BIACEIHTU

BIACEIHTU

¹ Joshua a thih hnuah Israel mi nih Bawipa kha an hal i, "Kanaan mi hna kha doh awkah ahodah kan caah a hmasa bik ah a kal lai?" tiah an ti. ² Bawipa nih, "Judah a hung kal lai; zohhmanh u, ram cu amah kut chungah ka pek cang," tiah a ti. ³ Cun Judah nih a unau Simeon sinah cun, "Kanaan mi kha kan hung doh hna nakhnga, keimah covo ram ah cun hung ka kalpi tuah; cun cu bantuk ṭhiamṭhiam in kei zong nih na covo ram ah cun kan kalpi ve lai," tiah a ti. Cucaah Simeon nih a hun kalpi. ⁴ Cun Judah cu a hung kal i Kanaan mi hna le Periz mi hna cu Bawipa nih an kut chungah a pek hna i Bezek khua ah an mi sang khat an tei hna. ⁵ Bezek khua ah cun Adoni-bezek an hmuh i an doh i Kanaan mi le Periz mi cu an tei hna. ⁶ Adonibezek cu a zam; sihmanhsehlaw an dawi i an tlaih i a siapi hna le a kepi hna kha an tan. ⁷ Cun Adonibezek nih cun, "An siapi hna le an kepi hna tan a simi siangpahrang sawm sarih nih ka cabuai toiah rawl ṭiltlawt an char tawn; ka rak tuah bangin Pathian nih a ka rulh ve cang," tiah a ti. Jerusalem ah an ratpi i khika ah a thi. ⁸ Cun Judah mi nih Jerusalem cu an doh i an lak i vainam in an sam cikcek i khuapi cu mei in an khangh. ⁹ Cun a hnuah, tlangram le Negeb le rawnram i a ummi Kanaan mi hna kha doh awkah Judah mi hna cu an ṭum. ¹⁰ Cun Hebron i a ummi Kanaan mi hna cu Judah mi nih cun an fuh hna i Sheshai le Ahiman le Talmai kha an tei hna. (Hebron cu, hlanah cun a min ah Kiriath-arba a si). ¹¹ Khika in Debir i a ummi kha an hei fuh hna. Debir cu, hlanah cun a min ah Kiriath-sefer a si. ¹² Cun Kaleb nih, "Kiriath-sefer kha a chim i a la khomi cu ka fanu Aksah kha nupi ah ka pek lai," tiah a ti. ¹³ Cun Kaleb nau Kenaz i fapa Othniel nih a lak i a fanu Aksah cu nupi ah a pek. ¹⁴ Cun Aksah cu a sinah a rat tikah Othniel cu Aksah nih a pa kha ram hal awkah a fial; Aksah cu a laa cungin a ṭum i Kaleb nih a sinah, ’Zeidah na duh?" tiah a ti. ¹⁵ Cun anih nih, "Laksawng pakhat in ka pe tuah; Negeb ram chungah na ka chiah caah tiput zong ka pek chih tuah hna," tiah a ti. Cun Kaleb nih chaklei tiput hna le thlanglei tiput hna kha a pek chih. ¹⁶ Cun Moses pu, Ken miphun a simi i a tefa hna kha ungkung khua in Negeb chung i a ummi Arad pawng i a ummi Judah ramlak ah khan Judah mi hna he an hung kal i an lakah cun an hung um. ¹⁷ Cun Judah cu a unau Simeon he an hung kal i Zefath i a ummi Kanaan mi hna cu an hung tei hna i an hrawh cikcek. Cucaah cu khua min cu Hormah ti a si. ¹⁸ Cun Judah nih Gaza le a pawngkam ram. Ashkelon le a pawngkam ram le Ekron le a pawngkam ram hna zong cu a lak hna. ¹⁹ Cun Bawipa cu Judah sinah a um i tlangram i a ummi hna cu a dawi hna, sihmanhsehlaw rawn i a ummi hna cu, thir rangleng hna kha an ngeih caah an dawi kho hna lo. ²⁰ Cun Moses nih a rak chim bang khan Hebron cu Kaleb an pek i Anak fapa pathum hna kha, cu ka cun a dawi hna. ²¹ Sihmanhsehlaw Benjamin mi nih Jerusalem i a ummi Jebus mi kha an dawi hna lo; cucaah nihin tiangin Jebus mi cu Benjamin mi hna he Jerusalem ah an um. ²² Josef hrin hna zong nih Bethel an hung doh i Bawipa cu an sinah a um. ²³ Cun Josef hrin hna nih cun Bethel kha ngiatthlai awkah mi an thlah hna. (Cu khua min cu, hlan ah cun Luz ti a si). ²⁴ Cun mingiathlaitu hna nih cun mipa pakhat khua chungin a chuah kha an hmuh i, "Zaangfahnak in, khua chung luhnak lam kan hmuhsak tuah, cun nangmah cu ṭha tein kan in ti ve te lai," tiah an ti. ²⁵ Cun khua chung luhnak lam cu a chimh hna; khua cu vainam in an sam cikcek, sihmanhsehlaw mipa le a innchungkhar vialte cu an thlah hna. ²⁶ Cun cu pa cu Hit mi ram ah a kal i khua pakhat a tlak i a min ah Luz a sak; nihin ni tiang hin mah cu cu a min a si ko. ²⁷ Manasseh nih Beth-shean le a khuate hna i a ummi si hna seh, Taanak le a khuate hna i a ummi si hna seh, Dor le a khuate hna i a ummi si hna seh, Ibleam le a khuate hna i a ummi si hna seh, Megiddo le a khuate i a ummi si hna seh, a dawi hna lo; sihmanhsehlaw Kanaan mi hna cu cu ram ah cun an i benh peng ko. ²⁸ Israel mi cu an hung ṭhawn tikah Kanaan mi hna cu hnekmi rian an ṭuanter hna, sihmanhsehlaw an dawi dih cikcek hna lo. ²⁹ Efraim nih Gezer i a ummi Kanaan mi kha an dawi hna lo; sihmanhsehlaw Kanaan mi cu an lakah Gezer ah cun an um ko. ³⁰ Zebulun nih Kitron i a ummi si hna seh, Nahalal i a ummi si hna seh an dawi hna lo; sihmanhsehlaw Kanaan mi hna cu an lakah an um ko i hnekmi rian kha an ṭuan. ³¹ Asher nih Akko i a ummi si hna seh, Sidon i a ummi si hna seh, Ahlab i a ummi si hna seh, Akzib i a ummi si hna seh, Helbah i a ummi si hna seh, Afik i a ummi si hna seh, Rehob i a ummi si hna seh a dawi hna lo; ³² an dawi hna lo caah khan Asher mi hna cu Kanaan mi hna lakah cun an um ko. ³³ Naftali nih Beth-shemesh i a ummi si hna seh, Beth-anath i a ummi si hna seh a dawi hna lo, sihmanhsehlaw cu ka ram i a ummi Kanaan mi hna lakah cun a um; sihmanhsehlaw Beth-shemesh le Beth-anath i a ummi hna cu an caah hnekmi rian ṭuanpiaktu ah an cang. ³⁴ Amor mi nih Dan mi hna cu tlangram ah an dawi ṭhan hna, rawn i rung ṭum cu an onh hna lo; ³⁵ Amor mi hna cu Har-heres, Aijalon le Shaalbim ah cun an i benh peng ko, sihmanhsehlaw Josef hrin hna kut cu an cungah a rit i hnekmi rian ṭuanpiaktu ah an cang. ³⁶ Cun Amor mi hna ramri cu Akrabbim i hung kainak le Sela le a cunglei in a kal.

¹ Cun Bawipa vancungmi cu Gilgal in Bochim ah a hung kal. Cun amah nih, "Izipt ram in kan hunpi i na pupa hna sinah pek awkin chiat ka sermi ram chungah kan luhpi. ’Nangmah he ka biakamnak cu ka hrawk bal lai lo i ² hi ram i a ummi hna he hin biakamnak zeihmanh na tuah lai lo; an biakṭheng cu na hrawh dih hna lai,’ tiah ka ti. Sihmanhsehlaw nawl kan pekmi cu na ngai lo. Na tuahmi hi zeidah a si? ³ Cucaah atu cu, na hmai in ka ṭhawl hna lai lo, ka ti; sihmanhsehlaw na caah dohtu an si lai i an pathian cu na caah rap an si lai," tiah a ti. ⁴ Bawipa vancungmi nih hi bia cu Israel mi vialte hna sinah a chim tikah, mi hna cu fak piin an ṭap. ⁵ Cun cuka hmun cu a min ah Bochim an sak; cuka ah Bawipa sinah rai an thawi. ⁶ Joshua nih mi kha a ṭinter hna tikah, Israel mi hna cu ram kha co awkah anmah le an covo cio ah khan an kal. ⁷ Cun mi hna nih cun Joshua nunchung le Joshua hnuah a nungmi upa, Israel mi caah Bawipa nih rian ngan a tuahmi vialte a rak hmutu hna an nunchung ah cun Bawipa rian kha an ṭuan. ⁸ Cun Nun fapa Joshua, Bawipa sal cu, kum za le kum hra a ti ah a thi. ⁹ Efraim tlangram chung, Gaash Tlang chaklei i Timnath-heres chung i amah covo ramri chungah cun an vui. ¹⁰ Cun cu chan mi vialte zong cu an pupa hna sinah pumh an si; cun annih hnuah Bawipa siseh, Israel ca i a tuahmi rian siseh, a hngal lomi chan thar a hung chuak. ¹¹ Cun Israel mi nih Bawipa mithmuh i thil ṭhalo a simi kha an tuah i Baal kha an biak hna. ¹² Bawipa an pupa hna Pathian, Izipt ram in a chuahpitu hna kha an hlawt; an velchum i a ummi hna pathian hna lak hin pathian dang kha an zulh hna i an hmaiah an kun i Bawipa cu a thin an hunter. ¹³ Bawipa cu an hlawt i Baal hna le Ashtaroth kha an biak. ¹⁴ Cucaah Bawipa thinhunnak cu Israel cungah a alh i miramhtu hna sinah khan a pek hna i an ramh hna; cun an pawngkam i a ummi an ral hna kut chungah a zuarh hna, cucaah annih nih an ral kha an celh kho ti hna lo. ¹⁵ Ral doh awkah an chuah fate Bawipa kut cu a chia lei in an caah a um, Bawipa nih ralrinnak a rak pek hna bang le an sinah chiat a rak ser bang khan; cucaah vansang au in an um. ¹⁶ Khi tikah Bawipa nih biaceihtu a chuahter hna i annih cu annih a ramhtu hna kut chung khan an khamhtu hna kha an si. ¹⁷ Asinain annih nih an biaceihtu hna bia cu an ngai hlei lo; annih nih pathian dang sinah khan hlawh an hlang ṭhiamṭhiam ko i annih hmaiah khan an kun ṭhiamṭhiam ko; Bawipa nawlbia a rak ngaimi an pupa hna nih an rak zulhmi lam khan an pial zau i annih tuah bantuk khan an tuah lo. ¹⁸ Bawipa nih an caah biaceihtu a chuahter fate, Bawipa cu biaceihtu sinah cun a um i biaceihtu nih cun amah chan chung vialte cu an ral hna kut chungin a khamh hna; zeicahtiah annih kha a hremtu hna le vansang au in a tuahtu hna ruang i an hrum-ainak nih khan Bawipa cu an cungah vel a ngeihter. ¹⁹ Sihmanhsehlaw biaceihtu cu a thih fate, annih cu an i mer ṭhan i an pale nakkhan chia deuh in an nung, pathian dang kha an zulh hna i an biak hna i an hmaiah an kun; an tuah tawnmi le lungkhong lam an zulh tawnmi kha pakhat hmanh an hlaw hna lo. ²⁰ Cucaah Bawipa thinhunnak cu Israel cungah a alh i, "Hi mi hna nih hin an pupa hna sinah nawl ka pekmi ka biakamnak kha an hrawh i ka bia kha an ngaih lo caah, ²¹ hi hnu hi cu annih hmai in, Joshua nih a thih tikah a nganhtami miphun hna kha, ka dawi ti hna lai lo, ²² an pupa hna bantuk khan Bawipa lam kha an zul lai maw zul lo tiah Israel mi cu hneksaknak caah annih cu ka hman hna lai," tiah a ti. ²³ Cucaah Bawipa nih hi miphun hna cu hmakhatte ah dawi loin a umtak rih hna i Joshua kut chungah khan a pe hna lo.

¹ Mah miphun hna hi Bawipa nih Kanaan ram chung i raldohnak zeihmanh a hngal lomi Israel mi vialte kha, hneksaknak ding ca i a nganhtami cu an si; ² Israel mi tefa hna nih raldohnak an hngalh nakhnga ca lawng le, cu hlan i raltuk a rak hngal bal lomi hna tei kha raldohnak a cawnpiak hna nakhnga ca lawngah a si. ³ Cu miphun hna cu mah hihi an si: Filistin mi hna bawi panga le Kanaan mi vialte le Sidon mi hna le Lebanon Tlang i a ummi Hiv mi hna, Baal-hermon Tlang in Hamath luhnak tiang. ⁴ Bawipa nih Moses in an pupa hna nawlbia a rak pekmi hna kha an ngai lai maw ngai lo ti hngalh nakding caah, cu hna cu Israel mi hneksaknak caah an si. ⁵ Cuticun Israel mi hna cu Kanaan mi le Hit mi le Amor mi le Periz mi le Hiv mi le Jebus mi hna lakah cun an um i, ⁶ an fanule cu nupi ah an ṭhit hna i an fanu hrimhrim hna cu, cu hna i an fapale sinah khan an pek hna; cun an pathian zong kha an biak hna. ⁷ "Cun Israel mi nih Bawipa mithmuh i thil ṭha lo kha an tuah, Bawipa an Pathian kha an philh i Baal hna le Asherah hna rian kha an ṭuan hna. ⁸ Cucaah Bawipa thinhunnak cu Israel mi cungah a alh i Mesopotamia siangpahrang Kushan-rishathaim kut chungah khan a zuarh hna; cu caah Israel mi nih cun Kushan-rishathaim cu kum riat an rianh. ⁹ Sihmanhsehlaw Israel mi nih cun Bawipa kha an auh tikah Israel mi caah cun Bawipa nih chuahtu pakhat a hun umter; amah nih cun a chuah hna, amah cu Kaleb nau Kenaz fapa Othniel a si. ¹⁰ Bawipa thlarau cu a cungah a tlung i Israel cu bia a ceih hna; raldoh awkah khan aa thawh i Mesopotamia siangpahrang Kushan-rishathaim kha Bawipa nih a kut chungah a pek; Kushan-rishathaim kha a tei. ¹¹ Cucaah ram cu kum sawm li aa din. Cun Kenaz fapa Othniel cu a thi. ¹² Cun Israel mi nih Bawipa mithmuh i thil ṭhalo cu an tuah ṭhan; cun Bawipa nih Moab siangpahrang Eglon cu Israel mi doh awkah a ṭhawnter, zeicahtiah Bawipa mithmuh i thil ṭhalo kha an tuah. ¹³ Ammon mi hna le Amalek mi hna kha a pumh hna i a kal i Israel kha a tei; cun ungkung khua kha an lak. ¹⁴ Cun Israel mi nih Moab siangpahrang Eglon cu kum hlei riat an rianh. ¹⁵ Sihmanhsehlaw Israel mi nih Bawipa kha an auh tikah annih cu Bawipa nih cun chuahtu pakhat a serpiak hna, Benjamin phun Gera fapa Ehud, kehtlak kha a si. Israel mi nih amah cu Moab siangpahrang Eglon sinah ngunkhuai an phorhter. ¹⁶ Cun Ehud nih cun kap hnih har nam, dong khat a saumi cu aa ser i a puan tangah a orhlei phei ah aa thlaih. ¹⁷ Cun Moab siangpahrang Eglon cu ngunkhuai cu a pek. Eglon cu mi thau ngai a si. ¹⁸ Cun Ehud nih ngunkhuai kha a pek dih tikah ngunkhuai a phortu hna kha a kalter hna. ¹⁹ Sihmanhsehlaw anih tu cu Gilgal khua pawng i lung suaimi hna umnak khan a kir ṭhan i, "Maw siangpahrang, nangmah caah biathlite pakhat ka ngei," tiah a ti. Cun, "Dai u," tiah nawl a pek hna. Cun a sinum vialte cu a sinin an chuak dih. ²⁰ Cun inncung thlan daihnak dal chung i a ṭhut lioah Ehud cu a sinah a ra. Cun Ehud nih, "Nangmah caah Pathian sinin bia pakhat ka ngei," tiah a ti. Cun a ṭhutdan in a hung tho. ²¹ Cun Ehud nih a kehlei kut in a vun i purh i a orhlei phei i nam kha a vun lak i a paw ah a sawh; ²² a hlok zong a pil dih, cun a thau nih nam cu a khuh; zeitintiah a paw i nam kha a phawi lo; a hnulei ah a tleng. ²³ Cun Ehud cu innleng ah a chuak i thlan daihnak dal innka cu a khar khumh i a hrenh hna. ²⁴ A kal hnuah a sinum kha an ra; thlan daihnak dal innka hna cu an i hrenh kha an hmuh tikah, "Thlan daihnak dal chung i khaan pakhat ah a zung i a si lai hi ta," tiah an ruah. ²⁵ An khuaruah a har cikcek tiang an ngan; thlan daihnak dal innka hna cu a hun hlei lo tikah khan tawh kha an i lak i an hun hna; cun cuka ah cun zelṭuang ah an bawipa cu a ruak in a rak ril ko. ²⁶ Kha ti i an ngan lengmang chungah khan Ehud cu a rak zam diam i lung suaimi hna kha a lonh hna i Seirah ah a le. ²⁷ A phak tikah Efraim tlangram ah cun muko a tum i Israel mi hna cu amah he tlangram cun an vung kal i amah nih cun a hrui hna. ²⁸ Cun anih nih, "Ka zul u; zeitintiah nan ral Moab mi hna cu Bawipa nih nan kut chungah an pek cang hna," tiah a ti hna. Cucaah an vun zulh i Moab ram zawn i Jordan tannak hna kha an tlaih hna i mi pakhat hmanh an tanter hna lo. ²⁹ Cun cu tan ah cun Moab mi cu thong hra tluk an thah hna, a ṭhawngmi le ralṭhami lawngte an dihlak in an si; pakhat hmanh an luat lo. ³⁰ Cucaah cu ni ah cun Moab cu Israel kut tangah an sung. Cun ram cu kum sawm riat chung aa din. ³¹ Amah hnuah cun Anath fapa Shamgar a hung si, Filistin mi za ruk caw tuknak fung in a thah hna; amah zong nih Israel kha a luatter ve.

¹ Cun Ehud thih hnuah, Israel mi nih Pathian mithmuh i thil ṭhalo kha an tuah ṭhan hoi. ² Cun Bawipa nih Kanaan siangpahrang Jabin, Hazor i siangpahrang a simi kut chungah khan a zuarh hna; a ralbawi cu Harosheth-Hagoiim i a ummi Sisera a si. ³ Khi tikah Israel mi nih Bawipa cu bawmhnak hal in an auh; zeitintiah Jabin nih thir rangleng za kua a ngei i Israel mi cu kum kul chung fak piin a hrem hna. ⁴ Khi caan ah profetnu Deborah, Lappidoth nupi nih cun Israel mi cu bia a ceih hna. ⁵ Efraim tlangram chung i Ramah le Bethel karlak i a ummi Deborah ungkung tangah khan a ṭhu tawn i an bia ceih awkah Israel mi cu a sinah an ra tawn. ⁶ Mi a hei thlah hna i Abinoam fapa Barak kha, Naftali ram Kedesh khua in a auh i, "Bawipa, Israel Pathian nih nangmah cu, ’Va kal law, Tabor Tlang ah na mi hna cu va pum hna, Naftali phun le Zebulun phun chungin thong hra va la hna, ⁷ cun Jabin ralbawi bik Sisera cu a rangleng hna le a ralkap hna he nangmah kha Kishon tiva pawng i rak in doh awkah, ka hnuh lai i amah cu nangmah kut chungah kan pek lai,’ an ti lo maw?" tiah a ti. ⁸ Cun Barak nih a sinah, "Na ka kalpi ahcun, ka kal lai; sihmanhsehlaw na ka kalpi lo ahcun, ka kal lai lo," tiah a ti. ⁹ Cun anih nih, "Kan kalpi hrimhrim lai; sihmanhsehlaw na kalnak lam nih hin nangmah sunparnak cu an phakpi lai lo, zeicahtiah Bawipa nih Sisera cu minu pakhat kut chungah a zuar lai," tiah a ti. Cun Deborah cu a tho i Barak he Kedesh ah an kal. ¹⁰ Cun Barak nih Zebulun le Naftali cu Kedesh ah a auh hna; cun mi sang khat a sinah cun an kal; Deborah zong a sinah a kal ve. ¹¹ Ken mi Heber cu Moses pu Hobab i tefa Ken mi hna sin khan aa ṭhen i Kedesh pawng Zaanannim ram i a ummi kuhthing hmun tiangin a puan thlam cu a va bunh. ¹² Abinoam fapa Barak cu Tabor Tlang ah a hung kal ti kha Sisera cu an chimh tikah, ¹³ Sisera nih cun a rangleng vialte, thir rangleng za kua kha le amah sin i a ummi vialte kha Harosheth-hagoiim in Kishon tiva ah a pumh hna. ¹⁴ Cun Deborah nih Barak cu, "Tho tuah, zeitintiah nihin hi Bawipa nih Sisera cu na kut chungah an pek ni a si. Bawipa cu na hmaiah a kal a si lo mei?" tiah a ti. Cucaah Barak cu Tabor Tlang cun amah a zultu mi sang khat he cun an vung kal. ¹⁵ Cun Bawipa nih Sisera le a rangleng vialte le a ralkap vialte cu vainam in a sualsawhrok dih cikcek hna; Sisera cu a rangleng cungin a ṭum i a ke in a zaam. ¹⁶ Cun Barak nih rangleng hna le ralkap hna cu Harosheth-hagoiim tiang a dawi hna i Sisera ralkap vialte cu vainam in an thi dih; pakhat hmanh an tang lo. ¹⁷ Sihmanhsehlaw Sisera cu a ke in Ken mi Heber i nupi Jael thlam ah a zam; zeitintiah Hazor siangpahrang Jabin le Ken mi Heber chung hna karlak ah cun remnak a um. ¹⁸ Cun Jael cu Sisera ton awkah khan a chuak i, "Rung pial ko, ka bawipa, ka sinah rung pial ko; ṭih hlah," tiah a ti. Cucaah a sinah cun thlam chungah a vung pial i puan in a khuh. ¹⁹ Cun anih nih, "Zaangfahnak in, ti din awk tlawm tein ka pe tuah, ka ti a hal ko," tiah a ti. Cucaah cawhnuk saphaw thawl pakhat a hun i din awk kha a pek i a khuh ṭhan. ²⁰ Cun anih nih, "Thlam innka ah khan dir law, mi an rat i nangmah kha, ’Hika ah hin aho tal an um maw?’ tiah an in hal ahcun, ’An um lo,’ tiah na ti lai," tiah a ti. ²¹ Sihmanhsehlaw Heber nupi Jael nih cun puan thlam khenhnak fung le sobul aa lak i, a baa i aa hngilh hluahmah lioah khan a sinah cun a thli tein a va kal i a phuzep ah a khenh, a tleng i vawlei ah aa bunh. Cucaah a thi. ²² Cun zohhmanh, Barak nih Sisera a dawi lioah khan, Jael nih ton awkah a va chuak i a sinah, "Ra hmanh, na kawlmipa cu kan hmuhsak lai," tiah a ti. Cucaah a thlam chungah cun a vung lut; khika ah cun Sisera cu a phuzep i puan thlam khenhnak fung he khan a rak ril ko. ²³ Cucaah khi ni ah Pathian nih Kanaan siangpahrang Jabin cu Israel mi hna hmaiah a tei. ²⁴ Cun Israel mi hna kut cu Kanaan siangpahrang Jabin cungah a ṭhawng chin lengmang i Kanaan siangpahrang Jabin cu an hrawh.

¹ Cun khi ni ah Deborah le Abinoam fapa Barak nih hla an sa i, ² "Hruitu hna nih Israel mi cu an hrui hna i Mizapi hna nih lungtho tein an i pek caah, Bawipa cu thangṭhat ko u. ³ "Ngai tuah u, maw siangpahrang hna, nan hna chi tuah u, maw bawi hna; Bawipa cu hla in ka hloi lai, Bawipa, Israel Pathian cu aw dawh in ka thangṭhat lai. ⁴ "Bawipa nangmah nih Seir in na kal tikah, Edom ram in na kal tikah, Vawlei cu aa hnin i van cu an zut, Asi, khuadawm nih ruah an surter hna. ⁵ Bawipa hmaiah tlang hna cu an i hnin, Bawipa, Israel Pathian, hmaiah cun khi Sinai tlang cu aa hnin. ⁶ "Anath fapa Shamgar chan ah, Jael chan ah, a bu in khual a tlawngmi hna cu an king i Khualtlawngmi hna nih lamhleng in an kal. ⁷ Israel chungah khuate mi hna cu an king cang, Nangmah, Deborah nih, Israel chungah nu bangin na thawh hlantiang cu an king ko. ⁸ Annih nih pathian thar kha an i thim hna tikah, Kutka ah raltuknak kha a um. Israel mi sang li chungah khan Phaw siseh, fei siseh, hmuh awk a rak ram maw? ⁹ Israel mi a haotu hna, mi lak i lungtho tein aa pemi hna leiah hin ka lung cu a um. Bawipa cu thangṭhat tuah u. ¹⁰ "Nannih laa raang hna cung i aa citmi hna, Nannih man fak puanphah cung i a ṭhumi hna, Nannih lam i a kalmi hna, A kong cu chim tuah u. ¹¹ Ti toihnak hmun ah hlasatu pawl aw zulh in, Khika ah annih nih Bawipa teinak cu an nolh ṭhan, Israel chung i a khuate mi hna i an teinak cu, an nolh ṭhan. "Cun Bawipa mi hna cu kutka hna leiah cun an vung kal. ¹² "I hlau tuah, i hlau tuah, Deborah! I hlau tuah, i hlau tuah, hla sa tuah! Tho tuah, Barak, na raltang cu hruai hna, Maw Abinoam fapa. ¹³ Khi tikah tuavon a tangmi hna cu an vung kal; Bawipa mi nih a ṭhawngmi kha doh awkah an kalpiak. ¹⁴ Efraim in an i thawh, khika in nelrawn ah an kal, Benjamin, nangmah le na mi hna cu an in zulh hna; Makhir in haotu hna, Cun Zebulun in ralbawi fung aa putmi hna cu, an vung kal; ¹⁵ Issakhar bawile cu Deborah he an ra i Issakhar cu Barak sinah zumhawktlak in a um; Nelrawn chungah cun amah he naih tein an vung choi. Reuben phun hna lakah cun, Lungthin i hriahdah lennak kha a um. ¹⁶ Zeicahdah tuurun hna ca i thonglawi tummi hei ngaih awk ko ah cun, Tuurun hna lakah cun na um peng ko? Reuben phun hna lakah cun, Lungthin i hriahdah lennak kha a um. ¹⁷ Gilead cu Jordan ralchan ah a um ko; Cun Dan zong cu zeicaahdah sangphawlawng hna sinah cun a um ko hnga? Asher cu rili kamah cun a ṭhu sawhsawh ko i, A tilawng dinhnak pawngah cun umhmun a khuar. ¹⁸ Zebulun hi an nunnak hmanh thih tiangin, raltuknak ah zei ah a rel lomi an si, Naftali zong hi lo chung i a sannak hmun ah a nunnak zei a rel lomi a si ve. ¹⁹ "Siangpahrang an ra, an rak doh hna; Khi tikah Taanak ah, Megiddo ti pawngah, Kanaan siangpahrang cu an doh hna; Ngun hranchaw zeihmanh an hmu lo. ²⁰ Vancung khin arfi nih an run tuk, An lam khin Sisera cu an run tuk. ²¹ Kishon tiva nih a fenh hna, A luangmi ti tha, Kishon tiva tha nih cun, a fenh hna. Hmailei ah ṭhawnnak he kal chin ko, ka nunnak! ²² "Khi tikah rangtum ke thawng cu, A rangtum ṭhawng hna an i chaih len thawng he, Fak piin a thang. ²³ "Meroz cu chiat serh tuah, tiah Bawipa vancungmi nih a ti, A chungah a ummi hna cu fak piin chiat serh tuah hna, Zeicahtiah Bawipa bawmh awkah an ra lo, A ṭhawngmi doh ah khan Bawipa kha bawmh awkah an ra lo. ²⁴ "Ken mi Heber nupi Jael cu Nu lakah thluachuak bik si ko seh, Thlam um nu lakah thluachuak bik si ko seh. ²⁵ Ti a hal i hnuk a rak pek, Bawi kheng in cawhnuk khal kha a rak pek. ²⁶ Thlam khenhnak fung kha aa lak, A orhlei kut in rianṭuantu hna sobul khan; Sisera cu a tuk i a lu kha a den, a phuzep ah khan a khenh i tleng lakin a khenh. ²⁷ A kehram ah a bawk rup ko, a tlu cang, Cawl loin a ril ko; A ke hramah a bawk rup ko, a tlu cang, A bawh rupnak ah, khika ah a thi diam ko. ²⁸ "Thlalang awng in a hei zoh, Sisera nu nih cun khuaikhar awng khan a hei cuanh: ’Zeicahdah a rangleng hi a rat bal hnga lo? Zeicahdah a rangleng hna ke thawng hi an rauh ko hnga? a ti. ²⁹ A nu fim bik hna nih khan an leh, Asilo, amah le amah aa let ṭhan ko, ³⁰ ’Hranchaw kha an hmu i an i phaw, a si lai lo maw? Pa pakhat caah nu pakhat maw pahnih cio dik; Sisera caah si in chumhmi puan hranchaw, Puan hranchaw si in chumh i tenhmi, Ka hngawng i i ngerh awkah, si in chumhmi puan tenhmi pahnih,’ a ti. ³¹ "Cu bantukin na ral vialte cu, maw Bawipa, rawk dih hna seh! Sihmanhsehlaw na hawikom hna cu, Ni khi a ṭhawnnak in a chuah bantuk khi si hna seh." Cun ram cu kum sawm li chung aa din.

¹ Israel mi nih Bawipa mithmuh i a ṭha lomi kha an tuah i Bawipa nih Midian kut chungah kum sarih a pek hna. ² Cun Midian kut nih cun Israel cu a tei; Midian ruang ah cun Israel mi hna nih tlang i a ummi khor hna le lungkua hna le ralhau hna cu an i ser. ³ Zeitintiah Israel mi nih thlaici an tuh fate Midian mi hna le Amalek mi hna le Nichuahlei mi hna nih an ra i an hung doh hna; ⁴ an hung chim hna i vawlei in a chuakmi thil cu Gaza pawng tiangin an hrawh dih i Israel chungah i cawmnak zeihmanh an nganh hna lo, tuu, cawtum le laa tiangin. ⁵ Zeitintiah annih nih an saṭil he an thlam he an ra i khaubawk zat in an ra; anmah he an kalauk he rel cawk an si lo; cucaah an ra luhpah in ram cu an hrawh dih ko. ⁶ Cun Midian ruangah cun Israel cu a ṭumchuk ngaingai i Israel mi nih bawmhnak duh ah Bawipa sinah an au. ⁷ Midian mi hna ruang i Israel mi nih Bawipa sin i an au tikah, ⁸ Israel mi sinah cun Bawipa nih profet pakhat a thlah; cun anih nih annih sinah "Hi bangin, Bawipa, Israel Pathian nih, Izipt ram in ka hun in hruai hna i saltannak inn chungin kan chuah hna; ⁹ cun Izipt mi hna kut le nanmah an hremtu hna kut chungin kan luatter hna i nan hmai in ka dawi hna i an ram cu kan pek hna; ¹⁰ cun nannih sinah, ’Keimah cu Bawipa nan Pathian cu ka si; an ram chung i nan umnak Amor mi hna pathian hna cu upatnak nan pe hna lai lo, ka ti; sihmanhsehlaw ka aw kha zei ah nan rel lo,’ a ti," tiah a ti. ¹¹ Cun Bawipa vancungmi cu a ra i Abiezrit fapa Joash ta a simi kuhthing toiah khan a ṭhu; cucu a fapa Gideon nih Midian mi hna sinin thuh awkah mitsur hang nennak chung i changvut a tuk lio kha a si. ¹² Cun Bawipa vancungmi cu a sinah a lang i a sinah, "Bawipa cu na sinah a um, nang a ṭhawng i ralṭha pa," tiah a ti. ¹³ Cun Gideon nih anih cu, "Bawipa, kan nawl, Bawipa cu kan sin i a um a si ahcun zeicahdah mah thil vialte nih hin a kan tlunhnawh kun? Kan pupa hna nih, ’Izipt ram in Bawipa nih a kan chuahpi lo mei,’ ti i kan sin i an ti tawnmi khuaruahhar thil vialte hna cu khuazei ah dah an si kun? Sihmanhsehlaw atu cu Bawipa nih a kan hlonh cang i Midian kut chungah a kan pek cang," tiah a ti. ¹⁴ Cun Bawipa cu a sin leiah aa mer i, "Hi na ṭhawnnak he hin kal law, Midian kut chungin Israel cu chuah tuah; keimah nih kan thlah lo mei?" tiah a ti. ¹⁵ Cun anih nih a sinah, "Bawipa, kan nawl ko, zeitindah Israel cu ka chuah khawh lai? Zohhmanh ka phun cu Manasseh chungah a der bik a si i kanmah innchungkhar chungah keimah cu a hme bik ka si," tiah a ti. ¹⁶ Cun Bawipa nih a chawnh i, "Sihmanhsehlaw nangmah sinah ka um lai i Midian mi hna cu mi pakhat tluk ceu in na thah dih ko hna lai," tiah a ti. ¹⁷ Cun anih nih, "Nangmah sinah mithmai ṭha ka hmuh a si ahcun, nangmah cu a ka chawntu na si tinak ah hmelchunhnak pakhat ka hmuksak tuah. ¹⁸ Nangmah sinah ka rat i ka laksawng ka rak put i na hmai i ka chiah hlantiang cu, hika hin i ṭhial sawh hlah tiah kan nawl," tiah a ti. Cun anih nih, "Na kir ṭhan hlantiang ka um ko lai," tiah a ti. ¹⁹ Cucaah Gideon cu a inn chungah a vung lut i meheh fa pakhat le changvut ephah pakhat in sermi thilnu cawh lo changreu kha a timhlamh; sa cu bawm chungah a khumh i a hang cu um chungah a chiah i a sinah kuhthing toiah cun a rak put hna i a pekchanh. ²⁰ Cun Pathian vancungmi nih cun a sinah, "Sa le thilnu cawh lo changreu kha la hna law, hi lung cungah hin chia hna, cun a hang kha toih hna," tiah a ti. Cun cu bang cun a tuah. ²¹ Khi tikah Bawipa vancungmi nih a kut i aa putmi ṭhiangṭhunh par cun, sa le thilnu cawh lo changreu kha a hei sawh hna i a tawngh hna; cun lung cun mei a tho i sa le thilnu cawh lo changreu cu a kangh dih hna; cun Bawipa vancungmi cu a mit hmuh lo ah a lo. ²² Khi tikah Gideon nih amah cu Bawipa vancungmi a si kha a hngalh; cun Gideon nih, "Aize, maw Bawipa Pathian! Atu cu Bawipa vancungmi cu hmaitonh in ka hmuh cang cu ta," tiah a ti. ²³ Sihmanhsehlaw Bawipa nih cun a chawnh i, "Na cungah daihnak um ko seh; ṭih hlah, na thi lai lo," tiah a ti. ²⁴ Cun khika ah Gideon nih Bawipa caah biakṭheng pakhat a ser i ’Bawipa cu daihnak a si’ tiah min a sak. Nihin ni tiang hin Abiezer mi hna ta a simi Ofrah khua ah cun a um ko. ²⁵ Khi zan ah Bawipa nih a sinah, "Na pa cawtum, cawtum pahnihnak kum sarih a timi kha la law, na pa ta a simi Baal biakṭheng kha chim dih tuah, cun a pawng i a ummi Asherah kha hau; ²⁶ cun hika ralhau cungah hin Bawipa na Pathian caah lung a ningcang te i tian in biakṭheng pakhat ser tuah; cun cawtum pahnihnak kha i lak law, Asherah na hau laimi thing cun khangh thawinak caah pechan tuah," tiah a ti. ²⁷ Cucaah Gideon nih, a sinum hna lakin pa pahra a lak hna i Bawipa nih a chimh bang khan a tuah; sihmanhsehlaw amah innchungkhar hna le khuami kha, chun i tuah awkah cun a ṭih tuk hna caah zan ah a tuah. ²⁸ Cu khuami cu zingkate i an thawh tikah, zohhmanh, Baal biakṭheng cu a cim i a pawng i Asherah cu aa hau i cawtum pahnihnak cu biakṭheng aa sami cungah cun pekchanh a rak si. ²⁹ Cun pakhat le pakhat cu, "Aho nih dah mah hi a tuah?" tiah an i ti. Cun an i dothlat i an i hal hnuah, "Joash fapa Gideon nih mah thil hi a tuah," tiah an ti. ³⁰ Cun khuami hna nih cun Joash cu, "Na fapa cu rak chuahpi, Baal biakṭheng cu a chimh i a pawng i a ummi Asherah cu a hau caah a thih awk a si," tiah an ti. ³¹ Sihmanhsehlaw Joash nih a hung chuahhnawhtu vialte hna sinah cun, "Baal cu maw nan ṭanh ko lai? Amah cu maw nan humhak ko lai? Amah a ṭanhtu paoh cu, zing ah hin thah a si lai. A biakṭheng kha chimh a si caah, pathian a si ahcun amah le amah i ṭanh ngat seh," tiah a ti. ³² Cucaah amah cu khi ni ah Jerubbaal tiah min sak a si, a sullam cu, a biakṭheng kha a chimh dih caah, "Baal nih amah cu doh tuah ngat seh," ti a si. ³³ Cun Midian mi vialte le Amalek mi hna le nichuahlei mi hna cu hmunkhat ah an ra i Jordan tiva tan in Jezreel Nelrawn ah an riak. ³⁴ Sihmanhsehlaw Bawipa thlarau cu Gideon cungah a tlung; cun muko kha a tum i Abiezer mi kha amah zulh awkah an i pum. ³⁵ Cun Manasseh mi vialte chung zongah lamkaltu a thlah hna i annih zong nih amah zulh awkah an chuak ve. Cun Asher, Zebulun le Naftali ah lamkaltu a thlah hna; annih zong nih an hun fonh ve hna. ³⁶ Cun Gideon nih Pathian sinah cun, "Nangmah nih na chim cang bangin keimah kut in Israel kha na chuah ding a si ahcun. ³⁷ Zohhmanh, phuhri ah tuu hmul ka chiah lai; tuu hmul cung lawng i dap a um i vawlei vialte cu a ro ko ṭung ahcun, khi tikah nangmah nih na chim cang bantukin keimah kut in Israel kha na chuah hna lai ti kha ka hngalh lai," tiah a ti. ³⁸ Cun cu bang cun a si taktak. A thaizing ah tuan tein a thawh i tuu hmul kha a sur tikah, kheng khat ti tuu hmul cun a sur. ³⁹ Cun Gideon nih Pathian sinah, "Ka cungah na thinhunnak kanghter sawh hlah, hi voi khatte hi cu ka chimter ko rih; hi voi khatte hi cu tuu hmul he hin ka hneksakter ko rih; tuu hmul lawnglawng hi ro seh law vawlei vialte ah hin dap tla seh tiah kan nawl," tiah a ti. ⁴⁰ Cun cu bangin Pathian nih cu zan ah cun a tuah; zeitintiah tuu hmul lawng cu a ro i vawlei cung vialte ah cun dap a um.

¹ Cun Jerubbaal (cucu Gideon) le amah sinah a ummi vialte cu zing tein an tho i Harod tiput pawngah an riak; cun Midian riahhmun cu an chaklei ah, Moreh tlang hram, nelrawn chungah a si. ² Bawipa nih Gideon cu a chawnh i, "Keimah nih Midian mi cu an kut chung i pek awkah na sin i a ummi hna kha an tam tuk; Israel nih, ’Keimah kut hrimhrim nih pei a ka khamh tiah,’ tiin ka cung lam ah aa uangthlar sual hnga. ³ Cucaah mizapi hnatheih ah, ’A thin a phangmi le a tha a thermi paoh inn ah kir hna seh,’ tiah va thanh tuah," tiah a ti. Cun Gideon nih a hneksak hna; sang hnih le thong hnih an kir i sang khat an tang. ⁴ Cun Bawipa nih Gideon cu, "Mi cu an tam tuk rih; tiva ah vun kalpi hna law, khika ah keimah nih kan hneksakpiak hna lai; nangmah sinah, ’Hi pa hi na sinah kal seh,’ ka timi paoh na sinah an kal lai; cun ’Hi pa hi na sinah kal hlah seh,’ ka timi paoh cu an kal lai lo," tiah a ti. ⁵ Cucaah mi cu ti ah cun a vun kalpi hna i Bawipa nih Gideon sinah cun, "Uico nih ti a liah bangin a lei in ti a liakmi paoh cu a dang tein na chiah hna lai; cu bantukin ti din awkah khuk bilmi zong," tiah a ti. ⁶ Cun a liah in a liakmi, a kut a kaa i a hun chiami cu, za thum an si; sihmanhsehlaw a dang vialte tu nih cun ti din awkah an khuk kha an i bil. ⁷ Cun Bawipa nih Gideon cu, "A liah in a liakmi mi za thum khan nannih cu kan khamh hna lai i Midian mi cu nan kut chungah kan pek hna lai; a dang vialte cu an inn cio ah kal hna seh," tiah a ti. ⁸ Cucaah mi hna i an thawl le an muko cu an sin khan a lak hna; cun Israel mi a dang vialte cu anmah le an thlam cio ah a kalter hna, sihmanhsehlaw za thum kha cu a umter hna; cun Midian riahhmun cu nelrawn chungah an thlang ah a si. ⁹ Khi zan ṭhiamṭhiam ah cun Bawipa nih amah cu, "Tho law, an riahhmun cu vung do tuah, zeitintiah na kut chungah kan pek cang. ¹⁰ Sihmanhsehlaw a kal na ṭih ahcun, na sinum Purah he khan riahhmun ah cun vung kal u; ¹¹ cun annih nih an chimmi kha nan theih lai i cu hnuah cun an riahhmun cu vung doh awkah na kut cu ṭhawnter an si lai," tiah a ti. Cun a sinum Purah he khan riahhmun chung i a ummi hriampumi hna ralven buk ah khan an vung kal. ¹² Cun Midian mi hna le Amalek mi hna le Nichuahlei mi vialte hna cu nel ah cun an tam leiah khaubawk zat in an um tengtung ko i an kalauk hna cu rel cawk lo, an tam ning cu rilikam i thetse zat an si. ¹³ Gideon nih a rat tikah, zohhmanh, mipa pakhat nih a hawipa kha a mang a rak chim len ko i, "Zohhmanh, mang pakhat ka manh; cun zohhmanh, barli changreu hlum khat cu Midian mi hna riahhmun ah a rung ril i riahbuk kha a phan i a khen i cucaah cun a tlu, cun a bingtalet in aa let i cucaah riahbuk cu per thlup in a ril ko," tiah a ti. ¹⁴ Cun a hawipa nih cun, "Mah hihi zeidang zeidang si loin Israel mi Joash fapa Gideon i a vainam a si ko cu; Pathian nih Midian le ralkapbu vialte cu a kut chungah a pek cang hna," tiah a leh. ¹⁵ Gideon nih mang le a sullam kong an i chimh cu a theih tikah Pathian kha a biak; cun Israel riahhmun ah khan a ra kir i, "Tho tuah u, zeitintiah Pathian nih Midian ralkapbu cu nan kut chungah an pek cang hna," tiah a ti. ¹⁶ Cun mi za thum kha phu thum ah a cheu hna i an dihlak in an kut chungah muko le thawllawng, a chung i meifar a ummi kha, a pek cio hna. ¹⁷ Cun annih cu, "Keimah kha ka zoh u law, ka tuah bantukin tuah ve u; riahhmun tonter bik ka phak tikah keimah tuah bantukin nan tuah ve lai. ¹⁸ Keimah le ka sin i a ummi vialte nih muko kha kan tum tikah, riahhmun velchum i a ummi vialte zong nih muko kha nan rak tum ve lai i, ’Bawipa ca le Gideon caah,’ ti in nan au lai," tiah a ti hna. ¹⁹ Cucaah Gideon le a sinah a ummi za khat hna cu zan ven a laifang hramthawk, a cawngtu an i chiah kate ah khan, riahhmun tonter cu an va phan; cun muko kha an tum i an kut i an i putmi thawl cu an den hna. ²⁰ Cun phu thum hna nih khan muko kha an tum i thawl kha an khuai hna, an kehlei kut in meifar kha an i put i an orhlei kut in tum awk muko kha an i put; cun, "Bawipa ca le Gideon caah vainam pakhat!" tiah an au. ²¹ Cun riahhmun a velchum khan an umnak hmun cio ah an dir i ralkap vialte cu an le dih; an au i an zamter dih hna. ²² Cun muko za thum kha an tum tikah Bawipa nih ralkap vialte cu anmah le anmah kha an vainam in a tukter ciammam hna i ralkap hna cu Zererah lei i Beth-shittah tiang an zam, Tabbath pawng Abel-meholah ramri tiangin. ²³ Cun Israel mi hna cu Naftali le Ahser le Manasseh dihlak chungin an kawh hna i Midian kha an dawi hna. ²⁴ Cun Gideon nih Efraim tlangram chung dihlak ah lamkaltu a thlah hna i, "Midian mi doh awkah rung ṭum tuah u, ti kha rak lakkanh hna u Beth-barah tiangin, cun Jordan zong," tiah a ti. Cucaah Efraim mi vialte cu an kawh hna i ti kha Beth-barah tiangin an tlaih hna, cun Jordan zong. ²⁵ Cun Midian bawi pahnih Oreb le Zeeb kha an tlaih hna; Midian mi an dawi pah hna ah cun, Oreb cu Oreb lung ah an thah i Zeeb cu Zeeb mitsur nennak ah an thah; cun Oreb lu le Zeeb lu cu Gideon sinah Jordan tiva ral ah an rak phorh hna.

¹ Cun Efraim mi nih amah cu, "Kan cung i na tuahmi hi zeidah a si, zeicahdah Midian doh awkah na kal tikah na kan kawh ve lo?" tiah an ti. Cun fak piin an sik. ² Cun anih nih annih cu, "Nanmah he tahchunh awk tlak in zeidah ka tuah? Efraim mitsur muasuat cu Abiezer mitsur lawh silingpi nakin a ṭha deuh lo maw? ³ Pathian nih nan kut chungah Midian bawi Oreb le Zeeb cu an pek cang hna; nannih he tahchunh awk tlak in kei nih zeidah ka tuah khawh?" tiah a ti hna. Cu tikah cu bia a hun chim tikah, a cung i an thinhunnak cu a dai. ⁴ Cun Gideon le a sin i a ummi za thum hna cu Jordan tiva cu an phan i an tan, an ba ko, sihmanhsehlaw an dawi lengmang ko hna. ⁵ Cu caah Sukkoth khuami hna sinah cun, "Zaangfahnak in keimah a ka zultu hna kha changreu rak pe hna u; zeicahtiah an baa cang i Midian siangpahrang Zebah le Zalmunna kha ka dawi ṭung hna," tiah a ti. ⁶ Cun Sukkoth khua chung upa hna nih cun, "Zebah le Zalmunna cu na kut chungah maw an um cang i changreu na ralkap kan pek hna hnga cu?" tiah an ti. ⁷ Cun Gideon nih, "Si ko seh, Zebah le Zalmunna cu Bawipa nih ka kut chung i a ka pek hna tikah ramlak i hling le so ah nan taksa cu kan cilchih te hna lai," tiah a ti. ⁸ Cun khika in Penuel ah a hung kal i cu bantuk ṭhiamṭhiam in a hung chimh ve hna; cun Penuel mi hna nih cun Sukkoth mi hna nih an leh bang khan an rak leh ve. ⁹ Cun Penuel mi hna cu, "Daihnak in ka rat ṭhan tikah hi innsang hi ka chimh lai," tiah a ti hna. ¹⁰ Cun Zebah le Zalmunna cu an ralkapbu he Karkor ah an um, sang khat le thong nga tluk an si, Nichuahlei mi ralkap vialte chungin nam tlaimi sing khat le sang hnih an thih cang caah a tangmi dihlak cu mah hihi an si. ¹¹ Cun Gideon cu, a bu in khualtlawnnak lam, Nobah le Jogbehah nichuahlei khan a hung kal i ralkapbu a hung tuk hna; ralkap cu hnangam tuk in an rak um. ¹² Cun Zebah le Zalmunna cu an zam; cun a dawi hna i Midian siangpahrang pahnih Zebah le Zalmunna cu a tlaih hna i ralkap vialte cu i comcawroi loin a tuah dih hna. ¹³ Cun Joash fapa Gideon cu raltuknak hmun khan Heres cho lei cun a kir. ¹⁴ Sukkoth khuami tlangval pakhat kha a tlaih i bia a hal; amah nih cun Sukkoth khuachung bawi le upa vialte, sawm sarih le pasarih cu, a ṭialpiak dih. ¹⁵ Cun Sukkoth mi sinah cun a ra i, " ’Zebah le Zalmunna cu na kut chungah maw an um cang i kannih nih a bami na mi hna cu changreu kan pek hna hnga,’ tiin nan bia eng i nan rak ka tinak Zebah le Zalmunna hi zoh tuah hna ngat u," tiah a ti hna. ¹⁶ Cun khuachung upa cu a tlaih hna i ramlak hling le so cu a lak hna, hling le so cun Sukkoth khuachung mi hna cu a cawnpiak hna. ¹⁷ Cun Penuel innsang kha a chimh i khuachung mi kha a thah hna. ¹⁸ Cun Zebah le Zalmunna cu, "Tabor i nan thahmi hna kha khuazei ah dah an um?" tiah a ti hna. Annih nih, "Nangmah bantuk hi an si ve ko, an dihlak in; siangpahrang fapa an lo hna," tiah an leh. ¹⁹ Cun anih nih, "Annih cu ka unau an si, ka nu fapa an si. Bawipa a nun bangin, annih cu a nung in rak zuah hna u law cu, kan that hna hnga lo," tiah a ti. ²⁰ Cun a fapa upa bik Jether sinah cun, "Tho law, that hna," tiah a ti. Sihmanhsehlaw tlangval nih cun a vainam aa zuh lo; tlangvalte a si rih caah a ṭih. ²¹ Cun Zebah le Zalmunna nih cun, "Nangmah kha tho law, kan that ko; zeitintiah mi cu patling a si bangin pei a thazang zong cu a si ve cu," an ti. Cun Gideon cu a tho i Zebah le Zalmunna cu a thah hna; cun an kalauk hngawng i oihmi ṭhi cu a lak hna. ²² Cun Israel mi nih Gideon cu, "Nangmah nih kan uk tuah, nangmah le na fapa le na tu tiangin; zeicahtiah nangmah nih Midian kut chungin na kan chuah," tiah an ti. ²³ Gideon nih annih cu, "Keimah nih kan uk hna lai lo, ka fapa zong nih an uk hna lai lo; Bawipa nih an uk hna lai," tiah a ti hna. ²⁴ Cun Gideon nih annih cu, "Thil pakhat bel hal kan duh ko hna; nan dihlak in nan hranchaw chung i hnatonh kha ka pe cio tuah u," tiah a ti hna. (Zeitintiah Ishmael mi an si caah sui hnatonh an ngei.) ²⁵ Cun annih nih, "Lunglawm tein kan in pek ko lai," tiah an leh. Cun puan an phah i an dihlak in an hranchaw chung i hnatonh cu, cu chungah cun an chiah cio. ²⁶ Cun a halmi hna sui hnatonh hna cu sui shekel thong khat le za sarih a si: ṭhi le kutkhih le Midian siangpahrang hna nih an i aihmi puan sen duk hna le an kalauk hna i an hngawng i an i oihmi hngawngoih hna lengah. ²⁷ Cun mah cu cun Gideon nih tlangbawi angki a ser i amah khua, Ofrah khua ah cun a chiah; cun mah cucu Israel mi vialte nih hlawhhlang an celhhnawh i Gideon le a innchungkhar caah foihnak ah a cang. ²⁸ Cu bangin Midian cu Israel mi hna hmaiah tei a si i an lu kha an hler ti lo. Cun Gideon chan chungah ram cu kum sawm li dinhnak a hmu. ²⁹ Joash fapa Jerubbaal cu a kal i amah innte ah a um. ³⁰ Gideon nih fapa sawm sarih, amah hrinmi hrimhrim a ngeih hna, zeicahtiah nupi tampi a ngei. ³¹ Cun a nupi chun, Shekhem i a ummi zong nih fapa a hrinpiak i a min ah Abimelek a sak. ³² Cun Joash fapa Gideon cu tar tlung in a nung i a thi, a pa Joash thlan ah, Abiezer mi hna khua Ofrah khua ah an vui. ³³ Gideon a thih cangka tein Israel mi cu an i mer hoi i Baal kha hlawhhlang an celhhnawh hoi hna i Baal-berith kha an pathian ah an ser. ³⁴ Cun Israel mi nih, an velchum i a ummi an ral hna kut in a chanhtu hna Bawipa an Pathian kha, an cing ti lo; ³⁵ cun Jerubbaal (cucu Gideon kha a si) innchungkhar cung zongah khan, Israel mi cung i ṭhatnak a tuahmi vialte caah khan, zaangfahnak an langhter lo.

¹ Cun Jerubbaal fapa Abimelek cu Shekhem khua ah a nu rualchan hna sinah khan a va kal i annih le a nu pale hna cu an phun ningpi khan a chawnh hna i, ² "Shekhem khua chung i a ummi vialte cu, ’Nannih caah zeidah a ṭha deuh, Jerubbaal fapa sawm sarih nih an dihlak in an in uk hna ah maw, pakhat lawng nih an uk hna ah dah?’ tiin an hna chungah va chim tuah u. Cun keimah cu nan ruh le nan sa ka si kha va philh fawn hlah u," tiah a ti hna. ³ Cun a nu rualchan hna nih cun amah ai in hi bia vialte cu Shekhem mi vialte hna an hna chungah an chim i an lung cu Abimelek zulh awkah khan a tlu deuh, zeicahtiah annih nih, "Amah cu kan unau a si," an ti. ⁴ Cun Baal-berith inn chungin ngun phar sawm sarih an pek i cu cun Abimelek nih cun mitoktawlol le mikhongkhol kha aa roih hna i amah kha an zulh. ⁵ Cun Ofrah khua i a pa inn ah khan a va kal i Jerubbaal fapale hna, a unau hna cu, minung sawm sarih, lung pakhat cungah a va thah hna; sihmanhsehlaw Jotham, Jerubbaal fapa a hniang bik tu cu aa thuh caah a tang. ⁶ Cun Shekhem khuami vialte le Beth-millo khuami vialte cu an i pum i Abimelek cu Shekhem khua lungphun hram i kuhthing pawngah cun siangpahrang ah an ser. ⁷ Mah cucu Jotham kha an chimh tikah, Gerizim Tlang par ah cun a hung kai i a dir i fak piin a au i annih cu, "Shekhem mi hna, ka bia ngai tuah u, Pathian nih nan bia a ngaih nakhnga. ⁸ Voi khat cu thingkung nih an siangpahrang ca i chiti thuh awkah an kal; cun annih nih oliv kung kha, ’Kan uk tuah,’ tiah an va ti. ⁹ Sihmanhsehlaw oliv kung nih cun, ’Minung le pathian hna nih upatnak an hmuhnak ka thau hi kaltak in thingkung hna cung i kui len awkah ka kal hnga maw?’ tiah a ti hna. ¹⁰ Cun thingkung hna nih cun theipi kung cu, ’Nangmah ra law, kan uk tuah,’ tiah an ti. ¹¹ Sihmanhsehlaw theipi kung nih cun, ’Ka thlumnak le ka tlai ṭha cu kaltak in thingkung hna cung i kui len awkah ka kal hnga maw?’ tiah a ti hna. ¹² Cun thingkung hna nih cun mitsur ruang cu, ’Nangmah ra law, kan uk tuah,’ tiah an ti. ¹³ Sihmanhsehlaw mitsur ruang nih cun, ’Minung le pathian hna an lung a lawmhtertu ka mitsur hang cu kaltak in thingkung hna cung i kui len awkah ka kal hnga maw?’ tiah a ti hna. ¹⁴ Khi tikah thingkung vialte nih cun hling kha, ’Nangmah ra law, kan uk tuah,’ tiah an ti. ¹⁵ Cun hling nih cun thingkung hna cu, ’Nannih nih lungthin tak tein nan siangpahrang ca i chiti nan ka thuh a si ahcun, ka thladem ah hin ra u law, rak i dor tuah u; sihmanhsehlaw cu bantukin a si lo ahcun, hlingbur chung cun mei chuak seh law, Lebanon sidar thing khi kangh dih hna seh,’ a ti hna. ¹⁶ "Cucaah Abimelek kha siangpahrang ah nan ser tikah khan nannih nih lungthin tak te le hmaizahnak in nan tuah a si i, cun Jerubbaal le a chungle hna cungah khan, a tuahnak nih a phut bantukin nan tuah a si ahcun — ¹⁷ zeitintiah ka pa nih ral an dohpiak hna i a thihphah dengmang i Midian kut chungin an chuah hna; ¹⁸ nannih tu nih cun nihin ni ah hin ka pa chungle cu nan doh hna i a fapa sawm sarih kha lungpi pakhat cungah minung sawm sarih cu nan thah hna; cun a salnu fapa Abimelek cu nan rualchan a si caah Shekhem khuami cungah siangpahrang ah nan ser — ¹⁹ cun nihin ah hin nannih nih Jerubbaal le a chungle cungah lungthin tak in le hmaizahnak in a tuah nan hei si ko ahcun Abimelek cungah cun i lawm ko u law, anih zong nannih cungah i lawm ve ko seh; ²⁰ sihmanhsehlaw cu bantukin a si lo ahcun, Abimelek chung hin mei chuak seh law, Shekhem le Beth-millo khuami kha kangh hna seh; cun Shekhem le Beth-millo khuami chung khan mei chuak ve seh law, Abimelek kha kangh ve seh," tiah a ti. ²¹ Cun Jotham cu a unau Abimelek kha a ṭih caah a tli i a zam diam i Beer khua ah a kal i khika ah a um. ²² Abimelek nih Israel cu kum thum a uk hna. ²³ Cun Pathian nih Abimelek le Shekhem khuami hna karlak ah khan thlarau ṭhalo a thlah i Shekhem khuami nih khan Abimelek cu an rawi; ²⁴ mah cucu, Jerubbaal fapa sawm sarih hna cung i sumṭhen loin an tuahnak kha a tlun i, an thi cu anmah a thattu hna an unaupa Abimelek le a unau hna thah awkah a kut a ṭhawntertu hna Shekhem khuami cungah khan, chiah a si nakhnga caah a si. ²⁵ Cun Shekhem khuami nih tlangpar hna ah khan amah lamhruang attu dingah mi an chiah hna i anmah pawng in cu lam in a kalmi paoh cu an rak ramh hna; cun cu kong cu Abimelek kha an chimh. ²⁶ Cun Ebed fapa Gaal cu a rualchan hna he Shekhem ah an i ṭhial i Shekhem khuami hna nih cun amah cungah khan zumhnak an ngei. ²⁷ Cun lo ah khan an kal i an mitsur dum chung i mitsur tlai kha an pumh hna i an nen hna i puai an tuah i an Pathian inn chungah khan an lut i, an ei an ding i Abimelek kha an zawmhtaih. ²⁸ Cun Ebed fapa Gaal nih, "Abimelek cu ahodah a si i kannih Shekhem khua mi cu ahodah kan si i a rian kan hei ṭuan hnga cu? Jerubbaal fapa le a rianṭuantu bawi Zebul nih khan Shekhem pa Hamor i a mi hna kha an rian an rak ṭuanpiak hna lo maw? Cu ti a si ahcun, zeicahdah amah cu a rian kan ṭuanpiak lai? ²⁹ Hi mi hna hi ka kut tangah um hna seh law, ka hei duh hnga dah! Abimelek cu ka hei ṭhial diam ko hnga. Abimelek cu ka hei thawh hnga i, ’Na ralkapbu cu nganter law, hung chuak ngat,’ ka ti hnga," tiah a ti. ³⁰ Ebed fapa Gaal bia cu khua uktu Zebul nih a theih tikah a thin a kangh in a kang. ³¹ Cun Abimelek sinah, Arumah ah, lamkaltu a hei thlah hna i, "Zohhmanh, Ebed fapa Gaal le a rualchan hna nih Shekhem khua ah an ra riangmang i nangmah doh awkah khuami kha an forh hna. ³² Cucaah zan ah nangmah le na sinah a ummi hna kha kal u law, lo in rak bawh hna u. ³³ Cun zinglei ah, ni a chuah cangkate in, tuan tein tho u law, khua cu nam u; cun amah le a sinah a ummi hna nih nannih doh awkah an chuah tikah, caan nih a sersiamning in an cungah tuah u," tiah a ti. ³⁴ Cun Abimelek le a sinah a ummi vialte cu zan in an tho i phu li in Shekhem cu an bawh. ³⁵ Cun Ebed fapa Gaal cu a chuak i khua hauka luhnak ah cun a dir; cun Abimelek le a sinah a ummi hna cu lamhruang ahnak khan an hung chuak. ³⁶ Cun Gaal nih mi kha a hmuh tik hna ah Zebul cu, "Zohhmanh, tlangpar in mi an rung khi!" tiah a ti. Cun Zebul nih anih cu, "Tlang thla khi minung bantukin na hmuh hna i a si ko lai," tiah a ti. ³⁷ Gaal nih, "Zohhmanh, ram laifang in mi an rung ṭum khi, cun phu khat cu Camhthiammi Hna Kuhthing lei in an ra khi," tiah a ti ṭhan. ³⁸ Cun Zebul nih anih cu, "Khuazei ah dah na kaa kha a si cang kun, nangmah nih a si lo mei, ’Abimelek cu ahodah a si i a rian kan ṭuan hnga cu,’ na rak ti kha. Mah mi hna hi zei i na rak rel lomi kha an si lo maw? Chuak law, i tawng tuah ngat u," tiah a ti. ³⁹ Cun Gaal cu Shekhem mi hna hmai bik ah khan a kal i Abimelek he an i do. ⁴⁰ Cun Abimelek nih a dawi i a hmaiah a zam; mi tampi hmapu in an ril, hauka luhnak tiang. ⁴¹ Cun Abimelek cu Arumah ah a um; cun Zebul nih Gaal le a rualchan kha a dawi hna i Shekhem ah cun an um kho ti lo. ⁴² A thaizing ah mi cu lo ah an kal. Cu kong cu Abimelek kha an chimh. ⁴³ A mi kha a lak hna i phu thum ah a cheu hna i lo in an bawh hna; cun a hei zoh i mi kha khua chungin an chuah kha a hmuh, cun a rak tuk hna i a thah hna. ⁴⁴ Lo chung i a ummi vialte kha phu hnih hna nih khan an nam hna i an thah lio hna ah khan, Abimelek le a sinah a ummi phu kha an le i khua hauka luhnak ah khan an dir. ⁴⁵ Cun cu ni cu chun nitlak in Abimelek nih khua kha a tuk; a tei i a chung i a ummi kha a thah hna; khua kha a hrawh cikcek i cite a phulh. ⁴⁶ Shekhem Innsang i a ummi vialte nih cu thawng cu an theih tikah El-berith inn ralhruang chungah cun an lut. ⁴⁷ Shekhem Innsang mi vialte hna cu hmunkhat ah an i pum tiah Abimelek kha an chimh. ⁴⁸ Cun Abimelek cu a sin i a ummi vialte hna he tiah Zalmon Tlang ah an hung kai; cun Abimelek nih hreitlung pakhat aa put i chawlthep bur khat a sam i a tun i a liang ah aa chawnh. Cun a sin i a ummi hna kha, "Ka tuahmi nan hmuhmi hi khulrang tein ka tuah bantukin tuah ve u," tiah a ti hna. ⁴⁹ Cucaah an dihlak in bur khat cio an i sam i Abimelek zulh in ralhruang hngauh in an chiah cio i an cung i ralhruang cu an khangh i cucaah Shekhem Innsang i a ummi vialte zong cu an thi, pa he nu he thong khat tluk an si. ⁵⁰ Cun Abimelek cu Thebez ah a kal i Thebez cu a chim i a lak. ⁵¹ Sihmanhsehlaw khua chungah cun a ṭhawngmi innsang pakhat a um i khua chung mi vialte cu cuka ah cun an zam dih, nu he pa he an dihlak in, cun cuka ah cun an i hrenh khumh; cun innsang inncung ah cun an kai. ⁵² Cun Abimelek cu innsang ah cun a ra i a tuk i innsang innka kha mei in duah awkah a hei naih. ⁵³ Cun nu pakhat nih rialnak lung a cunglei khin Abimelek cu a lu ah a vun cheh i a lu cu a kuai. ⁵⁴ Khi tikah a hriamnam putu tlangvalpa cu khulrang in a auh i, "Na vainam kha i zuh law, ka that tuah, cu ti a si lo ahcun, ’Nu pakhat nih a thah,’ an ka ti sual hnga," tiah a ti. Cun a tlangvalpa nih cun tleng lakin a chunh i a thi. ⁵⁵ Cun Israel mi nih Abimelek a thih kha an hngalh tikah anmah le an inn cio ah an tlung. ⁵⁶ Cuticun Pathian nih Abimelek cu, a pa cung i ṭhat lonak a tuahmi, a unau sawm sarih a thahmi hna ruangah khan, teirul a cham; ⁵⁷ cun Shekhem khuami hna an ṭhat lonak zong kha Pathian nih anmah lu cung lila ah a tlakter i Jerubbaal fapa Jotham chiatserhnak kha an cungah a tlung.

¹ Abimelek hnuah Issakhar phun mi Dodo fapa Puah i fapa Tola cu Israel mi chuah awkah a hung chuak; amah cu Efraim tlangram Shamir khua ah a um. ² Cun amah nih Israel mi cu kum kul le kum thum bia a ceih hna. Cun a thi i Shamir ah an vui. ³ Amah hnuah Gilead mi Jair cu a hung chuak i Israel mi cu kum kul le kum hnih bia a ceih hna. ⁴ Cun amah cu fapa sawm thum, laa sawm thum aa citmi a ngei; cun khua sawm thum an ngei i nihin tiangin Havvoth-jair ti an si i Gilead ram ah an um. ⁵ Cun Jair cu a thi i Kamon ah an vui. ⁶ Cun Israel mi nih Bawipa mithmuh ah ṭhat lonak an tuah ṭhan hoi i Baal le Ashtaroth le Siria pathian hna le Sidon pathian hna le Moab pathian hna le Ammon mi pathian hna le Filistin mi pathian hna kha an rian an ṭuan hna; Bawipa kha an hlawt i amah kha a rian an ṭuan lo. ⁷ Cun Bawipa thinhunnak cu Israel cungah a alh i Filistin mi hna kut chungah le Ammon mi hna kut chungah a zuarh hna i ⁸ annih nih khi kum ah Israel mi cu an rial hna i an hrem hna. Jordan tivaral Gilead ram chungah a ummi Amor mi ram i a ummi Israel tefa vialte hna cu, kum hleiriat chung an hrem hna. ⁹ Cun Ammon mi hna nih Judah le Benjamin le Efraim te chung zong kha doh awkah Jordan kha an tan; cucaah Israel cu chimpit vansang in a um. ¹⁰ Cun Israel mi nih Bawipa kha an auh i, "Nangmah cungah kan sual cang, zeitintiah kan Pathian kha kan hlawt i Baal kha kan biak hna," tiah an ti. ¹¹ Cun Bawipa nih Israel mi hna sinah cun, "Izipt mi hna le Amor mi hna le Ammon mi hna le Filistin mi hna sinin kan chuah hna lo maw? ¹² Sidon mi hna zong le Amalek mi hna le Maon mi hna nih nannih kha an in hrem hna i nannih nih nan ka auh i an kut chungin kan chuah hna. ¹³ Sihmanhsehlaw nannih nih nan ka hlawt i pathian dang kha nan biak hna; cucaah kan chuah ti hna lai lo. ¹⁴ Va kal u law, nan i thimmi pathian cu va au hna u; annih nih nannih cu vansang au in nan um lio caan ah in chuah hna seh," tiah a ti. ¹⁵ Cun Israel mi nih Bawipa sinah cun, "Kannih cu kan sual cang; nangmah nih a ṭha na tining paoh in kan cungah tuah ko; a chuah bel nihin ah hin zaangfahnak in kan chuah ko sawh," tiah an ti. ¹⁶ Cucaah annih sin i ramdang pathian hna kha an hlonh hna i Bawipa kha an biak; cun Israel mi hna retheihnak ruangah khan a thin a hung ngaingai. ¹⁷ Cun Ammon mi hna cu hriamnam la u, tiah ti an si i Gilead ah an riak; cun Israel mi hna cu hmun khat ah an i pum i Mizpah ah an riak. ¹⁸ Cun mizapi, Gilead ram hruaitu hna cu pakhat le pakhat an i chawn i, "Ammon mi doh a thawktu cu ahodah a si lai? Gilead ram chung i a ummi vialte hna i an haotu ah a si lai," tiah an ti.

¹ Gilead mi Jepthah cu a ṭhawngmi ralkap a si, sihmanhsehlaw amah cu hlawhhlangnu fapa a si. Gilead cu Jepthah pa a si. ² Cun Gilead nupi zong nih cun fapa hna a hun hrinpiak i a nupi fapa hna cu an hung ṭhan tikah Jepthah cu an hlonh i amah cu, "Nang cu kan pa inn chungah ro na co lai lo, nu dang fa na si caah," an ti. ³ Khi tikah Jepthah cu a unau hna sinin a zam i Tobram ah a um; cun santlailo pawl kha Jepthah sinah cun an i pumkhawm i amah he cun ral an hranh tawn. ⁴ Cun tlawmpal hnuah Ammon mi nih Israel mi kha an doh hna. ⁵ Cun Ammon mi hna nih Israel mi kha an doh tik hna ah, Gilead upa hna cu Jepthah kha Tobram in va lak awkah an kal; ⁶ cun Jepthah cu, "Ra law, kan hruitu si tuah, Ammon mi kha kan doh khawh hna nakhnga," tiah an ti. ⁷ Sihmanhsehlaw Jepthah nih Gilead upa hna cu, "Nannih nih nan ka huat i ka pa inn in nan ka dawi a si lo mei? Zeicahdah atu ah harnak chung nan phak tikah ka sinah nan rat?" tiah a ti hna. ⁸ Cun Gilead upa hna nih Jepthah cu, "Cucaah cun pei atu cu, kan sin i na kal i Ammon mi cu na doh hna i Gilead chung i a ummi vialte i kan lu na si nakhnga, nangmah leiah kan i mer cu," an ti. ⁹ Jepthah nih Gilead upa hna cu, "Ammon mi hna he i doh awkah inn i nan ka tlunpi ṭhan a si i, annih cu Bawipa nih keimah kha a ka pek ahcun nan lu ka si hnga," tiah a ti hna. ¹⁰ Cun Gilead upa hna nih Jepthah cu, "Bawipa cu kan karlak i biahngaltu a si lai; na chim bantukin kan tuah hrimhrim lai," tiah an ti. ¹¹ Cucaah Jepthah cu Gilead upa hna sinah cun a kal i mizapi nih cun an lu le an hruitu ah an ser; cun Jepthah nih a bia vialte cu Bawipa hmaiah Mizpah ah a chim. ¹² Cun Jepthah nih Ammon mi hna siangpahrang sinah cun lamkal a hei thlah hna i, "Zei tuah awk dah ka cungah na ngeih i ka ram doh awkah ka sinah na rat?" tiah a ti. ¹³ Cun Ammon mi hna siangpahrang nih Jepthah i a lamkal hna cu a rak leh hna i, "Israel mi nih Izipt ram in an rat lioah khan ka ram, Arnon in Jabbok tiang, cun Jordan tiang an lak caah, cucaah atu cu remnak tein ka khirh ṭhan tuah hna," tiah a ti. ¹⁴ Cun Jepthah nih Ammon mi hna siangpahrang sinah cun lamkal a hei thlah ṭhan hna i ¹⁵ anih sinah, "Hi bangin Jepthah nih a ti: Israel mi nih Moab ram siseh Ammon mi hna ram siseh an la lo, ¹⁶ sihmanhsehlaw Izipt ram in an hung kai tikah Israel mi hna cu ramlak in Rili Sen ah an kal i Kadesh an phan. ¹⁷ Cu tikah Israel mi nih Edom siangpahrang sinah lamkal an hei thlah hna i, ’Na ram chungin kan kalter ko, tiah kan in nawl,’ an ti; sihmanhsehlaw Edom siangpahrang nih a ngai duh lo. Cun Moab siangpahrang sin zongah an hei thlah hna, sihmanhsehlaw a hna a tla duh lo. Cucaah Israel mi cu Kadesh ah an tang ko. ¹⁸ Cun ramlak in an kal i Edom ram le Moab ram kha an vel hna i Arnon khattelei kamah an riak; sihmanhsehlaw Moab ram chungah an lut lo, zeitintiah Arnon cu Moab ramri a si. ¹⁹ Cun Israel mi nih Amor mi siangpahrang, Heshbon siangpahrang Sihon sinah lamkal an hei thlah hna; cun Israel mi nih a sinah, ’Na ram chungin kan ram ah kan kalter ko sawh,’ tiah an nawl. ²⁰ Sihmanhsehlaw Sihon nih Israel mi hna cu a ram chungin kal awkah a zum hna lo; cucaah Sihon nih a mi vialte kha a pumh hna i Jahaz ah an riak i Israel mi kha an doh hna. ²¹ Cun Bawipa, Israel mi hna Pathian nih, Sihon le a mi vialte cu Israel mi kut chungah a pek hna i an tei hna; cucaah cu ram i a ummi Amor mi hna ram vialte cu Israel mi nih an co. ²² Cun annih nih Amor mi hna ram vialte cu Arnon in Jabbok tiang, ramlak in Jordan tiang an co. ²³ Cuticun Bawipa, Israel mi hna Pathian nih, a mi Israel mi hna hmai in Amor mi hna cu a pawnchuah hna; annih cu nang nih na co awk an si hnga maw? ²⁴ Na pathian Khemosh nih co awkah an pekmi kha na co awk cu a si hnga lo maw? Bawipa kan Pathian nih kan hmai in a pawnchuahmi vialte cu kannih nih kan co hna lai. ²⁵ Nangmah hi, Moab siangpahrang Zippor i a fapa Balak nakin, zei ti tal in na ṭha deuh maw? Amah nih Israel mi hna kha a hnahnawh hna in a do bal hna maw? ²⁶ Israel mi nih Heshbon le a khuate hna chungah le Aroer le a khuate hna chungah le, Arnon tiva kam i a ummi khua vialte hna chung i an um lio, kum za thum chungah khan, zeicahdah kha chungah khan na rak lak ṭhan hna lo? ²⁷ Cucaah nangmah cungah ka sual lo, ka cung i ral na ser caah hin nangmah tu nih ka cungah na sual; Bawipa, Biaceihtu nih nihin ah hin Israel mi le Ammon mi hna karlak ah bia khiak seh," tiah a ti. ²⁸ Sihmanhsehlaw Ammon mi hna siangpahrang nih cun Jepthah nih a hei cahmi bia cu zeihmanh ah a rel lo. ²⁹ Cun Bawipa Thlarau cu Jepthah cungah a tlung i Gilead le Manasseh ah aa chawk i Gilead ram Mizpah ah a lan i Gilead ram Mizpah cun Ammon mi hna sinah a va lan chin. ³⁰ Cun Jepthah nih Bawipa sinah biakamnak pakhat a ser i, "Ammon mi cu ka kut chungah na ka pek hna ahcun, ³¹ Ammon mi hna sinin teinak he ka kir tikah keimah don awkah ka inn innka chungin a chuakmi paoh cu Bawipa ta a si lai i khangh thawinak caah ka pekchanh lai," tiah a ti. ³² Cucaah Jepthah cu anmah doh awkah khan Ammon mi hna sinah cun a va kal i Bawipa nih annih cu amah kut chungah khan a rak pek hna. ³³ Cun Aroer in Minnith khua pawng tiang, khua kul, Abel-keramim tiang, tampi a thah hna. Cucaah Ammon mi hna cu Israel mi hna hmaiah an sung. ³⁴ Cun Jepthah cu Mizpah i a inn ah a tlung i zohhmanh, a fanu nih amah kha don awkah khuang tete le laam he a hung chuak; amah lawnglawng cu fa a ngei; amah hlei ah fapa siseh fanu siseh a ngei ti hna lo. ³⁵ Cun a hmuh tikah a puan kha a thleh hna i, "Aize, ka fanu! Na ka niamter ngaingai ai, keimah ca i harnak nganpi tuahtu ah na cang ai; zeitintiah Bawipa sinah ka kaa ka pau cang i ka biakamnak cu ka la ṭhan kho ti lo," tiah a ti. ³⁶ Cun anih nih amah sinah, "Ka pa, Bawipa sinah na kaa na pau cang a si ahcun, na kaa chungin a chuakmi bangin ka cungah tuah ko, Bawipa nih pei na ral Ammon mi hna cungah na phu an hlampiak cang sawk cu," tiah a ti. ³⁷ Cun a pa sinah cun, "Hi thil hi ka tuahpiak tuah; thla hnih chung ka thlah law, tlang ah ka kal lai i ka vak lai i ngaknu ka sinak hi ka ṭah tuah lai, keimah le ka hawile nih," tiah a ti. ³⁸ Cun amah nih, "Va kal ko," tiah a ti. Cun thla hnih chung kha a thlah; cun a hawile he an kal i ngaknu a sinak kha tlang cungah an ṭah. ³⁹ Cun thla hnih donghnak ah a pa sinah a ra kir i biakamnak a ser ciami ning khan a cungah a tuah. Zeitikhmanh ah pa a hngal bal lo. Cun Israel mi hna lakah phung ah a cang i ⁴⁰ Israel mi fanu hna nih kum khat hnu kum khat Gilead mi Jepthah fanu kha kum khat ah ni li lengmang an ngaih.

¹ Efraim mi hna cu, hriamnam i lak u, tiah ti an si i Zafon ah an va kal i Jepthah sinah cun, "Zeicahdah Ammon mi hna doh awkah tiva kha na tan i kannih kha nangmah sin i kal awkah na kan auh lo? Na inn ah kan in duah chih lai," tiah an ti. ² Cun Jepthah nih annih cu, "Keimah le ka mi hna nih Ammon mi hna he ralnak fakpi kan rak ngei; cun kan auh tik hna ah an kut chungin nan ka chuah lo. ³ Cun nan ka chuah duh lo ti kha ka hmuh tikah, thih le thih tiin, Ammon mi hna doh awkah khan ka kal i Bawipa nih annih cu ka kut chungah a ka pek hna; cucaah, zeicaah hen dah, keimah doh awkah nihin ah nan ka rathnawh?" tiah a ti hna. ⁴ Cun Jepthah nih Gilead mi vialte kha a pumh hna i Efraim kha an doh; annih nih, "Efraim le Manasseh lakah, nannih Gilead mi hna cu Efraim chungin a zammi nan si," an ti hna caah Gilead mi nih Efraim mi kha an thah len hna. ⁵ Cun Gilead mi nih Jordan tiva tannak hna kha Efraim mi cu an lakkanh hna. Cun Efraim mi a zammi paoh nih, "Ka tanter ko," an ti tikah, Gilead mi hna nih cun, "Efraim mi na si maw?" tiah an ti. Cun anih nih, "Ka si lo," a ti tikah, ⁶ annih nih, "A si ahcun, Shibboleth ti kun," tiah an ti i anih nih, "Sibboleth," tiah a ti, zeitintiah dik tein a chim kho lo; khi tikah an tlaih i Jordan tiva tannak hna ah cun an thah hna. Cun khi caan ah Efraim mi sang li le thong hnih an thi. ⁷ Jepthah nih Israel cu kum ruk bia a ceih hna. Cun Gilead mi Jepthah cu a thi i amah khua Gilead ah cun an vui. ⁸ Amah hnuah Bethlehem khuami Ibzan nih Israel mi cu bia a ceih hna. ⁹ Amah nih fapa sawm thum a ngeih hna; fanu sawm thum amah phun lengah va a ngeihter hna i a lenglei in fanu sawm thum a fapale hna caah a luhter hna. Cun Israel mi cu kum sarih bia a ceih hna. ¹⁰ Cun Ibzan cu a thi i Bethlehem khua ah an vui. ¹¹ Amah hnuah Zebulun mi Elon nih Israel mi kha bia a ceih hna; cun Israel mi cu kum hra bia a ceih hna. ¹² Cun Zebulun mi Elon cu a thi i Zebulun ram chung i Aijalon khua ah an vui. ¹³ Amah hnuah Pirathon mi Hillel fapa Abdon nih Israel mi kha bia a ceih hna. ¹⁴ Amah cu laa sawm sarih cungah aa citmi fapa sawm li le tupa sawm thum a ngei; cun Israel mi kha kum riat bia a ceih hna. ¹⁵ Cun Pirathon mi Hillel fapa Abdon cu a thi i Amalek mi tlangram chung i a ummi Efraim ram chungah, Pirathon khua ah an vui.

¹ Cun Israel mi nih Bawipa mithmuh i a ṭha lomi kha an tuah ṭhan hoi i Bawipa nih Filistin mi kut chungah kum sawm li a pek hna. ² Cun Zorah khuami pakhat, Dan phun a simi, a min Manoah a simi cu a um i a nupi cu a cing i fa a ngei lo. ³ Cun Bawipa vancungmi cu minu sinah cun a lang i amah sinah cun, "Zohhmanh, na cing i fa na ngei lo; sihmanhsehlaw fa na pawi lai i fapa na hrin lai. ⁴ Cucaah i ralring tuah, mitsur zu siseh a ṭhawngmi zu siseh na ding lai lo i a thianglo zeihmanh na ei lai lo, ⁵ zeitintiah, zohhmanh, fa na pawi lai i fapa na hrin lai. Lu mehnak nam nih a lu a tawng lai lo, zeicahtiah ngakchiapa cu a chuahka in Bawipa ca i Nazir mi a si lai; cun amah nih Israel mi cu Filistin mi hna kut chungin chuah hram a thawk lai," tiah a ti. ⁶ Cun nu cu a ra i a va kha a chimh, "Pathian mi pakhat ka sinah a ra i a muisam cu Pathian vancungmi muisam bantuk a si, ṭih a nung ngaingai ko; khuazei in a si kha ka hal lo i a min kha a ka chim lo; ⁷ sihmanhsehlaw ka sinah, ’Zohhmanh, fa na pawi lai i fapa na hrin lai; cucaah mitsur zu siseh a ṭhawngmi zu siseh ding hlah, cun a thianglo zong zeihmanh ei hlah, zeitintiah ngakchiapa cu a chuah ka in a thih tiang Pathian caah Nazir mi a si lai,’ a ti," tiah a ti. ⁸ Khi tikah Manoah nih Bawipa kha a nawl ṭhan i, "Maw Bawipa, Pathian mi na rak thlahmi kha kan sinah ra ṭhan ko seh law, a chuak lai dingmi ngakchia cu zeitindah kan tuah lai ti kha kan cawnpiak seh tiah kan nawl," tiah a ti. ⁹ Cun Pathian nih Manoah aw cu a ngaih i Pathian vancungmi cu minu sinah khan, lo i a ṭhut lioah a ra ṭhan; sihmanhsehlaw a va Manoah cu a sinah a um lo. ¹⁰ Cun nu cu khulrang in a le i a va kha a chimh i, "Zohhmanh, kan hnulei i ka sin i a rami kha ka sinah a lang ṭhan," tiah a ti. ¹¹ Cun Manoah cu a tho i a nupi cu a hei zulh i mipa sin cu a phan i a sinah, "Hi minu sin i bia a chimtu kha nangmah na si maw?" tiah a ti. Cun anih nih, "Ka si," tiah a ti. ¹² Cun Manoah nih, "Na bia cu a tlin tikah ngakchiapa cu zeitindah a umtu ningcang a si lai i zeidah a tuah lai?" tiah a ti. ¹³ Cun Bawipa vancungmi nih cun, "Minu sin i ka chimmi vialte kha i ralring seh. ¹⁴ Mitsur ruang in a chuakmi paohpaoh ei hlah seh, cun mitsur zu siseh a ṭhawngmi zu zong siseh ding hlah seh, cun a thianglo zeihmanh ei hlah seh; nawl ka pekmi vialte kha amah nih ul seh," tiah a ti. ¹⁵ Manoah nih Bawipa vancungmi cu, "Zaangfahnak tein, in tlai u si law, meheh fa pakhat in in timhtuahpiak u sih," tiah a ti. ¹⁶ Cun Bawipa vancungmi nih Manoah sinah cun, "Ka tlai hmanh law, na rawl cu ka ei lai lo; sihmanhsehlaw khangh thawinak kha na timh a si ahcun Bawipa sinah pechan ko," tiah a ti. (Zeicahtiah Manoah nih amah kha Bawipa vancungmi a si cu a hngal lo.) ¹⁷ Cun Manoah nih Bawipa vancungmi sinah cun, "Na bia kha an tlin tikah kan in hmaizah nakhnga, na min ahodah a si?" tiah a ti. ¹⁸ Cun Bawipa vancungmi nih cun amah sinah, "Zeicahdah ka min na ka hal, khuaruahhar a si tiah na hngalh ko ṭung?" tiah a ti. ¹⁹ Cucaah chang thawinak he tiah meheh fa cu Manoah nih a lak i lungpi cungah Bawipa sinah a pekchanh, khuaruahharnak a tuahtu sinah cun. ²⁰ Cun biakṭheng cungin meizik cu van i a kai lioah, Manoah le a nupi nih an zoh ko lioah khan, Bawipa vancungmi cu biakṭheng meizik chung cun a kai, cun vawlei ah an bawk. ²¹ Bawipa vancungmi cu Manoah le a nupi sinah a lang ti lo. Cucaah Manoah nih Bawipa vancungmi a si kha a hngalh. ²² Cun Manoah nih a nupi sinah khan. "Kan thi ṭheoṭheo lai, Pathian kha kan hmuh caah," tiah a ti. ²³ Sihmanhsehlaw a nupi nih amah cu, "Bawipa nih thah a rak kan timh a si ahcun, khangh thawinak le chang thawinak kha kan kut chungin a kan cohlanpiak hnga lo, cun hi thil vialte zong hi a kan hmuhsak hnga lo i hi bantuk thil hna zong hi a kan chim hnga lo," tiah a ti. ²⁴ Cun nu nih cun fapa a hrin i a min ah Samson a sak; cun ngakchiapa cu a ṭhang i Bawipa nih thluachuahnak a pek. ²⁵ Cun Bawipa thlarau nih Zorah le Eshtaol karlak i a ummi Mahaneh-dan hmun ah khan amah cu cawlcanghter hram a thawk.

¹ Samson cu Timnah ah a vung kal i Timnah ah cun Filistin mi ngaknu pakhat a hmuh. ² Cun a hung tlung i a nu le a pa cu, "Timnah ah Filistin mi ngaknu pakhat ka hmuh; amah cu ka innchung caah ka ṭhitpiak tuah u," tiah a ti. ³ Sihmanhsehlaw a nu le a pa nih, "Na rualchan hna i an fanu hna lakah siseh, kan miphun vialte hna lakah siseh, nu an um lo caah maw cuarpar tan lomi Filistin mi hna lak i nupi ṭhit awkah na kal ko lai?" tiah amah cu an ti. Sihmanhsehlaw Samson nih a pa cu, "Ka ṭhitpiak ko, ka duh tuk cu ta," tiah a ti. ⁴ A nu le a pa nih mah cucu Bawipa sinin a si kha an hngal lo; zeitintiah Filistin mi kha doh awkah caan rem a kawl. Cun caan lioah cun Filistin mi nih Israel mi kha an uk hna. ⁵ Cun Samson cu a nu le a pa he tiah Timnah ah an vung kal i Timnah mitsur dum hna kha a vung phan. Cun zohhmanh, chiandeih no pakhat nih a rak awnhhnawh; ⁶ cun Bawipa thlarau cu ṭhawng ngaiin a cungah a tlung i chiandeih cu meheh fa thlehbaoh bantuk ceo khin a thlehbaoh dih ko; a kut in zeihmanh aa put fawn ṭung lo. Sihmanhsehlaw a tuahmi kha a nu siseh, a pa siseh, a chim hna lo. ⁷ Cun a vung kal i minu he cun bia an i ruah i minu cu Samson nih cun a duh ngaingai ko. ⁸ Cun tlawmpal hnuah amah cu vung ṭhit awkah a kal ṭhan i chiandeih ruak kha hei zoh pah awkah a pial i zohhmanh, chiandeih pum chungah cun khuai bu khat a rak um i hliti zong a um. ⁹ A kut in a sawk i a ei pah in a kal i a nu le a pa sin cu a phan i tlawmpal kha a pek ve hna i an ei. Sihmanhsehlaw khuaihliti cu chiandeih ruak chungin a lakmi a si kha a chim hna lo. ¹⁰ Cun a pa cu nu sinah khan a vung kal i khika ah Samson nih puai pakhat a tuah; cu bantuk cun tlangval nih an tuah tawn. ¹¹ Cun mi nih an hmuh tikah amah he um ṭi awkah hawi sawm thum an ratpi hna. ¹² Cun Samson nih annih cu, "Biahleng pakhat kan hal tuah hna lai; cun zei a si kha puai chung ni sarih chungah hin nan ka chimh khawh i nan hngalh khawh ahcun puan hmangṭhia zun sawm thum le puai puan zun sawm thum kan pek hna lai; ¹³ sihmanhsehlaw zei a si kha nan ka chimh khawh lo ahcun nanmah nih puan hmangṭhia zun sawm thum le puai puan zun sawm thum nan ka pek lai," tiah a ti hna. Cun annih nih, "Na biahleng cu chuah tuah, kan ngai tuah lai," tiah an ti. ¹⁴ Cun anih nih, "Eitu chungin ei awk a chuak. A ṭhawngmi chungin a thlummi a chuak," tiah a ti hna. Cun annih nih cu biahleng cu zei a si kha ni thum chung an hngal kho lo. ¹⁵ A ni linak ni ah Samson nupi cu, "Na va cu, biahleng kha zei a si a kan chimh nakhnga lem tuah, cu ti a si lo ahcun nangmah le na pa innchungkhar cu mei in kan in khangh hna lai. Kannih kha sifak i umter awkah maw hika ah na kan sawm?" tiah an ti. ¹⁶ Cun Samson nupi cu a hmaiah a ṭap i, "Na rak ka daw lo i na rak ka huat a si ko hi ta; ka ram mi hna cu biahleng na hal hna, asinain zei a si cu na ka chim ṭung lo," tiah a ti. Cun anih nih, "Zohhmanh, ka nu siseh ka pa siseh ka chim hna lo i nangmah cu kan chimh lai maw?" tiah a ti. ¹⁷ Cun an puai chung, ni sarih chung cu a hmaiah a ṭap i fak piin a hnek lengmang caah, a ni sarihnak ni ah cun a chimh. Cun anih nih biahleng cu a ram mi hna kha a chimh hna. ¹⁸ Cun cu khuami hna nih cun a sinah, ni sarihnak ni, ni a tlak hlanah, "Zeidah khuaihliti nakin a thlum deuh? Zeidah chiandeih nakin a ṭhawng deuh?" tiah an ti. Cun anih nih an sinah, "Ka cawla in rak ka thuang hlah u law, Ka biahleng hi nan rak hngal kho hnga lo," tiah a ti. ¹⁹ Cun Bawipa thlarau cu ṭhawng ngaiin a cungah a tlung i Ashkelon ah a vung kal i cu khuami cu sawm thum a vung thah hna i an thuam cu a lak i biahleng a chimtu hna kha puai puan cu a pek hna. Thin lin ngaiin a pa inn ah a hung kir ṭhan. ²⁰ Cun Samson nupi cu, a hawipa, a kawi a rak simi kha an pek.

¹ Tlawmpal hnuah khin, changvut ṭuan caan ah, Samson cu a nupi kha meheh fa he vung tlawn awkah a kal; cun anih nih, "Inn khaan chungah khin ka nupi sinah ka va lut lai," tiah a ti. Sihmanhsehlaw a pa nih a luhter duh lo. ² Cun a pa nih cun, "Amah cu na huat hrimhrim ko tiah pei ka rak ruah taktak cu; cucaah cun amah cu na hawipa sinah khan ka rak pek cang. A nau hi amah nakin aa dawh deuh ko lo maw? Amah tu hi i lak ko, tiah kan nawl," tiah a ti. ³ Cun Samson nih annih cu, "Atu tan hi cu, Filistin mi hna kongah hin, an cung i harnak ka tuah tikah mawhchiat awk ka si lai lo," tiah a ti hna. ⁴ Cucaah Samson cu a kal i cenghngia za thum a va tlaih hna i meifar tom kha aa lak hna i an mei cu a peh hna i an mei tuah khat karlak lengmang ah khan meifar tom pakhat lengmang a ṭem chih. ⁵ Cun meifar tom cu a van hna hnuah, Filistin mi hna i an rawl kung a dirmi hna lakah cun cenghngia cu a thlah hna i facang phal a bu in an tunmi hna le an rawl kung a dirmi hna le oliv dum hna zong kha an khangh dih hna. ⁶ Cun Filistin mi nih, "Aho nih dah mah hi a tuah?" tiah an ti. Cun annih nih, "Timnah mipa i a tupa, Samson nih khan a tuah, zeicahtiah a nupi kha a lakpiak i a hawipa kha a pek," tiah an ti. Cun Filistin mi cu an ra i amah le a pa kha mei in an khangh hna. ⁷ Cun Samson nih annih cu, "Mah hihi nan tuahmi va si kaw, nan cungah phu ka hlam hrimhrim lai i cu hnuah cun ka ngol te lai," tiah a ti. ⁸ Cun annih cu ngaan loin a thah hna i a vung kal i Etam lungpi kak chungah cun a um. ⁹ Cun Filistin mi cu an hung kal i Judah ram chungah khan an riak i Lehi kha an chim. ¹⁰ Cun Judah mi hna nih cun, "Zeicahdah nan kan hunhnawh?" tiah an ti hna. Annih nih, "Samson nih kan cungah a kan tuah bantukin a cung i tuah ve awkah, amah kha ṭem awkah kan ra," tiah an ti. ¹¹ Cun Judah ram mi cu mi thong thum Etam lungpi kak ah cun an vung kal i Samson cu, "Filistin mi hi a kan uktu an si hi na hnga lo maw? Cu ti a si ṭung ah cun, kan cung i na tuahmi hi zeidah a si kun?" tiah an ti. Cun anih nih, "Ka cungah an tuah bantukin pei an cungah ka tuah ve ko cu," tiah a ti. ¹² Cun annih nih a sinah, "Filistin mi hna kut chungah kan in pek nakhnga, nangmah ṭem awkah kan rung," tiah an ti. Cun Samson nih annih cu, "Kannih nih cun kan in that lai lo, tiah ka sinah chiat ser hmasa u," tiah a ti hna. ¹³ Annih nih, "Kan in that lai lo; a ṭem lawng kan in ṭem lai i an kut chungah kan in pek lai; kan in that hrim lai lo," tiah amah cu an ti. Cucaah hri thar pahnih in an ṭem i lungpi chung cun an hun chuahpi. ¹⁴ Lehi a phak tikah amah ton awkah cun Filistin mi cu au pah in an ra; cun Bawipa thlarau cu ṭhawng piin a cungah a tlung i a ban ṭemnak hri cu mei nih a tlaihmi khumhri bantuk ah a cang i an ṭemnak hri cu a kut in an tla ko. ¹⁵ Cun laa kharuh tharte hi a hmuh i a hei banh i a hei lak i mah cu cun mi thong khat a thah hna. ¹⁶ Cun Samson nih cun, "Laa kharuh in ka pon tengtung ko hna, Laa kharuh in mi thong khat ka thah hna," tiah a ti. ¹⁷ A biachim cu a dih tikah a kut chungin laa kharuh cu a hlonh i cu hmun cu Ramath-lehi tiah kawh a si. ¹⁸ Cun a ti a hal ngaingai i Bawipa kha a auh i, "Hi luatnak nganpi hi nangmah nih na salpa kut in na tlunter cang; atu ah hin tihal in ka thi i cuarpar tan lomi hna kut chungah ka tla ko lai maw?" tiah a ti. ¹⁹ Cun Pathian nih Lehi khua a kuarmi hmun cu a kahter i cu chung cun ti a hung chuak; cun a din tikah a thlarau cu a kir ṭhan i a nung ṭhan. Cucaah cu ka hmun min cu En-hakkore tiah ti a si; nihin tiangin Lehi khua ah cun a um ko. ²⁰ Cun Filistin mi hna chan ah Israel mi cu kum kul bia a ceih hna.

¹ Samson cu Gaza ah a va kal i khika ah hlawhhlangnu pakhat a hmuh i a va ihpi. ² Gaza mi hna cu, "Samson hika ah a ra," tiah an chimh hna i annih nih a hmun kha an kulh i khua hauka khan zan khuadei an bawh. Zan khuadei dai tein an um i, "Zinglei khua a dei tiang hngak u sih; cun khi tikah kan thah lai," an ti. ³ Sihmanhsehlaw Samson cu zanṭim tiang a it i zanṭim ah cun a tho i khua kutka innkhar hna le a tung pahnih hna kha a tlaih hna i a hrenhnak hna he cun an dihlak in a phawi hna i a liang ah aa khinh hna i Hebron hmai i a ummi tlangpar ah cun a kalpi hna. ⁴ Mah hi hnuah hin Sorek nelrawn i a ummi nu pakhat, a min Delilah a simi kha a duh. ⁵ Cun Filistin bawi hna kha a sinah an ra i, "Lem law, a thazang ṭhapi hi khuazei ah dah a um i zei lam in dah kan tei khawh i kan ṭem khawh i kan hrilh khawh lai, hngalh i zuam tuah; cun kannih nih ngun phar thong khat le za khat cio kan in pek lai," tiah an ti. ⁶ Cun Delilah nih Samson cu, "Zaangfahnak tein khuazei ah dah na thazang nganpi hi a um i tei khawh na si nakhnga zeitindah ṭem na si hnga, ka chim tuah," tiah a ti. ⁷ Cun Samson nih anih cu, "Liza a thar pasarih, a ro rih lomi in ka ṭem hna seh law ka der lai i midang bantuk cio ka si ko lai," tiah a ti. ⁸ Cun Filistin bawi hna nih cun a ro rih lomi liza a thar pasarih cu an rak put i cu cun a ṭem. ⁹ Innchung chungchin in a bawhtumi a umter hna. Cun anih nih, "Samson, Filistin mi nih an in luhhnawh hih!" tiah a ti. Sihmanhsehlaw liza hna cu, khumhri phuai mei nih a tongh i a cah bak bantuk khin a chah bak ko hna. Cucaah a thazang biathli cu hngalh a si lo. ¹⁰ Cun Delilah nih Samson sinah cun, "Zohhmanh, na ka hlen i lih na ka chimh; zeitindah ṭem khawh na si lai cu ka chim ko sawh," tiah a ti. ¹¹ Cun anih nih a sinah, "Hman bal lomi hri a tharmi in an ka ṭem ahcun, ka der lai i midang bantuk ka si ve ko lai," tiah a ti. ¹² Cucaah Delilah nih hri thar cu a lak hna i amah cu cu hri cun a ṭem i, "Samson, Filistin mi nih an in tlaih cang lai hih!" tiah a ti. Cun a bawhtu hna cu innchung chungchin ah an um. Sihmanhsehlaw a kut ṭemnak hri cu lazai bantuk men in a chah hna. ¹³ Cun Delilah nih Samson cu, "Atu tiangin na ka hlen lengmang ko i lih na ka chimh; zeitindah ṭem khawh na si hnga, ka chim ko," tiah a ti. Cun anih nih, "Ka lu cung samphiar phiar sarih hi thiam ah na tah chih i tahtlem in fek tein na khawn chih ahcun ka der lai i midang bantuk ka si ve ko lai," tiah a ti. ¹⁴ Cucaah a ih kar ah, Delilah nih cun a lu cung samphiar phiar sarih cu a lak hna i thiam ah a tah chih. Cun tahtlem in fek tein a khawn chih i, "Samson, Filistin mi nih an in tlaih cang lai hih!" tiah amah cu a ti. Sihmanhsehlaw aa hngilhnak in a hun i hlau i tahtlem he, a tlang he, a thiam he a phawi dih hna. ¹⁵ Cun anih nih a sinah, "Na lung ka sinah um ṭung loin, zeitindah, ’Kan dawt,’ tiah na ti khawh? Atu voi thum tiang na ka hlen cang i na thazang nganpi a umnak cu na ka chim lo," tiah a ti. ¹⁶ Cun ni khat hnu ni khat a bia in a rial lengmang i a lem lengmang tikah, a lungthin cu thih tiangin a ing a puang. ¹⁷ Cun a ruahnak vialte kha a chimh i a sinah, "Lu-ei nam zeihmanh nih ka lu a tawng bal lo; zeicahtiah kei cu ka nu paw chungin Pathian ca i Nazir mi ka si. Ka lu hi meh ahcun ka thazang nih hin a ka kaltak lai i ka der lai i midang bantuk cio ka si ve ko lai," tiah a ti. ¹⁸ Delilah nih a ruahnak vialte kha a ka chimh dih cang tiah a hngalh tikah, Filistin bawi hna kha bia a cah hna i a auh hna i, "Atu voi khat te cu hung rih tuah u, zeitintiah a ruahnak vialte a ka chimh dih cang," tiah a ti. Cun Filistin bawi hna cu a sinah an hung i an kut in phaisa kha an i put. ¹⁹ A phei chungah a ihter i mipa pakhat a auh i a lu cung i a sam phiar sarih cu a mehter. Cun hrem hram kha a thawk i a thazang nih khan a kaltak cang. ²⁰ Cun amah nih cun, "Samson, Filistin mi nih an in tlaih cang lai hih!" tiah a ti. Cun aa hngilhnak cun a hun i hlau i, "Voi dang bantuk khan ka chuak lai i keimah le keimah kaa luatter lai," tiah a ti. Cun anih nih, Bawipa nih a kaltak cang kha a hngal lo. ²¹ Cun Filistin mi nih an tlaih i a mit an khoih i Gaza ah an vun kalpi i dar hreng an khenh; cun thonginn chungah rawl rialnak lung in rawl kha an rialter. ²² Sihmanhsehlaw a lu i a sam cu meh hnuah khan ṭhan ṭhan hram a thawk ve. ²³ Cun Filistin bawi hna cu an pathian Dagon sin i raithawinak nganpi pek awk le nuamhnak tuah awkah an i pum; zeitintiah annih nih, "Kan pathian nih kan ral Samson cu kan kut chungah a kan pek cang," tiah an ti. ²⁴ Cun mi nih an hmuh tikah khan an pathian kha an thangṭhat i, "Kan pathian nih kan ral, kan ram a hrawkhraltu le tampi a kan thattu cu kan kut chungah a kan pek cang," tiah an ti. ²⁵ Cun an lung kha aa lawmh tikah annih nih, "Samson kha va ko tuah u, nunnuam kan tuahpiak seh," tiah an ti. Cucaah Samson cu thong chung khan an auh i an hmaiah nunnuam cu a tuahpiak hna. Tung karlak ah khan an dirter i ²⁶ Samson nih cun a kut in a tlaitu tlangval sinah cun, "Hi inn a sut tung hna cu ka tawnghter tuah hna, kaa hngauh tuah hna lai," tiah a ti. ²⁷ Inn cu pa he nu he an khat; Filistin bawi vialte hna cu khika ah an um, cun inncung ah cun Samson nih nunnuam a tuah lioah a zohtu nu le pa thong thum tluk an um. ²⁸ Cun Samson nih Bawipa kha a auh i, "Maw Bawipa Pathian, ka hngal ṭhan ko tiah kan nawl, ka ṭhawnter ṭhan ko tiah kan nawl, hi voi khatte hi cu, maw Pathian, Filistin mi hna cungah hin ka mit pahnih lak i pakhat caah hin phu ka hlam nakhnga, ka ṭhawnter ko," tiah a ti. ²⁹ Cun cu inn a dohtu bik a laifang tung pahnih hna cu, Samson nih fek tein a tlaih hna i, a orhlei kut in pakhat a kehlei kut in pakhat a tlaih hna i, a koih hna. ³⁰ Cun Samson nih, "Filistin mi hna sinah hin thi ning luao," tiah a ti. Cun a thazang dih umnak in a kun i, inn nih cun a chung i a ummi bawi hna le mi vialte hna cu a cimhhnawh hna. Cucaah a thih chihmi mithi hna cu, a nun chung i a thahmi hna nakin an tam deuh. ³¹ Cun a unau hna le a innchungkhar vialte an rung i an lak i an hun kalpi i Zorah le Eshtaol karlak i a ummi a pa Manoah thlan ah khan an vui. Israel mi kha kum kul bia a ceih hna.

¹ Efraim tlangram mi pakhat a min Mikah a simi a rak um. ² Cun amah nih a nu sinah, "Ngun phar thong khat le za khat an in lakpiak i cu kong i chiat na ser i ka hna theih ah na chimmi kha, zohhmanh, ngun kha ka sinah a um ko; keimah nih ka lak," tiah a ti. Cun a nu nih, "Ka fapa cu Bawipa nih thluachuah pe ko seh," tiah a ti. ³ Ngun tangka cu a nu kha a pek ṭhan i a nu nih, "Ka fapa cungah chiatsernak kha a tlun nakhnga lo, Bawipa sinah ngun tangka cu ka pekchanh hna. Thing milem ngun hutmi sernak caah hman a si lai. Cucaah atu ah ngun tangka cu na sinah kan pek ṭhan," tiah a ti. ⁴ Cun ngun tangka cu a nu kha a pek ṭhan hna. Ngun tangka hna chungin za hnih kha a lak i ngun soser kha a pek i soser nih cun milem ah a ser; milem cu thing in a ser i ngun in a tuam i Mikah innchung ah cun an chiah. ⁵ Cun Mikah nih cun hmunthiang pakhat a ngei i tlangbawi angki le milem tete a ser hna i, a fapa pakhat cu a thianter i a tlangbawi ah a cang. ⁶ Khi caan lioah cun Israel mi lakah siangpahrang an um lo; ahopaoh nih anmah le an duhmi cio kha an tuah ko. ⁷ Cun Judah ram chung Bethlehem khuami a simi, Judah chung a simi tlangval pakhat, Levi mi a simi a um i, cu pa cu khika ah khan a va pem. ⁸ Mipa cu Judah ram Bethlehem khua cun a chuak i hmun a hmuh khawhnak paoh ah um dingin a kal; cun a kalnak ah cun Efraim tlangram i a ummi Mikah inn cu a phan. ⁹ Cun Mikah nih a chawnh i, "Khuazei in dah na rat?" tiah a ti. Cun anih nih, "Keimah cu Judah ram Bethlehem i a ummi Levi mi ka si i hmun ka hmuhnak paoh i pem dingin ka kal," tiah a ti. ¹⁰ Cun Mikah nih amah cu a thawh i, "Ka sinah um law, ka caah pa le tlangbawi ah cang law, kum khat ah ngun phar hra lengmang kan pek lai, cun hnipuan hruk khat le na nuncannak zong," tiah a ti. ¹¹ Cun Levi mi cu mipa he um awkah cun a lung a si; cun tlangval cu a fapa hna lak i pakhat bantuk ah a cang. ¹² Cun Mikah nih Levi mipa cu a thianter i tlangval cu a tlangbawi ah cun a cang i Mikah inn ah cun a um. ¹³ Cun Mikah nih, "Atu cu Levi mi kha tlangbawi ah ka ngeih cang caah, Bawipa nih khuaawng a ka pemhter lai ti kha ka hngalh," tiah a ti.

¹ Khi caan lioah cun Israel mi lakah siangpahrang an um lo. Cun khi caan lioah cun Dan phunmi hna cu umnak dingah ro an kawl; zeicahtiah khi caan tiangah Israel phun hna nih an comi ro cu annih nih an co ve rih lo. ² Cucaah an phun ningpi chungin, Zorah le Eshtaol in, a ṭhawngmi panga, ram cu hung ngiat hung hlathlai awkah, an thlah hna; cun annih nih, "Va kal u law, ram cu hung hlathlai u," tiah an ti hna. Cun Efraim tlangram kha an phan i Mikah inn kha an phan i khika ah an riak. ³ Mikah inn pawng i an um tikah Levi mi tlangval aw kha an theih i cu lei cu an hei fuh i amah cu, "Aho nih dah mahka ah hin an ratpi? Mah ka hmun ah hin zeidah na tuah? Hika ah hin na rian zeidah a si?" tiah an ti. ⁴ Cun anih nih annih cu, "Cu bantuk, cu bantukin Mikah nih ka cungah a ka tuah; a ka hlan i a tlangbawi ah ka cang," tiah a ti hna. ⁵ Cun annih nih amah cu, "Pathian kan halpiak tuah, tiah kan in nawl, kannih nih kan kalhnawhchanmi hi kan hlawhtling lai maw tling lo kan hngalh khawh nakhnga," tiah an ti. Cun tlangbawi nih cun annih cu, ⁶ "Hnangam tein kal ko u. Nan kalhnawh chanmi hi, Bawipa mit tangah a um ko," tiah a ti hna. ⁷ Cun mi panga hna kha an kal i Laish an phan, khika i a ummi hna cu Sidon mi hna umtuning in kikdai le lunghrinnak ngei loin le vawlei cung i a ummi thil zeihmanh bau loin le chawva tampi ngei in le him tein an um le Sidon mi hna he an i hlat le aho he hmanh an i tlatkai lo kha an va hmuh hna. ⁸ Cun annih nih Zorah le Eshtaol i an unau hna sinah an rat tikah, an unau hna nih cun, "Zeitindah a si?" tiah an ti hna. ⁹ Annih nih, "I thawh u law, hung kalhnawh hna u sih; an ram cu kan hmuh i zohhmanh, a vawlei a ṭha ngaingai. Nan cawlcang lai lo dahra hi? Cu ram i hung kal, hung luh le hung co cu i khulnuarh hlah u. ¹⁰ Nan hung kal tikah lunghrinnak ngei lomi hna sinah nan hung phan lai. Ram cu a kaupi ko; asi, Bawipa nih nan kut chungah, vawlei cung i a ummi thil zeihmanh a bau lonak hmun cu an pek cang hna," tiah an ti. ¹¹ Cun Dan phun chungin mi za ruk, raltuknak hriamnam he aa thuammi hna cu Zorah le Eshtaol in an i thawh i ¹² an hung kal i Judah ram chung i Kiriath-jearim ah cun an riak. Cu ruangah cun cu hmun cu nihin tiang hin Mahaneh-dan tiah kawh a si; zohhmanh, mah cucu Kiriath-jearim nitlaklei ah a um. ¹³ Cun cuka cun Efraim tlangram ah khan an lan i Mikah inn kha an phan. ¹⁴ Cun Laish ram ngiat awkah a hung kalmi, mi panga hna nih khan an unau hna cu, "Hi inn hna chungah hin tlangbawi angki le milem tete hna le suaimi milem le thletmi milem an um kha nan hngal maw? Cucaah zeidah nan tuah lai kha ruat tuah u," tiah an ti hna. ¹⁵ Cun khi leiah an va kal i Mikah inn ah Levi tlangvalpa umnak kha an phan i a khuasakning kha an hal. ¹⁶ Danmi za ruk hna, raltuknak hriamnam aa putmi hna cu, kutka ah cun an dir; ¹⁷ cun tlangbawi cu kutka luhnak i minung za ruk raltuknak hriamnam aa putmi hna he an dir lioah, ram ngiat awkah a hung kalmi panga hna kha an lut i suaimi milem, tlangbawi angki, milem tete le thletmi milem kha an lak hna. ¹⁸ Cun hi hna nih hin Mikah inn chungah an luh i suaimi milem le tlangbawi angki le milem tete le thletmi milem kha an lak tik hna ah, tlangbawi nih khan annih cu, "Zeidah nan tuah?" tiah a ti hna. ¹⁹ Cun annih nih amah cu, "Dai tein um ko, na kaa cu na kut in hup ko, kan sinah ra law, kan caah pa le tlangbawi si ko. Nangmah caah mipa pakhat innchungkhar ca i tlangbawi si maw a ṭha deuh. Israel mi chung i phun khat le hrin khat ca i tlangbawi si dah a ṭha deuh?" tiah an ti. ²⁰ Cun tlangbawi cu a lung a lawm; tlangbawi angki le milem tete le suaimi milem kha a lak hna i mi hna sinah cun a kal. ²¹ Cucaah an i mer i an kal, ngakchia hna le saṭil hna le thil hna kha an hmaiah an chiah hna. ²² Mikah inn in hla nawn an phak tikah, Mikah inn pawng i a ummi inn i a ummi hna kha aa auh hna i Dan mi kha an phak hna. ²³ Dan mi cu an hei auh hna i annih nih an hun i mer i Mikah cu, "Na zeidah a ti i mah bantuk mibu he khan na kan rathnawh?" an ti. ²⁴ Cun anih nih, "Ka sermi ka pathian hna le tlangbawi cu nan i lak i nan kal, zeidah ka ngeih ti kun? Cucaah zeitindah nannih nih, ’Na zeidah a ti?’ tiah nan ka ti?" tiah a ti. ²⁵ Cun Dan mi hna nih amah cu, "Kan sinah hin bia chim len ko hlah, thin tawimi hna nih an in ṭhuat sual lai i na nunnak le na innchungkhar hna nunnak kha na sung sual lai," tiah an ti. ²⁶ Cun Dan mi hna cu an kal ko; Mikah nih a caah an ṭhawng tuk ti kha a hmuh tikah, aa let i a inn ah a kir. ²⁷ Cun Dan mi hna nih Mikah nih a sermi thil le amah ta a simi tlangbawi kha an i kalpi hna i Laish khua an phan, khi khuami hna cu kikdai le lunghrinnak ngei loin an um. Vainam in an sam dih hna i khua kha mei in an khangh. ²⁸ Sidon in a hlat ca le midang he i tlatkainak an ngeih lo caah, chanhtu ahohmanh an um lo. Cu khua cu Bethrehob ta a simi nelrawn chungah khan a um. Cun annih nih khua kha an sak ṭhan i a chungah an um. ²⁹ Cun khua cu a min ah, Israel hrinmi Dan an pu min chuankhan in Dan an sak, sihmanhsehlaw cu khua min cu a terte ah cun Laish a si. ³⁰ Cun Dan mi hna nih cun suaimi milem cu anmah caah an i phun. Cun Moses fapa Gershom i a fapa Jonathan le a fapa hna cu, ram kha sal i a taan ni tiang, Dan miphun caah tlangbawi an si. ³¹ Cucaah Mikah nih a sermi milem cu, Shiloh i Pathian inn ah a um chung cu, annih nih anmah caah an i chiah.

¹ Khi caan lioah, Israel chung i siangpahrang an um lo lioah khan, Levi mi pakhat cu Efraim tlangram a ken ah a pem i Judah ram Bethlehem khua in nuchun pakhat aa lak. ² Cun a nuchun cu a cungah a thin a hung i a sinin Judah ram Bethlehem khua i a pa inn ah khan khua a tli, khika ah thla li tluk a um. ³ Cun a va nih amah sinah bia nem va chim le amah kha kirpi ṭhan awkah a tho i a zulh. A sinum le laa tuah khat a kalpi hna. A nupi pa inn kha a va phan i ngaknu pa nih cun a rak hmuh tikah ton awkah lunglawmhnak in a ra. ⁴ Cun a pu, ngaknu pa nih khan, a camter i a sinah ni thum a cam; cu caah an ei an ding i khika ah an cam. ⁵ Ni linak ni ah zingka in an tho i kal awkah an i tim. Sihmanhsehlaw ngaknu pa nih cun a tupa cu, "Rawl tlawmpal in ei law, i hrim rih ngat, cu hnuah na kal te lai," tiah a ti. ⁶ Cucaah mipa pahnih hna cu hmunkhat ah an ṭhu i an ei i an ding ṭi. Cun ngaknu pa nih mipa sinah cun, "Tuzan cu riak rih ko law, lunglawm tein um ko," tiah a ti. ⁷ Cun mipa cu kal awkah a thawh tikah a pu nih khan a lem i khika ah a riak ṭhan. ⁸ Ni nganak ni ah kal awkah zingka tein a tho. Cun ngaknu pa nih khan, "I hrim rih tuah law, nitlak tiangin um tuah," tiah a ti. Cucaah an pahnih in an ei ṭi. ⁹ Cun mipa le a nuchun le a sal kha kal awkah an i thawh tikah, a pu, ngaknu pa nih cun, amah cu, "Zohhmanh, atu cu ni a tla dengmang cang, zan khuadei in cam ko rih u. Zohhmanh, khua a mui cuahmah cang; hika ah hin riak law, na lung kha nuamhter ko, cun thaizing ah zing tein na tho lai i na inn ah na kal ko lai," tiah a ti. ¹⁰ Sihmanhsehlaw mipa nih zan riah cu a duh ti lo; a tho i a kal i Jebus (cucu Jerusalem) ral kha a phan. A dan danhmi laa tuah khat kha aa ngeih hna i a nuchun zong kha a sinah cun a um. ¹¹ Jebus kha an hei naih tikah ni a tla dengmang cang i a salpa nih khan a bawipa cu, "Ra tuah, Jebus mi hna khua ah hin va pial u si law, khika ah va riak u sih," tiah a ti. ¹² Cun a bawipa nih amah cu, "Israel mi chungah aa tel lomi miphun dang hna khua chung luh awkah kan pial lai lo; sihmanhsehlaw Gibeah ah kan lan ko lai," a ti. ¹³ Cun a salpa sinah cun, "Ra tuah, hi hmun hna lakah pakhatkhat hi va fuh hna u si, Gibeah ah maw Ramah ah dik kan riah hnga," a ti. ¹⁴ Cucaah an lan i an kal ko; cun Benjamin ta a simi Gibeah pawng an phak tikah ni nih a tlak phuat hna. ¹⁵ Cun Gibeah i luh awk le riah awkah khika in an pial. Cun a lut i khua lai ah a ṭhu, zeitintiah zan riah awkah ahohmanh nih an inn chungah an tlunter hna lo. ¹⁶ Cun zohhmanh, zanlei sang ah tarpa pakhat cu lo i a rian ṭuannak in a ra tlung; cu pa cu Efraim tlangram mi a si i Gibeah ah a pem; cu ka hmunmi hna cu Benjamin mi an si. ¹⁷ Cun khua a hei zoh i khualai ah cun khualpa kha a hei hmuh. Cun tarpa nih cun, "Khuazei ah dah na kal lai? Khuazei in dah na rat?" a ti. ¹⁸ Cun anih nih, "Judah ram Bethlehem khua in ka ratnak Efraim tlangram i hmun ken ah cun kan kal lai. Judah ram Bethlehem khua ah cun ka kal i atu cu ka inn ah ka kir lio; ahohmanh nih an ka tlunter lo. ¹⁹ Kan laa hna caah ram le rawl kan ngei ko i, keimah le na salnu le na sal hna he a ummi tlangval caah hin rawl le mitsur hang kan ngei ko; zeihmanh kan bau lo," tiah a ti. ²⁰ Cun tarpa nih cun, "Nan cungah daihnak si ko seh; nan herhmi vialte cu keimah nih kan ruahpiak hna lai; khua lai bel ah cun riak hrimhrim hlah u," tiah a ti. ²¹ Cucaah a inn chungah a luhpi i laa cu rawl a pek hna. Cun an ke kha an i ṭawl i an ei i an ding. ²² Cun annih nih thanuam in an um lioah khan, zohhmanh, cu khua chung i zei ruaram lomi hna nih cun inn kha an kulh i innka kha an cumh len. Cu inn ngeitu tarpa kha, "Na inn ah a lutmipa kha kan theihhngalh nakhnga hun chuahpi tuah," tiah an ti. ²³ Cun mipa inn ngeitupa kha, an sinah a va chuak i annih cu, "Asilo, ka nau le hna, ṭhalo tuk hringhran in um hlah u; hi mipa nih ka inn chungah a luh cang caah hi thil ṭhalo cu tuah hlah u. ²⁴ Zohhmanh u, hika ah ka fanu ngaknu le a nuchun an um; ka hun chuahpi hna lai. Sual hna u law, nanmah nih a ṭha nan timi kha an cungah va tuah ko u, sihmanhsehlaw hi mipa cungah cun hi tlukin a ṭha lomi thil cu tuah hlah u," tiah a ti hna. ²⁵ Sihmanhsehlaw mi hna nih cun amah cu an ngai duh lo. Cucaah mipa nih a nuchun kha a tlaih i an sinah a hei chuah; cun annih nih amah kha an theihhngalh i zan khuadei in zinglei tiang an hrem. Cun khua fing a hung cah tikah an kalter. ²⁶ Cun khua a dei tikah minu cu a ra i a bawipa a tlunnak inn, mipa inn ah khan, innka ah a tlu i khua a ceu hlantiang a ril ko. ²⁷ Cun a bawipa cu zinglei ah a tho i innka kha a hun hna i kal awkah a chuah tikah, zohhmanh, a nuchun cu innka ah khan innkaba i tlaih in a ril ko. ²⁸ Anih nih, "Tho law, kal u sih," tiah amah cu a ti. Sihmanhsehlaw zeihmanh a let lo. Cun a laa cungah a chuan i mipa cu a tho i a inn leiah a kal. ²⁹ Cun a inn a phanh tikah nam aa lak i a nuchun cu a can, a kut a ke in, hmun hleihnih ah a ṭhen i Israel ram vialte ah a kuat dih. ³⁰ Cun a hmumi vialte nih, "Mah bantuk thil hi dah ngai Israel mi nih Izipt ram in an chuah ni in nihin tiangah a um bal lo, a hmuh zong kan hmu bal lo; ruat u law, i ceih ṭi u law, chim tuah u," an ti.

¹ Cun Israel mi vialte cu Dan in Beersheba tiang, Gilead zong tel chih in an chuak i, mibu cu Bawipa sinah Mizpah ah minung pakhat bantukin an i pum. ² Cun mi vialte haotu, Israel phun vialte haotu hna cu, Pathian mi aa pummi hna chungah cun an hung chuak i vainam putmi ralkap sing li an si. ³ (Benjamin mi nih Israel mi hna cu Mizpah ah an hung kal ti kha an theih.) Cun Israel mi nih, "Zeitindah hi ṭhat lonak hi a chuah ning a si, kan chim tuah," tiah an ti. ⁴ Cun an nawn minu va Levi mi nih khan a leh hna i, "Benjamin ta a simi Gibeah cu, cuka i riah awkah ka nuchun le keimah cu kan phan. ⁵ Cun Gibeah mi hna nih cun an ka chuahhnawh i zan ah ka riahnak inn cu an kulh. Keimah kha thah an ka timh i ka nuchun kha an sual i a thi. ⁶ Cun ka nuchun cu ka lak i ka can i Israel comi ram chung dihlak ah khan ka kuat; zeitintiah Israel chungah fihnung le hawrnak kha an tuah. ⁷ Nannih Israel mi vialte hna nih, ngaihmanh u, nan ruahnak le a ṭha nan tining kha chuah cio tuah u," tiah a ti hna. ⁸ Cun mi vialte cu minung pakhat bantukin an tho i, "Ahohmanh kan thlam ah kan kal lai lo i ahohmanh kan inn ah kan tlung lai lo. ⁹ Sihmanhsehlaw Gibeah cungah kan tuah laimi cu mah hihi a si: camcawhfung khiah in kan i thim lai i kan hung doh lai i, ¹⁰ Israel miphun vialte chungin minung za khat ah pahra, thong khat ah za khat, sang khat ah thong khat in kan lak hna lai i mi ca i rawl pechantu an si lai, zeitintiah an rat tikah Benjamin ta a simi Gibeah cu Israel chung i hawrnak sualnak a tuahmi vialte caah khan teirul an cham lai," tiah an ti. ¹¹ Cucaah Israel mi vialte cu lungthin khat tein cu khua doh awkah an i pum. ¹² Cun Israel miphun hna nih Benjamin phun chung dihlak ah khan mi an thlah hna i, "Nan lak i a chuakmi hi zei ṭhat lonak dah a si? ¹³ Cucaah atu ah kha mi hna, Gibeah i a ummi mi zei ruaram lo hna kha, kan thah hna i ṭhat lonak cu Israel chungin kan thianh naklai, kan pe hna u," an ti. Sihmanhsehlaw Benjamin mi hna nih cun an unau Israel mi hna bia kha an ngai duh lo. ¹⁴ Cun Benjamin mi hna cu Israel mi he i tuknak hmun i kal awkah Gibeah i khua hna cun an chuak. ¹⁵ Cun khi ni ah Benjamin mi hna nih an khua hna chungin vainam pumi an pumhmi hna cu sang hnih le thong ruk an si, Gibeah i a ummi hna nih an thim cikcekmi za sarih hna hleiah khan. ¹⁶ Mah hi hna vialte lakah hin thim cikcekmi za sarih kehtlak an um; an dihlak in sam zai hmanh a ngan lomi lungherh cheh thiam an si. ¹⁷ Cun Israel mi nih, Benjamin chim loin, vainam pumi sing li an pumh hna; hi mi vialte cu raltuk thiammi an si dih. ¹⁸ Israel mi cu an tho i Bethel ah an hung kal i Pathian kha an hal, "Kannih lakah hin ahodah Benjamin doh awkah a kal hmasa bik lai?" an ti. Cun Bawipa nih, "Judah a hung kal hmasa bik lai," a ti. ¹⁹ Cun Israel mi cu zingka in an tho i Gibeah kha an riahhnawh. ²⁰ Cun Israel mi cu Benjamin doh awkah khan an chuak i, Israel mi nih cun annih kha Gibeah i doh awkah cun ṭan hmun an i serh. ²¹ Benjamin mi hna nih Gibeah chungin an hung chuak i khi ni ah Israel mi cu sang hnih le thong hnih an hrilh hna. ²² Sihmanhsehlaw Israel mi cu an i serh ṭhan i hmasa bik ni i an ṭan hmun khuarnak hmun ah khan ṭan hmun an khuar ṭhan. ²³ Cun Israel mi nih an hung kal i Bawipa hmaiah zanlei tiang an ṭap; "Kan unau Benjamin mi hna he i doh awkah kan hung kal ṭhan lai maw?" ti in Bawipa kha an hal. Cun Bawipa nih, "Hung doh ṭhan hna u," a ti. ²⁴ Cucaah a ni hnihnak ni ah Israel mi nih Benjamin mi cu an fuh ṭhan hna. ²⁵ A ni hnihnak ni ah cun Gibeah in Benjamin cu annih kha doh awkah a chuak i Israel mi chungin sang khat le thong riat a hrilh hna; an dihlak in vainam pumi an si. ²⁶ Cun Israel mi vialte, ralkap bu cu an ningpi in, an hung kal i Bethel an phan i an ṭap; Bawipa hmaiah an ṭhu i khi ni cu zanlei tiang rawl an ul i Bawipa hmaiah khangh thawinak le daihnak thawinak kha an pekchanh. ²⁷ Cun Israel mi nih Bawipa kha an hal i (khi caan lioah Pathian biakamnak kuang cu khika ah a um i ²⁸ Aaron fapa Eleazar i fapa Phinehas nih khi caan lioah a hmaiah rian a ṭuan) annih nih, "Kan unau Benjamin mi hna kha doh awkah kan chuak rih lai maw, asiloah kan ngol lai dah?" tiah an ti. Cun Bawipa nih, "Hung kal u; zeitintiah thaizing ah cun annih cu nan kut chungah kan pek hna lai," a ti. ²⁹ Cucaah Israel nih Gibeah velchum in lamhruang attu mi an chiah hna. ³⁰ Cun ni thumnak ni ah Israel mi cu Benjamin mi kha doh awkah an hung kal i voi dang bantuk khan Gibeah pawngah cun ṭan hmun an khuar. ³¹ Cun Benjamin mi hna nih mi cu an chuahhnawh hna i khua lengah an va lan; cun voi dang bantuk khan mi cu thah hram an thawk hna, lam hna le ramlak ah Israel mi sawm thum tluk an thah hna. Lam pakhat cu Bethel ah a hung kalmi a si i a dang cu Gibeah ah a kalmi a si. ³² Cun Benjamin mi nih, "Hmasa bantukin kan hmaiah an zam dih," an ti. Sihmanhsehlaw Israel mi nih, "Zam u si law, khua chungin lam ah lem hna u sih," an ti. ³³ Cun Israel mi vialte cu an umnak hmun in an chuak i Baal-tamar ah ṭan hmun an khuar; cun lamhruang attu Israel mi hna nih khan Geba nitlaklei i an umnak hmun khan an hung chuak zutmat. ³⁴ Israel mi lakin thim cikcekmi sang khat hna nih khan Gibeah cu an chuahhnawh i an i doh cu a fak. Sihmanhsehlaw Benjamin mi hna nih rawknak nih a kan naih ti kha an hngal lo. ³⁵ Cun Bawipa nih Benjamin cu Israel hmaiah a tei; Israel mi nih khi ni ah Benjamin mi cu sang hnih thong nga za khat an thah hna. Hi mi hna cu vainam tlai an si dih. ³⁶ Cucaah Benjamin mi nih kan sung cang ti kha an hngalh. Israel mi hna nih Benjamin mi hna hmaiah an i zamter, zeicahtiah Gibeah kha lamhruang in a attu hna kha an i bochan hna. ³⁷ Cun lamhruang attu pawl nih cun khulrang in an tho i Gibeah kha an nam; lamhruang attu hna cu an chuak i khua cu vainam in an sam dih. ³⁸ Israel mi le lamhruang attu hna nih an rak thimmi hmelchunhnak cu, khuapi chung khan meikhu nganpi an chuahter tikah, ³⁹ Israel mi nih raltuknak leiah kir ṭhan awk a si lai ti a si. Benjamin nih cun Israel mi cu sawm thum tluk thah hram an thawk cang; annih nih, "Hmasa bik kan i tuknak bantuk khan, kan hmaiah an sung hrimhrim ṭhan ko," an ti. ⁴⁰ Sihmanhsehlaw hmelchunhnak cu khuapi chung i meikhu in kai hram a thawk tikah Benjamin mi hna nih an hnulei kha an hei zoh i zohhmanh, khua cu a ning piin meikhu in van ah a kai. ⁴¹ Cun Israel mi cu an i let i Benjamin mi hna cu vansang au in an um, zeitintiah rawknak nih a kan naih ti kha an hmuh. ⁴² Cucaah Israel mi hna hmaiah cun ramlak leiah khan an zam; sihmanhsehlaw raltuknak nih a phanh ṭhiamṭhiam hna i khua chungin a hung chuakmi hna kha an lakah an i cawh cang i an thah hna. ⁴³ Benjamin mi hna cu an sam hna i Nohah in Gibeah nichuahlei ral tiang an dawi hna i an lamh hna. ⁴⁴ Benjamin mi cu sang khat le thong riat an thi, an dihlak in mi ralṭha an si. ⁴⁵ Cun an i mer i ramlak lei Rimmon lungpi leiah khan an zam; lampi ah mi thong nga an thi i Gidom tiangin fak piin dawi an si i mi thong hnih an thi. ⁴⁶ Cucaah khi ni ah Benjamin mi a thimi hna cu vainam pu, sang hnih thong nga an si, an dihlak in mi ralṭha an si. ⁴⁷ Sihmanhsehlaw mi za ruk cu an i mer i ramlak lei Rimmon lungpi leiah khan an zam i Rimmon lungpi ah khan thla li an um. ⁴⁸ Cun Israel mi nih Benjamin mi cu an kirhnawh ṭhan hna i vainam in an sam hna. Mi siseh, saram siseh, an hmuhmi paohpaoh an sam dih hna. Cun an hmuhmi khua vialte zong mei in an duah hna.

¹ Cun Israel mi hna nih Mizpah ah khan, "Ahohmanh nih kan fanu hna cu Benjamin mi sinah ṭhit awkah kan pe hna lai lo," tiah chiat an ser. ² Cun mi hna cu Bethel ah an ra i Pathian hmaiah zanlei tiang an ṭhu i aw thang piin, lunghno ngaiin an ṭap. ³ Cun annih nih, "Maw Bawipa, Israel mi Pathian, zeicahdah Israel mi chungah hi thil hi a hung um i Israel mi lakin nihin ah hin phun khat cu an bau?" tiah an ti. ⁴ Cun a thaizing ah mi cu zingka tein an tho i khika ah biakṭheng pakhat an ser i khangh thawinak le daihnak thawinak kha an pekchanh. ⁵ Cun Israel mi nih, "Israel miphun vialte lakah ahodah Bawipa sin i i pumhnak ah a chuak lo?" tiah an ti. Zeitintiah annih nih Mizpah ah Bawipa sin i a ra lomi kongah khan chiatsernak nganpi pakhat an ser i, "Thah a si lai," an ti. ⁶ Cun Israel mi nih an nau Benjamin cungah cun zaangfahnak an ngei i, "Nihin ah hin Israel mi sinin phun khat cu chok an si. ⁷ Kannih nih Bawipa min in kan fanu hna cu an nupi caah kan pe hna lai lo tiah chiat kan ser cang caah, a tang rihmi hna caah cun an nupi caah zeidah kan tuah lai?" tiah an ti. ⁸ Cun annih nih, "Israel miphun hna lakah aho set dah Bawipa sinah Mizpah ah a hung kal lomi a si?" an ti. Cun zohhmanh, Jabesh-gilead in, aa pummi bu sinah riahhmun ah ahohmanh an ra lo. ⁹ Zeitintiah mi cu an pumh hna tikah zohhmanh, Jabesh-gilead i a ummi cu khika ah pakhat hmanh an um lo. ¹⁰ Cucaah aa pummi nih an mi ralṭha bik sang khat le thong hnih hna cu khika ah an thlah hna i, "Va kal u law, Jabesh-gilead mi hna cu vainam in va sam hna u, nu zong, ngakchia zong. ¹¹ Mah hihi nan tuah awk cu a si lai; pa vialte le pa he a it cangmi nu vialte cu nan thah cikcek hna lai," tiah an ti. ¹² Cun Jabesh-gilead i a ummi hna lakah cun pa a hngal rih lomi ngaknu za li an hmuh hna; annih cu Kanaan ram chung i a ummi Shiloh i riahhmun ah khan an ratpi hna. ¹³ Cun aa pummi vialte nih cun Rimmon lungpi i a ummi Benjamin mi sinah khan bia an hei cah hna i annih kha remnak bia an thanh hna. ¹⁴ Khi caan ah Benjamin mi cu an ra kir i Jabesh-gilead i an zuahmi nu hna kha an pek hna; sihmanhsehlaw an i za lo. ¹⁵ Bawipa nih Israel miphun hna chungah kuainak pakhat a ser caah, Benjamin mi hna cungah cun zaangfahnak an ngei. ¹⁶ Cun aa pummi hna lak i upa hna nih cun, "A tang rihmi hna cu an nupi caah zeidah kan tuah lai, Benjamin mi hna lak i nu hna cu hrawh an si cang ṭung?" an ti. ¹⁷ Cun annih nih, "Benjamin mi hna lakin a nung rihmi hna caah hin ro a um hrimhrim awk a si lai, Israel mi chungin miphun pakhat cu a loh nakhnga lo. ¹⁸ Sihmanhsehlaw kan fanu hna cu nupi caah kan pe kho hna lo," an ti. Zeitintiah Israel mi nih chiat an ser cang i "Benjamin mi nupi a pemi cu chiat si seh," an ti. ¹⁹ Cucaah annih nih, "Zohhmanh, Bethel chaklei, Bethel in Shekhem i a hung kalmi lam nichuahlei, Lebonah thlanglei ah a ummi Shiloh ah kumfatin Bawipa caah puai an tuah tawnmi a um," tiah an ti. ²⁰ Cun Benjamin mi kha nawl an pek hna i, "Va kal u law, mitsur dum chungah khan va bawh hna u law, va ngia hna u. ²¹ Cun Shiloh khua ngaknu hna nih lamnak chung i i tel ve awkah an ra chuah tikah, mitsur dum chung cun ra chuak u law, Shiloh ngaknu hna cu pakhat nih pakhat cio nupi ah i tlaih hna u law, Benjamin ram ah kal tuah u. ²² Cun annih an pale nih maw an ṭale nih maw kan sinah zai awkah an rat tikah kannih nih annih cu, ’Raldoh lioah khan an nupi ca ding cio kan rak lakpiak ṭung hna lo, nannih zong nih nan rak pe hna lo, rak pe hna u law, atu ah mawhchiat nan si hnga, cu caah zaangfahnak in kan pe ko hna u,’ tiah kan rak ti hna lai," an ti. ²³ Cun Benjamin mi hna nih cu bangin an tuah i, an kalpimi hna a lammi hna lakin anmah zat tein nupi an i lak hna. Cun an kal i an covo ram ah khan an kir i khua kha an ser ṭhan hna i an chungah an um. ²⁴ Cun Israel mi cu khi caan ah khika in anmah le an phun le an innchungkhar sin cio ah khan an kir i, khika in anmah le an covo ram cio ah khan an kal. ²⁵ Khi caan lioah khan Israel mi lakah siangpahrang an um lo; ahopaoh nih anmah duhmi cio kha an tuah ko.