EZEKIEL

EZEKIEL

¹ Kum sawm thum kum, thla linak thla, ni nga ni ah cun, saltangmi hna sinah Khebar tiva pawngah khan ka um i van kha aa hung i Pathian langhnak kha ka hmuh hna. ² Cu thla ni nga ni ah cun, cucu Jehoiachin sal i a tan a kum nganak a si. ³ Khaldi mi hna ram i Khebar tiva pawngah khan Buzi fapa tlangbawi Ezekiel sinah khan Bawipa bia cu a phan; cun khika ah Bawipa kut cu a cungah khan a um. ⁴ Khua ka hei cuan i zohhmanh, chaklei in ṭotho pakhat a rung hran kha ka hmuh; cu ṭotho sinah cun khuadawm nganpi pakhat a um i cu khuadawm cu ceunak nih a kulh i a chungah cun dar bantukin a tleumi ceunak a um. ⁵ Cun mei chungah cun minung mui a lomi thilnung pali an um. An muisam cu hi bantuk hi an si: minung pumruang an ngei. ⁶ Sihmanhsehlaw pakhat nih hmai pali cio an ngei i thla pali cio zong an ngei fawn. ⁷ An ke cu a ding i an ketin cu cawfa tin bantuk an si i dar kheng bantukin an tleu. ⁸ Cun an hrap pali i an thla toi cio ah cun minung kut kha an ngei cio. ⁹ Cun thilnung pali hna nih cun hmai le thla an ngei cio i an thla cu pakhat le pakhat an i tawng dih. An kal tikah khan an i mer lo, hmailei ah khan an kal cio ko. ¹⁰ An hmai cu, an hmailei hmai cu minung hmai an si; an pali khan an orhlei kap hmai cu chiandeih hmai an si i an pali khan an kehlei kap hmai cu cawtum hmai an si i an pali khan an hnulei hmai cu mupi hmai an si. ¹¹ Cu thilnung hna cu an thla tuah khat nih khan an hawile thla kha an tongh hna i tuah khat nih khan an pum kha an huh hna. ¹² Cun annih cu hmailei ah khan ding tein an kal cio ko i thlarau a kalnak lei paoh ah khan i mer lo tein an kal. ¹³ Thilnung hna cu an mui cu meiṭil vang hiamhuam in a ummi bantuk khi an si i an lakah cun meizik khi i chawk lengmang seh law cu ko cu a lo; mei cu a ceu ngaingai i mei chung cun nimtlau an chuak. ¹⁴ Cun nimtlau aa lek bantuk khin thilnung hna cu a kenkip ah an choi lengmang. ¹⁵ Thilnung pali hna cu ka zoh hna lioah khan vawlei cung an pawngah khan leng kekual pakhat ka hmuh, pakhat caah kual khat cio in. ¹⁶ Cu leng kekual an muisam le an umtuning cu hi bangin a si: an mui cu topaz lungvar bantukin a tleu; an pali cun an i lo dih i an umtuning cu leng kekual chungah khin a kual chin si hna seh law cucu an lo. ¹⁷ Cun an kal tikah hin anmah le an hmai zawn cio ah khan an kal ko i an lam kha an hlen lo. ¹⁸ Cun leng kekual pali hna nih cun tlang an ngei cio i tung zong an ngei dih; cun an tlang cu a velchum in mit in a khat dih. ¹⁹ Cun thilnung hna kha an kal tikah leng kekual hna cu an pawngin an kal ve; cun thilnung hna kha vawlei in an thawh tikah leng kekual hna zong kha an tho ve. ²⁰ Thlarau a kalnak lei paoh ah khan an kal ve i an sinah cun leng kekual cu an tho lengmang ve; zeicahtiah thilnung hna thlarau cu leng kekual chungah khan a um. ²¹ Cu hna cu an kal tikah hi hna zong cu an kal ve, cu hna cu an dir tikah hi hna zong cu an dir ve; cu hna cu vawlei in an thawh tikah leng kekual hna cu an sinah cun an tho ve; zeicahtiah thilnung hna thlarau cu leng kekual hna chungah cun a um. ²² Thilnung hna lu cungah cun cungkhuh bantuk hi a um i thlalang bantukin a tleu i an lu cungah cun aa samh. ²³ Cun cu cungkhuh tangah cun an thla cu aa samh cio i pakhat le pakhat kha an i tawng, cun an thla tuah khat nih an pum kha a khuh cio hna. ²⁴ Cun an thla thawng zong kha ka theih, an kal tikah an thla thawng cu ti tampi thawng bantuk a si, Lianngan Bik khuari thawng bantuk a simi bu nganpi thawng le ralkap bu thawng bantuk a si; an dir tikah an thla kha an ṭhumh hna. ²⁵ An thla an i thlep i an dir ah khan, an lu cung i a ummi cungkhuh cungah khan thawng pakhat a thang. ²⁶ Cun an lu cung i a ummi cungkhuh cungah cun bawiṭhutdan bantuk, safaiar lungvar, bawiṭhutdan a lomi kha a um i cu cungah cun minung pumruang a lomi pakhat a ṭhu. ²⁷ Cun a tai in a cunglei cu dar tleu bantuk a si i somei vaam huam in a ummi khi a lo, cun a tai in a tanglei cu mei bantuk a si i a velchum in a ceu dih. ²⁸ Ruahpi a sur ni ah khuadawm lak i chuncha a chuah bantuk khin a velchum i a ceumi cu a um. Bawipa sunparnak a muisam cu cu bantuk cu a si. Cucu ka hmuh tikah ka bawk i aw pakhat ka theih.

¹ Cun a ka thawh i, "Mipa, dir tuah, bia kan ruah lai," tiah a ti. ² Bia a chim lioah cun ka chungah thlarau kha a lut i ka ke in a ka dirter i bia a chimmi cu ka ngaih. ³ A ka thawh i, "Mipa, nangmah cu Israel mi hna sinah khan kan thlah lai, annih cu ralthawh hmang miphun, keimah a ka doh tawnmi miphun an si. ⁴ An pupa thawk in nihin ni hrimhrim tiangin keimah kha an ka doh lengmang ko i atu i nangmah kan thlahnak zong hi mi lungṭhawng le mi lungkhong mi chan a si. ⁵ Cun annih cu na thawh hna i, "Mah hihi Bawipa Pathian bia a si," na ti hna tikah, annih cu mi doh hmang an si caah annih nih cun an ngai duh theng hnga maw, an ngaih duh ah siseh, an ngaih duh lo ah siseh, an lakah profet pakhat an ngeih kha an hngalh lai. ⁶ Sihmanhsehlaw mipa, annih cu ṭih hna hlah, an chimmi bia zong kha ṭih hlah, nangmah dohtu le miṭhalo si ko hna hmanh seh law ṭih hna hlah, tlangngaikuang cung i a ṭhumi bantuk si hmanh law, ṭih hna hlah. Ral thawh hmangmi si ko hna hmanh seh law an chimmi siseh, an muisam siseh, ṭih awk zeihmanh a um lo. ⁷ Annih cu ral thawh hmangmi an si ko caah hin an ngaih duh zongah an ngaih duh lo zongah ka bia cu na chimh ko hna lai. ⁸ Sihmanhsehlaw mipa, nang tu cu ka bia hi ngai law anmah bantukin ral thawh duhmi si ve hlah. Na kaa kha ang law kan pekmi hi ei tuah," tiah a ti. ⁹ - ¹⁰ Cun kut pakhat cu keimah leiah a hun i samh kha ka hmuh i cu kut nih cun cazual pakhat aa put. Ka hmaiah cun cazual cu a samh i a kap hnih in aa ṭial dih, mithi ngaihnak hla le ṭahnak hla le ngaihchiatnak bia in aa ṭial dih.

¹ Cun a ka thawh i, "Mipa, na hmai i a ummi kha ei tuah, hi cazual hi ei tuah; cun va kal law Israel mi kha bia va chim hna," tiah a ti. ² Cucaah ka kaa cu ka an i ei awkah cazual cu a ka pek. ³ Cun aa thawh i, "Mipa, kan pekmi ca zual hi dolh law khim tein um tuah," tiah a ti. Cucaah ka ei i khuaihliti bantukin a thlum. ⁴ A ka thawh i, "Mipa, Israel mi sinah va kal law chimh ka duhmi hna kha va chim hna. ⁵ An holh a hrang i a harmi hna sinah thlah na si lo, Israel mi sinah thlah na si ko. ⁶ Miphun ngan pipi, an holh a hraan tuk ca le a har tuk ca i an chimmi zei a si tiah a sullam na hngalh khawh lomi hna sinah kan thlah lo. Annih sin tu ah khan rak in thlah ning law cu, annih nih cun na bia kha an rak ngaih ko hnga. ⁷ Sihmanhsehlaw Israel mi nih cun na bia ngaih kha an duh lai lo, zeicahtiah keimah ka bia ngaih kha an duh lo i annih cu ningzah hngal lomi le lung a hak i a ṭhawng hringhranmi an si. ⁸ Sihmanhsehlaw nangmah cu anmah he aa tluk ah kan ser lai. Ningzah an hngalh lo tluk le an lung a khon tlukin nang zong kan hahter ve lai i kan khonter ve lai. ⁹ Na cal cu ṭeklung nak hak deuh in ka ser lai. Ral thawh hmangmi si hna hmanh seh law zeitikhmanh ah ṭih hna hlah, zeitikhmanh ah na thin in phanter hna hlah seh," tiah a ka ti. ¹⁰ Cun a ka thawh i, "Mipa, nangmah kan chimhmi hi ṭha tein ngai law na lung chungah i cinken tuah. ¹¹ Na phunhawi sal i a tangmi hna sinah khan va kal law bia va chim hna. An ngaih duh ah siseh, an ngaih duh lo ah siseh, ’Hi hi Bawipa Pathian bia a si,’ tiah va chim hna," tiah a ti. ¹² Cun thlarau nih a ka cawi i, Bawipa sunparnak cu a umnak hmun in a thawh tikah khan ka hnulei ah thawng ṭihnung ngai pakhat ka theih. ¹³ Thilnung hna thla an i hnor thawng cu ka theih, leng kekual hna thawng cu ka theih fawn, cun thawng ṭihnung zong ka theih fawn. ¹⁴ Thlarau nih a ka cawi i a ka zuanpi i lunglawmhnak he khat in ka kal i Bawipa kut cu ka cungah ṭhawng ngaiin a um. ¹⁵ Cucaah saltang hna sinah cun Tel-abib ah ka phan i annih cu Khebar tiva pawngah an rak um. Ni sarih an sinah ka ṭhu i ka ar ko. ¹⁶ - ¹⁷ Ni sarih a donghnak ah cun Bawipa bia cu ka sinah a ra phan i, "Mipa, nangmah cu Israel mi hna vengtu ah kan ser cang. Ka bia kha an sinah na kalpi lai i annih cu ralrinnak na pek hna lai. ¹⁸ Miṭhalopa cungah thihnak ding bia khiahnak ka chim zong a si sual kho ko, a ziaza a ṭha lomi kha a hlawt i a nunnak kha khamh awkah ralrinnak kha na pek lo ahcun sualnak cu amah ta a si ko; a ṭhat lo ruangah a thi ko lai, sihmanhsehlaw a thihnak ruangah khan nangmah cu kan mawhchiat lai. ¹⁹ Sihmanhsehlaw ralrinnak na pe nain a ziaza ṭhalo kha a tuah lengmang ṭhiamṭhiam ko ahcun, a ṭhat lonak ruangah khan a thi lai i sihmanhsehlaw nangmah tu cu na luat kho lai. ²⁰ Asiloah, miding mi pakhatkhat cu a pial kho ko i palhnak kha a tuah khawh ko, cucu a rilhnak a chuahtertu ka siter ko lai; nangmah nih ralrinnak na pek lo caah a thi lai. A sualnak ruangah a thi lai; dinnak a rak tuahmi kha relpiak a si lai lo i a thih ruangah khan nangmah cu kan mawhchiat lai. ²¹ Sihmanhsehlaw miding mi kha sual lo awkah ralrinnak na pek hna i sual lo in an um ahcun annih nih ralrinnak kha an hmuh caah an nunnak kha an i khamh lai i nangmah zong nih na nunnak kha naa khamh ve lai," tiah a ti. ²² Bawipa kut cu ka cungah a phan i a ka thawh i, "Tho tuah, nelrawn ah khin vung kal law khika ah bia kan chimh lai," tiah a ka ti. ²³ Cucaah ka tho i nelrawn ah cun ka vung kal; khika ah cun Khebar tiva pawng i ka rak hmuh bantuk khan Bawipa sunparnak cu a rak um kha ka hmuh i ka bawk. ²⁴ Cun thlarau ka chungah a rung lut i a ka dirter i ²⁵ "Va kal law na inn chungah inn vaa hrenhkhumh. Mipa, nangmah cu hri in khih le ṭem na si lai i mi zapi sinah na chuak kho lai lo. ²⁶ Na lei cu na dang cunglei ah ka hren chih lai i bia na chim kho lai lo; annih cu ral thawh hmangmi an si ko nain, a situ ding hna cu nangmah cu na si lai lo. ²⁷ Sihmanhsehlaw nangmah kha chimh awk thil ka ngeih tikah bia chim khawhnak kha kan pek ṭhan lai. Khi tikah na thawh hna lai i, ’Mah hihi Bawipa Pathian bia a si,’ tiah na ti hna lai. Ngaih a duhmi nih ngai ko hna seh, a duh lomi nih duh lo ko hna seh; Zeicahtiah annih cu ral thawh hmangmi cu pei an si fam cu," a ka ti.

¹ A ka thawh i, "Mipa, tlakrawh pakhat in i lak law na hmaiah khan chia tuah. A cungah cun Jerusalem khua hmanthlak kha suai tuah: ² cun Jerusalem khua cu hreng law ralvennak buk kha sakhnawh law raltuknak chuntlung khan kulh law riahhmun hna kha serhnawh law ralhau vampang chimhnak thingthluan kha a velchum in chiahhnawh tuah. ³ Cun thir kheng pakhat in i lak law nangmah le khuapi karlak ah khan thir vampang ah chong tuah. Khuapi lei cu hoih tuah; nangmah cu khuapi a hrengtu cu na si lai i na hrenmi cu khuapi cu a si lai. Mah hihi Israel mi hna caah hmelchunhnak a si lai. ⁴ "Cun atu cu na kehlei hrap in it tuah, Israel mi hna ṭhat lonak cu na cungah ka chiah lai; na kehlei hrap in na ih chung caan kha an ṭhat lonak cu na in lai. ⁵ Ni khat cu an ṭhat lonak kum khat caah khan tuak in an ṭhat lonak cu kum za thum le kum sawm kua ing dingin kan khiah; cu can cu Israel mi hna ṭhat lonak cu na in lai. ⁶ Mah hi vialte hi na lim tikah na orhlei hrap in na it ṭhan lai i Judah ṭhat lonak cu ni sawm li na in lai; ni khat cu kum khat caah rel a si lai. ⁷ Cun hrenmi Jerusalem lei cu na zoh lai i na ban kha na hlimhnawh lai i ka bia kha na chimh lai. ⁸ Sifahnak na inmi caan cu na lim hlantiang khattelei hrap in khattelei hrap ah naa mer khawh nakhnga lo, zeitindah hri in kan ṭem cu va hngal ko. ⁹ "Cun changvut le barli, be le ra, fang le fangvoi kha la hna law kheng pakhat chungah cawh dih hna law cu cun na changreu cu ser tuah. Na hrap khat in na ih chung ni za thum le sawm kua kha cu changreu cu na ei lai. ¹⁰ Cun na rawl kha a tah tein na tah hna lai, ni khat ah pawng cheu na ei lai i cu cu ni khat caah a si lai. ¹¹ Na ti din awk zong a tah tein na tah lai; ni khat ah palang thawl khat in na din lai i cu cu ni khat caah a si lai. ¹² Na changreu cu barli changreu bantukin na rawh lai i na ei lai i a rawhnak thing caah minung ek na hman lai i mi nih an in hmuh khawhnak hmun ah na rawh lai," tiah a ti. ¹³ Bawipa nih hi ti hin a ti, "Hi thil hna hi Israel mi hna ramdang i ka ṭhek tik hna ah Phung i khammi rawl an ei a herh te lainak kha hngalhternak a si." ¹⁴ Sihmanhsehlaw kei nih kaa thawh i, "Maw Bawipa Pathian, zeitikhmanh ah kaa thurhhnawmh bal lo, amah tein a thimi maw, sa nih a sehmi maw, zeitikhmanh ah ka ei bal lo; sa thurhnawm ka kaa chungah a lut bal lo," tiah ka ti. ¹⁵ Cucaah minung ek can ah khan caw ek cu ka changreu rawhnak caah khan hman a ka sianh. ¹⁶ Cun a ka thawh i, "Mipa, Jerusalem khua i nifate an hmuhmi rawl cu ka ṭhumh hna lai; mi nih rawl an eimi cu thinphang lengmang in a tah tein an tah lai i ti an dinmi cu khuaruahhar lengmang in a tah in an tah ṭhiamṭhiam lai. ¹⁷ Pakhat le pakhat an i hmuh tikah an hnabei a dongh tiangin, an rawl le an ti cu a ṭum lai i an ṭhat lonak ruangah khan an lo ral dih lai," a ti.

¹ Cun a ka thawh i, "Mipa, nam a har ngaingaimi, lumettu nam bantuk kha i lak law na lu le na khahmul kha i met tuah. Cun cuaithlainak kha la law ṭhen thum ah sam cu ṭhen hna. ² Ral hrennak a dih tikah sam cheu thum cheu khat cu khuapi laifang ah khan khang; cun cheu thum cheu khat cu nam in sam law khuapi velchum ah cun hlonh; cun cheu thum cheu khat cu thlitu lakah khan hlonh hna law vainam zuh cia he ka zulh hna lai. ³ Cun hi sam chung hin tlawmpal tein la law na angki fual hmum ah khan ṭem chih hna. ⁴ Cun a dang kha la hna law mei ah paih hna law khang hna, cun an chung cun Israel mi hna cungah mei a chuak lai," tiah a ti. ⁵ Mah hihi Bawipa Pathian bia cu an si: "Hi khua Jerusalem khua hi miphun hna lakah an laifang ah ka chiah i ramdang nih an dum, ⁶ sihmanhsehlaw cu miphun dang hna le ramdang hna nak i ṭhalo deuh in ka phung le ka nawlbia kha a doh hna; a mi hna nih cun ka phung kha an hlawt hna i ka nawl bantuk khan um an duh lo." ⁷ Cucaah Bawipa Pathian nih, "Na velchum i a ummi miphun dang hna nak hmanh in i lawm lo deuh in na um i ka nawlbia bantukin um na duh lo i ka phunglam kha na zul hna lo i na pawngkam ah a ummi miphun phunglam hna hmanh kha na zulh duh hna lo caah, atu cu nangmah doh kha ka caan a si ve cang lai, tiah Bawipa Pathian nih a ti; ⁸ Na chungah hin miphun hna hmuh awkah biakhiahnak ka tuah lai i ⁹ cu biakhiahnak hna cu ka tuah balmi zong an si lo i hi hnu zongah ka tuah ti hna lai lo, na nawlbuarnak cu fih a nung tuk hringhran. ¹⁰ Cucaah maw Jerusalem, na chungah hin pale nih an fale kha an ei hna lai i fale nih an pale kha an ei hna lai; na cungah hin biakhiahnak ka tuah lai i na chung i a tangmi hna paoh cu khuazakip ah ka ṭhek dih hna lai. ¹¹ Ka hmunthiang kha na phung ṭhalo le na thil fihnung in na thurhhnawmh caah zaangfahnak um loin kan hloh lai, tiah Bawipa Pathian nih ka min chalh in ka ti; nangmah cu kan zuah hrimhrim lai lo. ¹² Na mi cheu thum cheu khat cu na chungah rai le mangṭam in an thi lai; cheu thum cheu khat cu na pawngkam ram ah vainam in an thi lai; cun cheu thum cheu khat cu khuazakip ah ka ṭhek hna lai i phawi cia vainam he ka zulh hna lai. ¹³ Khi tikah ka thinhunnak cu a dong lai i an cung i ka thinlinhnak cu ka ṭhumh lai i ka dai lai; ka thinlinhnak kha a dih tikah an sin i bia a chimtu cu Bawipa kha ka si i ka ham tuk hna ruangah cu bantukin ka chim ti kha an hngalh lai. ¹⁴ Nan pawngkam i a ummi hna nih nannih cu nihsawh awk le serhsat awkah kan ser hna kha aa chawkmi paoh nih cun an hmuh ko lai. ¹⁵ Nannih cu nihsawh awk le zawmhtaih awk thil ah nan cang lai i nan cung i biachahnak le biakhiahnak thinhung le thinlin in ka tuah tikah nan velchum i a ummi miphun hna caah i zohchunh awk thil ṭihnung nan si lai. ¹⁶ Hi bia hi Bawipa nih ka chim. Nannih cu thihnak cantiang mangṭam in kan kah hna tikah, nannih cu hrawh awkin kan kah hna lai. Nan cungah mangṭam ka tlunter lai i ni fate nan eimi nan rawl cu ka ṭhumh lai; ¹⁷ nannih cu mangṭam le sahrang kha kan thlahhnawh hna lai i nan fale kha an thah dih hna lai. Rai le thisen chuahnak nih an in tlunhnawh hna lai i vainam cu nan cungah ka tlunter lai, tiah Bawipa nih ka chim," tiah a ti.

¹ Mah hihi Bawipa nih ka sin i a chimmi bia a si: ² A ka thawh i, "Mipa, Israel ram tlanglei khi hei zoh law bia chimhnawh hna: ³ ’Israel ram tlang hna, Bawipa Pathian bia hi ngai tuah u,’ ti hna. Mah hihi tlang hna sin le fing hna sin le nelrawn hna sin le horkuang hna sin i ka chim duhmi bia cu an si; nan cungah vainam kha ka tlunter lai i nan khuahrumbo vialte kha ka hrawh dih hna lai. ⁴ Nan biakṭheng hna cu an rawk lai i nan zihmui khanghnak biakṭheng hna cu an kuai dih lai i nan mi hna lak i thahmi hna cu nan siasal hna hmaiah khan ka hlonh hna lai. ⁵ Israel mi hna ruak cu an siasal hna hmaiah khan ka hlonh hna lai i nan ruh cu nan biakṭheng hna pawngah khan ka ṭhek hna lai. ⁶ Nan umnak hmun kip ah khan thisen aa nehmi biakṭheng cu an ṭhing lai i nan khuahrumbo cu an rawk lai. Nan biakṭheng cu an rawk an ṭhing dih lai i nan siasal hna cu an kek an kuai dih lai i santlailo an si lai, nan zihmui khanghnak biakṭheng hna cu chimh an si lai i thil nan tuahmi vialte kha hloh dih an si lai; ⁷ thahmi hna kha nan pawng i an rilh liangluang tikah Bawipa ka si kha nan ka hngalh lai. ⁸ Sihmanhsehlaw annih cu an thih tikah, miphun hna lakah khan vainam thahnak in a luatmi tlawmpal cu kan zuahpiak hna lai. ⁹ Nannih cu ram dang i ṭhek nan si tikah, hi ka zuahmi hna, miphun dang hna sin i sal i a tangmi hna nih hin, an lungthin cu zeihmanh ruat loin ka sinin an i mer i an mit cu siasal duh ah a pingah an kal ruangah, zeitluk in dah ka lungthin a fah kha an hngalh lai. Khi tikah ṭhat lonak an tuahmi vialte le fihnung an tuahmi vialte ruangah khan anmah le anmah an i fih lai. ¹⁰ Cucaah annih nih keimah cu Bawipa ka si kha an hngalh lai i an cungah ṭhat lonak ka tlunter lai ka ti tikah khan a ṭhih in a kan ṭhih men lo, ti kha an hngalh lai," tiah a ti. ¹¹ Mah hihi Bawipa Pathian bia a si: "Nan zapei kha beng u law nan ke kha teng hna u, fihnung nan sinak kha ṭah u, maw Israel mi hna. ¹² Mi cu vainam le mangṭam le rai in an thi lai. A hlatnak hmun ah rai in an thi lai, inn ah vainam in an thi lai, cun a tangmi si hna seh, a luatmi si hna seh, mangṭam in an thi lai i cuticun a donghnak ah ka thinhunnak cu a dihnak a phan ve lai. ¹³ Ral kut in a thimi an mi hna cu an biakṭheng pawng i an siasal hna lakah siseh, fing kip le tlang kip cungah siseh, a hnah borh a ṭhami thingkung toi kip le kuhthing toi kip ah siseh, an siasal hna cu rimthaw an pekchanh hna nak hmun paoh ah, an rilh liangluang tikah, keimah cu Bawipa ka si kha nan hngalh lai. ¹⁴ Cuticun an cungah khan ka kut ka samh lai i an khuasaknak hmun kip ah khan ram cu ramcar ah ka canter lai i Riblah thetse ram nak hmanh in an car deuh lai. Cun annih nih Bawipa ka si kha an hngalh lai," tiah a ti.

¹ Bawipa bia cu ka sinah a phan i, ² "Mipa, hi bia hi Bawipa Pathian nih Israel mi hna sinah a chim duhmi bia cu a si, a ti: A dih cang! ram cung kil li cungah donghnak cu a tlung lio. ³ Donghnak cu atu nan cung a phan cang; nan cungah ka thinhunnak cu ka thlah lai. Nan tuahmi thil kha zeicahdah nan tuah tiah kan hal hna lai i fihnung nan tuahmi cu nanmah lu cung lila ah ka tlunter hna lai. ⁴ Nannih cu kan zaangfah hna lai lo, kan zuah fawn hna lai lo. Nan tuahmi thil hna le nan lak i a um lengmangmi thil fihnung hna ruangah khan sifahnak kan inter hna lai. Cucaah nannih nih Bawipa ka si kha nan hngalh lai," tiah a ti. ⁵ Mah hihi Bawipa Pathian bia a si: "Zohhmanh a ra cang, rawhralnak cu i thonh lulhmalh in an ra cang; donghnak cu a phan cang, donghnak cu a phan cang. ⁶ - ⁷ Ram chung i a ummi hna, nan cungah khuacimuihnak ni a tlung cang; cu caan cu a phan dengmang cang, cu ni cu a nai cang, hnahnawhnak le khuari thawng he a ra lai. ⁸ Khulrang tein ka thinhunnak cu a bungh in kan bunghhnawh hna lai. Nan tuahmi nan thil kha zeicahdah nan tuah tiah kan hal hna lai i fihnung nan tuahmi cu nanmah lu cung lila ah ka tlunter hna lai. Nannih cu kan zaangfah hna lai lo, kan zuah fawn hna lai lo. ⁹ Nan tuahmi thil hna le nan lak i fihnung a um lengmangmi ruangah khan sifahnak kan inter hna lai. Cucaah nannih nih an tutu hna cu keimah, Bawipa ka si kha nan hngalh lai. ¹⁰ "Zohhmanh, cu ni, rawhralnak ni cu hika a phan cang, an cungah a kek phut cang. Dinlonak kha a kuhkulul in a hung um cang, ruamkainak kha a par in a par, ¹¹ zaang-ennak cu dinlonak le ṭhat lonak chungah khan a ṭhang. Cu vialte cu anmah sualnak lawngte a si dih, an i tuai an i hmalnak le an i tenghteletnak chungin a chuakmi an si dih. ¹² Caan cu a tlung cang, cu ni cu a phan cang; cawtu zong i lawmh awk a si lo, zuartu zong i ngaihchih awk a si hlei lo, zeicahtiah an i tuai le an i hmalnak cungah khan a dihlak in ka thin a hung. ¹³ Zuartu nih khan a cawknak mi siseh, amah siseh, an nun chung paohpaoh ahcun, a zuarmi thil kha a let ṭhan kho lai lo, zeicahtiah an i cawknak kha hnahnawhnak ruangah khan let ṭhan khawh a si hlei lai lo. An nun chung paoh cu ahohmanh nih zeihmanh an tuah kho lai lo, ṭhat lonak tuah a duhmi hmanh nih khan zeihmanh an tuah kho hlei lai lo. ¹⁴ Muko cu an tum cang, zeizong vialte timh a si dih cang, sihmanhsehlaw ahohmanh ral dohnak ah an kal lo. ¹⁵ "Lengah vainam a um, chunglei ah rai le mangṭam an um; ramlak ah khan mi cu vainam in an thi lai i khua chungah mangṭam le rai nih a thah hna lai. ¹⁶ A luatmi an um i tlang ah an zam ahcun, khika ah a ṭap lengmangmi ṭhuro bantukin ka thah hna lai, ¹⁷ an kut cu a thlep lai i an khuk ah an zun a luang lai. ¹⁸ Buri puan i aih in an i chawk lai i an lu in an ke tiang an ther lai, an hmai cu vawlei kha an bih lai i an lu kha an i kongh dih lai. ¹⁹ An ngun cu lam ah khan an hlonh hna lai i an sui cu hmunthur bantukin an hlonh hna lai; Bawipa thinhun ni ah cun an sui le an ngun nih khan a khamh kho hna lai lo. An rawlṭam kha a dam lai lo i an paw zong a khim lai lo; zeicahtiah an tluknak a chuahtertu cu an ṭhat lonak kha a si lai. ²⁰ An hlawn ṭhaṭha cu porhlawtnak ah an hman i cu an hlawn cun fihnungmi siasal kha an ser hna. Cucaah an hlawn cu hmunthur bantuk ah ka ser lai i ²¹ ramdangmi sinah ramhmi thil le vawlei cung i miṭhalo bik hna sinah hranchaw ah ka pek hna lai i annih nih an thurhhnawmh hna lai. ²² Annih cu ka hmai kha ka merkanh hna lai i a sunglawimi ka ram cu an thurhhnawmh lai; mifir kha an ra lut lai i an thurter lai. ²³ "Nan kut kha i tum u, zeicahtiah ram cu thisen chuahnak in a khat i khuapi cu zaang-ennak in a khat. ²⁴ Miphun hna lak i a nauta bik kha an inn cu ka coter hna lai; a ṭhawngmi an i zumhnak kha ka zorter lai i an hmunthiang hna cu thurhhnawmh an si lai. ²⁵ Annih cungah therphannak a tlung lai, daihnak kha an kawl lai, sihmanhsehlaw an hmu lai lo. ²⁶ Thlichia kha pakhat hnu pakhat an i zul lai i thawngchia kha pakhat hnu pakhat an i zul ve lai. Langhnak kawl ah mi nih profet cu an fuh hna lai, sihmanhsehlaw tlangbawi nih lam ṭhit an thiam ti lai lo i upa nih fimchimh an thiam ti lai lo. ²⁷ Siangpahrang cu a ṭap lai, bawi cu vansangau in an um lai i zapi cu ṭihnak in an kut a ther lai. Hmuh awkah an i tlakning in an cungah ka tuah lai i zeicahdah thil an tuahmi kha an tuah tiah ka hal hna lai; cun annih nih keimah cu Bawipa ka si kha an ka hngalh lai," tiah a ti.

¹ Kum ruknak kum, thla ruknak thla, ni nganak ni ah inn ah ka ṭhu i Judah upa hna kha an ka leng. ² Chikkhatte ah khin Bawipa kut cu ka cungah a hung um i minung a lomi pakhat kha ka hmuh. A tai toi vialte cu mei khi siseh law cu ko cu a lo i a tai cung vialte cu dar bantukin a tleu i a ceu. ³ Kut bantuk a simi khi a hun samh i ka calsam in a ka tlaih. Thlarau nih van le vawlei karah a ka cawi i Pathian langhnak in Jerusalem ah a ka kalpi i chaklei hoihmi chungchin kutka luhnak ah khan a ka chiah; khika ah cun Hornak Siasal kha a um i cucu hornak lungthin thawhternak caah a si. ⁴ Nelrawn i ka hmuhmi langhnak bantuk khan Israel Pathian sunparnak cu khika ah khan a um. ⁵ Bawipa nih cun a ka thawh i, "Mipa, chaklei khi zoh tuah," tiah a ka ti. A chim bang cun chaklei cu ka zoh i biakṭheng kutka chaklei ah cun, luhnak ah khan, Hornak siasal cu a um. ⁶ A ka thawh i, "Mipa, zeidah an tuah kha na hmu maw? Hika ah Israel mi nih an tuahmi fihnung ṭeifiak nih keimah cu ka hmunthiang khan lamhlatpi ah a ka dawi i cu bantuk fihnung cu na hmuh chin lengmang ko rih hna lai," tiah a ti. ⁷ Cun siangpahrang inn pawl umnak luhnak ah khan a ka kalpi i kulhnak vampang ah cun awng pakhat a um kha ka hmuh. ⁸ A ka thawh i, "Mipa, awng kha khoih tuah," tiah a ka ti i ⁹ a ka ti bantukin ka khoih i mitlum ah a cang. "Vung lut law hika ah an tuahmi thil fihnung hna kha vung zoh tuah," tiah a ka ti. ¹⁰ Cucaah ka vung lut i khika ah a lawn in a lawnmi saram hna le fihnung a simi saram hna le rungrul cangcel hna hmanthlak hna kha ka hmuh hna; cun Israel mi siasal hna cu vampang ah khan an i suai liangluang ko. ¹¹ An hmaiah cun Israel mi upa sawm sarih an dir i an laifang ah cun Safan fapa Jaazaniah kha a dir, pakhat nih zihmui kheng pakhat cio an i put i cu kheng chung cun rimhmui khu an chuak. ¹² A ka thawh i, "Israel mi upa hna nih mui lak i an tuahmi khi na hmu maw? Anmah cio nih an i suaimi milem an chiahnak ah hmunthiang cio i an tuahmi khi? Annih nih cun Bawipa nih a kan hmu lo tiah an ruah i ram hi a hlawt cang, tiah an ruah. ¹³ Annih an tuahmi thil, hi nakin fih a nung deuh rihmi hna cu na hmuh chin rih hna lai," tiah a ti. ¹⁴ Cun Bawipa inn kutka, chaklei a hoihmi ah khan a ka kalpi i khika ah Tammuz a ṭah lengmangmi nu kha ka hmuh hna. ¹⁵ A ka thawh i, "Mipa, mah khikhi na hmu maw?" tiah a ka hal. Cun a ka thawh ṭhan i, "Hi nakin a chia deuhmi fihnung kha na hmuh rih lai," a ti. ¹⁶ Cucaah Bawipa inn chung chungchin tual ah khan a ka kalpi i khika ah Bawipa hmunthiang i va luhnak ah cun, innleng le biakṭheng karlak ah, mi kul le panga tluk, hmunthiang cu hnulei chit in nichuahlei kha a zoh i a chuak liomi nika bawh buin a biami kha ka hmuh hna. ¹⁷ A ka thawh i, "Mipa, khikhi na hmu maw? Hi thil fihnung hna hi thil hmetuai ah an rel caah maw Judah mi hna nih hin ram hi zaang-ennak in an khahter hi a si hnga? Ka thinhunnak damter an i zuam tik hmanh ah hin ka thin an ka phawh chin lengmang. ¹⁸ annih cu ka thinhun in ka merhnawh hna lai i ka zaangfah hna lai lo i ka zuah fawn hna lai lo. Thang piin ka au hna hmanh seh law ka ngai lai lo," tiah a ti.

¹ A thang ngaimi aw thawng pakhat kha ka theih i, "Khuapi kha hrawh awkah thiahmi cu an hriamnam cio kha i put in an ra khih," tiah a ti. ² Cun cunglei chaklei kutka hei fuhnak lam khan mi paruk an rat kha ka hmuh, raldohnak hreitlung an i put cio i anmah lak i pakhat cu puan hmangṭhia aa aih i a tai ah cafung le cahang kha a ngei; cun dar biakṭheng pawngah khan an dir. ³ Cun cherubim cung khan Israel Pathian sunparnak cu a tho. Biakinn tual ah khan a ra i puan hmangṭhia aa aih i a tai ah cafung le cahang a ngeimipa kha a kawh i, ⁴ "Khua chungah khan vaa chawk tuah, Jerusalem khua chungah khan vaa chawk tuah, khika i thil fihnung an tuahmi ruang i a ṭapmi hna le a ngaih a chiami hna kha an cal ah hmelchunhnak va khenh hna, tiah Bawipa nih a ti," tiah a ti. ⁵ Cun a dang hna cu, "Khua chungah khan zul u law zaangfahnak um loin that hna u, ngan hna hlah u. ⁶ An dihlak in that hna u law hrawk dih hna u, a tar siseh, a no siseh, nu ngakchia si hna seh, ngakchia tete si hna seh, nu si hna seh, that dih hna u; sihmanhsehlaw hmelchunhnak a ngeimi kha cu ahohmanh tawng hna hlah u; ka hmunthiang khan i thawk u," tiah a ti thawng kha ka theih. Cucaah biakinn hmai khan upa hna nih cun an i thawk. ⁷ "Biakinn kha thurter u, a tual kha miruak in khahter dih u law cun khua chungah va kal u law va that hna u," tiah a ti. ⁸ Annih nih an rian an ṭuan lioah khan keimah lawng cu ka um i khi tikah ka bawk i, "Maw Bawipa Pathian, Israel mi a tangmi vialte hi na thah dih hna lai maw? Jerusalem khua cungah na thinhunnak cu na bungh ko lai maw?," tiah ka au. ⁹ Cun a ka leh i, "Israel mi le Judah mi ṭhat lonak cu a ngan hringhran ko; ram cu lainawnnak in a khat i khuapi cu dinlonak in a khat. Hi ram hi Bawipa nih a hlawt cang tiah an ruah. Bawipa nih zeihmanh a hmu lo, tiah an ruah. ¹⁰ Sihmanhsehlaw ka zaangfah bal hna lai lo i ka zuah bal hna lai lo. An tuahmi thil vialte kha zei ruangah dah an tuah, tiah ka chimter hrimhrim hna lai," tiah a ti. ¹¹ Cun puan hmangṭhia aa aih i a tai i cafung le cahang a ngeimipa nih khan a tuahmi cu a hung chim i, "Nangmah nih nawl na ka pekmi kha ka tuah dih cang," tiah a ti.

¹ Cun cherubim hna lu cung i a ummi cungkhuh cungah khan safaiar lungvar bawiṭhutdan bantuk a hung langmi kha ka hmuh. ² Bawipa nih puan hmangṭhia aa aihmipa kha, "Cherubim hna tang i aa mer lengmangmi lengkekual hna karlak ah khan ra law cherubim hna lak i a ummi meiṭil kha na kut khat in i lak hna law khuapi cungah khan hlonh tuah hna," tiah a ti. Cucaah ka mithmuh te ah khan a kal. ³ Cun mipa cu a vung luh tikah cherubim cu biakinn orhlei kamah khan an dir i chungchin tual cu minmei nih a zelh. ⁴ Bawipa sunparnak cu cherubim hna cung cun a tho i sangpi ah a kai i tual leiah cun a kal; cun biakinn chungah cun minmei cu aa zel i Bawipa sunparnak ceu nih cun a tual cu a ceuh. ⁵ Cherubim hna thla khawn thawng cu lenglei tual tiang khan aa thei kho i Lianngan Bik Pathian nih bia chim seh law cu bantuk cun a thang. ⁶ Cun puan hmangṭhia aa aihmi cu, aa mer lengmangmi leng kekual hna karlak le cherubim hna lak i a ummi meiṭil kha lak a fial i ⁷ mipa cu a ra i lengkekual pakhat pawngah cun a dir. Cun cherubim hna lak i cherub pakhat nih cun anmah lak i a ummi mei cu a hei banh i tlawmpal cu a lak hna hnuah puan hmangṭhia aa aih mipa kha a pek; cun mipa nih cun aa lak hna i a chuak. ⁸ Cherubim hna thla tangah cun minung kut a lomi kha a hung lang. ⁹ Cherub pakhat sir ah pakhat lengmang in, cherubim hna sir ah cun lengkekual pali ka hmuh hna. ¹⁰ Topaz lungvar bantukin an cer i an palite cun an i lo dih, lengkekual pakhat chung i a kekual chin bantuk khin. ¹¹ Cherubim hna cu kehlei ah siseh, orhlei ah siseh, hnulei ah siseh, hmailei ah siseh, an kal tikah i mer lo tein an kal; an lu an hoihnak lei paoh ah khan i mer lo tein an kal. ¹² An pum cu a dihlak in, an keng he an kut he an thla he mit an khat dih, an palite cun, lengkekual zong kha mit an khat dih. ¹³ - ¹⁴ Leng kekual aa mer thawng cu ka hna chungah a hung thang. Pakhat nih hmai pali cio an ngei; pakhatnak cu cherub hmai bantuk a si, pahnihnak cu mi hmai bantuk a si, pathumnak cu chiandeih hmai bantuk a si, palinak cu mupi hmai bantuk a si. ¹⁵ Cun cherubim cu an hung tho i annih cu Khebar tiva pawng i ka hmuhmi thilnung hna kha an si ko. ¹⁶ Cherubim cu an kal tikah an sir in lengkekual kha an kal ve; cherubim hna nih an thla an samh i vawlei in an thawh tik hmanh ah lengkekual cu a pingah an ril lo. ¹⁷ Cherub pakhat a dir tikah khan a pawng i lengkekual pakhat zong kha a dir ve i cherub a thawh tikah khan lengkekual pakhat zong kha a rak tho ve; zeicahtiah thilnung hna thlarau cu lengkekual chungah khan a um. ¹⁸ Khi tikah Bawipa sunparnak cu biakinn tual khan a chuak i cherubim hna cungah khan a dir. ¹⁹ Cherubim hna nih cun an thla kha an samh hna i vawlei khan an tho; an sir i lengkekual hna he an kal kha ka zoh ko hna. Bawipa inn nichuahlei kutka ah khan an dir i Israel Pathian sunparnak cu an cungah khan a um. ²⁰ Israel Pathian tangah, Khebar tiva ah ka hmuhmi hna thilnung cu hi hna hi an si, annih cu cherubim an si kha ka hngalh. ²¹ Hmai pali le thla pali an ngei cio hna i an thla tangah minung kut bantuk kha an um cio. ²² An hmai cu Khebar tiva pawngah langhnak in ka hmuhmi bantuk kha an si; an dihlak te cun hmailei ah ding tein an kal cio.

¹ Thlarau nih a ka cawi i Bawipa inn, nichuahlei kutka ah khan a ka chiah; nichuahlei a hoihmi kutka ah khan. A innka pawngah khan minung kul le panga an um i an lakah cun bawi ngan pahnih ka hmuh hna, annih cu Azzur fapa Jaazaniah le Benaiah fapa Pelatiah kha an si. ² Cun Bawipa nih a ka thawh i, "Mipa, hi hna hi khua chung i ṭhat lonak le harnak khua a khangtu cu an si, ³ an i thawh i, ’Caan sau nawn chung cu inn sak a um lai lo; khuapi hi sa chuannak um a si i kannih hi a chung sa cu kan si,’ an ti. ⁴ Cucaah annih kha chim hna, maw mipa, annih kha chim hna," a ka ti. ⁵ Cun Bawipa thlarau kha chikkhatte ah ka cungah a rung tlung i, "Mah hihi Bawipa bia a si: Nannih Israel mi hna, mah hihi nanmah le nanmah nan i chimhmi bia cu a si: nan lung chung i a chuakmi ruahnak cu fiang tein ka hngalh ko. ⁶ Hi khua chungah hin mi kha nan thah lengmang hna, nan thah lengmang hna i lam ah khan an ruak cu a pon in nan pon hna. ⁷ Cucaah hihi Bawipa chimmi bia cu an si: Khika i nan chiahmi ruak hna khi pei sa cu an si cu. Khuapi hi sa chuannak um cu a si taktak, sihmanhsehlaw hi khua chung hin kan chuah hna lai. ⁸ Nannih nih nan ṭihmi cu vainam a si i cu vainam cu nan cungah ka tlunter lai, tiah Bawipa nih a ti. ⁹ Nannih cu a chungin kan chuah hna lai; ramdangmi hna kut chungah kan chanh hna lai; biaceihnak hmun ah kan chuahpi hna lai. ¹⁰ Israel ramri ah bia kan ceih hna tikah nannih zong vainam in nan thi lai; cuticun Bawipa ka si kha nan hngalh lai. ¹¹ Cucaah khuapi cu nan sa chuannak um a si lai lo, nannih zong a chung i sa kha nan si lai lo. ¹² Israel ramri ah nannih cu bia kan ceih hna lai i cuticun Bawipa ka si kha nan hngalh lai. Ka phunglam kha nan zul lo i ka nawlbia kha nan tuah lo, sihmanhsehlaw nan velchum i a ummi miphun dang hna phung tu kha nan zulh," tiah a ti. ¹³ Bia ka chim lengmang lioah cun Benaiah fapa Pelatiah cu a thi; cun ka bawk i fak piin ka ṭap i, "Maw Bawipa Pathian, a tangmi Israel mi vialte kha an donghnak na phakter dih ko hna lai maw?" tiah ka ti. ¹⁴ - ¹⁵ Bawipa bia cu ka sinah a ra i, "Mipa, annih cu na unau an si, atu ah Jerusalem khua i a ummi hna nih, ’Bawipa sinin ram hlapi ah an um cang, ram cu kanmah ta si awkah pek kan si cang’ tiin an timi hna Israel mi vialte hna hi an ning piin na unau le na rualchan lawngte an si dih. ¹⁶ Cucaah, mah hihi Bawipa bia an si, tiah chim hna: Miphun dang hna lakah ram hlapi ah ka ṭhawl hna i ram tampi ah ka ṭhek hna tikah, an va kalnak ram hna ah khan caan tlawmte cu an caah himnak hmun ka rak si. Cucaah mah hihi Bawipa Pathian bia cu an si, tiah chim hna: ¹⁷ Miphun dang hna chung khan ka pumh ṭhan hna lai i ka ṭhek hnanak ram chung khan ka khawmh ṭhan hna lai, cun Israel vawlei cu ka pek ṭhan hna lai. ¹⁸ Annih cu a chung i an luh tikah ṭhat lonak an tuahmi vialte le thil fihnung an tuahmi vialte kha an hlawt lai. ¹⁹ Lungthin dang ka pek hna lai i an chungah thlarau thar ka khumh lai; an pum chungin lung bantukin a hakmi lung an ngeihmi kha ka chuah lai i titsa bantukin a nemmi lung kha ka pek hna lai. ²⁰ Cun ka phung kha an zulh lai i ka nawlbia kha an tuah lai. Annih cu ka mi an si lai i kei cu an Pathian ka si lai. ²¹ Sihmanhsehlaw ṭhat lonak an tuahmi le thil fihnung an tuahmi cung i a lung a chia ṭheo rihmi tu cu an tuahmi kha zeicahdah an tuah tiah ka chimter hna lai, tiah Bawipa hrimhrim nih a ti," tiah a ti. ²² Cun cherubim nih cun an thla an samh i an sirah cun leng kekual kha an um i an cungah khan Israel Pathian sunparnak kha a um. ²³ Bawipa sunparnak cu a tho i khuapi chung khan a chuak i khuapi nichuahlei i a ummi tlang cungah khan a dir. ²⁴ Cun thlarau nih a ka cawi i Khaldia-ram i saltangmi hna sinah khan a ka kalpi. Hi thil vialte hi Pathian nih a run thlahmi langhnak khan a rami a si i ka hmuhmi langhnak nih cun a ka kaltak. ²⁵ Bawipa nih ka sin i a phuanmi vialte cu saltangmi kha ka chimh hna.

¹ Bawipa bia cu ka sinah a ra phan i, ² "Mipa, na umnak mi hi ralthawh hmangmi an si. Mit an ngei nain khua an hmu lai lo i hna an ngei nain khua an thei lai lo, zeicahtiah mi dohhmang an si. ³ Cucaah mipa, an mit hmuh hrimhrim ah chun ah lam ca i na herh ding kha i tim law khualtlawn ah cun i thawh tuah. Na inn kha na kaltak i an hmuhhngan ah ral taannak chungah na kal tikah hin, annih nih mi dohhmang kan si ti kha an hei hngalh hmanh hnga maw. ⁴ Na thil kha chuah hna law ral taannak chung i a kal ding bantukin i tim; an hmuhhngan te ah chun ah tuah law cun zanlei ah cun an hmuh hngan ṭhiamṭhiam ah saltannak chung i a kal dingin na inn in i thawh tuah. ⁵ Cun an hmuh hngan ah cun vampang kha pem law cu a pemnak chung cun na thilri kha kalpi hna. ⁶ Cun khua a muih tikah, na thil cu na liang ah i khinh law an hmuh hngan ah cun chuahpi, cun vawlei kha na hmuh khawh nakhnga lo na hmai kha i khuh. Nangmah cu Israel mi hna ca i ralrinnak hmelchunhnak ah kan ser lai," tiah a ti. ⁷ A ka chimh bantukte cun ka tuah. Chun ah ka thilri kha ka chuah hna i saltannak i a kal lai ding bantukin kaa tim i zanlei ah vampang cu ka kut in ka pemh. Khua a muih tikah ka thil cu kaa khinh i an hmuhhngan ah cun ka chuahpi. ⁸ - ⁹ A thaizing ah Bawipa bia cu ka sinah a ra phan i, "Mipa, Israel mi, khi dohhmangmi hna nih khin, zeidah na tuahmi kha a si? tiah an in hal lo maw?" tiah a ti. ¹⁰ Cun a ka thawh ṭhan i, "Mah hihi Bawipa Pathian bia a si tiah chim hna: Hi bia hi Jerusalem khua i a ummi siangpahrang fapa le khika i a ummi Israel mi vialte caah a si. ¹¹ Nangmah cu an caah ralrinnak hmelchunhnak na si kha chim hna; na tuahmi cu an cungah tuah a si lai, annih cu ral taannak le sal taannak ah an kal lai. ¹² An siangpahrang fapa nih khan thil kha mui ah aa khinh lai i a chuahnak ding ca i an sermi awng khan a chuak lai, amah cu ahohmanh nih an hmuh khawh nakhnga lo le amah zong nih vawlei kha a hmuh khawh nakhnga lo, a hmai kha aa khuh lai. ¹³ Sihmanhsehlaw ka sur in ka vorh lai i aa awh lai. Khaldi mi hna umnak Babilon ram ah khan, a hmu lai lo nain ka kalpi lai; cun khika ah khan a va thi lai. ¹⁴ Amah a cawngtu ralkap hna le a ralkap bu vialte kha thlitu pali lakah ka ṭhek dih hna lai i phawi cia vainam he ka zulh hna lai. ¹⁵ Cun miphun dang hna sin le ram dangdang ah ka ṭhek hna tikah khan Bawipa ka si cu an hngalh lai. ¹⁶ Sihmanhsehlaw an lakah tlawmpalte cu vainam le mangṭam in le rai in a luat ding kha ka nganh hna lai i cu hna nih cun an va kalnak miphun dang hna sinah khan thil fihnung an tuahnak kong vialte kha an va chim dih lai i annih nih Bawipa ka si kha an hngalh lai," a ti. ¹⁷ - ¹⁸ Cun Bawipa bia cu ka sinah a ra i, "Mipa, rawl na ei tikah ther lengmang in ei law ti na din tikah therphang lengmang in um tuah. ¹⁹ Cun zapi cu, Jerusalem khua chung i a ummi hna le Israel ram kong i Bawipa bia cu hihi a si, tiah chim hna: ’Annih nih rawl an ei tikah thinphang in an ei lai i ti an din tikah therphang in an din lai; ram chungah hin tuksapur thil a khat lai; zeicahtiah khika i a ummi hna cu zaang-ennak in an khat. ²⁰ Mi an um tawnnak khua kha a ṭhing lai i ram cu a rawk dih lai. Cuticun keimah cu Bawipa ka si kha nan hngalh lai,’ tiin na chimh hna lai," tiah a ti. ²¹ - ²² Bawipa bia cu ka sinah a ra phan i, "Mipa, Israel ram chung i atu lio caan i a leng ngaimi phungthluk bia, ’Caan cu a liam lengmang ko, langhnak hna cu an lo dai lengmang ko,’ timi hi zeidah a si? ²³ Annih cu thawh hna law mah hihi Bawipa Pathian bia a si, tiah chim hna: Hi phungthluk bia hi ka donghter cang lai; Israel ram chungah theih a si ṭhan bal ti lai lo, a ti. Cun annih cu, ’Cu caan cu a nai ngaingai cang i langhnak cu a tling taktak lai,’ tiah chim hna, a ti. ²⁴ Hi hnuah cun Israel mi hna lakah langhnak deu a um ti lai lo i lih ṭawnchommi mangihnak zong a um ti lai lo, ²⁵ zeicahtiah Bawipa nih ka duhmi kha ka chim lai i tuah a si ko lai. Hmailei ah thawn a si ti lai lo, mi doh hmangmi hna, nanmah chan ah hin ka chim lai i ka tuah lai, tiah Bawipa Pathian hrimhrim nih a ti," tiah a ti. ²⁶ - ²⁷ Bawipa bia cu ka sinah a ra i, "Mipa, Israel mi nih an i thawh i, ’Langhnak na hmuhmi cu saupi tlin loin a um ko lai, na chimmi cu hmaileipi kum ca khi a si,’ an ti. ²⁸ Cucaah hihi Bawipa Pathian bia a si tiah chim hna: Ka bia cu pakhat hmanh kha a rau lai lo i ka chim lio hmanh ah hin tuah a si lai. Mah hihi Bawipa Pathian bia hrimhrim a si," tiah a ti.

¹ Bawipa nih a ka thawh i, ² "Mipa, Israel mi profet hna kha chim hna; chim hna law anmah an lungchung chuak bia a chimmi hna kha chim hna, Bawipa nih a chimmi hi thei tuah u, ti hna: Bawipa Pathian bia cu hihi a si: ³ Maw profet ṭhalo, mihrut rual hna, lungthawhnak kan hmuh nan timi cu nanmah lungchung in a chuakmi men a si i langhnak zeihmanh nan hmu lo. ⁴ Maw Israel, na profet hna cu hnawmpon lak i a vakmi cenghngia bantuk an si. ⁵ Bawipa ni i ral tuk tikah fek tein an dir khawh nakhnga, Israel velchum i a ummi ralhau a rawkmi kha a rawhnak cu hung thlop awkah an hung kal lo. ⁶ Lih lawng kha an chim i ahmaan lomi langhnak lawng kha an hmu. ’Mah hihi Bawipa bia hrimhrim a si,’ an ti, asinain Bawipa nih annih cu a fial hna lo, asinain an bia cu Bawipa nih a tlinter ko lai, tiah an ruah. Nan profet hna nih hin hlennak langhnak a si lo maw an hmuhmi hi? ⁷ Nan mangihnak hi lih a si ko lo maw? Bawipa bia hrimhrim a si, nan ti, sihmanhsehlaw cu bia a chimtu cu Kei ka si lo. ⁸ "Cucaah hi tu hi Bawipa Pathian ka bia cu a si: ’Nan bia cu ahmaan lomi bia a si caah le nan hmuhmi langhnak cu lih an si caah, nannih cu kan ral hna, tiah Bawipa Pathian nih a ti. ⁹ Langhnak an hmuhmi ahmaan lomi a simi hna le an mangihnak lih a simi profet hna kha ka kut ka hlerhnawh hna lai. Ka mi hna nih khua an khannak hmun ah khan hmun an ngei lai lo i Israel mi hna min relnak cazin chungah khan khumh an si lai lo i Israel ram zong an ke nih a lam lai lo. ¹⁰ Cuticun nannih nih Bawipa ka si kha nan hngalh lai. Zeicahdah hi bantuk hin dantat an si lai ti ahcun, ka mi hna kha a pingah an hruai hna caah a si, zeizong vialte a ṭhat lo ko zongah khan, zeizong vialte a ṭha dih ko, an ti hna. Zei he dah aa lawh ti ahcun, vampang pakhat chong hna seh law, cu vampang an chon tikah cun fek tein mirang vawlei in sengh loin a lengin sirang nalh men hna seh law, cu he cun aa lo. ¹¹ Hi a nalhtu hna hi chim hna law, vampang cu a cim lai, ti hna; ruahpi kha fak piin a sur lai i lung bantukin a hakmi rial kha an tla lai i thlitu a fakmi kha ka hranter lai. ¹² Inn cu a tluk tikah, "Nan senghnak mirang vawlei kha tah khuazei ah dah a si kun?" an ti hna lai. ¹³ Cucaah hihi Bawipa Pathian bia a si: Zeizong vialte kha a rawh dih hlantiang, ka thin nan ka phawh caah thli chia kha ka hranter lai, ka thin hun in ruahpi fak piin ka surter lai i ka thinlinh in lung tlukin a hakmi rial kha ka tlakter hna lai. ¹⁴ Si rang nan thuhmi inn cu ka chimh lai i vawlei ah ka hrilh lai i a hram kha an lang dih lai. A tlu lai i cu chungah cun nannih zong hrawh nan si chih lai; cuticun Bawipa ka si kha nan hngalh lai. ¹⁵ Inn cungah cun ka thinhunnak kha ka hman lai i sirang a thuhtu hna cung zongah khan ka hman lai; cun mi nih an i thawh lai i ¹⁶ Inn kha a um ti lo, a satu hna zong kha an um ti lo, Jerusalem khua sin i bia a chimtu profet hna, daihnak a um na lo i, daihnak a um, tiah a chimtu hna kha an um ti lo,’ an ti lai. Mah hi Bawipa bia hrimhrim a si," tiah a ti. ¹⁷ "Cun atu cu, mipa, i mer law, na mi hna lak i a ummi nu hna, anmah lung chung chuak lawngin bia a chimmi hna kha chim hna. ¹⁸ Annih cu thawh hna law, law, ’Mah hihi Bawipa Pathian bia a si ti hna: Pa kha foih khawh nakding caah banrek ca i kutkhih a ṭhi i a mi kip nih an kum rup cio ah an i khuh khawh awkah lukhuh a sermi minu hna, nannih cu kan fih hna; nannih nih ka mi hna nunnak cu thah awkah kawl in nanmah nunnak tu cu him tein umter awk kha nan timh maw? ¹⁹ Nannih nih ka mi hna hmaiah barli pei khat ruang le changreu pelpawi ruangah nan ka thurhhnawmh cang, nannih nih lihbia ngaih a duh ngaimi ka mi hna sinah lih nan chimnak thawngin, a thi hnga lo ding kha nan thihter hna i a nung hnga lo ding kha nan nunter hna. ²⁰ Cucaah mah hihi Bawipa Pathian bia cu a si: Nannih nih pa kha vate bangin foih nan i zuamnak nan camh kutkhih kha ka duh lo. ²¹ Kha kutkhih kha ka chah hna lai i vate bangin nan foihmi hna an nunnak kha ka luatter lai. Nan hmaikhuh puan sau pipi cu ka thleh dih hna lai i nan kut chung khan ka mi cu ka chuah hna lai, annih foih khawhnak ṭhawnnak kha nan ngei ti lai lo. Cuticun Bawipa ka si kha nan hngalh lai. ²² Miding mi cu an cungah ṭhat lonak tuah ka tim lo nain an lung nan donghter hna i cu bantuk ṭhiamṭhiam in miṭhalo mi hna cu an lam ṭhalo kha hlawt i khamh an si nakhnga tu si loin thazang nan pek lehlam hna; ²³ cucaah nan hlennak langhnak hna cu nan hmu ti hna lai lo i nan mangihnak cu nan hmang ti lai lo. Ka mi hna cu nan kut chung khan ka chuah hna lai i cuticun Bawipa ka si kha nan hngalh lai," tiah a ti.

¹ Israel upa cheukhat hna kha an ra ka leng i ka hmai i an ṭhut lioah khan Bawipa nih a ka thawh i, ² - ³ "Mipa, hi mi hna nih hin an siasal hna cu an lung in an i khihchih hna i an tluknak a sertu thil sual kha an i zohchih peng. Cu bantuk mi hna cu ka sinah bia ka chimter hna hnga maw? ⁴ Annih cu chawn hna law hihi Bawipa Pathian bia a si tiah chim hna: Israel mi ahohmanh, a lung chungin a siasal aa khihchih peng i a tluktertu thil sual aa zohchih pengtu paoh nih profet sinah a rat ahcun, a siasal kha tam ko hna hmanh seh law keimah Bawipa nih ka pum in ka leh hrimhrim lai. ⁵ Israel mi hna cu an dihlak in an siasal hna nih ka sinin ṭhen ko hna in mising siter ko hna hmanh seh law, ka lehnak hna bia nih an lungthin kha a tlaih hna lai. ⁶ Cucaah hihi Bawipa Pathian bia a si tiah Israel mi cu chim hna: Nan siasal kha mertak hna u, thil fihnung nan tuahmi vialte kha nan hnulei chit hna u. ⁷ Israel mi nih si hna seh, miphundang mi nih si hna seh, ahohmanh nih keimah kha an ka hlawt i an lung in siasal kha an i khihchih i anmah rilhnak a tluntertu thil ṭhalo kha an i zohchih peng i cu bantuk mi hna nih cun keimah kha chawnh awkah profet sinah an rat ahcun, keimah Bawipa nih annih cu ka pum in ka leh hna lai. ⁸ Cu hna cu ka hmai ka chiathnawh hna lai i anmah cu i zohchunh awk le serhsatnak bia ah ka ser hna lai; anmah cu ka mi hna chungin ka chuah hna lai. Cuticun Bawipa ka si kha nan hngalh lai. ⁹ Profet pakhatkhat cu biachim khan leem khawh a si ahcun, a lemtu cu Bawipa ka si, ka kut ka chuah lai i amah cu Israel mi chungin ka chuah lai. ¹⁰ Profet he, bia a haltu he, an pahnih te cun an sual, cucaah dantat an si veve lai. ¹¹ Keimah sin i an ṭannak khan Israel mi cu zeitikhmanh ah an tlau ti lai lo i an cungah thurhhnawmhnak an i tlunter ti lai lo; annih cu ka mi an si cang lai i kei cu an Pathian ka si lai. Mah hihi Bawipa Pathian bia hrimhrim a si," tiah a ti. ¹² - ¹³ Mah hihi Bawipa nih ka sin i a chimmi bia kha a si: A ka thawh i, "Mipa, ram pakhatkhat nih ka cung i zumh awk tlak loin a umnak thawngin a sual tikah ka kut kha ka samh lai i nifate a rawl kha ka ṭhumh lai. A cungah mangṭam ka tlunter lai i minung he saṭil he ka thah hna lai. ¹⁴ Noah, Daniel le Job, kha mi pathum hna hmanh kha nung rih hna seh law, anmah nunnak dah ti lo cu an dinnak nih khan ahohmanh a khamh kho hlei hna lai lo. Mah hihi Bawipa Pathian bia hrimhrim a si. ¹⁵ Ram pakhatkhat cu a chung i a ummi minung hna kha hrawh awkah sahrang kha ka thlahhnawh hna, cu sahrang hna nih cun an hrawh cikcek i cu sahrang hna ṭih ah cun ahohmanh nih an pal ti lo tikah, ¹⁶ cuka ah cun kha mi pathum hna kha rak um hna hmanh seh law, an fapale le an fanule hna hmanh kha an khamh kho hna lai lo; anmah lawng kha an i khamh kho lai i an ram cu a rawk dih ko lai, tiah ka nun bangin ka chim, tiah Bawipa Pathian nih a ti. ¹⁷ Asiloah, cu ram ah cun vainam kha tlunter ning law cu vainam cu ram chung dihlak ah khan kal in minung le saṭil kha that hna tiah nawl pe ning law, ¹⁸ khaka ah khan kha pathum hna kha rak um hna hmanh seh law, annih nih khan an fapa si hna seh, an fanu si hna seh, an khamh kho hna lai lo, anmah lawng kha an i khamh lai i cucu a si ko hnga, tiah ka nun bangin ka chim, tiah Bawipa Pathian nih a ti. ¹⁹ Asiloah, minung le saṭil kha hrawh awkah, cu ram chungah cun rai tlunter ning law, ka thinhunnak cu thisen in bung ning law, ²⁰ cun Noah le Daniel le Job kha cuka ah cun rak um hna hmanh seh law, an fanule si hna seh, an fapale si hna seh, ahohmanh kha an khamh kho hna lai lo, an dinnak thawngin anmah lawng kha an i khamh kho lai tiah ka nun bangin ka chim, tiah Bawipa Pathian nih a ti. ²¹ "Mah hihi Bawipa Pathian bia cu a si: Cucaah cun ka dantatnak pali, vainam le mangṭam, sahrang le rai hna hi, minung le saṭil hna hrawh awkah Jerusalem khua cung i ka tlunter tikah, a caah zeitluk in dah ruahchannak a tlawm chinchin lai! ²² Tlawmpal cu a chungah nganh an si lai, a tangmi tlawmpal cu fapa si hna seh fanu si hna seh, chuahpi an si lai. Nangmah sin i an ra chuah ah khan rak zoh hna hmanh, zeitindah an umtuning a si i zeidah an tuahmi a si kha rak zoh hmanh. Jerusalem cung i harnak ka tluntermi vialte le a cung i sifahnak ka tluntermi vialte kongah hin mah nih hin tlawmpal cu na lung an daihter lai. ²³ Zeitindah an umtuning a si ti le zeidah an tuahmi a si ti kha na hmuh tikah na lung kha kan daihter lai, zeicahtiah sullam loin a cungah ka tuah lo ti kha na hngalh lai. Mah hihi Bawipa Pathian bia hrimhrim a si," tiah a ti.

¹ Mah hihi Bawipa bia ka sinah a phanmi a si: ² Mipa zeitindah mitsur ruang hi thingkung dang nakin a ṭhat deuh hlei? Zeitindah tupi chung i thingkung nge hna nakkhin a ṭhat hlei? ³ Thil santlaimi pakhat tal ser khawhnak ding thing a si maw? Mi nih tung pakhatkhat ah an ser kho in a cungah thil an bat kho maw? ⁴ Mei chungah tih a si i a dong pahnih hna cu mei nih a kangh hna i a laifang cu meihol bantukin a um ahcun zeital ah a ṭhahnem hnga maw? ⁵ Tlamtling tein a um lio hmanh ah zeihmanh ṭhathnemnak a ngei lo, Mei nih a kangh i a nah dih hnu chinchin ahcun zeitluk in dah a ṭhathnemnak cu a tlawm chinchin lai! ⁶ Cucaah hihi Bawipa Pathian bia a si: Tupi chung mitsur ruang cu mei i tih awk thing ca lawngah a ṭhathnem bantukin Jerusalem khuami hna cu mei ca lawnglawng ah an ṭhahnem ve. ⁷ - ⁸ Annih cu ka hmai ka chiathnawh hna lai, Mei chungin luat hna hmanh seh law mei ṭhiamṭhiam nih a kangh hna lai. Annih cu zumhawktlak loin an um caah ka hmai ka chiathnawh hna lai i Ram cu ka hrawh dih tikah Bawipa ka si cu nan hngalh lai. Mah hihi Bawipa Pathian bia hrimhrim a si, tiah a ti.

¹ Bawipa bia cu ka sinah a ra i, ² "Mipa, Jerusalem hi a ziaza fihnung a simi cu hngalhter tuah. ³ Mah hihi Bawipa Pathian nih a sinah a chimmi bia cu a si, tiah chim: ’Kanaan ram hi na pupa chuahkehnak ram a si i khika ah nangmah zong hi hrin na si; na pa cu Amor mi a rak si i na nu cu Hit mi a rak si. ⁴ Zeitindah na chuah ah hin tuah na rak si ti ahcun, na chuah ah hin na laihri tan na rak si lo, kholhnak ding ti zong chiahpiak na rak si lo i kholh na si lo, cite thuh awk na rak simi kha thuh na si lo i nau hlawmnak puan zongin hlawm na si fawn lo. ⁵ Ahohmanh nih zei ah an in rel lo caah hi thil hi pakhat hmanh an in tuahpiak lo, ahohmanh nih an in zaangfah fawn lo; na chuah ni ah khan nangmah hnawmhne lakah vawlei ah khan hrilh na rak si ko. ⁶ Cu tikah kei cu na pawngah khan ka rak i chawk i na thi chung i na ke na rak chaih len ko kha kan hmuh; na thi chung i na um lioah khan kan chawnh i, nung tuah, kan ti. ⁷ A hring zungzalmi thing, lo lak i a ummi thingkung bantukin kan cawngh i na nung i na ṭhang. Na hung ngaknu, na hnuk hna cu an hung bom i na sam cu an hung sau, sihmanhsehlaw taklawng na si ko rih i na lang ko rih. ⁸ "Cun na pawngah ka ra ṭhan i va ngeih cu na si cang ti kha kan hmuh. Ka puan cu kan zawnh i na taklawng cu kan huh. Cun kan hamnak kha ka fehter i nupi ah kan ṭhit i keimah ta ah na cang, tiah Bawipa Pathian nih a ti. ⁹ Cu tikah ti in kan kholh i na thi kha ka ṭawl i chihriti kan thuh. ¹⁰ Ṭamhmi puan kha kan aihter i saphaw kedan kan danhter; puan hmangṭhia khan kan thuamh i pu puan kha kan aih. ¹¹ Hlawn caah kutkhih kan khih i na hngawng ah ṭhi kan oih; ¹² hnartonh kan tonh, hnatonh kan tonh i suiluchin kan chinh. ¹³ Na hlawn cu sui le ngun an si, na thilthuam cu puan hmangṭhia le pu le ṭamhmi puan an si. Na rawl ah changvut le khuaihliti le oliv chiti an si i na hun i dawh ngaingai i siangpahrangnu na hung si. ¹⁴ Naa dawh minthannak cu khuazakip ah a thang, zeicahtiah keimah nih kan thuamhnak sunparnak nih cun naa dawhnak cu a tlinter, tiah Bawipa Pathian nih a ti. ¹⁵ "Sihmanhsehlaw naa dawhnak cu naa zum ciammam i na minthannak cu hlawhhlannak ah na hman i khualtlawngmi kip kha na rak i duh hna. ¹⁶ Na thilthuam kha naa lak hna i ṭheng kha dawh ngaiin naa ser i naa ṭamh i cuka ah cun nu le pa sualnak kha na tuah; naa dawh ruangah amah ta si awkah amah he cun na sual. ¹⁷ A ṭha ngaingaimi hlawn sui le ngun kan pekmi kha na lak i cucu pa siasal ah na ser hna i cu he cun nu le pa sualnak na tuah. ¹⁸ Annih cu ṭamhmi puan khan na khuh hna i ka chiti le ka zihmui kha na pekchanh dih hna. ¹⁹ Kan pekmi rawl, changvut, chiti le khuaihliti, nangmah kan cawmnak kha na lak i an hmaiah cun rim thaw ṭhawinak caah na hun hna. Mah hihi Bawipa Pathian bia hrimhrim a si. ²⁰ "Fanu, fapa na ka hrinpiakmi hna kha na lak hna i hi siasal hna hmaiah hin an rawl caah rai ah na thawi hna. Hlawh na hlannak nakin mah hihi a hme deuhmi thil a si maw? ²¹ Sihlah! Nangmah nih ka fale cu na thah hna i mei in na khangh hna i na siasal hna sinah cun na pek hna. ²² Fih a nungmi zuanzamnak na tuahmi vialte hna ruangah hin hlanlio kong kha na philh i taklawng le pumro in na rak um i na thi chung i na ke na rak chaih len ko lio kha na hngal ti lo. ²³ Ṭhat lonak na tuahmi vialte cu na tuah dih hna hnuah, (A! a va poi thiam dah, tiah Bawipa Pathian nih a ti) ²⁴ hmun lawng kip ah khan zaunak na donh hna i ṭhutdan sang naa ser hna. ²⁵ Lam ṭeka kip ah khan ṭhutdan sang cu na ser hna i naa dawhnak cu ningzahnak na phakter, aa chawkmi kip sinah khan na pum cu naa pe i a voi rel cawk loin na sual. ²⁶ A hormi na innpa Izipt he khan sualnak na tuah i sualnak na tuahmi a rel in rel cawk a si lomi nih khan ka thin a ka phawh. ²⁷ "Nangmah cu ka kut kan samhhnawh i na rawl kha kan ṭhumh. Cun nangmah aan huatu, Filistin minu hna, na zuanzamnak nih a nor cikcekmi hna sinah khan kan chanh ²⁸ Mah hihi i zat rih loin Assiria mi hna sinah khan na sual ṭhan hoi, nu le pa sualnak chungah khan na luhpi hna, sihmanhsehlaw naa zaa ṭhiamṭhiam hlei lo. ²⁹ Chawleh chawhrawlnak ram Khaldia ram ah khan nu le pa sualnak cu rel cawk lo na tuah, asinain hi hmanh ah hin naa za hlei fawn lo. ³⁰ "Ka thin na hei ka phawk hringhran dah! tiah Bawipa Pathian nih a ti. Mah hi vialte hi ningzah hngal lomi hlawhhlangnu bantukin na tuah. ³¹ Lam ṭeka kip ah khan na zaunak kha na ser hna i hmun lawng kip ah khan na ṭhutdan kha na ser hna, sihmanhsehlaw hlawhhlangnu sawhsawh bantuk si loin nang nih cun a man lak na duh lo. ³² A va cungin pa aa duhmi nih cun midang sin cun a man a lak tawn. ³³ Hlawhhlangnu zong nih a man an lak; sihmanhsehlaw nang nih cun an duhtu kha laksawng tu na pek lehlam hna i nangmah he sualnak tuah awkah vawlei cung khuazakip khan na lem hna. ³⁴ Sualnak na tuahnak ah hin nu dang he cun nan i ralkah: ahohmanh nih an in fuh lo, a man na la hna lo, na pek lehlam hna. Hoi dang he aa ralkah hrimhrimmi na si ko. ³⁵ - ³⁶ "Cucaah maw hlawhhlangnu, Bawipa bia cu ngai tuah. Mah hihi Bawipa Pathian bia cu a si: Na luannak ah hin na tlau cang, an duhtu hna he sualnak na tuahnak ah na pum cu naa langh cang. Fih a nungmi na siasal hna le annih sin pek awkah na thahmi ngakchia hna lehrulhnak ah, ³⁷ nangmah duhtu na fuhmi vialte hna, na duhmi vialte hna le na huatmi vialte hna kha, ka pumh hna lai. Annih cu khuazakip in ka pumh hna lai i an hmaiah khan na puan kan phoih dih lai i na takpum cu a dihlak in a lawng piin an in hmuh lai. ³⁸ Va cung pa duh le lainawn in taza kan cuai lai i nahchuah le thinhun in thisen a chuahtu tiin sual kan phawt lai. ³⁹ Cun annih sinah khan nangmah cu kan chanh lai. Annih nih na zaunak donhmi kha an chimh hna lai i na ṭhutdan sang kha an hrawh hna lai; cun na puan kha an in phoih lai i na hlawn sungsung kha an lak hna lai i taklawng le taklang in an in kaltak lai. ⁴⁰ Mibu kha an in pumhhnawh lai i lung in an in cheh lai, an vainam in an in sam cikcek lai. ⁴¹ Na inn kha an khangh hna lai i nu tampi hmuh hngan ah bia an in ceih lai. Nupa sualnak na tuahmi kha ka donghter lai i nangmah an duhtu hna sinah khan zeitikhmanh ah a man na pe ti lai lo. ⁴² Khi tikah ka thinhunnak cu ka ṭhumh lai i ka nahchuahnak cu na sinin aa mer lai. ⁴³ Dai tein ka um lai i ka thin a hung ti lai lo. Na no lio caan kha na philh i na tuahmi thil vialte hin awklokchong in na ka tuah caah kei zong nih na tuahmi thil ruangah na cungah teirul chamnak kha ka tlunter ve, tiah Bawipa Pathian hrimhrim nih a ti. "Hi ningzahnak hi na tuah lo maw? Fihnungmi thil dang zong na tuah hna lo maw? ⁴⁴ Phungthlukbia a hmangmi pawl nih an in thawh lai i, ’Nu ang,’ an in ti lai. ⁴⁵ A va le a fale hna a fihmi na nu fanu hrim na si ko. An vale le an fale a fihmi hna na unau hna i unau nu hrim na si ko. Nannih cu nan dihlak in nan nu cu Hit mi a si i nan pa cu Amor mi a si. ⁴⁶ Na u nu cu na chak i a fale he a ummi Samaria kha a si; na nau nu cu na thlanglei ah a fale he a ummi Sodom kha a si. ⁴⁷ Anmah umtuning in um ve in thil fihnung kha na tuah ve lo maw? Anmah nak hmanh in ṭhalo deuh in na um dengmang. ⁴⁸ Bawipa Pathian nih, na nau nu Sodom le a fale hna nih khan nangmah le na fale hna nih nan tuah bantuk hin cun an tuah bal lo, tiah ka nun bangin ka ti. Na naunu Sodom ṭhat lonak cu hihi a si: ⁴⁹ Amah le a fanu hna cu chawva le rawl tampi an ngeihmi kha an i porhlaw i hnangam le nuam ngaiin an um i sihmanhsehlaw misifak le mirethei kha an bawm bal hna lo. ⁵⁰ An ruam a hung kai i ka hmai i fihnung a simi thil kha an tuah i na hmuh bang hin ka hlonh hna. ⁵¹ Samaria nih hin sualnak leiah na cheu an banh lo; amah nakin thil fihnung tam deuh na tuah i cu na tuahmi thil fihnung he zohchih ahcun na unau nu cu a sual lo ko a lo. ⁵² Na unau nu hna nih an hmuh awk a si tiah na ruahmi ṭumchuknak cu na in hrim awk a si lai. Annih sualnak nakin nang na sualnak kha fih an nun tuk deuh caah nangmah he tahchunh ahcun annih cu a sual lo bangin an lang ko; cucaah atu cu ningzahnak le ṭumchuknak cu na in hna lai i na unau nu hna cu a sual lomi kha na lawhter ko hna lai. ⁵³ "Sihmanhsehlaw Sodom le a fanule hna le Samaria le a fanule hna kha an van ṭhatnak cu ka pek ṭhan hna lai i cu caan ah cun nangmah zong na van ṭhatnak kha kan pek ṭhan ve lai. ⁵⁴ Na ningzahnak cu na in lai i na tuahmi thil vialte ruangah khan hmaichiatnak na hmuh lai caah, annih caah cun hnangamnak na si lai. ⁵⁵ Sihmanhsehlaw na unau nu Sodom le a fanu hna le na unau nu Samaria le a fanu hna kha hlanlio an sining an si ṭhan tikah nangmah le na fanule hna cu hlanlio nan sining ah khan nan kir ṭhan ve lai. ⁵⁶ Naa porhlawt khawh lioah khan cun na unau nu Sodom kong kha tampi na thei in tampi na chim lo mei kha. ⁵⁷ na ṭhat lonak a langh hlanah khan cun? Sihmanhsehlaw atu cu amah bantukin Edom fanu hna le an pawngkam i a ummi vialte hna ca le, na velchum i a ummi Filistin mi fanu hna, nangmah an serhsattu hna caah khan, nihsawh awkah na cang cang. ⁵⁸ Atu cu nangmah zong na zuanzamnak le fih a nungmi na ziaza theitlai kha na ing ve cang lai. Mah hihi Bawipa bia hrimhrim a si," tiah a ti. ⁵⁹ Mah hihi Bawipa Pathian bia a si. Aa thawh i, "Nangmah nih biakamnak kha na hrawh i chiatsernak kha zei ah na rel lo caah na hmuh awk hnga a sining in na cungah ka tuah lai. ⁶⁰ Sihmanhsehlaw na no lio i nangmah he ka tuahmi biakamnak kha ka philh lai lo i zungzal in a hmun laimi biakamnak cu nangmah he ka ser lai. ⁶¹ Cun na rak tuahmi kha na hun hngalh ṭhan hna lai i na unau nu hna kha, a cang deuh he a no deuh he na hmuh hna tikah na ning a zak lai. Zeicahtiah annih cu na fanu si dingah nangmah kha kan pek hna lai i na biakamnak lengah a ummi an si lai lo. ⁶² Cuticun ka biakamnak cu nangmah sinah ka fehter lai i Bawipa ka si kha na hngalh lai. ⁶³ Na tuahmi vialte kha kan ngaihthiam dih hnuah cun, na lung a pem lai i na ning a zak lai i na lung a ar lai i voi khat hmanh na kaa na ang ṭhan ti lai lo. Mah hihi Bawipa Pathian bia hrimhrim a si," tiah a ti.

¹ Mah hihi Bawipa nih ka sinah a chimmi bia cu an si; a ka thawh i, ² "Mipa, Israel mi cu tahchunhnak bia le tuanbia in chim hna," a ka ti. ³ Hihi Bawipa Pathian bia cu a si: "Mupi nganpi, pakhat a hmul aa dawh ngaingai i, thla ngan pipi a ngei i a thla kaupi in a samhmi a rak um. Lebanon tlang ah khan a va zuang i Sidar kung a hluai kha a khiah i ⁴ Chawleh chawhrawlnak ram ah a zuanpi i chawdawrmi hna khua ah khan a chiah ⁵ Cun Israel ram khan mitsur ruang note pakhat kha a lak i a ṭhantertu dingah ti a um zungzalnak vawlei ṭhatnak hmun ah khan a phun. ⁶ Mitsur ruang note cu a hnah a hun corh i niam tein hmun kaupi ah a zam i mitsur ruang ah a hung cang. A nge hna cu mupi leiah khan an ṭhang i a hram hna cu thuk piin vawlei ah khan an lut. Mitsur ruang cu a hnah kha an hung tam i a ruang kha an khuh dih. ⁷ Mupi dang pakhat a um ve i thla ngan pipi a ngei i a hmul zong a chah ngai. Cun mitsur ruang nih khan a um lionak dum nakkhan ti tam deuh a ka pek khawh lai tiah a ruah caah mupi leiah cun a hram le a ṭe cu a mer hna. ⁸ A ngaingai ti ahcun, mitsur ruang kha vawlei a ṭhatnak ti a tamnak hmun, a hnah tampi a ngeih khawh i thei tampi a tlai khawh i mitsur ruang ṭha a si khawh nakding hmun ah khan cin a si ko cang. ⁹ Cucaah Bawipa Pathian bia hihi a si tiah chim hna: hi mitsur ruang hi a nung kho in a ṭhang kho ngai lai maw? Mupi pakhatkhat nih khan a hram in a bongh i a thei kha a zun dih hna lai lo maw? A nge kha a khiak hna in an car dih lai lo maw? Cuti i phawinak dingah cun thazang ṭhawng tuk zong a herh lai lo i miphun ṭhawngpi zong a herh lem lai lo. ¹⁰ Phun cu phun a si ko cang, asinain a nung in a ṭhang lai maw? Nichuahlei thli nih hranh in a car ko hnga lo maw? A umnak hmun ah cun a car hnga lo maw?" a ti. ¹¹ Bawipa nih cun a ka thawh i, ¹² "Ralthawh hmangmi hna kha, hi bianabia sullam hi nan hngal maw? tiah hal tuah hna. Babilon siangpahrang kha Jerusalem ah a ra i an siangpahrang le a bawi pawl kha Babilonia ah a kalpi hna tiah chim hna. ¹³ Siangpahrang tefa hna chungin mi pakhat kha a lak i amah he cun biakamnak a tuah i zumhtlak in ka um lai tiah bia a kamter. ¹⁴ Ram cu a ṭhawn ṭhan khawh nakhnga lo le, biakamnak kha a zulh taktak nakhnga ramchung upa kha sal ah a hruai hna. ¹⁵ Asinain Judah siangpahrang kha ral a tho i rang le ralkap tampi hal awkah Izipt ram ah khan lamkal a thlah hna. Cu bantuk mi cu a hlawh a tling kho hnga maw? Hi bantukin a tuah caah rawhnak cu a luat kho lai maw? Biakamnak kha hrawk in a luat kho hnga maw? ¹⁶ Ka nun bangin ka chim, tiah Bawipa nih a ti: Cu siangpahrang cu siangpahrang ṭhutdan cungah a ṭhuttertupa ram chungah khan a thi lai; bia aa kammi kha zei ah a rel lo i chiat aa serhmi a let ṭhanmi cu Babilon ah khan an thi lai. ¹⁷ Mi tampi thihnak ding caah raltuknak chuntlung le kahcham tampi a sermi Babilon mi hna kut chung khan Izipt siangpahrang ralkapbu ṭhawng hmanh nih an chanh kho lai lo. ¹⁸ A chiatsermi le a biakammi kha a let ṭhan hna. Hi thil vialte cu a tuah hna, atu cu an luat ti lai lo. ¹⁹ Cucaah hihi Bawipa Pathian bia cu a si. A thawh i, "Ka nun bangin ka chim, keimah min chalh in chiat a sermi kha zei ah a rel lo i aa let caah dan ka tat lai. ²⁰ Sur rap ka chiah lai i aa foih lai. Ka cungah zumh awk tlak in a um lo caah Babilon ah ka kalpi lai i khika ah dan ka tat lai. ²¹ A ralkap ṭhawng bikbik hna cu raltuknak hmun ah an thi lai i a nungmi a taangmi hna cu a kenkip ah an i ṭhek dih lai. Cun khi tikah keimah Bawipa nih hi bia cu ka chimh ti kha nan hngalh lai, tiah a ti. ²² Mah hihi Bawipa Pathian bia a si: Keimah zong nih sidar thingkung a hluai pakhat kha ka lak ve lai i tlang sang pakhat cungah ka phun lai. ²³ Israel tlang sang bik ah ka phun lai. Nge tampi a hun ngei hna lai i thei an tlai hna lai i sidar thing dawh ngaingai ah a cang lai. Cuka ah cun va a phunphun kha an um lai i a thladem ah khan khua an sa lai. ²⁴ Ram chung thing vialte nih khan, Keimah cu Bawipa ka si kha an hngalh lai. Keimah nih thingkung a sangmi kha ka hau hna i thingkung a niammi kha ka santer hna i a romi kha ka hrinter hna. Hihi Bawipa nih ka chim i ka tuah lai, tiah a ti.

¹ Bawipa nih a ka thawh i, ² "Mi nih Israel ram chungah an chim lengmangmi phungthlukbia ’Hringtu nu le pa hna nih mitsur thei thor an ei i an fale ha a za,’ an rak timi kha a sullam zeidah a si? ³ Ka nun bangin ka chim, tiah Bawipa Pathian nih a ti, hi phungthlukbia hi zeitikhmanh ah Israel ram chungah hman a si ti lai lo. ⁴ A nungmi paoh cu keimah ta an si dih, an hringtu nu le pa si hna seh, an fale si hna seh, an dihlak in ka ta an si. A sualmi paoh cu a thi ko lai. ⁵ "A dingmipa, a dingmi thil le a hmaanmi thil a tuahmipa kha ruat hmanh. ⁶ Khuahrumbo ah khan rawl a ei bal lo, Israel mi siasal kha a zohcho bal hna lo i midang nupi sinah a sual lo i nu kha an hnisuk lioah a naih bal hna lo. ⁷ Ahohmanh a hrem bal hna lo i leibatu nih biakamnak ca i thil an pekmi kha a khirh zungzal hna, zeitikhmanh ah mi a ramh bal lo. Rawl a ṭammi kha rawl a pek hna i hnipuan a ngei lomi kha hnipuan a pek hna. ⁸ A miak lak in siseh, a karh in siseh, tangka a cawih bal hna lo. ⁹ Dinlonak kha a hrial i pakhat le pakhat karlak ah aa buaktlak tein a um. Ka nawlbia kha a zulh hna i ka phungbia kha fel tein a tuah hna. Cu bantuk mi cu miding an si: amah cu a nung lai, tiah Bawipa Pathian nih a ti. ¹⁰ "Amah nih cun fapa pakhat a ngeih ko hnga i a fapa cu zaang-en hmangmi, lainawng, hi nawlbia zeihmanh i a rel lomi a si ko hnga. ¹¹ Hi nawlbia hi pakhat hmanh a zul lomi, khuahrumbo ah rawl a ei i ¹² midang nupi sinah a sualmi, vanchiami le sifakmi kha a hrem i miramh a hmangmi, leibatu nih biakamnak ca i thil an pekmi a khirh lomi, siasal kha a zohcho i fihnung phung kha a tuah vemi, ¹³ a miak le a karh in lei a cawihmi, hi bantuk mi cu a nung lai lo. Hi thil fihnung vialte hi a tuah hna caah a thi lai i a thisen kha a lu cungah a tla ko lai. ¹⁴ "Hi miṭhalopa nih hin fapa a hei ngeih ve ko hnga i cu a fapa nih cun a pa sualnak vialte cu a hmuh dih ko hna hnga; a hmuh cu a hmu ko hna hnga nain pakhat hmanh a tuah hna hnga lo. ¹⁵ Khuahrumbo ah rawl a ei bal lo, Israel mi hna siasal kha a zohcho bal hna lo, midang nupi he a sual bal lo. Mi kha a hrem hna lo, biakamnak thil kha a la lo i a fir lo. ¹⁶ A rawl a ṭammi kha rawl a pek hna i hnipuan a ngei lomi kha hnipuan a pek hna. ¹⁷ Biadinglo kha a hrial i a karh in siseh, dongtanh in siseh phaisa a cawih bal hna lo. Ka phungbia kha a zulh hna i ka nawlbia kha a tuah hna. Cu bantuk mi cu a pa sualnak ruangah khan a thi lai lo; a nung ko lai. ¹⁸ "A pa cu mihremhmang le miramhhmang a si ko hnga i a rualchan lakah khan nuncan ṭhalo in a nungmi a si ko hnga i a ṭhat lo ruangah cun a thi ko hnga. ¹⁹ Nannih nih nan i thawh hnga i, ’A pa sualnak ruangah khan zeicahdah a fapa kha dantat a si lo?’ nan ti hnga. Zeicahdah dantat a si lo ti ahcun, a dingmi le a hmaanmi thil kha a tuah zungzal i ka nawlbia kha ralring tein a zulh hna caah a si, cucaah cun a nung lai. ²⁰ A thi ding cu midang si loin a sualmi kha a si lai; a fa nih a pa sualnak kha aa hrawm lai lo, a pa zong nih a fapa sualnak kha aa hrawm lai lo. Miding mi nih a dinnak theitlai kha a hmuh lai i miṭhalo nih a ṭhat lonak theitlai kha a zun ve ko lai. ²¹ "Cun miṭhalopa nih a ṭhat lonak vialte kha a hlawt hna hnga i ka nawlbia vialte kha a tuah hna hnga i a dingmi le a hmaanmi thil kha a tuah ko hna hnga. Cu pa cu a nung lai; a thi lai lo. ²² A tuahmi ṭhat lonak vialte kha philhpiak a si lai i dinnak a tuahmi ruangah khan a nung lai. ²³ Miṭhalo mi thih cu maw ka duh? A ziaza kha aa remh i a nun kha ka duhmi a si deuh lo maw? tiah Bawipa Pathian nih a ti. ²⁴ "Cun miding mipa nih a ziaza ding kha a hlawt ko hnga i miṭhalo mipa nih fihnung a phunphun a tuahmi kha a tuah ve ko hnga; mah hihi tuah buin a nung ko hnga maw? Nung hlah, dinnak a rak tuahmi vialte kha hngalhpiak a si lai lo; zumhawktlak loin a nung, a sual i cucaah cun a thi lai. ²⁵ Bawipa nih zulhmi phunglam ngei setsai lo in rian a ṭuan, nan ti. Israel mi hna ngai hmanh u, phunglam ngei loin a tuahtu cu nanmah nan si, keimah ka si lo. ²⁶ Miding mipa nih a dinnak a mertak i ṭhat lonak lam ah khan a kal i a thih ahcun, a thih cu, cu ziaza ṭhalo a tuah ruangah cun a si lai. ²⁷ Cu bantukin miṭhalo mipa nih a ṭhat lonak kha a kaltak i a dingmi le a hmaanmi kha a tuah ahcun a nunnak kha a khamh lai. ²⁸ A sualnak kha an sining tein a hmuh hna i a hnulei a mertak hna ahcun, a nung lai, a thi lai lo. ²⁹ "Israel mi nih nan i thawh i, ’Bawipa nih phunglam ngei loin a tuah,’ nan ti. Asilo, phunglam ngei loin a tuahmi cu nanmah Israel mi nan si, keimah ka si lo. ³⁰ Cucaah cun maw Israel mi hna, Bawipa Pathian nih hitin a ti: Ahohmanh nanmahle nan tuahnak cung cio ah bia kan ceih hna lai. Nan ṭhat lonak khan i mer cang ko sawh u, cu ti a si lo ahcun nan ṭhat lonak kha nan tluknak a si lai. ³¹ Thil ṭhalo nan tuahmi kha hlonh hna u law lungthin thar le thlarau thar i lak u. ³² Zeicahdah nan thih lai ee, Israel mi hna? Ahohmanh nan thih cu ka duh ṭung lo, tiah Bawipa Pathian hrimhrim nih a ti," tiah a ti.

¹ Israel bawi hna cu ṭah hla lawh hna law hi bangin ti hna: ² Nan nu cu chiandeih hna lakah chiandeih pi a rak si! Chiandeih no hna lakah a bu kha a rak ser i a hrinmi a fa cu an tam. ³ A fale lak i pakhat cu a cawm i chiandeih no ah a hung cang. Sa seh kha a hun thiam i mi kha a ei hna. ⁴ Cun miphun hna nih khan an auhnawh i an tlung chungah khan an thlak, Cun Izipt ram ah khan sio in an hruai. ⁵ A nu nih a umtuning kha ruahchannak a um lo tiah a hmuh tikah a lung a dong, Cucaah a fale lak i a dang pakhat kha a lak i chiandeih tum no ah a ser ṭhan. ⁶ Chiandeih hna lakah khan aa chawk i Chiandeih tum no umtuning bantuk khan a um. Sa seh kha a hun thiam i mi kha a ei hna; ⁷ An inn ṭhaṭha kha a hrawh hna i an khua kha a ṭhio dih hna. Ram le a chung i a ummi thil vialte kha a onh thawng an theih tikah an khuaruah a har dih. ⁸ Cu ram velchum i a ummi ram vialte hna nih khan an hawhawthnawh i an dawi ciammam i Sur in an vorh i khor chungah an thlak. ⁹ Sio in bawm chungah an hruaih i Babilon siangpahrang sinah an ratpi i thong chungah an thlak. Cucaah Israel ram tlang cungah a aw cu zeitikhmanh ah theih a si ti lo. ¹⁰ Nan nu cu ti kam i phunmi mitsur ruang a rak si, Ti tampi a um caah thei tampi a tlai i a hnah cu hring hlerhhlurh in an um. ¹¹ A nge hna cu an ṭhawng i Uktu bawi ṭhiangṭhunh i ser awk hmanh ah an i tlak. A hung sang i a dang cungah khan a hung fong, A san caah khan le a nge an tam caah khan a lang ngaingai. ¹² Sihmanhsehlaw thinhun in sam a si i vawlei ah hlonh a si; Nichuahlei thli nih a chem i a ro dih, A thei kha a choih dih hna, A nge ṭhawngṭhawng kha an ro dih i mei nih a kangh hna. ¹³ Atu cu ramlak ah, a ro a carnak hmun ah phun a si ṭhan, ¹⁴ Amah nge chung lila khan mei a chuak i a nge vialte cu a kangh dih hna. Uktu bawi hna ca i ṭhiangṭhunh i ser awkah a ṭhawngmi nge a ngei ti lo,’ a ti," tiah a ti. Hihi ṭah hla cu a si i zapi hmanmi ah a cang lan.

¹ Kum sarihnak kum, thla nganak thla ni hra ni ah, Israel mi upa tlawmpal hna cu Bawipa kha lungthin hal awkah an ra i ka sinah khan an ṭhu. ² Khi tikah Bawipa sinin hi bia cu ka sinah a ra. ³ A ka thawh i, "Mipa, hihi Bawipa Pathian bia a si tiah Israel upa cu chim hna: ’Keimah cu ruahnak hal awkah nan ra maw? Ka nun bangin ka chim, nan ka hal kho lai lo. Hihi Bawipa Pathian bia hrimhrim a si,’ a ti," tiah a ti. ⁴ "Mipa, annih cu bia na ceih hna lai maw? Annih cu bia na ceih hna lai maw? Cun an pale nih fihnung an tuahmi vialte kha chim hna law, ⁵ mah hihi Bawipa Pathian bia a si, ti hna: Israel kha ka rak thim tikah khan kut hler in Jakob phun sinah khan chiatser in ka rak i ṭem chih i an sinah Izipt ram ah khan ka rak i phuang; ka kut kha ka hler i, Keimah cu Bawipa nan Pathian ka si, tiah ka rak ti. ⁶ Khi ni ah khan kut hler in chiat ka ser i Izipt ram in kan chuahpi hna lai i nan caah ka thimmi, cawhnuk le khuaihliti in a luangmi ram, ram vialte lak i ram ṭha cem ah cun kan luhpi hna lai, ka ti. ⁷ Annih cu an dihlak in, nan mit lungriam koin nan zohmi thil fihnung kha hlaw cang hna u law Izipt ram siasal khan i thurhhnawmh ti hlah u. Keimah cu Bawipa nan Pathian ka si, tiah ka ti hna. ⁸ "Sihmanhsehlaw an ka doh, ka bia kha ngaih an duh lo i ahohmanh nih an mit lungriam in an rak zohmi thil fihnung kha hlonh an duh hna lo i Izipt siasal kha hlawt an duh hna lo. Izipt ram ah khan, ka thinhunnak cu ka bunghhnawh lawlaw ko hna lai hlah maw, ka thinlinhnak cu ka hlinh lawlaw ko hna lai hlah maw, tiah ka rak ruat. ⁹ Israel mi hna an umnak miphun hna lakah khan, ka min cu thurhnawmh a si kun ai lai ri tiah ka min upat in rian kha ka ṭuan ṭhan. Khi miphun hna sinah khan, Israel mi cu Izipt ram in ka chuahpi hnanak khan kaa phuang. ¹⁰ Izipt ram chung cun ka chuahpi hna i ramlak ah khan ka kalpi hna. ¹¹ Khika ah annih cu ka nawlbia kha ka pek hna i ka phunglam kha ka cawnpiak hna, annih nih zul hna seh law nung hna seh tiah. ¹² Cu pinah, annih nih kannih cu Bawipa nih Amah caah a kan thianter ti kha an hngalh nakhnga annih le keimah karlak i hmelchunhnak caah sabbath kha ka pek hna. ¹³ Sihmanhsehlaw Israel mi nih cun ramlak ah khan an ka doh; ka nawlbia kha an zul duh hna lo, ka phunglam kha an hlawt hna, zul hna seh law an nunnak ding a si nain; cun ka sabbath kha an buar hna. Cucaah ramlak ah khan ka thinhunnak cu ka bunghhnawh ko hna lai i ka hrawh ko hna lai dahra maw tiah ka ruah ṭhan. ¹⁴ Asinain ka chuahpi hna, a hmumi miphun hna hmaiah khan ka min cu thurhhnawmh a si nakhnga lo ka min hmaizah in ka ṭuan ṭhan. ¹⁵ "Cuhleiah, ramlak ah cun kut hler in ka chimh hna i kan pekmi hna ram, cawhnuk le khuaihliti in a luangmi ram, ram vialte lak i ram ṭha cem ah cun kan luhpi hna lai lo, tiah chiatser in ka ti hna. ¹⁶ Zeicahtiah anmah an siasal kha zulh an duh caah ka phunglam kha an hlawt hna, ka nawlbia kha zulh an duh hna lo i ka sabbath kha an thurhhnawmh hna. ¹⁷ Asinain ka zaangfah tuk hna caah ramlak i hrawh le an donghnak phakter ko kha cu ka duh lo. ¹⁸ An fale hna cu ramlak ah khan, nan pale zulhmi nawlbia kha zul hna hlah u, an phunglam zulhmi zong kha zul hlah u, an siasal hna zong khan i thurhhnawmh ve hlah u, tiah nawl ka pek hna. ¹⁹ Ka thawh hna i, Keimah cu Bawipa nan Pathian ka si, ka nawlbia kha nan zulh hrimhrim lai, ²⁰ ka phunglam kha nan tuah hrimhrim hna lai. Ka sabbath kha thiang tein nan ulh hna lai i nannih le keimah karlak i hmelchunhnak an si lai; cuticun keimah cu Bawipa nan Pathian ka si kha nan hngalh lai, ka ti hna. ²¹ "Sihmanhsehlaw an fapale hna zong nih cun an ka doh ṭhiamṭhiam. Ka nawlbia kha an zul hna lo i ka phunglam kha an tuah hna lo, pakhatkhat nih rak tuah hna seh law cu, cu thawng cun nunnak an hei hmuh ṭung hnga, ka sabbath kha an buar fawn hna. Cu tikah ramlak ah cun ka thinhun ka chuahhnawh hna lai i ka thinlinh ka hlinh ko hna lai dahra maw, tiah ka ruah ṭhan. ²² Sihmanhsehlaw ka chuahpi hna kha a ka hmumi miphun hna mithmuh ah ka min cu thurhhnawmh a si nakhnga lo, ka min hmaizah in ka ṭuan ṭhan. ²³ - ²⁴ Cun annih nih ka nawlbia kha an ngai lo i ka phunglam kha an hlawt hna i ka sabbath kha an thurhhnawmh hna i an pupa hna siasal kha an mitthlirh peng hna caah, ’Nannih cu miphun hna lakah kan ṭhek hna lai i khuazakip ah kan kalter hna lai,’ tiah kut hler in an sinah ramlak ah chiat kha ka ser. ²⁵ Cun ka tuah rihmi cu hihi a si: An cungah khan nawlbia ṭha a si lomi kha ka chiah i nunnak hmuh khawhnak a si lomi phunglam kha ka chiah hna. ²⁶ Anmah le anmah kha siasal sin i laksawng an pekchanhnak thawngin ka thurhhnawmhter hna; an tuksa a purh khawh hna nakhnga, an siasal hna sinah khan an fapa upa bik hna kha ka pekter ko hna. Mah hihi ka tuahnak chan cu Bawipa ka si kha an hngalh nakhnga caah a si. ²⁷ "Cucaah maw mipa, Israel mi cu thawh hna law, ’Mah hihi Bawipa Pathian bia a si,’ tiah chim hna: Nan pupa hna nih an ka serhsat ṭhan hoi i zumh awk tlak loin an um ṭhan hoi. ²⁸ Annih cu kan pek hna lai tiah kut hler in chiat ka sermi ram i ka luhpi tik hna ah tlangbo kip le thingkung a hnah a ṭhami paoh kha an i chingchiah i khika ah khan an raithawinak kha an tuah hna, ka thin a ka phoktu an laksawng kha an pekchanh hna i an rim thaw thawinak le an thlet thawinak kha an hun hna. ²⁹ Nan fuhmi khuahrumbo hi zeidah a si? tiah ka hal hna, a min ah khuahrumbo ti a si lan. ³⁰ "Cucaah Israel mi cu chim hna law hihi Bawipa Pathian bia a si tiah ti hna; ’Nan pupa hna nih an i thurhhnawmh bangin nan i thurhhnawmh lengmang ko maw? Fih a nungmi an pathian hna sinah khan maw zeihmanh ruat loin nan i pek lengmang ko? ³¹ Nannih nih nan laksawng nan pekchanh hna le nan fapale hna cu raithawinak caah mei in nan khangh lengmang hna caah hin nan siasal hna sinah hin nihin ni tiangin nan i thurhhnawmh lengmang ko. Zeitindah nannih nih cun ka ruahnak cu nan ka hal khawh lai, maw Israel mi hna? Nan ka hal kho lai lo, tiah ka nun bangin ka chim,’ tiah Bawipa Pathian nih a ti. ³² Nannih nih nan i thawh i, ’Ram dang miphun cio hna bang si ve u sih law thing le lung kha bia hna u sih,’ tiah nan ti tikah hin, a si kho bal lai lomi thil kha nan ruahmi hi a si. ³³ Nannih cu a ṭhawngmi kut in kan uk hna lai i ka baan kha kan samhhnawh hna lai i ka thinhunnak kha kan toih hna lai, tiah ka nun bangin ka chim, tiah Bawipa Pathian nih a ti. ³⁴ Nan i ṭheknak ram chung khan le miphun hna chung khan a ṭhawngmi ka kut le samhmi ka baan le thletmi ka thinhunnak in kan chuah ṭhan hna lai i kan pumh ṭhan hna lai. ³⁵ Miphun dang hna ramlak ah khan kan kalpi hna lai i khika ah khan hmaitonh tein kan i tawng lai i bia cu kan chalh hna lai. ³⁶ Izipt ram lak chungah nan pupa hna ka rak chalh hna bantuk khan nannih zong kan chalh ve hna lai. Hihi Bawipa Pathian bia hrimhrim a si. ³⁷ "Ka fung tangin kan lanhter hna lai i biakamnak chungah kan luhpi hna lai. ³⁸ Keimah a ka dohtu le a ka raltu kha nan sinin ka ṭhawl hna lai. Atu i an umnak ram chung hin ka lak hna lai, sihmanhsehlaw Israel mi ram cu an ke nih a lam lai lo. Cuticun Bawipa ka si kha nan hngalh lai. ³⁹ "Cucaah maw Israel mi hna, hihi Bawipa Pathian bia cu a si: Va kal u law nan dihlak in nan siasal kha va phiak dih hna u. Cuticun hmailei ah ka nawl kha ngai loin nan um ti lai lo i nan laksawng hna le nan siasal hna khan ka min thiang cu nan thurhhnawmh ti lai lo. ⁴⁰ Sihmanhsehlaw ka tlang thiang cungah, Israel tlang sang cungah, khika ah Israel mi hna nih ram chungah an dihlak in ka rian an ṭuan lai, tiah Bawipa Pathian nih a ti. Khika ah khan ka cohlan hna lai i khika ah khan nan laksawng le nan pekchanhmi thil chung i a ṭha bikbik hna le a thiangmi nan thawhlawm vialte he khan ka pe u, tiah kan hal hna lai. ⁴¹ Nan i ṭheknak ram hna le miphun hna chungin kan chuahpi hna i kan pumh hna tikah, nan raithawinak rim thaw cu kan cohlanpiak hna lai. Miphun vialte hmuh awkah keimah lawnglawng kha nan ka biak lai. ⁴² "Nannih cu kut hler in nan pupa hna sinah pek awkin bia ka kammi ram, Israel mi vawlei ah khan kan tlunpi hna tikah, Bawipa cu keimah ka si kha nan hngalh lai. ⁴³ Khika ah nannih nih hlanlio nan umtuning le nan i thurhhnawmhnak thil ṭhalo vialte kha nan hngalh hna lai i thil ṭhalo nan rak tuahmi vialte ruangah khan nan i fih lai. ⁴⁴ Maw Israel mi hna, nan ziaza ṭhalo le nan tuahmi thil ṭhalo ningin si loin ka min upatnak in nan cungah ka tuah tikah, Bawipa ka si kha nan hngalh lai. Mah hihi Bawipa Pathian bia hrimhrim a si," tiah a ti. ⁴⁵ - ⁴⁶ Mah hihi Bawipa nih ka sinah a chimmi bia cu a si. A ka thawh i, "Mipa, i mer law Teman lei kha hoih law thlanglei kha na bia cu chimhnawh tuah; Negeb ram i tupi kha chimhnawh tuah. ⁴⁷ Thawh law, ’Bawipa bia hi ngai tuah, Bawipa bia cu hihi a si: Mei in kan duah lai i thing vialte kha a hring he a ro he an kangh dih hna lai. A meizik kha a mit lai lo i Negeb in a chaklei paohpaoh ah khan hmai vialte cu a kangh dih hna lai. ⁴⁸ Mi vialte nih a duahtu cu Bawipa ka si kha an hmuh lai; hmih khawh a si lai lo,’ tiah chim," a ka ti. ⁴⁹ Cun kei nih, "Aa, a si kho lo! Maw Bawipa Pathian, an ka thawh i, ’Anih tham cu bianabia lawng pei a chim lengmang ko cu,’ an ka ti," tiah ka au.

¹ Mah hihi Bawipa bia ka sin i a rami cu a si. A ka thawh i, ² "Mipa, i mer law Jerusalem lei kha zoh law a hmunthiang kha chimhnawh hna; Israel ram kha chimhnawh tuah. ³ Israel ram cu thawh law, "Hihi Bawipa bia an si: Nangmah cu kan ralchanh. Ka vainam cu a kawng chung khan ka phawi lai i na chung i a ummi kha a ding he a ṭhalo he ka sam hna lai. ⁴ Na miding hna le na miṭhalo hna cu aa tluk tein ka sam hna lai caah Negeb in chaklei ah a ummi paohpaoh cungah ka vainam cu a kawng chungin zuh a si lai. ⁵ Mi vialte nih, vainam a phawitu cu Bawipa ka si kha an hngalh lai i vainam cu a kawng chungah sawh a si ṭhan ti lai lo.’ tiah chim. ⁶ Mipa, an um hngan te ah cun hrum-ai tuah, na lungthin a kuai dih hlan tiangin hrum-ai cuahmah tuah. ⁷ Annih nih zeicahdah na hrum-ai lengmang ko, tiah an in hal tikah, thawh hna law, ’Ka theihmi thil kongah ka hrum ka ai, a rat tikah lungthin vialte a zor dih lai, ralṭhatnak vialte kha a lo lai, kut vialte kha an thlep dih lai, khuk vialte kha an zun didor an i thlauhmi nih a ciah dih hna lai. Cu thil cu a ra lio. Hika hi a phan ko cang,’ ti hna. Mah hihi Bawipa Pathian bia hrimhrim a si," tiah a ti. ⁸ - ⁹ Mah hihi ka sinah a rami Bawipa bia a si: "Mipa, annih cu chim hna, thawh hna law, hihi Bawipa bia a si, ti hna: Vainam, vainam cu tat a si i tleu zuar in tuah a si. ¹⁰ Mi thahnak ding caah, thah nolhnak ding caah nimtlau bantuk tleu in tat a si. Aa! ka fapa, tanbo cu thing in sermi siasal hna dennak caah ser a si! ¹¹ Tat awkah nam cu pek a si cang, kut in tlaih awkah timh a si cang. Vainam cu tat a si cang, a tleu cang, Mi thattu kut chung i chiah awkah khan timh a si cang. ¹² "Atu ah mipa, au law awn tuah, zeicahtiah hi thil vialte cu ka mi hna cungah a tla, vainam in thah awkah chanhmi hna Israel bawile hna cungah khan a tla i ka mi hna he an thi ṭi. ¹³ Cucaah lungfak in nan ṭang i cum tuah u, zeicahtiah cucu hneksaknak men a si lo, a ngaingai ti ahcun cu thingtan cu zeirello awk thingtan si lo sual seh law tah zeitindah nan tuah hnga? Hihi Bawipa Pathian bia hrimhrim a si, tiah a ti. ¹⁴ Sihmanhsehlaw mipa, nang cu bia chim law na kut kha beng hna; Vainam kha voi hnih voi thum in lek; Cu nam cu mi thahnak nam a si, an velchum in aa mer lengmangmi mi thahnak nam nganpi a si. ¹⁵ An lungre a theih nakhnga le mi tampi an rilh i an tluk nakhnga, Nimtlau bantukin a tleu i mi thahnak ding caah phawimi nam cu an kutka ah ka chiah dih hna. ¹⁶ Tat si law orhlei ah i mer, phawi si law kehlei ah i mer, Na par nih a sawhnak lei paoh ah i mer tuah. ¹⁷ Keimah zong nih ka kut ka bengh ve lai i ka thinhunnak kha ka ṭhumh lai, tiah Bawipa nih ka chim," a ti. ¹⁸ - ¹⁹ Mah hihi ka sin i a rami Bawipa bia a si: "Mipa, Babilon siangpahrang vainam a ratnak ding lam pahnih cu rin tuah, an pahnih khan ram pakhat in thawk hna. Cun hmelchunhnak tung pakhat in ser law lam an i ṭhennak ah khan chia hna. ²⁰ Cun vainam cu Ammon mi khua Rabbah i a ratnak ding lam kha rinpiak law cuka cun Judah ram ah a rung lai i Jerusalem khua a laifang ah cun a lut lai. ²¹ Zeicahtiah Babilon siangpahrang cu lam an i ṭhennak, lam ṭeka ah khan li kha tin a hmang tawn. Camcawhnak thal kha a zoh hna i chungkhar siasal kha an ruahnak a hal hna, sa hnit kha a zoh hna. ²² Camcawhnak thal ’Jerusalem’ ti i ṭialmi kha a orhlei kamah a tla: cucaah cuka ah cun au i raldohnak hawhawt in hawhawt i kutka chimhnak dennak kha ser i raltuknak chuntlung kha ser i ralvennak buk kha sak awk a si. ²³ Hmailei thil kong chimnak cu an caah ahmaan lo ding kha a lo ko lai, sihmanhsehlaw an ṭhat lonak kha an ka hngalhter peng ko lai i an ral hna kut chungah an tla ko lai. ²⁴ Cucaah cun hihi Bawipa Pathian bia cu a si: Lenglang piin nan ka dohnak hin thil ṭhalo nan tuahmi hi nan ka hngalhter peng caah le nan tuahmi vialte ah nan sualnak kha a langh ko caah le nanmah le nanmah kha ka lung chungah nan i paih lengmang caah, hramhram in nan ral hna kut chungah nan tla lai. ²⁵ "Miṭhalopa, mithianglopa, Israel mi uktu bawipa, nangmah dohnak ah dantatnak ni cu a ra cang. ²⁶ Mah hihi Bawipa Pathian bia cu a si: Na sumthawng kha i phoih, na bawiluchin kha chia. Zeizong vialte aa thleng dih cang; nautatmi kha uknak nawl pe hna, uktu kha ṭhum hna. ²⁷ Rawhralnak, rawhralnak! Asi, khuapi cu rawhralnak chungah ka phakter lai. Asinain khuapi dantattu dingah ka thimmi a phak hlan cu hi rawhnak hi a tlung lai lo. Amah sinah cun khuapi kha ka pek lai. ²⁸ "Mipa, Israel mi a serhsattu Ammon mi hna kha chim hna. Hihi Bawipa Pathian bia a si: Mi thahnak ding ca i zuhmi, thil hrawhnak ding ca i tatmi nimtlau bantukin a lek in aa lekmi vainam kha tat a si cang. ²⁹ Nannih nih nan hmuhmi langhnak cu ahmaan lomi an si. Hmailei thil kong nan chim chungmi cu lih an si. Nannih cu miṭhalo, misual nan si i nan dantatnak ni cu a phan dengmang. Vainam cu nan hngawng cungah a tla lai. ³⁰ "Vainam cu a kawng chungah sawh ṭhan u. Nannih cu ser nan sinak hmun ah khan bia kan ceih hna lai. Hrin nan sinak ram ah khan kan ceih hna lai. ³¹ A hliau in aa hliaumi mei bantukin nan cungah ka thinhunnak kha ka langhter tikah ka thinhunnak kha nan hngalh lai. Cun nannih cu thil hrawh thiamnak leiah a thiam ngaingaimi mipuar hna kut chungah kan chanh hna lai. ³² Mei in hrawh nan si lai. Nanmah ramchung ah khan nan thi cu thlet a si lai i ahohmanh nih an in hngal ti hna lai lo." Hihi Bawipa bia a si.

¹ Mah hihi Bawipa nih ka sinah a chimmi bia an si. A ka thawh i, ² "Mipa, lainawng khualipi cu bia na ceih lai maw? Thil fihnung a tuahmi vialte cu na hngalhter lai maw? ³ Anih cu thawh law hihi Bawipa bia a si tiah chim tuah: A ralhau chungah thisen a chuah i a cungah amah lila nih vanchiatnak aa tluntertu khualipi, siasal aa ser riangmang hna i cu aa sernak thawngin aa thurhhnawmhmi khualipi cu a caah ngaihchiat awk a va si dah! ⁴ Thisen na chuah ruang i sualnak na tuahmi cu nangmah cungah a si i siasal na sermi hna ruang i thurhhnawmhnak na hmuhmi cu nangmah cungah a si. Hi na tuahnak thawng hin na chan cu na tawiter i na kum donghnak cu na naiter. Hi caah hin nangmah cu miphun hna nihsawh awkah kan ser i ram kip serhsat awkah kan tuah. ⁵ A hlami ram nih si hna seh, a naimi ram nih si hna seh, na thangchiatnak ruangah le ningcang lopi i khua na saknak ruangah, an in nihsawh lai. ⁶ Nangmah chungah hin Israel mi bawi vialte hna nih an thil ti khawhnak cu thisen chuahnak caah an hman; ⁷ mi nih an nu le an pa hna kha an serhsat hna, ramdangmi kha an hrem hna i ngakṭah le nuhmei kha an rial hna. ⁸ Ka ca i a thiangmi thil kha zei ah nan rel hna lo i ka sabbath kha nan buar hna. ⁹ Jerusalem, nangmah chungah hin bia lanhtu hna nih thisen chuahnak ding caah khan rian an ṭuan i nangmah chungah hin khuahrumbo rawl danghnak i rawl a eimi hna le zuanzamnak a tuahmi hna kha an um. ¹⁰ Nangmah chungah hin mi a cheukhat nih an pale kha an ningzahnak an langhter hna i nu kha nuphung an hngalh lioah an buar hna; ¹¹ cun a cheu nih an innpale nupi kha an thurhhnawmh hna i an fapale nupi hna sinah khan an i buar; an pale fanu hrimhrim, an farle kha an sual hna. ¹² Nangmah chungah hin mi nih thisen chuahnak caah ziknawh an ei i docawi tikah dongtanh le a karh an lak hna. Nannih nih i miak duh ruangah nan hawile kha nan hrem hna i keimah cu nan ka philh; tiah Bawipa Pathian nih a ti. ¹³ "Cucaah zohhmanh u, a ding loin nan lakmi miaknak kha le nan khua chung i thisen chuahnak kha thinhun in ka kuttum in ka thongh lai. ¹⁴ Nannih cu kan tongh hna tikah nan ṭhawnnak thazang siseh, nan lungṭhawnnak siseh, an dir kho lai maw? Bawipa nih hi bia cu ka chim cang i ka tuah lai. ¹⁵ Nannih cu miphun hna lakah khan kan ṭhek hna lai i ram hlapi ah kan dawi dih hna lai; cuticun nannih cu nan i thurhhnawmhnak khan kan thianh hna lai. ¹⁶ Miphun hna mit hmuh ah kan vamh hna lai i keimah cu Bawipa ka si kha nan ka hngalh lai," tiah a ti. ¹⁷ - ¹⁸ Mah hihi Bawipa nih ka sinah a chimmi bia an si. A ka thawh i, "Mipa, Israel mi vialte cu ka caah ngun thianglo an si ko, an ngun cu dar le canphio le thir le suan he aa cawh dih. ¹⁹ Cucaah hihi Bawipa bia an si: Nannih cu cawhmi ah nan i can caah ²⁰ ngun le dar le thir le suan le canphio aa cawhmi hlumpi cu thir titnak um chungah mei in linh i titter awkah khumh a si bangin nannih cu Jerusalem khua ah kan pumh hna lai. Cuticun ka thinhun le ka thinlinh in kan pumh hna lai i khika ah kan chiah hna lai i kan tit hna lai. ²¹ Nannih cu kan pumh hna lai i ka thinhunnak mei cu ka chem lai i a chungah nan ti dih lai. ²² Nannih cu thir titnak um chungah ngun an tit bantukin kan tit hna lai i nan cungah Bawipa nih ka thinhunnak ka langh kha nannih nih nan hngalh lai," a ti. ²³ - ²⁴ Hihi Bawipa nih ka sinah a chimmi bia an si. A ka thawh i, "Mipa, Jerusalem cu thawh law, nangmah cu ruah nih a surh lomi ram bantuk na si; thinhunnak caan lioah na cungah ruah zeihmanh a sur lai lo, tiah chim. ²⁵ A chung i a ummi bawi hna cu, an sa sehmi an ei cuahmah lio i a ngur hluahmahmi chiandeih bantuk an si. Mi kha an seh hna i an chawhlawn le an thilri kha an chuh hna; an khua chung i nu tampi cu nuhmei ah an canter hna. ²⁶ A tlangbawi hna nih ka phunglam kha an hrawh i ka ca i a thiangmi thil kha an thurhhnawmh hna. A thiang le a thianglo kha an thleidang hna lo i a thiang le a thianglo an i dannak kha an cawnpiak hna lo. Ka sabbath hna kha zei ah an rel hna lo i kei cu an lakah hmaizahnak hmu loin ka um. ²⁷ A chung i a bawi pawl hna cu an sa sehmi a ei cuahmahmi cenghngia hrang bantuk an si, a ding loin miaknak hmuhnak caah khan mi thisen kha an chuah i an thah hna. ²⁸ A profet hna nih hi ṭhat lonak vialte cu an lih in langhnak an hmuhmi le an hrokhrawl bia in sirang an nalh hna i Bawipa nih zei bia a chim lo nain Bawipa nih hitihin a ti, tiah an ti. ²⁹ Zapi kha mipuar le mifir an si, vanchiami le sifakmi kha an serhsat hna i ramdangmi cungah ding loin khua an sa i an puar. ³⁰ Ram cu rawk lo dingin chanhtu dingah, a pemnak ah cun ka hmaiah a dir kho i a phit khotu ding annih lakah ka kawl hna i ahohmanh ka hmu hna lo. ³¹ An cungah ka thinhunnak kha ka bungh i ka thinlinhnak mei chungah khan annih cu ka hrawh cikcek hna. Cuticun annih nih hmuh awkah an i tlakmi dantatnak cu an cungah ka tlunter," tiah Bawipa Pathian nih a ti.

¹ Bawipa bia cu ka sinah a phan i, ² "Mipa, hlanah hin nu pahnih an rak um i an pahnih cun nu khat fa an si. ³ Izipt ram ah khan hlawhhlangnu ah an rak i cang i ngaknu an si ko lioah khan cuticun an um; khika ah khan an hnukpar cu an i muaiter hna i an hnuk cu an i thamter hna. ⁴ A upa u cu a min ah Oholah a si i a ngakchia deuh u cu Oholibah a si. Annih cu keimah ta ah an cang i fapa le fanu hna kha an ka hrinpiak. Oholah cu Samaria a si i Oholibah cu Jerusalem a si. ⁵ Oholah cu keimah ta a si ko nain hlawhhlangnu kha aa celh i a duhtu Assiria mi hna, ⁶ ralbawi hna le uktu bawi hna le bawi nganngan hna, an dihlak in aa dawhmi rangcung ralkap a si i rang aa citmi hna kha, a duh hna. ⁷ Assiria tlangval hna lak i pangpar a simi hna sinah khan hlawhhlangnu cu aa celh i an siasal khan aa thurhhnawmh i a duhnak nih a hruainak paoh ah khan a kal. ⁸ Izipt ram i a vung i thiammi hornak lam kha ngol a duh lo, khika ah a no lioah khan pa nih an rak ihpi i a thiangmi a hnuk kha an rak hmehpiak i an rak sual. ⁹ Cucaah a duhmi hna amah a duhtu Assiria mi hna sinah khan ka kaltak. ¹⁰ Annih nih an tlaihhrem i a fapa hna le a fanu hna kha an lak hna i amah cu vainam in an thah. Amah cu nu lakah ningzak bia ah a cang i a cungah biaceihnak kha tuah a si cang. ¹¹ A naunu Oholibah nih khan amah cu aa ngiat i a duhnak le a hornak kha a u nak hmanh khan a zual deuh. ¹² Amah zong nih cun Assiria mi kha a duh hna, uktu bawi hna le bawi nganngan hna le ralbawi hna, rang cung i an thuam tlingte he aa citmi tlangval rangcung ralkap pa dawhdawh hna kha a duh hna. ¹³ Amah zong cu aa thurhhnawmh cang ti kha ka hmuh; an pahnih tein an zulhmi lam cu aa khat; ¹⁴ sihmanhsehlaw Oholibah nih khan a sualnak cu hla deuh chinchin a kalpi; ¹⁵ - ¹⁶ vampang i suaimi pa hmanthlak hna kha a hmuh cangka hna in a duh colh hna i Khaldi ram ah khan lamkaltu a thlah colh hna. Cu hna cu si sen in suaimi Khaldi mi an si, an tai ah taisawm an i sawmh hna i an lu ah a zik a chuakmi ludomh an i domh. An dihlak in bawi ngan si dawh an si i Khaldi rammi taktak Babilon mi kha an lo hna. ¹⁷ Cun Babilon mi hna cu a ihkhun kha i hrawm awkah a sinah khan an ra i an sualpi i an thurhhnawmh; an nor cikcek tiangin an thurhhnawmh. ¹⁸ Hlawhhlangnu a si kha a ning a zak lo i a u nih a ka nor bantukin a ka nor cikcek hlantiang aa sualter hna. ¹⁹ A no lio i Izipt ram i hlawhhlangnu a rak i celh kha philh lo tein a um i atu le atu hlawhhlangnu cu aa celh lengmang ko. ²⁰ An hlawhhlangpa kha a duh hna, an chiaṭha cu laa ta bantuk an si i an ci cu rangtum ci bantukin a luan in a luang. ²¹ Cucaah Oholibah, na ngaknut lio i Izipt ram i na hnuk na rak i thamter hna bantuk le na hnukpar na rak i tonghter hna bantuk khan atu ah hornak in na nung ṭhan cang, a ti. ²² "Cucaah Bawipa bia cu hihi a si: Oholibah, nangmah an duhtu hna, na luak chuak cikcek in an nortu hna kha na cungah an thin ka hunter hna lai i a kenkip in nangmah cu an in chuahhnawh lai: ²³ Babilon mi hna le hi Khaldi mi vialte hna le Pekod, Shoa le Koa phun mi hna le an sin i a ummi Assiria mi vialte hna hi, na cungah an thin ka hunter hna lai. Annih cu tlangval dawhdawh, bawi nganngan le uktu bawi hna le ralbawi hna, bawi min thangthang, rangcung i aa citmi an si. ²⁴ Nangmah cu raltuknak rang le rangleng le thilphorhnak leng he an in fuh lai, miphun kip chungin lakmi ralkap hna, phawpi le phawte le dar luchin aa chinhmi hna he cun an in fuh lai; a kenkiplo in an in dum lai. Biaceihnak nawl ka pek hna lai i cu nawl cu nangmah cungah cun an hman lai. ²⁵ Na cungah ka thinhunnak kha kan chuahhnawh lai i nangmah cu an thinlinhnak kha an in langhhnawh lai. Na hnar le na hna kha an in hleh lai i a donghnak ah vainam in an in thah lai. ²⁶ Na hnipuan kha an in phoih dih lai i na hlawn vialte kha an in chuh dih lai. ²⁷ Cuticun na zuanzamnak le Izipt ram i hlawhhlannak rian na ṭuan ning kha kan ngolter lai i cu bantuk thil cu zeitikhmanh ah na ngai ṭhan ti hna lai lo i Izipt ram kha na ruat ṭhan ti lai lo. ²⁸ "Mah hihi Bawipa Pathian bia an si: Na huatmi hna, na luakchuak cikcek in an nortu hna kut chungah khan nangmah cu kan chanh lai i ²⁹ an in huatnak cu an in hngalhter lai. Na hmuhmi thil vialte kha an in chuh lai i hni lo le puan loin an in kaltak lai; hlawhhlangnu naa celhnak pum kha a lang dih lai. Hi thil nangmah cungah a tluntertu hi na zuanzamnak le an hornak hi an si, ³⁰ hi bantukin thil a um hi ramdangmi kha na zulh hna i hlawhhlangnu kha naa celh i an siasal in naa thurhhnawmh caah a si. ³¹ Na u ke neh kha na zulh i a hrai cu na kut chungah ka chiah lai. ³² Mah hihi Bawipa Pathian bia an si: Na u nu hrai kha na din lai, a kau i a thukmi hrai kha; A chungah cun nihsawhnak le serhsatnak a khat, Hrai nih a tlum khawh leng a si. ³³ Ritnak le ngaihchiatnak in a khat lai i Rawhnak le ralnak hrai a si lai, Cu hrai cu na u nu Samaria hrai a si; Cu hrai cu a ne tiangin na din lai. ³⁴ Cun hrai cu cip cikcek in na khuai lai i Na hnuk kha a ah dih hna lai. Mah hihi keimah biakhiahnak a si, tiah Bawipa Pathian nih a ti. ³⁵ Cucaah cun mah hihi Bawipa Pathian bia an si: Nangmah nih na ka philh i na hnulei ah na ka hlonh caah na hornak le na zuanzamnak man cu nangmah nih na in lai," tiah a ti. ³⁶ Bawipa nih a ka thawh i, "Mipa, Oholah le Oholibah cu bia na ceih hna lai maw? Thil fihnung an tuahmi ruangah khan sualphaw hna. ³⁷ Annih nih va cung in pa an i duh i an kut chungah thisen kha a um. Annih nih an siasal sinah khan va cung pa duhnak an tuah i an ka hrinpiakmi ka fale hna kha an siasal hna cu an rawl caah an pekchanh hna. ³⁸ Cun hi zong hi ka cungah an tuah rih: ka hmunthiang kha an thurhhnawmh i ka sabbath kha an buar hna. ³⁹ Ka hmunthiang chungah khan an lut i an siasal hna pekchanh awkah khan an fapale hna kha an thah hna caah ka hmunthiang cu an buar; mah hihi ka inn chung hrimhrim ah an tuah. ⁴⁰ Ram hlapi in pa kha an sawm hna i lamkaltu nih an sawm hna bangin an ra. Hi pa hna caah hin naa kholh i na mit kha si naa thuh i na hlawn in naa ṭamh i ⁴¹ a ṭha ngaingaimi ihkhun cungah khan na ṭhu i an hmaiah cun cabuai kha an hun i cu cabuai cungah cun keimah zihmui le chiti kha an chiah hna. ⁴² Thanuam ngaiin a ummi hna cu an au an khuang; cu pin ah mi sawhsawh hna hleiah khan ramlak in an ratpimi hna Sabean mi kha an um ve; annih nih nu hna kut ah khan kutkhih an hruk hna i an lu ah khan pangpar ṭhi dawhdawh an khimh hna. ⁴³ Cun ka thawh i, "Va cung pa duh in a tarmi nu khi an sualpi duh ti hnga maw, anih nih tah a zuam ti hnga maw, ka ti. ⁴⁴ Annih nih hlawhhlangnu an luhhnawh bantuk khan an luhhnawh ṭhiam, nu zuangzam Oholah le Oholibah kha cuticun an luhhnawh hna. ⁴⁵ Va cung in pa an i duh ruangah le thisen an chuah ruangah khan miding mipa hna nih cun sual an phawt hna lai, zeicahtiah annih cu va cung in pa aa duhmi an si i an kut chungah thisen a um. ⁴⁶ "Mah hihi Bawipa Pathian bia an si: Ramhtu ralkapbu cu au hna; ṭihnak le ramhnak chungah khan annih cu kaltak hna. ⁴⁷ Ralkap nih khan annih cu lung in chep hna seh law an vainam in sam cikcek hna seh, an fapa hna le an fanu hna kha that hna seh law an inn kha khang dih hna seh. ⁴⁸ Cuticun ram chungin zuanzamnak kha ka thianh lai i annih bantukin zuangzam lo dingah nu dang kha ka cawnpiak hna lai. ⁴⁹ Na zuanzamnak ziaza caah cun dantat na si lai i na siasal hna ruangah cun dantat na si lai, cun keimah cu Bawipa Pathian ka si kha na hngalh lai," tiah a ti.

¹ Sal kan tan kum kua kum thla hra thla ni hra ni ah Bawipa nih ka sinah a chimmi bia cu hihi a si. ² A ka thawh i, "Mipa, hi ni, hi ni hrimhrim hi a min ṭial tuah: Hi ni hi Babilon siangpahrang nih Jerusalem a dum ni a si, tiin. ³ Hi ral thawh hmangmi hna hi hla phuah hna law annih cu, hihi Bawipa bia cu an si tiah chim hna: Mei cungah um nganpi kha khing tuah, Khing law a chungah ti toih tuah; ⁴ A chungah sazam kha sanh hna, sazam a ṭha bikbik hna kha sanh hna. A ke le a liang le a ruh a ṭha bikbik kha a benh in benh hna; ⁵ Tuurun chungin a ṭha bikbik kha la hna. A toiah a velchum in thing kha tih hna; Tlok hluahmah in chum law a chung i saruh hna cu cuar hna. ⁶ Maw thisen in a luangmi khuapi, A thian in a thiang kho lomi cirik nih a eimi um! Cucaah Bawipa Pathian bia cu hihi a si: A chung i sazam kha, An caah camcawh fung zuh si hna hlah hmanh seh law zam khat hnu zam khat in thur hna. ⁷ Khuapi chungah thisen an chuahmi cu cu khua laifang ah cun a um ko rih i Cu thisen cu lung cungah khan an thlet, Leidip tal nih khuh seh tiin vawlei hmanh ah khan an thle lo. ⁸ Ka thinhunnak kha a alh nakhnga le phu kha ka hlam hna nakhnga, Thisen cu zeihmanh nih khuh lo dingin, Kei zong nih a romi lung cungah khan ka thlet ve, a ti. ⁹ Cucaah Bawipa Pathian bia cu hihi a si: Maw thisen in a luangmi khuapi, Kei zong nih mei khor nganpi pakhat ka ser lai. ¹⁰ A chung khat in thing ka tih lai i mei ka kau lai. Sa cu hmin tein ka chuan lai, A hang vialte kha a ruh he ka thlet dih hna lai. ¹¹ Cun um cu a lawngin mei cungah cun ka toh lai, A dar cu a linh tuk ah a sen dih lai i, A chung i a ummi hnawm vialte an ti dih lai i cirik vialte cu a kangh dih hna lai. ¹² I zuam len hmanh law a cirik kha a chah tuk caah a kok kho bal lai lo; Mei lawnglawng nih an khawhpiak khawh lai. ¹³ Cu bantukin na zuanzam thurhhnawmhnak in kan thianh tik hmanh ah cun na thiang rih lo, Cucaah na cung i ka thinhunnak ka tlinter cikcek hlantiang cu na thiang bal lai lo, a ti. ¹⁴ "Bawipa nih ka chim cang; a caan cu a ra lio ko, ka ṭuan lai. Kaa sum lai lo, zaangfahnak zong ka ngei lai lo, a let zong kaa let lai lo; nangmah cu na ziaza le na tuahmi vialte ruangah khan bia kan ceih lai. Mah hihi Bawipa bia hrimhrim a si," tiah a ti. ¹⁵ - ¹⁶ Mah hihi Bawipa nih ka sinah a chimmi bia a si. A ka thawh i, "Mipa, na dawt bikmi kha chikkhatte ah kan lakpiak lai, sihmanhsehlaw na ṭap lai lo, na ai lai lo, na mitthli zong na tlakter lai lo. ¹⁷ Lung ṭhawng in um ko, na ludomh cu naa domh tawn bantukin i domh law na kedan cu i danh tuah. Na hmur cunglei kha i khuh hlah, hnabeidonghnak rawl, timi zong kha ei hlah," a ti. ¹⁸ Zingka ah mizapi sinah cun bia ka chim i cu zanlei hrimhrim ah cun ka nupi cu a thi. ¹⁹ A thaizing ah cuticun na tuah lai tiah a ka chimh bantuk khan ka tuah. Mizapi nih cun, cu ti ka umtuzia cu an caah a sullam zeidah a si tiah an ka hal. ²⁰ Cun ka leh hna i, "Hi hi Bawipa nih a ka chimhmi bia cu an si, ka ti hna. Ka thawh hna i, ²¹ Israel mi cu va chim hna law hihi Bawipa bia a si: Nan i bochanmi nan Biakinn ṭhawnnak cu nan i porhlaw. Nannih nih zoh nan duh ngaingai i a chung i va len kha nan duh; sihmanhsehlaw Bawipa nih a thurter lai. Cun nan fale hna Jerusalem i a tangmi hna kha, ral ah an thi lai. ²² Cun keimah nih ka tuahmi kha nan tuah lai, nan hmai kha nan i khuh lai lo i mithi ngaimi nih an ngaihmi rawl kha nan ei lai lo. ²³ Na lu i khuh loin le na ke lawng in na kal lai lo. Mithi zong na ngai hna in na ṭah hna lai lo. Na sual ruangah na zor thluahmah lai i pakhat le pakhat kha nan i hrumhnawh lai. ²⁴ Khi tikah keimah cu nan caah hmelchunhnak ka si lai i ka tuahmi vialte kha nan tuah dih hna lai. Bawipa nih hi thil hi a phanh tikah, keimah cu Bawipa Pathian ka si kha nan hngalh lai, a ti, tiah ka ti hna. ²⁵ Cun Bawipa nih a ka thawh i, "Mipa, an i lawmhnak le an sunparnak a simi, zoh an duh ngaingaimi le len an duh ngaingaimi an biakinn kha an sinin ka ṭhial lai, an fapa hna le an fanu hna kha lam hlapi ah ka kalpi hna lai. ²⁶ Cucu ka tuah ni ah mi pakhat, rawhralnak in a luatmi kha nan sinah a ra lai i cu kong cu an chimh lai. ²⁷ Cun cu ni ṭhiamṭhiam ah cun nan ngeih ti lomi holh khawhnak kha nan ngeih ṭhan lai i anmah he cun bia nan i ruah lai. Cuticun mi hna caah nanmah cu hmelchunhnak nan si lai i keimah cu Bawipa ka si kha an hngalh lai," a ti.

¹ Mah hihi Bawipa nih ka sinah a chimmi bia an si: ² A ka thawh i, "Mipa, Ammon mi hna lei khi hei zoh law Bawipa Pathian bia hi ngai tuah. ³ A bia cu hihi a si: ’Nannih nih ka hmunthiang kha thurhhnawmh a si i Israel vawlei kha a rawk i Judah mi nih sal taannak chungah an kal kha nan hmuh tikah, "Va cei hna seh," nan ti caah, ⁴ nannih cu nichuahlei miphun sinah kan chanh hna lai. Nan lakah an riahbuk kha an sak hna lai i an umnak hmun kha an khuar hna lai; nan rawl kha an ei lai i nan cawhnuk kha an din lai. ⁵ Rabbah cu kalauk tlonnak hmun ah ka ser lai i Ammon cu tuu chiahnak kiam ah ka ser lai. Cuticun keimah cu Bawipa ka si kha nan hngalh lai. ⁶ Bawipa Pathian bia cu hihi a si: Nannih nih nan kut nan i bengh i nan ke nan tengh i Israel ram cu lungkhat tein nan serhsat i a cungah nan i hlorh caah, ⁷ nan cungah ka kut ka samh lai i nannih cu miphun hna hazawh ah kan ser hna lai i miphun dang hna sin khan kan ṭhen hna lai; khuazeika ram hmanh ah nannih cu kan hloh hna lai i nan cungah rawhnak ka tlunter lai. Cuticun keimah cu Bawipa ka si kha nan hngalh lai, tiah a ti. ⁸ "Mah hihi Bawipa Pathian bia an si: Moab nih aa thawh i, ’Judah cu midang bantuk cio a si ko,’ a ti, cu caah Moab cu ⁹ a ral khamnak kha khattelei kam in khattelei kam tiang ka hun hna lai i a khua kha ka langhter hna lai — a khua dawh bikbik hna Bethjeshimoth le Baal-meon le Kiriathaim hna cu. ¹⁰ Moab le Ammon cu hmunkhat ah nichuahlei miphun sinah ka chanh hna lai i Ammon mi cu miphun hna lakah hngalh an si ti lai lo i ¹¹ Moab cungah cun biaceihnak ka tuah lai. Cuticun Bawipa ka si kha an hngalh lai,’ tiah a ti. ¹² Bawipa Pathian bia cu hihi an si: Edom nih timh ciammam tein Judah cungah phu a hlam caah zungzal a hmunmi mawhchiatnak kha a hmuh, ¹³ cucaah Edom cungah cun ka kut ka samh lai i a chung i a ummi minung si hna seh, saram si hna seh, ka hrawh hna lai, tiah Bawipa nih a ti; cu ram cu Teman in Dedan tiang ka hrawh cikcek lai i vainam in thah an si lai. ¹⁴ Edom cung i phuhlamnak cu ka mi Israel mi hna thawngin ka tuah lai. Ka thinhunnak le ka thinlinhnak nih a fial hna bantukin Edom cungah cun an tuah lai, tiah Bawipa Pathian nih a ti. ¹⁵ Mah hihi Bawipa Pathian bia a si: Filistin mi hna nih timh ciammam tein phuhlamnak kha an tuah i lungkhat tein serhsatnak in teirul an cham hna i chan tampi an rak i huatnak kha i hrawhnak caah an hman caah ¹⁶ Filistin mi hna cungah ka kut ka samh lai, tiah Bawipa nih a ti; Kereth mi cu ka hloh hna lai i rili kam i a ummi a dang vialte cu ka hrawh hna lai. ¹⁷ Ṭih a nungmi teirulchamnak kha an cungah ka tuah lai i ka thinhun in dan ka tat hna lai. Teirul ka cham hna tikah keimah cu Bawipa ka si kha an hngalh lai, tiah a ti.

¹ Hi bia hi kum hleikhat kum, thla khatnak thla ni khat ni i ka sinah Bawipa nih a chimmi a bia an si. A ka thawh i, ² "Mipa, Tair nih Jerusalem cu a thawh i, A! miphun hna kutka a simi kha a bauh cang, A kutka hna cu keimah leiah an i hung; Kei cu ka rum chin lengmang, anih tu cu rawk relrul in a um ko, a ti. ³ Cucaah Bawipa Pathian bia cu hihi a si: Tair, nangmah cu kan doh, Rili nih tilet a hun thawhter hna bantukin Na cungah miphun tampi kha ka thawhter hna lai; ⁴ Tair ralhau kha an hrawh dih hna lai i a innsang kha an chimh dih hna lai. A vawlei kha ka ziah dih lai i a tleu in a tleumi lungpang ah ka ser lai. ⁵ Sur phonak tikulh hmete ah a cang lai; Hi bia hi Bawipa Pathian nih ka chim hna. Amah cu miphun hna hranchaw ah a cang lai i ⁶ A fanu hna cu ramlak ah vainam in an thi lai. Cuticun keimah cu Bawipa ka si kha an hngalh lai, tiah a ti. ⁷ Bawipa Pathian bia cu hihi a si: Tair dohtu dingah hin chaklei in Babilon siangpahrang Nebukhadnezzar, siangpahrang hna siangpahrang chin kha ka ratpi lai. Rangtum hna le rangleng hna le rangcung ralkap hna le ralkapbu nganpi he a ra lai. ⁸ Ramlak i a ummi na fanu hna cu vainam in a thah hna lai. Nangmah cu ralvennak buk an sakhnawh lai i kulhnak lungrual kha an chonhnawh lai i phaw kha an tianhnawh lai. ⁹ Vampang chimhnak thingtum in na ralhau cu a den hna lai i A hreitlung in na innsang cu a hau dih hna lai. ¹⁰ A rangcung ralkap hna nih an hmanmi rang a thongthong hna nih leidip in an in khuh dih lai i Mi nih a pem ciami khua ah an luh bantukin na kutka chungah an luh tikah, A rangtum khuarit in a rimi hna le, A rangleng kekual hna thawng ah cun na vampang hna cu an i hnin dih lai. ¹¹ Khua chung lam kha a rang ke in a naan dih hna lai i Na mi kha vainam in a thah hna lai i Na tung ṭhawngṭhawng kha vawlei ah an tlu lai. ¹² Na chawhlawn vialte cu hranchaw ah an cang lai, Na thilri vialte cu an in chuh dih lai, Na vampang cu an cim dih lai, Na run inn nuamnuam hna cu an tlu dih lai; Na lung hna le na thingphel hna le na hnawmtam vialte hna hmanh cu rili ah hlonh an si dih lai. ¹³ Cucaah na hla aw cu ka daihter lai i Na tingtang thawng cu theih an si ti lai lo. ¹⁴ A tleu in a tleumi lungpi ah kan ser lai, Ngatlai hna nih an sur an phonak hmun ah kan ser lai, Zeitikhmanh ah sak ṭhan na si ti lai lo. Hi bia cu Bawipa nih ka chim cang. Hihi Bawipa Pathian bia hrimhrim a si, a ti. ¹⁵ Mah hihi Bawipa Pathian nih Tair sinah a chimmi bia a si: "Na tluk thawng an theih tik le na chungah hmapumi hna cu an hrum an ai i sam an si cuahmah tikah, zeitluk in dik rilikam ram hna le tikulh hna cu an i hninh lai! ¹⁶ Cun rili uktu bawi vialte hna cu an bawiṭhutdan cung khan an rung ṭum lai i an puan kha an i chiah hna lai i ṭamhmi an puan kha an i phoih hna lai. A hratmi biar kha an i kaih lai; vawlei ah an ṭhu lai i na cung i a tlungmi thil ruangah khan khuaruahhar lungmit in an um lai. ¹⁷ Cun khi tikah hi mithi hla hi an in lawh lai: Maw khuapi minthang, Zeitindah na rawh dih ee, zeitindah rili cungin phiah na si ee! Nangmah le na chungah a ummi vialte hna, Nan ṭhawnnak cu rili chung i aa chiahmi hna, Nan ṭihnunnak ram chung i a khahtertu hna, Zeitindah nan rawh dih kun ee! ¹⁸ Na tluk ni ah rilikam ram kha an ther i Na loh ni ah rili chung tikulh hna cu an khuaruah a har. ¹⁹ Zeicahtiah hihi Bawipa Pathian bia cu a si: Nangmah cu a rawkmi khua, ahohmanh an um khawh lonak khua ah kan ser i na cungah rilipi kha ka tlunter i ti nih an khuh dih tikah, ²⁰ khor thukpi chungah a kalmi hna sinah khan kan nam chih lai i hlan lio pi in a thi lengmangmi hna sinah khan kan thlak lai. Vawlei tangah, zungzal in a kingmi hmun ah cun kan umter lai, khor thukpi chung i a vung kalmi hna sinah cun kan umter ve lai. Cucaah zeitikhmanh ah na chungah mi an um ṭhan ti lai lo i a nungmi hna ram chung zongah khan naa tel ti lai lo. ²¹ Nangmah cu ṭih a nungmi donghnak kha kan phakter lai i na um ti lai lo; mi nih an in kawl lai, sihmanhsehlaw an in hmu bal ti lai lo. Mah hihi Bawipa Pathian bia hrimhrim a si.

¹ Bawipa nih ka sinah a chimmi bia cu hihi a si. A ka thawh i, ² "Mipa, Tair hi ṭahhla lawh tuah, i thawh law, ³ ’Maw Tair, nangmah cu na rili lawngdinhnak hmun cungah naa hmung liailuai ko i nangmah nih miphun hna chawlehnak le chawhrawlnak cu rilikam ram tampi hna le tikulh tampi hna sinah na kalpi, mah hihi Bawipa Pathian bia a si: Maw Tair, naa thawh i, Kei cu dawhnak ah ka tling, na ti. ⁴ Na ramri cu rili chungpi tiang khi a phan i Nangmah an sertu hna nih naa dawhnak cu tling tein an ser; ⁵ Na thingrua caah Senir ram farthing kha an hman hna i Na sangphawlawng tung sernak caah Lebanon sidar thing kha an lak hna. ⁶ Bashan ram kuhthing a sang bikbik hna in na lawng zahnak fung kha an ser hna. Kittim tikulh rili kap tufar thing in na lawng innleng cu fek tein an ser hna. ⁷ Na lawng puanzar le alan caah Izipt ram puan ṭamhmi kha an hman hna; Na lawng cung ni deu thlamhnak hna cu Elishah tikulh maimaw puan le puan senduk in an ser hna. ⁸ Sidon mi le Arvad mi kha na lawng zaptu ah an cang i Maw Tair, na lawng mawngtu ah mi thiamthiam na chungah naa ngeih hna. ⁹ Gebal ram i mi thiamthiam hna nih na lawng kha an in thloppiak. Na thil an zuarhpiaktu ah rili i a kal khomi sangphawlawng le a cawngtu kha naa ngeih hna. ¹⁰ Paras mi le Lud mi le Put mi nih ralkap an in ṭuanpiak; An phaw le an luchin kha na velchum in an thlai hna i Sunparnak an petu hna cu anmah cu an si. ¹¹ Arvad mi hna le Silisia mi hna nih na ralhau kha an in conghpiak i Gammad mi hna nih na ralvennak innsang khan ral an in venpiak i Na ralhau velchum in an phaw kha an thlai hna; Naa dawhnak a tlintertu cu anmah kha an si. ¹² Chawlehnak i na hram pakhat cu Tarshish kha a si i na lungthu hreng chaw caah tampi a ngeihmi ngun le thir le canphio le suan kha an pek. ¹³ Javan, Tubal le Meshek nih an in dawr ve, na cawk ding caah sal le dar umpu kha an in tarh. ¹⁴ Beth-togarmah mi hna nih na lungthu hreng chaw caah rangtum le rangpi le laa kha an in tarh. ¹⁵ Rods mi zong nih an in dawr, tikulh ngan hna cu na chawlehnak hram an si, na hmuh awk hnga kha vui ho le eboni thing in an in pek. ¹⁶ Edom zong na chawlehnak hram a si, na rian ṭuanmi a tam hringhran ko, na lungthu hreng chaw caah thlalang sen, ṭamhmi puan le puan hmangṭhia, koral lungvar nak le lungvar sen kha an in pek. ¹⁷ Judah le Israel zong nih an in dawr, Minnith in a chuakmi changvut le rawl le a thlummi thil le chiti le balsam thingthling kha na cawk awk caah an in pek. ¹⁸ Damaskas cu na chawlehnak hram a si, na thil tuahmi a tam hringhran ko, na lungthuhreng chaw caah tampi a ngeihmi chungin Helbon zu le Sahar tuuhmul le ¹⁹ Izalla zu kuang kha an pek; cun na cawkmi chungah kahpathir le kassia thing le fu thlum kha an i tel. ²⁰ Dedan nih a hratmi tuuhmul kha kengdan puan caah an in zuarh. ²¹ Arabia le Kedar bawi vialte hna cu tuufa le tuukawng le meheh tum in na chawlehnak ah na hram an si; annih he chaw nan i lehnak cu cucu an si. ²² Sheba le Raamah in a rami chawdawr hna zong nih an in dawr ve i zihmui ṭha bik phun le lung mansung phun zakip le sui kha na lungthuhreng chaw caah an in pek. ²³ Harran, Kanneh le Eden, Asshur le Media ram dihlak i chawlet hna nih khan an in dawr; ²⁴ a mui aa dawhmi thilpuan hna le puan sen hna le ṭamhmi puan hna le a zual in an zualmi hri in an ṭemmi, a ṭialmi thilpuan kha an in zuarh; anmah he nan i zuarhnak le nan i cawknak cu hi thil ah hin an si. ²⁵ Tarshish sangphawlawng hna cu a runrun in na cawkmi thil a hun phortu an si; Rilipi cungah na lawng hna cu thil tampi phor in an thil a rit ko. ²⁶ Na lawng zaptu hna nih khan rili cungah cun an in kalpi, Sihmanhsehlaw rilipi cungah cun nichuahlei thli nih an hrawh. ²⁷ Na chawva vialte, na lungthuhreng chaw vialte, na cawkmi thil vialte, Na lawng cawng hna le a mawngtu hna, na lawng remhtu hna le na chawdawr hna le na ralkap hna le na lawng chung i a ummi bu vialte hna, Nangmah sin i a ummi paohpaoh cu an dihlak in na vanchiat ni ah rili chungah thlak an si dih; ²⁸ Na lawng mawngtu hna au thawng ah ti cu aa let hluahmah ko. ²⁹ Lawng zaptu vialte hna cu an lawng chungin lengah an chuah i Lawng cawngtu hna le lawng mawngtu hna cu an dihlak in tikam ah an kal tikah, ³⁰ Na cung i a tlungmi thil kong kha an thanh lai i Fak piin an ṭap lai; An lu ah leidip kha an i phulh i vutcam kha an i theh. ³¹ Na cung i a tlungmi thil ṭhalo ruangah khan an sam an i phawi i buri puan an i aih; Nangmah kha fak piin an in ṭah, lungfak ngaiin an ṭap thluahmah ko. ³² An ṭah hla ah cun nangmah kha an in lawh i an hla cu hihi a si: "Tair bantuk hi ahodah a um? Rili kamah a inn i chonh tengtung in? ³³ Rili kamah na chawva cu lawng chungin ṭhumh an si tikah Miphun tampi hna herhnak kha na tlinter; Na thil ngeihmi a tam hringhranmi le Thil na cawkmi in vawleicung siangpahrang kha na rumter hna. ³⁴ Atu cu a thukmi ti chungah rili nih an khuai cang; Na thilri vialte le na mibu vialte hna cu an tla cang. ³⁵ Rilikam i a ummi vialte hna le tikulh i a ummi vialte hna cu Na cung i a tlungmi thil nih an thlakawk a bar hna; An siangpahrang hna cu an lau i an hmai a chia dih. ³⁶ Miphun hna lakah chawdawr hna nih khan nangmah cu an in nihsawh; Ṭih a nungmi donghnak kha na phan cang i A zungzal in na lo lan ko cang lai.

¹ Mah hihi Bawipa nih ka sinah a chimmi bia an si. A ka thawh i, ² "Mipa, Tair bawi sinah cun va chim law, hihi Bawipa Pathian bia a si, va ti: Porhlawt ruamkainak in naa thawh i, ’Kei cu pathian ka si, Rilipi cungah pathian bantukin bawiṭhutdan cungah ka ṭhu,’ na ti. Nang cu minung na si ko i pathian na si lo nain pathian tluk ah naa ruat. ³ Ziah, Daniel nak fim deuh maw na si? Na caah a thuk tukmi biathli zeihmanh a um lo maw? ⁴ Na fim i na zer ngaingai ko, chawva tampi naa chiah ko, Na ro kuang chungah sui le ngun kha naa khon tengtung ko hna; ⁵ Chawlehnak i na fimnak thawngin chawva cu naa pon tengtung ko hna i, Na rumnak rup cun na ruamkainak cu a ṭhang. ⁶ Mah hihi Bawipa Pathian bia cu a si: Pathian tluk ah naa ruah caah ⁷ Na cungah ramdangmi kha ka tlunter hna lai; Annih cu miphun hna lakah a puarhrang bik an si i Na fimnak ṭhaṭha kha vainam in an sam lai i Naa porhlawtnak cu leidip lakah an hrilh lai. ⁸ Na thih nakhnga khor chungah khan an in nam chih lai i Rilipi chungah khan thihnak ningzak na in lai. ⁹ Nangmah an thattu hna nih an in dir-onh tikah khan, Pathian ka si, na ti ko rih lai maw? Nangmah an thattu hna kut chungah chungah cun, pathian na si lo, minung na si ko. ¹⁰ Thazang zeihmanh ngei loin ramdangmi hna kut chungah khan na thi lai. Zeicahtiah keimah nih ka chim cang. Mah hihi Bawipa Pathian bia hrimhrim a si, a ti. ¹¹ - ¹² Mah hihi Bawipa nih ka sinah a chimmi bia an si. A ka thawh i, "Mipa, Tair siangpahrang cu hi mithi hla hi lawh law, amah cu hihi Bawipa Pathian bia a si, tiah chim tuah: Nangmah cu tlinnak leiah zohchun awk tlak na rak si, Na fimnak cu a tlingmi a si i naa dawhnak zong a tling. ¹³ Pathian dum Eden dum chungah khan na rak um i Lungvar a phunphun in naa ṭamh: Naa ṭamhnak lungvar hna cu sardin le khrisolaih le lunghring le topaz le karnelian le jasper a hringmi le lapis lazuli le safaiar le karbankal le emeral an si. A ring cherhmarhmi na ṭhi cu sui an si i Naa menhmi na hniar hna cu hrin na si ni i an in serpiakmi kha an si. ¹⁴ Nangmah cu an cawngtu dingah a sangmi cherub kan chiahpiak; Pathian tlang thiang cungah khan na um i Mei bantukin sen himhiam in a linmi lung lakah khan porhlaw ngaiin naa chawk. ¹⁵ Na chuah ri in na ṭhat lonak a langh ni tiang, Nang cu thil na tuahmi paoh ah soisel awk zeihmanh na um lo. ¹⁶ Na chawlehnak kha a ngan tuk cang i phung zulh duh lonak kha na lung chungah a khat i a pingah na kal, Cucaah ningzahnak in Pathian tlang cung khan kan ṭhumh i Nangmah cawngtu cherub nih khan an dawi i, Mei bantukin sen himhiam in a linmi lunglak khan an ṭhawl. ¹⁷ Naa dawhnak nih khan na lung an puamter i Upatnak na hmuhmi karhter chinnak caah na fimnak kha a ping in na hman. Vawlei ah khan kan hlonh i siangpahrang dang zohchun awkah khika ah khan kan kaltak. ¹⁸ Chawlehnak ṭhalo na tuahnak ah khan na sualnak cu a ngan tuk caah Na hmunthiang kha na thurhhnawmh hna. Cucaah na chungah mei kha ka kau i an kangh. Mi vialte hmuh awk caah vawlei ah cun vutcam bangin kan kaltak. ¹⁹ Miphun hna lak i nangmah an hngaltu hna kha an khuaruah a har: Ṭih a nungmi donghnak kha na phan i a zungzal in na lo lan ko lai," a ti. ²⁰ - ²¹ Mah hihi Bawipa nih ka sinah a chimmi bia an si. A ka thawh i, "Mipa, Sidon lei khi zoh law a cung i a tlung ding bia hi chim tuah. ²² Mah hihi Bawipa Pathian bia an si, a ti: Sidon, nangmah cu kan ralchanh i Na mi hna lakah ka sunparnak cu ka langhter lai. Sidon cungah ka biakhiahnak ka ser tik le cu ti ka tuahnak thawngin ka thiannak ka langhter tikah, Mi nih Bawipa ka si kha an ka hngalh lai. ²³ A cungah rai ka tlunter ciammam lai i A khua chung lam ah thisen a luang lai; A khua chung lam ah khan ral kut in an thi lai i Vainam nih a kaa kip in a dum hna lai; Khi tikah mi nih Bawipa ka si kha an hngalh lai," a ka ti. ²⁴ Israel mi hna nih an pawngkam i a ummi hna nihsawhnak, hling hriahnak le hling chunhnak kha an ing ti lai lo i annih nih Bawipa Pathian ka si kha an hngalh lai. ²⁵ Mah hihi Bawipa Pathian bia an si: Israel mi hna cu an i ṭheknak miphun hna chungin ka pumh ṭhan hna tikah, cu thawng cun miphun hna mithmuh ah ka thiannak kha ka langhter lai. Ka sal Jakob ka rak pekmi, an vawlei te ah khan khua an sa lai. ²⁶ Khika ah khan lungdai tein an um lai i inn an sak hna lai i mitsur dum an ser hna lai; annih a nihsawhtu hna an pawngkam i a ummi hna cungah khan biaceihnak ka tuah tikah, annih cu lungdai tein an um lai. Cuticun keimah cu Bawipa an Pathian ka si kha an hngalh lai.

¹ Sal kan tan kum hra kum, thla hra thla, ni hleihnih ni ah, Bawipa nih ka sinah a chimmi bia cu hihi an si: ² A ka thawh i, "Mipa, Izipt siangpahrang Faro lei khi zoh law amah cung le a ram dihlak cungah a tlung ding hi chim tuah. ³ Hihi Bawipa Pathian bia an si tiah chim: Izipt siangpahrang Faro, Nail tiva chung i aa bualmi tisartlam, Nangmah cu kan doh. Naa thawh i, ’Ka Nail tiva cu keimah ta a si, a sertu kha keimah ka si,’ na ti. ⁴ Na kha le na kha karah sio ka chiah lai i Na phokphawher ah an i benh lai. Tiva chung khan kan sio vurmar lai i Na phokphawher ah nga i benh lulhmalh in kan hnuh lai. ⁵ Na tiva hna chung nga hna he cun thetse ram ah khan kan thlak hna lai; Ahohmanh chartu um lo le vuitu um loin vawlei ro ah khan na tla lai. Nangmah cu saram rawl le va rawl caah kan ser lai. ⁶ Cucaah Izipt ram i a ummi vialte nih Bawipa ka si kha an hngalh lai, Zeicahtiah Israel mi na bawmh hnanak cu phaikung nakin a ṭha hlei lo i ⁷ An in tlaih tikah an kut chungah na pertak hna i an zaktang ah khan na chunh hna; An in hngauh tikah na kiahtak hna i an kutke kha an ther dih. ⁸ Cucaah hihi Bawipa Pathian bia cu an si: Na cungah mi he saram he thah awkah vainam ka tlunter lai. ⁹ Nangmah nih naa thawh i, ’Nail tiva cu keimah ta a si, a sertu cu keimah ka si,’ na ti caah, Izipt ram cu ram pakpalawng ah a cang lai i annih nih Bawipa ka si kha an hngalh lai. ¹⁰ Cucaah nangmah le na Nail tiva cu kan ralchanh hna i Izipt cu chuahtakmi ram, khuakheng nih a hrawhmi ram ah, Migdol in Sai-en tiang, cun Kush ramri tiang hrimhrim in ka ser lai. ¹¹ Mi ke zeihmanh nih a pal lai lo i saram zeihmanh nih an pal fawn lai lo; a chungah mi um loin kum sawm li chung a um lai. ¹² Izipt ram cu chuahtakmi ramlak i ramking bik ah ka ser lai; a khua hna cu a rawkmi khua hna lakah kum sawm li chung an ṭiaotakmi khua an si lai. Cun Izipt mi cu miphun hna lakah ka ṭhek hna lai i ram kip ah ka ṭhio hna lai," a ka ti. ¹³ Mah hihi Bawipa Pathian bia cu an si: Kum sawm li a donghnak ah Izipt mi hna cu an i ṭheknak miphun hna sin khan ka pumh hna lai. ¹⁴ Izipt cu a vanṭhatnak kha ka pek ṭhan lai i an chuahkehnak ram Pathros ah khan ka kirpi ṭhan lai, cuka ah cun pennak hmete an si lai. ¹⁵ Pennak lakah pennak santlailo bik ah a cang lai i miphun dang hna cungah khan aa hlorh bal ti lai lo, zeicahtiah annih cu tlawm tuk ah ka ser hna lai caah miphun dang kha an uk kho ti hna lai lo. ¹⁶ Israel mi hna caah i bochan awk tlak an si ti lai lo; sihmanhsehlaw i bochan awkah an rak merhnawh hna ruang i an sualnak a langhtertu a si lai. Cun Bawipa Pathian ka si kha an hngalh lai, a ti. ¹⁷ Kum kul le kum sarih kum, thla khatnak thla ni khat ni i Bawipa nih ka sinah a chimmi bia cu hihi an si: ¹⁸ A ka thawh i, "Mipa, Babilon siangpahrang Nebukhadnezzar nih Tair dohnak ah a ralkap hna cu raltuknak hmun ah saupi a chiah hna i cucaah an lu zong a kolh dih i an liang zong a kok dih. Sihmanhsehlaw amah nih siseh, a ralkap hna nih si hna seh, cu ti i Tair saupi an dohnak thawng in zeihmanh a miak an hmuhmi a um lo. ¹⁹ Cucaah hihi Bawipa Pathian bia cu a si: Izipt ram cu Babilon siangpahrang Nebukhadnezzar ka pek lai. A chaw vialte kha a kalpi dih lai i a hrawh lai i a ramh lai i cu cun a ralkap cu lahkhah a pek hna lai. ²⁰ Tair a doh man ah khan Izipt ram cu ka pek lai, zeicahtiah amah nih ka rian kha a ṭuan. Mah hihi Bawipa Pathian bia hrimhrim a si. ²¹ "Khi tikah Israel nih nge no a corh ṭhan lai i annih lak i biachim khawhnak kha ka pek ṭhan lai i cun annih nih Bawipa ka si kha an hngalh lai," a ti.

¹ Bawipa nih ka sinah a chimmi bia cu hihi an si: A ka thawh i, ² "Mipa, chim law hihi Bawipa Pathian bia a si, tiah ti: Aize, cu ni tak cu dah! ³ Cu ni cu a nai ai cang, Bawipa ni cu a nai ai cang, Cu ni cu khua a dawm ni, miphun hna biaceih ni a si. ⁴ Khi tikah Izipt cungah vainam a tlung lai i Kush cungah lungfahnak a um lai, Thahmi hna cu Izipt ram chungah an tlu lai i An chawva vialte cu lakpiak dih an si lai i a hram vialte cu leh dih an si lai. ⁵ Kush le Put le Lud, Arab mi vialte le Libia mi vialte le a ṭangṭimi ram vialte hna cu, Amah he cun vainam in an thi dih lai. ⁶ Mah hihi Bawipa bia cu an si: Izipt a bawmmi paoh cu an tlu lai i Izipt nih aa uanthlarmi a thazang cu ṭhumh a si lai; Migdol in Saien tiang vainam in mi an thi lai. Hihi Bawipa Pathian bia hrimhrim a si, a ka ti. ⁷ Ṭiaotakmi ram lakah pakpalawng bik an si lai i an khua hna cu a rawkmi khua lakah an i tel lai. ⁸ Izipt cu mei in ka khangh i a bawmtu vialte hna cu an kiah dih tikah, keimah cu Bawipa Pathian ka si kha an hngalh lai. ⁹ Cu caan cu a phak tikah zeihmanh poi loin a um ko rihmi Kush cu va hlauh awkah ka hmaika in zualko kha khulrang in an kal lai i Izipt caan a phak tikah cun lung retheihnak nih a tlak ve lai, atu hmanh ah hin cu caan cu a ra lio cang. ¹⁰ Hihi Bawipa Pathian bia a si: Babilon siangpahrang Nebukhadnezzar kut in Izipt mi bu hna cu ka donghter hna lai. ¹¹ Miphun lak i a hrang bik, Amah le a mi hna nih cun ram cu an hrawh cikcek lai. Izipt cungah cun an vainam cu an i zuh lai i Ram chungah cun an thahmi hna cu an khat lai. ¹² Nail tivate hna cu hmun car ah ka ser hna lai i Izipt cu miṭhalo hna sinah ka zuarh lai; Ram le a chungah a ummi thil vialte cu ramdangmi kut in ka hrawh dih hna lai, tiah Bawipa nih ka ti. ¹³ Mah hihi Bawipa Pathian bia cu a si: Nof khua bawi hna le siangpahrang hna cu an donghnak ka phakter hna lai i Izipt ram chungah siangpahrang pakhat hmanh a chuak ṭhan ti lai lo. Khi tikah khi ram chungah ṭihnak kha ka chiah lai i ¹⁴ Pathros ram cu ka hrawh lai i Zoan khua cu mei in ka khangh lai i No khua cungah biaceihnak ka tuah lai. ¹⁵ Izipt ram ralhruang Sin khua cungah ka thinhunnak ka bungh lai i Nof khua chung minung hna cu ka thah hna lai. ¹⁶ Izipt cu mei in ka khangh lai i Saien cu nganfahnak in aa kual len lai; No khua kulhnak cu baoh a si lai i tilian cu a chungah an lut hungmang lai. ¹⁷ On khua le Pi-beseth khua tlangval hna cu vainam in an thi lai i Khua hrimhrim zong cu sal ah an taang lai. ¹⁸ Tahpanhes ah, Izipt seihnam cu ka chiah tikah, Khika ah chun ceu cu a mui lai; Khi tikah aa uanthlarmi a ṭhawnnak cu tei a si lai; Minmei nih a zelh lai i a fanu hna cu sal ah an taang lai. ¹⁹ Cuticun Izipt ram cungah khan biaceihnak ka tuah lai i Annih nih Bawipa ka si kha an hngalh lai. ²⁰ Kum hleikhat kum, thla khat thla, ni sarih ni i Bawipa bia ka sinah a rami cu hihi a si: ²¹ A ka thawh i, "Mipa, Izipt siangpahrang Faro ban cu ka khiah cang. Zohhmanh, vainam a tlaih khawh ṭhannak ding caah an thlop lo i an tuam lo. ²² Cucaah hihi Bawipa Pathian bia an si: Izipt siangpahrang Faro cu ka ralchanh; a kut kha a pahnih tein, a dammi he a kiakmi he khan, ka khiah hna lai i vainam cu a kut chung khan ka tlakter lai. ²³ Izipt mi cu miphun hna lakah ka ṭhek hna lai i ram kip ah ka ṭhio hna lai. ²⁴ Khi tikah Babilon siangpahrang cu ka ṭhawnter lai i a kut chungah ka vainam cu ka chiah lai; sihmanhsehlaw Faro ban cu ka khiah lai i a hmaiah cun hliam in a ril lai i a hrum-ai lengmang lai. ²⁵ Babilon siangpahrang cu a ban kha ka ṭhawnter lai, sihmanhsehlaw Faro ban cu a thlep lai. Babilon siangpahrang kut chungah ka vainam kha ka chiah i cu vainam cu Izipt ram cung i a lek tikah, mi nih Bawipa ka si cu an hngalh lai. ²⁶ Izipt mi cu miphun hna lakah ka ṭhek hna lai i ram kip ah ka ṭhio hna lai, cun annih nih Bawipa ka si kha an hngalh lai," a ti.

¹ Kum hleikhat kum, thla thum thla, ni khat ni ah, hi bia hi Bawipa nih a ka chimh: ² A ka thawh i, "Mipa, hi bia hi Faro le a mi vialte kha chim hna, amah cu thawh law, Na lianhngannak ah hin zei he dah kan tahchunh lai? ³ Assiria khi zohhmanh, Lebanon tlang i sidar thing a rak si khah. Aa dawhmi a nge nih khan tupi chung thing kha a lonh hna i An cungah khan i hlorh vengvung in a um. ⁴ Cerh nih an cawm i vawlei tang ti nih an santer, A velchum vawlei kha tiva nih an hnawnter i Ram chung i thingkung dang vialte hna tiang khan tiva tete cu an luang. ⁵ A nge cu an tam i a ṭe cu an sau; Zeicahtiah ti tampi nih a phak caah a si. ⁶ A nge ah khan van i a zuangmi va phun kip nih bu an ser i A nge tangah khan saram phun kip nih an fale kha an hrin hna i A thladem ah khan miphun ngan vialte nih an inn kha an sak hna. ⁷ Thingkung ngan, thingkung dawh a si taktak ko, Zeicahtiah a hram kha duhdim tein ti an hmu. ⁸ Pathian dum chung sidar thingkung cu zeihmanh nih an lonh kho lo, Farkung zeihmanh nih a nge kha an tluk kho lo i Saipres thing zeihmanh nih cu bantuk nge cu an ngei lo; Pathian dum chung i a ummi thing zeihmanh nih aa dawhnak kha an tluk kho lo. ⁹ Bawipa nih dawhnak kha ka pek i Pathian dum Eden dum chung i a ummi thing vialte nih an in hngar dih," tiah chim, a ka ti. ¹⁰ Cucaah Bawipa bia cu hihi a si: Amah cu cu tluk sang in a ṭhan i thingkung dang hna cungah aa fon i a ṭhan pah in aa porhlawtnak kha a san chin lengmang caah, ¹¹ amah a tawngtu ding miphun hna bawi sinah cun ka pek cang; a ṭhat lonak nih a phut rup khan amah cungah cun a tuah lai. ¹² Thlachiat a ruat lo bikmi miphun, miphun dang nih khan an hau cang i an hlonh cang. Tlang cung kip le hor chung kip ah a nge sau pipi cu an ril liangluang ko hna i ram chung tiva vialte hna kamah khan a nge hna cu kiak reprup in an um ko. A thladem toi khan vawlei cung miphun vialte hna cu an chuak i annih nih amah cu an kaltak. ¹³ A tlumi a luang cungah cun van i a zuangmi va vialte kha an i fu i a nge pawngah cun ram sa vialte kha an dir. ¹⁴ Cucaah ti ṭha tein a hmumi thingkung vialte hna cu cu tlukin an sang bal ti lai lo i kha thingkung tluk khan thingkung dang cungah an zik a fong ti lai lo. An lak i a ṭhawng bikbik hna zong, ti ṭha tein a hmumi si ko hna hmanh seh law, ding thlerthlur in an dir kho ti lai lo, zeicahtiah an dihlak in thihnak ah chanh an si cang, vawlei tang hmun i kal awkah khiah an si cang i cuka ah cun mi vialte co ciomi kha an co ve lai i khor chungah cun an tla ve ko lai. ¹⁵ Mah hihi Bawipa Pathian bia an si: Sheol i a vung kal tikah khan ti thuk cu a cungah khan kutka bangin ka khar, a tiva cu ka kham hna i ti tampi cu an car dih. Lebanon nih khan a ṭah i ram chung thing vialte hna kha an uai dih. ¹⁶ Khor chungah a vung kalmi hna he Sheol ah ka vun kalpi tikah khan, a tluk thawng ah miphun hna cu ka therter hna. Hi vawlei tang hmun hi Eden dum chung thingkung vialte hna le Lebanon thingkung a ṭha bikbik hna le ti nih ṭha tein a cawmmi thingkung hna nih hnangamnak an i laknak hmun a si. ¹⁷ Annih zong, amah bantukin Sheol ah cun an vung kal ve, vainam in thahmi hna sinah cun an vung kal; cun a thladem tangah a rak um tawnmi hna kha miphun kip sinah ṭhek an si. ¹⁸ Eden thingkung lakah khan a zei kha dah sunparnak le lianhngannak ah nangmah bantuk a rak si hna? Ahohmanh an si lo, asinain Eden thingkung hna sinah khan tanglei vawlei ah cun kalpi na si ve ko lai; vainam in thahmi hna sinah khan na ril ve ko lai i thazang a ngei lomi mithi hna bu chungah khan na um ve ko lai. Hi nih hin a sawhmi a sullam cu Faro le a minung vialte kha an si. Mah hihi Bawipa Pathian bia hrimhrim a si.

¹ Kan saltan kum hleihnih kum, thla hleihnih thla, ni khatnak ni ah Bawipa bia cu ka sin a phan. ² A ka thawh i, "Mipa, Izipt siangpahrang Faro kha mithi hla lawh tuah law amah cu hi bangin chim: Miphun hna chiandeih tum no, na lo cang ai! Nangmah cu Nail tiva i tisartlam, A thaw a phit tik i ti a ṭhen dih i A ke in ti a let hluahmah i Tiva tete hna zong a nawiter dihtu bantuk na si, a ti," tiah a ti. ³ Mah hihi Bawipa Pathian bia an si: Miphun tampi kha an i pumh tikah ka sur in kan khuh lai i a awng ah khan naa foih lai. ⁴ Vawlei ah khan kan hlonh lai i lei car ah khan kan tengh lai. Van i a zuangmi va vialte kha na cungah ka futter hna lai i ram sa nih na sa cu an i serh lai. ⁵ Na sa cu tlang cungah ka chiah hna lai i nelrawn cu a tholung khan ka khahter hna lai. ⁶ Na chungin a chuakmi thi khan ram cu ka ciah lai i na thisen in tlangpar tiang hrimhrim in ka ciah lai; cun ti luannak kahcham hna cu nangmah thisen in an khat lai. ⁷ Na ceunak kha ka hmih tikah van kha ka phenh lai i a arfi hna kha ka muihter hna lai; ni cu minmei in ka phenh lai i thlapa nih a ceunak a chuah lai lo. ⁸ Na cung van i ceunak a ummi hna cu ka muihter hna lai i na ram cungah muihnak ka tlunter lai. Mah hihi Bawipa Pathian bia hrimhrim a si. ⁹ A rawkmi na ralkapbu kha miphun dang hna sinah, na hngalh bal lomi ram ah ka kalpi hna tikah mi tampi cu an lungre ka theihter hna lai. ¹⁰ Nan cung i a tlungmi thil hin mi tampi kha an khuaruah ka harter hna lai; an siangpahrang hna hmaika ah ka vainam kha ka lek tikah an hmulthi a ling dih lai. Na tluk ni ah cun an cung i a tlung ding ciomi thil ruangah khan an ther lengmang ko lai. ¹¹ Zeicahtiah hihi Bawipa Pathian bia cu a si: Babilon siangpahrang vainam cu na cungah a tlung lai. ¹² Na ralkapbu cu an ning piin mi lak i thlachiat a ruat lo bikmi ralkap hna kut khan ka thihter hna lai. Izipt porhlawtnak cu an hrawh cikcek lai i a mi vialte cu hloh an si dih lai. ¹³ An saṭil vialte cu tiva kamah ka thah dih hna lai. Minung ke nih siseh, saram ke nih siseh, a lam ti hna lai lo. ¹⁴ Khi tikah an ti kha cang loin ka umter lai i an tiva tete hna cu chiti bangin nal ziahmah tein an luang lai. Mah hihi Bawipa Pathian bia hrimhrim a si. ¹⁵ Izipt cu ka hrawh dih i ram cu a ning piin a rawh cikcek tikah, cun cuka i a ummi hna cu ka tuk hna tikah, annih nih Bawipa ka si kha an hngalh lai. ¹⁶ Mah hihi mithi hla a si i miphun hna nu hna nih mithi hla bantukin an sak lai. Mithi hla bantukin, Izipt le a mi hna kha an lawh hna lai. Mah hihi Bawipa Pathian bia hrimhrim a si. ¹⁷ Kum hleihnih kum thla khatnak thla, ni hleinga ni ah Bawipa bia cu ka sinah a phan. A ka thawh i, ¹⁸ "Mipa, Izipt le a mi hna kha ṭah hla lawh hna, Nangmah le miphun hna nu hna nih lawh hna u, Khor chungah a vung kalmi hna he cun tanglei vawlei ah ka vun kalpi hna lai. ¹⁹ Nangmah cu midang nakin duhdawt deuhmi na si maw? Vung kal law thazang a ngei lomi mithi hna sinah khan dai tein vung it ko, tiah vung chim," a ka ti. ²⁰ Vainam cu timh cia in a dir ko. Amah he hmunkhat ah a kalmi le a mi vialte hna cu vainam nih a thahmi vialte hna sinah khan an thi ve lai. ²¹ Faro le a bawmtu hna cu Sheol i ralbawi nih hi bangin a chawnh hna lai; Thazang a ngei lomi mithi, vainam nih a thahmi hna cu an rung i an it. ²² Khika ah Assiria kha a mibu vialte hna he an um ve, a mi vuimi hna cu a velchum khan an um i an dihlak in vainam in thah i a thimi an si. ²³ A thlan hna cu khor a thuk biknak hmun ah khan tuah an si i a mibu hna cu a velchum ah khan an vui hna, annih cu an dihlak in vainam in thahmi an si, annih cu minung mi hna ram ṭihphannak in a rak khahtertu hna kha an si. ²⁴ Khika ah khan Elam kha a um ve, a velchum ah khan a mi hna kha an vui ve hna, an dihlak in vainam in thahmi an si; annih cu thazang zeihmanh ngei loin tanglei vawlei ah khan an vung kal cang, minung ram i ṭihphannak a rak khahter tawntu hna kha atu cu khor chung i a vung kalmi hna ningzahnak kha an i hrawm ve cang. ²⁵ Thahmi hna lakah khan amah caah le a velchum in phummi a mi hna caah khan dinhnak hmun serpiak an si; an dihlak in thazang ngei lo lawngte an si dih, vainam in thahmi an si dih. Hlanlio i minung mi hna ram i ṭihphannak a rak umter tawntu hna kha atu cu khor chung i a vung kalmi hna ningzahnak kha an i hrawm cang; annih cu thahmi hna lak i hmun pakhat ah khan chiah an si cang. ²⁶ Khika ah khan Meshek le Tubal cu an mibu vialte hna he khan an um ve, an velchum ah khan an mi hna cu an vui hna, annih cu minung mi hna ram ah ṭihphannak a rak umtertu kha an si nain, thazang zeihmanh a ngei lomi le vainam in thahmi an si cang. ²⁷ Annih cu thazang ngei loin a tlumi ralkap hna, Sheol ah an hriamnam he a vung kal i an vainam cu an lu tangah aa tlinh i an phaw cu an ruh cungah aa khuh i an ralṭhat ruangah minung umnak ram kha ṭihphannak in a rak khahtertu kha an si lo maw? ²⁸ Nang Faro zong, a thimi thazang a ngei lomi hna sinah khan na ril ve lai, vainam in thahmi hna sinah khan naa din ve lai. ²⁹ Khika ah Edom zong kha a siangpahrang hna le a bawi hna he an um ve, an ral a rak ṭha hna nain vainam in thahmi hna sinah khan chiah an si ve; thazang a ngei lomi mithi hna le khor chungah a vung kalmi hna sinah khan an i din ve lai. ³⁰ Khika ah Chaklei bawi hna le Sidon mi vialte hna kha an um ve, an ralṭhatnak thawngin ṭihphannak an chuahtermi vialte ruangah annih cu thahmi hna sinah khan ningzak in an vung kal ve. Vainam in thahmi hna sinah khan thazang zeihmanh ngei loin an it i khor chung i a vung kalmi hna ningzahnak kha an i hrawm. ³¹ Faro nih khan a rak hmuh hna lai i a rak sunghmi a mi hna caah khan a hna a ngam phah lai — Faro cu a ralkap bu he vainam in thah a si, tiah Bawipa Pathian nih a ti; ³² minung mi hna ram ah khan ṭihphannak a rak karhtertu rak si hmanh seh law, amah cu a mi vialte hna he, vainam in thahmi, thazang zeihmanh a ngei lomi mithi hna sinah khan dinhter a si ve ko. Mah hihi Bawipa Pathian bia hrimhrim a si.

¹ Mah hihi Bawipa nih ka sinah a chimmi bia an si. A ka thawh i, ² "Mipa, na mi cu chim hna law, hitihin ti hna: Ram pakhatkhat doh awkah ralkapbu cu ka kalter hna tikah, cu ram mi nih cun anmah lak i pakhatkhat cu ralvengtu ah an i thim hna. ³ Cu pa nih cun ral kha an rat a hmuh i ralrin peknak caah a muko kha a tum i ⁴ sihmanhsehlaw pakhatkhat nih cu cu zei ah a rel lo i ral nih an phanh ahcun, amah cung i a tlungmi kongah amah cu mawhchiat awk a si ko lai. ⁵ Amah mawh a si ko, zeicahtiah ralrin peknak thawng kha a theih tikah zeihmanh ah a rel lo; rak rel seh law cu a luat ko hnga. ⁶ Sihmanhsehlaw ralvengtu nih ral an rat a hmu nain a muko kha tum lo in zapi kha ralrinnak a pek hna lo ahcun, thahmi paoh kha an sualnak pi he thah chih an si ko lai; sihmanhsehlaw kha hna an thih ruangah khan ralvengtu kha mawhchiat a si lai, a ti. ⁷ Mipa, nangmah cu Israel mi hna caah ralvengtu ah kan ser. Ka sinin bia kha na lak hna lai i annih sinah ralrinnak kha na pek hna lai. ⁸ Mi pakhatkhat cu a ṭhat lo ruangah a cungah thihnak biakhiahnak ka tlunter ko lai; nangmah nih amah kha a ziaza ṭhinh awkah ralrinnak na pek lo zongah a sualnak cu amah ta a si ko i a ṭhat lonak ruangah a thi ko lai, asinain a thihnak caah cun kan mawhchiat lai. ⁹ Sihmanhsehlaw a ziaza ṭhinh awkah ralrinnak na pe nain a ṭhinh lo ahcun, a ṭhat lonak ruangah a thi lai, sihmanhsehlaw nang cu na luat lai. ¹⁰ Mipa, Israel mi cu chim hna law, nannih nih, ’Kannih cu kan sualnak ruang le kan nawl buarnak ruangah khan kan phorh a rit ko; cu ruangah cun kan tlum kan ral thluahmah ko, nunnak caah hin ruahchannak zeihmanh kan ngei lo,’ tiah nan phunzai lengmang, ti hna. ¹¹ Cucaah annih cu, ’Ka nun bangin ka chim, miṭhalo mi an thih cu ka duhmi a si lo. Miṭhalo mi nih an ziaza kha an ṭhinh i an nun kha ka duh deuh. Nan ziaza ṭhalo kha hlaw hna u, hlaw hna u; maw Israel mi hna, zeicahdah nan thih lai?’ a ti, tiah chim hna, a ka ti. ¹² Mipa, na mi cu chim hna law, hi bangin ti hna: Miding mi cu a palh tikah a dinnak nih khan a khamh lai lo, miṭhalo mi nih a ziaza kha a ṭhinh ahcun a ṭhat lonak nih khan sual a phaw lai lo. Miding mi cu a sual tikah a dinnak vialte nih a nunnak kha an khamh kho lo. ¹³ Miding mi cu na nunnak khamh a si lai, ka ti tikah ka din ruangah a si, tiin aa ruah sual ko hnga i palhnak kha a tuah ko hnga, cu tikah cun dinnak a rak tuahmi vialte kha pakhat hmanh hngalhpiak a si lai lo; ṭhat lonak a tuahmi ruangah cun a thi ko lai. ¹⁴ Cun miṭhalo mi cu a cungah thihnak bia ka hei ceih ko hnga, sihmanhsehlaw anih nih a ziaza kha aa remh hnga i a ding le a ṭha kha a tuah ko hnga: ¹⁵ khi tikah biakamnak a rak tuahmi kha a pek ṭhan hna i a firmi kha a cham ṭhan hna i palhnak kha a tuah ti lo i nunnak lam phunglam kha a zulh ahcun, a nung lai, a thi lai lo. ¹⁶ Sualnak a tuahmi kha pakhat hmanh amah dawnkhantu ah hngalhpiak a si lai lo i dinnak le ṭhatnak kha a tuah caah a nung lai. ¹⁷ Na mi nih an i thawh i, ’Bawipa cu zulhmi ningcang zeihmanh ngei lo in rian a ṭuan,’ an ti; sihmanhsehlaw anmah thil ti ning kha pei ningcang ngei lo cu a si cu. ¹⁸ Miding mi nih a dinnak kha a hlawt i palhnak kha a tuah ahcun, cu ruangah cun a thi ko lai; ¹⁹ cun miṭhalo mi nih a ṭhat lonak kha a hlawt i a ding le a ṭha kha a tuah ahcun a nung ko lai. ²⁰ Cucaah maw Israel mi hna, zeitindah nan tuahmi ning tein bia kan ceih hna tikah Bawipa cu ningcang loin rian a ṭuan nan ka ti khawh?’ tiah a ti. ²¹ Ral i kan taan kum hleihnih kum, thla hra thla, ni nga ni ah, Jerusalem khua in a rami ralzam pakhat ka sinah a ra i Jerusalem khua cu a rawk cang, tiah a ka chimh. ²² An rat lai zan ah cun Bawipa kut cu ka cungah a tlung i an ka phak tikah zinglei ah cun Bawipa nih holh khawhnak kha a ka pek ṭhan. Ka holh kho ṭhan cang i holh loin ka um ti lo. ²³ - ²⁴ Bawipa nih a ka chimhmi bia cu hihi an si: A ka thawh i, "Mipa, Israel ram a rawk cangmi i a ummi hna nih, ’Abraham nih ram hi a rak co lioah khan pakhat lawng a rak si, atu cu mi tampi kan si cang i ram cu ro caah pek kan si cang,’ an ti. ²⁵ Cucaah annih cu chim hna law, hihi Bawipa Pathian bia an si, tiah ti hna: Sa cu a thi he nan ei chih, siasal kha nan mit nan hlerhnawh hna i thisen kha nan chuah; cun nannih nih ram kha co awkah nan i ruahchih rih! ²⁶ Vainam kha nan i bochan, thil fihnung kha nan tuah hna, nan nupile kha nan i thurhhnawmhpiak i ram kha co nan i ruah ṭhiamṭhiam! ²⁷ Mah hihi Bawipa Pathian bia an si, tiah chim hna: Ka nun bangin ka chim, annih cu a rawkmi thil lakah khan vainam in an thi lai; ramlak ah saram hna rawl ah ka ser hna lai, ralhau chung le lungkua chungah rai in an thi lai. ²⁸ Ram cu a ṭiaomi ram ah ka ser lai; aa porhlawtmi a thazang cu pakpalawng ah a cang lai i Israel tlang hna cu ke pal lomi thetse ram ah an cang lai. ²⁹ Annih nih fihnung an tuahmi vialte ruangah ram cu ṭiaotakmi ram i ka ser tikah, keimah cu Bawipa ka si kha an hngalh lai. ³⁰ "Mipa, na mi nih an bubu in an i pum i na kong kha vampang toi le innka ah an i ceih i pakhat le pakhat cu, ’Bawipa sinin zei bia dah a um hnga va zoh tuah u sih,’ an i ti. ³¹ Cucaah ka mi hna cu, mi nih an tuah tawn cio bantukin, an ra hungmang lai i na hmaiah an ṭhu lai. Chimh awk na ngeihmi hna bia cu an theih lai, sihmanhsehlaw an tuah lai lo. ’Bia ṭha an si,’ an ti lai, sihmanhsehlaw an lung cu mah pumpak miaknak cio lawngah khan fek tein an bunh cang. ³² Annih caah cun aw ṭha ngai, hla dawh sak a thiam ngaimi, tingtang tum a thiammi ceo na si ko; na chimmi cu an ngaih lai, sihmanhsehlaw an tuah hrimhrim lai lo. ³³ Sihmanhsehlaw a caan a phak tikah cun—cu caan cu a phan te ṭheo lai va si kaw!—an lakah profet pakhat a rak um kha an vun hngalh te lai," tiah a ti.

¹ Mah hihi Bawipa nih ka sinah a chimmi bia an si: ² A ka thawh i, "Mipa, Israel mi tuukhal hna cu chim hna. Thawh hna law, Nannih tuukhal hna, hihi Bawipa bia an si, ti hna: Anmah zawn lawng aa ruatmi Israel mi tuukhal hna hi ka hei hua hna dah! Tuukhal nih hin tuu kha an zawn ruah awk a si hnga lo maw? ³ A hnuk kha nan din, a hmul kha nan i aih i a thaumi kha nan thah hna, sihmanhsehlaw tuu kha nan cawm hna lo. ⁴ A bami kha thazang nan pe hna lo, a zawmi kha nan hram hna lo, hma a ingmi kha an hma nan menpiak hna lo, a pingah a kalmi kha nan kirpi ṭhan hna lo i a tlaumi kha nan kawl hna lo; cucu vun chim loin annih cu zaangfahnak ngei lo le puarhrang ngaiin nan uk hna. ⁵ Cucaah annih cu an i ṭhek dih, khaltu an ngei lo, ram sa seh awk men ah an cang. ⁶ Ka tuurun cu a kenkip ah an vak, fing le tlang kip ah an kal i ram chungah khan an i ṭhek dih; ahohmanh an zei a poi lo i ahohmanh nih an kawl fawn hna lo. ⁷ - ⁸ "Cucaah nannih tuukhal hna, Bawipa bia cu thei tuah u. Ka nun hrimhrim bangin ka chim, tiah Bawipa nih a ti: ka tuu hna cu ram sa nih a seh hna i khaltu an ngeih lo caah sahrang ah an can i ka tuukhal hna nih ka tuu kong ah an zeihmanh a poi lo i anmah zawn lawng kha an i ruah caah, ⁹ cucaah nannih tuukhal hna, Bawipa bia hi thei tuah u. ¹⁰ Hihi Bawipa bia cu an si: Tuukhal cu ka ralchanh hna i annih cu ka tuu kha ka pe hna u, tiah ka hal hna lai. Kha tuukhal hna kha ka hlawt hna lai: anmah zawn lawng i ruat in an um kho ti lai lo; ka tuu cu an kaa chung khan ka chuah hna lai i annih kha i cawmnak ah an hmang ti hna lai lo," tiah a ti. ¹¹ Zeicahtiah hihi Bawipa Pathian bia cu an si: Atu cu keimah hrimhrim nih ka tuu kha ka zohkhenh cang hna lai i ka kawl cang hna lai. ¹² Tuukhal nih a pawngah a tuu an i ṭhek tikah anmah kawl awkah a kal bangin, ka tuu hna kawl awkah ka kal lai i khuachiat le khuadawm ni zongah siseh, khuazeihmanh ah i ṭhek hna ai kun, an i ṭheknak hmun paoh khan ka chuahpi hna lai. ¹³ Miphun kip sin khan ka chuahpi hna lai, ramdang khan ka pumh hna lai i anmah vawlei te ah khan ka hruai hna lai. Israel tlang cungah khan, a tiva pawng hna le a ram a hrinnak hmun kip ah khan ka tlonter hna lai. ¹⁴ Tlonnak hmun ṭha ah khan ka tlonter hna lai i an ram hninghno cu Israel tlang sang hna kha an si lai. Khika ah an i din lai, khika ram hninhnonak hmun ah khan an um lai i Israel ram tlang cungah khan ram ṭam awk tampi an hmuh lai. ¹⁵ Keimah hrimhrim nih ka tuurun cu ka zulh ka khalh hna lai i keimah hrimhrim nih an kawm ah ka khumh hna lai, tiah Bawipa Pathian nih a ti. ¹⁶ A tlaumi kha ka kawl hna lai, a pialmi kha ka kirpi ṭhan hna lai, hma a ingmi kha ka thlop hna lai, a zawmi kha thazang ka pek hna lai, asinain a thaumi le a ṭhawngmi kha ka hrawh hna lai. Zeicahtiah kei cu dinnak a tuahtu tuukhal ka si. ¹⁷ Nannih ka tuurun hna, mah hihi nan caah Bawipa Pathian ka bia cu a si: Tuu pakhat le pakhat karlak bia kha keimah nih ka ceih lai. ¹⁸ Nannih tuukawng le mehehtum hna. Ram hninghno umnak hmun i tlon cu nan i za lo maw? Zeicahdah a dang cu nan ke in nan lamh hna? Asiloah, din awk ti thiang kong zongah, zeicahdah a tangmi ti cu nan ke in nan nawiter dih? ¹⁹ Nannih nih nan lamhmi le nan nawitermi kha ka tuurun nih an ei le an din a hau. ²⁰ Cucaah nan sinah Bawipa Pathian nih a chimmi bia cu hihi a si: Atu cu keimah hrimhrim nih a thaumi le a dermi tuu kha bia ka ceih hna lai. ²¹ A bami kha nan sir le nan liang in nan en hna, nan ki in nan suk hna i nan dawi dih hna i nan ṭhio dih hna. ²² Cucaah ka tuurun cu keimah nih ka khamh lai i hrawh an si ti lai lo; tuu pakhat le pakhat kha keimah nih bia ka ceih cang hna lai. ²³ Cun annih zohkhenhtu dingah tuukhal pakhat kha an cungah ka chiahpiak hna lai i cucu ka sal David kha a si lai; ²⁴ anih nih cun a zohkhenh hna lai i an khaltu ah a cang lai. Bawipa cu an Pathian ka si lai i ka sal David cu an bawi a si lai, tiah Bawipa nih ka chim cang. ²⁵ Annih kha rumnak pek awkah anmah he biakamnak ka tuah lai; ram chungin sahrang kha ka ṭhawl dih hna lai i saṭil tlonnak hmun ah khan lungdai tein an um lai i tu chungah khan an it lai. ²⁶ Ka tlang pawngah khan ka umter hna lai i a caan te ah ruah, thluachuahnak ruah kha ka pek hna lai. ²⁷ Ram chung thing nih khan thei an tlai lai, vawlei nih khan rawl a chuah lai i mi cu anmah le an vawlei cio ah lungdai tein khua an sa lai. An hreng kha ka khiah hna i sal i a zuartu hna kut chung khan ka chuah hna tikah Bawipa ka si kha an ka hngalh lai. ²⁸ Ramdangmi hna nih an hrawk ti hna lai lo i sahrang zong nih a seh ti hna lai lo; ahohmanh nih hnahnawh ti loin lungdai tein an um lai. ²⁹ An cinthlakmi kha ka ṭhatter hna lai i hi ram chungah hin mangṭam kha an ing ti lai lo, miphun dang hna nihsawhnak zong kha an ing ti lai lo. ³⁰ Annih nih Bawipa an Pathian, keimah cu an sinah ka um kha an hngalh lai i annih cu ka mi Israel mi an si kha an hngalh lai, tiah Bawipa Pathian nih a ti. ³¹ Nannih cu ka tuurun, ka mi, ka cawmmi ka saṭil nan si i keimah cu nan Pathian ka si, tiah Bawipa Pathian nih a ti.

¹ Mah hihi Bawipa Pathian nih ka sinah a chimmi bia an si: ² A ka thawh i, "Mipa, Seir ram lei khi zoh law hi bia hi chimhnawh tuah. ³ I thawh law, hihi Bawipa Pathian bia an si, tiah chim: Maw Seir tlangram, nangmah cu kan doh: Na cungah ka kut ka samh lai i pakpalawng ram ah kan ser lai. ⁴ Na khua cu ka hrawh dih hna lai i nangmah cu ṭiaotakmi na si lai; Cuticun Bawipa ka si kha na hngalh lai. ⁵ Israel mi cu na lungchung tein na huat zungzal hna caah, Rawhralnak an ton ni ah le a hmanung bik dantatnak an hmuh ni ah Annih cu vainam sinah na pek hna. ⁶ Cucaah ka nun bangin ka chim, Thisen chuahnak cu na donghnak ah ka ser lai i Thisen chuahnak in na sual caah Thisen chuahnak nih cun an dawi lai. ⁷ Seir tlangram cu ṭiaotakmi ram, ramchiahru ah ka ser lai i A chung i a ummi vialte, aa chawk aa let lengmangmi hna kha an donghnak ka phakter hna lai; ⁸ Na tlang hna le na nelrawn hna cu miruak in ka khahter hna lai i Vainam nih a thahmi hna kha na tiva chungah an tla lai. ⁹ Nangmah cu ṭiaotakmi ram ah a zungzal in kan ser lai i Na khua chungah mi an um lai lo; Cuticun Bawipa ka si kha na hngalh lai, a ti. ¹⁰ Na thawh i, Miphun pahnih hna, Judah le Israel cu an ram pahnih hna he, khika ah Bawipa ka um ko nain, keimah ta an si lai i ka co hna lai, na ti. ¹¹ Cucaah ka nun bangin ka chim, na thinhunnak le na nahchuahnak cu lehrulh na si lai i na huat hna ruangah an cungah na tuahmi kha na cungah ka tuah ve lai, tiah Bawipa nih a ti. Nannih cu bia kan ceih tik hna ah nannih nih nan ka hngalh lai; ¹² Bawipa ka si kha nan hngalh lai. Israel ram tlang nan thangchiat hnanak vialte i nan i thawh i, ’Israel ram tlang hna cu ṭiaotakmi an si cang i kanmah ei awkah pek an si cang,’ nan timi kha ka theih dih ko. ¹³ Cun keimah kong zongah khan zeirello ngaiin bia nan chim i nannih nih atu le atu nan ka thangchiat, hihi ka theih dih ko. ¹⁴ Cucaah hihi Bawipa Pathian bia an si: Nangmah cu kan ṭhumh lai i vawlei cung cu a dihlak in an di a riamh tiang thetse ram ah kan ser lai. ¹⁵ Ka rothil a simi Israel cungah na diriam tein na tuah bantuk khan na cungah ka tuah ve lai. Maw Seir tlangram, na ṭiao dih lai, cucu Edom vialte donghnak a si lai. Cuticun mi nih Bawipa ka si kha an hngalh lai," a ti.

¹ Cun mipa, Israel tlang hna cu chawn hna law, Israel tlang hna, Bawipa bia cu thei tuah u, ti hna. ² Bawipa Pathian bia cu hihi a si: Ral nih an i thawh i, Vei mu, zungzal in a hmunmi tlang hna cu, kanmah ta an si cang, an ti. ³ Cucaah chim law, hihi Bawipa Pathian bia an si, tiah ti: Nannih Israel tlang hna, miphun dang hna nih an in tlaih hna i an in uk hna tikah nan velchum in mi nih an in rial hna i an in lamhchih hna; nan min cu bia an chimnak kip ah khan an cem chih lengmang. ⁴ Cucaah fing hna le tlang hna le tiva hna le nelrawn hna le nan velchum i a ummi miphun dang hna nih an rok an ramh i an serhsatmi ṭiaotakmi siangpahrang inn hna le zamtakmi khua hna sinah Bawipa Pathian nih a chim tikah a bia kha ngai tuah u. ⁵ Hihi Bawipa Pathian bia cu an si: Ka nahchuahnak mei lin chungin miphun dang hna sinah khan fiang tein ka chim cang i fiang khun in Edom kong ah khan ka chim. Zeicahtiah Edom nih khan porhlawt ruamkai ngaingai in le zeirello ngaiin ka ram kha a lak i a rok a ramh dih. ⁶ Cucaah Israel vawlei le fing le tlang hna le tiva hna le nelrawn hna cu thawh hna law, hihi Bawipa Pathian bia cu an si, tiah chim hna: Nannih nih miphun dang vialte nihsawhnak kha nan in awk a rak herh caah ka thinhun le ka nahchuahnak in ka lungthin kha ka chim. ⁷ Cucaah nan velchum i a ummi miphun hna cu annih nih an in nihsawh hna ruangah khan dantat an si lai, tiah kut hler in chiat ka ser cang. ⁸ Sihmanhsehlaw nannih Israel tlang hna tu nih cun, ka mi hna kha inn i an tlun lai caan a nai cang caah nge thar nan la lai i ka mi Israel mi hna caah cun thei nan tlai lai. ⁹ Zohhmanh u, atu cu nanmah caah ka si cang, nanmah leiah khan kaa mer lai i nannih cu thlawh nan si lai i thlaici tuh nan si lai. Nan cungah minung tampi, Israel chungkhar hna kha an ningpi in ka phun hna lai. ¹⁰ Khuapi cu mi nih an umhnawh ṭhan hna lai i siangpahrang inn cu an remh hna lai. ¹¹ Nan cungah minung tampi le saṭil tampi ka phun hna lai; annih cu an karh lai i tefa tampi an ngei lai. Nannih cu hlanlio nakin tam deuh le rum deuh ah kan ser hna lai. Cuticun Bawipa ka si kha nan hngalh lai. ¹² Ka mi Israel mi hna cu nan lam kha ka lamhter ṭhan hna lai. Nan chungah khua an sa lai i nannih cu an covo nan si lai; an fale kha nan that ti hna lai lo, tiah a ti. ¹³ Mah hihi Bawipa Pathian bia an si: Mi nih an i thawh i, nang cu a minung a sehmi ram le a miphun hna an fale a thahpiaktu hna ram na si, an in ti. ¹⁴ Sihmanhsehlaw mi kha na seh ti hna lai lo i na miphun hna zong kha an fale na thahpiak ti hna lai lo, tiah Bawipa Pathian nih a ti. ¹⁵ Miphun dang nih an in nihsawhnak kha kan theihter ti lai lo i miphun dang hna nih an in serhsatnak zong kha na ing ti lai lo. Hihi Bawipa Pathian bia hrimhrim a si. ¹⁶ - ¹⁷ Hihi Bawipa nih ka sinah a chimmi bia an si: "Mipa, Israel mi cu anmahle an vawleite i an um ah khan an ziaza le an thil tuahnak in an vawlei cu an thurhhnawmhter; an ziaza cu a thurhnawm i ka mithmuh ah fihnung a si. ¹⁸ Ram chung i thisen an chuahmi le ram cu an thurhhnawmhnak siasal hna ruangah khan annih cu ka thinhunnak ka bunghhnawh hna. ¹⁹ Miphun kip sinah ka ṭhek hna i ram dangdang ah an i ṭhen dih; an ziaza le an tuahsernak nih a hlawhmi dantatnak kha an cungah ka tlunter. ²⁰ An phaknak kip miphun hna sinah khan ka min thiang kha an thurhhnawmh. Mi nih an i thawh i, Hi hna hi Bawipa mi an si, a ram in a rami an si, an ti hna. ²¹ Sihmanhsehlaw Israel mi nih cun an phaknak miphun kip sinah khan ka min kha thurhhnawmhter hmanh hna seh law ka min thiang ruangah annih cu ka zuah hna. ²² "Cucaah Israel mi cu, hihi Bawipa Pathian bia a si, tiah chim hna. Nannih Israel mi hna, hi ka tuahmi hi nanmah ruangah a si lo, nan phaknak miphun kip sin i nan thurhhnawmhtermi ka min thiang ruangah khan a si deuh. ²³ Cu miphun hna sin i nan thurhhnawmhter cangmi a liannganmi ka min cu ka thianter lai. Annih nih nannih chungin ka thiannak ka langhter kha an hmuh tikah, miphun hna nih cun Bawipa ka si kha an hngalh lai, tiah Bawipa Pathian nih a ti. ²⁴ Miphun hna lak khan kan chuah hna lai i ram kip khan kan pumh hna lai i nanmah vawleite ah khan kan kalpi hna lai. ²⁵ Nan cungah ti thiang kan theh hna lai i nannih an thurhhnawmhtertu hna thil vialte khan kan thianh hna lai; nan siasal biaknak thurhhnawmhnak vialte khan kan thianh dih hna lai. ²⁶ Lungthin thar kan pek hna lai i thlarau thar nan chungah ka khumh lai. Nan pum chungin lung bantukin a hakmi nan lung kha ka lak lai i titsa bantukin a nemmi lung kha kan pek hna lai. ²⁷ Ka thlarau cu nan chungah ka khumh lai i ka nawlbia he aa tlak in kan umter hna lai i ka phunglam zulh in nan nung lai. ²⁸ Nan pupa ka pekmi hna ram chungah nan um lai i nannih cu ka mi ah nan i cang lai i kei cu nan Pathian ah ka cang lai. ²⁹ An thurhhnawmhtertu hna thil vialte chung khan kan khamh hna lai; fangvoi cu ka kawh lai i tampi ka vuiter lai; nan cungah mangṭam ka tlunter ti lai lo. ³⁰ Thingkung kha thei tampi ka tlaiter hna lai i vawlei kha rawl tampi ka vuiter lai i mangṭam nih ningzahnak a chuahtermi kha miphun hna lakah nan ing ti lai lo. ³¹ Nan ziaza ṭhalo le nan tuahsernak a ṭha lomi kha nan i hngal ṭhan lai i nan ṭhat lonak le fihnung nan sinak ruangah khan nanmah le nanmah nan i fih lai. ³² Hi ti ka tuah hi nanmah ruangah a si lo ti kha fiang tein hngal u, tiah Bawipa Pathian nih a ti. Cucaah Israel mi hna, nan ziaza ruangah ningzak hmaichia in um tuah u," a ti. ³³ Mah hihi Bawipa Pathian bia cu an si: Nannih cu nan ṭhat lonak vialte in kan thianh hna tikah khua chungah cun mi ka umter ṭhan hna lai i siangpahrang inn hna cu remh ṭhan an si lai. ³⁴ Atu i ṭiaotak a simi ram, aa chawkmi paoh hmuh awk i pakpalawng in a um komi ram hi, thlawh an si ṭhan lai. ³⁵ Mi nih an i thawh lai i hi ram ṭiaotak cangmi ram hi, Eden dum bantuk ah a cang ṭhan cang an ti lai. Hlan i a rak rawk i an rak bauh i an rak chimhmi khua, atu i ṭha tein kulh a si ṭhanmi hna chungah hin, mi khua an sa ṭhan lai. ³⁶ Nan velchum i a tangmi miphun hna nih, hrawhmi khua hna a remh ṭhan i ṭiaotakmi ram ah thlaici a cing ṭhantu cu Bawipa ka si hi an hngalh lai; Bawipa nih ka chim i ka tuah lai, tiah a ti. ³⁷ Mah hihi Bawipa Pathian bia an si: Israel mi cu hihi ka hal u, tiah ka ti rih hna lai: An pa hna cu tuu zat in ka tamter hna lai, laksawng thiang ah pekchanhmi tuu hna bantukin, puai caan i Jerusalem khua tuu hna bantuk ah ka ser hna lai. ³⁸ Cucaah a rawk cangmi an khua hna chungah cun minung a runrun in an khat lai i Bawipa ka si kha an hngalh lai, tiah a ti.

¹ Bawipa kut cu ka cungah a phan i a thlarau in a ka kalpi i ruh in a khatmi nel pakhat ah a ka chiah. ² An lakah cun a kenkip ah a ka chawhter i an dihlak in ka pal dih hna; nelrawn cu a khah in an khat i rel cawk lo an si i an ro ngaingai. ³ A ka thawh i; "Mipa, hi ruh hi an nung kho ṭhan hnga maw?" tiah a ka ti. Kei nih ka leh i, "Nangmah lawnglawng nih na hngalh, Bawipa Pathian," tiah ka ti. ⁴ Cun a ka thawh i, "Hi ruh ro hi bia chim hna law, maw ruh ro hna, Bawipa bia hi thei tuah u," ti hna, a ka ti. ⁵ Mah hihi Bawipa Pathian nih hi ruh hna sinah a chimmi bia cu a si: Nan chungah thaw ka chiah lai i nan nung lai. ⁶ Nan cungah thahri kha ka ṭem chih hna lai i tit kha kan pek hna lai i cuar in kan khuh hna lai i nan chungah thaw ka chiah lai i nan nung lai; cun nannih nih Bawipa ka si kha nan hngalh lai, a ti. ⁷ A ka fial bantukin bia chim cu kaa thawk i ka chim lengmang lioah cun thawng a hung um i ruh cu an hun i fonhtonh. ⁸ Ka zoh ko lio hna ah cun an cungah thahri kha an hung um i tit nih khan a hun khuh hna i cuar nih khan a hun zual hna, sihmanhsehlaw an chungah thaw a um lo. ⁹ Cun a ka thawh i, "Thli khi bia chim tuah, mipa, thli cu chim tuah law, hihi Bawipa Pathian bia an si, tiah ti: Maw thli, ra tuah, a kaa kip in ra law hi mithi mi hna chungah hin lut tuah law nung hna seh," a ti. ¹⁰ A ka fial bantukin biachim cu ka vun i thawk i thaw cu an chungah a lut i an hung nung i an ke in an dir i ralkapbu nganpi an hung si. ¹¹ A ka thawh i, "Mipa, hi ruh hna hi Israel mi innchungkhar a ning piin an si. Annih nih an i thawh i, ’Kan ruh cu an ro dih cang, kan nunnak hri cu a cat cang, mithi tluk ceo kan si ko cang,’ an ti. ¹² Cucaah annih cu chim hna law, hihi Bawipa Pathian bia an si, tiah chim hna: Maw ka mi hna, nan thlan cu ka hun hna lai i an chung khan kan chuah hna lai i Israel ram ah kan kirter hna lai. ¹³ Nan thlan kha ka hun hna i an chungin kan chuah hna tikah, Bawipa ka si kha nan hngalh lai, maw ka mi hna. ¹⁴ Khi tikah ka thlarau cu nan chungah ka chiah lai i nan nung lai i nan vawleite ah khan kan umter hna lai i hi bia cu Bawipa nih ka chimmi a si i tuah zong ka tuah laimi a si ti kha nan hngalh lai. Mah hihi Bawipa bia hrimhrim a si," a ti. ¹⁵ - ¹⁶ Hi bia hi Bawipa nih ka sinah a chimmi bia an si. A ka thawh i, "Mipa, phengphel pakhat in i lak law a cungah, ’Judah le a hawikom Israel mi hna caah,’ tiah ṭial tuah. Cun a dang phengphel pakhat i lak ṭhan law a cungah, ’Josef, (Efraim fung) le amah he aa kommi Israel chungkhar vialte caah,’ tiah ṭial fawn. ¹⁷ Cun phel khat ah an can nakhnga, an pahnih cun komh hna, na kut chungah aa bil khomi phengphel pakhat ah i cang hna seh. ¹⁸ Na phun hawi nih, hihi a sullam zeidah a si tiah an in hal tikah, ¹⁹ thawh hna law, hihi Bawipa Pathian bia an si, tiah chim hna: Josef phengphel, (Efraim a hawikom Israel phun hawi ta a simi) le cu phengphel he aa kommi Israel chungkhar hna kha ka lak hna lai i Judah phengphel he khan kan komh hna lai. Cuticun phengphel pakhat ah ka ser hna lai i ka kut chungah phengphel pakhat an si lai. ²⁰ Cun an hmaika i na ṭialmi phengphel hna kha na kut chung i an um tikah, ²¹ annih cu na thawh hna lai i Bawipa Pathian nih hi bangin a ti, na ti hna lai, Israel mi cu ṭhek an sinak miphun hna chung khan ka lak hna lai i ram kip chung khan ka pumh hna lai i anmahle an hmunte ah khan ka chiah hna lai. ²² Ram chungah le Israel tlang hna cungah miphun pakhat ah ka ser hna lai i an dihlak in siangpahrang pakhat nih a uk hna lai i pennak pahnih ah an i cheu hrimhrim ti lai lo. ²³ An siasal hna le an tuahmi thil fihnung hna le zumhawktlak loin an rak umnak vialte khan an i thurhhnawmh ti lai lo; sualnak chung i an kir ṭhan tawnnak khan ka chuah hna lai i ka thianh hna lai. Cuticun annih cu ka mi ah an cang lai i kei cu an Pathian ah ka cang lai. ²⁴ Ka sal David cu an uktu siangpahrang a si lai i tuukhal pakhat lawng an ngei lai. Ka phungbia ning khan an um lai i ka nawlbia kha an zulh hna lai i an tuah hna lai. ²⁵ Ka sal Jakob ka pekmi ram, nan pupa hna umnak ram ah khan an um lai. Annih le an tefa hna cu khika ah zungzal in an um lai i ka sal David cu zungzal in an bawi a si lai. ²⁶ Annih kha thluachuahnak pek awk caah anmah he biakamnak ka ser lai i cu biakamnak cu zungzal in an ta a si lai. Tam piin ka karhter hna lai i an lakah cun a zungzal in ka hmunthiang cu ka chiah lai. ²⁷ Cun ka umnak thladem toiah khan an um lai; kei cu an Pathian ka si lai i annih cu ka mi an si lai. ²⁸ Miphun dang hna nih khan, Israel mi cu an lakah a zungzal in ka hmunthiang kha a um caah Bawipa nih ka mithiang ah kaa chiah hna, ti kha an hngalh lai, tiah a ti.

¹ Mah hihi Bawipa nih ka sinah a chimmi bia an si. ² A ka thawh i, "Mipa, Magog ram i a ummi Rosh, Meshek le Tubal hna siangpahrang Gog cu hei merhnawh law a cungah hi bantukin bia chim tuah. ³ Hihi Bawipa Pathian bia an si, tiah chim: Rosh le Meshek le Tubal hna siangpahrang Gog, nangmah cu kan doh. Nangmah cu kan mer lai i na khabe ah sio in kan sio lai. ⁴ Nangmah le na ralkapbu pi hna cu kan kalpi hna lai, na rangtum hna le na rangcung ralkap hna, ralthuam tling tein aa thuammi na mi hna, phaw le nam he a ummi ralkapbu nganpi, vainam aa thlir ciomi ralkap hna; ⁵ cun anmah he cun Persia le Kush le Put mi hna phaw le luchin a ngei ciomi hna zong. ⁶ Gomer le a ralkapbu vialte hna, cun Beth-togarmah le chakleipi i a ummi a ralkapbu vialte hna — hi mibu tampi aa fon ṭhupmi hna hi nangmah sinah cun ka hruai chih dih hna lai. ⁷ I ralring tuah, ṭha tein i tim tuah, nangmah le nangmah he i fonh awkah aa pummi cu i tim tuah u law ka rian ṭuan awkah timhcia in um tuah u. ⁸ Ni tampi hnuah auh na si te lai; hmailei kum tampi hnuah khin, a rawk i remh ṭhanmi ram ah cun na lut ṭhan lai, cu ram cu a mi hna miphun tampi hna lakin kum saupi a ṭiao cangmi Israel ram tlang cung i pumh ṭhan a simi ram cu a si. Miphun hna lakin chuahpimi Israel mi hna cu ahohmanh nih hnahnawh lo tein khua an sa lai; ⁹ cun nang cu na ra lai i ṭotho bantukin na ra cutmat lai; cun nangmah le na ralkapbu vialte hna, mi tampi aa fonh ṭhupmi hna nih cun, ram cu khuadawm nih a khuh bantukin nan khuh lai. ¹⁰ Hihi Bawipa Pathian bia cu a si: Khi caan ah cun ruahnak pakhat na lu chungah a lut lai i ṭhat lonak khua na khan lai. ¹¹ Naa thawh lai i, ’Kulhkhar zeihmanh a ngei lomi khuate umnak ram kha ka tuk lai, daite le ahohmanh nih hnahnawh loin a ummi, ralhruang zong zeihmanh a ngei lo i kutka siseh, kutka hrenh siseh, zeihmanh a ngei lomi hna kha ka tuk hna lai,’ na ti lai. ¹² A rak rawkmi khuapi hna chung i a ummi hna kha ka ramh hna lai i an thil kha ka chuh hna lai, tiah naa ruah lai. Annih cu tunaite i miphun hna chungin pumh ṭhanmi an si i atu an thilri le saṭil hna he khan vawlei laifang lam tonnak ah an um. ¹³ Sheba mi hna le Dedan mi hna le Tarshish chawdawr hna nih an in thawh lai i, ’Hi mi hna ramh awk le an thil chuh awkah maw na ralkap hna cu na pumh hna i annih cu na tuk hna? An sui le ngun kha lak i an saṭil le thilri kha i kalpi hna maw naa timh?’ an in ti lai. ¹⁴ Cucaah mipa, Gog cu thawh law, hihi Bawipa Pathian bia an si, tiah chim tuah: Ka mi Israel mi hna cu ahohmanh nih hnahnawh lo tein khua an sak lioah annih doh awkah chaklei deng ram in naa thawh. ¹⁵ Miphun tampi hna chungin a ṭhawng ngaingaimi ralkapbu nganpi kha naa ratpi i rangcung ralkap lawngte an si. ¹⁶ Thlichia nih ram kha a hrawh bantukin ka mi Israel mi cu na hrawh hna lai. Cun caan hmanung bik caan ah cun, ka ram doh awkah keimah hrimhrim nih kan kalpi lai i nangmah hmang in ka tuahmi nih keimah cu ahodah ka si ti langhternak caah le ka thiannak langhternak caah, nang Gog, an hmangtu cu Keimah ka si kha miphun hna nih an hngalh lai, a ti. ¹⁷ Hihi Bawipa Pathian bia a si. Hlan lioah ka profet hna kaa in bia ka chim tikah, Israel mi doh awkah ka kalpi lai, ka rak timi cu nangmah hi na si. ¹⁸ Gog nih Israel ram cu a hun doh ciammam ni ah cun, ka thinhunnak cu a tlawh in a tlok lai, tiah Bawipa Pathian nih a ti. ¹⁹ Zeicahtiah ka hamnak hna le ka thinhunnak a linh in a linmi in chiatser in ka chim i cu ni ah cun Israel ram chung dihlak ah lihnin fakpi a um lai. ²⁰ Rili chung nga si hna seh, van i a zuangmi va si hna seh, ramlak saram si hna seh, vawlei ah a lawn in a lawnmi saram si hna seh, vawlei cung i a ummi minung vialte si hna seh, ka hmaiah a ther in an ther lai, ka ti. Tlang vialte kha an cim dih lai, lungpang vialte kha an tlu dih lai i ralhau vialte kha an rawk dih lai. ²¹ Gog doh awkah ka tlang hna cungah vainam kha ka auh lai i annih cu anmah le anmah kha pakhat le pakhat vainam in an i sam lai, a ti. Hihi Bawipa Pathian chimmi bia a si. ²² Ral le thisen chuahnak he biaceihnak ah ka chuahpi lai; a cungah khan a tuk ngaingaimi ruahpi ka surter lai i lung tlukin a hakmi rial le mei le kat cu amah le a ralkapbu hna le amah sinah a ummi mi tampi hna cungah khan ka tlakter lai. ²³ Cuticun ka lianhngannak le ka thiannak kha ka langhter lai i miphun tampi nih keimah Bawipa ka si kha an ka hngalh lai.

¹ Cun nang, mipa, Gog cu chim law, hihi Bawipa Pathian bia an si, tiah ti. Rosh le Meshek le Tubal siangpahrang Gog, nangmah cu kan doh. ² Na hnuhmai kan mer lai i kan dawi lai, chakleipi khan kan lak lai i Israel tlang ah kan kalpi lai. ³ Na kehlei kut i likuk cu ka tuk lai i na orhlei kut i cantiang cu ka den dih hna lai. ⁴ Khika ah, Israel tlang cungah cun, nangmah le na ralkap vialte le nangmah sin i a ṭangmi vialte hna kha, nan thi dih lai; sa ei hmang va le ramlak sahrang hna rawl ah kan ser hna lai. ⁵ Vawlei sawhsawh ah cun nan ril ko lai, zeicahtiah hi bia a chimtu cu keimah ka si. ⁶ Mah hihi Bawipa Pathian bia hrimhrim a si: Magog ram le ahohmanh nih hnahnawh lo tein rilikam ram le tikulh ah khua a sami hna cungah khan mei ka tlunter lai i mi kip nih Bawipa ka si kha an hngalh lai. ⁷ Ka min thiang cu ka mi Israel mi hna lakah khan hngalh ka siter lai i ka thurter ti lai lo; miphun dang hna nih khan Bawipa cu Israel mi hna lakah ka thian kha an hngalh lai, a ti. ⁸ Zohhmanh, hihi a tlung lai, hi vialte hi a tling lai, ka chimmi ni kha a phan lai, tiah Bawipa Pathian nih a ti. ⁹ Israel ram khuami hna nih khan an chuak lai i hi hriamnam hna cu mei tih awk thing ah an hman hna lai: phawpi he phawte he; li le thal, thingtan le fei — kum sarih chung hi thil hna hi mei tih awkah an hman hna lai. ¹⁰ Lo in siseh, tu chungin siseh, mei tih awk thing cu an la hna lai lo i an phor hna lai lo, hi hriamnam hna tu hi thing tih awk caah cun an hman hna lai. Cuticun anmah a rak ramhtu hna kha an ramh ve hna lai i hranchaw ah a rak sertu hna kha hranchaw ah an ser ve hna lai. Hihi Bawipa Pathian bia hrimhrim a si. ¹¹ Khi ni ah Israel ram ah si loin Rili nichuahlei Abarim nelrawn ah Gog cu vuinak hmun kha ka pek lai. Khika ah Gog le a ralkap vialte kha an vui hna lai i Abarim nelrawn vialte cu ahohmanh lut loin kham a si lai; cu hmun cu Gog Ralkap hna Nelrawn tiah an ti lai. ¹² Annih vuinak ah Israel mi cu thla sarih chung an rau lai i ram cu an thianh lai; ¹³ cu vuinak ah cun mi vialte nih khan an ṭuan awk hnga kha an ṭuan cio lai. Upatnak ka hmuh ni cu an caah philh lo awk ni a si lai, hihi Bawipa Pathian bia hrimhrim a si. ¹⁴ Ram cu thianh awkah ram chung i vaa chawh tawn awk rian le vawleicung i a tang rihmi hna kawl awk rian ah mi cu thim an si lai; annih nih thla sarih a dongh tikah khan kawl hram cu an i thawk lai. ¹⁵ Ram chungah cun an i chawk lai i pakhatkhat nih minung ruh kha an hmuh tikah, a pawngah cun hmelchunhnak kha an chiah lai i Gog Ralkap hna Nelrawn timi ah khan an vui lengmang hna lai. ¹⁶ Cucaah kha ralkapbu nganpi kong kha zeihmanh theih a um ti lai lo i ram cu thianh a si cang lai. ¹⁷ A ka thawh ṭhan i, "Mipa, hihi Bawipa Pathian bia an si: A zuangmi va vialte le ramlak sahrang vialte cu au tuah hna: ’Ra u, i pum u, ka raithawinak puai ah hin a kenkip in ra chuak tuah u, Israel tlang cung i raithawinak nganpi kan serpiakmi hna ah hin; sa kha ei u law thi kha ding u; ¹⁸ ralkap hna sa kha ei u law vawlei cung bawi hna thi kha ding tuah u; hi mi vialte hi Bashan tuukawng hna le tuu hna le mehehtum hna le cawtum hna le naatum hna cu an si. ¹⁹ Nannih kan timhpiak cuahmahmi hna raithawinak i thi hi ri lakin ding u law thau hi vuai lak in ei u. ²⁰ Ka cabuai ah cun rangtum le an cung i aa citmi ralkap hna le raltu miphun vialte hna sa kha vuai tein ei tuah u,’ ti hna," tiah a ka ti. Mah hihi Bawipa Pathian bia hrimhrim a si. ²¹ Miphun hna lakah ka sunparnak kha ka langhter lai; biaceihnak ka tuahmi le an cungah a ritmi kut ka chiahmi kha mi vialte nih an hmuh lai. ²² Khi ni thawk in hmailei ah cun Israel mi nih keimah cu Bawipa an Pathian ka si kha an hngalh lai. ²³ Miphun dang hna nih khan Israel mi sal i an tan kha an ṭhat lo ruang le ka sinah zumhawktlak loin an um ruangah a si ti kha an hngalh lai. Cucaah ka hmai kha ka rak thuhkanh hna i an ral hna kut chungah ka rak chanh hna, cun annih cu an dihlak tein vainam in an thi. ²⁴ An i phutawk tein an cungah rian ka ṭuan, a thurhnawmmi le ralthawh hmangmi an si bang khan ka hmai kha ka thuhkanh hna. ²⁵ Cucaah hihi Bawipa Pathian bia cu an si: Atu cu Jakob vanṭhatnak kha ka kirter ṭhan lai i ka tlaihchan hna nak kha Israel mi vialte cungah ka langhter lai i ka min thiang kha ka ṭanh lai. ²⁶ Anmah an vawlei te ah ahohmanh nih hnahnawh lo le ṭihphannak pek lo tein an um tikah cun, ningzahnak an inmi kha le ka cung i zumhawktlak loin an ummi kha an philh dih lai. ²⁷ Miphun dang hna chungin inn ah ka kirpi hna i an ral hna ram chungin ka pumh hna tikah, annih cu miphun tampi nih hmuh awkin ka thiannak hmuhsaknak ah ka ser hna lai. ²⁸ Miphun dang hna lak i sal i tan awk i a kaltertu hna keimah nih pakhat hmanh hnulei ah kaltak loin anmah an vawlei ah khan ka pumh ṭhan hna lai caah keimah cu Bawipa an Pathian ka si kha an ka hngalh lai. ²⁹ Israel mi hna cungah ka thlarau kha ka thlet lai caah annih cu ka hmai kha ka thuhkanh ti hna lai lo, tiah Bawipa Pathian nih a ti.

¹ Sal i kan tan a kum kul le kum nganak, cu kum a hramthawk thla, a ni hra ni ah, cu ni hrimhrim ah cun Pathian kut cu ka cungah a phan i khika ah a ka kalpi, cucu khuapi a rawk hnu kum hleili kha a si. ² Langhnak kha ka hmuh i cu langhnak chungah cun Pathian nih Israel ram ah khan a ka kalpi i a sang ngaingaimi tlang cungah khan a ka chiah i cuka ah cun keimah lei a hoihmi khuapi chung i a ummi inn bantuk inn pakhat kha ka hmuh. ³ Khuapi leiah cun a hei ka kalpi i dar in an sermi mipum a lomi mipa kha ka hmuh i la hmangṭhia le tahnak fung kha aa put i kutka ah cun a dir. ⁴ A ka thawh i, "Mipa, ṭha tein zoh law ṭha tein ngai hmanh, kan hmuhsakmi thil vialte kha ṭha tein i chingchiah hna, cucaah cun pei hika ah hin ratpi na si fam cu. Cun na hmuhmi vialte kha Israel mi va chim dih hna," a ka ti. ⁵ Cun biakinn a lenglei velchum cu vampang pakhat nih a kulh. Mipa nih aa putmi tahnak fung cu dong ruk a sau, cu dong cu dong sau phun a si i dong khat cu dong khat le zabok lengmang a si. Vampang cu a chahlei kha a tah i cu fung khat cu a si, a sanlei zong cu fung khat ṭhiamṭhiam cu a si. ⁶ Nichuahlei a hoihmi kutka ah khan a ra i a hlei khan a hung kai i kutka innleng cu a tah i cu fung khat cu a kauhlei a rak si. ⁷ A kam thluahmah i a ummi khaan hna cu an tung ah cu tahnak fung pakhat cio cu an si i an vang zongah cu tahnak fung pakhat cio cu an si ṭhiamṭhiam; khaan pakhat le pakhat karlak ah cun dong nga lengmang a tla; biakinn lei a hoihmi chungpi dongh i a ummi kutka innleng cu, cu fung khat cu a kauhlei a si ve. ⁸ - ⁹ Chungpi le kutka karlak khaan cu a tah i dong riat a si, cun a tung pahnih hna cu dong hnih veve an chah; chungpi le kutka karlak khaan cu biakinn lei naih bik ah khan a si. ¹⁰ Nichuahlei kutka a kam veve ah cun khaan pathum an um, an hmetngan cu an i tia dih; cun an karlak i vampang hna cu an chahlei kha an i khat dih fawn. ¹¹ Luhnak kha a tah i a kauhlei cu dong hra a si; cun kutka tiangah khan a thluanchuak in a kauhlei cu dong hleithum a si. ¹² Kha khaan hna hmaiah khan tlaihtleng an um cio i a kap hnih in a ummi tlaihtleng veve hna cu dong khat cio an kauhlei cu a si; cun a khan cu a sau dong ruk, a kauh dong ruk cio an si. ¹³ Kutka lam cu a tah; hmaitonh in a ummi khaan hna hnulei vampang in hnulei vampang tiangah khan, thlalangawng in thlalangawng tiangah dong kul le dong nga a si. ¹⁴ Innleng cu a tah i khattelei kam in khattelei kam tiangah dong kul a si, kutka innleng cu a tah dih hnuah lenglei tual kha a tah, ¹⁵ kutka in vung luhnak cun khattelei innleng dongh tiang dong sawm nga a si. ¹⁶ A khaan hna le tung hna nih cun a chunglei cio ah kutka lam lei hoih cio ah cun, thlalangawng an ngei i innleng a chunglei zongah cun thlalangawng an um i tung ah cun tumkung kha an suai cio hna. ¹⁷ Lenglei tual ah khan a ka chuahpi i cu tual ah cun a velchum in a khaan hna le a dot a dot in remhmi lungrual kha ka hmuh hna. ¹⁸ Lungrual cu kutka lam tiang kha an sang i an kauhlei le an saulei kha an i can dih; cucu a niam deuhmi lungrual kha a si. ¹⁹ Tual cu a kauhlei kha a tah i a niam deuhmi kutka lam khan a chung deuh kutka lam a lenglei tiangah dong za khat a si. ²⁰ Chaklei ah a hun ka merpi i chaklei a hoihmi kutka lam kha ka hmuh, cucu a leng deuh tual ta kha a si, cun a saulei le a kauhlei kha a tah. ²¹ A khaan hna cu sir khat ah pathum cio an um. An karlak i a ummi vampang hna le an innleng hna zong cu, kutka pakhatnak i bantuk kha an chahlei cu an si cio: an saulei dong sawm nga, an kauhlei dong kul le dong nga cio an si. ²² A thlalangawng hna le a innleng hna le a tum kung hna cu nichuahlei a hoihmi kutka i bantuk kha an si dih; cuka i hung kainak ah cun lamhbak pasarih a um i a innleng cu a chunglei donghnak ah cun a um. ²³ Cun chaklei kam kutka he hmaitonh in a ummi tual ah cun nichuahlei kam i a ummi kutka in va luh a si; kutka pakhat cun kutka pakhat tiang cu a tah i dong za khat a si. ²⁴ Cun thlanglei ah khan a vun ka kalpi i thlanglei a hoihmi kutka pakhat ka hmuh. A khaan hna le an tung hna le a innleng hna kha a tah hna i hawidang bantuk cio ah an saulei cu dong sawm nga an si i an kauhlei cu dong kul le dong nga an si. ²⁵ Cun kutka nih siseh, innleng nih siseh, hawidang bantuk cio khan an velchum in thlalangawng an ngei cio. ²⁶ Cuka i hung kainak ah cun lamhbak pasarih a um i a innleng cu a chunglei donghnak ah cun a um i a tung ah cun tum kung kha an suai cio hna. ²⁷ Chungchin tual cu thlanglei a hoihmi kutka pakhat a ngei, kutka pakhat in kutka pakhat tiang cu a tah i dong za khat a si. ²⁸ Chungchin tual ah cun thlanglei kam kutka khan a ka luhpi i a tah i a hawidang bantuk ṭhiamṭhiam kha a si. ²⁹ A khaan hna le a tung hna le a innleng hna cu a sau dong sawm nga, a kauh dong sawm nga cio an si ve. ³⁰ Chungchin tual nih cun le a innleng nih cun an velchum in thlalangawng an ngei. A innleng cu lenglei tual kha a zoh; ³¹ a tung hna ah cun tumkung kha an suai hna i hungkainak ah cun lamhbak pariat a um. ³² Cun chungchin tual, nichuahlei kam i a ummi ah cun, a ka luhpi i a kutka cu a tah i a hawidang bantuk ṭhiamṭhiam kha a hmetngan ah a si. ³³ A khaan hna le a tung hna le a innleng zong cu a hawidang bantuk ṭhiamṭhiam kha an si ve ko; chungchin tual cu le a innleng nih cun an velchum in thlalangawng an ngei i a tung cu dong sawm nga a si i a vang cu dong kul le dong nga a si. ³⁴ A innleng cu lenglei tual kha a hoih i a tung kip ah cun tum kung kha an suai hna; hung kainak ah cun lamhbak pariat a um. ³⁵ Cun chaklei kutka ah khan a ka kalpi i a tah i a hmetngan cu hawidang bantuk ṭhiamṭhiam kha a si. ³⁶ A khaan hna le tung le innleng zong cu cu bantuk ṭhiamṭhiam cu an si ve i a velchum in thlalangawng an um; a tung cu dong sawm nga a si i a vang cu dong kul le dong nga a si. ³⁷ A innleng cu lenglei tual kha a hoih i a tung cungah cun a kam kip khan tumkung an suai hna; hungkainak ah cun lamhbak pariat a um. ³⁸ Kutka innleng in vung luhnak ah khin khaan pakhat a um i cu khaan ah cun pumpek thawinak kha an ṭawl hna. ³⁹ Kutka innleng ah cun a kam veve ah cabuai pahnih an um i cuka ah cun pumpek thawinak le sual thawinak le phungbuar thawinak kha an thah hna. ⁴⁰ Chaklei kutka lei i hung kainak a lenglei ken ah khan cabuai pahnih an um, cun kutka innleng a kil ah khan a dang pahnih zong an um ṭhan. ⁴¹ Kutka lam a kil pali ah khan, kil khat ah pakhat cio an um ṭhan; an dihlak in sa thahnak ca i hmanmi cabuai cu pariat an si. ⁴² Pumpek thawinak ca i hmanmi pali hna cu lung in sermi an si, an saulei dong khat le a cheu, an kauhlei dong khat le a cheu, an sanlei dong khat cio an si; cu hna cungah cun pumpek thawinak ca le raithawinak dangdang hna ca i hmanmi thilri kha an chiah hna. ⁴³ Pekchanhmi sa cu cabuai cungah cun an chiah hna, cabuai cu a tlang zabok in a velchum in an kamh, a tlang kamhnak cu a chunglei a hoih. ⁴⁴ Cun chungchin tual chungah khan a ka luhpi i a chungah cun khaan pahnih ka hmuh hna, pakhat cu chaklei kutka kil ah khan a si i thlanglei a hoih, pakhat cu thlanglei kutka kil ah khan a si i chaklei a hoih. ⁴⁵ Thlanglei a hoihmi khaan hi biakinn a zohkhenhtu hna tlangbawi hna caah a si tiah a ka chimh. ⁴⁶ Chaklei a hoihmi khaan hi biakṭheng a zohkhenhtu hna tlangbawi hna caah a si; hi tlangbawi hna cu Zadok fapale kha an si i Levi miphun chungah khan anmah lawnglawng hi Bawipa rian ṭuan awkah a pawngah a ra ding cu an si. ⁴⁷ Tual cu a tah i tungvangpalh a si; a tung dong za khat a vang dong za khat a si i biakinn hmaiah cun biakṭheng kha a um. ⁴⁸ Biakinn chung a innleng ah cun a ka luhpi i innleng i a ummi tung pakhat cu a tah i a chahlei cu dong nga veve a si, kutka lam cu dong hleili a kau i kutka lam a kil cu dong thum cio an si. ⁴⁹ Innleng cu a sau dong kul a si i a kauh dong hleihnih a si; hungkainak ah cun lamhbak pahra a um i innka tung pawngah cun a kap hnih in tung ngan pipi an um.

¹ Cun hmunthiang chungah khan a ka luhpi i a tung kha a tah hna; an chahlei cu dong ruk cio an si. ² A luhnak kaa cu dong, hra a kau. Luhnak khattelei kap le khattelei kap i a ummi vampang cu dong nga veve a kaumi an si. A saulei cu a tah i dong sawm li a si, a kauhlei cu dong kul a si. ³ A chungah a vung lut i luhnak kaa i a ummi tung kha a tah hna i dong hnih cio an si; luhnak kaa cu dong ruk a si, khattelei kap le khattelei kap i a ummi vampang hna cu dong sarih cio an si. ⁴ Cun hmunthiang a va donghnak i a khaan cu a tah i a saulei dong kul, a kauhlei dong kul a si. Cun a ka thawh i, ’Hihi Hmun Thiang Bik cu a si,’ a ti. ⁵ Biakinn vampang cu a tah; dong ruk a sang i cun biakinn velchum in khattelei kam le khattelei kam i a ummi khaan hna cu dong li cio an kauhlei cu a si. ⁶ A khaan hna cu a thonh in an i thonh, dot thum in an um i dot khat ah sawm thum lengmang an si. Biakinn a velchum i a ummi vampang ah cun a khaan hna dohtu caah khan fonghlei an chiah hna i cucaah biakinn vampang nih khan a doh hna a hau lo. ⁷ A khaan hna dohnak cu dot khat hnu dot khat in biakinn velchum i an kai i an kauh chin lengmang bantuk khan a sir i a ummi khaan hna cu dot khat in dot khat ah an hung kai tikah khan an kau deuh chin lengmang ve; biakinn a kap ah cun cunglei kainak hlei pakhat a um, cucaah tangnung bik dot in cungnung bik dot tiang kai duh tikah a laifang dot tan khan kai a hau. ⁸ Cun biakinn velchum ah cun donhhlei pakhat zong a um kha ka hmuh; a sir i a ummi khaan hna an hram cu fung pakhat khengte kha a si, dong ruk cio an si. ⁹ A sir i a ummi khaan hna lenglei vampang an chahlei cu dong nga cio a si; cun donhhlei le ¹⁰ tual a khaan hna karlak cu dong kul a si i biakinn a velchum in a si dih. ¹¹ A sir khaan hna in innleng i va kalnak caah khan chaklei kamah luhnak a um i thlanglei kamah luhnak pakhat a um. Innleng a kauhlei cu a velchum in dong nga a si. ¹² Biakinn tual lei a hoihmi inn, nitlaklei kam i a ummi cu dong sawm sarih a kau; inn vampang cu a velchum in dong nga a chah i a saulei cu dong sawm kua a si. ¹³ Biakinn cu a tah; a saulei cu dong za khat a si; cun a tual le a innpi le a vampang hna cu dong za khat an dihlak in an saulei a si; ¹⁴ cun biakinn nichuahlei kap le a tual cu a kauhlei dong za khat a si. ¹⁵ Biakinn in nitlaklei ah a ummi tual a donghnak i a ummi inn le a kam veve i a ummi vampang cu a tah hna i a saulei dong za khat a si. Biakinn chung hmunthiang le chungchin hmunthiang le a lenglei innleng hna cu thingphel in an chon hna; ¹⁶ cun an pathum cun an velchum i a ummi thlalangawng cu an velchum in thing in kamh an si. ¹⁷ Vawlei in thlalangawng tiang, innka cung tiang, a chunglei he a lenglei he a ummi khaan hna, vampang velchum i a ummi hna cu a chunglei he a lenglei he an cungah hmanthlak suai an si, ¹⁸ an suaimi hna cu cherubim le tumkung an si, cherubim pahnih karlak ah tumkung pakhat lengmang in. ¹⁹ Cherub pakhat nih hmai pahnih lengmang an ngei: pakhat cu minung hmai a si i tumkung pakhat lei kha a zoh, a dang pakhat cu chiandeih hmai a si i a dang tumkung pakhat lei kha a zoh ve. Cuticun biakinn kha a velchum in hmanthlak an suai dih. ²⁰ Cherubim le tumkung hna cu vawlei in innka cunglei tiang kha an suai hna i hmunthiang vampang zongah khan an suai hna. ²¹ Hmunthiang innka tung hna cu tungvangpalh an si. ²² Hmun Thiang Bik hmaiah cun thing biakṭheng a lomi kha a um, a saulei cu dong hnih a si, a sanlei cu dong thum a si; a kil ah khan tung an bunh hna i a hram le a sir cu thing an si. Mah hihi Bawipa hmai i a ummi cabuai a si, tiah a ka chimh. ²³ Chungpi nih cun innkhar pahnih a ngei i Hmun Thiang Bik zong nih cun pahnih a ngei ve. ²⁴ Innka nih cun a khar pahnih cio an ngei i cu a khar hna cu kapza in hrenhmi an si caah hun khawh, kau khawh, an si. ²⁵ Vampang i an suai bantuk khan an cungah cherubim le tumkung kha an suai hna, cun lenglei innleng cungah cun thing in sermi cungzar a um. ²⁶ Cun innleng ah cun a kap hnih in vampang ah khan thlalangawng an um i an kil ah cun tumkung kha an suai hna.

¹ Cun chaklei kam i a ummi lenglei tual ah khan a ka kalpi i Biakinn tual lei a hoihmi khaan hna ah khan a ka luhpi. Cu khaan hna cu chaklei i a ummi inn hna kha hmaitonh in an um. ² Chaklei kam i a ummi khaan hna cu an saulei dong za khat an si i an kauhlei dong sawm nga an si. ³ Chunglei tual ta a simi hmun dong kul chungah khan lenglei tual ta a simi lungrual he hmaitonh in inn khaan dot thum in an um. ⁴ Cu khaan hna hmaiah cun chunglei kamah lam pakhat a um i dong hra a kau i dong za khat a sau i a luhnak innka hna cu chaklei kamah khan an um. ⁵ Cungdot khaan hna cu tangdot le a laifang khaan hna nakkhan an bi deuh. Zeicahtiah hnulei ah pil deuh in sak an si. ⁶ Dot thum in an um i dot khatnak khaan si hna seh, dot hnihnak khaan si hna seh, dot thumnak khaan si hna seh, an i ruang hna lo, cucaah cun inntual i a ummi inn dang hna nih dohtu tung pipi an ngeihmi hna kha an ngei hna lo. ⁷ Cun innkhaan hna hril lenglei thluahmah ah cun lenglei tual he hmaitonh in vampang pakhat dong sawm nga a saumi a um. ⁸ Lenglei tual innkhaan hna cu dong sawm nga an sau i biakinnpi he hmaitonh in a ummi khaan hna cu dong za khat an sau. ⁹ Hi khaan hna kehram thluahmah hin lam pakhat a kal i cu lam ah cun nichuahlei in luh a si, lenglei tual in innkhaan hna chung i nitlaklei in luh khawh nakding caah khan hi lam cu a si. ¹⁰ Cu lam a kauhlei cu inntual vampang rup khan a si. Thlanglei kam zongah, tual he hmaitonh in le inn he hmaitonh in khaan kha an um ¹¹ i an hmaiah khan lam pakhat a um. Chaklei khaan hna he khan an i lo dih, an saulei le an kauhlei aa khat dih, an innka hna nih thlanglei an hoih, kha dah ti lo cu, an chuahnak innka umtuning tehna, an pungsan tehna an i khat dih. ¹² Cucaah thlanglei kamah a ummi khaan hna chung luhnak caah khan lam donghnak chaklei vampang hram ah khan innka pakhat a um. ¹³ Cun a ka thawh i, "Tual hmai i a ummi chaklei khaan hna le thlanglei khaan hna kha khaan thiang an si caah cu khaan hna cu Bawipa hmaiah a chuakmi tlangbawi hna nih thawinak thiang bik an einak hna hmun an si lai, cuka khaan hna cu thil thiang bik thawinak — rawl thawinak, sual thawinak le phungbuar thawinak — chiahnak hmun thiang an si lai. ¹⁴ Tlangbawi kha hmun thiang i a luh tikah, khika ah a hmanmi thilthuam hna kha cuka i an chiahtak hna lo ahcun, lenglei tual ah khan an chuak lai lo, zeicahtiah cu thilthuam hna cu thil thiang an si, zapi sin i an va chuah hlanah khan thil dang in an i thlen awk a si. ¹⁵ Biakinn chunglei hmun kha a tah dih tikah nichuahlei a hoihmi kutka khan a ka chuahpi i biakinn hmun kha a velchum in a tah dih. ¹⁶ Nichuahlei kam kha tahnak fung khan a tah i a tahnak fung ningin dong za nga a si. ¹⁷ Cun aa mer i chaklei kam kha a tah i a tahnak fung in dong za nga a si. ¹⁸ Cun aa mer i thlanglei kam kha a tah i a tahnak fung ningin dong za nga a si. ¹⁹ Cun nitlaklei ah aa mer i a tah i a tahnak fung ningin dong za nga a si. ²⁰ A kam li te khan a tah dih, a saulei dong za nga, a kauhlei dong za nga a si. A velchum in vampang nih a kulh i cu vampang cu hmun thiang le hmun thiang lo thleidannak ca i tuahmi a si.

¹ Nichuahlei a hoihmi kutka ah cun a hei ka kalpi ² i Israel Pathian sunparnak cu nichuahlei in a rat kha ka hmuh. A aw cu ti thawng nganpi bantuk a si i vawlei cu a sunparnak cun a ceu. ³ A mui ka hmuhmi cu khuapi kha hrawh awk i a rat lio i ka hmuhmi bantuk kha a si. Kebar tiva pawng i ka hmuhmi bantuk kha a si i vawlei ah ka bawk. ⁴ Bawipa sunparnak cu biakinn leiah cun a hung kal i nichuahlei hoih in a ummi kutka leiah khan a kal. ⁵ Thlarau nih a ka cawi i chunglei tual ah khan a ka chiah i Bawipa sunparnak cu biakinn cu a khat. ⁶ Cun biakinn chung cun pakhat nih a hun ka chawnh kha ka theih i mipa cu ka pawngah khan a dir. ⁷ A ka thawh i, "Mipa, ka bawiṭhutdan umnak hmun, ka ke chiahnak hmun,Israel mi sinah zungzal in ka umnak ding hmun khi na hmu maw? Annih nih siseh, an siangpahrang nih si hna seh, ka sinah zumhawktlak loin an umnak le an thih tikah an siangpahrang hna ruak in ka min thiang cu an thurhhnawmh ti lai lo. ⁸ An innleng cu ka innleng pawngah an chiah i an innka tung cu ka innka tung pawngah an bunh, cun keimah le annih karlak ah cun vampang a um i annih nih ka minthiang cu thil fihnung an tuahnak khan an thurhhnawmh i ka thinhun in ka hrawh hna. ⁹ Sihmanhsehlaw atu cu ka sin i zumhawktlak loin an umnak kha an hlawt lai i an siangpahrang hna ruak kha ka sinin aa hlatnak hmun ah an ṭhial hna lai i zungzal in an lakah ka um cang lai. ¹⁰ Cucaah mipa, Israel mi cu hi biakinn kong le a sawisam le a hmetngan ning cu chim hna, annih cu thilṭhalo an tuahmi kha an ning a zah nakhnga. ¹¹ Annih nih an tuahmi vialte kha an ning a zah ahcun annih cu biakinn le a chung thilri hna le chuahnak innka hna le luhnak hna le a sanning vialte le cuticun sak a si lai ti i ruahnak vialte kha tling tein na chimh hna lai; annih cu ṭha tein chim hna law an hmuh khawh dingin suaipiak hna law annih nih an lung in an i cinken lai i an tuah khawh lai. ¹² Hihi tlang cung i sak ding biakinn sawisam cu a si; a velchum in a umnak hmun cu hmun thiang bik a si lai," a ti. ¹³ Hihi biakṭheng cu a tungvang kha dong in tah tikah a si, (cu dong cu dong khat le zabok a si kha). Biakṭheng a sanlei cu hihi a si: a hram cu dong khat a sang i dong khat a kau. A velchum i a tlang cu khap khat a kau. ¹⁴ Vawlei i a tonak in a hram tang nung bik cu dong hnih a si, a kauhlei cu dong khat a si, cun a dot hme deuh in a dot lian deuh tiang cu dong li a si i a kauhlei cu dong khat a si. ¹⁵ Biakṭheng tappi cu dong li a sang i dong khat cio a sangmi ki nih khan an doh. ¹⁶ Tappi cu dong hleihnih a sau i dong hleihnih a kau, cucu tungvangpalh tling cu a si. ¹⁷ A hram dot cungnung deuh cu a kam li in a saulei dong hleili, a kauhlei dong hleili a si i a tlang cu dong cheu a chah. Biakṭheng hram cu dong khat a chah i nichuahlei a hoihmi lamhbak kha an um. ¹⁸ A ka thawh i, "Mipa, hihi Bawipa Pathian bia an si: Biakṭheng cu ser dih a si tikah pumpek thawinak pekchanhnak ca le a cung i thi thehnak ding caah hihi zulh awk phunglam an si lai. ¹⁹ Levi tlangbawi, Zadok tefa hna lawng kha ka rian ṭuan awkah ka pawngah an ra lai, tiah Bawipa Pathian nih a ti. Annih cu sual thawinak caah cawtum no pakhat na phawt hna lai; ²⁰ a thi cu tlawmpal in na lak i biakṭheng ki pali ah khan le a hram dot cungnung deuh a kil pali ah khan le a tlang a velchum ah khan na chiah hna lai i cuticun na thianh lai i a caah remnak na serpiak lai. ²¹ Cun sual thawinak ca i chiahmi cawtum kha na lak lai i biakinn kulh chungah khan amah ca i chiahmi hmun ah cun mei in an khangh lai, sihmanhsehlaw Hmun Thiang Bik lengah khan a si lai. ²² A ni hnih ni ah do a tlami mehehtum pakhat kha sual thawinak caah na pekchanh lai i cawtum in an thianh bantuk khan biakṭheng cu mehehtum in an thianh lai. ²³ Biakṭheng cu na thianh hirhiar tikah saṭil run chung i cawtum no dotla le tuukawng dotla kha na pekchanh hna lai. ²⁴ Bawipa hmaiah khan na pekchanh hna lai; tlangbawi nih cite an phulh hna lai i Bawipa ca i khanghthawinak caah an thawi hna lai. ²⁵ Ni sarih chung cu nifate sual thawinak caah saṭil run chungin meheh pakhat, cawtum no pakhat le tuukawng pakhat kha na hman lengmang hna lai; cu hna cu an dihlak in dotla lawngte an si lai. ²⁶ Ni sarih chung kha biakṭheng caah cun remnak an ser lai i cun a thiang cang tiah an ti lai i Pathian ca hman awkah an thleidan lai. ²⁷ Cu caan a dih tikah, a ni riat ni in a hmailei ah cun tlangbawi hna nih khan, biakṭheng cungah cun nan khangh thawinak hna le nan daihnak thawinak hna cu an thawi hna lai i ka cohlan hna lai," tiah Bawipa Pathian nih a ti.

¹ Hmunthiang lenglei kutka, nichuahlei a hoihmi ah cun a hei ka kalpi ṭhan i a rak i khar. ² Bawipa nih cun a ka thawh i, "Hi kutka hi aa khar peng ko lai, aa hung lai lo. Bawipa, Israel Pathian cu a chung hin a luh caah minung ahohmanh an lut ve lai lo. ³ Khar a si peng ko lai. Sihmanhsehlaw uktu bawi belte cu hika i bawi a si caah, Bawipa hmai i rawl ei awkah khika ah a ṭhu lai; kutka innleng cun a lut lai i a chuak lengmang lai," a ti. ⁴ Chaklei kam kutka, biakinn lei a hoihmi ah khan a hun ka kalpi i Bawipa sunparnak nih Bawipa inn chungah a rak i zelh kha ka hmuh i ka bawk. ⁵ Bawipa nih cun a ka thawh i, "Mipa, nangmah kan chimhmi vialte, Bawipa inn ca i zulh awk phung le lam vialte hna kha ṭha tein i chingchiah hna law ṭha tein zoh hna law ṭha tein ngai hna. Bawipa inn chung i luhnak vialte le hmunthiang chungin chuahnak vialte kha ṭha tein i chingchiah hna. ⁶ Ral thawh a hmangmi Israel mi cu thawh hna law, hihi Bawipa Pathian bia an si, tiah chim hna: Nan fihnunnak cu kaa zaa cikcek cang, nannih Israel mi hna. ⁷ Cu hleiah ramdangmi kha nan i ratpi fawn rih hna; annih cu lungthin in siseh pum in siseh cuarpartan lomi an si, ka hmunthiang ah khan nan dir i ka rawl kha a thau he a thi he nan ka pek tikah ka inn kha an thurhhnawmh i ka biakamnak kha pakpalawng ah nan ser. ⁸ Ka thil thiang hna cu nanmah nih zohkhenh awk nan si nain hi hna tu hi ka hmunthiang zohkhenhtu ah khan nan chiah hna," a ti. ⁹ Mah hihi Bawipa Pathian bia an si: Ramdangmi ahohmanh, lungthin in siseh, pum in siseh, cuarpar tan lo a simi cu ka hmunthiang chungah an lut kho lai lo, Israel mi lak i a ummi hmanh ramdangmi cu ahohmanh an lut kho lai lo. ¹⁰ Sihmanhsehlaw Levi mi nih cun Israel mi hna nih a pingah an kal i an siasal kha an biak hna i an ṭhat lonak ruangah dantatnak an hmuh tikah khan, rak ka hlaw hna hmanh seh law, anmah ṭhiamṭhiam nih ka hmunthiang chungah rian an ṭuan lai. ¹¹ Biakinn kutka kha an zohkhenh hna lai i khika ah rian an ṭuan lai. Mi zapi ca i khangh thawinak hna le raithawinak hna kha anmah nih cun an thah hna lai i mi zapi caah cun rian kha an ṭuan lai. ¹² Annih nih an siasal hna hmaiah khan an rian cu an rak ṭuanpiak hna i an ṭhat lonak ruangah Israel cu vawlei ah an rak ṭhumh caah, an ṭhat lonak ca dantatnak cu an in lai, tiin kut hler in chiat ka ser, tiah Bawipa Pathian nih a ti. ¹³ Ka sinah tlangbawi rian ṭuan awkah ratnak lam an ngei lai lo; a thiangmi ka thil kha an naih hna lai lo i Hmun Thiang Bik pawngah khan an ra lai lo; annih nih fihnung an tuahmi thil ningzahnak kha an in lai. ¹⁴ Asinain biakinn zohkhenhtu ah cun ka chiah hna lai i khika i ṭuan ding rian vialte cu anmah kha ka pek hna lai. ¹⁵ Sihmanhsehlaw Israel mi hna cu ka sinin lam an tlau tikah khan Levi miphun tlangbawi hna, Zadok innchungkhar chung mi a simi tu nih khan cun ka hmunthiang kha ṭha tein an zohkhenh; hi hna tu nih hin cun ka rian ṭuan awkah an ka naih lai. Anmah nih an ka tuammuai lai, sathau le sathi cu an ka pek lai, tiah Bawipa Pathian nih a ti. ¹⁶ Ka rian ṭuan awkah le ka fialmi hna tuah awkah ka hmunthiang chungah a lut i ka cabuai a naihmi cu anmah an si lai. ¹⁷ Chunglei tual kutka chung i an luh tikah puan hmangṭhia in an i thuam lai; chungchin tual kutka le chungchin tual chungah ka rian an ṭuan tikah sahmul puan an i hruk lai lo. ¹⁸ La hmangṭhia ludomh an i domh lai i la hmangṭhia tawhrolh an tai ah an i hrolh lai; an puan cungah taisawm an i sawmh lai lo, an thlan a chuak sual hnga. ¹⁹ Lenglei tual i mizapi sinah an va chuah tikah, ka rian an ṭuan lio i an i hrukmi thilpuan kha an i phoih lai i a thiangmi khaan chungah khan an chiahtak hna lai i thilpuan dang an i hruk lai; cu ti an tuah lo ahcun thiannak ṭhawnnak kha an thilpuan cun mi zapi sinah khan an kalpi sual hnga. ²⁰ An lu an i met lai lo, an sam zong an sauter fawn lai lo, an sam cu a riam lawngin an riam tawn lai. ²¹ Tlangbawi ahohmanh, chungchin tual kha a luh lai ah zu a ding lai lo. ²² Nuhmei siseh, makmi siseh, a ṭhi lai lo, Israel hrin a simi ngaknu kha a ṭhit lai. Tlangbawi rohmi nuhmei bel a ṭhit khawh lai. ²³ A thiangmi thil kha a thiang lomi thil lakin thleidan khawh ding kha ka mi cu an cawnpiak hna lai i a thiangmi thil le a thiang lomi thil an i dannak kha an hmuhsak hna lai. ²⁴ Pakhat le pakhat i siknak a chuah tikah zung ah bia an ceih hna lai i bia cu ka phung ning zulh in an khiah hna lai. Caan ngei in tuahmi ka puai dihlak ah ka phung le ka nawlbia kha an zulh hna lai. Ka sabbath kha thiang tein an ulh hna lai. ²⁵ An nu an pa, an fanu an fapa, an u an nau, va a ngei lomi an far hna dah ti lo ahcun, mithi ruak he i tonghnak in an i thurhhnawmh lai lo. ²⁶ An i thianh hnuah ni sarih an rel lai i cu hnuah cun an thiang lai. ²⁷ Hmun Thiang Bik chung i rian ṭuan awkah chungchin tual ah khan an luh tikah, an sual thawinak kha an pekchanh lai, tiah Bawipa Pathian nih a ti. ²⁸ Israel ram chungah ro caah ram zeihmanh an ngeih awk a si lai lo; keimah cu an ro cu ka si. Israel ram chungah tinvo rorah zeihmanh na pe hna lai lo, keimah cu an tinvo cu ka si. ²⁹ Rawl thawinak le sual thawinak le phungbuar thawinak ca i hmanmi kha an ei hna lai, cun Israel mi nih Pathian sin i an pekmi paohpaoh cu anmah ta a si lai. ³⁰ Theitlai hmasa bik hna lak i hmasa bik hna le nan thawhlawm zeizong phun zakip vialte cu a ning piin tlangbawi hna ta a si lai. Nan inn chungah thluachuahnak a cam khawh nakhnga changreu ca nawnmi chang a hmasa bik hlum cu tlangbawi kha nan pek hna lai. ³¹ Tlangbawi ahohmanh nih, va siseh, saram siseh amah thih in a thimi le sahrang nih a sehmi paoh cu a sa an ei lai lo.

¹ Ram cu an co awk cio ah an phun an phun in camcawhfung khiah in nan phawt hna tikah, Bawipa caah ram bung pakhat nan zuah lai; a tung cu dong sang hnih le thong nga a si lai i a vang cu dong sang hnih a si lai; cu ram cu a pumpi in a thiangmi ram a si lai. ² Hi chungah hin hmun pakhat, tungvangpalh a simi, a tung dong za nga, a vang dong za nga a simi cu hmun thiang caah nan zuah lai i a velchum ah cun ram lawng dong sawm nga nan zuah lai. ³ Hi hmun chungah hin hmun pakhat nan tah lai i cu hmun cu a saulei dong sang hnih le thong nga, a kauhlei dong sang khat a si lai i cu chungah cun hmun thiang, a thiang bikmi hmun cu a um lai. ⁴ Hi hmun cu hmun thiang chung i rian a ṭuanmi tlangbawi hna le Bawipa rian ṭuannak i cuka hmun naih bik i a rami hna caah a si. Cu chungah cun an inn ca hmun le hmun thiang ca i a thiangmi hmun kha an i tel lai. ⁵ Dong sang hnih le thong nga a sau i dongsang khat a kaumi hmun kha Levi mi, biakinn rianṭuantu hna, ta ah khan a si lai; hi hmun chungah hin an umnak khua hna zong cu an um lai. ⁶ Khua cu hmun pakhat a vang dong thong nga a si i a tung dong sang hnih le thong nga a simi kha, hmun thiang ca i zuahmi kam thluahmah ah cun nan pek hna lai i cucu Israel mi vialte caah an si lai. ⁷ Hmun thiang ca i zuahmi ram le khua ca a simi hmun kam veve ah cun bawi nih cun ram a ngeih lai i cu a ram cu hmun thiang ca i zuahmi hmun le khua ca i chiahmi hmun lei hoih kha a si lai i nitlaklei ah cun nitlaklei ah khan a kal lai i nichuahlei ah cun nichuahlei ah khan a kal lai. Phun khatkhat nih an comi ram kam zuahmah khan a kal lai i nitlaklei i a donghnak tiang kha a hei phan lai i cun nichuahlei ah aa mer lai i a donghnak tiang a phan fawn lai. ⁸ Cucu Israel ram chungah a vo a si lai; Israel mi bawi hna nih ka mi hna cu an hrem bal ti hna lai lo, sihmanhsehlaw ram cu Israel mi kha an phun an phun cio ah an pek hna lai. ⁹ Mah hihi Bawipa Pathian bia an si: I za cang u, Israel bawi hna! Zaang-ennak le i ramhnak kha donghter cang u; phung le biading tu kha tuah hna u; ka mi kha ṭhawl ti hna hlah u, tiah Bawipa Pathian nih a ti. ¹⁰ Nan cuailung cu a hmaanmi siseh, nan rel le nan chiti tahnak zong a dikmi si hna seh. ¹¹ Rawl tahnak ephah le chiti tahnak bath cu an i khat lai, bath pakhat cu homer cheu hra cheu khat a si lai i ephah pakhat zong cu homer cheu hra cheu khat a si ve lai; cun homer cu tahnak tlangrel a si lai. ¹² Shekel pakhat cu gerah kul a si lai; cun nan mina cu shekel pahra a ritmi a um lai, kul le nga a ritmi a um lai i hleinga a ritmi a um lai. ¹³ Cun hi thawhlawm hna hi a dang tein nan chiah awk an si lai: changvut a si ah barli a si ah, homer pakhat ah ephah cheu ruk cheu khat lengmang. ¹⁴ Chiti cu kor khat ah bath cheu hra cheu khat lengmang (kor khat cu bath hra a si); ¹⁵ cun Israel phun chung mi paohpaoh nih tuu za hnih run chungin pakhat lengmang a dang tein a chiah lai. Rawl thawinak ca le khangh thawinak ca le daihnak thawinak caah hi thil hna cu ¹⁶ hi rammi vialte hna nih an ca i remnak tuahnak ding caah Israel mi hna bawi sinah khan an rak put lai, tiah Bawipa Pathian nih a ti; ¹⁷ cun an bawi cu khangh thawinak caah khan le rawl thawinak caah khan le thlet thawinak caah khan, thla thar ah siseh, sabbath ah siseh, Israel mi nih an ulhmi puai caan paohpaoh ah siseh, amah cu a ruatkhangtu a si lai. Israel mi ca i remnak sernak caah a herhmi sual thawinak le rawl thawinak le khangh thawinak kha amah hrimhrim nih a thawh hna lai. ¹⁸ Mah hihi Bawipa Pathian bia an si: Thla khatnak thla, a ni khatnak ni ah cawtum no pakhat dotlami kha nan lak lai i hmunthiang kha nan thianhnak lai. ¹⁹ Tlangbawi nih khan sual thawinak thi tlawmpal kha a lak lai i biakinn innka tung ah le biakṭheng tlang a kil pali ah khan le chunglei tual kutka tung hna ah khan a nalh hna lai. ²⁰ Thla sarih thla ah cu bantuk ṭhiamṭhiam cun nan tuah lai i cuticun biakinn caah remnak nan ser lai. ²¹ Thla khatnak thla ni hleili ni ah Lanhtak Puai nan tuah lai; changreu cu thilnu phulh loin nan ei lai. 45.21: ²² Cu ni ah cun nan bawi nih cun amah ca le mizapi ca i sual thawinak caah khan cawtum pakhat a thawh lai. ²³ Puai chung ni sarih chungah cun nifate in Bawipa sin i khangh thawinak caah dotlami cawtum pasarih le tuukawng pasarih a pekchanh lengmang lai, ni fate in mehehtum pakhat lengmang sual thawinak caah a pekchanh fawn lai. ²⁴ Cawtum pakhat le tuukawng pakhat sinah cun rawl thawinak rawl ephah pakhat le ephah pakhat ca i chiti hin khat lengmang cu a pekchanh chih lengmang hna lai. ²⁵ Thla sarih thla a ni hleinga ni i khual puai ni ah khan cu bantuk ṭhiamṭhiam cun a tuah lai; hi zong cu ni sarih chung a si ve lai i sual thawinak kha le khangh thawinak kha le rawl le chiti kha amah nih a thawh hna lai.

¹ Mah hihi Bawipa Pathian bia an si: Chunglei tual nichuahlei kutka cu rianṭuan ni ni ruk chung kha khar a si lai; sabbath ni le thla thar ni lawngah hun a si lai. ² Uktu bawi kha lenglei in kutka innleng ah khan a rat tikah, innka tung ah khan a dir lai i tlangbawi hna nih khan a khangh thawinak le daihnak thawinak kha an thawi hna lai. Kutka luh lai te ah cun a lu a khun lai i cun a chuak lai, sihmanhsehlaw kutka cu zanlei tiang khar a si lai lo. ³ Sabbath ni le thla thar ni ah kutka luhnak ah cun mizapi nih Bawipa hmaiah an kun lai. ⁴ Uktu bawi nih Bawipa sinah a pekchanhmi khangh thawinak cu hi bangin a si lai: sabbath ni ah dotla tuu paruk le dotla tuukawng pakhat; ⁵ rawl thawinak cu tuukawng he pek chih awkah khan ephah pakhat a si lai i tuu he pek chih awkah khan cun a duh zat paoh a si lai, cun ephah pakhat ca i chiti hin khat kha aa tel chih lengmang lai. ⁶ Thla thar ah dotla cawtum no pakhat, tuu paruk le tuukawng pakhat, an dihlak in dotla, pekchanh an si lai. ⁷ Cun rawl thawinak caah khan cawtum he pek chih awkah ephah pakhat, tuukawng he pek chih awkah ephah pakhat, tuu he pek chih awkah a pek khawh zat paoh an si lai i ephah pakhat caah chiti hin khat lengmang a chap lai. ⁸ Uktu bawi cu a rung luh tikah kutka innleng khan a rung lut lai i cu lam ṭhiamṭhiam cun a chuak lai. ⁹ Sihmanhsehlaw puai ni ah cun, mizapi kha Bawipa hmai i an rat tikah cun, kun awkah chaklei kutka in a lutmi pa cu thlanglei kutka in a chuak lai i thlanglei kutka in a lutmi pa cu chaklei kutka in a chuak lai. I mer in a luhnak kutka khan a chuah ṭhan awk a si lai lo, hmailei tu ah khan a lanh awk a si deuh lai. ¹⁰ Uktu bawi cu an sinah cun a um lai i an luh ah a lut ve lai i an chuah ah a chuak ve lai. ¹¹ Khual puai ah le puai ni paoh ah rawl thawinak cu cawtum he pek chih awkah ephah pakhat, tuukawng he pek chih awkah ephah pakhat, tuu he pek chih awkah a duh zat paoh, a si lai i ephah pakhat ah chiti hin khat lengmang a si chih lai. ¹² Uktu bawi nih khan khangh thawinak siseh, daihnak thawinak siseh, mah lungtho tein Bawipa sinah pekmi raithawinak caah a pek tik hna ah, nichuahlei kutka kha hunpiak a si lai i sabbath ah a tuah bantuk khan a khangh thawinak le a daihnak thawinak kha a tuah hna lai; cun a chuah tikah a hnu cun kutka cu khar a si lai. ¹³ Nifate in dotlami tuufa, kum khat a timi kha Bawipa sin i khangh thawinak caah nan thawh lai; zing fate in nan thawh lai. ¹⁴ Cu sinah cun rawl thawinak caah zing fate in ephah cheu ruk cheu khat kha nan thawh chih lai i changvut nawnnak caah chiti hin cheu thum cheu khat zong nan thawh chih fawn lai; Bawipa ca i rawl thawinak hi zeitik caan paoh ca i nan tuah lai tiah timi a si. ¹⁵ Zing fate in pekchanh tawnmi khangh thawinak caah cun tuu pakhat le rawl thawinak kha le chiti kha an pekchanh zungzal lai. ¹⁶ Hihi Bawipa Pathian bia cu an si: Uktu bawi nih khan a thilri chungin thil pakhatkhat cu a fapa pakhatkhat kha a ṭhenh tikah cu thil cu a fapa ta a si lai, zeicahtiah cu thil cu a innchungkhar thil lak i aa telmi kha a si. ¹⁷ Sihmanhsehlaw cu bantuk laksawng cu a sal pakhatkhat sinah a ṭhenh tikah sal in a luat tiang ca lawng kha a si lai; sal in a luat tikah cun a bawi sinah khan a kir ṭhan lai; cu thil cu a fapa hna thil a si i anmah ta a si lai ¹⁸ Uktu bawi nih khan mi nih an ngeihmi thilri kha a lakpiak hna lai lo; a fapale kha ro pek a duh hna tikah amah nih a ngeihmi vawlei khan a cheuh hna lai i cuticun ka mi hna cu an ro sin khan an i ṭhen lai lo i an i ṭhek lai lo. ¹⁹ Cun mipa nih cun chunglei tual thlanglei kam i a ummi, chaklei a hoihmi khaan hna i va luhnak ah khan a ka kalpi. Hi khaan cu tlangbawi hna ca i chiahmi khaan thiang an si. Cu khaan hna nitlaklei i a ummi khaan pakhat kha a ka sawhpiak i ²⁰ a ka thawh i, "Tlangbawi pawl nih thilzarh kha lenglei tual ah an chuahpi sual i mizapi kha mizarh ah an ser sual hna nakhnga lo, hi hmun hi tlangbawi pawl nih phungbuar thawinak le sual thawinak sa an chuannak hmun a si lai i rawl thawinak an reunak hmun a si lai," tiah a ti. ²¹ Cun lenglei tual ah khan a hei ka kalpi i cu tual a kil pali ah cun a hei ka lanhpi i cu kil ah cun tual dang aa pehmi an rak um cio. ²² Hi tual pali hna cu cungkhuh an ngei dih i an hmetngan kha aa khat dih, an saulei cu dong sawm li an si i an kauhlei cu dong sawm thum an si. ²³ Cu hna pali an velchum cio ah cun lungtian tlang khat cio an um i cu lungtian hngatchan cun tappi an um cio. ²⁴ A ka thawh i, "Hi hmun hna hi innpi a zohkhenhtu hna nih mizapi raithawinak an chuannak rawlchuan inn an si lai," a ti.

¹ Biakinn kutka ah cun a ka kalpi ṭhan i biakinn innleng tangin tiput pakhat a chuah i nichuahlei ah a luan kha ka hmuh; biakinn cu nichuahlei a hoih. Ti cu orhlei kam thluahmah in a luang i biakṭheng thlanglei kamah cun a vung luang. ² Chaklei kam kutka khan a ka chuahpi i tual nichuahlei kam i a ummi kutka ah khan a lenglei i a ummi lam in a ka kalpi i ti cu orhlei kam in a tla kiahmah. ³ Mipa cu nichuahlei i a va chuah tikah khan tahnak fung pakhat aa put. Dong thong khat kha a vun tah i ti cu a ka tanter i ka fengbeo a phan. ⁴ Dong thong khat a vun tah ṭhan i ti cu a ka tanter ṭhan i ka khuk tiang a phan. Dong thong khat a vun tah ṭhan i ti cu a ka tanter ṭhan i ka tai tiang a phan. ⁵ Dong thong khat a vun tah ṭhan i tilianpi ah a cang i ka tan kho ti lo, zeicahtiah ti cu a ṭhang tuk cang i a thuh leiah leuhnak tlak a simi a si cang; tan khawh lomi tilianpi ah a cang cang. ⁶ A ka thawh i, "Mipa, mah hihi chingchiah tuah," a ka ti i tilian kamah cun a ka kalpi ṭhan. ⁷ Ti kam i kan rat ṭhan tikah cun a kap hnih in thingkung tampi an um kha ka hmuh. ⁸ Cun a ka thawh i, "Hi ti hi nichuahlei i a ummi hmun ah a luang i Arabah tiang a vung luang; a donghnak ah cun, a ti a thumi rili tiang kha a vung phan lai i a ti cu a thlumter lai. ⁹ Hi ti a luannak hmun paoh ah khan sermi thilnung zeipaoh nih nunnak an hmuh lai. Nga cu rel cawk lo an si lai; zeicahtiah hi ti cu tithlum a si caah hi ti a luannak paoh ah zeizong vialte an nun nakhnga caah a si. ¹⁰ Engedi in En-eglaim tiang a kam ah cun ngatlai pawl nih khan an sur an samh hna lai i an dir lai. Khika ah khan nga phun zakip cu a bu pipi in an um lai, Rili Ngan i a ummi nga hna bantuk khin; ¹¹ sihmanhsehlaw a cerh le a tidil hna cu an ti kha thlumter an si lai lo, cite sernak caah cuticun chiah an si ko lai. ¹² Cu tiva a kam hnih ah cun rawl ca i a ṭhami thingkung vialte kha an um lai. An hnah cu a uai lai lo i an thei cu dongh ti a um lai lo; thla fate in tuante ah an tlai lengmang lai. Zeicahdah cuticun an si ti ahcun, an tohmi ti kha hmunthiang in a rami a si i an thei cu rawl caah an si i an hnah cu damnak caah an si," tiah a ti. ¹³ Hihi Bawipa Pathian bia cu an si: Israel miphun hna nih ram cu co awkah an luh tikah hihi an ramri cu an si lai, Josef nih khan vo hnih a co lai. ¹⁴ Kut hler in nan pupa hna sinah pek awkin chiat ka sermi ram cu pakhat le pakhat nan i cheu cio lai; camcawhfung khiah in nan ro ca ding cio ah khan pek nan si lai. ¹⁵ A ramri cu hihi a si lai: chaklei kamah, Rili Ngan in aa thawk lai i Hethlon le Lebo-hamath le ¹⁶ Zedad le Berothah le Sibraim kha a tan hna lai, cu hna cu Damaskas le Hamath ramri karlak i a ummi an si, cun Hauran ramri pawng Hazar-enan ah a lan lai. ¹⁷ Cucaah ramri cu rili in Damaskas ramri pawng i a ummi Hazar-enan tiang a kal lai i chaklei ah a hung kai lai; hihi a chaklei kam ramri cu a si. ¹⁸ Nichuahlei ah cun Jordan kha Hauran le Damaskas, Gilead le Israel mi hna karlak ramri a si lai, cun ramri cu a vung kal lai i Nichuahlei Rili ah Tamar tiang a phan lai, cu vial cu nichuahlei ramri kongah cun a si lai. ¹⁹ Thlanglei kam ramri cu Tamar in aa thawk lai i Kadesh pawng i a ummi Meribah ti tiang a phan lai; nannih pekmi ram cu Rili Ngan tiang a phan lai. Mah hihi Negeb leiah thlanglei kam cu a si. ²⁰ Nichuahlei ramri cu Rili Ngan cu a si ko; Lebo-hamath zawn tiang khan cucu ramri a si ko. ²¹ Nitlaklei ramri cu hi vial hi a si ko. ²² Hi ram cu Israel miphun hna kha ro caah camcawhfung khiah in nan i phaw lai, cun ramdangmi nan sin i a ummi hna zong kha fapa a ngeimi cu nan phawt ve hna lai. Annih cu Israel ram kek ah nan rel ve hna lai i Israel miphun hna lakah khan camcawhfung khiah in ro kha an co ve lai. ²³ Ramdangmi cu a umnak phun sinah khan a covo cu nan pek lai, tiah Bawipa Pathian hrimhrim nih a ti.

¹ Israel phun min cu hihi an si: Chaklei kam bik ah, Hethlon lei kalnak, Lebo-hamath le Hazar-enan lei; Hamath lei i va kal ahcun a chaklei kamah khan Damaskas a um, cuka ah cun nichuahlei in nitlaklei ah i kham in Dan covo cu a um lai. ² Dan a hun changtu ah nichuahlei in nitlaklei ah i kham in Asher covo a si lai. ³ Asher a hun changtu ah nichuahlei in nitlaklei ah i kham in Naftali covo a si lai. ⁴ Naftali a hun changtu ah nichuahlei in nitlaklei ah i kham in Manasseh covo a si lai. ⁵ Manasseh a hun changtu ah nichuahlei in nitlaklei ah i kham in Efraim covo a si lai. ⁶ Efraim a hun changtu ah nichuahlei in nitlaklei ah i kham in Reuben covo a si lai. ⁷ Reuben a hun changtu ah nichuahlei in nitlaklei ah i kham in Judah covo a si lai. ⁸ Judah a hun changtu ah nichuahlei in nitlaklei ah i kham in a ummi cu a dang tein na chiah dingmi nan zuahmi hmun kha a si lai. A kauhlei cu dong sang hnih le thong nga a si lai i a saulei cu nichuahlei in nitlaklei ah aa khammi covo hna tluk kha a si lai i cu a laifang ah cun hmunthiang kha a um lai. ⁹ Bawipa caah a dang tein nan zuah lai dingmi hmun cu a tung dong sang hnih le thong nga a si lai i a vang cu dong sang hnih a si lai. ¹⁰ Cu hmun cu hi bantukin ṭhen a si lai: tlangbawi hna caah khan chaklei kamah dong sang hnih le thong nga, nitlaklei kamah dong sang khat, nichuahlei kamah dong sang khat le thlanglei kamah dong sang hnih le thong nga chiahpiak an si lai i Bawipa hmun thiang cu cu a laifang ah cun a um lai. ¹¹ Cu hmun cu Israel mi hna lam an rak tlau i Levi mi hna nih an rak zulh hna bangin a zul lomi Zadok fapa hna, ka rian ṭha tein a ṭuanmi thiantermi tlangbawi hna caah khan a si lai. ¹² Zuahmi ram chungin tlangbawi hna caah a dang tein chiahmi hmun cu hmun thiang bik a si lai i Levi mi hna ramri kha a phan lai. ¹³ Tlangbawi hna ramri thluahmah ah cun Levi mi covo kha a si lai. A saulei cu dong sang hnih le thong nga a si lai i a kauhlei cu dong sang khat a si lai; a dihlak ah a saulei cu dong sang hnih le thong nga a si lai i a kauhlei cu dong sang khat a si lai. ¹⁴ Cu ram cu a cheuchumte zong an zuar lai lo i an thleng fawn lai lo; hi hmun ṭha cu an hlawt awk a si lai lo, zeicahtiah Bawipa ca i a thiangmi hmun a si. ¹⁵ A tangmi hmun, a kauhlei dong sang hnih le thong nga, a saulei dong sang hnih le thong nga a simi cu khuapi vawlei a si lai i umnak ca le zapi vawlei ah a si lai i khua cu cu a laifang ah cun a um lai. ¹⁶ A tungvang cu hihi an si lai: chaklei kamah dong thong li le za nga, thlanglei kamah dong thong li le za nga, nichuahlei ah dong thong li le za nga, nitlaklei kamah dong thong li le za nga a si lai. ¹⁷ Cu khua chung ram zapi ta a simi cu chaklei ah dong za hnih le sawm nga, nichuahlei ah za hnih le sawm nga, nitlaklei ah za hnih le sawm nga a si lai. ¹⁸ Zuahmi hmun kam zuahmah ah a ummi, nichuahlei ah dong sang khat, nitlaklei ah dong sang khat a simi cu khuapi chung rianṭuantu hna pawcawmnak caah a si lai. ¹⁹ Khuapi chung i rian a ṭuanmi nih cun an thlawh lai; Israel phun ahopaoh chung khan an si ko lai. ²⁰ Zuahmi ram, dong sang hnih le thong nga, tungvangpalh a simi cu, a ningpi khan a dang tein hmunthiang ah, khuapi ta a simi tiang khan nan chiah lai. ²¹ Zuahmi hmun thiang sinah a kam kip i a hleimi le khuapi ca i zuahmi pinah a hleimi cu uktu bawi kha pek a si lai. Nichuahlei ah zuahmi hmun pinah a ummi dong sang hnih le thong nga, nichuahlei kam tiang, nitlaklei ah dong sang hnih le thong nga, Israel miphun hna nih an comi ram kap thluahmah i a ummi kha uktu bawi cu pek a si lai; zuahmi hmunthiang le hmunthiang kha a laifang ah an um lai. ²² Levi mi hna ta le khuapi ta cu uktu bawi pekmi a laifang ah khan an um lai; Judah ramri le Benjamin ramri karlak ah khan an um lai. ²³ A tang rihmi Israel miphun hna kongah cun: nichuahlei in nitlaklei ah i kham in Benjamin covo kha pakhat a si lai. ²⁴ Benjamin chang ah nichuahlei in nitlaklei ah i kham in Simeon covo a si lai. ²⁵ Simeon chang ah nichuahlei in nitlaklei ah i kham in Issakhar covo a si lai. ²⁶ Issakhar chang ah nichuahlei in nitlaklei ah i kham in Zebulun covo a si lai. ²⁷ Zebulun chang ah nichuahlei in nitlaklei ah i kham in Gad covo a si lai. ²⁸ Gad thlanglei ramri cu thlanglei ramri, Tamar in a lan i Kadesh pawng Meribah ti tiang a phan i Tiva in Rili Ngan tiang a phanmi kha a si lai. ²⁹ Hi ram hi Israel miphun hna sinah ro caah nan phawt hna awk hnga cu a si lai i hihi an covo cu an si lai, tiah Bawipa Pathian hrimhrim nih a ti. ³⁰ - ³¹ Khuapi chungin chuahnak lam hna cu hihi an si lai i Israel miphun hna min kha bunh an si lai. Chaklei kam cu dong thong li le za nga a sau lai i kutka pathum a ngei lai, Reuben kutka, Judah kutka le Levi kutka an si lai; ³² nichuahlei kam cu dong thong li le za nga a sau lai i kutka pathum a ngei ve lai, Josef kutka, Benjamin kutka le Dan kutka an si lai. ³³ Thlanglei kam cu dong thong li le za nga a sau lai i kutka pathum ṭhiamṭhiam a ngei ve lai. Simeon kutka, Issakhar kutka le Zebulun kutka an si lai. ³⁴ Nitlaklei kam zong cu dong thong li le za nga a sau ve lai i kutka kha pathum a ngei ve lai, Gad kutka, Asher kutka le Naftali kutka an si lai. ³⁵ Khuapi velchum cu dong sang khat le thong riat a si lai i cu caan thawk in khuapi cu a min ah Bawipa Umnak Hmun ti a si lai.