NEHEMIAH

NEHEMIAH

¹ Hakaliah fapa Nehemiah bia. Kum kulnak kum, Khislev thla i Susa khuapi chungah ka um lioah, ² ka unau Hanani cu Judah ram chung mi cheukhat he an ra; cun a nung rihmi Judah mi salchuak hna kong le Jerusalem khua kong kha ka hal hna. ³ Cun annih nih an ka thawh i, "Saltannak chungin a luatmi khika ram i a nung rihmi hna cu harnak nganpi chung le ningzahnak chungah an um ko; Jerusalem kulhnak vampang hna cu an cim dih i a kutka hna cu mei nih a hrawh dih hna," an ti. ⁴ Hi bia cu ka theih tikah ka ṭhu i ka ṭap i saupi ngaihchia in ka um i vancung Pathian hmaiah khan rawl ul lengmang le thlacam lengmang in ka um. ⁵ Cun kaa thawh i, "Maw Bawipa, vancung Pathian, nangmah an dawtu le na nawlbia a ulmi hna cung i biakamnak le a fekmi na dawtnak a hmunhtertu a lian a ngan i ṭih a nungmi Pathian, ⁶ Israel mi hna nih nangmah cungah kan sual cang i cu sualnak cu phuang in na sal Israel mi hna caah chun zan in nangmah hmaiah thla ka cammi hi theih awkah na hna in ka ngaihpiak law, na mit in ka hmuhpiak ko sawh. Asi, keimah le ka pa innchungkhar hna cu kan sual cang. ⁷ Nangmah cungah ṭhat lonak kan tuah i na sal Moses sinah na pekmi na nawlbia le phungbia le phunglam hna kha kan zul hna lo. ⁸ Na sal Moses sinah nawl na pek i, ’Zumhawktlak loin nan um ahcun miphun hna lakah kan ṭhek hna lai; ⁹ sihmanhsehlaw ka sinah nan kir i ka nawlbia kha nan zulh hna i nan tuah hna ahcun, nan mi aa ṭhekmi hna cu a hlatnak bik vanhramdeng khi phan hna hmanh seh law, khika khan ka pumh hna lai i ka min chiahnak ah ka thim cangmi hmun ah cun ka pumh hna lai,’ ti in na timi kha philh hin hlah. ¹⁰ Annih cu nangmah nih na ṭhawnnak a nganmi le a ṭhawngmi na kut in na tlanhmi hna na sal le na mi an si. ¹¹ Maw Bawipa na sal ka thlacamnak hi ka ngaihpiak ko sawh; cun na sal hi nihin ah ka hlawh ka tlinter ko law hi mipa hmaiah hin zaangfahnak ka pe ko," tiah ka ti. Cu lioah cun kei cu siangpahrang hrai putu ka rak si.

¹ Nisan thla, Artazaksis Siangpahrang a bawi kum kulnak ah, a hmaika i mitsur hang a um tikah, mitsur hang cu ka lak i siangpahrang kha ka pek. Hi hlan ah cun a hmaiah khan ka ngaih a chia bal lo. ² Cun siangpahrang nih khan a ka thawh i, "Zeicahdah na hmai a chiat? Na zawt fawn ṭung lo? Zeidang si loin, na lung chungin na ngaih a chia i a si ko hih," tiah a ti. Cun kei cu ka thin a phang ngaingai. ³ Cun siangpahrang cu ka thawh i, "Siangpahrang cu zungzal in nung ko seh! Ka pupa hna thlan umnak khuapi cu a rawh ko i a kutka hna cu mei nih a kangh dih hna tikah hin, zeicahdah hmaichia loin ka um hnga," tiah ka ti. ⁴ Cun siangpahrang nih cun a ka thawh i, "Zeidah na ka hal duhmi a si?" tiah a ti. Cucaah vancung Pathian sinah khan thla ka cam. ⁵ Cun siangpahrang cu ka thawh i, "Siangpahrang duhnak a si i na hmaiah na sal nih hin mithmai ṭha ka hmuh a si ahcun, ka va remh nakhnga, Judah ram ka pupa hna thlan umnak khuapi ah cun ka kalter tuah," tiah ka ti. ⁶ Cun siangpahrang nih cun a ka thawh i (siangpahrang bawinu cu a pawngah khan a ṭhu), "Zei can dah na rauh hnga, cun zei tikah dah na ra kir ṭhan hnga?" tiah a ti. Cuticun siangpahrang nih keimah kalter kha a duhmi a si i kei nih caan cu ka tuk. ⁷ Cun siangpahrang sinah cun, "Siangpahrang duhnak a si ahcun, Tiva Ral ram a uktu hna cu va pek awkah, Judah ram ka phak tiangin an ka lanhter lengmang nakhnga, ca ka pe; ⁸ cun biakinn kulhnak kutka ca kaan le khua kulhnak vampang caah le keimah umnak ding inn caah thing a ka pek nakhnga, siangpahrang tupi uktu Asaf cu va pek awkah ca pakhat in ka pe fawn," tiah ka ti. Cun ka Pathian velngeihnak cu ka sinah a um caah ka halmi cu siangpahrang nih a ka pek. ⁹ Cun Tiva Ral ram a uktu bawi hna sinah cun ka va phan i siangpahrang ca cu ka pek hna. Siangpahrang nih keimah sinah cun ralkapbu ralbawi hna le rangcung ralkap hna kha a kalter hna. ¹⁰ Sihmanhsehlaw Horon mi Sanballat le a sinum Tobiah, Ammon mi kha, Israel fale hna kha an nunnuamhnak kawlpiak awkah mi a ra, ti an theih tikah lungnuam lo ngaiin an um. ¹¹ Cuticun Jerusalem khua cu ka phan i khika ah ni thum ka um. ¹² Cun zan ah keimah sin i a ummi mi tlawmpal he khan ka tho; sihmanhsehlaw Jerusalem khua ca i tuah awkah Pathian nih ka lung chungah a chuahtermi tu cu ahohmanh ka chim hna lo. Kaa citmi saṭil dah ti lo cu ka sinah saṭil zeihmanh an um lo. ¹³ Zan ah kaa chawk i Nelrawn Kutka in Cenghngia Tikhor tiang, cun Hnawmpon Kutka tiang ka kal i Jerusalem kulhnak vampang a cimmi hna le mei nih a hrawhmi a kutka hna cu ka zoh hna. ¹⁴ Cun Cerhti Kutka le Siangpahrang Tili tiang kha ka va kal, sihmanhsehlaw kaa citmi saṭil caah khan lanh khawhnak lam a um lo. ¹⁵ Cun zan ah cun nelrawn kam cun ka hung kal i kulhnak vampang kha ka zoh; cun hnulei ah kaa mer i Nelrawn Kutka khan ka lut i ka kir. ¹⁶ Cun bawi pawl nih khan khuazei i ka kal siseh, zei ka tuah siseh, an hngal lo; cun rian a ṭuan hnga ding Judah mi le tlangbawi hna le tuavon hna le bawi hna le midang hna kha ka chim rih fawn hna lo. ¹⁷ Annih cu ka thawh hna i, "Zei bantuk harnak chungah dah kan um i zeitindah Jerusalem cu a rawk ningin a um ko i a kutka hna cu an kangh dih ti kha nan hngalh. Kannih nih ningzah hmaichiat kan in ti nakhnga lo, ra u law, Jerusalem kulhnak vampang cu remh hna u sih," tiah ka ti. ¹⁸ Cun ka Pathian kut ka cung i ṭhatnak caah a ummi le siangpahrang nih ka sinah a chimmi bia hna kha annih cu ka chimh hna. Cun annih nih an i thawh i, "Tho u si law sa u sih," an ti. Cuticun rian ṭha ṭuan awk caah cun an kut cu an i ṭhawnter. ¹⁹ Sihmanhsehlaw Horon mi Sanballat le Ammon mi Tobiah, a sinum le, Arab mi Geshum nih mah cucu an theih tikah an kan nihsawh i an kan serhsat i, "Mah hi nan tuahmi hi zeidah a si? Siangpahrang maw nan doh?" tiah an kan ti. ²⁰ Khi tikah kei nih ka leh hna i, "Vancung Pathian nih khua awng a kan pemhter lai i kannih a sal hna nih hin kan tho lai i kan sak lai; sihmanhsehlaw nannih cu Jerusalem ah hin covo siseh, tinvo siseh, hngalh camcinnak siseh, nan ngei lai lo," tiah ka ti.

¹ Khi tikah tlangbawi ngan Eliashib kha a unau tlangbawi hna he khan an tho i Tuu Kutka kha an remh. An thianter i a innka kha an bunh hna; Za Innsang timi tiang khan an hei remh, Hananel Innsang timi tiang khan, cun an thianter. ² Eliashib a hun changtu ah khan Jeriko mi hna nih khan an remh i cu hna a hun chuangtu ah cun Imri fapa Zakkur kha a si. ³ Cun Hassenaah fapa hna nih khan Nga Kutka timi kha an remh; a kaan kha an khaan i a innkhar hna le a hrenhnak awng hna le a hrenhnak fung hna kha an bunh hna. ⁴ Cun anmah a hun changtu ah cun Hakkoz fapa Uriah i fapa Meremoth nih khan a remh. Cun cu hna a hun changtu ah cun Meshezabel fapa Berekhiah fapa Meshullam nih khan a remh. Cun anmah a hun changtu ah cun Baana fapa Zadok nih khan a remh. ⁵ Cun anmah a hun changtu ah cun Tekoa mi nih khan an remh; sihmanhsehlaw an bawi hna nih khan cun an Bawipa rian ah khan an lu an hlinh lo. ⁶ Cun Paseah fapa Joiada le Besodeiah fapa Meshullam nih khan Kutka Hlun kha an remh; a kaan hna cu an khan hna i a innkhar hna le a hrenhnak awng hna le a hrenhnak fung kha an bunh hna. ⁷ Anmah changtu ah cun Gibeon mi Melatiah le Meronoth mi Jadon le Tiva Ral ram uktu uknak chung i a ummi Gibeon mi hna le Mizpah mi hna nih an remh. ⁸ Anmah a hun changtu ah Harhaiah fapa sui soser hna lak in pakhat a min Uzziel nih a remh. Amah a hun changtu ah zihmui sertu hna lak i Hananiah nih a remh; cun Jerusalem cu Vampang Kau tiang khan an remh. ⁹ Anmah a hun changtu ah cun Jerusalem peng hnarcheu a uktu Refaiah, Hur fapa nih khan a remh. ¹⁰ Anmah a hun changtu ah cun, Harumaf fapa Jedaiah nih khan amah inn zawn kha a remh; cun amah a hun changtu ah Hashabneiah fapa Hattush nih khan a remh. ¹¹ Harim fapa Malkhijah le Pahath-moab fapa Hasshub nih Changreu Rawhnak Innsang khattelei kam kha an remh. ¹² Cun amah a hun changtu ah, Hallohesh fapa Shallum, Jerusalem peng hnarcheu a uktu le a fanule hna nih khan an remh. ¹³ Hanun le Zanoah khuami hna nih khan Nelrawn Kutka kha an remh; an ser ṭhan i a innkhar hna le a hrenhnak awng hna le a hrenhnak fung hna kha an bunh hna, cun kulhnak vampang kha dong thong khat, Hnawmpon Kutka tiang an remh. ¹⁴ Rekhab fapa Malkhijah, Beth-hakkherem peng a uktu nih khan Hnawmpon Kutka kha a remh; amah nih cun a ser ṭhan i a innkhar hna le a hrenhnak awng hna le a hrenhnak fung hna kha a bunh hna. ¹⁵ Cun Kolhozeh fapa Shallum, Mizpah peng a uktu nih khan Cerhti Kutka kha a remh; amah nih cun a ser ṭhan i a khuh i a innkhar hna le a hrenhnak awng hna le a hrenhnak fung hna kha a bunh hna; cun amah nih cun siangpahrang dum chung i Shelah Tidilnak vampang cu David Khua i a vung kalmi lamhbak tiang khan a remh. ¹⁶ Amah a hun chang ah cun Azbuk fapa Nehemiah, Beth-zur peng hnarcheu a uktu nih khan, David thlan zawn tiang le serchommi tidil le miṭhawng hna inn tiang khan a remh. ¹⁷ Amah a hun chang ahcun Levi mi nih an remh: Bani fapa Rehum; amah a hun changtu ah cun Keilah peng hnarcheu a uktu Hashabiah nih amah peng caah khan a remh. ¹⁸ Amah a hun changtu ah cun a unau pa nih khan a remh: Amah cu Henadad fapa Bavvai, Keilah peng hnarcheu uktu kha a si; ¹⁹ amah a hun changtu ah Jeshua fapa Ezer, Mizpah uktu nih vampang chunglei ah aa kuaihnak i ral hriamnam chiahnak zawn i a ummi tan kha a remh. ²⁰ Amah a hun changtu ah cun Zabbai fapa Baruk nih khattelei tan, vampang chunglei ah aa kuaihnak in tlangbawi ngan Eliashib inn i innka tiang kha a remh. ²¹ Amah a hun chang ah cun Hakkoz fapa Uriah i fapa Meremoth nih Eliashib inn innka in khattelei tan kha Eliashib inn dongh tiang a remh. ²² Amah a hun chang ah cun Nelrawn mi tlangbawi hna nih khan an remh. ²³ Anmah a hun chang ah cun Benjamin le Hasshub nih an inn zawn kha an remh. Anmah a hun chang ah cun Ananiah fapa Maaseiah i fapa Azariah nih amah inn pawng kha a remh. ²⁴ Amah a hun chang ah cun Henadad fapa Binnui nih khattelei tan, Azariah inn in vampang chunglei ah aa kuaihnak le ²⁵ lenglei ah a hei i kuaihnak kil tiang kha a remh. Uzai fapa Palal nih vampang chunglei ah aa kuaihnak hmun le ralvengtu hna hmun i siangpahrang inn cungnung in a hung chuakmi innsang zawn kha a remh. Amah chang ah cun Parosh fapa Pedaiah le ²⁶ Ofel i a ummi biakinn rian ṭuantu hna nih khan nichuahlei i Ti Kutka le a hung fongmi innsang zawn tiang kha an remh. ²⁷ Amah a hun chang ah cun a hung fongmi innsang nganpi zawn i a ummi tan kha Ofel vampang tiang Tekoa mi nih an remh. ²⁸ Rang Kutka chak ah khan tlangbawi hna nih anmahle an inn zawn cio kha an remh. ²⁹ Anmah chang ah cun Zadok fapa Immer nih khan amah inn zawn kha a remh. Amah chang ah cun Shekaniah fapa Shemaiah, Nichuahlei Kutka a cawngtu nih khan a remh. ³⁰ Amah chang ah cun Shelemiah fapa Hananiah le Zalaf fapa paruknak Hanun nih tan dang kha an remh. Amah chang ah cun Berekhiah fapa Meshullam nih amah khaan zawn kha a remh. ³¹ Amah chang ah cun suiser a si vemi Malkhijah nih Pumhnak Kutka zawn i a ummi biakinn rian ṭuantu hna inn le chawdawr hna inn le vampang lenglei i aa kuaihnak i a ummi cungdot tiang khan a remh. ³² Cun vampang lenglei i aa kuaihnak le Tuu Kutka karlak kha suiser hna le chawdawr hna nih an remh.

¹ Sanballat nih vampang kan remh kha a theih tikah a thin a phawh i a thinhun in Judah mi hna cu nehsawh serhsat in a ti hna. ² A unau hna le Samaria ralkapbu hna um hngan ah khan aa thawh i, "Hi Judah mi santlailo rual nih hin zei kan tuah an hei ti hnga dah? Thil kha an remh ṭhan hna lai maw? Raithawinak kha an tuah lai maw? Ni khat ah an lim hnga maw? Hnawmpon chung lung, khangh ciami lung hna kha an nunter ṭhan hna hnga maw?" tiah a ti. ³ Ammon mi Tobiah kha a pawngah cun a um i, "Asi, an sakmi cu — an sakmi lung vampang cu cenghngia nih hun kainak seh law a cim ko lai hen pei!" tiah a ti. ⁴ Maw kan Pathian, kannih cu an kan zawmhtaih caah hin kan thlacamnak cu rak kan theihpiak ko, an kan serhsatnak cu anmah lu cung lila ah kirter law saltannak ram chungah nihsawh awk mi ah canter ko hna. ⁵ Annih nih khua remhtu hna cu lang hngan in an thin an phawh hna caah an mawhnak cu khuhpiak hna hlah law an sualnak cu cazin chungin hlohpiak hna hlah. ⁶ Cuticun vampang cu a dihlak in a sanlei a canceo tiang cu aa tlai thliahmah in kan remh hna, hihi cu zeitindah a si khawh ti ah cun mi nih khan rian ṭuan duhnak lungthin an ngeih caah a si. ⁷ Sihmanhsehlaw Sanballat le Tobiah le Arab mi hna le Ammon mi hna le Ashdod mi hna nih, Jerusalem kulhnak vampang remhnak cu hma a kal i a kehkuainak hmun hna kha phih an si pah lengmang cang ti kha an theih tikah an thin a hung ngaingai; ⁸ cucaah Jerusalem kha doh awk le a chungah hnahnawhnak tuah awkah an dihlak in hmunkhat ah khua an khang. ⁹ Cun kannih nih kan Pathian sinah thla kan cam i annih sinin a kan vengtu dingah chunzan in ralveng pakhat kan chiah. ¹⁰ Sihmanhsehlaw Judah mi hna nih an i thawh i, "Rian ṭuantu hna kha an thazang a ṭum i hmunthur khuahnawm tam tuk a um rih fawn; kanmah lawngin vampang cu kan remh kho bal rua hna lai lo," an ti. ¹¹ Cun kan ral hna nih khan, "Zeihmanh an hngalh hlan le zeihmanh an hmuh manh hlanah, kan tlakphuat hna lai i kan thah hna lai i rian kha kan kham lai," an ti. ¹² Cun an sinah a ummi Judah mi hna cu khua chung i an rat tikah khan, voi hrate an kan chimh i, "An umnak hmun kip khan an ra lai i an kan doh ko lai," tiah an ti. ¹³ Cucaah kulhnak vampang hnulei i a ummi hmunlawng a niamnak bik ah khan mi cu an innchungkhar ning cio in an nam le an fei le an li he tiah ka chiah hna. ¹⁴ Cun thil umtuning kha ka hei zoh i, tuavon hna le bawi hna le mi zapi a dang dang hna kha, "Annih cu ṭih hna hlah u. A lian a ngan i ṭih a nungmi Bawipa kha hngal camcin tuah u, cun nan unau hna le nan fapa hna le nan fanu hna le nan nupi hna le nan inn hna caah khan do hna u," tiah ka ti hna. ¹⁵ Zeizong vialte kan theih dih kha kan ral hna nih an theih i Pathian nih an khuakhannak cu a hrawhpiak hna i kulhnak vampang ah cun kan kir i kan dihlak in kanmah le kan rian cio kha kan ṭuan ṭhan. ¹⁶ Cu ni thawk cun ka tang i rian a ṭuanmi hnarcheu lawng nih khan rian taktak cu an ṭuan i hnarcheu nih cun thir nga phaw angki kha i aih in an fei le an phaw le an li kha i tlaih in an dir; cun vampang remhnak rian a ṭuanmi Judah mi vialte kha bawi nih an zoh hna. ¹⁷ Thil phormi hna nih kut khat in an thil kha an i tlaih i kut khat in an hriamnam kha an i tlaih. ¹⁸ Inn satu hna nih an sakpah khan an tai ah an vainam kha an i thlaih cio. Cun muko tumtu kha ka pawngah an um. ¹⁹ Cun tuavon pawl le bawi hna le mi zapi a dang hna kha ka thawh hna i, "Hi rian hi rian ngan a si i hmun kaupi ah aa ṭhen dih i kannih zong kulhnak vampang cungah hin kan i ṭhek dih, pakhat le pakhat hla pipi ah kan um. ²⁰ Cucaah muko tum thawng nan theihnak hmun paoh ah, khika ah kan sinah nan i pum tawn lai. Kan Pathian nih a kan dohpiak lai," tiah ka ti. ²¹ Cuticun rian cu kan ṭuan i hnarcheu nih zinglei khuafing cah in arfi langh tiang fei kha an i tlaih. ²² Cun cu caan ah cun keimah nih mi zapi cu ka thawh hna i, "Kannih caah zan ah ralvengtu an si i chun ah rian ṭuantu an si nakhnga, ahohmanh nan salle cio he Jerusalem khua chungah ra riak cio u," tiah ka ti fawn. ²³ Cucaah keimah siseh, ka unau si hna seh, ka sinum si hna seh, ralvengtu a ka zultu si hna seh, ahohmanh thil kan i phoih lo, kan hriamnam kha kan i put i kan i tlaih cio dih.

¹ Cun mi zapi cu nu he pa he an unau Judah mi hna cungah khan fak piin an au an khuang. ² A cheu nih an i thawh i, "Kan fanule hna le kan fapale hna cu kan nunnak ca i rawl cawknak caah biahrennak ah kan hman cang hna," an ti; a cheu nih, ³ "Kan lo hna le kan mitsur dum hna le kan inn hna cu mangṭam lio i rawl cawknak caah biakamnak caah kan hman cang hna," an ti; ⁴ a cheu nih, "Siangpahrang sin pek awk ngunkhuai ca i tangka kan cawimi biahrennak caah kan lo le kan mitsur dum kha kan hman lengmang cang hna," an ti. ⁵ Cun annih nih cun, "Sihmanhsehlaw kan pum herhbaunak cu midang hna herhbaunak bantuk a si ve ko i kan fale hna cu an fale tlukin a ṭhami an si ve ko nain, kannih tu nih cun kan fale hna cu sal i i can awkah kan hnek lengmang ko hna. Kan fanule a cheukhat hna lebang cu sal ah an cang taktak cang, asinain, zeihmanh kan tuah khawhmi a um lo, zeicahtiah kan lo hna le kan mitsur dum hna cu midang ta an si cang," an ti. ⁶ Annih an aukhuannak le an chimmi bia hna cu ka theih tikah ka thin a hung ngaingai. ⁷ Keimah le keimah kha ṭha tein kaa ruat ciammam i tuavon pawl le bawi pawl kha ka mawhchiat hna i, "Nannih nih a miak nan ei, nan unau hna sin khan nan ei cio ko," tiah ka ti hna. Cun annih cu pumhnak nganpi ka serpi hna i ⁸ ka thawh hna i, "Kannih nih kan celh khawh chungin miphun dang hna sinah zuarhmi kan unau hna cu kan cawk hna; sihmanhsehlaw nannih nih cun nan unau hna cu nan zuarh hna i kanmah nih kan cawk ṭhan hna a herh lai," ka ti. Annih cu cipkhap ti loin an um i biachim awk pakhat hmanh an hngal lo. ⁹ Cucaah ka thawh hna i, "Nannih nih nan tuahmi hi a ṭhalo. Kannih kan ral miphun dang hna mit hmuh soisel awk um lo kan si nakhnga Pathian ṭih bu tein nan nun awk a si. ¹⁰ Keimah kong in ka chim a si ahcun, keimah le ka unau hna le ka tang i rian a ṭuanmi hna nih khan tangka le rawl kan cawih hna. Leiba ca i minung hren hi ngol u sih. ¹¹ Nihin hrimhrim ah hin an lo le an mitsur dum le an oliv dum le an inn le a miak nan lakmi le rawl le mitsur hang le chiti, annih sinin nan lakmi kha khirh hna u," tiah ka ti. ¹² Cun annih nih, "Mah hihi kan khirh hna lai i an sinin zeihmanh kan la ti lai lo. Na chim bangin kan tuah lai," an ti. Cun tlangbawi hna kha ka auh hna i an chim bangin tuah awkah chiat ka serter hna. ¹³ Ka puan zong kha ka thin i. "Hi biakamnak a tuah lomi paoh cu hi bantukin an inn cio le an rian cio in Pathian nih thing ko hna seh. Cu bang cun thin si ko hna seh law, lawngkarao in chiah si ko hna seh," ka ti. Cun aa pummi vialte nih, "Amen," an ti i Bawipa kha an thangṭhat. Cun mi nih bia an i kam bangkhan an tuah. ¹⁴ Cuhleiah Judah ram chung i an uktu bawi si awkah rian pek ka si thawk in, Artazaksis siangpahrang a sinak kum kulnak in kum sawm thum le kum hnihnak tiang, kum hleihnih chung, keimah nih siseh, ka unau hna nih siseh, uktu bawi ca rawl kha kan ei lo. ¹⁵ Keimah hlan i a rak ummi uktu bawi hna nih cun mi zapi cungah khan thilrit an chuan i annih sin cun ngun shekel sawm li hleiah rawl le mitsur hang kha an lak hna. An sinum hna hmanh nih mi zapi cu an lalhnawh hna. Sihmanhsehlaw kei nih cun Pathian ka ṭih caah cu bantuk cun ka tuah lo. ¹⁶ Hi kulhnak vampang remhnak rian ah hin ka thazang a dih-umnak in ka chuah i keimah caah vawlei zeihmanh kaa lakmi a um lo; cun ka sinum vialte hna cu khika ah rian ṭuan awkah cun an um. ¹⁷ Cun ka cabuai ah sawmmi minung za le sawm nga lengmang ka ngei hna, cu chungah cun Judah mi le bawi pawl kha an i tel; cun cu hna piin ah cun kan pawngkam i a ummi miphun hna chungin a rami an um rih fawn. ¹⁸ Ni khat ca i an chuanmi cu cawtum pakhat le thim khunmi tuu paruk an si tawn; ar zong kha an ka chuanpiak i ni hra dan paoh ah mitsur hang saphaw cua tampi an ka pek lengmang. Asinain, hi mi hna hi an thil a rih ko caah uktu bawi ca rawl kha ka la lo. ¹⁹ Maw ka Pathian, hi mi hna caah ka tuahmi thil vialte hi ka ṭhatnak ding caah ka hngalhpiak camcin ko.

¹ Sanballat le Tobiah le Arab mi Geshem le kan ral hna nih khan kulhnak vampang cu ka remh dih cang i a pemnak a um ti lo ti kha an theih tikah, (cu caan tiangah cun kutka ah khan innkhar ka bunh rih hna lo nain), ² Sanballat le Geshem nih cun ka sinah mi an hun thlah hna i, "Ra law Ono nelrawn i Hakkephirim khua ah kan i tong tuah lai," an ti; sihmanhsehlaw hihi cu an i timhmi keimah cung i harnak tlunter an duhmi khuhnak ca i hlennak men a si. ³ Cun annih sinah cun lamkal ka hei thlah hna i, "Rian nganpi pakhat ka ṭuan lio a si i cucaah cun ka rung thiam lai lo. Nanmah sin i ka run chungah zeicahdah rian cu ngol a rak si hnga?" tiah ka leh hna. ⁴ Cun cu bantukin voi li bia an ka cah i cu bantukin voi li ka leh ve hna. ⁵ Cu bantuk ṭhiamṭhiam cun a voi nganak ah Sanballat nih a sinum cu kau ciami ca pakhat he ka sinah a rak thlah. ⁶ A chungah cun hi bangin aa ṭial: "Nangmah le Judah mi hna cu ral thawh nan i timh caah nannih nih kulhnak vampang cu nan remh hna, tiah miphun hna sinah a thang i Geshem zong nih a chim ve. Cun an chimning ah cun nangmah cu an siangpahrang si kha na duh. ⁷ Cun nangmah kong kha Jerusalem ah, ’Judah ram chungah siangpahrang a um,’ tiin a chimtu ding profet kha na chiah fawn hna. Atu cu hi bia ningte hin siangpahrang cu theihter a si lai. Cucaah cun ra law khuaruat ṭi tuah u sih," tiah a ti. ⁸ Khi tikah kei nih a sinah mi ka hei thlah ve hna i, "Na chim bantuk hin zeihmanh tuahmi a um lo, nangmah nih na ruahnak in na phuahchommi a si ko," tiah ka ti. ⁹ Zeicahtiah annih nih an thinphang hna seh ti kha an ka duh i, "Rian ṭuan kha an kut nih a ngol lai i rian cu ngol a si lai," tiah an ruah. Sihmanhsehlaw maw Pathian, ka kut cu ṭhawnter ko hna. ¹⁰ Cun Mehetabel fapa Delaiah i fapa Shemaiah, inn i aa benh ko mipa inn ah cun ka va kal tikah, amah nih a rak ka thawh i, "Pathian inn, biakinn chungah cun i tong tuah u sih law biakinn innkhar cu khar hna u sih, zeicahtiah nangmah thah awkah an ra lai, zan ah nangmah thah awkah cun an ra lai," tiah a ti. ¹¹ Sihmanhsehlaw kei nih ka thawh i, "Keimah bantuk hi a zam ding maw ka si hnga? Keimah bantuk hi biakinn chungah lut in nun khawh a si hnga maw? Ka lut hrimhrim lai lo," tiah ka ti. ¹² Pathian nih amah cu a run thlah si lo tein, Tobiah le Sanballat nih a man an rak phalh ca i bia a rak ka chimhnawh a si kha ka hun hngalh i ka hun hmuh. ¹³ Ka thin a phan i hi bantukin ka tuah i ka sual i annih nih an ka thangchiat i an ka nihsawh nakhnga ding caah amah cu annih nih a man an rak phalh. ¹⁴ Maw ka Pathian, Tobiah le Sanballat hi an tuahmi thil ning te hin hngal camcin ko hna law profetnu Noadiah le a thinphang seh ti a ka duhmi profet dang vialte hna zong hi hngal camcin ko hna. ¹⁵ Cucaah kulhnak vampang cu Elul thla ni kul le ni nga ni ah, ni sawm nga le ni hnih chungah lim a si. ¹⁶ Cun kan ral vialte nih an theih tikah, kan pawngkam i a ummi miphun vialte hna cu an thin a phang i anmah le anmah an i zumhnak kha a ṭum ngaingai; zeicahtiah hi rian cu kan Pathian bawmhnak thawngin liim a si ti kha an hngalh. ¹⁷ Cuhleiah cu lioah cun Judah mi hna lak i tuavon pawl nih khan Tobiah cu ca tampi an kuat i Tobiah ca cu an sin a phan ve. ¹⁸ Amah cu Arah fapa Shekaniah i fanu va a si caah Judah mi tampi cu a sinah khan chiatser in an ṭang; cun a fapa Jehohanan nih khan Berekhiah fapa Meshullam i fanu cu nupi ah a ṭhit. ¹⁹ Cun thil ṭha a tuahmi zong kha an ka chimhnawh i ka bia cu amah sinah khan an lanh pi. Cun Tobiah nih keimah cu a thinphang seh tiin ca tampi a thlah.

¹ Kulhnak vampang kha kan lim i innka kha ka bunh hna i kutka cawngtu hna le hlasatu hna le Levi mi hna kha ka thiah dih hna tikah, ² ka unau Hanani le ralvennak inn uktu Hananiah kha Jerusalem khua zohkhenhnak rian cu ka pek hna, zeicahtiah amah cu midang tampi nakin zumhawktlak deuh le Pathian a ṭih deuhmi a si. ³ Cun annih cu ka thawh hna i, "Jerusalem kutka hna cu ni a lum hlantiang cu hun si hna hlah seh; cun ralvennak hmun i an dir lioah cun innka cu khar hna seh law hrenh hna seh. Jerusalem khuami hna chung khan ralvengtu cu nan thiah hna lai, anmah le an cawnghnak hmun cio ah khan le anmah le an inn zawn cio ah khan an um lai," tiah ka ti. ⁴ Khua cu a ngan i a kau ko, sihmanhsehlaw a chung i a ummi hna cu an tlawm i inn cu sak an si rih lo. ⁵ Cun Pathian nih tuavon hna le bawi hna le mi zapi hna kha an chuahkehnak ningin minthlak awk i pumhter awkah ka lung chungah ruahnak a ka pek. Cun a hmasa bik ah a rami hna chuahkehnak cauk kha ka hmuh i cu chungah cun hitin aa ṭial kha ka hmuh: ⁶ Hi ram mi, Babilon siangpahrang Nebukhadnezzar nih sal taannak chungah a kalpimi hna lakin, saltannak chungin a chuakmi cu mah hna hi an si; annih cu Jerusalem khua le Judah ram ah khan a kirmi an si i anmah le an khua cio ah khan an kir. ⁷ Annih cu Zerubbabel, Jeshua, Nehemiah, Azariah, Raamiah, Nahamani, Mordekai, Bilshan, Mispereth, Bigvai, Nehum, Baanah hna he khan a rami an si. Israel mi hna cu hi zat hi an si: ⁸ Parosh tefa hna, thong hnih za khat le sawm sarih le pahnih. ⁹ Shefatiah tefa hna, za thum sawm sarih le pahnih. ¹⁰ Arah tefa hna, za ruk sawm nga le pahnih. ¹¹ Pahath-moab tefa hna, Jeshua le Joab tefa hna cu thong hnih za riat le hleiriat. ¹² Elam tefa hna, thong khat za hnih le sawm nga le pali. ¹³ Zattu tefa hna, za riat sawm li le panga. ¹⁴ Zakkai tefa hna, za sarih le sawm ruk. ¹⁵ Binnui tefa hna, za ruk sawm li le pariat. ¹⁶ Bebai tefa hna, za ruk kul le pariat. ¹⁷ Azgad tefa hna, thong hnih za thum kul le pahnih. ¹⁸ Adonikam tefa hna, za ruk sawm ruk le pasarih. ¹⁹ Bigvai tefa hna, thong hnih sawm ruk le pasarih. ²⁰ Adin tefa hna, za ruk sawm nga le panga. ²¹ Ater tefa hna, Hezekiah tefa hna cu sawm kua le pariat. ²² Hashum tefa hna, za thum kul le pariat. ²³ Bezai tefa hna za thum kul le pali. ²⁴ Harif tefa hna, za khat le hleihnih. ²⁵ Gibeon tefa sawm kua le panga. ²⁶ Bethlehem le Netofah khuami, za khat sawm riat le pariat. ²⁷ Anathoth khuami hna, za khat kul le pariat. ²⁸ Beth-azmaveth khuami hna sawm li le pahnih. ²⁹ Kiriath-jearim, Khefirah le Beeroth khuami hna, za sarih sawm li le pathum. ³⁰ Ramah le Geba khuami hna, za ruk kul le pakhat. ³¹ Mikmash khuami hna, za khat kul le pahnih. ³² Bethel le Ai khuami za khat le kul le pathum. ³³ Nebo dang khuami sawm nga le pahnih. ³⁴ Elam dang tefa hna, thong khat za hnih sawm nga le pali. ³⁵ Harim tefa hna za thum le kul. ³⁶ Jeriko tefa hna za thum sawm li le panga. ³⁷ Lod, Hadid le Ono tefa hna za sarih kul le pakhat. ³⁸ Senaah tefa hna thong thum za kua le sawm thum. ³⁹ Tlangbawi hna; Jedaiah tefa Jeshua chung hna cu za kua sawm sarih le pathum. ⁴⁰ Immer tefa hna thong khat sawm nga le pahnih. ⁴¹ Pashhur tefa hna thong khat za hnih sawm li le pasarih. ⁴² Harim tefa hna thong khat le hleisarih. ⁴³ Levi mi hna: Jeshua tefa Hodevah hrinthlak hna lak i Kadmiel tefa hna kha sawm sarih le pali. ⁴⁴ Hlasatu hna: Asaf tefa hna za khat sawm li le pariat. ⁴⁵ Kutka cawngtu hna: Shallum tefa hna, Ater tefa hna, Talmon tefa hna, Akkub tefa hna, Hatita tefa hna, Shobai tefa hna za khat sawm thum le pariat. ⁴⁶ Biakinn rian ṭuantu hna: Ziha tefa, Hasufa tefa, Tabbaoth tefa, ⁴⁷ Keros tefa, Sia tefa, Padon tefa, ⁴⁸ Lebana tefa, Hagaba tefa, Shalmai tefa, ⁴⁹ Hanan tefa, Giddel tefa, Gahar tefa, ⁵⁰ Reaiah tefa, Rezin tefa, Nekoda tefa, ⁵¹ Gazzam tefa, Uzza tefa, Paseah tefa, ⁵² Besai tefa, Meunim tefa, Nefushesim tefa, ⁵³ Bakbuk tefa, Hakufa tefa, Harhur tefa, ⁵⁴ Bazlith tefa, Mehida tefa, Harsha tefa, ⁵⁵ Barkos tefa, Sisera tefa, Temah tefa, ⁵⁶ Neziah tefa, Hatifa tefa. ⁵⁷ Solomon sinum hna i an tefa hna: Sotai tefa, Sofereth tefa, Perida tefa, ⁵⁸ Jaala tefa, Darkon tefa, Giddel tefa, ⁵⁹ Shefatiah tefa, Hattil tefa, Pokhereth-hazzebaim tefa, Amon tefa. ⁶⁰ Biakinn rian ṭuantu hna le Solomon sinum hna i an tefa hna cu an dihlak in za thum sawm kua le pahnih an si. ⁶¹ A tanglei mi hna hi Tel-melah, Telharsha, Kherub; Addon le Immer in a rami, a hringsortu hna kha aho an si ti a chim kho lomi, Israel mi chungah kan i tel ve tel ve lo ti a chim kho lomi an si: ⁶² Delaiah tefa hna, Tobiah tefa hna, Nekoda tefa hna, za ruk sawm li le pahnih. ⁶³ Tlangbawi hna zong; Hobaiah tefa hna, Hakkoz tefa hna, Barzillai tefa hna (Gilead mi Barzillai fanu hna chungin pakhat nupi ah a ṭhimi a min in auh a simi kha). ⁶⁴ Hi hna nih hin chuahkehnak cazin chung i minthlakmi min lakah khan an min cu an kawl, sihmanhsehlaw an hmu kho lo, cucaah tlangbawi sinak chung khan a thianglo bantuk ah an chuah hna; ⁶⁵ ram uktu bawi nih khan, tlangbawi pakhat khat Urim le Thummim a zoh khomi an um hlan cu nannih nih a thiang bik rawl kha nan ei kho lai lo, tiah a ti hna. ⁶⁶ Aa pummi cu an dihlak in sang li thong hnih za thum le sawm ruk an si, ⁶⁷ cu lengah an salpa hna le an salnu hna kha an um rih i thong sarih za thum sawm thum le pasarih an si; cun hlasatu nu he pa he za hnih sawm li le panga an ngei hna. ⁶⁸ An rangtum hna cu za sarih sawm thum le paruk, an khacer hna cu za hnih sawm li le panga, ⁶⁹ an kalauk hna cu za li sawm thum le panga, an laa cu thong ruk za sarih le kul an si. ⁷⁰ Innchungkhar lu a cheukhat hna nih rian ṭuannak caah cun an thawh, Ram uktu bawi nih zapi ca chawkhonnak ah cun sui darik thong khat, hmaihum sawm nga, tlangbawi puan za nga le sawm thum a thawh. ⁷¹ Cun innchungkhar lu a cheukhat hna nih khan inn saknak ca tlang chaw caah sui darik sang hnih le ngun mina thong hnih le za hnih an pek. ⁷² Cun midang zapi nih an thawhmi cu sui darik sang hnih, ngun mina thong hnih le tlangbawi puan sawm ruk le pasarih an si. ⁷³ Tlangbawi hna le Levi mi hna le zapi a tlawmpal hna cu Jerusalem le a pawngkam ah khan an um; kutka cawngtu hna le hlasatu hna le biakinn rian ṭuantu hna le Israel mi a dang vialte kha anmah le an khua cio ah an um.

¹ Cun thla sarihnak thla a hung chuah i Israel mi hna cu an khua cio ah khan khua an sak cio tikah, mi zapi cu mi pakhat bantukin Ti Kutka timi hmai i tual ah khan an i pum i cazi Ezra kha Bawipa nih Israel mi a pekmi hna Moses phungbia cauk kha rak put awkah an fial. ² Cun tlangbawi Ezra nih khan phungbia cu, nu he pa he a thei i a hngal kho dingmi aa pummi an dihlak hmaiah khan, thla sarih thla a ni khat ni ah cun a chuahpi. ³ Cun Ti Kutka hmai i a ummi tual lei hoih khan zingka tein chun tiang, a hngal kho dingmi pa le nu hna hmaiah cun phungbia chung cun a rel i phungbia cauk cu mi vialte nih cun ṭha tein an ngaih. ⁴ Cu bantuk biachimnak ca i an sermi thing donhhlei ah cun cazi Ezra cu a dir i a pawngah cun a orhlei kamah Mattithiah, Shema, Anaiah, Uriah, Hilkiah le Maaseiah; cun a kehlei kamah Pedaiah, Mishael, Malkhijah, Hashum, Hashbaddanah, Zekhariah le Meshullam an dir. ⁵ Cun Ezra nih cun cauk cu mi vialte hmuh ah khan a kau, amah cu mi vialte nak sang deuh ah khan a dir; a kau tikah khan mi vialte cu an dir. ⁶ Cun Ezra nih Bawipa a liannganmi Pathian cu a thangṭhat i mi vialte nih khan an kut an hler i, "Amen, Amen," tiah an ti i an lu an khun i vawlei kha zoh in Bawipa kha an biak. ⁷ Cun mi zapi cu an umnak hmun i an um lio cio ah khan Levi mi Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, Pelaiah, hna zong nih khan mi zapi cu phungbia kha an hngalh nakhnga an bawmh hna. ⁸ Cun Pathian phungbia cauk chung khan tliang tein an rel i a sullam kha an chimh hna caah mi zapi nih an relmi cu an hngalh. ⁹ Cun ram uktu bawi a simi Nehemiah le tlangbawi le cazi a simi Ezra le mi zapi a cawnpiaktu hna Levi mi hna nih khan mi vialte cu an thawh hna i, "Nihin hi Bawipa, nan Pathian ca i ni thiang a si; nan ngaihchia hlah u; a ṭah zong ṭap hlah u," an ti hna. ¹⁰ Cun annih cu a thawh hna i, "Va kal u law, rawl thawthaw kha va ei u law mitsur hang thlumthlum kha va ding u; cun zeihmanh aa ngeih kho ve lomi hna kha va hrawm ve hna u; zeicahtiah nihin hi kan Bawipa caah ni thiang a si. Bawipa ah nan i lawmhnak cu nan thazang a si caah nan ngaihchia hlah u," tiah a ti. ¹¹ Cucaah Levi mi hna nih khan mi vialte cu an daihter hna i, "Nihin cu ni thiang a si caah dai tein um u, nan ngaihchia hlah u," tiah an ti hna. ¹² Cun mi vialte nih khan an thanhmi hna bia cu a sullam an hngalh cang caah, ei le dinnak va tuah awkah le midang zong kha va hrawm hna awk le lunglawmhnak nganpi tuah awkah an kal dih. ¹³ A ni hnihnak ni ah cun mi vialte hna chung i chungkhar lak lu a si ciomi kha tlangbawi hna le Levi mi hna he tiah cazi Ezra sinah khan phungbia chung bia cu cawn awkah hmunkhat ah an ra. ¹⁴ Cun phungbia chungah cun Bawipa nih Moses sinin nawlbia a pekmi hna aa ṭialmi kha an hmuh. Cu chungah cun, Israel mi hna cu thla sarihnak thla puai chung i deu chungah an um awk a si i ¹⁵ an khua dihlak hna le Jerusalem khua ah khan thawng thanh awk an si i, ’Tlang ah khin hung kal u law oliv nge hna le ramlak oliv nge hna le martal thing nge hna le tum nge hna le a hnah a ṭhami nge paoh kha deu saknak ding caah cun hung la hna u, cun deu cu cuticun nan sak hna lai, tiah aa ṭialning in sak awk an si lai,’ tiah ti awk an si kha aa ṭial. ¹⁶ Cucaah mi cu an va kal i an va lak hna i an inncung ah siseh, an tual ah siseh, Pathian inn tual ah siseh, Ti Kutka tual ah siseh, Efraim Kutka tual ah siseh, deu kha an i sak cio. ¹⁷ Sal chuak aa pummi vialte nih khan deu cu an i sak cio i deu chungah cun an um; cucu Nun fapa Joshua chan thawk in cu ni tiang, Israel mi nih an tuah bal lomi kha a si i lunglawmhnak a ngan ngaingaimi kha a um. ¹⁸ Cun nifate in, aa thawk ni in a dongh ni tiang, Pathian phungbia cauk chung khan a rel lengmang. Puai cu ni sarih an tuah i a ni riat ni ah an phunglam ning khan pumhnak thiang a um.

¹ Cun hi thla ni li ni ah Israel mi hna cu rawl ul le khum puan i aih le an lu i vawlei dip i phulh in an i pum. ² Cun Israel mi hna cu ramdangmi hna sin khan an i dang i an dir i an sualnak le an pale ṭhat lonak kha an phuan. ³ Cun an hmun cio ah khan an dir i Bawipa an Pathian phungbia cauk chung khan ni cheu li cheu khat chung cu an rel i a dang cheu li cheu khat chung cu sual phuannak le Bawipa an Pathian biaknak caah an hman. ⁴ Levi mi hna hleiah khan Jeshua, Bani, Kadmiel, Shebaniah, Bunni, Sherebiah, Bani le Khenani kha an dir i Bawipa an Pathian kha fak piin an auh. ⁵ Cun Levi mi Jeshua, Kadmiel, Bani, Hasshabneiah, Sherebiah, Hodiah, Shebaniah le Pethahiah nih hi bangin an thangṭhat: "Dir u law Bawipa nan Pathian cu ’Zungzal in zungzal tiang, sunparnak na min cu thangṭhat a si i thangṭhatnak vialte le hlorhnak vialte nakin a cungnung deuh. ⁶ Nangmah lawnglawng hi Bawipa cu na si; nangmah nih van cu na ser, a sang bik van cu a chung i a ummi thil vialte he na ser hna i vawlei le a cung i a ummi thil vialte zong hi na ser hna i rili le a chung i a ummi thil vialte zong hi na sermi an si dih. An dihlak hin nangmah nih na hmunhter hna i van i a ummi thil vialte nih khin nangmah cu an in biak. ⁷ Nangmah cu Abram kha a thim i Khaldi mi hna khua Ur khua in a chuahpi i a min ah Abraham a saktu Bawipa Pathian cu na si. ⁸ Cun amah cu nangmah sinah zumhawktlak a si kha na hmuh i a tefa hna cu Kanaan mi hna le Hit mi hna le Amor mi hna le Periz mi hna le Jebus mi hna le Girgash mi hna ram kha pek awkah amah sinah khan biakamnak kha na ser; cun nang cu na din caah na biakamnak cu na tlinter. ⁹ "Cun kan pupa hna nih Izipt ram ah hremnak an inmi kha na hmuh i Rili Sen i an aunak kha na theihpiak hna i ¹⁰ kan pupa hna kha zeirello in an ti hna kha na hngalh caah Faro le sinum hna le a ram mi vialte hna cungah hmelchunhnak le khuaruahhar kha na tuah i nihin ni tiangah a si bang hin min pakhat naa ser. ¹¹ Cun an hmaiah rili kha na cheu i cucaah rili chungah khan vawlei ro cungin an kal; cun a dawitu hna kha, a ṭhawngmi ti chungah lung a tlak bangin, a thukmi ti chungah na paih hna. ¹² Chun ah minmei tung in na hruai hna i zan ah an kalnak lam ceuhpiaktu dingah mei alh tung in na hruai hna. ¹³ Sinai Tlang cungah khan na rung ṭum i vancung khin annih cu na run chawnh hna i phunglam dikdik le phungbia taktak le phung ṭhaṭha le nawlbia ṭhaṭha kha na pek hna i ¹⁴ annih cu a thiangmi na sabbath kha na hngalhter hna i nawlbia le phung le phungbia kha na sal Moses sinin na pek hna. ¹⁵ Cun an rawlṭamnak daihter awkah vancung in changreu na pek hna i an tihal riamhter awkah lungpi chungin ti na pek hna, cun annih cu pek awkin chiat na rak sermi ram ah khan va kal i va co awkah nangmah nih na chimh hna. ¹⁶ "Sihmanhsehlaw annih le kan pupa hna nih cun porhlawt ngaiin thil an tuah i an hngawng kha an i rengh i na nawlbia kha an ngai lo; ¹⁷ annih nih na nawl ngaih kha an duh lo i an lak i khuaruahharnak na tuahmi kha an i cinken duh lo; sihmanhsehlaw an hngawng kha an i rengh i Izipt ram chung i sal an sinak chung i luh ṭhan awkah khan hruaitu pakhat an i ser. Sihmanhsehlaw nang cu ngaihthiam awkah aa tim i vel a ngei i zaangfahnak a ngeimi, thin a fual i a fekmi dawtnak in a khatmi Pathian na si caah annih cu na hlaw hna lo. ¹⁸ Annih nih thlet chommi cawfa kha an i ser i, ’Izipt ram in a kan chuahpitu kha Pathian cu mah hihi a si,’ tiah an ti i na min an in thangchiat hmanh ah khan ¹⁹ na zaangfahnak a ngan ruangah ramlak ah khan na hlaw ta hna lo; lam a hruaitu hna minmei tung nih khan chun ah a kaltak hna lo i annih kalnak ding lam a ceuhtu mei alh tung nih khan zan ah a kaltak hna lo. ²⁰ Annih cawnpiaknak caah na thlarau ṭha kha na pek hna i na manna kha sianh loin na um hna lo i an tihal a riamh nakhnga ti kha na pek hna. ²¹ Kum sawm li ramlak ah na cawm hna i zeihmanh an bau lo; an thilpuan kha a ṭet lo i an ke kha a phing lo. ²² Cun annih cu pennak le miphun kha na pek hna i hranchaw bantukin na phawt hna. Cuticun Heshbon siangpahrang Sihon ram le Bashan siangpahrang Og ram cu an lak hna. ²³ An tefa hna cu van i arfi zat khin na karhter hna i an pupa hna cu, "Va lut u law va co u," tiah na rak timi hna ram chungah khan na luhpi hna. ²⁴ Cucaah an tefa hna cu an lut i ram cu an co i an hmaiah cun cu ram a rak hlumtu Kanaan mi hna kha na tei hna i annih cu an duhduh in an tuah hna nakhnga an kut chungah an siangpahrang hna le cu ram mi hna cu na chanh hna. ²⁵ Cun annih nih kulhmi khua hna le a rummi ram kha an tlaih hna i thil ṭha in a khatmi inn hna le cawhmi tikhor hna le mitsur dum hna le oliv dum hna le thei a tlaimi thingkung tampi hna cu an co hna; an ei hna i an khim i an thau i na ṭhatnak a nganmi ah khan an i lawm. ²⁶ "Sihmanhsehlaw nawl ngai loin an um i nangmah kha an in ral i na phungbia kha an hnulei ah an hlonh i annih cu nangmah lei ah merter ṭhan awkah ralrinnak a petu hna profet hna kha an thah hna i thangchiatnak nganpi kha an tuah. ²⁷ Cucaah an ral hna kut chungah khan na chanh hna i annih nih an hrem hna. Sifahnak an in tikah nangmah cu an in auh i vancung khin na run theih hna; na zaangfahnak a ngan bantukin an ral hna kut chungin a khamhtu hna khamhtu kha na pek hna. ²⁸ Sihmanhsehlaw dinhnak an hmuh tikah na hmaiah ṭhat lonak an tuah ṭhan i an ral hna kut chungah khan na kaltak hna i cucaah annih nih an uk hna; asinain an i mer i nangmah kha an in auh tikah nangmah nih vancung khin na run theih hna i na zaangfahnak thawngin voi tampi na chuah hna. ²⁹ Cun na phungbia leiah khan merter awkah ralrinnak na pek hna. Sihmanhsehlaw porhlawt ngaiin thil an tuah i na nawlbia kha an ngai lo; na phunglam zulhnak thawngin nunnak a simi na phunglam tu kha an buar hna i an liang kha an i ṭhawnter i an hngawng kha an i rengh i na nawl ngaih kha an duh lo. ³⁰ Kum tampi na in hna i na thlarau in na profet hna sin khan ralrinnak na pek hna; sihmanhsehlaw an hnapet hmanh nih an ngai duh lo. Cucaah ramdang miphun hna kut chungah na chanh hna. ³¹ Sihmanhsehlaw nangmah cu vel a ngei i zaangfah a thiammi Pathian na si caah le na vel ngeihnak cu a ngan caah an donghnak kha na phakter hna lo i na hlaw hna lo. ³² " ’Cucaah atu cu kan Pathian, a lian a ngan i a ṭhawng i ṭih a nungmi Pathian, biakamnak a tlinter i a fekmi dawtnak a langhtertu, kan cung le kan siangpahrang hna le kan bawi hna le kan tlangbawi hna le kan profet hna le kan pupa hna le na mi dihlak cungah, Assiria siangpahrang hna chan in nihin tiang a tlungmi harnak vialte hi thil hmetuai ah rel sawh hna hlah. ³³ Zeitin a si hmanh ah, kan cung i a tlungmi thil vialte kongah nangmah cu na ding ko, zeicahtiah nang nih cun zumhawktlak tein na tuah i kannih nih cun ṭhalo piin kan tuah; ³⁴ kan siangpahrang hna, kan bawi hna, kan tlangbawi hna le kan pupa hna nih na pekmi hna na phungbia kha an ul lo i na nawlbia hna le ralrinnak na pekmi hna kha zei ah an rel lo. ³⁵ Nangmah nih na ṭhatnak a ngan ca i na pekmi hna an ram chung le an hmaiah na chiahmi ram ngan le ram rum chungah khan nangmah rian kha an ṭuan lo i an rian ṭhalo kha an mertak hna lo. ³⁶ Zohhmanh, nihin ah hin kannih cu sal kan si ko; a theitlai le a laksawng ṭha hna kha i lawmhpi awkah kan pupa hna na pekmi ram chungah hin kannih cu zohhmanh sal kan si ko. ³⁷ A theitlai hna cu, kan sual ruang i kan cung i na chiahmi siangpahrang hna sinah khan a kal dih; an duh duh in kan takpum cung le kan saṭil cung zongah khan nawl an ngei i kannih cu kan re a thei ngaingai ko,’ " tiah a ti. ³⁸ Hi thil vialte hna ruangah hin a fekmi biakamnak kha caṭial in kan ser i kan bawi hna le kan Levi mi hna le kan tlangbawi hna nih an cakhenhnak in an khenh.

¹ An cakhenhnak in a khenhtu hna cu hi hna hi an si: Hakaliah fapa Nehemiah, ram uktu bawi le Zedekiah, ² Seraiah, Azariah, Jeremiah, ³ Pashhur, Amariah, Malkhijah, ⁴ Hattush, Shebaniah, Malluk, ⁵ Harim, Meremoth, Obadiah, ⁶ Daniel, Ginnethon, Baruk, ⁷ Meshullam, Abijah, Mijamin, ⁸ Maaziah, Bilgai, Shemaiah, mah hna hi tlangbawi an si. ⁹ Cun Levi mi ah cun: Azaniah fapa Jeshua, Henadad fapa hna lak i Binnui le Kadmiel, ¹⁰ cun an unau hna Shebaniah, Hodiah, Kelita, Pelaiah, Hanan, ¹¹ Mika, Rehob, Hashabiah, ¹² Zakkur, Sherebiah, Shebaniah, ¹³ Hodiah, Bani, Beninu. ¹⁴ Mi zapi hna bawi hna cu: Parosh, Pahathmoab, Elam, Zattu, Bani, ¹⁵ Bunni, Azgad, Bebai, ¹⁶ Adonijah, Bigvai, Adin, ¹⁷ Ater, Hezekiah, Azzur, ¹⁸ Hodiah, Hashum, Bezai, ¹⁹ Harif, Anathoth, Nebai, ²⁰ Magpiash, Meshullam, Hezir, ²¹ Meshezabel, Zadok, Jaddua, ²² Pelatiah, Hanan, Anaiah, ²³ Hoshea, Hananiah, Hasshub, ²⁴ Hallohesh, Pilha, Shobek, ²⁵ Rehum, Hashabnah, Maaseiah, ²⁶ Ahiah, Hanan, Anan, ²⁷ Malluk, Harim, Baanah an si. ²⁸ A dang a tangmi mi zapi hna, tlangbawi hna, Levi mi hna, kutka cawngtu hna, hlasatu hna, biakinn rian ṭuantu hna cu an nupile le an fanule hna le an fapale hna he tiah, hngalh khawhnak a ngeimi paohpaoh hna le Pathian phungbia ruangah cu ram mi hna sinin aa thleidangmi vialte nih an unau hna lak i hruitu deuhdeuh cu an fonh hna i ²⁹ Pathian sal Moses sinin pekmi Pathian phungbia kha zulh awk le Bawipa kan Bawipa nawlbia vialte le phunglam hna le a bia hna kha ulh awk le tuah awkah chiat an ser i biakamnak an tuah. ³⁰ "Hi ram mi hna kha kan fanule cu nupi caah kan pe hna lai lo i an fanule hna zong kan fapale hna nupi caah kan la hna lai lo; ³¹ cun hi ram mi hna nih sabbath ni ah thilri siseh, rawl siseh, zuar awkah an ratpi ahcun kannih nih sabbath ni le nizarh ni ahcun kan caw hna lai lo; cun kum sarihnak kum theipar hna cu kan la hna lai lo i leiba ca biahrennak ca i hrenmi hna cu kan chuah dih hna lai. ³² - ³³ Cun kan Pathian inn rian ṭuannak ca le hun camcinmi changreu ca le pekchanh camcinmi changvut thawinak ca le pekchanh camcinmi khangh thawinak ca le sabbath hna ca le thla thar hna ca le caan a ngeimi puai hna ca le thil thiang hna ca le Israel mi hna ca i remnak tuahnak ca i sual thawinak ca le kan Pathian inn rian ṭuannak dihlak ca i kumfate in shekel cheu thum cheu khat thawh awk zong kha, atu hin kan thawh lai, tiah kan ti. ³⁴ Kannih tlangbawi hna le Levi mi hna le mi zapi hna nih khan thing thawhlawm caah camcawh fung khiahnak kan tuah, kan tining ah cun, innchungkhar cio nih aa chang lengmang in thiahmi caan cio ah khan kum khat hnu kum khat in Bawipa kan Pathian biakṭheng cung i khangh awkah, nawlbia chungah aa ṭial bangin, kan Pathian inn chungah khan kan rak phorh hna lai, kan ti. ³⁵ Kan lo chung thlai thar hna le kan thei kung theitlai hmasa bik hna cu a kum fate in Bawipa inn i rak put awkah bia kan i kam; ³⁶ cun phungbia chungah aa ṭial bangin, kan fapa hna lakah a chuak hmasa bik hna le kan saṭil hna lakah hrin hmasa bik hna le kan cawrun le tuurun hna chungah a chuak hmasa bik hna cu, kan Pathian inn ah, kan Pathian inn chung i rianṭuantu hna tlangbawi hna sinah khan ratpi awkah bia kan i kam fawn; ³⁷ cun tlangbawi hna sinah kan changvut cet kan nawn hmasa bikmi le theikung tlai hmasa bik vialte, mitsur hang thar le chiti hna cu kan Pathian inn i thil chiahnak dal chungah khan rak put awkah bia kan i kam; cun kan lo chungin a chuakmi rawl cheu hra cheu khat cu lothlomi khua nih an thawhmi cheu hra cheu khat a khawltu Levi mi hna sinah khan rak chuahpi awkah bia kan i kam fawn. ³⁸ Levi mi hna nih cheu hra cheu khat an kholh tikah Aaron chung a simi tlangbawi pakhat kha aa tel ve lai; cun Levi mi hna nih cun cheu hra cheu khat cu kan Pathian inn ah khan, thil chiahnak dal chung i an ca i chiahmi khaan cio ah khan an rak chiah hna lai. ³⁹ Israel mi le Levi mi hna nih cun rawl thawhlawm le mitsur hang thar thawhlawm le chiti thawhlawm kha hmunthiang umkheng chiahnak khaan hna le rian a ṭuantu hna tlangbawi hna le kutka cawngtu hna le hlasatu hna an umnak ah khan an rak put hna lai. Kannih nih kan Pathian inn cu kan daithlanh awk a si lai lo," an ti.

¹ Mi zapi a hruitu hna cu Jerusalem khua ah khan an um; a tangmi mi zapi hna nih khan pahra chung i pakhat cu Jerusalem khua thiang chung i va um awkah camcawhfung an zuh, cheu hra cheu kua tu cu khua dang ah khan an um ko. ² Cun Jerusalem khua chung i va um awkah mah lungtho tein aa timmi hna cu mi zapi nih khan an lawmh hna. ³ Peng uktu bawi Jerusalem khua i a ummi hna cu hi hna hi an si; sihmanhsehlaw Judah ram chung khua hna ah khan cun Israel mi a dang hna le tlangbawi hna le Levi mi hna le biakinn rianṭuantu hna le Solomon sinum hna tefa hna cu anmah le an thilri umnak an khua cio ah khan an um ko. ⁴ Cun Jerusalem khua chungah khan Judah tefa a cheukhat hna le Benjamin tefa a cheukhat hna kha an um. Judah tefa chung mi hna cu hi hna hi an si: Athaiah, amah cu Uzziah fapa, Uzziah cu Zekhariah fapa, Zekhariah cu Amariah fapa, Amariah cu Shefatiah fapa, Shefatiah cu Mahalalel fapa, Mahalalel cu Perez fapa hna lak i pakhat; ⁵ cun Maaseiah, amah cu Baruk fapa, Baruk cu Kolhozeh fapa, Kolhozeh cu Hazaiah fapa, Hazaiah cu Adaiah fapa, Adaiah cu Joiarib fapa, Joiarib cu Zekhariah fapa, Zekhariah cu Shelah phun chung mi a si. ⁶ Perez tefa Jerusalem i a ummi cu an dihlak in za li sawm ruk pariat an si i an dihlak in miralṭha an si. ⁷ - ⁸ Cun Benjamin tefa hna cu: Sallu le a rualchan Gabbai le Sallai le an rualchan dang an dihlak in za kua le kul le pariat an si. Sallu cu Meshullam fapa a si, Meshullam cu Joed fapa a si, Joed cu Pedaiah fapa a si, Pedaiah cu Kolaiah fapa a si, Kolaiah cu Maaseiah fapa a si, Maaseiah cu Ithiel fapa a si, Ithiel cu Isaiah fapa a si. ⁹ Zikhri fapa Joel cu an haotu a si i Hassenuah fapa Judah cu khua uktu bawi a hun changtu a si. ¹⁰ - ¹¹ Tlangbawi hna chungin hi hna hi an si: Jedaiah le a rualchan biakinn rianṭuantu hna za riat le kul le pahnih hna kha; Jedaiah cu Joiarib fapa a si, Joiarib cu Seraiah fapa a si, Seraiah cu Hilkiah fapa a si, Hilkiah cu Meshullam fapa a si, Meshullam cu Zadok fapa a si, Zadok cu Meraioth fapa a si, Meraioth cu Ahitub fapa a si, Ahitub cu Pathian inn zohkhenhtu a si; ¹² cun Adaiah le a unau hna, anmahle an pale chungkhar i lu a si ciomi hna kha, an dihlak in za hnih sawm li le pahnih an si; Adaiah cu Jehoram fapa a si, Jehoram cu Pelaliah fapa a si, Pelaliah cu Amzi fapa a si, Amzi cu Zekhariah fapa a si, Zekhariah cu Pashhur fapa a si, Pashhur cu Malkhiah fapa a si; ¹³ cun Amashai le miṭhawngṭha a simi a unau za khat le kul le pariat hna kha; Amashai cu Azarel fapa a si, Azarel cu Ahazi fapa a si, Ahazi cu Meshillemoth fapa a si, Meshillemoth cu Immer fapa a si, ¹⁴ cun an haotu cu Haggedolim fapa Zabdiel a si. ¹⁵ Levi mi hna chungin: Hasshub fapa Shemaiah kha a si, Hasshub cu Azrikam fapa a si, Azrikam cu Hashabiah fapa a si, Hashabiah cu Bunni fapa a si; ¹⁶ cun Pathian inn lenglei rian a zohkhenhtu, Levi mi hna lak i an upa bikbik Shabbethai le Jozabad kha an si; ¹⁷ cun Mikah fapa Mattaniah kha a si, Mikah Cu Zabdi fapa a si, Zabdi cu Asaf fapa a si, Asaf cu hla hruaitu a si i amah nih cun lunglawmhnak thlacamnak ah hin a hruaitu hna a si, cun Bakbukiah kha a si, amah cu a unau hna lakah upa bik a hun changtu kha a si; cun Shammua fapa Abda kha a si, Shammua cu Galal fapa a si, Galal cu Jeduthun fapa a si. ¹⁸ Khua thiang chung i a ummi Levi mi cu an dihlak ah za hnih sawm riat le pali an si. ¹⁹ Kutka cawngtu Akkub le Talmon le kutka a cawngtu an unau hna cu za khat sawm sarih le pahnih an si. ²⁰ Cun a tang rihmi Israel mi hna cu Judah ram chung i khua ah khan anmah le an comi an ro cio hmun ah khan khua an sa. ²¹ Sihmanhsehlaw biakinn rian ṭuantu hna cu Ofel ah khan an um i Ziha le Gishpa nih khan an zohkhenh hna. ²² Jerusalem i Levi mi a zohkhenhtu hna cu Bani fapa Uzzi kha a si, Bani cu Hashabiah fapa a si, Hashabiah cu Mattaniah fapa a si, Mattaniah cu Mika fapa a si, Mika cu Asaf chungkhar chung mi a si, hi hna chung hi Pathian rian ṭuannak i hlasatu kha an si. ²³ Anmah kong he aa pehtlaimi ah siangpahrang nawl pekmi pakhat a um i ni fate in hlasatu pawl nih cun an tuah a herhmi rian a um. ²⁴ Cun zeizong kong ah siangpahrang aiawh in hi mi hna lungthin a cheutu hna cu Pethahiah a si, amah cu Meshezabel fapa a si, Meshezabel cu Zerah innchungkhar chung mi kha a si i Zerah cu Judah fapa kha a si. ²⁵ Cun an khuate hna le an pawngkam i a ummi lo hna kong cu hi bantukin a si: Judah tefa a cheukhat hna cu Kiriath-arba le a khuate hna, Dibon le a khuate hna, Jekabzeel le a khuate hna, ²⁶ Jeshua khua le Moladah khua le Bethpelet khua le, ²⁷ Hazar-shual khua le Beersheba khua le a khuate hna ah le ²⁸ Ziklag le Mekonah le a khuate hna ah khan le ²⁹ Enrimmon le Zorah le Jarmuth le ³⁰ Zanoah le Adullam le a khuate hna ah le Lakhish le a lo hna ah le Azekah le a khuate hna ah khan an um. Cuticun Beersheba in Hinnom nelrawn tiang khua an sa. ³¹ Benjamin mi zong Geba, Mikmash, Aija, Bethel le a khuate hna, ³² Anathoth, Nob, Ananiah, ³³ Hazor, Ramah, Gittaim, ³⁴ Hadid Zeboim, Neballat, ³⁵ Lod, Ono le Ge-harashim ah khan an um. ³⁶ Judah ram i a ummi Levi mibu a cheukhat hna cu Benjamin ram ah khan an i fon.

¹ Shealtiel fapa Zerubbabel le Jeshua he a rami tlangbawi hna le Levi mi hna cu mah hna hi an si: Seraiah, Jeremiah, Ezra, ² Amariah, Malluk, Hattush, ³ Shekaniah, Rehum, Meremoth, ⁴ Iddo, Ginnethoi, Abijah, ⁵ Mijamin, Maadiah, Bilgah, ⁶ Shemaiah, Joiarib, Jedaiah, ⁷ Sallu, Amok, Hilkiah, Jedaiah; mah hna hi tlangbawi hna le an unau hna lakah, Jeshua chan ah khan upa bikbik cu an si. ⁸ Cun Levi mi hna cu mah hna hi an si: Jeshua, Binnui, Kadmiel, Sherebiah, Judah le Mattaniah, Mattaniah hi a unau hna he lawmhnak hla a tawlreltu an si. ⁹ Cun an unau hna Bakbukiah le Unno cu hlasak tikah khan anmah he cun hmaitonh in an dir. ¹⁰ Cun Jeshua cu Joiakim pa a si, Joiakim cu Eliashib pa a si, Eliashib cu Joiada pa a si, ¹¹ Joiada cu Jonathan pa a si, Jonathan cu Jaddua pa a si. ¹² Cun Joiakim chan ah cun hi hna hi pale innchungkhar ah lu a simi cio tlangbawi hna cu an si: Seraiah chungkhar ah Meraiah, Jeremiah chungkhar ah Hananiah, ¹³ Ezra chungkhar ah Meshullam, Amariah chungkhar ah Jehohanan, ¹⁴ Mallukhi chungkhar ah Jonathan, Shebaniah chungkhar ah Josef, ¹⁵ Harim chungkhar ah Adna, Meraioth chungkhar ah Halkai, ¹⁶ Iddo chungkhar ah Zekhariah, Ginnethon chungkhar ah Meshullam, ¹⁷ Abijah chungkhar ah Zikhri, Miniamin chungkhar ah, Moadiah chungkhar ah Pittai, ¹⁸ Bilgah chungkhar ah Shammua, Shemaiah chungkhar ah Jehonathan, ¹⁹ Joiarib chungkhar ah Mattenai, Jedaiah chungkhar ah Mattenai, Jedaiah chungkhar ah Uzzi, ²⁰ Sallai chungkhar ah Kallai, Amok chungkhar ah Eber, ²¹ Hilkiah chungkhar ah Hashabiah, Jedaiah chungkhar ah Nethanel. ²² Eliashib, Joiada, Johanan le Jaddua hna chan i tlangbawi innchungkhar hna lak i lu a si ciomi hna kha Persia mi Darius chan tiang khan cazin ah an min khumh a si. ²³ Levi mi innchungkhar hna chung i lu a simi tu hna kha cu Eliashib tu Johanan chan tiang lawng kha an min cazin ah ṭial a si. ²⁴ Pathian mi David nawl peknak ning khan, phu khat le phu khat nih aa chaang lengmang in thangṭhatnak le lawmhnak pek awk ah; an unau hna he hmaitonh in a ummi Levi mi upa bikbik hna cu Hashabiah, Sherebiah le Kadmiel fapa Jeshua an si. ²⁵ Mattaniah, Bakbukiah, Obadiah, Meshullam, Talmon le Akkub cu kutka conghnak inn i ral a vengtu kutka cawngtu kha an si. ²⁶ Jozadak fapa Jeshua i a fapa Joiakim chan le ram uktu bawi Nehemiah le tlangbawi le cazi a si kemhmi Ezra hna chan i thil umtuning cu mah hihi a si. ²⁷ Cun Jerusalem kulhnak vampang an pekchanh ah khan, lunglawmhnak le thanuamnak le hla in, sumsel, tingtang le thonglawi he tiah pekchanhnak cu conglawmh awkah Levi mi cu an umnak cio ah khan Jerusalem i ratpi awkah an va kawl hna. ²⁸ Cun Beth-gilgal le Geba le Azmaveth peng hna chung zong khan an i pum; zeicahtiah hlasatu hna nih khan Jerusalem velchum ah khan khua hme tete an i ser hna. ³⁰ Cun tlangbawi hna le Levi mi hna kha an i thianh i mi zapi hna le kutka hna le kulhnak vampang kha an thianh hna. ³¹ Khi tikah Judah bawi pawl kha kulhnak vampang cungah cun ka hun kalpi hna i Lawmhnak hlasatu dingah bu hnih ah ka ser hna. Bu khat cu orhlei ah an kal i vampang zulh thluahmah khan Hnawmpon Kutka leiah khan an kal; ³² cu hna hnuzul ah cun Hoshaiah le Judah upa pawl hnarcheu kha an kal; ³³ - ³⁴ cu hna sinah cun Azariah, Ezra, Meshullam, Judah, Benjamin, Shemaiah le Jeremiah zong kha an kal; cun tlangbawi a cheukhat hna zong kha muko he an kal ve. ³⁵ - ³⁶ Cu hna cu Jonathan fapa Zekhariah le a unau hna Shemaiah, Azarel, Milalai, Gilalai, Maai, Nethanel, Judah le Hanani nih khan, Pathian mi David aw dawh tumnak thilri kha i put in an zulh hna; cun cazi Ezra nih khan hmai a ṭhit hna. Jonathan cu Shemaiah fapa a si, Shemaiah cu Mattaniah fapa a si, Mattaniah cu Mikaiah fapa a si; Mikaiah cu Zakkur fapa a si, Zakkur cu Asaf fapa a si. ³⁷ Cerh Ti Kutka kha an hei lonh i lamhbak pawng khan ding tein David khua ah khan an kal, khua kulhnak vampang hung kainak hlei pawng khan an kal i David inn kha an lonh i nichuahlei i a ummi Ti Kutka kha an phan. ³⁸ Cun lawmhnak hlasatu bu dang kha kehlei ah an kal i mi zapi lak i upa pawl hnarcheu he khan kan zulh hna. Kulhnak vampang zulh thluahmah khan kan kal i ³⁹ Changreu Rawhnak Innsang kha kan lonh i Vampang Kau kha kan phan, Efraim Kutka kha kan lonh i Jeshanah Kutka le Nga Kutka chak khan kan kal i Hananel Innsang le Za Innsang pawng khan Tuu Kutka tiang kan kal; cun Cawngtu hna Kutka ah khan an dir. ⁴⁰ Cucaah lawmhnak hlasatu bu hna kha an bu hnih in Pathian inn chungah khan an dir i keimah le bawi pawl hnarcheu zong kha kan dir ve. ⁴¹ Cun tlangbawi Eliakim, Maaseiah, Miniamin, Mikaiah, Elioenai, Zekhariah le Hananiah kha an muko he an dir; ⁴² cun Maaseiah, Shemaiah, Eleazar, Uzzi, Jehohanan, Malkhijah, Elam le Ezer zong kha an dir. Cun hlasatu pawl cu an hruaitu Jezrahiah nih a hruai hna i hla an sa. ⁴³ Cun cu ni ah cun raithawinak ngan pipi an pekchanh hna i Pathian nih lunglawmhnak nganpi in an lung a lawmhter hna caah an i lawm; nu le ngakchia zong kha an i lawm ve. Cun Jerusalem khua chung i lunglawmhnak cu lamhlapi tiang a thang. ⁴⁴ Khi ni ah khan thil khonnak khaan le mi nih an thawhmi thil hna, theitlai hmasa bik hna le cheu hra cheu khat hna kha a zohkhenhtu dingah mi kan thiah hna; an rian cu tlangbawi hna le Levi mi hna ca i thawh awk tiin nawlbia nih a timi ningin khua kip nih an pawngkam i a ummi lo ning cio in an thawhmi rawl chiahnak khaan chung i rawn kha a si; zeicahtiah rian a ṭuantu tlangbawi hna le Levi mi hna cungah khan Judah mi vialte cu an i lawm. ⁴⁵ Cun David le a fapa Solomon nih phung an chiahtak bangin, hlasatu hna le kutka cawngtu hna nih an tuah bang khan, an Pathian rian le i thianhnak rian kha an ṭuan. ⁴⁶ Zeicahtiah David chan ah khan Asaf nih hlasatu hna hruitu bik le Pathian thangṭhatnak le lawmhnak chimnak hla a rak hruitu hna kha a si. ⁴⁷ Cun Israel mi vialte nih Zerubbabel le Nehemiah chan ah khan hlasatu pawl le kutka cawngtu pawl kha nifa an covo a simi kha an pek hna; cun Levi mi ca i a simi kha a dang tein an chiah i Levi mi hna nih khan Aaron tefa hna ca i a simi kha a dang tein an chiah ve.

¹ Khi ni ah khan mi zapi hmaiah cun Moses cauk chung khan an rel tikah Ammon mi hna le Moab mi hna cu ahohmanh, Pathian mi aa pummi hna chungah an luh awk a si lai lo, tiah aa ṭial kha an hmuh; ² zeicahtiah annih nih Israel mi kha changreu le ti he rak dong loin chiatserh awkah Baalam kha an rak i roih lehlam — asinain, kan Pathian nih chiatserhnak cu thluachuahnak ah a canter. ³ Mi zapi nih phungbia kha an theih tikah, ramdangmi hrinsor a simi vialte kha an thleidan hna. ⁴ Cun mah hi hlanah hin, kan Pathian inn i thil chiahnak khaan hna kha zohkhenhtu ah rian an pek i Tobiah he i ṭhitumnak in aa pehtlaimi tlangbawi Eliashib nih khan, ⁵ changvut thawinak le frankinsen le umkheng hna le rawl cheu hra cheu khat hna le mitsur hang le chiti, nawlbia in Levi mi hna le hlasatu hna le kutka cawngtu hna pek awk le tlangbawi hna ca i thawhlawm pekmi hlan i an rak chiahnak khaan nganpi kha Tobiah caah cun a timh. ⁶ Cun mah thil a si lioah hin kei cu Jerusalem ah ka um lo, zeicahtiah Babilon siangpahrang Artazaksis a bawi kum sawm thum le kum hnihnak ah siangpahrang sinah cun ka va kal. Cun tlawmpal hnuah khin siangpahrang cu a khonh ka hal i ⁷ Jerusalem ah ka ra i khi tikah Tobiah ca i Eliashib nih thil ṭhalo a tuahmi, Pathian inntual chung i khaan pakhat a timhpiakmi cu ka hmuh. ⁸ Cun kei cu ka thin a hung ngaingai i Tobiah innchungkhar thilri vialte cu khaan chung cun ka hlonh hna. ⁹ Cun nawl ka pek hna i khaan cu an thianh i cuka ah cun Pathian inn umkheng hna kha changvut thawinak le frankinsen he tiah ka luhpi hna. ¹⁰ Cun Levi mi hna cu an hmuh awk hnga a simi kha an pe hna lo ti kha ka hngalh fawn, cucaah cun Levi mi hna le hlasatu hna cu anmahle an rian cio kha kaltak riangmang in an lo ah an rak zam. ¹¹ Cucaah bawi pawl kha ka caak hna i, "Zeicahdah Pathian inn cu zamtak a si?" tiah ka ti hna. Cun hmunkhat ah ka pumh hna i an umnak hmun cio ah khan ka chiah hna. ¹² Cun Judah ram mi vialte nih rawl le mitsur hang le chiti cheu hra cheu khat hna kha thilri khonnak inn chungah cun an rak put hna. ¹³ Cun thilri khonnak inn hna a uktu ah cun tlangbawi Shelemiah, cazi Zadok le Levi mi hna chung mi Pedaiah kha rian ka pek hna i an bawmtu ah Mattaniah fapa Zakkur i fapa Hanan kha ka chiah, zeicahtiah annih cu zumhawktlak ah rel an si i an rian cu an unau hna kha thil phawt cu a si. ¹⁴ Keimah cu hi kongah hin ka hngal camcin ko, maw ka Pathian, cun ka Pathian inn ca le a rian ca i thil ṭha ka tuahmi hi hlo sawh hlah. ¹⁵ Khi caan ah khan Judah ram chungah sabbath ni i mitsur hang an nen i rawl kha tam piin an rak phorh i laa cung i an chuan hna kha ka hmuh; cun mitsur hang le mitsur thei le theipi le thilrit a phunphun, Jerusalem i sabbath ni i an rak phorh zong kha ka hmuh fawn; cun rawl an zuar ni ah cun ralrinnak ka pek hna. ¹⁶ Tair mi, khuapi chung i a ummi hna nih khan nga le thilri a phunphun an ratpi hna i sabbath ni ah cun Judah ram mi sin le Jerusalem khua chungah khan an zuar hna. ¹⁷ Khi tikah Judah ram tuavon pawl kha ka caak hna i, "Hi thil ṭhalo nan tuah i sabbath ni nan buar hi zeidah a si? ¹⁸ Nan pupa hna nih hi bantukin an tuah caah kan Pathian nih hi ṭhat lonak hi kan cung le hi khua cungah hin a tlunter a si lo maw? Asinain nannih nih sabbath nan buarnak thawngin Israel cungah thinhunnak tam chinchin nan tlunter," tiah ka ti hna. ¹⁹ Sabbath lai ni i Jerusalem kutka hna ah khua muih hram aa thawk tikah khin, innka cu khar dih awk an si lai tiah nawl ka pek hna i sabbath ni a dih hlantiang hun an si lai lo tiah nawl ka pek fawn hna. Cun sabbath ni ah cun thilrit zeihmanh luhpi an si nakhnga lo, ka sinum hna chungin tlawmpal kha kutka cu ka cawnghter hna. ²⁰ Khi tikah chawdawr hna le thil phun kip a zuarmi hna kha Jerusalem khua lengah cun voi khat voi hnih cu an riak. ²¹ Sihmanhsehlaw ralrinnak ka pek hna i, "Zeicahdah kulhnak vampang hmaiah khan nan riah? Cu bantukin nan tuah ṭhan ahcun kan tlaih hna lai," tiah ka ti hna. Cucaah cu thawk cun sabbath ni ah cun an ra ti lo. ²² Cun sabbath ni kha thiang tein umter awkah Levi mi hna kha, nan i thianh lai i nan ra lai i kutka kha nan cawngh hna lai, tiah nawl ka pek hna. Keimah ca ṭhatnak ding caah hi zong hi hngal camcin ko law, maw Pathian, a fekmi na dawtnak a ngan ningin ka zuah ko sawh. ²³ Khi caan ah khan Judah mi Ashdod khuami nu hna le Ammon mi nu hna le Moab mi nu hna a ṭhimi ka hmuh fawn hna; ²⁴ an fale hnarcheu nih Ashdod holh khan an holh i Judah holh khan an holh kho lo, miphun dang hna holh lawng khan an holh kho. ²⁵ Cun ka sik hna i chiat ka serh hna i a cheu cu ka velh hna i an sam kha ka tiao hna; cun Pathian min chalh in chiat ka serter hna i, "An fapa hna cu nan fanu hna kha nan pe hna lai lo i an fanu hna zong nan fapa hna caah siseh, nanmah caah siseh, nan la hna lai lo. ²⁶ Cu bantuk nu hna ruangah cun a si lo maw Israel siangpahrang Solomon nih a sual kha? Miphun tampi hna lakah amah bantuk siangpahrang ahohmanh an um lo i amah cu Pathian nih a dawt i Israel mi vialte cungah cun siangpahrang ah a ser; sihmanhsehlaw amah hmanh cu ramdang minu hna nih an sualter ko. ²⁷ Cucaah kannih nih nanmah bia cu ngaiin ramdang minu hna cu ṭhi in hi ṭhat lonak a nganmi vialte hi tuah in kan Pathian cungah cun zumhawktlak loin kan um awk a si hnga maw?" tiah ka ti hna. ²⁸ Cun tlangbawi ngan Eliashib fapa hna lak i Jehoiada cu Horon mi Sanballat fanu va kha a si, cucaah amah cu ka sinin ka dawi. ²⁹ Maw ka Pathian, annih nih tlangbawi rian le tlangbawi biakamnak le Levi mi hna biakamnak cu an buar caah annih cu hngal camcin ko hna. ³⁰ Cuticun ramdang thil paohpaoh khan annih cu ka thianh hna i tlangbawi hna le Levi mi hna cu anmah rian cio ah khan ka chiah ṭhan hna; ³¹ cun a caan khiahmi pekchanhnak ca thing le theitlai hmasa bik hna caah khan keimah nih ka thawh. Maw ka Pathian, keimah cu ka ca i a ṭhatnak ding caah ka hngal camcin ko.