HAGGAI
11 Siangpahrang Darius a bawi kum hnih kum, thla ruknak thla, a ni khat ni ah profet Haggai sinin Shealtiel fapa Zerubbabel, Judah ram uktu bawi le Jehozadak fapa Joshua, Tlangbawi Ngan sinah cun Bawipa bia cu a phan. 2 Ralkapbu Bawipa nih Haggai cu, "Hi miphun nih hin, Bawipa inn cu sak ṭhan awk a si rih lo, an ti," tiah a ti. 3 Khi tikah hi bia hi profet Haggai sin cun a ra phan: 4 "Hi inn hi rawk nelnul in a rilh ko lakah hin nannih cu inncung khuh ṭhaṭha a ngeimi inn i um cu a caan a si maw? 5 Cucaah hihi ralkapbu Bawipa nih a chimmi bia cu a si: Nan umtuning hi ruat hmanh u. 6 A tuh cu tampi nan tuh ko, sihmanhsehlaw tlawmte lawng nan zun; a ei cu nan ei ko, sihmanhsehlaw nan orthi a hnim bal lo; a din cu nan din ko, sihmanhsehlaw nan i za ceoceo tiang lawng a si; puan cu nan i aih ko, sihmanhsehlaw nan khua a lum bal lo; rianṭuantu nih khan an ṭuan man an hmuhmi cu zal pem chungah an sanh lengmang ko. 7 Ralkapbu Bawipa bia cu hi bangin a si: Nan umtuning hi ruat tuah u. 8 Tlang ah khin hung kai u law thing hung la u law ka sunparnak ka langhter khawh nakhnga ding, ka ca i aa tlakmi inn pakhat in sa tuah u, tiah Bawipa nih a ti. 9 Nan kawlmi cu a tampi, sihmanhsehlaw nan hmuhmi cu a tlawm. Nan rawl ṭuanmi cu inn i nan hun tlunpi ah khan kei nih lolak in ka rak chem hna. Zeicahdah hi bantukin a si? tiah Bawipa nih a ti. Hi ti a si cu, nannih vial nih i dornak inn nan i ngeih cio cang i kei ka inn vial rawk nelnul in a rilh ko caah hin a si. 10 Van nih dap tlakter duh lo le vawlei nih a theitlai a chuah duh lo cu nanmah ṭhat lonak ruangah pei a si cu. 11 Cucaah ram cungah siseh, tlang cungah siseh, fangvoi cungah siseh, mitsur hang thar cungah siseh, chiti cungah siseh, vawlei chungin a chuakmi thil paohpaoh cungah siseh, mi cungah siseh, saṭil cungah siseh, mi nih an ṭuannak in a chuakmi thil paohpaoh cungah rocar kha ka tlunter," tiah a ti. 12 Shealtiel fapa Zerubbabel, Jehozadak fapa Joshua Tlangbawi Ngan le a tangmi midang hna nih khan Bawipa an Pathian nih a chimmi cu an ngaih i Bawipa an Pathian nih profet Haggai kha a rak thlah tikah a chimmi kha an ngaih i Bawipa ruangah cun ṭihnak in an khat. 13 Cucaah Bawipa nih a thlahmi Haggai nih, Bawipa nih a fial bangin mizapi cu a thawh hna i, 14 "Bawipa nih, ’Nan sinah ka um ko,’ a ti," tiah a ti. Khi tikah Bawipa nih, Shealtiel fapa Zerubbabel, Judah ram uktu bawi le Jehozadak fapa Joshua, Tlangbawi Ngan kha le midang hna cu an lung a thawhter hna i thla ruk thla ni kul le ni li ni Darius a bawi kum hnihnak ah cun an ra i 15 Ralkapbu Bawipa, an Pathian inn ah cun rianṭuan hram an thawk.
21 Siangpahrang Dairus a bawi kum hnihnak, thla sarih thla, ni kul le ni khat ni ah cun, Bawipa nih profet Haggai sinin bia a chim. 2 Shealtiel fapa Zerubbabel, Judah ram uktu bawi, Jehozadak fapa Joshua, Tlangbawi Ngan, le midang hna cu a thawh hna i, 3 "Hi inn hi hmasa i a rak sunpar lioah a hmumi atu ah hin nan um rih maw? Atu ah hin tah zeidah a lawh cang? Pakpalawng a si cang ko lo maw? 4 Sihmanhsehlaw atu cu maw Zerubbabel, na lungṭhawng ko, tiah Bawipa nih a ti; maw Jehozadak fapa Joshua, Tlangbawi Ngan, na lungṭhawng ko; ramchung mi vialte hna, ṭuan tuah u, tiah ralkapbu Bawipa nih a ti. 5 Zeicahtiah Izipt ram in nan chuah i nan sinah biakamnak ka tuah bantuk khan nan sinah ka um ko. Ka thlarau nih an umpi ko hna, ṭih hlah u! 6 Zeicahtiah ralkapbu Bawipa nih hitihin a ti: Hmailei caan tlawmte chungah van hna le vawlei le rili le vawlei ro hi ka hninh ṭhan hna lai. 7 Cun miphun vialte cu ka hninh hna lai i an chawhlawn cu nan sinah an rak put lai i hi inn hi sunparnak in ka khahter lai, tiah ralkapbu Bawipa nih a ti. 8 Ngun cu keimah ta a si, sui cu keimah ta a si, tiah ralkapbu Bawipa nih a ti. 9 Hi inn a hmanung u sunparnak hi a hmasa u sunparnak nakkhan a ngan deuh lai, tiah ralkapbu Bawipa nih a ti; cun hi hmun ah hin rumnak ka chiah lai," tiah ralkapbu Bawipa nih a ti. 10 Dairus a bawi kum hnihnak, thla kua thla, ni kul le ni li ni ah, profet Haggai sinin Bawipa bia cu hihi a si: 11 Ralkapbu Bawipa nih hitin a ti, "Tlangbawi kha zeitindah nan biakhiahning a si, tiah hal tuah hna. 12 "Mi pakhatkhat nih Pathian sin pekmi sathiang kha a puan tlang bil chungah i fun seh law, a puanpar nih cun changreu maw sa chumhmi maw mitsur hang maw chiti maw rawl zeipaoh zong maw, hei tawng seh law cu tikah a tawnghmi rawl cu a thiang ah a canter lai maw? tiin hal tuah hna. Cucu a hal hna tikah tlangbawi hna nih cun, "A thiang lai lo," an ti. 13 Cun Haggai nih cun, "Mi pakhatkhat nih miruak tawng seh law, cun hi rawl pakhatkhat hi tawng hna seh law, cu rawl cu cu nih cun a thurter hna lai maw?" tiah a ti. Tlangbawi hna nih cun, "A thurter lai," an ti. 14 Cun Haggai nih cun, "Bawipa nih, ’Cu bantukin hi mi hna, ka hmaika i a ummi miphun le an kut nih a tuahmi rian vialte hi an si i an ka pekchanhmi hi a thiang lomi an si,’ a ti," tiah a ti. 15 Asinain nihin thawk in hmailei ah a tlung dingmi thil hi ruat hmanh u. Bawipa biakinn chungah lung pakhat kha lung dang pakhat cung i nan chonh hlanah khan zeitindah nan rak um? 16 Rawl pumhmi kha phorh kul a si lai tiah nan ruahmi ah khan phorh hra lawng a rak um; mitsur hang nennak khor umpu sawm nga a um lai tiah nan fuhmi ah, kul lawng a rak um; 17 Nannih le nan kumvui rawl vialte cu rocarnak le hrirai le rial in kan den hna, sihmanhsehlaw keimah leiah kirnak lungthin nan ngei hlei lo, tiah Bawipa nih a ti. 18 Nihin ni thawk hin hmailei cu ṭha tein ruat cang tuah u, thla kua thla, ni kul le ni li ni thawk hin. Bawipa biakinn hram nan bunh ni thawk hin ruat cang tuah u. 19 Rawlruk ah thlaici ca hmanh a um ti lo i mitsur ruang le theipi kung le taleti kung le oliv kung nih thei zeihmanh an tlai rih lo nain atu thawk in hmailei cu thluachuah kan pek cang hna lai, tiah Bawipa nih a ti. 20 Bawipa bia cu Haggai sinah thla ni kul le ni li ni ah a ra ṭhan i hitin a ti: 21 "Judah uktu bawi Zerubbabel cu, ’Van le vawlei le 22 pennak bawiṭhutdan hna hi ka hninh dengmang cang hna; miphun hna ṭhawnnak cu ka hrawh dengmang cang i an rangleng hna le an cung i aa citmi ralkap hna cu ka thluk dengmang cang hna; cun rangtum hna le an cung i aa citmi ralkap hna cu anmah le an hawi vainam cio khan an thi lai,’ tiah ralkapbu Bawipa nih a ti. 23 Cu ni ah cun ka sal Zerubbabel, Shealtiel fapa, nangmah cu kan lak lai i kan thim cang caah minkhenhnak kutdong hrolh ah kan ser lai, tiah Bawipa nih a ti, tiah va chim," a ti. Hihi ralkapbu Bawipa bia a si.