FILIPI

FILIPI

¹ Khrih Jesuh sal Paul le Timote nih, Filipi khua i a ummi Pathian mi nan dihlak, Khrih Jesuh a zummi hna cu, nan pastor hna le Khrihfa upa hna he, ca kan in kuat hna. ² Pathian kan Pa le Bawipa Jesuh Khrih nih vel le daihnak in pe ko hna seh. ³ Nan kong ka ruah fate, nan dihlak ruangah ka Pathian cu ka lawmh zungzal; ⁴ cun nan ca i thla ka cam fate lunglawmhnak in ka cam, ⁵ zeicahtiah a hramthawk tein nihin ni tiang, hi Thawngṭha rian ka ṭuannak ah hin nan ka bawmh zungzal. ⁶ Cucaah cun, nan chungah hi rian ṭha a thawktu Pathian nih, Khrih Jesuh Ni ah hi rian cu a lim tiangin, a ṭuan zungzal lai. ⁷ Ka hnakkar ah nan i tenh zungzal ko. Hi bantukin nan cungah lungthin ka ngeih hi ka ngeih hrim awk a si ko, zeicahtiah nan ka dawt tuk hringhran i thong i ka tlak ah siseh, leng i ka luat ah siseh, Thawngṭha kha ahmaan i biatak a si tiin ka chimnak rian ah khan nan ka bawmh zungzal. ⁸ Khrih Jesuh lungthin chungin a chuakmi ngaihnak in kan ngai hna, hi ti ka ti tikah hin ka lih a si lo ti cu Pathian nih a hngalh. ⁹ Nan ca i thla ka cam tawnmi cu, nan dawtnak ngeihmi cu hngalhnak ahmaanmi le a chia a ṭha thleidan khawhnak fimnak he ṭhang seh law, ¹⁰ cuticun a ṭha bik i thim awk kha nan hngalh lai, ti hi a si. Cun thurhhnawmhnak vialte le mawhchiatnak in Khrih Ni ah cun nan luat lai. ¹¹ Jesuh Khrih lawng nih a kan pek khawhmi ziaza ṭha taktak in nan nunnak cu a khat lai i cucu Pathian sunparnak le thangṭhatnak caah a si lai. ¹² Ka u le ka nau hna, ka cung i thil a tlungmi kha Thawngṭha karhtertu a si lehlam ti kha hngalhter kan duh hna. ¹³ Kha ti ka cung i thil a tlungmi ruangah khan siangpahrang inn a cawngtu vialte hna le a dang vialte hna zong nih Khrih sal ka si ruang i thong tlaknak ka in hi an hngalh. ¹⁴ Cun thong ka tlaknak nih hin kan unau pawl a tam deuh kha Bawipa an zumhnak ah lungfehnak a pek hna i cucaah an ral a ṭha chinchin i ṭih lo tein Thawngṭha bia kha an chim. ¹⁵ A cheu cu nahchuahnak an ngeih ca le mi he i al duhnak lungthin an ngeih ruangah Thawngṭha bia a chimmi an si taktak, sihmanhsehlaw a cheu cu lungthin ṭha te he a chimmi an si. ¹⁶ Pathian nih Thawngṭha ṭanh awk rian cu a ka thiah kha an hngalh caah, cu bantuk lungthin thiangte he a chimmi hna nih cun, keimah an ka dawtnak lungthin chung khan an chimmi bia cu an chim. ¹⁷ Sihmanhsehlaw a dang hna nih khan cun, keimah entai ruangah lungthin thianglo in Khrih kong kha an chim i thong i a um chungah hin harnak nih chuahhnawh chin lengmang seh ti duhnak in an chim. ¹⁸ Zeihmanh a poi lo! Khrih kong chim a si paoh ahcun kaa lawm ko — tinhmi ṭha in a si zongah, tinhmi chia in a si zongah — kaa lawm lengmang ko lai. ¹⁹ Zeicah ti ahcun, nan thlacamnak thawng le Jesuh Khrih sinin a rami thlarau bawmhnak thawngin luatter ka si lai, ti kha ka hngalh. ²⁰ Ka duhnak ngan bik le si kho seh ti ka duh bikmi cu, ka rian hi a tlam tlinh kho ning ti hi a si i a zungzal in, cun atu thengte chinchin ah hin, ka nun zongah ka thih zongah, ralṭhatnak in khah i ka pum hrimhrim in Khrih cu upatnak pek kha a si. ²¹ Nunnak hi ka caah zeidah a si? Kei ka caah cun nunnak cu Khrih a si ko. Cucaah thihnak nih hin a ṭha deuh chinchinmi thil hmanh a chuahpi lai. ²² Asinain ka nun ko rih i cu ka nun ruang i thil ṭha tam deuh ka tuah khawh ding a si ahcun, a zei cu dik kaa thim deuh hnga, ka hngal lo. ²³ Thil pahnih karlak ah kaa tenh: hi nunnak hi kaltak i Khrih he um cu ka duh hringhran, cucu a ṭha deuh suaumaumi a si; ²⁴ asinain ka nun rih cu nanmah ruangah a herh deuh rih fawn. ²⁵ Cucu nan caah a ṭha deuh ti kha fiang tein ka hngalh caah nung ko rih ning. Zumhnak i nan ṭhannak le nan i lawmhnak kha chap awkah nan sinah ka nung ko rih lai. ²⁶ Cucaah nan sin i ka um ṭhan tikah, keimah ruang i Khrih Jesuh chung i nan i lawmhnak kha a karh chinchin lai. ²⁷ A biapimi cu hi tu hi a si: Khrih Thawngṭha nih si hna seh ti an duhmi hna kha nan nuncan a si awk a si. Cucaah kan hmuh khawh hna ah siseh, kan hmuh khawh hna lo ah siseh, tinhmi pakhat he fek tein nan dir i Thawngṭha zumhnak ah hmunkhat i ral a do ṭimi nan si kha theih ka duhmi cu a si. ²⁸ Nan ral kha ṭih hna hlah u; ralṭha ngaiin um zungzal u law cu nih cun annih an sungh i nannih teitu nan si lai kha a langhter lai — teinak petu cu Pathian a si. ²⁹ Khrih ca rianṭuan thiah nan si tikah, a zumh lei lawng hi si loin a ca i temhinnak hmuh ding zong hi a si chih. ³⁰ Cucaah i dohnak chungah hin ka sinah nan i tel ve kho lai; hi i dohnak cu, hlan i ka rak dohmi nan rak hmuh cangmi le atu zong i ka doh lengmangmi nan rak theihmi ṭhiamṭhiam hi a si ko.

¹ Khrih chung i nan nunnak nih khan an ṭhawnter hna maw? A dawtnak nih khan nan hna an ngamter hna maw? Thlarau he hawikomhnak nan ngei maw? Pakhat le pakhat nan i daw in nan i zaangfah maw? ² Kan fial duhmi hna cu hihi a si: lungthin ah i khat u, pakhat le pakhat i daw u, lungrual tein um u law kaa lawmhnak hi tlinter u. ³ Pakhat le pakhat i entainak le mah pumpak thangṭhat kawlnak kha nan lakah umter hlah u. Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u. ⁴ Cun midang duhning kha hmuh thiam i zuam u law nanmah duhnak lawng kha ruat hlah u. ⁵ Nan lungput cu Khrih nih a rak ngeihmi lungput kha si seh; cucu hihi a si: ⁶ Pathian sinak kha a ngeih zungzalmi a si ko nain hramhram in Pathian tluk si awk kha cuh awkah a rel lo. ⁷ Amah lungtho te tu in cu vial cu a hlawt dih i sal sinak tu kha aa lak; Minung bantuk ah a cang i minung mui in a lang; ⁸ Mi toiah aa dor i nawlngaihnak lam kha thih tiangin a zulh— vailam cung thihnak kha. ⁹ Hi ruangah hin cunglei a sannak bik hmun ah khin Pathian nih a cawi i min vialte lak i min cungnung bik kha a pek; ¹⁰ Cucaah Jesuh min upatnak caah cun vancung i a ummi vialte nih si hna seh, vawlei i a ummi vialte nih si hna seh, vawlei tang i a ummi vialte nih si hna seh, an khuk an i bil lai i ¹¹ Pathian kan Pa sunparnak caah cun lei vialte nih Jesuh cu Bawipa a si, an ti lai. ¹² Cucaah ka dawtmi ka hawile hna, nan sin ka um i ka bia nan ngaih zungzal bantuk khan lamhlat i ka um zongah hin ka nawl ngai chinchin ko u ti kan duh hna. Nan khamhnak a tlin khawh nakhnga, ther le phang lengmang in ṭuan ko u. ¹³ Pathian tinhmi kha nan zulh khawh nakhnga le cu tuah duhnak lungthin nan ngeih nakhnga, Pathian cu nan chungah rian a ṭuan zungzal ko. ¹⁴ Zei rian nan ṭuan hmanh ah, phunzai lengmang lo le bia i al lengmang loin ṭuan u. ¹⁵ Hrokhrawlnak le ṭhat lonak in a khatmi chan ah hin sualnak ngei lo le a thiangmi si u law Pathian fale bantukin nung u. Nunnak bia nan pek hnanak ah hin ¹⁶ an lakah arfi bangin ceu u. Cu ti nan si ahcun Khrih Ni ah nanmah ruangah ka hmai a hngal ngaingai lai i ka ṭuanmi vialte le kaa zuammi vialte kha pakpalawng an si lo ti kha a lang lai. ¹⁷ Ka nunnak thisen hi nan zumhnak nih Pathian a pekmi raithawinak sa cungah toih a si hmanh ah cucu ka lawmhmi a si ko lai i cu kaa lawmhnak cu nan dihlak in kan hrawm hna. ¹⁸ Cu bantuk ṭhiamṭhiam in nannih zong nan i lawmh awk a si i nan i lawmhnak cu nan ka hrawm ve awk a si. ¹⁹ Nan thawngpang nih lungṭhatnak a ka pek lai ti ruahchannak ka ngeih caah Timote kha nan sinah tuan i ratter kha a si kho lai tiah Bawi Jesuh cu ka zumh ko. ²⁰ Amah lawnglawng hi keimah lungthin bantuk a ngei i nan zawn an ruat taktak mi hna cu a si. ²¹ Midang cu anmah rian lawng kha an ruat cio i Jesuh Khrih kong kha an ruat lo. ²² Cu bantuk mi a si taktak ti cu nanmah hrimhrim nih nan hngalh ko i zeitindah keimah le amah cu pa le fa bantukin Thawngṭha rian kan ṭuan ti kha nan hmuh. ²³ Zeitindah ka konglam ah thil umtuning a si lai ti kha a fian cangka, nan sinah ka rak thlah lai i ²⁴ keimah hrimhrim zong tuan ah nan sinah ka ra kho lai tiah Bawipa kha ka bochan. ²⁵ Cun kan nau Epafroditas hi nan sin i rak thlah a herh tiah ka ruah, amah cu ka ṭuannak i a ṭuan vemi, ral ka dohnak i a do vemi a si i keimah bawmh awkah nan hun thlahmi a si. ²⁶ Amah nih an ngai ngaingai hna i a zaw ti nan rak theih caah khan a lung a ṭha lo. ²⁷ A zaw taktak i a thih zong a thi dengmang, sihmanhsehlaw Pathian nih a zaangfah, amah lawng kha a zaangfah si loin keimah hrimhrim zong kha a ka zaangfah i ka cung i ngaihchiatnak ngan chinchin a tlung dingmi khan a ka luatter. ²⁸ Cucaah nan sin i hun kuat cu ka duh chinchin i nan hmuh tikah nan i lawm lai i ka ngaihchiatnak kha a lo lai. ²⁹ Cucaah Bawipa chung i unau pakhat bantukin lunglawmhnak in rak cohlang u. Amah bantuk mi kha hmaizah hna u; ³⁰ nanmah nih nan ka pek khawh lomi bawmhnak kha keimah cu hung pek awkah Khrih rian caah cun thih le thih ti in a ṭuan i a nunnak zong a sung dengmang.

¹ A donghnak ah, ka u le ka nau hna, Bawipa ah cun i lawm ko u. Hmasa i ka rak ṭial cangmi nolh ṭhan kha ka zeeng lo i nanmah an humhaktu hna a si. ² Thil ṭhalo a tuahmi hna kha i ralring hna u, nan cuarpar nan i tan awk a si a ti pengmi uico hna kha i ralring hna u. ³ Cuarpartan taktakmi cu anmah kha si loin, kanmah hi pei kan si cu; Pathian Thlarau thawngin Pathian a bia i Khrih Jesuh he aa pehtlaimi nunnak ah aa lawm i lenglei phunglam aa bochan lomi hi pei kan si cu. ⁴ A ngaingai ti ahcun cu bantuk thil hna aa bochan khomi ka si ve ko. Lenglei phunglam kaa bochan khawh a timi an um ahcun, cu bantuk ti khawhnak cu tam deuh chinchin ka ngei: ⁵ zarh khat ka si ah cuarpartan ka si, chuahkehnak lei in Israel mi, Benjamin phun, Hebru mithiang ka si; Judah mi Nawlbia zulhnak leiah Farasi ka si i ⁶ ka ṭan tuk leiah khrihfabu kha ka hrem. Nawlbia chung thil zulh in din ti ahcun soi awk um lo ka si. ⁷ Sihmanhsehlaw cu thil vialte, ka ca i miaknak ah rel khawhmi hna cu, Khrih ruangah sungh ah ka rel dih hna. ⁸ Cu lawng cu an si lo, a dang vialte zong kha sungh cikcek ah ka rel hna, cu thil hna nakin a sung deuh tukmi ka Bawipa Khrih Jesuh hngalhnak ruangah cun sungh cikcek ah ka rel hna. Khrih cu ka co khawh nakhnga le amah he cun kan i pehtlaih khawh nakhnga, Amah ruangah cun zeizong vialte hi ka hlonh dih hna, an dihlak in hnawmtam ah ka rel hna. ⁹ Keimah dinnak timi, Nawlbia zulhnak thawngin hmuhmi phun kha, ka ngei ti lo, atu cu Khrih zumhnak thawngin pekmi dinnak, Pathian sinin a ra i zumhnak chungah aa bunhmi dinnak lawng kha ka ngei cang. ¹⁰ Ka duhmi cu amah Khrih hngalh le a thawhṭhan ṭhawnnak hmuh ve le temhinnak a inmi in ve le amah thih bantukin thih ve lawng hi a si cang, ¹¹ cun kaa ruahchanmi cu thihnak in nunnak ah thawhter ka si lai. ¹² Hi thil ah hin ka tlam a tling cang ti a si lo i ka tling cang ti zong a si fawn lo. Sihmanhsehlaw a ka ngeitu cu Khrih kha a si cang caah cu thil cu ka ta a si khawh nakhnga kaa zuam lengmang. ¹³ Ka u le ka nau hna, cu thil cu ka phan cang tiah ka ruat hrimhrim lo; sihmanhsehlaw thil pakhat ka tuahmi cu, hnulei thil kha philh i hmailei thil banh i zuam kha a si. ¹⁴ Cucaah kawltung leiah cun laksawng hmuh awkah khan ka tli i cu laksawng cu Pathian nih Khrih Jesuh thawngin cunglei nunnak i a kan kawh hi a si. ¹⁵ Kannih thlarau lei in nutling patling a si cangmi hna nih cun, hitihin kan lungputning cu a si awk a si. Asinain ruahning phun dang a ngeimi nan um ahcun, Pathian nih cucu an fianterpiak ko hna lai. ¹⁶ A zei a si hmanh ah, atu tiang kan zulhmi phung ningin hmailei ah kal ko u sih. ¹⁷ Ka u le ka nau hna, ka nawl cawn hi i zuam ko u. Zohchun awk ṭha nan caah kan in chiahpiakmi hna; a zulmi kha i zohchunh hna u. ¹⁸ Hihi hlanah voi tampi kan chimh cang hna i atu ah mitthli he ka nolh rih, mi tampi cu an nuncan nih Khrih vailamtahnak ral ah a canter hna. ¹⁹ Annih cu hell ah an tla ko lai, zeicahtiah an Pathian cu an pumsa duhnak kha an si ko i ningzah awk a simi thil kha an i porhlaw i hi vawlei cung thil lawnglawng kha an ruat. ²⁰ Sihmanhsehlaw kannih cu vancung ram mi kan si i kan Khamhtu Bawipa Jesuh Khrih vancung in a rat lai kha ngangngan ngaiin kan hngak ko. ²¹ A der i a thi khomi kan pum cu a sunglawimi amah pum bantuk ah khan a kan thlen lai i cu tuahnak ah cun zeizong vialte amah uknak tang i a chiah hnanak ṭhawnnak kha a hman lai.

¹ Cucaah cun ka dawt i ka ngaihmi ka unaule hna, Bawipa chung i nan nunnak ah khan, cu bantuk cun fek tein dir ko u, nannih cu kaa lawmhnak le ka suiluchin nan si, ka dawtle hna. ² Euodia le Sintikhe, zaangfahnak in kan nawl hna, Bawipa chungah unau bantuk tein lungkhat in um i zuam u. ³ Cun ka ṭuanhawi, nangmah zong, kha nu hna kha rak bawm hna ti kan duh. Zeicahtiah Klement le ka ṭuanhawi dang vialte, nunnak cauk chungah an min aa ṭialmi vialte he, Thawngṭha karhter kha fak piin an ka bawmh. ⁴ Bawipa chung i nan nunnak ah khan i lawm zungzal ko u ti kan duh hna. I lawm ko u, tiah ka nolh ṭhan rih ko lai. ⁵ Mi vialte sinah nemnak tein va um u. Bawipa cu tuan ah a ra lai. ⁶ Zeithil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u. ⁷ Cun Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai. ⁸ A donghnak ah ka u le ka nau hna, nan lungthin kha a ṭha le thangṭhat awk a tlakmi thil in khahter hna u: a taktak a simi thil, a sunglawimi thil, a hmaanmi thil, aa dawhmi thil le upat awk a tlakmi thil in khahter hna u. ⁹ Keimah sinin nan hngalhmi le nan hmuhmi kha tuah i zuam hna u, ka chimmi nan theihmi si hna seh, ka tuahmi nan hmuhmi si hna seh, tuah i zuam hna u. Daihnak a kan petu Pathian nih cun an umpi hna lai. ¹⁰ Ka zawn nan ka ruahnak kha nan hun parter ṭhan caah Bawipa chungah hin kaa lawm hringhran. Ka zawnruah kha nan rak ngol ka ti duhnak a si lo, langhternak caan nan rak ngeih lo ca lawnglawng ah khan a rak si. ¹¹ Cun cu pinah, an ka hramkau lo, ti ruahnak ka ngeih caah hihi ka chimmi a si fawn lo, zeicahtiah ka ngeihmi paoh ah lungsi tein um ding kha ka thiam cang. ¹² Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang. ¹³ Ṭhawnnak a ka petu Khrih thawngin thil zeipaoh ka tuah khawh ko hna. ¹⁴ Asinain harnak ka tonmi ah nan ka bawmh caah kaa lawm ngaingai. ¹⁵ Nannih Filipi khuami nih nan hngalh ko kha ta, Thawngṭha ka rak chim ka hrawng i Masidonia ram in ka kal ah khan a rak si; nanmah lawnglawng kha bawmhnak a ka petu khrihfabu nan rak si; nanmah lawnglawng kha ka sunghnak siseh, ka miaknak siseh a ka hrawmpitu nan si. ¹⁶ Thesalonika khua i bawmhnak ka herh ah khan voi khatnak tam bawmhnak nan ka kuat. ¹⁷ Nan laksawng hmuh ka duh lawng cu a si lo, nan cazin zongah miaknak i ṭial chap ve seh ti ka duh. ¹⁸ Cucaah hi ca kan kuatmi hna hi, bawmhnak nan ka kuatmi vialte ka hmuh dih hna tinak ca a si — kaa zat leng tiangin nan ka kuat. Epafroditas nih nan laksawng cu a rak ka phorh i ka herhmi vialte cu ka ngei dih ko cang. Hi nan laksawng hi Pathian nih a duh i a cohlanmi raithawinak, rimhmui pekchanhmi bantuk an si. ¹⁹ Cun Khrih Jesuh chungah zeizong vialte tlamtling tein a ngeimi ka Pathian nih nan herhmi vialte cu an pek hna lai. ²⁰ Kan Pa Pathian cu zungzal in thangṭhat si ko seh! Amen. ²¹ Khrih Jesuh ta a simi Pathian mi kha an dihlak in an kut rak ka tlaihpiak hna u. Ka sin i a ummi u le nau hna nih nan kut an in tlaih hna. ²² Siangpahrang inn cawngtu pawl le hika i a ummi Pathian mi vialte hna zong nih nan kut an in tlaih hna. ²³ Bawipa Jesuh Khrih vel cu nan dihlak cungah um ko seh.