JOB

JOB

¹ Uz ram ah hin mipa pakhat a min Job a simi a rak um; cu pa cu soisel awk um lo, miding, Pathian a ṭih i ṭhat lonak kha a hrialmi a si. ² Amah nih cun fapa pasarih le fanu pathum a hrin hna. ³ Cun tuu thong sarih, kalauk thong thum, cawtum tuah za nga, cun laapi za nga le sinum tam ngaingai a ngei; cucaah hi pa cu nichuahlei mi vialte lakah a lianngan bik a si. ⁴ Cun anmahle an inn cio ah a fapa hna nih khan, an ni cio ah, rawl danghnak kha i chawng lengmang in an tuah tawn i an sin i ei awk le din awkah an farle pathum kha an sawm tawn hna. ⁵ Cun an puai kha a dih tikah Job nih khan a auh hna i a thianh hna; zingkate in a tho i an milu tlingte khan khangh thawinak a pekchanhpiak tawn hna; zeicahtiah Job nih cun aa thawh i, "Ka fapale hna nih hin sualnak an tuah ko hnga i an lung chungin Pathian kha an vawlhpamh ko hnga," tiah a ti. Cuticun Job nih a tuah lengmang tawn. ⁶ Cun Pathian fapa hna cu Bawipa hmai i an chuah ni a hung phan i Satan zong an sinah cun a ra ve. ⁷ Bawipa nih Satan cu a thawh i, "Khuazei in dah na rat?" tiah a ti. Satan nih cun a leh i, "Vawlei cung khuazakip i kaa chawhnak le kaa lehnak in," tiah a ti. ⁸ Cun Bawipa nih Satan cu a thawh i, "Ka sal Job hi na ruat bal maw? Vawlei cungah hin amah bantuk soisel awk um lo, miding, Pathian a ṭih i ṭhat lonak a mertakmi hi an um lo," tiah a ti. ⁹ Khi tikah Satan nih Bawipa cu a leh i, "Job nih hin Pathian cu a lak in maw a ṭih? ¹⁰ Amah le a inn le a ngeihmi vialte cu hau in na kulh hna lo maw? Nangmah nih a kut rianṭuannak cu thluachuah na pek i ram chungah hin a ngeihmi thil cu an karh. ¹¹ Sihmanhsehlaw atu cu na kut hei chuah law a ngeihmi thil vialte khi tawng tuah ngat, na hmai hrimhrim ah an vawlhpamh ko lai," tiah a ti. ¹² Cun Bawipa nih Satan cu a thawh i, "Zohhmanh, a ngeihmi vialte cu nangmah kut chungah an um; amah taktak belte na kut cun tawng hlah," tiah a ti. Cucaah Satan cu Bawipa hmaika cun a chuak. ¹³ Ni khat cu a fapale hna le a fanule hna cu an upa bik inn ah rawl an ei i mitsur hang an ding; ¹⁴ cun zualko pakhat kha Job sinah cun a ra i, "Cawtum hna cu lei an thuang i laa hna cu an pawngah an tlong; ¹⁵ cun Seba mi hna nih an chuahhnawh hna i an lak hna i na sinum hna kha vainam in an thah hna; cun keimah lawnglawng hi nangmah chimtu dingah ka luat," tiah a ti. ¹⁶ Cun bia a chim lengmang lioah cun a dang pakhat a ra i, "Pathian mei cu van in a rung tla i tuu le sinum kha a kangh hna i a thah hna; keimah lawnglawng hi nangmah chimtu dingah ka luat," tiah a ti. ¹⁷ Cun bia a chim lengmang lioah cun a dang pakhat a ra ṭhan i, "Khaldi mi hna cu bu thum in an i ser riangmang i kalauk kha an nam hna i an lak hna i sinum hna kha vainam in an thah hna; cun keimah lawnglawng hi nangmah chimtu dingah ka luat," tiah a ti. ¹⁸ Cun bia a chim lengmang lioah cun a dang pakhat a ra ṭhan hoi i, "Na fapa hna le na fanu hna cu an upa bik inn ah rawl an ei i mitsur hang an din lioah ¹⁹ zohhmanh, ramlak lei khin thli fakpi a hung hrang i inn cu a ki li in a den i seino pawl cungah cun a tla i an thi dih; cun keimah lawnglawng hi nangmah chimtu dingah ka luat," tiah a ti. ²⁰ Khi tikah Job cu a tho i a puan kha a thleh i a lu aa kawngh i vawlei ah a bawk i Pathian kha a biak. ²¹ Cun aa thawh i, "Ka nu paw chungin taklawng in ka chuak i taklawng in ka kir ṭhan lai; Bawipa nih a ka pek i Bawipa nih a lak ṭhan; Bawipa min cu thangṭhat si ko seh," tiah a ti. ²² Hi vialte ah hin Job nih sualnak a tuah lo i Pathian cu a mawhchiat lo.

¹ Pathian fapa hna cu Bawipa hmai i an chuah ṭhan ni a hung phan ṭhan i Satan zong cu Bawipa hmai i chuah ve awkah, an sinah cun a ra ve. ² Cun Bawipa nih Satan cu a thawh i, "Khuazei in dah na rat?" tiah a ti. Satan nih cun Bawipa cu a leh i, "Vawlei cung khuazakip i kaa chawhnak le kaa lehnak in," tiah a ti. ³ Cun Bawipa nih Satan cu a thawh i, "Ka sal Job hi na ruat bal maw? Vawlei cungah hin amah bantuk soisel awk um lo, miding, Pathian a ṭih i ṭhat lonak a mertakmi hi an um lo. Amah cu zei ruang lo ah hrawh awkin na ka canghter cang nain, a tlinnak cu fek tein aa tlaih peng ko," tiah a ti. ⁴ Khi tikah Satan nih Bawipa cu a leh i, "Cuar caah cuar! Mi nih cun a ngeihmi vialte cu a nunnak caah cun a sian ko lai ta. ⁵ Sihmanhsehlaw atu cu na kut hei chuah law a ruh le a sa kha tawng tuah hna ngat, na hmai hrimhrim ah an vawlhpamh ko lai," tiah a ti. ⁶ Cun Bawipa nih Satan cu a thawh i, "Zohhmanh, amah cu na kut chungah a um, a nunnak bel zuah ko," tiah a ti. ⁷ Cuticun Bawipa hmaika cun Satan cu a chuak i fih a nungmi hma in Job cu a kechik in a luthlung tiang a hrem. ⁸ Cun amah le amah i huahnak ah peipahau kha aa lak i vutcam lakah a ṭhu. ⁹ Cun a nupi nih amah cu a thawh i, "Na tlinnak cu fek tein naa tlaih peng ko rih lai maw? Pathian cu vawlpam law thi ko cang," tiah a ti. ¹⁰ Sihmanhsehlaw amah cu a thawh i, "A hrutmi nu bantukin pei bia na chim cu. Pathian kut in ṭhatnak kan hmuh i ṭhat lonak zong kan hmuh awk a si hnga lo maw?" tiah a ti. Hi thil vialte ah hin Job nih a kaa in sualnak a chim lo. ¹¹ Cun hi ṭhat lonak vialte a cung i a tlungmi kha a hawile pathum, Teman mi Elifaz; Shuh mi Bildad le Naamath mi Zofar nih khan an theih tikah, anmahle an umnak cio khan an ra. Amah kha hramh ding le hnangamter awkah khua an khang ṭi hna. ¹² Cun annih nih lamhlat piin an hei hmuh tikah an hngal kho lo i an ai thluahmah i an ṭap; cun an puan kha an thleh hna i van lei ah vutcam kha an vorh i an lu cungah an i phulh. ¹³ Cun amah cu vawlei ah khan ni sarih le zan sarih an ṭhutpi i a temhinnak kha a fak ngaingai ti an hmuh caah ahohmanh nih bia ka khat hmanh in an chawn lo.

¹ Hi hnuah hin Job nih a ka a pau i a chuah ni kha chiat a serh. ² Cun Job nih aa thawh i, ³ "Ka chuah ni cu rawkral ko seh, ’Fapa cu pawi a si cang,’ an ti zan zong kha, rawkral ko seh. ⁴ Kha ni kha muihnak si ko seh! Cung um Pathian nih kawl hlah seh, Ceunak zong nih ceuh hlah seh. ⁵ Muihnak le muih khemkhumnak nih kan ta a si, ti hna seh. Minmei nih zel camcin seh law chunmui nih ṭhih seh. ⁶ Kha zan kha — a chahmi muihnak nih tlai seh! Kum chung lawmhnak ni hna lakah i tel hlah seh, Thla relnak zongah i tel hlah seh. ⁷ Kha zan kha zan ṭhing si ko seh; Lawmhnak thawng zeihmanh leng hlah seh. ⁸ Kha ni kha eihthiammi hna nih chiatserh hna seh, Limkeng, a ṭhanghter khomi hna nih khan chiat cu serh hna seh. ⁹ Kha zan i zinglei arfi hna cu mui hna seh, Ceunak kha i ruahchan awk zeihmanh um hlah seh. ¹⁰ Ngaihchiatnak le harnak a ka phakter caah A ka chuahtertu zan kha chiatserh si ko seh. ¹¹ Zeicahdah ka chuah ah khan ka rak thih ko lo? Paw chungin ka chuah ah khan ka thaw a rak dongh ko lo? ¹² Zeicahdah phei cungah an rak ka pom i Ka dawp awkah hnuk an rak ka hmuah? ¹³ Kha lioah khan rak thi ning law, atu cu kaa din diam cang hnga. ¹⁴ Hlanlio siangpahrang inn hna a remh ṭhantu siangpahrang hna le bawi hna bang khan kaa hngilh diam cang hnga. ¹⁵ Cun an inn sui le ngun in a khahtertu bawi hna sinah khan ka hei i din diam cang ko hnga. ¹⁶ Zeicahdah thla tling loin a chuakmi ngakchia bantuk le Ceunak a hmu bal lomi bawhte bantukin ka rak loh ko lo? ¹⁷ Khika ah cun miṭhalo hna nih harnak tuah an ngol i Retheimi hna cu an i din. ¹⁸ Khika ah cun thongtla hmanh nih dinhnak an hmuh i Rianṭuan a hnektu hna aw kha an thei ti lo. ¹⁹ Khika ah mihme mingan an um ṭi i sal cu a bawipa sinin a luat cang. ²⁰ "Harnak chungah a um i a lung chungin a ngaih a chiami, ²¹ Thihnak a duh nain a hmu kho lo i Thuhmi chawhlawn nakin thihnak co a duh deuhtu hna, ²² Thlan an hmuh tik i aa lawm hringhran i a tha a nuammi hna cu, Zeicahdah ceunak pek an si ee? ²³ Pathian nih a velchum in a hren i a lam a pitmipa sinah cun Zeicahdah ceunak cu pek a si ee? ²⁴ Ka aihramnak cu ka rawl a si i Ka hrum-ainak cu ti luan in a luang. ²⁵ Ka phanmi thil cu ka cungah an tlung dih i Ka ṭihmi thil nih an ka tlunhnawh. ²⁶ Ka thabat a dam lo i dai tein ka um kho hlei lo; Dinh ka hmu lo, harnak a dong lo," tiah a ti.

¹ Khi tikah Teman mi Elifaz nih khan a leh i, ² "Na sinah bia kaa khat in chim ning law, na thin a hung hnga maw? Asinain, ahodah chim loin a um kho hnga? ³ Zohhmanh, nangmah nih mi tampi na rak cawnpiak hna i Kut a dermi cu na rak ṭhawnter hna. ⁴ A ril lengmangmi cu na bia nih a tun hna i A derthawmmi khuk cu nangmah nih na fehter hna. ⁵ Sihmanhsehlaw atu cu nangmah cungah harnak tlun caan a phan i na thin a tawi, Nangmah cu an tawngh i na lung a dong. ⁶ Pathian na ṭihnak cu naa bochanmi a rak si lo maw? Na ziaza tlinnak cu naa hngatchanmi a si lo maw kha? ⁷ Atu hi ruat hmanh, zeihmanh a sual lomi cu a rawkral bal maw? Khuazei tal ah miding cu hloh an si bal maw? ⁸ Keimah ka hmuhning ah cun ṭhat lonak lei a thuangtu hna le Harnak a tuhtu hna nih cun, cu ṭhiamṭhiam cu an zun tawn. ⁹ Pathian thaw in an rawk i A thinhunnak in a chem hna thawngin an kang dih. ¹⁰ Miṭhalo hna cu chiandeih bantukin an ngur i an awn, Sihmanhsehlaw Pathian nih a daihter hna i an ha a thlongh hna. ¹¹ Seh awk le ei awk a hmu ti lomi chiandeih bantukin an thi i An fale cu an i ṭhek dih. ¹² "A thli tein ka sinah bia a phan i Ka hna nih an i ceih sepmapmi cu a theih. ¹³ Mi an i hngilh hluahmah lio i zan i langhnak ka hmuhmi ka ruah tikah. ¹⁴ Ṭihnak le thathernak kha ka cungah a tlung i Ka ruh vialte kha a therter dih hna. ¹⁵ Thaw nih ka hmai kha a ka chem i ka hmulthi a ling; ¹⁶ Mui thluamthlam cu khika ah a dir ko, sihmanhsehlaw a mui kha ka hliah kho lo; Thil pakhat ka hmaiah a hung lang i Thawng pakhat, a aw a kua ngaimi cu ka theih: ¹⁷ ’A thi khomi minung hi Pathian hmaiah cun a ding kho maw? Minung hi a Sertu hmaiah a thiang kho maw? ¹⁸ Pathian nih a sinum hna hmanh kha a zum kho hna lo i A vancungmi hna hmanh kha, nan palh, tiah a ti hna; ¹⁹ Cucaah tlak inn ah khua a sa i a hram cu leidip a si i Pelep bangin a man khomi cu zeitluk in dah a ti chinchin hna lai. ²⁰ Zinglei le zanlei karlak ah an rawk dih; Ahohmanh i theihhngalh set loin an lo lan. ²¹ An thlam hri cu an lakin cat lakin hnuh a si ahcun, Fimnak ngei loin an thi men ko lo maw?

¹ "Au tuah hna, an lettu ding an um hnga maw? Mithiang aho cu dah na fuh bik hna lai? ² Asi taktak ko, thinhunnak nih mihrut kha a thah hna i Nahchuahnak nih lungthin tlawmmi kha a nawn hna. ³ Mihrut nih ngeihchiah hram an thlak kha ka hmuh, Sihmanhsehlaw an umnak cu chiat ka serh colh. ⁴ An fale hna cu an him deng naisai lo i Hauka ah khan lamh chih an si, Annih chanhtu ding kha ahohmanh an um lo. ⁵ An rawl ṭuanmi cu rawlṭammi nih an ei i Hling lak hmanh kha an lak; Cun tihalmi nih an chawva kha an chuh hna. ⁶ Zeicahtiah temhinnak cu leidip chungin a ra lo i Harnak cu vawlei in a kheu lo; ⁷ Sihmanhsehlaw meici cu cunglei ah a choi phung a si bantukin, Minung cu harnak hmu dingin hrin a si. ⁸ "Kei cu, nang ka si ahcun, Pathian kha ka fuh ko hnga i Amah sinah khan ka konglam cu ka chiah ko hnga; ⁹ Amah nih thil lianngan hna le ruah phak lomi thil hna le khuaruahharmi thil kha rel cawk loin a tuah hna: ¹⁰ Vawlei cungah ruah a surter i Lo chungah ti kha a luanter hna; ¹¹ Minauta cu cungsang ah a chiah hna i Ngaihchiami cu himnak ah a cawi hna. ¹² Mizer hna khuakhannak cu pakpalawng ah a canter, Cucaah an kut nih an i tinhmi cu an tlinter kho hna lo, ¹³ Mifim hna cu anmah zernak lila ah khan a foih hna i Mihrokhrawl hna timhtuahnak cu khulrang in a dong. ¹⁴ Chun ah muihnak he an i tong i Chunlai ah zan bantukin an i dap lengmang. ¹⁵ Sihmanhsehlaw ngakṭah hna cu an kaa chung khan a khamh hna i Mipam hna cu a ṭhawngmi hna kut chung khan a khamh hna; ¹⁶ Cucaah sifakmi nih ruahchannak an ngei i Biadinglo nih khan a kaa a cip. ¹⁷ "Zohhmanh, Pathian nih a chimhhrinmi cu lunglawmmi a si; Cucaah Lianngan Bik chimhhrinnak cu zeirello in um hlah. ¹⁸ Zeicahtiah amah nih hriamhma an inter, Asinain amah lila nih an men ṭhan; Amah nih cun an tuk, sihmanhsehlaw a kut nih an damter ṭhan. ¹⁹ Amah nih harnak paruk chungin an chuah lai, Pasarih chung zongah ṭhat lonak zeihmanh nih an tawng lai lo. ²⁰ Mangṭam a tlun tikah amah nih thihnak chungin an khamh lai, Ral chungah vainam ṭhawnnak chungin an tlanh lai. ²¹ Congoihnak a um tikah a phaw an chonkanh lai i Rawhralnak kha a rat tikah na ṭih awk a herh lai lo. ²² Rawhralnak le mangṭam an tlun tikah na ni lai i Vawleicung sahrang kha na ṭih hna lai lo. ²³ Lo chung lung hna nih cun hna an in hnawh lai lo i lo chung sahrang hna he cun rem tein nan um lai. ²⁴ Na thlam cu a him kha na hngalh lai i Na kawm kha na zoh lai i zeihmanh a bau lai lo. ²⁵ Na tefa hna cu tampi an si lai kha le Na hrinsor hna cu vawlei i ram bantuk an si lai kha na hngalh fawn lai. ²⁶ Rawl phal tommi cu amah caan te ah phuhri a phanh bantukin. Chan tling cikcek tein thlan khor na phan lai. ²⁷ Zohhmanh, mah hihi kan dothlat cikcek i ahmaanmi a si, Biatak a si caah na ca i a ṭha dingah i lak tuah," tiah a ti.

¹ Cun Job nih a leh i: ² "Ka thinlinhnak hi a khing thlai hei si seh law, Ka vanchiatnak hi a cuai thlai hei si seh law ka hei duh hnga dah! ³ Rili thetse nakin a rit deuh ko hnga, Cucaah cun pei ka bia hi a bultan cu. ⁴ Zeicahtiah Lianngan Bik nih a thal in a ka kah i A sivai nih ka thlarau cu a ciah. Pathian ṭihnunnak nih cun hmaitonh in an ka tianhnawh. ⁵ Ramlak laa cu ram a ṭam lioah a awn bal maw? Cawtum tah ramrawl a ei lioah a paw bal maw? ⁶ Thawtnak a ngei lomi rawl, cite phulh lomi cu aho nih dah an ei khawh? Arti hawng ah khin zeital thawtnak a um maw? ⁷ Cu bantuk rawl cu ka duh hna lo i ka caah fihnung an si. ⁸ "Ka halmi cu hei hmu ning law, Pathian nih ka duhmi cu hei ka pe seh law, ⁹ Pathian nih hei ka rial cikcek dih seh law, A kut kha hei samh seh law hei ka lek ko seh law, ka hei duh hnga dah! ¹⁰ Mah hihi ka hnangamnak a si ko hnga; Zawnruahnak ngei lo fahnak ah cun kaa lawm ko hnga; Zeicahtiah Mi Thiang bia cu ka hlaw hna lo. ¹¹ Hngah rih khawhnak ding caah thazang ka ngei ti hnga maw? Zei donghnak i ruahchan in dah lungsau in ka um rih hnga? ¹² Ka thazang cu lung thazang maw a si? Ka titsa cu dar dah a si? ¹³ Biatak tein, keimah chungah hin bawmtu zeihmanh a um lo, Thazang petu paohpaoh cu ka sinin an zam dih. ¹⁴ "Mahle hawi cung i zaangfahnak a ngei lomi cu Lianngan Bik ṭihnak a hlawmi a si. ¹⁵ Ka unaule hna cu tivacek bantuk hlen hmangmi an si, Tivate a kuang a liammi bantuk an si; ¹⁶ An chungah tikhal a um caah an nak i An chungah hawhra tlang kha an i thup. ¹⁷ A linh caan a phak tikah an lo, A sat tikah an umnak hmun in an lo. ¹⁸ A run in khual a tlawngmi hna nih an hun pialhnawh hna, Ramlak ah cun an hun luhhnawh hna i an thi tawn. ¹⁹ Tema khualtlawng run hna nih ti cu an kawl, Sheba khualtlawng mi hna nih an an i ruahchan. ²⁰ An rak i zumh caah khan an hnabei a dong, Cuka cu an phan i an lung a ar. ²¹ Cu bantuk ah cun ka caah hin nan i cang, Ka chiatnak kha nan hmuh i nan ṭih. ²² ’Laksawng ka pe tuah u,’ ka ti maw? Asiloah, ’Nan chawva chungin zik ka nawhpiak tuah u,’ ka ti dah? ²³ Asiloah, ’Hi ral kut chung hin ka chuah u,’ ka ti maw? Asiloah, ’Hremtu hna kut chungin ka tlan u,’ ka ti dah? ²⁴ "Ka cawnpiak u law, dai tein ka um ko lai; Zeitindah ka palhnak a si kha ka hngalhter tuah u. ²⁵ Fimnak in ṭha tein chimh ahcun ka lung a pem sawk hnga, Sihmanhsehlaw nan chimmi cu pakpalawng a si. ²⁶ Ka bia cu leh nan ka duh maw? A hnabei a dong cangmipa nih a chimmi cu thli lawng pei a si ko cu. ²⁷ Ngakṭah hna sal i lak awkah camcawhfung hmanh nan khiah ko hnga i Nan hawi ṭha bik hmanh cu chawlehnak ah nan hman ko hnga. ²⁸ Sihmanhsehlaw atu cu ka zoh hnik u, Nan hmaiah ka lih hrimhrim lai lo. ²⁹ Ruat rih hmanh u, dinlonak cu ka cungah tuah si hin ti hlah seh, Cun ka ṭhatnak cu zumh lo bantukin um a si caah hin, ruat rih hmanh u. ³⁰ Ka leiah hin palhnak zeital a um maw? A ding le a dinglo kha thleidang kho loin maw ka um?

¹ "Vawleicung ah hin mi nih rian har a ngei a si lo mei? Cun a ni hna hi hlanchom sinum ni bantuk an si ko lo maw? ² Thladem tang i dinh a duh ngaingaimi sal bantuk le A ṭuan man hmuh awkah a ngangnganmi hlanchom sinum bantuk a si. ³ Cu bantuk cun thla tampi rian pakpalawng ka ṭuan i Zanfate ngaihchiatnak kha ka hmu. ⁴ Ka vung ih tikah, Zeitik ah dah ka thawh lai, ka ti. Sihmanhsehlaw zan cu a sau i zinglei tiang kaa lawngvang lengmang ko. ⁵ Ka titsa cu tholung le hmunthur nih an tuam i Ka cuar cu a car i a kek ṭhan tawn. ⁶ Ka ni hna cu thiamtaktu thiampheifung nakin an khul a rang deuh i An donghnak cu ruahchannak zeihmanhlo he an phan. ⁷ "Ka nunnak cu thaw menmen a si kha hngal camcin ko; Ka mit nih hin ṭhatnak zeihmanh a hmu ṭhan ti lai lo. ⁸ Atu ah cun na ka hmuh, sihmanhsehlaw na ka hmu ṭhan ti lai lo, Ka kawl hmanh law, ka rak lo diam cang lai. ⁹ Minmei a ṭian i a loh bangin, Cu bang cun Sheol i a vung kalmi cu a hung ṭhan ti lai lo. ¹⁰ A inn ah a kir ṭhan ti lo, A hmun zong nih amah kha a rak hngal ti lo. ¹¹ "Cucaah ka kaa cu kaa sum lai lo; Lungthin fak ngaiin ka chim ko lai, Lungfak hringhran in ka zai ko lai. ¹² Keimah cu rili maw ka si i rili chung rulpi hen dah ka si, A ka cawngtu dingah vengtu na chiah cu? ¹³ ’Ka ihkhun nih a ka nuamhter lai, ka zaunak nih ka zainak hi a nemter lai,’ ka ti tikah. ¹⁴ Mang in na ka ṭhih i langhnak in ka thin na ka phanter. ¹⁵ Cucaah hngawng dih le thih cu ka ruh hna nakin thim ka duh deuh hna. ¹⁶ Ka hnabei a dong, nun hi ka duh ti lo. Hnahnawh lo tein keimah te lawng in um ko ning, ka nunnak cu tikhu men a si ko. ¹⁷ Minung hi zeidah a si i hi ti ko hin biapi ah na rel i A cungah na ruahnak na chiah i ¹⁸ Zingfate in na veh i zeitik paoh ah na hneksak lengmang? ¹⁹ Zei can dah khuadang hoitak loin na ka um lai i Ka cil ka dolh hlantiang keimah um i umter ko loin na ka um lai? ²⁰ Ka sual a si ahcun, nang minung lungthin a zohtu, Na cungah zei fahnak dah ka tuah? Zeicahdah keimah cu naa chingchiahmi ah na ka ser? Zeicahdah keimah cu na ca i thilrit ah ka can? ²¹ Zeicahdah ka phungbuarnak cu na ka ngaihthiam ko lo i, Ka ṭhat lonak cu na ka hlonhpiak ko lo? Zeicahtiah atu cu vawlei chungah ka it lai; Na ka kawl lai, sihmanhsehlaw ka rak um ti lai lo," tiah a ti.

¹ Cun Shuh mi Bildad nih a leh i: ² "Zei can dah hi thil hna hi na chim lengmang hna lai i Tar tlawhciar in na tlawhciar lengmang ko lai? ³ Pathian nih biading cu a merh bal maw? Asiloah, Lianngan Bik nih a dikmi cu a merh bal maw? ⁴ Na fale hna nih a cungah an sual caah An ṭhat lonak dantatnak kha an cungah a tlunter. ⁵ Pathian kha na kawl i Lianngan Bik kha na kawl i, ⁶ Nangmah cu na thian i na din ahcun, Na caah aa hlau hrimhrim lai i a dingmi naa tinhnak cu a tlinter lai. ⁷ Cun naa thawknak cu hme hmanh seh law, na donghnak lei cu a ngan lai. ⁸ "Zeicahtiah a liam ciami chan hna kha hal hna law, Kan pupa hna nih zeidah an hmuhmi a si kha ruat hmanh; ⁹ Kannih cu nizan mi ceote kan si ko i zeihmanh kan hngal lo, Zeicahtiah vawleicung kan ni hna cu thladem men an si ko. ¹⁰ Annih nih nangmah cu an in cawnpiak in an in chim in, an hngalhnak cu an in chim hnga lo maw? ¹¹ "Cerh um lonak hmun ah papairi kung cu a ṭhang kho maw? Ti um lonak hmun ah phaikung cu a ṭha kho maw? ¹² An par liopi le pheh an cut hlanah Ramkung dang hna hlanah tuan deuh ah an car. ¹³ Pathian a philhmi hna cu an dihlak in cu bantuk cu an si; Pathian zei ah a rel lomi hna cu an nunnak hri a cat. ¹⁴ Anmah le anmah an i bochannak cu manmarang aa zammi bantuk a si i An hngatchanmi cu sawmpalak bu men a si. ¹⁵ A inn kha aa hngauh, sihmanhsehlaw a inn cu a dir kho lo; A tlaih, sihmanhsehlaw a tlu ṭhiamṭhiam. ¹⁶ A thingkung cu hring dutmat in nitlang ah khan a ṭhang i A nge hna cu dum lengah khan an chuak. ¹⁷ Sihmanhsehlaw a hram nih lungpon a ngerh i lungtlap kha an i ton. ¹⁸ Cun mi pakhat nih a umnak hmun khan a phawi i A umnak hmun nih cun, ’Nangmah cu kan hngal bal lo,’ tiin a hlawt. ¹⁹ Mahticun a nunnak cu a uai i Vawlei chung khan thingkung dang kha an hung chuak. ²⁰ "Zohhmanh, Pathian nih cun soisel awk um lomi cu a hlaw lai lo, ṭhat lonak a tuahmi hna kha a domh fawn hna lai lo. ²¹ Na ka cu nihnak in a khahter te ko rih lai i Na hmur cu lawmhnak aunak in a khahter te ko lai. ²² Nangmah an huami cu ningzahnak in thuamh an si lai i Miṭhalo hna thlam cu a um ti lai lo," tiah a ti.

¹ Cun Job nih a leh i: ² "Biangai tein, mah cucu cu bantukin a si tiah ka hngalh ko, Sihmanhsehlaw minung cu zeitindah Pathian hmaiah cun a din khawh lai? ³ Amah he khan bia al a duh ahcun, voi thong khat chungah voi khat hmanh a let kho lai lo. ⁴ Pathian cu a lungthin in a fim i a thazang in a ṭhawng Aho nih dah an doh khawh lai? ⁵ Tlang cu a ṭhial hna i a thinhun in a leh hna tikah an hngal lo; ⁶ Vawlei cu a umnak hmun khan a hninh i a tung hna cu an i hnin; ⁷ Ni cu nawl a pek i chuak loin a um, Arfi cu a kharkhumh hna. ⁸ Amah nih van cu a samh hna i rili tilet hna cu a lamh hna. ⁹ Amah nih cun Fizang le Likuk canthum le Firuk le Thlanglei arfi hna kha a ser hna; ¹⁰ Amah nih cun hngalh phak lomi thil lianngan le Khuaruahharmi thil relcawklo a ser hna. ¹¹ Zohhmanh ka pawngah a kal, sihmanhsehlaw ka hmu lo; a lan i ka hngal lo. ¹² Amah nih cun a lak ko, aho nih dah an dawnh khawh lai? Aho nih dah, ’Zeidah na tuah?’ an ti lai? ¹³ "Pathian nih cun a thinhunnak hna cu a let ṭhan lai lo, A kehram ah Rahab bawmtu hna kha an kun. ¹⁴ A si ahcun, zeitindah keimah chinchin nih cun amah cu ka leh khawh lai? Zeitindah amah he i alnak dingah bia cu ka hmuh khawh lai? ¹⁵ Ka sual lo i sual a ka phawtu sinah khan zaangfahnak ka hal nain Zeihmanh lehnak ka hmu lo. ¹⁶ Zung ah khin hei chuahpi in amah nih khan rak ka let ko hmanh seh law, Ka nawlnak bia cu a ka ngaihpiak hnga tiah ka zum hlei lo. ¹⁷ Zeicahtiah thil hme tete kongah fak piin a ka tongh i Sullam ngei loin ka cungah tuknak cu ruah sur in a surter. ¹⁸ Ka thaw hmanh a ka dawpter manh lo i ngaihchiatnak in a ka khahter. ¹⁹ Thazang zuamkhawnnak a si ahcun, zohhmanh, amah cu a ṭhawng bik a si ko! Cun biading kong ah a si ahcun, aho nih dah, a bia cu ngaihpiak ko, tiah an ti khawh lai? ²⁰ Suallo si hmanh ning law, keimah kaa lila nih sual a ka phawt ko lai; Soi awk um lo si hmanh ning law, amah nih cun lamtlau a ka ti khawh ko lai. ²¹ Soi awk um lo ka si ko, sihmanhsehlaw ka caah zeidah a ṭhahnem? Nun hi a ka nor tuk cang. ²² Kan sual ah, kan thiam ah, zeihmanh aa dang lo, Pathian nih a kan hrawh ding a si ko. ²³ A sual lomi kha a thih tikah Pathian cu a ni ko. ²⁴ Pathian nih vawlei cu miṭhalo hna kut chungah a pek; Biaceihtu vialte kha mitcaw ah a ser hna. Cucu Pathian nih a tuah lo ahcun, aho nih dah a tuah kun? ²⁵ "Ka ni hna cu a tlimi nakin an khul a rang deuh, An liam i ṭhatnak zeihmanh an hmu lo. ²⁶ Vokkuanglawng khulrang ngai bantukin an kal, Muvanlai nih a sa a vun zuanhnawh bantuk khin an khul a rang. ²⁷ Ka phunzainak hi ka philh lai i Ngaihchia muihmai ka putmi hi ka hlawt lai i Lunglawm in ka um lai, ka ti ah, ²⁸ Nganfahnak ka in dingmi hi a ṭih in ka ṭih, Zeicahtiah nangmah nih suallo ah na ka rel lai lo, ti kha ka hngalh. ²⁹ Sualphawt ka si ko ding ṭung ah cun, Zeicahdah pakpalawng in ka ṭuan len ko lai? ³⁰ Chatphiat in i kholh hmanh ning law, ka kut cu cangal in i ṭawl hmanh ning law, ³¹ Nawncek chungah cun na ka thlak ṭhiamṭhiam ko lai i Keimah ka thilthuam lila nih fihnung ah an ka ser ding a si ko. ³² Pathian cu keimah nih leh khawh awkah le biaceihnak hmun i chuahpi awkah Keimah bantukin minung a si ṭung lo. ³³ Kan karlak ah biaceihtu le kan pahnih tein nawl a kan petu um hna seh law ka hei duh hnga dah. ³⁴ Cu ti a si ahcun Pathian nih ka keng cung hin a ṭhiangṭhunh kha a ṭhial hnga i Amah ṭihnak nih khan ka thin a ka phanter ti hnga lo. ³⁵ Cu tikah amah ṭihnak um lo tein bia ka chim khawh hnga, Zeicahtiah a ka ruah ning bantuk cu ka si lo, ti kha ka hngalh.

¹ "Ka nunnak hi ka fih; Ka phunzainak hi i sum hin loin ka chim ko lai; Lungfak hringhran in ka chim ko lai. ² Pathian cu ka thawh lai i, ’Sual ka phaw hlah; Zeicahdah na ka ralchanh hi a si, ka hngalhter. ³ Mi kha rialchih i nangmah kut nih a sermi kha nautat i Miṭhalo hna khuakhannak hnatlakpi cu, a ṭha tiah na ruah maw? ⁴ Titsa mit maw na ngeih? Mi hmuh bantukin maw na hmuh? ⁵ Na ni hna cu minung ni bantuk maw an si? Na kum hna cu minung hna kum bantuk dah an si? ⁶ - ⁷ Cucaah cun maw, keimah cu a sual lo, ti na hngal ko na le, Na kut chungin chuah khotu ahohmanh a ngei hna lo ti na hngal ko nain, Ka ṭhat lonak cu na hlat i ka sualnak cu na kawl? ⁸ Na kut in na ka ser i na ka siam; Cun maw naa mer i na ka hrawh. ⁹ Tlak in na ka ser kha philh hlah; Leidip ah maw na ka canter ṭhan lai? ¹⁰ Nangmah nih cawhnuk bangin na ka thlet i cawhnuk khal bangin na ka khalter lo maw? ¹¹ Nangmah nih cuar le tit in na ka tuam in ruh le tha in na ka phiar lo maw? ¹² Nangmah nih nunnak le a fekmi dawtnak na ka pek i Na zohkhenhnak nih ka thlarau kha a nunter. ¹³ Asinain, ka caah a thli tein tinhmi pakhat na ngeih kha ka hngalh. ¹⁴ Sual seh law, a sualnak kha ngaihthiam duh loin umning, tiah na ka ngiat. ¹⁵ Ka sual cangka in na sinin harnak ka hmuh, Sihmanhsehlaw dinnak ka tuah tikah zeihmanh thangṭhatnak ka hmu hlei ṭung lo. Kei cu harnak a ingmi ka si i ningzahnak nih a ka tuam. ¹⁶ Chiandeih bantukin ka hun i porhlawt ah Na ka kawl i ka cungah khuaruahharmi thil kha na tuah ṭhan; ¹⁷ Keimah ralchanhtu tehte kha na ngei zungzal hna, Ka cung i na thinhunnak cu na karhter; Ralkapbu thar thar kha keimah doh awkah na ratpi hna. ¹⁸ "Zeicahdah paw chung khan na rak ka chuahter? Ahohmanh nih an ka hmuh hlanah khan rak thi ning law, ka hei duh hnga dah. ¹⁹ A um bal lomi bantuk ka si ko hnga i paw in thlan ah kalpimi bantuk ka hei si ko hnga. ²⁰ - ²¹ Ka nun chung ni hi an tlawm ko lo maw? Ka va kal i ka kir ti lonak ding thihnak thladem le a thukmi muihnak ram i ka kal hlanah hin, Hnangamnak tlawmte tal ka hmuh nakhnga, keimah um tein ka umter ko tuah. ²² Cu ram cu thihnak thladem umnak le zeizong vialte sullam ngei lo i an umnak hmun, Ceunak cu muihnak a sinak hmun a si, ka ti lai," tiah a ti.

¹ Cun Naamath mi Zofar nih a leh i: ² "Bia tampi hi leh loin maw um a si lai? Mi biatam paoh hi maw thiamco zungzal a si lai? ³ Dong loin na chim lengmang komi nih hin mi kha holh loin a umter hna lai maw? Cun pakpalawng bia na chim lengmang ko tikah hin, aho tal nangmah situ an um lai lo maw? ⁴ Zeicahtiah naa thawh i, ’Ka ruahnak hi ahmaan, Pathian mithmuh ah ka thiang,’ na ti. ⁵ Sihmanhsehlaw Pathian nih hun in let seh law ka hei duh hnga dah! ⁶ Fimnak hi thap tampi a um i Minung fimnak nih a phak khawh lomi thil thuk an um ti kha an chimh hnga. Pathian nih na sualnak a cheu cu hmu duh loin an umpiak kha hngal tuah. ⁷ Pathian thil thuk hna cu na hmuh khawh hna maw? Lianngan Bik ṭhawnnak a donghnak cu na hmuh khawh maw? ⁸ Van nakkhin a sang deuh — zeidah na tuah khawh lai? Sheol nakin a thuk deuh — zeidah na hngalh khawh lai? ⁹ Vawlei velchum nakin a sau deuh i rili nakin a kau deuh. ¹⁰ Pathian nih an tlaih i biaceihnak ah an chuahpi ahcun, Aho nih dah amah cu a dawnh khawh lai? ¹¹ Pathian nih cun aho hi dah zeiruaramlomi a si ti kha a hngalh hna, An ṭhat lonak vialte kha a hmuh dih. ¹² Sihmanhsehlaw ramlak laa fa cu minung in a chuah tik ceo ah Mihrut cu an fim te lai. ¹³ "Na lungthin kha ding tein chia law Amah leiah khan na kut zao tuah. ¹⁴ Na kut chungah ṭhat lonak a um ahcun, lamhlatpi ah va hlonh tuah, ṭhat lonak cu na thlam chungah umter hlah. ¹⁵ Khi tikah dotlak lonak um loin na hmai cu na langh lai; Him tein na um lai i na ning a ṭi lai lo. ¹⁶ Na harnak cu na philh lai i tilian a lanmi bantuk ceo khin na cinken lai. ¹⁷ Cun na nunnak cu chun nakin a ceu deuh lai, A muihnak cu zingka bantuk a si lai. ¹⁸ Cun ruahchannak a um caah hnangam tein na um lai Pathian nih an huhphenh lai i him tein naa din lai. ¹⁹ Na it lai i ahohmanh nih na thin an in phanter lai lo, Mi tampi nih an in nawlpat lai. ²⁰ Sihmanhsehlaw miṭhalo cu mitcawtnak nih khan a tlakhnawh lai i Luatnak lam vialte kha a thlau hna lai, An i ruahchanmi cu, an thaw hmanung bik chuah kha a si ko lai," tiah a ti.

¹ Cun Job nih a leh i: ² "Biangai tein, nanmah hi pei mifim cu nan rak si hi, Fimnak tling cu nanmah nih pei nan rak ngeih hi! ³ Sihmanhsehlaw hngalhthiamnak cu nanmah tlukin ka ngei ve ko, Zeihmanh ah nanmah tluk ka si lonak a um lo. Nan chimmi hi ahopaoh nih an hngalh cio ko. ⁴ Ka hawile hmanh nih an ka nihsawh, Sihmanhsehlaw Pathian nih a ka leh caan cu a um ve ko; Miding le soi awk um lo ka si nain an ka nihsawh. ⁵ Harnak nan tong lo i nan ka nihsawh, a ril dengmangmi kha nan ka ṭhuat chih, ⁶ Sihmanhsehlaw mifir le Pathian zei i a rel lomi hna cu dai tein khua an sa i Pathian thin a phoktu hna cu himte le dai tein an um. ⁷ Van i a zuangmi va hna le saram hna nakin pei nan hngalhnak a tlawm deuh hi. Annih nih an in cawnpiak khawh hna ding tampi a um. ⁸ Vawlei i a ummi saram hna le rili chung i a ummi thilnung hna cu an fimnak kha hal tuah hna u. ⁹ Annih nih an dihlak in Pathian sermi kan si ti kha an hngalh. ¹⁰ A sermi thil vialte an nunnak a uktu cu Pathian a si i Minung thaw cu a kut chungah a um. ¹¹ Dang nih rawl cu a teh bantukin hna nih bia cu a hneksak ve hna lo maw? ¹² - ¹³ Fimnak cu tar nih an ngeih, Sihmanhsehlaw Pathian nih cun fimnak le ṭhawnnak a ngeih; Hngalhthiamnak cu chan saumi nih an ngeih, Sihmanhsehlaw Pathian nih cun hngalhthiamnak le thil ti khawhnak a ngeih. ¹⁴ Pathian nih a ṭheh ahcun, ahohmanh nih an sa ṭhan kho ti lo, Amah nih mi cu a kharkhumh ahcun, ahohmanh nih an hunpiak ṭhan kho ti lo. ¹⁵ Ti kha a tlaih hna ahcun an kao ko, a thlah hna ahcun vawlei kha an khuh dih. ¹⁶ Amah sinah cun ṭhawnnak le fimnak kha a um, Hlenmi hna le hlengtu hna cu amah kut tang ummi an si. ¹⁷ Fimchimtu pawl kha mihrut bantukin a umter hna, Biaceihtu pawl kha mihrut ah a ser hna. ¹⁸ Siangpahrang cu a ṭhumh hna i thongtla ah a ser hna. ¹⁹ Tlangbawi pawl cu puan loin a kalpi hna i A ṭhawngmi cu a thluk hna. ²⁰ Zumhmi mifim hna kha holh kho loin a tuah hna i Upa kha thil thleidan khawhnak fimnak kha a chuh hna. ²¹ Bawi kha ningzahnak a toih hna i a ṭhawngmi cu an taisawm kha a dorh. ²² Muihnak chungin thilthuk kha a hun langhter i A thukmi muihnak chungah khan ceunak a ratpi. ²³ Miphun kha mingan ah a ser hna i amah nih a hrawh ṭhan hna, Miṭhawng ah a ser hna i amah nih a ṭhumh ṭhan hna. ²⁴ An hruaitu hna cu an fimnak kha a lakpiak hna i Lam um lonak ramlak ah khan a vaihter hna. ²⁵ Mei lakah cun ceunak um loin an i dap lengmang i zuri bantukin an vai.

¹ "Zohhmanh, ka mit in mah vialte hi ka hmuh cang hna i Ka hna in ka theih hna i ka hngalh hna. ² Nanmah nih nan hngalhmi cu kei zong nih ka hngalh ve ko, Zeihmanh ah nanmah tluk ka si lonak a um lo. ³ Sihmanhsehlaw bia i ruah ṭi ka duhmi cu nanmah he si loin Lianngan Bik kha a si, Pathian he cun ka kong hi i al ka duh. ⁴ Nannih nih biatak cu lih in a lenglei kha nan nalh tawn, Nannih cu nan dihlak in lih ṭawn hmangmi nan si. ⁵ Dai ziar in um u law ka hei duh dah, mah cucu nan fimnak a si hnga! ⁶ Ka ruahnak kalning hi thei u law Ka hmur nih a chimmi nawlnak bia hi ngai tuah u. ⁷ Zeicahdah lih nan chim? Nan lih chimmi nih cun Pathian cu a bawmh lai tiah nan ruah maw? ⁸ Pathian cu a tuah ding kha nanmah nih maw nan tuahpiak lai i A bia cu nanmah nih maw nan chimrelpiak lai? ⁹ Nannih kha an zoh hna tikah, a ṭha in an hmu hna lai maw? Mi nan hlen hna bantukin amah cu nan hlen lai maw? ¹⁰ Nannih nih a thli tein duhdanhnak kha nan ngeih ahcun an sik hrimhrim hna lai. ¹¹ A lianhngannak nih khan nan thin an phanter hna lo maw? Amah ṭihnak nih cun an tlunhnawh hna lo maw? ¹² Nan phungthlukbia hna cu vutcam phungthlukbia an si, Nan i runvennak hna cu tlak runvennak men an si. ¹³ "Dai tein um u law ka chim ve lai, zei khom hmanh ka cungah tlung ai kun. ¹⁴ Ka sa cu ka ha in kaa seh lai i ka nunnak cu ka kut in kaa put lai. ¹⁵ Ruahchannak zeihmanh ka ngei ti lo, cucaah Pathian nih a ka thah zong ah zeidah a poi? A hmai hrimhrim ah ka bia cu ka va chim ṭhiamṭhiam ko lai. ¹⁶ Pathian zei ah a rel lomi cu a hmaiah an chuak ngam lai lo, ti tal hi cu ka khamhnak a si ṭheo lai. ¹⁷ Ka bia cu ṭhate in ngai hna u law, Ka fianternak bia hi nan hna chungah um hna seh. ¹⁸ Mah hihi fiang tein hngal tuah u: ka bia cu ka chim hnu hnuah cun ka luat lai ti kha ka hngalh ko. ¹⁹ Pathian, nangmah maw a ra lai i sual a ka phaw lai? Cu ti na tuah a si ahcun, kei cu dai tein ka um lai i ka thi ko lai. ²⁰ Thil pahnih lawnglawng hal kan duh, Na ka pek dingah cun na hmai in kaa thup lai lo: ²¹ Ka sin hin na kut cu la ṭhan law Na ṭihnunnak nih hin ka thin ka phanter hlah seh. ²² Cun ka au law, kan leh lai, Asiloah, bia ka chimter law, nang nih ka let. ²³ Ṭhat lonak le sualnak hna hi, zeizat hi dah nangmah tuahmi an si, ti ka si? Ka phungbuarnak le ka sualnak cu ka hngalhter ko hna. ²⁴ Zeicahdah na hmai kha na thuh i kei cu na ral ah na ka rel? ²⁵ Thli nih a choihmi thinghnah cu na dawi lai maw? Favai ro tah na dawi lai maw? ²⁶ Nangmah nih ka dantatnak ding cu na ṭial hna i Ka tlanval lio ka ṭhat lonak rocotu ah khan na ka ser. ²⁷ Ka ke ah hreng na khenh hna i ka lam cu na cawngh dih hna; Ka keneh hmanh kha ṭha tein na ngiat hna. ²⁸ Amah cu a ropmi saphaw bantuk, Rungrul nih a eimi puan bantuk a si.

¹ "Nu hrinmi minung paoh cu a chan a tawi i harnak in a khat. ² Pangpar bangin a hung par i a uai ṭhan ko; Thladem bangin a tli i aa peh lo. ³ Cu bantuk mi cungah cun maw na mit na chiah i nangmah he biaceihnak ah na luhpi? ⁴ Cu bantukin a thiang lomi minung chung cun a thiangmi zeihmanh a chuak kho bal lai lo. ⁵ A ni hna cu relpiak an si i A thla hna cu zeizat an si kha nangmah nih na hngalh; Nangmah nih a lonh khawh lomi ramri kha na serpiak. ⁶ Amah cu mertak ko law amah um tein umter ko, Kuli ṭuanmi bantukin a ni hna cu aa nuamhpi khawh ah i nuamhpi ko seh. ⁷ "Thing caah cun ruahchannak a um, Hau a si hmanh ah, a corh ṭhan lai i a nge hna cu an dong lai lo. ⁸ Vawlei chungah a hram cu tar in vawlei ah a hmui cu thi hmanh seh law, ⁹ Ti rim a theih cangka a corh ṭhan lai i thing langno bantukin a nge an borh ṭhan ko lai. ¹⁰ Sihmanhsehlaw minung cu a thi i an vui, Mi nih cun a thaw hmanung bik a chuah i khuazei ah dah a um ti. ¹¹ Ti cu tili chungin a kao bantuk le tiva cu a reu i a car bantukin, ¹² Minung cu a it i a tho ṭhan ti lo, Van hna khi an um ti lo hlan lo cu aa ṭhang lai lo. Mi cu a thih ahcun a nung ṭhan kho lai maw? Aa hngilhnak in aa hlau bal ti lai lo. ¹³ Pathian, Sheol ah khin ka thup law ka duh; Na thinhunnak a daih tiangin ka thup tuah, Khika ah cu tiangin na um lai tiah caan ka khiahpiak law Cun ka hngal ṭhan te tuah! ¹⁴ Cucaah ka rian cu zeitluk in a sau hmanh ah ka lung a dong lai lo i Ka luatnak ding cu ka rak hngah ṭhiuṭheo ko lai. ¹⁵ Na ka auh lai i kan leh lai, na kut tuahmi thil cu, hmuh na ka duh lai. ¹⁶ Khi tikah ka kekar cu na rel hna lai i Ka sualnak cu na ngia peng ti lai lo; ¹⁷ Ka phungbuarnak cu zal chungah khumh an si lai i Ka ṭhat lonak cu nangmah nih na khuh hna lai. ¹⁸ "Sihmanhsehlaw tlang cu an cim i an ril dih, Lungpi cu a umnak hmun khan ṭhial a si; ¹⁹ Ti nih lung cu an ziah hna i vawlei ṭha cu tihrang nih a fenh hna, Cu bantuk cun minung ruahchannak cu na hrawh. ²⁰ Amah cu a zungzal in na tei i a lo dai ko; A muihmai kha na thlen i na kalter diam. ²¹ A fapa hna nih upatnak an hun hmu, asinain a hngal lo; Annih cu ṭhumh an rung si, sihmanhsehlaw a hngal hlei lo. ²² Amah pum fahnak lawng kha aa hngal i amah lawng kha aa ṭah ko," tiah a ti.

¹ Cun Teman mi Elifaz nih a leh i: ² "Thli lawng a khatmi fimnak in maw mifim nih a leh awk a si hnga? Nichuahlei thli in maw aa khahter ko lai? ³ A ṭhahnem lomi bia le santlai lomi bia alnak kha maw a lehhlum lengmang ko lai? ⁴ Mi cu Pathian ṭih kha na thlauh i a sin i thlacam kha na dawnh. ⁵ Na ṭhat lonak nih na chimmi bia hi an chimter i Hlennak hi naa thimmi holh a si. ⁶ Keimah nih si loin, nangmah kaa hrimhrim nih nangmah cu sual an phawt, Nangmah hmur hrimhrim nih an mawhchiat. ⁷ "Nangmah hi minung vialte lakah hrin hmasa bikmi na si maw? Asiloah, tlang hna an sem hlanah hin dah na chuah? ⁸ Pathian pumhnak chung biathli cu na thei bal maw? Nangmah lawng hi maw minung fimnak a ngeimi cu na si? ⁹ Kan hngalh lomi zeidah na hngalh? Kan fian lomi zeidah na fian hlei? ¹⁰ Ṭuakparmi hna le tar hna cu kan sinah an um, Na pa nakin a upa deuhmi an si. ¹¹ Pathian nih an hnemhnak bia, na sinah nem tein chimmi cu naa za lo maw? ¹² Zei nih dah cu tluk lawmmam in na ral an ṭhatter i Na mit au na kan renghhnawh len ko? ¹³ Zei nih dah na thinhunnak kha Pathian cungah an chuahnawhter i Cu bantuk bia hna cu na kaa in na chuahter len hna? ¹⁴ Minung cu zeidah a si i a thian khawh lai cu? Nu hrinmi fa cu zeidah a si i a din khawh lai cu? ¹⁵ Pathian nih a mithiang hna hmanh kha a zum hna lo i Van hna hmanh kha a hmaiah suallo an si lo ahcun, ¹⁶ Zeitindah fihnung a si i a thu a man i ṭhat lonak cu ti bangin a dingmi minung chinchin cu, a si khawh lai? ¹⁷ "Kan hmuhsak lai, ka ngai hmanh, ka hmuhmi thil cu kan chimh lai; ¹⁸ (Mifim mi nih an rak chimmi, an upa hna nih thup lo tein an rak chimhmi hna biatak cu kan chimh lai. ¹⁹ An ram chungah cun ramdangmi an rak um lo i Pathian sinin a tlautertu hna zong an rak um lo). ²⁰ Mi a rial lengmangmi miṭhalo cu a nun chung paohpaoh ah harnak a tong zungzal ko lai. ²¹ Ṭihnak thawng kha a hna chungah an au lai i Him tein ka um tiah aa ruah lioah, mifir nih an chuahhnawh lai. ²² Muihnak chungin luatnak ding ruahchannak a um lo, Amah cu vainam nih khan hmun khatkhat in a orh peng ko. ²³ Langta hna rawl caah hlonh a si i, Cu bantuk mi nih cun, ka rawhnak ding kha a fiang, tiah a hngalh. ²⁴ Chikkhatte ah muihnak ni nih cun a tlun hnawh i Harnak le lungretheihnak nih a ṭhawngmi siangpahrang bantukin amah cu tuk awkah an bawh ko. ²⁵ Amah nih cun Pathian kha a kuttum a chuahhnawh i Lianngan Bik cu zeirello in a um; ²⁶ A lu aa khun riangmang i a phaw laipawng chahpi he cun a zuanhnawh. ²⁷ Amah cu khuapi kha a latu hna le A ngeitu nih an tliktak cangmi inn a tlaitu kha a si, ²⁸ Sihmanhsehlaw cu khua hna le inn hna cu ral nih a hrawh ṭhiamṭhiam hna lai. ²⁹ Sau a rum lai lo i a chawva nih sau an nguh lai lo, Vawlei chung zongah hram a thla lai lo; ³⁰ Muihnak in a luat lai lo i meizik nih a nge kha a hrem dih hna lai i Thli nih a par kha a choih dih hna lai. ³¹ A rian a nganmi kha i bochan in amah le amah i hleng hlah seh, Zeicahtiah a rianṭuanmi cu pakpalawng ah a cang lai. ³² A ungkung hna cu a caan lopi ah an uai lai i a nge hna cu an hring lai lo. ³³ An hmin hlanah a thei a ṭhilmi mitsur ruang bantuk a si lai i A par a thlongmi oliv kung bantuk a si lai. ³⁴ Zeicahtiah Pathian zei ah a rel lomi hna cu an dihlak in an car i Ziknawhmi thil in an sakmi an inn cu mei nih a kangh hna lai; ³⁵ Mi ṭhat lonak ding kha fapawi in an i pawi i ṭhat lonak kha an hrin, An paw chungin a chuakmi fa cu hlennak kha a si," tiah a ti.

¹ Cun Job nih a leh i: ² "Mah bantuk cu tampi ka theih cang; Nan ka hnemhnak cu hremnak lehlam a si. ³ Hitihin maw na chim thluangthluan ko lai? Nangmah bia in donghter kha maw na duh zungzal ko lai? ⁴ Nang le kei hi umhmun aa thleng ding si u si law nangmah bantuk hin kei zong nih ka chim khawh ve ko hnga. Bia cun kan ṭhuat len ko hnga i ka lu zong kan hrilhhnawh len ko hnga. ⁵ Sihmanhsehlaw thazang peknak biatu kha ka chim lai i Nangmah hnemhnak bia ka chimmi cu tiva bangin a luang lai. ⁶ Ka holh ah ka fahnak a dai hlei lo, Daite i ka um ah a ka kaltak hlei lo. ⁷ Pathian, nangmah nih na ka batter hrimhrim ko cang; Ka hawikom vialte cu na ṭhio dih hna. ⁸ Sawng ṭiamṭuam in na ka tuah i mah cucu ka cung i tehte a si; Ka ruh lawng a taan caah hin, ka dernak cu a sual caah a si, an ka ti. ⁹ Na thin hun in na ka thleh i na ka bauh, Na hacang na ka rialhnawh; Na thinhunnak cu fiang tein a lang. ¹⁰ Mi nih keimah seh awkah an kaa an ka anhnawh, An ka pumhhnawh i ka bel ah zawmhtaih ngaingai in an ka bengh. ¹¹ Pathian nih Pathian zei i a rel lomi hna sinah khan a ka chanh i Miṭhalo hna kut chungah khan a ka hlonh. ¹² Dai tein ka um ko, Sihmanhsehlaw Pathian nih ka orpareng in a ka dih i a ka khawn chih len i a ka tengh; A hmuichon selnak ah a ka hman i ¹³ A kam kip in a thal cu ka cungah ruah sur in an sur. Zaangfahnak ngei loin ka kal cu a hlai hna i ka hnit cu vawlei ah a thlet. ¹⁴ A ka khuai a ka hmal chin lengmang ko; A thin a hun tuk i a molh in a molh cangmi ralkap bantukin a ka zuanhnawh. ¹⁵ Ka cuar huhnak caah puanchia kaa ṭhit i ka samtom cu leidip chungah ka nawh. ¹⁶ Ka ṭahnak ah ka hmai a sen i ka mitcuar zong nak khiamkhuam in an um dih; ¹⁷ Sihmanhsehlaw ka kut nih zaang-ennak kha an tuah hna lo i Ka thlacamnak a thiang ko. ¹⁸ "Maw vawlei, ka thisen cu khuh hlah, Dinnak ca i ka aunak hi dai hin hlah seh. ¹⁹ Zohhmanh, ka tehte cu vancung khin a um i Cung sangpi ah khin ka bia a ka chimpiaktu ding cu a um ko. ²⁰ Pathian nih ka mitthli cu ka hmuhpiak seh law, Ka thlacamnak cu ka theihpiak ko seh. ²¹ Mi nih a hawipa caah nawlnak a tuah bantukin, Pathian a ka nawlpiaktu um seh law ka duh ko, ²² Zeicahtiah ka kir ṭhan ti lai lo nakding lam ka zulhnak dingah hin Kum tlawmte lawnglawng a duh ko.

¹ "Ka lungthin cu a kuai cang, ka ni cu rel an si cang; Thlan nih a ka hngah ko cang. ² Kaa mernak paoh ah mi nih an rak ka nihsawh, Ka thin an ka phawhnak cu ka mit nih a hmuh zungzal ko. ³ Pathian, ka lih ka chim lo, ka bia cu ka cohlanpiak ko, Ka chimmi cu, ahmaan, tiah a titu ding an um lo. ⁴ Hngalhthiamnak an ngeih nakhnga lo, an lung cu na phih hna i Ka cungah diriam in umter hna hlah. ⁵ Phungthluk bia hlun ah, mi pakhatkhat nih tangka ruangah a hawipa kha a rawi ahcun, A fale mit kha a caw lai, ti a si. ⁶ Hi phungthluk bia cu keimah cungah an hman i Mi nih an theih i an ra i ka hmai ah cil an ka chak. ⁷ Ngaihchiatnak in ka mit cu a mui cang i Ka kutke vialte hi thladem bantuk ceo an si cang. ⁸ Miding ka si, aa timi hna cu an khuaruah a har i Pathian zei i a rel lomi ah an ka chiah. ⁹ Hmaizah awk tlak ka si, aa timi hna nih cun, Kanmah hi kan hmaan, tiah an i ruat chin lengmang ko. ¹⁰ Asinain, ka hmaiah an dihlak in ra dir hna seh law, An lakah mifim pakhat hmanh an um lo kha ka hmuh ko lai. ¹¹ "Ka ni cu an liam cang, ka timhmi cu an rawk cang, Ka ruahchannak cu a lo cang. ¹² Chun cu zan ah a cang cang, zingka ceunak cu ka hmaiah a mui cang. ¹³ Ruahchannak zeihmanh ka ngei ti lo, Sheol hi ka umnak ding inn a si ko, Khika ah ka it lai: mui lakah cun ka it ko lai. ¹⁴ Thlan cu, ka pa na si, ka ti lai i A ka eitu rungrul cu, ka nu le ka far nan si, ka ti hna lai. ¹⁵ Khuazei ah dah ruahchannak cu ka ngeih? A ka hmuhpiaktu aho tal an um maw? ¹⁶ Keimah he vui ṭi awk le Sheol i vung kal ṭi awkah, Aa timmi aho tal an um maw?" tiah a ti.

¹ Cun Shuh mi Bildad nih a leh i: ² "Zei can dah bia cu na kawl rih lai? Ruat hmanh law kannih nih kan chim lai. ³ Zeicahdah kannih cu saṭil bantuk ah na kan rel? Zeicahdah kannih cu a hrutmi saram bantuk ah na kan hmuh? ⁴ Nangmah nih cun, keimah hi ka hmaan, na ti; Hi na timi hi ahmaan taktak ti nakding caah, Vawlei hi chuahtak dih i lung hna hi an umnak hmun in ṭhial dih maw a herh lai? ⁵ "Sihlah, a ceunak hmih a simi cu miṭhalo a si i A mei cun meizik a chuak ṭhan ti lai lo. ⁶ A thlam chungah ceunak cu a mui i a chung i a meiinn cu a mit. ⁷ A kehlan cu a rak fek, sihmanhsehlaw atu cu a ther, Amah khuakhannak lila nih khan a thluk; ⁸ Sur chungah khan a lut i tlung kha aa lamh. ⁹ Rap nih a kedil in a foih i a val nih khan fek tein a hren. ¹⁰ Vawlei ah hri kha an valhhnawh, lam ah rap kha an chiahhnawh. ¹¹ Ṭihnak nih a kenkip in an chuahhnawh i a hnulei in an dawi lengmang. ¹² A rak ṭhawng ngaingai nain, atu cu ṭihnak in a zeng ko. A pawng in vanchiatnak nih a dirhnawh ko. ¹³ Zawtnak ṭha lo nih a pum cu a zual dih i a kutke hna cu an thu dih. ¹⁴ A inn chung i him tein a umnak hmun khan an hnuh i Thihnak Siangpahrang ṭihnung hmaiah khan an chuahpi. ¹⁵ A innchung ah khan zeihmanh a tang ti lo. A umnak ah khan kaat a phulh. ¹⁶ A hram cu tanglei ah a car i an nge cu cunglei ah a ro; ¹⁷ Amah hngalh camcinnak kha vawlei in a lo i vawlei cungah min a chia ta lo. ¹⁸ Amah cu ceunak in muihnak ah nam a si i minung umnak vawlei cungin dawi a si. ¹⁹ A mi hna lakah tefa siseh, ciruang siseh, a ngei hna lo; A rak umnak tawn vawlei ah khan a nung in a rohmi an um lo. ²⁰ Nitlaklei mi hna nih a kong an theih tikah an tuk a sum i Nichuahlei mi hna cu an thlakawk a bar hna. ²¹ Ṭhat lonak a tuahmi hna khuasaknak hmun cu cu bantuk cu a si i Pathian zei ah a rel lomi hna umnak hmun cu mah bantuk cu a si," tiah a ti.

¹ Cun Job nih a leh i: ² "Zei can dah bia in nan ka hrem lai i nan ka tongh lai? ³ Atu le atu ka ningzahnak nan tuah lengmang i Ka cungah ningzak loin ṭhat lonak kha nan tuah lengmang. ⁴ A palh hmanh hei palh ning law ka palhnak cu keimah cungah pei a si ko lai cu. ⁵ Sihmanhsehlaw nannih cu keimah nak ṭha deuh ah nan i ruat i Harnak ka inmi hi, a sual ruangah a si, nan ti. ⁶ Pathian hi ka cungah a ding lo i, Amah nih a sur in a ka khuh ti hi nan hngal kho lo maw? ⁷ Mah hihi lainawn a si, tiin ka au ah, ahohmanh nih an ka let lo, Ka bawm u, tiah ka ti ah, dinnak zeihmanh ka hmu lo. ⁸ Ka lam kha vampang a ka chonkanh i cucaah ka lan kho lo, Ka lam ah muihnak kha a chiah. ⁹ Ka sunparnak cu a ka hlih i ka bawi luchin cu ka lu cungin a lak. ¹⁰ A kamkip in a ka den i ka lo cang, Ka thlam hri cu thingkung bangin a phawi. ¹¹ A thinlinhnak cu ka cungah a alh in a alh i, A ral ah a ka chiah. ¹² A ralkap hna cu keimah tuk awkah a rak thlah hna, Kahcham kha an i cawh i ka thlam velchum in an ka riahhnawh. ¹³ "Ka unau hna nih an ka hlawt, Ka theihhngalh hna cu mising rumro ah an cang. ¹⁴ Ka phunhawi le ka hawikom ṭha nih an ka deuh; ¹⁵ Ka inn chung i ka hawileng hna nih khan an ka philh, Ka salnu hna nih khan khual ah an ka chiah, Kei cu an mithmuh ah ramdangmi ka si ko cang. ¹⁶ Ka sinum kha ka auh, sihmanhsehlaw a ka let lo; A nawl i ka nawl hmanh ah a ka let duh lo. ¹⁷ Ka thawchuah cu ka nupi caah hnahnawk a si i Ka unau hrimhrim hna caah khan fihnung ka si cang. ¹⁸ Ngakchia no tete hmanh nih an ka serhsat, ka thawh tikah an ka nihsawh. ¹⁹ Ka hawikom ṭha vialte nih an ka fih i ka dawtmi hna nih an ka ral. ²⁰ Ka ruh cu ka cuar lengah an fong i ka ha vun in ka luat. ²¹ "Ka cungah zaangfahnak ngei tuah u, Ka cungah zaangfahnak ngei tuah u, maw nannih ka hawile hna, Zeicahtiah Pathian kut nih a ka tawngh cang. ²² Zeicahdah nannih nih Pathian nih a ka dawi bantukin nan ka dawi? Zeicahdah ka sa cu nan vuai cang ko lo? ²³ Ka bia hi ṭial si hna seh law ka hei duh dah! Cauk chungah ṭial si hna seh law ka hei duh dah. ²⁴ Zungzal a hmun dingin thir cafung le suan in Lung cungah khenh si hna seh law ka hei duh dah! ²⁵ Zeicahtiah a ka Tlanhtu a nun kha ka hngalh i Ni hmanung bik ah cun vawlei cungah hin a dir lai; ²⁶ Cun ka cuar cu hrawh a si dih tikah ka titsa in Pathian cu ka hmuh lai. ²⁷ Amah cu ka mit hrimhrim in ka hmuh lai i Midang nih si loin keimah hrimhrim nih ka hmuh lai. ²⁸ "Nannih nih nan i thawh i, Harnak a rualrual in a cungah aa tlunter khih! Hi harnak an hram cu amah chungah khin pei a um cu,’ nan ti tikah hin ka lung a dong. ²⁹ Sihmanhsehlaw ṭhat lonak vialte a thianhtu vainam, nanmah lei a sawhmi kha ṭih tuah u, Khi tikah nannih nih Dingthlu Lairel a um ko, ti kha nan hngalh lai," tiah a ti.

¹ Cun Naamath mi Zofar nih a leh i: ² "Ka lungre a theih caah kan leh i cucaah khulrang in ka chim zaunak cu a si. ³ Na chimmi cu keimah zawmhtaihnak caah a si i nangmah lehnak cu ka hngalh ve ko lai. ⁴ Hlanlio piin mah bantuk hin a si zungzal ko i Vawlei ah minung a um hramthawk in, hi bantukin a si zungzal ko ti kha na hngalh: ⁵ Miṭhalo lawmhnak cu tawite lawng a si i Pathian zei ah a rel lomi thanuamnak cu caan tawite lawng a si. ⁶ A sanlei cu van tawng in, a lu nih vanrang khi phan hmanh seh law, ⁷ Amah ek bantukin a lo ṭhan ko lai; Amah a rak hmumi hna nih khan, ’Khuazei ah dah a um?’ an ti lai. ⁸ Mang bantukin a lo lai, zan i langhnak hmuhmi bantukin a lo lai. ⁹ A rak hmutu mit nih khan an hmu ti lai lo, Amah a hmun zong nih khan a hmu ti lai lo. ¹⁰ A fale hna nih khan, sifakmi hna sinin a firmi kha an cham ṭhan lai, A kut hrimhrim nih a lakmi chawva cu an khirh ṭhan hna lai. ¹¹ A ruh cu tlangval ṭhawnnak in a khat ko, Sihmanhsehlaw leidip ah a cang zau lai. ¹² "Ṭhat lonak cu a kaa chungah a thlum in a thlum i a lei tangah aa chiah, ¹³ Cun mah cucu chak duh loin a ka chungah aa hmawm, ¹⁴ Sihmanhsehlaw a rawl cu a paw chungah cun aa thleng i, a pum chungah cun rul sivai a khaa ngaimi ah a cang. ¹⁵ Rumnak cu a dolh i a luak ṭhan, Pathian nih a paw chungin a chuah ṭhan. ¹⁶ A dolhmi cu rul sivai bantuk a si; Cu nih cun ping-er cuk bantukin a thah. ¹⁷ Khuaihliti le cawhnuk khal in a luangmi tiva hna cu anih din awk an si lai lo. ¹⁸ A rianṭuan man theitlai hna cu dolh manh loin a khirh ṭhan hna lai i A chawlehnak miakmi in nuamhnak zeihmanh a hmu lai lo. ¹⁹ Zeicahtiah sifakmi kha a rial hna i a hrem hna, Amah nih a sak lomi inn kha a chuh hna. ²⁰ "A duhfahnak cu a riamh khawh lo caah A duhmi thil ah cun thlachiat a ruat kho lo. ²¹ A ei dih hna ah cun a tangmi zeihmanh a um ti lo, Cucaah a rumnak nih cun sau a nguh lai lo. ²² A rum siling te ah a thaw a pit lai, harnak ṭhawnnak vialte cu a cungah an tlung lai. ²³ Pathian nih a cungah a thinhunnak cu a tlunter ciammam i Harnak cu ruah sur in a surter. ²⁴ Vainam khan luat aa zuam tikah dar cantiang nih khan a rak thil lai; ²⁵ Tleu ziarzuar in a ummi a hna cu a hnit in a keng ah a tleng. ²⁶ A khonmi thil vialte kha a lo dih, Minung kaumi a si lomi mei nih amahle a innchungkhar vialte cu a kangh dih hna. ²⁷ Van nih khin a ṭhat lonak cu an phuan lai i Vawlei nih hin amah sualphawt awkah a tho lai. ²⁸ A inn chung i a ngeihmi thilri vialte cu tilian nih a fenh dih hna lai, Pathian thinhun ni ah cun an loral dih lai. ²⁹ Mah hihi miṭhalo nih Pathian sinin a hmuhmi covo cu a si, amah ca i ro a ruahpiakmi cu a si," tiah a ti.

¹ Cun Job nih a leh i: ² "Ka bia hi ṭha tein ka ngaihpiak hna u law, Mah cucu nannih nih nan ka hnemhnak cu si seh. ³ Hong ka ing ko u law ka chim lai, Cun ka chim dih hnuah, nan duh ahcun nan ka nihsawh te lai. ⁴ Kei cu ka phunzainak hi minung cungah maw a si? Zeicahdah thintawi loin ka um lai? ⁵ Ka zoh u law nan khuaruah har u, nan kaa kha nan kut in i hup u. ⁶ Ka cung i a tlungmi hi ka ruah tikah ka lung a dong i ka tha a ther, ⁷ Zeicahdah miṭhalo hi an chan a sau i an tar zongah an ngan a dam, an lian an ngan i an ṭhawn? ⁸ An tefa hna cu innlo fek in an um kha an hmuh hna i An hrinsor hna cu an mithmuh ah an ṭhangcho. ⁹ An innchungkhar hna cu fek ṭhepṭhup le him tein khua an sa i Pathian dinnak ṭhiangṭhunh nih cun a phan hna lo. ¹⁰ An cawtum nih lak loin ci an thlak hna i An cawpi nih fa an hrin hna i an hrulh bal lo. ¹¹ An ngakchia tete cu tuurun bangin an chuak i an lam. ¹² Tingtang le thonglawi tum in hla an sa i lawi aw ah cun an i lawm. ¹³ Rumnak in an chan cu an hman i daihnak in Sheol ah cun an vung kal. ¹⁴ Pathian sinah cun, ’Kan sinin i ṭhen ko, na lam hngalh kha kan duh lo,’ an ti. ¹⁵ Lianngan Bik cu an i thawh i, ’Ahodah na si i na rian kan ṭuan hnga cu? Na sin i thla kan cam ah zei miaknak dah kan hmuh?’ an ti. ¹⁶ Annih nih, kanmah thazang tein kan hlawh a tling, an ti, Sihmanhsehlaw annih ruahning cu ka cohlang kho lo. ¹⁷ "Miṭhalo cu a mei a mit bal maw? Vanchiatnak an tong bal maw? ¹⁸ Pathian nih a thinhun in miṭhalo cu dan a tat hna in, thlitu nih a choihmi capawl le thlichia nih a choihmi leidip bantuk ah a ser bal hna maw? ¹⁹ Nannih nih cun, ’An pale ṭhat lo ruangah Pathian nih an fale cu dan a tat hna,’ nan ti, Sihmanhsehlaw kei nih cun, ’A sualmi cu Pathian nih anmahte kha dantat ko hna seh law, cucu an sual caah a si, ti kha langhter ko seh,’ ka ti. ²⁰ An rawhnak cu anmah mit hrimhrim nih hmu seh law Lianngan Bik thinlinhnak cu anmah nih ding hrim ko hna seh. ²¹ Minung cu a nunnak a dongh tikah cun, a fale an run i lawmh le lawmh lo cu zei ah a rel taktak ti hnga maw? ²² Vancung i a ummi hna hmanh bia a ceihtu Pathian cu, Aho tal nih dah an cawnpiak khawh hnga? ²³ "Mi pakhat cu a rum saling ah, i nuam ngai le hnangam ngaiin a um lioah, ²⁴ A pum cu thau in a khah i a ruh chung thlek hna cu an hnin lioah a thi. ²⁵ Cun a dang pakhat cu, ngaihchia ngaiin, ṭhatnak kha tep bal loin a thi. ²⁶ Leidip chungah bangrep in an it i cangcel nih an khuh hna. ²⁷ "Na ruahmi le zeitindah a bia cu ka al khawh lai tiin bia alnak ding na timh cuahmahmi cu ka hngalh ko. ²⁸ ’Atu hi minganpa inn kha khuazei ah dah a si? Miṭhalopa inn kha tah zeidah a can cang hnga?’ tiin bia na ka hal lai cu ka hngalh ko. ²⁹ Khualtlawngmi kha na hal bal hna lo maw? Annih nih an chimmi kha na hngal lo maw? ³⁰ Pathian cu a thin a hun i mi kha dan a tat hna tikah, a luatmi cu miṭhalo ṭheo an si ko. ³¹ Miṭhalopa cu, aho nih hmaitonh in, na ṭha lo, an ti lo i a tuahmi kha aho nih an lehrul lo. ³² - ³³ Thlan i zawnh a si tikah, Mi tampi nih a hnulei he a hmailei he an zulh; Leidip kha a caah cun a thlum i Mi thong tampi nih a thlan cu an ven. ³⁴ Cucaah hnemhnak nan ka chimhmi hi, zeitluk in dah pakpalawng a si? Nan chimmi hi lih lawngte an si!" tiah a ti.

¹ Cun Teman mi Elifaz nih a leh i: ² "Minung hi Pathian caah san a tlai khomi an um hnga maw? A fimmi hmanh hi Pathian ca i san a tlaimi an um hnga maw? ³ Na din ah, na dinnak nih cun Lianngan Bik cu zeital a bawm maw? Na ziaza cu soi awk um lo a si ah tah, cu nih cun zeital a ṭhathnem maw? ⁴ Ka din caah a ka chimhhrin rua tiah i ruat hlah, Hi ruangah hin a ka hneksak rua ti zongah i ruat hlah. ⁵ Nangmah cu miṭhalo ngai na si i na sualnak hi dongh a hngalh lo. ⁶ Na unau nih an cawimi tangka ruangah khan a puan kha na chuh i aih awk zeihmanh ngei loin na chiah. ⁷ Tha baami kha din awkah ti na pe hna lo i rawl ṭammi kha rawl na sianh hna lo. ⁸ Cucaah vawlei hi miṭhawng mi hna ta lawng maw a si? Hmaizahmi mi tlawmte hna ram lawng dah a si? ⁹ Nuhmei cu kutro in na kalter hna i Ngakṭah hna cu chanhtu ngei loin na tuk hna. ¹⁰ Cucaah na velchum in rap a um i ṭihnak nih an tlunhnawh cu khuaruahhar awk a si lo. ¹¹ Ceunak cu mui ah canter a si i cucaah khua na hmu kho lo, tilian nih an khuh. ¹² "Pathian cu van ah khin a sannak bik ah a um a si lo maw? A sang bik arfi hmanh khi chuk zoh in a vun zoh hna. ¹³ Sihmanhsehlaw nang nih cun naa thawh i, ’Pathian nih zeidah a hngalh? Muihnak nih a tuam i biaceih khawhnak ah khua a hmu kho lai lo; ¹⁴ A chahmi khuadawm cu a mit nih a hlan kho hna lo i Van kuai cungah khin a kenkip ah aa chawk len ko,’ na ti. ¹⁵ Miṭhalo hna nih an zulhmi lam kha ruat hmanh, ¹⁶ An caan a tlin hlanah lak an si i an hram cu tilian nih a fenh hna. ¹⁷ Hi hna nih hin Pathian cu an thawh i, ’Kanmah tein um ko u sih, Lianngan Bik nih cun kan cungah zeidah a tuah khawh lai?’ an ti. ¹⁸ Asinain, an inn hna cu thil ṭhaṭha in a khahtertu cu amah a si Annih i an i tinhmi le anih i aa tinhmi cu an i dang ngaingai. ¹⁹ Miṭhalo mi hna cu dantat an si tikah Miding mi hna cu an i lawm i a sual lomi hna cu an ni. ²⁰ An ngeihmi thil vialte cu an rawk dih i An chawva vialte hna cu mei nih a kangh dih hna. ²¹ "Atu cu, Job, Pathian he khan remnak ser law, na ral ah rel ti hlah law thluachuahnak na hmuh lai. ²² Cawnpiaknak kha a ka in i lak law a bia cu na lung chungah i khon hna. ²³ Lianngan Bik sinah na kir ṭhan i na lung na ṭhumh i Na inn chungin dinlonak kha na dawi i ²⁴ Sui kha leidip bantuk ah na rel i Ofir sui kha tiva lung tekem bantuk ah na rel ahcun, ²⁵ Lianngan Bik hrimhrim cu na sui a si lai i Amah cu a chonh in aa chonhmi na ngun a si lai. ²⁶ Khi tikah Lianngan Bik cu naa bochan zungzal lai i Amah cu naa lawmhnak a hram a si kha na hngalh lai. ²⁷ A sinah thla na cam lai i an theih lai; Cun na biahrennak kha na tlinter hna lai. ²⁸ Ka tuah lai, tiah na timi paoh ah na hlawh a tling lai i Na lam ah ceunak a tlang lai; ²⁹ Zeicahtiah Pathian nih aa porhlawmi kha a ṭhumh hna i toidormi kha a khamh hna. ³⁰ Zeihmanh a sual lomi kha a chuah hna, Na kut a thian caah nangmah zong an chuah lai," tiah a ti.

¹ Cun Job nih a leh i: ² "Nihin zong ka phunzainak cu a fak ko, Aihram loin ka um kho lo. ³ Amah cu khuazei ah dah a um ti kha hngal kho in, A umnak ah khan zeitindah fuh khawh a si hnga ti kha hngal ning law cu ⁴ A hmaiah khan ka bia cu ka va chim hnga i Ka bia cu tlamtling tein ka va chim ko hnga. ⁵ A ka lehnak ding bia kha ka theih hnga i Ka sinah a chim ding bia kha ka hngalh hnga. ⁶ Keimah cu nam chih awkah a ṭhawnnakpi cu a hmang hnga maw? A hmang lai lo, ka bia cu a ka ngaihpiak deuh ko lai. ⁷ A hmaiah cun miding mi cu thiam an co tawn i Ka bia a ka ceihtu bawi sin cun luatnak taktak ka hmuh ve ko lai. ⁸ Hmailei i ka kal ah, khika ah a um lo, Hnulei i ka kal ah ka hmu kho fawn lo; ⁹ Kehlei i ka kawl ah ka hmu kho lo, Orhlei i kaa mer ah ka hmu kho fawn lo. ¹⁰ Sihmanhsehlaw ka ṭuan ah siseh, kaa dinh ah siseh, a ka hngalh ko, A ka hneksak dih tikah, sui ka si kha a lang. ¹¹ A lam kha ka ke nih fek tein an zulh, a lam kha ka zulh i ka pial lo. ¹² A hmur in a chuakmi nawlbia kha zeirello in ka um hna lo i Ka lung chungah a kaa chuak bia kha ka khon hna. ¹³ Amah cu thlen khawh lo a si i aho nih dah an mer khawh lai? A duhmi cu a tuah ko. ¹⁴ Ka ca i aa tinhmi cu a tlinter lai, Cu bantuk tinhmi tampi cu a lung chungah a um. ¹⁵ Cucaah amah ton cu ka ṭih i amah kong ka ruah tikah ka thin a phang. ¹⁶ Pathian nih ka lung kha a ka derter, Lianngan Bik nih ka thin a ka phanter. ¹⁷ Muihnak kha ka mit a ka cawttertu a si nain, ka thin a ka phantertu cu muihnak kha si loin Pathian kha a si.

¹ Zeicahdah Lianngan Bik nih biaceih caan cu a khiah lo i amah a rianṭuantu hna caah dinnak in biaceih ni kha a chiah lo? ² Miṭhalo nih ramri lung kha an ṭhial i tuu kha an fir hna i anmah tuurun chungah an fonh hna. ³ Ngakṭah kha an laa an chuh hna i nuhmei kha an leiba a cham hlantiang an cawtum kha an hren. ⁴ Sifakmi kha lamthlang ah an en hna, mirethei kha an zam i an i thup. ⁵ Cucaah misifak cu thetse ram ah rawl kawl in a vak lengmangmi laa bantukin tuan tein a tho, Sihmanhsehlaw khuamuih tiang a ṭuan nain a fale cu rawl ṭam in an um ko. ⁶ Anmah ta a si lomi lo ah khan rawl an ṭuan i Miṭhalopa dum chungah khan mitsur thei lawh rian an ṭuan. ⁷ Zan khuadei taklawng in puan loin an it, Khuasik ah vorh awk puan an ngei lo. ⁸ Tlang cung ruah nih a surh hna i an cin dih, Dornak a um lo caah lungpi ah an i bek. ⁹ Ngakṭah kha miṭhalo nih sal ah an ser hna i Misifakpa a fa kha a leiba caah an tlaihpiak. ¹⁰ Pumlawng in, puan loin, rianṭuannak ah an kal, Rawlṭam in faphal kha an thiar; ¹¹ Miṭhalo mi hna oliv kung tlar lakah khan oliv chiti an sur, Mitsur cu an nen, sihmanhsehlaw an ti a hal. ¹² A thi cuahmahmi hna cu khuapi chungin an hrum an ai i Hliammi hna cu bawmhnak hal in an au; Sihmanhsehlaw Pathian nih an thlacamnak cu zeihmanh ah a relpiak hna lo. ¹³ Chun ceunak kha a doh i a lam kha a hngal lo i Ceunak lam ah khan a um duh lomi an um. ¹⁴ Lainawng cu sifak le retheimi kha thah awkah ceu hlan in a tho; ¹⁵ Mi nupi a sualtu nih cun khuamuih kha aa caan i, ’Aho nih an ka hmu lo,’ tiah a ruah. ¹⁶ Zan ah mifir cu a vak i a hmai cu hlennak in aa khuh, Chun i aa chingchiah ciami inn kha zan ah cun a bauh hna. An dihlak in ceunak a hngal lomi an si, ¹⁷ A muimi zan cu an caah zingka a si, Zeicahtiah annih cu a thukmi muihnak hawikom kha an si. ¹⁸ "Cu bantuk mi hna cu ti cung i buanbara bantuk an si; An comi hmun cu chiatserhmi hmun a si i an mitsur lo ah ahohmanh an kal duh lo. ¹⁹ Carnak le linhnak nih hawhra ti cu an kaoter hna, Cu bantukin a sualmi cungah Sheol nih a tuah ve. ²⁰ Ahohmanh nih amah cu an hngal ti lo, a nu hmanh nih a hngal ti lo; Tholung nih an ei i a rawk dih cikcek. ²¹ Zeicahdah hi bantukin a si ti ahcun, nuhmei kha a bawm duh hna lo i fahring lo nu kha a zaangfah hna lo caah a si. ²² Sihmanhsehlaw Pathian nih a ṭhawnnak in a ṭhawngmi kha a thah hna i Pathian nih a ṭuan tikah cun miṭhalo mi cu an thi. ²³ Pathian nih him tein khua a sakter ko hna, Sihmanhsehlaw ṭha tein a ngiat zungzal hna. ²⁴ Caan tawite chung miṭhalo cu hlorh an hung si, sihmanhsehlaw an lo zau; Pangpar bantukin an car i an ziam; rawl vui bantukin hleh an si. ²⁵ Mah hihi a si lo, tiah a ti khotu aho tal an um maw? Ka bia cu ahmaan lo, tiah a ti khotu an um maw?" tiah a ti.

¹ Cun Shuh mi Bildad nih a leh i: ² "Pathian cu zeizong vialte tuah khotu a si, A pennak vancung ah khin daihnak a umter. ³ A ralkapbu hna cu aho nih dah an rel cawk hna lai? Pathian ceunak nih a ceuh lomi hmun a um maw? ⁴ A si ahcun, zeitindah Pathian hmaiah minung cu a din khawh lai? Nu chungin a chuakmi cu zeitindah a thian khawh lai? ⁵ Zohhmanh, a mithmuh ah thlapa hmanh khi a tling lo i arfi hna hmanh khi sual lo an si lo; ⁶ Zeitluk in dah tholung ceo a simi minung cu a si chinchin lai i, Cangcel ceo a simi mifapa cu a si chinchin lai," tiah a ti.

¹ Cun Job nih a leh i: ² "Ṭhawnnak a ngei lomi cu na hei ka bawmh thiam dah! Thazang a ngei lomi cu na hei ka luatter thiam dah! ³ Zei ti awk a hngal ti lomi cu na hei ka fimter thiam dah, Na ruahnak cheuhmi cu mihrut mi caah a hei ṭha thiam dah! ⁴ Aho nih dah mah bantuk bia chim cu an forh i Na chimmi bia ah cun aho thlarau dah a lang? ⁵ Tanglei vawlei ah cun thladem hna cu a ther in an ther i Ti le a chung i a ummi thil vialte hna cu an thin a phang. ⁶ Sheol cu Pathian hmaiah cun taklawng in a um i Abaddon cu a khuhnak a chin kha hun a si. ⁷ Pathian nih van puan cu pakpalawng cungah khin a zam i Vawlei cu zeihmanhlo chungah a thlai. ⁸ A chahmi khuadawm chungah ti cu a fun hna i a rit nain khuadawm cu an i cheu lo. ⁹ Thlapa hmai cu a huh i a cungah cun a khuadawm kha a zamter. ¹⁰ Ti cungah khan, ceu le mui ramri ah khan, a bial in a rin. ¹¹ Van tung hna cu an ther, a sik hna i ar koin an um. ¹² A ṭhawnnak in rili rulpi kha a cheu, a thiamnak in Rahab kha a thah. ¹³ A thaw in van kha a thianter i a zammi rulpi cu a kut in a chunh. ¹⁴ Zohhmanh, mah hihi a ṭhawnnak tlangri ceo an si rih, Amah kong kan theihmi cu zeitluk in dah a tlawm! A ṭhawnnak khuari chinchin cu aho nih dah a hngalh khawh lai?" tiah a ti.

¹ Cun Job nih a biachimmi kha a thawh ṭhan i: ² "Dinnak a ka phaw duh lo i lungretheihnak in a ka khahtertu Lianngan Bik Pathian min in chiat ka ser: ³ Ka thaw cu ka chungah a um i Pathian thaw kha ka hnar chungah a um chung paoh ah cun, ⁴ Ka hmur nih ahmaan lomi bia kha an chim lai lo i ka lei nih hlennak bia kha a chim lai lo. ⁵ Nangmah cu na dik, tiah kan tinak ding kha, Pathian nih ka kham ko seh; Ka thih tiangin, ka sual lo, ka tinak kha ka ngol bal lai lo. ⁶ Ka bia a ding ti kha fek tein kaa tlaih lai i, ka thlah bal lai lo; Ka nun chung paohpaoh ahcun, kaa thleng bal lai lo. ⁷ "Ka ral cu miṭhalo hna nih an tonmi bantuk kha tong ko seh, Keimah a ka dohtu cu miding lo nih an tonmi bantuk rawhnak kha tong ko seh. ⁸ Pathian nih Pathian zei i a rel lomi cu a thah tikah, Pathian nih a nunnak a lakpiak tikah khan, A caah zei ruahchannak dah a um? ⁹ Harnak nih a tlunhnawh tikah Pathian nih a thlacamnak cu a ngaihpiak lai maw? ¹⁰ Lianngan Bik cu aa bochan hnga maw? Pathian cu a au camcin hnga maw? ¹¹ "Pathian thil ti khawhnak kha kan chimh lai, Lianngan Bik nih aa tinhmi cu ka thup lai lo. ¹² Nanmah hrim nih hi thil hi nan dihlak in nan hmuh cang hna ahcun, Zeicahdah pakpalawng bia hi nan chim lengmang kun? ¹³ "Pathian nih miṭhalo covo ah a chiahmi cu hihi a si, Thlachiat ruat lomi nih Lianngan Bik sinin an hmuhmi ro cu: ¹⁴ Fa cu a ngeih ko hna lai, sihmanhsehlaw vainam in an thi lai; Cun a tefa hna cu rawlṭam in khua an sa lai. ¹⁵ Amah hnuah a nung rihmi hna cu thlan ah rai nih a vui hna lai i nuhmei ahohmanh nih an ṭah hna lai lo. ¹⁶ Ngun cu leidip bantukin a pon ko hna lai i, Thilpuan cu a ponpon in a chiah ko hna lai nain, ¹⁷ Aa hruk-aihtu cu miding kha an si lai i, Sualnak a ngei lomi nih a ngun cu an i phaw lai. ¹⁸ A sakmi inn cu sawmpalak bu bantuk a si i, Ralvengtu nih an sakmi deu bantuk a si. ¹⁹ Ni khat cu rum ngaiin a it, sihmanhsehlaw cu bantuk cu a si ṭhan bal ti lo; A mit cu a hun i au i a chawva cu an lo dih cang. ²⁰ Harnak nih tilian bangin a phanh, zan ah phuchim nih a choih. ²¹ Nichuahlei thli nih a choih i a lo, a inn in lamhlapi ah khan a choih; ²² Zaangfahnak um loin a hranh i a ṭhawnnak nih khan heh tiah a den chih. ²³ A kut a benghhnawh i a umnak hmun kip ah khan therphang in a umter.

¹ "Ngun cawhnak khor an um i mi nih sui an ernak hmun a um; ² Thir cu vawlei in an lak i dar cu lung chungin an tit. ³ A thap a donghnak cu a muihnak tiang a phan i a dongh khitkhet tiangin an kawl. ⁴ Mi umnak hmun in a hlami nelrawn ah khor an cawh hna; Annih cu khualtlawngmi nih an philh hna, Mi he aa hlatnak ah an i thlai i khattelei in khattelei ah an i vawr. ⁵ A cung i vawlei in rawl kung an kho i a tang vawlei cu mei a kangh bantukin aa let. ⁶ A lung chung cun lapis lazuli lungvar kha an chuak i sui pan tete nih khan a tuam hna. ⁷ "Cuka lei kalnak lam cu cawihmang va zeihmanh nih an hngal lo i mupi mit zong nih a hmu bal lo; ⁸ Aa porhlawmi saram nih an lam lo i rul nih a tan bal lo. ⁹ "Minung nih ṭeklung pipi cu an kuai hna i tlang pipi cu a hram in an leh dih hna. ¹⁰ Lungpang chungah khan kahcham an cawh hna i a sungmi lungphun kip kha an mit nih a hmuh. ¹¹ Tiva kha an kham hna i vawlei tang i a ummi thil kha lengah an chuah hna. ¹² "Sihmanhsehlaw khuazei ah dah fimnak cu hmuh khawh a si lai? Hngalhthiamnak a hram cu khuazei ah dah a si? ¹³ Cuka kalnak lam cu mi nih an hngal lo i a nungmi ram ah hmuh a si lo. ¹⁴ Rili thuk nih, ’Ka chungah a um lo,’ a ti, Rili te nih, ’Ka sinah a um lo,’ a ti. ¹⁵ Sui in cawk khawh a si lo i a man cu ngun in thlai khawh a si lo. ¹⁶ Ofir sui in a man tuak khawh a si lo i Oniks le lapis lazuli lungvar zongin tuak khawh a si lo. ¹⁷ Sui le thlalang nih an tluk kho lo i Sui thiang hlawn zong nih a thleng kho lo. ¹⁸ Koral lungvar le alabaster lungvar hna cu chim awk tlak an si lo; Fimnak cu lungvar man sung nakin a cungnung deuh. ¹⁹ Ethiopia ram topaz lungvar nih a tluk kho lo i Sui thiang zongin a man tuak khawh a si lo. ²⁰ "A si ahcun, fimnak cu khuazei in dah a rat kun? Hngalhthiamnak a hram cu khuazei ah dah a si kun? ²¹ Vawlei cung i a nungmi thil ah a hmu khotu an um lo i Thli lak i a zuangmi va hna zong nih an hmu kho lo. ²² Thihnak le Rawhralnak nih an i thawh i, ’A kong hi biachawkvai lawngin kan theih,’ an ti. ²³ "Sihmanhsehlaw cuka kalnak lam cu Pathian nih a hngalh i Amah lawnglawng nih a hram cu a hngalh. ²⁴ Zeicahtiah vawlei deng tiang khan a hmuh khawh i Van tang i a ummi thil vialte kha a hmuh dih hna. ²⁵ Thli cu a rihnak a pek i ti cu tahnak in a tah hna i ²⁶ Ruah caah phung le lam kha a ser hna i Khuari nimtlau cu lam a serpiak hna tikah khan; ²⁷ Kha caan hmanh ah khan fimnak cu a rak hmuh cang i A man a rak tuak cang i a rak thlai cang. ²⁸ Cun minung cu a thawh i, ’Zohhmanh, Pathian ṭih hi fimnak cu a si, ṭhat lonak hrial hi hngalhthiamnak cu a si,’ tiah a ti," a ti.

¹ Cun Job nih a biachimmi cu a thawh ṭhan i: ² "Maw, hlan lio thla hna chung i ka rak um bantuk khan um ning law ka hei duh dah! Pathian nih a rak ka zohkhenh lio caan i ka rak um bantuk khan; ³ Ka lu cung i a meiinn a rak ceu i cu ceunak thawng i mui lak i ka rak kal khawh bantuk khan; ⁴ Ka chan lailing i ka rak si bantuk khan; Pathian nih ka inn cu a rak huhphenh i ⁵ Lianngan Bik cu ka sinah a rak um i ka salle hna cu ka pawngkam ah an um i, ⁶ Ka lam cu cawhnuk in an luan i Lung chungin chiti an rak puut lio bantuk kha si kho ning law ka hei duh dah! ⁷ Khua hauka i ka va kal i zapi ṭhutnak hmun i ka va ṭhut tikah khan, ⁸ Tlangval hna kha an ka hmuh tikah an kim i upa hna kha an tho i an dir; ⁹ Bawi hna kha holh an i sum i an kut in an kaa an i hup; ¹⁰ Tuavon hna aw kha a dai i mi kip nih holh loin an um. ¹¹ "Ka kong a theimi paoh nih ka ṭhatnak lei in an rak chim, A ka hmumi paoh nih ka ṭhatnak tehte ṭha an rak si. ¹² Sifakmi kha bawmh herh in an au tikah ka bawmh hna i, Chanhtu ngei lomi ngakṭah kha ka chanh hna. ¹³ A thi dengmangmi nih a thangṭhatmi cu keimah ka rak si i, Nuhmei, lunglawmhnak in hla a saktertu cu keimah ka rak si. ¹⁴ Dinnak cu puan bantukin kaa aih i, Biading cu ka caah puan le ludomh bantuk an rak si. ¹⁵ Mitcaw hna caah mit ka rak si i, Kebai hna caah ke ka rak si. ¹⁶ Sifakmi caah an pa ka rak si i, Khual kha an bia ka rak chimpiak hna. ¹⁷ Miṭhalo mi hna cu an hao kha ka rak thlongh hna i, An ha in an i sehmi kha ka rak chuh hna. ¹⁸ Khi tikah, ’Ka lianhngannak cu zor lo tein ka thi lai i, Ka chan chung ni hna cu thetse zat in relcawklo an si lai; ¹⁹ Ka hram cu ti leiah khan a zam lai i ka nge cungah khan dapti an um lai; ²⁰ Kaa tlaihmi ka likuk cu a thar zungzal lai i, Ka kut chungah thal cu timh cia in an um zungzal lai,’ tiah ka rak ruah. ²¹ "Zeidah a chim lai ti tein an ka ngaih i, A ruahnak kha zeidah a si hnga tiin dai tein an ka ngan. ²² Ka chim hnuah ahohmanh nih an chim ṭhan ti lo, Ka bia cu an cungah nem tein a tla. ²³ Ka bia cu ruah an hngah bantukin an hngah i, Ṭhal ruah an din bantukin an din ²⁴ Ka merhhnawh hna tikah an lung a ṭhawng i, Ka mithmai ceu kha an hmuh tikah an hmaichiatnak kha a lo. ²⁵ An haotu bik ah ka ṭhu i an kalnak ding lam kha ka khan, Ralkap hna he a riakmi siangpahrang bantukin khan. Ngaihchiami hna a hnemtu bantuk zong ka si.

¹ "Sihmanhsehlaw atu cu keimah nakin a no deuhmi hna nih cawhdeh awkah an ka nih, An pale hna cu ka tuurun cawngtu uico hna tluk fang i ka rak relmi an hei si ko ṭung hnga. ² Annih cu an tha a ṭum cang caah a ṭhawngmi an baan cu ka caah zeidah an ṭhathnem? ³ Rawlṭam in der fialfual in thetse ram i thinghram kha an teuh; ⁴ Rawl caah cite kung le hlingkung hnah kha an ṭawh hna i hmunphiah kung hram kha an cawh hna. ⁵ Minung sinin dawi an si i mifir bantukin auhnawh an si; ⁶ Horkuang chung le vawlei kua chung le lungpang kua chungah khua an sa. ⁷ Saram bantukin burbuk chungah an ai i hlingbur toiah an i pum, ⁸ Zeiruaramlo tefa rual, minung sinin ṭhawlmi an si. ⁹ "Sihmanhsehlaw atu cu hi hna hi hla a ka sakhnawhtu kha an si cang i Khua chung i mi kip ceihmi i a ka sertu cu an si. ¹⁰ An ka huat i an ka hrial, ka hmaiah cil hmanh an ka chak ngam. ¹¹ Pathian nih ka liza cu a dorh i a ka ṭhumh caah, Ka hmai i an i sum tawnnak kha an hlonh cang. ¹² Ka orhlei kam in a bu in an ka nam cutmat, Raltuknak chuntlung an ka serhnawh, ¹³ Keimah hrawh awkah ka ralhau kha an chimh hna i dawntu zeihmanh um loin an ka kaihnawh. ¹⁴ A awnnakpi cun an rung lut i a ril in an rung ril lulhmalh. ¹⁵ Ṭihnung nih khan an ka tlunhnawh chin luaimai i Kaa ruahchihmi kha thlitu choih bangin a choi i Teinak kaa ruahchanmi cu minmei bangin a ṭian. ¹⁶ Cucaah ka si a vang i ni fate in harnak nih a ka tlaih. ¹⁷ Zan ah fahnak nih ka ruh a ka ṭam i a ka teuhtu fahnak kha dinh a hngal lo. ¹⁸ Ka puan in fak piin a ka tlaih i ka angki hngawng in thaw chuah kho loin a ka reh. ¹⁹ Pathian hrimhrim nih nawncek chungah a ka hlonh i leidip le vutcam bantuk ah ka cang. ²⁰ "Nangmah cu kan auh i na ka let lo, Zaangfah hal awkah kan dirhnawh i, zeihmanh ah na ka rel fawn lo. ²¹ Ka cung i harnak tuah awkah na ka merhnawh i Huatnak in ka cung i harnak tuah awkah na ka zulh lengmang; ²² Na ka tlaih i thlitu lakah na ka ṭhutter i Thlichia nih heh tiah a ka den. ²³ Minung a simi paohpaoh ca i na chiahmi hmun, thihnak ah cun na ka kalter lai ti kha ka hngalh. ²⁴ Sihmanhsehlaw a kut a zaomi awkhlawh ka bawmh lomi hna an um lo. ²⁵ Harnak a tongmi hna caah khan ka ṭap tawn lo maw? Sifakmi caah khan ka ngaih a chia tawn lo maw? ²⁶ Sihmanhsehlaw ṭhatnak ka kawl tikah chiatnak a ra, Ceunak ka hngah tikah muihnak tu a ra. ²⁷ Ka thin hi a vamh in aa vam i a dai ziar bal lo; Harnak ni hna cu keimah ton awkah an ra. ²⁸ Hnabeidong le hawikom zeihmanh ngei loin kaa chawk ko, Mi zapi pumhnak ah ka dir tikah, bawmhnak hal ceo ah a si ko. ²⁹ Ram ui cu ka unau a si ko cang, ostrik va cu ka hawi a si ko cang. ³⁰ Ka cuar cu an nak dih i an kok, ka pum cu ni lin nih a ka kangh. ³¹ Ka tingtang cu ngaihchiatnak hlasaknak ah an cang i Ka thonglawi cu a ṭapmi hna aw he aa tlak in tum a si cang.

¹ "Ka mit kha, ngaknu na ngia hrimhrim lai lo, tiah ka ti. ² Cunglei i a ummi Pathian sinin ka covo cu zeidah a si lai i Cungsang i a ummi Lianngan Bik sinin ka ro cu zeidah a si lai? ³ Vanchiatnak nih hin miding lomi a tlunhnawh hna lo maw? Chiatnak nih hin ṭhat lonak a tuahtu a tlunhnawh hna lo maw? ⁴ Sihmanhsehlaw Pathian hrimhrim nih ka lam kha a zoh hna in ka ke hlan vialte kha a rel dih hna lo maw? ⁵ "Lih in rian ṭuannak ah kaa tel lo i hlennak lam kha ka zul lo," tiah chiat ka ser. ⁶ Pathian nih dinnak cuaithlainak ah cun ka thlai seh law ka sual lo kha a hngalh ko lai. ⁷ Lam khan ka ke hlan cu a pial i ka lung nih ka mit kha a zulh i ka kut ah hin hnawm aa benh ahcun, ⁸ Ka tuhmi cu midang nih ei hna seh law ka cinthlakmi cu phawi si ko seh. ⁹ Cun nu dang nih ka lungthin kha a ka lak i ka innpa innka in ka hngah ko a si ahcun, ¹⁰ Ka nupi cu midang sal ah cang seh law midang nih ihpi ko hna seh. ¹¹ Sihmanhsehlaw cucu thil ṭha lo, phung hmai i sualnak, ¹² Ka cinthlakmi vialte a kangh i a hrawk dihtu ding mei a si. ¹³ Ka salpa siseh, ka salnu siseh, ka cung i an phunzai tikah an bia ka lakpiak hna lo ahcun, ¹⁴ Pathian a langh tikah zeidah ka tuah kun lai? Biahalnak a ser tikah zei in dah ka leh lai? ¹⁵ Paw chung i a ka sertu nih cun anmah cu a ser ve hna lo maw? Pathian pakhat nih paw chungah a kan ser cio a si lo maw? ¹⁶ Sifakmi nih a duhmi kha sian loin ka um i nuhmei mit kha ka zetter i, ¹⁷ Ngakṭah kha pek ve loin keimah lawng nih ka rawl kha ka ei i — ¹⁸ A ngakchiat lio tein a ka upatmi ngakṭah, a chuahka in ka zohkhenhmi kha — ¹⁹ Puan ngeih lo ruangah a thimi ka hmuh i, i aih awk a ngei lomi misifak ka hmuh i, ²⁰ Cu pa cu ka tuuhmul in lumnak a hmuh lo caah amah nih cun thluachuahnak hmu ko, a ka ti lo ahcun, ²¹ Zung ah mi nih an ka bawmh sawk lai tiin ngakṭah cungah ka kut ka hler ahcun, ²² Ka liang hi a hram in tlong seh law Ka ban cu a hliahhlok in i phawi seh. ²³ Pathian ṭihnak cu ka cungah a um i a lianhngannak cu ka ṭih caah hi thil cu ka tuah ngam hna lo. ²⁴ Rumnak kha kaa bochan bal lo i, thilri in ka rumnak ah uarthlarnak zong ka ngei lo. ²⁵ Ka chawva a tam caah le ka rumnak a karh caah kaa lawm i ²⁶ Ni cu a tlan tikah ka zoh i thlapa cu a sunparnak in a kal tikah ka zoh i, ²⁷ Ka lung cu a pingah kalpi a si i anmah upatnak in ka kut ka hler hna ahcun, ²⁸ Hi hna hi, biaceihtu hna nih dan an tat awk ṭhat lonak an si ko hnga, Zeicahtiah cunglei Pathian sinah zumh awk tlak loin ka rak um a si hnga. ²⁹ Ka ral nih fahnak an in tikah kaa lawm bal lo, rawhralnak an ton tikah, diriam in ka um bal lo; ³⁰ An thih nakhnga tiin thlacamnak in sualnak ka tuah bal lo. ³¹ Ka sin i rian a ṭuanmi dihlak nih, khualtlung ka donh bal hna lo le ³² Khualtlawngmi kha ka inn chungah ka riahter hna i khualak lam ah ka riahter bal hna lo kha an hngalh. ³³ - ³⁴ Zapi congoih kha ṭih in ka minung hawi nihsawh kha ka phan caah Midang nih ṭhat lonak an tuahmi an thuh bangin ka thup bal maw? Ka sualnak cu keimah theih awk lawngah ka chia bal maw? ³⁵ Keimah chanhtu dingah tehte pakhat lawngin i kawh ko ning. Lianngan Bik nih taza a ka cuainak cu chim ko seh. Sual a ka puhtu nih a ka puhnak bia kha ca in rak ṭial seh law cu, dai tein ka rak um hnga lo i inn chungah ka rak i benh ko hnga lo. ³⁶ Ka liang in ka rak i put hnga i bawi luchin bantukin ka rak i chinh hnga; ³⁷ Ka rak umtuning vialte kha ka chim hnga i Cucu zung ah khan keimah chanhnak ding caah ka chim hnga. ³⁸ Ka vawlei nih khan keimah cu a ka chalh i a lei rinkuar hna nih khan an ṭahpi i, Man pek loin a chung chuakmi thil kha ka ei hna i ³⁹ Tangka a ka coihtu kha lungsi loin ka tuah hna ahcun, ⁴⁰ Changvut can ah hling kho hna seh law barli can ah belh kho ko hna seh," tiah a ti. Job bia cu an dong.

¹ Job nih amah aa hmuhnak ah cun miding ka si aa ti peng caah hi mi pathum hna nih hin a bialeh cu an ngol. ² Khi tikah Buz mi Barakhel fapa Elihu, Ram innchungkhar chung mi a simi kha a thin a hung. Job cungah cun a thin a hung, zeicahtiah Pathian nakin amah kha a ding deuh ah aa ruat i cun ³ Job hawile pathum hna cung zongah khan a thin a hung, zeicahtiah Job cu na palh tiah an ti nain lehnak an hngal lo i Pathian lehlam kha a palh an lawhter. ⁴ Annih cu amah nakin upa deuh an si caah Job sin i bia an chim ah khan Elihu cu chim loin aa sum. ⁵ Sihmanhsehlaw an pathum in an let kho lo ti kha a hmuh tikah a thinhunnak kha aa sum kho ti lo. ⁶ Cucaah Buz mi Barakhel fapa Elihu nih cun aa thawh i, "Kei cu kum in a nomi ka si i nannih cu upa nan si, Cucaah kaa sum i nan hmai i ka hngalhnak langhter kha ka ṭih. ⁷ Keimah le keimah cu, ’Kum le khua a saumi nih chim ko hna seh, chan a saumi nih chim ko hna seh,’ kaa ti. ⁸ Sihmanhsehlaw Pathian thlarau cu minung chungah a um i Lianngan Bik thaw nih hngalhnak cu a pek hna. ⁹ Upa lawng hi a fimmi an si lo i a dik a hngalmi hi a tarmi an si theng lo. ¹⁰ Cucaah cun, ka bia hi ngai tuah u, kei zong ka ruahnak ka chimter ve tuah u, ka ti. ¹¹ Zohhmanh u, chim awk nan i dahhriah lengmang lioah khan nan bia kha kan ngan hna i Nan ruahnak aphichuak zeidah a si lai ti kha ka ngaih. ¹² Aphi nan chuahmi kha ṭha tein ka rak ngaih, Sihmanhsehlaw Job cu a dong khotu nan um lo i a bia a let khotu zong nan um lo. ¹³ Cucaah kanmah nih fimnak cu kan hmuh cang, ti hlah u. Minung nih si loin Pathian nih a leh lai. ¹⁴ Nanmah bantukin bia thiam kaa tim lai lo, nan lehning in leh zong kaa tim lai lo. ¹⁵ Hi mi hna hi an hnabei a dongh i let kho ti loin an um i zeihmanh chim awk ngei loin an um i, ¹⁶ Holh awk an theih ti lo caah hin, chim loin maw ka um rih ko lai? An dir ko i an leh ti lo caah ka ngan ko lai maw? ¹⁷ Kei zong leithuan awk ka ngei ve, ka ruahnak cu ka langhter ve lai. ¹⁸ Zeicahtiah bia in a khah in ka khat i ka chung thli nih a tawn in a ka tawn. ¹⁹ Zohhmanh, ka lung cu thawchuahnak awng a kawlmi mitsur hang bantukin a um i Saphaw zucua thar bangin keh hnik aa zal. ²⁰ Damnak ka hmuh nakhnga ka chim lai, Ka ka cu ka an lai i ka leh lai. ²¹ Duhdanhnak kha aho cung hmanh ah ka ngei lai lo i Pathian siseh, minung siseh, ahohmanh ka fak hna lai lo. ²² Zeicahtiah fak cu ka thiam ṭung lo i a ka Sertu nih a ka donghter zau sual hnga.

¹ "Atu cu Job, ka chimmi hi thei tuah, ka bia vialte hi ṭha tein ngai tuah hna. ² Zohhmanh, nangmah lehnak cu timh cia in ka um ko; Bia cu ka lei par ah an um ko. ³ Hngalh bu tein ka chim kha ka lung nih a hngalh i Ka hmur nih an hngalhmi cu hmaan tein an chim. ⁴ Zeicahtiah Pathian thlarau nih a ka ser i Lianngan Bik thaw nih nunnak a ka pek. ⁵ Na ka leh khawh ahcun ka let tuah, Ka hmaiah na bia cu a ningcang tein tiang tuah hna; Na dir hmun i serh tuah. ⁶ Pathian mithmuh ahcun, kei zong nangmah bantukte ka si ko; Tlak pei khat ceo ka si ve ko. ⁷ Na ka ṭihnak nih na thin an phanter awk a herh lai lo, Ka kut nih an nenhnak zong na cung i a rih awk a herh lai lo. ⁸ Na chim awk hnga vialte cu na chim cang i ka theih cang; Na bia thawng cu ka theih cang hna: ⁹ ’Ka thiang, sualpalhnak ka ngei lo, soiselnak ka ngei lo i ṭhat lonak ka chungah a um lo. ¹⁰ Sihmanhsehlaw Pathian nih a palh ah a ka chiah tawn i a ral ah a ka rel; ¹¹ Ka ke cu hreng a khenh hna i ka tuahmi vialte cu a ngiat dih hna,’ na ti. ¹² "Zohhmanh, hihi kan lehnak a si lai: Na palh. Pathian cu mi nakin a ngan deuh; ¹³ Zeicahdah, ka bia cu zeihmanh a ka let lo, tiin amah cu na mawhchiat len ko? ¹⁴ Amah cu a let khomi ahohmanh an um ṭung lo. Asi, Pathian nih voi khat a chim hnuah cun, cu a chimmi fehter ṭhannak caah a voi hnihnak a chim ṭhan ti ṭung lo. ¹⁵ Mang ah, zan i langhnak an hmuhmi ah, Mi cung i mitkuh thu a tlun tikah, An ihkhun cung i an i hngilh hluahmah lioah, ¹⁶ Khi tikah mi cu Pathian nih an hna kha a hunpiak hna i Ralrinnak a pekmi hna nih an thin a phanter hna. ¹⁷ - ¹⁸ A thi khomi minung cu aa porhlawtnak kha kham awkah le Khor chung i vung tlak ding khan tlaih awkah le Thihnak tiva tan donh awkah khan Nuncan ṭhalo i a nunnak khan a merter. ¹⁹ Minung cu a ihkhun cung i fahnak a inmi le A ruh chung i fahnak a hmuhmi zongin chimhhrin a si tawn; ²⁰ Rawl kha a fih i a mertak i A or nih rawl thaw bikbik hmanh kha a duh hna lo. ²¹ A titsa cu uai hnianghnuang in a um i a ruh hna cu an i liklok dih. ²² A thlarau cu Khor a phan dengmang i A nunnak cu thihnak a phortu hna sin kha a phan dengmang. ²³ Sihmanhsehlaw amah caah vancungmi pakhat, thong khat lak i pakhat, Pathian le minung karlak i remnak sertu a um i, Minung nih ṭhatnak a tuahmi kha a langhter i, ²⁴ A thi khomi minung cu a co awk hnga kha petu ding a um ahcun, ’Leet ṭhan ko, Khor chungah cun vun kalter hlah, A tlanhnak man cu ka hmuh cang,’ a titu a um ahcun, ²⁵ Cu pa cu a tlanval lio nakkhan a titsa a ṭha deuh lai i a ṭhawn siling te ah khan a kir ṭhan lai. ²⁶ Cun Pathian kha ka zaangfah ko tiah a nawl i Na hmai kha ka hmuhter law lawmhnak in ka au lai, tiah a nawl ahcun, ²⁷ Cun mi vialte hmaiah, ’Ka sual cang, Dinnak kha dinlonak ah ka ser cang i cucu ka rak ruat bal lo,’ a ti ahcun, ²⁸ Khor chung i vung kalnak khan aa khamh i a nung i ceunak kha a hmu. ²⁹ Hi thil vialte hi Pathian nih minung cungah a tuah lengmang tawn ko, ³⁰ Nunnak ceunak tling cu hmuh awkah Khor chungin a chuah ṭhan tawn hna," tiah a ti. ³¹ "Maw Job, na hna chi tuah, ka bia kha ngai tuah; Dai tein um law ka chim lai. ³² Chim awk zei na ngeih ahcun ka let tuah; Chim tuah, zeicahtiah nangmah kha thiamcoh kan duh. ³³ Sihmanhsehlaw chim awk zeihmanh na ngeih lo ahcun ka bia ngai tuah; Dai tein um law, fimnak kan cawnpiak lai," tiah a ti.

¹ Cun Elihu nih a bia cu a peh i: ² "Ka bia hi thei tuah u, nannih mifim hna, Nan hna ka chit tuah u, nannih saupi hngalhnak a ngei cangmi hna; ³ Dang nih rawl kha a teh bantukin hna nih bia kha an hneksak ve hna. ⁴ A dikmi kha kanmah tein i hneksak u sih, A ṭha taktakmi kha kannih nih i khiak sih. ⁵ Zeicahtiah Job nih aa thawh i, ’Kei cu sualnak ka ngei lo i Pathian nih ka dinnak kha a ka lakpiak; ⁶ Ka ding ko nai kei cu lihchim ah rel ka si; Ka hma cu damh khawh ding a si lo, phungbuarnak zeihmanh ka tuah lo nain,’ a ti. ⁷ Job bantuk hi mi zeital an um bal maw? Holh dawh lo kha tihal in a haal i ⁸ Hawikom ṭhalo he khual tlawn a duh i miṭhalo hna he a kal ṭi tawnmi kha? ⁹ Zeicahtiah amah nih cun aa thawh i, ’Pathian cung i i lawmh nih hin minung caah zeihmanh ṭhathnemnak a tuah lo,’ a ti. ¹⁰ "Cucaah ka bia thei tuah u, nannih hngalhthiamnak a ngeimi hna, Pathian nih cun ṭhat lonak a tuah naisai lai lo i Lianngan Bik nih cun palhnak a tuah naisai lai lo. ¹¹ Zeicahtiah mi cu an rianṭuanning bantukin a lehrulh hna i An ziaza ning bantukin an cungah a tlunter. ¹² Biangai tein, Pathian nih ṭhat lonak a tuah lo i Lianngan Bik nih dinnak cu a merh lo. ¹³ Aho nih dah amah cu vawlei hi na zohkhenh lai tiah nawl an pek i a cungah vawlei pumpi hi an khinh? ¹⁴ A thlarau kha amah sinah a kirter ṭhan i nunnak petu thaw kha sinah a kawh ṭhan ahcun, ¹⁵ Titsa vialte cu hmunkhat ah an rawk dih lai i minung cu leidip ah a kir ṭhan ko lai. ¹⁶ "Cucaah Job, hngalhthiamnak na ngeih zinpan ahcun, mah hi thei tuah; ka chimmi cu ngai tuah. ¹⁷ Dinnak a huatu nih cun uktu a si kho bal hnga maw? ¹⁸ A ukning a ṭhat tuk caah, bawi hmanh kha, ’Santlai lo,’ a ti kho i, Tuavon hmanh kha, ’Zei ṭhahnem lo,’ tiah an hmai hrimhrim ah a ti ngam i, ¹⁹ Bawi kha a duhdanh hna lo i mirum kha misifak hna nakin a upat hlei lomi siangpahrang cu, Nangmah nih sual na phawt ko maw? Zeicahtiah annih cu an dihlak in Pathian sermi an si, ²⁰ Hmakhatte ah zanṭim ah a thi khomi an si; A tawngh hna tikah mirum cu an lo ko, Miṭhawng hna cu minung kut in si loin an lo ko. ²¹ A mit in minung an lam cu a zoh i an kehlan vialte cu a hmuh dih. ²² Thil ṭhalo tuahtu hna an i thuh khawhnak dingah Thihnak thladem a um lo i a thukmi muihnak zong a um lo. ²³ Pathian hmai i biaceih awk i chuah awk ah minung ca i tinhmi ni a um lo. ²⁴ Dothlatnak kha zeihmanh a tuah lo, sihmanhsehlaw a ṭhawngmi kha a hrawh hna i an hmun ah midang a chiah hna. ²⁵ Cucaah an tuahmi vialte kha pakpalawng ah a canter i Zan ah khan a merhnawh hna i an kuai dih. ²⁶ An ṭhat lo ruangah a tuk hna i zapi hmuh hngan ah a chimhhrin hna. ²⁷ Zeicahtiah amah nawl ngaih kha an ngol i a lam kha zei ah an rel lo. ²⁸ Khi tikah sifakmi aunak kha a hna chungah a phan i hremmi hna aunak kha a theih. ²⁹ - ³⁰ Dai tein a um zongah aho nih dah sual an phawt khawh lai? A hmai kha a thuh tikah aho nih dah an mawhchiat khawh lai? Lung a khongmi miphun le a mi vialte hna cungah, Pathian zei i a rel lomi siangpahrang kha an bawi i a ser bel ah zeitindik a si hnga? ³¹ "Abiana ah, Pathian cu hei i thawh law, Ka luan cang, ṭhat lonak cu ka tuah ti lai lo; ³² Santlai lomi misual ka si ko, nangmah nih lam ka hruai, Ṭhat lonak ka tuahmi paohpaoh kha zeihmanh ka tuah ti lai lo,’ hei ti law ³³ Hi na bia thawng hin amah na hlawtnak cu an ngaihthiam lai maw? Keimah nih si loin, nangmah nih naa khiah awk a si; Sihmanhsehlaw zeitindah na leh khawh lai? ³⁴ Mifim mi nih cun hitin an ti lai i Ka chimmi a theitu mifim hna nih cun hitin an chim lai. ³⁵ ’Job nih hin hngalhnak ngei loin a chim, a chimmi ah hin sullam a um lo. ³⁶ Bialehnak a chimmi hi miṭhalo mi hna bialehnak bantuk a si ve caah hin Zawnruah lo tein hneksak si ko seh. ³⁷ Zeicahtiah sualnak ah hin ralthawhnak a chapchih i Pathian kha dong loin a thangchiat,’ " tiah a ti.

¹ Cun Elihu nih a bia cu a peh ṭhan i: ² - ³ "Naa thawh i, ’Zei ṭhathnemnak dah ka hmuh? Rak sual hmanh ning law, atu ah hin tah cu nakcun ṭhathnemnak zei ka hmu hlei kun maw?’ na ti tikah hin, Mah hihi a ṭhami bia a si tiah ruat in Pathian hmaiah ka ding ko, tiah na ti maw? ⁴ Cucaah nangmah le na sin i a ummi na hawile hna cu keimah nih kan leh tuah hna lai. ⁵ Van khi hei zoh law ruat tuah, Nangmah cungpi i a ummi khuadawm khi zoh tuah hna. ⁶ Na sual a si ah, zeidah amah ralchanh in na tuah khawh? Cun na phungbuarnak cu a tam chin zongah, amah cu zeitindah na ti khawh hlei? ⁷ Na din a si ah, amah cu zei ṭhatnak dah na pek? Asiloah, na kut in amah nih a hmuhmi zeidah a um? ⁸ Na ṭhat lonak nih cun nangmah bantuk mi lawng hi pei a tongh khawh ko hna cu, Na dinnak zong nih mi fapa hna lawng hi pei a ṭhathnem khawh ko hna cu. ⁹ "Rialnak a tam tuk caah mi cu an au, A ṭhawngmi hna baan ruangah bawmhnak hal in an au. ¹⁰ Sihmanhsehlaw ahohmanh nih, ’A ka Sertu Pathian, zan ah him tein a kan zohkhenh i, ¹¹ Vawlei cung saram nakin fimnak tam deuh a kan pe i Van i a zuangmi va nakin fim deuh in a kan sertu kha khuazei ah dah a um?" an ti lo. ¹² Annih cu anmah nawl lawng kha a duh i aa porhlawmi an si caah An au tikah a let hna lo. ¹³ Pathian nih au sawhsawhnak cu a thei lo i Lianngan Bik nih mah cucu zeihmanh ah a rel lo. ¹⁴ ’A ka hmu lo,’ tiah na ti tikah hin na caah a ṭha lo chinchinmi a si. ¹⁵ Sihmanhsehlaw atu cu, Pathian cu a thin a hung lo i mi kha dan a tat hna lo i Hruhnak cu zeirello in a lanhter ko caah ¹⁶ Job nih bia lolak chim in a ka aa an i hngalh set ṭung loin bia kha a karhter luaimai ko hna," a ti.

¹ Cun Elihu nih khan a peh i: ² "Tlawm tein ka ing rih law ka hmuhsak lai, Pathian lei kap in tlawmte chim awk ka ngei rih. ³ A ka Sertu a ding tinak kha ka chim tikah hin Ka bia bawmtu hi lamhlat piin ka va khawmh hna lai. ⁴ Ka chimmi ah hin lih a um lo, na hmai i a dirmi hi hngalhnak a ngeimi ka si. ⁵ "Pathian nih a sangmi le a ṭhawngmi cu a hrawh hna i Miṭhalo cu thluachuahnak a pe hna lo. ⁶ Sihmanhsehlaw sifakmi le retheimi cu an hmuh awk hnga a simi kha a pek hna i Harnak a ingmi hna cu an hmuh awk hnga kha a pek hna, ka ti. ⁷ An bawiṭhutdan cung i a ṭhumi siangpahrang hna khi zoh hna hmanh: Pathian nih lianhngannak ṭhawnnak a pek hna tikah an lung a puam. ⁸ Cun na hmuh nolh hna tikah cun hreng khenh an si i sal cikcin in khih an si. ⁹ An ziaza a ṭha lomi kha a mawhchiat hna i An sualnak cu ruamkainak le mi tei duhnak an si kha a hmuhsak hna. ¹⁰ An hna chungah ralrinnak bia kha a pek hna i An ṭhat lonak lam khan kir ṭhan awkah a kawh hna. ¹¹ A bia an ngaih i a rian an ṭuan ahcun, An ni hna cu thluachuak in an hman i an kum hna cu nuamhnak in an hman. ¹² Sihmanhsehlaw an ngaih lo ahcun, vainam in an pam i thihnak tiva kha an tan. ¹³ Mi lungpuam nih cun an thinhun kha an chuahhnawh i Annih kha a ṭem hna tikah bawmhnak hal an duh lo. ¹⁴ Tlanval lioah an thi i an nunnak cu ningzahnak in a dong. ¹⁵ Hremnak a ingmi hna cu hremnak an inmi kha hmang in a chuah hna i, Vanchiatnak kha hmang in an hna a awnter hna. ¹⁶ "Harnak kha nuamhnak in thlen awk na hmuh tikah, i ralring tuah, Zeicahtiah na hmaiah thil tampi hunh na si i, Cabuai cung i hunmi rawl cu thau in a khatmi a si; ¹⁷ Biaceihnak rian na ṭuan lioah mirumpa rawl kha khim tein na ei ahcun. ¹⁸ Zu thawthaw kha a pingah i hruaiter hna hlah law Ziknawh kha na biakhiahnak kawiter hlah. ¹⁹ Na rumnak cu zeitluk hmanh in a ngan ah, cu nih cun zeidah an ṭhathnem lai? Na dir hmun a sangmi zong nih zeidah an ṭhathnem lai? ²⁰ "Ṭih a nungmi zan ah, miphun hna cu an umnak hmun in an loh tikah na thinphang hlah. ²¹ Ṭhat lonak tuah awkah naa mernak hnga lo i ralring tuah, Zeicahtiah cu ruangah cun pei harnak in hneksak na si cu. ²² Pathian cu kan cungah lianhnak in a um ko, Amah bantukin ahodah a nganmi ṭhawnnak a ngei? ²³ Aho nih dah a lam cu an ruahchungpiak i Aho nih dah, na palh, tiah an ti khawh? ²⁴ Mi nih hla in an thangṭhat zungzalmi a rian cu thangṭhat awkah va philh hlah. ²⁵ Mi vialte nih amah cu an zoh cio, mi nih lamhla piin an cuanh. ²⁶ Zohhmanh, Pathian cu a ngan tuk i kan hngal kho lo; A kum zeizat a si kha kan rel khawh leng a si. ²⁷ Tidor tete cu rili in cunglei ah a hnuh hna i minmei cu ruah ah a canter; ²⁸ Mah cucu van khin ruah in an rung sur i minung cungah tam piin an tla. ²⁹ Aho tal nih khuadawm an zamning khi a hngal kho maw? A khuadawm chung i khuari hna khi a hngal khotu an um maw? ³⁰ Minmei cu ti cungah a zamter hna i rili hram hna cu a khuh hna. ³¹ Cuticun miphun cu a cawm hna i rawl tampi a pek hna. ³² Ṭek chungah cun mei a khumh i aa tinhmi kha khen awkah nawl a pek. ³³ A thinhun in thlichia kha a thawhter i Thlichia a ra lio ti hngalhtertu lamkaltu cu khuari a si.

¹ "Hi zong nih hin ka lung kha a therter i a suk in aa su. ² Pathian aw khuari thawng le a kaa chungin a chuakmi aw thawng cu ngai tuah. ³ Van pumpi toiah a kalter i a nimtlau cu vawlei kil kip a phan; ⁴ Lianhngannak aw in khuarit in a rit caah a awn hluahmahmi aw nih a hun zulh. ⁵ Pathian aw cu a rianṭuannak ah khuaruahhar a si, Kan hngalhnak nih a phak lomi thil lianngan kha a tuah hna. ⁶ Hawhra cu a thawh i, ’Vawlei ah tla,’ a ti; Cun ruahpi kha, ’Fak piin sur,’ a ti. ⁷ A aw kha an theih tikah ruahpi cu tampi in a sur thluahmah. Mi kip kha inn chungah a hrenhkhumh hna i a sermi vialte kha zeihmanh tuah loin an dir sawhsawh ko. ⁸ Saram cu an bu chungah an lut i an kua chungah him tein an bawk. ⁹ Thlanglei inndal chungin thlichia cu a ra i Chaklei thli nih kihnak kha a ratpi. ¹⁰ Pathian thaw nih tikhal a umter i ti kaupi cu thir bangin an khal. ¹¹ Khuadawm chah pipi cu an chungah ti a rawn hna; Khuadawm nih a minmei cu khuazakip ah a ṭhek hna. ¹² Amah nih nawl a pekmi hna kha um khawhnak vawlei cungah hin tuah awkah, Amah hruainak thawngin an i hel lengmang. ¹³ Chimhhrinnak caah maw, a ram ṭhatnak ding caah maw, dawtnak caah dik, Amah nih mah cucu a umter ko. ¹⁴ "Maw Job, mah hi bia hi thei tuah, Dir ta rih law, Pathian nih khuaruahhar thil a tuahmi cu ruat tuah hna. ¹⁵ Zeitindah annih cu Pathian nih an rian kha a ṭuanter hna i, Zeitindah a khuadawm chungin nimtlau kha a lekter ti cu na hngal maw? ¹⁶ Zeicahdah khuadawm cu cunglei ah i nge tein a zam ti kha na hngal maw? Thiamnak a tlingmi a rianṭuan khuaruahhar a si cu na hngal maw? ¹⁷ Cun thlanglei thli a hung hran tikah vawlei cu a lin a sa i na thlan hripi he naa ciah kha, zeitindah a si tiah na hngal maw? ¹⁸ Amah bantukin van khi na samh kho maw? Thlalang a timi thletmi bantukin a hakmi khi zeitindah a si na hngal kho maw? ¹⁹ Amah sin chim ding bia cu kan cawnpiak tuah ngat, Kannih cu, zeizong vialte kha a muih dih caah kan ruahnak kan pumkhawl kho lo hi ta. ²⁰ Pathian cu, cu tik kha tikah bia na chim awk a si, tiah minung aho tal nih an ti kho maw? Thawng na thanh awk a si, tiah tah nawl an pe kho maw? ²¹ Voi khat cu ceunak cu hmuh khawh loin a um, Minmei le ruah nih khan an phenh; ²² Cun thli a hung hrang i a chem hna i chaklei in sui bantuk ceunak a hung chuak; Pathian cu ṭihnung lianhngannak in aa thuam. ²³ Lianngan Bik cu kannih nih kan hmu kho lo; Amah a ṭhawnnak cu kannih nih kan hngalh khawh leng a si, A dinnak cu biading tuah awkah khan a khul a nuar lo. ²⁴ Cucaah mi nih amah cu an ṭih; Amah le amah ka fim, tiah aa timi cu zei ah a rel hna lo," tiah a ti.

¹ Cun Bawipa nih phuchim chungin Job cu a leh i: ² "Hngalhnak aa tel lomi bia in fim chimhnak a muihtertu hi ahodah a si? ³ Na tai i sawmh law pa bantukin dir tuah, bia kan hal lai i na ka leh tuah lai. ⁴ Vawlei hram ka rak ser lioah hin khuazei ah dah na rak um? Na hngalh i na theih ahcun ka chim tuah. ⁵ A hmet a ngan zei ngaw si seh ti kha aho nih dah a khiah? Cucu na hngalh awk a si. Asiloah, tahnak hri kha a cungah aho nih dah a zam? ⁶ - ⁷ A dohtu a tung pipi hna cu zei cungah dah an dir? Deirel arfi hna cu hmunkhat ah hla an sak i Pathian fapa vialte hna lunglawm in an au tikah khan, Aho nih dah a killung kha a bunh? ⁸ Rili cu tilian in paw chungin a chuah tikah khan aho nih dah a rak zoh? ⁹ Rili cu khuadawm in puan zual in ka rak zual i minmei chungah khan ka rak tuam i, ¹⁰ A ramri ka serpiak i hrenhnak le innka ka chiah hna i, ¹¹ ’Hi tiang hi na ra lai, hi pin hi cu na kal ti lai lo, Cun hika ah hin aa porhlawmi na tilet hna cu an dong lai,’ ka ti. ¹² "Na chuahka in, fingrei cah cu, na caan a si cang tiah na ko bal i Zinglei cu hihi nang hmun a si, tiah na hmuhsak bal maw? ¹³ Vawlei kha a tlang in i tlaih i fizang cu a umnak hmun khan thin awkah, Zinglei cu na cawnpiak bal maw? ¹⁴ Tlak cu minkhenhnak in nam tikah a cungah a mui a hung langh bantukin, Zeizong vialte cu puan bil bantukin an langh ve tiang vankam cu a hun ceuh tikah, ¹⁵ Fizang cu a ceunak kha a lo i arfi cu pakhat hnu pakhat in an lo. ¹⁶ Rili a hna ah na lut bal cang maw? A thuknak hmun tah na phan cang maw? ¹⁷ Thihnak kutka hna cu na sinah phuan an si cang maw? A thukmi muihnak kutka a cawngtu hna cu na hmu bal hna maw? ¹⁸ Vawlei a kauhning hi na hngal maw? Hi vialte hi na hngalh ahcun, ka chim tuah. ¹⁹ Khuazei ah dah ceunak umnak hmun i va kalnak lam cu a si? ²⁰ Nangmah nih annih cu an ram leiah na kalpi kho hna maw? An inn lei lam ah cun na zul kho hna maw? ²¹ Na hngalh ṭheoṭheo lai, cu caan ah cun na rak chuah cang cu ta, Na chan a sau hringhran cang hi ta! ²² "Hawhra khonnak inn kha na lut bal maw? Rial khonnak inn kha na hmu bal maw? ²³ Mah cucu harnak ni caah ka khonmi an si i I doh le i tuk ni caah ka chiah hna. ²⁴ Zei lam in dah linhnak cu khuazakip ah ṭhek a si i Nichuahlei thli nih vawlei cungah a kalpi dih hna? ²⁵ "Aho nih dah ruahpi kha kahcham a cawhpiak i Aho nih dah ṭotho caah khan lam a sial? ²⁶ Mi an um lonak ram i ruah surter awkah le, Mi an um lonak thetse ram i ruah cu surter awkah; ²⁷ Cun ram car le ram king hninhnoter awkah le, Vawlei ro ah ram hring chuahter awkah khan, ²⁸ Ruah nih hin pa a ngei maw? Dapti dor hi tah aho nih dah a hrin? ²⁹ Aho paw chungin dah tikhal cu an chuah i van in a tla tawnmi hawhra hi aho nih dah a hrin? ³⁰ Ti cungah khan lung bantukin aa phah i a thukmi cungah khan a khal. ³¹ "Firuk ṭemnak hri cu na ṭem kho maw? Asiloah, Likuk-canthum hri cu na phoih kho maw? ³² Mazzaroth cu an caan te ah na hruai kho hna maw? Fizang cu an fale hna he lam na hmuhsak kho hna maw? ³³ Van a uktu phung hna khi nangmah nih maw na ser hna? Vawleicung thil umtuning a uktu phung hna hi nangmah nih dah na chiah hna? ³⁴ Nangmah cu ruahpi ban ngaw nih an surh nakhnga, khuadawm khi nawl na hun pe kho hnga maw? ³⁵ Nimtlau cu, kal tuah, tiah na ti ahcun, ’Ka kal lai,’ tiah an ti hnga maw? ³⁶ Aho nih dah khuadawm chungah khin fimnak a chiah i minmei cu hngalhnak a pek hna? ³⁷ - ³⁸ Vawlei cu thir bantukin a hah i leitlang hna cu pakhat le pakhat an i sengh dih tikah, Ahodah ruah kha kawh khawhnak dingah le vancung ti khonnak cu phongh khawhnak dingah, fimnak a ngei? ³⁹ - ⁴⁰ An kua ah an bawh i ram bur lakin seh ding sa an bawh lioah, Chiandeihpi cu a sa ei ding kha na kawlpiak kho in Chiandeih no hna cu an paw na khimter kho hna maw? ⁴¹ Lang-ak cu a fano hna kha rawl lo ruangah an onh lengmang tikah, Aho nih dah rawl a pek hna?

¹ "Tlang cung sathar hna nih zeitik ah dah fa an hrin kha na hngal maw? Sazuk nih zeitik dah fa a hrin kha na ngia maw? ² An pawi chung kha thla zeizat dah a si na rel kho maw? Cun an hrin caan kha na hngal maw? ³ Zeitik ah dah an bawh i an fale cu an hrin hna i an fale cu an chuah kha na hngal maw? ⁴ An fano tete cu an hung ṭhan i ramlak sawhsawh ah khan an tlon i an kal i kir ṭhan ti loin an tlah kha zeitik ah dah a si na hngal maw? ⁵ Siria ram i ramlak laa hna cu aho nih dah an duhduh in a tlonter hna? Arabia ram i ramlak laa hna cu aho nih dah luatnak a pek hna? ⁶ Thetse ram cu an umnak ding caah ka pek hna i Cite nelrawn cu an khuasaknak caah ka pek hna. ⁷ Khuapi chung rihaw kha an rem lo i mawngtu au len thawng kha ngaih an duh lo. ⁸ An tlonnak cu tlang cungah khan a si i a hringmi thil kip kha an kawl. ⁹ "Fungtum nih na rian ṭuan a duh lai maw? Na saṭil inn ah a riak duh lai maw? ¹⁰ Amah cu lei rinkuar rinnak ah hri na banh khawh lai maw? Na hnu in lei rinkuar cu leitlang den in a run ngetter hna lai maw? ¹¹ Amah cu a thazang a ṭhawng ko nain naa bochan khawh lai maw? Na rian cu amah kha na rinh khawh lai maw? ¹² Amah cu a ra kir lai i na phuhri ah na rawl cu a rak phorh hna lai, tiah na zumh maw? ¹³ "Ostrik va nih porhlaw ngaiin a thla a khawn, A thla le a hmul kha an tlawm tuk caah, ¹⁴ Leidip nih run lumh te ko hna seh tiin vawlei ah a ti cu a kaltak hna. ¹⁵ Ke nih kuai lak in a lamh sual hna lai i Ram sa nih an cilnan sual hna lai ti kha a philh. ¹⁶ A fale cu amah fale lo bangin a ṭhuat a den hna. A ṭuannak cu pakpalawng a si sual lai tiah phannak a ngei lo. ¹⁷ Zeicahtiah amah cu Pathian nih fimnak kha a pe lo i Hngalhthiamnak kha a tinter lo. ¹⁸ Hmunsang ah arhli bantukin aa chawk i Rangtum le a cung i aa citmi kha zeihmanh ah a rel hna lo. ¹⁹ "Rangtum cu a ṭhawnnak kha nangmah nih na pek maw? A hngawng kha a tuang in na thuamh maw? ²⁰ Khaubawk bangin na pehter maw? A hnar tum thawng cu ṭihnung a si. ²¹ Nelrawn ah khan a ke a chaih i aa cer, Hriamnam he a rak ummi kha a thazang dih-umnak in a hei nam hna. ²² Ṭihnung kha a nihsawh men ko i lung dongh a hngal lo; Vainam hmaiah khan a con in a kim lo. ²³ A cungah cun thal bawm kha aa khawng i a tleumi fei le feikawl kha an i lek. ²⁴ A zit in aa zi i aa chaih i muko aw thawng a theih tikah a chak tlaih khawh a si ti lo. ²⁵ Muko thawng a rin tikah a hnar a phit i, I tuknak cu a rim in a theih i haotu pawl an au le an hawhawt cu a theih. ²⁶ "Mupi nih cungsangpi ah a zuan i a thla thlanglei ah a zam cu nangmah nih maw na cawnpiak? ²⁷ Langta nih cunglei ah a zuan i cung sangpi ah a bu a ser khi nangmah nawl pek in maw a si? ²⁸ Lungpang cungah a um i a chengmi lungpang himnak hmun ah a bu kha a ser. ²⁹ Khika hmun cun cawi awk kha a ngiat hna; Lamhlatpi ah khin a mit nih a hei hmuh khawh hna; ³⁰ A fale cu thisen in a cawm hna; Saruak umnak hmun ah, khika ah langta cu a um," tiah a ti.

¹ Cun Bawipa nih Job cu a thawh i: ² "Minung nih Lianngan Bik he bia an i al tikah hin lungṭhawng in um awk a si maw? Pathian he bia aa almi nih hin a leh ṭhan awk a si hnga maw?" a ti. ³ Cun Job nih Bawipa cu a leh i: ⁴ "Zei rel awktlak a si lomi kei nih hin nangmah cu zeitindah ka leh khawh lai? Ka kut in ka ka kaa huh ah a ṭha deuh lai. ⁵ Voi khat ka chim cang i ka chim ti lai lo; Voi hnih ka chim cang i cu bantukin ka chim ṭhan ti lai lo," a ti. ⁶ Cun Bawipa nih Job cu phuchim chungin a leh i: ⁷ "Na tai i sawmh law pa bantukin dir tuah; Bia kan hal lai i na ka leh lai. ⁸ Nangmah cu na ding lo na ka ti ngam lai maw? Asiloah, nangmah cu na din nakhnga keimah cu na palh na ka ti lai maw? ⁹ Pathian kut bantuk kut na ngei maw? Amah aw bantukin khuarit in na ri kho maw? ¹⁰ "Lianhngannak le hmaizahnak in i fam law Sunparnak le rumra in i thuam tuah. ¹¹ Na thinhunnak cu chuahter law aa porhlawmi paoh cu zoh hna law ṭhum hna. ¹² Aa porhlawmi paoh cu zoh hna law tangah ṭhum ko hna; Cun miṭhalo hna cu an dirnak ah khan lam hna. ¹³ Leidip lakah khan hmunkhat ah thup dih hna; Hngalh lomi thlan ah khan thup men hna. ¹⁴ Khi tikah nangmah cu, nangmah orhlei kut lila nih an khamh khawh ti kha kan hngalhpi lai. ¹⁵ "Tisartlam, saram vialte bawi khi ruat hmanh, Saṭil cu ram bantukin a ei hna. ¹⁶ A tai i a thazang le a paw tit i a ṭhawnnak khi zoh hna hmanh. ¹⁷ A mei cu sidar thing bantukin a ṭhom i A phei thahri cu a phiar in an i phiar. ¹⁸ A ruh hna cu dar peng an si, a kutke hna cu thir tluan an si. ¹⁹ "Amah cu Pathian sermi thil hna lakah pakhatnak a si; Amah tluk a simi kha a uk hna. ²⁰ Tlang cung i a tlongmi saṭil kha a rawl ah a seh hna i Ramlak saram vialte cu a khai dih hna. ²¹ Tumpu bur tangah a bawk, phaikung tang le cerh ah aa thup. ²² Tumpu bur nih thladem a demh i tivate inhliam kung nih an kulh. ²³ Tiva cu a hung lenh zongah a thin a phang lo; Jordan Tiva nih a ka tiang phan hmanh seh law a duh in aa chawk ko. ²⁴ Aho tal nih sio in an sio kho maw? A hnar ah rap hri in an thil kho maw?

¹ "Leviathan cu nga sio in na hnuk kho hnga maw? Asiloah, hrihrual in a lei na khit hnga maw? ² A hnar cu hri in na thil kho hnga maw? A kha chungah sio na banh kho hnga maw? ³ Ka zaangfah ko tiah an nawl hnga maw? Bianem in, ka nunnak cu ka zuah ko, tiah an lem hnga maw? ⁴ Zungzal in na sal a si nakhnga dingah, nangmah he biakamnak a tuah lai maw? ⁵ Vate bantukin lente naa celhpi khawh lai maw? Asiloah, hlasak thiammi vate bantukin, na nu hna caah na khih khawh lai maw? ⁶ Chawlettu hna nih amah cu an i cuh lai maw? Chawdawr pawl hna nih an i ṭhenphaw lai maw? ⁷ A cuar cu fei in na chun kho lai maw? A lu cu nga tlaihnak fei in nan chun kho lai maw? ⁸ Amah cu na tlaih sual a si ahcun, nan i sual len ding kha ruat hmanh; Mah cucu na tuah ṭhan duh ti bal ding a si lo. ⁹ "Amah tlaih timh cu hnabei dong a si, pathian hna hmanh nih an hmuh ah an khuaruah a har lo maw? ¹⁰ A thawh cang ahcun, zeitluk in dah ṭihnung a si, Ahodah a dir-onh ngam lai? ¹¹ Amah a dotu paoh cu, ahodah hmapu loin a um hna? Van kaupi tangah hin pakhat hmanh an um lo. ¹² "A kutke kong si seh, a ṭhawngmi a thazang kong siseh, a tungtai dawhnak kong siseh, ka chim rih tuah lai. ¹³ Aho nih dah a puan a leng thuah kha a hawh khawh lai? A thir angki thuah hnih cu aho nih dah a chunh i a hlanh khawh lai? ¹⁴ Aho nih dah a hmai innka cu a hun khawh lai? A ha tian cu ṭihnung a si. ¹⁵ A keng cu a thuah in aa thuahmi phaw bantuk a si, Ṭeklung vampang in kulhmi bantuk a si. ¹⁶ Pakhat le pakhat cu an i naih tuk caah an karlak ah khan thli a lut kho lo. ¹⁷ Pakhat le pakhat kha an i peh dih, an i tlai dih i ṭhen khawh an si lo. ¹⁸ A hachiau tikah ceunak an choi ukmak i A mit hna cu zinglei ceu bantuk khi an si. ¹⁹ A kaa chungin aa hliau duakmakmi mei-alh an chuak i meici an pet lulhmalh. ²⁰ A tlok hluahmahmi um chung bantuk le a kang hluahmahmi phaiphawk bantukin, A hnar chungin meikhu a chuak. ²¹ A thaw nih cun lung meihol kha a alhter khawh i a kaa chungin meizik a chuak. ²² A hngawng ah khan ṭhawnnak a um i a hmai ah khan ṭihnak a laam. ²³ A paw cuar cu a chah i zeihmanh nih a khoihverh kho lo. ²⁴ A lung cu lung bantukin a hak, Fangrialnak lung a tanglei u bantukin a hak. ²⁵ A hung thawh tikah miṭhawng hna kha an thin a phang, A mei a hun vuak tikah, a umtu awk an hngal lo. ²⁶ Vainam nih a phan nain zeihmanh a ṭhahnem lo, Fei zong nih, thal zong nih, feipi zong nih, a zei an poih hlei lo. ²⁷ Thir cu capawl tluk ah a rel i dar cu thing mot tluk ah a rel. ²⁸ Cantiang nih a tei lo, Lungherh chehnak lung hna cu a caah favai tluk men an si. ²⁹ Anih caah cun tanbo cu phaikung men a si i Feipi a awnh vungmang cu a nih men ko. ³⁰ A paw cuar cu peipahau kuai haar bantuk a si, Rawl velhnak sobulpi bantukin nawncek lakah cun a lawn. ³¹ Ti thuk cu um bantukin a tlawhter, Tibual cu kheng chung zihmui hngerh bantukin a hngerh. ³² A kal tikah hin a hnulei in ti a lehmi cu a ceu pah thluahmah i Ti thuk cungah khin, tuuhmul raang vuan lulh hna seh law cu ko cu a lo. ³³ Ṭihnak zeihmanh ngei loin ser a si caah vawlei cungah hin amah tluk zeihmanh an um lo. ³⁴ Sermi thil vialte, a sang bikbik hna hmanh kha a zawmhtaih hna, Aa porhlaw vemi saram vialte lakah amah cu siangpahrang a si.

¹ Khi tikah Job nih Bawipa cu a leh i: ² "Nangmah nih zeizong vialte na tuah khawh i Na tinhmi cu dawnh khawh a si lo ti kha ka hngalh. ³ Sihmanhsehlaw ka hngalh lomi thil lianngan kha ka chim hna i Kei i hngalh awkah khuaruahhar tuk a simi kha ka chim hna. ⁴ ’Ngai law ka chim lai, bia kan hal lai i na ka chimh lai.’ ⁵ Hna theihnak lawngin nangmah cu ka rak in theih, Sihmanhsehlaw atu cu ka mit in kan hmuh cang; ⁶ Cucaah keimah le keimah cu kaa hua i leidip le vutcam lakah ṭhu in kaa ngaihchih," tiah a ti. ⁷ Bawipa nih Job sinah bia a chim dih tikah, Teman mi Elifaz kha a thawh i "Nangmah le na hawile pahnih cungah ka thin a hung, zeicahtiah ka kong kha nan chim awk hnga bangin ka sal Job nih a chim bantukin nan chim lo. ⁸ Cucaah cawtum pasarih le tuukawng pasarih in i lak hna u law ka sal Job sinah va kal u law nan caah khangh thawinak va pechan u; cun ka sal Job nih thla an campiak hna lai, zeicahtiah ka sal Job nih ka kong ah a dikmi bia a chim bantukin nannih nih nan chim lo ruangah nan hruhnak bantukin nan cungah ka tuah nakhnga lo amah thlacamnak cu ka cohlan lai," tiah a ti. ⁹ Cucaah Teman mi Elifaz le Shuh mi Bildad le Naamath mi Zofar cu an kal i Bawipa nih a chimhmi hna cu an tuah i Bawipa nih Job thlacamnak cu a cohlan. ¹⁰ Cucaah Bawipa nih Job cu a vanṭhatnak kha a pek ṭhan i a ngeihmi kha a let hnih in a pek ṭhan. ¹¹ Cun a sinah cun a unau vialte le a farle vialte le hlanlio i amah theihhngalh a rak simi vialte kha an ra i a inn ah cun amah he khan rawl an ei ṭi; cun a cung i Bawipa nih ṭhat lonak a tluntermi vialte ruangah khan annih nih amah cu an hramh i an hnemh; cun tuu pakhat le sui kutdonghrolh pakhat cio an pek. ¹² Cun Bawipa nih Job cu a chan a donghlei kha a thawk lei nakkhan thluachuahnak tam deuh in a pek i tuu thong hleili, kalauk thong ruk, cawtum tuah thong khat le laapi thong khat a ngei. ¹³ Fapa pasarih le fanu pathum zong a ngeih hna. ¹⁴ Cun upa bik nu cu Jemimah, pahnihnak cu Keziah, a pathumnak cu Kerenhappuk tiah min a sak hna. ¹⁵ Vawlei cung dihlak ah Job fanu tlukin aa dawhmi nu an um lo i an pa nih khan an ṭale sinah ro a pek ve hna. ¹⁶ Cun hi hnuah hin Job cu kum za khat le kum sawm li a nung i a fapa hna le a fapa hna i fapa hna kha a hmuh hna, chan li tiang. ¹⁷ Cun Job cu tar ngaiin, chan tling cikcek in a nung i a thi.