MATTHAI

MATTHAI

¹ Jesuh Khrih chuahkehnak cu hitihin a si. Amah cu David tefa kha a si i David cu Abraham tefa kha a si. ² Abraham cu Isak pa a si; Isak cu Jakob pa a si; Jakob cu Judah le a unau pawl pa a si; ³ Judah cu Perez le Zerah pa a si (an nu cu Tamar a si); Perez cu Hezron pa a si; Hezron cu Ram pa a si; ⁴ Ram cu Amminadab pa a si; Amminadab cu Nahshon pa a si; Nahshon cu Salmon pa a si; ⁵ Salmon cu Boaz pa a si (a nu cu Rahab a si); Boaz cu Obed pa a si (a nu cu Ruth a si); Obed cu Jesse pa a si, ⁶ Jesse cu Siangpahrang David pa a si. David cu Solomon pa a si (a nu cu Uriah nupi kha a si); ⁷ Solomon cu Rehoboam pa a si, Rehoboam cu Abijah pa a si; Abijah cu Asa pa a si; ⁸ Asa cu Jehoshafat pa a si; Jehoshafat cu Joram pa a si; Joram cu Uzziah pa a si; ⁹ Uzziah cu Jotham pa a si; Jotham cu Ahaz pa a si; Ahaz cu Hezekiah pa a si; ¹⁰ Hezekiah cu Manasseh pa a si; Manasseh cu Amon pa a si; Amon cu Josiah pa a si; ¹¹ Josiah cu Jekhoniah le a naule hna i an pa a si; cu caan ah cun Israel mi cu Babilon ram ah sal ah an kalpi hna. ¹² Babilon i sal i an kalpi hna hnuah: Jekhoniah cu Shealtiel pa a si; Shealtiel cu Zerubbabel pa a si; ¹³ Zerubbabel cu Abiud pa a si; Abiud cu Eliakim pa a si; Eliakim cu Azor pa a si; ¹⁴ Azor cu Zadok pa a si; Zadok cu Akhim pa a si; Akhim cu Eli-ud pa a si; ¹⁵ Eliud cu Eleazar pa a si; Eleazar cu Matthan pa a si; Matthan cu Jakob pa a si; ¹⁶ Jakob cu Josef pa a si; Josef cu Mary va a si, Mary cu Messiah timi Jesuh nu kha a si. ¹⁷ Cucaah Abraham in David tiangah chan hleili, David in Babilon i sal i an tan tiangah chan hleili, sal i an tan in Messiah chuah tiangah chan hleili a si. ¹⁸ Jesuh Khrih a chuahning cu hitihin a si: A nu Mary cu Josef he khan an i ham i asinain an i umh hlanah Thiang Thlarau in nau ka ngei lai ti kha a hngalh. ¹⁹ A hamtu Josef cu thil a hmaanning in tuah a duh zungzalmi a si; sihmanhsehlaw Mary cu zapi hmaiah ningzahter a duh lo caah an i hamnak kha a thli tein ka let lai, tiah khua a ruat lengmang. ²⁰ Cu kong a ruah lengmang lioah khan, a mang ah Bawipa vancungmi pakhat kha a sinah a lang i, "David tefa Josef, Mary hi na nupi ca i lak awkah ṭih hlah. Zeicahtiah fa a pawimi hi Thiang Thlarau thawngin a si. ²¹ Fapa a hrin lai i a min ah Jesuh na sak lai — zeicahtiah a mi kha an sualnak chungin a khamh hna lai," tiah a ti. ²² - ²³ Bawipa nih profet ka in, "Ngaknu cu fa a pawi lai i fapa a hrin lai i a min cu Emmanuel a si lai," tiah a chimmi a tlin nakhnga caah, hi thil vialte an hung um hi a si. (Emmanuel ti cu Pathian kan sinah a um, tinak a si.) ²⁴ Cucaah Josef cu a hun i hlauh tikah Bawipa vancungmi nih a chimhmi kha a tuah i Mary kha a ṭhit. ²⁵ Sihmanhsehlaw fa a hrin hlantiang, nu le va an si lo. Fapa a hrinmi cu Jesuh tiah Josef nih a sak.

¹ Jesuh cu, Judea ram Bethlehem khua ah, Siangpahrang Herod bawi a si lioah khan a chuak. A chuah tlawmpal ah cun arfi zohthiammi hna kha nichuahlei in Jerusalem khua ah khan an ra i, ² "Judah siangpahrang a si lai dingmi ngakchia a chuakmi cu khuazei ah dah a um? A arfi nichuahlei in a chuah kha kan hmuh i amah biak awkah cun atu hi kan ra," an ti. ³ Cu bia cu Siangpahrang Herod nih a theih tikah a awlok a chong ngaingai i cu bantuk cun Jerusalem khuami vialte hna zong kha an si ve. ⁴ Tlangbawi upa vialte hna le Phungbia cawnpiaktu saya hna kha a pumh hna i, "Khuazei ah dah Messiah cu a chuah lai?" tiah a hal hna. ⁵ Annih nih, "Judea ram Bethlehem khua ah," tiah an leh. "Cun Profet nih a rak ṭialmi cu hihi a si: ⁶ Judea ram ummi Bethlehem khua, Nangmah cu Judah ram khuapi hna lakah a hme bik na si naisai lo; Zeicahtiah nangmah chung hin hruaitu pakhat, ka mi Israel mi hna tuukhal a si dingmi cu a chuak lai," a ti. ⁷ Cucaah Herod nih cun nichuahlei mifim hna cu a thli tein a kawh hna i zeitik set ah dah arfi kha a chuah ti kha fiang tein a hal hna. ⁸ Cun Bethlehem khua ah khan a kalter hna i, "Va kal u law ngakchia kong kha ṭha tein va hlat u; cun nan hmuh tikah ra ka chim ṭhan u law kei zong amah cu ka va bia ve lai," tiah a ti hna. ⁹ Siangpahrang nih a ti hna bang cun an kal; cun nichuahlei ah an rak hmuh cangmi arfi kha a lang ṭhan i an hmaiah a kal i ngakchia umnak cungah cun a dir. ¹⁰ Arfi an hmuh ṭhan caah cun an i lawm tuk hringhran. ¹¹ Inn chungah khan an vung lut i ngakchia kha a nu Mary sinah cun an vung hmuh. An khuk an i bil i an biak. Cun an zal chung khan laksawng an i chuah i an pek, cu an laksawng cu sui le frankinsen zihmui le mura zihmui an si. ¹² Pathian nih an mang ah Herod sin i kir ti lo ding khan a chimh hna i cucaah lam dang in an ram ah khan an kir. ¹³ Annih an kal hnuah Bawipa vancungmi pakhat cu Josef sinah khan a mang ah a lang i, "Tho law, ngakchia le a nu kha i kalpi hna law Izipt ram ah va zam u. Cun chuak cang u, kan ti hna hlantiang cuka ah cun va um u. Herod nih ngakchia hi thah awkah a kawl lai," tiah a ti. ¹⁴ Josef cu a tho i ngakchia le a nu cu Izipt ram i zampi awkah zan ah khan a thawhpi hna. ¹⁵ Cuka ah cun Herod a thih tiang an um. Hi thil cu Bawipa nih profet ka in, "Ka Fapa cu Izipt ram in chuah awkah ka auh," a timi bia tlinnak caah khan a si. ¹⁶ Herod nih, nichuahlei mifim hna nih an ka hlen, ti kha a hngalh tikah, a thin a hung ngaingai. Arfi a chuahnak kong nichuahlei mifim hna nih an chimning khan a caan cu a tuak i Bethlehem khua le a pawngkam i a ummi khua hna chung i ngakchiapa kum hnih ri in a tanglei paoh kha thah dih hna awkah nawlbia a pek hna. ¹⁷ Cuticun profet Jeremiah nih a rak chimmi cu a hung tling. A chimmi cu: ¹⁸ "Ramah khua chungah thawng a thang, Cu thawng cu ṭahnak le ainak thawng a si. Rachel nih a fale cu a ṭah hna, An dihlak in an thih dih caah a ṭap lengmang ko i ngamh khawh a si lo," ti hi a si. ¹⁹ Herod a thih hnuah Izipt ram ah khan Josef sinah cun Bawipa vancungmi pakhat kha a lang i, ²⁰ "Tho law, ngakchia le a nu kha Israel ram ah hun kirpi ṭhan cang hna; zeicahtiah ngakchia thah a timmi kha an thi cang," tiah a ti. ²¹ Cucaah Josef cu a tho i ngakchia le a nu cu Israel ram ah khan a hun kirpi hna. ²² Arkelau nih a pa Herod kha a hun chan i Judea ram ah siangpahrang a si ti kha Josef nih a theih tikah cuka i va um awk cu a ṭih. A mang ah an chimh bantukin Galilee ram ah khan a kal i ²³ Nazareth khua ah khan umhmun a khuar. "Amah cu Nazareth khuami ti a si lai," tiah profet hna nih an rak chimmi tlinter awk caah, hiti in thil a hung um cu a si.

¹ Cu caan ah cun Tipil petu Johan kha a hung chuak i Judea ram ramcar chungah khan phung a chim. ² "Vancung Pennak cu a nai cang caah nan sualnak kha mertak cang hna u," tiah a ti hna. ³ Profet Isaiah nih, "Mipa pakhat cu ramlak ah a au i ’Bawipa cu a lam kha rak sialpiak u, A kalnak dingah lam kha ding tein rak tuahpiak u,’ tiah a ti," a ti tikah khan a rak chimhnawhchan duhmi cu Johan hi a si. ⁴ Johan hnipuan cu kalauk hmul in tahmi an si; a tai ah saphaw taisawm aa sawmh i khaubawk le khuaihliti in aa cawm. ⁵ A sinah khan Jerusalem khua in le Judea ram khuazakip in le Jordan tiva pawngkam ram dihlak in mi cu an chuak i ⁶ an sualnak kha an i phuang i Jordan tiva ah khan tipilnak a pek hna. ⁷ Johan nih, Farasi mi hna le Sadusi mi hna kha, tipil in awkah a sin i an rat kha a hmuh tikah a thawh hna i, "Rul hna, Pathian thinhunnak a ra liomi chung cun nan luat kho lai, tiah aho nih dah aan chimh hna? ⁸ Nan sualnak nan i ngaihchihnak cu nan theitlai in langhter ngat u. ⁹ ’Abraham cu a kan hringsortu a si,’ tiin kan luat lai, tiah i ruat hlah u. Pathian nih hi lung hna hi Abraham tefa ah cun a ser khawh ko hna, ti hi kan chimh hna. ¹⁰ Hreitlung nih thingkung cu an hram in a hau dengmang cang hna; thei ṭha a tlai lomi paoh cu hau an si lai i mei chungah paih an si lai. ¹¹ Nan sualnak nan i ngaihchih cang ti hngalhnak ah kei nih cun ti in tipilnak kan pek hna; sihmanhsehlaw ka hnu in a ra lai ding pa nih cun Thiang Thlarau le mei in tipilnak an pek hna lai. Amah cu keimah nakin tampi in a ngan deuh; kei cu a kedan putu hmanh ah kaa tlak lo. ¹² A kut in facang zahnak sisiap cu aa put i rawl cu a zah dih hna lai; a fang cu buk ah a rawn hna lai i a hi cu a mit lomi mei in a khangh hna lai," tiah a ti. ¹³ Cu caan ah cun Jesuh cu Galilee ram in Jordan tiva ah khan Johan sin i tipil in awkah a va kal. ¹⁴ Sihmanhsehlaw Johan nih cun a rak al i, "Keimah pei nangmah nih tipil pek awk ka si cu, ka sin i nangmah lehtuk na rat," tiah a rak ti. ¹⁵ Sihmanhsehlaw Jesuh nih cun, "Atu cu hitihin si ko seh. Pathian nih tuah awk a si a timi paoh cu i tuah ko seh," tiah a leh. Cucaah Johan cu a hna a tla ve. ¹⁶ Tipilnak a in dih cangka cun Jesuh cu ti chung cun a chuak. Van kha aa hung i Pathian Thlarau cu ṭhuro bantukin a rung zuan i a cung i aa fut kha a hmuh. ¹⁷ Cun vancung in aw pakhat a rung thang i, "Amah hi ka dawtmi ka Fapa a si, Amah cungah hin ka lung a tling," tiah a ti.

¹ Cun Thlarau nih Jesuh cu, Satan nih rak tukforh awkah, ramlak ah a kalpi. ² Ni sawm li le zan sawm li rawl loin a um hnuah Jesuh cu a rawl a ṭam ngaingai. ³ Khuachia cu a sinah a ra i, "Nangmah cu Pathian Fapa na si ahcun, hi lung hi changreu ah canter hna ngat," tiah a ti. ⁴ Jesuh nih cun, "Cathiang nih pei, ’Minung hi rawl lawngin a nung kho lo, sihmanhsehlaw Pathian nih a chimmi bia paoh cu a nunnak a si lai,’ a ti kha," tiah a ti. ⁵ Khuachia nih cun Jesuh cu khua thiang ah khan a kalpi i biakinn parpahlek ah khan a chiah. ⁶ Cun a thawh i, "Nangmah cu Pathian Fapa na si ahcun, vawlei ah khin vung zuang tuah; zeicahtiah Cathiang nih pei, ’Pathian nih nangmah kong ah a vancungmi kha nawl a pek hna i annih nih an kut in an in cawi lai i na ke cu lung ah naa khawng lai lo,’ a ti kha," tiah a ti. ⁷ Jesuh nih a thawh i, "Cathiang nih pei, ’Bawipa na Pathian cu hneksak hlah,’ a ti ve kha," tiah a leh. ⁸ Cun Khuachia nih cun Jesuh cu tlang sang ngaingaimi pakhat ah a kalpi i vawleicung ram vialte le an sunparnak vialte kha a hmuhsak i, ⁹ "Na khuk naa bil i na ka biak ahcun hi vialte hi kan pek dih lai," tiah a ti. ¹⁰ Cun Jesuh nih a leh i, "Satan, va kal cang, Cathiang nih pei, ’Bawipa na Pathian cu va bia law, amah rian lawnglawng va ṭuan,’ a ti kha," tiah a ti. ¹¹ Cun Khuachia nih cun a kaltak i vancungmi kha an ra i an rung hramh. ¹² Jesuh nih Johan kha thong ah an thlak ti a theih tikah Galilee ram ah khan lo diam in a kal. ¹³ Nazareth khua ah khan um loin Kapernaum khua tu ah khan a um; Kapernaum khua cu Zebulun le Naftali phun hna ram chung i a ummi khua, Galilee Rili pawng i a ummi kha a si. ¹⁴ Cuti in a tuah cu profet Isaiah nih, "Jordan tiva khattelei ral, rili lei hoih ah a ummi, ¹⁵ Zebulun le Naftali ram hna, Jentail mi hna Galilee — ¹⁶ Muihnak chung i a ummi hna nih khan ceunak nganpi an hmuh lai. Thihnak ram mui chung i a ummi hna cungah ceunak a tlung lai," a rak timi kha tlinter awk caah a si. ¹⁷ Cu caan thawk cun Jesuh nih, "Vancung Pennak a nai cang caah, nan sualnak kha mertak cang hna u," tiah a chimh lengmang hna. ¹⁸ Jesuh cu Galilee Rili kam i aa chawh lengmang lioah khan ngatlaitu unau a hmuh hna i cu hna cu Simon (Peter timi kha) le a nau Andru kha an si; rili chungah cun sur in nga an rak chep len ko; ¹⁹ annih cu Jesuh nih cun a hei auh hna i, "Ka zul u, mi tlaitu si awk kan cawnpiak hna lai," tiah a ti hna, ²⁰ An sur cu an kaltak zau i amah cu an zulh. ²¹ A hei kal deuh i unau Jeim le Johan, Zebedi fapa hna kha a hmuh hna. Annih cu an pa Zebedi he khan lawng chungah khan an rak um i an sur cu an rak timhtuah len ko. Jesuh nih cun a vun kawh hna i ²² chikkhatte ah an lawng le an pa cu an kaltak hna i Jesuh cu an zulh. ²³ Jesuh cu Galilee ram dihlak ah khan aa chawk i pumhnak inn ah khan a cawnpiak hna i pennak Thawngṭha kha a chimh hna i zawtnak le fahnak a ingmi a phunphun kha a damter hna. ²⁴ Amah thawng cu Siria ram zongah khan a thang dih i zawtnak a phunphun in a zawmi vialte hna le harnak a phunphun a ingmi hna kha amah sinah cun an ratpi hna: khuavang nih a tuahmi hna le mitlu a simi hna le a zengmi hna kha a damter dih hna. ²⁵ Galilee ram le Khua Pahra timi peng khan le Jerusalem khua le Judea ram le Jordan tiva khattelei ral ram in mi tampi an ra i amah kha an zulh.

¹ Jesuh nih mi zapi kha a hmuh hna tikah tlang cungah a kai i cuka ah cun a ṭhu. A zultu hna kha amah velchum ah cun an i pum ² i a ka a pau i a cawnpiak hna: ³ Mi chambau kan si ti aa hngalmi cu, lunglawmmi nan va si dah! Vancung Pennak cu nanmah ta a si. ⁴ A ṭap a hrammi cu lunglawmmi nan va si dah! Pathian nih an hnemh hna lai. ⁵ Nun a nemmi cu lunglawmmi nan va si dah! Pathian nih an kamhmi hna kha nan co lai. ⁶ Pathian duhnak tuah kha nan duhnak ngan bik i a chiami cu lunglawmmi nan va si dah! Pathian nih nan duhnak cu a tlinter lai. ⁷ Midang cungah zaangfahnak a ngeimi cu lunglawmmi nan va si dah! Pathian nih an zaangfah hna lai. ⁸ Lungthin a thiangmi cu lunglawmmi nan va si dah! Pathian kha nan hmuh lai. ⁹ Mi le mi karah remnak a sertu cu lunglawmmi nan va si dah! Pathian nih, ka fa, tiah an ti hna lai. ¹⁰ Pathian nih tuah u, a timi tuah ruangah hremnak a ingmi cu lunglawmmi nan va si dah! Vancung Pennak cu nanmah ta a si. ¹¹ "Nannih cu ka zultu nan si ruangah mi nih an in nihsawh hna i an in hrem hna i lih a phunphun an in puh hna tikah, nan caah lunglawmh awk a va si dah! ¹² Nan lung i lawm u law nan thanuam ko u, zeicahtiah vancung khua ah laksawng tampi chiahpiak nan si ko. Cu bantuk cun pei nan hlan i a rak ummi profet hna kha an rak hrem hna cu," tiah a ti. ¹³ "Nannih cu vawlei cite nan si. Sihmanhsehlaw cite kha a alnak cu a loh ahcun, zeitindah alter khawh a si ṭhan ti lai? Santlaihnak kha a ngeih ti lo caah hlonh awk le lamh awk men a si ko cang. ¹⁴ "Nannih cu vawlei ceunak nan si. Tlang cungah an tlakmi khua cu zeihmanh nih a phen kho lo. ¹⁵ Ahohmanh nih meifar an van tikah kho an khuh bal lo, mei vannak tu ah khan an chiah tawn i inn chung i a ummi vialte kha a ceuh dih hna. ¹⁶ Cu bantukin nannih nan ceunak zong cu mi hmaiah a ceu awk a si, cuticun thil ṭha nan tuahmi kha an hmuh lai i vancung khua i a ummi nan Pa kha an thangṭhat lai. ¹⁷ "Moses Nawlbia hna le profet hna cawnpiaknak kha hrawh awkah a ra, tiah ka ruat hlah u. Annih kha hrawh awkah si loin, an cawnpiaknak kha tlinter awk tu ah ka ra. ¹⁸ Mah hihi philh hlah u! Van le vawlei an hmunh chung paohpaoh cu Phungbia hi a deh pakhatte hmanh siseh, a rin pakhatte hmanh siseh a rawk lai lo — zeizong vialte hi a donghnak an phak hlanah cun an rawk lai lo. ¹⁹ Cucaah cun ahohmanh nih nawlbia lak i a hme bik te hmanh kha zul loin a um i midang zong kha cu bantukin a cawnpiak hna ahcun, cu pa cu Vancung Pennak chungah a hme bik a si lai. Cun Nawlbia kha a zul i midang zong kha, cu bantukin zulh awk, tiah a cawnpiakmi hna cu, Vancung Pennak ah mi ngan a si lai. ²⁰ Cucaah Pathian nih tuah hna seh, ti an duhmi hna tuahnak ah, Phungbia cawnpiaktu saya hna le Farasi mi hna nakin nan fel deuh lo ahcun, Vancung Pennak chungah cun nan lut kho lai lo. ²¹ " ’Lai va nawng hlah u, lai a nawngmi paoh cu biaceihtu hmaiah chuahpi a si lai, tiah hlanlio mi an rak ti tawn hna, ti kha nan theih. ²² Asinain kei nih cun, ’A u a nau cung i a thin a hungmi paoh cu biaceihtu hmaiah chuahpi nan si lai i a u siseh, a nau siseh, "Zei rua ram lo," a timi paoh cu biaceihtu bu sinah chuahpi nan si lai; cun ahohmanh, a u siseh, a nau siseh, "Mihrut" a timi paoh cu hell mei chung i tlak awkah aa tlakmi nan si lai,’ kan ti hna. ²³ Cucaah Pathian sinah nan laksawng cu biakṭheng cung i pekchanh na zalh tikah khan, na unau pakhatkhat kha na cungah thinhunnak a ngei ti na hun hngalh ahcun, ²⁴ biakṭheng hmaiah cun na laksawng cu chia ta law khulrang in va kal law na unau he khan remnak va tuah, cu hnuah cun ra ṭhan law Pathian sinah na laksawng cu va pe. ²⁵ "Mi pakhatkhat nih taza an cuai i zung ah an chuahpi ahcun, a caan a um rih lio, zung nan phak hlanah khan, amah he cun remnak tuah i zuam; cuka na phak hnuah cun biaceihtu sinah khan hluai na si lai i biaceihtu nih cun palik sinah an chanh chin lai i thong ah an in thlak lai. ²⁶ Biangai tein kan chimh, dan an in tatmi a dongh tiang khitkhet na in hlantiang thong ah cun na um lai. ²⁷ "Nu le pa sualnak va tuah hlah, an ti tawn cu nan theih. ²⁸ Sihmanhsehlaw kei nih cun, ahohmanh nih nu kha sual duhnak lungthin he a zoh ahcun, cu pa cu a lung chungin a sual cang, tiah kan ti hna. ²⁹ Cucaah na orhlei mit nih an sualter ahcun, khoih law hlonh ko. Na pum dihlak hell chung tlak nakcun na pum cung thil pakhatkhat na sungh cu a ṭha deuh. ³⁰ Na orhlei kut nih an sualter ahcun tan law hlonh ko. Na pum a ningpi in hell chung i tlak nakcun na kutke pakhatkhat sungh cu a ṭha deuh vingvan. ³¹ "Ahohmanh nih a nupi kha a mak ahcun maknak ca kha pe seh, tiah ti a si fawn. ³² Sihmanhsehlaw kei nih cun, hitihin ka ti: Mipa nih a nupi kha, zumhawktlak loin a um ti ṭung lo i a mak ahcun, a nupi kha va a ngeih tikah vacung in pa a duhter a si, cucaah mipa kha a sual; cun amah a rak ṭhitu zong kha a sual ve ṭhiamṭhiam. ³³ "Bia nan i kammi kha i let hlah u, Bawipa sinah chiatser in nan i kam cangmi cu nan tuah hrimhrim awk a si, tiah hlanlio mi hna an rak ti hna kha nan theih. ³⁴ Sihmanhsehlaw atu cu hihi kan chimh hna: Biakamnak nan tuah tikah chiatser biahrennak zeihmanh tuah hlah u; vancung khua chalh in chiatser hlah u, zeicahtiah vancung khua cu Pathian ṭhutnak a si; ³⁵ vawlei chalh zongin chiatser hlah u, zeicahtiah vawlei cu Pathian ke chiahnak a si; Jerusalem khua chalh zongin chiatser hlah u, zeicahtiah Jerusalem khua cu Siangpahrang ngan khua a si. ³⁶ Nanmah lu chalh zongin chiatser hlah u, zeicahtiah nan samfa fa khat hmanh nan dumter kho in nan ranter kho lo. ³⁷ ’Asi,’ ’Asilo,’ ti lawng kha chim ko u, cu pin cu Mi Ṭhalopa sinin a rami thil an si. ³⁸ "Mit caah mit ve, ha caah ha ve, tiin an rak ti tawn kha nan theih. ³⁹ Sihmanhsehlaw kei nih cun, nan cung i ṭhat lonak a tuahtu hna kha lehrul hna hlah u, kan ti hna. Nan orhlei bel ah an in bengh hna ahcun khatlei zong kha i chit rih u. ⁴⁰ Cun nan angki chungnawh lak awkah taza an in cuai hna ahcun nan angki leng zong kha va pe rih hna u. ⁴¹ Cun an uktu ralkap hna nih, an thil phorh kha, khan khat an in fial hna ahcun, khan hnih in va phorhpiak hna u. ⁴² Mi nih thil an in hal hna tikah va pe hna u, an in cawi hna tikah va cawih hna u. ⁴³ "Nan hawi kha va daw hna u law nan ral kha va hua hna u, tiah an ti tawn kha nan theih. ⁴⁴ Sihmanhsehlaw kei nih cun, hitihin kan ti hna: nan ral kha va daw hna u law an hremtu hna kha thla va campiak hna u, ⁴⁵ Cuticun vancung khua i a ummi nan Pa fale cu nan si lai. Anih nih cun a ṭhami he a ṭha lomi he, an cungah a ni kha a tlanter i, ṭhatnak a tuahmi he ṭhat lonak a tuahmi he, an cungah a ruah kha a surter. ⁴⁶ Zeicahdah an dawtu hna lawng nan dawt hna tikah, Pathian nih laksawng an pek hna lai? Ngunkhuai khawltu hna hmanh nih cucu an tuah ko ṭung. ⁴⁷ Cun nan hawikom lawng kha nan chawnh hna ahcun, zeital a hlei in nan tuahmi a um maw? Pathian bia lo hmanh nih cucu an tuah ko ṭung. ⁴⁸ Vancung khua i a ummi nan Pa a tlin bantukin nannih zong nan tlin awk a si.

¹ "Thil ṭha nan tuahmi hi zapi nih ka hmu hna seh ti duhnak lungthin in mizapi hmaiah nan tuah nakhnga lo i ralring u. Cu ti nan tuah ahcun vancung khua i a ummi nan Pa sinin laksawng zeihmanh nan hmu lai lo. ² "Cucaah mi kha thil an herhmi nan pek hna tikah, mi depde pawl nih pumhnak inn le zatlang lam ah an tuah bantukin nan tuahmi cu vaa uangthlar hlah u. Annih nih cun, mi nih kan thangṭhat hna seh, tiin an tuah. Hihi philh hlah u! An tuah man cu tling tein pei an hmuh cang cu! ³ Sihmanhsehlaw nannih nih cun mi kha an herhmi thil nan ṭhenh hna tikah, nan hawikom ṭha bik hmanh nih thei hlah seh, ti in va tuah u; ⁴ nanmah lawngte nih va hngal ko u. A thli tein nan tuahmi a hmutu nan Pa nih khan laksawng an pek hna lai. ⁵ "Thla nan cam tikah mi depde pawl nih an cam bantukin va cam hlah u. Annih nih cun, mi nih kan hmu hna seh, tiin pumhnak inn chung i dir riangmang i cam le zatlang lam tonnak i cam kha an duh. Hihi philh hlah u! Annih cu an laksawng kha tling tein an hmu cang. ⁶ Sihmanhsehlaw nannih cu thla nan cam tikah, nan inn khaan chungah va lut u law, innka vaa khar khumh u law, cuticun hmuh khawh lomi nan Pa sinah khan va cam u. Cun a thli tein nan tuahmi a hmutu nan Pa nih khan laksawng an pek hna lai. ⁷ "Thla nan cam tikah, Pathian bia lomi nih sullam a ngei set lomi bia tampi an hman bantukin va hmang ve hlah u, annih nih cun kan thlacam a sau ruangah hin Pathian nih a kan theihpiak deuh lai, tiah an ruah. ⁸ Annih bantuk cun va tuah hlah u, zeicahtiah nan Pa nih cun nan hal hlan in nan herhmi cu a hngalh cia ko. ⁹ Cucaah hi bantuk hin thla nan cam awk a si: ’Vancung khua i a um kan Pa, Na min thiang cu upat si ko seh; ¹⁰ Na pennak cu rung tlung ko seh, Vancung ah na duhnak an tuah bangin Vawlei cungah hin tuah si ve ko seh. ¹¹ Ni fate kan herhmi rawl cu nihin zongah hin kan pe tuah. ¹² Mi nih kan cungah ṭhat lonak an tuahmi kan ngaihthiam hna bangin Kan ṭhat lonak cu kan ngaithiam ve ko. ¹³ Tukforhnak chungah kan phakter hlah, Mi Ṭhalopa sin khan him tein kan khamh tuah. ¹⁴ "Mi nih nan cungah an tuahmi ṭhat lonak kha nan ngaihthiam hna ahcun, vancung i a ummi nan Pa zong nih an ngaihthiam ve hna lai. ¹⁵ Sihmanhsehlaw mi ṭhat lonak kha nan ngaihthiam hna lo ahcun vancung i a ummi nan Pa zong nih ṭhat lonak nan tuahmi kha an ngaithiam ve hna lai lo. ¹⁶ "Mi depde pawl nih rawl an ulh tikah hmaichia fiamfuam in an i umter bantukin nannih cu rawl nan ulh tikah i umter ve hlah u. Rawl an ul ti kan hngal hna seh tiin rawl ṭam hnianghnuang in an i chawk. Hihi philh hlah u! Annih nih cun an laksawng kha tling tein an hmuh cang. ¹⁷ Rawl nan ulh tikah nan hmai i phiah u law nan sam i hriat u, ¹⁸ cuticun midang nih rawl an ul ti awk kha an in hngal kho hna lai lo i hmuh khawh lomi nan Pa lawnglawng nih a hngalh lai. Cun a thli tein nan tuahmi a hmutu nan Pa nih laksawng an pek hna lai. ¹⁹ "Rungrul le cirik nih an ei khawh i mifir nih an baoh i an fir khawhnak vawlei ah hin nan chaw va khong hlah u. ²⁰ Rungrul le cirik nih an ei khawh lonak le mifir nih an baoh i an fir khawh lonak vancung tu ah khin nan chaw cu va khong u. ²¹ Zeicahtiah nan chaw a umnak ah nan lung zong a um ve lai. ²² Mit hi pum caah meiinn a si. Nan mit a ṭhat ahcun nan pum cu a dihlak in ceunak in a khat lai; ²³ sihmanhsehlaw nan mit kha a ṭhat lo ahcun, nan pum cu muihnak chungah a um lai. Cucaah nan chung i a ummi ceunak cu muihnak a si sual ahcun, cu muihnak cu a fak ngaingaimi muihnak a si lai. ²⁴ "Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangka cu an rian nan ṭuan kep kho lai lo. ²⁵ "Cucaah cun nan nunnak ding ca i nan herhmi rawl le ti kong ah le nan pum ca i nan herhmi hnipuan kong ah lungrethei awlokchong in va um hlah u, kan ti hna. A ngaingai ti ahcun, nunnak hi rawl nakin a biapi deuh lo maw? Cun pum zong hi hnipuan nakin a biapi deuh lo maw? ²⁶ A zuang lengmangmi va khi zoh tuah hna u: thlaici an tuh bal lo, rawl an ṭuan bal lo, buk zongah an rawn bal lo; sihmanhsehlaw vancung i a ummi nan Pa nih a zohkhenh ko hna. A si ah, nannih cu va nakin nan biapi deuh lo maw? ²⁷ Nan lungre a theih le nan awlok a chon thawngin nan nunnak tlawmte tal a sauter kho deuh mi aho tal nan um maw? ²⁸ "Cucaah zeicahdah hnipuan kong ah nan lungre a theih? Ramlak i a khomi lili pangpar khi zoh tuah hna ngat u: rian an ṭuan lo, hnipuan zong zeihmanh an i tah lo. ²⁹ Sihmanhsehlaw hihi kan chimh hna: Siangpahrang Solomon hmanh kha, kha tluk khan a rum ko nain hi pangpar hna lak i pakhat tluk hmanh hin aa dawhmi hnipuan a ngei lo. ³⁰ Sihmanhsehlaw ramlak ramkung, nihin ah a hring i thaizing ah meichung i an paihmi ramkung hna, a thuamhtu cu Pathian pei a si cu. Amah nih cun nannih chinchin cu thuamh loin an um hna hnga maw? Nan zumhnak a va hme hringhran dah! ³¹ Cucaah, ’Khuazei in dah ka ei awk ka rawl cu ka hmuh lai, ka din awk cu ka hmuh lai, ka hnipuan cu ka hmuh lai,’ tiin lungrethei in um hlah ngat u. ³² (Hi thil hna cu Pathian bia lomi hna nih an lungre an i theihpi zungzalmi pei an si cu.) Vancung khua i a ummi nan Pa nih hi thil vialte cu nan herh dih hna ti kha a hngalh ko. ³³ Cucaah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek ṭhiamṭhiam ko hna lai. ³⁴ Cucaah thaizing nih lungretheihnak cu a za in aa ngeih ve ko lai. Ni khat nih a chuahpimi harnak cung i a dang chonh chih lengmang hi a herh lo.

¹ "Pathian nih an soi nakhnga lo, mi va soi hna hlah — ² midang na soi hna ning te khan Pathian nih an soi lai i midang cung i na hmanmi tahnak te kha Pathian nih na cungah a hman ve lai. ³ Na mit chung i a ummi thingtan kha ruat ṭung loin zeicahdah na unau mit chung i a ummi mithnawmte kha na zoh? ⁴ Na mit chung i thingtan a um ko buin zeitindah na unau cu, ’Na mit hnawm cu in coihpiak ning,’ na ti ngam? ⁵ Mi depdepa, na mit chung i thingtan kha chuah hmasa law pei, na unau mithnawm cu fiang tein na hmuh lai i na coihpiak khawh lai cu! ⁶ "A thiangmi thil cu uico kha va pe hna hlah u — an i let lai i nanmah lehlam kha an in seh hna lai. Nan lungvar cu vok hmaiah va thla hlah u, vok nih cun a lamh in an lamh men ko lai. ⁷ "Hal u law an in pek hna lai, kawl u law nan hmuh lai, king u law innka cu an in hunpiak hna lai. ⁸ Zeicahtiah a halmi paoh cu pek an si lai i a kawlmi paoh nih cun an hmuh lai i a kingtu paoh cu innka kha hunpiak an si lai. ⁹ Nan fale nih changreu an in hal hna tikah lung a pemi nan um hnga maw? ¹⁰ Nga in hal hna seh law, rul nan pe hna hnga maw? ¹¹ Hi tlukin nan ṭhalo ko nain, nanmah hmanh nih nan fale kha thil ṭha pek nan hngalh ahcun, vancung i a ummi nan Pa chinchin nih cun zeitluk in dah thil ṭha cu a halmi kha a pek chinchin hna lai! ¹² "Mi nih kan cungah tuah hna seh ti nan duh bantuk khan midang cung zongah va tuah ve u; hihi Moses Nawlbia le profet hna cawnpiaknak an sullam cu a si. ¹³ "Kutka bi chungah cun lut tuah u, zeitintiah Hell ah a kalmi lam cu a kau i a fawi i mi tampi nih an zulh. ¹⁴ Nunnak a phanmi lam cu a har i a kutka cu a bi i a hmumi cu tlawmte lawng an si. ¹⁵ "Nal profet kha i ralring hna u, nan sin an rat ah cun tuu bantukin an i umter, sihmanhsehlaw an chunglei cu cenghngia hrang an si. ¹⁶ Annih cu an theitlai khan nan rak hngalh ko hna lai. Khohmung nih mitsur thei a tlai bal lo i saihmurhling nih theipi a tlai bal lo. ¹⁷ A ngan a dammi thingkung nih thei ṭha a tlai i kung chia nih thei ṭhalo a tlai tawn. ¹⁸ A ngan a dammi kung nih theichia a tlai kho lo i a kung a ṭha lomi nih thei ṭha a tlai kho ve lo. ¹⁹ Thei ṭha a tlai lomi cu hau i mei chung i paih an si tawn. ²⁰ Cuticun nal profet hna cu an theitlai khan nan hngalh ko hna lai. ²¹ " ’Bawipa, Bawipa,’ tiah a ka timi paoh in Vancung Pennak chungah an lut dih lai, tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai. ²² Cu Ni cu a phak tikah, mi tampi nih keimah cu, ’Bawipa, Bawipa! Na min in Pathian bia kha kan chim i na min in khuachia kha tampi kan ṭhawl hna i khuaruahharnak tampi kan tuah hna,’ an ti lai. ²³ Khi tikah annih cu ka thawh hna lai i, ’Nannih cu aho nan si kha kan hngal bal hna lo. Kal ko u, ṭhat lonak a tuahtu hna,’ tiah ka ti hna lai. ²⁴ "Cucaah hi ka bia a thei i a zulmi cu lung cungah a inn a sami mifimpa bantuk a si. ²⁵ Ruah a sur, ti a lian, thlitu nih fak piin a hranh. Sihmanhsehlaw lung cung i sakmi a si caah khan a pur lo. ²⁶ "Sihmanhsehlaw hi ka bia a thei i a zul lomi cu thetse cungah a inn a sami mihrutpa bantuk a si. ²⁷ Ruah a sur, ti a lian, thlitu nih fak piin a hranh i a pur; rawk cikcek in a tlu," tiah a ti. ²⁸ Jesuh nih hi bia vialte cu a chimh dih hna tikah mizapi cu a cawnpiak hna ning kha an khuaruah a har, ²⁹ zeicahtiah phungbia cawnpiaktu saya hna bantuk khan si loin hmual ngei ngaiin a cawnpiak hna.

¹ Jesuh cu tlang cung khan a rung ṭum i mi tampi nih an zulh. ² Cun thinghmuipa pakhat kha a ra i a hmaiah khuk bil in a kun i, "Bawipa, na duh ahcun na ka damter khawh ko," tiah a ti. ³ Jesuh nih a hei banh i a tongh i, "Ka duh. Thiang ko cang," tiah a ti. Chikkhatte ah a zawtnak khan a thiang. ⁴ Cun Jesuh nih amah cu a thawh i, "Ka bia ngai, ahohmanh chim hna hlah, sihmanhsehlaw tlangbawi sinah khan ding teomao in va kal law rak in zoh seh. Cun mizapi sinah ka thiang cang, ti langhternak caah Moses nih tuah awk a timi raithawinak kha va tuah," tiah a ti. ⁵ Jesuh cu Kapernaum khua i a va luh ah khan Rom ralbawi pakhat nih a rak don i, ⁶ "Bawipa, ka sinumpa cu a zaw i inn ah a ril ko, a cawl zong a cawlcang kho lo i a zual ngaingai ko," tiah a ti. ⁷ Jesuh nih cun, "Ka ra lai i ka damter lai," tiah a ti. ⁸ Ralbawipa nih cun, "Aa, bawipa, si hlah! Nang ka inn i rat dingah hin kaa tlak lo. Nawl hei pe law ka sinumpa cu a dam ko lai. ⁹ Kei zong ka cunglei bawi nawl tang i a ummi ka si i ka tang zongah ralkap an um ve. Pakhat cu, ’Kal,’ ka ti i a kal ve ko, cun a dang pakhat cu, ’Ra,’ ka ti i a ra ve ko; cun ka sal cu, ’Hihi tuah,’ ka ti i a tuah ve ko," tiah a leh. ¹⁰ Cu bia cu Jesuh nih a theih tikah a khuaruah a har i a zulmi mizapi hna cu, Hi pa bantukin zumhnak a ngeimi Israel mi hna lakah ahohmanh ka hmu rih hna lo. ¹¹ Hihi va philh hlah u: Nichuahlei le nitlaklei in mi tampi an ra te lai i Vancung Pennak chungah cun rawldanghnak cabuai ah Abraham le Isak le Jakob hna he tiah an ṭhu ṭi lai. ¹² Sihmanhsehlaw Vancung Pennak chung i a um ding a simi hna tu kha cu, khualeng muihnak ah hlonh an si lai i cuka ah cun an ṭap lai i an hacang an rial lai," tiah a ti. ¹³ Cun Jesuh nih ralbawipa cu a thawh i, "Inn ah va ṭin law na zumhmi cu tuahpiak na si lai," tiah a ti. Cun ralbawi sal cu, cu caan hrimhrim ah cun a rak dam. ¹⁴ Jesuh cu Peter inn ah khan a va kal i Peter nupi nu cu a rak zaw i ihkhun ah khan a rak ril ko. ¹⁵ A kut kha a vun tongh i a taklin cu a dai i a tho i annih kha a bultawl hna. ¹⁶ Zanlei sang a si tikah khuavang ngeimi tampi kha Jesuh sinah cun an ratpi hna. Bia kaa khat in thlarau ṭhalo kha a ṭhawl hna i a zawmi vialte kha a damter hna. ¹⁷ Hi a tuahmi hi, profet Isaiah nih, "Amah hrimhrim nih kan zawtnak kha a phorh i kan dam lonak kha a kalpi," tiin a rak chimmi tlinternak caah khan a si. ¹⁸ A pawngkam i a ummi mizapi cu Jesuh nih a hmuh hna tikah, a zultu hna cu rili khattelei ral i rak kal kha a fial hna. ¹⁹ Phungbia cawnpiaktu saya pakhat kha a sinah a ra i, "Saya, na kalnak paoh ah kan zulh lai," tiah a ti. ²⁰ Jesuh nih cun, "Cenghngia nih kua an ngei i vate cu bu an ngei, sihmanhsehlaw Mi Fapa cu riahnak hmun hmanh a ngei lo," tiah a leh. ²¹ Amah zultu a simi, midang pakhat nih khan, "Bawipa, va kir ta ning law ka pa kha va vui ta ning," tiah a ti. ²² Jesuh nih cun, "Ka zul ko, mithi nih an mithi cu rak vui ko hna seh," tiah a leh. ²³ Jesuh cu lawng chungah cun a lut i a zultu nih khan an zulh. ²⁴ Chikkhatte ah khin thlichia a hrang ciammam i tilet nih lawng cu a khuh. Sihmanhsehlaw Jesuh cu aa hngilh. ²⁵ A zultu cu a sinah khan an va kal i an ṭhangh i, "Bawipa, kan khamh tuah. Kan thi dih cang lai hi ta," an ti. ²⁶ Jesuh nih cun, "Zeicahdah cu ti lawmmam cun nan thin a phan? Nan hei ka bochan lo hringhran dah!" tiah a leh hna. Cun a tho i thli le tilet cu nawl a pek hna i dai zirziar tein rili cu a um ṭhan. ²⁷ An dihlak in an khuaruah a har i, "Hi pa hi zei bantuk minung dah a si? Thlichia le tilet hmanh nih dahngai a bia an ngaih ko hi," an ti. ²⁸ Jesuh cu Rili khattelei ral Gadarin mi hna ram kha a va phan i, miruak vuinak lungkua chungin a ra chuakmi mi pahnih nih an rak ton. Hi hna hi an chung i khuachia a ngeimi an si i ṭih an nun tuk hringhran caah cu lam ah cun ahohmanh an kal ngam lo. ²⁹ Hmakhatte ah khin an ai i, "Pathian Fapa, zeidah na kan duhnak a um? A caan a tlin hlanah kannih dantat awkah na ra maw?" tiah an ti. ³⁰ Cuka in aa hlat lem lomi hmun ah khin vok kha an tlong lulhmalh ko. ³¹ Khuachia nih cun Jesuh cu, "Kannih cu na kan chuah ding a si ahcun, vok chung tal ah khin kan luhter," tiah an nawl. ³² Jesuh nih cun, "Va kal u," tiah a ti hna i cucaah an chuak i vok chungah cun an lut. Vok cu an run ningpi in lungpang cun an zuang ciammam i rili chungah cun an tla i an thi dih. ³³ Vok zohkhenhtu hna cu khulrang in khua ah cun an va le i cu kong cu le khuachia nih a tuahmi hna kong kha an va chimh hna. ³⁴ Cucaah khua chung mi vialte cu Jesuh ton awkah khan an i thawh i an hmuh tikah, kan ram hin kir ko, tiah an nawl.

¹ Jesuh cu lawng chungah khan a lut i rili cung cun an kir ṭhan i amah a khua kha a phan. ² A sinah khan mizengpa pakhat kha, a ihkhun in an rak zawnh. Jesuh nih an zumhnak kha a hmuh tikah mizeng pa cu, "Ka fapa, na lung dong hlah! Na sualnak cu ngaihthiam na si cang," tiah a ti. ³ Cu tikah Phungbia cawnpiaktu saya a cheukhat nih khan, "Hi pa hi Pathian serhsat in bia a chim," an ti. ⁴ Jesuh nih an ruahmi kha a hngalh i, "Zeicahdah cu bantuk thil ṭhalo cu nan ruah? ⁵ ’Na sualnak cu ngaihthiam na si cang,’ ti cu maw a fawi deuh, ’Tho law kal tuah,’ ti dah a fawi deuh? ⁶ Mi Fapa nih vawlei cungah hin sual ngaihthiam khawhnak a ngei ti kha kan hngalhter hna lai," a ti i cucaah mizengpa cu, "Tho law, na ihkhun kha i put law inn ah va ṭin," tiah a ti. ⁷ Mipa cu a tho i inn ah cun a ṭin. ⁸ Cucu mi nih khan an hmuh tikah an thin a phang i cu bantuk nawlngeihnak cu Pathian nih minung kha a pek hna caah Pathian cu an thangṭhat. ⁹ Cuka hmun cun Jesuh cu a chuak i a kalpah ah khan ngunkhuai khawltu Matthai a zung i a rak ṭhut ko kha a hmuh. Amah cu, "Ka zul," tiah a ti. Matthai cu a tho i a zulh. ¹⁰ Jesuh cu Matthai inn i zanriah an ei lioah khan ngunkhuai khawltu tampi hna le misual mi hna nih khan amah le a zultu hna cu zanriah an dumpi hna. ¹¹ Mah cucu Farasi mi nih khan an hmuh hna i cucaah a zultu cu an thawh hna i, "Zeicahdah nan sayapa hi ngunkhuai khawltu hna le misual hna he rawl an ei ṭi?" tiah an ti. ¹² Jesuh nih cun a theih hna i, "A dammi nih cun sibawi an herh lo, a zawmi lawng nih khan an herh. ¹³ Va kal u law, ’Saram thawinak si loin ka duhmi cu zaangfahnak lungthin kha a si,’ tiah Cathiang chungah aa ṭialmi hi a sullam va ruat tuah u. Miding mi pawl kawh awkah ka rat ṭung lo, misual mi hna kawh awkah pei ka rat ko cu," tiah a ti. ¹⁴ Khi hnuah Tipil petu Johan zultu pawl kha Jesuh sinah cun an ra i, "Zeicahdah kannih le Farasi mi hna cu atu le atu rawl kan ul i nang na zultu hna cu an ulh kun lo," tiah an hal. ¹⁵ Jesuh nih cun, "Nupi ṭhit rawl danghnak puai ah, nupi ṭhitu a um chungah cun zeitindah an sawmmi hna cu ngaihchia in an um lai? Sihmanhsehlaw nupi ṭhitu an sinin aa ṭhen caan kha a phan ve te lai i cu tikah cun rawl cu an ul te ko lai. ¹⁶ "Ahohmanh nih angki hnawh cia kha ti khat hmanh a tla rih lomi thil thar in an belh bal lo, zeicahtiah cu ti i an belh ahcun an belhnak puan nih khan a thleh chin lai i a awng kha a kau chin lai. ¹⁷ Cun a hlunmi saphawcua chungah mitsur hang thar an rawn bal lo, cu ti an tuah ahcun a saphaw kha a kek lai i a mitsur hang kha a chuak dih lai i a saphaw kha a rawk lai. Cucaah mitsur hang thar cu saphawcua a tharmi chung tu ah an rawn tawn i cuticun an pahnih in ṭha tein an um," tiah a ti. ¹⁸ Cu bia cu Jesuh nih a chimh lio hna ah khan, Judah mi lak i bawi pakhat a simi kha a sinah a ra i a hmaiah a khuk aa bil i, "Tunaite ah khan ka fanu a thi, sihmanhsehlaw ra law a cungah na kut ra chia law a nung ko lai," tiah a ti. ¹⁹ Cucaah Jesuh cu a tho i amah cu a zulh i a zultu hna zong kha a sinah cun an kal ve. ²⁰ Cu lioah cun, nu pakhat, thi chuah zawtnak in kum hleihnih tiang a zaw cangmi kha a hnulei in a ra i a puan parte kha a tongh. ²¹ "A puan hmanh kha ka tongh khawh ahcun ka dam ko lai," tiah a lungchung in a ti. ²² Jesuh cu a hun i mer i minu cu a hmuh i, "Ka fanu, na thinphang hlah! Na ka zumhnak nih an damter cang," tiah a ti. Cu caan te ah cun minu cu a dam colh. ²³ Cun Jesuh cu Judah mi bawi inn ah cun a lut. Mithi caah tingtang a tummi hna le a awn au mi kha a hmuh hna tikah, ²⁴ "Nan dihlak in chuak tuah u! Ngakchia nute hi a thih ṭung lo, aa hngilh i pei a si ko cu," tiah a ti hna. Annih nih an nihsawh, ²⁵ Mi kha an chuah dih cangka in Jesuh cu ngakchianu khaan chungah khan a vung lut i a kut in a vun tlaih i a tho. ²⁶ Cu thawng cu cuka hrawng ram vialte ah cun a thang dih. ²⁷ Cuka hmun cun Jesuh cu a chuak i a kalpah ah khan mitcaw pahnih nih an zulh. "David Fapa kan zaangfah tuah," tiah an au. ²⁸ Jesuh cu inn chung i a luh tikah khan mitcaw pahnih hna cu a sinah cun an ra i annih cu, "Hihi ka tuah khawh tiah nan zum maw?" tiah a rak hal hna. Annih nih, "Asi, na tuah khawh tiah kan zumh bawipa," tiah an leh. ²⁹ Cun Jesuh nih an mit kha a tongh hna i, "Nan zumhning te cun si ko seh," tiah a ti i ³⁰ annih cu khua an hmu kho ṭhan. Annih cu Jesuh nih fak piin, "Hihi ahohmanh va chim hna hlah u," tiah a ti hna. ³¹ Sihmanhsehlaw an kal i Jesuh kong cu cuka hrawngah cun an thanh dih. ³² Mi kha an ṭian cuahmah lioah cun, khuachia nih a tuah ca i a holh kho lomipa pakhat kha Jesuh sinah cun an ratpi. ³³ A khuachia cu a chuah cangka in mipa cu a holh kho i mi vialte cu an khuaruah a har dih. "Hi bantuk thil hi Israel mi lakah kan hmu bal lo," an ti. ³⁴ Sihmanhsehlaw Farasi mi hna nih cun, "Khuachia ṭhawl khawhnak nawl a petu hi khuachia bawi a si," an ti. ³⁵ Cuticun Jesuh cu khuapi he khuate he a tlawng duahmah hna. An pumhnak inn ah khan a cawnpiak hna i Vancung Pennak kong Thawngṭha kha a chimh hna i a zaw a fakmi kip kha a damter hna. ³⁶ Mi zapi kha a hmuh hna tikah, khaltu a ngei lomi tuu bantukin lungrethei le awlokchong in an um kha a hmuh hna caah a zaang an fak ngaingai. ³⁷ Cucaah a zultu kha a thawh hna i, "Rawl ṭuan awk cu tampi a um ko, sihmanhsehlaw a ṭuantu ding cu tlawmte lawnglawng an si. ³⁸ Cucaah rawlṭuan uktu bawi sinah cun, rawl ṭuantu tam deuh a thlah hna nakhnga, thla va cam tuah u," a ti.

¹ Jesuh nih lamkal ah a thimmi hleihnih kha a auh hna i khuachia ṭhawl khawhnak le zawtnak fahnak vialte damter khawhnak nawl kha a pek hna. ² Hihi lamkal hleihnih hna an min cu a si: a hmasa bik ah Simon (Peter timi kha), cun a nau Andru; Zebedi fapa Jeim le a nau Johan; ³ Filip le Bartholomew; Thomas le ngunkhuai khawltu Matthai, Alfeas fapa Jeim, cun Tadias; ⁴ cun Phunṭanh Simon le Jesuh rawitu Judas Iskariot. ⁵ Jesuh nih mi pahleihnih kha a thlah hna i, "Jentail mi ram ah siseh, Samaria mi hna khua ah siseh, va kal hlah u. ⁶ Israel miphun chungin a tlaumi tuu hna sinah khan va kal u. ⁷ Cun, ’Vancung Pennak cu a nai cang,’ tiah va chim hna u. ⁸ A zawmi kha va damter hna u, mithi kha va thawhter hna u, thinghmui kha va thianter hna u, khuachia kha va ṭhawl hna u. Nannih nih man pek loin nan hmuh i man pek loin va pe ve hna u. ⁹ Nan zal ah sui tangka siseh, ngun tangka siseh, dar tangka siseh, i sanh hlah u. ¹⁰ Nan khualtlawnnak dingah cun rawl halnak zal siseh, angki khethuan siseh, kedan siseh, ṭhiangṭhunh siseh, i phorh hlah u. Rianṭuantu nih cun a herhmi thil cu a hmuh awk aa tlakmi a si ko. ¹¹ "Khuapi siseh, khuate siseh, nan phak tikah, tluninn an in awnhnak hna inn ah khan va kal u law cuka hmun in nan chuah hlantiang anmah cu va tlung ko hna u. ¹² Cun inn pakhatkhat ah nan luh tikah, ’Nan cungah daihnak um ko seh,’ nan ti lai. ¹³ Cuka inn i a ummi nih tluninn an in awnh hna ahcun daihnak in nan biakchawnh hnanak cu an cungah hmun ko seh; sihmanhsehlaw an in awnh hna lo ahcun nan biakchawnh hnanak cu i lak ṭhan u. ¹⁴ Cun innchungkhar pakhatkhat nih siseh, khua pakhatkhat nih siseh, an in tlunter duh hna lo ahcun, cuka hmun cu va kaltak u law nan ke i aa behmi leidip kha va thing u. ¹⁵ Mah hihi philh hlah u: Biaceih Ni ah Pathian nih, cu khuami nakcun Sodom le Gomorrah khuami kha a zaangfah deuh hna lai," tiah a ti. ¹⁶ "Ngai hmanh u! Cenghngia hrang rual lak i thlahmi tuu bantukin kan thlah hna. Cucaah rul bantukin vaa fim u law ṭhuro bantukin nan nun va nem u. ¹⁷ An in tlaih hna lai i zung ah an in chuahpi hna lai, pumhnak inn ah an in chuahpi hna lai i an in tuk hna lai cu caah vaa ralring u. ¹⁸ Uktu bawi hna hmai le siangpahrang hna hmaiah keimah ruangah an in chuahpi hna lai i annih cu le Jentail mi hna kha Thawngṭha kha nan chimh hna lai. ¹⁹ Nan bia an in ceih hna tikah zeidah ka chim lai, ti le zeitindah ka chim lai, ti kha nan khuaruah va har hlah u; a caan a phak tikah chim ding cu pek nan si te ko lai. ²⁰ Zeicahtiah nan chimmi bia cu nanmah bia a si lai lo; nan chung i bia a chimtu nan Pa Thlarau nih an pekmi hna bia a si lai. ²¹ "Mi nih anmah unau lila kha thah awkah mi an tlaihter hna lai, cun pale zong nih cu bantuk ṭhiamṭhiam in an fale cungah an tuah lai; fale zong nih khan an nule le an pale kha an doh hna lai i mi kha an thahter hna lai. ²² Mi kip nih nannih cu keimah ruangah an in huat hna lai, sihmanhsehlaw a dongh tiangin aa tlaih pengmi cu khamhnak nan hmu lai. ²³ Cun khua pakhat i an in hrem hna tikah, khua dang ah va zaam ko u. Hihi kan chimh hna: Mi Fapa a rat hlanah, Israel ram khua dihlak kha nan ṭol dih manh hna lai lo. ²⁴ "Siangngakchia cu ahohmanh a saya nakin a ngan deuh lo; sal zong a bawipa nakin a ngan deuh fawn lo. ²⁵ Cucaah siangngakchia caah a saya tluk si cu a za ko i sal caah a bawi tluk si kha a za ko. Innchungkhar i an lu cu Beelzebul ti a si ahcun, innchungkhar mi chinchin cu cu nak min chia deuh in pei auh an si lai cu," tiah a si. ²⁶ "Cucaah mi cu va ṭih hna hlah u. Khuhmi thil paoh kha hun dih an si ko lai i biathli vialte kha hngalh dih an si ko lai. ²⁷ Mui lak i kan chimhmi hna hi chun khua ceu ah va chim chin u, cun a thli in nan theihmi hi inn par in va au pi u. ²⁸ Pum cu a that kho ko nain thlarau a that kho lomi cu va ṭih hlah u; hell chungah pum he thlarau he a that khotu Pathian tu kha va ṭih u. ²⁹ Phaisa sen pakhat in pithlung pahnih nan cawk khawh, asinain khi pithlung pakhat hmanh kha nan Pa hngalh loin vawlei ah a tlong lo. ³⁰ Nannih chinchin cu nan lu cung sam hmanh kha a rel dih. ³¹ Cucaah nan thinphang hlah u: nannih cu pithlung tampi nakin tampi in nan sung deuh," tiah a ti. ³² "Amah mi ka si, tiah zapi hmaiah a phuang ngammi cu vancung khua i ka Pa hmaiah kei zong nih cuticun amah cu ka ti ve lai. ³³ Sihmanhsehlaw zapi hmaiah, amah mi ka si lo, tiah aa phehmi cu vancung khua i a ummi ka Pa hmaiah cuticun ka ti ve hna lai. ³⁴ "Vawlei cungah daihnak tlunter awkah a ra, tiah ka ruat hlah u, daihnak tlunter awkah ka ra lo, vainam tlunter awk tu ah ka ra. ³⁵ Ka ratnak chan cu fale hna le pale hna dohter awk, fanule hna le nule hna dohter awkah a si; ³⁶ nan ral ṭhalo bik hna cu nanmah innchungkhar chung mi lila an si lai. ³⁷ "Ahohmanh a nu siseh, a pa siseh, keimah nakin a daw deuhmi cu ka mi si awk aa tlak lo; ahohmanh a fapa siseh, a fanu siseh, keimah nakin a daw deuhmi cu ka mi si awk aa tlak lo. ³⁸ Ahohmanh a vailam tahnak kha aa put i ka hnu in a ka zul lomi cu ka mi si awk aa tlak lo. ³⁹ Ahohmanh a nunnak humhak a duhmi nih cun a nunnak cu a sung lai i keimah ruangah a nunnak a sungmi nih cun a nunnak cu a hmuh lai. ⁴⁰ "Nannih an conglawmhtu hna paoh nih keimah an ka conglawmh a si i keimah a ka conglawmhtu paoh nih a ka thlahtu a conglawmh a si. ⁴¹ Pathian lamkaltu cu Pathian lamkaltu a si ruangah a rak conglawmhtu paoh cu a laksawng kha aa hrawm ve lai; cun miṭha cu miṭha an si ruangah a rak conglawmhtu paoh cu miṭhapa laksawng kha aa hrawm ve lai. ⁴² Cun hihi philh hlah u! A ka zultu hna hi a ka zultu an si ruangah anmah lak i a nauta bik hmanh kha tikik hrai khat a pemi cu, laksawng kha a hmu hrimhrim lai," tiah a ti.

¹ Jesuh nih a zultu pahleihnih kha hi bia hi a chimh dih hna tikah, cuka hmun cun a chuak i cuka hrawng i a ummi khua ah khan a tlawng i a cawnpiak hna i phung a chimh hna. ² Tipil petu Johan nih thong chungin Khrih rianṭuannak kong kha a rak theih tikah a zultu tlawmpal kha a sinah a hei thlah hna i, ³ " ’A ra dingmi cu nangmah hi na si maw, asiloah, midang dah kan hngah rih lai,’ tiah va hal u," a ti hna. ⁴ Jesuh nih cun, "Nan hmuhmi le nan theihmi hi Johan cu va chim ko u: ⁵ mitcaw nih khua an hmuhnak le kebei an kal khawhnak le mithinghmui an thiannak le hnachet nih khua an theihnak le mithi thawhṭhan an sinak le misifak mi hna sinah Thawngṭha chim a sinak hi va chim ko u. ⁶ Keimah kong ah lung awṭawmnak zeihmanh a ngei lomi cu a caah lunglawmh awk a va si dah," tiah a leh hna. ⁷ Johan zultu pawl cu an kir tikah khan Jesuh nih Johan kong cu mizapi kha a chimh hna. "Thetse ram i Johan sin i nan va kal ah khan zeidah hmuh nan i ruah? Thli nih a kuiter lengmangmi ram hnah maw? ⁸ Zei ko dah zoh awkah nan va kal? Puan dawhdawh in aa thuammi hna zoh awkah maw? Puan dawhdawh in aa thuammi cu bawi inn ah pei an um tawn cu! ⁹ Zei set dah hmuh nan i ruahchihmi cu a si, ka chim tuah u. Profet maw? Profet nakin biapi deuh a simi pei nan hmuh cang hi! ¹⁰ Johan hi Cathiang nih, ’Hika ah hin ka lamkaltu cu a um ko; Amah cu nangmah lam sialtu dingah na hmaiah ka thlah lai, tiah Pathian nih a ti,’ tiah a timi kha a si. ¹¹ Hihi i cinken hmanh u: nu chungin a chuakmi lakah vawlei cungah hin Johan tlukin a nganmi ahohmanh an um lo; sihmanhsehlaw Vancung Pennak chung i a ummi hna lak i a hme bik hmanh Johan nakin a ngan deuh. ¹² Johan nih a rat ri in nihin ni tiang Vancung Pennak hi tonghmang loin tuknak a ing i tonghmang loin khua a sami hna nih cun lak an timh. ¹³ Johan caan tiang khan profet vialte hna le Moses phungbia nih vancung Pennak kong hi an chim; ¹⁴ cun cu bia cu nan zumh duh a si ahcun John hi Elijah kha a si i a ra lai tiah rak timi kha a si. ¹⁵ Cucaah hna nan ngeih ahcun, thei ko u! ¹⁶ "Tuchan mi hi zei he dah ka tahchunh hna hnga? Chawdawr tlang i lente aa celhmi ngakchia ko khi an lo, ka ti. Phu khat nih phu dang kha ¹⁷ ’Nupi ṭhitnak hla kha kan in tumpiak hna, asinain nan lam duh lo. Mithi ṭahnak hla kan in sakpiak hna, asinain nan ṭap duh fawn lo,’ tiah an hauh hna. ¹⁸ Johan cu a ra i rawl a ul i zu zong a ding lo, asinain a mi kip nih, ’Khuavang a ngei,’ an ti. ¹⁹ Mi Fapa cu a ra ve i a ei a ding i a mi kip nih, ’Hi pa hi zohhmanh u, misaram le mizuram, ngunkhuai khawltu hna le misual hna hawikom hi,’ an ti. Sihmanhsehlaw Pathian fimnak cu ahmaan tiah a theitlai nih khan a langhter ko," a ti. ²⁰ Cun Jesuh nih khuaruahharnak tam bik a tuahnak khua hna kha, an chung i a ummi hna nih an ziaza an thlen hlei lo caah a sik hna, ²¹ "Khorazin khua, na caah ngaihchia a va si dah. Bethsaida khua zong na caah ngaihchia a va si dah. Nan chung i khuaruahharnak ka tuahmi vialte hi Tair le Sidon khua ah rak tuah hna ning law, cu khua mi hna cu puanchia i aih le vutcam i phulh in an i ngaihchih diam cang hnga! ²² Cucaah hihi philh hlah u, Biaceih Ni ah cun Pathian nih Tair le Sidon khuami hna cu nanmah nakin a zaangfah deuh hna lai. ²³ Cun nang Kapernaum khua. Van ah i hlorhning ti na duh. Sihmanhsehlaw hell chungah vun hlonh na si lai. Zeicahtiah na chungah ka tuahmi khuaruahharnak vialte hi Sodom khua chungah khan tuah rak si hna seh law, nihin ni tiang hin a hmun ve ko rih hnga. ²⁴ Cucaah hihi philh hlah. Biaceih Ni ah cun Pathian nih Sodom khua cu nangmah nakin a zaangfah deuh lai," a ti. ²⁵ Khi caan ah khan Jesuh nih aa thawh i, "Maw ka Pa, van le vawlei a uktu. A fimmi le cathiammi hna sinin na thuhmi kha cathiam lomi hna sinah na langhter caah na cungah ka lawm. ²⁶ Asi, ka Pa, cucu nangmah nih siseh ti na duhningte a si. ²⁷ Ka Pa nih zeizong vialte kha ka kut chungah a ka pek dih. Pa dah ti lo nih cun ahohmanh nih Fapa kha an ka hngal lo i Fapa le an sinah a phuanmi hna dah ti lo nih cun ahohmanh nih Pa kha an hngal lo. ²⁸ "Rethei le thilrit mi vialte hna, ka sinah ra tuah u, dinhnak kan pek hna lai. ²⁹ Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. ³⁰ Ka seihnam cu a bei a nuam i ka thil cu a zaang," tiah a ti.

¹ Cu hnu tlawmpal ah khin Jesuh cu Sabbath ni ah lo kha tanpah in a kal. A zultu hna cu an rawl a ṭam i cucaah favui kha an zun i a fang kha an ei. ² Cucu Farasi mi nih an hmuh hna tikah Jesuh cu an thawh i, "Zohhmanh, Sabbath ni ah tuah lo ding timi kha na zultu hna nih an tuah," an ti. ³ Jesuh nih cun, "David le a mi hna cu an rawl a ṭam tikah khan, David nih zeidah a rak tuah, ti kha nan rel bal lo maw? ⁴ Pathian inn chungah pei a lut i changreu thiang cu a ei kha. Kha changreu kha amah nih siseh, a mi hna zong nih siseh, an ei awk a si ṭung lo. Tlangbawi lawnglawng nih pei an ei phung a si kha. ⁵ Cu pinah, Sabbath ni fate tlangbawi hna nih biakinn chungah Sabbath phunglam kha an buar lengmang nain an sual lo timi kha Moses Nawlbia chungah nan rel bal lo maw? ⁶ A ngaingai ti ahcun, biakinn nakin a ngan deuhmi pei hika ah hin a um cu. ⁷ Cathiang nih, ’Ka duhmi cu sa in tuahmi thawinak hi si loin zaangfahnak a si,’ tiah a timi kha a sullam rak hngal u law cu, a sual lomi kha sual nan phaw hna hnga lo; ⁸ zeicahtiah Mi Fapa cu Sabbath cung bawi pei a si cu," tiah a ti. ⁹ Jesuh cu hmun dang ah a kal i an pumhnak inn ah khan a lut. ¹⁰ Cuka ah cun a kut a zengmipa pakhat a rak um. Khika i a ummi hna lakah khan Jesuh cu sualphawt a duhmi an um caah amah cu, "Sabbath ni ah hin mi damter phung a si maw si lo?" tiah an hal. ¹¹ Jesuh nih annih cu, "Abiana ah nan tuu pakhatkhat khor chungah Sabbath ni ah tla sual seh law, chuah loin maw nan um ko hnga? ¹² A ngaingai ti ahcun, mi cu tuu nakin a let tam piin a sung deuh! Cucaah Sabbath ni ah hin ṭhatnak cu tuah phung a si ko," tiah a ti. ¹³ Cun mipa leiah khan a hei i mer i, "Na kut kha samh tuah," tiah a ti. A samh i khattelei kut bantukte khan a dam ko. ¹⁴ Cun Farasi mi hna cu an kal i Jesuh thah khawhnak ding khua kha an khang. ¹⁵ Cucu Jesuh nih a theih tikah cuka hmun cun lo diam in a kal i mi tampi nih an zulh. A zawmi vialte kha a damter hna i ¹⁶ amah kong kha midang nan chim hna lai lo, tiah a thlauh hna. ¹⁷ Cuti in a tuah cu Pathian nih Isaiah kaa in: ¹⁸ "Hika i a ummi hi ka thimmi ka sal a si. Ka dawt i a cung i ka lung a tlingmi a si. Amah cungah cun ka Thlarau kha ka chiah lai i miphun vialte hna sinah ka biading kha a thanh hna lai. ¹⁹ Bia kha a al len hna lai lo i a au zong a au len lai lo. ²⁰ Dinnak kha teinak ah a phakter hlantiang a kiakmi phaikung kha i hlang koin a khiak lai lo i a mit dengmangmi meiinn kha a hmit lai lo. ²¹ Amah cu miphun vialte nih an i bochan lai,’ tiah a timi kha tlinternak caah a si. ²² Cun Jesuh sinah cun, mipa pakhat khuachia nih a tuah ruangah a mit a caw i a holh kho lomi kha an ratpi. Jesuh nih cun a rak damter i cucaah a holh kho i khua zong a hmu kho. ²³ Mizapi cu an khuaruah a har i, "Hi pa hi David fapa a si sual hnga maw?" an ti. ²⁴ Sihmanhsehlaw cu bia cu Farasi mi nih an theih tikah, annih tu nih cun, "Hi pa nih khuachia a ṭhawl khawh hna cu an bawipa Beelzebul nih a bawmh caah a si," an ti. ²⁵ An lung chung i a ummi ruahnak cu Jesuh nih a hngalh caah annih cu, "Ram pakhat cu a chungah anmah le anmah aa domi bu an um ahcun cu ram cu saupi a hmun kho lai lo. Cun khua pakhatkhat zong a chungah anmah le anmah aa domi bu an um ahcun, a dir kho lai lo. ²⁶ Cucaah Satan pennak chungah hin bu khat le bu khat an i doh ahcun cu pennak cu aa ṭhen dih cang a si ko caah tuan te ah a rawk ko lai. ²⁷ Nannih nih nan ka thawh i khuachia ka ṭhawl khawh hna cu Beelzebul nih ṭhawl khawhnak nawl kha a pek caah a si, nan ka ti. Cucu va si seh law, nanmah zultu hna kha tah aho nih dah ṭhawl khawhnak kha an pek hna? Nanmah zultu lila hna i nan tuahnak nih pei nan palhnak cu an langhter ko hi. ²⁸ Nan timi hi a si lo, khuachia ṭhawl khawhnak a ka petu hi Beelzebul si loin Pathian Thlarau a si i cu nih cun Pathian Pennak cu nan sin a phan cang ti kha a langhter. ²⁹ "Cuhleiah, zeitindah miṭhawngpa inn cu amah kha an ṭem hmasa lo ah, aho nih dah an baoh khawh lai i a thilri cu an lak khawh lai? ³⁰ "Keimah a ka ṭanh lomi cu a ka ralmi an si; pumhkhawmh a ka bawm lomi cu ṭhektu an si. ³¹ Cucaah hihi kan chimh hna: minung hi sualnak zeipaoh an tuahmi le thil ṭhalo a chimmi cu ngaihthiam khawh an si ko lai; sihmanhsehlaw Thiang Thlarau ralchanh in bia ṭhalo a chimmi cu tu chan ah siseh, hmailei chan ah siseh, ngaihthiam khawh an si lai lo. ³² Mi Fapa ralchanh in bia ṭhalo a chimmi cu ngaihthiam khawh an si ko lai; sihmanhsehlaw Thiang Thlarau ralchanh in bia ṭhalo a chimmi cu tu chan ah siseh, hmailei chan ah siseh, ngaihthiam khawh an si lai lo. ³³ "Thingkung cu a kung na ṭhatter ahcun a thei a ṭha, a kung na chiatter ahcun a thei a chia. Thingkung cu a tlai in hngalh khawh a si. ³⁴ Rul hna, zeitindah miṭhalo nan si ahcun nan kaa in bia ṭha cu a chuah khawh lai? Kaa nih cun lungchung i a khatmi kha pei a chim cu. ³⁵ Miṭha nih cun thil ṭha aa khonmi chung khan thil ṭha a chuah hna i miṭhalo nih cun thil ṭhalo aa khonmi chung khan thil ṭhalo a chuah hna. ³⁶ "Hihi kan chimh hna: Nan kaa in a chuakmi bia, ruah setsai loin nan chimmi bia vialte kha, zeicahdah kha ti khan ka rak chim, tiah Biaceih Ni ah cun nan ti a hau te lai. ³⁷ Zeicahtiah nanmah bia lila in nan luatnak a si lai i nanmah bia lila in sualphawt nan si lai," tiah a ti. ³⁸ Cu tikah Phungbia cawnpiaktu saya tlawmpal hna le Farasi mi tlawmpal hna nih khan an hun thawh i, "Saya, khuaruahharnak pakhat in kan tuahpiak law kan duh ko hnga," an ti. ³⁹ Jesuh nih cun a thawh hna i, "Tu chan mi hi nan va ṭha loin Pathian zei ah nan hei rel lo hringhran dah. Khuaruahharnak pakhat in tuah, nan ka ti. Ka tuah lai lo. Profet Jonah khuaruahharnak dah ti lo kha cu khuaruahharnak zeihmanh kan tuahpiak hna lai lo. ⁴⁰ Ngapi chungah Jonah cu ni thum le zan thum a um bantuk khan Mi Fapa zong cu vawlei chungah ni thum le zan thum a um ve lai. ⁴¹ Biaceih Ni ah cun Nineveh khua mi hna kha, annih cu Jonah nih phung a chimh hna tikah an sualnak kha an i ngaihchih caah, an dir lai i sual an in phawt hna lai; hihi kan chimh hna: Jonah nakin a ngan deuhmi pei hika ah hin a um cu! ⁴² Biaceih Ni ah cun Thlanglei Siangpahrangnu kha a dir lai i sual an phawt hna lai, zeicahtiah anih cu vanhramdeng in a ra riangmang i Solomon fimnak kha a hung zoh; atu hi Solomon nakin a ngan deuhmi hika ah hin a um," tiah a ti hna. ⁴³ "Thlarau ṭhalo pakhat cu minung chungin a chuah tikah ram rocar ah khan dinhnak hmun kawl ah a vak lengmang. A hmuh khawh lo caah ⁴⁴ aa thawh i, "Ka chuahtakmi ka inn ah khan ka va kir ṭhan tuah lai," tiah a ti. Cuticun a va kir ṭhan i inn cu lawng hirhiar tein a rak um i thiang tein a rak i phiah kha a hmuh. ⁴⁵ Cu tikah a kal ṭhan i amah nakin a chia deuhmi thlarau pasarih kha a vaa sawm hna i an ra i cuka ah cun an um; a donghnak ah cun cu pa umtuning cu a hlan nakkhan a chia deuh. Cuticun atu chan, chan ṭhalo, umtuning ding hi a si lai," tiah a ti. ⁴⁶ Jesuh cu mizapi sinah bia a chim lengmang lioah khan a nu le a naule kha an ra. Lengah khan an dir i chawnh kan duh, tiah an ti. ⁴⁷ Cuka i a ummi aho nih dik, "Na nu le na naule cu lengah an dir ko i chawnh an in duh," tiah a hei chimh. ⁴⁸ Jesuh nih cun, "Ahodah ka nu cu a si? Ahodah ka naule cu an si?" tiah a leh i ⁴⁹ a zultu kha a hei sawh hna i, "Zohhmanh u, hi hna hi ka nu le ka naule cu an si! ⁵⁰ Vancung i a ummi ka Pa nih tuah hna seh ti a duhmi a tuahmi paoh cu, ka nau le ka far le ka nu an si ko," tiah a ti.

¹ Cu ni ṭhiamṭhiam ah cun Jesuh cu inn cun a chuak i rili kamah khan a va kal i a ṭhu i a cawnpiak hna. ² A helhhumtu cu an tam tuk caah lawng chungah a lut i a ṭhu; mizapi cu rilikam ah khan an dir. ³ Thil tampi a cawnpiak hna i cu cawnpiaknak caah cun tahchunhnak bia a hman hna. ⁴ Aa thawh i, "Thlaici vorh ah mipa pakhat cu aa thawh. Lo chung i thlaici cu a vorh tikah a cheu cu lam hril ah an tla i cu hna cu vate nih an char hna. ⁵ Cun a cheu cu vawlei tlawmte lawng a umnak, lung tamnak hmun ah an tla. Vawlei kha a chah lo caah thlaici cu a kheu zau. ⁶ Ni a hung chuak i thlaikheu hme tete cu a hun emh hna tikah an hram kha a thuh lo caah an car zau. ⁷ Cun thlaici a cheu cu hling lakah an tla. Hling nih cun a zual hna i an ṭhang kho lo. ⁸ Sihmanhsehlaw thlaici a cheu cu vawlei ṭhatnak ah an tla i a let za khat, a let sawm ruk, a let sawm thum in an vui," a ti. ⁹ Cun Jesuh nih cun, "Hna nan ngeih ahcun thei ko uh," tiah a ti hna. ¹⁰ A zultu hna kha a sinah cun an hung kal i, "Bia na chimh hna tikah zeicahdah bianabia na hman?" an ti. ¹¹ Annih cu a leh hna i, "Vancung Pennak kong biathli hngalhnak cu nannih cu pek nan si cang, sihmanhsehlaw hi hna cu pek an si lo. ¹² Zeicahtiah a ngeimi cu hawi hleihvuanh awk a ngeih tiangin chap chin a si lai i a ngei lomi cu a ngeihmi hnihchunte hmanh kha lakpiak a si lai. ¹³ Annih sinah bianabia ka hmannak cu hihi a si: a zoh cu an zoh len ve ko, sihmanhsehlaw an hmu kho lo, a ngaih cu an ngaih len ve ko, sihmanhsehlaw an thei kho lo. ¹⁴ Cucaah cun profet Isaiah nih a rak chimmi kha an kong ah hin a tling. Zeitindah a ti ti ah cun: ’A ngaih cu nan ngaih len ko lai, sihmanhsehlaw a sullam nan hngal lai lo; A zoh cu nan i zoh sek ko lai, sihmanhsehlaw nan hmu kho lai lo. ¹⁵ Zeicahtiah cun, hi mi hna hi an lung a khong cang, an hna a pit i an mit kha an i chinh. Cuticun rak si hna hlah seh law cu an mit nih khua a hmuh hnga i an hna nih khua a theih hnga i an lung nih khua a hngalh ko hnga, Cun keimah leiah an i mer hnga i ka damter ko hna hnga, tiah Pathian nih a ti.’ ¹⁶ "Nannih tu cu, nan van a va ṭha thiam dah. Nan mit nih a hmuh i nan hna nih a theih. ¹⁷ Hihi philh hlah u: Nan hmuhmi le nan theihmi hi profet tampi hna le Pathian mi tampi hna nih hmuh le theih an duh na in an hmuh khawh lomi le an theih khawh lomi a si," tiah a ti hna. ¹⁸ "Cucaah hi bianabia sullam hi ngai tuah u. ¹⁹ Lam hril i a tlami thlaici cu Vancung Pennak kong kha a theih cu a thei i a sullam a hngal ṭung lo mi kha an si. An chung i tuhmi thlaici cu Mi Ṭhalopa nih khan a chuah dih. ²⁰ Lung tamnak hmun i a tlami thlaici cu Vancung Pennak kha a theih cangka i lungtho ngaiin a cohlangmi kha an si. ²¹ Sihmanhsehlaw an chungah hram a thlak lo caah saupi an rau lo. Cu kong i harnak le hremnak an hun ton tikah an i ngol zau. ²² Hling lak i a tlami thlaici cu Vancung Pennak kong kha a theih cu a thei i sihmanhsehlaw hi vawlei cung khuasak tintuknak kong i lungretheihnak le chaw le va duhnak nih cu bia cu a thah i thei a tlai lomi hna kha an si. ²³ Cun vawlei ṭhatnak hmun i a tlami thlaici cu Vancung Pennak kong kha a thei i a sullam zong a hngalmi kha an si. Thei kha an tlai i a cheu cu a let za khat in, a cheu cu a let sawm ruk in, a cheu cu a let sawm thum in an karh," tiah a ti. ²⁴ Jesuh nih tahchunhnak bia dang pakhat a chimh ṭhan hna. "Vancung Pennak cu a lo chung i thlaici ṭha a tuhmipa bantuk a si. ²⁵ Zan khat cu ral pakhat kha a ra i mi an i hngilh karah rawl ci lakah cun belh ci a vorh i lo diam in a kal. ²⁶ Rawl kung cu an hung ṭhang i rawl cu an hung vuih tikah belh zong cu an hung lang. ²⁷ Cu pa salle hna cu an ra i, ’Bawipa, na lo chung i na tuhmi kha thlaici ṭha an si ṭung, khuazei in dah belh hi an rat kun?’ an ti. ²⁸ ’Hi a tuahtu cu kan ral kha a si,’ tiah a leh hna. Annih nih, ’Belh cu kan va bawt hna lai maw?’ tiah an hal. ²⁹ Anih nih, ’Bot hlah, zeicahtiah belh nan bawhpah ah khan rawl kung zong kha nan bawh chih sual hna lai. ³⁰ Rawl kung le belh cu hmunkhat ah rawl ṭuan caan tiang ṭhang ṭi ko hna seh. Cun khi tikah rawl ṭuantu pawl cu ka thawh hna lai i: Belh kha bawt hmasa hna u law mei chung i paih awkah tom hna u; cun rawl kha ṭuan hna u law ka buk chungah rawn hna u, ka ti hna lai,’ a ti," tiah a ti. ³¹ Jesuh nih tahchunhnak bia a dang pakhat a chimh ṭhan hna. "Vancung Pennak cu mipa nih aa lak i a lo i a tuhmi anṭam ci bantuk a si. ³² Thlaici vialte lakah a hme bik a si, sihmanhsehlaw a ṭhan tikah anhringso kung vialte lakah a ngan bik a si. Thingkung ah a hung cang i a nge ah khan va zong nih bu an ser," tiah a ti. ³³ Jesuh nih tahchunhnak bia a dang a chimh hna. "Vancung Pennak cu thilnu he aa lo. Cu thilnu cu nu pakhat nih aa lak i changvut rel khat chungah a phulhmi nih cun changvut cu a ning piin a thawhter," tiah a ti. ³⁴ Cu thil vialte cu mizapi kha a chimh hna tikah Jesuh nih cun tahchunhnak kha a hman hna; tahchunhnak hmang loin an sinah zeihmanh a chim duh lo. ³⁵ Hiti in a chimh hna cu, profet nih a rak chimmi tlinternak caah khan a si. Profet nih a rak chimmi cu: ’An sin i bia ka chim tikah tahchunhnak bia ka hman lai; Vawlei ser hramthawk in hngalh bal lomi thil cu ka chimh hna lai,’ ti hi a si. ³⁶ Jesuh nih mizapi cu a kaltak hna i inn chungah a lut. A zultu cu a sinah khan an ra i, "Lo chung belh bianabia sullam kha kan chim tuah," an ti. ³⁷ Jesuh nih cun a leh hna i, "Thlaici ṭha a tuhtu cu Mi Fapa hi a si, ³⁸ lo cu vawlei hi a si; thlaici ṭha cu Vancung Pennak chung i a ummi hi an si; belh cu Mi Ṭhalopa minung kha an si. ³⁹ Cun belh a tuhtu kan ral kha Khuachia a si. Rawl ṭuan caan hi, chan dongh caan a si i rawl ṭuantu hna cu vancungmi hi an si. ⁴⁰ Belh cu an pumh hna i an khangh hna bantuk hin chan donghnak ah cun a si te lai: ⁴¹ Mi Fapa nih hin vancungmi kha a thlah hna lai i a Pennak chung i ṭhat lonak a tuahtu vialte hna le mi a sualtertu vialte hna kha an pumh hna lai i ⁴² meiphu chungah an paih hna lai, cuka ah cun an ṭap lai i an hacang an rial lai. ⁴³ Cun Pathian mi hna cu an Pa Pennak chungah ni bangin an ceu lai. Cucaah hna nan ngeih ahcun, thei ko u," tiah a ti. ⁴⁴ "Vancung pennak cu lo chung i thuhmi rothil bantuk a si. Mi pakhatkhat nih a vaa hmuh sual tikah a khuh ṭhan ta tawn. A lung aa lawmh tuk caah a ngeihmi thil vialte kha a zuarh hna i a va kal ṭhan i a lo ning in a va cawk," tiah a ti. ⁴⁵ "Vancung Pennak cu lungvar a ṭha phun a kawlmipa bantuk a si fawn. ⁴⁶ A ṭha ngaingaimi kha a hmuh tikah a kal i a ngeihmi thil vialte kha a zuar i cu lungvar cu a cawk." ⁴⁷ "Vancung Pennak cu rili chung i chehmi sur, nga phun zakip a tlaitu bantuk a si. ⁴⁸ A khah tikah ngatlaitu hna nih cun tikam ah an hnuh i an ṭhu i nga kha an ṭhen hna: a ṭhami cu an bawm chungah an sanh hna i a ṭha lomi cu an hlonh hna. ⁴⁹ Chan donghnak ah cun cu bantuk cun a si lai: vancungmi kha an kal lai i miṭha mi hna lak khan miṭhalo mi kha an khawmh hna lai i ⁵⁰ meiphu chungah an paih hna lai. Cuka ah cun an ṭap lai i an hacang an rial lai," tiah a ti. ⁵¹ Jesuh nih cun, "Hi vialte hi nan hngal kho maw?" tiah a hal hna i, "Kan hngalh hna," tiah an leh. ⁵² Cucaah a thawh hna i, "Phungbia cawnpiaktu saya, Vancung Pennak kong cawnpiaknak a cohlangmi cu, inn ngeitu, a thil khonnak chungin thil thar he thil hlun he a chuah lengmangtu bantuk a si," tiah a ti. ⁵³ Jesuh nih tahchunhnak bia hna cu a chim dih in cuka hmun cun a chuak i ⁵⁴ a rak umnak khua Nazareth khua ah khan a kal. An i pumhnak inn ah khan a cawnpiak hna i a bia a theimi cu an lung a suk ngaingai hna. "Hi bantuk fimnak hi khoika ah dah a vaa lak hnga? Hi bantuk khuaruahhar tuahnak zong hi khuazei in dah a hmuh hnga? ⁵⁵ Lehtamapa fapa kha a si ko lo maw? A nu kha Mary hi a si ko lo maw? A naule kha Jeim le Josef le Simon le Judas hi an si lo maw? ⁵⁶ A farle kha hika i a ummi hi an si lo maw? Khuazei in dah hi thil vialte hi a vaa lak hnga?" an ti i ⁵⁷ cuticun an hlawt. Jesuh nih cun a thawh hna i, "Profet cu amah khua le a chungkhat hna sin ti lo ahcun, hmun dang ah cun upatnak hmu loin a um lo hen pei," tiah a ti hna. ⁵⁸ Zumhnak an ngeih lo caah khika ah cun khuaruahharnak tampi a tuah lo.

¹ Cu caan ah cun Galilee ram uktu Herod nih khan Jesuh kong cu a rak theih. ² A bawi pawl kha a thawh hna i, "Amah hi tipil petu Johan kha a si hrimhrim ko lai: thihnak in a tho ṭhan i a si lai. Cucaah cun khuaruahhar tuah khawhnak ṭhawnnak a ngeih hi a si lai," tiah a ti. ³ Herod nih khan Johan cu a rak tlaihter hna i thong ah an thlak. Cu ti i a tuahnak cu a nau Filip nupi Herodias ruangah khan a si. ⁴ Tipil petu Johan nih khan Herod cu, "Herodias cu na ṭhit awk a si lo," tiah a chimh lengmang caah ⁵ Herod nih cun Johan cu thah a duh, sihmanhsehlaw Judah mi nih cun Johan kha profet a si tiah an ruah caah annih cu a ṭih hna. ⁶ Herod chuah ni ah Herodias fanute kha zapi hmaiah cun a lam i Herod cu a lung a ton hringhran. ⁷ Cucaah bia a kam i, "Na ka halmi paoh kan pek lai," tiah chiatser in a ti. ⁸ A nu nih a chimh bangin, "Hika hrimhrim ah hin Tipil petu Johan lu kha kheng in ka pe," tiah a hal. ⁹ Siangpahrang cu a ngaih a chia ko, sihmanhsehlaw chiat a sermi ruang le a sawmmi hna kha an hmai a khah hna lo ruangah, a duhmi cu tlinter si ko seh, tiin nawl a pek hna. ¹⁰ Cucaah Johan cu thong chungah khan a lu a va tanter hna. ¹¹ A lu cu kheng cun an rak put i ngakchianute cu an pek i ngakchianute nih cun a nu sinah a hei kalpi. ¹² Johan zultu cu an ra i a ruak kha an lak i an vui; cun Jesuh kha an va chimh. ¹³ Cu thawng cu Jesuh nih a theih tikah cuka cun lawng in hmunking ah amah lawng tein a kal. Cu thawng cu mizapi nih khan an theih i an khua cio khan Jesuh cu an ke in an fuh. ¹⁴ Jesuh cu lawng chung khan a hung chuak i mizapi kha a hmuh hna tikah a zaang an fak ngaingai. Cucaah cun an mizaw hna kha a damter hna. ¹⁵ Zanlei sang a hung si tikah a zultu kha a sinah an ra i, "Kan umnak hi pilking ngaingai a si i khua zong a tlai fawn cang. Cucaah mi hi kalter hna, kan pawngkam khua ah hin va kal hna seh law rawl vaa cawk hna seh," tiah an ti. ¹⁶ Jesuh nih cun, "An kal a herh lai lo, nanmah nih ei awk zeilo pe hna u," tiah a leh hna. ¹⁷ "Kan ngeihmi cu changreu hlum nga le nga pahnih lawng pei a si ko cu," an ti. ¹⁸ Cun Jesuh nih cun, "Rak pu hna u," tiah a ti hna. ¹⁹ Mi cu ram cungah khan a ṭhutter hna i changreu hlum nga le nga pahnih cu aa lak i van a cau i Pathian kha a thangṭhat. Changreu kha a cheu hna i a zultu kha a pek hna i a zultu hna nih khan mizapi cu an phawt hna. ²⁰ An dihlak in an ei i an khim dih. Cun a zultu hna nih khan a ṭilṭawt rel hleihnih an char. ²¹ A eitu cu, nu le ngakchia rel loin, pa lawngte thong nga hrawng an si. ²² Jesuh nih mizapi kha a tlunter hna lioah khan, a zultu kha lawng in rili khattelei kamah khan, a hmaiah a rak kalter hna. ²³ Mi kha a tlunter dih hna hnu in Jesuh cu thlacam awkah amah lawng tein tlang ah khan a kai. Khua a hung tlai i Jesuh cu amah lawng tein cuka ah cun a um lioah khan, ²⁴ lawng cu rili cungah khan hlat nawn a phan cang i thli kha hmaitonh in a hran caah tilet nih khan a hlawh len ko. ²⁵ Cun khuangter hrawngah khin Jesuh cu an sin leiah cun a ke in ti cung cun a ra. ²⁶ A zultu nih ti cung i a ke in a kal kha an hmuh tikah an lau ngaingai i, "Mithla a si," tiah an ti i an ai. ²⁷ Jesuh nih cun hmakhatte ah a hei chawnh hna i, "Nan thinphang hlah u. Keimah pei ka si ko cu. Hnangam in um ko u," tiah a ti hna. ²⁸ Cun Peter nih khan a hun chawnh i, "Bawipa, nangmah na si taktak ahcun, na sinah ka ke in ti cungin ka ratter tuah," tiah a ti. ²⁹ Jesuh nih cun, "Ra ngat," tiah a ti. Cucaah Peter cu lawng cun a vung ṭum i ti cungah cun a ke in Jesuh leiah cun a kal. ³⁰ Sihmanhsehlaw thlitu a fah zia kha a vun hmuh tikah a thin a phang i ti chungah cun a pil cuahmah i, "Bawipa, ka khamh tuah," tiah a au. ³¹ Hmakhatte ah Jesuh nih a hei banh i a tlaih i, "Na zumhnak a va hme hringhran dah! Zeicahdah lungawṭawm in na um?" tiah a ti. ³² An pahnih in lawng chungah cun an lut i thlitu kha a dai. ³³ Lawng chung i a ummi a zultu hna nih khan Jesuh cu an biak i, "Nangmah cu Pathian Fapa na si hrimhrim," tiah an ti. ³⁴ Rili kha an hei tan i Genesaret ram kha an va phan; ³⁵ cuka mi hna nih khan Jesuh cu an rak hngalh ko. Cucaah cuka pawng hrawng i a ummi mizaw kha an cah hna i Jesuh sinah cun an ratpi hna. ³⁶ A zawmi cu na puan tlang tal kha tawnghter ko hna, tiah an nawl i a tawngmi paoh cu an dam dih.

¹ Farasi mi hna le Phungbia Cawnpiaktu saya pawl kha Jerusalem khua in an ra i Jesuh cu, ² "Zeicahdah na zultu hna nih kan pupa phung an buar? Rawl ei lai ah a phung bantukin an kut an i ṭawl lo," an ti. ³ Jesuh nih cun a thawh ve hna i, "A si ahcun zeicahdah nannih zong nih Pathian nawlbia kha nan buar ve i nanmah cawnpiaknak lawng kha nan zulh kun? ⁴ Pathian nih cun, ’Na nu le na pa kha va upat hna, a nu siseh a pa siseh a congoihmi cu thah si seh,’ tiah a ti. ⁵ Sihmanhsehlaw nannih nih nan cawnpiak hna ning ah cun, mi pakhatkhat nih a nu maw a pa maw bawmhnak ding caah zeilo thil a ngeihmi cu, ’Hihi cu Pathian ta a si,’ a ti ahcun, ⁶ a nu siseh, a pa siseh, a bawmh hna a herh ti lo, nan ti. Hihi Pathian bia zei i nan rel lo ning le nanmah cawnpiakning lawng zulh nan duhning cu a si. ⁷ Nannih mihrokhrawl hna. Nan kong Isaiah nih a rak chimmi hi a hmaan hringhran ko. ⁸ Hi mi hna nih hin an kaa lawngin an ka upat, sihmanhsehlaw an lungthin taktak cun an ka hlat ngaingai, tiah Pathian nih a ti. ⁹ Annih nih mi serchom nawlbia kha Pathian nawlbia bantukin an cawnpiak hna caah An ka biaknak hi zeihmanh a ṭhahnem lo,’ tiah Pathian nih a ti, tiah a rak chim," tiah a ti. ¹⁰ Cun Jesuh nih mizapi cu a sinah a kawh hna i, "Ngai u law hngalh i zuam hmanh u. ¹¹ Mi cu a kaa chung i a lutmi nih a thurter lo, sihmanhsehlaw a kaa chungin a chuakmi tu nih hin a thurter," a ti hna. ¹² Cun a zultu hna kha a sinah an ra i, "Na chimmi nih Farasi mi an thin a hunter ngaingai hna kha na hngal maw?" an ti. ¹³ Jesuh nih cun, "Vancung khua i a ummi ka Pa nih a phun lomi kung paoh cu phawi an si ko lai. ¹⁴ Annih cu nan hna i hnawh hna hlah u. Hruaitu mitcaw an si ko; mitcaw nih mitcaw kha a hruai ahcun an pahnih in khor ah an tla tawn," tiah a ti. ¹⁵ Peter nih khan a hun i thawh i, "Hi tahchunhnak bia hi a sullam kan chim tuah," tiah a ti. ¹⁶ Jesuh nih cun a thawh hna i, "Mi dang nakin nan fim deuh hlei lo hi ta! ¹⁷ Nan hngal kho lo maw? Mi kaa chung i a lutmi thil paoh cu a paw ah a lan i a lengah a chuak ṭhan ko. ¹⁸ Sihmanhsehlaw kaa chungin a chuakmi thil cu lung chungin a chuakmi thil an si i cu hna nih cun mi cu an thurter. ¹⁹ Zeicahtiah lai a nawntertu, nu le pa sualnak a tuahtertu, thil ṭhalo dangdang a tuahtertu, a firtertu, lih a chimtertu, mi a congoihtertu ruahnak ṭhalo vialte cu a lung chungin a hung chuakmi an si. ²⁰ Hihi mi a thurtertu cu an si. Sihmanhsehlaw rawl ei lai kut ṭawl lo nih cun mi a thurter lo," tiah a ti. ²¹ Jesuh cu cuka hmun cun a chuak i Tair le Sidon khua pawng ram ah khan a kal. ²² Cuka ram i a ummi Kanaan minu pakhat cu a sinah a ra i, "David Fapa, ka zaangfah tuah. Ka fanu cu khuavang nih a tuah i awlokchong in a um ko," tiah fak piin a au. ²³ Sihmanhsehlaw Jesuh nih bia kaa khat hmanh a let lo. A zultu kha an ra i, "Hi nu hi kalter ko. A kan zul lengmang, a kan auhnawh lengmang i hna a kan hnawh," tiah an ti. ²⁴ Cun Jesuh nih cun a vun leh i, "Israel mi lak i a tlaumi tuu hna sin lawngah pei thlah ka si ko cu," tiah a ti. ²⁵ Cu tikah minu cu a ra i a hmaiah khuk bil in a kun i, "Bawipa, ka bawm ko," tiah a ti. ²⁶ Jesuh nih cun, "Ngakchia rawl cu i lak riangmang i uico pek cu a hmaan lo," tiah a leh ṭhan. ²⁷ Minu nih cun, "Cucu a si taktak ko, bawipa; sihmanhsehlaw bawi cabuai cungin a tlami rawl ṭilṭawt cu uico nih an ei ve tawn ko hen pei," tiah a leh. ²⁸ Cucaah Jesuh nih cun, "Nangmah cu zumhnak ṭhawng ngaingai a ngeimi na si. Na duhmi cu kan tuahpiak ko lai," tiah a ti. Cu caan hrimhrim ah cun a fanu cu a rak dam. ²⁹ Jesuh cu cuka hmun cun a chuak i Galilee Rili kam hrawngah khan aa chawk. Tlang cungah a kai i a ṭhu. ³⁰ Mi tampi a sinah cun an ra i kebei le mitcaw le kutzeng le a holh kho lomi hna le mizaw dang tampi kha an ratpi hna i a kehram ah khan an chiah hna i a damter hna. ³¹ A holh kho lomi an holh khawh le a zengmi an dam le kebeimi an kal khawh le mitcawmi nih khua an hmuh ṭhan kha an hmuh hna tikah, mizapi cu an khuaruah a har i Israel Pathian kha an thangṭhat. ³² Jesuh nih a zultu kha a auh hna i, "Hi mi hna hi kan sinah ni thum an um cang i atu cu rawl ei awk an ngei ti lo i ka zaang an fak ngaingai. Rawl loin annih tlunter cu ka duh lo, lampi ah an va buhri sual lai," tiah a ti. ³³ A zultu nih cun an thawh i, "Hi ramcar ah hin, zeitindah minung hi zat pek awk rawl cu kan hmuh khawh lai?" an ti. ³⁴ Jesuh nih cun, "Changreu zeizat dah nan ngeih?" tiah a hal hna i, "Hlum sarih le nga hme tete tlawmte," tiah an leh. ³⁵ Cucaah Jesuh nih mizapi cu vawlei ah khan a ṭhutter hna. ³⁶ Cun changreu hlum sarih le nga kha aa lak hna i Pathian sinah thla a cam i a cheu hna i a zultu kha a pek hna i a zultu nih mizapi kha an pek hna. ³⁷ An dihlak in an ei i an i khim. A zultu pawl nih khan a ṭilṭawt sei sarih an khawmh. ³⁸ A eimi cu, nu le ngakchia chim loin, pa thong li an si. ³⁹ Cun Jesuh nih mizapi kha a tlunter hna i lawng chungah a lut i Magadan ram leiah khan a kal.

¹ Farasi mi le Sadusi mi tlawmpal kha Jesuh sinah cun an ra i amah kha foih an duh caah, vancung in a rungmi khuaruahhar kan hmuhsak tuah, an ti. ² Cun Jesuh nih cun, "Zanlei ah cun, ’Van kam a sen, thaizing cu khua a ṭha lai,’ nan ti i ³ zinglei ah cun, ’Van kam a sen i khua a dawm, nihin cu ruah a sur lai,’ nan ti. Nikhua zeidah a lawh lai ti kha van nan zohnak in nan hngalh khawh, sihmanhsehlaw atu caan hmelchunhnak hi cu an sullam nan hngal kho hna lo. ⁴ Tuchan mi hi mi ṭhalo le Pathian zei i a rel lomi nan si. Khuaruahharnak tuah nan ka fial, sihmanhsehlaw ka tuah lai lo. Khuaruahharnak tuahpiak nan si dingmi cu Jonah khuaruahharnak lawnglawng kha a si lai," tiah a ti. Cun lo diam in a kaltak hna. ⁵ A zultu pawl cu rili khattelei kamah lawngin an va kal ah khan changreu phorh an philh. ⁶ Jesuh nih cun a thawh hna i, "Farasi mi hna le Sadusi mi hna thilnu kha i ralring u," tiah a ti hna. ⁷ Cu tikah anmah le anmah cu, "Hi bia a chim hi changreu kan i phorh lo caah a si," tiah an i ceih. ⁸ Jesuh nih an chimmi cu a hngalh i cucaah, "Changreu nan ngeih lo kong kha zeicahdah nan i ceih len ko? Nan zumhnak a va tlawm hringhran dah! ⁹ Nan hngal kho bal rih lo maw? Changreu hlum nga in minung thong nga ka dangh hna ah khan, sei zeizat dah nan char kha nan hngal ti maw? ¹⁰ Cun hlum sarih in thong li ka dangh hna ah khan tah sei zeizat dah nan char kha? ¹¹ Nannih kan chimhmi hna hi changreu kong a si lo tiah zeitindah nan hngalh khawh lo ee? Farasi mi le Sadusi mi hna thilnu cu i ralring tuah u," tiah a ti hna. ¹² Khi tikah a zultu pawl nih khan, i ralring u, a kan timi hi changreu rawhnak thilnu kha si loin, Farasi mi hna le Sadusi mi hna cawnpiaknak kha a si, ti kha an hngalh. ¹³ Jesuh cu Sisaria Filipi khua pawng ram ah khan a va kal i a zultu hna cu, "Mi nih Mi Fapa hi aho a si, an ka ti dah?" tiah a hal hna. ¹⁴ Annih nih, "A cheu nih Tipil petu Johan a si, an in ti. A cheu nih, Elijah a si, an in ti, a cheu nih Jeremiah maw profet pakhatkhat dik a si, an in ti," tiah an leh. ¹⁵ Cun a thawh hna i, "Nannih tah, aho a si nan ka ti dah?" tiah a hal hna. ¹⁶ Simon Peter nih a leh i, "A Nungmi Pathian Fapa, Messiah kha na si," tiah a ti. ¹⁷ Jesuh nih cun, "Johan fapa Simon, mi vanṭha ngaingai na si! Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si. ¹⁸ Cucaah cun nang cu lung tum, Peter, na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo. ¹⁹ Vancung Pennak hunnak tawhfung cu kan pek lai i vawlei cung i na hrenhmi cu vancung zongah hrenh a si lai i vawlei cung i na awnhmi cu vancung zongah awnh a si lai," tiah a ti. ²⁰ Cun Jesuh nih Messiah a si cu ahohmanh chim hna hlah u, tiah a thlauh hna. ²¹ Cu caan thawk cun Jesuh nih a zultu hna cu, "Jerusalem ah ka kal lai i upa hna le tlangbawi ngan upa pawl hna le Phungbia cawnpiaktu saya hna nih harnak tampi an ka pek lai. An ka thah lai i ni thum ni ah nunter ṭhan ka si lai," tiah fiang tein a chimh hna. ²² Peter nih a dang deuh ah khin a hei i kalpi i a mawhchiat. "Bawipa, hi thil cu Pathian nih na cungah tlunter sawh hlah seh," tiah a ti. ²³ Jesuh cu a hun i mer i Peter cu, "Satan, ka sinah um hlah. Na ruahnak hi Pathian ruahnak si loin minung ruahnak a si caah ka caah dawntu na si," tiah a ti. ²⁴ Cun Jesuh nih a zultu cu a thawh hna i, "Ahohmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh. ²⁵ Zeicahtiah ahohmanh, mah nunnak humhak a duhmi cu a nunnak kha a sung lai i keimah ruangah a nunnak a sungmi cu a nunnak a hmumi a si lai. ²⁶ Mi nih hin vawlei pumpi hi co hmanh seh law, a nunnak a sungh ṭung ahcun zeital a miak hnga maw? A miak lai lo. A nunnak kha zeihmanh in a caw ṭhan kho lai lo. ²⁷ Mi Fapa hi ka Pa sunparnak in tuan ah ka vancungmi hna he ka ra lai i mi vialte kha an rian ṭuan ning cio in laksawng ka pek hna lai. ²⁸ Hihi philh hlah u. Mi Fapa cu Siangpahrang bantukin ka rat nan ka hmuh hlan cu a thi lo dingmi hika ah hin nan um," tiah a ti hna.

¹ Cu hnu ni ruk ah Jesuh nih Peter le Jeim le a nau Johan kha tlang sangpi cungah anmah lawng tein aa kaipi hna. ² An hmaiah cun a mui kha aa thleng i a hmai cu ni bangin a ceu i a hnipuan cu ceu bantukin an rang. ³ Cun a zultu pathum hna nih cun Jesuh cu Moses le Elijah he bia an i ruah kha an hmuh. ⁴ Cucaah Peter nih cun Jesuh cu a hun thawh i, "Bawipa, hika um hi a nuam; na duh ahcun thlam pathum in kan sakpiak hna lai, nang caah pakhat, Moses caah pakhat, Elijah caah pakhat," tiah a ti. ⁵ Cu ti i bia a chim lioah cun a ceumi minmei nih a run zelh hna i minmei chung cun aw nih, "Hi pa hi ka dawtmi ka Fapa, ka lung a ka tong ngaingaimi a si, amah bia kha ngai u," tiah a ti. ⁶ A zultu pawl nih aw kha an theih tikah an thin a phang tuk i vawlei ah an bawk. ⁷ Jesuh cu a ra i a tongh hna i, "Tho u, nan thin phang hlah u!" tiah a ti hna. ⁸ Cucaah van lei kha an hun zoh i Jesuh lawnglawng kha an hmuh. ⁹ Tlang cungin an ṭum pah ah khan, "Hi thil nan hmuhmi hi, Mi Fapa hi thihnak in thawhter ka si ṭhan hlanah cun ahohmanh chim hna hlah u," tiah a ti hna. ¹⁰ Cun a zultu pawl nih Jesuh cu, "Zeicahdah Phungbia cawnpiaktu saya pawl nih, Elijah cu a rat hmasa awk a si, an ti?" tiah an hal. ¹¹ Jesuh nih cun, "Elijah cu a ra hmasa taktak i zeizong vialte kha timhtuah hram a thawk taktak. ¹² Sihmanhsehlaw hihi kan chimh hna: Elijah cu a ra ko cang, sihmanhsehlaw mi nih an hngal lo i an duhduh in an tuah. Cu bantuk ṭhiamṭhiam in Mi Fapa zong hi an ka serhsat ve lai." tiah a ti hna. ¹³ Khi tikah a zultu pawl nih cun, a kan chimhmi hi tipil petu Johan kong a si, ti kha an hngalh. ¹⁴ Mizapi sin kha an phak ṭhan tikah Jesuh sinah cun mipa pakhat a ra i a hmaiah a khuk aa bil i ¹⁵ "Bawipa, ka fapa hi ka zaangfahpiak tuah. Amah cu mitlu a si i a tluk tikah hin mei chung le ti chung zongah a tlu tawn. ¹⁶ Na zultu pawl sinah ka ratpi nain an damter kho lo," tiah a ti. ¹⁷ Jesuh nih cun a leh i, "Nannih cu a zum kho lomi le a palhmi nan si hrimhrim ko. Zei can dah nan sinah ka um awk a herh lai? Zei can dah kan umpi hna a herh lai? Ngakchiapa cu ka sinah hin ratpi u," tiah a ti hna. ¹⁸ Jesuh nih khuachia cu, chuak, a ti i a chuak i cu caan thawk te cun ngakchiapa cu a dam colh. ¹⁹ Cun a zultu pawl kha Jesuh sinah cun anmah lawngin an ra i, "Zeicahdah khuachia kha kan ṭhawl khawh lo?" tiah an hal. ²⁰ Jesuh nih cun, "Nan zumhnak a zat lo caah a si. Hihi va philh hlah u: Anṭam ci tiate hmanh zumhnak nan ngeih ahcun, hi tlang hi, ’I thawn,’ ti u law aa thawn ko lai. Zei paohpaoh kha nan tuah khawh ko lai. ²¹ Sihmanhsehlaw hi bantuk cu thlacamnak le rawl ulhnak lawng nih a ṭhawl khawh; zei dang nih cun a ṭhawl kho lo," tiah a ti. ²² A zultu hna cu Galilee ah khan an i pumh dih ṭhan tikah, Jesuh nih khan a thawh hna i, "Mi Fapa hi mi kut chungah tuan ah pek a si cang lai, ²³ annih nih an thah lai, sihmanhsehlaw ni thum ni ah nunter a si ṭhan lai," tiah a ti hna. A zultu cu an ngaih a chia ngaingai. ²⁴ Jesuh le a zultu hna kha Kapernaum khua i an rat tikah biakinn ngunkhuai khawltu pawl nih khan Peter cu, "Nan sayapa nih biakinn ngunkhuai a pe bal maw?" tiah an hal. ²⁵ Peter nih cun, "A pek ko," tiah a leh hna. Peter cu inn chung i a vung luh ah khan Jesuh nih cun a rak hlehkanh i, "Simon, zeitindah na ruah? Aho nih dah vawlei cung siangpahrang hna hi ram dang thil luh man le ngunkhuai an pek tawn hna? Cuka ram mi hna nih cun maw ramdangmi nih dah?" tiah a hal. ²⁶ Peter nih cun, "Ramdangmi nih ta," tiah a leh. Cun Jesuh nih, "A ṭha ko, cu ti a si ahcun ramchungmi nih cun pek a herh lo. ²⁷ Sihmanhsehlaw hi mi hna hi an thinhunter ka duh lo. Cucaah rili ah va kal law sio va thla, na sio hmasa bikmi nga kha a ka va keu law a ka chungah cun kan pahnih ca i a za ding tangka na hmuh lai; cun va kal law biakinn ngunkhuai cu va pe hna," tiah a ti.

¹ Cu caan ah cun a zultu hna kha Jesuh sinah khan an ra i, "Vancung Pennak ah ahodah a ngan bik?" tiah an hal. ² Jesuh nih ngakchiapate pakhat kha a auh i an hmaiah a dirter i, ³ "Nannih cu nan i thlen i ngakchia bantuk ah nan i can lo ahcun Vancung Pennak chungah nan lut bal lai lo. ⁴ Vancung Pennak chung i a ngan bik cu mi toiah aa dor i hi ngakchia bantuk ah aa cangmi cu a si. ⁵ Cun ngakchia hi bantuk pakhatkhat kha ka min in nan conglawmh hna ahcun, keimah nan ka conglawmh a si." ⁶ "Hi ngakchia tete pakhatkhat hi keimah an ka zumhnak in a pialtertu hna cu, an hngawng ah facang rialnak lungtum nganpi i thlaih hna seh law, rili chungah paih si hna seh law an caah a ṭha deuh hnga. ⁷ Vawlei cungah hin cu bantuk tlukrilhnak a um caah a va poi hringhran dah! Cu bantuk cu a um ṭheoṭheo ko lai, sihmanhsehlaw cu bantuk a umtertu caah cun ṭihnung a si hringhran ko. ⁸ "Nan kut nih siseh, nan ke nih siseh, an pialter hna ahcun, tan u law hlonh ko hna u! Kut pahnih, ke pahnih he zungzal mei chung i tlak nakin kut le ke loin nunnak chung i luh cu nan caah a ṭha deuh. ⁹ Cun nan mit nih an pialter hna ahcun khoih u law hlonh ko hna u. Hell chungah mit pahnih he tlak nakcun mit pakhat he lawng nunnak chung i luh cu nan caah a ṭha deuh." ¹⁰ "Hi ngakchia tete hi pakhat hmanh zawmhtaih hna hlah u. Annih a vengtu hna an vancungmi kha vancung khua ah ka Pa hmaika ah an um zungzal ko. ¹¹ Mi Fapa cu a tlaumi khamh awkah ka ra. ¹² "Tuu za khat a ngeimipa nih, a tuu pakhat cu a tlau ahcun, zeidah a tuah hnga, tiah nan ruah? Tlang cungah a tlongmi sawm kua le pakua cu a kaltak hna lai i a tlaumi cu a kawl lai. ¹³ A hmuh tikah sawm kua le pakua a tlau bal lomi cung nakkhan hi tuu pakhat cungah hin aa lawm deuh. ¹⁴ Cu bantukte cun, vancung khua i a ummi nan Pa nih, hi ngakchia tete pakhatte hmanh hi tlauter a duh hna lo. ¹⁵ "Na unau pakhatkhat nih na cungah sualnak a tuah ahcun, amah sinah cun va kal law a sualnak cu va chim. Sihmanhsehlaw, a thli tein nanmah pahnih lawng theih in na va tuah lai. Na bia a ngaih ahcun, na unau ah na lak khawh ṭhan a si. ¹⁶ Sihmanhsehlaw na bia a ngaih duh lo ahcun, Cathiang nih, ’Sual puhnak paohpaoh cu ahmaan hmaanlo ti hngalhnak caah tehte pahnih maw pathum dik a hau,’ a ti bang khan, mi dang pakhat maw pahnih dik naa kalpi hna lai. ¹⁷ Sihmanhsehlaw an bia zong kha a ngaih hlei lo ahcun, cu thil cu Khrihfabu kha na chimh hna lai. Cun Khrihfabu bia kha a ngaih duh ṭhiamṭhiam lo ahcun, lawkihmi maw, ngunkhuai khawltu maw, cu bantuk mi ah cun va zoh. ¹⁸ "Cucaah nan dihlak in kan chimh hna: vawlei cungah nan khapmi thil paoh cu vancung zongah khap a si lai i vawlei cungah nan onhmi thil paoh cu vancung zongah awnh a si lai. ¹⁹ Cun hi zong hi kan chimh hna: hi vawlei cungah hin, nan halmi thil kong ah, pahnih nan lung aa khah ahcun, nan halmi thil cu vancung i a ummi ka Pa nih an pek hna lai. ²⁰ Zeicahtiah ka min in pahnih pathum nan i pumhnak ah kei zong nan sinah ka um ve," tiah a ti. ²¹ Cun Peter cu Jesuh sinah khan a ra i, "Bawipa, ka unau pakhatkhat nih ka cungah sualnak tuah seh law voi zeizat dah ka ngaihthiam lai? Voi sarih tiang maw?" tiah a hal. ²² Jesuh nih cun, "Sihlah, voi sarih si loin voi sawm sarih voi sarih, ²³ zeicahtiah Vancung Pennak cu hi bantuk hi a si: Siangpahrang pakhat nih a sal hna rian ṭuanning kha zoh aa tim. ²⁴ Aa thawk kate ah khin a salpa pakhat cu a sinah an ratpi i cu sal nih cun tangka talen thong hra a bat. ²⁵ Cu sal nih cun a leiba chamnak a ngeih lo caah a bawipa nih cun cu pa cu a nupi he a fale he a ngeihmi thil vialte he leiba chamnak dingah cun sal ah zuar si hna seh, tiah a ti. ²⁶ Cu salpa cu a bawipa hmaiah cun a khuk aa bil i, ’Zaangfahnak tein ka ngang rih tuah. Cham dih kan zuam ko lai,’ tiah a nawl. ²⁷ A bawipa nih a zaangfah i cucaah a leiba cu a ngaihthiam i a kalter. ²⁸ "Mipa cu a va chuak i a sal hawi pakhat, tangka tlawmte a rak batu kha a va fuh. Amah cu a tlaih i a or in a dih i, ’Na ka batmi kha ka cham dih,’ tiah a ti. ²⁹ A sal hawi nih cun a khuk aa bil i, ’Ka ngang rih sawh. Cham dih kan zuam lai,’ tiah a nawl. ³⁰ Sihmanhsehlaw a duh lo. Thong ah khan a leiba a cham dih hlantiang a thlak. ³¹ Cu thil cu a sal hawi midang nih khan an hmuh tikah an ing a puang ngaingai i an bawipa sinah khan an va kal i an va chimh. ³² Cucaah an bawipa nih kha sal kha a kawh i, ’Sal ṭhalo, na ka nawl caah na ka batmi vialte kan ngaihthiam dih. ³³ Na cung i zaangfahnak ka ngeih bantukin pei na sal hawi cungah na ngeih ve awk a si cu,’ tiah a ti. ³⁴ An bawipa cu a thin a hung ngaingai i a salpa cu a leiba a lim khawh dih hlantiang thong ah a thlak. ³⁵ "Nannih nih nan u nan nau kha nan lungchung taktak in nan ngaihthiam hna lo ahcun cu bantuk cun vancung khua i a ummi ka Pa nih nannih zong cu an tuah ve hna lai," tiah a ti hna.

¹ Jesuh nih cu kong cu a chim dih tikah Galilee ram khan a chuak i Jordan Tiva khattelei kam i a ummi Judea ram ah khan a kal. ² Mi tampi nih an zulh i a damter hna. ³ Farasi mi tlawmpal kha a sinah cun an ra i amah kha bia in foih an duh caah, "Pa nih a nupi maknak caah kan Phung nih a awnhmi lam zeital a um maw?" tiah an hal. ⁴ Jesuh nih cun, "A hramthawk in Pathian nih nu le pa in a ser hna, ⁵ ’cucaah pa nih a nu le a pa kha a kaltak hna lai i a nupi he an i fon lai i cu hna pahnih cu pum khat an si lai, tiah Sertu nih cun a ti,’ timi Cathiang chung ṭialmi kha nan rel bal lo maw? ⁶ Cucaah pahnih an si ti lo i pakhat an si cang. Pathian nih a fonhmi hna cu ahohmanh nih ṭhen hna hlah seh," tiah a ti. ⁷ Cun Farasi mi hna nih cun, "A si kun ahcun, zeicahdah Moses nih, ’Pa nih a nupi kha maknak ca pe seh law kalter seh,’ tiah nawl a kan pek kun?" tiah an hal. ⁸ Jesuh nih cun, "Moses nih nan nupile nan mak khawh hna tiah nawl an pek hna cu, chimh nan har tuk ruangah a si. Sihmanhsehlaw cuticun a hramthawknak caan ah cun a rak si lo. ⁹ Cucaah hihi kan chimh hna: Ahohmanh nih a nupi kha, zumh awktlak loin a um ti ṭung lo ahcun, a mak i nu dang a ṭhit ahcun, nu le pa sualnak a tuah a si," a ti. ¹⁰ Cun a zultu hna nih khan, "Nu le va kong ah, hitihin a si awk a si ahcun, i ṭhitumh lo a ṭha deuh," an ti. ¹¹ Jesuh nih cun, "Hi cawnpiaknak hi a mi kip caah a si lo, Pathian nih a thimmi hna ca lawngah a si. ¹² Mi nih nupi an ngeih khawh lonak sullam a dangdang a um cio: a cheu cu an i chuahpimi a si, a cheu cu mi nih cuticun an sermi an si; cun a cheu cu Vancung Pennak ruang hrimhrim i nupi ngei loin a ummi an si. Hi cawnpiaknak a zul khomi nih cun cuticun zul ko hna seh," a ti. ¹³ Mi zeimaw nih ngakchia kha Jesuh sinah khan an ratpi hna i, an cung i a kut chiah awk le thlacampiak hna awkah an nawl; sihmanhsehlaw a zultu nih khan an rak sik hna. ¹⁴ Jesuh nih cun aa thawh i, "Ngakchia cu ka sinah ra ko hna seh, dawn hna hlah u; zeicahtiah Vancung Pennak cu hi bantuk mi hna ta hi pei a si cu," tiah a ti. ¹⁵ An cungah a kut a chuan i a kal. ¹⁶ Voi khat ah mipa pakhat cu Jesuh sinah khan a ra i, "Saya, zungzal nunnak co awkah thil ṭha zeidah ka tuah awk a si?" tiah a hal. ¹⁷ Jesuh nih cun, "Zeicahdah ’zei thil ṭha dah,’ timi cu na ka hal? A ṭhami cu pakhat lawng pei a um ko cu. Nunnak chung i luh na duh ahcun nawlbia kha tah na zulh ko hna," tiah a leh. ¹⁸ Tlangvalpa nih cun, "Zei nawlbia hna dah?" tiah a ti. Jesuh nih, "Lai va nawng hlah; nu le pa sualnak va tuah hlah; fir hlah; lih chim hlah; ¹⁹ na nu le na pa kha upat hna; na minung hawi kha nangmah bantukin va daw hna, ti hawi hna hi ta," tiah a leh. ²⁰ "Hi nawlbia cu ka zulh dih cang hna. Zeidah zulh awk ka herh rih?" tiah a ti. ²¹ Jesuh nih cun a thawh i, "Mi tling si na duh ahcun, va kal law na ngeihmi thil vialte kha va zuar hna; cun tangka na hmuhmi cu misifak kha va pe hna; cuticun vancung khua ah chawva na ngei lai, cun ra law rak ka zul," tiah a ti. ²² Cu bia cu tlangval nih khan a theih tikah ngaihchia in a kal, zeicahtiah amah cu mirum ngaingai a si. ²³ Jesuh nih a zultu cu a thawh hna i, "Vancung Pennak chung luh hi mirum caah cun a har ngaingai lai, tiah kan chimh hna. ²⁴ Vun nolh ṭhan rih ko ning law, kalauk ca i ṭhim kaa chung luh kha mirum mi ca i Pathian Pennak chung luh nakin a fawi deuh," tiah a ti. ²⁵ Cu bia cu a zultu hna nih khan an theih tikah an khuaruah a har i, "Ahodah khamhnak a hmu kho kun lai?" an ti. ²⁶ Jesuh nih dengteo in a vun zoh hna i, "Hihi minung caah cun a si kho lo, sihmanhsehlaw Pathian caah cun zeizong vialte hi a si kho ko," tiah a leh hna. ²⁷ Cun Peter nih khan a hun i thawh i, "Zeizong vialte kha kan kaltak i nangmah kha kan in zulh. Zeidah kan comi a si lai?" tiah a hal. ²⁸ Jesuh nih cun, "Chan Thar chungah Mi Fapa hi ka bawi ṭhutdan cung i ka ṭhut tikah nannih a ka zultu hleihnih hna zong hi Israel mi phun hleihnih kha an biaceihpiak awkah bawi ṭhutdan cungah nan ṭhu ve lai. ²⁹ Cun keimah ruangah a inn siseh, a lo siseh, a u siseh, a nau siseh, a farle si hna seh, a pa siseh, a nu siseh, a fale si hna seh, a kaltakmi hna cu a let za khat in a hmuh ṭhan lai i zungzal nunnak kha pek a si lai. ³⁰ Sihmanhsehlaw atu i hmasa bik a simi tampi hi hmanung bik an si lai i atu i hmanung bik a simi tampi hi hmasa bik an si lai," tiah a ti.

¹ "Vancung Pennak cu mitsur dum a ngei i zingkate in a dum chung i rianṭuantu ding kawl awkah aa thawhmipa he aa lo. ² Ni khat ah hawi nih an hmuh cio tawnmi ngun tangka phar khat kan phalh hna lai, tiah a ti hna i mitsur dum chungah cun rianṭuan awkah khan a thlah hna. ³ Cun cu hnu suimilam pathum, zinglei suimilam pakua tluk ah khin chawdawr hrawngah khan a vaa chawk i zeihmanh a tuah lo mi tlawmpal kha a va hmuh hna. ⁴ Annih cu, ’Nannih zong ka dum ah rian va ṭuan u law a tawkzawn in kuli man cu kan pek hna lai,’ a ti hna i ⁵ cucaah an kal. Cun cu bantuk ṭhiamṭhiam cun chun suimilam hleihnih le zanlei suimilam pathum ah khan a tuah ṭhan. ⁶ Cun chawdawr ah khan a va kal ṭhan i cuka ah cun mi a cheu an rak dir ko rih kha a hmuh hna, cu ah cun zanlei suimilam panga a si dengmang cang. ’Zeicahdah chun nitlak zei tuah loin nan um sawhsawh ko?’ tiah a hal hna i, ⁷ ’Ahohmanh nih rian an kan fial duh lo caah a si,’ tiah an leh. ’A si ahcun, nannih zong ka dum ah va kal u law rian va ṭuan u,’ tiah a ti hna. ⁸ "Zanlei a hung si tikah dum ngeitu nih cun a dum uktu kha a kawh i, ’Rian ṭuantu kha au hna law an ṭuan man kha pe cio hna, hmanung bik i fialmi kha a hmasa bik ah pe hna law hmasa bik i fial mi kha hmanung bik ah pe hna,’ tiah a ti. ⁹ Suimilam panga ah ṭuan aa thawkmi pawl kha ngun tangka phar khat cio a pek hna. ¹⁰ Cucaah hmasa bik i rak fialmi pawl kha an ṭuan man lak awk i an rat tikah tam deuh kan hmu lai, tiah an i ruah; sihmanhsehlaw annih zong ngun tangka phar khat cio pek an si ve ko. ¹¹ Phaisa cu an i lak i rian ṭuan a fialtu hna cungah khan an zai. ¹² An i thawh i, ’A hmanung bik i na fialmi hna tham cu suimilam pakhat lawng pei an ṭuan ko cu, kannih cu chun nitlak pei ni lin lakah kan ṭuan cu, asinain kanmah na kan pek zat ṭhiamṭhiam na pek ve ko hna,’ an ti. ¹³ Cun annih lak i pakhat cu dum ngeitu nih khan a thawh i, ’Ka kawi, kan hleng hna lo. Hawi hmuh cio tawnmi ngun tangka phar khat hmu dingin pei nan hna a tlak ve ko kha. ¹⁴ Cucaah nan tangka cu i lak u law inn ah va ṭin ko u. A hmanung bik i ka fialmi hna nanmah zat pek ve cu keimah nawl pei a si ko cu. ¹⁵ Keimah tangka cu keimah nih ka duhduh in hman awk a si ko lo maw? Zeicahdah mi ka zaangfah hna hi nan hnah a chuah?’ tiah a ti. ¹⁶ Cuticun a hmanung bik kha a hmasa bik an si lai i a hmasa bik kha a hmanung bik an si lai," tiah Jesuh nih a ti. ¹⁷ Jesuh nih cun Jerusalem khua lei i an hung kal lioah khan, a zultu pahleihnih kha kaa dang ah aa kalpi hna i anmah lawngin bia a ruah hna. ¹⁸ A thawh hna i, "Jerusalem ah kan hung kal lai i Mi Fapa hi tlangbawi upa pawl le Phungbia cawnpiaktu saya pawl sinah khan an ka pek lai. Thah awk a si, tiin sual an ka phawt lai i ¹⁹ Jentail mi hna kut chungah an ka chanh lai. Annih nih cun nihchuak capo ah an rak ka ser lai i fung in an ka tuk lai i vailam thing cungah an ka khenhchih lai; cun a ni thumnak ni ah nunter ka si ṭhan lai," tiah a ti hna. ²⁰ Cun Zebedi fapa hna nu kha Jesuh sinah cun a fapa hna he khan an ra i a hmaiah khan a kun i zaangfahnak a hal. ²¹ "Zeidah na duh?" tiah Jesuh nih cun a hal i, "Siangpahrang na si tikah ka fapa pahnih hna hi na orhlei le na kehlei ah an ṭhutnak hnga, bia ka kam law ka duh," tiah a leh. ²² Jesuh nih cun, a fapale hna cu, "Nan ka halmi hi nan hngal lo. Ka din lai dingmi hrai hi nan din khawh lai maw?" tiah a leh hna. Annih nih, "Kan din khawh lai," tiah an leh. ²³ "Ka hrai cu a din zong nan din khawh taktak ve ko lai. Sihmanhsehlaw ka orhlei ah anih ṭhu seh, ka kehlei ah anih ṭhu seh, ti cu keimah thim khawhmi a si lo. Cuka hmun cu ka Pa nih a timhpiakmi hna caah a si," tiah a ti hna. ²⁴ Cu kong cu a dang pahra hna nih khan an theih tikah unau pahnih hna cungah cun an thin a hung i ²⁵ cucaah Jesuh nih cun an dihlak in a kawh hna i, "Vawlei cungah cun nan hngalh bantukin, bawi nih an ukmi hna cu a lal in an lalhnawh tawn hna i hruaitu hna nih khan an hruaimi hna cu a uk in an uk tawn hna. ²⁶ Sihmanhsehlaw nannih cu cuticun nan si awk a si lai lo. Nan lak i pakhat khat nih ngan a duh ahcun nan sinum a si awk a si. ²⁷ Ahohmanh pakhatnak si a duhmi cu nan sal a si awk a si. ²⁸ Cuticun pei Mi Fapa hi a si cu, rian ṭuanpiak dingah ka rat ṭung lo, mi tampi an rian ṭuanpiak awk le annih tlanhnak ca i ka nunnak pek awkah pei ka rat cu," tiah a ti hna. ²⁹ Jeriko khua in an i thawh ah khan Jesuh cu mi tampi nih an zulh. ³⁰ Lam pawng i a ṭhumi mitcaw pahnih hna nih khan Jesuh a kal ti thawng cu an theih tikah, "Maw David Fapa! Kan zaangfah tuah, bawipa," tiah an au. ³¹ Mizapi nih cun an sik hna i dai u, tiah an ti hna. Sihmanhsehlaw thang chinchin in, "Maw David Fapa, kan zaangfah tuah, bawipa," tiah an au. ³² Jesuh cu a dir i a kawh hna i, "Zeidah kan tuahpiak seh, ti nan ka duh?" tiah a hal hna. ³³ "Bawipa, kan mit hung kan damter law kan duh," tiah an leh. ³⁴ Jesuh nih a zaangfah hna i an mit cu a tawnghpiak hna i hmakhatte ah khua an hmu kho. Cun amah cu an zulh.

¹ Jerusalem khua kha an hei naih cang; Oliv Tlang i a ummi Bethfeih khua kha an phak in Jesuh nih a zultu pahnih kha hmaiah a hei thlah hna i, ² "Nan hmai khua ah khan rak kal u law laa pakhat aa hrengmi nan hmuh lai i cu laa sinah cun a fate kha a um lai. Cun nan phawih hna lai i ka sinah nan ratpi hna lai. ³ Mi nih zeimaw tiin an in ti hna ahcun, ’Kan Bawipa nih a herh,’ tiah nan ti ko hna lai i an in lakter ko hna lai," tiah a ti. ⁴ Hi thil hi profet nih: ⁵ "Zion fanu cu va chim u law, ’Na siangpahrang cu nangmah lei ah a ra lio, Amah cu mi nunnem a si i laa cu a hun i cit, Laa note a hun i cit,’ va ti u," tiah a timi tlinternak caah khan a si. ⁶ Cucaah a zultu kha hmaiah cun an rak kal i Jesuh nih a chimh hna bang khan an tuah. ⁷ Laa le a fate kha an ratpi hna i an puan kha an danh hna i Jesuh cu aa cit. ⁸ Mi tampi nih an puan cu lam ah khan an phah hna i a cheu nih thingnge kha an sam hna i lam ah cun an phah ve hna. ⁹ A hmai i a kalmi hna le a hnu in a zulmi hna cu an bu ning piin an au i, "David Fapa cu thangṭhat ko u! Bawipa min in a rami cu Pathian nih thluachuah pe ko seh, Pathian cu thangṭhat ko u," tiah an ti. ¹⁰ Jerusalem khua chungah an va luh tikah a khuapi in an i tuai i, "Hi pa hi ahodah a si?" tiah mi nih khan an rak hal hna i, ¹¹ "Hi pa hi Galilee ram Nazareth khuami profet Jesuh a si," tiah mibupi nih khan an leh hna. ¹² Jesuh cu biakinn ah khan a va lut i biakinn chung i chaw a rak zuarmi le a rak cawmi kha a ṭhawl dih hna; tangka thlengtu pawl cabuai le laileng zuartu pawl ṭhutdan kha a leh dih hna i ¹³ annih cu, "Cathiang chungah, ’Pathian nih ka inn cu thlacamnak inn a si lai, a ti,’ tiah aa ṭial. Sihmanhsehlaw nannih nih cun mifir kua ah nan ser cang," tiah a ti hna. ¹⁴ Mitcaw mi le kebei mi kha biakinn chungah cun a sinah khan an ra i a rak damter hna. ¹⁵ Tlangbawi upa le Phungbia cawnpiaktu saya hna nih khan khuaruahharmi thil a tuahmi kha an hmuh i ngakchia nih, "David Fapa cu thangṭhat u," tiin biakinn chungah an au kha an theih tikah an thin a hung i ¹⁶ cucaah Jesuh cu, "An chimmi cu na thei maw?" tiah an ti. Jesuh nih cun, "Thei dah e! ’Ngakchia tete hna le hnuktlai lio bawhte hna kha, na thangṭhatnak cu na chimter hna,’ tiah Cathiang chungah aa ṭialmi kha nan rel bal lo maw?" tiah a ti hna. ¹⁷ Jesuh nih cun a chuahtak hna i khua chung khan Bethani khua ah a kal i cuka ah cun a va riak. ¹⁸ A thaizing cu zingkate in Jesuh cu Jerusalem khua ah khan a kal ṭhan i lampi ah a rawl a ṭam. ¹⁹ Lam pawngah khan theipi kung a hei hmuh i a hei fuh, asinain a hnah lawng a rak si ai. Cucaah thingkung cu aa thawh i, "Zeitikhmanh ah thei tlai ti hlah," tiah a ti. Hmakhatte ah theipi kung cu a car ko. ²⁰ Cucu a zultu nih khan an hmuh tikah an hung ar i, "Zeitindah cu tluk khulrang in theipi kung cu a car manh?" an ti. ²¹ Jesuh nih cun, "Hihi philh hlah u: nan zumh i lung awṭawm lo tein nan um ahcun, hi theipi kung cung i ka tuahmi hi nan tuah khawh ve lai; cu lawng hmanh si loin hi tlang hmanh hi, ’I ṭhial law rili chungah i paih,’ nan ti ahcun aa ṭhial lai i aa paih ko lai. ²² Nan zumh ahcun thlacamnak in nan halmi paoh kha nan hmuh lai," a ti. ²³ Jesuh cu Biakinn ah khan a ra ṭhan i a cawnpiak hna lioah khan tlangbawi upa pawl le Judah mi hruaitu pawl kha an ra i, "Zei nawl in dah hi thil hi na tuah hna? Aho nih dah cu nawl cu an pek?" tiah an hal. ²⁴ Jesuh nih cun, "Bia pakhatte kan hal ve hna lai i nan ka leh ahcun, zei nawl in dah hi thil cu ka tuah hna, ti kha kan chimh ve hna lai. ²⁵ Johan tipil peknak kha: Pathian sinin maw a si, minung sinin dah?" tiah a leh hna. Zeitindah kan leh lai, tinak caah khan pakhat le pakhat an i al lengmang i "Pathian sinin kan ti ahcun, zeicahdah nan zumh kun lo? a kan ti lai; ²⁶ minung sinin kan ti ahcun, Johan cu profet a si, tiah mi nih an dihlak in an zumh caah zeitindah kan cungah an tuah lai ti kha phan awk kan si fawn," an ti. ²⁷ Cucaah, "Kan hngal lo," tiah an leh. Cun anih zong nih, "Kei zong nih zei nawl in dah hi thil hi ka tuah, ti kha kan chim ve hna lai lo," tiah a ti hna. ²⁸ "Zeitindah nan ruah? Mipa pakhat a rak um i fapa pahnih a ngeih hna. A upa u sinah khan a va kal i, ’Ka fapa, nihin cu va kal law mitsur dum ah rian va ṭuan,’ tiah a ti. ²⁹ Anih nih, ’Ka duh lo,’ tiah a leh. Sihmanhsehlaw a hnuah a lung a hun i thleng i mitsur dum ah cun a kal. ³⁰ Cun an pa cu a fapa a dang pakhat sinah khan a kal i cu ti ṭhiamṭhiam cun a va ti. Anih nih cun, ’E, e, bawipa,’ tiah a rak leh, sihmanhsehlaw a kal lo. ³¹ A si ahcun, cu hna pahnih lakah khan aho nih dah an pa duhnak kha a tuah?" tiah a hal hna. Annih nih, "Upa u nih khan," tiah an leh. Jesuh nih cun a thawh hna i, "Hihi kan chimh hna: Ngunkhuai khawltu hna le hlawhhlangnu hna nih Pathian Pennak chungah an in luhkanh cang hna lai hih. ³² Zeicahtiah Johan cu nan sinah a ra i ahmaanmi lam zulh awk kha an hmuhsak hna, sihmanhsehlaw nannih nih cun nan zum duh lo; ngunkhuai khawltu hna le hlawhhlangnu hna tu nih khan an zumh. Cucu nan hmuh hnu zongah nan lung nan i thleng duh ṭhiamṭhiam lo i amah kha nan zum duh hlei lo," tiah a ti. ³³ Jesuh nih cun a thawh ṭhan hna i, "Tahchunhnak bia pakhat in ngai rih tuah u: Lo ngeitupa pakhat a rak um i mitsur dum pakhat a rak ser; hau in a kulh, mitsur nennak caah khor a cawh i parthlam pakhat a sak. Cun a lo cu a ṭuantu hna sinah khan a hlanh i amah cu khualtlawn ah aa thawh. ³⁴ Mitsur thei lawh caan kha a phak tikah a hlanhmi hna sinah cun a sal kha a hei thlah hna i a hmuh awk hnga a simi kha an va hal hna. ³⁵ Dum a hlanhmi hna nih cun a salle cu an rak tlaih hna i pakhat an velh, pakhat an thah i pakhat lung in an cheh. ³⁶ Cun dum ngeitu nih cun hmasa nak tam deuh in sal dang a thlah ṭhan hna, sihmanhsehlaw hmasa bantuk ṭhiamṭhiam khan an rak tuah hna. ³⁷ A donghnak ah a fapa kha a hei thlah. ’Ka fapa cu an rak hmaizah ṭheoṭheo lai,’ tiah a ti. ³⁸ Sihmanhsehlaw dum hlanhmi pawl nih khan a fapa cu an rak hmuh tikah an i thawh i, ’Hihi dum ngeitu fapa a si. Ra u, that u si law a thilri hi i lak u sih,’ an ti. ³⁹ Cucaah an tlaih i dum lengah khan an hlonh i an thah. ⁴⁰ "A si ahcun, dum ngeitu kha a rat tikah zeitindah hi dum a hlanhmi hna cu a tuah hna lai?" tiah Jesuh nih cun a hal hna. ⁴¹ "Cu miṭhalo hna cu a thah hrimhrim hna lai i a theitlai a pe dingmi midang kha dum cu a hlanh hna lai," tiah an leh. ⁴² Jesuh nih khan annih cu, "Cathiang nih: ’Inn satu hna nih san a tlai lo tiin an hlawtmi lung cu lung santlai bik ah a cang; Cucu Bawipa tuahmi a si i khuaruahhar ngaingai a si tiah kan ruah,’ tiah a timi kha nan rel bal lo maw? ⁴³ Cucaah hitihin kan chimh hna: Nannih cu Pathian Pennak kha chuh nan si lai i thei ṭha tein a tlai dingmi kha pek an si lai. ⁴⁴ Hi lung cung i a tlami cu a kuai cikcek lai, hi lung nih a rialmi cu leidip ah a cang lai," tiah a ti. ⁴⁵ Tlangbawi upa pawl le Farasi mi hna nih khan Jesuh chimmi tahchunhnak bia cu an theih i kanmah a kan tihnawhchan ti kha an hngalh; ⁴⁶ cucaah tlaih kha an i zuam. Asinain mizapi nih khan Jesuh cu profet a si tiah an zumh caah an ṭih hna.

¹ Jesuh nih mizapi cu bianabia in a chimh ṭhan hna. ² "Vancung Pennak cu, a fapa caah nupi ṭhit rawl danghnak a tuahtu siangpahrang he aa lo. ³ A sawmmi kha, ra cang u, tiah va chimh awkah a sinum kha a thlah hna tikah, an ra duh lo. ⁴ Cun a sinum a dang kha a thlah ṭhan hna i, ’Rawl danghnak cu timh a si dih cang. Ka cawtum hna le ka saṭil thauthau hna cu ka thah cang hna. Zeizong vialte timh a si dih ko. Cucaah khulrang in rawl danghnak ah cun ra cang u,’ nan va ti hna lai, tiah a ti hna. ⁵ Sihmanhsehlaw a sawmmi hna nih khan zeihmanh ah an rak rel lo i a cheu cu an lo ah an kal, a cheu cu an chawdawr ah an kal, ⁶ a cheu nih cun a sinum hna kha an rak tlaih hna i an rak velh hna i an rak thah hna. ⁷ Siangpahrang cu a thin a hung i a ralkap kha a thlah hna i cu lainawngmi hna cu a thah hna i an khua kha a duah hna. ⁸ Cun a sinum kha a auh hna i, ’Nupi ṭhit rawl danghnak ka tuahmi cu timh dih a si cang; asinain ka sawmmi hna cu upatnak hmuh awkah an i tlak lo. ⁹ Cucaah zatlang lam ah khan va kal u law nan hmuhmi paoh vun sawm hna u,’ tiah a ti. ¹⁰ Cucaah a sinum hna cu zatlang lampi ah khan an va kal i an hmuhmi hna paoh kha, a chia a ṭha thlu loin, an va pumh hna i rawl danghnak khaan cu mi an khat dih. ¹¹ "An sawmmi hna va zoh awkah khan siangpahrang cu a vung lut i nupi ṭhitnak puan aa aih lo mi pakhat a hmuh. ¹² Siangpahrang nih cun, ’Ka kawi, zeitindah hika ah hin nupi ṭhitnak puan loin na luh zia," tiah a hal. Mipa nih cun zeihmanh a chim lo. ¹³ Cun siangpahrang nih khan a sinum cu a thawh hna i, ’A kut le a ke kha ṭem u law, khua leng mui lakah hei hlonh u. Cuka ah cun va ṭap seh law a hacang va rial seh,’ tiah a ti. ¹⁴ Zeicahtiah sawmmi cu an tam nain, thimmi cu an tlawm," tiah a ti. ¹⁵ Farasi mi pawl cu an kal i Jesuh foihnak ding caah khan bia an kawl. ¹⁶ anmah zultu tlawmpal hna le Herod paṭi mi tlawmpal hna kha a sinah cun an hei thlah hna. An vaa thawh i, "Saya, nang cu lih chim hmang lomi na si ti kha kan hngalh. Pathian nih, cuticun um hna seh, a tining kha biatak tein na cawnpiak tawn hna i ahohmanh an mithmai kha na zoh hlei hna lo. ¹⁷ Cucaah hihi kan chim tuah: Rom Siangpahrang ngunkhuai pek hi kan Phung he aa kalh maw kalh lo?" an ti. ¹⁸ Jesuh nih an lung chungin thil ṭhalo an i timh kha a hngalh ziar hna i cucaah cun, "Mihrokhrawl hna! Zeicahdah foih nan ka zalh? ¹⁹ Ngunkhuai pek ding tangka cu ka hmuhsak tuah ngat u," tiah a ti hna. Tangka cu an hun pek i, ²⁰ "Aho mui le aho min dah a cuang?" tiah a hal hna. Annih nih "Siangpahrang mui le min," tiah an leh. ²¹ Cun Jesuh nih cun, "A si ahcun, Siangpahrang cu siangpahrang ta a simi thil kha va pe u law Pathian cu Pathian ta a simi thil kha va pe ko u," tiah a ti hna. ²² Cucu an theih tikah an khuaruah a har i an kaltak. ²³ Cu ni ṭhiamṭhiam ah cun Sadusi mi tlawmpal kha a sinah khan an ra. (Annih cu mi hi thihnak in kan tho ṭhan lai lo a timi pawl kha an si). ²⁴ An i thawh i, "Saya, Moses nih a kan cawnpiakning ah: ’Mipa pakhat khat cu fa ngei loin a thih ahcun, a unau nih a nupi ro cu a ṭhit hrimhrim awk a si lai i an fale cu mithipa fale kha an si lai,’ tiah ti a si. ²⁵ Unau pasarih an rak um i an upa bik cu nupi a ngei, sihmanhsehlaw fa ngei loin a thi i cucaah a nau nih cun a rohmi a nupi cu a ṭhit. ²⁶ Cu bantuk ṭhiamṭhiam cun a pahnihnak pa zong cu a thi ve, cun a pathumnak pa zong cu a thi ṭhiamṭhiam i cuticun an pasarih ning cun an thi dih. ²⁷ A donghnak ah nu zong cu a thi ve. ²⁸ Cucaah an dihlak in an rak ṭhit caah khan, cu nu cu thawhṭhannak ni ah cun aho nupi bik dah a si kun lai?" an ti. ²⁹ Jesuh nih cun, "Nan hei palh hringhran dah. Hi ti nan palhnak cu Cathiang kha siseh, Pathian ṭhawnnak kha siseh, nan hngalh lo caah a si. ³⁰ Mithi cu nunter ṭhan an si tikah vancungmi bantuk an si lai i an i ṭhi in an i um ti lai lo. ³¹ Mithi thawhter ṭhan an sinak kong ah cun, Pathian nih nanmah hrimhrim an chimhmi hna kha nan rel bal lo maw? ³² ’Kei cu Abraham Pathian, Isak Pathian, Jakob Pathian ka si,’ tiah pei a ti kha. Cu a sullam cu Pathian cu minung mi Pathian a si, mithi Pathian a si lo, tinak a si," tiah a ti. ³³ Cucu an theih tikah mizapi cu a cawnpiakmi hna kha an khuaruah a har. ³⁴ Jesuh nih Sadusi mi kha holh awk hngal loin a tuah hna ti kha Farasi mi nih an theih tikah, hmun khat ah an i pum i ³⁵ annih lak i pakhat, Phungbia cawnpiaktu saya a simi nih khan bia in foih a timh. ³⁶ Aa thawh i, "Saya, Phungbia chungah hin zei nawlbia dah a ngan bikmi a si?" tiah a hal. ³⁷ Jesuh nih cun, " ’ Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,’ ³⁸ ti hi a ngan bik le a biapi bik nawlbia cu a si. ³⁹ A hun changtu biapi bik nawlbia cu, cu bantuk ṭhiamṭhiam cu a si i, ’Na innpa cu nangmah naa dawt bantukin na dawt lai,’ ti hi a si. ⁴⁰ Moses Nawlbia vialte le profet hna cawnpiaknak vialte cu, hi nawlbia pahnih chungah hin an i khumh dih," tiah a ti. ⁴¹ Farasi mi hna cu hmunkhat i an i pumh tikah khan Jesuh nih a thawh hna i, ⁴² "Messiah kong hi zeitindah nan ruah? Aho hrinsor dah a si?" tiah a hal hna. Annih nih "David hrinsor a si," tiah an leh. ⁴³ Khi tikah Jesuh nih cun, "A si ahcun, zeicahdah Thlarau nih David cu, Messiah cu ka Bawipa a si, tiah na ti lai, tiah a ti kun? David nih cun pei: ⁴⁴ Bawipa nih ka Bawipa cu a thawh i, Na ral hna cu na ke tangah ka chiah hna hlantiang Ka orhlei kamah hin ṭhu tuah, tiah a ti, a ti cu. ⁴⁵ David nih Messiah cu Bawipa, tiah a ti ahcun zeitindah amah cu David hrinsor cu a si khawh lai?" tiah a ti hna. ⁴⁶ Jesuh cu ahohmanh nih bia kaa khat hmanh an let kho lo i cu ni thawk cun ahohmanh nih bia an hal ngam ti lo.

¹ Cun Jesuh nih mizapi hna le a zultu hna kha a thawh hna i, ² "Phungbia cawnpiaktu saya hna hi le Farasi mi hna hi, Moses Nawlbia hi a sullam cucu a si, tiah a ti tu an si. ³ Cucaah an in chimhmi hna paoh cu nan ngaih le nan zulh a herh. Asinain anmah nawl bel i cawn hlah u, zeicahtiah an chimmi kha an tuah lo. ⁴ Thil kha ritpi in an tom i mi keng cungah an chuan, sihmanhsehlaw annih vial nih cun an kutdong par hmanh in an tawng duh lo. ⁵ Zei paohpaoh kha mi hmuh rem lawngin an tuah. An cal i an i khih chihmi Cathiang bia khumhnak bawmte khi zeitluk in dah an ngan i an puanki khi zeitluk in dah an fual, zoh hna hmanh u! ⁶ Rawl danghnak hmun ah upatnak hmun i ṭhut kha an duh i pumhnak inn ah ṭhutnak hampiak kha an ngen. ⁷ Zatlang lam ah mi nih upatnak in upatnak kan pe hna seh ti kha an duh i, "Saya, saya," ti kha an tlaihchan. ⁸ Sihmanhsehlaw nannih cu "saya" ti kha va duh hlah u, zeicahtiah Saya cu pakhat lawng nan ngei i nan dihlak in u le nau nan si. ⁹ Cun vawlei cungah hin ahohmanh, "Ka Pa," tiah va ti hna hlah u, zeicahtiah Pa cu pakhat lawnglawng nan ngei i amah cu vancung khua i a ummi a si. ¹⁰ "Hruaitu" ti zong duh hlah u, zeicahtiah Messiah lawnglawng hi nan hruaitu cu a si ko. ¹¹ Nan lak i a ngan bik cu nan sal a si awk a si. ¹² Mah le mah aa ngantermi cu ṭhumh an si lai i mi toiah aa dormi cu mi ngan ah ser an si lai," tiah a ti. ¹³ "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna. Vancung Pennak cu mi kha nan kharkanh hna, asinain nanmah cu nan lut duh ṭung lo i luh a duhmi zong kha nan awnh fawn ṭung hna lo. ¹⁴ (Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna! Nuhmei kha nan hlen nan hlen hna i an inn kha nan chuh hna, cun zapi hmuh awkah thla kha sau pipi in nan i camter. Hi caah hin pei nan dantatnak kha a fah chinchin lai cu!) ¹⁵ Phungbia cawnpiaktu saya hna le Farasi mi hna, nan caah ngaihchia a va si dah! Midepde hna! Lungthleng pakhat umter awkah rili kip kha nan tan i ram kip ah nan kal i lungthleng pakhat nan umter tikah cu pa cu, nanmah hell fa nan simi a let hnih ah nan canter. ¹⁶ "Lamhruaitu mitcaw hna, nan caah ngaihchia a va si dah! Nan i thawh i, ’Mi nih Biakinn in chiat a ser ahcun a chiatsernak nih khan a tlai lo, sihmanhsehlaw Biakinn chung i a ummi sui khan chiat a ser ahcun a chiatsernak nih khan a tlaih,’ tiah nan cawnpiak hna. ¹⁷ Mitcaw mihrut hna. A zei cu dah a biapi deuh? Sui cu maw asiloah sui a thiantertu Biakinn cu dah? ¹⁸ Nan i thawh hoi i, ’Mi nih biakṭheng in chiat a ser ahcun a chiatsernak nih khan a tlai lo, sihmanhsehlaw biakṭheng cung laksawng khan a ser ahcun a tlaih,’ nan ti. ¹⁹ Nan mit a va caw hringhran dah! A zei cu dah a biapi deuh? Laksawng cu maw, asiloah laksawng a thiantertu biakṭheng cu dah? ²⁰ Cucaah cun mi nih biakṭheng in chiat an ser tikah biakṭheng cu le a cung i a ummi thil vialte in chiat an ser a si; ²¹ cun Biakinn in chiat an ser tikah Biakinn cu le a chung i a ummi Pathian in chiat an ser a si. ²² Cun vancung in chiat an ser tikah Pathian bawiṭhutdan le a cung i a ṭhumi in chiat an ser a si. ²³ "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna! Tihang ṭamhnak puṭinan tehna, hamhhuai tehna, aithing tehna hmanh kha cheu hra ah cheu khat Pathian sinah nan pek, sihmanhsehlaw Nawlbia nih biapi taktak a si a timi dinnak le mi zaangfahnak le zumhtlakmi sinak hna cu zeihmanh ah nan rel ṭung lo; hi hna hi pei nan tuah awk a si cu, a dang zong kha daithlanh hlei loin. ²⁴ Lam hruaitu mitcaw hna. Fikfa kha kan i din chih sual lai tiah, heh tiah nan zet, asinain kalauk kha nan lemh ṭung! ²⁵ "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna. Nan hrai le nan kheng cu a lenglei kha thiang hirhiar tein nan ṭawl hna, asinain a chung cu nan firmi thil le mah karkalak huih lungthin he mi nan va chuhmi hna thil in a khat ṭung. ²⁶ Farasi mi mitcaw hna. Hrai chung i a ummi thil cu thianh hmasa hna u law, cucun pei a lenglei zong cu a thian ve lai cu! ²⁷ "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna. Si rang an thuhmi thlan bantuk nan si. Lenglei cun aa dawh ko, sihmanhsehlaw a chung cu mithi ruh le a thumi pei a khat cu. ²⁸ Cu bantuk cu nan si, a lenglei cun mi ṭha ko nan lo, sihmanhsehlaw nan chung cu lih le sualnak in a khat. ²⁹ "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna! Profet kha thlan ṭhaṭha nan serpiak hna i mithiang mi hna lungphun kha nan ṭamh, ³⁰ cun nan i thawh i, ’Kannih cun kan pupa hna chan ah hin rak um u si law, annih tuahmi hi cu kan tuah hnga lo i profet hna hi cu kan that hna hnga lo,’ nan ti. ³¹ Cucaah nanmah hrimhrim nih profet a rak thattu hna tefa nan si kha nan fianter ³² i nan pupa hna nih an rak thawkmi cu lim lawlaw ko uh. ³³ Rul hna, rul fale hna. Zeitindah hell chung tla ding i biaceihnak cu kan luat kho lai tiah nan i ruah? ³⁴ Hihi kan chimh hna: Profet hna le mifim hna le cawnpiaktu hna kha kan pek hna lai; a cheu cu nan rak thah hna lai, a cheu cu vailam ah thir in nan rak khenh chih hna lai, a cheu cu nan pumhnak inn ah fung in nan tuk hna lai i khua khat hnu khua khat nan dawi hna lai. ³⁵ Cucaah a sual lomi vialte hna thahnak ruang i dantatnak kha nan cungah a tla lai; a sual lomi Abel thawk in Biakinn le biakṭheng karlak ah nan thahmi Zekhariah, Berekhiah fapa, tiang khan. ³⁶ Hihi kan chimh hna: hi mi vialte hna ruang i dantatnak cu tu chan mi cungah hin a tlung lai. ³⁷ "Maw Jerusalem, Jerusalem, Profet kha na rak thah hna i nangmah sinah Pathian nih a run thlahmi lamkaltu hna kha lung in na rak den hna. Arpi nih a fale cu a thla tangah a huh hna bantukin na fale cu voi zeizat dik ka kut in huh ka timh hna i an duh lo. ³⁸ Atu cu na inn cu kin taktak in a king cang lai. ³⁹ Atu ri hin hmailei ah, ’Bawipa min in a rami cu Pathian nih thluachuah pe ko seh,’ na ti hlan cu, na ka hmu hrimhrim ti lai lo," tiah a ti.

¹ Jesuh cu Biakinn khan a chuak i a kalpah ah khan a zultu hna cu a sinah khan an ra i Biakinn le Biakinn he aa pehtlaimi inn hna kha an hmuhsak. ² Aa thawh i, "Hihi nan hmuh cio ko hna a si lo mei? Sihmanhsehlaw hihi kan chimh hna: lung pakhat hmanh hi a umnak kel ah a ummi an um te lai lo, an dihlak tein chimh an si dih lai," tiah a ti. ³ Cun Jesuh cu Oliv Tlang i a ṭhut lioah khan a zultu hna kha anmah lawngte in an ra i, "Hihi zeitik ah dah a si lai? Cun na ratnak ding hmelchunhnak le atu chan donghnak ding hmelchunhnak ah zei thil dah a um hna lai?" tiah an hal. ⁴ Jesuh nih cun, "I ralring u law ahohmanh i hlenter hna hlah u. ⁵ Zeicahtiah ka min in mi tampi an ra lai i, ’Keimah hi Messiah cu ka si,’ tiah an ti lai i mi tampi kha an hlen hna lai. ⁶ Lam nai i an i tuknak thawng le lam hla i an i tuknak thawngpang kha nan theih hna lai; sihmanhsehlaw nan awlokchong hlah u. Cu bantuk thil cu an um hrimhrim awk a si ko, asinain a donghnak a phan cang tinak a si lo. ⁷ Ram khat le ram khat an i do lai, peng khat le peng khat an i tu lai. A kenkip ah mangṭam le lihnin a tlung lai. ⁸ Hi thil vialte hi nau chuah lai nganfah a hmasa bik bantuk an si. ⁹ "Cun mi nih an in tlaih hna lai i dantat awkah an in chanh hna lai i an in thah hna lai. Keimah ruangah mi vialte nih an in huat hna lai. ¹⁰ Cu caan ah cun mi tampi nih an zumhnak kha an hlawt lai i pakhat le pakhat an i rawi lai i pakhat le pakhat an i hua lai. ¹¹ Cun nal profet tampi an chuak lai i mi tampi an hlen hna lai. ¹² Ṭhat lonak kha a karh tuk lai caah mi tampi cu an dawtnak kha a dai lai. ¹³ Sihmanhsehlaw a dongh tiangin a fekmi cu khamh an si lai. ¹⁴ Cun miphun vialte hna ca i tehte si awkah Vancung Pennak kong Thawng Ṭha hi khuazakip ah chim a si lai — cun cu hnu lawngah cun donghnak cu a si lai! ¹⁵ "Cun profet Daniel nih, ’Ṭhiotu Fihnung,’ a timi kha hmunthiang i a dir cu nan hmuh lai. (A reltu hna, hi a sullam hi i hngalh u). ¹⁶ Cun Judea ram i a ummi kha tlang ah zam hna seh. ¹⁷ A inncung i a ummi cu a innchung i a ummi thilri lak awkah ṭum hlah seh. ¹⁸ Lo i a ummi cu a puan lak awkah tlung hlah seh. ¹⁹ Cu caan ah cun fapawi nu hna le nau no ngeimi nu hna caah a har hringhran lai. ²⁰ Nan zam caan hi khuasik caan le Sabbath ni ah a si sual nakhnga lo, Pathian sinah thlacam u. ²¹ Zeicahtiah khi caan ah cun vawlei hramthawk in nihin ni tiangah a ummi harnak a zeihmanh nakin a let tampi in a fak deuhmi harnak kha a um lai. Cu bantuk harnak cu a um zong a um ti lai lo. ²² Cu caan cu Pathian nih rak tawiter hlah seh law ahohmanh a nungmi an um hnga lo. Asinain Pathian nih a mithim mi hna caah, cu caan cu a tawiter lai. ²³ "Cun ahohmanh nih, ’Messiah cu hika ah a um, khika ah a um,’ in ti ai kun hna, va zum hna hlah u. ²⁴ Zeicahtiah nal messiah le nal profet kha an chuak lai i Pathian mithim hna hmanh kha a si khawh ahcun hlen khawhnak ding caah hmelchunhnak le khuaruahhar nganngan an ser hna lai. ²⁵ Ngai hmanh u. A hlankan in hihi kan chimchung hna hih. ²⁶ "Cun mi nih, ’Ramlak ah a um,’ an in ti hna ahcun va kal hlah u; ’Hika ah aa thup ko,’ an in ti hna zongah vaa lun hlah u. ²⁷ Zeicahtiah Mi Fapa cu van ah nichuahlei in nitlaklei tiang aa lekmi nimtlau bantukin pei a rat lai cu. ²⁸ "Saruak umnak hmun ah langta an i pum tawn." ²⁹ "Cu caan harnak cu a dongh cangka in ni cu a mui lai i thlapa cu a ceu ti lai lo, arfi cu van in an tla lai i vancung ṭhawnnak cu an i hnin lai. ³⁰ Cun Mi Fapa hmelchunhnak kha van ah a lang lai; khi tikah vawlei cung miphun vialte kha an ṭap lai i Mi Fapa cu lianhngannak le sunparnak he vancung in a rat kha an hmuh lai. ³¹ Muko nganpi cu an tum lai i a vancungmi kha vawlei kil li ah a thlah hna lai i vanrang toi khuazakip in a mithim hna kha a pumh hna lai. ³² "Theipi kung nih hin thil pakhat in cawnpiak hna seh: A nge cu an hung hrin i an hung no i a hnah an hung corh tikah ṭhal caan cu a nai cang, ti kha nan hngalh. ³³ Cu bantukin hi thil vialte hi nan hmuh hna tikah, caan cu a nai cang, aa thawk dengmang cang, ti kha nan hngalh lai. ³⁴ Mah hihi philh hlah u: Hi thil vialte hi atu i a nung lio mi an thih dih hlanah hin a tlung ko lai. ³⁵ Van le vawlei cu an rawk lai; sihmanhsehlaw ka bia cu zeitikhmanh ah a rawk lai lo. ³⁶ "Asinain, cu ni le cu caan cu zeitik ah dah a si lai, ti kha ahohmanh nih an hngal lo; vancung mi zong nih an hngal lo, Fapa zong nih a hngal hlei lo, Pa lawnglawng nih a hngalh. ³⁷ Mi Fapa a rat cu Noah chan i thil umtuning bantuk kha a si lai. ³⁸ Tilian a tlun hlan, Noah lawng chung i a luh ni tiang kha, an ei an ding an i ṭhi an i um i ³⁹ tilian a hung tlun taktak i a fenh dih hna hlantiang kha cu, zeihmanh an hngal lo. Mi fapa a rat tikah cun cu bantuk cun a si lai. ⁴⁰ Cu caan ah cun mi pahnih lo ah rian a ṭuanmi hna lakah pakhat cu kalpi a si lai i pakhat cu nganhta a si lai. ⁴¹ Nu pahnih sum a sumi hna lakah pakhat cu kalpi a si lai i pakhat cu nganhta a si lai. ⁴² Cucaah nan Bawipa a rat lai ni nan hngalh lo caah ralring tein um ko u. ⁴³ Hihi philh hlah u: Inn ngeitu nih mifir a rat lai caan kha hngal seh law, hngilh lo tein a rak um hnga i mifir kha a inn chungah a luhter hnga lo. ⁴⁴ Cu ruangah cun nannih zong timh cia tein nan um zungzal awk a si, zeicahtiah Mi Fapa cu nan i rin lo caan ah khin a ra ko lai. ⁴⁵ "Cu a si caah aho cu dah zumh awk a tlakmi le a fimmi sal cu a si? Cu bantukin zumh awk a tlak i a fimmi sal cu, a Bawipa nih a sal hawi zohkhenhtu dingah, a caan hmaan tein an rawl a petu dingah, a chiahmi kha a si. ⁴⁶ A bawipa nih a tlun tikah, a rian a rak ṭuan liote ah a run tanhmi sal caah cun lunglawmh awk a va si dah! ⁴⁷ Cu sal cu a bawipa nih a ngeihmi thil vialte zohkhenhtu ah a chiah hrimhrim lai, tiah kan chimh hna. ⁴⁸ Sihmanhsehlaw cu pa cu miṭhalo a si ahcun, ’Ka bawipa cu a ra chom rih lai lo,’ tiah a lung chungin a ti lai i ⁴⁹ a sal hawi kha a ṭhuat a den hna lai i zuri pawl hna he khan an ei an ding ṭi lai. ⁵⁰ Cun a bawipa cu ni khatkhat cu aa rin lo caan le a hngalh lo caan ah a ra tlung lai i ⁵¹ a bawipa nih cun a sam cikcek lai i midepde pawl umnak hmun ah khan a umter ve lai. Cuka ah cun a ṭap lai i a hacang a rial lai.

¹ "Cun Vancung Pennak cu hi bantuk hi a si lai, voi khat cu ngaknu pahra an um i nupi ṭhi tlangval kha don awkah an meiinn cio he an i thawh. ² Panga cu an hrut i panga cu an fim. ³ A hrutmi nih cun an meiinn cu an i put ko nain zinan kha a hlei in an i ken lo. ⁴ A fimmi tu nih cun an meiinn he khan, zinan khat tein an rawnmi thawl kha an i ken chih cio. ⁵ Nupi ṭhi tlangval cu a rauh caah ngaknu hna cu an ngu i an i hngilh. ⁶ "Zanṭimpi ah khin mi an hung au i, ’Nupi ṭhi tlangval cu a ra cang. Ra chuak u law ra tong u,’ tiah an ti. ⁷ Ngaknu pahra cu an hun i hlau i an meiinn cu an hun timhtuah hna. ⁸ Khi tikah a hrutmi hna nih khan a fimmi hna cu, ’Kan meiinn an mit cuahmah ai, nan zinan kan ṭhen ve tuah u,’ an ti hna. ⁹ A fimmi hna nih cun, ’A si kho lai lo. Nanmah ca he kanmah ca he cun kan ngeihmi hi a za lai lo. Chawdawr ah va kal u law vaa cawk ko u; tiah an leh hna. ¹⁰ Cucaah a hrutmi ngaknu hna cu zinan cawk awkah khan chawdawr ah cun an va kal i cu karah nupi ṭhi tlangvalpa cu a rak phan. Timh cia tein a ummi ngaknu panga hna cu nupi ṭhit rawldanghnak chungah khan amah sinah cun an lut i innka kha an khar. ¹¹ "Hnu deuh ah khin ngaknu dang zong kha an ra phan ve. ’Bawipa, bawipa, innka hung kan hunh tuah,’ tiah an au. ¹² Sihmanhsehlaw nupi ṭhi tlangvalpa nih cun, ’Kan hngal hrimhrim hna lo,’ tiah a leh hna. ¹³ Cucaah cun, a ni siseh, a caan siseh, nan hngalh ṭung lo caah ralring tein um ko u. ¹⁴ "Vancung Pennak cu khualtlawn i aa thawhmipa bantuk a si. A salle kha a kawh hna i a thilri kha nan rak zohkhenh lai, tiah a ti hna. ¹⁵ Anmahle an thil ti khawh ning cio khan ngun tangka a pek hna: pakhat cu thong nga, pakhat cu thong hnih a pek i pakhat cu thong khat a pek. Cun khualtlawn ah cun aa thawh. ¹⁶ Thong nga a hmumi sal nih khan cu tangka cun chaw a let zau i a dang thong nga a miak a hmuh. ¹⁷ Cu bantuk ṭhiamṭhiam in thong hnih a hmu mipa zong nih khan a dang thong hnih a miak a hmuh ve. ¹⁸ Sihmanhsehlaw thong khat a hmutu pa nih khan cun, vawlei a cawh riangmang i a bawipa tangka kha a va thuh. ¹⁹ "Caan saupi hnuah khin an bawipa cu a ra tlung ṭhan i an tangka hmannak kong kha felfai in a tuahpi hna. ²⁰ Thong nga a hmumi sal kha a ra lut i a dang thong nga a rung pek. Aa thawh i, ’Bawipa, tangka thong nga na rak ka pek. Atu cu zohhmanh, a dang thong nga zong ka rak chuahpi,’ tiah a ti. ²¹ A bawipa nih cun, ’Sal ṭha, zumhawktlak sal, na tuahmi cu a ṭha ngaingai. Tangka tlawmte na lehthalnak ah zumhawktlak na si, cucaah tangka tampi tawngthamtu ah kan chiah lai. Ra lut law ka lunglawmhnak hi i hrawm ve,’ tiah a ti. ²² Cun tangka thong hnih a pekmi kha a ra lut i, ’Bawipa, tangka thong hnih na rak ka pek. Atu cu zohhmanh, a dang thong hnih zong ka rak chuahpi,’ tiah a ti. ²³ A bawipa nih cun, ’Salṭha, sal zumhawktlak, tangka tlawmte lehthalnak ah zumhawktlak na si, cucaah tangka tampi tawngthamtu ah kan chiah lai. Ra lut law ka lunglawmhnak hi i hrawm ve,’ tiah a ti. ²⁴ Cun tangka thong khat a hmumipa kha a ra lut i, ’Bawipa, nang cu mikhepkha na si kha ka hngalh. Na cin lonak hmun ah khan theitlai na lawh tawn i na tuh lonak hmun ah khan tirawl na ṭuan tawn. ²⁵ Cucaah kan ṭih i na tangka cu vawlei chungah ka va thuh. Zohhmanh na ta kha a ningte in, hihi a si ko,’ tiah a ti. ²⁶ A bawipa nih cun, ’Mi zaangthu, sal ṭhalo, ka phun lonak hmun ah theitlai ka lawh tawn le ka tuh lonak hmun ah tirawl ka ṭuan tawn cu na hngalh a si lo mei? ²⁷ Cu ti na hngalh ṭung ahcun ka tangka cu beng ah pei na rak chiah awk a si cu, ka ra kir tikah hin ka tangka he a karh he ka hmu hnga lo maw? ²⁸ Cucaah tangka cu a sin khan la u law tangka thong hra a ngeimipa kha pe u. ²⁹ Zeicahtiah a ngeimi cu chap chin an si lai i a hleivuang an ngeih tiangin an ngei lai; sihmanhsehlaw zeihmanh a ngei lomi cu a ngeihmi hnihchunte hmanh kha chuh a si lai. ³⁰ Cun hi sal santlai lopa hi a leng khuamui lakah va hlonh u; khika ah va ṭap seh law a hacang va rial len seh," tiah a ti. ³¹ "Mi Fapa cu Siangpahrang in vancungmi vialte hna he a rat tikah a bawiṭhutdan cungah cun a ṭhu lai i ³² vawleicung mi vialte cu a hmaiah pumh an si lai. Cun tuukhal nih tuu cu meheh sinin a ṭhen hna bantuk khan miphun vialte cu bu hnih ah a ṭhen hna lai; ³³ tuu cu a orhlei ah a chiah hna lai i meheh cu a kehlei ah a chiah hna lai. ³⁴ Cun a orhlei i a ummi cu Siangpahrang nih cun a thawh hna lai i, ’Nannih, ka Pa nih thluachuah a pekmi hna, ra tuah u. Ra u law vawlei ser ri in nan caah timh a simi pennak cu ra co tuah u. ³⁵ Ka rawl a ṭam i rawl nan ka pek, ka ti a hal i ti nan ka pek; khual ka si i nan inn ah nan ka tlunter. ³⁶ Puan aih awk ka ngei lo i puan nan ka pek; ka zaw i nan ka zohkhenh; thong ka tla i nan ka len,’ tiah a ti hna lai. ³⁷ Khi tikah miding mi hna nih cun, ’Bawipa, zeitik ah dah na rawl a ṭam i rawl kan in pek, na ti a hal i ti kan in pek, ³⁸ khual na si i kan in tlunter, puan aih awk ngei loin na um i puan kan in pek, ³⁹ na zawt i kan in zoh, thong ah na tlak i kan in len?’ tiah an leh lai. ⁴⁰ Cun Siangpahrang nih cun, ’Hihi kan chimh hna: Ka unau pakhatkhat cungah, zeitluk hmanh in sifak le nauta si seh law, nan tuahmi thil paoh hi ka cung i nan tuah a si,’ tiah a leh hna lai. ⁴¹ "Cun a kehlei i a ummi hna cu, ’Nannih, Pathian nih chiat a serhmi hna, kal ko u, Khuachia le a vancungmi hna ca i timh a simi zungzal mit lo mei chungah cun va kal ko u. ⁴² Ka rawl a ṭam ah rawl nan ka pe lo, ka ti a hal ah ti nan ka pe duh lo, ⁴³ khual ka si ah nan ka tlunter duh lo, puan aih awk ka ngeih lo ah puan nan ka pe duh lo, ka zawt i thong i ka tlak ah nan ka zohkhenh duh lo,’ a ti hna lai. ⁴⁴ Khi tikah annih nih, ’Zeitik te ah khan dah na rawl a ṭam, na ti a hal, puan aih awk ngei loin na um, khual na si, na zawt, thong ah na tlak i kan in hramh duh lo cu a si?’ tiah an leh lai. ⁴⁵ Cun Siangpahrang nih khan, ’Hihi kan chimh hna: misifak hramh nan duh hna lo paoh ah khan nan ka hramh duh lo a si,’ tiah a leh ṭhan ve lai. ⁴⁶ Hi hna cu zungzal hremhmun ah khan kalter an si lai: a dingmi cu zungzal nunnak ah khan an kal lai," tiah a ti.

¹ Jesuh nih hi bia vialte cu a chimh dih hna tikah a zultu pawl kha a thawh hna i, ² "Nan hngalh bantukin, hi hnu ni hnih ah, Lanhtak Puai kha a si cang lai, cun Mi Fapa cu vailam tahnak i khenhchih awkah tlaihter a si lai," tiah a ti hna. ³ Cun tlangbawi upa pawl le Judah mi upa hna kha Tlangbawi Ngan Kaiafas innpi ah cun an i pum i ⁴ a thli tein Jesuh kha tlaih i thah ding kha khua an khang. ⁵ "Puai chungah cun kan tuah lai lo, mizapi an i tuai sual lai," an ti. ⁶ Jesuh cu Bethani khua i thinghmui Simon inn i a um lioah khan, ⁷ nu pakhat a ra i lungrang thawl khatte in zihmui a man a fak ngaingaimi kha a rak i put i rawl a ei lioah khan a lu ah a toih. ⁸ A zultu hna nih khan cucu an hmuh tikah an thin a hung i, "Zeicahdah hi thil hi hitihin a sawksam ee? ⁹ Hi zihmui hi tangka tampi ah zuar i tangka cu misifak hna kha pek khawh ding a si ṭung," an ti. ¹⁰ Jesuh nih an i ceihmi cu a theih i, "Zeicahdah hi nu hi nan hnahnawh? A ka tuahpiakmi hi thil ṭha le thil dawh pei a si hi. ¹¹ Misifak cu zungzal in pei nan sinah an um ko lai cu, kei cu zungzal in nan sinah ka um ṭung lai lo. ¹² Zihmui ka pum i a ka toih hi vui awk ca i a ka timhtuah pei a si cu. ¹³ Hihi philh hlah u: hi thawngṭha hi vawlei cung khuazakip i an chimnak hmun paoh ah, a tuahmi thil hi amah philh lonak ah chim a si zungzal ve lai," tiah a ti hna. ¹⁴ Cun zultu pahleihnih lak i pakhat, Judas Iskariot timi kha, tlangbawi upa pawl sinah khan a va kal i ¹⁵ "Jesuh cu nan kut chung i kan chanh hna ahcun zeidah nan ka pek lai?" tiah a va ti hna. Cucaah ngun tangka sawm thum kha an rel i an pek. ¹⁶ Cu ri cun Judas nih khan Jesuh rawinak ding caan rem kha a bawh. ¹⁷ Thilnu Cawh Lo Changreu Puai a ni hmasa bik ah khan, a zultu kha Jesuh sinah cun an ra i, "Khuazei ah dah Lanhtak Puai Zanriah cu va tim u ti na kan duh?" tiah an ti. ¹⁸ Annih cu, "Khua chung i mipa pakhat sinah va kal u law, kan Sayapa nih, ’Ka caan a phan cang, ka zultu hna he na inn ah Lanhtak Zanriah ei kan duh,’ a ti tiah va chim u," tiah a ti hna. ¹⁹ A zultu pawl nih khan Jesuh nih a chimh hna bang cun Lanhtak Zanriah cu an timh. ²⁰ Zanlei sang a hung si tikah Jesuh le a zultu hleihnih hna cu rawl ei awkah khan an ṭhu ²¹ Rawl an ei lioah cun, "Nan lak i pakhat nih hin nan ka rawi lai," tiah a ti hna. ²² A zultu pawl cu an awlok a chong i pakhat hnu pakhat in, "Na ti duhmi cu kei cu ka si lo, a si lo mei?" tiah an ti duahmah cio. ²³ Jesuh nih cun, "Ka changreu ka hnimnak kheng i a changreu a hnim vemi nih hin a ka lei lai. ²⁴ Mi Fapa cu Cathiang nih a thi lai a tining khan a thi lai, sihmanhsehlaw Mi Fapa a rawitu caah cun ngaihchia a si ko. Cu pa cu chuak loin rak um seh law a caah a ṭha deuh hnga," tiah a ti. ²⁵ Leitu Judas nih khan a hun i thawh i, "Saya, keimah na ka ti duhnak cu a si i mei?" tiah a hal. Jesuh nih cun, "Na chim ko cu ta," tiah a leh. ²⁶ Zanriah an ei lioah cun Jesuh nih khan changreu kha a lak i thla a cam dih in a cheu i a zultu kha a pek hna. "I lak u law ei u; hihi ka pum a si," tiah a ti. ²⁷ Cun hrai kha a lak i Pathian sinah lawmhnak bia a chim dih in, annih cu a pek hna i, "Nan dihlak in ding u. ²⁸ Hihi ka thi a si, biakam fehternak thisen, sual ngaihthiamnak ca i mi tampi ca i thletmi cu a si. ²⁹ Hihi kan chimh hna: Ka Pa Pennak chungah nanmah he a thar in ka din ṭhan hlantiang hi mitsur hang hi ka ding ti lai lo," tiah a ti. ³⁰ Cun hla an sa i Oliv tlang ah khan an kal. ³¹ Jesuh nih annih cu a thawh hna i, "Cathiang nih, ’Pathian nih tuukhal kha a thah lai i tuurun chung tuu kha an i ṭhek dih lai,’ a ti caah, tuzan hrimhrim ah hin nan dihlak in nan ka zamtak lai. ³² Sihmanhsehlaw nunter ṭhan ka si tikah nan hmaiah Galilee ah ka rak kal chung lai," tiah a ti hna. ³³ Peter nih khan Jesuh cu a hun thawh i, "Midang vialte nih in zamtak hna hmanh seh law, kei cu kan zamtak bal lai lo," tiah a ti. ³⁴ Jesuh nih Peter cu, "Hihi va philh hlah: Tuzan i ar a khuan hlan ah amah cu ka hngal lo, tiah voi thum na ka ti lai," tiah a ti. ³⁵ Peter nih cun, "Na sin i ka thih ve ding a si hmanh ah, amah cu ka hngal lo, kan ti bal lai lo," tiah a leh. Cu bantuk cun zultu dang vialte zong nih khan an ti cio. ³⁶ Cun Jesuh cu Gethsemane an timi hmun ah khan a zultu hna he khan an kal i annih cu, "Khika i thla ka va cam kar ah khin, hika ah hin rak ṭhu u," tiah a ti hna. ³⁷ Peter le Zebedi fapa pahnih hna kha aa kalpi hna. A ngaih a chia i a awlok a chong. ³⁸ Annih cu a thawh hna i, "Ka lungre a thei tuk hringhran i ka thi sual lai. Cucaah cun hika ah hin rak um u law hngilh lo tein rak ka hngak u," tiah a ti hna. ³⁹ Hmailei ah khin tlawmpal a va kal i vawlei ah a bawk i, "Ka Pa, a si khawh ahcun hi hrai hi ka ṭhialpiak ko. Sihmanhsehlaw keimah duhmi cu si hlah seh, nangmah duhmi tu si ko seh," tiah thla a cam. ⁴⁰ Cun a ra kir i a zultu pathum hna cu an rak i hngilh kha a hmuh hna; cun Peter kha, "Suimilam pakhat hmanh hngilh loin nan ka hngak kho lo maw? ⁴¹ Tukforhnak chungah nan luh nakhnga lo hngilh lo tein um u law thlacam tuah u. Thlarau nih cun a huam ko, sihmanhsehlaw titsa cu a der," tiah a ti. ⁴² Cun Jesuh cu a va kal ṭhan i, "Ka Pa, hi hrai hi din loin hrial khawh a si lo ahcun, nangmah duhnak bangin si ko seh," tiah thla a cam. ⁴³ A zultu hna sinah khan a ra kir ṭhan i an rak i hngilh ṭhan; an mit a au in an au kho lo. ⁴⁴ Jesuh nih cun a kaltak ṭhan hna i a voi thumnak thla a cam ṭhan, a chim cia kha a chim ṭhan. ⁴⁵ Cun a zultu hna sinah khan a ra kir ṭhan i, "Nan i hngilh i nan i din ko rih maw? Zohhmanh u, Mi Fapa cu misual mi hna kut chung i chanhnak caan kha a phan cang. ⁴⁶ Tho u law, kal u sih. A ka rawitu kan sin a phan cang," tiah a ti hna. ⁴⁷ Bia a chim lengmang lioah cun a zultu hleihnih lak i a rak i tel vemi Judas kha a ra phan. Tlangbawi upa pawl le Judah upa hna nih an thlahmi mi runpi kha nam le thingtan i put in aa ratpi hna. ⁴⁸ Rawitu nih cun mizapi cu hmelchunhnak a rak pek cia hna i, "Ka hnamhmi cu tlaih nan duhmi kha a si lai i nan tlaih colh lai," tiah a ti hna. ⁴⁹ Judas nih cun a phak cangka tein Jesuh cu a hei fuh i, "Saya, na cungah daihnak um ko seh," tiah a ti i a hnamh colh. ⁵⁰ Jesuh nih cun, "Ka kawi, khulrang in tuah ko kun," tiah a leh. Cun an hung chuak i Jesuh cu an tlaih i fek tein an khih. ⁵¹ Jesuh sin i a ummi pakhat nih khan a nam aa zuh i Tlangbawi Ngan sal hnakhaw kha pet lakin a tuk. ⁵² Jesuh nih anih cu, "Na nam cu a kawng ah sawh ṭhan ko, zeicahtiah hriamnam a lami cu hriamnam in an thi lai. ⁵³ Ka pa kha bawmhnak ka hal khawh ko i khulrang in vancungmi ralkap bu hleihnih a run ka thlah khawh ko ti kha na hngal lo maw? ⁵⁴ Sihmanhsehlaw cu ti a si ahcun, zeitindah hi bantukin a si lai, tiah a rak chimtu Cathiang bia cu a tlin khawh kun hnga?" tiah a ti. ⁵⁵ Cun Jesuh nih mibupi cu a thawh hna i, "Kei cu damiah hei si ning law cu bang, zeicahdah tlaih awkah nam le thingtan he nan ka fuh? Nifate in pei Biakinn ah ka ṭhu i kan cawnpiak lengmang ko hna cu, nan ka tlaih ṭung lo. ⁵⁶ Sihmanhsehlaw hi thil vialte hi bantukin a sinak cu profet nih Cathiang chungah an rak ṭialmi kha a tlinnak ding caah a si," a ti. Cun a zultu hna nih khan an dihlak in an zamtak i an le dih. ⁵⁷ Jesuh cu a tlaitu hna nih khan Tlangbawi Ngan Kaiafas inn ah khan an kalpi i cuka ah cun Phungbia cawnpiaktu saya hna le upa hna kha an rak i pum. ⁵⁸ Peter nih lamhlat nawn khin a zulh i Tlangbawi Ngan inntual tiang kha a va kal. Inntual chungah khan a va lut i zeitindah thil a hung umtuning a si lai ti hngalh duh ah ralveng pawl sinah khan a ṭhu. ⁵⁹ Tlangbawi upa pawl le biaceihtu pawl nih khan an thah khawhnak hnga, an dihlak in a sual an kawl, ⁶⁰ sihmanhsehlaw an hmu kho lo. Lihchimmi tehte tampi an hung chuak nain an hmu kho hlei lo. A donghnak ah pahnih an hung chuak i, ⁶¹ "Hi pa nih hin ’Pathian Biakinn hi ka ṭheh lai i ni thum chungah ka sak ṭhan dih lai,’ a ti," tiah an ti. ⁶² Tlangbawi Ngan kha a hung dir i Jesuh cu, "Hi hna nih sual an in puhmi hi na let kho hna maw?" tiah a ti. ⁶³ Sihmanhsehlaw Jesuh cu dai tein a um ko. Cun Tlangbawi Ngan cu a hun i nolh ṭhan i, "A nungmi Pathian min chalh in, na chim hrimhrim lai, kan ti: Pathian fapa Messiah cu na si maw si lo, chim," tiah a ti. ⁶⁴ Jesuh nih cun, "Na chim ko cu ta. Sihmanhsehlaw nan dihlak in hihi kan chimh hna: Atu ri hin cun Mi Fapa hi, Cung Nung Bik orhlei i a ṭhut le khuadawm cungin a rat kha nan hmuh lai," tiah a leh hna. ⁶⁵ Cu bia a theih tikah cun Tlangbawi Ngan nih khan a puan kha a thleh i, "Cucu Pathian thangchiat a si. Tehte dang ahohmanh kan herh ti hna lo. Pathian thangchiatnak bia a chimmi cu nanmah nih nan theih ko cang. ⁶⁶ Zeitindah nan ruah?" tiah a ti. Annih nih, "A sual, thih awk a tlak," tiah an leh. ⁶⁷ Cun a hmaiah cil an chak i an tuk; cun a bengtu hna nih khan an thawh i, ⁶⁸ "Messiah cu pei na si fam cu, ahodah an beng, kan chim tuah ngat?" an ti. ⁶⁹ Peter cu lengah, inntual ah khan a ṭhu. Tlangbawi Ngan salnu pakhat kha a ra i, "Nangmah zong hi Galilee ram mi Jesuh sin i a rak um tawnmi na si ve ko," tiah a ti. ⁷⁰ Sihmanhsehlaw an dihlak hmaiah cun Peter nih khan aa pheh. "Na chimmi kong hi ka hngal lo," tiah a leh i ⁷¹ tual kutka leiah khan a va chuak. Sinum ngaknu dang pakhat nih a rak hmuh ṭhan i, "Hi pa zong hi Nazareth khuami Jesuh sin i a rak ummi a si ve," tiah cuka i a ummi kha a chimh hna. ⁷² Peter nih aa pheh ṭhan i, "Cu pa cu ka hngal lo tiah chiatser in ka chim," tiah a leh. ⁷³ Cu hnu tlawmpal ah cuka i a dirmi hna nih khan Peter cu an hei fuh i, "Phehthuh hau loin nang cu an sin i a rak i tel vemi na si hrimhrim ko. Na aw cawi nih an phuan," tiah an ti. ⁷⁴ Cun Peter nih cun chiatser in, "Biatak ka chim lo a si ahcun Pathian nih dan ka tat seh. Cu pa cu ka hngal hrim lo," tiah a ti. Cu caan te ah cun ar a hung khuang i ⁷⁵ Peter nih cun Jesuh nih, "Ar a khuan hlanah ’Amah cu ka hngal lo,’ tiah voi thum na ka ti lai," tiah a rak chimmi kha a lung ah a hung pem. A chuak i fak piin a ṭap.

¹ Zingkate ah tlangbawi upa pawl vialte hna le Judah upa hna cu an i pum i Jesuh thahnak ding khua kha an khang. ² Cikcin in an khih i an hei kalpi i Mangki bawi Pilat sinah khan an pek. ³ Jesuh a leitu Judas nih khan Jesuh cu thah awkah sual an phawt ti kha a hngalh tikah a sualnak kha aa ngaihchih i ngun tangka sawm thum kha aa lak i tlangbawi upa pawl le Judah upa hna kha a va pek ṭhan hna. ⁴ "A sual lomi thihnak ka phakter kha ka sual," tiah a ti. Sihmanhsehlaw annih nih cun an rak thawh i, "Cucu kan zeidah a poi? Nangmah nih naa tuahnak in vaa tuah ko," tiah an rak leh. ⁵ Judas nih tangka cu hmunthiang chungah khan a vun hlonh i a kaltak; cun a chuak i a vaa awk. ⁶ Tlangbawi upa hna nih cun tangka cu an char i, "Hi tangka hi thisen man tangka a si, cucaah Biakinn Tangka chiahnak i chiah ve cu kan Phung he aa ralchanh," tiah a ti. ⁷ An i ceih dih hnuah tangka cu Um Sertu Lo timi cawknak ah khan an hman i cu lo cu ramdang mi hna thlan mual ah a cang. ⁸ Cu nih cun Thisen Lo timi sullam kha a fianter i cu hmun cu nihin ni tiang hin Thisen Lo ti cun auh a si. ⁹ Cuticun profet Jeremiah nih a rak chimmi kha a hung tling. A chimmi cu: "Israel mi hna nih, cu pa man cu cu zat in si seh, tiah an khiahmi ngun tangka sawm thum kha an i lak i ¹⁰ um sertu lo cawknak ah khan, Bawipa nih a ka fial bangin, an hman," ti hi a si. ¹¹ Mangki bawi hmaiah cun Jesuh cu a dir i mangki bawipa nih cun, "Judah siangpahrang cu na si maw? tiah a hal. "Na chim ko cu ta," tiah Jesuh nih a leh. ¹² Tlangbawi upa pawl le Judah upa hna nih sual an puhmi tu cu zeihmanh a let hna lo. ¹³ Cucaah Pilat nih cun a thawh i, "Sual an in puhmi vialte hi na thei lo maw?" tiah a ti. ¹⁴ Sihmanhsehlaw Jesuh nih bia kaa khat hmanh a let duh lo i mangki bawipa cu a khuaruah a har ngaingai. ¹⁵ Lanhtak Puai caan ah hin Mangki bawipa nih cun, mi zapi nih chuak seh ti an duhmi thongtla pakhat kha a chuahpiak tawn hna. ¹⁶ Cu caan ah cun thongtla pakhat, zapi nih an hngalh ngaimi a um i a min cu Jesuh Bar-Abbas a si. ¹⁷ Cucaah mi zapi cu an hun i pumh tikah khan Pilat nih cun, "Jesuh Bar-Abbas le Jesuh Messiah ah hin, aho deuh hi dah in chuahpiak hna ning law nan duh?" tiah a hal hna. ¹⁸ Pilat nih khan Jesuh ka kut chung i an ka pek hi an nahchuah caah a si ti kha fiang tein a hngalh. ¹⁹ Pilat cu biaceihnak khaan chung i a ṭhut lioah khan a nupi nih bia a hun cah i, "Kha mipa, sualnak zeihmanh a tuah lomi kha zei ti hmanh in rak ti hlah; zeicahtiah zahan ah ka mang in kha pa ruangah khan sifahnak tampi ka in," tiah a ti. ²⁰ Tlangbawi upa pawl le upa hna nih khan mizapi cu Pilat kha, Bar-Abbas kan thlahpiak, tiah nan hal lai i Jesuh kha that, tiah nan ti lai, tiah an lem khawh hna. ²¹ Sihmanhsehlaw mangki bawipa nih cun, "Hi hna pahnih lakah hin, aho hi dah kan thlahpiak seh, ti nan ka duh?" tiah a hal hna. Annih nih Bar-Abbas tiah an leh. ²² Cun Pilat nih cun, "Khrih timi Jesuh cu zeitindah ka tuah kun lai?" tiah a hal hna. Annih nih, "Vailam ah khenh chih ko," tiah an leh. ²³ Sihmanhsehlaw Pilat nih cun, "Zei sualnak dah a tuah?" tiah a vun hal hna. Cu tikah fak piin an au ciammam i, "Vailam ah khenhchih ko," an ti. ²⁴ Pilat nih cu ti i ti lengmang cu zeihmanh san a tlai ti lo i mizapi nih hnahnawhnak lam an chuahter lai ti kha a hmuh tikah, ti kha aa lak i mizapi hmaiah cun a kut aa ṭawl i, "Hi misual lopa thihnak kong ah hin kei cu ka thiang, nanmah tuahmi a si," tiah a ti. ²⁵ Mizapi nih cun an dihlak in, "Hi pa thahnak ruang i dantatnak cu kanmah le kan tefa hna cungah tlung ko seh," an ti. ²⁶ Cu tikah Pilat nih Bar-Abbas cu a thlahpiak hna i Jesuh cu fung in a tukter hna i vailam thing i thir in khenh awkah a pek hna. ²⁷ Cun Pilat ralkap pawl nih khan Jesuh cu mangki bawi innpi chungah khan an luhpi i an kampani dihlak in an kulh. ²⁸ A puan kha an phoih i puan sen an aih. ²⁹ Cun hling nge in bawi luchin kha an phiar i a lu ah an chinh. A orhlei kut ah fung an putter. Cun a hmaiah an kun i an cawhdeh i, "Judah Siangpahrang cu saupi nung ko seh," tiah an au; ³⁰ cil an chak i fung cu an chuh i a lu ah khan an tuk nak. ³¹ An cawhdeh dih hnuah puan sen kha an phoih i amah puan kha an aihter ṭhan i vailamtahnak i khenh chih dingah an chuahpi. ³² Cun lam ah khan Sairin khuami Simon kha an ton i a vailam tahnak thing kha hramhram in an putter. ³³ Golgotha an timi hmun kha an va phan i (Golgotha ti a sullam cu Lu Ruh Hmun tinak a si), ³⁴ mitsur hang, hnitkha he cawhmi, kha an pek; a vun teh i a ding duh lo. ³⁵ Vailam ah cun an khenh chih i a thilpuan kha phe ah an i kah i an i ṭhen. ³⁶ Cun an ṭhu i an cawngh. ³⁷ A lu cungah cun sual an phawtnak bia an ṭialmi kha an benh. Cu bia cu: "Hihi Jesuh, Judah Siangpahrang cu a si," ti hi a si. ³⁸ Cun Jesuh sinah cun mifir pahnih an tah ve hna; pakhat a orhlei ah pakhat a kehlei ah. ³⁹ Cun aa chawkmi paoh nih khan an lu an thinhnawh i an bia-eng in, ⁴⁰ "Biakinnpi hmanh pei ka ṭheh lai i ni thum ah ka sak ṭhan dih lai, na rak ti kha. Pathian Fapa na si ahcun nangmah cu i khamh kun ngat. Vailamtahnak cung khan ta, na rung ṭum kun," an ti. ⁴¹ Cu bantuk ṭhiamṭhiam cun tlangbawi upa hna le Phungbia cawnpiaktu saya hna le upa hna nih khan an cawhdeh ve i ⁴² "Midang cu a khamh ṭung hna, amah vial aa khamh kho ṭung lo. Israel Siangpahrang cu a si kun lo maw? Vailam tahnak cung khan atu te ah hin rung ṭum seh law pei kan zumh hnga cu. ⁴³ Pathian kha aa bochan i Pathian Fapa ka si a ti. Pathian nih a khamh le khamh lo kan zoh fam lai ta!" an ti. ⁴⁴ A sin i mifir an tah vemi hna hmanh nih khan cu bantuk cun an nihsawh ve. ⁴⁵ Chun in zanlei suimilam pathum tiang cu ram cu a dihlak in muihnak nih a khuh i ⁴⁶ suimilam pathum tluk ah khin Jesuh cu a au i, "Eli, Eli, lema sabakthani," a ti, a sullam cu, "Ka Pathian, ka Pathian, zeicahdah na ka kaltak," ti a si. ⁴⁷ Cu ka i a dirmi a cheukhat nih khan an theih i, "Elijah a auh cuh," an ti. ⁴⁸ Pakhatpa cu khulrang in a va tli i puanchia kha aa lak i mitsur hang ah a hnim i fung par ah a ṭemh i dawpter a hun zalh. ⁴⁹ Sihmanhsehlaw a dang nih khan, "Um rih, amah kha khamh awkah Elijah cu a rat le rat lo kan zoh rih lai," an ti. ⁵⁰ Jesuh cu fak piin a au ṭhan i a cat colh. ⁵¹ Khi tikah Biakinn chung puanzar kha a lu in a taw tiang aa cheu. Vawlei kha aa hnin, lung kha an i cheu i ⁵² thlan kha an i hung; Pathian mi a rak thi ciami tampi kha an tho ṭhan. ⁵³ Thlan khan an chuak i Jesuh cu thihnak in a thawh ṭhan hnuah Khua Thiang chungah khan an lut i mi tampi nih an rak hmuh hna. ⁵⁴ Jesuh a cawngtu ral bawi le a sin i a ummi ralkap hna nih khan lihnin le thil dang a ummi vialte kha an hmuh tikah an thla a hlauh hna i, "Hi mi hi Pathian Fapa a si hrimhrim ko," an ti. ⁵⁵ Galilee ram mi Jesuh a rak zul tawnmi hna le a rak bawm tawntu nu tampi nih khan a langin an cuanh. ⁵⁶ Cu hna lakah cun Mary Magdalin, Jeim le Josef nu Mary le Zebedi fapa hna i an nu kha an i tel. ⁵⁷ Zanlei sang a si tikah khin Arimathea khua mirumpa pakhat a ra phan. A min cu Josef a si i amah zong cu Jesuh zultu pakhat a si ve. ⁵⁸ Pilat sinah khan a vung lut i Jesuh ruak kha a hal. Pilat nih Jesuh ruak cu Josef kha pe u, tiah a ti hna. ⁵⁹ Cucaah Josef nih cun a lak i khiangrang puan tharte in a tuam i ⁶⁰ amah thlan ca i lungkua ah a cawhmi thlan tharte ah cun a vui. Cun lung nganpi kha thlan khar ah cun a khar i a kal. ⁶¹ Mary Magdalin le Mary dang pakhat kha, cuka ah cun, thlan lei hoih khan an ṭhu. ⁶² A thaizing ah, (cucu Cawnningani a hun changtu ni ah khan) tlangbawi upa pawl kha le Farasi mi hna nih khan Pilat kha an va ton i, ⁶³ "Bawipa, hi milihchim pa nih hin a nun lioah, ’Ni thum hnuah thawhter ka si ṭhan lai,’ a rak ti kha kan hngalh. ⁶⁴ Cucaah cun thlan kha ni thum tiang ṭha tein cawng hna seh; cu ti a si lo ahcun, a zultu hna nih khan an va kal riangmang lai i a ruak kha an va fir lai i, thihnak in thawhter a si cang, tiah mi kha an chimh ko hna lai i a donghnak i a kan hlennak hi a hmasa i a kan hlennak nakkhan a chia deuh sual lai," an ti. ⁶⁵ Pilat nih cun, "Ralvengtu nan ngeih ko hna kha ta. Va kal u law a him khawh chung him in va tuah ko ngat u," tiah a ti hna. ⁶⁶ Cucaah an va kal i thlan cu him tein an cawnghter hna; lung kha ca an khenh i ralvengtu pawl kha, run veng u, an ti hna.

¹ Sabbath ni cu aa lim cang i zarh khat chung ni hmasa bik ni khuadei kate ah khin, Mary Magdalin le a dang Mary kha thlan va zoh awkah cun an kal. ² Chikkhatte ah khin li aa hnin i Bawipa vancungmi pakhat vancung in a rung ṭum i thlankhar kha a thawn i a cungah cun a ṭhu. ³ A mui cu nimtlau bantuk a si i a hnipuan cu hawhra bantukin an rang. ⁴ Ralveng pawl cu an thin a phang tuk hringhran i a therh hna i mithi bantukin an um. ⁵ Vancungmi nih khan nu cu a thawh hna i, "Nan thinphang hrimhrim hlah u. Vailam tahnak thing i khenhchihmi Jesuh nan kawl ti kha ka hngalh. ⁶ Amah cu hika ah hin a um ti lo, a chim bantukte khan, a tho cang. Ra u law an chiahnak hmun hi ra zoh hmanh u. ⁷ Cucaah khulrang in va kal u law a zultu hna kha, ’Thihnak in thawhter a si cang i atu cu nan hmaiah Galilee ram ah a rak kal chung cang; khika ah nan va hmuh lai,’ tiah va chim hna u. Cun kan chimhmi hna hi philh hlah u," tiah a ti hna. ⁸ Cucaah i hnawnam ngaiin thlan khan an kir, an thin a phangpah, an i lawmpah i a zultu hna va chimh awkah khan an le. ⁹ Jesuh nih, duak tiah a vun ton hna i, "Nan sinah daihnak um ko seh," tiah a ti hna. Amah cu an hun zuanhnawh i a ke an i tlaih i an biak. ¹⁰ Jesuh nih cun, "Nan thinphang hlah u; ka unau pawl kha, Galilee ah va kal u, tiah va chim hna u, khika ah an ka hmuh lai," tiah a ti hna. ¹¹ Nu pawl cu an kir lioah khan thlan cawngtu ralveng pawl a cheukhat kha khuapi chungah an va kal i tlangbawi upa pawl kha thil a cangmi vialte cu an va chimh hna. ¹² Upa pawl he khan an i ton i khua an khan dih hnuah, tlangbawi upa pawl nih cun ralkap pawl kha ṭhalo tein zik an nawh hna i ¹³ "A zultu pawl kha zan ah an ra i kan i hngilh karah a ruak kha an ra fir, nan ti lai. ¹⁴ Cun hi kong hi mangki bawipa nih thei ai kun, kanmah nih a ṭhat khawhnak chungin kan tuah lai i nannih cu zeihmanh fahnak nan ing lai lo," tiah an ti hna. ¹⁵ Ralvengtu pawl nih khan tangka cu an i lak i cuticun nan tuah lai tiah an timi hna kha an tuah. Nihin ni tiang hin, Judah mi nih an vahtermi bia cu, hi bia hi a si. ¹⁶ A zultu pahleikhat hna cu Galilee ram ah khan an kal i Jesuh nih a chimhmi hna tlang ah khan an kai. ¹⁷ An hmuh tikah an biak, sihmanhsehlaw a cheu cu lung awṭawm in an um. ¹⁸ Jesuh nih cun a hun naih hna i, "Vancung le vawlei cung i a ummi nawl ngeihnak vialte cu pek ka si cang. ¹⁹ Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law, ²⁰ kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai," tiah a ti hna.