JONAH

JONAH

¹ Bawipa bia cu Amittai fapa Jonah sin a phan i: ² "Nineveh khualipi ah cun va kal tuah, atu ah va kal law a ṭhat lonak nih khan a cerh in a ka cerh caah va si," tiah a ti. ³ Sihmanhsehlaw Jonah cu Bawipa sinin zam awkah khan Tarshish khua lei tu i kal awkah aa thawh. Joppa khua ah khan a va kal i khika ah Tarshish khua lei i a kal dingmi lawng pakhat kha a hmuh. A kalnak ding man kha a pek dih in lawng kha aa cit i Bawipa nih a phak khawh lonak Tarshish khua ah khan, cu lawng cun ka kal lai, tiah a ruah. ⁴ Sihmanhsehlaw Bawipa nih thlichia a hranter cimmam i rili tilet cu a san tuk caah lawng cu kuai dih hnik aa zal. ⁵ Lawng cawngtu pawl cu an thin a phang i an pathian sin cio ah khan bawmhnak hal awkah an au. Cun lawng kha zaanter deuh awkah thil kha an hlonh hna, sihmanhsehlaw Jonah tu cu tilawng chung a ken khat ah khan a vung kal i a it i aa hngilh ziar ko. ⁶ Lawng cawngtu hna haotu nih khan a hmuh i, "Naa hngilh hluahmah ko dah ngai! Tho law na pathian sinah thlacam ve hen, a hei kan zaangfah ahcun thi loin kan hei um phum ko hnga dah kaw," tiah a ti. ⁷ A hmanung bik ah lawngcawng hna nih cun an i thawh i, "Hi vanchiatnak kan tonmi hi aho ruangah dah a si hnga, camcawhfung kan zuk tuah lai," an ti. Cucaah camcawhfung cu an khiah i Jonah cungah khan a tla. ⁸ Cun annih nih an thawh i, "Kha, atu cu hi harnak kan tonmi kong ah hin ahodah mawhchiat awk a si, ti kha kan chim tuah. Zei rianṭuan dah na si? Khuazei in dah na rat? Khuazei rammi dah na si? Zei miphun dah na si?" tiah an ti. ⁹ Cun Jonah nih cun aa thawh i, "Kei cu Hebru mi ka si, Bawipa, vancung Pathian, rili le vawlei a sertu a biami ka si," tiah a leh hna. ¹⁰ Lawngcawng pawl cu an thin a phang i, "Zei thil ṭhalo dah na tuah?" tiah an ti. Annih cu a chimh hna caah Bawipa sinin a zam kha an hngalh. ¹¹ Thlichia cu a fak chin lengmang i cucaah lawngcawng pawl nih cun an thawh i "Rili hi a daih nakhnga, zeitindah kan in tuah lai?" an ti. ¹² Cun annih cu a thawh hna i, "Ka tlai u law ka hlonh u law, rili cu a dai ko lai. Hi thlichia nih an cil hna hi keimah ruangah a si ti kha ka hngalh," tiah a ti. ¹³ Lawngcawng pawl nih khan lawng cu tikam i chuahpi awkah fak piin an zah, sihmanhsehlaw thlichia cu a fah chin lengmang caah an tuah kho lo. ¹⁴ Cucaah Bawipa cu an auh i, "Maw Bawipa, hi mipa hi kan thihter ruangah kannih cu kan that hlah; zeicahtiah zeidah kan tuah awk a si kha a kan hmuhsaktu cu maw Bawipa nangmah na si," tiah an ti. ¹⁵ Cun Jonah cu an i lak i rili chungah cun an hlonh i chikkhatte ah tilet cu a dai. ¹⁶ Cucaah Bawipa cu lawngcawng pawl nih cun an ṭih i raithawinak kha an pekchanh i a sinah biakamnak kha an tuah. ¹⁷ Bawipa nih Jonah cu nga nganpi kha a dolhter i nga paw chungah cun ni thum le zan thum a um.

¹ Cun Jonah nih nga pawpi chung cun Bawipa a Pathian sinah thla a cam i, ² "Ka harnak chungin maw Bawipa kan auh i na ka leh; Sheol paw chungin bawmhnak hal awkah ka au i ka aunak cu na ka theihpiak. ³ A thuknak hmun, rili tawne ah khan na ka hlonh i ti nih khan a ka kulh dih, Na tilet ṭhawngṭhawng hna cu ka cungin an kal. ⁴ Na mit hmuhnak khan hlonh ka si cang i na biakinn thiang cu zeitikhmanh ah ka hmu ti lai lo, tiah ka ruah. ⁵ Ti nih cun a ka phum i ka hrom a ka phih, Rili nih cun a ka khuh dih cikcek i rili chung belh nih ka lu an ka zelh. ⁶ Tlang hna kehram hrimhrim kha ka vung phan, A kutka aa hrenh zungzalmi ram kha ka vung phan; Sihmanhsehlaw Maw Bawipa, ka Pathian, a thukmi hmun chung khan nangmah nih na ka chuah. ⁷ Ka nunnak kha a dih riahmah cang ti kha ka hngalh tikah, Maw Bawipa, nangmah cu kan hngalh ṭhan i ka thlacamnak cu na sinah na biakinn thiang chungah khan a phan ṭhan. ⁸ Santlailo siasal a biami hna nih cun nangmah sin i zumhawktlak in um kha an ngol, ⁹ Sihmanhsehlaw kei nih cun nangmah thangṭhatnak kha hla in ka sak lai i Nangmah sinah raithawinak kan pekchanh lai i Ka tuah lai, tiah bia kaa kammi kha ka tuah lai. Teinak cu Bawipa ta a si," tiah a ti. ¹⁰ Cun Bawipa nih nga sinah cun bia a chim i nga nih cun Jonah cu tikam ah a luak.

¹ Bawipa bia cu Jonah sinah a voi hnihnak a phan ṭhan i, ² "Nineveh khualipi ah cun va kal cang law kan chimhmi bia cu va thanh tuah hna," tiah a ti. ³ Cucaah Jonah cu aa tim i Bawipa nih a chimh bangin Nineveh khua ah cun a kal. Nineveh cu khua ngan tuk hringhran a si caah a chung cu ni thum lamkal a si. ⁴ Jonah cu khuapi chungah cun a va lut i ni khat a kal hnuah khin, "Hi hnu ni sawm li chungah Nineveh hi a rawk lai!" tiah a au. ⁵ Nineveh khuami nih cun Pathian bia cu an zumh. Zapi rawl ulhnak kan tuah lai i a hme bik in a ngan bik tiang, a mi kip nih buri kan i hruk lai, an ti. ⁶ Cu thawng cu Nineveh khua siangpahrang nih a rak theih tikah a bawiṭhutdan cung khan a tho i a siangpahrang puan kha aa phoih i buri kha aa aih i vutcam lakah a ṭhu. ⁷ Cun Nineveh khua chungah khan thawngthanhnak a tuah i, "Mah hihi siangpahrang le a bawi hna nih an chuahmi nawlbia a si: Ahohmanh nih zeihmanh nan ei lai lo; minung nih siseh, saṭil nih siseh, cawrun nih siseh, tuurun nih siseh, rawl nan ei lai lo, ram nan ṭam lai lo, ti nan ding lai lo. ⁸ Nan dihlak in buri nan i aih lai i Pathian sinah biatak tein thla nan cam cio lai. Cun nan ziaza ṭhalo kha nan hlawt hna lai i zaang-ennak nan tuah lengmangmi kha nan hlawt hna lai. ⁹ Pathian cu aa ngaihchih ko hnga dahkaw, a thin kha a dam ko hnga dahkaw; cu ti a si ahcun kannih cu thi loin kan um ko hnga," a ti. ¹⁰ Pathian nih an tuahmi kha a hmuh i an ziaza ṭhalo an hlawt kha a hmuh tikah aa ngaihchih i an cungah ka tlunter lai a timi ṭhat lonak kha a tlunter ṭhan lo.

¹ Hi kongah hin Jonah cu a lung a si hrimhrim lo i a thin a hung. ² Cucaah Bawipa sinah cun thla a cam i, "Maw Bawipa, ka ram chung i ka um liote khan, mah hite hi pei na tuah te ṭheo lai tiah ka rak phanmi kha a si cu; cucaah cun pei Tarshish khua lei i ka rak zam kha a si cu! Nangmah cu vel a ngei i zaangfah a hmang i thin a fual i lung a sau i chiatnak ka tlunter lai na timi kha tlunter ṭhan lo awkah a lung a thleng ṭhan tawnmi Pathian na si kha ka hngalh. ³ Cucaah cun atu cu ka that ko. Ka caah hin nun nakin thih a ṭha deuh," tiah a ti. ⁴ Cun Bawipa nih cun a leh i, "Cu ti tluk i thinhun awk cu na si hnga maw?" tiah a ti. ⁵ Cun Jonah cu khuapi chung cun a chuak i nichuahlei ah a kal i a ṭhu. Khika ah khan nidem aa thlamh i a ṭhu i khua chungah cun zeidah a tlung lai ti kha a hngak. ⁶ Khi tikah Bawipa nih Jonah cungah cun umruang pakhat kha a hun zamter i i nuam lo tuk in a um nakhnga lo umruang nih cun thladem a hun demh; cucaah Jonah cu a lung aa lawm ngaingai. ⁷ Sihmanhsehlaw a thaizing ah cun Pathian nih cu umruang cu rungrul pakhat a eiter i a thi. ⁸ Cun ni a hung chuah tikah nichuahlei thli lin kha Pathian nih a hranter i Jonah cu ni nih a lukheng in a vun emh caah a thi dengmang. Cucaah thihnak caah khan thla a cam i, "Ka caah hin nun nakin thih a ṭha deuh," a ti. ⁹ Sihmanhsehlaw Pathian nih a thawh i, "Umruang kong ah khan cu ti lawmmam cun maw na thin a hun ko?" tiah a ti. Cun anih nih, "Ka thin a hun tuk ah pei ka thih deng leh hi," tiah a leh. ¹⁰ Cun Bawipa nih a thawh i, "Hi umruang hi zan khat ah a hung kho i a thaizing ah a lo ṭhan; hi umruang kong ah hin na tuahmi thil zeihmanh a um lo, nangmah nih na khohtermi a si fawn lo. Sihmanhsehlaw na lung a fak. ¹¹ Cucaah cun hi Nineveh khua, a chung i keh le orh hmanh a hngal rih lomi ngakchia sing khat le sang hnih an umnak le saṭil rel cawk lo an umnak hi, zaangfah loin ka um awk a si hnga maw?" tiah a ti.