HABAKKUK

HABAKKUK

¹ Profet Habakkuk nih langhnak in a hmuhmi bia: ² Maw Bawipa, zei can dah nangmah cu kan auh lengmang lai i let loin na ka um lai? "A kenkip ah zaang-ennak lawng a um ko," tiah na sinah ka au, Sihmanhsehlaw khamhnak zeihmanh na tuah hlei lo. Zei can dah ka au lengmang ko rih lai? ³ Zeicahdah ṭhat lonak hi vialte hi na ka hmuhter i mi nih fahnak an inmi cu na zoh sawhsawh men ko? Rawhralnak le zaang-ennak nih an ka chuahhnawh, Remlonak kha a chuak i siknak kha a tam. ⁴ Cucaah nawlbia cu san a tlai ti lo i biading cu teitu a si kho ti lo; Miṭhalo nih khan miding mi cu an fimneh hna i cucaah biading cu merh lengmang a si ko cang. ⁵ Nannih mihlenhmang mi hna, zohhmanh u: Mah hihi nan khuaruah an hartertu hna le nan lung an suhaitu hna cu a si lai, Nanmah nan chan chungah hin thil pakhat ka tuah lai i cu thil cu an in chimh hna hmanh ah nan zum kho lai lo. ⁶ Mah cucu hihi a si: Khaldi mi cu ka thawhter hna lai, Annih cu mipuar, mithintawi an si; Anmah inn a si lomi lak awkah khan vawlei cung khuazakip ah an kal. ⁷ Miṭihnung ngaingai an si, anmah nawl hleiah cun aho nawl hmanh an duh lo. ⁸ An rangtum hna cu pawlai nakin an khul a rang deuh, Zan i a vakmi cenghngia nakin ṭih an nung deuh; An leng hnuktu rangtum hna nih khan heh tiah vawlei kha an huah i Langta nih sa a vun zuanhnawh vungmang bantuk khin lamhla piin an ra le. ⁹ Hi mi vialte hna hi zaang-ennak tuah awkah a rami an si, An mui ṭihnung cu nichuahlei thli bantuk a si, Sal i an tlaihmi hna cu thetse zat an si. ¹⁰ Siangpahrang cu an nihsawh men ko hna i uk bawi hna cu zeihmanh ah an rel hna lo; Ralhau an hmuh ah an nih a chuak men i raltuknak chuntlung kha an serhnawh duak hna i an lak ko hna. ¹¹ Cun annih cu thlitu bantukin an lan i an lo; An ṭhawnnak an pathian i aa serhmi hna cu vansang au in an um. ¹² Maw Bawipa, nangmah cu hlanlio piin na um cang lo maw? Ka Pathian, nangmah cu a thiang i zungzal in a nungmi na si. Maw Bawipa, annih kha biaceihtu ah a sertu hna cu nangmah na si, Maw Lungpi, annih kha biaceihnak ah biakhiaktu i a sertu hna cu nangmah na si. ¹³ Ṭhat lonak kha zoh awkah na mit cu a thiang tuk i minung nih fahnak an in tikah na zoh sawhsawh kho hna lo. A si kun ahcun, zeicahdah mi cu pakhat le pakhat an i rawi lengmang lengmang tikah na zoh sawhsawh ko hna i Zeicahdah a ṭha lomi hna nih anmah nakin a ding deuhmi kha an thah len ko hna tikah hin dai tein na um ziar ko? ¹⁴ Nangmah nih minung cu rili chung i a ummi nga, rili chung i a ummi thilnung uktu a ngei lomi bantuk ah khin na ser hna. ¹⁵ Ngatlaitu hna nih khan sio in an sio hna, sur sau in an hnuh hna i sur in an pumh hna, Cun an tlaihmi kha a tam caah an i lawm i an lam. ¹⁶ Cucaah an sur ngan kha raithawinak an pekchanh hna i an sur kha khangh thawinak an pekchanh hna; Zeicahtiah nun nuam ngaiin an nunnak le rawl tampi an ngeih khawhnak cu an sur hna thawng cun a si. ¹⁷ Cu bantuk cun mi nih vainam kha an i phawi zungzal ko i Zaangfahnak um loin miphun kha an sam lengmang ko hna.

¹ Ralvennak innsang ah khan ka va dir lai i kulhnak vampang ah khan ka va um lai; Ka sinah zeidah a chim lai ti kha ka va hngak lai i, Ka phunzainak kongah khan ka sinah zeidah a chim lai i, Kei nih zeitindah ka leh lai ti kha hmuh awkah ka va cuan lai. ² Cun Bawipa nih a ka leh i, "Langhnak na hmuhmi cu ṭial tuah, Lungtlap ah khan ṭial law a reltu nih tlikpah hmanh in an rel khawh nakhnga fiang tein ṭial tuah. ³ Na hmuhmi langhnak a tlin caan cu a phak rih lo caah a ṭial in ṭial. Asinain a caan cu khulrang in a ra lio ko i, Kan hmuhsakmi cu a tling hrimhrim ko lai. A caan cu a raumi a lo lai, sihmanhsehlaw hngak ko, a tling hrimhrim ko lai i sau a rau ti lai lo," a ti. ⁴ Cun a bia cu hihi a si: "A ṭha lomi cu a nung lai lo. Sihmanhsehlaw a dingmi cu a nung lai. Pathian sinah zumhtlak a sinak thawngin a nung lai," a ti. ⁵ Rumnak hi hlen a hmang, mihakkau hi an i porhlaw i dai zirziar in an um kho lo. Thihnak bantuk an si — khim ti an ngei lo. Cucaah cun ram khat hnu ram khat an tuk hna i an tei hna i an mi kha an sinah an pumh hna. ⁶ Teimi hna nih khan an teitu hna kha an nehsawh hna lai i zei i an rel hna lai lo kha an langhter lai. An thawh hna lai i, "Nanmah ta a si lomi thil kha nan i lak, asinain nan rawk ṭhiamṭhiam ko lai; Lei a batu hna kha hranhram in, ka pe ko, tiah nan cawh peng hna, Cuticun zei can tiang dah rum chin lengmang nan i timh lai? ⁷ Sihmanhsehlaw nan vun i hngalh khawh hlanah, Midang a teitu kha leiba ngei cu nan si lai i nan leiba cu hranhram in pekter nan si lai. Nan ral kha a ra lai i a ther in nan ther lai, nanmah kha an in ramh hna lai. ⁸ Miphun tampi kha nan ramh hna. Asinain a tangmi nih khan an in ramh ve hna lai. Lainawnnak nan tuahmi le vawleicung mi hna le khualipi chungah ṭhat lonak nan tuahmi ruangah an in ramh hna lai. ⁹ Rawk ding nan si ko cang! Hranhram in mi nan va chuhmi hna thil khan nan innchungkhar nan rumter i harnak le ṭihnung nih phak khawh lo dingin him tein nan tuah! ¹⁰ Asinain nan tuahmi nih cun nan innchungkhar cungah ningzahnak a tlunter; Miphun tampi kha nan va hrawh hna, asinain nan i tlunpimi cu nanmah rawknak kha a si ko. ¹¹ Vampang lung hmanh nih an in hauh cang hna i inntling hna nih khan an aw cu an rak thanter. ¹² Rawk ding nan si ko cang! Thisen chuahnak in khua cu nan tlak i sualnak cungah a hram cu nan bunh. ¹³ Nan teimi miphun hna nih fak piin an rak ṭuanmi cu pakpalawng ah nan ser i an rak sakmi cu meizik in nan khangh dih. Hihi a tuahtu cu ralkapbu Bawipa a si. ¹⁴ Sihmanhsehlaw rili cu ti in a khah bantukin vawlei cu Bawipa hngalhnak le sunparnak in a khat lai. ¹⁵ Rawk ding nan si ko cang! Nan thinhun in nan innpa hna cu nan nautat hna i ningzah nan thlaih hna. Zuri sawn in nan sawnter hna. ¹⁶ Upatnak si loin ningzahnak in khuh nan si ve lai, nanmah zong cu zuri sawn in nan sawn ve lai. Bawipa nih nan dantatnak hrai kha an dinter hna lai i nan thangṭhat upatnak kha ningzahnak ah a cang lai. ¹⁷ Lebanon tupi kha nan ṭhiam hna, atu cu nanmah zong ṭhiam na si ve lai. A chung saram kha nan thah hna, atu cu saram nih khan nan thin an in phanter hna lai; Lainawnnak nan tuahmi ruang le vawleicung mi hna le a khualipi hna cung i zaang-ennak nan tuahmi ruangah, hihi cu nan cungah a tlung lai. ¹⁸ Siasal hi a ṭhathnemnak zei a um maw? Minung nih an sermi a si ko i lih dah ti lo cu zeihmanh aan chimh khawhmi hna a um lo; a holh hmanh a holh kho lomi pathian cu a sertu caah a tuah khawhmi zeital a um maw? ¹⁹ Rawk ding nan si ko cang! Thingtan cu naa thawh i "I hlau tuah," na ti; Lungtum cu naa thawh i, "Tho tuah," na ti. Siasal nih zeital an phuanpiak kho maw? Ngun le sui cun tuam a si ko lai, asinain a chungah nunnak a um lo. ²⁰ Bawipa cu a biakinn thiang chungah a um, vawleicung mi vialte hna a hmaiah dai zirziar in um tuah u.

¹ Profet Habakkuk thlacamnak, Shigionoth aw in: ² Maw Bawipa, na thil tuahmi kha ka rak theih hna; Maw Bawipa, na rianṭuanmi kha ka rak hmuh. Hi kum vialte hna chungah hin nangmah cu naa langhter i Na thinhunnak chung zongah zaangfahnak kha na philh lo. ³ Pathian cu Teman in a ra, Mi Thiang cu Paran Tlang in a ra; A ceunak kha van a khat i a sunparnak cu vawlei kha a khat. ⁴ A ceunak cu ni ceunak bantuk a si, Amah sin cun ceunak kha an chuak; Cu hna hnulei ah cun a ṭhawnnak kha aa thup. ⁵ A hmaiah rai kha a kal i a kalnak paoh ah zawtnak nih a zulh. ⁶ A dir tikah vawlei kha aa hnin, a zoh hna tikah miphun kha an ther; Zungzal in a hmunmi tlang hna cu an i cheu i zungzal in a hmunmi fing hna cu an cim; ⁷ Kushan thlam hna cu an ther i Midian ram cu a lau. ⁸ Maw Bawipa, tiva hna cungah na thin a hung maw? Na thin hunhnawhmi cu tiva cu an si maw? Nangmah nih na teinak rangleng a hnuktu rangtum hna cu na chiah hna tikah, Na thinhunnak cu Rili cungah a si maw? ⁹ Na likuk cu phelh awkah na timh i Na thalbawm chungah cun cantiang a khat in na sanh hna; Vawlei cu tiva in na cheu dih. ¹⁰ Tlang nih an in hmuh tikah an i ngerh cukmak, Tilian hna cu an luang hluahmah; a thukmi rili hna cu an awn. ¹¹ A khul a rangmi na cantiang an hmuh tikah, A cer zukmakmi na fei an hmuh tikah ni nih mer a philh i thlapa nih a dirnak hmun ah a dir peng. ¹² Hronak he vawlei ah cun naa chawk i Na thinhun in miphun cu na lamh hna. ¹³ Na mi hna khamh awkah khan na kal i Na chiti thuhmi khamh awkah khan na ra; Miṭhalopa inn cu a cunglei in na vun ṭheh i a hram lung a langh ritret tiang na hlai. ¹⁴ Na hriamnam in a lu cu na hliam i amah a zultu hna cu a sin khan thlichia nih a choih hna. Sifakmi hna cu an i thuhnak hmun ah khan ei awkah annih nih an kaa an i aan. ¹⁵ Rili cu na rangtum hna he nan tan tikah a ṭhawngmi ti cu a so in a so. ¹⁶ Hi thil vialte hi ka theih tikah a therh in a ka therh, Cu thawng ka theih ah ka hmur cu a ther, Ka ruh cu ti bantuk ah an i cang i ka kal ah ka ke cu an ther; Kannih a kan dohtu hna cung i a tlung ding harnak ni ka ruah ah a ther in ka ther ko. ¹⁷ Theipi kung cu par loin, Mitsur ruang zongah a thei um hmanh hlah seh, Oliv thing cu tlai loin Lo zongah tirawl zeihmanh chuak loin um hmanh seh, Kawm chung saṭil run kha um loin Saṭil inn ah saṭil kha um hmanh hna hlah seh law, ¹⁸ Bawipa ah cun kaa lawm ṭhiamṭhiam ko lai i A ka khamhtu Pathian cu ka lawmh ṭhiamṭhiam ko lai. ¹⁹ Bawipa Pathian cu ka ṭhawnnak hram a si, Ka ke cu sazuk ke bantukin a khul a ranter hna i tlang sang cungah khan a ka hruai.