HEBRU

HEBRU

¹ Hlan ah cun Pathian nih kan pupa hna sin i bia a chim tikah profet kha a rak hman hna i a cheuchum tete le phun dangdang in a chimning cu a rak si. ² Sihmanhsehlaw atu kan chan, chan hmanung bik a simi chan ah hin cun, kan sinah a Fapa in a bia cu a chim. Amah thawng cun Pathian nih van le vawlei vialte kha a ser hna i amah cu Pathian nih a donghnak i zeizong vialte uktu ding i a thimmi cu a si. ³ Amah cu Pathian sunparnak in a ceu i Pathian he aa lo taktakmi kha a si; cun van le vawlei kha, ṭhawnnak a ngeimi a bia in a domhtlaih hna. Minung cu an sualnak kha a thianhpiak dih hna hnu in vancung ah khin Lianngan Bik Pathian orhlei kamah a ṭhu. ⁴ Pathian nih a Fapa cu vancungmi hna a pekmi nakin a ngan deuhmi min a pek bantukin, vancungmi hna nak ngan deuh ah a ser. ⁵ Pathian nih a vancungmi pawl cu ahohmanh, "Nangmah cu ka Fapa na si, nihin ah na Pa ah ka cang," a ti bal hna lo. Cu hleiah, "Keimah cu a Pa ka si lai i amah cu ka Fapa a si lai," ti zongah a ti bal fawn hna lo. ⁶ Pathian nih a fater cu vawlei cung i a thlah tikah, "Pathian vancungmi vialte nih amah cu an biak awk a si," a ti. ⁷ Cun Pathian nih vancungmi pawl kong ah cun, "Pathian nih a vancungmi hna cu thlitu ah a ser hna i a rianṭuantu hna cu meizik ah a ser hna," tiah a chim. ⁸ Sihmanhsehlaw a Fapa tu cu, "Maw Pathian, na bawiṭhutdan cu zungzal in zungzal tiang a hmun lai: Na pennak cu dinnak in na uk. ⁹ Ahmaanmi thil cu na duh i ahmaan lomi thil cu na huat; Cucaah cun Pathian, na Pathian nih cun an thim i, Na hawile hna nih an hmuhmi nakin a ngan deuh suaumaumi upatnak lunglawmhnak kha aan pek," tiah a ti. ¹⁰ Cun, "Bawipa, nangmah nih vawlei cu ser hram na thawk i van khi nangmah kut nih a sermi an si. ¹¹ Annih cu an lo dih lai, sihmanhsehlaw nang cu na hmun lai; puan bangin an hnawh dih lai. ¹² Angki bangin na bil hna lai i puan bangin an i thleng dih lai. Sihmanhsehlaw nang cu a zungzal in nangmah ningte na si ko i na tar bal lo," tiah a ti rih fawn. ¹³ Pathian nih a vancungmi kha, "Na ral cu na ke tangah ka chiah hna hlan tiang, Ka orhlei kamah hin ṭhu tuah," tiah ahohmanh a ti bal hna lo. ¹⁴ A si ahcun vancungmi cu ahodah an si kun? Vancungmi cu Pathian rian a ṭuantu thlarau, khamhnak a hmu hngami bawmh awkah Pathian nih a thlahmi kha an si.

¹ Cucaah a ping i kan kal sual nakhnga lo kan theihmi biatak kha fek chinchin in kan i tlaih awk a si. ² Vancungmi hna pekmi bia hmanh kha ahmaan ti a si i a zul lomi le a ngai lomi cu dantatnak hmuh awk an i tlakmi kha pek an si ahcun, ³ kannih nih khamhnak hi tluk a nganmi hi zeirello in kan um ahcun, zeitluk in dah dantatnak cu kan luat lo chinchin lai? Hi khamhnak cu a hmasa bik ah Bawipa hrimhrim nih khan a thanh i a theimi hna nih khan a thanhmi cu ahmaan tiah an kan chimh. ⁴ Cu pinah annih nih tehte an khaanmi kha ahmaan tinak ah Pathian nih hmelchunhnak le khuaruahharnak le a ṭhawnnak in tuahmi thil phunphun kha a tuah i Thiang Thlarau laksawng kha a duhning in a phawt hna. ⁵ Pathian nih ser a rak i timhmi vawlei uktu dingah khan vancungmi cu a chia hna lo, atu i kan chimmi hi, cu vawlei kong cu a si. ⁶ Sihmanhsehlaw Cathiang hmun khat ka ah, "Pathian, minung hi zeidah a si i a kong hi na ruah? Minung hi zeidah a si i na hnakkar ah na tenh? ⁷ Caan tawite chung cu vancungmi hna nak niam deuh ah na ser taktak; sunparnak le upatnak kha na chinh i, ⁸ Zeizong vialte uktu ah na ser," tiin a um bang khan, a si lehlam. Pathian nih, minung cu, "zeizong vialte uktu" ah a ser ti a si; zeizong vialte timi chungah hin thil vialte an i tel dih. Sihmanhsehlaw minung nih zeizong vialte a uk lo ti cu kan hmuh ko. Cucaah cun a sullam zeidah a si hnga? ⁹ A sullam cu Jesuh ah khan kan hmuh. Caan tawite chung cu vancungmi nak niam deuh ah khan a ser taktak i cucu Pathian vel thawngin mi vialte kan ca i a thihnak ding caah khan a si. Cun thihnak a inmi ruangah khan atu cu sunparnak le upatnak kha luchin ah chinh a si cang ti kha kan hmuh. ¹⁰ Zeizong vialte a ser i a zohkhenhtu Pathian nih, a sunparnak i fa tampi phakter awkah, Jesuh cu harnak innak in mi tling ah a ser cu aa tlakmi thil hrimhrim a si, zeicahtiah Jesuh cu khamhnak ah a phakpitu hna a si. ¹¹ Minung cu an sualnak kha a thianhpiak hna; minung sualnak a thianhtu le an sualnak a thianhpiakmi hna minung cu, an bu hnih in, an Pa cu aa khat ko. Cu ruangah cun Jesuh nih ka unau hna ti i kawh kha a ning a zak lo. ¹² Amah nih, "Pathian, ka unau hna sinah na kong cu ka chim lai, Aa pummi an dihlak hmaiah nangmah cu kan thangṭhat lai," a ti bang khan a si. ¹³ Cun, "Pathian cu kaa bochan," tiah a ti i, "Pathian nih a ka pekmi ngakchia hna sinah hika ah ka um," ti zongah a ti fawn. ¹⁴ Cun ngakchia tiah a timi hna cu, thi le sa in a nungmi minung an si bantukin, Jesuh zong cu anmah bantuk ah a run i cang i an sining kha aa hrawm ve. Cu bantukin a si cu, thihnak cung i nawl a ngeitu Khuachia kha, a thihnak thawng cun a hrawh nakhnga le ¹⁵ thihnak an ṭih ruang i an nun chung vialte sal bantukin khua a sami hna kha a luatter hna nakhnga caah a si. ¹⁶ A bawmhmi hna cu vancungmi kha an si lo ti kha a fiang. Cathiang nih, "Abraham tefa kha a bawmh hna," a ti bantuk khan, a bawmhmi hna cu Abraham tefa tu kha an si. ¹⁷ Cucaah zeizong kip ah a unau hna bantuk kha a si awk hrim a si i cu bantukin a si cu, annih nih sual ngaihthiamnak an hmuh khawh nakhnga ding caah, zumh awk a tlakmi le zaangfah a thiammi an Tlangbawi Ngan a si nakhnga caah a si. ¹⁸ Amah hrimhrim nih khan tukforhnak le temhinnak kha a rak in cang caah tukforhnak a ingmi kha a bawmh khawh hna.

¹ Pathian nih a kawh vemi Khrihfa u le nau hna, kan i lakmi phung ca i Tlangbawi Ngan si awkah Pathian nih a thlahmi Jesuh kong kha ruat hmanh u. ² Moses cu Pathian innchungkhar rian ah a fel bantukin Jesuh zong cu hi rianṭuantu dingah a thimtu Pathian sinah khan zumh awk tlak tein a um ve. ³ Inn satu nih inn nakin upatnak a hmuh deuh bantukin Jesuh zong cu Moses nakin sunparnak hmuh awkah tam piin aa tlak deuh. ⁴ Nan hngalh cio bangin inn cu mi nih an sak taktak — zeizong vialte a satu bel Pathian a si. ⁵ Moses cu Pathian inn chungah khan rianṭuantu zumh awk tlak a rak si i Pathian nih hmailei ah a rak chim lai dingmi zong kha a rak chim. ⁶ Sihmanhsehlaw Khrih zumh awk tlak a sining cu, Pathian inn a zohkhenhtu Fapa ningin a si. Cu inn cu kanmah hi kan si i cu kan simi cu kan i ruahchanmi kha fek te le ṭih lo tein kan i tlaih peng lawngah kan si zungzal lai. ⁷ Cucaah Thiang Thlarau nih a ti bantukin, "Nihin ah Pathian aw kha nan theih ahcun lungkhong in um hlah u; ⁸ Nan pupa hna nih Pathian kha an rak doh i thetse ram i an rak hneksak bantuk khan um hlah u; ⁹ Pathian nih, ’Kum sawm li chung ka tuahmi kha an hmu ko nain, khika ah khan an ka doh i an ka hneksak.’ ¹⁰ Cucaah an cungah ka thin a hun i annih cu ka caah zumhtlak an si bal lo i ka nawlbia kha an al zungzal i an cung i ¹¹ ka thin a hun caah cun chiatser tein, ’An i dinhnak ca i ka pekmi hna ram ah cun an lut hrimhrim lai lo,’ ka ti, tiah Pathian nih a rak ti." ¹² Ka u le ka nau hna, a nungmi Pathian zamtak a duhmi lungthin ṭhalo le Pathian bochan duh lonak lungthin a ngeimi nan um sual nakhnga lo i ralring u. ¹³ Nannih cu sualnak nih an hlen hna nakhnga lo le lungṭhawng in nan um sual nakhnga lo, Cathiang nih, "Nihin," a timi kha nan caah nihin a si chung paoh cu, nifate in pakhat le pakhat i bawm lengmang u. ¹⁴ Zeicahtiah a hramthawk tein ralṭha ngaiin kan rak zumhmi kha fek tein a dongh tiang kan i tlaih ahcun, kan dihlak in Khrih hawi kan si dih zungzal lai. ¹⁵ Cathiang nih a chimmi cu hihi a si: "Nihin ah Pathian aw kha nan theih ahcun Nan pupa hna nih Pathian an rak doh i an lung an rak ṭhawn bantuk khan, lung ṭhawng in um hlah u." ¹⁶ Ahodah Pathian aw cu a rak thei i Pathian a rak dohmi cu an si? Moses nih Izipt ram in a chuahpimi vialte kha an si ko. ¹⁷ Aho cungah dah Pathian kha kum sawm li chung a thin a hun? Sualnak a tuahmi, thetse ram i a thimi hna cungah khan a si. ¹⁸ Pathian nih, "Ka dinhnak chungah an lut lai lo," a ti ah khan, ahodah a tihnawh duhchan hna? Amah a dohtu kha a tihnawhchan hna. ¹⁹ Cucaah cun an zumh lo caah an rak luh khawh lonak kha a si, ti cu kan hmuh cang.

¹ Atu cu Pathian nih dinnak a rak chimmi kha kan hmuh nakhnga, a biakam kha a kan pek i cu kamhmi dinhnak chungah cun a lut lomi nan um sual nakhnga lo, ralring tein um u sih. ² Annih nih an rak theih bantuk khan, Thawngṭha cu kan theih cang. Sihmanhsehlaw an theihmi bia kha zumhnak in an cohlan duh lo caah an caah zeihmanh a ṭhahnem lo. ³ Cucaah, "Ka thin a hung i biakam tein, ’Kaa dinhnak chungah an lut hrimhrim lai lo,’ ka ti," timi bia nih a sawh duhmi dinhnak chungah a lut i Pathian sinah aa dinmi cu zumtu kanmah tu hi kan si. ⁴ Vawlei a rak ser ri khan a rian cu lim a si ko cang nain hi bia cu a chim; zeicahtiah Cathiang nih pei hmunkhat ah ni sarihnak ni kong ah, "Ni sarih ni ah Pathian cu a rian vialte in aa din," tiah a ti kha. ⁵ Cun a cunglei i kan rel cangmi ah khan, "Ka dinhnak chungah an lut hrimhrim lai lo," tiah a um fawn. ⁶ Pathian dinhnak chungah a lutmi an um awk a si ti cu a fiang, sihmanhsehlaw Thawngṭha a thei hmasami hna nih khan an zumh lo ruangah an luh khawh lo caah Pathian nih ni dang pakhat kha a chiah ṭhan. ⁷ Cu hnu kum tampi ah kan chim cangmi, "Nihin cu Pathian aw kha nan theih ahcun, lungkhong in um hlah u," timi bia kha David kaa in a chim ṭhan. ⁸ Joshua nih Pathian dinhnak chungah khan a rak luhpi hna ahcun, cu hnuah cun Pathian nih, ni dang, timi kha a chim ti hnga lo. ⁹ Cucaah Pathian mi hna cu, sabbath dinhnak nih khan a hngah ko rih hna, ¹⁰ zeicahtiah Pathian cu a rian in aa dinh bantukin Pathian dinhnak chungah a lutmi cu an rian in an i din ve. ¹¹ Cucaah Pathian dinhnak chung i kan luh khawh nakhnga fak piin i zuam u sih. Annih nih Pathian nawl kha an rak ngaih lo i an luh khawh lo bantuk khan kannih cu pakhat hmanh um sual hlah u sih. ¹² Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih. ¹³ Pathian sinin thuh khawhmi thil zeihmanh a um lo. Sermi thil vialte hi an dihlak in a hmaika ah an lang dih hirhiar i amah sinah cun kan kong cu kan i chim cio lai. ¹⁴ Cucaah kan zumhnak hi fek tein i tlaih ko u sih. Pathian umnak hrimhrim ah a hung lutmi Tlangbawi Ngan kan ngei i amah cu Pathian Fapa Jesuh kha a si. ¹⁵ Kan Tlangbawi Ngan hi kan santlaih lonak ah kan cung i zaangfahnak a ngei kho lomi tlangbawi a si lo. Kan Tlangbawi Ngan hi kanmah bantuk tein tukforhnak a ing vemi a si, sihmanhsehlaw sualnak zeihmanh a tuah lomi a si. ¹⁶ Cucaah cun ralṭhat in hmaiah fong u sih law, vel a umnak Pathian bawiṭhutdan cu fuh u sih. Khika ah kan herh lio caan te ah Pathian zaangfahnak le vel cu kan hmuh lai.

¹ Tlangbawi Ngan paohpaoh hi a mi hna chung khan thim a si i anmah aiawh in Pathian rianṭuantu ah chiah a si i sualnak ca i laksawng pek le raithawinak tuah kha a rian a si. ² Amah zong cu phun tam piin tlin lonak a ngeimi a si ve caah khan a hrutmi le a palhmi cungah khan lungnemnak a ngei kho. ³ Cun amah zong cu tlin lonak a ngeimi a si ve caah cun, midang sualnak ca hrimhrim zongah khan raithawinak a tuah a hau. ⁴ Ahohmanh anmah le anmah Tlangbawi Ngan ah an i thim kho lo. Aaron cu Pathian nih a kawh i Tlangbawi Ngan ah a can bantuk khan, Pathian kawhnak lawnglawng in Tlangbawi Ngan ah an cang kho. ⁵ Cu bantuk ṭhiamṭhiam in Khrih zong nih khan amah nawl in Tlangbawi Ngan ah aa canter lo. Pathian tu nih, "Nangmah cu ka Fapa na si, Nihin ah na Pa ah ka cang," tiah a ti. ⁶ Cun hmun dang zongah, "Nangmah cu zungzal in tlangbawi na si lai, Melkhizedek tlangbawi sining bantukin na si lai," tiah a ti fawn. ⁷ Vawlei cung a um lioah, Jesuh nih thihnak in a khamh khotu Pathian sinah aihramnak le mitthli he thlacamnak le nawlnak kha a tuah. Amah cu a lung a nemmi le Pathian sinah aa pemi a si caah Pathian nih a theih. ⁸ Sihmanhsehlaw Pathian Fapa a si ko nain Pathian nawl ngaih kha harnak innak chungin a thiam. ⁹ A tlingmi ah ser a si tikah amah nawl a ngaimi vialte hna caah zungzal khamhnak hram ah a cang i ¹⁰ Pathian nih Melkhizedek tlangbawi sining in Tlangbawi Ngan na si, tiah a ti. ¹¹ Melkhizedek kongah hin chim awk tampi kan ngei ko, sihmanhsehlaw a hngalh nan i harh tuk caah nan sin i fianter cu a har ko. ¹² Nannih cu saya hmanh si awk nan si cang nain, Pathian bia cawnnak hmasa bik chimtu saya kha nan herh rih. Rawl taktak ei kha nan cu cang, sihmanhsehlaw caw hnuk ṭheo nan ding ko rih. ¹³ Caw hnuk ṭheo aa rinh ko rihmi cu ngakchia an si ko rih i ahmaan le ahmaan lo kongah hngalhnak a ngei rih lomi an si. ¹⁴ Sihmanhsehlaw rawl taktak cu upa nih khan an ei khawh; annih cu chia le ṭha thleidan khawhnak a ngei cangmi an si.

¹ Cucaah hmailei ah fong u sih, Khrihfa cawnpiaknak a hram kan i domhnak kha hnulei ah kaltak u sih law a tlam a tlingmi cawnpiaknak kha fuh u sih. Santlai lomi rian kaltak kha a hram in i domh ṭhan lengmang ti hlah u sih, cun Pathian zumh zong kha a hram in i thawk ṭhan lengmang ti hlah u sih; ² tipil innak kong tehna, kutchuannak kong tehna, mithi thawhṭhannak kong tehna le zungzal biaceihnak kong tehna hi, an hram ah i hel lengmang ti hlah u sih. ³ Hmailei ah kal u sih, Pathian a hna a tlak ahcun, kan kal kho hrim ko lai. ⁴ Zeitindah a tlu ṭhanmi hna cu ngaihchihnak an ngeih ṭhan khawh ti lai? Annih cu Pathian ceunak chungah a rak um cangmi an si, vancung laksawng kha a tep i Thiang Thlarau a co ve cangmi an si. ⁵ Pathian bia cu a ṭha ti a hngalmi le a ra lai dingmi chan ṭhawnnak cu zei bantuk dah a si lai ti a theimi an si. ⁶ Cun annih cu an tlu. Annih cu ngaihchihnak ah kirpi ṭhan khawh an si ti lo. Pathian Fapa kha vailam ah an khenh ṭhan ca le zapi hmaiah ningzak ngaingai in an tuah ṭhan caah ngaihchihnak ah kirpi ṭhan khawh an si ti lo. ⁷ Ruah a surmi a rak dawptu le a thlotu hna caah a ṭhahnemmi rawl kung a khohtertu vawlei cu Pathian nih thluachuah a pekmi vawlei a si. ⁸ Sihmanhsehlaw cu vawlei nih cun hling le belh lawng kha a khohter hna ahcun zeihmanh santlaihnak a ngei lo; Pathian nih chiat a serh men lai i mei nih a kangh men lai. ⁹ Kan dawtmi kan hawile hna, hi bantukin bia chim hmanh u sih law, nannih kong tu ah cun kan hna a ngam ko. Nannih cu, thluachuahnak a ṭha deuhmi, khamhnak a ngeimi nan si ti kha kan hngalh. ¹⁰ Pathian cu miding lo a si lo. Rian nan rak ṭuanmi le nan Khrihfa hawi nan rak bawmh tawn hna i atu zongah nan bawmh ko rih hna thawngin nan langhtermi amah nan dawtnak kha a philh lai lo. ¹¹ Nan i ruahchanmi cu a tlin nakhnga, bawmh duhnak lungthin nan ngeih tawnmi kha a dongh tiangin ngei cio ko u, ti kan in duh hna. ¹² Mi thathu si awk kha kan in duh hna lo, sihmanhsehlaw an zumhnak le an lungsaunak thawngin Pathian nih bia a kamhmi hna a hmumi hna bantuk si awk kha kan in duh hna. ¹³ Pathian nih Abraham bia a rak kamh ah khan, aa kammi cu ka tuah hrimhrim lai tinak ah khan chiat a rak ser. Cun amah nakin a ngan deuhmi an um lo caah cu chiatsernak ah cun amah min kha a hman i, ¹⁴ "Nangmah cu thluachuahnak kan pek lai i tefa tampi kan pek lai tiah bia kan kam," tiah a ti. ¹⁵ Abraham cu a lung a sau i cucaah Pathian nih bia a kamhmi kha a hmuh khawh. ¹⁶ Minung nih chiatsernak an tuah tikah minung nakin a ngan deuhmi min kha an hman i cu chiatsernak nih cun pakhat le pakhat bia an i alnak kha a chah tawn. ¹⁷ Cu bantukin Pathian zong nih, bia a kamhmi hna nih khan a biakam cu a let hrimhrim lai lo, ti kha fiang tein hngal hna seh ti a duh caah, cu a biakamnak cu chiatsernak in a fehter. ¹⁸ Hi thil pahnih, biakamnak le chiatsernak hna hi thlen khawh a si lomi thil an si i hi hna kongah hin Pathian nih a lih a chim kho lo. Cucaah a sin i him tein a ummi kannih nih cun kan hmai i a kan chiahpiakmi ruahchannak kha ralṭha ngaingai in fek tein kan i tlaih. ¹⁹ Hi ruahchannak hi kan nunnak caah a fekmi le a ṭhawngmi thir cangai bantuk a si. Vancung biakinn puanzar kha lonh in chungchin hmunthiang ah khan kan ruahchannak cu a lut. ²⁰ Cuka ah cun kanmah aiawh in Jesuh kha kan hlanah a rak lut cang i Melkhizedek tlangbawi sining in zungzal Tlangbawi Ngan ah a cang.

¹ Melkhizedek cu Salem siangpahrang a rak si i Cung Nung Bik Pathian tlangbawi a rak si. Abraham cu siangpahrang hna a tei hnanak raltuknak hmun khan a hung kir tikah Melkhizedek nih cun a rak don i thluachuahnak a rak pek. ² Abraham nih hranchaw a lakmi cheu hra cheu khat kha a pek. (Melkhizedek min a sullam pakhatnak cu "Dinnak Siangpahrang" ti a si. Cun amah cu Salem siangpahrang a si caah a min sullam cu "Daihnak Siangpahrang" ti zong a si fawn.) ³ Melkhizedek cu a nu siseh, a pa siseh, an konglam an ṭialmi zeihmanh a um lo, a hringsortu hna zong an konglam ṭialmi zeihmanh a um lo; a chuahnak kong ṭialmi zong a um lo i a thihnak kong ṭialmi zong a um lo. Amah cu Pathian Fapa bantuk hi a si i zungzal in tlangbawi a si ko. ⁴ Cucaah zeitluk mingan dah a si kha nan hngalh. A kan hringsortu Abraham hmanh nih hranchaw a lakmi dihlak cheu hra cheu khat kha a pek. ⁵ Cun Levi tefa tlangbawi a simi hna kha Nawlbia nih Israel mi hna sinin cheu hra cheu khat nan khawlh hna lai, tiah a ti hna. Israel mi cu Abraham tefa an si ve ko nain le an phunhawi an si ko nain thawhlawm cu an kholh ko hna. ⁶ Sihmanhsehlaw Melkhizedek cu Levi hrinsor a si lo nain cheu hra cheu khat kha Abraham sin hmanh cun a khawlh i Pathian thluachuahnak a hmumi Abraham kha thluachuahnak a pek. ⁷ Thluachuah petu cu thluachuah pekmi nakin a ngan deuh ti cu a fiangmi a si. ⁸ Tlangbawi hna kongah cun, cheu hra cheu khat kha a thi khomi minung nih an khawlh hna, sihmanhsehlaw Melkhizedek kong ah cun, a nungmi minung nih. Cathiang chimning in, cheu hra cheu khat cu a khawlh. ⁹ Cucaah Abraham nih Melkhizedek cu cheu hra cheu khat a pek tikah khan, cheu hra cheu khat a co tawntu Levi nih khan a pek tinak a si. ¹⁰ Zeitintiah Levi cu a chuak rih lo nain Melkhizedek nih a hringsortu Abraham a ton tikah khan, Abraham paw chungah cun a rak um cang. ¹¹ Levi mi tlangbawi sining in Israel mi cu Nawlbia kha pek va si hna kaw, Levi tlangbawi pawl an rian ṭuannak kha a tlingmi rak si seh law, tlangbawi phun dang, Aaron tlangbawi sining si lo i Melkhizedek tlangbawi sining in a simi chuah kha a herh hnga lo. ¹² Tlangbawi sining kha aa thlen tikah Nawlbia zong kha thlen a herh ve. ¹³ Cun hi kong i an rak chimchungmi bia vialte nih a sawhmi kan Bawipa kha Levi miphun si loin phun dang a si i a phun chungmi cu biakṭheng ah tlangbawi rian a ṭuanmi ahohmanh an um bal lo. ¹⁴ Judah phun chungin a chuakmi a si ti kha fiang tein hngalh a si i Moses nih tlangbawi kong a chim tikah hi phun kong hi a telh lo. ¹⁵ Hi kong cu a fiang chin lengmang; tlangbawi phun dang, Melkhizedek bantuk kha a hung chuak. ¹⁶ Amah cu minung sermi phung le lam in tlangbawi cangmi a si lo, hrawh khawh lomi nunnak ṭhawnnak thawngin tlangbawi a cangmi a si. ¹⁷ Cathiang nih, "Melkhizedek tlangbawi sining zulh in nang cu tlangbawi na si zungzal lai," a ti. ¹⁸ Cucaah phung hlun cu san a tlai lo i thil ti khawhnak a ngeih lo caah hlawt a si; ¹⁹ Moses Nawlbia nih khan zeihmanh thil tlamtling ah a ser khawhmi a um lo. Sihmanhsehlaw atu cu ruahchannak ṭha deuh kha a hung phan i cu thawng cun Pathian kha kan naih khawh cang. ²⁰ Cuhleiah Pathian chiatsernak zong kha a um rih. Midang cu tlangbawi i an ser hna tikah cu bantuk chiatsernak cu zeihmanh a um lo. ²¹ Sihmanhsehlaw Jesuh cu chiatser tein tlangbawi ah ser a si i Cathiang nih amah kong ah cun, "Bawipa nih chiatser tein bia a chim cang i a bia cu a let lai lo: ’Nangmah cu zungzal in tlangbawi na si lai,’ a ti," tiah a ti. ²² Hi an i dannak nih hin Jesuh cu a ṭha deuhmi biakamnak a fehtertu ah khan a ser fawn. ²³ Cun an i dannak dang a um rih: tlangbawi dang hna kha cu a thi lengmangmi an si caah an rian kha aa pehtlai kho lo i a tam zong an tam a herh. ²⁴ Sihmanhsehlaw Jesuh cu zungzal in a nungmi a si caah zungzal in tlangbawi a si. ²⁵ Cucaah cun amah thawngin Pathian a fuhmi hna paoh cu a khamh khawh zungzal ko hna; zeicahtiah zungzal in a nun caah Pathian kha a nawlpiak khawh zungzal hna. ²⁶ Cucaah Jesuh cu kan duhnak a tlinter khotu Tlangbawi Ngan cu a si; palhnak a ngei lo, sualnak a ngei lo; misual mi hna lak khan ṭhen a si i vancung ah khin cawi a si. ²⁷ Amah cu tlangbawi dang hna bantuk kha a si lo, amah sualnak caah siseh, midang sualnak caah siseh, ni fate in raithawinak tuah kha a herh lo. Amah le amah raithawinak i aa pek ah khan zungzal ca za in raithawinak pakhat a tuah. ²⁸ Moses Nawlbia nih cun a tling lomi minung kha tlangbawi ngan ah a ser hna, sihmanhsehlaw chiatser tein tuahmi biakamnak, Moses Nawlbia hnu deuh ah a rami nih cun zungzal in a tlingmi tlangbawi ah Fapa kha a ser.

¹ Ka chimmi chungah a biapi bik cu hihi a si: cu bantuk Tlangbawi Ngan thengte cu kan ngei i amah cu vancung i a Lian Ngan Bik orhlei kam i a ṭhumi a si. ² Hmun Thiang Bik chungah khan Tlangbawi Ngan rian kha a ṭuan i cu a ṭuannak cu minung sakmi si loin Pathian sakmi biaknak thlam taktak chungah khan a si. ³ Tlangbawi Ngan cu Pathian sin i pekmi laksawng pek le saram raithawinak pekchanh kha an rian a si bantukin, kannih kan Tlangbawi Ngan zong nih cun pekchanh awk a ngeih ve kha a herh. ⁴ Vawlei cungah hin cun Tlangbawi Ngan a rak si hnga lo, zeicahtiah Judah phung ningin laksawng a pechantu tlangbawi kha an um ko. ⁵ Asinain cu tlangbawi hna nih rian an ṭuannak biakinn cu vancung i a ummi biakinn a mui le a thlam sawhsawh men a si. Puan biakinn kha Moses nih a ser lai tikah Pathian nih, "Tlang cung i a muisam kan hmuhsakmi bantukte khan zeizong vialte na tuah dih lai," tiah a chimhmi bia nih khan a sawhmi cu hihi a si. ⁶ Cucaah anmah rian nakin tampi in a ngan deuhmi rian kha Jesuh cu pek a si. Pathian le minung kar ah a sermi biakamnak cu thil ṭha deuh kamhmi ruangah a ngan deuhmi a si bantukin, a tlangbawi rian zong cu, a ngan deuhmi a si ve. ⁷ Biakamnak hmasa deuh nih khan tlin lonak zeihmanh rak ngei hlah seh law, biakamnak dang a herhnak zeihmanh a um hnga lo. ⁸ Sihmanhsehlaw Pathian nih a mi hna cu a mawhchiat hna i, "Bawipa nih aa thawh i, ’Israel mi hna le Judah mi hna he biakamnak ka tuah lai ni cu a ra lio. ⁹ Izipt ram chungin an pupa hna cu chuahpi awkah an kut in ka rak hruai hna ni i an sin i ka tuahmi biakamnak bantuk kha cu, a si lai lo. Anmah he ka tuahmi biakamnak kha zei ah an rel lo caah annih cu zei ah ka rel ve hna lo,’ tiah Bawipa nih a ti. ¹⁰ Hmailei ah Israel mi hna sin i ka tuah dingmi biakamnak cu hihi a si lai, tiah Bawipa nih a ti. Ka nawlbia cu an hngalhnak chungah ka chiah hna lai i an lung chungah ka ṭial hna lai. Keimah cu an Pathian ka si lai i annih cu ka mi an si lai. ¹¹ Ahohmanh nih an hawile kha cawnpiak a herh lai lo i ’Bawipa kha hngal tuah,’ ti chimh zong a hau lai lo, A hme bik in a ngan bik tiang nih an ka hngalh ko lai. ¹² An palhnak cu ka zaangfah hna lai i an sualnak cu ka hngal camcin ti lai lo," tiah a ti. ¹³ Pathian nih biakamnak thar kong a chim caah hin a hmasa deuh kha cu a hlun ah a cang i a hlunmi le a ṭetmi paoh cu an lo zau ko lai.

¹ Biakamnak hmasa bik nih khan Pathian biaknak caah phunglam a ngei i biakinn zong a ngei, a biakinn cu minung sermi a si. ² Biaknak puan thlam kha an ser, a lenglei cu Hmun Thiang ti a si. Cu chungah cun meiinn, cabuai le Pathian sin hunhmi changreu kha an um. ³ Puanzar pahnihnak hnulei ah khan Hmun Thiang Bik timi hmun kha a um. ⁴ Cu chungah cun rimhmui khanghnak sui biakṭheng le sui hutmi kuang, biakamnak an chiahnak kuang kha an um. Cu kuang cungah cun manna an chiahnak sui um, Aaron ṭhiangṭhunh a corhmi le nawlbia an ṭialnak lungtlap pahnih kha an chiah hna. ⁵ Cu kuang cungah cun Pathian sunparnak cherub kha an um i sual ngaihthiamnak hmun kha an thla an zarh. Hi thil kong hi a dihlak in chim caan atu hi a si lo. ⁶ Thil umtuning cu hitihin a si: Lenglei thlam chungah khan tlangbawi hna cu an rian ṭuan awkah ni fate in an lut lengmang; ⁷ asinain chungchin thlam ah khan cun Tlangbawi Ngan lawng a lut kho i cu zong cu kum khat ah voi khat lawng a si. Thisen kha aa put i amah caah le mi nih hngalh loin an tuahmi sualnak caah Pathian sinah khan a pek. ⁸ Hi bantukin thil umtuning a simi kong hin Thiang Thlarau nih fiang tein a kan cawnpiakmi cu, lenglei thlam a um chung paoh kha cu Hmun Thiang Bik chung i va luhnak lam kha a awng rih lo, ti a si. ⁹ Hi tahchunhnak hi atu kan caan i a ummi thil kong ah a si. Pathian sin i pekchanhmi laksawng le saram raithawinak nih khan Pathian a biatu lungthin kha tling lakin a ṭhatter kho lo. ¹⁰ Cu laksawng le raithawinak hna nih an tuah khawhmi cu rawl kong le din awk kongkau le i thianhnak phunglam a phunphun lawng kha an si. Hi thil vialte hi lenglei phunglam lawng an si i, Pathian nih zeizong vialte a remh ṭhan caan ca tiang lawng an si. ¹¹ Sihmanhsehlaw a um lai ding a rak simi, hika i a um cangmi thil ṭha hna Tlangbawi Ngan Khrih kha a ra cang. Rian a ṭuannak thlam cu a ngan deuh i a tling deuh; minung sermi a si lo, cu a sullam cu sermi vawlei cung thil i aa telmi a si lo tinak a si. ¹² Khrih nih thlam chung khan a va kal i voi khat ah zungzal ca za dingin Hmun Thiang Bik chungah a va luh tikah, raithawinak i pekchanh awkah cawfa thi siseh, meheh thi siseh, aa put lo, amah thi thengte kha aa put i khamhnak kha a kan serpiak. ¹³ Phunglei in a thiang lomi cu meheh thi le cawtum thi le khanghmi cawfa vutcam kha an theh hna i cu bantukin phunglei in an thian lonak kha thianhpiak an si tikah mithiang ah an cang. ¹⁴ Cu hmanh nih cu bantukin a tuah khawh ahcun, Khrih thisen nih cun, zeitluk in dah a tuah khawh chinchin lai! Zungzal hmunmi Thlarau in a tlingmi raithawinak bantukin Pathian sinah amah le amah cu aa pe. Kannih nih Pathian nung kha kan biak khawh nakhnga santlai lomi rian kan tuah tawnmi kan chiaṭha thleidannak chung i a cammi kha a thi in a kan thianhpiak lai. ¹⁵ Pathian kawhmi hna nih Pathian kamhmi zungzal thluachuahnak kha an hmuh khawh nakhnga, biakamnak thar cu Khrih nih khan a ser. Sihmanhsehlaw cu biakamnak cu thihnak a um hnu lawngah a si kho i cu thihnak nih aa tinhmi cu biakamnak hmasa tang i a rak ummi hna nih cu biakamnak tang i an um lio i an rak tuahmi palhnak chung khan luatter kha a si. ¹⁶ - ¹⁷ Zeicahtiah rovuih bia cu rovuitu a nun lioah cun sullam a ngei lo. Cucaah ro a vuitu kha a thi tiah fiang tein hngalh a hau i cu rovuih bia cu a thih hnu lawnglawng ah hman khawh a si. ¹⁸ Cu ruangah cun pei biakamnak hmasa u hmanh kha thisen hman lawnglawng in ser khawh a rak si cu. ¹⁹ A hmasa bik ah Nawlbia nih a ti bantukin, Moses nih mizapi kha nawlbia vialte cu a relpiak hna. Cun cawfa thi kha aa lak i ti he a cawh hnuah, Nawlbia cauk le mizapi kha, hisop le tuuhmul sen in a theh hna i ²⁰ "Pathian nih nan zulh lai tiah an fialmi hna nawlbia a fehtertu cu hi thisen hi a si," a ti. ²¹ Cu bantuk ṭhiamṭhiam in biaknak thlam le biaknak i hmanmi thilri vialte kha Moses nih cun a theh ve hna. ²² Nawlbia ning ah cun zei paohpaoh hi thisen in thianh a si i sualnak hi thisen luanh lawnglawng in ngaihthiam a si. ²³ Atu i kan chimmi thil, vancung thil mui le thlam a simi hna nih hi bantukin thianhnak an herh ahcun, vancung thil hrimhrim, a taktak le a ngaingai a simi hna zong nih khan raithawinak a ṭha deuhmi an herh ve ko. ²⁴ Khrih a luhnak hmun thiang kha minung nih an sermi hmun thiang hi a si lo, a taktak le a ngaingai hna mui le thlam men ah khan si loin vancung hrimhrim ah khan a hung lut i kanmah aiawh in Pathian hmaiah khan, atu tiang hi a chuak lengmang ko. ²⁵ Judah mi Tlang Bawi Ngan cu kum fate in Hmun Thiang Bik chungah khan sa thi he a lut lengmang. Sihmanhsehlaw Khrih cu amah le amah i thawi awkah voi tampi a luh a herh lo, ²⁶ cu ti tuah a herh a si ahcun, vawlei ser hramthawk in voi tam tuk a in cang hnga. Amah le amah raithawinak i aa hmannak thawngin sualnak kha a hloh khawh nakhnga chan vialte nih donghnak an phak dengmang caan ah hin voi khat ah za lak in a hung lang. ²⁷ Minung hi voi khat kan thi lai i cu hnuah cun Pathian nih bia a kan ceih lai. ²⁸ Cu bantuk ṭhiamṭhiam in mi tampi sualnak lakpiak awkah Khrih cu voi khat raithawinak ah pek a si. Cun a hung lang ṭhan lai i cu a hung langh ṭhan cu sualnak kongah si ti loin amah a hngakmi hna khamh awkah a si lai.

¹ A taktak le a ngaingai a simi thil kha Judah phung nih hin tling ngaingai le hmaan ngaingai in a langhter kho lo. A ra dingmi thil ṭha muithlam ceo a rak si. An tuah tawnmi raithawinak kha kum fate in tuah lengmang a si ko. Cucaah cun zeitindah hi Nawlbia nih hin, Pathian a biami hna cu, cu raithawinak an tuahmi thawng cun mithiang ah a ser khawh hna lai? ² Pathian a biami hna kha an sualnak thianhpiak rak si taktak hna seh law, kan sual tiah i phuhrunnak an ngei ti hnga lo i raithawinak vialte kha an rak ngol cang hnga. ³ Sihmanhsehlaw raithawinak nih khan, an sualnak tu kha, kum fate in a hngalhter lengmang hna. ⁴ Zeitintiah cawtum thi le meheh thi nih cun sualnak kha a hlo kho taktak bal lo. ⁵ Cucaah Khrih nih vawlei i a rung ṭum lai ah khan Pathian cu a thawh i, "Raithawinak le pekchanhmi thil cu na duhmi an si lo, Sihmanhsehlaw keimah caah taksa pum kha na ka timhpiak cang. ⁶ Biakṭheng cungah a pumning in khanghmi sa cu na lawmhmi a si lo, Sual thianhnak ca i thawimi sa zong na lawmhmi a si lo. ⁷ Cucaah kaa thawh i, ’Nawlbia cauk chungah aa ṭial bantukin, Pathian, nangmah nih tuah seh ti na ka duhmi tuah awkah ka ra,’ ka ti," a ti. ⁸ A hmasa bik ah, "Raithawinak siseh, pekchanhmi thil siseh, biakṭheng cungah khanghmi saram si hna seh, sual thianhnak caah tuahmi raithawinak si hna seh, na duhmi an si lo i na lawmhmi zong an si lo," a ti. Hi raithawinak vialte hi Nawlbia ningin tuah an si ko nain hitihin a ti. ⁹ Cun aa thawh ṭhan i, "Pathian, nangmah nih tuah seh ti na ka duhmi tuah awkah ka ra," a ti. Cuticun Pathian nih raithawinak hlun vialte kha a hlawt hna i Khrih raithawinak khan a thlen hna. ¹⁰ Jesuh Khrih nih Pathian duhmi kha a tuah caah, voi khat ah za lak in amah a pum aa pekchanhnak thawng khan kannih cu kan sualnak in a kan thianh cang. ¹¹ Judah tlangbawi hna nih cun, dirhmun in an rian kha ni fate an ṭuan lengmang i raithawinak an pekchanh tawnmi kha voi tampi an pekchanh lengmang. Sihmanhsehlaw hi raithawinak nih hin sualnak kha a thianh kho taktak bal lo. ¹² Asinain Khrih nih cun raithawinak kha sualnak caah voi khat a ser i cucu zungzal ca in a za ko, cu hnuah Pathian orhlei kamah khan a ṭhu. ¹³ Cuka ah cun Pathian nih a ral kha a kelamh i a ser hna ding caan kha a hngak. ¹⁴ Voi khat raithawinak in an sualnak thianhpiak a simi hna cu zungzal ca in a tlingmi ah a ser hna. ¹⁵ Cun Thiang Thlarau zong nih tehte a khaannak kha a kan hngalhter. A hmasa bik ah, ¹⁶ "Hmailei caan ah annih he ka tuah laimi biakamnak cu hihi a si: An lung chungah ka nawlbia kha ka chiah hna lai i An ruahnak chungah ka ṭial hna lai," a ti. ¹⁷ Cun aa thawh ṭhan i, "An sualnak le an ṭhat lonak kha kaa cinken ti lai lo," a ti fawn. ¹⁸ Cucaah annih cu ngaihthiam an si hnuah cun an sualnak thianhnak ding ca i raithawinak kha a herh ti lo. ¹⁹ Cucaah ka u le ka nau hna, Jesuh thihnak thawngin Hmun Thiang Bik chungah khan luhnak nawl kan ngei cang. ²⁰ Cu luhnak ah cun puanzar kha a thleh i lam thar nunnak lam kha a kan hunpiak — puanzar cu a pum kha a si. ²¹ Cuhleiah Pathian inn a zohkhenhtu Tlangbawi Ngan kha kan ngei fawn. ²² Cucaah cun lungthin tak le zumhnak fek he Pathian cu naih u sih. Sual aa phuhrungmi kan lungthin le kan pum kha ti thiang in i thianh u sih law amah cu naih u sih. ²³ Bia a kan kamhtu Pathian cu zumh awk tlak a si bantukin kan i ruahchanmi cu fek tein i tlaih peng ko u sih. ²⁴ Pakhat le pakhat kan i dawt khawh nakhnga le thil ṭha kan i tuahpiak khawh nakhnga, i bawm tliahmah u sih. ²⁵ Pakhat le pakhat hmun khat i i pumh lengmang kha ngol hlah u sih; a cheu nih cun ngol hmanh hna seh law, kannih cu i forh chin u sih, zeicahtiah Bawipa Ni cu a nai deuh chin lengmang ti kha kan hngalh caah i forh chin lengmang ko u sih. ²⁶ Biatak kha hngalhter kan si hnu i kan sual lengmang peng ko ahcun, sualnak thianhnak caah raithawinak zeihmanh a um ti lo. ²⁷ Kan ca i a tangmi cu biaceihnak le Pathian a dohmi hna a hrawktu ding mei ṭihnung lawng kha a si ko cang. ²⁸ Moses Nawlbia a zul lomi cu, tehte pahnih chimnak in, a sual tiah hmuh a si ahcun, zaangfahnak um loin thah a si. ²⁹ Cu hmanh cu ti a si ahcun, Pathian Fapa zei i a rel lomi cu zeitindah tuah a si lai? Sualnak in a thianhtu Pathian biakamnak thisen zei i a rel lomi cu zeitindah tuah a si lai? Vel a ngeimi Thlarau a nihsawhtu cu zeitindah tuah a si lai? A in laimi dantatnak cu zeitluk in dah a ngan chinchin lai, ruat ko hmanh. ³⁰ "Keimah nih phu cu ka hlam lai, keimah nih ka cham lai," tiah a ti i, "Bawipa nih a mi cu bia a ceih hna lai," ti zongah a ti fawntu kha ahodah a si ti cu kan hngalh. ³¹ Pathian nung kut chung i tlak cu thil ṭihnung ngaingai a si! ³² Hlan deuh thil umtuning kha ruat hmanh u. Ceunak nan hmuh kate kha va si kaw, kha caan ah khan harnak tampi nan ing, asinain harnak nih khan an tei hna lo. ³³ A cheu cu an in nihsawh hna i zapi hmuh awkah an in hrem hna, sihmanhsehlaw kha lioah khan a cheu nih an in dirkamh peng ve hna. ³⁴ Thongtlami kha an thongtlak nan inpi hna i nan thil an in chuh hna tikah lunglawm tein nan pek hna, hi thil hna nakin a ṭha deuhmi thil le a hmun kho deuhmi thil nan ngeih kha nan hngalh. ³⁵ Cucaah nan ralṭhatnak kha thlau sual hlah u, nan ralṭhatnak nih cun laksawng nganpi an phorh hna lai. ³⁶ Pathian duhnak nan tuah khawh nakhnga le bia an kamhmi hna nan co khawh nakhnga lungsau thinfual in um u. ³⁷ Zeicahtiah Cathiang nih, "Tlawmpalte lawnglawng hnuah a ra dingmi cu a ra lai, a rau lai lo. ³⁸ Ka miding mi hna nih cun an zumh lai i an nung lai; Sihmanhsehlaw ahohmanh aa letmi cu an cungah ka lung aa lawm lai lo," tiah a ti bang khan a si lai. ³⁹ Kannih cu aa let i a tlaumi kha kan si lo. Zumhnak a ngei i khamhnak a hmumi tu kha kan si.

¹ Zumhnak ngeih kan ti hi, kan i ruahchanmi kan hmuh ṭheo lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh hi a si. ² Zumhnak an rak ngeih caah hlanlio mi hna nih khan Pathian cu a lung an rak ton. ³ Van le vawlei cu Pathian bia nih a ser hna ti kha zumhnak in kan hngalh i cucaah hmuh khawhmi thil cu hmuh khawh lomi thil chungin ser a si ti kha a lang. ⁴ Kain nih a pekmi raithawinak nakin a ṭha deuhmi raithawinak Abel nih Pathian a pekmi cu zumhnak in a si. Zumhnak thawngin amah cu Pathian nih miding ah a cohlan i cucu Pathian nih a laksawng a cohlanpiaknak ah khan a lang; cun a thih hnu zongah, zumhnak cu bia a chim ṭhiamṭhiam ko rih. ⁵ Enok kha thi loin Pathian sinah a kaitertu cu zumhnak a si; Pathian nih a lak caah khan ahohmanh nih an hmu ti lo. Cathiang nih a chimmi cu, Enok nih khan van i a kai hlanah Pathian lung kha a ton, ti a si. ⁶ Ahohmanh nih zumhnak loin Pathian lung ton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh. ⁷ Noah kha, a hmuh khawh lomi hmailei thil kongah, Pathian nih ralrinnak a pek tikah, cu ralrinnak bia a theihtertu cu zumhnak a si. Pathian bia kha a ngaih i lawng pakhat a ser i cu chungah cun amah le a innchungkhar kha him tein an um. Cuticun a zumhnak khan vawleicung mi vialte cu, an palh, ti kha a langhter i zumhnak thawngin a rami dinnak kha Pathian sinin a hmuh. ⁸ Pathian nih Abraham kha a auh tikah, a bia a ngaihtertu le, kan pek lai, tiah a kamhmi ram i a kaltertu kha zumhnak a si. Khuazei ah ka kal ti hngal loin a ram kha a chuahtak. ⁹ Pathian nih a kamhmi ram chungah khan zumhnak in ramdangmi bantukin khua a sa. Isak le Jakob he tiah thlam chungah khan khua an sa i cu hna zong cu Pathian biakamnak a hmumi an si ve. ¹⁰ Zungzal in a hmunmi khuapi, Pathian sermi cu, Abraham nih cun a hngah. ¹¹ Abraham kha a tar tuk cang i Sarah kha fa ngei kho lo a si nain, Abraham cu hringtu pa ah a sertu cu zumhnak a si. Pathian nih khan a biakamnak cu a tuah ṭheo lai, ti kha a zumh. ¹² Mithi bantuk a si ko cang nain, hi mipa pakhat chung hin, van i arfi zat a simi le rili kam i rel cawk lo thetse zat tefa kha an chuak. ¹³ Hi mi vialte hna hi zumhnak ngei in an thi. Pathian nih a kamhmi hna cu an hmu lo, sihmanhsehlaw lamhlatpi in an rak hmuh i an rak i lawm i vawlei cungah hin khual le a vakvai menmi kan si, an rak ti. ¹⁴ Cu bantukin bia a chimmi hna nih cun, anmah ta a simi ram an kawl kha an langhter. ¹⁵ An kaltak ciami ram kha an ruat ṭhan ti lo, rak ruat ṭhan hna seh law cuka ram i kir ṭhannak caan ṭha an rak ngei ko hnga. ¹⁶ Annih nih an ngaihmi ram cu, ram ṭha deuh vancung ram tu kha a si. Pathian nih an caah khua pakhat a timhpiak hna i cucaah annih nih Pathian cu, kan Pathian, tiin an kawh tikah, Pathian cu a ning a zak lo. ¹⁷ Pathian nih Abraham cu a hneksak tikah, a fapa Isak kha raithawinak ah a pekchanhtertu cu zumhnak a si. Pathian nih bia a kamhmi cu Abraham kha a si, sihmanhsehlaw a fapa ngeihchunte pakhat kha raithawinak i pekchanh awkah aa tim kho ko. ¹⁸ Pathian nih Abraham cu a rak thawh i, "Tefa na ngeih laimi cu Isak chung chuak hi an si lai," a rak ti. ¹⁹ Abraham nih khan, Pathian nih Isak cu thihnak in a thawhter khawh ko, tiah a rak zumh i cu bantuk cun Pathian nih Isak cu thihnak in a thawhter ti awk a si taktak. ²⁰ Jakob le Esau cu, hmailei ah thluachuahnak nan hmu lai, tiah Isak nih zumhnak in bia a kamh hna. ²¹ Josef fapa kha an dihlak in Jakob nih a thih laite ah zumhnak in thluachuahnak a pek hna; a ṭhiangṭhunh kha aa hngauh i Pathian kha a biak. ²² Josef nih khan a thih lai ah, Israel mi cu Izipt ram in an chuak te lai, tiah zumhnak in a chim. Cun a pum kha, zeitindah run tuah awk a si lai tiah bia a chiahtaktertu zong kha zumhnak ṭhiamṭhiam a si. ²³ Moses kha a chuah hnu thla thum tiang a nu le a pa nih an thuh i cu a thuhtertu hna cu zumhnak a si. Fa chuak thiam ngai a si kha an hmuh i siangpahrang nawlbia al kha an ṭih lo. ²⁴ Cun Moses kha a hung upat tikah Faro fanu fapa si a duhter lotu kha zumhnak a si. ²⁵ Sualnak chung i caan tawite chung i nuamh nakin Pathian mi hna sin sifah in kha aa thim deuh. ²⁶ Messiah ruang i nihsawhnak in cu Izipt ram chawhlawn vialte nakin a sung deuh ah a rel i cucu zeicahdah a si tiah, hmailei hmuh laimi laksawng kha a rak i ruah chih caah a si. ²⁷ Siangpahrang thinhunnak kha ṭih loin Moses cu Izipt ram khan a chuak i cu a chuahtertu cu zumhnak a si; hmuh khawh lomi Pathian kha hmu seh law cu bang, a kir in a kir duh ti lo. ²⁸ Lanhtak Puai a sertertu le innka ah thisen nan thuh lai, a titertu kha zumhnak a si; kha an tuahmi kha Thihnak Vancungmi nih Israel mi hna fater kha that hna hlah seh ti caah a si. ²⁹ Rili Sen, vawlei ro cung bantukin Israel mi a tantertu hna kha zumhnak a si; Izipt mi nih tan an timh ve tikah ti nih khan a dolh hna. ³⁰ Israel mi nih ni sarih chung an vel hnuah Jeriko khua kulhnak vampang a cimhtertu kha zumhnak a si. ³¹ Pathian nawl a ngai lomi hna sinah khan hlawhhlangnu Rahab cu a thi lo, kha a luattertu kha zumhnak a si i cucu mingiatu pawl a rak thuhphenh hna caah khan a si. ³² Ka chim lengmang ko rih hnga maw? Gideon tehna, Barak tehna, Samson tehna, Jefthah tehna, David tehna, Samuel tehna, le profet hna kong chim awk tampi a um ko nain a chimnak caan ka ngei ti lo. ³³ Zumhnak in ram ngan pipi kha an tuk hna i an tei hna. A dingmi thil kha an tuah i Pathian nih bia a kamhmi hna kha an hmuh. Chiandeih kha an ka an phih hna, ³⁴ mei ṭihnung kha an hmih i vainam thahnak in an luat. Annih cu an rak der, sihmanhsehlaw miṭhawng ah an cang, raltuknak hmun ah khan a ṭhawngmi an si i ramdangmi ralkap kha an tei hna. ³⁵ Zumhnak in nu hna cu an mithi kha nun ṭhanterpiak an si. A dang cu a ṭha deuhmi nunnak i thawhter si kha an duh deuh caah, luatnak kha i lak duh loin hremnak in an thi. ³⁶ A cheu cu nihsawhnak le fung tuknak kha an ing i a cheu cu ṭemnak le thongthlaknak kha an ing. ³⁷ Lung in an cheh hna, hluah in cheu hnih ah an chuah hna, vainam in an thah hna. Tuu phaw le meheh phaw i aih in an vak hniapmap i hremnak le serhsatnak kha an ing. ³⁸ Vawlei hi an caah umnak ah a ṭha theng lem lo. Ralzam bantukin ramlak le tlang ah an zam i vawlei tang lungkua le khor ah khua an sa. ³⁹ Hi mi vialte hna hi an zumhnak ruangah hin zeitluk in dah thangṭhat awk an tlak? Asinain Pathian nih a kamhmi hna thil kha a hmuh hmanh an hmu lo, ⁴⁰ zeicahtiah kan caah Pathian nih khuakhannak ṭha deuh a ngeih caah a si; annih kha kanmah he lawngin tlinnak a hmu kho ding an rak si.

¹ Hi tlukin vanrang zat in a tammi tehte bu nih khan kannih cu an kan kulh. Cucaah cun lam a kan dawntu thil paohpaoh le kan tlaihchan pengmi sualnak vialte kha hlaw hna u sih law kan hmai i chiahmi tlikzuamnak ah khan i zuam u sih. ² Jesuh kha fek tein i zoh chih u sih, amah cungah cun kan zumhnak cu a hramthawk in a dongh tiang a um. Hmailei lunglawmhnak aa ruahchanmi ruangah khan vailam cung i thih ningzahnak cu zeihmanh ah a rel lo i atu cu Pathian bawiṭhutdan orhlei kamah khan a hung ṭhu cang. ³ A inmi thil kha ruat hna hmanh u, misual mi nih kha tlukin an huatnak a in peng ko kha ruat hmanh u. Cucaah cun lungdong in maw ngol sual lai u ci. ⁴ Zeicahtiah sualnak nan dohnak ah hin thihnak tiang ngaingai cu nan ing rih lo. ⁵ Pathian nih a fale bantukin an chawnhnak hna, lung ṭhawnnak bia kha nan philh cang dahra? "Ka fapa, Bawipa nih an chimhhrin tikah zeirello in um hlah, an sik tikah na lung dong hlah. ⁶ Zeicahtiah Bawipa nih a dawtmi hna cu dan a tat tawn hna i fa i a cohlanmi hna cu a chimhhrin tawn hna," tiah pei a um kha. ⁷ Harnak nan inmi cu nan pa nih an pekmi hna harnak a si ti bantukin ing ko u, zeicahtiah nan innak nih khan, Pathian nih a fale bantukin an ti hna, ti kha a langhter. Fa a simi paoh cu a pa nih a velh bal lomi aho tal an um maw? ⁸ A fale dang vialte kha dan a tat hna i nannih cu dan an tat ṭung hna lo ahcun, nannih cu fa taktak si loin lakfa nan si ti sullam tu a si hnga. ⁹ Minung kan pale kong hi ruat hmanh u, an kan chimhhrin i kan upat hna, cucaah cun nunnak kan hmuh nakhnga, thlarau lei kan Pa chinchin cu zeitluk in dah a bia kan ngaih chinchin awk a si. ¹⁰ Minung kan pale nih cun anmah nih ahmaan ti i an hmuhning in an kan chimhhrin i caan tawite ca lawng a si tawn; sihmanhsehlaw Pathian nih a kan chimhhrin cu kanmah ca ṭha dingah le a thiannak kha kan i hrawm khawh ve nakhnga caah a si. ¹¹ Dantatnak kan in tikah kan in lioah cun kan lung a kan lawmhtertu si loin kan ngaih a kan chiattertu a si. Sihmanhsehlaw cu bantuk dantatnak innak nih a chimhhrinmi hna cu daihnak laksawng dinnak nunnak kha an hmu. ¹² Cucaah a thlepmi nan ban kha hler hna u law a dermi nan khuk kha fehter hna u, ¹³ cun a ping a pang ah nan ke hlang sual lo tein um u. Cu ti nan tuah ahcun a beimi nan ke kha a rawk lan lai lo i hmasa i ṭhawnnak a rak ngeihmi kha a ngei ṭhan kho lai. ¹⁴ Midang he rem i zuam u law nunnak thiang in nun i zuam u, zeicahtiah nunnak thiang ngeih loin ahohmanh nih Pathian cu an hmu kho lai lo. ¹⁵ Pathian vel kha ahohmanh nih nan mertak sual nakhnga lo i ralring u. A khami thingkung, a hung ṭhang i mi tampi harnak a petu bantuk kha ahohmanh si sual hlah u. ¹⁶ Ahohmanh nu le pa sualnak tuah hlah u, thlarau lei thil zeihmanh i a rel lomi Esau bantuk zong si hlah u, anih nih cun rocotu sinak kha rawl voi khat ei men ah a zuar ko. ¹⁷ Nan hngalh bantukin, a hnuah cun a pa thluachuahnak kha hmuh ṭhan duh hmanh seh law a hmu ṭhan kho ti lo; mitthli tla in ṭahhnawh len hmanh seh law a tuah ciami kha a thleng kho ti lo. ¹⁸ Nannih nih nan phakmi tlang cu Israel mi nih an phakmi tlang, tawngh khawhmi tlang Sinai Tlang kha a si lo; kha tlang ah khan cun a alh hluahmahmi mei le minmei nak pipi le muihnak le ṭotho le ¹⁹ muko tum thawng le aw thawng kha an hmuh an theih hna. Aw kha an theih tikah, thei ti sawh hlah u sih, tiin mizapi nih khan an nawl, ²⁰ zeicahtiah saṭil a si hmanh ah tlang a tawngtu paoh cu thi lak in lung in cheh a si lai, timi nawlbia kha a celh in an celh lo. ²¹ An hmuhmi cu ṭih a nun tuk caah Moses nih, "A ther in ka ther i ka thin a phang," a ti. ²² Sihmanhsehlaw nannih nih nan phakmi tlang cu Zion Tlang le Pathian nung khualipi van Jerusalem, vanmi a thongthong in an umnak kha a si. ²³ Pathian fapa upa bikbik, vancung ah an min aa ṭial cangmi hna lunglawm in an i pumhnak kha nan phan cang. Mi vialte biaceihtu a simi Pathian le mitling i sermi hna miding mi thlarau hna sin kha nan phan cang. ²⁴ Biakamnak thar a sertu Jesuh sin le Abel thisen nih a chimmi thil nakin a let tam piin a ṭha deuhmi thil kong a chimtu a thletmi a thisen sin kha nan phan cang. ²⁵ Cucaah cun ralring tein um u law nan sin i bia a chimtu bia kha al sual hlah u. Vawlei ah Pathian bia a chimtu bia theih a duh lomi cu an luat lo. Cucaah cun vancung in bia a run chimtu bia cu kan ngaih lo ahcun zeitluk in dah kan luat lo chinchin lai. ²⁶ Kha lioah khan a aw nih vawlei cu a hninh, sihmanhsehlaw atu i bia a kan kammi cu, "Vawlei lawng hi si ti loin van zong voi khat cu ka hninh ṭhan lai," ti hi a si. ²⁷ "Voi khat cu ka hninh ṭhan lai," ti bia nih hin, sermi thil cu hninh le ṭhial an si lai ti kha fiang tein a langhter i hninh khawh lomi thil kha a hmun lai. ²⁸ Cucaah cun kannih nih hninh khawh lomi pennak kha kan hmuh caah i lawm u sih. ²⁹ Kannih kan Pathian cu mi kangh a hmangmi mei a si caah upatnak le ṭihnak in amah duhning tein bia u sih law amah cungah cun i lawm u sih.

¹ Khrih chungah unau nan si bantukin pakhat le pakhat i daw zungzal u. ² Khualtlung kha daw hna u. Khualtlung a dawmi cu an hngalh loin vancungmi nih khan an tlun tawn hna. ³ Thong a tlami kha, an sin i thong a tla vemi bantukin philh hna hlah u. Hremnak a ingmi kha, an sin i hremnak a ing vemi bantukin philh hna hlah u. ⁴ Ṭhitumnak hi mi vialte nih kan hmaizah awk a si i nu le va hi zumh awk tlak an si veve awk a si. Nu le pa sualnak a tuahmi hna le va cungin pa aa duhmi hna cu Pathian nih an bia a ceih hna lai. ⁵ Tangka hi duh tuk hlah u, nan ngeihmi ah khan nan lung awi ko u. Zeicahtiah Pathian nih, "Kan kaltak bal hna lai lo i kan hlaw bal fawn hna lai lo," a ti. ⁶ Cucaah kannih cu kan ralṭha u si law, "Bawipa cu a ka bawmtu a si, zeihmanh ka ṭih lai lo. Minung nih ka cungah zeidah an tuah khawh lai?" tiah ti u sih. ⁷ Pathian bia a rak in chimtu hna nan hruaitu hmasa hna kha philh hna hlah u. Zeitindah an nuncan kha a si i zeitindah an thihning a si kha ruat ṭhan u law an zumhnak kha cawng hna u. ⁸ Jesuh Khrih cu nizan le nihin le zungzal in amah ning a si ko. ⁹ Cawnpiaknak hmaan lo a phunphun kha a pingah i hruaiter hna hlah u. Pathian vel nih nan lung kha a ṭhawnter ahcun a ṭha, rawl kong phunglam zulh nih cun zeihmanh ṭhathnemnak a chuahpi lo; hi bantuk phunglam a zulmi hna cu an zulhmi phunglam nih khan zeihmanh a bawm hna lo. ¹⁰ Judah mi biaknak thlam chung i rian a ṭuanmi hna tlangbawi hna nih khan kannih biakṭheng cung i thawimi raithawinak sa einak nawl kha an ngei lo. ¹¹ Judah mi Tlangbawi Ngan nih khan Hmun Thiang Bik chungah sual thawinak caah saram thisen kha a luhpi tawn; sihmanhsehlaw saram pum kha cu, riahhmun lengah an khangh hna. ¹² Hi ruangah hin Jesuh zong kha, hau lengah a thih kha a si i cucu a thi in mi kha kan sualnak thianhpiak a kan duh caah a si. ¹³ Cucaah cun amah sinah khan riah hmun lengah cun kal u si law a inmi ningzahnak kha va ing ve u sih. ¹⁴ Hi vawlei ah hin kannih caah zungzal hmun ding khua a um lo, a ra laimi khua tu kha kan cuan. ¹⁵ Cucaah Pathian cu thangṭhat zungzal ko u sih. Cu thangṭhatnak cu Jesuh min kan kaa in kan phuan kha a si i cucu Jesuh thawngin Pathian sinah kan pekchanhmi kan raithawinak a si. ¹⁶ Pakhat le pakhat i bawmh le pakhat le pakhat cung i ṭhatnak tuah kha philh hlah u; hihi Pathian lung a tongmi raithawinak a si. ¹⁷ Nan hruaitu pawl kha an bia ngai hna u law an nawl zul hna u. An rianṭuan ningcang kha Pathian hmaiah chim an duh te lai caah, i din loin nannih kha an in zohkhenh hna. An nawl nan ngaih hna ahcun an rian kha lunglawm tein an ṭuan lai, nan ngaih hna lo ahcun ngaihchia in an um lai i cucu nan caah a ṭhahnem lai lo. ¹⁸ Thla kan campiak lengmang ko u. A hmaanmi thil kha tuah kan duhmi a si zungzal caah kan chiaṭha thleidannak kha a thiang ko. ¹⁹ Cun Pathian nih, nan sinah tuan chinchin ah a ka ratter nakhnga thla rak ka campiak u tiah kan nawl fawn hna. ²⁰ Pathian nih kan Bawipa Jesuh cu thihnak in a thawhter i Jesuh cu a thihnak thawng khan Tuukhal Ngan le zungzal biakamnak a fehtertu a si. ²¹ Cun Jesuh thihnak in a thawhtertu daihnak Pathian nih cun amah duhnak nan tuah khawhnak dingah a herhmi thil vialte cu in pe hna seh law Jesuh Khrih thawngin kan chungah a duhmi paoh cu tuah ko seh. Cun Khrih cungah zungzal in zungzal tiang sunparnak cu um ko seh. Amen. ²² Ka u le ka nau hna, ca kan kuatmi hna hi a sau zong a sau lem lo i cucaah cun lung ṭhawnnak bia kan chimhmi hna hi lungsau ngaiin rak zul u tiah kan nawl hna. ²³ Kan unau Timote kha thong chungin a chuak cang ti theihter kha kan duh hna. A rat manh ahcun, nanmah tlawn i ka rat tikah ka rak i ratpi lai. ²⁴ Nan hruaitu vialte hna le Pathian mi vialte hna kha rak ka biakchawnhpiak hna u. Kan unau pawl nih Itali ram in an in biakchawnh hna. ²⁵ Pathian vel cu nan dihlak cungah um ko seh.