JEREMIAH

JEREMIAH

¹ Jeremiah bia, amah cu Benjamin ram chung Anathoth khua i a ummi tlangbawi hna chung mi Hilkiah fapa a si; ² Amah sinah cun Bawipa bia cu Judah siangpahrang Amon fapa Josiah a bawi kum hleithum kum ah a phan; ³ Judah siangpahrang Josiah fapa Jehoiakim chan zongah khan a phan i Josiah fapa Zedekiah, Judah siangpahrang, a bawi kum hleikhatnak a dongh tiang khan a phan. Cu kum thla nganak chungah khan Jerusalem mi cu sal ah khan kalpi an si. ⁴ Cun Bawipa bia cu ka sinah a ra i, ⁵ "Paw chung i kan ser hlanah kan hngalh i na chuah hlanah kan thianter cang; Nangmah cu miphun hna ca i profet ah kan chiah cang," tiah a ti. ⁶ Khi tikah kei nih ka thawh i, "Aa, Bawipa Pathian ! Zohhmanh, ngakchiate men ka si i biachim ka thiam lo," tiah ka ti. ⁷ Sihmanhsehlaw Bawipa nih a ka thawh i, "Ngakchiate men ka si, ti hlah; Zeicahtiah cu hna sinah cun va kal, tiah kan tinak ah na kal lai i nawl kan pekmi paoh kha na chim lai. ⁸ Annih cu ahohmanh ṭih hna hlah. Zeicahtiah na sinah ka um i kan huhphenh lai", tiah Bawipa nih a ti." ⁹ Khi tikah Bawipa nih a kut cu a hun samh i ka ka kha a tawngh; cun Bawipa nih cun a ka thawh i, "Zohhmanh, ka bia cu na ka chungah ka chiah cang hna. ¹⁰ Zohhmanh nihin ah hin nangmah cu miphun hna cung le pennak hna cungah, phawi awk le ṭheh awkah, hrawh awk le hral awkah, sak awk le phun awkah kan chiah cang," tiah a ti. ¹¹ Cun Bawipa bia cu ka sinah a ra i, "Jeremiah, zeidah na hmuh?" tiah a ti. ¹² Cun kei nih, "Tuan tein a parmi almond kung ka hmuh," tiah ka ti. "Na hmaan, zeitintiah kaa tinhmi kha tlinter awkah tuan tein ka tho," tiah a ti. ¹³ Bawipa bia cu a voi hnihnak ka sinah a phan ṭhan i, "Zeidah na hmuh?" tiah a ti. Cun kei nih, "A tlok hluahmahmi um, chaklei in hika leiah a sawnmi ka hmuh," tiah ka ti. ¹⁴ Cun Bawipa nih a ka thawh i, "Hi ram chung i a ummi vialte hna cungah chaklei in ṭhat lonak a rung tlung lai. ¹⁵ Zeicahtiah zohhmanh, chaklei ram hna chung i a ummi miphun vialte kha ka kawh hna, tiah Bawipa nih a ti; cun annih cu an ra lai i Jerusalem kutka luhnak hna ah khan le a velchum vampang vialte hna pawng le Judah ram khua vialte ah khan an bawiṭhutdan cu an chiah cio hna lai. ¹⁶ Keimah kha an ka hlawt i pathian dang hna sinah zihmui an khangh i anmah kut lila in sermi an biaknak ṭhat lonak vialte ruangah an cungah ka biakhiahnak cu ka chim lai. ¹⁷ Sihmanhsehlaw nang cu na lung ṭhawng ko, tho law nawl kan pekmi vialte kha chim hna. Annih ruangah na lung dong hlah, atu i na lung a dongh ahcun an hmaika i na um tikah na lung kaan donghter chinchin sual lai. ¹⁸ Nihin ah hin nangmah cu, Judah ram siangpahrang hna le bawi hna le tlangbawi hna le mi zapi hna he aa tawng dingah kan ser, kulhmi khuapi, thir tung le dar vampang bantuk na si lai. ¹⁹ Annih nih nangmah cu an in tuk lai, sihmanhsehlaw na sinah ka um i kan huhphenh lai caah an in tei lai lo, tiah Bawipa nih a ti," tiah a ti.

¹ Bawipa bia cu ka sinah a ra i, ² "Va kal law Jerusalem vialte nih an theih nakhnga va au tuah, Bawipa bia cu hi bangin a si: Na ngaknut lio i na ka tlaihchannak le Hammi na si lio i na ka dawtnak kha ka hngalh camcin ko, Thetse ram, zeihmanh cinthlak lonak ram ah khan na rak ka zulh lengmang ko. ³ Cu lioah khan cun Israel cu Bawipa caah a rak thiang, A rawl ṭuanmi lak i theitlai hmasa bik a rak si. Amah a rak eitu vialte hna cu dantat loin a luatmi an um lo i Ṭhat lonak nih khan a tlunhnawh zungzal hna, tiah Bawipa nih a ti," tiah a ti. ⁴ Bawipa bia cu ngai tuah u, maw Jakob tefa hna le Israel chungkhar vialte hna. ⁵ Bawipa nih hi bangin a ti: "Nan pupa hna nih zei palhnak dah ka cungah an hmuh i Ka sinin lamhlatpi ah an kal i pakpalawng kha an zulh i pakpalawng ah an can? ⁶ Annih nih, ’Izipt ram chungin a kan chuahpitu Bawipa, Ramlak ah a kan hruai i thetse ram le khor tampi umnak ram, Ram ro ram car le muihnak ram, ahohmanh nih an pal lomi, ahohmanh an um lonak ram chungah a kan hruaitu kha, Khuazei ah dah a um?’ an ti lo. ⁷ Keimah nih thil tampi a chuahnak ram ah, A theitlai hna le a thil ṭha hna kha ei awkah kan luhpi hna. Sihmanhsehlaw nan rung luh tikah ka ram kha nan thurhhnawmh i Ka ro kha fihnung ah nan ser. ⁸ Tlangbawi hna nih khan, ’Bawipa cu khuazei ah dah a um?’ an ti ti lo. Phungbia a tlaimi hna nih khan keimah kha an ka ruat lo; Ka mi tuukhal hna nih khan keimah cu an ka doh; Profet hna nih khan Baal min in bia an chim i Bawmh khawhnak zeihmanh a ngei lomi pathian kha an zulh hna. ⁹ Cucaah nannih cu taza kan cuai peng ko hna lai i Nan fale hna fale zong ka cuai peng ko hna lai, tiah Bawipa nih a ti. ¹⁰ Nitlaklei ah Saipras tikulh tiangin va kal hmanh u law va zoh hmanh u, Nichuahlei ah Kedar tiangin mi hei thlah hna u law ṭha tein va zoh hna seh, Hi bantuk thil hi a um bal hnga maw? ¹¹ Miphun pakhatkhat nih a pathian hna kha, pathian an si lo hmanh ah, a thleng bal hna maw? Sihmanhsehlaw ka mi hna nih cun an Sunparnak kha zeihmanh a ṭhahnem lomi thil ah an thlen. ¹² Maw van hna, hi kong ah hin khuaruahhar in um tuah u, Ka mi hna ruangah hin hnabei dong cikcek in ther len tuah u, tiah Bawipa nih a ti. ¹³ Zeicahtiah ka mi hna nih hin ṭhat lonak pahnih an tuah: Ti nung a chuahnak cerh keimah cu an ka hlawt i Tikuang, a chungah ti a zawi kho lomi, a zutmi tikuang kha an i ser. ¹⁴ Israel cu sal maw a si? Amah cu ṭuang chuak sal maw a si? Zeicahdah a rawh kun? ¹⁵ Zeicahdah chiandeih nih an hukhnawh i an aihnawh? Zeicahdah a ram cu pakpalawng ah a can? Zeicahdah a khuapi hna cu an rawk i mi nih an chuahtak hna? ¹⁶ Memfis mi hna le Tahpanhes mi hna nih nan lu an in khuai hna lai. ¹⁷ Bawipa nan Pathian nih lam an hruai hna tikah, Nanmah nih amah kha nan zamtak caah, Mah hi vialte hi nanmah nih nanmah lila cungah nan i tlunter, a si lo mei? ¹⁸ Cun Nail tiva ti, va din awkah Izipt ram i na va kal lai cu, Na caah zei miaknak dah a um lai? Asiloah, Zufrates tiva ti va din awkah Assiria ram i na va kal lai cu, Zeidah na miakmi a um lai? ¹⁹ Nangmah dan an tattu cu na ṭhat lonak kha a si ko lai i Sual an phawtu cu na tlaunak kha a si ko lai. Bawipa na Pathian hlawt le keimah upat ti lo cu Na caah zeitluk in dah a ṭhat lo i zeitluk in dah a khaat fawn, ti kha hngal tuah; Mah hihi Ralkapbu Bawipa Pathian bia hrimhrim a si. ²⁰ "Hlanpi ah na hngawngkual cu na khiah cang i na hri cu na chah cang hna i, ’Na sal ka si ti lai lo,’ na ti. Asinain, tlang sang kip cungah le thing hring kip toiah hlawhhlangnu bangin na it. ²¹ Nangmah cu mitsur ruang ṭha bikcem in kan phun, Ci ṭha in lakmi na si. A si kun ahcun, zeitindah na rawh i ramlak mitsur ruang ah na can kun? ²² Cangal in naa kholh nain le chatpiat tampi na hmang nain, Na sualnak cu ka hmaiah a lang ṭhiamṭhiam ko, tiah Bawipa Pathian nih a ti. ²³ Zeitindah, ’Kaa thurhhnawmh lo, Baal kha ka zul hna lo,’ na ti khawh? Nelrawn i na kalnak na lam khi zoh ngat; Na thil tuahmi kha philh hlah ngat. Hrem khawh lomi kalauk-la, a tlik tik i a ping le a pang i a tlimi, ²⁴ Ramlak ah amah lawngin a le i A phol tikah a hnar in pa rim a kawlmi bantuk na si! A duhnak ahcun aho nih dah an kham khawh lai? A kawltu hna nih khan an tha i batter len duh hna hlah seh; A phol thla ah cun fawi tein hmuh khawh a si ko lai. ²⁵ Lung tamnak hmun kal kha i sum law Na hrom cu a ti halter loin um ko hen aw. Sihmanhsehlaw naa thawh i, ’Ka hnabei a dong cang, Ram dang pathian kha ka duh hna i anmah kha ka zulh ko hna lai,’ na ti. ²⁶ Mifir cu tlaih a si tikah a ning a zah bantukin Israel innchungkhar cu an ning a zak lai; Anmah le an siangpahrang hna le an bawi hna le an tlangbawi hna le an profet hna zong an ning a zak lai; ²⁷ Thingkung kha, ’Nangmah cu ka pa na si,’ an ti i Lung kha, ’Nangmah nih na ka hrin,’ an ti. Annih nih an hnulei an ka chit i an hmai kha an ka hoih lo. Sihmanhsehlaw harnak an ton ni ah cun, ’Tho law, kan khamh tuah,’ an ti. ²⁸ Nan ca i nan i sermi nan pathian hna cu khuazei ah dah an si kun? An in khamh khawh hna ahcun, harnak nan ton ni ah cun tho hna ngat seh; Zeicahtiah, maw Judah, na khua le na pathian an i zat. ²⁹ Zeicahdah ka cungah nan phunzai? Nannih nih nan dihlak in nan ka doh, tiah Bawipa nih a ti. ³⁰ Nan fale ka velh hna cu pakpalawng men a si, an i remh hlei lo; Chiandeih hrang bantukin nanmah vainam nih nan profet kha a ei hna. ³¹ Israel mi cungah hin tlun inn donh hmang maw ka si? Ram car le ti um lonak hmun bantuk maw ka si? A si kun ahcun zeicahdah ka mi hna nih hin, ’Kan i ṭhen cang, na sinah kan ra ti lai lo,’ an ti? ³² Ngaknu nih a hlawn kha a philh khawh lai maw? Mo nih a thuam kha a philh khawh lai maw? Sihmanhsehlaw ka mi hna nih cun atu le atu an ka philh. ³³ Duhtu kawlnak caah na lam naa thimmi cu na hei thiam dah! Cucaah nu ṭhalo cem hmanh nih na sinin fimnak aa cawn khawh lai. ³⁴ Na puan ki ah thisen aa neh — a sual lomi misifak nunnak thi kha. Hi thi cu inn na bauhnak in naa nehmi a si lo, Kuhthing toi kip i rai na thawinak in naa nehmi a si deuh. ³⁵ Nangmah nih cun naa thawh i, ’ka sual lo, a thinhunnak a dam diam cang,’ na ti. Zohhmanh, ’Ka sual lo,’ na timi cu kan zuam lai. ³⁶ Zeicahdah fawi tehlek in na kalnak lam cu naa thlen? Assiria nih an deuh bantuk khan Izipt zong nih an deuh ve lai, ³⁷ Izipt ram in hmaichia in nan kir ko lai, Zeicahtiah nan i bochanmi cu Bawipa nih a hlawt cang hna i Anmah thawng in khuaawng zeihmanh nan pem lai lo.

¹ Mipa pakhat nih a nupi kha a mak i a nupi nih cun a kaltak i midang nupi a si tikah, Cu pa nih cun cu nu cu a fuh ṭhan lai maw? Cu nu cu thurhhnawmh a si cang lo maw? A la ṭhan kho ti lo. Sihmanhsehlaw nannih cu duhtu tampi he hlawhhlang nan i celh i Atu cu ka sinah ra kir nan duh! tiah Bawipa nih a ti. ² Tlangpar kolh khi hei cuan hna u law zoh hna hmanh u, Khuazei ah khin dah it ṭi loin nan um? Ramlak i Arab mi hna bantukin an duhtu hna kha hngak in lam pawngah nan ṭhu. Hlawhhlan ṭhalo nan tuahnak thawngin ram kha nan thurhhnawmh cang. ³ Hi ruangah hin ruah kha sur ka thlauh i ṭhal ruah kha a sur lo. Asinain, na cal cu hlawhhlang cal a si i na ning a zak duh hrimhrim lo. ⁴ Cun atu naite ah naa thawh i, "Nangmah cu ka Pa, ka no lio in ka hawi ṭha zungzal na si"; na ti i ⁵ "Zungzal in a thin a hung lem hnga maw? A dongh tiangin a thin a lin lem hnga maw?" tiah na ruah. Na chimning cu hitihin a si ko, Sihmanhsehlaw ṭhat lonak na tuah khawhmi paoh cu na tuah ṭhiamṭhiam," tiah a ti. ⁶ Josiah Siangpahrang chan ah Bawipa nih a ka thawh i, "Hi zumhawktlak lo Israel nih hin zeidah a tuah kha na hmu cang maw, tlang sang kip i a kai i thingkung hring kip toi i hlawhhlangnu aa celh hi? ⁷ Mah hi vialte hi a tuah dih cun ka sinah a kir rua lai tiah ka rak ruah; sihmanhsehlaw a kir lo i a unaunu hlenhmang Judah nih cun mah cucu a hmuh ve. ⁸ Kha zumhawktlak lo Israel kha, vacung in pa aa duh caah maknak ca he ka kalter zong kha a hmuh fawn. Sihmanhsehlaw a unaunu, hlenhmang Judah kha a thin a phang lo, amah zong cu a kal i hlawhhlangnu kha aa celh ve lehlam. ⁹ Zeihmanh ruahnak ngei loin hlawh a hlan le vacung pa duh bantuk a simi lung le thing a biaknak thawng khan ram cu a thurter. ¹⁰ Hi vialte hnuah hin, zumhawktlak lo a simi a unaunu Judah nih khan ka sinah lungthin taktak he si loin i titer men in a ra kir," tiah Bawipa nih a ti. ¹¹ Cun Bawipa nih a ka thawh i, "Zumhawktlak lo Israel hi hlenhmang Judah nakin mawhchiat awk a tlawm deuh lehlam. ¹² Va kal law hi bia hi chaklei ah va thanh law hitihin va ti: Zumhawktlak lo Israel, ra kir tuah, tiah Bawipa nih a ti; Nangmah cu thinhunnak in kan zoh ti lai lo, Zeicahtiah kei cu zaangfah thiammi ka si, tiah Bawipa nih a ti; Zungzal in ka thin a hung lai lo. ¹³ Palhnak na tuahmi kha ka tuah taktak ti ko law Bawipa na Pathian na dohnak kha i phuang ko. Thing thladem toi kip ah ram dang pathian hna he nan i duhnak kha i phuang law Ka bia na ngaih lonak kha i phuang ko, tiah Bawipa nih a ti. ¹⁴ Maw zumh awk tlak lo fale hna, ra kir tuah u, tiah Bawipa nih a ti; Zeicahtiah keimah cu nan Bawipa ka si; Nanmah cu khua khat chungin pakhat, innchungkhar pakhat chungin pahnih in kan lak hna lai i Zion ah kan kalpi hna lai. ¹⁵ Cun ka lung a ka tongmi tuukhal kan pek hna lai i Fimnak le hngalhthiamnak in an in cawm hna lai. ¹⁶ Cun ram chungah cun nan hung karh i nan punzam tikah Mi nih Bawipa Biakamnak Kuang kong kha an chim ti lai lo, A ruah zong an ruat ti lai lo, a hngalh zong an hngal ti lai lo; A herh zong an herh ti lai lo i a dang zong an ser ti lai lo. ¹⁷ Khi caan a phak tikah Jerusalem cu Bawipa bawiṭhutdan ti a si lai, Miphun vialte cu Jerusalem ah cun Bawipa min upat awkah an i pum lai; Annih nih a ṭha lomi an lungthin kha fek ṭhup in an zul ti lai lo. ¹⁸ Khi tikah cun Judah chungkhar le Israel chungkhar cu an i fon lai i Hmun khat ah chaklei ram khan, ro caah an pupa ka pekmi hna ram ah khan an ra ṭi lai. ¹⁹ Zeitluk in dah nannih cu lawmhnak he fa bantukin ka hei in tuah hna hnga i A nuammi ram, miphun vialte hna ram lak i aa dawh bik ro cu ka hei in pek ko hna hnga, ka ti. Cun nannih nih keimah cu, ka Pa, tiah nan ka ti lai i Keimah zulhnak lam khan nan pial ti lai lo, tiah ka ruah. ²⁰ Sihmanhsehlaw zumh awk tlak lomi nupi bantukin Ka cungah zumhawktlak loin nan um, maw Israel mi hna, tiah Bawipa nih a ti. ²¹ Tlangpar kawng i ṭah thawng cu ngai hmanh. Israel mi hna nih zaangfah hal in an aunak aw cu! Zeicahdah hitin a si ti ahcun, annih nih lam kawi kha an zul i Bawipa an Pathian kha an philh caah a si. ²² Maw a tlaumi ka fale hna, ka sinah ra kir u, Nan tlaunak kha kan damter hna lai. Maw Bawipa, na sinah kan ra, nangmah sinah kan ra; Zeicahtiah nangmah cu kan Pathian na si. ²³ Tlangpar i tuahmi biaknak sin khin bawmhnak zeihmanh a ra lo i Tlang sang cung i au lennak zong khin zeihmanh a ra lo; A ngaingai ti ahcun, Bawipa kan Pathian chung lawngah hin Israel khamhnak cu a um. ²⁴ Hlanliopi in ningzahnak pathian Baal nih cun Kan pupa hna nih an ṭuanmi theitlai hna le, an tuurun hna le an cawrun hna le, An fapa hna le an fanu hna kha a ei dih hna. ²⁵ Ningzak in it ko u sih, kan mualphonak nih khan kan khuh ko seh, Zeicahtiah kanmah le kan pupa hna nih Bawipa kan Pathian cungah khan Hlanpi in atu tiang kan sual i Bawipa kan Pathian kha a bia kan ngai lo," nan ti.

¹ "Maw Israel, ka sinah ra kir ko, ka sinah ra kir ko, tiah Bawipa nih a ti. Ka hmaika in fih a nungmi na siasal kha na ṭhial hna i pial ti loin na um i, ² ’Bawipa a nun bangin,’ tiin biatak le biading le dinnak in chiat na ser ahcun, Miphun hna nih nangmah bantukin thluachuakmi si ve awkah thla an cam lai i Nangmah ah cun sunparnak an hmuh lai." ³ Bawipa nih hi bangin Judah ram mi hna le Jerusalem khua chung mi hna sinah a ti: Nan dinhtermi vawlei cu let u law hling lakah thlaici tuh hlah u. ⁴ Bawipa rian ṭuan awk caah nan cuarpar i tan u, nan lung cuarpar i tan u, Maw Judah ram mi hna le Jerusalem khuami hna; Cu ti a si lo ahcun, ṭhat lonak nan tuahmi ruangah khan ka thinhunnak kha mei bangin a alh lai i Hmih khawh lo in a kang sual lai." ⁵ Ram chung dihlak ah muko kha tum u! Fakpi le fiang tein au u! Judah ram mi Jerusalem khuami kha, Kulhmi khua ah tli u, tiah chim hna u. ⁶ Zion lei lam cu hmuhsak hna u! Himnak hmun leiah khan le u! Rau hlah u! Bawipa nih chaklei in ṭhat lonak le rawknak nganpi a rak put lio. ⁷ Rambur chungin chiandeih a hung chuak cang Miphun hna hrawktu aa thawh cang; Nan ram kha hrawh awkah a umnak hmun in a chuak cang; Nan khuapi hna cu an chungah mi um loin an rawk cikcek lai. ⁸ Hi ruangah hin buri i aih u law ṭap u law fak piin ai tuah u, Zeicahtiah Bawipa thinhunnak ṭih a nungmi cu kan sinin aa mer lo." ⁹ Khi ni ah cun siangpahrang le bawi hna cu an thin a phang lai i tlangbawi hna cu an khuaruah a har lai i profet hna cu an lung a dong lai, tiah Bawipa nih a ti. ¹⁰ Cun kei nih ka thawh i, A, Bawipa Pathian, hi mi hna le Jerusalem khua cu, ’Daihnak nan hmu lai,’ tiin na rak timi hna kha na hlen diam hna a si ko, zeicahtiah vainam tu nih pei an nunnak cu a chunh kun hna hi, ka ti. ¹¹ Khi tikah hi mi hna le Jerusalem khuami hna cu hitin chimh an si lai: Thetse ram tlangpar kawng in ka mi hna leiah thli lin a hrang, Cu thli cu vamhnak caah a si lo, thianternak ca zongah a si lo; ¹² Vamhnak ca le thianhnak caah a ṭhawng tukmi thli cu ka fial lai i a hrang lai i Atu cu an cung i ka chim duhmi bia kha ka chim lai. ¹³ Zohhmanh, khuadawm bantukin ral cu hmaiah an fong, An rangleng hna cu phuchim bantuk an si; An rangtum hna cu muvanlai nakin an khul a rang deuh — Aize! Kannih cu kan lo cang ai! ¹⁴ Maw Jerusalem, palhnak na tuahmi kha na lung chungin i thianh law, Khamh na si ko rih hnga dah kaw! Zei can dah na ruahnak ṭhalo cu na chungah a cam lai? ¹⁵ Dan ram in zualko pakhat a ra i Efraim Tlang in thawng ṭhalo pakhat a thang. ¹⁶ Mah thil vialte hi miphun kha thanh hna u, Jerusalem rawknak kha thanh u: Ram hlat piin ral namtu kha an ra i Judah ram khua kha an auhnawh hna. ¹⁷ Keimah kha a ka doh caah, Ral nih a velchum in an kulh dih, tiah Bawipa nih a ti. ¹⁸ Na umtuning le na thil tuahmi nih mah hihi na cungah an tlunter, Mah hihi na dantatnak a si i Mah thil vialte hi na ka doh ruangah an chuak. ¹⁹ Maw ka thin aw, maw ka thin aw! Ka ngan a fah tuk caah a ngerh in kaa ngerh. Ka lung cu a tor dutmat i dai tein ka um kho lo, Zeicahtiah raltuk launak thawng, muko thawng kha ka theih. ²⁰ Chiatnak nih chiatnak kha a hun zulh colh, Ram cu a ningpi in a rawk. Ka thlam hna cu an tlu i an khuhnak puan hna cu an tlek dih cikcek. ²¹ Zei can dah alan cu thlai a si kha ka hmuh peng ko lai i Muko aw thawng cu ka theih lai? ²² Ka mi hna cu mihrut an si, keimah kong kha zeihmanh an hngal lo; Annih cu fa lungping, hngalhthiamnak ngei lomi an si. Ṭhat lonak tuah bel an thiam ngai, sihmanhsehlaw ṭhatnak cu zeitindah ka tuah lai ti kha an hngal lo. ²³ Khi tikah vawlei kha ka zoh i, zohhmanh, a rawk dih i a lawngpi a si ko; Vancung khi ka hei zoh hna i an ceunak kha a um ti lo. ²⁴ Tlang khi ka hei zoh hna i an sawn len ko, Mual vialte cu an i hnin dih. ²⁵ Khua ka zoh i mi an um lo, van i a zuangmi va kha an zam dih. ²⁶ Theitlai ṭhatnak lo ṭha kha thetse ram a si cang i Khuapi vialte kha an rawk dih cang, A thin a hungmi Bawipa hmaika ah cun. ²⁷ Bawipa nih hi bangin a ti, "Ram cu a ning piin a ṭiao dih lai, Sihmanhsehlaw a donghnak taktak cu ka phakter lai lo. ²⁸ Cucaah vawlei cu a ngaih a chia lai i cunglei van hna cu an nak dih lai; Keimah nih ka chim cang i ka timh cangmi a si caah Kaa ngaihchih lai lo i ka lung zong kaa let lai lo." ²⁹ Rang cung ralkap hna le thalkah thiam hna an thawng ah khua kip cu an zam dih; Lungkua chungah an lut, rambur lakah an i thup, lungpang ah an kai; Khua paohpaoh cu ṭiaotak an si dih, an chungah ahohmanh an um ti lo. ³⁰ Maw nang, ṭiaotakmi, puan sen in naa thuamh i sui hlawn in naa ṭamh i Na mit hna cu thuhmi si in na kauhter hna hi, a sullam zeidah a si? Pakpalawng ah pei naa ṭamh ko cu. Na tlangval hna nih an in nihsawh i na nunnak kha lakpiak an in timh. ³¹ Nau nganfah a ing liomi nu aihramnak bantuk a simi aihramnak, A fater a hring liomi nu nganfahnak bantuk a simi aikionak kha ka theih. Zion fanu, a thaw a suk in aa su i a kuttum heh tiah a rengmi kha a si. Aize! ka ba tuk ko cang, thah len ko cu ka ba tuk ko cang.

¹ Jerusalem khua chung lam a kenkip ah khan vaa chawk u law va zoh u law vaa chingchiah tuah u, Khi khua cu ka ngaihthiam khawh nakhnga Biading a kawl i biatak a tuahmi mi pakhat tal, A khua chung i hmun kau pipi ah khan va kawl tuah hna u law nan hmu kho hna hnga maw? ² Annih nih, "Bawipa a nun bangin," an ti ko nain, Lih in chiat an ser. ³ Maw Bawipa, na mit nih biatak kha a kawl a si lo maw? Nangmah nih annih kha na tuk hna, sihmanhsehlaw an zei a poi lo, An lung kha na chunh hna, sihmanhsehlaw an i remh hlei lo. Annih nih an hmai cu ṭeklung nak hak deuh ah an ser i Ngaihchih kha an duh lo. ⁴ Khi tikah kei nih kaa thawh i, "Mah hna hi cu misifak mi hrut men an si, Bawipa lam kha a hngal lo i An Pathian phungbia kha a hngal lomi an si; ⁵ Cucaah mingan hna sinah ka kal lai i annih kha ka va chimh hna lai. Annih nih cun Bawipa lam kha an hngalh lai i An Pathian phungbia kha an hngalh lai," ka ti. Sihmanhsehlaw annih zong nih Bawipa nawlbia kha an al i a bia kha ngaih duh loin an um ve. ⁶ Cucaah tu chung chiandeih nih a thah hna lai i Thetse ram chung cenghngia nih a hrawh hna lai. Pawlai nih an khua ah a chawhhnawh hna lai i A chuak ngammi paoh kha a thleh a bauh dih hna lai; Zeicahtiah an phungbuarnak kha a tam i An tlaunak kha rel cawk lo a si. ⁷ Zeitindah kan ngaihthiam khawh hna lai? Nan fale nih an ka hlawt i pathian a si lomi pathian kha chiatsernak ah an hman hna. Khim tein ka cawm hna, sihmanhsehlaw vacung pa duh kha an i thim deuh i Hlawhhlangnu inn ah khan an va kal lengmang. ⁸ Annih cu thau tein cenhmi rangṭum hor an si, An innpa le nupi lawng kha an awnhhnawh cio ko hna. ⁹ Hi thil hna ruangah hin, dantat loin maw ka um hna hnga? tiah Bawipa nih a ti; Cun hi bantuk miphun cungah hin phuhlam loin maw ka um hnga? ¹⁰ A mitsur ruang tlar hna lakah cun hung kal law hung hrawk hna, Sihmanhsehlaw donghnak taktak cu hung tuah hlah; An nge cu hung sam dih hna, Bawipa ta an si lo caah. ¹¹ Israel innchungkhar le Judah innchungkhar cu, An pahnih in ka cungah zumh awk tlak lo hrimhrim in an um, tiah Bawipa nih a ti. ¹² Bawipa a um kha an zum lo i, ’Amah cu a um lo, Kan cungah ṭhat lonak zeihmanh a tlung lai lo; Vainam siseh, mangṭam siseh, kan tong lai lo. ¹³ Profet hna chimmi cu thlitu men an si lai, an chungah bia a um lo,’ an ti. ¹⁴ Cucaah Bawipa Ralkapbu Pathian nih a ka chimhmi bia cu hihi a si: "Hi bia hi an chim caah, ka bia cu na kaa chungah mei ah ka canter lai i Hi mi hna hi thing ah ka canter hna lai i, mei nih cun a kangh dih hna lai." ¹⁵ Maw Israel innchungkhar, zohhmanh, Na cungah lamhlatpi in miphun phun khat ka ratpi lio, tiah Bawipa nih a ti. Cu miphun cu miphun ṭhawng ngai, hlan piin a rak ummi, An holh nan theih lomi miphun, an chimmi zong nan hngalh khawh lomi miphun a si. ¹⁶ An thalbawm cu a chin chinh lomi thlan bantuk a si, An dihlak in miṭhawng an si. ¹⁷ Nan kumvui mi le nan rawl kha an ei dih lai, Nan fanu le nan fapa hna kha an ei dih hna lai, Nan tuurun le nan cawrun kha an ei dih hna lai, Nan mitsur hang hna le nan theipi kung hna kha an hrawh dih hna lai, Nannih nih nan i bochanmi nan khua hna cu, kulhnak vampang ngei hmanh hna seh law, Vainam in an chimh dih hna lai. ¹⁸ Sihmanhsehlaw khi caan zong hmanh ah cun, nan donghnak ngaingai cu ka tuah lai lo, tiah Bawipa nih a ti. ¹⁹ Cun nannih nih, "Zeicahdah Bawipa kan Pathian nih hi thil vialte hna hi kan cungah a tuah?" tiah nan ti tikah, "Nannih nih nan ka hlawt i ramdang pathian kha nan ram chungah nan biak hna bang hin, nanmah ram a si lomi ram ah phun dangmi kha nan rianh hna lai," tiah kan leh hna lai. ²⁰ Mah hihi Jakob innchungkhar kha va chim hna u, Judah ram chungah aupi tuah u: ²¹ Maw mihrut le ruahnak a ngei lomi hna, mah hihi thei tuah u, mit a ngei nain khua a hmu lomi hna, hna a ngei nain khua a thei lomi hna. ²² Nan ka ṭih lo maw? tiah Bawipa nih a ti; Ka hmaiah nan tha a ther lai lo maw? Rili caah thetse kha ramri ah a chia i A lonh khawh lo zungzalmi dawntu a caah a chiatu keimah hmaiah hin nan tha ther loin maw nan um ko lai? Rili tilet cu an tho ko lai, sihmanhsehlaw an lonh kho lo; Tilet cu an awn ko lai, sihmanhsehlaw an pah kho lo. ²³ Sihmanhsehlaw hi mi hna hi cu an lung a khong i doh duhnak lungthin an ngei, Ral thawh hmangmi an si i atu cu an luan diam cang. ²⁴ Annih nih an lungchung in, "Anmah caante cio ah fur ruah le ṭhal ruah kha a kan pe i Rawl ṭuannak caan pelh lo tein khuacaan a kan chiahpiaktu Bawipa kan Pathian kha ṭih u sih," an ti lo. ²⁵ Sihmanhsehlaw nan ṭhat lonak nih thil umtuning cu a lettalam in a umter dih hna i Nan sualnak nih nan cung i tlunter a duhmi a zaangfahnak cu a donh hna. ²⁶ Zeicahtiah ka mi hna lakah miṭhalo kha an um i Va rap chiahtu nih rap a chiah bantukin rap kha an chiah, Sihmanhsehlaw an rap cu minung foihnak caah a si. ²⁷ Va in a khatmi bawm bantukin an inn cu hlennak in a khat. Cucaah annih cu an ngan i an rum, ²⁸ An thau i an tlornal. Ṭhat lonak tuahnak ah khan, a za cang ti an hngal lo, Ngakṭah nih khuaawng an ton khawh nakhnga dingah biading in bia an ceih lo i sifak rethei kha an ṭanpi hna lo. ²⁹ Hi thil hna ruangah hin dantat loin maw ka um hna hnga? Miphun hi bantuk cungah hin phuhlam loin maw ka um hnga? tiah Bawipa nih a ti. ³⁰ Hi ram chungah hin khuaruahhar a simi le thil ṭhalo ngai a simi a chuak: ³¹ Profet hna nih lih in bia an chim i tlangbawi hna zong nih anmah tining paoh kha an zulh ve; Ka mi hna nih cu ti i tuah cu an duhning a si ko, Sihmanhsehlaw a donghnak a phak tikah, zeitindik nan um te fang lai.

¹ Maw Benjamin mi hna, Jerusalem in chuak u law himnak hmun ah zam tuah u, Tekoa ah muko tum u law Beth-hakkerem ah alan thlai tuah u; Zeicahtiah chaklei in ṭhat lonak kha a hung lang cuahmah, rawhralnak nganpi cu. ² Zion fanu, a mui a ṭha i no cipcep tein a ummi cu a donghnak a nai ai. ³ Amah sinah cun tuukhal hna kha an tuurun cio he an rak chuak tawn i A velchum ah cun an thlam kha an bunh hna, An hmun cio ah khan an saṭil run kha an tlong tawn. ⁴ Amah doh awkah khan i tim u, Tho u law, chun ah tu u sih. A tlai tuk cang, ni aa mer cang i zanlei thladem hna cu an sau cang. ⁵ Cucaah i tim u law zan ah tu u sih, A inn ṭhaṭha hna cu hrawk dih hna u sih. ⁶ Mahtihin Ralkapbu Bawipa nih a ti, "Jerusalem khua thingkung kha hau hna u law Ral tuknak chuntlung kha a pawngah serhnawh u. A chungah hin zeidang um loin hremnak lawnglawng a um caah Hi khua hi dan ka tat lai." ⁷ Tikhor nih ti thar a chuah lengmang bangin Hi khua nih hin a ṭhat lonak kha a tharter lengmang ve; A chungah hin zaang-ennak le i velhnak thawng kha a leng zungzal i Ka hmuhmi cu zawtnak le hma lawng kha an si ko. ⁸ Maw Jerusalem, i ralring tuah, Cu ti a si lo ahcun kan chuahtak lai i Ahohmanh um lonak ram, ṭiaotakmi ah kan ser sual lai." ⁹ Hi bangin Ralkapbu Bawipa nih a ti, "Mitsur ruang bantukin Israel mi a tangmi hna cu an mua sua cikcek hna, Mitsur thei a lotu bantukin a nge hna kha na kut in vun pur rih tuah hna." ¹⁰ Cun kei nih ka leh i, "Aho nih dah ka chawnh hna le ralrinnak ka pek hna tikah ka bia an ngaih duh lai? Annih nih an hna an i phih cang i an ngai bal lai lo. Na bia cu ngaih an duh lo i na chimmi cu nihchuak ah an rel. ¹¹ Bawipa, na thinhunnak cu ka chungah a khat, A in in ka ing kho ti lo," ka ti. Cu tikah Bawipa nih a ka thawh i, "Ka thinhunnak cu khua lak i aa chawkmi ngakchia hna cungah le Aa pummi tlangval hna cungah khan bung ko kun. Pasal si hna seh, nupi si hna seh, cu chungah cun an i tel ve lai i A tar ngaingaimi ṭuakparmi hna zong kha an i tel ve ko lai. ¹² An inn hna cu midang pek an si lai, An lo hna le an nupile hna zong; Zeicahtiah hi ram chung i a ummi hna hi dan ka tat hna lai," tiah a ti. ¹³ Annih cu a hme bik in a ngan bik tiang, hrokhrawl in hmuhmi miaknak kha a duhmi an si; Profet le tlangbawi hna hmanh kha lih in rian a ṭuanmi an si. ¹⁴ Ka mi hna cu, an hma kha an menpiak ko hna, Sihmanhsehlaw a leng parpavuan lawng in a si; ’A dam ko lai,’ an ti, zeidah a dam ko lai? Zeihmanh a dam lai lo! ¹⁵ Annih nih hi fihnung a simi thil hna kha an tuah tikah an ning a zak maw? Zak hlah ee, an ning a zak hrimhrim lo; hmaisen zong kha an hngal lo. Cucaah a tlumi hna sinah an tlu ve lai; dan ka tat hna tikah an dih lai, tiah Bawipa nih a ti. ¹⁶ Hi bangin Bawipa nih a ti, "Lam tonnak ah khan dir tuah u law hlanlio lam kha kawl hna u, ’Ṭhatnak ah a phanmi lam cu khuazei ah dah a si? tiah hal hna u. Cu lam cu zul u law nan caah dinhnak nan hmuh lai,’ ti hna u. Sihmanhsehlaw annih nih an i thawh i, ’Cu lam cu kan zul lai lo,’ an ti. ¹⁷ Cun ka thawh hna i, ’Nan caah ralvengtu ka chiah hna lai, Muko aw thawng kha ngai u,’ ka ti hna. Sihmanhsehlaw annih nih an i thawh i, ’Zei ah kan rel lai lo,’ an ti. ¹⁸ Cucaah cun, maw miphun hna, ngai u law, Nannih a hmutu vialte hna, an cung i a tlung laimi thil hi hngal tuah u. ¹⁹ Maw vawlei, ngai tuah, Hi mi hna cungah hin, anmah khuakhanmi theitlai, rawhralnak cu ka tlunter lai; Zeicahtiah ka bia kha zei ah an rel lo i ka cawnpiaknak kha an hlawt. ²⁰ Sheba in a rami frankinsen zihmui le ram hla piin a rami fu thlum hna cu ka caah zeidah an ṭhathnem? Nan khangh thawinak cu ka cohlang hna lai lo, Nan raithawinak zong ka lawmhmi an si lo. ²¹ Cucaah hi mi hna hi an hmaiah i chuih awk lungtum ka chiahpiak hna lai i an i chuih lai i an tlu lai; Pale hna le fale hna le innpa le hawikom hna kha hmun khat ah an thi lai," tiah Bawipa nih a ti. ²² Hitihin Bawipa nih a ti, "Zohhmanh, chaklei ram in miphun pakhat a ra lio, Van hramdeng in miphun ngan pakhat a cawlcang lio; ²³ Li le fei kha an i put, Mipuar an si i zaangfahnak an ngei lo. An rang kha an i cit hna i an thawng cu rili thawng bantuk a si; Raltuknak caah pa nih aa thuamh bangin an i thuam, Nangmah he doh awkah, Maw Zion fanu!" ²⁴ Cu thawng an chimmi cu kan theih i Kan kut hna cu thazang ngei loin an uai dih; Nu nih nau nganfah an inmi bantuk nganfahnak nih a kan tlaih. ²⁵ Lo ah kal hlah u, lam zongah i chawk hlah u, Zeicahtiah ral cu vainam i put in a kenkip ah aa chawk ko. ²⁶ Maw ka mi hna fanu, buri i aih law vutcam i phulh tuah; Fapa ngeih chunte a thih i an ṭah bantukin fak piin ṭap tuah, Zeicahtiah a kan hrawktu ding nih a kan tuk dengmang cang. ²⁷ Jeremiah, nangmah cu ka mi hna fiantertu le hneksaktu ah kan ser, Va hneksak hna law an umtuning kha va hliah tuah. ²⁸ An dihlak in midohhmang, milungkhong, Mi congoih i a vak lengmangmi an si. ²⁹ Sohor nih a chem i somei cu a vaam, Thiantertu nih khan thir dar cu a titter hna, Sihmanhsehlaw zeihmanh a ṭhahnem lo, zeicahtiah suan le dar le thir kha an i ṭhen hlei lo. ³⁰ Annih cu ngun ek tiah ti an si, Zeicahtiah Bawipa nih a hlawt hna.

¹ Hi bia hi Bawipa sinin Jeremiah sinah a rami bia a si. ² Bawipa inn kutka ah khan va dir law khika ah khan va thanh tuah: Bawipa biak awkah hi kutka hna chungah a lutmi Judah mi vialte hna, Bawipa bia hi thei tuah u, va ti. ³ Hi bia hi Ralkapbu Bawipa, Israel mi Pathian bia cu a si: Nan umtuning le nan thil tuahmi kha i remh u law hi hmun ah hin kan umter hna lai. ⁴ Nannih nih nan i thawh i, ’Hi hmun hi Bawipa biakinn a si,’ Bawipa biakinn a si, Bawipa biakinn a si,’ tiah nan ti lengmang,’ hi bia lih a simi hi i bochan hlah u. ⁵ Nan umtuning le nan thil tuahmi kha i remh u law, pakhat le pakhat ṭhalo piin i ti hlah u law, ⁶ ramdangmi le ngakṭah le nuhmei kha dekhleng hna hlah u law hi hmun ah hin a sual lomi thisen kha chuah hlah u law nanmah lila fahnak ding caah pathian dang kha zul hna hlah u. ⁷ Khi tikah hlanlio piin nan pupa hna sinah zungzal in co awkah ka pekmi hna ram ah hin nannih cu kan umter ko hna lai. ⁸ Hi hlennak bia kha nan i bochannak thawng in zeihmanh ṭhathnemnak nan hmu lo. ⁹ Nannih nih nan fir, lai nan nawng, va cung in pa nan i duh i lih in tehte nan cang, Baal sinah raithawinak nan khangh, nan hngalh lomi pathian kha nan dawi hna. ¹⁰ Cun ka sinah nan ra i ka min in kawhmi hi inn chungah hin keimah hmaiah nan dir i, ’Kan him ko,’ nan ti, hi thil fihnung vialte hna tuah awkah hin kan him ko, tiah nan ruah. ¹¹ Hi inn keimah min in kawhmi inn hi, mifir hna kua ah maw nan ruah? Hi thil vialte hi, keimah hrimhrim nih ka hmuh, tiah Bawipa nih a ti. ¹² Ka min ka rak umternak hmasa, Shiloh khua i ka hmun thiang ah khan va kal u law, ka mi Israel mi hna ṭhat lo ruangah khakha zeitindah ka tuah ti kha va zoh tuah u. ¹³ Cun atu cu hi thil vialte hi nannih nih nan tuah ve, tiah Bawipa nih a ti; nannih sinah ngol lo tein bia ka chim, sihmanhsehlaw nan ngai duh lo, kan auh hna zongah nan ka let duh lo. ¹⁴ Cucaah Shiloh cung i ka tuahmi kha hi inn ka min umnak inn nan pupa hna sinah ka pek i nannih nih nan i bochanmi inn cungah hin ka tuah lai; ¹⁵ cun nan rualchan Efraim tefa vialte hna kha ka hlonh hna bangin, nannih zong ka mit hmuh lonak ah kan hlonh hna lai. ¹⁶ Jeremiah, hi mi hna caah hin thlacam hlah, an caah nawlnak le thlacamnak tuah hlah, keimah zong kha ka nawl len hlah; zeicahtiah na bia cu ka ngai lai lo. ¹⁷ Judah ram chung khua hna le Jerusalem khua chung lam hna ah khan zeidah an tuah kha na hmu lo maw? ¹⁸ Ngakchia nih thing kha an khawmh, an pale nih mei an kau i nu nih changvut cet an nen i vancung bawinu caah changreu thlum an ser, cun thlet thawinak kha pathian dang hna sinah an pekchanh — hi vialte hi keimah thin hunter awk caah an tuahmi a si. ¹⁹ Sihmanhsehlaw a thin an huntermi cu keimah ka si maw, tiah Bawipa nih a ti. Si hlah, anmah tu kha an si deuh, ningzahnak in anmah le anmah aa khuhmi hna kha an si. ²⁰ Cucaah Bawipa Pathian nih hi bangin a ti: Zohhmanh u, hi hmun cungah hin, minung cung le saṭil cungah, lo chung thingkung hna le vawlei theitlai cungah, ka thinhunnak ka bungh lai; a kang lai i a mit ti lai lo. ²¹ Hitihin Ralkapbu Bawipa, Israel Pathian nih a ti: "Nan raithawinak ah nan khangh thawinak cu chap chin luaimai hna u law khangh awk a simi thawinak sa kha ei lawlaw ko hna u. ²² Nan pupa hna cu Izipt ram in ka chuahpi hna tikah khan, khangh thawinak kong le raithawinak kong ah zeihmanh nawlbia ka pek ṭung hna lo, cu kong ah zeihmanh ka chim ṭung lo. ²³ Nawl ka pekmi hna cu mah hi pei a si ko cu: Ka bia nan ngaih ahcun nan Pathian ka si lai i ka mi nan si lai. Cun khuaawng pemh nan duh ahcun, ka nawlbia kha zul hna u, ka ti. ²⁴ Sihmanhsehlaw ngaih an duh lo i zeizong ah an rel duh lo, anmah ruahnak le anmah lungkhonnak tu kha an zul deuh i hmailei ah kal loin hnulei tu ah an kir. ²⁵ Nan pupa hna nih Izipt ram in an chuah ni in nihin ni tiang, ka sal profet vialte hna kha ngol lo tein ni khat hnu ni khat an sinah ka thlah hna; ²⁶ asinain ka bia cu an ngai hlei lo i an hna zong an chi hlei lo, an hngawng tu kha an ṭhawnter. An pupa hna nakin an ṭha lo deuh. ²⁷ Hi bia hi na chimh hna tikah an in ngai lai lo. Na auh hna zongah an in let lai lo. ²⁸ Khi tikah annih cu na thawh hna lai i, ’Hi miphun hi Bawipa an Pathian aw a ngai lo miphun an si i chimhhrinnak zong a cohlang duh lomi an si; biatak cu a thi cang, an hmur ah a cuang ti lo. ²⁹ Maw Jerusalem, Pathian sin i naa peknak hmelchunhnak na sam kha i met law hlonh tuah; Tlang par kolh ah khin va ṭap tuah, Zeicahtiah a thin a huntertu chan kha Bawipa nih a hlawt cang i a kaltak cang hna,’ na ti lai. ³⁰ Zeicahtiah Judah mi nih ka mit hmuh ah ṭhat lonak an tuah, tiah Bawipa nih a ti. Ka min in kawhmi inn kha fih a nungmi an siasal in an thurhhnawmh cang, ³¹ Benhinnom nelrawn ah Tofeth biaknak hmunthiang kha an ser i khika ah an fapa hna le an fanu hna kha an khangh hna; mah cucu keimah pekmi nawlbia a si lo, ka lunglai chuak balmi zong a si lo. ³² Cucaah cun zohhmanh cuka hmun cu Tofeth ti maw, asiloah Hinnom fapa nelrawn ti maw si ti loin, Thahnak Nelrawn ti a si cang lai nakding caan a ra lio, tiah Bawipa nih a ti; zeicahtiah mithi mi hna cu hmun dang ah vuinak hmun a um ti lo caah Tofeth ah cun an vui hna lai. ³³ Cun hi mi hna ruak cu van i a zuangmi va hna caah le lei i a tlongmi saram hna caah rawl an si lai i annih ṭhawltu ah ahohmanh an um ti lai lo. ³⁴ Cun Judah ram chung khua hna chungin le Jerusalem khua chung lam hna in lawmhnak aw le thanuamnak aw, nupi ṭhi tlangval aw le ṭhitmi ngaknu aw cu ka daihter lai; zeicahtiah ram cu a ṭiao dih cang lai.

¹ "Khi caan ah, Judah siangpahrang hna ruh le a bawi hna ruh le tlangbawi hna ruh le profet hna ruh le Jerusalem khua chung mi hna ruh cu an thlan in chuah an si lai, tiah Bawipa nih a ti. ² Cun annih nih an rak duh hna i an rian an rak ṭuan hna i an rak dawi hna i an rak kawl hna i an rak biakmi hna, ni le thlapa le van ralkapbu vialte hna hmaiah khin an pho hna lai. Cu ruh hna cu pumh an si lai lo, vui zong an si lai lo, vawlei ah non ah an cang lai. ³ Hi miphun ṭhalo chungin a nungmi paohpaoh nih hin, ka ṭhawl hnanak hmun kip ah, nun nakin thih an duh deuh lai," tiah Ralkapbu Bawipa nih a ti. ⁴ Annih cu, Bawipa nih hi bangin a ti, tiah na chimh hna lai: Mi nih an tluk tikah an tho ṭhan kho ti lo maw? Pakhat khat cu lam an tlau tikah, an kir ṭhan kho ti lo maw? ⁵ A si kun ahcun, ziahdah ka mi hna hi anmah duh bantuk lawngin an um ko kun hnga? Ziahdah hlennak kha fek ṭhup in an i tlaih peng ko i Ka nawlngaihnak lei ah khan kir an duh hnga lo? ⁶ An bia kha ka ngaih hna i biatak ka theihmi pakhat hmanh a um lo, ’Aa, zei hen ka tuah,’ tiah ngaihchia in a ṭapmi misual pakhat hmanh ka hmu hna lo. Raltuknak hmun chungah rangtum a lut cutmatmi bantukin Anmahle an kalnak lam cio ah khan lu hlinh in an lut cio ko. ⁷ Van i a zuangmi vaca nih khin amah a kai caan te kha a hngalh i Ṭhuro le laiphudit le langta hna nih anmahle an kir caan te kha an hngalh cio, Sihmanhsehlaw ka mi hna nih cun ka phunglam kha an hngal lo. ⁸ Zeitindah, ’Kannih cu kan fim i Bawipa phungbia kha kan ngei’ nan ti khawh? Cazi hna nih pei an hlennak cafung in lih ah an ser cang hi. ⁹ Nan mifim hna cu ningzahnak an phan, An lung aa tuai i chikkhatte ah khulrang tein thil hngalh khawhnak fimnak an ngeihmi kha an thlau cang. Bawipa bia cu zei ah an rel ti lo, An fimnak cu zei bantuk fimnak dah a si? ¹⁰ Cucaah an nupile cu midang sinah ka pek hna lai i An lo cu mi thar kha ka pek hna lai, Zeicahtiah a hme bik in a ngan bik tiang, a dinglo miaknak ah khan an hak a kau cio; Tlangbawi in profet tiang, an dihlak in hlennak lawngte an tuah. ¹¹ Ka mi hna cu an hma kha an menpiak ko hna, sihmanhsehlaw a parpavuan lawng a si, ’A ṭha dih ko lai,’ an ti, A ṭha dih ko lai? Zei cu dah a ṭha dih ko hnga? ¹² Annih nih fihnung kha an tuah tikah an ning a zak maw? Zak hlah e, an ning a zak hrimhrim lo; Hmaisen zong kha an hngal lo. Cucaah a tlumi hna sinah an tlu ve lai; Annih cu dan ka tat hna tikah an ril lai," tiah Bawipa nih a ti. ¹³ An rawl ṭuanpiak kha ka duh ko hna, Sihmanhsehlaw mitsur ruang ah mitsur tlai a um lo i Theipi kung ah thei zong a um lo; An hnah hmanh kha an car dih, tiah Bawipa nih a ti. ¹⁴ Zeicahdah nan ṭhut sawhsawh ko? Hmunkhatte ah nan dihlak in tho tuah u, Kulhnak hau a ngei mi kan khua hna ah khan va kal u si law Khika ah khan va thi dih hna u sih; Zeicahtiah Bawipa cungah kan sual caah, Bawipa kan Pathian nih hrawh awkah a kan ruah cang i Sivai paihmi ti kha din awkah a kan pek cang. ¹⁵ Zeihmanh a ṭhami a um lo tikah hin khuaawng pemh kan i ruahchan kho hnga maw? Ṭihnung a tlak cutmat tikah hin dinhnak kan i ruahchan kho hnga maw? ¹⁶ An rangtum hna hnarphit thawng cu Dan in theih a si, An rangtum tildit lo hna awnh thawng ah vawlei cu a ning piin aa hnin. Ral cu an ra i ram cu a chung i a ummi thil vialte he khan an ei dih, Khuapi le a chung i a ummi hna zong, an hrawh dih hna. ¹⁷ Zohhmanh u, nan lakah rul kan thlahhnawh hna lai, Ahohmanh nih an camh khawh lomi pinger hna cu, kan thlahhnawh hna lai. Annih nih cun an in cuk hna lai, tiah Bawipa nih a ti. ¹⁸ Zeitindah ka ngaihchiatnak hi ka in khawh lai? Ka lung si a vang. ¹⁹ Ram hlapi ah a ummi ka mi hna au thawng cu ngai hmanh: ’Bawipa cu Zion ah a um lo maw? A Siangpahrang cu a chungah cun a um ti lo maw?’ tiah an au. Zeicahdah an siasal hna le ramdang pathian hna in ka thin an ka phawh? a ti. ²⁰ Rawl ṭuan caan aa lim cang, ṭhal caan a dih cang, Kannih cu khamh kan si hlei lo, tiah an ti. ²¹ Ka mi hna cu hma an in kha ka hmuh tikah ka lungre a thei; Ngaihchiat in ka ṭap i ka lung a dong cikcek. ²² Gilead ah damnak si-ai a um ti lo maw? Khika ah sibawi pakhat tal an um lo maw? Zeicahdah ka mi hna hi an dam lo?

¹ Ka lu hi tikhor hei si seh law, Ka mit hi mitthli cerhtiput hei si seh law ka hei duh dah, Cuticun ka mi a thimi hna kha chunzan in ka ṭah khawh hna hnga. ² Thetse ram ah khin riahbuk pakhat ngei ning law ka hei duh hnga dah. Ka mi hna hi ka chuahtak hna hnga i ka kaltak diam hna hnga. An dihlak in va cung pa duh an si, rawi hmangmi aa bumi an si. ³ An lei cu an hriam a si, kuaih ciami likuk bantuk a si, Biatak si loin lih tu kha ram chungah hin bawi a si. Ṭhat lonak pakhat in ṭhat lonak pakhat ah an kal i Keimah cu zeihmanh ah an ka rel lo, tiah Bawipa nih a ti. ⁴ Ahohmanh nan innpa kha i ralring cio hna u, nan unau kha zum hna hlah u; Zeicahtiah unau nih unau kha hlen a si i hawikom nih hawikom kha congoih a si. ⁵ An hawikom kha lentecelhnak ah an hman hna i Biatak kha an chim bal lo; An lei kha lihchim an cawnpiak hna. An sualnak chungah thuk piin an um i an kir kho ti lo. ⁶ Palhnak kha palhnak nih a zulh chin lengmang i Hlennak kha hlennak nih a zulh chin lengmang. Keimah hngalh kha an duh lo, tiah Bawipa nih a ti. ⁷ Cucaah Ralkapbu Bawipa nih hi bangin a ti: Keimah cu anmah ṭhentu ka si i ka hneksak hna lai. Zeitindah ka mi cu zeirello in ka um khawh hna lai? ⁸ An lei cu thihnak cantiang a si, an kaa nih hlennak bia a chim; I rem ngaiin an i chawn cio. Sihmanhsehlaw an lung chung cun pakhat le pakhat i foihnak ding khua kha an khang cio. ⁹ Hi thil hna ruangah hin dantat loin ka um hnga maw? Hi bantuk miphun cungah hin phuhlam loin maw ka um hnga, tiah Bawipa nih a ti. ¹⁰ Tlang cungah khin fakpi in ka ṭap lai i ka kiao len ko lai. Ramlak saṭil tlonnak ah khin ṭah hla ka lawh lai. Zeicahtiah annih cu an kang dih i ahohmanh nih an pal ti hna lo. Caw pawt thawng zong kha theih a si ti lo. Van i a zuangmi va hna le lolak saram hna zong kha an lo dih cang. ¹¹ Jerusalem cu a rawkmi thil pon ah le cenghngia nih an veh lengmangmi hmun ah ka ser lai; Cun Judah ram khua hna cu an chungah mi um ti loin ka ṭhio dih hna lai. ¹² Zeicahdah hi ram cu ram thi ah a can i thetse ram bantukin a ro i aho pal lomi a si? Hi kong hngalhnak caah hin ahodah a fimnak aa zami cu a si? Midang kha a chimh khawh hna nakhnga ahodah Bawipa nih lungthin a cheuhmi cu a si? tiah Jeremiah nih a ti. ¹³ Cun Bawipa nih a leh i, "Hi thil hi zeicahdah a chuah ti ahcun, ka mi hna nih ka pekmi hna cawnpiaknak kha an hlawt caah a si. Ka bia kha ngaih an duh lo i ka chimhmi hna zong kha tuah an duh lo. ¹⁴ Annih nih an pupa hna nih an cawnpiak hna bang khan an lung a khong i Baal siasal lehlam kha an biak hna. ¹⁵ Cucaah Ralkapbu Bawipa keimah Israel Pathian nih ka tuah laimi kha ngai hmanh. Ka mi hna hi ei awkah anfangkha ka pek hna lai i din awkah sivai cawhmi ti kha ka pek hna lai. ¹⁶ An pupa nih si hna seh, anmah nih si hna seh, an hngalh bal lomi miphun hna sinah ka ṭhek hna lai i ka lim cikcek hna hlantiang vainam kha ka thlahhnawh hna lai, tiah a ti. ¹⁷ Hi bangin Ralkapbu Bawipa nih a ti: Ṭah a thiammi nu kha au hna law Thih hla lawh a thiammi nu kha cah hna; ¹⁸ Khulrang in ra hna seh law ka ṭah hna seh, Kan mitthli a luan i kan mitthli a tlak nakhnga. ¹⁹ Zion i ṭah thawng cu ngai hmanh: Zeitluk in dah kan rawhnak cu ṭihnung a si, Zeitluk in dah kan ningzahnak cu a fah! Kan vawlei cu kan chuahtak cang hna i kan inn cu an cim dih cang. ²⁰ Maw minu hna, Bawipa bia cu thei tuah u law amah kaa chung bia cu nan hna nih thei tuah hna seh; Nan fanu hna cu ṭahnak hla kha cawnpiak hna u law Mithi ṭahnak hla cu pakhat le pakhat i cawnpiak cio hna seh; ²¹ "Thihnak cu kan thlalangawng in an rung lut i Kan inn ṭhaṭha hna ah an lut cang; Khualak lam i ngakchia hna kha an thah hna i Khualak tual i tlangval hna kha an dawi hna," tiin i cawnpiak hna seh. ²² Cun Bawipa nih hi bangin a ti: Mithi mi an ruak hna cu lo lakah ek bantukin an ril liangluang lai i Rawlṭuantu hna nih an ṭuan hnu i an kaltakmi rawl, ahohmanh nih an pumh ṭhan ti lomi bantuk khi an si lai. ²³ Hi bangin Bawipa nih a ti: "Mifim nih a fimnak kha i porhlaw hlah seh, miṭhawng nih a thazang kha i porhlaw hlah seh, mirum nih a rumnak kha i porhlaw hlah seh; ²⁴ sihmanhsehlaw ahohmanh nih porhlawt a duh a si ahcun hi tu hi i porhlaw deuh seh: Keimah theih le hngalh hi. Zeicahtiah keimah cu Bawipa ka si i a dong lomi dawtnak kha ka pek hna i vawlei cungah hin biading le dinnak kha ka tuah; hi thil hna hi ka lunglawmhnak an si," tiah Bawipa nih a ti. ²⁵ - ²⁶ Bawipa nih, "Chunglei in si lo i pumsa lawngin cuarpartan a simi hna Izipt mi hna le Judah mi hna le Edom mi hna le Ammon mi hna le Moab mi hna le thetse ram i a ummi vialte hna le a sam aa metmi vialte hna cung i dantatnak ka tlunter lai caan kha a ra lio. Hi mi vialte hna le Israel mi hna hi an chunglei in an cuarpar an i tan lo," tiah a ti.

¹ Maw Israel chungkhar hna, Bawipa nih nan sin i a chimmi bia hi ngai tuah u. ² Hi bangin Bawipa nih a ti: Miphun dang hna lam kha i cawn hlah u, Van i hmelchunhnak nan hmuhmi hna ruang zongah khin nan khuaruah har hlah u, Khi bantuk i khuaruah a harmi cu miphun dang hna khi pei an si ko cu. ³ Miphun dang hna i an siasal hna cu hlennak men a si, Tupi chung i va haumi thing, Zungthiampa nih cop in a hei saih i ⁴ Sui le ngun in a ṭamh i a tluk nakhnga lo sobul le thir in a khenh chihmi pei an si ko cu. ⁵ Cu bantuk siasal hna cu zil dum i ritṭih thlaimi bantuk ceo an si ko, an holh kho lo; An kal khawh lo caah a phorh in phorh an herh. Annih cu ṭih hna hlah u, harnak zeihmanh an tuah kho lo, Ṭhatnak zong zeihmanh an tuah kho fawn lo. ⁶ Maw Bawipa, nangmah bantukin ahohmanh an um lo, Nangmah cu na lianngan ko, Na min cu a lianngan i a ṭhawng. ⁷ Maw miphun vialte hna Siangpahrang, Nangmah cu ahodah ṭih loin a um hnga? Zeicahtiah nangmah cu ṭih awk tlak hrimhrim na si; Miphun a fim bikbik hna lak le an bawi bikbik hna lakah, Khuazei tal ah nangmah bantuk hi hmuh khawh an si hnga maw? ⁸ Annih cu an dihlak in mihrut an si i an nga fawn; An fimnak pakpalawng cu thingtum sinin an cawnmi a si. ⁹ Denmi sui cu Tarshish in rak phorhmi a si i Sui cu Ufaz in rak phorhmi a si; An dihlak in zungthiampa le suisertupa sermi an si dih. Maimaw le kadipa in an thuamh hna, An zate in zungthiam sermi an si. ¹⁰ Sihmanhsehlaw Bawipa cu Pathian taktak a si, Pathian nung le zungzal Siangpahrang a si. A thin a hun ciammam ah vawlei aa hnin i Miphun hna nih a thinhunnak kha an ing kho lo. ¹¹ (Nannih nih annih cu hi bangin nan chimh hna lai: "Van le vawlei sertu a si lo pathian hna cu hrawh an si lai. Vawlei cungah khuazei hmanh ah an um ti lai lo," ti in.) ¹² Pathian nih vawlei hi a ṭhawnnak in a ser Vawlei hi a fimnak in a umnak hmun ah hin a umter Van khi a thiamnak in a samh hna. ¹³ A aw thawng ah van i ti khi an awn, Van hram deng in minmei kha a thawhter, Ruah caah awng kha a ser hna i A thil khonnak inn chungin thli kha a chuahter hna. ¹⁴ Mi vialte hi mihrut, hngalhnak zeihmanh a ngei lomi an si dih; Sui sertu vialte hna hi an siasal sermi hna nih hin zumhawktlak lo ah an canter dih hna; Zeicahtiah milem an sermi hna cu hlennak men an si i An chungah thaw zeihmanh a um lo. ¹⁵ Zeihmanh an ngei lo, nihchuak men an si, An biaceih ni a phak tik i a rawk menmi an si. ¹⁶ Jakob sertu Pathian cu mah hna bantuk hi a si lo, Amah cu zeizong vialte sertu a si i Israel hi amah ca hrimhrim i aa kawhmi miphun a si; Amah a min cu Ralkapbu Bawipa a si. ¹⁷ Nan thil kha hmunkhat ah pum hna u law ram chung hin i chuahpi hna u, Nannih hrenkanhmi hna. ¹⁸ Zeicahtiah Bawipa nih hitin a ti: Atu tan hi cu, hi ram chung mi hi an dihlak in ka phawi hna lai, Fak piin ka hmeh hna lai i ro lak in ka sur hna lai. ¹⁹ A, ka hma cu an va fak hringhran dah, Ka inmi tuknak cu an zualhma ko. Sihmanhsehlaw hihi cu ka sining pei a si cu, ka in awk pei a herh cu, ka ti. ²⁰ Ka inn cu a rawk cang, ka thlam hri vialte cu an cat dih cang; Ka fale nih an ka kaltak i an lo diam cang; Ka thlam a bunh ṭhantu ding ahohmanh an um lo, A puanzar hna a phun ṭhantu ding ahohmanh an um lo. ²¹ Ka mi hna a khaltu hna cu mihrut minga men an si i Bawipa kha ruahnak an hal bal lo, Cucaah khuaawng an tong lo i an tuurun hna cu an i ṭhek dih. ²² Ngaihmanh, bia chawkvai pakhat a rung thang, A thawng a ngan chin lengmangmi thawngpang cu chaklei ram in a rung; Judah ram khua hna cu ṭhio awk le cenghngia riahhmun i ser awkah a rami ralkapbu thawng a si. ²³ Maw Bawipa, minung nih a zulhmi a lam hi amah nih aa thimmi an si lo i A nun chung i a kalnak lam zong hi amah nih aa ser khawhmi an si lo ti kha ka hngalh. ²⁴ Maw Bawipa, kan remh tuah, Sihmanhsehlaw dinnak in si seh, Na thinhun in cun si hlah seh, Zeicahtiah zeihmanhlo ah na kan canter sual hnga. ²⁵ Nangmah an hngal duh lomi miphun hna cungah le Na min an au lomi miphun hna cungah, na thinhunnak cu bung tuah; Zeicahtiah Jakob cu an ei cang i an lim cang, A inn cu an hrawh cikcek cang.

¹ Jeremiah sinah Bawipa sinin a rami bia: ² Hi biakamnak bia hna hi ngai law Judah ram chung mi hna le Jerusalem khuami hna cu va chim hna. ³ Mah hihi Bawipa, Israel Pathian bia an si, tiah va chim hna. ⁴ Thir titnak somei a simi Izipt ram in nan pupa hna kha ka chuahpi hna tikah annih he biakamnak ka rak tuah i kha biakamnak bia a zul lomi paoh cu nan cungah chiatserhnak tlung ko seh. Annih cu ka rak thawh hna i, Ka nawl nan ngaih i kan chimh mi hna vialte nan tuah ahcun, ka mi nan si lai i nan Pathian ka si lai, ka rak ti. ⁵ Cuticun nan pupa hna sinah, cawhnuk le khuaihliti in a luangmi ram kan pek hna lai, ti in bia ka rak kammi kha, ka tlinter lai; cu ram cu atu i nan comi ram hi a si, tiah a ti, tiin. Cun kei nih ka leh i, "Cu bantuk cun si ko seh Bawipa," tiah ka ti. ⁶ Cun Bawipa nih a ka thawh i, "Hi bia vialte hi Judah ram chung khua hna le Jerusalem khuachung lam ah khan va thanh hna: Hi biakamnak bia hi ngai hna u law tuah hna u, va ti. ⁷ Nan pupa hna cu Izipt ram in ka chuahpi hna ri in atu tiang, hi bantukin tuah hlah u, ka ti lengmang hna, ralrinnak ka pek lengmang hna; Ka nawl ka ngai u, ka ti hna. ⁸ Sihmanhsehlaw annih nih an ngai lo i an hna zong an ka chit duh lo, an dihlak in anmah le an lungkhon ning cio khan an kal ko. Cucaah an cung i biakamnak ka tuahmi, annih nih an zulh duh lomi biakamnak chung i a ummi dantatnak vialte kha an cungah ka tlunter," tiah a ti. ⁹ Cun Bawipa nih a ka thawh ṭhan i, "Judah ram mi hna le Jerusalem khua chung mi hna nih hin keimah dohnak tuah an i tim: ¹⁰ An pupa hna sualnak ah khan an kir ṭhan i ka bia kha ngaih an duh lo; pathian dang hna kha an zulh hna i an biak hna; Israel le Judah nih an pupa hna he ka rak tuahmi biakamnak kha an hrawh. ¹¹ Cucaah Bawipa nih hi bangin a ti: Atu cu an luat khawh lomi ṭhat lonak kha an cungah ka tlunter lai; an ka au lai nain annih cu ka ngai hna lai lo. ¹² Judah ram khua chung mi hna le Jerusalem khuami hna nih raithawinak an pekchanhmi pathian hna sinah khan an kal lai i an auh hna lai, sihmanhsehlaw an harnak caan ah khan an rak khamh kho hna lai lo. ¹³ Zeicahtiah, maw Judah na pathian cu na khua zat an si; cun Baal sin i raithawinak khanghnak ding caah na sermi biakṭheng hna cu Jerusalem khua chung lam zat an si. ¹⁴ Cucaah Jeremiah, hi mi hna caah hin thlacam hlah, anmah aiawh zongin aunak siseh, nawlnak siseh, tuah hlah, zeicahtiah an harnak caan i an ka auh tikah ka ngai hna lai lo," tiah a ti. ¹⁵ Cun Bawipa nih, "Ka dawtmi nih thil ṭhalo hna a tuah tikah, ka innchung i umnak dingah hin, zei nawl dah a ngeih ti? Nan cung i a tlung dengmang cangmi rawknak hi biakṭheng cung i nan pekchanhmi thawinak sathau nih hin a donh khawh lai maw? ¹⁶ Hlan ah cun Bawipa nih, ’Oliv thingkung, a hnah hring dildel tein a um i aa dawhmi,’ tiah a rak in ti. Sihmanhsehlaw atu cu puak cukmak in fahnak na in lai; mei nih na hnah cu a kangh hna lai i na nge cu a hrem dih hna lai. ¹⁷ Nanmah an phuntu hna Ralkapbu Bawipa nih, nan cungah ṭhat lonak ka tlunter lai, tiin Baal sin i raithawinak nan khangh i ka thin nan ka phawh tikah khan kan hro hna; sihmanhsehlaw zeicahdah nan cungah harnak kha a tlun ti ahcun, nanmah nih ṭhat lonak nan tuahmi thawngin a si, a ti," tiah a ti. ¹⁸ Ka ral nih ka cungah thil ṭhalo tuah an timhmi cu Bawipa nih a ka hmuhsak i ka hngalh. ¹⁹ Thah awkah an hruai bang a rak zul hniapmapmi hna tuu bantuk ka rak si; Keimah rawinak caah khua an rak khan i, ’Thingkung cu a thling a um lioah hau u sih. A min hrimhrim kha philh dup in philh a si nakhnga minung lak hin a hloh in hlo u sih,’ an rak ti kha ka rak hngal lo. ²⁰ Maw Ralkapbu Bawipa, ding tein bia a ceih i Minung lungchung le ruahnak a hneksak dihtu, Ka cung bia hi nangmah kan pek, Phu na hlam hnanak cu ka hmuhter ko. ²¹ Cucaah ka nunnak kha lak a zal i, ’Bawipa min in bia chim ti hlah, na chim ahcun kan in thah lai,’ a timi Anathoth khuami hna kong ah khan, ²² mah hihi Bawipa bia a si — a bia cu mah hihi a si: Annih cu dan ka tat hna lai: an tlangval hna cu vainam in an thi lai, an fapa hna le an fanu hna cu mangṭam in an thi lai; ²³ pakhat hmanh an tang lai lo; zeicahtiah biaceihnak kum ah Anathoth khuami hna cungah ṭhat lonak ka tlunter lai, a ti.

¹ Maw Bawipa, nangmah cu na din caah bia kan al lai, Na hmaiah ka bia cu ka rak chuahpi ko lai. Zeicahdah mi ṭhalo hna cu khuaawng an ton i hlen hmangmi hna cu nuam tein khua an sak? ² Nangmah nih na phun hna i hram an thla, An ṭhang i thei an tlai. An hmur ah cun na cuang lengmang ko, Asinain an lung cu nangmah he aa hlat ko. ³ Sihmanhsehlaw maw Bawipa, nangmah nih na ka hngalh i ka tuahmi cu na hmuh ko, Zeitluk in dah kan dawt kha nangmah nih fiang tein na hngalh ko. Hi mi ṭhalo hna hi, thah awkah kalpimi tuu hna bantukin kalpi hna law Thah ni caah a dang in chia ko hna. ⁴ Zei can dah kan ram hi car remrum in a um lai i A ram hring hna hi rocar in an um lai? A chung mi hna kha an ṭhat lo tuk ca le, ’Kan tuahmi kha Pathian nih a hmu lai lo,’ tiah an ti caah, Va si hna seh, saram si hna seh, a tangmi zeihmanh an um lo. ⁵ Cun Bawipa nih Jeremiah cu a thawh i, Mi he tlik nan i zuam hmanh i na bat a si ahcun, Zeitindah rangtum cu na zuam khawh hna lai? A fawinak ram ah na rilh ahcun, Zeitindah Jordan kuam ramhnok lakah cun naa tuah kun lai? ⁶ Na unau, nangmah innchungkhar chung mi hrimhrim hmanh nih an in rawi cang; Nangmah tuk awkah khan an i thawh cio. Na sinah bia ṭhaṭha an chim hmanh ah zum hna hlah," tiah a ti. ⁷ Israel innchungkhar cu ka hlawt cang hna, Ka mi cu ka hlonh cang hna. Ka dawt ngaingaimi cu a ral hna kut chungah ka chanh cang. ⁸ Tupi chung i chiandeih bantukin ka mi hna hrimhrim nih an ka zuanhnawh i an ka awnhhnawh; Cucaah anmah cu ka huat hna. ⁹ Ka thimmi ka mi hna hi mupi, a ka kip in mupi dang nih an sanhmi bantuk a si. Ra u, nannih sahrang hna, ra u nan dihlak in, Rawl danghnak ah hin ra ei cio u. ¹⁰ Tuukhal tampi nih ka mitsur dum kha an hrawh i ka lo kha an naan dih, Ka lo a ṭhami te kha thetse ram ah an ser dih, ¹¹ Ṭiaotakmi hmun, ram pakpalawng le ti um lonak hmun ah an ser i ka ngaih a chia. Ram cu a ning piin thetse ram ah a cang cang, sihmanhsehlaw ahohmanh an zei a poi lo. ¹² Ramlak tlangsang hmun kawng ah khan ramhtu an ra phan lulhmalh cang, cu hna cu ram kha khattelei kam in khattelei kam tiang a eitu Bawipa vainam kha an si; dai tein a um khomi zeihmanh an um lo. ¹³ Ka mi hna nih changvut an cin i hling an zun, Thaba ngaiin an ṭuan, sihmanhsehlaw rawl fang zeihmanh an hmu lo. Bawipa kha a thin a hun caah an kumvui cu a ṭha hrimhrim lo. ¹⁴ Bawipa nih, "Ka mi Israel mi ka pekmi hna ram a hrawk dihtu an innpa miṭhalo hna kongah chim awk ka ngei," tiah a ti. "Hi mi hna hi, a hram in phawimi thingkung bangin, an ram in hmun dang ah ka kalpi hna lai i an sin khan Judah cu ka khamh lai. ¹⁵ Sihmanhsehlaw ka lak hna hnuah cun, an cungah zaangfahnak ka ngei ṭhan lai i an ti le an ram cio ah khan ka kirpi ṭhan hna lai. ¹⁶ Cun ka mi hna cu Baal min in chiatser an rak cawnpiak hna bantuk khan, annih zong nih ka mi hna biaknak kha an lungthin dihumnak in an i lak ve i, ’Bawipa a nun bangin,’ ti in chiat an ser ve ahcun, ka mi hna lakah telh chihmi innchungkhar an si ve lai. ¹⁷ Sihmanhsehlaw ka bia a ngai lomi miphun cu ahohmanh an si ah an hram in ka bongh hna lai i ka hrawh hna lai," tiah Bawipa nih a ti.

¹ Bawipa nih a ka thawh i, "Va kal law puan biar vaa cawk law na tai ah i kaih, sihmanhsehlaw ti tawnghter hlah," a ti. ² Cucaah Bawipa bia bang cun kaa cawk i ka tai ah kaa kaih. ³ Cun Bawipa bia cu a voi hnihnak ka sinah a ra ṭhan i, ⁴ "Tho law Zufrates tiva ah va kal tuah. Khika ah na tai i naa kaihmi na biar kha lungkak chungah va thup tuah," a ti. ⁵ Cucaah ka tho i Bawipa nih nawl a ka pek bangin Zufrates tiva pawngah ka va thuh. ⁶ Cun caan saupi hnuah khin Bawipa nih a ka thawh i, "Tho law, Zufrates tiva ah khan va kal tuah, cun khika ah va thup tiah nawl ka rak in pekmi biar kha va la," tiah a ti. ⁷ Cun Zufrates tiva ah cun ka va kal i ka thuhnak hmun kha ka va zoh, sihmanhsehlaw ka vun lak tikah, biar cu a rawk dih cang, zeihmanh ah a ṭha ti lo. ⁸ Cun Bawipa nih cun a ka chawnh ṭhan i a bia cu hi bangin a si: ⁹ Hi bantuk hin Judah aa porhlawtnak a nganmi le Jerusalem aa porhlawtnak a nganmi kha ka hrawh lai. ¹⁰ Hi miṭhalo hna nih hin ka bia ngaih kha an duh lo; pathian dang kha an zulh hna i an rian an ṭuan hna i an kunhnawh hna. Cucaah annih cu, zeihmanh ah a ṭha ti lomi biar bantuk hi an si lai. ¹¹ Biar cu tai ah hren chih a si bantukin Israel mi vialte hna le Judah mi vialte hna cu an ning piin keimah ah kaa hren chih hna. Zeicahdah mahtin ka tuah ti ahcun, annih kha ka mi an si i ka caah min ṭhatnak le sunparnak an chuahpi nakhnga, ti caah a si; sihmanhsehlaw ka bia cu ngaih an duh lo. ¹² Annih cu hi bia hi na va chimh hna lai; "Hi bangin Bawipa, Israel Pathian nih a ti, ’Ralca vialte cu mitsur hang in an khat lai,’ va ti. Cun annih nih an in thawh lai i, ’Ralca vialte cu mitsur hang in an khat lai ti kha kan hngalh ko pei,’ an ti lai. ¹³ Khi tikah na thawh hna lai i, ’Hi bangin Bawipa nih a ti: Hi ram chung i a ummi vialte hna hi an rit hlan tiang, mitsur hang in ka khahter hna lai — bawiṭhutdan ah a ṭhumi siangpahrang David tefa hna, tlangbawi hna le profet hna le Jerusalem i a ummi vialte hna hi ka ritter hna lai. ¹⁴ Cun ralca pakhat le pakhat an i khawn bantukin annih cu ka den cikcek hna lai, pale zong hual lo, fapa hna zong hual loin. An cungah zaangfahnak siseh, velngeihnak siseh, nemnak siseh, ka ngei lai lo; annih hrawh kha kaa sum hrimhrim lai lo," tiah Bawipa nih a ti. ¹⁵ Ngai u law nan hna chi tuah u, nan lung puam hlah u, Zeicahtiah bia a chimtu hi Bawipa a si. ¹⁶ Bawipa nan Pathian cu sunparnak pe tuah u, Khua a muih hlan le huaphap lawngin a ceumi tlang pang i nan ke a nal hlan le Nannih nih nan kawlmi ceunak cu mui padap i a ser hlanah hin. ¹⁷ Cu bantukin a thukmi muihnak chung i nan um hmanh i nan ngaih duh lo ahcun, Lungthin fah tuk ah a ṭah lawng ka ṭap lai i ka mitthli lawng a tla ko lai; Zeicahtiah Bawipa tuurun cu sal ah kalpi an si cang. ¹⁸ Siangpahrang le a nu sinah cun, "Nan i porhlawtnak nan bawiluchin cu nan lu cungin an tlak cang caah Ṭhutdan niam ah ṭhu tuah u," va ti. ¹⁹ Negeb ram khua cu kulh an si dih cang, Ahohmanh nih an chanh kho hna lo; Judah ram mi vialte cu sal ah hruai an si cang, An ning piin kalpi an si cang. ²⁰ Jerusalem khuami hna, hei cuan u law chaklei in a rami khi hei zoh tuah hna u, Nanmah an in pekmi hna tuurun kha khuazei ah dah a si? Naa porhlawt ngaimi tuurun kha? ²¹ Ka hawikom an si tiah na ruahmi hna kha na cung i uktu ah chiah an si tikah zeidah na chim lai? Nau nganfah a ingmi nu bantukin nganfahnak kha na in lai. ²² "Zeicahdah mah thil hi ka cungah a tlun hnga?" tiah na ti ahcun, Na sualnak a tam ruangah na hni cu phoih na si i Na ke cu langhter an si. ²³ Ethiopia mi nih a cuar kha aa thlen khawh maw? Cakei nih tah a ṭial kha aa thlen khawh maw? I thleng kho hna seh law cu, nannih ṭhat lonak dah ti lo zeidang tuah a thiam lomi zong nih hin ṭhatnak kha nan tuah ve hnga. ²⁴ Cucaah thetse ram thli nih a choihmi favai bantukin nannih cu kan ṭhek hna lai. ²⁵ Nannih nih keimah kha nan ka hlawt i pathian deu kha nan i bochan hna caah Mah hihi nan covo, ral thawh hmangmi hna covo, Keimah nih kan tahpiakmi hna cu a si, tiah Bawipa nih a ti. ²⁶ Cucaah keimah hrimhrim nih nan hni kha kan phoih hna i Nan ningzahnak kha ka langhter. ²⁷ Va cungin pa nan i duhnak, hor au in nan aunak, nan thurhnawmhnak hna hi ka huat hna. Tlang cungah le ram lakah thil ṭhalo nan tuahmi kha ka hmuh hna. Aize, Jerusalem, nang cu khua thurhnawm na si ai! Zei can dah, zei can dah na rauh rih lai?

¹ Khua a khen kong ah Bawipa bia Jeremiah sinah a phanmi: ² "Judah cu a uai i a khua hna cu zeihmanh tuah zuam loin an um, A mi hna cu vawlei ah an pil i Jerusalem ṭahnak cu a kai. ³ A saṭil bawi hna nih khan an sinum hna cu ti kawl awkah an thlah hna; Tili ah khan an va kal, sihmanhsehlaw ti an hmu lo, An tithawl ro he an kir. ⁴ Ruah a um lo caah vawlei in theitlai zeihmanh a chuak lo, Lothlo pawl cu an hnabei a dong, An ngaih a chiat caah an luchin kha an i phongh. ⁵ Ram lakah sazuk nih fa a hrin, Sihmanhsehlaw ram a um lo caah a fate cu a kaltak; ⁶ Ramber a um lo caah ramlak laa hna cu tlangpar hmunkawng ah khan an dir i Cenghngia bangin an lei an i chak i an thaw a ha i an mit a mui. ⁷ Kan ṭhat lonak nih sual kan phaw hmanh seh law, Maw Bawipa, na min ruangah kan bawm ko; Zumhtlak kan si lonak cu a tam ko, nangmah cungah kan sual ko. ⁸ Maw nang, Israel mi nih an i ruahchanmi, harnak caan i a khamhtu hna, Kan ram chungah hin khual bantukin maw na um ko lai? Zan khat riak khualtlawng bantuk maw na si ko lai? ⁹ Chikkhatte i teimi bantuk maw na si ko hnga? Amah le amah aa khamh kho lomi bantuk maw na si ko lai? Maw Bawipa, nang cu kan lakah na um i Kannih cu, Ka ta nan si, tiah na kan ti; Kan kaltak sawh hlah. ¹⁰ Bawipa nih hi mi hna kong ah hi bangin a chim: Annih hi ka lam in tlau a duhmi an si i an duhnak paoh ah an vak. Cucaah an cungah lawmhnak a ngei ti lo; an ṭhat lonak kha a philh lo i an sualnak kha dan a tat hna. ¹¹ Cun Bawipa nih a ka thawh i, "Hi mi hna ṭhatnak caah hin thlacam hlah. ¹² Annih nih rawl an ulh tikah an aunak kha ka ngaihpiak hna lai lo; khangh thawinak le changvut thawinak kha an pekchanh tikah ka cohlanpiak hna lai lo. Vainam le mangṭam le rai tu in ka thah hna lai," tiah a ti. ¹³ Cun kei nih kaa thawh i, "Maw Bawipa Pathian, profet nih an thawh hna i, ’Vainam nan tong lai lo, mangṭam zong nan ing lai lo, hi hmun ah hin daihnak cu kan pek hrimhrim hna lai,’ a ti, tiah an ti hna," ka ti. ¹⁴ Cun Bawipa nih a ka thawh i, "Profet hna nih keimah min in lihbia kha an chim; keimah nih ka thlah hna lo, nawl zong ka pe hna lo, a chawnh zong ka chawn hna lo. Annih nih annih cu lih a simi langhnak le santlailo bong le anmah lung chung ruahnak menmen kha an chimh hna. ¹⁵ Cucaah, vainam le mangṭam cu hi ram ah hin a tlung lai lo," a titu profet hna, ka thlah hna naloin ka min in bia an chimmi kong ah cun, Bawipa nih hi bangin a ti: Cu profet hna cu vainam le mangṭam in an thi lai. ¹⁶ Cun annih nih an chimhmi hna zong cu an nupile he an fapale hna he an fanule hna he; vainam le mangṭam ruangah cun phumtu hmanh ngei loin Jerusalem khua chung lam hna ah cun hlonh an si lai. An hmuh awk hnga a simi ṭhat lonak kha an cungah ka toih hna lai. ¹⁷ Cucaah annih na chimh ding hna bia cu mah hihi a si: Chun zan in ka mitthli cu hul loin luang camcin ko seh, Zeicahtiah ka mi hna ngaknu thiang cu kuai cikcek in den a si i fak piin hma a ing. ¹⁸ Lo i ka va chuah tikah vainam nih a thahmi hna an rilh liangluang ko kha ka hmuh hna; Khua chung i ka va luh ah, mangṭam in a thi cuahmahmi kha ka va hmuh hna; Profet hna le tlangbawi hna cu rawl hal in ram chungah an vak lengmang i dinh mui an hmu lo. ¹⁹ Judah cu na hlawt hrimhrim ko cang maw? Zion cu na fih ko cang maw? Kan caah damnak a um khawh ti lo tiangin zeicahdah na kan tuk? Zeicahdah caan ṭha deuh cu na kan ruahchanter ṭung, zeihmanh a ṭhami kan hmuh ṭung lo, Zeicahdah damnak caan cu na kan ruahchanter ṭung i rawknak lawnglawng a si ṭung? ²⁰ Kan ṭhat lonak le kan pupa hna sualnak kha na sinah kan phuan ko, Maw Bawipa, na cungah kan sual ko. ²¹ Na min a umnak kha zeirello in um hlah law A sungmi na bawiṭhutdan cung zongah nihsawhnak phakter hlah. Kan sin i na biakam cu philh hlah law pakpalawng ah ser sawh hlah. ²² Miphun dang pathian, pathian deu a simi hna lakah ruah surter kho an um maw? Asiloah, van hna nih khin ruahpi an surter kho maw? Nangmah cu kan in bochan nakhnga, Pathian na si lo maw, Maw Bawipa ? Hi thil vialte hna a tuahtu hi nangmah lawnglawng na si.

¹ Cun Bawipa nih a ka thawh i, "Moses le Samuel hmanh kha ka hmaiah dir hna seh law, hi mi hna hi ka zaangfah hlei hna lai lo. Ka hmaika in dawi hna law kal ko hna seh. ² Cun annih nih, ’Khuazei ah dah kan kal lai?’ tiah an in hal tikah, annih cu na thawh hna lai i, ’Hi bangin Bawipa nih a ti: "Rai ca i a simi cu rai sinah, Vainam ca i a simi cu vainam sinah; Mangṭam ca i a simi cu mangṭam sinah, Saltannak ca i a simi cu saltannak ah," tiah na ti hna lai,’ a ti. ³ "An cungah hrawktu phun li ka chiah lai, tiah Bawipa nih a ti: thattu ah vainam, sehtu ah uico, eitu ah van i a zuangmi va hna le hrawktu ah vawlei i a kalmi saram hna. ⁴ Cun Judah siangpahrang Hezekiah fapa Manasseh nih Jerusalem khua chung i a tuahmi sualnak ruangah annih cu vawleicung ram vialte hna sinah tuksum ah ka ser hna lai. ⁵ Aho nih dah na cungah zaangfahnak a ngeih lai, Maw Jerusalem? Aho nih dah an in hnemh lai? Zeitindah na ningcang a si, ti hal awkah aho nih dah an in pialhnawh lai i na cungah, ṭhatnak tlung ko seh, an in ti lai? ⁶ Nang nih cun na ka hlawt cang i hnulei na ka chit cang, tiah Bawipa nih a ti; Cucaah nangmah cu ka kut kan samhhnawh i kan hrawh ko, I dinhdorh lengmang hi ka ing kho ti lo. ⁷ Ka vamh hna i ram chung khua kip ah khan ka ṭhek hna; Annih nih an lam kha an hlawt duh lo caah an cungah ngaihchiatnak ka tlunter i ka mi cu ka hrawh hna. ⁸ An lakah nuhmei hna cu rili thetse nakin ka tamter deuh hna; Chun cingling ah an cungah ramhtu kha ka tlunter ukmak hna. Ral i run chim lai ṭihnung kha an cungah ka tlunter. ⁹ Fapa pasarih a ngeimi nu kha thlalau in mah hngal loin a ril ko, Chun a si ko rih lioah a ceunak cu a mit cang; Ningzak le hmaichia in a ril ko. Cun annih lak i a tang rihmi vialte hna cu vainam in thih awkah an ral hna kut chungah ka pek cang hna," tiah Bawipa nih a ti. ¹⁰ Aize, aize, ka nu, zeicahhen na rak ka hrin ngelcel! Hnahnawhnak chung i a um ding le vawlei pumpi he aa ralchanh dingmi minung pei ka rak si ko hi. Aho sin hmanh in tangka ka cawi hna lo i Ahohmanh zong ka cawih fawn hna lo, Sihmanhsehlaw mi kip nih an ka thangchiat. ¹¹ Bawipa nih a leh i, Sihmanhsehlaw fak piin kan ṭhawnter lai; Harnak caan le vanchiatnak caan ah na ral cu na ke tangah ka chiah hna lai. ¹² Thir nih chaklei in a rami kahpathir cu a khiah khawh maw? ¹³ Bawipa nih a ka thawh i, "Ka mi hna nih ram chung a dihlak ah hin sualnak an tuah caah hi sualnak ruangah hin dan ka tat hna lai, an chawva le an rothil vialte kalpi awkah ral kha ka rak thlahhnawh hna lai. ¹⁴ Annih cu an hngalh bal hrimhrim lomi ram ah khan an ral hna kha ka rianhter hna lai, zeicahtiah ka thinhunnak cu mei bantuk a si i zungzal in a alh ko lai," tiah a ti. ¹⁵ Bawipa nangmah nih na hngalh; Bawipa, ka philh hlah law ra ka leng tuah, Keimah a ka hremtu hna cungah ka phu ka hlampiak ko. Ka cungah na thin fual ko sawh law ka la sawh hlah, Nangmah ca i nihsawhnak ka inmi cu hmu ko sawh. ¹⁶ Na bia zei ah a rel lomi cu ka in hna a hau, Na bia cu kei ka caah cun lawmhnak le thanuamnak a si; Zeicahtiah nangmah nih keimah cu na ta si awkah min na ka bunh cang, Maw Bawipa, Ralkapbu Pathian. ¹⁷ Aa nuam huahmahmi hna sinah khan ka ṭhu ka um bal lo i An sin zongah kaa nuam bal lo; Nangmah nih rian na ka pekmi ruangah keimah lawng tein ka um i Nangmah nih thinhunnak in na ka khahter. ¹⁸ Zeicahdah ka fahnak hi a dongh kun lo? Zeicahdah ka hma hi hnabei dong a si i a dam duh lo? Nangmah cu ka caah, a ti a car tawnmi tivate, bochan awk a tlak lomi bantuk na si. ¹⁹ Cun Bawipa nih hi bangin a leh; Ka sinah na kir ṭhan ahcun kan lak ṭhan lai i ka hmaiah na dir lai. Bia ṭha chim kha na thiam i bia chia kha na hlawt ahcun, Ka bia chimtu na si lai. ²⁰ Nangmah cu an caah pemh khawh lomi dar vampang ah kan ser lai, An in doh lai, sihmanhsehlaw an in tei lai lo, Zeicahtiah nangmah kha huhphenh awk le khamh awkah keimah cu na sinah ka um, ²¹ Miṭhalo mi hna kut chung khan kan chuah lai i, Thlachiat ruat lomi hna kut chung khan kan khamh lai," tiah Bawipa nih a ti.

¹ Bawipa bia cu ka sin a phan ṭhan i, ² "Nupi ṭhi hlah, cun hi bantuk hmun ah hin fapa siseh, fanu siseh, ngei fawn hlah. ³ Hika i a chuakmi fa hna le an nule an pale kongah zeidah a tlung lai ti kha kan chimh lai. ⁴ Zawtnak ṭihnung ngaingai in an thi lai. Ahohmanh nih an ṭah hna lai lo, vui zong an tong lai lo. Vawlei i ek pon bantukin an ril lai. Annih cu ral kut in an thi lai, asiloah mangṭam in an thi lai, an ruak cu van i a zuangmi va hna le vawlei i a ummi saram hna caah rawl an si lai. ⁵ "Zeicahtiah Bawipa nih hitihin a ti: Ṭahnak inn chungah khan va lut hlah, ṭah awkah siseh, hnemh awkah siseh, va kal hlah; hi mi hna sin hin ka daihnak ka lak cang, a fekmi ka dawtnak le ka zaangfahnak zong, tiah Bawipa nih a ti. ⁶ Hi ram ah hin mingan he mihme he an thi lai, sihmanhsehlaw vui an si lai lo i ahohmanh nih a ṭah zong an ṭah hna lai lo, anmah ruangah ahohmanh a ah zong an i at lai lo, an sam zong an i kawngh lai lo. ⁷ Mithi ngai hna cu an hna ngamter awkah ahohmanh nih rawl an dumpi hna lai lo i an nu le an pa nih an thihtakmi hna hmanh kha ahohmanh nih hnangamnak hrai kha an pe hna lai lo. ⁸ Cun rawl danghnak inn chung zongah, annih he ṭhut ṭi awkah siseh, ei ṭi awkah siseh, din ṭi awkah siseh, na lut lai lo. ⁹ Zeicahtiah ralkapbu Bawipa Israel Pathian nih hi bangin a ti: Nangmah chan hrimhrim ah hin le nangmah mit hmuh hrimhrim ah hin, hi hmun i lawmhnak le thanuamnak aw thawng vialte, nupi ṭhipa aw le a mo aw kha, ka daihter hna lai. ¹⁰ "Cun hi mi hna hi hi bia vialte kha na chimh hna tikah an in thawh lai i, ’Zeicahdah hi a nganmi ṭhat lonak hi kan cung i tlun awkah Bawipa nih nawl a pek? Zei ṭhat lonak dah kan tuah? Bawipa kan Pathian cungah zei sualnak dah kan tuah?’ tiah an ti lai. ¹¹ Cun nang nih na leh hna lai i, ’Nan pupa hna nih an ka hlawt i pathian dang kha an zulh hna i an rian an ṭuan hna i an biak hna caah a si. An ka hlawt i ka phungbia kha an ngai lo. ¹² Cun nannih hi nan pupa hna nak chia deuh in nan um i milungkhong, miṭhalo nan si i ka bia kha ngaih nan duh lo. ¹³ Cucaah hi ram chung hin kan hlonh vurmar hna lai i nanmah zong nih nan pupa hna zong nih an hngalh bal lomi ram ah nan kal lai, khika ah chun zan in pathian dang hna kha an rian nan ṭuanpiak hna lai i nan cungah zaangfahnak zeihmanh ka ngei lai lo,’ a ti tiah na chimh hna lai. ¹⁴ "Cucaah ’Izipt ram in Israel mi a chuahpitu hna Bawipa a nun bangin,’ ti si ti loin. ¹⁵ ’Chaklei ram le ṭhek an sinak ram vialte hna chungin Israel mi a kirpitu hna Bawipa a nun bangin,’ tiin mi nih chiat an ser lai caan kha a ra lio; cun an pupa hna sinah ka rak pekmi anmah ramte ah khan ka kirpi ṭhan hna lai, tiah Bawipa nih a ti. ¹⁶ "Cun ngatlaitu tampi kha ka cah hna lai i hi mi hna hi an tlaih hna lai, tiah Bawipa nih a ti. Cun cu hnuah cun ramvaimi tampi kha ka cah hna lai i tlang kip le fing kip le lungpang kua kip ah khan an kawl hna lai. ¹⁷ Zeicahtiah ka mit nih an lam cu a hmuh dih ko hna i ka sin in an i thup lo, an ṭhat lonak zong hmu loin ka um lo. ¹⁸ Annih nih ka ram cu fih a nungmi an siasal hna ruak in an khahter i ka ro cu an thil fihnung in an khahter caah an sualnak le an ṭhat lonak cu a let hnih in ka chamter hna lai," tiah Bawipa nih a ti. ¹⁹ Maw Bawipa, nangmah cu ka thazang le ka ralhruang, harnak caan i ka himnak na si; Vawlei khuazakip in miphun hna kha na sinah an ra lai i ’Kan pupa hna nih an rak comi cu hlennak le pakpalawng le santlai lomi siasal men kha an rak si ko. ²⁰ Minung nih a caah pathian aa ser khawh hna lai maw? Aa ser khawh hmanh ah, cu bantuk pathian hna cu pathian a si lomi an si,’ an ti lai. ²¹ Cucaah annih cu ka cawnpiak hna lai, Voi khat ah za lak in ka ṭhawnnak le ka thazang cu ka hngalhter hna lai, Cun annih nih ka min cu Bawipa a si kha an hngalh lai," tiah Bawipa nih a ti.

¹ Judah sualnak cu thir cafung in ṭial a si; an lungthin lungtlap cungah cun daimon zum in khenh a si i an biakṭheng ki hna ah cun anmah sual phawtu dingah suai an si. ² An biakṭheng le an tung thiang hna cu thingkung hring kip toiah tlang ram fing le tlang kip cungah cun an dir. ³ Nan ram chung dihlak i nan sualnak ruangah nan chawva cu hranchaw ah mi ka pek hna lai i nan rochaw cu man loin ka pek hna lai. ⁴ Kan pekmi hna nan ro kha nan sung lai. Nan hngalh lomi ram chungah nan ral kha nan rianh hna lai, zeicahtiah ka thinhunnak cu a alhmi mei a si i zungzal in a alh ko lai. ⁵ Bawipa nih hi bangin a ti: "Minung kha a bochan i minung kha aa hngatchanmi ah aa serh i Bawipa kha a mertakmi cu a cungah chiat tlung ko seh! ⁶ Amah cu thetse ram i a ummi burbuk bantuk a si, Ṭhat lonak a rat tikah zeihmanh a hmu lai lo. Ramlak i lungtamnak hmun ah cun khua a sa lai, ahohmanh an um khawh lonak cite ram ah cun, a um lai. ⁷ Sihmanhsehlaw keimah kha a ka bochan i a ka hngatchanmi cu thluachuahnak ka pek lai. ⁸ Amah cu tikam phunmi thingkung bantuk, tiva kam i hram a zammi bantuk a si. Vaupi ni a chuah tikah, ṭih awk zeihmanh a ngei lo, A hnah cu hring dildel in an um zungzal ko. Khuakhen kum a tlun tikah a zei a poi lo i a thei zong a dong lo. ⁹ Lungthin hi zeizong vialte nakin a zer bik, Aho nih dah minung lungthin hi a hngalh khawh lai? Damh khawh ti lo tiangin a zaw cang. ¹⁰ Bawipa nih minung ruahnak cu ka dah dih i an lungthin cu ka zet dih, An tuahnak nih a phut ningin le an ziaza ning cio in ka cham hna. ¹¹ Dinlonak in chawva a ngei luaimaimi cu Amah ti a si lomi ti a bu chungah a tlummi vaking bantuk a si, A chan ṭim hlanah a chawva cu a kaltak ko hna lai i A donghnak ah cun mihrut a si kha amah nih a langhter ko lai. ¹² Kan Biakinn cu sunparnak bawiṭhutdan bantuk a si. A hramthawk in tlangsang cungah a dirmi bantuk kha a si. ¹³ Maw Bawipa, nangmah cu Israel mi nih an i hngatchanmi na si, Nangmah an hlawtu vialte cu ningzahnak an phan lai; Bawipa, nangmah cu nunnak cerhti na si i Nangmah an hlawmi vialte cu leidip lak i min ṭialmi bangin an lo lai. ¹⁴ Ka damter law, Maw Bawipa, ṭha tein ka dam lai, Ka khamh law him tein ka um lai; Zeicahtiah ka thangṭhatmi cu nangmah na si. ¹⁵ Mi nih an ka thawh i, "Bawipa nih a kan hronak bia cu khuazei ah dah an si? An rat khawh ahcun atu ah ra hna ngat seh!" an ti. ¹⁶ Sihmanhsehlaw Maw Bawipa, an cungah ṭhat lonak tlunter kha kan fial bal lo i An ca i harnak caan tlun kha ka duhmi a si bal lo. Nangmah nih ka ka in a chuakmi bia vialte cu na hngalh dih, Ka chimmi bia vialte cu na hnatlakmi an si ko. ¹⁷ Ka caah ṭihnung si sawh hlah, Rawhralnak ni ah nangmah lawnglawng hi ka himnak na si. ¹⁸ A ka hremtu kha ningzahnak phakter ko hna, sihmanhsehlaw kei cu ka luatter ko, Annih cu therphang in umter ko hna, sihmanhsehlaw kei cu ka thin ka phanter hlah. An cungah rawhralnak ni kha tlunter law hrawk cikcek ko hna, a ti. ¹⁹ Bawipa nih a ka thawh i, "Va kal law, Judah siangpahrang hna an luh an chuahnak Benjamin Kutka ah khan le Jerusalem i kutka dang vialte hna ah khan va dir tuah. ²⁰ Cun Bawipa bia cu thei tuah u, nannih Judah siangpahrang hna le Judah ram mi vialte le hi kutka in a lutmi Jerusalem khuami vialte hna, va ti. ²¹ Hitihin Bawipa nih a ti: Nannih nih sabbath ni ah thil nan phorh nakhnga lo le Jerusalem kutka hna zongah hin nan luhpi hna nakhnga lo, ṭha tein i ralring u. ²² Sabbath ni ah nan inn chungin thil zeihmanh nan chuahpi hna lai lo i rian zong nan ṭuan lai lo, sihmanhsehlaw nan pupa hna nawl ka pek hna bang khan sabbath ni cu thiang tein nan ulh lai. ²³ Asinain annih nih an ngai lo i zei zongah an rel lo, cawnpiaknak cu theih le ngaih an duh hrimhrim lo. ²⁴ Sihmanhsehlaw nannih cu ka bia nan ngaih i sabbath ni ah hi khuapi kutka hna chungah hin zei thil hmanh nan luhpi hna lo i khi ni cu thiang tein ul in rian nan ṭuan lo ahcun, ²⁵ hi khuapi kutka hna chungah hin David bawiṭhutdan ah a ṭhu dingmi siangpahrang hna kha an lut lai. Annih nih rangleng hna le rangtum hna kha an i cit hna lai i an ralbawi hna le Judah ram mi hna le Jerusalem khuami hna nih an cawngh hna lai: cun hi khua cu zungzal in a hmun lai, tiah Bawipa nih a ti. ²⁶ Cun Judah ram khua hna le Jerusalem khua kiangkap khua hna le Benjamin ram le Shefelah tlangram le Negeb in mi kha an ra lai i khangh thawinak le raithawinak le changvut thawinak le frankinsen zihmui kha an rak put hna lai i Bawipa inn ah lawmhnak thawinak kha an rak put fawn hna lai. ²⁷ Sihmanhsehlaw sabbath ni kha thiang tein ulh awk le sabbath ni ah thil phorh lo le Jerusalem kutka ah luhpi lo awk i ka bia kha nan ngaih lo ahcun, hi kutka hna cu mei in ka khangh hna lai; Jerusalem khua i siangpahrang inn hna kha a kangh hna lai i a mit lai lo," tiah a ti.

¹ Mah hihi Bawipa sinin Jeremiah sinah a rami bia a si; ² "Tho law umsertu inn ah vung kal law khika ah ka bia kha kan chimh lai," a ti. ³ Cucaah umsertu inn ah cun ka vung kal i a lengke kual i rian a rak ṭuan len ko kha ka vung hmuh. ⁴ Voi khat voi hnih cu a sermi um cu a ṭha in a chuah lo tikah a hrawh ṭhan tawn i a duhning in um dang ah a ser ṭhan tawn. ⁵ Khi tikah Bawipa bia cu ka sinah a ra i, ⁶ "Maw Israel innchungkhar hna, umsertu nih tlak kha a duhduh in a tuah bantuk hin kaan tuah kho hna lo maw? A kut chung i a ummi tlak bantuk khi ka kut chungah hin nan si. ⁷ Zeitik caan paoh ah, miphun pakhat khat si hna seh, ram pakhat khat si hna seh, ka phawi lai, ka ṭheh lai, ka hrawh lai, tiah ka tlerh ko hnga, ⁸ sihmanhsehlaw cu ka tlerhmi miphun nih cun a ṭhat lonak kha a mertak ahcun a cung i thil ṭhalo ka tuah lai ka timi kha a ṭhat deuhnak in ka ruah ṭhan lai. ⁹ Cun voi khatkhat cu miphun pakhat siseh, ram pakhat siseh, ka sak lai i ka phun lai, tiah ka ti ko hnga. ¹⁰ Sihmanhsehlaw ka mithmuh ah thil ṭhalo kha a tuah i ka bia a ngaih lo ahcun, a ca i thil ṭha tuah kaa timhmi kha ka ruah ṭhan a herh fawn ko lai. ¹¹ Cucaah va kal law, Judah ram mi hna le Jerusalem mi hna cu, mah hihi Bawipa bia a si tiah va chim hna: Keimah cu umsertu ka si. Nan cung i a tlung dingah thil ṭhalo kha ka tim lio i nanmah dantatnak ding lam kha ka tuak lio. Lam ṭhalo nan zulhmi kha nan dihlak in kirtak cio u; nan ziaza le nan tuahnak kha i remh cio u, a ti. ¹² Sihmanhsehlaw annih nih an in thawh lai i, ’Zeicahdah kan i remh len ko lai? Kan duhning cio paoh in kan tuah cio ko lai i kan lung chungin a chuakmi ning cio paoh in kan um ko lai,’ tiah an in leh lai. ¹³ Cucaah Bawipa bia cu hi bangin a si na ti lai: Miphun hna kha va hal tuah hna u, hi bantuk hi aho tal nih an thei bal maw? Ngaknu thiang Israel nih thil ṭhalo cem bik a tuah ko. ¹⁴ Lebanon tlang par lungpang lakah khan hawhra nih tlak a ngol lai maw? A tlangpang i a luangmi tiva hna cu an reu ko hnga maw? ¹⁵ Reu hlah, sihmanhsehlaw ka mi hna nih cun an ka philh; Annih nih siasal menmen hna sinah khan raithawinak an khangh, Annih nih an zulh awk hnga lam a simi ah khan an ril i hlan lam kha an zul ti hna lo; Lam hleng le ser lomi lam tu ah khan an i mer. ¹⁶ Anmah nih an ram cu pakpalawng ah an ser i Zungzal in mi nih an nihsawh lai. A pawng i a kalmi paoh cu an thla a hlauh hna lai i an lu an i thin sek len lai. ¹⁷ Nichuahlei thli bantukin annih cu an ral hna hmaiah ka ṭhek dih hna lai, An ṭumchuk ni ah ka hmailei chit loin ka hnulei tu ka chit hna lai, a ti. ¹⁸ "Ra tuah u, Jeremiah hi zeitindah kan tuah lai, i ceih tuah u sih," an ti. "Kannih lam a kan hruaitu ah tlangbawi an um ṭhiamṭhiam ko lai, fim a kan chimtu ah mifim an um ṭhiamṭhiam ko lai i Pathian bia a chimtu ah profet an um ṭhiamṭhiam ko lai. Ra u law, a cungah bia kawl tuah u sih, a bia cu zeihmanh ah rel hlah u sih," an ti. ¹⁹ Sihmanhsehlaw a ka raltu hna nih ka cungah an chimmi bia cu ka ruahpiak law ka theihpiak ko. ²⁰ Ṭhatnak hi ṭhat lonak in maw lehrulh a si lai? Na thinhunnak kha an sinin aa ṭhial khawh nakhnga anmah aiawh in nangmah cu kan nawl i na hmai i ka dir kha philh sawh hlah. ²¹ Cucaah an fale hna cu mangṭam tonter hna, Vainam sinah khan kaltak men ko hna. An nupile hna cu fa ngei lo le nuhmei siter ko hna, an pale hna cu thihnak nih kalpi ko hna seh, An tlangval hna cu raltuknak hmun ah vainam in thi hna seh. ²² Ralrinnak pek hmasa loin an cungah ramhtu kha tlunter hna, An inn chungin kiaonak le ainak thawng kha thang hna seh, Zeicahtiah ka tlaknak ding caah khor an cawh i Kaa foihnak ding caah rap an chiah. ²³ Asi, Maw Bawipa, nangmah nih keimah thahnak ding caah an timhmi vialte cu na hngalh dih ko; An ṭhat lonak kha hlohpiak hna hlah law, an sualnak kha hnawhpiak hna hlah. Ril cuahmah in na hmaiah chuahpi an si tikah, Na thinhun ni ah an cungah cun ṭuan ko.

¹ Bawipa nih hitin a ti: "Va kal law tlak in sermi thawl pakhat va caw. Cun an upa tlawmpal hna le an tlangbawi tlawmpal kha i kalpi hna law, ² Ben-hinnom Nelrawn i Peipahau Kutka luhnak ah khan va kal u, cun khika ah khan kan chimhmi bia cu va thanh. ³ ’Maw Judah siangpahrang hna le Jerusalem khuami hna, Bawipa bia hi thei tuah u,’ va ti. Hi bangin Ralkapbu Bawipa, Israel Pathian nih a ti: Hi hmun cungah hin rawhralnak ka tlunter lai i mah cu a theimi paoh cu, an hna zaizil khing dihlak in a khenh hna lai. ⁴ Zeicahtiah hi mi hna nih hin an ka hlawt i hi hmun hi keimah ta si hlah seh law cu bang cun an tuah, anmah nih siseh, an pupa hna nih siseh, Judah siangpahrang hna nih siseh, an hngalh bal lomi pathian hna sinah khan rai an thawi i hi hmun cu a sual lomi thisen kha an khahter. ⁵ Baal caah khan hmunthiang an ser hna i cuka ah cun an fapale hna kha baal ca i khangh thawinak ah an khangh hna. Mah cucu keimah nih ka pekmi hna nawlbia a si lo; a chim zong ka chim bal lo, ka lunglai zongah a chuak bal lo. ⁶ Cucaah hi hmun cu Tofeth ti si ti lo le Ben-hinnom Nelrawn ti si ti loin Thahnak Nelrawn ti a si cang lai ni kha a ra lio, tiah Bawipa nih a ti. ⁷ Hi hmun ah hin Judah le Jerusalem khuakhannak kha thawl khuai bantukin ka khuai lai. Annih cu an ral hna nih khan an tei hna lai i vainam in an thah hna lai. An ruak cu van i a zuangmi va hna le vawlei i a tlongmi saram hna sinah rawl caah ka pek hna lai. ⁸ Cun hi khua hi mi thla a hlauhmi khua le cekcekhnawh thluahmah awk khua ah ka ser lai; a cung i ṭhat lonak a tlungmi vialte ruangah hin a pawng i a kalmi paoh cu an thla a hlauh hna lai i an cekcek len lai. ⁹ Cun khika i a ummi hna cu anmah fale sa lila kha ka eiter hna lai. An ral hna le annih thah a duhmi hna nih an kulh hna tikah, an umtuning kha a har tuk hringhran lai caah pakhat le pakhat kha an i ei lai. ¹⁰ Cun nangmah sinah a kalmi hna hmuhhngan te ah khan thawl kha na khuai lai i ¹¹ na thawh hna lai i, ’Ralkapbu Bawipa nih hi bangin a ti: Hi bantuk hin hi miphun le hi khuapi hi ka khuai lai, mi nih tlak um cu an khuai tikah remh ṭhan khawh a si ti lo bantukin, remh ṭhan khawh ti lo dingin ka khuai lai. Cun mi nih an mithi hna cu, hmun dang ah vuinak a um lo caah Tofeth ah an vui hna lai. ¹² Mah hihi, hi hmun cungah le a chungah a ummi hna cungah ka tuah dingmi cu a si, tiah Bawipa nih a ti: Hi khua cu Tofeth bantuk ka siter lai. ¹³ An thur ruangah Jerusalem khua inn hna le Judah siangpahrang inn hna cu Tofeth bantuk an si lai — vancung thil bu sin i raithawinak a cung i an khanghnak inn vialte le pathian dang hna sin i thlet thawinak an thletnak inn vialte hna cu, Tofeth bantukin an thur lai,’ a ti, tiah na chimh hna lai," tiah a ti. ¹⁴ Cun Jeremiah cu Bawipa nih bia va chim ti i a kalternak hmun Tofeth khan a ra i Bawipa inn a tual ah khan a dir. Mi vialte cu a thawh hna i, ¹⁵ "Ralkapbu Bawipa, Israel Pathian nih hi bangin a ti: Hi khuapi cungah le a pawngkam khua vialte ah hin ka tlunter lai tiah ka rak timi dantatnak kha, nannih nih nan lung a ṭhawn i ka bia kha ngaih nan duh lo caah, ka tlunter taktak lai, a ti," tiah a ti.

¹ Immer fapa tlangbawi Pashhur, Bawipa inn i bawi upa bik a simi nih cun, hi thil hna Jeremiah nih a chim cu a theih tikah, ² Jeremiah cu fung in a tuk i hreng a khenh i Bawipa inn chung i Cunglei Benjamin Kutka timi ah khan a chiah. ³ A thaizing ah a hreng cu a phoih i Jeremiah nih cun a thawh i, "Bawipa nih na min cu Pashhur an ti lo, Magor-missabib an ti cang," tiah a ti. ⁴ "Zeicahtiah hi bangin Bawipa nih a ti: Nangmah cu nangmah lila caah le na hawikom hna caah ṭihnung ah kan ser lai. Na hmuh hngan hrimhrim ah annih cu an ral hna vainam in an tlu lai. Cun Judah ram vialte cu Babilon siangpahrang kut chungah ka pek lai i Babilon ah sal ah a kalpi hna lai i vainam in a thah hna lai. ⁵ Cu hleiah, khuapi chung chawva vialte, rumnak vialte le Judah siangpahrang hna rorah vialte cu an ral hna kut chungah hranchaw ah ka pek hna lai i an tlaih hna lai i Babilon ah an kalpi hna lai. ⁶ Cun nangmah Pashhur le na innchungkhar vialte cu sal taannak chungah nan kal lai i Babilon kha nan phan lai. Cuka ah cun nan thi lai i cuka ah cun vui nan si lai, nangmah le hlennak in na chimhmi na hawile vialte hna cu," tiah a ti. ⁷ Maw Bawipa, nangmah nih na ka hlen i hlen ka si ko cang; Keimah nakin na ṭhawng deuh i na ka tei; Mi kip nih capo ah an ka saih i chun nitlak an ka nihsawh. ⁸ Bia ka chim paoh ah a au in au a hau i Zaang-ennak le rawhralnak a um, tiah thanh a hau. Bawipa, na bia ka chim ruangah serhsat le nihsawh ka si thluangthluan ko. ⁹ Bawipa kong cu ka lung chungah ka riahter ti lai lo i A min zongin bia ka chim ti lai lo, ka ti ah, A bia cu ka lung chungah hin mei bantukin a alh i ka ruh chungah hin mei linh bantukin aa khumh. Ka chung i tlaih peng kha ka celh ti lo i chuak loin ka tlai kho hrim ti lo. ¹⁰ Mi tampi a thli tein an i ceih kha ka theih i, Amah cu sual puh ko u! Sual kan puh ko lai,’ an ti. Ka hawikom vialte nih pelhhreuh kaa lamh sual nakhnga ding lawngte kha an bawh i, ’Hlen khawh a si ko hmanh maw, cu ti a si khawh ahcun kan tlaih khawh lai i a cungah phu kan hlam khawh lai,’ an ti. ¹¹ Sihmanhsehlaw Bawipa cu keimah leiah a ṭang i ṭhawng ngai le zaangfahnak ngei in a um, Cucaah a ka hremtu hna cu an ril lai i zeihmanh tuah kho loin an tlu lai. An tuah duhmi kha an tlinter khawh lo tikah An ningzahnak cu a fak ngaingai lai, An minchiatnak cu zeitikhmanh ah philh a si ti lai lo. ¹² Maw Ralkapbu Bawipa, nang cu mi kha ding tein a hneksak i lungthin le ruahnak a hmu dihtu na si, Ka cung thil hi nangmah cungah ka chuan cang caah An cung i phu na hlammi cu ka hmuhter ko. ¹³ Bawipa sinah cun hlasa tuah u, Bawipa cu thangṭhat tuah u! Zeicahtiah misifak mi hna cu an cung i ṭhat lonak a tuahtu hna kut chung khan a luatter cang hna. ¹⁴ Ka rak chuah ni kha chiatserh si ko seh! Ka nu nih a rak ka hrin ni kha a philh in philh si ko seh. ¹⁵ Ka pa cu, ’Fapa na ngei,’ tiah a hung chim i a lung a lawmhtertu kha chiatserh si ko seh. ¹⁶ Khi mipa cu, zaangfahnak um loin Bawipa nih a hrawhmi hna khua bantuk a si lai. ¹⁷ Thihnak nih ka chuah hlanah a rak ka lak ti ṭung lo caah, Amah nih cun zinglei ah nganfah ainak kha a theih lai i Chun ah raltuk launak thawng kha a theih lai. Rak ka la seh law cu ka nu paw kha ka thlan a hei si ko hnga i Chuak loin ka hei um lan ko hnga. ¹⁸ Zeicahdah ngaihchiatnak le retheihnak lawng hmuh awkah le Ka chan cu ningzahnak lawngin hman awkah Ka nu paw chungin ka rak chuah hnga?

¹ Siangpahrang Zedekiah nih Malkhiah fapa Pashhur le Ma-aseiah fapa tlangbawi Zefaniah cu Jeremiah sinah hi bia he a hei thlah hna i, ² "Babilon siangpahrang Nebukhadnezzar nih a kan tuk caah hin Bawipa cu rak kan halpiak tuah. Bawipa nih cun hlanah a rak tuah tawn bantuk khan khuaruahharnak a hei tuah ko hnga i Nebukhadnezzar nih a kan kulhnak hi a lak zong a hei lak ṭhan ko hnga," a ti. ³ Khi tikah Jeremiah nih annih cu a leh hna i ⁴ hihi Bawipa, Israel Pathian bia cu a si tiah Zedekiah cu va chim u: "Babilon siangpahrang le Khaldi mi hna, khua kulhnak hau lengin an kulhtu hna na dohnak nangmah hriamnam lila kha na cungah ka tlunter hna lai. Annih cu hi khuapi a laifang ah hin ka luhpi hna lai. ⁵ Keimah hrimhrim nih thinhunnak le thinlinhnak le samhmi kut le ban ṭhawng he kan doh lai. ⁶ Hi khua chungah a ummi hna minung he saṭil he ka thah hna lai; annih cu rai ṭhalo ngaiin an thi lai. ⁷ Cun cu hnuah cun, Judah siangpahrang Zedekiah le a sinum hna le a mi hna, hi khua chung i rai le vainam le mangṭam a luatmi hna kha Babilon siangpahrang Nebukhadnezzar le anmah thah a duhmi an ral hna kut chungah ka sanh hna lai. Vainam in an sam cikcek hna lai; anmah cu an zaangfah hna lai lo, a nganh zong an ngan hna lai lo, vel zong an ngeih hna lai lo,’ tiah a ti. ⁸ Cun Bawipa nih Jeremiah cu a thawh i, "Hi miphun cu hi tiin na chimh fawn hna lai. Hi bangin Bawipa nih a ti: Zohhmanh u, nunnak lam le thihnak lam i thim awkah kan pek hna. ⁹ Hi khuachung i a tangmi paohpaoh cu vainam le mangṭam le rai in an thi lai; sihmanhsehlaw a chuak i an kulhtu hna Khaldi mi hna sinah aa pemi cu an nung lai; a nunnak ceoceo tal cu aa luatpi lai. ¹⁰ Hi khua hi ka hmai ka thuhtak cang, an cung i ṭhatnak tuahnak ding caah si loin chiatnak tuahnak ding caah a si lai. Babilon siangpahrang sinah khan pek a si lai i mei in a khangh lai, tiah Bawipa nih a ti," tiah a ti. ¹¹ - ¹² "Jeremiah, Judah siangpahrang innchungkhar, David Siangpahrang tefa hna cu, Bawipa nih ka chimmi kha va chim tuah hna: Nifate in dinnak kha tuah a si nakhnga i zuam u. Hlenmipa kha a hlengtu sinin va chanh u. Cucu nan tuah lo ahcun, ṭhat lonak nan tuahmi nih hin ka thinhunnak cu hmih khawh lomi mei bantukin a alhter sual lai. ¹³ Jerusalem, nang cu nelrawn cung i lungpi a dirmi bantukin nelrawn cungah sangpi ah na ṭhu. Sihmanhsehlaw Bawipa keimah nih kan doh lai. Naa thawh i, ahohmanh nih an ka tu kho lai lo, ahohmanh nih ka ralhruang hi an bauh kho lai lo, na ti. ¹⁴ Sihmanhsehlaw Bawipa keimah nih na tuahmi ruangah dan kan tat lai. Na siangpahrang inn cu mei in ka khangh lai i a pawngkam i a ummi thil vialte cu mei nih cun a kangh dih hna lai, hi bia hi Bawipa keimah nih ka chim," tiah a ti.

¹ - ² Bawipa nih Judah siangpahrang inn ah khan kal a ka fial i, "Maw Judah siangpahrang, David bawiṭhutdan ah a ṭhumi nangmah le na bawi hna le na mi hna, hi kutka chungin a chuak a lutmi hna nih ngai tuah u, hihi Bawipa bia cu a si. ³ Thil nan tuah tikah dingte le hmaan tein tuah u, hremmi kha a hremtu kut chungin chuah u, ramdangmi le ngakṭah le nuhmei hna cungah ṭhat lonak siseh, zaang-ennak siseh, tuah hlah u. ⁴ Hi bia nan ngaih lawnglawng ah, David bawiṭhutdan cungah a ṭhumi siangpahrang hna, rangleng le rangtum i cit in an miṭhi hna le an lalang hna he hi inn kutka chungah a lutmi an um rih lai. ⁵ Sihmanhsehlaw hi bia hi zei ah nan rel hna lo ahcun, hi inn hi a rawk lai tiin keimah min chalh in chiat ka ser, tiah Bawipa nih a ti. ⁶ Zeicahtiah Judah siangpahrang inn kong ah Bawipa nih hi bangin a ti: Nangmah cu ka caah Gilead bantuk le Lebanon tlangpar bantukin i dawh hmanh law, Ahohmanh an um lonak hmun thetse ram ah kan canter lai. ⁷ Nangmah dotu dingah hriamnam he a um ṭhepṭhupmi bu, a rawl a ṭammi bu kha ka rak thlah lai. Na sidar thing ṭha bikbik hna cu an hau hna lai i Mei chungah an paih hna lai. ⁸ "Cun miphun tampi hna chung mi cu hi khua pawng hin an kal te lai i pakhat le pakhat cu, ’Zeicahdah Bawipa nih hi bang hin hi khuapi cungah hin a tuah hnga?’ tiah an i ti te lai. ⁹ Cun an i lehnak cu, ’Annih nih Bawipa an Pathian biakamnak kha an hlawt i pathian dang kha an biak hna i an rian an ṭuan hna caah a si,’ ti a si lai," a ti. ¹⁰ Nannih Judah mi hna, Siangpahrang Josiah kha ṭah hlah u, A thih zun zong ngai hlah u; Sihmanhsehlaw a fapa Shallum tu kha lunghno ngaiin ṭah u, Zeicahtiah kir ti lo dingin an kalpi lai, A chuahnak ram kha zeitik hmanh ah a hmu ṭhan ti lai lo. ¹¹ Judah siangpahrang Shallum, Josiah fapa, a pa Josiah a chaangtu kong ah Bawipa nih, "Hika hmun hin a chuak cang i a ra kir ṭhan ti lai lo. ¹² An kalpinak ram ah khan a va thi lai i hi ram hi a hmu ṭhan ti lai lo," tiah a ti. ¹³ Dinlonak in a inn a sa i Hlennak in a inn cungdot khaan hna kha a ser i Man loin a rammi kha rian a ṭuanter i An ṭuan man nihlawh a pe duh lomi cu A cungah ningzahnak tlung ko seh. ¹⁴ ’Keimah caah inn nganpi pakhat ka sak lai i Cungdot khaan kau pipi ka ser hna lai, Thlalangawng ka ser hna lai, Sidar thing in ka ṭamh lai i si sen ka thuh lai,’ a timi cu A cungah ningzahnak tlung ko seh. ¹⁵ Na sidar thing kha a ṭhat deuh ahcun cu nih cun siangpahrang na si kha a langhter maw? Na pa kha ruat hmanh: tlamtling tein ei awk din awk a ngeimi a si, dingte le aa ruang tein thil a timi a si, Cucaah a caah zeizong vialte a ṭha dih. ¹⁶ Mirethei le misifak cungah khan bia ding tein a ceih, Cu nih cun keimah a ka hngalh kha a langhter a si lo maw, tiah Bawipa nih a ti. ¹⁷ Sihmanhsehlaw nang cu miaknak dah ti lo ahcun mit na ngei lo, Zei dang ruat loin miaknak lawnglawng kha na ruat. A sual lomi thisen chuah khawh nakding le Hremnak le zaang-ennak tuah khawh nakding lawng kha naa ruah chih, tiah a ti. ¹⁸ Cucaah Judah siangpahrang Josiah fapa Jehoiakim kong ah Bawipa bia cu hi bangin a si: ’Aize, ka nau, ka dawtmi ka nau,’ tiin siseh, ’Aize, ka bawipa le ka siangpahrang,’ tiin siseh, a ṭahtu ahohmanh an um lai lo. ¹⁹ Laa vui bantukin amah cu vui a si lai i Jerusalem kutka lengah khan an hnuh lai i an hlonh lai." ²⁰ Jerusalem khuami hna, Lebanon ah khin hung kal u law hung au tuah u, Bashan ah khin fak piin hung au tuah u; Abirim in fak piin au u, zeicahtiah nanmah sin i a ṭangmi vialte kha an sung cang. ²¹ Nan tlam a tlin lioah kan chawnh hna, Sihmanhsehlaw ngaih nan duh lo. Mah hihi nan tlanval lio in nan umtuning a si tawnmi a si; Zeitikhmanh ah ka bia nan ngai bal lo. ²² Nan hawile vialte cu thlitu nih a kalpi hna lai i Nanmah an dawtu vialte hna kha saltannak chungah an lut lai. Khi tikah nan ṭhat lonak ruangah ningzahnak le nautatnak nan in lai. ²³ Maw Lebanon i a ummi hna, Sidar thing lak i bu a sami hna, Nau nganfahnak bantuk nganfahnak nan cung i a phak tikah, Zeitluk in dik nan hei i lawngh len te lai! ²⁴ "Ka nun bangin," tiah Bawipa nih a ti: Jehoiakim fapa Koniah, Judah Siangpahrang cu ka orhlei kut cung i min khenhnak kutdonghrolh na si ti lai lo. Koniah, nangmah cu kan phawi lai. ²⁵ Nangmah thah an duhmi, nangmah nih na ṭihmi hna Babilon siangpahrang Nebukhadnezzar le Khaldi mi hna kut chungah khan nangmah cu kaan chanh lai. ²⁶ Cun nangmah le an hringtu na nu cu nan chuahkehnak ram a si lomi ramdang ah kan hlonh vurmar hna lai i khika ah nan pahnih in nan thi lai. ²⁷ Nanmah ram, nan ngaih ngaingaimi ram ah khan nan kir ṭhan ti lai lo. ²⁸ Hi mipa Koniah hi mi nawl lawng in a ummi, zeihmanh i rel awk tlak lo le santlailo, ahohmanh i duh lomi thil a si maw? Amah le a fale hna cu an hngalh bal lomi ram ah hlonh vurmar le dawi an si hi zeidang ruangah a si hnga maw? ²⁹ Maw ram, ram, ram, Bawipa nih a chimmi cu ngai tuah. ³⁰ "Hi pa hi upatnak vialte chuh dihmi, Amah chan chung i a hlawhtling lo ding, David bawiṭhutdan cung i ṭhu ding siseh, Judah ram chung a uktu ding siseh, Tefa zeihmanh a thlau lomi, tiin ṭial tuah," tiah Bawipa nih a ti.

¹ Ka tuurun chung tuu a ṭhek i a tlautertu hna tuukhal cu an cungah ningzahnak tlung ko seh, tiah Bawipa nih a ti. ² Cucaah ka mi a zohkhenhtu tuukhal hna kong ah Bawipa, Israel Pathian bia cu hi bangin a si: "Nannih nih ka tuurun cu nan ṭhek hna i nan dawi hna. Nan zohkhenh hna lo, sihmanhsehlaw ṭhat lonak nan tuahmi ruangah nanmah kha dantat awkah keimah nih nanmah cu kan zoh ko hna, tiah Bawipa nih a ti. ³ Ka tuu a tangmi hna cu ka dawinak hna ram kip khan keimah hrimhrim nih ka pumh ṭhan hna lai. Anmah le an inn cio ah ka ṭinpi ṭhan hna lai i an pungzam lai i an karhcho lai. ⁴ Anmah khaltu dingah tuukhal ka chiah hna lai, ṭihnak siseh, hnabei donghnak siseh, dantatnak siseh, an tong ṭhan ti lai lo, tiah Bawipa nih a ti. ⁵ David ruang in a dingmi Nge pakhat ka corhter lai caan a ra lio, tiah Bawipa nih a ti. Cu siangpahrang nih cun fimnak in a uk hna lai i Ram chungah phung le dinnak kha a hmunhter lai. ⁶ Amah chan ah cun Judah cu him tein khua a sa lai i Israel cu hnahnawh lo tein a um lai. Amah a min cu, Bawipa cu kan Dinnak a si, ti a si lai. ⁷ "Cucaah cun zohhmanh, mi nih, ’Israel mi Izipt ram in a chuahpitu hna Bawipa a nun bangin,’ ti si ti loin, ⁸ ’Israel tefa hna chaklei ram in le a ṭhawl hnanak ram kip chungin, anmah le an vawlei cio i khuasakter ṭhan awkah a ratpitu hna Bawipa a nun bangin,’ ti in chiatsernak an tuah lainak caan kha a ra lio," tiah Bawipa nih a ti. ⁹ Profet hna kong ah Jeremiah nih hitin a ti: Ka chung thukpi ah hin ka lung cu a kuai i Ka ruh hna chungah hin thazang zeihmanh a um lo; Bawipa bia ruangah, ṭih a nungmi a bia ruangah zuri bantuk ka si cang, zu nih a teimi bantuk ka si cang. ¹⁰ Zeicahtiah ram cu va cung pa duhmi in a khat i Anmah ruangah cun vawlei cu a ro dih i Ramlak ram hno vialte cu an car dih. An zulhmi lam cu ṭhat lonak a si i an ṭhawnnak hna cu a ning loin an hman. ¹¹ "Profet nih si hna seh, tlangbawi nih si hna seh, An phu hnih in Pathian kha zei ah an rel lo; Ṭhat lonak an tuahmi kha ka inn chung hmanh ah ka hmuh, tiah Bawipa nih a ti. ¹² Cucaah an lam cu an lamh tikah a nal lai; Mui lakah an i ṭhek lai i an tlu lai, An cungah harnak ka tlunter lai, an dantatnak caan cu a ra lio, tiah Bawipa nih a ti. ¹³ Samaria profet hna cu ruahnak zeihmanh a ngei lomi an si kha ka hmuh: Baal min in bia an chim i ka mi Israel mi kha a pingah an hruai hna. ¹⁴ Jerusalem profet hna chungah thil fihnung bik pakhat ka hmuh: Va cungin pa aa duhmi an si i miziathiam an si, Ṭhat lonak a tuahmi hna kha thazang an pek hna i Cucaah ahohmanh nih an sualnak kha an mertak duh lo. A chung i a ummi vialte hna cu, Ka caah Sodom le Gomorrah bantuk an si ko. ¹⁵ Cucaah profet hna kong ah Ralkapbu Bawipa nih, "Annih cu ei awkah anfangkha ka pek hna lai i Din awkah a khami sivai ka pek hna lai; Zeicahtiah Jerusalem profet hna sinin ram dihlak ah Pathian zeirellonak kha a karh cang," tiah a ti. ¹⁶ Ralkapbu Bawipa nih hi bangin a ti: Profet nih an chimmi bia kha ngai hlah u, Ruahchannak pakpalawng in nan lung an thawhtertu hna kha an bia ngai hna hlah u; Annih nih an chimmi langhnak kan hmuh an timi cu anmah lung chungin thil an suaimi chungin a chuakmi a si, Bawipa kaa chungin a chuakmi a si lo. ¹⁷ Bawipa bia zei ah a rel lomi kha an thawh hna i, ’Khuaawng na tong lai,’ an ti hna; An lung a khonning cio in a kalmi hna kha an thawh hna i ’Na cungah vanchiatnak a tlung lai lo,’ an ti hna. ¹⁸ Sihmanhsehlaw annih lakah ahodah Bawipa khuakhannak chungah aa tel i Aho nih dah a bia kha a theih? Annih lakah aho nih dah a bia cu an ngaih i an zulh? ¹⁹ A kangh in mi a kangmi thli, Bawipa sinin a chuakmi khi zohhmanh, Ṭotho phuchim a si khi! Miṭhalo hna lung chungah aa zi len ko. ²⁰ Bawipa thinhunnak cu, a lung chung tinhmi kha a tuah i a tlinh hlanah cun aa let lai lo. Hmailei caan ah mah hihi fiang tein nan hngalh te lai. ²¹ Hi profet hna hi ka thlahmi an si lo, asinain a tlik ko in an tli; Bia zeihmanh ka chim hna lo, asinain, heh tiah an chim. ²² Ka khuakhannak chungah an rak i tel ve a si ahcun, Ka bia kha ka mi hna sinah thanh hna seh law, Ṭhat lonak lam an zulhmi le thil ṭhalo an tuahnak khan kirter hna seh. ²³ Keimah cu lamnaite i a ummi Pathian lawng maw ka si? Lamhlat ah tah ka um ve lo maw? ²⁴ Ka hmuh khawh lonak hmun pakhatkhat ah minung hi aa thup kho hnga maw? Van le vawlei hi ka khat dih lo maw? tiah Bawipa nih a ti. ²⁵ Ka min in lih a chimmi profet hna nih, ’Mang ka manh cang, mang ka manh cang,’ an ti cu ka theih. ²⁶ Hi profet hna, lih lawngte a chim i anmah nih an phuah chommi lawng a aupi lengmangtu hna nih hin, zeitik ah khin dik an aw hi an hei thlen te lai? ²⁷ Hi an mang, pakhat le pakhat an i chimhmi thawng hin, ka mi hna cu ka min kha kan philhter hna lai, tiah an ruah; an pupa hna nih Baal min ruangah ka min an rak philh bantuk khan. ²⁸ Profet pakhatkhat nih mang a manh ahcun, a mang cu chim ko seh, bia chim awk a ngeih ahcun, ka bia cu a ning tein chim ko seh. Favai le a fang cu nan thleidang kho hna lo maw, tiah Bawipa nih a ti. ²⁹ Ka bia cu mei bantuk i kangh hmang a si lo mei? Lungpi a cheutu sobul bantuk a si lo mei? ³⁰ Pakhat nih a dang pakhat sinin, cun a dang pakhat nih a dang pakhat nolh sinin, anmah hman awk cio ah ka bia a fir lengmangmi profet hna cu ka ralchanh hna, tiah Bawipa nih a ti. ³¹ Cun anmah bia kha keimah sinin a rami bia a si tiin a timi profet zong kha ka ralchanh hna, tiah Bawipa nih a ti. ³² Lih kha mang i a manh i a zuar ṭhan i ka mi hna kha hrokhrawl le pakpalawng in a pingah a hruaitu profet cu ka ralchanh hna, tiah Bawipa nih a ti. Annih a thlahtu hna kha keimah ka si lo, a fialtu hna zong ka si lo, cucaah hi profet hna nih hin hi mi hna hi zeihmanh an ṭhathnem hna lai lo. Mah hihi Bawipa bia hrimhrim a si. ³³ Hi mi hna nih si hna seh, profet nih si hna seh, tlangbawi nih si hna seh, ’Bawipa bia thilrit cu zeidah a si?’ tiah an in hal ahcun, annih cu, ’Nanmah hi a thilrit cu nan si, Bawipa nih nannih cu kan hlonh hna lai,’ a ti, tiah na leh hna lai. ³⁴ Cun profet nih siseh, tlangbawi nih siseh, hi mi hna lak i pakhat khat nih si seh, ’Bawipa bia cu thilrit a si,’ timi bia kha a hman ahcun, cu mipa cu le a innchungkhar cu dan ka tat hna lai. ³⁵ Nanmah lakah nan i chawnh tikah nan hman awk hnga bia cu, ’Bawipa nih zeitindah a leh?’ ti maw, asiloah, ’Bawipa nih zeidah a chim,’ ti a si lai. ³⁶ ’Bawipa bia cu thilrit a si,’ ti cu nan chim hrimhrim lai lo, zeicahtiah cu bantukin a chimmi cu a caah thilrit a si taktak lai; nan chim a si ahcun, Ralkapbu Bawipa, Pathian nung, kan Pathian a bia kha pakpalawng ah nan canter hna lai. ³⁷ Profet sinah bia nan chim tikah nan chim ding ning cu, ’Bawipa nih zeitindah an leh?" ti maw, asiloah, ’Bawipa nih zeidah a chim?’ ti a si lai. ³⁸ Sihmanhsehlaw ’Bawipa bia cu thilrit a si,’ tiah a timi paoh cu nan sinah Bawipa nih hi ti hin a ti: ’Bawipa bia cu thilrit a si,’ tiah nan ti lai lo, tiah bia kan cah hna nain, ’Bawipa bia cu thilrit a si,’ tiah nan ti caah, keimah hrimhrim nih thilrit bantukin kan phorh hna lai i kan hlonh hna lai, ³⁹ cun nan pupa hna le nanmah kan pekmi hna khua cu nanmah he ka mit hmuh phak lo ah kan hlonh hna lai. ⁴⁰ Nan cungah a dong lomi nihsawhnak le a dong lomi ningzahnak zeitikhmanh i philh ti lo ding kha ka tlunter lai, tiah a ti.

¹ Bawipa nih biakinn hmaiah theipi bawm hnih an chiahmi kha a ka hmuhsak. Mah hihi Babilon siangpahrang Nebukhadnezzar nih Jerusalem khua in Jehoiakim fapa Jekoniah, Judah siangpahrang cu Judah ram bawi hna le zungthiam hna le soser hna le he tiah sal taannak ah a hruai hna i Babilon ah a ratpi hna hnuah khan a si. ² Bawm khat chung i cu an ṭha ngaingai, a hmin hmasa bik theipi bantuk khi an si; bawm khat chung i tu cu an chia ngaingai, an chiat tuk caah ei awk a tlak lomi khi an si. ³ Cun Bawipa nih cun a ka thawh i, "Zeidah na zoh, Jeremiah?" tiah a ka ti. Cun kei nih, "Theipi, theipi ṭha, a ṭha ngaingaimi le theipi chia, a chia ngaingaimi, a chiat tuk ca i ei awkah aa tlak lomi," tiah ka ti. ⁴ Khi tikah hi bia cu Bawipa sinin ka sinah a ra i, ⁵ "Hi bangin Bawipa Israel Pathian nih a ti: Hi ram in Khaldi mi hna ram ah ka kaltermi hna Judah ram mi hna sal i a tangmi hna hi, hi theipi ṭha bantuk ah hin ka rel hna lai. ⁶ An cungah ṭhatnak tuah dingin ka zohkhenh hna lai i an ram ah hin ka kirter ṭhan hna lai; ka sersiam hna lai i ka ṭhet hna lai lo, ka phun hna lai i ka phawi hna lai lo. ⁷ Keimah hngalh khawhnak lungthin kha ka pek hna lai, zeicahtiah keimah cu Bawipa ka si; an lungthin a dihumnak in keimah sinah an kir ṭhan lai caah annih cu ka mi an si lai i kei cu an Pathian ka si lai. ⁸ Sihmanhsehlaw Judah siangpahrang Zedekiah, a bawile hna le Jerusalem i a nung rihmi hna cu, hi ram chung i an um ah siseh, Izipt ram i an um ah siseh, hi hna vialte cu theipi chia, a chiat tuk ca i ei awkah a tlak lomi bantuk ah khan ka ser hna lai, tiah Bawipa nih a ti. ⁹ Vawlei cung ram kip ah annih cu tuksapur ah ka ser hna lai, annih cu ka dawi hnanak ram kip ah nihsawh awk le phungthluk bia le zawmhtaih awk le chiatserh awkah ka ser hna lai. ¹⁰ Cun anmah le an pupa hna sinah ka pekmi hna ram in annih cu hrawh cikcek an si hlantiang, an cungah vainam le mangṭam le rai ka tlunter lai," tiah a ti.

¹ Josiah fapa Jehoiakim, Judah siangpahrang, a bawi kum linak ah Judah mi vialte kong i Jeremiah sin i a phanmi bia cu hihi a si, (cucu Babilon siangpahrang Nebukhadnezzar a bawi kum khatnak a si ve), ² cun cu bia cu profet Jeremiah nih Judah mi vialte le Jerusalem khua chung i a ummi vialte kha a chimh hna: ³ "Amon fapa Josiah, Judah siangpahrang, a bawinak kum hleithum ri in atu tiang, kum kul le kum thum chung, Bawipa bia cu ka sinah a ra lengmang i nan sinah thlah lo tein ka chim lengmang ve, sihmanhsehlaw nan ngai lo. ⁴ Bawipa nih thlah lo tein a sal hna a profet hna kha nan sinah a rak thlah lengmang ko hna nain, nannih nih a ngaih zong nan ngai lo, ngaih duhnak zong zeihmanh nan langhter lo. ⁵ Nannih nih lam ṭha lo nan zulhmi le thil ṭha lo nan tuahmi kha nan mertak ahcun, nan pupa hna sin le nanmah sinah Bawipa nih an pekmi ram ah hin zungzal in nan um lai; ⁶ pathian dang kha nan biak hna lo i an rian nan ṭuan hna lo i nan biak fawn hna lo i cun nan kut sermi siasal in ka thin zong kha nan ka phawh fawn lo ahcun nan cungah harnak ka tuah lai lo. ⁷ Sihmanhsehlaw ka bia nan ngai lo, nan kut nih a sermi siasal khan ka thin nan ka phawh, cucaah nanmah lila nih nanmah cungah harnak nan i tlunter," tiah Bawipa nih a ti. ⁸ "Cucaah ka bia kha nan ngaih duh lo caah, ⁹ chaklei miphun vialte kha ka cah hna lai, tiah Ralkapbu Bawipa nih a ti. Ka sal Nebukhadnezzar, Babilon siangpahrang kha ka cah fawn lai. Hi ram le a chung i a ummi hna le a pawngkam i a ummi miphun vialte hna doh awkah ka ratpi hna lai i ka hrawh cikcek hna lai, tuksapur le cekcekhnawh thluahmah awk le zungzal nihsawh awkah ka ser hna lai. ¹⁰ Cun annih sinin thanuamnak aw thawng le lawmhnak aw thawng vialte cu ka daihter lai; nupi ṭhipa aw thawng le a mo aw thawng le rawl rialnak lung aw thawng hna cu ka daihter hna lai; meiinn ceunak cu ka hmih dih hna lai. ¹¹ Kum sawm sarih chung hi ram hi ningzak le tuksapur in a um lai i hi miphun hna nih hin Babilon siangpahrang cu an rianh lai. ¹² Cun kum sawm sarih cu a dih tikah, Babilon siangpahrang le a miphun cu an ṭhat lo ruangah khan dan ka tat hna lai i Khaldi mi hna ram cu zungzal in pakpalawng ah ka ser lai. ¹³ Cu ram cungah cun ka chimmi vialte, hi cauk chung i aa ṭialmi vialte, hi mi hna cung tlung dingin profet Jeremiah nih a chimmi vialte kha ka tlunter lai. ¹⁴ Babilon mi cu an tuahmi kha ka lehrulh hna lai i miphun tampi le siangpahrang nganngan hna nih sal ah an tlaih hna lai," tiah Ralkapbu Bawipa nih a ti. ¹⁵ Hi bangin Bawipa, Israel Pathian nih ka sinah a ti: "Hi thinhunnak mitsur hang hrai hi ka kut in i lak law, va kal, tiah kan fialnak miphun vialte cu va dinter hna. ¹⁶ Annih nih an din tikah an luak lai i a molh hna lai; cu bantuk cu annih lak i ka thlah dingmi vainam cu a si." ¹⁷ Cucaah Bawipa kut cun hrai cu ka lak i Bawipa nih a ka thlahnak miphun vialte cu ka dinter hna, ¹⁸ cu hna cu hihi an si: Jerusalem le Judah khuapi hna le a siangpahrang hna le a bawi hna, annih cu nihin tiang i an si bang hin, ningzak le tuksapur le nihsawh awk thil le serhsat awk thil ah ka canter hna; ¹⁹ cun hrai a ding hngatu ding cu hi hna hi an si: Izipt siangpahrang Faro, a bawi hna le a upa vialte hna; ²⁰ Izipt mi vialte hna le ramdang mi Izipt ram chung i a ummi vialte hna; Uz ram siangpahrang vialte hna; Filistin khua Ashkelon, Gaza, Ekron le Ashdod khua a tang rihmi cung i siangpahrang vialte hna; ²¹ Edom, Moab le Ammon mi vialte hna; ²² Tair le Sidon siangpahrang vialte hna; Mediterranean rili ram i siangpahrang vialte hna; ²³ Dedan, Tema le Buz ram khuapi vialte hna; An sam aa metmi vialte hna; ²⁴ Arabia siangpahrang vialte hna; Thetse ram miphun hna i siangpahrang vialte hna; ²⁵ Zimri, Elam le Media siangpahrang hna; ²⁶ Chaklei siangpahrang vialte hna, a hla he a nai he, pakhat hnu pakhat in. Vawlei cung i miphun a simi paohpaoh nih cun an din lai, a hmanung bik ah Babilon siangpahrang nih a din lai. ²⁷ Annih cu na thawh hna lai i, ’Hi ti hin Ralkapbu Bawipa, Israel Pathian nih a ti: Hihi ding u, ri u law lua u; nan lak i ka thlah dingmi vainam hmaiah hin tho ti lo dingin tlu u,’ na ti hna lai. ²⁸ Cun annih nih hrai kha na kut in i lak i din kha an duh lo ahcun, na thawh hna lai i, ’Ralkapbu Bawipa nih, nan din hrimhrim lai. ²⁹ Ka min in auhmi khua cu dan ka tat hmasa bik lai; nannih cu kan luat hnga tiah nan i ruat maw? Luat hlah, nan luat kho lai lo, zeicahtiah vawlei cung i khua a sami vialte tuknak caah vainam kha ka au lio, tiah Ralkapbu Bawipa nih a ti,’ na ti hna lai. ³⁰ "Ka chimmi bia vialte cu na thanh hna lai i ’Bawipa cu cung sangpi khin a rung au lai, A umnak hmunthiang khin khuarit in a rung ri lai. Amah tuurun chungah khan fak piin a huk lai i Mitsur thei a nengtu hna an au thawng bantukin vawleicung mi vialte cungah khan a au lai. ³¹ A au thawng cu vanhramdeng tiang a thang lai, zeicahtiah Bawipa cu miphun vialte cungah bia a ngei i minung vialte kha taza a cuai hna lai i a sualmi cu vainam in an thi lai, tiah na chimh hna lai,’ tiah Bawipa nih a ti. ³² Zohhmanh, rawhralnak cu miphun pakhat sinin pakhat sinah a karh chin lengmang i thlichia cu vanhramdeng in a tho lio, tiah Bawipa nih a ti. ³³ Cun cu ni ah cun Bawipa nih a thahmi hna cu vawlei khattelei kam in khattelei kam tiang hmunthur bantukin an ril liangluang ko lai. Ahohmanh nih an ṭah hna lai lo, a pumh zong an pum hna lai lo, a vui zong an vui hna lai lo. ³⁴ Maw tuukhal hna, ṭap u law ai u, Tuurun bawi hna, vutcam lakah i lawng u. Atu cu thahnak hmun i kal kha nan chel a si cang i tuukawng ṭha bantukin nan tlu lai. ³⁵ Tuukhal hna caah zamnak hmun khuazei hmanh ah a um lai lo. Tuurun bawi hna caah luatnak lam zeihmanh a um lai lo. ³⁶ Tuukhal hna ai thawng cu ngai hmanh, Tuurun bawi hna kiao thawng cu thei hmanh, Zeicahtiah an tlonnak ram cu Bawipa nih a hrawh lio i, ³⁷ A thinhun ruangah dai tein a ummi an innlo hna cu a rawk dih. ³⁸ Chiandeih a kua a chuahtakmi bantuk khan an zam, Zeicahtiah an ram cu pakpalawng ah a cang cang, Vainam le thinhunnak nih pakpalawng ah a canter dih cang.

¹ Judah siangpahrang Josiah fapa Jehoiakim bawi hramthawk ah, hi bia hi Bawipa sinin Jeremiah sinah a ra: ² Bawipa nih Jeremiah cu a thawh i, "Bawipa inntual ah va dir law, khika ah biak awkah a rami Judah ram chung mi vialte hna sinah cun, bia va chim tuah. Annih kha na chimh hna lai tiah nawl kan pekmi vialte kha zeihmanh ngan loin na chimh hna lai. ³ Annih nih an hei ngaih phum in an lam ṭha lo cio khan an hei i mer phum ko hmanh hnga maw. Cu ti a si ahcun ṭhat lonak an tuah ruang i an cung i ṭhat lonak tuah ka timhmi kha kaa let ko hnga. ⁴ Annih cu na thawh hna lai i, Bawipa bia cu hi bangin a si: Ka bia nan ngaih lo i nan hmai i ka chiahmi ka nawlbia kha nan zulh lo i ⁵ nan sinah ka thlahmi ka profet hna bia kha zei ah nan rel lo ahcun, zei ah nan rel bal hna lo va si kaw, ⁶ hi inn hi Shiloh bantuk ah ka canter lai i hi khuapi hi vawlei cung miphun vialte caah nihsawh awk thil ah ka ser lai, a ti, na ti hna lai," tiah a ti. ⁷ Tlangbawi hna le profet hna le mi vialte nih hi bia cu Jeremiah nih Bawipa inn chungah a chim kha an theih. ⁸ Cun annih sinah na chim lai tiin Bawipa nih nawl a pekmi vialte kha a chim dih tikah, tlangbawi hna le profet hna le mi zapi nih khan an tlaih i, "Na thi lai," tiah an hro. ⁹ "Zeicahdah Bawipa min in bia na chim i, hi inn cu Shiloh bantuk a si lai i hi khua cu a chung ummi pakhat hmanh um lo tiangin a ṭiao lai, na ti," an ti. Cun mi vialte nih cun Jeremiah cu Bawipa inn ah khan an kulh. ¹⁰ Cun Judah bawi hna nih hi thil cu an theih tikah siangpahrang inn khan Bawipa inn ah cun an kal i Bawipa inn i kutka thar luhnak ah cun an ṭhu cio. ¹¹ Cun tlangbawi hna le profet hna nih cun bawi hna le mi vialte cu an thawh hna i, "Hi pa hi thih awk a tlak. Hi khua kha rawk seh, tiah a chim: nan hna in nan theih cio," an ti. ¹² Cu tikah Jeremiah nih bawi vialte le mi vialte cu a thawh hna i, "Hi inn kong le hi khua kong i nan theihmi bia vialte hi chim awkah Bawipa nih a ka thlah. ¹³ Nannih nan lam le nan tuahnak kha nan i remh i Bawipa nan Pathian kha a nawl nan ngaih ahcun, a lung aa let lai i, nan cungah ka tlunter lai ti in an hro hnanak ṭhat lonak kha a lak ṭhan lai. ¹⁴ Sihmanhsehlaw kei tu cu nan kut chungah ka um ko; a ṭha le a hmaan nan tining paoh in ka cungah tuah ko u. ¹⁵ Sihmanhsehlaw nan ka thah ahcun, nanmah le hi khua le a chungah a ummi vialte hi, nan dihlak in, a sual lomi thisen kan chuah caah hin kan sual ti bel hi fiang tein run i hngal u, zeicahtiah hi bia vialte hi nan theihhngan i chim awkah Pathian nih a ka thlah taktak," tiah a ti. ¹⁶ Cun bawi hna le mi vialte nih cun tlangbawi le profet kha an thawh hna i, "Hi mipa hi thah awk a si lo, zeicahtiah kan sinah Bawipa kan Pathian min in bia a chim ko," tiah an ti. ¹⁷ Cu ram upa a cheukhat hna zong cu an dir i aa pummi hna cu, ¹⁸ "Judah siangpahrang Hezekiah chan ah Moresheth khuami Mikah nih bia a chim i Judah ram mi vialte cu, hi hi Ralkapbu Bawipa bia a si: Zion cu thuanmi lei ah a cang lai i Jerusalem cu a rawkmi hnawmpon ah a cang lai, Biakinn tlang cu hlingbur hmun ah a cang lai, tiah a ti hna. ¹⁹ Judah siangpahrang Hezekiah le Judah mi vialte nih amah cu an thah maw? Siangpahrang nih khan Bawipa cu a ṭih i zaangfahnak a hal lo maw? Cu tikah Bawipa nih cun a lung a thlen i an cungah ka tlunter lai tiin a hro hnanak rawhralnak kha a let ṭhan. Asinain, kannih cu kan cungah ṭhat lonak nganpi kan i tlunter hnik," tiah an ti. ²⁰ Bawipa min in bia a rak chim vemi midang pakhat a rak um ve, amah cu Kiriath Jearim khuami Shemaiah fapa Uriah a si. Jeremiah nih a chim bantuk hin amah zong nih hi khua le hi ram a rawhnak ding kha a rak chim ve. ²¹ Siangpahrang Jehoiakim le a ralkap vialte hna le a bawi vialte hna nih a bia kha an theih i siangpahrang nih cun amah cu thah awkah a kawl. Cucu Uriah nih a theih tikah a thin a phang i Izipt ram ah a zam. ²² Khi tikah Siangpahrang Jehoiakim nih cun Akbor fapa Elnathan le midang kha Izipt ram ah cun a thlah hna i ²³ Izipt ram cun Uriah cu an vung lak i Siangpahrang Jehoiakim sinah an ratpi. Vainam in a rak thah i a ruak cu mi sawhsawh vuinak hmun ah khan an hlonh. ²⁴ Sihmanhsehlaw Safan fapa Ahikam kha Jeremiah leiah cun a ṭan caah mizapi kut chung i va thihnak khan a luat.

¹ Judah siangpahrang Josiah fapa Zedekiah a bawi hramthawk ah hi bia cu Bawipa sinin Jeremiah sinah a ra: Bawipa bia cu hi bangin a si, ² "Hngawngkual le a hri kha i lak hna law na hngawng ah i banh. ³ Cun Edom siangpahrang, Moab siangpahrang, Ammon siangpahrang, Tair siangpahrang le Sidon siangpahrang sinah khan, Judah siangpahrang Zedekiah sinah Jerusalem ah a rami an lamkal hna sinin bia cah hna. ⁴ An bawile caah khan hi bia hi pe hna: Hi bangin Ralkapbu Bawipa, Israel Pathian nih a ti: Mah hihi nan bawile cu va chim hna u, ⁵ ’Ka ṭhawnnak a nganmi le aa samhmi ka baan in vawlei cu ka ser i vawlei cung i a ummi minung le saram hna cu ka ser hna; cun aa tlak ti i ka ruahmi sin paoh ah ka pek khawh. ⁶ Hi ram vialte ka sal Nebukhadnezzar, Babilon siangpahrang sinah a petu cu keimah ka si i saram hna zong amah rian ṭuantu dingah a petu cu keimah ka si fawn. ⁷ Miphun vialte hna nih amah le a fapa le a tupa kha, a ram nih, a caan a phak hlantiang, an rianh hna lai; cun miphun ṭhawng hna le siangpahrang ngan hna nih amah cu an duhduh in an hman ve te lai. ⁸ Zei miphun hmanh si hna seh, zei ram hmanh si hna seh, hi Nebukhadnezzar, Babilon siangpahrang hi a rian a ṭuan duh lo i a hngawngkual tangah hin a hngawng chiah a duh lomi cu, cu hna cu vainam le mangṭam le rai in, amah kut tang i ka umter dih hna hlan tiang, dan ka tat hna lai,’ tiah Bawipa nih a ti. ⁹ Cucaah nan profet si hna seh, nan litin thiam si hna seh, nan mifim si hna seh, nan camhthiam si hna seh, nan eihthiam si hna seh, Babilon siangpahrang cu rian hlah u, tiin an in chimtu hna cu an bia ngai hlah u. ¹⁰ An in chimhmi hna cu lih a si; cucaah nannih nih nan ngaih ahcun nan ram in a hlat ngaingaimi ram ah kalpi nan si lai i keimah nih kan ṭhawl hna lai i nan thi lai. ¹¹ Sihmanhsehlaw Babilon siangpahrang hngawngkual tangah a hngawng a chia i amah kha a rianmi miphun paoh cu anmah ram te ah khan ka umter hna lai i an ram cu an thlawh lai i khika ah khua an sa lai," tiah Bawipa nih ka ti," a ti. ¹² Judah siangpahrang Zedekiah sinah cu bia vialte cu ka chim i, "Babilon siangpahrang hngawngkual tangah cun na hngawng cu na chiah i amah le a mi hna cu na rianh hna ahcun na nung lai. ¹³ Zeicahdah Babilon siangpahrang a rian duh lomi miphun kong ah Bawipa nih a chim bangin nangmah le na miphun cu vainam le mangṭam le rai in nan thih lai? ¹⁴ Babilon siangpahrang kut tang um cu duh hlah, tiin an titu profet hna cu an bia ngai hna hlah, zeicahtiah an in chimhmi cu lih a si. ¹⁵ Annih cu ka thlahmi an si lo, hlennak in ka min in bia an chim i cucaah cun nangmah kha kaan dawi lai i na thi lai, nangmah le nangmah sin i bia a chimmi profet hna hi, tiah Bawipa nih a ti," tiah ka ti. ¹⁶ Cun tlangbawi hna le mi vialte hna sinah cun ka chim i, Bawipa nih hi bangin a ti, tiah ka ti: Bawipa inn umkheng hna cu tuante Babilon in kirpi an si ṭhan lai, tiah a titu profet hna cu an bia ngai hna hlah u, an in hlennak hna men a si. ¹⁷ Annih cu an bia ngai hna hlah u, Babilon siangpahrang cu rian ko u law nan nung deuh lai. Zeicahdah hi khuapi hi a ṭiao lai? ¹⁸ Annih cu profet an si i Bawipa bia cu an chungah a um taktak a si ahcun, Bawipa inn chungah le Judah siangpahrang inn chungah le Jerusalem ah nganhtami umkheng hna cu Babilon ah kalpi loin Bawipa nih a umter hna nakhnga Ralkapbu Bawipa cu nawl hna ngat seh. ¹⁹ Zeicahtiah Babilon siangpahrang Nebukhadnezzar nih Judah siangpahrang Jehoiakim fapa Jekoniah cu Judah ram chung tuavon hna le Jerusalem khua chung tuavon hna he ²⁰ Jerusalem in Babilon ah a kalpi hna tikah khan, Nebukhadnezzar nih a kalpi lomi hi khua chungah a tangmi tung hna le dar hmaihum nganpi le a dirnak ke hna le umkheng dang vialte hna kong ah Bawipa bia cu hihi a si. ²¹ Bawipa inn chungah le siangpahrang inn ah le Jerusalem ah a tang rihmi umkheng kong ah Israel Pathian, Ralkapbu Bawipa bia cu hihi a si: ²² Babilon ah kalpi an si lai i ka auh ṭhan hna hlantiang khika ah an um lai, tiah Bawipa nih a ti; cun ka kirpi ṭhan hna lai i hi hmun ah hin ka chiah ṭhan hna lai, a ti fawn.

¹ Cu kum ṭhiamṭhiam, Judah siangpahrang Zedekiah bawi hram aa thawk kum, a thla nganak thla ah cun, Gideon khua profet Hananiah, Azur fapa nih cun, Bawipa inn chungah, tlangbawi hna hmaiah le mi vialte hna hmaiah cun a ka thawh i, ² "Mah hihi Ralkapbu Bawipa, Israel Pathian bia cu a si: Babilon siangpahrang hngawngkual cu ka khiah cang. ³ Kum hnih chungah, Babilon siangpahrang Nebukhadnezzar nih hi hmun in Babilon ah a kalpimi umkheng vialte cu hi hmun ah hin ka rak kirpi ṭhan hna lai. ⁴ Hi hmun ah hin Judah siangpahrang Jehoiakim fapa Jekoniah le Judah ram in Babilon ah a kalmi saltang vialte hna zong kha ka kirpi hna lai, tiah Bawipa nih a ti, zeicahtiah Babilon siangpahrang hngawngkual cu ka khiah lai, a ti," tiah a ti. ⁵ Cun profet Jeremiah nih profet Hananiah cu Bawipa inn chungah a dirmi tlangbawi hna le mi vialte hmaiah khan a thawh i, ⁶ "Cuticun hei si tak seh law dah ngai kaw! Bawipa nih cu bang cun tuah ko sawh seh; na chimmi na bia cu Bawipa nih tlinter hram ko seh law, hi hmun ah hin Babilon ram in Bawipa umkheng hna cu le saltang vialte hna kha kirter ṭhan hram ko hna seh! ⁷ Asinain, nangmah le mi vialte sinah ka chim awk a herhmi bia belte hi thei hmanh: ⁸ Nangmah le keimah um hlanah, hlan liopi ah a ummi profet hna nih ram tampi cungah le pennak nganngan cungah ral le mangṭam le rai a tlun lainak kha an rak chim tawn. ⁹ Cucaah daihnak a um lai, tiah a chimtu profet tu cu, cu profet bia a tlin tikah pei dik amah cu Bawipa nih a thlahmi a si taktak le si taktak lo kha hngalh a si te ko lai," tiah a ti. ¹⁰ Cun profet Hananiah nih profet Jeremiah hngawng i hngawngkual cu a lak i a khiah i ¹¹ mi vialte hmaiah cun, "Bawipa nih hi bangin a ti: Hi bangin Babilon siangpahrang Nebukhadnezzar hngawngkual cu ka khiah lai, mah hihi kum hnih chungah ka tuah lai, a ti," tiah a ti; cun Jeremiah cu a kal. ¹² Profet Hananiah nih profet Jeremiah hngawng i a ummi hngawngkual a khiah hnu tlawmpal ah Bawipa bia cu Jeremiah sinah a ra: ¹³ "Thing in sermi hngawngkual cu na khiah cang hna, sihmanhsehlaw an hmun ah thir hngawngkual kha na co lai. ¹⁴ Zeicahtiah hi bangin Ralkapbu Bawipa, Israel Pathian nih a ti, ’Hi miphun vialte hna hngawng ah hin thir hngawngkual ka chiah lai i Babilon siangpahrang cu an rianh lai. Amah cu an rianh lai, amah riantu dingah ramlak saram hmanh amah cu ka pek cang hna,’ " tiah a ti. ¹⁵ Cun Jeremiah nih Hananiah cu a thawh i, "Hananiah, ngaihmanh! Nang cu Bawipa nih an thlahmi na si lo i lihbia kha hi miphun hi na bochanter hna. ¹⁶ Cucaah Bawipa nih hi bangin a ti: ’Zohhmanh, vawleicung in nang cu kan ṭhial lai. Bawipa dohnak kha na chim caah tukum chung hrimhrim ah na thi lai,’ a ti," tiah a ti. ¹⁷ Cu kum hrimhrim a thla sarihnak thla ah profet Hananiah cu a thi.

¹ Profet Jeremiah nih Jerusalem khua in, saltangmi hna an upa hna le tlangbawi hna le profet hna le mi vialte hna, Nebukhadnezzar nih Jerusalem in Babilon ah a kalpimi hna kha ca a kuat hna. ² Mah cucu Jekoniah siangpahrang le a nu siangpahrang bawinu le tilditmi hna le Judah le Jerusalem bawi hna le zungthiam hna le soser hna kha, Jerusalem khua in an kal hnuah a ṭialmi a si. ³ Judah siangpahrang Zedekiah nih cun Safan fapa Elasah le Hilkiah fapa Gemariah cu cu ca he cun Babilon siangpahrang Nebukhadnezzar sinah a thlah hna. Profet nih a ṭialmi cu hihi a si: ⁴ "Ralkapbu Bawipa, Israel Pathian nih hitin a ti: Jerusalem in Babilon ah sal ah ka kaltermi vialte hna sinah, ⁵ Inn rak i sak hna u law a chungah rak um ko hna u; dum rak i ser hna u law, a chuakmi rak ei ko hna u, ⁶ nupi rak i ṭhit hna u law fapa hna le fanu hna rak ngei ko hna u; nan fapale kha nupi rak ṭhitpiak hna u law nan fanule kha va rak ngeihter hna u law, fanu hna le fapa hna kha rak hring ko hna seh, khaka ah khan nan karhcho i a zorlei nan si nakhnga lo. ⁷ Sal ah kan tanternak hna khuapi kha a ṭhatnak ding kawl cio u law kha khua caah khan Bawipa sinah thla cam cio ko u; zeicahtiah a ṭhat ahcun nannih zong ṭhatnak nan hmu ve lai. ⁸ Hi bangin Ralkapbu Bawipa, Israel Pathian nih a ti: Nan lak i a ummi profet hna le litin thiam hna kha i hlenter hna hlah u, mangmanh nan fialmi hna mifim kha an bia ngaihpiak hna hlah u. ⁹ Annih nih ka min in lih an in chimh hna, annih cu ka thlahmi an si lo, tiah Bawipa nih a ti. ¹⁰ "Mah hihi Bawipa chimmi bia cu a si: Babilon cungah hin kum sawm sarih kha a tlin tikah nan bia cu kan lakpiak ṭhan hna lai i thil ṭha nan cungah ka tlunter lai ti in bia kan kammi hna kha ka tlinter lai i hi hmun ah hin kan kirpi ṭhan hna lai. ¹¹ Nan ca i ka tinhmi cu keimah lawnglawng nih ka hngalh, tiah Bawipa nih a ti. Cucu vanchiatnak si loin thluachuahnak a si lai i nan hnu i a rung um ding tefa tampi kong a si lai. ¹² Nan ka hal i ka sinah thla nan cam ahcun nan bia kan ngaihpiak hna lai. ¹³ Nan ka kawl tikah nan ka hmuh lai; nannih nih nan lung dihlak in nan ka kawl tikah ¹⁴ keimah cu nan ka hmuh lai, tiah Bawipa nih a ti. Cun nannih cu nan vanṭhatnak kha kan pek ṭhan hna lai i miphun vialte hna sin le hmun kip i kan ṭhawl hnanak hmun khan kan pumh ṭhan hna lai i saltannak chungah kan kalter hnanak hmun khan cuka i nan rak kalnak nan ram ah khan kan kirpi ṭhan hna lai, tiah Bawipa nih a ti. ¹⁵ "Nannih nih, Babilon ah Bawipa nih profet a kan pek ve ko, nan ti. ¹⁶ David bawiṭhutdan ah a ṭhumi siangpahrang kong ah le hi khua chungah khua a sami, nan sinah saltannak chungah a kal lomi nan phunhawi mi hna kong i Bawipa bia hi ngai tuah u: ¹⁷ Mah hihi Ralkapbu Bawipa bia cu a si: An cungah vainam le mangṭam le rai kha ka tlunter lai i theipi ṭhalo, a ṭhat lo tuk ca i ei awk tlak a si lomi bantuk ah ka ser hna lai. ¹⁸ Annih cu vainam le mangṭam le rai in ka zulh hna lai i vawlei cung ram kip ah tuksapur ah ka ser hna lai, ka ṭhawl hnanak miphun kip sinah khan fihnung le ṭeifiak, zawmhtaih awk le nihsawh awkah ka ser hna lai. ¹⁹ Hihi an cungah a tlung lai, zeicahtiah annih sinah ka profet kha ka thlah lengmang ko hna nain, ka bia kha an ngai duh lo, tiah Bawipa nih a ti. ²⁰ Sihmanhsehlaw nannih saltangmi hna, Babilon ah Jerusalem in ka kaltermi hna, keimah Bawipa bia hi ngai tuah u: ²¹ "Nan sinah lih in bia a chimmi Kolaiah fapa Ahab le Maaseiah fapa Zedekiah kong ah Ralkapbu Bawipa, Israel Pathian bia cu hi bangin a si: Annih cu Babilon siangpahrang Nebukhadnezzar kut ah ka chanh hna lai i nan mithmuh hrimhrim ah a thah hna lai. ²² Jerusalem in Babilon ah sal ah kalpimi hna nih, chiat ser an duh tikah, ’Babilon siangpahrang nih a nung in a kiaomi Zedekiah le Ahab bantukin Bawipa nih na cungah tuah seh,’ tiah an ti lai. ²³ Annih nih mihrut bantukin thil an tuah caah hi ṭhat lonak hi an cungah a tlung lai — mi nupi cung sualnak an tuah i ka min in lih an chim. Mah hihi Bawipa duhnak he aa ralchanhmi a si; an tuahmi cu ka hngalh i an cungah tehte ka si, tiah Bawipa nih a ti." ²⁴ - ²⁵ Ralkapbu Bawipa, Israel Pathian nih, Nehelam fapa Shemaiah sin i va chim awk bia a ka pek. Nehelam nih cun Jerusalem khuami vialte hna le Maaseiah fapa profet Zefaniah le tlangbawi dang vialte hna sinah khan amah min in ca a rak kuat i a ca chungah cun Shemaiah nih khan Zefaniah cu ²⁶ "Bawipa nih Jehoiada hmun ah khan tlangbawi ah an ser cang i atu cu biakinn chungah bawi bik na si cang. Cucaah na rian cu profet ka si aa timi, mihrut hna paoh kha thir cincik in khih le an hngawng i thirkual oih kha a si lai. ²⁷ Zeicahdah Anathoth khuami Jeremiah, mi sinah profet biachim in bia a chim lengmangmi cungah khan zeihmanh na tuah bal lo? ²⁸ Babilon i a ummi hna kha, khika ah khan saltang saupi nan si lai caah inn le lo i khuar hna u law dum i ser hna u law, nan cinthlakmi khan i cawm hna u, tiin ca a kuat hna caah amah kha thlauh hrimhrim awk a si," a ti ²⁹ Cu ca cu Zefaniah nih khan a ka relpiak i ³⁰ Bawipa nih a ka thawh i ³¹ hi bia Nehelam mi Shemaiah kong bia hi, Babilon i a ummi saltang vialte kha kua hna a ka ti: ³² "Keimah Bawipa nih, Shemaiah le a tefa vialte cu dan ka tat hna lai. Amah cu ka thlahmi a si lo. Asinain profet bantukin bia a chim hna i lih kha a zumhter hna. Nan lakah tefa zeihmanh a ngeih hna lai lo. Ka mi hna cu, keimah doh awk kha a fial hna caah ka mi hna ca i thil ṭha ka tuah ding kha a thih hlanah a hmu manh hna lai lo. Keimah Bawipa nih hi bia cu ka chim," tiah a ka ti.

¹ Bawipa sinin Jeremiah sinah a rami bia. ² Hihi Bawipa, Israel Pathian bia cu a si: Na sin i ka chimmi bia vialte kha cauk chungah ṭial tuah, ³ zeicahtiah mah hihi Bawipa bia hrimhrim a si: Ka mi Israel mi hna le Judah mi hna an vanṭhatnak ka pek ṭhan hna lai ni a ra lio, tiah Bawipa nih a ti; an pupa hna sinah ka pekmi ram ah khan ka kirpi ṭhan hna lai i cu ram cu an co lai. ⁴ Hi bia hi Israel le Judah kong ah Bawipa nih a chimmi a si: ⁵ "Daihnak thawng si loin, launak ai thawng le ṭihnak ai thawng kha ka theih. ⁶ I hal u law ruat tuah hmanh u! Pa nih fa a hring kho maw? A si kun ahcun, zeicahdah pa nih nu naunganfah ing bangin an paw lawng an i domh ko kun? Zeicahdah rau diakduak in an um dih? ⁷ Ṭih a nungmi ni cu a ra lio; cu tluk ṭih a nungmi ni cu a um bal lo, Cu ni cu Jakob tefa hna caah harnak caan a si; Sihmanhsehlaw him tein an chuak ko lai," tiah a ti. ⁸ Cun khi ni a phak tikah, an hngawng i hngawngkual cu ka khiah hna lai i an cikcin cu ka chah dih hna lai; ramdangmi nih an duhduh in an hmang ti hna lai lo. ⁹ Bawipa an Pathian le an caah ka chuahter laimi an siangpahrang David kha an rian an ṭuan cang hna lai, tiah Ralkapbu Bawipa nih a ti. ¹⁰ "Cucaah cun ṭih hlah maw Jakob, ka sal; Maw Israel, lungdong in um hlah, tiah Bawipa nih a ti. Zeicahtiah ram hlapi khan kan ratpi ṭhan lai i na tefa hna cu sal i an tannak hmun khan ka kirpi ṭhan hna lai; Cun Jakob cu hnangam tein a um ṭhan lai i thluachuak le lungdai in a um lai. ¹¹ Zeicahtiah Bawipa nih, na sinah ka um i kan khamh lai, tiah a ti. Nannih kan ṭhek hnanak miphun vialte cu an donghnak ka phakter hna lai. Sihmanhsehlaw nang cu na donghnak kan phakter lai lo. Dantat awk naa tlakning in dan kan tat nain a hloh cu kan hlo taktak lai lo," tiah Bawipa nih a ti. ¹² Hi bia hi Bawipa nih Zion sinah a chimmi a si: Na hma cu damh khawh ding a si ti lo i Tuknak na inmi cu a fak ngaingai ko. ¹³ Nangmah an zohkhenhtu ding ahohmanh an um lo i Cuar thar cu a corh kho ti lai lo. ¹⁴ Nangmah a rak in dawtu vialte nih khan an in philh cang; Zeihmanh ah an in rel ti lo. Ral nih an in ṭhuat bantukin kan ṭhuat i Zaangfahnak ngei loin dan kan tat cang; Zeicahtiah na ṭhat lonak cu a ngan i Na sualnak cu a tam ngaingai. ¹⁵ Zeicahdah na hliamhma ruangah na phunzai len ko i Ka hma cu an dam kho ti lai lo, na ti? Na ṭhat lonak cu a ngan i na sualnak a tam ngaingai caah pei hi bantukin dan kan tat cu. ¹⁶ Asinain, an eitu vialte cu ei an si ve lai i An hremtu vialte hna cu sal ah an tang lai. Nangmah aan ramhtu cu ramh an si ve lai i nangmah aan hrawktu cu hrawh ka siter ve hna lai. ¹⁷ Mi nih nang cu, "Ṭhawlmi, hawikom zeihmanh a ngei lomi Zion, an in ti nain, Cuar thar cu ka corhter ṭhan lai i na hma cu ka damter ṭhan lai," tiah Bawipa nih a ti. ¹⁸ Bawipa nih hitin a ti: Zohhmanh, Jakob tefa hna cu an vanṭhatnak kha ka pek ṭhan hna lai i An umnak kip ah khan ka dawtnak kha ka hmuhsak hna lai. Khua cu an rawknak mual cungah khan sak an si ṭhan cio lai i Inn kip chungah khan a rak um tawnmi chungkhar kha an um ṭhan cio hna lai. ¹⁹ Cuka i a ummi hna nih cun thangṭhatnak hla an sa lai i lunglawmhnak in an au lai. Ka karhter hna lai, an zor chuk lai lo; Upatnak ka pek hna lai, nautat an si ti lai lo. ²⁰ An fale hna cu hlanlio i an sining ah khan ka siter ṭhan hna lai i An mibu hna cu ka hmaika ah fehter an si lai. A hremtu vialte hna cu dan ka tat hna lai; ²¹ Anmah chung mi kha an uktu ah a chuak lai i Anmah mi hrimhrim kha an bawi ah a si lai. Ahohmanh nih anmah tein an ka naih ngam bal lo caah, Keimah nih amah cu, ka naih, tiah ka ti lai i a ka naih lai, tiah Bawipa nih a ti. ²² Cucaah nannih cu ka mi nan si lai i Kei cu nan Pathian ka si lai. ²³ Zohhmanh, zei bantuk thlichia dah Bawipa sinin a chuakmi khi a si? Zeizong vialte a phiak dihtu phuchim a si khih. Miṭhalo hna lu cungah cun aa zel; ²⁴ Aa tinhmi le a duhnak kha a tlinh hlan le a lim hlanah cun a dong lai lo. Mah hi kong hi hmailei ah fiang tein nan hngalh te lai.

¹ Khi tikah keimah cu Israel phun vialte hna Pathian ka si lai i annih cu ka mi an si lai, tiah Bawipa nih a ti. ² Mah hihi Bawipa bia cu a si: Vainam in a luatmi hna nih khan thetse ram ah zaangfahnak an hmuh; Israel mi hna nih dinhnak kha an duh tikah, ³ Lamhlat piin an sinah ka rung lang; Israel mi hna, nannih cu kan dawt zungzal hna i Dong loin kan zohkhenh zungzal ko hna. ⁴ Nannih cu kan tunmer ṭhan hna lai. Nan tingtang kha nan i lak ṭhan hna lai i lawmhnak in nan lam ṭhan lai. ⁵ Samaria tlang cungah khan mitsur dum kha nan ser ṭhan hna lai i Mitsur dum in a chuakmi cu a cingtu hna nih khan an ei lai. ⁶ Efraim tlang cung i ralveng hna nih, "Ra u law Zion ah hung kal u sih, Bawipa kan Pathian sinah cun hung kal u sih," an ti caan kha a ra lio, tiah a ti. ⁷ Zeicahtiah mah hihi Bawipa bia cu a si: Jakob ruangah lunglawmhnak in thang piin au tuah u, Miphun lakah phun ngan bik a si; Thangṭhatnak cu hla in sa u law, Bawipa nih a mi cu a khamh cang hna i Israel mi a tangmi hna cu a zuah hna, tiah chim u. ⁸ Chaklei ram in ka ratpi hna lai, Vanhramdeng in ka pumh hna lai. Mitcaw le kebei zong an sinah an ra ve lai i Fapawi le a ni thla a tling dengmangmi hna zong an sinah an i tel lai; Miphun ngan piin an ra kir ṭhan lai. ⁹ Inn ah an ra tlung, an tlun pah in an ṭap, Sihmanhsehlaw ka hnemh hna lai i keimah cu a cawngtu hna ka si lai. A luangmi tiva ah ka hruai hna lai; An lam kha a mil tuk caah an tlu an ril lai lo. Zeicahtiah keimah cu Israel mi caah an pa ka si cang i Efraim cu ka fapa upa bik a si. ¹⁰ "Bawipa bia cu ngai tuah u, Maw miphun hna, Thanh u law rilikam ram le a hlatmi tikulh hna cu hngalhter hna u: ’Israel cu a ṭhektu nih khan a pumh ṭhan lai i Tuukhal nih a tuurun a zohkhenh bangin a zohkhenh lai,’ tiah chim u. ¹¹ Bawipa nih Jakob cu a tlanh ṭhan cang i A ṭhawngmi a ral kut chung khan a chuah ṭhan cang. ¹² Zion tlang par ah cun lawmhnak aw thawng he an ra lai, Bawipa nih ṭhatnak tampi a pek hna caah hmaipanh ngaiin an ra lai, Ṭhatnak a pekmi hna cu rawl le mitsur hang thar le chiti le tuurun chung i a no tete le cawrun chung i a no tete tampi kha an si. Ti toihmi dum bantuk an si lai i zeihmanh an chambau bal ti lai lo. ¹³ Cun ngaknu hna cu an lam lai i an i lawm lai, Tlangval le patar hna cu an tha a nuam lai; An mithi zunngaihnak cu lunglawmhnak ah ka thlen lai, Ka thin ka nemter lai i an ngaihchiatnak lonh in lunglawmhnak ka pek hna lai. ¹⁴ Tlangbawi hna cu hi ram thau kha ka vuaiter hna lai i Ka mi hna cu ka ṭhatnak in an khim lai," tiah Bawipa nih a ti. ¹⁵ Bawipa nih hi bangin a ti: "Ngai hmanh, lunghno ngaiin ṭahnak thawng cu Ramah khua ah a thang, Cucu Rachel nih a fale a ṭah hnanak thawng kha a si; A fale kha an um ti lo caah hnemh kha a duh lo." ¹⁶ Bawipa nih hi bangin a ti: "Fak piin na ṭah lengmang ko cu ngol cang law na mitthli thla ti hlah; Zeicahtiah na rianṭuan man ah laksawng kan pek lai, Annih cu an ral hna ram in an kir ṭhan lai. ¹⁷ Na hnu i a rung um dingah tefa na thlautak hna lai; Na fale hna cu anmahle an ram te ah khan an kir ṭhan lai. ¹⁸ Israel mi hna nih ngaihchia in, ’Bawipa, kannih cu a hrang i a lung a khongmi cawtum bantuk kan si, sihmanhsehlaw nangmah nawl zulh kha na kan cawnpiak; Kan hruai ṭhan law kan ra kir ko lai; nangmah cu Bawipa, kan Pathian na si. ¹⁹ Na sinin kan rak pial cang, sihmanhsehlaw ra kir ṭhan zau kha kan duh. Kannih kha dan na kan tat hnuah cun ngaihchia in kan lu lawng kan khun ko. Kannih nih kan no lioah kan rak sual caah khan ningzahnak le hmaichiatnak kha kan rak tong,’ an ti kha ka theih. ²⁰ "Efraim, nangmah cu ka dawt bikmi fa na si. Na min ka chim fate, nangmah kha dawtnak in kan ruat tawn. Nangmah cu ka lung nih an ngai i na cungah zaangfahnak ka ngei lai," tiah Bawipa nih a ti. ²¹ "Nan lam chingchiahnak dingah lungpon hnuai hna u, chingchiahnak tung phun hna u; Nan zulh dingmi lam cu fiang tein i hngalh u. Ra kir ṭhan tuah u, Maw Israel mi hna, Nan khua hna ah cun ra kir ṭhan cio tuah hna u. ²² Zeicahdah lung awṭawm in nan um lai, nannih zumhawktlak lomi hna? Bawipa nih thil thar pakhat vawlei cungah hin ka ser: nu nih pa an tluk hna lai." ²³ Ralkapbu Bawipa, Israel Pathian nih hitin a ti: "Annih cu an ram ah ka kirter ṭhan hna tikah, Judah ram le a khua hna ah cun, ’Bawipa nih Jerusalem tlang thiang a umnak hmun thiang cu, Thluachuahnak pe ko seh,’ tiah an ti ṭhan lai. ²⁴ Judah ram le a khua hna chungah khan mi cu an um lai i lothlo zong an um lai i an tuurun he a ummi tuukhal hna zong an um lai. ²⁵ A bami cu ka hrimhter ṭhan hna lai i rawlṭam in thazang a tlawmmi cu rawl khim tein ka pek hna lai. ²⁶ Cu tikah ka mi hna nih cun, ’Kaa hngilh i ka thazang a tlung ṭhan,’ an ti lai. ²⁷ "Bawipa nih hi bangin a ti: Israel ram le Judah ram cu minung le saram in ka khahter hna lai caan a ra lio. ²⁸ Annih cu ṭheh awk le phawi awk le chimh awk le hrawh awk le harnak pek awkah ka rak ngiat hna bantuk khan atu cu annih kha tun awk le thawh awkah ka zohkhenh cang hna lai, tiah Bawipa nih a ti. ²⁹ Cu caan a phak tikah cun, mi nih, ’An pale nih mitsur thei thor an ei i An fale ha a za,’ an ti ti lai lo. ³⁰ Ahohmanh mitsur theithor a eimi cu amah hate kha a za ko lai i ahohmanh amahle a sualnak ruang te ah a thi ko lai." ³¹ "Israel mi hna le Judah mi hna he biakamnak thar ka ser lai ni cu a ra lio, tiah Bawipa nih a ti. ³² Izipt ram in chuahpi awkah an kut in ka hruaimi hna an pupa hna sinah ka tuahmi biakamnak bantuk kha a si lai lo. Ka biakamnak kha an zul lo nain an cungah ka lung a sau, tiah Bawipa nih a ti. ³³ Sihmanhsehlaw cu caan cu a phak tikah, Israel mi hna he biakamnak ka ser laimi cu mah hihi a si: Ka phunglam cu an chungah ka chiah lai i an lungthin cungah ka ṭial lai. Keimah cu an Pathian ka si lai i annih cu ka mi an si lai," tiah Bawipa nih a ti. ³⁴ Cun annih nih pakhat le pakhat kha, ’Bawipa kha hngal tuah,’ tiin i cawnpiak kha an herh ti lai lo, zeicahtiah a hme bik in a ngan bik tiang, an dihlak in an ka hngalh lai. An ṭhat lonak kha ka ngaihthiam hna lai i an sualnak kha ka hngal camcin ti lai lo,’ tiah Bawipa nih a ti. ³⁵ Chun ceutertu ah ni a chia i zan ceutertu ah arfi le thlapa kha a chia i rili tilet kha a thawhter i a awnhtertu nih hitin a ti, a min cu Ralkapbu Bawipa a si: ³⁶ Thil umtuning ka chiahmi hi ka hmaika in a loh khawh a si ahcun, Cu tik bel ah Israel tefa hna cu ka hmaika i miphun si ti lo dingin an lo ve hnga, tiah Bawipa nih a ti. ³⁷ Cunglei van khi aho tal nih tah kho in tanglei vawlei hi aho tal nih a thuknak hlai khawh si seh law, cu tik bel ah Israel tefa vialte hna cu an tuahmi ruangah khan ka hlawt khawh hna hnga, tiah Bawipa nih a ti. ³⁸ "Zohhmanh, khuapi cu Hananel Innsang in Kil Kutka timi tiang, Bawipa upatnak caah sak ṭhan a si lai ni kha a ra lio. ³⁹ A ramri cu nitlaklei ah Gareb tlang tiang a va lan lai i Goah ah khan a run i kual lai. ⁴⁰ Miruak le hmunhnawm an hlonhnak horkuang kha a ning piin, cun Kidron tiva cung i a ummi lo vialte, nichuahlei, ah Rang Kutka timi tiang kha Bawipa ca i a thiangmi thil an si lai. Khuapi cu ṭheh i hrawh a si ti lai lo," tiah Bawipa nih a ti.

¹ Judah siangpahrang Zedekiah a bawi kum hra kum ah Jeremiah sinah Bawipa bia kha a phan, cu kum cu Nebukhadnezzar a bawi kum hleiriat kum a si ve. ² Cu caan ah cun Babilon siangpahrang ralkap hna nih Jerusalem kha an kulh i profet Jeremiah cu siangpahrang bawi inn he aa pehmi ralvengtu hna inn tual ah khan thong ah a tlak lio a si. ³ "Bawipa nih, ’Hi khua hi Babilon siangpahrang sinah ka pek lai i a lak lai. ⁴ "Zedekiah Siangpahrang hi Babilon mi hna kut in a luat lai lo. Babilon siangpahrang sinah khan pek a si lai i amah cu hmaitonh tein a hmuh lai i a pum hrimhrim in a chawnh lai. ⁵ Zedekiah cu Babilon ah an kalpi lai i khika ah a cung i rian ka ṭuan hlantiang a um lai. Babilon mi kha do hmanh hna seh law, a tei hna lai lo, tiah Bawipa nih a ti, tiah Jeremiah cu na chim", tiah Zedekiah Siangpahrang nih cun a ti i cucaah khika ah khan thong i a thlaknak cu a si. ⁶ Jeremiah nih cun, "Bawipa bia ka sinah a ra phan i, ⁷ ’Na pacheu Shallum i a fapa Hanamel cu na sinah a ra lai i, "Anathoth i a ummi ka lo cu ka caw tuah, zeicahtiah nangmah cu a ka naihmi ka rualchan na si bangin lo tlanhnak nawl cu nangmah ta a si," a ti lai,’ a ka ti," tiah a ti. ⁸ Bawipa nih a ka chimh chung bangin ka unau Hanamel cu ka sinah ralvengtu hna inntual ah cun a ra i, "Benjamin ram chung Anathoth khua i ka lo cu ka caw tuah, zeicahtiah cu lo ngeih awk le tlanhnak nawl cu nangmah ta a si, nangmah cu a ka naih bikmi ka rualchan na si bangin; nangmah nih ka caw ko," tiah a ti. Khi tikah mah hihi Bawipa bia a si ti kha ka hngalh. ⁹ Cucaah Anathoth khua i lo cu ka unau Hanamel sin khan ka cawk i a man cu ka thlaipiak, ngun shekel hleisarih a si. ¹⁰ Hnatlaknak ca cu ka min ka thut i min khenhnak in ka khenh i tehte kha ka hngalhpi u ka ti hna i tangka kha a thlainak ah ka thlai. ¹¹ Cun kan i cawknak ca hna kha, min khenhnak i cabawm i khenh chihmi he, cun a kawipa cabawm i khumh lomi he khan ka lak hna i ¹² Mahseiah fapa Neriah i fapa Baruk kha, ka unau Hanamel hmaika ah cun, i cawknak ca chung i an min aa ṭialmi tehte hna le ralvennak inntual i Judah mi a ṭhumi hna hmaika ah khan ka pek. ¹³ An dihlak hmaika ah cun Baruk cu ka thawh i, ¹⁴ "Hihi Ralkapbu Bawipa, Israel Pathian bia cu a si: Hi kan i cawknak ca hna hi, minkhenhnak in cabawm i khenh chihmi he cun a khawpi cabawm i khumh lomi he hin i lak hna law, saupi chiah khawh an si nakhnga tlak um chungah va khumh hna. ¹⁵ Zeicahtiah Ralkapbu Bawipa, Israel Pathian bia cu: Hi ram chungah hin inn hna, lo hna, mitsur dum hna, i zuarh i cawk an si ṭhan lainak caan a ra lio, ti hi. ¹⁶ Cawknak ca cu Neriah fapa Baruk kha ka pek hnuah Bawipa sinah thla ka cam i, ¹⁷ ’Maw Bawipa Pathian, Na ṭhawnnak a nganmi le samhmi na ban in van le vawlei hi na ser hna; nangmah caah a si kho lomi thil zeihmanh a um lo. ¹⁸ Minung thong tampi cungah khan zumhawktlak na sinak kha na langhter peng ko, sihmanhsehlaw an pale sualnak man kha an hnu i a hung ummi an fale cungah khan na tlunter fawn. ¹⁹ Maw a lianngan i a ṭhawngmi Pathian, na min cu Ralkapbu Bawipa a si, naa tinhmi thil cu thil lianngan an si i na tuahnak cu khuaruahhar a si. Na mit nih mi an kalnak lam vialte cu a hmuh dih i annih cu an umtuning cio le an tuahmi thil nih hmuh awk aa tlakning cio khan na lehrulh hna. ²⁰ Izipt ram chungah khan hmelchunhnak le khuaruahharnak kha na tuah hna i nihin tiang zong hin Israel mi hna lak le minung vialte hna lakah na tuah lengmang ko rih hna, cun nihin ni tiang i a nungmi min kha nangmah nih naa ser. ²¹ Izipt ram in na mi hna cu hmelchunhnak le khuaruahharnak he, a ṭhawngmi kut le samhmi ban le ṭih a nungmi ṭhawnnak he na chuahpi hna. ²² Cun an pupa hna sinah chiatser in na kammi hi ram, khuaihliti le cawhnuk in a luangmi ram hi annih cu na pek hna. ²³ Sihmanhsehlaw hi ram chungah an luh i an co tikah annih nih na nawlbia kha an ngai lo i na cawnpiak hna ningin an nung lo; na fialmi hna kha zeihmanh an tuah duh lo. Cucaah hi ṭhat lonak vialte hi an cungah na tlunter. ²⁴ Babilon mi hna nih khuapi cu lak awkah a velchum in kulhnak chuntlung an ser i annih nih an tuk. Raltuknak le mangṭam le rai nih khuapi cu an kut chungah a tlakter lai. Bawipa, nangmah nih na chimmi cu a tling ko cang ti kha na hmuh ko. ²⁵ Sihmanhsehlaw maw Bawipa Pathian, Babilon mi hna nih khuapi kha la dengmang cang hna hmanh seh law, tehte hna hmaiah lo kha a ka cawktertu cu nangmah na si," tiah ka ti. ²⁶ Cun Bawipa nih Jeremiah cu a thawh i, ²⁷ "Keimah cu Bawipa, mi vialte i Pathian ka si. Ka caah a si kho lomi thil zeital a um maw? ²⁸ Cucaah hi khuapi cu Babilon siangpahrang Nebukhadnezzar le a ralkap hna sinah ka pek lai i annih nih an lak lai. ²⁹ Hi khua a dotu Khaldi mi hna kha an ra lut lai i hi khua cu mei in an duah lai i an khangh lai. Keimah thinhunter awkah Baal sinah inn cungah raithawinak an khanghnak inn hna le pathian dang hna sinah thlet thawinak an pekchanhnak inn hna zong kha an khangh dih hna lai. ³⁰ Hlan lio tein Israel mi hna le Judah mi hna nih hin ka duh lomi lawngte kha an tuah lengmang ko; Israel mi nih siasal an sermi khan ka thin an ka phawh. ³¹ Hi khua nih hin tlak a si ka in atu tiang ka thinhunnak kha a tuah lengmang i ka thin kha a ka phawh lengmang, cucaah ka hlonh ko lai; ³² Israel le Judah nih an siangpahrang hna le an bawi hna le an tlangbawi hna le an profet hna le Jerusalem le Judah ram chung i a ummi an mi hna nih ṭhat lonak an tuahmi in ka thin an ka phawh cang. ³³ An hnulei an ka chit i an hmai kha an ka mertak; anmah cawnpiak awkah kaa zuam lengmang nain ngaih an duh lo i zulh zong an duh lo. ³⁴ An thil fihnung siasal hna cu ka min umnak inn chungah khan an chiah hna i an thurhnawmhter. ³⁵ Benhinnom Nelrawn ah Baal caah hmunthiang an ser hna i khika ah Molek sinah an fanu hna le an fapa hna kha an pek hna. Hi thil fihnung tuah awk hi le sualnak chungah Judah luhpi hi keimah sinin a chuakmi nawlbia a si lo i ka lunglai ah a chuak balmi zong a si lo. ³⁶ "Cucaah Bawipa, Israel Pathian nih aa thawh i, ’Jeremiah, hi mi hna cu raltuknak le mangṭam le rai nih hi khuapi cu Babilon siangpahrang kut chungah a phakter lai, tiah na chimh hna. Sihmanhsehlaw atu cu chim awk ka ngeih rihmi kha ngai tuah. ³⁷ Ka thin hun le ka thin linh le ka thin han in ka dawinak hna ram vialte chung khan ka pumh ṭhan hna lai i hi hmun ah hin ka ratpi ṭhan hna lai i ahohmanh nih hnahnawh lo tein ka umter hna lai. ³⁸ Annih cu ka mi an si lai i kei cu an Pathian ka si lai. ³⁹ Annih cu an nunning ah tinhmi pakhat lawngte ka pek hna lai: cucu anmah ca le an tefa hna ca i a ṭhami keimah ṭih zungzal kha a si lai. ⁴⁰ Annih he zungzal in a hmunmi biakamnak kha ka ser lai i donglo in ka ṭhatnak in ka vorh hna lai; an lung kha keimah ṭihnak in ka khahter lai i keimah sinin an pial ti lai lo. ⁴¹ An cungah kaa lawm lai i an ca i ṭhatnak tuah kha ka tha a nuam lai, cun zumh awk tlak tein ka lung le ka thin taktak in hi ram chungah hin ka phun hna lai. ⁴² "Hi mi hna cungah hi tluk a nganmi ṭhat lonak ka tlunter bantuk hin, anmah ka kamhmi hna ṭhatnak vialte kha ka pek hna lai. ⁴³ Jeremiah, hi ram hi minung siseh, saram siseh, an um lonak thetse ram bantuk a si lai tiah na ti i Babilon mi sinah pek a si lai, na ti. Sihmanhsehlaw hi ram chungah hin lo kha i cawk le i zuarh an si ṭhan lai. ⁴⁴ Benjamin ram chungah siseh, tlang ram khua hna chungah siseh, Shefelah ram chungah siseh, Negeb khua hna chungah siseh, lo cu i cawk le i zuarh an si ṭhan lai i cawknak ca hna cu minthut le minkhenhnak in khenh le tehte theihhngalh in tuah an si ṭhan lai, zeicahtiah an vanṭhatnak cu ka pek ṭhan hna lai," tiah Bawipa nih a ti.

¹ Jeremiah cu ralvengtu hna inntual i hren a si ko rih lioah khan Bawipa bia cu a voi hnihnak a sinah a ra. ² Vawlei kha a ser i mui a ngeihter i a fehtertu Bawipa bia cu hi bangin a si; a min cu Bawipa a si: ³ "Nan ka auh ahcun kan leh hna lai i a nganmi le a thukmi thil nan hngalh bal lomi hna kha kan chimh hna lai. ⁴ Keimah, Bawipa, Israel Pathian nih, Jerusalem khua chung inn hna le Judah siangpahrang inn cu an rawk lai; Babilon mi hna nih kulhnak chuntlung ah an sermi hna cu va chuah i va tuk kha santlailo a si," ka ti. ⁵ "Cun nan va chuah; nan va tukmi hna nih cun ka thin hun le ka thin linh in ka tuk laimi hna ruak khan hi khua hi an khahter lai i cu vial ceo cu a si ko lai. A chung i a ummi minung hna nih ṭhat lonak an tuahmi ruangah hi khua cu ka mertak cang. ⁶ Sihmanhsehlaw hi khua cu ka damter ṭhan lai i a mi hna cu ka damter hna lai i lawmhnak le daihnak le himnak kha ka pek hna lai. ⁷ Judah le Israel cu an vanṭhatnak kha ka pek ṭhan hna lai i hmasa ah an rak sining te bantuk khan ka sak ṭhan hna lai. ⁸ Ka cungah sualnak an tuahmi vialte khan ka thianh hna lai; an sualnak cu ka ngaihthiam hna lai i keimah an ka dohnak kha ka ngaihthiam hna lai. ⁹ Jerusalem khua nih hin vawlei cung miphun vialte hmaiah min ṭhatnak le thangṭhatnak le sunparnak a ka pek lai. A cungah ka tluntermi thluachuahnak vialte kha an theih i a cung i ka tluntermi thluachuahnak le daihnak kha an hmuh tikah an lung a suk hna lai i an khuaruah a har lai," a ti. ¹⁰ Bawipa nih hitihin a ti: "Nannih nih nan i thawh i, hi hmun cu a rawk cang, Judah ram khua chungah siseh, Jerusalem khua chungah siseh, mi siseh, saram siseh, an um ti lo. Pakpalawng ah a cang ko cang, mi zong an um ti lo, saram zong an um ti lo, nan ti. ¹¹ Sihmanhsehlaw hi hmun ah hin thanuamnak thawng le lunglawmhnak thawng, nupi ṭhitu aw le a mo aw cu theih an si ṭhan lai. Mi nih ka biaknak inn ah lunglawmhnak laksawng an rak put tikah hla an sa lai i, A lianngan bik Bawipa cu lawm tuah u, Zeicahtiah amah cu a ṭha, A fekmi a dawtnak cu zungzal in a hmun, an ti lai. Hi ram cu hmasa ah a rak rum tlukte khan ka rumter ṭhan lai," tiah Bawipa nih a ti. ¹² Mah hihi Ralkapbu Bawipa bia a si: Hi hmun le a khua vialte hna, a rawk i a ril komi, a chungah mi siseh, saram siseh an um lonak ah hin, tuukhal hna nih an tuu an pumh hnanak himnak hmun a um ṭhan lai. ¹³ Tlangram khua ah si hna seh, Shefelah khua ah si hna seh, Negeb khua ah si hna seh, Benjamin ram chungah siseh, Jerusalem khua pawngkam ah siseh, Judah ram khua hna chungah siseh, tuurun hna cu anmah a reltu hna kut tang khan an kal duahmah ṭhan lai, tiah Bawipa nih a ti. ¹⁴ "Hngak ko, Israel le Judah cungah bia ka kamhmi hna thluachuahnak vialte ka tlunter lai ni a ra lio. ¹⁵ Khi ni le khi caan ah, David Nge, a dingmi ka corhter lai; ram chungah a hmaanmi le a dingmi thil kha a tuah lai. ¹⁶ Khi ni ah cun Judah cu him tein a um lai i Jerusalem cu ahohmanh nih hnahnawh lo tein khua a sa lai; cun a min cu, ’ Bawipa cu kan dinnak a si,’ ti a si lai," tiah Bawipa nih a ti. ¹⁷ Zeicahtiah Bawipa bia cu hi bangin a si: Israel mi bawiṭhutdan cung i a ṭhu ding kha David nih ngei loin a um bal lai lo i ¹⁸ Levi tlangbawi hna zong nih khan ka hmaika i khangh thawinak pechantu ding le chang thawinak a khangtu ding le pekchanhnak a tuahtu ding minung kha ngei loin an um bal hna lai lo. ¹⁹ Bawipa nih Jeremiah cu a thawh i, ²⁰ "Hi hi Bawipa bia a si: Chun ca le zan ca i phung ka sermi hi hrawh khawh a si i annih nih ningcang loin an um khawh a si ahcun, ²¹ David ka sal he ka biakamnak zong kha a rawk kho ve lai i a tefa hna kha pakhat hmanh a bawiṭhutdan cung i a ṭhu ding um loin a si kho ve ko lai; cun Levi mi ka tlangbawi ka rianṭuantu hna he ka biakamnak zong, cu bantuk ṭhiamṭhiam in a si ve kho ko hnga. ²² Van i arfi rel cawk lo le rili thetse rel cawk a si lomi bantukin, ka sal David i a tefa cu ka karhter hna lai i ka rian a ṭuanmi Levi mi hna zong ka karhter hna lai," tiah a ti. ²³ Bawipa nih Jeremiah cu a thawh i, ²⁴ "Israel le Judah, ka thimmi innchungkhar pahnih hna hi Bawipa nih a hlawt cang hna, tiah mi nih an ka timi hi na ngia maw? Cucaah ka mi hna cu an nehsawh hna i miphun ah an rel ti hna lo. ²⁵ Sihmanhsehlaw Bawipa keimah nih chun le zan he biakamnak kan ngei i vawlei le van a uktu phunglam kha ka ser hna. ²⁶ Mah hihi ka tuah bantukte hin Jakob tefa hna le ka sal David sin i ka biakamnak cu ka fehter lai. Abraham, Isak le Jakob tefa hna uktu ah David tefa pakhat kha ka thim lai. Ka mi cu an van ṭhatnak kha ka pek ṭhan hna lai i an cungah zaangfahnak ka ngei lai," tiah a ti.

¹ Babilon siangpahrang Nebukhadnezzar le a ralkapbu nih amah uknak tang i a ummi ram vialte le miphun vialte he Jerusalem le a khuate hna kha an doh hna lioah, Bawipa sinin Jeremiah sinah a rami bia cu hihi a si. ² Mah hihi Bawipa, Israel Pathian bia cu a si: "Va kal law Judah siangpahrang Zedekiah cu va chim, mah hihi Bawipa bia a si: Hi khua hi Babilon siangpahrang kut chungah ka pek lai i mei in a khangh lai. ³ A kut chungin na luat lai lo, tlaih na si hrimhrim lai i a kut chungah chanh na si hrimhrim lai. Amah cu hmaitonh tein na hmuh lai i nan pum hrimhrim in bia nan i ruah lai, cun Babilon ah na kal lai. ⁴ Maw Judah siangpahrang Zedekiah, Bawipa nih nangmah an cahmi bia cu thei rih tuah. A bia cu hihi a si: Vainam in na thi lai lo. ⁵ Dai tein na thi ko lai. Na pupa hna, nangmah hlanah a ummi siangpahrang hna caah meiphu an tih bantuk khan nangmah upatnak caah an tih ve lai. Nangmah cu an in ṭah lai i an ṭang an i cumh pah in, ’Aize, bawipa!’ an ti lai. Mah hihi keimah chimmi a si," tiah Bawipa nih a ti. ⁶ Profet Jeremiah nih hi bia vialte cu Judah siangpahrang Hezekiah kha Jerusalem khua ah, ⁷ Babilon siangpahrang ralkap hna nih Jerusalem khua an tuk lioah khan a chimh. Ralkap pawl nih cun Lakhish le Azekah zong kha an tuk, hi hna lawng hi Judah ram chung i kulh ngeimi khua a tangmi cu an si. ⁸ Siangpahrang Zedekiah nih Jerusalem khuami vialte he an sal hna luatter awkah biakamnak a ser hnuah Bawipa sinin Jeremiah sinah a rami bia cu hihi a si. ⁹ Hebru mi nih Hebru mi sal i nan zuatmi hna vialte cu, nu an si ah, pa an si ah, nan luatter hna lai; nanmah nan phunhawi a simi Judah mi kha sal ah nan zua hna lai lo, tiah a ti. ¹⁰ Cun bawi vialte hna le mi zapi hna nih, an salle hna cu nu an si ah, pa an si ah, luatter i sal i zuat ti lo dingin biakamnak an tuahmi cu an tlinter i an salle cu an luatter hna. ¹¹ Sihmanhsehlaw a hnuah an lung an i let ṭhan i an thlah ciami salpa le salnu hna kha hramhram in sal ah an zuat ṭhan hna. ¹² Khi tikah hi bia cu Jeremiah sinah Bawipa sinin a ra. ¹³ Hihi Bawipa, Israel Pathian bia cu a si: Nan pupa hna cu Izipt ram in, saltannak ram chungin ka chuahpi hna tikah annih sinah biakamnak ka ser. ¹⁴ Cucu hihi a si: ’Nan sin i a hun i zuarmi Hebru mi, kum ruk an rian cangmi hna kha, nannih nih kum sarihnak chungah nan luatter hna lai. ¹⁵ Nan pupa hna nih cun ka bia cu ngaih an duh lo i ka nawl zong zulh an duh lo. Sihmanhsehlaw nannih tu nih cun tunaite ah sal luatnak ding caah thawng nan thanh i ka hmaika ah, ka min a pumi inn chungah biakamnak nan ser i cucaah ka mithmuh ah a ṭhami thil kha nan tuah. ¹⁶ Asinain, nannih zong nih ka min cu nan thurter ṭhan cang. Nannih nih nan luatter cangmi sal hna kha nan dihlak in nan lak ṭhan hna i nu he pa he nan sal ah hramhram in nan ser ṭhan hna. ¹⁷ Cucaah hitin Bawipa nih a ti: Ka bia nan ngai lo; nan phunhawi Hebru mi kha luatnak nan pe hna lo. Cucaah keimah zong nih luatnak kan pek ve ding hna cu: tuknak le rai le mangṭam in thihnak kha a si lai. Nan cung i ka tuahmi ruangah vawlei cung ram vialte cu an tuksa nan purh hna lai. ¹⁸ - ¹⁹ Judah le Jerusalem hruaitu hna nih khan, siangpahrang inn i bawi hna le tlangbawi hna le hi ram chung mi vialte hna he khan, cheu hnih ah an chuahmi cawtum a laifang i an kalnak in ka sinah biakamnak an tuah. Sihmanhsehlaw ka hmaika i biakamnak an tuahmi cu an hrawh i a chung i zulh awk hna cu an zul lo. Cucaah hi mi hna cungah hin, cawtum cung i an tuahmi kha an cungah ka tuah ve lai. ²⁰ An ral hna sinah ka pek hna lai. Anmah thah a duhmi hna sinah khan ka chanh hna lai i an ruak cu va le ramlak saram nih an ei hna lai. ²¹ Judah siangpahrang Zedekiah le a bawi hna cu anmah thah a duhtu an ral hna sinah khan ka pek hna lai. Cun nanmah doh a ngol cangmi Babilon siangpahrang ralkapbu sinah khan annih cu ka sanh hna lai. ²² Keimah nih nawl ka pek hna lai i hi khuapi ah hin an ra kir ṭhan lai. An tuk lai, an lak lai i an khangh dih lai. Judah ram khua hna cu ahohmanh an um lonak thetse ram bantuk ah ka ser hna lai, tiah Bawipa nih a ti.

¹ Judah siangpahrang Josiah fapa Jehoiakim chan ah Bawipa sinin Jeremiah sinah a rami bia: ² "Rekhab mi hna sinah va kal law, va chawn hna law, Bawipa inn ah a dal pakhat chungah hin rak luhpi hna; cun mitsur zu kha din awkah pe hna," a ti. ³ Cucaah Habazziniah fapa Jeremiah i fapa Jaazaniah le a unau hna le a fapa vialte hna le Rekhab mi an chungkhar ning piin ka lak hna i ⁴ annih cu Bawipa inn ah khan ka ratpi hna i Pathian mi Igdaliah fapa Hanan fapa hna khaan chungah khan ka luhpi hna; cucu innleng a cawngtu Shallum fapa Maaseiah khaan cung i a ummi bawi khaan he khan aa peh. ⁵ Cun Rekhab mi hna cu mitsur hang a khatmi awi-um hna le hrai hna kha ka hunh hna i din ka sawm hna. ⁶ Sihmanhsehlaw annih nih, ’Kannih cu zu cu kan ding lai lo. Zeicahtiah kan pu Rekhab fapa Jonadab nih nawl a kan pek i, ⁷ "Zeitikhmanh ah mitsur hang nan ding lai lo, nanmah nih siseh, nan fale nih si hna seh; inn nan sa lai lo; thlaici zong nan thla lai lo; mitsur dum zong nan ser lai lo; hi thil hna hi pakhat hmanh nan tuah hna lai lo. Sihmanhsehlaw mipem nan sinak ram ah hin saupi nan nun nakhnga nan nun chung vialte thlam chung khuasami nan si lai," a kan ti. ⁸ Kan pu Rekhab fapa Jonadab nawl cu kan ngaih i kan chan chung vialte zu kan ding lo, kan nupile zong nih an ding lo, kan fapale zong nih an ding lo, kan fanule zong nih an ding lo. ⁹ Umnak ding caah inn kan i sak lo, mitsur dum zong kan ngei lo i thlaici zong kan tuh lo. ¹⁰ Thlam chungah hin khua kan sa ko i kan pu Jonadab nawlbia kha ngai le zul in kan um ko. ¹¹ Sihmanhsehlaw Babilon siangpahrang Nebukhadnezzar nih hi ram a ra doh tikah, "Ra u law Khaldi mi ralkapbu hna le Aramean mi ralkapbu a ra liomi hna hlanah hin Jerusalem ah kal u si," a kan ti i cucaah Jerusalem ah hin kan um,’ an ti. ¹² - ¹³ Khi tikah Ralkapbu Bawipa, Israel Pathian nih Jeremiah cu Judah rammi le Jerusalem khuami sin i va kal i annih cu hi bia va chimh kha a fial i, "Bawipa nih, zeicahdah ka bia ngaih hi nan duh lo i ka cawnpiaknak zulh hi nan al, tiah kan hal hna. ¹⁴ Jonadab nih a tefa hna cu zu din lo awkin nawl a pek hna i annih nih an pu nawlbia cu an ngaih caah nihin ni tiang te hin ahohmanh zuding an um lo. Sihmanhsehlaw nannih cu bia kan chim lengmang hna nain ka bia nan ngai duh lo. ¹⁵ Ka sal profet hna cu nan sinah ka rak thlah lengmang ko hna i nan ziaza ṭhalo kha ngol awk le a dingmi thil kha tuah awkah an in chimh lengmang ko hna. Nan pupa hna sinah ka pekmi ram ah hin nan um thluangthluan khawh nakhnga annih nih pathian dang kha biak lo ding le an rian ṭuan lo awkah ralrinnak an in pek lengmang ko hna. Sihmanhsehlaw ka bia kha nan ngai duh lo i zeizong ah nan ka rel fawn lo. ¹⁶ Jonadab tefa pawl nih cun an pu nih nawl a pekmi hna kha an zulh, sihmanhsehlaw nannih cu ka nawl nan ngai lo. ¹⁷ Cucaah Ralkapbu Bawipa, Israel Pathian nih Judah mi le Jerusalem mi nan cungah rawhralnak ka tlunter lai tiah ka timi vialte kha ka tlunter lai. Nannih cu kan chawnh hna tikah nan ngai duh lo i kan kawh hna tikah nan ka leh duh lo caah hihi nan cungah ka tuah lai," tiah a ti. ¹⁸ Cun Rekhab mi cu Jeremiah nih a thawh hna i, "Hi bia hi Ralkapbu Bawipa, Israel Pathian bia a si: Nannih nih nan pu Jonadab nawl kha nan ngaih i a nunchimhnak kha nan zulh i an fialmi vialte hna kha nan tuah caah, ¹⁹ hi bangin Ralkapbu Bawipa, Israel Pathian nih, ’Rekhab fapa Jonadab nih zeitikhmanh ah ka hmai i a dir dingmi tefa a bau bal lai lo,’ a ti," tiah a ti hna.

¹ Judah siangpahrang Josiah fapa Jehoiakim a bawi kum li kum ah Bawipa sinin hi bia cu Jeremiah sinah a ra: ² "Cazual pakhat in i lak law Israel kong le Judah kong le miphun vialte hna kong ah kan chimhmi bia vialte kha, Josiah chan i kan chimh hmasa bik ni thawk in atu tiang ka chimmi kha ṭial tuah. ³ Judah mi hna nih hin an cung i ṭhat lonak tlunter ka timhmi hi an theih tikah an zulhmi lam ṭhalo hi an hei hlawt cio sual ko hmanh hnga maw; cu ti an tuah ahcun an ṭhat lonak le an sualnak cu ka ngaihthiam ko hna hnga," a ti. ⁴ Cucaah Jeremiah nih Neriah fapa Baruk kha a auh i Baruk nih cun Bawipa nih Jeremiah sinah a chimmi bia vialte Jeremiah nih a auh in a auhmi kha cazual chungah cun a ṭial. ⁵ Cun Jeremiah nih Baruk cu hitin a ti: "Kei cu Bawipa inn i kal kha onh ka si lo. ⁶ Cucaah keimah can ah rawl ulh ni ah nangmah cu na kal lai i kan auhmi ningin Bawipa cazual cungah Bawipa bia na ṭialmi cu zapi theih ah na va rel lai. Judah mi an khua cio in a rami hna an theihhngan ah khan na va rel lai. ⁷ Hi mi hna cungah hin Bawipa nih thinhunnak a nganmi le thinlinhnak a nganmi in bia a chim caah hin, annih nih Bawipa sinah khan zaangfahnak an hei hal phum ko hnga," tiah a ti. ⁸ Cun Neriah fapa Baruk nih cun profet Jeremiah nih tuah awk i a fialmi vialte kha a tuah dih i Bawipa inn chungah Bawipa bia cu cazual chung khan a rel. ⁹ Judah siangpahrang Josiah fapa Jehoiakim a bawi kum nga kum, thla kuanak thla ah Jerusalem i a ummi vialte hna le Judah ram chung khua hna in a rami vialte hna nih Bawipa hmaiah rawl ulhnak kha an tuah. ¹⁰ Khi tikah Bawipa inn chungah cun mi vialte theih ah, Baruk nih Jeremiah bia cu cazual chung khan a rel; cu a relnak cu biakinn chung, caṭialtu Safan fapa Gemariah khaan chungah khan a si. Cu Khaan a umnak cu biakinn i a ummi Kutka Thar an timi cunglei tual ah khan a si. ¹¹ Safan fapa Gemariah i fapa Mikaiah nih cazual chungin relmi Bawipa bia vialte cu a theih tikah, ¹² siangpahrang inn ah cun a vung kal i caṭialtu khaan ah cun a lut; khika ah bawi vialte kha an rak ṭhu: caṭialtu Elishama, Shemaiah fapa Delaiah, Akhbor fapa Elnathan, Safan fapa Gemariah, Hananiah fapa Zedekiah le bawi dang vialte hna cu. ¹³ Cun Mikaiah nih cun Baruk nih mi zapi theih ah cazual chungin a relmi bia a rak theihmi vialte cu a chimh hna. ¹⁴ Khi tikah bawi vialte nih cun Kushi fapa Shelemiah fapa Nethaniah i fapa Jehudi cu Baruk sin i hi bangin va chim awkah an hei thlah i, "Mi zapi theih ah na relmi cazual cu rak i put law, ra," an ti. Cucaah Neriah fapa Baruk nih cun cazual cu aa put i an sinah cun a va kal. ¹⁵ Cun annih nih an thawh i, "Ṭhu law rel tuah," an ti. Cucaah Baruk nih cun a relpiak hna. ¹⁶ Cun bia kha an theih dih tikah thinphang in pakhat le pakhat kha an i zoh i, Baruk cu an thawh i, "Hi bia vialte hi siangpahrang kan chimh lai," tiah an ti. ¹⁷ Cun Baruk cu an thawh i, "Zeitindah hi bia vialte hi na ṭial hna, kan chim tuah," tiah an ti. ¹⁸ Anih nih a thawh hna i, "Hika chung bia vialte hi Jeremiah nih a dihlakte hin a ka auh hna i cun kei nih cahang in cazual chungah hin ka ṭial hna," tiah a ti. ¹⁹ Cun bawi hna nih cun Baruk cu an thawh i, "Va kal law nangmah le Jeremiah cu vaa thup u law ahohmanh nan umnak kha hngalhter hna hlah u," an ti. ²⁰ Cun cazual cu caṭialtu Elishama khaan chungah an fim dih in zung ah khan an va kal i zeizong vialte kha siangpahrang cu an chimh. ²¹ Khi tikah siangpahrang nih Jehudi cu cazual kha va lak awkah a thlah i caṭialtu Elishama khaan chung khan a va lak i Jehudi nih cun siangpahrang le a pawng i a dirmi bawi vialte hna cu a relpiak hna. ²² Cu lio cu thla kua thla a si siangpahrang cu khuasik caan i a umnak inn chungah cun mei a to. ²³ Cun Jehudi nih cun cazual cu tlang thum tlang li a vun rel paoh khin siangpahrang nih cun ca tannak namte in a tan lengmang hna i mei chungah cun a paih lengmang hna, cazual cu a dihlak in a ciamh dih tiang cuticun a tuah. ²⁴ Siangpahrang siseh, hi bia a theimi a sinum nih si hna seh, thinphannak a langhter i a puan a thlekmi ahohmanh an um lo. ²⁵ Elnathan le Delaiah le Gemariah nih siangpahrang cu cazual kha khang hlah, tiah an nawl nain a duh lo. ²⁶ Cun siangpahrang nih siangpahrang fapa Jerahmeel le Azriel fapa Seraiah le Abdeel fapa Shelemiah kha caṭialtu Baruk le profet Jeremiah kha va tlaih awkah a fial hna, sihmanhsehlaw Bawipa nih a thuh hna. ²⁷ Jeremiah nih Baruk a auhmi cazual kha siangpahrang nih a khangh hnuah Bawipa bia cu Jeremiah sinah a ra i ²⁸ "Cazual a dang pakhat i lak law cazual hmasa i a ummi bia, Judah siangpahrang Jehoiakim nih a khanghmi bia vialte kha ṭial dih hna. ²⁹ Cun Judah siangpahrang Jehoiakim sinah cun Bawipa nih hi bangin a ti, tiah na va ti lai: Hi cazual cu na khangh i, ’Zeicahdah a chungah hin Babilon siangpahrang cu a ra hrimhrim lai i hi ram hi a hrawh lai i minung siseh, saram siseh a thah dih hna lai, tiin na ṭial? na ti. ³⁰ Cucaah Judah siangpahrang Jehoiakim, nangmah kong ah Bawipa nih hi bangin ka ti: David bawiṭhutdan cung i a ṭhu ding ahohmanh na ngei hna lai lo i na ruak cu chun ah ni nih a linh lai i zan ah hawhra nih a tlak lai. ³¹ Nangmah le na tefa hna cu na bawile vialte hna he, sualnak nan tuahmi ruangah dan kan tat hna lai. Nangmah nih siseh, Jerusalem mi le Judah mi nih si hna seh, ralrinnak kan pekmi hna cu zeihmanh ah nan rel lo, cucaah nan cungah ka tlunter lai ka timi rawhralnak vialte nan dihlak cungah ka tlunter lai," tiah a ti. ³² Cun Jeremiah nih cazual dang pakhat kha aa lak i caṭialtu Baruk, Neriah fapa kha a pek i Judah siangpahrang Jehoiakim nih mei ah a khanghmi cazual chung i a ummi bia vialte kha Jeremiah nih a auhning in a ṭial ṭhan; cun cu bantuk bia cu Jeremiah nih tampi a chap.

¹ Jehoiakim fapa Koniah changtu ah khan Babilon siangpahrang Nebukhadnezzar nih Josiah fapa Zedekiah cu Judah ram siangpahrang ṭhutdan cungah khan a ṭhutter. ² Sihmanhsehlaw amah nih siseh, a sinum nih si hna seh, a rammi nih si hna seh, profet Jeremiah sinin Bawipa nih a chimmi bia kha an ngai lo. ³ Siangpahrang Zedekiah nih cun Shelemiah fapa Jehukal le Ma-aseiah fapa tlangbawi Zefaniah kha profet Jeremiah sinah a hei thlah hna i, "Bawipa kan Pathian sinah thla rak kan campiak tuah," tiah a ti. ⁴ Jeremiah cu mi zapi sinah khan a lut a chuak ko rih, zeicahtiah thong ah thlak a si rih lo. ⁵ Cu caan lio hrawngah cun Faro ralkapbu kha Izipt ram in an hung chuak i cu thawng cu Jerusalem a kulhtu Khaldi mi hna nih khan an theih tikah Jerusalem an kulh kha an ngol. ⁶ Khi tikah profet Jeremiah sinah Bawipa bia kha a ra i, ⁷ "Hi bangin Ralkapbu Bawipa, Israel Pathian nih a ti: Keimah kha bia hal awkah an thlahtu Judah siangpahrang sinah cun, ’Zohhmanh, nangmah bawmh awkah aa thawhmi Faro ralkapbu cu anmah ram Izipt ram ah khan an kir dengmang cang. ⁸ Cun Khaldi mi kha an ra ṭhan lai i hi khua hi an tuk lai i mei in an khangh lai. ⁹ Hi bangin Bawipa nih a ti, "Khaldi mi nih cun an kan kaltak hrimhrim lai," tiin nangmah le nangmah cu i hleng hlah, zeicahtiah an in kaltak hna lai lo. ¹⁰ Khaldi mi ralkapbu nanmah an dotu hna cu an ningpi khin hei tei bia hna u law, hmapumi lawng kha anmah le an thlam cio ah khan hei tang hna seh law, cu hmanh ah cun an tho ṭhan lai i hi khua cu mei in an khangh ṭhiamṭhiam ko lai,’ a ti, na ti lai," tiah a ti. ¹¹ Faro ralkapbu an ṭih hna ruangah Khaldi mi ralkap hna nih Jerusalem kulh an ngol lio caan te ah khan, ¹² Benjamin ram i roco awk a ngeihmi, cuka mi hna hmai i va lak awkah cun, Jeremiah cu Jerusalem khua in Benjamin ram i va kal awkah cun aa thawh. ¹³ Cun Benjamin kutka a phak tikah khan, ralvengtu pakhat a min Irijah a simi nih profet Jeremiah cu, "Khaldi mi hna sinah zam naa tim," tiin a ti i a tlaih. Irijah cu Shelemiah fapa a si i Shelemiah cu Hananiah fapa a si. ¹⁴ Cun Jeremiah nih cun, "Cucu a si lo, Khaldi mi hna sinah zam kaa tim lo," tiah a ti. Sihmanhsehlaw Irijah nih cun a ngai duh lo i Jeremiah cu a tlaih i bawi hna sinah khan a kalpi. ¹⁵ Cun bawi pawl cu Jeremiah cungah khan an thin a hung i an tuk i caṭialtu Jonathan inn chungah khan thong ah an thlak; cu inn cu thong ah an rak ser cangmi a si i ¹⁶ cu inn tang khor ah cun Jeremiah cu an chiah i cuka ah cun saupi a um. ¹⁷ Zedekiah Siangpahrang nih Jeremiah cu a hei cah i a sinah a hunter. Siangpahrang nih cun a inn ah a thli tein bia a hal i, "Bawipa sinin zei bia a um maw?" tiah a ti. Cun Jeremiah nih a leh i, "A um ko. Nang cu Babilon siangpahrang kut chungah chanh na si lai," tiah a ti. ¹⁸ Cun Jeremiah nih Siangpahrang Zedekiah cu a thawh i, "Nangmah cungah siseh, na sinum hna cungah siseh, hi mi hna cungah hin siseh, zei palhnak dah ka tuah i thong ah nan ka thlak? ¹⁹ ’Babilon siangpahrang cu nangmah doh awkah siseh, hi ram doh awkah siseh, a ra lai lo,’ a titu na profet hna kha tah khuazei ah dah an si kun? ²⁰ Cucaah, maw siangpahrang ka bawipa, kan nawlnak cu ka ngaihpiak ko sawh: caṭialtu Jonathan inn ah cun ka kua ṭhan ti hlah, na ka kuat a si ahcun, khika ah ka thi taktak ko lai," tiah a ti. ²¹ Cucaah Siangpahrang Zedekiah nih nawlbia a chuah i Jeremiah cu ralvengtu hna pawl tual ah khan an chiah. Cun cu khua chung i changreu cu a dih hlantiang, Changreu Sertu Lam timi changreu sernak khan ni fate changreu hlum khat lengmang an pek. Cuticun ralvengtu hna tual ah khan Jeremiah cu a tang ko.

¹ Mattan fapa Shefatiah, Pashhur fapa Gedaliah, Shelemiah fapa Jukal le Malkhiah fapa Pashhur nih mizapi sinah Jeremiah nih a chimmi kha an theih. Amah nih a chimhmi hna cu ² Bawipa nih, "Khua chungah a tangmi cu ral kut in maw mangṭam in maw an thi lai. Sihmanhsehlaw a chuak i Khaldi mi hna sinah aa pemi cu an thi lai lo, zeidang an i chuahpi khawh lo hmanh ah an nunnak he tal cun an luat lai," a ti, ti hi a si. ³ Jeremiah nih annih a rak chimhmi hna cu, Bawipa nih, "Hi khua hi Babilon siangpahrang ralkapbu kut chungah ka pek lai i an lak lai," a ti, ti a si. ⁴ Cun bawi hna nih cun siangpahrang sinah cun, "Hi mipa hi thah awk a si, zeicahtiah hi bantukin a chimnak thawng hin ralkap hna le hi khua chung i a tangmi hna hi an lung a derter hna. Hi pa hi mi ṭhatnak a kawlmi si loin an chiatnak a kawlmi tu a si deuh," an ti. ⁵ Siangpahrang Zedekiah nih cun aa thawh i, "Amah cu nan kut chungah a um ko; zeicahtiah nanmah duh lomi cu siangpahrang nih zeihmanh a tuah kho lo," tiah a ti hna. ⁶ Cucaah cun Jeremiah cu an lak i ralvennak inntual i a ummi tikhor ah khan an thlak, hri in an vun thlak. Khor chungah cun ti a um lo, nawncek lawng a um i nawncek chungah cun Jeremiah cu a pil. ⁷ Cun Ethiopia mi, tildit Ebed-melek, siangpahrang innchung i a ummi nih, Jeremiah cu tikhor chungah an thlak ti kha a theih tikah, siangpahrang cu Benjamin Kutka i a ṭhut lioah khan ⁸ a va fuh i siangpahrang cu a thawh i, ⁹ "Siangpahrang ka bawipa, hi mi hna nih profet Jeremiah cung i an tuahmi hi a ṭha hrimhrim lo. Annih nih khor chungah an hlonh i khua chung i rawl a um ti lo tikah a umnak hmun ah khan rawl ṭam in a thi lai," tiah a ti. ¹⁰ Khi tikah siangpahrang nih Ethiopia mi Ebed-melek cu nawl a pek i, "Hika hin mi pathum i kalpi hna law profet Jeremiah cu a thih hlan ah tikhor chung cun va hnuk u," tiah a ti. ¹¹ Cucaah Ebed-melek nih mi cu siangpahrang inn ah cun aa kalpi hna i thilpuan chiahnak khaan i thilpuan tlek ṭukṭak hna le puanchia hlun ṭukṭak hna kha an lak hna i Jeremiah sinah khan khor chungah cun hri in an vun thlak hna. ¹² Cun Ethiopia mi Ebed-melek nih cun Jeremiah cu a vun thawh i, "Kha puanchia hna kha na zaktang le hri karlak ah khan rak i danh hna," tiah a vun ti. Jeremiah nih cun cuticun a tuah. ¹³ Cun Jeremiah cu hri in an hnuh i tikhor chung cun an chuah. Jeremiah cu ralvennak inntual ah cun a um. ¹⁴ Siangpahrang Zedekiah nih profet Jeremiah cu a hei cah i Bawipa inn luhnak kutka a pathumnak khan a sinah cun an luhpi. Siangpahrang nih Jeremiah cu a thawh i, "Bia pakhat in kan hal lai, ka sinin zeihmanh thup hlah," tiah a ti. ¹⁵ Jeremiah nih Zedekiah cu, "Ka chim ahcun na ka thah hrimhrim ding a si ko; ruahnak kan cheuh ahcun naa lak duh ding a si fawn lo," tiah a ti. ¹⁶ Cun Siangpahrang Zedekiah nih Jeremiah sinah cun a thli tein chiat a ser i, "Ka nunnak a sertu Bawipa a nun bangin, kan that lai lo i na nunnak hrawh awk a kawlmi hna kut chung zongah kan chan lai lo," tiah a ti. ¹⁷ Khi tikah Jeremiah nih Zedekiah cu, "Hi bangin Bawipa, Ralkapbu Pathian, Israel Pathian nih a ti: Babilon siangpahrang i a bawi hna sinah hin naa pek ahcun na nunnak cu zuah a si lai i hi khua hi mei in khangh a si lai lo, nangmah le na innchungkhar cu nan nung lai. ¹⁸ Sihmanhsehlaw Babilon siangpahrang i a bawi hna sinah naa pek lo a si ahcun, hi khua hi Khaldi mi hna kut chungah pek a si lai i an khangh lai i nangmah zong an kut in na luat lai lo," tiah a ti. ¹⁹ Cun Siangpahrang Zedekiah nih cun Jeremiah sinah khan, "Khaldi mi hna sinah a zammi Judah mi kha ka ṭih hna, zeicahtiah kha hna kut chungah khan Khaldi mi hna nih hin an ka chanh lai i ṭhalo in an ka tuah sual lai," tiah a ti. ²⁰ Cun Jeremiah nih, "An in chan lai lo. Kan chimhmi paohpaoh ah hin Bawipa bia na zulh ahcun, nangmah caah a ṭha dih ko lai i na nunnak kha zuah a si lai. ²¹ Sihmanhsehlaw i pek kha na duh lo ahcun hihi Bawipa nih a ka hmuhsakmi langhnak cu a si: ²² Zohhmanh Judah siangpahrang inn chungah a tangmi nu vialte hna cu Babilon siangpahrang i a bawi hna sinah kalpi an si lai i annih nih, Na hawikom lila nih khan nangmah cu a pingah an in hruai i na caah an ṭhawng tuk; Na ke cu nawncek chungah an pilter i an in mertak i an in kaltak cang, an ti lai. ²³ Na nupi vialte hna le na fale vialte hna cu Khaldi mi hna sinah hruai an si lai i nangmah hrimhrim zong an kut chungin na luat lai lo. Babilon siangpahrang nih an tlaih lai i hi khua hi mei in a khangh lai," tiah a ti. ²⁴ Cun Zedekiah nih Jeremiah cu, "Hi bia hi ahohmanh theihter hna hlah, cun na thi lai lo. ²⁵ Bawi hna nih khan nangmah he bia kan i ruah kha an theih i na sinah an rat i an in thawh i, ’Siangpahrang sinah na chimmi le siangpahrang nih an chimhmi cu kan chim tuah, kan sinin zeihmanh thup hlah law kan in that lai lo,’ an ti ahcun, ²⁶ annih cu na thawh hna lai i, ’Jonathan inn ah khan ka va thih nakhnga lo, khika ah ka kua ṭhan ti hlah, tiah siangpahrang cu ka nawl,’ tiah na ti lai," tiah a ti. ²⁷ Bawi vialte cu Jeremiah sinah cun an ra taktak i bia an hal i siangpahrang nih a chim bantukte khan a leh hna. Annih nih an tuah khawhmi zeihmanh a um lo, zeicahtiah ahohmanh nih bia an i ruah thawng kha a langin an thei hna lo. ²⁸ Cun Jeremiah cu ralvennak inntual ah cun Jerusalem an lak ni tiang a um.

¹ Judah siangpahrang Zedekiah a bawi kum kuanak, thla hra thla ah, Babilon siangpahrang Nebukhadnezzar le a ralkapbu vialte nih Jerusalem cu an rathnawh i an kulh; ² Zedekiah a bawi kum hleikhatnak thla linak thla, cu thla ni kua ni ah cun khuapi kulhnak cu an bauh. ³ Jerusalem cu an lak tikah Babilon siangpahrang i a bawi vialte hna cu an ra i a laifang kutka ah khan an ṭhu: Samgar mi Nergal-sharezer, tilditmi lak upa bik Nebo-sarsekim, hmaisuang ralkapbu haotu Nergal-sharezer le Babilon siangpahrang i a bawi dang vialte hna cu an si. ⁴ Judah siangpahrang Zedekiah nih a hmuh hna tikah, amah a cawngtu ralkap hna he cun an zam i zan ah siangpahrang dum lam khan, Vampang Pahnih Karlak timi kutka khan an le. Arabah leiah khan an zam, ⁵ sihmanhsehlaw Khaldi mi ralkap hna nih khan an dawi hna i Jeriko nelrawn ah khan Zedekiah cu an phanh. Siangpahrang cu an tlaih i Hamath ram Riblah khua ah Babilon siangpahrang Nebukhadnezzar hmaiah khan an ratpi i a hmaiah cun a kong kha aa chim. ⁶ Cun Babilon siangpahrang nih khan Zedekiah fapa hna cu a hmuhhngan te ah khan Riblah khua ah cun a thah hna, Judah ram bawi hna zong kha a thah hna. ⁷ Cun Zedekiah cu a mit an khoih i Babilon i kalpi awkah dar hreng an khenh. ⁸ Khaldi mi hna nih cun siangpahrang inn le Bawipa inn le mi zapi inn hna kha an khangh hna i Jerusalem kulhnak vampang cu an chimh hna. ⁹ Ralvengtu hna haotu Nebuzaradan nih khuachung i a tangmi hna le anmah sin i a zammi hna le zungthiam a tangmi hna cu Babilon ah sal ah a kalpi hna. ¹⁰ Ralvengtu hna haotu Nebuzaradan nih cun zeihmanh a ngei lomi misifak tlawmpal hna kha Judah ram ah cun a nganhta hna i mitsur dum cawngtu le rianṭuantu ah a ser hna. ¹¹ Babilon siangpahrang Nebukhadnezzar nih cun Jeremiah kong ah ralvengtu haotu Nebuzaradan cu nawl a pek i, ¹² "Amah cu va la law ṭha tein zohkhenh tuah, a cungah harnak zeihmanh tuah hlah, amah nih aa chimhning paoh in a cungah va tuah ko," tiah a ti. ¹³ Cucaah ralvengtu haotu Nebuzaradan nih, tilditmi upa bik Nebushazban le hmaisuang ralkap haotu Nergal-sharezer le Babilon siangpahrang bawi hna lak i upa bikbik kha a thlah hna i ¹⁴ Jeremiah cu ralvengtu hna tual khan an va lak. Cun a umnak i kalpi awkah Safan fapa Ahikam i fapa Gedaliah sinah khan an chiah. Cucaah Jeremiah cu a phunhawi mi hna sinah khan a um. ¹⁵ Ralvengtu hna tual chung i hren a si lioah khan Jeremiah sinah Bawipa bia cu a ra i, ¹⁶ "Va kal law, Ethiopia mi Ebedmelek cu, hi bangin Ralkapbu Bawipa, Israel Pathian nih a ti, tiah va chim: ’Zohhmanh, hi khua kong i ka bia kha, ṭhatnak caah si loin chiatnak caah ka tlinter lai i khi ni a phak tikah cucu hmuh awkah khika ah na um lai. ¹⁷ Sihmanhsehlaw nang cu khi ni ah cun kan huhphenh lai i na ṭihmi hna kut chungah chanh na si lai lo,’ tiah Bawipa nih a ti. ¹⁸ Nang cu him tein kan zohkhenh lai i vainam in thah na si lai lo; na ka bochan caah zeidang zeihmanh naa chuahpi kho lai lo nain, na nunnak he tal cun na luat lai,’ tiah Bawipa nih a ti," tiah a ti.

¹ Jeremiah kong ah Bawipa sinin a rami bia: Ralvengtu hna haotu Nebuzaradan nih khan Jerusalem khua le Judah ram in sal ah an kalpimi hna saltang hna he khan cikcin khih buin Ramah khua ah Jeremiah cu a kalpi; ² khika ah a thlah i Jeremiah cu a thawh i, Bawipa na Pathian nih hi hmun cungah hin rawhralnak ka tlunter lai tiah a rak ti i ³ nannih nih Bawipa cungah nan sual i a bia nan ngaih duh lo caah hi thil cu nan cung i a tlun nakhnga an chimh cangmi hna thil cu a tlinter. ⁴ Sihmanhsehlaw nang Jeremiah cu nihin ah na kut ṭemnak cikcin cu kan phoih cang. Na duh ahcun ka sinah Babilon ah ra tuah, ṭha tein kan zohkhenh lai, sihmanhsehlaw rat lo kha na duh deuh ahcun a ṭha ve ko. Ram cu a ning piin na hmaika ah a um ko, a ṭha bik na tinak paoh ah kal ko," tiah a ti. ⁵ Cun Jeremiah nih a leh hlanah khin Nebuzaradan nih cun, "Babilon siangpahrang nih Judah ram khua hna a uktu ah a sermi Gedaliah sinah khan va kir ṭhan law amah sinah cun langhngan in va um ko, asiloah, na duhnak paoh ah va kal ko’, a ti," tiah a peh. (Gedaliah cu Ahikam fapa a si, Ahikam cu Safan fapa a si). Cun ralvengtu haotu nih cun i cawmnak rawl a pek i laksawng a ṭhenh i a kaltak. ⁶ Cun Jeremiah cu Ahikam fapa Gedaliah sinah khan Mizpah ah cun a ra i ram chung i a tangmi hna lakah khan amah sinah cun a um ve. ⁷ Ramlak i a ummi raltho pawl haotu vialte hna le an mi hna nih, Babilon siangpahrang nih Ahikam fapa Gedaliah kha ram uktu bawi ah a ser i amah cu Babilon i kalpi lomi a derthawm bikbik hna pawl, nu hna le pa hna le ngakchia hna zohkhenhtu ah khan a chiah, ti an theih tikah, ⁸ a sinah Mizpah ah cun an ra. Nethaniah fapa Ishmael kha a ra, cun Kareah fapa Johanan le Jonathan kha an si, cun Tanhumeth fapa Seraiah, cun Netofah mi Efai fapa hna, cun Beth-maakah mi Jazaniah le a mi hna kha an si. ⁹ Safan fapa Ahikam i fapa Gedaliah nih cun an sinah khan biakamnak a ser i, "Khaldi mi bawi hna kha ṭih hna hlah u. Ram chungah hin um ko u law Babilon siangpahrang hi rian ko u law nan caah a ṭha ko lai. ¹⁰ Kei cu Mizpah ah hin ka um lai i Khaldi mi hna hi an rat paoh ah ka rak zohkhenh hna lai; sihmanhsehlaw nannih cu mitsur hang le ṭhal caan theitlai hna le chiti kha pum hna u law um chungah khan khong hna u law nan lakmi khua hna chungah khan um ko hna u," tiah a ti hna. ¹¹ Cu bantukin Moab ram le Ammon ram le Edom ram le ram dangdang i a ummi Judah mi hna zong nih khan, Babilon siangpahrang nih Judah ram chungah khan a tangmi a nganhta hna i Safan fapa Ahikam i fapa Gedaliah cu an ukbawi ah a ser ti kha an rak theih. ¹² Cucaah an i ṭheknak hmun khan Judah mi vialte cu Judah ram ah khan an ra kir i Mizpah i Gedaliah sinah cun an ra chuak; cun mitsur hang le ṭhal caan theitlai kha tam nawnpi an pumh. ¹³ Kareah fapa Johanan le ramlak i a ummi raltho pawl hruitu vialte cu Gedaliah sinah Mizpah ah an ra i, ¹⁴ amah cu an thawh i, "Ammon mi siangpahrang Baalis nih Nethaniah fapa Ishmael kha nangmah thah awkah a thlah kha na hngal maw?" an ti. Sihmanhsehlaw Ahikam fapa Gedaliah nih a zum hna lo. ¹⁵ Cun Kareah fapa Johanan nih Gedaliah cu a thli tein a thawh i, "Va kal ning law ahohmanh hngalh loin Nathaniah fapa Ishmael cu va that ning. Zeicahdah nangmah cu naa thahter lai i nangmah sinah aa pummi Judah mi vialte cu ṭhek dih kan si lai i Judah mi a tangmi cu hrawh a si lai?" tiah a ti. ¹⁶ Sihmanhsehlaw Ahikam fapa Gedaliah nih Kareah fapa Johanan cu, "Cu bantuk cu tuah hlah. Ishmael kong i na chimmi cu lih a si," tiah a leh.

¹ Thla sarihnak thla ah, siangpahrang chung a simi Ishmael cu (Ishmael cu Nethaniah fapa a si, Nethaniah cu Elishama fapa a si) Mizpah khua ah Ahikam fapa Gedaliah sinah mi pahra he an ra. Cun khika i rawl an ei lioah, ² Nethaniah fapa Ishmael le mi pahra hna nih cun Safan fapa Ahikam i fapa Gedaliah, Babilon siangpahrang nih ram uktu bawi ah a sermi cu an thawhhnawh i vainam in an thah. ³ Mizpah ah Gedaliah sin i a ummi Judah mi vialte hna le khika i Khaldi mi ralkap a rak um sualmi hna zong kha an thah hna. ⁴ Gedaliah an nawn thaizing, zapi nih an hngalh hlanah, ⁵ Shekhem le Shiloh le Samaria in pa sawm riat an ra. An khahmul kha an i meh i an puan kha an thleh hna i an pum cu an i at, annih nih Bawipa biakinn i pekchanh awkah changvut thawinak le zihmui kha an rak i put. ⁶ Cun Nethaniah fapa Ishmael cu anmah ton awkah ṭah bu in Mizpah in a ra chuak i a ton tik hna ah, "Ahikam fapa Gedaliah sinah hin rung lut tuah u," tiah a ti hna. ⁷ Sihmanhsehlaw khua chung i an rung luh tikah Nethaniah fapa Ishmael le a sin i a ummi hna nih cun an thah hna i tikhor chungah an thlak hna. ⁸ Sihmanhsehlaw anmah lak i minung pahra, "Kannih cu kan that hlah, zeicahtiah changvut le barli le chiti le khuaihliti khonmi tampi lo lakah kan ngei," tiin Ishmael sinah a timi cu a that hna lo. A kut aa sum i cu hna cu hawi dang sinah khan a that hna lo. ⁹ Ishmael nih a thahmi hna an ruak a hlonhnak tikhor cu tikhor nganpi a si. Ishmael nih miruak cu cu tikhor ah cun khat lakin a hlonh hna. Hi tikhor cu Baasha nih Siangpahrang Asa a rak tuk ah khan Asa ni a rak cawhmi a si. ¹⁰ Cun siangpahrang fanu hna le Mizpah khua i a tangmi a dang vialte hna, ralbawi Nebuzaradan nih Gedaliah kut tangah a chimmi hna kha Ishmael nih a tlaih hna i Ammon ram leiah aa kalpi hna.. ¹¹ Cun Kareah fapa Johanan le ralkap pawl haotu vialte hna nih Nethaniah fapa Ishmael nih ṭhat lonak a tuahmi vialte kha an theih tikah ¹² an mi hna he khan an dawi i Gibeon tili pawngah khan an va phak. ¹³ Ishmael tlaihmi vialte hna nih khan Kareah fapa Johanan le ralkap pawl haotu vialte kha an hmuh hna tikah an tha a nuam i ¹⁴ cu tikah Mizpah ah Ishmael nih a tlaihmi vialte hna kha an i let i Kareah fapa Johanan sinah khan an i fon. ¹⁵ Sihmanhsehlaw Nethaniah fapa Ishmael cu minung pariat he Johanan sin khan a luat i Ammon mi hna ram ah khan a zam. ¹⁶ Cun Johanan le ralkap haotu pawl nih khan Ishmael nih Gedaliah a nawn hnu i Mizpah ah a tlaih hna i aa kalpimi thongtla hna kha a zohkhenh hna — cu hna cu nu le ngakchia le tilditmi an si. ¹⁷ - ¹⁸ Ishmael nih khan Babilon siangpahrang nih ram uktu ah a chiahmi Gedaliah kha a thah caah Babilon mi cu an ṭih ngaingai hna. Cucaah Babilon mi hna sinin zam awkah Izipt ram kal an i thawh. Lampi ah Bethlehem pawng Geruth Kimham ah khan an riak.

¹ Cun raltho pawl ralbawi vialte hna le Kareah fapa Johanan le Hoshaiah fapa Azariah kha mi vialte hna he a hme bik in a ngan bik tiang an ra i ² profet Jeremiah cu an thawh i, "Zaangfah kan in halnak hi kan cohlanpiak ko: Kanmah aiawh in le hi a tangmi hna aiawh hin Bawipa na Pathian sinah thlacam tuah; zeicahtiah nangmah nih na kan hmuh bangin mi tampi chung khan a tangmi cu tlawmte lawng kan si. ³ Bawipa na Pathian nih cun kan kalnak ding lam le kan tuah dingmi thil kha a kan hmuhsak nakhnga thlacam tuah," tiah an ti. ⁴ Khi tikah profet Jeremiah nih cun annih cu, "Nan bia cu ka theih cang; nan duhnak bangin Bawipa nan Pathian sinah cun thla ka cam lai i Bawipa nih an leh hnanak paoh kha kan chimh hna lai; zeihmanh kan phehmi hna a um lai lo," tiah a ti. ⁵ Cun Jeremiah sinah cun, "Kannih nih kan chiatsernak kha kan zulh lo ahcun, Bawipa cu a ding le zumhtlak tehte kan cungah si ko seh! Bawipa na Pathian nih kannih chimh awkah nangmah an kuatmi paoh cu kan tuah lai, tiah bia kan i kam. ⁶ Kan duh zongah, kan duh lo zongah, a sinah va kal, tiah kan in fialmi Bawipa, kan Pathian cu a bia kan ngaih lai; kan caah a ṭhat nakhnga a bia kan ngaih lai," tiah an ti. ⁷ Ni hra hnuah Bawipa bia cu Jeremiah sinah a ra. ⁸ Cun Kareah fapa Johanan le ralkap pawl haotu hna a sin i a ummi vialte le mi vialte hna cu, a hme bik in a ngan bik tiang, a auh hna i ⁹ annih cu a thawh hna i, "Hi bangin Bawipa, Israel Pathian, a sin i nan duhnak va chim awkah nan ka kaltermi nih cun, a ti: ¹⁰ Hi ram chungah hin nan um ko ahcun kan tunmer hna lai i kan ṭhetṭhiam hna lai lo, kan phun hna lai i kan phawi hna lai lo, zeicahtiah nan cung i ṭhat lonak ka tuahmi kha kaa ngaichih. ¹¹ Babilon siangpahrang nan ṭihmi hi ṭih hlah u; Bawipa nih, "Ṭih hlah u, zeicahtiah amah kut chungin nannih cu khamh awk le chuah awkah nan sinah ka um ko," tiah a ti. ¹² Nan cungah zaangfahnak ka langhter lai i amah zong nih an zaangfah ve hna lai i nanmah ram chungte ah hin an umter ko hna lai. ¹³ Sihmanhsehlaw nannih nih, Bawipa nan Pathian cu a nawl ngai loin nan um sual ko hnga i, ’Hi ram ah hin kan um lai lo. ¹⁴ Izipt ram tu ah kan kal ko lai, khika ah cun ral dohnak kha kan hmu ti lai lo i muko aw thawng kha kan thei ti lai lo, rawl um lo ruangah rawlṭam in kan um lai lo i ¹⁵ khika ah khua kan sa ko lai,’ nan ti sual ko hnga. Khi ti a si ahcun, maw Judah mi a tangmi hna, Bawipa bia hi thei tuah u. Hi bangin Ralkapbu Bawipa, Israel Pathian nih a ti: Izipt ram chung i va luh awk le khika i va um awk kha nan i timh peng ko a si ahcun, ¹⁶ nan ṭihmi vainam nih khan khika Izipt ram ah cun an dawi cuahmah ko hna lai i khika ah nan thi lai. ¹⁷ Izipt ram i va kal i va um awkah aa tim pengmi vialte cu vainam le mangṭam le rai in an thi lai; an cung i ka tlunter laimi ṭhat lonak in a luatmi an um lai lo i a nungmi zong an um lai lo," tiah a ti. ¹⁸ Hi bangin Ralkapbu Bawipa, Israel Pathian nih a ti: Ka thinhunnak le ka thinlinhnak cu Jerusalem khuami hna cungah bungh a si bantuk khan Izipt ram i nan kal ahcun nan cungah bungh a si ve lai. Nannih cu vawlhpamhmi, tuksapur, holh chia tlenghnak le thangchiatmi nan si lai. Hi hmun hi zeitikhmanh ah nan hmu ti lai lo, tiah a ti hna. ¹⁹ Cun Jerimiah nih a bia cu a peh i, "Nannih Judah ram chung i a tangmi hna, Bawipa nih Izipt ram i kal lo awkah an chimh hna. Cucaah nan palh ngaingai caah ²⁰ atu ah ralrinnak kan pek hna. Bawipa kan Pathian sinah cun nan ka kalter i, ’Bawipa kan Pathian sinah thla kan campiak tuah! Nan tuah awk a si, tiah a kan timi paoh kha kan chim law, kan tuah lai’, nan ti. ²¹ Atu cu kan chimh cang hna, sihmanhsehlaw Bawipa kan Pathian nih nanmah chimh a ka fialmi vialte kha a dihlak in nan al dih. ²² Cucaah hihi philh hlah u, va kal i va um nan duhnak ram ah hin ral kut le mangṭam le rai in nan thi lai," tiah a ti.

¹ Bawipa an Pathian nih, annih cu va chim hna tiah a timi bia cu Jeremiah nih a chim tikah, Hashaiah fapa Azariah le Kareah fapa Johanan le an hawile hna nih khan Jeremiah cu ninghngal ngaiin an thawh i ² "Lih na chim. Bawipa kan Pathian nih kannih cu Izipt ram i vung kal i vung um kha thlauh awkah nangmah cu an thlah lo. ³ Sihmanhsehlaw Neriah fapa Baruk nih, kannih cu thah awkah, a si lo le Babilon i sal i kalpi awkah Khaldi mi hna kut chungah pek kan si nakhnga, an forh," tiah an ti. ⁴ Cucaah Kareah fapa Johanan le ralkap pawl bawi vialte hna le mi vialte nih cun Bawipa nawl cu ngaih an duh lo i Judah ram chung i um cu an duh lo. ⁵ Kareah fapa Johanan le ralkap pawl bawi vialte hna nih cun, Judah ram chung i um ṭhan awkah, an i ṭheknak ram kip in a hung kirmi Judah mi a tangmi vialte hna kha an pumh dih hna — ⁶ pa he nu he ngakchia he siangpahrang fanu hna he, cun ralvengtu haotu Nebuzaradan nih Safan fapa Ahikam i fapa Gedaliah sinah a chiahtakmi paohpaoh le profet Jeremiah le Neriah fapa Baruk zong kha an pumh dih hna; ⁷ hi hna vialte hi Bawipa nawl cu ngai loin Izipt ram chungah cun an vung kal i Tahpanhes kha an phan. ⁸ Khi tikah Bawipa bia cu Jeremiah sinah Tahpanhes ah cun a ra: ⁹ "Lung ngan pipi i lak hna law Tahpanhes i a ummi Faro siangpahrang inn i luhnak ah khan mirang-vawlei in benh hna. ¹⁰ Na tuah lio cu Judah mi nih in hmu hna seh law annih cu, ’Mah hihi Ralkapbu Bawipa, Israel Pathian bia cu a si, tiah chim hna: Babilon siangpahrang Nebukhadnezzar ka sal cu ka cah lai i hika i ka benhmi lung cungah hin a bawiṭhutdan cu a toh lai i an cungah hin a thladem zarhnak cu a samh lai. ¹¹ Cun Izipt cu a doh lai i thah awk kha a thah hna lai i sal i kalpi awk kha a kalpi hna lai i vainam in thah awk kha vainam in a thah hna lai. ¹² Izipt pathian hna biakinn cu mei in a khangh hna lai, inn cu a khangh hna lai i pathian cu sal ah a hruai hna lai. Tuukhal nih a puan i ṭhah a ummi a zoh hna bangin Izipt ram cu a zoh lai. Aa tinhmi cu a tlinter dih hnuah Izipt cu a kaltak lai. ¹³ Izipt ram chung i a ummi Beth-shemesh i tung thiang hna cu a den dih hna lai i Izipt pathian hna biakinn cu a khangh dih hna lai," tiah a ti.

¹ Izipt ram chung Migdol, Tahpanhes, Nof le Pathros ram chungah a ummi Judah mi vialte kongah Jeremiah sin i a rami bia: ² "Hi bangin Ralkapbu Bawipa, Israel Pathian nih a ti: Jerusalem khua le Judah ram khua vialte hna cungah ka tluntermi ṭhat lonak vialte cu nan hmuh cang: atu ah cun an ṭiao dih i ahohmanh um ti loin kaltak an si dih cang, ³ hihi zei ruangah dah a si, ti ahcun, an hngalh bal lomi pathian kha an zulh hnanak thawng le cu pathian hna sinah raithawinak an khanghnak thawngin ka thin a ka phoktu hna ṭhat lonak ruangah khan a si. Hi a tuahtu cu nanmah le nan pupa hna kha nan si. ⁴ Ka sal profet vialte hna kha hi ralrinnak bia he hin nannih sinah ka rak thlah lengmang hna i, ’Ka huatmi thil fihnung hi tuah sawh hlah u,’ tiah ka ti lengmang. ⁵ Sihmanhsehlaw nan pale hna nih an ngai duh lo, zei ah an rel lo. An ṭhat lonak kha an ngol hlei lo i pathian dang hna sin i raithawinak khangh kha an baang hlei lo. ⁶ Cucaah Judah ram chung khua hna le Jerusalem khuachung lampi hna ah khan ka thinhunnak cu mei bantukin a kang i nihin i ṭiaotakmi hnawmpon an simi ah hin an cang. ⁷ "Atu cu Bawipa, Ralkapbu Pathian, Israel Pathian nih hi bangin a ti: Zeicahdah nanmah lila cungah hi bantuk a nganmi rawhralnak hi nan i tlunter? Zeicahdah Judah mi nan cungah, pa si u, nu si u, ngakchia si u, bawhte si u law, a nungmi um lo tiangin, rawhnak nan i tlunter? ⁸ Mah hihi umnak hmun nan i khuarnak Izipt ram i pathian dang hna sinah raithawinak nan pekchanhnak thawngin siasal biaknak nan tuahmi in ka thin nan ka phawhnak ruangah a si. Nanmah le nanmah kha nan i hrawk lai i vawlei cung miphun vialte sinah nihsawh awk le zawmhtaih awkah nan cang lai. ⁹ Nan pupa hna ṭhat lonak kha siseh, Judah siangpahrang hna ṭhat lonak kha siseh, an nupile hna ṭhat lonak kha siseh, nanmah ṭhat lonak hrimhrim kha siseh, nan nupile hna ṭhat lonak kha siseh, Judah ram chung le Jerusalem khua chung lam hna i an tuahmi hna kha, nan philh cang hna maw? ¹⁰ Nihin ni tiang hin ngaihchiatnak nan ngei lo i hmaizahnak zong nan ngei rih lo, nan pupa hna le nanmah hmai i ka chiahmi ka phungbia le ka nawlbia kha nan zul hna lo. ¹¹ Cucaah Ralkapbu Bawipa, Israel Pathian nih hi bangin a ti: Nan cung i ṭhat lonak tlunter awk le Judah mi kha hloh cikcek awkah ka lung kaa thlek cang. ¹² Izipt ram chung i um hmun khuar awkah kal aa tim pengmi cu Izipt ram ah cun an donghnak an phan dih lai. A cheu cu nam in an thi lai, a cheu cu mangṭam in an thi lai. A sang he a niam he aa khatrep in vainam in siseh, mangṭam in siseh, an thi lai i annih cu vawlhpamhmi, tuksapur, holhchia tlenghnak le thangchiatmi an si lai. ¹³ Jerusalem i a ummi kha dan ka tat hna bantukin Izipt ram chung i a ummi hna cu vainam le mangṭam le rai in dan ka tat ve hna lai. ¹⁴ Judah ram i a tangmi hna nih khan Judah ram ah kan kir ṭhan te lai i khika ah kan um ṭhan te lai ti ruahchannak in Izipt ram i um hmun khuar awkah an ra; sihmanhsehlaw an kir ṭhan ti lai lo, pakhat hmanh an nung lai lo, pakhat hmanh an luat lai lo. ¹⁵ "Cun an nupile hna nih pathian dang sinah raithawinak an khangh ti a hngalmi pa vialte hna le an pawng i a rak dir lulhmi nu vialte hna nih Jeremiah cu an leh i, ’Bawipa min in na kan chimhmi cu kan ngai lai lo. ¹⁶ Kannih kan i hren chihnak biakamnak kha tlinter awkah kan i tim. ¹⁷ Judah ram khua hna le Jerusalem khua chung lam hna ah, kanmah le kan pupa hna le kan siangpahrang hna le bawile hna nih kan tuah tawn bantuk khan Vancung Khuazingnu sinah cun raithawinak kha kan khangh ko lai i thlet thawinak kha kan pekchanh ko lai. Zeicahtiah kha caan ah khan rawl tampi kan rak ngei i kan hna a rak ngam; vanchiatnak zeihmanh kan tong lo. ¹⁸ Sihmanhsehlaw Vancung Khuazingnu sin i thawinak khangh kan ngol le thlet thawinak pekchanh kan ngol ri in zei paohpaoh kan chambau dih i vainam le mangṭam in kan thi lengmang,’ an ti. ¹⁹ Cun nu hna nih cun, ’Vancung Khuazingnu sinah thawinak kan khangh i thlet thawinak kan bungh tikah khan, thlapa samthihkuang a lomi changreu thlum a cung i amah mui a cuangmi kan ser kha kan vale nih ṭha tein an hngalh ko,’ an ti. ²⁰ Cun Jeremiah nih hi nu hna le pa hna le mi vialte sinin cu bantuk lehnak kha a hmuh tikah aa thawh i, ²¹ ’Nanmah le nan pupa hna le nan siangpahrang hna le nan bawile hna le hi ramchung mi hna nih Judah ramchung khua hna ah le Jerusalem khuachung lam ah nan tuahmi raithawinak kha Bawipa nih a philh hna lo, ²² a in khawh ti lo tiangin a lung chungah cun an kai luaimai. Nan tuahnak cu an ṭhalo tuk hringhran i nan tuahmi thil cu fih an nung tuk hringhran. Nan ram cu ṭiaotakmi hmun pakpalawng ah a cang i nihin i a si ko rih bantuk hin tuksapur le nihsawh awk, ahohmanh um lonak hmun a si ko rih. ²³ Nannih nih hi raithawinak kha nan khangh hna i Bawipa cungah nan sual i Bawipa cu a nawl nan ngai lo i phungbia le a nawlbia le cawnpiaknak kha nan zulh lo caah, hi harnak hi nan cungah a tlung,’ " tiah a ti. ²⁴ Jeremiah nih mi vialte le nu vialte hna cu a thawh ṭhan rih hna i, "Judah ram in a ra i Izipt ram ah a ummi vialte, nan dihlak in Bawipa bia hi thei tuah u. ²⁵ Hi bangin Ralkapbu Bawipa, Israel Pathian nih a ti: Nu hna, nan bia le nan tuahnak kha nan zulhter. ’Kan i kammi, Vancung Khuazingnu sin i raithawinak khangh le a sin i thlet thawinak pekchanh cu kan tlinter lai,’ nan ti. Si ko seh, nan biahrennak cu tlinter u law nan biakamnak cu tuah taktak hna u. ²⁶ Sihmanhsehlaw Judah ram in a ra i Izipt ram ah a ummi vialte hna Bawipa bia hi ngai tuah u. Ka min cu Judah mi hna hmur ah a cuang ti lai lo, tiin keimah nih ka min a nganmi in chiat ka ser cang, tiah Bawipa nih a ti; Izipt ram chungah cun, ’Bawipa Pathian a nun bangin,’ ti in chiat an ser ti lai lo. ²⁷ Nan cung i ṭhatnak tlunter awkah si loin ṭhat lonak tlunter dingah nannih cu ṭha tein kan zoh hna, cun Judah ram mi Izipt ram i a ummi vialte nih pakhat hmanh an taan lo tiangin vainam le mangṭam in an thi lai. ²⁸ Cun cu tikah cun Judah ram mi Izipt ram i khua a vung sami hna lakah a nung rihmi hna nih khan, aho bia dah a dir, anmah bia maw keimah bia dah, ti kha an hngalh lai. ²⁹ Ka bia nih nan cungah ṭhat lonak a tlunter khawh lai ti hngalh khawh nakhnga ding caah, nannih cu hi hmun ah hin dantat kan timh hna i cu hmelchunhnak cu hi kan pekmi hna hi a si: ³⁰ Hi bangin Bawipa nih a ti: Judah siangpahrang Zedekiah cu a nunnak thah awkah a kawltu a ral Babilon siangpahrang Nebukhadnezzar sinah ka pek bantuk khan Izipt siangpahrang Faro Hofra cu a ral hna kut chung le a nunnak hrawh awk a kawlmi hna kut chungah khan ka chanh lai," tiah a ti.

¹ Judah siangpahrang Josiah fapa Jehoiakim a bawi kum li kum ah, profet Jeremiah nih Neriah fapa Baruk sinah a chimmi bia cu hihi a si, Jeremiah nih a auh in a auhmi bia cu Baruk nih khan cauk chungah a ṭial hna. ² "Maw Baruk, Bawipa Israel Pathian nih na sinah hi bangin a ti: ³ Naa thawh i, ’Ngaihchia ka hei si hringhran dah! Ka fahnak cungah Bawipa nih ngaihchiatnak a ka chap; ka aihramnak nih hin a ka nor ko cang i dinhnak zeihmanh ka hmu lo,’ na ti. ⁴ Baruk sinah na chim ding bia cu hihi a si, hi bangin Bawipa nih a ti: Zohhmanh, ka sakmi kha ka ṭheh ṭhan i ka phunmi kha ka phawi ṭhan. Cu bantuk cun vawlei pumpi kha a si lai. ⁵ Na caah thil lianngan kha na kawl hna. Sihmanhsehlaw cu kawl cu ngol ko hna, zeicahtiah mi vialte cungah rawhralnak kha ka tlunter lai, tiah Bawipa nih a ti; nang cu na kalnak paoh ah kan nunter ko lai, sihmanhsehlaw na nunnak lawnglawng kha naa khamh kho lai i zeihmanh a dang na thil cu na chanh khawhmi an um lai lo," tiah a ti.

¹ Miphun hna kong ah profet Jeremiah sinah Bawipa bia a rami: ² Izipt kong: Judah siangpahrang Jehoiakim, Josiah fapa a bawi kum li kum ah, Babilon siangpahrang, Nebukhadnezzar nih Zufrates tiva kam i Karkhemish khua ah a teimi Izipt siangpahrang Faro Neko i a ralkapbu kong: ³ Phawpi le phawte he khan i tim u law ral doh awkah hmaiah fong u! ⁴ Rang kha danh hna u law i cit hna u, maw rangleng ralkap hna! Thir luchin chinh in umhmun khuar tuah u, Nan fei kha ta hna u law thir angki kha i hruk hna u! ⁵ Sihmanhsehlaw ka hmuhmi hi zeidah a si kun? An hnabei a dong i hnulei ah an i mer, An ralkap hna cu an ṭhuat chih len hna i rianrang in an zam; Hnulei i her hleng loin an le dih. Ṭihnung cu thlah a si cang, tiah Bawipa nih a ti. ⁶ Khulrangmi kha an luat kho maw? Ralkap zong kha an i khamh kho maw? Chaklei ah Zufrates tiva kamah an ril i an tlu. ⁷ Nail tiva lianh bantukin a lianmi hi ahodah a si? Tiva a ti a kai uahmahmi bantuk hi? ⁸ Izipt hi Nail tiva lianh in a lian, Tiva a ti a kai uahmahmi hna bantukin. Aa thawh i, "Ka lian lai, vawlei hi ka khuh dih lai, Khuapi hna le an chung i a ummi cu ka hrawh hna lai," a ti. ⁹ Maw rangcung ralkap hna, nam u, Maw rangleng hna, nan biatak chuah u! Ralkap bu, hmaiah fong tuah u; Ethiopia mi hna le phaw aa putmi Put mi hna. Likuk hruai cia in aa tlaihmi Lidia mi hna, chuak tuah u. ¹⁰ Hi ni cu Bawipa, Ralkapbu Pathian ni a si, phuhlam ni a si, A ral hna cung i phu aa hlam ni cu a si. Vainam nih a ei hna lai i a duhnak a riam lai, An thi cu a ri lai. Zeicahtiah Bawipa, Ralkapbu Pathian nih chaklei ram ah Zufrates tiva kamah raithawinak kha a tuah. ¹¹ Gilead ah hung kal law damnak si hung i lak tuah, Maw Izipt fanu thiang. Nangmah nih si tampi na hneksak lengmang cang i pakpalawng an si dih; Na caah damnak zeihmanh a um lo. ¹² Miphun hna nih na aunak kha an theih i, Vawlei cu na kiaonak khan a khat. Ralkap cu pakhat le pakhat an i pah i an pahnih in hmun khat ah an ril. ¹³ Babilon siangpahrang Nebukhadnezzar nih Izipt ram tuk awkah a rat tikah, Bawipa nih profet Jeremiah a chimhmi bia: ¹⁴ "Izipt ah vung thanh u law Migdol ah aupi tuah u, Memfis le Tahpanhes ah cun thanh tuah u; ’Dir law timh cia tein um tuah, Zeicahtiah vainam nih na pawngkam cu a ei lai,’ tiah chim u. ¹⁵ Zeicahdah Apis cu a zam? Zeicahdah nangmah an cawmtu pathian cu fek tein a dir lo? Bawipa nih lengah a nam cang. ¹⁶ Izipt mizapi hna cu an ril i an tlu, pakhat le pakhat an i pah dih; ’Tho tuah, kanmah mi hna sinah khan, kan chuahnak ram ah khan kir u sih, Hremtu vainam hi zamtak u sih,’ tiah an i ti. ¹⁷ Izipt ram siangpahrang Faro cu, ’Thawng lawng Lian, Caan Tlolh Ṭung,’ ti min kha pe u. ¹⁸ "Ka nun bangin," tiah Siangpahrang, a min Ralkapbu Bawipa a simi nih cun a ti. Tlang hna lak i Tabor tlang a san cem bantuk le Karmel tlang cu rili cung sangpi ah aa hlorh bantukin Nangmah an dohtu dingmi a ṭhawnnak cu a si lai. ¹⁹ Saltang dingin nan thil i tim u, Maw Izipt ram mi hna! Zeicahtiah Memfis hi pakpalawng ah a cang lai i a chungah ahohmanh um loin a ṭiao lai. ²⁰ Izipt cu aa dawhmi cawla note a si, Sihmanhsehlaw chaklei in tlep nih a run ṭumhnawh cang. ²¹ A ram chung i man phalh in a ṭuanmi ralkap hna cu cenhmi cawfa bantuk an si; Sihmanhsehlaw annih zong an i let i an zam, an umhmun ah a dir ngammi ahohmanh an um lo. An ṭumchuk ni cu an cungah a phan cang, biaceih an si ni caan cu. ²² Izipt cu ral nih an fuh caah a zam i rul awnh in a awn; Mi nih thing an hau bantukin hreitlung he an tuk. ²³ A tupi cu an vah dih i aa porhlaw ti lo, tiah Bawipa nih a ti; Zeicahtiah an minung hna cu rel cawk lo an si i an ralkap hna cu khaubawk nakin an tam deuh. ²⁴ Izipt mi hna cu ningzahnak an phan, chaklei miphun kut chungah sal ah an tang cang. ²⁵ Thebes khua pathian Ammon cu dan ka tat lai, Izipt cu a pathian hna le a bawi hna he khan dan ka tat lai; Faro le amah aa bochanmi vialte hna kha dan ka tat hna lai. ²⁶ Annih cu anmah hrawh aa tim hrimhrimmi Babilon siangpahrang Nebukhadnezzar le a ralkap hna kut chungah ka chanh hna lai; Sihmanhsehlaw hmailei caan ah cun ram cu hlan bantukin mi an um ṭhan lai, tiah Ralkapbu Bawipa nih a ti. ²⁷ "Sihmanhsehlaw maw ka sal Jakob, ṭih hlah, Maw Israel, na hnabei dong hlah; Zeicahtiah ram hlapi khan him tein kan kirpi ṭhan hna lai i Nan tefa hna cu sal i an tannak ram khan ka kirpi ṭhan hna lai. Jakob cu thadam tein a um ṭhan lai i Nunnuam le thinphang lo tein khua a sa ṭhan lai. ²⁸ Bawipa nih, ṭih hlah, maw Jakob, ka sal, Zeicahtiah na sinah ka um ko. Nanmah kan dawi hnanak miphun hna cu an donghnak phakter hna hmanh ning law nannih cu kan donghter hna lai lo. Nan i tlak bantukin dan in tat hna hmanh ning law, A hloh cu kan hlo hna lai lo, tiah a ti.

¹ Faro nih Gaza a tuk hlanah, Filistin mi hna kong ah Bawipa bia profet Jeremiah sinah a phanmi cu hihi a si: ² Bawipa nih hi bangin a ti: Zohhmanh chaklei in ti a rung lian lai i a kawr khat in a liam dih lai, Ram le a chung i a ummi thil vialte kha a phum dih hna lai. Khuapi i hna le a chung i a ummi minung hna zong. Mi cu an ai an kiao lai i cu ram i a ummi vialte hna cu an ṭap dih lai. ³ An rangtum hna tin khawn thawng cu ngai hmanh! An rangleng hna an rung choi cukmak thawng le an rangleng ke rilh thawng cu! Pale nih an fale caah zeihmanh an ruat kho ti lo; An kut nih zeihmanh a tuah kho ti lo. ⁴ Zeicahtiah Filistin mi vialte hna hrawhnak ni cu a phan cang i Khuavengtu ralkap an dih cikcek tiangin Tair le Sidon cu hrawh an si lai. Kaftor tikulh in a rami Filistin mi hna cu Bawipa nih a hrawh hna lai. ⁵ Gaza cu kawng lakin meh a si cang, Ashkelon cu a rawk cang. Filistin mi a tangmi hna cu zei can dah an ṭah lai? ⁶ Nannih nih, ’Bawipa vainam, zei can dah na kan sam len ko rih lai? Na kawng ah vaa sawh law khika ah vaa din ko!’ nan ti. ⁷ Sihmanhsehlaw zeitindah rianṭuan awk ka pek tikah hin aa dinh khawh lai? Amah cu Ashkelon khua i a ummi hna le rili kam i a ummi hna kha tuk awkah nawl ka pek cang, tiah a ti.

¹ Moab kong ah Ralkapbu Bawipa, Israel Pathian nih hi bangin a ti: "Aize, Nebo cu a lo i a ṭiao cang ai! Kiriathaim cu lak a si cang i a mual a pho cang ai! Misgab cu ningzahnak a phan i a hnabei a dong cang; ² Moab minthannak cu a um ti lo. Heshbon ah a cung ṭhat lonak ding kha khua an khan: ’Ra u law hrawk dih u sih, miphun si ti hlah seh,’ an ti. Nannih Madmen i a ummi hna zong tuk nan si lai i nan mi hna cu vainam nih a dawi hna lai. ³ Horanaim in nganfah ainak thawng cu ngai hmanh: ’Ṭiaonak le rawknak nganpi!’ an ti. ⁴ Moab cu a rawk cang, an au thawng cu Zoar tiang a thang. ⁵ Luhith i hung kainak ah khan mi cu ṭah buin an kai; Horanaim i vung ṭumnak ah khan. ’Rawknak,’ ti thawng kha an theih. ⁶ ’Zam u, zam u, nan nunnak caah zam u, thetse ram i laa lee bantukin zam tuah u,’ an ti. ⁷ Moab, nangmah nih na ralhau hna le na hriamnam hna kha naa bochan caah, nang zong lak na si ve lai; na pathian Khemosh cu a tlangbawi hna le a bawi hna he saltannak chungah a kal lai. ⁸ Hrawktu kha khua kip cungah a tlung lai i khua pakhat hmanh a luatmi a um lai lo; nelrawn cu a rawk lai i tlangcung hmunrawn zong hrawh a si lai, tiah Bawipa nih a ti. ⁹ "Moab caah thlanlung phun tuah u, zeicahtiah tunaite ah a rawk lai; a khua hna cu an rawk dih lai i Khika ah ahohmanh an um lai lo." ¹⁰ Daithlang in Bawipa rian a ṭuanmi cu chiat ko seh! Thisen chuah awkah a nam a hmang duh lomi cu chiat ko seh! ¹¹ Mitsur hang a ne a tho bal lomi bantukin Moab hi hnahnawh lo tein a um zungzal ko; Um khat hnu um khat i tlennak kha a tong lo, Saltannak kha a tong lo; Cucaah a thawtnak kha a chungah a tang i a rim zong aa thleng lo. ¹² Cucaah ralca cu a thlutu dingah mi ka thlah hna lai caan kha a ra lio; An ralca cu an thluk hna lai i an um vialte kha an tlen hna lai i an den dih hna lai. ¹³ Cun Israel cu aa bochanmi a pathian Bethel nih a deuh bantuk khan Moab cu a pathian Khemosh nih a deuh ve lai, tiah Bawipa nih a ti. ¹⁴ "Moab mi hna, zeitindah nannih nih, Kannih cu ralṭha le ralkap ṭhawng kan si," nan ti khawh? ¹⁵ Moab le a khua hna a hrawktu cu a ra cang, A tlangval hna lak i a ṭha bikbik cu an thi dih cang, tiah Ralkapbu Bawipa a min a simi Siangpahrang nih a ti. ¹⁶ Moab tluknak ding cu a phan cuahmah cang, A rawknak ding cu a nai ko cang. ¹⁷ Amah cu ṭah tuah u, nannih a pawngkam i a ummi vialte hna, amah minthannak a hngalmi hna; nannih nih, "Aize, ralbawi fung cu a kiak ai cang, upatnak fung cu a kiak ai!" ti u. ¹⁸ Nannih Dibon khuami hna, nan sunparnak hmun khan rung ṭum u law a carmi vawlei ah hin ṭhu tuah u; zeicahtiah Moab a hrawktu cu hika a phan cang i nan ralhau kha a hrawh dih cang hna. ¹⁹ Maw Aroer i a ummi hna, lam pawngin dir u law zoh tuah u. A zammipa le a zamminu kha rak hal hna hmanh u law, ’Zeitindah a si?’ tiah rak ti hna hmanh u. ²⁰ "Moab cu a tlu cang; ai u law ṭap tuah u! ’Moab cu a rawk cang,’ tiah Arnon tiva hrawn ah khan va thanh u," an in ti hna lai. ²¹ Nelrawn khuapi hna cungah khan biaceihnak cu a tlung cang: Holon, Jahzah, Mefath. ²² Dibon, Nebo, Beth-diblathaim, ²³ Kiriathaim, Beth-gamul, Beth-meon, ²⁴ Kerioth le Bozrah khua cungah khan biaceihnak cu a tlung cang. Moab ram khua vialte cungah, a hla mi he a naimi he, biaceihnak a phan cang. ²⁵ Moab ki cu tan a si cang i a ban cu a kiak cang, tiah Bawipa nih a ti. ²⁶ "Moab kha, Bawipa cu zei i a rel lo caah ritter law a luak ah khan i bual seh law nihsawhnak hmu seh. ²⁷ Moab, Israel mi kha zeitindah nihchuak capo i na ser hna kha philh hlah. Mifir hna lakah tlaihchihmi si hna seh law cu bang, cuticun na tuah hna khah. ²⁸ Maw nannih Moab ram mi hna, Khuapi kha kaltak hna u law lungkua ah va um u, Lungkua kaa kam i bu a sami ṭhuro bantuk si ko u. ²⁹ Moab porhlawtnak kha kan theih cang, aa porhlaw taktak ko — Aa uahnak le aa porhlawtnak le a ruamkainak le a lungpuamnak kha kan theih. ³⁰ A mi zeirellonak kha ka hngalh, tiah Bawipa nih a ti; Aa uanthlarnak cu pakpalawng a si, a tuahnak cu pakpalawng a si. ³¹ Cucaah Moab cu ka ṭah lai, Moab ram chung i a ummi hna paohpaoh caah cun lungfak ngaiin ka ṭap lai; Kir-heres mi hna cu ka ṭah hna lai. ³² Jazer mi ka ṭah hna nak tam deuh in Sibmah mi kha ka ṭah hna lai. Maw Sibmah khuapi, nang cu mitsur ruang a nge Rili Thi tiang a zam i Jazer tiang a phanmi bantuk na si, Sihmanhsehlaw atu cu ṭhal caan i na theitlai hna le na mitsur thei hna cu hrawh an si cang. ³³ Thei tampi a tlai tawnmi Moab ram khan Lunglawmhnak le thanuamnak kha lak an si cang; Mitsur hang nennak hmun in mitsur hang cu ka donghter cang; Lawmhnak aw thawng he a neng tawnmi kha an um ti lo, Lawmhnak au thawng zeihmanh a leng ti lo. ³⁴ Heshbon khuami hna le Elealeh khuami hna cu an ai i an ai thawng cu Jahaz tiangin a thang; Zoar i a ummi hna nih an rak theih i Horonaim le Eglath-shelishiyah tiangin a thang. Nimrim tivate hmanh kha a car dih. ³⁵ Cun Moab ram chung i khuahrumbo ah raithawinak le an pathian hna sinah zihmui khanghnak kha ka donghter lai, tiah Bawipa nih a ti. ³⁶ An ngeihmi chawva vialte kha a rawk dih cang caah Moab le Kir-heresmi hna cu, mi nih mithi zunngaih hla thonglawi in an tum bantukin, ka lung nih a ṭah hna. ³⁷ Annih nih an dihlak in an lu an i kawngh i an khahmul an i meh i an kut an i at i an tai ah buri an i venh. ³⁸ Moab ram chung i inncung hna ah le an tual kau pipi hna ah cun, ṭahnak hla dah ti lo cu zeihmanh a um lo; zeicahtiah Moab cu ahohmanh nih zei i an rel lomi um bangin ka khuai cang, tiah Bawipa nih a ti. ³⁹ Moab cu a hnabei dongh in ningzak in a zam ko. Moab cu nihsawh awkah a cang cang i a pawngkam i a ummi vialte hna caah hnabeidonghnak ah a cang cang. ⁴⁰ Bawipa nih hi bangin a ti: Zohhmanh, muvanlai nih a thla aa samh i a vun zuanhnawh bantuk khin, Moab cu miphun pakhat nih a zuanhnawh lai. ⁴¹ Khuapi hna cu lak an si lai i ralhruang hna cu tlaih an si lai; Khi ni ah cun Moab ralkap hna lung cu Naunganfah a ing liomi nu lung bantukin a dong lai; ⁴² Khi tikah Moab cu hrawh a si lai i miphun a si ti lai lo, Zeicahtiah Bawipa kha zei ah a rel lo. ⁴³ Ṭihnung, khor le rap nih khan, Moab mi cu an orh ko hna, tiah Bawipa nih a ti. ⁴⁴ Ṭihnung chungin a zam khomi kha khor chungah a tla lai, Cun khor chungin a chuak khomi kha rap ah aa foih lai. Hi thil vialte hna hi dantatnak an hmuh kum ah Moab cungah ka tlunter lai, tiah Bawipa nih a ti. ⁴⁵ Heshbon thladem tangah, Bawmtu ngei lomi mizam hna cu an i din; Sihmanhsehlaw hmasa i Siangpahrang Sihon nih a rak ukmi Heshbon kha a kang cuahmah len ko. Raldoh a duhmi Moab mi hna ramri hna le tlang sang hna cu mei nih a kangh cang hna. ⁴⁶ Aize, maw Moab, na caah ngaihchia a va si dah! Khemosh pathian a biami hna cu an lo ai cang; Zeicahtiah na fapa hna cu saltannak chungah kalpi an si cang i Na fanu hna zong kalpi an si ve ai! ⁴⁷ Sihmanhsehlaw hmailei caan ah cun Moab cu, Vanṭhatnak kha ka pek ṭhan lai, tiah Bawipa nih a ti. Hi tiang hi Moab cung i biaceihnak cu a si.

¹ Ammon mi hna kong ah Bawipa nih hi bangin a ti: "Israel nih hin fapa a ngei hna lo maw? Rocotu a ngei lo maw? A si kun ah cun, zeicahdah Milkom nih Gad ram cu a co i Amah a biami hna cu Gad ram chung khua ah hin an um? ² Cucaah zohhmanh, Ammon mi hna khua Rabbah ah khan raltuknak thawng ka thanter lai caan kha a ra lio, tiah Bawipa nih a ti; Ṭiaotakmi hnawmpon ah a cang lai i a khuate hna cu mei in khangh cikcek an si lai i Israel nih a rak pawnchuahtu hna kha a pawnchuah ve hna lai, tiah Bawipa nih a ti. ³ Maw Heshbon ṭap tuah, zeicahtiah Ai khua cu a rawk dih cang. Rabbath Ammon khua pawngkam i a ummi khuate hna, ai tuah u, Buri i hruk u law, nan ṭang i cum tuah u, nan pum cu nam in i at dih tuah u. Zeicahtiah Milkom cu saltannak chungah a kal lai, A tlangbawi hna le a bawi hna he khan an kal lai. ⁴ Nannih ṭhawnnak a dong cuahmahmi hna, Zeicahdah nan ṭhawnnak cu nan i porhlawt len ko? Nannih mah hriamnam aa bochanmi lamtlaumi hna, Zeicahdah nan hriamnam cu nan i bochan i ’Ahohmanh nih an kan tu ngam lai lo,’ nan ti? ⁵ Zohhmanh, a kenkip in nan cungah ṭihnung ka tlunter lai i A ping i a zammi kha a pumkhawltu ding ahohmanh um loin nan dihlak in i comcawroi loin nan zam lai. ⁶ Sihmanhsehlaw hi hnuah hin Amon mi hna cu, An vanṭhatnak kha ka pek ṭhan hna lai, tiah Bawipa nih a ti. ⁷ Hihi Edom kong ah Ralkapbu Bawipa nih a chimmi cu a si: Teman ah fimnak a um ti lo maw? A mifim hna kha ruahnak cheuh an thiam ti lo maw? An fimnak kha a thu cang maw? ⁸ Dedan khuami hna cu an i mer i an zam i lamhlapi ah an i thup; Zeicahtiah Esau tefa hna cu ka hrawh cang hna lai, An cung i dantatnak ka tlunter caan kha a phan cang. ⁹ Mitsur thei lotu kha nan sinah an rat tikah a mua cu an nganh ding a si, Cun zan ah mifir nih na thei tlaiter kha fir seh law A duhmi lawng kha a lak ko lai. ¹⁰ Sihmanhsehlaw Esau cu a takfangkarao in ka chiah, Aa thuhnak hmun kha ka hun hna i thuhnak hmun khuazeihmanh ah a ngei ti lo. A fale hna le a unau hna le a innpa hna kha hrawh an si i Amah bawmtu ahohmanh an um ti lo. ¹¹ Ngakṭah na fale cu ka sinah kaltak hna law keimah nih nungdam tein ka zohkhenh hna lai; Na nuhmei hna nih keimah cu ka hngal ṭhan hna seh, a ti. ¹² "Dantat awkah aa tlak lomi hna hmanh nih dantatnak hrai kha an din ahcun, nang cu dantat loin ka luat hnga tiah maw naa ruah? Na luat lai lo, hrai cu na din hrimhrim lai. ¹³ Bozrah khua cu tuksapur le ṭiaotakmi khua ah a cang lai i mi nih an nihsawh lai i a min cu chiatsernak ah an hman lai. A pawngkam khuate vialte cu zungzal in an rawk lai, tiin keimah nih chiat ka ser cang," tiah Bawipa nih a ti. ¹⁴ Jeremiah nih, "Miphun hna sinah lamkaltu kha thlah a si i ’Nan ralkap hna cu pum hna u law Edom cu tu u, I tuknak ding caah khan tho u,’ tiah a au tikah khan. Hi bia cu Bawipa sinin ka theih," tiah a ti. ¹⁵ "Zohhmanh, nangmah cu miphun hna lakah a hme bik le mi vialte i nihsawhmi ah kan ser. ¹⁶ Celh awk loin naa porhlawtnak le na lung puamnak nih khan a ping ah an kalpi cang, Lungpang chung lungkua ah na um i a sannak tlangpar hna kha na ta an si, Asinain, muvanlai tluk sang in na bu ser hmanh law, khika in kan ṭhumh lai," tiah Bawipa nih a ti. ¹⁷ Edom cu tuksapur a simi hmun ah a cang lai; khikalei i a kalmi paoh cu an tuksa a purh hna lai i a cung i harnak a tlungmi vialte ruangah khan an nihsawh lai, ¹⁸ Sodom le Gomorrah le an pawngkam khua vialte bantuk khan a rawk lai, tiah Bawipa nih a ti. Khika ah ahohmanh khua an sa lai lo, minung ahohmanh innlo a khuarmi an um lai lo. ¹⁹ Zohhmanh, Jordan tiva kam tupi chungin a hung chuak i zungzal in a hringmi saṭil tlonnak ram lakah a ra chuakmi chiandeih bantukin keimah nih Edom mi vialte kha ka dawi dih hna lai i tuukawng ṭha bikbik kha ka tlaih din hna lai. Ahodah keimah bantuk hi a um i ahodah keimah tluk hi a um? Tuukhal aho tal ka hmaiah a dir khomi an um maw? ²⁰ Cucaah Edom cungah Bawipa nih khua a khan mi le Teman khuami hna cung i aa tinhmi hi thei tuah hna u: Tuurun chung i a no tete hna cu kalpi an si lai i an tlonnak hmun cu an cung i thil a tlungmi ruangah cun khuaruahhar in a um lai. ²¹ Edom cu a tluk tikah a thawng a than tuk caah vawlei aa hnin lai i a ainak thawng cu Rili Sen tiangin a thang lai. ²² A thla aa samh riangmang i van sangpi khin a vun namtu muvanlai bantukin Bozrah cu a ral nih a nam lai. Khi ni ah Edom ralkap hna cu nau nganfah a ing liomi nu bantukin an thin a phang lai. ²³ Damaskas kong ah Bawipa nih a chimmi bia: Hamath le Arpad cu thawng ṭhalo an theih caah an hnabei a dong; A dai kho lomi rili bantukin an khuaruah a har caah an i let lengmang ko. ²⁴ Damaskas cu a lung a dong cang i a zam; A thin a phang, a therh i nau nganfah nih a tlaih cang. ²⁵ Lunglawmhnak khua a rak si tawnmi, Lawmhnak hla an sak tawnnak khua kha, Ngaihchia lungleng a si ai cang. ²⁶ Cucaah khualak lam ah a tlangval hna cu an tlu lai i Khi ni ah a ralkap hna cu thihnak chungah dai tein an it ko lai, tiah Ralkapbu Bawipa nih a ti. ²⁷ Cun Damaskas kulhnak vampang cu mei in ka duah lai i Benhadad siangpahrang inn hna cu a kangh dih hna lai. ²⁸ Babilon siangpahrang Nebukhadnezzar nih a teimi Kedar miphun le Hazor khua uktu bawi hna kong ah Bawipa nih a chimmi bia: Tho tuah u, Kedar cu tu tuah u, Nichuahlei mi Arab mi hna kha hrawk hna u. ²⁹ An thlam hna le an tuurun hna le an puanzar hna le an thilri vialte kha chut dih hna u, An kalauk zong kha kalpi hna u law, Mi cu, ’Nan velchum in ṭihnung a um,’ tiin chim hna u. ³⁰ Zam u, zam u, khulrang in zam u, Maw Hazor i a ummi hna, lamhlatpi ah vaa thup u, Zeicahtiah Babilon siangpahrang Nebukhadnezzar nih nan ca i ṭhat lonak dingah khua a khan i tinhmi pakhat a ser cang, tiah Bawipa nih a ti. ³¹ Tho u, a daithlangmi miphun kha fuh hna u sih, An ruahnak sawhsawh lawng i him tein khua a sa i kutka siseh, kothrolh siseh, a ngei ṭung lomi kha tu hna u sih. ³² An kalauk hna cu hranchaw ah kalpi an si lai i An saṭil run tampi hna cu hranchaw ah an cang lai. An bep sam aa metmi hna kha a kenkip ah ka ṭhek hna lai i An pawngkam hmun kip in an cungah rawhralnak ka ratter lai; ³³ Hazor cu cenghngia tlonnak hmun ah ka ser lai i zungzal in a rawk ko lai; Khika ah ahohmanh an um lai lo i ahohmanh nih innlo an khuar lai lo, tiah Bawipa nih a ti. ³⁴ Judah siangpahrang Zedekiah a bawi hramthawk ah Elam kong i profet Jeremiah sinah Bawipa bia a rami: ³⁵ Hi bangin Ralkapbu Bawipa nih, a ti: Zohhmanh, Elam likuk, an ṭhawnnak hriamnam ṭha bik cu ka khiah lai; ³⁶ Van ṭhen li i ṭhenmi khan Elam cungah thli pali ka tlunter lai; Hi thli pali hna sinah hin ka ṭhek hna lai i Elam ram in saltang an phanh lonak miphun zeihmanh an um lai lo. ³⁷ Elam cu anmah hrawh awk aa timmi an ral hna hmaiah khan ka hrawh lai. An cungah ka thinhunnak ka chuahter ciammam lai i ka hrawh dih hna lai, an loh cikcek hlantiang, vainam in ka hrem hna lai. ³⁸ Khi tikah ka bawiṭhutdan cu Elam ah ka chiah lai i khika siangpahrang le a bawi hna cu ka hrawh hna lai, tiah Bawipa nih a ti. ³⁹ Sihmanhsehlaw hmailei caan ah cun Elam cu a vanṭhatnak kha ka pek ṭhan lai," tiah Bawipa nih a ti.

¹ Babilon kong, Khaldi mi hna ram kong i Bawipa nih profet Jeremiah ka in a chimmi bia: ² "Miphun kip sinah chim law thanh tuah, Hmelchunhnak tar law thanh tuah, Thup hlah; "Babilon cu a tlu cang, Bel cu ningzahnak a phan cang, Marduk cu a hnabei a dong cang, Babilon siasal hna cu ningzahnak an phan cang, a pathian deu hna cu an hnabei a dong cang. ³ Zeicahtiah anmah tuk awkah chaklei in miphun pakhat a rung cang, Pakpalawng hmun ah a ser lai i khika ah minung siseh, saram siseh, an um lai lo," tiah chim, a ti. ⁴ Khi ni le khi caan ah cun Israel mi hna le Judah mi hna cu hmun khat ah an ra ṭi lai i Bawipa an Pathian cu mitthli he an kawl lai; ⁵ Zion lei hoih in cuka kalnak ding lam cu an hal hna lai i, "Ra tuah u, zungzal hmunmi, philh khawh lo ding biakamnak in Bawipa sinah i peh u sih," an ti lai, tiah Bawipa nih a ti. ⁶ Ka mi cu tuu tlau an si cang, an tuukhal hna nih khan a pingah an kalter hna i tlang cungah khan an duhnak kip ah an vaihter hna; tlang pakhat in tlang dang pakhat ah an kal lengmang i an kawm kha an philh cang. ⁷ A hmumi hna paoh nih khan annih cu an ei hna i an ral hna nih cun, "Annih nih Bawipa cungah an sual caah kannih nih kan tuahmi hi cu sual a si lo. An pupa hna nih khan Bawipa cu an rak i bochan i annih zong nih hin amah sinah cun zumhawktlak tein an um ve awk a si," tiah an ti. ⁸ Israel mi hna, Babilon ram in zam u, Khaldi mi hna ram khan zam tuah u; Hmaiah kal u law saṭil run a hruitu mehehtum bantuk kha si tuah u. ⁹ Zeicahtiah chaklei i a ummi miphun, a ṭhawngmi bu khat kha ka cawlcanghter hna lai i, Babilon kha ka dohter hna lai; Babilon khua cu an nam lai i an tlaih lai. An i tinhmi a ngan bal lomi thal kah thiam hna bantukin an cantiang cun an kah. ¹⁰ Khaldi mi cu ramh an si lai i a ramhtu hna nih khan an duhmi paoh cu tling tein an i lak lai, tiah Bawipa nih a ti. ¹¹ Babilon mi hna, nanmah nih ka miphun kha nan hrawh hna; Nan tha a nuam, nan lung aa lawm i facang cil dih hnuah cawla nih a duhduh in a lek bangin nan le nain le rangtum bangin nan awn nain, ¹² Nan nu cu hmaichiatnak fakpi a ing lai i Nanmah an hringtu hna cu a ning a zak lai. Babilon cu miphun hna lakah a hme bik a si lai, ti um lonak thetse ram car a si lai. ¹³ Bawipa thinhunnak ruangah Babilon ah cun ahohmanh an um lai lo, A ṭiao dih cikcekmi hmun a si ko lai; A pawng i a kalmi paoh cu an tuksa a purh hna lai i a cung i a tlungmi ruangah an khuaruah a har lai. ¹⁴ Li le thal a tlaimi vialte hna, Babilon cu a kulh in i tiang tuah u; Amah cu kap u, nan cantiang cu semrel hna hlah u, ¹⁵ Amah cu teinak in auhnawh u, a kut a hler cang; A ralvennak buk kha an cim cang, a ralhau kha an rawk cang; Mah hihi Bawipa nih a cungah phuhlamnak a tuahmi cu a si. Amah cungah cun phuhlamnak tuah ve u, Amah nih a rak tuah bang khan a cungah tuah ve u. ¹⁶ Babilon i thlaici tuhtu vialte kha hrawk dih hna u, Rawl ṭuan caan i faah a tlaitu vialte kha hlo dih hna u. Khika i a ummi ramdangmi vialte hna cu, Cu ram a tutu ralkap hna an ṭih hna caah, Anmahle an miphun cio sinah le anmahle an ram cio ah khan an kir dih lai; ¹⁷ Israel mi cu chiandeih nih a dawi i a ṭhek dihmi tuurun bantuk a si; An sa a ei hmasa biktu kha Assiria siangpahrang a si i An ruh a ṭam hmanung biktu kha Babilon siangpahrang a si. ¹⁸ Cucaah Ralkapbu Bawipa, Israel Pathian nih hi bangin a ti: Assiria siangpahrang dan ka tat bantukin Babilon siangpahrang le a ram cu dan ka tat lai. ¹⁹ Israel cu a tlon tawnnak hmun ah khan ka kirpi ṭhan lai i Karmel le Bashan ah khan a tlong ṭhan lai; Efraim ram tlang hna le Gilead ram tlang hna cungah khan a paw khim tein rawl a ei lai. ²⁰ Cu caan a phak tikah Israel mi hna chungah sualnak hmuh a si lai lo i Judah mi hna chungah ṭhat lonak hmuh a si lai lo; zeicahtiah ka nuntermi hna cu an sualnak kha ka ngaihthiam hna lai, tiah Bawipa nih a ti. ²¹ Merathaim ram cu do u; Cu ram le Pekod i ummi hna cu do hna u; Vainam in that dih hna u law hrawk cikcek hna u, Keimah nih kan fialmi hna paoh kha tuah dih u, tiah Bawipa nih a ti. ²² Ram chung i ral tuknak thawng le rawhralnak thawng nganpi cu ngai hmanh u! ²³ Zeitindah vawlei pumpi a rak dengtu sobul kha aa cheu i a kuai dih cikcek kha zohhmanh u, Zeitindah Babilon cu miphun hna lakah tuksapur ah a can ee! ²⁴ Maw Babilon, rap na chiah i nangmah rawhnak caah a si; Hngalh loin nangmah le nangmah naa foih ai; Khakha na si cang ko khah, naa foih ko cang khah, Zeicahtiah Bawipa pei na zuamcawh cu. ²⁵ Bawipa nih a ralthuam chiahnak cu a hun i a thinhunnak hriamnam kha a chuah hna, Zeicahtiah Ralkapbu Bawipa nih Khaldi mi hna ram ah ṭuan awk rian pakhat a ngeihmi cu hihi a si. ²⁶ A rawlṭuan caan kha a phan cang: A buk kha kau hna u law rawl cu a pon in pong hna u, Hrawk cikcek u law a nungmi pakhat hmanh ngan hna hlah u. ²⁷ A ralkap cu that dih hna u, thahnak hmun ah vun kalpi hna u. An caah ngaihchia a va si dah! An ni, an dantat caan cu a phan cang. ²⁸ Babilon in a luatmi saltang hna cu Zion ah an ra i Babilon mi hna nih Bawipa biakinn cung i an tuahmi thil ruangah Bawipa kan Pathian nih an cung i phuhlamnak a tuahmi kha an rung chim. ²⁹ Nan cantiang in paw vungmang in Babilon cu kap u, Nannih nan likuk a za sih cia in a ummi hna. A velchum in nan riahbuk in kulh u, pakhat hmanh luatter hna hlah u. Ṭhat lonak a tuahmi thil vialte kha lehrul dih u; Amah nih Bawipa, Israel Mi Thiang kha zei ah a rel lo caah Amah nih a rak tuah bantuk khan a cungah tuah ve u. ³⁰ Cucaah a tlangval hna cu khualak lam ah khan an ril lai i Khi ni ah a ralkap hna cu thihnak chungah dai tein an it lai, tiah Bawipa nih a ti. ³¹ Babilon, nangmah cu na lung a puam caah kan ralchanh, Nangmah dan kan tat lai caan, na ni cu a phan cang, tiah Bawipa, Ralkapbu Pathian nih a ti. ³² Lungpuammi miphun cu a ril lai i a tlu lai, Amah a tungtu ding ahohmanh an um lai lo; A khua cu mei in ka khangh lai i a velchum i a ummi thil vialte cu a kangh dih hna lai. ³³ Israel mi le Judah mi cu hrem ṭi an si, Anmah a tlaitu hna nih khan fek tein an hren hna i an thlah duh hna lo. ³⁴ Sihmanhsehlaw bawmtu ṭhawng an ngei, A min cu Ralkapbu Bawipa a si; Amah hrimhrim nih an bia cu a chimpiak hna lai, Babilon le a mi hna cungah cun harnak le hnahnawhnak a tlunter lai. ³⁵ Khaldi mi hna le Babilon i a ummi hna le an bawi hna le an mifim hna cungah vainam aa thlai ko, tiah Bawipa nih a ti. ³⁶ Nal profet hna cungah vainam aa thlai ko, annih cu mihrut an si cang; A ralkap hna cungah aa thlai ko, annih cu an lung a dong cang; ³⁷ A rangtum hna le a rangleng hna le a chung i a ummi mizapi hna cungah khan aa thlai ko, annih cu nu bantuk an si lai; A chawhlawn cungah aa thlai ko, ramh an si dih lai; ³⁸ A ti cungah aa thlai ko, an kao dih lai; Zeicahtiah hi ram cu siasal biaknak ram a si, An pathian ṭihnung pipi kha sunparnak an pek hna. ³⁹ Cucaah Babilon cu cenghngia le sa-ui umnak hmun ah a cang lai i ramcar chimbu khuasaknak hmun ah a cang lai; minung umnak hmun cu a si bal ti lai lo i ahohmanh nih an hlumh lomi hmun a si thluangthluan lai. ⁴⁰ Pathian nih Sodom le Gomorrah le an pawngkam khua hna kha a hrawh tik hna ah khika ah mi ahohmanh an um ti lo bantukin a chungah ahohmanh khua an sa ve lai lo, tiah Bawipa nih a ti. ⁴¹ Zohhmanh, miphun pakhat chaklei in a ra, miphun nganpi a si, Siangpahrang ṭhawngṭhawng hna kha vanhramdeng in an i hlau cang; ⁴² Li le vainam kha an i bei, Mipuar ngai, zaangfahnak ngei lomi an si. Rangtum kha an i cit hna i an thawng cu rili thawng bantuk a si; Annih cu nangmah doh awk i aa tiangmi an si, maw Babilon. ⁴³ An thawng cu Babilon siangpahrang nih a theih i a kut cu a tha a duai; Nau nganfah a ingmi nu nganfahnak bantuk nih a tlaih cang. ⁴⁴ Zohhmanh, Jordan tiva kam tupi chungin a chuak i zungzal in a hringmi saṭil tlonnak ram lakah a ra chuakmi chiandeih bantukin, Keimah nih mi vialte kha ka dawi dih hna lai i Tuukawng ṭha bikbik kha ka tlaih dih hna lai. Zeicahtiah keimah bantuk hi ahodah a um? Keimah tluk hi ahodah a um? Tuukhal aho tal ka hmaiah a dir khomi an um maw? ⁴⁵ Cucaah Babilon cungah Bawipa nih khua a khanmi le Khaldi mi hna ram cung i aa tinhmi hi thei tuah hna u: Tuurun chung i a no tete hna cu kalpi an si lai i An tlonnak hmun cu an cung i a tlungmi thil ruangah cun khuaruahhar in a um lai. ⁴⁶ Babilon cu a tluk tikah a thawng a than tuk caah vawlei aa hnin i A ainak thawng cu miphun zakip sin tiang a thang.

¹ Hi bangin Bawipa nih a ti: Zohhmanh, Babilon khua le Khaldi ram i a ummi hna ralchanhtu dingah hrawktu thlichia ka thawhter lai, ² Cun Babilon ah facang vamtu ka thlah hna lai i Amah cu an vamh lai i a ram cu an hrawh lai; Harnak ni a tlun tikah a kenkip in an tuk lai. ³ Babilon ralkap hna cu an likuk a za sih le thir angki i aihnak caan kha pe hna hlah u; A tlangval hna kha pakhat hmanh ngan hna hlah u, A ralkap vialte kha that dih hna u. ⁴ Khaldi mi hna ram chungah khan thi hna seh, An khuapi chung lam ah khan ril liangluang ko hna seh. ⁵ Israel le Judah cu an Pathian, Ralkapbu Bawipa nih a ma hna lo, Sihmanhsehlaw Khaldi mi ram cu sualnak in a khat i Israel Mi Thiang nih a hlawt cang. ⁶ Babilon in zam tuah u, nan nunnak i khamh cio tuah u! Cu ti nan tuah lo ahcun, Hi caan hi Bawipa nih phu a hlam caan, lehrulhnak a pek caan a si caah Amah sualnak ruangah khan nan rawk ve sual lai. ⁷ Babilon cu Bawipa kut chung i sui hrai, vawlei vialte a ritter dih tu a si; Miphun hna nih a mitsur hang cu an din i cu nih cun a molhter dih hna. ⁸ Chikkhat ah Babilon cu a tlu i a kuai ko; Amah cu ṭah tuah u! A hma caah khan si va la tuah u, a hei dam phum ko hnga dah kaw. ⁹ Khika i a ummi ramdangmi hna nih, "Babilon cu bawmh awk kan i zuam, sihmanhsehlaw a tlai tuk cang. Cucaah ra u law kaltak u si law kan inn cio ah tlung u sih. Pathian nih a ṭhawnnak dihlak in Babilon cu dan a tat cang i a hrawh cikcek cang," tiah an ti. ¹⁰ Bawipa nih, "Ka mi hna, au u law, ’Kannih cu kan sual lo kha Bawipa nih nih fiang tein a langhter cang; Ra u law, Bawipa kan Pathian nih a tuahmi cu, Zion ah thanh u sih,’ ti u," tiah a ti. ¹¹ Bawipa nih Babilon kha hrawh a timh caah Medes siangpahrang lungthin kha a cawlcanghter hna, A biakinn an hrawh ruangah hi bangin an cungah phu a hlam lai. Ral a tutu ralbawi hna nih, "Nan cantiang kha ta hna u! Nan phaw kha i bei hna u! ¹² Babilon kha tu cang u, tiah hmelchunhnak alan thlai cang u. Ralvengtu kha chap hna u, sentari kha chia hna u, lamhruang attu dingmi kha chia hna u!" an ti. Bawipa nih tuah a timhmi kha a tuah cang i Babilon mi hna cungah ka tuah lai tiah a timi kha a tuah cang. ¹³ Maw khuapi rum, ti tampi pawng i khua a sami, Na donghnak cu a phan cang, na nunnak hri cu a cat cang. ¹⁴ Bawipa hrimhrim nih, ’Rel cawk lo a simi khaubawk zat in minung in ka rak in khahter, Sihmanhsehlaw na cungah teinak vahla thlorh a si cang lai," tiah chiatser in a ti. ¹⁵ Pathian nih vawlei hi a ṭhawnnak in a ser, Vawlei hi a umnak hmun ah hin a fimnak in a umter; Van khi a thiamnak in a samh hna. ¹⁶ Nawl a pek hna bangin vancung i ti khi an awn, Vanhramdeng in minmei kha a thawhter. Ruah chungah cun nimtlau a lekter hna i A thilkhonnak chungin thli kha a chuahter hna. ¹⁷ Mi vialte hi mihrut, hngalhnak ngei lo an si dih, Sui sertu vialte hna hi an siasal sermi hna nih hin zumhawktlak lo an siter dih hna. Zeicahtiah an milem sermi hna cu hlennak men an si i an chungah thaw a um lo. ¹⁸ Annih cu zeihmanh man an ngei lo, nihchuak men a si, An biaceih ni a phak tik i a rawk men ding an si. ¹⁹ Jakob sertu Pathian cu hi hna bantukin a si lo, Zeicahtiah amah cu zeizong vialte sertu a si i Israel hi amah ca hrimhrim i aa kawhmi miphun a si, Amah a min cu Ralkapbu Bawipa a si. ²⁰ Bawipa nih Babilon cu, Nang cu ka sobul le ka ral hriam na si; Nangmah in miphun hna cu ka khuai cikcek hna, Nangmah in ram cu ka hrawh hna; ²¹ Nangmah in rangtum le a cung i aa citmi cu ka thah hna, ²² Nangmah in rangleng le rangleng aa cittu cu ka den hna; Nangmah in pa hna le nu hna cu ka den hna, Nangmah in tar le no cu ka den hna, Nangmah in tlangval le ngaknu cu ka den hna; ²³ Nangmah in tuukhal le a tuurun cu ka den hna, Nangmah in lei lettu le a rangtum hna cu ka den hna; Nangmah in ram ukbawi le ralbawi hna cu ka den hna, tiah a ti. ²⁴ Cu bantukin Babilon le Khaldi mi hna cu Na mit hmuh i Zion cung i ṭhat lonak an tuahmi ruangah Teirul ka cham hna lai, tiah Bawipa nih a ti. ²⁵ Maw Babilon, nang cu vawlei pumpi a hrawktu tlang bantuk na si, Nangmah cu kan ralchanh cang; Nangmah cu ka kut kan samhhnawh lai i Cangdonh lo na sermi ah cun kan hrilh lai i a kangmi tlang ah kan ser lai. ²⁶ Na lung cu pakhat hmanh innkil lung caah hman a si lai lo i pakhat hmanh innhram caah hman a si lai lo; Nangmah cu zungzal in ṭiaotakmi hmun na si lai, tiah Bawipa nih a ti. ²⁷ Ram chungah, ral tuk ah i thawh cang u, tinak hmelchunhnak alan kha thlai u, Miphun hna lakah muko kha tum tuah u, Miphun hna cu amah doh awkah tim hna u, Ararat, Minni le Ashkenaz ram hna cu amah doh awkah ko hna u; Amah dotu ah ralbawi ngan bik pakhat chia tuah, Khaubawk bupi zat in rang kha hunpi hna. ²⁸ Amah doh awkah miphun kha tim hna u, Medes siangpahrang le a ram uktu bawi hna le a upa hna le amah nih a ukmi vialte hna kha, amah doh awkah tim hna u. ²⁹ Babilon cu ṭiaotakmi hmun le mi um lonak hmun siter awkah Bawipa nih Babilon kong i aa tinhmi kha a tlin cang caah Vawlei cu a ther i aa hnin. ³⁰ Babilon ralkap hna nih raltuk an ngol cang, An ralhruang chungah khan a thuh in an i thup; An ralṭhatnak a dong cang i nu bantuk an si cang. A inn cu mei in an khangh hna i a kutka hrenhnak hna cu an kiak cang. ³¹ Babilon siangpahrang cu, Na khualipi kha a kam kip in luhhnawh a si cang ti chimh awkah Zualko pakhat hnu pakhat nih an tlikhnawh. ³² Tiva tannak hna kha ral nih an tlaih cang hna i Ralhau cu mei in an khangh hna i Ralkap cu zeiti um awk hngal loin an um, an ti. ³³ Ralkapbu Bawipa, Israel Pathian nih, Babilon cu facang cilnak phuhri bantuk a si, A rauh hlanah a cungah facang ṭuan caan a phan lai, tiah a ti. ³⁴ Zion i a ummi hna nih, Babilon siangpahrang Nebukhadnezzar nih a kan ei i car dihlak in a kan dawp, Um lawng bantukin a kan toh. Rulpi bangin a kan dolh, Kan sa thawthaw in a paw cu a khahter i a kan luak. ³⁵ Kan cung i zaang-ennak tuahmi le phuhlamnak tuahmi hi Babilon cungah tla seh, an ti lai. Jerusalem i a ummi hna nih, Kan thisen cu Khaldi ram i a ummi hna cungah tla seh, an ti lai. ³⁶ Cucaah hi bangin Bawipa nih a ti: Zohhmanh, na bia cu kan chimpiak lai i na phu kha kan hlampiak lai; A rili cu ka kaoter lai i a tiput hna cu ka carter hna lai; ³⁷ Cun Babilon cu a rawkmi thil pon, Cenghngia tlonnak hmun, tuksapur le cekcekhnawhmi hmun, A chung i mi a um lomi hmun ah a cang lai. ³⁸ Babilon mi hna cu chiandeih bangin an awn lai, Chiandeih fano bangin an ngur len lai. ³⁹ An zu dinnak cu zawtnak in ka donghter lai i An rit tuk ah an i ngerh len lai i an i lawng len lai. A dong lomi hngilhnak chungah khan an tla lai i An i hlau ti lai lo, tiah Bawipa nih a ti. ⁴⁰ Thahnak hmun i kalpimi tuufa hna le tuukawng le meheh tum bantukin ka kalpi hna lai. ⁴¹ Babilon vawlei cung dihlak nih an hlorhmi cu tlaih a si cang; Babilon cu miphun hna lakah tuksapur ah a cang cang! ⁴² Rili nih Babilon cu a phum cang, A awn hluahmahmi tilet hna nih cun an khuh cang. ⁴³ A khuapi hna cu hmun rocar ah an cang cang, Hmun car le thetse ram an si cang, Ahohmanh um lonak ram, minung fa ahohmanh nih an pal lomi ram a si cang. ⁴⁴ Babilon ah Bel cu dan ka tat lai i A dolhmi kha ka chakter ṭhan lai; Miphun hna cu amah sinah khan an ra tungmang ti lai lo, Babilon kulhnak vampang cu a cim cang; ⁴⁵ Amah chungin chuak tuah u, maw ka mi hna, Bawipa thinhunnak ṭihnung chung cun mi kip nih mahle nunnak kha i khamh cio hna seh! ⁴⁶ Ram chung i thawngpang nan theihmi kong ah nan lung dong hlah u law nan thin zong phang hlah u, Zeicahtiah kum khat ah thawngpang pakhat a um, cun a kum nolh ah thawngpang dang a um ṭhan, Ram chungah hnahnawhnak a um i uktu pakhat nih uktu dang pakhat kha a doh, tiin a um tawn. ⁴⁷ Cucaah zohhmanh, Babilon milem hna cu dan ka tat hna lai ni cu a ra lio, tiah Bawipa nih a ti; A ram cu a ning piin ningzahnak a phan lai, A mi an thahmi hna cu a chungah cun an ril liangluang ko lai. ⁴⁸ Van le vawlei le a chung i a ummi thil vialte hna nih, Babilon cu a tluk caah lunglawmhnak in hla an sa lai; Zeicahtiah chaklei in a rami ral hna nih, amah cu an tei lai, tiah Bawipa nih a ti. ⁴⁹ Vawleicung khuazakip ah Babilon nih mi kha a rak thah hna caah le Atu ah Israel mi tampi a thah hna caah Babilon cu a tlu hrimhrim lai. ⁵⁰ A vainam chungin a luatmi hna, kal u, dir hlah u; Lamhlapi ah um hmanh u law, Bawipa kha ka hngal camcin u, Jerusalem kha nan lungchung in ruat camcin u. ⁵¹ Nannih nih, Kannih cu ningzahnak kan phan, Ramdangmi nih biakinn chung hmunthiang kha an lak hna caah hmaichiatnak nih a kan khuh, nan ti. ⁵² Cucaah zohhmanh, a milem hna cung i biaceihnak ka tuah lai caan le A ram chung dihlak ah hliammi an hrum-ai len lai caan cu a ra lio, tiah Bawipa nih a ti. ⁵³ Babilon cu van tawng in sang in, A kulhnak vampang hna cu ahohmanh kai khawh loin ser si hna hmanh seh law, A cungah hrawktu ka thlah hna lai, tiah Bawipa nih a ti. ⁵⁴ Babilon khua chung i ṭah thawng cu ngai hmanh. Khaldi mi hna ram i rawknak nganpi thawng cu. ⁵⁵ Zeicahtiah Bawipa nih Babilon cu a ṭhio lio a si i Khuachung thawngpang cu a daihter lio a si. Ralkap nih cun a awnmi tilet bantukin an luhhnawh i au thawng he an tuk. ⁵⁶ Hrawktu cu Babilon hrimhrim ah khan an phan cang, A ralkap cu an tlaih hna i an likuk cu an khiahpiak hna. Bawipa, teirul cham hmangmi Pathian nih a lehrulh hrimhrim hna lai. ⁵⁷ A bawi hna le a mifim hna le a ram ukbawi hna le ralbawi hna le ralkap hna cu Ka ritter hna lai; A dong lomi hngilhnak chungah an tla lai i an i hlau ṭhan ti lai lo, tiah Siangpahrang, a min Ralkapbu Bawipa a simi nih a ti. ⁵⁸ Hi bangin Ralkapbu Bawipa nih Babilon kulhnak vampang a chah ngaingaimi cu vawlei ah chimh a si lai, A sangmi a kutka hna cu mei in khangh an si lai. Mi nih an ṭuanmi vialte cu pakpalawng ca men ah a si cang, Mi nih pakpalawng ca men ah an tha an i dit, tiah a ti. ⁵⁹ Mahseiah fapa Neriah i fapa Seraiah cu Zedekiah Siangpahrang a zohkhenhtu bawi a si. Judah siangpahrang Zedekiah a bawi kum li kum ah cun Seraiah cu Babilon ah a kal i Jeremiah nih bia a cah. ⁶⁰ Jeremiah nih Babilon cung i a tlung ding ṭhat lonak vialte cu cauk chungah a ṭial dih hnuah ⁶¹ Seraiah cu a thawh i, "Babilon nan phak tikah hika i aa ṭialmi bia vialte hi mi zapi theihhngan ah na va rel hrimhrim lai. ⁶² Cun thla na cam lai i, ’Bawipa, hi hmun hi ka hrawh lai i a chungah zeihmanh an um lai lo, minung zong an um lai lo, saram zong an um lai lo i zungzal in a ṭiaomi hmun a si lai,’ tiah na ti, na ti lai. ⁶³ Cun hi cauk cu na rel dih in lung na ṭem chih lai i Zufrates tiva chungah na paih lai i ⁶⁴ ’Hihi Babilon cung i a tlung ding cu a si — a pil lai i a tho ṭhan ti lai lo, zeicahtiah Bawipa nih a cungah ṭhat lonak a tlunter lai,’ na ti lai," tiah a ti. Hi tiang hi Jeremiah bia cu a si.

¹ Zedekiah cu siangpahrang a si tikah kum kul le kum khat a si i Jerusalem ah kum hleikhat a bawi. A nu min cu Hamutal a si i amah cu Libnah khuami Jeremiah fanu a si. ² Cun Jehoiakim nih a rak tuah ve bang khan Bawipa hmaiah thil ṭhalo kha a tuah. ³ Jerusalem le Judah nih Bawipa thin cu an phawh tuk caah a donghnak ah cun a hmuh lonak hmun ah a dawi hna. Cun Zedekiah nih Babilon siangpahrang kha a doh. ⁴ A bawi kum kuanak, thla hra thla, cu thla ni hra ni ah cun Babilon siangpahrang Nebukhadnezzar cu Jerusalem tuk awkah, a ralkapbu pi he an ra i an kulh i a velchum in ralvennak innsang kha an sakhnawh. ⁵ Cuticun Zedekiah siangpahrang a bawi kum hleikhatnak kum tiang khuapi cu an kulh. ⁶ Cun khuapi chungah cun mangṭam cu a fak tuk hringhran cang i mi caah rawl a um ti lo caah cu kum thla linak thla a ni kua ni ah khuapi cu an bauh khawh. ⁷ Cun mah cucu Judah siangpahrang Zedekiah nih khan a hmuh tikah, hriamnam he amah a cawngtu vialte hna he khan khuachung cun zan ah an zam i siangpahrang dum pawng i a ummi kutka Vampang Pahnih Hna Karlak timi khan an chuak. Khaldi mi nih khuapi cu an kulh nain Arabah leiah khan an zam. ⁸ Sihmanhsehlaw Khaldi mi ralkap hna nih cun siangpahrang cu an dawi i Jeriko nelrawn ah an phak; cun a ralkap vialte hna cu an i ṭhek dih i an zamtak. ⁹ Cun siangpahrang cu an tlaih i Hamath ram Riblah khua ah Babilon siangpahrang sinah cun an hunpi i a bia kha a ceih. ¹⁰ Babilon siangpahrang nih cun Zedekiah fapa hna cu a hmuhhngan te ah cun a thah hna i Judah bawi vialte hna zong Riblah ah cun a thah hna. ¹¹ Cun Babilon siangpahrang nih Zedekiah cu a mit a khoih i dar hreng a khenh i Babilon ah a kalpi i a thih tiang thong ah a thlak. ¹² Babilon siangpahrang a bawi kum hleikuanak, thla nganak thla, cu thla ni hra ni ah khan, Babilon siangpahrang pum ralvengtu ralkap hna haotu Nebuzaradan cu Jerusalem ah a lut. ¹³ Bawipa inn le siangpahrang inn le Jerusalem i inn ngan vialte kha a khangh dih hna, Gedaliah inn zong kha a khangh fawn. ¹⁴ Ralvengtu ralkap hna haotu le Khaldi mi ralkap hna nih cun Jerusalem velchum i kulhnak vampang cu an chimh dih. ¹⁵ Cun ralvengtu ralkap hna haotu Nebuzaradan nih cun khua chung i nganhtami hna le Babilon siangpahrang sin i a zammi hna le zungthiam pawl a tangmi hna kha sal ah a kalpi hna. ¹⁶ Ralvengtu ralkap hna haotu Nebuzaradan nih cun ram chung misifak bikbik hna kha mitsur dum zohkhenhtu le rianṭuantu ah a chiah ta hna. ¹⁷ Cun tawngca tung Bawipa inn chung i a ummi hna kha le dar hmaihum nganpi le a dohnak hna Bawipa inn chung i a ummi hna cu Khaldi mi hna nih cun an den cikcek hna i a dar vialte cu Babilon ah an kalpi. ¹⁸ Cun biaknak inn chung i biaknak ca i hmanmi thil vialte, um tehna, cawhlek tehna, mei hmihnak tehna, hmaihum tehna, zihmui khanghnak kheng tete hna, dar-um vialte hna kha an kalpi dih. ¹⁹ Cun sui le ngun in sermi thil paohpaoh kha cu an lak dih hna: khengkuar tehna, mei luahnak tehna, hmaihum tehna, um tehna, meiinn tung tehna, zihmui khanghnak kheng tehna, thlet thawinak ca i khengkuar tehna kha an si. ²⁰ Cun Siangpahrang Solomon nih Bawipa inn ca i a sermi tung pahnih, hmaihum nganpi, hmaihum nganpi tang i a ummi cawtum dar in sermi hleihnih hna le hmaihum dohtu hna cu a thlai in thlai cawk an si lo. ²¹ Tungpi pakhat cu dong hleiriat a sang i a sum cu dong hleihnih a si; a chung cu a kua i a thir cu zung li a chah. ²² A par ah cun dar in sermi chin a um; cu luchin cu dong nga a sang; cun luchin ah cun a velchum in dar in sermi sur le taleti an um. Cun tungpi pahnihnak cu a taleti hna he cun cu bantuk ṭhiamṭhiam cu a si. ²³ Taleti a langmi cu sawm kua le paruk an si, a velchum i sur cung i a ummi taleti cu za khat an si. ²⁴ Cun ralvengtu ralkap haotu nih cun tlangbawi bik Seraiah le tlangbawi pahnihnak Zefaniah le biakinn cawngtu bawi pathum hna kha a kalpi hna. ²⁵ Cun khuapi chung cun raldomi ralkap a uktu hna tilditmi pakhat le siangpahrang sinah a va lut kho tawnmi mi pasarih khuachung i a um rihmi hna le, mi kha raldoh awk a herh tikah pumhter awk a rian a simi ralbawi ngan bik bawmtu le a dangmi pipa sawm ruk zong kha a kalpi hna. ²⁶ Annih cu ralvengtu ralkap hna haotu Nebuzaradan nih cun a lak hna i Riblah khua ah Babilon siangpahrang sinah khan a kalpi hna. ²⁷ Babilon siangpahrang nih cun Hamath ram Riblah khua ah cun a tuk hna i a thah hna. Cuticun Judah cu a ram chungin sal ah kalpi a si. ²⁸ Mah hna hi Nebukhadnezzar nih kum sawm sarih kum ah sal ah a kalpimi hna cu an si: Judah mi thong thum le kul le thum; ²⁹ Nebukhadnezzar a bawi kum hleiriat kum ah Jerusalem in za riat sawm thum le pahnih; ³⁰ Nebukhadnezzar a bawi kum kul le kum thum kum ah ralvengtu ralkap hna haotu Nebuzaradan nih Judah mi za sarih le sawm li le panga sal ah a kalpi hna; an dihlak ah thong li le za ruk an si. ³¹ Cun Judah siangpahrang Jehoiakim sal i a taan kum sawm thum le kum sarih kum, a thla hleihnih thla, cu thla ni kul le ni nga ni ah, Babilon siangpahrang Evil-merodak cu siangpahrang a can kum a si i Judah siangpahrang Jehoiachin cu a zaangfah i thong chungin a chuah; ³² amah cu ṭha tein a zohkhenh i Babilon khua ah cun amah sinah a ummi siangpahrang hna ṭhutnak cungchin cabuai ah khan ṭhutnak a pek. ³³ Cucaah Jehoiachin nih a thongtla puan kha aa phoih i a chan chung vialte siangpahrang cabuai ah cun ni fate rawl a ei lengmang. ³⁴ Cun amah aa cawmnak i hman awkah siangpahrang nih a herhning paoh in a nun chung a thih ni tiangin thil a pek lengmang.