LEVITIKAS

LEVITIKAS

¹ Bawipa nih Moses cu a kawh i tonnak thlam chungin a chawnh i hi bangin a ti: ² "Israel mi hna sinah cun chim law, annih sinah: Nannih lakah ahohmanh nih Bawipa sinah pekchanhnak nan tuah tikah saṭil pekchanhnak cu cawrun chungin siseh, tuurun chungin siseh, nan rak put lai, ti hna. ³ "A pekchanhnak cu cawrun chungin khangh thawinak a si ahcun, a tum do a tlami kha pek a si lai; Bawipa hmaiah amah cu cohlan a si nakhnga tonnak thlam innka ah cun a pek lai; ⁴ amah nih khangh thawinak sa a lu cungah cun a kut a chiah lai i amah caah remnak tuahnak caah cohlanpiak a si lai. ⁵ Cun Bawipa hmaiah cawtum kha a thah lai i Aaron fapa hna, tlangbawi hna nih khan, sa thi cu an pek lai i, tonnak thlam innka i a ummi biakṭheng kha a velchum in an theh lai. ⁶ Cun khangh thawinak sa cu a phaw a hawh lai i a can cikcek lai; ⁷ cun tlangbawi Aaron fapa hna nih cun biakṭheng cungah cun mei an kau lai i a ningcang tein mei cungah cun thing an chiah lai; ⁸ cun Aaron fapa hna tlangbawi hna nih cun biakṭheng cung mei cung thing cungah cun sazam hna cu, a lu le a thau cu a ningcang tein an chiah hna lai; ⁹ sihmanhsehlaw a chungril hna le a ke hna cu ti in an ṭawl hna lai. Cun tlangbawi nih a dihlak in khangh thawinak caah biakṭheng cungah a khangh lai; mei in thawinak, Bawipa caah rimthaw a si lai. ¹⁰ "Khangh thawinak ca i a pekchanhmi cu tuurun chungin siseh, meheh run chungin siseh a si ahcun, a tum dotla a si lai; ¹¹ cun Bawipa hmaiah a ummi biakṭheng chaklei kamah a thah lai i Aaron fapa hna tlangbawi hna nih khan a thi cu biakṭheng kha a velchum in an theh lai. ¹² Cun a can cikcek lai, a lu he a thau he, cun tlangbawi nih biakṭheng cung mei cung thing cungah cun a ningcang tein a chiah hna lai; ¹³ sihmanhsehlaw a chungril le a ke hna cu ti in a ṭawl hna lai. Cun tlangbawi nih a dihlak te cun a pek lai i biakṭheng cungah a khangh lai; khangh thawinak, mei in thawinak, Bawipa caah rimthaw a si lai. ¹⁴ "Bawipa sin i a pekchanhmi cu vate khangh thawinak a si ahcun, a pekchanhmi ṭhuro si hna seh laileng no si hna seh a rak put hna lai. ¹⁵ Cun tlangbawi nih biakṭheng ah a rak put lai i a lu cu cat lak in a merh lai i biakṭheng cungah a khangh lai; cun a thi cu biakṭheng sirah cun a thlor lai; ¹⁶ cun a cok cu a hmul he a lak lai i biakṭheng pawng i nichuahlei kam vutcam chiahnak hmun ah cun a hlonh lai; ¹⁷ a thlaki a thlongh hna lai, sihmanhsehlaw a pum cu a cheu lai lo. Cun tlangbawi nih biakṭheng cungah cun, mei cung thing cungah cun a khangh lai; mah cucu khangh thawinak, mei in thawinak, Bawipa caah rimthaw cu a si.

¹ "Ahohmanh nih changvut thawinak kha Bawipa sin i thawinak ah a rak put tikah, a pekchanhmi cu changvut dipmite a si lai; chiti a toih lai i frankinsen a toih lai i ² Aaron fapa hna tlangbawi hna sinah khan a rak put lai. Cun cu chung cun changvut dipmi le chiti cu a frankinsen vialte he pei khat in a lak lai; cun tlangbawi nih cun mah hi cu hngalh camcinnak caah biakṭheng cungah a khangh lai; mei in thawinak, Bawipa caah rimthaw a si lai. ³ Cun changvut thawinak chungin a taangmi cu Aaron le a fapa hna caah a si lai; mah hi cu mei in thawinak Bawipa sin pekmi hna lakah a thiang bik a si ve. ⁴ "Changreu rawhnak um chung i rawhmi changvut thawinak cu na pekchanh tikah, thilnu telh lo changvut dip chiti he cawhmi changreu a si lai, asiloah, thilnu telh lo changreu pan chiti thuhmi a si lai. ⁵ Na pekchanhmi cu u-kang chungah reumi changvut thawinak a si ahcun, thilnu telh lomi changvut dip chiti he cawhmi a si lai; ⁶ na hmal cikcek lai i chiti na toih lai; mah cucu changvut thawinak a si. ⁷ Cun na pekchanhmi cu um in chuanmi changvut thawinak a si ahcun changvut dip le chiti in na ser lai. ⁸ Hi thil in sermi changvut thawinak cu Bawipa sinah na rak put lai; tlangbawi sinah na chanh tikah biakṭheng ah a kalpi lai. ⁹ Cun tlangbawi nih changvut thawinak chung cun hngalh camcinnak kha a lak lai i biakṭheng cungah a khangh lai; mah cucu mei in thawinak, Bawipa caah rimthaw a si lai. ¹⁰ Cun changvut thawinak chungin a tangmi cu Aaron le a fapa hna caah a si lai; mah hi cu mei in thawinak Bawipa sin pekmi hna lakah a thiang bik a si ve. ¹¹ "Bawipa sinah nan rak putmi changvut thawinak paohpaoh cu thilnu telh in sermi a si lai lo; zeitintiah thilnu siseh khuaihliti siseh Bawipa sinah mei in thawinak caah nan khang lai lo. ¹² Theitlai hmasa bik thawinak caah cun Bawipa sinah nan rak put ko hna lai, sihmanhsehlaw rimthaw caah cun biakṭheng cungah nan khang hna lai lo. ¹³ Nan changvut thawinak vialte cu cite nan phulh hna lai; nan Pathian he biakamnak cite cu nan changvut thawinak vialte chungin nan bauter lai lo; nan pekmi vialte sinah cite nan pek chih lai. ¹⁴ "Bawipa sinah theitlai hmasa bik hna changvut thawinak nan pek ahcun, nan theitlai hmasa bik hna changvut thawinak caah cun a voi tharmi chungin lakmi, mei in reu i rialmi fang nan pek lai. ¹⁵ Cun chiti nan toih lai i frankinsen nan toih ve lai; mah cucu changvut thawinak pakhat a si. ¹⁶ Cun tlangbawi nih hngalh camcinnak caah cun rialmi fang le chiti cawhmi a cheu cu, frankinsen a dihlak he, a khangh lai; mah cucu Bawipa sinah mei in thawinak a si.

¹ "Mi pakhatkhat nih a pekchanhmi cu daihnak thawinak pekchanhnak a si ahcun, cawrun chungin saṭil pakhatkhat, a pa siseh a nu siseh, a pekchanh ahcun, Bawipa hmaiah dotla a pek awk a si lai. ² Cun a pekchanhmi lu cungah a kut a chuan lai i tonnak thlam innka ah a thah lai i Aaron fapa hna, tlangbawi hna nih khan, a thi cun biakṭheng kha a velchum in an theh lai. ³ Cun daihnak thawinak pekchanhnak chungin, Bawipa sinah mei in thawinak caah, a chungril khuhtu thau le, a kiar vialte le, ⁴ a kal pahnih le an cung i a tai zawn ah a ummi thau le, kal hna he a lak chihmi a thin tuamtu cu a pek hna lai. ⁵ Cun Aaron fapa hna nih biakṭheng cungah mei cung i thing cung i khangh thawinak sa cungah cun an khangh lai; mei in thawinak, Bawipa caah rimthaw a si. ⁶ "A pekchanhmi cu, Bawipa sin i daihnak thawinak pekchanhnak caah, tuurun chungin saṭil pakhat a pa siseh a nu siseh a si ahcun, dotla a si lai. ⁷ A pekchanhmi cu tuufa a si ahcun Bawipa hmaiah a pek lai. ⁸ A laksawng lu cungah cun a kut a chuan lai i tonnak thlam hmaiah a thah lai; cun Aaron fapa hna nih a thi cu biakṭheng a velchum ah khan an theh lai. ⁹ Cun daihnak thawinak pekchanhnak chung cun, Bawipa sin i mei in thawinak caah, a thau kha le, a thaumi a mei cu a thluan in, a kengruh tiangin a hun khoihmi le, a chungril a khuhtu thau le a kiar vialte le, ¹⁰ a kal pahnih a tai zawn i a ummi thau he, cun a thin tuamtu a kal hna he a lak chihmi cu a pek lai. ¹¹ Cun tlangbawi nih biakṭheng cungah cun Bawipa sinah mei in pekmi rawl ah a khangh lai. ¹² "A pekchanhmi cu meheh a si ahcun, Bawipa hmaiah a pek lai. ¹³ A lu cungah a kut a chuan lai i tonnak thlam hmaiah a thah lai; cun Aaron fapa hna nih a thi cu biakṭheng a velchum ah khan an theh lai. ¹⁴ Cun mah chung cun, Bawipa sinah mei in thawinak caah amah laksawng ah, a chungril a khuhtu thau le, a kiar vialte le ¹⁵ a kal pahnih a tai zawn i a ummi thau he, cun a thin tuamtu a kal hna he a lak chihmi cu a thawi lai. ¹⁶ Cun tlangbawi nih biakṭheng cungah rimthaw ca i mei in thawimi rawl ah a khangh hna lai. Thau vialte cu Bawipa ta a si. ¹⁷ Thau siseh thi siseh nan ei lai lo, mah hihi nan chan chung vialte, nan umnak hmun kip ah, zungzal nawlbia a si lai."

¹ Cun Bawipa nih Moses cu, "Israel mi kha chim hna law, ² timh ciammam si loin sualnak a tuah i Bawipa nawlbia a buarmi hna cu a tanglei nawlbia hi an zulh a hau lai, va ti hna. ³ Sualnak a tuahmi cu Tlangbawi Ngan a si i mizapi cungah mawhnak a tlunter a si ahcun, cawtum no dotla pakhat Bawipa sinah a sualnak hna caah cun a thawi lai. ⁴ Cawtum cu tonnak thlam innka ah Bawipa hmaiah cun a rak put lai i cawtum lu cungah cun a kut a chuan lai i Bawipa hmaiah cun cawtum cu a thah lai. ⁵ Cun chiti thuhmi tlangbawi nih cawtum thi tlawmpal cu a lak lai i tonnak thlam ah a rak put lai; ⁶ thi chungah cun tlangbawi nih a kutdong a hnim lai i hmunthiang puanzar hmai Bawipa hmaika ah cun thi cu tlawmpal in voi sarih a theh lai. ⁷ Cun tlangbawi nih tonnak thlam chung a ummi rimthaw zihmui biakṭheng ki hna ah cun, Bawipa hmaika ah, thi cu tlawmpal a thuh lai. Cun cawtum thi a taang mi cu tonnak thlam innka ah a ummi khangh thawinak biakṭheng hram ah cun a thlet lai. ⁸ Cun sual thawinak cawtum thau vialte cu a chuah dih lai, a chungril tuamtu thau siseh, a kiar siseh, ⁹ a kal pahnih a tai zawn ah a ummi le an thau si hna seh, a thin tuamtu siseh, a lak hna lai i ¹⁰ daihnak thawinak ca i pekchanhmi cawtum a thau a tuah bantuk khan, khangh thawinak biakṭheng cungah a khangh hna lai. ¹¹ Sihmanhsehlaw cawtum phaw le a sa vialte cu, a lu he, a ke hna he, a chungril hna he, a ek he, ¹² cawtum cu a pumpi in riahbuk lengah hmun thiang pakhat vutcam thletnak hmun ah cun, a kalpi lai i thing cungah a khangh lai; vutcam thletnak hmun ah cun khangh a si lai. ¹³ "Israel mi bu nih an bupi in hngalh loin sualnak an tuah i cu thil cu zapi hmuh lomi thil a si i Bawipa nih tuah lo awk tiin nawl a pekmi pakhatkhat cu an tuah i an mawh ahcun, ¹⁴ annih nih an tuahmi sualnak cu a langh tikah, an zapi in sual thawinak caah cawtum no pakhat an thawi lai i tonnak thlam hmaiah an rak put lai. ¹⁵ Cun an bu chung upa hna nih cawtum lu ah cun Bawipa hmaika ah an kut an chuan lai i cawtum cu Bawipa hmaika ah an thah lai. ¹⁶ Cun chiti thuhmi tlangbawi nih cawtum thi cu tlawmpal in tonnak ah a rak put lai i ¹⁷ tlangbawi nih cun sathi chungah cun a kutdong a hnim lai i Bawipa hmaiah puanzar hmaiah cun voi sarih a theh lai. ¹⁸ Cun sathi cu tlawmpal in tonnak thlam chungah a ummi biakṭheng ki ah cun a thuh lai, Bawipa hmaika ah cun; cu sathi a taangmi cu tonnak thlam innka ah a ummi khangh thawinak biakṭheng hram ah cun a thlet lai. ¹⁹ Cun a thau vialte cu a lak dih lai i biakṭheng cungah a khangh lai. ²⁰ Cu bantukin cawtum cu a tuah lai; sual thawinak cawtum a tuah bantuk khan, mah hi zong cu a tuah ve lai; cun tlangbawi nih cun annih caah remnak a ser lai i annih cu ngaihthiam an si lai. ²¹ Cun cawtum cu riahbuk lengah a kalpi lai i a hmasa cawtum a khangh bantuk khan a khangh ve lai; mah hihi mi zapi ca i sual thawinak a si. ²² "Uktu pakhatkhat nih sualnak a tuah tikah, Bawipa a Pathian nih tuah lo awk i nawl a pekmi thil pakhatkhat kha hngalh loin a tuah i a mawh tikah, ²³ cu sualnak a tuahmi cu a hngalh ahcun, aa thawinak caah meheh pakhat, a pa dotla, a rak put lai. ²⁴ Amah nih meheh lu cungah cun a kut a chuan lai i Bawipa hmai i khangh thawinak an thahnak hmun ah khan a thah lai; mah hihi sual thawinak a si. ²⁵ Cun tlangbawi nih sual thawinak thisen cu tlawmpal in a kutdong in a tawh lai i khangh thawinak biakṭheng ki ah cun a thuh hna lai i a tangmi a thi cu khangh thawinak biakṭheng hram ah cun a thlet lai. ²⁶ Cun a thau vialte cu biakṭheng ah a khangh hna lai, daihnak thawinak pekchanhnak sathau bantuk khan; cu bantuk cun tlangbawi nih a sualnak caah cun remnak a tuahpiak lai i ngaihthiam a si lai. ²⁷ "Zaran chungin pakhatkhat nih Bawipa nih tuah lo awk i nawl pekmi thil pakhatkhat tuah in, hngalh lo i sualnak a tuah i a mawh a si ahcun, ²⁸ sualnak a tuahmi kha a hngalh tikah aa thawinak caah meheh pakhat, a nu dotla, a tuahmi a sualnak caah cun a rak put lai. ²⁹ Cun sual thawinak lu cungah cun a kut a chuan lai i sual thawinak cu khangh thawinak hmun ah khan a thah lai. ³⁰ Cun tlangbawi nih a thi cu tlawmpal in a kutdong in a lak lai i khangh thawinak biakṭheng ki ah khan a thuh hna lai i a taangmi a thi cu biakṭheng hram ah cun a thlet lai. ³¹ Cun a thau vialte cu daihnak thawinak chungin a thau lak a si bang khan a lak dih lai i tlangbawi nih biakṭheng cungah Bawipa ca i rimthaw ah a khangh lai; cun tlangbawi nih a caah remnak a tuahpiak lai i ngaihthiam a si lai. ³² "Sual thawinak ca i a pekchanhmi ah tuufa a rak put ahcun, a nu dotla a rak put lai i ³³ sual thawinak lu cungah cun a kut a chuan lai i sual thawinak caah khangh thawinak an thahnak hmun ah khan a thah lai. ³⁴ Cun tlangbawi nih sual thawinak sathi cu tlawmpal in a kutdong in a lak lai i khangh thawinak biakṭheng ki ah cun a thuh hna lai i a tangmi a thi cu biakṭheng hram ah a thlet lai. ³⁵ Cun a thau vialte cu daihnak thawinak ca i pekchanhmi tuufa chungin a thau lak a si bantuk khan a lak lai i, tlangbawi nih biakṭheng cungah, Bawipa sinah mei in pekchanhmi hna cungah khan, a khangh lai. Cun tlangbawi nih sualnak a tuahmi caah khan remnak a serpiak lai i ngaihthiam a si lai."

¹ "Ahohmanh nih thil a hmuhmi ah siseh, a hngalhmi ah siseh, hngaltu a si i zapi hmaiah chiatsertertu aw a theih zongah a chim duh lo ahcun, a sual a ṭhat lonak kha amah nih a in lai. ² Cun, ahohmanh nih a thiang lomi thil, a thiang lomi saram ruak siseh, a thiang lomi saṭil ruak siseh, a thiang lomi a lawnmi ruak siseh a tongh i amah nih a hngalh lo i aa buar ahcun, amah nih a hun hngalh cangka in a mawh lai. ³ Cun ahohmanh nih minung thian lonak, zei bantuk thian lonak phun hmanh in thianglo si ai kun, cun amah nih a hngalh lo i a buar ahcun, amah nih a hun hngalh tikah a mawh lai. ⁴ Cun ahohmanh nih ṭhat lonak tuah awk siseh, ṭhatnak tuah awk siseh, i ruat cungcang loin a hmur in zei bantuk chiatsernak hmanh si ai kun, a ser i amah nih a hngalh lo ahcun, a hun hngalh tikah hi chiatsernak pakhatkhat cungah a mawh lai. ⁵ Hi thil pakhatkhat cungah a mawh ahcun, sualnak a tuahmi kha a phuan lai i ⁶ sualnak a tuahmi caah khan Bawipa sinah sual thawinak a rak put lai, tuurun chungin a nu, tuufa siseh meheh siseh, sual thawinak caah a si lai; cun tlangbawi nih a sualnak caah remnak a serpiak lai. ⁷ "Sihmanhsehlaw tuufa kha a ngeih nih a tlinh lo ahcun, sualnak a tuahmi caah khan sual thawinak caah ṭhuro pahnih siseh, laileng no pahnih siseh, Bawipa sinah a rak put lai, pakhat cu sual thawinak caah a si lai i pakhat cu khangh thawinak caah a si lai. ⁸ Tlangbawi sinah a rak put hna lai i tlangbawi nih cun sual thawinak ding ca cu a thawi hmasa lai; a hngawng cu a merh lai, sihmanhsehlaw a lu cu a chat lai lo i ⁹ sual thawinak thisen cu tlawmpal in biakṭheng sirah a theh lai i thisen a taangmi cu biakṭheng hram ah a zor lai; mah cucu sual thawinak a si. ¹⁰ Cun, pahnihnak cu a phunglam ning in khangh thawinak caah a thawi lai i sualnak a tuahmi caah khan tlangbawi nih remnak a serpiak lai i ngaihthiam a si lai. ¹¹ "Sihmanhsehlaw ṭhuro pahnih siseh, laileng no pahnih siseh, a ngeih nih a tlinh lo ahcun, sualnak a tuahmi thawinak caah khan, sual thawinak caah changvut dip ephah cheu hra cheu khat a rak put lai; chiti a toih lai lo, frankinsen zong a toih lai lo, zeitintiah mah hi cu sual thawinak a si. ¹² Cun tlangbawi sinah a rak put lai i tlangbawi nih pei khat in a lak lai i biakṭheng cungah Bawipa sin i mei in thawinak cungah cun hngalh camcinnak ah a khangh lai; mah cucu sual thawinak a si. ¹³ Cu bantukin tlangbawi nih a caah, hi thil pakhatkhat hna cung i sualnak a tuahmi caah cun remnak a serpiak lai i ngaihthiam a si lai. Cun a taangmi cu changvut thawinak i bantuk khan tlangbawi caah a si lai." ¹⁴ Bawipa nih Moses kha hi bangin a chimh, ¹⁵ "Ahohmanh nih phung a buar i Bawipa thil a thiangmi pakhatkhat cungah hngalh loin a sual ahcun, Bawipa sin i phungbuar thawinak caah tuurun chungin tuukawng pakhat dotla a rak put lai; hmunthiang i shekel ning khan ngun shekel zeizat man a si kha na tuak lai; mah cucu phungbuar thawinak a si. ¹⁶ A thiangmi thil cung i a palhsualnak caah cun rulhnak a tuah lai i a cheu nga cheu khat a chap lai i tlangbawi kha a pek lai; cun tlangbawi nih phungbuar thawinak tuukawng khan remnak a serpiak lai i ngaihthiam a si lai. ¹⁷ "Ahohmanh nih Bawipa nih tuah lo awk i nawl a pekmi tuahnak in a sual ahcun, a hngalh lo hmanh ah, a mawh ko, a ṭhat lonak cu amah nih a in lai. ¹⁸ Tuurun chungin tlangbawi sinah tuukawng pakhat dotla, nangmah nih phungbuar thawinak caah a man a za na timi a rak put lai i tlangbawi nih remnak, hngalh loin a tuahmi a palhnak caah khan, a serpiak lai i ngaihthiam a si lai. ¹⁹ Mah cucu phungbuar thawinak a si; Bawipa hmaiah a mawh ko."

¹ Bawipa nih Moses sinah hitin a ti, ² "Ahohmanh nih, a innpa kha chawva kennak kong ah siseh ṭilva zohkhenhnak kong ah siseh a hlen i, ramhnak in siseh, a innpa kha hremnak in siseh, ³ thiltlau kha a hmuh i cu kong ah lihchimnak le ding loin chiatsernak in siseh, Bawipa cungah a sual i phung a buar ahcun mah hi thil vialte minung nih an tuah tawnmi hna chungah hin ⁴ pakhatkhat ah a sual i a mawh tikah, a firmi siseh, hramhram in a lakmi siseh, amah an kentermi siseh, thiltlau a hmuhmi siseh, ⁵ ding loin chiat a serhnawhmi zei thil paoh siseh a rulh lai; tling tein a rulh lai i a cheu nga cheu khat a chap lai i a phungbuar thawinak ni ah a ngeitu sinah khan a pek ṭhan lai. ⁶ Cun tlangbawi sinah Bawipa sin i a pekchanhmi phungbuar thawinak cu a rak put lai, tuurun chungin tuukawng pakhat dotla, nangmah nih phungbuar thawinak caah a man a za na timi a si lai; ⁷ cun tlangbawi nih cun Bawipa hmaiah remnak a serpiak lai i, a mawhnak thil a tuahmi paohpaoh kong ah ngaihthiam a si lai." ⁸ Bawipa nih Moses sinah hi bangin a ti, ⁹ "Aaron le a fapa hna cu hi bangin nawl pe hna: Mah hihi khangh thawinak phunglam a si. Khangh thawinak cu biakṭheng cung tappi ah cun zan khuadei zinglei tiang chiah a si lai i biakṭheng mei cu a alh camcin lai. ¹⁰ Cun tlangbawi nih a puan hmangṭhia cu aa hruk lai i a pum cungah a puan hmangṭhia tawhrolh cu aa hrolh lai i, biakṭheng cung i mei nih a kangh dihmi khangh thawinak vutcam cu a lak lai i biakṭheng kamah a chiah hna lai. ¹¹ Cun a puan kha aa phoih hna lai i puan dang aa aih lai i vutcam cu riahbuk leng hmunthiang ah a kalpi lai. ¹² Biakṭheng cung i mei cu alhter camcin a si lai, a mih awk a si lai lo; zing fate in tlangbawi nih a cungah thing a tih lai i a cungah khangh thawinak cu a ningcang tein a chiah lai i, a cungah daihnak thawinak hna thau cu a khangh lai. ¹³ Biakṭheng cungah cun mei alhter a si thluangthluan lai; a mih awk a si lai lo. ¹⁴ "Cun mah hihi changvut thawinak phunglam a si. Aaron fapa hna nih Bawipa hmaika ah biakṭheng hmaiah an pekchanh lai. ¹⁵ Cun pakhat nih changvut thawinak changvut dip cu pei khat in a lak lai, changvut thawinak cung i a ummi chiti le frankinsen vialte he, cun mah hihi hngalh camcinnak caah Bawipa ca i rimthaw ah biakṭheng cungah a khangh lai. ¹⁶ Cun a tangmi cu Aaron le a fapa hna nih an ei lai; hmunthiang ah thilnu telh loin an ei lai; tonnak thlam tual chungah an ei lai. ¹⁷ Thilnu he reu a si lai lo. Mei in keimah sin i thawinak hna chungin anmah vo ah ka pek cang hna; a thiang bikmi thil a si ve, sual thawinak le phungbuar thawinak bantuk khan. ¹⁸ Aaron tefale hna chungin pa paohpaoh nih an ei lai; Bawipa sinah mei in thawinak hna chungin nan tefa chan tiangin zungzal nan vo a si lai; cu thil a tawngmi hna paoh cu thleidan an si lai." ¹⁹ Bawipa nih Moses sinah hi bangin a ti, ²⁰ "Mah hihi chiti thuh a si ni ah Aaron le a fapa hna nih Bawipa sinah an pekchanh awk thawinak a si lai. Pekchanh tawnmi changvut thawinak ah changvut dip ephah pakhat cheu hra cheu khat, a cheu cu zinglei ah, a cheu zanlei ah. ²¹ Chiti he ukang cungah ser a si lai; ṭhate i cawh in na rak put lai, changvut thawinak bantukin reu cia in a dar tete in na rak put lai i, Bawipa ca i rimthaw ah na pekchanh lai. ²² Aaron fapa hna lak in amah a chaangtu ding i chiti thuhmi tlangbawi nih zungzal nawlbia bangin Bawipa sinah a pekchanh lai; a dihlak in khangh a si lai. ²³ Tlangbawi changvut thawinak kip cu a dihlak in khangh a si lai; ei a si lai lo." ²⁴ Bawipa nih Moses sinah hi bangin a ti, ²⁵ "Aaron le a fapa hna sinah hi bangin chim tuah, Mah hihi sual thawinak phunglam a si. Khangh thawinak thahnak hmun ah khan sual thawinak cu Bawipa hmaiah thah a si lai; mah cucu a thiang bik a si ve. ²⁶ Sualnak caah a pechantu tlangbawi nih cun a ei lai; hmun thiang pakhat ah ei a si lai, tonnak thlam tual chungah cun. ²⁷ A sa a tawngtu paoh cu thleidan a si lai; cun a thi kha puan cungah a tlak ahcun, a tlakmi puan cu hmun thiang pakhat ah na suk lai. ²⁸ Cun sa chuannak tlak-um cu khuai a si lai; sihmanhsehlaw marlei in chuan a si ahcun mah cucu ṭawl in ti in tlengh a si lai. ²⁹ Tlangbawi hna lak i pa paoh nih cun an ei lai; mah hihi a thiang bik a si ve. ³⁰ Sihmanhsehlaw hmunthiang chungah remnak tuahnak ca i tonnak thlam chungah rak putmi thi an laknak sual thawinak cu, ei a si lai lo; mei in khangh a si lai.

¹ "Mah hihi phungbuar thawinak phungbia a si. A thiang bik a si ve. ² Khangh thawinak an thahnak hmun ah khan phungbuar thawinak cu an thah lai i a thisen cu biakṭheng a velchum ah khan an theh lai. ³ A thau cu a dihlak in pekchanh a si lai, a thaumi a mei, a chungril, a khuhtu thau, ⁴ a kal pahnih a tai zawn ah a ummi thau he, cun a kal he a lak chihmi a thin tuamtu ⁵ mah hna hi tlangbawi nih Bawipa sin i mei in thawinak ah biakṭheng cungah a khangh hna lai; cucu phungbuar thawinak a si. ⁶ Tlangbawi hna lak i pa paoh nih cun mah cucu an ei lai; hmun thiang pakhat ah ei a si lai; mah cucu a thiang bik a si ve. ⁷ Phungbuar thawinak cu sual thawinak bantuk a si, an pahnih caah phunglam pakhat a si; sa cu remnak a sertu tlangbawi ta a si lai. ⁸ Cun mi zei khangh thawinak hmanh a thawipiaktu tlangbawi nih cun, an pekchanhmi khangh thawinak phaw cu a co lai. ⁹ Cun changvut thawinak kip cu, reunak um chung i reumi siseh, um chung i reumi siseh, ukang chung i reumi siseh, a pechantu tlangbawi ta a si lai. ¹⁰ Cun changvut thawinak kip cu, chiti he cawh in siseh a ro in siseh, Aaron fapa vialte hna nih aa tluk cio in an co lai. ¹¹ "Cun mah hihi mi nih Bawipa sinah an pek awk daihnak thawinak pekchanhnak phunglam cu a si. ¹² Lawmhnak ca i pek a si ahcun, lawmh thawinak he cun thilnu telh lo changreu chiti he cawhmi, thilnu telh lo chang per tete chiti thuhmi le, chiti he ṭha tein cawhmi changvut dip cu a pekchanh chih lai. ¹³ Lawmhnak ca i daihnak thawinak a pekchanhmi ah cun, thilnu telhmi changreu zong a rak put chih lai. ¹⁴ Cun mah cu chung cun thawinak kip chungin changreu pakhat a thawi lai, Bawipa sin i thawinak caah; mah cucu daihnak thawinak hna thisen a thehtu tlangbawi ta kha a si lai. ¹⁵ Cun lawmhnak ca i daihnak thawinak pekchanhmi sa cu thawinak a tuah ni ah cun ei a si lai; a thaizing tiangin zeihmanh a taanter lai lo. ¹⁶ Sihmanhsehlaw a pekchanhmi thawinak cu biakam thawinak siseh, mah lungtho tein thawinak siseh a si ahcun, thawinak a tuah ni ah ei a si lai i a tangmi cu a thaizing zongah ei a si lai, ¹⁷ sihmanhsehlaw a kiptuh tiang thawinak sa a tangmi cu mei in khangh a si lai. ¹⁸ A daihnak thawinak pekchanhmi sa cu a ni thumnak ni i ei a si ahcun, a pechantu cu cohlan a si lai lo, a pechantu zong cu pekchanh ah relpiak a si lai lo; thil fihnung a si lai i a eitu nih a ṭhat lonak cu a in lai. ¹⁹ "A thiang lomi thil zeihmanh a tawngtu sa cu ei a si lai lo; mei in khangh a si lai. Sa cu a thiangmi vialte hna nih an ei lai, ²⁰ sihmanhsehlaw thian lonak a cung i a um lioah Bawipa daihnak thawinak pekchanhmi sa a eimi cu, cu mi cu a miphun sinin hlawt a si lai. ²¹ Cun ahohmanh nih thil thianglo, minung thian lonak siseh, saram thianglo siseh, a thiang lomi thil fihnung zeipaoh siseh, a tawngh i Bawipa daihnak thawinak pekchanhmi sa a ei ahcun cu mi cu a miphun sinin hlawt a si lai." ²² Bawipa nih Moses sinah, ²³ "Israel mi hna sinah va chim tuah, cawtum siseh, tuu siseh, meheh siseh, a thau nan ei lai lo. ²⁴ Amah tein a thimi saram siseh, sa nih a sehmi siseh, a thau nan ei hrimhrim lai lo, sihmanhsehlaw zeidang caah cun nan hman khawh lai. ²⁵ Zeitintiah Bawipa sinah mei in pekmi thawinak sa a thau a eimi kip cu a miphun sinin hlawt a si lai. ²⁶ Cu hlei ah zei thi paoh, va thi siseh, saram thi siseh, khuazei nan umnak hmanh ah nan ei lai lo. ²⁷ Thi zei hmanh a eimi cu a miphun sinin hlawt a si lai," a ti. ²⁸ Bawipa nih Moses sinah hitin a ti, ²⁹ "Israel mi hna sinah hi bangin va chim tuah, Bawipa sinah a pekchanhmi daihnak thawinak a pekchanhmi nih Bawipa sinah a rak put lai; a daihnak thawinak hna a pekchanhmi chung cun Bawipa sin i mei in thawinak ding hna cu ³⁰ amah kut hrimhrim in a rak put lai; Bawipa hmaiah a ii cu hninh thawinak caah a hninh khawh nakhnga, a thau cu a ii he a rak put lai. ³¹ Tlangbawi nih a thau cu biakṭheng cungah a khangh lai, sihmanhsehlaw a ii cu Aaron le a fapa hna caah a si lai. ³² Cun na daihnak thawinak hna pekchanhmi chungin thawinak caah a orhlei phei cu tlangbawi cu na pek lai; ³³ Aaron fapa hna lakah daihnak thawinak hna thi le thau a thawitu nih a orhlei phei cu a co lai. ³⁴ Zeitintiah Israel mi hna nih an pekchanhmi daihnak thawinak chungin tlangbawi Aaron le a fapa hna cu hninhmi ii le thawimi phei cu ka pek cang hna; mah cucu Israel mi sinin a zungzal in an hmuh awk a si. ³⁵ Bawipa sin i mei in thawinak hna chungin Aaron le a fapa hna nih an covo cu a si; mah cucu Bawipa tlangbawi rianṭuan awk ca i pek an si ni ah an sinah thianter a si; ³⁶ chiti thuh an si ni ah Israel mi nih mah hihi an pek hna awk cu Bawipa nawlpekmi a si; an tefa chin tiangin a zungzal in an hmuh awk cu a si." ³⁷ Mah hihi khangh thawinak, changvut thawinak, sual thawinak, phungbuar thawinak, thianternak le daihnak thawinak hna phunglam cu a si. ³⁸ Israel mi kha Bawipa sinah nan thawinak kha rak pu tuah hna u tiah Sinai ramlak i nawl a pek hna ni i Bawipa nih Moses kha Sinai Tlang i nawl a pekmi cu a si.

¹ Bawipa nih Moses sinah, ² "Aaron cu a fapa hna he kalpi hna law, puan hna le thuhnak chiti le thilnu telh lo changreu bawm khat le sual thawinak cawtum le tuukawng pahnih hna kha kalpi ve hna; ³ cun tonnak thlam innka ah mi zapi cu pum hna," tiah a ti. ⁴ Cun Moses nih Bawipa nih nawl a pek bangin a tuah i mi zapi cu tonnak thlam innka ah cun an i pum. ⁵ Cun Moses nih mi zapi sinah cun, "Mah hihi tuah awk tiah Bawipa nawl pekmi cu a si," tiah a ti. ⁶ Cun Moses nih Aaron le a fapa hna cu a ratpi hna i ti in a kholh hna. ⁷ Cun angki leng cu a hruk i, taisawm a sawmh i, tlangbawi angki fual a hruk i, tlangbawi angki a aih i, dawh tein tahmi tlangbawi angki hri in a sawmh, mah hri cun a ṭem chih. ⁸ Cun ṭangbenh kha a cungah a benh i ṭangbenh chungah cun Urim le Thummim kha a chiah hna. ⁹ Cun lupawng a ponh i a lupawng cungah, hmailei ah, sui kheng, a thiangmi bawi luchin cu, a benh; Moses nih Bawipa nih nawl a pek bang khan a tuah. ¹⁰ Cun Moses nih thuhnak chiti kha a lak i puan biakinn le a chungah a ummi thil vialte kha a thuh hna i a thianter hna. ¹¹ Cun chiti cu tlawmpal in biakṭheng ah cun voi sarih a theh i, biakṭheng le a umkheng vialte le a hmaihum le a hunnak cu thianter awk caah a thuh hna. ¹² Cun thuhnak chiti cu tlawmpal in Aaron lu ah a toih i a thuh i a thianter. ¹³ Cun Moses nih Aaron fapa hna cu a ratpi hna i angki leng a hruk hna i taisawm a sawmh hna i lupawng a ponh hna, Bawipa nih Moses nawl a pek bang khan. ¹⁴ Cun sual thawinak cawtum cu a rak put i Aaron le a fapa hna nih sual thawinak cawtum lu cungah cun an kut an chuan. ¹⁵ Moses nih a thah i a thi cu a lak i biakṭheng ki hna ah cun a velchum in a kutdong in a thuh, cun biakṭheng ca i remnak ser awkah biakṭheng cu a thianter i a hramah thi cu a thlet i a thianter. ¹⁶ Cun a chungril a tuamtu thau vialte le a thin tuamtu le a kal pahnih cu an thau he a lak hna i Moses nih biakṭheng cungah a khangh hna. ¹⁷ Sihmanhsehlaw cawtum cu a phaw le a sa le a ek he riahbuk lengah mei in a khangh, Bawipa nih Moses kha nawl a pek bang khan. ¹⁸ Cun khangh thawinak tuukawng kha a hun pek; Aaron le a fapa hna nih tuukawng lu cungah cun an kut an chuan. ¹⁹ Cun Moses nih a thah i a thi cu biakṭheng velchum ah a theh. ²⁰ Cun tuukawng cu a can i Moses nih a lu le a sa le a thau cu a khangh hna. ²¹ Cun a chungril le a ke hna cu ti in a ṭawl hna i Moses nih tuukawng cu a pum in biakṭheng cungah khangh thawinak caah, rimthaw Bawipa sin i mei in thawinak caah, a khangh, Bawipa nih Moses nawl a pek bang khan. ²² Cun a dang tuukawng pakhat, thleidannak tuukawng cu, a pek; cun Aaron le a fapa hna nih tuukawng lu cungah an kut an chuan. ²³ Cun Moses nih a thah i a thi cu tlawmpal in a lak i Aaron orhlei hnakhaw parte le a orhlei siapi le a orhlei kepi ah a thuh hna; ²⁴ cun Aaron fapa hna cu an ratpi hna i Moses nih thi cu tlawmpal in an orhlei hnakhaw par tete le an orhlei siapi le an orhlei kepi ah a thuh hna; cun Moses nih thi cu biakṭheng velchum ah a thlet. ²⁵ Cun a thau le a thaumi a mei le a chungril tuamtu thau vialte le a thin tuamtu le a thau he a kal pahnih le a orhlei phei cu a lak hna; ²⁶ cun thilnu telh lo changreu bawm Bawipa hmai i a ummi chung khan thilnu telh lo changreu pakhat le chiti he cawhmi changreu hlum khat le changreu pante dar khat kha a lak hna i sathau cungah le orhlei phei cungah khan a chiah hna; ²⁷ cun mah thil vialte hi Aaron le a fapa hna kut chungah a chiah hna i Bawipa hmaiah hninh thawinak caah a hninh hna. ²⁸ Cun Moses nih an kut chungin a lak hna i khangh thawinak he biakṭheng cungah a khangh hna, thleidannak thawinak, rimthaw Bawipa ca i mei in thawinak caah a khangh hna. ²⁹ Cun Moses nih a ii cu a lak i Bawipa hmai i hninh thawinak caah a hninh; Bawipa nih Moses nawl a pek bangin, mah cucu thleidannak tuukawng chungin Moses vo cu a si. ³⁰ Cun Moses nih thuhnak chiti tlawmpal le biakṭheng cung i a ummi thi tlawmpal cu a lak i Aaron le a puan hna cu a theh hna i, a fapa hna le a fapa hna puan hna zong cu a theh hna; cu bangin Aaron le a puan hna le a fapa hna le a fapa hna puan hna cu a thianh ṭi hna. ³¹ Cun Moses nih Aaron le a fapa hna cu, "Tonnak thlam innka ah sa kha chuang u law, cuka ah sa le thleidannak thawinak bawm chung i a ummi changreu cu ei u, ’Aaron le a fapa hna nih an ei lai,’ tiah nawl ka pek bang khan, a ti. ³² Cun sa le changreu a tangmi cu mei in nan khangh lai. ³³ Cun tonnak thlam innka in ni sarih chung nan chuak lai lo, nanmah thleidannak ni hna a tlin hlantiang, zeitintiah nanmah thleidannak caah ni sarih a herh lai. ³⁴ Nihin i tuahmi bang hin, nannih ca i remnak ser awkah Bawipa nih nawl a kan pek cang. ³⁵ Tonnak thlam innka ah, chunzan in ni sarih chung, Bawipa nih an fialmi hna tuah awkah, nan thih sual nakhnga lo nan um lai; zeitintiah cu bang cun nawl pek ka si," tiah a ti. ³⁶ Cun Bawipa nih Moses in nawl a pekmi tuah awk thil vialte cu Aaron le a fapa hna nih an tuah.

¹ Ni riat ni ah Moses nih Aaron le a fapa hna le Israel upa hna kha a auh hna i ² Aaron sinah, "Cawtum no pakhat in sual thawinak caah, cun khangh thawinak caah tuukawng pakhat, dotla veve, la hna law, Bawipa hmaiah thawi hna. ³ Cun Israel mi hna sinah, ’Sual thawinak caah meheh tum pakhat le, khangh thawinak caah cawfa pakhat le tuufa pakhat, kum khat veve a si i dotla veve a simi le, ⁴ daihnak thawinak hna caah cawtum pakhat le tuukawng pakhat la hna law, Bawipa hmaiah thawi hna, cun chiti he cawhmi changvut thawinak zong; zeitintiah nihin ah Bawipa cu nannih sinah a lang lai,’ tiah ti hna," tiah a ti. ⁵ Cun Moses nih nawl a pekmi cu tonnak thlam hmaiah an hun hruai hna i aa pummi nih an dihlak in an hun naih i Bawipa hmaiah an dir. ⁶ Cun Moses nih, "Mah hihi Bawipa nih tuah awkah nawl an pekmi hna cu a si; cun Bawipa sunparnak cu nannih sinah a lang lai," tiah a ti. ⁷ Cun Moses nih Aaron sinah, "Biakṭheng cu hei naih law, na sual thawinak le na khangh thawinak cu thawi hna, cun nangmah le mi hna caah remnak ser tuah; cun mi hna thawinak cu rak pu law, an caah remnak ser tuah, Bawipa nawl peknak bang khan," tiah a ti. ⁸ Cu caah Aaron nih biakṭheng cu a hei naih i sual thawinak cawfa kha a thah, mah cucu amah caah a si. ⁹ Cun Aaron fapa hna nih a thi kha a sinah an rak put i thi chungah cun a kutdong a hnim i biakṭheng ki ah cun a neh i thi cu biakṭheng hram ah cun a thlet; ¹⁰ sihmanhsehlaw sual thawinak sa i a thau le a kal hna le a thin tuamtu hna cu Bawipa nih Moses nawl a pek bang khan, biakṭheng cungah a khangh. ¹¹ A sa le a phaw cu mei in riahhmun lengah a khangh hna. ¹² Cun, khangh thawinak cu a thah i Aaron fapa hna nih a thi cu an pek i biakṭheng cu a velchum in a theh. ¹³ Cun khangh thawinak sa cu a zamzam in a lu he an hun pek i biakṭheng cungah a khangh hna. ¹⁴ Cun a chungril le a ke kha a ṭawl hna i khangh thawinak he biakṭheng cungah a khangh hna. ¹⁵ Cun mizapi thawinak cu a pek; sual thawinak meheh, mizapi ca i a simi cu, a lak i a thah i sualnak caah a thawi, sual thawinak hmasa bik bang khan a tuah. ¹⁶ Cun khangh thawinak kha a pek i a phunglam ning in a thawi. ¹⁷ Cun changvut thawinak kha a pek; pei khat in a lak i zinglei khangh thawinak hleiah biakṭheng cungah a khangh. ¹⁸ Cawtum le tuukawng zong kha a thah hna, mah cucu mi zapi ca i daihnak thawinak an si. Aaron fapa hna nih a thi cu an pek i biakṭheng cu a velchum in a theh. ¹⁹ Cun cawtum thau le tuutum thau le, a thaumi mei le, chungril tuamtu le, kal hna le, thin tuamtu cu an pek i ²⁰ an thau cu an ii cungah an chiah hna i an thau cu biakṭheng cungah a khangh, ²¹ sihmanhsehlaw an ii le a orhlei phei cu Bawipa hmai i hninh thawinak caah Aaron nih a hninh hna, Moses nawlpek bangin. ²² Cun Aaron nih mi zapi leiah cun a kut a hler hna i thluachuah a pek hna. Cun sual thawinak le khangh thawinak le daihnak thawinak hna a thawi dih in a rung ṭum. ²³ Cun Moses le Aaron cu tonnak thlam chungah an lut i an hung chuah tikah mi zapi kha thluachuahnak an pek hna i, Bawipa sunparnak cu mi vialte sinah cun a lang. ²⁴ Cun Bawipa hmaika in mei a hung chuak i biakṭheng cung i khangh thawinak le thau cu a kangh hna; cun mi vialte nih khan an hmuh tikah an au i an bawk.

¹ Cun Aaron fapa Nadab le Abihu nih an meilaknak kheng cu an i lak veve i a chungah mei an chiah i a cungah zihmui an phulh i Bawipa hmaiah a thiang lomi mei cu an thawi, nawl a pek lomi hna kha an tuah. ² Cun Bawipa hmaika in mei a hung chuak i a kangh hna i Bawipa hmaika ah cun an thi. ³ Khi tikah Moses nih Aaron sinah, "Mah hihi Bawipa nih a chimmi cu a si, ’Ka pawng i a ummi hna lakah thianghlim in kaa langhter lai i mi vialte hmaiah thangṭhat ka si lai,’ a ti," tiah a ti. Cun Aaron cu dai tein a um ko. ⁴ Cun Moses nih Aaron pa unau Uzziel fapa Mishael le Elzafan cu a kawh hna i, "Hmaiah hung chuak u, hmunthiang hmai in nan unau hna cu riahhmun lengah chuahpi hna u," tiah a ti hna. ⁵ Cucaah an ra chuak i Moses nih a chim bang khan riahhmun lengah an angkileng in an hnuh hna. ⁶ Cun Moses nih Aaron le a fapa hna Eleazar le Ithamar sinah, "Nan sam i thlah hlah u, nan puan kha thlek hna hlah u, nan thih sual i mibu dihlak cungah thinhunnak a rat sual nakhnga lo; sihmanhsehlaw Bawipa nih a kanghtermi mei kanghnak cu nan unau, Israel chungkhar dihlak nih khan, ṭah hna seh. ⁷ Cun tonnak thlam innka khan, nan thih sual nakhnga lo, chuak hlah u; zeitintiah Bawipa thuhnak chiti cu nan cungah a um," tiah a ti. Cun Moses bia bangin an tuah. ⁸ Cun Bawipa nih Aaron cu a chawnh i, ⁹ "Nangmah nih siseh, na fapale hna nih siseh, tonnak thlam chungah nan luh tikah mitsur hang siseh zu siseh nan ding lai lo, nan thih sual nakhnga lo; mah cucu a zungzal in nan tefa hna chan tiangin nawlbia a si lai. ¹⁰ Nannih nih a thianghlim le zaran tawnghmi, cun a thianglo le a thiang kha nan thleidan lai i ¹¹ Israel mi hna kha Moses in Bawipa nih a chimmi nawlbia vialte kha nan cawnpiak hna lai," tiah a ti. ¹² Cun Moses nih, Aaron le a tangmi a fapa hna Eleazar le Ithamar sinah, "Bawipa sinah mei in thawinak hna chungin a tangmi changvut thawinak kha la u law, biakṭheng pawngah thilnu telh loin ei u, zeitintiah mah cucu a thiang bik a si. ¹³ Bawipa sinah mei in pekmi thawinak hna chungin nangmah le na fapa hna vo a simi kha, nawlpek nan si bangin hmunthiang ah nan ei lai. ¹⁴ Sihmanhsehlaw hninhmi ii le thawimi phei cu, nangmah le na fapa hna le na fanu hna le tiah, a thiangmi hmun paoh ah nan ei lai. Zeicaahtiah Israel mi hna pekchanhmi daihnak thawinak chungin, mah hna cu nangmah le na fapa hna vo ah pek nan si. ¹⁵ Thawimi phei le hninhmi ii cu Bawipa hmai i hninh thawinak ca i hninh awkah, mei in thawinak hna thau he nan rak put lai, mah cucu nangmah le na fapa hna caah, Bawipa nawl peknak bangin, zungzal in nan vo a si lai," tiah a ti. ¹⁶ Cun Moses nih sual thawinak meheh kong kha fel tein a hlat i zohhmanh, an rak khangh diam cang ai! Cun Aaron fapa a taangmi hna Eleazar le Ithamar cungah a thin a hung i, ¹⁷ "Zeicahdah sual thawinak cu hmunthiang chungah nan ei lo? A thiang bik thil mi zapi ṭhat lonak phortu ding i Bawipa hmai i remnak serpiaknak ca i mah cucu nannih kha pekmi a si ṭung! ¹⁸ Zohhmanh, a thi cu hmunthiang a chunglei ah nan luhpi lo. Nannih nih nawl kan pek hna bang khan hmunthiang chungah nan rak ei hrimhrim awk a si," tiah a ti. ¹⁹ Cun Aaron nih Moses sinah, "Zohhmanh, nihin ah Bawipa hmai i an sual thawinak le an khangh thawinak kha an thawi cang, sihmanhsehlaw mah hi bantuk thil hna nih hin an ka tlak kun! Nihin ah sual thawinak kha rak ei ning law, Bawipa mithmuh ah cohlan awk tlak a rak si hlei hnga maw?" a ti. ²⁰ Cun Moses nih mah cucu a theih tikah a lung a tling ko.

¹ Cun Bawipa nih Moses le Aaron sinah, ² "Israel mi hna sinah va chim tuah u, vawlei cung i a ummi saram vialte lakah mah hna hi a nungmi thil nan ei awk cu an si lai. ³ Saram lakah a tin a ṭe i aa ṭhen i rawlret a khaimi cu nan ei lai. ⁴ Asinain rawlret khaimi lakah siseh, tin ṭemi lakah siseh, mah hna hi cu nan ei lai lo: kalauk, rawlret cu a khai nain a tin a ṭet lo caah nannih caah a thianglo a si. ⁵ Cun vawrvok, rawlret a khai nain a tin a ṭet lo caah nannih caah a thianglo a si. ⁶ Cun saveh, rawlret a khai nain a tin a ṭet lo caah a thianglo a si. ⁷ Cun vok, a tin a ṭe i aa ṭhen ko nain rawlret a khai lo caah, nan caah a thianglo a si. ⁸ An sa nan ei lai lo i an ruak nan tawng lai lo; nan caah a thianglo an si. ⁹ "Ti chung i a ummi thil vialte lakah mah hna hi nan ei lai. Rili chungah siseh, tiva chungah siseh, ti chung i a ummi, ṭeh le phokphawher a ngeimi thil paohpaoh cu nan ei hna lai. ¹⁰ Sihmanhsehlaw rili chungah siseh, tiva chungah siseh, a ummi, ṭeh le phokphawher a ngei lomi, ti chungah a lawn in a lawnmi thil le ti chung i a nungmi thil hna cu, nannih caah fihnung an si. ¹¹ Nannih caah fihnung an si zungzal lai; an sa nan ei lai lo i an ruak cu fihnung ah nan rel hna lai. ¹² Ti chungah a ummi thil zeipaoh ṭeh le phokphawher a ngei lomi cu nan caah fihnung a si. ¹³ "Cun, va hna lakah mah hna hi fihnung ah nan rel awk an si lai, nan ei hna lai lo, fihnung an si: muvanlai, tettet, mu-ar-cawi, ¹⁴ kaite, muchia phun kip, ¹⁵ langak phun kip, ¹⁶ ostrik, thlanghnap, rili-va mupi phun kip, ¹⁷ chimbu, tingala, tivapual, ¹⁸ ti-ar, pelikan, langta, ¹⁹ tivakok, ram varang phun kip, chuangtuar, le palak. ²⁰ "Buṭit-khaubawk thla a ngei i ke pali in a kalmi vialte cu nan caah fihnung an si. ²¹ Sihmanhsehlaw thla ngeimi buṭit-khaubawk ke pali in a kalmi lakah a keṭeng cung i vawlei i pernak ca i ke a ngeimi cu nan ei lai. ²² Cu hna chungah cun, khauzik phun kip, khuangbai phun kip, buṭit phun kip, le khaubawk phun kip cu nan ei khawh hna lai. ²³ Sihmanhsehlaw thla ngeimi buṭit-khaubawk ke pali a ngeimi vialte cu nannih caah fihnung an si. ²⁴ "Cun mah thil hna thawng hin thianglo nan cang lai; an ruak a tawngtu paoh cu zanlei tiang an thur lai i ²⁵ an ruak in zeipaoh a latu nih a thilpuan a suk lai i zanlei tiang thianglo a si lai. ²⁶ A tin a ṭe nain a tin aa ṭhen lomi saram siseh, rawlret a khai lomi saram siseh, nannih caah a thianglo a si; a tawngmi hna paoh cu thianglo an si lai. ²⁷ Ke pali in a kalmi saram hna lakah a kebor in a kalmi vialte cu nannih caah thianglo an si; an ruak a tawngtu paoh cu zanlei tiang thianglo an si lai i ²⁸ an ruak a phortu nih a thilpuan kha a suk lai i zanlei tiang thianglo a si lai; annih cu nan caah thianglo an si. ²⁹ "Cun vawlei ah a lawn in a lawnmi hna lakah mah hna hi nan ca i thianglo an si: zuhri, zu, kinglang ngan phun kip, ³⁰ ṭekral, tang, kinglang, thetse rawn kinglang le conghrang. ³¹ A lawnmi thil vialte lakah mah hna hi nan ca i thianglo an si; mah hna hi an thih tikah a tawngtu hna paoh cu zanlei tiang thianglo an si lai. ³² Cun, an thih tikah an tlakhnawhmi thilri paoh cu a thur lai, thing thilri siseh, puan siseh, saphaw siseh, sawngkhoi siseh, hman awk thil a simi paohpaoh; ti chungah ciah a si hrimhrim lai i zanlei tiang thianglo a si lai; cu tikah a thiang lai. ³³ Cun annih lak i pakhatkhat cu tlak um a simi paohpaoh cungah a tlak ahcun, a chung i a ummi vialte cu thianglo an si lai i nan khuai lai. ³⁴ Cu um chung i ei awk a ummi zei rawl paoh, ti nih a ciahmi paoh cu, thianglo a si lai; cun cu bantuk um paohpaoh chung i din awk thil vialte cu thianglo an si lai. ³⁵ Cun zei thil paoh an ruak pelpawi a zeipaoh nih a tlakmi hna cu thianglo an si lai; changreu rawhnak a si zongah, meiphu a si zongah, khuai cikcek a si lai; thianglo an si i nan caah thianglo an si lai. ³⁶ Sihmanhsehlaw cerhti siseh tikuang a chung i ti a ummi cu siseh a thiang lai, asinain zeipaoh an ruak a tawngtu paoh cu thianglo an si lai. ³⁷ Cun an ruak zei zawn paoh nih cin awk a simi thlaici zei paoh a nenh ahcun, a thiang ko; ³⁸ sihmanhsehlaw thlaici cu ti in ciah a si i an ruak zei zawn paoh nih a nenh ahcun, nan caah thianglo a si. ³⁹ "Cun nan eimi saram zeipaoh a thih ahcun, a ruak a tawngtu paoh cu zanlei tiang thianglo a si lai, ⁴⁰ cun a ruak a eimi paoh cu a thilpuan a suk hna lai i zanlei tiang thianglo a si lai; a ruak a putu paoh zong nih a thilpuan a suk hna lai i zanlei tiang thianglo a si lai. ⁴¹ "Vawlei ah a vah in a vak lulhmalhmi thil paoh cu fihnung a si; ei awk a si lai lo. ⁴² A paw in a lawnmi zeipaoh siseh, ke pali in a kalmi zeipaoh siseh, ke tampi a ngeimi zeipaoh siseh, vawlei ah a vah in a vakmi thil vialte cu nan ei hna lai lo; zeitintiah fihnung an si. ⁴³ A vah in a vakmi thil zeihmanh khan nannih nih fih nan i nunter lai lo; cun cu hna cun a thur zong nan i thurter lai lo, thianglo nan si sual hnga. ⁴⁴ Zeitintiah keimah cu Bawipa nan Pathian ka si; cu caah i thianter u law, thianghlim u, keimah ka thian caah. Vawlei ah a vah in a vakmi thil zeihmanh in i thurter hlah u. ⁴⁵ Zeitintiah keimah cu nan Pathian si awkah, Izipt ram in an chuahpitu hna Bawipa ka si; cucaah nannih cu nan thian awk a si, keimah ka thian caah," tiah a ti. ⁴⁶ Mah hihi saram le va le ti chung i a cawlcangmi thilnung kip le vawlei i a vakmi thil kip kong i phunglam a si; ⁴⁷ a thiang le thianglo le a nungmi thil ei awk a si hngami le a nungmi thil ei awk lo a si hngami hna thleidannak caah a si.

¹ Bawipa nih Moses sinah hitin a ti, ² "Israel mi kha chim hna: Nu nih fa a pawi i fapa a hrin ahcun, ni sarih thianglo a si lai; nuphung a hngalh caan bantuk khan thianglo a si lai. ³ Cun a ni riat ni ah a cuarpar tan a si lai. ⁴ Cun thisen ruangah cun i thianh lengmang in ni sawm thum le ni thum a um rih awk a si lai; aa thianhnak ni a tlin hlan lo cu thil thiang zeihmanh a tawng lai lo, hmunthiang chung zongah a lut lai lo. ⁵ Sihmanhsehlaw fanu a hrin ahcun, zarh hnih thianglo a si lai, nuphung a hngalh caan bantuk khan; cun thisen ruangah cun i thianh lengmang in ni sawm ruk le ni ruk a um rih awk a si lai. ⁶ "Cun aa thianhnak ni kha a tlin tikah, fapa caah siseh, fanu caah siseh, tlangbawi sinah, tonnak thlam innka ah khangh thawinak caah tuufa kum khat a timi a rak put lai i sual thawinak caah laileng no pakhat maw ṭhuro pakhat dik a rak put lai. ⁷ Cun amah nih Bawipa hmaiah a thawi lai i remnak a serpiak lai; cun a thi chuahnak cun amah cu a thiang lai. Mah hihi fapa a hringmi caah siseh, fanu a hringmi caah siseh, phunglam a si. ⁸ Cun tuufa kha a ngeih khawh lo ahcun, ṭhuro pahnih maw, laileng no pahnih dik a lak hna lai, pakhat cu khangh thawinak caah a si lai i a dang cu sual thawinak caah a si lai; cun tlangbawi nih remnak a serpiak lai i amah cu a thiang lai."

¹ Bawipa nih Moses le Aaron sinah hitin a ti, ² "Mi pakhatkhat cu a pum cuar cungah phinnak siseh, pharnak siseh, bonak siseh pakhatkhat a ngeih i cucu a pum cuar cung i thinghmui zawtnak ah a can tikah, cu tikah cun tlangbawi Aaron sinah siseh, tlangbawi a simi a fapa pakhatkhat sinah siseh, ratpi a si lai i ³ tlangbawi nih cun a pum cuar cung i zawtnak a umnak zawn cu a zoh lai; zawtnak a umnak zawn hmul cu a ran i a zawtnak cu a pum cuar nakin a thuk deuh a lawh ahcun, cucu thinghmui zawtnak a si; tlangbawi nih a zoh dih tikah amah cu thianglo a si tiah a thanh lai. ⁴ Sihmanhsehlaw a pum cuar i a bomi cu a ran i cuar nakin a thuk deuh a lawh lo i a hmul kha a ran lo ahcun, tlangbawi nih zawtnak a ngeimi cu ni sarih chung a hren lai i ⁵ ni sarihnak ni ah cun a zoh lai, cun amah hmuhnak ah zawtnak cu amah ning a si i a cuar ah zawtnak cu a karh lo ahcun, tlangbawi nih a dang ni sarih a hren rih lai; ⁶ tlangbawi nih cun ni sarihnak ni ah a zoh ṭhan lai i zawtnak a umnak zawn cu a dulh i zawtnak cu cuar ah khan a karh lo ahcun, tlangbawi nih cun amah cu a thiang tiah a thanh lai; mah cucu a phar sawhsawhmi a si; a thilpuan a suk hna lai i a thiang ko lai. ⁷ Sihmanhsehlaw amah thiannak ca i tlangbawi sin i aa hmuh hnuah khan a pharmi cu a cuar ah a karh ahcun, tlangbawi hmaiah khan a chuak ṭhan lai; ⁸ cun tlangbawi nih a zoh lai i a cuar ah a pharnak kha a karh ahcun tlangbawi nih cun amah cu a thianglo tiah a thanh lai; mah cucu thinghmui zawtnak a si. ⁹ "Mi pakhatkhat cu thinghmui zawtnak nih a tlaih tikah tlangbawi sinah chuahpi awk a si lai; ¹⁰ cun tlangbawi nih a zoh lai i a cuar ah a rangmi hmul a chuahtertu a rangmi phinnak a um i a phinnak ah cun a sa hring a langh ahcun, ¹¹ cucu a pum cuar chung i thinghmui hma hlun a si, tlangbawi nih amah cu thianglo a si tiah a thanh lai; a hreng lai lo, zeitintiah amah cu thianglo a si ko. ¹² Cun thinghmui zawtnak cu cuar ah a chuah i, tlangbawi nih a hmuh khawh tiangah a zawmipa a cuar cu a lu in a ke tiang thinghmui zawtnak nih cun chuak lakin a khuh ahcun, ¹³ tlangbawi nih a zoh lai i thinghmui zawtnak nih khan a pum dihlak kha a chuah cang ahcun, cu pa cu cu zawtnak in a thiang tiah a thanh lai; a rang ah a cang dih cang i amah cu a thiang. ¹⁴ Sihmanhsehlaw a cungah sa hring a langh ahcun amah cu thianglo a si lai. ¹⁵ Tlangbawi nih sa hring cu a zoh lai i amah cu thianglo a si tiah a thanh lai; sa hring cu thianglo a si, zeicahtiah thinghmui zawtnak a si. ¹⁶ Sihmanhsehlaw a sa hring cu aa thlen ṭhan i a rang ah aa can ṭhan ahcun tlangbawi sinah a ra lai i ¹⁷ tlangbawi nih a zoh lai i a zawtnak cu a rang ah aa thlen ahcun, tlangbawi nih a zawmi cu a thiang tiah a thanh lai; amah cu a thiang cang. ¹⁸ Cun pakhatkhat cuar i khuaihli a um i a dam tikah, ¹⁹ cu khuaihli umnak i a rangmi phinnak siseh, a sen nawn a rang nawn in a bomi siseh a chuah ahcun, tlangbawi sinah hmuhsak awk a si lai; ²⁰ cun tlangbawi nih a zoh lai i cuar nakin thuk deuh a lawh i a hmul kha a ran ahcun, tlangbawi nih amah cu thianglo a si tiah a thanh lai; mah cucu thinghmui zawtnak a si, hma chungin a hung langmi a si. ²¹ Sihmanhsehlaw tlangbawi nih a zoh i a cung i a ummi hmul kha a ran lo i, cuar nakin a thuh deuh lo i sihmanhsehlaw a dulh ahcun, tlangbawi nih ni sarih a hren lai; ²² cun cuar ah a karh ahcun tlangbawi nih amah cu thianglo a si tiah a thanh lai; a cuar cu zawtnak a ing. ²³ Sihmanhsehlaw a bomi cu kaa khat lawngah a um i a karh lo ahcun, khuaihli hma hmape a si; tlangbawi nih a thiang tiah a thanh lai. ²⁴ "Asiloah, mipa pakhat cu a cuar a kangh i a kanghnak tit hring cu a bo i sen nawn rang nawn in a um, asiloah a ran tikah, ²⁵ tlangbawi nih a zoh lai i a bonak ka i hmul cu a ran i cuar nak thuk deuh in a langh ahcun, cucu thinghmui zawtnak a si; mei hma in a hung chuakmi a si tlangbawi nih amah cu thianglo a si tiah a thanh lai; thinghmui zawtnak a si. ²⁶ Sihmanhsehlaw tlangbawi nih a zoh i a bonak ka i a hmul kha a ran lo i cuar nakin a thuk deuh lo i a dulh ahcun, tlangbawi nih amah cu ni sarih a hren lai i ²⁷ ni sarihnak ni ah a zoh lai; cuar ah a karh ahcun tlangbawi nih amah cu thianglo a si tiah a thanh lai; cucu thinghmui zawtnak a si. ²⁸ Sihmanhsehlaw a bo cu kaa khat lawngah a um ko i cuar ah a karh lo i a dulh ahcun, mah cucu mei hma in a hung phingmi a si; tlangbawi nih amah cu a thiang ko tiah a thanh lai; zeicahtiah mah cucu mei hma hmape a si ko. ²⁹ "Pa nih siseh, nu nih siseh, an lu ah maw an khahmul ah maw zawtnak an ngeih tikah, ³⁰ tlangbawi nih zawtnak cu a zoh lai i cuar nakin thuk deuh in a langh i cuka hmul cu a en i a pan ahcun, tlangbawi nih amah cu thianglo a si tiah a thanh lai; mah cucu thakpherh, lu maw khahmul thinghmui zawtnak a si. ³¹ Cun tlangbawi nih a thakmi zawtnak cu a zoh i cuar nak i thuk deuh in a langh lo i a chungah hmul nak a um lo ahcun, tlangbawi nih cun thakpherh zawtnak a ngeimi cu ni sarih a hren lai; ³² ni sarih ni ah tlangbawi nih cu zawtnak cu a zoh lai i thakpherh cu a karh lo i a chungah hmul eng a um lo i thakpherh cu cuar nakin thuk deuh in a langh lo ahcun, ³³ a hmul cu amah nih aa meh lai; sihmanhsehlaw thakpherh umnak zawn cu a met lai lo; cun tlangbawi nih thakpherh zawtnak he a ummi cu a dang ni sarih a hren rih lai. ³⁴ Cun ni sarihnak ni ah cun thakpherh cu tlangbawi nih a zoh lai i cuar ah khan a karh lo i cuar nakin thuk deuh in a langh lo ahcun, tlangbawi nih cun amah cu a thiang tiah a thanh lai, cun a hnipuan a suk hna lai i a thiang lai. ³⁵ Sihmanhsehlaw aa thianh hnuah thakpherh cu a cuar ah khan a lawn ahcun, ³⁶ tlangbawi nih amah cu a zoh lai i thakpherh cu a cuar ah a lawn ahcun, tlangbawi nih hmul eng kha kawl a herh lai lo; amah cu thianglo a si. ³⁷ Sihmanhsehlaw a hmuhnak ah thakpherh cu amah bon a si i a umnak ah hmul nak an khoh ahcun, thakpherh cu a dam a si, amah cu a thiang; tlangbawi nih amah cu a thiang, tiah a thanh lai. ³⁸ "Pa nih siseh, nu nih siseh a pum cungah bonak, a rangmi bonak, a ngeih ahcun ³⁹ tlangbawi nih a zoh lai i pum cung cuar i bonak cu a ranning a dulh nawn ahcun, cucu takthak, cuar i a hung chuakmi a si; amah cu a thiang ko. ⁴⁰ "Mipa pakhatkhat cu a sam a tlong i a lu a kolh, sihmanhsehlaw a thiang ko. ⁴¹ Cun mipa pakhat cu a hmailei sam le a bep sam a tlong i a cal a ngau, sihmanhsehlaw a thiang ko. ⁴² Sihmanhsehlaw a lukheng dau ah cun siseh, a cal ngau ah cun siseh, a sen nawn a rang nawn in zawtnak bo a um ahcun, mah cucu a cal kolh ah siseh, a kheng kolh ah siseh, thinghmui zawtnak a chuakmi a si. ⁴³ Cu tikah tlangbawi nih amah cu a zoh lai i a kheng kolh ah siseh, a cal kolh ah siseh, zawtnak a hung phingmi cu sen nawn rang nawn in a um i pum cuar cung i thingmui zawtnak a chuakmi bantuk a si ahcun, ⁴⁴ amah cu mi thinghmui a si, amah cu thianglo a si; tlangbawi nih amah cu thianglo a si tiah a thanh hrimhrim lai; a zawtnak cu a lu cungah a um. ⁴⁵ "Mithinghmui, cu zawtnak a ngeimi nih cun, hni puan tlek aa aih lai i a sam cu a thlaiter lai i a hmur cunglei cu aa huh lai i, ’Ka thianglo, ka thianglo,’ tiah a au lai. ⁴⁶ Cu zawtnak a ngeih chung cu thianglo a si lai; amah cu thianglo a si ko; riahhmun lengah amah lawngin a um lai. ⁴⁷ "Puan zong, sahmul puan siseh, la hmangṭhia puan zong siseh; ⁴⁸ a tah in tahmi siseh, a phiar in phiarmi siseh, la hmangṭhia siseh, sahmul zong siseh; saphaw siseh zeipaoh saphaw in sermi siseh, ⁴⁹ thinghmui zawtnak a um i cu zawtnak cu puan ah siseh, saphaw ah siseh, a tah in tahmi ah siseh, a phiar in phiarmi ah siseh, zeipaoh saphaw in sermi ah siseh, a hring deuh in siseh, a sen deuh in siseh, a langh ahcun, thinghmui zawtnak a si i tlangbawi zohter awk a si. ⁵⁰ Cun tlangbawi nih zawtnak cu a zoh lai i zawtnak a ngeimi cu ni sarih a hren lai i ⁵¹ zawtnak cu ni sarihnak ni ah a zoh lai. Zawtnak cu puan ah, a tah in tahmi ah siseh, a phiar in phiarmi ah siseh, saphaw, zei ca paoh i an hmanmi saphaw ah siseh, a lawn ahcun cucu a fakmi phun thinghmui zawtnak a si; mah cucu thianglo a si. ⁵² Cun puan cu tahmi siseh, phiarmi siseh, sahmul siseh, la hmangṭhia siseh, saphaw in sermi paohpaoh siseh, thinghmui zawtnak umnak paoh cu a khangh lai, a fakmi phun thingmui zawtnak a si, mei ah khangh hrimhrim awk a si. ⁵³ "Cun tlangbawi nih a zoh i puan ah cun, tahmi siseh, phiarmi siseh, saphaw in sermi paohpaoh zong siseh, zawtnak cu a lawn lo ahcun, ⁵⁴ zawtnak a umnak puan cu a sukter hna lai i ni sarih chung a hren rih lai; ⁵⁵ cun tlangbawi nih zawtnak a umnak thil kha an suk hnuah a zoh lai. Cun zawtnak a umnak hmun kha a mui aa dan hlei lo ahcun, zawtnak kha a lawn lo nain, mah cucu thianglo a si; mei ah nan khangh lai, thinghmui zawtnak a umnak cu a hmailei i a si zongah, a hnulei i a si zongah nan khangh lai. ⁵⁶ "Sihmanhsehlaw tlangbawi nih a zoh i suk hnuah zawtnak cu a loh dengmang ahcun, cu zawn cu puan ah khan siseh, saphaw ah cun siseh, tahmi ah cun siseh, phiarmi ah cun siseh, a thleh lai; ⁵⁷ cun puan ah cun, tahmi ah siseh, phiarmi ah siseh, saphaw in sermi paoh ah siseh, a langh ṭhan ahcun a karh a si; cu zawtnak a umnak thil cu mei in nan khangh lai. ⁵⁸ Sihmanhsehlaw puan tahmi siseh, phiarmi siseh, saphaw in sermi paoh siseh, nan suk tikah zawtnak nih a kaltakmi cu, a voi hnihnak nan suk ṭhan lai i a thiang lai." ⁵⁹ Mah hihi, sahmul siseh, la hmangṭhia siseh, tahmi siseh, phiarmi siseh saphaw in sermi puan siseh, thinghmui zawtnak a ummi a thian le a thian lo khiahnak phunglam cu a si.

¹ Bawipa nih Moses sinah hitin a ti: ² "Mah hihi mithinghmui nih aa thianh ni ca i phunglam a si lai; tlangbawi sinah kalpi a si lai; ³ tlangbawi cu riahhmun lengah a chuak lai i a zoh lai. Cun mithinghmui chung i thinghmui zawtnak cu a dam ahcun, ⁴ tlangbawi nih cun thianh awk a simi caah cun a nungmi va thiang pahnih le sidar thing le thil sen le husop lak a fial hna lai; ⁵ cun tlangbawi nih ti luangmi cungah tlak um chungah va pakhat cu thah awkah nawl a pek hna lai. ⁶ A nungmi va cu sidar thing le thil sen le husop he a lak hna lai i ti luangmi cung i thahmi va thi chungah khan a nungmi va he cun a hnim hna lai; ⁷ cun thinghmui zawtnak in thianh awk a simi cu voi sarih a theh lai i amah cu a thiang tiah a thanh lai i a nungmi va cu ramlak ah cun a thlah lai. ⁸ Cun thianh awk a simi nih cun a hnipuan a suk hna lai i a sam vialte aa meh dih lai i ti in aa kholh lai i amah cu a thiang lai; cun cu hnuah cun riahnak hmun chungah cun a lut lai, sihmanhsehlaw amah buk lengah ni sarih a um lai. ⁹ Cun ni sarih ni ah a lu cung sam vialte aa meh dih lai; a khahmul le a mittlang hmul vialte aa meh dih lai. Cun a hnipuan kha a suk hna lai i a pum kha ti in aa kholh lai i amah cu a thiang lai. ¹⁰ "Cun ni riat ni ah do a tlami tuufa a pa pahnih le tuufa a nu pakhat kum khat a simi do a tlami le changvut thawinak i changvut dip ephah cheu hra cheu thum chiti he cawhmi le chiti thawl khat a lak lai. ¹¹ Cun tlangbawi a thianhtu nih cun thianh dingmi le mah thil hna hi Bawipa hmaiah, tonnak thlam innka ah khan a chiah hna lai. ¹² Cun tlangbawi nih tuufa a pa pakhat kha a lak lai i phungbuar thawinak caah a thawi lai, chiti thawl khat he cun, cun hninh thawinak caah a hninh hna lai, Bawipa hmaiah; ¹³ cun tuufa cu sual thawinak le khangh thawinak an thahnak hmun, hmun thiang chungah khan, a thah lai; zeitintiah phungbuar thawinak cu sual thawinak bantukin tlangbawi ta a si; a thiang bik a si. ¹⁴ Tlangbawi nih cun phungbuar thawinak sathi cu tlawmpal in a lak lai i thianh awk dingmi orhlei hnakhaw par le a orhlei siapi le a orhlei kepi ah a neh lai. ¹⁵ Cun tlangbawi nih thawl chung chiti cu tlawmpal in a lak lai i amah kehlei zapei kuar ah a thlet lai, ¹⁶ cun a kehlei kut zapei kuar i a ummi chiti cu a orhlei kutdong in a tawh lai i chiti cu tlawmpal in Bawipa hmaiah voi sarih a theh lai. ¹⁷ Cun a kut chung i a taangmi chiti cu tlawmpal in thianh awk a simi orhlei hnakhaw par le a orhlei siapi le a orhlei kepi cungah, phungbuar thawinak thi cungah khan a thuh lai; ¹⁸ tlangbawi kut chungah a tang rihmi chiti cu thianh awk a simi lu ah khan a thuh lai. Cun tlangbawi nih amah caah cun Bawipa hmaiah remnak a serpiak lai. ¹⁹ A thian lonak in thianh awk a simi caah khan remnak serpiak awkah tlangbawi nih sual thawinak kha a pek lai. Cun a hnuah khangh thawinak kha a thah lai i ²⁰ tlangbawi nih khangh thawinak le changvut thawinak cu biakṭheng cungah a thawi hna lai. Cuticun tlangbawi nih remnak a serpiak lai i amah cu a thiang lai. ²¹ "Sihmanhsehlaw amah cu sifak a si i cu zat cu a tlinh khawh lo ahcun, amah ca i remnak sernak caah tuufa a pa pakhat phungbuar thawinak i hninh awk caah, changvut dip ephah cheu hra cheu khat chiti he cawhmi changvut thawinak caah, cun chiti thawl khat a lak lai; ²² cun ṭhuro pahnih maw laileng no pahnih dik, a tlinh khawh deuh paohpaoh kha an si fawn lai; pakhat cu sual thawinak a si lai i pakhat cu khangh thawinak a si lai. ²³ Cun ni riat ni ah amah thianhnak caah tlangbawi sinah, tonnak thlam innka ah Bawipa hmaiah cun a rak put hna lai; ²⁴ tlangbawi nih phungbuar thawinak tuufa le chiti thawl khat cu a lak hna lai i Bawipa hmai i hninh thawinak caah tlangbawi nih cun a hninh hna lai. ²⁵ Phungbuar thawinak tuufa cu a thah lai i tlangbawi nih phungbuar thawinak sathi cu tlawmpal in a lak lai i thianh awk a simi orhlei hnakhaw par le a orhlei siapi le a orhlei kepi ah a neh hna lai. ²⁶ Cun tlangbawi nih cun chiti cu tlawmpal in amah a kehlei zapei kuar ah a thlet lai i ²⁷ a orhlei kutdong in a kehlei kut chung i a ummi chiti cu Bawipa hmaiah voi sarih a theh lai; ²⁸ cun tlangbawi nih thianh awk a simi a orhlei hnakhaw par le a orhlei siapi ah le a orhlei kepi ah, phungbuar thawinak thi thuhnak hmun ah khan a orhlei kut chung i a ummi chiti cu tlawmpal in a thuh lai; ²⁹ tlangbawi kut ah a tangmi chiti cu thianh awk a simi kha Bawipa hmai i remnak serpiak awkah a lu ah a thuh lai. ³⁰ Cun a tlinh khawhmi paoh, ṭhuro siseh laileng no siseh, ³¹ pakhat cu sual thawinak caah, pakhat cu khangh thawinak caah, changvut thawinak he hmunkhat ah a thawi lai; cun tlangbawi nih thianh liomi cu Bawipa hmaiah remnak a serpiak lai. ³² Mah hihi thingmui zawtnak a ngei i amah thianhnak caah a tlinh kho lomi ca i phunglam cu a si." ³³ Bawipa nih Moses le Aaron sinah hi bangin a ti: ³⁴ "Co awk i kan pekmi hna Kanaan ram chungah nan luh tikah, nan comi ram chung i inn pakhatkhat ah thinghmui zawtnak ka chiah ahcun, ³⁵ cu inn a ngeitu nih cun a ra lai i tlangbawi kha, ’Ka inn chungah hin zawtnak phun khatkhat um dawh a si ko,’ tiah a chimh lai. ³⁶ Inn chung i a ummi thil vialte cu thianglo ah thanh a si sual nakhnga lo, zawtnak va zoh awk i tlangbawi a kal hlanah khan, tlangbawi nih inn cu, rak lawnter u, tiah nawl a pek hna lai. Cu hnuah cun tlangbawi cu inn zoh awkah cun a lut lai. ³⁷ Zawtnak cu a zoh lai i zawtnak cu vampang ah a hring deuh a sen deuh in a umnak hmun a hmuh i a leng hawng nakin a thuk deuh a lawh ahcun, ³⁸ tlangbawi cu inn chungin innka in a chuak lai i inn cu ni sarih a hrenh lai. ³⁹ Cun ni sarih ni ah tlangbawi cu a ra ṭhan lai i a zoh lai; cun zawtnak cu inn vampang ah cun a rak karh ahcun, ⁴⁰ tlangbawi nih cun zawtnak a umnak lung cu la u law, khua lengah hmun thianglo pakhatkhat ah hlonh u, tiah nawl a pek hna lai. ⁴¹ Cun innchung cu a velchum in a ziahter hna lai i lung benhnak thung an ziahmi cu khua lengah hmun thianglo pakhatkhat ah an thlet lai; ⁴² cun lung dang an lak hna lai i kha lung hna umnak ah khan an chiah hna lai i lung benhnak thung dang zong kha an lak lai i inn cu an benh lai. ⁴³ "Lung cu an lak hna i inn cu an ziah i an benh hnuah zawtnak cu inn chungah cun a chuah ṭhan ahcun, ⁴⁴ tlangbawi cu a va kal lai i a zoh lai; zawtnak cu inn chungah cun a rak lawn ahcun mah cucu inn chung i a fak phun thinghmui zawtnak a si; mah cucu inn thianglo a si. ⁴⁵ Inn cu an ṭheh lai, a lung hna le a thing hna le inn i lung benhnak thung vialte hna he cun khualeng i hmun thianglo pakhat ah an thiar hna lai. ⁴⁶ Cu hleiah hrenh lio i cu inn ah a lutmi cu zanlei tiang thianglo a si lai; ⁴⁷ cu inn chung i a itmi nih cun a thil kha a suk hna lai; cu inn chung i rawl a eimi nih cun a thil kha a suk hna lai. ⁴⁸ "Sihmanhsehlaw tlangbawi a rat i a zoh i inn cu lungbenhnak thung in benh a si hnuah zawtnak cu inn chungah a karh lo ahcun, tlangbawi nih inn cu a thiang tiah a thanh lai, zeitintiah zawtnak cu a dam cang. ⁴⁹ Cun inn thianhnak caah cun va a hmemi pahnih cu sidar thing le thil sen le husop he tiah a lak hna lai i ⁵⁰ va pakhat cu tlak-um chungah a luangmi ti cungah a thah lai, ⁵¹ cun sidar thing le husop le thil sen cu a nungmi va he tiah a lak hna lai i a luangmi ti cung i thahmi va thi ah khan a hnim hna lai i inn cu voi sarih a theh lai. ⁵² Cuticun inn cu va thi le a luangmi ti le a nungmi va le sidar thing le husop le thil sen in a thianh lai; ⁵³ cun a nungmi va cu khua chungin ram lakah a zuanter lai; cu bangin inn caah cun remnak a ser lai i a thiang a si lai." ⁵⁴ Mah hihi zei bantuk thinghmui zawtnak paoh ca i phunglam a si: thakpherh caah siseh, ⁵⁵ puan i a ummi zawtnak caah siseh, inn i a ummi thinghmui zawtnak caah siseh, ⁵⁶ phinnak caah siseh, bonak caah siseh, pharnak caah siseh, ⁵⁷ zeitik ah dah a thianlo i zei tikah dah a thian ti langhternak caah an si. Mah hihi thinghmui zawtnak ca phunglam a si.

¹ Bawipa nih Moses le Aaron sinah hitin a ti: ² "Israel mi cu hi bangin chim hna u. Pa paohpaoh nih a pum chungin a chuakmi thil a ngeih ahcun cu a thil chuakmi cu a thianglo a si. ³ Mah hihi thil chuakmi ruang i a thian lonak ca i phunglam cu a si: a pum chung cun a chuah camcin ah siseh, a chuah cu a pih ah siseh, amah chungah thian lonak a si ko. ⁴ Cu thil chuakmi a ngeimi i a ihnak ihkhun paoh cu thianglo a si lai i a ṭhut nenhmi thil paoh cu thianglo a si lai. ⁵ Cun ahohmanh a ihkhun cu a tawngmi paoh nih a hnipuan cu a suk hna lai i ti in aa kholh lai i zanlei tiang thianglo a si lai. ⁶ Cun ahohmanh thil chuak ngeimi nih a ṭhut nenhmi thil cungah a ṭhumi paoh nih a hnipuan a suk hna lai i ti in aa kholh lai i zanlei tiang thianglo a si lai. ⁷ Cun ahohmanh thil chuak a ngeimipa pum a tawngmi cu a hnipuan a suk awk a si lai i ti in aa kholh lai i zanlei tiang thianglo a si lai. ⁸ Thil chuakmipa nih a thiangmi pakhatkhat cu cil a chak ahcun a hnipuan cu a suk hna lai i ti in aa kholh lai i zanlei tiang thianglo a si lai. ⁹ Thil a chuakmi nih aa citnak kengdan paohpaoh cu thianglo a si lai. ¹⁰ Amah toiah a ummi thil zeipaoh a tawngmi paoh cu zanlei tiang thianglo a si lai; cu bantuk thil a phortu nih cun a hnipuan a suk hna lai i ti in aa kholh lai i zanlei tiang thianglo a si lai. ¹¹ Cun thil chuak ngeimi nih a kut ti in tlengh loin mi pakhatkhat a tawngh ahcun a tawnghmi nih khan a hnipuan kha a suk hna lai i ti in aa kholh lai i zanlei tiang thianglo a si lai. ¹² Thil chuak a ngeimi nih a tawnghmi tlak um cu khuai a si lai i thing umkheng hna cu ti in tlengh an si lai. ¹³ "Cun thil chuakmi cu a thil chuakmi in a thian tikah amah thianhnak caah ni sarih aa rel lai i a hnipuan a suk hna lai i a luangmi ti ah a pum cu aa kholh lai i a thiang lai. ¹⁴ Cun ni riat ni ah ṭhuro pahnih maw laileng no pahnih dik aa put hna lai i Bawipa hmaiah tonnak thlam innka ah cun a ra lai i tlangbawi sinah cun a pek hna lai; ¹⁵ tlangbawi nih cun a thawi hna lai, pakhat cu sual thawinak caah, pakhat cu khangh thawinak caah; cun tlangbawi nih amah caah cun a thil chuakmi caah khan Bawipa hmaiah remnak a serpiak lai. ¹⁶ "Mipa pakhatkhat cu a ci a chuah ahcun a pum dihlak in ti in aa kholh lai i zanlei tiang thianglo a si lai. ¹⁷ Puan siseh saphaw siseh a ci nih a nehmi paoh cu ti in suk a si lai i zanlei tiang thianglo a si lai. ¹⁸ Pa nih nu he a ih i a ci a chuah ahcun an pahnih in ti in an i kholh lai i zanlei tiang thianglo an si lai. ¹⁹ "Nu nih a nuphung tawn a hngalh tikah, ni sarih chung thianglo in a um lai i ahohmanh amah a tawngtu cu zanlei tiang thianglo a si lai. ²⁰ A thianlo chung i a ihnak paoh cu thianglo a si lai; a ṭhutnak paoh zong thianglo a si lai. ²¹ Ahohmanh a ihnak a tawng paoh cu a hnipuan kha a suk lai i ti in aa kholh lai i zanlei tiang a thianlo awk a si lai. ²² Cun a ṭhuthnawhmi thil zeihmanh a tawngtu cu a hnipuan kha a suk lai i ti in aa kholh lai i zanlei tiang a thianlo awk a si lai; ²³ ihkhun siseh, a ṭhuthnawhmi thil zeipaoh siseh, a tawngh tikah zanlei tiang thianglo a si lai. ²⁴ Cun pa ahohmanh nih amah he a ih i a thian lonak cu a cungah a um ahcun cu pa cu ni sarih chung thianglo a si lai i a ihnak ihkhun paoh cu thianglo a si lai. ²⁵ "Nu nih nuphung a hngalh caan ah si loin a thi ni tampi a chuah ah siseh, cun a nuphung tawn nakin sau deuh a thi a chuah ahcun siseh, a thi a chuah chung vialte cu thianglo in a um ko lai; nu phung a hngalh caan i a thianlo bantukin thianglo a si ko lai. ²⁶ A thi a chuah chung vialte cu a ihnak ihkhun paoh cu a nuphung hngalh tawn caan i a ihkhun bantuk kha a si lai i a ṭhutnak paoh cu a thianlo tawn caan lio i a thianlo bantuk khan a si lai. ²⁷ Cun ahohmanh cu thil hna a tawngtu cu thianglo a si lai i a hnipuan kha a suk hna lai i ti in aa kholh lai i zanlei tiang thianglo a si lai. ²⁸ Sihmanhsehlaw a thichuahnak kha a thian ahcun ni sarih aa rel lai i cu hnuah cun a thiang lai. ²⁹ Cun ni riat ni ah cun ṭhuro pahnih maw laileng no pahnih dik a lak lai i tlangbawi sinah, tonnak thlam innka ah cun, a rak put hna lai. ³⁰ Tlangbawi nih pakhat cu sual thawinak caah, a dang pakhat cu khangh thawinak caah a thawi hna lai i amah cu Bawipa hmaiah thichuah i a thian lonak caah cun tlangbawi nih remnak a serpiak lai. ³¹ "Cu bangin Israel mi hna cu an thian lonak in nan fimkanter hna lai, annih lak i a ummi keimah puan biakinn thurternak in an thih sual nakhnga lo," a ti. ³² Thil chuak a ngeimi le ci chuak a ngeimi, cu thawngin a thiang lomi hna le nu amah thian lonak in a zawmi, cun ahopaoh, pa siseh, nu siseh, thil chuak a ngeimi paoh, ³³ cun thian lonak a ngeimi nu he a itmi zong, mah hna caah hin mah hihi phunglam cu a si.

¹ Aaron fapa pahnih nih Bawipa hmai an va naih i an thih hnuah khan Bawipa nih Moses cu a chawnh i ² Moses sinah hi bangin Bawipa nih a ti: "Na u Aaron cu va chim law, puanzar chung hmunthiang ah, kuang cung i a ummi velngeihnak ṭhutdan hmaiah cun zeitikhmanh ah lut hlah seh, a thi sual lai; zeitintiah velngeihnak ṭhutdan cungah cun minmei in ka lang lai. ³ Sihmanhsehlaw hi bangin Aaron nih hmunthiang chungah, sual thawinak caah cawtum no pakhat le khangh thawinak caah tuukawng pakhat he tiah, ⁴ la hmangṭhia angkileng cu aa hruk lai i la hmangṭhia tawhrolh cu aa hrolh lai, la hmangṭhia taisawm aa sawmh lai i la hmangṭhia lupawng aa ponh lai; mah hna hi thilpuan thiang an si. A pum cu ti in aa kholh lai i mah cucu aa hruk hna lai. ⁵ Cun Israel mibu sin cun meheh tum pahnih sual thawinak caah, tuukawng pakhat khangh thawinak caah a lak lai. ⁶ "Cun Aaron nih cawtum cu amah caah sual thawinak caah a thawi lai i amah le a innchungkhar caah remnak a ser lai. ⁷ Cu hnuah cun meheh pahnih kha a lak hna lai i Bawipa hmaiah tonnak thlam innka ah cun a chiah hna lai; ⁸ Aaron nih meheh pahnih hna cungah cun camcawh fung a khiah lai, camcawh fung pakhat cu Bawipa caah, a dang pakhat cu Azazel caah. ⁹ Cun Aaron nih Bawipa ca camcawh fung a tlaknak meheh cu a lak lai i sual thawinak ah a thawi lai; ¹⁰ sihmanhsehlaw Azazel ca camcawh fung a tlaknak meheh cu a cungah remnak ser awkah a nung in Bawipa hmaiah chuahpi a si lai, ram lakah Azazel sinah hei thlah a si nakhnga. ¹¹ "Aaron nih amah ca i sual thawinak ah cawtum cu a chuahpi lai i amah ca le a innchung khar caah remnak a ser lai; cawtum cu amah ca i sual thawinak caah a thah lai. ¹² Cun Bawipa hmai i a ummi biakṭheng cung meiṭil in a khatmi mei-laknak-kheng cu a lak lai i rimhmui dip tein denmi zapei hnih he puanzar chungah a luhpi lai i ¹³ rimhmui cu Bawipa hmai i mei ah cun a paih lai, rimhmui khu nih cun biahngalhternak cung i velngeihnak ṭhutdan cu a khuh i a thih sual nakhnga lo caah a si lai, ¹⁴ cun cawtum thi cu tlawmpal in a lak lai i a kutdong in velngeihnak ṭhutdan a hmailei cu a theh lai, cun velngeihnak ṭhutdan hmaika ah cun thi cu a kutdong in voi sarih a theh lai. ¹⁵ "Cun mi zapi ca i a simi sual thawinak meheh kha a thah lai i a thi cu puanzar chungah a luhpi lai, cun a thi cu cawtum thi a tuah bantuk khan a tuah lai, velngeihnak ṭhutdan cung le velngeihnak ṭhutdan hmai kha a theh lai; ¹⁶ Israel mi an thian lonak ruang le an phungbuarnak, an sualnak vialte ruangah, cu bangin hmunthiang caah cun remnak a ser lai; cu bantuk ṭhiamṭhiam in an thian lonak chung i annih he a um camcinmi tonnak thlam caah cun a tuah lai. ¹⁷ Remnak ser awk i a thiangmi hmun ah a luh tikah a chuah ṭhan i amah ca le a innchungkhar ca le aa pummi Israel mi ca i remnak a ser dih hlantiang, ahohmanh tonnak thlam chungah an um lai lo. ¹⁸ Cun Bawipa hmai i a ummi biakṭheng leiah cun a chuak lai i cu biakṭheng caah cun remnak a ser lai, cawtum le meheh thi kha tlawmpal in a lak hna lai i biakṭheng ki cu a velchum in a thuh hna lai. ¹⁹ Cun a cungah thi cu tlawmpal in a kutdong in voi sarih a theh lai i Israel mi an thian lonak cun a tlengh lai i a thianh lai. ²⁰ "Hmunthiang ca le tonnak thlam ca le biakṭheng ca i remnak a tuahnak a dih tikah, meheh nung cu a pekchanh lai; ²¹ Aaron nih a kut pahnih in meheh nung lu ah cun a chuan lai i Israel mi ṭhat lonak vialte, an phungbuarnak vialte le an sualnak vialte cu a cungah cun a phuan lai i meheh lu cungah cun a chiah hna lai, mi pakhat timhcia in a ummi nih khan ramlak ah a kalpi lai. ²² Meheh nih cun an ṭhat lonak vialte cu hmunking ah a phorh lai i, meheh cu ramlak ah cun a thlah lai. ²³ "Cun Aaron cu tonnak thlam chungah a lut lai i hmunthiang chung i a luh i aa hrukmi la hmangṭhia thilpuan kha aa phoih hna lai i cuka ah cun a kaltak hna lai; ²⁴ hmunthiang ah a pum cu ti in aa kholh lai i a thilpuan cu a aih hna lai i a ra chuak lai i amah ca khangh thawinak le zapi ca khangh thawinak kha a thawi lai i amah ca le zapi caah remnak a ser lai. ²⁵ Sual thawinak thau cu biakṭheng cungah a khangh lai. ²⁶ Azazel sinah meheh kha a thlahtu nih khan a hnipuan kha a suk lai i ti in a pum kha aa kholh lai i cu hnuah riahnak hmun chungah khan a lut lai. ²⁷ Cun sual thawinak ca i cawtum le sual thawinak ca i meheh, hmunthiang chung i remnak ser awk ca i an thi rak luhpimi hna kha, riahnak hmun lengah chuahpi an si lai; an phaw le an sa le an ek hna cu mei in khangh an si lai. ²⁸ A khangtu hna nih a hnipuan kha a suk i a pum kha ti in aa kholh awk a si lai, cu hnuah riahhmun chungah a lut kho lai. ²⁹ "Cun mah hihi nannih nan phung zungzal a si lai, thla sarih thla a ni hra ni ah nan i temhinter lai i nanmah mi hrimhrim nih siseh, khual nan sin i a ummi nih siseh, rian nan ṭuan lai lo; ³⁰ zeitintiah hi ni ah hin nannih caah, nannih cu thianh awkah, remnak ser a si lai; nan sualnak vialte in Bawipa hmaiah nan thiang lai. ³¹ Nannih caah dinh zirziarnak sabbath a si lai i nannih nih nan i temhinter lai; zungzal ca phung a si. ³² Cun tlangbawi a pa hmun i tlangbawi si awk i chiti thuhmi le thleidanmi nih la hmangṭhia thil puan thiang kha i hruk in remnak kha a ser lai; ³³ hmunthiang caah remnak a ser lai, tonnak thlam le biakṭheng caah remnak a ser lai; tlangbawi hna le aa pummi mi vialte caah remnak a ser lai. ³⁴ Cun mah hihi nannih caah zungzal phung a si lai, Israel mi hna caah an sualnak vialte ruangah kum khat ah voi khat remnak ser a si lai." Cun Moses nih Bawipa nih nawl a pek bangin a tuah.

¹ Cun Bawipa nih Moses sinah, ² "Aaron le a fapa hna le Israel mi vialte sinah, ’Mah hihi Bawipa nawlpekmi thil a si,’ tiah va chim tuah. ³ Israel innchungkhar chungmi mi zeihmanh nih cawtum siseh, tuufa siseh, meheh siseh, riahhmun chungah siseh, riahhmun lengah siseh, a thah i ⁴ Bawipa puan biakinn hmaiah Bawipa sin i laksawng caah tonnak thlam innka ah a rak put lo ahcun, cu pa cungah cun thisen chuah mawhnak khinh a si lai; thisen a chuah hrimhrim ko; cu pa cu a mi hna sinin hlonh a si lai. ⁵ Mah hihi, Israel mi nih khualeng i an thahmi an i thawinak hna kha Bawipa sinah, tonnak thlam innka i a ummi tlangbawi sinah an rak put hna i Bawipa sin i daihnak thawinak ca i an thahnak hna hnga caah a si; ⁶ tlangbawi nih cun Bawipa biakṭheng cungah tonnak thlam innka ah cun a thi cu a theh lai i a thau cu Bawipa ca i rimthaw ah a khangh lai. ⁷ Cucaah hlawhhlang an sihnawhmi meheh khuachia hna caah khan an raithawinak cu an that ti lai lo. Mah hihi an tefa chin tiang i an zungzal phung cu a si lai. ⁸ "Cun annih sinah, Israel inn-chungkhar chungmi siseh, annih lak i a pemmi siseh, ahohmanh khangh thawinak siseh, raithawinak siseh, a tuah i ⁹ Bawipa sin i thawi awkah tonnak thlam innka ah a ratpi lomi cu, cu pa cu a mi hna sinin hlonh a si lai, na ti lai. ¹⁰ "Israel innchungkhar mi siseh, an sin i a pemmi siseh, ahohmanh nih zei thi hmanh a ei ahcun, thi a eimi cu ka hmai ka chiathnawh lai i a mi hna chungin ka hlonh lai. ¹¹ Zeitintiah titsa nunnak cu thi chungah a um i nan nunnak ca i biakṭheng cung i remnak sernak caah kan pekmi hna a si; zeitintiah nunnak thawng cun thi cu remnak sertu cu a si. ¹² Cucaah Israel mi cu, ’Nannih lakah ahohmanh nih thi nan ei lai lo; nan lak i an pemmi hna zong nih an ei lai lo,’ tiah ka ti hna kha. ¹³ Israel mi siseh, annih sin i a pemmi khual siseh, ahohmanh nih ram vaihnak ah ei awk a simi sa siseh, va siseh, a hmuhton ahcun a thi kha a zor lai i leidip in a khuh lai. ¹⁴ "Zeitintiah titsa vialte nunnak cu thi cu a si; cu caah Israel mi sinah, zei sa thi hmanh nan ei lai lo, zeitintiah titsa vialte nunnak cu an thi cu a si; a eitu paoh cu hlonh a si lai, tiah ka rak ti. ¹⁵ Cun amah thih in a thimi siseh, sa nih a sehmi siseh, a eimi paoh cu anmah rammi a si ah khual a si ah, a thilpuan kha a suk hna lai i ti in aa kholh lai i zanlei tiang thianglo a si lai; cu hnuah cun a thiang lai. ¹⁶ Sihmanhsehlaw a suk hna lo i a taksa aa kholh lo ahcun a mawhnak cu amah nih a in lai," tiah a ti.

¹ Cun Bawipa nih Moses cu a chawnh i, ² "Israel mi hna sinah hitin va chim tuah, Kei cu Bawipa nan Pathian ka si. ³ Nannih nan rak umnak Izipt ram i an tuah bantuk khan nan tuah lai lo i kan kalpi hna lainak ram Kanaan ram i an tuah bantuk zongin nan tuah lai lo. Annih an nawlbia kha nan zul lai lo. ⁴ Ka phunglam hna kha nan tuah lai i ka nawlbia hna kha nan ulh lai i nan zulh hna lai. Keimah cu Bawipa nan Pathian ka si. ⁵ Cucaah nannih nih ka nawlbia le ka phunglam kha nan ulh hna lai, cu tuahnak thawngin mi nih an nung lai: keimah hi Bawipa cu ka si. ⁶ "Nannih lak i ahohmanh nih mah he aa naihmi rualchan cu an pumlawnnak hlim awkah nan fuk hna lai lo. Keimah hi Bawipa cu ka si. ⁷ Na pa cu a pumlawnnak na hlim lai lo, mah cucu na nu pumlawnnak a si; amah cu na nu a si; amah pumlawnnak cu na hlim lai lo. ⁸ Na pa nupi pumlawnnak cu na hlim lai lo; mah cucu na pa pumlawnnak a si ko. ⁹ Na far pumlawnnak cu na hlim lai lo, na pa fanu a si ah, na nu fanu a si ah, innchung i hrinmi a si ah, kaa dang i hrinmi a si ah a pum lawnnak na hlim lai lo. ¹⁰ Na fapa fanu pumlawnnak siseh, na fanu i fanu pumlawnnak siseh na hlim lai lo; zeitintiah an pumlawnnak cu nangmah pumlawnnak a si ko. ¹¹ Na pa nupi fanu, na pa nih a hrinmi cu a pumlawnnak na hlim lai lo, zeitintiah amah cu nangmah far a si. ¹² Na pa far pumlawnnak na hlim lai lo; zeitintiah amah cu na pa he aa naihmi sahlawh a si. ¹³ Na nu unau pumlawnnak kha na hlim lai lo, zeitintiah amah cu na nu he aa naihmi rualchan a si. ¹⁴ Na pa unau pumlawnnak kha na hlim lai lo, cucu a nupi kha na fuk lai lo ti a si; amah cu na nu a si. ¹⁵ Na fapa nupi pumlawnnak kha na hlim lai lo, amah cu na fapa nupi a si, a pumlawnnak kha na hlim lai lo. ¹⁶ Na unau nupi pumlawnnak kha na hlim lai lo, amah cu na unau i pumlawnnak a si. ¹⁷ Nu le fa an pumlawnnak kha na hlim hna lai lo, a pumlawnnak hlim awkah a fapa fanu siseh, a fanu fanu siseh, na la lai lo; annih cu nangmah he aa naihmi na sahlawh an si; mah cucu ṭhat lo cikcek a si. ¹⁸ Cun na nupi unau cu na nupi a nun chungah a pumlawnnak hlim awkah na kemh ṭi awk a si lo. ¹⁹ "Nu cu a nuphung hngalhnak in a thianlo lioah a pumlawnnak hlim awkah na fuk lai lo. ²⁰ Na innpa nupi cu amah he i thurter awkah pumsa duhnak in na ihpi lai lo. ²¹ Molek sin i mei in chanh awkah na fale chungin ahohmanh na pe lai lo; cu bantuk tuahnak in na Pathian min thurter hlah; keimah hi Bawipa cu ka si. ²² Nu he ih ṭi bantukin pa he na it ṭi lai lo; mah cucu fihnung a si. ²³ Cun zei saram paoh ihpi in i thurter hlah, nu zong nih saram he ih ṭi awkah i pe hlah seh: mah cucu thil ningcanglo a si. ²⁴ "Mah thil hna chung hin a zeihmanh hin i thurhnawmhter hlah u, zeitintiah nan hmai i ka hlonh laimi miphun hna nih hin mah thil hna hin an i thurter cang i ²⁵ ram cu a thurhnawm cang i cu caah a ṭhat lonak kha dan ka tat i ram nih cun a chung i a ummi kha a luak hna. ²⁶ Sihmanhsehlaw nannih nih cun ka nawlbia hna le ka phunglam hna kha nan zulh hna lai i hi fihnung a simi hna hi pakhat hmanh nan tuah hna lai lo, nanmah ram mi nih siseh, khual nan sin i a pemmi nih siseh nan tuah lai lo. ²⁷ (Zeitintiah hi fihnung vialte hna hi nan hlan i a rak ummi, cu ram mi nih cun an tuah i cucaah cu ram cu a thurhnawm cang); ²⁸ nannih hlan i a rak ummi miphun a luak hna bantuk khan nannih cu nan thurhhnawmh tikah an luak ve sual hna lai. ²⁹ Zeitintiah hi thil fihnung hna a zeipaoh hi a tuahtu paoh cu, cu a tuahtu hna paoh cu, an mi sinin hlonh an si lai. ³⁰ Cucaah fihnung a simi phung nan hlanah an rak tuahmi hna hi, pakhat hmanh nan tuah ve nakhnga lo le, mah hna hin nan i thurhhnawmh nakhnga lo, ka nawlbia hi i tlaih tuah u: keimah cu Bawipa nan Pathian cu ka si," tiah a ti.

¹ Cun Bawipa nih Moses cu a chawnh i, ² "Hi bangin Israel mibu hna sinah va chim tuah; Nan thian awk a si, zeitintiah keimah, Bawipa nan Pathian cu ka thiang. ³ Nannih vialte nih nan nu le nan pa kha nan upat hna lai i ka sabbath hna kha nan ulh hna lai, kei cu Bawipa nan Pathian ka si. ⁴ Siasal leiah i mer hlah u, thletmi pathian zong i ser hna hlah u: keimah hi Bawipa nan Pathian cu ka si. ⁵ "Nannih nih daihnak thawinak Bawipa sinah nan pek tikah cohlan nan si nakhnga in nan pek lai. ⁶ Nan pek ni ah ei a si lai, asiloah a thaizing ah; a kiptuh tiang a tangmi paoh cu mei in khangh a si lai. ⁷ A kiptuh ah ei a si sual ahcun, mah cucu fihnung a si; cohlan a si lai lo i ⁸ a eitu paoh nih a ṭhat lonak cu a in lai, zeitintiah Bawipa thil thiang pakhat a thurhhnawmh a si; cu pa cu a mi hna sinin hlonh a si lai. ⁹ "Nan lo rawl nan ṭuan tikah nan lo cu a pawngri tiang taktak in nan ṭuan lai lo, famua zong nan ṭuan hnuah nan sua lai lo. ¹⁰ Nan mitsur dum kha nan thianh hirhiar lai lo, nan mitsur dum chung i a tlami mitsur thei zong kha nan char hna lai lo; misifak le mipem caah nan nganhtak hna lai: keimah cu Bawipa nan Pathian cu ka si. ¹¹ "Nan fir lai lo; hlennak in thil nan ti fawn lai lo, pakhat le pakhat lih nan i chim fawn lai lo. ¹² Ka min chalh in lih in chiat nan ser lai lo, mah cucu nan Pathian min thurhnawmhter a si; keimah cu Bawipa ka si. ¹³ "Na innpa kha na serhsat lai lo i a ramh zong na ramh lai lo. Kuli ṭuanmi rianṭuan man cu zan khuadei a thaizing tiang na sinah i chiah hlah. ¹⁴ Hnachet cu va vawlpam hlah, mitcaw hmaiah tlukrilhnak thil va chia hlah, sihmanhsehlaw na Pathian cu va ṭih ko: keimah hi Bawipa cu ka si. ¹⁵ "Biaceihnak ah dinlonak nan tuah lai lo; sifakmi kha na duhdanh hna lai lo, mingan zong kha na hmaizah hlei lai lo, sihmanhsehlaw dinnak in na innpa bia kha na ceih lai. ¹⁶ Na mi hna lakah mi kongthang ceih in vak len ko hlah, na innpa nunnak hrawh awkah dir hlah: keimah hi Bawipa cu ka si. ¹⁷ "Na unau cu na lungchung in na hua lai lo, sihmanhsehlaw na innpa cu na chimhhrin lai, amah ruangah sualnak na ing sual lai. ¹⁸ Nangmah na phun hawi cungah phu na hlam lai lo, na lung chungin huatnak zong na pawi lai lo, sihmanhsehlaw na innpa cu nangmah naa dawt bantukin na dawt lai: keimah hi Bawipa cu ka si. ¹⁹ "Ka nawlbia kha nan ulh lai. Na saṭil cu phun dangdang he fa na ngeihter hna lai lo; na lo ah thlaici phun hnih na tuh lai lo; thil phun hnih in tahmi puan zong naa aih fawn lai lo. ²⁰ "Nu pakhatkhat cu sal a si i pa he aa ham cangmi a si nain tlanh rih lo, a luatnak pek rih lo a si, cu nu cu pa pakhatkhat nih pumsa duhnak in a ihpi ahcun, dothlatnak ser awk a si lai. Thah cu an si lai lo, zeicahtiah nu cu a luatmi a si lo; ²¹ sihmanhsehlaw pa nih amah caah phungbuar thawinak kha Bawipa sinah a rak put lai, tonnak thlam innka ah cun, phungbuar thawinak ca i tuukawng cu a rak put lai. ²² Cun tlangbawi nih amah cu phungbuar thawinak tuukawng cun Bawipa hmaiah sualnak a tuahmi caah cun remnak a serpiak lai i a tuahmi sualnak cu ngaihthiam a si lai. ²³ "Ram chung i nan luh i nannih nih rawl caah thingkung a phunphun nan cin tikah, nannih nih cu an theitlai cu ulhmi ah nan rel hna lai; nannih caah kum thum chung ulhmi ah rel a si lai; ei hrimhrim lo awk a si lai. ²⁴ Cun a kum linak ah an theitlai vialte cu Bawipa thangṭhat pekchanhnak caah thleidan an si lai. ²⁵ Sihmanhsehlaw a kum nganak ah cun an theitlai cu nan ei hna lai, nannih caah tam chin in an tlai nakhnga: keimah cu Bawipa nan Pathian ka si. ²⁶ "Zei sa hmanh a chung i a thi he nan ei lai lo. Kut ṭial zoh siseh, eih siseh, nan tuah lai lo. ²⁷ Nan bep sam nan i met lai lo, nan khahmul zong a par nan riam lai lo. ²⁸ Mithi hna ruangah nan taksa zeihmanh i at hlah u, nan pum cungah a ṭial zong i ṭial fawn hlah u: keimah cu Bawipa ka si. ²⁹ "Na fanu cu hlawhhlangnu ah ser in thurter hlah, ram cu hlawhhlangnu sinak chungah, a tla lai i ṭhat lonak a khat sual lai. ³⁰ Ka sabbath hna cu nan ulh hna lai i ka hmunthiang cu nan upat hna lai: keimah cu Bawipa ka si. ³¹ "Khuavang le camhthiam kha fukpanh hna hlah u; annih nih nannih kha thurter awkah va kawl hna hlah u: keimah hi Bawipa nan Pathian cu ka si. ³² "Sam parmi hmaiah cun na dir lai i tar a simi hmai cu na upat lai, cun na Pathian cu na ṭih lai: keimah cu Bawipa ka si. ³³ "Khual pakhatkhat nih nan ram ah an pem hna tikah a cungah ṭhat lonak nan tuah lai lo. ³⁴ Nannih an pemmi hna khual cu nannih lak i nanmah rammi bantuk a si lai i nangmah naa dawt bantukin na dawt lai; zeitintiah nannih zong Izipt ram ah khual nan rak si: kei cu Bawipa nan Pathian ka si. ³⁵ "Tahnak ah mi nan hleng lai lo; a saulei tahnak ah siseh, a rih leiah siseh, a tam leiah siseh, nan lih lai lo. ³⁶ A dikmi cuai thlainak, a dikmi cuai lung, a dikmi ephah, a dikmi hin nan hman lai: keimah cu Bawipa nan Pathian Izipt ram in an chuahtertu hna kha ka si. ³⁷ Ka nawlbia vialte le ka phunglam vialte kha nan ulh hna lai i nan tuah hna lai: keimah cu Bawipa ka si."

¹ Bawipa nih Moses a chawnh i, Israel mi hna sinah hi bangin va chim, tiah a ti: ² "Israel mi lak in siseh, an sinah a pemmi khual hna lak in siseh, ahohmanh nih a fa zeihmanh kha Molek a pek ahcun amah cu thah a si lai; ram mi nih lung in an cheh lai. ³ Cu pa cu ka hmai ka chiathnawh lai i a mi hna lakin ka hlonh lai, a fa pakhat cu ka hmunthiang thurhnawmhter awk le ka min thiang thurhnawmh awkah Molek kha a pek caah, ka hlonh hna lai. ⁴ Cun hi ram mi hna nih cu pa i a fa pakhat Molek a pek cu an i hngalhter duh lo i an thah lo ahcun, ⁵ cu pa le a innchungkhar hna cu ka hmai ka chiathnawh hna lai i an mi hna lak in ka hlonh hna lai, amah le Molek sin i va hlawhhlan awkah amah a zulmi vialte cu, ka hlonh hna lai. ⁶ "Mi pakhatkhat nih khuavang le camhthiam kha a fuhpanh hna i hlawh a hlanhnawh hna ahcun, cu mi cu ka hmai ka chiathnawh lai i a mi hna lak in ka hlonh lai. ⁷ Cu caah i thianter u law, thianghlim tuah u; zeicahtiah kei cu Bawipa nan Pathian ka si. ⁸ Ka nawlbia kha ul hna u law, tuah hna u; nannih an thiantertu hna Bawipa cu keimah ka si. ⁹ Zeitintiah a nu siseh, a pa siseh, chiat a serhmi paoh cu thah awk a si lai; a nu siseh, a pa siseh, chiat a serh cang hna, an thisen cu amah cungah a si. ¹⁰ "Mipa pakhatkhat nih a innpa nupi he an sual ahcun, nu he pa he an pahnih in thah an si lai. ¹¹ A pa nupi a ihpimi cu a pa pumlawnnak a hlim a si; an pahnih in thah an si lai, an thisen cu anmah cungah a si. ¹² Mipa pakhatkhat nih a fapa nupi a ihpi ahcun an pahnih in thah an si lai; mah rualchan he sualnak an tuah, an thisen anmah cungah a si. ¹³ Mipa nih mipa cu nu bantukin a ihpi ahcun, an pahnih in fihnung an tuah; thah an si lai, an thisen cu anmah cungah a si. ¹⁴ Mipa pakhatkhat nih nupi a ṭhit i a nu zong nupi ah aa serh ahcun, mah cucu ṭhat lo cikcek a si; mei in khangh an si lai, amah he anmah he; nannih lakah cu ṭhat lonak cu um hlah seh. ¹⁵ Mipa nih saram a ihpi ahcun thah a si lai; cun saram cu nan thah lai. ¹⁶ Nu nih zei saram paoh a fuh i a ihpi ahcun, cu nu le saram cu nan thah hna lai; annih cu thah an si lai, an thisen cu anmah cungah a si. ¹⁷ "Mipa pakhatkhat nih amah far, amah pa fanu maw amah nu fanu maw a lak i pa nih nu a pumlawnnak kha a hmuh i nu nih pa a pumlawnnak kha a hmuh ahcun, mah cucu ningzah awk thil a si, an mi hna mithmuh ah hlonh an si lai; pa nih a farnu pumlawnnak kha a hlim a si caah a dantatnak cu amah nih a in lai. ¹⁸ Pa pakhatkhat nih nu pakhatkhat cu a zawtnak a ngeih lioah a ihpi i a pumlawnnak a hlim ahcun, a cerhti cu a hlim a si i nu nih a thi chuahnak a hun a si; an mi hna sinin an pahnih in hlonh an si lai. ¹⁹ Na nu unau siseh, na pa far siseh, an pumlawnnak na hlim lai lo; zeitintiah mah cucu mah he aa naihmi rualchan hlim a si; dantatnak cu anmah nih an in lai. ²⁰ Pa pakhatkhat nih a pa unau nupi a ihpi ahcun a pa unau pumlawnnak a hlim a si, an sualnak cu an in lai; fa ngei loin an thi lai. ²¹ Mipa pakhatkhat nih amah unau nupi kha a lak ahcun, mah cucu thianlo a si; amah unau pumlawnnak kha a hlim, fa ngei loin an um lai. ²² "Cucaah ka nawlbia vialte le ka phunglam vialte nan ulh hna lai i nan tuah hna lai, cucaah kan hruai hna lainak ram nih an luak hna lai lo. ²³ Nan hmaiah ka dawimi miphun i an phung kha nan zul hna lai lo; zeitintiah mah cu thil hna cu an tuah caah ka huat hna. ²⁴ Sihmanhsehlaw nannih sinah cun, ’An ram cu nan co lai i nan co awkah kan pek hna lai, cawhnuk le khuaihliti in a luangmi ram cu,’ tiah ka ti. Keimah hi Bawipa nan Pathian, mi hna sinin an thleidangtu hna cu ka si. ²⁵ Cu caah nannih nih saram thiang le thianglo le va thiang le thianglo thleidannak nan ser lai; nannih nih nanmah lila cu saram in siseh, va in siseh, vawlei i a vakmi thil zeipaoh nannih nih a thianglo ah rel awk i ka thleidanmi hna in, fihnung ah nan i ser lai lo. ²⁶ Nannih cu keimah caah mithiang nan si lai; zeitintiah keimah, Bawipa cu, ka thiang i nannih cu keimah ta nan si nakhnga, midang sinin kan thleidan hna. ²⁷ Pa siseh, nu siseh, khuavang ngei maw camhthiam maw a si ahcun thah a si lai; lung in cheh an si lai; an thisen cu anmah cungah a si lai."

¹ Cun Bawipa nih Moses cu a chawnh i hi bangin a ti: "Tlangbawi hna, Aaron fapa hna cu va chim hna law, annih lakah ahohmanh nih an mi hna lak i mithi ruangah i thurter hna hlah seh. ² Anmah naih bik rualchan, an nu, an pa, an fapa, an fanu, an unau ruangah dah ti lo ahcun i thurter hna hlah seh. ³ Cun an far, va a ngeih lo caah, amah caah cun an i thurter ko hnga. ⁴ Asinain ṭhitumnak lei in aa pehtlaimi an thih ah i thurter hna hlah seh. ⁵ An lukheng an i kolh lai lo, an khahmul par zong an riam lai lo, an taksa zong zeihmanh an at lai lo. ⁶ An Pathian caah an thianghlim lai i an Pathian min cu an thurhhnawmhter lai lo, annih nih mei in thawinak hna Bawipa sinah an pekchanhmi an Pathian changreu cu an pekchanh caah an thianghlim lai. ⁷ Hlawhhlangnu siseh, a thur cangmi nu siseh, an ṭhi hna lai lo; makmi nu zong an ṭhi lai lo; zeitintiah tlangbawi cu a Pathian caah mithianghlim a si awk a si. ⁸ Amah cu na thianter lai, zeitintiah nan Pathian changreu cu a pechantu a si; nan caah mithianghlim a si lai; zeicahtiah nannih an thiantertu hna Bawipa keimah cu ka thiang. ⁹ Tlangbawi ahopaoh fanu nih hlawhhlang cannak in aa thurter ahcun, a pa a thurter a si; amah cu mei in khangh a si lai. ¹⁰ "Tlangbawi, a unau hna lak i upa bik a simi, a lu cung i thuhnak chiti toihmi, puan aih awkah thiantermi nih cun a lu cung sam kha a thlah lai lo i a hnipuan zong a thlek lai lo; ¹¹ mithi umnak ah a lut lai lo, a pa ruang hmanh ah siseh, a nu ruang hmanh ah siseh, aa thurter lai lo; ¹² hmunthiang chung zongin a chuak lai lo i a Pathian hmunthiang kha a thurter lai lo, zeitintiah a Pathian thuhnak chiti in thianter a si cang: keimah cu Bawipa ka si. ¹³ Nupi ah ngaknu thiang a ṭhit awk a si lai. ¹⁴ Nuhmei maw, makmi maw, thurhhnawmh ciami nu maw, hlawhhlangnu maw, mah hna hi a ṭhi hna lai lo; sihmanhsehlaw amah mi hna chung i ngaknu thiang kha nupi ah a ṭhit lai i ¹⁵ a fale kha a mi hna lakah a thurhhnawmhter hna lai lo; zeitintiah keimah cu Bawipa ka si, keimah nih ka thianter." ¹⁶ Cun Bawipa nih Moses cu a chawnh i, ¹⁷ "Aaron sinah, ’Na tefa hna lakah an tefa chin tiangin, dotlak lonak a ngeimi paoh nih cun a Pathian changreu pekchanhnak tuah awkah ra naih hlah seh. ¹⁸ Zeitintiah dotlak lonak a ngeimi nih cun ra naih awk an si lo, mitcaw, kebei, hmai rawk, kut ke pakhatkhat sau tuk, ¹⁹ ke kiak, kut kiak, ²⁰ keng kul, mi tawi, khua ṭha tein a hmu lomi, thakpherh a ngeimi, mi ṭial, til denmi hna nih cun an naih awk a si lo; ²¹ tlangbawi Aaron tefa hna lak in ahohmanh dotlak lonak a ngeimi nih cun, Bawipa sinah mei in pekchanhmi thil pekchanh awkah a rat awk a si lo; dotlak lonak a ngeih caah a Pathian ta a simi changreu cu pekchanh awkah ra naih hlah seh. ²² A Pathian ta a simi changreu a ei ko lai, a thiang bik zong, a thiangmi thil zong, ²³ sihmanhsehlaw puanzar pawngah cun a ra lai lo i biakṭheng zong a fuk lai lo, zeitintiah dotlak lonak a ngeih caah ka hmunthiang kha a thurter sual lai; a thiantertu hna Bawipa cu keimah ka si,’ a ti tiah na chim lai," tiah a ti. ²⁴ Cu bangin Moses nih Aaron le a fapa hna le Israel mi vialte cu a chimh hna.

¹ Cun Bawipa nih Moses a chawnh i, ² "Aaron le a fapale hna kha, keimah sinah Israel mi hna nih an ka pekmi thil thiang cu hrial hna seh, ka min thiang cu an thurhhnawmh nakhnga lo, tiah chim hna; keimah cu Bawipa ka si. ³ Annih cu, ’Nan tefachin tiangin, nan tefa vialte hna lakah ahohmanh nih, Israel mi nih Bawipa sinah an pekmi thil thiang hna cu, thian lonak a ngeih lioah a naih ahcun, cu pa cu ka hmaika in hlonh a si lai; keimah cu Bawipa ka si. ⁴ Aaron tefa a simi lak in ahohmanh mithinghmui a si ah, thilchuak a ngeimi a si ah, a thian hlan lo, thilthiang cu a ei hna lai lo. Mithi he i tawnghnak in a thiang lomi thil zeihmanh siseh, a ci a chuakmipa siseh, a tawngmi paoh le, ⁵ ahohmanh amah a thurter khotu a lawnmi thil siseh, a sinin thian lonak aa lak khawh dingmipa, cu pa thian lonak cu zei bantuk hmanh si ai kun, a tawngmi paoh cu — ⁶ cu bantuk a tawngmi cu zanlei tiang thianglo a si lai i a pum cu ti in aa kholh lo ahcun thil thiang cu a ei hna lai lo. ⁷ Ni a tlak tik in a thiang lai i cu hnuah cun thil thiang cu a ei hna lai, mah cu hna cu a rawl ca an si. ⁸ I thurter awkah amah tein a thimi siseh, sa nih a sehmi siseh, a ei lai lo; keimah cu Bawipa ka si.’ ⁹ Biakinn cu an thurhhnawmh ruangah sual an huah i a chungah an thih sual nakhnga lo, ka nawlbia cu an ulh lai, keimah cu Bawipa ka si, keimah nih ka thianter hna. ¹⁰ "A lengmi nih thil thiang cu a ei lai lo. Tlangbawi sin i khua a sami nih siseh, kuli a ṭuanmi nih siseh, thil thiang cu an ei lai lo; ¹¹ sihmanhsehlaw tlangbawi nih tangka in a thil si awk caah sal a cawk ahcun, cu sal nih cun a ei lai; cun a inn chungah a chuakmi hna nih cun a rawl cu an ei lai. ¹² Tlangbawi fanu cu a lengmi he an i ṭhit ahcun thil thiang pekchanhmi kha a ei hna lai lo. ¹³ Sihmanhsehlaw tlangbawi fanu cu nuhmei maw, makmi maw a si i fa a ngeih lo i a ngaknut lio bantukin a pa inn ah a kir ṭhan ahcun, a pa rawl cu a ei ve ko lai; sihmanhsehlaw a lengmi nih cun ahohmanh nih an ei lai lo. ¹⁴ Cun pakhatkhat nih thil thiang cu hngalh loin a ei sual ahcun, a man cheu nga cheu khat cu a chawnh lai i thil thiang cu tlangbawi sinah cun a pek lai. ¹⁵ Tlangbawi hna nih Israel mi hna thil thiang, Bawipa sinah an pekchanhmi cu an thurhhnawmh hna lai lo, ¹⁶ cu bantuk tuahnak in ṭhat lonak le mawhnak an thil thiang an ei hna thawngin an cungah i tlunhter hna hlah seh: zeitintiah keimah cu a thiantertu hna Bawipa cu ka si," tiah a ti. ¹⁷ Cun Bawipa nih Moses cu a chawnh i, ¹⁸ "Aaron le a fapa hna le Israel mi vialte kha chim hna. Israel innchungkhar mi ahohmanh nih siseh, Israel mi hna sin i a pemmi nih si hna seh, a pekchanhnak a tuah tikah, biakamnak a tuahmi ca i a pekmi siseh, Bawipa sinah khangh thawinak bantukin pekmi mah lungthote pekchanhnak siseh, ¹⁹ cohlan awk ahcun cawtum hna lakin maw, tuu hna lakin maw, meheh hna lakin maw, a pa dotla nan thawi lai. ²⁰ Dotlak lonak a ngeimi thil zeipaoh nan pechan lai lo, zeitintiah an cohlanpiak hna lai lo. ²¹ Cun ahohmanh nih, daihnak pekchanhmi thil thawinak Bawipa sinah a pekchanh tikah, biakamnak tlinternak ca i a si ah siseh, mah lungthote i pekchanhnak ca i a si ah siseh, cawrun chungin a si ah, tuurun chungin a si ah, cohlan awk dingah cun a tlingmi a si lai; a cungah dotlak lonak zeihmanh a um lai lo. ²² A mit a cawmi maw, a ruh a kiakmi maw, a kut ke a rawkmi maw, hma a ngeimi maw, thakpherh a ngeimi maw, a pharmi maw, cu bantuk saṭil hna cu Bawipa nan pechan lai lo, mei in biakṭheng cung i Bawipa sin i thawinak ca zongah nan hmang hna lai lo. ²³ Cawtum siseh, tuufa siseh, a kut ke pakhatkhat a sau tuk maw a tawi tuk a ngeimi cu mah lung tho pekchanhmi ahcun nan pek ko lai, sihmanhsehlaw biakamnak thawinak caah cun cohlan khawh a si lai lo. ²⁴ Zei saram hmanh, a til a kek, a kuai, a tlek a bauhmi paoh cu Bawipa nan pechan lai lo, nan ram chung zongah nan thawi lai lo; ²⁵ cun cu bantuk saram ramdangmi sinin nan hmuhmi cu nan Pathian rawl caah nan pechan fawn lai lo. An kiahkuainak thawngin an cungah dotlak lonak a um caah, an cohlanpiak hna lai lo," tiah a ti. ²⁶ Cun Bawipa nih Moses cu a chawnh i, ²⁷ "Cawtum siseh, tuu siseh, meheh siseh, a chuah tikah a pi sinah ni sarih a um lai; cun a ni riat ni thawk cun Bawipa sin i mei in pekchanh awk caah cohlan a si lai. ²⁸ A pi cu caw a si zongah, tuu a si zongah, a pi he a fa he ni khatte ah an pahnih in nan that hna lai lo. ²⁹ Lawmhnak thawinak Bawipa sinah nan pekchanh tikah nannih cu cohlan nan si nakhnga dingin nan thawi lai. ³⁰ Cu ni theng ah cun ei dih a si lai, zinglei tiangin a zeihmanh nan tanter lai lo; keimah cu Bawipa ka si. ³¹ "Cu bangin ka nawlbia cu nan ulh hna lai i nan tuah hna lai: keimah cu Bawipa ka si. ³² Nannih nih ka min thiang kha nan thurhhnawmh lai lo, sihmanhsehlaw Israel mi hna lakah keimah cu thianter ka si lai; keimah cu nannih an thiantertu hna, ³³ nan Pathian si awkah Izipt ram in an chuahpitu hna Bawipa kha ka si: keimah cu Bawipa ka si," tiah a ti.

¹ Bawipa nih Moses cu a chawnh i, ² "Israel mi cu, a caan khiahmi Bawipa puai, nannih nih pumhnak thiang caah nan thanh ding, a caan khiahmi ka puai hna cu, mah hihi an si, tiah chim hna. ³ Ni ruk chung rianṭuan a si lai; sihmanhsehlaw ni sarihnak ni ah cun dinh zirziarnak sabbath, pumhnak thiang a si lai; rian zeihmanh nan ṭuan lai lo; nan umnak cio ah Bawipa ca sabbath a si. ⁴ "Mah hna hi a caan khiahmi Bawipa puai, a thiangmi pumhkhawmhnak, an ca i khiahmi caan cio i nan thanh hngami cu an si. ⁵ Thla khatnak thla, a thla chung ni hleilinak zanlei ah cun Bawipa lanhtak puai a si lai. ⁶ Cun cu thla ṭhiamṭhiam, a ni hleinga ni ah cun Bawipa ca i thilnu tel lo changreu puai a si lai; ni sarih chung thilnu telh lomi changreu nan ei lai. ⁷ A ni khat ni ah a thiangmi pumhnak nan ngei lai, rian fak nan ṭuan lai lo. ⁸ Sihmanhsehlaw mei in pekchanhnak Bawipa sinah ni sarih nan tuah lai; ni sarih ni ah cun pumhnak thiang a si lai; rian fak nan ṭuan lai lo," tiah a ti. ⁹ Cun Bawipa nih Moses sinah, ¹⁰ "Israel mi hna sinah hi bangin va chim tuah, ’Nannih kan pekmi hna ram chungah nan luh i a rawl nan ṭuan tikah, nan rawl ṭuanmi theitlai hmasa bik phal cu tlangbawi sinah nan ratpi lai,’ ¹¹ cun amah nih faphal cu, cohlannak nan hmuh nakhnga Bawipa hmaiah a hninh lai; sabbath thaizing ah tlangbawi nih cun a hninh lai. ¹² Cun faphal nan hninh ni ah cun tuufa dotla, a pa, kum khat a timi Bawipa sin i khangh thawinak caah nan thawi lai. ¹³ Cun cu he a si ṭimi changvut thawinak cu changvut dip ephah cheu hra cheu hnih, chiti he cawhmi, Bawipa sinah mei in thawi awk rimthaw cu a si lai; cun cu he a si ṭimi thlet thawinak cu mitsur hang hin cheu li cheu khat a si lai. ¹⁴ Cun nan Pathian sin i pekchanhnak nan tuah hlantiang, cu ni theng tiang cu, changreu siseh, fangvoi a reu in siseh, a hring in siseh, nan ei lai lo; mah hihi nan techin fapar tiangin nan umnak kip ah zungzal ca nawlbia a si. ¹⁵ "Sabbath ni a thaizing, hninh thawinak faphal nan rak put ni khan nan rel lai i ¹⁶ zarh sarih kheng a tling lai, sabbath ni ni sarihnak a thaizing ah cun ni sawm nga a si lai; cu caan ah cun rawl thar changvut thawinak cu Bawipa sinah nan pek lai. ¹⁷ Nan umnak hna khan hninh awkah, ephah cheu hra cheu hnih in sermi changreu hlum hnih nan rak put lai; changvut dip in sermi an si lai i thilnu he rawhmi an si lai, Bawipa ca i theitlai hmasa bik hna caah an si lai. ¹⁸ Cun changreu he cun dotla tuufa pasarih kum khat cio a timi le cawtum no pakhat le tuukawng pahnih nan pek lai; Bawipa caah khangh thawinak an si lai, an changvut thawinak le thlet thawinak hna he cun, Bawipa ca i rimthaw mei in thawinak a si lai. ¹⁹ Cun meheh tum pakhat sual thawinak caah, cun kum khat cio a timi tuufa a pa pahnih daihnak pekchanh thawinak caah nan thawi hna lai. ²⁰ Tlangbawi nih theitlai hmasa bik changreu he cun Bawipa hmai i hninh thawinak caah cun tuufa pahnih he cun a hninh hna lai; Bawipa ca i a thiangmi, tlangbawi vo an si lai. ²¹ Cu ni theng ah cun thawngthanhnak nan ser lai; a thiangmi pumhnak nan tuah lai; rian fak zeihmanh nan ṭuan lai lo: nan techin fapar tiangin nan umnak kip ah zungzal ca nawlbia a si. ²² "Cun nan ram rawl nan ṭuan tikah nan lo cu a pawngri tiangin nan ṭuan lai lo, nan rawl ṭuan hnuah a mua zong nan sua lai lo; sifak le khual caah nan nganh hna lai: keimah cu Bawipa nan Pathian ka si," tiah a ti. ²³ Cun Bawipa nih Moses cu a chawnh i, ²⁴ "Israel mi hna sinah hi bangin va chim tuah. Thla sarihnak thla, a ni khatnak ni ah dinh zirziarnak ni nan ulh lai, muko aw he thanh cukmakmi hngalh camcinnak, a thiangmi pumhnak cu a si lai. ²⁵ Rian fak zeihmanh nan ṭuan lai lo i Bawipa sinah mei in thawinak nan pek lai," tiah a ti. ²⁶ Cun Bawipa nih Moses cu a chawnh i, ²⁷ "Hi thla sarihnak thla a ni hra ni hi remnak ni a si; nannih caah pumhnak thiang caan a si lai i nannih nih nanmah lila cu nan i temhinter lai i Bawipa sinah mei in thawinak nan pek lai. ²⁸ Mah ni hrim ah hin cun rian zeihmanh nan ṭuan lai lo: zeitintiah remnak ni a si, nannih ca i Bawipa nan Pathian hmai i remnak ser awk caah tuahmi a si. ²⁹ Hi ni i aa temhinter lomi paoh cu a mi hna sinin hlonh a si lai. ³⁰ Cun hi ni hrim i rian zeihmanh a ṭuanmi paoh cu, cu mi cu a mi hna sinin ka hrawh lai. ³¹ Rian zeihmanh nan ṭuan lai lo: nan techin fapar tiangin nan umnak kip ah zungzal ca nawlbia a si. ³² Nannih caah dinh zirziarnak sabbath a si lai i nanmah le nanmah kha nan i temhinter lai; cu thla ni kua ni zanlei in, a thaizing zanlei tiang nan sabbath cu nan ulh lai," tiah a ti. ³³ Cun Bawipa nih Moses cu a chawnh i, ³⁴ "Israel mi hna sinah hi bangin va chim tuah. Hi thla sarihnak thla ni hleinga ni hin ni sarih tiang Bawipa ca deu puai a si lai. ³⁵ A ni khatnak ni ah a thiangmi pumhnak a si lai; rian fak zeihmanh nan ṭuan lai lo. ³⁶ Ni sarih chung Bawipa sinah mei in thawinak nan pek lai; ni riatnak ni ah a thiangmi pumhnak nan ser lai i Bawipa sinah mei in pekchanhnak nan tuah lai; mah cucu a liannganmi pumhnak a si; rian fak zeihmanh nan ṭuan lai lo. ³⁷ - ³⁸ Hi puai hna hi Bawipa puai caan khiahmi puai cu an si i pumhnak thiang in nan hman hna lai; Mei in khanghmi thawinak hna pekchanh caan a si lai — cu thawinak hna cu khanghthawinak, changvut thawinak, raithawinak, thlet thawinak an si i anmah nite cio ah tuahmi an si — cun puai hna cu Bawipa sabbath hna hlei le Bawipa sinah na pekmi biakamnak thawinak le mah lungtho tein pekchanhmi thawinak hleiah khan a si. ³⁹ "Thla sarih thla ni hleinga ni ah, ram chungin a chuakmi nan pumhkhawmh dih tikah, Bawipa puai cu ni sarih nan ulh lai; a ni khatnak ni ah cun dinh zirziar a si lai i a ni riat ni zongah cun dinh zirziar a si lai. ⁴⁰ Cun ni khatnak ni ah aa dawhmi thingkung theitlai hna le ungkung nge hna le, a hnah a buk liailuaimi thingkung nge hna le, tivakam inhliam hna cu nan lak hna lai i Bawipa nan Pathian hmaiah ni sarih chung nan i lawm lai. ⁴¹ Mah puai hi Bawipa ca puai ah kum khat ah ni sarih nan ulh lai; nan tefachin tiangin zungzal ca nawlbia a si; thla sarihnak thla ah nan ulh lai. ⁴² Deu chungah ni sarih nan um lai; Israel ram mi a simi vialte nih deu chungah an um lai, ⁴³ Izipt ram in ka chuahpi hna tikah khan Israel mi hna cu deu ah khua an sa ti kha nan tefa hna nih an hngalh nakhnga deu chungah cun nan um lai, keimah cu Bawipa nan Pathian ka si," tiah a ti. ⁴⁴ Cu bangin Moses nih Israel mi hna cu a caan khiahmi Bawipa puai hna kha a thanh hna.

¹ Bawipa nih Moses cu a chawnh i, ² "Israel mi hna cu, oliv chiti a fimmite, van awk i ṭhuatmi cu, meiinn kha alh camcinternak caah, nangmah sin i rak put awkah nawl pe hna. ³ Tonnak thlam chung biakamnak puanzar lengah khan Aaron nih a ningcang tein zanlei in zinglei tiang Bawipa hmaiah a chiah camcin lai; mah hihi nan techin fapar tiangin nawlbia a si lai. ⁴ Sui thiang in sermi meiinn tung cungah khan meiinn hna cu a ningcang tein a chiah camcin hna lai. ⁵ "Cun changvut dip na lak lai i changreu hlum hlei hnih in na ser lai; hlum khat ah ephah cheu hra cheu hnih lengmang a si lai. ⁶ Sui thiang cabuai cungah cun tlang hnih in na chiah hna lai, tlang khat ah paruk lengmang in. ⁷ Cun a tlang veve ah cun a thiangmi frankinsen na chiah lai, Bawipa sin i mei in pekchanhmi hngalh camcinnak ca changreu he cun an kai ṭi lai. ⁸ Sabbath ni fate Aaron nih a ningcang tein Bawipa hmaiah cun, Israel mi hna airawl in zungzal biakamnak caah a chiah camcin lai. ⁹ Cun mah cucu Aaron le a fapa hna caah a si lai i hmunthiang chungah khan an ei lai, zeitintiah Bawipa sinah mei in pekchanhmi lakah khan a caah a thiang bik, a hmuh camcin awk vo cu a si," tiah a ti. ¹⁰ Israel minu pakhat i a fapa, a pa Izipt mi a simi cu Israel mi hna lakah aa chawk i Israel minu fapa cu le Israel mipa pakhat cu riahhmun ah cun an i si i ¹¹ Israel minu fapa nih cun Pathian Min cu a vawlhpamh i chiat a serh. Amah cu Moses sinah an ratpi. A nu min cu Shelomith, Dan phun chung mi Dibri fanu a si. ¹² Bawipa duhnak annih sin i thanh a si hlantiang thong chungah an chiah. ¹³ Cun Bawipa nih Moses cu a chawnh i, ¹⁴ "Chiat a sertu cu riahhmun lengah chuahpi law, amah biachim a theitu vialte nih a lu cungah an kut chia hna seh, cun aa pummi vialte nih lung in chep hna seh. ¹⁵ Cun Israel mi hna cu, a Pathian chiat a serhtu paoh nih cun amah a sualnak kha a in lai. ¹⁶ Bawipa min a vawlpammi cu thah a si lai; aa pummi vialte nih lung in an cheh lai: mipem a si zongah, laikhat mi a si zongah, Min cu a vawlhpamh ahcun thah a si ko lai, tiah chim hna," a ti. ¹⁷ "Cun, mi a thatmi cu thah a si lai. ¹⁸ Saṭil a thatmi nih a cham lai, nunnak caah nunnak. ¹⁹ Mi pakhatkhat nih a innpa kha a mui a chiatter ahcun a tuah bantukin a cungah tuah a si ve lai, ²⁰ ruh khiah caah ruh khiah ve, mit caah mit ve, ha caah ha ve; mi kha a mui a chiatter bantukin chiatter a si ve lai. ²¹ Saṭil a thatmi nih a cham lai; mi a thatmi cu thah a si lai. ²² Mipem ca le laikhat caah phungbia pakhat nan ngei lai tiah chim hna; zeitintiah keimah cu Bawipa nan Pathian ka si," tiah a ti. ²³ Cu bangin Moses nih Israel mi cu a chimh hna i chiat sertu cu riahhmun lengah an chuahpi i lung in an cheh. Bawipa nih Moses nawl a pek bangin Israel mi nih an tuah.

¹ Bawipa nih Moses cu Sinai Tlang cungah a chawnh i, ² "Israel mi hna sinah hi bangin va chim, Nannih kan pekmi hna ram chungah nan luh tikah, cu ram nih cun Bawipa caah sabbath a ulh awk a si lai. ³ Nan lo chungah kum ruk chung thlaici nan thlak lai i kum ruk chung nan mitsur dum cu nan thlawh lai i a theitlai nan pumhkhawmh lai; ⁴ sihmanhsehlaw a kum sarihnak kum ah cun ram caah dinh zirziarnak sabbath a si lai, cucu Bawipa ca i sabbath cu a si lai; nan lo ah thlaici nan thla lai lo i nan mitsur dum zong nan thlo lai lo. ⁵ Nan rawl hlih cu nan ṭuan hna lai lo i nan sersiam lomi mitsur ruang i mitsur thei cu nan lo hna lai lo; mah kum cu ram caah cun dinh zirziarnak kum a si lai. ⁶ Cu ram sabbath nih cun rawl an pek hna lai, nanmah caah siseh, nan salnu nan salpa hna caah siseh, man pekmi sinum siseh, nannih sin i a ummi mipem caah siseh; ⁷ nan saṭil ca le nan ram chung i a ummi saram ca zongah ram nih a voimi vialte cu rawl caah a si lai. ⁸ "Cun sabbath kum timi pasarih hna kum cu na rel lai, pasarih let sarih kum, sabbath pasarih hna kum cu nan caah kum sawm li le kum kuanak a si lai. ⁹ Cun thla sarih thla ni hra ni ah cun a thangmi muko kha nan chawhpi lai; remnak ni ah cun nan ram chung vialte ah muko cu nan tum thluahmah lai. ¹⁰ Cun kum sawm nganak kum cu nan thianter lai i cu ram chung khuazakip ah, a chung i a ummi vialte kha, luatnak nan thanh hna lai; nan caah jubili a si lai, nannih nan thil cio le nan chungkhar sin cio i nan kir caan cu a si lai. ¹¹ Cu kum sawm nganak kum cu nan caah jubili a si lai; cu kum ah cun thlaici nan thla lai lo, amah tein a khomi zong kha nan ṭuan lai lo, nan ser siam lomi mitsur ruang mitsur thei zong kha nan pumkhawm lai lo. ¹² Zeitintiah jubili a si; nan caah a thian awk a si; lo chungin a voimi lawng kha nan ei lai. ¹³ "Jubili kum ah hin mah le thil sin cio ah kir ṭhan nan si lai. ¹⁴ Nan innpa sin i nan zuar ah siseh, nan innpa sin i nan cawk ah siseh, pakhat le pakhat nan i hleng lai lo. ¹⁵ Jubili hnu a kum zatning paoh in nan innpa sinin nan cawk lai i tirawl a voi kum zatning paoh in nanmah cu an zuarh hna lai. ¹⁶ Kum a tam ahcun a man cu nan karh lai, kum a tlawm ahcun a man cu nan ṭhumh lai, zeitintiah tirawl a voining zat cu an zuarhmi hna cu a si. ¹⁷ Pakhat le pakhat nan i hleng lai lo, sihmanhsehlaw nan Pathian kha nan ṭih lai; zeitintiah keimah cu Bawipa nan Pathian ka si. ¹⁸ "Cucaah ka nawlbia kha nan tuah lai i ka phunglam kha nan ulh hna lai i nan tuah veve hna lai; cucaah hi ram chungah hin him tein nan um lai. ¹⁹ Ram nih a theitlai a chuah lai i khim tein nan ei lai i ram chungah him tein nan um lai. ²⁰ Nannih nih, ’Kum sarihnak kum ah cun zeidah kan ei kun lai, thlaici kan thlak lo i kan tirawl kan pumhkhawmh hna lo ahcun?’ tiah nan ti ahcun, ²¹ kum ruknak kum ah khan ka thluachuahnak cu nan cungah nawl ka pek lai i kum thum ca in theitlai a chuah lai. ²² Kum riat kum ah thlaici nan tuh tikah, rawl hlun kha nan ei ko lai; kum kuanak kum, a theitlai a chuah kum tiang cun, rawl hlun cu nan ei lai. ²³ Ram cu zungzal ca cun nan zuar lai lo, zeitintiah ram cu keimah ta a si; zeitintiah nannih cu keimah sin i mipem le khual nan si. ²⁴ Nan comi ram chung vialte ah cun lo kha tlanh ṭhan nan sian lai. ²⁵ "Nan unau a si a fah i a thilri a cheukhat cu a zuar ahcun, amah he aa naih bikmi a rualchan nih a ra lai i a unau nih a zuarmi cu a tlanh lai. ²⁶ Mi pakhatkhat nih tlanhpiaktu a ngeih lo i amah cu a hun i chilhkhah i a tlanhnak ding caah a za a ngeih ahcun, ²⁷ a zuar ri khan kum rel seh law, a zuarhmipa kha a tangmi man zat pe ṭhan seh; cun amah thilri ah cun a kir lai. ²⁸ Sihmanhsehlaw lak ṭhannak ah a za a ngeih lo ahcun, a zuarmi cu a cawtu kut chungah khan jubili kum tiang a tang ko lai; jubili ah cun chuahter a si lai i amah kha a thilri sinah cun a kir ṭhan lai. ²⁹ "Kulh a ngeimi khua chung i inn pakhat cu mi pakhatkhat nih a zuah ahcun, a zuarh hnu kum khat pumhlim chungah a tlanh ṭhan khawh lai; kum khat tlingte tlanhnak nawl a ngei lai. ³⁰ Kum khat tlingte chung i a tlanh khawh lo ahcun kulhmi khua chung i inn cu a zungzal in a tefa hna tiangin, a cawtu ta cu a si lai; jubili zongah khirh ṭhan a si hlei lai lo. ³¹ Sihmanhsehlaw kulhnak a ngei lomi khuate chung i inn hna cu ram chung i lo bantuk hna ah khan rel an si lai; tlanh khawh an si lai i jubili ah khirh ṭhan an si lai. ³² Sihmanhsehlaw Levi mi hna khua, an covo khua hna chung i inn hna cu, Levi mi nih zeitikhmanh ah an tlanh khawh lai. ³³ Cun Levi mi pakhatkhat nih tlanh khawhnak nawl a ngeihmi cu a hman lo ahcun, an covo khua chung i a zuarmi inn cu jubili ah khirh ṭhan a si lai; zeitintiah Levi mi hna khua chung i inn hna cu Israel mi hna lakah an covo an si. ³⁴ Sihmanhsehlaw tlangram chung lo, an khua ta a simi hna cu zuarh khawh an si hnga lo; zeitintiah mah cucu a zungzal an vo a si. ³⁵ "Na unau cu a si a fah i nangmah kha an toh ahcun, nangmah nih na rak cawmken lai; khual le mipem bantukin na sinah a um lai. ³⁶ A miak siseh a karh siseh amah sinin na la lai lo, sihmanhsehlaw na Pathian cu ṭih ko; na unau cu na sinah khua a sak khawh nakhnga. ³⁷ Na tangka kha a karh in na cawih lai lo, na rawl zong a miak in na pe lai lo. ³⁸ Keimah cu Bawipa nan Pathian Kanaan ram kha nanmah pek awk le nan Pathian si awkah Izipt ram chungin an chuahpitu hna ka si. ³⁹ "Cun na unau kha na kiangah a si a fah i amah le amah kha na sinah aa zuar ahcun, sal bantuk cun na hmang lai lo: ⁴⁰ nangmah sinah amah cu kuli bantuk le mipem bantukin a um lai. Jubili kum tiang an rianh lai; ⁴¹ cun nangmah sinin amah he a fale he an chuak lai i amah innchungkhar sinah khan an kir lai i a pupa hna covo ah khan a kir lai. ⁴² Zeitintiah anmah cu, Izipt ram in ka chuahpimi ka sal an si; sal ah zuar an si lai lo. ⁴³ Amah cu hrang piin na uk lai lo, sihmanhsehlaw na Pathian kha na ṭih lai. ⁴⁴ Salnu salpa nan ngeih awk hngami hna cu, nan velchum i a ummi miphun hna chungin salnu salpa caah cun nan cawk hna lai. ⁴⁵ Cun nannih sin i khua a sami phundang mi hna le nan ram i hrinmi an chungkhar hna lak zongin nan cawk khawh hna lai i nan misa an si lai. ⁴⁶ Nan hnu i nan fapa hna kha, zungzal in co awkah nan roh khawh hna lai; annih cu sal ah nan ser khawh hna lai, sihmanhsehlaw Israel mi nan unau a simi hna cu, pakhat le pakhat hrang piin nan i uk lai lo. ⁴⁷ "Nangmah sin i a ummi khual maw mipem maw a hung rum i a pawng i a ummi na unau a si a fah i na sin i a ummi khual sinah cun maw mipem sinah cun maw, asiloah, khualpa innchungkhar lak i pakhatkhat sinah maw aa zuar ahcun, ⁴⁸ aa zuarh hnu zongah tlanh khawh a si lai; a unau pakhatkhat nih an tlanh lai, ⁴⁹ asiloah, a pa unau nih maw a pa unau fa nih maw a tlanh lai, asiloah, amah innchungkhar mi a simi pakhatkhat nih a tlanh lai; asiloah, amah cu a hung rum ahcun amah le amah aa tlan lai. ⁵⁰ A cawtu pa he cun amah le amah aa zuarh kum in jubili kum tiang an rel ṭi lai i a luatnak man cu a kum zat ning in a si lai; amah a ngeitu sin i a um caan cu kuli can bantukin tuakpiak a si lai. ⁵¹ Kum tampi a bat rih ahcun a tlanhnak man caah khan a kum zat ning in a rak cawknak man chung khan khirh a si lai. ⁵² Sihmanhsehlaw jubili kum tiangah kum tlawmte lawnglawng a taan ahcun amah he cun an tuak lai i amah tlanhnak ca tangka amah sinin kum zeizat rianṭuannak dah a ba rih tining khan a khirh lai. ⁵³ Kum khat hnu kum khat in rawihmi kuli bantuk amah sinah a si lai; na mithmuh ah hrang piin amah cu a uk lai lo. ⁵⁴ Cun mah tining hin tlanh a si khawh lo ahcun jubili kum ah amah he a fale he luatter an si lai. ⁵⁵ Zeitintiah keimah caah cun Israel mi cu ka sal an si; Izipt ram in ka chuahpimi ka sal an si; keimah cu Bawipa nan Pathian ka si.

¹ "Nannih nih an hmai i kun awkah, siasal nan i ser lai lo i ṭialmi milem siseh, tung siseh, nan bunh lai lo, cun nan ram chungah suaimi lung nan phun lai lo; zeicahtiah keimah cu Bawipa nan Pathian ka si. ² Ka sabbath cu nan ulh hna lai i ka hmunthiang cu nan upat lai: keimah cu Bawipa ka si. ³ "Ka phunglam kha nan zulh hna i ka nawlbia kha nan ulh hna i nan tuah hna ahcun, ⁴ nan ruahpi cu an caan te ah kan pek hna lai i ram nih hin tirawl an chuahpiak hna lai i nan lo chung thing hna nih thei an tlai lai. ⁵ Nan facil nih cun mitsur lawh caan cu a hei phak lai i mitsur lawh caan nih cun thlaici thlak caan a phak lai; nan rawl cu khim tein nan ei lai i nan ram chungah him tein khua nan sa lai. ⁶ Cun ram chungah daihnak ka chiah lai i nan it lai i ahohmanh nih nan thin an in phanter hna lai lo; cun ram chungin sahrang ṭhalo kha ka ṭhial hna lai i vainam kha nan ram chungah aa chawk lai lo. ⁷ Nan ral kha nan dawi hna lai i nan hmaiah vainam in an tlu lai. ⁸ Nannih lak i panga nih za khat nan dawi hna lai i nannih lak i za khat nih thong hra nan dawi hna lai; nan ral hna cu nan hmaiah vainam in an tlu lai. ⁹ Cun nannih cu hmaizahnak kan pek hna lai i kan punzamter hna lai i kan karhsoter hna lai i, nannih he ka biakamnak kha ka fehter lai. ¹⁰ Cun saupi chiahmi rawl hlun khonmi kha nan ei lai i a thar chiahnak caah a lawnnak a um nakhnga a hlun cu nan chuah hna lai. ¹¹ Cun ka umnak cu nanmah lakah ka ser lai i ka nunnak nih an hua hna lai lo. ¹² Nan sinah kaa chawk lai i kei cu nan Pathian ka si lai i nannih cu ka mi nan si lai. ¹³ Keimah cu Bawipa nan Pathian, Izipt ram in an sal nan si nakhnga lo an chuahpitu hna ka si; keimah nih nan seihnam hngawng kual cu ka khiah cang i dingte i dir in kan kalter hna. ¹⁴ "Sihmanhsehlaw ka bia nan ngaih lo i hi nawlbia vialte hi nan tuah hna lo i ¹⁵ ka phungbia kha zei i nan rel hna lo i nan nunnak nih ka phunglam kha a huat i cucaah ka nawlbia tuah duh loin ka biakamnak lehlam kha nan hrawh ahcun, ¹⁶ kei zong nih mah hihi nan cungah ka tuah ve lai: Nan cungah khulrang ṭihnung, tlumralnak le, mit a hrawktu le nunnak a zorter thluahmahtu ngornak ka tlunter lai. Cun nan thlaici thlakmi cu pakpalawng a si ko lai, zeitintiah nan ral hna nih an ei lai; ¹⁷ ka hmai kan chiathnawh hna lai i nan ral nih an in tei hna lai; an huami nih an in uk hna lai i ahohmanh nih an in dawi hna lo zongah nan zam lai. ¹⁸ Cun mah hi ti, ti zong i ka bia nan ngaih ṭhiamṭhiam lo ahcun nan sualnak ruangah a let sarih in kan chimhhrin rih hna lai i, ¹⁹ nan ṭhawnnak nan i porhlawtnak kha ka hrawh lai i nan van hna cu thir bantuk ah ka ser hna lai i nan vawlei cu dar bantuk ah ka ser lai; ²⁰ cun nan thazang cu pakpalawng ah nan hman lai, zeitintiah nan ram nih tirawl a chuah lai lo i nan ram chung thingkung hna nih thei an tlai lai lo. ²¹ "Cun keimah ralchanh in nan kal i ka bia nan ngaih lo ahcun, nan cung ah hremnak, nan sualnak nakin a let sarih tam in ka tlunter lai. ²² Nannih lak i sahrang cu ka thlah hna lai i nan fale kha an in sehpiak hna lai, nan saṭil kha an in hrawhpiak hna lai i an in tlawmter hna lai, cu caah nan lam hna cu an ṭhing dih lai. ²³ "Cun hi chimhhrinnak thawng zongin keimah leiah nan i mer hlei lo i keimah ralchanh in nan kal ko ahcun, ²⁴ keimah zong nannih ralchanh in ka kal ve lai i keimah hrimhrim nih nan sualnak ruangah a let sarih in kan tuk hna lai. ²⁵ Cun nannih cungah vainam ka tlunter lai i biakamnak caah khan phuhlamnak a tuah lai; nan khua chungah nan i pumh ahcun nan lakah rai ka tlunter lai i nan ral hna kut ah khan nanmah cu pek nan si lai. ²⁶ Cun nan i rinhcanhmi rawl kha ka chah tikah nu pahra nih changreu rawhnak pakhat ah nan changreu cu nan rawh lai i nan changreu cu a khing thlai tein pek ṭhan nan si lai; cun nan ei lai i nan i khimh lai lo. ²⁷ "Cun mah hi ti, ti hmanh zong i ka bia nan ngaih hlei lo i keimah ralchanh in nan kal ko ahcun, ²⁸ keimah zong thinhun in nanmah ralchanh in ka kal ve lai i keimah hrimhrim nih nan sualnak caah khan a let sarih in kan chimhhrin hna lai. ²⁹ Nan fapale sa kha nan ei lai i nan fanule sa kha nan ei lai. ³⁰ Nan khuahrum bo cu ka hrawh hna lai i nan zihmui biakṭheng cu ka hau dih hna lai i nan ruak cu nan siasal hna ruak cungah ka hlonh hna lai i ka nunnak nih an huat hna lai. ³¹ Nan khua cu ka ṭiaoter hna lai i nan hmunthiang cu ka ṭhinter hna lai i nan rimthaw cu ka hnim hna lai lo. ³² Ram cu ka hrawh cikcek lai i cu caah nan ral hna cu a chung i an um tikah an khuaruah a har lai. ³³ Miphun hna lakah kan ṭhek hna lai i nan hnu in vainam kan zuhhnawh hna lai i nan ram cu a ṭhing lai i nan khua cu an ṭiao lai. ³⁴ "Cun ram nih cun nan ral hna ram i nan um chung, a ṭhin chung vialte cu a sabbath hna kha a rak i lawmhpi lai; ram cu aa din lai i a sabbath hna cu aa lawmhpi lai. ³⁵ A ṭhin chung vialte cu aa din ko lai; a chungah nan um lio i nan sabbath kum hna ah ram nih a hmuh lomi dinhnak cu a hmuh lai. ³⁶ Nannih lak i a tangmi hna tu cu, an ral hna ram chungah an lung chungah lungdernak ka umter lai; hnahchawl aa hninmi thawng nih a zamter hna lai i vainam lak i zam bantukin an zam lai i ahohmanh i dawi lo ah an thi lai. ³⁷ Ahohmanh i dawi ṭung lo ah vainam he dawi bantukin pakhat le pakhat an i rilhhnawh lai i nan ral hna hmai i dir awkah ṭhawnnak nan ngei lai lo. ³⁸ Cun miphun hna lakah nan loral lai i nan ral hna ram nih khan an ei dih hna lai. ³⁹ Cun nannih lakin a tangmi hna cu nan ral hna ram chungah, an ṭhat lo ruangah an loral chin lengmang lai; cun an pupa hna ṭhat lo ruang zongah, anmah bantukin an loral lai. ⁴⁰ "Sihmanhsehlaw keimah cung i rawinak an tuahnak le keimah ralchanh in an kalnak chung i an tuahmi ṭhat lonak le an pupa hna ṭhat lonak, ⁴¹ cu ruang i anmah ralchanh in ka kal i an ral hna ram chung i ka luhpinak hna cu an i phuan i cuarpar tan lo an lung cu a nem i an ṭhat lonak kha an i remh ahcun; ⁴² cu tikah cun Jakob sin i ka biakam kha ka hngalh ṭhan lai, Isak sin i ka biakam le Abraham sin i ka biakam kha ka hngalh ṭhan lai i ram kha ka hngalh ṭhan lai. ⁴³ Sihmanhsehlaw ram cu an kaltak lai i anmah um loin a ṭhin lioah a sabbath hna cu aa lawmhpi lai; cun ka phunglam kha zei ah an rel lo i an nunnak nih ka nawlbia kha an huat caah an ṭhat lonak dantatnak cu an co lai. ⁴⁴ Asinain cu vialte ruang hmanh ah cun, an ral hna ram chung i an um tikah, ka hlaw hna lai lo, annih kha hrawh cikcek i annih he ka biakam kha hrawh tiangin ka hua fawn hna lai lo; zeitintiah keimah cu Bawipa an Pathian ka si. ⁴⁵ Sihmanhsehlaw anmah zawnruah ah, an Pathian ka si nakhnga, miphun hna hmuh i Izipt ram in ka chuahpimi an pupa hna he ka biakam kha ka hngalh ṭhan lai: keimah cu Bawipa ka si," tiah a ti. ⁴⁶ Mah hihi Bawipa nih amah le Israel mi hna karlak ah Sinai Tlang cungah Moses thawngin nawlbia hna le phunglam hna le phungbia hna a sermi cu an si.

¹ Bawipa nih Moses cu a chawnh i, ² "Israel mi cu hi bangin va chim hna. Mipa pakhatkhat cu a hleikhun in Bawipa sinah tuahmi biakamnak ruangah Bawipa sinah pek a si ahcun, ³ na tuakning man in cu pa cu luatter a si lai: kum kul in sawm ruk tiangah ngun shekel sawm nga, biakinn shekel in thlaimi a si lai. ⁴ Cun mi cu nu a si ahcun a man i na tuakmi cu shekel sawm thum a si lai. ⁵ Cun kum nga in kum kul tiangah pa a si ahcun a man na tuakmi cu shekel kul a si lai i nu a si ahcun shekel pahra a si lai. ⁶ Cun thla khat in kum nga tiangah, a man na tuakning cu pa caah ngun shekel panga, cun a man na tuakning cu nu caah shekel pathum a si lai. ⁷ Cun kum sawm ruk in a cunglei a si ahcun, a man na tuakning cu pa caah shekel hleinga a si lai i nu caah shekel pahra a si lai. ⁸ Cun a man na tuakmi cu pakhatkhat nih a si a fah tuk caah a pek khawh lo ahcun, a minung cu tlangbawi hmaiah a chuahpi lai i tlangbawi nih cun a man cu a tuak lai; biakamnak a sertu nih a ti khawhning khan in tlangbawi nih a man cu a tuak lai. ⁹ "Cu bantuk pekchanhnak caah Bawipa sin i mi nih an pekchanhmi cu saram a si ahcun, mi zeihmanh nih Bawipa sinah an pekmi cu a thiangmi a si. ¹⁰ Zeihmanh a airawl ah a hmang lai lo, a thlen zong a thleng lai lo, a ṭha cu a chia ah, a chia cu a ṭha ah an thleng lai lo; cun saram cu saram in a thlen ahcun, a thlennak le a thlenmi cu an pahnih in a thiangmi thil ah an cang lai. ¹¹ Cun a thiang lomi saram, Bawipa sinah thawinak ca i pekchanh tawn lomi a si ahcun, mipa nih cun saram cu tlangbawi hmaiah a rak put lai i ¹² tlangbawi nih a ṭha ah maw a chia ah dik a rak tuak lai; tlangbawi nih a tuakning in, cu bang cun a si lai. ¹³ Sihmanhsehlaw tlanh a duh ahcun a man tuakmi cungah cheu nga cheu khat a chap lai. ¹⁴ "Mi pakhatkhat nih a inn cu Bawipa ca i thian awkah a pekchanh ahcun, tlangbawi nih a ṭha ah maw a chia ah dik a tuak lai; tlangbawi nih a tuakning in, cu bang cun a si lai. ¹⁵ Cun a pechantu nih a inn cu tlanh a duh ahcun, a man tuakmi cungah tangka in cheu nga cheu khat a chonh lai i amah ta a si lai. ¹⁶ "Mi pakhatkhat nih roconak in amah ta a simi ram a cheubang cu Bawipa sinah a pekchanh ahcun, a man na tuakning cu a chung i thlaici tuhmi zat ning in a si lai; barli homer pakhat tuhnak cu ngun shekel sawm nga ah tuak a si lai. ¹⁷ Jubili kum in a pekchanhnak cu a si ahcun, nangmah nih a man na tuakning bantuk cun a hmun lai; ¹⁸ sihmanhsehlaw a lo cu jubili hnuah pekchanh a si ahcun, tangka in a man cu, jubili kum ṭhan hlantiang a tangmi kum zat ning in tlangbawi nih a tuak lai i nangmah nih a man na tuakmi chungin ṭhumhnak a um te lai. ¹⁹ Cun a pechantu nih a lo cu tlanh a duh ahcun, a man tuakmi cheu nga cheu khat cu tangka in a man ah cun a chonh lai i amah ta in a hmun lai. ²⁰ Sihmanhsehlaw lo cu tlanh a duh lo ah siseh, lo cu midang sin i a zuar cang ah siseh, tlanh a si ti lai lo; ²¹ sihmanhsehlaw mah lo cu jubili i luatter a si tikah Bawipa caah a thiangmi ah, ulh-amh awk i sermi lo bantuk ah a cang lai; tlangbawi ta ah a si lai. ²² Roconak in a comi si loin a cawk in a cawkmi lo kha Bawipa sinah a pekchanh ahcun, ²³ tlangbawi nih a man cu jubili kum tiangah zeizat dah a si ti kha a tuak lai i a tuakmi zat ning cun cu pa nih cun Bawipa ca i a thiangmi thil ah, cu ni ah cun a pek lai. ²⁴ Jubili kum ah cun a cawknak pa, roconak in a rak cotupa sinah khan, lo cu a kir ṭhan lai. ²⁵ Man tuaknak paohpaoh cu biaknak inn shekel ning in a si lai: shekel pakhat ah gerah pakul a si lai. ²⁶ "Sihmanhsehlaw later fa paohpaoh cu, Bawipa ta an si caah, ahohmanh nih an pekchanh awk a si lo; cawtum siseh, tuu siseh, Bawipa ta a si. ²⁷ Cun a thiang lomi saram a si ahcun, nangmah nih a man na tuak ning in a cawk ṭhan lai i cheu nga cheu khat a chap lai; a tlanh lo ahcun a man tuakning ah zuar a si lai. ²⁸ "Sihmanhsehlaw ulh-amhmi thil, Bawipa sinah mi pakhatkhat nih a pekchanhmi paohpaoh cu, a ngeihmi chungin zeihmanh siseh, minung a si ah, saram a si ah, ro i a comi a lo a si ah, zuarh awk zong a si lai lo i tlanh awk zong a si lai lo; ulh-amhmi thil paohpaoh cu Bawipa caah a thiang bik a si. ²⁹ Ulh amhmi minung cu ahohmanh a si ah, mi sinin hrawh cikcek hngami paohpaoh cu tlanh a si lai lo; thah a si ko lai. ³⁰ "Ram chung thil, cheu hra cheu khat vialte cu, ram chung i thlakmi thlaici a si ah, thingkung hna theitlai a si ah, Bawipa ta a si; Bawipa ca i a thiangmi a si. ³¹ Ahohmanh nih a cheu hra cheu khat azeihmanh kha tlanh a duh ahcun cheu nga cheu khat a bet lai. ³² Cun tuurun chungin siseh, cawrun chungin siseh, cheu hra cheu khat paohpaoh cu, saṭil khaltu ṭhiangṭhunh toi i a lanmi saṭil a pahranak paohpaoh cu, Bawipa ca i a thiangmi an si lai. ³³ Ahohmanh nih a ṭhat a chiat kha a dothlat lai lo; a thlen zong a thleng lai lo; a thlen a si ahcun a thlennak le a thlenmi kha an pahnih in a thiangmi ah an cang lai; tlanh khawh a si lai lo," tiah a ti. ³⁴ Mah hihi Sinai Tlang ah Bawipa nih Israel mi hna caah Moses a pekmi nawlbia cu an si.