JOSHUA

JOSHUA

¹ Bawipa sal Moses thih hnuah, Moses rianṭuantu Joshua, Nun fapa cu, Bawipa nih a chawnh i, ² "Ka sal Moses cu a thi cang; cucaah nangmah le hi mi vialte hna hi tho u law, hi Jordan tiva hi tan u law, anmah, Israel mi hna ka pek laimi ram chungah cun lut tuah u. ³ Nan keza nih a lamh laimi hmun paoh cu, Moses sinah bia ka rak kam bang khan, nanmah kan pek cang hna. ⁴ Ramlak le hi Lebanon tlang in tiva ngan Zufrates tiang, Hit mi hna ram vialte nitlaknak leiah Rili Ngan tiang; nan ram a si lai. ⁵ Na nunchung vialte ahohmanh na hmai i a dir khomi an um lai lo; Moses sinah ka um bang khan, nangmah sin zongah ka um lai; kan deuh lai lo i kan hlaw fawn lai lo. ⁶ Ṭhawng ngai le ralṭha ngaiin um tuah; zeitintiah an pupa hna sinah pek awkin chiat ka rak ser cangmi ram hi, hi mi hi na coter hna lai. ⁷ Moses ka sal nih nawl an pekmi phungbia vialte ningin ralring tein tuah awkah, a ṭhawn bel ṭhawng ngai le ralṭha ngaiin um ko; khuazei ka na kalnak hmanh ah khuaawng na pemh nakhnga, orhlei ah siseh kehlei ah siseh i mer hlah. ⁸ Hi phungbia cauk nih hin na kaa kha chuahtak hlah seh; sihmanhsehlaw a chungah aa ṭialmi vialte ningin tuah awkah ralring tein na um nakhnga, chunzan in mah cucu na ruat lai; zeitintiah khi tikah na lam kha na tluanter lai i khi tikah khua awng na tong lai. ⁹ Keimah nih nawl kan pek a si lo mei? Ṭhawng ngai le ralṭha ngaiin um ko; na thinphang hlah, na lung zong dong hlah; zeicahtiah Bawipa na Pathian cu khuazeika na kalnak hmanh ah na sinah a um ko," tiah a ti. ¹⁰ Cun Joshua nih mi zapi chung i an bawi hna cu, ¹¹ "Riahhmun chungah khan i chawk u law, mi zapi kha, ’Riahcaw i tim tuah u; zeitintiah ni thum chungah, Bawipa nan Pathian nih co awkah an pekmi hna ram cu va co awkah hi Jordan hi nan tan lai,’ tiah chim hna u," tiah nawl a pek hna. ¹² Cun Reuben mi hna le Gad mi hna le Manasseh phun cheu hna sinah khan Joshua nih, ¹³ "Bawipa sal Moses nih, ’Bawipa nan Pathian nih dinhnak hmun an pek hna i hi ram hi an pek hna lai,’ tiin nawl an pekmi hna kha i cinken tuah u. ¹⁴ Nan nupile hna le nan fale hna le nan saṭil cu Jordan tiva ral Moses nih an pekmi hna ram ah hin an rung tang lai; sihmanhsehlaw nannih lak i miralṭha vialte cu ralthuam in i thuam in, nan unau hna hmaiah nan kai lai i nan bawmh hna lai, ¹⁵ Bawipa nih nan unau hna cu nanmah bantukin dinhnak a pek hna i Bawipa nan Pathian nih a pek liomi hna ram cu annih zong nih an co hlantiang nan bawmh hna lai. Cun Bawipa sal Moses nih a pekmi hna Jordan ral nichuahlei kam i a ummi ram, nanmah ta a simi ram ah cun, nan kir lai i nan co lai," tiah a ti. ¹⁶ Cun Joshua cu an leh i, "Nawl na kan pekmi paohpaoh cu kan tuah lai i khuazei hmanh ah na kan thlahnak paoh ah kan kal lai. ¹⁷ Moses kha zeizong vialte ah a bia kan ngaih bantuk tein nangmah bia zong kan ngaih lai; amah belte, Bawipa na Pathian cu Moses sinah a rak um bang khan na sinah um ve ko seh! ¹⁸ Zei na fial paoh ah na nawlbia kha a ralchanh i na bia kha a almi cu ahohmanh thah a si lai. A ṭhawn bel ṭhawng law, ralṭha ngaiin um ko," tiah an ti.

¹ Cun Nun fapa Joshua nih Shittim in a thli tein mi pahnih ram ngiatu ah a thlah hna i, "Va kal u law ram kha va cuan tuah u, Jeriko ko kha," tiah a ti. Cun an kal i Rahab a min a simi hlawhhlangnu inn ah an lut i khika ah an tlung. ² Cun Jeriko siangpahrang cu, "Zohhmanh, ram ngiatthlai awkah Israel mi tuzan ah hika ah an ra," tiah an chimh. ³ Cun Jeriko siangpahrang nih Rahab sinah cun mi a hei thlah hna i, "Na sinah a rami, na inn chungah a lutmi kha rak chuahpi hna; zeicahtiah ram vialte kha ngiatthlai awkah a rami an si," tiah a ti. ⁴ Sihmanhsehlaw minu nih cun mipa pahnih hna cu a rak lak hna i a rak thuh hna i, "Biatak a si, ka sinah mi cu an ra ko, sihmanhsehlaw khuazei in an rat cu ka hngal lo; ⁵ cun kutka khar a si deng, mui ah khan, mi hna cu an chuak; khuazei ah dah mi hna cu an kal ka hngal lo; khulrang in dawi tuah hna u, nan phak ko hna lai," tiah a ti. ⁶ Sihmanhsehlaw inncung ah a kaipi hna i a tianmi khumkung lakah khan a thuh hna. ⁷ Cucaah mi nih cun Jordan tiva lei lam ah khan ti tannak hmun tiangin an dawi hna i, a dawitu hna kha an chuah cangka tein kutka kha an khar. ⁸ An ih hlanah, an sinah inncung ah cun nu cu a hung kai i ⁹ mi hna sinah cun, "Bawipa nih hi ram kha an pek cang hna i nanmah kan in ṭihnak hna nih khan a kan nenh i hi ram chung ummi vialte kha nan hmaiah an ther dih cang, ti kha ka hngalh. ¹⁰ Zeitintiah Izipt ram in nan chuah tikah zeitindah Bawipa nih nan hmaiah Rili Sen ti kha a carter i zeitindah Jordan tiva ral ah a ummi Amor mi siangpahrang pahnih Sihon le Og kha nan hrawh cikcek hna kha kan theih. ¹¹ Cun cucu kan theih cangka tein kan lung cu an ther i nanmah ruangah ahohmanh ralṭha an um ti lo; zeitintiah cunglei van le tanglei vawlei i Pathian a simi cu Bawipa nan Pathian kha a si. ¹² Cucaah atu cu, nan cungah zaangfahnak ka langhter cang bantukin, nannih zong nih ka pa innchungkhar cungah zaangfahnak nan langhter ve i, hmelchunhnak taktak nan ka pek i, ¹³ cun ka pa le ka nu, ka ṭale le ka unau hna le anmah ta a simi vialte cu nan khamh hna i kan nunnak kha thihnak chungin nan kan chuah naklai, Bawipa min in ka sinah chiatser tuah u," tiah a ti. ¹⁴ Cun mi hna nih cun a sinah, "Kan nun ah nan nung ve lai! Hi kan rian hi na chim lo ahcun, Bawipa nih hi ram kha a kan pek tikah zaangfahnak te le zumh awk tlak tein kan in ti lai," tiah an ti. ¹⁵ Cun thlalangawng in hri in a vun thlak hna, zeitintiah a inn cu khua kulhnak ralhau chungah sak chih a si caah amah cu ralhau chungah khan a um. ¹⁶ Cun anih nih, "An dawitu hna nih an in ton sualnak hna hnga lo, tlang ah hung kai u; cun an dawitu hna an kir hlantiang, ni thum in cuka ah cun hung i thup u; cu hnuah cun va lan te ko u," tiah a ti hna. ¹⁷ Mi hna nih khan, "Chiat na kan sertermi lawng hin cun mawhchiat kan si hnga lo. ¹⁸ Zohhmanh, ram chungah kan rung luh tikah hi hri sen hi na kan chuahternak thlalangawng ah hin na rak hren lai, cun na inn chungah hin na pa le na nu, na ṭale le na pa innchungkhar vialte nan rak pumh hna lai. ¹⁹ Na innka in khuachung lam ah ahohmanh an chuah ahcun a thi cu amah lu cungah a si lai i, kannih cu mawhchiat awk kan si lai lo; sihmanhsehlaw na inn chung i a ummi aho cung hmanh ah kut thlak a si ahcun, a thi cu kan lu cungah a si lai. ²⁰ Sihmanhsehlaw kan rian hi na chim ahcun, chiat na kan sertermi biakamnak ah hin kannih cu mawhchiat awk kan si hnga lo," tiah an ti. ²¹ Cun anih nih, "Nan bia bangin si ko seh," tiah a ti. Cun a kalter hna i an kal; cun hri sen kha thlalangawng ah khan a hren. ²² An kal i tlang ah cun an hung kal, a dawitu hna an kir hlantiang, khika ah ni thum an um; a dawitu hna nih khan lam thluanchuak in an kawl hna, sihmanhsehlaw zeihmanh an hmu lo. ²³ Cun mi pahnih hna kha tlang cung cun an rung ṭum ṭhan i tiva cu an tan i Nun fapa Joshua sinah khan an ra; cun an cung i thil a tlungmi vialte kha an chimh. ²⁴ Cun annih nih Joshua sinah, "Bawipa nih ram cu a dihlak in kan kut chungah a kan pek taktak ko cang; cu hleiah cu ram chung ummi vialte hna cu kanmah ruangah an therphang ko," tiah an ti.

¹ Zingka tein Joshua cu a tho i Shittim in Israel mi vialte he an i thawh; cun Jordan kha an phan i an tan hlanah khika ah an riak. ² Ni thum hnuah riahhmun chungah cun bawi hna kha an i chawk i ³ mi kha, "Bawipa nan Pathian biakamnak kuang kha Levi tlangbawi pawl nih an put kha nan hmuh tikah, nan umnak cio khan nan i thawh lai i nan zulh lai, ⁴ zeitintiah hi leiah cu hlan cu nan kal bal lo caah nan kalnak ding lam cu an hmuhsak hna a hau lai. Asinain nanmah le a karlak cu dong thong hnih tluk in aa hlat lai; nan naih lai lo," tiah nawl an pek hna. ⁵ Cun Joshua nih mi zapi hna cu, "Bawipa nih thaizing ah nan lakah khuaruahhar a tuah lai caah i thianh tuah u," tiah a ti hna. ⁶ Cun Joshua nih tlangbawi hna cu, "Biakamnak kuang kha i lak u law, mi zapi hmaiah lan tuah u," tiah a ti hna. Cun biakamnak kuang cu an i lak i mi zapi hmaiah cun an kal. ⁷ Cun Bawipa nih Joshua cu a chawnh i, "Nihin ah hin nangmah cu Israel mi vialte mithmuh ah hlorh hram kan thawk lai, zeitintiah annih nih, Moses sinah ka rak um bang khan, nangmah sinah ka um ve lai, ti kha an hngalh nakhnga. ⁸ Cun biakamnak kuang a putu tlangbawi hna cu, ’Jordan ti kam nan phak tikah Jordan tiva chungah cun nan dir peng lai,’ tiin nawl na pek hna lai," tiah a ti. ⁹ Cun Joshua nih Israel mi hna cu, "Hika ah hin ra u law, Bawipa nan Pathian bia kha thei tuah u," tiah a ti hna. ¹⁰ Cun Joshua nih, "Mah hi hin Pathian nung cu nan lakah a um i, amah nih pel lo tein nan hmai in Kanaan mi hna le Hit mi hna le Hiv mi hna le Periz mi hna le Girgash mi hna le Amor mi hna le Jebus mi hna cu a dawi hna lai, ti kha hngal ko u. ¹¹ Zohhmanh u, vawleicung dihlak Bawipa i biakamnak kuang nih nannih hmaiah Jordan tiva a tan lai. ¹² Cucaah Israel miphun hna chungin mi hleihnih, phun khat chungin mi pakhat cio, nan lak hna lai. ¹³ Cun Bawipa, vawlei cung dihlak i Bawipa a simi, a kuang putu tlangbawi hna keza nih Jordan ti a lamh tikah, Jordan ti cu a cat lai i cunglei in a rungmi ti cu bu khat ah an dir lai," tiah a ti. ¹⁴ Cucaah, mi hmai i biakamnak kuang a putu tlangbawi hna he Jordan tiva tan awkah mi nih an thlam in an i thawh tikah le ¹⁵ kuang a putu hna nih Jordan tiva kha an phak i kuang a putu tlangbawi hna ke cu ti chungah aa hnei tikah (rawl ṭuan caan chung cu Jordan tiva hi a kuang a liam ko), ¹⁶ cunglei in a rungmi ti kha an dir i lam hlatpi ah Zarethan ram pawng i a ummi khua Adam ah cun a bu in an dir i, Arabah rili, Cite Rili lei i a vung luangmi cu an cat dih; cun Jeriko khua zawn cun mi nih cun an tan. ¹⁷ Cun Israel mi vialte nih leiro cungin an tan lioah, Jordan tiva chungah cun, Bawipa biakamnak kuang a zawntu tlangbawi hna kha, an phun ning piin Jordan tiva cu an tan dih hlantiang, leiro cungah cun an dir.

¹ An phun ning piin Jordan tiva kha an tan dih tikah, Bawipa nih Joshua cu a chawnh i, ² "Mi zapi chungin mi hleihnih, phun khat in pakhat cio, la hna law, ³ ’Hika hin, Jordan tiva chung hin, tlangbawi hna ke a dirnak hmun thengte khan, lung hleihnih in la u law, i put hna u law, tuzan i nan riahnak hmun ah chia hna u,’ tiah nawl pe hna," tiah a ti. ⁴ Cun Joshua nih Israel mi chungin mi hlei hnih hna cu, phun khat in pakhat cio a thimmi hna cu, a kawh hna i ⁵ Joshua nih an sinah, "Bawipa nan Pathian kuang hmaiah cun Jordan tiva laifang ah khan nan va kal lai i Israel mi phun zat in, nan liang in pakhat nih lung pakhat cio nan put lai, ⁶ cun hmailei caan ah nan tefa hna nih, ’Hi lung hna hi nan caah zei sullam dah an si?’ tiah an in hal tik hna ah, mah hihi nan lakah hmelchunhnak a si lai. ⁷ Khi tikah nannih nih Bawipa biakamnak kuang hmaiah Jordan tiva ti cu a cat; Jordan kha a tan tikah Jordan ti cu a cat, tiah nan chimh hna lai. Cucaah hi lung hna cu Israel mi caah zungzal hngalh camcinnak an si lai," tiah a ti. ⁸ Cun Israel mi hna nih cun Joshua nih nawl a pek hna bangin an tuah, Bawipa nih Joshua a chimh bang khan, Jordan tiva chungin, Israel miphun zat in, lung hleihnih cu an lak i an riahnak hmun ah an i kalpi hna i khika ah an chiah hna. ⁹ Cun Joshua nih Jordan tiva laifang, biakamnak kuang a putu tlangbawi hna ke dirnak hmun ah khan, lung pahleihnih a bunh hna i khika ah nihin ni tiangin an um ko. ¹⁰ Moses nih Joshua nawl a rak pekmi vialte bangin Bawipa nih Joshua cu mi zapi kha chimh hna awkah nawl a pekmi vialte a dih hlantiang, kuang a zawntu tlangbawi hna cu Jordan tiva chungah an dir. Mi zapi nih cun hnawhnam in an tan; ¹¹ cun mi vialte nih cun an tan dih tikah Bawipa biakamnak kuang le tlangbawi hna cu zapi hmaiah cun an kal. ¹² Reuben fapa hna le Gad fapa hna le Manasseh phun cheu hna kha Moses nih a rak chimh hna bang khan Israel mi hmaiah cun hriamnam i ken in an kal; ¹³ ral doh dingah timh cia tein ralthuam in aa thuammi mi sang li tluk, Bawipa hmaiah ral doh awkah, Jeriko nelrawn leiah cun an kal. ¹⁴ Khi ni ah Bawipa nih Joshua cu Israel mi vialte hmaiah a hlorh i Moses an rak ṭihzah bantuk khan amah cu a chan chung vialte an ṭihzah ve. ¹⁵ Cun Bawipa nih Joshua cu a chawnh i, ¹⁶ "Hngalhternak bia kuang a zawntu tlangbawi hna kha Jordan in hung chuah awkah nawl pe hna," tiah a ti. ¹⁷ Cucaah Joshua nih tlangbawi hna cu, "Jordan tiva in hung chuak u," tiah nawl a pek hna. ¹⁸ Cun Bawipa biakamnak kuang a zawntu tlangbawi hna kha Jordan tiva chungin an chuah i tlangbawi hna keza nih cun lei ro a tawngh tikah, Jordan tiva ti cu an umnak ah an kir ṭhan i hmasa bantuk khan a kuang cu a liam ko. ¹⁹ Thla hmasa bik thla, a ni hra ni ah, mi hna cu Jordan in an hung chuak i Jeriko nichuahlei ramri i a ummi Gilgal ah an riak. ²⁰ Cun Jordan chungin an lakmi lung hleihnih hna kha Joshua nih Gilgal ah a phun hna. ²¹ Cun Israel mi hna sinah cun, "Hmailei caan ah nan fale hna nih an pale hna cu, ’Hi lung hi zei sullam dah an si?" tiah an hal tik hna ah, ²² khi tikah nan fale hna cu, ’Israel mi nih hi. Jordan hi vawlei ro cungin an rak tan,’ tiah nan hngalhter hna lai. ²³ Bawipa nan Pathian nih kan tan dih hlantiang kan caah a cartermi Rili Sen cungah a tuah bang khan, Jordan tiva ti cu nan tan dih hlantiang a carter, ²⁴ zeitintiah vawlei cung mi vialte nih Bawipa kut cu a ṭhawng ti kha an hngalh nakhnga le Bawipa nan Pathian cu zungzal in nan ṭih nakhnga," tiah a ti.

¹ Jordan khattelei ral nitlaklei i a ummi Amor mi hna siangpahrang vialte le rili pawngah a ummi Kanaan mi siangpahrang vialte nih Israel mi caah an tan dih hlantiang Jordan tiva ti cu Bawipa nih a kaoter tiah an theih tikah, Israel mi hna ruangah cun an thin a phang i an chungah thlarau zeihmanh a um ti lo. ² Khi caan ah Bawipa nih Joshua cu, "Ṭeklung namte ser hna law, Israel mi cu a voi hnihnak an cuarpar tan ṭhan hna," tiah a ti. ³ Cucaah Joshua nih ṭeklung namte cu a ser hna i Gibeath-haaraloth ah Israel mi cu an cuarpar a tan hna. ⁴ Cun mah hihi Joshua nih zei ruangah dah an cuarpar a tan hnanak cu a si: Izipt ram in a chuakmi pa vialte, ralkap vialte kha Izipt ram in an chuah hnuah ramlak ah khan lampi ah an thi dih. ⁵ A chuakmi pa vialte kha cuarpar tan an rak si nain, Izipt ram i an chuah hnu ramlak i lampi ah a chuakmi vialte hna tu kha cu cuarpar tan lo an si. ⁶ Bawipa aw kha an rak ngaih lo caah, an phun ningin, Izipt ram in a chuakmi ralkap vialte, an rawh dih hlantiang, Israel mi hna cu ramlak ah khan kum sawm li an rak vai; kannih pek awkah Bawipa nih kan pupa hna sinah chiat a sermi, cawhnuk le khuaihliti in a luangmi ram kha annih nih hmu lo dingin annih sinah Bawipa nih chiat a ser. ⁷ Cucaah Joshua nih an cuarpar a tanmi hna cu anmah can ah Pathian nih a dirhmi an fale hna kha an si; lampi ah cuarpartan lo an rak si caah khan cuarpar tan loin an rak um ko. ⁸ An phun ningin an cuarpar tannak a dih tikah, an dam tiang riahhmun i an umnak cio ah cun an um. ⁹ Cun Bawipa nih Joshua sinah cun, "Nihin ni ah hin nan sinin Izipt mi nih an in nihsawh hnanak cu ka hrilh cang," tiah a ti. Cucaah cu ka hmun min cu nihin tiangin Gilgal ti a si. ¹⁰ Israel mi hna cu Gilgal i an riah lioah, Jeriko nelrawn ah cun, cu thla ni hleili ni zanlei ah lanhtak puai kha an tuah. ¹¹ Cun lanhtak puai a thaizing, cu ni hrimhrim ah cun, cu ram in a chuakmi, thilnu cawh lo chang le vaireu kha an ei. ¹² Cun cu ram in a chuakmi an ei tikah, a thaizing in manna kha a dong i Israel mi nih manna kha an ngei ti lo; sihmanhsehlaw cu kum ah cun Kanaan ram in a chuakmi thil kha an ei. ¹³ Joshua cu Jeriko khua pawngah a um tikah a mit a hun hler i a hun zoh i, zohhmanh, a hmaiah mipa pakhat a vainam zuh cia in a dir; Joshua cu a sinah a va kal i amah cu, "Kanmah caah maw na si, kan ral hna caah dah na si?" tiah a ti. ¹⁴ Cun anih nih, "Sihlah; sihmanhsehlaw Bawipa ralkapbu hruitu in ka ra," tiah a ti. Cun Joshua cu vawlei ah a bawk i a biak i, "Ka bawipa nih a salpa a fialmi cu zeidah a si?" tiah a ti. ¹⁵ Cun Bawipa ralkapbu hruitu nih cun Joshua sinah cun, "Na kedan kha i phoih hna; zeicahtiah na dirnak kha hmun thiang a si," tiah a ti. Cun cu bangin Joshua nih a tuah.

¹ Jeriko khua cu a chunglei he a lenglei he Israel mi hna ruangah cun aa khar khipkhep ko; ahohmanh a chuak a lut an um lo. ² Cun Bawipa nih Joshua cu a chawnh i, "Zohhmanh, Jeriko cu a siangpahrang he, a miṭhawng ralṭha hna he tiah, na kut chungah kan pek cang. ³ Khua cu nan vel lai, ralkap vialte nih chel khat an vel lai. Cu bantukin ni ruk nan tuah lai. ⁴ Cun tlangbawi pasarih nih tuukawng ki muko pasarih kuang hmaiah cun an i put lai; cun ni sarihnak ni ah cun khua cu voi sarih nan vel lai, tlangbawi nih muko cu an tum hna lai. ⁵ Cun tuukawng ki cu an tum vuaimai tikah, muko aw thawng cu nan theih cangka in mi vialte cu fak piin nan au lai; cun khua kulhnak ralhau cu a tlu lai i mi zapi cu anmah le an hmai zawn cio ah khan ding tein an kal lai," tiah a ti. ⁶ Cucaah Nun fapa Joshua nih cun tlangbawi cu a auh hna i, "Biakamnak kuang kha i lak u law, Bawipa biakamnak kuang hmaiah khan tlangbawi pasarih nih tuukawng ki muko pasarih i put hna seh," tiah a ti. ⁷ Cun mi zapi sinah cun, "Hmaiah kal u; khua kha vel u law, hriam pumi pa kha Bawipa kuang hmaiah lanhter hna u," tiah a ti. ⁸ Cun Joshua nih mi zapi cu nawl a pek hna bangin, tlangbawi pasarih, tuukawng ki muko pasarih Bawipa hmai i aa putmi hna cu, muko cu tumpah in a hmaiah an kal i Bawipa biakamnak kuang nih cun a zulh hna. ⁹ Cun muko a tumtu tlangbawi hna hmaiah cun ralthuam in aa thuammi kha an kal i muko an tumpah lengmang lioah cun, hnulei ralveng hna nih cun kuang kha an hun zulh. ¹⁰ Sihmanhsehlaw Joshua nih mi hna kha, "Au u, tiah kan ti hna ni hlantiang nan au lai lo, nan aw zong theih awk nan siter lai lo, nan kaa zongin zei bia hmanh nan chuahter lai lo," tiah nawl a pek hna. ¹¹ Cucaah Bawipa kuang cu khua kha chel khat a velter i riahhmun ah an ra i riahhmun ah cun an riak ṭhan. ¹² Cun Joshua cu zingka tein a tho i tlangbawi hna nih Bawipa kuang kha an zawnh. ¹³ Cun tlangbawi pasarih Bawipa hmai i tuukawng ki muko pasarih aa putmi hna kha muko hna cu tum pah lengmang in an kal; cun ralthuam in aa thuammi kha an hmaiah an kal i hnulei ralveng hna cu Bawipa kuang hnulei in an ra, tlangbawi hna nih an kalpah in muko cu an tum lengmang. ¹⁴ Cun a ni hnihnak ni ah cun khua cu chel khat an vel i riahhmun ah an kir ṭhan. Cu bantukin ni ruk an tuah. ¹⁵ Ni sarihnak ni ah cun zingka tein khuafing cah ah an tho i khua cu cu bantuk ṭhiamṭhiam in chel sarih an vel; cu ni lawngah khua chel sarih an vel cu a si. ¹⁶ Cun a voi sarihnak ah cun, tlangbawi nih muko an tum tikah khan, Joshua nih mi zapi hna sinah cun, "Au tuah u; zeitintiah Bawipa nih khua cu an pek cang hna," a ti. ¹⁷ "Cun khua cu le a chung i a ummi thil vialte cu hrawh awkah Bawipa sinah pekchanh an si lai; kannih nih kan thlahmi lamkaltu hna kha a rak thuh hna caah Rahab le amah he a inn chungah a ummi vialte cu an nung lai. ¹⁸ Sihmanhsehlaw hrawh awkah pekchanh ciami thil kha nannih nih nan ulh hna lai, cu ti a si lo ahcun, nannih nih nan pekchanh hna tikah khan pekchanhmi thil pakhatkhat kha nan lak sual hnga i Israel riahhmun cu hrawh awk ca thil ah nan ser hnga i a cungah harnak nan tlunter sual hnga. ¹⁹ Sihmanhsehlaw sui le ngun vialte le thir le dar umkheng hna cu Bawipa ca thil thiang an si lai; Bawipa chawva chungah an lut ve lai," tiah a ti ²⁰ Cucaah mi cu an au i muko cu tum an si. Mi nih muko thawng kha an theih cangka tein, mi cu fak piin an au i ralhau cu a tlu, cu caah anmah le an hmai zawn cio khan mi cu khua chungah cun an hung lut i khua cu an lak. ²¹ Cun khua chungah a ummi vialte cu, nu he pa he, tar he no he, cawtum, tuu le laa he tiah vainam in an sam dih cikcek hna. ²² Cun Joshua nih ram a va ngiatu mi pahnih hna sinah khan, "Hlawhhlangnu inn chungah khan va kal u law, minu cu le amah ta a simi vialte cu a sinah chiat nan rak ser bang khan hun chuahpi hna u," tiah a ti. ²³ Cucaah thlingthlatu a rak simi tlangval hna nih khan an va lut i Rahab le a pa le a nu le a ṭale hna le amah ta a simi vialte kha an chuahpi hna; cun a rualchan vialte kha an chuahpi hna i Israel riahhmun lengah an chiah hna. ²⁴ Cun khua cu mei in an khangh, a chung i a ummi thil vialte he; sui le ngun, thir le dar umkheng belte Bawipa inn chawva sinah an chiah hna. ²⁵ Sihmanhsehlaw hlawhhlangnu Rahab le a pa innchungkhar le amah ta a simi vialte cu Joshua nih a nung in a zuah hna i, Joshua nih Jeriko ngiatthlai awkah a thlahmi lamkaltu hna kha a rak thuh hna caah Israel chungah nihin ni tiang hin a um. ²⁶ Khi tikah Joshua nih chiatser in, "A tho i hi Jeriko khua a sa ṭhanmi cu Bawipa hmaiah chiatserh si seh. A fater luhloh in a hram lung cu a phum lai i A fapa hniang bik luhloh in a kutka cu a bunh hna lai," tiah a ti hna. ²⁷ Cucaah Bawipa cu Joshua sinah a um i cu ram chung vialte ah cun a min a thang.

¹ Sihmanhsehlaw pekchanhmi thil kongah cun Israel mi cu zumhawktlak loin an um ai; zeitintiah Judah phun chungmi Zerah fapa Zabdi fapa Karmi fapa Akhan nih pekchanhmi thil cu tlawmpal a lak i Bawipa thinhunnak cu Israel mi cungah a alh. ² Joshua nih Jeriko in Bethel nichuahlei i a ummi Beth-aven pawng i a ummi Ai khua ah mi a hei thlah hna i, "Hung kal u law, ram cu hung thlingthla tuah u," tiah a ti hna. Cun mi cu an hung kal i Ai cu an hung ngiatthlai. ³ Cun Joshua sinah an rung kir i a sinah, "Mi vialte cu kalter hna hlah, sihmanhsehlaw thong hnih thong thum tluk hung kal hna seh law, Ai cu hung chim hna seh; mi zapi cu an ning piin khika ah an re hung theihter awk a si lo, zeicahtiah tlawmte lawng an si ko," tiah an ti. ⁴ Cucaah mi zapi chungin thong thum tluk an hung kal i Ai khuami hna hmaiah an zam len ai, ⁵ cun Ai khuami nih sawm thum le paruk tluk an rak thah hna i kutka hmailei ah Shebarim tiangin an dawi hna i zuanchuknak ah khan an thah hna. Cun mi zapi cu an thin a phang i ti bantuk an si. ⁶ Khi tikah Joshua nih a puan kha a thleh hna i Bawipa kuang hmaiah cun zanlei tiang vawlei ah a bawk, amah le Israel upa hna cu an bawk; cun an lu ah leidip an i phulh. ⁷ Cun Joshua nih, "Aize, maw Bawipa Pathian, kannih cu hrawh awk men i Amor mi kut chung i pek awkah zeicahdah hi mi hna cu Jordan tiva ral ah na kalpi hna? Jordan tiva ral i khua rak sak kha kan lung rak tling ko seh law mu! ⁸ Maw Bawipa, hi bantukin an ral hna hmaiah Israel mi an zaam tikah hin zeidah ka chim khawh hnga! ⁹ Zeitintiah Kanaan mi hna le hi ram chung i a ummi vialte nih an theih lai i an kan kulh lai i vawlei cung hin kan min an hloh lai; na min lianngan cu zeidah na tuahpiak lai?" tiah a ti. ¹⁰ Bawipa nih Joshua cu a chawnh i, "Tho tuah, zeicahdah na bawh ko? ¹¹ Israel nih a sual cang; nawl ka pekmi hna ka biakamnak cu an buar cang; pekchanhmi thil cu tlawmpal an i lak; an fir i lih an chim i an thil sinah an chiah hna. ¹² Cucaah Israel mi nih an ral hna hmaiah an dir kho lo; annih cu hrawh awk thil ah khan an i can caah an ral hna hmaiah an zaam. Nan lak in pekchanhmi thil kha nan hrawh lo ahcun nan sinah ka um ti lai lo. ¹³ Tho law, mi zapi kha thianter hna, ’Thaizing ah i thianh u, zeicahtiah Bawipa, Israel Pathian nih, "Maw Israel, nannih lakah pekchanhmi thil an um, nannih lak in cu pekchanhmi thil cu nan hlonh hna hlantiang nan ral hna hmaiah nan dir kho lai lo," tiah hi bangin a ti," tiah chim hna. ¹⁴ Cucaah zinglei ah nan phun nan phun in a naih ah ratpi nan si lai; cun Bawipa nih a lakmi phun cu nan chung nan chung in a naih ah nan ra lai; cun Bawipa nih a lakmi innchungkhar cu a mi a mi in a naih ah nan ra lai. ¹⁵ Bawipa biakamnak cu a buar i Israel mi lakah ningzah awk a simi thil a tuah caah, pekchanhmi thil a rak lami cu, amah he a ngeihmi vialte he, mei in khangh a si lai," tiah a ti. ¹⁶ Cucaah Joshua cu zingka tein a tho i Israel cu an phun an phun cio ah a naih ah a ratpi hna i Judah phun cu lak a si; ¹⁷ cun Judah innchungkhar hna cu a naih ah a ratpi hna i Zerah innchungkhar cu lak a si; cun Zerah innchungkhar cu a mi a mi in a naih ah a ratpi hna i Zabdi cu lak a si; ¹⁸ cun amah nih amah innchungkhar cu a mi a mi in a naih ah a ratpi hna i Judah phun Zerah fapa Zabdi fapa Karmi fapa Akhan cu lak a si. ¹⁹ Khi tikah Joshua nih Akhan sinah cun, "Ka fapa, Bawipa Israel Pathian sinah sunparnak pe law, amah cu thangṭhat tuah; na tuahmi kha ka chim tuah; ka sinin thup hlah," tiah a ti. ²⁰ Cun Akhan nih Joshua cu a leh i, "Biangai tein Bawipa Israel Pathian cungah ka sual cang i mah hihi ka tuahmi cu a si: ²¹ hranchaw lakah khan Shinar puan aa dawh ngaimi le ngun shekel za hnih le sui tlang khat, shekel sawm nga a ritmi ka hmuh hna tikah ka mit an thi i ka lak hna; cun zohhmanh, ka thlam chung vawlei chungah ka thuh hna, ngun cu a tang bik ah," tiah a ti. ²² Cucaah Joshua nih lamkal a hei thlah hna i thlam ah cun an va tli i zohhmanh, thlam chungah cun a rak thuh taktak ko, a tang bik ah ngun. ²³ Cun thlam chung cun an lak hna i Joshua le Israel mi vialte sinah an ratpi; cun Bawipa hmaiah an chiah hna. ²⁴ Cun Joshua le Israel mi vialte nih Zerah fapa Akhan cu le ngun cu le puan cu le sui tlang cu le a fapa hna le a fanu hna le, a cawtum hna le a laa hna le a tuu hna le a thlam le a ngeihmi vialte cu an lak hna i Akhor Nelrawn ah an hun kalpi hna. ²⁵ Cun Joshua nih, "Zeicahdah kan cungah harnak na tlunter? Nihin ah Bawipa nih na cungah harnak a tlunter ve," tiah a ti. Cun Israel mi vialte nih lung in an cheh; mei in an khangh hna i lung in an cheh hna. ²⁶ Cun nihin tiangin a ummi lungpumh nganpi pakhat a cungah cun an pumh; cun Bawipa cu a kangh in a kangmi a thinhunnak cun aa mer. Cucaah cun nihin tiangin cu ka hmun cu Akhor Nelrawn tiah ti a si.

¹ Cun Bawipa nih Joshua cu a chawnh i, "Ṭih hlah, na lung zong dong hlah; ralkap vialte kha i lak hna law, tho law, Ai ah cun hung kal tuah; zohhmanh, Ai khua siangpahrang cu a mi he a khua he a ram he na kut chungah kan pek cang; ² cun Ai khua le a siangpahrang cungah Jeriko khua le a siangpahrang cung i na tuah bantuk khan na tuah lai; a hranchaw le a saṭil hna cu nanmah ca i hranchaw ah nan i lak hna lai; khua cu a hnulei in lamhruang va at u," tiah a ti. ³ Cucaah Ai i hung kal awkah Joshua le ralkap vialte cu an tho; cun Joshua nih ralṭhami miṭhawng sang thum a thim hna i zan ah a thlah hna. ⁴ Cun hitin nawl a pek hna, "Zohhmanh u, khua cu a hnulei in lamhruang nan ah lai; khua cun lamhlat ngaingai ah cun kal hlah u, sihmanhsehlaw ralring cia tein nan um lai; ⁵ cun keimah le ka sinah a ummi vialte nih khua cu kan hun fuh lai. Cun kannih doh awkah an hung chuah tikah, hmasa bang khan kan zaamtak hna lai; ⁶ cun khua in lamhlat ah kan hnuh dih hna hlantiang an kan dawi lai, zeicahtiah annih nih, "Hmasa bang khan kannih cu an kan zamtak,’ tiah an ti lai. Cuticun kan zaamtak hna lai; ⁷ khi tikah nan lamhruang ahnak khan nan tho lai i khua cu nan tlaih lai; zeitintiah Bawipa nan Pathian nih nan kut chungah an pek hna lai. ⁸ Cun khua kha nan lak tikah Bawipa fialnak bangin nan tuah lai, khua cu mei in nan khangh lai; zohhmanh u, nawl kan pek hna hi," a ti. ⁹ Cuticun Joshua nih a thlah hna i lamhruang ahnak hmun ah khan an kal i Ai in nitlaklei Ai le Bethel karlak ah khan an um; sihmanhsehlaw cu zan cu Joshua cu mi zapi sinah khan a um. ¹⁰ Cun Joshua cu zingka tein a tho i mizapi kha a pumh hna i mi zapi hmaiah Israel mi upa hna he Ai ah cun an hung kal. ¹¹ Cun amah sin i ralkap a ummi vialte cu an hung kal i khua cu a hmailei in an hei naih i Ai in chaklei ah an riak; anmah le Ai karlak ah horkuang pakhat a um. ¹² Cun pa thong nga tluk a lak hna i Bethel le Ai karlak ah, khua in nitlaklei ah cun, lamhruang a ahter hna. ¹³ Cuticun ralkap cu an chiah hna, riahhmunpi cu khua in chaklei ah, hnulei ralveng cu khua in nitlaklei ah. Sihmanhsehlaw Joshua kha cu zan cu nelrawn ah cun a riak. ¹⁴ Cun Ai khua siangpahrang nih mah hihi a hmuh tikah amah le a mi vialte, khua chung i a ummi pa hna cu, khulrang in zingka tein Arabah lei i vung zuanchuknak ah khan Israel mi cu raldohnak hmun i ton awkah an kal; sihmanhsehlaw amah dohtu ah khua hnulei ah lamhruang attu an um ti kha a hngal lo. ¹⁵ Cun Joshua le Israel mi vialte nih khan an hmaiah cun a sung bantukin an i umter i ramlak leiah cun an zaam. ¹⁶ Cucaah khua chungah a ummi vialte cu anmah dawi awkah hmunkhat ah an kawh hna i Joshua cu an dawi i khua cun a hlatnak ah an lem hna. ¹⁷ Ai ah siseh Bethel ah siseh, Israel dawi awkah a kal lomi ahohmanh an um lo; khua cu khar loin an kaltak i Israel mi cu an dawi hna. ¹⁸ Khi tikah Bawipa nih Joshua sinah, "Na kut chungah a ummi fei kha Ai leiah sawh tuah; zeitintiah na kut chungah kan pek lai," tiah a ti. Cun Joshua nih a kut chungah a ummi fei cu khua leiah cun a hei sawh. ¹⁹ Lamhruang attu hna nih khan khulrang tein an umnak khan an tho i a kut a samh cangka an tli i khua chungah an lut i an lak; cun khua cu mei in khangh awkah an i hnawhnam. ²⁰ Cucaah Ai khuami hna nih khan hnulei an hei zoh tikah, zohhmanh, khua meikhu cu van a tawng; cun annih cu hi lei khi lei ah an zaam kho lo, zeicahtiah ramlak leiah a tlimi hna nih khan a hun dawitu hna cu a rak an lehkhuh hna. ²¹ Cun Joshua le Israel mi vialte nih lamhruang attu hna nih khua an lak cang kha le khua meikhu cu a kai kha an hmuh tikah, khi tikah an i let i Ai khuami kha an thah hna. ²² Cun a dang hna nih khan khua lei khan an hun fuh hna; cucaah annih cu Israel mi nih an karceh hna, hi lei ah a cheu, khi lei ah a cheu; cun Israel mi nih an thah hna, pakhat hmanh a nungmi siseh a luatmi siseh an um lo. ²³ Sihmanhsehlaw Ai siangpahrang cu a nung in an lak i Joshua sinah an ratpi. ²⁴ Israel mi nih an va dawi hna i pakhat hmanh an taan lo tiangin vainam in an va thahnak hna ramlak hmun ah khan Ai khuami cu an sam dih cikcek hna tikah, Israel mi vialte nih Ai khua ah khan an kir i vainam in an sam dih. ²⁵ Cun cu ni ah, nu he pa he, Ai khuami vialte an dihlak in, a thimi cu sang khat le thong hnih an si. ²⁶ Zeitintiah Ai khuami vialte a hrawh dih cikcek hna hlantiang Joshua nih fei a sawhnak a kut kha a ṭhum ṭhan lo. ²⁷ Joshua kha Bawipa nih nawl a pekmi bia bangin, khi khua saṭil hna le hranchaw hna tu cu Israel mi nih an hranchaw ah an i lak. ²⁸ Cucaah Joshua nih Ai cu a khangh i nihin ni tiangah a si bangin, a rawkmi thil pon ah a ser. ²⁹ Cun Ai khua siangpahrang cu thingkung cungah zanlei tiang a thlai; cun ni a tlak zuahmah tikah Joshua nih nawl a pek hna i thingkung cung cun a pum cu an ṭhumh i khua hauka luhnak ah cun an hlonh i, a cungah lungpon nganpi an pumh; cucu nihin ni tiang hin a um ko. ³⁰ Khi tikah Joshua nih Ebal Tlang ah Bawipa, Israel Pathian caah biakṭheng pakhat a ser, ³¹ Bawipa, sal Moses nih Israel mi nawl a pek hna bang khan, Moses phungbia cauk chung i, "remh lomi lung in sermi biakṭheng ahohmanh nih thir hreihriam in tawngh lomi," tiin aa ṭial bang khan a ser. Cun cu cungah cun Bawipa, sinah khangh thawinak an pek i daihnak thawinak an thawi. ³² Cun khika ah, Israel mi hna hmaika ah cun, Moses nih a ṭialmi phungbia kha lung hna cungah cun a ṭial. ³³ Cun Israel mi vialte cu, mipem he Israel mi chungchuak taktak he, an upa hna le an bawi hna le an biaceihtu hna he tiah, Bawipa biakamnak kuang a putu Levi mi tlangbawi hna hmai kuang hmailei le hnulei ah cun an dir, hnarcheu cu Gerizim Tlang hmaiah, hnarcheu cu Ebal Tlang hmaiah; Bawipa sal Moses nih a thawkterte ah Israel mi cu thluachuah nan pek hna lai, ti i nawl a rak pek hna bang khan. ³⁴ Cun a hnuah phungbia chung bia vialte cu, thluachuahnak he chiatserhnak he, phungbia cauk chungah aa ṭialmi vialte ning khan, a rel. ³⁵ Moses nawl pekmi chungin, Israel mi aa pummi vialte le nu le ngakchia le an sin i a ummi mipem hna hmaiah, Joshua nih a rel lomi bia pakhat hmanh a um lo.

¹ Jordan tiva ral tlangram le rawnram Rili Ngan kam ram thluahmah in Lebanon tlang tiang i a ummi Hit mi hna le Amor mi hna le Kanaan mi hna le Periz mi hna le Hiv mi hna le Jebus mi hna siangpahrang vialte hna nih mah hi kong cu an theih tikah, ² Joshua le Israel cu doh awkah lung khat in an i pum. ³ Sihmanhsehlaw Gibeon khuami hna nih Joshua nih Jeriko le Ai cungah a tuahmi kha an theih tikah, ⁴ annih nih cun zer ngaiin an tuah; an kal i riahcaw an i rawnh i an laa hna kha sawngkhoi ṭet le a ṭet i a tlek i belhmi saphaw zucua kha an phorhter hna i, ⁵ a ṭet i belhchommi kedan an i danh i hnipuan ṭet ṭiapṭuap an i aih; cun an riahcaw vialte cu a car i a buar dihmi an si. ⁶ Cun Gilgal riahhmun ah khan Joshua le Israel mi hna sinah an va kal i, "Ram hla piin a rami kan si, cucaah kanmah he biakamnak ser u," tiah an ti. ⁷ Sihmanhsehlaw Israel mi hna nih cun Hiv mi hna sinah cun, "Kanmah lak i a ummi nan si sual men ko hnga; cu ti a si ahcun zeitindah nannih he biakamnak kan tuah khawh lai?" tiah an ti. ⁸ Annih nih Joshua sinah, "Na sal kan si ko hi ta," tiah an ti. Cun Joshua nih annih cu, "Ahodah nan si, cun khuazei in dah nan rat?" tiah a ti hna. ⁹ Annih nih, "Bawipa na Pathian min ruangah ram hlat piin na sal hna hi kan ra; zeitindah Izipt ram ah a tuahmi vialte le ¹⁰ Amor mi hna siangpahrang pahnih Jordan tiva ral i a ummi, Heshbon siangpahrang Sihon le Bashan siangpahrang Og, Ashtaroth ah a ummi hna cung i a tuahmi vialte kha kan theih. ¹¹ Cun kan upa hna le kan ram minung vialte hna nih, ’Lampi caah riahcaw i rawnh u law, va kal u law, va tong hna u, cun annih sinah, "Kannih cu nan sal kan si; ra u law, kanmah he biakamnak ser u," tiah va ti hna u,’ tiah an kan ti. ¹² Kan riahcaw ca i kan changreu hna hi, nannih sin rat awk i kan inn in kan i thawh ni ah cun a lumte an si, sihmanhsehlaw atu cu, zohhmanh u, an car dih i an buar dih cang; ¹³ hi saphaw zucua hna hi kan rak rawn hna ah cun a tharte an rak si; sihmanhsehlaw, zohhmanh u, atu an kak dih cang; cun hi kan hnipuan hna le kan kedan hna hi kan ratnak lam a hlat tuk caah an ṭet dih cang," tiah an ti. ¹⁴ Cucaah mi hna nih cun an hun phorhmi riahcaw cu an ei pi hna i Bawipa awka zeihmanh an ngai lo. ¹⁵ Cun Joshua nih annih he remnak a ser i annih kha nunter dingah annih he biakamnak a ser; cun aa pummi hruaitu hna nih annih sinah chiat an ser. ¹⁶ Annih nih an sin i biakamnak an ser hnu ni thum ah an pawng ummi an si le an lak i an i cawh kha an theih. ¹⁷ Cun Israel mi cu an i thawh i an khua cu a ni thumnak ni ah an va phanh hna. An khua hna cu Gibeon, Khefirah, Beeroth le Kiriath-jearim an si. ¹⁸ Sihmanhsehlaw Israel mi nih cun an that hna lo, zeicahtiah aa pummi hruaitu nih khan Bawipa Israel Pathian chalh in an sinah chiat an ser cang. Khi tikah aa pummi vialte nih cu hruaitu hna cungah khan an phunzai. ¹⁹ Sihmanhsehlaw hruaitu vialte hna nih khan aa pummi vialte sinah, "Kannih nih Bawipa Israel Pathian chalh in annih sinah chiat kan ser cang i cucaah kan tawngh hna ahcun a ṭha hnga lo. ²⁰ Mah hihi an cungah kan tuah lai i nung ko hna seh, kannih nih an sin i chiat kan rak ser cangmi biakamnak ruangah khan kan cungah thinhunnak a tlung sual ai hnga," tiah an ti. ²¹ Cun hruaitu hna nih cun, "Nung ko hna seh," tiah an ti hna. Cucaah hruaitu hna nih annih kongah an chim bang khan, annih cu aa pummi vialte caah, thinghlamtu le tithantu ah an cang. ²² Joshua nih a kawh hna i annih cu, "Zeicahdah kan sinah nan um ko nain, ’Nan sinin lam hlatpi i a ummi kan si,’ tiin nan kan hlen? ²³ Cucaah nannih cu chiatserhmi nan si cang i, a cheu cu thing hlamtu le ti thantu sal, ka Pathian inn caah nan si zungzal lai," tiah a ti hna. ²⁴ Annih nih Joshua cu an leh i, "Bawipa na Pathian nih a sal Moses kha hi ram hi a dihlak in nanmah kha pek awk le nan hmai in hi ram chung i a ummi vialte kha hrawh awkah nawl a pek ti kha fiang tein na sal hna kha an kan chimh i, cucaah nanmah ruangah hin kan nunnak kongah kan thin a phan ngaingai caah mah hi kan tuah. ²⁵ Atu ah hin zohhmanh, na kut chungah kan um ko: na mithmuh ah a ṭha le a dik na ti bantukin kan cungah cun tuah ko," tiah an ti. ²⁶ Cu bang cun an cungah a tuah i Israel mi hna kut chung khan a chuah hna i an that hna lo. ²⁷ Sihmanhsehlaw Joshua nih khi ni ah cun aa pummi ca le a thim laimi hmun i Bawipa biakṭheng caah annih cu nihin ni tiangin thing hlamtu le ti thantu ah a ser hna.

¹ Jerusalem siangpahrang Adonizedek nih zeitindah Joshua nih Ai kha a lak i Ai khua le a siangpahrang cu Jeriko le a siangpahrang a tuah hna bantukin a hrawh cikcek i, zeitindah Gibeon khuami hna nih Israel mi he remnak an ser i an lakah an um kha a theih tikah a thin a phang ngaingai, ² zeicahtiah Gibeon cu siangpahrang khua bantukin khua ngan a si ve i Ai khua nakin a ngan deuh i a chung ummi vialte hna cu miṭhawng an si. ³ Cucaah Jerusalem siangpahrang Adonizedek nih Hebron siangpahrang Hoham le Jarmuth siangpahrang Piram le Lakhish siangpahrang Jafia le Eglon siangpahrang Debir cu a cah hna i, ⁴ "Ka sinah hung u law, ka bawm u, Gibeon cu tu u sih; Joshua le Israel mi hna he remnak a ser caah," tiah a ti. ⁵ Khi tikah Amor mi siangpahrang panga, Jerusalem siangpahrang, Hebron siangpahrang, Jarmuth siangpahrang, Lakhish siangpahrang, le Eglon siangpahrang hna nih cun an ralkap kha an pumh hna i an ralkap dihlak he khan Gibeon khua cu a pawng in riahhnawh i hung hranh awkah an hung kal. ⁶ Cun Gibeon mi hna nih cun Joshua cu Gilgal riahhmun ah cun an hei cah i, "Na sal hna cungin na kut kha dorh hlah; khulrang in hung law, kan khamh law, kan bawm tuah; zeitintiah tlang cungah khua a sami Amor mi siangpahrang vialte kha kanmah doh awkah an i pum," tiah an ti. ⁷ Cucaah Joshua cu Gilgal in ralkap vialte le miralṭha miṭhawng vialte he tiah a hung kal. ⁸ Cun Bawipa nih Joshua cu a chawnh i, "Ṭih hna hlah, zeitintiah annih cu na kut chungah kan pek cang hna; anmah lakah na hmaiah a dir khomi pakhat hmanh an um lai lo," tiah a ti. ⁹ Cucaah Joshua nih zan khuadei te Gilgal in a hung kal i hlauhsaphak in a paoh hna. ¹⁰ Cun Bawipa nih Israel mi hna hmaiah cun a comcawroi loin a zamter hna i, Gibeon ah cun tampi an thah hna, Beth-horon i hung kainak lam ah cun an dawi hna i Azekah le Makkedah khua tiang an thah lengmang hna. ¹¹ Cun Israel mi hmai i an zaam i Beth-horon i hung kainak in an va liam lioah khin Bawipa nih Azekah tiang vancung in lung ngan pipi a thlakhnawh hna i an thi; Israel mi nih nam in an thahmi hna nakin rial in a thimi cu an tam deuh. ¹² Bawipa nih Amor mi hna cu Israel mi hna sinah a pek hna ni ah Joshua nih Bawipa kha a chawnh i Israel mi hna mithmuh ah, "Ni, Gibeon ah dir peng tuah, Cun Thlapa, nang, Aijalon nelrawn ah," tiah a ti. ¹³ Miphun nih khan an ral hna cu phu an hlam hna hlantiang, Ni cu a dir peng i thlapa cu a taang. Mah hihi Jashar cauk ah aa ṭial lo mei? Ni cu van laifang ah khin a taang i ni khat pum tluk cu tlak tim loin a um. ¹⁴ Cu bantuk ni, Bawipa nih minung aw a ngaih ni bantuk kha, cu hlanah siseh cu hnuah siseh a um bal lo; zeitintiah Bawipa nih Israel cu a dohpiak. ¹⁵ Cun Joshua le Israel mi vialte cu an riahhmun Gilgal ah cun an kir dih ṭhan. ¹⁶ Hi siangpahrang panga hna cu an zaam i Makkedah i lungkua ah an i thup ¹⁷ Cun Joshua cu, "Siangpahrang panga hna kha an hmuh cang hna, Makkedah i lungkua ah an i thup ko,’ tiah an chimh. ¹⁸ Cun Joshua nih, "Lungkua kaa ah cun lung ngan pipi hril hna u, cun a pawngah anmah cawngtu ah mi chia hna u; ¹⁹ sihmanhsehlaw cuka ah cun nannih cu um hlah u, nan ral kha dawi hna u, an hnu dawn pawl kha tlak phuat hna u, an khua chungah khan luhter hrimhrim hna hlah u; zeitintiah Bawipa nan Pathian nih annih cu nan kut chungah an pek cang hna," tiah a ti. ²⁰ Joshua le Israel mi hna nih an ci a mih hlantiang an thah cikcek hna tik le a tangmi tete hna cu kulhmi khua chungah an luh tikah, ²¹ mi vialte cu him tein Joshua sinah Makkedah riahhmun ah cun an kir; Israel mi ahohmanh kha, pakhat hmanh nih bia an chim ngam lo. ²² Cun Joshua nih, "Lungkua kaa kha hung u law, lungkua chung khan siangpahrang panga hna kha ka sinah rak chuahpi tuah hna u," tiah a ti. ²³ Cu bangin an tuah i lungkua chung khan siangpahrang panga hna kha a sinah an chuahpi hna, Jerusalem siangpahrang, Hebron siangpahrang, Jarmuth siangpahrang, Lakhish siangpahrang le Eglon siangpahrang hna cu. ²⁴ Cun cu siangpahrang hna cu Joshua sinah an chuahpi hna tikah, Joshua nih Israel mi vialte kha a kawh hna i amah sinah a kalmi ralkap hna bawi hna sinah khan, "Rak ka naih tuah u, hi siangpahrang hna hngawng hi lam tuah hna u," tiah a ti. ²⁵ Cun Joshua nih annih sinah, "Nan thin phang hlah u, nan lung zong dong hlah u; ṭhawng u law, ralṭha ngaiin um tuah u; zeicahtiah Bawipa nih nan dohmi hna nan ral vialte cungah kha bang khan a tuah lai," tiah a ti. ²⁶ Cun a hnuah Joshua nih a tuk hna i a thah hna i thingkung panga cungah a thlai hna. Cun thingkung cungah cun zanlei tiang an i thlai; ²⁷ sihmanhsehlaw ni a tlak cuahmah tikah, Joshua nih nawl a pek hna i thingkung cung khan an ṭhumh hna i, an i thuhnak lungkua chungah khan an hlonh hna i lungkua kaa cu lung ngan pipi in an khar, nihin ni tiang hrimhrim hin a um ko. ²⁸ Cun khi ni ah Joshua nih Makkedah cu a lak i cu khua le a siangpahrang cu vainam in a sam dih hna; a chung i a ummi paohpaoh cu a thah dih hna, pakhat hmanh a zuah hna lo; cun Jeriko siangpahrang cungah a tuah bang khan Makkedah siangpahrang cungah cun a tuah. ²⁹ Cun Joshua cu a sinah a ummi Israel mi vialte he Makkedah in Libnah ah an va lan i Libnah kha an doh; ³⁰ cun Bawipa nih cu khua cu an siangpahrang he tiah Israel mi kut chungah a pek hna; cu khua cu a chung i a ummi vialte he vainam in a sam dih hna; pakhat hmanh a zuah hna lo; Jeriko siangpahrang cungah a tuah bang khan an siangpahrang cungah cun a tuah. ³¹ Cun Joshua cu a sinah a ummi Israel mi vialte hna he Libnah in Lakhish ah an va lan i an kulh i an tuk: ³² cun Bawipa nih Lakhish khua cu Israel mi kut chungah a pek i a ni hnihnak ni ah a lak i cu khua cu a chung i a ummi vialte he vainam in a sam, Libnah cung i a tuah bantuk khan. ³³ Cun Gezer siangpahrang Horam cu Lakhish bawmh awkah a hung kal i, Joshua nih amah he a mi hna he, pakhat hmanh taang lo tiangin, a thah hna. ³⁴ Cun Joshua cu Israel mi vialte he Lakhish in Eglon ah an va lan; cun an kulh i an doh; ³⁵ cu ni ah cun an lak i vainam in an sam dih; cu khua chung i a ummi paoh cu khi ni ah a hrawh cikcek hna, Lakhish cung i a tuah bang khan. ³⁶ Cun Joshua cu Israel mi vialte he Eglon in Hebron ah an hung kal i an hung doh; ³⁷ an lak i a siangpahrang he a khua hna he, a chung i a ummi vialte hna he, vainam in an sam dih hna; pakhat hmanh a zuah hna lo, Eglon cungah a tuah bantuk khan, a chung i a ummi vialte he a hrawh dih cikcek. ³⁸ Cun Joshua cu Israel mi vialte he Debir leiah aa mer i a doh, ³⁹ a siangpahrang he a khua hna he a lak dih; vainam in an sam dih hna i a chung i a ummi vialte cu an hrawh cikcek hna; pakhat hmanh a zuah hna lo; Hebron cung le Libnah le a siangpahrang cung i a tuah bang khan Debir le a siangpahrang cungah a tuah. ⁴⁰ Cu bangin Joshua nih ram cu a ning piin, tlangram siseh, Negeb siseh, rawnram siseh, tlangpangzau siseh, an siangpahrang vialte he a tei dih hna; pakhat hmanh a zuah hna lo, Bawipa Israel Pathian nih nawl a pek bang khan thaw a chuah paohpaoh cu a hrawh dih cikcek hna. ⁴¹ Joshua nih annih cu Kadesh-barnea in Gaza tiang a tei hna. Goshen ram vialte zong Gibeon tiangin. ⁴² Bawipa Israel Pathian nih Israel mi cu a dohpi hna caah Joshua nih hi siangpahrang vialte hna le an ram cu ṭum khat ah a lak dih hna. ⁴³ Cun Joshua cu amah sinah a ummi Israel mi vialte he Gilgal i an riahhmun ah cun an kir ṭhan.

¹ Cun hi kong cu Hazor siangpahrang Jabin nih a theih tikah, Madon siangpahrang Jobab le Shimron siangpahrang le Akhshaf siangpahrang le ² chaklei tlangram i a ummi siangpahrang hna le Khinneroth thlang Arabah i a ummi siangpahrang hna le rawnram i a ummi siangpahrang hna le nitlaklei Nafoth-dor i a ummi siangpahrang hna le ³ nichuahlei le nitlaklei i a ummi Kanaan mi hna le, tlangram i a ummi Amor mi hna, Hit mi hna, Periz mi hna le Jebus mi hna le Hermon tang Mizpah ram i a ummi Hiv mi hna cu bia a cah hna. ⁴ Cun an ralkap vialte hna le an rang le an rangleng tampi hna he tiah an ra chuak ciammam i, bu nganpi, an tam ning cu rili kam i thetse zat hrimhrim an si. ⁵ Cun hi siangpahrang vialte hna nih cun an ralkapbu vialte cu an fonh hna i Israel mi kha doh awkah Merom ti ah cun an ra i an riak, ⁶ Cun Bawipa nih Joshua cu a chawnh i, "Annih kha ṭih hna hlah, zeicahtiah thaizing atu tikah hin an dihlak in thah cia in Israel mi sinah ka pek hna lai; an rang cu an tha nan pheh hna lai i an rangleng cu mei in nan khangh hna lai," tiah a ti. ⁷ Cucaah Joshua le a ralkap vialte hna nih cun Merom ti pawngah cun duak tiah an va pauh hna i an nam colh hna. ⁸ Cun Bawipa nih annih cu Israel mi kut chungah a pek hna i an thah hna i, Sidon Ngan le Misrefoth-maim tiang, cun nichuahlei ah Mizpah nelrawn tiang an dawi hna; pakhat hmanh an taan ti lo tiang an thah lengmang hna. ⁹ Cun Bawipa nih a fial bantukin Joshua nih an cungah a tuah; an rang kha an tha an pheh hna i an rangleng kha mei in a khangh hna. ¹⁰ Cun khi caan ah Joshua cu a let i Hazor kha a lak, an siangpahrang cu vainam in a thah; zeitintiah Hazor cu hmasa ah cun cu peng vialte hna lu cu a si. ¹¹ A chungah a ummi vialte cu vainam in an thah dih hna i an hrawh cikcek hna; thaw a chuahmi pakhat hmanh an zuah lo; Hazor cu mei in a khangh. ¹² Cun cu siangpahrang hna khua vialte le an siangpahrang hna cu Joshua nih a lak hna i vainam in a thah hna, a hrawh cikcek hna, Bawipa sal Moses nih nawl a rak pek bang khan. ¹³ Mual cung i a ummi khua hna tu cu, Joshua nih a khanghmi Hazor dah ti lo cu, Israel mi nih an khang hna lo. ¹⁴ Cun hi khua hranchaw vialte hna le saṭil hna cu Israel mi nih hranchaw ah an i lak dih; sihmanhsehlaw mi cu an hrawh dih hna hlantiang nam in an thah hna i thaw a chuahmi pakhat hmanh an ngan ta hna lo. ¹⁵ Bawipa nih a sal Moses kha nawl a pek bangin Moses nih Joshua kha nawl a pek chin i cu bang cun Joshua nih a tuah; Bawipa nih Moses nawl a pekmi vialte kha pakhat hmanh a hrelhmi an um lo. ¹⁶ Cucaah Joshua nih cu ram vialte, tlangram le Negeb vialte le Goshen ram vialte le rawnram le Arabah le Israel tlangram le a rawnram cu, ¹⁷ Seir lei i a hung kaimi Halak Tlang in Hermon Tlang tang i a ummi Lebanon nelrawn i a ummi Baal-gad tiangin a lak dih hna. Cun an siangpahrang vialte kha a lak hna i a tuk hna i a thah hna. ¹⁸ Joshua nih cu siangpahrang hna he cun saupi an i do. ¹⁹ Gibeon i a ummi Hiv mi hna dah ti lo cu Israel mi hna he remnak a tuahmi khua pakhat hmanh an um lo, an dihlak in raldohnak i an lakmi an si dih. ²⁰ Bawipa nih Moses nawl a pek bangin hrawh cikcek an si i zaangfahnak um loin hloh cikcek an si nakhnga, an lung ṭhawnter i Israel mi hna doh cu Bawipa tuahmi a si. ²¹ Cun khi caan ah Joshua cu a ra i tlangram a simi Hebron, Debir, Anab le Judah tlangram vialte in le Israel tlangram vialte in Anak mi cu a hloh dih hna; Joshua nih an khua hna he a hrawh cikcek hna. ²² Israel mi ram chungah Anak mi cu pakhat hmanh an tang lo; Gaza le Gath le Ashdod lawngah tlawmpal an tang. ²³ Cucaah Bawipa nih Moses sinah a rak chim cangmi vialte bantuk khan Joshua nih ram cu a ning piin a lak i an phun ning cio i phawtning khan Joshua nih Israel mi hna sinah ro caah a pek hna. Cun ram cu ral in aa din.

¹ Mah hna hi Israel mi nih an tei i an ram an chuhmi hna, Jordan tiva ral nichuahlei ram, Arnon nelrawn in Hermon Tlang tiang, Arabah in nichuahlei paohpaoh ram siangpahrang hna cu an si; ² Heshbon khua ah a ummi Amor mi siangpahrang Sihon. A uknak cu Arnon tiva nelrawn kam i a ummi Aroer khua in le cu nelrawn laifang in Ammon mi ramri Jabbok tiva tiang a si, cucu Gilead ram hnarcheu a si, ³ cun Arabah zong, Khinneroth Rili tiang nichuahlei kam zuahmah in, cun Beth-jeshimoth leiah Arabah rili tiang, cucu Cite Rili a si, cun thlanglei ah Pisgah tlangpangzau hram tiangin. ⁴ Cun, Refaim mi lakin a taangmi pakhat Bashan siangpahrang Og zong. Amah cu Ashtaroth le Edrei khua ah a um. ⁵ Amah nih Hermon Tlang le Salekah le Bashan vialte, Geshur mi hna le Maakath mi hna ramri tiang, cun Gilead ram hnarcheu Heshbon siangpahrang Sihon ramri tiangin a uk. ⁶ Bawipa sal Moses le Israel mi hna nih an tei hna; Bawipa sal Moses nih cun an ram cu Reuben mi le Gad mi le Manasseh phun cheu hna sinah khan ro caah a pek hna. ⁷ Jordan tiva nitlaklei ah, Lebanon nelrawn i a ummi Baal-gad in Seir leiah a hung kaimi Halak Tlang tiang i, Joshua le Israel mi nih an teimi, cu ram siangpahrang hna cu mah hna hi an si cun Joshua nih an ram cu Israel miphun hna sinah khan an i ṭhenhning in ro caah a pek hna, — ⁸ tlangram ah siseh, rawnram ah siseh, Arabah ah siseh, tlangpang zau ah siseh, ramlak ah siseh, Negeb ah siseh, cucu Hit mi le Amor mi le Kanaan mi le Periz mi le Hiv mi le Jebus mi hna ram an si): ⁹ Jeriko siangpahrang, pakhat; Bethel pawngah a ummi Ai siangpahrang, pakhat; ¹⁰ Jerusalem siangpahrang, pakhat; Hebron siangpahrang, pakhat; ¹¹ Jarmuth siangpahrang, pakhat; Lakhish siangpahrang, pakhat; ¹² Eglon siangpahrang, pakhat; Gezer siangpahrang, pakhat; ¹³ Debir siangpahrang, pakhat; Geder siangpahrang, pakhat; ¹⁴ Hormah siangpahrang, pakhat; Arad siangpahrang, pakhat; ¹⁵ Libnah siangpahrang, pakhat; Adullam siangpahrang, pakhat; ¹⁶ Makkedah siangpahrang, pakhat; Bethel siangpahrang, pakhat; ¹⁷ Tappuah siangpahrang, pakhat; Hefer siangpahrang, pakhat; ¹⁸ Afek siangpahrang, pakhat; Lasharon siangpahrang, pakhat; ¹⁹ Madon siangpahrang, pakhat; Hazor siangpahrang, pakhat; ²⁰ Shimron-meron siangpahrang, pakhat; Akhshaf siangpahrang, pakhat; ²¹ Taan-akh siangpahrang, pakhat; Megiddo siangpahrang, pakhat; ²² Kedesh siangpahrang, pakhat; Karmel ah a ummi Jokneam siangpahrang, pakhat; ²³ Nafath-dor ah a ummi Dor siangpahrang, pakhat; Galilee ah a ummi Goi-im siangpahrang, pakhat; ²⁴ Tirzah siangpahrang, pakhat; an dihlak in siangpahrang sawm thum le pakhat an si.

¹ Atu cu Joshua cu a upa i a tar ngaingai cang. Bawipa nih a chawnh i, "Nang cu na upa i na tar ngaingai cang, asinain co awk ram tampi a um rih. ² Mah hihi a tang rihmi ram cu a si; Filistin mi hna ram a dihlak le Geshur mi ram a dihlak. ³ (Izipt nichuahlei i a ummi Shihor in chaklei ah Ekron ramri tiang, mah cucu Kanaan mi ram ah rel a si; cun Filistin bawi panga an um, Gaza i le Ashdod i le Ashkelon i le Gath i le Ekron i hna cu an si), ⁴ cun thlanglei ah Avvim mi hna ram zong, Kanaan mi hna ram vialte le Sidon mi ta a simi Mearah, Amor mi hna ramri Afek tiang le, ⁵ Gebal mi hna ram le nichuahlei ah Lebanon vialte, Hermon Tlang tang i a ummi Baal-gad in Hamath khua luhnak tiang, ⁶ tlang ram i a ummi vialte Lebanon in Misrefoth-maim tiang, Sidon mi vialte hna cu. Keimah hrimhrim nih Israel mi hna hmai in ka dawi hna lai; nawl kan pek bantuk khan ram cu Israel mi hna sinah ro caah a cheuh tu cu rak cheu ko hna. ⁷ Cucaah atu cu hi ram hi phun kua le Manasseh phun cheu hna kha ro caah cheu tuah hna," tiah a ti. ⁸ A dang Manasseh phun cheu hna he cun, Reuben mi le Gad mi nih Moses nih a pek hna bang khan an ro kha an co, Jordan ral nichuahlei ah khan, Bawipa sal Moses nih a pek hna bang khan: ⁹ Arnon tiva nelrawn ri ah a ummi Aroer khua thawk in, cu nelrawn laifang ah a ummi khua le Medeba tlangrawn ram vialte Dibon tiangin; ¹⁰ cun Heshbon ah a ummi Amor mi siangpahrang Sihon khua vialte, Ammon mi hna ramri tiang; ¹¹ cun Gilead ram le Geshur mi hna le Maakath mi hna ram le, Hermon tlang vialte le, Bashan dihlak Salekah tiangin; ¹² Ashtaroth le Edrei in a pengtu Bashan siangpahrang Og pennak vialte (Refaim mi hna lakin a taangmi hna lakah amah lawng cu a tang); mah hna hi Moses nih a tei hna i a dawi hna. ¹³ Sihmanhsehlaw Geshur mi si hna seh, Maakath mi si hna seh, Israel mi nih an dawi hna lo; Geshur le Maakath cu nihin ni tiang hin Israel mi lakah an um ko. ¹⁴ Levi phun lawng kha Moses nih ro a pek lomi cu a si; Bawipa Israel Pathian sinah mei in pekchanhmi thil cu, a chimh cang bang khan annih ro cu a si. ¹⁵ Cun Moses nih Reuben miphun cu an innchungkhar ning cio ah ro a pek hna. ¹⁶ Cucaah an ram cu Arnon nelrawn ri ah a ummi Aroer khua in le, nelrawn laifang ah a ummi khuapi le, Medeba hrawng tlangrawn ram vialte cu a si; ¹⁷ Heshbon le tlangrawn ram chungah a ummi khua vialte he; Dibon le Bamoth-baal le Beth-baal-meon le ¹⁸ Jahaz le Kedemoth le Mefaath le ¹⁹ Kiriathaim le Sibmah le nelrawn tlang cungah a ummi Zereth-shahar le ²⁰ Beth-peor le Pisgah tlangpang zau le Beth-jeshimoth zong, ²¹ cucu tlangrawn ram khua vialte le Heshbon i bawi a simi Amor siangpahrang Sihon pennak vialte cu a si. Moses nih amah cu Midian mi hruaitu hna Evi le Rekem le Zur le Hur le Reba, Sihon bawi ram chungah a ummi hna he cun a tei. ²² Beor fapa Balaam, camthiammi zong kha Israel mi nih an thahmi hna lakah khan vainam in an thah chih ve. ²³ Reuben mi hna ramri cu Jordan tiva cu a si. Mah hihi Reuben mi hna nih an innchungkhar ning cio ah an comi ram cu a si, an khuapi hna le an khuate hna he tiah. ²⁴ Cun Moses nih Gad miphun zong an innchungkhar ning cio ah ro a pek hna. ²⁵ An ram cu mah hna hi a si: Jazer le, Gilead ram khua vialte le, Ammon mi hna ram hnarcheu, Rabbah nichuahlei ah a ummi Aroer tiang, ²⁶ cun Heshbon in Ramath-mizpeh le Betonim tiang, cun Mahanaim in Debir ram tiang, ²⁷ cun nelrawn chungah Heshbon siangpahrang Sihon pennak a taangmi, Beth-haram, Beth-nimrah, Sukkoth le Zafon; a ramri cu Jordan tiva Khinneroth Rili a thlanglei kam tiang a si; cu ram cu Jordan tiva ral nichuahlei ram cu a si. ²⁸ Mah hihi Gad mi hna nih an innchungkhar ning cio ah, an comi ram cu a si, khuapi hna le a khuate hna he. ²⁹ Cun Moses nih Manasseh phuncheu cu ro a pek; an innchungkhar ning cio in Manasseh phuncheu cu pek a si. ³⁰ An ram cu Mahanaim in Bashan ram vialte a dihlak, Bashan siangpahrang Og pennak vialte cu a ning piin, Bashan chung i a ummi Jair khua vialte, khua sawm ruk hna cu, ³¹ cun Gilead ram a cheu le Bashan ram chung i Og nih a penmi ram khuapi Ashtaroth le Edrei. Mah hna hi Manasseh fapa Makhir tefa hna cu pek an si, an innchungkhar ning cio ah Makhir mi hnarcheu cu pek an si. ³² Jordan tiva ral Jeriko in nichuahlei Moab nelrawn chung i Moses nih a phawtmi hna ram cu mah hna hi an si. ³³ Sihmanhsehlaw Levi phun cu Moses nih ro a pe hna lo; an sinah a rak chim bang khan Bawipa Israel Pathian cu an ro cu a si.

¹ Cun mah hna hi Kanaan ram chungah Israel mi nih an comi ram cu an si, tlangbawi Eleazar le Num fapa Joshua le Israel tefa hna chung i an phun cio lu hna nih an phawtmi hna cu an si. ² Bawipa nih Moses nawl a pek bang khan phun kua le a cheu caah cun an co ning cu camcawh fung zuh in a si, ³ zeitintiah Moses nih Jordan tiva ral ah phun hnih le a cheu cu ro kha a pek cang hna; sihmanhsehlaw annih lakah Levi mi hna cu ro a pe hna lo. ⁴ Josef tefa hna cu phun hnih an si, Manasseh le Efraim; ram chungah Levi mi hna cu vo an pe hna lo, sihmanhsehlaw umnak khua hna le cu pawngkam i caw le saṭil dang tlonnak ram lawnglawng cu pek an si. ⁵ Bawipa nih Moses nawl a pek bang khan Israel mi nih an tuah; ram cu an i ṭhen. ⁶ Cun Judah phunmi kha Joshua sinah Gilgal ah an ra i Keniz phun Jefunneh fapa Kaleb nih a sinah, "Nangmah le keimah kongah, Bawipa nih Pathian mi Moses sinah Kadesh-barnea ah bia a chimmi kha na hngalh. ⁷ Bawipa sal Moses nih ram cu hung ngiatthlai awkah Kadesh-barnea in a ka thlah tikah kum sawm li ka rak si; cun ka lungchung i a umning bantuk tein bia cu amah cu ka rak phorh ṭhan. ⁸ Sihmanhsehlaw keimah he a hung kal ṭimi ka unau hna nih khan mizapi cu an awlok an chonter hna, sihmanhsehlaw kei tu nih cun Bawipa ka Pathian kha fek tein ka zulh. ⁹ Cun Moses nih khi ni ah chiat a ser i, ’Bawipa ka Pathian cu fek tein na zulh caah, na ke nih a lamhmi ram cu nangmah ca le na tefa hna caah zungzal in ro an si hrimhrim lai,’ tiah a ti. ¹⁰ Cun atu cu, zohhmanh, Bawipa nih a chim bang khan hi kum sawm li le kum nga chung hi Bawipa nih Moses sinah hi bia a chim ri khan a ka nunter, Israel mi nih ramlak ah an vah lioah khan; cun atu cu zohhmanh, nihin ni ah hin kum sawm riat le kum nga ka si. ¹¹ Moses nih a rak ka thlah ni i ka ṭhawn tluk te khan nihin ni tiang ka ṭhawng ko rih; raldohnak caah siseh, kalnak caah siseh, ratnak caah siseh, atu i ka thazang cu kha lio i ka thazang bantuk kha a si ko. ¹² Cucaah Bawipa nih kha ni ah a rak chimmi tlangram cu atu ah hin ka pe tuah, zeitintiah Anak mi hna nih zeitindah khika ah kulhmi khualipi hna he an um kha, kha ni ah khan na rak theih cang. Bawipa nih a chim bang khan Bawipa nih a hei ka umpi hnga i ka hei ṭhawl khawh ko hna hnga dah kaw," tiah a ti. ¹³ Cun Joshua nih thluachuah a pek i Hebron cu Jefunneh fapa Kaleb sinah khan ro caah a pek. ¹⁴ Cucaah Hebron cu Keniz phun Jefunneh fapa Kaleb ro ah, Bawipa, Israel Pathian kha fek tein a rak zulh caah, nihin ni tiang hin a cang. ¹⁵ Hebron khua min cu a hlanah cun Kiriath-arba a rak si; hi Arba cu Anak mi hna lakah mingan bik a rak si. Cun ram cu raldohnak in aa din.

¹ Judah phun caah an innchungkhar ning cio ah an vo cu thlanglei ah Edom ramri, thlanglei bik ah Zin ramlak tiang a phan. ² Cun an thlanglei ramri cu Cite Rili kam, thlanglei a zohmi rili fonghlei thawk in a si. ³ Akrabbim i hung kainak thlanglei in a kal i Zin a hei phan, cun Kadesh-barnea thlanglei ah a hung kai, cun Hezron pawng in Addar tiang a kal, cun Karka lei ah aa mer, ⁴ Azmon tiang a lan i Izipt Tivate ah a hung chuak; cuticun an ramri cu rili ah a dong. Mah hihi an thlanglei ramri cu a si. ⁵ Cun nichuahlei an ramri cu Cite Rili a si, Jordan tiva chuak tiang. Cun chaklei kam ramri cu Jordan tiva chuak i rili fonghlei in aa thawk; ⁶ cun ramri cu Beth-hoglah ah a hung kai i Beth-arabah chak in a lan; cun ramri cu Reuben fapa Bohan Lung tiang a hung kai; ⁷ cun ramri cu Akhor nelrawn in Debir tiang a hung kai; cuticun chaklei ah a kal, cun nelrawn thlanglei kamah a ummi Adummim i hung kainak ralchan i a ummi Gilgal leiah aa mer; cun ramri cu En-shemesh ti tiang a lan i En-rogel ah a dong; ⁸ cun ramri cu Jebus mi umnak tlang thlanglei fing (cucu Jerusalem) i Hinnom fapa nelrawn leiah a hung kai; cun ramri cu, nitlaklei ah, Refaim nelrawn chaklei kamah, Hinnom horkuang ralchan i a ummi tlangpar tiang a hung kai; ⁹ cun ramri cu tlangpar cun Neftoah Ti a putnak tiang a vung kal i cuka cun Efron Tlang khua hna tiang a lan; cun ramri cu Baalah (cucu Kiriath-jearim) leiah aa kuai i ¹⁰ ramri cu Baalah nitlaklei ah Seir Tlang leiah aa let, Jearim Tlang (cucu Khesalon) chaklei fing kha a zulh i Beth-shemesh tiang a vung kal i Timnah pawng in a lan; ¹¹ ramri cu Ekron fing tiang chaklei ah a kal, cun Shikkeron leiah aa kuai i Baalah Tlang leiah a kal i Jabneel ah a chuak; cun ramri cu rili ah a dong. ¹² Cun nitlaklei ramri cu Rili Ngan le a kam cu a si. Mah hihi Judah phun, an innchungkhar ning cio in, an velchum i an ramri cu a si. ¹³ Bawipa nih Joshua nawl a pekmi bangin, Jefunneh fapa Kaleb cu Judah mi hna lakah vo pakhat, Kiriath-arba cu a pek, cucu Hebron a si (Arba cu Anak pa kha a si). ¹⁴ Cun Kaleb nih khika in Anak fapa pathum, Sheshai, Ahimah, le Talmai, Anak tefa hna cu, a dawi hna. ¹⁵ Cun khika in Debir khuami kha doh awkah a hung kal; hlanah cun Debir min cu Kiriath-sefer a rak si. ¹⁶ Cun Kaleb nih, "Kiriath-sefer atu i a latu paoh cu ka fanu Aksah kha nupi ah ka pek lai," tiah a ti. ¹⁷ Cun Kaleb nau Kenaz fapa Othniel nih a lak i, amah cu a fanu Aksah cu nupi ah a pek. ¹⁸ Aksah nih a sinah a rat tikah, a pa kha lo pakhat hal awkah a fial; cun a laa cungin a ṭum i Kaleb nih, "Zei dah na duh?" tiah Aksah cu a ti. ¹⁹ Amah nih, "Laksawng pakhat in ka pe tuah; Negeb ram chungah na ka chiah caah, tiput hna zong kha ka pek chih tuah," a ti. Cun Kaleb nih chaklei tiput hna le thlanglei tiput hna kha a pek chih. ²⁰ Judah phun nih an innchungkhar ning cio ah an comi ram cu mah hi a si. ²¹ Edom ramri leiah thlanglei bik ah Judah phun i an khua hna cu mah hihi an si: Kabzeel, Eder, Jagur, ²² Kinah, Dimonah, Adadah, ²³ Kedesh, Hazor, Ithnan, ²⁴ Zif, Telem, Bealoth, ²⁵ Hazor-hadattah, Kerioth-hezron (cucu Hazor), ²⁶ Amam, Shema, Moladah, ²⁷ Hazar-gaddah, Heshmon, Beth-pelet, ²⁸ Hazar-shual, Beersheba, Biziothia, ²⁹ Baalah, I-im, Ezem, ³⁰ Eltolad, Khesil, Hormah, ³¹ Ziklag, Madmannah, Sansannah, ³² Lebaoth, Shilhim, Ain, le Rimmon; a zapi ah khuapi pakul le pakua an si, an khuate hna he. ³³ Cun rawnram ah, Eshtaol, Zorah, Ashnah, ³⁴ Zanoah, En-gannim, Tappuah, Enam, ³⁵ Jarmuth, Adullam, Sokoh, Azekah, ³⁶ Shaaraim, Adithaim, Gederah, Gederothaim; khuapi hleili, an khuate hna he. ³⁷ Zenan, Hadashah, Migdal-gad, ³⁸ Dilean, Mizpah, Jokthe-el, ³⁹ Lakhish, Bozkath, Eglon, ⁴⁰ Kabbon, Lahmam, Khitlish, ⁴¹ Gederoth, Beth-dagon, Naamah, le Makkedah; khuapi hleiruk, an khuate hna he. ⁴² Libnah, Ether, Ashan, ⁴³ Iftah, Ashnah, Nezib, ⁴⁴ Keilah, Akhzib, le Mareshah; khuapi pakua, an khuate hna he. ⁴⁵ Ekron, a khuapi hna le a khuate hna he; ⁴⁶ Ekron in rili tiang, Ashdod sir i a ummi vialte, an khuate hna he. ⁴⁷ Ashdod, a khuapi hna le a khuate hna; Gaza, a khuapi hna le a khuate hna; Izipt tiva le rili ngan le a kam tiang. ⁴⁸ Cun tlangram ah, Shamir, Jattir, Sokoh, ⁴⁹ Dannah, Kiriath-sannah (cucu Debir), ⁵⁰ Anab, Eshtemoth, Anim, ⁵¹ Goshen, Holon, le Giloh; khuapi hleikhat, an khuate hna he. ⁵² Arab, Dumah, Eshan, ⁵³ Janim, Beth-tappuah, Afekah, ⁵⁴ Humtah, Kiriath-arba (cucu Hebron), le Zior; khuapi pakua, an khuate hna he. ⁵⁵ Maon, Karmel, Zif, Juttah, ⁵⁶ Jezreel, Jokdeam, Zanoah, ⁵⁷ Kain, Gibeah, le Timnah; khuapi pahra, an khuate hna he. ⁵⁸ Halhul, Beth-zur, Gedor, ⁵⁹ Ma-arath, Beth-anoth, le Eltekon; khuapi paruk, an khuate hna he. ⁶⁰ Kiriath-baal (cucu Kiriath-jearim), le Rabbah; khuapi pahnih, an khuate hna he. ⁶¹ Ramlak ah, Beth-arabah, Middin, Sekakah, ⁶² Nibshan, Cite Khua, le En-gedi; khuapi paruk, an khuate hna he. ⁶³ Sihmanhsehlaw Jerusalem khuami Jebus mi hna cu Judah mi hna nih an dawi kho hna lo; cucaah nihin ni tiangin Jebus mi hna cu Judah mi hna he Jerusalem ah an um ko.

¹ Josef tefa hna vo cu Jeriko pawng Jordan tiva Jeriko tiput hna nichuahlei kap in aa thawk i ramlak ah a lut i Jeriko in Bethel tlangram ah a hung kai; ² cun Bethel in Luz ah a kal i Arki mi ram Ataroth ah a lan; ³ cun nitlaklei ah Jaflet mi hna ram ah a vung kal, thlanglei Beth-horon ram tiang; cun Gezer ah a phan i rili ah a dong. ⁴ Josef mi Manasseh le Efraim nih an vo ding kha an co. ⁵ An innchungkhar ning cio ah, Efraim mi hna ram cu a tanglei bangin a si: nichuahlei kamah an vo ramri cu Ataroth-addar, chaklei Beth-horon tiang, ⁶ cun ramri cu khika in rili ah a vung kal; chaklei ah ramri cu Mikmethath a si; cun nichuahlei ah ramri cu Taanath-shiloh lei ah aa kuai i a hei lonh i nichuahlei ah Janoah ah a kal, ⁷ cun Janoah in Ataroth le Naarah tiang a vung kal, Jeriko kha a hei pal pah i Jordan ah a dong. ⁸ Tappuah in ramri cu nitlaklei ah a kal i Kanah tivate a phan i rili ah a dong. Cu bantukin Efraim mi hna nih an innchungkhar ning cio in an comi ram cu a si; ⁹ Manasseh ram chung i Efraim mi hna caah an chiahmi khua hna, cu khua vialte hna le an khuate hna he cun tiah. ¹⁰ Sihmanhsehlaw Gezer i a ummi Kanaan mi kha cu an dawi hna lo; cu caah nihin tiangin Kanaan mi hna cu Efraim mi hna lakah an um, sihmanhsehlaw hnekmi rian ṭuan awkah sal ah an cang cang.

¹ Cun Manasseh phun kha vo pek an si, amah cu Josef fater kha a si. Manasseh fater Makhir, Gilead pa cu ralkap a si caah Gilead le Bashan kha pek a si. ² Cun Manasseh phun chung i a taang rihmi hna cu an innchungkhar ning cio ah vo phawt an si, Abiezer, Helek, Asriel, Shekhem, Hefer le Shemida; mah hna hi Josef fapa Manasseh i a tefa hna cu pa lei in an innchungkhar ning cio ah an si. ³ Manasseh fapa Makhir fapa Gilead fapa Hefer i fapa Zelofehad cu fapa a ngei lo, fanu lawnglawng a ngeih hna; mah hna hi a fanule hna min cu an si: Mahlah, Noah, Hoglah, Milkah, le Tirzah. ⁴ Tlangbawi Eleazar le Nun fapa Joshua le haotu hna sinah cun an ra i, "Bawipa nih Moses cu, kan unau hna sinah covo kan ngeih ve nakhnga, nawl a pek," tiah an ti. Cucaah Bawipa nawlbia bang cun an pa unau hna lakah cun covo a pek ve hna. ⁵ Cuticun Manasseh nih vo hra a co, Jordan khattelei ral i a ummi Gilead le Bashan ram hleiah; ⁶ zeicahtiah Manasseh fanu hna nih a fapa hna he vo an co ve caah a si. Gilead ram cu Manasseh mi a dang hna nih cun an co. ⁷ Manasseh ram cu Asher in Shekhem nichuahlei i a ummi Mikmethath tiang a phan; cun ramri cu thlanglei ah En-Tappuah mi umnak tiangin a vung kal. ⁸ Tappuah ram cu Manasseh ta a si, sihmanhsehlaw Manasseh ramri i a ummi Tappuah khua cu Efraim fapale hna ta a si. ⁹ Cun ramri cu Kanah tivate ah a vung kal. Hi tivate thlanglei i a ummi, Manasseh khua hna lak i a ummi khua hna hi cu Efraim ta an si. Cun Manasseh ramri cu cu tiva chaklei kam cun a kal i rili ah a dong; ¹⁰ thlanglei kam cu Efraim ram a si i chaklei kam cu Manasseh ram a si, ramri ah cun rili a si; chaklei ah Asher a phan, nichuahlei ah Issakhar a phan. ¹¹ Cun Issakhar le Ahser chung zongah cun Beth-shean le a khuate hna, Ibleam le a khuate hna, Dor le a khuate hna, i a ummi hna Endor le a khuate hna i a ummi hna Taanak le a khuate hna i a ummi hna, Megiddo le a khuate hna i a ummi hna cu Manasseh ta an si; a pathumnak cu Nafath a si. ¹² Sihmanhsehlaw Manasseh fapa hna nih cu khuami hna cu an pawnchuah kho hna lo; Kanaan mi hna cu cu ram ah cun an i benh peng ve ko. ¹³ Sihmanhsehlaw Israel mi kha an hung ṭhawn tikah Kanaan mi hna cu hnekmi rian kha an ṭuanter hna i an dawi dih cikcek hna lo. ¹⁴ Cun Josef phun nih Joshua kha an chawnh i, "Kei cu atu tiangah Bawipa nih thluachuahnak a ka pek caah mi tampi ka si nain, zeicahdah covo pakhat le hmun pakhat lawnglawng na ka pek?" tiah a ti. ¹⁵ Cun Joshua nih annih cu, "Nannih cu mi tampi nan si ahcun, tupi ah khin hung kal u law, Periz mi le Refaim mi hna ram ah lo hung vat ngat u, Efraim tlangram cu nan caah a bit tuk ṭung cu ta," tiah a ti hna. ¹⁶ Josef phun nih cun, "Tlangram cu kan caah cun aa za lo; sihmanhsehlaw rawn i a ummi Kanaan mi vialte hna cu Beth-shean le a khuate i a ummi nih si hna seh, Jezreel Nelrawn i a ummi nih si hna seh thir rangleng an ngei," tiah an ti. ¹⁷ Cun Joshua nih Josef tefa Efraim le Manasseh sinah cun, "Nannih cu mi tampi nan si i nan ṭhawng ngaingai; vo pakhat lawng nan co lai lo, ¹⁸ sihmanhsehlaw tlangram cu nan ta a si lai, tupi a si nain nan vah lai i a deng tiangin nan co lai; Kanaan mi hna cu thir rangleng an ngei i an ṭhawng nain nan ṭhawl hna lai," tiah a ti.

¹ Cun Israel mibu cu an ning piin Shiloh ah an i pum i khika ah tonnak thlam kha an bunh; an hmaiah ram cu tei in a um ko. ² Israel mi hna lakah phun sarih, vo cheuh rih lomi an um. ³ Cucaah Joshua nih Israel mi hna sinah cun, "Bawipa, nan pupa Pathian nih an pekmi hna ram chungah hin luh i va co awkah zei can dah nan i daithlanh lai? ⁴ Phun khat nih mi pathum cio i thawh u law, ka thlah hna lai; an i thawh lai i ram cu a dihlak in an ṭol lai i, an covo hnga ding kha ruahchih in ram kong cu an ṭial lai i keimah sinah an ra lai. ⁵ Vo pasarih ah an cheu lai, Judah pawl cu an ram chungah thlanglei ah khan an um ko lai i Josef chungle hna cu an ram chungah chaklei ah khan an um ko lai. ⁶ Hmun sarih in cheumi ram kong cu nan ṭial lai i nan ṭialmi cu hika ka sinah nan rak put lai; cun Bawipa kan Pathian hmaiah hika ah nan caah camcawh fung kan khiahpiak hna lai. ⁷ Levi mi hna cu nannih lakah vo an ngei lo, zeitintiah Bawipa tlangbawi an sinak cu an ro a si; cun Gad le Reuben le Manasseh phun cheu nih khan Bawipa sal Moses nih a pekmi hna an vo cu Jordan nichuahlei ral ah khan an co cang," tiah a ti. ⁸ Cucaah mi hna cu an i thawh. Ram kong ṭial awkah a kalmi hna cu Joshua nih bia a beuh hna i, "Ram cu va ṭol dih u law, a kong kha va ṭial u law, ka sinah ra ṭhan u; cun nannih caah Bawipa hmaiah hika ah hin Shiloh ah camcawh fung kan khiahpiak hna lai," tiah a ti, ⁹ Cucaah, mi cu an kal i ram cu an ṭol dih; hmun sarih ah an cheumi ram kong cu cauk chungah a khua a khua in an ṭial; cun Joshua sinah Shiloh i an riahhmun ah khan an ra i ¹⁰ Shiloh ah cun Bawipa hmaiah Joshua nih camcawh fung a khiahpiak hna. Khika ah Joshua nih Israel mi hna cu ram kha a cheuh hna, an vo cio kha, a pek hna. ¹¹ Benjamin phun innchungkhar ca i camcawh fung cu a hung chuak i an comi ram cu Judah phun le Josef phun karlak ah khan a tla. ¹² Chaklei kamah an ramri cu Jordan ah aa thawk; cun ramri cu Jeriko chak ah a ummi fing ah a hung kai, cun nitlaklei ah tlangram kha a tan i Beth-aven ramlak ah a dong. ¹³ Khika in ramri cu Luz lei ah thlanglei ah a vung kal i Luz fing (cucu Bethel) kha a phan. Cun ramri cu Thlanglei Beth-horon thlang i a ummi tlang cung i Ataroth-addar khua ah cun a vung phan. ¹⁴ Cun ramri cu kaa dang leiah aa mer i nitlaklei ramri ah a cang. Beth-horon thlang i a ummi mual in thlanglei ah a kal i Kiriath-baal ah a dong (cucu Kiriath-jearim a si), cu khua cu Judah phun ta a si. Mah hihi nitlaklei ramri cu a si. ¹⁵ Cun thlanglei kam cu Kiriath-jearim donghnak ah a thawk i ramri cu khika in Efron ah a kal, cun Neftoah Ti a putnak tiang, ¹⁶ cun ramri cu Refaim nelrawn chaklei donghnak ah a ummi Hinnom fapa nelrawn ralchan i a ummi tlang hram ah a vung kal; cun Hinnom nelrawn cu a vun zul i Jebus mi fing thlang khan a lan i En-rogel a vung phan; ¹⁷ cun chaklei hoih in aa kuai i En-shemesh a phan, cun khika in Adummim i hung kainak ralchan i a ummi Geliloth ah a kal; cun Reuben fapa Bohan Lung ah cun a vung kal, ¹⁸ cun Beth-arabah fing kha chaklei in a hei tan i Arabah ah a vung kal; ¹⁹ cun ramri cu Beth-hoglah fing chaklei ah a va lan i ramri cu Cite Rili chaklei fonghlei ah a dong, Jordan tiva thlanglei donghnak ah khan. Mah hihi thlanglei donghnak ah khan. Mah hihi thlanglei kam ramri cu a si. ²⁰ Nichuahlei, kamah Jordan cu a ramri a si. Benjamin phun nih an innchungkhar ning cio ah an comi ram cu, a velchum in a ramri nih a kulhning in, mah hihi a si. ²¹ An innchung khar ning cio ah Benjamin phun khua hna cu mah hihi an si: Jeriko, Beth-hoglah, Emek-keziz, ²² Beth-arabah, Zemaraim, Bethel, ²³ Avvim, Parah, Ofrah, ²⁴ Khefar-ammoni, Ofni, Geba, — khua pa hleihnih an khuate hna he; ²⁵ cun Gibeon, Ramah, Beeroth, ²⁶ Mizpah, Khefirah, Mozah, ²⁷ Rekem, Irpeel, Taralah, ²⁸ Zela, Haelef, Jebus (cucu Jerusalem), Gibeah, le Kiriath-jearim — khua pa hleili an khuate hna he. Mah hihi Benjamin phun nih an innchungkhar ning cio ah an comi cu a si.

¹ Camcawh fung pahnihnak cu Simeon caah a hung chuak, an innchungkhar ning cio ah Simeon phun caah cun; cun an vo cu Judah phun nih an comi chungah khan a si. ² Amah nih a comi hna cu Beersheba, Sheba, Moladah, ³ Hazar-shual, Balah, Ezem, ⁴ Eltolad, Bethul, Hormah, ⁵ Ziklag, Beth-markaboth, Hazar-susah, ⁶ Beth-lebaoth, le Sharuhen khua pahleithum an khuate hna he; ⁷ cu En-rimmon, Ether le Ashan khua pali an khuate hna he; ⁸ cun hi khuapi hna velchum i a ummi khuate vialte, Ballath-beer, Negeb i Ramah tiangin. Mah hihi Simeon phun nih an innchungkhar ning cio ah an comi cu a si. ⁹ Simeon phun nih an comi ram cu Judah ram chungah khan aa tel ve. Judah phun vo cu an caah a ngan tuk caah Simeon phun nih cun an comi ram chungah cun vo an co ve. ¹⁰ Camcawh fung pathumnak cu Zebulun phun caah a hung chuak, an innchungkhar ning cio ah. An comi ram cu Sarid tiang a phan; ¹¹ cun an ramri cu nitlaklei ah a hung kal i Mareal ah a lan i Dabbesheth i a ummi tivate tiang a kal; ¹² cun Sarid in ramri cu khattelei kamah nichuahlei ah Khisloth-tabor ramri tiang a kal; ¹³ khika in Daberath ah a kal i Jafia a hung phan; khika in nichuahlei kam zuahmah in a kal i Gath-hefer le Eth-kazin a phan cun Rimmon ah a va kal i Neah lei ah aa kuai; ¹⁴ cun chaklei ah ramri cu aa mer i Hannathon ah a kal i Iftahel nelrawn ah a dong. ¹⁵ Cun Kattath, Hahalal, Shimron, Idalah, le Bethlehem — khuapi hleihnih, an khuate hna he. ¹⁶ Mah hihi Zebulun phun nih an innchungkhar ning cio in an comi vo cu a si — hi khua hna le an khuate hna cu. ¹⁷ Camcawh fung palinak cu Issakhar caah a hung chuak, an innchungkhar ning cio ah Issakhar phun caah cun. ¹⁸ Cun a ram chungah cun Jezreel, Khesulloth, Shunem, ¹⁹ Hafaraim, Shion, Anaharath, ²⁰ Rabbith, Kishion, Ebez, ²¹ Remeth, En-gannim, En-haddah le Beth-pazzez an um; ²² ramri nih cun Tabor, Shahazumah, le Beth-shemesh zong a tongh hna i a ramri cu Jordan ah a dong — khua hleiruk, an khuate hna he. ²³ Mah hihi Issakhar phun nih an innchungkhar ning cio ah an comi vo cu a si — hi khua hna le an khuate hna he cun. ²⁴ Camcawh fung panganak cu Asher phun caah a hung chuak, an innchungkhar ning cio ah. ²⁵ A ram chungah cun Helkath, Hali, Beten, Akhshaf, ²⁶ Allam-melek, Amad, le Mishal an um; nitlaklei leiah Karmel le Shihor-libnath a hei tongh i ²⁷ nichuahlei ah aa mer, Beth-dagon ah a kal i Zebulun le Iftahel nelrawn tongh in chaklei ah Beth-emek le Neiel ah a kal; cun chaklei ah a lan i Jabul, ²⁸ Ebron, Rehob, Hammon, Kanah le Sidon Ngan tiang a kal; ²⁹ cun ramri cu Ramah leiah aa mer i kulhmi khuapi Tair a phan; cun ramri cu Hosah leiah aa mer i rili ah a dong; Mahalab, Akhzib, ³⁰ Ummah, Afek, le Rehob — khua kul le khua hnih, an khuate hna he, ³¹ Mah hihi Asher phun nih an innchungkhar ning cio ah an comi ro cu a si — hi khua hna le an khuate hna he cun. ³² Camcawh fung paruknak cu Naftali phun caah a hung chuak, an innchungkhar ning cio in, Naftali phun caah cun. ³³ A ramri cu Helef le Zaanannim ah a ummi kuhthing le Adami-nekeb le Jabneel in a thawk i Lakkum tiang a kal, cun Jordan ah a dong; ³⁴ cun ramri cu nitlaklei ah Aznoth-tabor leiah aa mer i khika in Hukkok ah a kal i thlanglei ah Zebulun le nitlaklei ah Asher le nichuahlei ah Judah kha Jordan ah a pal pah hna. ³⁵ Kulhmi khua hna cu Ziddim, Zer, Hammath, Rakkath, Khinnereth, ³⁶ Adamah, Ramah, Hazor, ³⁷ Kedesh, Edrei, En-hazor, ³⁸ Ziron, Migdalel, Horem, Beth-anath, le Beth-shemesh an si — khua hlei kua, an khuate hna he. ³⁹ Mah hihi Naftali phun nih an innchungkhar ning cio in an comi vo cu a si — hi khua hna le an khuate hna cu. ⁴⁰ Camcawh fung pasarihnak cu Dan phun caah a hung chuak, an innchungkhar ning cio ah. ⁴¹ Cun an comi ram chungah cun Zorah, Eshtaol, Ir-shemesh, ⁴² Shaalabbin, Aijalon, Ithlah, ⁴³ Elon, Timnah, Ekron, ⁴⁴ Eltekeh, Gibbethon, Baalath, ⁴⁵ Jehud, Bene-berak, Gath-rimmon, ⁴⁶ le Mejarkon le Rakkon le Joppa changtu ram cu an i tel. ⁴⁷ Dan mi nih an ram cu an sungh tikah, Dan mi hna cu an hung kal i Leshem kha an hung doh i an tei. Vainam in an sam dih hnuah an lak i a chungah khua an sa i anmah thlatu Dan min chuankhan in Leshem cu Dan tiah an ti. ⁴⁸ Mah hihi Dan miphun nih an innchungkhar ning cio ah an comi vo cu a si — hi khua hna le an khuate hna cu. ⁴⁹ Cun ram cu an covo cio ah an i phawt dih tikah, Israel mi hna nih cun Nun fapa Joshua kha anmah lakah vo pakhat an pek. ⁵⁰ Bawipa nawl pek bangin a halmi hna khua, Efraim tlangram i a ummi Timnath-serah kha an pek; cu khua cu a ser ṭhan i a chungah khua a sa. ⁵¹ Mah hna hi tlangbawi Eleazar le Nun fapa Joshua le Israel mi phun hna i an chung cio lu hna nih Shiloh ah Bawipa hmaiah tonnak thlam innka ah camcawhfung khiah in an phawtmi covo cu an si. Cuticun ram phawt cu an lim.

¹ Cun Bawipa nih Joshua cu a chawnh i, ² "Israel mi hna cu, ’Moses sinin nannih sinah ka chimmi himnak khua kha ser hna u, ³ khika ah timh cianak um lo le hngalh loin mi a that sualmi nih a zam nakhnga; nannih caah thisen phuhlamtu sinin himnak khua an si lai. ⁴ Hi khua pakhatkhat ah hin a va zam lai i khua luhnak kutka ah cun a dir lai i khi khua upa hna sinah khan a kong cu a va chim lai; cun annih nih khua chungah cun an luhpi lai i hmun an pek lai i, anmah sinah cun a um lai. ⁵ Cun thisen phuhlamtu nih a dawi ahcun, mi thattu cu a kut chungah an rak pek awk a si lai lo, zeicahtiah a innpa a rak thah cu hngalh lo le hlanah huatnak ngei loin a si. ⁶ Cun mi zapi hmaiah biaceih awkah a dir hlan le khi caan ah tlangbawi ngan a simi a thih hlantiang cu, khi khua ah cun a um lai; khi tikah mi thattu cu a zamtakmi amah khua le amah inn ah khan a kir ṭhan lai,’ tiah chim hna," tiah a ti. ⁷ Cucaah Naftali tlangram i Galilee ram chungah Kedesh le, Efraim tlangram ah Shekhem le, Judah tlangram ah Kiriath-arba (cucu Hebron) cu an thim hna. ⁸ Cun Jeriko nichuahlei Jordan tiva ral ah Reuben phun chungin tlangrawn ram ramlak i a ummi Bezer le, Gad phun chungin Gilead i a ummi Ramoth le, Manasseh phun chungin Bashan i a ummi Golan kha an thim hna. ⁹ Mah khua hna hi Israel mi vialte le an lak i khual a pemmi hna caah tinhmi an si, zeitintiah timh cianak um loin mi a thatmi paoh nih khika ah an zam i, mi zapi hmaiah a dir hlanah cun thisen phuhlamtu kut in a thih nakhnga lo, tinhmi an si.

¹ Cun Levi chung upa hna cu tlangbawi Eleazar le Nun fapa Joshua le Israel miphun hna i an chung cio lu hna sinah cun an ra i ² Kanaan ram chung i Shiloh khua ah cun annih sinah, " Bawipa nih kannih cu umnak khua hna le kan saṭil ca i tlonnak ram pek dingin Moses sin in nawl a rak pek cang," tiah an ti. ³ Cucaah Bawipa nawl peknak bangin Israel mi nih Levi mi hna cu a tanglei khua hna le saṭil tlonnak ram hna hi an vo chungin an pek hna. ⁴ Kohath mi innchungkhar hna caah cun camcawh fung cu a hung chuak. Cucaah Levi mi chungin tlangbawi Aaron tefa a simi nih khan camcawh fung khiah in Judah, Simeon, le Benjamin phun hna sinin khua hleithum an hmuh. ⁵ Cun a taang rihmi Kohath mi hna nih khan Efraim phun, Dan phun le, Manasseh phun cheu hna innchungkhar hna sin khan camcawh fung khiah in khua pahra an hmuh. ⁶ Gershon mi hna nih Issakhar phun, Asher phun, Naftali phun le Bashan i a ummi Manasseh phun cheu hna innchungkhar hna sin khan camcawh fung khiah in khua hleithum an hmuh. ⁷ Merari mi hna nih an innchungkhar ning cio in Reuben phun le Gad phun le Zebulun phun hna sinin khua hleihnih an hmuh. ⁸ Bawipa nih Moses sinin nawl a pek bang khan, hi khua hna le an pawngkam i saṭil tlonnak ram hna cu Israel mi nih camcawh fung khiah in Levi mi kha an pek hna. ⁹ Judah phun le Simeon phun chungin an min in chimmi a tanglei khua hna cu an pek hna. ¹⁰ Levi phun i a ummi Kohath phun chungah innchungkhar pakhat, Aaron tefa hna nih cun, an co hna, zeitintiah camcawh fung cu annih cungah hmasa bik ah a tla. ¹¹ Judah tlangram chung i Kiriath-arba (cucu Hebron; Arba cu Anak pa a si) le a velchum i saṭil tlonnak ram cu an pek hna. ¹² Sihmanhsehlaw khuapi pawng lo hna le a khuate hna cu Jefunneh fapa Kaleb kha a covo caah an pek. ¹³ Cun tlangbawi Aaron tefa hna cu mi thattu ca i himnak khua Hebron le a saṭil tlonnak ram hna, Libnah le a saṭil tlonnak ram hna, ¹⁴ Jattir le a saṭil tlonnak ram hna, Eshtemoa le a saṭil tlonnak ram hna, ¹⁵ Holon le a saṭil tlonnak ram hna, Debir le a saṭil tlonnak ram hna, ¹⁶ Ain le a saṭil tlonnak ram hna, Juttah le a saṭil tlonnak ram hna, Beth-shemesh le a saṭil tlonnak ram hna, — hi phun hnih hna chungin khua pakua cu pek an si; ¹⁷ cun Benjamin phun chungin Gibeon le a saṭil tlonnak ram hna, Geba le a saṭil tlonnak ram hna, ¹⁸ Anathoth le a saṭil tlonnak ram hna le Almon le a saṭil tlonnak ram hna — khua pali cu pek an si. ¹⁹ Aaron tefa hna, tlangbawi hna cu, an khua a dihlak ah hleithum, an saṭil tlonnak ram cio he, an si. ²⁰ Levi mi chung i Kohath innchungkhar hna lakah a taang rihmi Kohath mi hna cu, annih an pekmi hna khua cu Efraim phun chungin an si. ²¹ Annih cu mi thattu caah himnak khua a simi Shekhem, Efraim tlangram i a ummi le a saṭil tlonnak ram hna, Gezer le a saṭil tlonnak ram hna, ²² Kibzaim le a saṭil tlonnak ram hna, Beth-horon le a saṭil tlonnak ram hna — khua pali cu pek an si; ²³ cun Dan phun chungin Eltekeh le a saṭil tlonnak ram hna, Gibbethon le a saṭil tlonnak ram hna, ²⁴ Aijalon le a saṭil tlonnak ram hna, Gath-rimmon le a saṭil tlonnak ram hna — khua pali cu pek an si; ²⁵ cun Manasseh phun cheu chungin Taanak le a saṭil tlonnak ram hna le Gath-rimmon le a saṭil tlonnak ram hna — khua pahnih cu pek an si. ²⁶ Kohath mi lakah a taangmi innchungkhar hna i an khua kha a dihlak ah pahra an saṭil tlonnak ram cio hna he, an si. ²⁷ Cun Levi mi innchungkhar hna lakah pakhat a si vemi Gershon mi hna cu Manasseh phun cheu chungin Bashan i a ummi Golan, mi thattu ca i himnak khua a simi le, Beeshterah khua le a saṭil tlonnak ram hna, — khua pahnih cu pek an si; ²⁸ cun Issakhar phun chungin Kishion le a saṭil tlonnak ram hna, Daberath le a saṭil tlonnak ram hna, ²⁹ Jarmuth le a saṭil tlonnak ram hna, En-gannim le a saṭil tlonnak ram hna, — khua pali cu pek an si; ³⁰ cun Asher phun chungin Mishal le a saṭil tlonnak ram hna, Abdon le a saṭil tlonnak ram hna, ³¹ Helkath le a saṭil tlonnak ram hna le Rehob le a saṭil tlonnak ram hna — khua pali cu pek an si; ³² cun Naftali phun chungin mi thattu caah himnak khua a simi Kedesh, Galilee ram i a ummi, le a saṭil tlonnak ram hna, Hammoth-dor le a saṭil tlonnak ram hna le, Kartan le a saṭil tlonnak ram hna — khua pathum cu pek an si. ³³ Gershon mi innchungkhar hna nih an co ciomi khua hma cu a dihlak ah hleithum, an saṭil tlonnak ram cio hna he, an si. ³⁴ Cun Levi mi a taang rihmi Merari innchungkhar hna cu Zebulun phun chungin Jokneam le a saṭil tlonnak ram hna, Kartah le a saṭil tlonnak ram hna, ³⁵ Dimnah le a saṭil tlonnak ram hna, Nahalal le a saṭil tlonnak ram hna — khua pali cu pek an si; ³⁶ cun Reuben phun chungin Bezer le a saṭil tlonnak ram hna, Jahaz le a saṭil tlonnak ram hna, ³⁷ Kedemoth le a saṭil tlonnak ram hna le Mefaath le a saṭil tlonnak ram hna, — khua pali cu pek an si; ³⁸ cun Gad phun chungin Gilead ah a ummi Ramoth, mi thattu caah himnak khua a simi le a saṭil tlonnak ram hna, Mahanaim le a saṭil tlonnak ram hna, ³⁹ Heshbon le a saṭil tlonnak ram hna, Jazer le a saṭil tlonnak ram hna — a dihlak ah khua pali cu pek an si. ⁴⁰ Levi phun chungin a taang rihmi Merari innchungkhar hna cu khua an pekmi hna a dihlak ah hleihnih an si. ⁴¹ Israel mi hna covo lakah Levi mi khua hna cu a dihlak ah sawm li le pariat, an saṭil tlonnak ram cio hna he, an si. ⁴² Hi khua hna nih hin an velchum ah saṭil tlonnak ram hna kha an ngei cio; cuticun hi khua hi a dihlak in an si. ⁴³ Cu bangin Bawipa nih Israel mi cu an pupa hna sinah pek awkin chiat a sermi ram vialte kha a pek hna. An tei i khika ah um hmun an khuar. ⁴⁴ Cun Bawipa nih an pupa hna sinah chiat a rak ser bantukte khan, a kenkip ah dinhnak a pek hna. An ral ahohmanh nih an celh hna lo, zeitintiah Bawipa nih an ral hna cu an kut chungah a pek hna. ⁴⁵ Bawipa nih Israel chungle hna sinah biakamnak ṭha a sermi vialte lakah khan pakhat hmanh pakpalawng ah a cangmi a um lo; an dihlak tein a tling dih.

¹ Cun Joshua nih Reuben mi le Gad mi le Manasseh phun cheu kha a auh hna i ² annih cu, "Bawipa sal Moses nih nawl an pekmi vialte hna kha nan tuah i nawl kan pekmi hna vialte ah ka bia kha nan ngaih; ³ hi can riamruam nannih nih nan unau hna kha nihin tiang thlahthlam loin nan um i Bawipa nan Pathian nih an fialmi hna cu ṭha tein nan tuah. ⁴ Cun atu cu Bawipa nan Pathian nih nan unau hna kha bia a kam hna bangin dinhnak a pek cang hna; cucaah kir cang u law, Bawipa sal Moses nih Jordan tiva khattelei ral ah an pekmi hna nan covo a umnak ram i nan inn ah khan kal tuah u. ⁵ Bawipa sal Moses nih, Bawipa nan Pathian cu dawt awk le, a lam vialte kha zulh awk le, a nawlbia hna kha tuah awk le, amah sinah i bek awk le, amah cu nan lung dihlak le nan thlarau vialte in a rianṭuan awkah nawl an pekmi hna nawlbia le phungbia cu tuah awkah ṭha tein i ralring tuah u," tiah a ti hna. ⁶ Cucaah Joshua nih thluachuah a pek hna i a kalter hna; cun an inn ah an kal. ⁷ Cun, Manasseh phun i a cheu kha Moses nih Bashan ah covo a pek hna; sihmanhsehlaw a dang a cheu kha cu Joshua nih Jordan in nitlaklei ram ah an unau hna pawngah covo a pek hna. Cun Joshua nih an inn ah a thlah hna i thluachuah a pek hna tikah, ⁸ annih sinah, "Chawva a tampi le saṭil tampi le ngun, sui, dar, le thir le thilpuan tampi he nan inn ah va kal tuah hna u; nan ral hna sinin nan lakmi hranchaw kha nan unau hna he vaa phaw u," tiah a ti. ⁹ Cucaah Reuben mi hna le Gad mi hna le Manasseh phun cheu cu Kanaan ram chungah a ummi Shiloh khua i Israel mi hna sin cun an ṭhen i an inn ah an kir. Bawipa nih Moses sinin nawl a peknak thawngin an comi an ram Gilead ram ah cun kal awkah an i thawh. ¹⁰ Kanaan ram chung Jordan tivakam hrawng ram kha an va phak tikah Reuben mi hna le Gad mi hna le Manasseh phun cheu nih khan khika ah Jordan tiva pawngah biakṭheng nganpi pakhat an ser. ¹¹ Cun Israel mi hna nih, "Zohhmanh, Reuben mi hna le Gad mi hna le Manasseh phun cheu nih Kanaan ram ramri ah Jordan tivakam hrawng ram chung Israel mi hna ta a simi leiphek ah, biakṭheng pakhat an ser," tiah mi nih an chim kha an theih. ¹² Cu kong cu Israel mi nih an theih tikah Israel mi nih an dihlak in annih kha doh hna awkah Shiloh ah an i pum. ¹³ Cun Israel mi nih Gilead ram i Reuben mi hna le Gad mi hna le Manasseh phun cheu sinah cun tlangbawi Eleazar fapa Phinehas kha an thlah, ¹⁴ cun amah sinah bawi pahra, Israel phun hna chungin pakhat cio, Israel phun hna chung i a lu a si ciomi hna kha an i tel. ¹⁵ Cun Gilead ram i Reuben mi hna le Gad mi hna le Manasseh phun cheu hna sinah khan an ra i annih cu, ¹⁶ "Bawipa mibu nih an ning piin, ’Israel Pathian cungah nan tuahmi rawinak hi zeidah a si, nihin ah Bawipa kha doh awkah Bawipa zulhnak khan nan pial i biakṭheng pakhat nan i ser hi a sullam zeidah a si? ¹⁷ Peor i kan sualnak, cu ruang i Bawipa mibu cungah rai a tlun i a thianh hmanh kan i thianh khawh rih lomi kha, kan i za rih lo maw, ¹⁸ cu i nannih i Bawipa sinin i i mer nan i timh? Nannih nih Bawipa cu nihin ah nan doh ahcun, Israel mibu dihlak cungah khan thaizing ah a thin a hung lai. ¹⁹ Atu cu, nan ram kha a thian lo a si ahcun, Bawipa puan biakinn a dirnak Bawipa ram chungah khan ra ve u law, kan lakah covo i lak ve ko ngat u; sihmanhsehlaw Bawipa tu cu doh hlah u law, Bawipa kan Pathian biakṭheng hleiah a dang biakṭheng sernak in kannih zong kha amah dotu bantuk ah rel chih kan siter ve hlah u. ²⁰ Pekchanhmi thil kongah khan Zerah fapa Akhan cu zumhawktlak loin a um i Israel mibu dihlak cungah thinhunnak a tla a si lo mei? Cun a ṭhat lonak ruangah amah lawng kha a thi lo,’ an ti," tiah an ti. ²¹ Cun Reuben mi hna le Gad mi hna le Manasseh phun cheu nih Israel innchungkhar i an lu hna cu an leh hna i, ²² Bawipa cu pathian hna Pathian a si, Amah nih a hngalh dih, Israel zong nih hngal seh. Bawipa kan doh ruang a si ah maw Amah cung i zumhawktlak lo kan si ruangah maw ²³ hi biakṭheng hi kan ser i Bawipa sinin a kan pialter a si ahcun, nihin ah hin kan zuah hrimhrim hlah u; cun a cung i khangh thawinak thawinak caah caah siseh, chang thawinak thawinak caah siseh, daihnak thawinak thawinak caah siseh, kan tuah a si ahcun Bawipa hrimhrim nih kan cungah phuhlamnak cu tuah seh. ²⁴ Cu tuahnak ding caah kan tuahmi a si lo, kan tuahnak cu hmailei ah nan fale nih kan fale cu, "Bawipa Israel Pathian he zei tlaihnak dah nan ngeih? ²⁵ Zeitintiah nannih Reuben mi hna le Gad mi hna, nannih le kannih karah Bawipa nih Jordan cu ramri ah a ser ko; Bawipa chungah nannih cu covo nan ngei lo,’ an ti hna lai ti kan phan caah kan tuah cu a si. Cuticun nan fale nih kan fale cu Bawipa biak kha an ngolter sual hna hnga. ²⁶ Cucaah kannih nih, ’Khangh thawinak caah si loin le raithawinak caah si loin, ²⁷ kannih le nannih karlak ah, kan hnu i kan tefa hna karlak ah biahngaltu a si i Bawipa rian cu kannih nih amah hmaika ah kan khangh thawinak le raithawinak le daihnak thawinak in kan rak ṭuan ve tinak caah biakṭheng pakhat ser u sih; hmailei ah nan tefa hna nih kan tefa hna cu, "Bawipa chungah covo zeihmanh nan ngei lo," an ti sual hna nakhnga lo,’ tiah kan ti. ²⁸ Cun mah hihi hmailei ah kannih sinah siseh, kan ciruang hna sinah siseh, chim a si sual ahcun, ’Bawipa biakṭheng a keep hi zohhmanh u, kan pupa hna nih khangh thawinak caah si loin le raithawinak caah si loin, nannih le kannih karlak i biahngaltu si dingah an rak sermi hi,’ tiah kan chim lai tiah kan ruah. ²⁹ Bawipa kan Pathian biakṭheng a puan biakinn hmai i a dirmi hlei in, khangh thawinak le chang thawinak le raithawinak caah biakṭheng dang sernak thawng in Bawipa lam in nihin ah pial le Bawipa doh cu kan ruat naisai lo!" tiah an ti. ³⁰ Tlangbawi Phinehas le amah sinah a ummi mibu bawi hna, Israel miphun an lu cio hna nih cun, Reuben mi hna le Gad mi hna le Manasseh mi hna nih an chimmi bia kha an theih tikah, an lung a lawm ngaingai ko. ³¹ Cun tlangbawi Eleazar fapa Phinehas nih Reuben mi hna le Gad mi hna le Manasseh mi hna cu, "Bawipa cungah rawinak nan tuah lo caah, Bawipa cu kan lakah a um, tiah nihin ah kan hngalh; Israel mi hna cu Bawipa kut chungin nan khamh cang hna," tiah a ti hna. ³² Cun tlangbawi Eleazar fapa Phinehas le bawi hna cu Gilead ram i Reuben mi hna le Gad mi hna sinin Kanaan ram ah Israel mi sinah an kir i bia kha an rak phorh hna. ³³ Cun hi kong nih Israel mi kha an lung a ton hna; Israel mi nih Pathian kha an thangṭhat i, Reuben mi hna le Gad mi hna an umnak ram hrawh awk i annih doh awk kha an ceih ti lo. ³⁴ Reuben mi hna le Gad mi hna nih cu biakṭheng cu Ed tiah min an sak; "Zeitintiah cu biakṭheng cu Bawipa cu Pathian a si tiah kan karlakah biahngaltu a si caah," an ti.

¹ Caan saupi hnuah, Bawipa nih Israel mi hna cu an velchum i an ral hna sinin dinhnak a pek hna tik le Joshua cu a upat i a tar ngaingai tikah, ² Joshua nih Israel mi vialte an upa hna le an lu hna le an biaceihtu hna le an bawi hna kha a auh hna i annih cu, "Atu cu ka upa i ka tar ngaingai cang; ³ cun nannih nih Bawipa nan Pathian nih hi miphun vialte hna cungah nan caah a tuahmi kha nan hmuh cang, zeitintiah nannih an dohpiaktu hna cu Bawipa nan Pathian kha a si. ⁴ Zohhmanh u, nannih cu a tang rihmi miphun hna kha nan phun cio caah ro ah kan pek hna, ka tei ciami miphun vialte hna he, Jordan tiva thawk in nitlaklei ah Rili Ngan tiang. ⁵ Bawipa nan Pathian nih nan hmaiah a dawi hna lai i nan mit hmuh phak lo tiang a ṭhawl hna lai; cun Bawipa nan Pathian nih bia an kam hna bangin an ram cu nan co lai. ⁶ Cucaah Moses phungbia cauk chungah aa ṭialmi vialte kha zulh awk le tuah awkah fek tein um ko u; orhlei ah siseh; kehlei ah siseh pialtak hlah u. ⁷ Nannih nih hika i nan lakah a tang rihmi miphun hna he hin i cawh lo le, an pathian hna min kha chim lo le, cu hna cun chiatser lo le, an rianṭuan lo le an hmaiah kun loin, ⁸ nihin ni tiang nan tuah bangin Bawipa nan Pathian sinah i bek ko u. ⁹ Zeitintiah Bawipa nih nan hmai in a ngan le a ṭhawngmi miphun hna kha a dawi hna i, nannih cu nihin ni tiangah ahohmanh nih an in celh hna lo. ¹⁰ Bawipa nan Pathian nih bia an kam hna bangin amah cu an dohpiaktu hna kha a si caah, nan lak i mi pakhat nih thong khat kha a dawi hna. ¹¹ Cucaah Bawipa nan Pathian cu dawt awkah i ralring ngaingai tuah u. ¹² Nan i mer i hika ah nannih lakah a tang rihmi miphun hna hi nan fonh hna i nan ṭhit nan lak hna i an nu hna kha nan ṭhit hna i annih nih an in ṭhit ve hna ahcun, ¹³ Bawipa nan Pathian nih hi miphun hna hi nan hmai in a ṭhawl lan hna lai lo ti kha fiang tein hngal ko u; Bawipa nan Pathian nih an pekmi hna hi ram ṭha chung hin nan loh hlantiang nan caah rap le thang le, nan hnak i tuknak fung le nan mit chung i hling an si lai. ¹⁴ "Cun, atu cu vawleicung vialte phung bangin ka kal ve cang lai. Nannih nih nan dihlak in, Bawipa nan Pathian nih nanmah kongah biakamnak a tuahmi thilṭha vialte lakah pakhat hmanh pakpalawng a can lo kha nan lungthin le nan ruahnak in nan hngalh; nannih caah a dihlak in a tling dih, pakhat hmanh a bau lo. ¹⁵ Sihmanhsehlaw Bawipa nan Pathian nih nannih kongah biakamnak a tuahmi thilṭha vialte kha nan caah a tlin bantukte khan, Bawipa nan Pathian nih hi ram ṭha an pekmi hna chung hin an hrawh hna hlantiang Bawipa nih nan cungah thilṭhalo vialte kha a tlunter lai, ¹⁶ Bawipa nan Pathian nih nawl an pekmi hna biakamnak kha nan buar i pathian dang hna kha nan kalhnawh i an rian nan ṭuan i an hmaiah nan kun ahcun, khi tikah Bawipa thinhunnak cu nan cungah a alh lai i an pekmi hna ram ṭha hin khulrang tein nan rawk lai," tiah a ti hna.

¹ Cun Joshua nih Israel miphun vialte kha Shekhem ah a pumh hna i Israel mi upa hna le lu hna le biaceihtu hna le bawi hna kha a auh hna; cun Pathian hmaiah an hung chuak. ² Cun Joshua nih mi vialte cu, "Hi bangin Bawipa Israel Pathian nih a ti: ’Hlan liopi ah cun nan pupa hna cu Zufrates tiva khattelei ral ah an rak um, Abraham le Nahor pa Terah cu; cun pathian dang kha an rak biak hna. ³ Cun nan pa Abraham kha Tiva ral khan ka lak i Kanaan ram chung dihlak ah ka hruai i a tefa cu tampi ah ka ser hna. Isak kha ka pek i ⁴ Isak cu Jakob le Esau kha ka pek. Cun Esau cu Seir tlangram kha ngeih awkah ka pek, sihmanhsehlaw Jakob le a fale hna cu Izipt ah an vung kal. ⁵ Cun Moses le Aaron kha ka thlah hna i Izipt cu a chung i ka tuahmi in ka hrem; cun a hnuah nannih cu kan chuahpi hna. ⁶ Cun nan pale hna cu Izipt in ka chuahpi hna i rili kha nan phan; cun Izipt mi nih nan pale cu rangleng le rangcung ralkap in Rili Sen tiang an dawi hna. ⁷ Cun Bawipa kha an ka auh tikah, Izipt mi he nan karlak ah muihnak ka chiah i rili kha an cungah ka tlunter i ka khuhter hna; cun nannih mit nih Izipt cung i ka tuahmi kha an hmuh; cun ramlak ah caan saupi nan um. ⁸ Cun Jordan khattelei kamah a ummi Amor mi hna ram ah khan kan hruai hna; nannih kha an in doh hna i annih cu nan kut chungah kan pek hna i, an ram cu nan lak i annih cu nan hmaiah ka hrawh hna. ⁹ Cun Zippor fapa Balak, Moab siangpahrang, cu a tho i nan nih kha an doh hna; cun mi a hei thlah hna i Beor fapa Balaam cu nannih kha chiat serh awkah a sawm. ¹⁰ Sihmanhsehlaw Balaam cu ka ngai duh lo, cucaah thluachuahnak an pek hna; cuticun nannih cu a kut chungin kan chuah hna. ¹¹ Cun Jordan tiva kha nan tan i Jeriko kha nan phan i Jeriko khuami hna le Amor mi hna, Periz mi hna, Kanaan mi hna, Hit mi hna, Girgash mi hna, Hiv mi hna le Jebus mi hna zong nih nannih kha an rak in doh hna; annih cu nan kut chungah kan pek hna. ¹² Cun Amor mi siangpahrang pahnih nan hmai in a ṭhawltu hna khuaingal kha nan hmaiah ka thlah; nan vainam in siseh, nan likuk in siseh a si lo. ¹³ Nan rak thlawh lomi ram le nan rak sak lomi khua hna kha kan pek hna i khika ah nan um; nan phun lomi mitsur ruang le oliv dum theitlai kha nan ei.’ " ¹⁴ "Cucaah atu cu Bawipa kha ṭih u law, amah rian kha lungtak te le zumhawktlak tein ṭuan tuah u; Tiva khattelei ral le Izipt ram ah nan pupa hna nih an biakmi pathian hna kha hlaw hna u law, Bawipa kha bia tuah u. ¹⁵ Cun Bawipa biak kha nan duh lo a si ahcun nihin ni ah hin nan biak ding cu i thim u; Tiva khattelei ral ram ah nan pupa hna nih an biakmi pathian hna maw, asiloah, an ram nan umnak a simi Amor mi pathian hna dah nan i thim lai; kei le kan innchungkhar tu nih cun Bawipa kha kan biak ko lai," tiah a ti ¹⁶ Cun mizapi nih cun an leh i, "Bawipa kha pathian dang biaktak awkah kan hlaw naisai lai lo! ¹⁷ Zeitintiah Bawipa kan Pathian cu kanmah le kan pupa hna kha sal taannak inn, Izipt ram in a kan chuahpitu le kan mithmuh ah hmelchunhnak lianngan a tuahtu le kan kalnak kip le kan palmi miphun kip lakah a kan zuahtu kha a si; ¹⁸ cun Bawipa nih kan hmai in mi vialte, ram chung i a ummi Amor mi hna kha, a dawi hna; cucaah kannih zong nih kan Pathian a si caah Bawipa cu kan biak lai," tiah an ti. ¹⁹ Sihmanhsehlaw Joshua nih mi zapi cu, "Bawipa cu a rian nan ṭuan kho lai lo, zeitintiah amah cu Pathian thiang a si; nahchuak Pathian a si; nan phungbuarnak siseh, nan sualnak siseh, an ngaithiam hna lai lo. ²⁰ Nannih nih Bawipa kha nan hlawt i ramdang pathian kha nan biak hna ahcun, nan cung i ṭhatnak a tuah hnuah khan, aa let lai i ṭha loin an tuah hna lai i an hrawh dih hna lai," tiah a ti. ²¹ Cun mi zapi nih Joshua cu, "A si hin lai lo, sihmanhsehlaw Bawipa kha kan biak ko lai," tiah an ti. ²² Cun Joshua nih mizapi cu, "Bawipa kha biak awkah nan i thim cang ti biahngaltu cu nanmah lila kha nan si," a ti hna. Cun annih nih, "Biahngaltu cu kanmah hi kan si," an ti. ²³ Amah nih, "Hi a si ahcun nanmah lak i a ummi ramdang pathian hna kha hlaw hna u law, nan lung in Bawipa, Israel Pathian, cu i hngatchan tuah u," tiah a ti hna. ²⁴ Cun mi zapi nih cun Joshua cu, "Bawipa kan Pathian cu kan biak lai i amah aw kha kan ngaih lai," tiah an chawnh. ²⁵ Cucaah Joshua nih khi ni ah mizapi hna he cun biakamnak a tuah i annih caah Shekhem ah nawlbia le phunglam kha a serpiak hna. ²⁶ Cun Joshua nih hi bia hna cu Pathian phungbia cauk chungah a ṭial hna; cun lung nganpi pakhat a lak i Bawipa hmunthiang chungah a ummi kuhthing kung tangah a bunh. ²⁷ Cun Joshua nih mi vialte cu, "Zohhmanh u, mah hi lung hi kan cung i biahngaltu a si lai, zeitintiah Bawipa nih kan sinah a chimmi bia vialte kha hi lung nih hin a theih; cu caah nan cungah biahngaltu a si lai, nan Pathian cungah nan hrokhrawl sual nakhnga lo," tiah a ti hna. ²⁸ Cun Joshua nih mi zapi cu anmah le an comi ram cio ah a kalter hna. ²⁹ Hi thil hna hnuah Nun fapa Joshua, Bawipa sal cu, a thi, kum za khat le kum hra a si. ³⁰ Cun annih nih Efraim tlangram i a ummi Gaash tlang chaklei ah a ummi amah comi Timnath-serah ah khan an vui. ³¹ Cun Israel mi nih Joshua nunchung vialte le, Joshua hnu i a nung i Bawipa nih Israel mi caah a tuahmi rian vialte a hngaltu upa hna nunchung cu Bawipa rian kha an ṭuan. ³² Israel mi nih Izipt ram in an hun i kaipimi Josef ruh kha, Shekhem khua i hmun pakhat Jakob nih Shekhem pa Hamor i a fapa hna sinin tangka za khat in a cawkmi ah khan an vui; cu hmun cu Josef tefa hna rothil ah a cang. ³³ Cun Aaron fapa Eleazar zong a thi i amah fapa Phinehas nih Efraim tlangram chung i a comi Gibeah khua ah an vui.