ISAIAH

ISAIAH

¹ Amoz fapa Isaiah sinah Pathian nih Judah le Jerusalem kongah Judah siangpahrang Uzziah, Jotham, Ahaz le Hezekiah hna chan i a hmuhmi langhnak hna. ² Bawipa nih aa thawh i, "Van le vawlei hna, Bawipa nih ka chimmi hi ngai tuah u. Ka cawm cia le ka ken cia ka fale nih hin an ka doh. ³ Caw nih a ngeitu kha a hngalh i laa nih a bawipa nih rawl a peknak kuang kha a hngalh. Sihmanhsehlaw ka mi Israel mi hna nih cun cu hmanh cu an hngal lo. A hngalh in an hngalthiam hrimhrim lo," a ti. ⁴ A! misual phun, ṭhat lonak in a khat i dinlonak a tuah pengmi hna, nannih cu nan lo cang. Bawipa Israel Pathian Thiang cu nan hlawt i hnulei nan chit caah nan sualnak nih chuk ah an hnuh cang hna. ⁵ Zeicahdah nan puar chin lengmang ko? Fak chinchin in dantat maw nan duh? Israel mi hna, nan lu cu hma a khat i nan lungthin le nan ruahnak cu a zaw. ⁶ Nan kechik in nan luthlung tiang, nan pum cungah hin khuazei hmanh ah damnak a um lo, hma le rung in nan khat dih. Nan hma cu an in ṭawlpiak hna lo i an in tuampiak hna lo. Si zong an in thuhpiak hna lo. ⁷ Nan ram cu a rawk dih i nan khua cu an kang dih. Nanmah mit hmuh hrimhrim ah ramdangmi nih khan nan ram cu an lak i an hrawh dih. ⁸ Jerusalem lawng a tang, cu hmanh cu ral nih an kulh dih — mitsur lo chung lo hngaktu thlam bantuk ceo a si, zil lo chung deu bantuk ceo a si cang. ⁹ Ralkapbu Bawipa nih mi kha tlawmte tanter hna hlah seh law, Jerusalem cu a rawk dih cikcek taktak cang hnga, Sodom le Gomorrah an rawh dih cikcek bantuk khan a rawk dih cikcek ve cang hnga. ¹⁰ Jerusalem, na uktu bawi hna le na mi hna hi Sodom le Gomorrah khuami bantuk kha an si. Bawipa nih an chimhmi bia hi ngai tuah. Kan Pathian nih an cawnpiak mi hi ṭha tein ruat tuah. ¹¹ Pathian nih cun, "Nan ka pekchanh lengmangmi thawinak vialte hi a duh ko hna ti ah maw nan ka ruah? Khangh thawinak caah tuu nan khanghmi hna le nan saṭil ṭha bikbik hna thau nan khanghmi hna hi kaa za diam cang. Nan cawtum hna le nan tuu hna le nan meheh hna thi nih hin a nor in an ka nor cang. ¹² Keimah biak awk i nan rat tikah, hi vialte hi nan tuah lai, tiah aho nih dah an in ti hna? Ka Biakinn chungah hin torcawl len u, tiah aho nih dah an in fial hna? ¹³ Man ngei lo nan ka pekchanhmi thil hi ka duh ti hna lo. Nan ka pekchanhmi zihmui rim hi ka luak a chuak. Nan Thla Thar Puai te hna, nan Sabbath te hna, nan biaknak pumhnak tehna hi a in in ka ing kho ti lo; nan sualnak nih a thutter dih cang hna. ¹⁴ Nan Thla Thar Puai hna le nan ni thiang hna cu a huat in ka huat hna. Ka caah a phorh ka zuam ti lomi thilrit an si. ¹⁵ "Thlacam in nan kut nan hler tikah kan zoh duh hna lai lo. Zeizat tam hmanh in cam u law kan ngaihpiak hna lai lo, zeicahtiah nan kut ah thisen aa neh. ¹⁶ Thiang tein i kholh u. Nan tuah lengmang ka hmuhmi ṭhat lonak hi ngol hna u. Ṭhat lonak cu tuah ti hna hlah u law ¹⁷ a dingmi thil tuah tu kha cawng cang u. Dinnak tuah kha i zuam u, cucu mi nih an serhsatmi hna bawmh le ngakṭah hna chanh le nuhmei hna ṭanpi kha a si," a ti. ¹⁸ Bawipa nih aa thawh i, "Atu cu hi bia hi ṭhate in ruat ṭi tuah u sih. Nan sualnak cu a sen in sen hna hmanh seh law, hawhra bantukin an thiang hna lai; a dum in dum hna hmanh seh law tuuhmul bantukin an vaar lai. ¹⁹ Ka bia nan ka ngaih paoh ahcun, ram nih a chuahtermi thil ṭha kha nan ei hna lai. ²⁰ Sihmanhsehlaw ka bia kha nan ka al i nan ka doh ahcun nan thi ko lai. Hi bia cu Bawipa nih ka chim," a ti. ²¹ Zumhawktlak a rak si tawnmi khua kha, atu cu hlawhhlangnu a si cang. Hlanah khan cun a chungah miding an rak um tawn, sihmanhsehlaw atu cu lainawng pawl lawng an tang cang. ²² Jerusalem, hlan ah cun ngun bantuk na rak si, sihmanhsehlaw atu cu zeihmanh man na ngei ti lo; zu thlum bantuk na rak si, sihmanhsehlaw atu cu na da cang. ²³ Na bawi hna cu ralthawh hmangmi le mifir hna hawikom an si; laksawng le ziknawh kha an ei thluangthluan ko. Zung ah khan ngakṭah kha zeitikhmanh ah an ṭanh duh bal hna lo i nuhmei cu an bia kha a ngaih hmanh an ngaihpiak duh bal hna lo. ²⁴ Cucaah Bawipa, Ralkapbu Bawipa Israel miṭhawng nih a chimmi bia hi ngai tuah u: "Ka ral hna, phu kan hlam cang hna lai i harnak nan ka pe ti lai lo. ²⁵ Atu cu kan tongh cang hna lai. Ngun an thianh bantukin kan thianh hna lai i nan thurhnawmhnak vialte kha ka thianh dih lai. ²⁶ Hlanpi ah nan rak ngeihmi hruaitu hna le fimchimtu hna bantuk kha kan pek ṭhan hna lai. Cun Jerusalem cu, dinnak khua, zumhawktlakmi khua, ti a si lai," a ti. ²⁷ Bawipa cu a din caah Jerusalem le aa ngaihchihmi paoh cu a khamh hna lai. ²⁸ Asinain a sualmi le amah a dohmi paoh cu a hrawh hna lai; amah a hlawmi paoh cu a thah dih hna lai. ²⁹ Thingkung nan rak biakmi hna le dum thiang nan rak sermi hna kha nan i ngaichih ngaingai lai. ³⁰ A thi cuahmahmi kuhthing bantukin nan car lai i ti toih lomi dum bantukin nan ro lai. ³¹ Thing ro cu meici nih a alhter bantukin miṭhawng hna cu amah tuahmi lila nih a hrawh hna lai i cu bantukin an rawhnak cu ahohmanh nih an kham kho lai lo.

¹ Judah le Jerusalem kong ah Pathian nih Amoz fapa Isaiah cu hi bangin bia a chimh: ² Hmailei caan pi ah cun Bawipa biakinn a dirnak tlang hi tlang vialte lakah a sang bik tlang a si lai. Miphun vialte kha cuka ah cun an ra luaimai lai i ³ mi tampi nih an i thawh lai i, "Bawipa tlang ah cun hung kal u sih, Israel Pathian biakinn ahcun hung kal u sih. Tuah hna seh ti a kan duhmi tuah kha kan thiam lai i a kan thimpiakmi lam kha kan zulh lai," an ti lai. Bawipa cawnpiaknak cu Jerusalem in a ra i a mi hna sinah Zion in bia a chim. ⁴ Miphun ngan pipi an i siknak cu a remh hna lai. An vainam cu tuhmui ah an ser hna lai i an fei cu namtong ah an ser hna lai. Phun khat le phun khat an i do ti lai lo, ral doh zong an i tim ti lai lo. ⁵ Atu cu, Jakob tefa hna, Bawipa nih a kan pekmi ceunak chungah cun i chawk cang u sih! ⁶ Pathian, na mi Jakob tefa hna cu na hlawt cang hna. Nichuahlei in a rami camhthiam hna le Filistia ram in a rami camhthiam hna cu, hi ram hi an khat dih i hi ram mi hna nih, cu hna phung cu an zulh ve. ⁷ An ram cu sui le ngun in a khat i an rumning cu a dongh in dongh a hngal lo. An ram cu rangtum an khat i an rangleng cu rel cawk lo an si. ⁸ An ram cu siasal in a khat i anmah nih an kut in an ser chommi thil kha an biak hna. ⁹ An dihlak in ningzahnak le hmai-chiatnak an phan lai. Bawipa, annih cu ngaihthiam hna hlah! ¹⁰ Bawipa thinhunnak kha thuhtak awkah le a ṭhawnnak le a sunparnak kha thuhtak awkah, lungpang tamnak tlang lungkua chungah an i thup lai, asiloah, vawlei ah khor an i cawh lai. ¹¹ Minung porhlawtnak le ruamkainak a dongh lai ni kha a ra lio. Khi tikah Bawipa cu hlorh a si lai. ¹² Khi ni ah cun Ralkapbu Bawipa nih a ṭhawngmi le aa porhlawmi le a ruam a kaimi vialte kha a ṭhumh dih hna lai. ¹³ Lebanon tlang i a ummi sidar thingkung sang vialte hna le Bashan ram i a ummi kuhthing vialte hna cu a hau dih hna lai. ¹⁴ Tlang sang hna le fing bo hna kha a rawnhter hna lai i ¹⁵ inn sang hna le khua kulhnak ralhau vialte cu a chimh dih hna lai. ¹⁶ Lawng ngan bikbik hna le lawng dawh bikbik hna hmanh kha ti chungah a pilter dih hna lai. ¹⁷ Cun minung porhlawtnak cu a dong lai i minung ruamkainak cu a rawk lai. Cu ni a phak tikah cun Bawipa lawnglawng kha hlorh a si lai i ¹⁸ siasal cu an lo dih lai. ¹⁹ Bawipa cu vawlei kha hninh awk i a rat tikah, a thinhunnak zamtak awkah le a lianhngannak le a sunparnak kha thuhtak awkah, mi cu lungpang tamnak tlang lungkua ah khan an i thup lai, asiloah, vawlei ah khor an i cawh hna lai. ²⁰ Cu ni a phak tikah cun, an i serchommi sui siasal hna le ngun siasal hna kha, tawte le palak an hlonhhnawh hna lai. ²¹ Bawipa cu vawlei kha hninh awk i a rat tikah, a thinhunnak zamtak awkah le a lianhngannak le a sunparnak kha thuhtak awkah mi cu lungpang tamnak tlang lungkua hna le khor chungah khan an i thup lai. ²² Thih thiammi minung cu i bochan hna hlah u. Zeihmanh an ṭhathnem ṭung lo.

¹ Atu cu Bawipa Ralkapbu Bawipa nih Jerusalem khua chung le Judah ram chungah mi nih an i bochanmi vialte hna kha a kalpi dih hna lai. An ti le an rawl vialte kha a lak dih lai, ² an mi ralṭha hna le an ralkap hna, an biaceih bawi hna le an profet hna, an kutṭial zoh thiam hna le an mifim hna, ³ an ralbawi hna le an uktu bawi hna, an ram hruaitu hna le thil umtuning anmah duhning in umter awkah camh a hmangmi hna kha a kalpi dih hna lai. ⁴ Annih cu kum tling lo ngakchia nih an uk hna lai. ⁵ Pakhat le pakhat an i rial lai. Mino nih upa kha an hmaizah hna lai lo i zeiruaramlo pawl nih khan an cung mi kha zeihmanh ah an rel hna lai lo. ⁶ Phun khat chung mi hna nih khan an unau pakhatkhat kha an thim lai i, "Nang cu puan aih awk tal na ngei, hi caan har chungah hin kan haotu si ko," an ti lai. ⁷ Sihmanhsehlaw anih nih a thawh hna lai i, "Kei cu si hlah ning. Kan bawm kho hna lai lo. Rawl zong puan zong ka ngei ve lo. Nan haotu ah cun ka ser hlah u," tiah a leh hna lai. ⁸ Asi, Jerusalem cu a lo ko cang! Judah cu a tlu cuahmah ko cang! An chimmi le an tuahmi paoh cu Bawipa duh lomi lawngte an si dih; langhngan in Pathian hrimhrim kha an nihsawh. ⁹ Ṭhat lonak lungthin an paw chung i an i chiahmi hrimhrim kha anmah sual phawtu tehte a si te lai. Sodom mi nih langhngan rumro in an rak sual bantukin annih zong nih an tuah ve. Annih cu an lo ko cang, cucu anmah nih anmah cung lila i an i tluntermi a si. ¹⁰ Miding mi cu an i lawm lai, an caah thil a rem thliahmah ko lai. An ṭuan man kha an i lawmhpi lai. ¹¹ Sihmanhsehlaw miṭhalo cu an lo ko cang; an tuahmi kha an cungah lehrulh a si lai. ¹² Tangka cawihtu pawl nih ka mi kha an hrem hna i thil cawihtu pawl nih an hlen hna. Ka mi hna, nan hruaitu pawl nih a pingah an in kalpi hna caah khuazei lei kal awk nan hngal lo. ¹³ Bawipa cu a bia kha chim awkah aa tim cang, miphun vialte kha an bia ceih awkah a tlam a tling cang. ¹⁴ Bawipa nih cun, a mi hna an upa le an hruaitu pawl kha biaceih awkah a chuahpi hna lai. Taza a cuainak hna cu hitihin a si: "Mitsur dum kha nan ramh dih hna i nan inn cu misifak nan chuhmi hna thil kha a khat. ¹⁵ Ka mi nan rial hna cu nan rial hna awk hrimhrim a si lo i misifak nan deh nan hlen hna i an thil nan chuh hna cu nan tuah hrimhrim awk a si lo tiah Bawipa Ralkapbu Pathian nih ka ti," a ti. ¹⁶ Bawipa nih, "Jerusalem khua nu hna khi zohhmanh hna u, zeitluk in dah an i zumh! An kal ah van lawng an cau i ahohmanh an hmu hna lo; a khiah in an i khiak. An fengbeo i an i thlaihmi an khi-ing tete cu ring cherhmarh hna seh tiah kar tawi tete in an kar. ¹⁷ Sihmanhsehlaw dan ka tat cang hna lai — an lu ka meh hna lai i lu kawng in ka chiah hna lai," a ti. ¹⁸ Bawipa nih Jerusalem nu hna cu, an i porhlawtmi thil paohpaoh a lakkanh dih hna lai ni a phan lio. An fengbeo ah an i khihmi le an lu ah an i khimhmi le an hngawng ah an i oihmi le ¹⁹ an kut ah an i khihmi hlawn vialte cu a lakpiak dih hna lai. An lu an i khuhnak puan le ²⁰ an luchin le an ban le an tai ah an i khihmi camh le ²¹ an kutdong hrolh le an hnarthlaih le ²² an puan ṭhaṭha vialte le an angki fual le an puai puan hna le kutput zal hna le ²³ an thlamlang hni hna le la hmangṭhia pavuah hna le an lu an i khuhnak puan hme tete hna le lukhuh thlamlang vialte hna cu a lakpiak dih hna lai. ²⁴ Zihmui kha hmang ti loin a thut in an thu lai, taisawm ṭhaṭha kha hmang ti loin hrihrual hrat pipi tu kha an hman hna lai, samthlairem dawh si ti loin lukolh an si cang lai; puan ṭhaṭha kha i aih ti loin puan tlek chia pipi kha an i aih lai; an i dawhnak cu ningzahnak ah aa thleng lai! ²⁵ Khua chung pa hna cu, a ṭhawng bikbik hmanh kha, ral kut in an thi lai. ²⁶ Khua kulhnak vampang kutka hna cu zuun ngaiin an ṭap lai i khuapi hrimhrim zong hi, hni lo puan loin vawlei ah a ṭhu komi nu bantuk a si lai.

¹ Cu caan a phak tikah nu pasarih nih pa pakhat kha an tlaih lai i, "A cawm cu kanmah tein kan i cawm ko lai i hnipuan zong kanmah tein kan i damh ko lai, sihmanhsehlaw mah lawng khuasak ningzah hi kan luat khawh nakhnga nangmah cu kan va, in ti ko u sih," an ti lai. ² Hi ram chung thing hna le ram vialte hna hi Bawipa nih ngan ngaingai le dawh ngaingai in a ṭhanter hna caan a phan lai. Israel mi chungin a tangmi vialte hna kha cu, an ram chungin rawl a chuakmi ah khan an i lawm ṭhan lai i an hmai a hngal ṭhan lai. ³ Pathian nih a tangmi si dingin a thimmi hna, Jerusalem i a tangmi vialte kha, mithiang ti an si lai. ⁴ Bawipa nih hi miphun cu a ṭhawnnak in bia a ceih hna lai i a thianh hna lai, Jerusalem cu a sualnak le a chungah thisen chuahmi kha a ṭawlpiak lai. ⁵ Cun Zion Tlang cung le khika i aa pummi vialte hna cungah Bawipa nih chun ah minmei a zamter lai i zan ah meikhu le a ceumi meizik kha a umter lai. Pathian sunparnak nih khua cu a pumpi in a khuh lai i a hum a zual lai. ⁶ A sunparnak nih khan khua cu chun ah thladem a demh lai i himnak hmun, thli le ruah in himnak hmun ah a ser lai.

¹ Ka hawipa le a mitsur dum hla ka phuahmi hna hi ngai tuah u. Vawlei ṭhatnak tlang cungah ka hawipa nih mitsur dum pakhat a ngei. ² Vawlei kha a cawh i lung kha a hlonh hna; mitsur kung ṭha bik phun kha a cin hna. Mitsur ruang cawnghnak caah cun parthlam pakhat a sak i mitsur thei nennak caah cun khor pakhat a cawh. Mitsur thei an hmin lai cu a hngah, sihmanhsehlaw an thor dih ai. ³ Cucaah ka hawipa nih cun aa thawh i, "Jerusalem khua chung i a ummi hna le Judah ram chung i a ummi hna, keimah le ka mitsur dum hi bia kan thlek tuah u. ⁴ Ka dum caah hin tuah ka tlolhmi zei tal a um maw? Ka tlolhmi zeihmanh a um lo ahcun, zeicahdah mitsur thei a ṭhami a tlai lai tiah ka ruahmi tu tlai loin, a thormi lawng a tlai kun? ⁵ "Cucaah cun ka dum cu hitihin ka tuah lai. A kulhnak kha ka baoh hna lai i a hau kha ka hrawh hna lai i saram kha ka eiter dih hna lai i ka nanter dih hna lai. ⁶ Ka buatter lai i mitsur ruang cu an nge ka tanpiak hna lai lo; vawlei zong kha ka co lai lo, hling le so tu ka khahter hna lai. Khuadawm hmanh kha, ruah pe hlah, tiah ka thlauh lai," a ti. ⁷ Israel cu Lianngan Bik Bawipa dum cu a si; Judah ram mi hna cu mitsur ruang a cinmi cu an si. Thil ṭha kha nan tuah lai tiah a ti hna, sihmanhsehlaw lai nawnnak lehlam kha an tuah. A dingmi thil kha nan tuah lai tiah a ti hna, Sihmanhsehlaw an hremmi hna ṭah thawng tu kha a theihmi cu a si. ⁸ Nan lo cang! Nan ngeih cia ah khan inn thar le lo thar lawng nan i chap chin luaimai ko. Midang caah hmun a dih zau cang lai i ram chungah hin nanmah pi lawng khua nan sa lai. ⁹ Cun Ralkapbu Bawipa nih a chimmi kha ka theih i, "Hi inn ngan pipi le inn ṭhaṭha hna hi an rawk dih lai. ¹⁰ Rel nga hmun lo ah an cinmi mitsur ruang nih mitsur hang thawl khat lawng a chuah lai i faci phor hra an tuhmi nih phor khat lawng a vui lai," a ti. ¹¹ Nan lo cang! Zu din ah zingkate in nan tho i zan ah tlaipi tiang ri cikcek in nan din. ¹² Nan puai ah tingtang le thonglawi le khuang he a erh in nan i erh i zu he nan i ciah. Sihmanhsehlaw Bawipa nih zeidah a tuah ti kha nan hngal lo. ¹³ Cucaah cun nannih cu sal ah kalpi nan si lai. Nan hruaitu pawl cu rawlṭam in an thi lai i nan zapi pawl cu tihal in an thi lai. ¹⁴ Mithi khua cu anmah ei duh ah khan a kaa kau piin aa an ko. Jerusalem khua chung tuavon pawl zong kha, zapi pawl aa chawk ur komi hna he cun a dolh duahmah ko hna. ¹⁵ An dihlak in ningzahnak an hmu lai i milungpuam vialte kha ṭhumh an si lai. ¹⁶ Sihmanhsehlaw Ralkapbu Bawipa nih a lianhngannak cu ahmaanmi thil a tuahmi ah khan a langhter i a thiannak cu a mi hna an bia a ceihpiak hnanak ah khan a langhter. ¹⁷ Khuapi an rawhnak hmun ah cun tuufa nih ram an ṭam lai i meheh fa nih ram no an ei lai. ¹⁸ Nan lo cang! Nan sualnak kha nan i hlitphuak kho ti lo. ¹⁹ Nan i thawh i, "Bawipa nih ka tuah lai a timi cu khulrang in tuah tuah ngat seh, kan zoh fom lai ta. Israel Pathian nih cun aa timhmi cu tuah tuah ngat seh. A lung chungah zeidah aa chiah ti cu kan zoh fom lai ta," nan ti. ²⁰ Nan lo cang! Thil ṭha cu thil ṭhalo nan ti i thil ṭhalo cu thil ṭha nan ti. Khuamui kha khuaceu nan ti i khua ceu kha khua mui nan ti. A kha mi kha a thlum nan ti i a thlummi kha a kha nan ti. ²¹ Nan lo cang! Kan fim nan ti, a fim ngaingai ah nan i ruat. ²² Nan lo cang! Zureu thawl lei i minthang hna! Zu ser le zu lap ton i ṭih ngei lo hna! ²³ Hi bantuk thil tuah ah cun hi tlukin nan ral a ṭha nain zik an in nawh hna tikah misual cu nan luatter hna i a sual lomi kha an bia ding tein nan ceihpiak duh hna lo. ²⁴ Cucaah cun facangzi le ramro cu an ker i an kangh bantukin, Israel Pathian a thiangmi Ralkapbu Bawipa nih a kan cawnpiakmi kha nan ngaih duh lo caah nan hram cu a thu lai i nan par cu a ro lai. ²⁵ Bawipa cu a mi hna cungah a thin a hung i anmah kha dantat awkah a kut a samh. Tlang cu an i hnin lai i a thimi cu an ruak kha zatlang lam ah an ril lai. Cu ti a si hmanh ahcun Bawipa thinhunnak cu a dong rih lai lo i dantatnak pek awkah a kut cu aa samh ko rih lai. ²⁶ Bawipa nih, lamhlapi i a ummi miphun kha, ra u, tiah hmelchunhnak a pek hna. Vanhramdeng in fifik in a kawh hna. An ra cang, khulrang in an ra cang. ²⁷ Ahohmanh a bami an um lo, ahohmanh a rilmi an um lo, ahohmanh a ngu i aa hngilhmi an um lo. Taisawm a dormi pakhat hmanh an um lo, kedan hri a catmi pakhat hmanh an um lo. ²⁸ An cantiang cu a har ngaingai i an likuk cu i kuai pengpung in an um. An rang cu an tin kha ṭeklung bantukin an hak, an rangleng kekual hna cu phuchim herh in an i herh. ²⁹ An ralkap hna cu, a sa sehmi ka chut hna hlah seh tiah aa kalpimi chiandeih bantuk an si. ³⁰ Cu ni a phak tikah cun Israel cu an hawhawthnawh lai i an aw cu rili thawng bantuk a si lai. Hi ram hi zohhmanh u! Muihnak le harnak lawng a si ko. Ceunak cu muihnak nih a dolh cang!

¹ Siangpahrang Uzziah a thih kum ah khan Bawipa cu ka hmuh. A sang i aa hlorhmi a bawiṭhutdan cungah khan a ṭhu i a puan cu biakinn kha a khat. ² A velchum ah cun mei bantuk a simi thilnung kha an dir i thla paruk cio an ngei. Cu thilnung hna nih cun an hmai kha an thla pahnih cun an i huh cio, an pum kha a dang pahnih in an i huh i a dang pahnih cu zuannak ah an hman hna. ³ Pakhat le pakhat kha an i chawn i, "A thiang, a thiang, a thiang, Ralkapbu Bawipa cu a thiang! Vawlei cung vialte hi a sunparnak in a khat dih," an ti. ⁴ An aw nih cun biakinn cu a hram in a hninh i biakinn cu meikhu in a khat. ⁵ Cun kei nih kaa thawh i, "E law, mah hi ka si ko cang! Ka lo ko cang. Ka ka in a chuakmi bia hi bia sual lawngte an si i ka umnak mi zong hi bia sual le bia thur a hmangmi lawngte an si. Cun atu ah ka mit hrimhrim in Siangpahrang, Ralkapbu Bawipa cu ka hmuh," ka ti. ⁶ Cun thilnung pakhat kha ka sinah a rung zuang i biakṭheng cung meiṭil cengceh in a cehmi kha a run i put. ⁷ Meiṭil cun ka hmur kha a ka tawngh i, "Meiṭil nih na hmur an tawngh cang, cucaah cun mawhchiat awk na sinak cu a lo cang i na sualnak cu ngaihthiam na si cang," a ti. ⁸ Cun Bawipa nih, "Ahodah ka fial lai? Ahodah ka lamkal a si lai?" a ti kha ka theih. Kei nih, "Keimah ka kal lai! Ka thlah tuah," tiah ka leh. ⁹ Cucaah a ka thawh i, "Va kal law hi mi hna hi hi bia hi va chim hna: ’Ngai lengmang hmanh u law a sullam cu nan hngal bal lai lo. Zoh lengmang hmanh u law a um lio lengmangmi hi zei thil dah a si ti kha nan hngal bal lai lo,’ va ti hna," a ti. ¹⁰ Cun a ka thawh ṭhan i, "Hi mi hna nih an hmuh khawh nakhnga lo le an theih khawh nakhnga lo le an hngalh khawh nakhnga lo, an lung pihter hna, an hna chehter hna law an mit cawtter hna. An hmuh khawh le an theih khawh le an hngalh khawh ahcun keimah lei ah an i mer sual lai i damnak an hmu sual lai," a ti. ¹¹ "Hi bantuk hin zei can dah a um lai, Bawipa," tiah ka hal i, "Khuapi cu a rawk dih i a lawn dih tiang—inn cu a chung i mi umtu an um lo tiang—hi ram hi a kin in a kin dih cikcek tiang a si lai. ¹² Hi mi hna hi ram hlapi ah ka kuat hna lai i ram hi a dihlak in king ringriang in a um lai. ¹³ Ram chungah hin mi pahra an taan hmanh ah cu hna zong cu thah an si ṭhiamṭhiam lai; annih cu mi nih an haumi kuhthing chumhmui bantuk an si lai," a ti. (Cu thing chumhmui cu Pathian miphun a thar in an i thawk ṭhannak ding hmelchunhnak a si.)

¹ Siangpahrang Ahaz nih Judah ram a uk lioah khan raldohnak pakhat a chuak. (Ahaz cu Jotham fapa a si i Jotham cu Uzziah fapa a si.) Siria siangpahrang Rezin le Israel siangpahrang Pekah nih Jerusalem kha an tuk, sihmanhsehlaw an la kho lo. (Pekah cu Remaliah fapa a si.) ² Judah siangpahrang nih Siria ralkap hna cu Israel ram chung kha an phan cang, ti kha a theih tikah, amah le a mi hna cu an thin a phang tuk hringhran i thlitu nih thingkung a hninh bantuk khin an i hnin. ³ Bawipa nih Isaiah cu a thawh i, "Na fapa Shear Jashub kha i ṭhit law Siangpahrang Ahaz cu hung tong tuah u. Puan taktu pawl rianṭuannak hmun, cunglei tili in ti a rung luannak tidong a donghnak ah khan nan va hmuh lai. ⁴ Amah cu, i ralring peng in lungdai tein um ko, lau hlah, awlokchong in um hlah, nan va ti lai. Rezin Siangpahrang le a mi Siria mi hna thinhunnak le Siangpahrang Pekah thinhunnak cu a mit dengmangmi thingthu bul pahnih khu tluk fang men a si ko. ⁵ Siria ram nih hin Israel ram le a siangpahrang he ṭhurual tlu in Judah ram dohnak khua kha an khan. ⁶ Judah ram cu vung chim i cu ramchung mi hna cu vung lauter i anmah lei i ṭanter i Tabeel fapa kha bawiṭhutdan cung i ṭhutter kha an i tim, nan va ti lai. ⁷ "Sihmanhsehlaw Bawipa keimah hrimhrim nih, hihi cu a si bal lai lo ka ti kha nan va chimh lai. ⁸ Zeicahdah a si bal lai lo? Siria cu Damaskas nakin a ṭhawng deuh lo i Damaskas cu Siangpahrang Rezin nakin a ṭhawng deuh fawn lo. Israel tu cu, kum sawm ruk le kum nga chungah hin a rawk tuk lai caah miphun pakhat ti awk tlak hmanh in a dir kho lai lo. ⁹ Israel cu Samaria khua nakin a ṭhawng deuh lo i Samaria cu Siangpahrang Pekah nakin a ṭhawng deuh fawn lo. " ’Na zumhnak a ṭhawn lo ahcun, na hmun hrimhrim lai lo,’ a ti, tiah hung chim," a ti. ¹⁰ Bawipa nih Ahaz cu bia dang pakhat a cah ṭhan i, ¹¹ "Bawipa na Pathian cu hmelchunhnak pakhat in hal tuah, a thuk lei ah mithi khua in a hung chuakmi hmelchunhnak tluk zong thuk ko seh, a sanlei ah vancung in a rung ṭummi tluk zongin sang ko seh, a ti. ¹² Ahaz nih cun aa thawh i, "Hmelchunhnak cu ka hal lai lo. Bawipa cu hneksak del zong ka duh lo," tiah a leh. ¹³ Cu tikah Isaiah nih cun aa thawh i, "Siangpahrang David tefa a simipa, ka bia hi ngai tuah. Hi tlukin minung ing na puanter cang pinah hin maw Pathian ing cu na puanter rih lai? ¹⁴ Atu cu Bawipa hrimhrim nih hmelchunhnak an pek lai. Fa a pawi liomi nu pakhat a um i fapa a hrin lai i a min ah Immanuel sak a si lai. ¹⁵ A hung upat i chiaṭha thleidang kho a si tikah a rawl cu cawhnuk le khuai hliti an si lai. ¹⁶ Cu caan a phak hlanah, nangmah an hrocer lengmangmi siangpahrang pahnih hna ram kha chuahtak an si lai. ¹⁷ "Israel pennak le Judah pennak an i ṭhennak in atu tiangah harnak a tlungmi vialte hna nakin a har deuhmi harnak cu nangmah le na mi hna le siangpahrang innchungkhar dihlak cungah Bawipa nih a tlunter lai — cu a tlunter dingmi cu Assiria siangpahrang kha a si! ¹⁸ "Cu caan a phak tikah Bawipa nih Izipt mi kha fifik in a kawh hna lai i Nail tiva a vaṭeng a hla bikmi hmun i a ummi tiang khan tho bantukin an ra lai, Assiria mi zong kha a kawh hna lai i khuai bantukin an ra ve lai. ¹⁹ A thukmi horkuang chung le lungpang chung lungkua vialte kha a khah in an khat lai i hlingbur vialte le saṭil tlonnak ram vialte ram kha a zual in an zual hna lai. ²⁰ "Cu caan a phak tikah, Bawipa nih Zufrates tiva ral i a ummi sam mettu pakhat kha a hlan lai i cu sam mettu nih cun nan khahmul le nan lu cung sam le nan takpum cung hmul vialte kha an meh dih hna lai — cu pa cu Assiria siangpahrang kha a si lai! ²¹ "Cu caan a phak tikah lothlopa pakhat nih cawpino pakhat le mehehpi pahnih lawng a ngeih hmanh ah, ²² an hnuk kha tam tuk hringhran a chuah lai caah duhdim tein aa za ko lai. Asi, ram chung i a tangmi vialte nih cawhnuk le khuai hliti ei awk an i ngeih dih cio lai. ²³ "Cu caan a phak tikah, mitsur ruang ruang khat ah a man tangka thong khat a simi ruang, ruang thong khat an umnak lo ṭhaṭha hna kha an bua dih lai i hlingbur le hling le so lawnglawng an khat dih lai. ²⁴ Khika ah li le thal aa put lomi cu ahohmanh an kal ngam lai lo. Asi, ram hi a pumpi in hlingbur le hling le so lawnglawng a khat dih lai. ²⁵ Rawl an rak cinnak tlang vialte kha hling nih a khuh dih hna lai caah cuka ah cun ahohmanh an kal duh ti lai lo. Caw le tuu tlonnak hmun a si lai," a ti tiah a ti.

¹ Bawipa nih a ka thawh i, "Ca ṭialnak tlap a nganmi pakhat in i lak law cafang puam pipi in, ’Maher-shalal-hash-baz’ tiah ṭial. ² Cun tehte caah zumhawktlakmi pahnih, tlangbawi Uriah le Jeberekhiah fapa Zekhariah kha i lak hna," a ka ti. ³ Cu hnu tlawmpal ah ka nupi sinah khan ka va kal i fa a pawi i fapa a hrin. Bawipa nih cun, "A min ah, ’Maher-shalal-hash-baz’ na sak lai. ⁴ Ngakchiapa nih, ka nu, ka pa, ti a thiam hlanah Damaskas chawva vialte le Samaria hranchaw vialte cu Assiria siangpahrang nih a kalpi dih hna lai," a ka ti. ⁵ Bawipa nih cun a ka chawnh ṭhan i, ⁶ "Hi mi hna nih hin, dai tein a luangmi Shiloah tiva ti kha an duh lo i Rezin le Remaliah fapa hmaiah a ther in an ther caah, ⁷ Bawipa nih Zufrates Tiva tilian cu an cungah a tlunter lai, cucu Assiria siangpahrang le a sunparnak kha an si; an tiluannak kahcham vialte le an titlang vialte kha a phum dih hna lai i ⁸ Judah ram chungah khan tilian bantukin a vung luang lai; cun a liam in a liam lai i hngawng tiang a phan lai; cun aa samhmi a thla nih khan na ram cu a bitkauhnak in a huh dih lai, maw Immanuel," a ti. Pathian cu kan sinah a um ko! Aa samhmi a thla in ram cu a huhphenh. ⁹ Nannih miphun vialte hna, ṭihnak in hmunkhat ah i pum tuah u. Vanhramdeng ram hna, ka bia ngai tuah u. Ral doh awkah timh cu i tim ko u, sihmanhsehlaw thinphang in um ṭhiamṭhiam ko u. ¹⁰ Khua cu khang lengmang ko u, sihmanhsehlaw nan khuakhanmi cu thlua an chuak bal lai lo. Nan duh zat in chim u, sihmanhsehlaw pakpalawng an si ko lai, zeicahtiah Pathian pei kan sinah a um cu. ¹¹ Mi nih an zulhmi lam kha zulh lo awkah, Bawipa nih a liannganmi a ṭhawnnak in ralrinnak a ka pek. A ka thawh i, ¹² "Hi mi hna an khuakhannak ah hin i tel hlah, cun an ṭihmi zong hi ṭih hna hlah. ¹³ Ralkapbu Bawipa keimah hi a thiangmi ka si kha philh hlah; na ṭih hrimhrim awk cu keimah hi ka si. ¹⁴ Ṭih a nungmi ka thiannak ruangah hin, mi nih an i chuih i an rilhnak lung bantuk ka si; Judah ram chung le Israel ram chung i a ummi hna le Jerusalem i a ummi hna a foihtu ding rap bantuk ka si. ¹⁵ Mi tampi an i chuih lai i an ril lai. An tlu lai i an kuai cikcek lai. An i foih lai," a ti. ¹⁶ Pathian nih a ka pekmi bia kha ka zultu hna nih ṭha tein an zohkhenh awk le an i ken awk a si. ¹⁷ Bawipa nih a mi cu a thuhtak cang hna, sihmanhsehlaw kei nih cun ka zumh i kaa bochan. ¹⁸ Zohhmanh, keimah le Bawipa nih a ka pekmi ka fale hi Zion Tlang i a ummi Ralkapbu Bawipa sinin a rami Israel mi caah hmelchunhnak le chingchiahnak kan si. ¹⁹ Kutṭial zoh thiammi hna le thitlawn thiam hna, a awn a aumi kha, hal hna u, tiah mi nih an in ti hna lai. An in thawh hna lai i, "A donghnak in ti ahcun, mi nih hin thlarau kha pei bia an hal awk hna a si i mithi kha pei a nungmi can ah an tlawn awk hna a si cu," an ti lai. ²⁰ Sihmanhsehlaw nannih nih cun, "Bawipa nih an cawnpiakmi hna kha ngai ko u! Thitlawng bia kha ngai hna hlah u — an chimmi nih zeihmanh an ṭhathnem hna lai lo, tiah nan leh hna lai," a ti. ²¹ Mi cu ram chungah khan hnabei dong le rawlṭam in an vak lai. An rawlṭam le an thinhun in an siangpahrang le an Pathian kha chiat an serh hna lai. Van an zoh lai, ²² Vawlei an bih lai, sihmanhsehlaw harnak le muihnak dah ti lo cu zeihmanh an hmu lai lo; cu muihnak cu muihnak ṭihnung a si i cu chungah cun an lut cuahmah ko. Hi harnak caan chung hin luatnak lam an caah zeihmanh a um lai lo.

¹ Zebulun le Naftali phun umnak ram nih hin hlanah cun ningzahnak a rak phan nain hi ram nih hin hmailei ah cun upatnak a hmuh lai, cu ram cu Mediterranean rili in aa thawk lai i nichuahlei ah Jordan tiva ral tiang, miphun dang an umnak Galilee ram hrimhrim tiang a phan lai. ² Mui lak i a rak i chawkmi hna nih khan ceunak nganpi an hmuh cang! Thihnak thladem tangah an rak um, sihmanhsehlaw atu cu ceunak nih a ceuh cang hna. ³ Bawipa, nangmah nih annih cu lunglawmhnak nganpi na pek hna i an tha na nuamter hna. Mi nih rawl an ṭuan tikah an i lawmh bantuk le an tlaihmi hranchaw an i phawt tikah an i lawmh bantukin Nangmah nih na tuahpiakmi hna cungah khan an i lawm. ⁴ Zeicahtiah rit piin an phorhmi hngawngkual kha na khiahpiak hna i an liang i a tu lengmangtu hna fung kha na khiah dih. Hlan liopi ah Midian ralkapbu na rak tei hna bantuk khan, na mi a hremtu hna le a serhsattu hna cu Bawipa nangmah nih na tei cang hna. ⁵ A dohtu hna ralkapbu kedan vialte le thisen aa nehmi an hnipuan vialte cu mei in hrawh an si dih lai. ⁶ Kan caah ngakchia pakhat a chuak! Fapa pakhat pek kan si! Amah cu kan uktu bawi a si lai. Amah cu Khuaruahhar Fim Chimtu, A Ṭhawngmi Pathian, Zungzal Hmunmi Pa, Daihnak Bawi, ti a si lai. ⁷ A lianhngannak cu a ṭhang chin lengmang lai; a ram cu a dai zungzal lai. Siangpahrang David tefa pakhat bantukin a ram cu a uk lai i atu thawk in caan donghnak tiang, hmaante le ding tein a uk lai. Ralkapbu Bawipa nih hi vialte hi tuah hrimhrim awkah aa tim. ⁸ Bawipa nih Israel pennak cungah, Jakob tefa hna cungah, a bia a thlah cang. ⁹ Israel mi vialte le Samaria khua chung i a ummi vialte nih cu bantukin a tuah cu an hngalh dih lai. Atu cu an i porhlaw i an lung a puam. An i thawh i, ¹⁰ "Tlakrawh inn cu an cim, sihmanhsehlaw lung inn in kan thlen ṭhan sawk hna lai, saikamor thing kaan cu an kiak, sihmanhsehlaw sidar thing ṭha bikbik in kan thlen ṭhan sawk hna lai," an ti. ¹¹ Bawipa nih an ral hna cu anmah doh awkah khan a cawlcanghter cang hna. ¹² Nichuahlei in Siria nih, nitlaklei in Filistia nih, an ka an i aan i seh an duh hna. Cu ti a si na hmanh cun Bawipa cu a thin a dam kho lo i dantatnak pek awkah a kut cu aa samh ko rih. ¹³ Israel mi cu an i ngaihchih lo; Ralkapbu Bawipa nih dan a tat hna nain amah leiah an i mer hlei lo. ¹⁴ Ni khat te ah Bawipa nih Israel mi hna le an hruaitu pawl cu dan a tat dih hna lai; a sam dih hna lai, lu he mei he a sam dih hna lai. ¹⁵ Lu cu tar le hmaizahmi kha an si, mei cu cawnpiaknak hmaanlo a cawnpiaktu hna profet kha an si. ¹⁶ Hi mi hna hi a hruaitu hna nih a ping ah an hruai hna i zeiti um awk hngal loin an tuah hna. ¹⁷ Cucaah cun Bawipa nih tlangval pakhat hmanh kha a luatter hna lai lo i mi cu an dihlak in Pathian zei i a rel lomi le bia ṭhalo chimmi lawngte an si caah, nuhmei zong ngakṭah zong ahohmanh a zaangfah hna lai lo. Cu ti a si na hmanh cun Bawipa thinhunnak cu a dong lo i dantatnak pek awkah a kut cu aa samh ko rih. ¹⁸ Hi mi hna ṭhat lonak cu hlingbur le rambur a khangtu mei bantukin a alh. A khu a dir in a dirmi mei, tupi a khangtu mei bantuk a si. ¹⁹ Ralkapbu Bawipa thinhunnak nih ram cu a dihlak in a kangh i mi cu mei rawl ah cun an cang. ²⁰ Ram chung khuazakip ah an hmuhmi rawl paoh kha an i cuh i an ei, sihmanhsehlaw an khim hlei lo. Anmah an fale lila hmanh kha an ei hna! ²¹ Manasseh mi hna le Efraim mi hna cu pakhat le pakhat an i do, cun an pahnih in Judah kha an doh fawn. Cu ti a si na hmanh cun Bawipa thinhunnak cu a dong lo i dantatnak pek awkah a kut cu aa samh ko rih.

¹ Ka mi hna hremnak ah phung dinglo a sermi nannih cu nan lo cang! ² Cu ti nan tuah caah cun sifakmi nih an hmuh awk hnga a simi kha an hmu kho lo i an bia kha ding tein ceihpiak a um bal lo. Cu phung cun nannih nih nuhmei le ngakṭah kha an thil le an ri nan chuh hna. ³ Pathian nih dan an tat hna tikah zeitindik nan i tuah lai? Bawmhnak kha khuazei ah dah nan tlikhnawh lai? Khuazei dah nan chawva kha nan thuh hna lai? ⁴ Raldohnak hmun ah nan thi lai, asilole sal ah an in kalpi hna lai. Cu ti a si na hmanh cun Bawipa thinhunnak cu a dong lai lo i dantatnak pek awkah a kut cu aa samh ko rih lai. ⁵ Bawipa nih aa thawh i, "Ka thin a ka huntertu hna dantatnak caah Assiria cu thingtan bantukin ka hman. ⁶ Pathian zei ah a rel lomi miphun, ka thin a ka phoktu hna tuk awkah Assiria cu ka thlah. An thil va chuh awk le ramh awk le mi kha khualak lam i nawncek he lamh chih awkah annih cu ka thlah hna," a ti. ⁷ Sihmanhsehlaw Assiria siangpa-hrang nih hin a lungchung tein amahte in aa tinhmi thil pakhat, a puarṭhawng ngaimi a ngei. Miphun tampi hrawh hrimhrim kha aa tim. ⁸ Aa thawh i, "Ka ralbawi cu an dihlak in siangpahrang an si. ⁹ Kalno khua le Karkhemish khua kha ka tei hna. Hamath khua le Arpad khua kha ka tei hna. Samaria le Damaskas kha ka tei hna. ¹⁰ Siasal a biami, Jerusalem le Samaria nak hmanh in siasal tam deuh a ngeimi miphun kha dantat awkah ka phak hna. ¹¹ Samaria le a siasal vialte cu ka hrawh dih cang hna i cu bantuk ṭhiamṭhiam in Jerusalem le cu khua chung i an biakmi siasal hna cungah cun ka tuah lai," tiah tluang a khawng. ¹² Sihmanhsehlaw Bawipa nih, "Atu i Zion Tlang cung le Jerusalem khua chungah ka tuah liomi hi ka dih tikah cun, Assiria siangpahrang hi aa porhlawtnak le a tluangkhawnmi ruangah hin dan ka tat lai," a ti. ¹³ Assiria siangpahrang nih cun aa thawh i, "Hi vialte hi keimah tuahmi an si dih. Kei cu ka ṭhawng, ka fim, i a zer zong ka zer. Ram khat le ram khat karlak i ramri cu ka hloh dih hna i an i khonmi thilri cu ka chuh dih hna. Cuka i khua a sami hna cu cawtum bantukin ka naan hna. ¹⁴ Vawlei cung miphun hna cu va bu bantuk men an si, vate ti hlawm in an chawva cu ka hlawm hna. Ka thin a ka phanter khotu dingah thla a samh ngammi pakhat hmanh an um lo, a ka awnhhnawh ngamtu dingah kaa a ang ngam pakhat hmanh an um lo," ti in tluang a khawng. ¹⁵ Sihmanhsehlaw Bawipa nih, "Hrei-tlung nih a hmangtu nakin ka ngan deuh a ti kho maw? Hluah cu a hmangtu nakin a biapi deuh maw? Thingtan nih mi cu a phorh ṭung hna lo, mi nih pei thingtan cu an phorh cu," tiah a ti. ¹⁶ Atu i khim lirliar in rawl a eimi hna cungah Bawipa nih rai a tlunter lai. An takpum chungah khan mei bantukin a kang pengmi a um lai. ¹⁷ Israel ceunak Pathian cu, mei ah cun a cang lai. Israel Pathian thiang cu meizik ah cun a cang lai i ni khat chungah zeizong vialte kha a kangh dih hna lai, hling le so hmanh kha a kangh dih hna lai. ¹⁸ Tupi ṭhaṭha le lo ṭhaṭha kha an rawk dih lai, thihnak tiang a tlunter khotu zawtnak nih mi a tlunhnawh bantuk khi a si lai. ¹⁹ A tangmi thingkung cu an tlawm tuk hringhran lai caah ngakchia hmanh nih a rel dih khawh hna lai. ²⁰ Israel mi lakin a taangmi hna nih, a rak hrawk dih dengmangtu hna miphun kha an i bochan ti lo caan a phan lai. Bawipa Israel Pathian thiang tu kha an i bochan taktak cang lai. ²¹ Israel mi hna lakin tlawmpal cu a ṭhawngmi an Pathian sinah khan an kir lai. ²² Atu ah cun Israel mi cu rili kam thetse zat si hna hmanh seh law, a kir ṭhanmi cu tlawmte lawng an si lai. Hi mi hna hi rawhralnak cu chiahpiak an si ko i cu rawhralnak cu an ton hrim awk a si ko. ²³ Bawipa Ralkapbu hna Pathian nih ka tuah lai tiah a chim bangin, ram chung dihlak ah cun rawhralnak cu a tlung ko lai. ²⁴ Bawipa Ralkapbu hna Pathian nih Zion i a ummi cu a thawh hna i, "Izipt mi nih an rak in hrem hna bantuk khan Assiria mi nih hin in hrem hna hmanh seh law, Assiria mi hi ṭih hna hlah u. ²⁵ Dantatnak kan pekmi hna cu caan tawite chungah ka dihter lai i cun annih cu ka hrawh hna lai. ²⁶ Oreb lungpi ah Midian mi ka rak tuk hna bantuk khan keimah Ralkapbu Bawipa nih annih cu ka fung in ka tuk hna lai. Izipt ka rak hrem bantuk khan Assiria cu ka hrem lai. ²⁷ Cu caan a phak tikah Assiria ṭhawnnak chung khan nannih cu kan luatter hna lai i an hngawngkual cu nan hngawng ah thilrit an si ti lai lo," a ti hna. ²⁸ Ral cu Aiath an phan cang. Migron kha an lonh cang. Mikmash ah an thilri kha an i chiah. ²⁹ Maabarah pawng khan an lan i Geba ah zan khat an riak. Ramah khuami hna cu an lau dih i Siangpahrang Saul Siangpahrang khua Gibeah khuami hna kha an zam dih. ³⁰ Gallim khuami hna au tuah u! Laishah khuami hna Gallim khuami au thawng cu ngai tuah u! Anathoth khuami hna, Gallim khuami hna aunak thawng cu let hna u. ³¹ Madmenah khuami hna le Gebim khuami hna cu himnak kawl ah an zam dih. ³² Ral cu nihin hrimhrim ah hin Nob khua ah an um i Zion Tlang, Jerusalem khua cu an kuttum an thinhnawh len ko. ³³ Bawipa Ralkapbu hna Bawipa nih thing nge thlangh in a thlangh hna lai. Aa porhlaw bikbik hna le a sang bikbik hna kha a thlangh hna lai i ningzahnak a phakter hna lai. ³⁴ Tupi chung thingkung kha hreitlung in an hau hna bangin annih cu Bawipa nih a hau hna lai i Lebanon tlang thing ṭha bikbik an tluk bangin an tlu lai!

¹ Siangpahrang David ciruang hi haumi thingkung bantuk a si; chumhmui in nge thar an corh bantukin David tefa chungin siangpahrang thar pakhat a chuak lai. ² A mi kha a uk khawh hna nakhnga Bawipa ṭhawnnak nih amah cu fimnak le hngalhnak le thiamnak a pek lai. Bawipa duhnak kha zeidah a si ti a hngalh lai i Bawipa cu a ṭih lai. ³ Cun Bawipa rian ṭuan kha aa lawmhnak a si lai. Leng lang men le mi chim chin bia men in bia a khiak lai lo; ⁴ Sifakmi kha an bia ṭha tein a ceihpiak hna lai i nauta pawl kha a ṭanh hna lai. Amah nawl pekning in ram cu dantat a si lai i mi ṭhalo cu an thi lai. ⁵ A mi cu dinnak in a uk hna lai i an caah zumh awk tlakmi a si lai. ⁶ Cenghngia le tuu kha hmunkhat ah dai tein an tlong ṭi lai i pawlai le mehehfa cu an bawk ṭi lai. Cawfa le chiandeih no kha rawl an ei ṭi lai i ngakchia tete nih khan an zohkhenh hna lai. ⁷ Caw le vom cu rawl an ei ṭi lai i an fale cu dai tein an bawk ṭi hna lai. Caw nih facang zi an ei bantukin chiandeih nih facang zi cu a ei ve lai. ⁸ Sivai ngeimi rul pawngah ngakchia nih lente an i celh hmanh ah harnak zeihmanh an tong lai lo. ⁹ Zion Tlang, Pathian tlang thiang chungah cun thil ṭihnung le thil ṭhalo zeihmanh a um lai lo. Rili cu ti in a khah bantukin hi ram cu Bawipa hngalhnak in a khat lai. ¹⁰ Siangpahrang David ciruang chungin a chuakmi siangpahrang thar cu miphun hna caah hmelchunhnak a si lai i cu a si lainak ni cu a phan lai. A siangpahrang khua chungah khan an i pum lai i upatnak an pek lai. ¹¹ Cu ni a phak tikah Bawipa nih a ṭhawnnak kha a hman ṭhan lai i Assiria ram le Izipt ram le Pathros ram le Ethiopia ram le Elam ram le Babilonia ram le Hamath ram le rili kam ram hna le tikulh ram hna chung i a ummi a tang rihmi hna kha, inn ah a tlunpi hna lai. ¹² Israel mi le Judah mi aa ṭhekmi hna kha vawlei ki li in ka pumh ṭhan hna lai i hmuhsaknak caah Bawipa nih hmelchunhnak pakhat a tar lai. ¹³ Israel ram nih khan Judah ram kha a nahchuah ti lai lo i Judah zong cu Israel ral a si ti lai lo. ¹⁴ Hmunkhat ah nitlaklei i a ummi Filistin mi kha an tuk hna lai i nichuahlei i a ummi kha an ramh ṭi hna lai. Edom mi le Moab mi kha an tei hna lai i Ammon mi nih an nawl an zulh hna lai. ¹⁵ Bawipa nih thli lin a chuahter lai i cu thli lin nih cun Nail tiva le Zufrates tiva kha a kaoter hna lai i tiva hme tete pasarih lawng kha a nganh hna lai caah ahopaoh nih an tan khawh hna lai. ¹⁶ Assiria ram chung i a tangmi a mi hna caah khan, an pupa nih Izipt ram in an rak zam tikah Bawipa nih lam nganpi a serpiak hna bang khan, Assiria ram chung cun lam nganpi pakhat a um lai.

¹ Ni khatkhat cu mi nih hitin hla an sak ni a phan te lai: "Bawipa, nangmah cu kan lawmh ko. Ka cungah na thin a rak hung, sihmanhsehlaw atu cu na ka hnemh i na thin cu a hung ti lo. ² Pathian cu ka khamhtu a si; Amah cu kaa bochan lai i ka thin a phang lai lo. Bawipa nih ṭhawnnak le thazang a ka pek, amah cu ka khamhtu a si. ³ A ti a halmi cu tikik nih lawmhnak a pek hna bangin Pathian mi cu Pathian nih a khamh hna tikah an i lawm." ⁴ Ni khatkhat cu mi nih hitin hla an sak ni a phan te lai: "Bawipa cu thangṭhat ko u, Amah kha bawmhnak hal u. Miphun vialte kha a tuahmi chim hna u, zeitluk in dah a lianhngan ti kha chim hna u. ⁵ Thil lianngan a tuah hna caah Bawipa cu hla in thangṭhat u. Vawlei dihlak nih cu thawng cu thei hna seh. ⁶ Zion i a ummi paohpaoh cu au u law hla sa u. Israel Pathian thiang cu a lianngan i a mi hna sinah khua a sa."

¹ Hi bia hi Babilon kong ah Amoz fapa Isaiah nih Pathian sinin a hmuhmi bia a si: ² Tlang kawng pakhat par ah raltuknak alan phun tuah! Ralkap cu au hna law, aa porhlawmi khualipi kutka cu tu cang hna u ti hmelchunhnak caah na ban kha hlerpiak hna. ³ Bawipa nih a thin a phoktu kha tuk awkah a ralkap kha a kawh hna, cu a thiangmi raldohnak doh awkah cun aa zum ngaingaimi a ralkap, ral cu kanmah nih kan tei ṭheo lai tiah aa ruatmi ralkap pawl kha, a kawh hna. ⁴ Tlang cung thawng cu ngai tuah u — mibu nganpi thawng a si, miphun tampi le ram tampi aa pummi thawng a si. Ralkapbu Bawipa nih a ralkap cu raldoh awkah a timh hna. ⁵ Lamhlatpi i a ummi ram vanhramdeng in a rami an si. A thinhun in ram cu a pumpi in Bawipa nih a hrawh lai. ⁶ Nganfak in ai tuah u! Bawipa ni cu a nai cang, Lianngan Bik nih rawhnak a tlunter lai ni cu a nai cang. ⁷ Mi cu ahopaoh an kut a thlep lai i an lung a dong lai. ⁸ An dihlak in therphang in an um lai i nau nganfah a ingmi nu bantukin fahnak nih a tei hna lai. Pakhat le pakhat kha an i zoh tikah an i ṭih lai i an hmai thi khal a chuak ciocio lai. ⁹ Bawipa ni cu a ra lio, a thinhunnak le a thinlinhnak ni, ni ṭihnung cu a phan dengmang cang. Vawlei cu ramking ah a cang lai i misual mi paohpaoh cu thah an si lai. ¹⁰ Arfi hna le arfi bu hna khi an ceu ti lai lo, ni cu a chuah tikah a mui lai i thlapa cu a vang lai lo. ¹¹ Bawipa nih aa thawh i, "Vawleicung ah rawhralnak ka tlunter lai i miṭhalo vialte cu an sualnak ruangah khan dan ka tat dih hna lai. Aa porhlawmi paohpaoh kha ka ṭhumh hna lai i a lung a puammi le ruam a kaimi vialte cu dan ka tat hna lai. ¹² A tangmi cu sui nakin an tlawm deuh lai, Ofir sui nakin an tlawm deuh lai. ¹³ Ralkapbu Bawipa keimah nih ka thinhunnak ka chuah ni ah cun, van khi an ther dih lai i vawlei hi a umnak hmun in a choi lai. ¹⁴ "Babilon ram chung i ramdangmi a ummi hna kha, anmahle an ram cio ah an kir lai, sakhi cu ramvai hna sinin a zam bantukin annih zong cu an zam lai, khaltu ngei lo tuu an i ṭhek bantukin an i ṭhek lai. ¹⁵ Tlaih a tongmi paoh cu thi lakin nam in chunh an si lai. ¹⁶ Zeihmanh tuah kho ṭung loin an mit lawng i an zoh ko lio hna ah khan, an fale tete cu thi lakin an tenghpiak hna lai, an inn kha an ramh hna lai i an nupile kha hranhram in an sualpiak hna lai," a ti. ¹⁷ Bawipa nih, "Babilon tuk awkah Media mi kha ka cawlcanghter lio hna. Annih cu ngun kha zeihmanh ah an rel lo i sui zongin lem khawh an si lo. ¹⁸ An li le an thal in tlangval kha an thah duahmah ko hna lai. Ngakchia cungah siseh, bawhte cungah siseh, zaangfahnak zeihmanh an ngei lai lo. ¹⁹ Babilon ram hi ram vialte lakah ram dawh bik a si, a chung i a ummi a mi hna nih an i chor ngaingaimi a si. Sihmanhsehlaw Bawipa nih Sodom le Gomorrah ka rak hrawh bantuk khan ka hrawh ve lai. ²⁰ Cuka ah cun ahohmanh an um ṭhan ti lai lo. A vak a vai tawnmi Arab mipa zong nih cuka ah cun a thlam a bunh lai lo; cuka ah cun tuukhal zong nih an saṭil an khal hna lai lo. ²¹ Cu hmun cu thetse rawn saram umnak hmun ah a cang lai i chimbu nih an bu an saknak hmun a si lai. Cuka ah cun ostrik va an um lai i sathar hna cu cu hmunrop ah cun an laam lai. ²² Innsang hna le bawi inn nuamnuam ah khan cenghngia aw le ramui awnh thawng lawng a leng ko lai. Babilon cu a caan a phan cang! A ni cu a dih dengmang cang," a ti.

¹ Bawipa nih a mi Israel mi cu a zaangfah ṭhan hna lai i amah mi ah khan a thim ṭhan hna lai. An ram ah khan a kirter ṭhan hna lai i ramdangmi nih khan an fuh hna lai i an sinah cun an um lai. ² Israel mi cu Bawipa nih a pekmi hna ram i an kir kha miphun tampi nih an bawmh hna lai i cuka ah cun cu miphun hna nih cun sal bantukin an rian an ṭuanpiak hna lai. Hmasa i Israel mi a rak tlaitu hna kha atu cu Israel mi nih an tlaih ve hna lai i hmasa i a rak hremtu hna kha an uk ve hna lai. ³ Bawipa nih Israel mi cu fahnak le temhnak an inmi chung le an duh na lo i an hnekmi hna rian chung khan dinhnak a pek hna lai. ⁴ Hi bantukin dinhnak a pek hna tikah annih nih Babilon siangpahrang kha an nihsawh lai i, "Siangpahrang ṭhalopa cu a ril cang! Ahohmanh a hrem ṭhan kho ti hna lai lo. ⁵ Midang rial chih a hmangmi le an teimi hna hrem a hmangmi uktu ṭhalo hna ⁶ an ṭhawnnak cu Bawipa nih a donghter cang. ⁷ A donghnak ah atu cu vawlei nih hin a dihlak in dinhnak le daihnak a hmuh cang i a mi kip kha lunglawmhnak in hla an sa. ⁸ Lebanon tlang i a ummi saipres thing hna le sidar thing hna cu, siangpahrang kha a rilh cang caah an i lawm; amah cu a lo cang i anmah a hautu hna a um ti lo caah an i lawm! ⁹ Babilon siangpahrang rak don awkah cun mithi khua cu aa tim. Vawlei cung i mi lianngan a rak simi hna thlarau kha an i teltum. Siangpahrang hna thlarau kha an bawiṭhutdan in an tho. ¹⁰ An dihlak in amah cu, "Atu cu kanmah tlukin na der ve ai cang! Kanmah bantuk na si ve ko cang. ¹¹ Tingtang aw dawhdawh he upatnak an rak in pek tawnmi kha atu cu mithi khua ah na um ve ai cang. Tholung a khatmi ihkhun ah na it ve cang i cangcel nih a zual in an in zual ve ai cang," an rak ti. ¹² Babilon siangpahrang, Deirel arfi ceu, nang cu vancung in na tla cang! Hlanah cun miphun tampi kha na rak tei hna, sihmanhsehlaw atu cu vawlei ah an in hlonh cang. ¹³ Vancung i hung kai i a sang bikmi arfi nak sang i na bawiṭhutdan hung chiah cu na rak i zuam. Chaklei i a ummi tlang, pathian hna an i pumhnak tlang ah khan siangpahrang bantukin ka ṭhu lai tiah naa ruah. ¹⁴ Khuadawm cungah khin ka kai lai i Cungnung Bik bantuk ka si lai na ti. ¹⁵ Asinain, cu nemmam cu si loin mithi khua a tawne bik tu ah na tla ai! ¹⁶ Mithi nih ṭhep loin an rak in zoh lai i kaa ang in, "Hi pa hi vawlei kha a hninh in a rak hnin i ram vialte kha a ther in a rak therter dihtu hna kha a si lo maw? ¹⁷ Amah hi khualipi vialte a hrawk dihtu le vawlei cu thetse ram i a canter dihtu kha a si lo maw? A tlaih ciami sal hna cu a thlah bal ti lo i inn ah a kirter ti lotu kha a si lo maw?" an in ti lai. ¹⁸ Vawlei cung siangpahrang dang vialte cu an thlan dawhdawh chungah khan an it hna, ¹⁹ sihmanhsehlaw nang cu thlan na ngei lo i a thut in va thut lak awkah na ruak cu a hlonh in hlonh a si. Na ruak cu raltuknak hmun i a thimi ralkap hna ruak nih khan a khuh i cu hna sinah cun lung khor chungah hlonh le lamh chih a si. ²⁰ Siangpahrang dang bang in nang cu vui zong na tong lai lo, zeicahtiah nangmah nih na ram cu na hrawh i na mi cu na thah hna. A ṭha lomi na innchungkhar chungin a nungmi ahohmanh an um lai lo. ²¹ I samnak cu thawk ko u! Hi siangpahrang fapa hna hi anmah a hringsortu hna sualnak ruangah hin an thi lai. An lakah ahohmanh vawlei uktu an um lai lo i vawlei cungah khua an ser lai lo. ²² Ralkapbu Bawipa nih, "Babilon cu ka tuk lai i ka hrawh lai. Zeihmanh ka nganhmi a um lai lo — ngakchia siseh a tangmi si hna seh, ka nganhmi zeihmanh an um lai lo. Bawipa nih hi bia cu ka chim. ²³ Babilon cu tibual ah ka canter lai i khika ah chimbu an um lai. Zeizong vialte a phiak dihtu hmunphiah in Babilon cu ka phiah lai. Ralkapbu Bawipa nih hi bia cu ka chim," a ti. ²⁴ Ralkapbu Bawipa nih chiatser in, "Siseh tiah ka khanmi cu a si ko lai. Ka tuah lai ka timi cu tuah a si ko lai. ²⁵ Israel ram ka ram chungah hin Assiria mi kha ka thah hna lai i ka tlang cungah ka lamh chih hna lai. Assiria hngawngkual chung khan ka mi cu ka luatter hna lai i an phorhmi thilrit khan ka luatter hna lai. ²⁶ Hihi vawlei cung ca i khua ka khanmi cu a si i miphun dantat awkah khan ka ban cu aa samh ko," a ti. ²⁷ Ralkapbu Bawipa nih hi hi tuah aa timh hrimhrimmi a si; dantatnak pek awkah a ban cu aa samh i ahohmanh nih an dawn kho lai lo. ²⁸ Hi bia hi Ahaz Siangpahrang a thih kum i a chimmi a si. ²⁹ Filistia ram mi hna, nanmah an tutu hna fungfek cu a kiak cang, sihmanhsehlaw i lawm hlei hlah u. Rul cu pakhat a thih tikah a ṭha lo deuh chinmi kha a airawltu ah a hung um tawn. Rul ti chungin, a zuangmi rul kha a keuh. ³⁰ Bawipa cu a mi hna lak i sifakmi hna caah tuukhal a si lai i him tein a umter hna lai. Sihmanhsehlaw nannih Filistin mi cungah cun mangṭam a tlunter lai i pakhat hmanh cu mangṭam nih cun a nung in an zuahmi hna nan um lai lo. ³¹ Filistin mi khuapi hna, ai u law, bawmhnak duh ah au tuah u! Nan dihlak in therphang in um u. Chaklei in leidip khu a rung lio — cu leidip khu cu ralchia aa tel lomi ralkap an si. ³² Filistia ram in a rami lamkaltu hna kha zeitindah bia kan rak leh hna lai? Bawipa nih Zion cu a fehter cang i cuka ah cun fahnak a ingmi a mi hna kha him tein khua a sakter hna lai, tiah kan rak chimh hna lai.

¹ Hi hi Moab kong bia a si: Zan khatte ah Ar khua le Kir khua cu hrawh an si i Moab ram cu a ning piin a daidup ko. ² Dibon khuami hna cu hmunthiang i va ṭah awkah tlang ah khan an kai. Moab mi hna nih cun Nebo khua le Medeba khua kha an ṭah hna; an ngaihchiat in an lu an i kongh i an khahmul an i ziah. ³ Zalam i aa chawkmi hna cu buri puan an i aih i khua chung mi zapi pumhnak hmun le inn chung hna ah khan mi cu an ṭap i an ai. ⁴ Heshbon khuami hna le Elealeh khuami hna cu an ai i an ai thawng cu Jahaz khua tiang a thang. Ralkap hmanh an tha a therh hna, an ralṭhatnak kha a lo dih cang. ⁵ Moab caah ka lung a fak hringhran. Mi cu Zoar khua ah an zam. A cheu cu an ṭah pah in Luhith lam leiah khan an hung kal; a cheu cu Horonaim leiah khan an zam i an i ṭah sek. ⁶ Nimrim tiva cu a kao, a pawng ram cu an car dih i a hringmi zeihmanh an taang lo. ⁷ Inhliam nel kha an tan i an ngeihmi vialte kha zampi an i zuam. ⁸ Moab ramri kip ah ṭah thawng lawng a leng ko. Eglaim khua le Beerelim khua zongah ṭah thawng lawng a leng ko. ⁹ Dibon khua ah khan tiva cu thisen in a luang, sihmanhsehlaw cuka mi hna caah khan Pathian nih cu nak chia chin cu a chiah ko rih. Moab ram chung i a tangmi hna kha heh tiah an sam hna lai.

¹ Thetse ram i a ummi khua Sela khua in Moab mi nih, Jerusalem khua i bawi a simi sinah laksawng caah tuufa pakhat an kuat. ² Arnon tiva kam khan an hngah i zei tuah awk hngal loin an i chawk lengmang, vate fano an bu chungin an lak hna i an thla lawng an bengh lengmang bantuk khi an si. ³ Judah mi cu an thawh hna i, "Zeitindah kan um lai, kan chim tuah u. Chun ni lin ah naidem a demhtu thing bangin kannih cu kan huppheng tuah u, nan thladem tangah cun kan dorter tuah u. Kannih cu ralzam kan si, ahohmanh nih an kan hmuh khawh lonak ding hmun ah kan thup u. ⁴ Nan ram chungah kan umter u law, kanmah hrawh a kan duhtu hna sin khan kan huppheng ko u," an ti hna. (Hremnak le rawhralnak kha a dong lai i ram a hrawktu kha an um ti lai lo, ⁵ Khi tikah David tefa pakhat cu siangpahrang a si lai i a mi kha zumhawktlak le dawtnak in a uk hna lai. A hmaanmi thil tuah ah khan a khul a rang lai i mi kha dinnak cu a tuahter hna lai.) ⁶ Judah mi nih an i thawh i, "Moab mi cu miporhlaw ngaingai an si kha kan theih. Miruamkai, mizum an si kha kan hngalh, sihmanhsehlaw an tluangkhawnnak cu pakpalawng an si," an ti. ⁷ Harnak an in caah khan Moab mi cu an ṭap lai. Kir Heres Khua i rawl thawthaw an rak ei tawn kha an lung ah a hung pem tawn lai i an dihlak in an ṭap tawn lai, lung dong in an um lai. ⁸ Heshbon khua lo hna le Sibmah khua mitsur dum hna cu an rawk dih — miphun hna uktu bawi lunglawmhtertu zu a chuahnak mitsur dum kha an rawk dih. Voi khat cu a mitsur ruang kha nichuahlei ah Jazer khua tiang a zam i thetse ram zong kha a va phan, cun nitlaklei ah Rili Thi ralchan tiang a phan. ⁹ Sihmanhsehlaw atu cu Jazer ka ṭah bang khan Sibmah khua mitsur ruang cu ka ṭah ve hna. Heshbon le Elealeh caah ka mitthli a tla, zeicahtiah mi lawmhternak dingah kumvui zeihmanh a um lo. ¹⁰ Rawl tampi a rak chuahnak lo ah khan atu cu ahohmanh aa lawmmi an um lo. Mitsur dum chungah khan a aumi siseh, hla a sami siseh, ahohmanh an um lo. Ahohmanh zu ser awkah mitsur thei a nengmi an um lo, lunglawmhnak au thawng kha a dong cang. ¹¹ Moab caah ngaihchia in ka hram i Kir Heres caah lungfak in ka ai. ¹² Moab mi hna nih thla cam awkah tlang cung hmunthiang ah an kal lengmang le an biakinn i an kal lengmang cu alak ah an tha lam an i bat men, zeihmanh a ṭhathnem hna lai lo. ¹³ Hi bia hi Bawipa nih Moab kong ah a rak chimmi bia a si. ¹⁴ Cun atu cu aa thawh i, "Kum thum chung hrimhrim ah Moab rumnak cu a lo dih lai. A mi tampi hna chung khan tlawmte lawng an tang lai i cu hna cu a der a thawmmi an si lai," a ti.)

¹ Hi bia hi Damaskas kong bia a si. Bawipa nih aa thawh i, "Damaskas cu khua a si ti lai lo, thil rawk pon lawnglawng a si cang lai. ² Siria khua hna cu zungzal in chuahtak an si lai. Tuu le caw tlonnak hmun ah an cang lai i ahohmanh nih an ṭhawl hna lai lo. ³ Israel cu hupphengtu ralhruang zeihmanh a ngei ti lai lo i Damaskas cu amahte in aa ukmi ram a si ti lai lo. Siria mi hna chungin a tangmi hna kha Israel mi hna bantukin ningzak in khua an sa ve lai. Hi bia hi Bawipa nih ka chim," a ti. ⁴ Bawipa nih, "Israel lianhngannak a dongh lai ni a phan lai, cun a rumnak vialte cu sifahnak nih a rolh lai. ⁵ Israel cu rawl an hleh i an ṭuan cianak lo bantuk a si lai, Refaim Nelrawn i famua an suatnak cia lo bantuk a si lai. ⁶ Tlawmte lawnglawng an tang lai i Israel cu a thei an lawh dih i a parpahlek ah pum hnih pum thum, a nge ah pum li pum nga lawng an nganhmi oliv kung bantuk a si lai. Bawipa Israel Pathian keimah nih hi bia cu ka chim," a ti. ⁷ Cu ni a phak tikah annih a sertu hna Israel Pathian thiang cu bawmh an hal lai. ⁸ Anmah nih an kut in an sermi biakṭheng kha an i bochan ti lai lo, anmah nih an kut in an tuahmi zong kha an i bochan ti hna lai lo — cu an kut in an tuahmi hna cu Asherah khuazingnu biaknak caah an tuahmi thingṭial hna zihmui khanghnak caah an sermi biakṭheng hna kha an si. ⁹ Cu ni a phak tikah cun ralhau in kulhmi khua hna kha an zamtak hna lai i an rawk dih lai; Israel mi nih an rak dawi hna tikah Hiv mi le Amor mi nih an rak zamtakmi hna khua bantuk kha an si lai. ¹⁰ Israel, nangmah an chanhtu le lungpi bangin an hupphengtu na Pathian cu na philh cang. Dum thiang tu kha naa serh hna i ramdang pathian kha na biak. ¹¹ Asinain na cin hna zing hrimhrim ah kho in par hna hmanh seh law kumvui zeihmanh na hmu ṭhiamṭhiam lai lo. Harnak le a dam kho lomi fahnak lawng a um lengmang ko lai. ¹² Miphun ṭhawngṭhawng hna cu an i tuai, an i tuai thawng cu rili thawng bantuk le tilet ngan pipi thawng bantukin a thang. ¹³ Miphun hna cu hmailei ah rili tilet bangin an kal, sihmanhsehlaw Pathian nih a sik hna i an kir, tlang cung i thli nih a choihmi leidip bantuk le phuchim nih a choihmi capawl bantuk an si. ¹⁴ Zanlei ah cun annih nih thil ṭihnung an chuahter, sihmanhsehlaw zinglei ah cun an lo. Cu bantuk cu kan ram a hrawktu paoh cu an si ko.

¹ Ethiopia ram chung tiva hna ralchan ah, thla khawn thawng a thannak ram pakhat a um. ² Cuka ram cun lamkaltu hna kha Nail tiva cungin phaikung in sermi tilawng in an rung. A khul a rangmi lamkaltu hna, inn ah kir ṭhan u. Nan ram ah bia kha hei kirpi ṭhan u. Nail tiva thawhnak i a ummi nan ram ah cun hei kirpi ṭhan u; a ṭhawng i a lian a nganmi nan phun, a sang i a cuar a nal in a nalmi nan miphun, vawlei cung dihlak ah ṭih a simi sinah cun hei kirpi ṭhan u. ³ Vawlei cung i a ummi vialte hna, ngai tuah u. Tlang par ah hmelchunhnak alan an tar kha rak zoh tuah u. Muko tum thawng cu rak ngai tuah u, ⁴ Bawipa nih a ka thawh i, "Rawlṭuan caan khualum ah daite in dap cu aa ser i chun laicer ah ni cu dawh ngaiin a tlan bantukin, vancung khin ka run in zoh hna lai. ⁵ Mitsur thei lawh an si hlan, a par an ṭilh dih i a thei an hmin cuahmah lioah khin, nam in mitsur nge cu pheh an si bantuk khin, ral nih Ethiopia mi kha an hrawh hna lai. ⁶ An ralkap hna ruak cu va le saram nih run ei hna seh tiah kaltak an si lai. Ṭhal ah va nih an ei hna lai i khuasik ah saram nih an ei hna lai," a ti. ⁷ Nail tiva thawhnak i a ummi ram sinin Ralkapbu Bawipa nih pekchanhmi thil a cohlan ni a phan lai; hi a ṭhawng i a liannganmi miphun, a sang i an cuar a nal in a nalmi hna, vawlei cung dihlak nih an ṭihmi hna sin hin laksawng a cohlan ni a phan lai. Annih cu Ralkapbu Bawipa biaknak hmun Zion Tlang ah khan an ra lai.

¹ Hi bia hi Izipt kong bia a si. Bawipa cu khuadawm aa cit i khulrang in Izipt ram ah a ra. A hmaiah Izipt ram siasal hna cu an ther i Izipt mi hna cu an lung a dong. ² Bawipa nih aa thawh i, "Izipt ram chungah mah le mah i dohnak ka chuahter lai, u le nau kha an i do lai i innpa le innpa kha an i do lai. Khua khat le khua khat an i tu lai i siangpahrang pakhat le pakhat uknak an i cuh lai. ³ Izipt mi an khuakhannak kha ka tuai lai i an lung ṭhawnnak kha ka zorter lai. An siasal kha, kan bawm u, tiah an ti hna lai; khuavang kha zeitindah kan um lai tiah an hal hna lai i mithi thlarau kha ruahnak kan cheu u tiah an ti hna lai. ⁴ Izipt mi cu a puar ngaingaimi uktu siangpahrang kut chungah ka pek hna lai i a uk hna lai Bawipa Ralkapbu Bawipa nih hi bia cu ka chim," a ti. ⁵ Nail tiva ti cu a puan lai i tiva cu a car te lai. ⁶ Tivapi in tilaknak kahcham an cawhmi hna cu duhsah tein an car caah an thu lai. Phaikung le ram kha an car lai i, ⁷ Nail tiva kamah an cinmi rawlkung vialte kha an ro lai i thli nih a choih hna lai. ⁸ Nail tiva ah nga tlaih in a paw aa cawmmi hna kha an hrum lai i an ai lai; an sio le an sur cu zeihmanh san an tlai ti lai lo. ⁹ Khumla in puan a takmi hna cu an lung a dong lai i ¹⁰ puan taktu hna le zungthiam pawl cu hnabeidong le lungrethei in an um lai. ¹¹ Zoan khua chung haotu hna cu mihrut an si! Cun Izipt ram mifim bikbik hna nih lungthin an cheuhmi hna cu hruh bia men a si. Kannih cu hlanlio siangpahrang hna le mifim hna an ro a cotu kan si tiah zeitindah siangpahrang cu an chimh ngam? ¹² Izipt siangpahrang khuazei ah dah na fimchimtu mifim hna cu an si kun? Ralkapbu Bawipa nih Izipt ram caah hin zei khuakhannak dah a ngeih ti kha a chimh zong an in chimh khawh sual ko hnga dah kaw! ¹³ Zoan khua le Memfis khua chung haotu hna cu mihrut an si ko. Annih cu an miphun kha a hruaitu ding an si nain a pingah an kalpi hna. ¹⁴ Lungthin an cheuh hna tikah an lung a tuaitam chin tu dingin Bawipa nih lungthin a cheutu cu a umter hna. Cucaah cun Izipt cu a tuahmi paoh ah khan a palh lengmang i amah luak lila i a nalmi zuri bantukin a sawn lengmang. ¹⁵ A ram chung i a ummi ahohmanh nih, mirum si hna seh, misifak si hna seh, mihme si hna seh, mingan si hna seh, Izipt cu bawmhnak an pe kho lo. ¹⁶ Izipt mi cu nu bantukin an ral a chiat caan a phan lai. Ralkapbu Bawipa nih anmah dantat awkah a kut a samh kha an hmuh tikah a ther in an ther lai. ¹⁷ Ralkapbu Bawipa nih an umtuning ding an ca i a timhmi kha an hngalh chel paoh ah Judah mi kha an ṭih ngaingai hna lai. ¹⁸ Cu caan a phak tikah Izipt ram khua panga ah Hebru holh kha hman a si lai. Cuka i a ummi hna nih Ralkapbu Bawipa min in chiat an ser lai. Cu khua hna lak i pakhat cu "Ni Khua" tiah ti a si lai. ¹⁹ Cu caan a phak tikah Izipt ram chungah Bawipa ca biakṭheng pakhat a um lai i Izipt ramri ah lungphun pakhat cu Bawipa caah ser a si lai. ²⁰ Cu biakṭheng le lungphun cu Izipt ram chungah Ralkapbu Bawipa a um ti hngalhnak hmelchunhnak a si lai. Cuka mi hna nih hremnak an in i Bawipa kha, kan bawm tuah tiah an hal tikah annih chuahtu dingah khan mi a thlah lai. ²¹ Izipt mi sinah Bawipa nih aa langhter lai. Cu bantukin aa langhter tikah annih nih an hngalh lai i an biak lai i raithawinak le pekchanhmi thil an pek lai. Annih nih a fekmi biakamnak an tuah lai i bia an i kammi cu an tlinter lai. ²² Bawipa nih Izipt mi cu dan a tat hna lai, sihmanhsehlaw a damter ṭhan hna lai. Annih nih amah leiah khan an i mer lai i an thlacamnak kha a theihpiak hna lai i a damter hna lai. ²³ Cu caan a phak tikah Izipt le Assiria kar ah lam nganpi pakhat a um lai. Hi ram pahnih hna mi cu an i tlawng an i kai lai i hi miphun pahnih hna cu hmunkhat ah Pathian an bia lai. ²⁴ Cu caan a phak tikah, Israel cu Izipt le Assiria he aa tluk in a um lai i hi miphun pathum hna hi vawleicung mi vialte caah thluachuahnak an si lai. ²⁵ Ralkapbu Bawipa nih thluachuah a pek hna lai i, "Ka mi Izipt mi hna, thluachuah kan pek hna lai, ka sermi Assiria mi hna, thluachuah kan pek hna lai, ka thimmi Israel mi hna, thluachuah kan pek hna lai," a ti hna lai.

¹ Assiria siangpahrang Sargon nih a fial bantukin, Assiria ralkap uktu bawi a ngan bik nih Filistin mi khua Ashdod kha a tuk. ² Cu hlan kum thum ah khan Bawipa nih Amoz fapa Isaiah cu, naa hrukmi khum puan le na kedan kha i phoih hna, tiah a rak ti. Bawipa nih a chimh bang cun, taklawng le kelawng in aa chawk. ³ Ashdod cu lak a si tikah Bawipa nih aa thawh i, "Ka sal Isaiah cu taklawng le kelawng in kum thum chung aa chawk. Hihi Izipt ram le Ethiopia ram cung i a tlung ding hmelchunhnak a si. ⁴ Hi ram pahnih hna chung mi a tlaihmi sal hna cu Assiria siangpahrang nih taklawng in a kalpi hna lai. Tar thlu lo, no thlu loin, ke lawng le taklawng in an kal lai i an chiaṭha zong kha a lang lai; cuticun Izipt ram cungah ningzahnak a tlunter lai. ⁵ Ethiopia aa bochanmi le Izipt a um sawk tiah aa porhlawmi cu an ruahnak a khel ngaingai hna lai i vansang au in an um lai. ⁶ Cu caan a phak tikah Filistia ram rili kam i a ummi hna nih, ’Assiria siangpahrang sinin an kan huhphenh lai tiah kan rak i bochanmi hna kha zoh hna hmanh u. Zeitindah kannih zong kan nun bal rua hnga,’ an ti lai," tiah a ti.

¹ Hi bia hi Babilon ram kong bia a si. Thetse ram i a herh in aa herhmi phuchim bantukin, ṭih a nungmi ram in rawhralnak kha a tlung lai. ² Langhnak ka hmuhmi cu ṭihnung a si ko, i rawinak le i lainak, rawhralnak langhnak a si. Elam ralkap hna, tu tuah u. Media ralkap hna, khuapi kha kulh hna u. Babilon nih a tluntermi temhinnak kha a dong cang lai. ³ Langhnak chung i ka hmuhmi nih ka thla an hlauh i ka ngan an ka fahter, nau nganfah a ingnu nganfah bantukin. ⁴ Ka lung a mit, ka ṭih tuk ah a ther in ka ther. Zanlei cu phan cang ko seh ti ka duh hringhran, sihmanhsehlaw zei dang um loin thlalaunak lawnglawng a ka phorh. ⁵ Langhnak ka hmuhmi ah cun, rawl danghnak nganpi an timh; sawmmi hna ṭhutnak ah puan kha an phah. An ei an ding. Cu lioah cun chikkhatte ah khin, "Bawi pawl, nan phaw i lak u," ti thawng a hung thang. ⁶ Cun Bawipa nih a ka thawh i, "Va kal law, ralvengtu pakhat in va chia, cun a hmuhmi paoh kha in chim seh. ⁷ Pahnih pahnih in rang cung in a rami a hmuh hna le laa cung le kalauk cungin a rami a hmuh hna ahcun, ṭha tein ngia hna seh," tiah a ti. ⁸ Ralvengtu nih cun, "Bawipa, ka ralvennak buk ah hin chun zan in ka dir ko," tiah a au. ⁹ Cun khulrang in an ra. Rang cungin pahnih pahnih in an ra. Ralvengtu nih cun, "Babilon cu a rawk cang. An biakmi siasal vialte kha vawlei ah kuai liangluang in an ril ko," tiah thawng a thanh. ¹⁰ Ka mi hna, nannih cu changvut bangin rial nan si, sihmanhsehlaw atu cu Ralkapbu Bawipa Israel Pathian sinin ka theihmi thawng kha kan thanh hna. ¹¹ Hi bia hi Edom kong bia a si. Edom ram in mi pakhat nih a hun ka auh i, "Ralvengtu zeitikdah zan cu a dih lai? A dih dengmang cang maw, ka chim tuah," tiah a ti. ¹² Kei nih ka leh i, "Khua cu a dei deng, sihmanhsehlaw zan kha a ra ṭhan lai. Hal na ka duh ahcun, ra law rak ka hal ṭhan te," ka ti. ¹³ Hi bia hi Arabia ram kong bia a si. Dedan miphun, Arabia ramcar i kalauk run he a riakmi hna, ¹⁴ nan sin i tihal in a rami kha ti rak pe hna u. Tema ram mi hna, ralzam kha rawl rak pe hna u. ¹⁵ Annih cu thah a timtu hna vainam le kah a timtu hna li le thal le raldohnak hriam ṭihnung a zamtakmi an si. ¹⁶ Cun Bawipa nih a ka thawh i, "Kum khat chung hrimhrim ah Kedar miphun lianhngannak kha donghnak a phan lai. ¹⁷ Thal kah thiammi pawl kha Kedar mi lakah ralṭha bik an si, sihmanhsehlaw tlawmte lawng an taang lai. Hi bia cu Bawipa, Israel Pathian nih ka chimmi a si," a ti.

¹ Hi bia hi Langhnak Nelrawn kong bia a si. ² Khuapi cu a dihlak in aa tuai, thaw le ri he a khat i a hninh in aa hnin. Hi ral ah a thimi nan mi hna hi raltuk i a thimi an si lo. ³ Nan haotu vialte kha, an zam dih i thal fang khat thlah hlanah an ral nih an tlaih dih hna. ⁴ Cucaah cun diriam tein ka ṭah nakhnga, ka dawn hlah u. Ka mi hi zat riamruam an thih caah hin, hnemh ka zal hlah u. ⁵ Atu caan hi lau caan, sungh caan, i tuai caan, Langhnak Nelrawn caah a si i, hihi Bawipa Ralkapbu Bawipa nih kan cungah a tluntermi a si. Kan khua kulhnak vampang cu an chimh dih hna i kan bawm u ti au thawng cu tlang ah a thang. ⁶ Elam ram in a rami ralkap hna cu rang an rak i cit i li le thal he an ra. Kir ram in a rami ralkap hna cu an phaw kha timh cia tein an um. ⁷ Judah ram chung nelrawn hna cu rangleng an khat i Jerusalem hauka ah rangcung ralkap kha an dir. ⁸ Judah ralhruang vialte cu an cim dih. Cu bantukin thil a hung si tikah nan hriamnam kha nan i chuah. ⁹ - ¹⁰ Jerusalem kulhnak vampang kha khuazei zawn dah remh a herh ti kha nan hngalh. Jerusalem khua chung inn kha nan rel dih hna i a cheu cu khua kulhnak vampang remhnak caah khan nan ṭheh hna i a lung kha nan hman hna. Khua chung i ti i khon awkah ¹¹ kulhnak vampang chungah khan tikhonnak inn nan sak i a hlunmi tidil in a rung luangmi ti kha nan khon. Sihmanhsehlaw hi thil vialte hlan piin a rak khangtu, hi thil a tluntertu Pathian cu zeihmanh ah nan rel lo. ¹² Bawipa Ralkapbu Pathian nih cun, ṭah awk le mitthli tlak awk le nan lu i kongh awk le buri i aih awkah an auh hna. ¹³ Sihmanhsehlaw a nih salam men in nan ni i puai tu nan tuah. Tuu le caw kha nan that i zu nan ding. "Ding in ei ko u sih! Thaizing ah cun kan hei thi dih ko lai hen cu," nan ti. ¹⁴ Ralkapbu Bawipa hrimhrim nih a ka chawnh i, "Hi thil ṭhalo hi, an nun chung paoh cu, ngaihthiam an si bal lo. Hi bia cu Bawipa Ralkapbu Pathian nih ka chimmi a si," a ti. ¹⁵ Bawipa Ralkapbu Pathian nih Shebna sin kal kha a ka fial, (Shebna cu siangpahrang inn chungkhar uktu bawi a si.) ¹⁶ A ka thawh i, "Aho ah dah naa rel? Tlangpang lungpang ah khan zeicahdah thlan pakhat naa ser? ¹⁷ Mi ngan cu na si sawk ko lai, sihmanhsehlaw Bawipa nih an thur lai i an hlonh lai. ¹⁸ Pumpululh zit in an zit i ram ngan deuh ah an hlonh vurmar lai. Cuka ah cun naa uanthlar ngaingaimi rangleng hna hramah khan na thi lai. Nangmah cu na bawipa innchungkhar cungah ningzahnak a tluntertu na si. ¹⁹ Bawipa nih na rian in an phuah lai i a sangmi na umnak hmun khan an ṭhumh lai, tiah va chim," a ka ti. ²⁰ Bawipa nih Shebna cu a thawh i, "Cu thil cu a hung phanh tikah, Hilkiah fapa Eliakim ka sal kha ka kawh lai. ²¹ Na bawinak puan le taisawm cu amah kha ka pek lai i nangmah nih na rak ngeihmi nawlngeihnak vialte kha amah cungah ka chiah lai. Jerusalem khuami le Judah ram mi hna caah anih cu pa bantuk a si lai. ²² David te chung tawh cu a liang cungah ka chiah lai i a hunmi cu ahohmanh nih an khar kho lai lo, a kharmi cu ahohmanh nih an hung kho lai lo. ²³ Thlam hri hrennak khenhteo bantukin fek tein ka khenh lai i a innchungkhar dihlak caah upatnak hrampi a si lai. ²⁴ "Sihmanhsehlaw a rualchan vialte hna le a tefa vialte hna cu a caah thilrit an si lai. Thil bahnak in aa thlaimi um le kheng bantukin a cung in an i thlai lai. ²⁵ Cu bantukin thil a si tikah fek tein aa khenhmi thil bahnak cu a pong lai i a tla lai i cucu a cung in aa thlaimi vialte an donghnak a si lai," a ti. Cu bia cu Bawipa bia a si.

¹ Hi bia hi Tair kong bia a si. Rili cungah lawng in a kalmi hna, ṭap tuah u. Nan lawng dinhnak khua Tair khua cu a rawk cang; a inn vialte le a lawng dinhnak hmun hna cu an rawk cang. Nan lawng cu Saipras in an kir tikah cu thawng cu nan theih lai. ² Sidon chawdawr hna, ṭap tuah u. ³ Izipt ram in a chuakmi rawl kha cawk awk le ram dangdang hna he chaw i cawk le i zuarh awkah, nan lawng cu rili cungah nan thlah hna. ⁴ Sidon khualipi, ningzahnak na phan cang! Rilite rilipi hna nih khan an in hlawt i, "Fa kan rak ngei bal lo. Fapa zong fanu zong kan cawm bal hna lo," an ti. ⁵ Tair a rawk cang ti kha an theih tikah Izipt mi hmanh an lau lai i an khuaruah a har lai. ⁶ Ngaihchia in ṭap tuah u, Foinisia mi hna. Spain ram ah zam i zuam tuah u. ⁷ Hlanpi in a rak ummi lunglawmhnak khua Tair khua kha hihi maw a si ko? Ram thar va tlak awkah rili ralmi a thlah tawntu hna kha, mah hi maw a si ko? ⁸ Siangpahrang khua, a mirum hna vawlei cung i hmaizah bikmi a simi hna khua Tair khua i hi thil vialte a tluntertu hi ahodah a si? ⁹ Ralkapbu Bawipa a si! An tuahmi an i porhlawtnak kha donghter awkah le upatmi an mi hna kha ningzahnak ah phakter awkah Bawipa nih hi thil hi a tuah. ¹⁰ Kal u law lo va thlo u, Spain ram chung ram thar i a ummi hna. Ahohmanh nanmah hupphengtu ding an um ti lo. ¹¹ Bawipa nih rili cungah a kut a samh cang i pennak kha a hrawh cang hna. Foinisia ram chawleh chawhrawlnak hmun kha hrawh awkah nawlbia a chuah cang. ¹² Sidon khualipi, na lunglawmhnak cu a dih cang. Na mi cu hrem an si cang i Saipras tikulh i an zam hmanh ah, cuka zongah cun an him ṭhiamṭhiam lai lo. ¹³ (Tair ram cu saram nih an hrawh, cu a hrawhtertu cu Assiria a si lo, Babilon tu kha a si. Tair khua cu kulhnak chuntlung a serhnawh i a ralhau vialte a chim dih i a hrawk dihtu cu Babilon a si.) ¹⁴ Rili cung i lawng in khual a tlawngmi hna, ngaihchia in ṭap ko u. Nan i bochanmi khuapi kha a rawk cang. ¹⁵ Tair cu kum sawm sarih chung philh a si caan a phan lai, kum sawm sarih cu siangpahrang chan chan khat a si. Cu kum cu a dih tikah Tair cu hla i a cuangmi hlawhhlangnu bantuk a si lai. Cu hla cu hihi a si: ¹⁶ Na tingtang kha i lak law khua chungah i chawk tuah, maw philh cangmi hlawhhlangnu. A rak in duhtu pawl kha na lem ṭhan khawh hna nakhnga tingtang cu i tum law na hla cu sa tuah hna." ¹⁷ Kum sawm sarih a dih tikah Bawipa nih Tair cu a rak ṭuan tawnmi a rian hlawhhlan rian ah khan a kirter ṭhan lai i vawlei cung ram dihlak ah khan a kal ṭhan lai. ¹⁸ Chawleh chawhrawlnak in a hmuhmi tangka cu Bawipa sinah a pek lai. A khong hna lai lo i a thup hna lai lo, sihmanhsehlaw Bawipa a biami hna nih a tangka cu an herhmi rawl le thilpuan cawknak ah an hman lai.

¹ Bawipa nih vawlei cu a hrawh cikcek lai i a cungah zeihmanh um lo in a lawng dih lai. A bingtalet in a chiah lai i a cung i a ummi vialte kha a ṭhek dih hna lai. ² Ahopaoh nih cu bantuk thil cu ton a si ko lai — tlangbawi nih si hna seh, zapi nih si hna seh, sal nih si hna seh, bawi nih si hna seh, thil cawtu nih si hna seh, a zuartu nih si hna seh, tangka mi a cawihtu nih si hna seh, tangka mi sinin a cawimi nih si hna seh, mirum si hna seh, misifak si hna seh, cu bantuk cu an ton dih ko lai. ³ Vawlei cu a kek a kuai dih lai i a rawk dih lai. Cu bia cu Bawipa nih a chimmi a si i a chim bangin a si ko lai. ⁴ Vawlei cu a ro i a car; vawlei cu a uai in a uai; van zong vawlei zong an rop dih. ⁵ Mi nih Pathian nawlbia kha an buar caah vawlei cu an thurter i zungzal hmun dingin a sermi biakamnak kha an hrawh caah an hnawmhter. ⁶ Cucaah Pathian nih vawlei cu hrawh awkah khan vawlei cu chiat a serh, vawleicung mi nih an sual man kha an in. A tangmi cu an tlawm chin lengmang. ⁷ Mitsur ruang kha an car i mitsur zu kha a tlawm. A rak i lawm tawnmi kha atu cu an ngaih a chia dih cang i ⁸ an i lawmhnak hla dawh le tingtang tum thawng le khuang thawng kha a dai cang. ⁹ Hlasak pah i mitsur zu din kha a um ti lo, ahohmanh nih mitsur zu kha a thaw an ti ti lo. ¹⁰ Khuapi chungah zeizong vialte hnahnawk in a um dih, inn kha khar an si dih i mi kha lengah chuah an si dih. ¹¹ Zalam ah khan mi cu an dir i, zu kan duh, tiah an au; lawmhnak cu a lo cang, ram chungin hlonh a si cang. ¹² Khuapi cu a rawk i a kutka cu an baoh dih hna. ¹³ Mah hihi vawlei cung miphun dihlak cung i a tlung dingmi thil cu a si. Zei he dah aa lawh lai ti ahcun, rawl ṭuan a dih tik i oliv thei vialte oliv nge in an ṭhilh dih hna hnu le mitsur ruang in mitsur thei vialte an lawh dih hna caan he khin aa lo lai. ¹⁴ A tangmi cu lunglawm in hla an sa lai. Nitlaklei i a ummi nih Pathian a lianhngannak kong kha an chim lai i ¹⁵ nichuahlei i a ummi nih an thangṭhat lai. Rili kam i a ummi hna nih Bawipa Israel Pathian cu an thangṭhat lai. ¹⁶ Vawlei cung a hlatnak bik ram i a ummi hna sinin a dingmi miphun, Israel miphun thangṭhatnak hla kha kan theih lai. Sihmanhsehlaw kei ka caah cun ruahchan awk a um lo. Ka der chin lengmang ko. Mirawihmang mi pawl kha mi rawi an hmang ṭhiamṭhiam ko i an mirawinak kha a chia chin lengmang a panh. ¹⁷ Vawleicung mi hna! Thil ṭihnung le khor le rap nih an in bawh ko hna. ¹⁸ Thil ṭihnung kha zamtak aa zuammi cu khor chungah an tla lai, khor chungin a luatmi cu rap ah an i foih lai. Van in ruah bawnbok ngaw in a sur lai i vawlei hram cu aa hnin lai. ¹⁹ Vawlei cu a kak a kuai lai i aa cheu lai. ²⁰ Vawlei cu zuri bangin a sawn lai i ṭotho lak thlam bangin aa hnin lai. Vawlei cu a sualnak nih rit piin a nenh; a tlu lai i zeitikhmanh ah a tho ṭhan ti lai lo. ²¹ Bawipa nih cunglei ṭhawnnak le vawlei cung uktu hna kha dan a tat hna lai ni a phan lai. ²² Pathian nih siangpahrang hna kha thongtla hna bangin khor chungah i tet tein a erh hna lai. An dantatnak ni a phak hlantiang thong ah cun a khumh hna lai. ²³ Ralkapbu Bawipa cu siangpahrang a si lai caah thlapa cu a mui lai i ni cu a tlang lai lo. Jerusalem khua cu Zion Tlang in a uk lai i a sunparnak cu an upa hna nih khan an hmuh lai.

¹ Bawipa, nangmah cu ka Pathian na na si, Kan upat lai i na min kha ka thangṭhat lai. Khuaruahharmi thil kha na tuah hna; hlan lio piin na rak i timhmi thil kha zumh awk tlak tein na tlinter hna. ² Khuapi cu na hrawh dih cikcek hna i an kulhnak ralhau cu na chimh dih hna. Kan ral nih an sakmi inn ṭhaṭha cu an rawk dih cang, ahohmanh nih an sa ṭhan ti hna lai lo. ³ A ṭhawngmi miphun nih an in thangṭhat lai i a puarmi miphun hna khua ah khan nangmah cu an in ṭih lai. ⁴ Sifak rethei, bawmtu ngei lomi nih khan an in fuh i harnak caan ah him tein na umter hna. Thlichia a hran tikah an i dornak na si i ni a linh tikah an naidem na si. Mipuar nih cun khuasik caan thlichia bantuk le ⁵ a ro a carmi hmun i ni lin bantukin mi kha an tuk an den tawn hna. Sihmanhsehlaw Bawipa, nang nih cun kan ral cu na daihter hna i khuadawm nih ni lin a daihter bangin mi puarmi au thawng cu na daihter. ⁶ Hi Zion Tlang cungah hin Ralkapbu Pathian nih vawlei cung miphun vialte caah rawl danghnak a timh lai — cu rawl danghnak cu rawl thaw bik le zu thaw bik in a timh lai. ⁷ Miphun vialte cungah minmei bangin a zammi ngaihchiatnak kha a ṭianter lai. ⁸ Bawipa nih thihnak cu zungzal ca in a hrawh lai. Mi vialte cu an mitthli a hnawh hna lai i a miphun nih vawlei cung khuazakip ah zawmhtaihnak an inmi kha a lakpiak hna lai. Hi bia cu Bawipa hrimhrim nih a chimmi bia a si. ⁹ Cu bantukin thil a hung si tikah mi kip nih an i thawh lai i, "Amah cu kan Pathian a si. Amah cu kan i bochan i a kan chuah. Amah cu Bawipa a si. Amah cu kan i bochan i a kan khamh caah atu cu lunglawm in kan um i kan tha a nuam," an ti lai. ¹⁰ Bawipa nih Zion Tlang cu a huhphenh lai, sihmanhsehlaw capawl kha nawncek chungah an lamhchih bantukin Moab cu vawlei ah lamhchih a si lai. ¹¹ Ti aa liomi nih ti an i lio tikah an kut an samh bantuk khin annih zong nih an kut an samh ve lai, sihmanhsehlaw an ke an chaih fate an i porhlawtnak nih khan an kut cu tanglei ah a hnuh lengmang hna lai. ¹² Pathian nih Moab ralhau sang pipi hna cu a chimh hna lai i leidip lakah an tlu lai.

¹ Hi hla hi Judah ram chungah an sak ni a phan lai: Kan khuapi cu a ṭhawng, Pathian hrimhrim nih a kulhnak cu a ven! ² Khuapi kutka cu hung hna u law zumhawktlak a simi miphun kha luhter u, dinnak a tuahmi miphun kha luhter u. ³ Bawipa, nangmah nih, an i tinhmi kha fek tein aa tlaih i nangmah an bochanmi cu, a tlingmi daihnak kha na pek hna. ⁴ Bawipa kha i bochan zungzal ko u, amah nih an huhphenh zungzal hna lai. ⁵ Aa porhlawmi cu a ṭhumh hna, an umnak khua ṭhawng kha a hrawh i a kulhnak vampang cu a chimh hna i leidip lakah an tlu. ⁶ Atu ah cun rak hremmi nih khan a cung in an chawhhnawh i an ke in an lamh. ⁷ Bawipa, miṭha cu an lam na sialpiak hna i an zulhmi lam cu na pheiter. ⁸ Nangmah duhnak kha kan zul i nangmah kha kan in bochan; kan duhmi cu nangmah na si ko. ⁹ Zan ah nangmah kha kan ngai; vawlei le a cung i a ummi kha an bia na ceih tikah dinnak hi zeidah a si ti kha an hngalh lai. ¹⁰ Nang nih cun miṭhalo kha na zaangfah ko hna nain, dinnak tuah kha an cawng duh hlei lo. Miding mi an umnak ram hmanh ah hin ṭhat lonak kha an tuah ṭhiamṭhiam ko, na lianhngannak kha an hngal duh hlei lo. ¹¹ Na ral nih, dan a kan tat lai, ti awk an hngal lo, temhinnak pe hna law na timhmi dantatnak kha inter hna. Na mi kha zeitluk in dah na dawt hna ti kha annih cu hmuhsak hna. ¹² Bawipa, nangmah nih rumnak na kan pek lai; kan tuah khawhmi thil vialte hi nangmah tuahmi lawngte an si dih. ¹³ Bawipa, kan Pathian, midang nih an kan uk, sihmanhsehlaw kan Bawi cu nangmah lawnglawng na si. ¹⁴ Atu cu an thi cang i an nung ṭhan ti lai lo, an thlarau cu a tho ṭhan lai lo, zeicahtiah nangmah nih dan na tat cang hna i na hrawh cang hna. Ahohmanh nih an hngal ti hna lo. ¹⁵ Bawipa, nangmah nih kan miphun cu na ṭhanter i a ram cu a kam kip in na kauhter, cucaah nangmah nih upatnak na hmuh. ¹⁶ Bawipa, nangmah nih na mi cu dan na tat hna i harnak an in tikah na sinah thla an cam. ¹⁷ Nau ngan a fakmi nu nih a ai bantukin, nangmah nih na kan aiter, Bawipa, ¹⁸ Kan ngan cu a fak ko, sihmanhsehlaw kan hrinmi zeihmanh a um fawn lo. Kan ram caah zeihmanh kan teimi a um lo i kan tuah khawhmi a um lo. ¹⁹ Kan mi hna a thimi kha an nung ṭhan lai! An pum kha a nung ṭhan lai. An thlan i a itmi vialte kha an i hlau lai i lunglawm in hla an sa lai. Dapti nih vawlei cu a hrinter ṭhan bantukin a thi ciami cu Bawipa nih a nunter ṭhan hna lai. ²⁰ Ka mi hna, nan inn chungah lut u law innka i kharkhumh u. Pathian thinhunnak a dih hlantiang, caan tawite chung cu i thup u. ²¹ Vawleicung mi kha an sual ruang i dantat awkah Bawipa cu a rung ṭum lai. Vawlei cungah a thli tein lainawnnak an tuahmi kha a puang dih lai i an thahmi hna kha vawlei nih a thup ti hna lai lo.

¹ Cu ni ah cun Leviathan rulpi, a kualh in aa kual i a ngerh in aa ngerhmi rulpi kha dantat awkah le rili chung i a ummi rulpi kha thah awkah a ṭhawng i a har ngaingaimi a vainam kha Bawipa nih a hman lai. ² Cu ni ah cun a nuammi a mitsur dum kong ah Bawipa nih hitihin bia a chim lai, ³ "Ka mitsur dum cu ka cawngh i ti ka toih zungzal. Ahohmanh nih an hrawh nakhnga lo chunzan in ka cawngh. ⁴ Ka mitsur dum cungah ka thin a hung ti lo. Sam len awk hling le so um hna seh law ka duh hnga. Um hna seh law a khangh in ka khangh dih hna hnga. ⁵ Asinain ka mi hna an ral nih keimah huhphenhnak hmuh kha an duh ve ahcun, keimah he i remnak tuah hna seh. Asi, keimah he i remnak tuah hna seh," a ti. ⁶ Cu ni ah cun, Israel mi, Jakob tefa hna cu thingkung bangin hram an thla lai i an kuhkulul lai i an par lai. Vawlei cu an tlai kha a khat dih lai. ⁷ Israel kha Bawipa nih dan a tatmi cu, a ral hna a tatmi hna tluk khan cun a fak lo, minung zong a ral hna tluk khan cun an thi lo. ⁸ Bawipa nih a mi hna dan a tat hna cu, ramdang i a kalter hna kha a si. A ṭhawngmi thli, nichuahlei thlitu kha a choihter hna. ⁹ Pathian bia lomi biakṭheng kha thungrang bantukin rial an si hlan le tung thiang le zihmui khanghnak biakṭheng hna kha hlonh dih an si hlanah cun, Israel sualnak cu ngaihthiam a si kho lai lo. ¹⁰ Ralhau in kulhmi khuapi cu a rawk cang. Zeihmanh um lonak ramlak bantukin chuahtak a si cang. Caw tlonnak phong, ram an ṭam i an bawhnak hmun ah a cang cang. ¹¹ Thing nge cu an kiak i an car i nu nih mei tih awkah an khawmh hna. Mi nih khan zeihmanh an hngalh khawh lo caah, anmah a sertu Pathian nih khan a zaangfah hna lai lo i vel zong a ngeih hna lai lo. ¹² Cu ni ah cun, Bawipa hrimhrim nih a mi Israel mi kha an bia a ceih hna lai, khattelei deng in khattelei deng tiang, Zufrates tiva in Izipt ramri tiang. A ṭhami le a ṭha lomi kha a ṭhen hna lai. ¹³ Cu ni a phak tikah, Assiria ram le Izipt ram i sal ah a tangmi Israel mi vialte kha muko in a kawh hna lai. An ra lai i Bawipa cu Jerusalem khua chungah, a tlang thiang cungah khan an biak lai.

¹ Israel ram cu a lo cang! A sunparnak cu, a mi hruaitu upa pawl, zu a ri zungzalmi nih an i chinhmi pangpar luchin bangin a ziam cuahmah cang. Aa porhlawmi an lu hna cu zihmui an i thuh, sihmanhsehlaw an ril ko, thi koin an ri i an ril ko. ² Anmah dohtu dingah a ṭhawng i a liannganmi pakhat Bawipa nih a chiah ko. Rial bantukin a ra lai, ruahpi sur in a sur lai, ti lian bantukin a ra lai i ram kha a tei cikcek lai. ³ Efraim mi zu rit buin a hruai zungzalmi haotu pawl nih an i uanthlarmi pangpar ṭhi rual kha vawlei ah lamh beh an si lai. ⁴ Cu haotu pawl sunparnak a ziam lio lengmangmi cu, a hmin hmasa bikmi theipi, an hmin cangka in an lawh hna i an eimi hna bantuk khin, a lo lai. ⁵ Khi ni ah Ralkapbu Bawipa cu a tangmi a mi hna caah a sunglawimi bawi luchin pangpar in ṭamhmi bantuk a si lai. ⁶ Biaceihtu hna kha dinnak lungthin a pek hna lai i khua kulhnak kutka ah ral a rak khirhtu hna kha ralṭhatnak a pek hna lai. ⁷ Profet hna le tlangbawi hna hmanh kha zu an ri tuk i an sawn lengmang. Zu le zureu tam tuk an din caah lungmit in an ril lengmang i khoika zawn ah kan kal ti hmanh kha an hngal lo. Cucaah profet nih Pathian sinin langhnak an hmuhmi ah an palh i tlangbawi nih bia an ceihnak ah an palh. ⁸ An ṭhutnak cabuai cu luak a khat i a thiannak hmun pakhat hmanh a um lo. ⁹ Keimah kong ah khan an zai i, "Khi pa nih khin, aho ka cawnpiak hna ti ah dah aa ruah hnga? Aho nih dah a bia cu an herh? Hnukthlei ka bawhte ca lawngah pei a ṭhat ko cu. ¹⁰ Amah nih cun a cafang tete in, a tlang a tlang in, cawn awk timi a bu a bu in cawnpiak a hei kan zalh," an ka ti. ¹¹ Keimah bia kha nan ngaih lo ahcun, holh phun dang in a holhmi ramdangmi kha, nanmah cawnpiaktu dingah Pathian nih a hman hna lai. ¹² Dinhnak le hnangamnak kan pek hna lai, tiah nan dihlak in an ti hna, sihmanhsehlaw nannih nih cun nan ngai duh lo. ¹³ Cu ruangah cun pei Bawipa nih a cafang tete in, a tlang a tlang in, cawn awk timi a bu a bu in an cawnpiak hna lai cu a si cu. Cun nannih cu nan kal tikah nan ril lengmang ko lai. Hma nan ing lai, rap in foih nan si lai i sal ah tlaih nan si lai. ¹⁴ Cucaah cun Jerusalem khuami uktu, mi lungpuam rual hna, Bawipa nih a chimmi hi ngai tuah u. ¹⁵ Thihnak he hnatlaknak kan tuah cang i mithi khua he biakamnak kan tuah cang tiah nan i porhlaw. Lih le hlennak nih an kan huhphenh khawh lai tiah nan i bochan hna caah harnak a tlun tikah kan luat lai tiah nan i ruat. ¹⁶ Sihmanhsehlaw Bawipa Pathian nih a chimmi cu hihi a si: "Zion ah hin a fek i a ṭhawngmi inn hram ka ser lai. Cu hram ah cun innkil lung, lungcang pakhat ka bunh lai i cu lung cungah cun, ’Zumhnak fek cu a lung zong a sau,’ tiah ṭial a si lai. ¹⁷ A hram a phei lei in an tahnak hri cu dinnak a si lai i a tunglei in an tahnak hri cu lihchim lonak a si lai. Sihmanhsehlaw nan i hngatchanmi lih bia cu rial he a rami ṭotho nih a choih dih lai i nan himnak cu tilian nih a fenh dih lai," a ti. ¹⁸ Thihnak he hnatlak ṭinak nan tuahmi cu hloh a si lai i mithi khua he biakamnak nan tuahmi cu hrawh a si lai. Harnak a tlun tikah nan dir kho lai lo. ¹⁹ Zing khat hnu zing khat an den chih lengmang hna lai i chun he zan he nan in a hau lai. Pathian sinin a rami bia thar paohpaoh nih ṭihnak thar an rak i ratpi lai. ²⁰ Phungthluk bia chung i, ihkhun a tawi tukmi cung i puan a bi tukmi he a it mipa bantuk kha nan si lai. ²¹ Perazim Tlang le Gibeon nelrawn ah Bawipa nih ral a rak tuk hna bantuk khan, aa timhmi tuah awkah an tuk hna lai i cu a tuahmi cu khuaruahhar ngai a lo ko lai nain an tuk taktak ko hna lai. A rian cu a lim lai i cu a rian cu khuaruahhar ngaingai a si. ²² Ralrinnak kan pekmi hna hi nan nih men chuak hlah seh. Nan nih a chuah ahcun nan caah luatnak a har chinchin lai. Ralkapbu Bawipa nih ram cu a dihlak in ka hrawh lai a timi kha ka theih cang. ²³ Ka chimmi hi ngai tuah u, kan chimhmi hna hi ṭha tein nan hna chit tuah u. ²⁴ Lothlopa nih a lo cu, thlaici tuhnak caah ti in a thuan lawng a thuang zungzal bal lo. ²⁵ A thuan dih cun thlaici kha a tuh hna, nannan tehna, zira tehna kha a tuh hna. Changvut le barli kha a tlang a tlang in a tuh hna i a lo ri ah thlaici dang kha a tuh hna. ²⁶ Pathian nih a cawnpiak caah a rian kha a ṭuanning a thiam. ²⁷ Zira ci le nannan ci kawnnak caah thingtan rit pipi kha a hmang bal lo, a zaangmite a hmet a ngan aa tawkzate kha a hman tawn. ²⁸ Changvut fang cu parh cikcek in a naang bal lo, a fang kha rawk lo tein cawleng kha a rialter. ²⁹ Hi bantuk fimnak vialte hi Ralkapbu Bawipa sinin a rami a si. Pathian khuakhannak cu a fimmi a si zungzal i thlua a chuak zungzal.

¹ Pathian biakṭheng, Jerusalem zong a rawk cang! David a rak riahnak khua kha a rawk cang. Kum khat kum hnih chung cu an puai le an puai kha i tong ko rih hna seh, ² cun "Pathian biakṭheng" timi khua ah cun Pathian nih harnak a tlunter lai. Ṭahnak le aihramnak a um lai i a khua hrimhrim kha raithawinak an khanghnak biakṭheng ah a cang lai. ³ Khua cu Pathian nih a tuk lai, a kulh lai i a hren lai. ⁴ Jerusalem cu vawlei tangin bia chim a hun zalmi muthla bantuk a si lai, leidip chungin a hung chuakmi aw dinte bantuk a si lai. ⁵ Jerusalem, nangmah an dotu ramdangmi vialte hna cu leidip bangin an choi dih lai i ṭih a nungmi a ralkap hna cu capawl bangin thli nih a choih dih hna lai. Chikkhatte le ruah lopi ah khin ⁶ Ralkapbu Bawipa nih a ṭhawngmi ṭotho le lihnin in a khamh lai. Thlichia a hranter lai i zeizong vialte a khang dihtu mei a chuahter lai; ⁷ cun Pathian biakṭheng khua a tutu ralkap vialte hna kha, an hriam le an nam vialte he an zeizong tein, mang bantukin an lo lai, zanmang bantukin an lo lai. ⁸ Jerusalem tuk awkah aa pummi miphun vialte hna cu, a rawl a ṭammipa, a mang i rawl a ei ko na i aa hlauh tikah a rawl a ṭam ṭhiamṭhiammi bantuk le tihal in a thi dengmangmi, a mang i ti a ding nain aa hlauh tikah a dang a car ṭhiamṭhiammi bantuk khi an si lai. ⁹ Va kal u law va hrut ṭhiamṭhiam ko rih u. Va kal u law mitcaw in va um ṭhiamṭhiam ko rih u. Zu din loin ri ko u. Dor khat hmanh din ṭung lo ah sawn lengmang in um ko u. ¹⁰ Bawipa nih an ngutter hna i thu hluahmah in nan i hngilh dengmang cang. Profet cu nan mit an si awk a si, sihmanhsehlaw Pathian nih cu nan mit cu an mit a huh hna. ¹¹ Profet nih an hmuhmi langhnak sullam cu thuhkanh nan si lai, cakhenhnak in khenh chihmi cazual bantuk a si lai. A rel a thiammi sin i nan va kalpi i, kan relpiak tuah, nan va ti tikah, aa hrenh caah ka rel kho lo, a rak in ti hna lai. ¹² A rel a thiam lomi sin i nan va kalpi i kan relpiak tuah, nan va ti tikah, kei cu ca rel ka thiam lo caah ka rel kho lo, a rak in ti hna lai. ¹³ Bawipa nih, "Hi mi hna nih hin kan in biak tiah an ka ti, sihmanhsehlaw an bia cu sullam a ngei lomi lawngte an si i an lung cu kaa dangpi ah a um. Biaknak an timi cu minung serchommi phung le pupa nih an zulh tawnmi lam lawnglawng kha a si i an kaa in a chim a thiam sawhsawh in an thiammi kha a si. ¹⁴ Cucaah cun a tlung lai tiah a ruah in an ruah hrimhrim lomi thil kha pakhat hnu pakhat in an cungah ka tlunter lai i cu nih cun a hlauh in an hlauh hna lai. An mifim cu mihrut ah an cang lai i an fimnak cu an caah zeihmanh ṭhathnemnak a ngei lai lo," a ti. ¹⁵ Bawipa nih hmu hlah seh, tiah an khuakhannak a thupmi hna cu an lo cang. An i timhmi cu a thli tein an ṭuan i, kan tuahmi cu ahohmanh nih an hmu lai lo i an hngal lai lo, tiah an ruah. ¹⁶ Zeizong vialte kha a bingtalet in an ser dih. Zeidah a biapi deuh, um sertu maw tlak dah? Mi nih an sermi thil nih khan, a sertu minung cu, "Na ka ser lo," a ti khawh lai maw? Asiloah, "Na tuahmi hi zei a si na hngal lo," a ti khawh lai maw? ¹⁷ Phungthluk ah an ti bang, tupi hmawng cu lo ah a cang lai i lo cu tupi ah a cang ṭhan lai. ¹⁸ Cu ni a phak tikah cun, thang piin an relmi cauk chung bia cu hnachet nih a theih khawh lai i muihnak chungah a ummi mitcaw kha an mit a dei lai i khua an hmu kho lai. ¹⁹ Misifak le mirethei hna nih, Israel Pathian thiang nih a pekmi hna lawmhnak kha an hmuh ṭhan lai. ²⁰ Midang a hremtu hna le Pathian zei ah a rel lomi hna caah cun an donghnak a si lai. Misual paoh cu hrawh an si lai. ²¹ Mi congoih a hmangmi hna le misual dantat loin a luattertu hna le lihchim lomi nih biakhiahnak a dingmi an hmuh ding hmu kho loin a dawntu milihchim hna cu, Pathian nih a hrawh hna lai. ²² Cucaah cun atu cu Abraham kha harnak chungin a khamhtu Bawipa, Israel Pathian nih, hi bangin a ti: "Ka mi hna, ningzak hmaichia in nan um ti lai lo, nan hmai thikhal zong a chuak ti lai lo. ²³ Kan pek laimi hna nan fale kha nan hmuh hna lai i keimah cu Israel Pathian thiang ka si kha nan hngalh lai. Nan ka upat lai i nan ka ṭihzah lai. ²⁴ Mihrut nih hngalhthiamnak an ngei kho cang lai i a phun a zai zungzalmi nih cawnpiaknak cohlan kha an duh cang lai," a ti.

¹ Bawipa nih aa thawh i, "Keimah kha an ka doh caah Judah ram a uktu hna cu an lo cang. Ka khuakhanmi a si lomi kha an zulh i ka duh lo nain hnatlak ṭinak an tuah, sualnak pakhat cungah a dang pakhat an chap chin lengmang. ² Keimah hal hmasa loin Izipt ah an vung kal i bawmhnak an hal hna. Izipt nih kan huppheng seh ti an duh caah Izipt siangpahrang kha an i bochan. ³ Asinain Izipt siangpahrang nih khan a bawm kho hna lai lo i Izipt nih, kan huhphenh hna lai, a timi cu rawhralnak in a dong lai. ⁴ Judah mi cu, an lamkaltu kha Izipt mi hna khua Zoan le Hanes an phan cang nain, ⁵ bochan awk a tlak lomi kha kan rak i bochan sual i a kan bawm kho ṭung lomi kha kan rak i hngatchan sual, ti in an i ngaihchih lai," a ti. ⁶ Thlanglei thetse ram chung i a ummi saram hna kong ah Bawipa nih a chimmi bia cu hihi a si: "An lamkaltu hna cu, ṭih awk umnak ram, chiandeih le sivai ngeimi rul le zuan a thiammi rulpi an umnak ram tan khan an kal. Bawmhnak zeihmanh a pe kho ṭung hna lomi miphun phorh awkah khan an laa le an kalauk hna cu a man a fak ngaingaimi laksawng kha an phorhter hna. ⁷ Izipt nih bawmhnak a pekmi hna cu santlailo a si. Cucaah Izipt cu ’Ṭih awk tlak lo rulpi’ tiah min ka sak. ⁸ Hi miphun hi zeidah an lawh ti kha cauk pakhat chungah a ṭial in na ṭial lai i cu na ṭialmi cu an ca i a hmunmi tehte a si lai, tiah Pathian nih a ka ti. ⁹ Annih cu a zungzal in Pathian kha an doh, a zungzal in lih an chim, a zungzal in Pathian cawnpiaknak kha an al. ¹⁰ Profet pawl kha, dai tein um ko u, an ti hna. An thawh hna i, "Zeidah a ding ti kha kan chim hlah u, theih kan duhmi kha ta nan kan chimh ko. Kan i ruahning in va um ko u sih. ¹¹ Lam kan kian u law kan kalnak kha kan dawn hlah u. ’Israel Pathian Thiang,’ nan ti lengmangmi theih hi kan duh lo," tiah an ti hna. ¹² Sihmanhsehlaw Israel Pathian Thiang nih a chimmi cu hihi a si: "Kan chimhmi hna kha zei ah nan rel lo i zaang-ennak le hlennak tu kha nan i bochan. ¹³ Nan sual hrimhrim ko. Nannih cu a tung in a kuaimi vampang sangpi bantuk nan si; chikkhatte ah nan tlu te lai. ¹⁴ Tlak um bantukin an in den cikcek hna lai, fak tuk in nan keh nan kuai lai caah meiṭil laknak caah a zami le tikhor ti suahnak ah a zami hmanh nan um lai lo," a ti. ¹⁵ Bawipa Pathian, Israel Pathian Thiang nih cun a mi cu a thawh hna i, "Ra kir u law dai tein keimah kha ka bochan ko u. Cu ti nan um ahcun nan ṭhawng lai i him tein nan um lai," a ti hna. Sihmanhsehlaw cu bantukin um cu nan duh lo. ¹⁶ Tlik a mumi rang kan i cit hna lai i cuticun kan ral hna kut in kan luat lai tiah khua nan khan. Asi, nan hmaan ko, nan zam a herh taktak lai. Sihmanhsehlaw kan rang cu an ṭhawng ve ko, tiah nan ruat lai nain nanmah an dawitu hna rang cu an ṭhawng chinchin lai. ¹⁷ Ral pakhat nan hmuh tikah, thong khat nan zam lai i nan dihlak in an zamtertu hna dingah hin ral panga lawnglawng a za ko lai. Nan ralkapbu chung khan ahohmanh an tang lai lo, tlang par i alan nan thlainak tung te lawng kha a tang lai. ¹⁸ Asinain nan cungah a velngeihnak langhter duh ah Bawipa nih an hngah ko hna. Amah nih cun a dingmi thil kha a tuah zungzal caah nanmah zaangfah awk kha aa tim ko. Lunglawmhnak hi Bawipa i bochannak chungin a chuakmi a si. ¹⁹ Jerusalem khua i a ummi hna, nan ṭap ti lai lo. Bawipa cu zaangfah a thiammi a si i bawmhnak nan hal tikah nan auhnak cu an leh hna lai. ²⁰ Bawipa nih harnak caan chungah an luhter hna lai, sihmanhsehlaw khi chungah khan nanmah cawnpiak awkah amah hrimhrim kha a rak um lai i nanmah nih amah kha kawl a herh ti lai lo. ²¹ Lam in kehlei orhlei ah nan pial sual ahcun, "Lam cu hika leiah hin a si. Lam kha zul u," tiah nan hnulei in a aw kha nan theih lai. ²² Ngun nan hutmi nan siasal hna le sui nan hutmi nan siasal hna kha nan i lak hna lai i hmunhnawm hlonh in nan hlonh hna lai i, "In hmu ti hna hlah u sih," nan ti hna lai. ²³ Thlaici nan tuh tikah Bawipa nih ruah a surter lai i a khohter hna lai i kumvui ṭha an pek hna lai. Cun nan saṭil nih ram hno tampi an hmuh lai. ²⁴ Nan lei a thuangtu cawtum hna le laa hna nih khan cawhlek le fungṭe in an thianhmi ram rawl ṭha bikbik kha an ei lai. ²⁵ Nan ral hna cu an ralhruang nan chuh hna i an mi nan thah hna ni ah tlang kip le fing kip in ti an luang lai. ²⁶ Thlapa cu ni tlukin a ceu lai i ni cu a let sarih in a ceu lai, ni sarih chung ceunak khi ni khat ah i fonh dih seh law cu bantuk cu a si lai. Bawipa nih a mi hna cu an hma a menpiak hna i a damter hna ni ah hi thil vialte hi a tlung lai. ²⁷ Bawipa lianhngannak le sunparnak cu lamhlatpi in hmuh khawh a si. Mei le meikhu in a thinhunnak kha a lang. Bia a chim i a bia cu mei bantukin a alh. ²⁸ Zeizong vialte a fenh dihtu ti lian bantukin thlitu kha a hmaiah a kalter. Miphun tampi kha a hrawh hna i a ṭha lomi an khuakhannak kha pakpalawng ah a canter. ²⁹ Sihmanhsehlaw nannih Pathian mi hna cu nan i lawm lai i a thiangmi puai zan i hla an sak bantukin hla nan sa lai. Bawipa, Israel Lungpi thangṭhat in biakinn ah thonglawi aw zulh in a kalmi hna bantukin nan i lawm lai. ³⁰ Bawipa nih mi vialte kha a rumra a ummi a aw kha a theihter hna lai i a thinhunnak hmual kha a hngalhter hna lai. Meizik le ṭotho le rial le a tuk ngaingaimi ruah kha an um lai. ³¹ Assiria mi cu Pathian aw an theih tik le a dantatnak hmual kha an hngalh tikah a ther in an ther lai. ³² Pathian nih a tuk chih lengmang hna bantuk khan a mi hna zong nih cun an khuang le an dar kha an rak ṭhuanh chih lengmang ve hna lai. Pathian hrimhrim nih Assiria mi cu a doh hna lai. ³³ Assiria siangpahrang khanghnak dingah meiphu nganpi tihnak ding hmun kha hlan piin timh a si cang. Cu meiphu tihnak ding hmun cu thukpi le kau piin cawh a si i a chung khat in thing chiah a si. Cu meiphu duahnak dingah cun Bawipa nih a thaw ah meizik a chuah lai i cu nih cun a alhter lai.

¹ Bawmhnak hal awkah Izipt i a vung kalmi cu an lo cang. An i bochanmi cu Izipt ṭhawnnak kha a si — a rangtum hna le a rangleng hna le a ralkap hna kha an si. Sihmanhsehlaw Bawipa, Israel Pathian Thiang kha cu an i bochan lo, bawmhnak zong an hal duh lo. ² A tuahmi cu zeidah a si ti kha a hngalh. Rawhnak kha a tlunter. Miṭhalo cu dan ka tat hna lai i a hupphengtu hna zong ka tat ve hna lai tiah a rak chimmi kha a chim bangin a tlinter taktak. ³ Izipt mi cu pathian an si lo — minung lawng an ve ko! An rangtum hna cu thlarau an si lo. Bawipa nih rian a vun ṭuan tikah cun a ṭhawngmi miphun kha a cim cutmat ko i cu miphun ṭhawng nih a bawmhmi miphun der zong kha a tlu ve ṭhiamṭhiam lai. An pahnih in an rawk lai. ⁴ Bawipa nih a ka thawh i, "Sa a uammi chiandeih cu tuukhal pawl nih an au an khuanhnawh len zongah an ṭhawl khawh lo bantukin keimah Ralkapbu Bawipa zong hi, Zion Tlang ka humhaknak hin zeihmanh nih a ka ṭhawl kho lai lo. ⁵ Va nih a fale kha huhphenh awkah a bu cungah aa hel lengmang bantukin keimah Ralkapbu Bawipa zong nih Jerusalem cu ka huhphenh lai i ka humhak lai," a ti. ⁶ Pathian nih, "Israel mi hna, fak piin ka thin nan ka hunter i nan ka doh. Sihmanhsehlaw atu cu ka sinah ra kir cang ko u. ⁷ Sualnak siasal sui le ngun in nan i sermi nan hlonh hna caan kha a phan lai. ⁸ Raldohnak ah hin Assiria mi cu hrawh an si lai, sihmanhsehlaw minung ṭhawnnak in a si lai lo. Assiria mi cu raltuknak hmun in an zam lai i an tlangval hna cu sal ah an tlaih hna lai. ⁹ An siangpahrang cu a zam lai i a bawi pawl cu an thin a phan tuk caah raltuknak i an i putmi an alan hmanh kha an zamtak lai," a ti. Jerusalem ah an biakmi Pathian, a raithawinak caah Zion i a mei a ummi Bawipa nih hi bia cu a chim.

¹ Ni khatkhat cu dinnak in ram a uktu siangpahrang a um te lai i a kut tang i rian a ṭuanmi a bawi hna zong nih dinnak in mi kha an uk ve hna lai. ² Annih cu thlitu a hran tikah dornak le thlichia a hran tikah i thuhnak hmun bantuk an si lai. Annih cu thetse ram i tiva luang bantuk le ramcar i lungpi naidem bantuk an si. ³ An mi nih an herh an baumi kha hmu lo le thei loin an um lai lo. ⁴ Thin tawi in an um ti lai lo i an tuahmi kha hngalh ciammam tein an tuah lai i an chimmi kha an lung taktak a si lai. ⁵ Ahohmanh nih mihrut cu hmaizahmi tiah an ruat ti hna lai lo i mihrokhrawl cu lihchim lomi tiah an ruat ti hna lai lo. ⁶ Mihrut nih cun hruhnak bia kha a chim i zei ṭhat lonak dah ka tuah lai ti kha a ruat. A tuahmi le a chimmi cu Pathian zawmhtaihnak lawng kha an si i rawlṭammi kha rawl a pe bal hna lo i tihalmi kha din awk zeihmanh a pe bal hna lo. ⁷ Amah cu miṭhalo a si i thil ṭhalo kha a tuah; sifakmi kha an rawk khawh nakhnga a lih in khua a khan lengmang i an hmuh hngami kha hmu loin an um nakhnga aa zuam. ⁸ Sihmanhsehlaw lihchim lomi nih cun thil a tuah tikah lihchim lo tein a tuah i a hmaanmi thil kong ah khan fek tein a dir. ⁹ Nunnuam zaang-awl in a um i khuaruahharnak zeihmanh a ngei lomi nu hna, ka chimmi hi ngai tuah u. ¹⁰ Atu ah cun hnangam in nan um, sihmanhsehlaw kumvoi atu tikah hin cun lungdong in nan um lai, zeicahtiah mitsur thei lawh awk zeihmanh nan ngei lai lo. ¹¹ Nunnuam zaang awl ngaiin khua nan sa i khuaruahharnak zeihmanh tong loin nan um; sihmanhsehlaw atu cu a ther in ther cang u. Nan puan kha i phoih dih u law nan tai ah puanchia i kaih u. ¹² Vansang au in nan ṭang kha i cum u, zeicahtiah rawl tampi a chuah tawnnak lo hna le mitsur dum hna kha an rawk dih i ¹³ hling le so lawng an khat dih. Nuam tein mi nih an rak umnak inn hna le minung a khah in an rak khahnak khuapi kha ṭah ko hna u. ¹⁴ Siangpahrang inn hmanh kha chuahtak a si lai i an ram chung khualipi kha zamtak a si lai. Ral vennak inn hna le umnak inn hna cu saram kua an si zungzal cang lai. Khika ah ramlak laa kha an i chawk lai i tuu kha an tlong lai. ¹⁵ Asinain Pathian nih voi khat cu a thlarau kha a kan thlahhnawh ṭhan lai. Zeihmanh a ṭhahnem lomi hmun kha vawlei ṭha ah a cang ṭhan lai i lo chungin rawl tampi a chuak ṭhan lai. ¹⁶ Ram chung hmun kip ah mi nih dinnak le biading in rian an ṭuan lai. ¹⁷ Mi kip nih a dingmi thil kha an tuah cio caah daihnak le himnak zungzal in a um lai. ¹⁸ Pathian mi hna cu an inn ah khan daihnak le himnak a um lai i lung retheihnak in an luat lai. ¹⁹ (Tupi cungah khan rial an tla lai i khuapi cu an rawk lai.) ²⁰ Rawl caah ti tampi a um lai i caw le rang caah ramhno tampi a um lai caah zeitluk in dik aho paoh an i lawmh cio lai.

¹ Kan ral cu an lo cang! Ahohmanh nih an ramh hna lo i an rawi hna lo nain, mi kha an ramh hna i an rawi hna. Sihmanhsehlaw an miramh le an mirawi caan kha a dih lai i anmah tu kha ramhmi le rawimi an si ve cang lai. ² Bawipa, kan zaangfah ko sawh. Kan i bochanmi cu nangmah na si. Ni khat hnu ni khat kan huppheng ko law harnak caan ah kan khamh tuah. ³ Nangmah nih ral na kan tukpiak tikah, miphun hna cu cu raltuknak thawngpang ah cun an zam dih. ⁴ An chawva vialte kha an chuh hna i hranchaw ah an lakpiak dih hna. ⁵ Zeitluk in dah Bawipa cu a ngan! Zeizong vialte kha amah nih a uk dih. Jerusalem kha dinnak le ṭhatnak in a khahter lai i ⁶ hi miphun cu a fehter lai. A mi kha a huhphenh zungzal hna i fimnak le hngalhnak kha a pek hna. Annih chawva a sung bik cu Bawipa an ṭihnak kha a si. ⁷ Kan bawm u, tiah mi ralṭha kha an au. Daihnak tlunter aa zuammi lamkaltu hna kha fak piin an ṭap. ⁸ Lam ah khan himnak a um lo caah cu lam cu ahohmanh nih an zul ti hna lo. Biakamnak kha an rawk, cuticun kan tuah ṭi lai ti hnatlaknak kha zeihmanh ah an rel lo. Ahohmanh zei ah an i rel lo. ⁹ Ram cu a um sawhsawh ko i mi nih an chuahtak. Lebanon tlang tupi cu an car i Sharon nelrawn cu thetse ram bantuk a si, cun Bashan ram le Karmel Tlang thingkung hna cu an hnah a ṭil dih. ¹⁰ Bawipa nih miphun cu a thawh hna i, "Atu cu ka cawlcang cang lai! Zeitluk in dah a ṭhawngmi ka si kha kan hmuhsak cang hna lai. ¹¹ Nannih nih san a tlai lomi khua kha nan khan i nan tuahmi paohpaoh kha zeihmanh a ṭhahnem lomi thil an si. Nanmah le nanmah nan i hrawk ko. ¹² Thung ser awkah an khanghmi lung bantukin nan mot lai i vutcam ah cang lakin a kangmi hlingbur bantukin nan lo lai. ¹³ Lamnai i a ummi nih si hna seh, lamhla i a ummi nih si hna seh, ka tuahmi kha thei hna seh law ka ṭhawnnak kha hngal hna seh," a ti. ¹⁴ Zion i a ummi misual hna cu an thinphan tuk ah a ther in an ther. "Pathian biaceihnak cu zungzal in a alhmi mei bantuk a si. Cu bantuk mei cu kan lakah hin a celh kho kan um ngai hnga maw?" an ti. ¹⁵ A dingmi thil kha na chim i na tuah ahcun na celh ko lai. Na lianhngannak cu misifak hlennak ah khan hmang hlah law ziknawh kha la hlah. Lainawnnak tuah awk le thil dang a ṭha lomi tuah awkah khua a khangmi kha kom hna hlah. ¹⁶ Cu bantukin na um ahcun khua-awng na pem lai i a ṭhawngmi ralhau bantukin na fek lai. Rawl ei awk kha na ngei zungzal lai i tidin awk kha zeitikhmanh ah na dong lai lo. ¹⁷ Ram kaupi a uktu siangpahrang sunparnak cu na mit in na hmuh ṭhan lai. ¹⁸ Ramdang in a rami ngunkhuai khawltu hna le mingiatu hna na rak ṭihmi hna kha, na lung chung i na ruahmi thil men ah an cang lai. ¹⁹ A ruam a kaimi ramdangmi, an holh na theih lomi kha na hmu ti hna lai lo. ²⁰ Biaknak puai kan tuah tawnnak Zion khua khi zoh hmanh. Jerusalem khi zoh hmanh. Khika um cu zeitluk in dah hnangam a si lai. A cawl in a cawl lomi thlam, a khenhnak fung phawi bal lomi le a hri a cat bal lomi bantuk a si lai. ²¹ Bawipa nih a sunparnak kha a kan hmuhsak lai. Tiva ngan pipi le tiva kau pipi pawngah khua kan sa lai, asinain kan ral hna tilawng cu cuka ah cun zeitikhmanh ah an ra lai lo. ²² - ²³ Cu lawng cung i thil hnuhnak hri vialte cu santlailo an si; lawng puanzar cu samh khawh an si lo. Kan ral hna ralkapbu i an chawva vialte cu lak dih an si lai. A tam tuk hringhran lai caah kebei hmanh nih an i cuh khawh ve lai. Bawipa hrimhrim cu kan siangpahrang a si lai i amah nih a kan uk lai i a kan huhphenh lai. ²⁴ Kan ram i a ummi cu ka zaw tiah an zai ti lai lo i an sualnak vialte cu ngaihthiam an si lai.

¹ Miphun vialte hna, ra tuah u. I pum u law ka bia ngai tuah u. Vawlei dihlak le a cung i a ummi vialte kha hika ah hin ra hna seh law ka bia cu ngai hna seh. ² Miphun vialte hna le an ralkapbu vialte hna cungah Bawipa cu a thin a hung. Hrawh dih dingin a ruah cang hna. ³ An ruak kha an vui hna lai lo, cuka ah cun an ril liangluang ko lai i an thu thluahmah ko lai; cun tlang cu thisen nih a ciah in a ciah dih lai. ⁴ Ni le thlapa le arfi cu an kuai lai i leidip ah an cang lai. Van cu cazual bantukin aa zual lai i arfi cu mitsur ruang hnah ṭilh bantuk le theipi kung hnah tlak bantukin an ṭil lai. ⁵ Van ah khin Bawipa nih a nam cu a timh cang i hrawh awkah a ruah cangmi Edom kha atu cu a tuk lai. ⁶ A nam ah cun an thi le an thau kha tlor zelzul in an i neh lai, raithawinak ah an hmanmi tuufa hna thi le thau bantuk le meheh thi le thau bantuk kha an si lai. Bawipa nih hi raithawinak cu Bozrah khua ah khan a tuah lai; hi bantukin a nganmi thahnak cu Edom ram ah khan a tuah lai. ⁷ Mi cu cawtum hrang le cawtum no bantukin an thi lai i vawlei cu thisen nih a ciah in a ciah lai i thau nih a khuh lai. ⁸ Hi caan hi Bawipa nih Zion kha a khamh i a ral hna cungah phu a hlam caan kha a si lai. ⁹ Edom ram tiva cu kattaza ah an cang lai i a vawlei cu kat ah a cang lai. Ram cu a ning piin kattaza kangh in a kang lai. ¹⁰ Chunzan in a kang lengmang ko lai i a meikhu cu a kai thluangthluan ko lai. Ram cu cu ti cun chan khat hnu chan khat hman awk ṭha ti loin a um lai i ahohmanh nih a pal zong an pal ti lai lo. ¹¹ Chimbu le langak lawng nih an hngah lai. Bawipa nih, zeihmanh a um lomi ram, ramcar ah a ser ṭhan lai. ¹² Ram cu uktu siangpahrang a ngei lai lo i hruaitu vialte hna kha an um ti lai lo. ¹³ Siangpahrang inn vialte hna le ralhau a ngeimi khua vialte hna chungah khan hling le so lawng an kho cang lai i ram-ui le chimbu kha an um lai. ¹⁴ Saram kha an tlong lai i pakhat le pakhat an i ko lai. Zan vak khuachia kha cuka ah cun a ra lai i dinhnak hmun a hung kawl lai. ¹⁵ Chimbu nih bu an i sak lai an ti an tit lai i an tlumh hna lai i an fale cu an zohkhenh hna lai. Cuka ah cun langta kha pakhat hnu pakhat in an i pum lai. ¹⁶ Thilnung kong ṭialnak Bawipa cauk chungah khan kawl tuah u law zeidah a chim ti kha rel tuah u. Hi thilnung vialte hna hi pakhat hmanh a baumi an um lai lo i pakhat hmanh keptu ngei lo zong an um lai lo. Cu bantukin si seh tiah Bawipa nih a ti i amah hrimhrim nih hmunkhat ah cun a umter hna lai. ¹⁷ Ram a phawtu hna cu Bawipa a si i amah nih an covo cio kha a pek hna lai. Ram chungah cun chan khat hnu chan khat an um lai i anmah ta a si zungzal cang lai.

¹ Ramlak le ramcar hna cu an i lawm lai i Thetse ram cu a par lai. ² Thetse ram cu hla a sa lai i lawmhnak in a au lai; Lebanon Tlang bantukin aa dawh lai i Karmel Tlang le Sharon nelrawn lo bantukin a ṭha lai. Mi kip nih Bawipa sunparnak le kan Pathian a lianhngannak le a ṭhawnnak kha an mit in an hmuh lai. ³ A tha a bami cu an kut ṭhawnter hna u law a khuk a thermi cu thazang pe hna u ⁴ A lung a dongmi cu, "Na thinphang hlah, lungṭhawng in um ko! Pathian cu nangmah chanh awkah a ra lai, na ral kha na phu a hlam hna lai," ti hna u. ⁵ Mitcaw nih khua an hmuh lai i hnachet nih khua an theih lai. ⁶ Kebei cu an pet an lam lai i a holh kho lomi kha lunglawmhnak in a au in an au lai. Thetse ram chungah khan tiva a luang lai; ⁷ a kangh in a kangmi thetse kha tidil ah an i cang lai i hmun car kha cerh an khat lai. Ram-ui an rak um tawnnak hmun ah khan cerh ram le phaikung an kho lai. ⁸ Cuka ah cun lam nganpi pakhat a um lai i a min ah "Thiannak Lam" ti a si lai. Hi lam cu misual mi nih an zul lai lo i hi lam a zulmi cu mihrut nih an pialter kho hna lai lo. ⁹ Chiandeih zeihmanh an um lai lo, saram ṭihnung zeihmanh an i chawk lai lo. Bawipa nih a luattermi hna cu hi lam hin inn ah an tlung lai. ¹⁰ Jerusalem cu lunglawm tein an phan lai i hla an i sak pah lai i lawmhnak in an au lai. Zungzal in an i lawm lai i ngaihchiatnak le lung retheihnak an ing ti lai lo.

¹ Hezekiah kha Judah siangpahrang a si a kum hleilinak ah, Assiria siangpahrang Sennakherib nih khan Judah ram khua, ralhau a ngeimi khua kha a tuk hna i a lak hna. ² Cun a ralbawi ngan bik kha Lakhish khua in Jerusalem khua ah ralkap tampi he a thlah i Siangpahrang Hezekiah kha, i pe ko, nan va ti lai, tiah a ti. Ralbawipa nih cun puantaktu pawl lam kha a kham, cu a khamnak cu cunglei lam in ti a rung luannak kahcham pawngah khan a si. ³ Judah mi pathum nih an hung ton: cu hna cu siangpahrang inn zohkhenhtu Eliakim, Hilkiah fapa, zung ca ṭialtu Shebna le cazin kengtu Joah, Asaf fapa kha an si. ⁴ Assiria bawipa nih cun, zeicahdah Siangpahrang Hezekiah hi amah le amah hi tlukin aa zumh hnga ti kha Assiria siangpahrang nih hngalh a duh tiah a chimh hna. ⁵ A thawh hna i, "Bia nih hin ralkap lei ṭhawnnak le thiamnak hi a tei khawh tiah dahra nan zumh? Keimah doh hi aho nih khin dah a kan bawmh ngam hnga tiah nan ruah? ⁶ Izipt nih a kan bawmh lai tiah nan i ruah ahcun, cucu phaikung ṭhiangṭhunh i i hman bantuk a si — phaikung cu ṭhiangṭhunh i hman ahcun a kiak i kut lam ah mi a chun. Izipt siangpahrang cu mi nih an i bochan tikah cu bantuk cu a si ko," a ti. ⁷ Cun a bia cu a vun peh i, "Asiloah, ’Bawipa kan Pathian pei kan i bochan,’ nan ti hnga maw? Cu nan Pathian cu, Hezekiah nih a biakṭheng vialte a hrawhpiak dih i Judah ram mi le Jerusalem khuami hna cu, biakṭheng pakhat lawngah Pathian nan bia cang lai, tiah a timi hna kha a si ṭung. ⁸ Chawdet bantukin ka siangpahrang min in kan i det tuah lai. Rang thong hnih kan pek hna lai, cun nannih nih aa cit khotu ding cu zat cu nan i kawl lai! ⁹ Assiria bawi lak i a hme bik hmanh tluk ṭung loin, Izipt nih rangleng le rangcung ralkap a kan kuat lai, nan hei ti. ¹⁰ Nan ram ka ra doh i ka ra hrawh hi Bawipa bawmhnak tel loin a si tiin dahra nan ruah? Bawipa hrimhrim nih pei nan ram doh le hrawh hi a ka fial cu," a ti. ¹¹ Cun Eliakim le Shebna le Joah nih khan ralbawipa cu, "Aramaik holh in kan chawn, kan hngalh ko. Hebru holh cun kan chawn hlah; ralhau cung mi vialte nih kan bia an kan ngaih ko," an ti. ¹² Anih nih a leh hna i, "Nanmah le nan siangpahrang lawng cu maw hi bia hi ka bawipa nih va chim hna a ka ti, tiah nan ruah. Nanmah lawng nan si lo, ralhau cung i a ṭhumi vialte hna zong khi ka chimh hna a hau; anmah zong cu nanmah bantukin mah ek a ei ve ding le mah zun a ding ve ding an si ko," a ti. ¹³ Cun a dir i Hebru holh in fak piin a au i, "Assiria siangpahrang nih an chimhmi hna hi ngai tuah u. ¹⁴ Hezekiah nih in hleng hna hlah seh tiah ralrinnak an pek hna. Hezekiah nih cun an khamh kho hna lai lo. ¹⁵ Bawipa kha i bochan u, tiah an lem hnanak kha i zumh hlah u, Bawipa nih a kan khamh lai i Assiria mi kha kan khualipi hi a lakter hna lai lo, tiah i ruah sual hlah u. ¹⁶ Hezekiah cu a bia ngai hlah u. Assiria siangpahrang nih khua kha chuahtak u law ka sinah i pe u, tiah an ti hna. ¹⁷ Nanmah ram bantuk a simi ram, mitsur zu a chuahnak lo a umnak ram le changreu ser awk rawl a umnak ram i siangpahrang nih an umter hna hlan cu, nanmahle nan mitsur ruang nih a tlaimi thei le nan theipi nih a tlaimi thei kha an eiter ko hna lai i nanmahle nan tikhor ti te kha an dinter ko hna lai. ¹⁸ Bawipa nih a kan khamh lai, ti in Hezekiah kha i hlenter hlah u. Ram dang pathian hna nih tah an ram cu Assiria siangpahrang kut cun an khamh kho hna maw? ¹⁹ Hamath khua le Arpad khua hna pathian cu tah, khuazei ah dah an si kun? Sefarvaim khua pathian hna kha tah, khuazei ah dah an um? Ahohmanh nih Samaria kha an khamh kho lo, a si lo mei? ²⁰ Hi ram pathian vialte hna nih hin an ram cu zeitik tal ah dah kan bawipa kut chungin an khamh khawh? Cu ti a si ko ṭung ahcun, zei nih dah, Bawipa nih Jerusalem khua cu a khamh lai, tiah an ruahter hna?" a ti. ²¹ Siangpahrang Hezekiah nih a chimh hna bantukin mi cu dai tein an um i bia kaa khat hmanh an let lo. ²² Cun Eliakim, Shebna le Joah nih an puan kha ngaihchiatnak langhternak ah an thleh i Assiria ralbawipa nih a chimmi cu siangpahrang kha an va chimh.

¹ Siangpahrang Hezekiah nih an chimhmi bia kha a theih cangka, a ngaihchiatnak langhternak ah a puan kha a thleh i buri puan kha aa aih i Bawipa Biakinn ah a kal. ² Siangpahrang inn zohkhenhtu Eliakim le zung ca ṭialtu Shebna le tlangbawi upa pawl kha profet Isaiah, Amoz fapa sinah khan a thlah hna. Annih zong nih buri puan an i aih ve. ³ Hi bia hi Isaiah nan va chimh lai, a timi hna cu a si: "Nihin hi temhinnak ni a si; dantatnak kan in ni a si i hmaichia in kan um ni a si. Zei he dah kan i lawh tiah a fa a chuak dengmang cang na i chuahternak thazang a ngei lomi nu bantuk kan si. ⁴ Assiria siangpahrang nih a nungmi Pathian kha nihsawh awkah a ralbawi kha a rak thlah. Bawipa na Pathian nih hi nihsawhnak bia hi rak thei hna seh law a chimtu kha dantat ko hna seh. Cucaah a tangmi kan mi hna caah thla rak cam ko." ⁵ Isaiah nih Siangpahrang Hezekiah bia kha a theih tikah ⁶ hitihin a leh: "Bawipa nih, ’Assiria mi nih an ka serhsat ruangah na zei hmanh rak poi hlah! an ti. ⁷ Bawipa nih an siangpahrang cu bia chawkvai pakhat a theihter lai i cu bia chawkvai nih cun a ram ah a kirter lai; cun cuka ah cun mi kha amah cu a thahter hna lai," a ti. ⁸ Assiria ralbawipa nih khan, Assiria siangpahrang cu Lakhish khua khan a chuak cang i cu khua pawng i a ummi Libnah khua kha a tu lio ti kha a theih, cucaah a ruahnak va hal awkah a va kal. ⁹ Izipt ralkapbu Ethiopia siangpahrang Tirhakah nih a hruimi hna kha Assiria ralkap doh awkah cun an i thawh cang ti kha Assiria mi nih cun an theih. Cu bia cu Assiria siangpahrang nih khan a theih tikah Judah siangpahrang Hezekiah kha ca a kuat i, ¹⁰ "Naa bochanmi na Pathian nih ka kut chungah na tla lai lo tiah an chimh, sihmanhsehlaw cu bia cu i zumh sual hlah. ¹¹ Assiria siangpahrang nih hrawh kan i timhmi ram cungah zeitindah kan tuah tawn ti cu na theih ko. Ka luat kho hnga tiah naa ruat dahra? ¹² Ka pupa hna nih khan Gozan le Haran le Rezef khua kha an hrawh hna i Telassar khua i a ummi Beth-eden mi kha an thah hna, kha hna kha an pathian nih ahohmanh an khamh khawhmi hna an um lo. ¹³ Hamath khua le Arpad khua le Sefarvaim khua le Hena khua le Ivvah khua siangpahrang hna kha tah khuazei ah dah an si?" a ti. ¹⁴ Siangpahrang Hezekiah nih ca cu lamkaltu hna sin khan a lak i a rel. Cun Biakinn ah khan a kal i Bawipa hmaika ah a phah i ¹⁵ thla a cam. ¹⁶ "Ralkapbu Bawipa, Pathian bawiṭhutdan cungah a ṭhu mi, nangmah lawnglawng hi Pathian na si i vawlei cung pennak vialte a uk dihtu na si. Nangmah nih van le vawlei kha na ser hna. ¹⁷ Atu cu Bawipa, kan thlacamnak hi kan theihpiak law kannih cu run kan zoh tuah. A nungmi Pathian nangmah serhsatnak bia Sennakherib nih a chimmi vialte hi ngai tuah. ¹⁸ Bawipa, kannih nih kan dihlak in, Assiria siangpahrang nih miphun tampi cu a hrawh hna i an ram kha an rawk dih cikcek i ¹⁹ an pathian kha an khangh dih hna, ti cu kan theih — sihmanhsehlaw annih cu pathian an si lo, minung nih an kut in an ser chommi thing le lung siasal menmen an si. ²⁰ Cucaah Bawipa kan Pathian, kannih cu Assiria mi hna kut chungin kan khamh ko sawh; cuticun vawlei cung miphun vialte nih nangmah lawnglawng Pathian na si kha an hngalh lai," a ti. ²¹ Cun Amoz fapa Isaiah nih Siangpahrang Hezekiah cu bia hei cah i Siangpahrang thlacamnak kha Bawipa, Israel Pathian nih hi bangin a leh tiah a hei chimh. ²² Bawipa nih cun, "Sennakherib, nangmah cu Jerusalem khua nih khan a nih in an nihsawh men ko, capo men ah an saih ko. ²³ Ahodah ka nihsawhmi le ka serhsatmi hi a si tiah na ruah? Israel Pathian thiang hi na ka serhsatmi cu ka si. ²⁴ Tlang sang bikbik cu ka rangleng in ka tei hna, Lebanon tlang parpahlek hmanh ka tei, tiin keimah kha tluangkhawnhnawh awkah na sal cu na thlah hna. Cuka ah cun sidar thing a sang bik cem hna le saipres thing a ṭha bikbik hna kha ka hau hna i tupi a deng tiang ka phan tiah tluang na khawng. ²⁵ Ram dang ah tikhor ka cawh hna i ka din hna, ka ralkap nih Nail Tiva cu vawlei ro tan in an tan, tiin naa thangṭhat. ²⁶ "Hi thil vialte hi hlan piin keimah nih ka rak timh cangmi an si ti kha na thei bal lo maw? Atu cu ka tlinter cang hna. Kulhmi khua kha hnawmpon i ser khawhnak nawl cu kan pek. ²⁷ Cuka i a ummi hna cu zeihmanh an tuah kho lo. An thin a phang i an lung a caw. Lo chung i a khomi ram si hna seh, inncung i a khomi belh si hna seh, nichuahlei thli lin nih a hranh tik hna i an uai an car bantuk khi annih zong cu an si ve. ²⁸ "Asinain nangmah kong cu a dihlak in ka hngalh dih; zei na tuah le khuazei i na kal kha ka hngalh dih. Zeitluk in dah ka cung i na thin a hun kha ka hngalh. ²⁹ Cu bantukin na thin a hun le naa porhlawt kha ka theih i cucaah cun atu cu na hnar in sio in kan sio lai na ka ah chak kan hlomh lai; cun n ratnak lam te khan kan kirter ṭhan lai," a ti. ³⁰ Cun Isaiah nih khan Siangpahrang Hezekiah cu a thawh i, "Hmailei ah a tlung dingmi thil hmelchunhnak cu hihi a si lai. Tukum le kumvoi cu rawl a hlih nan i rinh lai, sihmanhsehlaw a kum thumnak ah cun anmahte in a khomi rawl lawng kha nan ei lai, sihmanhsehlaw cu kum a hun changtu kum ah cun rawl kha nan cin khawh lai i nan zun khawh lai, mitsur ruang kha nan zun khawh lai, mitsur ruang kha nan phun khawh hna lai i an thei kha nan ei khawh hna lai. ³¹ Judah phun chungin a tangmi hna kha, vawlei chungah thuk piin hram a thla i thei a tlaimi thingkung bantukin an hninghno lai. ³² Ralkapbu Bawipa nih hi cu a tlinter hrimhrim lai caah Jerusalem khua le Zion Tlang ah a tangmi cu an um lai," a ti. ³³ Assiria siangpahrang kong ah Bawipa nih a chimmi cu hihi a si: "Hi khua chungah hin a luh zong a lut lai lo, thal zong pakhat hmanh a thlah lai lo. Phaw aa putmi ralkap zong nih a naih in an naih lai lo i a velchum ah raltuknak chuntlung zong zeihmanh ser a si lai lo. ³⁴ A ratnak lam khan a kir ṭhan lai i hi khua chungah hin a lut lai lo. Bawipa nih hi bia cu ka chim cang. ³⁵ Keimah nih upatnak ka hmuh nakhnga le ka sal David sin i biakamnak ka rak sermi ruangah khan, hi khua cu ka hum lai i ka huhphenh lai," a ti. ³⁶ Bawipa vancungmi pakhat kha Assiria mi ralkap riahnak hmun ah khan a va kal i sing khat le sang riat le thong nga a va thah hna. A thaizing khua a hung dei tikah cun an thi phengphung ko. ³⁷ Cu tikah Assiria siangpahrang cu aa let i Nineveh khua ah khan a kir. ³⁸ Ni khat cu a pathian Nisrok biakinn i pathian a biak lioah khan a fapa hna lak i pahnih Adrammelek le Sharezer nih an vainam in an thah i annih cu Ararat ram ah an zam. A dang a fapa pakhat Esarhaddon nih a chan i siangpahrang ah a cang.

¹ Cu caan lio hrawngah cun Siangpahrang Hezekiah kha a zaw i a thi dengmang. Profet Isaiah Amoz fapa kha amah zoh ah cun a va kal i, "Bawipa nih, ’zeizong vialte kha ningcang tein chia dih seh, zeicahtiah a dam ṭhan ti lai lo,’ a ti. Cucaah cun thih awkah i tim ko," tiah a va ti. ² Hezekiah cu vampang leiah khan aa mer i thla a cam. ³ "Bawipa, na rian zumhawktlakte le lungthin tak tein ka ṭuan kha philh hlah. Cun tuah seh ti na ka duhmi tuah kaa zuam zungzal zong kha philh hlah," tiah a ti i lunghno ngaiin a ṭap. ⁴ Cun Bawipa nih Isaiah cu, ⁵ Hezekiah sinah khan va kal law, "Na pu David i a Pathian Bawipa keimah nih na thlacamnak kha ka theih i na mitthli kha ka hmuh, kum hleinga kan nunter rih lai. ⁶ Nangmah le hi khua Jerusalem khua hi Assiria siangpahrang kut chungin kan khamh hna lai i hi khua hi ka huhphenh lai," a ti, tiah va chim tiah a fial. ⁷ Isaiah nih cun a leh i, "Bawipa nih a biakamnak cu a tuah lai ti hngalhnak caah hmelchunhnak pakhat an pek lai. ⁸ Cu hmelchunhnak cu hihi a si lai: Siangpahrang Ahaz nih a sermi ni tahnak kheng ah khan Bawipa nih ni thla cu dikiri pahra hnulei ah a kirter ṭhan lai," a ti. Cuticun ni thla cu dikiri pahra hnulei ah khan a kir ṭhan. ⁹ Hezekiah cu a zawtnak khan a dam ṭhan i hi thangṭhatnak hla hi a phuah: ¹⁰ Ka nunnak hi chantling tein nun thlu loin Ka chan lailing ah mithi khua ah ka kal rua lai tiah ka rak ruah. ¹¹ Minung mi hna vawlei cungah hin, Bawipa si seh, a nungmi si hna seh, ka hmu ti rua hna lai lo, ka rak ti. ¹² Ka nunnak cu a cat i a dong, ṭhehmi thlam bantuk le thiamruak la cat bantuk a si. Pathian nih ka nunnak cu a donghter rua lai tiah ka ruah. ¹³ Zan khuadei nganfak in ka ai, chiandeih nih ka ruh khi ka ṭam hna seh law cu ko cu a lo. Pathian nih ka nunnak cu a donghter rua lai tiah ka ruah. ¹⁴ Ka aw kha a lo riahmah i ṭhuro hrum in ka hrum. Van ka zoh ah ka mit re a thei. Bawipa, hi harnak vialte chung hin ka chuah ko. ¹⁵ Zeidah ka chim khawh lai? Hi thil a tuahtu cu Bawipa a si. Ka chung a vang i kaa hngilh kho lo. ¹⁶ Bawipa, nangmah ca lawnglawng ah ka nung ko lai; ka damter law, ka nunter ko. ¹⁷ Ka chungvanghnak cu daihnak ah a cang lai. Nangmah nih ka nunnak cu ṭihnung chungin na khamh, ka sualnak vialte kha na ka ngaihthiam. ¹⁸ Mithi khuami nih cun ahohmanh nih an in thangṭhat kho lo, mithi nih cun zumhawktlak na si kha an i bochan kho lo. ¹⁹ Atu i keimah nih kan thangṭhat bantukin nangmah an thangṭhatmi cu minung hi an si. Zeitluk in dah zumhawktlak na si kha pale nih an fale kha an chimh hna. ²⁰ Bawipa, nangmah nih na ka damter, tingtang tum in na thangṭhatnak hla ka sa lai, kan nun chung paohpaoh cu Biakinn chungah nangmah thangṭhatnak hla kan sa lai. ²¹ Isaiah nih siangpahrang cu theipi in sibang ser law na hma khan i thuh law na dam lai, a ti. ²² Cun Siangpahrang Hezekiah nih cun, "Biakinn ah ka kal kho ṭhan lai tinak ah zei hmelchunhnak dah a um lai?" tiah a ti.

¹ Cu caan lio hrawng ṭhiamṭhiam ah cun, Babilon siangpahrang Merodak Baladan, Baladan fapa nih khan, Siangpahrang Hezekiah cu a zaw ti kha a theih caah ca le laksawng a kuat. ² Hezekiah nih khan lamkaltu pawl cu ṭha tein a rak conglawmh hna i a chawva kha a hmuhsak hna — sui le ngun le zihmui le thil rimhmui le a ral hriamnam kha a hmuhsak hna. A thil chiahnak inn i a chiahmi si hna seh, a ram chung thil si hna seh, a hmuhsak lomi hna zeihmanh an um lo. ³ Khi tikah profet Isaiah cu Siangpahrang Hezekiah sinah khan a va kal i, "Hi mi hna hi khuazei in dah an rat i zeidah an in chimh?" tiah a va hal. Hezekiah nih cun, "Ram hlapi, Babilon ram in an ra," tiah a leh. ⁴ "Siangpahrang inn chungah zeidah an zoh?" a ti. "Zeizong vialte an zoh dih ko, thil chiahnak inn chung thil ka hmuhsak lomi hna zeihmanh a um lo," tiah a leh. ⁵ Cu tikah Isaiah nih siangpahrang cu a thawh i "Ralkapbu Bawipa nih, ⁶ ’Na siangpahrang inn chung i a ummi thil a dihlak, na pupa hna nih nihin tiangin an rak khonmi kha, Babilon ram i kalpi an si dih lai caan kha a phan lai,’ a ti. A tangmi zeihmanh a um lai lo. ⁷ Nangmah na tefa hrimhrim kha a cheu an kalpi hna lai i Babilon siangpahrang inn i rianṭuantu ah an til an dit hna lai," tiah a ti. ⁸ Hi bia a sullam cu, keimah chan chungah cun daihnak le himnak a um lai, ti a si tiin Siangpahrang Hezekiah nih cun a ruah caah, "Bawipa sinin a rami bia na ka chimhmi cu bia ṭha a si," tiah a leh.

¹ "Hnem tuah hna u, ka mi hna cu hnem tuah hna u," tiah nan Pathian nih a ti. ² "Jerusalem khuami cu lunglawmhnak pe hna u law, ’Cu caan an in cu a za cang i atu cu an sualnak kha ka ngaihthiam cang hna,’ a ti tiah chim hna u. An sualnak ruangah a za in dan ka tat cang hna," a ti. ³ Aw pakhat nih, "Bawipa caah ramcar chungah lam pakhat sial u! Kan Pathian caah thetse ram i lam cu sial u. ⁴ Horkuang vialte cu chilh an si lai i tlang vialte cu chimh an si lai. Tlang cu hmun rawn ah an cang lai i a bingbomi hmun cu rawn didiai in an um lai. ⁵ Cun Bawipa sunparnak cu a lang lai i mi vialte nih an hmuh lai. Hi biakamnak cu Bawipa hrimhrim nih a tuahmi a si," a ti. ⁶ Aw pakhat nih, "Thanh tuah," tiah a ti. Kei nih, "Zeidah ka thanh lai?" tiah ka leh. "Minung vialte hi ram bantuk men an si, ramlak pangpar nakin an chan a sau hlei lo. ⁷ Bawipa nih thli a chemter hna tikah ram cu an car i pangpar cu an uai. Minung hi ram bantuk men cu an si taktak ko. ⁸ Asi, ram cu a car i pangpar cu a uai, sihmanhsehlaw kan Pathian bia cu zungzal in a hmun. ⁹ Maw Jerusalem, tlang sang cungah kai law thawng ṭha kha thanh tuah! Maw Zion, fak piin au law thawngṭha kha thanh tuah. Au ko, ṭih hlah. Judah ram khua hna kha, nan Pathian a ra lio, tiah chim hna. ¹⁰ Bawipa nih ṭhawnnak in a uk hna lai i a khamhmi kha aa ratpi hna lai. ¹¹ A tuurun kha tuukhal nih an tuu an zohkhenh hna bangin a zohkhenh hna lai; tuufa tete kha a pumh hna lai i a kut in a cawi hna lai; an nule kha nem tein a hruai hna lai. ¹² Aho tal nih rilipi ti khi a zapei kuar in a tah kho maw? van khi tah a khap in a tah khotu aho tal an um maw? Vawlei hi tah aho nih dah hrai pakhat chungah a vawlei a khumh dih khawh? Asiloah, fing le tlang vialte hna hi aho nih dah cuaithlainak in a thlai khawh hna? ¹³ Bawipa cu, hihi na tuah awk a si, tiah a chim khomi aho tal an um maw? Aho tal nih Bawipa cu an cawnpiak kho in ruahnak an cheu kho maw? ¹⁴ Zeitindah thil hi tuah awk an si ti hngalhnak le theihnak caah Bawipa nih aho tal ruahnak a hal bal hna maw? ¹⁵ Bawipa, caah cun miphun hna hi zeihmanh an si lo, ti dor pakhat tluk hmanh an si lo, lamhlatpi i a ummi tikulh hna khi leidip tluk fang i a zaangmi men an si. ¹⁶ Lebanon tlang tupi chung saram vialte hna khi, kan Pathian sin raithawinak caah an i za lo, a thingkung vialte hna zong khi a mei kaunak caah an tlawm tuk. ¹⁷ Miphun hna hi Bawipa caah cun zeihmanh an si lo. ¹⁸ Pathian cu aho he dah na tahchunh khawh lai? Zeidah a lawh ti kha zeitindah na chimh khawh lai? ¹⁹ Zungthiam mi nih an sermi siasal bantuk a si lo, sui sermi nih sui an hut i ngun hram an sermi chung i an tohmi siasal bantuk hi a si lo. ²⁰ Sui le ngun aa damh kho lomi nih cun a rop kho lomi thing kha an i thim. Zungthiam mi kha an kawl hna i siasal cu rawk lo dingin an serter hna. ²¹ Nan hngal rih lo maw? Nan thei rih lo maw? Hlan piin an rak in chim cang hna lo maw? Vawlei cu zeitindah hram aa thawk ti kha nan thei bal lo maw? ²² Vawlei leng le van pin i a bawiṭhutdan cung i a ṭhumi nih khin vawlei cu a ser; a cung i a ummi hna cu khaubawk bantuk men an si. Van cu puanzar bantukin a zam i mi umnak thlam bantukin a samh. ²³ Uktu bawi ṭhawngṭhawng kha a ṭhumh hna i pakpalawng ah a canter dih hna. ²⁴ Annih cu thingkung note, phun kate le hram thla kate bantuk khi an si. Bawipa nih thlitu kha a thlahhnawh hna tikah an car i capawl bantukin thlitu nih cun a choih hna. ²⁵ Pathian thiang cu aho he dah tahchunh khawh a si lai? Amah bantuk aho tal an um maw? ²⁶ Van khi zoh tuah u! Nan hmuhmi arfi khi aho nih dah a ser hna? Ralkapbu bantukin a hruaitu hna nih khin a ser hna; zeizat an si kha a hngalh i an dihlak in an min in a auh hna! A ṭhawnnak cu a lianngan hringhran ko — pakhat hmanh an tlau bal lo! ²⁷ Israel, a si kun ahcun, zeicahdah Bawipa nih ka harnak hi a hngal lo i ka caah hin thil a rem in a chia lo, tiah na zai? ²⁸ Nan hngal lo maw? Nan thei lo maw? Bawipa cu zungzal hmunmi Pathian a si i Amah nih vawlei kha a ser dih; zeitikhmanh ah a baa bal lo i a thazang a tlawm bal lo. Ahohmanh nih a lungthin kha an hngal lo. ²⁹ A dermi le a bami kha thazang a pek hna. ³⁰ A nomi hmanh kha an tha a der tawn i tlangval hmanh kha an tha a ba kho. ³¹ Sihmanhsehlaw Bawipa aa bochanmi cu thazang thar an la. Mupi bangin an zuang lai; an tlik tikah an baa lai lo, an kal tik zongah an tha a di lai lo.

¹ Pathian nih, "Lamhlatpi i a ummi ram hna, dai tein um u law ka bia ngai tuah u. Biaceihnak hmun i nan bia chim awkah i tim tuah u. Chimnak caan nan ngei lai. Ahodah a hmaan ti khiah awkah hmunkhat ah ṭhu ṭi tuah u sih. ² "Aho nih dah teitu kha Nichuahlei in a ratpi i a kalnak kip ah teitu a siter lengmang? Aho nih dah siangpahrang hna le miphun hna kha a teiter hna? Annih cu leidip khi va si hna seh law cu bang, a vainam nih cun a sam duahmah ko hna; thlitu nih capawl a choih bantuk khin a thal nih a ṭhek hna. ³ A dawi thluahmah hna i a khul a ran tuk caah a ke nih vawlei hmanh kha a tawng set lo. ⁴ Hi thil a umtertu hi ahodah a si? Tuanbia kalning hi hi bantukin si seh tiah aho nih dah a rak ti? Bawipa cu a hramthawknak i a rak ummi kha ka si i Bawipa cu a donghnak i a um laimi zong ka si. ⁵ "Lamhlatpi i a ummi rammi hna nih ka tuahmi kha an hmuh; an thin a phang i a ther in an ther. Cucaah an dihlak in hmunkhat ah an i pum. ⁶ Zungthiam pawl kha pakhat le pakhat an i bawm i pakhat le pakhat lung ṭhawnnak an i pe. ⁷ Lehtama nih sui serpa kha, "Na tuahmi a ṭha," a ti. Siasal a milhtu nih khan siasal cu hmunkhat ah thir in a funtomtu kha, na lung ṭhawng ko, a ti. Pakhat nih, ’Na senghnak cu a ṭha ko,’ a ti i annih nih siasal cu thir in a umnak ding hmun ah khan an khenh chih. ⁸ "Sihmanhsehlaw Israel ka sal, nang cu keimah nih kan thimmi miphun na si i ka hawi Abraham tefa na si. ⁹ Vanhramdeng khin kan ratpi; vawlei cung a hlatnak bik hmun in kan kawh i, ’Nang cu ka sal na si,’ kan ti. Kan hlaw lo, a thim in kan thim lehlam. ¹⁰ Na thin phang hlah — na sinah ka um ko, Keimah cu na Pathian ka si — zeihmanh ṭih hlah. Kan ṭhawnter lai i kan bawmh lai; kan huhphenh lai i kan khamh lai. ¹¹ "Ka mi hna, nan cung i a thin a hungmi cu hmaichiatnak le ningzahnak an hmu lai. Nanmah an dohtu hna cu an thi lai; ¹² nanmah cungah raldohnak a tuahmi cu vawlei in an lo lai. ¹³ Keimah cu Bawipa nan Pathian ka si i ṭhawnnak kan pek hna; ’Nan thinphang hlah u, kan bawmh hna lai,’ tiah keimah nih ka ti," a ti. ¹⁴ Bawipa nih aa thawh i, "Israel, na hmete ko i na der ngai ko nain na thinphang hlah. Kan bawmh lai. Keimah Israel Pathian thiang hi nangmah an khamhtu cu ka si. ¹⁵ Facang tuknak fung, a thar i hahar an bunhmi bantuk ah kan ser lai. Tlang kha na rial hna lai i na hrawh lai; fing kha na hmawh dih hna lai i leidip ah an cang lai. ¹⁶ Van ah na hlerh hna lai i thlitu nih a choih hna lai; thlichia nih a kenkip ah a ṭhek dih hna lai. Sihmanhsehlaw nang cu naa lawm lai, zeicahtiah keimah cu na Pathian ka si, Israel Pathian thiang keimah cu na ka thangṭhat lai. ¹⁷ "Ka mi hna cu tihal in ti an kawl i an dang a car tikah, Bawipa nih an thlacamnak cu ka leh hna lai; Israel Pathian nih ka hlaw bal hna lai lo. ¹⁸ Tlang car ah tiva ka luanter hna lai i nelrawn ah cerhti ka putter hna lai. Thetse ram kha tidil ah ka ser hna lai i ramcar kha a luangmi cerh ah ka ser hna lai. ¹⁹ Thetse ram ah khan sidar thing le anri thing le lenhmui le oliv kha ka khohter hna lai. Ramcar ah tupi an um lai, far thing tupi le saipres thing tupi le thal thing tupi an um lai. ²⁰ Mi nih khan cucu an hmuh lai i Bawipa nih ka tuahmi a si kha an hngalh lai. Cu thil a umtertu cu Israel Pathian thiang ka si kha an hngalh lai," a ti. ²¹ Bawipa, Israel siangpahrang nih hitihin a ti: "Miphun dang pathian hna, nan bia cu rak chuahpi tuah hnek u, nan thiam khawh chungin chim tuah u. ²² Ra chuak u law hmailei thil um ding kha chim chung tuah u. Biaceihtu pawl cu thil um cia kong kha chim hna u, cun thil um lai ding kha, an hung um taktak tikah kan hngalh khawh hna nakhnga, zeitindah an um te lai ti kha kan chim tuah u. ²³ Hmailei thil um ding kha kan chim tuah u — cu ti nan chim khawh ahcun pathian nan si kha kan hngalh lai. Ṭhatnak pakhat tal, chiatnak pakhat tal tuah u law cuticun thinphang awlok chong in kan um lai i cuticun ta pathian nan si le si lo cu kan hngalh fam hnga. ²⁴ Sihmanhsehlaw nannih cu zeihmanh nan si lo, nan tuahmi vialte zong zeihmanh an si lo, nanmah an biatu hna zong fihnung an si. ²⁵ "Nichuahlei i a ummi mipa pakhat kha ka thim cang i chaklei in nanmah tuk awkah ka ratpi lai. Um sertu nih tlak cu a ke in a nan bantukin ram uktu hna cu a nan hna lai. ²⁶ Nan chimmi kha ahmaan taktak tiah kan in ti khawh hna nak dingah, hitihin thil a um te lai tiah aho tal nih nan rak kan chim in, aho tal nih nan rak chim chung kho maw? Cu kong cu ahohmanh nih nan rak chim kho lo, nan chimmi ahohmanh nih an thei lo! ²⁷ Cu thawng Zion a chim hmasa biktu cu Bawipa ka si, Jerusalem cu, ’Na mi hna an ra lio! Na mi hna an ra tlung lio!’ tiah va chimh awkah keimah nih lamkaltu ka thlah. ²⁸ An pathian kha ka zoh hna tikah bia chim awk a ngeimi pakhat hmanh an um lo; bia ka halmi hna a ka let khotu pakhat hmanh an um lo. ²⁹ Hi pathian hna hi pakpalawng an si, an tuah khawhmi zeihmanh a um lo — hi siasal pathian hna hi thazang zeihmanh a ngei lomi, zei thil hmanh a tuah kho lomi an si.

¹ Bawipa nih aa thawh i, "Hi ka sal hi ka dawmhtlaihmi ka sal a si — ka thim i a cung i ka lung a tlingmi a si. Amah cu ka ṭhawnnak in ka khahter i miphun vialte cungah dinnak a tlunter lai. ² A au a khuang lai lo, zatlang lam ah thang urmar in biachimnak a tuah lai lo. ³ A derthawmmi cungah khan nem tein a um lai i bawmtu a ngei lomi kha a zaangfah hna lai. A hmunmi dinnak kha mi vialte cungah a tlunter lai. ⁴ A lung a dong lai lo, a tha zong a chia lai lo, vawlei cungah dinnak kha a hmunhter lai. Lamhlat pipi i a ummi ram nih a cawnpiaknak kha ngangngan in an hngak ko," a ti. ⁵ Pathian nih van khi a ser hna i a samh hna; vawlei le a cung i a ummi thilnung vialte kha amah nih a ser hna; vawlei cung i a ummi vialte kha nunnak le thaw a pek hna. Cu Bawipa Pathian nih cun a sal cu a thawh i, ⁶ "Vawlei cungah hin dinnak a len nakhnga, Bawipa nih nangmah cu kan kawh i ṭhawnnak kan pek. Nangmah thawng in miphun kip he biakamnak ka ser lai i nangmah thawngin miphun kip sinah ceunak ka tlunter lai. ⁷ Mitcaw cu an mit na auter hna lai i a muimi thonginn chungah a ṭhumi cu na luatter hna lai. ⁸ "Keimah lawnglawng hi Bawipa na Pathian cu ka si. Ka sunparnak hi pathian dang ahohmanh hrawm ka duh hna lo i ka thangṭhatnak hi siasal zeihmanh hrawm ka duh hna lo. ⁹ Ka rak chimchungmi kha atu cu an tling cang. Atu cu thil thar kha kan chimh lai, um an i timh hlanah hin kan chimh lai," a ti. ¹⁰ Bawipa cu hla thar in thangṭhat tuah u; vawlei vialte hna, a thangṭhatnak hla cu sa tuah u. Rili cungah tilawng in a kalmi hna, amah cu thangṭhat tuah u; rili chung thilnung vialte hna, amah cu thangṭhat u. Lamhlatpi i a ummi ram hna, hlasa tuah u, cuka ram i a ummi vialte hna, hla cu sa tuah u. ¹¹ Thetse ram le a chung i a ummi khua vialte nih Pathian cu thangṭhat hna seh, Kedar mi nih amah cu thangṭhat hna seh. Sela khua i a ummi cu lunglawmhnak in tlang cungin a au in rung au hna seh. ¹² Lamhlatpi ram i a ummi nih Bawipa cu thangṭhat hna seh law sunparnak pe hna seh. ¹³ Mi ralṭha kha raltuk awkah aa thawh bantukin Bawipa cu aa thawh; ral tuk awkah cun aa tim i a hiar in a hiar; ral hla kha aa thawh i raltuknak hmun au khan a au; a ral kha a ṭhawnnak cu a hmuhsak hna. ¹⁴ Pathian nih aa thawh i, "Caan saupi dai tein ka um i ka mi kha ka let hna lo. Sihmanhsehlaw atu cu cawlcangh a cu cang; nau ngan a fakmi nu bantukin ka ai. ¹⁵ Fing le tlang kha ka hrawh hna lai i ram le thingkung kha ka carter dih hna lai. Tiva luannak nelrawn kha thetse ram ah ka canter dih hna lai i tili kha ka kaoter hna lai. ¹⁶ A mit a cawmi ka mi cu, an kal bal lonak lam khan ka kalpi hna lai. Muihnak cu ceunak ah ka canterpiak hna lai i an hmai i lam bingbo cu lam mil ah ka ser hna lai. Hi thil hi tlolh lo tein ka tuah hrimhrim hna lai. ¹⁷ Siasal aa bochanmi vialte le milem cu kan pathian a si tiah a timi vialte cu ningzak le hmaichia in an um lai," a ti. ¹⁸ Bawipa nih aa thawh i, "A hna a chetmi hna, ngai tuah u! A mit a cawmi hna, ṭha tein zoh tuah u. ¹⁹ Ka sal nakin a mit a caw deuhmi an um ti hnga maw? Ka thlahmi ka lamkal nakin a hna a chet deuhmi an um ti hnga maw? ²⁰ Israel, nang cu thil tampi na hmu i na thei, sihmanhsehlaw na caah zeihmanh an si lo. Theihnak ding caah hna cu na ngei? Asinain zeital na theihmi a um maw? ²¹ Bawipa cu mi khamh a duhmi Pathian a si, cucaah a cawnpiaknak kha upat hna seh, ti a duh. ²² Sihmanhsehlaw atu ah cun a mi hna cu mi nih an ramh hna, vawlei tang thonginn chungah an khumh hna i thonginn chungah an hrenh hna. An ramh hna i an thil an chuh hna, ahohmanh a chanhtu hna an um lo. ²³ Nannih lakah aho tal hihi a ngaimi nan um maw? Atu thawk in hmailei ah tah ṭha tein a ngaimi nan um maw? ²⁴ Aho nih dah Israel cu thil chuttu hna kut chungah khan a chanh? Bawipa hrimhrim kha a si, a cung i sualnak kan tuahmi Bawipa kha a si. Cuticun nung hna seh a kan tining in kan nung duh lo, a kan cawnpiakmi zong kha ka ngai lo. ²⁵ Cucaah cun a thinhun ṭhawnnak kha a kan inter i ral hremnak kha a kan tuarter. Israel mi hna lakah a thinhunnak cu mei alh in a alh, sihmanhsehlaw zei thil dah a um ti kha kan hngal lo, kan i cawn khawhmi zong zeihmanh a um fawn lo.

¹ Israel, nangmah an sertu Bawipa nih hitihin a ti: "Na thinphang hlah, kan huhphenh lai. Nangmah cu na min in kan auh, keimah ta na si. ² Ti thuk na tan tikah na sinah ka um lai, harnak na inmi nih an tei lai lo. Mei alh na tan tikah an kangh lai lo, harnak na inmi nih an hliam lai lo. ³ Zeicahtiah keimah cu Bawipa na Pathian ka si, nangmah an khamhtu Israel Pathian thiang cu ka si. Nangmah luatternak ding caah Izipt cu ka hlawt lai i Ethiopia le Seba zong ka hlawt ko hna lai. ⁴ Na nunnak khamh awkah miphun pipi zong kha ka hlawt ko hna lai, zeicahtiah nangmah cu ka caah a sungmi na si i upatnak kan pek i kan dawtmi na si. ⁵ Na thinphang hlah — na sinah ka um ko. A hlatmi nichuahlei ram le a hlat bik nitlaklei ram in, na mi cu inn ah ka tlunpi hna lai. ⁶ Chaklei ram cu, thlah hna u, ka ti hna lai i thlanglei ram cu, tlai hna hlah u, ka ti hna lai. Ram hla pipi in ka mi cu kir hna seh law, vawlei cung khuazakip in kir hna seh. ⁷ Annih cu keimah mi an si i keimah sunparnak petu dingah ka sermi an si," a ti. ⁸ Pathian nih aa thawh i, "Ka mi cu biaceihnak hmun ah au hna u. Mit cu an ngei, sihmanhsehlaw khua an hmu lo, hna cu an ngei, sihmanhsehlaw khua an thei lo. ⁹ Biaceihnak hmun i chuah awkah miphun dang kha au hna u. An pathian aho tal nih hmailei thil kong an chimchung kho maw? Atu i a um liomi thil hi aho tal nih an rak chimchung kho maw? Hi pathian hna nih hin, kan chimmi cu a hmaan i kan bia cu biatak a si ti langhternak caah tehte rak i chuahpi hna seh. ¹⁰ "Israel mi hna, ka tehte cu nanmah hi nan si, tiah Bawipa nih a ti; ka sal si awkah ka thimmi cu nanmah hi nan si, cucaah cun nan ka hngalh i nan ka zumh awk a si, keimah lawnglawng hi Pathian cu ka si ti kha nan hngalh awk a si. Keimah hleiah pathian dang zeihmanh an um lo, an rak um bal lo i hmailei zongah an um bal lai lo. ¹¹ Keimah lawnglawng hi Bawipa cu ka si, keimah lawnglawng hi nanmah an khamh khotu hna cu ka si. ¹² Thil um lai ding kha ka rak in chimhchung hna i cu hnuah cun nanmah bawmh ah ka ra. Miphun dang pathian nih cun hi bantukin an tuah bal lo; ka tehte cu nanmah hi nan si. ¹³ Keimah hi Pathian cu ka si i ka si zungzal ko lai. Ahohmanh ka ṭhawnnak chungin a luat khomi an um lai lo; ka tuahmi kha ahohmanh nih an thleng kho lai lo," a ti. ¹⁴ Nanmah an khamhtu hna Bawipa, Israel Pathian thiang nih aa thawh i, "Nanmah khamh awkah Babilon cu ralkapbu pakhat ka tukter lai; khuapi kulhnak kutka kha ka chimh hna lai i mi an au khuannak kha ṭahnak ah a cang lai. ¹⁵ Keimah Bawipa cu nan Pathian thiang ka si, Israel, nangmah Sertu cu keimah ka si i na siangpahrang cu keimah hi ka si," a ti. ¹⁶ Hlanpi ah hin Bawipa nih rili tan in lam pakhat a rak ser i cu lam cu tilet chungin a kal. ¹⁷ A ṭhawngmi ralkapbu kha a hrawh hna, rangleng le raltuknak rangtum kha ti chungah a paih hna. An pil dih, zeitikhmanh ah an chuak ṭhan ti lo, meifar mih bantukin an mit. ¹⁸ Sihmanhsehlaw Bawipa nih cun, "A um ciami mi thil kha i tlaih peng hlah u, hlanpi i a rak um cangmi lawng kha tuak peng hlah u. ¹⁹ Thil thar ka tuah ding tu kha i ngiat u. Cucu atu ah hin a um lio cang, a hmuh hmanh nan hmuh khawh ko lai. Ramcar chungin lam pakhat ka kalter lai i cuka ah cun tiva luang kan pek hna lai. ²⁰ Ka thimmi ka mi hna ti pek awk caah ramcar chung i tiva ka luanter hna tikah cun, ramlak saram hmanh nih khan an ka upat lai, ram-ui le ostrik va hmanh nih khan an ka upat lai. ²¹ Ka thimmi ka mi hna cu keimah ca i kaa sermi an si — anmah nih ka thangṭhatnak hla cu an sak hna lai," a ti. ²² Bawipa nih, "Asinain, Israel mi hna, nan biakmi cu keimah ka si lo; kei nih cun kan nor cang hna. ²³ Khangh thawinak caah nan hmanmi tuu cu keimah nan ka pe lo; raithawinak nan tuah tikah nan upatmi cu keimah ka si lo. Laksawng ka pe u tiah thilrit kan khinh hna lo zihmui ka pe u ti zongah kan ti fawn hna lo. ²⁴ Zihmui kha nan ka cawkpiak lo i nan saṭil thau in ka lung nan ka riamhter lo. Nan sualnak tu khan thilrit nan ka khinh i ṭhat lonak nan tuahmi khan ka lungre nan ka theih. ²⁵ "Asinain nan sualnak an hnawhpiaktu hna cu keimah ka si, keimah cu keimah ka si ruangah hi bantukin ka tuah cu a si; nan sualnak cu kan cinkenpiak hna lai lo. ²⁶ Biaceihtu zung ah chuak tuah u sih, taza nan ka cuainak cu rak chuahpi tuah u, kanmah hi kan hmaan, nan ti khawhnak dingah nan bia cu hun chuahpi tuah u. ²⁷ Nan pupa hmasa bik hna nih sualnak an rak tuah, nan hruaitu pawl nih ka cungah sualnak an tuah. ²⁸ Nan uktu pawl nih ka hmunthiang kha an thurhnawmh, cucaah cun Israel mi nan cungah rawhralnak ka tlunter i ka mi hna nan cungah zawmhtaihnak ka phakter," a ti.

¹ Bawipa nih aa thawh i, "Ka sal Israel mi hna, ngai tuah u, Jakob tefa, ka mi thimmi hna, ngai tuah u. ² Nanmah an sertu hna cu Bawipa ka si, nan nunnak a hram a thawknak khan keimah nih kan bawmh hna. Nan thinphang hlah u; nanmah cu ka sal nan si, ka dawtmi ka mithim nan si. ³ "Ti a halmi ram kha ti ka pek lai i thetse ram ah khan tiva ka luanter hna lai. Nan tefa cu ka lianhngannak ka toih hna lai i nan ciruang cu ka thluachuahnak ka toih hna lai. ⁴ Ti ṭha tein toihmi ram le tiva kam i a khomi inhliam kung bantukin an hninghno lai. ⁵ "Midang zong nih, pakhat hnu pakhat in, ’Kei cu Bawipa mi ka si,’ an ti lai i Israel mi chungah khan an i fon lai. An ban ah khan Bawipa min hmelchunhnak kha an ser lai i ’Kei cu Bawipa mi ka si ve,’ an ti lai," a ti. ⁶ Israel mi kha a uk i a hupphengtu hna Bawipa, Ralkapbu Bawipa nih hitin a ti: "Keimah cu a hmasa bik le a hmanung bik ka si, Keimah lawnglawng hi Pathian ka si i Keimah chim lo a dang pathian zeihmanh an um lo. ⁷ Ka tuahmi hi a tuah khotu a dang aho tal an um maw? Caan hramthawknak in caan donghnak tiang thil a um lai ding fiang tein a chimchung khotu aho tal an um maw? ⁸ Ka mi hna, nan thinphang hlah u. Thil um lai ding vialte kha hlanlio piin atu tiang, ka rak chimchung cang kha nan hngalh i ka tehte cu nanmah nan si. Pathian dang aho tal an um maw? Lungpi dang ahohmanh an um lo, ka hngalhmi pakhat hmanh an um lo. ⁹ Siasal a sermi hna cu pakpalawng an si i a sung tuk hringhran ah an ruahmi an pathian hna cu santlailo an si. Hi pathian a biami hna cu mitcaw le mihrut an si i ningzahnak an ing lai. ¹⁰ Pathian bantukin biak awkah thir le dar in siasal ser rian cu pakpalawng rian a si. ¹¹ Siasal a sertu hna cu minung an si, minung nak ngan deuh an si lo. Ra hna seh law biaceihnak hmun ah ra chuak ve tuah hna seh — an thin a phang lai i nihsawhnak an ing ve ko lai. ¹² Sosertu nih thir pakhat kha aa lak i mei ah a linh. A ṭhawngmi a kut in a den i mui ngei ah a ser. A rawl a ṭam, a ti a hal i a ba. ¹³ Lehtama nih khan thing kha a tah. A ser dingmi mui kha thungrang in a rin i a rinning cun a hriamnam in a saih. Minung mui in a ser, aa dawh ngai mipa mui in a ser i biakinn chungah an chiah. ¹⁴ Cu sernak i hman awkah sidar thing a va hau, asiloah kuhthing maw saipres thing maw tupi chungah khan a va thim. Cucu a duh lo ahcun lawril thing kha a cin in a cin hna i a ṭhantertu hna ding ruah kha a hngah. ¹⁵ Thingkung kha a cheu cu tih awkah a hman i a cheu cu siasal sernak ah a hman. A cheu kha mei tih awkah a hman i cu a mei cu toh awk le rawl chuannak ah a hman. Cun a cheu kha pathian sernak ah a hman i cucu a biak. ¹⁶ Thing a cheu cu mei tih awkah khan a hman, cu mei ah cun sa kha a chuan i a ei i a paw a khim. Mei cu a to i, "A lum i a va nuam dah!" a ti. ¹⁷ Cu thing ṭhiamṭhiam a tangmi cun siasal pakhat a ser. A hmaiah a kun i a biak. A sinah thla a cam i, "Nangmah cu ka pathian na si, ka khamh tuah," a ti. ¹⁸ Cu bantuk mi cu an hrut tuk, kan tuahmi kha zei a si ti awk an hngal lo. Biatak hngalh kha an duh lo, an mit an chinhkanh i an lungthin an kharkanh. ¹⁹ Siasal a sertu nih, "Thing cu, a cheu mei tih awkah ka hman. Cun mei ah cun rawl le sa ka chuan hna i ka ei hna. Cun thing kha a tangmi cu siasal ah ka ser i cu thingtan hmaiah cun atu hi ka kun," ti ruah awk a hngal lo. ²⁰ Cu ti a tuah cu vutcam ei sullam bantuk men a si. Ruahnak hrut a rak ngeihmi nih khan a pingah a hruai tuk cang caah bawmh khawh hmanh a si ti lo. Ka kut i kaa putmi siasal hi pathian a si hrimhrim lo ti kha a hngal lo. ²¹ Bawipa nih aa thawh i, "Israel mi hna, hi thil hi philh hlah u; ka sal nan si kha philh hlah u. Nannih cu ka sal si awkah kan ser hna, cucaah kan philh bal hna lai lo. ²² Nan sualnak cu khuadawm bantukin ka chem dih cang. Ka sinah ra kir u, nanmah an khamhtu hna cu keimah ka si," a ti. ²³ Nannih van hna, lunglawmhnak in au tuah u, vawlei cung i a thukmi hmun hna, au tuah u. Tlang te tupi chung thing vialte hna, lunglawmhnak in au tuah u. Bawipa nih a mi Israel mi cu a khamh cang hna i cuticun a lianhngannak kha a langhter cang. ²⁴ "Keimah cu Bawipa, nanmah an sertu hna le an khamhtu hna ka si. Keimah cu zeizong vialte a sertu Bawipa ka si. Keimah lawnglawng nih van cu ka samh hna; vawlei ka rak ser ah hin ahohmanh nih an ka bawm lo. ²⁵ Kut ṭial zohthiam kha mihrut ah ka canter hna i arfi zohthiam nih an chimchungmi kha pakpalawng ah ka canter. Mifim hna fimnak bia cu pakpalawng ah ka ser i an fimnak cu hruhnak a si kha ka langhter. ²⁶ Sihmanhsehlaw ka sal nih cun thil a chimchung tikah le ka timhmi phuan awkah lamkal ka thlah tikah, cu ka timhmi hna le chimchungmi thil hna cu ka tlinter hna. Jerusalem cu ka thawh i, na chungah mi an um ṭhan lai, Judah ram khua cu remh an si ṭhan lai tiah ka chimh. Hi khua hna cu an rawhnak chung khan an tho ṭhan lai. ²⁷ Rili cu ka nawl in ka carter. ²⁸ Sairas cu ka thawh i, ’Keimah aiawh in uktu a si ding cu nangmah na si; tuah seh ti kan duhmi kha na tuah lai: Jerusalem cu sa ṭhan u tiah nawl na pek hna lai i Biakinn cu a hram ser u, tiah na ti hna lai,’ ka ti," tiah a ti.

¹ Sairas cu Bawipa nih a thimmi siangpahrang a si! Bawipa nih amah cu miphun tampi kha tei awkah a fial; siangpahrang kha an lianhngannak phawih awkah a thlah: Bawipa nih khua kulhnak hau kutka hna kha a hunpiak lai. Bawipa nih Sairas cu a thawh i, ² "Keimah hrimhrim nih na lam kha kan sialpiak lai i fing le tlang kha ka rawnhter hna lai. Dar in an sermi kutka kha ka baoh hna lai i thir fung kha ka tan hna lai. ³ A muihnak i a ummi rothil hna le aa thupmi hmun i a ummi hlawnthil hna kha kan pek lai; cun keimah cu Bawipa ka si kha na hngalh lai i Israel Pathian nih na min in an kawh kha na hngalh fawn lai. ⁴ Ka sal Israel mi kha na bawmh hna lai tiah kan fial, annih cu ka thimmi miphun an si. Nang nih cun na ka hngal lo nain upatnak nganpi kha kan pek. ⁵ "Keimah cu Bawipa ka si, Pathian dang an um lo. Nang nih cun na ka hngal lo nain na herhmi thazang kha kan pek lai. ⁶ Vawleicung mi vialte nih, nichuahlei in nitlaklei tiang, keimah cu Bawipa ka si i Pathian dang an um lo kha an hngalh nakhnga, hi bantukin ka tuah cu a si. ⁷ Keimah nih ceunak zong ka ser i muihnak zong ka ser; thluachuahnak zong ka tlunter i vanchiatnak zong ka tlunter, Bawipa nih hi thil vialte hi ka tuah dih hna. ⁸ Teinak cu van in ruah sur in ka surter lai i vawlei nih a rak i donh lai, cun luatnak le dinnak cu vawlei ah cun an par lai. Bawipa nih mah hi cu ka umter lai," a ti. ⁹ Tlak um nih a sertu kha bia a al ngam hnga maw? Um dang bantuk cio a si vemi nih khan a al ngam hnga maw? Um nih khan, a sertu kha, a ser na ka thiam lo, tiah a zaihnawh bal maw? ¹⁰ Aho tal nih an nu le an pa cu, "Zeicahdah hi bantukin nan ka hrin?" tiah an ti ngam bal hna maw? ¹¹ Bawipa, Israel Pathian thiang, hmailei thil um ding a sersiamtu nih, "Ka fale kong ah zeihmanh bia na ka hal awk a si lo; cun khakha na ti awk a si, khakha na tuah awk a si, ti zongah na ka chimh awk a si lo. ¹² Vawlei a sertu cu keimah ka si i a cung um dingah mi a sertu cu keimah ka si. Ka ṭhawnnak in van cu ka samh hna i ni le thlapa le arfi cu ka uk hna. ¹³ Keimah hrimhrim nih Sairas cu ka cawlcanghter i cu ka cawlcanghter cu, thil kha hmaan tein tuah si seh ti kaa tinhmi tlinter ding caah khan a si. A kalnak lam paoh kha ka fehter lai. Jerusalem ka khua kha a remh ṭhan lai i ka saltang hna kha a luatter hna lai. Ahohmanh nih Sairas cu, hihi na tuah lai tiah an fial lo i nawhthuh zong an pe lo," a ti. Ralkapbu Bawipa nih hi bia cu ka chim. ¹⁴ Bawipa nih Israel cu a thawh i, "Izipt le Ethiopia rumnak cu nangmah ta an si lai, Seba mi khansang hna cu na sal an si lai; thir cikcin he an in zulh lai. Na hmaiah an kun lai i, ’Na sinah Pathian a um — amah lawnglawng hi Pathian cu a si. ¹⁵ Israel Pathian, a mi a khamhtu hna Pathian hi, amah le amah aa thupmi Pathian a si,’ tiah an chim lai," a ti. ¹⁶ Siasal a sertu cu an dihlak in ningzahnak an phan lai; an dihlak in mual an pho lai. ¹⁷ Sihmanhsehlaw Israel cu Bawipa nih a khamh i teinak a hmuhmi cu zungzal in a hmun lai; a mi cu ningzahnak an phan lai lo. ¹⁸ Van cu Bawipa nih a ser hna — amah cu Pathian a si. Vawlei kha a ser i a siam — fekte le saupi nguh in a ser, vawlei cu thetse ram, ram pakpalawng ah a ser lo, minung umnak caah a ser. Amah cu, "Keimah hi Bawipa cu ka si, keimah hleiah pathian dang an um lo," a titu kha a si. ¹⁹ A thlithup in bia ka chim lo, kaa tinhmi zong kha ka thup lo. Thil aa tuaitamnak hmun ah khan ka kawl u, tiah Israel mi kha ka ti hna lo. Keimah hi Bawipa cu ka si i biatak kha ka chim; a hmaanmi kha ka langhter," a ti. ²⁰ Bawipa nih aa thawh i, "Miphun kip chung mi hna, hmunkhat ah i pum tuah u; rampi a rawk hnuah a nung rihmi hna, nan bia ceih awkah chuak tuah u. Thing siasal put in aa pummi hna le anmah a khamh kho lomi pathian sinah thla a cammi cu, zeihmanh a hngal lomi an si. ²¹ Ra u law biaceihnak hmun ah nan bia cu ra chim tuah u; tazacuaimi hna cu pakhat le pakhat lungthin i cheu tuah u. Thil a um ding kha aho nih dah a hlankan in a rak thanh chung i cuticun a um te lai tiah aho nih dah a rak chimchung? Cu ti a tuahtu cu Bawipa, a mi a khamhtu hna Pathian kha ka si lo maw? Pathian dang ahohmanh an um lo. ²² Vawleicung mi vialte hna, keimah leiah khan i mer u law khamhnak hmu u. Keimah lawnglawng hi Pathian cu ka si ko. ²³ Ka chimmi cu a hmaanmi a si i aa thleng lai lo. Keimah nih ka min chalh tein hi biakamnak hi ka tuah: ’Mi vialte kha ka sinah an ra lai i ka hmaiah an kun lai; na sinah zumhawktlak tein kan um lai tiin bia an i kam lai,’ ka ti. ²⁴ "Nangmah thawng lawnglawng in teinak le ṭhawnnak kha hmuh khawh a si," an ti lai. Sihmanhsehlaw a ka huami cu ningzahnak an ing lai. ²⁵ Bawipa nih Jakob tefa vialte cu ka chuah dih hna lai i annih nih an ka thangṭhat lai.

¹ Atu cu Babilon pathian kha donghnak an phan cang! Hlanah cun Bel le Nebo kha an rak biak hna, sihmanhsehlaw atu cu laa cungah khan an khin hna i a tha a bami saram caah phorhrit an si cang. ² Atu cu kha pathian hna kha donghnak an phan cang; siasal cu anmah le anmah an i khamh kho lo; mi nih an tlaih hna i an kalpi hna. ³ Jakob tefa hna, ka bia kha ngai tuah u, ka mi chungin a tangmi hnihchun vialte hna, ka ngai tuah u. Nan chuahka in keimah nih kan puak hna i nan nu paw chungin kan cawi hna. ⁴ Keimah cu nan Pathian ka si i nan tar i nan ṭuak a par tiang kan zohkhenh hna lai. Keimah nih kan ser hna i kan zohkhenh hna lai, kan bawmh hna lai i kan chuah hna lai. ⁵ "Aho he dah nan ka tahchunh lai?" tiah Bawipa nih a ti. Keimah bantuk aho tal a dang an um maw? ⁶ Mi nih an tangka bawm kha an kau i sui kha an bungh hna; cuaithlainak in ngun kha an thlai hna. Sui soser pakhat kha pathian kan serpiak tiah an fial i cu hmaiah cun an kun i cucu an biak. ⁷ An liang ah an i khinh i an kalpi; cun a hmunte ah khan an chiah i cuka ah cun a dir; a dirnak hmun khan aa ṭhial kho lo. A sin i thla an cam tikah ahohmanh a let kho hna lo. harnak chung zongin a khamh kho hna lo. ⁸ Nannih misual mi hna, hihi philh hlah u; ka tuahmi kha ruat u. ⁹ Hlanpi ah a rak ummi thil kha philh hlah u; keimah lawnglawng Pathian ka si le keimah bantuk a dang pathian ahohmanh an um lo kha hngal peng u. ¹⁰ A hramthawk tein a phichuak zeidah a si te lai ti kha ka rak chim; thil um ding kha a um hlan piin ka rak chim. Kaa tinhmi cu ka tlolh bal lai lo, ka ti; tuah kaa timhmi cu a dihlak in ka tuah lai. ¹¹ Nichuahlei in ra tiah, mipa pakhat ka kawh, mupi nih ar a nam hna bantukin a nam hna lai i kaa tinhmi kha a tlinter lai. Hi bia cu keimah nih ka chim i a tling lai. ¹² Nannih mi lung hak hna, ka bia ngai tuah u, nannih nih cun teinak cu a hla ngaingai rih tiah nan ruah. ¹³ Sihmanhsehlaw teinak ni cu lamnai ah ka ratpi cang — a hla hrimhrim ti lo. Ka teinak ni cu a rau ti lai lo. Jerusalem cu ka khamh lai i khika ah Israel mi cu upatnak ka pek hna lai," a ti.

¹ Bawipa nih, "Babilon, na bawiṭhutdan cung khan rung ṭum law leidip lakah i bual tuah. Hmasa ah cun ngaknu thiang bantuk na rak si, ahohmanh tei lo na rak si. Asinain atu cu nem hniphnepte le no cipcep tein na um ti lo, atu cu sal na si cang. ² Facang rialnak lung kha mer ko kun, changvut kha rial ko kun. Na hmai khuhnak puan kha i phawih law na thil thuam ṭhaṭha kha i phawih hna. ³ Mi kuttang i na um le ningzahnak na in kha an in hmuh lai, salnu bantukin hnipuan loin na um kha an in hmuh lai. Teirul kan cham lai i ahohmanh nih an ka kham kho lai lo," a ti. ⁴ Israel Pathian thiang nih a kan luatter — a min cu Lianngan Bik Bawipa a si. ⁵ Bawipa nih Babilon cu a thawh i, "Dai zuar in ṭhu ko cang law a muihnak ah khan um ko; nangmah cu, miphun tampi hna bawinu, an in ti ti lai lo. ⁶ Ka mi hna cungah khan ka thin a rak hung i ka mi a si ti lomi bantukin ka rak tuah hna. Annih cu na kut chungah ka chiah hna i an cungah zaangfahnak zeihmanh na ngei lo, an tar pipi hmanh, hrang ngaiin na rak ti hna. ⁷ Siangpahrang bawinu ka si zungzal rua lai tiah naa ruat i hi thil hi na lung tak in na rak ruat bal hna lo, zeitindah an dongh te lai ti zong kha na rak ruat bal lo. ⁸ Nang, nuamhnak a duhmipa, hi bia hi ngai tuah, him te le hnangam tein ka um, tiah na ruat. Pathian tluk ngan ah naa ruat i keimah bantuk ahohmanh an um lo, tiah na ruah. Zeitikhmanh ah nuhmei cu ka si bal lai lo tiah na ruah i fale thihloh ka ing bal lai lo na ti. ⁹ Asinain chikkhatte ah, ni khatte ah, hi thil hi an pahnih in na cungah an tlung lai. Camh cu zeizat hmanh na hmang ko lai nain na fale cu an thi ṭhiamṭhiam ko lai i nuhmei cu na si ṭhiamṭhiam ko lai. ¹⁰ "Na ṭhat lonak chungah hnangam in na um ko; ahohmanh nih an ka hmu lo, tiah na ruah. Na fimnak le na hngalhnak nih a pingah an in hruai i nangmah le nangmah cu, ’Pathian ka si — keimah bantuk midang ahohmanh an um lo,’ naa ti. ¹¹ Vanchiatnak kha na cungah a tlung lai i na camh nih khan an khamh kho lai lo. Hmakhatte ah na cungah rawhralnak a tlung lai — na mang hmanh i na manh bal lomi rawhralnak kha a tlung lai! ¹² "Na camh le na eih vialte kha i chiah hna; na no lio tein na hman zungzalmi an si. A bawmh zong an hei in bawmh khawh ko hnga dahkaw, na ral kha an thin zong na hei phanter khawh ko hna hnga dahkaw! ¹³ Ruahnak an in cheu nain zeihmanh na tuah kho hlei lo. Ruahnak an petu hna cu hmaiah ra chuak hna seh law in khamh tuah hna seh — arfi kong kha a cawng i van kha a bu a bu in a ṭhen i thla khat hnu thla khat in na cung i a tlung ding vialte an chim khotu ding hna nih cun, in khamh tuah hna ngat seh. ¹⁴ "Annih cu capawl pelpawi bantuk men an si lai i mei nih a kangh dih hna lai. Anmah le anmah hmanh an i khamh kho lai lo. Mei cu toh nuam mei men a si lai lo, an ca i a lin tukmi mei a si lai. ¹⁵ Nan chan chung vialte ruahnak nan hal zungzalmi arfi zohthiam hna nih ruahnak an in pekmi hna i an in phakpi hna laimi cu hihi a si ko. An dihlak in an in kaltak hna lai i an duhnak cio paoh ah khan an kal lai, nanmah khamhtu ah a tangmi pakhat hmanh an um lai lo," a ti.

¹ Israel mi hna, hihi ngai tuah u, Judah tefa hna, ngai tuah u. Bawipa min in chiat nan ser i Israel Pathian cu kan biak nan ti — sihmanhsehlaw nan chimmi cu pakhat hmanh a sullam nan ruahmi a si lo. ² Asinain, kannih cu khua thiangmi kan si, Israel Pathian aa bochanmi kan si, cu Pathian cu a min ah Ralkapbu Bawipa a si, tiin nan i porhlaw. ³ Bawipa nih Israel cu a thawh i, "Hlan liopi khan a um ding thil cu ka rak chimchung i cun hmakhatte ah cucu ka hun umter! ⁴ Lunghak mi nan si lai ti kha ka hngalh cia, thir bantukin a ṭhawng i dar bantukin kuaih khawh lomi nan si. ⁵ Nan hmailei caan cu hlanpi in ka rak chimchung cang, thil cu an hung um hlanah ka rak thanh chung cang, zeicahtiah cucu nan siasal nih an tuahmi a si nan ti nakhnga lo le nan thirdar milem nih an tluntermi a si nan ti khawh nakhnga lo caah a si. ⁶ "Ka chimchungmi vialte kha an tling dih; ka chimchungmi kha an hmaan nan ti awk a hau. Atu cu a ra lai dingmi thil thar kan chimh hna lai, hlan i ka rak phuan bal lomi thil kha kan chimh hna lai. ⁷ Atu lawnglawng ah hi thil cu ka umter hna, hi bantuk hi hlan ah zeitikhmanh ah a rak um bal lo. ⁸ Rinh awk tlak na si lo cu ka hngalh, na chuahka in midohhmang na si cu hngalh a si. Hi ti na rak si ruangah hin hi kong na theih bal lonak le bia pakhat hmanh na hna a phak bal lonak cu a si. ⁹ "Mi nih ka min kha an thangṭhat khawh nakhnga, ka thinhunnak cu kaa sum; ka thin cu kaa sum hranhram i ka hrawk hna lo. ¹⁰ Ngun cu somei chungah hneksak a si bangin temhinnak mei chungah khan kan hneksak hna. Asinain santlailo nan rak si. ¹¹ Thil ka tuahmi hi keimah ca lawnglawng ah a si ko, ka min kha chiatter ka duh lo, cun keimah ta lawnglawng a simi sunparnak kha midang he i hrawm zong ka duh fawn lo," a ti. Bawipa Nih Hruaitu Ah A Thim ¹² "Ka thimmi Israel mi hna, ngai tuah u, keimah lawnglawng hi Pathian ka si, a hmasa bik le a hmanung bik ka si. ¹³ Ka kut in vawlei hram kha ka ser hna i van kha ka samh hna. Van le vawlei kha ka auh hna tikah, khulrang tein an ra chuak. ¹⁴ Nan dihlak in i pum u law ngai tuah u. Ka thimmi nih Babilon kha a tuk lai tiah zei pathian hmanh nih an rak chimchung kho lo; ka thimmi nih cun ka fialmi kha a tuah lai. ¹⁵ Bia a chim i a kotu cu keimah ka si; keimah nih ka chuahpi i hlawhtlinnak ka pek. ¹⁶ Cucaah ka naih u law ka chimmi kha ngai tuah u. A hramthawk tein hlangfang in kan chimh hna i ka bia cu ka tlinter zungzal," a ti. (Atu cu Bawipa Pathian nih a ṭhawnnak kha a ka pek i a ka thlah.) ¹⁷ Israel Pathian thiang, nanmah an khamhtu hna Bawipa, nih, "Keimah cu Bawipa nan Pathian, nan ca ṭhatnak cawnpiak an duhtu hna le nan zulh awk hnga lam an hmuhsaktu hna ka si. ¹⁸ "Ka nawlbia kha rak ngai u law, ti ka hei duh dah! Thluachuahnak cu nan caah, zeitikhmanh i a reu bal lomi tiva bantukin, a luan in a luang zungzal ko hnga! Ti kam a deng lengmangtu tilet bantukin teinak cu nan sinah a phan ko hnga! ¹⁹ Nan tefa cu rili kam thetse zat in an tam hnga i zeitikhmanh i rawk kho lo dingin ka ser hna hnga," a ti. ²⁰ Babilon in chuak tuah u, luat in kal tuah u! "Bawipa nih a sal Israel cu a khamh cang," tiin thawngpang cu lunglawmhnak in aupi u, khuazakip ah thanh u. ²¹ Bawipa nih a mi cu a lin i a romi thetse ram tan in a rak hruai hna tikah, tihal retheihnak an ing lo; lungpi chungin an caah ti kha a chuahter; lungpi kha a cheu i a chungin ti a luang. ²² Bawipa nih, "Misual mi hna caah cun himnak a um lo," a ti.

¹ Lamhlatpi i a ummi miphun hna, ram hlapi i a ummi hna, ka bia ngai tuah u. Ka chuah hlan in Bawipa nih a ka thim i a sal si awkah a ka fial. ² Ka bia cu vainam bantukin a harter, a kut hrimhrim in a ka huhphenh. Cantiang bantuk ah a ka ser i a thalbawm chungah a ka sanh. ³ A ka thawh i, "Israel, nangmah cu ka sal na si; nangmah ruangah mi nih an ka thangṭhat lai," a ti. ⁴ Kei nih ka thawh i, "Ṭuan cu ka ṭuan ko, sihmanhsehlaw ka ṭuanmi cu san a tlai lo. Ka thazang cu a dih umnak in ka hman, sihmanhsehlaw zeihmanh ka tlamtlinh lo," ka ti. Asinain Pathian nih thil cu a ṭhatter ko lai tiah ka zumh i ka ṭuan man kha a ka pek ko lai. ⁵ Ka chuah hlan in Bawipa nih a ka fial; a mi cu kirpi ṭhan hna awkah le aa ṭhekmi Israel mi kha pumh ṭhan hna awkah, a sal ah a ka ser. Bawipa nih upatnak a ka pek; amah cu ka thazang hrampi a si. ⁶ Bawipa nih cun a ka thawh i, "Ka sal, nangmah caah rian ngan deuh chin ka ngei; Israel mi chungin a tangmi hna kha lianhngannak ah phakter ṭhan lawng si loin, Nangmah cu miphun hna ca ceunak ah kan ser lai — cuticun vawlei dihlak nih khamhnak a hmuh lai," a ti. ⁷ Miphun kip nih fak piin an serhsat i an huat i, uktu hna sal a simi cu, Israel Pathian thiang le khamhtu nih, "Na luat kha siangpahrang nih an in hmuh lai i nangmah upatnak pek awkah an tho lai; bawi zong nih an in hmuh lai i nangmah upatnak pek awkah niam ngaiin an kun lai," a ti. Bawipa, Israel Pathian thiang nih a sal cu a thim cang i a biakamnak cu a zulh caah, hi thil cu a tling lai. ⁸ Bawipa nih a mi cu a thawh hna i "Nanmah khamhnak caan kha a phak tikah, kan dawt hnanak kha ka langhter lai i bawmhnak nan ka hal i nan aunak kha kan leh hna lai. Nanmah cu kan ven kan huhphenh hna lai i nanmah thawngin mi vialte he biakamnak ka ser lai. Atu lio i a rawk dihmi nan ram ah khan kan umter ṭhan hna lai. ⁹ Thongtlami cu, ’Chuak u,’ ka ti hna lai i muihnak chung i a ummi cu, ’Ceunak ah hung chuak u,’ ka ti hna lai. Annih cu tlang cung i a tlongmi tuu bantuk an si lai; ¹⁰ zeitikhmanh ah an ti a hal lai lo i an rawl a ṭam lai lo. Ni lin le thetse lin nih retheihnak a pe hna lai lo, zeicahtiah annih cu anmah a dawtu hna nih khan a hruai hna lai. Cerhti umnak hmun ah khan a hruai hna lai. ¹¹ "Tlang lakah cun lam nganpi pakhat ka ser lai i ka mi hna kalnak ding caah cun lam pakhat ka sial lai. ¹² Ka mi cu lamhla pipi in an ra lai i chaklei le nitlaklei in an ra lai, thlanglei i a ummi Sai-en khua in an ra lai," a ti. ¹³ Van hna, hlasa tuah u! Maw vawlei, lunglawmhnak in au tuah! Tlang cu lunglawmhnak in au hna seh. Bawipa nih a mi cu a hnemh cang hna lai; retheihnak a ingmi a mi cu a zaangfah cang hna lai. ¹⁴ Sihmanhsehlaw Jerusalem khuami nih cun an i thawh i, "Bawipa nih a kan hlawt cang! A kan philh cang!" an ti. ¹⁵ Cucaah Bawipa nih a leh hna i, "Nu nih a fa cu a philh kho hnga maw? A chungchuak cu daw loin a um kho hnga maw? Nu nih hin cun a philh hmanh a philh kho hnga, sihmanhsehlaw kei nih cun kan philh bal hna lai lo. ¹⁶ Jerusalem, nangmah cu kan philh kho bal lai lo, na min cu ka zapei cungah kaa ṭial cang. ¹⁷ Nangmah an remh ṭhantu ding cu an ra dengmang cang, nangmah an hrawktu cu an kal zau lai. ¹⁸ Na pawngkam kha zoh law zeidah a um ti kha ngia tuah. Na mi cu an i pum cuahmah cang — inn ah an ra tlung lai. Keimah cu a nungmi Pathian ka si hrimhrim bangin, nang zong na mi cu naa chawr hrimhrim hna lai; va ngeika ngaknu nih a hlawn aa chawr bantuk khin naa chor ve hna lai! ¹⁹ "Na ram cu a rak rawk dih i pakpalawng ah a rak cang dih, sihmanhsehlaw atu cu, a chung um awk i a ra dingmi hna caah a hme tuk cang lai. Nangmah cu rawk relrul in an kaltaktu hna kha na sinin lamhlapi ah ṭhial an si cang lai. ²⁰ Sal i na tan lioah a chuakmi na fale hna nih, ni khatkhat cu an in thawh lai i, ’Hi ram hi kan caah a bi tuk cang, umnak ah hmun dang kan herh,’ an ti lai. ²¹ Cun nangmah le nangmah cu, ’Aho nih dah mah hna hi a ka hrinpiak? Ka fale cu an rak thi cang i fa dang ka ngeih ti ṭung hna lo. Kei cu sal ah pei ka tan cu, mak pei ka si cang cu — hi fale hi aho nih dah a rak zohkhenh hna? Keimahte lawng pei an rak ka nganh kha — hi fale hna hi khuazei in dah an rat hnga?’ naa ti lai," a ti. ²² Bawipa Pathian nih a mi cu a thawh hna i, "Miphun dang hna cu hmelchunhnak ka pek hna lai i nan fale cu inn ah an ratpi hna lai. ²³ Siangpahrang cu nan caah nan pa bantuk an si lai i siangpahrang bawinu hna nih cun hringtu nu bantukin an in umh hna lai. Nan hmaiah niam ngaiin an kun lai i upatnak an in pek hna lai; nanmah an in hmaizah hnanak cu an langhter lai. Khi tikah Bawipa ka si cu nan hngalh lai i keimah bawmhnak a hngakmi paoh cu a khel hna lai lo," a ti. ²⁴ Ralkap bu cu an hranchaw kha nan chut kho hna maw? Bawi ṭhawng cu a thongtla hna kha nan chut kho hna maw? ²⁵ Bawipa nih hi bia halnak cu a leh i, "Cu bantukte cu a um laimi thil hi a si. Ralkap nih an tlaihmi hna thongtla cu an chuak lai i Bawi ṭhawng cu a hranchaw kha chuh a si lai. Nanmah an dotu hna paoh cu ka doh hna lai i nan fale cu ka chuah hna lai. ²⁶ Nanmah an hremtu hna cu anmah le anmah kha ka thahter hna lai, lainawn le thinhun kha a rit in an i rit chih lai. Cu tikah mi vialte nih Bawipa ka si kha an hngalh lai i, nanmah an khamhtu hna le an luattertu hna ka si kha an hngalh lai. Keimah cu Israel Pathian ṭhawng ka si kha an hngalh lai," a ti.

¹ Bawipa nih aa thawh i, "Mipa nih a nupi a mak bantukin ka mi hna cu ka dawi hna tiin dahra nan ruah? Khuazei ah dah maknak ca cu a si kun? Mipa nih a fale cu sal ah a zuar hna bantukin sal ah a kan zuar tiin dahra nan ka ruah? Asilo, sal i nan taan cu, nanmah nan sual ruangah a si; lamhlatpi i kalpi nan si cu nanmah nan ṭhat lo ruangah a si. ² Ka mi hna cu anmah khamh awk i ka hei fuh hna tikah khan, zeicahdah an ka leh duh lo? Ka auh hna tikah khan, zeicahdah an ka chawnh duh lo? Anmah khamhtu dingah ka der tuk maw? Ka bia in rili kha ka kaoter khawh i tiva kha thetse ram ah ka canter khawh hna; an chung i a ummi nga kha ti an hmuh lo caah an thi. ³ Van khi, mithi ngai seh law cu bang, a muih in ka muihter khawh," a ti. ⁴ Bawipa Pathian nih chim awk kha a ka cawnpiak caah tha a bami kha thazang ka pek khawh hna. A ka cawnpiak ding theih kha zing fate in a ka hngahhlangter. ⁵ Bawipa Pathian nih hngalhthiamnak a ka pek caah amah cu ka do lo i ka pialtak fawn lo. ⁶ A ka tumi kha ka keng ka chit ko hna, an ka serhsat tikah ka kham hna lo, ka khahmul an ka phawipiak i ka hmia i cil an ka chak ah khan zeihmanh ka ti hna lo. ⁷ Asinain Bawipa Pathian nih a ka bawmh caah an ka serhsatnak cu zeihmanh ah ka rel lo. An ka serhsatnak in khawhnak caah cun ka hmai cu ṭeklung bantuk ka siter. ⁸ Bawipa cu ka pawngah a um caah ningzahnak ka phan lai lo ti kha ka hngalh i ka sual lo kha a langhter lai. Taza a ka cuai ngamtu an um hnga maw? Taza cuainak hmun ah kal tuah u sih. Sual cu ka puh tuah seh. ⁹ A ka ṭanhtu cu Bawipa Pathian hrimhrim kha a si, cucaah aho nih dah sual an ka phawt khawh lai? Taza a ka cuaitu vialte kha an lo lai, rungrul nih a eimi puan bantukin an lo lai. ¹⁰ Nannih Bawipa a ṭih mi vialte hna, a sal bia a ngaimi vialte hna, nan kalnak lam cu mui ko hmanh seh law Bawipa cu i bochan u law i hngatchan ko u. ¹¹ Midang hrawhnak khua a khang lengmangmi hna, nan dihlak in nanmah khuakhanmi lila nih an hrawh hna lai. Cucu Bawipa hrimhrim nih nan cungah a tlunter lai i temhnak cu nan in lai.

¹ Bawipa nih aa thawh i, "Khamhnak hmuh a duhmi hna, ka bia ngai tuah u, bawmhnak hmuh a duh i ka sin i a rami hna, ngai tuah u. Nannih nan chuahnak lungpi kha ruat hmanh u, nannih an in cawh hnanak lungkhor kha ruat hmanh u. ² Nannih an hringsortu hna Abraham le Sarah kha ruat hna hmanh u. Abraham cu ka rak auh lioah khan fa a ngei lo, sihmanhsehlaw thluachuahnak ka pek i fa ka pek; a tefa cu tampi ah ka ser hna. ³ "Zion cungah zaangfahnak ka langhter lai, a rawkmi a hmun chung i a ummi hna kha ka zaangfah hna lai. A ram cu thetse ram a si nain dum ah ka ser lai, Eden chung i ka chiahmi dum bantuk ah khan ka ser lai. Cuka ah cun lunglawmhnak le thanuamnak, keimah thangṭhatnak le lawmhnak hla an um lai. ⁴ "Ka mi hna ka bia ngai tuah u, ka chimmi hi ngai tuah u: Cu ka chimmi cu miphun hna kha ka cawnpiak hna i ka phunglam nih ceunak ah a phakpi hna lai, ti hi a si. ⁵ Khulrang in ka ra lai i ka khamh hna lai; teinak ka hmuh laimi caan cu a nai cang. Keimah hrimhrim nih miphun kha ka uk hna lai. Lamhlapi i a ummi ram nih an ka hngah, anmah khamh awkah ngangngan ngai in an ka hngah. ⁶ Van khi zoh tuah hna u, vawlei hi zoh tuah u. Van cu meikhu bangin a lo lai; vawlei cu thilpuan hlun bangin a ṭet lai i a mi vialte cu an thi dih lai. Sihmanhsehlaw ka rak putmi luatnak cu zungzal in a hmun lai; ka teinak cu zeitikhmanh ah a rawk kho lai lo. ⁷ "Zeidah a hmaan ti kha a hngal i a lung chungah ka cawnpiaknak aa cinkenmi hna, ka bia ngai tuah u. Mi nih an in hro hna le an in zawmhtaih hna tikah nan thinphang hlah u. ⁸ Cu bantuk mi cu rungrul eimi puan bantukin an lo lai! Sihmanhsehlaw ka rak putmi luatnak cu zungzal in a hmun lai, ka teinak cu zungzal in a hmun lai. ⁹ Bawipa, i hlau law kan khamh tuah. Na ṭhawnnak kha hmang law ka khamh tuah; hlanlio i na rak hman bantuk khan hmang tuah. Rili chung limkeng Rahab a sam cikcektu kha nangmah na si. ¹⁰ Rili ti kha a kaoter i rili chungin lam a tuahtu kha nangmah na si i na khamhmi hna nih khan cuka cun an tan. ¹¹ Na luattermi hna nih khan Jerusalem cu, lunglawmhnak le hlasak pah le thanuam au khuannak he an phak lai. Zungzal in an i lawm lai i ngaihchiatnak le lung retheihnak in an luat zungzal cang lai. ¹² Bawipa nih aa thawh i, "Nanmah thazang an petu hna cu keimah ka si. Cucaah cun zeicahdah ram nakin sau deuh a nung hlei lomi, a thi khomi minung cu nan ṭih hna? ¹³ Nanmah kha an sertu hna le van kha a samh i vawlei hram a bunhtu Bawipa kha nan philh cang dahra? Nanmah an hremtu hna an thinhun le nanmah thah an zaltu hna an thinlinh cu zeicahdah ṭih zungzal in nan um? An thinhunnak nih cun a tawngh hmanh an tawng kho hna lai lo. ¹⁴ Thong i a tlami kha tuan ah chuah an si lai; saupi an nung lai i an herhmi rawl kha an hmuh dih lai. ¹⁵ "Keimah cu Bawipa nan Pathian ka si; rili cu ka thawhter i a tilet cu ka awnhter hna. Ka min cu Ralkapbu Bawipa a si! ¹⁶ Van khi ka samh hna i vawlei hram cu ka bunh hna. Zion cu ka thawh i, ’Nangmah cu ka mi na si! Keimah nih kan cawnpiak cang i ka kut in kan huhphenh,’ ka ti." ¹⁷ Jerusalem, i hlau tuah! I ṭhang law tho tuah! Bawipa nih a thinhun in dantatnak hrai din awk an pekmi cu na din cang; na din cang i na sawn len cang. ¹⁸ Nangmah hruaitu ahohmanh an um lo, na mi hna lakah na kut in an hruaitu ding pakhat hmanh an um lo. ¹⁹ Vanchiatnak thuah hnih nih an in tlak phuat; na ram cu raldohnak nih a hrawh cikcek i na mi cu rawl loin an um. Ahohmanh zaangfahtu na ngei lo. ²⁰ Lam ṭeka kip ah na mi hna cu an der tuk caah an ril; annih cu rap nih a foihmi sa bantuk an si. Pathian thinhunnak a ṭhawnnak cu an hngalh cang. ²¹ Jerusalem khua chung i sifah a ingmi hna, zuri bantukin a sawn lengmangmi hna, ²² Nannih cu Bawipa nan Pathian nih an huhphenh hna i, "Thinhun in kan pekmi hna hrai kha nan kut chungin ka lak lai. An sawntertu hna zu kha nan din a herh ti lai lo. ²³ Kha zu kha nanmah an hremtu hna, lamkalai ah an bawhter hna i an ke in leidip bantukin an lamtu hna kha, ka pek hna lai," tiah an ti hna.

¹ Jerusalem, ṭhawng law ngan ṭhan tuah! Pathian khua thiang, sunparnak in i thuam tuah! Cuarpar tan lomi cu na kutka chungin ahohmanh an lut ti lai lo. ² Jerusalem, luat lakin i thing tuah! Leidip lak khan tho law na bawiṭhutdan cungah khan ṭhu tuah. Sal i a tangmi Zion mi a ṭemtu hna hri cu chat tuah. ³ Bawipa nih a mi cu a thawh hna i, "Man loin sal ah zuar nan si. Cu bantuk ve in man loin tlanh nan si lai. ⁴ Hmasa ah Izipt ram ah ramdang mi in nan rak um, cun hnu deuh ah sullam zeihmanh um loin Assiria nih an hrem hna. ⁵ Atu ah Babilon ah cu bantuk ṭhiamṭhiam cun nan um; zeihmanh lo ruangah khika ah sal ah nan tang. Nanmah an uktu hna cu an i porhlaw i tluang an khawng, ka min cu an zawmhtaih thluangthluan ko. ⁶ Sihmanhsehlaw hmailei caan ah cun, keimah cu Pathian ka si i nanmah sin i biachimtu ka si kha nan hngalh lai," a ti. ⁷ Daihnak thawng ṭha i phorh in tlang cungin a rami lamkaltu ke cu zeitluk in dah aa dawh! Teinak kong kha amah nih cun a run thanh i Zion cu a thawh i, "Na Pathian cu siangpahrang a si," a ti. ⁸ Khua a vengtu kha an au i lunglawm in hmunkhat ah hla an sa. Zion i Bawipa a kir ṭhan kha an mit hrimhrim in an hmuh. ⁹ Jerusalem khua chung i a rawkmi hmun hna, lunglawm le thanuam in au tuah u. Bawipa nih a mi cu a hnemh cang hna, a khuapi cu a khamh cang. ¹⁰ Bawipa nih a thiangmi a ṭhawnnak cu a hman cang; a mi kha a khamh cang hna i cucu vawlei mi vialte nih an hmuh cang. ¹¹ Thil thiang a phortu hna, Babilon khan khulrang in chuak u. Tawngh lo ding timi thil kha tawng hna hlah u, thiang tein um u law khua kha chuahtak u. ¹² Atu tan hi cu namhnaw in nan chuah a hau lai lo, a zam in nan zam a herh lai lo, Bawipa nan Pathian nih an hruai hna lai i nan hnu, nan hmai, nan sirlei in an ven hna lai. ¹³ Bawipa nih aa thawh i, "Ka sal cu a rianṭuanmi ah khan khuaawng a tong lai; a lian a ngan lai i upatnak a hmu lai. ¹⁴ An rak hmuh ah khan mi tampi cu an khuaruah a har; a muihmai cu a rak rawk tuk hringhran i minung hmanh a lo lo. ¹⁵ Sihmanhsehlaw atu cu miphun tampi kha amah an hmuh tikah an khuaruah a har lai, an khuaruah a har tuk ah siangpahrang hna cu ar ko in an um lai. An hngalh bal lomi thil kha an hmuh lai i an hngalh lai," a ti.

¹ Mi nih khan an leh i, "Atu i kan chimmi hi aho nih dah an rak kan zumh khawh hnga? Hi thil ah hin Bawipa kut aa tel kha aho nih dah an hmuh khawh hnga? ² Vawlei car i a keomi thingkung bantukin a sal cu a rak ṭhang, cucu Bawipa duhning a rak si. Zoh kan duh nakhnga dingah i dawhnak le rumra zeihmanh a ngei lo, iang zeihmanh a ngei lo i a pumrua zong a chuakthiammi a si lo. ³ Zeihmanh ah kan rak rel lo i kan rak hlawt; ngaihchiatnak le nganfahnak kha a rak in hna. Ahohmanh nih a zoh hmanh kan rak zoh duh lo — zei ah a rel in kan rak rel hrimhrim lo. ⁴ "Asinain zawtnak a inmi cu kanmah nih kan rak in hngami kha a si i nganfahnak a tuarmi cu kanmah nih kan rak tuar hngami kha a si. Temhnak a inmi cu, Pathian nih a cungah dantatnak a tluntermi a si, tiin kan rak ruah zungzal. ⁵ Sihmanhsehlaw hma a in cu kan sual ruangah a rak si i tuknak a huah cu kan ṭhat lo ruangah a rak si. A inmi dantatnak in luatnak kan hmu i an tuknak vual in damnak kan hmu. ⁶ Kannih cu kan dihlak in a tlaumi tuu bantuk kan si; kan duhnak cio paoh ah khan kan rak kal. Cucaah dantatnak cu Bawipa nih amah cung tu ah khan a tlunter i cu dantatnak cu kanmah tu nih kan in awk a rak simi kha a si. ⁷ Fak piin an hrem, a si nain dai tein aa in ko; bia kaa khat hmanh a chim lo. Thah awkah an kalpimi tuufa bantuk le a hmul meh awkah an hruaimi tuu bantukin, awn au lo tein a um. ⁸ An tlaih, thah awkin bia an khiah i thah awkah an kalpi, zei ti a va um te lai ding kha ahohmanh an zei a poi lo. ⁹ Sualnak zeihmanh a tuah bal lo nain le lih pakhat hmanh a chim bal lo nain misual mi hna he khan thlan khat ah an vui ṭi i mirum mi hna sinah khan an vui." ¹⁰ Bawipa nih aa thawh i, "Temhnak a in cu ka rak duhmi a si ko; thihnak cu ngaihthiamnak a umtertu raithawinak a si. Cucaah a tefa kha a hmuh hna lai i chan saupi a nung lai, cun amah thawngin khua ka khanmi cu a tlam a tling lai. ¹¹ Fahnak a in hnuah lunglawmhnak a hmuh ṭhan lai, ka inmi cu pakpalawng a si lo, ti kha a hngalh lai. Amah cu a dingmi ka sal a si; mi tampi nih an in dingmi dantatnak cu a in lai i annih cu zumh awk tlak a simi ka mi ah a ser hna lai. ¹² Cucaah amah cu upatnak hmun ka pek lai, milian mingan le miṭhawng hna lakah hmun ka pek lai. A nunnak kha i awṭawm lo tein pek a sian i misual mi kha an in ding cu a inpi hna," a ti.

¹ Jerusalem, nangmah cu fa a ngei lomi nu bantuk na si. Sihmanhsehlaw atu cu hla na sa kho cang i lunglawm in na au kho cang. A va nih a kaltak bal lomi nu nakin fa tam deuh na ngei cang lai. ² Na umnak thlam kha ngan deuh in sa. A hri kha sauh hna law a tung kha fehter hna. ³ A kam kip in na ramri cu na kauh lai; miphun dang nih atu ah an umnak ram hi na mi nih an co ṭhan hna lai; atu i a kingmi khua hi a linsa ṭhan lai. ⁴ Na thinphang hlah — ningzahnak na ing ti lai lo; serhsatnak na hmu ti lai lo. Na ngaknut lio i zumh awk tlak lo na rak si kha na philh lai i nuhmei na si lio i na umhar vialte kha na philh lai. ⁵ Nangmah an sertu cu na va bantuk a si lai — a min cu Ralkapbu Bawipa a si! Israel Pathian thiang nih cun an khamh lai — amah cu vawlei cung dihlak uktu a si. ⁶ Israel, nang cu ngaknu note, a va nih a hlawt i a lungre a thei ngaingaimi bantuk na si. Sihmanhsehlaw Bawipa nih cun an auh ṭhan i, ⁷ "Caan tawite chung cu kan kaltak, sihmanhsehlaw dawtnak thukpi he kan lak ṭhan. ⁸ Ka thinhun in tawite chung cu khattelei kan mertak, sihmanhsehlaw a zungzal in kan dawt lai," a ti. Cuticun nangmah an khamhtu Bawipa nih a ti. ⁹ "Noah chan ah biakamnak ka rak tuah i, vawlei cungah buanchukcho ka tlunter ti lai lo, ka rak ti. Atu na sinah biakamnak ka ser ve i na cungah ka thin a hung ti lai lo i kan mawhchiat ti lai lo, dan zong kan tat ti lai lo, ka ti. ¹⁰ Fing le tlang hmanh khi an cim hnga i an rawk ko hnga, sihmanhsehlaw kei nih kan dawtnak cu zeitikhmanh ah a dong lai lo. Daihnak kan pek lai, tiah bia kaa kammi cu, a zungzal in ka zulh lai," tiah nangmah an dawtu Bawipa nih a ti. ¹¹ Bawipa nih aa thawh i, "Maw Jerusalem, nang cu harnak na ing i bawmtu na ngei lo, ahohmanh hnemtu na ngei lo. Asinain na hram cu lungvar man sung in ka ser ṭhan hna lai. ¹² Na innsang cu rubi lungvar in ka sak hna lai i na kutka cu mei bantukin a ceumi lungvar in ka sak hna lai; na kulhnak vampang cu sui lungvar in ka sak hna lai! ¹³ "Keimah hrimhrim nih na mi cu ka cawnpiak hna lai i ṭhanchonak le daihnak ka pek hna lai. ¹⁴ Dinnak le ṭhatnak nih an in ṭhawnter lai. Hremnak le ṭihphannak in na him cang lai. ¹⁵ Ahohmanh nih an in tuk ahcun, keimah hnatlaknak tel loin a si; ahohmanh nih an in doh ahcun, an sung lai. ¹⁶ "Soser kha ka ser hna, annih nih so kha an ser i hriamnam kha an chuah. Cun ralkap zong kha ka ser hna i annih nih hriamnam kha mi thahnak ah an hman. ¹⁷ Sihmanhsehlaw sermi hriamnam zeihmanh nih khan nangmah cu an pem kho lai lo; sual an puhtu vialte hna kha na leh khawh dih hna lai. Ka salle cu ka ven hna lai i teinak ka pek hna lai," a ti. Hi bia cu Bawipa nih a chim.

¹ Bawipa nih aa thawh i, "Ti a halmi paoh ra tuah u, hika ah hin ti a um. Tangka zeihmanh a ngei lomi hna ra tuah u, rawl kha i cawk u law ei tuah u. Ra u law mitsur zu le cawhnuk kha i cawk hna u — a man zeihmanh pek a hau lai lo. ² Zeicahdah rawl a si ṭung lomi ah nan phaisa kha nan hloh? Zeicahdah nan nihlawh man vialte cu nan hman dih ṭung i rawlṭam in nan um ṭhiamṭhiam ṭung? Ka bia ngai u law ka chimmi kha tuah tuah u, rawl vialte lakah a thaw bik kha nan ei lai. ³ "Ka mi hna, ka bia ngai u law ka sinah ra tuah u; ka sinah ra u law nunnak nan hmuh lai. A hmunmi biakamnak kha nanmah he ka ser lai i David ka kamhmi thluachuahnak kha kan pek hna lai. ⁴ Amah cu miphun tampi hruaitu le uktu ah ka ser i amah thawngin ka lianhngannak kha ka langhter. ⁵ Atu cu ramdang miphun kha nan auh hna lai; hlanah cun an rak in hngal hna lo, sihmanhsehlaw atu cu nanmah he fonh duh ah a tlik in an ra tli lai. Bawipa nan Pathian, Israel Pathian thiang nih hi vialte cu ka tlinter lai; upatnak le sunparnak kha kan pek lai," a ti. ⁶ Atu cu Bawipa kha kan naih ah a um caah amah leiah cun i mer u law amah sinah cun thla cam u. ⁷ Miṭhalo nih an zulhmi an lam kha hlaw hna seh law an ruahning kha thleng hna seh. Bawipa kan Pathian leiah cun i mer hna seh, amah cu mi zaangfah a thiam i khulrang in mi a ngaithiam khotu a si. ⁸ Bawipa nih, ’Ka ruahning cu nan ruahning a si lo, ka thil tining zong nan thil tining he an i khat lo. ⁹ Van khi vawlei nakin a let tam piin a san deuh bangin ka ruahning le ka thil tining zong nan ruahning le nan thil tining nakin a let tam piin a sang deuh. ¹⁰ Ka bia cu van in a rung tlami ruah le hawhra bantuk a si lai. Ruah le hawhra nih cun, van ah kir ṭhan ti loin vawlei kha an hnawnter i thlaici kha an khohter i an ṭhanter i thlaici tuhtu kha thlaici an pek hna i rawl eitu kha rawl an pek hna. ¹¹ Cu bantuk cu ka kaa in a chuakmi bia cu a si ve lai — ka sinah a lawngin a ra kir ṭhan lai lo, tuah seh tiah ka fialmi kha a tlolh lai lo i ka thlahhnawh chanmi thil ah khan a tlam a tling lai. ¹² "Babilon in lunglawm in nan chuak lai; khuapi chungin daihnak he nan chuak lai. Fing le tlang kha lunglawm in hla an sa lai i thingkung kha lunglawm in an au lai. ¹³ Atu i hlingbur an umnak hmun ah hin saipres thing an kho lai i hling lakah hin martal thing rimhmui an um lai. Hi hmelchunhnak hi zungzal in a hmunmi hmelchunhnak a si lai i Bawipa nih ka tuahmi an hngalhter ṭhantu hna a si lai," a ti.

¹ Bawipa nih a mi cu a thawh hna i, "Nannih cu tuan ah kan khamh hna lai. Cucaah cun a dingmi thil le a hmaanmi thil kha tuah hna u. ² Sabbath ni a ul zungzal i a buar lomi kha thluachuahnak ka pek hna lai. Ṭhat lonak zeihmanh a tuah lomi kha thluachuahnak ka pek hna lai," a ti. ³ Bawipa mi sin i aa fonmi ramdangmi nih khan, "Bawipa nih a mi hna sin i biak ve cu a ka sianh lai lo," tiah ti hlah seh. Tilditmi nih khan, kannih cu Bawipa mi hna lakah kan i tel kho lai lo, ti hna hlah seh. ⁴ Zeicahtiah Bawipa nih annih cu a thawh hna i, "Sabbath ulhnak le keimah duhmi tuahnak in nan ka upat i ka biakamnak kha zumh awk tlak tein nan zulh ahcun, ⁵ nan min cu ka Biakinn chungah le ka mi hna lakah, fapa fanu nan ngeih i nan min cinken a si nak hmanh khin, sau deuh cinken a si lai. Zeitikhmanh ah kan philh hna lai lo," a ti. ⁶ Cun Bawipa nih a mi hna chung i aa tel vemi, amah a daw i a rian a ṭuanmi, Sabbath kha a ul i a biakamnak kha ṭha tein a zulmi ramdangmi kha a thawh hna i, ⁷ "Ka tlang thiang Zion ah kan kalpi hna lai. Thlacamnak inn ka inn ah khan lawmhnak kan pek hna lai i biakṭheng cung i nan ka pekchanhmi raithawinak kha ka cohlan hna lai. Ka Biakinn cu miphun vialte caah thlacamnak inn ti a si lai," a ti. ⁸ Saltannak chungin a mi Israel mi a chuahpitu hna Bawipa Pathian nih, anmah he fonh awkah midang kha ka ratpi rih hna lai, tiah bia aa kam. ⁹ Bawipa nih ramdangmi kha, ramlak saram bantukin ra u law ka mi hi ra ei hna u, tiah a chimh hna. ¹⁰ A thawh hna i, "Ka mi ralrinnak a petu ding a simi an hruaitu hna kha mitcaw lawngte an si. An hngalhmi zeihmanh a um lo. Inn hngaktu ui, a bao lomi bantuk an si — an it sawhsawh i mang lawng an man men ko. Ih cu an duh hringhran. ¹¹ A paw a kau tukmi, a za cang ti a hngal lomi uico bantuk an si. Hngalhnak ngei lo hruaitu an si. Anmahle an duhning cio paoh khan an um i anmah miaknak lam cio lawng kha an kawl. ¹² Hi zuri hna nih hin an i thawh i, ’Zu kha la rih u sih law kan celh chungin tawng u sih. Thaizing cu nihin nak hmanh hin a ṭha chin deuh rih lai,’ an ti," a ti hna.

¹ Miṭha kha an thi, sihmanhsehlaw an thih cu ahohmanh nih zei ah an rel lo, a hngalh hmanh an hngal lo. Asinain an thih ah khan harnak nih fahnak a pek khawh ti hna lonak hmun ah an kal a si. ² Nuncan ṭha in a nungmi nih cun thihnak ah khan daihnak le dinhnak an hmuh. ³ Nannih misual mi, mifihnung hna, hika ah hin biaceih awkah ra tuah u. Nannih cu vacung in pa a duhmi hna le hlawhhlangnu hna nakin nan ṭha deuh hlei lo. ⁴ Ahodah nan dehcawhmi cu a si? Nannih lihchim mi hna nih nan nihsawhmi cu ahodah a si? ⁵ Hrinsor ṭhatnak pathian kha nan biak hna i cu biaknak ah cun nu le pa sualnak tuah kha a si nan ti i thingkung thiang nan timi hna toiah khan nan sual. Tiva kam lungkua ah khan nan fale cu rai ah nan thawi hna. ⁶ Cu tiva kam cun lungmil tete kha nan lak hna i pathian ah nan biak hna. Zu le laksawng kha nan pek hna i rawl kha nan hunh hna. Hi ti nan tuahmi nih hin a ka lawmhter ko, ti ah maw nan ruah? ⁷ Tlang sang cungah khan nan kai i raithawinak nan va tuah i nan va sual. ⁸ Nan siasal fihnung cu nan inn hmailei innka hram zapi hmuh khawhnak dingah nan chiah hna. Keimah kha nan ka hlawt, nan puan kha nan i phoih i nan mi duhmi he nan ihkhun kaupi cungah khan nan kai, cu hna cu nan sin ih awkah a man nan phalh hna. Cuka ah cun nan duhduh in nan um. ⁹ Nan zihmui le nan sathau kha nan i thuh hna i Molek pathian biak awkah khan nan kal. Biak awk pathian kawl ah ram kip ah mi nan thlah hna, mithi khua tiang hmanh in mi nan thlah hna. ¹⁰ Pathian dang kawl ah nan re nan i theih ko, sihmanhsehlaw ngol cu nan duh hlei lo. Fih a nungmi nan siasal nih khan ṭhawnnak a kan pek tiah nan ruah caah a bat in nan ba kho lo. ¹¹ Bawipa nih aa thawh i, "Zei pathian nan ṭih hna caah dah keimah kha a philh in nan ka philh? Sau tuk dai tein ka um caah maw keimah cu nan ka ṭih ti lo? ¹² Nan tuahmi cu ahmaan tiah nan ruah, sihmanhsehlaw nan ziaza kha kan hlih hna lai i nan siasal nih khan an in khamh kho hna lai lo. ¹³ Kan bawm u, tiah nan au tikah khan, nan siasal nih cun in khamh hna seh. Thaw thaw khat nih a choih hna lai. Sihmanhsehlaw keimah a ka bochanmi cu ram chungah hin an um lai i keimah kha ka Biakinn cungah an ka biak lai," a ti. ¹⁴ Bawipa nih, "Ka mi cu ka sinah kirter hna u. An lam i dawntu a ummi vialte kha ṭhial dih hna u. Lam kha co u law sersiam u. ¹⁵ "Keimah cu a sang i a thiangmi Pathian, zungzal in a nungmi ka si. Hmun sang le hmun thiang ah khan ka umnak cu a si, sihmanhsehlaw mi toi aa dormi le sual ngaihchihmi hna sin zongah khan ka um i cucaah ruahchannak le hnangamnak kha an ngei ṭhan kho. ¹⁶ Ka mi cu nunnak kha ka pek hna i sual ka phaw lengmang hna lai lo, a zungzal in an cungah ka thin zong a hung lai lo. ¹⁷ An sual ruang le an duhfah ruangah an cungah ka thin a rak hung, cucaah cun ka thinhun in dan ka tat hna i ka kaltak hna. Sihmanhsehlaw an lung a hak i anmah kalning ṭhiamṭhiam khan an kal. ¹⁸ "An umtuning kha ka hmuh cang; sihmanhsehlaw ka damter hna lai. Ka hruai hna lai i ka bawmh hna lai; ngaih a chiami kha ka hnemh hna lai. ¹⁹ An dihlak in, lamnai i a ummi he lamhla i a ummi he, daihnak kan pek hna lai, ka ti hna. Ka mi cu ka damter hna lai. ²⁰ Sihmanhsehlaw miṭhalo cu tilet a tho zungzalmi rili bantuk an si, tilet cu an tho zungzal i hmunthur le nawncek kha an chuahpi zungzal. ²¹ Misual mi caah cun himnak a um lo," tiah Bawipa nih a ti.

¹ Bawipa nih, "Nan au khawh chungin au tuah u. Ka mi Israel mi cu an sualnak kha chim hna u. ² Ni fate in an ka biak i, na nawl kha kan zulh hna i ahmaanmi kha kan tuah hna, an ti. Thluachuahnak kan pe law a dingmi phunglam kan pe, an ti," tiah a ti. ³ Mi nih khan an i thawh i, "Bawipa nih a hmuh hrathrai ding ṭung lo ahcun zeicahdah rawl cu kan ulh lai? Zei i a rel ṭung lo ahcun zeicahdah harnak cu kan in lai?" an ti. Bawipa nih a thawh hna i, "Rawl nan ulh pah ah pei nanmah duhnak kha nan kemh chih i nan rianṭuantu kha nan hrem hna cu. ⁴ Nan puarhrang zungzal, nan i vel, nan i si lengmang. Hi bantuk rawl ulhnak nih hin nan thlacamnak cu a ka ngaihter lai, tiah nan ruat maw? ⁵ Rawl nan ulh tikah nanmah le nanmah sifah nan i pe, nan lu cu ram hnah bantukin niam tein nan khun i bawhnak caah khumpuan nan phah i a cungah vutcam nan phulh. Cucu maw rawl ulh nan timi cu a si? Cu nih cun a lung a ton lai ti ah maw nan ka ruah? ⁶ "Ka duhmi rawl ulhnak cu hihi a si: Hremnak cikcin kha chat hna u law dinlonak hngawngkual kha phoih hna u law hremmi kha luatter hna u. ⁷ A rawl a ṭammi kha nan rawl hrawm hna u law inn ngei lo misifak kha tlun inn onh hna u. Aih awk a ngei lomi kha thilpuan ṭhen hna u law nan sahlawh le nan rualchan hna kha bawm loin um hna hlah u. Hi hi ka duhmi rawl ulh phun cu a si. ⁸ "Cu ti nan tuah ahcun kan dawt hnanak kha nan cungah zinglei ni ceu bangin a ceu lai i nan hma cu khulrang in a dam lai. Nanmah khamh awkah nan sinah ka um zungzal lai; nan sin i ka umnak nih cun a kam kip in an ven hna lai. ⁹ Thla nan cam tikah kan leh hna lai. Nan ka chawnh tikah kan chawnh ve hna lai. "Hremnak le nautatnak le holh ṭha lo kha nan ngol i ¹⁰ rawlṭam mi kha rawl nan pek hna i herhbau in khua a sami kha an herhnak nan bawmh hna ahcun, nannih an zultu hna muihnak kha chun ceu ah a cang lai. ¹¹ Cun nannih cu keimah nih lam kan hmuhsak zungzal hna lai i thil ṭha in nan paw kan khimter zungzal hna lai. Ngandam le thazang ṭhawng in kan umter hna lai. Ti tampi a ngeimi dum bantuk nan si lai; a kao bal lomi cerhti bantuk nan si lai. ¹² Saupi a rawk cangmi nan inn le nan lo kha nan mi nih cun an remh ṭhan hna lai i hmasa a hlun hram ah khan an bunh ṭhan hna lai. A kuaimi thil kha a remh i a rawkmi inn kha a sa ṭhantu, ti nannih cu nan si lai," a ti hna. ¹³ Bawipa nih, "Sabbath ni cu nizarh ah nan rel i cu ni ah cun nanmah duhnak tuah kha nan i sum i ka nizarh cu nan sunhsak i nan upat i cu ni ahcun khual tlawng lo le rian ṭuan lo le holh sawhsawh loin nan um ahcun, ¹⁴ ka rian nan ṭuannak chungin a chuakmi lawmhnak kha nan hmuh lai. Vawleicung mi vialte kha nanmah cu kan upatter hna lai i nan pu Jakob ka pekmi ram kha nanmah nih nan co lai. Hi bia cu Bawipa nih ka chim," tiah a ti.

¹ Bawipa cu nanmah khamh awkah a kut a tawi lo, bawmhnak nan halmi theihnak caah a hna a chet lo. ² An theih hna lo cu nan sualnak ruangah a si. Biak nan timh tikah amah sin phanh an dawntu hna cu nan sualnak kha a si. ³ Lih nan chim, nan puar i lai nan nawn. ⁴ Biaceihnak hmun ah nan kal, sihmanhsehlaw ahohmanh bia hmaan a chimmi nan um lo. Nan bia tei khawhnak caah lih kha nan i bochan. Midang harnak peknak caah khua nan khan i cucu nan tlinter taktak. ⁵ Ṭhat lonak khua nan khan mi cu a sivai a ṭhawngmi rul ti bantukin ṭihnung a si. Pum khat kha khuai hmanh ah a dang pakhat a hung chuak ṭhan ko. Sihmanhsehlaw cu bantuk nan khua khannak nih cun zeihmanh an ṭhat hnem hna lai lo, sawmpalak bu in tahmi puan santlailo bantuk men a si ko lai. ⁷ Ṭhat lonak pakhatkhat tuah ding kha khua nan khang zungzal i cu nan khanmi tuah kha a ngan in nan ngang kho lo. A sual lomi thah kha nan i thlachiat bal lo. Nan phaknak kip ah rawhralnak le ṭhat lonak kha nan chiahtak i ⁸ nanmah nan um paoh ahcun ahohmanh himbawm in khua a sami an um bal lo. Nan tuahmi thil paohpaoh hi a ding lomi an si dih. Nan zulhmi lam kha lamding lo a si i cu lam i a kalmi paoh cu a himbawmmi ahohmanh an um lo. ⁹ Mi nih khan an i thawh i, "Mi nih kan cungah ṭhat lonak an tuah tikah, zeicahdah Bawipa nih a kan khamh lo, ti kha atu cu kan hngalh cang. Kan kalnak lam ah ceunak kan hmu lai tiah kan rak i ruah, sihmanhsehlaw muihnak lawnglawng a um i. ¹⁰ mitcaw bantukin a dah in kan i dap. Chun ah zan bantukin kan i chuih i kan ril, mithi khua a muimi i a ummi bantuk khi kan lo hna. ¹¹ Kan ning a ṭi, kan thla a kam. Pathian nih hremnak le ṭhat lonak chungin kan khamh seh ti kan duh, sihmanhsehlaw zeihmanh a um lo. ¹² "Bawipa na cung i kan sualnak cu a tam ko. Kan sualnak nih sual a kan phawt ko. Kan sualnak cu kan i hngal ko. ¹³ Nangmah cu kan in doh, kan in hlawt i kan in zul duh lo. Kan Pathian cu kan in kirtak i kan in hlawt. Kan lung chungin lih kha kan i pawi i cu lih cu mi congoihnak le mi rawinak ah kan hman hna. ¹⁴ Dinnak cu kan ṭhawl i ahmaanmi thil nih a naih in a kan naih kho lo. Zapi i pumhnak hmun ah khan biatak cu zeihmanh ah rel a si lo i biaceihnak hmun ah khan dinnak zeihmanh a um lo. ¹⁵ Biatak chim kha a tlawm tuk hringhran caah ṭhat lonak tuah a duh lomi cu, mihrut ah rel an si," an ti. Bawipa nih hihi a hmuh dih i dinnak a um lo caah a thin a hung. ¹⁶ Hremmi hna a bawmtu ding pakhat hmanh an um lo kha a hmuh tikah a awlok a chong. Cucaah anmah khamhnak ah cun amah ṭhawnnak kha a hman lai i a tei hna lai. ¹⁷ Dinnak cu thir angki bantukin aa hruk lai i teinak cu lukhuh bantukin aa khuh lai. Thil ahmaan in tuah duhnak le mi cungah ṭhat lonak a tuahtu hna teirul cham le dantat duhnak kha puan bantukin aa aih lai. ¹⁸ A ral cu an tuahmi ning khan dan a tat hna lai, lamhlapi i a ummi hmanh kha dan a tat hna lai. ¹⁹ Nichuahlei in nitlaklei tiang, mi kip nih an ṭih lai i a ṭhawnnak a nganmi kha an hmaizah lai. A hlonh in aa hlonhmi tiva bantukin a ra lai, a ṭhawngmi thlitu bantukin a ra lai. ²⁰ Bawipa nih a mi cu a thawh hna i, "Nan sualnak a mertakmi vialte, nan dihlak in ven awkah le khamh awkah Jerusalem ah ka ra lai. ²¹ Cun hi biakamnak hi nanmah he ka ser lai: Ka ṭhawnnak in ka phunglam le cawnpiaknak kha kan pek hna, cun atu thawk in hmailei caan vialte tiang hi phunglam le cawnpiaknak cu nanmah le nan fale le nan tefa fachin hna nih nan ngaih awk le nan i cawnpiak awk a si," a ti.

¹ Tho tuah, Jerusalem, ni bantukin tlang tuah; Bawipa sunparnak cu na cungah a tlang! ² Miphun dang cu muihnak nih a huh hna lai, sihmanhsehlaw nang cungah cun Bawipa ceunak cu a ceu lai; a sunparnak lianhngannak cu na sinah a um lai. ³ Miphun tanpi nih na ceunak cu an fuh lai i na ni thar a chuakmi cu siangpahrang nih an fuh lai. ⁴ I mer law na pawngkam ah khan zeidah a um ti kha zoh tuah. Na mi cu inn i tlun awkah an i pum. Na fapa hna cu lamhla piin an ra lai i na fanu hna cu ngakchia bangin puak cungin an ra lai. ⁵ Mah hihi na hmuh lai i lunglawmhnak in na khat lai, naa lawmh tuk ah a ther in na ther lai. Miphun hna nih an rumnak cu na sinah an rak put lai i naa lawmh tuk ah a ther in na ther lai. Miphun hna nih an rumnak cu na sinah an rak put lai i rili bangin an chawva cu a ra lai. ⁶ Kalauk bu ngan ngan cu an ra lai, Midian le Efah in an ra lai. Sheba in an ra lai i sui le zihmui kha an rak phorh hna lai. Pathian nih a tuahmi thil kong thawng ṭha kha mi nih an chim lai. ⁷ Kedar le Nebaioth ram tuu vialte kha raithawinak i hman awkah na sinah an ratpi hna lai i Bawipa lunglawmhternak caah biakṭheng cungah an pekchanh hna lai. Bawipa nih a Biakinn cu a sunparter chinchin lai. ⁸ Khuadawm bantukin a zuan in a zuangmi lawng khi zei lawng dah an si? An bu hlam ah a zuangmi ṭhuro bantukin a zuangmi lawng khi zeidah an si? ⁹ Annih cu lamhla piin a rami lawng an si, Pathian mi hna, inn i a rak tlunpitu hna lawng an si. Bawipa, Israel Pathian thiang upat awkah sui le ngun kha an rak i phorh; Bawipa nih miphun dang vialte cu, a mi Israel mi kha, upatnak a pekter hna. ¹⁰ Bawipa nih Jerusalem cu a thawh i, "Ramdangmi nih na vampang kha an remh lai i an siangpahrang nih na rian an ṭuan lai. Ka thinhun in dan kan tat, sihmanhsehlaw atu cu kan dawtnak le kan zaangfahnak kha na cungah ka langhter lai. ¹¹ Miphun dang siangpahrang hna nih an chaw le an va cu an ratpi khawh nakhnga, chunzan in na kutka cu i hung zungzal ko hna seh. ¹² Sihmanhsehlaw na rian an ṭuanpiak duh lomi miphun hna cu hrawh cikcek an si lai. ¹³ "Far thing le Junipar thing le saipres thing, Lebanon tupi chung i thing ṭha bikbik hna kha, nangmah Jerusalem remhnak ah le ka biakinn dawhternak ah le ka khuapi dawhternak caah an rak phorh hna lai. ¹⁴ Nangmah a rak in hremtu hna an fapale kha an ra ve lai i nangmah cu hmaizahnak pek awkah an kun lai. Hlan i zei ah a rak in rel lomi vialte hna kha na ke hram ah an kun lai. Nangmah cu, ’Bawipa Khua, Israel Pathian Thiang Khua Zion,’ an in ti lai. ¹⁵ "Hlawt na si ti lai lo i huat na si ti lai lo. Ṭiaotakmi khua, khua rop na si ti lai lo. Khua lianngan le khua dawh ah kan ser lai i. zungzal in zungzal tiang lawmhnak hmun ah kan ser lai. ¹⁶ Nu nih a fa kha a zohkhenh bantukin, miphun hna le siangpahrang hna nih khan an in zohkhenh lai. Bawipa nih kan khamh kha na hngalh lai, Israel Pathian ṭhawng nih kan luatter kha na hngalh lai. ¹⁷ Dar can ah sui kan pek lai, thir can ah ngun kan pek lai i thing can ah darsen kan pek lai. Lung can ah thir na hmuh lai. An uktu bawi hna nih khan an in hrem ti lai lo, dinnak le daihnak in ka ukter hna lai. ¹⁸ Puarṭhawnnak thawng kha theih a si ti lai lo, rawhnak nih na ram cu a hnin ti lai lo. Vampang nih khua a ven bangin kan ven lai i kan huhphenh lai; nangmah cu kan khamh caah na ka thangṭhat lai. ¹⁹ "Chun ah ni cu na ceunak a si ti lai lo i zan ah thlapa cu na ceunak a si ti lai lo. Bawipa cu zungzal in na ceunak ka si cang lai i ka sunparnak ceunak cu na cungah a tlang lai. ²⁰ Na ngaihchiat ni cu a dong lai. Bawipa cu zungzal in na caah ceunak ka si lai, nika le thlapa nakin a hmun deuhmi ceunak ka si lai. ²¹ Na mi nih an dihlak in ahmaanmi thil kha an tuah lai i ram kha zungzal in an co lai. Ka lianhngannak kha mi vialte sin i langhter awkah annih cu ka phun hna i ka ser hna. ²² Nan innchungkhar hna lak i a hme bik le santlailo bik hna hmanh kha a ṭhawngmi miphun tluk ah an i cang lai. Amah le a caan te ah hi thil cu khulrang in ka umter lai. Keimah cu Bawipa ka si," a ti.

¹ Bawipa Pathian nih thlarau in a ka khahter. Sifakmi hna sinah thawng ṭha phorh awk le lung a kuaimi hna damter awk le sal i a tangmi hna sinah chuahnak thanh awk le thong chung i a ummi hna sinah luatnak thanh awkah a ka thim i a ka thlah. ² Bawipa nih a mi cu a khamh cang hna lai i an ral cu a tei cang hna lai, ti thanh awkah a ka thlah. A ngaih a chiami vialte kha hnemh awk le ³ Zion i ngaihchia in a ummi vialte hna cu vutcam caah pangpar ṭhi, mitthli caah lawmhnak chiti le thangṭhatnak hla pek awkah a ka thlah. Annih cu Bawipa hrimhrim nih a phunmi thingkung bantuk an si lai. Thil ṭha kha an tuah lai i Pathian cu a tuahmi thil ruangah khan an thangṭhat lai. ⁴ Saupi a rawk cangmi khua kha an remh ṭhan hna lai. ⁵ Jerusalem, ramdangmi nih na rian an in ṭuanpiak lai. Na saṭil kha an in zohkhenhpiak hna lai i na lo kha an in thlawhpiak hna lai, na mitsur dum kha an in cawngpiak hna lai. ⁶ Nang tu cu Bawipa tlangbawi tiah ti na si lai i miphun hna rumnak cu na ei lai, na ta an si caah khan na hmai a hngal lai. ⁷ Na ningzahnak le na thangchiatnak cu a dong cang. Nangmah ramte ah khan na um cang lai i na rumnak cu a let hnih in a ṭhang lai; na lawmhnak cu zungzal in a hmun lai. ⁸ Bawipa nih, "Dinnak kha ka duh i hremnak le thil ṭhalo tuahnak kha ka huat. Ka mi cu ka lehrulh hrimhrim hna lai i anmah he zungzal hmunmi biakamnak ka ser lai. ⁹ Miphun dang sinah khan an min a thang lai i a hmumi hna paoh nih, thluachuahnak ka pekmi miphun an si kha an hngalh lai," a ti. ¹⁰ Bawipa nih a tuahmi thil ruangah Jerusalem cu aa lawm. Va ngei lai ngaknu aa ṭamhmi bantuk a si. Pathian nih khamhnak le teinak he a thuamh cang. ¹¹ Thlaici cu an keuh i an ṭhan bantukin, Bawipa Pathian nih a mi cu a khamh hrimhrim hna lai. Cun miphun vialte nih amah cu an thangṭhat lai.

¹ Jerusalem cu lung ṭhawnnak pek awkah bia ka chimh lai, khamhnak a hmuh hlantiang le, a teinak zan meifar ceu bantukin a ceu hlantiang ka dai hrimhrim lai lo. ² Jerusalem, miphun hna nih, teitu na si kha an hmuh lai! An siangpahrang vialte nih na sunparnak kha an hmuh lai. Min thar in auh na si lai i cu min cu Bawipa hrimhrim nih an pek lai. ³ Aa dawhmi bawiluchin bantuk Bawipa caah na si lai. ⁴ "Hlawtmi, " ti na si ti lai lo i na ram zong "Kaltakmi Nupi" ti a si ti lai lo. Na min thar cu "Hefzibah" ti a si lai i na ram cu "Beulah" ti a si lai. Cu Bawipa kha na cungah aa lawmh caah a si i na ram caah va bantuk a si lai. ⁵ Tlangval nih ngaknu a ṭhit bantukin Nangmah an Sertu nih an ṭhit lai. Tlangval cu a mo cungah aa lawmh bantukin Na Pathian cu na cungah aa lawm lai. ⁶ Maw Jerusalem, na ralhau cungah ralvengtu ka chiah hna, chun nitlak zan khuadei an dai lai lo. Bawipa nih biakamnak ka tuakmi kha an ka theihter ṭhan lengmang lai i ka biakam cu philh hrimhrim loin an ka tuah lai. ⁷ Jerusalem cu ka remh ṭhan i vawleicung dihlak nih an thangṭhatmi khua i ka ser hlantiang, a dinh in ka dinhter hna lai lo. ⁸ Bawipa nih biatak tein bia aa kam, a biakam cu a lianhngannak in a tlinter lai. Cu a biakam cu hihi a si: "Nan tirawl cu nan ral hna caah rawl a si ti lai lo i ramdangmi nih nan mitsur hang cu an in dinkanh ti hna lai lo. ⁹ Thlaici a tuh i rawl a ṭuantu nanmah nih rawl cu nan ei lai i Bawipa cu nan thangṭhat lai. Mitsur kha a zohkhenh i a pumhkhawmtu nih, ka biakinn chungah mitsur hang cu nan din lai," a ti. ¹⁰ Jerusalem khuami hna, i thawh u law nan mi a ra kir liomi hna caah lam va ser u. Lam nganpi pakhat in va ser u law lung vialte kha hlonh dih hna u. ¹¹ "Jerusalem khuami cu chim hna u law, Bawipa nan khamhtu cu a ra lio i a tlanhmi a mi kha a rak i ratpi hna, tiah vawleicung dihlak ah Bawipa nih a thanh i cucu miphun vialte nih an hngalh nakhnga hmelchunhnak pakhat in tar tuah u," a ti tiah va ti hna u. ¹² Nannih cu "Pathian Mi Thiang," ti nan si lai, "Bawipa Khamh Mi" ti nan si lai. Jerusalem cu, "Bawipa Dawt Mi Khua," "Pathian Nih A Hlawt Lomi Khua" ti a si lai.

¹ "Ahodah Edom ram in a rami khi a si? Ahodah thisen aa nehmi puan he Bozrah in a rami khi a si? Ahodah sunparnak in aa thuam i ṭhawnnak in a kalmi khi a si? Amah cu, Khamhnak a thanhtu, mi khamh awk i a ṭhawngmi, Keimah hi ka si. ² Zeicahdah na puan cu an sen i mitsur hang a nengtu puan bantuk a si? ³ Keimah nih, keimah lawnglawng in mitsur hang cu ka nen i ka thinlinh in ka nen hna; An hang nih ka puan cu a peh i ka puan cu a seh dih. ⁴ Zeicahtiah phuhlam ni cu ka lung chungah a um cang i tlanhnak ka tuah lai, ka timi kum cu a phan cang. ⁵ Khua ka cuan, sihmanhsehlaw bawmtu ahohmanh an um lo; mithram cat in ka zoh, sihmanhsehlaw a ka bawmtu ahohmanh an um lo; ⁶ Ka thinhun in miphun kha ka lamhchih hna i ka thinlinh in ka naan cikcek hna; Cun an thisen kha vawlei ah ka thlet," a ti. ⁷ Bawipa dawtnak fek cu ka chim lai, kan ca i a tuahmi thil ruangah ka thangṭhat lai. Israel mi cu thluachuahnak tam piin a pek hna i cu a pek hna cu a zaangfah hna ca le a dawtnak a feh caah a si. ⁸ Bawipa nih aa thawh i, "Annih cu ka mi an si, an ka hleng lai lo" a ti. Cucaah an harnak vialte chung khan a khamh hna. ⁹ Annih khamhtu cu vancungmi a si lo, Bawipa hrimhrim kha a si. A dawt hna i an zawn a ruah hna caah a khamh hna. Hlanah khan a rak zohkhenh zungzal ko hna. ¹⁰ Sihmanhsehlaw an doh i a ngaih an chiatter. Cucaah Bawipa cu an ral ah a cang i a doh hna. ¹¹ Sihmanhsehlaw hlanlio chan, Bawipa sal Moses chan kha an vun thei ṭhan i, "Rili chungin a mi hna cu an hruaitu hna he a rak khamhtu hna Bawipa kha atu hi khuazei ah dah a si hnga? Moses thlarau a rak petu Bawipa kha khuazei ah a si hnga? ¹² Zungzal hmunmi minthannak hmuh awkah, a mi hna hmaiah rili hmanh a cheu i a sal Moses thawngin thil lianngan a tuah i a ṭhawnnak a hmangmi Bawipa kha khuika ah dah a si hnga?" an ti. ¹³ Bawipa nih ti thuk a tanpi lio hna ah khan, ramlak rang bantukin an ke a fek i voi khat hmanh an ril lo. ¹⁴ Cawrun kha ram ṭhatnak nelrawn ah an kanh hna bangin Bawipa nih a mi cu dinhnak a pek hna. Cuticun Bawipa nih khan a mi cu a hruai hna i a min cu thangṭhatnak a hmu. ¹⁵ Na sunparnak le na thiannak he na umnak hmun van khin run kan zoh tuah, Bawipa Kan zawn na kan ruahnak kha khuazei ah dah a si? Na ṭhawnnak kha khuazei ah dah a um? Na kan dawtnak le na kan zaangfahnak kha khuazei ah dah an um? Kan hrelh sawh hlah. ¹⁶ Nangmah cu kan Pa na si. A kan hringsortu Abraham le Jakob hmanh nih an kan bawm kho lo, sihmanhsehlaw Bawipa, nangmah cu kan Pa na si. Nangmah cu a kan chuahtu zungzal na si. ¹⁷ Zeicahdah na lam zul loin na kan pialter? Zeicahdah kan lung na kan hahter i nangmah cu kan in mertak? Nangmah na rian a ṭuanmi hna ruangah le nangmah mi a si zungzal komi hna ruangah, ra kir ko sawh. ¹⁸ Kan ral nih na mi cu an kan dawi dih dengmang i Biakinn cu an thurhhnawmh. ¹⁹ Nangmah cu a kan uktu a rak si bal lomi bantukin kan cungah naa umter i kannih cu na mi a rak si bal lomi bantukin na kan tuah.

¹ Zeicahdah van khi na run baoh ko lo i na rung ṭum ko lo? Tlang nih hin an in hmuh hnga i an in ṭih tuk ah a ther in an ther hnga. ² Mei lin chungah a tlokmi ti bantukin an ther hnga. Ra law na lianhngannak cu na ral hna sinah hin langhter tuah, na hmaiah miphun hna cu a ther in ther hna seh. ³ Voi khat cu na rak ra i na tuah lai tiah kan ruah lomi thil ṭihnung kha na tuah hna; tlang nih an in hmuh i ṭihnak in an ther. ⁴ Amah aa bochantu hna caah cu bantukin rian a ṭuantu Pathian cu nangmah lawnglawng na si, nangmah bantuk cu ahohmanh nih a theih zong an thei bal hna lo a hmuh zong an hmu bal hna lo. ⁵ Ahmaanmi thil tuah duhnak a ngeimi kha na bawmh hna i nangmah nih cutin um hna seh ti na duhning a philh lomi cu na lawmh hna. Kan cungah na thin a rak hung, sihmanhsehlaw kan sual lengmang ṭhiam ko; kan cungah na thin a hung ko nain hlanlio piin kan sual lengmang ko. ⁶ Kan dihlak in misual kan si, kan thil tuahmi ṭha bik kan timi hna hmanh hi puanchia fihnung an si. Kan sualnak ruangah cun hnahchawl thli nih a choihmi bantuk khi kan si. ⁷ Ahohmanh nih thlacam in nangmah lei kan hoih lo, ahohmanh nih bawmhnak hal in kan in fuh lo. Kan sinin naa thup i kan sual ruangah na kan kaltak cang. ⁸ Sihmanhsehlaw Bawipa, nangmah cu kan Pa na si. Kannih cu tlak bantuk kan si i nangmah cu um sertu bantuk na si. Nangmah nih kannih cu na kan ser, ⁹ cucaah cun kan cungah fak tuk in na thinhung hlah, kan sualnak zong zungzal in i cinken sawh hlah. Kannih cu na mi kan si, kan zaangfah ko sawh. ¹⁰ Na khua thiang hna cu thetse ram bantuk an si i Jerusalem cu a rawk i ṭiaotakmi khua a si. ¹¹ Kan pu le kan pa hna nih an in thangṭhatnak hmun, hmun dawh le hmun thiang, kan Biakinn cu mei nih a hrawh cang, a nuammi kan hmun cu an rawk dih cang. ¹² Bawipa, hi thil nih hin na lung an hnorsuang hrim lo maw? Zeihmanh tuah loin maw na um ko lai kan celh lo tiangin na kan inter ko lai?

¹ Bawipa nih aa thawh i, "Ka mi hna thlacamnak kha leh awkah timh cia tein ka rak um ko, sihmanhsehlaw thla an cam lo. Ka hmu hna seh, tiah timh cia tein ka rak um ko, sihmanhsehlaw a kawl timh in an ka tim lo. An thlacamnak leh i, ’Hika ah ka um ko, kan bawmh hna lai,’ ti in ti awkah timh cia tein ka um ko, sihmanhsehlaw ka miphun nih ka sinah thla an cam lo. ² Anmah duhnak lei paoh ah a kal i ṭhat lonak a tuah peng tu hna hi, ka za ka chanh zungzal ko hna. ³ ningzah hngal hrimhrim loin ka thin an ka hunter zungzal ko. Dum thiang timi ah khan lawkih rai an thawi i lawkih biakṭheng cungah khan zihmui an khangh. ⁴ Zan ah thi tlawn ah lungkua kip le thlan kip ah khan an kal. Hi hna nih hin voksa kha an ei i lawkih raithawinak ah an hmanmi sa tihang kha an din. ⁵ Cun midang kha an thawh hna i kannih cu mithiang tuk kan si, kan tawng hlah u, an ti hna. Hi bantuk mi cu a in in ka ing kho hna lo — an cung i ka thinhunnak cu a mit kho lomi mei bantuk a si. ⁶ "Dan ka tat hna lai tiah bia ka khiah cang i an dantatnak ding cu ka ṭial cang. An tuahmi kha hmu loin ka um sual lai lo, an sualnak ruangah khan ka lehrulh hna lai i ⁷ an pupa sualnak ruangah khan teirul ka cham hna lai. Lawkih hmunthiang ah khan zihmui an khangh i ka min kha an ka thangchiat. Cucaah hmuh awkah an i tlak bantukin dan ka tat hna lai." ⁸ Bawipa nih aa thawh i, "Mitsur thei ṭha cu ahohmanh nih an rawk bal lo, mitsur hang sernak tu ah khan an hman hna. Cu bantukin kei zong nih ka mi cu an dihlak in ka hrawk hna lai lo, ka rian a ṭuantu cu ka khamh hna lai. ⁹ Israel mi lakah Judah tefa a simi kha thluachuah ka pek hna lai i an tefa nih ka ram le ka tlang kha an co lai. Ka thimmi ka mi, ka rian a ṭuanmi cu, cuka ah cun an um lai. ¹⁰ Keimah cu an ka biak lai i nitlaklei ah Sharon Nelrawn ah an tuurun le an cawrun kha an tlonter hna lai i nichuahlei ah Harnak Nel timi ah khan an tlonter hna lai. ¹¹ "Sihmanhsehlaw keimah a ka hlaw i Zion ka tlang thiang kha zeirello in a um i Gad le Meni a biami nan caah cun thil dang a si lai. ¹² Kan kawh hna tikah nan ka let lo i ka chim tikah nan ngaih lo caah sar thih in nan thi lai. Ka nawl zulh duh lo le ṭhat lonak tuahtu kha nan i thim. ¹³ Cucaah keimah a ka bia i ka nawl a zulmi cu ei awk le din awk tampi an ngei lai nain nannih cu nan rawl a ṭam lai i nan ti a hal lai. Annih cu an lung aa lawm lai, sihmanhsehlaw nannih cu ningzahnak nan hmu lai. ¹⁴ Lunglawm in hla an sa lai, sihmanhsehlaw nannih cu lungkuai in nan ṭap lai. ¹⁵ Ka thimmi ka mi hna nih cun nan min cu chiatserhnak ah an hman lai. Bawipa nih kan thah hna lai. Sihmanhsehlaw ka nawl a zulmi cu min thar ka pek hna lai. ¹⁶ Ram chung i a ummi ahopaoh nih thluachuahnak an hal tikah Pathian cu thluachuahnak kan pe tiah an hal lai, amah cu zumhawktlak a si. Chiat a sermi paoh nih Pathian min in an ser lai, amah cu zumhawktlak a si. Hlanlio harnak kha cu an dih cang lai i philh an si cang lai," a ti. ¹⁷ Bawipa nih aa thawh i, "Van thar le vawlei thar ka ser hna i hlanlio thil cu a philh in philh an si cang lai. ¹⁸ Ka sermi thil kha zungzal in i lawmhpi hna u law i nuamhpi hna u. Ka sermi Jerusalem thar cu lawmhnak in a khat lai i a mi hna cu an i lawm lai. ¹⁹ Jerusalem le a mi hna ruangah keimah zong lawmhnak in ka khat lai. Ṭahnak a um ti lai lo i bawmhnak hal zong a herh ti lai lo. ²⁰ Ngakchia kha an no lioah an thi ti lai lo i ahopaoh tar tlung in an nung cio lai. Kum za khat a simi kha mino ah rel an si lai. Cu hlan i thih cu dantatnak hmelchunhnak a si lai. ²¹ - ²² Mi nih inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsur hang kha an din hna lai, midang nih an dinkanh hna lai lo. Thingkung bantukin ka mi cu an chan a sau lai. An ṭuanmi chungin an hmuhmi theitlai kha tlamtling tein an hman hna lai. ²³ An ṭuanmi rian ah khan khua awng an pem lai i an fale nih vanchiatnak an tong lai lo. Anmah he an fale he hmailei caan ra ding tiangin thluachuah ka pek hna lai. ²⁴ Ka sin i thla an cam tikah an thlacam a dih hlan hmanh in ka leh hna lai. ²⁵ Cenghngia le tuufa cu an tlong ṭi lai i chiandeih nih caw bantukin capawl an ei lai. Rul cu ṭih an nung ti lai lo i a rawl ah leidip a si lai. Ka tlang thiang Zion Tlang cungah cun i hliamkhuainak le i hrawhnak zeihmanh a um ti lai lo," a ti.

¹ Bawipa nih aa thawh i, "Van hi ka ṭhutnak a si i vawlei hi ka ke chiahnak a si. Cucaah zei bantuk inn dah nan ka sakpiak khawh lai i ka umnak ding caah zei bantuk hmun dah nan ka serpiak khawh lai? ² Van le vawlei hi keimah nih ka ser dih hna. Mi toiah aa dor i an sualnak aa ngaihchih i a ka ṭih i ka nawl a ngaimi cu an cungah ka lung aa lawm. ³ "Hi mi hna nih hin cun anmah duhning paoh in an tuah. An duh ah raithawinak caah cawtum kha an thah i an duh ah minung kha an hei thah fawn ko; tuufa kha rai ah an thawi i uico zong kha a hngawng an hei merh fawn ko; rawl thawinak caah fang an pekchanh i vok thi zong an hei pekchanh fawn ko, zihmui kha an khangh i siasal sinah khan thla an hei cam fawn ko. Pathian biaknak ah hi bantuk fihnung lam zulh hi an i lawmh zia a si. ⁴ Cucaah cun ka kawh tik hna i an ka leh duh lo ca le ka chawnh tik hna i an ka chawnh duh lo caah an ṭihmi thil thengte, rawhralnak kha an cungah ka tlunter lai. Ka nawl zulh duh lo i ṭhat lonak tuah cu an i thimmi a si," a ti. ⁵ Nannih Bawipa kha a ṭih i a nawl a ngaimi hna, Bawipa nih a chimmi kha ngai tuah u. "Ka cungah zumh awk tlak in nan um ruangah nanmah mi lila a cheu nih an in huat hna i an in hlawt hna. An in nihsawh hna i, ’Lunglawm in nan um kha hmuh kan duh, cucaah cun Bawipa nih a lianhngannak kha langhter seh law in khamh tuah hna seh,’ an ti. Sihmanhsehlaw ningzahnak a hmumi cu anmah kha an si lai. ⁶ Ngai hmanh u! Khua chung i aw thawng cu, Biakinn chung i thawng cu, Bawipa nih a ral dan a tat hnanak thawng a si. ⁷ "Ka khua thiang cu nganfak loin fa a hringmi nu bantuk a si. ⁸ Cu bantuk thil cu aho tal nih an hmu bal in an thei bal maw? Ni khat ah miphun phun khat cu chuah khawh a si bal maw? An phun ningin a chuah hlanah Zion cu saupi nganfah a in a hau lai lo. ⁹ Ka mi cu hrinnak caan phakter ṭung in hrin taktak loin a umter hna lai tiah ka ruat hlah u," tiah a ti. Hi bia cu Bawipa nih a chim. ¹⁰ Jerusalem a dawmi vialte hna, Jerusalem he cun i lawm ṭi u law amah ruangah cun nan tha nuam tuah u. Hmasa i a rak ṭahtu vialte hna, atu cu amah he cun i lawm tuah u. ¹¹ Ngakchia nih a nu hnuk a din bantukin a sunparnak ah cun nan i lawm lai. ¹² Bawipa nih aa thawh i, "A hmunmi rumnak kha kan pek hna lai; miphun hna chawva cu a kao bal lomi tiva bantukin nan chungah a rung luang lai. Nu nih a cawmmi a fa, a cawi a pommi bantuk nan si lai. ¹³ Nu nih a fa a hnemh bantukin Jerusalem khua chungah kan hnemh hna lai. ¹⁴ Hi thil a hung um tikah nan lung aa lawm lai; an ṭhawnter hna lai i nan ngan an damter hna lai. Cucaah Bawipa keimah nih ka nawl a ngaimi cu ka bawmh hna i ka ral cu ka thinhunnak ka chuahhnawh hna ti kha nan hngalh lai," a ti. ¹⁵ Bawipa cu mei he a ra lai. A thin a huntertu hna dantat awkah ṭotho a run i cit lai i a ra lai. ¹⁶ A sual tiah a hmuhmi vawleicung mi vialte kha mei le vainam in dan a tat hna lai i an thi lai. ¹⁷ Bawipa nih aa thawh i, "Lawkih biaknak i kal awkah le dum thiang timi ah a run in kal awk caah aa thianh i voksa le zusa le rawl fihnung a dangdang a eimi hna an donghnak ding cu a nai cang. ¹⁸ An ruahnak le an tuahmi kha ka hngalh. "Miphun kip chung minung kha ka pumh hna lai. Hmunkhat i an i pumh tikah ka ṭhawnnak nih zeidah a tuah khawh ti kha an hmuh lai i ¹⁹ dan a tattu hna cu keimah ka si kha an hngalh lai. Sihmanhsehlaw a cheu cu ka zuah hna lai i ka minthannak a thei rih lomi hna le ka lianhngannak le ṭhawnnak a hmu rih lomi miphun le ram hla pipi ah khan ka thlah hna lai: Spain ram le Libia ram le Lidia ram, (Lidia ram cu thal kah thiammi umnak ram a si), Tubal ram le Grik ram ah ka kuat hna lai. Hi miphun hna hi ka lianhngannak kha an chimh hna lai. ²⁰ Nan phunhawi vialte hna kha, miphun dang hna sin cun, ka sinah laksawng ah, an rak kirpi hna lai. Jerusalem i ka tlang thiang ah khan rang cung le laa cung le kalauk cung le rangleng in an ratpi hna lai, Israel mi nih Biakinn ah biaknak lei in a thiangmi bawm in rawl kha an ratpi bantukin an ratpi hna lai. ²¹ Annih lakah a cheu cu tlangbawi le Levi mi ah ka ser hna lai. ²² "Ka lianhngannak thawngin vawlei thar le van thar cu an hmunh bantukin nan tefa hna le nan min cu an hmun ve lai. ²³ Thla thar puai le Sabbath ni ah phun kip chungin Jerusalem i keimah biak awkah an ra lai," tiah Bawipa nih a ti. ²⁴ "An chuah pah ah a ka dohtu hna an ruak kha an hmuh lai. An sa a eitu tholung kha zeitikhmanh ah an thi lai lo i a kanghtu hna mei kha zeitikhmanh ah a mit lai lo. Annih cu an hmuh hna tikah mi vialte cu an luak a chuak lai."