LUKA

LUKA

¹ Theofilas Bawipa, Mi tampi nih kan lak i thil a cangmi kong hi an thiam khawh chungin ṭial an rak i zuam cio. ² Cu an ṭialmi cu a hramthawk lio i an mit in a rak hmumi hna nih an kan chimhmi le hi bia a rak chimtu hna nih an rak chimning khan a si. ³ Cucaah Bawipa, kei zong nih hi thil vialte hi a hramthawk tein ṭha tein ka dothlat cikcek hnuah na sinah aa tlai thliahmah in ṭial ah a ṭha tiah ka ruah. ⁴ A chimh zong an in chimh len cangmi kong biatak kha a ningcang tein na hngalh khawh nakhnga, tiin hi ca hi kan kuat. ⁵ Herod kha Judea Siangpahrang a si lioah, Abijah tlangbawi phu chungah aa telmi tlangbawi pakhat a min Zekhariah an timi kha a rak um. A nupi min cu Elizabeth a si i amah zong cu tlangbawi hrinthlak a si ve. ⁶ An pahnih in Pathian hmaiah nuncan ṭha in a nung i Bawipa nawlbia vialte le phunglam vialte tlamtling tein a zulmi an si. ⁷ Elizabeth cu a cin caah fa pakhat hmanh an ngei lo. An pahnih in an tar ngaingai cang. ⁸ Ni khat cu Zekhariah kha, nifate an rianṭuannak ah a caan a hung phan ve i Pathian hmaiah khan tlangbawi rian cu a ṭuan. ⁹ Tlangbawi hna nih an zulhmi phungning in, biakṭheng cung i rimhmui khangh awkah khan amah cu camcawhfung zuh in an thim. Cucaah Bawipa Biakinn chungah khan a vung lut. ¹⁰ Cu caan cu rimhmui khangh lio i mi zapi Biakinn leng i thla an cam caan kha a si. ¹¹ A sinah Bawipa vancungmi pakhat a rung lang i rimhmui an khanghnak biakṭheng orhlei kamah khan a dir. ¹² Amah cu Zekhariah nih khan a hmuh tikah a lau i a thin a phang. ¹³ Sihmanhsehlaw vancungmi nih cun a thawh i, "Zekhariah, na thinphang hlah! Pathian nih na thlacamnak kha a theih i na nupi Elizabeth nih fapa an hrinpiak lai. A min ah Johan na sak lai. ¹⁴ Amah cu a chuah tikah naa lawm hringhran lai i midang tampi zong an i lawm ngaingai ve lai. ¹⁵ Zeicahtiah amah cu Bawipa hmaiah mi ngan a si lai. Zu siseh, zureu siseh, zeihmanh a ding lai lo. A chuahka hrimhrim in Thiang Thlarau in a khat lai; ¹⁶ Israel mi mi tampi kha Bawipa an Pathian sinah a kirpi ṭhan hna lai. ¹⁷ Amah cu Pathian thlahmi lamkaltu a si lai i profet Elijah bantukin a fekmi le a ṭhawngmi a si lai. Pale hna le fale hna kha hmunkhat ah a fonh ṭhan hna lai i nawl a ngai lomi hna kha miding mi hna ruahnak lam leiah a hruai ṭhan hna lai. Bawipa mi hna cu Bawipa ca i aa tlakmi minung si awkah a rak timh hna lai," tiah a ti. ¹⁸ Zekhariah nih vancungmi cu a thawh i, "Cucu a si kho lai tiah zeitindah ka zumh khawh lai? Zeicahtiah kei cu ka tar cang i ka nupi zong a tar ve fawn," tiah a ti. ¹⁹ Vancungmi nih cun a leh i, "Kei cu Gabriel, hi thawngṭha nangmah chimh awkah a ka thlahtu Pathian hmai i a dirmi cu ka si. ²⁰ Ka bia cu na ka zum lo, asinain a caan a phak tikah cun a tling ṭhiamṭhiam te ko lai. Na zumh lo caah holh kho loin na um lai i kan chimhmi thil kha a tlin ni a phak hlantiang bia pakhat hmanh na chim kho lai lo," tiah a ti. ²¹ Cu chung cu zapi nih khan Zekhariah cu an rak hngah ko i zeicahdah Biakinn chungah cu cancan cu a rauh hnga, tiah an khuaruah a har. ²² A hung chuah tikah a chawn kho hna lo — cucaah Biakinn chungah langhnak a hmu ti kha an hngalh. A kut in hmelchunhnak kha a tuah i cuticun a chawnh hna, bia pakhat hmanh a chim kho lo. ²³ Biakinn chung i a rianṭuannak caan kha a dih tikah Zekhariah cu inn ah a ṭin. ²⁴ Cu hnu tlawmpal ah cun a nupi Elizabeth cu nau kha a hun pawi i thla nga chung leng chuak loin a um. ²⁵ A thawh i, "Atu cu a donghnak ah Bawipa nih hi tlukin maw a ka bawmh! Zapi hmai i ka ningzahnak cu a ka lakpiak cang," tiah a ti. ²⁶ Elizabeth pumlawnglo in a um thla ruknak ah, Pathian nih vancungmi Gabriel cu Galilee ram khua pakhat Nazareth timi ah cun a thlah. ²⁷ Siangpahrang David hrinsor a simipa Josef an timi he kan i ṭhi lai tiah bia aa kammi ngaknu kha bia na va chimh lai tiah a fial. Cu ngaknu cu a min ah Mary a si. ²⁸ Vancungmi kha a sinah cun a ra i. "Na cungah daihnak um ko seh. Bawipa cu na sinah a um i thluachuahnak tam piin an pek," tiah a ti. ²⁹ Vancungmi bia kha a theih tikah Mary cu a lau ngaingai i a bia kha a sullam zeidah a si hnga tiah a khuaruah a har. ³⁰ Vancungmi nih cun a thawh i, "Mary, na thinphang hlah. Zeicahtiah Pathian nih nangmah cu vel an ngeih. ³¹ Nau na pawi lai i fapa na hrin lai i a min ah Jesuh na sak lai. ³² Amah cu milian mingan a si lai i Cungnung Bik Pathian fapa tiah ti a si lai. Amah a hringsortu Siangpahrang David bawiṭhutdan kha Pathian nih amah cu a pek i ³³ Jakob tefa hna siangpahrang zungzal in a si lai, a pennak cu zeitikhmanh ah a dong lai lo," tiah a ti. ³⁴ Mary nih vancungmi cu a thawh i, "Ngaknu thiang ka si ṭung, zeitindah hihi cu a si khawh lai?" tiah a ti. ³⁵ Vancungmi nih cun a leh i, "Thiang Thlarau kha na cungah a phan lai i Pathian ṭhawnnak cu na cungah aa fu lai. Hi ruangah hin a thiangmi fa cu Pathian Fapa tiah ti a si lai. ³⁶ Hi hleiah na rualchan Elizabeth kha a tar leiah fa a pawi i a cing ti i rak ti tawnmi kha atu hi a thla ruknak a si cang, ³⁷ zeicahtiah Pathian nih a tuah khawh lomi thil zeihmanh a um lo," tiah a ti. ³⁸ Mary nih a thawh i, "Kei cu Bawipa salnu ka si ko, na chim bang cun ka cungah si ko seh," tiah a ti i vancungmi nih cun a kaltak. ³⁹ Cu hnu tlawmpal ah Mary cu aa tim i Judah tlangram i a ummi khua pakhat ah khan khulrang in a hung kal. ⁴⁰ Zekhariah inn ah khan a vung lut i Elizabeth cu a vun biak. ⁴¹ Elizabeth nih Mary i a vun chawnhnak bia kha a theih tikah a paw chung i a fate cu a rak cawl. Elizabeth cu Thiang Thlarau in a khat i, ⁴² aw thangpi in, "Nangmah cu nu vialte lakah thluachuak bik nu na si. Na hrin laimi na fa zong hi fa thluachuak a si. ⁴³ Zeicahdah ka Bawipa nu nih hin kei tehna hi na hung ka tlawn? ⁴⁴ Na ka biakchawnhnak ka theih cangka khan pei ka chung i ka fate cu lunglawmhnak in aa hlawh len cu. ⁴⁵ Bawipa bia na sinah a rami kha a tling taktak lai ti zumh cu na caah lunglawmh awk a va si hringhran dah," tiah a ti. ⁴⁶ Mary nih aa thawh i: "Thanh tuah, ka lungthin, Bawipa lianhngannak cu. ⁴⁷ I lawm tuah, ka nunnak, Bawipa na khamhtu cungah; ⁴⁸ A salnu hi hi tluk minauta ka si nain a ka philh lo. Nihin thawk in hmailei ah cun mi vialte nih thluachuaknu an ka ti lai; ⁴⁹ Bawipa, a ṭhawngmi Pathian nih ka cungah khuaruahhar tuk in rian a ṭuan. A min cu a thiang; ⁵⁰ Amah a ṭihmi vialte kha chan khat hnu chan khat in a zaangfah hna. ⁵¹ A ṭhawngmi a ban kha a samh i miruamkai hna kha an khuakhanmi he a ṭhek dih hna. ⁵² Siangpahrang ṭhawngṭhawng kha an bawiṭhutdan cungin a ṭhumh hna i Minauta kha a cawi hna. ⁵³ Rawl a ṭammi kha thil ṭhaṭha in a khimter hna i Mirum kha kut lawngin a kalter hna. ⁵⁴ Kan pupa hna sinah a rak sermi biakamnak kha a zulh hna; A sal Israel kha bawmh awkah a ra i ⁵⁵ Abraham le a tefa vialte hna sinah zungzal in zaangfahnak langhter ding kha a philh lo," tiah a ti. ⁵⁶ Mary cu thla thum tluk Elizabeth sinah khan a um i cun inn ah a tlung ṭhan. ⁵⁷ Elizabeth cu a nithla a hung tling i fapate a hrin. ⁵⁸ Bawipa cu zeitluk in dah a cungah a ṭhat ti kha a innpa hna le a rualchan hna nih an theih tikah amah tluk te cun an dihlak in an i lawm. ⁵⁹ Ngakchiate cu zarh khat a hung ti ah khin a cuarpar tan awkah an kalpi; annih nih a pa min Zekhariah in kan auh lai, tiah an ti. ⁶⁰ Sihmanhsehlaw a nu nih khan, "Asilo, a min cu Johan a si lai," tiah a ti. ⁶¹ Annih nih amah cu an thawh i, "Nan sahlawh nan rualchan lakah cu min a ngeimi pakhat hmanh an um ṭung lo," tiah an ti. ⁶² Cun a pa kha kut zaoh in an chawnh i ngakchiapa kha a min zeidah sak na duh, tiah an hal. ⁶³ Zekhariah nih cun caṭialnak catlap a hal hna i, "A min cu Johan a si," tiah a ṭial. ⁶⁴ Cu cangka cun Zekhariah cu a holh kho ṭhan i Pathian kha a hun thangṭhat. ⁶⁵ A innpa hna cu an khuaruah a har i hi thil kong cu Judea ram tlang cung vialte ah khan a thang dih. ⁶⁶ A theimi paoh kha an lung a suk hna i. "Hi fa hi zei ko dah a can te lai?" tiah an ti cio. Zeicahtiah Bawipa ṭhawnnak cu a cung i a um kha a fiang ko. ⁶⁷ A pa Zekhariah cu Thiang Thlarau in a khat i, Pathian bia kha a chim: ⁶⁸ "Bawipa, Israel Pathian cu thangṭhat u sih. A mi hna bawmh awkah a ra cang i a luatter cang hna. ⁶⁹ Kan caah a ṭhawngmi Khamhtu kha a chuahter cang. Amah cu a sal David tefa kha a si. ⁷⁰ Hlanliopi ah a profet thiang hna sinin, ⁷¹ ’Kan ral hna kut chungin le kanmah a kan huatu vialte hna sin khan, khamh awkah bia a kan kam. ⁷² Kan pupa hna cu, nan cungah zaangfahnak ka ngei lai, a ti hna i a thiangmi a biakamnak kha ka philh lo,’ tiah a ti hna. ⁷³ - ⁷⁴ Kan ral hna kut chungin luatter awkah le Amah cu ṭihnak um loin a rian kan ṭuan nakhnga, Kan pu Abraham sinah chiatser in bia aa kam i ⁷⁵ cucu kan nunchung vialte, amah hmaiah thianghlim le ding tein kan um nakhnga caah a si. ⁷⁶ Nang, ka fa, nangmah hi Cungnung Bik Pathian profet tiah ti na si lai; Amah lam kha rak sersiam chung awkah Bawipa hmaiah cun na rak kal chung lai. ⁷⁷ A mi hna kha, nan sual ngaihthiam nan si thawngin khamhnak nan hmu lai, tiah na chimh hna lai. ⁷⁸ Zeicahtiah, kan Pathian cu zaangfah thiammi le minunnem a si: Khamhnak khuaceu ṭha cu kan cungah a tlunter lai i ⁷⁹ Thihnak thladem mui lak i a ummi hna kha vancung in a vun ceuh hna lai; Kannih cu daihnak lam ah a kan hruai lai," tiah a ti. ⁸⁰ Ngakchia cu a hung ṭhang i thlarau in a ṭhawngmi a si; Israel mi zapi sinah a hun i langh hlantiang, thetse ram ah cun a um.

¹ Khi caan ah Siangpahrang Awkastas nih nawlbia a chuah i, ’Ram chung i a ummi vialte nih milu relnak caah nan min nan i thla dih lai,’ tiah a ti. ² Hi milu relnak hmasa bik a hung um ah hin Kuirinias cu Siria ram uktu a rak si. ³ Cucaah min i thlak awkah a mi paohpaoh in anmahle an khua cio ah khan an kal. ⁴ Josef cu Galilee ram i Nazareth khua in Judea ram i Bethlehem khua an timi, Siangpahrang David chuahnak khua ah khan a kal. Josef kha khika i a kalnak cu amah kha David hrinsor a si caah a si. ⁵ Cun minthlak awk i a kal ah khan a hammi Mary kha a sinah aa kalpi. A nithla kha a tling dengmang i ⁶ Khika i an um lioah khan a hrin caan kha a phan, fapate kha a hrin i cucu a fater a si. ⁷ Puan in a zual i caw rawl einak kuang chungah khan a thlim — riahnak khualbuk ah khan an caah hmun a um lo. ⁸ Cuka hrawngah cun, an tuurun a zohkhenh i ramlak i a riakmi tuukhal hna kha an um. ⁹ Bawipa vancungmi cu an sinah a lang i Bawipa sunparnak cu an velchum in a ceu. Annih cu an thin a phang tuk hringhran, ¹⁰ sihmanhsehlaw vancungmi nih cun a thawh hna i, "Nan thinphang hlah u; zeicahtiah nan sin i ka ratnak cu nan ca i thawngṭha he a si, cu thawngṭha nih cun mi vialte sinah lunglawmhnak a tlunter lai. ¹¹ Tu zan hrimhrim ah hin David khua chungah nan Khamhtu kha a chuak cang — Khrih Bawipa cu! ¹² Cun hihi nan ca i hmelchunhnak cu a si lai: ngakchiate pakhat kha puan in an zual i caw rawl einak kuang chung i an thlim kha nan va hmuh lai," tiah a ti. ¹³ Cu cangka cun vancung ralkapbu nganpi cu vancungmi sinah khan an rung lang i Pathian kha hla in an thangṭhat: ¹⁴ "A sang bik van ah khin Pathian cu sunparnak hmu ko seh, Cun a dawtmi hna umnak vawlei ah hin remnak um ko seh," tiah an ti. ¹⁵ Cun vancungmi hna cu annih sinin vancung i an kir ṭhan tikah khan tuukhal hna cu pakhat le pakhat kha, "Bethlehem khua ah cun va kal u si law Bawipa nih a kan chimhmi thil cu va zoh tuah u sih," an i ti. ¹⁶ Cucaah khulrang in an kal i Mary le Josef cu an va ton hna i ngakchiate cu caw rawl einak kuang chung i a rak ih ko kha an va hmuh. ¹⁷ Tuukhal pawl nih ngakchia cu an hmuh tikah amah kong i vancungmi nih a chimmi kha an chimh hna ¹⁸ Tuukhal pawl nih an chimmi a theimi paoh cu an khuaruah a har dih. ¹⁹ Mary nih hi thil vialte hi aa cinken hna i thuk piin a ruah hna. ²⁰ Tuukhal pawl cu an kir i an va hmuhmi le an theihmi ruangah khan Pathian cu an thangṭhat; vancungmi nih a chimh hna bantukte khan a si taktak ko. ²¹ Cu hnu zarh khat ah, ngakchia cu cuarpartan caan a phak tikah khan, a min ah Jesuh an sak — cu min cu a nu nih a pawi hlan i vancungmi nih a rak sak cangmi kha a si. ²² Moses Nawlbia nih nan tuah lai tiah a timi i thianh caan kha Josef le Mary caah cun a phan. Cucaah annih nih ngakchia cu Bawipa hmai i chanh awkah Jerusalem khua ah khan an i kalpi. ²³ Bawipa nawlbia chungah cun, Nan fater, pa a simi hna paoh kha Bawipa sinah nan pekchanh hna lai, tiah aa ṭial. ²⁴ Cun Bawipa nawlbia nih, Ṭhuro tuah khat, asiloah, laileng no pahnih, raithawinak ah nan pekchanh hna lai, a ti bantukin annih nih raithawinak kha an pekchanh. ²⁵ Jerusalem khua ah khan mipa pakhat, a min Simeon a simi a rak um. Amah cu miṭha le Pathian a ṭihmi kha a si i Israel khamhnak ding a rak hngakmi kha a si. Thiang Thlarau nih khan a umpi i ²⁶ Thiang Thlarau nih cun Bawipa biakamhmi Messiah na hmuh hlanah cun na thi lai lo, tiah a ti. ²⁷ Thlarau nih a hruainak thawngin Simeon cu Biakinn chungah cun a lut. Ngakchia Jesuh cu a nu le a pa nih, phung nih tuah awk a si tiah a tining in, Biakinn chungah an run luhpi tikah, ²⁸ Simeon nih cun a rak pom i Pathian cu a thangṭhat i: ²⁹ "Nihin ah hin, maw Bawipa, nangmah nih na salpa cu dai tein ka rian na ka limter cang, Atu cu nangmah na biakamnak kha a tling cang. ³⁰ - ³¹ Zeicahtiah miphun vialte zohchih in khamhnak ding na rak timhmi cu ka mit hrimhrim in ka hmuh cang; ³² Cucu Jentail mi hna caah na lam a langhtertu a simi ceunak le na mi Israel mi hna ca i sunparnak cu a si," tiah a ti. ³³ Simeon nih ngakchiapa kong a chimmi nih cun a nu le a pa kha an lung a sukhai ngaingai hna. ³⁴ Simeon nih cun thluachuahnak a pek hna i a nu Mary kha a thawh i, "Hi ngakchia cu Pathian nih Israel mi lakah mi tampi an rawk nakhnga le khamh an si nakhnga caah a thimmi a si. Amah hi Pathian sinin a rami hmelchunhnak, mi tampi nih an doh laimi a si i ³⁵ an dohnak thawng cun mi tampi an lungthin chunglei kha a lang lai. Cun ngaihchiatnak nih vainam bantukin na lungthin kha a chunh lai," a ti. ³⁶ Profet nu pakhat, a min Anna an timi zong kha a um ve, amah cu Asher phun chung mi Fanuel fanu kha a si. Amah cu a tar ngaingai cang, a va he kum sarih lawng an rak um ṭi manh i atu cu ³⁷ kum sawm riat le kum li a si cang. Biakinn kha a kaltak bal lo i chun he zan he Pathian kha rawl ulh le thlacam in a biak. ³⁸ Amah zong cu, cu caan te ah cun a ra ve i Pathian cu a thangṭhat i Pathian nih Jerusalem cu a tlanh ṭhan lai tiah a hngakmi vialte hna sinah khan ngakchiapa kong kha a chim. ³⁹ Bawipa nawlbia nih nan tuah awk a si tiah a timi vialte kha an tuah dih in Galilee ram i an umnak khua Nazareth khua ah khan an kir ṭhan. ⁴⁰ Ngakchia cu a hung ṭhang i a hung ṭhawng; fimnak in a khat i Pathian thluachuahnak kha a cungah a um. ⁴¹ Lanhtak Puai paoh ah khan, kum fate in, Jesuh nu le pa hna cu Jerusalem ah khan an kal lengmang. ⁴² Jesuh kha kum hleihnih a si tikah voi dang bantukin puai ah cun an kal ṭhan. ⁴³ Puai ni kha a dih tikah inn lei tlun ah khan an i thawh, sihmanhsehlaw ngakchiapa Jesuh kha Jerusalem khua ah cun a tang. Cucu a nu le a pa nih an hngal lo; ⁴⁴ annih ruahnak ah cun an hawile sinah khan a um rua, an ti i cucaah chun nitlak hlam loin an kal. An sahlawh pawl le an hawikom hna sin i an va kawl tikah khan an hmu ti lo. ⁴⁵ Cucaah amah kawl awkah cun Jerusalem ah khan an kir ṭhan. ⁴⁶ A ni thumnak ni ah Biakinn chungah khan an va hmuh i cawnpiaktu Judah mi hna sinah khan a rak ṭhu i an bia kha a rak ngai i bia a rak hal len ve ko hna. ⁴⁷ A bia a theimi paoh cu a fimning le a bia lehning ah khan an khuahruah a har. ⁴⁸ An va hmuh tikah a nu le a pa zong cu an khuaruah a har ve. A nu nih cun a thawh i, "Ka fa, zeicahdah hi bantukin na kan tuah? Na pa le na nu nih awlokchong in pei kan in kawl cu," tiah a ti. ⁴⁹ Annih cu "Zeicahdah nan ka kawl? Ka Pa inn ah ka um awk a si ti kha nan hngal lo maw?" tiah a ti hna. ⁵⁰ Sihmanhsehlaw annih nih a chimhmi hna kha a sullam an hngal lo. ⁵¹ Cuticun Jesuh cu an sinah Nazareth khua ah khan a kir i a nu le a pa kut tangah nawl ngai tein a um: Hi thil vialte hi a nu nih a lung chungah aa ken dih. ⁵² Cun Jesuh cu pum lei in siseh, fimnak lei in siseh, a hung ṭhang i Pathian hmai le minung hmaiah mithmai ṭha a hmu.

¹ Siangpahrang Tiberius kha a bawi kum, kum hleinganak kum a si, Pontius Pilat kha Judah ram mangki a si, Herod kha Galilee uktu a si i a nau Filip cu Iturea le Trakhonitis peng uktu a si; Lisanias cu Abilen uktu a si i ² Annas le Kaiafas cu tlangbawi ngan an si. Cu caan lioah cun Zekhariah fapa Johan sinah ramcar chungah khan Pathian bia cu a phan. ³ Cucaah Jordan tiva hrawn hrawngah khan Johan cu aa chawk i, "Nan nun ṭhin u law tipilnak ing u. Cun Pathian nih nan sualnak an ngaihthiam hna lai," a ti hna i ⁴ Profet Isaiah nih a cauk chungah a rak ṭial bang khan a hung si. A ṭialmi cu hitin a si: ⁵ A kuarhnak hmun vialte kha rak chilh hna u law Tlang sang le fing bo kip kha rak rawnhter hna u; Lam aa ngerhmi kha rak dinter hna u, Lam bingbo vialte kha rak tlorhnalh hna u; ⁶ Cun minung phun paohpaoh nih Pathian khamhnak kha an hmuh lai,’ a ti," tiah aa ṭialmi kha a hung tling. ⁷ Johan sinah khan mi cu a bubu in tipil in awkah khan an hung chuak lulhmalh. A rak thawh hna i, "Rul hna, Pathian thinhunnak a ra liomi sin cun nan luat kho lai tiah aho nih dah aan chimh hna? ⁸ Nan nun nan ṭhinh cu nan thil timi ah khan langhter u. ’Abraham pei a kan hringsortu cu a si tiah,’ ti len hlah u. Pathian nih cun a duh ahcun hi lung hi a lak hna lai i Abraham tefa ah cun a ser khawh ko hna. ⁹ Thingkung cu hau awkah a hram ah hreitlung kha chiah a si cang; thei ṭha a tlai lomi kung paoh cu hau an si lai i mei chungah paih an si lai," tiah a ti. ¹⁰ Mizapi nih cun an thawh i. "A si kun ahcun zeidah kan tuah kun lai?" an ti. ¹¹ Anih nih, "Angki pahnih a ngeimi nih a ngei lomi kha pakhat ṭhen seh, cun rawl a ngeimi nih a ngei lomi kha hrawm seh," a ti. ¹² Ngunkhuai khawltu pawl kha tipil in awkah an ra i, "Saya, kannih hi tah zeidah kan tuah awk a si lai?" tiah an hal. ¹³ A thawh hna i, "Khawlh awk timi nak tam in va khawl hna hlah u," tiah a ti hna. ¹⁴ Ralkap zong kha an ra i, "Kannih tah zeitin? Zeidah kan tuah awk cu a si ve lai?" an ti. Annih cu a thawh hna i, "Ahohmanh hramhram in tangka va chut hna hlah u; va tlerhkhonh fawn hna hlah u. Nan lahkhah ah khan nan lung va tling ko u," tiah a ti hna. ¹⁵ Mizapi cu an i ruahchannak kha a hung ṭhang i Johan hi aho ko dah a si hnga, amah hi Messiah cu a si sual hnga maw, tiah an ruat lengmang. ¹⁶ Cucaah Johan nih cun an dihlak in a thawh hna i, "Kei nih cun tiin tipilnak kan pek hna, sihmanhsehlaw keimah nakin a ngan deuh ngaingaimi a ra lio. A kedan hri phoihtu hmanh ah kei cu kaa tlak lo. Amah nih cun Thiang Thlarau le mei in tipilnak an pek hna lai. ¹⁷ Amah nih cun a ṭalawn kha aa put i rawl kha a zah hna lai; a fang ṭha cu buk chungah a rawn hna lai, sihmanhsehlaw a hi cu a mit lomi mei chungah a khangh hna lai," tiah a ti. ¹⁸ A phunphun in Johan nih cun mizapi cu Thawng Ṭha kha a chimh hna. ¹⁹ Sihmanhsehlaw uktu bawi Herod nih khan a nau nupi Herodias kha a ṭhit caah le thil dang a ṭha lomi tampi a tuah caah amah cu Johan nih khan a sik i ²⁰ cu ruangah cun Herod nih cu nakin a ṭhalo chinchinmi kha a tuah: Johan cu thong ah a thlak. ²¹ Mi dang vialte kha tipil a pek dih hna in Jesuh zong kha tipil cu a pek ve. Thla a cam lioah khan van cu aa hung i ²² Thiang Thlarau cu a pum in ṭhuro bantukin a cungah cun a rung ṭum. Cun vancung in aw pakhat a rung thang i, "Nangmah cu kan dawtmi ka fapa na si. Na cungah ka lung a tling," tiah a ti. ²³ Jesuh nih a rian ṭuan hram a thawk tikah amah cu kum sawm thum hrawng a si, amah cu Josef fapa a si tiah mi nih an ruah. Josef cu Heli fapa a si, ²⁴ Heli cu Matthat fapa a si, Matthat cu Levi fapa a si, Levi cu Melkhi fapa a si, Melkhi cu Jannai fapa a si, Jannai cu Josef fapa a si, ²⁵ Josef cu Mattathias fapa a si, Mattathias cu Amos fapa a si; Amos cu Nahum fapa a si, Nahum cu Esli fapa a si, Esli cu Naggai fapa a si, ²⁶ Naggai cu Maath fapa a si, Maath cu Mattathias fapa a si, Mattathias cu Semein fapa a si, Semein cu Josek fapa a si, Josek cu Joda fapa a si, ²⁷ Joda cu Joanan fapa a si, Joanan cu Resa fapa a si, Rhesa cu Zerubbabel fapa a si, Zerubbabel cu Shealtiel fapa a si; Shealtiel cu Neri fapa a si; ²⁸ Neri cu Melkhi fapa a si; Melkhi cu Addi fapa a si. Addi cu Kosam fapa a si, Kosam cu Elmadam fapa a si, Elmadam cu Er fapa a si, ²⁹ Er cu Joshua fapa a si, Joshua cu Eliezer fapa a si, Eliezer cu Jorim fapa a si, Jorim cu Matthat fapa a si, Matthat cu Levi fapa a si; ³⁰ Levi cu Simeon fapa a si, Simeon cu Judah fapa a si. Judah cu Josef fapa a si, Josef cu Jonam fapa a si, Jonam cu Eliakim fapa a si, ³¹ Eliakim cu Melea fapa a si, Melia cu Menna fapa a si, Menna cu Mattatha fapa a si, Mattatha cu Nathan fapa a si, Nathan cu David fapa a si, ³² David cu Jesse fapa a si, Jesse cu Obed fapa a si, Obed cu Boaz fapa a si, Boaz cu Sala fapa a si, Sala cu Nahshon fapa a si, ³³ Nahshon cu Amminadab fapa a si, Amminadab cu Admin fapa a si, Admin cu Arni fapa a si, Arni cu Hezron fapa a si, Hezron cu Perez fapa a si, Perez cu Judah fapa a si, ³⁴ Judah cu Jakob fapa a si, Jakob cu Isak fapa a si, Isak cu Abraham fapa a si, Abraham cu Terah fapa a si, Terah cu Nahor fapa a si, ³⁵ Nahor cu Serug fapa a si, Serug cu Reu fapa a si, Reu cu Peleg fapa a si, Peleg cu Eber fapa a si, Eber cu Shelah fapa a si, ³⁶ Shelah cu Kainan fapa a si, Kainan cu Arpaksad fapa a si, Arpaksad cu Shem fapa a si, Shem cu Noah fapa a si, Noah cu Lamek fapa a si, ³⁷ Lamek cu Methuselah fapa a si, Methuselah cu Enok fapa a si, Enok cu Jared fapa a si, Jared cu Mahalaleel fapa a si, Mahalaleel cu Kainan fapa a si, ³⁸ Kainan cu Enosh fapa a si, Enosh cu Seth fapa a si, Seth cu Adam fapa a si, Adam cu Pathian fapa a si.

¹ Jesuh cu Thiang Thlarau he khat in Jordan tiva khan a ra kir i Thlarau nih ramcar chungah khan a kalpi. ² Khika ah Khuachia nih ni sawm li chung a rak tukforh. Cu chung vialte cu rawl a ei lo caah cu caan a dih tikah a rawl a ṭam ngaingai. ³ Khuachia nih cun a thawh i, "Nangmah cu Pathian Fapa na si ahcun, hi lung hi changreu ah i cang tiah ti tuah ngat," tiah a ti. ⁴ Jesuh nih cun a leh i, "Cathiang nih pei, ’Minung nunnak hi rawl lawngin a si lo,’ a ti cu," tiah a ti. ⁵ Cun Khuachia nih cun a hun kaipi i chikkhatte ah khin vawleicung ram vialte kha a hmuhsak dih. ⁶ Khuachia nih cun a thawh i, "Hi lianhngannak vialte le hi chawva vialte hi kan pek lai. A dihlak hin keimah pek ka si cang i ka duhmi paoh ka pek khawh hna. ⁷ Cucaah ka hmaiah na khuk i bil law hi vialte hi na ta an si dih ko lai," tiah a ti. ⁸ Jesuh nih, "Cathiang nih pei, ’Bawipa na Pathian cu na biak lai i amah rian lawng kha na ṭuan lai,’ a ti cu," tiah a leh. ⁹ Cun Khuachia nih cun Jerusalem ah khan a kalpi i Biakinn parpahlek ah khan a ṭhutter. Cun a thawh i, "Nangmah cu Pathian Fapa na si ahcun hika hin vung zuang tuah ngat. ¹⁰ Zeicahtiah Cathiang nih pei, ’Pathian nih nangmah kha ṭha tein zoh khenh awkah a vancungmi kha a fial hna lai,’ tiah a ti kha. ¹¹ Cu pinah, ’An kut in an in cawi lai i lung ah na ke hmanh an i khawng lai lo,’ tiah a ti fawn," tiah a ti. ¹² Jesuh nih aa thawh i, "Cathiang nih pei, ’Bawipa na Pathian cu va hneksak hlah,’ a ti ve kha," tiah a leh. ¹³ Khuachia nih Jesuh cu a phunphun in a tukforh dih hnuah caan tlawmpal chung cu a kaltak. ¹⁴ Cun Jesuh cu Galilee ah khan a ra kir i Thiang Thlarau cu a sinah khan a um. Cuka hrawng vialte cu amah kong kha a thang dih. ¹⁵ An i pumhnak inn ah khan a cawnpiak hna i a mi kip nih an thangṭhat. ¹⁶ Jesuh cu a rak tlonlennak Nazareth khua ah khan a va kal i Sabbath ni ah cun hmasa i a rak tuah tawn bantuk khan pumhnak inn ah a kal. Cathiang rel awkah khan a hung dir i ¹⁷ profet Isaiah cazual kha an pek. Cazual cu a vun samh i, ¹⁸ "Bawipa Thlarau cu ka cungah a um. Sifakmi hna sin i Thawngṭha chim awkah chiti a ka thuh i Saltangmi hna sin i luatnak thanh awkah a ka thlah. Mitcaw mi hna sin i khuahmuh ṭhannak pek awk le Hremmi hna luatter dingah a ka thlah, ¹⁹ Bawipa nih a mi hna a khamh hna lai ding kum cu va thanh awkah a ka thlah!" tiah aa ṭialnak hmun kha a rel. ²⁰ Jesuh nih cazual cu a zual ṭhan i a zohkhenhtu kha a pek ṭhan i a ṭhu. Pumhnak inn i a ummi vialte nih amah cu ṭhep loin an zoh dih. ²¹ Annih cu a thawh hna i, "Hika Cathiang cang hi, nannih nih ka rel tikah nan theih bantukin nihin ni ah hin a tling cang," tiah a ti. ²² An lung a hmuh ngaingai hna i bia dawhdawh a chimmi nih khan an khuaruah a harter dih hna. An i thawh i, "Amah hi Josef fapa kha a si lo hlah i?" an ti. ²³ Cun anih nih a thawh hna i, " ’Sibawipa, nangmah le nangmah i damter,’ timi phungthlukbia kha nan ka chimhnawh te lai, tiah fiang tein ka hngalh ko. Cun nan i thawh fawn lai i, ’Kapernaum khua ah na tuah tiah kan theihmi thil cu na chuahkehnak khua zongah hin tuah ve hna,’ ti zongah nan ka ti fawn lai. ²⁴ Cucaah hihi kan chimh hna: Profet cu amah chuahkehnak khua ah cun conglawmh a tong bal lo. ²⁵ Cucaah ka bia hi ngai hmanh u. Elijah chan i kum thum le a cheu khua a khen i Israel ram chung dihlak ah pam a tlun ah khan, cu ram chungah nuhmei tampi an rak um taktak ko, ²⁶ sihmanhsehlaw cu hna sinah cun Elijah kha thlah si loin Sidon ram Zarefath khua nuhmei sin tu ah khan thlah a si deuh. ²⁷ Profet Elisha chan ah Israel ram ah thinghmuimi tampi an rak um ko, sihmanhsehlaw Siria mi Naaman dah ti lo cu ahohmanh damtermi an um lo," tiah a ti. ²⁸ Hi bia an theih tikah pumhnak inn chung i a ummi vialte cu an thin a hung dih. ²⁹ An tho i Jesuh cu khualeng ah an hnuh i lungpang cungin thlak awkah, khua a ṭhutnak tlang a par ah khan an kalpi. ³⁰ Sihmanhsehlaw zapi lak khan aa zuk i a lan. ³¹ Cun Jesuh cu Galilee ram i khua pakhat, Kapernaum khua ah khan a kal i khika ah sabbath ni ah khan a cawnpiak hna. ³² A cawnpiakning hna kha an khuaruah a har, zeicahtiah a bia cu hmual a ngei ngaingai. ³³ Cuka pumhnak inn ah cun khuachia thlarau a ngeimi pa pakhat a rak um; fak piin a au i, ³⁴ "Nazareth khuami Jesuh, zeidah na kan duhnak a si? Kanmah hrawh awkah maw hika ah hin na rat? Nangmah cu aho na si kha kan hngalh ko — Pathian lamkaltu a thiangmi na si ko," tiah a ti. ³⁵ Jesuh nih thlarau cu, "Dai tein um law, mipa chung khan chuak," tiah a ti. Khuachia nih cun mipa cu an dihlak hmaika ah khan a thluk i a cungah zeihmanh ṭhat lonak tuah loin a kaltak. ³⁶ An dihlak in an khuaruah a har i pakhat le pakhat cu, "Hi bia hi zei bantuk bia dah a si? Hi mipa nih hin nawlngeihnak le ṭhawnnak in thlarau ṭhalo kha nawl a pek hna i an chuak ko," tiah an i ti. ³⁷ Cun Jesuh kong cu cu ram chung khuazakip ah khan a thang. ³⁸ Jesuh cu pumhnak inn khan a chuak i Simon inn ah a kal. Simon nupi nu cu a rak zaw i a tak a lin ngaingai i cu kong cu Jesuh kha an chimh. ³⁹ Jesuh cu a va kal i a ihkhun pawngah khan a dir i a zawtnak cu a sik. A taklin nih cun a thlah i chikkhatte ah a tho i a bultawl hna. ⁴⁰ Ni tlak hnuah, mizaw a ngeimi paoh nih khan, zawtnak a phunphun in a zawmi an mizaw hna kha Jesuh sinah cun an ratpi hna; an lu cungah khan a kut a chuan diahmah i an dihlak in a damter hna. ⁴¹ Mi tampi chungin khuachia zong kha an chuak i an chuahpah ah cun, "Nangmah cu Pathian Fapa na si," tiah an au. Sihmanhsehlaw annih cu a sik hna i holh a thlauh hna, zeicahtiah Messiah a si kha an hngalh. ⁴² Khuadei kate ah Jesuh cu khuachung khan a chuak i hmunking ah a kal. Sihmanhsehlaw mizapi nih khan an kawl i a umnak an va phak tikah khan, kan kaltak ti hlah, tiah an hnek. ⁴³ Sihmanhsehlaw a thawh hna i, "Pathian Pennak kong Thawngṭha kha khua dang zongah ka chim hrimhrim awk a si, cu chim ah cun pei Pathian nih a ka thlah cu," tiah a ti. ⁴⁴ Cucaah Judea ram chung i pumhnak inn hna ah khan Thawngṭha cu a chim hna.

¹ Ni khat cu Genesaret Tilikam ah Jesuh cu a dir lioah khan mi tampi nih Pathian bia theih awkah amah cu an buthnawh. ² Ti kam i an hrenmi lawng pahnih kha a hmuh hna; ngatlai pawl cu an lawng khan an chuak i titlang ah khan an sur cu an rak su len ko. ³ Cu ka i a ummi lawng pakhat, Simon ta ah cun Jesuh cu a lut i tikam cun tlawm tein hei nam deuh u tiah a ti. Jesuh cu lawng chungah cun a ṭhu i mizapi kha a cawnpiak hna. ⁴ Bia a chim dih in Simon cu a thawh i, "Ti thuhnak leiah khin na lawng hi hei thawn deuh law nangmah le na hawile nih khan nan sur khan nga kha chep hna u," tiah a ti. ⁵ Simon nih cun, "Bawipa, zan khuadei kan vorh ṭualmal ko nain zeihmanh kan tlai lo. Sihmanhsehlaw ti ko u, na ti ahcun sur cu kan cheh rih ko lai," tiah a ti. ⁶ Sur cu an vun cheh hna i nga cu tam tuk hringhran an tlaih hna caah an sur cu tleh dih hnek aa zal. ⁷ Cucaah lawng dang i a ummi an hawile kha, ra kan bawm u, tiah an kut an hei zaoh hna. An ra i lawngah cun a khat tein an sanh hna, an khah tuk caah lawng cu an pil dengmang. ⁸ Simon Peter nih cucu a hmuh tikah Jesuh hmaiah cun a khuk aa bil i, "Bawipa, ka kaltak ko, kei cu misual ka si," tiah a ti. ⁹ Amah le a sir i a ummi hna cu an tlaihmi nga kha a tam tuk caah an khuaruah a har. ¹⁰ Simon hawile hna Jeim le Johan, Zebedi fapa hna zong kha, cu bantuk ṭhiamṭhiam cun an um. Jesuh nih Simon cu a thawh i, "Na thinphang hlah, atu thawk in mi na tlai cang hna lai," tiah a ti. ¹¹ Lawng cu tikam ah an hnuh i zeizong vialte kha an kaltak i Jesuh kha an zulh. ¹² Voi khat cu khua pakhat ah hin Jesuh cu a um i cuka ah cun thinghmui zawtnak nih a tuam in a tuammipa pakhat a rak um. Jesuh kha a hmuh tikah a hmaiah khan a bawk i, "Bawipa, na duh ahcun na ka thianter khawh," tiah a nawl. ¹³ Jesuh nih cun a kut a hei samh i a hei tawngh. "Damter kan duh, thiang ko," tiah a ti. Chikkhatte ah thinghmui zawtnak nih cun a kaltak. ¹⁴ Jesuh nih cun, "Mah hihi ahohmanh chim hna hlah, tlangbawi sin bel ah khan va kal zau law rak in zoh seh; na thiang cang ti langhternak ah Moses nawlbia ningin raithawinak kha va tuah," tiah a fial. ¹⁵ Sihmanhsehlaw Jesuh thawng cu a thang chinchin i mirun tampi nih a bia ngaih awkah le an zawtnak in damter awkah an fuh. ¹⁶ Hnathiannak hmun ah khan a kaltak tawn hna i khika ah khan thla a va cam tawn. ¹⁷ Ni khat cu Jesuh nih a cawnpiak hna lioah khan Farasi mi tlawmpal hna le Phungbia cawnpiaktu saya hna, Galilee ram le Judea ram khuazakip in le Jerusalem khua in a rami hna kha a pawngah cun an ṭhu. A zawmi damternak ding caah khan Bawipa ṭhawnnak cu Jesuh sinah khan a um. ¹⁸ Mi tlawmpal nih khin a zengmipa pakhat kha a ihkhun in an hun zawnh i an ra. Inn chungah khan vun luhpi i Jesuh hmaika i vun chiah kha an i tim. ¹⁹ Sihmanhsehlaw mi an tam tuk caah zei ti hmanh in an luhpi kho lo. Cucaah inncung ah an kaipi i inn cihmi lungtlap kha an ṭhial hna hnuah a ihkhun cun mizapi laifang ah cun Jesuh hmaika ah khan an vun thlak. ²⁰ Jesuh nih zeitluk in dah an zumh ti kha a hmuh tikah mipa cu a thawh i, "Ka kawi, na sualnak cu ngaihthiam na si cang," tiah a ti. ²¹ Cu tikah Phungbia cawnpiaktu saya hna le Farasi mi hna cu anmah le anmah kha, "Pathian a thangchiatmi pa hi ahodah a si? Ahohmanh nih sual thlahpiak khawh a si ṭung lo, Pathian lawng nih pei thlahpiak khawh a si ko cu," tiah an i ceih. ²² Jesuh nih an ruahnak cu a hngalh hna i, "Zeicahdah cu bantuk thil cu nan ruah? ²³ ’Na sualnak cu ngaihthiam na si cang,’ ti maw a fawi deuh, ’Tho law kal tuah,’ ti dah a fawi deuh? ²⁴ Cucaah vawlei cungah hin Mi Fapa nih sual ngaihthiam khawhnak nawl a ngei ti kha nannih sinah ka langhter lai," tiah a ti hna. Cucaah mizengpa cu a thawh i, "Tho law na ihkhun kha i cawi law inn ah va ṭin," tiah a ti. ²⁵ Cun an hmaika ah cun hmakhatte ah a tho i a ihnak ihkhun cu aa cawi i Pathian thangṭhat pah in inn ah a ṭin. ²⁶ An dihlak in an khuaruah a har ko. Ṭihnak in an khat i Pathian cu an thangṭhat i, "Nihin i kan hmuhmi thil cu khuaruahhar an va si dah!" tiah an ti. ²⁷ Cu hnuah cun Jesuh cu a va chuak i ngunkhuai khawltu Levi kha, a zung i a rak ṭhut ko cu a hmuh. Jesuh nih cun a thawh i, "Ra ka zul," tiah a ti. ²⁸ Levi cu a tho i, zeizong vialte kha a kaltak i a zulh. ²⁹ A hnuah Levi nih khan a inn ah cun Jesuh kha rawl danghnak nganpi a tuahpiak i ngunkhuai khawltu tampi hna le midang hna kha an sinah cun an ṭhu. ³⁰ Cun Farasi mi tlawmpal hna le anmah bu chung um a simi Phungbia cawnpiaktu saya hna kha Jesuh zultu sinah cun an zai i, "Zeicahdah ngunkhuai khawltu hna le misual mi hna he rawl nan ei ṭi?" an ti. ³¹ Jesuh nih a thawh hna i, "A dammi nih sibawi an herh lo, a zawmi lawnglawng nih an herh. ³² Sualnak kan ngei lo tiah aa ruatmi hna kha i ngaihchih u ti awkah ka ra lo, misual mi tu kha, i ngaichih u tiin kawh awkah ka ra," tiah a ti. ³³ Jesuh cu mi a cheukhat nih an thawh i, "Johan zultu pawl cu atu le atu rawl an ul i thla an cam, cun Farasi mi hna zultu pawl zong nih khan cu bantuk ṭhiamṭhiam cun an tuah; sihmanhsehlaw nang na zultu hna cu an ding an ei ko," tiah an ti. ³⁴ Jesuh nih a leh hna i, "Nupi ṭhit rawl danghnak ah, nupi ṭhitupa cu an sin i a um chungah khan sawmmi hna cu rawl ulhter awk a si, tiah nan ruat maw? Nan ruat hrimhrim lai lo. ³⁵ Sihmanhsehlaw nupi ṭhitupa an sin in a chuah caan kha a phan ko lai i cu tikah cun rawl cu an ul te ko lai," tiah a ti. ³⁶ Jesuh nih hi bianabia zong hi a chimh hna: "Thil hlun kha thil thar thlehmi in ahohmanh nih an belh bal lo. Cu bantukin an tuah ahcun thil thar kha a tlek lai i a thar thlehmi thil pelpawi kha a hlun he khan aa tlak lai lo. ³⁷ Cun ahohmanh nih mitsur hang rawnnak saphaw thawl a hlunmi chungah mitsur hang thar kha an rawn bal lo. Cuti an rawn ahcun, mitsur hang thar nih khan saphaw thawl kha a kheh lai i mitsur hang cu a tle dih lai i saphaw thawl kha a rawk lai. ³⁸ Cuticun ahohmanh nih an tuah lai lo. Mitsur hang thar cu saphaw thawl a tharmi chungah rawn awk a si. ³⁹ Cun mitsur hang a hlunmi din hnuah ahohmanh nih a thar kha an duh lo. ’A hlun kha a thar nakin a thaw deuh,’ an ti," tiah a ti.

¹ Voi khat cu Sabbath ni ah hin Jesuh cu khual a tlawng i changvut lo kha a palpah hna. A zultu hna nih khan changvut vui cu an sihpah hna i an kut in an hnuai hna i a fang kha an ei hna. ² Farasi mi a cheukhat nih an i thawh i, "Zeicahdah kan Phung nih Sabbath ni ah nan tuah kho lo a timi nan tuah?" an ti. ³ Jesuh nih cun a leh hna i. "David le a hawile kha an rawl a ṭam tikah zeidah David nih a tuah; ti kha nan rel bal lo maw? ⁴ Pathian inn chungah pei a lut i Pathian hunhmi changreu kha a lak i a ei i a hawile zong a pek hna kha. Khati a tuahmi kha kan Phung he aa ralchanhmi a si ṭung, zeicahtiah cu changreu cu tlangbawi lawnglawng nih pei ei phung a si kha," tiah a ti hlei ah, ⁵ "Mi Fapa hi Sabbath Bawi pei a si cu," tiah a ti hna. ⁶ Sabbath ni dang pakhat ah khan Jesuh cu pumhnak inn ah a lut i a cawnpiak hna. Cuka ah cun a orhlei kut a zengmipa a rak um. ⁷ Phungbia cawnpiaktu saya hna le Farasi mi a cheu khat hna nih khan Jesuh cu thil ṭhalo a tuah tiah zeitindah sual kan phawt khawh lai ti kha an kawl; cucaah cun sabbath ni ah hin aho tal a damter hna lai maw, tiah ṭha tein an ngiat. ⁸ Sihmanhsehlaw Jesuh nih an ruahnak kha a hngalh i a kut a zengmipa cu a thawh i, "Dir law hmaiah hin ra chuak tuah," tiah a ti. Mipa cu a tho i a dir. ⁹ Cun Jesuh nih annih cu a thawh hna i. "Bia kan hal hna: kan Phung nih sabbath ni ah zei tuah dah a kan onh? Ṭhatnak tuah maw ṭhat lonak tuah dah? Mi nunnak khamh maw mi nunnak hrawh dah?" tiah a ti. ¹⁰ Annih cu a mit in a zoh duahmah hna i, cu hnuah mipa kha a thawh i, "Na kut kha samh," tiah a ti. A kut cu a samh i a dam. ¹¹ Sihmanhsehlaw annih cu an thin a khenh hna i Jesuh hi zeitindah kan hrawh khawh lai ti kha an i ceih. ¹² Cu caan lioah cun ni khat cu tlang cungah thlacam awkah a kal i zan khuadei Pathian sinah thla a cam. ¹³ Khua a dei tikah a zultu kha a kawh hna i hleihnih a thim hna i lamkaltu tiah a ti hna. ¹⁴ An min cu hihi an si: Simon (Peter ti zongah timi) le a nau Andru; Jeim le Johan, Filip le Bartholomew, ¹⁵ Matthai le Thomas, Alfeas fapa Jeim le phunṭanh tiah an kawhmi Simon, ¹⁶ Jeim fapa Judas le rawitu ah a cangmi Judas Iskariot. ¹⁷ Tlang cung cun an sinah a rung ṭum hnuah Jesuh cu hmunrawn pakhat ah a zultu mi tampi hna sinah khan a dir. Cuka ah cun mi tampi an um i cu hna cu Judea ram khuazakip le Jerusalem khua le rilikam khua a simi Tair le Sidon khua in a rami an si; ¹⁸ annih an ratnak cu a bia theih duh le an zawtnak damnak hmuh duh ah a si. Thlarau ṭhalo nih awlok a chonhmi hna zong kha an ra i a damter hna. ¹⁹ A chungin ṭhawnnak kha a chuah caah mi nih cun an dihlak in amah tawngh kha an i zuam i an dihlak in a damter hna. ²⁰ Jesuh nih a zultu kha a zoh hna i a thawh hna i, "Nannih sifakmi hna i lawm u, Pathian Pennak cu nanmah ta a si. ²¹ Nannih atu i rawl a ṭammi hna i lawm u, Nan paw a khim lai. Nannih atu i a ṭapmi hna i lawm u, Nan ni lai. ²² Mi Fapa ruangah mi nih an in huat hna i an in hlawt hna i an in serhsat hna i miṭhalo an in ti hna tikah i lawm ko u. ²³ Cu ni ah cun i lawm u law a lam in lam u, zeicahtiah nan caah vancung ah laksawng nganpi chiahpiak nan si. Cu bantuk te cun pei an pupa hna nih khan profet hna kha an rak tuah hna cu. ²⁴ "Sihmanhsehlaw nannih atu i a rummi, nan caah cun ngaihchia a va si dah! Nan nun nuamhnak kha nan hmuh cang. ²⁵ Atu i a paw a khimmi nan caah cun ngaihchia a va si dah! Rawlṭam in nan vak lai. Atu i a ni lengmangmi nan caah cun ngaihchia a va si dah! Ngaihchia in nan ṭap lai! ²⁶ Mi vialte nih, an in chimthiam hna tikah nan caah ngaihchia a va si dah; zeicahtiah cuti te cun pei an pupa hna nih khan nal profet kha an rak ti hna cu," a ti. ²⁷ "Nannih ka bia a theimi hna, nan ral kha va daw hna u, an huatu hna cungah khan ṭhatnak va tuah u, ²⁸ chiat an serhtu hna kha thla va campiak hna u. ²⁹ Mi pakhatkhat nih na bel ah an bengh ahcun khattelei bel zong i chit rih; pakhatkhat nih na angkileng an chuh ahcun na angki chungnawh zong va pe rih. ³⁰ Thil zeimaw an halmi paohpaoh kha va pe hna, cun mi pakhatkhat nih na ta a simi kha aa lak ahcun va hal ṭhan ti hlah. ³¹ Ka tuahpiak hna seh ti na duhmi kha mi va tuahpiak hna. ³² "Nangmah an dawmi lawng kha na dawt hna ahcun zeicahdah thluachuah hmuh cu naa ruah? Misual mi hmanh nih anmah a dawtu hna cu an dawt ve ko ṭung hna. ³³ - ³⁴ Cun na cung i ṭhatnak a tuahmi cung lawng i ṭhatnak na tuah ve ahcun, zeicahdah thluachuah hmuh cu naa ruahchan? Misual mi hna zong nih misual vemi hna sinah khan an cawihmi hna zat hmuh ṭhan dingah cun an coih ve ko ṭung hna. ³⁵ Cuticun nan tuah awk a si lo. Nan ral kha daw hna u, an cungah khan ṭhatnak tuah u, chaw kha mi va cawih hna u law ka hmuh ṭhan lai, tiah ruahchannak ngei hlah u. Laksawng tampi nan hmuh lai i Cung Nung Bik Pathian fa nan si lai, zeicahtiah amah cu miṭhalo mi hna le lawmh hmanh a duh lomi hna cung hmanh ah a ṭha. ³⁶ Nan Pa cu mi zaangfah thiam a si bantukin nannih zong mi zaangfah thiammi si ve u," tiah a ti. ³⁷ "Midang kha va soi hna hlah u law nannih zong Pathian nih an soi ve hna lai lo; midang kha sual va phaw hna hlah u law nannih zong Pathian nih sual an phaw ve hna lai lo; midang kha an sualnak va ngaithiam hna u law nannih zong Pathian nih nan sualnak an ngaihthiam ve hna lai. ³⁸ Midang kha thil va ṭhen hna u, nannih zong Pathian nih an ṭhenh ve hna lai: liam thluahmah in, nan i chap khawh chungin, nan zawi khawh le khawh loin nan kut chungah an thlet hna lai. Midang ca i nan hmanmi tahnak rel kha Pathian nih nanmah ca zongah a hman ve lai," tiah a ti. ³⁹ Cun hi tahchunhnak bia hi Jesuh nih a chimh hna: "Mitcaw nih mitcaw kha lam a ṭhi kho lai lo, a ṭhit a si ahcun an pahnih in hor ah an tla lai. ⁴⁰ Siangngakchia cu a saya nakin a ngan deuh lo, sihmanhsehlaw siangngakchia nih a cawnnak kha a dih tikah cun a saya bantuk a si lai. ⁴¹ "Na mit chung i a ummi thingtan kha ruat ṭung loin zeicahdah na unau mit i mithnawm pelte a ummi cu zoh na duh? ⁴² Na mit chung i a ummi thingtan cu hmu ṭung loin zeitindah na unaupa cu, "Ka nau, na mithnawm kha in cawihpiakning," na ti khawh? Mi depde. Na mit chung i thingtan kha chuah hmasa law pei na unau hna mit chung i a ummi mithnawm hme tete cu na hmuh khawh lai i na cawih khawh lai cu," tiah a ti. ⁴³ "A ngan a dammi thingkung nih thei chia a tlai lo, thingkung ṭhalo zong nih thei ṭha a tlai ve lo. ⁴⁴ Thingkung paohpaoh cu an theitlai in hngalh khawh an si; hlingbur in theipi nan lo bal lo, theihmung bur in mitsur thei nan lo bal fawn lo. ⁴⁵ Miṭha nih a lung chung i thil ṭha a khonmi chung khan ṭhatnak a chuahter; miṭhalo nih a lung chung i thil ṭhalo a khonmi chung khan chiatnak a chuahter. Zeicahtiah mi nih a kaa in a chimmi hi a lung chung i a khatmi kha a si," tiah a ti. ⁴⁶ "Zeicahdah nannih nih, ’Bawipa, Bawipa,’ nan ka ti len ko i kan chimhmi hna cu nan tuah ṭung lo? ⁴⁷ Ka sinah a ra i ka bia a ngai i a zulmi cu zei he dah aa lawh ti kha kan hmuhsak hna lai. ⁴⁸ Amah cu inn a sami bantuk a si: thuk piin a cawh i a hram kha lungpi cungah a bunh. Tiva cu a hung lian i inn cu a hun den, sihmanhsehlaw fek tein sak a rak si caah a hninh in a hnin kho lo. ⁴⁹ Sihmanhsehlaw ka bia a thei i a zul ṭung lomi cu a hram ṭha tein ser hmasa loin inn a sa menmi bantuk a si; tilian nih cu inn cu a hun den tikah chikkhatte ah a pur i a tlu ruangmang ko," a ti.

¹ Hi bia vialte hi mizapi kha a chimh dih hna in Jesuh cu Kapernaum khua ah khan a kal. ² Cuka i a ummi Rom ralbawi pakhat nih sinum pakhat a ngei i a sinumpa cu a dawt ngaingai; cu pa cu a zaw i a thi dengmang. ³ Cu ral bawipa nih Jesuh thawng kha a theih tikah, a sinumpa kha a ra damter nakhnga amah cu va nawl awkah Judah mi upa kha a hei thlah hna. ⁴ Jesuh sin kha an va phan i biatak tein an va nawl. "Hi pa hi bawmh awk aa tlak taktakmi a si. ⁵ Kan miphun hi a kan dawt i amah hrimhrim nih pumhnak inn a kan sakpiak," an ti. ⁶ Cucaah Jesuh cu anmah he cun a va kal. Inn khin lamhla a si ti lonak hmun a phak tikah, ralbawipa nih cun a hawikom kha a hun thlah hna i, "Bawipa, na re i theih hlah, nangmah luhnak dingah ka inn hi aa tlak lo; ⁷ Keimah nih ka pum in ka hung in dong lai ka ti ah, cu an dong ding zongah cun aa tlak in kaa hmu fawn lo. Nangmah nih, ’Dam seh,’ hei ti law ka salpa cu a dam ko lai. ⁸ Keimah zong hi bawi ngan deuh kut tang i a ummi ka si, cun keimah kut tang zongah cun ralkap an um ve. Hi pa cu, Kal, ka ti ah a kal ko i khi pa cu, Ra, ka ti ah a ra ko; cun ka sal zong cu, Hihi tuah, ka ti ah a tuah ko, a ti tiah va chim u," a ti hna. ⁹ Hi bia a theih tikah Jesuh cu a khuaruah a har i a hnulei ah aa mer i a zultu zapi hna cu, "Hi bantuk zumhnak hi dah ka hmuh bal lo, Israel mi hna lak hmanh ah," tiah a ti. ¹⁰ Lamkaltu hna cu ralbawipa inn ah khan an va kir i a sinumpa a rak dam kha an va hmuh. ¹¹ A thaizing ah Jesuh cu Nain an timi khua ah a kal; a zultu hna le mi tampi nih khan an zulh. ¹² Khua hauka a hei phak ah khin ruak vui awk i a kalmi mirun kha an hung chuak ve. A thimipa cu nuhmeinu fapa a si i amah lawngte cu a fa a si, mi tampi nih khuachung cun nuhmeinu cu an kalpi. ¹³ Bawipa nih cun amah cu a hmuh tikah a zaang a fak ngaingai i, "Ṭap hlah," tiah a ti. ¹⁴ Cun a va kal i ruak kuang kha a tawngh i a zawntu hna cu an dir. Jesuh nih cun, "Tlangvalpa, tho tuah, kan ti," tiah a ti. ¹⁵ Mithipa cu a hung ṭhu i bia a hun chim i Jesuh nih a nu sinah khan a pek ṭhan. ¹⁶ An dihlak in ṭihnak in an khat i Pathian kha an thangṭhat. "Kan lakah profet nganmi a chuak cang i Pathian nih a mi hna khamh awkah a ra cang," an ti. ¹⁷ Jesuh thawngpang cu Judea ram vialte le a pawngkam ram ah khan a thang dih. ¹⁸ Johan zong cu hi kong kha a zultu hna nih khan an chimh ve. Johan nih cun an lak i pahnih kha a auh hna i ¹⁹ Bawipa sinah cun a hei thlah hna i, ’/"Nangmah hi a ra lai timi cu na si maw; asiloah a dang dah kan orh rih lai?’ tiah va hal u," a ti hna. ²⁰ Jesuh sin an phak tikah an i thawh i, "Tipil petu Johan nih a kan thlah i nangmah cu, ’A ra lai tiah timi cu na si maw, asiloah a dang dah kan orh rih lai,’ tiah va hal u, a kan ti," an ti. ²¹ Cu caan lio thengte ah cun Jesuh nih mi tampi kha an zawtnak le an nganfahnak, thlarau ṭhalo nih a tuah hnanak khan a damter hna i mitcaw tampi kha khua a hmuhter hna. ²² Johan zultu pawl cu a leh hna i, "Va kir u law nan hmuhmi le nan theihmi: mitcaw nih khua an hmuhnak le, kebei nih an kal khawhnak le thinghmuimi nih thiannak an hmuhnak le hnachet nih khua an theihnak le a thimi hna nunter ṭhan an sinak le sifakmi hna sinah Thawngṭha chim a sinak kong kha Johan cu va chim u. ²³ Keimah kong ah lung awṭawm in a um lomi cu an caah lunglawmh awk a va si dah," tiah a ti. ²⁴ Lamkaltu hna kha an kal dih in Jesuh nih Johan kong kha mi zapi cu a chimh hna. Ramlak i Johan nan hei fuhpanh tikah khan zeidah kan hmuh lai tiah nan rak ruah? Phaikung thli nih a chem diahmahmi hna kha maw? ²⁵ A si lai lo. Cucu a si ṭung lo ahcun zeidah zoh awkah nan chuahhnawh kun? Thilpuan ṭhaṭha aa hrukmi zoh awkah maw? A taktak ti ahcun cu bantukin aa thuam i nunnuam ngaingai in a ummi hna cu siangpahrang inn chungah pei an um tawn cu. ²⁶ Sihmanhsehlaw zei ko cu dah zoh nan va duhmi cu a si kun? Profet maw? Asi, profet nakin a ngan deuhmi pei nan hmuh ko hi. ²⁷ Zeicah ti ahcun Johan cu Cathiang nih, ’Hika ah hin ka tlangautu kha a um i amah cu na hmaiah ka thlah lai; amah nih cun na lam kha an sialpiak lai,’ tiah Pathian nih a ti, a timi kha pei a si cu, ²⁸ Kan chimh hna, nu hrinmi fa lakah Johan nakin a ngan deuhmi ahohmanh an um lo, sihmanhsehlaw Pathian Pennak chung i a ummi hna lak i a hme bik hmanh Johan nakcun a ngan deuh," tiah a ti. ²⁹ Mi zapi le ngunkhuai khawltu hna nih khan a bia cu an theih; anmah cu Pathian bia kha a ngai i tipilnak a ingmi cu an si. ³⁰ Sihmanhsehlaw Farasi mi le Phungbia cawnpiaktu saya hna nih khan cun an ca i Pathian nih a tinhmi kha an duh lo i Johan tipil peknak kha an cohlang duh lo. ³¹ Jesuh nih aa thawh i, "Tuchan mi hi zei he dah ka tahchunh hna hnga? Zei he dah an i lawh hnga? ³² Chawdawrnak hmun ah a ṭhu i bu khat le bu khat kha: Thonglawi kan in tumpiak hna, sihmanhsehlaw nan lam duh lo; Mithi hla kan in sakpiak hna, sihmanhsehlaw nan ṭap duh lo; tiah aa timi ngakchia bantuk an si. ³³ Tipil petu Johan kha a hung chuak i rawl a ul i zu zeihmanh a ding lo, sihmanhsehlaw nan i thawh i, khuavang a ngei, nan ti. ³⁴ Cun Mi Fapa kha a hung chuak ve i a ei a ding i nannih nih nan i thawh i, "Hi pa hi zohhmanh u, misaram le mizuram, ngunkhuai khawltu hna le misual hna kawi a si,’ nan ti. ³⁵ Sihmanhsehlaw Pathian fimnak cu ahmaan taktak ko ti kha a rak cohlangmi vialte nih an langhter," tiah a ti. ³⁶ Farasi mi pakhat nih Jesuh cu zanriah ei ah a sawm. Jesuh cu a inn ah cun a va kal i rawl ei awkah khan an ṭhu. ³⁷ Cu khua ah cun a sualminu pakhat a rak um. Farasi mipa inn ah Jesuh cu rawl a hrawng ti kha a theih i cucaah lungrang thawl pakhat a khat tein zihmui a ummi kha a rak i put i ³⁸ Jesuh hnulei ah cun a kehram ah khan a dir, a ṭap i a mitthli in a ke kha a cinter. Cun a ke i a mitthli cu a sam khan a hnawh i a hnamh hna i zihmui kha a toih hna. ³⁹ Jesuh rawlhrawn a sawmtu Farasi mi nih khan mah cucu a hmuh tikah a lung chungin, "Hi pa hi profet a si taktak ahcun amah a tawngtu nu hi ahodah a si i zeitluk a sualminu dah a si ti kha a hngalh lai," tiah a ti. ⁴⁰ Jesuh nih a hun i thawh i, "Simon, zeilo thil pakhat chimh awk kan ngei," tiah a ti. Simon nih cun, "Asi, saya, ka chim tuah," tiah a ti. ⁴¹ Jesuh nih cun, "Tangka cawihtupa sinah lei a bami pahnih an um. Pakhat nih ngun tangka za nga a bat i a dang pakhat nih sawm nga a bat. ⁴² An pahnih tein an cham kho veve lo, cucaah a ngaihthiam hna. A si ahcun, aho nih khan dah amah cu a dawt deuh lai?" tiah a ti. ⁴³ Simon nih cun a thawh i, "Ka ruahnak ah, tam deuh a ngaihthiammi nih khan ta a dawt deuh lai," tiah a leh. "Na hmaan," tiah Jesuh nih a ti. ⁴⁴ Cun minu lei kha a hei hoih i Simon cu a thawh i, "Hi nu hi na hmu maw? Na inn chungah ka ra lut i sihmanhsehlaw ka ke ṭawlnak caah ti naa ka pe lo, sihmanhsehlaw amah nih hin cun ka ke kha a mitthli in a ṭawl hna i a sam in a hnawh hna. ⁴⁵ Ka rat tikah na rak ka hnam lo, sihmanhsehlaw ka rat ri in atu tiang ka ke hnamh kha a ngol lo. ⁴⁶ Ka lu i thuh awkah chiti zeihmanh na ka pe lo, sihmanhsehlaw anih nih cun ka ke kha zihmui in a culh. ⁴⁷ Cucaah hihi kan chimh, dawtnak nganpi a langhtermi nih khan a sualnak tampi a simi cu ngaihthiam an si cang, ti kha a langhter. An sualnak tlawmte lawng ngaihthiam a simi hna nih cun dawtnak tlawmte lawng an langhter ve," tiah a ti. ⁴⁸ Cun Jesuh nih minu cu a thawh i, "Na sualnak cu ngaihthiam na si," tiah a ti. ⁴⁹ Cabuai i a ṭhu vemi hna nih khan, "Sualnak hmanh a ngaithiamtu hi ahodah a si?" tiah an i ceih. ⁵⁰ Sihmanhsehlaw Jesuh nih minu cu a thawh i, "Na zumhnak nih khan an khamh cang, dai tein va kal ko," tiah a ti.

¹ Cu hnu tlawmpal ah cun Jesuh cu khuapi he khuate he a tlawng duahmah hna i Pathian Pennak kong Thawngṭha kha a chimh hna. Lamkaltu pahleihnih hna nih khan an zulh i ² an zawtnak le thlarau ṭhalo nih a tuah hnanak in a damtermi hna nih khan an zulh ve. Cu hna cu a chungin thlarau ṭhalo pasarih a chuahpiakmi Mary (Magdalin timi) le ³ Herod zung i bawi a simi Khuza nupi Joanna le Susanna le Jesuh le a zultu hna kha an ngeihmi thil in a rak bawmtu hna, nu dang tampi kha an si. ⁴ Jesuh sinah cun khua pakhat hnu pakhat in mi an ra chin luaimai i mi tampi an i pumh tikah Jesuh nih hi bianabia hi a chimh hna: ⁵ "Mipa pakhat cu thlaici vorh awkah aa thawh. Lo chung i thlaici a vorh tikah cun a cheu cu lam hril ah an tla i mi nih an lamh hna i vate nih an char hna. ⁶ A cheu cu lung lakah an tla, an hung keuh tikah vawlei a hnawn lo caah an car dih. ⁷ Thlaici a cheu cu hling lakah an tla, hling he cun an kho ṭi i hling nih cun a thah hna. ⁸ Cun thlaici a cheu cu vawlei ṭha ah an tla; an hung ṭhang i theifang let za khat cio an vui," tiah a ti. Hi bia a chim ah hin, "Theihnak hna nan ngeih ahcun thei ko u," tiah a auhnawh hna. ⁹ Jesuh cu a zultu hna nih khan, hi tahchunhnak bia hi a sullam zeidah a si, tiah an hal. ¹⁰ Jesuh nih a thawh hna i, "Pathian Pennak kong biathli hngalhnak cu nannih cu pek nan si cang; sihmanhsehlaw midang cu tahchunhnak bia lawngin chimh an si lai, cucaah cun an zoh len lai nain an hmu lai lo, an ngai len lai nain an hngal lai lo," tiah a ti. ¹¹ "Hi tahchunhnak bia a sullam cu hihi a si: thlaici cu Pathian bia a si. ¹² Lam i a tlami thlaici cu, a theih cu a theimi an si ko: asinain khuachia nih a rathnawh hna i an lung chungin thlaici kha a chuahpiak ṭhan hna caah a zum lo i khamhnak a hmu lomi kha an si. ¹³ Lung lakah a tlami thlaici cu bia kha a thei i lunglawm ngaiin a cohlang i sihmanhsehlaw an chung i thuk a pil lomi kha an si. Caan tlawmte chung lawng kha an zumh i tukforhnak a rat tikah an tlu ṭhan. ¹⁴ Hling lakah a tlami thlaici cu hi mi hna bantuk hi an si: Pathian bia cu an theih nain khuaruahhar vansannak le rumnak le nuamhnak nih a rialdip hna tikah an thei a hmin kho lomi kha an si. ¹⁵ Vawlei ṭha ah a tlami thlaici cu bia kha lungtho tein a thei i an lung chungah ṭha tein aa cinken i a thei a tlai tiangin aa zuammi cu an si," tiah a ti. ¹⁶ "Ahohmanh nih meiinn kha an van tikah kho an khuh bal lo, ihkhun tang zongah an chia bal lo. Mi nih inn chung i an rung luh tikah ceunak kha an hmuh nakhnga mei vannak cungah khan an van tawn. ¹⁷ Zeicahtiah thuhmi kha a lang lo dingmi zeihmanh a um lo i biathli zong hngalh lo dingmi le ceunak ah chuahpi lo dingmi zeihmanh a um lo. ¹⁸ "Cucaah nan ngaihning kha i ralring u; zeicahtiah a ngeimi kha chap chin an si lai i a ngei lomi kha ka ngeih tiah an i ruahmi thil tlawmte hmanh kha lakpiak an si lai," tiah a ti. ¹⁹ Jesuh a nu le a naule kha a sinah an ra, sihmanhsehlaw mi an tam tuk caah a sin an phan kho lo. ²⁰ "Na nu le na naule kha lengah an dir ko, ton an in duh," tiah an chimh. ²¹ Annih cu Jesuh nih, "Ka nu le ka naule cu maw — ka nu le ka naule cu Pathian bia kha a thei i an theih bantukin a tuahmi paoh kha an si ko," tiah a leh hna. ²² Ni khat cu Jesuh kha a zultu hna he lawng chungah an lut i annih cu a thawh hna i, "Tili khattelei ral ah khin va kal u sih," tiah a ti hna. Cucaah an i thawh. ²³ Lawng in an kal lioah cun Jesuh cu aa hngilh. Thlitu fak ngai tili cungah cun a rung hrang ciammam i lawng cu ti khah hnik aa zal i an thin a phang ngaingai. ²⁴ A zultu hna cu Jesuh sinah khan an ra i an hlauh i, "Saya, saya, kan thi dengmang ko hih," an ti. Jesuh cu a hung tho i thlitu le tilet cu a caak hna. Thlichia cu a dai i zeizong vialte cu dai zirziar in a um. ²⁵ Cun a zultu hna cu a thawh hna i, "Khuazei ah dah nan zumhnak cu a um kun?" tiah a ti. Sihmanhsehlaw annih cu an khuaruah a har i an thin a phang i pakhat le pakhat cu, "Hi pa hi aho hen a si? Thlichia le tilet kha nawl a pek hna i an ngaih ko dahngai," tiah an i ceih. ²⁶ Galilee ram in tili ralchan i a ummi Gerasa mi hna ram ah khan lawng in an va kal. ²⁷ Jesuh cu titlang a hei lamh ah khin cu ka khua i a ummi mipa pakhat, a chungah khuachia nih an luhhnawh mipa nih khan a rak ton. Caan saupi puan loin a um cang i inn ah um duh loin mithi vuinak lungkua ah khan a um: ²⁸ Jesuh cu a hmuh tikah fak piin a ai i a hmaiah a bawk i aw thang piin, "Jesuh, Cung Nung Bik Pathian Fapa, ka cungah zeidah tuah na duh? Dan ka tat sawh hlah, tiah kan nawl," tiah a ti. ²⁹ Jesuh nih thlarau ṭhalo kha a chungin chuak tiah nawl a pek caah hitihin a tinak cu a si. Thlarau ṭhalo nih khan voi tampi a tlaih tawn i kan tuahhmawh sual lai kaw tiah a kut le a ke kha thir cikcin in an ṭem tawn nain cikcin cu a chah dih hna i ramlak ah cun khuachia nih cun a lohpi tawn. ³⁰ Jesuh nih cun a thawh i, "Na min ahodah a si?" tiah a ti. "Ka min cu Mi Bupi a si," tiah a leh — zeicahtiah a luhhnawhtu khuachia cu tampi an si. ³¹ Khuachia nih khan Jesuh cu dongh hngal lo khor thukpi chungah khan kan thla sawh hlah tiah an nawl. ³² An pawngah cun tlangpang ah khan vok a runpi in an tlong lulhmalh ko. Khuachia nih khan Jesuh cu vok chungah khin kan luhter ko tiah an nawl i a luhter hna. ³³ Cucaah khuachia cu mipa chung cun an chuak i vok chungah cun an lut; an run ningpi in lungpang hrap cun tili chungah khan an zuang i an thi dih. ³⁴ Vok a zohkhenhtu hna nih khan cu ti i thil a um cu an hmuh i cucaah an tli i khua chung le lo lakah khan thawng cu an thanh hna. ³⁵ Cu ti i thil a hung ummi zoh awkah mi cu an va kal. Jesuh sinah khan an va phan i khuachia nih an chuahtak cangmi pa kha a kehram ah puan i aih le lungfim tein a ṭhut kha an va hmuh i an dihlak in an thin a phang. ³⁶ Cu thil a rak hmu cangtu hna nih khan zeitindah mipa nih damnak a hmuh ti kha an rak chimh hna. ³⁷ Cu tikah Gerasa ram i a ummi hna nih cun an ṭih ngaingai caah an zapi in Jesuh cu, kal ko tiah an nawl. Cucaah Jesuh cu lawng chungah khan a lut i a kal. ³⁸ Khuachia nih an chuahtak cang mipa nih khan Jesuh cu a nawl i, "Na sinah kal ve ko ning," a ti. Sihmanhsehlaw Jesuh nih a donh i, ³⁹ "Inn ah va tlung law Pathian nih na caah a tuahmi tu kha va chim hna," tiah a ti. Mipa cu khua chungah khan aa chawk i a caah Jesuh nih a tuahmi kha a chimh hna. ⁴⁰ Jesuh cu tili khattelei kam i a va kir tikah khan mibu nih khan an rak lawmh, zeicahtiah amah cu an rak hngah ko. ⁴¹ Khi tikah mipa pakhat a min Jairu a simi kha a ra; amah cu cuka hrawng pumhnak inn i hruaitu pakhat a si. Jesuh ke hramah cun a bawk i ka inn ah ra ko sawh, tiah a nawl, ⁴² zeicahtiah fanu pakhat te lawng a ngeihmi, kum hleihnih a simi kha a cat lengmang. Jesuh cu a kal lioah khan mibu nih cun a zual in an zual. ⁴³ Cuka ah cun nu pakhat thichuah zawtnak in kum hleihnih a zaw cangmi a um i a ngeihmi vialte kha sibawi phalh awkah a hmang dih cang nain ahohmanh nih an damter kho lo. ⁴⁴ Zapi lak cun Jesuh hnulei khan a ra i a puan kite kha a hei tongh i chikkhatte ah a thi cu a pit. ⁴⁵ Jesuh nih cun aa thawh i, "Ahodah a ka tawng?" tiah a ti. Ahohmanh nih kan in tawng lo, tiah an ti; cun Peter nih aa thawh i, "Saya, mi nih cun pei a zual in an in zual i a but in an in buthnawh cu," tiah a ti. ⁴⁶ Sihmanhsehlaw Jesuh nih, "Aho nih dik an ka tawngh ko, zeicahtiah ka chungin ṭhawnnak a chuah pei ka hngalh ko cu," tiah a ti. ⁴⁷ Minu nih cun a ka hngalh cang ti kha a hngalh tikah ther lengmang in a ra chuak i Jesuh ke hramah cun a bawk. Mi zapi hmaiah cun zeicahdah amah kha a tawngh i zeitindah chikkhatte ah damnak a hmuh kha a chimh. ⁴⁸ Jesuh nih amah cu a thawh i, "Ka fanu, na zumhnak nih an damter, dai tein va kal ko," tiah a ti. ⁴⁹ Cu bia cu Jesuh nih a chim lioah khan pumhnak inn zohkhenhtu inn cun zualko pakhat a ra i, "Na fanu cu a thi cang, saya cu hnahnawh ti duh hlah," tiah a chimh. ⁵⁰ Cu bia cu Jesuh nih a theih i Jairu cu a thawh i, "Na thinphang hlah, zum ko law a dam ko lai," tiah a ti. ⁵¹ Inn kha an va phak tikah Peter le Jeim le Johan le ngakchianu a nu le a pa dah ti lo cu amah he inn chung i luh ding kha a dang ahohmanh a onh hna lo. ⁵² Khika i a ummi vialte nih ngakchia cu an ṭah. Jesuh nih a thawh hna i, "Ṭap hlah u, ngakchia hi a thi lo, aa hngilh i pei a si ko cu," tiah a ti hna. ⁵³ A thi ko ti kha an hngalh caah an nih a chuak. ⁵⁴ Sihmanhsehlaw Jesuh nih a kut khan a vun tlaih i, "Tho tuah, ka fanu," tiah a vun auh. ⁵⁵ A nunnak cu a hung kir ṭhan i hmakhatte ah a tho; cun Jesuh nih ei awk pe u, tiah a ti hna. ⁵⁶ A nu le a pa cu an khuaruah a har ngaingai, sihmanhsehlaw hi kong cu ahohmanh chim hna hlah u, tiah Jesuh nih a thlauh hna.

¹ Jesuh nih pahleihnih hna kha hmunkhat ah a auh hna i khuachia ṭhawl khawhnak le zawtnak damter khawhnak ṭhawnnak le nawlngeihnak kha a pek hna. ² Cun Pathian Pennak kong chim awk le mizaw damter awkah a thlah hna. ³ Annih cu a thawh hna i, "Atu khual nan tlawn lainak ding caah hin zeihmanh i phorh hlah u: ṭhiangṭhunh siseh, zal siseh, riahcaw siseh, tangka siseh, angki khethuan siseh, zeihmanh i phorh hlah u. ⁴ Tluninn an in onh hnanak inn paoh ah, cu khua in nan chuah hlan tiang va um ko u; ⁵ tluninn an in onh duh hna lonak khua paoh cu, nannih nih va kaltak ko u law annih kha ralrinnak peknak caah nan ke beh leidip kha va khawnhnawh hna u," tiah a ti. ⁶ Zultu hna cu an i thawh i khua kip kha an tlawng i hmun kip ah Thawngṭha kha an chim i a zawmi kha an damter hna. ⁷ Galilee ram a uktu Herod nih khan hi bantukin thil a ummi vialte kha a theih ve; hi kong ah hin a lung aa tuai ngaingai, zeicahtiah mi a cheu nih, "Tipil petu Johan kha a nung ṭhan," an ti. ⁸ Midang nih, Elijah kha a hung lang cang, an ti i a dang nih hlan lio pi i a rak ummi profet pakhatkhat a hung nung ṭhan, an ti. ⁹ Herod nih cun, "Johan cu a lu ka tanter ṭung hna, a thawng ka theih lengmangmi mipa hi ahodah a si kun?" tiah a ti. Cun Jesuh hmuh ding kha heh tiah aa zuam lengmang. ¹⁰ Lamkaltu hna cu an ra tlung i an tuahmi vialte kha Jesuh cu an chimh dih. A sinah aa kalpi hna i anmah lawng tein Bethsaida timi khua ah khan an kal. ¹¹ Cu thawng cu mizapi nih khan an theih tikah an zulh. A rak lawmh hna i Pathian Pennak kong kha a rak chimh hna i damnak a herhmi kha a damter hna. ¹² Nitlak aa timh tikah khin pahleihnih kha a sinah cun an ra i, "Mizapi hi kalter hna law hika hrawng khua hna le lo hna ah hin rawl le riahnak kawl awkah kal hna seh, zeicahtiah kan umnak hmun hi mi um lonak hmun a si ṭung," an ti. ¹³ Sihmanhsehlaw Jesuh nih a rak thawh hna i, "Nanmah nih ta ei awk cu nan pek ko hna," tiah a ti. Annih nih, "Kan ngeihmi cu dihlak ah changreu hlum nga le nga pahnih pei a si ko cu. Mizapi caah hin rawl cawk fial maw na kan duh?" an ti. ¹⁴ (Cuka i a ummi cu upa thong nga hrawng an si). Jesuh nih a zultu hna cu, "Mi kha sawm nga hrawng duahmah in a bu a bu in ṭhutter hna u," tiah a ti hna. ¹⁵ Cu bantuk cun a zultu hna nih cun an tuah i an dihlak in an ṭhutter hna. ¹⁶ Jesuh nih changreu hlum nga le nga pahnih cu a lak hna i van lei a zoh i Pathian kha a lawmh hnuah a cheu hna i mizapi phawt awkah khan a zultu kha a pek hna. ¹⁷ An dihlak in an ei i an khim dih; an nganhmi cu a zultu hna nih khan an khawmh hna i bawm hleihnih khat a si. ¹⁸ Voi khat cu Jesuh kha amah lawng tein thla a cam lioah a zultu hna kha a sinah an ra i, "Mi nih aho a si an ka ti dah?" tiah a hal hna. ¹⁹ "A cheu nih Tipilpetu Johan a si, an in ti. Cun a dang nih, Elijah a si, an in ti. Cun a dang nih hlanlio i a rak ummi profet pakhatkhat kha a nung ṭhan, an in ti," tiah an ti. ²⁰ Cun annih cu a thawh hna i, "Nannih tah zeitin? Nannih nih tah aho a si nan ka ti dah?" tiah a hal hna. Peter nih a vun leh i, "Nangmah cu Pathian Messiah na si," tiah a ti. ²¹ Cun Jesuh nih ka kong cu ahohmanh nan chim hna lai lo tiah fek tein a ti hna i, ²² "Mi Fapa nih hin temhinnak tampi ka in hrimhrim lai; upa hna le tlangbawi upa hna le Phungbia cawnpiaktu saya hna nih an ka hlawt lai. An ka thah lai i ni thumnak ni ah thawhter ka si ṭhan lai," tiah a chimh hna. ²³ Cun annih cu an dihlak in a thawh hna i: "Ahohmanh nih zulh nan ka duh ahcun mah zawnruahnak kha nan ngol lai i ni fa tein nan vailam kha nan i put lai i nan ka zulh lai. ²⁴ Zeicahtiah mah himnak lawng a ruatmi cu a nunnak kha a sung lai sihmanhsehlaw keimah ruangah a nunnak a sungmi cu khamhnak kha a hmu lai. ²⁵ Mi pakhatkhat nih vawlei hi a dihlak in co seh law amah cu lotlau ṭung seh law, asiloah rawkral ṭung seh law, zeital a miak hnga maw? Miak hlah. ²⁶ Ahohmanh keimah le ka cawnpiaknak kha a kan zahpimi cu, Mi Fapa nih ka sunparnak le ka Pa le a thiangmi vancungmi hna sunparnak he ka rat tikah, ka zahpi ve hna lai. ²⁷ Cun nannih nih hika ah hin, Pathian Pennak an hmuh hlan tiang a thi lo dingmi an um tiah kan chimhmi hna hi i cinken u," tiah a ti. ²⁸ Hi bia a chim hnu zarh khat tluk ah Jesuh nih Peter le Johan le Jeim kha thlacam awkah tlang ah aa kaipi hna. ²⁹ Thla a cam lioah khan a hmai cu aa thleng i a hnipuan cu rang cercur in an um. ³⁰ Chikkhatte ah khan mi pahnih nih bia an hung ruah. Annih cu Moses le Elijah kha an si. ³¹ Vancung sunparnak in an i thuam i Jerusalem khua i a thihnak thawng in Pathian nih a timhmi a tlinter lainak kong kha Jesuh he cun an i ruah. ³² Peter le a hawile hna cu thu hluahmah in an rak i hngilh, sihmanhsehlaw an hun i hlau i Jesuh sunparnak le a sinah a dirmi pahnih kha an hmuh hna. ³³ Mi nih khan Jesuh cu an kaltak lioah khin Peter nih a thawh i, "Saya, hika i kan um hi thil ṭha a si. Deu pathum in kan sak lai, pakhat nangmah caah, pakhat Moses caah, pakhat Elijah caah," tiah a ti. (Ka chimmi hi zei a si ti a hngal ngaingai lo). ³⁴ Bia a chim lengmang lioah cun minmei a hung kai i a hun zelh hna, cun a zultu hna cu an ning a ṭi. ³⁵ Minmei chung cun aw pakhat nih, "Amah hi ka thimmi ka Fapa a si, a bia kha ngai u," tiah a run chim. ³⁶ Aw kha a daih tikah Jesuh cu amah lawng tein a um ko kha an hmuh. Dai tein an um i an hmuhmi kha ahohmanh an chim hna lo. ³⁷ A thaizing ah tlang cung cun an vung ṭum i mi tampi nih Jesuh cu an rak ton. ³⁸ Mizapi lak cun mipa pakhat a hung au i, "Saya, ka fapa hi ka zohpiak hmanh, amah lawnglawng hi fa ka ngeihmi a si. ³⁹ Thlarau nih a luhhnawh ciammam tawn i a au a khuang i a ther thluahmah i a buanbara zong a tawh dih tawn; atu le atu cuticun a tuah i a kal in a kaltak duh lo. ⁴⁰ Na zultu hna kha, hung ka ṭhawlpiak ko sawh u, tiah ka nawl hna i sihmanhsehlaw an ṭhawl kho fawn lo," tiah a ti. ⁴¹ Jesuh nih cun a leh i, "Nan hei zum loin nan hei palh thiam dah. Zei can riamruam hen kan umpi hna a herh lai? Zei can dah kan in hna lai?" tiah a ti. Cun mipa cu aa thawh i, "Hika ah hin na fapa cu ratpi tuah," tiah a ti. ⁴² Ngakchiapa cu a rat lioah khan khuachia nih cun vawlei ah a thluk ciammam i i let cukmak in a tuah. Jesuh nih thlarau ṭhalo cu a sik i ngakchiapa cu a damter i a pa sinah khan a pek ṭhan. ⁴³ Pathian ṭhawnnak kha an hmuh tikah mi vialte cu an khuaruah a har dih. Jesuh nih a tuahmi thil kong ah mi hna cu khuaruah har in an um ko lioah khan a zultu hna cu a thawh hna i, ⁴⁴ "Kan chimh dingmi hna hi philh hlah u. Mi Fapa hi minung ṭhawnnak ah chanh a si lai," tiah a ti. ⁴⁵ Sihmanhsehlaw cucu a sullam zeidah a si ti kha an hngal lo. An hngalh nakhnga lo thuhkanh an si i cu kong cu amah hal kha an ngamh fawn lo. ⁴⁶ A zultu hna lakah cun bia alnak pakhat a hung chuak i cucu an lakah ahodah a ngan bik ti kha a si. ⁴⁷ Jesuh nih an ruahnak kha a hngalh i cucaah ngakchiate pakhat kha a lak i a pawngah a dirter i ⁴⁸ annih cu, "Ka min in hi ngakchiate tluninn a onhtu nih keimah tluninn a ka onh a si, cun keimah tluninn a ka onhtu nih keimah a ka thlahtu tluninn a onh kha a si. Zeicahtiah nan lak i a hme bikmi cu a ngan bikmi a si," tiah a ti. ⁴⁹ Johan nih a hun i thawh i, "Saya, nangmah min in khuachia a ṭhawlmipa pakhat kan hmuh i kanmah bu chungmi a si lo caah kan thlauh," tiah a ti. ⁵⁰ Jesuh nih a thawh i, "Thlauh hna hlah u, zeicahtiah an dotu hna a si lomi paoh cu an bawmtu hna an si," tiah a ti. ⁵¹ Jesuh cu vancung i laknak caan kha a nai cuahmah tikah a lung aa thlek i Jerusalem khua lei kal awkah khan aa thawh. ⁵² A hmaiah khan lamkal a thlah hna i cu hna cu an rak kal i Samaria mi hna khua pakhat ah khan zeizong vialte rak timh chung awkah an rak lut. ⁵³ Sihmanhsehlaw Jerusalem i a kal lai kha a fian ko caah cuka khuami hna nih cun tluninn kha onh an rak duh lo. ⁵⁴ Cu thil cu a zultu hna Jeim le Johan nih khan an hmuh tikah, "Bawipa, hi mi hna hrawhnak ding caah hin vancung in mei au u tiah na kan duh maw?" an ti. ⁵⁵ Jesuh cu aa mer i a sik hna i ⁵⁶ khua dang ah khan an lan. ⁵⁷ Annih nih an kal lengmang lioah khan pakhatpa nih a thawh i, "Na kalnak paoh ah kan zulh lai," tiah a ti. ⁵⁸ Jesuh nih cun, "Cenghngia nih kua an ngei i vate nih bu an ngei, sihmanhsehlaw Mi Fapa cu riahnak hmun hmanh ka ngei lo," tiah a ti. ⁵⁹ A dang pakhat tu cu a thawh i, "Ka zul," tiah a ti. Sihmanhsehlaw cu pa nih cun, "Bawipa, ka pa kha va vui ta ning," a ti. ⁶⁰ Jesuh nih cun a leh i, "Mithi nih an mithi kha va vui ko hna seh. Nang tu cu va kal law Pathian Pennak kong kha va chim ko," tiah a ti. ⁶¹ A dang pakhat nih a thawh ve i, "Bawipa kan zulh lai, sihmanhsehlaw ka chungle kha dam tein, va ti ta hna ning," tiah a ti. ⁶² Jesuh nih a leh i, "Ahohmanh leithuan aa ot i hnulei a zoh peng ṭungmi cu Pathian Pennak caah santlaihnak a ngei lo," tiah a ti.

¹ Cu hnuah cun Bawipa nih a dang sawm sarih le pahnih kha a thim hna i amah a kalnak ding khua le hmun paoh ah khan a hmaiah pahnih pahnih in a thlah hna. ² Annih cu a thawh hna i, "Rawl ṭuan awk a tampi ko nain a ṭuantu tlawmte lawng an si. Cucaah rawl a ṭuantu dingah mi tam deuh a thlah hna nakhnga lo ngeitu sinah khan thla va cam tuah u. ³ Atu ah i thawh u law kal u. Nannih cu cenghngia lak i tuufa thlah bantukin kan thlah hna. ⁴ Phaisa bawm siseh, zal siseh, kedan siseh i phorh hlah u; lampi ah ahohmanh biakchawnh awkah dircon hlah u. ⁵ Inn pakhatkhat ah nan luh tikah a hmasa bik ah, "Hi inn chungah daihnak um ko seh," va ti u. ⁶ Daihnak a duhmipa a rak um a si ahcun, daihnak na cungah um seh, tiin nan biakchawnhnak cu a cungah hmun seh; sihmanhsehlaw cu ti a si lo ahcun daihnak in nan biakchawnhnak cu nan sinah kir ṭhan seh. ⁷ Cu inn ah cun um ko u law an in pekmi hna paoh kha va ding u law va ei ko u; zeicahtiah rianṭuantu cu a ṭuan man a hmuh awk a si. Inn khat hnu inn khat in i thawn lengmang hlah u. ⁸ Khua pakhatkhat ah nan luh i tluninn an rak in onh hna fate, an in hunhmi hna paoh kha va ei u law, ⁹ cuka khua i a ummi mizaw kha va damter hna u law, cuka khuami hna cu, ’Pathian Pennak cu nan pawngte a phan cang,’ tiah va chim hna u. ¹⁰ Sihmanhsehlaw tluninn an rak in onh hna lonak khua paoh cu an khuachung lam ah khan i chawk u law lai i, ¹¹ ’Kan ke i aa behmi nan khua chung leidip hmanh hi kan in thinhnawh tak hna; sihmanhsehlaw hi tu hi cu run philh hlah u: Pathian Pennak nan pawngte a phan cang hih,’ nan ti hna lai. ¹² Mah hihi kan chimh hna, Biaceih Ni ah cun hi khua nak hin Pathian nih Sodom khua kha a zaangfah deuh lai," tiah a ti. ¹³ "Maw Khorazin khua, na caah zeitluk ṭihnung dah a si? Bethsaida zong, na caah zeitluk ṭihnung dah a si ve? Na chung i ka tuahmi khuaruahharnak hna hi Tair le Sidon khua ah khan rak tuah hna ning law khika i a ummi minung hna cu, an nunning an i thlen langhternak caah puanchia aih in le vutcam i phulh in an ṭhu diam cang hnga! ¹⁴ Biaceih Ni ah cun nanmah nakin Tair le Sidon kha Pathian nih a zaangfah deuh te hna lai. ¹⁵ Cun maw Kapernaum, vancung i hun i hlorh khi na duh mu? Hell chungah khin vun hlonh na si lai," a ti. ¹⁶ A zultu kha a thawh hna i, "Nan bia a ngaimi paoh nih ka bia an ngaih a si, an hlawmi hna paoh nih keimah an ka hlawt a si, keimah a ka hlawmi paoh nih a ka thlahtu kha an hlawt a si," tiah a ti. ¹⁷ Sawm sarih le pahnih kha thanuam ngaiin an ra kir i, "Bawipa, nangmah min in kan thawl hna tikah khuachia hmanh nih kan nawl an ngaih," an ti. ¹⁸ Jesuh nih a leh hna i, "Satan kha van in nimtlau bantukin a tlak kha ka hmuh. ¹⁹ Ngai hmanh u: rul le tlangngaikuang hmanh lamh khawhnak ṭhawnnak le nan Ral ṭhawnnak tei khawhnak kan pek hna caah zeihmanh nih an ti kho hna lai lo; ²⁰ sihmanhsehlaw thlarau ṭhalo nih nan nawl an in ngaih hna caah khan i lawm hlah u, vancung i nan min ṭial a si ca tu ah khan i lawm tuah u," a ti hna. ²¹ Khi tikah khan Jesuh cu Thiang Thlarau nih lawmhnak in a khahter i, "Maw ka Pa, van Bawi le vawlei Bawi a simi, mifim le mithiam hna sinin na rak thuhmi kha fimnak le thiamnak a ngei lomi hna sinah na langhter caah hin nangmah cu kan lawmh. Asi, ka Pa, hi thil na tuahnak cu nangmah duh tein le nangmah nih naa thimning tein a si ko. ²² "Ka Pa nih zeizong vialte kha a ka pek cang: Pa nih dah ti lo nih cun ahohmanh nih Fapa kha ahodah a si, ti awk an hngal lo, Fapa le an sinah Fapa nih Pa a phuan duhmi hna dah ti lo nih cun Pa kha ahodah a si ti awk ahohmanh nih an hngal lo," tiah a ti. ²³ Cun Jesuh cu a zultu hna leiah khan a hei i mer i anmah bing tein, "Nan hmuhmi thil nan hmuh caah hin zeitluk in dah nan caah lunglawmh awk a si. ²⁴ Zeicahtiah fiang tein kan chimh hna, profet tampi hna le siangpahrang hna nih nan hmuhmi hi hmuh an rak duh ko nain an hmu kho lo, theih an rak duh ko nain an thei kho lo," tiah a ti hna. ²⁵ Cun Phungbia cawnpiaktu saya pakhat a ra i amah kha foih a hung zalh, aa thawh i, "Saya, zungzal nunnak hmuh awkah zeidah ka tuah lai?" tiah a ti. ²⁶ Jesuh nih a leh i, "Cathiang nih zeitindah an chim i an chimmi cu zeitindah a sullam naa lakning a si?" tiah a ti. ²⁷ Mipa nih cun a leh i, " ’Bawipa na Pathian cu na lungthin dihlak le na nunnak dihlak le na thazang dihlak le na ruahnak dihlak in na dawt lai i na innpa zong kha nangmah naa dawt tlukin na dawt lai,’ a ti," tiah a ti. ²⁸ Jesuh nih cun, "Na bialehnak ahmaan; cucu va tuah law na nung lai," tiah a ti. ²⁹ Sihmanhsehlaw Phungbia cawnpiaktu sayapa nih cun thiam hun i coh kha a duh i, "Ahodah ka innpa cu a si?" tiah Jesuh kha a hal. ³⁰ Jesuh nih cun a leh i, "Voi khat cu mipa pakhat kha Jerusalem in Jeriko khua leiah a vung kal: Cu a vung kal lioah cun damiah nih an rak tlaih i a puan an phoih i an tuk i thilo nunglo in an kaltak. ³¹ Cu lioah cun tlangbawi pakhat hi cuka lei lam ah cun a vung kal ngelcel; mipa cu a hei hmuh tikah lam khattelei kam cun a hrial. ³² Cu bantuk ṭhiamṭhiam in Levi mi pakhat zong cuka ah cun a va kal ve, mipa cu a hei kalhnawh i a hei bih tak i khattelei kam cun a kaltak ve. ³³ Sihmanhsehlaw Samaria mipa pakhat, cuka lei lam i khual a tlawngmi cu, cu pa umnak kha a va phan; amah kha a hmuh tikah a zaang a fak ngaingai. ³⁴ A hei fuh i a hma ah cun chiti le mitsur hang kha a thuh hna i a men hna; cun mipa cu a saṭil cungah khan a chuan i khual riahnak inn pakhat ah a kalpi i cuka ah cun a zohkhenh. ³⁵ A thaizing ah ngun tangka phar hnih aa chuah i riahnak inn hngaktupa cu a pek i, ’Amah hi ṭha tein rak zohkhenh law amah caah na liauheumi vialte cu hi lei ka ra kir ṭhan tikah kan pek ṭhan lai,’ a ti," tiah a ti. ³⁶ Cun Jesuh nih cun aa thawh i, "Hi mi pathum hna lakah hin aho hi dah damiah nih an tlaih mipa innpa kha a si tiah na ruah?" tiah a ti. ³⁷ Phungbia cawnpiaktu saya nih cun, "Amah a zaangfahtu kha," tiah a leh. Jesuh nih, "Va kal law cu bantuk cun va tuah ve," tiah a ti. ³⁸ Jesuh le a zultu hna cu khual an tlawn lioah khan khua pakhat an va phan i cuka ah cun minu pakhat a min Martha a simi nih a inn ah a rak tlunter hna. ³⁹ Nau pakhat a ngei i a min cu Mary a si. Mary cu Bawipa ke hram ah cun a ṭhu i a cawnpiaknak kha a ngai. ⁴⁰ Martha cu a rian a tam caah khan a ing a puang i, "Bawipa, ka nau nih keimah lawng rianṭuan a ka rinh hi na zei a poi lo maw? Va bawm tiah hun chim" tiah a ti. ⁴¹ Bawipa nih cun a leh i, "Martha, Martha, thil tam tuk kong ah na lungre a thei i na ing a puang, ⁴² sihmanhsehlaw a herh taktakmi cu pakhat lawng a si ko. Mary nih ahmaanmi thil cu aa thim cang i cucu ahohmanh nih an chut lai lo," tiah a ti.

¹ Voi khat cu Jesuh kha kaa khat ah thla a cam. A thlacam cu a dih tikah a zultu pakhat nih aa thawh i, "Bawipa, Johan nih a zultu hna a cawnpiak hna bangin kannih zong thlacam kan cawnpiak ve," tiah a ti. ² Jesuh nih cun, "Hitihin thla cu nan cam awk a si lai: ’Kan Pa, Na min thiang cu upat si ko seh, Na Pennak cu tlung ko seh. ³ Kan herhmi rawl ni fate in kan pe ko. ⁴ Kan cung i a sualmi hna kha kan ngaihthiam hna caah Kan sualnak kha kan ngaithiam. Cun a harmi hneksaknak kan phakter hlah,’ nan ti lai," a ti. ⁵ Cun Jesuh nih a zultu cu a thawh hna i, "A biana ah nannih lak i pakhatkhat cu zanṭim ah a hawipa inn ah a va kal i, ’Ka kawi, changreu hlum thum in ka cawi ta ko. ⁶ Ka kawipa pakhat khual a tlawng i ka inn ah atute ah khan a ra chuak i pek awk zeihmanh ka ngei lo,’ tiah a va ti. ⁷ Cun a hawipa nih cun a inn chung cun, ’Hna ka hnawh hlah, innka ka hrenh cang i ka fale he kan it cang, nangmah thil pek awkah ka tho kho ti lo,’ a ti. ⁸ A si ahcun zeitindah a tuah kun lai? Amah cu na hawi a si ruangah a tho in na herhmi changreu kha an pe lai lo nain ningzak loin na hal peng hrat caah khan, na herhmi paoh cu an pek ko lai. ⁹ Cucaah hihi kan chimh hna: Hal u law pek nan si lai; kawl u law nan hmuh lai; king u law innka cu hunpiak nan si lai. ¹⁰ Zeicahtiah a halmi paoh cu pek an si lai i a kawlmi paoh nih an hmuh lai, a kingmi paoh cu innkhar kha hunpiak an si lai. ¹¹ Nannih hringtu pa hna lakah, nan fale nih nga an in hal hna ah, rul a pemi nan um hnga maw? ¹² Arti an in hal hna ah tah tlangngaikuang nan pe hna hnga maw? ¹³ Hi tluk i nan ṭhalo ko na hin nan fale kha thil ṭha pek cu nan hngalh ahcun, vancung i a ummi nan Pa nih cun amah kha Thiang Thlarau a halmi cu zeitluk in dah a pek chinchin hna lai," tiah a ti. ¹⁴ Jesuh nih a holh kho lomi khuachia kha a ṭhawl i cu khuachia cu a chuah tikah mipa cu holh hram aa thawk. Mizapi cu an khuaruah a har ko, ¹⁵ sihmanhsehlaw a cheu nih an i thawh i, "Khuachia ṭhawl khawhnak ṭhawnnak a petu cu khuachia hna lak i an bawi bik Beelzebul kha a si," an ti. ¹⁶ A dang nih amah kha foih an rak duh ve, cucaah na tuahmi hi Pathian hnatla a si le si lo hngalhnak ah khuaruahharnak pakhat in ser tuah, an ti. ¹⁷ Sihmanhsehlaw Jesuh nih an ruahnak kha a hngalh i, "Ram zeihmanh, anmah le anmah aa domi bu ah aa ṭhen ahcun sau a dir lai lo, anmah le anmah aa domi innchungkhar cu an i ṭhen. ¹⁸ Cucaah Satan pennak zong cu a chungah anmah le anmah aa domi bu an um ahcun zeitindah a dir khawh lai? Nannih nih nan i thawh i Beelzebul nih ṭhawnnak a pek caah khuachia kha a ṭhawl khawh hna, nan ka ti. ¹⁹ Ka ṭhawlning hna cu hitihin a si ahcun, nanmah nan zultu hna nih khan tah zeitindah an ṭhawl kun hna? Nanmah nan zultu hna lila nih pei nan palh diam ti kha an langhter ko cu. ²⁰ Beelzebul ṭhawnnak in khuachia kha ka ṭhawl hna a si ṭung lo, Pathian ṭhawnnak in pei a si deuh cu, cu nih cun Pathian Pennak kha nan sin a phan cang ti kha a langhter. ²¹ "A ṭhawngmipa nih a hriamnam dihlak he a inn kha a ven tikah a ngeihmi thil vialte kha a him tawn. ²² Sihmanhsehlaw amah nakin a ṭhawng deuhmipa nih a hung doh i a hung tei tikah inn ngeitupa nih aa bochanmi hriamnam vialte kha aa kalpi dih hna i a firmi thil kha midang a phawt hna. ²³ "Keimah a ka ṭanh lomi cu a ka dohtu an si; pumh a ka bawm lomi cu ṭhektu an si," tiah a ti. ²⁴ "Thlarau ṭhalo pakhat kha minung chungin a chuah tikah dinhnak hmun kawl awkah ram rocar chungah khan a kenkip ah aa chawk. A hmuh khawh lo caah khan aa thawh i, ’Ka chuahtakmi inn ah khan ka kir ṭhan lai,’ a ti. ²⁵ Cucaah a va kir i inn cu thiangte le tlahirhiar tein a rak um ko kha a va hmuh. ²⁶ Cun a va chuak i amah nakin a chia chinchinmi thlarau pasarih kha aa ratpi hna i cuka ah cun aa umpi hna. Cucaah a donghnak ah cun kha mipa kha a hramthawk i a sining nakkhan a umtuning a chia deuh," a ti. ²⁷ Jesuh nih hi bia a chim dih tikah hin mizapi lak cun minu pakhat a hung au i, "Nangmah a rak in hring i a rak in cawmtu nu hi zeitluk in dik aa lawmh," tiah a ti. ²⁸ Sihmanhsehlaw Jesuh nih a thawh i, "Pathian bia kha a thei i a ngaimi caah cun zeitluk in dik lunglawmhnak a si chinchin," tiah a leh. ²⁹ Mi nih Jesuh kha an zual lulh ko lioah khan a thawh hna i, "Tuchan mi hi miṭhalo an va si hringhran dah. Pathian hnatlaknak a si ti hngalhnak caah khuaruahhar kan hmuhsak tuah, an ti, sihmanhsehlaw Jonah khuaruahharnak kha dah ti lo cu zeihmanh hmelchunhnak pek an si lai lo. ³⁰ Profet Jonah cu Nineveh khuami hna caah hmelchunhnak a rak si bantuk khan Mi Fapa zong hi tuchan mi hna caah hin hmelchunhnak a si ve lai. ³¹ Biaceih Ni ah cun Chimlei Siangpahrangnu kha a dir te lai i atu chan mi hna hi sual a phawt te hna lai, zeicahtiah Solomon fimnak bia ngaih duh ah khan anih cu lamhla piin a ra i asinain hika ah hin Solomon nakin a ngan deuhmi a um ko ṭung. ³² Biaceih Ni ah cun Nineveh khuami cu an dir lai i nannih kha sual an in phawt hna lai, zeicahtiah annih cu Jonah bia chimmi an theih tikah khan an ziaza an i thleng, asinain hika ah hin Jonah nakin a ngan deuhmi a um ko ṭung," tiah a ti. ³³ Ahohmanh nih meiinn a van tikah a thuh in a thup bal lo, kho zong a khuh bal lo, sihmanhsehlaw mei vannak tu ah khan a van i mi an rung luh tikah khua an hmu kho. ³⁴ Nan mit cu nan pum caah meiinn bantuk a si; nan mit a fian tikah nan pum cu ceunak in a khat, sihmanhsehlaw nan mit a ṭhat lo tikah nan pum cu a dihlak in muihnak chungah a um. ³⁵ Cucaah nan chung i ceunak a ummi cu muihnak a si nakhnga lo i ralring tuah u. ³⁶ Cun nan pum cu a dihlak in ceunak in a khah i a zeika zawn hmanh kha muihnak chungah a um lo ahcun, meiinn nih a ceunak in an ceuh hna bantuk khin a ceu lai. ³⁷ Bia a chim dih tikah Jesuh cu Farasi mi pakhat nih rawl hrawn a sawm; cucaah a va kal i rawl ei awkah khan a ṭhu. ³⁸ Jesuh nih rawl ei hlanah a kut aa ṭawl lo kha Farasi mi nih cun a hmuh tikah a khuaruah a har. ³⁹ Cucaah Bawipa nih cun amah cu a thawh i, "Nannih Farasi mi nih kheng le hrai kha a lenglei cu nan ṭawl tawn hna, sihmanhsehlaw a chunglei ah cun hakkauhnak le ṭhat lonak in nan khat. ⁴⁰ Mihrut hna! A lenglei a sertu Pathian nih khan a chunglei zong cu a ser lo maw? ⁴¹ Sihmanhsehlaw nan hrai chung le nan kheng chung i a ummi thil kha misifak va pe hna u law nan caah zeizong vialte a thiang ko lai. ⁴² "Farasi mi hna, nan caah ṭihnung a va si dah! Pathian sinah, tihang ṭamhnak puṭinan tehna, khamhmuai tehna, anthor tehna le a dangdang kha cheu hra ah cheu khat lengmang nan pek ko, sihmanhsehlaw biading le Pathian dawtnak kha nan thlahdorh. A dang kha thlahdorh hlei loin pei hi hna hi nan tuah awk a si cu. ⁴³ "Farasi mi hna, nan caah ṭihnung a va si dah! Pumhnak i ṭhutdan a dang tein chiahpiakmi i ṭhut cu nan duh i chawdawrnak hmun i upatnak in kuttlaih cu nan tlaihchan. ⁴⁴ Nan caah ṭihnung a va si dah. Nannih cu hmelchunhnak tuah lomi thlan, a cung i mi nih hngalh loin an kal tawnnak bantuk cu nan si," a ti. ⁴⁵ Phungbia cawnpiaktu saya pakhat nih a hun thawh i, "Saya, hi bantukin na chim tikah hin kannih zong na kan thangchiat a si ve," tiah a ti. ⁴⁶ Jesuh nih cun a leh i, "Nannih Phungbia cawnpiaktu saya hna zong, nan caah ṭihnung a va si dah! Nanmah nih nan kutdong hmanh in nan tawngh duh ṭung lomi thilrit kha mi nan khinh hna. ⁴⁷ Nan caah ṭihnung a va si dah. Profet hna caah khan thlan ṭhaṭha nan ser hna, cu profet hna cu nan pu le nan pa hna nih an rak nawnmi hna kha an si. ⁴⁸ Cucaah nanmah hrimhrim nih nan pupa hna nih an rak tuahmi nan hnatlakpi hnanak kha nan langhter; annih nih profet kha an nawn hna i nannih nih an thlan kha nan ser hna. ⁴⁹ Hi ruangah hin pei Pathian Fimnak nih, ’Annih cu profet le lamkaltu kha ka thlahhnawh hna lai, a cheu an thah hna lai i a cheu an hrem hna lai’ a ti cu. ⁵⁰ Cucaah tuchan mi hna hi vawlei ser hramthawknak in profet an thahmi vialte hna ruangah khan dantat an si lai, ⁵¹ Abel an nawnnak thawk in biakṭheng le hmunthiang karlak ah an thahmi Zekhariah tiangin. Asi, kan chimh hna, atu chan mi hi, cu mi vialte hna ruangah cun dantat an si lai. ⁵² "Nannih Phungbia cawnpiaktu saya hna, nan caah ṭihnung a va si dah. Hngalhnak innka hunnak tawh kha nannih nih nan ken, nanmah cu nan lut duh ṭung lo i luh aa zuammi hna zong kha nan dawnh fawn ṭung hna," tiah a ti. ⁵³ Cuka hmun in a chuah tikah Phungbia cawnpiaktu saya hna le Farasi mi hna nih khan zeimaw ti tal in kan tlai kho hnga maw tiah thil tampi kongah biarap an chiah i ṭha tein an bawh; ⁵⁴ zei maw ti tal in bia a chim sualmi a um kho in a chim sualmi lila ah cun kan tlai kho hnga maw tiin thil tampi kong ah bia an hal lengmang.

¹ Mi cu a thongthong in an i pum i, i pah lulhmalh in an um tikah, Jesuh nih a hmasa bik ah a zultu kha a thawh hna i, "Farasi mi thilnu kha i ralring u, ka chim duhmi cu midepde an sinak hi a si. ² Khuhmi thil paoh hi hun an si dih lai i biathli paohpaoh hi hngalh an si dih lai. ³ Cucaah mui lakah nan chimmi cu chun ceu ah theih an si lai, cun innka nan i khar khumhnak khaan chungah a thli tein nan chimmi cu inncung in aupi an si lai," tiah a ti. ⁴ "Kan chimh hna, ka duale, pum cu a that kho nain a hnuah cu nak ṭhalo deuh zeihmanh a tuah kho ti lomi cu ṭih hna hlah u. ⁵ Ṭih awk cu ahodah a si kha kan hmuhsak hna lai: Thah hnu i hell zong i thlak khawhnak nawl a ngeimi Pathian hi a si. Asi, amah cu va ṭih u, tiah kan chimh hna. ⁶ "Pithlung panga cu pia hnih ah an zuar hna a si lo maw? Asinain an lak i pakhat hmanh khi Pathian nih a philhmi hna an um lo. ⁷ Nan lu cung samfa hmanh kha a rel dih hna. Cucaah nan thinphang hlah u: pithlung tampi nakin pei nan sun deuh cu!" tiah a ti. ⁸ "Hihi kan chimh hna: mizapi hmaiah a ka ṭanhmi cu Mi Fapa nih, Pathian vancungmi hna hmaiah, a ṭanh ve hna lai. ⁹ Sihmanhsehlaw nangmah ta ka si lo tiah zapi hmaiah aa phehmi cu, Pathian vancungmi hna hmaiah Mi Fapa zong nih, ka ta nan si lo, tiah a ti ve hna lai. ¹⁰ Mi Fapa a thangchiattu cu ahohmanh ngaihthiam an si lai, sihmanh-sehlaw Thiang Thlarau a thangchiattu cu ngaihthiam an si lai lo. ¹¹ "Pumhnak inn ah siseh, mangki bawi hmai le uktu bawi hmaiah tazacuai awkah an in chuahpi hna tikah, zeitindah kaa runven lai i zei bia dah ka chim lai, tiah nan khuaruah va har hlah u. ¹² Zeicahtiah Thiang Thlarau nih khi caan ah nan chim awk cu an chimh ko hna lai," tiah a ti. ¹³ Zapi lakin mipa pakhat nih a hun thawh i, "Saya, ka pa nih a kan rohmi thilri kha a ka cheuh ve naklai ka unaupa kha ka chimhpiak tuah," tiah a ti. ¹⁴ Jesuh nih cun a vun leh i, "Mipa, aho nih dah nan pahnih karlak i biathlektu ding le ro ṭhentu dingah nawl a ka pek?" tiah a ti. ¹⁵ Cun annih cu an dihlak in a vun thawh hna i, "Ralring tein um u, hakkauhnak kha i veng u; zeicahtiah mi a nunnak taktak cu, zeitluk hmanh in rum seh law, a thilri hi a si lo," tiah a ti. ¹⁶ Cun Jesuh nih hi tahchunhnak bia hi a chimh hna. Aa thawh i, "Mirumpa pakhat nih hin, rawl a vui ngaimi lo pakhat a ngei. ¹⁷ Cu tikah a lungchung in, ’Ka rawl vialte chiahnak ding hmun ka ngeih ti ṭung lo. Zeidah ka tuah ah a ṭha hnga? ¹⁸ Aa, hihi ka tuah lai: Ka rawlruk kha ka ṭheh hna lai i anmah nakin a ngan deuhmi kha ka sak hna lai. Cuka ah cun ka rawl le ka thilri dang vialte kha ka chiah hna lai. ¹⁹ Cun keimah le keimah cu kaa thawh lai i, Mivanṭha pa! Kum tampi caah a za in thil ṭha vialte cu na ngeih cang. Cucaah nuam tein um ko cang, ei law ding law i nuam ko, ka ti lai,’ a ti. ²⁰ Sihmanhsehlaw Pathian nih a thawh i, ’Mihrutpa, tuzan hrimhrim ah hin na nunnak cu an in lakpiak a hau lai; cucaah nangmah ca i na khonmi thilri vialte hi aho nih dah a co kun lai?’ a ti," tiah a ti. ²¹ Cun Jesuh nih cun a biadonghnak ah, "Hitihin pei anmah ca lawng i chawva a khong cuahmah i Pathian hmuhnak i a rum ṭung lomi cu an si cu," tiah a ti. ²² Cun Jesuh nih a zultu kha a thawh hna i, "Hi caah hin pei nunnak ca i nan herhmi rawl le nan pum ca i nan herhmi hnipuan kong ah nan lungrethei hlah u kan ti hna cu. ²³ Zeicahtiah nunnak hi rawl nakin biapi deuh ngaingai a si i pum hi hnipuan nakin biapi deuh ngaingai a si. ²⁴ Langak khi zoh hmanh hna ngat u, thlaici an tuh lo, rawl zong an ṭuan lo, rawl chiahnak buk zong an ngei lo, rawl khonnak ruk zong an ngei lo; asinain Pathian nih a cawm ko hna. Nannih cu va nakin a let tampi in pei nan sun deuh cu. ²⁵ Nan lakah aho tal, a lungretheihnak thawngin a nunnak ah suimilam pakhat tal zong a chap khomi nan um maw? ²⁶ Cu bantuk thil hmete hmanh nan tuah khawh ṭung lo ahcun zeicahdah thil dang kong ah cun lungrethei in nan um? ²⁷ Ramlak pangpar khi zeitindah an ṭhan ti khi zoh hna ngat u: rian an ṭuan lo, hnipuan zong an i tah fawn lo. Sihmanhsehlaw hihi kan chimh hna: Solomon hmanh kha, kha tluk khan a rum nain hi pangpar hna pakhat tluk i aa dawhmi thilthuam a ngei lo. ²⁸ A kho sawhsawhmi ram, nihin ah a nung i a thaizing ah meiphu i an paihmi ram a thuamhtu hi Pathian a si ahcun, nannih chinchin cu zeitluk in dah an thuamh hna lai — nannih zumhnak a hmemi hna! ²⁹ Cucaah ei awk le din awk rumro kha ruat in lungrethei in um hlah u. ³⁰ (Zeicahtiah hi thil hna hi cu vawlei mi nih an kawlhawl tawnmi hna an si ko). Nan Pa nih hi thil hi nan herh hna ti cu a hngalh ko. ³¹ Cucaah amah Pennak cu biapi bik ah ruat u law nan herhmi thil vialte hi an pek ko hna lai," tiah a ti. ³² "Tuurun hmete hna, nan thinphang hlah u! Zeicahtiah nan Pa nih Pennak cu nanmah kha pek an duh hna. ³³ Nan ngeihmi thil kha zuar hna u law tangka cu mi kha ṭhen hna u. A ṭet kho lomi phaisa bawm kha i zalh u law vancung ah nan ro kha khong hna u, khika ah cun mifir nih an fir kho hna lo i rungrul nih an ei khawh hna lo caah a zor lei an panh bal lai lo. ³⁴ Cun nan ro umnak ah nan lung zong a um zungzal ko lai," tiah a ti. ³⁵ "Zei thil paoh tlung ai kun, tiin nan taisawm kha fek tein i sawmh le nan meiinn kha i van in ralring tein um u; ³⁶ nupi ṭhitnak puai in a ra ṭinmi an bawipa a hngak i a hung phak i innka a hun kingh tikah hmakhatte ah hunpiak awkah timhcia tein a rak ummi a sal hna bantuk khan um u. ³⁷ An bawipa nih inn a phak tikah i hlau le ralring tein a rak ummi a sal hna caah cun lunglawmh awk a va si dah! Hihi kan chimh hna: a taisawm kha aa sawmh lai i a ṭhutter hna lai i a bultawl hna lai. ³⁸ Zanṭim i a ra ṭin a si ah, cu nak tlai deuh i a ra ṭin a si zongah, timhcia tein an um kha a ra hmuh hna cu, an caah zeitluk lawmh awk dah a si. ³⁹ Cun nannih nih hihi i cinken u: Inn ngeitu nih mifir a rat lai caan kha a hngalh ahcun mifir kha a inn cu a bauhter lai lo. ⁴⁰ Cucaah nannih zong i ralring ve u, zeicahtiah a ra lai tiah nan zumh lo caan ah khin Mi Fapa cu a ra ko lai," tiah a ti. ⁴¹ Peter nih a thawh i, "Bawipa, hi bianabia hi kanmah maw na kan chimh, asiloah mizapi caah dah na ti?" tiah a ti. ⁴² Bawipa nih a leh i, "A si ahcun, aho cu dah zumhawktlak le a fimmi sal cu a si? Zumhawktlak le a fimmi sal cu a bawipa nih a innchungkhar zohkhenhtu ah a chiah i sal dang kha anmah le an caan te cio ah an co awk hnga rawl a pemi hna cu a si. ⁴³ A bawipa cu inn i a hung tlun tikah cu ti i a rak tuah a hmuhmi a sal caah cun zeitluk in dah lunglawmh awk a si. ⁴⁴ Hihi kan chimh hna, cu pa cu a bawipa nih a thilri vialte zohkhenhtu ah a chiah hrimhrim lai. ⁴⁵ Sihmanhsehlaw ’Ka bawipa cu saupi a rau ko rih lai,’ a ti i sal dang pawl kha nu he pa he a tu a vel, a ei a ding i, rihai in a ummi sal cu, ⁴⁶ a bawipa cu a ra phan lai ti i a ruah lo ni le a hngalh lo caan ah khan a ra phan lai i cu sal cu a bawipa nih cun a sam cikcek lai i nawl ngai lomi hna tinvo kha a coter ve lai. ⁴⁷ "A bawipa duhnak a hngal ko na i cu a duhmi a tuah duh lomi sal cu a fakmi tuknak a in lai. ⁴⁸ Sihmanhsehlaw a bawipa duhnak a hngal lo i asinain tuk awk tlak a simi thil a tuahmi cu a dinmi tuknak a in lai. Tampi pekmi cu tampi hal ṭhan a si ve lai; tam deuh pek a simi cu tam deuh hal ṭhan a si ve ko lai," tiah a ti. ⁴⁹ "Vawlei hi mei in duah awkah pei ka rat cu, alh hluahmah cang seh law ka hei duh dah! ⁵⁰ Tipil in awk pakhat ka ngei i cucu a dih hlanah cun ka lungre a va thei dah. ⁵¹ Vawlei cungah hin remnak tlunter awkah a ra ti ah dahra nan ka ruah? Remnak si loin ṭhennak tu tlunter awkah ka ra. ⁵² Atu ri hin cun innchungkhar pakhat chung i a ummi mi panga hna cu an i ṭhen lai i pathum nih pahnih an doh hna lai pahnih nih pathum an doh hna lai, ⁵³ an pale nih an fapa hna kha an doh hna lai i an fapale nih an pale hna kha an doh lai; an nule nih an fanule kha an doh hna lai i an fanule nih an nule kha an doh hna lai; fapale nupi hna nih vale nule kha an doh hna lai i fapale nupi hna kha fapale nu hna nih an doh hna lai," tiah a ti. ⁵⁴ Jesuh nih mizapi cu a thawh ṭhan hna i, "Nitlaklei in khuadawm a thawh kha nan hmuh tikah hmakhatte ah, ’Ruah a sur lai,’ nan ti i a sur taktak. ⁵⁵ Cun Chimlei thli a hung hran nan pum nih a theih tikah, ’Khua a sa lai,’ nan ti i a lin taktak. ⁵⁶ Midepde hna, van le vawlei kha nan zoh i an sullam zeidah an si ti kha nan hngalh khawh; a si kun ahcun zeicahdah caan sullam hi nan hngalh khawh kun lo?" a ti. ⁵⁷ "Zeicahdah ahmaanmi thil tu kha tuah awkah nan lung nan i thlek ko lo? ⁵⁸ Mi pakhatkhat nih tazacuai an duh i zung ah an chuahpi ahcun, lam i nan kal lioah khan nan bia cu na remter khawh nakhnga vaa zuam tuah; cu ti na tuah khawh lo ahcun biaceihtu bawi hmaiah khan an chuahpi lai i biaceihtu bawi nih khan palik sinah an chanh lai i palik zong nih khan thong ah an in thlak lai. ⁵⁹ Na tlak vekvek a si ahcun, dan an in tatmi na liam dih cikcek hlan cu na chuak hrimhrim lai lo," tiah a ti.

¹ Cu caan ah cun Jesuh cu, Pilat nih Galilee mi hna Pathian sinah raithawinak an pekchanh lio i a thahmi hna kong kha an rak chimh. ² Jesuh nih a leh hna i, "Cu Galilee mi hna cu cu bantukin thihnak an in caah Galilee mi a dang hna nakin a sual deuhmi an si tiah nan ruah maw? ³ Asilo, nannih zong nan nunning nan ṭhinh lo ahcun anmah thih bantukin nan thi ve lai. ⁴ Siloam i innsang nih a nenhmi pahleiriat hna kha tah? Hiti an thihnak nih hin annih kha Jerusalem khua chung i a ummi midang vialte hna nakin an sual deuh tiah a langhter tiah nan ruah maw? ⁵ A si hrimhrim lo, nannih zong nan nun nan ṭhinh lo ahcun anmah thih bantukin nan thi ve lai," a ti. ⁶ Cun Jesuh nih hi bianabia hi a chimh hna: Aa thawh i, "Mipa pakhat nih a dum chungah theipi kung pakhat a cin. A tlai maw tlai lo ti a va zoh tikah zeihmanh a rak tlai lo. ⁷ Cucaah a dum zohkhenhtupa kha a thawh i, "Zohhmanh, kum thum chung theipi kung hi a tlai maw tlai lo, tiah zoh awkah ka ra lengmang i a tlai zeihmanh ka hmu rih lo. Cucaah hau ko. Zeicahhen vawlei dah tu kha a ei lengmang lai?’ tiah a ti. ⁸ Sihmanhsehlaw dum cawngtu nih khan a leh i, "Bawipa, hi kum khatte hi cu zuah ko rih, a velchum in ka cawh lai i non ka toih lai. ⁹ Cun kumvoi ah a tlai ahcun a ṭha ko, a tlai lo le na hauter te ko hna lai,’ a ti," tiah a ti. ¹⁰ Sabbath ni ah voi khat cu Jesuh nih pumhnak inn ah a cawnpiak hna. ¹¹ Cuka ah cun minu pakhat a chungah thlarau ṭhalo a ngeimi a um i thlarau nih cun kum hleiriat chung a zawtter cang i a keng kha a kul dih i a ding kho ti lo. ¹² Jesuh nih a hmuh tikah a hei auh i, "Minu, na zawtnak in na luat cang," tiah a ti. ¹³ A cungah khan a kut a chuan i cu cangka cun ding tein a dir kho i Pathian kha a thangṭhat. ¹⁴ Pumhnak inn zohkhenhtu cu Jesuh nih Sabbath ni ah mi a damter caah khan a thin a hung i, "Rianṭuannak dingah ni ruk pei a um ko cu; cucaah cun cu ni ruk chungah cun tah nan rat i nan rak i damter; Sabbath ni ah hin cun ti hlah ngat u," tiah mizapi cu a hun ti hna. ¹⁵ Bawipa nih cun a leh i, "Mi depde hna. Aho paoh nih Sabbath ni ah nan caw siseh nan la siseh an inn in nan thlah hna i ti dinh awkah nan kalpi ko ṭung hna. ¹⁶ Atu hika i a ummi nu Abraham fanu, Satan nih kum hleiriat chung a hrenmi hi Sabbath ni ah hin phoih awk a si hnga lo maw?" tiah a ti. ¹⁷ Bia a lehnak nih cun a ral vialte hna cu ningzak in a umter dih hna i khuaruahhar a tuahmi cungah khan mizapi cu an i lawm. ¹⁸ Jesuh nih aa thawh i, "Pathian Pennak hi zei he dah aa lawh? Zei he dah ka tahchunh khawh lai? ¹⁹ Mipa nih a lo ah a tuhmi anṭam ci he aa lo; anṭam cu a hung ṭhang i thingkung ah a cang i a nge ah khan vate nih bu an sak," tiah a ti. ²⁰ Jesuh nih aa thawh ṭhan i, "Pathian Pennak cu zei he dah ka tahchunh lai? ²¹ Minu nih thilnu aa lak i changvut rel khat chungah a phulh i cu thilnu nih cun changvut cu a thawhter dih. Cu thilnu bantuk cu a si," tiah a ti. ²² Jesuh cu Jerusalem i a kalpah ah khan khua kha a pal duahmah hna i a cawnpiak pah lengmang hna. ²³ Mi a cheukhat nih bia an hal i, "Bawipa, mi hi tlawmte lawng maw khamh an si lai?" an ti. ²⁴ Jesuh nih a leh hna i, "Kutka bi chung khan lanh i zuam ko u, zeicahtiah hihi kan chimh hna: mi tampi cu luh an i zuam lai nain an lut kho lai lo. ²⁵ "Inn ngeitu cu a tho lai i kutka cu a khar lai; cun nannih cu a leng i nan dir i kutka khar cu nan kingh i, ’Bawipa, innka kan hunh tuah,’ nan ti tikah, ’Khuazei in dah nan rat kha ka hngal lo,’ tiah an leh hna lai. ²⁶ Cun nannih nih nan leh ve lai i, ’Na sinah pei rawl kan ei i ti kan din kha, kan khua ah pei na kan cawnpiak kha,’ nan ti lai. ²⁷ Anih nih an thawh hna lai i, ’Khuazei in nan rat kan hngal lo. Nannih ṭhat lonak a tuahmi vialte hna, ka sinin kal ko u,’ a ti hna lai. ²⁸ Nannih vial cu lengah nan um lai i Abraham le Isak le Jakob le profet vialte hna cu Pathian Pennak chungah khan nan hmuh hna lai, cu tikah nan ṭap len lai i nan hacang nan i rial sek te lai. ²⁹ Nichuah, nitlak, chaklei, thlanglei, in mi kha an ra lai i Pathian Pennak cabuai ah khan an ṭhu lai. ³⁰ Cu tikah cun atu i a hmanung bik hi a hmasa bik an si lai i atu i a hmasa bik hi a hmanung bik an si lai," tiah a ti. ³¹ Cu lioah cun Farasi mi tlawmpal kha Jesuh sinah khan an ra i, "Herod nih thah an duh caah hika hin na chuah a hau," tiah an chimh. ³² Jesuh nih cun a leh hna i, "Va kal u law, cu cenghngia cu, ’Nihin le thaizing ah khuachia kha ka ṭhawl hna lai i damnak kha ka tuah lai, cun a ni thum ni ah ka rian cu ka lim lai,’ a ti, tiah va chim u. ³³ Sihmanhsehlaw nihin le thaizing le kiptuh cu ka kal ko rih lai, zeicahtiah profet cu Jerusalem khuachung dah ti lo ahcun khuazei hmanh ah thah phung a si ṭung lo. ³⁴ "Maw Jerusalem, Jerusalem, profet kha na thah hna i Pathian nih na sinah lamkaltu a rak thlahmi kha lung in na rak cheh hna. Arpi nih a fale cu a thla tangah a huh hna bantukin voi zeizat te dik na chung mi cu ka kut in huh kan timh hna i na duh lo. ³⁵ Zohhmanh, na biakinn cu Pathian nih a hlawt cang. Cun hihi kan chimh, nangmah nih, ’Bawipa min in a rami cu a cungah thluachuahnak um ko seh,’ na ti caan a phak hlan cu na ka hmu ti lai lo," tiah a ti.

¹ Voi khat cu Sabbath ni ah hin Jesuh cu Farasi mi hna lak i haotu pakhat inn ah rawl a hrawng i mi nih khan fel tein an ngiat. ² Mipa pakhat, a ke le a kut a phingmipa cu Jesuh sinah khan a ra i ³ Jesuh nih cun Phungbia cawnpiaktu saya hna le Farasi mi hna cu a thawh hna i, "Kan Phung nih Sabbath ni i mi damter hi a onh maw onh lo," tiah a hal hna. ⁴ Sihmanhsehlaw annih nih zeihmanh an chim lo. Jesuh nih mipa cu aa lak i a damter i a kalter. ⁵ Cun annih cu a thawh hna i, "Nan lak i pakhatkhat hi a fa maw, asiloah a caw maw Sabbath ni ah tikhor ah tla seh law, Sabbath ni a si ai tiah chuah loin maw nan um ko hnga," tiah a ti. ⁶ Hi kong ah hin zeihmanh an let kho lo. ⁷ Rawl hrawn kawh tikah mi a cheu cu ṭhutnak hmun ṭha bikbik an i thim tawn kha Jesuh nih a hmuh hna caah hi tahchunhnak bia hi an dihlak in a chimh hna: ⁸ "Nupi ṭhit rawldanghnak puai ah pakhatkhat nih an in sawm hna ahcun ṭhutnak ṭha bik kha i cuh hlah. Zeicahtiah nangmah nakin a biapi deuhmi midang kha an sawm khawh i ⁹ nan pahnih in an sawmtu hna nih khan, nangmah cu an thawh lai i, ’Hi hmun hi kian tuah,’ tiah an ti sual lai. Cu tikah cun a niam bik hmun i na vung ṭhut tikah khan na ning a zak lai. ¹⁰ Cu nakin rawlhrawn an in sawm tikah va kal law a niam bik hmun ah khan va ṭhu deuh. Zeicahtiah an sawmtupa kha na sinah a ra lai i, ’Hung kai tuah, ka kawi, hmun ṭha deuh ah hin,’ an ti lai. Hi nih hin sawmmi vialte hna hmaiah khan hmaihngalnak an pek lai. ¹¹ Amah le amah a ngan ah aa chiami cu nauta ah chiah a si lai i mi tangah aa dormi cu mi ngan ah ser a si lai," tiah a ti. ¹² Cun Jesuh nih rawlhrawn a sawmtu cu a thawh i, "Chuncaw ei siseh, zanriah ei siseh, na sawm hna tikah na hawi na kom le na unau hna le na sahlawh na rualchan hna le na innpa mi rumrum kha va sawm hna hlah. Zeicahtiah anmah zong nih an in sawm ve lai i na tuahmi kha cham na si ko lai. ¹³ Rawl danghnak na tuah tikah, misifak, kutzeng, kezeng le mitcaw kha va sawm hna law ¹⁴ annih nih an in cham khawh lai lo caah thluachuahnak na hmu lai. Miṭha mi kha thihnak in an thawh ṭhan tikah Pathian nih an cham lai," tiah a ti. ¹⁵ Cabuai i a ṭhu vemi pakhat nih cu bia cu a rak theih i, "Pathian Pennak chung rawl danghnak i aa tel vemi cu zeitluk in dik an i lawmh lai," tiah Jesuh cu a ti. ¹⁶ Jesuh nih amah cu a thawh i, "Voi khat ah hin mipa pakhat a rak um i cu pa nih cun rawl danghnak nganpi pakhat a rak tuah i cu rawl danghnak ah cun mi tampi a sawm hna. ¹⁷ Rawldanghnak caan cu a cut tikah a sinum kha, ’Ra cang u, zeizong vialte timh a si dih cang,’ tiah a sawmmi hna cu va ti hna, tiah a thlah. ¹⁸ Sihmanhsehlaw an dihlak in pakhat hnu pakhat sonhtarhnak kha an rak kawl cio. A hmasa bik nih a sinumpa cu a rak thawh i, ’Ka ngaithiam ko, lo ka caw ngelcel i ka va kal i ka va zoh lo ahcun a si kho lo,’ tiah a ti. ¹⁹ A pahnihnak nih aa thawh i, ’Cawtum tuah nga ka cawk hna i atu hi ka hneksak hna lai ka ti, cucaah cun ka ngaithiam ko,’ a ti. ²⁰ A pathumnak nih aa thawh i, ’Atute kha nupi ka ṭhi i ka ra thiam lai lo,’ tiah a ti. ²¹ A sinumpa kha a bawipa sinah cun a va kir ṭhan i cu vialte cu a chimh dih. Inn ngeitupa cu a thin a hung i a sinum cu a thawh i, ’Khulrang in zatlang lam ah siseh, inn le inn karlak lam ah siseh, va kal law sifakmi si hna seh, kutzeng kezeng si hna seh, mitcaw si hna seh hunpi hna,’ tiah a ti. ²² Cun tlawmpal ah khin a sinum nih cun a thawh i, ’Bawipa, na nawl bangin tuah a si cang, sihmanhsehlaw hmun a lawng ko rih,’ tiah a ti. ²³ Cucaah a bawipa nih khan a sinumpa cu a thawh i, ’Khua le khua kar i lam ngan ah siseh, lam hme ah siseh, va kal law ka inn a khah nakhnga mi kha ratter hna. ²⁴ Hi hi kan chimh hna, ka sawmmi hna nih khan cun ahohmanh nih ka zanriah hi an tep lai lo,’ a ti," tiah a ti. ²⁵ Jesuh sinah cun mi tampi an kal ve. Aa mer i a thawh hna i ²⁶ "Ahohmanh ka sinah a rami cu a pa siseh, a nu siseh, a nupi siseh, a fale si hna seh, a unau si hna seh, a farle si hna seh, amah le amah siseh, aa huat lo ahcun a ka zultu a si kho lo. ²⁷ A vailam tahnak kha aa put i a ka zul lomi cu a ka zultu a si kho lo. ²⁸ Nannih lak i pakhatkhat nih inn sak aa timh tikah, ka rian hi a dih tiangin ka phaisa nih a ka zo lai maw zo lai lo ti hngalhnak dingah a ṭhu hmasa i pei zeizat dah a dih lai ti kha a tuak hmasa cu. ²⁹ Cu bantukin a tuak hmasa lo ahcun a inn cu a hram a thawk hnuah dih kho ṭung loin a um lai i a hmumi paoh nih nihchuak ah an saih lai. ³⁰ ’Hi pa nih hin sak a hei i ot i a dih khawh ṭung lo hen hi,’ an ti lai. ³¹ Siangpahrang pakhatkhat nih, amah tuk awkah ralkap thong kul he a rami siangpahrang kha, a ralkap thong hra he rak doh awkah a hei chuahhnawh ahcun, a ṭhu hmasa lai i pei, kha siangpahrang kha ka do kho lai maw do kho lo tiah aa tuak hmasa lai cu. ³² Ka do kho lai lo tiah a hngalh ahcun, siangpahrang cu lamhlapi i a rat lioah khan va don i remnak ser awkah lamkal a thlah hna lai. ³³ Cu bantuk ṭhiamṭhiam in nannih zong, nan ngeihmi vialte kha nan hlawt dih lo ahcun, ka zultu nan si kho lai lo," tiah a ti hna. ³⁴ "Cite hi a ṭha, sihmanhsehlaw a alnak kha a loh ahcun zeitin hmanh in alter khawh a si ti lo. ³⁵ Vawlei ṭhatternak caah a ṭhahnem lo, ek pon ca zongah a ṭhahnem lo; a hlonh in hlonh awk lawnglawng a si ko. Cucaah hna nan ngeih ahcun, thei ko u!" tiah a ti hna.

¹ Voi khat cu ngunkhuai khawltu pawl le misual pawl kha a sinah tampi an ra i a bia kha an ngai. ² Farasi mi hna le Phungbia cawnpiaktu saya hna cu an zai i, "Hi pa hi misual mi kha a rak pomhlawm hna i rawl zong a eipi hna," an ti. ³ Cucaah cun Jesuh nih hi tahchunhnak bia hi a chimh hna: ⁴ "A biana ah pakhatkhat nih tuu za khat hei ngei u law pakhat va tlau seh law, cu tikah zeitindah nan tuah lai? Tuu sawm kua le pakua kha an tlonnak hmun ah cun kaltak in a tlaumi cu a hmuh hlan loin a kawl lai lo maw? ⁵ A va hmuh tikah a lung aa lawm tuk i cucaah a liang ah aa khinh i ⁶ inn ah a tlunpi. Cun a hawikom hna le a innpa hna kha a auh hna i, ’Ra ka lawmhpi tuah u, zeicahtiah a tlaumi ka tuu kha ka hmuh ṭhan cang,’ a ti. ⁷ Cu bantuk ṭhiamṭhiam in, ngaihchih a herh lomi miding sawm kua le pakua hna nakin aa ngaichihmi misual pakhat ruangah vancung khua ah lunglawmhnak tam deuh a um lai," tiah a ti. ⁸ "Asiloah, tangka phar hra a ngeiminu nih pakhat kha a thlau ahcun zeidah a tuah? Meiinn a van i pei a inn kha a phiah i a hmuh hlan tiang a ken le a kawi zong kha a kawl cikcek cu. ⁹ A hmuh tikah a hawikom hna le a innpa hna kha a auh hna i, ’Ka lawmhpi u, zeicahtiah ka thlaumi ka tangka kha ka hmuh ṭhan cang,’ a ti. ¹⁰ Cu bantuk ṭhiamṭhiam in, aa ngaihchihmi misual pakhat ruangah Pathian vancungmi hna cu an i lawm," tiah a ti. ¹¹ Jesuh nih cun a thawh ṭhan hna i, "Voi khat ah fapa pahnih a ngeimipa a rak um. ¹² A ngakchia deuh pa nih khan a pa cu a thawh i, ’Ka pa, atu hin ka co hnga a simi ro cu ka pe ko,’ a ti. Cucaah an pa nih an unau cun ro cu a cheuh hna. ¹³ Ni tlawmpal hnuah khin ngakchia deuh pa nih cun a thilri cu a zuarh i a man tangka cu aa lak i an inn cun a kal. A hla ngaingaimi ram ah a kal i khika ah khan duhduh in khua a va sa i a tangka cu a va sawksam dih. ¹⁴ A ngeihmi vialte cu a hloh dih. Cun cu ram ah cun mangṭam a tlung ciammam i a tawro in a ṭhu. ¹⁵ Cucaah cuka ram mipa pakhat sinah khan kuli va ṭuan awkah a kal i cu pa nih cun vok cawngh awkah a lo ah a rak kalter. ¹⁶ Vok nih an eimi bekawng hmanh kha ṭam lenning ti a duh, asinain ahohmanh nih ei awk zeihmanh an pe lo. ¹⁷ A donghnak ah cun a lung a hung fim i, ’Ka Pa kuli vialte hmanh nih ei cawk loin ei awk an ngei, kei vial hika ah hin rawlṭam in ka thi cuahmah. ¹⁸ Ka tho lai i ka pa sinah ka kal lai i, "Ka pa, Pathian sin le na sinah ka sual cang. ¹⁹ Na fa ti awk ka tlak ti lo; na kuli pakhat bantukin ka chia ve ko," ka ti lai,’ a ti. ²⁰ Cucaah a tho i a pa sinlei kir ah cun aa thawh. "Lamhlatpi i a rat lio kha a pa nih cun a rak hmuh; a zaang a fak ngaingai i a hei tlikhnawh i a kuh i a hnamh. ²¹ A fapa nih cun, ’Ka pa, Pathian sin le nangmah sinah ka sual cang. Na fapa ti awk ka tlak ti lo,’ tiah a ti. ²² Sihmanhsehlaw a pa nih khan a sinum kha a auh hna i, ’Khulrang in puan ṭha bik kha rak pu u law aih u. A kutdong ah kutdonghrolh hrolh u law a ke ah kedan danh u. ²³ Cun va kal u law cawfa a thau bik kha va la u law va that u, lunglawm ngaiin puai tuah u sih. ²⁴ Zeicahtiah hi ka fapa hi a rak thi, sihmanhsehlaw atu cu a nung ṭhan; a rak tlau, sihmanhsehlaw atu cu ka hmuh ṭhan cang,’ a ti. Cun cuticun puai tuah hram cu an thawk. ²⁵ "Cu lioah cun a fapa upa u kha lo ah a um. A hung tlun i inn a hun naih tikah khin hlasak thawng le lam thawng cu a theih. ²⁶ An sal pakhat kha a auh i, ’Zeidah an tuah?’ tiah a hal. ²⁷ An salpa nih cun, ’Na naupa kha inn ah a ra tlung ṭhan i dam te le him tein inn a phak ṭhan caah na pa nih caw thaute khan a thlathlauh,’ tiah a ti. ²⁸ Fapa upa u cu a thin a hung tuk i inn chungah khan a lut duh lo; cucaah a pa kha a va chuak i, ra lut ko, tiah a lem. ²⁹ A pa cu a thawh i, ’Zohhmanh, kum hi zat riangruang, sal bantukin na rian ka ṭuan i voi khat hmanh na nawl ngai loin ka um bal lo. Zeidah na ka pek? Ka hawikom he i nuamhnak caah meheh pakhat hmanh na ka pe lo. ³⁰ Sihmanhsehlaw hi na fapa, thilri vialte hlawhhlangnu sin i a hlolak dihtu hi inn i a hung tlun ṭhan tikah caw thaute kha na thahpiak!’ tiah a ti. ³¹ Cun a pa nih cun a leh i, ’Ka fapa, nang cu inn ah a zungzal in na um i ka ngeihmi vialte cu na ta an si dih. ³² Sihmanhsehlaw na nau cu a rak thi i pei atu cu a nun ṭhan cu, a rak tlau i pei atu cu hmuh ṭhan a si cu, cucaah kan thlathlauh i kan i lawmh awk a si hrim ko,’ tiah a leh," tiah a ti.

¹ Jesuh nih a zultu kha a thawh hna i, "Mirumpa pakhat a rak um i cu mirumpa nih cun thil zohkhenhtu pakhat a ngei i a thil zohkhenhtu nih cun a tangka kha a duhduh in pakpalawng ah a hman tiah an chimh. ² Amah cu a kawh i, ’Nangmah kong i ka theihmi hi zeidah a si? Ka thilri na tuahtonak cazin kha tlamtling tein ka pe tuah, zeicahtiah ka thil zohkhenhtu na si kho ti lo,’ tiah a ti. ³ Mipa nih cun a lungthli in, ’Ka bawipa nih hin ka rian in a ka phuah ko lai, Zeidah ka tuah kun lai? Vawlei cawh le ka celh lo, mi thil hal le ka ning a zak fawn. ⁴ A! Atu cu zeidah ka tuah lai ti kha ka hngalh cang! Cu ti ka tuah ahcun ka rian a dih tikah an inn ah a ka umter duhtu hawikom ka ngei hna lai,’ a ti. ⁵ Cucaah a bawipa lei a bami vialte kha a auh hna. A hmasa bikpa kha, ’Ka bawipa cu zeizat dah nang na bat?’ tiah a ti. ⁶ Anih nih, ’Oliv chiti pung za khat,’ tiah a leh. Thil zohkhenhtu pa nih cun, ’Hihi na cazin siseh, ṭhu law sawm nga in ṭial,’ tiah a ti. ⁷ A dang pakhat cu, ’Nang tah zeizat dah na bat?’ tiah a ti. ’Changvut rel thong khat,’ tiah a leh. ’Hihi na cazin siseh, za riat in ṭial,’ tiah a ti. ⁸ Cu thil zohkhenhtu mihrokhrawlpa cu a bawipa nih khan cu bantukin fim ngaiin thil a ti caah a thangṭhat; zeicahtiah hi vawlei cung mi hna hi an thil tining ah ceunak mi hna nakin an fim deuh," tiah a ti. ⁹ Cun Jesuh nih cun, "Cucaah hitin kan chimh hna: vawlei cung chawva in hawikom i ser hna u, zeicahtiah chawva cu a dih tikah zungzal inn ah an umter hna lai. ¹⁰ Thil hmete ah zumhawktlak a simi cu thil ngan zongah zumhawktlak an si tawn, thil hmete ah a hrokhrawlmi cu thil ngan zongah an hrokhrawl tawn. ¹¹ Vawlei cung thil tuahtoning i zumhawktlak lo nan si ahcun zeitindah rumnak taktak cu pek khawh nan si lai? ¹² Cun midang thil a simi ah zumhawktlak nan si lo ahcun aho nih dah nanmah ta a simi thil cu an in pek hna lai? ¹³ "Sinum pakhat cu bawi pahnih sal a si kho lo: pakhat kha a huat lai i pakhat kha a dawt lai; pakhat sinah zumh awktlak tein a um lai i pakhat kha zei ah a rel lai lo. Pathian le chawva cu nan bawi ah an pahnih in nan kemh kho hna lai lo," tiah a ti. ¹⁴ Farasi mi nih hi a chimmi vialte cu an theih tikah, annih cu tangka a duhmi an si caah, amah kha an nihsawh. ¹⁵ Jesuh nih a thawh hna i, "Nannih hi minung mithmuh i miding aa lawhtermi pawl nan si, sihmanhsehlaw Pathian nih cun nan lungthin cu a hngalh ko. Zeicahtiah minung nih man sung ngai i an ruahmi cu Pathian mithmuh ah cun pakpalawng a si ko. ¹⁶ "Moses Phungbia le profet ṭialmi ca hna cu Tipil petu Johan chan tiang caah khan an si; cu ri cun Pathian Pennak Thawngṭha cu chim a si i a mi kip cu heh tiah an lut. ¹⁷ Sihmanhsehlaw Phungbia chung i a deh hme bikte hmanh a loh nakin van le vawlei loh hmanh kha a fawi deuh lai. ¹⁸ "Ahohmanh a nupi a ma i nu dang a ṭhimi cu a nupi cungin sualnak a tuah a si; cun makmi nu a ṭhimi cu sualnak a tuah a si," tiah a ti. ¹⁹ Voi khat cu mirum pakhat hi a rak um i puan man sung bikbik in aa thuam i nifate in nuam ngaingai in khua a sa. ²⁰ Cun misifak pakhat, a min Lazaruh an timi zong kha a um ve i hma nih a pumpuluk in a tlunh. ²¹ Mirumpa cabuai in a tlami rawl ṭiltlawt kha ka khim lai ti i ruahchan in mirumpa innka hram ah khan an ratpi tawn. Cun uico kha an ra i a hma kha an liahpiak tawn. ²² Misifakpa cu a thi i vancungmi nih vancung puai tuahnak ah khan an zuanpi i Abraham pawngah khan an ṭhutter. Mirumpa zong cu a thi ve i an vui. ²³ Mirumpa cu Hell chungah a tla i nganfak ngaiin a um; cunglei hi a hun zoh i lamhlapi ah khin Abraham le a pawng i Lazaruh kha a hun hmuh hna. ²⁴ Cucaah a hun kawh i, "Ka pa Abraham, ka zaangfah tuah. Lazaruh kha hei thlah law a kutdong kha ti ah va hnim seh law ka lei ah hin run ka thlerh seh, zeicahtiah hi mei chungah hin ka ngan a fak tuk hringhran," tiah a ti. ²⁵ Sihmanhsehlaw Abraham nih a thawh i, "Ka fapa, na nun lioah khan thil ṭha phun kip kha pek na si i Lazaruh nih khan thil ṭhalo vialte a co kha philh hlah ngat; sihmanhsehlaw atu cu anih cu nuam tein a um i nang cu nganfak ngaiin na um. ²⁶ Cu pinah; kan karlak ah horkuang thukpi a um i cucaah hikalei in nangmah leiah tan a duhmi nih khan an tan kho lo i cu bantuk ṭhiamṭhiam in nangmah lei in kanmah leiah rat a duhmi zong an ra kho ve lo," tiah a ti. ²⁷ Cun mirumpa nih cun a thawh i, "Asi, ka pa, Lazaruh cu ka pa inn ah khan hun thlah ko, ²⁸ cuka ah cun chuahpi unau panga ka ngei hna i hung kal seh law annih tal cu hi nganfah innak hmun ah hin an rat nakhnga lo ralrinnak hung pe hna seh," a ti. ²⁹ Abraham nih cun aa thawh i, "Na unau hna ralrinnak petu dingah cun Moses le profet hna an um ko ṭung; an chimmi kha na unau hna nih cun ngai ko hna ngat seh," tiah a ti. ³⁰ Mirumpa nih cun a hun leh i, "Ka pa, Abraham, cucu a za lo, mi pakhatkhat cu thihnak in a thawh i an sin i a va kal ahcun an nunning kha an ṭhinh ko lai," tiah a ti. ³¹ Sihmanhsehlaw Abraham nih, "Moses le profet kha an bia an ngaih hna lo ahcun, mi pakhatkhat cu thihnak in a thawh hmanh ah an zum hlei lai lo," a ti.

¹ Jesuh nih a zultu kha a chimh hna i, "Sualnak chungah mi a tlaktertu thil cu an um ṭheo lai; sihmanhsehlaw cu thil hna a umtertu caah cun ṭihnung a va si dah! ² Hi ngakchia tete hna lak i pakhat hmanh hi va sualter nakin cu pa cu a hngawng ah facang rialnak lungtumpi i thlaih seh law rilipi chungah hlonh si seh law a caah a ṭha deuh hnga. ³ I ralring ko u. "Na unau nih a sual ahcun va mawhchiat, aa ngaihchih ahcun va ngaithiam. ⁴ Ni khat ah na cungah voi sarih a sual i voi sarih ningin, ’Kaa ngaichih,’ a ti ahcun na ngaihthiam hrimhrim lai," tiah a ti. ⁵ Lamkaltu hna nih khan Bawipa cu, "Kan zumhnak hi nganter deuh tuah," an ti. ⁶ Bawipa nih cun a leh hna i, "Nannih nih anṭam ci ngaw zumhnak nan ngeih ahcun, hi thingtheihmung kung hi, ’Na hram in i phawi law rili ah khin vaa phun,’ nan ti ah nan nawl an ngaih ko hna lai," tiah a ti. ⁷ "Abiana ah sinum pakhat hei ngei u law, cu nan sinum cu lei hei thuang seh law, asiloah, tuu hei khal seh law, lo in inn i a hung tlun tikah, ’I rianranh law rawl kha ei,’ nan ti lai maw? ⁸ Ti hlah. Nan i thawh lai i, ’Ka zanriah kha hei tim, cun rawl ka ei lio le ka din lioah na angki leng kha i hruk law ka bultawl, cu hnuah cun na ei ve te lai i na din ve te lai,’ nan ti deuh lai. ⁹ Na tuah awk a si timi a tuah ruangah sinum nih cun, na tuahmi a ṭha, tiin lawmhnak hmuh awk a si i mei? ¹⁰ Nannih zong cu bantuk cu nan si ve ko, tuah u tiah fialmi rian kha nan tuah dih tikah, ’Kannih cu sal santlailo kan si, kan tuah awk hnga rian a simi lawng pei kan tuah ko cu,’ va ti u," tiah a ti hna. ¹¹ Jesuh cu Jerusalem khua lei i a kalpah ah khan Samaria le Galilee karlak in a kal. ¹² Khua pakhat chungah hin a va lut i cuka ah cun thinghmuimi pahra an rak um i cu hna nih cun an rak ton. Lamhlatpi khin an dir i, ¹³ "Jesuh Bawipa, kan zaangfah tuah," tiah an au. ¹⁴ Jesuh nih cun a hmuh hna i, "Va kal u law tlangbawi nih khan rak in zoh hna seh," tiah a ti hna. An kalpah cun lampi ah cun an thiang. ¹⁵ An lak i pakhat cu ka dam cang ti a hngalh tikah khan a ra kir i Pathian kha fak piin a thangṭhat. ¹⁶ Jesuh ke hram ah khan vawlei ah a bawk i Jesuh cu a lawmh. Cu pa cu Samaria mi a si. ¹⁷ Jesuh nih aa thawh i, "An pahra ningin an dam lo maw? Pakua tah khuazei ah dah an si kun? ¹⁸ Annih zong ra kir in Pathian kha an thangṭhat kho lo maw? Hi ramdang mipa lawng hi maw a ra kho?" tiah a ti. ¹⁹ Cun Jesuh nih amah cu a thawh i, "Tho law kal tuah; na zumhnak nih an damter cang," tiah a ti. ²⁰ Farasi mi a cheu nih Jesuh cu, zeitik ah dah Pathian Pennak cu a tlun lai, tiah an hal. Anih nih a leh hna i, "Pathian Pennak cu hmuh awkin a ra lo. ²¹ Ahohmanh nih, ’Zohhmanh, hika ah a um hih, khika ah a um khih,’ an ti kho lo; zeicahtiah Pathian Pennak cu nan chungah pei a um cu," tiah a ti hna. ²² Cun a zultu kha a thawh hna i, "Nannih nih, Mi Fapa ni kha hmuh kan hei duh dah, nan ti caan a phan te lai; sihmanhsehlaw nan hmu lai lo. ²³ ’Khika lei khi zohhmanh u, hika lei hi zohhmanh u,’ tiah aan timi hna an um lai. Sihmanhsehlaw cu zoh awkah cun va chuak hlah u. ²⁴ Nimtlau cu vankam khattelei kam in khattelei kamah a lek i van cu a ceuh bantuk khin Mi Fapa cu amah ni ah cun a si ve lai. ²⁵ Sihmanhsehlaw a intuar hmasat le tu chan mi hna nih an hlawt hmasa kha a herh lai. ²⁶ Noah chan ah a rak si bantuk khan Mi Fapa chan zongah a si ve lai. ²⁷ Noah nih lawng chungah a luh i buanchukcho kha a tlun i an thih dih ni tiang hrimhrim kha, an ei an ding an i ṭhi an i um ko. ²⁸ Lot chan i a rak si bantuk khan a si ve lai. An ei, an ding, an i caw an i zuarh, thlaici an cing, inn an sa. ²⁹ Lot cu Sodom in a chuah ni ah khan mei le kat cu vancung in a rung sur i a thah dih hna. ³⁰ Cuticun Mi Fapa a langh ni ah cun a si ve lai. ³¹ "A inn cung i a ummipa cu a inn chung i a ummi thil lak awkah ṭum hlah seh; cu bantuk ṭhiamṭhiam in lo i a ummipa cu inn ah tlung hlah seh. ³² Lot nupi kha va philh hlah u. ³³ Amah nunnak khamh aa zuammi cu a nunnak cu a sung lai; a nunnak a sungmi nih cun a nunnak cu a khamh lai. ³⁴ Hihi kan chimh hna: cu zan ah cun mi pahnih ihkhun pakhat ah a rak itmi an um lai, pakhat cu lak a si lai i pakhat cu nganhtak a si lai. ³⁵ Nu pahnih kha fang an su ṭi lai, pakhat cu lak a si lai i pakhat cu chiahtak a si lai. ³⁶ Pa pahnih lo ah rian a ṭuanmi an um lai, pakhat lak a si lai i pakhat cu chiahtak a si lai," tiah a ti. ³⁷ Amah cu a zultu nih cun, "Bawipa, khuazei ah dah?" tiah an hal i, "Saruak umnak ah langta an i pum tawn," tiah a leh hna.

¹ Lungdong loin thla nan cam zungzal awk a si, ti cawnpiaknak caah Jesuh nih hi bianabia hi a chimh hna. ² Aa thawh i, "Khua pakhat ah hin Pathian zong a ṭih lo i mi zong a hmaizah lomi biaceihtu bawi pakhat a rak um. ³ Cun cuka khua ah cun nuhmei pakhat a um ve i ka bia kha ka ceihpiak tuah, tiah atu le atu a ra ti lengmang. ⁴ Biaceihtu nih caan saupi chung cu a al lengmang, ⁵ sihmanhsehlaw a donghnak ah cun, ’Pathian cu ka ṭih lo i minung kha ka hmaizah hna lo nain, hi nuhmeinu nih hin hnahnawhnak a ka pek lengmang caah a bia cu ka ceihpiak ko lai; cu lo ahcun a ra lengmang ko lai i ka re lam a ka theihter chin lai,’ a ti," tiah a ti. ⁶ Cun Bawipa nih cun a peh ṭhan i, "A ding lomi biaceihtu bawi nih a chimmi cu nan theih cang. ⁷ Pathian nih tah amah a mi hna chunzan hlan in a sinah bawmh hal awkah a au lengmangmi hna cu thiamcoh loin maw a um hna hnga? Anmah bawmh awkah cun a khul a nuar ko hnga maw? ⁸ Hihi kan chimh hna: anmah cu thiam a coh hna lai i cucu khulrang tein a tuah lai. Sihmanhsehlaw Mi Fapa nih a rat tikah vawlei ah hin zumhnak a hmu te hnga maw?" tiah a ti. ⁹ Anmah kha kan ṭha tiah aa ruat i midang vialte kha zei a rel lomi hna sinah Jesuh nih hi tahchunhnak bia hi a chim. ¹⁰ "Mi pahnih cu Biakinn i thlacam awkah an hung kal; pakhat pa cu Farasi mi a si i a dang cu ngunkhuai khawltu a si. ¹¹ Farasi pa cu a dir i hi bantukin thla a cam: ’Maw Pathian, kei cu midang bantukin hak a kaumi, lih a chimmi, nu le pa sualnak a tuahmi, ka si lo caah nangmah cu kan lawmh; cun khi ngunkhuai khawltupa bantuk zong khi ka si lo caah kan lawmh fawn. ¹² Zarh khat chungah voi hnih lengmang rawl ka ul i chawva ka hmuhmi vialte cheu hra cheu khat kan pek,’ tiah a ti. ¹³ Sihmanhsehlaw ngunkhuai khawltupa cu lamhlatpi ah khin a dir i vanlei hmanh zoh ngam loin a ṭang aa cum i, ’Maw Pathian, kei misual cungah hin zaangfahnak ngei ko,’ tiah a ti. ¹⁴ Hihi kan chimh hna: Farasi mipa kha si loin hi pa tu hi a sualnak ngaihthiam in inn ah a ṭinmi cu a si. Zeicahtiah amah le amah aa ngantermi cu ṭhumh an si lai i mi tangah aa dormi cu mi ngan ah ser an si lai," tiah a ti. ¹⁵ Mi cheu nih an fale kha an cung i a kut a chuanpiak hna nakhnga Jesuh sinah khan an ratpi hna. Sihmanhsehlaw a zultu hna nih khan an rak hmuh hna i an sik hna. ¹⁶ Sihmanhsehlaw Jesuh nih ngakchia cu a auh hna i, "Ngakchia kha ka sinah ratter ko hna u. Annih kha dawn hna hlah u, zeicahtiah Pathian Pennak cu hi bantuk mi hna ta hi pei a si cu. ¹⁷ Hihi philh hlah u: Pathian Pennak hi ngakchia nih a rak i cohlan bantukin a cohlang lomi cu, cu Pennak chungah cun an lut bal lai lo," tiah a ti. ¹⁸ Judah mi haotu pakhat nih a thawh i, "A ṭhami saya, zungzal nunnak hmuh awkah zeidah ka tuah lai?" tiah a ti. ¹⁹ Jesuh nih a thawh i, "Zeicahdah miṭha tiah na ka ti?" tiah a hal i, "Pathian dah ti lo cu ahohmanh miṭha an um ṭung lo. ²⁰ Nawlbia kha na hngalh ko ṭung hna: Va cung in siseh, nupi cung in siseh, sual hlah, lainawng hlah, fir hlah, lih chim hlah, na nu le na pa upat hna, ti pei an si kha," tiah a ti. ²¹ Mipa nih cun aa thawh i, "Hi nawlbia vialte hi cu ka ngakchiat tein ka zulh lengmang cang hna," tiah a ti. ²² Hi bia cu Jesuh nih a theih tikah, "Pakhat te na bau kun. Na ngeihmi vialte kha va zuar law tangka cu sifakmi kha va ṭhen hna, cun vancung khua ah chawva na ngei lai; cun ra law ka zul," tiah a ti. ²³ Sihmanhsehlaw hi bia cu mipa nih khan a theih tikah a ngaih a chia ngaingai, zeicahtiah amah cu mirum ngaingai a si. ²⁴ Jesuh nih a ngaih a chiat kha a hmuh tikah aa thawh i, "Mirum caah cun Pathian Pennak chung i luh hi a va har hringhran dah. ²⁵ Kalauk ṭhimka chung i luh nakin mirummi Pathian Pennak chung luh cu a har deuh suaumau," tiah a ti. ²⁶ A bia a theimi nih cun an hal i, "Ahodah khamhnak cu a hmu kho kun lai," an ti. ²⁷ Jesuh nih a leh hna i, "Minung tuah khawh lomi hi Pathian nih cun a tuah khawh ko," tiah a ti. ²⁸ Cun Peter nih aa thawh i, "Zohhmanh, kannih cu nangmah zulh awkah kan inn kha kan chuahtak ko hna," tiah a ti. ²⁹ Jesuh nih a leh i, "Asi, na chimmi cu ahmaan, cun hihi kan chimh hna: Pathian Pennak ruangah inn siseh, nupi siseh, unau siseh, nu le pa si hna seh, fale si hna seh, a kaltakmi cu ³⁰ tu chan ah hin a let tampi in rulh an si lai i hmai chan ah zungzal nunnak an hmuh lai," tiah a ti. ³¹ Jesuh nih zultu pahleihnih kha a dang tein a kalpi hna i, "Ngai hmanh u, Jerusalem ah kan kal lai i khika ah profet hna nih Mi Fapa kong an ṭialmi paohpaoh kha a tling dih lai. ³² Jentail mi hna kut ah pek ka si lai i annih nih cun capo ah an ka saih lai i an ka nihsawh lai i cil an ka chak lai. ³³ Fung in an ka tuk lai i an ka thah lai, sihmanhsehlaw ni thum ni ah nunnak ah ka tho ṭhan lai," tiah a ti hna. ³⁴ A zultu hna nih khan hi thil kong hi zeihmanh an hngal lo; a bia sullam kha thuhkanh an si i Jesuh nih a chimmi a sullam kha an hngal lo. ³⁵ Jesuh cu Jeriko khua kha a hei phan deng i awkhlawh pakhat a mit a cawmi hi lam pawngah a rak ṭhu i thil a hal hna. ³⁶ Mizapi an kal lulhmalh kha a theih tikah "Hihi zeidah a si?" tiah a hal hna. ³⁷ Annih nih, "Nazareth khuami Jesuh a lanh lio a si," tiah an leh. ³⁸ Cun a au i, "Jesuh, David Fapa, ka zaangfah tuah," a ti. ³⁹ Hmai i a ummi hna nih cun an sik i dai tein um ko, an ti. Sihmanhsehlaw thang chinchin in a au i, "David Fapa, ka zaangfah tuah," tiah a ti. ⁴⁰ Cucaah Jesuh cu a dir i mitcawpa cu ka sinah ratpi u tiah a ti. A pawng a ra phak tikah Jesuh nih a thawh i, ⁴¹ "Zeidah ka tuahpiak seh ti na ka duh?" tiah a hal. "Bawipa, khua hmuh ṭhan ka duh," tiah a leh. ⁴² Cun Jesuh nih a thawh i, "Hmu tuah, na zumhnak nih an damter cang," tiah a ti. ⁴³ Hmakhatte ah khua cu a hun hmu kho i Jesuh kha a zulh i Pathian kha a lawmh. Mizapi nih cucu an hmuh tikah Pathian kha an thangṭhat.

¹ Jesuh cu Jeriko khua ah cun a vung lut i khua cu a hei tan. ² Cuka ah cun ngunkhuai khawltu upa bik pakhat a min Zakia a simi a rak um i amah cu mirum a si. ³ Jesuh cu ahodah a si hnga ti kha hngalh a duh caah hmuh aa zuam i asinain amah cu miniamte a si caah le mizapi nih an phenh caah a hmu kho lo. ⁴ Cucaah cun hmaiah khan a rak tli i saikamor thingkung pakhat ah, cukalei i a kalmi Jesuh hmuh duh ah cun a rak kai. ⁵ Cuka hmun cu a phak tikah Jesuh nih cun cunglei kha a hun zoh i Zakia cu, "Zakia, khulrang in rung ṭum, na inn ah kan tlung lai," tiah a ti. ⁶ Zakia cu, khulrang in a ṭum i lunglawmhnak in a inn ah cun a tlunter. ⁷ Cu a hmumi vialte cu an zai i, "Hi pa hi misual mi inn i tlun awkah a kal," an ti. ⁸ Zakia cu a dir i Bawipa cu, "Bawipa, ngaihmanh, misifak caah ka ngeihmi thil hnarcheu ka pek lai; cun ka hlenmi hna an um ahcun a let li in ka cham hna lai," tiah a si. ⁹ Jesuh nih a thawh i, "Nihin ah hi inn ah khamhnak a phan; hi pa zong hi Abraham tefa a si ve. ¹⁰ Zeicahtiah Mi Fapa cu a tlaumi kawl awk le khamh awkah a ra," tiah a ti. ¹¹ Hi bia a chimmi a theimi hna sinah khan hi tahchunhnak bia hi a chim. Jerusalem khua kha a hei phanh dengmang cang caah Pathian Pennak kha a lang hnik lengmang cang tiah an ruah. ¹² Cucaah a thawh hna i, "Bawi pakhat cu ram hlapi pakhat ah a kal i cuka ram i siangpahrang a si hnuah inn ah ra tlun ṭhan aa tim. ¹³ A kal hlanah a sal pahra kha a kawh hna i sui tangka phar khat cio a pek hna. Cun a thawh hna i, ’Ka um lo karah hi hin chaw rak let u,’ a ti hna. ¹⁴ A ram mi nih cun amah cu an huat i, ’Hi pa hi kan siangpahrang si awkah kan duh lo,’ tiin lamkal a hnu in an hei thlah hna. ¹⁵ Cu bawi cu siangpahrang ah cun an rak ser i a ra kir. Tangka a pekmi sal hna kha hmakhatte ah a auh hna i, zeizat dah nan hmuh tiah a hal hna. ¹⁶ A hmasa bikpa kha a hung chuak i, ’Bawipa, na ka pekmi sui tangka phar khat khan sui tangka phar hra ka hmuh,’ tiah a ti. ¹⁷ Aa thawh i, ’A ṭha, nangmah cu sal ṭha na si. Thil hmete ah zumhawktlak na si caah khua pahra uktu ah kan chiah lai,’ a ti. ¹⁸ A pahnihnak sal kha a ra i, ’Bawipa, na ka pekmi sui tangka phar khat khan sui tangka phar nga ka hmuh,’ tiah a ti. ¹⁹ Amah zong cu a thawh i, ’Khua panga uktu na si lai,’ tiah a ti. ²⁰ Cun a dang sal pakhat kha a ra i, ’Bawipa, na sui tangka kha a um ko; puanchia in ka fun i ka chiah ko. ²¹ Nangmah cu mikhepkha na si caah kan ṭih, Nangmah ta a si lomi kha na lak i thlaici na tuh lonak hmun ah na zun tawn,’ tiah a ti. ²² Amah cu a thawh i, ’Sal ṭhalo. Nangmah bia lila cu nangmah biaceihnak ah ka hman lai. Nangmah nih keimah cu mikhepkha ka si le ka ta a si lomi a la tawn i ka tuh lonak hmun i a zun tawntu ka si cu na hngalh. ²³ A si kun ahcun zeicahdah tangka cu tangka chiahnak beng ah na rak chiah lo? Rak chia law cu, ka kir tikah hin a miak he ka hmu hnga lo maw?’ tiah a ti. ²⁴ Cuka i a dirmi hna cu a thawh hna i, ’Amah cu sui tangka kha chut u law phar hra a ngeimi pa kha va pe u,’ a ti hna. ²⁵ Annih nih an thawh i, ’Bawipa, anih cu phar hra a ngeih cang ṭung,’ an ti. ²⁶ Annih cu a leh hna i, ’A ngeimi paoh kha tam chin chap an si lai i a ngei lomi kha a ngeihmi hnihchunte hmanh kha chuh an si lai. ²⁷ Cun an siangpahrang si awkah a ka duh lotu ka ral hna kha cu, hika ah hin ratpi hna u law ka hmaiah that hna u, a ti,’ " tiah a ti. ²⁸ Jesuh nih hi bianabia a chim dih in an hmaiah cun Jerusalem khua lei ah khan a kal. ²⁹ Oliv Tlang i Bethfeih le Bethani khua kha a phak deng tikah a zultu pahnih kha hmaiah a hei thlah hna i, ³⁰ "Nan hmai khua ah khin rak kal u law nan va luhpah ah khin cit bal rih lomi laafa nan hmuh lai. Cucu a hri va phoih u law hika ah hin ratpi u. ³¹ Pakhatkhat nih, ’Zeicahdah mah khakha a hri nan phoih?’ an in ti hna ahcun, ’Bawipa nih a herh,’ tiah va ti ko u," tiah a ti hna. ³² An va kal i Jesuh nih a chimh hna ningte cun zeizong vialte kha an va hmuh. ³³ Laafate cu an phoih lioah khan a ngeitu hna nih khan, "Zeicahdah nan phoih?" tiah an ti hna. ³⁴ Annih nih, "Bawipa nih a herh," tiah an leh hna i ³⁵ laafate cu Jesuh sinah khan an kalpi. Cun laa cungah khan an puan an danh i Jesuh cu an citter. ³⁶ A kalnak ah khan lam ah puan kha an phah. ³⁷ Jerusalem khua kha a hei naih i lam cu Oliv Tlang in chuk i a vung zuannak ah khan a zultu mibu nganpi nih cun, an hmuhmi thil lianngan vialte ruangah khan Pathian cu an lawmh i aw fak piin an thangṭhat. ³⁸ "Bawipa min in a rami siangpahrang cu Pathian nih thluachuahnak pe ko seh. Vancung ah daihnak um seh law, Pathian cu sunparnak pek si ko seh," tiah an au. ³⁹ Cun mizapi chung cun Farasi mi a cheukhat hna nih Jesuh cu an hun thawh i, "Saya, na zultu hna hi daihter hna," an ti. ⁴⁰ Jesuh nih cun a leh hna i, "Hi hna hi an daih ahcun lung hrimhrim hi an au lai," tiah a ti. ⁴¹ Khuapi cu a hei naih chin lengmang i a hei hmuh tikah a ṭah i, ⁴² "Nihin ah hin daihnak caah zeidah a herh ti kha hei hngal law cu mu! Sihmanhsehlaw cucu na hmu kho ṭung lo. ⁴³ Zeicahtiah na ral nih raltuknak chuntlung in an in kulh i an in hren i a kenkip in an in luhhnawh caan kha a phan lai. ⁴⁴ Nangmah le na vampang kulh chung i a ummi minung hna cu an in hrawh dih cikcek hna lai: Pathian cu nangmah khamh awkah a rat caan kha na hngalh lo caah cuka hmun ah cun aa chonhmi lung pakhat hmanh leh loin an kaltakmi a um lai lo." ⁴⁵ Jesuh cu Biakinn chungah khan a vung lut i chawdawr pawl kha a ṭhawl hna i, ⁴⁶ "Cathiang chungah, ’Pathian nih ka inn cu thlacamnak inn a si lai,’ a ti, tiah aa ṭial. Sihmanhsehlaw nannih nih cun mifir thuhnak kua ah nan ser cang," a ti hna. ⁴⁷ Jesuh nih Biakinn ah khan nifate in a cawnpiak hna. Tlangbawi upa pawl hna le Phungbia cawnpiaktu saya hna le hruaitu pawl nih khan thah an duh, ⁴⁸ sihmanhsehlaw mi vialte nih khan a bia cu an ngaih i pakhat hrelh hmanh kha an duh lo caah annih nih cu tuahnak ding caah cun lam an hmu kho lo.

¹ Ni khat cu Jesuh cu Biakinn i mizapi a cawnpiak lio hna le Thawngṭha kong a chimh lio hna ah tlangbawi upa pawl le Phungbia cawnpiaktu saya hna le upa pawl kha an ra i, ² "Hi thil tuah khawhnak dingah hin zei nawl dah na ngeih? Aho nih dah nawl an pek, kan chim?" an ti. ³ Jesuh nih a leh hna i, "Bia pakhat in hal ve hna ning. ⁴ Johan nih tipil pek khawhnak nawl a ngeihmi kha Pathian sin i a hmuhmi maw a si, minung sin i a hmuhmi dah a si, ka chim tuah u?" tiah a ti hna. ⁵ Annih cu pakhat le pakhat kha an i al i. "Zeitindah kan ti lai? ’Pathian sinin,’ kan ti ahcun, ’A si ahcun zeicahdah Johan cu nan zumh kun lo?’ a kan ti lai. ⁶ Minung sinin; kan ti ahcun, hika i a ummi vialte nih hin Johan cu profet a si hrimhrim tiah an zumh caah lung in an kan cheh lai," an ti. ⁷ Cucaah an i thawh i, "Khuazei in dik a hmuh kan hngal lo," an ti. ⁸ Cun Jesuh nih, "A si ahcun, kei zong nih zei nawl in dah hi thil hi ka tuah hna ti kha kan chim ve hna lai lo," tiah a ti hna. ⁹ Cun Jesuh nih mizapi cu hi tahchunhnak bia hi a chimh hna. Aa thawh i, "Mipa pakhat nih mitsur dum pakhat a tuah i rianṭuantu hna sinah khan a hlanh i khual a tlawng i saupi a rau. ¹⁰ Mitsur thei lawh caan kha a phak tikah rianṭuantu pawl sinah khan a sal pakhat a hei thlah i ka covo a si hngami kha ka pe ve u tiah a hei hal hna. Sihmanhsehlaw rianṭuantu hna nih khan a sal cu an rak velh i a lawng in an kirter. ¹¹ Cucaah a dang a sal pakhat a hei thlah ṭhan, sihmanhsehlaw hi pa zong cu an rak velh i a lawngin an kirter ṭhiamṭhiam. ¹² Cun a sal pathumnak kha a hei thlah ṭhan i amah zong cu an rak ṭhuat i an rak ṭhawl. ¹³ Cu tikah dum ngeitu nih cun aa thawh i, ’Zeitindah ka tuah lai? Ka dawtmi ka fapa thengte hi ka hei thlah lai; amah cu an rak hmaizah ṭheo lai,’ tiah a ti. ¹⁴ Sihmanhsehlaw amah cu rianṭuantu pawl nih khan an rak hmuh tikah pakhat le pakhat cu an i ruah i, ’Hi pa hi dum ngeitu fapa a si. That u sih law dum hi kanmah ta ah a cang lai,’ an ti. ¹⁵ Cucaah dum lengah khan an chuah i an thah. Cucaah dum ngeitu nih khan dum rianṭuantu hna kha zeitindah a ti hna lai? ¹⁶ Amah cu a ra lai i cu hna cu a thah hna lai i dum cu midang kha a zohter hna lai," tiah a ti. Cucu mizapi nih khan an theih tikah, "Si sawh hlah seh," an ti. ¹⁷ Jesuh nih annih cu a zoh hna i, " ’Inn satu nih san a tlai lo tiin an hlawtmi lung kha innkil lung ah a cang,’ tiin Cathiang chungah a ummi bia hi tah a sullam zeidah a si kun?" tiah a hal hna. ¹⁸ Cun aa thawh ṭhan i, "Cu lung cung i a tlami paoh cu a kuai cikcek lai i cu lung nih a rialmi hna paoh cu leidip bantukin an dip lai," tiah a ti. ¹⁹ Phungbia cawnpiaktu saya hna le tlangbawi upa hna nih khan Jesuh cu tlaih colh an duh, zeicahtiah hi bianabia hi kanmah a kan chimhnawh ti kha an i hngalh, sihmanhsehlaw mizapi kha an ṭih hna. ²⁰ Cucaah caan rem tu kha an bawh i mi ngiatu an thlah hna. "Zumh awktlakmi bantukin nan i umter lai i bia nan hal lai. A bia kha tlaih nan i zuam lai i cu a bia cu nawlngeitu mangki bawi sin i phakpinak ding ca i sonhtarhnak ah kan hman lai," an ti hna. ²¹ Cu mingiatu hna nih cun Jesuh cu an thawh i, "Saya, na chimmi le na cawnpiaknak hi ahmaan tiah kan hngalh. Ahohmanh an hmai na zoh hlei fawn hna lo, Pathian nih minung caah a herh a timi biatak kha na cawnpiak ko hna. ²² Cucaah cun kan chim tuah, Rom Siangpahrang sin i ngunkhuai pek hi kan Phung he aa ralchanhmi a si maw si lo?" tiah an ti. ²³ Sihmanhsehlaw Jesuh nih an zernak cu tleng lakin a rak hmuh ṭung i cucaah cun a thawh hna i, ²⁴ "Ngun tangka phar khat in ka hmuh sak tuah u. Aho hmai le min dah a cuang?" tiah a ti hna. ²⁵ Annih nih, "Siangpahrang hmai le min a cuang," tiah an leh. Cucaah Jesuh nih a thawh hna i, "A si ahcun, Siangpahrang ta a simi cu Siangpahrang kha pe ko u, Pathian ta a simi cu Pathian kha pe ko u," tiah a ti hna. ²⁶ Cuticun zapi lak i tlaih an i zuamnak cu pakpalawng ah a cang i a lehnak hna cu an khuaruah a har i dai tein an um. ²⁷ Sadusi mi tlawmpal kha Jesuh sinah cun an ra. (Annih cu minung hi thihnak in an tho ṭhan lai lo tiah a timi an si). Annih nih amah cu an thawh i, ²⁸ "Saya, Moses nih nawlbia a kan ṭialpiak i cu nawlbia chungah cun, ’Mipa pakhatkhat cu a thih i a nupi kha fa ngei loin a roh ahcun, cu pa a unau nih cun, cu nu cu a ṭhit lai, mithi mipa caah khan fa a hrinpiak khawh nakhnga,’ a ti. ²⁹ Voi khat cu unau pasarih an um; an upa bik cu nupi a ṭhi i fa ngei loin a thi. ³⁰ Cu tikah apahnihnak pa nih khan a ṭhit i fa ngei loin a thihtak ve. ³¹ Cun apathumnak pa nih khan a ṭhit hoi i fa ngei loin a thihtak ṭhiamṭhiam. Cu bantuk cun an pasarih ningte cun a si — fa ngei loin an thi dih. ³² A hmanung bik ah minu zong cu a thi ve. ³³ Mithi hna cu an thawh ṭhan ni ah, amah cu aho nupi cu dah a si lai? An pasarih tein an ṭhit ṭung?" an ti. ³⁴ Jesuh nih a leh hna i, "Tu chan mi hna hi cu an i ṭhi i an i um; ³⁵ sihmanhsehlaw thihnak in thawh ṭhanter awktlak a simi hna le a ra lai dingmi chan i um awkah aa tlakmi hna cu an i ṭhi an i um lo. ³⁶ Annih cu vancungmi bantuk an si i an thi kho lo. Annih cu thihnak in thawh ṭhantermi an si cang caah Pathian fa an si. ³⁷ Moses nih a thimi hna cu nunnak ah thawhter ṭhan an si lai ti cu fiang tein a chim ko. A alhmi burbuk kong a chimnak ah khan aa thawh i, ’Bawipa cu Abraham Pathian, Isak Pathian Jakob Pathian a si,’ a ti. ³⁸ Cu nih cun Pathian cu a nungmi hna Pathian a si i a thimi hna Pathian a si lo ti kha a fiang tein a langhter — zeicahtiah annih cu amah sinah cun an nung dih," tiah a ti. ³⁹ Phungbia cawnpiaktu saya a cheu nih khan an hun i thawh i, "Saya, na lehnak hna cu a ṭha ngaingai," an ti. ⁴⁰ Zeicahtiah amah cu bia an hal ngam lo. ⁴¹ Jesuh nih annih cu a thawh hna i, "Zeitindah Messiah cu David fapa a si lai, tiah an ti khawh? ⁴² Zeicahtiah David hrimhrim nih pei, ’Bawipa nih ka Bawipa cu, ⁴³ Na ral vialte hna cu na ke tang i kelamh ah ka chiah hna hlantiang Ka orhlei kamah hin ṭhu tuah,’ tiah Salm cauk chungah a ti cu. ⁴⁴ David nih khan ’Bawipa’ tiah a ti ṭung ahcun, zeitindah Messiah cu David fapa cu a si khawh lai?" tiah a ti. ⁴⁵ Mizapi nih cun an dihlak in an ngaih ko lioah khan Jesuh nih a zultu kha a thawh hna i, ⁴⁶ "Phungbia cawnpiaktu saya pawl kha i ralring hna u; annih cu angkifual pipi i hruk in chawh a duhmi, chawdawrnak hmun ah mi nih hmaizahnak in ka chawnbia hna seh ti a duhmi, pumhnak i ṭhutnak ṭha aa cuhmi, puai i hmun ṭha aa hammi an si; ⁴⁷ mi nih ka hmu hna seh ti duh ah thla sau pipi in an cam, sihmanhsehlaw nuhmei kha an thilri le an inn tiangin an chuh ṭung hna. Dantatnak an hmuh ding cu a fak chinchinmi a si ko lai," tiah a ti.

¹ Jesuh nih a pawngkam kha a hei zoh i Biakinn tangka chiahnak ah mirum mi nih an thawhlawm an thlak kha a hmuh hna; ² cun a si a fak ngaingaimi nuhmeinu zong nih phaisa sen pahnihte a thlak ve kha a hmuh. ³ Cun aa thawh i, "Hihi kan chimh hna: Hi a si a fakmi nuhmeinu nih hin a taktak ti ahcun hawi dang vialte nakin tam deuh a sanh. ⁴ Zeicahtiah a dang tham nih cun an chawva a hleivuang kha pei an pek ko cu, sihmanhsehlaw hi nu nih hin cun, a si a fak na tein, a nunnak ding ca i aa chiahmi kha pei a dihlak in a pek cu," tiah a ti. ⁵ An lak i mi a cheu nih khan Biakinn kong kha an rak ceih i aa dawhnak kong le a lung ṭhaṭha hna le Pathian sin i laksawng an pekchanhmi kong kha an rak chim. ⁶ Jesuh nih aa thawh i, "Mah hi vialte hi nan hmuh, sihmanhsehlaw hika i lung vialte hi pakhat hmanh an umnak hmun cio i kaltak loin hlonh an si dih lai caan a tlung lai," tiah a ti. ⁷ "Saya, zeitik ah dah mah hihi a si lai? Cun a caan a phan cang ti a langhtertu dingah zei hmelchunhnak dah a um lai?" tiah an hal. ⁸ Jesuh nih a thawh hna i, "I ralring u; ahohmanh i hlenter hna hlah u. Zeicahtiah mi tampi keimah min put in an ra lai i, ’Keimah hi amah cu ka si,’ an ti lai i ’A caan cu a phan cang,’ an ti lai. Sihmanhsehlaw zul hna hlah u. ⁹ Raldohnak le ralthawhnak kong nan theih tikah nan thinphang hlah u; cu bantuk thil cu a um hmasa hrim awk a si, sihmanhsehlaw a donghnak a nai cang tinak a si theng lo," tiah a ti. ¹⁰ Cun aa thawh ṭhan i, "Ram pakhat le pakhat an i do lai, cozah pakhat le pakhat an i tu lai; ¹¹ hmun kip ah ṭih a nungmi lihnin le mangṭam le ngal-eu zawtnak a tlung lai; thil ṭihnung le hmelchunhnak ngan pipi kha van in an lang lai. ¹² "Hi thil vialte an tlun hlanah hin nannih cu tlaihkhih nan tong lai i hremnak nan ing lai; pumhnak inn ah khan biaceih awkah an in chuahpi hna lai i thong ah an in thlak hna lai; keimah ruangah siangpahrang hna hmaiah le uktu bawi hna hmaiah an in chuahpi hna lai. ¹³ Cucu nan ca i Thawngṭha chimnak caan ṭha a si lai. ¹⁴ Zeitindah kan i runvennak ding caah bia kan chim lai tiah a hlankan in nan lungre rak thei hlah u; ¹⁵ zeicahtiah nan ral ahohmanh nih an in tei hna i an in al khawh hna nakhnga lo, bia le fimnak kha kan pek hna lai. ¹⁶ Nan nu le nan pa, nan u nan nau, nan sahlawh nan rualchan, nan hawi nan kom hna nih khan an in rawi hna lai i nannih lak i a cheukhat cu thahnak nan ing lai. ¹⁷ Keimah ruangah mi kip nih an in huat hna lai. ¹⁸ Sihmanhsehlaw nan lu cung samfa fa khat hmanh a tlau lai lo. ¹⁹ Fek tein dir ko u, zeicahtiah hitihin pei nan nunnak cu nan khamh lai cu," tiah a ti. ²⁰ Cun Jesuh nih cun, "Nannih nih Jerusalem khua kha ralkap i an kulh nan hmuh tikah a rauh hlanah a rawk cang lai ti kha hngalh u. ²¹ Khi tikah Judea ram i a ummi hna cu tlang ah zam hna seh law; khuapi chungah a ummi hna cu chuak hna seh law khualeng ramlak i a ummi hna cu khuapi chungah khan lut hna hlah seh. ²² Zeicahtiah mah hihi ’Dantatnak Ni’ tiah timi kha a si i Cathiang nih a chimmi vialte cu a tlinnak ding caah umter dingmi an si. ²³ Cu caan ah cun fapawi nu ca le hnuktlai lio nau a ngeimi hna caah zeitluk in dik a har lai. Hi ram chungah hin harnak ṭihnung a tlung lai i hi miphun cungah hin Pathian thinhunnak a tlung lai. ²⁴ Annih cu vainam in thah an si lai i ram kip ah sal ah an hruai hna lai, Jentail mi nih Jerusalem khua cu an naan lai i an caan a dih hlantiang an ke tangah an chiah lai. ²⁵ "Cun ni le thlapa le arfi ah khin hmelchunhnak an lang lai. Vawleicung ram hna cu rili tilet a thomi le a awnmi nih awlokchong in an tuah hna lai. ²⁶ Vawlei cung pumpi i a tlung dingmi thil an ruah ah khan mi cu ṭihnak in a ther in an ther lai; zeicahtiah vancung ṭhawnnak cu an i hnin lai. ²⁷ Cun Mi Fapa cu sunparnak le lianhngannak he khuadawm cung i a rat kha an hmuh lai. ²⁸ Mah hi vialte hi um hram an hun i thawk tikah, dir u law cunglei kha zoh tuah u, zeicahtiah nan tlanhnak cu a nai cang," tiah a ti. ²⁹ Cun Jesuh nih hi tahchunhnak bia hi a chimh hna i, "Theipi kung le thingkung dang hna kha ruat hna hmanh u. ³⁰ Hnahte an hun lak nan hmuh tikah thal a chuak dengmang cang ti kha nan hngalh. ³¹ Cu bantukin hi thil hna an hung um kha nan hmuh tikah Pathian Pennak cu a nai cang ti kha nan hngalh lai. ³² "Mah hihi philh hlah u: Hi thil vialte hi atu i a nungmi hna an thih dih hlan ah hin a tlung lai. ³³ Van le vawlei cu an rawk lai, sihmanhsehlaw ka bia cu an rawk lai lo," tiah a ti. ³⁴ "I ralring tuah u. Zudin sa-einak le khuasak tintuk harnak lawng kha ruat hlah u, cu ti nan si ahcun cu Ni nih cun ruah lopi ah rap bantukin an foih sual hna lai. ³⁵ Zeicahtiah cu Ni cu vawlei cung i a ummi vialte hna cungah a tlung dingmi a si. ³⁶ Hi a tlung hnga dingmi thil vialte hi him tein chuak lakin nan tan khawh nakhnga, thazang nan ngeih nakhnga le Mi Fapa hmaiah nan dir khawh nakhnga, ralring tein um u law thla va cam zungzal ko u," tiah a ti. ³⁷ Cu hrawng vialte cu Jesuh cu Biakinn ah khan mi kha a cawnpiak hna i zanlei paoh ah khan lengah a chuak i Oliv Tlang ah khan a va riak tawn. ³⁸ Mi vialte cu amah bia ngaih awkah khan Biakinn ah khan zingka tein an kal tawn.

¹ Lanhtak Puai timi Thilnu Telhlo Changreu Puai kha a nai cang. ² Tlangbawi upa hna le Phungbia Cawnpiaktu saya hna nih khan mizapi kha an ṭih hna caah zeitindah Jesuh kha a thli in kan thah lai tiah lam an kawl. ³ Khi tikah zultu pahleihnih hna lak i aa tel vemi Judas Iskariot an timi chungah khan Satan cu a lut. ⁴ Cucaah Judas cu a va kal i tlangbawi upa hna le Biakinn cawngtu hna an bawile hna he khan zeitindah Jesuh cu an sinah a chanh khawh lainak ding kha an ceih. ⁵ An lung a si ngaingai i phaisa kan in pek lai, tiah an ti. ⁶ Cucu Judas zong kha a hna a tla i mizapi hngalh loin zeitindah Jesuh cu an sinah ka lei khawh lai tinak caan rem bawh hram kha a thawk. ⁷ Thilnu Telhlo Changreu Puai chung i Lanhtak rawl caah tuufa an thah hna ni kha a phan. ⁸ Jesuh nih Peter le Johan cu a thawh hna i, "Va kal u law Lanhtak zanriah kan ei ding kha va tim tuah u," tiah a ti hna. ⁹ "Khuazei ah dah va tim u tiah na kan duh?" tiah annih nih an ti. ¹⁰ Anih nih a thawh hna i. "Ngai hmanh u. Khuapi chung i nan vung luh ah khan ti-um in ti a thanmipa he nan i tong lai. A luhnak inn tiang khan nan hei zulh lai i ¹¹ cu inn a ngeitu pa cu, ’Kan sayapa nih, "Khuazei ah dah a ka zultu hna he Lanhtak zanriah kan einak ding khaan cu a si?" a ti,’ tiah nan va hal lai. ¹² Cungdot ah khaan kaupi pakhat, ṭhutdan cabuai tlamtling tein an chiahnak an hmuhsak hna lai i cuka ah cun nan va timh lai," tiah a ti. ¹³ An va kal i Jesuh nih a chimh hna bantukte khan thil cu an va hmuh hna i annih nih Lanhtak zanriah cu an timh. ¹⁴ A caan a phak tikah Jesuh cu lamkaltu hna he khan cabuai ah cun an ṭhu. ¹⁵ Annih cu a thawh hna i, "Sifahnak ka in hlanah hin hi Lanhtak rawl nannih he ei ṭi hi ka duh hringhran. ¹⁶ Zeicahtiah Pathian Pennak chungah hi rawl hi a sullam taktak langhter a si hlan paoh cu ka ei ti lai lo," tiah a ti. ¹⁷ Cun Jesuh nih hrai kha a lak i Pathian sinah lawmhnak bia a chim hnuah, "Hihi i lak u law i hrawm u, ¹⁸ zeicahtiah Pathian Pennak a phanh hlan tiang cu, hi mitsur hang hi ka ding ti lai lo," tiah a ti. ¹⁹ Cun chang kha a lak i Pathian sinah lawmhnak bia a chim hnuah a cheu i annih cu a pek hna i, "Hihi ka pum a si, nan ca i ka pekmi cu. Keimah philh lonak ah run tuah u," tiah a ti. ²⁰ Cu bantuk ṭhiamṭhiam in zanriah an ei dih hnuah hrai zong kha a pek hna i "Hi hrai hi nan caah ka thletmi ka thi in khenhchihmi Pathian biakamnak a si. ²¹ "Sihmanhsehlaw zohhmanh u. Keimah a ka rawitu cu ka sinah cabuai ah hin a um ko. ²² Pathian nih a khiah cia bantukin Mi Fapa cu a thi lai, sihmanhsehlaw a rawitu caah cun ṭihnung a va si hringhran dah!" tiah a ti. ²³ Cun anmah le anmah cu, aho nih dah mah hihi a tuah lai, tiah pakhat le pakhat kha an i hal. ²⁴ Cun a zultu hna lakah khan, ahodah a ngan bik ah ruah awk a si, ti bia alnak kha a chuak. ²⁵ Jesuh nih a thawh hna i, "Jentail mi siangpahrang hna nih cun an michia kha a lal in an lalhnawh hna i nawl ngeitu hna kha ram ca ’Thil ṭha tuahtu’ ti an si tawn. ²⁶ Sihmanhsehlaw nannih cu hitihin nan si awk a si lo: nan lak i a ngan bik kha a ngakchia bik bantuk a si awk a si i hruaitu a simi kha sal bantuk a si awk a si. ²⁷ Ahodah a ngan deuh? Rawl ei awkah a ṭhumi kha maw rawl a petu kha dah? Chim hau loin a ṭhumi kha a ngan deuh. Sihmanhsehlaw kei cu nan lakah rawl petu bantukin ka um. ²⁸ "Harnak ka in caan a dihlak in a ka umpitu cu nanmah nan si; ²⁹ cun ka Pa nih uknak nawl a ka pek bantukin kei zong nih nannih he biakamnak ka tuah lai. ³⁰ Ka Pennak ah ka cabuai ah nan ding nan ei lai i Israel mi phun hleihnih kha biaceihpiak awkah bawi ṭhutdan cungah nan ṭhu lai," tiah a ti. ³¹ Jesuh nih, "Simon, Simon, ngai-hmanh. Lothlotupa nih facang cu a fang le a hi a thleidan bantukin Satan nih nannih cu nan dihlak in hneksaknak nawl kha a hmuh cang. ³² Sihmanhsehlaw Simon, na zumhnak a pur nakhnga lo nangmah caah thla ka cam. Cun keimah lei ah na hon i mer ṭhan tikah na unaule kha thazang na pek ve hna lai," tiah a ti. ³³ Peter nih a leh i, "Bawipa, nangmah he thongtlak le thih kha ka ngamh ko," tiah a ti. ³⁴ Jesuh nih a leh ve i, "Peter, tuzan ah, amah cu ka hngal lo, tiah voi thum tiang na ka ti hlan tiang ar a khuang lai lo," tiah a ti. ³⁵ Cun Jesuh nih annih cu a thawh hna i, "Phaisa bawm siseh, zal siseh, kedan siseh i ken loin ka rak in thlah hna ah khan zeital nan bau maw?" tiah a ti. "Zeihmanh kan bau lo," tiah annih nih an leh. ³⁶ Cun Jesuh nih, "Sihmanhsehlaw atu cu, phaisa bawm siseh, zal siseh a ngeimi paoh nih i phorh u; cun vainam a ngei lomi paoh nih a angkileng kha zuar seh law pakhat in i cawk seh. ³⁷ Zeicahtiah Cathiang nih, ’Amah cu misual mi hna sinah rel chih a si cang,’ tiah a timi kha ka kong ah hin a tlin awk a si. Ka kong an rak ṭialmi vialte kha a tling cuahmah cang," tiah a ti. ³⁸ Cun annih nih, "Bawipa, zohhmanh, hika ah hin vainam pahnih an um ko," tiah an ti i, "Cucu a za," tiah a leh hna. ³⁹ Cun Jesuh cu a chuak i a tuah tawn bantuk khan Oliv Tlang ah a kal i a zultu kha a sinah an kal ve. ⁴⁰ A hmun kha a phak tikah annih cu a thawh hna i, "Tukforhnak chungah nan tlak sual nakhnga lo thlacam tuah u," a ti hna. ⁴¹ Cun an sin khan lungchep tluk a va kal i a khuk aa bil i thla a cam. ⁴² "Ka Pa, na hna a tlak ahcun hi hrai hi ka ṭhialpiak ko. Sihmanhsehlaw keimah nawl si loin nangmah nawl si ko seh," tiah a ti. ( ⁴³ Vancung in vancungmi pakhat a sinah a rung lang i a rung hnemh. ⁴⁴ Lungthin fak ngaingai in fak chinchin in thla a cam i a thlan cu vawlei ah thi dor bantukin a tla.) ⁴⁵ A thlacamnak cun a tho i a zultu hna sinah khan a va kir i an rak i hngilh kha a hmuh hna, an lungre a theih tuk ah an ba dih. ⁴⁶ Annih cu, "Zeicahdah nan i hngilh? Tukforhnak ah nan tlak nakhnga lo tho u law thlacam u," a ti hna. ⁴⁷ Bia a chim lengmang lioah cun mibu kha an ra phan i zultu pahleihnih lak i aa tel vemi Judas nih khan a hun hruai hna. Jesuh cu hnamh awkah a hun fuh. ⁴⁸ Sihmanhsehlaw Jesuh nih a rak thawh i, "Judas, Mi Fapa hi hnamh in maw na rawi ko lai?" tiah a ti. ⁴⁹ Jesuh cu a sin i a ummi a zultu hna nih khan thil umtuning kha an hmuh tikah an thawh i, "Bawipa, kan vainam kan hmang hna lai maw?" an ti. ⁵⁰ Cun an lak i pakhatpa nih khan Tlangbawi Ngan sal kha a orhlei hna pet lak in a tuk. ⁵¹ Sihmanhsehlaw, "Hihi cu a za cang," tiah Jesuh nih a ti. Mipa a hna kha a tawngh i a damter. ⁵² Cun amah tlaih awkah a rami tlangbawi upa pawl hna le Biakinn cawngtu hna i an bawi pawl hna le upa hna kha a thawh hna i, "Damiah hei si ning law cu bang, zeicahdah vainam le thingtan he nan ka rathnawh? ⁵³ Nifate in pei nan sinah Biakinn ah ka um ko cu, tlaih nan ka zalh ṭung lo. Sihmanhsehlaw atu hi cu nanmah le muihnak ṭhawnnak nan caan a si," tiah a ti hna. ⁵⁴ Jesuh cu an tlaih i Tlangbawi Ngan inn ah khan an kalpi; cun Peter nih lamhlatpi khin a zulh. ⁵⁵ Tual laifang ah khan mei an kau i mei cu an to i a tomi hna sinah cun Peter cu a ṭhu ve. ⁵⁶ Cun mei a toh lio cu sinumnu ngakchia pakhat nih a hmuh i dengteo in a zoh i, "Hi pa zong hi amah sinah aa telmi a si ve," tiah a ti. ⁵⁷ Sihmanhsehlaw Peter nih aa pheh i, "Minu, a hngalh hmanh ka hngalh ṭung lo," a ti. ⁵⁸ Cu hnu tlawmpal ah cun pa pakhat nih a hmuh i, "Nangmah zong hi anmah lak i aa telmi na si ve ko," tiah a ti. Sihmanhsehlaw Peter nih cun aa pheh ṭhan i, "Mipa, ka si lo," tiah a leh. ⁵⁹ Cu hnu suimilam pakhat tluk ah khin midang pakhat nih ṭhawng chinchin in, "Hi pa hi amah sin i aa telmi a si hrimhrim ko, zeicahtiah Galilee mi pei a si ko hi!" tiah a ti. ⁶⁰ Sihmanhsehlaw Peter nih cun, "Mipa, na chimmi hi zei a si ti awk hmanh ka hngal lo," tiah a leh. Bia a chim lioah cun, chikkhatte ah khin ar a hung khuang. ⁶¹ Bawipa cu a hun i mer i Peter kha a hei zoh i Peter nih cun Bawipa nih, "Tuzan ah ar a khuan hlanah, amah cu ka hngal lo, tiah voi thum tiang naa pheh lai," a timi kha a lung ah a hung pem. ⁶² Peter cu a chuak i lunghno ngaiin a ṭap. ⁶³ Jesuh cu a cawngtu hna nih khan nihchuak ah an saih. An tuk, ⁶⁴ a mit an huh i, "Ahodah an tu? Kan chim tuah," tiah an ti chih. ⁶⁵ Cuticun nihsawhnak bia kha a cungah tampi an chim. ⁶⁶ Khua a dei tikah Judah mi upa hna le tlangbawi upa pawl hna le Phungbia cawnpiaktu saya hna kha an i pum i an hmaiah cun Jesuh cu an chuahpi. ⁶⁷ Annih nih an thawh i, "Messiah na si maw si lo kan chim tuah," an ti. Anih nih, "Kan chimh hna zongah nan ka zum lai lo, ⁶⁸ cun bia kan hal hna zongah nan ka let duh fawn lai lo. ⁶⁹ Sihmanhsehlaw atu hin cun Mi Fapa hi Lianngan Bik Pathian orhlei kamah ṭhutter ka si cang lai," tiah a ti. ⁷⁰ Cun annih nih an dihlak in, "Pathian Fapa maw na si kun?" an ti. Anih nih a leh hna i, "Nan ka ti bangin ka si," tiah a ti. ⁷¹ Cun annih nih, "Tehte dang zeidah kan herh ti? Amah kaa hrimhrim in pei kan theih ko cang cu," an ti.

¹ An bu ningpi khan an tho i Jesuh cu Pilat hmaiah khan an kalpi. ² Anih cu sual kha an phawt i, "Hi pa nih hin kan mi hna a pingah a hruai hna kha kan tlaih, a thawh hna i Sizar Siangpahrang sinah ngunkhuai nan pe lai lo, a ti hna i, keimah hi siangpahrang Khrih cu ka si, a ti hna," an ti. ³ Cun Pilat nih cun, "Judah mi hna siangpahrang cu na si maw?" tiah a hal. Jesuh nih cun, "Na chim bangin ka si ko," tiah a leh. ⁴ Khi tikah Pilat nih cun tlangbawi upa pawl hna le mizapi cu, "Hi pa hi a sualnak zeihmanh ka hmu lo," tiah a ti hna. ⁵ Sihmanhsehlaw fak chinchin in an au i, "Hi pa nih hin a cawnpiaknak in mizapi lakah hnahnawhnak a chuahter. Galilee ram in aa thawk i Judea ram vialte kha a cul dih i atu cu hika hi a phan cang," an ti. ⁶ Cucu Pilat nih a theih tikah, "Hi pa hi Galilee mi maw a si?" tiah a hal hna. ⁷ Jesuh cu Herod nih a ukmi peng chungin a si ti kha a hngalh tikah amah cu Herod sinah cun a hei kuat; cu lioah cun Herod zong cu Jerusalem khua ah a um. ⁸ Herod cu Jesuh a hmuh tikah khan a lung aa lawm ngaingai, zeicahtiah amah kong kha a rak theih tawnmi a si i hmuh a duhnak kha a saupi cang; cun Jesuh nih cun khuaruahharnak pakhatkhat a tuah lai tiah a ruah. ⁹ Cucaah Herod nih cun Jesuh cu bia tampi a hal len, sihmanhsehlaw Jesuh nih kaa khat hmanh a let lo. ¹⁰ Tlangbawi upa pawl hna kha le Phungbia cawnpiaktu saya hna kha an chuak i Jesuh cu fak piin sual an puh. ¹¹ Herod le a ralkap hna nih khan Jesuh cu capo ah an saih i zeirello ngaiin an ti. Puan ṭha ngaingai an aihter i Pilat sinah khan an kuat ṭhan. ¹² Cu ni hrimhrim ah cun Pilat le Herod cu hawikom ah an cang; cu hlanah cun ral an rak si. ¹³ Pilat nih tlangbawi upa pawl kha le hruaitu hna le mi zapi kha a auh hna i, ¹⁴ "Hi pa hi ka sinah nan ratpi i mizapi kha a pingah a hruai hna, nan ti. Atu cu amah kha nan hmaiah ka kher i thil ṭhalo a tuah tiah nan puhmi vialte kha pakhat hmanh a tuah tiah ka hmu kho lo. ¹⁵ Herod zong nih a sualnak a hmu ve lo, cucaah ka sinah a rak thlah ṭhan: Hi pa nih hin thah awk tlak thil a tuahmi pakhat hmanh a um lo. ¹⁶ Cucaah ka tukter hna lai i ka thlah lai," tiah a ti. ( ¹⁷ Lanhtak puai paoh ah Pilat nih thongtla pakhat lengmang a thlahpiak hna awk a si.) ¹⁸ Mizapi cu an au ciammam i, "Amah cu that ko. Bar-Abbas tu kan thlahpiak," tiah an ti. ¹⁹ (Bar-Abbas cu khua chung i zapi buainak a ummi ruangah le lainawn ruangah thong ah cun an rak thlak.) ²⁰ Pilat nih Jesuh cu luatter a duh caah zapi cu bia a chimh ṭhan hna, ²¹ sihmanhsehlaw an au ṭhan i, "Vailam ah khenh ko, vailam ah khenh ko," an ti. ²² Pilat nih cun a chimh ṭhan hoi hna i, "Zei sualnak dah a tuah? Thih awktlak thil a tuahmi pakhat hmanh ka hmu kho lo. Fung in ka tukter hna lai i ka thlah lai," a ti. ²³ Sihmanhsehlaw an awreng chuak in, Jesuh cu vailam ah khenh chih ko, tiin an au lengmang i a donghnak ah cun an aunak nih cun a tei. ²⁴ Cucaah an hal lengmangmi biakhiahnak kha Jesuh cungah cun a tuahpiak hna. ²⁵ Chuak seh ti an duhmi pa, hnahnawhnak a chuahter ruang le lai a nawn ruang i thong i an thlakmipa kha, a chuahter i Jesuh cu anmah duh paoh in tuah awkah an kut chungah a pek hna. ²⁶ Jesuh cu ralkap nih khan an kalpi i lampi ah khuate lei in khuapi ah a rami Sairin khuami Simon kha an ton. An tlaih i vailam tahnak kha an khinh i Jesuh hnulei khan an zulhter. ²⁷ Mi tampi nih an zulh i cu hna lakah cun a ṭang aa cum i amah a rak ṭah lengmangmi nu tlawmpal zong an um. ²⁸ Jesuh nih annih kha a merhnawh hna i, "Jerusalem minu hna, keimah caah ṭap hlah u; nanmah le nan fale ca tu ah ṭap deuh u. ²⁹ Zeicahtiah mi nih, ’Fa a ngei bal lo i fa a hring bal lo i fa hnuk a din bal lomi nu hna cu an van a va ṭha dah,’ an ti caan a phan lai. ³⁰ Cu caan cu mi nih tlang hna cu, ’Kan tlak u,’ an ti hna i, fing hna cu, ’Kan khuh u,’ an ti caan a si lai. ³¹ Zeicahtiah thing cu a hrin lioah cu bantuk thil hna cu tuah a si ahcun a ro tik chinchin ahcun zeidah a lawh lai?" tiah a ti. ³² A dang pahnih, misual veve kha, Jesuh sin i thah awkah cun an kalpi ve hna. ³³ Cun "Lu Ruh" an timi hmun kha an phak tikah Jesuh cu vailam ah an khenh chih i misual pahnih hna zong kha a orhlei ah pakhat a kehlei ah pakhat an khenh chih ve hna. ³⁴ Jesuh nih aa thawh i, "Ka Pa, ngaithiam hna. An tuahmi hi zei a si ti awk an hngal lo," tiah a ti. Camcawhfung zuh in a hnipuan kha an i phaw. ³⁵ Judah mi hruaitu pawl nih an nihsawh i, "Midang cu a khamh hna, amah cu Pathian nih a thimmi Messiah a si ahcun amah le amah kha i khamh kun ngat seh," tiin an ti lioah khan zapi nih cun an dir i an zoh ko. ³⁶ Ralkap pawl zong nih khan an nihsawh i an hun hnawh i mitsur hang thor kha an pek i, ³⁷ "Judah Siangpahrang na si ahcun i khamh kun ngat," an ti, ³⁸ A lucung i an ṭialmi bia cu: "Hihi Judah Siangpahrang cu a si," ti hi a si. ³⁹ Cuka i aa thlai vemi misual pakhat nih cun Jesuh cu a nihsawh i, "Messiah cu na si kun lo maw? Nangmah cu i khamh law kannih zong kan khamh ve ngat?" tiah a ti. ⁴⁰ Sihmanhsehlaw a dang pakhat nih khan a mawhchiat i "Pathian na ṭih lo maw? Hika ah hin cun biakhiahnak aa khatmi toiah kan um. ⁴¹ Sihmanhsehlaw kannih ca i biakhiahnak an tuahmi cu ahmaanmi a si, zeicahtiah kan tuahmi ruangah kan hmuh awk a simi kha kan hmuh; sihmanhsehlaw anih hi cu ṭhat lonak zeihmanh a tuah lo," tiah a ti. ⁴² Cun Jesuh cu a thawh i, "Jesuh, Siangpahrang in na rat tikah ka philh te hlah," tiah a ti. ⁴³ Cun Jesuh nih cun, "Mah hihi kan chimh: nihin ah Paradis ah keimah sinah na um lai," a ti. ⁴⁴ Chun suimilam hleihnih tluk ah ni cu a mui i muihnak nih ram cu a pumpuluk in zanlei suimilam pathum tiang a khuh; ⁴⁵ cun Biakinn chung puanzar kha cheu hnih ah aa cheu. ⁴⁶ Jesuh cu aw thangpi in a au i, "Ka Pa, na kut chungah ka thlarau kha ka chiah," tiah a ti. Cucu a chim dih in a cat. ⁴⁷ Cucu ralbawipa nih khan a hmuh i Pathian kha a thangṭhat i; "Hi pa hi a sual hrimhrim lo," tiah a ti. ⁴⁸ Cu thil va zoh awkah cuka i aa pummi hna nih thil umtuning kha an hmuh tikah an ṭang i cum lengmang in inn ah an ṭin. ⁴⁹ Jesuh kha pumpak in a rak hngalmi hna le Galilee ram in amah a rak zultu nu hna nih khan, hi thil cu a langin an cuanh. ⁵⁰ - ⁵¹ Judea ram khua, Arimathea an timi ah hin mipa pakhat a min Josef a simi a um. Amah cu miṭha le hmaizah awktlakmi a si i Pathian Pennak a tlun lainak a hngakmi kha a si. Amah cu Khawngsil chungah khan aa telmi a si ve nain an biachahnak le an thil tinak kha a hna a tla lo. ⁵² Pilat hmaiah khan a vung lut i Jesuh ruak kha a hal. ⁵³ A ruak kha a ṭhumh i puan rang in a zual i lungkua i an cawhmi thlan ah a vui. Cu thlan cu thlan thar a si i ahohmanh nih an hmang rih lo. ⁵⁴ Cu caan cu Cawnningani a si i Sabbath ni kha aa thawk dengmang cang. ⁵⁵ Galilee ram in Jesuh a zulmi nu hna kha Josef sinah cun an kal i thlan le a chungah zeitindah Jesuh ruak cu an chiah ti kha an hmuh. ⁵⁶ Cun inn ah an ṭin i a ruak caah khan zihmui le sathau kha an timh. Sabbath ni ah cun Nawlbia bangin an i din.

¹ Zarhpi ni zingkate ah nu hna cu zihmui an timhmi kha i put in thlan ah khan an va kal. ² Thlankhar lung a rak i thawn kha an hmuh i ³ cucaah an vung lut colh, sihmanhsehlaw Jesuh ruak kha an hmu lo. ⁴ Cuka ah cun a zei ti ruah awk hngal loin an dir ko i cu lioah cun chikkhatte ah khin puan rang aa aihmi mi pahnih an pawngah cun an rung dir. ⁵ Nu hna cu ṭihnak in an khat i mi nih an chawnh hna tikah khan vawlei lei hoih in an kun. Mi nih cun an thawh hna i, "Zeicahdah a nungmi cu a thimi lakah nan kawl? ⁶ Hika ah a um lo, a tho cang. ⁷ ’Mi Fapa cu misual mi hna kut ah chanh a si lai i vailam ah an khenhchih lai i ni thum ni ah nunnak ah a tho ṭhan lai,’ tiah Galilee i a um lioah a rak in chimhmi hna kha philh hlah ngat u," tiah an ti hna. ⁸ Cu tikah nu hna cu a bia kha an lung ah a hung pem i, ⁹ thlan cun an kir i hi thil kong vialte cu zultu pahleikhat kha le a dang vialte kha an chimh hna. ¹⁰ Cu nu hna cu Mary Magdalin, Joanna le Jeim nu Mary kha an si; anmah le an sin i a kal vemi midang hna nih khan hi kong cu lamkaltu kha an chimh hna. ¹¹ Sihmanhsehlaw lamkaltu pawl nih khan nu nih an chimmi cu pakpalawng ah an ruah i an zum hna lo. ¹² Sihmanhsehlaw Peter cu a tho i thlan ah khan a va le, a vun bih i ruak zualnak puan kha a hmuh hna, a dang zeihmanh a hmu lo. Cun inn ah a kir i cu thil a cangmi kong cu khuaruahhar in a ruat lengmang. ¹³ Cu ni ṭhiamṭhiam ah cun an lak i pahnih hna cu Emmaus an timi khua leiah an kal i ¹⁴ thil umtuning kong vialte kha an i ruah. Emmaus cu Jerusalem in khan sarih tluk a si. ¹⁵ Cu ti i bia an i ruah lengmang i an i ceih lengmang lioah cun Jesuh hrimhrim nih khan a hei fuh hna i an sinah cun a kal ve. ¹⁶ A hmuh cu an hmuh ko, sihmanhsehlaw an hngal kho lo. ¹⁷ Jesuh nih cun a thawh hna i, "Nan kal pah in zeidah pakhat le pakhat nan i ceih len ko?" tiah a ti. Cun hmaichia ngaiin an dir. ¹⁸ Cun pakhatpa, a min Kleopas a simi nih khan a hun thawh i, "Tunaite i Jerusalem khua ah thil a cangmi hi Jerusalem khua chung i a ummi ah nangmah lawng hi maw a hngal lomi na si hnga?" tiah a hal. ¹⁹ Cun anih nih, "Zei thil hen dah?" tiah a ti. "Nazareth khuami Jesuh cung i a tlungmi thil cu hen ta," tiah an leh. "Hi pa cu profet a si i Pathian hmaiah mi vialte nih a chimmi le a tuahmi ah hmual ngeimi a si, tiah an ruah. ²⁰ Kan tlangbawi upa pawl hna le a kan uktu bawi hna nih thah awkah an chanh i cun vailam ah khan an khenh chih. ²¹ Kannih nih cun amah cu Israel mi hna a luattertu a si rua lai tiah kan rak i ruahchan. Cu pinah cun, cu thil a umnak hi atu hi a ni thumnak a si. ²² Kanmah lak i a ummi nu a cheukhat nih kan khuaruah an kan harter. Zingkate ah thlan ah cun an va kal i ²³ asinain a ruak kha an hmu lo. An ra kir i vancungmi an i langh kha kan hmuh hna i cu hna nih cun, a nung, tiah an kan chimh, an ti. ²⁴ Cun kanmah bu chungmi a cheukhat cu thlan ah cun an va kal i nu nih an chimningte khan an va hmuh, sihmanhsehlaw amah cu an hmu lo," an ti. ²⁵ Cun Jesuh nih cun a thawh hna i, "Nan va hrut thiam dah! Profet nih an chimmi zumh kha nan vaa harh hringhran dah. ²⁶ Messiah nih hi thil vialte kha a sunparnak chung i a luh hlanah a in awk a herh a si lo maw?" tiah a ti. ²⁷ Cun Jesuh nih Cathiang chungah, Moses cauk hna thawk in profet hna ṭialmi cauk hna tiang, amah kong aa ṭialmi vialte kha fiang tein a chimh hna. ²⁸ An kalnak ding khua cu an hei phan deng i cu tikah Jesuh nih cun hmailei i a kal rih lai bantuk khin aa umter; ²⁹ sihmanhsehlaw an tlaih i, "Kan sinah tlung ve ko, zanlei a si cang i a muih zong a mui dengmang cang," an ti. Cucaah anmah sinah cun a tlung. ³⁰ Anmah sinah cabuai ah khan a ṭhu i changreu kha aa lak i thla a cam i changreu cu a beuh i a phawt hna. ³¹ An mit kha a hung fim i aho a si kha an hun hngalh; sihmanhsehlaw a lo ṭhan. ³² Annih nih cun, "Lampi i bia a kan ruah le Cathiang sullam a kan chimh ah khan kan chungah mei kang bang a si lo mei kha?" tiah pakhat le pakhat cu an i ti. ³³ Hmakhatte ah an tho i Jerusalem ah an kir ṭhan. Zultu pahleikhat le a dang hna kha an rak i pum i, ³⁴ "Bawipa cu a tho taktak ko. Simon nih a hmuh," tiah an rak i ceih len ko. ³⁵ Cun pahnih hawl hna nih khan lampi i thil a hung ummi le Bawipa cu changreu a hun cheu tik i an hngalhnak kong kha an chimh hna. ³⁶ Cucu an chimh lengmang hna lioah khan Bawipa hrimhrim cu an lakah a hung dir i, "Nan cungah daihnak um ko seh," tiah a ti hna. ³⁷ An thin a phang an ning a ṭi i mithla kan hmu rua tiah an ruah. ³⁸ Sihmanhsehlaw a thawh hna i, "Zeicahdah nan khuaruah a har? Zeicahdah nan lungawṭawm in nan um? ³⁹ Ka kut le ka ke hi zoh hna ngat u, keimah kha pei ka si ko hi. Ka tawng u law nan hngalh ko lai, mithla nih cun ruh le sa a ngeih ṭung lo, kei cu ka ngeih pei nan ka hmuh ko hi," tiah a ti hna. ⁴⁰ Cu bia a chim dih in a kut le a ke kha a hmuhsak hna. ⁴¹ An zum kho ngaingai rih lo, zeicahtiah cu thil cu si taktak awkah a ṭha tuk a lo i lungawṭawm in an um ko rih. Cucaah, "Hika ah hin zei tal ei awk nan ngei maw?" tiah a hal hna. ⁴² Annih nih ngasa em cia pakhat kha an pek i ⁴³ aa lak i an hmaiah cun a ei. ⁴⁴ Cun annih cu a thawh hna i, "Nan sin i ka rak um lio i kan chimhmi hna kha mah hi hrimhrim hi pei an si cu: Moses Phungbia chung le profet hna nih an ṭialmi chung le Salm chungah keimah kong an rak ṭialmi vialte cu a tlin dih awk a si," tiah a ti. ⁴⁵ Cun an lungthin kha a hun pemh hna i Cathiang sullam kha an hun hngalh. ⁴⁶ Annih cu a thawh hna i, " ’Messiah nih cun sifahnak kha a in lai i ni thumnak ni ah thihnak in a tho ṭhan lai, ⁴⁷ cun amah min in sual ngaihchihnak le sual ngaihthiamnak kong kha Jerusalem khua in i thawk in miphun vialte hna sinah chim a si lai,’ tiah aa ṭial. ⁴⁸ Cun nannih cu hi thil vialte a hngaltu tehte nan si. ⁴⁹ Cun keimah hrimhrim nih ka Pa nih bia aa kammi kha nan cungah ka run thlah lai. Sihmanhsehlaw cunglei in ṭhawnnak kha nan cung i a tlun hlantiang khuapi chung hin hngak ko u," tiah a ti hna. ⁵⁰ Cun khuapi chung khan a chuahpi hna i Bethani khua tiang a kalpi hna. Khika ah a kut a hler i thluachuahnak a pek hna. ⁵¹ Thluachuah a pek lio hna ah cun an sinin aa ṭhen i vancung ah a kal. ⁵² Amah cu an biak i lunglawm ngaiin Jerusalem ah an kir i ⁵³ an caan vialte cu Biakinn chungah khan Pathian thangṭhatnak caah an hman.