ṬAHNAK HLA

ṬAHNAK HLA

¹ Hmasa i minung a rak khat tawnmi khua kha, Zeitindah umhar in a ṭhut ko ee! Hmasa i miphun hna lak i khua lianngan a rak simi kha, Zeitindah nuhmei ah a can; Ram uktu bawinu a rak simi kha hnekmi rianṭuantu ah a cang ko ee! ² Zan ah lunghno in a ṭap, A bel ah a mitthli a luang; Amah a dawtu hna lakah khan A hnemtu pakhat hmanh an um lo; A hawi vialte cu rawitu ah an cang dih i a ral ah an i cang dih. ³ Saltang harnak chungah le A dong lo rian hrang ṭuannak chungah Judah cu a lut cang, Miphun hna lakah khua a sa i dinhnak hmun a hmu lo; Amah a harnak chungah khan A dawitu hna nih khan an phak. ⁴ Zion lei kalnak lam kha an ṭap, zeitintiah a puai thiang ah khan a rami an um lo; A kutka vialte cu an rawk dih, a tlangbawi hna cu an hrum an ai; A ngaknu hna cu lamhlatpi ah an hnuh hna i Amah hrimhrim nih fak piin a in. ⁵ A ral hna cu a bawi ah an cang, A ral hna cu nuam tein an um, Zeitintiah a tuahmi a ṭha lomi rel cawk lo ruangah khan Bawipa nih amah cu fak piin dan a tat; A fano cu an lo dih, Ral nih khan saltannak chungah an kalpi hna. ⁶ Zion fanu sinin lianhngannak vialte a lo cang, A bawi hna cu, ram ṭam awk hmu kho loin a zam lengmangmi sakhi, ba cikcek in sakap nih an dawimi bantuk an si. ⁷ Jerusalem nih hremnak a in lio caan le a vahvaih lio caan kha a hngalh camcin ko, A mi hna cu an ral kut chungah an tlak i Annih bawmtu ahohmanh an um lo lio caan kha, a philh kho lo. A ral nih cun a hmuh i a ṭumchuknak kha diriam in a nihsawh. ⁸ Jerusalem cu fak piin a sual ko, Cucaah puanchia thur bantuk ah rel a si cang; A rak upat tawntu vialte nih khan zei ah an rel ti lo, Zeicahtiah a taklawng in a um kha an hmuh. Cucaah a hrum a ai i ningzak in mi hmai a zoh ngam ti lo. ⁹ A hni ah thurhnawmhnak cu aa beh i Hmailei a sicannak ding kha a ruat lo. A tluknak cu zumh khawh lo tiangin a si i Amah hnemtu ah ahohmanh an um lo. Bawipa, a harnak hi nangmah nih run zohpiak law, Zeitindah a ral nih an tei kha run hmuhpiak ko. ¹⁰ A ro vialte kha tlaih awkah a ral nih a kut kha a chuah; Khi tikah khan, nangmah na mibu chungah luh awk na thlauhmi Jentail mi hna a hmunthiang chung i an luh kha a hmuh hna. ¹¹ A mi vialte hna cu an hrum an ai, Rawl kha heh tiah an hal; An thazang kha hmuh ṭhan awkah An rothil cu rawl ah an zuar hna. "Maw Bawipa, run ka zoh law, Zeitluk in dah zohchuk ka si kha run ka hmu tuah," tiah a ṭap. ¹² Lam i aa chawkmi hna nan caah, Mah hihi zeihmanhlo maw a si ko? A zoh tal cu ka zohpiak ko sawh u: Ka lungfahnak bantuk lungfahnak hi a um maw? Bawipa nih a thinhun ni ah zaangfahnak um loin dan a ka tatnak hremnak bantuk hi a um ti maw? ¹³ Vancung in mei a run thlah i Ka ruh chungah khan a vak dih; Ka ke kha foih awkah sur a phah i Hnulei ah a ka kirter ṭhan; Ṭiaonak tahchunhnak caah a ka ser i Chun nitlak zawtnak in a ka hrem. ¹⁴ Ka palhnak cu ka cungah ṭem chih an si i Amah kut hrim nih ka velchum in a ngerh hna; A hngawngkual cu ka hngawng ah khan a ka khinh i A rih tuk caah ka tha nih a celh lo; Cu ti i a ka khinh bu cun Bawipa nih a ka kaltak i ka dir kho lo. ¹⁵ Ka khua kulh chung i a ummi miṭhawng vialte hna cu Bawipa nih zeihmanh ah a rel hna lo; Ka ralkap valno rual kha cil dih awkah ralkap kha a ka pumhhnawh luaimai hna. Bawipa nih Judah fanu thiang cu, Mitsur nennak chung i mitsur thei bantukin a ke in a cil. ¹⁶ Hi thil hna ruangah hin ka ṭap i Ka mit cu mitthli in a luang; Keimah hnemtu ding le ka thazang hrimhtertu ding cu lamhlapi lawngah an um. Ka fapale hna cu lileng in an um, Ral nih a tei hna caah. ¹⁷ Zion nih a za a zao, Sihmanhsehlaw a hnemtu ahohmanh an um lo; Bawipa nih Jakob innpa hna cu, Amah ral ah nan cang lai, tiah nawl a pek hna; Jerusalem cu an lakah Puanchia fihnung ah a cang cang. ¹⁸ Bawipa cu a ding ko; A nawl a altu cu keimah ka si. Ngai tuah u, nannih miphun vialte hna, ngai tuah u law ka lungfahnak hi ka zohpiak tuah u: Ka ngaknu thiang hna le ka tlangval hna cu saltannak chungah an kal cang. ¹⁹ A ka dawtu kha ka kawh hna, Sihmanhsehlaw zumhawktlak an si ti lo; Khua chung i a ummi ka tlangbawi hna le upa hna kha, An thazang hrimh ṭhan awk caah rawl an kawl nain, Zeihmanh an hmu lo. ²⁰ Maw Bawipa, zeitluk in dah ka lungre a theih hi run zoh tuah. Ka lung si a vang i Ka chungthin aa let dih, Nangmah kha zeihmanh ruat loin kan doh caah a si. Vainam nih khualak lam ah ngakṭah a ser hna i Rai nih inn chungah ngakṭah a ser hna. ²¹ Hnemtu zeihmanh ngei loin ka aihram len ko hi ka theihpiak ko. Ka ral vialte hna nih ka harnak hi an theih tikah, Nangmah tuahmi ah hin an i lawm; Sihmanhsehlaw nangmah nih, keimah bantuk an si ve naklai ni bia na kammi kha khulrang in tlunter ko. ²² Ṭhat lonak an tuahmi vialte cu na hmaika kha phan ko hna seh; Ka ṭhat lonak vialte ruangah nangmah nih na ka hrem bantukin Annih zong hrem ve ko hna; Zeicahtiah ka aihramnak cu a tam ko i Ka lung cu a tha a ba ko.

¹ Bawipa nih a thinhun in Zion fanu cu muihnak in a khuh ai! Israel sunparnak cu vancung in vawlei ah a thlak i A thinhun ni ah cun Zion cu a ke chiahnak a si kha a hngal ti lo. ² Bawipa nih zaangfahnak um loin Jakob umnak vialte cu a hrawh dih. A thinhun in Judah fanu ralhau vialte kha a chimh dih; Pennak le a bawi hna cu vawlei ah a ṭhumh hna i a thurhhnawmhter hna. ³ A thinhun in Israel sunparnak ki cu a tan i Ral an rat cuahmah lioah khan a bawmhnak kut cu a zuhkanh hna; Jakob chungah cun meizik bangin a alh i a pawngkam vialte kha a kangh dih. ⁴ Ral bantukin a li kha aa koih; Ral bantukin a dir i A rak lawmh tawnmi vialte hna kha A ban ṭhawng in a thah hna; A thinhunnak cu mei bangin Zion fanu thlam cungah a bungh dih. ⁵ Bawipa cu ral bantuk ah a cang cang i Israel cu a hrawh cang; An inn sangsang hna cu a hrawh hna i An ralhruang hna cu a chimh dih hna; Judah fanu cungah ngaihchiatnak kha, A chonh chin luaimai ko. ⁶ Mitsur ruang kha a thei lawh a si bangin a puan biakinn kha a ramh i Pumhnak hmun kha a rawkmi hmun ah a ser. Bawipa nih Zion ah cun puai pumhnak le sabbath hngalhnak vialte kha a hloh dih; A thinhunnak a fah caah, Siangpahrang he tlangbawi he zei ah rel loin a um hna. ⁷ Bawipa nih amah biakṭheng lila kha a hlawt i A hmunthiang kha chiat a serh. A inn vampang hna cu ral kut chungah khan a pek hna; Bawipa innchung hrimhrim ah khan Puai tuah ni i teinak hawhawt bantukin an au. ⁸ Bawipa nih Zion fanu kulhnak vampang hna cu hrawh awkin a ruah hrimhrimmi a si; A hri in an hmetngan kha a tah hna i Hrawh awkah khan a kut aa sum lo; Ralhruang chuntlung le vampang hna kha a ṭahter hna i An pahnih in hnabeidong in an ril ko. ⁹ A kutka hna cu vawlei chungah an pil, Kutka hrolh hna cu a den hna i a tan dih hna; A siangpahrang le a uktu bawi hna cu Jentail mi sinah an um i phung cu a um ti lo; A profet hna zong nih Bawipa sinin langhnak an hmu fawn lo. ¹⁰ Zion fanu upa hna cu vawlei ah an ṭhu i an hrum; An lu cungah leidip an i phulh i Buri kha an i aih; Jerusalem ngaknu thiang hna nih Vawlei ah an lu kha an khun. ¹¹ Ka ṭahnak ah ka mit a phing dih i Ka chung a vang; Ka lung cu ngaihchiatnak in vawlei ah bungh a si, Zeicahtiah khualak lam ah khan ngakchia le bawhte hna cu an ba i ¹² ’Khuazei ah dah rawl le mitsur hang kan hmuh khawh lai?’ tiah an au — Khuachung lam ah cun hliammi hna bantukin an ba, an nule ṭang chungah cun ha lengmang in an thaw an chuah. ¹³ Maw Jerusalem fanu, na caah zeidah ka chim khawh lai i Zei he dah kaan tahchunh khawh lai? Nangmah hnemh awk caah zei he dah kan tahṭhimh khawh lai Maw Zion fanu thiang? Zeicahtiah na hma cu rili ngaw a ti i aho nih dah aan damter khawh lai? ¹⁴ Na profet nih an in hmuhpiakmi langhnak cu Ahmaan lomi le phuahchommi lawnglawng an si; Na sualnak kha i hngal lakin an in chim lo i Cucaah cun na cung i a tlung dingmi dantatnak nih an hrial kho lo. Annih nih an in hmuhpiakmi langhnak cu hlennak an si, a deu le dehnak an si. ¹⁵ A kalmi paoh nih khan an kut an in benghhnawh i An in cekcekhnawh i an lu an in thinhnawh, Maw Jerusalem fanu; "Hi khua hi maw, dawhnak ah a tlingmi vawlei cung dihlak lawmhnak, rak timi cu a si?" an ti. ¹⁶ Na ral vialte hna nih khan an in nihsawh: An in cekcekhnawh i an hacang an in rial hnawh i, Aa, hika hi kan phan cang, Hi ni hi pei kan rak ngan lengmangmi kha a si cu; Kan hmuh taktak cang hi ta,’ an ti. ¹⁷ Bawipa nih aa timhmi cu a tuah cang, A hronak hna cu a tlinter cang; Hlan liopi in a ruah cang bantukin Zaangfahnak um loin aan hrawh i Na ral cu na cungah a lawmhter hna i Nangmah an dohtu cu a lianhnganter hna. ¹⁸ Bawipa sinah cun lungriam tein ṭap tuah, Maw Zion fanu vampang; Na mitthli cu a chun a zan in tla thluahmah ko seh. Caan tlawmte hmanh i din hlah Na mitthli zong hul hrim hlah seh. ¹⁹ Zan ah tho law fak piin au tuah; Zan ven thawknak kip ah Bawipa hmaiah cun na lung cu ti bangin bung ko. Na fale hna nunnak caah a sinah na kut hler tuah. ²⁰ Bawipa, run zoh law run hmu tuah; Hi bantukin na hremmi hi ahodah a si? Nu nih an paw theitlai, Him tein an hrinmi cu an ei ko hna lai maw? Tlangbawi le profet hna cu Bawipa hmunthiang chungah thah an si ko lai maw? ²¹ Khuachung lam ah khin mino he micang he an ril liangluang ko. Ka ngaknu thiang hna le ka tlangval hna cu vainam le rai in an tlu cang; Nangmah nih na thinhun ni ah na thah hna i zaangfahnak um loin na thah hna. ²² Keimah doh awkah ka ral hna cu, puai tuah awkah aa pummi bantukin, a kenkip in na auh hna; Bawipa thinhun ni ah cun pakhat hmanh an luat lo; pakhat hmanh an nung lo. Him tein ka hrinmi hna le ka cawmmi kha an dihlak in ka ral nih an hrawh hna.

¹ Temhinnak a hngaltu cu keimah ka si, A thinhunnak fungfek cu ka in cang. ² Keimah hi a ka kalpi i Ceunak a um lonak muihnak chung i a ka kaltakmi cu ka si. ³ Keimah lawng hi a kut in a ka rialchih ko i cuticun chun nitlak in a si ko. ⁴ Ka tit le ka cuar cu sawng ṭiamṭuam in a tuah dih hna i ka ruh cu a khiah dih hna; ⁵ Ka velchum in vampang kha a chon hna, ka hnulei he ka hmailei he, ⁶ A thihnak a saupi cangmipa bantuk khan a muimi hmun chungah a ka hlonh. ⁷ Ka luat khawh nakhnga lo vampang chungah a ka erh i hreng a ka khenh; ⁸ Ka au i bawmhnak ka hal hmanh ah ka thlacam cu a ka ngai duh lo. ⁹ Ka lam ah cun lungtum a hronh hna i ka lam cu a hnawhter. ¹⁰ Vom bantukin a ka bawh i Mi a bawh ziartu chiandeih bantukin a ka bawh. ¹¹ Ka lam kha a kawiter, ka ke kha a ka beiter i cihai lileng in a ka kaltak. ¹² A likuk kha a za a sih i Keimah cu cantiang hna ca hmuichon ah a ka ser. ¹³ A thalbawm chungin aa chuahmi thal hna khan ka kal kha a chunh hna. ¹⁴ Miphun vialte hna caah nihchuak ah ka cang i, Chun nitlak in an hla-eng sakhnawhmi hmuichon ka si cang. ¹⁵ A khami an in a ka khimter i Anfangkha in a ka ritter. ¹⁶ Lung cungah ka ha kha a ka beuhpiak hna; Vutcam a ka eiter i ngakṭahnak in a ka hrem; ¹⁷ Daihnak kha ka nunnak chungin a chuak cang i Nunnuamh kha zei a si ka philh cang. ¹⁸ Khi tikah ka thazang a um ti lo, tiah ka au i, Cuticun Bawipa kaa ruahchannak zong a lo ve. ¹⁹ Ka temhnak le ka vahvaihnak ka ruah ah hin Anfangkha le hnitkha bantuk an si ko. ²⁰ Cucu run ka hngalhpiak, maw run ka ka hngalhpiak ko law, run ka hlawm ko sawh. ²¹ Hi vialte hi ka lung chungah kaa chiah hna i Cucaah ka ngan filfial ko lai: ²² Bawipa dawtnak a fekmi cu, a dong hrimhrim lai lo, A zaangfahnak zong a cat lai lo; ²³ Zing fate in an thar lengmang, Zumhtlak a sinak cu a lianngan hringhran. ²⁴ Ka ngeihmi dihlak cu Bawipa hi a si ko, ka ti; Cucaah amah cu lungsau in ka ngan ko lai; ²⁵ Bawipa cu amah aa bochanmi hna vialte cungah a ṭha. ²⁶ Cucaah a kan khamhnak ding cu lungsau in kan hngah awk a si. ²⁷ Cu lungsau cu kan no lio i kan hngalh ah a ṭha bik. ²⁸ Harnak kan in tikah kanmah lawng tein daite le lungsau in kan ṭhut awk le ²⁹ Amah duhnak zulh in kan lu kan khun awk a si. Zeicahtiah ruahchan awk a um kho rih ko. ³⁰ An kan tuk i an kan nihsawh zongah kan i in awk a si ko. ³¹ Zeicahtiah Bawipa nih cun a sal hna cu zungzal in a hlaw hna lai lo. ³² Fak piin dan a tat hna lai nain A dawtnak a tam rup in an cungah zaangfahnak a ngei lai; ³³ Minung hi a hrem hna le dan a tat hna hi, A duh taktak caah a tuahmi a si lo. ³⁴ Ram chung i thongtlami hna mi zeihmanh hi ke in lamh le ³⁵ Cung Nung Bik zeirello in um i mi cu an hmuhtheih awk hnga a simi chuh le ³⁶ Zung chung i biading merh hna hi Bawipa nih a hnatlakpimi an si bal lo. ³⁷ Bawipa nih a thlauhmi thil cu Aho nih dah tuah si seh tiah nawl a pek khawh lai? ³⁸ A chia siseh a ṭha siseh, Cung Nung Bik kaa chungin a chuakmi an si lo maw? ³⁹ Zeicahdah minung, a thi khomi minung nih hin, a phun a zai lai? ⁴⁰ Kannih nih kan lam kha zoh ṭhan hna u si law, hneksak hna u si law Bawipa sinah kir ṭhan u sih; ⁴¹ Kannih nih, kan kut lawng kha si loin, kan lung tu kha vancung Pathian sinah hler u sih. ⁴² Kanmah hrimhrim te hi a sual i an dohtu cu kan si i Nangmah nih na kan ngaihthiam kho lo. ⁴³ Thinhun in naa mer i na kan dawi i zaangfahnak um loin na kan thah; ⁴⁴ Khuadawm pinah khin, kan thlacamnak nih a phak lengah khin naa thup; ⁴⁵ Miphun hna lakah hlonhmi thil le hmunthur bantukin na kan tuah. ⁴⁶ Kan ral hna nih an dihlak in an ka an kan an hnawh i an kan nihsawh. ⁴⁷ Kan hmaiah sadawitu khanhawtnak le khor le chiatnak le rawhralnak kha an um. ⁴⁸ Ka mi hna hma ruangah Ka mitthli tiva ti bangin a luang. ⁴⁹ - ⁵⁰ Vancung i a ummi Bawipa nih khin a run ka zoh i Ka temhinnak kha a run ka hmuh ko lioah hin Ka mit cu a dong lomi mitthli in a luang i zeihmanh nih a hnem kho hna lo; ⁵¹ Ka khuachung ngaknu vialte hna nih an tonmi thil in Bawipa nih a ka hrem. ⁵² Zeiruanglo ah ka ral a simi hna nih Va bantukin an ka dawi; ⁵³ Khor chungah cun an ka nam i Ka cungah khor cu lung in an chinh; ⁵⁴ Ti nih ka lu a ka phum i ’Ka donghnak a phan cang,’ tiah ka ti. ⁵⁵ Sihmanhsehlaw maw Bawipa, nangmah min cu Khor tawne khan ka hun auh; ⁵⁶ Ka aw kha na theih; ’Keimah chanh awkah ra tuah,’ tiah ka au tikah, Na hna i cheh sawh hlah. ⁵⁷ Nangmah kha kan auh tikah ka pawngah na um; Nangmah nih, ’Ṭih hlah,’ na ka ti. ⁵⁸ Bawipa, nangmah nih ka bia cu na ka chimpiak i ka nunnak cu na tlanh; ⁵⁹ Maw Bawipa, nangmah nih ka cung i dinlonak an tuahmi cu na hmuh i Keimah lei ca ṭha in biakhiahnak kha na tuah; ⁶⁰ Phuhlam an duhnak le Keimah cung i rawinak an tuahmi vialte cu na hmuh dih. ⁶¹ Maw Bawipa, an ka zawmhtaihnak le an ka rawinak liangluang hna le, ⁶² Ka ral hna nih chun nitlak in an ka congoihnak le an ka thangchiatnak cu, na theih. ⁶³ Annih nih an ṭhut ah siseh, an dir ah siseh, zeitindah an ka thangchiat cu zoh tuah. ⁶⁴ Maw Bawipa, an tuahmi ruangah lehrul ko hna, Annih nih hmuh awkah an i tlakmi cu pe ko hna. ⁶⁵ Na lung kha zeitluk in dah a hah khawh ti kha hmuhsak hna law Annih zawnruahnak kha zeitluk tlawm dah na ngeih ti kha hngalhter ko hna. ⁶⁶ Maw Bawipa, thinhun in dawi hna law na van tangin hlo hna.

¹ Zeitluk in dah sui cu a dulh cang i Zeitluk in dah sui thiang cu a ziamh cang! Hmunthiang lung hna cu khuachung lam a kenkip ah an ril liangluang ko. ² Zion fapa sung hna khi zohhmanh hna, Hmasa ah cun sui thiang anmah khing an man, Atu tu ah cun ahopaoh nih hei sermi vawlei um tluk ceo an si. ³ Huel nga hmanh nih an hnuk an chuah i an fale kha hnuk an dinh hna; Sihmanhsehlaw ka mi hna i an fanule hna cu Thetse ram i a ummi ostrik va bantukin an nun a chia. ⁴ Hnuk ding lio bawhte lei cu A ti a hal caah a dang ah aa beh; Ngakchia nih rawl kha an hal hna Sihmanhsehlaw ahohmanh nih a ṭiltlawt hmanh an pe kho hna lo. ⁵ Rawl thawthaw in cawm a rak simi hna kha zeihmanh ngei loin khuachung lam ah an ṭhu ko, Puan ṭhaṭha a rak i aih tawnmi hna kha ekpon cungah an ṭhu ko. ⁶ Ka mi hna dantatnak hi Sodom dantatnak nakin a chia deuh, Sodom khua cu chikkhatte ah hrawh a rak si caah Ahohmanh an ngaih a chia manh lo. ⁷ Bawi luchin chinhmi a bawile hna cu hawhra nakin an rak thiang deuh i cawhnuk nakin an ngo deuh; An pum cu koral lungvar nakin an sen tertar deuh i An kutka hna cu lapis lazuli lungvar bantukin an tleu. ⁸ Sihmanhsehlaw an hmai cu ṭumṭing nakin a nak deuh cang i Lampi ah ahohmanh nih an hngal hna lo; An cuar cu an ruh cungah kor hnianghnuang in an um i thingro bantukin an car. ⁹ Vainam in a thimi hna cu Rawlṭam in a thimi hna nakin an van a ṭha deuh; Lo in a chuakmi rawl kha an hmuh lo caah an lo dai ko. ¹⁰ Nu nunnem tete hna nih khan anmah kut in an fale kha an chumh hna; Ka mi hna cu hliam an si ni ah cun an fale lila cu an rawl ah an cang ko. ¹¹ Bawipa nih diriam in a thinlinhnak kha a chuah i a thinhunnak kha a bungh; Zion ah mei a kau i a hram kha a kangh dih. ¹² Ral nih siseh, ral chimtu nih siseh Jerusalem kutka chungah an lut lai, ti hi ahohmanh nih an zum lo, Vawlei cung siangpahrang nih si hna seh, Vawlei cung i khua a sami paoh nih si hna seh an zum lo. ¹³ A kulhnak vampang chungah Miding mi hna thisen a chuahtu A profet hna sualnak ruang le A tlangbawi hna ṭhat lonak ruangah a si. ¹⁴ Lam ah khan mitcaw bantukin an i chawk i thi kha an i neh tuk hringhran caah An puan hmanh kha mi nih tongh an duh lo. ¹⁵ ’Kal u, kal u, mithurhnawm hna!’ tiah mi nih an hauh hna. ’Kal u, kan naih hlah u,’ tiin, Khulrang in an kal, miphun hna lakah khan an vai i Dinhnak hmun zeihmanh an hmu lo. ¹⁶ Bawipa hrimhrim nih a ṭhek hna, annih kha a ruat ti hna lo; Tlangbawi kha a duhdanh ti hna lo i Upa kha a zaangfah ti hna lo. ¹⁷ Kan mithram cat in bawmhnak a ra hnga maw tiah kan zoh, Sihmanhsehlaw zeihmanh a um lo. Kannih a kan khamh kho ṭung lomi miphun kha kan hngah filfial ko. ¹⁸ Kannih nih kan chuah tikah zapi lam kha hrial in lamte kha kan zul; Kan ni cu a dong ko cang, Kan donghnak cu a phan cang. ¹⁹ A kan dawitu hna cu van i langta hna nakkhin an khul a rang deuh; Tlang cungah kan sul khan heh tiah an kan zulh i Kannih kha tlaih awkah ramlak in an kan bawh. ²⁰ Bawipa chiti thuhmi, kan nunnak thaw a simi kha, Amah cu miphun hna lakah a thlazung in a ka hupphengtu a si lai, tiah kan rak i ruahchan. ²¹ Uz ram ah a ummi Edom fanu, I lawm law na tha nuam ko; Asinain, na caan a phak tikah hrai cu na sin a phan ve lai i, Na rit tikah nangmah le nangmah cu ningzahnak ah naa paih te lai. ²² Zion fanu, na sualnak ruang i dantatnak cu a tling cang; Saltannak chungah kalpi na si ṭhan bal ti lai lo. Sihmanhsehlaw Edom fanu, nang cu, na sualnak kha dantat a si lai i na ṭhat lonak kha langhter a si lai.

¹ Maw Bawipa, zei nih dah a kan tlakhnawh kha philh hlah; Run zoh law zeitluk in dah nihsawh kan si kha run kan hmu tuah. ² Kan pale sinin kan comi ro cu khual sinah pek an si i Kan inn hna cu ramdangmi sinah pek an si. ³ Kannih cu pa ngei loin, ngakṭah bantuk kan si, Kan nule hna cu nuhmei bantuk an si. ⁴ Kanmah ti lila kha din kan duh ah kan cawk a hau i Kanmah thing lila kha phaisa in kan cawk lawngah kan ngeih khawh. ⁵ Hngawngkual cu kan hngawng ah khinh kan si i a luan tuk in hnek kan si; Kan tha a ba nain dinh mui kan hmu lo. ⁶ Kannih cu rawl kha an kan pek nakhnga a chel ah Izipt mi hna he remnak kan tuah, A chel ah Assiria mi hna he kan tuah. ⁷ Kan pupa hna nih an rak sual i atu ah an um ti lo, Annih sualnak thilrit kha kannih nih kan phorh. ⁸ Sal hna cu kan uktu ah an i cang i annih sinin a kan chuahtu ahohmanh an um lo. ⁹ Ni lin lakah thih le thih tiin Kan rawl kha ramlak in kan rak i phorh. ¹⁰ Rawlṭam linhsatnak nih kan cuar cu Somei nih a nahter bantukin a nahter. ¹¹ Zion ah nu kha tlaihhrem an si; Judah ram khua hna ah ngaknu thiang kha tlaihhrem an si. ¹² Bawi hna cu an kut in thlai an si i upa nih upatnak an hmu lo. ¹³ Facang rialnak ah tlangval hna cu an ba i An thing phor nih a neh hna caah pa ngakchia cu an ril. ¹⁴ Upa nih hauka i an biaceihnak kha an ngol i Tlangval nih tingtang hri kha an pet ti lo. ¹⁵ Lawmhnak nih a kan zamtak cang i Kan lamnak hna cu ṭahnak ah an cang cang. ¹⁶ Pangpar ṭhirual cu kan lu cungin an tla cang; Harnak nih a kan khuh cang, misual kan si caah. ¹⁷ Hi ruangah hin kan lungthin a zaw i Hi vialte ruangah hin kan mit kha a mui: ¹⁸ Zeicahtiah Zion Tlang cu a ṭiao i A cungah cenghngia kha an i chawk. ¹⁹ Maw Bawipa, nangmah cu zungzal in bawi na si ko, Na bawi ṭhutdan cu chan khat hnu chan khat a hmun. ²⁰ - ²² Na kan hlawt rumro a si lo i tah cawk loin kan cungah na thin a hun a si lo ahcun, Maw Bawipa, nangmah leiah kan hruai ṭhan ko, hlan lio kan sunparnak kha kan pe ṭhan ko.