MIKAH

MIKAH

¹ Mah hihi Judah siangpahrang Jotham, Ahaz le Hezekiah bawi lio i Moresheth khuami Mikah sinah Bawipa bia a phanmi cu a si; cu bia cu langhnak in Samaria le Jerusalem kong ah a hmuhmi a si. ² Mi vialte hna, nan dihlak in ngai tuah u; Maw vawlei le a chung i a ummi vialte hna nan hna chi tuah u, Zeitintiah Bawipa Pathian nih nannih cu sual phawt awkah a biakinn thiang chung khan bia a run chim. ³ Zohhmanh, Bawipa cu a umnak hmun khan a chuak i a rung ṭum i vawleicung tlang sang hna cungah khan aa chawk. ⁴ Mei nih khuaiseng kha a linh tikah a zor bantukin tlang hna cu amah toiah cun an zor i, Tlang pang ah ti an luan bantuk khin horkuang chungah an vung luang. ⁵ Mah hi vialte hi Jakob ṭhat lonak ruang le Israel sualnak ruangah a si. Jakob ṭhat lonak cu zeidah an si? Samaria khua chung i an tuahmi kha an si lo maw? Judah mi hna cu khuazei khuahrumbo ruangah dah dan ka tat hna lai? Jerusalem khua hi an khuahrumbo cu a si ko. ⁶ Cucaah Samaria cu ramlak i thilchia ponnak hmun, mitsur cinnak ah ka ser lai. A lung kha hor chungah ka hlonh hna lai i a dirnak a hram kha ka langhter lai. ⁷ A milem vialte cu den an si dih lai i a siasal vialte cu an dihlak in khangh an si lai; A siasal vialte cu hnawmpon ah ka ser hna lai. Hlawhhlannak man in a cawkmi an si i hlawhhlannak man ah an cang ṭhan lai. ⁸ Cucaah Mikah nih aa thawh i, "Ka kiao ka raak lai i taklawng le kelawng in kaa chawk lai; Cenghngia bangin ka ai lai i thetse ram chimbu bangin ka ṭap lai. ⁹ Samaria cu a hma kha a dam kho ti lo; Judah zong cu bantuk hma cu a ing ve lai; Rawhralnak cu ka mi an umnak Jerusalem khua kutka kha a phan cang. ¹⁰ Diriam tein nan mit phing lak in Gath ah nan ṭap lai lo maw? Beth-leafrah khua ah leidip kha i phulh tuah u. ¹¹ Shafir khua i a ummi hna kal tuah u; Zaanan khua i a ummi hna cu ningzak in an khua chungin an chuak cang lo maw? Beth-ezel cu ṭahnak khua a si, amah nih cun bawmhnak zeihmanh an pe kho ti hna lai lo. ¹² Rawhralnak kha a rung ṭum i Jerusalem khua kutka hrimhrim kha a phak caah, Maroth khuami hna cu fak piin an lau. ¹³ Maw Lakhish mi hna, rangtum kha rangleng ah khit hna u, Zeicahtiah a hmasa bik ah Zion fanu hna sualnak chungah a kalpitu cu nangmah na si i Israel ṭhat lonak cu nangmah thawngin a rak si. ¹⁴ Nannih Judah rammi hna Moresheth-gath khua cu chuahtak ko u, Israel siangpahrang hna nih Beth-akhzib khua in bawmhnak zeihmanh an hmu kho ti lo. ¹⁵ Maw Mareshah mi hna, nannih zong nan umnak hmun kha lak awkah midang ka rak thlah hna lai i Israel sunparnak cu Adullam lungkua ah aa thup lai. ¹⁶ Naa lawmh tawnnak na fale ruangah khan na lu i kawngh tuah; Annih nih an in kaltak i saltannak chungah an luh cang caah langta bantukin na lu i kolh tuah.

¹ An ihkhun cungin ṭhat lonak le sualnak khua a ruat i An ruahmi cu kan tuah khawh sawk tiin tuah awkah deika tein a thomi hna cungah cun ningzahnak tlung ko seh! ² Lo kha an mit a thit ahcun an lak ko, inn kha an duh ahcun an tlaih ko; Mi kha an inn le an thilri an chuh ko hna. ³ Cucaah Bawipa bia cu hi bangin a si: Hi mi hna cungah hin rawhralnak tlunter ka tim lio i ahohmanh an luat kho lai lo. I uangthlar ngaiin nan i chawk thluaimai kho ti lai lo, Zeicahtiah cu caan cu an caah caan chia a si lai. ⁴ Cu ni a phak tikah nan konglam hi mi nih rawhralnak tahchunhnak ah an hman lai i hi ngaihchiatnak hla hi an sak lai i Kan rawk cikcek cang! Bawipa nih kan ram cu a lak cang. Sal i a kan tlaitu kha a pek cang hna, an ti lai. ⁵ Cucaah ram cu Bawipa mi hna nih an i cheuh ṭhan tikah nannih cu covo zeihmanh nan ngei lai lo. ⁶ Mizapi nih an i thawh i, "Phung kan chim len hlah; cu bantuk kong hoi hna cu kan chim len hlah. Pathian nih cun ningzahnak ah a kan phakter lai lo. ⁷ Israel mi hi chiatserhnak toiah maw an um? Bawipa hi a thinhun aa sum kho ti lo maw? Cu bantuk thil cu a tuah taktak ko hnga maw? Ding tein thil a tuahmi hna sinah cun nem tein bia a chim lo maw?" an ti. ⁸ Bawipa nih a leh hna i, "Sihmanhsehlaw nannih cu ka mi hna ral nan si. Dai tein a ummi hna cu an angki leng kha an keng cungin nan firpiak hna i, Raltuknak in a ra kirmi ralkap hna kha an lung nan donghter hna. ⁹ Ka mi hna nu hna cu an duh vemi an inn khan nan dawi hna i An fale hna cu ka thluachuahnak kha nan lakkanh hna. ¹⁰ Tho u law kal u, hihi dinhnak hmun a si lo. Sualnak ruangah ṭih a nungmi rawhralnak he nan i tong lai. ¹¹ "A kenkip ah aa chawk i a lih le a hrokhrawl in, ’Nan caah mitsur hang le zu cu a luan in an luang ko lai,’ tiah profet biachim in a chimmipa cu mi nih an duhmi profet cu a si. ¹² "Sihmanhsehlaw nannih Israel mi a tangmi vialte cu hmunkhat ah kan pumh hna lai. Tuukawm kawm khat chung i a ummi bantuk le tlonnak pakhat chung i a tlongmi tuu bantukin hmunkhat ah kan pumh hna lai i, Nan ram ah cun mi tampi thawngpang a leng lai," a ti. ¹³ Pathian nih lam kha a hunpiak hna lai i a hruai hna lai. Khua kulhnak kutka khan an chuak lai i luat tein an kal lai. An siangpahrang, Bawipa hrimhrim nih cun a hruai hna lai.

¹ Cun kaa thawh i, "Nannih Jakob hruaitu hna, Israel uktu hna, ngai tuah u, A dingmi thil a duhtu kha nan si awk a si, ² Sihmanhsehlaw ṭhatnak kha nan huat i ṭhat lonak kha nan duh; Mi kha a nung in an cuar nan hawh hna i an ruh i aa benhmi tit kha nan khoih; ³ Ka mi kha an sa nan ei hna, an cuar nan hawh hna; An ruh nan den hna i um chung i chuan awk sa bangin nan can hna," ka ti. ⁴ Khi tikah Bawipa kha an auh lai, sihmanhsehlaw a let hna lai lo; khi caan a phak tikah a hmai kha a thuhkanh hna lai, zeicahtiah an tuahmi kha a ṭhalo tuk hringhran. ⁵ Mizapi cu, a man a phalh khotu hna sinah, nan cungah daihnak a tlung lai, tiin bia a kamhtu hna le, a phalh kho lomi hna sinah, nan cungah ral a tlung lai, tiin a ṭhihtu hna profet hna nih an hlen cang hna. Hi profet hna kongah Bawipa nih a chimmi bia cu hihi a si: ⁶ Ka mi hna cu a pingah nan hruai hna caah langhnak zeihmanh nan hmu ti lai lo i zeihmanh nan rak chimchung kho ti fawn lai lo. Profet hna, nan ni cu a dong dengmang cang; ni nih an liamtak dengmang cang hna. ⁷ Hmutu pawl si hna seh, mang ih thiam si hna seh an dihlak in an ning a zak lai; Pathian sinin lehnak zeihmanh a um lo caah an dihlak in an kaa an i hup lai. ⁸ Sihmanhsehlaw kei tu cu Bawipa thlarau nih ṭhawnnak le bia khiah thiamnak le ral ṭhatnak in a ka khahter i Israel mi hna cu an sualnak kha zeidah a si tiah ka chimh hna. ⁹ Israel uktu hna, ka bia ngai tuah u, nannih dinnak kha a hua i ṭhatnak kha palhnak i a mertu hna, ngai tuah u. ¹⁰ Pathian khualipi Jerusalem cu lainawnnak le dinlonak in nan sak. ¹¹ Khua a uktu hna nih khan ziknawh ei in an uk hna. Tlangbawi hna nih khan a man hmuh awk lawngah phungbia kha an chimh hna. Profet hna nih khan tangka hmuhnak ding ca lawngah phuannak kha an chim; Cun an dihlak in Bawipa cu kan sinah a um, an ti dih. An i thawh i, "Bawipa cu kan sinah a um lo mei? Harnak zeihmanh nih a kan tlunhnawh kho lai lo," an ti. ¹² Cucaah nanmah ruangah Zion cu lei bantukin thuan a si lai i, Jerusalem cu a rawkmi thilpon ah a cang lai i, Biakinn tlang cu tupi ah a cang lai.

¹ Hmailei caan ah cun Bawipa inn a umnak tlang cu tlang vialte lakah a sang bik a si lai; Cu tlang ah cun mi tampi kha an ra lai, phun tampi kha an ra lai i, ² "Ra u law Bawipa tlang ah cun kai hna u si, Jakob Pathian inn ah cun kal hna u si, Kannih cu a lam kha kan cawnpiak seh law A lam cu kannih nih zul u si," an ti lai. Zeicahtiah cawnpiaknak cu Zion in a chuak i, Bawipa bia cu Jerusalem khua in a ra; ³ Amah cu miphun tampi hna biaceihtu kha a si lai i, Lam hlat pipi i a ummi miphun ṭhawngṭhawng hna karlak i biakhiaktu a si lai. Annih nih an vainam hna cu tuhmui ah an ser hna lai i an fei hna cu hlawhkawi ah an ser hna lai; Miphun pakhat nih miphun pakhat cungah a vainam kha a hler ti lai lo i, Raltuk zong kha an i cawnpiak ti lai lo; ⁴ Pakhat le pakhat ahohmanh hnahnawhnak i pe lo tein Anmahle an mitsur ruang toi cio le an theipi kung toi cio ah khua an sa hna lai; Zeicahtiah hi bia cu ralkapbu Bawipa hrimhrim nih a chimmi a si. ⁵ Mi vialte hna cu anmahle an pathian min cio ah an kal ko lai, Sihmanhsehlaw kannih cu Bawipa kan Pathian min in a zungzal in kan kal lai. ⁶ Khi ni ah cun a tlaumi kha ka pumh hna lai i, Raltangmi kha ka khawmh hna lai i a derthawmmi kha thazang ka pek hna lai. ⁷ A tlaumi kha a tangmi bantukin ka kilkawi hna lai i Zohkhenh ti lomi kha a ṭhawngmi miphun ah ka ser hna lai, tiah Bawipa nih a ti. Bawipa cu Zion tlang cungah atu le zungzal in an siangpahrang a si lai. ⁸ Cun nang, lung in sermi innsang, Zion fanu tlang, Nangmah sin i biakamnak sermi vialte kha ka tlinter lai; Hmasa lio na bawinak kha a ra kir ṭhan lai i Jerusalem fanu nih uknak na rak ngeihmi zong kha a ra kir ṭhan lai. ⁹ Zeicahdah atu hi a lau in nan lau? Siangpahrang nan ngei lo maw? Fimchimtu a tangmi nan ngei lo maw? Zeicahdah nau nganfah a ing liomi nu bantukin a ngerh in nan i ngerh len ko? ¹⁰ Nau nganfah a ing liomi nu bantukin vawlei ah i ngerh len tuah, Maw Zion fanu; Zeicahtiah atu cu hi khuapi hi na kaltak lai i ramlak ah na riak lai; Cuticun Babilon ah na ra lai. Khika ah khin khamh na si lai i khika ah khin Bawipa nih na ral hna kut chungin an luatter lai. ¹¹ Sihmanhsehlaw atu cu miphun tampi nih an in chuahhnawh i, "Hremnak ing seh, Zion cungah kan diriam seh," an ti. ¹² Sihmanhsehlaw annih nih Bawipa ruahnak kha an hngal lo i aa tinhmi zong kha an hngalthiam lo. A ngaingai ti ahcun, annih kha phuhri i faphal pumh bantukin a pumtu hna cu Bawipa kha a si. ¹³ Na facang cil cu thawk cang tuah, Maw Zion fanu, Zeicahtiah na ki cu thir in ka ser lai i na tin cu dar in ka ser hna lai i Miphun tampi kha na naan hna lai. A ding loin an rak lakmi thil kha Bawipa sinah na pek ṭhan hna lai i, An chawva hna cu vawlei cung dihlak uktu Bawipa sinah na chanh hna lai.

¹ Jerusalem khuami hna, kulhnak vampang phen ah khan i thup u, Nannih cu an in kulh cang hna; Israel uktu cu a bel ah fung in an tuk lai. ² Sihmanhsehlaw Bethlehem Efrath, nangmah cu Judah ram chungah a hme bik khua hna lakah naa tel ve nain, Nangmah chungin Israel uktu a chuak lai. Amah a hram cu kan hnuleipi caan, a luan cangmi caan chungah khan a um cangmi a si. ³ Cucaah nu nih nau nganfah a in chung caan lawng kha Bawipa nih Israel cu a kaltak lai i, A miphun chungmi sal i a tangmi hna kha an unaule he cun an i fon ṭhan lai. ⁴ Amah cu a hung chuah tikah Bawipa ṭhawnnak thawngin le Bawipa a Pathian min lianngan thawngin Annih cu tuukhal bantukin a khalh hna lai. A lianhngannak nih khan vawlei deng tiang a phak lai caah annih cu him tein khua an sa lai, ⁵ Amah cu daihnak mi a si lai. Assiria mi cu kan ram chung i an rung luh tikah le Kan ralhau hna kha an baoh khawh hna tikah, Anmah dohtu dingah kan hruaitu a ṭhawng bikbik kha kan thlah hna lai. ⁶ Annih nih an vainam in Assiria ram cu an tei lai. Assiria mi nih kan ram cu an hung chim tikah kannih cu an kan khamh lai. ⁷ Israel mi chungin a tangmi hna cu, Bawipa sinin a rung tlami dap le ramhring cung i a rung surmi ruahpi bantuk an si lai; Annih nih cun minung kha i bochan loin Pathian kha an i bochan lai. ⁸ Israel mi a cheukhat cu miphun hna lakah khan, Tu chung le phong i rawl a kawlmi chiandeih bantukin an si lai; Tuurun lak i thlahmi chiandeih no bantuk an si lai. An lakah khan a vung lut i a nam hna i a thleh a bauh dih hna i anmah chanhtu ding ahohmanh an um lo. ⁹ Israel nih cun a ral kha a tei dih hna lai i a hrawh dih hna lai. ¹⁰ Khi ni ah cun nan rangtum vialte hna le nan rangleng vialte hna cu ka hrawh dih hna lai. ¹¹ Nan ram chung khua cu ka hrawh dih hna lai i nan ralhau cu ka chimh dih hna lai. ¹² Nan eihthiam vialte kha ka hrawh dih hna lai i nan lakah camhthiam kha an um ti lai lo. ¹³ Nan ram chung i nan siasal hna le nan tung thiang hna kha ka hrawh dih hna lai; Nanmah nih nan kut in nan serchommi thil hna hmaiah khan hmaizahnak in nan kun ti lai lo. ¹⁴ Nan ram chung i tungthiang hna kha ka hau dih hna lai i, Thisen aa nehmi nan biakṭheng hna kha ka hrawh dih hna lai. ¹⁵ Ka thinhun le ka thinlinh in, ka nawl a ngai lomi miphun vialte cu phu ka hlam dih hna lai.

¹ Atu cu Bawipa nih a chimmi bia hi thei tuah u: Tho tuah law, Bawipa, na bia cu chim tuah, tlang hna khi na tehte si hna seh, Fing hna nih khin na chimmi cu thei hna seh. ² Nannih tlang ngan pipi hna, zungzal in a hmunmi tung vawlei a dohtu hna, Bawipa bia hi thei tuah u; Zeicahtiah Bawipa nih a mi hna chalh awk bia a ngei i cu bia cu Israel he an i al lai. ³ Maw ka mi hna, nan cungah zei hen dah ka tuah? Zeitindah nan tha kan batter hna? Mah hihi ka let tuah u. ⁴ Izipt ram in kan chuahpi hna, sal cannak ram in kan tlanh hna; Nanmah hruai awkah Moses le Aaron le Miriam kha ka thlah hna. ⁵ Moab siangpahrang Balak nih nan cungah tuah a timhmi kha ruat tuah u, Maw ka mi hna; Cun zeitindah Beor fapa Baalam nih a leh kha ruat fawn tuah u; Bawipa nih nanmah khamhnak caah a tuahmi kha nan hngalh khawh nakhnga, Shittim in Gilgal tiang nan kalnak kha ruat tuah u. ⁶ Bawipa cu ka fuh tikah zeidah kaa put lai? Cungsang ah a ummi Pathian hmaiah zeitindah ka kun lai? Khangh thawinak le kum khat a timi cawfa hna he maw amah cu ka fuh lai? ⁷ Bawipa cu tuukawng a thongthong le chiti a tiva in a luangmi kha pe ning law, cucu maw a duhmi cu a si hnga? Ka tuah sualmi tlanhnak caah ka fapa upa bik cu maw ka pekchanh lai? Ka sualnak caah khan ka fale cu maw amah cu ka pekchanh hna lai? ⁸ Nannih hmun kip kaa kip i a ummi vialte hna, Pathian nih cun thil ṭha kha zeidah a si ti cu an chimh cang ko ṭung hna; An halmi hna cu, ding tein thil ti le zaangfahnak ngeih le na Pathian hmai i toidor tein khuasak kha pei a si ko cu. ⁹ Bawipa aw cu ngai hmanh u, Amah min ṭih cu hlawhtlinnak a si. Bawipa nih cun khualipi cu a thawh i, ¹⁰ "Khuapi chungah aa pummi hna ngai hmanh u. Miṭhalo mi hna inn chungah dinlonak in an lakmi ro chaw tampi an um. Tahnak deu ka huatmi kha an hman. ¹¹ Khing deu le cuai deu a hmangmi hna kha ka ngaithiam kho hna hnga maw? ¹² Khuapi chung i mirum mi nih khan sifakmi kha an hrem hna, Cu hna cu mihrokhrawl lawngte an si dih. ¹³ Cucaah atu cu nan sualnak ruangah nan rawhnak ding kha ka thawk cang. ¹⁴ A ei cu nan ei lai, sihmanhsehlaw nan khim lai lo, nan rawl a ṭam ṭhiamṭhiam ko lai. Nau nganfahnak cu nan in lai, sihmanhsehlaw fa cu nan hring hna lai lo, Cun nan hrin hna hmanh ah vainam sin tu ah khan ka pek hna lai. ¹⁵ Thlaici cu nan tuh lai, sihmanhsehlaw nan zun lai lo, Oliv chiti cu nan sur lai, sihmanhsehlaw nan hmang hna lai lo, Mitsur thei cu nan nen hna lai, sihmanhsehlaw a hang cu nan ding hna lai lo. ¹⁶ Omri siangpahrang cawnpiaknak kha nan i ken, A fapa Ahab le a innchungkhar nih an tuahmi kha nannih zong nih nan tuah ve; An lam paoh kha nan zulh hna. Cucaah nannih cu rawk cikcek in kan ṭhio hna lai, Miphun dang hna nih nannih cu an in nihsawh hna lai i an in serhsat hnanak cu nan in lai," a ti.

¹ Aize! Theikung cungah thei zeihmanh a hmu ti lomi le Mitsur ruang ah a thei zeihmanh a hmu ti lomi rawlṭammi bantuk ka si ai cang. Mitsur thei vialte le theipi a thaw ngaingaimi cu an lawh dih ai cang hna. ² Ram chungah lihchim lomi miding pakhat hmanh an tang ti lo, Pathian sin i zumhawktlak in a ummi pakhat hmanh an um ti lo. An dihlak in an thi dih ai. Zeitik ah dah lainawnnak caan ṭha ka hmuh lai ti lawng kha an bawh cio ko, Sakaptupa nih a rap chungah foih awkah sa a hot hna bantukin, u le nau kha pakhat le pakhat i foih awkah an i hot. ³ Ṭhat lonak tuah kha a thiam ngaingaimi an si dih. Bawi nih si hna seh, biaceihtu nih si hna seh, ziknawh kha an duh dih. Nawl ngeimipa nih khan a duhnak kha a chimh hna i hmunkhat ah khua an khang ṭi. ⁴ An lak i miṭha bik hna le lihchim lo bik hna hmanh kha hlingbur bantuk an si. Pathian nih dan kan tat hna lai tiah ralrinnak a pek cang hna bangin Mi cu dan a tat hna lai ni kha a phan cang. Annih cu vansang au in an um dih lai. ⁵ Na innpa kha va zum hlah, na hawikom zong vaa bochan hlah. Na nupi sin i na chimmi hmanh kha vaa ralring. ⁶ Zeicahtiah hi caan ah hin cun fapale nih an pale kha an thangchiat hna i fanule nih an nule kha an doh hna; Fapa hna nupile nih an vale nu kha an doh hna i cucaah an ral hna cu anmah innchungkhar mi lila kha an si. ⁷ Sihmanhsehlaw kei cu Bawipa kha ka kawl lai, Ka khamhtu Pathian cu ka hngah lai, Ka Pathian nih cun a ka theih lai. ⁸ Maw ka ral hna, ka cungah nan diriam hlah u; Ka tlu cang, sihmanhsehlaw ka tho ṭhan lai; Atu cu muihnak chungah ka um, sihmanhsehlaw Bawipa nih ceunak a ka pek lai. ⁹ Bawipa cungah cun ka sual cang, cucaah a thinhunnak cu tu caan tlawmte chung cu ka in lai. Sihmanhsehlaw a donghnak ah cun keimah kha a ka ṭanh lai i ka cung i ṭhat lonak an tuahmi vialte kha ding tein a tuah ṭhan dih lai. ¹⁰ Khi tikah, "Bawipa na Pathian cu khuazei ah dah a um?" tiin nehsawh zawmhtaih in a ka timi ka ral hna nih khan an vun hmuh lai i an ning a zak lai. Annih cu an sungh i lam i nawncek lakah lamhchih an si kha ka hmuh hna lai. ¹¹ Jerusalem mi hna, nan khua ralhau remh ṭhannak caan cu a phan lio cang. Khi caan ah nan ram cu kauh a si lai. ¹² Nan mi hna cu a kenkip in nan sinah an ra kir lai — nichuahlei ah Assiria in, thlanglei ah Izipt ram in, a hlatnak rili in le tlang kip in an ra kir lai. ¹³ Sihmanhsehlaw vawlei cu a cung i a ummi minung hna ṭhat lonak ruangah khan thetse ram ah a cang lai. ¹⁴ Bawipa, na mi na thimmi hna hi nangmah nih khal hna. Annih cu anmah lawngin ramlak ah khan an um i ram hninghno nih khan a kulh hna. Hlan liopi ah an rak tuah bantuk khan Bashan le Gilead i a ummi ramhno lakah cun kalter hna law tlonter hna. ¹⁵ Izipt ram in na rak chuah tikah khuaruahharnak na rak tuah bantuk khan kan caah khuaruahharnak kan tuahpiak tuah. ¹⁶ Miphun dang hna nih khan hmu hna seh law an thazang an i bochanmi kha ṭhawng ko hmanh seh law an thinphang hna seh; An kaa kha i cip hna seh law an hna kha i phit hna seh, ¹⁷ Rul bantukin leidip kha liak hna seh law Vawlei i a lawn in a lawnmi thilnung bantukin vawlei kha ei hna seh. Annih nih an ralhau chung khan ther lengmang le phang lengmang in hung chuak hna seh law nangmah cu in ṭih hna seh, Maw Bawipa kan Pathian. ¹⁸ Bawipa, nangmah bantuk Pathian ahodah a um? Nang nih cun kan ṭhat lonak kha na kan ngaihthiam i na mi a tangmi hna kan sualnak kha na lanhtak, Na thinhunnak kha a zungzal in linhter loin, Aa thleng lomi na dawtnak tu kha na kan hmuhsak. ¹⁹ Kan cungah zaangfahnak kha na ngei ṭhan ko rih lai i, Kan ṭhat lonak kha na ṭawl lai i kan sualnak kha a thukmi rili tawne ah na hlonh lai. ²⁰ Kan pupa hna sinah chiatser in bia na rak kam cang bantuk khan, Na mi Israel mi kan cungah hin zumhawktlak na sinak kha na langhter lai i kannih Abraham tefa hna hi aa thleng lomi na dawtnak kha na kan hmuhter lai.