GENESIS

GENESIS

¹ A hramthawk ah, Pathian nih van le vawlei a ser hna tikah, ² vawlei cu mui zong a ngei lo, pungsan zong a ngei lo. Rilipi cu muihnak nih a khuh i ti cungah cun Pathian ṭhawnnak cu aa chawk. ³ Cun Pathian nih, "Ceunak um seh," tiah a ti i ceunak cu a hung um. ⁴ Ceunak cu a zoh i aa lawm. Cun ceunak le muihnak cu a ṭhen hna i ⁵ ceunak cu "Chun" tiah min a sak i muihnak cu "Zan" tiah a ti. Zanlei cu a hung dih i zinglei kha a hung um cucu ni khatnak ni cu a si. ⁶ Cun Pathian nih cun, "Ti le ti a ṭhentu hna ding caah aa kuaimi van pakhat in um seh law, ti cu hmun hnih ah um hna seh," tiah a ti i cu tining cun a hung si. ⁷ Cuticun Pathian nih cun van kuai cu a ser i a tang i a ummi ti le a cung i a ummi ti cu a ṭhen hna; ⁸ van kuai cu a min ah "Van" a sak. Zanlei cu a hung dih i zinglei kha a hung um, cucu ni hnihnak ni cu a si. ⁹ Cun Pathian nih cun, "Van tang i a ummi ti cu hmun khat ah i pum hna seh law vawlei kha hung lang seh," tiah nawl a pek i cu bang cun a hung si. ¹⁰ Vawlei cu a min ah "Vawlei" a sak i a pumhtermi ti cu "Rili" tiah a ti. A tuahmi kha a zoh i a lung a si. ¹¹ Cun aa thawh i, "Vawlei cungah hin thingram a phunphun kho hna seh, a tlaimi kung hna le rawl a phunphun thei a phunphun a vuimi rawlkung hna," tiah a ti i cu bang cun a hung si. ¹² Cucaah cun vawlei cungah cun thingram a phunphun an kho, rawl a vuimi rawlkung hna le thei a tlaimi thingkung hna an si. Pathian nih a tuahmi cu a zoh i a lung a si. ¹³ Zanlei cu a hung dih i zinglei kha a hung um, cucu ni thumnak ni cu a si. ¹⁴ Cun Pathian nih cun, "Chun le zan a ṭhentu ding le ni le kum le caan kha zeitik in dah an i thawk cio ti hngalhtertu dingah van ah khin ceunak um hna seh; ¹⁵ cun cu ceunak hna nih cun vawlei hi ceuh hna seh," tiah a ti i cu bang cun a hung si. ¹⁶ Cucaah Pathian nih cun ceunak ngan pipi pahnih hi a ser hna, ni hi chun uktu dingah a ser i thlapa hi zan uktu dingah a ser; arfi zong khi a ser hna; ¹⁷ ceunak hna cu van ah khin vawlei a run ceuhtu dingah a chiah hna, ¹⁸ chun le zan a uktu hna ding le ceunak le muihnak a ṭhentu hna dingah a chiah hna. A tuahmi kha a zoh i a lung a si. ¹⁹ Zanlei cu a hung dih i zinglei kha a hung um, cucu ni linak ni kha a si. ²⁰ Cun Pathian nih cun aa thawh i, "Ti nih hin thilnung phun tampi a hrin hna lai i va hi thli lakah hin an zuang lai," a ti i cu bang cun a hung si." ²¹ Cuticun Pathian nih cun rili chung i a ummi sahrang ṭihnung pipi le ti lak i a tlongmi thilnung a phunphun le va a phunphun kha a ser hna. A tuahmi kha a zoh i a lung a si. ²² Cun thluachuah a pek hna i, "Ti chung i a ummi thilnung hi karh u law rili hi khat u, va hi tampi in karh u," tiah a ti hna. ²³ Zanlei cu a dih i zinglei kha a hung um, cucu ni nganak ni a si. ²⁴ Cun Pathian nih cun, "Vawlei nih hin inn zuat saṭil a phunphun le ramlak saram a phunphun, a hme he a ngan he, hring hna seh," a ti i cu bang cun a hung si. ²⁵ Cuticun inn zuat saṭil a phunphun le ramlak saram a phunphun a hme he a ngan he a ser hna. A tuahmi kha a zoh i a lung a si. ²⁶ Cun Pathian nih cun, "Atu cu minung kan ser cang hna lai; kanmah mui an keng lai i kanmah he kan i lo lai. Nga si hna seh, va si hna seh, inn zuat saṭil si hna seh, ramlak i a ummi saram a hme he a ngan he si hna seh, an uk dih hna lai," tiah a ti. ²⁷ Cuticun Pathian nih minung cu amah mui lo in a ser, minung cu Pathian mui in a ser hna. Mipa le minu kha a ser hna. ²⁸ Thluachuahnak a pek hna i, "Tefa tampi in ngei u law nan tefa cu vawlei cung khuazakip ah khat hna seh, cun annih nih vawlei cu uk hna seh. Nannih cu nga cung le va cung le ramlak saram a hme he a ngan he an dihlak cung i nawlngeihnak kan pek hna," a ti. ²⁹ Nan ei awk caah thlai phun kip le thei phun kip kan pek hna; ³⁰ Sihmanhsehlaw ramsa vialte hna le va vialte hna le vawlei ah a lawn in a lawnmi vialte nunnak thaw a ngeimi vialte hna caah ram hring le thlaihnah borbor ka pek hna," a ti i cu bang cun a hung si. ³¹ Pathian nih a sermi thil vialte cu a zoh i a lung a si ngaingai. Zanlei cu a hung dih i zinglei kha a hung um, cucu ni ruknak ni cu a si.

¹ Cuticun vawlei le van le vawlei le vancung i a ummi thil vialte cu ser an si. ² Ni sarihnak ni ah Pathian nih a tuahmi thil vialte cu a lim hna i cu ni ah cun rian ṭuan loin a um. ³ Ni sarih ni cu thluachuah a pek i a dang tein a chiah, zeicahtiah cu ni cu a thil ser a lim i rianṭuan loin a um ni kha a si. ⁴ Vawlei le van i a ummi thil vialte ser an sining cu cuticun a si. Bawipa Pathian nih vawlei le van i a ummi thil vialte hna cu a ser hna tikah, ⁵ vawlei cungah hin ramkung zeihmanh a um lo i thlaici zeihmanh a kho lo, zeicahtiah vawlei cungah khan ruah a surter rih lo i vawlei cung i rian a ṭuantu ahohmanh an um rih lo. ⁶ Asinain ti cu vawlei chungin a put i vawlei kha a hnawnter. ⁷ Cun Bawipa Pathian nih vawlei khan tlak tlawmpal a lak i mipa ah a ser; nunnak petu thaw kha a hnar chungah a chuahhnawh i mipa cu a hung nung. ⁸ Cun Bawipa Pathian nih nichuahlei ah Eden dum pakhat a ser i cuka ah cun a sermi mipa kha a chiah. ⁹ Vawlei chung cun aa dawhmi thingkung le rawl ca i a ṭhami kung a phunphun kha a khohter hna, dum laifang ah cun nunnak thingkung, chia le ṭha hngalh khawhnak thingkung zong a khohter. ¹⁰ Eden cun tiva pakhat a luang i cu tiva nih cun dum cu ti a toih. Cu tiva cu tiva pali ah aa ṭhen. ¹¹ Pakhatnak cu a min ah Pishon a si; cu tiva cu Havilah ram a velchum i a luangmi kha a si. ¹² Cuka ah cun sui thiang ngaingai phun kha an hmuh i a man a sungmi thingthling le oniks lungvar sen zong an hmuh hna. ¹³ Tiva pahnihnak a min cu Gihon a si; cu tiva cu Kush ram velchum i a luangmi kha a si. ¹⁴ Tiva pathumnak cu Tigris a si, cu tiva cu Assiria ram nichuahlei i a luangmi kha a si. Tiva palinak cu Zufrates tiva kha a si. ¹⁵ Cun Bawipa Pathian nih mipa cu a lak i Eden dum chungah cun dum cu a thlawh awk le ven awkah a chiah. ¹⁶ Mipa cu a thawh i, "Dum chung i a ummi thingkung vialte hi an thei na ei dih ko hna lai, ¹⁷ sihmanhsehlaw a ṭha le a ṭhalo hngalhnak pe khotu thingkung a tlai hi cu na ei lai lo. Cu thingthei cu na ei hrimhrim lai lo. Na ei ahcun, na ei ni hrimhrim ah na thi lai," a ti. ¹⁸ Cun Bawipa Pathian nih cun, "Mipa amah lawng i a um hi a ṭha lo, hawile bawmtu ka serpiak lai," a ti. ¹⁹ Cucaah vawlei khan saram an dihlak le va an dihlak kha a ser hna i mipa sinah cun an min rak sak awkah a ratpi hna. Mipa nih min a rak sakmi hna kha an min ah a cang lan. ²⁰ Cuticun mipa nih cun inn zuat saṭil vialte le va vialte le ramlak saram vialte cu min a sak hna, asinain amah caah cun hawile bawmtu an um lo. ²¹ Cun Bawipa nih mipa cu thu hluahmah in a hngilhter i aa hngilh karah cun a hnakruh pakhat kha a zuh i cu a zuhnak cu titsa in a phih. ²² Mipa hnakruh a zuhmi cun minu pakhat a ser i a sinah cun a ratpi. ²³ Cun mipa nih cun aa thawh i, "Atu hi pei keimah phun taktak a simi cu a si hi; Ka ruh i lakmi ruh, ka sa in lakmi sa. A min ah "Nu" si seh, zeicahtiah amah cu mipa chungin lakmi a si," a ti. ²⁴ Cucaah cun pei pa nih a nu le a pa a kaltak hna i a nupi he an i fonh i pum khat i an can hi a si cu. ²⁵ Mipa le a nupi cu an pahnih in hnipuan an ngei lo, sihmanhsehlaw an ning a zak lo.

¹ Bawipa Pathian nih a sermi saram hna lakah rul hi a zer bik. Rul nih cun minu kha a thawh i, "Dum chung i a ummi thingthei hi a zeihmanh nan ei lai lo tiah Pathian nih an ti taktak hna maw?" tiah a hal. ² Nu nih cun, "Dum laifang i a ummi thingthei khi dah ti lo cu, ³ dum chung i a ummi thingthei vialte hi azeipaoh kan ei khawh ko hna," tiah a leh. "Pathian nih khi thing khi cu a tlai nan ei lai lo, a tongh zong nan tawng lai lo, nan tongh ahcun nan thi lai, a kan ti," tiah a ti. ⁴ Rul nih cun, "Cucu ahmaan lo; nan thi lai lo. ⁵ Pathian nih cu bantukin a ti cu, kha thingthei nan ei ahcun nan ei cangka in amah bantukin hngalhnak nan ngei ve lai i a ṭha le a ṭhalo kha nan hngal ve lai ti a hngalh caah a si," a ti. ⁶ Nu nih cun thingkung cu mithlang ngai a si le a thei cu mitthi ngai a si kha a hmuh tikah a fimmi si cu zeitluk in dah a nuamh hnga ti kha a ruat. Cucaah a thei cu a lawh i a ei. Cun a va zong kha tlawmpal a pek ve i a ei ve. ⁷ An ei dih cangka in hngalhnak kha an vun hmu i taklawng an si kha an i hngal; cucaah theipi hnah kha an i ṭhit i an i hruk. ⁸ Cu ni zanlei sang ah cun Bawipa Pathian cu dum chung i aa chawh kha an theih i thing lakah khan an i thup. ⁹ Sihmanhsehlaw Bawipa Pathian nih cun mipa cu a vun auh i, "Khuazei ah dah na um?" tiah a ti. ¹⁰ Mipa nih cun, "Dum chung i naa chawh thawng kha ka theih i taklawng ka si caah ka thin a phang, kaa thup," tiah a leh. ¹¹ Pathian nih cun, "Aho nih dah taklawng na si cu an chimh?" tiah a hal. "Ei hlah tiah kan timi thei kha na ei dahra?" tiah a ti. ¹² Mipa nih cun, "Na ka serpiakmi nu nih khan thei cu ei awkah a ka pek i ka ei," tiah a leh. ¹³ Bawipa Pathian nih minu cu a thawh i, "Zeicahdah hihi na tuah?" tiah a hal. Minu nih cun, "Rul nih a ka hlen i a ka eiter," tiah a leh. ¹⁴ Cun Bawipa Pathian nih rul cu a thawh i, "Hi ruangah hin nangmah cu dantat na si; hi chiatsernak hi nangmah lawng nih na in lai. Atu thawk hin na paw in na lawn cang lai i na eimi rawl cu leidip a si lai. ¹⁵ Nangmah le nu cu nan i hua lai, a tefa le na tefa cu ral an si lai. Mi nih na lu kha rial an in zuam lai i nang nih an kedil kha cuk naa zuam ve lai," a ti. ¹⁶ Cun minu cu a thawh i, "Fa na pawinak i harnak na inmi kha ka karhter lai, fa na hrinnak i fahnak na inmi kha ka karhter lai; asinain na va cu na duh ṭhiamṭhiam ko lai i amah cu na cung bawi a si lai," a ti. ¹⁷ Cun Adam cu a thawh i, "Na nupi bia na ngaih i ei hlah kan timi thei kha na ei caah vawlei hi nangmah ruangah chiatserh a si lai. Na ei khim rawl hmuhnak dingah na nun chung fak piin rian na ṭuan a hau lai. ¹⁸ Hlingbur le belh kha an kho tung lai i ramlak thingram kha na ei a hau lai. ¹⁹ Rawl na hmuh khawhnak dingah, vawlei i na kir ṭhan hlan tiang, thlan hripi puak in na cawl a hau lai; Nangmah cu, cu vawlei cun sermi na si. Leidip na si i leidip ah na kir ṭhan lai," a ti. ²⁰ Mipa nih a nupi cu a min ah Evi a sak, zeicahtiah amah cu minung vialte nu a si. ²¹ Cun Bawipa Pathian nih Adam le a nupi cu saphaw hnipuan a serpiak hna i a aihter hna. ²² Cun Bawipa Pathian nih khan aa thawh i, "Atu cu mipa hi a ṭha le a ṭhalo a hngalh ve cang caah kanmah bantuk a si cang. Cucaah cun nunnak thingkung hi a banh sual lai i a thei hi a ei lai i zungzal in a nung sual ko lai," a ti. ²³ Cucaah Bawipa Pathian nih khan Eden dum chung cun a ṭhawl i amah a sernak vawlei kha thlawh awkah a kalter. ²⁴ Pathian nih mipa cu a chuah i Eden dum nichuahlei kamah khan cherubim vancungmi hna le zei ti lei paoh i aa mer khomi mei vainam kha a chiah hna. Annih nih cun nunnak thingkung kha ahohmanh nih naih kho hna hlah seh tiah an cawngh.

¹ Cun Adam nih a nupi Evi cu a hngalh i fa a pawi. Fapa pakhat a hrin i, "Bawipa bawmhnak thawngin fapa pakhat ka hmuh," tiah a ti. Cucaah a min ah Kain a sak. ² Cun hnu deuh ah a nau Abel zong kha a hun hrin. Abel cu tuukhal a si i Kain cu lothlo a si. ³ Kain nih cun a lochung chuak cu Bawipa sinah laksawng ah a rak put hna. ⁴ Cun Abel zong nih khan a saṭil nih an hrin hmasa bikmi hna kha a rak put ve hna i a thah hna i an sa a ṭhatnak bik kha Bawipa sinah cun laksawng ah a pek ve hna. Bawipa cu Abel le a laksawng cungah khan a lung a si, ⁵ sihmanhsehlaw Kain le a laksawng cungah khan cun a lung a si lo. Kain cu a thin a hung i a hmai a chia. ⁶ Cu tikah Bawipa nih Kain cu a thawh i, "Zeicahdah na thin a hun i na hmai a chiat? ⁷ Ṭhatnak kha rak tuah law cu na merh ko hnga; sihmanhsehlaw ṭhat lonak kha na rak tuah caah sualnak nih cun nangmah tei awkah sahrang bantukin an bawh ko. Nangmah kha uk an duh, sihmanhsehlaw nangmah nih na tei awk a si," a ti. ⁸ Cun Kain nih a nau Abel kha a thawh i, "I chawk tuah u sih," a ti. Lo an va phak tikah khan Kain nih a nau cu a thah. ⁹ Bawipa nih Kain cu, "Na nau Abel tah, khuazei ah dah a um?" tiah a hal. Kain nih cun, "Ka hngal lo. Ka nau cawngtu maw ka si awk a si?" tiah a leh. ¹⁰ Cun Bawipa nih cun, "Zeicahdah hi thil ṭhalo hi na tuah? Ngai hmanh! Nangmah nih na chuahmi na nau thisen nih khan vawlei in a ka auh lengmang ko. ¹¹ Nangmah cu chiatserh na si cang i hi hmun hin ṭhawl na si lai. Hi hmun vawlei hi na nau thisen na chuahmi dolh awkah a kaa a rak angmi kha a si. ¹² Lo na thlawh tikah vawlei nih rawl zeihmanh an chuahpiak lai lo; vawlei cungah inn ngei loin a vak lengmangmi na si lai," a ti. ¹³ Cun Kain nih khan Bawipa cu: "Hi dantatnak hi ka caah a fak tuk. ¹⁴ Hi ram le nangmah hmaika in na ka ṭhawl i kei cu mivakvai ka si cang lai i a ka hmumi paoh nih an ka thah lai," tiah a leh. ¹⁵ Cun Bawipa nih Kain cu, "Cuticun a si lai lo, nangmah an thatmi paoh cu a let sarih in teirul cham a si lai," tiah a ti. Cucaah Bawipa nih Kain cungah cun, a hmumi paoh nih that hna hlah seh tiah hmelchunhnak pakhat a chiah. ¹⁶ Kain nih cun Bawipa cu a kaltak i Eden nichuahlei i a ummi ram "Vahvaihnak ram" timi ah cun a va um. ¹⁷ Kain nih a nupi cu a hngalh i fa a pawi i fapa pakhat a hrin i a min ah Enok a sak. Cun Kain nih cun khua pakhat a ser i cu khua cu a min ah a fapa min chuankhan in Enok a sak. ¹⁸ Enok nih fapa pakhat a ngeih i a min cu Irad a si; Irad cu Mehujael pa a si, Mehujael cu Methusael pa a si i Methusael cu Lamek pa a si. ¹⁹ Lamek cu nupi pahnih a ngei, pakhat cu Adah a si i a dang pakhat cu Zillah a si. ²⁰ Adah nih cun Jabal a hrin i Jabal cu, caw a khal i thlam chung i khua a sami pawl, a hringsortu hna a si. ²¹ Jabal nau cu a min ah Jubal a si, amah cu tingtang le thonglawi tum a thiammi hna a hringsortu hna a si. ²² Cun Zillah nih Tubal-Kain a hrin i amah cu thir le dar hreihriam vialte a sertu hna a hringsortu a si. Tubal-Kain far cu Naamah a si. ²³ Lamek nih khan a nupile cu a thawh hna i, "Ka nupi Adah le Zillah, ka bia ngai tuah u. Mipa pakhat cu, amah nih a ka tuk caah ka thah, Tlangval pakhat cu, amah nih a ka hliam caah ka thah. ²⁴ Kain a tutu paoh cu a let sarih in phuhlam an si ahcun, Keimah a ka tutu chinchin cu let sawm sarih let sarih in phuhlam an si lai," a ti. ²⁵ Cun Adam nih khan a nupi cu a hngalh ṭhan i fapa a hrin. A nupi nih cun, "Kain nih a thahmi Abel airawltu ah khan Pathian nih fapa pakhat a ka pek," a ti i a min ah Seth a sak. ²⁶ Seth nih cun fapa pakhat a ngeih i a min ah Enosh a sak. Cu caan cun mi nih Bawipa kha a min in biak hram an thawk.

¹ Hihi Adam tefa hna min cazin cu a si. (Pathian nih minung a rak ser hna ah khan amah he i lo in a rak ser. ² Nu le pa in a ser hna i thluachuahnak a pek hna i "Minung phun" tiah min a sak hna). ³ Adam cu kum za le sawm thum a si tikah amah bantuk a simi fapa pakhat a ngei i a min ah Seth a sak. ⁴ Cu hnuah cun Adam cu kum za riat a nung rih. Fa dang kha a ngeih hna i ⁵ kum za kua le sawm thum a si ah a thi. ⁶ Seth cu kum za le kum nga a si ah fapa pakhat Enosh a ngei i ⁷ cu hnuah cun kum za riat le kum sarih a nung. Fa dang kha a ngeih hna i ⁸ kum za kua le hleihnih a si ah a thi. ⁹ Enosh cu kum sawm kua a si ah fapa pakhat Kenan a ngei i ¹⁰ cu hnuah kum za riat le kum hleinga a nung. Fa dang kha a ngeih hna i ¹¹ kum za kua le kum nga a si ah a thi. ¹² Kenan cu kum sawm sarih a si ah fapa pakhat Mahalalel a ngei i ¹³ cu hnuah kum za riat le sawm li a nung. Fa dang kha a ngeih hna i ¹⁴ kum za kua le kum hra a si ah a thi. ¹⁵ Mahalalel cu kum sawm ruk le kum nga a si ah fapa pakhat Jared a ngei i ¹⁶ cu hnuah kum za riat le sawm thum a nung. Fa dang kha a ngeih hna i ¹⁷ kum za riat sawm kua le panga a si ah a thi. ¹⁸ Jared cu kum za sawm ruk le kum hnih a si ah fapa pakhat Enok a ngei i ¹⁹ cu hnuah kum za riat a nung. Fa dang kha a ngeih hna i ²⁰ kum za kua sawm ruk le pahnih a si ah a thi. ²¹ Enok cu kum sawm ruk le kum nga a si ah fapa pakhat Methuselah a ngei. ²² Cu hnuah Enok cu Pathian he i kom in kum za thum a nung i fa dang kha a hrin hna; ²³ kum za thum sawm ruk le kum nga tiang a nung. ²⁴ Enok cu a nun chung dihlak Pathian he tlongleng ṭi in a nung i Pathian nih a lak caah a um ti lo. ²⁵ Methuselah cu kum za sawm riat kum sarih a si ah fapa pakhat Lamek a ngei i ²⁶ cu hnuah kum za sarih kum sawm riat le kum hnih a nung. Fa dang kha a hrin hna i ²⁷ kum za kua le kum sawm ruk le kum kua a si ah a thi. ²⁸ Lamek cu kum za sawm riat le pahnih a si ah fapa pakhat a ngei i ²⁹ "Bawipa nih chiat a serhmi vawlei i rian har kan ṭuannak hin, hi pa nih dinhnak a kan pek lai," tiin, a min ah Noah a sak. ³⁰ Cu hnuah Lamek cu kum za nga sawm kua le kum nga a nung. Fa dang a ngeih hna i ³¹ kum za sarih sawm sarih le kum sarih a si ah a thi. ³² Noah cu kum za nga a si hnuah fapa pathum Shem, Ham le Jafeth kha a ngeih hna.

¹ Cu tikah cun vawlei cung khuazakip ah minung tampi an um cang i fanu kha an hrin hna. ² Cu fanu hna an i dawh cu pathian fapa hna nih khan an hmuh hna i cucaah an duhmi kha an i thim hna i an ṭhit hna. ³ Cun Bawipa nih aa thawh i, "Minung hi zungzal in nun cu ka sianh hna lai lo, zeicahtiah titsa an si. Atu thawk in kum za le kum kul nak tam an nung ti lai lo," a ti. ⁴ Cu caan le cu hnu zongah cun, vawlei cungah hin Nefilim mingan pipi kha an rak um i annih cu minung fanu hna le pathian fapa hna tefa kha an si. Annih cu hlanliomi mi ralṭha le mi minthang kha an si. ⁵ Bawipa nih minung cu khuazakip ah an ṭhat lo tuk hringhran le an lungchung cu ruahnak ṭhalo lawnglawng a khah kha a hmuh tikah, ⁶ minung a rak ser hna i vawlei cung i a rak umter hna kha a ngaih a chia. Aa ngaichih i, ⁷ "Ka sermi minung vialte hna hi vawleicung in ka hloh dih hna lai. Saram vialte le va vialte he ka hloh dih hna lai, ka rak ser hna hi kaa ngaichih," a ti. ⁸ Asinain Noah nih cun Bawipa kha a lung a ton. ⁹ - ¹⁰ Noah tefa hna cu hihi an si: fapa pathum a ngeih hna, Shem, Ham le Jafeth an si. Noah cu miṭha a si i amah lawnglawng kha cu caan ah cun Pathian lung a tongmi a si; Pathian he i hawikomh in a nungmi a si. ¹¹ Sihmanhsehlaw midang vialte cu Pathian mithmuh ah miṭhalo an si dih i an ṭhat lonak cu khuazakip ah a karh. ¹² Pathian nih vawlei cu a zoh tikah a ṭha hrimhrim lo ti kha a hmuh, zeicahtiah minung kha an dihlak in sual in an nung. ¹³ Cun Pathian nih Noah cu a thawh i, "Minung hi an dihlak in hrawh awkah ka ruah cang. An dihlak in ka hrawh hna lai, zeicahtiah vawlei hi sualnak an tuahmi in a khat. ¹⁴ Cucaah cun lawng pakhat in i ser, thing ṭha kha hmang hna law a chungah a khaan ser hna, cun lawng cu a chunglei he a lenglei he kahtazasi thuh dih. ¹⁵ A tung pe za li le sawm nga, a vang pe sawm sarih le pe nga, a san pe sawm li le pe nga in na sak lai. ¹⁶ Lawng cu a cungkhuh na ser lai i a cungkhuh le a vampang karah lehhmah hleiriat na awnter lai. Dot thum in na sak lai i a kam ah innka na ser lai. ¹⁷ A nungmi thil vialte hrawhnak ding caah vawlei cungah buanchukcho ka tlunter lai. Vawlei cung i a ummi thil vialte an thi dih lai, ¹⁸ sihmanhsehlaw nangmah he cun biakamnak tu ka ser lai. Lawng chungah cun na nupi le na fapa hna le an nupile hna kha na luhpi hna lai i ¹⁹ saram chungin a nu le a pa cio nung tein chiah dingah na luhpi ve hna lai. ²⁰ Nung tein chiah dingah va phun dihlak chungin pahnih cio, saram phun chungin, a hme he a ngan he, pahnih cio, lawng chungah cun luhpi an si lai. ²¹ Cun nanmah ca le anmah caah rawl phun zakip na lak hna lai i na khon hna lai," a ti. ²² Cun Noah nih khan, Pathian nih a fialmi vialte cu a tuah dih.

¹ Bawipa nih Noah cu a thawh i, "Na innchung khar dihlak he lawng chungah cun lut tuah; nangmah lawnglawng hi atu mi hna lakah hin ka lung a ka tongmi na si. ² Saram thiang pawl kha cu tuah sarih cio in i luhpi hna (saram thiang timi cu ei khawhmi pawl tinak a si), asinain a thianglo pawl kha cu a nu pakhat le a pa pakhat lawngin i luhpi hna. ³ Cun va zong kha tuah sarih cio in i luhpi hna. Cu ti na tuah cu saram hna le va hna kha, vawlei cungah hin an ci lo hlah seh tinak caah a si lai. ⁴ Ni sarih chungah vawlei cungah hin ruah ni sawm li le zan sawm li ka surter lai i ka sermi thil nung vialte cu hrawh an si dih lai," tiah a ti. ⁵ Cun Noah nih cun Bawipa nih a chimhmi vialte kha a tuah dih hna. ⁶ Vawlei cung i buanchukcho a tlun ah cun Noah cu kum za ruk a si. ⁷ Amah le a nupi, a fapale hna le an nupile hna cu buanchukcho in luat awkah lawng chungah cun an lut. ⁸ - ⁹ Cun Pathian nawl pek bangin, saram thiang pawl khan phun khat ah a nu le a pa cio, a thianglo pawl khan phun khat ah a nu le a pa cio ve, va hna chung khan phun khat ah a nu le a pa cio le saram hna pawl chung khan phun khat ah a nu le a pa cio ṭhiamṭhiam Noah sinah cun lawng chungah khan an lut. ¹⁰ Ni sarih hnuah vawlei cungah buanchukcho cu a tlung. ¹¹ Noah kum za ruk a si kum, thla hnihnak thla a ni hleisarih ni ah, vawlei tang i a ummi rilipi a hna vialte kha an i hung i van i awng vialte zong khi an i hung ve i ti cu vawlei cungah an tla, ¹² vawlei cungah ruah cu ni sawm li le zan sawm li a sur. ¹³ Cu ni ah cun Noah le a nupi, a fapa pathum hna, Shem, Ham le Jafeth le an nupile kha, lawng chungah cun an lut. ¹⁴ An sinah cun ramlak saram a phunphun le inn zuat saṭil a phunphun le saram a phunphun le va a phunphun zong kha an lut ve. ¹⁵ Thilnung phun kip kha a nu le a pa cio Noah sinah cun, ¹⁶ Pathian nawlpek ning khan, lawng chungah cun an lut. Cun Bawipa nih Noah hnu cun innka cu a khar. ¹⁷ Buanchukcho cu ni sawm li chung a um i ti cu a thuh caah lawng cu a cawi khawh. ¹⁸ Ti cu a thuk deuh lengmang i lawng cu ti cungah cun a vuan. ¹⁹ Ti cu a thuk chin lengmang i tlang sang bikbik kha a khuh dih hna i ²⁰ tlang par a zik cungah khan pe kul le pe nga a kai, ²¹ vawlei cung i a ummi thilnung vialte cu an thi dih — va vialte, saṭil vialte, saram hna phun vialte, mi vialte, an thi dih. ²² Vawlei cung i a ummi thilnung vialte an thi dih. ²³ Bawipa nih vawlei cung i a ummi thilnung vialte cu a thah dih hna, cu hna lakah cun minung zong an i tel, saṭil zong an i tel, saram hna phun zong an i tel, va zong an i tel. Hrawh lomi cu Noah le a sin i lawng chung i a ummi lawnglawng kha an si. ²⁴ Vawlei cungah ti cu ni za le ni sawm nga chung a thuk chin lengmang ko.

¹ Pathian nih Noah le a sin i lawng chungah a ummi saram vialte le saṭil vialte kha a philh hna lo, cucaah vawlei cungah thli a hranter i ti cu ṭum hram aa thawk. ² Vawlei tang rilipi an hna hna le van i a ummi awng hna cu a phih hna. Van in a rung surmi ruah cu a tlaih hna i ³ ti cu a ṭum chin lengmang. Ni za le ni sawm nga chung ti cu a ṭum i ⁴ thla sarihnak thla a ni hleisarih ni ah Ararat ram tlang pakhat ah lawng cu aa din. ⁵ Ti cu a ṭum chin lengmang i thla hranak thla a ni khat ni ah tlang par kha an lang. ⁶ Ni sawm li hnuah Noah nih thlalangawng kha a hun i ⁷ langak pakhat a thlah. (Vawlei cungin ti cu a kao hlantiang a kenkip ah a zuang lengmang). ⁸ Cun Noah nih cun ti cu a zor cang maw zor cang lo ti hngalhnak dingah ṭhuro pakhat a thlah, ⁹ sihmanhsehlaw ti nih khan vawlei kha a rak khuh dih rih caah futnak hmun a hmu lo. Cucaah Noah nih khan a kut in a hei banh i lawng chungah cun a luh ṭhan. ¹⁰ Ni sarih a ngan hnuah lawng chung cun ṭhuro cu a thlah ṭhan. ¹¹ A sinah zanlei ah khan a ra kir i a hmur in oliv hnah tharte hi a hun i put. Cucaah Noah nih ti cu a ṭum cang ti kha a hngalh. ¹² Cun Noah nih cun a dang ni sarih a ngan ṭhan i ṭhuro kha a thlah ṭhan; tutan cu a ra kir ti lo. ¹³ Noah kum za ruk le kum khat a si kum, thla khatnak thla a ni khatnak ni ah, ti cu vawlei cungin a kao dih. Lawng cungkhuh kha a hun i khua a hei zoh tikah, vawlei cu a ro cang ti kha a hmuh. ¹⁴ Thla hnihnak thla, cu thla ni kul le ni sarih ni ah vawlei cu a dihlak in a ro. ¹⁵ Pathian nih Noah cu a thawh i, ¹⁶ "Na nupi le na fapa hna le an nupile hna he, lawng chung hin chuak cang u. ¹⁷ Cun saram vialte zong kha chuah hna — va si hna seh, saṭil si hna seh, saram hna phun si hna seh, chuah dih hna law vawlei cungah hin fa hring ṭhan hna seh law karh ṭhan hna seh," a ti. ¹⁸ Cucaah Noah cu a nupi le a fapa hna le an nupile hna he khan lawng chung cun an chuak. ¹⁹ Ramlak saram vialte, inn zuat saṭil vialte, va vialte, saram hna phun vialte kha, anmah le an phun ning cio in a bubu in lawng chung cun an chuak. ²⁰ Noah nih Bawipa caah biakṭheng pakhat a ser; saram thiang pawl le va chung khan phun khat ah pakhat cio a lak hna i khangh thawinak caah biakṭheng cungah cun a khangh hna. ²¹ Bawipa nih cu rim thaw cu a theih tikah, "Minung tuahmi ruangah vawlei cu zeitikhmanh ah chiat ka serh ṭhan ti lai lo; minung cu a no lio tein a ruahnak cu a ṭhalo ti kha ka hngalh. Atu i ka tuah bantuk hin zeitikhmanh ah thilnung vialte kha ka hrawk ṭhan ti hna lai lo. ²² Vawlei a um chung paohpaoh cu Tuh caan a um lai i ṭuan caan zong a um ko lai. Khuasik caan a um lai i khualum caan a um lai, ṭhal caan a um lai i fur caan a um lai, chun a um lai i zan a um lai. Hi hna hi zeitikhmanh ah an dong lai lo," a ti.

¹ Pathian nih Noah le a fapa hna cu thluachuah a pek hna i, "Fa tampi in ngei hna u law nan fale cu vawlei cung khuazakip ah khat hna seh. ² Vawlei cung saram vialte, va hna le saram hna phun hna le nga hna zong nih an in ṭih hna lai. Annih cu an dihlak in nanmah kut tangah chiah an si. ³ Saram vialte le thlaihring vialte cu nan ei khawh hna lai; an dihlak in rawl caah kan pek hna; ⁴ asinain sa kha a chung i thi a um lioah cun nan ei lai lo, zeicahtiah nunnak cu thi cu a si. ⁵ Pakhatkhat nih an in thah hna ahcun, thihnak in dan ka tat hna lai. Nanmah an thattu hna saram cu ka thah hna lai i ahohmanh a minung hawi a thatmi cu dan ka tat hna lai. ⁶ Minung cu Pathian mui keng in sermi a si caah, minung a thatmi cu, a minung hawi nih an thah ve lai. ⁷ Nannih cu fa tampi ngei u law nan tefa hna kha vawlei cung khuazakip ah khat dih hna seh," a ti. ⁸ Cun Pathian nih Noah le a fapale cu a thawh hna i, ⁹ "Nanmah le nan hnu i a um lai ding nan tefa hna sinah, atu ah biakamnak ka tuah, ¹⁰ cun nan sin i a ummi thilnung vialte — va si hna seh, saṭil si hna seh, saram si hna seh — lawng chungin a chuakmi paohpaoh sinah khan ka tuah. ¹¹ Ka biakamnak cu hihi a si: Thilnung vialte kha buanchukcho in hrawh an si ti lai lo. Zeitikhmanh ah buanchukcho nih vawlei hi a hrawk ti lai lo, tiah bia kaa kam," a ti. ¹² Cun Pathian nih cun, "Nanmah le saram vialte hna sin i ka sermi ka biakamnak zungzal in a hmunmi hmelchunhnak caah, ¹³ ka chuncha cu minmei chungah khin ka chiah. Vawlei he biakamnak ka sermi hmelchunhnak a si lai. ¹⁴ Minmei cu vawlei cung i ka zaamter i minmei chung i chuncha a langh fate, ¹⁵ buanchukcho nih thilnung vialte kha a hrawk ṭhan ti hna lai lo ti in nanmah le saram vialte hna sin i biakamnak ka tuahmi kha ka hngalh ṭhan lai. ¹⁶ Chuncha cu minmei chung i a hung langh tikah ka hmuh lai i nanmah le vawlei cung thilnung vialte sin i zungzal hmunmi biakamnak ka sermi kha ka hngalh ṭhan lai," a ti. ¹⁷ Pathian nih Noah cu a thawh i, "Hi hmelchunhnak hi vawleicung thilnung vialte hna sin i biakamnak ka tuahmi hmelchunhnak a si," a ti. ¹⁸ Lawng chungin a chuakmi Noah fapa hna cu Shem, Ham le Jafeth an si (Ham cu Kanaan pa a si). ¹⁹ Hi Noah fapa pathum hi vawlei cung mi vialte a hringsortu hna an si. ²⁰ Noah cu lothlo a si i amah cu mitsur dum a ser hmasa biktu a si. ²¹ Mitsur zu cu a din i a ri, a thilpuan vialte kha aa phoih dih i a thlam chungah taklawng in a it. ²² Kanaan pa Ham nih khan a pa taklawng in a rilh ko cu a hmuh tikah a unau pahnih kha a va chimh hna. ²³ Cu tikah Shem le Jafeth nih cun puan pakhat kha an i lak i an kenglei ah an chiah i an liang le an liang in an i zawn. Cun hnulei chit in thlam chungah cun an va lut i an pa cu an va khuh; an pa taklawng in a um cu an hmuh nakhnga lo khattelei kha an zoh peng. ²⁴ Noah cu a zuritnak khan a hung fim i a fapa a hniang bik nih a cung i a tuahmi kha a hngalh tikah, ²⁵ aa thawh i, "Kanaan cungah chiat tlung ko seh; a unau hna sal a si lai," a ti. ²⁶ Cun aa thawh ṭhan i, "Shem Pathian Bawipa cu thangṭhat ko u. Kanaan cu Shem sal a si lai. ²⁷ Pathian nih Jafeth cu karhter seh law A tefa hna cu Shem tefa hna he um ṭi hna seh. Kanaan cu Jafeth sal a si lai," a ti. ²⁸ Buanchukcho hnuah Noah cu kum za thum le sawm nga a nung i ²⁹ kum za kua le sawm nga a si ah a thi.

¹ Noah fapa Shem, Ham le Jafeth i an tefa hna cu hihi an si, buanchukcho hnu i an hrinmi an si: ² Jafeth fapa hna cu Gomer, Magog, Madai, Javan, Tubal Meshek le Tiras an si. ³ Gomer fapa hna cu Ashkenaz, Rifath le Togarmah an si. ⁴ Javan fapa hna cu Elishah, Tarshish, Kit mi le Rodan mi an si. ⁵ Annih hi rili kam le tikulh i khua a sami hna hringsortu an si. Hi hna hi Jafeth tefa cu an si; an phun cio in an ram cio ah khan khua an sa i anmah le an holh cio kha an hmang. ⁶ Ham fapale cu Kush, Izipt, Put le Kanaan an si. ⁷ Kush fapa cu Seba, Havilah, Sabtah, Raamah le Sabteka an si. Raamah fapa cu Sheba le Dedan an si. ⁸ Kush nih cun fapa pakhat a ngeih i a min ah Nimrod a si; amah cu vawlei cung uktu a liannganmi hna lakah a hmasa bik a si. ⁹ Amah cu vawlei cungah sakap bik zong a si i cucaah mi nih phungthluk bia ah, "Nimrod bantuk sa kah thiam," ti a si tawn. ¹⁰ Pennak a uk hmasa bikmi hna cu Babel, Erek le Akkad an si i an dihlak in Shinar ram chung ummi an si. ¹¹ Cu ram cun Assiria ram ah a kal i Nineveh khua le Rehoboth-Ir khua le Kalah khua le ¹² Resen khua kha a tlak hna, Resen cu Nineveh le Kalah khuapi karlak i a ummi a si. ¹³ Izipt cu Lud le Anam le Lehab le Naftuh le ¹⁴ Pathrus le Kasluh le Kaftor mi hna pa kha a si i cu hna chung cun Filistin mi kha an chuak. ¹⁵ Kanaan cu Sidon (a fapa upa bik) le Heth le ¹⁶ Jebus mi hna le Amor mi hna le Girgash mi hna le ¹⁷ Hiv mi hna le Arki mi hna le Sinmi hna le ¹⁸ Arvad mi hna le Zemari mi hna le Hamath mi hna pa kha a si. Hi hnuah hin, Kanaan miphun chung i phun dangdang hna kha an i ṭhek i ¹⁹ Kanaan ram ramri cu Sidon in Gerar leiah Gaza tiang a phan, Cun Sodom le Gomorrah le Admah le Zeboiim leiah Lasha tiang a phan fawn. ²⁰ Hi hna hi Ham tefa cu an si, an phun cio in an ram cio ah khan khua an sa i anmahle an holh cio kha an hmang. ²¹ Jafeth u Shem zong nih khan fa a hrin hna, amah cu Eber tefa a hringsortu hna kha a si. ²² Shem fapale cu Elam, Asshur, Arpakshad, Lud le Aram an si. ²³ Aram fapa hna cu Uz, Hul, Gether le Mash an si. ²⁴ Arpakshad cu Shelah pa a si i Shelah cu Eber pa a si. ²⁵ Eber nih fapa pahnih a ngeih hna i pakhat cu a min ah Peleg a si, cun a nau cu a min ah Joktan a si; Peleg an saknak a sullam cu amah chan ah khan vawlei mi kha an i ṭhen dih caah a si. ²⁶ Joktan cu Almodad, Shelef, Hazarmaveth, Jerah, ²⁷ Hadoram, Uzal, Diklah, ²⁸ Obal, Abimael, Sheba, ²⁹ Afir, Havilah le Jobab pa a si. Hi hna hi an dihlak in Joktan fa an si. ³⁰ An umnak ram cu Mesha in Sefar leiah, nichuahlei tlang pipi hna tiang kha a si. ³¹ Hi hna hi Shem tefa cu an si, an phun cio in an ram cio ah khan khua an sa i anmahle an holh cio kha an hmang. ³² Hi hna hi Noah tefa hna nih an hrinmi hna miphun cu an si, anmahle an i hrinsor ning cio le an phun kalning cio in. Vawlei cung miphun vialte hna hi buanchukcho hnuah Noah fapa hna nih an hrinsormi hna an si.

¹ Hlanah cun vawleicung mi vialte hna nih hin holh phun khat lawng an rak ngei i bia an rak hmanmi cu an i khat dih. ² Nichuahlei i an hei i thawn tikah Shinar ram ah khan nelrawn pakhat an va phan i cuka ah cun umhmun an khuar. ³ Cun pakhat le pakhat cu, "Ra u! Tlakrawh ser u si law mei in raw hna u sih," an i ti. Cuticun inn saknak ah tlakrawh cu an hman hna i a senghnak ah bitumen an hman hna. ⁴ Cun annih nih an i thawh i, "Atu cu khuapi pakhat kan ser lai i a chungah innsang pakhat, a par van tawng in kan sak lai. Kan thang kan i chuah lai i vawlei cungah hin kan i ṭhek lai lo," an ti. ⁵ Cun hi mi hna nih khuapi an sermi le innsang an sakmi zoh awkah khan Bawipa cu a rung ṭum i ⁶ "Atu cu hi mi vialte hna hi miphun phun khat an si, holh pakhat lawng an hmang i atu i an tuahmi hi hmailei ah an tuah laimi thil a hramthawknak lawng a si. A rauh hlanah an duhmi thil paoh kha an tuah khawh ko lai. ⁷ Cucaah cun pakhat le pakhat an holh an i hngalh khawh nakhnga lo, vung kal u si law an holh kha vung danter dih hna u sih," a ti. ⁸ Cuticun Bawipa nih vawlei cung khuazakip ah a ṭhek dih hna i khuapi ser cu an ngol. ⁹ Cu khuapi cu a min ah Babel an ti, zeicahtiah cuka ah cun Bawipa nih mi vialte kha an holh a danter hna i cuka cun vawlei cung khuazakip ah khan a ṭhek hna. ¹⁰ Hihi Shem tefa cu an si. Buanchukcho hnu kum hnih ah Shem cu kum za khat a tling i fapa pakhat a hrin i a min ah Arpakshad a si. ¹¹ Cu hnuah cun kum za nga a nung i fa dang zong kha a ngeih hna. ¹² Arpakshad cu kum sawm thum le kum nga a si ah fapa pakhat Shelah a ngei; ¹³ cu hnuah cun kum za li le kum thum a nung i fa dang zong a ngeih hna. ¹⁴ Shelah cu kum sawm thum a si ah fapa pakhat Eber a ngei; ¹⁵ cu hnuah cun kum za li le kum thum a nung i fa dang zong a ngeih hna. ¹⁶ Eber cu kum sawm thum le kum li a si ah fapa pakhat Peleg a ngei; ¹⁷ cu hnuah cun kum za li sawm thum a nung i fa dang zong a ngeih hna. ¹⁸ Peleg cu kum sawm thum a si ah fapa pakhat Reu a ngei; ¹⁹ cu hnuah cun kum za hnih le kum kua a nung i fa dang a ngeih hna. ²⁰ Reu nih kum sawm thum le kum hnih a si ah fapa pakhat Serug a ngei; ²¹ cu hnuah cun kum za hnih le kum sarih a nung i fa dang zong a ngeih hna. ²² Serug nih kum sawm thum a si ah fapa pakhat Nahor a ngei; ²³ cu hnuah cun kum za hnih a nung i fa dang zong a ngeih hna. ²⁴ Nahor nih kum kul le kum kua a si ah fapa pakhat Terah a ngei; ²⁵ cu hnuah kum za khat le kum hleikua a nung i fa dang zong a ngeih hna. ²⁶ Terah nih kum sawm sarih a si tikah Abram le Nahor le Haran kha a hrin hna. ²⁷ Terah tefa cu hi hna hi an si: Terah cu Abram le Nahor le Haran pa a si. Haran cu Lot pa a si i ²⁸ Haran cu amah a chuahkehnak Khaldi ram Ur khua ah khan a pa a nun lioah a thi. ²⁹ Abram nih cun Sarai a ṭhit i Nahor nih Haran fanu Milkah kha a ṭhit, Haran cu Iskah pa kha a si. ³⁰ Sarai cu a cing i fa a ngei kho lo. ³¹ Terah nih a fapa Abram le a tu Lot, Haran fapa kha le, Abram nupi Sarai kha, Kanaan ram lei i kal awkah Khaldi ram Ur khua khan a thawhpi hna. Sihmanhsehlaw Haran khua tiang an kal i cuka ah cun umhmun an khuar. ³² Cuka ah cun Terah cu a thi i a thih ah cun kum za hnih le kum nga a si.

¹ Bawipa nih Abram cu a thawh i, "Na ram le na rualchan le na pa inn kha chuahtak hna law kan hmuhsak laimi ram ah kal tuah. ² Tefa tampi kan pek lai i miphun nganpi ah an cang lai. Nangmah cu thluachuah kan pek lai i na min kan thanter lai, cucaah na min cu thluachuah peknak ah an hman lai. ³ Nangmah thluachuah an petu kha thluachuah ka pek ve hna lai i chiat an serhtu kha chiat ka serh ve hna lai. Vawlei cung miphun vialte nih hin, Nangmah thluachuah kan pek bantuk hin thluachuah kan pe ve, tiah an ka hal lai," a ti. ⁴ Abram cu kum sawm sarih le kum nga a si tikah, Bawipa nih a chimh bantuk khan, Haran khua cun aa thawh; Lot kha a sinah a kal ve. ⁵ Abram cu a nupi Sarai le a nau fapa Lot le Haran khua an um hnu i an ngeihmi an chawva vialte le an sal vialte hna he khan Kanaan ram lei kal ah cun aa thawh. Kanaan ram an phak tikah ⁶ Abram cu ram chungah cun aa chawk i Shekhem khua an hmunthiang, Moreh thing zarh an timi kha a va phan. (Cu lioah cun Kanaan mi kha cu ram chungah cun an um ko rih). ⁷ Bawipa cu Abram sinah khan a lang i, "Hi ram hi na tefa ka pek hna laimi ram cu a si," a ti. Cuka ah cun amah sin i a rung langmi Bawipa caah khan Abram nih biakṭheng pakhat a ser. ⁸ Cu hnuah cun thlanglei ah khan a vun i thawn chin i Bethel khua nichuahlei i a ummi tlang ram ah khan umhmun a khuar, cuka cu Bethel le Ai karlak ah khan a si, Bethel kha nitlaklei ah a um i Ai kha nichuahlei ah a um. Cuka ah cun biakṭheng zong kha a ser i Bawipa kha a biak. ⁹ Cun thlanglei ah khan riahhmun pakhat hnu pakhat in a vung i thawn chin lengmang i Negeb ram tiang a phan. ¹⁰ Sihmanhsehlaw cuka ram ah cun rawl a um lo i mangṭam cu a fah ngaingai caah Abram cu Izipt ram i caan tlawmpal vung um ta awkah khan thlanglei kha a panh chin lengmang. ¹¹ Izipt ram chung a luh laite ah khan a nupi Sarai cu a thawh i, "Nang cu mi dawh na si. ¹² Izipt mi nih an in hmuh tikah, Abram nupi a si, an ti lai i nangmah duh ah keimah kha an ka thah lai. ¹³ Cucaah a far ka si, tiah na ti hna lai i nangmah thawngin an ka nunh lai i ka caah harnak zeihmanh a um lai lo," a ti. ¹⁴ Izipt ram an vung luh tikah khan a nupi mi dawh a si cu Izipt mi nih khan an rak hmuh. ¹⁵ An bawi pawl nih khan, aa dawh hringhran cu an hmuh i Faro kha an chimh i siangpahrang inn ah khan an kalpi. ¹⁶ Amah ruangah cun Faro nih cun Abram cu ṭha tein a zohkhenh i tuu run le meheh run le caw le laa le sal le kalauk kha a pek. ¹⁷ Sihmanhsehlaw Abram nupi Sarai kha a inn ah cun a kalpi ruangah cun Bawipa nih Faro le a inn chung i a ummi vialte hna cu zawtnak a fakmi in dan a tat hna. ¹⁸ Cu tikah Faro nih Abram cu mi kha a auhter hna i, "Zeicahdah hi bantukin ka cungah rian na ṭuan? Zeicahdah ka nupi a si tiah na ka chimh lo? ¹⁹ Zeicahdah ka far a si na ti i na ka ṭhitter? Na nupi hi i lak law kal u," tiah a ti. ²⁰ Faro nih a mi kha nawl a pek hna i Abram cu a nupi le a ngeihmi vialte he khan ram chung cun an dawi.

¹ Abram cu Izipt ram khan a chuak i chaklei ah Negeb ram leiah khan a hung kal, a sinah cun a nupi le a ngeihmi vialte le Lot zong kha an kal ve. ² Abram cu mi rum ngaingai a si, tuu tampi a ngei, meheh tampi a ngei, caw tampi a ngei i sui le ngun zong tampi a ngei. ³ Cun riahhmun pakhat hnu pakhat in Negeb ram in Bethel khua leiah khan aa thawn, hmasa i Bethel khua le Ai khua karlak i a rak riahnak hmun kha a hei fuh. ⁴ Biakṭheng a rak sernak hmun ah khan a hung kal ṭhan i cuka ah cun Bawipa kha a biak. ⁵ Abram he a kal ṭimi Lot zong nih khan tuu le meheh le caw le a sin i a um vemi minung kha a ngeih ve hna. ⁶ An pahnih in hmunkhat i um awkah saṭil tlonnak ram nih a zaat hna lo, saṭil tam tuk an ngei veve. ⁷ Cucaah Abram saṭil cawng hna le Lot saṭil cawng hna kha an i si lengmang. (Cu lioah cun Kanaan mi hna le Periz mi hna kha cu ram chungah cun an um ko rih). ⁸ Cun Abram nih Lot cu a thawh i, "Kannih cu rualchan kan si, na mi hna le ka mi hna hi an i sik lengmang awk a si lo. ⁹ I ṭhen u sih. Ram hi na duhnak kaa zawn i thim law ka kaltak ko. Nang kehlei i na kal ahcun kei orhlei ah ka kal lai, orhlei i na kal ah cun kehlei ah ka kal lai," a ti. ¹⁰ Cucaah Lot cu khua a cuan i Jordan tiva nelrawnpi kha Zoar khua tiangin ti tampi a um i Bawipa dum bantuk le Izipt ram bantuk a si kha a hmuh. (Cucu Bawipa nih Sodom le Gomorrah khua a hrawh hna hlan kha a si.) ¹¹ Lot nih cun Jordan nelrawn cu a ningpi in aa thim i nichuahlei ah khan a kal. Abram le Lot an i ṭhenning cu, cuticun a si. ¹² Abram cu Kanaan ram chungah khan khua a sa i Lot cu nelrawn i a ummi khualipi hna lakah khan a um i Sodom khua pawngah khan riahhmun a ser. ¹³ Sodom khuami cu miṭhalo, Bawipa cung i ṭhat lonak a tuahmi misual an si. ¹⁴ Lot aa ṭhial hnuah Bawipa nih Abram cu a thawh i, "Na umnak hmun khan, nichuah nitlak chaklei thlanglei vialte cuan tuah hna; ¹⁵ na hmuhmi ram vialte kha nangmah le na tefa cu kan pek hna lai i a zungzal in nan ta a si lai. ¹⁶ Tefa tampi kan pek lai i an tam tuk ah ahohmanh nih an rel kho hna lai lo, leidip cu ahohmanh nih an rel khawh hna lo bantuk khi an si lai. ¹⁷ Cucaah i tim law ram hi a pumpi in ṭol tuah, zeicahtiah a dihlak in nangmah cu kan pek lai," a ti. ¹⁸ Cucaah Abram nih a riahhmun cu a ṭhial i Hebron khua i Mamre thingzarh an umnak ah khan a va um, cuka ah cun Bawipa caah biakṭheng pakhat a va ser.

¹ Shinar ram siangpahrang Amrafel, Ellasar siangpahrang Ariok, Elam siangpahrang Khedorlaomer le Goiim siangpahrang Tidal nih ² siangpahrang a dang panga kha an doh hna, cu hna cu: Sodom siangpahrang Bera, Gomorrah siangpahrang Birsha, Admah siangpahrang Shinab, Zeboiim siangpahrang Shemeber le Bela siangpahrang an si (Bela cu Zoar a si). ³ Hi siangpahrang panga hi hmunkhat ah an ṭangṭi i Siddim nelrawn ah khan an ralkap cu an pumh hna; Siddim nelrawn cu atu i Rili Thi timi khi a si. ⁴ Khedorlaomer kut tangah khan kum hleihnih an rak um i a kum hleithumnak ah amah kha an doh. ⁵ A kum hleili kum ah Khedorlaomer le amah he a ṭangṭimi hna kha an ralkap he an ra ciammam i Refaim mi kha Ashteroth Karnaim ah, Zuzim mi kha Ham ah, Emim mi kha Kiriathaim nelrawn ah, ⁶ Hormi kha Seir tlang ah an tei hna i thetse rawn kam i a ummi Elparan khua tiang an dawi hna. ⁷ Cun an hun i mer i Kadesh ah khan an hung kir i Amelek mi hna ram vialte le Hazazontamar i a ummi Amor mi kha an tei hna (Kadesh cu Biaceihnak Cerhti ti zongah ti a si). ⁸ Cun Sodom siangpahrang, Gomorrah siangpahrang Admah siangpahrang, Zeboiim siangpahrang le Bela siangpahrang nih (Bela cu Zoar a si), ⁹ Elam siangpahrang Khedorlaomer le Goiim siangpahrang Tidal le Shinar siangpahrang Amrafel le Ellasar siangpahrang Ariok doh awkah Siddim nelrawn ah an ralkapbu cu a hunpi hna, khatlei ah panga le khatlei ah pali an si. ¹⁰ Siddim nelrawn cu bitumen an cawhnak khor in a khat i cucaah Sodom siangpahrang le Gomorrah siangpahrang kha raltuknak hmun cun zam an i timh tikah cu khor chungah cun an tla. A dang cu tlang ah khan an zam. ¹¹ Siangpahrang pali hna nih cun Sodom le Gomorrah i a ummi thil vialte kha, rawl vialte he an i lak i an kal. ¹² Lot zong cu Sodom i a um caah a ngeihmi thil vialte he an kalpi ve. ¹³ Sihmanhsehlaw a luat sualmi pakhat nih Hebru mi Abram cu cu kong cu a chimh. Abram cu Mamre thingzarh pawng i khua a sami a si, Mamre cu Eshkol le Aner hna u kha a si i hi hna hi Abram he ṭangṭi an si. ¹⁴ Abram nih a rualchan an tlaih ti kha a theih tikah a riahhmun i a ummi a minung hna lak i zumhawktlak a timi minung za thum le hlei riat kha a kawh hna i siangpahrang hna cu Dan khua tiang an dawi hna. ¹⁵ A mi cu bu hnih ah a ṭhen hna i zan ah an tuk hna i an tei hna. Damaskas khua chaklei i a ummi Hobah tiang an dawi hna i ¹⁶ an thilri vialte kha an chuh ṭhan dih hna. A rualchan Lot le a chawva vialte zong kha a kirpi ṭhan hna, nu hna le mi dang zong an i tel. ¹⁷ Abram cu Khedorlaomer le amah sinah a ṭangmi siangpahrang hna a va tei hnanak in a ra kir tikah, Sodom siangpahrang nih khan Shaveh nelrawn an timi in a rak don, (Shaveh nelrawn cu siangpahrang Nelrawn ti zongah ti a si). ¹⁸ Cun Salem Siangpahrang Melkhizedek, Cung Nung Bik Pathian tlangbawi zong a simi nih khan Abram cu changreu le mitsur zu a rak phorh i ¹⁹ thluachuah a pek i: "Van le vawlei a sertu Cung Nung Bik Pathian nih Abram cu thluachuah in pe seh. ²⁰ Na ral an teitertu Cung Nung Bik Pathian cu thangṭhat si ko seh," a ti. Cun Abram nih hranchaw a lakmi vialte cheuhra cheukhat a pek. ²¹ Cun Sodom siangpahrang nih Abram cu a thawh i, "Ka minung hna dah ti lo cu, na lakmi thil paohpaoh kha an dihlak in nangmah nih i chiah ko hna," a ti. ²² Sihmanhsehlaw Abram nih cun a leh i, "Van le vawlei a sertu Cung Nung Bik Pathian hmaiah chiatser tein bia kaa kam i, ²³ na thil a simi paohpaoh, la fang pakhat le phanah hri tiangin zeihmanh kaa lak lai lo, ka ti. Cucaah cun nang zong nih zeitikhmanh ah, "Abram cu keimah nih pei ka rumter ko cu," na ti kho ve lai lo. ²⁴ Zeihmanh keimah caah kaa lak lai lo. Ka mi hna nih an hman cangmi thil hna le ka sin ṭang hna nih an hmuhtin awk a si vemi thil lawnglawng kha ka cohlan hna lai; Aner, Eshkol le Mamre nih khan an covo cu an i lak ve lai," a ti.

¹ Cu hnuah cun Abram nih langhnak a hmuh i Bawipa bia kha a theih. Bawipa nih cun a thawh i, "Abram, na thinphang hlah. Keimah cu phaw bantukin an hupphengtu ka si. Na laksawng cu a nganpi a si lai," a ti. ² Sihmanhsehlaw Abram nih cun a thawh ve i, "Maw Bawipa Pathian, kei cu fa ka ngei lo; cucaah zeitindah laksawng cu na ka pek khawh lai? Ka ro a ka cotu ding cu Damaskas khuami Eliezer hi pei a si ko hi. ³ Fa zeihmanh na ka pe lo i cucaah cun ka sal hna lak i pakhatkhat nih ka ro an ka co cu a hau ko lai," a ti. ⁴ Cun Bawipa nih, "Hi sal hi na rocotu cu a si lai lo, na rocotu cu nangmah na fapa hrimhrim a si lai," tiin a chimh cu a theih ṭhan. ⁵ Bawipa nih cun lengah a chuahpi i, "Van khi zoh law na rel khawh ahcun arfi khi rel tuah hna. Na tefa cu khi arfi zat khi an si lai," a ti. ⁶ Abram nih Bawipa cu a zumh i cu a zumhnak cu Bawipa nih a dinnak ah a cohlanpiak. ⁷ Cun Bawipa nih Abram cu a thawh i, "Hi ram hi nangmah pek awkah Khaldi ram Ur khua in chuah an fialtu cu Bawipa hi ka si," a ti. ⁸ Sihmanhsehlaw Abram nih cun, "Maw Bawipa Pathian, cucu ka ta a si lai ti cu zeitindah ka hngalh khawh lai?" a ti. ⁹ Pathian nih cun, "Cawla kum thum a timi pakhat, meheh kum thum a timi pakhat, tuukawng kum thum a simi pakhat, cun ṭhuro pakhat le laileng pakhat kha rak ka pe hna," a ti. ¹⁰ Hi saram vialte hi Abram nih Pathian sinah khan a rak put hna. A cheu hna i a cheumi hna cu hmaitonh cio ah tlang hnih in a chiah hna; va kha cu a can hna lo. ¹¹ Langta nih an run zuanhnawh hna i a ṭhawl hna. ¹² Ni a tlak cuahmah tikah khan Abram cu aa hngilh i a cungah ṭihnak nganpi a tlung. ¹³ Bawipa nih cun a thawh i, "Na tefa hna cu ram dang ah khual an si lai, cuka ah cun sal ah an cang lai i kum za li chung hremnak an ing lai. ¹⁴ Asinain cu bantukin a hremtu hna miphun kha keimah nih dan ka tat hna lai i cu ram in an chuah tikah chawva tampi he an chuak lai. ¹⁵ Nang tu cu chan tling in na nung lai i dai tein na thi lai; khup kha hmuah in na nun hnuah an in vui lai. ¹⁶ Na tefa hna cu chan li hnuah an ra kir ṭhan lai, zeicahtiah Amor mi hna cu dantat awk tlak hrimhrim in an sual tik lawngah ka ṭhawl hna lai," a ti. ¹⁷ Cun ni a tlak i khua a muih tikah a khumi mei um pakhat le a alhmi mei tom pakhat kha an hung chuak i sa a chiahmi hna karlak ah khan an kal. ¹⁸ Cu ni ah cun Bawipa nih Abram cu bia a kam i, "Hi ram hi a dihlak in na tefa kha ka pek hna lai tiah bia kaa kam, Izipt ram ri i a ummi tiva in tiva ngan Zufrates tiang a si lai; ¹⁹ Ken mi hna ram le Keniz mi hna ram le Kadmon mi hna ram le ²⁰ Hit mi hna ram le Periz mi hna ram le Refaim mi hna ram le ²¹ Amor mi hna ram le Kanaan mi hna ram le Girgash mi hna ram le Jebus mi hna ram zong hi an i tel chih dih lai," a ti.

¹ Abram cu a nupi Sarai nih fa zeihmanh a hrinpiak lo. Sarai nih cun Izipt mi salnu pakhat a ngei i a min ah Hagar a si. ² Sarai nih cun Abram cu a thawh, i, "Zohhmanh, kei cu Bawipa nih fa ngeih a ka sianh lo. Cucaah cun zeicahdah ka salnu hi na ihpi ko lo? Fa a hei ka hrinpiak ko hnga dah kaw," tiah a ti. ³ Cuticun Sarai nih Izipt mi a salnu Hagar cu Abram kha nupi caah a pek. (Cu thil cu bantukin a hung um cu Abram kha Kanaan ram chung i kum hra a um hnuah a si). ⁴ Abram nih Hagar cu a ihpi i fa a pawi. Hagar nih cun fa ka pawi ti kha a hun i hngalh tikah porhlawt in aa la i Sarai kha zeihmanh ah a rel lo. ⁵ Khi tikah Sarai nih Abram cu a thawh i, "Hagar nih zeihmanh i a ka rel lo hi nangmah palh a si. Keimah hrimhrim nih ka sal cu kan pek i fa ka pawi ti aa hngalh cangka keimah kha a ka serhsat. Cucaah kannih pahnih lakah hin ahodah a ding ti kha Bawipa nih kan ceih seh," tiah a ti. ⁶ Cun Abram nih a leh i, "A ṭha ko, amah cu na sal a si i na kut tangah pei a um ko cu; na duhning paoh in a cungah tuah ko," a ti. Cucaah Sarai nih cun a vun hrem ve i Hagar cu a tli. ⁷ Bawipa vancungmi nih Hagar cu Shur lei kalnak lam i a ummi cerhti, thetse rawn cerhti ah khan a ton i, ⁸ "Sarai salnu Hagar, khuazei in dah na rat i khuazei ah dah na kal lai?" a ti. Hagar nih cun, "Sarai sinin ka zaam," tiah a leh. ⁹ Cun vancungmi nih cun, "Sarai sinah cun va kir ṭhan law a kut tangah ṭha tein va um," a ti. ¹⁰ Cun vancungmi nih cun, "Tefa tam tuk hringhran kan pek lai i a rel in rel cawk an si lai lo. ¹¹ Fapa pakhat na ngei lai i a min ah Ishmael na sak lai, Zeicahtiah Bawipa nih na harnak kha an theihpiak. ¹² Sihmanhsehlaw na fapa cu ramlak laa bantuk a si lai, a mi kip kha a doh hna lai i mi kip nih khan an doh ve lai. A rualchan hna umnak in lamhlapi ah khua a sa lai," a ti. ¹³ Hagar nih cun amah le amah kha, "A ka hmutu cu ka hmuh taktak ko maw?" tiah aa hal i cucaah Bawipa cu, "Nang cu mi a hmutu Pathian na si," ti min in a auh. ¹⁴ Cucaah cun pei Kadesh le Bered karlak i a ummi tikhor cu, "Beer-la-hai-roi" tiah mi nih an ti cu, (Beer-la-hai-roi a sullam cu, "A ka hmutu Pathian nung tikhor," ti a si). ¹⁵ Hagar nih cun Abram cu fapa a hrinpiak i a min ah Ishmael a sak. ¹⁶ Abram cu kum sawm riat le kum ruk a si.

¹ Abram cu kum sawm kua le kum kua a si tikah Bawipa cu a sinah a lang i, "Kei cu Lianngan Bik Pathian ka si. Na nun chung vialte ka nawl ka ngai law soi awk zeihmanh um loin um. ² Nangmah sinah biakamnak ka ser lai i tefa tampi kan pek lai," a ti. ³ Cun Abram cu a khuk aa bil i a bawh lioah Pathian nih cun, ⁴ "Hi biakamnak hi kan pek: nangmah cu miphun tampi a hringsortu hna na si lai. ⁵ Na min kha Abram si ti loin Abraham a si cang lai. Zeicahtiah miphun tampi hringsortu ah kan ser cang. ⁶ Tefa tampi kan pek lai i a cheu cu siangpahrang an si lai. Na tefa cu an tam tuk hringhran lai caah miphun phun ah an i chuah lai. ⁷ "Ka biakamnak cu, zungzal hmunmi biakamnak caah, nangmah le a ra lai ding chan i na tefa hna sinah, ka fehter lai. Nangmah na Pathian le na tefa hna an Pathian ka si lai. ⁸ Hi ram, atu i khual na sinak ram hi, nangmah le na tefa hna cu kan pek hna lai. Kanaan ram hi a ning piin nan ta a si zungzal lai i keimah hi an Pathian ka si lai," a ti. ⁹ Pathian nih Abraham cu a thawh i, "Nangmah zong nih keimah he kan biakamnak hi na zulh hrimhrim ve lai, nangmah le hmailei chan i a um laimi na tefa hna nih nan zulh hrimhrim ve lai. ¹⁰ Cun nangmah le na tefa hna nih tuah awkah kan hna a tla nan ti awk cu hihi a si: nanmah lak i pa paohpaoh cu nan cuarpar nan i tan dih lai. ¹¹ - ¹² Atu ri hin cun fapa nan ngeihmi paohpaoh cu ni riat a si ah an cuarpar nan tan hrimhrim hna lai, nan inn chung i a chuakmi nan sal hna zong, cun ramdangmi sin i nan cawkmi sal hna zong an i tel chih dih lai. Hi nih hin nanmah le keimah karlakah biakamnak a um kha a langhter lai. ¹³ Pakhat hmanh hrelh loin nan cuarpar cu tan nan si lai i cu nih cun nanmah sin i biakamnak ka sermi hi zungzal hmunmi biakamnak a si kha nan cungah hmelchunhnak in a langhter lai. ¹⁴ Cuarpar aa tan lomi pa cu a miphun chungin hlonh a si lai, zeicahtiah keimah he biakamnak cu a zul lo," tiah a ti. ¹⁵ Cun Pathian nih Abraham cu, "Na nupi cu Sarai tiah na ko ti lai lo, a min cu Sarah a si cang. ¹⁶ Amah cu thluachuahnak ka pek lai i fapa pakhat an hrinpiak lai. Amah cu thluachuah ka pek lai i miphun hna nu a si lai; a tefa hna lakah cun siangpahrang zong an um lai," a ti. ¹⁷ Abraham cu a khuk aa bil i asinain, "Mipa nih kum za khat a si ah fa a ngei kho ngai hnga maw? Sarah nih hin kum sawm kua ah fa cu a ngei ngai hnga maw?" ti a ruah ah a nih a chuak. ¹⁸ Pathian cu a thawh i, "Ishmael cu ka huhphenhpiak law nungdam tein ka zohkhenhpiak ko tiah kan nawl," a ti. ¹⁹ Sihmanhsehlaw Pathian nih, "Na palh; na nupi Sarah nih fapa an hrinpiak lai i a min ah Isak na sak lai. Amah le a tefa hna sinah khan ka biakamnak cu ka fehter lai. Cu ka biakamnak cu zungzal hmunmi biakamnak a si. ²⁰ Ishmael huhphenh awk kha na ka hal, cucaah hitihin ka tuah lai: Ishmael cu thluachuahnak ka pek lai i fa tampi le tefa tampi ka pek lai. Amah cu bawi bawi hleihnih pa a si lai i a tefa cu miphun nganpi ah ka ser hna lai. ²¹ Cun ka biakamnak cu, Sarah nih kumvoi atu tik i an hrinpiak laimi na fapa Isak sinah ka fehter lai," a ti. ²² Pathian le Abraham cu an i chawnh dih in Pathian nih cun Abraham cu a kaltak. ²³ Cu ni ṭhiamṭhiam ah cun Abraham nih a fapa Ishmael le a salpa vialte kha, Pathian nih a chimh bangin, an cuarpar a tan hna; a inn i a chuakmi si hna seh, a cawk in a cawkmi si hna seh, a inn i a ummi pa paohpaoh cu an cuarpar a tan hna. ²⁴ Abraham cu cuarpartan a si ah kum sawm kua le kum kua a si i ²⁵ a fapa Ishmael cu kum hleithum a si. ²⁶ An pahnih cun ni khat te ah, ²⁷ an sal vialte hna he cun an cuarpar cu tan an si.

¹ Bawipa cu Abraham sinah Mamre i thingzarh hna lakah khan a lang. Chun ni lin lai i Abraham cu a thlam innka i a ṭhut lioah khan, ² khua a hei zoh i mipa pathum an dir ko kha a hmuh hna. A hmuh hna le cangka a va tli i a va don hna. A khuk aa bil i, ³ "Bawipa, Ka inn ah tang ta loin kei santlailo pa hi, ka lanhtak sawh hlah. ⁴ Ti in cahpiak hna ning law nan ke i ṭawl u law thing toiah hin i din ta u. ⁵ Rawl tlawmpal tein in serpiak hna ning law ei ta u law cun nan bat a dam in nan lan te lai. Ka inn nan ra phan cang ṭung i rawl ei ta lo cu ka sia a herh," a ti. Annih nih, "A ṭha ko, na chim bantuk cun tuah ko," tiah an leh. ⁶ Abraham cu khulrang in thlam chungah khan a vung lut i Sarah cu a thawh i, "Khulrang in changvut na ngeihmi lak i a ṭha bik kha pawng sawm thum in i lak law nawng law changreu ah ser tuah," a ti. ⁷ Cun cawrun leiah khan a va tli i a thau milmialmi cawfa pakhat kha a va tlaih i a salpa pakhat kha a pek i zokzok in a rak can i chumh awkah a rak timh. ⁸ Cawhnuk thawhpat le cawhnuk hring le sa kha a hunh hna i an ei lioah cun thingkung tangin a dirhnawh hna. ⁹ Cun annih nih, "Na nupi Sarah tah khuazei ah dah a si?" an ti. "Thlam chungah khin a um ko," tiah a leh hna. ¹⁰ A lengtu hna pakhat nih cun aa thawh i, "Na nupi Sarah nih kumvoi atu tikah hin fapa a hrin lai i cu tikah cun ka ra ṭhan te lai," a ti. Sarah nih cun a hnulei innka khan a ngaih ko hna. ¹¹ Abraham le Sarah cu an tar ngaingai cang i Sarah cu nuphung hmanh a hngal ti lo. ¹² Cucaah Sarah cu a ni i, "Atu cu fa ngei dingah ka tar tuk cang, cu lunglawmhnak cu ka hmu ngai hnga maw? Cu pinah ka va zong a tar fawn," a ti. ¹³ Cun Bawipa nih Abraham cu a thawh i, "Zeicahdah Sarah nih a nih i, ’Hi tluk i ka tar hnuah hin fa cu ka ngei kho ngai hnga maw?’ a ti? ¹⁴ Bawipa caah hin zei thil paoh hi a har tukmi a um maw? A caan a tlin tikah kumvoi atu tikah hin na sinah ka ra ṭhan lai i Sarah nih fapa a hrin lai," a ti. ¹⁵ Sarah cu a thin a phang i, ka ni lo, tiah aa pheh. Anih nih, "Na ni ko, na ni hrimhrim ko," tiah a ti. ¹⁶ Mi cu an i thawh i Sodom khua a langhnak hmun ah khan an kal i Abraham zong cu anmah thlahpah ah an sinah a kal ve. ¹⁷ Cun Bawipa nih amah le amah cu aa thawh i, "Ka thil tuah laimi hi Abraham cu chim loin ka um kho lo. ¹⁸ A tefa hna cu a ngan i a ṭhawngmi miphun ah an cang lai i vawlei cung miphun vialte hna nih hin Abraham thluachuahnak ka pekmi bantuk kha kan pe ve tiah an ka hal lai. ¹⁹ A hmaanmi le a dingmi thil tuah hi ka nawlbia zulh a si ti kha a fale le a hnu i a ra laimi a tefa hna kha a cawnpiaknak hna hnga, amah cu ka thim cang. Cun bia kaa kammi vialte kha ka tuahpiak lai," tiah a ti. ²⁰ Cun Bawipa nih cun, "Sodom le Gomorrah khua hi an thang a chia ngaingai ko i an sualnak cu a ngan ngaingai ko. ²¹ Cucaah kan theihmi thawng hi a hmaan maw hmaanlo ti hngalh awkah ka vung kal hrimhrim lai. A si taktak le si taktak lo kha ka vung hliah lai," a ti. ²² Cun mi kha an i thawh i Sodom leiah cun an kal, sihmanhsehlaw Bawipa cu Abraham sinah khan a taang. ²³ Abraham nih Bawipa cu a hei naih i, "A sual lomi cu a sualmi hna sinah na thah chih taktak ko hna lai maw? ²⁴ Khuapi chungah khan a sual lomi sawm nga um hna seh law na hrawh ṭhiamṭhiam ko lai maw? Sawm nga khamh awkah khan an khua cu na zuah hnga lo maw? ²⁵ A sual lomi cu a sualmi hna sinah khan na that bal hna lai lo. Cucu a si kho lo. Nangmah nih cucu na tuah bal ding a si lo. Cu ti a si ahcun, a sual lomi cu a sualmi bantukin pei dantat an si ve kun hnga cu. Cucu a si kho lo. Vawlei cung dihlak bia a ceihtu Dingthlu Lairel nih cun ding tein pei a ceih lai cu," a ti. ²⁶ Bawipa nih cun a leh i, "Sodom khua chung i a sual lomi minung sawm nga ka hmuh hna ahcun, cu sawm nga ruangah cun khua cu a ningpi in ka zuah lai," tiah a ti. ²⁷ Abraham nih khan a hun i thawh ṭhan i, "Kei cu leidip le vutcam si ko hmanh ning law, Bawipa, nangmah cu ngamh ngaiin kan chawnh hi ka ngaithiam ko. ²⁸ Sawm nga si loin sawm li le panga um hna seh law tah zeitindah a si hnga? Panga in an tlawm ruangah cun khua cu na hrawh dih ko hnga maw?" a ti. Bawipa nih cun, "A sual lomi sawm li le panga ka hmuh hna ahcun khua cu ka hrawk lai lo," a ti. ²⁹ Abraham nih cun aa thawh ṭhan i, "Sawm li lawng um hna seh law tah?" a ti. Anih nih, "Sawm li an um ahcun ka hrawk lai lo," a ti ve. ³⁰ Cun Abraham nih cun aa thawh ṭhan i, "Bawipa, ka cungah na thin hung sawh hlah. Ka chim rih ko lai. Sawm thum lawng um hna seh law tah?" a ti. Anih nih, "Sawm thum ka hmuh hna ahcun ka hrawk hna lai lo," a ti. ³¹ Abraham nih cun aa thawh ṭhan i, "Bawipa, na sinah ngamh ngaiin bia ka chim lengmang hi ka ngaithiam ko. Kul lawng um hna seh law tah?" tiah a ti. Anih nih, "Kul ka hmuh hna ahcun ka hrawk lai lo," a ti. ³² Cun Abraham nih cun, "Bawipa, na thinhung hlah, voi khat in ka chim ko rih lai. Pahra lawng um hna seh law tah?" a ti. Cun anih nih, "Pahra an um ahcun ka hrawk lai lo," a ti. ³³ Abraham he bia an i ruah dih cun, Bawipa cu a kal i Abraham zong cu inn ah a ṭin.

¹ Zanlei sang ah vancungmi pahnih kha Sodom khua chung i an va luh tikah, Lot cu mi an i ton tawnnak hauka hramah khan a rak ṭhu. A hmuh hna cangka a tho zau i annih kha a rak don hna. An hmaiah cun a kun i, ² "Ka bawipale hna, nan salpa inn ah ra lut tuah u law ka tlung tuah u. Nan ke kha i ṭawl u law tuzan cu riak u. Thaizing ah nan tho lai i nan kal duhnak ah cun nan kal chin te lai," a ti hna. Sihmanhsehlaw annih nih, "A si lo, khualai ah hin kan riak ko lai," tiah an leh. ³ Sihmanhsehlaw a nawl lengmang hna i a donghnak ah a inn ah cun an kal. Lot nih cun changreu kha a ser i rawl thaw ngai a serpiak hna i annih nih an ei. ⁴ Khual cu an ih hlanah, Sodom khuami pa nih khan inn cu an rak kulh. Khuachung mipa vialte cu a no he a tar he an tling dih. ⁵ Lot cu an vun auh i, "Na inn i a riakmi pahnih hna kha khuazei ah dah an si? Hun chuahter hna law kan rak ihpi hna lai," an ti. ⁶ Lot cu lengah a va chuak i innka cu a khar. ⁷ Annih cu a thawh hna i, "Ka duate le, zei kan ti hnga, hi bantuk ṭhat lonak cu tuah sawh hlah u! ⁸ Zohhmanh u, pa a hngal rih lomi fanu ngaknu pahnih ka ngei hna. Annih tu hi rak chuahpi hna ning law nan duh paoh in nan rak tuah hna lai. Sihmanhsehlaw hi khual hi cu zeitin hmanh in ti hna hlah u, ka inn chung i a ummi ka khual an si i ka huhphenh hna hrimhrim awk a si," a ti. ⁹ Sihmanhsehlaw annih nih an thawh i, "Kan kian, a nang ramdangmi hi i thlak hlah, nangmah nih hin maw cutin tuah u khatin tuah u na hei kan ti. Kan kian, cu lo ahcun anmah nak fak in kan in tongh sual lai," an ti. Lot cu an en i innka kha baoh awkah an hei fuh. ¹⁰ Asinain, inn chunglei i a ummi mi pahnih nih khan Lot cu inn chungah khan an hun hnuh i innka cu an khar. ¹¹ Cun lenglei i a ummi vialte kha an mit an cawtter hna i cucaah innka kha an hmu kho lo. ¹² Mi pahnih nih khan Lot cu an thawh i, "Hika ah hin midang na ngei ti hna maw? Na fapa hna le na fanu hna le khua chung i na mi a simi hna paohpaoh kha i chuahpi hna law hika hmun hin chuak u, ¹³ zeicahtiah hi hmun hi kan hrawh cang lai. Hi mi hna an thangchiatnak hi Bawipa nih a theih cang i Sodom khua hi hrawh awkah a kan thlah cang," an ti. ¹⁴ Cun Lot cu a va chuak i a fanule a ṭhitu hna ding pawl kha, "Khulrang in hika hmun hi chuahtak u, hi hmun hi Bawipa nih a hrawh lai," a ti hna. Sihmanhsehlaw aa capo tiah an ruah. ¹⁵ Khua a hung dei tikah vancungmi nih khan Lot cu an hnawh i, "I hnawh tuah! Na nupi le na fanu pahnih kha i lak hna law chuak u. Cu ti nan chuah ahcun khua a rawh tikah nan thi lai lo," an ti. ¹⁶ Asinain Lot cu aa nuainai i sihmanhsehlaw Bawipa nih khan a cungah zaangfahnak kha a ngeih caah, mi nih khan amah cu le a nupi le a fanu pahnih hna cu an kut in an hnuh hna i khua lengah an chuahpi hna i cuka ah cun an kaltak hna. ¹⁷ Cun khua chungin an chuahpi dih hna hnuah khan vancungmi pakhat nih cun aa thawh i, "Nan nun nakhnga tli u! Hnulei zoh hlah u, nelrawn chungah dircon hlah u. Tlang ah tli u law nan thi lai lo," a ti hna. ¹⁸ Sihmanhsehlaw Lot nih a leh i, "Bawipa, cucu a si kho lo. ¹⁹ Zohhmanh, ka cungah zaangfahnak nganpi na tuah cang i ka nunnak na ka khamh hi na ka zaangfah ruangah cun a si ko. Tlang cu an hla tuk i ka phak hlanah rawhnak nih khan a ka cil lai i ka thi lai. ²⁰ Cucaah cun khi khua hmete khi na hmu maw? A nai i ka phak khawh lai. Cucaah khika ah khin ka kalter, hmun hmete men a si ko kha na hmuh ko i khika ah ka nunnak kha a him ko lai," a ti. ²¹ Anih nih aa thawh i, "Cucu ka hna a tla; khi khua cu ka hrawk lai lo. ²² I hnawh! A tlik in tli! Khika na phak hlanah cun zeihmanh ka tuah kho lo," a ti. Lot nih khan cu khua cu khua hmete a ti caah a min ah Zoar sak a si. ²³ Ni a chuah ah khin Lot cu Zoar a phan ve; ²⁴ Bawipa nih Sodom le Gomorrah cungah cun kat mei kha a surter i ²⁵ Bawipa nih cun cu khua pahnih hna le cu nelrawn a dihlak le khuapi chung i a ummi vialte hna le ram chung i a khomi thil vialte hna cu a hrawh dih hna. ²⁶ Lot nupi cu hnulei aa mer i cite tung ah a cang. ²⁷ A thaizing zingkate ah Abraham cu Bawipa hmai i a dirnak hmun ah khan khulrang in a va kal. ²⁸ Sodom le Gomorrah le nelrawn cu a vun cuanh hna i, somei nganpi chung i meikhu a chuah hluahmah bantuk khin, vawlei cun meikhu cu a tho. ²⁹ Asinain Pathian nih nelrawn chung ummi khua kha a hrawh hna tikah Abraham kha a philh lo i Lot kha himnak hmun ah a zamter. ³⁰ Lot cu Zoar i um kha a ngamh lo caah a fanu pahnih hna he khan tlang ah an i thawn i cuka ah cun lungkua chungah an um. ³¹ A fanu upa deuh nih khan ngakchia deuh cu a thawh i, "Kan pa hi a tar cang i a ningcang in fa kan ngeih khawhnak dingah vawlei cungah hin ahohmanh vat awk pa an um ti lo. ³² Cucaah cun, ra law, zu kan ritter lai i kan ihpi lai i amah thawng cun fa kan ngei lai," a ti. ³³ Cu zan ah cun zu cu an dinh i a fanu upa deuh nih khan a ihpi, sihmanhsehlaw a rit tuk caah cucu a hngal lo. ³⁴ A thaizing ah upa u nih khan ngakchia u cu a thawh i, "Zahan ah khan kan pa cu ka ihpi cang; tu zan ah hin ritter rih u sih law ka tuah bantuk khan nang nih va tuah ve. Cun kan pahnih in kan pa thawngin tefa kan ngei veve lai," a ti. ³⁵ Cucaah cu zan ah cun zu cu an ritter ṭhan i a ngakchia deuh nih khan a ihpi ve. Cu zan zong cu a rit tuk caah cucu a hngal lo. ³⁶ Cuticun Lot fanu pahnih hna cu an pa thawngin fa an pawi. ³⁷ A upa deuh nih khan fapa a hrin in a min ah Moab a sak. Amah cu atu Moab mi a hringsortu hna hi a si. ³⁸ A ngakchia deuh zong nih khan fapa a hrin ve i a min ah Ben-ammi a sak. Amah cu atu Ammon mi a hringsortu hna hi a si.

¹ Abraham cu Mamre khan Negeb ram leiah aa thawn i Kadesh le Shur karlak ah khan a um. Gerar i a um lioah khan ² a nupi Sarah cu ka far a si tiah a ti. Cucaah Gerar siangpahrang Abimelek nih khan a sinah Sarah cu ratpi u, tiah a ti hna. ³ Cu zan ah cun a mang ah Pathian cu a sinah a lang i, "Sarah hi va ngeimi a si caah nan thi lai," tiah a ti. ⁴ Sihmanhsehlaw Abimelek nih khan a naih hmanh a naih lo i cucaah, "Bawipa, a sual lomi cu na ka thah ko lai maw? ⁵ Abraham nih pei aa thawh i, ’Ka far a si,’ a ti cu, cu hleiah, amah hrim zong nih pei, ’Ka ṭa a si,’ a ti cu. Mah hihi lung thiang tein ka tuah i zeihmanh ka palhnak a um lo," a ti. ⁶ Pathian nih cun a mang ah khan a vun leh i, "A si, lung thiang tein na tuah ti kha ka hngalh; cucaah cun pei ka cungah na sual sual lai tiah a tongh hmanh kan tonghter lo cu. ⁷ Asinain atu cu minu kha a va sinah kirter ṭhan. A va cu profet a si i thla an campiak lai i na thi lai lo. Sihmanhsehlaw na kirter ṭhan lo ahcun, nangmah le na innchungkhar kha nan thi dih lai, tiah ralrinnak kan pek," a ti. ⁸ A thaizing zingkate ah Abimelek nih a sinum vialte kha a kawh hna i hi thil vialte kha a chimh hna i an thin a phang ngaingai. ⁹ Cun Abimelek nih Abraham kha a auh i, "Kan cung i na tuahmi hi zeidah a si? Zei palhnak dah na cungah ka tuah i hi ṭhat lonak nganpi hi kan cungah tlunter na zalh? Ka cung i na tuahmi hi ahohmanh nih a tuah awk a si hrimhrim lo. ¹⁰ Zeicahdah mah hihi na tuah?" tiah a hal. ¹¹ Abraham nih cun a leh ve i, "Hika ah hin Pathian a ṭihmi pakhat hmanh an um lai lo i ka nupi duh ah hin keimah tu kha an ka thah lai tiah ka rak ruah caah a si. ¹² Amah cu ka far cu a si taktak, ka pa fanu cu a si nain ka nu fanu cu a si lo, cucaah ka ṭhit. ¹³ Cucaah Pathian nih ka pa inn in ram dang i a ka kalter tikah, amah cu ka thawh i, ’Ka cung i zumhawktlak tein na tuah dingmi rian pakhat na ngei, cucu khuazeika kan kalnak hmanh ah, ka ṭa a si, na ka ti lai,’ ka ti," tiah a ti. ¹⁴ Cun Abimelek nih khan Abraham cu Sarah kha a pek ṭhan i tuu le sal zong kha a pek chih hna. ¹⁵ Abraham cu a thawh i, "Ka ram chung khuazeika hmanh ah hin na duhnak paoh ah na um kho," a ti. ¹⁶ Cun Sarah kha a thawh i, "Na ṭa cu ngun tangka phar thong khat ka pek lai i cucu na sin i a ummi vialte hna sinah, na thiang ti langhternak caah a si lai; sualnak zeihmanh na tuah lo kha an dihlak in an hngalh lai," a ti. ¹⁷ - ¹⁸ Abraham nupi Sarah cung i a tlungmi thil ruangah khan Bawipa nih Abimelek inn chung i a ummi nu vialte kha fa ngei kho loin a tuah dih hna. Cucaah Abraham nih Abimelek kha thla a campiak i Pathian nih a damter. A nupi le a salnu hna zong kha a damter hna i fa an ngei kho ṭhan.

¹ Bawipa nih bia aa kam bang khan Sarah cu a bawmh i ² fa a pawi i Abraham kha a tar hnuah fapa a hrinpiak. An fapa cu Pathian nih a chimmi caan te ah khan a chuak. ³ Abraham nih a min ah Isak a sak. ⁴ Isak cu ni riat a si tikah, Pathian nih a fial bang khan Abraham nih cun a cuarpar a tan. ⁵ Isak a chuah ah Abraham cu kum za khat a si. ⁶ Sarah nih cun aa thawh i, "Pathian nih lawmhnak le nihnak a ka pek. Cu kong a theimi paoh nih an ka nihpi lai," a ti. ⁷ Cun aa thawh ṭhan i, "Ahohmanh nih Abraham cu, Sarah nih fano a cawm te hna lai, tiah an rak chim kho lai lo. Asinain a tar lei sang ah fapa pakhat ka hrinpiak ko," a ti. ⁸ Ngakchia cu a ṭhang i a hnuk thlah ni ah Abraham nih puai nganpi a serpiak. ⁹ Ni khat cu Izipt minu Hagar nih Abraham a hrinpiakmi fapa Ishmael kha Sarah fapa Isak he cun lente an i celh. ¹⁰ Cucu Sarah nih a hmuh i, "Hi salnu le a fapa hi ṭhawl hna. Ka fapa Isak nih a co awk hnga a simi na chawva vialte hi, hi salnu fapa nih hin a tinco ve awk a si hrimhrim lo," a ti. ¹¹ Hi nih hin Abraham cu a lungre a theihter ngaingai, zeicahtiah Ishmael zong cu a fapa a si ve. ¹² Sihmanhsehlaw Pathian nih Abraham cu a thawh i, "Ngakchiapa le na sal Hagar kongah lungrethei in um hlah. Sarah nih an chimhmi paoh cu tuah ko, zeicahtiah tefa kan kamhmi cu Isak chung hin an chuak lai. ¹³ Na salnu fapa zong kha tefa tampi ka pek ve lai i miphun pakhat an tling ve lai, amah zong cu na fapa pei a si cu," a ti. ¹⁴ A thaizing cu zingka tein Abraham nih Hagar cu rawl tlawmpal le saphaw tithawl ti a khat tein a ummi kha a pek i nau kha a puakter i a kalter hna. Hagar cu Beer-sheba ramlak ah khan a vai lengmang. ¹⁵ Ti cu a dih tikah ngakchia cu burbuk pakhat toiah a chiahtak i ¹⁶ lam hla nawn, thal kah phak hrawng khin a hngah. "Ngakchia a thih cu ka hmu ngam lo," a ti i cuka i a ṭhut lioah cun fak piin a ṭap. ¹⁷ Pathian nih ngakchiapa a ṭah cu a run theih i vancung in Pathian vancungmi nih khan Hagar cu a run chawnh i, "Hagar, zeicahdah na lungre a theih? Na thinphang hlah. Pathian nih ngakchiapa a ṭah kha a theih cang. ¹⁸ Tho law va kal law va cawi law va pom. A tefa cu miphun nganpi ah ka ser hna lai," a ti. ¹⁹ Cun Pathian nih Hagar cu a mit kha khua a hun hmuhter i tikhor pakhat a hmuh. A va kal i ti thawl khan ti cu a va than i ngakchiapa kha a dinh. ²⁰ Ngakchiapa cu Pathian nih a umpi i a ṭhang i Paran ramlak ah khan khua a sa; amah cu sakah thiam ngaimi a hung si. ²¹ A nu nih Izipt ram in nupi a ṭhitpiak. ²² Cu caan ah cun Abimelek cu a ralbawi ngan bik Fikol he khan Abraham sinah cun an va kal i, "Na tuahmi thil kip ah Pathian nih an umpi. ²³ Cucaah cun keimah siseh ka fale si hna seh ka tefa si hna seh, na kan hlen nakhnga lo Pathian hmaiah hin bia i kam. Kei cu na cungah zumhawktlak in ka um, cu bantuk cun nang zong ka cung le na umnak ram cungah hin zumhawktlak na si nakhnga bia i kam," a ti. ²⁴ Cun Abraham nih, "Kaa kam," a ti. ²⁵ Abraham nih Abimelek cu Abimelek sinum pawl nih an chuhmi tikhor kong kha a chimh. ²⁶ Abimelek nih cun, "Cucu ka hngal lo. Na rak ka chim lo i atu hi ka theih hmasa bik a si," a ti. ²⁷ Cun Abraham nih Abimelek cu tuu le caw tlawmpal a pek i an pahnih in biakamnak an ser. ²⁸ Abraham nih tuufa pasarih kha a tuurun chungin a dang tein a chiah hna i ²⁹ cucu Abimelek nih, "Zeicahdah kha ti khan na tuah?" tiah a hal. ³⁰ Abraham nih cun, "Hi tuufa pasarih hi na ka cohlan hrimhrim hna lai. Zeicahtiah cu ti na ka cohlannak nih cun, hi tikhor a cotu hi keimah ka si kha a langhter lai," tiah a leh. ³¹ Cucaah cuka hmun cu a min ah Beer-sheba ti a si, zeicahtiah an pahnih in biakamnak an tuahnak cu cuka ah cun a si. ³² Beer-sheba ah biakamnak kha an tuah dih cun, Abimelek le a ralbawi ngan bik Fikol cu Filistin mi hna ram ah khan an kir ṭhan. ³³ Cun Abraham nih Beer-sheba ah cun thingkung pakhat a phun i Bawipa, Zungzal Hmunmi Pathian kha a biak. ³⁴ Filistin mi hna ram ah cun Abraham cu saupi a um.

¹ Cu hnu tlawmpal ah cun Pathian nih Abraham kha a hneksak i, "Abraham," tiah a ti i Abraham nih, "Bawipa, na chimmi bia ka ngai ko," tiah a leh. ² Pathian nih cun a thawh i, "Na fapa, fapa pakhat lawngte na ngeihmi Isak na dawtmi kha i lak law Moriah ram ah va kal. Cuka ah cun kan hmuhsak laimi tlang cungah khangh thawinak ah na khangh lai," a ti. ³ A thaizing cu zingka tein Abraham nih a laa kha a dan a danh i Isak le a sinum pahnih hna he tiah an kal. Thawinak ding caah cun thing tlawmpal a hlam i Bawipa nih a chimhmi hmun leiah khan kal aa thawh. ⁴ A ni thum ni ah Abraham nih cun cu hmun cu lamhlatpi khin a hei hmuh. ⁵ Cun a sinum pawl cu a thawh hna i, "Nannih cu hika ah hin rak um u. Khika ah khin Pathian va biak awkah ngakchiapa le keimah hi kan va kal lai i kan va biak dih in nan sinah kan ra kir ṭhan lai," a ti. ⁶ Cun Abraham nih khanghthawinak ca ding thing cu Isak kha a phorhter i amah nih mei le nam kha a put hna. Cuticun hmunkhat ah an pahnih cun an kal. ⁷ Isak nih khan a pa cu, "Ka pa," tiah a ti i a pa nih cun, "Hawi, ka fapa," tiah a leh. Isak nih cun, "Mei le thing cu an um, sihmanhsehlaw khanghthawinak ca ding tuufa tah khuazei ah dah a si kun?" a ti. ⁸ Abraham nih cun, "Pathian nih a khan te ko lai, ka fapa," tiah a leh i cuticun an pahnih cun hmunkhat ah an kal lengmang. ⁹ Bawipa nih a chimhmi hmun kha an phak tikah, Abraham nih biakṭheng pakhat a ser i a cungah thing kha a chiah. A fapa cu a ṭem i biakṭheng cung thing cungah cun a chiah. ¹⁰ Cun ka thah lai tiah nam a vun i lak ah khin ¹¹ Bawipa vancungmi nih vancung in a run auh i, "Abraham, Abraham!" tiah a ti. Abraham nih, "Asi, hika ah ka um ko," tiah a leh. ¹² Vancungmi nih cun, "Ngakchiapa kha fahnak zeihmanh pe hlah, a cungah zeihmanh zong tuah fawn hlah. Fapa pakhat lawngte na ngeihmi hmanh pek sian loin na ka um lo caah Pathian nawl ngaih cu na duh ngaingai ti kha ka hngalh," tiah a ti. ¹³ Abraham cu khua a hei hoi i tuukawng pakhat burbuk lak i a ki in a rak taan ko kha a hmuh. A hei fuh i a va lak i a fapa can ah khanghthawinak ah cun a thawi. ¹⁴ Abraham nih cu hmun cu, "Bawipa nih a khaan ko," tiah min a sak i atu chan tiang zongin mi nih, "Bawipa tlang cungah cun Bawipa nih a khaan ko," an ti tawn. ¹⁵ Bawipa vancungmi nih Abraham cu vancung in a voi hnihnak a run kawh ṭhan i, ¹⁶ "Keimah nih keimah min hrimhrim in biakamnak ka ser lai — hihi Bawipa chimmi bia a si — fapa pakhat lawngte na ngeihmi kha pek sian loin na ka um lo caah thluachuah tam piin kan pek lai. ¹⁷ Van i arfi zat le rili kam i thetse zat khin tefa kan pek lai. Na tefa nih cun an ral kha an tei hna lai. ¹⁸ Cun vawlei cung miphun vialte nih, na tefa thluachuah ka pek hna bantuk hin thluachuah kan pe ve, tiah an ka nawl lai — hi vialte cu nangmah nih ka nawl na ngaih caah a si," a ti. ¹⁹ Cun Abraham cu a sinum hna sinah khan a kir i Beer-sheba ah khan hmun khat ah an tlung ṭi i cuka ah cun khua a sa. ²⁰ Cu hnu tlawmpal ah cun Abraham nih a nau Nahor nih khan Milkah he fa an hrin hna ti kha a theih: ²¹ Uz cu fapa upa bik a si, a nau ah Buz a si, cun Aram pa Kemuel a si, ²² cun Khesed, Hazo, Pildash, Jidlaf le Bethuel an si. ²³ (Bethuel cu Rebekah pa kha a si). Milkah nih Abraham nau Nahor kha hi fapa pariat hi a hrinpiak hna. ²⁴ Nahor nupi a pahnihnak Reumah nih, Tebah, Gaham, Tahash le Maakah a hrin hna.

¹ Sarah cu kum za kum kul le kum sarih a nung i ² Kanaan ram chung Kiriath-arba khua ah a thi (Kiriath-arba cu Hebron ti zongah ti a si). Abraham nih khan a ruak tuamhlawmnak ding cu a tuah i a ṭah. ³ Cun a thimi a nupi cu a kaltak i Hit mi hna sinah khan a va kal i, ⁴ "Kei cu hika ah hin ramdangmi le a lang i a ra um tami ka si. Cucaah nan vawlei tlawmpal cu kan i vuinak ding caah ka zuarh u law ka duh, ka nupi cu cuka ah cun ka vui khawh nakhnga," a ti. ⁵ Annih nih an leh i, "Bawipa, kan bia kan ngai. ⁶ Nangmah cu kan lakah a ṭhawngmi bawi pakhat na si; kan ngeihmi thlan lak i a ṭha bik ah na mithi cu vui ko. Ahohmanh nih an ngeihmi thlan cu sianh loin an in um lai lo i na mithi vui cu an in dawn lai lo," an ti. ⁷ Cu tikah Abraham cu a dir i an hmaiah a kun i, ⁸ "Hika ah hin ka nupi cu vui seh ti nan ka duh a si ahcun, Hit mi Efron, Zohar fapa kha ka nawlpiak u law ⁹ amah ta a simi Makpelah lungkua kha ka zuarh seh. Cu lungkua cu a lo kam i a ummi a si. Nan hmaika hrimhrim ah hin a man tling tein a ka zuarh nakhnga ka nawlpiak u law kei nih vuinak hmun kaa ngeih ve lai," tiah a ti hna. ¹⁰ Efron zong cu Hit mi hna sinah pumhnak hmun khua hauka ah khan a ṭhu ko i cuka i a ummi vialte theih ah cun, ¹¹ "Bawipa, cuticun a si lai lo, lo le a chung i a ummi lungkua cu an dihlak in nangmah kan pek lai. Ka mi hna an hmaika hrimhrim ah hin nangmah cu kan pek lai i na nupi cu na vui lai," tiah a ti. ¹² Sihmanhsehlaw Abraham cu mi zapi hmaiah cun a kun i ¹³ mi vialte nih thei kho hna seh tiin Efron cu a thawh i, "Na duh ning cun si sawh seh; cucaah cun ka bia hi ngai tuah: lo cu a ningpi in kan cawk lai. Cun a man kan pekmi cu ka cohlang law ka nupi cu cuka ah cun ka vui lai," a ti. ¹⁴ Efron nih cun a hun leh ve i, ¹⁵ "Bawipa, nang le kei kar ah cu ram ngun tangka phar za li man thamtham cu zeidah a va si. Na nupi cu cu lo chungah cun va vui ko," tiah a ti. ¹⁶ Abraham cu a hna a tla ve i Hit mi hna theih hngan i Efron nih cu zat in si seh a timi zat khan Abraham nih cun a thlai — chawdawr pawl nih an thlai ningin ngun tangka phar za li a si. ¹⁷ Cuticun Mamre nichuahlei i a ummi Makpelah lo Efron ta a rak simi kha, Abraham thil ah a cang; a lo he a chung i a ummi lungkua he, thingkung vialte he, Abraham ta ah an cang dih. ¹⁸ Pumhnak i aa telmi Hit mi vialte nih khan cu lo cu Abraham ta a si cang ti kha an hngalhpi. ¹⁹ Cun Abraham nih khan a nupi cu hi lungkua, Kanaan ram chung i a ummi lungkua ah cun a vui. ²⁰ Cuticun Hit mi hna ta a rak simi lo le a chung lungkua kha vuinak hmun caah Abraham ta ah an cang.

¹ Abraham cu a tar ngaingai cang i a thil tuahmi kip ah khan Bawipa nih thluachuahnak a pek. ² A sal upa bik, a ngeihmi thil vialte a zohkhenhtu kha a thawh i, "Ka phei tangah na kut chia law bia i kam. ³ Van le vawlei uktu Pathian Bawipa min in chiatser in, ka sinah bia i kam ti kan duh. Cu bia kamter kan duhmi cu hihi a si: atu i ka umnak Kanaan ram mi hi ka fapa Isak nupi caah na ṭhi hrimhrim hna lai lo. ⁴ Ka chuahkehnak ram ah khan na va kal lai i ka rualchan hna chung khan ka fapa Isak caah cun nupi na va ṭhit lai," tiah a ti. ⁵ A salpa nih cun a thawh i, "Hika ram lei rat awkah ngaknu nih cun an inn cu kaltak duh hlah seh law tah zeitindah ka tuah hnga? Na fapa cu maw na chuahkehnak ram ah cun ka kirter ṭhan hnga?" tiah a hal. ⁶ Abraham nih cun, "Ka fapa cu cuka ah cun na kirter hrimhrim hnga lo. ⁷ Vancung Pathian Bawipa nih, ka pa inn le ka sahlawh le ka rualchan vialte hna sinin a ka chuahpi i, hi ram hi na tefa ka pek hna lai, tiah chiatser tein bia a ka kam. A vancungmi kha na hmaiah a thlah lai i cuka ah cun ka fapa caah nupi ding na va hmuh ko lai. ⁸ Sihmanhsehlaw nu nih khan an zulh duh lo ahcun, ka sin i bia naa kammi na luat lai. A zei si hmanh ah, ka fapa cu a kir bel cu ram ah cun na kirpi bal hnga lo," tiah a leh. ⁹ Cucaah a salpa nih cun a bawipa Abraham phei tangah cun a kut kha a chiah i a fialmi kha tuah dingin bia aa kam. ¹⁰ A salpa nih cun a bawipa kalauk chungin pahra kha a lak hna i laksawng man sungsung kha aa phorh hna i Mesopotamia ram Nahor khua i kal awkah cun aa thawh. ¹¹ A va phak tikah, khua pawng i a ummi tikhor pawngah khan a kalauk cu a bawhter hna. Cu caan cu zanlei sang, nu nih ti than awk i an rat caan khi a si. ¹² Cun thla a cam i, "Bawipa, ka bawipa Abraham i a Pathian, nihin ah hin hlawhtlinnak ka pe law ka bawipa sin i bia na kammi kha hmunhter ko. ¹³ Atu ah hin khua chung ngaknu nih ti an rung thannak ding tikhor ah hin ka um i hi tikah ¹⁴ ngaknu kha ka thawh i, ’Zaangfahnak in na ti-um kha vun ṭhum law ti din awk ka pe tuah,’ ka ti i, ’Ding hen, na kalauk hna zong kha ti ka pek hna lai,’ a timi cu, na sal Isak ca i na thimmi si seh. Cu bantuk thil a si ahcun, ka bawipa sin i na biakamnak kha a hmun tiah ka hngalh lai," a ti. ¹⁵ A thlacam a dih hlanah khin Rebekah kha a ti-um cu a liang ah a run i khinh i a ra. Rebekah cu Bethuel fanu kha a si, Bethuel cu Milkah fapa kha a si i Milkah cu Abraham nau Nahor nupi kha a si. ¹⁶ Rebekah cu ngaknu a si i aa dawh ngaingai. Tikhor ah cun a vung kal i a um khat cun ti cu a vung than i a hung chuak ṭhan. ¹⁷ Abraham salpa nih khan a hei tlikhnawh i, "Zaangfahnak tein na um chung ti kha din awkah ka pe tuah," tiah a ti. ¹⁸ Rebekah nih cun, "Ding hen, bawipa," a ti i a ti-um cu a liang cung cun a vun ṭhumh i a tlaih bu khan a dinter. ¹⁹ A din dih in Rebekah nih khan, "Na kalauk hna ca zongah hin ka vung than lai i cim tein ding hna seh," a ti. ²⁰ Saṭil ti dinnak kuang ah khan a ti cu a bungh i tikhor chungah cun a vung tli ṭhan i a kalauk kha an tihal a riamh cikcek hlantiang ti cu a thanpiak hna. ²¹ Bawipa nih ka khualtlawnnak ah hin hlawhtlinnak a ka pe maw pe lo tiin mipa nih khan Rebekah cu dai tein a zoh ko. ²² Kalauk kha ti a dinh dih hna hnuah Abraham salpa nih khan a man a fak ngaimi sui hnartonh pakhat kha aa chuah i a hnar ah cun a tonh, cun sui kuthrolh ngan pipi pahnih zong aa chuah i a kut ah khan a hrolh hna. ²³ Cun ngaknu cu a thawh i, "Ahodah na pa a si, ka chim tuah. Na pa inn ah cun keimah le ka mi hna caah riahnak hmun a um hnga maw?" tiah a hal. ²⁴ Ngaknu nih cun, "Nahor le Milkah fapa Bethuel fanu ka si," tiah a leh. ²⁵ "Kan inn ah cun ramro le saṭil rawl zong tampi a um i nanmah riahnak ca hmun zong a um ko," a ti fawn. ²⁶ Cun Abraham salpa nih cun a khuk aa bil i Bawipa kha a biak. ²⁷ Cun aa thawh i, "Ka bawipa Abraham i a Pathian, ka bawipa sin i a biakam let lo tein a ummi cu thangṭhat si ko seh. Bawipa nih ka bawipa i a unau inn ah ding tein a ka hruai ko," tiah a ti. ²⁸ Ngaknu cu a nu inn ah khan a va tli i cu kong cu a dihlak in a chimh dih. ²⁹ Rebekah ṭa Laban kha, mipa umnak tikhor lei i va kal awkah cun lengah khan a tli. ³⁰ A hnartonh le a far kut i a kuthrolh kha a hmuh hna i a far nih mipa nih a ka chimh a timi a chimmi zong kha a theih tikah Abraham salpa, a kalauk hna pawng i a dirnak tikhor ah khan a va kal. ³¹ Amah cu, "Bawipa, ra lut tuah. Nangmah cu Bawipa nih thluachuah an pekmipa na si. Zeicahdah lengah cun na um ko. Kan inn chungah nangmah caah hmun pakhat kan sersiampiak cang i na kalauk hna ca zongah hmun a um ko," a ti. ³² Cucaah mipa cu inn chungah khan a lut i Laban nih khan kalauk cu an thil a ṭhumh hna i ramro le rawl kha a pek hna. Cun Abraham salpa le a mi hna ke ṭawlnak caah ti a rak put. ³³ Rawl kha an hun hunh hna, sihmanhsehlaw mipa nih khan aa thawh i, "Ka rathnawh chanmi thil ka chim hlanah cun ka ei lai lo," a ti. Laban nih, "Chim ko," tiah a ti. ³⁴ Abraham salpa nih cun aa thawh i, "Kei cu Abraham sal ka si. ³⁵ Bawipa nih ka bawipa cu thluachuahnak tampi a pek i mi lianngan pakhat ah a ser. Tuurun le mehehrun le caw le sui le ngun le salnu le salpa le kalauk le laa kha a pek hna. ³⁶ Cun ka bawipa nupi Sarah nih khan ka bawipa cu a tar toiah fapa pakhat a hrinpiak i ka bawipa nih a fapa cu a ngeihmi thil vialte kha a pek dih. ³⁷ A nawlbia kha ngaih awkah chiatserh tein bia a ka kamter i cu biakam ah cun hitihin a ti: ’Ka umnak Kanaan ram ngaknu hna chungin ka fapa caah nupi na hal hrimhrim lai lo. ³⁸ Ka pa miphun, ka sahlawh ka rualchan hna sinah na kal lo i cu hna sinin ka fapa caah nupi na ṭhit lo a si ahcun, na cungah chiatnak tlung seh,’ a ka ti. ³⁹ Cun ka bawipa cu ka thawh i, ’Nu nih cun a ka zulh duh lo ah tah, zeitindah a si hnga, ka ti. ⁴⁰ A ka leh i, ’Amah nawl ka ngaih zungzalmi Bawipa nih a vancungmi kha na sinah a kalter lai i na hlawh a tling ko lai. Ka mi hna sinin, ka pa chungkhar hna sinin ka fapa cu nupi na va hmuhpiak ko lai. ⁴¹ Hihi na tuah ahcun, chiat kan sertermi hin na luat lai, cun ka rualchan hna sinah na va kal i an in pek duh lo ahcun, chiat kan sertermi khan na luat ṭhiamṭhiam lai,’ a ka ti. ⁴² "Cun nihin i tikhor ka ra phak ah khan thla ka cam i, Bawipa, ka bawipa Abraham i Pathian, ka khualtlawnnak ah hin nangmah nih thluachuahnak ka pe ko. ⁴³ Atu hi tikhor ah hin ka um. Ngaknu pakhatkhat tithan i an rat tikah ka rak thawh lai i, ’Na ti-um chung khan din awk ti ka pe tuah,’ tiah ka rak ti lai i ⁴⁴ cu i anih nih, ’Ding hen, cun na kalauk hna zong kha ti ka dinh hna lai,’ a ti ahcun, cu ngaknu cu Bawipa nih ka bawipa fapa nupi ca i a thimmi si seh, ka ti. ⁴⁵ Ka lung chungin thla ka cammi a dih hlanah cun, Rebekah kha a ti-um a liang ah run i khinh in a ra i tithan ah cun tikhor chungah khan a vung ṭum. Amah cu ka rak chawnh i, ’Zaangfahnak in ti din awk ka pe tuah,’ ka ti. ⁴⁶ Khulrang in a ti-um cu a liang cung khan a ṭhumh i, ’Ding hen, na kalauk hna zong kha ka dinh hna lai,’ a ti. Cuticun ka din i ka kalauk hna zong cu ti cu a dinh hna. ⁴⁷ Ngaknu cu ka thawh i, ’Ahodah na pa a si?’ ka ti. A ka leh i, ’Nahor le Milkah fapa Bethuel i fanu ka si,’ a ti. Cun a hnar ah khan hnartonh ka tonh i a kut ah khan kuthruk kha ka hruk hna. ⁴⁸ Ka khuk kaa bil i Bawipa kha ka biak, cun lam ṭha tein a ka hruaitu Pathian, ka bawipa Abraham i a Bawipa kha ka thangṭhat. Amah nih cun ka bawipa i a unau inn ah hin a ka hruai i a fanu kha ka Bawipa fapa caah cun ka hmuh cang. ⁴⁹ Cucaah cun ka bawipa cungah hin a phung ning bantukin rian cu kan ṭuan lai nan ti ahcun ka chim u; cun kan ṭuan hnga lo nan ti ahcun ka chim fawn ko u, cuticun lung i thleh awk kaa hngal lai," a ti. ⁵⁰ Laban le Bethuel nih cun, "Hi thil hi Bawipa sinin a rami a si caah kannih nih biakhiahnak hi kan tuah awk a si hnga lo. ⁵¹ Hika ah pei Rebekah cu a um ve ko hi; i lak law i kalpi ko. Bawipa hrimhrim nih a chim bang cun, na bawipa fapa nupi cu va si ko seh," tiin an leh. ⁵² An bia cu Abraham salpa nih khan a theih tikah vawlei lei hoih in a kun i Bawipa kha a biak. ⁵³ Cun sui hlawn le ngun hlawn le hnipuan kha a chuah hna i Rebekah kha a pek hna. A ṭa le a nu zong kha a man a fakmi laksawng a pek hna. ⁵⁴ Cun Abraham salpa le a mi hna nih cun rawl cu an ei i an din i cu zan cu cuka ah cun an riak. A thaizing an thawh tikah salpa nih khan, "Ka bawipa sinah ka tlunter cang u," a ti. ⁵⁵ Asinain a nu le a ṭa nih khan, "Ngaknu cu kan sinah zarh khat maw ni hra in dik um rih ko seh. Cun a kal te lai," an ti. ⁵⁶ Sihmanhsehlaw anih nih a thawh hna i, "Ka camter hlah u. Bawipa nih ka khualtlawnnak ah hin ka hlawh a tlinter cang; cucaah cun ka bawipa sinah ka kirter ko u," a ti. ⁵⁷ Annih nih, "Ngaknu kha au u si law zeitindah a ti ve hnga, hal hmasa hnik tuah u sih," an ti. ⁵⁸ Cucaah Rebekah cu an auh i, "Hi pa sin kal cu na duh maw?" tiah an hal. Anih nih, "Ka duh ko, ka kal lai," tiah a leh hna. ⁵⁹ Cucaah an far Rebekah kha amah a cawngtu nu he Abraham salpa le a mi hna sinah cun an kalter. ⁶⁰ Cun Rebekah cu thluachuah an pek i, "Kan farnu, nang cu mi thong tampi nu ah va cang law, Na tefa hna nih khan an ral hna khuapi kha tei hna seh," an ti. ⁶¹ Cun Rebekah le a sinum ngaknu pawl cu kalauk an i cit hna i mipa sinah cun an kal; Abraham salpa nih khan Rebekah cu aa lak i an kal. ⁶² Isak cu Beer-lahai-roi ah khan a rak i thawn i Negeb rawn ah khan a um. ⁶³ Ni khat cu zanlei sang ah khin tuan nawn ah ram lakah khan a vaa chawk i kalauk an rat kha a hmuh. ⁶⁴ Cun Rebekah nih Isak kha a hei hmuh. A kalauk cung khan a ṭum i, ⁶⁵ Abraham salpa kha, "Khika hmun i mipa, kanmah lei i a rami khi ahodah a si?" tiah a hal. "Ka bawipa a si," tiah a leh. Cucaah a hmaikhuhnak puan kha aa lak i a hmai cu aa khuh. ⁶⁶ Salpa nih khan a tuahmi vialte cu Isak kha a chimh dih. ⁶⁷ Cun Isak nih cun Rebekah cu a thlam ah aa luhpi i a nupi ah a cang. Isak nih cun Rebekah cu a dawt ngaingai i cucaah a nu thih hnuah Rebekah nih khan Isak cu a hna a ngamter ṭhan.

¹ Abraham nih midang pakhat a ṭhit ṭhan i a min ah Keturah a si. ² Keturah nih cun Zimran, Jokshan, Medan, Midian, Ishbak le Shuah a hrinpiak. ³ Jokshan cu Sheba le Dedan pa a si, cun Dedan fapa hna cu Asshurim, Letushim, le Leummim an si. ⁴ Midian fapa hna cu Efah, Efer, Hanok, Abida le Eldaah an si. Hi hna hi an dihlak in Keturah tefa an si. ⁵ Abraham nih a ngeihmi thil vialte cu Isak kha a pek ta dih. ⁶ Sihmanhsehlaw a thih hlanah a nupi dang hna fapa hna zong kha laksawng a pek hna i nichuahlei ah a kalter hna; a fapa Isak sinin aa hlatmi ram Nichuahlei ram ah a kalter hna. ⁷ Abraham cu kum za sawm sarih le kum nga a nung. ⁸ Chan tling cikcek in a nun hnuah a thi i a phunhawi hna sinah khan pumh a si ve. ⁹ A fapa Isak le Ishmael nih khan Makpelah lungkua ah khan an vui, cu lungkua cu Mamre nichuahlei i a ummi lo, Hit mi Zohar fapa Efron ta a simi i a ummi kha a si. ¹⁰ Cu lo cu Abraham nih khan Hit mi hna sin cun a cawk i Abraham le a nupi Sarah cu an pahnih tein cuka ah cun vui an si. ¹¹ Abraham thih hnuah a fapa Isak cu Pathian nih thluachuah a pek. Isak cu Beer-lahai-roi ah khan khua a sa. ¹² Hi hna hi Ishmael tefa kha an si, Ishmael cu Sarah salnu Izipt mi Hagar nih Abraham a hrinpiakmi fapa kha a si. ¹³ Ishmael fapa hna an min cu, an chuah ningin, aa chang lengmang in hi ning hin a si: Ishmael fapa upa bik cu Nebaioth a si, cun Kedar, Adbeel, Mibsam, ¹⁴ Mishma, Dumah, Massa, ¹⁵ Hadad, Tema, Jetur, Nafish, le Kedemah an si. ¹⁶ Hi hi Ishmael fapa hna cu an min cio le an khua cio le an umnak hmun cio he tiah an si — phuntungtu hleihnih le an phun cio an si. ¹⁷ (Ishmael cu a thih i a miphun hna sin i fonh a si ah khan kum za sawm thum le kum sarih a si.) ¹⁸ Ishmael tefa cu Havilah le Shur karlak ram ah khan an um, cu ram cu Izipt ram in nichuahlei, Assiria lei lam ah khan a si. An rualchan hna he a dang in an um. ¹⁹ Abraham fapa Isak tefa cu hihi an si: Isak pa cu Abraham a si. ²⁰ Isak cu Rebekah a ṭhit ah kum sawm li a si, Rebekah cu Mesopotamia ram i a ummi Aramean miphun Bethuel fanu a si i a ṭa cu Aramean miphun Laban kha a si. ²¹ Isak nupi cu fa a ngeih lo caah Isak nih cun Bawipa sinah thla a campiak. A thlacamnak cu Bawipa nih a leh i Rebekah cu fa a pawi. ²² A chung i a ummi faphir pa veve a simi cu pakhat le pakhat an i nam len tikah cun aa thawh i, "Hi bantukin a si ding a si ahcun, zeicahdah ka thih ko lo?" a ti. Cun Bawipa sinah a sullam hal awkah a kal i, ²³ Bawipa nih cun a rak thawh i, "Na chungah hin miphun pahnih an um. Aa ralmi miphun phun hnih na hrin hna lai, pakhat cu a ṭhawng deuh lai i a upa deuh nih a ngakchia deuh kha a rianh lai," a ti. ²⁴ A nithla a tlin tikah fa cu a hrin hna i faphir an si. ²⁵ A chuak hmasamipa cu a sen i a cuar cu a hmulmi puan bantuk a si, cucaah a min ah Esau an sak. ²⁶ Cun a nau kha a hung chuah tikah a u kedil kha fek tein aa tlaih, cucaah a min ah Jakob an sak. An chuah ah Isak cu kum sawm ruk a si. ²⁷ Ngakchia cu an pahnih in an hung ṭhang, Esau cu sakah thiammi a si, ramvaih a duh ngaimi a si, sihmanhsehlaw Jakob cu midai, miholhlo, inn lawng i a ummi a si. ²⁸ Isak nih Esau cu a dawt deuh, zeicahtiah a sa kahmi sa kha a ei lengmang, sihmanhsehlaw Rebekah nih Jakob kha a dawt deuh ve. ²⁹ Ni khat cu Jakob kha pehang a rak chuang i cu lioah cun Esau kha ram vaihnak in a ra tlung. ³⁰ A rawl cu a ṭam i Jakob cu, "Ka rawl a ṭam tuk, kha thil sen kha ka khat in ka pe tuah," tiah a ti. (Cu ruangah cun Esau cu Edom ti i min sak a sinak cu a si.) ³¹ Sihmanhsehlaw Jakob nih aa thawh i, "Fater na sinak kha na ka pek ahcun kan pek lai," a ti. ³² Esau nih cun, "A ṭha ko, ka thih cang leh lai hi ta! Cu fater sinak ko cu a!" a ti. ³³ Cun Jakob nih cun, "Na fater sinak cu kan pek hrimhrim lai tiah bia i kam hmasa," a ti. Esau nih cun biakamnak cu a ser i a fater sinak cu Jakob sinah cun a zuar. ³⁴ Cun Jakob nih changreu le pehang a pek i a ei a din hnuah a tho i a kal. Fater a sinak kha Esau nih cun zei ah a rel lo.

¹ Mangṭam a dang a tlung ṭhan, Abraham chan i hlan deuh i a tlungmi hleiah khan. Cucaah cun Isak cu Filistin mi Siangpahrang Abihmalek sin Gerar khua ah a va kal. ² Bawipa cu Isak sinah khan a lang i, "Izipt ram ah cun vung kal hlah, um kan tinak ram tu ah um ko. ³ Hika ah hin tlawmpal in um ko law na sinah ka um lai i thluachuah kan pek lai i hi ram vialte hi nangmah le na tefa kha kan pek hna lai. Na pa Abraham sin i ka sermi biakamnak kha ka let lai lo. ⁴ Van i arfi zat khin tefa kan pek lai i hi ram vialte hi annih cu ka pek hna lai. Na tefa thluachuah ka pek hna bantuk hin thluachuah kan pe ve tiah vawlei cung miphun vialte nih an ka hal lai. ⁵ Abraham nih khan ka nawl a ngaih i ka nawlbia vialte kha a zulh hna caah nangmah cu thluachuahnak kan pek lai," a ti. ⁶ Cucaah Isak cu Gerar ah khan a um. ⁷ Cuka mi hna nih a nupi kong kha an hal tikah, ka nupi a si, a ti ngam lo caah, ka far a si, a ti. Rebekah cu aa dawh ngaingai i cucaah amah an duh ruangah keimah kha cuka mi hna nih cun an ka thah lai, tiah a thin a phan caah cuticun a ti. ⁸ Cuka i Isak cu sau nawn a um hnuah khin, Filistin mi Siangpahrang Abimelek nih cun a thlalangawng in khua a hei cuan i Isak nih Rebekah a pom kha a hmuh. ⁹ Abimelek nih Isak cu ra seh tiah mi a hei thlah i, "Zohhmanh, na nupi a si hrimhrim lai. Zeicahdah ka far a si na ti kun?" a ti. Cun Isak nih cun, "Ka nupi a si ka ti ahcun an ka thah lai ti ka phan caah a si," ti in a leh. ¹⁰ Abimelek nih cun, "Kan cung i na tuahmi hi zeidah a si ruat hmanh. Ka mi pakhatkhat nih na nupi cu an ihpi sual ko hnga i kan cung i sualnak a tluntertu cu nangmah na si hnga," a ti. ¹¹ Cun Abimelek nih khan mi cu an dihlak in nawl a pek hna i, "Hi mipa siseh, a nupi siseh, an cungah ṭhat lonak a tuah mi cu thah nan si lai," a ti hna. ¹² Cu ram ah cun Isak nih thlaici a tuh i cu kum ah cun a tuhmi thlaici a let za khat in a zun; cucu Bawipa nih thluachuah a pek caah a si. ¹³ A ṭhangcho chin lengmang i mirum ngaingai ah a cang. ¹⁴ Tuurun tampi le cawrun tampi le sal tampi a ngeih hna caah Filistin mi nih khan an nahchuah. ¹⁵ Cucaah cun a pa Abraham a nun lio i Abraham salle nih an cawhmi tikhor vialte kha an chilh dih hna. ¹⁶ Cun Abimelek nih Isak cu a thawh i, "Kan kaltak cang. Kanmah nakin na ṭhawng tuk cang," a ti. ¹⁷ Cucaah Isak cu a kal i Gerar nelrawn ah khan khua a sa. ¹⁸ A pa Abraham a nun lio i Abraham salle pawl nih an rak cawhmi tikhor, Filistin mi nih an chilh dihmi kha a cawh ṭhan hna. Isak nih cun a pa nih min a rak bunhmi ṭhiamṭhiam kha a bunh hna. ¹⁹ Nelrawn chungah cun Isak salle nih cun tikhor pakhat an cawh i cerh pakhat an hmuh. ²⁰ Gerar khua saṭil khal hna le Isak saṭil khal hna cu an i si i bu khat nih, "Hi ti hi kanmah ta a si," an ti, a dang bu khat ve nih, "Kanmah ta a si," an ti ve. Cucaah cu tikhor cu a min ah Isak nih Esek a sak; amah he an i sik ruangah cun. ²¹ Isak salle pawl nih cun tikhor a dang pakhat an cawh ṭhan i cu kongah cun siknak a um ṭhiamṭhiam, cucaah a min ah, Sitnah a sak. ²² Cuka hmun cun aa ṭhial i tikhor a dang pakhat a cawh ṭhan. Cu kong ah cun siknak a um lo, cucaah a min ah Rehoboth a sak. Aa thawh i, "Atu cu hi ram chungah hin Bawipa nih luatnak a kan pek cang i hika hmun ah hin kan ṭhangcho cang lai," a ti. ²³ Mah ka hmun cu Isak nih a chuahtak i Beersheba ah a kal. ²⁴ Cu zan ah cun Bawipa kha a sinah a lang i, "Kei cu na pa Abraham Pathian kha ka si. Na thinphang hlah, keimah nih kan umpi ko. Ka sal Abraham ruangah thluachuahnak kan pek lai i tefa tampi kan pek lai," a ti. ²⁵ Cuka ah cun Isak nih biakṭheng pakhat a ser i Bawipa cu a biak. Cun cuka ah cun a thlam kha a bunh i a salle nih khan tikhor pakhat an cawh. ²⁶ Abimelek cu a fimchimtu Ahuzzath le a ralbawi Fikol he tiah Isak ton awkah Gerar khua in an ra. ²⁷ Isak nih cun a rak thawh i, "Hlan vial ah na ka rem lo i na ram in na ka dawi, zeicahdah atu ah keimah ton awkah na rat?" a rak ti. ²⁸ Annih nih cun, "Atu cu Pathian nih an umpi kha kan hngalh i nangmah le kanmah karlak ah biakamnak a fekmi a um awk a herh tiah kan ruah. ²⁹ Na cungah harnak zeihmanh kan tuah lo bantukin nang zong nih kan cungah na tuah nakhnga lo bia i kam ti kan in duh. Na cungah zaangfahnak kan rak ngei i dai tein kan in kalter. Atu cu Bawipa nih thluachuah an pek cang," an ti. ³⁰ Isak nih puai a tuahpiak hna i an ei i an ding. ³¹ A thaizing cu zingka tein an tho i chiatser in biakamnak cu an tuah veve. Isak nih, dam tein va kal cang u, a ti hna i a sinin dai tein an i ṭhen. ³² Cu ni ah cun Isak cu a salle nih tikhor an cawhmi kong cu an ra chimh. "Ti kan hmuh cang," tiah an ti i ³³ cucaah cu tikhor cu a min ah Shibah a sak. Cucaah cun pei cu khua cu Beer-sheba tiah ti a si rih cu. ³⁴ Esau cu Hit mi Beeri fanu Judith a ṭhit ah kum sawm li a si. Cun Hit mi Elon fanu Basemath zong kha a ṭhit fawn. ³⁵ Isak le Rebekah cu an lung an lawmh loter ngaite hna.

¹ Isak cu a tar cang i a mit khua a hmu ti lo. A fapa upa deuh Esau kha a auh i, "Ka fapa," tiah a ti i, Esau nih, "Hawi," a ti. ² Isak nih cun a thawh i, "Ka tar i ka thi chom cang lai. ³ Cucaah cun na hriam, na li le na thal kha i lak hna law ram va vai law sa va ka kahpiak. ⁴ Cun ka duh tawnmi rawl kha thaw tein ka chuanpiak law ra ka pe. Ka ei lai i ka thih hlanah ka thluachuahnak hmanung bik cu kan pek lai," a ti. ⁵ Isak nih a fapa Esau bia a ruah cu Rebekah nih khan a rak ngaih hna. Esau cu a pa ram vaihpiak awk i a kal tikah, ⁶ Rebekah nih khan Jakob cu a thawh i, "Tu naite ah khan na pa nih Esau cu, ⁷ ’Sa ka kahpiak law rawl ka chuanpiak. Ka ei lai i ka thih hlanah Bawipa hmaiah ka thluachuahnak cu kan pek lai,’ a ti kha ka theih. ⁸ Cucaah cun ka fapa, ka bia ngai law kan chimhning paoh in tuah. ⁹ Mehehrun lakah khan va kal law meheh no a thaumi pahnih in va ka lakpiak, cun ka chuan hna lai i na pa nih a duhmi rawl ah khan ka ser hna lai. ¹⁰ Na pa cu na hei chanh lai i a ei lai i a thih hlanah a thluachuahnak kha an pek lai," a ti. ¹¹ Sihmanhsehlaw Jakob nih cun a nu cu, "Esau cu mi hmulruh a si i kei cu mi cuarnal ka si kha na hngalh. ¹² Ka pa nih ka tawng sual seh law ka hlen kha a hngalh lai; cucaah cun thluachuahnak cu chim loin chiatsernak tu ka cungah kaa tlunter sual hnga maw," a ti. ¹³ A nu nih cun, "Ka fapa na cung i chiatsernak naa tlunter sual a si le cu chiatsernak cu keimah cung tu ah tlung ko seh. Ka chim bantuk hin va tuah ko, va kal law meheh cu va ka lakpiak ko hna," a ti. ¹⁴ Cucaah cun a va kal i a sinah cun a ratpi hna i a pa nih a duhmi rawl ah khan a chuan hna. ¹⁵ Cun Rebekah nih Esau thil ṭha bikbik, an inn chung i a chiahmi kha, a lak hna i Jakob kha a aihter hna. ¹⁶ Meheh phaw cu Jakob kut le a hmul a um lonak a hngawng ah khan a benh hna. ¹⁷ Cun thaw ngaingai in a chuanmi rawl le changreu a sermi cu a pek. ¹⁸ Cun Jakob cu a pa sinah cun a vung kal i, "Ka pa," tiah a vun ti i a pa nih, "Hawi," tiah a rak leh. "Ka fapa pahnih lak i aho deuh kha dah na si?" tiah a ti i ¹⁹ Jakob nih cun, "Na fapa upa deuh Esau kha ka si. Na ka chimhmi kha ka tuah cang. Tho law ka rak in putmi sa hi ei law thluachuahnak cu ka pe tuah," tiah a leh. ²⁰ Isak nih cun, "Zeitindah cu tluk khulrang in na hmuh khawh, ka fapa?" tiah a ti i Jakob nih, "Bawipa na Pathian nih a ka bawmh caah a si," tiah a leh. ²¹ Isak nih Jakob cu, "Rak ka naih deuh law kan tawng tuah lai. Ka fapa Esau na si taktak maw si taktak lo?" a ti. ²² Jakob nih khan a pa cu a hei naih i a pa nih cun a rak tongh i, "Na aw cu Jakob aw a si ṭung, na ban cu Esau ban a si ṭung," a ti. ²³ Jakob cu a ban kha Esau ban bantukin a hmul caah a hngal kho lo. A thluachuahnak kha pek a vun i thawk cang nain ²⁴ aa thawh ṭhan i, "Ka fapa Esau na si taktak maw?" a ti ṭhan. "Ka si ko," tiah a leh. ²⁵ Isak nih cun, "Na sa cu rak ka pe. Ka ei lai i ka thluachuahnak cu kan pek lai," a ti. Jakob nih cun a hei pek i din awkah mitsur zu zong a pek chih. ²⁶ Cun a pa nih cun a thawh i, "Rak ka naih deuh law ka hnam tuah ka fapa," tiah a ti. ²⁷ Hnamh awkah a hei fuh i Isak nih khan a puan kha a rak hnimh i a thluachuahnak cu a pek: "Ka fapa rim hi Bawipa nih thluachuah a pekmi lo rim bantuk a si. ²⁸ Pathian nih van dap kha in pe seh law na lo kha ṭhatser hna seh. Rawl tampi le mitsur zu tam piin in pe seh. ²⁹ Miphun tampi cu na sal si hna seh law na hmaiah kun hna seh. Na rualchan hna cungah nang cu bawi si law Na nu tefa hna cu na hmaiah kun hna seh Chiat an serhmi cu chiatserh si ve hna seh, thluachuah an pemi cu thluachuah si ve hna seh," a ti. ³⁰ Isak nih a thluachuahnak a pek cu a lim i Jakob cu a kal kate ah khin, a u Esau kha a ram vaihnak cun a rung tlung. ³¹ Amah zong nih cun rawl cu thaw ngaiin a chuan i a pa cu a hei put. A pa cu, "Ka pa, tho law na fapa nih ka rak in putmi sa cu ei law na thluachuahnak cu ka pe tuah," tiah a ti. ³² Isak nih cun, "Ahodah na si?" tiah a ti. "Na fapa upa deuh Esau ka si," tiah a leh. ³³ Isak cu a therh in a therh i, "Ahodah sa aa thah i a rak ka pemi kha a si kun? Na rat hlan deuhte ah khan pei ka rak ei cu. Amah cu ka thluachuah donghnak kha ka pek cang i cucaah amah ta a si zungzal ko lai," a ti. ³⁴ Cucu Esau nih a theih tikah fakpi le lunghno ngaiin a ṭap i, "Kei zong na thluachuahnak cu ka pe ve ko," tiah a ti. ³⁵ Isak nih cun, "Na nau kha a ra i a ra ka hlen a si ko. Amah nih cun na thluachuahnak cu aa lak ko cang," tiah a leh. ³⁶ Esau nih cun, "Atu hi a voi hnihnak a ka hlen a si. A min Jakob a si hi a rak si awk hrim pei a si hi. Fater ka sinak kha aa lak i atu cu ka thluachuahnak zong kha aa lak fawn. Thluachuahnak cu pakhat tal na ka nganh ti lo maw?" a ti. ³⁷ Isak nih cun Esau cu a leh i, "Amah cu nangmah bawi ah ka ser cang i a rualchan vialte cu a sal ah ka ser cang hna. Rawl le mitsur zu kha ka pek cang. Na ca i ka tuah khawh ding zeidah a tang ti i, ka fapa?" a ti. ³⁸ Esau nih a pa cu ngol duh loin a nawl chih lengmang i, "Ka pa, thluachuahnak cu pakhat lawng maw na ngeih ko? Kei zong ka pe ve ko," a ti i fak piin a ṭap. ³⁹ Cun Isak nih cun a thawh i, "Vawlei rumnak na caah a um ti lo, Van dap na lo caah a um ti lo. ⁴⁰ Na vainam in na nung lai i na nau sinum na si lai. Asinain na doh ve tikah Na hngawng i a hngawngkual cu na khiah lai," a ti. ⁴¹ A pa nih Jakob kha thluachuahnak a pek caah cun Esau nih Jakob cu a huat i a lungchung in, "Ka pa cu va thi deng cang kaw, a zun ngaih kan lim cun Jakob cu ka thah lai," tiah a ti. ⁴² Sihmanhsehlaw Rebekah nih khan Esau nih aa tinhmi cu a theih i cucaah Jakob kha a auh i, "Ngai hmanh, na u Esau nih phuhlam an timh i thah an timh. ⁴³ Cucaah cun ka fapa, kan chimhning in tuah. I tim law ka ṭa Laban sinah Haran khua ah va zam. ⁴⁴ Amah sinah cun na u a thin a dam i ⁴⁵ a cung i na tuahmi a philh hlantiang va um. Cun mi ka hun thlah hna lai i na ra kir ṭhan te lai. Zeicahdah ka fapa nan pahnih tein ni khat ah nan ka thihtak hnga?" a ti. ⁴⁶ Rebekah nih Isak cu a thawh i, "Esau nih a ṭhit mi hna ramdangmi a nupile nih hin an ka nor tuk hringhran. Jakob zong nih Hit mi hi a ṭhit ve sual ahcun, ka caah thih hmanh a ṭha deuh," a ti.

¹ Isak nih Jakob cu a kawh i thluachuah a pek hnuah, "Kanaan mi nu hi cu ṭhi hna hlah. ² I tim law Mesopotamia ram i a ummi na nu pa Bethuel inn ah va kal. Cuka nu pakhatkhat cu vaa ṭhit hna, na pu Laban fanu pakhatkhat kha vaa ṭhit hna. ³ Lianngan Bik Pathian nih na nupi ṭhitnak ah cun thluachuah in pe seh law fa tam piin in pe seh law miphun tampi hna pa ah in ser seh. ⁴ Abraham thluachuah a pek bantuk khan nangmah le na tefa hna cu thluachuah in pe hna seh law, atu i na umnak ram, Pathian nih Abraham a pekmi ram hi nangmah ta si seh," a ti. ⁵ Isak nih Jakob cu Mesopotamia ram i a ummi Aramean mi Bethuel fapa Laban sinah khan a thlah. Laban cu Jakob le Esau nu Rebekah ṭa kha a si. ⁶ Esau nih Jakob kha Isak nih thluachuahnak a pek i nupi vaa ṭhit awkah Mesopotamia ram ah a kalter ti kha a theih. Cun thluachuah a pek ah khan, Kanaan mi nu na ṭhi lai lo tiah nawl a pek ti zong kha a theih fawn. ⁷ Jakob nih a nu le a pa kha an nawl a ngaih hna i Mesopotamia ram ah a kal cang ti kha a hngalh. ⁸ Cucaah Esau nih, ka pa Isak nih Kanaan mi nu kha a duh hna lo ti kha a hngalh. ⁹ Cucaah cun Abraham fapa Ishmael sinah khan a va kal i nu dang pakhat a va ṭhit, a min cu Mahalath a si, amah cu Ishmael fanu kha a si i Nebaioth far a si. ¹⁰ Jakob cu Beer-sheba khan aa thawh i Haran khua leiah cun a kal. ¹¹ Hmun pakhat khi a va phan i ni a tlak caah cuka ah cun a riak. A it i chantling ah lung aa tlinh. ¹² Mang a manh i a mang ah cun hlei pakhat a hmuh i cu hlei cu vawlei in van tiang a phan i cu hlei ah cun Pathian vancungmi kha an kai i an ṭum lengmang. ¹³ Cun Bawipa nih cun, "Keimah hi Bawipa, Abraham le Isak Pathian kha ka si. Na ihnak ram hi nangmah le na tefa kha kan pek hna lai. ¹⁴ Na tefa cu an tam tuk ah vawlei cung leidip zat an si lai. An ram cu nichuahlei he nitlaklei he chaklei he thlanglei he a kau chin lengmang lai i vawlei cung miphun vialte nih na tefa hna thluachuah ka pek hna bantuk hin kan pe ve tiah an ka hal lai. ¹⁵ Khuazeika na kalnak hmanh ah kan umpi zungzal lai i kan huhphenh zungzal lai, cucu philh hlah, cun hi ram ah hin kan kirpi ṭhan lai. Kan chimhmi vialte ka tuah dih hlanah cun nangmah cu kan kaltak lai lo," tiah a ti. ¹⁶ Jakob cu a hun i hlau i, "Bawipa cu hika hmun ah hin a um taktak, a hngalh bel ka rak hngal lo i a si," a ti. ¹⁷ A thin a phang i, "Hika hmun hi hmun ṭihnung ngai pei a rak si hi! Pathian inn le vancung kutka pei a rak si hi," a ti. ¹⁸ Jakob cu zingka tein a tho i aa tlinhmi lung cu philh lonak lung ah a bunh i Pathian sin i pekchanhnak caah chiti a toih. ¹⁹ Cu hmun cu a min ah Bethel a sak. (Cu hlanah cun cu khua cu a min ah Luz rak ti a si). ²⁰ Cun Jakob nih Bawipa Pathian sinah cun chiatser in biakamnak a tuah i, "Atu ka khualtlawnnak ah hin na ka umpi i na ka huhphenh i rawl le hnipuan na ka pek i ²¹ ka pa inn ah him tein ka kir ṭhan ahcun nangmah cu ka Pathian na si lai. ²² Philh lonak lung ah ka phunmi lung hi na inn a si lai i na ka pekmi thil vialte cheu hra ah cheu khat kan pek lai," a ti.

¹ Jakob cu a kal lengmang i nichuahlei mi hna ram cu a phan. ² Lo ah khin tikhor pakhat a hei hmuh i a pawngah cun tuu run thum nih an bawhhnawh ko. Tuurun cu cu tikhor ti cu an dinh tawn hna i cu tikhor cu a chin ah lung nganpi a si. ³ Tuurun vialte kha an pumh dih hna tikah tuukhal pawl nih khan a chin lung cu an thawn tawn i ti cu an dinh tawn hna. Cun lung cu a umnak ah khan an chiah ṭhan tawn. ⁴ Jakob nih annih cu a thawh hna i, "Ka duale, khuazei mi dah nan si?" a ti hna. Annih nih, "Haran khuami kan si," an ti. ⁵ Cun, "Nahor fapa Laban kha nan hngalhmi a si maw?" a ti hna i annih nih, "Asi, kan hngalhmi a si," an ti. ⁶ "A dam tah a dam maw?" tiah a hal hna i, "A dam ko. Zohhmanh, a fanu Rachel kha a tuurun he an ra khih," tiah an leh. ⁷ Cun Jakob nih cun, "Atu cu ni a sangpi rih i saṭil run khumh a cut rih lo caah, zeicahdah ti nan dinh hna lo i nan thlah rih hna lo?" tiah a ti. ⁸ Annih nih, "Tuurun vialte kha kan pumh dih hlan hna le lung chin kha kan i bawmh lulhmalh i kan thawn hlanah cun, cucu kan tuah kho lo; cu hnu lawngah cun kan tuurun cu ti kan dinh khawh hna lai," an ti. ⁹ Cu bantukin Jakob nih bia a ruah lio lengmang hna ah cun Rachel kha a pa tuurun he khan a ra phan ve. Rachel cu a pa tuurun a zohkhenhtu kha a si. ¹⁰ Jakob nih a nu ṭa Laban tuurun he Rachel cu a hmuh tikah tikhor ah khan a va kal i lung kha a thawn i tuu kha ti a dinh hna. ¹¹ Cun Rachel kha a hnamh i a ṭap. ¹² Rachel cu a thawh i, "Kei cu na pa far Rebekah fapa ka si," tiah a ti. Cu kong cu a pa va chimh awkah Rachel cu a tlik in a tli i ¹³ a pa nih a far fapa Jakob kong cu a theih tikah amah ton awkah cun a ra le ve. A kuh i a hnamh i a inn ah khan a luhpi. Cun Jakob nih Laban cu thil umtuning vialte kha a chimh. ¹⁴ Laban nih cun a thawh i, "Asi, nangmah cu ka thi le ka sa taktak na si," tiah a ti. Cuka ah cun Jakob cu thla khat pumte a um. ¹⁵ Laban nih Jakob cu, "Ka rualchan na si ai pat tiin alak in ka rian ṭuan cu a ṭha hnga lo. Zeizat dah kan pek hnga?" a ti. ¹⁶ Laban nih cun fanu pahnih a ngeih hna i a upa deuh cu a min ah Leah a si i a ngakchia deuh cu Rachel a si. ¹⁷ Leah cu aa dawh tuk lo, Rachel tu cu a tungtai a ṭha i aa dawh ngaingai. ¹⁸ Jakob nih cun Rachel cu a duh i, "Kum sarih in kan rianh lai i na fanu a ngakchia deuh Rachel hi na ka pek lai," a ti ¹⁹ Laban nih cun, "Midang peknak cun nangmah pek cu ka duh deuh. Cucaah cun ka sinah cun um," tiah a ti. ²⁰ Rachel conak dingah cun Jakob nih khan kum sarih cu rian kha a ṭuan i asinain a dawt caah khan cu kum sarih cu ni tlawmte bantuk men ah khin a rel ko. ²¹ Jakob nih cun Laban cu, "Ka caan a tling cang, na fanu cu ka pe cang kun law ṭhi cang ning," a ti. ²² Cucaah Laban nih nupi ṭhitnak puai a tuah i cuka mi vialte cu a sawm hna. ²³ Sihmanhsehlaw cu zan ah cun Rachel kha si loin Leah tu kha Jakob sinah cun a hei kalpi i Jakob nih a rak ihpi. ²⁴ (Laban nih cun a salnu Zilpah kha a fanu Leah cu a kalh). ²⁵ A thaizing ah cun Jakob nih Leah a si kha a hngalh. Laban cu a thawh i, "Zeicahdah hi bantukin ka cungah na tuah? Rachel pek dingin pei na rian cu ka ṭuan cu, zeicahdah na ka hlen kun?" a ti. ²⁶ Laban nih cun, "Hika ah hin cun u le hlanah naule nih va ngeih phung a si lo. ²⁷ Nan i ṭhitnak puai zarh khat chung hi tlinter ko law cucu a dih in kum sarih na ka rianh rih dingah cun Rachel cu kan pek lai," a ti. ²⁸ Jakob cu a hna a tla i ṭhitumnak zarh cu a dih tikah, Laban nih a fanu Rachel cu nupi ah a pek. ²⁹ (Laban nih a salnu Bilhah kha a fanu Rachel cu a kalh). ³⁰ Cucaah Jakob nih khan Rachel zong cu a ihpi i Leah nakkhan a dawt deuh. Laban cu a dang kum sarih a rianh ṭhan. ³¹ Bawipa nih Leah cu dawt lo deuh a si kha a hmuh tikah anih tu kha fa ngeih khawhnak a pek i Rachel kha cu fa ngei loin a um ko. ³² Leah cu fa a pawi i fapa a hrin. Aa thawh i, "Bawipa nih ka harnak kha a ka hmuhpiak cang, atu cu ka va nih a ka dawt cang lai," a ti; cucaah a min ah Reuben a sak. ³³ Fa a pawi ṭhan i a dang fapa a hrin ṭhan. "Kei cu dawt lomi ka si kha Bawipa nih a theih caah hi fapa hi a ka pek ṭhan," a ti i cucaah a min ah Simeon a sak. ³⁴ Fa a pawi ṭhan i fapa a hrin ṭhan. "Atu cu fapa pathum ka hrinpiak cang caah ka va hi ka sinah fek deuh in aa ṭem cang lai," a ti i cucaah a min cu Levi a sak. ³⁵ Fa a pawi ṭhan i fapa a hrin ṭhan. "Atu cu Pathian ka thangṭhat lai," a ti i cucaah a min cu Judah a sak. Cun fapa a ngei ti lo.

¹ Rachel nih Jakob fa a hrinpiak khawh lo kha a hmuh tikah a u kha a nahchuah i Jakob cu a thawh i, "Fa ka pe, cu ti a si lo ahcun ka thi lai," a ti. ² Jakob cu Rachel cungah khan a thin a hung i, "Pathian ai cu ka rawlh kho lo. Fa ngei loin an umtertu cu Pathian pei a si cu," a ti. ³ Rachel nih cun, "Ka salnu Bilhah hi ihpi kun, amah tal nih fa ka hrinpiak seh. Cuticun amah thawngin nu ka cang kho ve lai," a ti. ⁴ Cuticun a salnu cu a va kha a pek i a va nih cun a ihpi. ⁵ Bilhah cu fa a pawi i Jakob cu fapa a hrinpiak. ⁶ Rachel nih khan, "Pathian nih keimah ṭanh in bia a ka ceihpiak cang. Ka thlacamnak kha a theih i fapa a ka pek," a ti i cucaah a min cu Dan a sak. ⁷ Rachel salnu Bilhah cu fa a pawi ṭhan i Jakob cu a dang fapa a hrinpiak ṭhan. ⁸ Rachel nih cun, "Ka u he kan i cuh i keimah nih ka tei," a ti i cucaah a min cu, Naftali a sak. ⁹ Leah nih fa ka ngei kho ti lo ti kha a hngalh tikah a salnu Zilpah kha Jakob cu nupi ah a pek. ¹⁰ Cun Zilpah nih cun Jakob cu fapa a hrinpiak. ¹¹ Leah nih cun, "Ka van a ṭha ko," a ti i cucaah a min cu Gad a sak. ¹² Leah salnu Zilpah nih cun Jakob cu fapa a hrinpiak ṭhan i ¹³ Leah nih cun, "Ka vaa lawm hringhran dah! Atu cu nu nih, Lunglawm minu an ka ti lai," a ti i cucaah a min cu Asher a sak. ¹⁴ Changvut ṭuan caan ah khin Reuben cu lo ah a va kal i mandarek kha a va hmuh hna i a nu sinah a rak put hna. Rachel nih khan Leah cu, "Na fapa nih a rak phorhmi mandarek kha tlawmpal in ka pe ve," tiah a ti. ¹⁵ Leah nih cun, "Ka va na ka chuh hi naa za rih lo maw? Ka fapa mandarek zong lak rih na zalh hi?" a ti. Rachel nih cun, "Na fapa mandarek kha na ka pek ahcun Jakob he tu zan ah na it kho lai," a ti. ¹⁶ Lo in zanlei ah Jakob cu a hung tlun tikah Leah nih cun a va don i, "Tu zan cu ka sinah na ih a hau, ka fapa mandarek in kan cawk cang," a ti. Cucaah cu zan cu a ihpi. ¹⁷ Pathian nih Leah thlacamnak kha a leh i fa a pawi i Jakob cu fapa panganak a hrinpiak. ¹⁸ Leah nih cun, "Ka salnu kha ka va ka pek caah Pathian nih laksawng a ka pek," a ti i cucaah a min ah cun Issakhar a sak. ¹⁹ Leah cu fa a pawi ṭhan i Jakob cu fapa paruknak a hrinpiak. ²⁰ Aa thawh i, "Pathian nih laksawng ṭha ngaingai a ka pek. Atu cu fapa paruk ka hrinpiak cang caah ka vaa nih a ka khinhhramh cang lai," a ti i cucaah a min ah cun Zebulun a sak. ²¹ Cun fanu a run hrin i a min ah Dinah a sak. ²² Cun Pathian nih Rachel kha a vun philh ve lo i a thlacamnak kha a leh i fa ngeih khawhnak a pek. ²³ Fa a pawi i fapa a hrin. Aa thawh i, "Fa ngeih lo ningzahnak kha Pathian nih a ka lakpiak cang. ²⁴ Bawipa nih fa dang zong ka pe ko rih seh," a ti i a min ah Josef a sak. ²⁵ Josef chuah hnu khan Jakob nih Laban cu a thawh i, "Atu cu inn ah ka tlunter cang. ²⁶ Kan rianh man i na ka pekmi ka nupi hna le ka fale hna hi ka pe hna law kal cang ning. Ṭha tein na rian kan ṭuanpiak cu nangmah nih na hngalh," tiah a ti. ²⁷ Cun Laban nih Jakob cu a thawh i, "Biachimnak nawl ka pe ve tuah: litin in ka hngalhmi cu, Bawipa nih thluachuah a ka pek hi nangmah thawngin a si. ²⁸ Na ṭuan man chim law kan pek lai," a ti. ²⁹ Jakob nih cun, "Zeitindah na rian ka ṭuan le keimah nih ka zohkhenh hna thawngin zeitluk in dah na saṭil an karh cu na hngalh. ³⁰ Ka rat hlanah cun na saṭil cu tlawmte lawng an rak si, sihmanhsehlaw atu cu tampi ah an i chuah cang; keimah thawngin Bawipa nih thluachuah cu an pek ko. Atu cu keimah ca kaa ṭuan caan a si ve cang," a ti. ³¹ Laban nih cun, "Zeidah kan pek lai?" tiah a ti ṭhan i Jakob nih cun, "Ka duhmi cu ṭuan man kha a si lo. Ka chimmi hi na tuah ding ahcun na saṭil kha kan zohpiak rih ko lai. ³² Nihin ah na saṭil run chungah khan ka vaa chawk dih lai i tuufa a nak paohpaoh le meheh fa a ṭial paohpaoh le a ṭial a deh in aa dehmi paohpaoh kha a dang ah ka va chiah dih hna lai i cucu ka ṭuan man cu an si lai. ³³ Hihi a zafangmi thil a si tiah ka ruah. Hmailei ah ka din le din lo cu fawi tein na hmuh khawh ko lai. Ka ṭuan man kha na rak zoh hna tikah, ka meheh hna lakah a ṭial lomi le a ṭialning a deh in aa dehmi a si lomi le tuufa a nak lomi na hmuh hna ahcun, cucu a fir in firmi an si ti kha na hngalh lai," a ti. ³⁴ Cun Laban nih khan, "A ṭha na chimning cun kan tuah lai," tiah a leh. ³⁵ Sihmanhsehlaw cu ni ah cun Laban nih khan, mehehtum a ṭialmi vialte le a deh in aa dehmi vialte, mehehpi a ṭialmi vialte le a deh in aa dehmi vialte, an pum cungah rannak a ngeimi vialte kha a dang in a chiah dih hna i tuu a nakmi zong kha a dang in a chiah dih hna i a fapale kha a khalhter hna. ³⁶ Cun cu run cu Jakob umnak in a hlat khawh chung ni thum lamkal ah a va chiah hna i a tangmi cu Jakob nih a khalh hna. ³⁷ Jakob nih cun aa thawh ve i poplar thing le almond thing le fahia thing a hringmi nge kha aa lak hna i an hawng a hlih hna i cucaah cun a rang in an ṭial. ³⁸ Hi thing nge hna hi saṭil tidinnak kuang hmaiah khan a chiah hna. Cuka i a chiah hna cu saṭil cu tidin awk i an rat ah khan an i kaih tawn caah a si. ³⁹ Saṭil nih thing nge chiahmi hna hmai i an i kaih caah cun a phei in a ṭialmi le ṭial dip in a ṭialmi le ṭial hrawl in a ṭialmi kha an hrin hna. ⁴⁰ Jakob nih tuu kha a dang tein a chiah hna i Laban saṭil run chung i a ṭialmi le a nakmi hna sinah khan a tlonter hna. Cuticun Jakob nih cun amah saṭil run cu aa ser ve i Laban saṭil run he khan a fonh hna lo. ⁴¹ Saṭil lak i a ṭhawngṭhawng pawl kha an phol tikah tidinnak kuang ah khan an hmaiah cun fung kha a chiah hna i cuticun fung ṭial lakah khan a kaihter hna. ⁴² Sihmanhsehlaw a derthawm pawl an phol ah cun an hmaiah fung kha a chia hna lo. Cucaah a derthawm pawl cu Laban ta an si i a ṭhawng pawl cu Jakob ta an si. ⁴³ Khulrang in a rum ko. Saṭil run tampi le sal le kalauk le laa kha a ngeih hna.

¹ Laban fapa hna nih, "Kan pa ngeihmi vialte Jakob nih aa lak dih cang. A chawva vialte cu kan pa ta in aa lakmi an si," tiah an ti thawng kha a theih. ² Cun Laban zong nih hmasa i a rak umtuning bantuk khan um ti loin a umtuning cu aa dang cang ti zong kha a hmuh. ³ Cun Bawipa nih khan, "Na pupa hna le na rualchan hna ram ah khan kir cang. Na sinah ka um lai," a ti. ⁴ Cucaah Jakob nih Rachel le Leah cu bia a hei cah hna i a saṭil run an tlonnak pil ah khan ka tong hna seh a ti. ⁵ Annih cu a thawh hna i, "Nan pa umtuning hi hmasa i ka cung i a umtuning bantuk kha a si ti lo; sihmanhsehlaw ka pa Pathian nih cun a ka umpi ko. ⁶ Ka thazang a dih-umnak in nan pa ca i rian ka ṭuan cu nan pahnih in nan hngalh. ⁷ Asinain a ka hlen i ka hmuh awk hnga kha voi hra a ka hlen. Sihmanhsehlaw ka cung i ṭhat lonak tuah cu Pathian nih a onh lo. ⁸ Laban nih, ’Meheh lak i a ṭial paoh na rianṭuan man ah si hna seh,’ a ti ah, saṭil run vialte nih a ṭial lawng tein fa an hrin. ’Ṭial hrawl in a ṭialmi meheh cu na rianṭuan man ah si hna seh,’ a ti ah saṭil run vialte nih ṭial hrawl lawng tein fa an hrin. ⁹ Pathian nih saṭil run tampi kha nan pa sinin a lak hna i keimah a ka pek. ¹⁰ "Saṭil phol caan ah mang ka manh i ka mang ah cun a kaihtu hna meheh tum kha ṭial hrawl in a ṭialmi le, ṭial dip in a ṭialmi le a deh in aa dehmi an si kha ka hmuh. ¹¹ Cu ka mang ah cun vancungmi nih a ka thawh i, ’Jakob,’ a ka ti i, kei nih, ’Hawi,’ ka ti. ¹² Cun, ’Zohhmanh, a kaihtu hna mehehtum vialte khi a ṭial le ṭial hrawl in a ṭialmi le a deh in aa dehmi an si khih. Hi bantukin thil ka siternak cu Laban nih na cung i a tuahmi vialte kha ka hmuh caah a si. ¹³ Kei cu Bethel khua i na sin i a langmi Pathian kha ka si, Bethel khua cu rolung pakhat chiti na toih i keimah sinah biakamnak na sernak khua kha a si. Cucaah atu cu i tim law na chuahkehnak ram i kal awkah hi ram hin chuak tuah’ a ka ti," tiah a ti hna. ¹⁴ Rachel le Leah nih cun, "Kan pa sinin kan co hnga dingmi thil zeihmanh a um ti lo. ¹⁵ Kannih cu ramdang mi in pei a kan zoh ko cu. A kan zuar i kan man a hmuhmi vialte cu a hman dih. ¹⁶ Pathian nih kan pa sinin a lakmi chawva vialte cu kanmah le kan fale ta a si ko cang. Pathian nih an fialning paoh in tuah ko," tiah an leh. ¹⁷ - ¹⁸ Cucaah Kanaan ram i a ummi a pa sin kir awkah khan Jakob cu aa tim. A fale hna le a nupi hna kha kalauk cungah a chuan hna i Mesopotamia ram i a ngeihmi chawva vialte he a saṭil run vialte cu a hmaiah a kalter chung hna. ¹⁹ Laban cu a tuu hmul meh ah khan a kal i a um lo karah a pa ta a simi an chungkhar pathian hna kha Rachel nih a rak fir hna. ²⁰ Jakob nih Aramean mi Laban cu a hlen i a kal lai kha a chim lo. ²¹ A ngeihmi thil vialte kha aa lak i a zaam. A chuak i Zufrates tiva kha a tan i Gilead Tlanglei kha a fuh. ²² Ni thum hnuah Jakob a zaam ti kha Laban cu an chimh. ²³ A mi kha aa kalpi hna i Jakob cu an dawi, ni sarih hnuah Gilead Tlang ah a phanh. ²⁴ Cu zan ah cun Aramean mi Laban sinah khan Pathian cu mang in a ra i, "Jakob sinah hronak bia na chim nakhnga lo i ralring," a ti. ²⁵ Jakob cu tlang ah khan a rak riak i Laban nih cun a hun phanh. Laban zong cu Gilead Tlang ah cun a riak ve. ²⁶ Laban nih Jakob cu a thawh i, "Zeicahdah na ka hlen i ka fanule cu ral tlaihmi bangin naa kalpi hna? ²⁷ Zeicahdah na ka hlen i keimah chimh lo tein na kal? Rak ka chim law cu lunglawmhnak le hla le tingtang le thonglawi he ka rak in thlah hnga lo maw. ²⁸ Ka tu tete hna le ka fanule hmanh, dam tein vaa kal cang kun u tiin a hnamh hmanh na ka hnamhter hna lo. Hi na tuahmi ah hin na va hrut hringhran dah! ²⁹ Na cungah hin harnak ka duh ahcun ka tlunter khawh ko. Asinain zahan ah na pa Pathian nih, ’Jakob sinah hronak bia na chim nakhnga lo i ralring,’ tiah a ka ti. ³⁰ Inn tlun naa ngaih tuk cang caah na kal ti cu ka hngalh, asinain zeicahdah ka pathian kha naa fir hna?" a ti. ³¹ Jakob nih cun, "Ka thin a phannak cu na fanu hna kha hramhram in na ka chuh sual hna lai ti ka ruah caah a si. ³² Cun hika i a ummi aho sin hmanh ah na pathian cu na hmuh hna ahcun, cu pa cu thah a si lai. Kan mi hna hmuh hngan te ah hin, na ta a simi paoh cu kawl law i lak hna," tiah a leh. Rachel nih a fir hna kha Jakob nih a hngal lo. ³³ Laban cu Jakob thlam chungah khan a lut i a kawl; cun Leah thlam chungah khan a lut, cun an salnu pahnih hna thlam chungah khan a lut, sihmanhsehlaw a pathian cu a hmu hna lo. Cun Rachel thlam chungah khan a lut. ³⁴ Rachel nih khan an innchungkhar pathian kha rak la hna kaw cucaah cun kalauk kengdan chungah a chiah hna i an cungin a ṭhut danh hna. Laban nih cun thlam cu a kawl dih sihmanhsehlaw a hmu hna lo. ³⁵ Rachel nih a pa cu a thawh i, "Bawipa, na hmai i ka dir khawh lo caah hin ka cungah na thin hung hlah, nuphung ka hngalh lio a si caah a si," a ti. Laban nih cun a kawl len hna nain a innchungkhar pathian tete cu a hmu kho hna lo. ³⁶ Cun Jakob cu a thin a pok cang i Laban cu, "Zei sualnak ko dah ka tuah i zei phung ko dah ka buar i hiti i na ka kawl le na ka suat? ³⁷ Ka ngeihmi thil vialte cu na thlok dih cikcek hna, na innchungkhar thil a simi zeital na hmu hna maw? Na mi hna le ka mi hna hmaiah hin chia law, ahodah a ding, ahodah a ding lo, kan ceih hna seh. ³⁸ Na sinah kum kul ka um i na tuu nih si hna seh na meheh nih si hna seh fa an hrulh bal lo, na tuurun chungin na tuukawng zong ka ei bal hna lo. ³⁹ Sa nih tuu pakhat khat a seh tikah, keimah palh ruangah a si lo, tiin a ruak cu na hmuh awkah na sinah ka ratpi bal lo, keimah nih ka liam ko. Chun i firmi siseh zan i firmi siseh na liam hna lai na ka ti. ⁴⁰ Chun ah nilin voi tampi ka in i zan ah khuasik voi tampi ka in. Kaa hngilh khawh lo caan voi tampi a um. ⁴¹ Cuticun na sin i kum kul ka um chung kha a si zungzal ko. Na fanu pahnih hna caah kum hleili kan rianh i na saṭil run hna caah kum ruk kan rianh. Cu na hmanh cun ka hmuh hnga ding ka ṭuan man kha voi hra te na ka thlen. ⁴² Ka pa Pathian Abraham Pathian, Isak nih a biakmi Pathian nih khan rak ka umpi hlah seh law kut ro in na ka kalter ko hnga. Asinain Pathian nih cun harnak ka inmi le ka rianṭuanmi kha a hmuh i zahan ah bia a kan ceih cang," a ti. ⁴³ Laban nih Jakob cu a leh ve i, "Ka fanu hna hi keimah ta an si, ngakchia hna hi keimah ta an si, saṭil run hna hi keimah ta an si. Na hmuhmi vialte hi keimah ta an si dih. Asinain atu cu ka fanu hna le an fale hna caah zeidah ka tuah khawhmi a um? ⁴⁴ Biakamnak tu ser u si law cu bia kan i kammi kan lung a kan pem tawntu ah lungpumh pakhat ser u sih," a ti. ⁴⁵ Cun Jakob nih philh lonak lung pakhat a bunh i ⁴⁶ a mi kha lung va khawm u a ti hna i an va khawmh i a hram ah cun an pumh hna. Cun lungpumh hramah cun rawl an ei. ⁴⁷ Laban nih khan cu lungpumh cu Jegar-sahadutha tiah min a sak i Jakob nih cun Galeed tiah min a sak. ⁴⁸ Laban nih cun, "Hi lungpumh hi nangmah ca le keimah caah hngalh ṭhantertu si seh," a ti. Cu ruangah cun cu hmun Galeed an tinak cu a si. ⁴⁹ Cun Laban ṭhiamṭhiam nih cun, "A dangdang i kan um tikah Pathian nih kan zohkhenh ciocio seh," a ti fawn. Cucaah cu hmun cu Mizpah tiah ti a si. ⁵⁰ Laban nih cun aa thawh ṭhan i, "Ka fanule hi ṭhaṭhilo in na tuah hna ah siseh, nu dang na ṭhit hna ah siseh, keimah nih cun ka hngal lai lo nain Pathian nih a run kan zoh ko kha philh hlah," a ti. ⁵¹ Cun Laban nih Jakob cu, "Hi hna hi kan karlak i ka pumhmi hna lung cu an si i hihi philh lonak lung cu a si. ⁵² Hi lungpumh le hi philh lonak lung hi hngalhter ṭhantu an si. Nangmah doh awkah hi lungpumh hi ka lonh lai lo i nang zong nih keimah doh awkah hi lungpumh le hi philh lonak lungphun hi na lonh ve lai lo. ⁵³ Abraham Pathian le Nahor Pathian cu kan karlak biaceihtu si seh," a ti. Cun Jakob nih khan a pa Isak nih a biakmi Pathian min in biakamnak a tuah. ⁵⁴ Sa pakhat a thah i tlang cungah cun raithawinak ah a pek i a mi hna kha rawl ei awkah cun a sawm hna. An ei dih hnuah cu zan cu tlang ah cun an riak ⁵⁵ A thaizing cu zingka tein Laban nih khan a tu tete hna le a fanu hna cu dam tein vaa kal cang u tiin a hnamh hna i aa thawh i inn leiah a kir.

¹ Jakob cu a kal lengmang i Pathian vancungmi nih khan an ton. ² A hmuh hna tikah, "Hi hi pei Pathian ralkapbu a si hi," a ti i cucaah cuka hmun cu a min ah Mahanaim a sak. ³ Jakob nih a u Esau sinah khan, Seir peng Edom ram ah cun lamkaltu a hei thlah hna. ⁴ Hi bantukin nan va chim lai, tiah a cawnpiak hna: "Kei Jakob na salpa hi Laban sinah ka va um i cu can cu kir lo in khua ka va sa ti kha ka bawipa Esau cu chimh kan duh. ⁵ Caw le laa le tuu le meheh le sal kha ka ngei ve hna i na zaangfahnak hmuh awkah atu hi bawipa, na sinah mi ka rak thlah hna," a ti. ⁶ Lamkaltu kha Jakob sin i an ra kir tikah, "Na u Esau sinah cun kan va kal i asinain nangmah ton awkah khan a rak i thawh cang. Mi za li aa ratpi hna," an ti. ⁷ Jakob cu a thin a phang ngaingai i a awlok a chong. A sin i a ummi minung hna le a tuu hna le a meheh hna le a caw hna le a kalauk hna kha bu hnih ah a ṭhen hna. ⁸ Esau nih a bu hmasa u hi kan tu ai kun, a hmanung u hi cu a luat kho lai," tiah a ruah. ⁹ Cun Jakob nih khan thla a cam i, "Ka pu Abraham Pathian le ka pa Isak Pathian, ka thlacamnak hi ka theihpiak tuah. Bawipa, nangmah nih na ka thawh i, ’Na ram le na rualchan hna sinah kir law na caah thil cu tluang tein ka umter ko hna lai; na ka ti. ¹⁰ Na sal ka cung i na zaangfahnak le zumhawktlak na sinak na langhtermi hi a hmu dingah aa tlakmi ka si lo. Jordan tiva kha ka ṭhiangṭhunh he lawng ka rak tan, sihmanhsehlaw atu cu hi bu bu hnih hna he hin ka ra kir. ¹¹ Cucaah cun ka u Esau kut chung hin ka khamh ko tiah kan nawl. Kanmah doh awk le hrawh awkah, hi nu le ngakchia hna tiang hin hrawh awkah a ra rua tiah ka ruah i ka thin a phang ko. ¹² ’Na caah thil cu tluang tein ka umter ko hna lai i tefa kan pek lai i an tam tuk ah a rel in rel cawk an si lai lo, rili kam thetse zat khi an si lai,’ tiin bia na ka kammi kha philh sawh hlah," a ti. ¹³ Cuka i zan khat a riah hnuah a ngeihmi chungin hi thil hna hi a u Esau laksawng ding caah a thim hna: ¹⁴ Mehehpi za hnih le mehehtum pa kul, tuupi za hnih le tuutum pa kul, ¹⁵ hnuk sur liomi kalauk sawm thum, an fale he, cawpi sawm li, cawtum pahra, laapi pakul le laa tum pahra. ¹⁶ Run khat kha a sal pakhat cio a zohter hna i annih cu a thawh hna i, "Ka hmaiah rak kal chung u law run khat le run khat kha aa hlat nawn in zulhter hna u," a ti. ¹⁷ Sal hmasa bik kha a thawh i, "Ka u Esau nih an ton i, ’Khuazei ah dah na bawipa cu a si? Khuazei ah dah nan kal lai? Naa ṭhit mi na saṭil hi aho ta dah an si?" tiah an hal tikah, ¹⁸ ’Na sal Jakob ta an si. Ka bawipa Esau nangmah caah laksawng ah an kuat. Amah Jakob cu kan hnute ah hin a ra lio ve,’ na ti lai," a ti. ¹⁹ Pahnihnak pa le pathumnak pa le saṭil a ṭhitu vialte kha aa khat cio ah a chimh hna i, "Esau cu nan ton tikah hitihin nan ti lai: ²⁰ ’Asi, na sal Jakob cu kan hnute ah hin a ra lio ve ko,’ nan ti lai," a ti hna. Jakob nih cun, "Ka hmai i ka rak kalter chungmi laksawng nih hin a thin a damter lai i keimah i ka ton tikah cun a ngaihthiam zong maw a ka ngaihthiam khawh," tiah a ruah. ²¹ Laksawng cu an rak kalpi chung i anih cu cuka an riahnak hmun ah cun cu zan cu a rung riak. ²² Cun zan ah cun Jakob cu a tho i a nupi pahnih hna le a salnu pahnih hna le a fa hleikhat hna kha aa kalpi hna i Jabbok Tiva kha tan tawnnak hmun in a tan. ²³ Khattelei ral i a chuahter dih hna hnuah a ngeihmi thil vialte zong kha va ral ah cun a kalter hna. ²⁴ Amah lawng hnuah a tang. Cun mipa pakhat nih khuadei tiang a hung paih. ²⁵ Mipa nih cun ka tei kho ti lo ti kha a hmuh tikah Jakob cu a khel ah a thongh i an i paih lioah cun Jakob cu a khelruh a pelh. ²⁶ Mipa nih cun, "Ka thlah, khua a dei deng cang," a ti. Sihmanhsehlaw Jakob nih cun, "Thluachuahnak na ka pek lo ahcun kan thlah bal lai lo," tiah a leh. ²⁷ Mipa nih cun, "Na min ahodah a si?" tiah a hal i, "Jakob," tiah a leh. ²⁸ Mipa nih cun, "Na min cu Jakob a si ti lai lo. Pathian zong na paih, minung zong na paih hna i na tei hna; cucaah na min cu Israel a si cang lai," a ti. ²⁹ Jakob nih, "Na min ka chim," tiah a ti i asinain anih nih, "Zeicahdah ka min cu na ka hal?" a ti. Cun Jakob cu thluachuah a pek. ³⁰ Jakob nih, "Pathian kha hmaitonh in ka hmu nain ka nung rih," a ti i cucaah cuka hmun cu a min ah Peniel a sak. ³¹ ’Jakob nih Peniel in a chuah ah ni zong a chuak ve, a khel ruangah cun a bei. ³² Cu ruangah cun pei atu chan tiangin Israel tefa hna nih hin khelbo cung i a ummi tit an ei lonak hi a si cu; Jakob a thonghnak kha cu tit hlum ah cun a rak si.

¹ Jakob nih Esau minung za li he an rat kha a hmuh i cucaah ngakchia kha Leah, Rachel le salnu pahnih kha a phawt hna. ² Annih le an fale kha hmaisuang ah a chiah hna, cun Leah le a fale nih khan an hun chan hna i Rachel le Josef cu hnu bik ah a chiah hna. ³ Jakob cu an hmaiah khan a kal i a u a phak hlanah voi sarih vawlei ah a kun. ⁴ Esau tu nih cun a hun zuanhnawh i a kuh i a pom i a hnamh. An pahnih in an ṭap. ⁵ Esau cu a hnuhmai a hun i mer i nu le ngakchia kha a hmuh hna tikah, "Hi na sin i a ummi hna hi mi zei dah an si?" tiah a hal. Jakob nih, "Bawipa, hi hna hi Pathian nih a ka zaangfahmi ka fale an si," tiah a leh. ⁶ Cun salnu kha an fale he an ra i an kun; ⁷ cun Leah le a fale kha an si; cun a hmanung bik ah Josef le Rachel kha an si i an ra kun ve. ⁸ Cun Esau nih, "Bu dang ka tonmi hna kha tah? Zei sullam dah khakha a si?" a ti. Jakob nih, "Na ka zaangfah khawh nakhnga ca i ka rak thlahmi an si, bawipa," tiah a leh. ⁹ Esau nih cun, "A zaa in ka ngei ko, ka nau; na ta cu nangmah caah i chiah ko," tiah a ti. ¹⁰ Jakob nih, "Cuticun si hin hlah seh. Na ka zaangfah a si ahcun kan pekmi laksawng cu ka cohlanpiak ko. Hi tlukin ka cung i na ṭhat caah na hmai hmuh hi ka caah Pathian hmai hmuh tluk a si. ¹¹ Nangmah caah ka rak phorhmi ka laksawng cu ka cohlanpiak ko hna; Pathian nih a ka zaangfah i ka herhmi vialte kha a ka pek ko," a ti. Aa lak hlan lo a nawl lengmang. ¹² Esau nih cun, "I tim u si law kal u sih. Kei nan hmaiah ka kal lai," a ti. ¹³ Jakob nih cun, "Bawipa, ngakchia cu thazang an ngeih lo le kan tuu le kan caw kha an fale hna he ka ruah hna awk a herh kha na hngalh. Fak tuk in kan kalpi hna ahcun, ni khat hmanh a si ah, a run ningin an thi ko lai. ¹⁴ Cucaah cun ka bawipa, rak kan kaltak ko. Hnu in duhsah in ka run in zulh lai. Seir i kan in phak hlantiang kan kal khawh chungin ngakchia le caw hna he ti cun kan ra ve ko lai," a ti. ¹⁵ Cun Esau nih, "Ka mi hi tlawmpal in kan chiahtak kun lai," a ti. Sihmanhsehlaw Jakob nih, "Cucu na ka zaangfah caah a si taktak ko, bawipa, asinain a herhnak a um lai lo," tiah a ti. ¹⁶ Cucaah Esau cu, cu ni ah cun Seir leiah cun a kir ṭhan. ¹⁷ Jakob tu cu Sukkoth leiah khan a kal i cuka ah cun amah ca i inn le caw ca i dornak thlam kha a sak hna. Cu ruangah cuka hmun cu a min ah Sukkoth ti a si. ¹⁸ Jakob cu Mesopotamia ram khan a ra kir i Kanaan ram chung khua Shekhem kha him tein a phan. Khua hmailei i a ummi lo ah khan riah hmun cu a khuar. ¹⁹ Cu lo cu Shekhem pa Hamor tefa hna sin khan ngun tangka za khat in a cawk. ²⁰ Cuka ah cun biakṭheng pakhat a ser i a min ah El, Elohe-Israel, a sak.

¹ Jakob le Leah nih an hrinmi an fanu Dinah kha cu rammi nu cu a leng hna. ² Cuka ram bawi Shekhem, Hiv mi Hamor fapa nih khan a hmuh tikah a tlaih i a ihpi i a min a chiatter. ³ A lungthin cu Jakob fanu Dinah cung lawngah cun a um i ngaknu cu a dawt i bia thlumthlum in a chawnh. ⁴ Cun a pa cu, "Ngaknu cu ka ṭhitpiak," tiah a nawl. ⁵ Jakob nih a fanu a min a chiatter kha a theih, asinain, a fapale kha ramlak ah caw an khal i an um lo caah an ra kir hlan cu zeihmanh tuah loin a um. ⁶ Shekhem pa Hamor cu Jakob he bia vaa ruah awkah khan a va kal i ⁷ cu lio te ah cun Jakob fapale zong cu ramlak khan an ra tlung. Shekhem nih cu bantuk thil ṭhalo a tuah i Jakob fanu a sualnak thawngin Israel mi a serhsat hna kha an theih tikah a lau in an lau i an thin a khenh ngaingai hna. ⁸ Hamor nih khan a thawh i, "Ka fapa Shekhem nih na fanu cu a duh, cucaah cun a nupi ah kan pe ko. ⁹ Ṭhitumnak in hmunkhat i a ṭangṭimi ah i cang u si law kannih nih na fanu kha kan ṭhit hna lai i nannih nih kan fanu kha nan ṭhit ve hna lai. ¹⁰ Cun kan sinah kan ram chungah hin khua nan sa ve lai i nan duhnak hmun paoh ah nan um lai, nan duhduh in chaw nan let lai i nan ngeihmi thil kha nan ta a si lai," a ti. ¹¹ Cun Shekhem nih cun Dinah pa le a ṭale cu a thawh hna i, "Hi te hi cu ka zaangfah ko u law nan duhmi paoh kha kan pek ko hna lai. ¹² Zei laksawng dah nan duh, man zong nan duh zat in hau ko u; amah kha nan ka ṭhitter paoh ahcun nan ka halmi paoh cu kan pek ko hna lai," a ti. ¹³ Jakob fapa pawl nih cun, Shekhem nih an farnu Dinah kha a thang a chiat caah bia an leh hna tikah Shekhem le a pa cu an hlen hna. ¹⁴ An thawh hna i, "Kan farnu cu cuarpar tan lomi pa cu kan vatter kho lo; kan vatter a si ahcun kan caah thangchiatnak a si hnga. ¹⁵ Kan hna a tlak khawh nakhnga dingah thil pakhat lawnglawng a um i cucu pa vialte nan cuarpar nan i tan lawngah a si hnga. ¹⁶ Cu tikah cun kan fanu cu nan kan ṭhit hna hnga i kannih zong nih nan fanu cu kan in ṭhit ve hna hnga. Nan sinah khua kan sa hnga i miphun phun khat ah kan cang hnga. ¹⁷ Asinain kan chimmi cu nan duh lo i cuarpar nan i tan lo ahcun, kan farnu cu kan i lak lai i kan kal ko lai," an ti. ¹⁸ An chimmi cu Hamor le a fapa Shekhem nih cun a ṭha ko tiah an ruah i ¹⁹ Jakob fanu cu a duh ngaingai caah an chimmi cu khulrang in a tuah. A innchungkhar lakah amah cu biapi bik a simi a si. ²⁰ Khua hauka pumhnak hmun ah khan Hamor le a fapa Shekhem cu an va kal i an khuami cu, ²¹ "Hi hna hi kan cungah miṭha an si; kan ram chungah hin umter ve hna u si law an duhduh in khualtlawng ko hna seh. Kan ram nih hin a tlum khawh ve ko hna lai. An fanule kha ṭhi hna u sih, annih zong nih kan fanule kha ṭhi ve hna seh. ²² Asinain hi mi hna kannih he miphun phun khat an si khawh nakding cu anmah bantukin kan cuarpar kan i tan ve lawngah a si. ²³ An saṭil le an chawva le an caw hna cu kan ta an si lai. Cucaah kan lakah um ve ko hna seh ti cu kan hna tla cio ko u sih," an ti hna. ²⁴ Hamor le Shekhem nih an chimmi cu khuami vialte kha an hna a tla i pa vialte kha an cuarpar an i tan dih. ²⁵ Cu hnu ni thum, an zual ling te ah khin, Jakob fapa pahnih Simeon le Levi, Dinah ṭale nih khan, an nam an i lak riangmang i a thli tein khua chungah cun an lut i pa vialte kha an thah dih hna. ²⁶ Hamor le a fapa Shekhem kha an thah hna i Shekhem inn khan Dinah cu an lak i an kal. ²⁷ An farnu a thang an chiat caah cun Jakob fapa a dang nih khan a ngan a fakmi cu an tuk hna i khua chung i thil sunglawi deuh paohpaoh kha an lak dih. ²⁸ Khua chung i a ummi thil he ramlak i a ummi thil he an lak dih hna — an saṭil run le laa le thil kip kha an lak hna. ²⁹ An chawva vialte kha an lak, nu le ngakchia pawl vialte kha an tlaih hna i inn chung i a ummi thil vialte kha an i kalpi dih. ³⁰ Jakob nih Simeon le Levi cu, "Harnak chungah nan ka paih ai; atu cu hi ramchung mi vialte Kanaan mi hna le Periz mi hna nih an ka huat cang. Kei cu mi tampi a ngeimi ka si lo, cucaah cun hi hna vialte hi an i fonh dih i an ka tuk ahcun, keimah he ka innchungkhar dihlak he an kan hloh ko lai," a ti. ³¹ Sihmanhsehlaw annih nih, "Kan farnu kha hlawhhlang bantukin tuah cu kan ing kho lo cu ta," tiah an leh.

¹ Pathian nih Jakob cu a thawh i, "I tim law Bethel ah kal law cuka ah cun va um. Cun na u Esau sinin na zam lio i na sin i a langmi Pathian caah khan cuka ah cun biakṭheng pakhat in va ser," a ti. ² Cucaah Jakob nih cun a innchungkhar le a sin i a ummi kha an dihlak in, "Nan i chiahmi ramdang pathian kha hlonh dih hna u; i thianh u law thil thiang i hruk u. ³ Hika hmun hi kan chuahtak lai i Bethel ah kan kal lai, cuka ah cun harnak ka in caan le khuazeika ka kalnak hmanh i a ka umpitu Pathian caah khan biakṭheng pakhat ka ser lai," a ti hna. ⁴ Cucaah an i chiahmi ramdang pathian vialte le an i tonhmi hnatonh vialte kha Jakob cu an pek i Shekhem pawng i a ummi kuhthing toiah khan a thuh hna. ⁵ Jakob le a fapa hna cu kal awk i an i thawh tikah khan, an pawngkam khuami hna cungah cun ṭihnak nganpi a tlung i cucaah an dawi ngam hna lo. ⁶ Jakob cu a mi vialte hna he Kanaan ram khua Luz cu an phan (Luz cu Bethel a si). ⁷ Cuka ah cun biakṭheng pakhat a ser i cuka hmun cu a min ah Bethel a sak; zeicahtiah a u sinin a zam lioah khan khaka hmun ah khan a sinah Pathian a lang. ⁸ Rebekah umtu Deborah kha a thi i Bethel khua thlang i kuhthing tangah cun an vui. Cucaah "Ṭahnak kuhthing" tiah min an sak. ⁹ Jakob cu Mesopotamia ram in a hung kir ṭhan tikah khan Pathian cu a sinah a lang ṭhan i thluachuah a pek. ¹⁰ Pathian nih cun a thawh i, "Na min cu Jakob a si, sihmanhsehlaw atu ri hin cun na min cu Israel a si cang lai," a ti. Cucaah Israel ti a si. ¹¹ Cun Pathian nih amah cu, "Keimah cu Lianngan Bik Pathian ka si. Fa tam piin ngei hna. Tefa tampi na ngei lai i a cheu cu siangpahrang an si lai. Na tefa cu an tam tuk lai caah miphun tampi ah an cang lai. ¹² Abraham le Isak ka pekmi hna ram kha nangmah kan pek lai i cu ram cu na hnu i a ummi na tefa hna zong cu ka pek hna lai," a ti. ¹³ Cun Pathian nih an i chawnhnak hmun ah khan Jakob cu a kaltak i vancung ah a kir ṭhan. ¹⁴ Cuka ah cun Jakob nih rolung pakhat a bunh i a cungah cun din awk thawinak a toih i chiti zong a toih. ¹⁵ Cuka hmun cu a min ah Bethel a sak. ¹⁶ Bethel khua cun an i thawh i Efrath khua in hla nawn an si rih lioah khin, Rachel cu a nau ngan a fak i a zualhma ngaingai. ¹⁷ Cu ti i a ngan a fah lioah cun, nau hlawmtu nu nih khan, "Na thinphang hlah, fapa na ngei ṭhan," a ti. ¹⁸ Cun a thaw hmanung bik sinah cun, a cahpah khin, "Ben-oni run ti u," a ti, asinain a pa nih cun, Benjamin tiah a min cu a sak. ¹⁹ Rachel cu a thi i Efrath lei kalnak lam ah khan an vui. Efrath cu Bethlehem ti a si cang. ²⁰ Jakob nih a thlan ah cun philh lonak lung pakhat a phun i cu "Rachel Lungphun" cu atu tiang hin cuka ah cun a um. ²¹ Israel cu a va lan i Eder innsang ralchan ah khan a riahnak hmun cu a ser. ²² Israel kha cu ram i a um lioah cun Reuben nih khan a pa nupi pakhat Bilhah cu a ihpi. Cu kong cu Israel nih khan a theih i a thin a hung ngaingai. Jakob fapa cu hleihnih an si: ²³ Leah fa ah Reuben, Jakob fapa upa bik, Simeon, Levi, Judah, Isakhar le Zebulun an si. ²⁴ Rachel fa ah Josef le Benjamin an si. ²⁵ Rachel salnu Bilhah fa ah, Dan le Naftali an si. ²⁶ Leah salnu Zilpah fa ah, Gad le Asher an si. Hi hna hi Jakob nih Mesopotamia ram ah a hrinmi an si. ²⁷ Jakob cu a pa Isak sin kha a phan, Isak cu Mamre ah khan a rak um i Mamre cu Abraham le Isak an rak umnak khua a si, (Mamre cu Kiriath-arba ti zongah ti a si, Hebron ti zongah ti a si). ²⁸ Isak cu a thih ah kum za le sawm riat a si, ²⁹ Tar tlung nung in a mi hna cu thihnak ah khan a fonh hna i a fapa Esau le Jakob nih khan an vui.

¹ Esau tefa cu hi hna hi an si, (Esau cu Edom ti zongah ti a si). ² Esau nih Kanaan minu kha a ṭhit hna, cu hna cu Hit mi Elon fanu Adah, Hiv mi Zibeon fapa Anah i fanu Oholibamah, ³ le Ishmael fanu Basemath an si; Basemath cu Nebaioth far a si. ⁴ Adah nih Esau cu Elifaz a hrinpiak, Basemath nih Reuel a hrinpiak; ⁵ cun Oholibamah nih Jeush, Jalam le Korah a hrin hna. Hi hna hi Esau nih Kanaan ram chungah a hrinmi an si. ⁶ Cun Esau nih a nupi hna le a fapa hna le a fanu hna le a innchung i a ummi vialte hna le, a caw vialte hna le Kanaan ram chung i a ngeihmi thilri vialte hna he khan aa pong i a nau Jakob sinin ram hlapi ah a kal. ⁷ Zeicahdah a kal ti ahcun Jakob he an umnak ram nih khan a cawm kho ti hna lo; saṭil tam tuk an ngei i hmunkhat ah an um kho ti lo. ⁸ Cucaah Esau (Edom) cu Seir tlangram ah khan a va um. ⁹ Hi hna hi Seir tlangram i a ummi Edom mi hna an pa Esau i a tefa cu an si. ¹⁰ Esau fapa hna min cu hihi an si: Elifaz, amah cu Esau nupi Adah fapa a si, Reuel, amah cu Esau nupi Basemath fapa a si. ¹¹ Elifaz fapa hna cu: Teman, Omar, Zefo, Gatam le Kenaz an si. ¹² Timna cu Esau fapa Elifaz nupi hna lak i pakhat a si i amah nih cun Amalek a hrin. Hi hna hi Esau nupi Adah fapa cu an si. ¹³ Reuel fapa hna cu: Nahath, Zerah, Shammah le Mizzah an si. Hi hna hi Esau nupi Basemath fapa cu an si. ¹⁴ Esau nupi Oholibamah fapa hna cu Jeush, Jalam le Korah an si. Oholibamah cu Zibeon fapa Anah i a fanu a si. ¹⁵ Hi hna hi Esau tefa lakah phuntungtu pawl cu an si. Esau fapa upa bik Elifaz fapa hna lak i bawi cu Teman, Omar, Zefo, Kenaz, ¹⁶ Korah, Gatam le Amalek an si. Hi hna hi Edom ram chung i a ummi Elifaz tefa hna lak i phuntungtu cu an si. Annih cu Adah fapa kha an si. ¹⁷ Esau fapa Reuel fapa cu hi hna hi an si. Annih lak i phuntungtu cu: Nahath, Zerah, Shammah le Mizzah an si. Hi hna hi Edom ram chung i a ummi Reuel tefa hna lak i phuntungtu cu an si. Annih cu Esau nupi Basemath fapa kha an si. ¹⁸ Esau nupi Oholibamah fapa cu hi hna hi an si: an phuntungtu cu Jeush, Jalam le Korah an si. Esau nupi Oholibamah, Anah fanu, nih a hrinmi phuntungtu cu hi hna hi an si. ¹⁹ Esau (Edom) tefa cu hi hi an si i an phuntungtu hna zong cu hi hna hi an si. ²⁰ Hor miphun Seir fapa cu hi hi an si, annih cu cuka rammi cu an si: Lotan, Shobal, Zibeon, Anah, ²¹ Dishon, Ezer le Dishan. Hi hna hi Hor miphun an phuntungtu, Edom ram i a ummi Seir fapa cu an si. ²² Lotan fapa cu Hori le Heman an si; Timna cu Lotan far a si. ²³ Shobal fapa cu Alvan, Manahath, Ebal, Shefo, le Onam an si. ²⁴ Zibeon fapa cu Aiah le Anah an si. (Anah hi a pa Zibeon laa ramlak i a khalh lio hna ah, ti lum cerh a hmutu kha a si). ²⁵ Anah fale cu, Dishon le Anah fanu Oholibamah kha an si. ²⁶ Dishon fapa cu Hemdan, Eshban, Ithran, le Kheran an si. ²⁷ Ezer fapa cu Bilhan, Zaavan le Akan an si. ²⁸ Dishan fapa cu Uz le Aran an si. ²⁹ Hor miphun phuntungtu hna cu Lotan, Shobal, Zibeon, Anah ³⁰ Dishon, Ezer le Dishan an si. Hormi phuntungtu cu an phun ning cio in Seir ram ah hi hna hi an si. ³¹ Israel siangpahrang ahohmanh nih Edom ram cu an uk hlanah, cu ram a rak uktu siangpahrang cu hi hna hi an si. ³² Beor fapa Bela nih Edom ram cu a rak uk, a khua cu a min ah Dinhabah a si. ³³ Bela a thih tikah Bozrah khuami Zerah fapa Jobab nih khan a hun chaan. ³⁴ Jobab a thih tikah Teman mi hna ram i a ummi Husham nih a hun chaan. ³⁵ Husham a thih tikah, Moab ram chung i Midian a rak teitu Bedad fapa Hadad nih khan a hun chaan. A khua min cu Avith a si. ³⁶ Hadad a thih tikah Masrekah khuami Samlah nih khan a hun chaan. ³⁷ Samlah a thih tikah, Zufrates tiva kam i a ummi khua Rehoboth khuami Shaul nih khan a hun chaan. ³⁸ Shaul a thih tikah, Baal-hanan, Akhor fapa nih khan a hun chaan. ³⁹ Akhor fapa Baal-hanan a thih tikah Hadad nih a chaan. A khua min cu Pau a si i a nupi cu Mehetabel a si. Mehetabel cu Matred fanu a si i Matred cu Mezahab fanu a si. ⁴⁰ Esau tefa hna lak i phuntungtu cu hi hna hi an si, an phun ning cio le an umnak hmun ning cio in ṭial an si: Timna, Albah, Jetheth, ⁴¹ Oholibamah, Elah, Pinon, ⁴² Kenaz, Teman, Mibzar, ⁴³ Magdiel le Iram. Hi hna hi Edom phuntungtu hna cu an si, anmah ram a simi i an umnak hmun ning cio in ṭial an si (Edom mi hna pa cu Esau a si).

¹ Asinain Jakob cu a pa rak umnak Kanaan ram chungah khan a um ko. ² Jakob tefa hna tuanbia cu hihi a si. Kum hleisarih a simi tlangval Josef cu a unau pawl, a pa nupi Bilhah le Zilpah fapa hna he khan tuu le meheh an cawng tawn i a unau pawl nih thil ṭhalo an tuahmi kha a pa cu a chimh tawn. ³ Josef cu a tar hnu i a hrinmi a fa a si caah Israel nih khan a fale dang nakin a dawt khun i angki leng a saumi ban fual kha a serpiak. ⁴ An pa nih annih nakin Josef a dawt deuh kha a unau hna nih cun an hmuh tikah an huat ngaingai i a chawnh hmanh ṭhiṭha in an chawn duh lo. ⁵ Voi khat cu Josef nih cun mang a manh i a mang cu a unau pawl kha a chimh hna. Cucaah cun an huat chinchin. ⁶ A thawh hna i, "Ka mang hi ngai hmanh u. ⁷ Lo pakhat ah hin kan dihlak in kan um i faphal kan tom len ko. Cu lioah cun ka faphal cu a tho i ding tein a dir. Cun nannih nan faphal hna nih khan an kulh i a hmaiah an kun," a ti. ⁸ A unau pawl nih cun, "Kan cungah siangpahrang ka si lai tiin dahra naa ruah? Nangmah nih cun maw na kan uk ko hnga?" an ti i a mang kong a chimhmi hna ruangah cun an huat chinchin. ⁹ Cun Josef nih cun mang dang pakhat a manh ṭhan i, "Mang dang pakhat ka manh ṭhan i cu ka mang ah cun nika le thlapa le arfi hleikhat nih ka hmaiah an kun," tiah a unau pawl cu a chimh hna. ¹⁰ A mang cu a pa le a unau pawl kha a chimh hna i a pa nih cun a sik i, "Zei bantuk mang dah na manh? Na nu le na unau pawl le keimah hi na sinah ra in na hmaiah an kun lai tiin maw na ruah?" a ti. ¹¹ Josef cu a unau pawl nih khan cun an nahchuah ngaingai, sihmanhsehlaw a pa nih cun thil vialte kha a lung chungin a ruah lengmang. ¹² An pa saṭil run khalh awkah khan Josef unau pawl cu Shekhem ah khan an va kal i ¹³ Israel nih khan Josef cu a thawh i, "Na ule cu Shekhem ah saṭil kha an khal hna. I tim law an sinah kan thlah lai," a ti. Josef nih cun, "Kaa tim ko," tiah a leh. ¹⁴ A pa nih cun a thawh i, "Va kal law na ule kha an dam dam lo va zoh hna law saṭil zong cu an i nincan le nincan lo va zoh hna; cun bia rak ka phorh te," a ti. Cuticun a pa nih khan Hebron nelrawn khan a thlah. Shekhem kha a va phak tikah ¹⁵ ramlak i aa chawh len ko kha mipa pakhat nih a rak hmuh i, "Zeidah na kawl?" tiah a hal. ¹⁶ Anih nih, "Ka ule ka kawl hna," a ti. Cun, "Khuazei ah dah saṭil kha an cawngh hna ka chim tuah?" a ti. ¹⁷ Mipa nih cun, "An kal cang; Dothan ah kan kal lai an ti kha ka theih," a ti. Cucaah Josef nih khan a ule cu a hei dawi hna i Dothan ah khan a va hmuh hna. ¹⁸ Lamhlat piin a rat lio kha an hei hmuh i an pawng a phak hlanah amah thah nakding khua kha an rak khang. ¹⁹ An i thawh i, "Mang man pa a ra cang khih. ²⁰ Ra u law that u sih, a ruak cu tikhor chungah kan hlonh lai; sahrang nih a seh kan ti lai. Cun a mang kha zeidah an lawh kan zoh tuah lai," an ti. ²¹ An i ceih thawng kha Reuben nih a theih hna i Josef nunnak khamh kha aa zuam. "A thah cu that hlah u sih," a ti. ²² Cun, "That hlah u, ram lak tikhor chungah hin thla u law a thah cu that hlah u," a ti hna. Hiti a ti hna cu a nunnak kha ka khamh lai i ka pa sinah ka kuat ṭhan lai ti a duh caah a si. ²³ Josef nih a ule cu a hei phanh hna tikah a angki leng banfual kha an rak hlih i ²⁴ tikhor car ah an thlak. ²⁵ Rawl an ei lioah khin Gilead lei in a rami Ishmael mi khualtlawng bu khat kha an hmuh hna. An kalauk cu mitsur thei car le hangṭamh a phunphun kha Izipt i vung zuar awkah an phor. ²⁶ Judah nih khan a unau pawl cu a thawh hna i, "Kan naupa cu kan thah i kan i pheh ah hin zeidah kan miak lai? ²⁷ Ishmael mi hna sinah khin zuar u sih. Cu ti kan tuah ahcun amah thah kha a herh lai lo, a ngaingai ti ahcun kan nau pei a si, kan thi le kan sa pei a si ve," a ti. A unau pawl cu an hna a tla. ²⁸ Cun Midian chawlet pawl cu an ra phak tikah Josef cu tikhor chung khan an va chuah i Ishmael mi sinah khan ngun tangka phar kul ah an zuar i annih nih Izipt ram ah khan an kalpi. ²⁹ Reuben nih khan tikhor cu a va zoh ṭhan i Josef kha a rak um ti lo cu a hmuh tikah a ngaihchiatnak langhternak ah a thilpuan kha a thleh hna. ³⁰ A unau pawl sinah khan a va kir i, "Ngakchiapa kha a um ti lo. Zeitindah ka tuah lai?" a ti. ³¹ Cun meheh pakhat an thah i Josef angki leng kha a thi ah cun an hnim. ³² A angki leng cu an pa sinah khan an hei kalpi i, "Hi hi kan hmuh ko. Na fapa ta a si maw si lo zoh tuah," an ti. ³³ Amah nih cun a rak hngalh zau i, "Asi, ka fapa ta a si. Sahrang nih a seh cang ko hi ta. Josef cu a thleh a baoh dih cang ko hi ta!" a ti. ³⁴ Jakob nih a thilpuan kha a thleh hna i a tai ah a ngaihchiat langhternak ah puan nak aa menh i saupi a fapa cu a ṭah lengmang. ³⁵ A fapa vialte le a fanu vialte hna nih khan hnemh an i zuam, sihmanhsehlaw an hnemhnak kha duh loin a thawh hna i, "Mithi khua Sheol ah ka fapa zunngai in kal ko ning," a ti hna. ³⁶ Cun Midian pawl nih khan Josef cu Izipt ram ah khan Faro bawi pakhat a simi Potifar sinah an va zuar; amah cu siangpahrang inn cawngtu hna haotu bawi a si.

¹ Cu caan ah cun Judah kha a unau pawl sin khan a chuak i Adullam khuami Hirah sinah a va um. ² Cuka ah cun Judah nih khan Kanaan mipa a min Shua a simi fanu pakhat a va hmuh. A ṭhit i a ihpi i ³ fa a pawi. Fapa a hrin i a min ah Er a sak. ⁴ Fa a pawi ṭhan i fapa a hrin ṭhan i a min ah Onan an sak. ⁵ Cun fapa a hrin ṭhan i a min ah Shelah an sak. Shelah a hrin ah cun Judah cu Khezib ah a um. ⁶ Judah nih a fapa upa bik Er kha nupi a ṭhitpiak i a nupi min cu Tamar a si. ⁷ Er cu a ziaza a ṭhat lo caah Bawipa a cungah aa lawm lo i a thah. ⁸ Cucaah Judah nih Onan cu a thawh i, "Na u nupi rohmi kha va ihpi. Vale unau rian a simi na rian kha va tlinter law cuticun na u nih tefa a ngei kho lai," a ti. ⁹ Asinain Onan nih khan fa kan hrinmi cu keimah ta an si lai lo ti kha a hngalh i cucaah cun a u nupi ro cu a ihpi fate a ci kha a pingah a chuahter i cucaah a u caah khan tefa a um kho lo. ¹⁰ A tuahmi nih khan Bawipa cu a lawmhter lo caah amah zong cu a thah ve. ¹¹ Cun Judah nih khan a fapa nupi ro Tamar cu a thawh i, "Na pa inn ah va kir law ka fapa Shelah a upat hlantiang khika ah nuhmei in va um ko kun," a ti. Hi ti a ti cu a ule bantukin Shelah zong kha a thi ve sual lai ti a phan caah a si. Cucaah Tamar cu a pa inn ah khan a kir i a um. ¹² Cu hnu tlawmpal ah Judah nupi Shua fanu kha a thi. Judah nih a nupi zunngaih caan kha a lim tikah a hawipa Adullam khuami Hirah he khan a tuu an hmul an meh hnanak khua Timnah ah khan an va kal. ¹³ Tamar kha, "Na va i a pa Judah cu Timnah ah a tuu an hmul meh awkah a kal lai," tiah mi nih an chimh. ¹⁴ Cucaah a nuhmei thilthuam aa hrukmi kha aa thleng i hmaikhuh puan aa khuh i Timnah lei kalnak lam i a ummi Enaim khua luhnak hauka ah khan a rak ṭhu. Shelah cu a upa cang nain an ṭhitter duh lo ti kha a hngalh. ¹⁵ Judah nih a hmuh tikah a hmai aa khuh caah hlawhhlangnu a si rua tiah a ruah. ¹⁶ Lam pawngah cun a hei fuh i, "Ra tuah, it tuah u sih," a ti. A fapa nupi ro a si kha a hngal lo. Tamar nih cun, "Zeidah na ka phalh lai?" a ti. ¹⁷ Anih nih, "Ka meheh run chungin meheh no pakhat in ka rak in kuat lai," a ti. Cun Tamar nih cun, "A ṭha ko, na rak ka kuat hlantiang biakamnak na ka pek paoh ahcun," a ti. ¹⁸ Biakamnak caah cun zeidah kan pek hnga? a ti. Tamar nih cun, "Na minkhenhnak kha a hri he, cun naa putmi na ṭhiangṭhunh kha," a ti. ¹⁹ A pek hnu cun a hmaikhuh puan kha aa hawh i nuhmei thilpuan kha aa hruk ṭhan. ²⁰ Nu sin khan a biakamnak thil lak ṭhan awkah a hawipa Adullam khuami Hirah cu meheh note kha a kuat, sihmanhsehlaw cu nu cu a hmu kho lo. ²¹ Cuka mi cu, "Enaim khua lampawng i hlawhhlangnu kha khuazei ah dah a si?" a ti hna. "Cuka ah cun hlawhhlangnu an um bal ṭung lo," tiah an leh. ²² Judah sinah khan a va kir i, "Ka hmu kho lo, cuka ah hlawhhlangnu an um bal lo tiah cuka mi nih cun an ka ti," a ti. ²³ Judah nih cun, "Thil kha lak vaa zuam hna hlah, mi nih an ka theih ahcun an ka nihsawh lai. Na hmuh khawh lo hmanh ah hi meheh note cu ka kuat ko hi ta," a ti. ²⁴ Cu hnu thla thum tluk ah khin Judah cu, "Na fapa nupi ro kha fa a pawi," tiah an chimh. Judah nih cun, "Khua lengah va chuahpi u law a khangh in va khang u," a ti. ²⁵ An chuahpi lioah khin a va i a pa cu bia a hei cah i, "Fa a ka pawitertu cu hi thil hna a ngeitu hi a si. Rak zoh hna law aho ta dah an si — hi minkhenhnak le a hri le ṭhiangṭhunh hi," a ti. ²⁶ Judah nih cun a rak hngalh zau hna i, "Tamar cu a hmaan. Palhnak a tuahtu cu keimah ka si; ka fapa Shelah kha ka rak ṭhitter awk cang a si," a ti. Amah cu a ihpi ṭhan ti lo. ²⁷ A nithla a tlin tikah fa phir a pawi kha an hngalh. ²⁸ A ngan fah lioah khan pakhat nih a kut a hun chuah i nau hlawmtu nih khan a rak tlaih i, "Hi pa hi a chuak hmasami a si," tiin la sen a khih. ²⁹ Asinain a kut cu a hnuh ṭhan i pakhat tu kha a chuak hmasa. Cun nau hlawmtu nih khan, "A! nangmah hi maw na chuak hmasa," a ti. Cucaah a min ah Perez an sak. ³⁰ Cu hnuah a nau cu a kut i hrisen he cun a hung chuak. A min ah Zerah an sak.

¹ Josef cu Izipt ram ah khan an vun kalpi i Izipt mi a min Potifar a simi, Faro bawi pakhat, siangpahrang inn cawngtu hna bawi a simi nih khan Izipt ram i a vun kalpitu Ishmael mi hna sin khan a rak cawk. ² Bawipa nih Josef cu a umpi i a caah thil kalning a tluang dih ko. A bawipa Izipt mipa inn ah cun a um. ³ Bawipa nih Josef cu a umpi i zei a tuahnak hmanh ah Bawipa nih a tlam a tlinter ti kha a bawipa nih cun a hmuh. ⁴ Potifar cu Josef cungah khan a lung a tling i a rianṭuanning zong kha a duhning a si, cucaah cun a inn le a ngeihmi thil vialte zohkhenhtu ah a chiah. ⁵ Cu thawk cun Josef ruangah khan Bawipa nih cun Izipt mipa innchungkhar cu thluachuah a pek hna. A inn chung i a ngeihmi thil si hna seh, a lo chung i a ngeihmi thil si hna seh. Bawipa nih cun thluachuah a pek hna. ⁶ Potifar nih cun a ngeihmi thil vialte cu Josef kut chungah khan a chiah dih ko i a ei awk rawl dah ti lo kha cu a dang zeihmanh a lungre aa theihmi a um lo. Josef cu mipumruaṭha midawh a si. ⁷ Tlawmpal ah khin a bawipa nupi nih cun a duh i, "It u sih," tiah a ti. ⁸ Josef nih cun a duh lo i, "Hika ka um ruangah ka bawipa cu a inn chung thil kongah lungretheihnak zeihmanh ngei lo tein a um. A ngeihmi thil vialte kha keimah kut chungah a chiah dih. ⁹ Hi inn chungah hin amah tlukin nawl ka ngei i a ka sianh lomi zeihmanh a um lo, a nupi nangmah dah ti lo cu. Cucaah cun cu bantuk thil ṭhalo cu zeitindah ka tuah khawh lai i Pathian cungah ka sual lai?" tiah a leh. ¹⁰ Ni khat hnu ni khat a lem lengmang nain Josef nih cun zeihmanh ah a rel lo i a ihpi duh lo. ¹¹ Asinain ni khat cu Josef kha a rian ṭuan awkah inn chungah khan a vung lut i cu lioah cun inn chungah khan ahohmanh an um lo; ¹² cucaah a angki leng khan a rak tlaih i, "Ka ihpi ko," tiah a ti. Sihmanhsehlaw Josef nih cun a lektak i lengah a chuak i a angki leng cu a kut chungah cun a kaltak. ¹³ A angkileng cu a kaltak i lengah a zaam ti kha a hmuh tikah, ¹⁴ a innchung mi kha a auh hna i, "Mah hi zohhmanh u! Ka va nih hi Hebru mipa hi kan inn ah a ratpi i atu cu a kan serhsat ngaingai cang. Ka khaan chungah a ka luhhnawh i kan it lai a ka ti i asinain a than khawh chungin ka ai. ¹⁵ Ka ai kha a theih tikah a angkileng kha ka pawngah a zaamtak i a le i lengah a chuak," a ti. ¹⁶ Josef a bawipa inn i a ṭin hlantiang angkileng cu a rak i chiah ko. ¹⁷ Cun a chim hmasa bantuk ṭhiamṭhiam khan a chimh ve i, "Khi Hebru sal kan sin i na ratpimi nih khin ka thangchiat a ka duh caah ka khaan chungah a ka luhhnawh. ¹⁸ Sihmanhsehlaw ka ai ciammam i lengah a chuak i ka pawngah a angkileng hi a lektak," a ti. ¹⁹ "Hitihin na salpa nih ka cungah rian a ṭuanning a si ko," tiah a nupi nih a rak chimh tikah Josef bawipa cu a thin a hung tuk hringhran. ²⁰ Josef cu a tlaihter hna i siangpahrang thongtla pawl an chiah hnanak hmun ah khan an chiah i cuka ah cun a um. ²¹ Asinain Bawipa nih khan Josef cu a umpi i a cungah zaangfahnak a ngei i cucaah thongbawi kha a lung a hmuh ngaingai. ²² Josef cu thongtla dang vialte uktu ah khan a chiah i thonginn chung i an tuahmi thil vialte kha amah nih a zoh dih hna. ²³ Bawipa nih khan Josef cu a umpi i a tuahmi paoh kha a tlam a tlinter caah Josef zohkhenhmi thil a simi paoh kha cu thong bawi nih zeihmanh a zoh a herh lo.

¹ Cu hnu tlawmpal ah Izipt siangpahrang cu din awk lei khuakhangtu bawi le changreu sertu bawi upa bik nih khan a lung an tong lo. ² Faro cu a bawi pahnih hna cungah cun a thin a hung i ³ Josef an chiahnak hmun, inn cawngtu hna haotu bawi inn ah khan thong ah an thlak ve hna. ⁴ Inn cawngtu hna haotu bawi nih khan an rian ṭuanpiaktu dingah Josef cu an sinah khan a chiah. Thong chungah cun saupi an um. ⁵ Zan khat cu Izipt siangpahrang din awk lei khuakhangtu bawi le changreu sertu nih cun thong chungah cun mang an manh veve i sullam an ngei veve. ⁶ Zinglei i Josef cu an sin i a rat tikah khan an lungre a thei ti kha a hmuh hna. ⁷ "Zeicahdah nihin cu nan ngaih a chiat ko?" tiah a ti hna. ⁸ Annih nih, "Mang pakhat veve kan ngei i a kan lehpiaktu ahohmanh an um lo," tiah an leh. Josef nih cun, "Mang lehnak a pe khotu cu Pathian a si. Nan mang cu ka chim tuah u," a ti hna. ⁹ Cucaah din awk lei khuakhangtu nih a mang cu a vun chim i, "Ka mang ah hin ka hmaiah mitsur ruang ruang khat a um i ¹⁰ nge pathum a ngei. A hnah an corh cangka khin a par kha an hung chuak colh i a thei cu an hung hmin colh. ¹¹ Faro hrai kha kaa put i mitsur thei cu ka lawh hna i hrai chungah cun ka sur hna i Faro cu ka pek," a ti. ¹² Josef nih cun, "Hihi a sullam cu a si: a nge nge thum cu ni thum tinak an si. ¹³ Ni thum chungah Faro nih an chuahter lai i an ngaihthiam lai i na hmun ah an chiah ṭhan lai; Faro cu a zu bawi na rak si lio i na rak pek tawn bang khan a hrai cu na pek ṭhan lai. ¹⁴ Cu bantukin na caah thil kalning a tluan tikah ka philh hlah law ka kong kha Faro sinah chimpiak va ka philh hlah. Hi thong chung hin ka luatter ve te. ¹⁵ A ngaingai ti ah cun kei cu Hebru ram hin hramhram in an rak ka tlaih i hika zongah hin thong tlaknak ding tlak zeihmanh ka tuahmi a um lo," a ti. ¹⁶ Changreu sertu upa bik nih zu bawi mang sullam kha a ṭha lei a si ti a hmuh tikah Josef cu a thawh i, "Kei zong mang ka ngei ve; ka mang ah cun ka lu ah changreu bawm pathum kaa khinh i ¹⁷ a cung bik bawm ah cun Faro ca changreu a phunphun a um; asinain va nih khan an rung ei hna," a ti. ¹⁸ Josef nih cun, "Hihi a sullam cu a si: bawm pathum cu ni thum tinak a si; ¹⁹ ni thum chungah Faro nih an chuah lai i na lu an tan lai. Cun na ruak kha thingkung ah a thlai lai i va nih na sa kha an ei lai," a ti. ²⁰ A ni thum ni ah cun Faro chuah ni kha a hung si, a bawi vialte hna caah rawl danghnak pakhat a ser i a zu bawi le a changreu sertu upa bik kha a bawi vialte hna hmaiah cun a chuahter hna. ²¹ Zu bawi kha hmasa a rianṭuannak hmun ah khan a chiah ṭhan i ²² changreu sertu upa bik kha a thlai. Josef nih an mang a sullam a chimning bantuk te khan a si taktak. ²³ Asinain zu bawi nih khan Josef kha cu a ruat ti lo, a philh diam ko.

¹ Kum hnih a liam hnuah khin Faro nih mang pakhat a manh i a mang ah cun Nail Tiva kamah khan a dir. ² Cu lioah cun tiva chung khan caw thau pasarih an hung chuak i hluang lakah khan an tlong. ³ Cun a dang caw pasarih tiva chung cun an hung chuak ve; annih cu der ṭiakṭuak in an um. An ra i tiva kamah khan caw thau pasarih hna pawngah khan an dir. ⁴ Cun caw der nih khan caw thau pasarih kha an ei hna i cun Faro cu aa hlau. ⁵ Aa hngilh i mang a manh ṭhan. A mang ah cun rawlkung pakhat chung hin favui pasarih an chuak i an fang kha a khat i an hmin. ⁶ Cun a dang favui pasarih an hung chuak ve ṭhan i cu hna cu nichuahlei thli nih a chemmi bantukin thep selsul in an um. ⁷ Thep selsul in a ummi favui nih khan a ngan i a khimmi favui kha an dolh hna. Faro cu a hun i ṭhang i a mang a si. ⁸ A thaizing ah cun a khuaruah a har i cucaah cun Izipt ram chung camhthiam le mifim vialte kha a kawh dih hna. A mang cu a chimh hna, asinain ahohmanh nih a sullam an lehpiak kho lo. ⁹ Cu tikah zu bawi nih khan Faro cu, "Nihin ah hin ka palh cang ti kha na sinah ka phuan a hau. ¹⁰ Na sal hna kan cung i na thin a rak hun ah khan changreu sertu upa bik le keimah kha inn cawngtu hna haotu bawi inn ah thong ah na rak kan thlak. ¹¹ Zan khat cu mang kan manh veve i kan mang cu sullam an ngei veve. ¹² Kan sinah cun Hebru tlangval note pakhat, inn cawngtu hna haotu bawi a simi sal kha a um ve i kan mang cu kan chimh. Amah nih cun kan mang cu a kan lehpiak i an sullam cu a kan chimh veve. ¹³ A chimning bantuk tein thil cu an hung si taktak: kei kha ka umnak hmun ah chiah ka hung si ṭhan i changreu sertu kha thlai a hung si," a ti. ¹⁴ Faro nih cun Josef cu a auhter hna i khulrang in thong chung cun an chuah. A khahmul aa meh dih le a thil aa thlen dih in Faro hmaiah cun a rung lut. ¹⁵ Faro nih khan Josef cu a thawh i, "Mang ka manh i ahohmanh nih an let kho lo. Nangmah nih hin mang cu na leh khawh tiah an ka chimh," a ti. ¹⁶ Josef nih cun, "Keimah leh khawh bia a si lo, Pathian nih Faro cu a ṭhami lehnak a pek lai," tiah a leh. ¹⁷ Faro nih cun aa thawh i, "Mang pakhat ka manh i ka mang ah cun Nail tiva kamah hin ka dir. ¹⁸ Tiva chung cun caw thau pasarih an hung chuak i hluang lakah cun an tlong. ¹⁹ Cun caw dang pasarih a der ṭiakṭuak pipi khi an hung chuak ve Izipt ram chung i ka hmuhmi hna lakah a der bik le a ṭhalo bik an si lai. ²⁰ Caw der nih cun caw thau kha an ei dih hna. ²¹ Asinain an ei dih hna hnu zongah cun an ei hna hlan bantuk khan an der ṭhiamṭhiam ko caah ahohmanh nih an ei hna ti awk an hngal kho lai lo. ²² Cun mang ka manh ṭhan i ka mang ah cun facang kung pakhat chungin favui pasarih a fang a khat i a hminmi, an hung chuah kha ka hmuh. ²³ Cun a dang favui pasarih an hung chuak ve i cu hna cu nichuahlei thli nih a chemmi bantukin thep selsul in an um. ²⁴ Favui chia pasarih nih cun favui ṭha pasarih kha an dolh hna. Ka mang cu camh thiammi kha ka chimh hna, sihmanhsehlaw a ka lehpiak khotu ahohmanh an um lo," a ti. ²⁵ Josef nih khan Faro cu a thawh i, "Na mang pahnih kha an sullam aa khat; Pathian nih a tuah ding kha an chimh. ²⁶ Caw thau pasarih kha kum sarih an si, favui ṭha pasarih zong kha kum sarih an si ṭhiamṭhiam; an sullam cu aa khat ko. ²⁷ Cun caw der pasarih hnu deuh i a hung chuakmi le nichuahlei thli nih thep selsul in a chemmi favui chia pasarih zong kha mangṭam kum sarih an si ve. ²⁸ Pathian nih a tuah laimi kha an hmuhsak tiah kan ti bantukte khan a si. ²⁹ Izipt ram chungah hin ngeihpi kum kum sarih a tlung lai. ³⁰ Cu hnuah cun pam kum sarih a tlung lai i pam nih khan Izipt ram cu a hrawh dih lai caah kum ṭha kum vialte kha an philh dih hna lai. ³¹ A hun zultu hna mangṭam cu a fah tuk hringhran lai caah thil tampi a rak um lio caan kha philh rumro in philh a si ko lai. ³² Faro nih voi hnih tiangtiang in na manh cu, hi thil hi Pathian nih a ruah cang i a rauh hlanah a tlunter lai tinak caah a si. ³³ "Cucaah nangmah nih mi pakhat a fim i a thiammi, Izipt ram zohkhenhtu dingah hin na thim a hau. ³⁴ Cun hi ram chungah hin bawi chia hna law ngeihpi kum kum sarih chungah hin rawl a chuakmi vialte cheu nga cheu khat kha la hna seh law ³⁵ a ra laimi kum ṭha kum sarih chungah hin rawl vialte kha pum hna seh. Cun nangmah nawl pekning in ṭuan hna seh law khuapi chungah khan rawl cu khong hna seh law cawng hna seh. ³⁶ Cu rawl cu Izipt ram cung i a tlung laimi mangṭam kum sarih chungah hin khonmi ah a cang lai i cuticun Izipt ram chung mi hi mangṭam chungah hin ahohmanh an thi lai lo," a ti. ³⁷ Cu bia cu Faro le a bawi pawl kha an hna a tla i ³⁸ annih cu a thawh hna i, "Hi bantuk mi hi a dang khuazei ah dah kan hmuh khawh ti hna lai, Pathian thlarau nih a umpimi hi?" a ti. ³⁹ Cucaah Faro nih Josef cu, "Pathian nih hi vialte cu nangmah kha an hmuhsak caah nangmah nakin hngalhnak a ngei deuhmi le a fim deuhmi an um ti lo. ⁴⁰ Ka ram zohkhenhtu ah hin nangmah cu kan chiah lai i na bia kha a mi kip nih an ngaih lai. Nangmah nakin ka ngan deuhnak cu siangpahrang ṭhutdan cung ṭhutnak kong lawngah hin a si lai," a ti. ⁴¹ Cun Faro nih khan Josef cu, "Nangmah hi Izipt ram vialte uktu ah kan chiah hi na hngal ko lo maw," a ti. ⁴² Faro nih cun a minkhenhnak kutdonghrolh kha aa phoih i Josef kutdong ah cun a hrolh; la hmangṭhia puan dawh ngaingai kha a aihter i a hngawng ah sui ṭhi a oih. ⁴³ Siangpahrang rangleng pahnihnak ah khan a citter i a cawngtu hna kha a hmai in an kal i, "Lam kian u," tiah an au. Cuticun Josef cu Izipt ram vialte uktu bawi ah khan ser a si. ⁴⁴ Faro nih Josef cu, "Keimah hi siangpahrang cu ka si; Izipt ram chung a dihlak ah hin ahohmanh nih nangmah nawl loin an kut hmanh an hler lai lo i an ke zong an cawi lai lo," a ti. ⁴⁵ Josef cu Zafenath-paneah min a sak. Cun nupi a ṭhitpiak i a nupi cu, On khua tlangbawi Potifera fanu Asenath a si. Josef cu Izipt ram chungah khan cuticun nawl a ngei. ⁴⁶ Izipt ram siangpahrang Faro kut tang i rianṭuan hram aa thawk ah khan Josef cu kum sawm thum a si. Siangpahrang cu khualtlawnnak nawl kha a hal i Izipt ram chung khuazakip ah khan aa chawk. ⁴⁷ Ngeihpi kum kum sarih chungah khan ram chung i rawl a chuakmi cu a tam ko. ⁴⁸ Izipt ram chung i rawl tampi a um lio kum sarih chungah cun Josef nih khan rawl vialte cu a pumh i khuapi chungah khan a khon hna. Khua pakhat chungah khan anmahle an pawng kam cio i a ummi lo chung rawl cio kha a khon hna. ⁴⁹ A khonmi rawl cu a tam tuk hringhran i rilikam thetse bantuk a si. Rawl cu a tam tuk hringhran i rel cawk a si ti lo caah a rel hmanh an rel ti lo. ⁵⁰ Mangṭam a tlun hlanah khan Josef nih cun On khua tlangbawi Potifera fanu Asenath he khan fapa pahnih an hrin hna. ⁵¹ Josef nih cun, "Pathian nih ka temhinnak vialte le ka pa innchungkhar chung mi vialte kha a ka philhter dih hna," tiin a fapa hmasa bik cu a min ah Manasseh a sak. ⁵² Cun, "Harnak ka innak ram ah Pathian nih fa a ka pek," tiin a fapa pahnihnak cu Efraim a sak. ⁵³ Josef nih a rak chim bantuk te khan Izipt ram ah a tlungmi ngeih kum kum sarih kha a hung dong i ⁵⁴ mangṭam kum sarih cu aa thawk. Ramdang ah cun mangṭam a tlung dih, sihmanhsehlaw Izipt ram chungah cun rawl a um. ⁵⁵ Izipt ram chung mi vialte cu an rawl a hung ṭam tikah Faro sinah cun rawl cu an hal. Anih nih Izipt mi cu a thawh hna i, "Josef sinah va kal u law a chimning paoh in va tuah u," a ti hna. ⁵⁶ Mangṭam nih ram cu a pum piin a hlanh tikah Josef nih rawl khonnak inn vialte kha a hun hna i rawl cu Izipt mi kha a zuarh hna; mangṭam kha Izipt ram chungah cun a fak ko cang. ⁵⁷ Cun mangṭam cu vawlei cung khuazakip ah a fah ngaingai caah vawlei cung khuazakip in Josef sin i rawl cawk awkah khan Izipt ram ah cun an ra.

¹ Jakob nih Izipt ram ah rawl a um ti kha a theih tikah a fapale kha a thawh hna i, "Zeicahdah zeihmanh tuah loin hika ah hin nan dir ko. ² Izipt ram ah rawl a um ti kha ka theih; cuka ah cun vung kal u law mangṭam in kan thih nakhnga lo vung kan cawkpiak u," a ti. ³ Cucaah Josef ule pahra kha Izipt ram i rawl vung cawk awkah khan an kal. ⁴ Jakob nih Josef chuahpi Benjamin kha cu a kalter lo, a thi sual lai ti a phang. ⁵ Kanaan ram i mangṭam a tlun caah cun Israel fapa hna cu midang he khan rawl cawk ah cun an ra ve. ⁶ Josef nih cun Izipt ram uktu a si bantukin rawl cu vawlei cung mi vialte kha a zuarh hna. Cucaah Josef ule zong cu an ra i a hmaiah cun an kun. ⁷ Josef nih a ule kha a hmuh hna tikah a rak hngalh hna, asinain a hngal lo bantukin aa umter. Biahrang ngaiin a chawnh hna i, "Khuazei in dah nan rat?" a ti hna. Annih nih, "Rawl cawk ah Kanaan ram in kan ra," tiah an leh. ⁸ Josef nih khan a ule cu a rak theih ko hna, sihmanhsehlaw annih nih cun an hngal lo. ⁹ Anmah kong i mang a manhmi kha a hun hngalh i, "Mingiatu nan si; kan ram a dernak zawn kawl awkah nan ra," a ti hna. ¹⁰ Annih nih, "Asilo, bawipa, na salle hi rawl cawk ah kan ra ko. ¹¹ Kan dihlak hin unau chuakkhat kan si. Mingiatu kan si lo, bia hmaan a chimmi kan si, bawipa," tiah an leh. ¹² Josef nih cun, "A si lai lo! Kan ram hi khuazeika zawn dah a der ti ngiat duh ah nan ra ko," a ti hna. ¹³ Annih nih, "Bawipa, kannih hi unau hleihnih chuak kan si, pa khat hrin kan si i kan pa cu Kanaan ram i a ummi a si. A ngakchia bik cu atu hi kan pa sinah a um i pakhat cu a thi cang," an ti. ¹⁴ Josef nih cun, "Ka chimning te cu nan si ko. Mingiatu nan si ko. ¹⁵ Nan si si lo hngalhnak ah kan hneksak hna lai: Faro min chalh in chiat ka ser, nan nau hniang bik hika i a rat hlan cu nan kir kho lo. ¹⁶ Cucaah cun mi pakhat i thlah u law amah cu va ko u. Nan chimmi bia hi a hmaan le hmaan lo aa hliah hlan cu a dang cu thong ah nan um lai. Cu ti a si lo ahcun, Faro min chalh in, mingiatu nan si hrimhrim ko," a ti. ¹⁷ Cuticun thong ah ni thum a thlak hna. ¹⁸ A ni thumnak ni ah Josef nih a thawh hna i, "Kei cu Pathian biami ka si caah hi ka chimmi nan tuah ahcun nan nunnak cu nan luat lai: ¹⁹ Nannih cu lihchim lomi nan si ahcun, thong i an in thlak hnanak inn ah khan pakhat lawng nan taang lai i a dang cu rawl ei awk a ngei lomi nan innchungkhar hna sinah khan nan rawl cawkmi cu nan hei phor lai. ²⁰ Nan nau hniang bik kha biatak nan ka chim maw chim lo ti fiannak ah nan ratpi hrimhrim lai i cu ti nan tuah ahcun thah nan si lai lo," a ti. Annih zong, cu bantukin tuah awk cu an hna a tla. ²¹ Pakhat le pakhat kha, "Kan nau cung i ṭhat lonak kan rak tuah kha kan rak palh taktak; ka bawm ko sawh u tiah a rak kan nawl i a harnak kan hmu ko na i a bia kan rak theih duh lo kha! Kha ruangah khan atu harnak kan phak hi a si," tiah an i ceih. ²² Reuben nih khan, "Ngakchiapa kha harnak pe hlah u kan ti hna i nan rak ngai duh lo cu ta. Atu cu amah thih ruangah khan hi ton kan tong," a ti hna. ²³ Josef nih khan an chimmi cu a hngalh ko, sihmanhsehlaw anmah chawnhnak ah holh lettu kha a hman caah, annih nih cun kan chimmi a hngalh ti kha an hngal lo. ²⁴ Josef cu a kal i a ṭap. An sinah bia ka chim kho cang lai a tiin a ra kir i Simeon kha a thim i an hmaika ah cun a khih. ²⁵ Josef nih an sawngkhoi ah rawl a khat tein nan rawnpiak hna lai, cun an tangka kha an sawngkhoi ah nan sanhpiak cio hna lai i riahcaw nan ronh cio hna lai tiah nawl a pek hna i a chim bang cun an tuahpiak hna. ²⁶ Unau rual nih khan an cawkmi rawl cu an laa kha an phorhter hna i an kal. ²⁷ Zan i an riahnak hmun ah khan ka laa rawl ka pe lai tiah pakhat nih a sawngkhoi kha a vun kau i a kaa ah a tangka kha a hmuh. ²⁸ "Ka tangka an ka khirh ṭhan ai e," tiah a unau pawl kha a ti hna i, ’Ka sawngkhoi chungah a rak um ko," tiah a chimh hna. An khuaruah a har. Thinphang ngaiin pakhat le pakhat cu, "Pathian nih hin kan cungah zeidah a tuah hnga?" an i ti. ²⁹ Kanaan ram i an pa Jakob sin kha an phak tikah an cung i a tlungmi thil vialte kha an chimh: ³⁰ "Ram uktu bawi nih awhrang in a rak kan chawnh i kan ram ngiat awkah a rami nan si," a kan ti. ³¹ Kannih nih, "Mingiatu kan si lo, miding kan si. ³² Unau hleihnih chuak kan si, pa khat hrin kan si. Pakhat nih cun a kan thihtak cang i a ngakchia bik cu kan pa sinah Kanaan ram ah a um," kan ti. ³³ Cun mipa nih cun a kan thawh i, "Miding nan si le si lo cu hitin ta ka hngalh lai: Ka sinah pakhat nan taang lai i a dang cu mangṭam a ingmi nan innchungkhar hna rawl hei phorh awkah nan tlung lai. ³⁴ Cun nan nau hniang bik cu ka sinah nan ratpi lai. Cu ti nan tuah ahcun miding nan si, mingiatu nan si lo ti kha ka hngalh lai; nan unaupa kha kan pek ṭhan hna lai i hi ram chungah hin chaw nan let kho lai, a kan ti," an ti. ³⁵ An sawngkhoi kha an vun tlen cio tikah an phaisa sawngkhoi cio kha an sawngkhoi chung cio ah cun an rak um; an phaisa sawngkhoi kha an hmuh hna tikah anmah he an pa he an thin a phang. ³⁶ An pa Jakob nih cun a thawh hna i, "Fa loin pei nan ka chiah lai hi. Josef a lo cang; Simeon a lo cang; atu Benjamin zong kalpi nan duh fawn. A ingtu cu keimah ṭheo ka si ko," a ti. ³⁷ Reuben nih a pa cu a thawh i, "Benjamin kha na sin i ka kirpi ṭhan lo ahcun ka fapa pahnih kha na thah khawh hna. Keimah ṭuanvo ah chia ko, ka rak kirpi hrimhrim lai," a ti. ³⁸ Asinain Jakob nih, "Ka fapa nih cun an zul kho hna lo; a u a thi cang, amah lawng a tang. Lampi ah a thi sual hnga. Ka cung i nan tlunter sual ding ngaihchiatnak hi ka ing kho lai lo; ka tar tuk cang, a ka thah sual lai," a ti.

¹ Kanaan ram chung mangṭam cu a zual chin, ² Jakob innchungkhar nih Izipt in an rak phorhmi rawl kha an ei dih tikah Jakob nih khan a fapale cu, "Vung kal ṭhan u law rawl cu tlawmpal tal kan cawkpiak ko kun u," a ti hna. ³ Judah nih a thawh i, "Kan naupa kan i ṭhit lo ahcun, mipa nih khan nan ka tong kho hrimhrim lai lo tiah fek tein a kan ti. ⁴ Kan naupa kha kan sin i kalter na sian ahcun kan kal lai i rawl cu kan vung in cawkpiak hna lai. ⁵ Na sian lo ahcun, kan kal lai lo, zeicahtiah mipa nih khan, ’Nan naupa nan run i ratpi lo ahcun nan ka tong kho lai lo,’ tiah a kan ti," a ti. ⁶ Israel nih cun, "Zeicahdah mipa cu nau dang pakhat kan ngei tiah nan va chimh? Nan chimhnak thawngin ka caah nan harter tuk," a ti. ⁷ Annih nih, "Mipa nih cun kanmah kong le kan innchungkhar kong kha a kan hal lengmang i, ’Nan pa a nung rih maw? Nau nan ngei maw?’ ti hoi hna in a kan ti i a kan halmi cu leh lo awk a ṭha lo. Nan nau nan i ratpi lai a kan ti lai ti kha a ruah awk hrimhrim kan rak hngal lo," tiah an leh. ⁸ Judah nih khan a pa Israel cu, "Ngakchiapa cu keimah sinah kalter ko, cun kan i tim lai i kan kal ko lai. Cu ti lawnglawng cun kan dihlak in, nangmah he kan fale he, kanmah he rawl loin kan thi lai lo. ⁹ Ka nunnak hin amah caah bia kaa kam; amah kong ah hin keimah cungah ṭuanvo na chiah khawh. Na sinah himte le dam tein ka kirpi ṭhan lo ahcun na hmaiah ka nun chung vialte mawhchiatnak cu ka in lai. ¹⁰ Rak kal u si law cu, atu hi voi hnih kan i let manh cang hnga," a ti. ¹¹ An pa Israel nih cun, "Cu ti bantukin a si awk a si ahcun, hitihin tuah u: hi ram chung thil chuak ṭha bikbik kha i phorh hna u, mitsur thei car tlawmpal, khuaihliti tlawmpal, hangṭamh, hru thei le almon thei, hi hna hi nan sawngkhoi chungah i sanh hna u law mipa cu laksawng ah vung phorh u. ¹² Cun phaisa kha a let hnih in i phorh u, zeicahtiah nan sawngkhoi kaa i an chiah ṭhanmi tangka kha nan khirh ṭhan hna awk a si lai. An palh sual caah a si lai. ¹³ Nan nau cu i kalpi u, i tim u law mipa sinah cun vung kal ṭhan u. ¹⁴ Lianngan Bik Pathian nih nannih cu in zaangfah hna seh law mipa nih cun nan unaupa kha le Benjamin cu ka sinah rak kirter hna seh. Ka fale nih nan ka thihtak a si ahcun thih tak pei dik a si ko lai," a ti. ¹⁵ Cucaah laksawng kha an i phorh i tangka zong kha a let hnih in an i phorh; Benjamin zong kha an i kalpi. An i tim i Izipt ah cun an vung kal i Josef hmaiah cun an vung chuak. ¹⁶ Josef nih Benjamin kha an sin i a hmuh tikah, a inn a zohtu kha a thawh i, "Hi mi hna hi inn ah khan hei kalpi hna; sa pakhat in va that law va chuang, chun ah ka sinah rawl an ei lai," a ti. ¹⁷ A inn zohtu nih khan Josef nih a chim bantuk khan a tuah i Josef inn ah khan a kalpi hna. ¹⁸ A inn i an kalpi hna caah cun an thin a phang i, "Kan hnulei tan i kan phaisa kan sawngkhoi chung i an kan khirhmi ruangah khan a si ko lai. An kan zuanhnawh lai i sal ah an kan tlaih lai i kan laa hi an i lak hna lai," tiah an ruah. ¹⁹ Cucaah Josef inn zohtu cu an va fuh i innka hram ah khan an va chawnh i, ²⁰ "Bawipa, zaangfahnak in chawnh kan in duh. Hmasa ah hika ah rawl cawk awkah kan ra cang. ²¹ Riah hmun kan phak i kan sawngkhoi kan kau cio tikah kan sawngkhoi kaa ah khan kan tangka kha kan hmuh cio — kan tangka a dihlak tling tein, a rih ning zong a sining tein. Cucu atu ah hin kan rak i phorh ṭhan hna. ²² Cun rawl dang cawknak dingah phaisa zong a dang kan i phorh fawn. Aho nih dik kan phaisa cu kan sawngkhoi chungah a rak sanh kan hngal lo," an ti. ²³ Cun inn zohtu nih cun, "Nan thin phang hlah u. Nan lungre thei hlah u. Nan Pathian, nan pa Pathian nih hi tangka cu nan sawngkhoi chungah khan an chiahpiak hna. Hmasa i nan ka cawknak phaisa cu ka hmuh ko," a ti. Cun Simeon kha an sinah a ratpi. ²⁴ Josef inn chungah khan annih cu a luhpi hna. An ke ṭawlnak ah ti a pek hna i an laa kha rawl a pek hna. ²⁵ Josef chun i a rat tik caah cun an laksawng cu an rak timh hna; cuka ah rawl kan ei lai ti kha an theih. ²⁶ Josef cu inn i a ra ṭin tikah inn chungah cun an laksawng kha an va pek i a hmaiah khan an kun. ²⁷ An dam dam lo kha a hal hna i, "A kong nan ka chimhmi nan pa patar kha zeitindah a um? A nung rih maw? A dam ko maw?" a ti. ²⁸ Annih nih, "Kan pa na salpa cu a nung ko rih i a dam ko," tiah an leh. Cun an khuk an i bil i a hmaiah cun an lu an khun. ²⁹ A chuahpi a nau Benjamin kha Josef nih a hmuh tikah, "Hi pa hi nan ka chimhmi nan nau hniang bik cu a si ṭheo lai. Ka fapa, Pathian nih thluachuahnak in pe ko seh," a ti. ³⁰ A nau a hmuh tikah Josef cu a hnarno a ṭam i cucaah cun khulrang in a kal. A ṭah dengmang caah a khaan chungah khan a lut zokzok i a va ṭap. ³¹ A hmai aa phiah dih in a ra chuak i zei poi lo bantuk tein i umter in, rawl cu kan pe u, tiah a ti hna. ³² Josef cu amah dang tein an pek, cun a unau pawl cu cabuai a dang pakhat ah an pek hna i Josef sinah rawl a eimi Izipt mi cu anmah dang tein an pek ve hna, zeicahtiah Izipt mi nih cun Hebru mi he rawl ei ṭi cu ningzak ah an rel. ³³ Josef unau pawl cu Josef hmaiah khan an kum aa channing tein aa chang diahmah in an ṭhutter hna, upa bik in ngakchia bik tiang cuticun an ṭhutter hna; cu bantukin an ṭhutter hna kha an hmuh tikah pakhat le pakhat khuaruahhar in an i zoh. ³⁴ Josef cabuai cung rawl cu an pek hna i Benjamin kha hawi nak let nga tam in an pek. Cuticun an ei an ding i an i nuam.

¹ Josef nih a inn zohtu kha nawl a pek i, "An phorh khawh zat in an sawngkhoi ah rawl kha rawnh hna law an sawngkhoi ka cio ah an phaisa kha sanh. ² Cun ngakchia bikpa sawngkhoi kaa ah khan ka ngun hrai le rawl cawknak ca i a tangka kha sanh," a ti. A chimh bantuk cun a tuah. ³ A thaizing cu zingka tein annih cu an laa hna he khan an kalter hna. ⁴ Cun khua in lamhla an kal hlanah khin, Josef nih a inn zohtu kha a thawh i, "I tim law va dawi hna. Na phak hna tikah, ’Zeicahdah thil ṭha cu thil ṭhalo in nan kan lehrulh? ⁵ Zeicahdah ka ngun hrai nan fir? Hi hrai hi ka bawipa nih dinnak ah a hmanmi hrai a si i hmailei ah zeidah a tlung lai ti zohnak i a hmanmi a si. Nan tuahmi hi thil ṭhalo ngaingai a si!" na va ti lai,’ tiah a ti. ⁶ Inn zohtu nih khan a hei phak hna tikah a chim ning te khan a va ti hna. ⁷ Annih nih, "Hi bantukin bia na chim tikah zeidah na chim duhmi a si, bawipa? Cu bantuk thil tuah ding cu a ruah in kan ruah balmi a si lo. ⁸ Kan sawngkhoi kaa i kan hmuhmi tangka kha Kanaan ram in na sin i kan rak kirpi ṭhan kha na hmuh. Zeicahdah ngun siseh sui siseh na bawipa innchung ta cu kan fir lai? ⁹ Bawipa, cu thil cu aho kan sin paoh hmanh ah na hmuh a si ahcun, cu pa cu thah si u sih, cun a taangmi cu na sal si u sih," tiah an leh. ¹⁰ Cun anih nih, "Ka hna a tla, asinain ahohmanh cu hrai a cungah hmuh a simi paoh cu ka sal nan si lai, a dang cu nan kal kho ko lai," a ti. ¹¹ Cucaah khulrang in an sawngkhoi cio kha vawlei ah an ṭhumh i an kau cio. ¹² Josef inn zohtu pa nih khan ṭha tein a kawl, upa bik in aa thawk i ngakchia bik tiang a kawl i hrai cu Benjamin sawngkhoi chungah a hmuh. ¹³ An ngaihchiat in an puan kha an thleh i an laa cu an thil an chonh hna i khuapi leiah cun an kir. ¹⁴ Judah le a unau pawl Josef inn an va phak ah khan Josef cu a rak um ko rih. A hmaiah an kun i ¹⁵ Josef nih cun, "Zeidah nan tuah? Keimah bantuk minung nih hin cun litin in nan umtuning ka hngalh khawh dih kha nan hngal lo maw?" a ti. ¹⁶ Judah nih aa thawh i, "Bawipa, na sinah zeidah kan chim khawh rua hnga! Zeitindah kan i hlihphuah khawh rua hnga. Pathian nih kan sualnak kha a phuan cang, bawipa. Kan dihlak in pei dik na sal kan si ko lai, na hrai an hmuhnak pa lawng si loin," a ti. ¹⁷ Josef nih cun, "Si hlah, si hlah, cuticun kan ti hna hnga lo. Ka hrai an hmuhnak pa lawng kha ka sal a si ko lai. A dang cu nan pa sinah himte le dam tein nan kal ko lai," a ti. ¹⁸ Judah nih Josef cu a hei fuh i, "Bawipa, na sinah luat tein biachimnak nawl ka zaangfah tuah. Bawipa, ka cungah na thin hung hlah, nangmah cu Faro bantuk hrimhrim na si ko. ¹⁹ Bawipa, nangmah nih na kan thawh i, ’Pa nan ngei maw, unau dang nan ngei maw?’ tiah na kan hal. ²⁰ Kannih nih, ’Bawipa, pa pakhat kan ngei i a tar cang; cun nau ngakchia kan ngei i cu pa cu a tar hnu i a hrinmi a si. Cu ngakchiapa i a u cu a thi i an nu i a hrinmi hna lakah amah lawng cu a nungmi a si; a pa nih cun a dawt ngaingai,’ tiah kan in leh. ²¹ Cun bawipa, na kan thawh i, ’Hika ah hin ratpi u law hmuh ka duh,’ na kan ti. ²² Cun kannih nih, ’Ngakchiapa nih cun a pa cu a kaltak kho lai lo, a kaltak ahcun a thi lai,’ tiah kan in chimh. ²³ Cun naa thawh i, ’Nan nau hniang bik nan i ratpi lo ah cun nan ka tong kho lai lo,’ na ti. ²⁴ "Cun ka pa na salpa sin i kan va kir tikah na chimmi kha kan chimh. ²⁵ Cun aa thawh i, ’Va kal ṭhan u law rawl tlawmpal tal in va kan cawkpiak u,’ a ti. ²⁶ Kannih nih, ’Kan kal kho lai lo, zeicahtiah kan nau hniang bik nih a kan zulh lo ahcun mipa kha kan tong kho lai lo. Kan nau hniang bik aa tel lawnglawng ah kan kal kho lai,’ kan ti. ²⁷ Kan pa nih cun, ’Ka nupi nih fapa pahnih a ka hrinpiak ti cu nan hngalh. ²⁸ Pakhat nih cun a ka thihtak cang. Ka ruahnak ah sa nih a seh i a thleh baoh dih ṭheo lai, ka ti, kha ri khan ka hmu ti lo. ²⁹ Cun atu cu hi pa hi nan i kalpi i a thih sual ahcun kei ka kum caah hin cun cu ngaihchiatnak nih cun thlan khor a ka phakter ko lai,’ a ti. ³⁰ - ³¹ "Cucaah cun bawipa, ka pa sinah ka va kir i ka pa nih ngakchiapa kha ka sinah a rak hmuh lo ahcun, cu cangka cun a thi ko lai. Kan pa nunnak cu hi ngakchiapa nunnak he hin aa ṭemṭawn tuk. Tlangvalpa hi kan sinah aa tel lo a hngalh ahcun a thi ko lai i na salle nih hin na salpa kan pa sampar cu ngaihchia in Sheol ah kan liamter ko lai. ³² Cun bawipa, na salpa keimah nih hin hi ngakchiapa caah hin ka nunnak in ka pa sinah bia kaa kam i, na sinah ngakchiapa hi ka rak kirpi ṭhan lo ahcun, na hmaiah mawhchiatnak cu ka nun chung vialte ka in lai, ka ti. ³³ Cucaah cun, bawipa, ngakchiapa ai ah hin keimah hi na sal ah hika ah hin ka um lai, anih tu hi a ule hna he kir hna seh. ³⁴ Zeitindah ngakchiapa tel loin ka pa sinah ka kir ngam lai? Ṭhat lonak ka pa cung i a tlun hmuh lai kha a ngamh in ka ngamh lo," a ti.

¹ Josef cu a zimuaitu hna hmaiah khan aa sum kho ti lo i, "Chuak dih hna seh," tiah a au. Josef nih a unau pawl kha aho a si a chimh hna lioah hin ahohmanh midang a sinah an um lo. ² A ik kha a than caah Izipt mi nih khan an rak theih ve i siangpahrang inn ah khan thawng cu a va thang. ³ Josef nih a unau pawl cu, "Josef ka si. Ka pa kha a nung rih maw?" a ti. Sihmanhsehlaw a unau pawl nih khan an ṭih tuk i zeihmanh an let kho lo. ⁴ Cun Josef nih cun, "Rak ka naih deuh u," a ti hna i, "Keimah cu nan nau Josef, Izipt ram i nan zuarmi kha ka si. ⁵ Hi ram i nan rak ka zuar caah hin nanmah le nanmah sual i phaw hlah u, lung ṭhalo zongin um hlah u. A ngaingai ti ahcun nan hmai i a rak ka kaltertu hi Pathian a si i nan nunnak khamhnak ding caah a rak si. ⁶ Ram chung i mangṭam a tlun hi a kum hnihnak lawng a si rih, a dang kum nga a um rih lai i cu chungah cun lothlawh zong a um lai lo, rawl ṭuan zong a um lai lo. ⁷ Vawlei cungah hin tefa nan ngeih nakhnga le nanmah cu nan dihlak in nan nundam nakhnga le a nungmi bu nganpi nan si nakhnga caah Pathian nih nan hmai i a rak ka kalter hi a si. ⁸ Cucaah cun hika i a rak ka kaltertu ngaingai hi nanmah nan si lo, Pathian a si. Faro caah pa bantuk ah a ka ser i a ram vialte cu keimah nih ka zohkhenh dih i Izipt ram vialte cu ka uk dih. ⁹ "Cucaah cun ka pa sinah khulrang in va kir u law, na fapa Josef nih, ’Pathian nih Izipt ram vialte uktu ah a ka ser, cucaah khulrang in ka sinah ra. ¹⁰ Goshen peng ah na um lai i ka pawngah na um kho lai — nangmah he, na fale he, na tule he, na tuu hna he, na meheh hna he, na caw hna he, na ngeihmi thil vialte hna he. ¹¹ Goshen i na um ahcun kan zohkhenh khawh lai. Mangṭam hi kum nga chung a um rih lai i nangmah le na innchungkhar le na ngeihmi thil vialte kha harnak ton ding kan duh hna lo,’ tiah bia an cah ti in va chim u. ¹² Cun atu cu nan dihlak in, ka nau Benjamin he bia an ruahtu hna cu keimah hrimhrim ka si kha nan ka hmuh cang. ¹³ Ka pa cu, zeitluk nawl ngei dah Izipt ram chungah hin ka si kha va chim u law nan hmuhmi thil zong kha va chim u. Cun khulrang in amah cu hika ah hin ratpi u," a ti. ¹⁴ Cun a nau Benjamin cu a kuh i a ṭap; Benjamin zong nih a kuh ve i a ṭap ve. ¹⁵ Cun a ule dang vialte kha a hnamh hna i a kuh hna i a ṭap. ¹⁶ Josef unau pawl kha an ra ti thawng cu Faro siangpahrang inn ah khan a va thang i Faro le a bawi pawl cu an i lawm. ¹⁷ Faro nih khan Josef cu, "Na unau pawl cu an thil kha an saṭil cungah khan chonh hna seh law Kanaan ram ah khan va kir hna seh. ¹⁸ Cun an pa le an innchungkhar kha va la hna seh law ka sinah ra hna seh. Izipt ram chung a chuakmi thil lak i a ṭha bik kha an ei lai. ¹⁹ "Cun Izipt ram in an nupile an fale caah rangleng zong kha i kalpi hna seh. An pa kha an va lak i an rat nakhnga chim hna. ²⁰ An thilri kaltak kha an sia herh hlah seh, Izipt ram chung vialte i hmun ṭha bik cu pei an ta a si lai cu," a ti. ²¹ Cu bantuk cun Israel fapa hna nih khan an tuah. Faro chim bangin Josef nih khan rangleng a pek hna i lampi ca riahcaw zong a rawnh hna. ²² Cun voi khat thil thlennak cio zong a pek hna, Benjamin tu cu ngun tangka za thum le voi nga thil thlennak a pek. ²³ A pa kha Izipt ram chung thil chuakmi lak i a ṭha bikbik laa pahra phor a kuat i a pa nih lampi i a run ei awkah rawl le changreu le rawl dangdang kha laa pahra phor a kuat fawn. ²⁴ A unau hna cu a hei thlah hna i, "Lampi ah lungrethei in va um hlah u," tiah a ti hna. ²⁵ Izipt cun an chuak i Kanaan ram ah an pa sin kha an phan. ²⁶ "Josef kha a nung ko rih. Amah cu Izipt ram vialte a uktu a si," an ti. Jakob cu a lung a caw i a zum kho hna lo. ²⁷ Sihmanhsehlaw Josef nih a chimhmi vialte hna kha an chimh i amah Izipt ram i a kalnak ding caah Josef nih rangleng a kuatmi kha a hmuh tikah a lung aa lawm ngaingai ṭhan. ²⁸ Cu tikah aa thawh i, "Ka fapa Josef a nung rih ti ka theih hi a za cang! Ka vung kal lai i ka thih hlanah ka vung hmuhtak lai," a ti.

¹ Israel nih a ngeihmi thil vialte cu a timh dih i Beer-sheba ah a kal, khika ah a pa Isak Pathian sinah khan raithawinak a tuah. ² Pathian nih Israel cu zan ah langhnak in a chawnh i, "Jakob, Jakob," a ti i anih nih, "Asi, na salpa nih ka ngaih ko," tiah a leh. ³ "Keimah cu Pathian, na pa i a Pathian ka si. Izipt ram kal cu ṭih hlah; cuka ah cun na tefa hna cu miphun ngan ah ka ser hna lai. ⁴ Izipt ram ah cun ka vun in kalpi lai i na tefa cu hika ah hin ka kirpi ṭhan hna lai. Na thih tikah Josef nih an umpi lai," a ti. ⁵ Jakob cu Beer-sheba khan aa thawh. Israel fapa hna nih khan an pa Jakob le an fale a hmemi hna le an nupile hna kha Faro nih an i cit awk ca i a kuatmi rangleng chungah khan an citter hna. ⁶ An saṭil hna le an ngeihmi thil, Kanaan ram chung i an hmuhtonmi vialte he khan Izipt ram ah cun an kal. Jakob nih khan a tefa vialte cu aa kalpi dih hna: ⁷ a fapa hna he a fapale fa hna he a fanu hna he a fanu fale hna he aa kalpi dih hna. ⁸ Israel tefa Izipt ram ah a vung kalmi hna cu an min hihi an si. Jakob le a fapa hna cu: Jakob fapa upa bik Reuben, ⁹ cun Reuben fapa hna cu: Hanok, Pallu, Hezron le Karmi. ¹⁰ Simeon fapa hna cu: Jemuel, Jamin, Ohad, Jakhin, Zohar, le Kanaan minu fapa Shaul. ¹¹ Levi fapa hna cu: Gershon, Kohath le Merari. ¹² Judah fapa hna cu: Er, Onan, Shelah, Perez le Zerah (Er le Onan cu Kanaan ram ah an thi). Perez fapa cu Hezron le Hamul an si. ¹³ Isakhar fapa hna cu: Tola, Puvah, Job le Shimron. ¹⁴ Zebulun fapa hna cu: Sered, Elon, le Jahleel. ¹⁵ Hi hna hi an far Dinah he, Mesopotamia ram ah Leah nih Jakob a hrinpiakmi kha an si. An dihlak ah Leah nih a hrinpiakmi a tefa cu sawm thum le pathum an si. ¹⁶ Gad fapa hna cu: Zefon, Haggi, Shuni, Ezbon, Eri, Arodi, le Areli. ¹⁷ Asher fapa hna cu: Imnah, Ishvah, Ishvi, Beriah, le an far Serah. Beriah fapa hna cu Heber le Malkhiel an si. ¹⁸ Hi hleiruk hi Zilpah nih Jakob a hrinpiakmi tefa an si; Zilpah cu Laban nih a fanu Leah a kalhmi kha a si. ¹⁹ Jakob nupi Rachel fapa cu Josef le Benjamin an si. ²⁰ Izipt ram ah On khua tlangbawi Potifera fanu Asenath nih khan Izipt ram ah Josef cu Manasseh le Efraim a hrinpiak hna. ²¹ Benjamin fapa hna cu: Bela, Bekher, Ashbel, Gera, Naaman, Ehi, Rosh, Muppim, Huppim, le Ard. ²² Hi pahleili hna hi Rachel nih Jakob a hrinpiakmi tefa an si. ²³ Dan fapa cu Hushim a si. ²⁴ Naftali fapa hna cu: Jahzeel, Guni, Jezer, le Shillem. ²⁵ Hi pasarih hi Bilhah nih Jakob a hrinpiakmi tefa an si; Bilhah cu Laban nih a fanu Rachel a kalhmi kha a si. ²⁶ Jakob tefa Izipt ram i a kalmi kha a fapale nupi hna rel loin sawm ruk le paruk an si. ²⁷ Izipt ram ah khan Josef nih fapa pahnih a hrin hna i Jakob innchungkhar mi dihlak Izipt ram i a kalmi cu sawm sarih an si. ²⁸ Jakob nih Judah kha Goshen ram i rak kal chung awkah Josef sinah a thlah. Goshen ram kha an phak tikah ²⁹ Josef nih cun a rangleng kha a timhter hna i a pa Israel don awkah khan Goshen ah cun a kal. An i ton tikah a pa cu a hngawng in a kuh i a kuh bu cun saupi a ṭap. ³⁰ Israel nih Josef cu a thawh i, "Nangmah kan hmuh cang hnu le na nung rih ti ka theih hnu paoh ah cun ka thih zongah zeihmanh a poi ti lo," a ti. ³¹ Cun Josef nih a unau hna le a pa innchungkhar mi hna cu, "Ka unau pawl le ka pa innchungkhar mi Kanaan ram i a ummi kha ka sin an ra phan cang. ³² Annih cu tuukhal an si i saṭil kha an khal hna; an tuurun vialte le an saṭil run vialte hna le an ngeihmi thil vialte hna kha an rak i ratpi hna,’ tiah Faro kha ka va chimh a hau lai. ³³ Cun Faro nih an auh hna i ’Nan rianṭuanmi zeidah a si?’ tiah an hal hna tikah, ³⁴ ’Kannih cu bawipa, kan pupa nih an rak tuah tawn bangin kan no lio tein saṭil zohkhenh kan si,’ nan ti lai. Cu ti nan ti ahcun Goshen ram ah hin nan um kho lai," a ti hna. Hi bangin a chimh hna cu Izipt mi nih khan tuukhal paoh cu an duh hna lo caah a si.

¹ Cucaah Josef cu a va kal i Faro cu a va chimh i, "Kanaan ram in ka pa le ka unau pawl kha an saṭil le an cawrun hna le an ngeihmi thil vialte he an ra phan cang i atu cu Goshen ram ah an um," a ti. ² Cun aa kalpimi a unau panga hna kha Faro hmaiah cun a chuahpi hna. ³ Annih cu Faro nih khan, "Zei rianṭuan dah nan si?" tiah a hal hna i annih nih, "Kannih cu kan pu kan pa hna bantukin tuukhal kan si, bawipa," tiah an leh. ⁴ "Cun bawipa, hika ram i kan ratnak cu Kanaan ram chungah khan mangṭam a fak tuk i kan saṭil run caah khan ram zeihmanh a um lo. Cucaah cun bawipa, Goshen ram chungah hin kan umter ko tiah kan in nawl," an ti. ⁵ - ⁶ Faro nih Josef cu a thawh i, "Goshen ram chungah cun um hna seh, cun annih lakah thil ti khomi na hngalh hna ahcun ka saṭil zohkhentu ah ka chiahpiak hna," a ti. Jakob le a fapa hna cu Josef umnak Izipt ram i an va kal ah khan Izipt siangpahrang Faro nih khan a rak theih. Josef cu a thawh i, "Atu cu na pa le na unau pawl kha na sinah an rat cang caah Izipt ram cu a dihlak in nangmah nih na duhning in tuah ko. Ram chung a ṭhatnak bik hmun ah umter hna," a ti. ⁷ Cun Josef nih a pa Jakob kha a ratpi i Faro hmaiah khan a chuahpi. Jakob nih Faro kha thluachuahnak a pek. ⁸ Faro nih khan, "Kum zeizat dah na ti?" tiah a hal. ⁹ Jakob nih cun, "Ka vahvaih chung hi kum za le sawm thum a si cang. Hi kum hna hi a harmi kum an si. Ka pupa hna an vahvaih kum he tuak chun ahcun tlawmte a si ko," tiah a leh. ¹⁰ Jakob nih cun Faro cu thluachuah a pek tak i a kal. ¹¹ Cun Josef nih cun a pa le a unau pawl cu Izipt ram chungah khan umnak a serpiak hna i Faro nawl peknak bangin Izipt ram chung i ram ṭha bik Rameses ram ah cun thilri a ngeihter hna. ¹² Josef nih cun a pa le a unau pawl le a pa innchungkhar chung mi vialte kha a hniang bik tiangin rawl a pek hna. ¹³ Mangṭam cu a fak tuk hringhran i vawlei cung khuazei hmanh ah rawl a um lo i an rawl a ṭam caah Izipt ram mi hna le Kanaan ram mi hna cu an der ngaingai. ¹⁴ Izipt mi hna le Kanaan mi hna nih rawl an cawknak an tangka vialte cu Josef nih khan a pumh dih hna i Faro siangpahrang inn ah khan a chiah hna. ¹⁵ Izipt ram tangka le Kanaan ram tangka vialte cu a dih tikah Izipt mi vialte cu Josef sinah khan an ra i, "Kan thihter sawh hlah, rawl cu kan pe ko; kan caah thil pakhatkhat tuah ko tuah. Kan phaisa a dih cang," an ti. ¹⁶ Josef nih cun, "Nan saṭil rak pu hna u. Nan phaisa a dih cang ahcun nan saṭil cun rawl hi i thlen u," a ti hna. ¹⁷ Cucaah an saṭil cu Josef sinah khan an rak put hna i Josef nih khan an rangtum hna le tuu hna le meheh hna le caw hna le laa hna cu rawl khan a rak thlen hna. Cu kum cu an saṭil man ah khan rawl cu a pek hna. ¹⁸ A kumvoi ah an ra ṭhan i, "Bawipa, na sinin zeihmanh kan thup lai lo, kan tangka cu a dih cang i kan saṭil cu nangmah ta an si cang. Atu cu nangmah pek awkah zeihmanh a tang ti lo, kan pum le kan vawlei dah ti lo cu. ¹⁹ Kan thihter hlah! Zei zeital dik kan tuahpiak ko. Kan vawlei kha kan sunghter hlah. Nangmah nih rawl man ah kan lakpiak. Faro sal kan si lai i kan vawlei cu amah ta an si lai. Rawl loin kan thih nakhnga lo le kan vawlei hi thetse ram ah an can nakhnga lo thlaici kan pe tuah," an ti. ²⁰ Josef nih Izipt ram chung vawlei vialte cu Faro caah a cawk dih; mangṭam cu a fah tuk hringhran caah a mi kip nih an lo kha an zuarh cio ko i Izipt ram cu a dihlak in Faro ta a si. ²¹ Izipt ram khattelei deng in khattelei deng tiang mi vialte cu Josef nih sal ah a ser dih hna. ²² A cawk lomi ram cu tlangbawi hna ram a simi lawnglawng kha an si. Annih cu Faro nih ei awk a pek hna caah an ram zuarh cu a hau lo. ²³ Josef nih mizapi cu a thawh hna i, "Nihin ah Faro caah nanmah le nan ram cu kan cawk cang hna. Hika ah hin nan caah thlaici a um. I lak u law nan lo ah tuh hna u. ²⁴ Nan ṭuan tikah cheu nga cheu khat kha Faro nan pek lai. A taangmi cu nanmah caah a si lai, nan lo tuh awk thlaici ca le nanmah le nan innchungkhar hna le nan fale hna ei awk rawl caah a si lai," a ti. ²⁵ Annih nih an leh i, "Kan nunnak kha na kan khamh; kan cungah, bawipa, na ṭha i Faro sal kan si ko lai," an ti. ²⁶ Cuticun Josef nih Izipt ram chungah cun upadi pakhat a ser i cu upadi ah cun rawl a chuakmi vialte kha cheu nga cheu khat cu Faro ta a si. Cu upadi cu nihin tiang hin a hmun ko. Tlangbawi hna ram lawnglawng Faro ta ah cun an cang lo. ²⁷ Israel mi cu Izipt ram ah khan an um i an rum i fa tampi an ngei. ²⁸ Jakob cu Izipt ram ah khan kum hleisarih a nung, a kum kum za le sawm li le kum sarih a si tiang a nung. ²⁹ A thih caan kha a naih tikah a fapa Josef kha a auh i, "Ka sinah bia i kam tuah. Na kut kha ka phei tangah chia law, na cungah ka ṭha lai i zumhawktlak tein ka um lai. Izipt ram ah kan vui lai lo tiin, bia i kam. ³⁰ Ka pu le ka pa an vui hnanak hmun ah khan vui ka duh ve. Cucaah Izipt ram in ka chuahpi law an thlan ah khan ka vui," tiah a ti. Josef nih cun, "Na chim bangin ka tuah lai," tiah a leh. ³¹ Israel nih cun, "Ka tuah lai, tiah bia i kam," a ti. Josef nih bia cu aa kam i Israel nih cun a ihkhun lu lei hoih khan a lu a khun.

¹ Cu hnu tlawmpal ah cun Josef cu, na pa a zaw, tiah an chimh. A fapa pahnih Manasseh le Efraim kha aa kalpi hna i a pa cu an va zoh. ² Jakob cu, na fapa Josef kha nangmah zoh ah a ra, tiah an chimh tikah, a hun i hrim i ihkhun cungah cun a ṭhu. ³ Jakob nih Josef cu a thawh i, "Lianngan Bik Pathian cu Kanaan ram Luz khua ah ka sinah a lang i thluachuah a ka pek. ⁴ A ka thawh i, ’Fa tampi kan pek lai i na tefa cu miphun tampi ah an i chuah lai; hi ram hi na tefa cu ka pek hna lai i an ram zungzal in a si lai,’ a ti. ⁵ Na fapa pahnih, hika i ka rat hlanah Izipt ram i na rak hrinmi hna zong kha keimah ta an si; Reuben le Simeon kha ka fa an si tluk tein Efraim le Manasseh zong hi ka fa an si lai. ⁶ Sihmanhsehlaw anmah hnu i na hrinmi hna na fale cu nangmah ta an si lai; asinain ro kongah cun an ule min sinah khan rel chih an si lai. ⁷ Zeicahdah hi bantukin ka tuah ti ahcun Mesopotamia ram in ka ra kir lioah keimah ngaihchiattertu dingah na nu Rachel nih lampi ah Kanaan ram chung Efrath khua kan hei phak deng ah khan a ka thihtak caah a si. Cun amah cu Efrath lei kalnak lam ah cun ka vui," tiah a ti. (Efrath cu Bethlehem a si). ⁸ Israel nih Josef fapale kha a hmuh hna tikah, "Hi ngakchia hi ahodah an si?" tiah a ti. ⁹ Josef nih, "Pathian nih Izipt ram ah a ka pekmi ka fapa an si," tiah a leh. Israel nih cun, "Ka sinah ratpi hna law thluachuah ka pek hna lai," a ti. ¹⁰ Israel cu a tar cang caah a mit khua a hmu kho set ti lo. Josef nih a pawngah cun a hei kalpi hna i a rak pom hna i a rak hnamh hna. ¹¹ Israel nih Josef cu, "Nangmah hi kan hmuh ṭhan ti lai tiah ka rak ruat lo, sihmanhsehlaw atu cu Pathian nih na fale hmanh a ka hmuhter hna," a ti. ¹² Cun Josef nih Israel phei cung cun a ṭhial hna i a hmaiah cun a kun. ¹³ Josef nih an pahnih in an kut in a tlaih hna. Efraim kha a orhlei kut in a tlaih, zeicahtiah Israel kehlei ah um seh ti a duh, Manasseh kha a kehlei kut in a tlaih, zeicahtiah Israel orhlei ah um seh ti a duh, cuticun Israel sinah cun a hei kalpi hna. ¹⁴ Sihmanhsehlaw Israel nih khan a kut cu a rak kalhkeh hna i a orhlei kut cu ngakchia deuh a simi Efraim lu cungah khan a chiah i a kehlei kut cu upa deuh a simi Manasseh lu cungah khan a chiah. ¹⁵ Thluachuahnak a pek hna i: Ka pu Abraham le ka pa Isak, a hmaiah a rak umtertu hna Pathian nih hi ngakchia hi thluachuah pe ko hna seh. Nihin ni tiangin a ka hruai zungzaltu Pathian nih thluachuah vanluh pe ko hna seh. ¹⁶ Harnak phun zakip chungin a ka chuahtu vancungmi nih thluachuah pe ko hna seh. Keimah ka min le ka pu Abraham min le ka pa Isak min cu an chungah hin nung seh. Fa tampi ngei hna seh law bu nganpi ah i chuah hna seh," a ti. ¹⁷ A pa nih Efraim lu cungah a orhlei kut a chuan kha Josef nih a hmuh tikah a awlok a chong i cucaah a pa kut cu Efraim lu cung khan a lak i Manasseh lu cungah a chiah. ¹⁸ A pa cu, "Ka pa, hitihin cun a si lai lo. Hi pa hi pei upa deuh a si cu, amah cungah hin ta na orhlei kut kha na chiah," a ti. ¹⁹ A pa nih cun a duh lo i, "Ka fa, ka hngalh ko. Manasseh tefa hna zong hi mi lianngan an si ko lai. Asinain a nau pa cu amah nakin a ngan deuh lai a tefa cu miphun lianngan pipi ah an i chuah lai," a ti. ²⁰ Cucaah cu ni ah cun thluachuah cu a pek hna i, "Israel mi hna nih thluachuah an i pek tikah, nan min kha an hman hna lai i, ’Pathian nih Efraim le Manasseh bantuk, in siter hna seh,’ an i ti lai," a ti. Cuticun Jakob nih Efraim cu Manasseh hmaiah a chiah. ²¹ Cun Israel nih Josef cu, "Ka thi dengmang cang ti cu na hngalh. Asinain Pathian nih an umpi lai i na pupa hna ram ah khan an kirpi ṭhan lai. ²² Na unau a dang ahohmanh si loin nangmah kha ram ṭhatnak i a ummi Amor mi hna sinin ka nam le ka li in ka lakmi Shekem kha kan pek," a ti.

¹ Jakob nih a fapale kha a auh hna i, "I pum u law, hmailei ah nan cungah zeidah a tlung lai ti kha kan chimh hna lai," a ti. ² "Jakob fapa hna, i pum u law ngai tuah u, nan pa Israel chimmi cu ngai tuah u. ³ "Reuben, nangmah cu ka hrin hmasa bik, ka ṭhawnnak le ka thazang theitlai hmasa bik, ka fale vialte lakah kaa chawr bik le a ṭhawng bik na si. ⁴ Asinain nangmah cu tilian bantukin a fek lomi na si caah biapi bik na si lai lo, na pa ihkhun cungah na kai i ka ihkhun kha na thurter. ⁵ "Simeon le Levi hi unau an si, an hriamnam cu thil ṭhalo tuahnak ah an hman. ⁶ An biathli ah khan kaa tel duh lai lo, an i pumhnak ah khan ka um duh lai lo, zeicahtiah an thin a hun tikah mi kha an thah hna i siamsaknak men ah cawtum kha an tha an pheh hna. ⁷ An thinhunnak cu ṭih a nun tuk caah an cungah chiatserhnak nih tlunhnawh hna seh, an thinlinhnak cu a puarhran tuk caah chiat nih tlunhnawh ko hna seh. Jakob ram chungah ka ṭhek hna lai i Israel mi lakah ka ṭhen dih hna lai. ⁸ "Judah, na unau nih an in thangṭhat lai. Na ral cu an hngawng in na tlaih hna lai; Na unau hna kha na hmaiah an kun lai. ⁹ Judah cu chiandeih fa a sasehmi a that i a kua ah a kir ṭhanmi a si; Chiandeihpi bantukin a bawk i ahohmanh nih an helh ngam lomi a si. ¹⁰ A bawifung kha a hler i a ke le a ke karlak ah a chiah; a lianhngannak cu, a ngeitu taktak a rat i, cu nih cun mi vialte a uk hna hlantiang amah nih aa chiah ko lai. ¹¹ A laa no kha mitsur ruang, mitsur ruang ṭha bik phun ah khan a hren; a thilpuan cu mitsur zu chungah khan a suk, a sen in a senmi mitsur zu chungah khan. ¹² Mitsur zu a din tuk caah a mit cu sen tertur in an um i cawhnuk a din tuk caah a ha cu vaar vervur in an um. ¹³ "Zebulun cu rili kamah khua a sa lai, a rili tlang hna cu lawng dinhnak hmun an si lai; a ram cu Sidon tiang a phan lai. ¹⁴ "Issakhar cu a ṭhawngmi laa a si, asinain a thil phorhmi tom hnih hna karlak ah khan a bawk. ¹⁵ Aa dinhnak hmun kha zeitluk in dah a ṭhat ti le, a umnak ram kha zeitluk in dah a nuamh ti kha a hmuh tikah a phorhmi thil kha phorh awkah aa hnek ṭhan i sal bantukin rian har a ṭuanmi ah a cang. ¹⁶ "Dan cu a mi hna uktu a si lai, A mi hna cu Israel phun cio bantuk kha an si lai. ¹⁷ Dan cu lam pawng i a um mi rul, sivai ṭha ngaingaimi rul a si. Rang ke ah cuk a hmangmi rul a si i rang aa citmi kha an tla tawn. ¹⁸ "Maw Bawipa na khamhnak cu ka hngak ko. ¹⁹ "Gad cu mifir run nih an nam lai. sihmanhsehlaw amah nih a rak nam ve hna lai i a dawi hna lai. ²⁰ "Asher ram ah rawl thawthaw a chuak lai; siangpahrang ca i aa tlakmi rawl a chuak lai. ²¹ Naftali hi a duh in a tlongmi sazuk, fa dawhdawh a hringmi a si. ²² "Josef hi laa le a si, Cerh pawng i a ummi laa le a si, a fale cu tlangpang ah an um. ²³ Sakah thiam nih khan an nam, an li le an thal he an dawi; ²⁴ Sihmanhsehlaw an li cu a kiak dih, an baan tha cu a cat dih. Cu a chattu cu Jakob Pathian Ṭhawng lianhngannak le Israel Lungpi Tuukhal min a si. ²⁵ Nangmah bawmtu cu na pa i a Pathian, Nangmah thluachuah an petu Lianngan Bik Pathian kha a si. Cunglei van ruah thluachuahnak le Tanglei ti thuk thluachuahnak le Hnuk thluachuahnak le Paw thluachuahnak le ²⁶ Rawl thluachuahnak le Pangpar thluachuahnak le Hlan piin a rak ummi tlang cung thluachuahnak le Zungzal hmunmi tlang cung i thil dawh le thil ṭha a ummi vialte, Hi vialte hi Josef lu cungah i fu hna seh, A unau hna sinin thleidanmi cal cungah cun um hna seh. ²⁷ "Benjamin hi sa a seh lengmangmi cenghngia a si; Zinglei ah a sehmi kha a ei, Zanlei zongah a seh ciami kha a phaw lengmang ṭhiamṭhiam ko." ²⁸ Hi hi Israel phun hleihnih cu an si i hihi an pa nih a chimhmi hna bia cu a si. Anmah he aa tlakmi cio thluachuahnak kha a pek hna. ²⁹ Jakob nih annih cu ro a vuih hna i, "Atu cu ka phun hawi hna sinah pumh ka si cang lai i Hit mi Efron lo i a ummi lungkua ah khan nan ka vui lai. ³⁰ Cu lo cu Kanaan ram chung Mamre nichuahlei Makpelah i a ummi a si. Abraham nih khan hi lo cu a lungkua he vuinak hmun caah Hit mi Efron sinin a rak cawkmi a si. ³¹ Cuka hmun ah cun Abraham le a nupi Sarah kha an vui hna; cuka hmun ah cun Isak le a nupi Rebekah kha an vui hna; cuka hmun ah cun kei zong nih Leah kha ka vui. ³² Kha lo le a chung i a ummi lungkua kha Hit mi hna sinin cawkmi a si," a ti. ³³ Jakob nih a fapale kha cu bantuk kha bantukin nan tuah lai tinak bia kha a chimh dih hna tikah a ke kha ihkhun ah khan a hun fim hna i a phunhawi mi hna sinah khan aa pum ve.

¹ Josef nih a pa cu aa kunhnawh i a ṭap i a hmai ah a hnamh. ² Cun Josef nih a kut tang rianṭuanmi sibawi hna cu a pa cu thu kho loin si in nan thuh lai tiah a ti hna. A ti bangin an tuah i ³ ni sawm li an rau, thu lo dingin si thuhnak tuahnak ah hin cu can cu rauh tawn phung a si ko. Cun Izipt mi nih khan ni sawm sarih chung an ṭah. ⁴ A pa ṭahnak caan cu a dongh tikah Josef nih Faro bawi pawl kha a thawh hna i, "Zaangfahnak tein, Faro kha, ⁵ ’Ka pa nih a thih lai ah, Kanaan ram chung i aa cawhmi thlan ah na ka vui lai, tiah bia a ka kamter caah ka pa ruak cu va ka vuiter seh law ka vui dih in ka ra kir ṭhan lai, a ti,’ tiah va ka chimhpiak u," a ti hna. ⁶ Faro nih cun, "Na ka vui lai tiah bia an kamter bantukin va kal law na pa cu va vui ko," tiah a leh. ⁷ Cucaah Josef cu a pa vui ah khan a kal. Amah sinah cun Faro bawi vialte hna le a inn i rian a ṭuanmi upa vialte hna le Izipt ram chung haotu deuhdeuh paoh kha an kal dih. ⁸ Cun Josef a innchungkhar le a unau hna le a pa innchungkhar zong kha an kal ve. An ngakchia hna le an tuu hna le an meheh hna le an caw hna lawng kha Goshen ram ah cun an chiahtak hna. ⁹ Rangleng le rangcung ralkap zong kha an kal ve; bu ngan ngaingai an si. ¹⁰ Cun Jordan nichuahlei i a ummi Atad hmun, facang cilnak hmun kha an phak tikah khika ah ruak humhnak nganpi an ser i Josef nih a pa ruak cu ni sarih a suan. ¹¹ Kanaan mi nih Atad i ruak humhnak an tuahmi cu an hmuh tikah, "Izipt mi caah a fak ngaingaimi mithi ngaihnak a si," an ti. Cucaah cu hmun cu Abel-mizraim tiah min sak a si. Jordan nichuahlei um a si. ¹² Cuticun Jakob nih a chimh hna bang khan a fale nih cun an tuah; ¹³ Kanaan ram ah khan an kalpi i Abraham nih Hit mipa Efron sinin vuinak hmun caah a cawkmi vawlei Mamre in nichuahlei i a ummi Makpelah lo chung lungkua ah khan an vui. ¹⁴ Josef nih a pa kha a vui dih in a unau hna le ruak vuinak ah amah sin i a kalmi vialte hna he khan Izipt ram ah an kir ṭhan. ¹⁵ An pa a thih hnuah khan Josef unau pawl nih cun, "Josef nih hin kan hua peng sual in a cung i ṭhat lonak kan rak tuahmi ruangah khan teirul cham kan tim seh law zeitin?" tiah an ti. ¹⁶ Cucaah Josef kha bia an hei cah i, "Na pa nih a thih hlanah hi bia hi a kan chimhtak: ¹⁷ Josef cu va chim u law a unau hna nih a cung i an tuahmi thil ṭhalo hi ngaithiam hna seh tiah na pa nih an nawl va ti u,’ a ti. Cucaah cun na pa Pathian sal hna nih na cungah kan tuahmi ṭhat lonak cu kan ngaithiam ko," an ti. Hi bia an chimh tikah Josef cu a ṭap. ¹⁸ Cun a unau pawl hrimhrim kha an ra i a hmaiah an kun i, "Na sal kan si ko hih," an ti. ¹⁹ Sihmanhsehlaw Josef nih cun a thawh hna i, "Nan thinphang hlah u; Pathian hmun ah khan keimah le keimah cu kaa chia kho lai lo. ²⁰ Ka cung i ṭhat lonak tuah awkah khua nan khan, sihmanhsehlaw cu nan khuakhannak cu Pathian nih thil ṭha ah a canter. Cu a canter cu zeicahdah a si ti ahcun cu thawngin nihin i a nungmi mi tampi hna hi, an nunnak khamh awkah a rak si. ²¹ Cucaah nan thinphang hlah u. Nanmah he nan fale he ṭha tein kan zohkhenh hna lai," a ti. ²² Josef cu a pa innchungkhar mi hna he khan Izipt ram ah cun an um i a thih ah kum za le kum hra a si. ²³ Efraim fale hna le an fale chin kha a hmuh manh hna. Manasseh fapa Makhir fale kha an chuah tikah Josef nih a innchungkhar chungah a lak hna. ²⁴ A unau pawl kha a thawh hna i, "Atu cu ka thihnak a nai cang, sihmanhsehlaw Pathian nih an zohkhenh hrimhrim hna lai i hi ram hin an chuahpi hna lai i Abraham le Isak le Jakob a kamhmi hna ram ah khan an kalpi hna lai," a ti. ²⁵ Cun Josef nih cun Israel fapale kha bia a kamter hna i, "Pathian nih nannih kha ka chim bantuk cun an bawmh hna tikah ka ruh hi hi hmun hin nan sinah i kalpi hrimhrim dingin bia ka kam u," a ti hna. ²⁶ Cuticun Josef cu kum za le kum hra a ti ah a thi i Izipt ram ah cun thut lonak dingin si an thuh i kuang chungah an chiah.