JEIM

JEIM

¹ Pathian le Bawipa Jesuh Khrih sal a simi Jeim nih, vawlei cung khuazakip i aa ṭhekmi Pathian mi kha kan biakchawnh hna. ² Ka u le ka nau hna, nan cungah hneksaknak a phunphun a tlun tikah vanṭha ah i rel u, ³ zeicahtiah cu bantuk hneksaknak cu nan zumhnak in nan tei tikah in khawhnak nan ngei. ⁴ Zeihmanh bau loin a tlingmi nan si nakhnga, a karlak ah ing kho loin um sual loin a dongh tiangin ing ko u. ⁵ Sihmanhsehlaw fimnak a baumi nan um ahcun, Pathian sinah thlacam seh law Pathian nih a pek ko lai; Pathian nih cun ahopaoh kha zaangfah ngai le siang ngaiin a pek ko hna. ⁶ Asinain thla nan cam tikah lung awṭawm lo tein nan zumh hrimhrim lai. Lung awṭawm in a ummi cu thlichia nih a choihmi rili tilet bantuk a si. ⁷ - ⁸ Cu bantuk mi nih cun, ka halmi kha Pathian nih a ka pek lai, tiah a ruah awk a si lo; lung awṭawm in a ummi cu an i tinhmi ah khan an kal ciahmah kho bal lo. ⁹ Zumtu sifak cu Pathian nih ṭhanchonak a pek tikah i lawm seh law ¹⁰ zumtu mirum cu Pathian nih ṭumchuknak a pek tikah i lawm seh. Zeicahtiah mirum cu ramlak pangpar a par a ṭilh bangin an ṭil lai. ¹¹ Ni cu a hung chuak i a linhnak nih pangpar kung kha a emh; a par cu a ṭil i aa dawhnak cu a lo. Cu bantukte cun mirummi cu hnahnawk luri ngaiin an rian an ṭuan cuahmah lioah khan an lo ko lai. ¹² Hneksaknak a in tikah fek tein a ummi cu a lung aa lawm, zeicahtiah cu bantuk hneksaknak kha a tei khawh caah Pathian nih amah a dawtu hna a kamhmi nunnak kha laksawng ah a hmuh lai. ¹³ Cu bantuk hneksaknak kha mi nih an in tikah, "Tukforhnak hi Pathian sinin a ra," an ti awk a si lo; zeicahtiah Pathian cu ṭhat lonak nih a tukforh kho lo i amah zong nih ahohmanh a tukforh bal hna lo. ¹⁴ Sihmanhsehlaw mi nih tukforhnak kan in cu, kan duhnak a ṭha lomi nih khan a kan pialpi i rap ah a kan foih caah a si tawn. ¹⁵ Cu tikah thil ṭhalo duhnak nih cun sualnak kha a pawi i a hrin; cun sualnak cu a ṭhang i patling a si tikah thihnak kha a hrin. ¹⁶ Ka dawtmi ka u le ka nau hna, i palh sual hlah u. ¹⁷ Laksawng ṭha le laksawng tlamtling paohpaoh hi vancung in a rami an si; vancung i a ceumi thil a Sertu Pathian sinin a rami an si. Amah cu aa thleng lo, vancung thil ceu hna le cu thil ceu hna thladem cu an i thleng lengmang nain anih cu aa thleng bal lo. ¹⁸ Amah nih amah duh tein a kan ser i a kan sernak ah cun biatak kha a hman, cucaah kannih cu a sermi thil vialte lakah cungnung bik kan si. ¹⁹ Ka dawtmi u le nau hna, mah hihi philh hlah u: ahohmanh bia theih duhnak leiah cun a khul a rangmi si u law biachimnak lei le thinhunnak lei ah cun a khul a nuarmi si u. ²⁰ Minung thinhunnak nih Pathian tinhmi dinnak kha a chuahter lo. ²¹ Cucaah cun a thurhnawmmi ziaza vialte le a ṭha lomi ziar le zar vialte kha hlaw ko hna u. Pathian sinah khan i pe u law khamhnak an pe khotu hna bia, nan lungchung i a tuhmi kha, i cohlan ko u. ²² A bia kan theih paoh ahcun a za, tiah nanmah le nanmah kha i hleng len hlah u. A bia cu a tuah tu in tuah deuh u. ²³ A bia a thei nain a tuah ṭung lomi cu hi bantuk mi hi a si: mipa pakhat nih thlalang aa bih i amah le amah cu aa hmu. ²⁴ Ṭha tein aa zoh i a kal i zei ka lo ti kha a philh colh. ²⁵ Sihmanhsehlaw mi a luattertu nawlbia tling chungah ṭha tein aa bih i cucu a ruat peng i, a theihmi kha philh loin a tuahmipa cu Pathian nih a tuahnak ah lawmhnak a pek. ²⁶ Mi pakhatkhat nih, kei cu biaknak leiah aa zuammi ka si, tiah aa ruat ko lai, sihmanhsehlaw a lei kha a uk khawh lo ahcun a biaknak cu pakpalawng a si i amah le amah aa hlengmi a si. ²⁷ Sihmanhsehlaw nuhmei ngakṭah ṭha tein zohkhenh le vawlei cungah thurhnawm lo tein um tu hi Pathian kan Pa nih biaknak thiang le biaknak taktak i a ruahmi cu a si.

¹ Ka u le ka nau hna, sunparnak Bawi, Bawipa Jesuh Khrih a zummi nan si bantukin mi thleidannak lungthin zeihmanh ngei hlah u. ² Tahchunhnak ah, mirumpa pakhat cu sui kutdong hrolh le hnipuan ṭhaṭha in nan i pumhnak ah a ra, cun misifak pakhat cu hnipuan ṭet fiapfuap he a ra ve. ³ Hnipuan ṭha he a ramipa cu upatnak nan pek i, "Hika ṭhutnak ṭha bik ah hin ṭhu tuah," nan ti i misifakpa tu cu, "A dir in dir ko, asilole ṭuang ah hin kan ke hramah hin ṭhu," nan ti ahcun, ⁴ nanmah lakah thleidannak nan tuah a si i ahmaan lomi lungthin in biakhiahnak nan tuah a si. ⁵ Ka dawtmi ka u le ka nau hna, ngai hmanh u. Pathian nih hi vawlei cung i misifak hna hi, zumhnak i a rummi si awk le amah a dawtu a kamhmi hna Pennak kha a comi si awkah a thim hna. ⁶ Asinain nannih nih cun sifakmi cu nan zawmhtaih hna. Ahodah hremnak an petu hna le biaceihtu hmaiah an chuahpi tawntu hna kha an si? Mirummi an si lo maw? ⁷ Pathian nih an pekmi hna min ṭha a thangchiattu kha anmah cu an si. ⁸ Cathiang chungah a ummi Pennak nawlbia kha nan zulh ahcun ahmaanmi thil nan tuah a si. Cu nawlbia cu, "Na innpa kha nangmah naa dawt bantukin na dawt lai," ti a si. ⁹ Sihmanhsehlaw mi cu a lenglei i an langhning lawngin na ti hna ahcun na sual cang, Nawlbia nih khan nawlbia buartu ah an hmuh cang. ¹⁰ Nawlbia chung bia pakhat a buarmi cu nawlbia a dihlak in a buar a si ko. ¹¹ Zeicahtiah "Vacung in pa i duh hlah," a ti tu ṭhiamṭhiam nih cun pei, "Lainawng hlah," a ti cu. Vacung in pa naa duh lo hmanh ah lai na nawn ahcun nawlbia buartu na si ṭhiamṭhiam ko. ¹² Zalonnak an petu nawlbia nih bia a ceih laimi hna bantukin nan biachim le nan thil ti ah um u. ¹³ Zeicahtiah zaangfahnak a ngei lomi cu Pathian nih a bia a ceih tikah a zaangfah ve lai lo; zeicahtiah zaangfahnak cu biaceihnak nih a tei. ¹⁴ Ka u le ka nau hna, pakhat khat nih, "Zumhnak ka ngei," ti seh law, cu zumhnak cu a tuahnak nih a langhter ṭung lo ahcun, zeidah a ṭhathnem? Cu zumhnak nih cun a khamh khawh lai maw? ¹⁵ A biana ah, hnipuan a herhmi le rawl ei awk a ngei lomi nan unau an um hnga. ¹⁶ Cu hna cu i thawh riangmang i, "Pathian nih thluachuah in pe ko hna seh. Lum tein um u law khim tein ei u," ti cu, an herhmi nan pek ṭung hna lo ahcun zeidah a ṭhathnem? ¹⁷ Cu bantukte cu zumhnak zong cu a si ve, tuahnak zeihmanh a chuahter lo ahcun a thimi thil a si ko. ¹⁸ Sihmanhsehlaw a cheu nih nan i thawh hnga i, "Pakhat nih zumhnak a ngeih, a dang pakhat nih tuahnak a ngeih," nan ti hnga. Cu tikah kan lehnak hna cu, "Zeitindah tuahnak um loin mi nih zumhnak a ngeih khawhning a si ka hmuhsak tuah. Kei nih cun ka zumhnak cu ka tuahnak in kan hmuhsak hna lai," ti hi a si hnga. ¹⁹ Pathian cu pakhat lawng a si ti nan zumh. A ṭha ko. Khuachia zong nih cucu an zumh ve ko — an zumh ve ko i an ṭih caah a ther in an ther. ²⁰ Maw mihrut hna, tuahnak um loin zumhnak cu san a tlai lo ti kha in hmuhsak hna ning law maw nan duh? ²¹ Zeitindah kan pu Abraham kha Pathian he remnak a rak hmuh? Isak cu biakṭheng cung i a pekchanh tik i a tuahnak thawngin pei a si kha. ²² Nan hngal kho lo maw? A zumhnak le a tuahnak cu hmunkhat ah pei rian an ṭuan kha; a zumhnak cu a tuahnak thawngin pei a tlin kha. ²³ Cucaah cun, "Abraham nih Pathian a zumh i cu a zumhnak thawng cun Pathian nih miding ah a cohlan," tiah a titu Cathiang bia cu a tling. Cucaah Abraham cu, "Pathian hawi," tiah ti a si. ²⁴ Cucaah minung cu an zumhnak thawng lawnglawng khan si loin, an tuahmi thawng khan Pathian he i remnak an hmu ti cu nan hngalh. ²⁵ Hlawhhlangnu Rahab zong kha, cu bantuk ṭhiamṭhiam cun a si. Pathian he i remnak a hmuhnak cu a tuahnak thawngin a si; Judah mi mingiatu pawl kha a rak luhter hna i lam dang in a chuahter hna. ²⁶ Cucaah cun pum cu thlarau loin a thih bantukin zumhnak zong tuahnak loin a thi ve.

¹ Ka u le ka nau hna, tam tuk cu saya nan si awk a si lo, zeicahtiah kannih saya pawl hi hawi nak fak deuh in biaceihnak kan hmu lai ti kha nan hngalh. ² Kan dihlak hin palhnak kan tuah cio tawn. A biachim ah palhnak a tuah lomi cu mitling a si i a pum aa uk khomi a si. ³ Kan nawl kan ngai seh tiah rang cu chak kan hlomh i kan duhnak ah kan kalter. ⁴ Cun sangphawlawng khi ruat rih hmanh u: thil nganpi a si i a ṭhawng ngaingaimi thli nih a kalter, sihmanhsehlaw lawng meizahnak hmete nih a uk i a cawngtupa nih a duhduhnak ah a kalter. ⁵ Cu bantukte cu lei hi a si: thil hmete a si nain ngan pipi in aa porhlaw tawn. Meici hmete nih ram kaupi a khangh tawn kha ruat hmanh u. ⁶ Lei cu mei bantuk a si. Thil ṭhalo aa hlumnak kha a si i kan pum chungah hin a dihlak khan ṭhat lonak cu a vahter. Kan nunnak hi a dihlak in mei in a khangh i cu mei cu hell in a thomi mei a si. ⁷ Minung nih thilnung dang vialte hi hrem khawh lomi an ngei lo — ramlak saram si hna seh, va si hna seh, a lawn in a lawnmi si hna seh, nga si hna seh, an hrem khawh dih hna. ⁸ Sihmanhsehlaw lei cu a hrem khotu ahohmanh an um lo. Lei cu thil ṭha lo, uk khawh lomi, thihnak sivai in a khatmi a si. ⁹ Kan Bawipa le kan Pa a simi Pathian thangṭhatnak caah kan hman i Pathian mui in sermi kan minung hawi chiatserhnak ah kan hman fawn. ¹⁰ Thangṭhatnak bia le chiatserhnak bia kha kan kaa pakhat chung cun an chuak. Ka u le ka nau hna, hitihin cun a si awk a si lo. ¹¹ Cerh pakhat chungin ti thlum le ti kha an chuak ṭi bal lo. ¹² Ka u le ka nau hna, theipi kung nih oliv thei a tlai bal lo, mitsur ruang nih theipi a tlai bal fawn lo; ti al zong nih ti thlum a chuahter kho ve lo. ¹³ Nan lakah a fim i hngalhnak a ngeimi nan um maw? Cu hna nih cun a fimmi le hngalhnak a ngeimi an si kha a ṭhami an nunning le toidornak lungthin le fimnak in an tuahmi thil ah khan an langhter awk a si. ¹⁴ Sihmanhsehlaw nan lung chungin mi nahchuahnak nan ngeih i mi cungah nan thin a hun peng i mah zawn lawng aa ruatmi nan si ahcun, mifim kan si tiin i porhlaw hlah u law, biatak dohnak ah lih kha chim lengmang hlah u. ¹⁵ Cu bantuk fimnak cu vancung in a rami a si lo; cu bantuk fimnak cu hi vawlei cung fimnak hi a si i thlarau aa tel lomi fimnak, khuachia fimnak tu a si. ¹⁶ Nahchuahnak le mah zawn lawng ruahnak a umnak paoh ah i rem lonak le ṭhat lonak a phunphun kha a um zungzal. ¹⁷ Sihmanhsehlaw cunglei in a rami fimnak cu a hmasa bik ah a thiang i cun daite le nem tein a um i hawikom cungah a ṭha; midang zaangfahnak khan a khat i thil ṭha kha tampi a tlai; thleidannak zeihmanh a ngei lo i a zer zong a zer lo. ¹⁸ Cun daihnak sertu pawl nih daihnak in an tuhmi thlaici nih a thei a tlaimi cu ṭhatnak a si.

¹ Nan i siknak le nan i velhnak vialte hi khuazei in dah an rat? Nuamhnak nan duhnak in an ra i cu nan duhnak cu nan pum chungah khan anmah le anmah aa do lengmangmi an si. ² Thil nan duh, sihmanhsehlaw nan ngei kho ṭung lo, cu tikah mi thah nan ngamh; thil ngeih kha nan duh, sihmanhsehlaw nan hmu kho ṭung lo, cu tikah nan i si i nan i vel. Nan duhmi kha Pathian nan hal lo caah nan hmu lo. ³ Cun nan hal tikah nan hmu kho lo, zeicahtiah nan i tinhmi kha a ṭha lo; nanmah nuamhnak ca lawng i hman awkah khan thil cu nan hal. ⁴ Zumh awk tlak lo minung hna! Vawlei he i hawikomh hi Pathian he i ral a si ti kha nan hngal lo maw? Vawlei hawikom si a duhmi paoh nih cun Pathian ral ah an i ser ko. ⁵ "Pathian nih kan chungah a chiahmi thlarau cu duhnak ṭihnung in a khat," tiah Cathiang nih a timi kha sullam ngei lo a si tiah ruat sual hlah u. ⁶ Sihmanhsehlaw Pathian pekmi vel cu cu nak hmanh cun a ṭhawng deuh chinchin. Cathiang nih a ti bangin, "Pathian nih aa porhlawmi cu a doh hna i mi toi i aa dormi kha vel a ngeih hna." ⁷ Cucaah Pathian nawl kha ngai ko u. Khuachia kha doh u law an zam tak ko hna lai. ⁸ Pathian cu naih u law an naih ve hna lai. Misual mi hna, nan kut kha i ṭawl u. Miziathiam hna, nan lung kha i thianh u. ⁹ Ngaihchia in um u, ṭap u law ai u; nan nihnak kha ṭahnak in thleng u, nan i lawmhnak kha ngaihchiatnak in thleng u. ¹⁰ Bawipa hmaiah toidor tein um u law amah nih an hlorh hna lai. ¹¹ Ka u le ka nau hna, pakhat le pakhat i soi hlah u. Ahohmanh a u a nau kha a soi i sual a phaw lengmangmi cu Nawlbia kha a soi i sual a phawmi a si. Nawlbia cu sual na phawt a si ahcun nang cu nawlbia a zulmi kha na si ti lo, Nawlbia sual a phawtu kha na si lehlam. ¹² Pathian lawnglawng hi nawlbia a kan petu le nawlbia cung i bia a khiak khotu cu a si. Amah lawnglawng nih hin a kan khamh khawh i a kan hrawh khawh. Cucaah cun, na minung hawi bia a ceihtu dingah khan, aho ka si ti ah dah naa ruah? ¹³ "Nihin ah maw thaizing ah dik khual kan tlawng lai i khika ah kum khat kum hnih tluk kan um lai i chaw kan tuah lai i tangka tampi kan hmu lai," tiah a timi hna, ka bia hi ngai tuah u. ¹⁴ Thaizing ah na nunnak cu zei a lawh lai hmanh na hngalh ṭung lo. Nang cu minmei zaammi bantuk, atute a hung um i a lo zaumi bantuk pei na si ko cu. ¹⁵ "Bawipa a hna a tlak ahcun, kan nung lai i cucu khakha kan tuah lai," ti tu ah nan ti awk deuh a si. ¹⁶ Sihmanhsehlaw na lung a puam i naa porhlaw; cu bantuk porhlawtnak vialte cu ahmaan lomi thil a si. ¹⁷ Cucaah cun hi a ṭhami thil hi ka tuah awk a si tiah a hngal ko ṭung i a tuah lomi cu misual a si.

¹ Nannih mirum hna, ka bia hi ngai tuah u. Nan cung i harnak a tlung ding ruangah hin ṭap u law ai len tuah u. ² Nan chawhlawn cu a thu dih cang i nan thilthuam cu rungrul nih a ei dih cang hna. ³ Nan sui le nan ngun cu cirik nih a ei hna i hi cirik hi nanmah sual an phawtu hna tehte a si lai i nan sa kha mei bantukin an eitu hna a si lai. Hi a dong dengmangmi caan ah hin chaw le va kha nan i khon hna. ⁴ Nan lo chung i rian a ṭuanmi, an nihlawh nan pek hna lomi an aunak thawng kha a thang i nan rawlṭuantu hna an aunak thawng kha Pathian Lianngan Bik Bawi i a hna chung a phan cang. ⁵ Hi vawlei cungah cun nuam ngai le duhtling ngaiin nan nung. Sa thah ni caah nanmah le nanmah nan rak i thauter. ⁶ A sual lomi kha sual nan phawt hna i nan thah hna i an in doh hna lo. ⁷ Cucaah cun ka u le ka nau hna, Bawipa a rat hlantiang lungsau in um ko u. Lothlopa nih a lo in a sunglawimi rawl a chuah lai kha lungsau in a hngah tawn. Fur tlak lai le faruahthawh rat lai kha lungsau in a ngan. ⁸ Nannih zong nan lung a sau awk a si. Ruahchannak sangpi ngei ko u. Bawipa cu a ra dengmang cang. ⁹ Harnak nan ton tikah pakhat le pakhat i mawhchiat hlah u. Cu ti nan um ahcun Pathian nih bia an ceih sual hna lai. Biaceihtu cu lamnai te ah a um ko i a rung lut zau ko lai. ¹⁰ Bawipa min in bia a rak chimmi profet hna kha, ka u le ka nau hna, philh hna hlah u. Harnak chung i lungsau in sifahnak a ingmi an si caah i zohchun hna u. ¹¹ Annih nih an in khawh cah, lunglawmmi kan ti hna. Job lungsaunak kha nan theih i Pathian nih a donghnak ah a pek ṭhannak kong kha nan theih. Bawipa cu zaangfahnak le zawnruahnak in a khatmi a si. ¹² Cun cu pinah biakamnak nan tuah tikah chiatsernak hmang hlah u; vancung cemchih in siseh, vawlei cemchih in siseh, zei thil paoh cemchih in siseh, chiatser hlah u. A si ti nan duh ahcun, a si, ti ko; a si lo, ti na duh ahcun, a si lo, ti ko; cu ti na tuah lo ahcun Pathian biaceihnak na ing sual lai. ¹³ Nan lakah harnak a tongmi nan um ahcun, thla cam hna seh. A lung aa lawmmi nan um ahcun, thangṭhatnak hla sa hna seh. ¹⁴ A zawmi nan um ahcun, Khrihfa upa kha au hna u law thla in campiak hna seh law Bawipa min in chiti kha in thuh hna seh. ¹⁵ Zumhnak in thla an camnak nih khan a zawmi kha a damter lai; Bawipa nih damnak kha a pek ṭhan lai i sualnak a tuahmi kha ngaihthiam a si lai. ¹⁶ Cucaah cun nan sualnak kha pakhat le pakhat i chim u law pakhat le pakhat thla i campiak u, cu ti nan tuah ahcun damnak nan hmuh lai. Miṭha mi thlacamnak cu hmual a ngei. ¹⁷ Elijah kha kanmah bantuk minung a si ve ko. Ruah sur hlah seh tiah biatak tein thla a cam i kum thum le a cheu ruah sur loin a um. ¹⁸ Cun thla a cam ṭhan i ruah a sur i vawlei nih tirawl a vuiter. ¹⁹ Ka u le na nau hna, pakhatkhat biatak in nan tlau sual i a dang pakhatkhat nih nan kirpi ṭhan tikah, ²⁰ misual kha aa palhmi lam in a kirpi ṭhantu nih, cu misual mi thlarau cu thihnak in a khamh lai i sualnak tampi ngaihthiamnak a umter lai, ti kha va philh hlah u.