HOSEA

HOSEA

¹ Judah mi hna siangpahrang Uzziah, Jotham, Ahaz le Hezekiah le Israel mi hna siangpahrang Jeroboam, Jehoash fapa, an bawi lio caan i Beeri fapa Hosea sinah Bawipa bia a rami: ² Bawipa nih Hosea sinin Israel sinah a hmasa bik bia a chim tikah, Bawipa nih amah cu a thawh i, "Va kal law mizuangzamnu kha va ṭhi law cu mizuangzamnu he cun fa va ngei u; zeicahtiah hi ram hi Bawipa sinah zumhawktlak loin a um caah mizuangzamnu bantuk a si cang," tiah a ti. ³ Cucaah cun a kal i zeihmanh a ṭhahnem lomi nu Gomer kha a va ṭhit; cun fa a pawi i fapa a hrinpiak. ⁴ Cun Bawipa nih a thawh i, "A min ah Jezreel va sak tuah; Zeicahtiah Jezreel i thisen an chuahmi ruangah khan Jehu tefa hna cu dan ka tat hna lai i Israel pennak cu ka donghter lai. ⁵ Khi ni ah Israel likuk cu Jezreel nelrawn ah ka khiah lai," tiah a ti. ⁶ Fa a pawi ṭhan i fanu a hrin i Bawipa nih a thawh i, "A min ah Lo-ruhamah tiah sak tuah, Zeicahtiah Israel cu ka hram bal ti lai lo i ka ngaihthiam bal ti lai lo," tiah a ti. ⁷ Sihmanhsehlaw Judah cu ka dawt lai i ka khamh lai. Li in siseh, vainam in siseh, ral hriamnam in siseh, rangtum in siseh, rangcung ralkap in siseh, ka khamh hna lai lo, sihmanhsehlaw Bawipa an Pathian in ka khamh hna lai. ⁸ Lo-ruhamah cu hnuk a thlei dih in fa a pawi ṭhan i fapa a hrin; cun Bawipa nih a thawh i, "A min ah Lo-ammi" sak tuah, Zeicahtiah nannih cu ka mi nan si lo i Kei cu nan Pathian ka si lo," tiah a ti. ¹⁰ Sihmanhsehlaw Israel mi hna cu rili thetse bantukin rel cawk lo an si lai, tah cawk zong an si lai lo, rel cawk zong an si lai lo; annih cu "Ka mi an si lo," ti an si ti lai lo i sihmanhsehlaw "A Nungmi Pathian Fa," titu an si cang lai. ¹¹ Cun Judah mi le Israel mi hna cu hmunkhat ah fonh an si lai i anmahte nih hruaitu pakhat kha an i thim lai, cun annih nih ram kha an co lai, Jezreel ni cu a lianngan lai.

¹ Na ṭa Ammi le na far Ruhamah cu chim hna law ² Nan nu cu lem tuah u, Amah cu keimah nupi a si lo maw? Keimah cu a va ka si lo maw? Hlawhhlangnu muisam a kenmi cu a hlawt i a duhtu hna cu a ṭang in a ṭhen hna nakhnga, lem tuah u. ³ Cu ti a si lo ahcun ka phoih dih lai i a chuah ni i taklawng in a um bantuk khan ka hlih dih sual lai; Ram car bantukin ka tuah lai i thetse car in ka car sual lai i tihal in ka thihter sual lai. ⁴ A fale zong kha ka daw phit hna lai lo; Annih cu nu zuangzam fa an si i, ⁵ An nu kha hlawhhlangnu a si ai, Annih a pawitu hna cu ningzah a hngal lomi, Aa thawh i, "A ka duhtu cu ka dawi ko hna lai; rawl le din awk le sahmul le laa le chiti le zihmui an ka pek paoh ahcun," a timi kha a si. ⁶ Cucaah a lam cu hlingbur in ka kham hna lai i dai kha ka chon hna lai, Cuticun a zulh tawnmi a lam kha zul kho loin ka tuah lai. ⁷ A duhtu kha a dawi hna tikah a phan a phan hna lai lo, A kawl hna tikah a hmu hna lai lo; Cu tikah aa thawh lai i, "Ka va sinah khan ka kir ṭhan lai, amah sin i ka rak um ah khan atu nakin ka caah a ṭha deuh," a ti lai. ⁸ Anih nih cun rawl le mitsur hang thar le chiti a petu kha keimah ka si kha a hngal lo i Baal siasal sernak ca i an hmanmi sui le ngun tam piin amah a petu kha keimah ka rak si kha a hngal fawn lo. ⁹ Cucaah rawl ṭuan caan ah ka rawl cu ka lak ṭhan hna lai i Mitsur hang nen caan ah ka mitsur hang cu ka lak ṭhan hna lai; A taklawng i khuhnak ding caah ka pekmi sahmul le la kha ka lak ṭhan hna lai; ¹⁰ Cuticun zei bantuk mihur dah a si kha ka langhter lai i Ahohmanh nih ka sinin amah fir kha an duh ti lai lo. ¹¹ Aa nuamhnak vialte, a khualtlawnnak tehna, thla thar tehna, sabbath tehna, puai tehna cu ka donghter hna lai. ¹² A duhtu hna nih an ka phalhmi a si tiah a timi mitsur ruang le theipi kung hna kha ka hrawh hna lai i Ramlak saram an tlonnak ramlak ah ka ser hna lai. ¹³ Baal sin i raithawinak a khangh ni, a ni thiang hna, Hnatonh aa tonh i ṭhi aa oih i a duhtu hna a dawi hna i keimah a ka philh ni hna ruangah khan dan ka tat lai, tiah Bawipa hrimhrim nih a ti. ¹⁴ Sihmanhsehlaw atu cu ngaihmanh, Ka lem ṭhan lai i ramlak ah cun ka kalpi lai i ka hnemh lai. ¹⁵ Khika ah a mitsur dum cu ka pek ṭhan lai, Harnak Horkuang cu Ruahchannak Kutka ah ka ser lai i Izipt ram in a chuah i a no lio bantuk khan khika ah a ka leh lai. ¹⁶ Khi ni ah cun, "Ka va," a ka ti lai i, "Ka Baal," a ka ti ti lai lo. ¹⁷ Baal hna min hrimhrim kha a hmur in ka hnawh hna lai i an min hi a chim in chim an si ti lai lo. Hihi Bawipa bia hrimhrim a si. ¹⁸ Khi ni ah Israel aiawh in ramsa hna le van i a zuangmi va hna le vawlei i a lawn mi thilnung hna he biakamnak ka ser lai i nunnak a ngeimi thil paohpaoh nih ṭihnak zeihmanh um loin an um ṭi khawh nakhnga likuk le vainam le ral hriamnam hna cu ka hrawh dih hna lai i vawlei cungin ka hloh hna lai i ka mi cu daite le him tein ka umter hna lai. ¹⁹ Maw Israel, nangmah cu ka nupi ah kan lak lai i na cungah dinnak le zumhtlak in ka um lai; dawtnak fek le zaangfahnak dong lomi in kan dawt lai i Bawipa cu na ka hngalh lai. ²⁰ Ka biakam kha ka zulh lai i nangmah cu keimah ta ah kan ser lai i nang zong nih na Bawipa ah na ka ser lai. ²¹ - ²² Khi tikah ka mi Israel mi an thlacamnak kha ka leh hna lai. Vawlei ah ruah ka surter lai i rawl le mitsur le oliv thei kha an chuah hna lai, tiah Bawipa nih a ti. ²³ Ram chungah khan ka mi kha fek tein ka umter hna lai i ka ṭhanchoter hna lai. "Dawt lomi" hna tiah timi hna cungah khan dawtnak ka ngei lai i "Ka mi an si lo," timi hna kha, "Ka mi an si," ka ti hna lai. Annih cu an pahnih in ka mi nan si ka ti hna lai i, Annih nih, "Kan Pathian na si," an ka ti lai.

¹ Bawipa nih a ka thawh i, "Bawipa keimah nih Israel mi hna cu pathian dang kha an bia hna nain le siasal pekchanhmi mitsur tlai car changreu thlum kha an duh nain ka dawt ṭhiamṭhiam ko hna bantukin, Va kal law midang nih an duhmi, va cung pa duh nu nu pakhat cu va daw tuah," tiah a ti. ² Cucaah ngun phar hleinga le barli homer pakhat le mitsur hang thawl khat in amah cu ka va cawk ṭhan i ³ ka thawh i, "Caan sau nawn tiang ka inn ah na um lai i hlawhhlangnu naa celh lai lo, aho he hmanh nu le va nan si lai lo, keimah he zong kan si lai lo. ⁴ Zeicaahtiah Israel mi cu caan sau nawn chung kha siangpahrang siseh, bawi siseh, raithawinak siseh, tung thiang siseh, siasal siseh, innchungkhar pathian si hna seh, ngei loin an um lai; ⁵ Sihmanhsehlaw cu hnuah cun Bawipa an Pathian le David an siangpahrang kha an kawl ṭhan hna lai i Caan donghnak ah cun Bawipa leiah khan a ṭhatnak ruangah ṭihzah ngaiin an i mer ṭhan lai," ka ti.

¹ Maw Israel, Bawipa bia cu thei tuah; Zeicahtiah hi rammi hna cungah hin Bawipa nih bia pakhat a ngei: Hi ram chungah hin pakhat le pakhat i zumhnak le pakhat le pakhat i bochannak le Pathian hngalhnak a um lo, ² Chiatser in biakamnak kha an tuah, sihmanhsehlaw an zul lo, an i that, an i ramh; va cung pa duhnak le zaang-ennak le i thahnak le i nawnnak lawng kha a si ko. ³ Cucaah ram cu ngaihchia in a um lai i a chung i a ummi vialte cu an lotlau dih lai i Anmah sinah cun ramlak saram hna le van i a zuangmi va hna zong an lotlau ve lai; Nga hmanh kha rili chungin an lo lai. ⁴ Bawipa nih aa thawh i, "Zapi kha ahohmanh nih sual phaw hna in a chimh zong chimhring hna hlah seh, Zeicahtiah sual phawt ka duhmi hna cu nanmah tlangbawi hi nan si. ⁵ Chun zan in nan palh lengmang ko i profet hna zong nih khan nanmah nakin zeihmanh a ṭha deuh in an tuah hlei lo. Nan nu Israel cu ka hrawh lai. ⁶ Ka mi hna nih keimah cu an ka hngalh duh lo caah an rawk. Nannih tlangbawi hna nih keimah hngalh kha nan duh ve lo i ka cawnpiaknak kha nan hlawt, Cucaah nanmah le nan fapale hna cu ka tlangbawi sinak khan kan hlawt hna. ⁷ Tlangbawi nan tam chin lengmang paoh ah ka cung i nan sualnak kha a tam chin lengmang ve. Upatnak nan hmuhmi cu ningzahnak ah ka canter lai. ⁸ Ka mi hna an sualnak kha rumnak ah nan hman i sual chin lengmang hna seh ti nan duh. ⁹ Zapi nih dantatnak ah hmuh dingmi kha tlangbawi hna cungah a tlung ve lai. Annih cu dan ka tat hna lai i ṭhat lonak an tuahmi ruangah khan ka lehrulh hna lai. ¹⁰ Annih nih an co awk a simi raithawinak sa kha an ei tikah an rawl a ṭam ṭhiamṭhiam ko lai. Tefa ṭha ngeihnak pathian kha an biak, sihmanhsehlaw keimah kha kaltak riangmang in pathian dang kha an zulh hna caah fa an ngei hlei lai lo," tiah a ti. ¹¹ Zu nih ka mi hna cu a molhter cang hna! ¹² Thingtan kha phuannak an hal hna i Funghreu nih khan hngalh an duhmi kha an chimh hna! Annih nih kei cu an ka hlawt cang; Nu hlawhhlangnu i aa cangmi bantukin annih cu pathian dang sinah khan an i pe cang. ¹³ Tlang cung i khuahrumbo ah khan rai an thawi i Thingkung a sang i a hnah a ṭha i a thladem a kaumi toiah khan zihmui an khangh. Cu ruangah cun nan fanule hna cu hlawhhlangnu ah an cang i Nan fapale nupi hna cu vacung in pa an i duh. ¹⁴ Sihmanhsehlaw hi ruangah hin annih cu dan ka tat hna lai lo, Zeicahtiah nanmah zong biakinn i hlawhhlangnu a ummi hna he nan kal ve ko i anmah he cun Baal sinah khan raithawinak nan pekchanh ve ko, Cuticun phungthluk bia i "Hngalhnak a baumi cu an rawk," tiah a um bantuk khan an rawk. ¹⁵ Nannih Israel mi cu keimah sinah zumhawktlak loin um hmanh u law Judah mi tu cu, cu bantukin si ve sawh hna hlah seh. Gilgal ah siseh, Bethel ah siseh, va kal in Pathian va bia hlah u; A nungmi Pathian min chalh in khika ah biakamnak va tuah hlah u. ¹⁶ Israel mi cu cawla bantukin a lung a ṭhawngmi an si. Cucaah zeitindah tuufa bantukin ramhnonak ah cun rawl ka pek khawh hna lai? ¹⁷ Israel mi cu siasal nih a molhter cang, amah um in um ko seh; ¹⁸ An zudin kha a dih in nu le pa sualnak kha heh tiah an tuah; upatnak nakkhan duh paoh tlon kha an duh deuh. ¹⁹ Thlichia choihtu in choih an si lai i an raithawinak ruangah khan an ning a zak lai.

¹ Nannih tlangbawi hna, hihi thei tuah u; Nannih Israel mi hna, hihi ngai tuah u. Nannih siangpahrang innchungkhar mi hna, ka bia hi i chingchiah tuah u. Nannih cu midang kha bia a ceihtu ding nan si, Sihmanhsehlaw biaceihnak kha nanmah cungah a tlung lai. Nannih cu Mizpah i chiahmi rap le Tabor tlang i chiahmi sur rap le ² Shittim i cawhmi khor thuk ah nan i cang cang; Sihmanhsehlaw nan dihlak in dan kan tat ko hna lai. ³ Israel cu zei bantuk mi dah a si ti kha ka hngalh ko, ka sinin aa thup kho lai lo. Amah cu ka sinah zumhawktlak loin khua a sa i mi hna kha thurhhnawmh an si cang. ⁴ Thil ṭhalo an tuahmi nih khan Pathian lei i an kirnak ding lam kha a phih; Siasal biaknak lungthin nih khan a tei hna i Bawipa kha zei ah an rel lo. ⁵ Israel sual a phawtu cu amah aa porhlawtnak lila kha a si ko, An sualnak nih khan a rilhter hna i a tlukter hna; Cun Judah mi zong cu an sinah khan an tlu ve. ⁶ Bawipa sin i raithawi awk caah an tuu hna le an caw hna kha i put hna hmanh seh law zeihmanh san a tlai lo; A kaltak cang hna caah amah cu an hmu kho lo. ⁷ Bawipa kha an rawi i a sinah zumhawktlak in an um lo; An fale hna cu amah ta an si lo; Cucaah an ram cu a rawk lai. ⁸ Gibeah ah muko kha tum u, tuuki kha Ramah ah tum u, Beth-aven ah raltuknak au khan au u law: "Benjamin, nangmah sinah kan ṭang!" tiah ti u. ⁹ Hi thlen ṭhan khawh lomi rawhnak hi Israel mi phun cung i tlung dingin ka thanh cang; Dantat ni ah Efraim cu a ṭiao cikcek lai. ¹⁰ Bawipa nih aa thawh i, "Judah mi nih an unau hna an ram kha an fir caah ka thin a hung i an cungah dantatnak cu tilian bantukin ka tlunter lai. ¹¹ Israel cu harnak chungah a um cang. A bawm kho ṭung lomi kha bawmh hal awkah a fuh lengmang hna caah, Amah ta a si hrimhrim komi ram kha a sung cang. ¹² Cucaah Israel cungah khan rawhnak ka tlunter lai i Judah mi cungah khan lohtlaunak ka tlunter lai. ¹³ Israel nih zeitluk in dah ka zawt ti kha aa hngalh i Judah nih a hma kha aa hmuh tikah, Israel cu siangpahrang ngan kha bawmhnak va hal awkah Assiria ah a kal, Sihmanhsehlaw a damter kho hna lo i an hma zong a damter kho lo. ¹⁴ Israel mi le Judah mi cu a ṭhawngmi chiandeih bantukin ka zuanhnawh hna lai; Keimah hrimhrim nih ka thleh ka baoh dih hna lai i ka kaltak hna lai. Ka hnuh hna lai i ahohmanh nih an chanh kho hna lai lo. ¹⁵ Ka mi hna cu an sualnak ruangah sifah an in i keimah kha an ka kawl hlantiang cuticun ka kaltak ko hna lai. Sifahnak an in ruangah keimah kha an hei ka kawl phum hmanh hnga maw," tiah a ti.

¹ Ra u law Bawipa sinah kir cang u sih; Zeicahtiah a kan thlehbaoh dih cang i atu cu a kan damter cang lai, a kan tuk cang i atu cu kan hma kha a kan menpiak cang lai; ² Amah hmaiah kan um khawh nakhnga Ni hnih hnuah cun a kan nunter ṭhan lai i A ni thum ni ah hmasa kan sining ah khan a kan chiah ṭhan lai. ³ Bawipa hngalh cu i zuam u sih, Khua a dei hrimhrim lai bantukin, kan sinah a ra hrimhrim lai; Vawlei a hnawntertu ding ṭhal ruah a sur hrimhrim lai bantukin kan sinah a ra hrimhrim lai. ⁴ Maw Efraim, zeitindah kan tuah lai? Maw Judah zeitindah kan tuah lai? Na dawtnak hi zinglei minmei bantuk, a ṭian zaumi dap bantuk ceo a si. ⁵ Cucaah nan cung i biaceihnak bia le rawhralnak bia a chimtu ka profet cu kan thlahhnawh hna. Ka mi nih tuah hna seh tiah kan duhmi hna cu a fiang i a tliang ko: ⁶ Ka duh bikmi cu fek tein nan ka dawt hi pei a si cu, nan raithawinak hi a si ṭung lo, Ka mi nih nan ka hngalh hi pei a si cu, khanghthawinak nan ka pekchanh hi a si ṭung lo. ⁷ Adam ah ka biakamnak kha an hrawh, Khika ah an ka hlen. ⁸ Gilead cu thil ṭhalo tuahtu hna umnak hmun a si, thisen sul nih a langhter. ⁹ Damiah nih mi an bawh hna bantukin, Shekhem khua lei i a kalmi hna kha thah awkah tlangbawi hna cu an i pum. An tuahmi cu a ṭhalo tuk hringhran. ¹⁰ Israel hmunthiang ah thil ṭhalo ngaingai pakhat ka hmuh: Khika ah Efraim cu hlawh a hlang i Israel cu amah le amah aa thurhhnawmh. ¹¹ Cun nangmah ca zongah, maw Judah, biaceihnak caan kha a ra lio.

¹ Ka mi hna cu an van ṭhatnak kha pek ṭhan ka duh hna i Israel mi cu damter ka duh hna tikah khan, A hung langmi cu Efraim ṭhat lonak lawnglawng le Samaria chiathrutnak lawnglawng kha a si ko, Mi kha an hlen hna, thil kha fir awkah mi inn kha an baoh i lam i a kalmi kha an thil an chuh hna. ² Thil ṭhalo an tuahmi vialte kha ka hngalh camcin ko ti kha a ruah awk an hngal lo; An sualnak nih khan a kulh hna i ka hmaika khan an luat kho lo. ³ Siangpahrang cu an ṭhat lonak khan a lung an awih i bawi hna cu an mi hlenthiamnak khan an lung an lawmhter hna, ⁴ An dihlak in va cung in pa aa duhmi an si. Changreu sertu nih changreu rawhnak ah mei a tih i changvut cet a nawnmi kha a thawh lioah mei cu tawngtham lo tein a um caah changreu rawhnak cu a lin ngaingai, cu bantukin a linmi changreu rawhnak bantuk cu an si. ⁵ An siangpahrang puai ni ah bawi pawl cu zu an ri dih i Miruamkai rual hna sinah cun amah zong cu aa tel ve. ⁶ Annih an lung cu changreu rawhnak linh bangin a lin. Zan khuadei dai tein an i dinh tikah an thinhunnak cu a hngilh in aa hngilh, Sihmanhsehlaw zinglei ah cun mei alh in a alh ṭhan. ⁷ Changreu rawhnak bantukin linsa in an um i an uktu bawi hna kha an thah hna. An siangpahrang cu pakhat hnu pakhat in an nawn hna, Sihmanhsehlaw ahohmanh nih keimah sinah khan thla an cam lo. ⁸ Efraim le ramdangmi an i cawh hi ngaihchia a si, Efraim cu a cheu lawng a hminmi changreu hlum bantuk a si cang. ⁹ Ramdangmi kha an i bochan hna caah anmah thazang kha a ṭum, sihmanhsehlaw cucu an hngal lo; An sam a par dih cang hmanh kha an hngal lo. ¹⁰ Israel cu aa porhlawtnak lila nih khan sual a phawt ko, Sihmanhsehlaw Bawipa an Pathian sin i kir ṭhan cu an duh lo; Hi bantukin thil si ko hmanh seh law, amah kawl kha an duh lo. ¹¹ Efraim hi laileng hrutte a si, Atu ah Izipt kha a vun auh, atu lila ah Assiria leiah khan aa mer ṭhan. ¹² Khuazei lei i an i mer hmanh ah ka sur in ka khuh hna lai i A zuang liomi vaa tlaih bantukin ka tlaih hna lai; An i pum ti ka theih cangka, sal ah ka tlaih hna lai. ¹³ Ka sinin an tlau cang caah an cungah harnak tlung ko seh. Keimah kha an ka doh caah rawhralnak nih tlunhnawh ko hna seh. Kei nih cun chuah ka duh ko hna, sihmanhsehlaw keimah kong ah lih an chim. ¹⁴ Ka sin i thla an cammi hi lungtak in an si lo; An ihkhun cungah khan an kiao an ai men i a si ko, Rawl le mitsur hang thar caah khan nam in an i at, Sihmanhsehlaw keimah kha an ka doh. ¹⁵ Kei nih cun ka bawmh hna i ṭhawnnak kut ka pe ko hna nain, Keimah dohnak ding khua kha an khan. ¹⁶ Keimah kha santlailo pathian leiah an ka mertak. Liza a dormi bantukin santlailo an si. An hruaitu hna kha porhlaw ngaiin bia an chim caah vainam in an thi lai i Izipt ram nih an nihsawh hna lai.

¹ Muko kha tum tuah, Bawipa hmunthiang cungah ral cu langta bantukin an rung zuang. Ka mi nih amah he ka sermi ka biakamnak cu an hrawh i Ka cawnpiaknak kha an doh. ² Annih nih keimah cu, kan Pathian na si an ka ti i annih cu, na mi kan si an ti, ³ Sihmanhsehlaw a ṭhami thil kha an duh lo. Hi ruangah hin an ral nih an dawi hna lai. ⁴ Siangpahrang kha an ser hna, sihmanhsehlaw keimah duhning in a si lo, bawi kha an chiah hna, Sihmanhsehlaw keimah hngalh loin an tuah; Annih nih an sui le an ngun in siasal kha an i ser hna. ⁵ Nan cawfa pathian cu an thu, maw Samaria; Ka thinhunnak cu an cungah a alh in a alh. Suallo tein an nun khi zeitik riamruam ah khin dik a hei si te lai. ⁶ Hi cawtum hi zei bantuk pathian dah a si ee? Zungthiam i an sermi pei a si ko hi, pathian a si ṭung lo; Samaria cawfa cu kuai cikcek in den a si lai. ⁷ Israel nih thli a tuh i phuchim a zun; A dirmi rawl kung vui a ngei lomi nih rawl fang zeihmanh an chuahpi lo. An chuahpi hmanh ah an chuahpimi cu ramdangmi nih an dolh dih lai. ⁸ Atu cu Israel hi dolh a si cang, miphun hna lakah a lo cang, man ngei lo a si cang. ⁹ Ramlak i a lemi laa bantukin an lung a ṭhawng i anmah tining lawngin kal an duh. Assiria kha bawmhnak va hal awkah an kal. Israel mi nih hin huhphenhnak hmuh awkah, miphun dang sinah khan an i zuar cang. ¹⁰ Sihmanhsehlaw ka pumh hna lai i dan ka tat hna lai. Assiria siangpahrang nih a hrem hna tikah an i lawng len te lai. ¹¹ Sual thianhnak caah tiin Israel mi nih biakṭheng tam deuh an ngeih deuh paoh ah, sualnak hmun kha a karh chin lengmang ve a si ko! ¹² Cawnpiaknak kha rel cawk loin ca in ka ṭialpiak ko hna nain zeihmanh ah an rel hna lo. ¹³ Annih nih raithawinak tuah le sa ei kha an duh ngaingai, Sihmanhsehlaw Bawipa keimah cu an cungah ka lung a tling lo. An sualnak kha ka philh lai lo i dan ka tat hna lai; Izipt ram ah ka kalter ṭhan hna lai, asilole, Assiria ram ah rawl thianglo kha an ei lai. ¹⁴ Israel nih inn ṭhaṭha kha a sak hna, sihmanhsehlaw a Sertu kha a philh cang. Judah nih kulhnak ralhau a ngeimi a khua kha a karhter luaimai hna, Sihmanhsehlaw a khua cu mei in ka duah hna lai i a inn ṭhaṭha hna cu a kangh dih hna lai.

¹ Israel mi hna, lawkih mi bantukin puai nan tuahmi hi ngol u. Zeicahtiah nan Pathian cu nan hlawt i a cungah khan zumhawktlak loin nan um. Nan ram chung dihlak ah hin hlawhhlangnu bantukin Baal sinah nan i zuar i an phalhmi hna rawl kha nan i lawmhpi. ² Sihmanhsehlaw rawl siseh, oliv chiti siseh a za in nan ngei lai lo i mitsur hang kha a um lai lo. ³ Bawipa ram chungah hin Israel mi hi khua nan sa kho lai lo i Izipt ram ah khan nan kir ṭhan lai, asilole Assiria ram ah rawl thiang lo kha nan ei lai. ⁴ Midang ram ah cun Bawipa sinah mitsur hang thawinak kha an pechan kho lai lo, an raithawinak zong kha an pe kho lai lo. An raithawinak paoh kha ruakhngah camceh nih a thurhhnawmhtermi rawl bantukin an si lai. An rawl cu rawlṭam damnak ca lawngah a si lai, Bawipa biaknak inn ah kalpi a si lai lo. ⁵ Cun Bawipa puai ni, khual an i telnak puai ni kha a phanh tikah zeidah an tuah lai? ⁶ Rawhralnak kha an luat hmanh ah Izipt nih khan a rak i fimhlawm lai i Memfis cu an thlan a si lai; Rili chung thetse tlang nih khan an lawng cu a hrawh hna lai, An ram ah khan belh a kho lai i an umnak hmun ah khan hling an kho lai. ⁷ Dantatnak ni cu a phan cang, phuhlamnak ni cu a phan cang; Israel cu ṭhumh a si cang. Khi tikah nan sualnak a nganmi nih khan profet cu mihrut ah a ser hna lai i hmutu cu mimolh ah a ser hna lai. ⁸ Pathian nih a mi Israel mi hna kha ralrinnak bia chimh awkah keimah cu profet in a ka kalter, Sihmanhsehlaw ka kalnak kip ah va bantukin foih kha nan ka zuam. Pathian ram chung hrimhrim ah hin mi kha profet i a rel hna cu an si. ⁹ Annih nih an tuahmi ah khan an sual tuk hringhran ko, Gibeah i a rak si bantuk te kha a si ko. Pathian nih an sualnak kha a philh lai lo i dan a tat hna lai. ¹⁰ Bawipa nih aa thawh i, "Israel hi ka rak hmuh terte ah cun thetse ram i a khomi mitsur thei bantuk a rak si. Nan pupa hna ka rak hmuh hmasa terte ah hin theipi a hung tlai hmasa bikmi hna hmuh bantuk khi a rak si. Sihmanhsehlaw Baal-Peor an phak tikah Baal biak hram kha an thawk i an duhmi an siasal ka huat tluk khan anmah cu ka huat hna. ¹¹ Israel sunparnak cu va bangin a zuang lai i Annih nih fa an hring ti lai lo; Pumlawnglo in a ummi nu an um ti lai lo i fa pawi zong an um ti lai lo. ¹² Annih nih fa an ngeih hmanh ah ka lakpiak hna lai i pakhat hmanh ka nganh hna lai lo. Hi mi hi ka kaltak tik hna ah an cungah thil ṭhalo ngaingai a tlung lai. ¹³ Chiandeih fano cu kah awk ding lawngah an hung chuah bangin, Efraim nih a fale hna cu sam awk ding caah a chuahpi hna lai. ¹⁴ Pe ko hna, maw Bawipa, zei cu dah pe hna tiah kan nawl lai? Fa a hrulhter lengmangmi nau-inn le a carmi hnuk kha pe ko hna. ¹⁵ Ṭhat lonak an tuahmi vialte kha Gilgal in aa thawk, Huat hram ka thawh hnanak cu khika khan a si. Ṭhat lonak an tuahmi ruangah khan ka ram chungin ka dawi hna lai. Annih cu ka daw ti hna lai lo, an hruaitu hna nih an dihlak in an ka ral. ¹⁶ Israel mi cu a hram a car i thei a tlai ti lomi thingkung bantuk an si. Fa an ngei lai lo, an ngeih hmanh ah an dawt ngaingaimi an fale hna cu ka thah hna lai. ¹⁷ Annih cu ka Pathian nih a hlawt hna lai, Zeicahtiah a bia kha an ngai lo, Annih cu miphun hna lakah mivakvai an si lai.

¹ Israel mi cu tlai a duh ngaimi phun mitsur ruang bantuk an si, A thei tam deuh a hung tlai paoh ah biakṭheng zong kha tam deuh an sak ve, An vawlei nih tam deuh a chuahter paoh ah an biakmi tung thiang kha dawh deuh in an ser ve hna. ² An lungthin a sualmi, hi minung hna cu, an sual ruangah an tuar awk a si. Pathian hrimhrim nih an biakṭheng cu a den dih hna lai i an biakmi an tung thiang cu a hau dih hna lai. ³ Annih nih cun an i thawh lai i, "Bawipa kan ṭih lo caah siangpahrang kan ngei lo; Asinain siangpahrang nih cun zei tal a kan tuahpiak kho hnga maw? an ti lai. ⁴ A chim lawng kha an chim lengmang, Sullam ngei loin chiat kha an ser i biakamnak kha an tuah i Pakhat le pakhat taza i cuainak kha sivai a ngeimi belh leileh rinkhuar ah an khoh bantukin an kho. ⁵ Beth-aven i a ummi cawfa-pathian ruangah khan Samaria mi hna cu a ther in an ther; An cawfa-pathian cu sal ah an kalpi caah a biami hna cu an ṭap i tlangbawi hna cu an ai, An sunparnak a simi an siasal ruangah cun mi cu lungrethei in an um. ⁶ Siasal cu Assiria ah kalpi a si lai i Uktu Siangpahrang ngan cu laksawng ah va ṭhenh a si lai; Efraim cu ningzahnak nih a phak lai i Israel mi nih an nawl ngaih lonak ningzahnak kha an in lai. ⁷ Samaria le a siangpahrang cu ti cung i aa vuanmi thing pelpawi bantukin fenh an si; ⁸ Israel mi nih sualnak an tuahnak hmunthiang hna cu hrawh an si lai, Aven i a ummi khuahrumbo hna cu hloh an si lai; An biakṭheng hna cu hling le belh nih a zual hna lai i Tlang cu, "Kan nenh ko u," an ti hna lai i fing cu "Kan tlak ko u," an ti hna lai. ⁹ Gibeah i sualnak an rak tuahnak thawk khan ka cung i sualnak tuah hi Israel mi nih an ngol rih lo. Cucaah ral nih Gibeah ah a phak hna lai. ¹⁰ Hi misual miphun hi ka doh hna lai i dan ka tat hna lai. Anmah doh awkah miphun tampi kha an ṭang ṭi lai i an sualnak a tammi ruangah hin dantatnak an in lai. ¹¹ Israel cu ṭha tein cawnpiak cangmi, facang cil zong a duh cangmi cawla bantuk a si; Sihmanhsehlaw aa dawhmi a hngawng ah khan thuantum khinh i leithuannak thingthluan tu kha ṭemchih awkah ka ruah cang; Judah cu leithuannak kha ka hnuhter i Israel cu leitlang dennak kha ka hnuhter. ¹² Annih cu ka thawh hna i, "Nan caah dinnak kha i tuh u law keimah lei i nan ṭannak nih a chuahpimi thluachuahnak kha zun tuah u. Nan dinhtermi vawlei kha ṭuan cang hna u, Zeicahtiah atu cu Bawipa keimah leiah i mer caan a si cang i ka ra lai i thluachuahnak kan pek hna lai," tiah ka ti. ¹³ Sihmanhsehlaw nannih nih ṭhat lonak tu kha nan tuh i a theitlai kha nan zun. Nan lih chimmi nih a chuahtermi theitlai kha nan ei cang. Nannih nih nan rangleng hna le nan ralkap hna kha nan i bochan caah, ¹⁴ Raltuknak cu nan mi hna cungah a tlung lai i nan ralhau vialte cu an rawk dih lai. Shalman siangpahrang nih Beth-arbel a rak hrawh i Nu le ngakchia a rak thah dih hna ni bantuk kha a si lai. ¹⁵ Bethel khuami hna, nan tuahmi thil a ṭha lomi ruangah hihi nan cung i a tlung dingmi cu a si; Khua a dei hrimhrim lai bantukin Israel siangpahrang zong cu hloh a si hrimhrim ve lai.

¹ Israel cu ngakchia a si lio in ka dawt; Ka fapa cu Izipt ram chungin chuah awkah ka auh; ² Sihmanhsehlaw ka kawh deuh hna paoh ah an ka hlat chin lengmang Baal sinah khan raithawinak an tuah i serchom siasal sinah khan rimhmui kha an khangh. ³ Efraim kal a rak cawnpiaktu kha keimah ka si. Kut in a rak pomtu hna kha keimah ka si; ⁴ Sihmanhsehlaw hruainak hri in ka khih hna i dawtnak in ka hruai hna kha an hngal lo. Ngakchia bantukin ka bel ah ka hun cawi hna i rawl khaih awkah ka kunhnawh hna. ⁵ Keimah lei i kir ṭhan cu an duh lo caah Izipt ram ah cun pei dik an kal ṭhan ko lai i Assiria mi cu an siangpahrang a si ko lai. ⁶ Ral nih an khua kha an lak dih hna lai i khua kutka hrenhnak thingtluan hna cu an khiah dih hna lai. Lungthin cheuhnak ṭhalo kha ka mi nih an zulh caah ral nih cun an hrawh dih hna lai. ⁷ Keimah cu an ka mertak cang i cu ruangah a chuakmi thil kha an hrial kho ti lai lo, An cung i an i khinhmi seihnam rit ruangah khan an ai len lai, sihmanhsehlaw ahohmanh nih an ṭhialpiak kho hna lai lo. ⁸ Zeitindah kan hlawt khawh lai, Efraim? Zeitindah kan thlah khawh lai, Israel? Admah ka rak hrawh bantuk khan kan hrawh lai maw? Zeboiim cung i ka rak tuah bantuk khan na cungah ka tuah lai maw? Ka tuah kho lai lo, ka chungah ka lung cu aa thleng cang i ka ngaihchiatnak cu a alh in a alh cang. ⁹ Ka thinhun in kan hrawk lai lo, Israel cu ka hrawk ṭhan lai lo. Zeicahtiah kei cu Pathian ka si, minung ka si lo. A Thiang Mi Keimah cu nan sin i a ummi hi ka si, Nan sinah thinhun in ka ra lai lo. ¹⁰ An ral cu chiandeih bantukin ka awnhhnawh hna lai i ka mi nih cun an ka zulh lai; Nitlaklei in khulrang in ka sinah an ra lai. ¹¹ Khulrang in an ra lai, va zuan in Izipt ram in an hung zuang lai i laileng bantukin Assiria ram in an rung zuang lai; Cun an inn cio ah khan khua ka sakter hna lai. Hihi Bawipa bia hrimhrim a si. ¹² Efraim nih hlennak bia in a ka kulh i Israel chungkhar hna nih dehnak bia in an ka kulh; Cun Judah cu Pathian kha zulh duh loin aa chang i, A thiang tiah a timi siasal kha an biak ko rih hna.

¹ Efraim cu a tuurun thli menmen a simi kha a khal i Amah cu chun nitlak in nichuahlei thil a dawi lengmangmi kha a si; Assiria he khan biakamnak kha a va ser i Izipt ram ah khan laksawng chiti kha a vun phorh. ² Bawipa nih Judah cungah bia pakhat a ngei i Jakob cu a ziaza ruangah khan dantat aa tim; thil ṭhalo a tuahmi kha a lehrulh lai. ³ A nu paw chung hmanh ah khan a unau kha a chawhkanh i Upa a hung si tikah Pathian kha a zuam. ⁴ Vancungmi he khan an i pai i a tei. Jakob cu a ṭap i thluachuahnak ka pe tiah a hal. Khi tikah Pathian cu Jakob sinah cun Bethel ah khan a ra i amah he cun an i chawn. ⁵ Cucu Bawipa, Ralkapbu Pathian kha a si i a min cu Bawipa a si. ⁶ Cucaah atu cu Jakob tefa hna, nan Pathian cu i bochan u law amah sinah khan kir tuah u. Amah sinah khan zumhawktlak in um u law ding tein um ko u, Cun nan Pathian nih rian a ṭuan lai kha thinfual in hngak ko u. ⁷ Israel mi hi Kanaan mi bantukin mihrokhrawl an si, Cuai deu kha an hman hna i mihlen kha an duh. ⁸ Asinain annih nih cun an i thawh i, Kannih cu kan rum cang, chawva tampi kan ngei cang; Dinlonak in an rum tiah ahohmanh nih an kan ti kho lai lo, an ti. ⁹ Sihmanhsehlaw Izipt ram in an chuahpitu hna nan Pathian cu Bawipa hi ka si. Thetse ram i nan um lio i nan sin i ka rat tikah puan thlam chungah nan um bantuk khan, ṭhal thlam chungah kan umter ṭhan ko hna lai. ¹⁰ Profet hna sinah cun bia ka chim i langhnak tampi ka pek hna. Atu cu profet hna sin cun rawhralnak kha ka tlunter lai. ¹¹ Gilead ah siasal kha an biak hna, cu a biatu hna cu an thi lai. Gilgal ah cawtum kha rai ah an thawi hna, cucaah biakṭheng hna cu lo lak lungpon ah an cang lai. ¹² Kan pu Jakob cu Aram ram ah khan a rak zam i Khika ah nupi ṭhitnak caah mi tuu kha a rak khal. ¹³ Bawipa nih Israel mi kha Izipt ram chung i sal i an cannak in chuah awkah profet pakhat kha a thlah; Cun profet pakhat in a zohkhenh hna. ¹⁴ Israel mi nih Bawipa kha fak piin a thin an hunter; Annih cu an sualnak ruangah khan thihnak hmuh awk an tlak i Pathian nih a ngaithiam hna lai lo. Bawipa nih a cung i ningzahnak an tluntermi ruangah khan dan a tat hna lai.

¹ Efraim phun mi nih bia an chim tikah midang nih khan an rak ṭih tawn hna; Israel mi a dang hna nih khan an rak zohcho hna. Sihmanhsehlaw annih nih Baal an biak ruangah khan an sual i hi ruangah hin an thi lai. ² Cuhleiah atu zongah hin an sual chin lengmang ko; ukang thir khan siasal an i ser. An ngun in siasal cu an ser hna i annih cu minung ruahnak nih a suaichommi hna le minung kut nih a serchommi hna an si. Cun an i thawh i, "Annih cu raithawinak pechan hna u," an ti. Zeitindah mi nih siasal cu an hnamh khawh hna lai? Cawtum mui a lomi siasal hna cu? ³ Cucaah cu mi hna cu zinglei minmei bantukin an ṭian lai i, A lo zaumi dap bantukin an lo lai. Annih cu phuhri in thli nih a choihmi capawl bantuk an si lai i, Meikhu chuahnak in a chuakmi meikhu bantuk an si lai. ⁴ Sihmanhsehlaw Izipt ram in an chuahpitu hna nan Pathian Bawipa kha ka si. Kha lioah khan cun keimah dah ti lo cu pathian dang zeihmanh nan hngalhmi hna an um lo. Keimah lawnglawng kha nan khamhtu ka rak si ko. ⁵ Ram car, thetse ram ah khan kan zohkhenh hna. ⁶ Sihmanhsehlaw ram ṭha chungah khan nan vung luh tikah nan paw a khim, nan thi a hnim i nan i porhlaw i nan ka philh. ⁷ Cucaah nannih cu chiandeih bantukin kan zuanhnawh hna lai, Pawlai bantukin nan lam in kan bawh hna lai. ⁸ A fa chuhmi vompi bantukin nannih cu kan zuanhnawh hna lai i kan thleh kan baoh dih hna lai. Chiandeih bantukin a hmunte ah khan kan ei dih hna lai i, Sahrang bantukin kan thleh cikcek hna lai. ⁹ Nannih Israel mi, nannih cu kan hrawh hna lai, aho nih dah an in bawmh khawh hna lai? ¹⁰ Siangpahrang kan pe, hruaitu kan pe, tiah nan ka hal. Sihmanhsehlaw cu hna cu khuazei ah dah an um kun? ¹¹ Ka thinhun in siangpahrang cu kan pek hna, ka thinlinh in anmah cu ka lak ṭhan hna. ¹² Efraim sualnak cu cazual ah ṭem chih a si ko, A ṭhat lonak hna cu cazin chungah ṭial an si ko. ¹³ Israel nih hin nun khawh nakding caah caan ṭha a ngei ko, Sihmanhsehlaw a hrut tuk i cu caan cu aa lak lo. Amah cu a hung chuak dengmangmi naute, a nu paw chungin chuah a duh lomi bantuk khi a si. ¹⁴ Hi mi hna hi Sheol chungin ka khamh hna lai lo, Thihnak ṭhawnnak chung zongin ka chuah hna lai lo. Maw thihnak, na rai hna he cun ra tuah! Sheol, hrawh khawhnak ṭhawnnak na ngeihmi he cun ra tuah! Hi mi hna hi an cungah zaangfahnak zeihmanh ka ngei lo. ¹⁵ Efraim cu phaikung bantukin hno hluahmah hmanh seh law Nichuahlei thli a sami kha thetse ram lei in ka run hranter lai i an cerh le an tiput vialte cu an car dih lai. A sungmi thil vialte cu a lohpi dih hna lai. ¹⁶ Samaria nih a Pathian kha a doh caah a ṭiao dih lai; A mi hna cu ral kut in an thi lai i a ngakchia no tete hna cu vawlei ah tengh an si lai, Fapawi liomi an nule hna cu an paw thler dih an si lai.

¹ Maw Israel, Bawipa na Pathian sinah cun kir ṭhan tuah; Na sualnak nih khan an rilhter cang i an tlukter cang. ² Bawipa sinah cun kir law hihi na thlacamnak cu siter ko: "Kan sualnak vialte cu kan ngaithiam law kan thlacamnak cu kan cohlanpiak tuah, Cun kannih nih bia kan in kam cang bantukin kan in thangṭhat lai," ti tuah. ³ Assiria nih a kan khamh kho bal lai lo, raltuknak rang nih a kan huppheng kho lai lo; Kannih nih kanmah kut in kan sermi siasal kha, "Nannih cu kan pathian nan si," tiah kan ti ṭhan ti hna lai lo. Bawipa, bawmtu dang a ngei lomi cu na zaangfah tawn hna tiin, kan sualnak kha kan i phuang. ⁴ An zuanzamnak hi keimah nih ka damter lai i Ka lung chung taktak in ka dawt hna lai; An cung i ka thinhunnak cu a dam cang. ⁵ Israel caah cun dap bantuk ka si lai i lili pangpar bantukin a par lai. Phaizawng kung bantukin hram a thla lai i ⁶ a nge nono kha an corh hluahmah lai; Oliv thing bantukin aa dawh lai i Lebanon tlang bantukin a rim a hmui lai. ⁷ Israel cu ka thladem tangah khua a sa ṭhan lai i rawl kha tam piin an cin lai; Mitsur ruang bantukin an ṭhang hluahmah lai i Lebanon mitsur hang bantukin an min a thang lai. ⁸ Israel mi nih siasal cu zei ah dah an i tuah ti hna lai? Ka chim cang i ka fehter cang. Cucu hihi a si: Nanmah dornak an petu hna farkung cu keimah ka si; Thluachuahnak nan hmuhmi vialte a hram cu keimah ka si. ⁹ A fimmi nih cun hika i aa ṭialmi hi i hngalh hna seh law an lungchung in i cinken hna seh. Bawipa lam cu lamding an si i miding mi nih cun cu lam cu an zulh hna, sihmanhsehlaw misual mi cu an ril i an tlu.