṭhalo hna cu anmah tuahnak lila ah khan an i foih. Higgaion. Selah ¹⁷ Miṭhalo vialte hna le Pathian a hlawmi vialte an donghnak cu thihnak a si. ¹⁸ Mipam cu hrelh an si zungzal lai lo i hremmi cu ruahchan awk ngei lo an si zungzal lai lo. ¹⁹ Bawipa, ra tuah, mi nih zeirello in in um hna hlah seh! Lawkihmi cu na hmaiah chuahter hna law an bia ceih hna. ²⁰ Maw Bawipa, annih cu an thinphanter hna, minung menmen an si kha hngalhter hna. Selah

¹ Maw Bawipa, zeicahdah lamhla tuk ah na um? Zeicahdah harnak caan ah naa thuh? ² Miṭhalo cu an ruam a kai i misifak kha an hrem hna; anmah nih an chiahmi rap ah khan i foih hna seh. ³ Miṭhalo nih a duhnak ṭhalo kha aa porhlaw i hakkaumi nih Bawipa kha a vawlhpamh i a hlawt. ⁴ A ruam a kai caah miṭhalo nih cun aa thawh i, "Pathian nih cun dan a ka tat lai lo, ka duhnak ṭhalo kha a zeihmanh a poi lem lai lo," a ti. Miṭhalopa nih a ruahmi cu cucu a si. ⁵ A rianṭuannak ah a hlawh a tling. Pathian biaceihning kha a hngalthiam lo; a ral kha a nih in a nihsawh hna. ⁶ Amah le amah cu, "Ka sung bal lai lo; harnak ka tong bal lai lo," aa ti. ⁷ A bia cu chiatserhnak le lih le hronak in a khat; huat awk bia le bia ṭhalo chim ah khan a khul a rang. ⁸ Khuate ah khan aa thup riangmang i a sual lomi kha a nawn hna. Thah a duhmi kha aa ngiat hna i; ⁹ chiandeih bantukin a bawh hna, a rap in a foih hna i a kalpi hna. ¹⁰ Vanchiapa cu a ril ko, miṭhawngpa nih a thah. ¹¹ Miṭhalopa nih cun aa thawh i, "Pathian cu a zeihmanh a poi lai lo, a mit aa chinh i a ka hmu bal lai lo," a ti. ¹² Maw Bawipa ra law ka khamh tuah! Hremmi kha philh sawh hna hlah, Pathian. ¹³ Zeitindah miṭhalo hna nih cun Pathian cu zeirello in an um khawh lai i? "Dan a kan tat bal lai lo," an ti khawh lai? ¹⁴ Nang nih cun na hmuh ko hna; temhinnak le ngaihchiatnak a ingmi cu na hngalh ko hna i bawmh awkah naa tim zungzal ko. Bawmhnak a herhmi kha na bawmh zungzal hna caah vanchiami nih nangmah kha an in fuh. ¹⁵ Miṭhalo le misual cu an ṭhawnnak kha hrawk hna law an ṭhat lonak ruangah khan tling khitkhet in dantat hna. ¹⁶ Bawipa cu zungzal in zungzal tiang siangpahrang a si i a ram chung hin lawkihmi cu an lo lai. ¹⁷ Bawipa, minauta cu an thlacamnak kha na ngaihpiak hna i lungṭhawnnak na pek hna. ¹⁸ Hremmi hna le ngakṭah cu an aunak kha na theihpiak hna i anmah lei ṭanh in bia na ceih, cucaah a thi khomi minung nih hin thil ṭihnung kha an umter ti lai lo.

¹ Ka himnak dingah Bawipa cu kaa bochan. Nang nih naa thawh i, "Va bantukin tlang ah zuang tuah, ² zeicahtiah miṭhalo nih an likuk kha an i hruai i muihnak i a ummi miṭha kha kah awkah an cantiang cu an i tinh. ³ Thil aa nincan lo tikah hin miṭha nih an tuah khawhmi zeihmanh a um lo," tiah na ka ti tikah hin zeitluk in dah na hruh. ⁴ Bawipa cu a biakinn thiang chungah a um ko i a bawiṭhutdan cu van ah khin a um ko. Mi vialte kha a zoh hna i an tuahmi vialte kha a hngalh dih. ⁵ Miṭha zong, miṭhalo zong ṭha tein a dothlat hna; zaang-ennak a duhmi kha a thinlung dihlak in a huat hna. ⁶ Miṭhalo cungah meiṭil le kaat kha a surter; a alhmi mei in dan a tat hna. ⁷ Bawipa cu a ding i tuahsernak ding kha a duh, mi dingmi nih a hmai kha an hmuh lai.

¹ Ka khamh tuah, maw Bawipa ! Miṭha an um ti lo i lihchim lomi an um ti lo. ² Pakhat le pakhat an i hleng i hlepar faknak hmur le lung hnih ngei in bia an chim. ³ Maw Bawipa, hlepar fak thiam lei cu daihter law tluang a khawng lengmangmi kaa cu phit hna. ⁴ Annih nih an i thawh i, "Kan duhmi paoh kan chim ko lai, ahohmanh nih an kan kham kho lai lo. Aho nih dah, cucu nan chim awk a si, tiah an kan chimh khawh lai?" an ti. ⁵ Bawipa nih aa thawh i, "Sifakmi cu an hrem hna i retheimi cu aihram lengmang in an tuah hna caah atu cu ka ra lai i an ngaihmi himnak cu ka pek hna lai," a ti. ⁶ Bawipa biakamnak cu zumhawktlak an si; somei chungah voi sarih tiang erletmi ngun tlukin an thiang. ⁷ - ⁸ Miṭhalo cu a kenkip ah an um i mi zeipaoh nih thilṭhalo kha an hlawrh, Maw Bawipa, hi mi hna sin hin kan kilveng law him tein kan umter zungzal ko.

¹ Zei can dah na ka philh lai, maw Bawipa ? Na ka philh zungzal ko lai maw? Zei can dah na ka thuh tak rih lai? ² Zei can dah fahnak hi ka in lai? Zei can dah ngaihchiatnak in ka lung hi chun he zan he a khah lai? Zei can dah ka ral hi ka cungah a lek in an i lek lai? ³ Maw Bawipa ka Pathian, ka zoh law ka let tuah. ka thih nakhnga lo, ka thazang kha ka pe ṭhan tuah. ⁴ Cu ti na ka tuah ahcun ka ral nih, "Amah cu kan tei cang," an ti kho lai lo i ka sunghnak ah khan an di a riam kho lai lo. ⁵ Sihmanhsehlaw a fekmi na dawtnak kha kaa bochan i na ka khamh lai ti ka zumh caah kaa lawm lai. ⁶ Bawipa cu ka cungah a ṭhat zungzal caah amah cu hla in ka thangṭhat lai.

¹ Mihrut nih cun an i thawh i, "Pathian a um lo," an ti. An dihlak in an thu, thil ṭhalo kha an tuah; ahmaanmi thil a tuahmi ahohmanh an um lo. ² Minung lakah hin a fimmi le keimah a ka biami an um hnga maw ti hngalh duh ah Bawipa nih vancung khin a run zoh hna. ³ Sihmanhsehlaw an dihlak in an tlau cang, an dihlak in an chiatnak aa tluk dih, Pakhat hmanh thil hmaan a tuahmi an um lo, pakhat taktak hmanh an um lo. ⁴ Bawipa nih, "An hngal hnga lo maw? Ṭhat lonak a tuahmi vialte hi mihrut maw an si dih hnga? ka mi kha an ramh hna i cucu an i cawmnak, ka sinah thla an cam bal lo," a ti. ⁵ Sihmanhsehlaw Pathian cu a nawl a ngaimi hna sinah a um caah annih cu an thin a phang ngaingai lai. ⁶ Miṭhalo hna nih sifakmi an khuakhannak cu dawnkhan hna hmanh seh law a humhaktu hna cu Bawipa a si ko. ⁷ Israel khamhnak cu Zion in ra seh ti ka hei duh hringhran dah! Bawipa nih a mi cu luatnak a pek ṭhan hna tikah, Jakob tefa cu an lung aa lawm lai, Israel mi cu an tha a nuam lai.

¹ Bawipa, na biakinn chungah ahodah a lut lai? Na tlang thiang Zion cungah ahodah a um lai? ² A um ding cu, zeizong vialte ah Pathian nawl a zul i a hmaanmi thil a tuah zungzal i a bia biahmaan le biatak a si i ³ mi congoih a hmang lo i hawikom cungah ṭhat lonak a tuah lo i a innpa a congoih lo i ⁴ Pathian nih a hlawtmi kha zeirello in a um i Bawipa nawl a zulmi cu a upat i Zeitluk in a har hmanh ah a biakam ningin a tuah zungzal i ⁵ a karh la loin mi tangka a cawih i a sual lomi hna sual phawt awkah ziknawh pek khawh lomi cu an si. Hi thil a tuahmi hna cu an i hnin bal lai lo.

¹ Maw Pathian, nangmah cu kan fuh ko, ka huppheng ko sawh. ² Bawipa cu ka thawh i, "Nangmah cu ka Bawipa na si; thil ṭha ka ngeihmi vialte hi nangmah sinin ka hmuhmi an si," ka ti. ³ Bawipa mi, zumhawktlak a simi hna cu, zeitluk in dah an ṭhat! Anmah he um ṭi cu kaa lawmhnak ngan bik a si. ⁴ Pathian dang a zuan lengmangmi nih cun, an cungah harnak an i tlunter. An raithawinak ah kaa tel duh lai lo i an pathian cu ka bia hna lai lo. ⁵ Nangmah dah ti lo cu ka ngeihmi dang zeihmanh a um lo, maw Bawipa, ka herhmi vialte cu nangmah nih na ka pek, ka nunnak cu na kut chungah a um. ⁶ Laksawng na ka pekmi cu zeitluk in dah khuaruahhar an si, zeitluk in dah an ṭhat! ⁷ Bawipa nih a ka hruai caah amah cu ka thangṭhat, zan ah ka lungthin nih ralrinnak a ka pek. ⁸ Bawipa ka sinah a um cu ka hngalh zungzal, amah cu keimah he naihte ah a um i zeihmanh nih an ka hnin kho lo. ⁹ Cucaah lawmhnak le thanuamnak in ka khat i him tein ka um zungzal. ¹⁰ Cu ti ka si cu Mithi khua ah khan na ka kaltak lai lo le na dawtmi cu Khor Thuk chungah na ka chiahtak lai lo caah a si. ¹¹ Nunnak lei kalnak lam cu na ka hmuhsak lai; ka sinah na um caah lawmhnak in ka khat i na ka bawmh caah nuamhnak ka hmu zungzal.

¹ Maw Bawipa, kan nawlnak a dingmi hi ngai tuah, nangmah bawmh hal in ka aunak hi ka theihpiak tuah. Ka chungah hlennak zeihmanh a um lo caah ka thlacamnak cu ka theihpiak ko. ² Ahmaanmi thil kha nangmah nih na hngalh caah keimah lei ṭanh in bia na ceih lai. ³ Ka lung cu na hngalh, zan ah ka sinah na ra. Ṭha tein na ka hneksak cikcek i ka chungah duhnak ṭhalo zeihmanh a um lo kha na hmuh. ⁴ Midang bantukin ṭhat lonak bia zeihmanh ka chim lo, na nawl kha ka zulh i puarhrannak lam kha ka zul lo. ⁵ Na lam kha ka zulh zungzal i zeitikhmanh ah ka pialtak bal lo. ⁶ Maw Pathian, na sinah thla ka cam i na ka leh: cucaah atu zongah hin keimah leiah i mer law ka bia cu ka ngaihpiak ko. ⁷ Maw Khamhtu Bawi, na dawtnak khuaruahhar cu langhter ko; na kiang kan um ahcun kan ral hna kut chungin kan him. ⁸ - ⁹ A ka dohtu miṭhalo hna sin hin Na mitfang bantukin ka veng law Na thlazung in ka hup tuah. Huatnak in a khatmi ka ral nih khan an ka dum, ¹⁰ zaangfahnak zeihmanh an ngei lo i ¹¹ kaa mernak lei paoh ah khan an rak um dih, keimah thluk khawhnak ding caan ṭha kha an bawh. ¹² Chiandeih bantuk an si i thleh dih le baoh dih kha an ka duh, an i thuhnak hmun in chiandeih no bantukin an ka bawh. ¹³ Maw Bawipa, ra law ka ral hi do hna law tei hna! Miṭhalo hna kut chung hin na vainam in ka chanh tuah, ¹⁴ na ṭhawnnak in an kut chungin ka khamh tuah, hi vawlei cung nun chung i an duhmi thil vialte tling tein a ngei khomi hna kut chung hin ka khamh tuah. An caah na khonmi dantatnak kha an cungah tlunter law an tefa hna ca zongah i za seh law an tefa hna tefa chin hna ca zongah i za rih seh. ¹⁵ Kei tu nih cun ka sual lo caah na hmai kha ka hmuh lai i cun ka hun i hlauh tikah nangmah ka sin i na um caah lunglawmhnak in ka khat lai.

¹ Maw Bawipa ka ṭhawnnak, nangmah cu kan dawt hringhran ko! Nangmah cu a ka chanhtu na si. ² Bawipa cu ka khamhtu a si, amah cu a fekmi ka ralhruang a si. Ka Pathian cu a ka hupphengtu a si, amah sinah cun him tein ka um. Phaw bantukin a ka huhphenh, a ka ven i him tein a ka umter. ³ Bawipa cu ka auh i ka ral hna kut chungin a ka khamh. Bawipa cu thangṭhat ko u. ⁴ Thihnak nih a hri in a ka ṭem, rawhralnak tilian nih a ka tlunhnawh. ⁵ Thihnak nih a hri in a ka ṭem, thlan nih a rap kha a ka chiahhnawh. ⁶ Ka harnak chungin Bawipa cu ka auh; bawmhnak hal in ka Pathian cu ka auh. A biakinn chungin ka aw kha a theih, bawmhnak ka halnak ka aw cu a hna a phan. ⁷ Cun Pathian cu a thin a hun caah vawlei cu aa hnin i a ther; tlang hram hna cu an i hnin i an i sai dih. ⁸ A hnar chungin meikhu an chuak i a kaa chungin a hliau in aa hliaumi meizik an chuak. ⁹ Van khi a run baoh i a rung ṭum, a ke tang i a ummi khuadawm nakpi he a rung ṭum. ¹⁰ Cherubim kha aa cit hna i a rung zuang, thlitu kha a thla in aa cit i khulrang in a choi. ¹¹ Muihnak in amah le amah cu aa tuam, ti a khatmi khuadawm nakpi nih khan a zulh. ¹² A hmai i aa lekmi nimtlau chungin rial le meiṭil an tla, khuadawm nakpi chung khan an rung tla. ¹³ Cun Bawipa cu vancung in khuari bantukin a rung ri i Cung Nung Bik aw cu a rung thang. ¹⁴ A thal cu a thlah hna i a ral cu a ṭhek hna; ṭek kha a tlakter i an zaam dih. ¹⁵ Maw Bawipa, nangmah nih na ral cu na sik hna i na thinhun in na onhhnawh hna tikah rili tawne cu a lang i vawlei hram cu a chin kha aa hung. ¹⁶ Bawipa nih vancung khin a run ka banh i a ka tlaih; ti thuk chungin a ka chuah. ¹⁷ A ṭhawngmi ka ral hna kut chungin a ka chuah, a ka huami vialte hna kut chungin a ka chuah — annih cu ka caah a ṭhawng tukmi an si. ¹⁸ Harnak ka ton tikah an ka doh, sihmanhsehlaw Bawipa nih cun a ka huhphenh. ¹⁹ Ṭihnung chungin a ka chuah; ka cungah a lung a tlin caah a ka khamh. ²⁰ Ka din caah Bawipa nih laksawng a ka pek, a sual lomi ka si caah thluachuah a ka pek. ²¹ Bawipa nawlbia cu ka zulh; ka Pathian cu ka doh lo, ²² A phunglam vialte kha ka zulh i a nawlbia kha zul loin ka um hna lo. ²³ Palhnak ka tuah lo kha a hngalh, thil ṭhalo ka hrial kha a hngalh. ²⁴ Cucaah cun ka din caah khan laksawng a ka pek i ka sual lo a hngalh caah khan ṭuan man a ka pek. ²⁵ Bawipa, nang cu zumhawktlak a simi sinah zumhawktlak in na um ve i a ṭhami sinah na ṭha ve. ²⁶ A thiangmi sinah na thiang i asinain miṭhalo cu na huat hna. ²⁷ Mi toiah aa dormi cu na khamh hna i miruamkai cu na ṭhumh hna. ²⁸ Bawipa nih ceunak a ka pek, ka Pathian nih muihnak cu a ka dawipiak. ²⁹ Ka ral hna doh khawhnak thazang a ka pek, an ralhau baoh khawhnak ṭhawnnak a ka pek. ³⁰ Hi Pathian hi, zeitluk in dah a tuahmi kha a tlin i zeitluk in dah a bia kha i bochan awk an si! A huhphenhnak a kawlmi hna caah cun phaw bantuk a si. ³¹ Bawipa lawnglawng hi Pathian cu a si, Pathian lawnglawng hi kan ralhau cu a si, ³² Amah hi a kan ṭhawntertu Pathian cu a si, kan kalnak lam a himtertu cu a si. ³³ Sazuk ke bantukin ka ke cu a khul a ranter i tlang cungah him tein a ka umter. ³⁴ Raltuk a ka cawnpiak i cucaah a ṭhawng bikmi likuk hmanh kha ka hman khawh. ³⁵ Bawipa, nangmah nih na ka huhphenh i, na ka khamh; na ka zohkhenhnak nih mingan ah a ka ser i na dawtnak nih him tein a ka umter. ³⁶ Nangmah nih na ka huhphenh caah an ka tlai kho lo i a tluk zong ka tlu bal lo. ³⁷ Ka ral cu ka dawi hna i ka tlaih hna, Ka tei hna hlantiang ka ngol hna lo, ³⁸ Ka tuk hna i an tho kho ti lo, ka kehram ah an ril ko. ³⁹ Raltuknak hmun caah thazang na ka pek i ka ral hna teinak ah ṭhawnnak na ka pek. ⁴⁰ Ka ral hna cu keimah hnulei chit in na zamter hna i a ka huatu cu ka hrawh hna. ⁴¹ Bawmhnak hal in an ai, sihmanhsehlaw ahohmanh nih an khamh kho hna lo; Bawipa kha an auh, sihmanhsehlaw a let hna lo. ⁴² Dip cikcek in ka rial hna i thli nih a choihmi leidip bantuk ah an cang, lam i leicet bantukin ka lamh hna. ⁴³ Ral thawh hmangmi miphun chungin na ka khamh i miphun hna uktu ah na ka ser: ka hngalh bal lomi kha ka kut tangah an um. ⁴⁴ Ka bia an theih tikah ka nawl an ka zulh, ramdangmi kha ka hmaiah an kun. ⁴⁵ An hnabei a dong i an ralhau chung khan ther lengmang in an ra. ⁴⁶ Bawipa cu a nungmi Pathian a si, ka khamhnak lungpi cu thangṭhat ko u! Pathian cu ka khamhtu a si, a lianhngannak kha thanh tuah u! ⁴⁷ ka ral hna teinak kha a ka pek i miphun tampi kha ka kut tangah a chiah hna: ⁴⁸ Ka ral hna kut chungin a ka khamh. Bawipa, nangmah nih ka ral hna teinak cu na ka pek i mipuarhrang mi hna kut chungin na ka huhphenh. ⁴⁹ Cucaah miphun kip sinah nangmah cu kan thangṭhat lai i na thangṭhatnak cu hla in ka sak lai. ⁵⁰ Pathian nih a siangpahrang cu teinak nganpi a ka pek; a fekmi a dawtnak kha a thimmi keimah David le Ka tefa hna cungah zungzal in a langhter.

¹ Van nih khin Pathian sunparnak a langhter i a tuahmi thil kha a kan hmuhsak. ² Chun nih a hun changtu chun sinah khan a chim i zan zong nih a hun changtu zan sinah khan a nolh ve. ³ Bia siseh holh siseh an hmang lo, aw thawng zong zeihmanh theih a um lo; ⁴ asinain an aw cu vawlei khuazakip ah a thang i an bia cu vanhramdeng a phan. Bawipa nih ni cu van ah khin thlam a sakpiak i ⁵ nupi ṭhi tlangval a inn in a hung chuah bantuk khin a hung chuak, tlik aa zuammi tlik zuamnak i an hung chuah bantuk khin a hung chuak. ⁶ Vanhramdeng khattelei khin aa thawk i khattelei ah a kal. A linhnak in aa thup khomi thil zeihmanh an um lo. ⁷ Bawipa phung cu a ṭhat a tling, nunnak thar petu a si. Bawipa nawlbia cu bochan awk a tlak, fimnak a baumi fimnak petu a si. ⁸ Bawipa phunglam cu ahmaanmi an si, cu phunglam a zulmi cu an lung aa lawm. A nawlbia cu dinnak leiah a tlingmi an si i hngalhthiamnak lungthin pe khotu an si, ⁹ Bawipa biak cu a ṭha, cu biaknak cu zungzal in a hmun lai. Bawipa biakhiahnak cu an ding, zungzal in ahmaanmi an si. ¹⁰ Sui nakin duh deuh awk an si, sui thiang bik phun nak hmanh in duh deuh awk an si, Khuaihliti nakin an thlum deuh, khuaihliti thiang bik nakin an thlum deuh. ¹¹ Na sal hi hngalhnak an ka pek i ka zulh hna caah laksawng ka hmu. ¹² Ahohmanh amah sualnak aa hmu khomi an um lo; a thli tein ka tuahmi ka sualnak chungin ka thianh tuah. ¹³ Lenglang sualnak chung zongah ka luh nakhnga lo ka kham law cu sualnak cu keimah uktu siter hna hlah; cu tikah ṭhatnak leiah mitling ka si lai i sualnak ṭihnung chungin ka luat lai. ¹⁴ Ka kaa chung bia hna le ka lung chung ruahnak hna cu, nangmah cohlan awk tlak si ko hna seh, maw Bawipa, ka lungpi le ka tlantu.

¹ Harnak na ton ni ah Bawipa nih in let ko seh. Jakob Pathian nih in huppheng ko seh! ² A biakinn chungin bawmhnak in pe seh law Zion Tlang cungin in pe ko seh. ³ Na pekchanhmi thil vialte kha in cohlanpiak seh law na raithawinak vialte nih khan a lungtong ko seh. Selah ⁴ Na duhmi kha in pe seh law na timhmi vialte kha tlinter ko seh. ⁵ Cun teinak na hmuhmi ruangah khan lunglawm in kan au lai, teinak na hmuhmi cu kan Pathian thangṭhat in kan conglawmh lai Na halmi vialte cu Bawipa nih in pe ko seh. ⁶ Atu cu Bawipa nih a thimmi siangpahrang kha teinak a pek ti ka hngalh cang; a thiangmi a vancung khin a run leh i a ṭhawngmi a lianhngannak in teinak kha a pek. ⁷ Mi a cheu nih an raltuknak rangleng kha an i bochan; a cheu nih an rangtum kha an i bochan hna; sihmanhsehlaw kannih cu Bawipa kan Pathian ṭhawnnak kha kan i bochan. ⁸ Annih cu an ril i an tlu lai. sihmanhsehlaw kannih cu kan tho lai i, fek tein kan dir lai. ⁹ Maw Bawipa, siangpahrang cu teinak pe ko; kan auh tikah Bawipa nih a kan leh lai.

¹ Bawipa, nangmah nih thazang na pek caah siangpahrang cu aa lawm; teinak na pek caah lawmhnak in a khat. ² A duhmi kha na pek i an halnak kha na leh. Selah ³ Thluachuahnak tampi he na len i a lu ah suiluchin na chinh. ⁴ Nunnak an hal i na pek, nun sau le chan sau na pek. ⁵ Nangmah nih na bawmh caah a sunparnak cu a ngan, minthannak le lianhngannak na pek, ⁶ na thluachuahnak cu a hmuh zungzal hna i nangmah a sin i na um caah lawmhnak in a khat. ⁷ Siangpahrang nih Cung Nung Bik cu aa bochan i Bawipa dawtnak a fekmi thawngin siangpahrang a si zungzal lai. ⁸ Siangpahrang nih a ral kha a tlaih dih hna lai i a huatu vialte kha a tlaih dih hna lai. ⁹ A hung chuah tikah meizik bantukin a hrawh dih hna lai. Bawipa nih a thinhun in a kangh dih hna lai i mei nih a kangh dih hna lai. ¹⁰ Siangpahrang nih an fale kha a thah dih hna lai i an tefa kha a nawn dih hna lai. ¹¹ A cung i ṭhat lonak tuah kha an i tim lai i khua an khang lai, sihmanhsehlaw an khuakhanmi le an timhnak cu an tling kho lai lo. ¹² A thal in a kah hna lai i an i mer lai i an thi lai. ¹³ Bawipa, na ṭhawnnak he ra tuah. na ṭhawnnak cu hla in kan thangṭhat lai.

¹ Ka Pathian, ka Pathian, zeicahdah na ka hlawt? Ka bawm ko sawh, tiah fak piin ka au, sihmanhsehlaw bawmhnak cu a ra hlei lo. ² Chun ah nangmah cu kan auh, maw ka Pathian, sihmanhsehlaw na ka let lo; zan zongah kan auh, sihmanhsehlaw dinh ka hmu kho hlei lo. ³ Sihmanhsehlaw nangmah cu Israel Mi Thiang, Israel mi nih an thangṭhatmi na si i na bawiṭhutdan cungah khan na ṭhu. ⁴ Kan pupa nih an in bochan, nangmah cu an in bochan i na khamh hna. ⁵ Nangmah kha an in auh i ṭih awk chungin an luat, nangmah kha an in bochan i na khel hna lo. ⁶ Sihmanhsehlaw kei cu minung ka si ti lo, cangcel ka si ko cang; mi vialte nih an ka serhsat i an ka nihsawh. ⁷ A ka hmumi paoh nih capo ah an ka saih, an lei an ka chakhnawh i an lu an ka thinhnawh. ⁸ An i thawh i, "Bawipa naa bochan ṭung, zeicahdah an khamh kun lo? Bawipa nih an dawt ahcun, zeicahdah an bawmh kun lo?" an ti. ⁹ Him tein a ka chuahtertu cu nangmah na si i bawhte ka si lioah ṭha tein a ka zohkhenhtu cu nangmah na si. ¹⁰ Ka chuah ri in nangmah cu kan bochan zungzal i ka chuah ri in ka Pathian na si zungzal ko. ¹¹ Hung ka hlaat sawh hlah! Harnak nih a ka naih i a ka bawmtu ahohmanh an um lo. ¹² Ka ral nih cawtum bantukin an ka kulh, Bashan ram cawtum ṭihnung pipi bantuk nih khan an ka kulh. ¹³ Chiandeih bantukin an kaa an ka anhnawh, an awn i an kaa balh hiamhuam in an i an. ¹⁴ Ka thazang a dih cang, vawlei i thletmi ti bantukin a dih cang. Ka ruh vialte kha ka hliahhlok in an pong dih, ka lung cu ka chungah a timi khuailul bantuk a si. ¹⁵ Ka hrom cu leidip ro in a ro, ka lei cu ka dang cunglei ah aa beh. Leidip lak i hung thi dingah na ka kaltak. ¹⁶ Miṭhalo bu nih an ka kulh, uico run bantukin an ka zuanhnawh; ka kut le ka ke ah an ka seh. ¹⁷ Ka ruh vialte an lang dih. Ka ral nih khan an ka zoh i an di a riam; ¹⁸ ka hnipuan kha an i phaw i ka puan caah khan voihfung an zuh. ¹⁹ Ka hlaat sawh hlah, maw Bawipa ! Khulrang in ra law ka bawm tuah, maw ka Khamhtu! ²⁰ Vainam chungin ka khamh law kha uico hna sin khan ka nunnak cu khamh ko, ²¹ Kha chiandeih hna sin khan ka khamh ko; kha cawtum hrang hna hmaiah khan kei cu zeihmanh a tuah khomi ka si lo. ²² Na tuahmi kha ka mi cu ka chimh hna lai, an i pumhnak ah kan thangṭhat lai. ²³ Annih cu ka thawh hna lai i, "Bawipa sal hna, Bawipa cu thangṭhat tuah u! Jakob tefa hna, amah cu upat tuah u. Israel mi hna, amah cu bia tuah u. ²⁴ Sifakmi kha anih nih cun a hrelh hna lo i an nganfahnak kha zeirello in a um lo; annih kha a hlaat hna lo i bawmhnak hal in an aunak kha a leh hna," ka ti lai. ²⁵ Aa pummi dihlak hmaiah, nangmah cu na tuahmi ruangah kan thangṭhat lai; nangmah nawl zulmi an dihlak hmaiah kaa kammi raithawinak kha kan pekchanh lai. ²⁶ Sifakmi nih an duh zat in an ei lai, Bawipa sinah a rami nih Bawipa cu an thangṭhat lai. Zungzal in thluachuak in um ko hna seh. ²⁷ Miphun vialte nih Bawipa cu an hngalh camcin lai, vawleicung khuazakip in amah leiah an i mer lai; miphun zakip nih an biak lai. ²⁸ Bawipa cu siangpahrang a si i amah nih miphun vialte cu a uk hna. ²⁹ Miporhlaw vialte kha a hmaiah an kun lai, a thi khomi minung, a thi ding a si komi vialte hna kha a hmaiah an kun lai. ³⁰ Hmailei chan mi nih a rian an ṭuan lai; a ra lai ding chan sinah Bawipa kong cu mi nih an chim lai. ³¹ A chuak rih lomi minung kha, "Bawipa nih mi a khamh hna," tiah an chimh hna lai.

¹ Bawipa cu tuukhal bantukin a ka vengtu a si, ka herhmi vialte kha a ka pek dih. ² Ramhring lakah a ka bawhter, dinh hmun ti pawngah a ka hruai. ³ Thazang thar kha a ka pek i a rak ka kamh bantukin ahmaanmi lam ah a ka hruai. ⁴ A thuk bikmi muihnak horkuang chungin kal hmanh ning law, Bawipa, zeihmanh ka ṭih lai lo, zeicahtiah nangmah nih na ka umpi. Na ṭhiangṭhunh le na tanbo nih ka hna an ka ngamter. ⁵ Ka ral hna hmaika ah rawl na ka dangh, ka lu ah chiti na ka toih i ka hrai cu a liam in a liam. ⁶ Na ṭhatnak le na dawtnak nih ka nun chung vialte an ka umpi lai i na inn cu a zungzal in ka inn a si lai.

¹ Vawlei le a chung i a ummi thil vialte hi Bawipa ta an si, vawlei le a cung i a ummi minung vialte zong hi amah ta kan si dih. ² Rili cungah vawlei cu a dirter i a hram cu rili thuk chungah khan a bunh. ³ Bawipa tlang ah ahodah a kai kho lai? A biakinn thiang chungah ahodah a lut kho lai? ⁴ Tuahnak le lungthin in a thiang i siasal kha a bia lo i hlennak biakam a tuah lomi kha an kai kho lai i an lut kho lai. ⁵ Bawipa nih thluachuah a pek hna lai i annih a khamhtu hna Pathian nih, nan sual lo, a ti hna lai. ⁶ Cu bantuk mi cu Pathian sin i a ra khomi an si, Jakob Pathian hmaika i a chuak khomi an si. Selah ⁷ Kutka hna, kau piin i hung u, zungzal in a ummi innka hna, kau piin i hung u; a liannganmi siangpahrang cu a lut lai. ⁸ A liannganmi siangpahrang cu ahodah a si? A liannganmi siangpahrang cu a ṭhawng i a lian a nganmi, raltuknak hmun in teitu a simi Bawipa kha a si. ⁹ Kutka hna kau piin i hung u, zungzal hmunmi innka hna, kau piin i hung u; a liannganmi siangpahrang cu a lut lai. ¹⁰ A liannganmi siangpahrang cu ahodah a si? Amah cu ralkapbu Bawipa, a liannganmi siangpahrang kha a si! Selah

¹ Maw Bawipa, nangmah sinah thla ka cam, ka Pathian, nangmah cu kan bochan. ² Sungh ningzahnak chung khan ka khamh law ka ral cu ka cungah an di riamhter hna hlah. ³ Nangmah an bochanmi cu an sung lo i, asinain nangmah doh ah a khul a rangmi cu sunghnak kha an phan. ⁴ Maw Bawipa, na lam kha ka cawnpiak hna law ka hngalhter hna. ⁵ Nangmah cu ka khamhtu na si caah na biatak ningin nun cu ka cawnpiak tuah. Chun nitlak in nangmah kha kan bochan. ⁶ Maw Bawipa, hlan piin ka cungah na rak langhter tawnmi na dawtnak fek le na zaangfahnak cu philh hna hlah. ⁷ Ka tlanval lio ka sualnak le ka palhnak kha ka ngaithiam ko hna. A fekmi na dawtnak le na ṭhatnak ruangah keimah cu ka philh hlah, Maw Bawipa ⁸ Bawipa cu a ding i a ṭha: misual mi kha an zulh awk a simi lam cu a cawnpiak hna. ⁹ Mi toi i aa dormi kha lamding in a hruai hna i a duhnak kha a cawnpiak hna. ¹⁰ A biakam le nawlbia a zulmi vialte cu, dawtnak in a hruai hna i zumhawktlak tein a kalpi hna. ¹¹ Maw Bawipa, ka sualnak cu zeitluk hmanh in ngan seh law, na min ruangah ka ngaithiam ko. ¹² Bawipa nawl a zulmi nih an zulh awk hnga lam kha an hngalh lai. ¹³ Nun nuam tein an um lai i an fale cu hi ram chungah hin him tein khua an sa lai. ¹⁴ Bawipa cu a nawl a zulmi hna hawikom a si i a biakam kha a cawnpiak hna. ¹⁵ Bawipa cu kaa bochan zungzal i thil ṭihnung chungin a ka chuah. ¹⁶ Maw Bawipa, keimah lei hoi law, ka zaangfah tuah, zeitintiah ka um a har i ka thazang a der. ¹⁷ Ka lung retheihnak vialte cu ka chawng law ka harnak dihlak chungin ka khamh tuah. ¹⁸ Ka retheihnak vialte le ka innak vialte kha ka ruahpiak hna law Ka sualnak vialte cu ka ngaithiam ko hna. ¹⁹ Ka ral vialte hi zoh tuah hna, zeitluk in dah an ka huat hi hmu tuah. ²⁰ Ka huppheng law ka khamh tuah, himnak hmuh duh ah nangmah cu kan fuh caah mualpho in ka umter sawh hlah. ²¹ Nangmah kha kan bochan caah ka ṭhatnak le ka lih chim lonak nih ka huppheng ko hna seh. ²² Maw Pathian, na mi cu kan harnak chung hin kan khamh ko!

¹ Bawipa, nangmah kha ka lung a dih-umnak in kan bochan i a dingmi thil kha ka tuah caah, misual lo ka sinak kha ka thanhpiak tuah. ² Ka hneksak law ka hlathlai cikcek tuah, Maw Bawipa, ka lung duhnak le ruahnak hi zoh tuah hna. ³ A fekmi na dawtnak nih lam a ka hmuhsak i zumhawktlak na sinak nih a ka hruai zungzal. ⁴ Hlen hmangmi kha ka kom hna lo i mihrokhrawl zong kha ka kom hna lo. ⁵ Miṭhalo bu kha ka huat hna i ṭhat lonak a tuahmi kha ka hrial hna. ⁶ Maw Bawipa, ka sual lo langhnak caah ka kha kaa ṭawl i nangmah biak awkah na biakṭheng velchum ah kaa chawk. ⁷ Lunglawmhnak hla kha ka sa i khuaruahhar thil na tuahmi vialte kha ka chim hna. ⁸ Bawipa, na umnak inn kha ka tlaihchan i na sunparnak a umnak hmun kha ka duh. ⁹ Misual hna sinah ka thah chih hlah, lainawngmi hna sinah ka hlonh chih hlah — ¹⁰ annih cu ṭhat lonak kha zungzal in a tuah i nawhthuh pek aa tim zungzalmi an si. ¹¹ Kei tu cu ahmaanmi thil kha ka tuah; ka zaangfah law ka khamh tuah. ¹² Him tein hmun rawn ah ka dir i zapi pumhnak ah Bawipa cu ka thangṭhat!

¹ Bawipa cu ka ceunak le ka khamhnak a si; ahohmanh ka ṭih hna lai lo. Bawipa cu a ka hupphengtu ralhruang a si, ka thin a phang lai lo. ² Miṭhalo nih an ka doh i thah an ka zalh tikah, an ril tawn i an tlu tawn. ³ Ralkapbu nganpi nih ka kulh hna hmanh seh law ka thin a phang lai lo; ka ral nih ka doh hna hmanh seh law Pathian cu kaa bochan ṭhiamṭhiam ko lai. ⁴ Bawipa cu thil pakhat ka hal, ka duhmi thil cu pakhat lawnglawng a si ko; cucu ka nun chung vialte Bawipa inn chung i um le a ṭhatnak kha khuaruahhar in zoh le amah kha lam ka hruai tuah tiin hal cu a si. ⁵ Harnak caan ah him tein a thla tangah a ka dorter; a biakinn chungah him tein a ka chiah i a sangmi lungpi cungah a ka chuan. ⁶ Cucaah ka velchum i a ummi ka ral cu ka tei hna lai. Lunglawmhnak au thawng he a biakinn chungah ka raithawinak cu ka pekchanh lai; hla ka sa lai i Bawipa cu ka thangṭhat lai! ⁷ Bawipa, nangmah kan auh tikah ka bia ka theihpiak tuah, ka zaangfah law kan halnak cu ka let tuah. ⁸ "Ka sinah ra tuah," tiah na ti. Bawipa, na sinah ka ra lai; ⁹ keimah cu ka thuhtak sawh hlah. Ka cungah na thinhung hlah, na sal hi ka ṭhawl sawh hlah. Maw Pathian, ka Khamhtu, nangmah cu a ka bawmtu na si, ka kaltak hlah, ka chia ta sawh hlah. ¹⁰ Ka nu le ka pa hmanh nih khin hei ka hlaw hna seh law, Bawipa nih cun a ka zohkhenh ṭhiamṭhiam ko lai. ¹¹ Maw Bawipa, ka ral an um caah hin, a himmi lam in ka kalpi law na duhnak kha ka cawnpiak ko. ¹² Lih le hro in a ka tlerh lengmangmi ka ral hna lakah hin ka chia ta hlah. ¹³ A mi hna cung i Bawipa a ṭhatnak hi ka hmuh hrimhrim lai tiah ka zumh ko. ¹⁴ Bawipa cu i bochan u! Zumhnak ngei u, nan lung dong hlah u! Bawipa cu i bochan ko u!

¹ Maw Bawipa, nangmah cu kan auh, ka himnak lungpi, ka aunak cu ka theihpiak tuah. Na ka leh lo ahcun mithi khua i a kalmi hna bantuk ka si ve sual lai. ² Nangmah bawmhhal awkah ka au i na biakinn thiang lei hoih in ka kut ka hler tikah ka aunak kha ka theihpiak tuah. ³ Miṭhalo hna, thil ṭhalo a tuahtu hna sinah khan sual ka phaw hlah — annih cu a bia a thlum ṭung i an lungthin vial huatnak in a khatmi an si. ⁴ An tuahmi thil ruangah khan dantat hna, thil ṭhalo an tuahmi vialte ruangah khan, dantat hna. An rianṭuanning in lehrul ko hna hmuh awk an i tlakmi kha pe ko hna. ⁵ Bawipa nih a tuahmi thil kha zeihmanh ah an rel lo i a sermi thil zong kha zeihmanh ah an rel lo; cucaah dan a tat hna lai i zungzal in a hrawh hna lai. ⁶ Bawipa cu thangṭhat tuah u; bawmh hal in ka aunak kha a theih cang! ⁷ Bawipa nih a ka huh i a ka phenh; amah cu kaa bochan ko. A ka bawmh i kaa lawm, cucaah amah thangṭhatnak hla ka sa. ⁸ Bawipa nih a mi kha a huhphenh hna; a thimmi a siangpahrang kha a chanh i a khamh. ⁹ Na mi cu khamh ko hna, Maw Bawipa ; nangmah ta a simi cu thluachuah pe ko hna. An tuukhal si law zungzal in veng ko hna.

¹ Nannih pathian hna, Bawipa cu thangṭhat ko u; a sunparnak le a lianhngannak cu thangṭhat u. ² Bawipa min sunglawi cu thangṭhat u, A Thiangmi Bawipa cu a langh tikah a hmaiah kun u. ³ Bawipa aw cu rili cungah a thang, a sunglawimi Pathian cu khuari bantukin a ri i a aw cu rili cungah khan a thang dih. ⁴ Bawipa aw cu a than khawh chung le a ṭhawn khawh chungin a thang! ⁵ Bawipa aw nih cun sidar thing kha a khiah dih hna, Lebanon tlang sidar hmanh kha a khiah dih hna. ⁶ Lebanon tlang cu cawfa bantukin a pehter hna i Hermon Tlang cu fungtum no bantukin a choiter. ⁷ Bawipa aw nih ṭek kha a tlakter. ⁸ A aw nih thetse ram kha a hninh hna, Kadesh thetse ram kha a hninh in a hninh. ⁹ "Pathian cu thangṭhat ko u," tiin a biakinn chungah an au lioah, Bawipa aw nih cun sakhi kha fa a hrinter hna i thingkung kha an hnah vialte a choih dih hna. ¹⁰ Rili thuk pipi kha Bawipa nih a uk hna, siangpahrang bantukin zungzal in a uk hna. ¹¹ Bawipa nih a mi cu thazang a pek hna i thluachuah daihnak a pek hna.

¹ Maw Bawipa, nangmah nih na ka khamh i ka ral kha ka cungah diriam in na umter hna lo caah kan thangṭhat. ² Bawipa, ka Pathian, nangmah sinah bawmhnak hal in ka au i na ka damter. ³ Mithikhua in na ka kirter ṭhan. Khor Thukpi chung i a vung kalmi hna sinah kaa tel ve nain, ka nunnak cu na ka pek ṭhan. ⁴ Nannih a mithiang hna, Bawipa cu thangṭhat u; A Thiangmi Pathian nih a tuahmi kha philh hlah u law amah kha lawm u. ⁵ A thinhun cu caan tawite chung lawng a si; a ṭhatnak tu nih cun chantlung a nguh. Zan ah mitthli tlaknak um hmanh seh law zinglei ah cun lawmhnak a ra ṭhan ve. ⁶ Him tein ka um kha ka hngalh i "Ahohmanh nih an ka tei bal lai lo," ka ti. ⁷ Bawipa, ka cungah na ṭha ko; tlang cungah a ummi ralhruang a him bantukin him tein na ka umter. Sihmanhsehlaw na ka thuhtak tikah ṭihnak in ka khat. ⁸ Bawipa, nangmah cu kan auh, a bawm ko sawh, tiah kan nawl. ⁹ Ka thihnak cun zei ṭhatnak dah a chuak lai? Thlan i ka va kalnak cun zei miaknak dah a chuak lai? Mithi nih an in thangṭhat khawh maw? A dong lomi na ṭhatnak cu an chim khawh maw? ¹⁰ Maw Bawipa, Ka bia cu ka theihpiak law ka zaangfah tuah! Bawipa, ka bawm tuah! ¹¹ Ka ngaihchiatnak cu lunglawmh lamnak ah na ka thlenpiak cang, ka mithi ngaihnak puan cu na ka lakpiak i lunglawmhnak puan kha na ka pek. ¹² Cucaah dai tein ka um lai lo; nangmah cu kan thangṭhat ko lai. Bawipa, nangmah cu ka Pathian na si, a zungzal in kan thangṭhat lai.

¹ Himnak hmuh duh ah kan fuh, Maw Bawipa, ka sunghter sawh hlah. Nangmah cu a dingmi Pathian na si, ka khamh ko sawh, tiah kan nawl. ² Ka thlacamnak cu ka theihpiak law ka khamh ko sawh; ka himnak lungpi si law ka khamhnak ding caah a fekmi ralhau si ko. ³ Nangmah cu ka lungpi le ka ralhruang na si, bia na ka kamh bangkhan lam ka hmuhsak law ka hruai tuah. ⁴ An ka chiahhnawhmi rap khan ka veng ko; nangmah cu ka himnak hmun na si. ⁵ Nangmah kut chungah ka thlarau ka chiah, Bawipa, nangmah nih na ka khamh lai, nang cu zumhawktlakmi Pathian na si. ⁶ Siasal santlailo a biami cu na huat hna, asinain kei cu nangmah kha kan bochan. ⁷ A fekmi na dawtnak ruangah ka lung aa lawm lai i ka tha a nuam lai. Ka temhinnak kha na hmuh i ka harnak kha na hngalh. ⁸ Ka ral hna kut chungah na ka phakter lo, himte tu in na ka zohkhenh. ⁹ Harnak chung i ka um caah, Maw Pathian ka zaangfah ko; ka ṭah tuknak ah ka mit zong a phing dih i ka tha zong a dih cikcek cang. ¹⁰ Ka nun chung kum hna cu ngaihchiatnak in a liam i hrum ainak in an khat, Harnak tam tuk ka inmi ruangah ka thazang cu a lo dih i ka ruh hna cu an rop thluahmah. ¹¹ Ka ral nih capo ah an ka saih, ka innpa nih an ka nihsawh; a ka hngalmi nih an ka ṭih i lam i an ka hmuh tikah an ka lektak. ¹² Rak thi cang ning law cu bang, mi vialte nih an ka philh i hlonhmi thil bantuk ka si. ¹³ Ka ral tampi nih a thli tein an ka congoih, ṭihnak nih a dum in a ka dum. ka loh nakhnga ding khua kha an khan i keimah thahnak ding khua kha an ruat lengmang. ¹⁴ Sihmanhsehlaw kaa bochanmi cu nangmah na si, maw Bawipa ; nangmah cu ka Pathian na si. ¹⁵ Ka caan cu na kut chungah a um dih, ka ral hna kut chungin ka khamh law a ka hremtu hna kut chungin ka khamh tuah. ¹⁶ Kei cu na sal ka si, ka cungah zaangfahnak ngei ko; a fekmi na dawtnak ruangah ka khamh tuah! ¹⁷ Maw Bawipa, nangmah kha kan auh; ka sunghter sawh hlah! Miṭhalo cu sung hna seh, mithikhua ah dai tein um hna seh. ¹⁸ Lihchimmi kha daihter hna — annih cu miporhlaw, miruamkai, bia songpuam in miding mi kong ceih a hmangmi an si. ¹⁹ Nangmah an ṭihtu hna caah na chiahmi thil ṭha cu zeitluk in dah khuaruahhar an si. Mi kip hmuh ah na tuahmi thil ṭha cu zeitluk in dah khuaruahhar a si, nangmah an bochanmi cu na huhphenh hna. ²⁰ Mi nih thah an timh hna caah na thlam chungah khan na thuh hna i an ral pawl nih an nihsawh khawh hna nakhnga lo na thla tangah na chiah hna. ²¹ Bawipa cu thangṭhat ko u! Ka ral nih an ka kulh i an ka tuk tikah a dawtnak cu khuaruahhar in ka cungah a langhter. ²² ka thin a phang i na sinah umter ti loin na ka dawi cang rua tiah ka ruah. Sihmanhsehlaw nangmah sinah bawmhnak hal in ka au tikah ka aunak kha na rak theih. ²³ Nannih a mithiang vialte hna, Bawipa cu daw ko u! Bawipa nih zumhawktlakmi cu a huhphenh hna, sihmanhsehlaw miporhlaw cu fak piin dan a tat hna. ²⁴ Bawipa cungah a ruahchannak a chiami vialte hna, lungṭhawng le thazang ṭhawng in um ko u!

¹ A sualnak ngaihthiam a si i a palhnak maimilh a simi cu a lung aa lawm. ² Bawipa nih, sual a phawt lomi le a lung chungah hlennak a ngei lomi cu a lung aa lawm. ³ Ka sualnak kha ka phuan hna lo tikah chun nitlak in ka ṭap. ⁴ Bawipa, chunzan in dan na ka tat i ka thazang cu a dihlak in a zor, ṭhal ni lin nih khua a roter bantuk khin ka thazang cu a ro dih. Selah ⁵ Khi tikah ka sualnak cu nangmah sinah ka phuan hna; ṭhat lonak ka tuahmi cu ka thup hna lo. Nangmah sinah khan ka phuan dih hna i ka nawlbuarnak vialte cu na ka ngaihthiam dih. Selah ⁶ Cucaah zumhawktlak a simi vialte hna nih cun, herhnak caan an ton tikah na sinah thla an cam awk a si; tilian a tlun tikah a phan hna lai lo. ⁷ Nangmah cu kaa thuhnak hmun na si, harnak chungin na ka khamh lai. Nangmah nih na ka huhphenh caah fak piin na khamhnak cu hla in ka thangṭhat. Selah ⁸ Bawipa nih, "Na zulh awk hnga lam kha kan hmuhsak lai, kan cawnpiak lai i lungthin kan cheuh lai. ⁹ Na duhnak zulhter awkah chak le kaahlawmh a haumi rang le laa bantukin hrut hlah," a ka ti. ¹⁰ Miṭhalo nih cun temhnak an in a hau ko lai, sihmanhsehlaw Bawipa aa bochanmi cu a dawtnak fek nih khan a huhphenh hna. ¹¹ Bawipa nih a tuahmi thil ruangah, miding vialte hna, i lawm u law thanuam in um tuah u. Amah a nawl a zulmi vialte hna, lunglawm in au tuah u!

¹ Miding vialte hna, Bawipa nih a tuahmi thil ruangah i lawm tuah u; amah a nawl a zulmi vialte hna, amah cu thangṭhat tuah u. ² Tingtang in Bawipa cu thangṭhat tuah u, hri hra ngeimi tingtang in thangṭhat u. ³ Hla thar in thangṭhat u, dawh ngaiin hri hra tingtang cu tum u law fak piin hla sa u. ⁴ Bawipa bia cu biatak an si, a ṭuanmi rian cu zumhawktlak an si dih. ⁵ Bawipa nih dinnak le ṭhatnak cu a duh; vawlei cu a fekmi a dawtnak in a khat. ⁶ Bawipa nih a nawlbia in van khi a ser hna, ni le thlapa le arfi khi a bia in a ser hna. ⁷ Rili vialte kha hmunkhat ah a pumh hna; a thukmi rilipi cu thil khonnak inn chungah a khumh hna. ⁸ Vawlei vialte, Bawipa cu ṭih tuah; vawleicung mi vialte hna, Bawipa cu ṭih tuah u. ⁹ Bia a chim i vawlei cu a hung um, nawl a pek i zeizong vialte an hung chuak. ¹⁰ Miphun dang nih tuah an i timhmi kha Bawipa nih pakpalawng ah a canter i tling kho loin a umter hna. ¹¹ Sihmanhsehlaw amah khuakhanmi cu zungzal in a hmun i amah timhmi cu zungzal in a fek. ¹² An Pathian ah Bawipa a simi miphun cu lunglawmmi miphun an si, Bawipa nih a mi ah a thimmi hna cu lunglawmmi an si. ¹³ Bawipa nih vancung khin a run kan zoh i minung vialte hi a kan hmuh dih. ¹⁴ A uknak hmun khin a run kan zoh i vawleicung mi vialte hi a kan hmuh dih. ¹⁵ Kan ruahnak vialte hi amah sermi an si dih i kan tuahmi vialte cu a hngalh dih. ¹⁶ Siangpahrang nih a ral a tei hna cu ralkapbu ṭhawngmi a ngeih caah a si lo ralkap nih a ral a tei cu a thazang a ṭhawn caah a si lo. ¹⁷ Ral teinak caah ral tuknak rang hi san an tlai lo. a nganmi an ṭhawnnak nih a khamh kho hna lo. ¹⁸ Bawipa nih amah a ṭihmi cu a zohkhenh hna i a fekmi a dawtnak aa bochanmi cu him tein a umter hna. ¹⁹ Thihnak chungin a khamh hna i mangṭam tlun caan ah a nunter hna. ²⁰ Bawipa cu kan i bochan, amah cu a kan bawmtu le kan phaw a si. ²¹ Amah thawngin kan lung aa lawm i a min thiang cu kan i bochan. ²² Maw Bawipa, nangmah cu kan in bochan caah, a fekmi na dawtnak cu kan sinah um ko seh.

¹ Bawipa cu a zungzal in ka lawmh lai, amah thangṭhat cu a ngol in ka ngol lai lo. ² A tuahmi thil ruangah khan ka thangṭhat lai; hremnak a ingmi nih thei u law i lawm tuah u. ³ Bawipa lianhngannak cu chim ṭi u si law a min cu thangṭhat ti u sih. ⁴ Bawipa sinah cun thla ka cam i a ka leh; ka ṭihmi thil vialte in a ka luatter. ⁵ Hremnak a ingmi nih amah cu an zoh, zeitikhmanh ah a deuh hna lai lo. ⁶ Santlai lomi nih amah cu an auh i a leh hna; an harnak chungin a khamh dih hna. ⁷ Bawipa a ṭihmi cu a vancungmi nih khan an zoh hna i ṭihnak chungin an luatter hna. ⁸ Bawipa hi zeitluk in dah a ṭhat ti kha nanmah tein va kawl cio hmanh u, amah chungah him tein a ummi cu a lung aa lawm. ⁹ A mi vialte hna, Bawipa cu ṭih tuah u, amah a ṭihmi nih cun an herhmi thil vialte kha an hmuh. ¹⁰ Chiandeih hmanh hi rawl hmu loin an um tawn i rawlṭam in an vak tawn, sihmanhsehlaw Bawipa nawl a zulmi cu zeihmanh an baumi a um bal lo. ¹¹ Ka hawile mino hna, ra u law, ka bia ngai tuah u; Bawipa ṭihzah ning cu kan cawnpiak hna lai. ¹² Nun nuam tein nun le chan saupi le lunglawm in nun cu nan duh maw? ¹³ Nan duh ahcun, bia ṭhalo chim kha i sum u, lih kha chim hlah u. ¹⁴ Ṭhat lonak kha hrial u law ṭhatnak kha tuah u; daihnak kha duh u law nan hmuh khawh nakhnga fak piin i zuam u. ¹⁵ A dingmi cu Bawipa nih a zohkhenh hna i an aunak kha a theih; ¹⁶ sihmanhsehlaw ṭhat lonak a tuahmi kha cu a ral hna i cucaah anmah mi lila hmanh nih khan an philh hna. ¹⁷ Miding mi nih cun Bawipa kha an auh i an bia kha a ngaihpiak hna, an harnak chungin a chuah hna. ¹⁸ Lung a dongmi kha Bawipa nih a umpi hna i ruahchannak a ngei lomi kha a khamh hna. ¹⁹ Miṭha nih harnak tampi a in tawn, sihmanhsehlaw harnak a inmi chung khan Bawipa nih a khamh; ²⁰ Bawipa nih him tein a zohkhenh i a ruh pakhat hmanh a kiak lo. ²¹ Miṭhalo cu ṭhat lonak nih a thah hna lai, miding mi a huami hna cu dantatnak an ing lai. ²² Bawipa nih a sal cu a khamh hna lai; amah tangah aa dormi cu him tein an um lai.

¹ A ka dohmi kha do ve hna law a ka tumi kha tu ve hna, Maw Bawipa ² Na phaw le na ralthuam in i thuam law keimah bawmh ah i thawh tuah. ³ A ka dawitu hna kha na fei le na hreitlung in rak kham hna. Ka Khamhtu na si kha nangmah nih keimah cu ka hngalhter. ⁴ Thah a ka zalmi kha sung hna seh law ningzahnak phan hna seh. Keimah thah awkah khua a khangmi hna kha an khuakhanmi cu pakpalawng ah cang seh law ⁵ thli nih a choihmi capawl bantuk si hna seh, Bawipa vancungmi nih a dawimi bantuk si hna seh. ⁶ An lam cu mui in nal seh law Bawipa vancungmi nih cun deng len hna seh. ⁷ Sullam zeihmanh um loin keimah foihnak ding caah rap an chiah i keimah tlaknak ding caah khor thukpi an cawh. ⁸ Asinain anmah nih an hngalh hlanah rawhnak nih a phanh hna lai i anmah chiahmi rap ah khan an i foih lai, anmah cawhmi khor ah khan an tla lai. ⁹ Cu tikah Bawipa ruangah cun kei cu kaa lawm lai i a ka khamh caah ka tha a nuam lai. ¹⁰ Ka lungthin dihlak in Bawipa cu ka thawh lai i, "Nangmah bantuk ahohmanh an um lo! A dermi kha a ṭhawngmi hna kut chungin na huhphenh hna i sifakmi le retheimi kha mi hrem mi hrem hmangmi hna kut chungin na khamh hna," ka ti lai. ¹¹ Miṭhalo nih sual an ka phawt i ka hngalh hrimhrim lomi sualnak kha an ka puh. ¹² Ṭhatnak cu chiatnak in an ka lehrulh i ka hnabei a dong cikcek. ¹³ Sihmanhsehlaw annih an zawt tu ah cun ngaihchiatnak thuam kaa hruk i rawl hmanh ka ei lo; ka hawikom ca le ka unau caah lu fakpi khun in thla ka cam tawn bantukin, annih ca zongah cun ka cam. ¹⁴ A nu thih a ngaimi bantukin lukhun le ngaihchia in kaa chawk. ¹⁵ Harnak ka ton tikah an i lawm i an ka dum i nihchuak ah an ka saih; khuai nih khan heh tiah ngol loin an ka tuk. ¹⁶ Harnak kha an ka phakter i an ka nihsawh, an hacang lawng an ka rialhnawh. ¹⁷ Bawipa, zei can dah na zoh ko rih hna lai? An kut chungin ka chuah law hi chiandeih hna kut chung hin ka nunnak khamh ko. ¹⁸ Cun mizapi pumhnak ah kan lawmh lai i mizapi hmaiah cun kan thangṭhat lai. ¹⁹ Khi milihchim hna, ka ral hna khi, ka sungh ruangah an di riamhter hna hlah; sullam um loin a ka huami hna khi ka ngaihchiatnak an hmuh ruangah mit diriam in umter hna hlah. ²⁰ Hawikom bantukin bia an chim lo, daihnak a duhmi hna kha lih a phunphun an puh lehlam hna. ²¹ Annih nih an au i, "Na tuahmi kha kan hmuh," an ti. ²² Sihmanhsehlaw Bawipa, nangmah nih hihi cu na hmuh cangmi a si. Cucaah dai tein um hlah, Maw Bawipa ; lamhlatpi ah um sawh hlah. ²³ Bawipa, i hlau law ka chanh tuah; ka Pathian, tho law ka bia ka chimpiak tuah. ²⁴ Bawipa, nang cu na ding, cucaah misual lo ka si kha ka thanhpiak tuah; ka Pathian, ka ral cu ka cungah diriam in umter hna hlah. ²⁵ "A cungah tlung seh, ti kan duhmi te kha a cungah a tlung cang," titer hna hlah. "Amah cu kan tei diam cang," titer hna hlah. ²⁶ Ka nganfah innak i a di a riammi kha sung cikcek hna seh law khuaruahhar vansang au in um hna seh; amah nakin kan ṭha deuh aa timi kha ningzahnak le hmaichiatnak nih zual hna seh. ²⁷ Ka luat caah a lung aa lawmmi cu lawmhnak in au hna seh law, "Bawipa cu a lianngan ko, a sal nih hlawhtlinnak a hmuh i amah cu a lawmhpi," tiah chim lengmang hna seh. ²⁸ Cun na dinnak kha ka thanh lai i chun nitlak in kan thangṭhat lai.

¹ Sualnak nih miṭhalo cu a lungchung thukpi ah bia a chimh i Pathian kha a hlawt i a ṭih lo. ² Amah le amah sang tuk i aa ruah caah cun Pathian nih ka sualnak kha a hmu lai lo i sual a ka phaw lai lo tiah a ruah. ³ A kaa chuak bia cu bia ṭha lo le lih lawng an si i mifim si i thil ṭha tuah kha a ngol cang. ⁴ Ihkhun cung i a zau lio hmanh ah thil ṭha lo lawng kha a tuak, a tuahmi kha thil ṭha a um lo i thil ṭha lo kha a hua hna lo. ⁵ Bawipa, a fekmi na dawtnak cu van a tawng i zumhawktlak na sinak cu van a phan. ⁶ Na dinnak cu tlang nganpi bantukin a fek i na biakhiahnak cu rilipi bantukin a thuk. Bawipa, nangmah nih minung le saram cu na zohkhenh hna. ⁷ Maw Pathian, zeitluk in dah na dawtnak hi a sun! Na thla tangah mi nih dornak an hmuh. ⁸ Na inn in a chuakmi rawl kha duhdim tein an ei i na ṭhatnak tiva chung khan ti na pek hna. ⁹ Nang cu nunnak vialte hram na si; nangmah ceunak thawngin kannih nih ceunak kha kan hmuh. ¹⁰ Nangmah an hngalmi kha daw zungzal ko hna law a dingmi cungah khan ṭhatnak tuah zungzal ko. ¹¹ Miruamkai nih khan ka tu hna hlah seh, miṭhalo nih khan ka zamter hna hlah seh. ¹² Miṭhalo an rilhnak kha zohhmanh! Khika ah khin an ril, an tho kho ti lo.

¹ Miṭhalo hna ruangah awlokchong in um hlah, ṭhat lonak a tuahmi kha hngar hna hlah; ² a romi ramkung bantukin an lo lai i belhhring bantukin an uai lai. ³ Bawipa cu i bochan u law ṭhatnak kha tuah u; ram chungah hin um u law him tein khuasa u. ⁴ Bawipa kha i bochan u law nan lungthli tum kha an pek hna lai. ⁵ Na nunnak kha Bawipa pe tuah, amah kha i bochan law amah nih an bawmh lai. ⁶ Na ṭhatnak kha ceunak bantukin a ceuter lai i na dinnak kha chunlai bantukin a ceuter lai. ⁷ Bawipa hmaiah cun dai tein um ko law zeidah a tuah lai ti kha lungsau in hngak ko; thil ṭhalo an i tinhmi a tuah kho lengmangmi hna le an rian ṭuannak ah a hlawh a tlingmi hna kong ah zei poi loin va um ko. ⁸ Thinhung in um hlah u, hrut sual hlah u! Lung rethei in um hlah u! Cu nih cun zeihmanh an ṭhathnem hna lai lo. ⁹ Bawipa aa bochanmi cu him tein ram chungah hin an um ko lai; sihmanhsehlaw miṭhalo cu ṭhawl an si lai. ¹⁰ Luklak ah miṭhalo cu an lo ko lai, na kawl hna hmanh ah na hmu kho hna lai lo. ¹¹ Sihmanhsehlaw mi toiah aa dormi cu ram chungah hin him tein an um lai i daihnak kha tlamtling tein an hmuh lai. ¹² Miṭhalo nih miṭha hrawhnak ding khua kha a khan i a hacang a rialhnawh. ¹³ Sihmanhsehlaw Bawipa nih cun miṭhalopa cu a nihsawh men ko, zeicahtiah luklak ah a rawh lai kha a hngalh. ¹⁴ Miṭhalo nih cun an nam kha an i zuh i an likuk kha an i hruai i sifak le retheimi kha thah le miṭha mi nawn kha an duh; ¹⁵ sihmanhsehlaw anmah nam lila nih an keng ah a chunh hna lai i an likuk cu an kiak dih lai. ¹⁶ Miṭha nih a ngeihmi thil tlawmte cu miṭhalo nih a khonmi thil tampi nakin a ṭha deuh; ¹⁷ zeicahtiah miṭhalopa cu Bawipa nih a thazang a chuh lai i miṭha cu a huhphenh lai. ¹⁸ Bawipa nih a nawl a zulmi cu a zohkhenh hna i ram cu anmah ta a si zungzal lai. ¹⁹ Caan ṭhalo a tlun tikah sifah an ing lai lo, mangṭam a tlun tikah ei awk a za an ngei lai. ²⁰ Sihmanhsehlaw miṭhalo cu an thi lai; Bawipa ral cu ramlak pangpar bantuk in an lo lai; meikhu bantukin an ṭian lai. ²¹ Miṭhalo nih cun thil a cawi hna tikah a cham ṭhan ti hna lo, sihmanhsehlaw miṭha cu vel a ngei i nun a siang. ²² Bawipa nih thluachuah a pekmi cu ram ram chungah hin him tein an um lai, sihmanhsehlaw chiat a serhmi cu ṭhawl an si lai. ²³ Minung hi a kalnak ding lam a hmuhsaktu cu Bawipa a si, Amah duhnak a tuahmi cu a huhphenh hna. ²⁴ A tluk sual zongah a ril lan lo, zeicahtiah Bawipa nih a kut in a thawh ṭhan. ²⁵ Ka rak no i atu cu ka tar cang, asinain hi vialte chungah hin miṭha cu Bawipa nih a hlawt kha ka hmu bal lo i a fale zong rawl hal in an vah kha ka hmu bal lo. ²⁶ Siang tein mi kha a pek zungzal hna i a coih zungzal hna, cun a fale kha thluachuahnak an si. ²⁷ Ṭhat lonak kha mertak u law ṭhatnak kha tuah u; cun hi ram chungah hin nan um zungzal lai; ²⁸ zeicahtiah a hmaanmi thil kha Bawipa nih a duh i zumhtlak a simi a mi kha a kaltak bal hna lo. Annih cu a huhphenh zungzal hna, sihmanhsehlaw miṭhalo mi hna an tefa cu ṭhawl an si lai. ²⁹ A dingmi cu ram chungah him tein an um lai i ram cu zungzal in anmah ta a si lai. ³⁰ Mifim nih cun fimnak bia an chim i ahmaanmi bia kha an ka in a chuak. ³¹ A Pathian nawlbia kha a lung chungah aa chiah i zeitikhmanh ah a kaltak lo. ³² Miṭhalo nih cun miṭha kha aa ngiat aa ngiat i thah a zalh; ³³ sihmanhsehlaw Bawipa nih a ral kut chungah khan miṭha cu a kaltak lo, tazacuai a si zongah khan sual phawtnak a phakter lo. ³⁴ Bawipa cu i bochan u law a nawl kha zul tuah u; ram kha co awkah thazang an pek hna lai i miṭhalo cu pawnchuah an si kha nan hmuh lai. ³⁵ Miṭhalopa pakhat, mipuarhrang ngai a si i Lebanon sidar thingkung bantukin mi vialte a iap dih hna kha ka rak hmuh; ³⁶ sihmanhsehlaw tlawmpal ah khin cuka ah cun ka va kal ṭhan i cu pa cu a rak um ti lo; ka kawl len nain ka hmu kho ti lo. ³⁷ Miṭha khi zohhmanh u, miding khi zohhmanh u; daihnak mi cu tefa an ngei; ³⁸ sihmanhsehlaw misual cu hrawh an si dih, an tefa cu hloh an si. ³⁹ Bawipa nih miding cu a khamh hna i harnak caan ah a huhphenh hna. ⁴⁰ A bawmh hna i a chuah hna; annih nih huhphenhnak hmuh awkah an fuh caah miṭhalo hna kut chung khan a khamh hna.

¹ Bawipa, na thinhung hlah law, ka si hlah. Na thinhun in dan ka tat hlah. ² Dan cu na ka tat cang i na ka hrem cang; na ka tuk cikcek cang. ³ Na thin a hun caah ṭhalo tein ka zaw; ka sual ruangah ka pum cu a dihlak in a zaw. ⁴ Ka sualnak tilet chungah ka pil i ka sualnak cu an rih caah tangah an ka hnuh. ⁵ Ka hruh caah ka hma cu a thu i a man. ⁶ Ka keng zong a kul dih i ka ril ko; chun nitlak ngaihchia in ka um. ⁷ Ka tak cu fak piin a lin i zual ngaiin ka zaw. ⁸ Ka tha a dih cikcek i ka ril ko, lungrethei le sivang in ka hram. ⁹ Bawipa, ka duhmi cu na hngalh; ka hramnak vialte cu na theih dih. ¹⁰ Ka lung a tor, ka tha a dih i ka mit a maw. ¹¹ Ka hma le ka rung ruangah, ka hawi le ka innpa nih a naih hmanh an ka duh lo; ka chungkhat hmanh nih an ka hrial. ¹² Thah a ka duhmi nih rap an ka chiahhnawh i ka cungah fahnak tlunter a duhmi nih khan, kan in hloh cang lai, tiah an ka tlerh; keimah hrawhnak ding kha chun nitlak in an tim. ¹³ Hnachet bantuk ka si i khua ka thei kho lo, holh aa bantuk ka si i ka holh kho lo; ¹⁴ khua a theih lo ca i an chawnh tikah zeihmanh a let kho lomi hna bantuk ka si. ¹⁵ Bawipa, nangmah kha kan bochan; Bawipa ka Pathian, nangmah nih na ka leh lai. ¹⁶ Harnak ka in ruangah ka ral hna hi diriam in umter hna hlah, ka tluk hi an i porhlawtnak ah canter hlah. ¹⁷ Ka tlu dengmang i ka nganfahnak nih hin a ka tlaih peng ko. ¹⁸ Ka sualnak cu ka phuan hna. asinain lungrethei in ka um ṭhiamṭhiam. ¹⁹ Ka ral cu ngandam le thazang ṭhawng in an um ṭung; sullam um loin a ka huami an tam tuk. ²⁰ Ahmaanmi thil kha tuah kaa zuam caah ṭhatnak cu chiatnak in a lehrulmi pawl nih khan an ka doh. ²¹ Bawipa, ka hlawt sawh hlah, ka Pathian, ka kaltak sawh hlah. ²² Bawipa ka khamhtu, atu ah ka bawm ko!

¹ "Ka tuahmi ah khan kaa ralring lai ka lei kha sualnak ka tuahter lai lo; miṭhalo kha lamnai i an um lioah zeihmanh ka chim lai lo," ka ti. ² Holh loin ka um i bia pakhat hmanh ka chim lo, a ṭhami thil kong hmanh ka chim lo. Sihmanhsehlaw ka nganfah cu a karh chin i ³ ka lungthin cu khuaruahharnak in a khat. Ka ruah deuh paoh ah ka lungretheihnak kha a zual chin, ⁴ "Bawipa, zei can dah ka nun rih lai? Zei tikah dah ka thih lai? Zeitluk tuan ah dah ka nunnak hi a dongh lai ka chim tuah," ti hi hal loin ka um kho lo. ⁵ Ka nunnak hi zabok can men ah na ser! Nang na mit ah cun ka nun chung hi zei karlote bantuk a si ko. Minung hi voi khat thaw chem tluk men an si dih taktak ko; ⁶ thlahawm menmen an si ko. An tuahmi vialte hi pakpalawng an si dih; chaw le va kha heh tiah an khon, sihmanhsehlaw a cotu ding cu aho an si kha an hngal lo. ⁷ Cu ti a si caah cun, Bawipa, zeidah kaa ruahchan khawhmi a um? Nangmah lawnglawng hi kaa ruahchanmi na si. ⁸ Ka sualnak vialte chung hin ka khamh law mihrut nih capo ah ka sai ti hna hlah seh. ⁹ Hi tlukin nganfahnak na ka inter caah dai tein ka um lai i bia pakhat hmanh ka chim lai lo. ¹⁰ Dan cu ka tat ti sawh hlah, na dantatnak in ka thi dengmang cang. ¹¹ Minung cu a sualnak kha dantat awkah na sik tikah. a iang vialte kha a lo dih, minung hi thaw menmen a si taktak ko. Selah ¹² Bawipa, ka thlacamnak cu ka theihpiak tuah, kan nawlnak cu ka ngaihpiak ko; nangmah kan auh tikah dai tein ka umtak hlah. Ka pupa vialte hna bantukin, kei cu caan tawite chung lawng na khualpa cu ka si ko. ¹³ Thlan mual ka liam i ka um ti lo hlanah hin lunglawmhnak tlawmpalte tal ka hmuh nakhnga hnahnawk lo tein run ka umter ko.

¹ Bawipa bawmhnak cu ka hngak lengmang i a donghnak ah ka aunak cu a ngaih i a theih. ² Ṭih a nungmi khor chung khan a ka chuah. nawncek khor chung khan a ka chuah Him tein lungpi cungah khan a ka ṭhutter i fek tein a ka umter. ³ Hla thar kha a ka cawnpiak, ka Pathian thangṭhatnak hla kha a ka cawnpiak. Hi thil cu mi tampi nih an hmuh lai i Bawipa kha an i bochan lai. ⁴ Bawipa kha aa bochan i siasal leiah aa mer lo i pathian taktak a si lomi a biami hna sinah aa fon lomi cu lunglawmmi an si. ⁵ Maw Bawipa ka Pathian, nangmah nih kan caah thil tampi na tuah; nangmah bantuk ahohmanh an um lo. Nangmah nih lam ṭhaṭha tampi khua na kan khanpiak. An dihlak in chim i tim ning law a chim hmanh ka chim cawk hna hnga lo. ⁶ Raithawinak le pekchanhmi thil hi na duhmi an si lo, biakṭheng cungah a pum in khanghmi thawinak sa hi na kan halmi a si lo, kan sualnak thianhnak ca i raithawinak tuah zong hi na kan halmi an si lo, asinain nangmah nih khan na bia kan theih khawh nakhnga ding caah hna tu kha na kan pek i ⁷ cucaah cun, "Hika ah hin ka um ko; keimah cawnpiaknak ding caah na chiahmi cu Nawlbia cauk chungah an um ko. ⁸ Ka Pathian, zeitluk in dah na duhnak tuah cu ka duh! Na cawnpiaknak cu ka lung chungah kaa chiah hna," tiah kan leh. ⁹ Bawipa na mi an i pumhnak ah, na kan khamhnak thawng ṭha kha ka chim. A chim cu a ngol in ka ngol bal lai lo, ti kha na hngalh. ¹⁰ Khamhnak thawngṭha hi keimah ca lawngah kaa chiah bal lo, zumhawktlak na sinak le na kan bawmhnak hi ka chim zungzal. Na dawtnak a fekmi le zumhawktlak na sinak hi na mi vialte an i pumhnak ah chim loin ka um bal lo. ¹¹ Bawipa, ka cungah na zaangfahnak a dong lai lo ti kha ka hngalh. Na dawtnak le zumhawktlak na sinak nih him tein an ka umter zungzal lai. ¹² Harnak tam tuk nih an ka dum — a rel in rel cawk an si lo. Ka sualnak nih a ka phak cang i khua ka hmu kho ti lo; ka lu cung sam nakin ka sualnak cu an tam deuh, ka lung ṭhawnnak a dih cang. ¹³ Bawipa, ka khamh ko sawh, atu ah ka bawm ko! ¹⁴ Thah a ka zalmi kha sung cikcek hna seh law i tuai dih hna seh. Harnak ka inmi ruangah aa lawmmi cu an hnulei ah i let hna seh law ningzak in um hna seh. ¹⁵ A ka nihsawhtu pawl kha an sunghnak nih khan lungdong cikcek in umter hna seh! ¹⁶ Nangmah sinah a rami vialte cu lunglawm le thanuam in um hna seh. Na khamhnak a duhmi vialte nih, "Bawipa cu a lianngan hringhran ko," ti zungzal hna seh. ¹⁷ Kei cu ka si a fak i ka re a thei, sihmanhsehlaw Bawipa, nangmah nih na ka ruah ko. Nangmah cu ka Khamhtu le a ka Bawmtu na si — rau sawh hlah, Maw ka Pathian!

¹ Sifak zawn a ruatmi cu lunglawmmi a si, harnak chung i a um tikah Bawipa nih a bawmh lai. ² Bawipa nih a huhphenh lai i a nunnak kha a zuah lai; ram chungah lunglawm in a umter lai i a ral hna kut chungah a kaltak lai lo. ³ A zawt tikah Bawipa nih a bawmh lai i a damter ṭhan lai. ⁴ "Nangmah cungah ka sual cang, Bawipa ; ka zaangfah law ka damter ko," ka ti. ⁵ Ka ral nih an ka congoih. An i thawh i, "Zeitik dah a thih lai i philh a si lai," an ti. ⁶ Keimah zoh i a rami kha lung thiang in an ra lo, ka thangchiatnak lawng kha an hlat i an chuah tikah a kenkip ah an chim. ⁷ A ka huami nih khan a thli tein an ka congoih, ka ca i a ṭha lo bik ding kha an ruat. ⁸ An i thawh i, "A zawt a zual ko, a ihkhun in a tho bal ti lai lo," an ti. ⁹ Ka hawi ṭha bik, ka zumh bikmi, rawl a ka hrawng lengmangmi hmanh kha ka ral ah a cang. ¹⁰ Bawipa, ka zaangfah law damnak ka pe ṭhan ko; cun ka ral cu teirul ka cham ṭhan hna lai. ¹¹ Cu tikah ka cungah na lung aa lawm ti le ka ral nih an ka tei lai lo ti kha ka hngalh lai. ¹² Ahmaanmi kha ka tuah caah na ka bawmh lai; na hmaika ah a zungzal in na ka umter lai. ¹³ Bawipa, Israel Pathian cu thangṭhat u sih! Atu le a zungzal in thangṭhat u sih? Amen! Amen!

¹ Sazuk nih rial tidai a ngaih bantukin Maw Pathian nangmah cu kan ngai. ² Maw a nungmi Pathian, nangmah cu tihal in kan hal; zeitik ah dah na umnak ah ka hun khawh lai i kan biak khawh lai? ³ Chun nitlak zan khuadei in ka ṭap i ka mitthli lawng kha ka rawl cu a si ko; ka ral nih, "Na Pathian cu khuazei ah dah a si kun?" tiah atu le atu an ka ti lengmang. ⁴ Hlanlio kong kha ka ruah tikah ka lung a leng; Pathian inn i mi zapi he kan rak kal i kan kal tikah keimah i ka rak hrui hna i Pathian thangṭhat in lunglawm le thanuam in hla kan rak sak i kan rak au kha ka ruah tikah ka lung a leng hringhran. ⁵ Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai. ⁶ Ka lungre a thei, cucaah cun amah cu ka hngalh ṭhan; kaa thuhnak Jordan tiva hrawn, Hermon Tlang le Mizar tlang pawngah amah cu ka hngalh ṭhan lai. ⁷ Tithuk nih tithuk kha a chawnh; Pathian tisor cu a huk in an huk! Annih cu ka nunnak a leh chihtu ngaihchiatnak tilet an si. ⁸ Bawipa nih a dawtnak fek cu nifa kan sinah langhter ko seh! Amah cu zan fate in hla in thangṭhat ning law ka nunnak a ka pe ṭhantu Pathian sinah cun thlacam ko ning. ⁹ Pathian ka lungpi cu ka thawh i, "Zeicahdah na ka philh? Ka ral nih an ka hremnak hi zeicahdah ka in zungzal ko lai? ¹⁰ An ka nihsawhnak nih a ka hrilh cang, annih nih, ’Khuazei ah dah na Pathian cu a um kun?’ tiah an ka ti chih lengmang," ka ti. ¹¹ Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai.

¹ Pathian, ka sual lo kha ka thanhpiak law Pathian zei i a rel lomi hna lakah hin ka bia ka chimpi tuah; lihchim hmangmi le miṭhalo hna kut chung hin ka chuah tuah. ² Nangmah cu a ka hupphengtu Pathian na si; zeicahdah na ka kaltak? Ka ral nih an ka hremnak hi zeicahdah ka in zungzal ko lai? ³ Na ceunak le na biatak cu run thlah hna law, ka hruai hna seh na tlang thiang Zion ah cun ka kalpi ṭhan hna seh law na umnak na biakinn ah cun ka hruai hna seh. ⁴ Cun Pathian, nangmah nih lunglawmhnak le thanuamnak na ka pek caah, na biakṭheng ah cun ka hung kal lai; ka tingtang cu kaa tum lai i nangmah thangṭhatnak cu hla in ka sa lai, Maw Pathian, ka Pathian. ⁵ Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai.

¹ Maw Pathian, hlan lio pi ah na rak tuah bantukin kan pupa hna chan ah thil lianngan na tuahmi kha kan hna hrimhrim in kan theih i kan pupa hna zong nih an kan chimh: ² Cu thil lianngan na tuahmi hna cu, zeitindah nangmah hrimhrim nih hi ram chung lawkihmi kha na dawi hna i an ram ah cun na mi kha nan umter hna ti le zeitindah phundang mi cu dan na tat hna i na mi tu cu na ṭhanchoter hna, ti hi a si. ³ Hi ram cu na mi nih an nam in an teimi a si lo, anmah ṭhawnnak in an teimi zong a si lo; nangmah lianhngannak le ṭhawnnak in a si i nangmah nih na dawt hna langhternak caah an sin i na umhnawh hnanak tu nih khan hi ram cu a tei. ⁴ Nangmah cu ka siangpahrang le ka Pathian na si; nangmah nih na mi cu teinak na pek hna. ⁵ Na ṭhawnnak in kan ral cu kan tei hna; nangmah nih na kan umpinak thawngin kan ral cu kan tei hna. ⁶ Keimah Khamhtu dingah ka li kha kaa bochan lo i ka thal zong kaa bochan lo ⁷ sihmanhsehlaw nangmah nih kan ral hna sinin na kan khamh i a kan huatu kha na kan teipiak hna. ⁸ Nangmah cu kan in thangṭhat zungzal ko lai i kan in lawmh zungzal ko lai. ⁹ Sihmanhsehlaw atu cu maw Pathian, na kan hlawt cang i kan ral nih khan an kan tei cang; kan ralkap hna kha na kalpi ti hna lo. ¹⁰ Kan ral hna hmaiah na kan zamter i kan thil kha an i lak. ¹¹ Tuu an thah hna bantukin an kan thah i ram dang ah na kan ṭhek dih. ¹² Na mi cu man tlawmte ah na kan zuar i cu na kan zuarnak ah cun na miakmi zeihmanh a um lo. ¹³ Kan cung i na tuahmi kha kan innpa nih an hmuh i an kan nihsawh i capo ah an kan saih. ¹⁴ Miphun hna lakah zahpi awk thil ah na kan ser; kanmah serhsatnak ah an lu kha an ka thinhnawh. ¹⁵ Kan ral hna le a kan huatu hna nih an ka nihsawhnak le an ka zawmhtaihnak ka theihmi ruangah hin, hmaichia in ka um zungzal i ningzahnak nih a ka khuh zungzal. ¹⁷ Kannih nih cun kan in philh lo na le kanmah he na sermi na biakamnak kha kan rawk lo nain. hi thil vialte hi kan cungah a tlung. ¹⁸ Na sinah zumhawktlak loin kan um lo, Na nawl ngai loin kan um fawn lo. ¹⁹ Asinain sahrang lakah na kan kaltak i a thuk bik muihnak chungah na kan chiahtak ṭhiamṭhiam. ²⁰ Kan Pathian kha biak kan in ngol i ramdang pathian sinah thla kan cam a si ahcun, ²¹ nangmah nih na hmuh ṭheoṭheo hnga, zeicahtiah minung lungthin chung biathli cu na hngalh dih. ²² Asinain thah kan si thluangthluan cu nangmah ruangah a si i thah awk tuu bantukin tuah kan si cu nangmah ruangah a si. ²³ Bawipa, i hlau tuah! Zeicahdah naa hngilh? Tho tuah, a zungzal in kan hlawt hlah. ²⁴ Zeicahdah na kan thuhtak? Kan inmi temhnak le harnak kha philh hlah. ²⁵ Vawlei ah na kan hrilh cang; leidip lakah kan ril ko. ²⁶ Tho law kan bawm tuah! A fekmi na dawtnak ruangah kan khamh tuah!

¹ Hi hla siangpahrang ka phuah ah hin, ka lungthin cu holh dawh in a khat; ka lei cu ca ṭial thiammi cafung bantuk a si. ² Pa vialte lakah pa dawh bik na si, bia chim a thiam ngaingaimi na si; Pathian nih zungzal in thluachuahnak an pek! ³ A ṭhawngmi siangpahrang, na vainam kha i bei tuah; nang cu a ṭhawngmi le a liannganmi siangpahrang na si. ⁴ Biatak le biading kha hmunhter awkah na tei tiang lianhngannak in hmailei ah kal tuah. Na ṭhawnnak nih teinak ngan pipi an hmuhpiak lai. ⁵ Na thal cu an hriam i na ral cu an lung tiang a taih hna; miphun kip kha na hmaiah an tlu. ⁶ Pathian nih an pekmi bawiṭhutdan cu zungzal in a hmun lai! Na ram cu dinnak in na uk; ⁷ a hmaanmi thil ṭha kha na duh i a ṭha lomi thil kha na huat. Cucaah cun Pathian, na Pathian nih khan a rak in thim i midang nakin tam deuh in lunglawmhnak kha an toih. ⁸ Mura zihmui le aloes zihmui le kassia zihmui in na puan cu na namter hna i vui ho in sakmi siangpahrang inn ah khan hla dawh tum thiam nih an in conglawmh. ⁹ Na inn i a ummi bawinu hna lakah khan siangpahrang fanu zong an um, cun na bawiṭhutdan orhlei kamah khan siangpahrang bawinu cu a dir, sui ṭha bik in sermi hlawn in aa ṭamh. ¹⁰ Siangpahrang bawipa i a ngaknu, ka chimmi hi ngai tuah — na mi le na rualchan kha philh ta hna. ¹¹ Naa dawh caah siangpahrang nih an duh lai, amah cu na bawi a si, a nawl kha va ngai tuah. ¹² Tair mi nih laksawng an in put lai, mirum nih na lung tluanter an i zuam lai. ¹³ Siangpahrang fanu cu siangpahrang inn chungah cun a um — a vaa dawh hringhran dah, A puan cu sui la in an tah. ¹⁴ A puan dawh ngaimi he cun siangpahrang sinah khan an hei kalpi, a mawle nih khan an zulh i anmah zong cu siangpahrang sin tiang an kal ve. ¹⁵ Lunglawm le thanuam in an ra i siangpahrang bawipa inn ah cun an lut. ¹⁶ Ka siangpahrang bawipa, nangmah nih fapa tampi na ngeih hna lai i na pupa hna cu an hmun an rolh hna lai; nangmah nih vawlei dihlak uktu ah khan na ser hna lai. ¹⁷ Na minthannak cu ka hla nih a nunter zungzal lai i mi kip nih zungzal thluangthluan in an in thangṭhat lai.

¹ Pathian cu kan i dornak le kan thazang a si, harnak caan ah a kan bawm zungzaltu a si. ² Cucaah cun vawlei cu i hnin in tlang cu rili chungah tla hna hmanh seh law ka thin a phang lai lo; ³ rili tilet cu tho in awn hmanh seh, tlang zong i hnin dih hna hmanh seh law ka thin a phang lai lo. ⁴ Pathian khua, Cung Nung Bik Pathian inn thiang ah lawmhnak a ratpitu tiva pakhat a um. ⁵ Pathian cu khuapi chungah cun a um i zeihmanh nih a hrawk bal lai lo; zingka tein amah bawmh awkah a ra lai. ⁶ Miphun cu a ther in an ther, pennak ram cu an i hnin, Pathian aw cu a thang i vawlei cu ti ah a cang dih. ⁷ Lian Ngan Bawipa nih a kan umpi, Jakob Pathian cu kan himnak a si. Selah ⁸ Ra law zohhmanh, Bawipa i a tuahmi hi; Zohhmanh zeitluk khuaruahhar thil hna dah leicung ah hin a tuah. ⁹ Hi vawleicung pumpi ah ral cu a daihter dih ko hna, likuk cu a khiah hna i fei cu a hrawh dih hna, phaw hna cu mei in a khangh dih hna. ¹⁰ "Raldohnak kha ngol u" a ti hna, "Cun keimah cu Bawipa ka si hi hngal tuah u, miphun vialte hna a uktu cu ka si i, vawlei pumpi ah a ngan bikmi cu ka si," a ti. ¹¹ Lianhngannak he a khatmi Bawipa cu kan sinah a um; Jakob Pathian cu kan himnak a si. Selah

¹ Mi vialte hna, lunglawm in nan zapei beng tuah u, hla dawhdawh in Pathian cu thangṭhat u! ² Cung Nung Bik Bawipa cu ṭih awk a si, amah cu a liannganmi siangpahrang vawlei cung vialte uktu a si. ³ Mi kip kha kan tangah a chiah hna i miphun hna uknak kha a kan pek. ⁴ Kan umnak ram hi amah nih a kan thimpiakmi a si; a dawtmi a mi nih kan i porhlawt ngaimi ram a si. ⁵ Pathian cu a bawiṭhutdan cungah cun a hung kai; Bawipa a hung kai lioah cun lunglawmhnak au thawng le muko tum thawng a thang. ⁶ Pathian cu hla in thangṭhat tuah u, kan siangpahrang cu thangṭhat tuah u. ⁷ Pathian cu vawlei cung dihlak siangpahrang a si; amah cu hla in thangṭhat tuah u. ⁸ A thiangmi a bawiṭhutdan cungah Pathian cu a ṭhu, miphun kip kha a uk hna. ⁹ Miphun dang hna an uktu bawi hna cu, Abraham Pathian mi hna bang khan hmunkhat ah an i pum. Ralkap vialte hna phaw cu Bawipa ta an si; amah nih zeizong vialte kha a uk dih.

¹ Bawipa cu a lian a ngan i fak piin thangṭhat awk a si; kan Pathian khualipi chungah le a tlang thiang cungah thangṭhat awk a si. ² Pathian tlang Zion cu a sang i aa dawh; a liannganmi siangpahrang khuapi nih vawlei cung vialte kha lawmhnak a pek hna. ³ Pathian cu a chungah a um caah a ralhau chungah khan himnak a um. ⁴ Siangpahrang kha an i pum i Zion Tlang tuk awkah an ra. ⁵ Sihmanhsehlaw an hmuh tikah an lau i an thin a phang i an zam. ⁶ Ṭihnak le lungretheihnak nih a tlaih hna i nau nganfah a ingmi nu bantukin an um. ⁷ Pathian nih nichuahlei thli in lawng ngan pipi kha a hrawh hna. ⁸ Lianngan Bik Bawipa kan Pathian khualipi chungah, Pathian nih a tuahmi thil cu a theih in kan rak theih. asinain atu cu a hmuh in kan hmuh cang; khuapi cu him tein a zohkhenh zungzal lai. ⁹ Maw Pathian, a fekmi na dawtnak kong kha, na biakinn chungah kan ruat. ¹⁰ Khuazakip ah nangmah cu an in thangṭhat i na minthannak nih vawlei cung kha a cul dih. Dinnak in na uk hna; ¹¹ Zion mi cu i lawm hna seh! Na biakhiahnak cu ahmaanmi an si, Judah ram chung khua ah lawmhnak um hna seh. ¹² Zion tlang ah khan i chawk u law a inn sang kha rel hna u, ¹³ a vampang kha ngia hna u law a ralhau kha ṭha tein zoh hna u; cu ti nan zoh i nan ngiat ahcun, nanmah nan tefa hna kha ¹⁴ Pathian cu a zungzal in kan Pathian a si i hmailei i a ra ding caan vialte ah a kan hruai lai, tiah nan chimh khawh hna lai.

¹ Mi vialte hna, hihi thei tuah u, Khuazakip i a um mi hna, ngai tuah u, ² a hme a ngan, a rum sifak, nan dihlak in ngai tuah u. ³ Ahmaanmi khua ka ruat lai i a fimmi bia ka chim lai. ⁴ Bia thuk kha ka ruat hna lai i tingtang tum pah in a sullam kha ka fianter hna lai. ⁵ Ka ral miṭhalo hna, an rumnak aa bochan i an chawva aa porhlawmi nih an ka dum tikah ka thin a phang lo. ⁷ Minung nih cun zeitikhmanh ah amah le amah aa tlan kho lo; a nunnak man kha Pathian a cham kho lo; ⁸ zeicahtiah minung nunnak man cu a sung tuk. A pek khawhmi cu ⁹ thlan chungin a luattertu le zungzal in a nuntertu ah a zaa bal lai lo. ¹⁰ Hihi philh hlah: mifim zong mihrut bantukin an thi ve ko lai i an chaw le an va cu an fale kha an roh ve ko hna lai. ¹¹ Thlan cu zungzal in an umnak ding hmun a si ko lai i cuka ah cun a zungzal in an um ko lai. Hmun le ram kha an rak ngei ko lai nain an chaw le an va cu midang sin i an kaltak a hau ṭhiamṭhiam ko lai. ¹² Mi cu a lianhngannak nih thihnak in a khamh kho lo; saram bantukin a thi ve ko lai. ¹³ Anmah le anmah aa bochanmi, an rumnak cung i a hna a ngammi hna khi an cungah zeidah a tlung ti kha zoh hmanh u. ¹⁴ Tuu bantukin a thi dingin ruah an si cang i an tuukhal cu thihnak a si lai. Miding mi nih khan zinglei ah an tei hna lai i mithi hna ram ah an pum cu a thu a man lai, cuka cu an inn in aa hlatmi hmun a si lai. ¹⁵ Sihmanhsehlaw kei cu Pathian nih a ka khamh lai; thihnak ṭhawnnak chungin a ka chuah lai. ¹⁶ Mizeimaw nih a rum i a chawva kha a ṭhan chin lengmang tikah, na thinphang hlah; ¹⁷ a thih tikah zeihmanh aa phorh kho hlei lai lo, a chawva nih thlan ah an zul kho lai lo. ¹⁸ Hi vawleicung a nun chungah hin saduhthah in nung kho hmanh seh law khua awng a ton ruangah thangṭhatnak hmu hmanh seh law ¹⁹ a thi cangmi a pupa hna sinah khan a kal ve ko lai i cuka cu zungzal in muihnak a umnak hmun a si ko. ²⁰ Mi cu lianhngannak nih thihnak in a khamh kho lo; saram bantukin a thi ve ko lai.

¹ Lianngan Bik Pathian Bawipa nih bia a chim; vawlei cu a dihlak in nichuahlei in nitlaklei tiang a auh. ² Pathian cu Zion in ni bangin a rung tlang, dawhnak ah a tlingmi khua chung cun a rung tlang. ³ Kan Pathian cu a ra lio, sihmanhsehlaw dai tein a rat cu a si lai lo, a alh hluahmahmi mei a hmaiah khan a um i ṭih a nungmi thlichia nih a zual. ⁴ A mi kha bia a ceih hna i van le vawlei kha tehte ah a auh hna. ⁵ Aa thawh i, "Zumhawktlak a simi keimah sinah raithawinak in biakamnak a tuahmi ka mi hna kha ka sinah pum hna u," a ti. ⁶ Van nih khin, "Pathian cu a ding, amah hrimhrim kha biaceihtu a si," tiah an chim. ⁷ "Ka mi hna, ka bia ngai u law bia ka chim lai; Israel, nangmah cu fiang tein kan hngalhter lai. Pathian cu keimah hi ka si i keimah cu na Pathian ka si. ⁸ Nan ka pek zungzalmi raithawinak le khanghthawinak ruangah kan sik hna a si lo. ⁹ Nan lo chung nan cawtum hna le nan meheh run chung meheh hna kha ka herhmi an si lo, ¹⁰ zeicahtiah ramlak i a ummi saram vialte hi keimah ta an si dih i tlang thong khat cung i a tlongmi saṭil vialte khi keimah ta an si dih. ¹¹ Ramlak i a ummi va vialte cu keimah ta an si i lo lak i a ummi thilnung vialte zong keimah ta an si dih. ¹² "Ka rawl ṭam seh law kan chim hna lai lo, zeicahtiah vawlei le a cung i a ummi thil vialte cu keimah ta an si dih. ¹³ Cawtum sa cu ka ei hna maw? Meheh thi cu ka din maw? ¹⁴ Pathian sinah lawmhnak chim cu nan raithawinak si seh law Lianngan Bik cu kan in pek lai tiah nan i kammi pekchanh awk vialte kha pechan ko u. ¹⁵ Harnak a phak tikah ka au u, kan khamh hna lai i nan ka thangṭhat lai," a ti. ¹⁶ Sihmanhsehlaw Pathian nih miṭhalo cu a thawh hna i, "Zeicahdah ka nawlbia cu nan ciah len ko? Zeicahdah ka biakamnak kong cu nan chim len ko? ¹⁷ Kan chimhhrin hna lai, ka ti tikah nan duh ṭung lo, ka nawlbia kha nan hlawt ko ṭung hna. ¹⁸ Mifir nan hmuh tikah a hawi ah nan i cang i vacung pa duhmi hna he nan i kom. ¹⁹ Ṭhat lonak bia chim kha nan i tim zungzal i lihchim kha a sum in nan i sum lo. ²⁰ Nanmah nan unau congoih kha nan i tim zungzal, midang sual kawl lawng kha nan duh. ²¹ Hi vialte hi nan tuah i keimah nih cun zeihmanh ka chim lo, cucaah nanmah bantuk ah nan ka ruah. Sihmanhsehlaw atu cu kan sik cang hna lai i thil kha fiang tein kan hngalhter cang hna lai. ²² "Zei i a ka rel lomi hna, hihi ngai tuah u, nan ngaih lo ahcun kan hrawh hna lai i ahohmanh nih an in khamh kho hna lai lo. ²³ Lawmhnak chim hi keimah upatnak thawinak cu a si, ka nawl a ngaimi cu ka khamh hrimhrim hna lai," a ti.

¹ Pathian, a fekmi na dawtnak ruangah ka cungah zaangfahnak ngei ko; na zaangfahnak a ngan caah ka sualnak cu ka thianhpiak ko hna. ² Ka ṭhat lonak cu ka ṭawlpiak hna law ka sualnak cu ka thianhpiak ko hna. ³ Ka palhnak cu kaa hngal i ka sualnak cu kaa thei zungzal ko. ⁴ Ka sualnak cu, nangmah cungah, nangmah cung hrimhrim ah a si i a ṭhalo ah na ruahmi kha ka tuah. Cucaah cun bia na ka ceih tikah na hmaan ko i sual na ka phawt tikah na ding ko. ⁵ Sual cia in hrin ka si, ka nu nih a ka pawi ah khan, misual ka si cang. ⁶ Zumhawktlak lungthin hi na duhmi a si, ka lung chung hi na fimnak in khahter ko. ⁷ Ka sualnak cu ka hnawhpiak law ka thiang lai, ka ṭawl law hawhra nakin ka rang deuh lai. ⁸ Lunglawmhnak le thanuamnak aw thawng cu ka theihter law na ka khiah i na ka hrilh cang nain ka lung aa lawm ṭhan lai. ⁹ Ka sualnak cu na mit chinhkanh ko hna law ka ṭhat lonak vialte cu ka hnawhpiak dih ko hna. ¹⁰ Maw Pathian, ka chungah hin lungthin thar ka serpiak law a thar le zumhtlak a simi ruahnak ka chungah chia ko. ¹¹ Na umnak hmun khan ka ṭhawl hlah, na thiang thlarau kha ka lakkanh hlah. ¹² Na khamhnak chungin a chuakmi lawmhnak kha ka pe ṭhan law ka lungthin cu nangmah nawl zulh duhmi ah ser ko. ¹³ Cu tikah misual mi kha na nawlbia cu ka cawnpiak hna lai i nangmah leiah an i mer ṭhan lai. ¹⁴ Maw Pathian, ka khamhtu, ka nunnak hi ka zuah ko sawh law, na dinnak hi lunglawm tein ka thanh lai. ¹⁵ Maw Bawipa, biachim ka bawm law nangmah cu kan thangṭhat lai. ¹⁶ Raithawinak hi na duhmi an si lo, rak si hna seh law cu ka rak in pek ko hnga; na lawmhmi cu khangh thawinak zong hi a si lo. ¹⁷ Ka raithawinak cu toidornak lungthin hi a si, maw Pathian, toidornak lungthin le nawl ngaimi lungthin hi na hlaw lai lo. ¹⁸ Maw Pathian, Zion cu zaangfah law bawm tuah; Jerusalem kulhnak vampang cu remh ṭhan hna. ¹⁹ Khi tikah ahmaanmi raithawinak le khangh thawinak hna ah cun naa lawm lai i na biakṭheng cungah cawtum cu an thawi hna lai.

¹ Mi liannganpa, zeicahdah ṭhat lonak na tuahmi cu naa porhlawt? Pathian dawtnak cu a fek ko. ² Midang hrawhnak ding caah khua na khang lengmang, na lei cu a harmi nam bantuk a si, lih lawng kha na chim ṭualmal ko. ³ Ṭhat lonak kha ṭhatnak nakin na duh deuh i biatak chim nakin lih chim kha na duh deuh. ⁴ Na bia in mi fahnak pek kha na duhmi a si, nang cu milip na si. ⁵ Cucaah Pathian nih an hrawh zungzal cang lai; an tlaih lai i na thlam chungin an chuah lai, a nungmi hna ram in an dawi lai. ⁶ Miding nih hihi an hmuh lai i an ṭih lai, an in nihsawh lai i, ⁷ "Himnak hmuhnak caah Pathian aa bochan lomipa hi zohhmanh u, Pathian kha i bochan loin a rumnak pi tu kha aa bochan i a ṭhat lonak tu ah khan himnak a um, tiin a ruah," an in ti lai. ⁸ Sihmanhsehlaw kei cu Pathian inn pawng i a khomi oliv kung bantuk ka si; a fekmi a dawtnak cu zungzal in kaa bochan zungzal. ⁹ Maw Pathian, na tuahmi thil ruangah kan lawmh zungzal lai; na mi hna lakah nangmah ṭhatnak kha ka chim zungzal lai.

¹ Mihrut nih cun an i thawh i, "Pathian a um lo," an ti. An dihlak in an thu, thil ṭhalo kha an tuah, ahmaanmi thil a tuahmi ahohmanh an um lo. ² Pathian nih vancung khin minung kha, Aho tal a fim i Pathian a kawlmi an um hnga maw tiin a run zoh. ³ Sihmanhsehlaw an dihlak in an pial cang, an dihlak in an chiatlei ah an i tluk; pakhat hmanh thil hmaan a tuahmi an um lo, pakhat taktak hmanh an um lo. ⁴ Pathian nih, "An hngal hnga lo maw? Ṭhat lonak a tuahmi hi mihrut maw an si dih ko hnga? Ka mi kha an ramh hna i cucu an i cawmnak ah an hman, ka sinah thla an cam lo," a ti. ⁵ Sihmanhsehlaw Pathian nih nan ral hna cu an ruh kha a ṭhek dih hna caah an thin a phang ngaingai lai; hmasa i an thin a rak phan tawnning bantuk sawhsawh kha si loin atu cu an thin a phang taktak lai. Annih cu a hlawt cang hna caah an sung cikcek lai. ⁶ Israel khamhnak cu Zion in ra seh ti ka hei duh hringhran dah! Pathian nih a mi cu rumnak a pek ṭhan hna tikah Jakob tefa cu an lung aa lawm lai, Israel mi cu an tha a nuam lai.

¹ Maw Pathian, na ṭhawnnak in ka khamh ko; na thazang in ka luatter ko. ² Maw Pathian, ka thlacamnak hi ka theihpiak tuah, ka chimmi bia hi ka ngaihpiak tuah, ³ Mi lungpuam hna cu keimah doh awkah an ra, mipuarhrang hna nih thah an ka zalh — Pathian zei i a rel lomi hna nih khan thah an ka zalh. ⁴ Pathian cu a ka bawmtu a si kha ka hngalh, Bawipa cu a ka chanhtu a si kha ka hngalh. ⁵ Pathian nih ka ral cu anmah ṭhat lonak lila khan dantat ko hna seh! Amah cu zumhawktlak a si caah a hrawh hna lai. ⁶ Bawipa, nangmah cu na ṭhat caah lunglawm tein thawinak cu kan pek lai i na sinah lawmhnak ka langhter lai. ⁷ Ka harnak vialte chungin na ka chuah i ka ral an sungh cu ka hmuh hna.

¹ Maw Pathian, ka thlacamnak cu ka ngaihpiak law kan nawlnak cu ka hlonhpiak hlah. ² Ka bia kha ka ngaihpiak law ka let tuah; lungrethei in ka baa tuk hringhran cang. ³ Ka ral nih an ka tlerhnak le miṭhalo nih an ka hremnak nih ka lungre an ka theihter. Ka cungah harnak an tlunter; ka cungah an thin a hung i an ka huat. ⁴ Ka lung cu ṭihnak in a khat, an ka thah sual lai ti kha ka phang tuk. ⁵ Ka ṭih tuk ah a ther in ka ther i ka luthlung in ka kechik tiang ka ther dih. ⁶ "Ṭhuro bangin thla cu ngei ning law ka zuang hnga i ka vaa din hnga! ⁷ Lamhlapi ah khin ka zuang hnga i ramlak ah inn ka vaa sak hnga. ⁸ Thlichia le ruahpi chung hin dornak hmun kha khulrang in ka hmuh ko hnga," ka ti. ⁹ Bawipa, annih cu hrawk hna law an biachimmi cu tuainak ah canter; khuapi chungah ka hmuhmi thil cu zaang-ennak le i tuainak a si. ¹⁰ Chunzan in khuapi cu a kulhnak hau cungin an chawhhnawh lengmang; harnak le thil ṭhalo tuahnak in a khat. ¹¹ A kenkip ah rawhnak a um, a chung lam hna cu pakhat le pakhat i hremnak le hlennak in a khat. ¹² A ka nihsawhtu hi ka ral si seh law cu, ka in khawh ko hnga, ka cung i tluang a khawng lentu hi a ka dohtu kha si seh law cu, a ka hmuh khawh lonak hmun ah ka thuhtak diam ko hnga; ¹³ sihmanhsehlaw hi bantukin ka cungah rian a ṭuantu cu ka hawi, ka rianṭuan hawi le keimah he aa naih ngaimi ka hawikom na si tikah hin a fak tuk hringhran in ka thei. ¹⁴ Pakhat le pakhat bia ṭhaṭha kha kan rak i ruah i hawi zapi he hmunkhat ah biakinn ah kan rak kal ṭi tawn. ¹⁵ Ka ral hna cungah cun thihnak kha khulrang in tlung seh law mithi khua ah khan a nung in vung kal hna seh. An inn chung le an lung chungah ṭhat lonak a um. ¹⁶ Sihmanhsehlaw Bawipa Pathian cu ka bawm tuah tiah ka auh i a ka khamh lai. ¹⁷ Ka ainak le ka hramnak cu zing siseh, chun ah siseh, zan ah siseh, amah sinah an kai zungzal ko i ka aw cu a ka theihpiak ṭheo lai. ¹⁸ Ka ral tampi hna he kan i tuknak hmun in him tein a ka kirpi ṭhan ko lai. ¹⁹ Zungzal in uktu a simi Pathian nih ka bia cu a ka theihpiak lai i annih cu a sunghter hna lai; annih nih amah cu an ṭih lo caah an tuah khawhmi zeihmanh a um lai lo. ²⁰ Hlanlio ka hawi nih khan a hawi lila cu a tuk hna; a biakam cu a zul lo. ²¹ A chimmi bia cu thawhpat nakin a nal deuh sihmanhsehlaw a lung chungah cun huatnak a um; a bia cu chiti bantukin a nem, sihmanhsehlaw nam bantukin mi a chun. ²² Na thilri cu Bawipa sinah ṭhum ta law amah nih an bawmh lai; miṭha cu zeitikhmanh ah a sunghter bal lai lo. ²³ Sihmanhsehlaw Bawipa, nangmah nih lainawng mi hna le lihchim mi hna cu vawlei tang khor thukpi ah khin an chan ṭim hlanah na thlak hna lai. Kei tu nih cun nangmah kha kan bochan lai.

¹ Ka ral nih an ka hrem thluangthluan i an ka cil lengmang caah hin Maw Pathian, ka zaangfah ko sawh. ² A ka dohtu nih hin chun nitlak in an ka hrem i annih hi an tam hringhran ko. ³ Ka thin a phan tikah, Maw Cungnung Bik, nangmah cu kan bochan. ⁴ Pathian cu kaa bochan i a biakam cu ka thangṭhat; amah cu kaa bochan i ka thin a phang lo. Minung menmen nih cun zeidah an ka ti khawh lai? ⁵ Ka ral nih cun ka tuahmi thil kip ah harnak an ka pek, zeitindah a cungah fahnak kan tlunter khawh lai ti kha an ruat zungzal. ⁶ Mi hmuh lonak hmun ah khan an i thup i ka tuahmi paohpaoh kha an ka ngiat dih, zeitindah kan thah khawh lai ti kha an i ruahchih. ⁷ An ṭhat lo ruangah cun, Maw Pathian, dantat ko hna; hi mi hna hi na thinhun in raltuknak ah cun, sunghter ko hna. ⁸ Zeitluk in dah harnak ka in kha na hngalh; ka mitthli cu na thawl chungah na rawn hna, na cauk chungah na ṭial hna a si lo mei? ⁹ Nangmah kan auh ni ah ka ral cu an kir lai, mah hi fiang tein ka hngalh — Pathian cu keimah leiah a um. ¹⁰ Pathian cu kaa bochan i a biakam cu ka thangṭhat, Bawipa biakamnak cu ka thangṭhat lai. ¹¹ Amah cu kaa bochan i ka thin a phang lo, minung menmen nih cun zeidah an ka ti khawh lai? ¹² Pathian, na sinah ka rak i kammi kha kan pek lai, thangṭhat thawinak cu kan pek lai, ¹³ zeicahtiah nangmah nih thihnak chungin na ka chuah i ka ke kha rilhnak chungin na khamh. Cucaah Pathian hmaika ah cun kaa chawk i minung cungah a ceumi a ceunak chungah cun ka um.

¹ Ka zaangfah ko, Maw Pathian, ka zaangfah ko, himnak hmuh duh ah nangmah cu ka fuh. Thlichia ṭihnung a dih hlantiang, na thlazung in ka huppheng ko. ² Cung Nung Bik Pathian cu ka auh, ka herhnak vialte a ka petu Pathian cu ka kawh. ³ Vancung khin a run ka leh lai i a ka khamh lai; a ka dohtu kha a sunghter hna lai. Pathian nih cun a fekmi a dawtnak le zumhawktlak a sinak kha ka cungah a langhter lai. ⁴ Mi seh hmang chiandeih hna lakah ka it, an ha cu fei le thal bantuk an si, an lei cu kawngthun har bantuk an si. ⁵ Maw Pathian, na lianhngannak cu van ah khin langhter law na sunparnak cu vawlei cung dihlak ah hin langhter ko. ⁶ Ka ral nih keimah foihnak ah sur rap an chiah, lungretheihnak nih a ka tei; ka kalnak lam ah khor an cawh, sihmanhsehlaw anmah tu an tla. ⁷ Ka lung a hmun ko, maw Pathian, ka lung a fek ko; nangmah thangṭhatnak hla ka sa lai. ⁸ Ka nunnak, i hlau tuah, ka tingtang le ka thonglawi hna, i hlau tuah u. Zinglei cu ka ṭhangh lai. ⁹ Maw Bawipa, miphun hna lakah kan lawmh lai, mi vialte hna lakah kan thangṭhat lai. ¹⁰ A fekmi na dawtnak cu vancung tiang a phan, zumhawktlak na sinak cu van a tawng. ¹¹ Maw Pathian, na lianhngannak cu van ah khin langhter law na sunparnak cu vawleicung dihlak ah hin langhter ko.

¹ Nannih uktu bawi hna, bia nan ceih tikah ding tein nan ceih taktak maw? Mi vialte kha aa ruang tein nan ceih hna maw? ² Nan ceih hna lo. Ṭhat lonak tuah nan duhmi lawng kha nan ruat i ram chungah khan mithahnak le lainawnnak nan umter. ³ Miṭhalo cu an chan chung vialte palhnak a tuahmi an si, an chuah ni in lihchim an i thawk. ⁴ Rul bantukin sivai an ngei, rawchok hnachet bantuk an si, zeihmanh an thei lo, ⁵ rawchok hnachet nih cun rul camhthiam aw kha a thei kho lo. ⁶ Maw Pathian, an ha cu khiak dih hna, Maw Bawipa, hi ṭihnung chiandeih hna hi an ho phawi dih hna! ⁷ Tlang pang i a luangmi ti a loh bantukin lo hna seh, lam i lamh chihmi belh bantukin lo hna seh. ⁸ Nawncek chungah a lo ralmi cengkeuh bantuk si hna seh, ni a hmu bal lomi fa rawk bantuk si hna seh. ⁹ An hngalh manh hlanah Pathian nih burbuk sam in a sam hna lai, an nun ko lioah Pathian nih a thinhun in thli choih in a choih hna lai. ¹⁰ Misual mi nih dantatnak an hmuh kha miding mi nih an hmuh tikah an i lawm lai, miṭhalo mi hna thi cu ti tan bantukin an tan lai. ¹¹ Mi nih an i thawh lai i, "Miding mi cu laksawng an hmu taktak ko; vawleicung ah hin Dingthlu Lairel Pathian a um taktak ko," an ti lai.

¹ Ka ral hna sin hin ka khamh tuah, ka Pathian; a ka dohtu hna kut chung hin ka huppheng tuah. ² Miṭhalo hna kut chung hin ka khamh law lainawng hna kut chung hin ka chuah tuah. ³ Zohhmanh, keimah cu thah awkah an ka bawh, keimah doh awkah mipuarhrang pawl cu an i pum. ⁴ Ṭhat lonak le sualnak ka tuah ruangah si loin ka sual ca le ka palh ca zongah si loin, Maw Bawipa, an ka bawhnak hmun ah khan khulrang in an va tli. ⁵ Maw Lianngan Bik Bawipa, tho law ka bawm tuah; maw Israel Pathian, nangmah hrimhrim nih ra zoh tuah. I hlau law miphun kha dantat hna, mi rawi hmang, miṭhalo mi hi, zaangfah hna hlah. ⁶ Zanlei fate an ra kir i uico bantukin an au i khua chungah an i chawk. ⁷ An chimmi bia cu ngai tuah! An lei cu an kaa chungah vainam bantuk an si nain an i thawh i, "Aho nih dah a kan theih lem lai?" an ti. ⁸ Sihmanhsehlaw Maw Bawipa, nang nih cun na nihsawh ko hna; miphun vialte cu capo men ah na saih ko hna. ⁹ Maw a ka Vengtu, nangmah nih na ka huhphenh; Maw Pathian, nangmah cu ka ralhruang na si. ¹⁰ A ka dawtu ka Pathian nih a ka don lai, ka ral cu a ka teipiak hna lai. ¹¹ Annih cu that hna hlah, ka mi hna nih an philh sual ai hnga, na ṭhawnnak in ṭhek hna law hrawk hna, Maw Bawipa kannih kan phaw! ¹² An kaa chungah sualnak a um an bia cu bia sual lawngte an si; an i porhlawtnak ah cun anmah lila i foih hna seh. Annih cu chiatserhnak bia a chimmi le lihchimmi an si caah ¹³ na thinhun in hrawk dih hna, hrawk dih cikcek hna. Cu tikah Israel uktu cu Pathian a si i vawleicung vialte zong a uk chih dih ti kha an hngalh lai. ¹⁴ Ka ral cu zanlei fate an ra kir i uico bantukin an au i khua chungah an i chawk. ¹⁵ Rawl kawl ah an vak i a za an hmuh lo tikah an zai. ¹⁶ Sihmanhsehlaw kei tu cu na ṭhawnnak kha hla in ka thangṭhat lai; zing fate in a fekmi na dawtnak kong kha hla in ka sa lai. Nangmah cu ka caah himnak na si, harnak caan ah dornak lungpi na si. ¹⁷ Maw a ka Vengtu, nangmah cu kan thangṭhat lai; Pathian cu ka ralhruang na si, a ka dawtu Pathian cu ka himnak na si.

¹ Maw Pathian, na kan hlawt cang i kan ralhau kha na chim dih cang hna; kan cungah na thin a hung — sihmanhsehlaw atu cu kanmah leiah i mer ko sawh. ² Vawlei kha na hninhter i na kahter; atu cu a hma kha damter ṭhan ko, zeicahtiah kuai dih aa zal cang. ³ Na mi cu temhnak tampi na kan inter, a kan rittertu zu kha na kan dinter. ⁴ Nangmah an ṭihmi hna caah hmelchunhnak na phun, sihmanhsehlaw an i let i an ral hna sin khan an zam ṭhiamṭhiam. ⁵ Na ṭhawnnak in kan khamh tuah; kan thlacamnak kha kan let tuah, cuticun na dawtmi hna hi kan luat kho lai. ⁶ Pathian nih a hmunthiang chungin aa thawh i, "Shekhem cu ka tei lai i ka cheu lai, cun Sukkoth Nelrawn cu ka mi kha ka phawt hna lai. ⁷ Gilead cu keimah ta a si, Manasseh zong keimah ta a si, Efraim cu ka luchin a si i Judah cu ka bawifung a si. ⁸ Sihmanhsehlaw Moab cu ka kut ṭawlnak kheng ah ka hman lai i Edom cu ka kedan chiahnak kuang ah ka hman lai. Filistin nih hin, amah cu ka tei lai i ka au lai, tiin aa ruah dahra?" a ti. ⁹ Maw Pathian, aho nih dah ralhau a ngeimi khua chungah a ka luhpi lai? Aho nih dah Edom ah a ka kalpi lai? ¹⁰ Na kan hlawt taktak ko cang maw? Kan ralkap cu na kalpi ti hna lai lo maw? ¹¹ Minung bawmhnak cu zeihmanh a ṭhathnem lo caah kan raldohnak ah hin nangmah nih kan bawm ko. ¹² Pathian kan sinah a ṭan caah kan tei hna lai; kan ral cu amah nih a kan teipiak hna lai.

¹ Maw Pathian, ka aunak cu ka theihpiak ko, ka thlacamnak cu ka ngaihpiak ko ² Inn in hlapi ah ka um i khuaruahhar vansang au in ka umnak hmun hin nangmah cu kan auh. ³ Himnak hmun ah ka kalpi tuah, nangmah cu keimah nakin a sang deuhmi lungpi na si, ka ral hna sinin a ka hupphengtu a fekmi innsang na si. ⁴ Na thlam chungah a zungzal in ka umter tuah, na thla tangah him tein i dor ko ning. ⁵ Maw Pathian, nangmah nih bia kaa kammi kha na theih i nangmah an upatmi hna ro kha na ka pek. ⁶ Siangpahrang cu a nunnak ah kum tampi bet ko, sau piin nunter ko. ⁷ Pathian, na hmaika ah cun zungzal in uktu si seh law a fekmi na dawtnak le zumhawktlak na sinak khan amah cu kilveng ko. ⁸ Cucaah ni khat hnu ni khat, na sinah bia kaa kammi ka tlinter pah in nangmah thangṭhatnak cu hla in ka sa zungzal lai.

¹ Pathian lawnglawng kaa bochan, amah sinin ka khamhnak cu a ra. ² Amah lawnglawng hi a ka hupphengtu le ka Khamhtu a si, amah cu ka ralhruang a si i ahohmanh nih an ka tei bal lai lo. ³ Aa sawnmi vampang bantuk le baohmi hau bantuk a simi pa cu, nannih nih nan dihlak in zei can dah nan doh lai i thah nan i zuam lai? ⁴ Nan duhmi cu upatnak hmun i a ṭhutnak khan ṭhumh hi a si ko i lihchim zong hi nan duh hringhranmi a si fawn. Nan kaa cun thluachuahnak bia nan chim, sihmanhsehlaw nan lungchung cun chiat nan serh. ⁵ Pathian lawnglawng kha kaa bochan, amah lawnglawng kha kaa ruahchan. ⁶ Amah lawnglawng hi a ka hupphengtu le Khamhtu a si, amah cu ka ralhruang a si i ahohmanh nih an ka tei bal lai lo. ⁷ Khamhnak ka hmuhmi le upatnak ka hmuhmi cu amah thawng lawnglawng in a si; amah cu a ṭhawngmi lungpi ka him a si. ⁸ Ka mi hna, Pathian cu i bochan zungzal u! Amah cu kan himnak a si caah nan harnak vialte kha chim dih u. ⁹ Mi vialte hi thaw bantuk menmen an si, a thi khomi minung hi zeihmanh an man lo. Cuaithlainak cungah chia hna u law zeihmanh an tlai lai lo, thaw nak hmanh in an zaang deuh. ¹⁰ Zaangṭhawnnak le puarhrannak hi i bochan hlah u, mi thil chuh khawh hi i ruahchan hlah u; na rumnak hi karh lengmang hmanh seh law i bochan hlah. ¹¹ Pathian nih, ṭhawnnak cu keimah ta a si i dawtnak ka ngeihmi cu a fek, ¹² a ti kha voi khat nak tam ka theih. Bawipa, nangmah hrimhrim nih mi cu, an rianṭuanning in na lehrulh ko hna.

¹ Maw Pathian, nangmah cu ka Pathian na si, nangmah cu kan ngai. Ka nunnak nih hin an hlam i ka thlarau nih tihal in an hal; vawlei ro nih ti a duh bantuk khin an duh. ² Hmunthiang ah cun in hmu ning law zeitluk in dah na lianhngan le na sunpar kha in hngal ning, ti ka duh. ³ A fekmi na dawtnak cu nunnak nakin a ṭha deuh, cucaah cun nangmah cu kan thangṭhat lai. ⁴ Ka nun chung paohpaoh cu kan lawmh lai; nangmah leiah ka kut ka hler lai i thla ka cam lai. ⁵ Ka nunnak cu rawldangh bantukin aa dang lai i a khim lai, cun nangmah thangṭhat lawmhnak hla kha ka sa lai. ⁶ Ihkhun cung i ka ih tikah nangmah cu kan thei, zan khuadei nangmah kha kan ruat, ⁷ zeicahtiah nangmah cu a kan bawmtu na si zungzal. Na thla tangah lawmhnak in hla ka sa. ⁸ Nangmah kha kan tlaihchan i na kut nih him tein an ka umter. ⁹ Keimah thah a ka zalmi kha mithi khua ah an kal lai; ¹⁰ raltuknak hmun ah khan an thi lai i an ruak cu cenghngia nih an ei hna lai. ¹¹ Pathian thawngin siangpahrang cu aa lawm lai; Pathian min in biakamnak a tuahmi vialte hna cu an i lawm lai, sihmanhsehlaw milihchim hna cu an kaa phih a si lai.

¹ Maw Pathian, harnak ka tong, ka thlacamnak cu ka ngaihpiak tuah! Ka thin a phang, ka ral hna kut chungin ka khamh tuah! ² Miṭhalo hna khuakhannak chungin ka khamh law misual bu hna sinin ka huppheng ko. ³ An lei kha nam bantukin an i tat i bia ṭhalo kha thal bantukin an kah. ⁴ Miṭha kha lamhruang an ah hna i chikkhatte ah i sumṭhen loin an thal cun an kah hna. ⁵ Thil ṭhalo tuahnak ding khua an khanmi ah khan, pakhat le pakhat thazang an i pe, khuazei ah dah kan rap kha kan chiah hna lai tiah an i ceih. "Kan rap cu ahohmanh nih hmu hna hlah seh," an ti. ⁶ Ṭhatlo tuahnak ding khua cu an khan i "Ṭhatlo tuahnak ding khua kan khanmi cu a ṭha tuk," an ti. Minung lungthin le ruahnak hi khuaruahharmi thil thuk a si hrimhrim ko. ⁷ Sihmanhsehlaw Pathian nih a thal in a kah ciammam hna i chikkhatte ah khin hma an pu ko. ⁸ An bia nih khan rawhnak a phakpi hna lai i a hmumi paoh nih an lu an thinhnawh hna lai. ⁹ An dihlak in an thin a phang lai; Pathian nih a tuahmi kha an chim lai i a tuahmi kong cu an ruat hna lai. ¹⁰ Bawipa nih a tuahmi thil ruangah khan miding mi vialte cu an i lawm lai; Bawipa chungah cun himnak an hmuh lai i miṭha vialte nih amah cu an thangṭhat lai.

¹ Maw Pathian, nang cu kan thlacamnak a kan lettu na si caah ² Zion ah kan in thangṭhat lai i na sinah bia kan i kammi kha kan in pek lai. ³ Mi vialte nih an sualnak cu na hmaiah an phuan lai: kan sualnak cu kan caah a rit tuk hringhran, nangmah lawnglawng nih na kan thianhpiak khawh. ⁴ Nangmah nih na thimmi hna cu an lung aa lawm, na hmunthiang ah na umtermi hna mi lunglawm an si! Na inn chung i a ummi thil ṭha cu kan khim lai i a thiangmi na biakinn chung thil ṭha cu kan i zaa lai. ⁵ Maw Pathian, kan Khamhtu, thla kan cam tikah na kan leh i khuaruahhar thil na tuahmi in na kan khamh. Vawleicung mi vialte le a hla bik rili ral i a ummi hmanh nih an in bochan. ⁶ Na ṭhawnnak in tlang pipi hna cu an umnak hmun ah khan na umter hna i a ṭhawngmi na lianhngannak cu na langhter. ⁷ Rili thawng cu na daihter i tilet thawng cu na nemter; mi au thawng cu na daihter. ⁸ Thil lianngan na tuahmi hna ruangah vawlei cu a dihlak in a thin a phang. Vanhramdeng in vanhramdeng tiang na tuahmi thil kha mi nih an thangṭhat i an lawmh. ⁹ Ram cu na dawt caah a cungah ruah na surter; na rumter i a vawlei na ṭhatter. A chung i na umtermi tiva cu an kao bal lo, cu tiva hna nih cun rawl a phunphun an chuahter — cucu nangmah tuahmi a si. ¹⁰ An thuanmi lo cu ruah ti na pek i ciap tein ruah nih cun a surh; vawlei cu na nemter i thlaikho kha na ṭhanter hna. ¹¹ Na ṭhatnak nih kum ṭha a vuiter. Na kalnak paoh ah rawl tampi a um. ¹² Saṭil tlonnak hmun cu saṭil run in an khat i tlangpang hna cu lawmhnak in an khat. ¹³ Ram hnonak hmun cu tuu in an khat i nelrawn cu facang in an khat; lunglawmhnak in an au i hla an sa.

¹ Mi vialte hna, Pathian cu lunglawmhnak in thangṭhat tuah u! ² A sunglawimi a min kha hla in thangṭhat u, sunparnak in thangṭhat u. ³ Pathian sinah cun, "Na tuahmi thil hi zeitluk in dah khuaruahhar an si. Na lianhngannak kha a ngan tuk caah na ral cu na hmaiah therphang in an kun. ⁴ Vawlei cungmi vialte nih an in biak i hla in an in thangṭhat, na min kha hla in an thangṭhat," tiah chim u. ⁵ Ra u law Pathian nih a tuahmi thil hi zoh hna hmanh u, minung sinah a tuahmi thil khuaruahhar hi zoh hna hmanh u. ⁶ Rili cu vawlei ro ah a canter i kan pupa hna nih tiva cu an ke in an tan. Cuka ah cun, a tuahmi thil ruangah khan kan i lawm. ⁷ A ṭhawnnak in a uk zungzal i miphun hna cu a ngiat zungzal hna. Ahohmanh amah doh awkah ral tho hna hlah seh. ⁸ Miphun vialte hna, kan Pathian cu thangṭhat tuah u; nan thangṭhatnak cu thanter u. ⁹ Amah nih nung dam tein a kan umter i tlu loin a kan umter. ¹⁰ Maw Pathian, nangmah nih na kan hneksak; ngun cu mei in an thianh bantukin kannih zong na kan hneksak ve. ¹¹ Rap ah na kan foihter i kan keng ah thilrit na kan khinh. ¹² Kan ral nih khan an kan lamh beh; tilian le meisul lakah na kan kalter, asinain atu cu himnak hmun na kan phakter. ¹³ Na inn ah khangh thawinak kha ka rak put lai; bia kaa kammi kha kan pek lai. ¹⁴ Harnak chung ka rak um lio i kan pek lai ka timi kha kan pek lai. ¹⁵ Biakṭheng cung i khangh awkah tuu kha ka rak put hna lai, meheh khanghmi rim thaw kha aa zel lai i, cawtum le meheh kha raithawinak ah kan pek chanh hna lai. ¹⁶ Pathian a upatmi vialte hna, ra u law ra ngai tuah u; Pathian nih ka ca i a tuahmi kha kan chimh hna lai. ¹⁷ Pathian cu bawmhnak duh ah ka rak auh; amah cu hla in ka rak thangṭhat. ¹⁸ Ka sualnak kha rak thup ning law ka thlacamnak cu a rak ka ngaihpiak hnga lo. ¹⁹ Sihmanhsehlaw Pathian nih cun a ka theihpiak i ka thlacamnak cu a ka ngaihpiak. ²⁰ Pathian nih ka thlacamnak kha a ka hlawtpiak lo i a fekmi a dawtnak kha ka sinin ṭhial loin a um caah, amah cu ka thangṭhat.

¹ Maw Pathian, vawleicung mi vialte nih na duhnak kha an hngalh i ² miphun vialte nih na khamhnak kha an hngalh nakhnga, kan zaangfah law thluachuahnak kan pe ko, kan cungah na hmai tlanter ko. ³ Maw Pathian, miphun kip nih in ṭhangṭhat hna seh, miphun vialte nih in thangṭhat hna seh. ⁴ Nangmah nih miphun vialte cu dinnak in bia na ceih hna i mi vialte cu na hruai hna caah miphun vialte cu i lawm hna seh law lunglawmhnak in hla sa hna seh. ⁵ Mi kip nih in thangṭhat hna seh, Maw Pathian; miphun vialte nih in thangṭhat ko hna seh. ⁶ Vawlei nih rawl kha a chuahter cang, Pathian kan Pathian nih thluachuah a kan pek cang. ⁷ Pathian nih thluachuah a kan pek; vawleicung mi zakip nih upat hna seh.

¹ Pathian cu tho seh law a ral kha ṭhek dih hna seh! Amah a huatu cu zam dih hna seh. ² Meikhu kha thli nih a choih bantukin a choih dih hna lai, khuailul kha mei nih a emh tikah a tit bantukin miṭhalo cu Pathian hmaika ah an rawk lai. ³ Sihmanhsehlaw miding mi cu an i lawm lai i a hmaiah khan an tha a nuam lai; lunglawm ngaingai in an um lai. ⁴ Pathian cu hla in thangṭhat u, a min cu thangṭhat u; khuadawm aa citmi caah cun lam kha ser tuah u. Amah a min cu Bawipa a si — amah hmaiah cun i lawm tuah u! ⁵ A biakinn thiang chungah a ummi Pathian nih, ngakṭah le nuhmei kha an zawn a ruah hna. ⁶ Lungleng le umhar in a ummi kha umnak inn a pek hna i thongtla kha luatnak lawmhnak chungah a chuahpi hna; sihmanhsehlaw ralthawh hmangmi cu ramcar ah an um lai. ⁷ Maw Pathian, na mi na hruai hna tik le thetse ram tan in na kalpi hna tikah khan ⁸ vawlei cu aa hnin i van in ruahpi a sur; cu bantukin a si cu Sinai Tlang Pathian a rat ca le Israel Pathian a rat ruangah a si. ⁹ Ruah tampi in na surter i a fe cangmi na ram kha na ṭhatter ṭhan. ¹⁰ Cuka ah cun na mi nih innlo an khuar i na ṭhatnak thawngin sifakmi kha rawl ei awk na pek hna. ¹¹ Bawipa nih nawlbia cu a chuah i cu thawng cu nu tampi nih an kalpi: ¹² "Siangpahrang hna le an ralkap hna cu an zam cang," an ti. Inn i a ummi nu hna nih khan, hranchaw an tlaihmi kha an rak i phaw; ¹³ cu hranchaw hna cu ngun in tuammi ṭhuro milem tete an si, an thla cu sui bantukin a tleu. (Zeicahdah a cheu cu raldoh ni ah tuu kawm chungah nan um ko?) ¹⁴ Lianngan Bik Pathian nih siangpahrang hna cu Zalmon Tlang ah a ṭhek dih hna tikah khika ah hawhra kha a surter. ¹⁵ Bashan tlang hi zeitluk in a nganmi tlang dah a si! Tlang zum tampi a ngeimi tlang a si. ¹⁶ Zeicahdah cu bantuk tlang ngan, tlang zum tampi a ngeimi tlang nih, Pathian nih umnak ah aa thimmi tlang cu na nihsawh? Cuka ah cun Pathian cu, zungzal in a um ko ṭung lai! ¹⁷ A ṭhawngmi a rangleng thong tampi he Bawipa cu Sinai Tlang in a ra i a hmunthiang ah cun a lut. ¹⁸ Tlang sang par ah cun a hung kai i sal tlaihmi tampi aa hruaih hna; amah a dohtu hna nih khan amah cu laksawng an pek. Cuka ah cun Bawipa Pathian cu a um lai. ¹⁹ Ni khat hnu ni khat kan thilrit a kan changtu Bawipa cu thangṭhat ko u, amah cu a kan khamhtu Pathian a si. ²⁰ Kan Pathian cu mi a khamhtu Pathian a si, amah cu Bawipa kan Bawipa, thihnak chungin a kan chuahtu a si. ²¹ Pathian nih a ral pawl cu an lu a khuai hrimhrim hna lai, an sualnak lam a zul pengmi hna cu. ²² Bawipa nih, "Nan ral cu Bashan in ka rak kirpi ṭhan hna lai; rili thukmi chungin ka rak kirpi ṭhan hna lai i ²³ an thisen chungah cun nan i chawk lai i nan uico nih an duh chungin an liah hna lai," a ti. ²⁴ Maw Pathian, teinak in na kal cu mi vialte nih an hmuh, Pathian ka siangpahrang a hmunthiang chung i a luh cu an hmuh dih. ²⁵ Hlasatu pawl kha hmaisuang ah an um, aw dawh tum thiam pawl kha hnulei ah an um, an karlak ah khan khuang tumtu nu pawl kha an um. ²⁶ "A mi an i pumhnak ah Pathian cu thangṭhat u; Israel tefa vialte hna, Bawipa cu thangṭhat ko u." ²⁷ A hmasa ah an lak i phun hme bik Benjamin kha a ra, cun Judah phun hruaitu pawl kha an mi hna he cun an ra i Zebulun le Naftali phun hruaitu pawl nih khan an zulh hna. ²⁸ Maw Pathian, na ṭhawnnak langhter ko, kan ca i na hmanmi na ṭhawnnak kha langhter ko. ²⁹ Siangpahrang nih laksawng an in putnak Jerusalem khua chung i na biakinn khan langhter ko. ³⁰ Izipt cu mawhchiat ko, phaikung lak i a tlongmi sahrang kha mawhchiat ko, miphun cu chimhring ko hna, an fale he a ummi cawtum hna kha; annih nih na hmaiah an kun i an ngun cu an in pek hlantiang annih cu chimhring ko hna. Ral thawh a duhmi kha ṭhek ko hna. ³¹ Izipt ram in cozah nih thlahmi lamkaltu an ra lai; Ethiopia mi nih Pathian sinah thlacam in an kut an hler lai. ³² Vawleicung ram hna, Pathian cu hla in thangṭhat u, Bawipa cu thangṭhat ko u. ³³ Van a citmi, a hlunmi van aa citmi cu thangṭhat u. Aw thang piin a au cu ngai tuah u. ³⁴ Pathian ṭhawnnak cu thanh tuah u a lianhngannak cu Israel mi cungah a um, a ṭhawnnak cu van ah khin a um. ³⁵ Pathian, Israel Pathian, a hmunthiang chung in a rami cu zeitluk in dah ṭihnung a si! A mi cu ṭhawnnak le lianhngannak a pek hna. Pathian cu thangṭhat ko u!

¹ Maw Pathian, ka khamh ko sawh! Ti nih ka hngawng tiangin a ka phum cang. ² A thukmi nawncek chungah ka pil cuahmah i lamh awk a fekmi hmun a um lo. A thuhnak hmun ka phan cang i tilet nih an ka phum dengmang cang. ³ Ka bawm tuah tiin ka aunak ah ka baa cang i ka or zong a fak dih cang; bawmhnak a ka pe lai maw tiin ka mithram cat in kan zoh. ⁴ Zei ruang lo ah a ka huatu hna cu ka lu cung sam nakin an tam deuh, ka ral an sinak kongah lih a chimmi hna cu an ṭhawng i thah an ka duh. Ka fir lomi thil kha an ka chamter. ⁵ Maw Pathian, ka sualnak cu nangmah sinin an i thup kho lo; zeitluk in dah ka hruh cu na hngalh ko. ⁶ Maw Lianngan Bik Pathian Bawipa, nangmah an bochantu hna cungah ningzahnak ka tlunter nakhnga lo ka bawm. Maw Israel Pathian, nangmah an biatu hna cungah hmaichiatnak ka tlunter nakhnga lo ka bawm. ⁷ Nangmah ruangah nihsawhnak ka hmuh hi a si i nangmah ruangah ningzahnak nih a kan khuh hi a si. ⁸ Ka unau hna sinah khual ah ka cang i ka nufale hna sinah ramdangmi ah ka cang. ⁹ Na biakinn ka ṭanhnak hi ka chungah mei bantukin a alh i nangmah an in nihsawhnak kha keimah cungah a tla. ¹⁰ Rawl ulhnak in toidornak lungthin ngeih kaa zuam i asinain mi nih an ka nihsawh ṭhiamṭhiam. ¹¹ Zuun ngaihnak thuam in kaa thuam i capo ah an ka saih. ¹² Zatlang lam ah ka kong an ka ceih i zuri nih hla an ka phuah ¹³ Asinain kei cu na sinah thla ka cam ko lai, Maw Bawipa ; a nganmi na dawtnak ruangah ka let law, kan khamh lai tiah na ka kammi ruangah ka let ko sawh, na duh tik caan ah nangmah nih ka let ko, Maw Pathian. ¹⁴ Nawncek chung ka tlaknak khan ka chuah ko, ka ral hna kut chungin ka huppheng ko law a thukmi ti chungin him tein ka chuah ko. ¹⁵ Tilian cu ka fenhter sawh hlah; a thukmi ti chungah cun ka pilter sawh hlah, thlan chungah cun ka tlakter sawh hlah. ¹⁶ Maw Bawipa, a fekmi na dawtnak ṭhatnak thawngin ka thlacamnak cu ka let law, zawnruahnak ngan na ngeihmi thawngin keimah leiah i mer ko. ¹⁷ Na sal hi ka thuhtak hlah; harnak nganpi ka tong — atu hrimhrim ah ka let ko sawh! ¹⁸ Ra ka zuanhnawh law ka khamh tuah; ka ral hna kut chungin ka chuah tuah. ¹⁹ Zeitluk in dah an ka nihsawh i hmaichiatnak le ningzahnak ka huah kha na hngalh; ka ral cu na hmuh dih ko hna. ²⁰ An ka serhsat tuk caah ka lung zong a rawk dih; zeihmanh ka tuah kho ti lo. An ka zaangfah rua lai tiah ka rak ruah, sihmanhsehlaw zaangfahnak zeihmanh ka hmu lo; a ka hnemtu an um rua lai tiah ka rak ruah, sihmanhsehlaw ahohmanh an um lo. ²¹ Ka rawl a ṭam tikah sivai tu an ka pek, ka ti a hal tikah ti thor an ka dinh. ²² An puai cu anmah rawhnak ah cang seh law an i nuamhnak cu anmah tluknak ah cang ko seh. ²³ An mit cawtter hna law khua hmu kho hna hlah seh; an keng cu derthawm zungzal hna seh. ²⁴ Na thinhunnak cu toih hna law na thinlinhnak nih phan hna seh. ²⁵ An riahhmun cu chuahtak hna seh law an thlam chungah a nungmi pakhat hmanh tang hna hlah seh. ²⁶ Dan na tat cangmi kha an hrem chinchin hna i nganfahnak na inter cangmi hna kha an thangchiat hna. ²⁷ An sualnak kha cazin chungah i khumh dih law na khamhnak chungah covo zeihmanh ngei hna hlah seh. ²⁸ An min cu a nungmi minung cazin khan hloh si hna seh; na mi hna min cazin chungah i tel hna hlah seh. ²⁹ Sihmanhsehlaw kei cu harnak chung le temhinnak chungah ka um i cucaah cun ka cawi law ka khamh tuah, Maw Pathian. ³⁰ Pathian cu hla in ka thangṭhat lai, a lianhngannak cu ka thanh lai i amah cungah kaa lawmhnak cu ka chim lai. ³¹ Hi nih hin Bawipa cu cawtum pekchanh nakin a lawmhter deuh lai i cawtum kum tlingmi pekchanhnak hmanh in a lawmhter deuh lai. ³² Cu thil cu serhsatnak a ingmi nih an hmuh tikah an i lawm lai; Pathian a biami cu lung ṭhawnnak thar an hmu lai. ³³ Sifahnak le retheihnak a ingmi hna thlacamnak cu Bawipa nih a ngaih i thong chungah a ummi hna kha a philh hna lo. ³⁴ Van le vawlei hna, Bawipa cu thangṭhat tuah u, rili le a chung i a ummi thil vialte hna, Bawipa cu thangṭhat tuah u. ³⁵ Zion cu a khamh lai i Judah ram chung khua cu a remh ṭhan hna lai; a mi cu cuka ah cun khua an sa lai i ram cu an co lai; ³⁶ a sal hna an tefa nih an co lai i amah a dawmi kha cuka ah cun an um lai.

¹ Maw Pathian, ka khamh tuah, Maw Bawipa, atu ah ka bawm tuah. ² Thah a ka zalmi kha sung hna seh law i tuai dih hna seh. Harnak ka inmi ruangah aa lawmmi cu an hnulei ah i let hna seh law ningzak in um hna seh. ³ A ka nihsawhtu pawl kha an sunghnak nih khan lungdong cikcek in umter hna seh. ⁴ Nangmah sinah a rami vialte cu lunglawm le thanuam in um hna seh. Na khamhnak a duhmi vialte nih, "Bawipa cu a lianngan hringhran ko," ti zungzal hna seh. ⁵ Kei cu ka thazang a der i zeihmanh ka tuah kho lo; cucaah run ka zuanhnawh ko, Maw Pathian. Nangmah cu a ka bawmtu le Khamhtu na si — rau sawh hlah, Maw Bawipa! Bawipa!

¹ Maw Bawipa, nangmah cu kaa dornak hmun na si, zeitikhmanh ah ningzahnak ka phakter hlah! ² Na din caah ka hram law ka chanh ko, ka bia ka ngaihpiak law ka khamh tuah. ³ Ka caah himnak lungpi si law a fekmi ralhruang a ka hupphengtu si ko; nangmah cu ka himnak lungpi le ka ralhruang na si. ⁴ Ka Pathian, miṭhalo hna kut chungin ka khamh tuah, mipuarhrang le miding lo hna kut chungin ka khamh ko. ⁵ Bawipa, nangmah cungah ka ruahchannak vialte kha ka chiah, ka no lio tein nangmah cu kan bochan zungzal. ⁶ Ka nun chung vialte nangmah cu kan hngatchan; ka chuahka in nangmah nih na ka huhphenh zungzal; nangmah cu a zungzal in kan thangṭhat lai. ⁷ Ka nunnak hi mi tampi caah cun khuaruahhar a si, sihmanhsehlaw nangmah cu a ṭhawngmi a ka hupphengtu na si. ⁸ Chun nitlak in kan thangṭhat i na sunparnak cu ka chim. ⁹ Atu cu a tar cang aipat tiin ka hlaw sawh hlah, san a tlai ti ualpat lo tiin ka kaltak hlah. ¹⁰ Ka ral nih cun thah an ka duh, an i ceih i keimah thahnak ding khua kha an khaan. ¹¹ An i thawh i, "Pathian nih a hlawt cang, dawi u sih law tlai u sih; zeicahtiah a chanhtu ding ahohmanh an um lo," an ti. ¹² Maw Pathian, lamhlatpi ah ka umtak hlah; ka Pathian, atu ah ka bawm ko. ¹³ A ka dohtu pawl kha sung hna seh law rawk hna seh. Ka cungah fahnak tlunter aa zuammi kha ningzahnak le hmaichiatnak phan hna seh. ¹⁴ Nangmah cungah ka ruahchannak vialte cu ka chiah dih ko lai, nangmah cu kan thangṭhat chin lengmang lai. ¹⁵ Na dinnak kong kha ka chim lai i na khamhnak kha chun nitlak ka thanh lai; na khamhnak cu ka hngalh khawh leng a si nain ka thanh lai. ¹⁶ Bawipa Pathian, na ṭhawnnak cu ka thangṭhat lai, na dinnak, nangmah dinnak lawnglawng kha ka thanh lai. ¹⁷ Ka no lio tein nangmah nih na ka cawnpiak i atu tiangin khuaruahhar na tuahmi kha ka chim lengmang ko. ¹⁸ Atu cu a tar i a sam a par cang aipat tiin ka kaltak hlah, maw Pathian. Hmailei chan a ra ding vialte sinah na ṭhawnnak le na lianhngannak ka chimnak dingah hin nangmah nih ka umpi ko. ¹⁹ Maw Pathian, na dinnak cu van khi a phan. Thil lianngan tampi na tuah hna, nangmah bantuk ahohmanh an um lo. ²⁰ Ka cungah harnak le nganfahnak kha na tlunter, sihmanhsehlaw nangmah nih ka thazang kha na ka pek ṭhan lai i thlan chungin na ka khamh lai. ²¹ Hmasa nakin a ngan chinchin ah na ka ser lai, nangmah nih hnangamnak na ka pek ṭhan lai. ²² Tingtang in nangmah cu kan thangṭhat lai, Ka Pathian, zumhawktlak na sinak cu ka thangṭhat lai. Maw Israel Mi Thiang, ka tingtang in nangmah thangṭhatnak hla cu ka sa lai. ²³ Nangmah thangṭhat in tingtang ka tum pah in lunglawm in ka au lai, nangmah nih na ka khamh caah ka minung sinak a dihlak in kan thangṭhat lai. ²⁴ Chun nitlak in na dinnak kha ka chim lai, zeicahtiah harnak pek a ka duhmi kha an sung cang i ningzahnak an phan cang.

¹ Maw Pathian, siangpahrang nih hin bia ka ceih tikah na dinnak kha ka hman nakhnga, ka cawnpiak ko; ² cun na mi cu dinnak in ka uk hna nakhnga le sifakmi kha ding tein an bia ka ceihpiak hna nakhnga na dinnak kha keimah cu ka hrawm ko. ³ Ram nih hin rumnak i lawmhpi seh law dinnak kha a chungah leng seh. ⁴ Siangpahrang nih khan sifakmi kha an bia duhdanh lo tein ceihpiak hna seh law retheimi kha bawm hna seh law mi hremtu kha tei hna seh. ⁵ Ni a ceu chung paoh le thla a ceu chung paoh cu na mi nih a zungzal in in bia hna seh. ⁶ Siangpahrang cu lo a surhtu ruah bantuk si seh law vawlei a cawmtu ruah bantuk si seh. ⁷ A chan chungah dinnak kha karh seh law thlapa a ceu chung paoh cu siṭhatnak kha hmun ko seh. ⁸ A penmi ram cu rili pakhat in rili pakhat tiang a si lai i Zufrates tiva in vanhramdeng tiang a si lai. ⁹ Thetse ram mi kha a hmaiah an kun lai i a ral kha leidip lakah an bawk lai. ¹⁰ Spain ram siangpahrang le tikulh ram siangpahrang hna nih khan laksawng an rak put lai; Arabia ram siangpahrang le Ethiopia ram siangpahrang hna nih khan laksawng an ra ṭhenh lai. ¹¹ Siangpahrang vialte kha a hmaiah an kun lai i miphun vialte nih a rian an ṭuan lai. ¹² Amah a autu sifakmi hna le retheimi hna, mi nih zei ah an rel lomi hna kha, a chanh hna. ¹³ A dermi le sifakmi cungah zaangfahnak a ngei i retheimi kha an nunnak kha a khamh hna. ¹⁴ Hremnak chung le serhsatnak chungin a khamh hna; an nunnak kha a caah thil sung a si. ¹⁵ Siangpahrang cu saupi nung ko seh! Arabia ram in sui rak pe hna seh; a zungzal in thlacampiak hna seh; Pathian nih a zungzal in thluachuahnak pe seh. ¹⁶ Ram chungah rawl tam piin um ko seh; Lebanon tlang i a ummi rawl kung ṭha bantuk nih tlang vialte cu tuam dih hna seh. Ramlak i a khomi ram bantukin khuapi cu minung in khat hna seh. ¹⁷ A min cu zeitikhmanh ah philh si ti hlah seh; a minthannak cu ni a um chung paohpaoh dai loin um zungzal ko seh. Miphun zakip nih amah cu thangṭhat hna seh, mi vialte nih Pathian cu, siangpahrang thluachuah na pek bantukin kannih zong ka pe ve, tiin nawl hna seh. ¹⁸ Bawipa Israel Pathian cu thangṭhat ko u, amah lawnglawng cu, hi thil khuaruahhar a tuah khotu a si. ¹⁹ A sunglawimi a min cu zungzal in thangṭhat ko u, a sunparnak cu vawleicung dihlak ah khat seh. Amen, Amen. ²⁰ Hihi Jesse fapa David thlacamnak an donghnak a si.

¹ Pathian hi Israel mi hna cungah a ṭha taktak ko, lung thiang a ngeimi hna cungah a ṭha taktak ko. ² Sihmanhsehlaw kei cu ka rak tlu dengmang, ka rak nal dengmang; ³ zeicahtiah miṭhalo hna an huncho kha ka hmuh i an i porhlawt kha ka theih tikah cu nih cun ka nah a ka chuahter. ⁴ Annih cu fahnak zeihmanh an ing lo, an ngan a dam i an ṭhawng. ⁵ Midang bantukin harnak zeihmanh an tong lo, midang bantukin temhinnak zeihmanh an hmu lo. ⁶ Cucaah cun ruamkai kha ṭhi bantukin an i oih i puarthau cu puan bantukin an i aih; ⁷ An mit pawt lellul pipi in an um i an lungthin cu ṭhat lonak khuaruahnak in a khat. ⁸ Midang kha zeihmanh ah an rel hna lo i thil ṭhalo lawng kha an ceih. An ruam a kai i zeitindah midang kha kan hrem khawh hna lai ti lawng kha an ceih. ⁹ Vancung i a ummi Pathian kha an thangchiat i vawleicung i a ummi minung kha an duhduh in an ti hna. ¹⁰ Cucaah cun Pathian mi hmanh nih an merhnawh hna i an chimmi paoh kha an zumh dih. ¹¹ An i thawh i, "Pathian nih cun a hngal lai lo, Cungnung Bik nih cun a hmu lem lai lo," an ti. ¹² Miṭhalo mi cu hi bantuk hi an si ko. Thil tampi an ngei i an ngei chin luaimai. ¹³ A si kun ahcun, thiang tein nun kaa zuam i ka kut in sualnak tuah lo kaa sum hi pakpalawng maw a si ko lai? ¹⁴ Pathian, chun nitlak in harnak na ka inter i zing fate in dan na ka tat. ¹⁵ Cu bantuk bia cu rak chim ning law na mi hna cungah rawitu ka rak si ṭung hnga. ¹⁶ Cucaah cun hihi hngalh a har tuk ko nain, hngalh awkah kaa zuam; ¹⁷ na biakinn chung i ka luh tik ceo ah miṭhalo hna cungah zeidah a tlung lai ti kha ka hngalh. ¹⁸ Lam nal ah na chiah taktak hna i rawhralnak chungah na tlakter hna. ¹⁹ Chikkhatte ah an rawk i an donghnak cu ṭihnung ngaingai a si. ²⁰ Bawipa, annih cu zanmang bantuk an si, na hun i hlauh tikah annih cu an lo colh. ²¹ Ka cekne tiangin a ka runh i ka thin a ka khenh tikah; ²² Ka hrut i zeihmanh ka hngalthiam lo; na cung i ka umtuning cu saram umtuning bantuk a si. ²³ Asinain nangmah sin ṭhiamṭhiam ah khan ka um i ka kut in na ka hruai. ²⁴ Ka kalnak dingah khan lungthin na ka cheuh i a donghnak ah cun upatnak he na ka cohlan lai. ²⁵ Vancung ah khin nangmah hlei in ahodah ka ngeih? Nangmah kan ngeih cang caah vawlei ah hin zeidah ka herhmi a um? ²⁶ Ka pum le ka ruahnak cu zorchuk hna hmanh seh law Pathian kha ka thazang a si; amah lawnglawng kha ka herhmi cu a si ko. ²⁷ Nangmah an hlawmi cu an thi hrimhrim lai, nangmah cungah zumhawktlak in a um lomi cu na hrawh hna lai. ²⁸ Sihmanhsehlaw kei ca tu ah cun, Pathian pawng um le, Bawipa Pathian chungah i dor le a tuahmi thil thanh hi a va nuam hringhran dah!

¹ Zeicahdah hitihin na kan hlawt, Maw Pathian? Na mi cungah hin zungzal in maw na thin a hun lai? ² Hlanlio piin na mi si awkah na kan thimmi hi kan philh hlah. Na rak umnak Zion Tlang zong kha philh hlah. ³ Ra law kan thil a rawkmi hi na ke hrimhrim in ra pal, kan ral nih biakinn chung thil vialte an hrawh dih. ⁴ Na hmunthiang chungah na ral kha an au, biakinn kha an lak cang. ⁵ Hreitlung in thing a hautu pawl nih thing an hau bantukin, ⁶ thingphel vialte kha an hreitlung le an sobul in an khuai dih hna. ⁷ Na biakinn kha an khangh; nangmah kan in biaknak hmun kha an thurhhnawmh; a dihlak in an hrawh dih! ⁸ Kanmah kha a rial in rial cikcek an kan duh, ram chung hmunthiang paoh kha an khangh dih hna. ⁹ Kan thil thiang kha an lo dih, profet an um ti lo, hi bantukin thil kha zei can dah a um ti kha ahohmanh nih an hngal lo. ¹⁰ Maw Pathian, kan ral nih hin zei can dah an kan nihsawh lai? Na min hi a zungzal in maw an nihsawh ko lai? ¹¹ Zeicahdah bawmh na kan duh lo? Zeicahdah na kut cu na hnulei ah na chiah hna? ¹² Pathian, a hramthawk tein nangmah cu kan siangpahrang na si i vawlei cungah hin nangmah nih ral kha na tei hna. ¹³ A ṭhawngmi na thazang in rili kha na cheu i rili chung rulpi kha an lu na den dih hna. ¹⁴ Leviathan rulpi lu kha na den hna i a ruak cu thetse ram mi kha ei awkah na pek hna. ¹⁵ Cerhti le tiput cu na luanter hna i tiva ngan cu na carter hna. ¹⁶ Chun le zan cu nangmah nih na ser hna, ni le thlapa cu an umnak hmun cio ah khan na chiah hna. ¹⁷ Vawlei cu a donghnak ri kha nangmah nih na ser hna i ṭhal caan le khuasik caan cu na ser hna. ¹⁸ Sihmanhsehlaw maw Pathian, na ral nih an in serhsat kha philh hlah; annih cu mihrut an si i nangmah cu zei ah an in rel lo. ¹⁹ Santlailo na mi hna hi a puarhrangmi an ral hna kut chungah kaltak hna hlah; hremnak a ingmi na mi hi philh hna hlah. ²⁰ Kanmah he biakamnak na tuahmi kha philh hlah. Kan ram chung a muihnak hmun paoh hi zaang-ennak in a khat. ²¹ Hremmi kha sunghter hna hlah law sifak le rethei nih in thangṭhat ko hna seh. ²² Maw Pathian, tho law na bia kha chim tuah! Nangmah zei ah an rel lomi nih chun nitlak in nihchuak i an in saih kha philh hlah. ²³ Na ral nih thinhun in an au len cu philh hlah, an dotu hna nih hnahnawhnak thawng an umter zungzalmi cu philh hlah.

¹ Nangmah cu kan in thangṭhat, Maw Pathian, nangmah cu kan in thangṭhat. Zeitluk in dah na lianhngan kha kan thanh i khuaruahharmi thil na tuahmi kha kan chim. ² Pathian nih, "Biaceihnak dingah caan ka khiah cang i aa buaktlak tein ka ceih hna lai. ³ Vawlei le a cung i a ummi minung vialte hi lo dih hna hmanh seh law vawlei hram cu fek tein ka umter lai. ⁴ Miruamkai kha i porhlaw hlah u ka ti hna i miṭhalo kha nan lung puam hlah u, ka ti hna; ⁵ i leksuai ti hlah u ka ti hna i i fak len ti hlah u ka ti hna," a ti. ⁶ Biaceihnak hi nichuahlei in siseh nitlaklei in siseh a ra lo, chaklei in siseh thlanglei in siseh a ra lo; ⁷ bia a ceihtu cu Pathian a si i a cheu kha a ṭhumh hna i a cheu kha a cawi hna, ⁸ Bawipa nih a kut in hrai pakhat aa put, cu hrai cu zu hrim, a ṭhawng ngaingaimi in a khat, a thlet i miṭhalo vialte kha a dinter hna, a ne zongin an khawn dih. ⁹ Sihmanhsehlaw kei cu Jakob Pathian kong chim kha ka bang lai lo i amah thangṭhatnak hla sak zong kha ka ngol bal lai lo. ¹⁰ Miṭhalo mi hna ṭhawnnak cu a hrawh lai, sihmanhsehlaw miding mi ṭhawnnak kha cu a karh chin lai.

¹ Pathian cu Judah ram chungah an hngalh ngaingai i Israel ram ah a min a thang. ² A umnak inn cu Jerusalem ah khan a si i Zion Tlang cungah khan khua a sa. ³ Cuka ah cun ral pawl an cantiang kha a khiah dih hna i an phaw le an nam zong kha a hrawh dih hna — an hriamnam vialte kha a hrawh dih. ⁴ Zeitluk in dah na sunparnak cu a lianhngan, maw Pathian! Na ral na tei hnanak tlang in na ra kir tikah khan, zeitluk in dah na rumra kha a ngan! ⁵ An ralkap ralṭha pawl cu an hranchaw kha na chuh hna i atu cu thihnak hngilh in an i hngilh cang; an hriamnam a run hmangtu dingah a tangmi pakhat hmanh an um lo. ⁶ Na ṭhih hna tikah maw Jakob Pathian, an rangtum vialte le an rangcung ralkap vialte cu an ril dih! ⁷ Sihmanhsehlaw nangmah cu mi nih an in ṭih hringhran ko! Na thin a hun ahcun ahodah na hmaiah a dir ngam lai? ⁸ - ⁹ Vawleicung i hremnak a ingmi vialte hna khamh awkah; nangmah nih na biakhiahnak cu thanh awk i na thawh tikah, na biakhiahnak cu vancung khin na run langhter i vawlei cu a thin a phang i dai tein a um. ¹⁰ Minung thinhunnak nih cun nangmah thangṭhatnak tu kha a karhter chin lehlam; ral chungin a nung in a tangmi hna nih na puai kha an tuah hna lai. ¹¹ Kan in pek lai tiah nan i kammi kha Bawipa nan Pathian cu pe u; kan pawngkam i a ummi miphun hna, Bawipa cu laksawng ra pe u. Pathian nih minung cu amah ṭih dingin a ser hna, ¹² a ruam a kaimi bawi kha a ṭhumh hna i siangpahrang nganngan kha therphang lengmang in a umter hna.

¹ Pathian cu fak piin ka auh, fak piin ka auh i a ka theih. ² Harnak caan ah Bawipa sinah cun thla ka cam; zan khuadei thlacam in ka kut cu ka hler hna, sihmanhsehlaw hnangamnak ka hmu kho lo. ³ Pathian kha ka ruat i ka hram, khua ka ruat i ka lung a dong. Selah ⁴ A ka hngilhter lo, ka lungre a thei tuk i zeihmanh ka chim kho lo. ⁵ A liam ciami ni kha ka ruat hna i a luan ciami kum kha ka hngalh ṭhan hna. ⁶ Zan khuadei fak piin khua ka ruat; khua ka ruat lengmang i keimah le keimah kaa halmi cu hihi a si: ⁷ Bawipa nih hin a zungzal in maw a ka hlawt ko lai? Ka cungah hin lawmhnak a ngei ṭhan ti lai lo maw? ⁸ Daw ti loin maw a ka um ko lai? Bia a ka kammi cu pakpalawng maw a si ko lai? ⁹ Pathian nih hin minung cung i zaangfahnak ngeih kha a philh ko hnga maw? Minung cung i zawnruahnak a ngeih tawnmi kha a thinhunnak nih dahra a hloh dih?" ka ti. ¹⁰ Cun kaa thawh i, "Ka lungfah bikmi cu — Pathian cu zeizong vialte tuah khotu a si ti lo," ti hi a si, ka ti. ¹¹ Bawipa, thil lianngan na tuahmi kha ka philh hna lai lo i kan hnulei caan i khuaruahharmi thil na tuahmi kha ka lung ah an hung pem ṭhan lai. ¹² Na tuah ciami thil vialte kha ka ruat ṭhan hna lai i ka lung chungin ka tuaktan hna lai. ¹³ Maw Pathian, na tuahmi thil vialte hi an thiang dih! Nangmah tlukin a nganmi pathian zeihmanh an um lo. ¹⁴ Nang cu khuaruahharmi thil a tuahtu Pathian na si; na ṭhawnnak cu miphun hna lakah khan na langhter. ¹⁵ Na lianhngannak in na mi cu na khamh hna, na mi Jakob tefa hna le Josef tefa hna cu na khamh hna. Selah ¹⁶ Maw Pathian, ti nih an in hmuh tikah an thin a phang i rili tawne hna cu an ther. ¹⁷ Khuadawm nih ruah a surter, van in khua a ri i nimtlau kha a kenkip ah an lek. ¹⁸ Khuari thawng cu a tor in a tor i nimtlau nih vawlei kha a ceuh dih; vawlei cu a hninh in aa hnin. ¹⁹ Rili cungah na ke in na kal, a thukmi rilipi cu na tan, sihmanhsehlaw na ke neh cu hmuh khawh an si lo. ²⁰ Na mi cu tuukhal bangin na hruai hna, Moses le Aaron kha na cawnghter hna.

¹ Maw ka mi hna, kan cawnpiakmi hna kha ngai tuah u, ka chimmi bia kha ṭha tein ngai tuah u. ² Nan sinah bia ka chim lai i hlanlio thil khuaruahhar kha a sullam kan chimh hna lai. ³ Cu thil cu kan rak theihmi le kan rak hngalhmi kha an si, kan pupa hna nih an kan chimhmi kha an si. ⁴ Bawipa ṭhawnnak le amah nih thil lianngan a tuahmi hna le, thil khuaruahhar a tuahmi hna kha, kan fale cu chim loin kan um hna lai lo, kan hmai chan mi kha kan chimh hna lai. ⁵ Israel mi kha nawlbia a pek hna, Jakob tefa kha nawlbia a pek hna. Ka nawlbia cu nan fale kha nan cawnpiak hna lai, tiin kan pupa kha a fial hna. ⁶ Cuticun hmai chan mi nih an hngalh ve lai i an fale kha an cawnpiak ve hna lai. ⁷ Cun Pathian zong kha an i bochan lai i a tuahmi thil kha an philh hna lai lo, a nawlbia kha an zulh zungzal hna lai. ⁸ Annih cu a hringsortu hna bantuk kha an si lai lo, kha hna kha cu ralthawh hmang, nawl ngai lomi, Pathian fek tein aa bochan lomi, Pathian sinah zumhawktlak in a um bal lomi an si. ⁹ Li le thal in ral a tu tawnmi Efraim mi kha raltuk taktak ni ah cun an zam. ¹⁰ Pathian sinah bia an i kammi kha an zul lo, a nawlbia kha ngaih an duh lo. ¹¹ A tuahmi thil kha an philh hna i khuaruahharnak a langhtermi kha an i cinken lo. ¹² An pupa hna mithmuh hrimhrim ah khan Pathian nih khuaruahharmi thil pakhat a tuah, Zoan lo ah, Izipt ram ah khan a tuah. ¹³ Rili kha a cheu i a chungin a hruai hna; ti cu vampang bantukin a dirter hna. ¹⁴ Chun ah khuadawm in a hruai hna i zan ah mei ceu in a hruai hna. ¹⁵ Ram car chungah khan lung ngan pipi kha a khuai hna i rili ti zat in din awk ti a pek hna; ¹⁶ lungpang chung khan tiva a chuahter hna i ti cu tiva bangin a luanter. ¹⁷ Sihmanhsehlaw Pathian cungah cun sualnak an tuah lengmang ko i Cung Nung Bik kha ramcar chungah cun an doh zungzal ko. ¹⁸ Kan duhmi rawl cu na kan pek hrimhrim lai tiin Pathian cu an hneksak. ¹⁹ Pathian cu an thangchiat i, "Pathian nih cun ramcar ah cun cabuai cu a hung kho ngai hnga maw? ²⁰ Lungpi cu a tuk i ti cu a chuak hluahmah taktak, asinain rawl cu a kan pe kho ngai hnga maw? A mi cu sa a kan pe kho ngai hnga maw?" an ti. ²¹ Cu an chimmi cu Pathian nih a theih tikah an cungah a thin a hung; a mi cu mei in a hrem hna i an cung i a thinhunnak kha a ṭhang, ²² zeicahtiah amah kha an i bochan duh lo i a kan khamh lai, tiah an zum duh lo. ²³ Sihmanhsehlaw van kha bia a chimh i a innka kha a hunter; ²⁴ vancung cun rawl a run pek hna, an ei awk manna changreu kha a run thlak hna. ²⁵ Cuticun vancungmi rawl kha an ei. Pathian nih an ei khawh chung ei awkin a pek hna. ²⁶ Cun nichuahlei thli kha a hranter i a ṭhawnnak in thlanglei thli kha a thawhter, ²⁷ cun leidip zat in va kha a thlak hna, rili kam thetse zat in a thlak hna; ²⁸ an riahhmun laifang ah khan an tla, an thlam velchum ah khan an tla. ²⁹ Cuticun mi nih khan an ei hna i an khim; Pathian nih an duh zat in a pek hna. ³⁰ Sihmanhsehlaw an ei lio, a khim hmanh an khim hlanah khan, ³¹ Pathian cu an cungah a thin a hung i an miṭhawng bikbik kha a thah hna, Israel tlangval ṭha bikbik kha a thah hna! ³² Hi vialte khuaruahharnak a tuah ko nain mi cu an sual lengmang ko i a zumh in an zum duh lo; ³³ cucaah cun an ni cu thaw bantukin a donghter hna, an nunnak cu chikkhatte ah thil ṭhalo nih a tlunhnawh hna i a dong. ³⁴ Sihmanhsehlaw a cheu a thah hna tikah khan, a cheu cu amah leiah an i mer ve; an i ngaichih i amah sinah thla fak piin an cam. ³⁵ Annih a hupphengtu hna cu Pathian a si kha an hun hngalh i annih a khamhtu hna cu Cungnung Bik a si kha an hun theih. ³⁶ Sihmanhsehlaw an bia cu lih lawngte a si i an chimmi paoh cu hlennak lawngte a si. ³⁷ Amah sinah khan zumhawktlak in an um lo, amah sin i bia an i kammi kha an zul lo. ³⁸ Asinain Pathian cu a mi hna cungah khan zaangfahnak a ngei, an sualnak kha a ngaihthiam hna i a hrawk hna lo. Thinhun kha voi tampi aa sum i a thinlinhnak kha voi tampi chuahter loin a um. ³⁹ Minung an si kha a philh lo, a hung hrang i a lo ṭhan komi thlitu bantuk men an si kha a philh lo. ⁴⁰ Voi zeizat riamruam dik amah kha ramcar chungah khan an doh; voi zeizat riamruam dik a ngaih an chiatter! ⁴¹ Atu le atu Pathian kha an hneksak, atu le atu Israel Mi Thiang kha a thin an hunter. ⁴² A liannganmi a ṭhawnnak kha an philh; an ral hna kut chungin a khamh hna kha an philh, ⁴³ Izipt ram Zoan lo lak i a liannganmi thil le khuaruahharmi thil a tuahmi kha an philh. ⁴⁴ Tiva kha thi ah a canter hna i Izipt mi nih khan tiva ti cu an ding kho lo. ⁴⁵ Tho kha a thlahhnawh hna i awlok an chonh hna, utlak kha a thlahhnawh hna i an lo kha an hrawhpiak dih hna. ⁴⁶ An rawl kung eitu ah lunghmul a thlahhnawh hna i an lo hrawktu ah khaubawk a thlahhnawh hna. ⁴⁷ An mitsur ruang cu rial in a thah hna i an theipi kung cu hawhra in a thah hna. ⁴⁸ An caw cu rial in a thah hna i an tuurun cu ṭek in a thah hna. ⁴⁹ Ṭih a nungmi a thinhunnak kha an cungah a thlet hnawh hna i hrawktu vancungmi a thlahhnawhmi hna nih khan harnak tampi an pek hna. ⁵⁰ A thin kha a sum lo i an nunnak zong kha a zuah hna lo; rai in a thah dih hna. ⁵¹ Izipt ram chung innchungkhar dihlak an fapa upa bik kha a thah dih hna. ⁵² Cun tuukhal bangin a mi cu a chuahpi hna i ramcar chungah khan lam a hruai hna. ⁵³ Him tein a kalpi hna i zeihmanh an ṭih lo, sihmanhsehlaw an ral hna cu rili nih a vui hna. ⁵⁴ A ram thiang chungah cun a luhpi hna, amah hrimhrim nih a teimi tlang ah cun a phakpi hna. ⁵⁵ A mi pawl cu hmailei i an hung fon deuh lengmang tikah khan cuka i a rak ummi hna kha a dawi hna; ram cu Israel miphun kha a cheuh hna i cuka ah cun an thlam chung cio ah khan khua a sakter hna. ⁵⁶ Asinain Lianngan Bik Pathian kha an doh i an hneksak. A nawlbia kha zulh an duh lo i ⁵⁷ an pu an pa hna bantuk khan ral thawh hmang le zumh awk tlak loin an um ve, aa merhmi likuk in kahmi thal cu a ka a kheng khomi a si lo caah i bochan khawh ding a si lo bantukin annih zong bochan awk a tlakmi an si ve lo. ⁵⁸ Lawkih biaknak hmun an sermi nih khan a thin a hunter i an serchommi siasal hna nih khan a nah an chuahter. ⁵⁹ Cucu Pathian nih a hmuh tikah a thin a hung i cucaah a mi cu a hlawt hna. ⁶⁰ Shiloh khua i a ummi an thlam cu a kaltak, minung sin i a umnak a inn cu a kaltak. ⁶¹ Biakamnak kuang kha kan ral pawl cu a tlaihter hna. a lianhngannak le a sunparnak an umnak kuang cu a tlaihter hna. ⁶² Amah a mi hna lila cungah cun a thin a hung i an ral kha annih cu a thahter hna. ⁶³ Ral ah tlangval cu an thi lengmang i ngaknu pawl cu vat awk an ngei ti lo. ⁶⁴ Tlangbawi cu vainam in an thi i an nupile nih khan a ngaih hmanh an ngai kho hna lo. ⁶⁵ A donghnak ah Bawipa cu hngilh i hun i hlauh bantuk khin a hun i hlau; zu nih a tha a pawttermi ralkap ṭhawng bantuk khi a si. ⁶⁶ A ral cu a khirh hna i a tei cikcek hna, ningzak in a thawh in tho kho ti loin a tei hna. ⁶⁷ Josef tefa kha a hlawt hna i Efraim phun kha a thim hna lo. ⁶⁸ Judah phun tu kha a thim i a duh ngaingaimi Zion Tlang tu kha a thim. ⁶⁹ Cuka ah cun a biakinn kha a sak, vancung i a inn bantuk a si; vawlei bantuk fek in a ser i zungzal him dingin a tuah. ⁷⁰ A sal David kha a thim i tuu a khalhnak le tuu a cawnghnak khan a lak. ⁷¹ Amah cu Israel siangpahrang ah a ser, Pathian mi hna tuukhal ah a ser. ⁷² David nih cun a lungthin a dih-umnak in a zohkhenh hna i fimnak in a hruai hna.

¹ Maw Pathian, lawkihmi nih na mi hna kan ram hi an rung chim; na biakinn thiang cu an thurhhnawmh i Jerusalem cu an hrawh dih. ² Na mi hna an ruak cu langta ei awkah an hlonh hna i na sal hna an ruak cu saram ei awkah an hlonh hna. ³ Na mi hna an thisen cu ti bantukin an luanter, Jerusalem khua pumpi ah thi cu ti bantukin a luang, ruak vuitu ding ahohmanh an um lo. ⁴ Kan pawngkam i a ummi miphun hna nih capo ah an kan saih, an kan nihsawh i an kan zawmhtaih; ⁵ Bawipa, zei can dah kan cungah na thin a hun lai? Zungzal in maw a hun ko lai? Na thinhunnak cu zungzal in maw mei bantukin a alh ko lai? ⁶ Nangmah an bia lomi miphun cu na thinhunnak kha toih hna law nangmah an hlawmi cu na thinhunnak kha langhhnawh ko hna. ⁷ Annih nih kan mi kha an thah hna i kan ram kha an hrawh dih. ⁸ Kan pupa hna nih sualnak an tuahmi ruangah cun kannih cu dan kan tat hlah, ruahchan awk zeihmanh kan ngeih ti lo caah zaangfahnak tu kan cungah ngei ko. ⁹ Na min upatnak ding caah kan bawm tuah, Maw Pathian kan Khamhtu; kan chuah law kan sualnak cu kan ngaithiam ko. ¹⁰ Zeicahdah miphun dang hna nih, "Nan Pathian cu khuazei ah dah a um kun?" tiah an kan ti lai? Na sal kha an thi an luanter hna caah miphun dang pawl dan na tat hna cu kan mit hrimhrim nih hmu seh. ¹¹ Thongtla pawl cu an aihramnak kha theihpiak ko sawh hna, thah awkin biakhiah cangmi cu a liannganmi na ṭhawnnak in luatter ko hna. ¹² Bawipa, miphun dang pawl cu, nangmah an in zawmhtaih ruangah khan a let sarih in rul hna. ¹³ Cun kannih na mi, na tuurun chung tuu hna nih hin, zungzal in kan in lawmh lai i kan hmailei hna.

¹ Maw Israel Tuukhal, kan bia kan ngaihpiak tuah, Josef kha tuurun bantukin a hruaitu, kan thlacamnak kan theihpiak tuah. Cherubim cungah bawiṭhutdan cung i a ṭhumi, ² na dawtnak cu kan cungah langhter ko; Efraim le Benjamin le Manasseh phun cungah langhter ko! Na ṭhawnnak cu kan hmuhter, ra law kan khamh tuah. ³ Kan kirpi ṭhan ko, Maw Pathian! Na dawtnak kha kan cungah langhter law kannih nih khamhnak kan hmuh lai. ⁴ Maw Lianngan Bik Bawipa Pathian, zeitik tiang dah na mi hna kan thlacamnak hi let duh loin na kan um lai? ⁵ Mitthli hi ni fate kan ei awk rawl ah na ser i hrai nganpi khat in kan din awkah na kan chiahpiak ko. ⁶ Kan khua chingchan hna hmaiah ningzak in na kan umter i kan ral nih an lung diriam tein an kan nihsawh. ⁷ Kan kirpi ṭhan ko, Maw Lianngan Bik Pathian, na dawtnak kha kan cungah langhter law kannih nih khamhnak kan hmuh lai. ⁸ Izipt ram in mitsur ruang pakhat na chuahpi; miphun dang kha na ṭhawl hna i an ram ah cun cu mitsur ruang cu na phun. ⁹ A ṭhan khawh nakhnga hmun kha na thianhpiak i cucaah a hram cu thukpi an pil kho i a ruang cu an zam i ram vialte kha an huh dih. ¹⁰ Tlang cu thladem a demh hna i sidar kung ngan pipi cu a nge nih a huh dih hna. ¹¹ A nge cu an zam lengmang i Mediterranean Rili an phan, Zufrates Tiva tiang an phan. ¹² Zeicahdah a kulhnak hau vialte cu na bauh dih? Atu cu aa chawkmi paoh nih a thei kha an fir; ¹³ ngal nih an nan dih i saram vialte nih an ei. ¹⁴ Maw Lianngan Bik Pathian, kanmah leiah i mer ko! Vancung khin run kan zoh law ra law na mitsur ruang hi rung khamh ko. ¹⁵ Nangmah hrimhrim nih na cinmi mitsur ruang hi ra khamh tuah; hi tluk ṭhawng in na ṭhantermi mitsur ruang no hi ra khamh tuah! ¹⁶ Kan ral nih mei in an khangh i an sam dih; na thinhun in zoh hna law hrawk hna. ¹⁷ Nangmah nih na thimmi miphun cu kan huppheng law kan zohkhenh ko, nangmah nih hi tluk ṭhawng in na ṭhantermi miphun cu kan zohkhenh ko! ¹⁸ Nangmah cu zeitikhmanh ah kan in mertak ti lai lo; nungdam in kan umter law kan in thangṭhat lai. ¹⁹ Kan kirpi ṭhan ko, Maw Lianngan Bik Bawipa Pathian! Na dawtnak kha kan cungah langhter law kannih nih khamhnak k zeitikhmanh ah kan in mertak ti lai lo; nungdam in kan umter law kan in thangṭhat lai.

¹ A kan chanhtu Pathian cu lunglawmhnak in hla in thangṭhat u; Jakob Pathian cu hla in thangṭhat u! ² Hla dawh sak cu thawk u law khuang cu tum hna u; tingtang le thonglawi in aw dawhdawh cu tum hna u. ³ Thla thar caan le thla lai caan ah, kan puai ah tuu ki cu tum hna u. ⁴ Hihi Israel ram ah kan phung a si, Jakob Pathian nih tuah a kan fialmi a si. ⁵ Izipt ram doh awkah aa thawh tikah, Israel mi kha nawlbia ah a pek hna. Ka theih bal lomi aw pakhat kha ka theih i cu aw nih cun, ⁶ "Nan keng cung thilrit pipi kha kan lakpiak cang hna i nan rianṭuannak bawm kha kan chiahter cang hna. ⁷ Harnak nan in tikah nan ka auh i kan khamh hna. Khuadawm chung i kaa thuhnak hmun khin ka run in leh hna; Meribah cerh ah khan kan hneksak hna. ⁸ "Ka mi hna, ralrinnak kan pekmi hna hi ngai tuah u; Israel, ka bia hi ngai ko sawh! ⁹ Ramdang pathian kha bia hrimhrim hna hlah u, keimah dah ti lo cu a dang zeihmanh bia hna hlah u. ¹⁰ Keimah cu Bawipa nan Pathian ka si, keimah nih Izipt ram in kan chuahpi hna; nan ka ang u law rawl kan pek hna lai. ¹¹ "Asinain ka mi nih ka bia ngaih nan duh lo; Israel nih ka nawl zulh na duh lo. ¹² Cucaah nan lung ṭhawn ning bantukin nan lam kha kan zulhter hna i nan duhmi paoh kha kan tuahter hna. ¹³ Ka mi nih hin ka bia ngai u law zeitluk in dik ka hei i lawmh hnga! Ka nawl zul u law, zeitluk in dik ka lung a va si hnga! ¹⁴ Nan ral kha khulrang tein kan teipiak ko hna hnga. ¹⁵ A ka huami cu ka hmaiah therphang in an kun lai, dantatnak an inmi cu zungzal in a hmun lai. ¹⁶ Changvut ṭha bik in ka

¹ Vancung biaceihnak hmun ah Pathian cu a dir i pathian pawl an i pumhnak ah biakhiahnak hi bantukin a tuah; ² "Ding loin biaceih hi ngol hrimhrim cang u, miṭhalo duhdanh kha ngol cang u. ³ Sifakmi le ngakṭah kha an bia ceihpiak hna u, rethei le bawmtu ngei lo kha hmaan tein ruahpiak hna u. ⁴ Sifak le retheimi kha chuah hna u, miṭhalo hna kut chung khan khamh hna u. ⁵ "Nan va hrut thiam dah, nan va fim lo thiam dah! Khuamui chungah nan um i vawlei cungah hin dinnak zeihmanh a um ti lo. ⁶ Nannih cu pathian nan si, Cungnung Bik fapa nan si, kan ti hna. ⁷ Asinain minung bantukin nan thi lai, siangpahrang fapa an thih bantukin nan thi ve lai," a ti. ⁸ Maw Pathian, ra law vawlei hi uk tuah; miphun vialte hi nangmah ta an si.

¹ Maw Pathian, um sawhsawh ko hlah; dai zirziar le holh loin um hlah, maw Pathian! ² Zohhmanh, na ral cu an cawl an cang i nangmah an huatu cu nangmah doh awkah an i tim len ko. ³ Na mi hna tuknak dingah a thli in khua an khang i nangmah nih na huhphenhmi hna doh awk kha an i tim. ⁴ An i thawh i, "Israel hi a phun hloh in hlo u sih, zungzal in philh si seh," an ti. ⁵ An khuakhanmi ah cun lungkhat in an um i nangmah doh awkah cun an ṭang ṭi. ⁶ Cu hna cu, Edom mi, Ishmael mi; Moab mi, Hagri mi, ⁷ Gebal mi, Ammon mi, Amalek mi, Filistia mi le Tair mi an si; ⁸ Assiria zong kha an sinah aa ṭom ve, an dihlak in Lot tefa cu an bawmh hna. ⁹ Midian mi cungah na tuahmi bantuk kha annih cung zongah tuah ve, Kishon Tiva ah Sisera le Jabin cung i na tuahmi bantuk kha an cungah tuah ko; ¹⁰ Sisera le Jabin cu Endor ah na sunghter hna i an ruak cu vawlei ah a rop. ¹¹ Oreb le Zeeb cungah na tuahmi bantuk kha an ralbawi hna cungah cun tuah ko; Zebah le Zalmunna na sunghter hna bantuk khan, an uktu bawi vialte cu sunghter ko hna; ¹² cu uk bawi pawl nih cun an rak i thawh i, "Pathian ram a simi cu kanmah caah kan i lak lai," an rak ti. ¹³ Ka Pathian, annih cu leidip bangin ṭhek ko hna, thli nih a choihmi capawl bangin ṭhek dih hna. ¹⁴ Mei nih tupi kha a kangh i meizik nih tlang cu a hliau bantukin ¹⁵ annih cu ṭotho in dawi hna law thlichia in ṭhih ko hna. ¹⁶ Maw Bawipa, na min lianngan kha an phuan hlantiang, ningzahnak cu an lu cungah khinh luaimai ko hna. ¹⁷ Sung hna seh law therphang zungzal in um hna seh, ningzak hmaichia in thi hna seh. ¹⁸ Nangmah lawnglawng hi Bawipa na si le vawlei dihlak uktu, Cungnung Bik na si kha hngal hna seh!

¹ Maw Lianngan Bik Bawipa, zeitluk in dah na biakinn cu ka duh! ² Cuka i um cu ka duh hringhran! Bawipa biakinn chung tual cu ka ngai hna. A nungmi Pathian cu ka nunnak dihlak in hla in ka thangṭhat. ³ Pithlung hmanh nih bu an i sak i pele hmanh nih anmah innte an ngei; an fano cu na biakṭheng pawngah an chiah hna, maw Lianngan Bik Bawipa, kan siangpahrang le kan Pathian. ⁴ Na biakinn chungah a ummi cu zeitluk in dah an i lawmh, nangmah thangṭhatnak hla a sa zungzalmi hna cu zeitluk in dah an tha a nuam! ⁵ Nangmah sinin thazang a hmumi hna cu zeitluk in dah an i lawmh, Zion Tlang i va kal a duhmi hna cu zeitluk in dah an i lawmh. ⁶ A ro a carmi nelrawn kha an tan tikah cerhti put tamnak hmun ah a cang; ruahter nih khan tidil in a khahter. ⁷ An kal tikah an ṭhawng chin lengmang; Zion Tlang ah pathian hna Pathian cu an hmuh lai. ⁸ Maw Lianngan Bik Bawipa Pathian, ka thlacamnak kha ka theihpiak tuah, Jakob Pathian, ka thlacamnak kha ka ngaihpiak tuah. ⁹ Maw Pathian, kan siangpahrang cu thluachuahnak pe ko, nangmah nih na thimmi siangpahrang cu thluachuahnak pe ko. ¹⁰ Na biakinn chungah ni khat um cu hmun dang i ni thong khat um nakin a ṭha deuh. Miṭhalo mi hna inn chung i um nakcun ka Pathian inn kutka hram dir hmanh ka duh deuh. ¹¹ Bawipa cu a kan hupphengtu le a sunglawimi kan siangpahrang a si, amah nih thluachuah a kan pek i vel le thangṭhatnak kan hmuh. A dingmi thil a tuahtu paoh cu thil ṭha kha pe loin a um hna lo. ¹² Maw Lianngan Bik Pathian, nangmah an bochanmi cu lunglawmmi an si.

¹ Bawipa, na ram cu na zaangfah ko, Israel cu a kumvui na ṭhatter ṭhan. ² Na mi hna an sualnak kha na ngaihthiam hna i an palhmi vialte kha na maimilh hna. ³ An cung i na thinhunnak kha na damter i na thinlinhnak kha na daihter. ⁴ Maw Pathian, kan Khamhtu, kan kirpi ṭhan law kan cungah lungsi loin um ti hlah. ⁵ Kan cungah zungzal in maw na thin a hun ko lai? Na thin cu a dam bal lai lo maw? ⁶ Thazang thar kan pe law, na mi nih kan in thangṭhat lai. ⁷ Maw Bawipa, a fekmi na dawtnak cu kan hmuhsak ko, na khamhnak zong kan pe fawn. ⁸ Bawipa Pathian i a chimmi bia cu ka ngai lai, hruh lam a simi lam, kan lam kha kan zulh ṭhan lo caah a mi kannih hi daihnak kha a kan kamh. ⁹ Amah a upatmi khamh awkah khan aa tim zungzal ko i kan ram chungah hin a sunparnak cu a um zungzal lai. ¹⁰ Dawtnak le zumhawktlak sinak cu an ra ṭi lai; dinnak le daihnak cu an i tong lai. ¹¹ Minung nih zumhawktlak a sinak kha van leiah a kai lai i Pathian dinnak nih vancung khin a run zoh lai. ¹² Bawipa nih kumvui ṭha a kan pek lai i kan ram nih rawl tampi a chuahter lai. ¹³ Bawipa hmaiah khan dinnak cu a kal lai i a lam kha a rak sialpiak lai.

¹ A derthawmmi le santlai lomi ka si caah ka thlacamnak cu ka ngaihpiak law ka let tuah, Maw Bawipa ² Nangmah kha an tlaihchanmi ka si caah thihnak in ka khamh ko; nangmah sal ka si ca le nangmah an bochanmi ka si caah ka khamh ko sawh. ³ Nang cu ka Pathian na si caah ka cungah zaangfahnak ngei ko, Maw Bawipa ; chun nitlak in na sinah thla ka cam. ⁴ Ka thlacamnak cu na sinah a kai lengmang caah na salpa hi ka lung ka lawmhter ko. ⁵ Nangmah sin i thla a cammi hna cungah cun na ṭha i ngaihthiamnak le a fekmi dawtnak in na khat, Maw Bawipa ⁶ Bawipa, ka thlacamnak cu ka ngaihpiak law nangmah bawmh hal in ka aunak hi ka theihpiak tuah. ⁷ Ka thlacamnak kha na ka leh tawn caah harnak caan ah nangmah kha kan auh lengmang. ⁸ Bawipa, nangmah bantuk pathian dang ahohmanh an um lo, nangmah tuahmi bantuk a tuah khomi pakhat hmanh an um lo. ⁹ Nangmah nih na sermi miphun vialte hi an chuak lai i na hmaiah an kun lai. Na lianhngannak kha an thangṭhat lai, ¹⁰ zeicahtiah Pathian, nangmah lawnglawng hi a ṭhawngmi na si, nangmah lawnglawng hi khuaruahhar a tuah khotu na si. ¹¹ Bawipa, tuah seh ti na ka duhmi kha ka cawnpiak law na nawl kha fel tein ka zulh lai; ka lungthin a dih umnak in na rian ka ṭuan nakhnga ka cawnpiak ko. ¹² Ka lungthin dihlak in kan thangṭhat lai, Maw Bawipa ka Pathian; na lianhngannak cu a zungzal in ka chim lai. ¹³ A fekmi na dawtnak cu zeitluk in dah ka caah a ngan! Thlan tawne in na ka khamh. ¹⁴ Maw Pathian, miruamkai pawl nih an ka fuh, nangmah zei i an rel lomi miṭhalo pawl nih thah an ka zalh. ¹⁵ Bawipa, nang cu zaangfahnak le dawtnak in a khatmi Pathian na si; thin a fual i zaangfahnak a ngei zungzal i zumhawktlak a si zungzalmi na si. ¹⁶ Keimah leiah i mer law ka zaangfah tuah; ka nu nih a rak in biak bantukin kei zong nih kan biak ve caah, thazang ṭhawnnak ka pe law ka khamh tuah. ¹⁷ Bawipa, na ṭhatnak kha ka cungah langhter ko, cu tikah keimah a ka huami hna nih khan hnangamnak le bawmhnak na ka pek kha an hmuh lai i an ning a zak lai.

¹ Pathian nih tlang thiang cungah a khualipi kha a sak; ² Jerusalem khua cu, Israel ram chung i hmun dang vialte nakin a dawt deuh. ³ Pathian nih nangmah kong ah a chimmi bia sunglawi cu ngai tuah, Maw Pathian khualipi; Selah ⁴ "Ka nawl a ngaimi miphun hna cazin kha ka ṭial tikah, Izipt le Babilon kha ka telh chih hna lai; cun Filistia le Tair le Ethiopia zong kha, Jerusalem ta nan si tiah ka ti hna lai," a ti. ⁵ Zion kong ah cun, miphun vialte kha Zion ta an si dih ti a si lai i Cungnung Bik nih a ṭhawnter lai. ⁶ Bawipa nih miphun hna cazin kha a ṭial lai i annih cu Jerusalem khuami hna chungah khan a telh chih hna lai. ⁷ Hlasa mi pawl le milam mi pawl nih khan an dihlak in na thangṭhatnak hla kha an sak lai. Selah

¹ Bawipa Pathian, ka khamhtu, chun nitlak in ka au i zan ah na hmaika ah ka ra. ² Ka thlacamnak cu ka theihpiak ko sawh law nangmah bawmhnak hal in ka aunak cu ka ngaihpiak ko sawh! ³ Harnak tam tuk nih an ka tlunhnawh i thlankhor an ka phakpi dengmang. ⁴ Thihnak a phan dengmangmi hna bantuk kha ka si ve i ka thazang vialte a lo dih cang. ⁵ Mithi hna lakah khan kaltak ka si ko; ral kut in a thimi an thlan chung i a it komi hna bantuk ka si, annih cu na philh diam cang hna i bawmh khawh a si in an si ti lo. ⁶ Thlan khor a thuhnak ka ah khan na ka hlonh, a thuk bik le a mui bik khor chungah khan na ka thlak. ⁷ Na thinhunnak nih rit ngaiin a ka nenh i na thinhunnak tilet nih khan a ka khuh. ⁸ Ka hawikom kha na ka chuh hna i annih nih a fih in an ka fih. ⁹ Kei cu thong ah ka tla i ka luat kho lo; harnak ka in ruangah ka mit zong a rawk dih. Bawipa, ni fate in kan auh i nangmah sinah thlacam in ka kut ka hler. ¹⁰ Khuaruahhar na tuahmi hna cu mithi caah maw an si? Mithi cu maw a tho hna in nangmah an thangṭhatmi cu an si? ¹¹ A fekmi na dawtnak cu thlan chungah maw chim a si i zumhawktlak na sinak cu rawhralnak hmun ah cun dah chim a si? ¹² Khuaruahharmi thil na tuahmi cu muihnak hmun ah cun maw hmuh an si i na ṭhatnak cu rawhralnak hmun ah cun dah hmuh a si? ¹³ Bawipa, ka bawm ko sawh, tiin kan auh; zing fate in na sinah thla ka cam. ¹⁴ Bawipa, zeicahdah na ka hlawt? Zeicahdah na ka thuhtak? ¹⁵ Ka ngakchiat lio tein temhnak ka ing lengmang i thihnak ka naih zungzal; dan na ka tatmi ka phorhnak ah hin ka ba cikcek cang. ¹⁶ Ṭih a nungmi na thinhunnak nih khan a ka khuh i na mi tuknak nih khan holh kho loin a ka tuah; ¹⁷ chun nitlak in tilian bang an ka kulh; a kenkip in an ka chuahhnawh. ¹⁸ Ka hawikom ṭha bik hna hmanh nih khan an ka chuahtak; ka ca i a tangmi hawikom cu muihnak lawnglawng kha a si ko.

¹ Bawipa, a fekmi na dawtnak cu hla in ka sak zungzal ko lai i zumhawktlak na sinak cu ka chim thluangthluan ko lai. ² Na dawtnak cu zungzal in a hmun lai ti kha ka hngalh, zumhawktlak na sinak cu van tlukin a fek. ³ Naa thawh i, "Ka thimmi sinah bia kaa kam cang; ka sal David cu bia ka kam i, ⁴ ’Na tefa pakhat cu siangpahrang a si zungzal lai; na pennak cu zungzal in ka hmunhter lai,’ ka ti," na ti. Selah ⁵ Vancung pathian hna nih khin khuaruahharmi thil na tuahmi hna cu hla in an sak hna; Bawipa, zumhawktlak na sinak cu hla in an thangṭhat. ⁶ Bawipa, vancung i a ummi khi nangmah bantuk ahohmanh an um lo, pathian hna lakah hin ahohmanh nangmah tluk an um lo. ⁷ Nangmah cu pathian hna nih an khuakhannak bu chungah khan an in upat i na kiang i a ummi vialte nih khan an in ṭih dih. ⁸ Lianngan Bik Bawipa Pathian, ahohmanh nangmah tluk i a ṭhawngmi an um lo; zeizong vialte ah nang cu zumhawktlak na si, Bawipa ; ⁹ nangmah nih rilipi cu na uk i a tilet cu na daihter hna. ¹⁰ Limkeng Rahab cu na tei i na thah; a liannganmi na ṭhawnnak in na ral cu na tei hna. ¹¹ Vawlei hi na ta a si, van zong khi na ta a si ko; vawlei le a cung i a ummi thil vialte hi na sermi an si; ¹² nangmah nih Chaklei le Thlanglei kha na ser hna, Tabor Tlang le Hermon Tlang nih lunglawmhnak in hla in an in thangṭhat. ¹³ Zeitluk in dah na lianhngan! Zeitluk in dah na ṭhawn! ¹⁴ Na pennak cu dinnak le biading cungah a hram bunh a si, na tuahmi thil kip chungah hin dawtnak le zumhawktlak sinak an um. ¹⁵ Hla in nangmah an biami cu milunglawm an si, na zaangfahnak ceunak chung i a ummi cu lunglawmmi an si. ¹⁶ Nangmah thawngin chun nitlak an i lawm i na ṭhat ruangah nangmah cu an in thangṭhat. ¹⁷ Nangmah nih teinak ngan pipi na kan pek, na zaangfahnak thawngin teinak cu kan hmu, ¹⁸ cu ti kan hmuhnak cu a kan hupphengtu kha nangmah thimmi a si caah a si; nangmah Israel Mi Thiang nih kan siangpahrang cu na kan pek. ¹⁹ Zumhawktlak a simi na sal hna sinah hlan liopi ah langhnak in bia na chim i, "Ralkap min thang pakhat cu bawiluchin ka chinh cang; mizapi hna chungin thimmi kha bawiṭhutdan cu ka pek cang. ²⁰ Ka sal David cu ka thim cang i nan siangpahrang ah ka ser cang. ²¹ Ka thazang cu a sinah a um zungzal lai i ka ṭhawnnak nih a ṭhawnter lai. ²² A ral nih zeitikhmanh ah an tei lai lo i miṭhalo nih an tei bal lai lo. ²³ A ral cu ka rial dih hna lai i amah a huatu cu ka thah hna lai. ²⁴ Amah cu ka dawt zungzal lai i a cungah zumhawktlak in ka um zungzal lai; ral teinak kha ka pek zungzal lai. ²⁵ A penmi a ram cu Mediterranean Rili in Zufrates Tiva tiang ka phakter lai. ²⁶ Keimah cu a ka thawh lai i, ’Nangmah cu ka pa le ka Pathian na si; a ka hupphengtu le ka khamhtu na si,’ a ka ti lai. ²⁷ Amah cu ka fater ah ka ser lai i siangpahrang vialte lak i a ngan bik ka siter lai. ²⁸ A sin i bia kaa kammi cu ka tuah zungzal lai i amah he kan biakamnak cu zungzal in a hmun lai. ²⁹ A tefa pakhat cu siangpahrang a si zungzal lai; a bawiṭhutdan cu van a hmunh chung paoh a hmun ve lai. ³⁰ "Sihmanhsehlaw a tefa hna nih khan ka nawlbia an zulh duh lo i ka phung ningin an nun lo i ³¹ ka cawnpiakmi hna kha zei ah an rel lo i ka chimhmi hna kha an zulh lo ahcun, ³² an sualnak ruangah khan dan ka tat hna lai i palhnak an tuahmi ruangah khan fungfek in ka tuk hna lai. ³³ Sihmanhsehlaw David dawt kha cu ka ngol lai lo, bia ka kamhmi zong kha ka tlolh lai lo. ³⁴ Amah he bia kan i kamnak kha ka hrawk lai lo, amah sin i bia ka kammi cu pakhatte hmanh ka let ṭhan lai lo. ³⁵ "Voi khat ah zungzal ca in bia kaa kam; cu kaa kammi cu: ’David cu ka hleng bal lai lo,’ ti hi a si. ³⁶ Tefa a ngei zungzal hna lai i ni a tlan chung paoh cu a pennak kha keimah nih ka cawnghpiak lai. ³⁷ Thlapa cu van ah khin zumhawktlak tehte a si bantukin cu thlapa bantuk cun a pennak cu a fek lai," na ti. Selah ³⁸ Sihmanhsehlaw na thimmi siangpahrang cungah cun na thin a hung i amah cu na kaltak i na hlawt cang. ³⁹ Na sal sin i bia na kammi cu na hrawh i a bawiluchin cu leidip lakah na hlonh. ⁴⁰ A khua kulhnak cu na chimh dih hna i a ralhau cu rawk relrul in na kaltak hna. ⁴¹ Aa chawkmi paoh nih a thil kha an fir i a innpa pawl nih an nihsawh. ⁴² Teinak cu a ral hna tu kha na pek hna i annih cu lunglawm in na umter hna. ⁴³ A hriamnam cu santlailo ah na ser hna i raltuknak hmun ah na sunghter. ⁴⁴ A bawifung kha na lakpiak i a bawiṭhutdan cu vawlei ah na hrilh. ⁴⁵ A kum nih a phak hlanah na tarter i hmaichiatnak nih a zual in a zual. Selah ⁴⁶ Maw Bawipa, zei can dah naa thuh lai? Zungzal in maw naa thuh lai? Na thinhunnak cu mei bangin zei can dah a alh lai? ⁴⁷ Bawipa, minung cu a nunnak hi zeitluk in dah a tawi ti kha philh hlah; mi vialte cu a thi dingin na kan ser dih kha philh hlah! ⁴⁸ Ahodah thi loin a nung zungzal kho lai? Zeitindah mi nih cun thlan cu a hrial khawh lai? Selah ⁴⁹ Maw Bawipa, hlanlio i na dawtnak na rak langhtermi hna kha khuazei ah dah an si dih? David bia na rak kamhmi kha tah, khuazei ah dah an um kun? ⁵⁰ Na sal nih nihsawhnak ka in kha philh hlah law Pathian zei i a rel lomi hna nih an ka serhsatnak kha philh sawh hlah. ⁵¹ Bawipa, na thimmi siangpahrang hi na ral pawl nih an zawmhtaih hringhran ko! A kalnak kip ah khan an nihsawh. ⁵² Bawipa cu zungzal in thangṭhat si ko seh! Amen! Amen!

¹ Maw Bawipa, nangmah cu kan inn na si zungzal! ² Tlang an sem hlan le vawlei kha na ser hlan in nangmah cu zungzal in, hramthawknak zong um lo donghnak zong um loin Pathian na si. ³ Minung cu an rak sining ah khan kir ṭhan u na ti hna, vawlei ah na canter ṭhan hna. ⁴ Kum thong khat hi nang caah cun ni khat bantuk a si; a dih cangmi nizan bantuk kha a si ko, zan khat chung i suimilam caan tawite pakhat bantuk khi a si ko. ⁵ Tilian bantukin minung cu na fenh hna; zan mang bantuk men an si ko. ⁶ Zinglei ah a hung keo i a hung ṭhang i a par i zanlei ah cun a carmi belh bantuk men an si ko. ⁷ Na thinhunnak nih a kangh in a kan kangh i na thinlinhnak nih kan thin a kan phanter. ⁸ Kan sualnak cu na hmaiah na chiah hna, a thli tein kan sualnak cu na hmuh dih ko hna. ⁹ Na thinhunnak nih kan chan a kan tawiter; kan nunnak cu fifik bantuk men in donghnak a phan. ¹⁰ Kan chan cu kum sawm sarih a si ko, kan thazang a ṭhawn deuh le sawm riat a si; cu hmanh ah retheihnak le harnak lawng kha kan ing, kan nunnak cu a dih zau i kan lo. ¹¹ Na thinhunnak hmual cu aho nih dah fiang ngaingai in an hngalh? Na thinlinhnak nih zei bantuk thil ṭihnung dah a chuahter khawh ti kha aho nih dah an hngalh? ¹² Kan nunnak hi zeitluk in dah a tawi ti kha kan hngalhter law cuticun kan fim deuh lai. ¹³ Bawipa, zei can dah kan cungah lung ṭhul loin na um lai? Na sal hna kan cungah hin zaangfahnak ngei ko. ¹⁴ Zing fate in a fekmi na dawtnak in kan khahter, cuticun hla kan sa lai i kan nun chung vialte kan i lawm lai. ¹⁵ Harnak kan in lio caan le kum chungah kan cungah na rak tluntermi ngaihchiatnak zat khan atu cu lunglawmhnak kan pe tuah. ¹⁶ Kannih na sal rual hi khuaruahharmi thil na tuahmi cu kan hmuhter law kan tefa hna nih a liannganmi na ṭhawnnak cu hmu ve hna seh. ¹⁷ Bawipa kan Pathian, kan cungah na thluachuahnak cu um seh law kan thil timi kip ah khua awng kan pemhter ko! Kan thil timi kip ah khua awng kan pemhter ko!

¹ Himnak hmuh duh ah Cung Nung Bik kha a fuhmi le Lianngan Bik huhphenhnak chung ah aa dormi nih cun, ² "Bawipa, nangmah cu a ka chanhtu le a ka hupphengtu na si! Nangmah cu ka Pathian na si; nangmah cu kan bochan," an ti lai. ³ Hmuh lomi thil ṭihnung vialte le thihnak zawtnak vialte chungin him tein an huhphenh hrimhrim lai. ⁴ A thla in an huh lai i him tein na um lai; zumhawktlak a sinak nih khan an huhphenh lai i him tein an umter lai. ⁵ Zan i a chuakmi ṭihnung kha na ṭih hna lai lo, chun ah ruahpak loin a chuakmi cantiang zong kha na ṭih lai lo; ⁶ mui lak i a ummi rai zong kha na ṭih lai lo i chun ceu i mi a that cuahmahmi ngal-eu zong kha na ṭih lai lo. ⁷ Na pawng ah mi thong khat an thi ko lai, na velchum ah thong hra zong an thi ko lai, sihmanhsehlaw nang cu zeihmanh nih an tawng lai lo. ⁸ Miṭhalo cu zeitindah dantatnak a in kha na zoh lai i na hmuh lai. ⁹ Bawipa cu chanhtu ah naa ser i Cungnung Bik cu hupphengtu ah naa ser caah ¹⁰ harnak zeihmanh nih an tlunhnawh kho lai lo i vanchiatnak zeihmanh na inn a phan lai lo. ¹¹ Na kalnak kip i nangmah zohkhenhtu dingah Pathian nih a vancungmi kha a chiah hna lai. ¹² An kut in an in dawmh lai i lung ah na ke kha naa khawng lai lo. ¹³ Chiandeih le rul kha na lamh hna lai, chiandeih ṭih nungnung le rul sivai ṭhawngṭhawng kha na lamh chih len hna lai. ¹⁴ Pathian nih, "A ka dawmi cu ka khamh hna lai i a ka hngalmi cu ka huhphenh hna lai. ¹⁵ An ka auh tikah ka leh hna lai i harnak an in tikah ka umpi hna lai. Ka chuah hna lai i ka upat hna lai. ¹⁶ Laksawng ah nun sau ka pek hna lai i ka khamh hrimhrim hna lai," a ti.

¹ Bawipa sinah lawmhnak hla sak cu zeitluk in dah a nuamh! Cungnung Bik Pathian, nangmah min upat in hlasak cu zeitluk in dah a nuamh! ² - ³ Hri tampi a ngeimi tingtang le thonglawi aw dawh he, a fekmi na dawtnak thangṭhat in zingfate in hlasak le zumhawktlak na sinak zanfate in thanh cu a nuam hringhranmi a si. ⁴ Bawipa, thil lianngan na tuahmi nih ka lung an ka lawmhter, na tuahmi thil ruangah cun lawmhnak in hla ka sa. ⁵ Maw Bawipa, na tuahmi thil cu zeitluk in dah an ngan! Na ruahnak cu zeitluk in dah a thuk! ⁶ Mihrut nih an hngalh khawh lo i lungtlawmmi nih an theihthiam khawh lomi cu, ⁷ miṭhalo kha belh bantukin an ṭhan i thil ṭhalo a tuahmi hna kha thluachuah an hmuh hi a si; sihmanhsehlaw rawhralnak an hmu ko lai, ⁸ zeicahtiah Bawipa, nangmah cu uktu ngan bik kha zungzal in na si. ⁹ Na ral cu an thi lai i miṭhalo vialte cu raldohnak ah an sung lai i an i ṭhek dih lai ti kha kan hngalh. ¹⁰ Nangmah nih fungtum bantuk ṭhawng ah na ka ser; thluachuahnak na ka pek i ka lung aa lawm. ¹¹ Ka ral an sungh kha ka hmuh i miṭhalo pawl an ai len kha ka theih. ¹² Miding mi cu tumkung bantukin an hninghno lai i Lebanon tlang sidar thingkung bantukin an ṭhang lai. ¹³ Annih cu Bawipa inn chungah cinmi thing bantuk, Bawipa biakinn chungah hninghno ngaiin a um i ¹⁴ an tar tik hmanh ah thei a tlai lengmang i a zungzal in hring dildel in a um i a ṭhawng ngaimi bantuk an si. ¹⁵ Hi nih hin Bawipa cu a ding ti le a ka chanhtu ka lungpi chungah cun palhnak zeihmanh a um lo, ti kha a langhter.

¹ Bawipa cu siangpahrang a si! Rumra in aa thuam i a tai cu thazang in aa sawmh. Vawlei cu a umnak hmun ah khan fek tein a chiah i a hninh in hninh khawh a si lo. ² Bawipa, na bawiṭhutdan cu a hramthawk tein a fek i nangmah cu caan thawk hlan in na rak um cang. ³ Bawipa, rilipi cu a awn, a tilet cu an awn hluahmah ko. ⁴ Bawipa cu vancung ah khin uktu ngan bik a si, rilipi aw thawng nakin a ngan deuh rili tilet nakin a ṭhawng deuh. ⁵ Bawipa, na phunglam cu zungzal in an hmun, na Biakinn cu zungzal in zungzal tiang a thiang taktak.

¹ Bawipa, nang cu phuhlamtu Pathian na si, na thinhunnak kha langhter tuah. ² Nangmah cu mi vialte bia a ceihtu na si, tho law miporhlaw kha hmuh awk an i tlakmi dantatnak kha pe hna. ³ Miṭhalo pawl hi zei can dah an i lawmh lai? Zei can dah an i lawmh ko rih lai, Maw Bawipa ⁴ Zei can dah ṭhat lonak a tuahtu pawl hi ruamkai in an um rih lai i sualnak an tuahmi kha an i porhlawt rih lai? ⁵ Bawipa, na mi kha an rial hna, nangmah ta a simi kha an hrem hna. ⁶ Nuhmei le ngakṭah kha an thah hna i kan ram chungah a ummi khual kha an nawn hna. ⁷ An i thawh i, "Bawipa nih cun a kan hmuh lem lai maw? Bawipa nih cun a hngalh lem lai maw?" an ti. ⁸ Ka mi hna, zeitindah cu tluk cun nan hruh khawh? Zeitik ah dah nan hngalh khawh te lai? ⁹ Kan hna a sertu cu Pathian a si, zeitindah hna sertu Pathian nih cun thei loin a um khawh lai? Kan mit a sertu cu Pathian a si, zeitindah mit sertu nih cun hmu loin a um khawh lai? ¹⁰ Miphun vialte cu amah ukmi an si, dantat loin a um hna hnga maw? Mi vialte a cawnpiaktu cu amah a si, hngal loin a um kho hnga maw? ¹¹ Bawipa nih an ruahmi cu a hngalh dih ko; zeitluk in dah an ruahnak pakpalawng a si ti cu a hngalh dih ko. ¹² Bawipa, nangmah nih na chimhhrinmi, na phunglam na cawnpiakmi hna cu lunglawmmi an si, ¹³ Miṭhalo mi caah thlan cawh a si hlantiang, harnak caan ah dinhnak na pek hna. ¹⁴ Bawipa nih a mi cu a hlaw hna lai lo, amah ta a simi cu a zamtak hna lai lo. ¹⁵ Biaceihnak hmun ah dinnak kha a um ṭhan lai i miding paohpaoh nih an zulh lai. ¹⁶ Ahodah miṭhalo a ka dohpitu kha nan si? Ahodah ṭhat lonak a tuahmi hna a ka dohpitu kha nan si? ¹⁷ Bawipa nih rak kan bawm hlah seh law, mithi khua kha khulrang tein kan rak phan diam ko hnga. ¹⁸ Ka ke kha an nal cuahmah tikah, Bawipa, na dawtnak nih a ka tlaih. ¹⁹ Khuaruahhar vansang au in ka um tikah na ka hnemh i ka lung na ka lawmhter. ²⁰ Bawipa, ziknawh a eimi biaceihtu hna he cun zeitinhmanh in nan i tlak kho lo, dinlonak kha dinnak ah a ser i ²¹ miṭha kha a rawi a phiar i a sual lomi kha thih dantatnak a pemi hna he cun a komh in nan i kom kho lo. ²² Sihmanhsehlaw kei cu Bawipa nih na ka huhphenh i ka Pathian nih him tein na ka umter. ²³ Annih cu an ṭhat lo ruangah dan na tat hna lai i an sual ruangah na hrawh hna lai; Bawipa kan Pathian nih na hrawh hna lai.

¹ Ra u law Bawipa cu thangṭhat u sih. Kannih a kan khamhtu Lungpi cu lunglawmhnak in hla in thangṭhat u sih. ² Lunglawmhnak in amah hmaiah chuak u sih law lawmhnak le thangṭhatnak hla sa u sih. ³ Zeicahtiah Bawipa cu a ṭhawngmi Pathian a si, pathian dang vialte cung siangpahrang ṭhawng a si. ⁴ Vawleicung vialte hi amah nih a uk dih, lungkua thuk bik in tlang sang bik tiang a uk dih hna. ⁵ Amah nih a sermi rili kha a uk i amah nih a sermi vawlei zong kha a uk fawn. ⁶ Ra tuah u, kun u sih law bia u sih; a kan Sertu Bawipa hmaiah cun kan khuk i bil u sih! ⁷ Amah cu kan Pathian a si, kannih cu a kan zohkhenhmi kan si, a kan cawmmi tuurun kan si. A chimmi kha nihin cu ngai tuah u; a bia cu hihi a si: ⁸ "Nan pupa hna kha Meribah ah lung hak in an rak um bang khan nannih cu um hlah u, ⁹ an ca i ka tuahmi kha an hmu ko nain khaka ah khan an ka hneksak i an ka zuamcawh. ¹⁰ Kum sawm li chung awlok an ka chonh i, "Annih cu ka nawlbia a ngai duh lo i ka cungah zumhawktlak in a um duh lomi an si,’ ka ti. ¹¹ Ka thin a hung i, "Dinhnak ka pek hnanak ding ram chungah cun an lut hrimhrim lai lo,’ tiin chiatser in bia ka chim," a ti.

¹ Bawipa cu hla thar in thangṭhat u, vawlei mi vialte hna, Bawipa cu hla in thangṭhat u! ² Bawipa cu hla in thangṭhat u, a kan khamhnak thawng ṭha kha nifate in chim u. ³ Miphun hna sinah a sunparnak kha thanh u, mi vialte kha thil lianngan a tuahmi cu chim hna u. ⁴ Bawipa cu a lian a ngan i sang piin thangṭhat awk a si; pathian dang vialte nakin ṭih awk deuh a si. ⁵ Miphun dang hna pathian cu siasal men an si, sihmanhsehlaw Bawipa nih cun van khi a ser hna. ⁶ Sunparnak le rumra cu a velchum ah an um i lianhngannak le dawhnak cu a biakinn chungah an um. ⁷ Vawleicung mi vialte hna, Bawipa cu thangṭhat ko u, a sunparnak le a ṭhawnnak kha thangṭhat u. ⁸ A min he aa tlakmi sunparnak kha Bawipa cu pe u, raithawinak kha rak i put u law a biakinn chungah ra lut u. ⁹ A Thiang Mi cu a hung chuah tikah a hmaiah khan kun u; vawleicung mi vialte hna, a hmaiah cun a ther in ther u. ¹⁰ Miphun vialte kha, "Bawipa cu siangpahrang a si, Vawlei cu a umnak hmun ah hninh khawh loin fek tein a bunh, mi vialte kha dinnak in bia a ceih hna lai," tiah chim hna u. ¹¹ Vawlei le van, i lawm tuah u. Rili le a chung i a ummi thilnung vialte hna, awn u; ¹² lo le a chung i a ummi thil vialte hna, i lawm u! Cun tupi chung i a ummi thingkung hna cu lunglawm in Bawipa hmaiah an au lai, ¹³ zeicahtiah vawlei uk awkah a ra cang; vawleicung mi vialte kha dingte le i ruang tein a uk hna lai.

¹ Bawipa cu siangpahrang a si, maw vawlei i lawm tuah! Rili chung i a ummi tikulh vialte hna, i lawm u! ² Khuadawm le muihnak kha a velchum in an um; a pennak cu dinnak le biading cungah a hram a bunh. ³ A hmaiah mei cu a kal i a velchum i a ummi a ral kha a kangh dih hna. ⁴ A nimtlau nih vawlei kha a ceuh dih, vawlei nih cun a hmuh i a ther. ⁵ Bawipa hmaiah tlang cu khuaiseng bantukin an ti. vawlei cung dihlak Bawipa hmaiah cun khuaiseng bantukin an ti. ⁶ Van nih khin a dinnak kha an chim i mi vialte nih a sunparnak kha an hmuh. ⁷ Siasal a biami vialte kha an ning a zak dih, an siasal aa porhlawmi vialte kha an ning a zak dih; pathian vialte cu a hmaiah an kun dih. ⁸ Bawipa, nangmah nih na tuahmi biathlehnak ruangah, Zion mi cu an lung aa lawm i Judah ram khua hna cu an tha a nuam. ⁹ Lianngan Bik Bawipa, nangmah cu vawleicung dihlak a uktu na si; pathian vialte hna nakin a let tam piin na ngan deuh. ¹⁰ Ṭhat lonak a huami kha Bawipa nih a dawt hna, a mi kha a huhphenh hna i miṭhalo mi pawl kut chung khan a chuah hna. ¹¹ Ceunak cu miding mi hna cungah khan a tlang i lunglawmhnak cu miṭha mi hna cungah khan a tlang. ¹² Bawipa nih a tuahmi thil ruangah, a dingmi nannih vialte i lawm tuah u. Mi Thiang nih a tuahmi kha philh hlah u law amah kha lawmhnak in thangṭhat u.

¹ Bawipa cu hla thar in thangṭhat tuah u, khuaruahharmi thil kha a tuah hna! A ṭhawnnak le a thiangmi a thazang in ral kha a tei hna. ² Bawipa nih cun ral a tei hnanak thawng kha a thanh i a khamhnak ṭhawnnak kha miphun vialte a hngalhter hna. ³ Israel mi bia a kamhmi hna kha a zulh i an cungah a fekmi dawtnak a ngei i zumhawktlak in a um. Kan Pathian nih ral a teinak kha mi vialte nih khuazakip ah an hmuh. ⁴ Vawlei mi vialte hna, lunglawm in Bawipa cu hla in thangṭhat tuah u; lawmhnak hla in thangṭhat u law a au in au u! ⁵ Bawipa thangṭhatnak hla cu sa u, thangṭhatnak hla cu tingtang he ṭhuan hna u. ⁶ Muko le tuukawng ki tum hna u law Bawipa, siangpahrang hmaiah cun lunglawm in au u. ⁷ Rili le a chung i a ummi thilnung vialte hna, awn tuah u! Vawlei le a cung i a ummi thilnung vialte hna, hlasa tuah u! ⁸ Maw rilipi hna, nan kut beng tuah u; maw tlang hna, Bawipa hmaiah cun lunglawm in hlasa tuah u, ⁹ zeicahtiah amah cu vawlei uk awkah a ra cang. Vawleicung mi vialte cu dinnak le ruannak in a uk hna lai.

¹ Bawipa cu siangpahrang a si, mi vialte cu an ther dih; cherubim cung i a bawiṭhutdan cungah khan a ṭhu, vawlei cu aa hnin dih. ² Bawipa cu Zion ah lianngan ngaiin a um, miphun vialte kha a uk dih hna. ³ A lian a ngan i rumra a ngeimi a min cu mi vialte nih an thangṭhat lai. Amah cu Mi Thiang a si. ⁴ A liannganmi Siangpahrang, nang cu ahmaanmi thil a duhmi na si; Israel mi cungah ding tein le a tlari in thil na tuah. ⁵ Bawipa kan Pathian cu thangṭhat u; a bawiṭhutdan hmaiah khan amah cu bia u, amah cu Mi Thiang a si. ⁶ Moses le Aaron cu a tlangbawi an si, Samuel cu a sinah thla a rak cammi pakhat a si; Bawipa cu an auh i a leh hna. ⁷ Khuadawm tom chungin a chawnh hna, a pekmi hna nawlbia le phunglam kha an zulh. ⁸ Bawipa kan Pathian, na mi nih na sinah thla kan camnak kha na kan leh; nangmah cu sualnak a ngaithiam khotu Pathian na si kha na kan hngalhter i kannih cu a sual lo ah na kan rel. ⁹ Bawipa kan Pathian cu thangṭhat u, a tlang cungah cun amah cu bia u. Bawipa kan Pathian cu Mi Thiang a si!

¹ Vawlei mi vialte hna, lunglawm in Bawipa cu hla in thangṭhat u! ² Bawipa cu lunglawm tein bia u law lunglawmhnak hla he a hmaiah cun ra chuak u. ³ Bawipa cu Pathian a si kha zeitikhmanh ah philh hlah u! A kan sertu cu amah a si i kannih cu amah ta kan si; a mi kan si i a tuurun kan si. ⁴ A kutka chungah cun lawmhnak he lut tuah u, a tual ah cun thangṭhatnak hla he lut tuah u; amah cu lawm u law thangṭhat tuah u. ⁵ Bawipa cu a ṭha; a fekmi a dawtnak cu zungzal in a hmun, zumhawktlak a sinak cu chan vialte tiangin a hmun.

¹ Ka hla cu dinnak le zumhawktlak sinak kong a si, cu hla cu kan sakpiak lai, Maw Bawipa ² Ka cungah zei khom hmanh tlung seh law, fimnak le soi awk um lo a simi lam kha zulh kaa zuam lai. Ka inn chungah hin lungthiang in khua ka sa lai. ³ A thurmi tinhmi zeihmanh ka ngei lai lo; zumhtlaklo si kha a huat in ka huat lai. ⁴ Hrokhrawlnak lungthin kha ka hlawt dih lai i ṭhat lonak kha a ruah hmanh ruat loin ka um lai. ⁵ Mi congoih a hmangmi kha daihter kaa zuam hna lai i miporhlaw hna le miruamkai hna he cabuai i ṭhut ṭi cu ka hrial lai. ⁶ Zumhawktlak bikbik kha ka hawikom ah kaa thim hna lai i ka sal cu an nunning soi awk a um lomi kha an si lai. ⁷ Ka inn chungah mi thangchiat hmangmi kha ahohmanh an um kho lai lo, ka hmuh khawhnak hmun ah mi lihchim hmang cu an dir kho lai lo. ⁸ Ni khat hnu ni khat in miṭhalo cu ka daihter hna lai i Ṭhat lonak a tuahtu vialte cu Bawipa khuapi chungin ka dawi dih hna lai.

¹ Maw Bawipa, ka thlacamnak cu ka ngaihpiak law nangmah bawmhnak hal ah ka aunak cu ka theihpiak ko. ² Harnak ka in tikah hin ka thuhtak hlah! Ka aunak cu ka ngaihpiak law khulrang in ka let tuah. ³ Ka nunnak cu meikhu bangin a lo, ka pum cu mei bangin a kang. ⁴ Ram car bangin ka nunnak cu a uai, rawl ei duhnak zeihmanh ka ngei lo. ⁵ Fak piin ka hrum i ka ai, ka ruh le ka cuar lawng ka si ko. ⁶ Thetse ram i a ummi va bantuk khi ka si, chuahtakmi khua rop i chimbu bantuk ka si. ⁷ Hngilh kho loin ka um, inncung va, amah lawngin a um i a ci a haimi bantuk ka si. ⁸ Chun nitlak in ka ral nih an ka nihsawh, nihchuak capo i a ka saitu pawl nih ka min cu chiatsernak ah an hman. ⁹ Ka rawl cu vutcam a si i ka dinmi cu mitthli he aa cawh, ¹⁰ zeicahtiah ka cungah na thin a hun caah a si. Na ka cawi i na ka hlonh. ¹¹ Ka nunnak cu zanlei sang thladem bantuk men a si; Kei cu ram bantuk ka si ko. ¹² Sihmanhsehlaw Bawipa, nangmah cu siangpahrang na si zungzal ko; chan vialte nih an in philh lai lo. ¹³ Na tho lai i Zion cu na zaangfah lai, a cung i zaangfah ngeih caan cu a phan cang; atu hi cu caan cu a si cang. ¹⁴ Hrawh dih cikcek a si ko nain na salle nih kan duh ṭhiamṭhiam, a rawk dih ko nain a cungah zaangfahnak kan ngei ṭhiamṭhiam. ¹⁵ Miphun kip nih Bawipa cu an ṭih lai, vawlei cung siangpahrang vialte nih a ṭhawnnak cu an ṭih lai. ¹⁶ Bawipa nih Zion kha a remh ṭhan tikah Bawipa lianhngannak cu a lang lai, ¹⁷ Kaltak cia a mi kha an thlacamnak a ngaihpiak hna lai i a theihpiak hna lai. ¹⁸ Bawipa nih a tuahmi thil kha a ra lai ding chan caah ṭial tuah u, cuticun a chuak rih lomi nih amah kha an thangṭhat khawh lai. ¹⁹ Bawipa nih a sangmi a hmunthiang khin a run cuanh, vancung khin vawlei cu a run cuanh, ²⁰ cu a run cuanh cu thongtla pawl an aihramnak theih awk le thah awk i biaceih cangmi hna luatter awkah a si. ²¹ Cucaah Bawipa min cu mi nih Zion ah an chim lai i Jerusalem ah amah cu an lawmh lai; ²² cucu zeitik ah dah a si lai ti ahcun, miphun hna le pennak hna kha hmunkhat ah an i pumh i Bawipa kha an biak tikah a si lai. ²³ Ka chan ṭim hmanh ti hlanah Bawipa nih ka thazang a ka derter i ka nunnak kha a tawiter. ²⁴ Ka Pathian, atu cu ka la rih hlah, ka tar hlanah cun ka la rih hlah! Bawipa, nang cu zungzal in a ummi na si, ²⁵ hlanpi ah vawlei cu na rak ser cang, Nangmah nih na kut hrimhrim in van khi na ser hna. ²⁶ Van le vawlei cu an lo dih lai, sihmanhsehlaw nang cu na hmun lai; annih cu puan bangin an ṭet lai. Puan bangin na thlen hna lai i an lo lai; ²⁷ sihmanhsehlaw nang cu zungzal in nangmah bon na si ko i na nunnak a dong lo. ²⁸ Kan fale cu him tein khua an sa lai i an tefa hna cu nangmah nih zungzal in na huhphenh hna lai.

¹ Maw ka nunnak, Bawipa cu thangṭhat tuah! Ka sining vialte, a min thiang cu thangṭhat tuah u! ² Maw ka nunnak, Bawipa cu thangṭhat law zeitluk in dah zaangfahnak a ngeih kha philh hlah. ³ Ka sualnak vialte kha a ka ngaihthiam i ka zawtnak vialte kha a ka damter; ⁴ thlan chungin a ka khamh i dawtnak le zaangfahnak he thluachuah a ka pek; ⁵ ka nunnak cu thil ṭha in a khahter i cucaah ka no peng i mupi bantukin ka ṭhawng. ⁶ Hremnak a ingmi kha biaceih tikah Bawipa nih a ṭanh hna i an hmuh awk hnga a simi kha a pek hna. ⁷ Moses kha aa tinhmi cu a chimh i Israel mi kha thil lianngan a tuahmi cu a hmuhter hna. ⁸ Bawipa cu zaangfahnak le dawtnak in a khat, a thin a fual i a fekmi dawtnak in a khat. ⁹ Mawhchiat chih lengmang kha a hmang lo i thinhung zungzal in a um lo. ¹⁰ Hmuh awk kan i tlakning in dan a kan tat lo, kan sualnak le ṭhat lonak kan tuahmi ning zongin a kan lehrul lo. ¹¹ Van cu vawlei nakin a san deuh ngaingai bantukin a dawtnak cu amah a ṭihmi hna caah cun a ngan ve. ¹² Nichuahlei le nitlaklei an i hlat tluk khin kan sualnak cu kanmah he i hlat ah a kan ṭhialpiak. ¹³ Pale nih an fale an zaangfah hna bantuk khin Bawipa nih amah a ṭihmi cu a zaangfah hna. ¹⁴ Zei in dah ser kan si kha a hngalh i leidip men kan si kha a philh lo. ¹⁵ Minung cu a nunnak hi ram bantuk men a si ko; a hung ṭhang i ramlak pangpar bangin a hung par. ¹⁶ Cun thli a hung hrang ciammam i a lo ai, ahohmanh nih an hmu ṭhan ti lo. ¹⁷ Sihmanhsehlaw Bawipa nih amah a upatmi hna a dawtnak hna cu, zungzal in a hmun i a ṭhatnak nih chan vialte tiang a nguh, ¹⁸ a biakamnak a zulmi le a nawlbia a ngaimi hna cungah cun Bawipa ṭhatnak cu cu bantuk cun a si. ¹⁹ Bawipa nih a bawiṭhutdan cu vancung ah khin a hun; zeizong vialte cungah siangpahrang a si. ²⁰ Nannih a ṭhawng i a liannganmi vancungmi hna, Bawipa cu thangṭhat tuah u; a nawlbia kha a ngai i a chimmi a tuahmi vialte hna, Bawipa cu thangṭhat tuah u! ²¹ Vancung i a ummi ṭhawnnak vialte hna, Bawipa cu thangṭhat tuah u, a duhnak a tuahmi a sal vialte hna, Bawipa cu thangṭhat tuah u, ²² A sermi thil vialte hna, a pennak chung hmun zakip ah Bawipa cu thangṭhat tuah u! Maw ka nunnak, Bawipa cu thangṭhat tuah!

¹ Maw ka nunnak, Bawipa cu thangṭhat tuah! Bawipa ka Pathian, zeitluk in dah na lianhngan! Sunparnak le lianhngannak in naa thuam i ² ceunak in naa tuam. Van khi puan thlam bantukin na samh hna i ³ cunglei i a ummi ti cungah khin na inn cu na sak. Khuadawm cu rangleng ah na hman hna i thlitu cu an thla cung cit awkah na hman hna. ⁴ Thlitu cu na lamkaltu ah na hman hna i nimtlau cu na sal ah na hman hna. ⁵ Vawlei cu a umnak hmun ah khan fek tein na bunh i ahohmanh nih an ṭhial kho lo. ⁶ Vawleicung cu rili in puan bangin na khuh i a tlang cu ti nih a khuh hna; ⁷ sihmanhsehlaw ti cu na sik hna tikah an le na au thawng kha an theih tikah an zam. ⁸ Tlang cung khan nelrawn ah an vung luang i an ca i na sermi hmun ah khan an um; ⁹ an lonh khawh lomi ramri kha na chiah i vawlei kha an khuh ṭhan kho ti lo. ¹⁰ Nelrawn ah cerh kha na putter hna i ti cu tlang le tlang karah an luang. ¹¹ Ramlak saram kha ti din awk an pek hna i ramlak laa nih khan an tihal riam in an din hna; ¹² an pawngkam thingkung cungah vate nih bu an i ser i hla an sa. ¹³ Vancung khin tlang cungah ruah na run surter i vawlei cu na thluachuahnak in a khat. ¹⁴ Saṭil caah ram na khohter, minung hman awk caah thing na khohter cucaah minung nih cun ti-rawl kha an cin khawh hna i ¹⁵ an lung a lawmhtertu dingah mitsur hang kha an chuahter; an tha an nuamtertu dingah oliv chiti kha an chuahter i thazang a petu dingah rawl an chuahter. ¹⁶ Lebanon Tlang sidar thingkung cu ruah tampi an hmu, annih cu Bawipa nih amah caah aa cinmi thingkung an si. ¹⁷ Cuka ah cun vate nih bu an i ser i vaca nih farkung ah bu an i ser ve. ¹⁸ Sathar kha tlang sang ah an um i sahniar cu lungpang ah an i thup. ¹⁹ Thla relnak ah thlapa na ser, ni nih khin tlak caan amah tein aa hngalh. ²⁰ Zan kha na ser i mui ah saram kha an chuak. ²¹ Chiandeih no kha rawl an kawlpah in an awn, Pathian nih a pekmi hna rawl kha an kawl. ²² Ni a chuah in an kir i an kua chungah khan an bawk. ²³ Cun mi cu an rianṭuan awkah an chuak i zanlei tiang an ṭuan. ²⁴ Bawipa, na sermi thil hi an tam hringhran ko! An dihlak in fimnak in na ser hna. Vawlei cu na sermi thil in a khat. ²⁵ A ngan ngaingai i a kau ngaingaimi rilipi kha na ser, a chungah thilnung a hme he a ngan he a rel rel cawk loin an um; ²⁶ a cungah sangphawlawng kha an kal i a chungah Leviathan rulpi kha lente aa celh, Leviathan cu rili chung rulpi nangmah nih na sermi kha a si. ²⁷ An herhmi an rawl hmuhnak ah, an dihlak in nangmah kha an in bochan. ²⁸ Nang nih na pek hna i an ei, rawl cu na pek hna i an khim, ²⁹ Naa mer tikah an awlok a chong, na thaw kha na tlaihkanh hna tikah an thi i an chuahkehnak vawlei ah khan an kir ṭhan. ³⁰ Sihmanhsehlaw thaw na pek hna tikah an nung; vawlei cu nunnak thar na pek. ³¹ Bawipa sunparnak cu zungzal in hmun ko seh, a sermi thil cungah Bawipa cu i lawm ko seh. ³² Vawlei kha a zoh tikah vawlei cu a ther in a ther, tlang kha a tawngh tikah meikhu kha a chuak. ³³ Ka nun chung vialte Bawipa cu hla in ka thangṭhat lai; ka nunnak a um chung ka Pathian thangṭhatnak hla cu ka sa lai. ³⁴ Pathian nih lunglawmhnak a ka pek zat in, ka thangṭhatnak hla nih amah cu a lunglawmhter ve seh. ³⁵ Misual mi cu vawleicung hin hloh si hna seh, miṭhalo cu um ti hna hlah seh. Ka nunnak, Bawipa cu thangṭhat ko! Bawipa cu thangṭhat ko!

¹ Bawipa sinah lawmhnak bia chim u, a lianhngannak kha thanh u; cun a tuahmi thil kha miphun vialte chim hna u. ² Amah cu hla in thangṭhat u, thangṭhat u! A tuahmi thil khuaruahhar vialte kha chim u! ³ Kannih cu amah mi kan si caah kan i lawm, Bawipa rian a ṭuanmi vialte i lawm u. ⁴ Bawmhnak hmuh awkah amah cu va fuh u, a hmaika ah khan va um zungzal u. ⁵ - ⁶ A sal Abraham tefa hna, Pathian nih a liannganmi khuaruahhar a tuahmi le biakhiahnak a tuahmi kha philh hna hlah u, a thimmi Jakob tefa hna, philh hlah u. ⁷ Bawipa cu kan Pathian a si; a nawlbia cu vawlei cung dihlak caah a si. ⁸ Biakamnak a sermi cu zungzal in a zulh lai, a biakamnak cu chan thong khat tiang a zulh lai, ⁹ Abraham le Isak he a tuahmi biakamnak kha a zulh hna lai. ¹⁰ Bawipa nih Israel he zungzal a hmunmi biakamnak cu a ser, Jakob he a biakamnak in aa ṭem chih i, ¹¹ "Kanaan ram cu kan pek lai, cu ram cu nangmah ta a si lai," a ti. ¹² Pathian mi cu an rak tlawm i cu ram ah cun khual an rak si. ¹³ Ram khat in ram khat ah an vai, peng khat in peng dang ah an pem, ¹⁴ sihmanhsehlaw annih cu ahohmanh kha a hremter hna lo i anmah ruangah siangpahrang kha a sik hna. ¹⁵ Aa thawh i, "Ka thimmi ka sal cu tawng hna hlah u, ka profet cu fahnak pe hna hlah u," a ti. ¹⁶ An ram ah Bawipa nih mangṭam a tlunter i an rawl vialte kha a lakpiak dih hna tikah, ¹⁷ mi pakhat kha an hmaiah a rak thlah, cu mipa cu sal i an zuarmi Josef kha a si. ¹⁸ A ke ah hreng an khenh i a hngawng ah hngawngkual an bunh. ¹⁹ A rak chim chungmi kha a tlin hlantiang, Bawipa nawl in hneksaknak kha a ing. ²⁰ Cun Izipt siangpahrang nih khan a chuahter, miphun tampi uktu nih khan a luatter. ²¹ A ram uknak nawl kha a pek i a ram vialte uktu ah khan a ser; ²² siangpahrang kut tang bawi vialte hna cungah khan nawl a ngei i siangpahrang lungthin cheutu hna cung zongah khan cawnpiaknak nawl a ngei. ²³ Cun Jakob cu Izipt ram ah khan a vung kal i cuka ah cun a vung um. ²⁴ Bawipa nih a mi hna cu fa tampi a ngeihter hna i an ral hna nakin ṭhawng deuh ah a ser hna. ²⁵ Izipt mi cu a mi kha a huatter hna i a sal hna cungah khan hlennak in rian a ṭuanter hna. ²⁶ Cun a sal Moses le a thimmi Aaron kha a thlah hna. ²⁷ Pathian hmelchunhnak kha an tuah i Izipt ram ah cun khuaruahharmi thil kha tampi an tuah. ²⁸ Ram cungah cun muihnak an tlunter, sihmanhsehlaw Izipt mi nih khan a nawl an ngai duh lo. ²⁹ An tiva cu thisen ah a canter hna i an nga cu a thah dih hna. ³⁰ An ram ah cun utlak an khat, siangpahrang inn chung hmanh ah khan an khat. ³¹ Pathian nih nawl a pek hna i fikfa le hmaisem nih an ram cu a zual in an zual. ³² An ram ah khan ruah surter loin rial le ṭek lehlam kha a tlakter hna. ³³ An mitsur ruang le theipi kung kha a hrawh hna i thingkung kha a khiah dih hna. ³⁴ Nawl a pek hna i khaubawk kha an hung chuak, a rel rel cawk loin an hung chuak; ³⁵ an ram chung thil hring vialte kha an ei dih, rawl kung zong kha an ei dih. ³⁶ Izipt mi innchungkhar cio i a chuak hmasa bik fapa paoh kha a thah dih hna. ³⁷ Cun Israel mi kha a chuahpi hna, sui le ngun kha an i phorh, an dihlak in an ṭhawng i an ngan a dam. ³⁸ Izipt mi nih khan annih cu an ṭih hna caah an kal tikah khan Izipt mi cu an i lawm. ³⁹ A mi hna cungah cun khuadawm a zar i zan ah ceunak petu dingah mei a pek hna. ⁴⁰ An hal i nimte a pek hna, vancung in rawl khim tein a pek hna. ⁴¹ Lungpi kha a khuai i ti a chuak, thetse ram ah cun tiva bantukin a luang. ⁴² A sal Abraham sinah a sermi a biakam thiang kha a philh lo. ⁴³ Cuticun a mi cu hlasak pah in a chuahpi hna i lunglawmh au thawng he a thimmi cu a kalpi hna. ⁴⁴ Ramdangmi an rak umnak ram kha a pek hna i an lo kha a coter hna, ⁴⁵ zeicahdah cuticun a tuah ti ahcun, ka mi nih ka nawl kha ngai hna seh law ka phunglam kha zul hna seh ti a duh caah a si. Bawipa cu thangṭhat ko u!

¹ Bawipa cu thangṭhat ko u! Bawipa sinah lawmhnak bia chim tuah u, zeicahtiah amah cu a ṭha, a dawtnak cu zungzal in a hmun. ² Aho nih dah thil lianngan a tuahmi vialte cu a chim cawk lai? Aho nih dah zaa lak in an thangṭhat khawh lai? ³ Amah nawl a zulmi cu mi lunglawm an si, a dingmi thil a tuahmi cu mi lunglawm an si! ⁴ Na mi hna na bawmh hna tikah ka philh hlah, Maw Bawipa, na khamh hna tikah kei zong ka telh ve. ⁵ Na mi hna an ṭhancho cu ka hmuhter law na miphun an i lawmhnak ah cun ka telter ve, nangmah ta a simi hna an hmaihngalnak ah cun kei zong ka hmai ka hngalter ve. ⁶ Kan pupa hna an rak sual bantuk khan kannih zong kan sual ve, palhnak kha kan tuah ve i ṭhat lonak kha kan tuah ve. ⁷ Izipt ram i a rak ummi kan pupa hna nih khan Pathian tuahmi thil khuaruahhar kha an hngalthiam lo, an cungah a dawtnak voi tampi a langhter kha an philh i Lianngan Bik cu Rili Sen ah khan an doh. ⁸ Sihmanhsehlaw bia a kamh hna bangkhan a khamh hna, cu a khamh hna cu a liannganmi a ṭhawnnak langhternak caah a si. ⁹ Rili Sen cu nawl a pek i a ro, cun a mi cu vawlei ro cung kal bantukin a kalpi hna. ¹⁰ A huatu hna kut chung khan a khamh hna i an ral kut chung khan a chuah hna. ¹¹ An ral cu ti nih khan a phum dih hna i pakhat hmanh an tang lo. ¹² Cu tikah a mi nih khan a biakam cu an zumh i hla in an thangṭhat. ¹³ Sihmanhsehlaw a tuahmi kha an philh ṭhan zau i amah ruahnak hal hmasa loin rian an ṭuan: ¹⁴ thetse ram ah khan an duhnak nih a tei hna caah Pathian kha hneksak an del; ¹⁵ cucaah an halmi kha a pek hna i asinain rai ṭhalo kha an cungah a tlunter. ¹⁶ Thetse ram ah cun Moses kha an nahchuah, Bawipa sal thiang Aaron zong kha an nahchuah; ¹⁷ Cu tikah vawlei nih khan a kaa a an i Dothan kha a dolh; Abiram le a innchungkhar kha a phum hna; ¹⁸ anmah a zultu pawl kha mei nih a tlak hna i cu miṭhalo pawl cu mei nih cun a kangh dih hna. ¹⁹ Horeb tlang ah sui cawfa kha an ser i cu siasal cu an biak; ²⁰ Pathian sunparnak cu ram a eimi saram mui ah an thlen. ²¹ Izipt ram chungah khuaruahharmi thil a tuahmi thawngin Pathian nih a khamh hna, asinain cu Pathian cu an philh. ²² Cuka ah cun khuaruahharmi thil tampi a tuah, Rili Sen ah cun thil ṭihnung tampi a tuah hna. ²³ Cucaah Pathian nih cun ka mi cu ka hrawh hna lai a ti; asinain a thimmi a sal Moses nih khan Pathian cu a thlauh i a thinhunnak nih khan a that hna lo. ²⁴ Ram nuam kha zeirello in an um i bia a kamhmi hna kha an zum lo; ²⁵ an thlam chungah khan an um i an zai, Bawipa bia kha an ngai duh lo. ²⁶ Cucaah a fakmi ralrinnak kha a pek hna i, "Thetse ram chungah hin ka thah hna lai, ²⁷ cun nan tefa cu lawkihmi hna lakah ka ṭhek hna lai i ramdang ah ka thihter hna lai," a ti. ²⁸ Cun Pathian mi pawl nih khan Peor ah cun Baal kha an biak ve i nunnak a ngei lomi pathian hna sinah rai an thawimi sa kha an ei ve. ²⁹ An thil tuahmi nih cun Bawipa cu a thin a phawh i rai ṭhalo nih a tlunhnawh hna; ³⁰ sihmanhsehlaw Finehas kha a dir riangmang i a sualmi kha dan a tat hna caah rai cu a ṭian. ³¹ Cu a tuahmi cu a caah dinnak ah relpiak a si i hmailei caan tiang zongin a si zungzal ko lai. ³² Bawipa cu a mi nih Meribah Cerh ah khan a thin an hunter i anmah ruangah cun Moses cu a awlok a chong. ³³ Moses cu a thin an hunter tuk hringhran caah a chim awk a si lomi tiang zong khan a chim phah. ³⁴ Bawipa nih a fial hna bang khan tuah loin lawkihmi cu an that hna lo, ³⁵ an ṭhit an vat lehlam hna i an ziaza kha an i cawn. ³⁶ Pathian mi nih cun siasal kha an biak hna i cucu an rawhnak a chuahtertu kha a si. ³⁷ An fapale le an fanule kha lawkih pathian sinah rai ah an thawi hna; ³⁸ a sual lomi an fanule le an fapale hna cu an thah hna i Kanaan mi siasal hna sinah khan raithawinak ah an pek hna; hi ti an thah hnanak nih hin vawlei kha a thurter. ³⁹ An thil tuahmi nih hin anmah cu a thurhnawmhter hna i Pathian sinah khan zumhawktlak in khua an sa lo. ⁴⁰ Cucaah Bawipa cu a mi hna cungah khan a thin a hung i a fih in a fih hna. ⁴¹ Annih cu Pathian bia lomi hna kut tangah khan a kaltak hna i an ral nih khan an uk hna. ⁴² An ral nih cun an rial hna i cawlcang kho loin an kut tangah cun an chiah hna. ⁴³ Bawipa nih a mi pawl cu voi tampi a khamh ko hna, sihmanhsehlaw amah doh tu kha an duhmi cu a si i sualnak chungah khan thuk chin lengmang in an pil. ⁴⁴ Asinain Bawipa nih cun an auh tikah khan a theih hna i an temhinnak kha a hmuhpiak hna. ⁴⁵ A biakamnak kha a hngalh camcinpiak hna i a nganmi a dawtnak ruangah a lung kha a thlen. ⁴⁶ Thong i a thlatu hna kha an cungah zaangfahnak a ngeihter hna. ⁴⁷ Maw Bawipa, kan Pathian, kan khamh tuah, miphun tampi lak i kan i ṭheknak in kan khawm ṭhan law na min thiang kha kan thangṭhat lai i nangmah lawmhnak bia chim in kan i lawm lai. ⁴⁸ Bawipa Israel Pathian cu thangṭhat u sih; atu ah thangṭhat u sih law

¹ Bawipa cu lawm tuah u, zeicahtiah amah cu a ṭha. a fekmi a dawtnak cu zungzal in a hmun. ² Bawipa nih a khamhmi vialte hna, amah cu thangṭhat u sih. Nan ral kut chungin an chuah hna i ³ ram dang in an tlunpi hna, nichuah, nitlak, chaklei, thlanglei in an tlunpi hna. ⁴ A cheu cu sul le lam a um lonak thetse ram ah khan an vai i an umnak ding khua kalnak lam kha an i hmuh kho lo; ⁵ an rawl a ṭam, an ti a hal i an hnabei a dong cikcek. ⁶ An harnak chung cun Bawipa kha an auh i an harnak chung khan a khamh hna. ⁷ A hruai hna i an umnak ding khua ah khan a kalpi hna. ⁸ Cucaah Bawipa cu, an cung i thil ṭha a tuahmi caah khan le a fekmi a dawtnak ruangah khan, an lawmh hrimhrim awk a si. ⁹ Ti a halmi kha an ti hal a riamhter hna i rawl a ṭammi kha thil ṭha in an paw a khimter hna. ¹⁰ A cheu cu lungdong in khuamui lakah an um, thir cikcin he nganfah a ingmi thongtla an si. ¹¹ zeicahdah hi bantukin an si ti ahcun, Lianngan Bik Pathian nawl zulh kha an duh lo i a cawnpiak hnanak kha an al caah a si. ¹² Rian hrang an ṭuannak ah khan an ba i an rilh tikah ahohmanh nih an hlawm duh hna lo. ¹³ Cu bantuk harnak chung cun Bawipa cu an auh i an temhinnak chung cun a khamh hna. ¹⁴ Khuamui lakah lungdong in an umnak chung cun a chuah hna i an thir cikcin cu a chahpiak hna. ¹⁵ Cucaah Bawipa cu, an cung i thil ṭha a tuahmi caah khan le a fekmi a dawtnak ruangah khan, an lawmh hrimhrim awk a si. ¹⁶ Dar innkhar kha a khuai dih hna i thirfung kha a tan dih hna. ¹⁷ A cheu cu an sual ruangah an zaw, ṭhat lonak an tuah ruangah temhnak an ing; ¹⁸ rawl kha a mui hmuh hmanh an duh lo i an thi dengmang. ¹⁹ An harnak chungin Bawipa kha an auh i temhnak an inmi chung cun a khamh hna. ²⁰ A nawlbia in a damter hna i thlan chungin a khamh hna. ²¹ Cucaah Bawipa cu, an cung i thil ṭha a tuahmi ruangah khan le a fekmi a dawtnak ruangah khan, an lawmh hrimhrim awk a si. ²² Raithawinak in an lawmh awk a si i a tuahmi thil vialte kha lunglawmhnak hla in an thanh awk a si. ²³ A cheu cu rili cungah khan sangphawlawng in an kal i cuticun an paw an i cawm; ²⁴ Bawipa nih a tuahmi thil kha an hmuh i rili cungah a tuahmi thil khuaruahhar kha an hmuh hna. ²⁵ Nawl a pek i thlichia a hrang i tilet a tho. ²⁶ Sangphawlawng cu sang pipi ah a cawi hna i thuk pipi ah a ṭhumh hna; cu bantuk ṭihnung chungah cun mi cu an hnabei a dong; ²⁷ zuri bantukin an sawn i an tlu; an thiamnak vialte cu zeihmanh san a tlai lo. ²⁸ An harnak chung khan Bawipa cu an auh i an temhinnak chung khan a khamh hna. ²⁹ Thlichia cu a daihter i tilet cu an dai. ³⁰ Tilet a daih caah khan an i lawm i kal an duhnak lawng dinhnak ah khan him tein a phakter hna. ³¹ Cucaah Bawipa cu, an cung i thil ṭha a tuahmi ruangah khan le a fekmi a dawtnak ruangah khan, an lawmh hrimhrim awk a si. ³² A mi hna an i pumhnak ah khan a lianhngannak cu an chim awk a si i upa hna an i pumhnak ah khan amah cu an thangṭhat awk a si. ³³ Bawipa nih tiva cu a kaoter hna i cerh cu a roter hna. ³⁴ Vawlei ṭhatnak hmun cu, cite vawlei, vawlei ṭhalo ah a canter, zeicahtiah cuka i a ummi hna cu an ṭha lo. ³⁵ Thetse ram kha tili ah a canter hna i ramcar kha cerhti put ah a canter hna. ³⁶ Cuka ah cun rawl a ṭammi kha a umter hna i khuasaknak ah khuapi pakhat an ser, ³⁷ lo ah khan thlaici an tuh i mitsur ruang kha an phun hna i rawl tampi an vuiter. ³⁸ A mi kha thluachuah a pek hna i fa tampi an ngei, an saṭil run kha a lohtlauter hna lo. ³⁹ Pathian mi hna cu, raltuknak ah an sungh i ningzahnak an huah tikah, hremnak le harnak an in tikah, ⁴⁰ anmah a hremtu hna kha ningzahnak a phakter hna i sul le lam a um lonak thetse ram ah khan a vaihter hna. ⁴¹ Sihmanhsehlaw sifak retheimi kha an harnak chungin a chuah hna i an tefa cu saṭil run bantukin a karhter hna. ⁴² Miding mi nih mah hihi an hmuh i an i lawm, sihmanhsehlaw miṭhalo cu cipkhap ti ngam loin an um. ⁴³ A fimmi nih cun hi thil hi ruat hna seh; Bawipa dawtnak fek cu ruat zungzal hna seh.

¹ Ka lung a hmun ko, maw Pathian, ka lung a fek ko! Nangmah thangṭhatnak hla ka sa lai. Ka nunnak i hlau tuah, ² Ka tingtang le ka thonglawi hna i hlau tuah u! Zinglei cu ka ṭhangh lai. ³ Maw Bawipa, miphun hna lakah kan lawmh lai, mi vialte hna lakah kan thangṭhat lai. ⁴ A fekmi na dawtnak cu vancung tiang a phan, zumhawktlak na sinak cu van a tawng. ⁵ Maw Pathian, na lianhngannak cu van ah khin langhter law na sunparnak cu vawleicung dihlak ah hin langhter ko. ⁶ Na ṭhawnnak in kan khamh tuah; kan thlacamnak kha kan let tuah, cuticun na dawtmi hi kan luat kho lai. ⁷ Pathian nih a hmunthiang chungin aa thawh i, "Shekhem cu ka tei lai i ka cheu lai, cun Sukkoth Nelrawn cu ka mi ka phawt hna lai. ⁸ Gilead cu keimah ta a si. Manasseh zong keimah ta a si, Efraim cu ka luchin a si i Judah cu ka bawifung a si. ⁹ Sihmanhsehlaw Moab cu ka kut ṭawlnak kheng ah ka hman lai i Edom cu ka kedan chiahnak kuang ah ka hman lai; Filistia cu ka tei lai i ka au lai," a ti. ¹⁰ Maw Pathian, aho nih dah ralhau ngeimi khua chungah a ka luhpi lai? Aho nih dah Edom ah a ka kalpi lai? ¹¹ Na kan hlawt taktak ko cang maw? Kan ralkap cu na kalpi ti hna lai lo maw? ¹² Minung bawmhnak cu zeihmanh a ṭhathnem lo caah kan raldohnak ah hin nangmah nih kan bawm ko. ¹³ Pathian kan sinah a ṭan caah kan tei hna lai; kan ral cu amah nih a kan teipiak hna lai.

¹ Maw ka thangṭhatmi Pathian, dai tein um hlah. ² Miṭhalo le milihchim pawl nih an ka tlakphuat i lih in ka thang an ka chiat. ³ An ka congoih, thil dawhcah lo ka tuahmi zeihmanh a um lo nain sual an ka puh. ⁴ Ka daw ko hna na le an caah thla ka cam ko nain an ka doh. ⁵ Ṭhatnak kha chiatnak in an ka lehrulh i dawtnak kha huatnak in an ka cham. ⁶ Ka ral cu a bia a ceihpiaktu dingah mihrokhrawl kha thimpiak, cun amah ral lila pakhatkhat nih sual puh hna seh. ⁷ Biaceihnak kha ing seh law, "Na sual," ti hna seh. A thlacam hmanh kha sual ah relpiak hna seh. ⁸ A nunnak kha dong zau seh law, midang nih a rian kha co hna seh! ⁹ A fale cu ngakṭah si hna seh law, a nupi cu nuhmei si seh. ¹⁰ A fale cu inn ngei loin a vak lengmangmi rawlhal si hna seh; thilchia hlonhnak ah khan um hna seh law, cu an umnak hmun hmanh cun ṭhawl si rih hna seh. ¹¹ Tangka a rak cawihtu hna nih khan a ngeihmi thil vialte cu, lakpiak dih hna seh law, a rianṭuanmi vialte cu khual nih chut dih hna seh. ¹² Ahohmanh nih a cungah zaangfahnak ngei hna hlah seh, ngakṭah a fale kha aho zohkhenh hmanh tong hna hlah seh. ¹³ A tefa vialte cu thi dih hna seh law hmai chan ah cun a min cu philh dipdep si seh. ¹⁴ Bawipa nih a pupa hna sualnak kha philh hlah seh law a nu sualnak kha ngaithiam hlah seh. ¹⁵ Bawipa nih an sualnak cu hngal zungzal ko seh, anmah belte philh dipdep si ko hna seh. ¹⁶ Cu pa nih cun mi zaangfah ruam hi a ruah in a ruat bal lo; sifak, rethei le santlailo mi kha a hrem hna i a thah hna. ¹⁷ Mi chiatserh kha a duhmi thil a si — amah cu chiatserh si ve seh. ¹⁸ Angki hruk a fawi tluk hin a caah chiatserh cu a fawi, a chiatserhnak bia nih cun amah kha ti bantukin ciah seh law a ruh kha chiti bantukin ciah hna seh. ¹⁹ A chiatserhnak bia nih cun amah kha puan bangin men seh law taisawm bangin khimh peng seh. ²⁰ Bawipa nih ka ral cu hitihin dantat hna seh, ka thang a ka chiattu ka ral hna cu hitihin tat hna seh. ²¹ Sihmanhsehlaw Maw Bawipa ka Pathian, bia na ka kamh bang khan ka bawm ko, na dawtnak a ṭhat ruangah ka chuahter ko. ²² Kei cu sifak le rethei ka si; ka lung a fak tuk hringhran. ²³ Zanlei thladem a loh zau bang khin loh kaa zal cang, khaubawk thlitu nih a choih bang khin choih ka si cang. ²⁴ Rawl khim ei awk ka ngeih lo caah ka khuk cu a ther in an ther i ka pum cu der hrianghruang in a um. ²⁵ Mi nih an ka hmuh tikah an ka nihsawh, keimah serhsatnak ah an lu lawng an thing ko. ²⁶ Maw Bawipa ka Pathian, ka bawm tuah; a fekmi na dawtnak ruangah ka khamh tuah. ²⁷ A ka khamhtu cu nangmah na si kha, ka ral cu hngalhter hna. ²⁸ Annih nih cun chiat an ka serh lai, sihmanhsehlaw nang nih cun thluachuah na ka pek lai. A ka hremtu cu sung hna seh law na sal kei tu cu lunglawm in umning. ²⁹ Ka ral cu ningzahnak nih a khuh in khuh hna seh; hmaichiatnak cu puan bangin i aih hna seh. ³⁰ Bawipa cu fak piin ka thangṭhat lai, mi an i pumhnak hmun ah amah cu ka hlawrh lai, ³¹ zeicahtiah sifakmi a chanhtu hna cu amah a si i thah awkin an bia a ceihtu hna kut chungin a chuahtu hna cu amah a si.

¹ Bawipa nih siangpahrang ka Bawipa cu a thawh i, "Na ral cu na ke tangah ka chiah hna hlantiang, ka orhlei kamah hin ṭhu tuah," tiah a ti. ² Zion in a rami Bawipa nih, uknak nawl cu an pek tikah, "Na ral cu uk hna," an ti lai i na nawl ngeihnak cu hmun dang tiangin a karh lai. ³ Na ral kha na tuk hna ni ah, na mi nih anmah lungtho tein an in chuahhnawh lai. Na tlangval hna cu zinglei dap bantukin, na sinah tlang thiang ah khan an ra chuak lai. ⁴ Bawipa nih a fekmi biakamnak a tuah i a let ṭhan lai lo, "Nang cu zungzal in tlangbawi na si lai, Melkhizedek tlangbawi a sining in na si lai," a ti. ⁵ Bawipa cu na orhlei kamah a um ko; a thin a hun ni ah siangpahrang kha a tei hna lai. ⁶ Miphun kha an bia a ceih hna lai i raltuknak hmun kha miruak in a khahter lai; vawlei cung dihlak ah siangpahrang kha a tei hna lai. ⁷ Lam pawng i a luangmi tiva kha siangpahrang nih cun a din lai, a tha aa hrim lai i teitu a si lai.

¹ Bawipa cu thangṭhat u! Bawipa cu a mi hna an i pumhnak ah ka lungthin a dih umnak in ka lawmh lai. ² Bawipa nih a tuahmi thil cu zeitluk in dah khuaruahhar a si! A tuahmi thil cung i aa lawmmi hna nih cun an sullam kha hngalh an duh. ³ A tuahmi thil cu upatnak le lianhngannak in a khat; a dinnak cu zungzal in a hmun. ⁴ Bawipa nih thil khuaruahhar a tuahmi hna kha philh loin a kan umter; amah cu mi cungah vel a ngei i zaangfah a thiam. ⁵ Amah a ṭihtu kha rawl in a cawm hna, bia aa kammi kha zeitikhmanh ah a philh lo. ⁶ A ṭhawnnak cu a mi hna sinah khan a langhter, ramdangmi hna ram cu a mi kha a pek hna. ⁷ A tuahmi thil kip ah zumhawktlak le miding a si; a nawlbia kha i bochan awk tlak an si; ⁸ zungzal in an hmun; biatak le dinnak in pek an si. ⁹ A mi cu khamhnak a pek hna i zungzal hmunmi biakamnak kha an sinah a ser. Amah cu a thiang i a ṭhawngmi a si. ¹⁰ Bawipa ṭih hi fim hram i thawh cu a si; cu bantukin a nungmi cu hngalhnak ah an ṭhang, Bawipa cu zungzal in thangṭhat si ko seh.

¹ Bawipa cu thangṭhat u! Bawipa a ṭihmi cu mi lunglawm an si. A nawlbia zulh a nuam in a theimi cu mi lunglawm an si. ² Cu bantuk mi hna fale cu ram chungah hin miṭhawng an si lai, miṭha mi hna fale cu thluachuah hmumi an si lai. ³ An innchungkhar hna cu an rum an lian lai i khua awng an pem zungzal lai. ⁴ Miṭha mi hna caah cun muihnak chungah khan ceunak a tlang, mi cungah vel a ngeimi le mi zaangfah a thiammi le miding mi hna caah cun ceunak kha a tlang. ⁵ Mi chaw a cawih hna tikah siang ngaiin a cawih i a rian a ṭuannak ah lihchim lo tein a ummi cu milunglawm an si. ⁶ Miṭha cu an sung bal lai lo, philh an si bal lai lo. ⁷ Thawng chia theih kha a ṭih lo. a zumhnak a ṭhawng i Bawipa kha aa bochan. ⁸ Lungrethei le thinphang in a um lo; ka ral cu an sung hrimhrim lai ti kha a hngalh. ⁹ A herh a baumi kha siang ngaiin a pek hna, mi cung i zaangfahnak a ngeihmi cu zungzal in a hmun; amah cu a ṭhawng lai i hmaizah a si ko lai. ¹⁰ Miṭhalo pawl nih khan hihi an hmuh i an ing a puang, an hacang lawng an rial ko; an rak i ruahchanmi kha pakpalawng ah a can dih bantuk khan annih zong an lo ve.

¹ Bawipa cu thangṭhat ko u! Bawipa salle hna, Bawipa min cu thangṭhat u. ² A min cu thangṭhat si ko seh, atu in zungzal tiang thangṭhat si ko seh! ³ Nichuahlei in nitlaklei tiang, Bawipa min cu thangṭhat si ko seh. ⁴ Miphun vialte cu Bawipa nih a uk hna, a sunparnak nih van khi a lonh dih hna. ⁵ Bawipa kan Pathian bantuk hi ahohmanh an um lo, vancung ah siseh, vawlei ah siseh, amah bantuk ahohmanh an um lo, a bawiṭhutdan cu cung sangpi ah khin a hun, ⁶ asinain van le vawlei run zoh awkah hin a rung kun. ⁷ Sifakmi kha leidip lak i an umnak khan a cawi hna, retheimi kha an retheihnak chungin a chuah hna i ⁸ siangpahrang fale hawikom ah khan a ser hna; a mi hna siangpahrang fale hawikom ah khan a ser hna. ⁹ Fa a ngei kho lomi nu kha upatnak a pek hna i fa a ngeimi lunglawmmi nu ah a ser hna. Bawipa cu thangṭhat u! Bawipa cu thangṭhat u!

¹ Israel mi nih Izipt ram in an chuah tikah, Jakob tefa pawl nih cu ram cun an chuah tikah, ² Judah cu Bawipa mithiang ah a cang, Israel cu amah ta ah a cang. ³ Rili Sen nih a rak zoh hna i an zamtak hna, Jordan Tiva cu luang loin a rak um. ⁴ Tlang cu meheh bantukin an i hlok i tuu bantukin an pet i an choi. ⁵ Rili, zei nih dah an zamter? Jordan Tiva, zeicahdah luang loin na um? ⁶ Tlang hna zeicahdah meheh bantukin nan i hlawh? Fing hna, zeicahdah tuu bantukin nan peh i nan choi? ⁷ Maw vawlei, Bawipa a rat caah cun ther ko, Jakob Pathian hmaiah cun ther ko. ⁸ Amah nih cun lungpi kha tili ah a canter hna i lungpang kha cerhti put ah a canter hna.

¹ Kanmah si loin, na min lawnglawng hi sunparnak pek awk cu na si, Bawipa, zeicahtiah na dawtnak cu a fek i zumhawktlak na si. ² Zeicahdah miphun dang hna nih, "Nan Pathian cu khoika ah dah a um?" tiah an kan hal lai? ³ Kan Pathian cu vancung ah khin a um i a duhmi paoh kha a tuah ko. ⁴ Annih pathian tu cu sui le ngun in sermi an si, minung kut nih a sermi an si. ⁵ Kaa cu an ngei, sihmanhsehlaw an holh kho lo, mit cu an ngei, sihmanhsehlaw an hmu kho lo. ⁶ Hna an ngei, asinain khua an thei lo, hnar an ngei, sihmanhsehlaw rim an thei lo. ⁷ Kut an ngei, sihmanhsehlaw zeihmanh an tawng kho lo, ke an ngei, sihmanhsehlaw an kal kho lo; an hrom nih aw zeihmanh a ser kho lo. ⁸ Siasal a sertu hna le siasal aa bochanmi hna cu an sermi siasal bantuk cu si ve hna seh! ⁹ Maw Israel mi hna, Bawipa cu i bochan u, amah nih an bawmh hna lai i an huhphenh hna lai. ¹⁰ Pathian tlangbawi hna, Bawipa cu i bochan u, amah nih an bawmh hna i an huhphenh hna. ¹¹ Bawipa a ṭihmi vialte hna, amah cu i bochan u, amah nih an bawmh hna i an huhphenh hna. ¹² Bawipa nih a kan philh lo i thluachuah a kan pek lai; Israel mi le Pathian tlangbawi vialte kha thluachuah a pek hna lai. ¹³ Amah a ṭihmi vialte cu thluachuah a pek hna lai, a hme a ngan thleidang loin a pek hna lai. ¹⁴ Bawipa nih nangmah le na fale cu, tefa in pe ko hna seh! ¹⁵ Van le vawlei a sertu Bawipa nih cun, thluachuahnak in pe ko hna seh! ¹⁶ Vancung khi Bawipa ta a si, sihmanhsehlaw vawlei hi cu, mi kha a pek hna. ¹⁷ Bawipa a thangṭhattu cu mithi an si lo, holh lo i dai tein umnak hmun ah a vung kalmi nih an thangṭhat kho lo, ¹⁸ sihmanhsehlaw kannih a nungmi nih amah cu kan lawmh lai, atu in zungzal tiang kan lawmh lai. Bawipa cu thangṭhat u!

¹ Bawipa nih ka thlacamnak kha a ka ngaihpiak i a ka theihpiak caah Bawipa cu ka dawt. ² Amah ka auh fate a ka theihpiak zungzal. ³ Thihnak nih a hri in a ka ṭem, Sheol nih a kut in a ka khimh. Ṭihnak le lung retheihnak in ka khat. ⁴ Cu tikah Bawipa cu ka auh i, "Bawipa, ka khamh ko sawh," tiah ka nawl. ⁵ Bawipa cu velngeimi le miṭha a si, kan Pathian cu mi zaangfah thiammi a si. ⁶ Bawipa nih a awlok a chongmi kha a huhphenh hna, ṭihnung chung i ka um tikah a ka khamh. ⁷ Bawipa cu ka cungah a ṭhat caah, maw ka nunnak, hnangam tein um ko. ⁸ Bawipa nih thihnak chungin a ka khamh, ka mitthli kha a ka hnawh i raltuknak ah a ka sunghter lo. ⁹ Cucaah cun Bawipa hmaiah kaa chawk kho i, a nungmi hna sinah khua ka sa rih. ¹⁰ "Ka lo dimdiam ko cang," ka ti lio hmanh ah, a zumh cu ka zumh peng ko, ¹¹ Ka thin a phan tuk cang i, "Ahohmanh bochan awk tlak an um lo," ka ti lio zongah, ka zumh peng ṭhiamṭhiam ko. ¹² Bawipa cu ka cung i a ṭhatnak vialte ruangah hin zeidah ka pek khawh lai? ¹³ A ka khamh caah khan Bawipa cu din awk thawinak ka pekchanh lai. ¹⁴ A mi vialte an i pumhnak ah khan bia kaa kammi kha ka pek lai. ¹⁵ A mi pakhatkhat an thih tikah Bawipa caah zeitluk in dah a fah! ¹⁶ Bawipa, kei cu na sal ka si; ka nu nih na rian a rak in ṭuanpiak bang khan kei zong nih ka ṭuan ve. ¹⁷ Lawmhnak chimnak raithawinak cu kan pek lai i na sinah thla ka cam lai. ¹⁸ - ¹⁹ Na mi vialte an i pumhnak, Jerusalem khua na Biakinn tual ah cun, na sinah bia kaa kammi kha kan pek lai. Bawipa cu thangṭhat u!

¹ Miphun vialte hna, Bawipa cu thangṭhat u! Mi vialte hna, amah cu thangṭhat u! ² A kan dawtnak fek cu a ṭhawng i zumhawktlak a sinak cu zungzal in a hmun. Bawipa cu thangṭhat u!

¹ Bawipa cu a ṭhat i a dawtnak cu zungzal in a hmunh caah lawm tuah u! ² Israel mi nih, "A dawtnak cu zungzal in a hmun," ti hna seh. ³ Pathian tlangbawi hna nih, "A dawtnak cu zungzal in a hmun," ti hna seh. ⁴ Bawipa a ṭihmi vialte nih, "A dawtnak cu zungzal in a hmun," ti hna seh. ⁵ Lung sivang in ka umnak chungin Bawipa cu ka auh; ka auhnak cu a ka leh i a ka luatter. ⁶ Bawipa cu ka sinah a um caah zeihmanh ka ṭih lo; minung nih cun ka cungah zeidah an tuah khawh lai? ⁷ A ka bawmtu cu Bawipa a si caah, ka ral kha an sungh cu ka hmuh lai. ⁸ Minung i bochan nakcun Bawipa i bochan cu a ṭha deuh; ⁹ bawi i bochannak cun Pathian i bochan kha a ṭha deuh. ¹⁰ Ral tampi nih an ka kulh, sihmanhsehlaw Bawipa ṭhawnnak thawngin ka tei dih hna! ¹¹ A kaa kip in an ka kulh, sihmanhsehlaw Bawipa ṭhawnnak thawngin ka tei dih hna! ¹² Khuai zelh in an ka zelh, sihmanhsehlaw hlingbur kangh in an kang, Bawipa ṭhawnnak thawngin ka tei dih hna. ¹³ Fak piin an ka tuk i an ka tei ciaomau, sihmanhsehlaw Bawipa nih a ka bawmh. ¹⁴ Bawipa cu ka himnak le ka ralhruang a si, amah cu a ka chuahtu a si. ¹⁵ Pathian mi hna thlam chung i ral teinak au thawng cu ngai hmanh: Bawipa ṭhawnnak a liannganmi nih kan ral cu a tei hna, ¹⁶ a ṭhawnnak nih teinak a kan pek, a ṭhawnnak a liannganmi nih raltuknak hmun ah teinak a kan pek!" an ti. ¹⁷ Ka thi lai lo, ka nung ko lai i Bawipa nih a tuahmi thil kha ka chim hna lai. ¹⁸ Fak piin dan a ka tat, sihmanhsehlaw thih ngaingai cu a ka siang lo. ¹⁹ Biakinn kutka cu ka hunpiak hna u, ka lut lai i Bawipa cu ka thangṭhat lai. ²⁰ Hihi Bawipa kutka cu a si, miding mi lawng an lut kho lai. ²¹ Bawipa, nangmah nih ka thlacamnak na ka theihpiak i teinak na ka pek caah; nangmah cu kan thangṭhat! ²² Inn satu pawl nih santlailo ah an rel i an hlawtmi lung cu, santlai bik lung a rak si ziar ko! ²³ Cucu Bawipa tuahmi a si, zeitluk in dah aa dawh! ²⁴ Bawipa nih a kan pekmi ni hi zeitluk in dah a ṭhat; hi ni ah hin i lawm u si law i nuam u sih. ²⁵ Kan khamh tuah, Maw Bawipa kan khamh tuah. Bawipa, thluachuahnak kan pe ko! ²⁶ Bawipa min in a rami cu Pathian nih thluachuah a pek hna. Bawipa biakinn chungin kannih nih thluachuah kan rak in pek hna. ²⁷ Bawipa cu Pathian a si; kan cungah a ṭha. Nan kut in thing nge kha i put in puai cu thawk u law biakṭheng kha vel u. ²⁸ Nangmah cu ka Pathian na si i kan lawmh; na lianhngannak cu ka thanh lai. ²⁹ Bawipa cu a ṭhat caah lawm tuah u, a dawtnak fek cu zungzal in a hmun.

¹ An nunning ah soisel awk zeihmanh a um lo i Bawipa nawlbia a zulmi cu mi lunglawm an si. ² A nawlbia kha a zul i lungthin dihlak in a nawl a ngaimi cu mi lunglawm an si. ³ Ṭhat lonak kha an tuah lo, Bawipa lam kha an zulh. ⁴ Na nawlbia kha na kan pek i zumhawktlak tein nan zulh lai na kan ti. ⁵ Na kan pekmi phunglam cu zumhawktlak tein zul kho ning law zeitluk in dik ka va lunghmuih hnga! ⁶ Na nawlbia vialte kha ṭha tein kaa zohchih hna ahcun ningzahnak ka phan lai lo. ⁷ Na biakhiahnak a dingmi kha ka hngalh hna lai i lung thiang in kan thangṭhat lai. ⁸ Na nawlbia kha ka zulh hna lai, zeitikhmanh ah ka kaltak hlah. ⁹ Zeitindah tlangval nih thiang tein a um lai? Na nawl ngaihnak thawngin thiang tein a um lai. ¹⁰ Ka lungthin a dih umnak in na rian ṭuan kha kaa zuam; na nawlbia kha zul loin ka umnak hnga lo ka bawm. ¹¹ Nangmah cungah sualnak ka tuah nakhnga lo na nawlbia cu ka lung chungah kaa chiah. ¹² Bawipa, nangmah cu kan ṭhangṭhat, na phunglam cu ka cawnpiak ko hna. ¹³ Na kan pekmi nawlbia vialte cu, fak piin ka chim lengmang hna lai. ¹⁴ Chawva tampi ngeih nakin na nawlbia zulh cu ka duh deuh. ¹⁵ Na kan hmuhsakmi thil kha ṭha tein ka ngiat hna i na kan cawnpiakmi thil kha ka dothlat hna. ¹⁶ Na nawlbia cu kaa lawmhnak an si, na phunglam cu ka philh hna lai lo. ¹⁷ Na sal cungah hin ṭhatnak tuah ko, cuticun ka nung lai i na cawnpiaknak kha ka zulh hna lai. ¹⁸ Na nawlbia chung i a ummi khuaruahhar biatak kha ka hmuh khawh nakhnga, ka mit ka auter ko. ¹⁹ Vawlei cungah hin caan tlawmte lawng ka um lai, cucaah na nawlbia kha ka thuhkanh hna hlah. ²⁰ Na biakhiahnak kha ka lung nih chun zan in a ngai ko. ²¹ Mi porhlaw kha na chimhhrin hna; na nawlbia a pialtakmi cu chiatserhmi an si. ²² Nangmah phunglam kha ka zulh hna caah an ka serhsatnak le an ka nihsawhnak cun ka luatter ko. ²³ Uktu bawi hna nih khan, keimah hrawhnak khua cu khang ṭi lengmang hna hmanh seh law, kei na sal cu na nawlbia tu kha ka ruat camcin ko lai. ²⁴ Na ka cawnpiaknak nih lawmhnak a ka pek; fim a ka chimtu a si. ²⁵ Leidip lakah ka ril ko cang, bia na ka kamh bang khan ka nunter ṭhan ko. ²⁶ Ka tuahmi vialte kha na sinah ka phuan dih i na ka leh; na nawlbia kha ka cawnpiak tuah hna. ²⁷ Na phunglam zulhning kha ka cawnpiak law na cawnpiaknak khuaruahhar cu ka ruat hna lai. ²⁸ Ngaihchiatnak nih a ka hrilh, bia na ka kamh bang khan thazang ka pe ṭhan tuah. ²⁹ Lam ping zulh ka dawn law na ṭhatnak thawngin na phunglam kha ka cawnpiak tuah. ³⁰ Na nawl zulh awkah ka lung kaa thlek cang; na phunglam kha ṭha tein ka ruat hna. ³¹ Bawipa, lam na ka hmuhsakmi kha ka zulh hna, hnabei dong in ka umter hlah. ³² Nangmah nih hngalhthiamnak tam chinchin in na ka pek lai caah, na nawlbia cu lunglawm tein ka zulh hna lai. ³³ Na phunglam an sullam kha ka cawnpiak hna law zeitikhmanh ah ka zulh zungzal hna lai. ³⁴ Na phunglam kha fiang tein ka chim law ka zulh lai; ka lungthin a dih umnak in ka zulh lai. ³⁵ Na nawlbia chungah khan lunglawmhnak ka hmuh caah na nawlbia lam cu ka zulhter ko. ³⁶ Rumnak nakin na nawlbia zulh kha ka duhter deuh. ³⁷ Santlailo thil kha biapi i ka rel sual nakhnga lo ka bawm, bia na ka kamh bang khan ka cungah ṭhatnak tuah ko. ³⁸ Nangmah an ṭihtu hna sinah biakamnak na tuahmi cu, na sal keimah cung zongah hin tlinter ko. ³⁹ Ka ṭihmi thangchiatnak khan ka khamh ko; zeitluk in dah na nawlbia cu a ṭhat! ⁴⁰ Nangmah cu na din caah na nawlbia zulh kha ka duh hna; ka cungah ṭhatnak tuah ko. ⁴¹ Zeitluk in dah na ka dawt kha ka hmuhsak law bia na ka kamh bang khan ka khamh tuah, Maw ka Bawipa ⁴² Cun na bia kha kaa bochan caah, a ka nihsawhtu kha bia ka leh khawh hna lai. ⁴³ Ka rak i ruahchanmi cu na biakhiahnak kha a si zungzal caah biatak cu ka chim zungzal khawh nakhnga ka bawm. ⁴⁴ Na phunglam cu ka zulh zungzal lai, zungzal in zungzal tiang ka zulh lai. ⁴⁵ Na nawlbia zulh kha kaa zuam caah luat ngaiin ka nung lai. ⁴⁶ Na nawlbia cu siangpahrang kha ka chimh hna lai i cu tuah cu ka ning a zak lai lo. ⁴⁷ Na nawlbia cu ka duh hna caah na nawlbia zulh cu ka caah a nuam. ⁴⁸ Na nawlbia cu ka upat hna i ka duh hna; na cawnpiaknak cu ka ruat camcin hna lai. ⁴⁹ Na sal bia na ka kamhmi kha philh hlah, na biakamnak cu ka ruahchannak hrampi a si. ⁵⁰ Nganfah ka in hmanh ah ka hna a ngam, zeicahtiah na biakamnak nih nunnak a ka pek. ⁵¹ Mi porhlaw hna nih an ka zawmhtaih, sihmanhsehlaw kei cu na phunglam kha ka kaltak lo. ⁵² Bawipa, hlan i na rak ka cawnpiakmi kha ka philh hna lo, kha nih khan an ka lawmhter. ⁵³ Miṭhalo nih na phunglam an hrawh ka hmuh tikah ka thin a hung. ⁵⁴ Ka inn in lamhlatpi i ka umnak hmun ah na nawlbia kha hla in ka hlawi hna. ⁵⁵ Bawipa, zan ah nangmah kha kan ruat i, na phunglam kha ka zul. ⁵⁶ Na nawlbia ka zulh hna hi kaa lawmhnak a si. ⁵⁷ Nangmah lawnglawng hi kan duhmi na si ko, Maw Bawipa ; na phunglam zulh awkah bia kaa kam. ⁵⁸ Ka lungthin dihlak in kan nawl, bia na ka kamh bangin ka zaangfah tuah! ⁵⁹ Ka ziaza kha ṭha tein kaa ruat i na nawlbia zulh kha bia kaa kam. ⁶⁰ Rau loin, khulrang in na nawlbia kha ka zulh hna. ⁶¹ Miṭhalo nih an hri in an ka ṭem, sihmanhsehlaw na phunglam kha ka philh lo. ⁶² Na biakhiahnak an din ruangah khan zanṭim i ka hun i hlauh tikah nangmah cu kan thangṭhat. ⁶³ Na rian a ṭuanmi hna cu ahohmanh an si ah ka hawikom an si, na phunglam a zulmi hna i an hawikom ka si. ⁶⁴ Bawipa, vawlei hi a fekmi na dawtnak in a khat; na nawlbia cu keimah kha ka cawnpiak tuah hna. ⁶⁵ Bawipa, na biakam kha na zulh i na sal ka cungah hin na ṭha ko. ⁶⁶ Na nawlbia kha kaa bochan hna caah fimnak le hngalhnak ka pe ko. ⁶⁷ Dan na ka tat hlanah cun a pingah ka kal tawn, sihmanhsehlaw atu cu na bia kha ka ngaih. ⁶⁸ Zeitluk in dah na ṭhat i zeitluk in dah vel na ngeih! Na nawlbia cu ka cawnpiak tuah hna. ⁶⁹ Mi porhlaw hna nih lih in ka thang an ka chiat, sihmanhsehlaw kei nih cun ka lungthin dihlak in na nawlbia kha ka zulh hna. ⁷⁰ Hi mi hna cu hngalhnak a ngei lomi an si, sihmanhsehlaw kei cu na nawlbia ah kaa lawm. ⁷¹ Dantatnak ka inmi cu ka caah a ṭha, zeicahtiah na nawlbia kha a ka hngalhter. ⁷² Na ka pekmi nawlbia cu ka caah vawlei cung tangka vialte nakin a ṭha deuh. ⁷³ Nangmah nih na ka ser i nangmah nih him tein na ka umter; na nawlbia kha ka hngalh khawh hna nakhnga hngalhthiamnak ka pe ko. ⁷⁴ Na biakamnak kha kaa bochan caah nangmah an ṭihmi nih an ka hmuh tikah an lung aa lawm lai. ⁷⁵ Bawipa, na nawlbia kha an ding ti ka hngalh i zumhawktlakmi na si caah dan na ka tat cu a si. ⁷⁶ Kei na sal hi bia na ka kamh bantukin a fekmi na dawtnak nih cun ka lung ka lawmhter ko seh. ⁷⁷ Na phunglam kha kaa lawmhnak a si caah ka cungah zaangfahnak ngei law ka nung lai. ⁷⁸ Lih in sual an ka puh caah miporhlaw pawl cu, ningzahnak phan hna seh, kei tu cu na nawlbia kha ka ruat ko hna lai. ⁷⁹ Nangmah an ṭihmi le na nawlbia a hngalmi cu ka sinah ra hna seh. ⁸⁰ Ral tuknak i sungh ningzahnak khan ka luat nakhnga, na nawlbia cu tlamtling tein ka zulhter ko. ⁸¹ Maw Bawipa, na khamhnak ka hngahnak ah hin ka ba tuk hringhran cang; na bia cu kaa bochanmi a si. ⁸² "Zeitik ah dah na ka bawmh lai?" ti lengmang in ka um i na ka kamhmi ka cuanhnak ah hin ka mithram a fak tuk cang. ⁸³ Kei cu an hlonhmi saphaw cua bantukin santlailo ka si, asinain na nawlbia cu ka philh hna lo. ⁸⁴ Zei can dah ka ngan a herh rih lai? A ka hremtu kha zeitik ah dah dan na tat hna lai? ⁸⁵ Na nawlbia a zul duh lomi miruamkai pawl nih khan, ka tlaknak dingah khor an cawh. ⁸⁶ Na nawlbia cu zumhawktlak an si dih, mi nih lih in an ka hrem, ka bawm tuah! ⁸⁷ An ka thah khawh ciaomau, sihmanhsehlaw na nawlbia kha ka daithlanh hna lo. ⁸⁸ Na dawtnak fek ruangah ka cungah ṭha ko, cuticun na phunglam kha ka zulh khawh hna lai. ⁸⁹ Bawipa, na bia cu zungzal in a hmun lai; vancung ah khin fek tein a um. ⁹⁰ Zumhawktlak na sinak cu chan vialte tiangin a hmun, vawlei cu a umnak ah na chiah i cuka ah cun a um peng ko. ⁹¹ Nangmah nawlbia thawngin zeizong vialte hi nihin ni tiang an hmun, zeicahtiah zeizong vialte cu an dihlak in na sal an si. ⁹² Na nawlbia hi kaa lawmhnak hram rak si hlah seh law, ka dantatnak inmi ah hin ka thi diam cang hnga. ⁹³ Na nawlbia cu ka daithlanh bal hna lai lo, zeicahtiah anmah nih cun pei an ka nunter cu. ⁹⁴ Kei cu nangmah ta ka si, ka khamh ko sawh. Na nawlbia zulh kha kaa zuam lengmang ko. ⁹⁵ Miṭhalo pawl nih thah awkah an ka bawh ko, sihmanhsehlaw kei cu na phunglam kha ka ruat ko hna lai. ⁹⁶ Zei thil hmanh hi a tlingmi a um lo ti kha ka hngalh cang, asinain na nawlbia cu donghnak a ngei lo. ⁹⁷ Zeitluk in dah na phunglam cu ka duh, chun nitlak cu lawng cu ka ruat ko. ⁹⁸ Na nawlbia nih a ka umpi zungzal i ka ral vialte hna nakin a ka fimter deuh. ⁹⁹ Na cawnpiaknak kha ka ruah hna caah, ka sayate vialte nakin ka hngal deuh. ¹⁰⁰ Na nawlbia kha ka zulh hna caah tar nakin fimnak ka ngei deuh. ¹⁰¹ Na bia zulh kha ka duh caah ziaza ṭhalo vialte kha ka hrial hna. ¹⁰² Na cawnpiaknak kha zeirello in ka um hna lo, zeicahtiah a ka cawnpiaktu cu nangmah na si. ¹⁰³ Zeitluk in dah na nawlbia cu an thlum, khuaihliti nakin an thlum deuh. ¹⁰⁴ Na nawlbia in fimnak ka hmuh, cucaah ziaza ṭhalo vialte kha ka huat hna. ¹⁰⁵ Na bia cu ka ke caah meiinn a si, ka lam ah ceunak a si. ¹⁰⁶ Na ka cawnpiaknak a dingmi, ka zulh hna lai tiah bia kaa kammi kha, ka zulh taktak hna lai. ¹⁰⁷ Maw Bawipa, ka temhinnak hi a fak tuk hringhran, bia na ka kamh bangin ka nunter ko sawh. ¹⁰⁸ Maw Bawipa, ka lunglawmhnak thlacamnak cu ka cohlang law, na nawlbia kha ka cawnpiak tuah hna. ¹⁰⁹ Nifate thinphang zungzal in ka um ko, sihmanhsehlaw na nawlbia cu ka philh lo. ¹¹⁰ Miṭhalo nih keimah foihnak caah rap an chiah, sihmanhsehlaw na nawl zul loin ka um lo. ¹¹¹ Na nawlbia cu zungzal ka ro an si, ka lung a ka lawmhtertu an si. ¹¹² Ka thih ni tiangin na nawlbia cu ka zulh zungzal ko hna lai. ¹¹³ Na sinah zumhawktlak in a um lomi cu ka huat hna, sihmanhsehlaw kei cu na phunglam kha ka duh. ¹¹⁴ Nangmah cu a ka khamhtu le a ka hupphengtu na si, na biakam cu kaa bochan. ¹¹⁵ Nannih misual mi hna, ka kaltak u, kei cu ka Pathian nawlbia kha ka zul lai. ¹¹⁶ Bia na ka kamh bangin thazang ka pe law ka nung lai. kaa ruahchannak ah hin hnabeidong in ka umter hlah. ¹¹⁷ Ka domh law ka him lai, na nawlbia cu zungzal in ka ruat hna lai. ¹¹⁸ Na phunglam a zul duh lomi vialte kha na hlawt hna, zernak in khua an khanmi vialte cu pakpalawng a si. ¹¹⁹ Nang na mit hmuh ah cun vawleicung miṭhalo vialte hi hmunthur men an si dih, cucaah kei cu na nawlbia kha ka duh. ¹²⁰ Nangmah kan ṭih caah a ther in ka ther, na biakhiahmi hmaiah cun khuaruahhar in ka dir. ¹²¹ A dingmi le a ṭhami thil kha ka tuah, ka ral hna sinah ka chia ta hlah. ¹²² Na sal kha, kan bawmh lai, tiah biakamnak ka pe tuah, miruamkai hna nih hin harnak ka pe hna hlah seh. ¹²³ Na khamhnak hi ka mit hram fak in ka cuan, na ka kamhmi luatnak cu. ¹²⁴ A fekmi na dawtnak ningin ka cungah ṭuan law na nawlbia cu hung ka cawnpiak ko hna. ¹²⁵ Kei cu na sal ka si, cucaah cun hngalhthiamnak ka pe law na ka cawnpiakmi kha ka hngalh khawh hna lai. ¹²⁶ Mi nih na phunglam kha an zulh duh ti lo caah atu caan hi na cawlcangh caan a si awk a hau. ¹²⁷ Na nawlbia cu sui nakin ka duh deuh hna, sui ṭha bik nakin ka duh deuh hna. ¹²⁸ Cucaah cun na cawnpiaknak kha ka zulh hna i lam hmaanlo vialte kha ka huat hna. ¹²⁹ Na kan cawnpiaknak cu khuaruahhar an si; ka lungthin a dih umnak in ka zulh hna. ¹³⁰ Na kan cawnpiaknak fianternak nih khan ceunak a chuahpi, hngalhnak a tlawmmi kha fimnak a pek hna. ¹³¹ Na nawlbia kha ka duh tuk hna caah, ka kaa kaa an i ka thaw aa su. ¹³² Na dawtmi hna cu na merhnawh hna i an cungah zaangfahnak na ngeih bantukin kei zong ka merhnawh ve law ka zaangfah ve ko sawh. ¹³³ Bia na ka kamh bantukin tlu loin ka khamh law ṭhat lonak nih khan ka tei sawh hlah seh. ¹³⁴ A ka hremtu hna kut chung khan ka khamh tuah, cuticun na nawlbia kha ka zulh hna lai. ¹³⁵ Na sal cungah hin na hmai kha tlanter law, na phunglam kha ka cawnpiak ko. ¹³⁶ Mi nih na phunglam kha zulh an duh lo caah an mitthli cu tiva bangin a luang. ¹³⁷ Bawipa, nang cu na ding i na nawlbia zong a ding. ¹³⁸ Nangmah pekmi nawlbia cu an hmaan i an ding. ¹³⁹ Ka ral nih na nawlbia cu zei ah an rel hna lo caah ka thin cu meialh in a alh. ¹⁴⁰ Zeitluk in dah na biakam cu a hmaan! Zeitluk in dah na sal nih ka duh! ¹⁴¹ Kei cu santlailo le zeirello mi ka si, sihmanhsehlaw na nawlbia cu ka daithlanh hna lo. ¹⁴² Na dinnak cu zungzal in a hmun lai, na phunglam cu ahmaan zungzal ko. ¹⁴³ Harnak le lung retheihnak in ka khat, sihmanhsehlaw na nawlbia nih an ka lawmhter. ¹⁴⁴ Na kan cawnpiaknak cu zungzal in a ding, hngalhthiamnak ka pe law ka nung lai. ¹⁴⁵ Ka lungthin dihlak in nangmah cu kan auh, Maw Bawipa ka let law na nawlbia cu ka zulh hna lai. ¹⁴⁶ Nangmah kha kan auh, ka khamh law na nawlbia kha ka zulh hna lai. ¹⁴⁷ Ni a chuah hlanah nangmah cu bawmhnak hal duh ah kan auh, na biakamnak kha kaa bochanmi cu a si. ¹⁴⁸ Zan khuadei mit cungtang chin loin ka um, cucu na cawnpiakmi ka ruahnak ah a si. ¹⁴⁹ A fekmi na dawtnak thawngin, maw Bawipa, ka thlacamnak cu ka theihpiak ko, na ṭhatnak thawngin ka nunnak cu ka zuahpiak ko. ¹⁵⁰ A ka hremtu mipuarhrang hna nih khan an ka naih chin lengmang, annih cu na phunglam a zul duh bal lomi kha an si. ¹⁵¹ Sihmanhsehlaw Maw Bawipa, nang nih cun lam nai tein na ka umpi i na biakamnak cu a si taktakmi an si. ¹⁵² Na kan cawnpiaknak cu hlanlio piin ka rak hngalh cang, zungzal hmun dingin na ser hna. ¹⁵³ Ka temhinnak hi ka zohpiak law ka khamh tuah, zeicahtiah na phunglam cu zeirello in ka um hna lo. ¹⁵⁴ Ka bia ka chimpiak law ka luatter tuah, bia na ka kamh bang khan ka khamh tuah. ¹⁵⁵ Na nawlbia kha miṭhalo mi nih cun an zulh hna lo caah annih cu khamhnak an hmu lai lo, ¹⁵⁶ sihmanhsehlaw Bawipa na zaangfahnak cu a ngan caah na biakhiahnak bantukin ka khamh ko. ¹⁵⁷ Ral tampi le hremtu tampi ka ngei, ka luak an chuak, zeicahtiah na nawlbia kha an zul duh lo. ¹⁵⁸ Khi mirawitu hna khi ka zoh hna tikah ka luak an chuak, zeicahtiah na nawlbia kha an zul duh lo. ¹⁵⁹ Bawipa, zeitluk in dah na cawnpiaknak ka duh cu hngal ko. A fekmi na dawtnak thawngin ka khamh ko! ¹⁶⁰ Na phunglam a chung muru cu biatak a si, a dingmi na nawlbia vialte cu zungzal in an hmun. ¹⁶¹ Miṭhawng nih ding lo piin an ka serhsat, sihmanhsehlaw na phunglam cu ka hmaizah. ¹⁶² Bia na kammi thawngin zeitluk in dah ka lung aa lawmh, ro chaw aa hmuhmi bantukin kaa lawm. ¹⁶³ Lih cu ka huat hna i ka fih hna, sihmanhsehlaw na phunglam cu ka duh. ¹⁶⁴ A dingmi na biakhiahnak ruangah ni khat ah voi sarih lengmang ka lawmh. ¹⁶⁵ Na phunglam a duhmi cu him tein khua an sa i a tlukter khotu hna zeihmanh a um lo. ¹⁶⁶ Maw Bawipa, na khamhnak cu kaa ruahchan i nawl na ka pekmi cu ka tuah hna. ¹⁶⁷ Na nawlbia cu ka zulh hna; ka lungthin dihlak in ka duh hna. ¹⁶⁸ Na nawlbia le na cawnpiaknak cu ka zulh hna; ka tuahmi vialte cu na hmuh dih. ¹⁶⁹ Maw Bawipa, nangmah bawmh hal in ka aunak cu na sin phakter ko. Bia na ka kamh bangin hngalhnak ka pe ko. ¹⁷⁰ Ka thlacamnak cu na hmaika phan seh law bia na ka kamh bangin ka khamh tuah. ¹⁷¹ Na phunglam cu na ka cawnpiak hna caah kan thangṭhat zungzal ko lai. ¹⁷² Na nawlbia cu an din caah na phunglam cu hla in ka sak lai. ¹⁷³ Na nawlbia cu ka zulh hna caah a zungzal in ka bawm ko. ¹⁷⁴ Zeitluk in dah na khamhnak hmuh cu ka duh, Maw Bawipa ! Na phunglam zulh hi kaa lawmhnak a si. ¹⁷⁵ Kan thangṭhat khawh nakhnga, nunnak ka pe tuah! Na cawnpiaknak nih ka bawm hna seh. ¹⁷⁶ Tuu tlau bantukin ka vai; cucaah ra law na sal hi ka kawl tuah, zeicahtiah na phunglam cu zeirello in ka um hna lo.

¹ Harnak chung ka um tikah Bawipa cu ka auh i a ka leh. ² Maw Bawipa, lihchim hmangmi hna le hlen hmangmi hna sin hin ka khamh ko. ³ Nannih milihchim hna, nan cungah Pathian nih zeidah a tuah lai? Zeitindah dan an tat hna lai? ⁴ Ralkap cantiang le meiṭil sen in dan an tat hna lai. ⁵ Nannih lak um cu Meshek khua um tluk in a har, Kedar mi hna lak um tluk a si. ⁶ Daihnak a huami hna sinah sau tuk ka um cang! ⁷ Kei nih daihnak ka chim paoh ah, annih nih dohnak an duh.

¹ Tlang khi ka hei cuan hna i, khuazei in dah bawmhnak ka hmuh lai? ka ti. ² Bawmhnak ka hmuh dingmi cu Bawipa sinin a ra lai, van le vawlei sertu a simi sin cun a ra lai. ³ A ka hupphengtu cu i ṭhang peng ko seh law, ka tlukter sawh hlah seh: ⁴ Israel hupphengtu cu a ngu bal lo i aa hngilh bal lo, ⁵ Bawipa nih an ven ko lai, nangmah huhphenh awkah na pawngin an umhnawh ko. ⁶ Chun ah ni nih harnak an pe lai lo i zan ah thlapa zong nih harnak an pe ve lai lo. ⁷ Bawipa nih ṭihnak chungin an huhphenh lai i him tein an chiah lai. ⁸ Atu in zungzal tiang, na chuahlei siseh, na luhlei siseh, an zohkhenh zungzal lai.

¹ "Bawipa inn ah kal u sih," an ka ti tikah khan ka rak i lawm. ² Atu cu maw Jerusalem, na kutka chungah kan dir cang! ³ Jerusalem cu i rem ṭhipṭhep le i dawh cikcek in sakmi khua a si. ⁴ Cuka ah cun Bawipa sin i lawmhnak bia chim awkah, Israel miphun cu an kal tawn, cu lawmhnak bia chim cu Bawipa nih a fialmi hna a si. ⁵ Cuka ah cun David chung bawiṭhutdan hna cu, an hun hna. ⁶ Jerusalem daihnak caah thla cam u! "Nangmah an duhmi cu an thluachuak hna seh! ⁷ Na kulhnak vampang chunglei ah daihnak um seh law na siangpahrang inn hna chungah himnak um seh. ⁸ Ka rualchan hna le ka hawikom hna ruangah, Jerusalem cu, "Na chungah daihnak um seh," ka ti. ⁹ Bawipa kan Pathian inn ruangah, na ṭhatnak ding caah thla ka cam.

¹ Bawipa, nangmah lawng kei cu kan cuan ko, na umnak hmun van lei lawng ka zoh ko. ² Sal nih a bawipa aa bochan bantuk le salnu nih a bawinu aa bochan bantukin, Bawipa kan Pathian, nangmah lawng kan hun in zoh ko, kan cungah zaangfahnak na ngeih hlantiang kan in zoh ko lai. ³ Maw Bawipa, kan zaangfah ko sawh, kan zaangfah ko sawh; an kan serhsat tuk hringhran! ⁴ Mirum nih sau tuk an kan zawmhtaih cang i miporhlaw nih sau tuk an kan nihsawh cang.

¹ Bawipa kha kanmah leiah rak ṭang hlah seh law, zei huah dah kan rak huah hnga, Israel mi hna ka let tuah u! ² "Kan ral nih an kan tuk ah khan, Bawipa kha kanmah leiah rak ṭang hlah seh law ³ kan nung in an kan dolh dih hnga, an thinhun ling ah khan an rak kan dolh dih hnga. ⁴ Kha tikah tilian nih khan a rak kan fenh diam hnga i ti nih khan a rak kan phum diam hnga. ⁵ a hlonh in aa hlonhmi tilian nih khan a rak kan phum diam hnga." ⁶ Kan ral nih hrawh awkah a kan siang lotu Bawipa cu lawm ko u sih. ⁷ Rap chiahtupa rap in a luatmi va bantukin kan luat; rap cu a hrawh i kannih cu kan luat. ⁸ Bawmhnak kan hmuhnak cu Bawipa sinin a si, amah cu van le vawlei a sertu a si.

¹ Bawipa aa bochanmi cu Zion Tlang bantuk an si; Zion Tlang, hninh khawh zong a si lo i ṭhial khawh zong a si lomi bantuk an si. ² Tlang nih Jerusalem khua kha an kulh bangin, Bawipa nih a mi cu a kulh hna, atu thawk in zungzal tiang a kulh hna. ³ Pathian mi hna ram cu miṭhalo nih an uk zungzal lai lo, an uk ahcun, Pathian mi hna hrimhrim hmanh nih khan, ṭhat lonak an tuah sual hnga. ⁴ Bawipa, ṭhatnak a tuahmi hna cungah ṭhatnak tuah ve ko, na nawl a ngaimi hna cungah ṭhatnak tuah ko. ⁵ Sihmanhsehlaw anmah lam, lam ṭhalo a zulmi hna cu, miṭhalo dan na tat hna tikah khan, dantat ve ko hna. Israel cungah daihnak um ko seh.

¹ Bawipa nih Zion i a kan kirpi ṭhan ah khan, kan mang bantuk a rak si! ² Zeitluk in dah kan nih kan kheh i zeitluk in dah lunglawmhnak hla kan sak kha! Kha tikah khan miphun dang hna nih, "An caah Bawipa nih thil lianngan a tuah," an kan ti. ³ Kan caah thil lianngan a tuah taktak hna; zeitluk in dah kan rak i lawmh! ⁴ Bawipa, kan ram ah kan kirpi ṭhan ko, a carmi tiva ah ruah nih ti a chuahpi ṭhan bangin, kan kirpi ṭhan ko. ⁵ Mitthli he thlaici a tuhmi nih, lunglawmh aunak he an zun lai; ⁶ Ṭah buin thlaici aa phorhmi hna nih lunglawmhnak hlasa le facang phal i put in an ra kir lai!

¹ Bawipa nih inn cu a sak lo ahcun, a satu hna rianṭuannak cu santlailo a si; Bawipa nih khua kha a ven lo ahcun, a vengtu hna hngilh loin an umnak cu santlailo a si. ² Khuasak tintuknak caah fak tuk in rianṭuan le tuan tein thawh i tlaipi ah ih lengmang hi santlailo a si, zeicahtiah Bawipa nih a dawtmi cu, an i hngilh karah, an herhmi kha a pek ko hna. ³ Fale hi Bawipa sinin kan hmuhmi ro an si, thluachuah a kan pekmi an si. ⁴ Mipa nih a no lioah a ngeihmi fapa hna cu ralkap kut chung cantiang bantuk an si. ⁵ Cu bantuk cantiang a thalbawm khat in a ngeimi cu mi lunglawm a si! Biaceihnak hmun ah a ral kha a ton hna tikah a sung bal lai lo.

¹ Bawipa a ṭihmi cu mi lunglawm an si, a nawl a ngaimi cu mi lunglawm an si. ² Rian na ṭuan tikah nangmah pawcawmnak khim na hmuh lai i na lung aa lawm lai i khua awng na pem lai. ³ Na nupi cu na inn chungah a thei a ṭhami mitsur ruang bantuk a si lai, na fapale nih oliv thing tuaino bantukin na cabuai kha an kulh lai. ⁴ Bawipa nawl a ngaimi cu hi bantukin thluachuahnak an hmu hrimhrim lai. ⁵ Bawipa nih Zion Tlang in thluachuahnak in pe ko hna seh! Nan nun chung vialte, Jerusalem rumnak cu co ve ko u. ⁶ Nan tufa nan hmuh hna tiangin nung ko u. Israel cungah daihnak um ko seh.

¹ Israel, na no lio tein na ral nih zeitluk in dah an rak in hrem kha, chim tuah! ² I thawh law, "Ka no lio tein ka ral nih fak piin an ka hrem zungzal, sihmanhsehlaw an ka tei lo. ³ Ka keng cu leithuan in an thuan, leikuang rinkuar sau pipi in an tuah bantuk khin an tuah. ⁴ Sihmanhsehlaw a dingmi Bawipa nih saltannak chung cun a ka luatter," tiah chim tuah. ⁵ Zion a huatu vialte hna cu sung hna seh law kir dih hna seh! ⁶ Inn cungah a khomi ram, hleh cut hlan i a carmi bantuk khi si hna seh. ⁷ Cu bantuk ram cu ahohmanh nih pumh awkah an sak hna lo i a tom in i phorh awkah an rel hna lo. ⁸ Cucaah an pawng i a kalmi ahohmanh nih, "Bawipa nih thluachuah in pe hna seh, Bawipa min in thluachuah kan in pek hna," an ti hna lai lo.

¹ Ka awlok a chon caah nangmah cu kan auh, Maw Bawipa ! ² Ka aunak cu ka theihpiak law bawmh kan halnak cu ka ngaihpiak ko! ³ Kan sualnak kha cazin chungah na kan khumhpiak ahcun ahodah sual phawtnak cu a luat khomi a um lai? ⁴ Sihmanhsehlaw nangmah nih kan sualnak cu na kan ngaihthiam, cucaah nangmah cu kan in hmaizah. ⁵ Bawipa bawmhnak cu i hngahhlang ngaiin ka hngak ko, a bia cu kaa bochan. ⁶ Ralvengtu pawl nih khuadei lai an i ngaih nak hmanh khin Bawipa hon lai cu kaa ngaih deuh. ⁷ Bawipa cu a dawtnak kha a fek i mi tlanh kha a duh zungzalmi a si caah, Maw Israel, amah cu i bochan ko. ⁸ A mi Israel mi vialte kha an sualnak chungin a khamh hna lai.

¹ Maw Bawipa, kaa porhlawtnak kha ka hlawt cang, ka ruamkainak kha ka chuahtak cang. Thil lianngan kha biapi ah ka ruat ti hna lo, ka ca i a har tukmi thil kha zei ah ka rel ti hna lo. ² Ka hna a ngam i ka lung a dai ko. Ngakchia cu a nu ṭang ah dai tein a ih bantukin ka lung cu ka chungah dai tein a um ko. ³ Israel, atu in zungzal tiang, Bawipa cu i bochan ko.

¹ Maw Bawipa, David kha philh hlah, a rianṭuanmi vialte zong kha philh hlah. ² Bawipa, bia aa kammi kha philh hlah, Israel Pathian Lianngan Bik, na sinah chiat aa serhmi kha philh hlah. ³ - ⁵ Cu a biakamnak cu hitihin a si: "Bawipa caah hmun pakhat ka ser khawh hlan lo, Israel Pathian Lianngan Bik caah umnak inn pakhat ka tuah khawh hlan lo, inn chung zongah ka lut lai lo i a ih zong ka it lai lo, a dinh zong kaa din lai lo i a hngilh zong kaa hngilh lai lo," a ti. ⁶ Bethlehem khua ah biakamnak kuang kong kha kan theih i Jaar lo lakah khan cu kuang cu kan hmuh. ⁷ "Bawipa inn ah khan kal u sih, a bawiṭhutdan hmaiah khan amah cu bia u sih," kan ti. ⁸ Maw Bawipa, biakamnak kuang he cun naa dinhnak hmun ah khan ra tuah, na ṭhawnnak hmelchunhnak a simi kuang he cun ra law zungzal in um tuah. ⁹ Na mi na khamh hna kha tlangbawi nih thanh hna seh law na mi cu an dihlak in lunglawm in au hna seh. ¹⁰ Na sal David kha bia na rak kamh, na thimmi siangpahrang kha hlaw hlah, maw Bawipa ¹¹ David sinah biakamnak fek pakhat, na let ṭhan lo dingmi kha na rak ser, cu na biakamnak cu hihi a si: "Na fapa pakhat cu siangpahrang ah ka ser lai i na hnuah amah cu uktu bawi a rung si lai. ¹² Na fapale hna nih khan ka biakamnak kha an zulh i nawl ka pekmi hna kha an tuah ahcun, an fapale hna zong cu nangmah hnu zulh in siangpahrang an si zungzal lai." ¹³ Zeicahtiah Bawipa nih Zion cu aa thim cang i khika ah a umnak inn kha ser a duh. ¹⁴ Aa thawh i, "Hika hi zungzal ka umnak a si lai; hika hmun hi ka uknak ka chiahnak hmun ca i ka duhmi a si. ¹⁵ Zion cu a herhbaumi vialte kha tlamtling tein ka pek lai i a misifak hna cu rawl khim tein ka pek hna lai. ¹⁶ Keimah nih ka khamh hna kha a tlangbawi pawl ka thanhter hna lai i a mi pawl kha lunglawm in hla ka sakter hna lai i ka auter hna lai. ¹⁷ Hika hmun ah hin Siangpahrang David tefa pakhat cu siangpahrang ngan pakhat ah ka ser lai, hika hmun ah hin ka thimmi siangpahrang uknak cu ka hmunhter lai. ¹⁸ A ral pawl cu ningzahnak in ka khuh hna lai, asinain anih cu a cer in a cermi suiluchin kha ka chinh lai.

¹ Unau rual i rem tein khuasak ṭi hi zeitluk in dah a ṭhat i a nuamh! ² Aaron luthlung in a khabe ah, a khabe in a angki hngawng ah a vung luangmi oliv chiti bantuk a si. ³ Hermon Tlang dap, Zion tlang cung i a tlami bantuk a si. Zion Tlang ah cun thluachuahnak kan pek hna lai, tiah Bawipa nih bia a kan kam, zungzal nunnak cu.

¹ Bawipa sal vialte hna, ra u law Bawipa cu thangṭhat u sih, zan i a biakinn chung i rian a ṭuanmi vialte hna, amah cu thangṭhat u sih. ² Thlacam in a biakinn chungah nan kut hler u law Bawipa cu thangṭhat u. ³ Van le vawlei a sertu Bawipa nih, Zion in thluachuah in pe ko hna seh.

¹ Bawipa cu thangṭhat u. Bawipa sal hna, a min cu thangṭhat u, ² Bawipa inn chungah a dirmi hna, kan Pathian hmunthiang chungah a ummi hna, a min cu thangṭhat u. ³ Bawipa cu a ṭhat caah thangṭhat u zaangfah thiammi a si caah a min cu hla in thangṭhat u. ⁴ Jakob cu amah minung si awkah amah nih aa thim, Israel mi cu amah mi si awkah amah nih aa thim hna. ⁵ Kan Bawipa cu a liannganmi a si kha ka hngalh, pathian dang vialte hna nakin a ngan deuh. ⁶ Vancung ah siseh, vawlei cungah siseh, rili chungah siseh, rili tangah siseh, a duhmi paoh kha a tuah ko. ⁷ Vanhramdeng in khuadawm kha a ratpi hna, thlichia chungin ṭek kha a chuahter i a thil khonnak inn chungin thli kha a chuahter. ⁸ Izipt ram ah fater paohpaoh kha a thah hna, minung fater he saram fater he a thah hna. ⁹ Faro le a bawi pawl dantatnak ah khuaruahharmi thil le hmelchunhnak kha a ser hna. ¹⁰ Miphun tampi kha a hrawh hna i siangpahrang ṭhawngṭhawng kha a thah hna. ¹¹ Cu hna cu: Amor mi siangpahrang Sihon, Bashan siangpahrang Og le Kanaan siangpahrang dihlak an si. ¹² An ram cu a mi kha a pek hna, Israel mi kha a pek hna. ¹³ Bawipa, nangmah cu Pathian na si kha mi nih an hngalh zungzal ko lai; chan vialte nih a philh in an philh lai lo. ¹⁴ Bawipa nih a mi cu a zaangfah hna lai, a sal cu a luatter hna lai. ¹⁵ Miphun dang nih an biakmi siasal cu sui le ngun in sermi an si; minung nih an kut in an sermi an si. ¹⁶ Kaa cu an ngei, sihmanhsehlaw an holh kho lo, mit cu an ngei, sihmanhsehlaw khua an hmu lo. ¹⁷ Hna an ngei, asinain khua an thei lo, an kaa chungah thaw a um lo. ¹⁸ Cu siasal a sertu hna le cu siasal aa bochanmi hna cu, an sermi siasal bantuk ah cun an i cang lai! ¹⁹ Israel mi hna, Bawipa cu thangṭhat u; Pathian tlangbawi hna, amah cu thangṭhat u. ²⁰ Nannih Levi mi hna, Bawipa cu thangṭhat u. amah a ṭihmi vialte hna, Bawipa cu thangṭhat u. ²¹ Bawipa cu Zion ah thangṭhat u, a inn Jerusalem ah thangṭhat u. Bawipa cu thangṭhat u.

¹ Bawipa cu a ṭhat caah lawm tuah u, a dawtnak cu zungzal in a hmun. ² Lawm tuah u, pathian hna Pathian cu, a dawtnak cu zungzal in a hmun. ³ Bawi vialte Bawipa cu lawm tuah u, a dawtnak cu zungzal in a hmun. ⁴ Amah lawng nih khuaruahhar thil lianngan a tuah khawh, a dawtnak cu zungzal in a hmun. ⁵ A fimnak in van khi a ser hna, a dawtnak cu zungzal in a hmun. ⁶ A thukmi ti cungah vawlei kha a sak, a dawtnak cu zungzal in a hmun. ⁷ Nika le thlapa kha a ser hna, a dawtnak cu zungzal in a hmun. ⁸ Ni cu chun uktu ah a ser, a dawtnak cu zungzal in a hmun. ⁹ Thlapa le arfi cu zan uktu ah a ser hna, a dawtnak cu zungzal in a hmun. ¹⁰ Izipt mi an fapa upa bik kha a thah hna, a dawtnak cu zungzal in a hmun. ¹¹ Israel mi kha Izipt ram chungin a chuahpi hna, a dawtnak cu zungzal in a hmun. ¹² A ṭhawngmi a kut le a ban in a chuahpi hna, a dawtnak cu zungzal in a hmun. ¹³ Rili Sen kha a cheu, a dawtnak cu zungzal in a hmun. ¹⁴ A mi cu rili chung khan a hruai hna, a dawtnak cu zungzal in a hmun. ¹⁵ Faro le a ralkap bu kha rili chungah a paih hna, a dawtnak cu zungzal in a hmun. ¹⁶ Thetse ram chungah khan a mi kha amah nih a hruai hna, a dawtnak cu zungzal in a hmun. ¹⁷ Siangpahrang ṭhawngṭhawng kha a thah hna, a dawtnak cu zungzal in a hmun. ¹⁸ Siangpahrang min thangthang kha a thah hna, a dawtnak cu zungzal in a hmun. ¹⁹ Amor mi siangpahrang Sihon kha a thah, a dawtnak cu zungzal in a hmun. ²⁰ Bashan siangpahrang Og kha a thah, a dawtnak cu zungzal in a hmun. ²¹ An ram cu a mi kha a pek hna, a dawtnak cu zungzal in a hmun. ²² Israel a sal kha an ram cu a pek, a dawtnak cu zungzal in a hmun. ²³ Kan sungh tikah khan a kan philh lo, a dawtnak cu zungzal in a hmun. ²⁴ Kan ral hna kut chungin a kan chuah, a dawtnak cu zungzal in a hmun. ²⁵ Minung le saram kha rawl a pek dih hna, a dawtnak cu zungzal in a hmun. ²⁶ Vancung Pathian hi lawm tuah u, a dawtnak cu zungzal in a hmun.

¹ Babilon tiva hna kamah cun kan ṭhu i Zion kan ruah chel paoh ah kan ṭap tawn. ² Kan pawng i a ummi inhliam kung hna ah cun kan tingtang kha kan bah tawn hna. ³ A kan tlaitu nih khan hlasak an kan fial i, "Kan i nuamh nakhnga, Zion hla kan sakpiak u," an kan ti. ⁴ Zeitindah Bawipa hla cu miphun dang ram ah kan sak khawh lai? ⁵ Jerusalem, nangmah kha kan philh a si ahcun, ka orhlei kut hi car seh, ⁶ nangmah kha kan hngalh camcin lo i kaa lawmhnak sang bik ah kan chiah lo ahcun, ka lei hi ka dang ah i beh seh. ⁷ Jerusalem an tlaih ni ah, Edom mi nih an tuahmi kha philh hlah, Maw Bawipa, "Hrawk dih cikcek u law a hram tiangin kalh dih u," an ti kha philh hin hlah. ⁸ Babilon, hrawh na si cang lai! Kan cung i na tuahmi ruangah, teirul an chamtu cu an i lawm lai, ⁹ nan ngakchia no tete aa lak riangmang i lung cung i a dengtu hna cu, an i lawm lai.

¹ Bawipa, nangmah cu ka lungthin dihlak in kan lawmh; nangmah cu pathian hna hmaiah kan ṭhangṭhat. ² Na biakinn thiang hmaiah ka kun i na min kha ka thangṭhat, zeicahtiah na dawtnak cu a fek i zumhawktlak na si, nangmah le na nawlbia cu a sang bik nan si kha na langhter. ³ Kan auh tikah na ka leh, na ṭhawnnak in na ka ṭhawnter. ⁴ Bawipa, vawlei cung siangpahrang vialte nih, na biakamnak kha an theih caah an in thangṭhat lai. ⁵ Bawipa nih na tuahmi thil kong kha hla in an sak lai i a liannganmi na sunparnak kha hla in an thangṭhat lai. ⁶ Bawipa cu hi tluk hin a sang hringhran ko nain minauta kha an zawn a ruah hna i miruamkai kha a hmuh lonak ah an i thup kho lo. ⁷ Harnak nih a kulh in a ka kulh hmanh ah, him tein na ka umter ko, a thin a linh in a linmi ka ral kha na doh hna i na ṭhawnnak in na ka khamh. ⁸ Na ka kamhmi thil vialte kha tlinter ko hna, Bawipa, na dawtnak cu zungzal in a fek ko; na thawk ciami rian cu liim ko.

¹ Bawipa, na ka kawl dih hirhiar i na ka hngalh dih cikcek! ² Ka tuahmi vialte cu na hngalh dih, lamhlatpi khin ka ruahnak vialte cu na hngalh dih ko hna. ³ Rian ka ṭuan ah siseh, kaa dinh ah siseh, na ka hmuh, ka tuahmi vialte kha na hngalh dih. ⁴ Ka chim hlan in ka chim ding vialte kha na hngalh dih. ⁵ Ka hnulei le ka hmailei in na ka cawngh i ka cungah na kut na zar. ⁶ Na ka hngalhnak hi a thuk tuk hringhran, ka ruahnak nih a phak khawh leng a si. ⁷ Na thlarau sin hin khuazei ah dah ka zam khawh lai? Na hmaika hin khuazei ah dah kaa thuh khawh lai? ⁸ Vancung ah khin hung kai ning tiah, cuka ah cun na rak um ko lai, mithi khua ah khin vung it ning tiah, cuka zongah cun na rak um ṭhiamṭhiam ko lai. ⁹ Nichuahlei ha khin lo diam in hei zuang hnik ning law, asiloah nitlaklei a hlatnak bik hmun zongah khin hei um hnik ning law, ¹⁰ cuka zongah cun a ka hruaitu dingah nangmah na rak um ṭhiamṭhiam ko lai, a ka bawmtu dingah na rak um ṭhiamṭhiam ko lai. ¹¹ Muihnak kha, ka thup tuah, ka hei ti ko hnga, asiloah, ka velchum i ceunak kha, zan ah cang ka hei ti ko hnga, ¹² asinain cucu zeihmanh a ṭhahnem hlei hnga lo, zeicahtiah muihnak cu nang caah cun a mui lo i zan hmanh kha chun tlukin a ceu ko. Nang caah cun muihnak le ceunak cu zeihmanh an i dang lo. ¹³ Ka pum chung thil vialte hi nangmah sermi an si dih; ka nu pawchung i a ka semtertu cu nangmah na si. ¹⁴ Hi bantuk thil thuk le khuaruahharmi thil ruangah hin nangmah cu kan lawmh: keimah kong i khuaruahhar a simi thil le nangmah nih na tuahmi thil khuaruahhar a simi hna kong ah hin kan lawmh. Nangmah nih na ka hngalh dih cikcek ko; ¹⁵ Ka pum hi nang caah cun khuaruahhar awk a si lo, zeitindah a thli tein muisam ka hun ken le ka nu pawchung ah zeitindah ka hung ṭhan ti kha nang na caah cun khuaruahhar a si lo. ¹⁶ Ka chuah hlan in na rak ka hmuh diam cang. Ka ca i na sermi ni hna cu na cauk chungah an rak i khumh diam cang, hram an i thawk hlan hmanh khan an i ṭial diam cang. ¹⁷ Maw Pathian, na ruahnak cu ka caah zeitluk in dah hngalh a har, na ruahnak cu a tam tuk ah a dongh in a dong kho lo. ¹⁸ Rel tim hnik hna ning law thetse nak tam an si ṭung; an dihlak in rel dih dingah cun, nangmah chan can nun a hau hnga! ¹⁹ Maw Pathian, miṭhalo kha cu that ko hna, ti ka duh. Mipuarhrang pawl nih hin ka kaltak hna seh, ti ka duh hringhran ko. ²⁰ Nangmah kong ah thil ṭhalo lawng an chim i na min chiatnak lawng kha an chim lengmang. ²¹ Bawipa nangmah an huatu cu ka huat ve hna, nangmah an dohtu cu zei ah ka rel ve hna lo. ²² Huat taktak in ka huat hna i ka ral ah ka rel hna. ²³ Maw Pathian, ka pur cikcek law ka lungthin hi hngal ko; ka hneksak law ka ruahnak hi hmu ko. ²⁴ Ka chungah hlenthawinak a um sual hnga maw? a um sual ahcun ka hmuhpiak law zungzal hmunmi lam ah khan ka hruai ko.

¹ Maw Bawipa, miṭhalo hna kut chung khan ka khamh ko; mipuarhrang hna sin khan him tein ka umter ko. ² Ṭhat lonak khua lawng kha an khang zungzal ko, siknak lawng kha an chuahter zungzal ko. ³ An lei cu rul lei bantuk a si i an bia cu rawchok sivai bantuk a si. Selah ⁴ Miṭhalo mi hna kut chung khan ka huppheng law, maw Bawipa, ka tluknak ding lawng a tuaktan lengmangmi hna mipuarhrang hna sin khan him tein ka umter ko. ⁵ Miruamkai pawl nih khan rap an ka chiahhnawh, mihrokhrawl pawl nih khan sur rap cu an chiah i lam ah khan keimah foihnak dingah cun an phah. Selah ⁶ Bawipa cu ka thawh i, "Nangmah cu ka Pathian na si," ka ti. Bawipa, nangmah bawmhnak hal in ka aunak cu ka theihpiak ko! ⁷ Maw Bawipa ka Pathian, nangmah cu ka khamhtu ṭhawng na si, raltuknak hmun ah na ka huhphenh. ⁸ Maw Bawipa, miṭhalo cu an duhmi thil kha hmuhter hna hlah; thil ṭhalo an khanmi kha tlinter hlah. Selah ⁹ Ka ral kha teitu siter hna hlah, an ka tlerhnak cu anmah cung lila ah tlakter. ¹⁰ Meiṭil sen nih tlak hna seh law, chuak kho ti loin khor thuk chungah tla hna seh. ¹¹ Lih in midang sual a puhmi cu, mi sual an puhnak hna ah khan thluachuak hna hlah seh; mipuarhrang cu ṭhat lonak nih khan tlak hna seh law hrawk hna seh. ¹² Bawipa, nangmah nih misifak cu na ṭanpi hna i mirethei cu an hmuh awk hnga a simi kha na hmuhter hna, ti kha ka hngalh. ¹³ Miding nih cun an in thangṭhat taktak lai, na hmaika ah khan khua an sa zungzal lai.

¹ Maw Bawipa, nangmah kha kan auh, khulrang in ka bawm tuah! Nangmah kan auhnak ka aw hi ka ngaihpiak ko. ² Ka thlacamnak cu zihmui bangin ka cohlanpiak law ka kut ka hlermi cu zanlei raithawinak sa bangin ka cohlanpiak ko. ³ Bawipa, ka kaa ah hin ralvengtu ka chiahpiak law ka hmur ah hin cawngtu ka chiahpiak ko. ⁴ Thil ṭhalo tuah duhnak ka ngeih sual nakhnga lo le miṭhalo hna thil ṭhalo tuahnak ah kaa tel ve nakhnga lo, ka lungthin hi nangmah nih kham ko; an puai ah cun a tel in i tel hlah ning! ⁵ Miṭha nih cun dawtnak in ka si hna seh law dan ka tat ko hna seh, sihmanhsehlaw miṭhalo nih cun ka lu ah sathau ka thuh hna hlah seh, zeicahtiah cu bantukin ka cungah an tuah ahcun, thil ṭhalo an tuahmi i aa tel vemi ah an ka ser khawh sual ai hnga. ⁶ An uktu bawi hna kha lungpang cungin hlonh an si tikah, mi nih ka bia ahmaan kha an hngalh lai. ⁷ Mi nih an tan an cheu i a pel le a pawi ah a cang dihmi thing bantukin, an ruh cu thlanka kamah khan ṭhek dih si hna seh. ⁸ Sihmanhsehlaw Bawipa Pathian, kei nih cun kan bochan i nangmah chungah dornak kha ka kawl; ka thihter sawh hlah! ⁹ Keimah foihnak dingah an chiahmi rap cun ka huppheng law thil ṭhalo a tuahtu hna chiahmi thang khan ka luatter ko. ¹⁰ Miṭhalo cu anmah rap lila ah khan i foih hna seh, kei bel harnak zeihmanh tong loin kal ko ning.

¹ Bawmhnak hmuhduh ah Bawipa cu ka auh i amah cu ka nawl. ² Ka harnak vialte kha amah ka chimh dih i ka retheihnak vialte kha ka hngalhter. ³ Ka thlarau kha ka chungah a bat tikah, zeidah ka tuah awk a si kha nangmah nih na hngalh. Ka kalnak lam ah khan ka ral nih rap an ka chiahhnawh. ⁴ Ka pawngkam kha ka zoh tikah, a ka bawmtu ding ahohmanh ka hmu hna lo, a ka hupphengtu ding ahohmanh an um lo, ahohmanh ka zawn a ka ruattu an um lo. ⁵ Bawipa, bawmhnak duh ah nangmah cu kan auh, Bawipa nangmah cu a ka hupphengtu na si; ka nun chungah hin ka duhmi le ka herhmi cu nangmah lawnglawng na si ko. ⁶ Hnabei donghnak chungah khan a pil in ka pil cang caah ka bawm ko sawh, tiin kan auhnak cu ka ngaihpiak ko. Keimah nakin a let tampi in a ṭhawng deuhmi, ka ral hna kut chungin ka khamh tuah. ⁷ Na min cu ka thangṭhat khawh nakhnga thong chung hin ka chuah ko sawh. Ka hmuh awk hnga a simi laksawng kha na ka pek tikah a dingmi hna nih cun pangpar ṭhi kha an ka oih lai.

¹ Bawipa, ka thlacamnak cu ka theihpiak law kan nawlnak cu ka ngaihpiak ko. Nang cu na ding i zumhawktlak na si caah Ka thlacamnak cu ka let tuah. ² Keimah na salpa hi na hmaika i biaceihnak ah ka phakter hlah; na hmaiah hin ahohmanh a sual lomi an um lo. ³ Ka ral nih a ka hrem i a ka tei cikcek. A muimi thonginn chungah a ka khumh i hlanpi ah a thi cangmi hna bantuk kha ka si. ⁴ Cucaah ka celh ti lo i ka hnabei a dong. ⁵ A liam ciami ni kha ka hun thei ṭhan hna; nangmah nih na tuahmi thil vialte kha ka hun ruat ṭhan hna i na tuahmi thil vialte kha ka hun hngal ṭhan hna. ⁶ Nangmah leiah thlacam in ka kut cu ka hler hna; vawlei car nih ti a ngaih bantuk khin ka nunnak nih nangmah cu an ngai. ⁷ Bawipa, atu ah ka let ko sawh, ruahchannak zeihmanh ka ngei ti lo! Ka thuh tak hlah, na ka thuh tak ahcun mithi khua i a vung kalmi bantuk ka si ko lai. ⁸ Nangmah cu kan bochan ko; zinglei ah a fekmi na dawtnak kha ka hngalhter ṭhan ko. Ka thlacamnak cu nangmah sinah an kai, ka kalnak ding lam cu ka hmuhsak ko. ⁹ Bawipa, huhphenhnak hmuh duh ah nangmah cu kan fuh; ka ral hna kut chung hin ka chanh ko. ¹⁰ Nangmah cu ka Pathian na si; cucaah na duhnak tuah kha ka cawnpiak ko. Na velngeihnak thawngin himnak lam ah ka hruai tuah. ¹¹ Bia na ka kam bang khan ka khamh tuah, Maw Bawipa ; na ṭhatnak thawngin ka harnak chung khan ka chuahter ko. ¹² Na ka dawt caah ka ral cu that hna law a ka dohtu vialte kha hrawk hna, zeicahtiah keimah cu na sal ka si.

¹ Bawipa, ka lungpi cu thangṭhat si ko seh! Amah nih raltuknak kha a ka cawnpiak i ka kutdong kha raldoh a thiamter hna. ² Amah cu a ka hupphengtu lungpi ka ralhruang a si, a fekmi ralvenbuk le himnak hmun a si, kaa bochanmi phaw a si. Miphun dang kha ka ke tangah amah nih a chiah hna. ³ Maw Bawipa, minung hi zeidah a si i a zawn na ruah? Minung fapa hi zeidah a si i biapi ah na rel? ⁴ Minung cu thaw bantuk men a si ko, a nun chung ni hna cu a liam zaumi thladem bantuk men an si ko. ⁵ Maw Bawipa, van kha run ṭhum hna law kan sinah rung ṭum tuah, tlang kha run tawng hna law meikhu chuah hna seh. ⁶ Nimtlau kha a kenkip ah lekter hna law na ral kha ṭhek dih hna; na thal in kap hna law zam dih hna seh! ⁷ Cunglei khan run ka banh law a thukmi ti chung hin ka chuah tuah; ramdangmi hna ṭhawnnak chung hin ka khamh tuah; ⁸ annih cu biatak a chim bal lomi, biatak ka chim lai tiah chiat i serh hnu hmanh ah lih a chim ṭhiamṭhiammi an si. ⁹ Maw Pathian, nangmah cu hla thar in kan thangṭhat lai, tingtang kha kaa tum lai i kan thangṭhat lai. ¹⁰ Siangpahrang cu teinak kha na pek hna i na sal David cu na khamh. ¹¹ A puarmi ka ral hna kut chung khan ka khamh ko, ramdangmi hna ṭhawnnak chung hin ka khamh tuah, annih cu biatak a chim bal lomi, biatak ka chim lai tiah chiat i serh hnu hmanh i lih a chim ṭhiamṭhiammi an si. ¹² Kan fapale hna cu an tlanval lioah, a ṭhawngmi thingkung bantuk si hna seh law, kan fanule hna cu bawi inn ṭamhnak tung bantuk si hna seh. ¹³ Kan rawl inn hna cu rawl a phunphun in khat hna seh, kan lo lak i a ummi tuu hna nih fa a thongthong in hring hna seh. ¹⁴ Kan caw nih fa tampi hring hna seh law a lotlaumi le a rawkmi pakhat hmanh um hna hlah seh. Kan khuachung lam ah lungfah ṭahnak thawng zeihmanh leng hlah seh. ¹⁵ Hi bantukin a ummi miphun cu aa lawmmi miphun an si; an Pathian ah Bawipa a simi hna cu, lunglawmmi an si.

¹ Ka Pathian le ka siangpahrang, na lianhngannak cu ka thanh lai i nangmah cu a zungzal in kan lawmh lai. ² Nifate in kan thangṭhat lai i a zungzal in kan lawmh lai. ³ Bawipa cu a lian a nganmi a si, fak piin thangṭhat awk a si; a lianhngannak cu kan hngalh khawh leng a si. ⁴ Na tuah sernak cu chan khat hnu chan khat thangṭhat a si lai, thil khuaruahhar na tuahmi cu aupi an si lai. ⁵ Mi nih na sunparnak le lianngannak kha an chim lai, kei nih thil khuaruahhar na tuahmi kha ka ruat hna lai. ⁶ Mi nih thil khuaruahhar na tuahmi kha an chim hna lai, kei nih na lianhngannak kha ka thanh lai. ⁷ Annih nih na ṭhatnak kha an chim lai, na velngeihnak kha hla in an sak lai. ⁸ Bawipa cu dawtnak a ngeimi le mi zaangfah thiammi a si, thinhun a har i a fekmi dawtnak in a khatmi a si. ⁹ Aho cung paoh ah a ṭha i a sermi hna an dihlak cungah zaangfahnak a ngei. ¹⁰ Bawipa, na sermi thil vialte nih an in thangṭhat lai, na sermi hna nih an in lawmh lai! ¹¹ Na pennak a sunpar ning kha an chim lai i na ṭhawnnak kha an thanh lai. ¹² Cucaah mi vialte nih thil khuaruahhar na tuahmi kha an hngalh lai i na pennak a sunpar ning le a lianhngan ning kha an hmuh lai. ¹³ Na pennak cu zungzal in a hmun lai i nangmah cu zungzal in siangpahrang na si lai. Pathian nih cun biakamnak a tuahmi kha zumhawktlak tein a zulh i a tuahmi thil paoh kha an ṭha dih. ¹⁴ Harnak a ingmi kha a bawmh hna i ṭhumhnak a tongmi kha a cawi hna. ¹⁵ Ruahchannak he na sermi thil nung vialte nih an in zoh i an herhmi rawl kha an herh caan te ah a pek hna. ¹⁶ Na kut na samh i an dihlak in an herhmi kha tling tein an hmuh. ¹⁷ Bawipa cu thil a tuahnak paoh ah hin ding tein a tuahmi a si, rian a ṭuannak paoh ah hin zaangfahnak a ngeimi a si. ¹⁸ A autu vialte hna cu an pawng khin an umhnawh hna, lungtak in a autu vialte hna cu. ¹⁹ Amah a ṭihmi paoh cu an herhmi vialte kha a pek hna i an aunak kha a theih i a khamh hna. ²⁰ Amah a dawtu cu an dihlak in a huhphenh hna, sihmanhsehlaw miṭhalo cu a hrawh dih hna lai. ²¹ Bawipa cu ka thangṭhat lai, thilnung vialte nih a min thiang cu zungzal in thangṭhat hna seh!

¹ Bawipa cu thangṭhat u! Maw ka nunnak, Bawipa cu thangṭhat ko! ² Ka nun chung vialte amah cu ka thangṭhat lai; nunnak ka ngeih chung paohpaoh ka Pathian cu hla in ka thangṭhat lai. ³ Bawi kha i bochan hna hlah u, nanmah an khamh kho ṭung hna lomi kha i bochan hna hlah u. ⁴ An thih tikah leidip ah an kir ko; cu ni ah cun an khuakhannak vialte cu an dong fawn ko. ⁵ Jakob Pathian kha bawmtu ah aa serhmi cu mi lunglawm an si, Bawipa a Pathian kha aa hngatchanmi cu mi lunglawm an si; ⁶ amah nih cun van le vawlei le rili le an chung i a ummi thil vialte kha a ser hna. ⁷ A biakam kha a tlolh bal lo; hremmi hna ṭanh in bia kha a ceih i rawl a ṭammi kha rawl a pek hna. Bawipa nih thongtla kha a luatter hna i ⁸ mitcaw kha khua hmuhnak a pek hna. Ṭhumhnak a ingmi kha a cawi hna i a dingmi a mi kha a dawt hna. ⁹ Hi ram chungah a ummi ramdangmi kha a huhphenh hna; nuhmei le ngakṭah kha a bawmh hna, sihmanhsehlaw miṭhalo pawl khuakhannak cu a hrawh. ¹⁰ Bawipa cu zungzal in siangpahrang a si ko lai! Zion, na Pathian cu zungzal in uktu a si lai. Bawipa cu thangṭhat u!

¹ Bawipa cu thangṭhat u! Kan Pathian cu hla in thangṭhat hi a ṭha; amah thangṭhat hi a nuam i ahmaan. ² Bawipa nih Jerusalem cu a remh ṭhan lai, saltang mi kha a kirpi ṭhan hna lai. ³ Lungkuai mi kha a damter hna i an hma kha a menpiak hna. ⁴ Arfi kha a rel dih hna i an dihlak in min a bunh hna. ⁵ Kan Bawipa cu a lian a ngan i ṭhawnnak in a tling, thil a hngalhning hi tah khawh a si lo. ⁶ Mi toi i aa dormi cu a cawi hna, sihmanhsehlaw miṭhalo cu vawlei ah a rial hna. ⁷ Bawipa cu hla in thangṭhat tuah u, kan Pathian cu tingtang aw dawh in thangṭhat u. ⁸ Van ah khin minmei a zamter; vawlei kha ruah in a cawm i tlang cungah ram a khohter hna. ⁹ Saram kha rawl a pek hna i lang-ak no nih an awnh tikah rawl a pek hna. ¹⁰ Bawipa nih rangtum ṭhawngṭhawng hi biapi ah a ruahmi an si lo, ralkap ralṭhami hi a lawmhmi an si fawn lo; ¹¹ asinain a lung a tongmi cu amah a ṭihmi le a fekmi a dawtnak aa bochanmi kha an si. ¹² Jerusalem, Bawipa cu thangṭhat tuah! Zion, na Pathian cu thangṭhat tuah! ¹³ Amah nih na kutka kha a fehter hna, na mi kha thluachuahnak a pek hna. ¹⁴ Na ramri kha him tein a umter hna i changvut ṭha bikbik in na paw an khimter. ¹⁵ Vawlei ah a nawlbia kha a thlah i khulrang in a ra phan. ¹⁶ Sahmul tluk chah in hawhra kha a tlakter i leidip bangin dappar kha a ṭhek. ¹⁷ Rial cu lung tekem bangin a tlakter; kihnak a run thlahmi cu ahohmanh nih an celh lo. ¹⁸ Cun nawlbia kha a vun chuah i hawhra cu a ti; thli kha a hranter i ti cu a luang. ¹⁹ Jakob cu a bia kha a chimh, Israel cu a nawlbia le a phunglam kha a pek. ²⁰ Miphun dang hna caah cun mah hihi a tuah hna lo, a phunglam kha an hngal hna lo. Bawipa cu thangṭhat u!

¹ Bawipa cu thangṭhat u! Cung sangpi i a ummi hna, Bawipa cu vancung khin run thangṭhat u! ² A vancungmi vialte hna, amah cu thangṭhat u, a vancung ralkap vialte hna, amah cu thangṭhat tuah u! ³ Ni le thla hna, amah cu thangṭhat u! A ceumi arfi hna, amah cu thangṭhat u! ⁴ Van sang bik hna, amah cu thangṭhat u, vancung i a ummi ti hna, amah cu thangṭhat u! ⁵ An dihlak in Bawipa min cu thangṭhat hna seh! Bia a chim i annih cu ser an si; ⁶ amah nawl pekmi thawngin annih cu an umnak hmun cio ah khan zungzal in an um i a nawl ngai loin an um lo. ⁷ Rili chung thil ṭihnung hna le rilipi thuk hna, Bawipa cu vawlei ah hin thangṭhat u! ⁸ Nimtlau le rial, hawhra le khuadawm, a nawl a ngaimi thlichia, nannih nih Bawipa cu thangṭhat ko u! ⁹ Fing le tlang hna, thingthei kung le tupi hna, amah cu thangṭhat u! ¹⁰ Saram vialte hna, inn zuat saṭil le ramlak saram hna, a paw in a lawnmi le vate vialte hna, nan dihlak in amah cu thangṭhat u. ¹¹ Siangpahrang vialte le mi vialte hna, uktu le bawi vialte hna, amah cu thangṭhat u! ¹² Tlangval le ngaknu hna, tar le no le ngakchia vialte hna, amah cu thangṭhat u! ¹³ An dihlak in Bawipa min cu thangṭhat hna seh! A min cu min dang vialte nakin a ngan deuh; a sunparnak nih van le vawlei a lonh hna. ¹⁴ A miphun kha miphun ṭhawng ah a ser hna, cucaah a mi vialte nih an thangṭhat, a dawt ngaingaimi Israel mi nih khan an thangṭhat. Bawipa cu thangṭhat u!

¹ Bawipa cu thangṭhat u! Bawipa cu hla thar in thangṭhat u; a mithiang an i pumhnak ah amah cu thangṭhat u. ² Israel, nangmah an sertu ruangah cun i lawm tuah, Zion mi hna, nan siangpahrang ruangah cun i lawm tuah u! ³ Nan lamnak ah khan a min cu thangṭhat u, amah cu khuang le tingtang in thangṭhat u. ⁴ Bawipa nih a mi cu a zaangfah hna i santlai lomi kha teinak a pek hna. ⁵ An teinak ah cun Pathian mi cu i lawm hna seh law rawl danghnak an tuahmi ah cun lunglawm in hla sa hna seh. ⁶ Vainam a harmi i put in Pathian an thangṭhatnak ah cun a au in au hna seh. ⁷ Cu vainam cun miphun dang kha tei hna seh law lawkihmi kha dantat hna seh; ⁸ an siangpahrang hna kha khit hna seh law thir cikcin in hreng hna seh; ⁹ Pathian nawlbia bangin miphun dang cu dantat hna seh. Pathian mi nih an hmuhmi teinak cu hihi a si. Bawipa cu thangṭhat u!

¹ Bawipa cu thangṭhat u! Pathian cu a biakinn chungah khan thangṭhat u; a ṭhawnnak cu vancung ah khin thangṭhat u! ² Thil lianngan a tuahmi ruangah amah cu thangṭhat u! A sang bik a lianhngannak cu thangṭhat u! ³ Muko in thangṭhat u! Tingtang le thonglawi in thangṭhat u! ⁴ Khuang le lam in thangṭhat u, tingtang le thonglawi in thangṭhat u! ⁵ Sumsel in thangṭhat u! A aw a thangmi sumsel in thangṭhat u! ⁶ Thilnung vialte hna, Bawipa cu thangṭhat u! Bawipa cu thangṭhat u!