EXODUS

EXODUS

¹ Hi hna hi Jakob fapa, an pa sinah Izipt ram i an innchungkhar cio he a vung kalmi hna an min kha a si: ² Reuben, Simeon, Levi, Judah, ³ Issakhar, Zebulun, Benjamin, ⁴ Dan, Naftali, Gad le Asher. ⁵ Jakob tefa hrimhrim kha sawm sarih an si. Josef cu Izipt ram ah khan a rak um cang. ⁶ Josef le a unau pawl vialte cu an thi dih, cu chanmi cu an dihlak in an thi dih. ⁷ Asinain Israel mi nih cun fa tampi an ngeih hna i an tam tuk i an ṭhan tuk hringhran caah cu ram cu an khat dih. ⁸ Siangpahrang thar, Josef a hngal lomi kha Izipt ram ah khan a hung bawi. ⁹ A mi kha a thawh hna i, "Israel mi hna hi zohhmanh hna u, an tam tuk i an ṭhawn tuk cang caah hin thinphang kan si. ¹⁰ An tam chin lengmang ti nakhnga lo an cungah fim ngaiin kan ṭuan a hau lai. Ral a thawh sual ahcun kan ral hna sin tu ah khan an i ṭawm lai i kanmah kha an kan doh lai i kan ram hin an chuak lai," a ti hna. ¹¹ Cucaah sal uktu bawi kha an cungah an chiah hna i rian fak ṭuan kha hnek rumro in an hnek hna, Israel mi nih cun rawl khonnak khua Pithom le Rameses kha Faro caah cun an sak. ¹² Sihmanhsehlaw Izipt mi nih Israel mi cu fak deuh in an hrem hna paoh ah tam deuh in an karh i kau deuh ah an i ṭhek. Izipt mi nih cun Israel mi cu an huat hna i an ṭih hna; ¹³ sal hremnak a fakmi chungah khan an khumh hna i ¹⁴ tlakser rian le tlakrawh rian le rian har phun zakip kha an ṭuanter hna i cuticun rethei ngaingai in an chiah hna. Rian har phun zakip kha rumro in an hnek hna. ¹⁵ Cun Izipt siangpahrang nih khan, Israel nu pawl nau an hrin tikah a bawmtu hna sayamah pahnih, an min Shifrah le Puah a simi kha a thawh hna i, ¹⁶ "Hebru nu pawl kha fa nan ngeihter hna tikah, pa an si ahcun nan thah hna lai i nu an si ahcun nan nunh hna lai," tiah a ti hna. ¹⁷ Sihmanhsehlaw nau hrintertu sayamah hna nih cun Pathian kha an ṭih caah siangpahrang nawl kha an zul lo i pa zong kha an nunh hna. ¹⁸ Siangpahrang nih khan sayamah cu a kawh hna i, "Zeicahdah hi bantukin nan tuah i pa ngakchia kha nan nunh hna?" a ti. ¹⁹ Annih nih, "Hebru nu pawl cu Izipt nu bantuk an si lo, fa hrin kha an i fawih ngaite i sayamah kan va phak tikah hin cun an fale cu an rak chuak diam cang tawn caah a si," tiah an leh. ²⁰ Pathian cu sayamah hna cungah cun a ṭha i Israel mi cu an karh chin lengmang i an ṭhawng chin lengmang. ²¹ Sayamah hna nih khan Pathian kha an ṭih caah Pathian nih annih cu tefa a pek hna. ²² Cu tikah Faro nih a mi vialte kha nawl a pek hna i, "Hebru mi nih fa an hrinmi pa paohpaoh cu tiva ah nan hlonh dih hna lai, nu lawnglawng kha nan nunh hna lai," tiah a ti hna.

¹ Levi phun chung mipa pakhat nih khan cu phun chung minu pakhat cu a ṭhit. ² Fa a pawi i fapa pakhat a hrin. A chuak thiam ngaingaimi fapa a si kha a hmuh tikah thla thum chung a thuh. ³ A thuh khawh ti lo tikah khin phaikung in an tahmi bawm pakhat kha aa lak i farthling le bitumen in a nalh i cu bawm chungah cun a fapate cu a chiah i tiva kam ram lakah khan a va thuh. ⁴ A unute nih a cungah zeidah a tlung te lai tiin lamhlat nawn khin a cawngh. ⁵ Faro fanu kha i kholh awkah tiva ah cun a ra i a lalang pawl kha tiva kamah khan an i chawk. Faro fanu nih cun bawmte kha a hmuh i a salnu kha va la tiah a fial. ⁶ Faro fanu nih cun a vun hun i a chungah ngakchiapate pakhat cu a rak um i cu ngakchiapa cu a hung ṭap. A zaang a fak ngaingai i, "Mah hi ngakchiate hi Hebru mi hna ngakchia pakhat a si ko lai," tiah a ti. ⁷ A farnute nih khan Faro fanu cu, "Hi ngakchia an zohkhenhpiaktu dingah Hebru minu pakhat in in auhpiak ning," tiah a ti. ⁸ "Va au," tiah a ti i ngakchianute nih cun a va kal i ngakchiapa i a nu kha a va auh. ⁹ Faro fanu nih khan ngakchiapa a nu cu a thawh i, "Hi ngakchiapa hi i lak law va ka cawmpiak. Cun na cawm man cu keimah nih kan pek lai," a ti. Cucaah nu nih khan ngakchia cu a lak i a cawm. ¹⁰ Ngakchia cu a ngan nawn tikah Faro fanu sinah cun a hei kalpi i a fapa ah a rak i ser. Aa thawh i, "Ti chungin ka chuahmi a si caah," a ti i a min ah Moses a sak. ¹¹ Cu hnu tlawmpal, Moses cu a hung upat tikah khan, a phunhawi mi cu a va leng hna i zeitluk in dah rianhrang ṭuan an hnek hna ti kha a va hmuh. A miphun hawi pakhat Izipt mipa i a thah zong kha a va hmuh fawn. ¹² A pawngkam kha a zoh i ahohmanh a hmuh hna lo tikah, Izipt mipa cu a thah i a ruak cu vawlei chungah a thuh. ¹³ A thaizing ah khan a va kal ṭhan i Hebru mi pahnih an rak i velh len ko kha a hmuh hna. A sualpa cu a thawh i, "Zeicahdah na phunhawi a si mipa cu na velh len ko?" a ti. ¹⁴ Cu pa nih cun aa thawh i, "Aho nih dah nangmah cu a kan uktu bawi le bia a kan ceihtu ding bawi ah an in ser? Izipt mipa na thah bantuk khan dahra thah na ka timh ve?" a ti. Moses cu a thin a phang i, "Ka tuahmi kha mi nih an hngalh ko cang hi ta," tiah a ruah. ¹⁵ Cucu Faro nih a hngalh tikah Moses cu thah a zalh. Asinain Moses nih cun a zamtak i Midian ram i va um awkah a kal. Cuka a va phak tikah tikhor pawngah khan a ṭhu. ¹⁶ Midian tlangbawipa nih cun fanu pasarih a rak ngeih hna. Ti than awkah khan an ra i an pa tuu le meheh kha ti dinh awkah saram ti dinhnak kuang chungah khan ti cu an thlet. ¹⁷ Asinain tuukhal pawl kha an ra i an dawi hna. Moses nih cun a chanh hna i an saṭil cu ti a dinhpiak hna. ¹⁸ An pa Reuel sin i an va tlun tikah a rak thawh hna i, "Zeitindah nihin cu tuante ah nan tlun khawh?" a rak ti hna. ¹⁹ Annih nih, "Izipt mipa pakhat nih tuukhal pawl sin khan a kan chanh i ti hmanh a kan thanpiak i kan saṭil kha ti a kan dinhpiak hna," tiah an leh. ²⁰ Anih nih cun, "Cu pa cu khuazei ah dah a um?" tiah a fanule cu a hal hna i, "Zeicahdah cuka ah cun nan kaltak? Va kal u law va ko u, kan sinah rawl rak ei seh," a ti. ²¹ Cuka um cu Moses nih cun a duh i Reuel nih khan a fanu Zipporah kha nupi ah a pek. ²² Fapa pakhat a hrin. Moses nih, "Kei cu midang ram ah khual ka si," a ti i a min ah Gershom a sak. ²³ Caan saupi hnuah Izipt siangpahrang kha a hung thi. Israel mi cu an sal cannak ah khan an hrum an ai lengmang ko i bawmhnak hal in an ṭap. An ainak cu Pathian sin kha a phan i ²⁴ an hrumainak kha a theihpiak hna i Abraham le Isak le Jakob sin i a sermi a biakamnak kha a philh lo. ²⁵ Israel mi sal an sinak kha a hmuh i annih sinah khan aa hngalhter.

¹ Moses cu a nupi pa Jethro, Midian tlangbawi a simi, tuu le meheh kha a cawng hna i saṭilrun cu thetse ram pinah khan a kalpi hna i Horeb tlang, Pathian tlang timi kha a phan. ² Pathian vancungmi kha meizik bantukin burbuk laifang khan a sinah cun a hung lang. Moses nih cun a hei zoh i burbuk cu a alh hluahmah ko, sihmanhsehlaw a kaang ṭung lo. ³ Cucaah cun, "Ka hei naih deuh lai i ka hmuhmi thil khuaruahhar khi ka va zoh tuah lai. Zeicahdah burbuk khi a kangh dih kun hnga lo?" tiah a lung chungin a ti. ⁴ Bawipa nih a rat kha a hmuh tikah, burbuk chung cun Pathian nih cun a hun auh i, "Moses, Moses" tiah a ti i, "Zeidah?" tiah Moses nih cun a leh. ⁵ Pathian nih cun, "Ra naih deuh ti hlah. Na kedan kha i phoih, na dirnak hmun kha hmun thiang a si. ⁶ Kei cu na pa i a Pathian, Abraham Pathian, Isak Pathian, Jakob Pathian kha ka si," a ti. Moses nih khan Pathian zoh cu a ṭih caah a hmai kha aa khuh. ⁷ Cun Bawipa nih cun, "Zeitluk in dah ka mi hna nih Izipt ram ah temhinnak an huah ti kha fiang tein ka hmuh cang; a hremtu hna nih an cung i rian fak an khinh hna ruang i bawmhnak hal in an ainak kha ka theih. An nganfahnak cu ka hngalh dih cikcek. ⁸ Izipt mi hna sinin chanh i a vawlei a ṭhami le a hmun a kaumi ram i annih cu kalpi awkah ka rung ṭum cang. Cu ram cu ram rum le ram ṭha a si i atu ah Kanaan mi hna le Hit mi hna le Amor mi hna le Periz mi hna le Hiv mi hna le Jebus mi hna kha cuka ah cun an um. ⁹ Israel mi an ainak kha ka theih cang i Izipt mi nih zeitluk in dah an hrem hna kha ka hmuh. ¹⁰ Atu cu nangmah kha Faro sinah kan thlah lai i ka mi Israel mi cu Izipt ram in na chuahpi hna lai," a ti. ¹¹ Moses nih khan Pathian cu, "Faro sinah va kal i Israel mi Izipt ram in chuahpitu dingah cun kei cu ka tlak lo," a ti. ¹² Pathian nih cun, "Keimah nih kan umpi lai i keimah nih nangmah kha kan thlah ti cu hi nih hin a langhter lai. Cucu zeidah a si lai ti ahcun, Izipt ram in na chuahpi hna tikah khan hi tlang ah hin nan ka biak lai," a ti. ¹³ Moses nih Pathian cu a thawh i, "Israel mi hna sinah ka va kal i, ’Nan pupa hna Pathian nih nan sinah a ka thlah,’ ka va ti hna tikah, ’Ahodah a min a si?’ tiah an rak ka hal lai, cu tikah zei a si ti ah dah ka leh hna lai?" a ti. ¹⁴ Pathian nih cun Moses cu a thawh i, "Keimah cu Keimah ka si ko. Keimah a simi nih khan, keimah cu nan sinah a ka thlah, tiah Israel mi cu na chimh hna lai," a ti. ¹⁵ Cun Pathian nih Moses cu a thawh ṭhan i, "Israel mi cu, ’Bawipa, nan pupa hna i an Pathian, Abraham Pathian, Isak Pathian, Jakob Pathian nih khan nan sinah a ka thlah,’ tiah na chimh hna lai. Hihi a zungzal in ka min a si, hi ti hin hmailei chan vialte nih an ka auh lai. ¹⁶ Va kal law Israel mi hruaitu pawl vialte kha va pum hna law, ’Bawipa, nan pupa hna Pathian, Abraham Pathian, Isak Pathian, Jakob Pathian kha ka sinah a lang i, "Nan sinah ka ra i Izipt mi hna nih nan cungah zeidah an tuah ti kha ka hmuh cang; ¹⁷ cucaah nannih cu an in hrem hnanak Izipt ram khan kan chuahpi hna lai i Kanaan mi le Hit mi le Amor mi le Periz mi le Hiv mi le Jebus mi an umnak ram ah khan kan kalpi hna lai. Cu ram cu ram rum le vawlei a ṭhatnak hmun a si," a ti,’ tiah va chim hna. ¹⁸ Annih nih na chimmi cu an ngaih ko lai. Cun Israel mi hruaitu pawl he cun Izipt siangpahrang sinah khan nan va kal lai i, ’Hebru mi hna Pathian Bawipa nih khan a kan ton; cucaah cun Bawipa kan Pathian sin i raithawinak pekchanh awkah ni thum lamkal ah thetse ram chungah kan kalter,’ nan va ti lai. ¹⁹ Hramhram in hnek lo ahcun Izipt siangpahrang nih cun an kalter duh hna lai lo ti cu ka hngalh ko. ²⁰ Ka ṭhawnnak kha ka hman lai i cuka ah cun khuaruahharmi thil kha ka tuah hna lai i cu khuaruahharmi thil cun Izipt cu dan ka tat lai. Cu hnu ceo ah cun an kalter hna lai. ²¹ "Izipt mi cu ka mi kha kan hmaizahter hna lai i cucaah nan kal tikah kutro in nan kal lai lo. ²² Nu paohpaoh nih nan umnak inn nu le nan innpa kha thilpuan le hlawn le sui le ngun kha nan hal cio hna lai. Cucu nan fapa hna le nan fanu hna kha nan hruk nan aih hna lai i cuticun Izipt mi cu an thil kha nan chuh dih hna lai," a ti.

¹ Moses nih cun a leh i, "Israel mi nih an ka zumh lo i ka chimmi an ngaih duh lo i, ’Bawipa cu na sinah a lang pek lai lo,’ an ka ti ah tah zeitindah ka tuah lai?" a ti. ² Bawipa nih cun, "Naa putmi kha zeidah a si?" a ti. Moses nih, "Ṭhiangṭhunh," tiah a leh. ³ Bawipa nih cun, "Vawlei ah khan hlonh," a ti. Moses nih cun a vun hlonh i rul ah a cang i a zaam. ⁴ Bawipa nih cun Moses cu, "A mei khan vun tlai," a ti. Moses nih cun a vun tlaih i a kut ah khan ṭhiangṭhunh ah a cang ṭhan. ⁵ Bawipa nih cun, "Bawipa, an pupa hna Pathian, Abraham Pathian, Isak Pathian, Jakob Pathian na sinah ka langh kha an zumh khawh nakhnga, kha ti khan na va tuah lai," a ti. ⁶ Bawipa nih khan Moses cu a thawh ṭhan i, "Na angki leng chungah khan na kut kha vun nawk tuah," a ti. A chim bang cun a vun nawh i a hun chuah ṭhan tikah a kut cu zawtnak nih a tlunh, ṭialṭang in a rang dih i hawhra bantuk a si. ⁷ Bawipa nih cun, "Na kut cu na angki leng chungah khan vun nawk ṭhan tuah," a ti. A vun nawh ṭhan i a hun chuah tikah, a tak dang bantuk khan dam hirhiar tein a um ṭhan. ⁸ Bawipa nih cun, "Nangmah kha an in zumh khawh lo i hmelchunhnak pakhatnak nih an lung a pemter khawh hna lo ahcun, pahnihnak tal nih hin cun a zumhter ṭheo hna lai. ⁹ Cun hi hmelchunhnak pahnih hna thawng zongin an zumh khawh hlei lo i na chimmi kha an ngaih duh ṭhiamṭhiam lo ahcun, tiva chung ti kha tlawmpal in na lak lai i vawlei ah khan na thlet lai. Cu ti cu thisen ah a cang lai," a ti. ¹⁰ Moses nih Bawipa cu, "Bawipa, kei cu ka ngaithiam ko; zapi sin biachim a thiammi ka si bal lo i na ka chawnh hnu zongah hin ka thiam hlei ṭhiamṭhiam lo, Bawipa . Kei cu biachim holhrel a thiam lomi, mikahak, leichum ka-aa ka si," a ti. ¹¹ Bawipa nih cun a thawh i, "Minung hi a ka cu aho nih dah a pek? Aho nih dah hnachet in a tuah i holh kho lo in a ser? Aho nih dah hmuhnak a pek i aho nih dah a mit a cawtter? Cu ti a tuahtu cu Bawipa hi ka si lo maw? ¹² Cucaah cun va kal ko; na holhnak ah kan bawmh lai i na chim ding kha kan chimh lai," a ti. ¹³ Sihmanhsehlaw Moses nih, "Bawipa, kei cu ka ngaithiam ko, midang tu thlah ko hna," tiah a ti. ¹⁴ Bawipa cu Moses cungah khan a thin a hung i, "Levi mi na u Aaron kha a um a si lo mei? Amah cu bia chim a thiam ngaingaimi a si kha ka hngalh. Atu hi nangmah don awkah a ra lio i nangmah kha hmuh an duh ngaingai. ¹⁵ Amah kha chim ding cu na chimh lai. Nan pahnih in chim awk kha kan bawmh hna lai i nan pahnih in nan tuah awk kha kan chimh hna lai. ¹⁶ Nangmah aiawh in mi zapi sinah khan Aaron nih cun bia cu a chim lai; amah cu na ka-hlang a si lai i nang cu Pathian bantukin, cucu chim, khakha chim, a titu na si lai. ¹⁷ Hi ṭhiangṭhunh hi i put, hi ṭhiangṭhunh hin khuaruahharnak na tuah hna lai," a ti. ¹⁸ Moses cu a pu Jethro sinah khan a va kal i, "Izipt ram i ka rualchan pawl an nung rih maw ti vung zoh ka duh hna, cucaah cun ka kalter law ka vung zoh hna lai," a ti. Jethro nih cun, dam tein vung kal ko, a ti. ¹⁹ Bawipa nih Moses kha Midian ram ah cun a chawnh i, "Atu cu Izipt ram ah vung kir cang, nangmah thah an duhmi vialte kha an thi cang," a ti. ²⁰ Moses nih a nupi le a fapa hna kha a lak hna i laa cungah a citter hna i Izipt ram ah khan an kir. Pathian nih a pekmi ṭhiangṭhunh kha aa put. ²¹ Bawipa nih Moses cu a thawh i, "Atu cu Izipt ram ah na kir lio cang, na tuah khawh lai kan timi khuaruahharmi thil vialte kha Faro hmaiah na tuah hna lai. A lung ka ṭhawnter lai i mi cu kalter a duh hna lai lo. ²² Cu tikah Faro cu na thawh lai i, Bawipa nih, ’Israel cu ka fapa upa bik a si. ²³ Ka fapa nih cun a ka biak khawh nakhnga kalter ko, tiah kan ti i na duh lo. Cucaah cun na fapa upa bik kha ka thah lai,’ a ti, na ti lai," tiah a ti. ²⁴ Lampi i an riahnak hmun pakhat ah Bawipa nih Moses kha a ton i thah a zalh. ²⁵ Zipporah nih khan lung harmi pakhat aa lak i a fapa cuarpar kha a tan i cu lung cun Moses ke kha a tawngh hna. Zipporah nih cun, "Nangmah cu thisen chuahtertu ka va na si hrimhrim ko," a ti. ²⁶ Cun Bawipa nih Moses kha a nunter. Cu caan ah cun pei, khaka ah khan, cuarpar tannak tuahmi ruangah khan, "thisen chuahtertu va," tiah a ti kha a si cu. ²⁷ Bawipa nih Aaron cu a thawh i, "Moses ton awkah thetse ram ah khan va kal tuah," tiah a ti. Amah ton awkah cun Pathian tlang ah khan a va kal i a ton tikah a hnamh. ²⁸ Pathian nih Moses cu kal a fial tikah a chimhmi vialte kha Moses nih cun Aaron cu a chimh dih i Bawipa nih tuah a fialmi khuaruahharmi thil vialte zong kha a chimh dih fawn. ²⁹ Moses le Aaron cu an va kal i Israel mi hruaitu vialte kha an pumh hna. ³⁰ Aaron nih cun, Pathian nih Moses a chimhmi vialte kha a chimh hna i khuaruahharmi thil vialte kha mi zapi hmaiah cun a ser hna. ³¹ Mizapi nih cun an zumh i Bawipa cu kan sinah a ra i retheihnak kan inmi kha a hmuh ti kha an hngalh tikah an kun i an biak.

¹ Moses le Aaron cu Faro sinah khan an va kal i Faro cu, "Bawipa, Israel Pathian nih, ’Ka mi hna cu, thetse ram ah biaknak puai an tuah khawh nakhnga, kalter hna seh,’ aan ti," tiah an ti. ² Faro nih cun, "Bawipa cu ahodah a si?" tiah a leh hna. "Zeicahdah a bia cu ka ngaih lai i Israel mi cu ka kalter hna lai? Bawipa cu ka hngal lo; Israel mi cu ka kalter hrimhrim hna lai lo," a ti. ³ Annih nih, "Hebru mi Pathian nih khan a kan ton. Bawipa kan Pathian sinah cun raithawinak kan tuah khawh nakhnga, ni thum lamkal ah thetse ram ah cun kan kalter ko. Kan kal lo ahcun rai in maw asiloah ral in maw a kan thah sual lai," an ti. ⁴ Izipt siangpahrang nih cun Moses le Aaron cu, "Mi an rian nan ṭhulh hna hi a sullam zeidah a si? Sal hna, nan rian ah khan kal ko u," a ti hna. ⁵ Faro nih cun aa thawh ṭhan i, "Hi mi hna hi ka ram chung mi taktak nakin an tam deuh cang. An rianṭuanmi hi ṭuan hna hlah seh ti maw nan duh?" a ti hna. ⁶ Cu ni hrimhrim ah cun Faro nih khan Izipt mi sal uktu hna le Israel mi kuli khawng hna kha, ⁷ "Tlakrawh sernak ah mi cu hlan bantuk khan capawl nan pe ti hna lai lo, anmah tein vaa lak cang hna seh. ⁸ Asinain tlakrawh an sermi a tlawm a tam cu, hlan i an sermi zat ṭhiamṭhiam kha a si lai; nan ṭhumhpiak hrimhrim hna lai lo. ’Kan Pathian sinah raithawi kan duh caah kan kalter,’ an ti cu an thathut caah a si ko. ⁹ Fak deuh in rianṭuanter hna u law an rian ah hin i manh hrimhrim loin an um lai i Moses le Aaron nih lih an chimh lengmangmi hna hi ngai loin an um ko lai," a ti hna. ¹⁰ Sal uktu hna le kuli khawng pawl cu mi zapi sinah khan an va kal i, "Faro nih, ’Capawl ka pe ti hna lai lo, ¹¹ anmah tein an i hmuh khawhnak hmun ah i kawl hna seh; asinain an sermi tlakrawh cu hmasa zat ṭhiamṭhiam kha a si lai,’ an ti hna," tiah an chimh hna. ¹² Cucaah mi cu capawl kawl ah khan Izipt ram ah cun an i ṭhek. ¹³ Sal uktu pawl nih khan an hnawh hna i, "Capawl an rak in pek lio hna i ni khat ah nan sermi zat hrimhrim kha ni fate in nan ser lai," an ti hna. ¹⁴ Faro sal uktu pawl nih khan Israel mi kuli khawng pawl, rian zohtu i an chiahmi hna cu, fung in an tuk hna i, "Zeicahdah hmasa i nan sermi zat tlakrawh kha nihin ah nan ser lo," an ti hna. ¹⁵ Cun Israel mi kuli khawng pawl cu Faro sinah khan an va kal i, "Bawipa, zeicahdah hi bantukin kan cungah na tuah? ¹⁶ Bawipa, capawl kha an kan pe lo, asinain hmasa kan sermi zat ṭhiamṭhiam kha nan ser lai an kan ti. Cun Bawipa, fung in an kan tuk fawn. Na palh," tiah an va ti. ¹⁷ Faro nih cun, "Nan tha a thu, nan tha a thu tuk hringhran. Cucaah cun, ’Bawipa sinah raithawinak pekchanh kan duh caah kan kalter,’ nan ka ti. ¹⁸ Nan rian ah khan kal zokzok u. Capawl zeihmanh an in pe hna lai lo, sihmanhsehlaw cu zat cu nan ser awk a si timi zat ṭhiamṭhiam khan tlakrawh cu nan ser lai," a ti hna. ¹⁹ "Nan rak ser tawnmi zat ṭhiamṭhiam khan tlakrawh cu nan ser lai," tiah ti an si tikah, Israel mi kuli khawng pawl nih cun, harnak chungah kan um cang, ti kha an i hngal. ²⁰ Faro sin khan an hung chuah tikah, anmah a rak hngak ko mi hna Moses le Aaron nih khan an rak ton hna. ²¹ Moses le Aaron cu an thawh hna i, "Nan tuahmi hi Bawipa nih hmu ko seh. Faro le a bawi pawl kha nan kan huatter hna, cucaah dan in tat ko hna seh. Kanmah thahnak ah an kut ah vainam nan pek hna," an ti hna. ²² Cun Moses cu Pathian leiah khan aa mer ṭhan i, " Bawipa, zeicahdah hi mi hna hi, hi ti hin na hrem hna? Zeicahdah keimah hi na rak ka thlah? ²³ Nangmah aiawh in Faro sinah biachim awk i ka rat ri in na mi cu heh tiah an hrem hna i nang nih annih bawmhnak ah zeihmanh na tuah fawn ṭung lo," a ti.

¹ Cun Bawipa nih Moses cu a thawh i, "Atu cu Faro cungah zeidah ka tuah lai ti kha na hmuh cang lai. Annih kalter dingah khan a hnek hrimhrim in ka hnek lai. A ram chungin a ṭhawl hrimhrim in an ṭhawl hna lai," a ti. ² Pathian nih Moses cu a chawnh i, "Keimah cu Bawipa ka si. ³ Abraham le Isak le Jakob sinah Lianngan Bik Pathian in ka rak lang. Annih sinah khan ka min in ka rak i langh lo, ka min cu Bawipa a si. ⁴ Anmah he khan biakamnak zong ka rak tuah i ramdangmi bantukin khua an rak saknak ram Kanaan ram kha kan pek hna lai, tiah bia ka rak kam hna. ⁵ Atu cu Izipt mi nih sal ah an zuatmi hna Israel mi an aihramnak kha ka theih i ka biakamnak kha ka philh lo. ⁶ Cucaah cun Israel mi cu na va thawh hna lai i, ’Keimah cu Bawipa ka si: Izipt mi hna nih hramhram in an in ṭuantermi hna rian hin kan luatter hna lai. An sal nan sinak chung hin kan chuah hna lai. Ṭih a nungmi dantatnak tlunter awkah aa samhmi ka baan ṭhawng hin, nannih cu kan khamh hna lai. ⁷ Nannih cu ka mi ah kan lak hna lai i kei cu nan Pathian ka si lai. Nannih nih kei cu Bawipa nan Pathian, Izipt mi nih hramhram in an in hnekmi hna rian in an luattertu hna ka si kha nan hngalh lai. ⁸ Chiatser tein Abraham le Isak le Jakob sinah kan pek hna lai ti in bia kaa kammi ram ah khan kan kalpi hna lai; cu ram cu nanmah ta ding hrimhrim ah kan pek hna lai. Kei cu Bawipa kha ka si,’ a ti, tiah na va chimh hrimhrim hna lai," a ti. ⁹ Cucu Moses nih khan Israel mi cu a va chimh hna, asinain an sal cannak kha a fak tuk hringhran i an lung a dongh tuk caah a bia kha an ngai duh lo. ¹⁰ Cun Bawipa nih Moses cu, ¹¹ "Va kal law Izipt siangpahrang Faro cu, Israel mi kha a ram chungin rak chuahter hrimhrim hna seh, a ti tiah va chim," a ti. ¹² Sihmanhsehlaw Moses nih khan Bawipa cu, "Israel mi hmanh nih ka bia an ngaih duh lo ahcun, zeitindah Faro chinchin nih cun a ngaih duh nemmam lai? Biachim holh rel ah le santlailo ngaimi ka si fawn," a ti. ¹³ Bawipa nih Moses le Aaron cu, "Va kal u law Israel mi hna le Izipt mi siangpahrang Faro kha, Israel mi cu Izipt ram in nan chuahpi hna lai tiah Bawipa nih a kan ti, nan va ti hna lai," a ti. ¹⁴ Hi hna hi an innchungkhar cio an lu cio kha an si: Israel fater Reuben fapa hna cu Hanok, Pallu, Hezron, le Karmi; hihi Reuben phun cu an si. ¹⁵ Simeon fapa ah: Jemuel, Jamin, Ohad, Jakhin, Zohar le Kanaan minu fapa Shaul; hi hna hi Simeon phun cu an si. ¹⁶ Levi fapa an min cu hihi an si, an tefa hna cio he: Gershon, Kohath le Merari. Levi cu kum za khat sawm thum le kum sarih a nung. ¹⁷ Gershon fapa cu Libni le Shimei le an phun cio kha an si. ¹⁸ Kohath fapa cu Amram, Izhar, Hebron le Uzziel an si. Kohath cu kum za le sawm thum le kum thum a nung. ¹⁹ Merari fapa cu Mahli le Mushi an si. Hi hna hi Levi phun cu an si, an tefa cio he. ²⁰ Amram nih a pa far Jokhebed kha a ṭhit i Aaron le Moses kha a hrin hna. Amram cu kum za le sawm thum le kum sarih a nung. ²¹ Izhar fapa cu Korah, Nefeg le Zikhri an si. ²² Uzziel fapa cu Mishael, Elzafan le Sithri an si. ²³ Aaron nih Elisheba, Amminadab fanu, Nahshon far, kha a ṭhit i Nadab, Abihu, Eleazar le Ithamar kha a hrinpiak hna. ²⁴ Korah fapa cu Assir, Elkanah le Abiasaf an si, hi hna hi Korah phun kha an si. ²⁵ Aaron fapa Eleazar nih khan Putiel fanu pakhat kha a ṭhit i cu nih cun Finehas a hrinpiak. Hi hna hi Levi innchungkhar lu cu, an phun ning cio in an si. ²⁶ Hi Aaron le Moses hi Pathian nih, "Israel mi cu Izipt ram chungin an bu an bu in chuahpi hna u," a timi hna kha an si. ²⁷ Izipt siangpahrang Faro cu, "Israel mi kha luatter hna," tiah a titu kha, Moses le Aaron ṭhiamṭhiam an si. ²⁸ Izipt ram ah Bawipa nih Moses cu a chawnh i ²⁹ "Keimah cu Bawipa ka si; kan chimhmi vialte kha Izipt siangpahrang Faro cu va chim," a ti. Sihmanhsehlaw Moses nih, ³⁰ "Kei cu biachim holhrel ah san a tlai lo ngaimi ka si kha na hngalh, zeitindah Faro nih cun ka bia cu a ngaih duh lai?" a ti.

¹ Bawipa nih khan Moses cu a thawh i, "Zohhmanh, nangmah cu Faro caah Pathian bantuk ah kan ser lai i na u Aaron nih na profet bantukin a sinah bia a chim lai. ² Na tuah awk a si tiah kan chimhmi vialte kha Aaron cu na chimh lai i Aaron nih cun Faro kha, Israel mi cu hi ram hin chuahter hna, tiah a chimh lai. ³ Sihmanhsehlaw Faro cu a lung ka ṭhawnter lai i Izipt ram chungah hin khuaruahharmi thil tampi ka tuah lai nain ⁴ na bia a ngai duh lai lo. Cu tikah ka ṭhawnnak cu Izipt ram ah khan ka langhter lai i Izipt mi kha fak piin dan ka tat hna lai; cun ka ralkapbu, Israel mi kha Izipt ram cun ka chuahpi hna lai. ⁵ Izipt mi nih cun an cung i ka kut ka hler tik le Israel mi kha an ram chungin ka chuahpi hna tikah, keimah cu Bawipa ka si kha an hngalh lai," a ti. ⁶ Bawipa nih nan tuah lai tiah nawl a pekmi hna cu Moses le Aaron nih khan an tuah. ⁷ Faro sin i bia an va chim ah khan Moses cu kum sawm riat a si i Aaron cu kum sawm riat le kum thum a si. ⁸ Cun Bawipa nih Moses le Aaron cu a thawh hna i, ⁹ "Faro nih a rak in thawh hna i, ’Nan tuah khawh taktak le tuah khawh taktak lo cu khuaruahharmi thil nan tuahmi in ta nan langhter,’ an ti hna ahcun, Moses nih Aaron kha, ’Na ṭhiangṭhunh kha i lak law Faro hmaiah khan hlonh law rul ah canter,’ na ti lai," tiah a ti hna. ¹⁰ Moses le Aaron cu Faro sinah khan an va kal i Bawipa nih a fial hna bang khan an va tuah. Aaron nih khan a ṭhiangṭhunh cu Faro hmaiah khan a hlonh i rul ah aa cang. ¹¹ Cun Faro nih a mifim le camhthiam pawl kha a auh ve hna i annih zong nih cu bantuk cu an tuah khawh ve. ¹² An ṭhiangṭhunh kha an hlonh ve hna i rul ah an i cang ve. Sihmanhsehlaw Aaron ṭhiangṭhunh nih khan a dolh dih hna. ¹³ Faro cu a lung a ṭhawng i Bawipa nih a chim bantukte khan an bia kha ngaih a duh lo. ¹⁴ Cun Bawipa nih Moses cu a thawh i, "Faro cu a lung a ṭhawng ngaingai i Israel mi hna kalter kha a duh lo. ¹⁵ Cucaah cun va kal u law Faro cu Nail tiva i a kal caan zinglei ah va tong u. Tiva kam khan rak hngak u. Rul ah aa cangmi ṭhiangṭhunh kha i put u. ¹⁶ Cun Faro cu, ’Hebru mi Pathian Bawipa nih, nangmah sinah a kan thlah i, "Thetse ram ah an ka biak khawh nakhnga ka mi cu chuahter hna," a ti tiah va chim a ka ti, asinain atu tiang na ngai duh lo. ¹⁷ Cucaah Bawipa chimmi cu, "Ka tuah laimi thil thawng hin Bawipa ka si cu na hngalh lai," ti hi a si. Zohhmanh, hi ṭhiangṭhunh hin tiva ti kha ka tuk lai i thisen ah a cang lai. ¹⁸ Nga kha an thi lai i tiva kha a thut in a thut lai caah Izipt mi nih an ding kho lai lo,’ na ti lai," tiah a ti. ¹⁹ Bawipa nih Moses cu a thawh i, "Aaron kha, ’Na ṭhiangṭhunh cu Izipt ram chung ti vialte cungah hler tuah, tiva si hna seh, tilak si hna seh, tidil si hna seh, an cungah hler tuah. Ti cu thisen ah an i cang dih lai i ram chungah khan a dihlak in thisen a um lai, thing tikuang le lung tikuang hmanh ah thisen cu a um lai,’ tiah chim," a ti. ²⁰ Moses le Aaron nih cun Bawipa nih a fial hna bang khan an tuah. Faro le a bawi hna hmaiah cun Aaron nih khan a ṭhiangṭhunh cu a hler i tiva kha a tuk, a chung ti vialte kha thisen ah an cang dih. ²¹ A chung nga kha an thi i a thut tuk caah Izipt mi nih a ti kha an ding kho lo. Izipt ram chungah khuazakip ah thisen kha a um dih. ²² Cun Izipt mi camhthiam pawl nih khan cu bantuk cu an tuah ve i Faro cu hmasa bantuk ṭhiamṭhiam khan a lung a ṭhawng ko. Bawipa nih a chim bantukte khan Moses le Aaron cu an bia a ngai duh hna lo. ²³ Faro cu aa thawh i a inn ah a ṭin, an tuahmi cu zeihmanh ah a relpiak hna lo. ²⁴ Tiva ti kha an din khawh lo caah Izipt mi vialte nih khan tiva tlang kha ti din awk ti kawlnak ah an cawh. ²⁵ Bawipa nih tiva a tuk cu ni sarih a si cang.

¹ Bawipa nih tiva kha a tuk hnu ni sarih ah, Bawipa nih Moses cu a thawh i, "Va kal law Faro cu, ’Bawipa nih, "Ka mi hna cu luatter hna, keimah kha ka bia hna seh. ² Ngai hmanh, cucu na duh lo ahcun, na ram hi a dihlak in utlak in ka hrem lai. ³ Tiva cu utlak in a khat lai i tiva cu an kaltak lai i na inn chungah an lut lai; na ihnak khaan le na ihkhun le na bawi pawl inn le na mi hna inn ah khan an lut lai; na tappi le na changreu sernak kheng chung tiangin an lut lai. ⁴ Nangmah siseh, na mi si hna seh, na bawi pawl si hna seh an in kaihnawh hna lai," a ti,’ tiah va chim," tiah a ti. ⁵ Cun Bawipa nih Moses cu, "Aaron kha, ’Na ṭhiangṭhunh cu tiva cung le tilak cung le tidil cungah khan hler law Izipt ram chungah khan utlak kha chuak hna seh,’ tiah chim," a ti. ⁶ Cucaah Aaron nih cun a ṭhiangṭhunh cu ti cungah khan a hler i utlak kha an chuak ciammam i ram kha a khah in an khat. ⁷ Asinain camhthiam pawl zong nih khan utlak cu ram chungah khan an chuahter ve hna. ⁸ Faro nih Moses le Aaron kha a auh hna i, "Bawipa sinah cun thlacam u law ka mi hna sin hin utlak hi la hna seh, cun nan mi hna cu Bawipa sinah raithawinak an pekchanh khawh nakhnga ka kalter hna lai," a ti. ⁹ Moses nih Faro cu, "Utlak nih cun nanmah le nan inn hna kha an in kaltak hna i tiva chung lawngah an um nakhnga, zeitik ah dah nangmah ca le na bawi pawl hna ca le na mi hna caah cun thla cu ka cam lai, ka chim tuah," a ti. ¹⁰ Faro nih cun, "Thaizing ah," tiah a leh. Cun Moses nih, "Asi, na chim bantukin a si lai, zeicahtiah Bawipa kan Pathian bantuk hi pathian dang ahohmanh an um lo ti kha na hngalh nakhnga," a ti. ¹¹ Cun, "Utlak nih cun nangmah le na inn hna le na bawi pawl hna le na mi hna cu an in kaltak hna lai i tiva chung lawngah khan an um lai," a ti. ¹² Moses le Aaron nih Faro cu an kaltak i Faro cungah a tluntermi utlak kong ah khan Bawipa sinah fak piin thla an cam. ¹³ Moses nih a nawl bantuk khan Bawipa nih cun a tuah i inn chung i a ummi le tual i a ummi le lo i a ummi utlak vialte kha an thi dih. ¹⁴ Izipt mi nih cun a pon in an pon hna i ram cu a thut in a thu. ¹⁵ Faro nih thil cu a hung ṭha deuh ṭhan ti kha a hmuh tikah a lung a hak ṭhan i Bawipa nih a rak chim bantukte khan Moses le Aaron cu an bia ngaih kha a duh ṭhan hna lo. ¹⁶ Bawipa nih Moses cu, "Aaron kha, ’Na ṭhiangṭhunh in vawlei kha tu law leidip kha fikfa ah an i cang lai i Izipt ram kha an khat lai,’ tiah chim," a ti. ¹⁷ Cuticun an tuah. Aaron nih khan a ṭhiangṭhunh cu a hler i vawlei kha a tuk. Leidip cu fikfa ah an i cang i mi le saṭil kha a zual in an zual hna. ¹⁸ Camhthiam pawl zong nih khan fikfa chuahter cu an i zuam ve, sihmanhsehlaw an tuah kho lo. Fikfa nih cun minung he saṭil he awlok an chawnh hna. ¹⁹ Camhthiam pawl nih khan Faro cu, "Hihi cu Pathian tuahmi a si," an ti. Sihmanhsehlaw Faro cu a lung a hak ko i Bawipa nih a rak chim bantuk te khan Moses le Aaron cu an bia a ngai duh hna lo. ²⁰ Bawipa nih Moses cu a thawh i, "Zingkate ah Faro cu tiva i a kal ah khan va tong law, ’Bawipa, nih, "An ka biak nakhnga ka mi cu kalter hna seh. ²¹ Ka mi cu a kalter hna lo ahcun amah le a bawi hna le a inn hna cungah tho ka tlunter hrimhrim hna lai. Izipt mi vialte an inn cung dihlak ah ka tlunter lai, cun an dirnak vawlei hmanh kha tho in ka khahter lai. ²² Cu ni ah cun ka mi hna umnak Goshen ram kha cu ka zuah lai i cuka ah cun tho pakhat hmanh an um lai lo, zeicahdah cuticun a si lai ti ahcun, Faro nih keimah Bawipa nih hi ram ah rian ka ṭuan kha a hngalh khawh nakhnga caah a si lai. ²³ A mi le ka mi cu ka thleidan hna lai. Cun hi khuaruahharmi thil hi thaizing ah a tlung lai," tiah nangmah cu an ti,’ tiah va chim," tiah a ti. ²⁴ Cuticun Bawipa nih a tuah taktak i tho cu bu ngan pipi in Faro siangpahrang inn le a bawi pawl inn le Izipt ram dihlak ah cun an lut i ram cu tho nih cun a hrawh dih. ²⁵ Cun Faro nih khan Moses le Aaron kha a auh hna i, "Va kal u law hi ram chungah hin nan Pathian sinah cun raithawinak cu va tuah u," a ti. ²⁶ Moses nih khan, "Cucu a ṭha lai lo, zeicahtiah Bawipa kan Pathian sin i rai i kan thawimi saṭil hna kha Izipt mi nih hin an fih hna lai. Izipt mi nih an fihmi saṭil kha kan hman hna i an mit hmuh i kan thawi hna ahcun, lung in thi lakin an kan cheh lai. ²⁷ Cucaah cun Bawipa kan Pathian nih a kan fial bantukin thetse ram chung ni thum lamkal ah kan kal hrimhrim awk a si lai i cuka ah cun Bawipa kan Pathian sinah khan rai cu kan vaa thawi lai," a ti. ²⁸ Faro nih cun, "Lamhlapi nan kal lo ding ahcun, thetse ram ah khan Bawipa nan Pathian sin i raithawi awkah cun kan kalter ko hna lai. Thla ka campiak tuah u," a ti hna. ²⁹ Moses nih cun, "Thaizing ah tho nih hin nangmah le na bawi hna le na mi hna kha an in kaltak hna nakhnga, ka kal cangka hin Bawipa sinah thla ka va cam lai. Asinain hlen cu na kan hleng ti hnga lo, Bawipa sin i raithawinak va tuah awkah mi cu kalter loin na thlauh ti hna hnga lo," a ti. ³⁰ Moses nih Faro cu a kaltak i Bawipa sinah khan thla a cam i ³¹ Bawipa nih cun Moses nih a nawl bantuk khan a tuah. Tho nih cun Faro le a bawi hna le a mi hna kha an kaltak hna i pakhat hmanh tang loin an kal dih. ³² Sihmanhsehlaw cu caan tiang zongah cun Faro cu a lung a hak ṭhan i mi kha a kalter duh hna lo.

¹ Bawipa nih Moses cu a thawh i, "Va kal law Faro cu, Hebru mi hna Pathian Bawipa nih, ’Ka mi cu an ka biak nakhnga kalter hna. ² Na kalter duh ṭhiamṭhiam hna lo i na tlaih peng ko rih hna ahcun, ³ nan saṭil cungah rai ṭihnung ka tlunter lai: nan rang si hna seh, nan laa si hna seh, nan kalauk si hna seh, nan caw si hna seh, nan tuu si hna seh, nan meheh si hna seh, an cungah rai ka tlunter lai. ⁴ Israel mi hna saṭil le Izipt mi hna saṭil kha ka thleidan hna lai i Israel mi ta a simi cu pakhat hmanh an thi lai lo. ⁵ Bawipa nih caan ka khiah cang; thaizing ah ka tuah lai,’ a ti, tiah na va chimh lai," a ti. ⁶ A thaizing ah Bawipa nih a chim bantuk cun a tuah taktak i Izipt mi saṭil vialte cu an thi dih, sihmanhsehlaw Israel mi hna saṭil cu pakhat hmanh an thi lo. ⁷ Faro nih khan zeitindah thil umtuning a si ti kha a hal tik hna ah, Israel mi ta a simi saṭil cu pakhat hmanh an thi lo ti kha a hngalh. Sihmanhsehlaw Faro cu a lung a hak ṭhiamṭhiam i a kalter duh hlei hna lo. ⁸ Bawipa nih Moses le Aaron cu a thawh hna i, "Meiphu vutcam kha va ṭhuam u law Moses nih cu vutcam cu Faro hmaiah khan thlitu lakah vorh seh. ⁹ Izipt ram dihlak cungah khan leidip bantukin an zuang lai i a khuazakip ah minung cung le saram cungah hma an chuahter lai," a ti. ¹⁰ Cucaah meiphu vutcam kha an i ṭhuam i Faro hmaiah cun an dir; Moses nih khan thli lakah cun a hlonh i minung cung le saram cungah hma kha an chuahter. ¹¹ Camhthiam pawl kha, annih zong cu hawi dang bantukin hma nih cun a tlunh ve hna caah Moses hmaiah khan an chuak kho lo. ¹² Sihmanhsehlaw Bawipa nih Faro kha a lung a hahter i Bawipa nih a rak chim bantuk khan a kalter duh ṭhiamṭhiam hna lo. ¹³ Bawipa nih Moses cu, "Zingka tein tho law Faro cu va tong law, ’Hebru mi hna Pathian Bawipa nih, "Ka mi cu kalter hna law ka bia hna seh. ¹⁴ Atu cu dantatnak vialte kha keimah hrimhrim nih nangmah cung le na bawi pawl cung le na mi hna cungah ka tlunter lai, cu ti in ka tuah lai cu vawlei cung dihlak ah hin keimah bantuk pathian dang ahohmanh an um lo ti kha na hngalh nakhnga caah a si. ¹⁵ Nangmah le na mi hna cung i rai tlunter awkah ka kut kha rak samh ning law nan rak lo dih cikcek cang hnga. ¹⁶ Sihmanhsehlaw ka ṭhawnnak kha nangmah cu kan hmuhsak khawh nakhnga kan nunter i cuticun ka minthannak nih vawleicung kha a cul dih lai. ¹⁷ Asinain ka mi hna cungah na ruam a kai ṭhiamṭhiam rih i kalter na duh hna lo. ¹⁸ Ngai hmanh, thaizing atu tikah hin rial ngan pipi ka tlakter ciammam lai i cu bantuk rial cu Izipt ram a thawhkehnak in ahohmanh nih an hngalh bal lomi rial an si lai. ¹⁹ Cucaah hmun lawng i a ummi nan saṭil vialte le thilri vialte hna kha dornak a ngeimi hmun ah chia dih hna u tiah nawl pe hna. Khuhzarh a ngei lomi vialte kha, mi si hna seh, saṭil si hna seh, rial nih cun a tlak hna lai i an thi dih lai," a ti,’ tiah va chim," a ti. ²⁰ Faro bawi a cheu pawl kha cu Bawipa nih a chimmi kha an ṭih i cucaah an salle le an saṭil kha inn chungah an khumh hna. ²¹ Asinain a cheu nih cun Bawipa chimmi kha zeihmanh ah an rel lo i an salle le an saṭil hna kha lo lakah cun an kaltak ko hna. ²² Cun Bawipa nih Moses cu a thawh i, "Van lei ah na kut hler law Izipt ram chungah a dihlak in, mi cung le saṭil cung le lo chung i a ummi thlai kung vialte cungah rial cu tla seh," a ti. ²³ Cucaah Moses nih a ṭhiangṭhunh kha van leiah a hler i Bawipa nih cun khua a ritter, rial le ṭek kha vawlei ah an tla. Bawipa nih rial cu Izipt ram cungah khan a tlakter. ²⁴ Rial fak piin a tla i nimtlau kha a kenkip ah a lek; Izipt ram a thawhkehnak in Izipt ram cungah cu bantuk thlichia cu a um bal rih lo. ²⁵ Izipt ram chung dihlak ah khan leng i a ummi paoh cu minung he saṭil he rial nih cun a den dih hna. Lo chung thlai kung vialte kha a den dih hna i thingkung vialte kha a khiah dih hna. ²⁶ Israel mi an umnak Goshen ram lawnglawng kha rial a tlak lonak hmun cu a si. ²⁷ Faro nih Moses le Aaron kha a auhter hna i, "Tutan cu keimah ka sual; Bawipa cu ahmaan i kei le ka mi hna cu kan palh. ²⁸ Bawipa sinah cun thlacam u; hi khuari le rial hi kan ing kho ti hna lo. Nan kal lai, tiah bia kan kam hna, sau nan hngah a hau ti lai lo," a ti. ²⁹ Cun Moses nih amah cu, "Khuapi chungin ka chuah cangka tein Bawipa sinah ka kut ka va hler lai. Vawlei hi Bawipa ta a si ti kha na hngalh naklai khuari cu a dai lai i rial cu a dih lai. ³⁰ Asinain nangmah le na bawi pawl nih Bawipa Pathian cu nan ṭih rih lo ti kha ka hngalh," a ti. ³¹ Khum le barli cu an rawk dih, zeicahtiah barli cu a hmin cang i khum cu a par lio a si. ³² Changvut le fangvoi tu cu an rawk lo, zeicahtiah annih cu tlai deuh i a vuimi an si. ³³ Moses nih Faro cu a kaltak i khuapi chung khan a chuak. Thlacamnak in Bawipa sinah a kut kha a hler i khuari le rial kha an dih i ruah kha a dong. ³⁴ Faro nih ruah le rial le khuari kha an dih cang ti a hmuh tikah a sual ṭhan hoi i a bawi hna he khan lung hak in an um ṭhan. ³⁵ Bawipa nih Moses sinin a rak chim bantuk te khan lung hak cun a um i Israel mi cu kalter kha a duh hna lo.

¹ Bawipa nih Moses cu a thawh i, "Faro sinah va kal. Khuaruahharmi thil hi an lakah ka tuah khawh nakhnga caah amah le a bawi pawl cu an lung ka ṭhawnter cang hna. ² Cun cu lawng si loin annih lakah hi khuaruahharmi thil ka tuah tikah zeitindah Izipt mi cu mihrut ah ka ser hna ti kha nan fale le nan fale fachin kha nan chimh hna nakhnga caah a si fawn. Nan dihlak in Bawipa ka si kha nan hngalh lai," a ti. ³ Cucaah Moses le Aaron kha Faro sinah cun an va kal i, "Hebru mi Pathian Bawipa nih, ’Zei can dah ka nawl zul duh loin na um lai? Ka mi hna cu an ka biak khawh nakhnga kalter hna. ⁴ Ka mi kha kalter duh loin na um peng ko ahcun, thaizing ah na ram chungah khaubawk ka tlunter hna lai. ⁵ Vawlei kha an khuh dih lai i a langh in a lang lai lo. Rial nih a hrawh lomi thil vialte kha an ei dih lai; na thingkung vialte kha an ei dih hna lai. ⁶ Na inn le na bawi pawl inn le na mi hna inn kha an khat lai. Na pu na pa hna nih hi ram i an rat hramthawk in an hmuhmi thil vialte lakah hi tlukin a chiami cu a um lai lo,’ a ti," tiah an chimh. Cun aa mer i Faro cu a chuahtak. ⁷ Faro cu a bawi pawl nih khan an thawh i, "Hi pa hi zei can dah harnak a kan pek lai? Va kal ko hna seh law Bawipa an Pathian cu va bia ko hna seh. Izipt ram a rawk cang hi na hmu kho rih lo maw?" an ti. ⁸ Cucaah Moses le Aaron cu Faro sinah khan an ratpi ṭhan hna i annih cu a thawh hna i, "Nan kal lai i Bawipa nan Pathian cu nan va biak lai. Asinain ahodah a kal ding cu nan si lai?" a ti. ⁹ Moses nih cun, "Kan dihlak in kan kal lai, kan ngakchia hna he, kan tar hna he, kan fapa hna he ka fanu hna he, kan tuu hna he kan meheh hna he kan caw hna he kan kal lai, zeicahtiah Bawipa sinah biaknak puai kan ngeih awk a herh," a ti. ¹⁰ Faro nih cun, "Bawipa nih in bawm hna seh! Nu le ngakchia cu nan i kalpi hna hnga lo, zeicahtiah harnak pakhatkhat tuah nan i tim ti cu a fiang. ¹¹ Cucaah cun va kal i Bawipa biak kha nan duhmi a si ko ahcun, pa lawnglawng nan kal lai," a ti i cuticun Faro hmaika khan a ṭhawl in an ṭhawl hna. ¹² Bawipa nih Moses cu a chawnh i, "Izipt ram cungah khan na kut cu hler law khaubawk kha tlunter hna. A kheumi thil paohpaoh kha ra ei dih hna seh, rial nih a nganhmi kha ei dih hna seh," a ti. ¹³ Cun Moses nih a ṭhiangṭhunh cu a hler i Bawipa nih nichuahlei in thli kha cu ram cungah cun chun nitlak le zan khuadei a hranter. Zinglei ah cun khaubawk kha thli nih cun a chuahpi hna. ¹⁴ Izipt ram chungah cun an lut ciammam i ram cu a pumpi khah in an khat. Cu zat khaubawk cu an hmu bal hna lo i hmailei zongah an hmu bal ti hna lai lo. ¹⁵ Ram kha a khuh in an khuh dih i cucaah vawlei cu nak dup in a um ko. Ram chung i a khomi thil vialte le rial nih a nganhmi thingthei kung vialte kha an ei dih. Izipt ram chung a dihlak ah thing hring pakhat siseh, ram hring pakhat siseh a taangmi an um lo. ¹⁶ Cu tikah Faro nih Moses le Aaron kha khulrang in a auh hna i, "Bawipa nan Pathian cung le nanmah cungah ka sual cang. ¹⁷ Cucaah atu voi khatte hi cu, ka sualnak kha ka ngaithiam u law hi thihnak dantatnak hi Bawipa nan Pathian nih a ka ṭhialpiak nakhnga amah sinah cun thla ka campiak u," a ti hna. ¹⁸ Moses nih Faro cu a chuah tak i Bawipa sinah cun thla a cam. ¹⁹ Bawipa nih thlitu cu nitlaklei kap in ṭhawng ngaiin a hranter i khaubawk cu a choih hna i Rili Sen ah khan a thlak dih hna. Izipt ram chung a dihlak ah khaubawk pakhat hmanh an tang lo. ²⁰ Sihmanhsehlaw Bawipa nih Faro cu a lung a ṭhawnter i Israel mi cu kalter a duh ṭhiamṭhiam hna lo. ²¹ Bawipa nih Moses cu a thawh i, "Van leiah khin na kut hler law, khuamui a muih tuk ah a fah in a fakmi nih Izipt ram kha a dihlak in khuh seh," a ti. ²² Moses nih a kut cu van leiah khan a hler i Izipt ram chung dihlak ah cun ni thum chung muihnak a chah ngaingaimi a tlung. ²³ Izipt mi cu pakhat le pakhat an i hmu kho lo i ni thum chung ahohmanh an inn in a chuak kho an um lo. Asinain Israel mi an umnak ah khan cun ceunak a um ko. ²⁴ Faro nih cun Moses kha a kawh i, "Bawipa biak ah cun va kal u, nan nu pawl le nan ngakchia hna zong kal ve hna seh, asinain nan tuu le nan meheh le nan caw bel hika ah hin nan chiahtak hna lai," a ti. ²⁵ Moses nih cun aa thawh i, "Cu ti a si ahcun, Bawipa kan Pathian sin i pekchanh awkah, raithawinak ding ca le khangh thawinak ding caah saṭil na kan pek a hau lai. ²⁶ Kan saṭil cu kan sinah an kal ve hrimhrim a hau; pakhat hmanh kan kaltak hna lai lo. Bawipa kan Pathian biaknak caah cun saṭil kha kan thim hna a hau lai i cuka kan va phak hlanah cun kanmah hrimhrim zong nih Bawipa biaknak caah zei hi dah kan hman hna lai ti kha kan hngal rih lai lo," a ti. ²⁷ Bawipa nih Faro cu a lung a ṭhawnter i kalter kha a duh hna lo. ²⁸ Moses cu, "Ka hmaika hin chuak! A hmuh in ka hmu ti hlah, na ka hmuh ahcun na ka hmuh ni cu ka thih ni a si ti kha i ruah," tiah Faro nih cun a ti. ²⁹ Moses nih cun, "Na chim bang cun si ko seh! Zeitikhmanh ah in hmu ti hlah ning," tiah a leh.

¹ Bawipa nih Moses cu a thawh i, "Faro le Izipt mi hna cungah hin dantatnak pakhat lawnglawng ka tlunter rih lai. Cu hnuah cun an kalter ko hna lai. An kalter hna tikah cun a ṭhawl in an ṭhawl hna lai. ² Cun na mi hna kha chim hna law nu nih siseh, pa nih siseh, an innpa cio kha sui hlawn le ngun hlawn hal cio hna seh," a ti. ³ Bawipa nih Izipt mi cu Israel cungah khan hmaizahnak a ngeihter hna. A ngaingai ti ahcun Izipt bawi pawl le mi zapi nih khan Moses cu mingan ngaingai pakhat ah an ruah. ⁴ Moses nih khan Faro cu, "Bawipa nih hitin a ti, ’Zan ṭim hrawngah khin Izipt mi hna lakah ka chawk lai i ⁵ Izipt ram chung i fater a simi paohpaoh kha an thi lai, Faro rocotu a bawiṭhutdan cung i a ṭhu dingmi fater thawk in facang rialnak lung i facang a rialmi salnu fater tiang an thi lai. Saṭil hna fater vialte zong an thi ve lai. ⁶ Hi hlanah a um bal lo i hmailei zongah a um bal lo ding aihramnak kha Izipt ram chung dihlak ah a tlung lai. ⁷ Sihmanhsehlaw Israel mi hna lakah cun uico nih minung siseh saṭil siseh a auh hna thawng hmanh a leng lai lo; cucaah Bawipa nih Izipt mi le Israel mi cu ka thleidan hna kha na hngalh lai,’ a ti," tiah a ti. ⁸ "Cun na bawi vialte hna hi ka sinah an ra lai i ka hmaiah an kun lai i, ’Nangmah le na mi hna cu va kal ko u,’ tiah an ti lai. Cu hnuah cun hi ram hin ka chuak lai," tiah a ti fawn. Cun thinhung ngaiin Moses nih Faro cu a chuahtak. ⁹ Bawipa nih Moses cu a chawnh i, "Izipt ram chungah hin khuaruahharmi thil kha ka tuah chinchin khawh rih hna nakhnga, Faro nih hin na bia kha an ngai lai lo," a ti. ¹⁰ Hi khuaruahharmi thil vialte hi Moses le Aaron nih Faro hmaiah khan an ser hna, sihmanhsehlaw Bawipa nih a lung a hahter caah Israel mi kha a ram chung cun a chuahter duh hna lo.

¹ Izipt ram ah khan Bawipa nih Moses le Aaron cu a chawnh hna i, ² "Atu thla hi nan caah kum khat chung thla hmasa bik a si lai. ³ Atu thla a ni hra ni ah hin, pa pakhat nih mahle innchungkhar ca cio ah tuufa pakhat maw mehehfa pakhat dik, nan i thim lai. ⁴ Cun innchungkhar pakhatkhat cu, kha sa kha a pum in a ei khotu dingah mi nan tlawm tuk ahcun nan innpa nanmah an changtu hna he khan, a minung zat tuak in, cu sa cu nan i hrawm lai. Pakhat nih zeizat dah ei khawh a si ti tuak in cu sa a ei dingmi cu, cu zat cu si u sih ti khan nan khaan lai. ⁵ Cu sa cu a bei lomi, hma zeihmanh a ngei lomi, kum khat a timi a si lai; tuu zong a si ah, meheh zong a si ah, a zeipaoh kha nan i thim khawh lai. ⁶ Atu thla ni hleili ni tiang hi, nan i chiah hna lai i cu ni zanlei ah cun Israel mi vialte nih cu sa cu nan thah cio hna lai. ⁷ Cun an thi kha tlawmpal in nan lak lai i nan innka tung le nan innkaba ah khan nan nalh hna lai i inn chungah khan sa cu nan ei lai. ⁸ Cu zan ah cun sa cu a em in nan em lai i thilnu phulh lo changreu le ankha he nan ei lai. ⁹ A hring in nan ei hna lai lo, chumh zongin nan ei hna lai lo, a pumning in nan em hna lai, an lu he an ke he an chungril he nan em hna lai i cuticun nan ei hna lai. ¹⁰ An zeihmanh kha zinglei tiang nan tanter hna lai lo, a tangmi a um ahcun mei in nan khangh hrimhrim hna lai. ¹¹ Cun nan eining cu hi ti hin a si lai: nan puan kha nan i sawihnawt lai i nan kedan kha nan i danh lai i nan ṭhiangṭhunh kha nan i put lai, cuticun khulrang in nan ei lai. Cu puai cu Bawipa ca i Lanhtak Puai a si. ¹² Cu zan ah cun Izipt ram ah khan kaa chawk lai i fater vialte kha minung si hna seh, saram si hna seh, ka thah dih hna lai. Izipt ram pathian vialte kha dan ka tat dih hna lai; keimah hi Bawipa cu ka si. ¹³ Thisen hi nannih nan umnak inn hmelchunhnak a si lai. Thisen kha ka hmuh tikah nannih cu kan lanhtak hna lai i Izipt ram ka hrem tikah dantatnak nih a chuahtermi rawhralnak cu nan cungah a tlung lai lo. ¹⁴ Hi ni hi nan caah philh khawh lomi ni a si lai; Bawipa biaknak puai ah nan hman lai. A hmunmi puai ah nan ser lai i chan khat hnu chan khat in nan hman zungzal lai. ¹⁵ " ’Ni sarih chung thilnu phulh lo changreu kha nan ei lai. A hmasa bik ni ah, nan inn chung khan thilnu kha nan thianh dih hna lai, a ni hmasa bik ni in a ni sarihnak ni tiang thilnu phulhmi changreu a eimi cu Israel mi chung khan thlei an si lai. ¹⁶ A ni hmasa bik ni le a ni sarihnak ni ah khan biaknak pumhnak nan ngei lai. Cu ni hnih chung cu rian zeihmanh nan ṭuan lai lo, nan ei awk rawl tuahto lawng kha onh nan si. ¹⁷ Hi thilnu phulh lo changreu puai cu nannih nih nan ulh lai, zeicahtiah hi ni hi nan ralkapbu Izipt ram in ka chuahpi hna ni kha a si. Hi ni cu a hmunmi puai ni ah chan khat hnu chan khat in nan ulh lai. ¹⁸ Thla hmasa bik thla, a ni hlei li ni zanlei in a ni kul le ni khat ni zanlei tiang, thilnu phulh lo changreu kha nan ei lai. ¹⁹ Ni sarih chung, nan inn chungah thilnu nan chia hrimhrim lai lo, thilnu phulhmi changreu a eimi cu nanmah miphun chung mi a si ah, ramdang mi a si ah, Israel mi bu chungin thlei a si lai. ²⁰ Thilnu phulhmi changreu kha nan ei hrimhrim lai lo; nan inn cio ah thilnu phulh lo changreu kha nan rak ei cio lai,’ tiah Israel mi vialte kha nan thanh hna lai," tiah a ti. ²¹ Moses nih Israel mi hruaitu pawl vialte kha a auh hna i, "Va kal u law nan innchungkhar cio caah tuufa maw meheh fa maw vaa thim u law Lanhtak sa kha va that hna u. ²² Hissop nge kha i khiah hna u law nan innleng i a ummi sathi ah khan nok hna u law nan innka tung le nan innkaba ah khan nalh hna u. Zinglei tiang, ahohmanh nan inn chungin nan chuak hrimhrim lai lo. ²³ Bawipa cu Izipt mi hna kha thah awkah Izipt ram i aa chawh tikah nan innkaba cung thi le nan innka tung cung thi kha a hmuh hna lai i cuticun hrawktu kha nanmah thah awkah nan inn chungah khan lut loin a umter lai. ²⁴ Hi phung hi nanmah le nan tefa hna caah a hmunmi phung nan zulh zungzal dingmi a si lai. ²⁵ Cun Bawipa nih, kan pek hna lai, tiah bia an kamhmi hna ram chung i nan luh tikah, hi phung hi nan zulh zungzal lai. ²⁶ Nan fale nih, ’Hi phung hi a sullam zeidah a si?" tiah an in hal hna tikah, ²⁷ nannih nih, ’Bawipa sinah pekmi lanhtak thawinak a si, zeicahtiah Izipt mi hna a rak thah hna ah khan Izipt ram i a um vemi Israel mi hna cu kan inn kha a lanhtak hna i kan inn cu a zuah hna,’ tiah nan leh hna lai,’ tiah a chimh hna. Mi zapi cu an khuk an i bil i Bawipa kha an biak. ²⁸ Israel mi cu an kal i mahticun an tuah; Bawipa nih Moses le Aaron a fial hna ning khan an tuah. ²⁹ Zanṭim ah Bawipa nih Izipt ram fater vialte cu a thah hna; bawiṭhutdan cungah a ṭhu ding Faro fater thawk in thong chung i a ummi thongtla fater tiang an thi; saṭil fater vialte zong an thi. ³⁰ Faro le a bawi vialte hna le a mi vialte hna cu zan ah cun an tho i fak piin an ṭap, zeicahtiah mithi a um lonak inn pakhat hmanh a um lo. ³¹ Cu zan ṭhiamṭhiam ah cun Faro nih khan Moses le Aaron cu a auh hna i, "Nanmah le Israel mi hna cu khulrang in chuak u. Ka mi kha kaltak hna u law nan ti bangin nan Pathian cu va bia u. ³² Nan ka hal bangin nan tuu le nan meheh le nan caw kha i kalpi hna u law, chuak u. Cun thluachuahnak ka hmuh nakhnga thla ka campiak u," a ti hna. ³³ Izipt mi nih khan, khulrang in chuak ko u, nan chuah lo ahcun kan thi dih ko lai, tiah heh tiah an nawl hna. ³⁴ Cucaah Israel mi nih cun thilnu phulh lo changnawn cu a kheng in an puan in an fun hna i an liang in an put hna. ³⁵ Israel mi nih cun Moses nih a chimh hna bang khan, Izipt mi cu sui hlawn le ngun hlawn le hnipuan kha an hal hna. ³⁶ Bawipa nih Izipt mi cu Israel mi cungah khan hmaizahnak a ngeihter hna i an halmi hna paoh kha an pek hna. Israel mi nih Izipt mi cu an ṭheh ṭipṭiap ko hna. ³⁷ Israel mi cu Rameses in an i thawh i Sukkoth ah an kal. Nu nau chim loin ke in a kalmipa thong za ruk tluk an si. ³⁸ Midang tampi le tuu le meheh le caw tampi zong an sinah cun an kal ve. ³⁹ Izipt ram in an i chuahpimi thilnu telh lo changnawn kha changreu ah an ser. Izipt ram in khulrang tuk in an ṭhawl hna caah khan thilnu cu an phulh lo. Rawl i timhlamhnak caan zeihmanh an ngei lo. ⁴⁰ Israel mi cu Izipt ram ah khan kum za li le kum sawm thum an um. ⁴¹ Kum za li le sawm thum a tlin nite ah khan Bawipa ralkapbu vialte hna cu Izipt ram cun an chuak. ⁴² Cu zan cu Bawipa nih Izipt ram chungin chuahpi awkah hngilh loin a congh hna zan kha a si. Cu zan cu Bawipa sin i pekchanhmi zan a si i Israel mi nih chan khat hnu chan khat in hngilh loin an um awk hnga zan cu a si. ⁴³ Bawipa nih Moses le Aaron cu a thawh hna i, "Lanhtak Puai tuah ningcang cu hi bantukin a si lai: Ramdangmi ahohmanh nih an ei lai lo, ⁴⁴ asinain nan cawkmi hna sal nih cun, an cuarpar tan an si hnuah an ei lai. ⁴⁵ A hung um tami nih si hna seh, nan hlan tami rianṭuantu si hna seh, cu hna nih cun an ei lai lo. ⁴⁶ Sa pum pum khat kha inn pakhat chungah ei a si lai i a zeihmanh kha lengah nan chuahpi lai lo; a ruh pakhat hmanh nan khiak lai lo. ⁴⁷ Israel mi nih nan bu ning tein hi puai cu nan tuah awk a si lai. ⁴⁸ Ramdangmi pakhatkhat nan sinah a um i Bawipa sinah lanhtak puai kha tuah a duh ve ahcun a sin i a ummi pa vialte kha an cuarpar nan tan hmasa hna lai i cu hnuah cun puai ah cun aa tel kho lai; amah cu Israel mi taktak bantukin nan zoh lai. Sihmanhsehlaw cuarpar tan lomi nih cun an ei hrimhrim lai lo. ⁴⁹ Cu phunglam nih cun Israel mi taktak zong kha a nenh hna i nan sin i khua a sami ramdangmi zong kha a nenh hna," tiah a ti. ⁵⁰ Israel mi vialte nih khan Moses le Aaron chimmi cu an ngaih i Bawipa nih Moses le Aaron a fialmi hna ning khan an tuah. ⁵¹ Cu ni hrimhrim ah cun Bawipa nih Israel mi hna cu an bu an bu cio in Izipt ram khan a chuahpi hna.

¹ Bawipa nih Moses cu a thawh i, ² "Fater, pa vialte cu keimah sinah nan ka pekchanh hna lai. Israel mi fater paohpaoh cu, minung an si ah, saram an si ah, keimah ta an si," a ti. ³ Mi zapi kha Moses nih cun a thawh hna i, "Sal ah nan cannak inn, Izipt ram in nan chuah ni hi philh hrimhrim hlah u, zeicahtiah hi ni ah hin Bawipa nih ṭhawnnak a liannganmi he an chuahpi hna. Thilnu phulhmi changreu nan ei hrimhrim lai lo. ⁴ Abib thla chung nihin ni ah hin Izipt ram in nan chuak lai. ⁵ Kanaan mi le Hit mi le Amor mi le Hiv mi le Jabus mi an umnak ram kha nanmah pek awkah Bawipa nih nan pupa cu fek tein bia a rak kamh hna. Cu ram cu ram rum le ram ṭha a si. Cu ram chung an phakpi hna tikah hi thla ṭhiamṭhiam ah hin hi phunglam hi nan ulh lai. ⁶ Ni sarih chung thilnu phulh lo changreu nan ei lai i a ni sarihnak ni ah Bawipa caah puai nan tuah lai. ⁷ Thilnu telh lo changreu kha ni sarih chung nan ei lai; thilnu phulhmi changreu siseh, thilnu siseh, nan ram chungah nan umter hrimhrim lai lo. ⁸ Cu ni ah cun nan fapa kha nan thawh hna lai i, ’Hi ti kan tuahmi vialte hi Izipt ram in kan rak chuah tikah khan Bawipa nih kan ca i a tuahmi philh lonak caah a si,’ tiah nan chimh hna lai. ⁹ Bawipa nih ṭhawnnak nganpi in Izipt ram in an chuahpi hna caah Bawipa phungbia cu nan chim zungzal awk a si lai, cu bantukin nan chim zungzal khawh nakhnga hi phunglam cu nan ban i nan i khihmi hmelchunhnak le nan cal i nan i ṭem chihmi ruah nolhtertu bantukin, thil an theih ṭhantertu hna a si lai. ¹⁰ Cucaah hi phung cu amahle a caan te ah khan kum khat ah voi khat lengmang nan tuah lai," a ti hna. ¹¹ "Bawipa nih nan pupa hna le nanmah kha fek tein a rak in kamhmi hna ram ah khan an luhpi hna lai. Cu ram cu an pek hna tikah. ¹² Kha nan hrin hmasa bik fapa paohpaoh kha nan pek lai; nan saṭil nih a hrin hmasa bik fa a pa paohpaoh cu Bawipa ta an si. ¹³ Asinain la fa hmasa bik cu tuufa in nan tlanh hna lai. Tlanh nan duh lo ahcun a hngawng nan khiah hna lai. Cun nan fater pa paohpaoh cu nan tlanh hna lai. ¹⁴ - ¹⁵ Hmailei ah nan fale nih, ’Hihi a sullam zeidah a si?’ tiah an in hal hna ahcun, ’Sal i kan cannak inn, Izipt ram chung i fater vialte kha, minung he saram he, Bawipa nih a rak thah dih hna. Cu ruangah cun fater paohpaoh Bawipa sinah raithawinak i kan pekchanh hna hi a si i kan fater hna kan tlanh hna hi a si,’ tiah nan leh hna lai. ¹⁶ Bawipa nih Izipt ram in ṭhawnnak lianngan in a kan chuahpi caah hi phunglam cu nan caah, nan ban i nan i khihmi hmelchunhnak le nan cal i nan i ṭem chihmi hmelchunhnak bantukin, thil an hngalhter ṭhantu hna a si lai," a ti. ¹⁷ An tuk awk a herhmi ral kha an hmuh hna tikah an lung i let in maw Izipt ram ah khan kir ṭhan hna lai, ti kha Pathian nih a phan caah, Faro nih Israel mi cu a kalter hna tikah khan, rili kam zulh in Filistia ram ah a hung kalmi lam kha a tawi bik a si ko nain, cu lam cu Pathian nih cun a zulhter hna lo. ¹⁸ Phihlik kheng tlang vel in a velter deuh hna i thetse ram in Rili Sen lei tu ah khan a kalpi hna. Israel mi cu ral hriamnam tling tein an ngei. ¹⁹ Josef nih Israel mi cu fek tein bia a kamter hna bantuk khan, Moses nih Josef ruh cu a kalpi. Josef nih khan zeitindah a rak ti tiah, "Pathian nih an bawmh hrimhrim hna lai; cu tikah ka ruh cu hika hmun hin nan sinah nan i kalpi lai," a rak ti. ²⁰ Sukkoth khua cun an i thawh i thetse ram a ramri i a ummi Etham khua ah khan an riak. ²¹ Chun ah Bawipa cu an hmaiah minmei tom in annih kha lam hmuhsak awkah a kal i zan ah an hmaiah mei tom in annih kha ceunak pek awkah a kal, cucaah cun zan zongah chun zongah an kal kho. ²² Minmei tom cu Israel mi hna hmaiah khan chun ah a um zungzal i mei tom cu zan ah a um zungzal ve.

¹ Bawipa nih Moses kha a thawh i, ² "Israel mi kha, hnulei ah kir u law Pi-ha-hiroth hmai Migdol le rili karlak, Baal-zefon hmai, rili kamah khan riak u, tiah chim hna. ³ Faro nih khan, ’Israel mi cu ram chungah khan an vai sawhsawh ko, thetse ram nih a kulh hna,’ tiah a ruah lai. ⁴ Faro cu a lung ka ṭhawnter lai i a dawi hna lai i Faro le a ralkapbu cu ka tei hna lai, cu ka tei hnanak nih khan upatnak a ka hmuhter lai. Izipt mi nih keimah cu Bawipa ka si kha an hngalh lai," a ti. Israel mi nih cun a chimh hna bang khan an tuah. ⁵ Izipt siangpahrang Faro cu, Israel mi kha an kal cang, tiah an chimh tikah, amah le a bawi pawl cu ruahnak dang an hun ngei ṭhan i, "Zeidah kan rak tuah? Israel mi cu kan sal an sinak chung khan kan luatter hna ai!" an ti. ⁶ Faro nih cun a raltuknak rangleng kha a timh zokzok i a mi hna he an dawi hna. ⁷ Rangleng lak i a ṭha bikbik za ruk kha aa kalpi hna i rangleng dang zong an kal ve, cu rangleng chungah cun bawi kha an um dih cio. ⁸ Bawipa nih Faro cu a lung kha a ṭhawnter i Bawipa zohkhenhnak thawngin a chuakmi Israel mi kha a dawi hna. ⁹ Izipt mi nih cun an rangtum vialte he, Faro rangleng hna le a mawngtu hna le a ralkap hna he cun an dawi ciammam hna i rili kam i an riahnak Pi-ha-hiroth pawng Baal-zefon hmaiah khan an hei phak hna. ¹⁰ Faro nih khan a hun naih chin lengmang hna i cu lioah cun Izipt mi nih an hun nam cuahmah hna kha Israel mi nih cun an rak hmuh hna. An thin a phang i Bawipa sinah khan an au. ¹¹ Moses cu an thawh i, "Izipt ram i thlan a um lo caah maw thetse ram i thih awkah hin na kan chuahpi? Izipt ram in na kan chuahpi hi zeidah a si ti cu zoh tuah ngat! ¹² Hi bantuk thil a tlung te lai ti kha kan kal hlan in kan in chim cang lo mei? Kan in thawh i, ’Kannih cu kan kaltak ko, Izipt mi sal si ko u sih,’ kan in ti. Hika thetse ram i thihnak cun sal si kha kan caah a ṭha deuh," an ti. ¹³ Moses nih khan mi zapi cu a leh hna i, "Nan thinphang hlah u! Fek tein dir u law nanmah khamh awkah Bawipa nih zeidah nihin ah a tuah lai kha zoh tuah u: cu a tuah laimi cu hihi a si lai, nihin i nan hmuhmi Izipt mi hna hi zeitikhmanh ah nan hmu ṭhan ti hna lai lo. ¹⁴ Bawipa nih nan ral cu an dohpiak hna lai, nannih cu zeihmanh nan tuah a herh lai lo," a ti. ¹⁵ Bawipa nih Moses cu, "Zeicahdah na ka auh len ko? Israel mi kha hmaiah kal u, ti hna. ¹⁶ Na ṭhiangṭhunh kha hler law rili cungah khan na kut samh tuah, cun rili kha aa ṭhen lai i Israel mi cu rili chung khan vawlei ro cungin an kal kho lai. ¹⁷ Izipt mi kha an lung ka hahter hna lai i rili chungah cun an dawi hna lai; cun Faro le a ralkapbu vialte le a rangleng hna cu ka tei hna lai i cu ka tei hnanak nih cun upatnak a ka pek lai. ¹⁸ Annih cu ka tei hna tikah Izipt mi nih khan Bawipa ka si cu an hngalh lai," a ti. ¹⁹ Israel bu hmaiah a kalmi vancungmi kha aa ṭhial i an hnu in a zulh hna. An hmai i a ummi minmei tom kha aa ṭhial i an hnuah a um. ²⁰ Izipt mi ralkapbu le Israel mi ralkapbu hna karlak ah khan minmei tom cu a um. Minmei nih cun khua a muihter i khuamuih zong a tuanhter, cucaah zan khuadei Izipt ralkapbu le Israel ralkapbu cu pakhat le pakhat an i naih kho lo. ²¹ Moses nih rili cungah khan a kut a hler i zan khuadei a ṭhawngmi nichuahlei thli kha a hrang i cu thli nih cun rili cu a nam i vawlei ro ah a canter. Ti cu aa ṭhen i ²² Israel mi cu rili chung khan vawlei ro cungin an kal, ti cu orhlei kam le kehlei kamah vampang bantukin aa chong. ²³ Izipt mi nih cun an dawi hna i Faro rangtum vialte le rangleng vialte le a mawngtu vialte hna nih khan rili chungah cun an hei nam hna. ²⁴ Khuadei laite ah khin Bawipa nih cun minmei tom le mei tom chung khan Izipt mi kha a vun zoh hna i a tuaiter dih hna. ²⁵ An rangleng ke cu a taapter hna i har lengmang fangfang in an kal kho, cucaah cun Izipt mi nih cun, "Israel mi hi zamtak hna u sih, Bawipa pei anmah lei ah a ṭang i kanmah a kan do ko hi," an ti. ²⁶ Bawipa nih Moses cu, "Rili cungah khin na kut hler law Izipt mi hna khi an rangleng le an rangleng mawngtu vialte hna he ti nih phum dih hna seh," a ti. ²⁷ Cucaah Moses nih cun a kut cu rili cungah khan a hler i khua a dei ah khin ti cu amah ningkel bantuk khan a um ṭhan. Ti nih a hun naih cuahmah hna tikah cun Izipt mi cu chuah an i zuam i heh tiah an tli, sihmanhsehlaw Bawipa nih rili chungah cun a thlak dih hna. ²⁸ Ti cu a kir i Israel mi a dawitu vialte hna, rangleng vialte hna le a mawngtu vialte hna le Faro ralkapbu vialte hna kha a phum dih hna, pakhat hmanh an tang lo. ²⁹ Asinain Israel mi tu cu rili chung khan vawlei ro cungin an kal i ti cu an orhlei le an kehlei ah khan vampang bantukin an i chong. ³⁰ Cu ni ah cun Bawipa nih Israel mi cu Izipt mi hna kut chung khan a khamh hna i Israel mi nih Izipt mi cu rilikam i an thih i an rilh liangluang ko kha an hmuh hna. ³¹ Izipt mi hna cungah a liannganmi ṭhawnnak in Bawipa nih rian a ṭuan ti kha an hmuh i Bawipa kha an ṭih; Bawipa cungah khan zumhnak an ngei i a sal Moses cung zongah khan zumhnak an ngei ve.

¹ Khi tikah Moses le Israel mi nih hi hla hin Bawipa cu an thangṭhat: "Bawipa nih lianhngannak in a tei cang, rangtum hna le an cung i aa citmi hna cu rili chungah a paih hna, cucaah Bawipa cu hla in ka thangṭhat lai. ² Bawipa nih a ṭhawngmi le a liannganmi ah a ka ser, amah cu a ka khamhtu kha a si. Amah cu ka Pathian a si i ka thangṭhat lai, ka pupa hna Pathian a si i a lianhngannak cu hla in ka sak lai. ³ Bawipa cu ralkap a si, a min cu Bawipa a si. ⁴ "Faro rangleng hna le ralkapbu cu rili ah a paih hna, a bawi ṭhawng bikbik hna cu Rili Sen chungah an thi. ⁵ Rili thuk nih khan a phum hna, ti ne ah khan lung bantukin an tla. ⁶ Bawipa, na orhlei kut a ṭhawngmi cu khuaruahhar a si; ral pawl kha a den cikcek hna. ⁷ A ṭhawngmi na lianhngannak in na ral cu na tei hna i na thinhunnak cu a alh in a alh i, capawl bangin a kangh dih hna. ⁸ Na thaw in na chem i ti cu an i chong, a luang liomi ti cu vampang bangin a dir; rili thuk cu a ne tiangin a hak. ⁹ Ral nih khan an i thawh i, ’Kan dawi hna lai, kan tlaih hna lai; an chawva cu kan i ṭhen lai i kan duhmi paoh kha kan i lak lai. Kan vainam kha kan i chuah lai i an ngeihmi thil vialte kha kanmah ṭhawnnak thawngin kan chuh hna lai,’ an ti. ¹⁰ Sihmanhsehlaw na thaw voi khat na chuah i rili nih a khuh hna; ṭih a nungmi ti chungah khan suan bantukin an tla. ¹¹ "Bawipa, pathian hna lakah hin ahodah nangmah bantuk a um? Ahodah nangmah bantukin a thiangmi a um hna? Ahodah nangmah bantukin khuaruahharmi thil a tuah khomi a um i a liannganmi thil tuahnak ah ṭih awk a simi a um? ¹² Na orhlei kut kha na samh i vawlei nih a dolh hna. ¹³ Bia na kamhmi hna bantukte khan, na tlanhmi hna cu na hruai hna i na ṭhawnnak in lam na ṭhit hna i na inn thiang na phakpi hna. ¹⁴ Miphun dang nih khan cucu an theih i a ther in an ther; nau nganfah bantuk a simi ṭihnak nih Filistin mi cu a tlaih hna. ¹⁵ Edom bawi hna cu an thin a phang i Moab mi hna lak i an miṭhawng hna cu a ther in an ther; Kanaan ram i a ummi cu an dihlak in an lung a phang. ¹⁶ Ṭihnak le thinphannak kha an cungah a tlung. Na ṭhawnnak a lianhngan ruangah, lung bantukin cang loin an dir, maw Bawipa, na mi hna an lanh dih hlantiang, nangmah na mi hrimhrim an lanh dih hlantiang an dir. ¹⁷ Na mi cu na luhpi hna lai i na tlang cungah khan na phun hna lai, na umnak inn ca i na sermi hmun ah khan na phun hna lai maw Bawipa, nangmah hrimhrim nih na sakmi biakinn ah khan na phun hna lai, maw Bawipa . ¹⁸ Bawipa cu zungzal in zungzal tiang siangpahrang a si lai," an ti. ¹⁹ Faro rangtum hna cu a rangleng le a mawngtu hna he khan rili chungah an lut i Bawipa nih ti cu a kir ṭhan i a khuh dih hna. Sihmanhsehlaw Israel mi cu rili chung khan vawlei ro cungin an kal. ²⁰ Profetnu Miriam, Aaron far nih khan khuang aa lak i nu vialte nih khan a hnu in an zulh i khuang tum pah cun an laam. ²¹ Miriam nih cun hla a sakpi hna i, Bawipa nih lianhngannak in a tei caah Bawipa cu hla in thangṭhat u; rangtum hna le a cung i aa citmi hna kha rili chungah a paih hna," a ti. ²² Moses nih khan Israel mi cu Rili Sen khan a thawhpi hna i Shur ramcar chungah khan an lut. Ramcar chungah cun ni thum an kal i ti zeihmanh an hmu lo. ²³ Cerh Khaa kha an va phan i a ti kha a rak khaat tuk caah an ding kho lo. Cucaah cun a min ah Cerh Khaa tiah an sak. ²⁴ Moses cungah khan an zai i, "Zeidah kan din lai?" an ti. ²⁵ Moses nih Bawipa sinah thla fak piin a cam i Bawipa nih cun thingtan pakhat a hmuhsak i cu thingtan cu ti chungah khan a paih i ti cu a khaat kha a lo. Cuka ah cun Bawipa nih zulh awk phunglam a pek hna i a hnek zong a hneksak hna. ²⁶ Bawipa nan Pathian ka bia kha ṭha tein nan ngaih i a ding ka timi kha nan tuah i ka nawlbia kha nan zulh hna i ka phunglam kha nan tuah hna ahcun, Izipt mi cungah ka tluntermi rai kha nan cungah ka tlunter lai lo. Keimah cu an damtertu hna Bawipa ka si," a ti. ²⁷ Cun Elim kha an va phan i cuka ah cun cerh pahleihnih le ungkung sawm sarih an rak um; cun ti pawngah khan an riak.

¹ Israel mi vialte cu an dihlak khan Elim cun an i thawh i Izipt in an chuah hnu thla hnihnak thla, a ni hleinga ni ah Sin ramcar kha an phan. Sin cu Elim le Sinai kar i a ummi a si. ² Ramcar chungah cun an dihlak in Moses le Aaron cungah khan an zai i, ³ "Bawipa nih Izipt ram ah khan rak kan that lawlaw seh law kan duh deuh hnga. Izipt ram ah khan cun sa um hram ah khan kan ṭhu i kan duh zat in rawl kan ei. Sihmanhsehlaw atu cu hi ramcar chungah hin nan kan chuahpi i rawlṭam in kan thi dih cang lai," an ti. ⁴ Bawipa nih Moses cu, "Nan dihlak caah van in rawl ka surter lai. Ni fate in nan chuahhnawh lai i cu ni ca i aa za dingin nan char lai. Kan cawnpiakmi hna kha nan zul maw zul lo ti cu hi ning hin kan hneksak khawh hna lai. ⁵ Ni ruk ni ah cun voi dang i nan char tawnmi a let hnih in nan char lai i nan chuan lai," a ti. ⁶ Cucaah Moses le Aaron nih Israel mi vialte cu, "Zanlei ah Izipt ram in an chuahpitu hna kha Bawipa a si cu nan hngalh lai i ⁷ zinglei ah Bawipa sunparnak kha nan hmuh lai. Amah cung i nan phunhrannak kha a theih. Asi, nan phunhran kha amah cung i nan phunhran a si, zeicahtiah kannih cu phunhranhnawh awk tlak kan si ṭung lo," an ti hna. ⁸ Cun Moses nih aa thawh i, "Zanlei ah ei awk sa an petu hna le zinglei ah nan duh tawk in ei awk rawl an petu hna cu Bawipa a si lai, zeicahtiah a cung i nan phunnak le nan zainak liangluang kha a theih. Nan kan zaihnawh len ko cu, zaihnawh awk tlak kan si maw? Nan kan zaihnawh cu Bawipa cung i nan zai pei a si cu," a ti hna. ⁹ Moses nih Aaron cu, "Mi zapi kha, ’Bawipa nih nan phunzainak kha a theih caah ra u law Bawipa hmaiah cun ra dir u,’ ti hna," tiah a ti. ¹⁰ Aaron nih mi zapi cu bia a chimh lio hna ah ramcar lei kha an hoih i cu lioah cun khulrang in Bawipa sunparnak cu vandawm in a rung lang. ¹¹ Bawipa nih Moses cu a thawh i, ¹² "Israel mi hna an phunzainak cu ka theih cang, cucaah, ’Pa fa hmelpalh ah ei awk sa nan hmuh lai i zinglei ah nan duh zat in rawl nan hmuh lai. Cun Bawipa cu nan Pathian ka si kha nan hngalh lai, a ti,’ tiah chim hna," a ti. ¹³ Zanlei ah nimte an ra ciammam i an riahnak hmun kha an khat dih, cun zinglei ah an riahnak hmun velchum ah cun dap a um. ¹⁴ Dap kha a ṭian tikah thetse ram vawlei cungah cun zeilo a pan dirdiar tete khi an um, vawlei i a tlami hawhra pan tete bantuk khi an si. ¹⁵ Israel mi nih an hmuh tikah zei a si ti awk kha an hngal lo i pakhat le pakhat cu, "Zeidah a si?" tiah an i hal. Annih cu Moses nih khan, "Hihi Bawipa nih nan ei awk i an pekmi hna rawl a si. ¹⁶ Bawipa nih, nan i zat awk tawk cio in nan char lai, pakhat caah omer pakhat tluk cio in nan char lai. Cun mahle thlam chung i khua a sami dihlak ca cio khan char a si lai, a ti," tiah a chimh hna. ¹⁷ A chimhning hna cun Israel mi nih an tuah, a cheu nih tam deuh in an char, a cheu nih tlawm deuh in an char. ¹⁸ Asinain an tah tikah tam deuh a charmi kha tam tuk an ngei hlei lo i tlawm deuh a charmi kha tlawm tuk an ngei hlei lo. An charmi kha an ca i aa za ciomi a si. ¹⁹ Moses nih cun, "Ahohmanh nih zinglei tiang nan i chiah lai lo," a ti hna. ²⁰ Asinain a cheu nih cun Moses bia kha an ngai lo i a cheuchum kha a thaizing tiang an i chiah. A thaizing ah cun tholung an khat dih i an rawk dih. Moses cu an cungah khan a thin a hung. ²¹ Zing fate in an char hna i anmahle an i zat awk tawk cio khan an char hna, ni a hung linh tikah cun an ti dih. ²² Ni ruk ni ah cun rawl cu, voi dang i an char tawnmi a let hnih in an char, pakhat caah omer pahnih cio ah an char. Israel mi hruaitu vialte hna kha Moses sinah cun an ra i cu kong cu an ra chimh. ²³ Cun Moses nih a thawh hna i, "Bawipa nawl pekmi cu hihi a si: ’Thaizing cu dinh ni, dinh ni zarh, Bawipa sin i pekchanhmi ni a si. Cucaah rawh nan duhmi kha atu ah raw u law chuan nan duhmi kha atu ah chuang u; a taangmi kha ngaan u law zinglei tiang ṭha tein chia u,’ a ti," tiah a chimh hna. ²⁴ Moses nih nawl a pek hna bangin a taangmi cu a thaizing tiang an chiah i a thu lo, a chungah tholung zeihmanh a um lo. ²⁵ Moses nih cun a thawh hna i, "Nihin cu hihi ei u, zeicahtiah nihin cu dinh ni, Bawipa sin i pekchanhmi ni a si i lo lakah rawl zeihmanh nan hmu lai lo. ²⁶ Ni ruk chung nan char hna lai, sihmanhsehlaw ni sarih ni ah cun dinh ni a si caah, zeihmanh a um lai lo," tiah a ti hna. ²⁷ Ni sarih ni ah cun micheu cu rawl char awkah an va kal i asinain zeihmanh an hmu lo. ²⁸ Cu tikah Bawipa nih khan Moses cu a thawh i, "Zei can riamruam dah ka nawlbia le ka phunglam cu zul duh loin nan um lai? ²⁹ Dinh ni an petu hna cu Bawipa ka si kha philh hlah u, dinh ni a si ruangah cun pei ni ruk ni ah ni hnih ca za dingin rawl kan pek hna cu. Nan umnak hmun cio ah nan um awk a si, ahohmanh nan inn in nan chuak lai lo," a ti. ³⁰ Cucaah cu ni ah cun mi cu rian an ṭuan lo. ³¹ Israel mi nih cu rawl cu a min ah manna an sak. Koriander mu bantuk a si, a rang i khuaihliti cawhmi changper bantukin a thlum. ³² Moses nih cun, "Bawipa nih, ’Bawm pakhat chungah sanh u law nan tefa hna chan tiangin chia hna u, cun annih nih Izipt ram in kan chuahpi hna i ramcar chung i nan vah lioah zei rawl in dah kan cawm hna ti kha an hmuh lai,’ a ti," tiah a ti. ³³ Moses nih Aaron kha a thawh i, "Um pakhat in i lak law a chungah manna kha khiat khat in chia, cun na tefa hna hmuh awkah Bawipa hmaiah khan cu um cu na chiah lai," a ti. ³⁴ Bawipa nih Moses a fial bang khan, him tein a um khawh nakhnga, biakamnak kuang hmaiah khan a chiah. ³⁵ Israel mi nih manna cu kum sawm li an ei, mi umnak ram an phak tiang cu manna cu an ei; Kanaan ramri an phak tiang khan manna cu an ei. ³⁶ (Omer pakhat cu efah cheu hra cheu khat a si.)

¹ Israel mibu cu an dihlak in Sin ramcar khan an i thawh i Bawipa nih nawl a pek hna bangin riahhmun pakhat hnu pakhat an i thawn. Refidim ah khan an riak, asinain din awk ti a um lo. ² Moses cu an sik i, "Din awk ti kan pe," an ti. Moses nih annih cu a leh hna i, "Zeicahdah keimah cu nan ka sik? Zeicahdah Bawipa cu hneksak nan del?" a ti hna. ³ Sihmanhsehlaw mi cu an ti a hal tuk i Moses cu an zaihnawh i, "Zeicahdah Izipt ram khan na kan chuahpi? Kanmah he kan fale he kan saṭil he ti haal in thah awkah maw na kan chuahpi?" an ti. ⁴ Moses nih Bawipa sinah khan thla fakpi in a cam i, "Hi mi hna hi zeitindah ka tuah hna lai? Atu hi lung in a cheh zong an ka cheh sual ko lai," a ti. ⁵ Bawipa nih Moses cu a thawh i, "Israel mi hruaitu pawl kha tlawmpal in i sawm hna law zapi hmaiah va kal u. Tiva na tuknak na ṭhiangṭhunh kha i lak law va kal. ⁶ Horeb tlang lungpi cungah khan na hmaiah ka rak dir lai. Lungpi cu na tuk lai i mi zapi din awkah ti a chuak lai," a ti. Moses nih Israel mi hruaitu pawl hmaiah cun cu bantuk cun a tuah. ⁷ Cuka hmun cu "Hneksaknak" ti le "Siknak" tiin a min ah kawh a si; zeicahtiah Israel mi cu Bawipa he khan an i si i, "Bawipa hi kanmah leiah a ṭang maw ṭang lo dah?" ti in an hneksak ruangah khan cuticun min an sak cu a si. ⁸ Amalek mi kha an ra i Israel mi cu Refidim ah khan an ra tuk hna. ⁹ Moses nih Joshua kha a thawh i, "Mi tlawmpal in i hril hna law thaizing ah Amalek mi kha va do hna u. Kei tu cu tlangpar ah khan ka dir lai i Pathian nih a ka pekmi ṭhiangṭhunh kha ka hler lai," a ti. ¹⁰ Moses nih a fial bang khan Joshua cu Amalek mi hna doh awkah khan a kal i Moses, Aaron le Hur cu tlangpar ah khan an kai. ¹¹ Moses nih a ban a hler hna chung paoh cu Israel mi nih khan an tei lengmang hna, sihmanhsehlaw a ṭhumh hna paoh ah cun Amalek mi nih khan an nawr ve tawn hna. ¹² Moses cu a ban tha kha a dit tikah Aaron le Hur nih khan lung pakhat an lak i a cungah cun an ṭhutter i annih nih khattelei veve in an dirkamh i a ban kha an doh hna. Ni a tlak tiang a ban cu an doh hna i ¹³ Joshua nih cun Amalek mi cu a tei dih cikcek hna. ¹⁴ Cun Bawipa nih Moses kha a thawh i, "Hi kong hi philh a si nakhnga lo cauk chungah ṭial tuah, cun Amalek mi kha a philh in philh an si lai, tiah Joshua kha chim," tiah a ti. ¹⁵ Moses nih biakṭheng pakhat a ser i a min ah, "Bawipa cu ka hmelchunhnak puanzar a si," a ti. ¹⁶ Moses nih cun aa thawh i, "Bawipa hmelchunhnak puanzar cu i tlaih u! Bawipa nih Amalek mi cu a zungzal in a doh hna lai," a ti.

¹ Midian ram tlangbawi Jethro, Moses pu nih khan, Moses le Israel mi hna caah Pathian nih a tuahmi vialte le Bawipa nih Izipt ram in a chuahpi hna ning kha a rak theih. ² Cucaah Moses nih a rak tluntermi a nupi Zipporah kha Jethro nih cun a ratpi. ³ Jethro nih Zipporah fapa pahnih Gershom le Eliezer zong kha aa ratpi ve hna. (Moses nih khan, "Ram dang ah khual ka si," a rak ti i cucaah a fapa pakhat kha Gershom a sak. ⁴ Cun, "Ka pa i a Pathian cu a ka bawmtu a si i Faro vainam chungin a ka khamh," a ti fawn i cucaah a min ah a fapa a dang pakhat cu Eliezer a sak.) ⁵ Jethro cu Moses nupi le fapa hna he khan Moseste an riahnak thetse ram chung Bawipa tlang ah khan a ra. ⁶ Moses kha bia a hei cah i, "Na pu keimah le na nupi le na fapa a pahnih cu na sinah kan ra lio," a ti. ⁷ Amah ton awkah khan Moses cu a kal i a hmaiah a kun i a hnamh. Pakhat le pakhat cu an dam dam lo kong kha an i hal i thlam chungah khan an lut. ⁸ Israel mi hna ruangah Izipt mi hna le Faro cungah Bawipa nih a tuahmi vialte kha a chimh dih. Lampi ah harnak an tonmi le Bawipa nih a khamh hnanak zong kha a chimh. ⁹ Jethro nih an cung i Bawipa a ṭhatnak vialte le Izipt mi hna sinin a khamh hnanak kong a theih tikah a lung aa lawm ngaingai. ¹⁰ Aa thawh i, "Izipt mi hna kut chung le Faro kut chungin an khamhtu hna Bawipa cu thangṭhat ko u. Izipt mi kut tang sal cannak i a mi a khamhtu hna Bawipa cu thangṭhat ko u. ¹¹ Atu cu Bawipa hi pathian vialte hna lakah a ngan bik a si tiah ka hngalh; Izipt mi hna nih Israel mi cungah huatnak in rian an ṭuan tikah hi bantukin a tuah caah khan, a ngan bik a si cu ka hngalh," a ti. ¹² Cun Jethro nih cun Pathian caah raithawi awk a hun i phorhmi le khanghthawinak a hun i phorhmi cu an thawi hna i Aaron le Israel mi hruaitu pawl vialte cu Moses pu sinah cun an ra i Pathian hmaika ah rawl kha an ei ṭi hna. ¹³ A thaizing ah cun Moses cu mi zapi biaceih awkah khan a ṭhu i zinglei in zanlei tiang a hmaika ah cun mi kha an um. ¹⁴ Moses pu Jethro nih khan a tuahmi vialte cu a hmuh tikah, "Mi zapi ca i na tuah lengmangmi hi zeidah a si? Mi nih zinglei in zanlei tiang an in dirhnawh tikah, zeicahdah hika ah hin nangmah lawngin na ṭhut?" tiah a ti. ¹⁵ Moses nih cun, "Pathian duhnak kha zeidah a si kan kawlpiak an ka ti caah hitihin ka tuah ko. ¹⁶ Mi pahnih an i sik tikah ka sinah an ra i ahodah a palh, ahodah a palh lo ti kha bia ka thlehpiak hna i Pathian nawl le upadi kha ka chimh hna," tiah a leh. ¹⁷ Cu tikah Jethro nih cun a leh i, "Na tuahmi hi ahmaan lo. ¹⁸ Nangmah zong na ba tuk lai, na sin i a ummi zong an ba tuk lai. Hi rian hi na caah a tam tuk, nangmah lawngin na tuah kho lai lo. ¹⁹ Cucaah ruahnak in cheu tuahning, ka bia cu ngai tuah, Pathian nih in umpi ko seh. Nang na rian cu mi zapi Pathian sin i chuahpi i an i siknak bia a sin i lanh kha a si lai. ²⁰ Cun nawlbia le phunglam kha na cawnpiak hna lai i zeitindah an nun awk a si ti le zeidah an tuah awk a si ti kha na hngalhter hna lai. ²¹ Sihmanhsehlaw thil ti khomi kha na thim hna lai i mi zapi hruaitu ah na chiah hna lai: a thong bu hruaitu le a za bu hruaitu le sawm nga bu hruaitu le pahra bu hruaitu tiin na chiah hna lai. Annih cu Pathian a ṭihmi, bochan awk tlak a simi an si lai, nawhthuh pek khawh lomi an si lai. ²² Annih nih biaceihtu an si tikah zungzal ca in an si lai. Bia har deuhdeuh kha na sinah an chuahpi lai, asinain a hme deuh pawl kha cu anmah nih an ceih lai. Cu nih cun na caah rian kha a fawiter deuh lai i na thilrit kha an in chan lai. ²³ Hi bantukin na tuah ahcun, Bawipa nih nawl an pekning hin na tuah ahcun, na ba tuk lai lo i mi zong kha an bia limpiak in inn ah an ṭin kho lai," a ti. ²⁴ Moses nih Jethro bia cu a ngaih i a chim bantuk khan a tuah. ²⁵ Israel mi dihlak chung khan thil ti kho deuhdeuh pawl kha a thim hna i hruaitu ah khan a chiah hna: a thong pawl hruaitu, a za pawl hruaitu, sawm nga pawl hruaitu, pahra pawl hruaitu, tiin a chiah hna. ²⁶ Mi zapi ca biaceihtu rian kha zungzal ca in an ṭuan. Bia har deuhdeuh kha Moses sinah an chuahpi, sihmanhsehlaw a fawi deuh pawl kha cu anmah nih an ceih. ²⁷ Cun Moses nih a pu cu a kalter i amah ram leiah khan a tlung.

¹ Israel mi nih Izipt ram in an chuah a thla thumnak thla, a ni khat ni ah Sinai thetse ram ramcar kha an phan. ² Refidim khan an chuak i Sinai ramcar kha an phan i Sinai tlang hmaiah khan an riak. ³ Moses cu tlang cungah khan Pathian ton awkah a hung kal. Tlang cung cun Bawipa nih khan a vun auh i, ⁴ "Israel mi cu, ’Izipt mi cungah ka tuahmi thil kha nan hngalh; cun mupi nih a fa kha a thla in a cawi bantukin kan cawi hna i ka sin kan phakpi hna kha nan hngalh fawn. ⁵ Cucaah ka nawlbia kha nan ngaih i ka biakamnak kha nan zulh ahcun, ka mi hrimhrim nan si lai. Vawlei hi a dihlak in ka ta a si, asinain, ka thimmi miphun cu nanmah hi nan si lai. ⁶ Nannih cu tlangbawi bantukin ka rian a ṭuanmi miphun nan si lai i keimah sin i pekchanhmi nan si lai,’ a ti, tiah chim hna. Cucu Israel mi cu na chimh hrimhrim hna lai," a ti. ⁷ Cucaah Moses cu a kal i Israel mi hruaitu pawl kha a pumh hna i Bawipa nih a fialmi vialte kha a chimh hna. ⁸ Cun mi zapi nih khan an dihlak in, "Bawipa nih a chimmi paoh cu kan tuah dih lai," an ti. Mi zapi nih an lehnak kha Moses nih khan Bawipa cu a chimh ṭhan. ⁹ Bawipa nih Moses cu, "Mi zapi nih nangmah he bia kan i ruah kha an theih i nangmah kha an in zumh zungzal nakhnga, na sinah a chahmi khuadawm in ka ra lai," a ti. Mi zapi nih an lehnak kha Moses nih Bawipa cu a chimh. ¹⁰ Bawipa nih Moses cu, "Mi zapi sinah khin va kal law nihin le thaizing biaknak ding caah va timhlamhter hna. An thil kha su hna seh law ¹¹ kiptuh caah i ralring cia hna seh. Cu ni ah cun, Bawipa cu Sinai Tlang cungah ka rung ṭum lai i cuka ah cun mi zapi nih khan an dihlak in an ka hmuh khawh lai. ¹² Mizapi caah khan tlang velchum ah cun ramri na ser lai i, ’Tlang cungah maw kai lai u ci, a hram zong maw tawng lai u ci. Nan tawngh sual ahcun a tawngmi cu thah nan si lai; ¹³ Ahohmanh nih tawngh loin thi lakin lung in cheh nan si lai, asilole thal in kah nan si lai. Mi zong saṭil zong hi ti hin tuah nan si lai; thah nan si hrimhrim ko lai,’ na ti hna lai. Tuuki muko kha tum a si tik lawnglawng ah mi zapi cu tlang cungah an kai kho lai," a ti. ¹⁴ Moses cu tlang cung khan a rung ṭum i mi zapi cu Pathian biaknak caah khan a timhlamhter hna. An thil kha an suk i ¹⁵ Moses nih cun a thawh hna i, "Kiptuh ah cun timh cia tein um u. Ahohmanh nu le pa si hlah u," a ti hna. ¹⁶ Ni thumnak ni zingka ah cun tlang cungah cun khuari le ṭektla a um i khuadawm chahpi kha a um; tuukawng ki muko kha fak piin an tum. Riahhmun i a ummi vialte kha an thin a phang i an ther dih. ¹⁷ Moses nih khan mi zapi cu Pathian ton awkah khan a kalpi hna i tlang hramah cun an dir. ¹⁸ Bawipa cu Sinai Tlang cungah khan mei in a rung ṭum caah Sinai Tlang cu a dihlak in meikhu nih a zelh. Meikhu cu meiphu meikhu bantuk khin a kai hluahmah i mi zapi cu an dihlak in a ther in an ther. ¹⁹ Tuukawng ki muko thawng cu a thang chin lengmang. Moses nih cun bia a chim i Pathian nih khuari in a run leh. ²⁰ Bawipa cu Sinai Tlang par ah cun a rung ṭum. Moses cu tlangpar ah cun hung tuah tiah a run kawh i Moses cu a hung kai. ²¹ Bawipa nih Moses cu a thawh i, "Keimah zoh awkah ahohmanh nih ramri kha an lonh sual nakhnga lo ralrinnak vung pe hna, tampi an thi sual lai. ²² Tlangbawi hmanh keimah pawngah a rami cu an i thianh lai, cu ti a si lo ahcun dan ka tat sual hna lai," a ti. ²³ Moses nih Bawipa cu, " ’Tlang ah khan ramri ser u law cuticun tlang cu tlang zarh ah cang seh,’ tiin ralrinnak na kan pek caah, mi zapi cu an ra kho lai lo," tiah a ti. ²⁴ Bawipa nih Moses cu, "Vung kal law Aaron kha hun i kaipi. Asinain tlangbawi hna le mi zapi hna nih khan ka sin rat awkah ramri kha an lonh hrimhrim lai lo, dan ka tat sual hna lai," a ti. ²⁵ Moses cu a vung kal i mi zapi kha a vung chimh hna.

¹ Pathian nih hi bia vialte hi a chim hna. ² Aa thawh i, "Sal i nan cannak inn chung, Izipt ram chungin an chuahtu hna cu Bawipa nan Pathian hi ka si. ³ "Keimah hlei in pathian dang zeihmanh nan bia lai lo. ⁴ "Vancung i a ummi thil si hna seh, vawlei i a ummi thil si hna seh, ti chung i a ummi thil si hna seh, vawlei tang i a ummi thil si hna seh, cu hna mui he aa lo in siasal zeihmanh nan i ser lai lo. ⁵ Zei bantuk siasal hmanh an si ah an hmaiah nan kun lai lo i nan bia hna lai lo, zeicahtiah keimah hi Bawipa nan Pathian cu ka si i nahchuah a ngeimi Pathian ka si. A ka huatu cungah cun chan thum chan li tiangin an tefa hna cungah khan dantatnak ka tlunter. ⁶ Asinain a ka daw i ka nawlbia a zulmi hna cungah cun chan thong khat tiangin a fekmi ka dawtnak kha ka langhter. ⁷ "Bawipa nan Pathian min cu ningcang loin hmang hlah u, ningcang loin ka min a hmangmi cu dan ka tat hna lai. ⁸ "Sabbath ni kha philh hlah u, Bawipa caah va hmang u. ⁹ Nan rian vialte kha ni ruk chung nan ṭuan lai, ¹⁰ sihmanhsehlaw ni sarih ni cu dinh ni a si i Pathian caah nan hman lai. Cu ni ah cun ahohmanh rian nan ṭuan lai lo, nanmah siseh, nan fale si hna seh, nan sal si hna seh, nan saṭil si hna seh, nan khua chung i a ummi miphun dang si hna seh, ahohmanh rian nan ṭuan lai lo. ¹¹ Ni ruk chungah Bawipa nih van le vawlei le rili le an chung i a ummi thil vialte kha a ser hna i ni sarih ni ah cun aa din. Cucaah cun Bawipa nih dinh ni cu thluachuah a pek i amah ca rian ṭuannak caah a duh. ¹² "Nan nu le nan pa kha upat hna u, cu ti nan tuah ahcun, Bawipa nan Pathian nih an pekmi hna ram ah hin saupi nan um lai. ¹³ "Lai nan nawng lai lo. ¹⁴ "Va cung pa duh siseh, nupi cung nu duh siseh, nan tuah lai lo. ¹⁵ "Nan fir lai lo. ¹⁶ "Nan minung hawi cungah tehte dinglo nan si lai lo. ¹⁷ "Nan innpa inn kha nan mit a thi lai lo. A nupi siseh, a salpa siseh, a salnu siseh, a cawtum siseh, a laa siseh, a ngeihmi thil paohpaoh si hna seh, nan mit a thi lai lo," a ti. ¹⁸ Mi zapi nih khan khuari thawng le tuukawng ki muko aw thawng kha an theih i nimtlau le tlang cung meikhu kha an hmuh hna tikah, a ther in an ther i lamhlat piin an dir. ¹⁹ Moses kha an thawh i, "Nangmah nih bia cu kan chim ko, na chimmi cu kan ngaih ko lai, sihmanhsehlaw Pathian nih a kan chimh ahcun kan thi lai," an ti. ²⁰ Moses nih mi zapi cu, "Nan thinphang hlah u; Pathian a rat cu nanmah hneksak awk le sualnak nan tuah nakhnga lo amah nan a ṭih zungzal nakhnga ca lawngah a si," a ti. ²¹ Sihmanhsehlaw mi zapi cu lamhlatpi ṭhiamṭhiam khan an dir i Moses lawng cu Pathian umnak minmei a nah in a nakmi pawngah khan a va kal. ²² Bawipa nih Moses cu a thawh i, "Israel mi cu, ’Nan sinah vancung in bia ka chim kha nan hmuh cang. ²³ Keimah he biak ṭi awkah, sui in siseh, ngun in siseh pathian nan i ser hna lai lo. ²⁴ Vawlei in biakṭheng pakhat ka caah nan ser lai i cu cungah cun khangh thawinak le hawikomhnak thawinak ca i nan hmanmi nan caw le nan tuu hna kha nan khangh hna lai. Cuka hmun ah nan ka biak lai tiah kan timi hna hmun paoh ah khan nan sinah ka ra lai i thluachuahnak kan pek hna lai. ²⁵ Ka caah biakṭheng cu lung in nan ser a si ahcun, nanmah nih nan remhmi lung in nan ser lai lo, zeicahtiah a remhnak i nan thirkhenh nan hman caah khan, ka ca i hman awkah aa tlak ti lo. ²⁶ Ka biakṭheng ah hleihlak in nan kai lai lo, cu ti nan kai ahcun ka biakṭheng ah cun nan chiaṭha kha nan langhter sual lai,’ a ti, tiah chim hna," a ti.

¹ "Hi phung hi Israel mi na pek hna lai: ² Hebru mi a simi kha sal i na cawk tikah kum ruk chung an rianh lai. A kum sarihnak ah cun amah nih zeihmanh pek hau loin na luatter lai. ³ A rat tikah amah lawngin a rat a si ahcun amah lawngin na kalter lai, asinain a nupi he an si ahcun a nupi he cun na kalter hna lai. ⁴ A bawipa nih khan nupi cu a ṭhitpiak i fanu fapa an ngeih hna ahcun, a nupi le a fale cu a bawipa ta kha an si i a kaltak hna lai, amah lawng cu a chuak lai. ⁵ Sihmanhsehlaw salpa nih khan, ’Ka bawipa cu ka dawt, ka nupi le ka fale zong ka dawt hna, luat ka duh lo,’ a ti ahcun ⁶ a bawipa nih khan Pathian sinah a chuahpi lai; innka ah maw innka tung ah khan maw a chuahpi lai i a hna an vih lai. A thih tiang a sal a si lai. ⁷ "Mipa nih a fanu kha sal ah a zuar ahcun, salpa bantuk khan anih cu luatter a si lai lo. ⁸ A nupi hna lak i pakhat si ve awkah a duhtu a bawipa lung kha a ton lo ahcun, midang kha a tlanhter hna lai; ramdang mi sin i zuarnak cu nawl a ngei lai lo, zeicahtiah cucu a ding lomi thil a si. ⁹ A fapa ṭhitter a duh a si ahcun a fanu bantukin a tuah lai. ¹⁰ Cun nu dang kha a ṭhit ahcun, a ṭhit hmasami kha rawl le hnipuan a rak pek tawnmi zat ṭhiamṭhiam kha a pek lai i hmasa ah a nupi a rak sinak vialte zong kha a pek ṭhiamṭhiam lai. ¹¹ Hi bantukin a cungah a tuah lo a si ahcun a luatter lai i tangka zeihmanh a la lai lo. ¹² "Ahohmanh mi a vel i a thatmi cu amah cu thah a si lai. ¹³ Asinain ruah ciammam si loin a thah sual a si ahcun, nan caah kan chiahpiak laimi hna hmun ah a zaam lai. ¹⁴ Sihmanhsehlaw mi pakhatkhat cu a thin a hun i timh ciammam tein midang pakhat a thah a si ahcun, ka biakṭheng hmanh khan nan hnuh lai i amah cu thah a si lai. ¹⁵ "A nu siseh a pa siseh a velmi cu thah a si lai. ¹⁶ "Ahohmanh mi a firmi cu, a zuar ah siseh, amah kut chung i hmuh a si ah siseh, thah a si lai. ¹⁷ "Ahohmanh a nu siseh, a pa siseh chiat a serhmi cu thah a si lai. ¹⁸ "Mi an i velh tikah, pakhat nih a dang pakhat kha lung in a cumh, asiloah a kut in a thongh, asinain a thih lo ahcun, dantatnak kha a ing lai lo; sihmanhsehlaw lung in cumhmipa kha maw thonghmi kha maw ihkhun ah a kuah a si ahcun, ¹⁹ hnu deuh ah ṭhiangṭhunh he i chawk kho hmanh seh law a cumtu nih khan asiloah a thongtu nih khan, a caan a sunghmi man kha a liam lai i a dam tiang a zohkhenh lai. ²⁰ "Mi pakhatkhat nih a salpa maw a salnu maw fung in a tuk i hmakhatte ah a thih ahcun, cu pa cu dantat a si lai. ²¹ Asinain a sal cu ni khat ni hnih a nun ahcun a bawipa cu dantat a si lai lo. A sal cu a thil a si. ²² "I vuak i velhnak hmun ah, fapawi nu pakhatkhat kha pa pakhatkhat nih a tuk i amah cu a thi lo nain a fa kha a rawk ahcun, a tutu pa kha a tukmi nu i a va nih ka liamh seh a ti zat paoh in dantat a si lai i biaceihtu hna nih cawi seh an timi zat in a cawi lai. ²³ Sihmanhsehlaw a thih ahcun dantatnak cu, nunnak caah nunnak ve, ²⁴ mit caah mit ve, ha caah ha ve, kut caah kut ve, ke caah ke ve, ²⁵ khangh caah khangh ve, hma caah hma ve, tuk caah tuk ve, a si lai. ²⁶ "Mi pakhatkhat nih a salpa maw a salnu maw a tuk i a mit a rawhter ahcun, a mit man ahcun a luatter lai. ²⁷ A ha a thlonghpiak ahcun ha man ahcun a luatter lai. ²⁸ "Cawtum nih nu siseh, pa siseh, a suk i a thih ahcun cawtum cu lung in thi lakin cheh a si lai; a sa kha ei lo a si lai; asinain a ngeitu kha cu dantat a si lai lo; ²⁹ sihmanhsehlaw kha cawtum kha mi suk hmang tawn a rak si i a ngeitu kha theihter a si cang i a ngeitu nih ṭha tein a khumh lo ahcun, nu siseh, pa siseh a suk hna i an thih ahcun, cu cawtum cu lung in thi lakin cheh a si lai i a ngeitu zong thah a si lai. ³⁰ Asinain a thimi nunnak man ah cu zat in si seh, ti a um ahcun, a nunnak khamhnak dingah khan, cu zat in si seh tiin khiahmi cu a liam dih lai. ³¹ Cawtum nih ngakchianu maw ngakchiapa maw a thah hna ahcun hi phung ning ṭhiamṭhiam hin tuah a si lai. ³² Cawtum nih salnu maw salpa maw a thah ahcun a ngeitu nih khan sal bawi cu ngun tangka sawm thum a pek lai i cawtum cu thi lakin lung in cheh a si lai. ³³ "Mi pakhatkhat nih khor kha a chin chin loin a kaltak, asiloah khor cu a cawh i a chin a chinh lo caah a chungah caw siseh laa siseh a tla, ³⁴ cu bantuk thil a um tikah cun saṭil man cu a liam lai. Saṭil man cu a ngeitu kha a pek lai i a thimi saṭil cu amah nih aa lak lai. ³⁵ Pakhat pa cawtum nih pakhat pa cawtum a thah ahcun, cu hna pahnih nih cun a nungmi cawtum kha an zuar lai i a man an i ṭhen lai, a thimi sa zong kha an i ṭhen lai. ³⁶ Asinain kha cawtum kha mi suk a hmang tawn ti theih a si i a ngeitu nih khan ṭha tein a khumh lo ahcun, a man a liam lai i a nungmi cawtum kha a thimi cawtum caah cun a pek lai; a thimi cawtum cu aa lak lai.

¹ "Mi nih cawtum siseh tuu siseh a fir i a thah ahcun, a zuarh zong a zuarh ahcun, cawtum pakhat caah cawtum panga a liam lai i tuu pakhat caah tuu pali a liam lai. ² - ⁴ A liam hrimhrim awk a si lai. Zeihmanh ngeihmi a ngeih lo ahcun, a firmi chamnak ah khan amah cu zuar a si lai. A firmi saṭil kha, cawtum siseh, laa siseh, tuu siseh, a kut chungah a rak nun ko rih ahcun, a let in a liam lai. "Mifir pakhat nih inn a bauh i a bauhnak ah an thah ahcun a thattu cu lainawng a si lo. Asinain ni chuah hnuah a si ahcun lainawng a si ṭhiamṭhiam. ⁵ "Mi pakhatkhat nih a saṭil kha lo lakah siseh mitsur dum chungah siseh a tlonter hna i a thlah sual hna i midang lo kha an ei ahcun, a lo chung thil chuak a ṭha bik in maw asiloah a mitsur dum chung thil chuak a ṭha bik in maw a cham lai. ⁶ "Mei a tlan sual i ram kha a kangh i ponmi rawl siseh, a dir liomi rawl siseh, thlaici tuhmi lo siseh, a kangh ahcun, mei a thawhtertu nih khan a kangmi man cu a liam lai. ⁷ "Mi pakhatkhat nih a dang pakhat kha tangka siseh, thil man sung siseh, a kenter i cu pa inn cun mifir nih an fir ahcun, a firtu cu hmuh khawh a si ahcun a firtu nih cun a let in a liam lai. ⁸ A firtu kha hmuh khawh a si lo ahcun a hawipa thil kha amah nih a la maw la lo ti hngalhnak ah inn ngeitu pa cu Bawipa sinah chuahpi a si lai. ⁹ "Thilri cuhnak kong ah, an i cuhmi cu cawtum siseh, laa siseh, tuu siseh, hnipuan siseh, zei thil a tlaumi paoh zong a si ah, an bia cu Pathian hmaiah chuahpi a si lai. Pathian nih sual a phawtmi nih khan a dang pa kha a let in a rulh lai. ¹⁰ Mi pakhatkhat nih laa siseh, cawtum siseh, tuu siseh, saṭil dang pakhatkhat siseh, mi dang pakhat kha rak ka zohkhenhpiak hna tiah a fial i saṭil cu a thih ahcun, asiloah hma a in ahcun, a si lo ah ral nih an tlaih ahcun, tehte a um lo ahcun ¹¹ Bawipa hmai i chiatsernak nih cu thilri cu amah nih a fir maw fir lo ti kha a khiah lai. A fir lo a si ahcun, a ngeitupa kha a sung lai i a cham a herh lai lo; ¹² sihmanhsehlaw amah nih a fir a si ahcun, a ngeitu kha a let in a cham lai. ¹³ Sa nih a seh a si ahcun a ruak kha tehte caah a chuahpi lai; sa sehmi cu a cham awk a si lai lo. ¹⁴ "Mi pakhatkhat nih mi dang sinin saṭil aa hlan i a ngeitu um lo kar ah hma a ing asiloah a thih ahcun, a hlangtu nih khan saṭil man cu a liam lai. ¹⁵ Asinain a ngeitu kha a um ve ko ahcun, a hlangtu nih khan a liam a herh lai lo. Man in hlanhmi a si ahcun a man kha hlan man nih cun a hluh cang." ¹⁶ "Ham lomi ngaknu kha mi pakhatkhat nih a lem i nu le va an si ahcun, man kha a man lai i a ṭhit lai. ¹⁷ Sihmanhsehlaw ngaknu pa a hna a tlak lo ahcun ngaknu man kha a lemtu nih cun a liam ṭhiamṭhiam lai. ¹⁸ "Hnam ngeimi nu kha nan nunter hna lai lo. ¹⁹ "Saram he nu le pa a simi cu thah an si lai. ²⁰ "Bawipa sinah si loin pathian dang sinah rai a thawimi cu thih awk tlak a si tiah sual phawt a si lai. ²¹ "Nannih zong kha Izipt ram ah khan ramdang mi nan rak si ve caah, ramdangmi kha nan serhsat hna lai lo i nan hrem fawn hna lai lo. ²² Nuhmei le ngakṭah kha zawmtai hna hlah u, ²³ nan zawmhtaih hna ahcun bawmhnak duh ah ka sin i an au tikah ka rak leh hna lai i ²⁴ ka thin a hung lai i raltuknak ah nan thi sual lai. Nan nupile kha nuhmei ah an cang ve ko lai i nan fale kha ngakṭah ah an cang ve ko lai. ²⁵ "Nan lakah khua a sami misifak ka mi hna kha ahohmanh tangka nan cawih hna tikah tangka cawihtu nih an tuah tawn bantukin a karh nan la hna lai lo. ²⁶ Biakamnak caah tiin a puan kha nan lakpiak ahcun nitlak hlanah nan pek ṭhan lai, ²⁷ zeicahtiah cu lawng cu pei khualumnak ding caah i khuhnak a ngeih cu. Cucu nan lakpiak ahcun zeidah aa vorh ti kun lai? Bawmhnak duh ah a ka auh tikah ka leh lai, zeicahtiah kei cu mi zaangfah hmangmi ka si. ²⁸ "Pathian cu nan thangchiat lai lo, nan mi hna hruaitu a simi kha chiat nan serh lai lo. ²⁹ "Rawl nan hmuhmi chungin siseh, chiti le mitsur hang nan hmuhmi chungin siseh, keimah ca thawhlawm pek kha duh loin um hlah u. "Nan fapa nan hrin hmasa bikmi hna kha nan ka pek lai. ³⁰ Cun nan caw fater hna le nan tuu fater hna zong kha nan ka pek lai; fater a simi cu pa a si ahcun a nu sinah ni sarih tiang a um lai i ni riat ni ah ka sinah nan ka pekchanh lai. ³¹ "Nannih cu keimah sin i pekchanhmi nan si lai caah ramlak ah sa nih a sehmi sa kha nan ei lai lo, uico kha nan pek hna lai.

¹ "Ahmaan lomi thawngpang kha mi sinah nan chim chin lai lo. A sualmipa kha ahmaan lomi tehte sinak in va bawm hlah. ² Ṭhat lonak tuah ah an tam deuh ai pat tiin a tam deuh leiah khan va ṭang hlah, cun biaceihnak ah a tam deuh lawmhnak a si paoh ahcun tiin dinnak a khamtu tehte va si hlah. ³ Biaceih tikah misifak cungah duhdanhnak zeihmanh ngei hlah. ⁴ "Na ralpa cawtum siseh, laa siseh, a tlik na hmuh sual ahcun, a sinah khan va hruai hna. ⁵ A laa kha a thil nih a nenh ahcun kaltak hlah, a thil cawi kha va bawm. ⁶ "Nan lak i misifak pakhatkhat kha taza cuai a si ahcun, a bia kha ding tein ceihpiak ko u. ⁷ Ahmaan loin sual i phawtnak kha hrial ko u. A sual lomi kha thih dan pe hlah u, zeicahtiah cu bantuk thil ṭhalo a tuahmi cu keimah nih sual ka phawt hna lai. ⁸ Nawhthuh la hrimhrim hlah u, zeicahtiah nawhthuh nih cun bawi kha an mit a cawtter hna i a sual lomi hna bia kha pakpalawng ah a canter. ⁹ "Ramdang mi kha nan zawmhtaih hna lai lo, nannih zong Izipt ram ah ramdang mi nan rak si caah ramdang mi si cu zei bantuk dah a si ti kha nan hngalh." ¹⁰ "Kum ruk chung nan lo kha nan thlawh hna lai i an chungin a chuakmi kha nan lak hna lai. ¹¹ Sihmanhsehlaw kum sarihnak kum ah cun nan dinhter hna lai i an chungin a chuakmi kha nan la hna lai lo. Cuka i a vuimi cu nan lak i a ummi nan misifak nih i lak hna seh law an nganhmi cu saram nih ei hna seh. Nan mitsur dum le oliv dum zong cu bantuk ṭhiamṭhiam in nan tuah lai. ¹² "Ni ruk chung rian nan ṭuan lai, sihmanhsehlaw ni sarihnak ni ah cun nan ṭuan lai lo, nan cawtum hna le nan laa hna cu i din hna seh, cun nan sal hna le ramdang mi hna zong nih hrimhnak ah hmang hna seh. ¹³ Kan chimhmi hna hi ṭha tein ngai u. Nannih nih pathian dang sinah thla nan cam hrimhrim lai lo, an min hmanh a chim in nan chim lai lo. ¹⁴ "Kum khat ah voi thum lengmang keimah upatnak ah puai nan ngei lai. ¹⁵ Thilnu Phulh Lo Changreu puai kha nan tuah lai; kan chimh cang hna bantuk khan, Abib thla chung i ni khiahmi ni sarih chung kha thilnu phulh lo changreu nan ei lai, zeicahtiah cu thla cu Izipt ram in nan chuah thla kha a si. Ahohmanh ka hmaiah kut put ngei loin nan chuak lai lo. ¹⁶ Rawl Ṭuan Puai timi kha nan tuah fawn lai; cu puai cu nan lo chung i nan cinthlakmi rawl a theipar hmasa bik an zat caan ah khan a si lai. Kum dongh ah Thingthei Lawh Puai kha nan tuah lai, cu puai cu nan mitsur dum le nan thingthei dum in thingthei nan lawh hna caan ah khan a si lai. ¹⁷ Kum khat ah voi thum lengmang nanmah lak i pa paohpaoh cu keimah Bawipa hmaiah nan chuak lai. ¹⁸ "Raithawinak nan ka pekchanh tikah thilnu phulhmi changreu kha nan hmang lai lo. Ka puai ca i hmanmi sa cu an thau kha a thaizing tiang nan taanter hna lai lo. ¹⁹ "Rawl nan ṭuan hmasa bikmi chung i a ṭha bikbik kha Bawipa nan Pathian inn chungah nan rak put lai. "Tuufa kha a nu hnuk in nan chuang lai lo. ²⁰ "Lampi i nanmah an huphengtu hna le ka timhmi ram i an luhpitu hna ah vancungmi pakhat ka thlah lai. ²¹ Amah chimmi kha ngai u law a chimmi kha zul u. Amah cu keimah min in rian a ṭuanmi a si caah rak doh hlah u; cu bantuk palhnak cu an ngaithiam kho hna lai lo. ²² Asinain amah bia kha nan ngaih i ka chimmi vialte kha nan tuah ahcun, nan ral kha keimah nih kan dohpiak hna lai i an dotu hna a dohtu kha ka si lai. ²³ Ka vancungmi kha nan hmaiah a kal lai i Amor mi le Hit mi le Periz mi le Kanaan mi le Hiv mi le Jebus mi hna an umnak ram ah khan kan kalpi hna lai i annih cu ka hrawh dih hna lai. ²⁴ An pathian kha nan bia hna lai lo i an hmai zongah nan kun fawn lai lo, kha mi hna nih an tuahmi kha nan tuah ve lai lo, an pathian cu nan hrawh dih cikcek hna lai i an lung zarh vialte cu nan den dih cikcek hna lai. ²⁵ Bawipa nan Pathian lawng kha nan biak lai i ti le rawl in thluachuahnak kan pek hna lai i nan dam lonak vialte kha kan lakpiak hna lai. ²⁶ Nan ram chungah ahohmanh nau rawk nan um lai lo i fa ngei loin a ummi nan um lai lo, chan sau pipi kan nunter hna lai. ²⁷ "Nanmah an dotu hna nih khan keimah cu an ka ṭih lai; nanmah an tutu hna kha an cungah tuainak ka tlunter lai i nan ral vialte nih khan an hnulei an in chit hna lai i an in zamtak hna lai. ²⁸ Ka ṭihnunnak kha nan hmaiah ka kalter lai i Hiv mi le Kanaan mi le Hit mi kha a rak dawi dih hna lai. ²⁹ Kum khat chungah cun ka dawi dih hna lai lo, zeicahtiah ram kha a lawng sual hnga. ³⁰ Fa tam deuh nan ngeih i ram kha nan lak khawh tiang, tlawm tete, tlawm tete in ka ṭhawl lengmang hna lai. ³¹ Nan ramri cu Rili Sen in Mediterranean Rili tiang, thetse ram in Zufrates Tiva tiang a si lai. Ram chung i a ummi hna tei khawhnak ṭhawnnak kan pek hna lai i annih cu nan dawi dih hna lai. ³² Anmah he biatlaknak zeihmanh nan tuah lai lo, an pathian hna he zong biatlaknak zeihmanh nan tuah lai lo. ³³ Nan ram chungah cun an um lai lo, ka cungah an in sualter sual hna hnga. An pathian kha nan biak hna ahcun cu nih cun nanmah rawhnak kha a chuahter lai," a ti.

¹ Bawipa nih khan Moses cu a rak thawh i, "Tlang cungah khan Aaron le Nadab le Abihu le Israel mi hruaitu hna sawm sarih he khan nan ra lai i hla nawn in keimah biak ah nan kun lai. ² Moses lawnglawng ka pawngah cun na ra lai; a dang kha cu lamnai ah an ra lai lo i mi zapi kha na sinah cun an ra lai lo," tiah a ti. ³ Moses kha a va kal i mi zapi cu Bawipa nawlbia le phunglam vialte kha a va chimh hna. Mi zapi nih khan, "Bawipa nih a chimmi vialte cu kan tuah dih lai," an ti. ⁴ Moses nih Bawipa nawlbia vialte cu a ṭial hna. A thaizing zingkate ah tlang hram ah cun biakṭheng pakhat a ser i lungphun hleihnih, Israel miphun hleihnih caah khan a phun. ⁵ Cun Israel mi tlangval kha a thlah hna i khangh thawinak kha an tuah i hawikomhnak thawinak caah Bawipa kha cawtum an thahpiak. ⁶ Cawtum thi a hnarcheu kha Moses nih kheng chungah a chiah i a hnarcheu bak kha biakṭheng cungah a theh. ⁷ Cun biakamnak cauk kha aa lak i mi zapi cu aw thangpi in a relpiak hna i annih nih, "Bawipa nih nawl a kan pekmi vialte cu kan tuah dih lai; amah nawl cu kan zulh lai," an ti. ⁸ Cun Moses nih kheng chung thi kha aa lak i mi zapi cu a theh hna. Aa thawh i, "Bawipa nih hi nawlbia vialte hi an pek hna tikah nanmah he a sermi biakamnak a fehtertu cu hi thisen hi a si," a ti. ⁹ Moses, Aaron, Nadab, Abihu le Israel mi hruaitu sawm sarih kha tlang cungah cun an kai i ¹⁰ Israel mi Pathian kha an hmuh. A ke toiah khin safaiar lungvar dum an phahmi ṭuang bantuk a um i cu ṭuang cu van bantuk khin a ceu. ¹¹ Israel mi hruaitu pawl kha harnak zeihmanh a pe hna lo; Pathian kha an hmuh i an ei i an ding. ¹² Bawipa nih Moses cu a thawh i, "Ka sinah tlang cungah hung kai law hung um. Ka mi hna cawnpiaknak caah ka timi ka nawlbia le ka phunglam ka ṭialnak lungtlap hna kha kan pek lai," a ti. ¹³ Moses cu a sal Joshua he khan an i tim i Pathian tlang ah cun an hung kai. ¹⁴ Moses nih hruaitu pawl kha a thawh hna i, "Kan ra kir hlantiang hika ah hin rak kan hngak u. Aaron le Hur nih an in umpi ko hna i bia a ngeimi paoh cu anmah nih khan rak in ceihpiak hna seh," a ti hna. ¹⁵ Moses cu tlang cungah cun a hung kal i minmei nih khan tlang cu a rak zelh. ¹⁶ Sinai Tlang cungah khan Bawipa sunparnak cu a rung ṭum i minmei nih khan ni ruk chung a khuh. Ni sarihnak ni ah minmei chung cun Bawipa nih Moses kha a auh. ¹⁷ (Israel mi nih cun Bawipa sunparnak cu tlang cung i a kangmi mei in an hmuh.) ¹⁸ Moses cu minmei chungah khan a lut i tlang cungah cun a kai. Cuka ah cun ni sawm li le zan sawm li a um.

¹ Bawipa nih Moses cu a thawh i, ² "Israel mi cu va chim hna law keimah caah thawhlawm tho hna seh. Ahohmanh an si ah thawhlawm pek a ka duhmi cu an thawhlawm kha na cohlanpiak hna lai. ³ Na cohlan awk hnga thawhlawm cu hihi an si lai: sui, ngun, dar, ⁴ tuuhmul a sen, a eng, a dum, la hmangṭhia, meheh hmul in sermi puan, ⁵ tuukawng phaw si sen buhmi, saphaw ṭha phun, anri thing, ⁶ mei inn ca sathau, thuh awk chiti he cawhmi zihmui, khangh awk sa he cawh awk zihmui, ⁷ karnelian lungvar le tlangbawi ngan angki thiang le ṭang benh i hman awk lungvar. ⁸ Biakinn pakhat an ka serpiak lai i cuticun an lakah ka um lai. ⁹ Ka umnak le a chung thilri vialte hna cu kan hmuhsak laimi pungsan ning in na ser hna lai. ¹⁰ "Anri thing in kuang pakhat nan ser lai i a tung lehhmah sawm li le panga, a vang lehhmah kul le pasarih, a san lehhmah kul le pasarih a si lai. ¹¹ A chunglei he a lenglei he sui thiang in nan tuam lai i a velchum in sui in a tlangkawm nan ser lai. ¹² A bing pali sui in nan ser lai i cu a bing cu a ke ah khan nan thlaih hna lai, kap khat ah pahnih lengmang in nan thlaih hna lai. ¹³ Anri thing in zawnhnak lang nan ser hna lai i sui in nan tuam hna lai. ¹⁴ Cu lang cu a kap veve i a ummi a bing chung khan nan hrolh hna lai i cuticun kuang cu nan zawnh lai. ¹⁵ Lang cu a bing chungah khan nan hrolh zungzal hna lai, nan phawi hna lai lo. ¹⁶ Kuang chungah cun kan pek laimi lungtlap pahnih, biakamnak hngalhter ṭhantu, kha na chiah hna lai. ¹⁷ "A chin kha sui thiang in na ser lai i lehhmah sawm li le panga a sau lai i kul le pasarih a kau lai. ¹⁸ A chin a par veve caah cun a den in denmi sui in cherubim pahnih na ser hna lai i ¹⁹ khattelei dongh ah pakhat, khattelei dongh ah pakhat na chiah hna lai. A chin he i seng citcet tein na ser hna lai. ²⁰ Kuang chin kha an ven khawh nakhnga, cherubim nih khan an cunglei veve ah an thla kha an samh veve lai; hmaitonh in an um lai i kuang chin kha an zoh veve lai. ²¹ A chin cu kuang cungah cun na chiah lai i kuang chungah cun biakamnak hngalhter ṭhantu lungtlap pahnih kan pek laimi kha na chiah hna lai. ²² Cuka ah cun kan ton lai; Israel mi hna caah ka timi ka nawlbia vialte cu kuang chin cung le biakamnak kuang cung i a ummi cherubim pahnih hna karlak cun kan pek tawn lai. ²³ "Anri thing in cabuai pakhat na ser lai i a sau lehhmah sawm thum le paruk, a kauh lehhmah hleiriat, a san lehhmah kul le pasarih a si lai. ²⁴ Sui thiang in na tuam lai i a velchum in a tlangkawm kha sui in na ser lai. ²⁵ A velchum in a tlangpang kha lehhmah pali kau in na ser lai i a tlangkawm cu sui in na ser lai. ²⁶ A putnak ding a bing pali sui in na ser hna lai i a ke an umnak a kil pali ah khan na thlaih hna lai. ²⁷ Cabuai putnak lang hrolhnak ca i na sermi a bing hna cu a tlang pawng ah khan na thlaih hna lai. ²⁸ Lang cu anri thing in na ser hna lai i sui in na tuam hna lai. ²⁹ Cun dinmi thawinak caah khan pakan le hrai le than-um le kanto kha na ser hna lai. An dihlak in sui thiang in na ser hna lai. ³⁰ Cun ka hmaika cabuai ah khan ka sin i pekchanhmi changreu kha hun zungzal a si lai. ³¹ "Mei vannak tung pakhat sui thiang in na ser lai. A ke le a tung kha denmi sui in na ser hna lai; cun a ṭamhnak pangpar hna le pangpar kuhkulul tete hna le pangpar sarh tete hna cu, a tungpi he cun i seng cikcek tein na ser hna lai. ³² Kam khat khan nge pathum veve an tho lai. ³³ A nge paruk nih khan ṭamhnak pangpar par thum cio an ngei lai i almon pangpar bantuk an si lai, a kuhkulul tete hna le a sarh tete hna kha an um lai. ³⁴ Meiinn tungpi nih cun ṭamhnak pangpar pali a ngeih hna lai i cu pangpar cu kuhkulul tete le a sarh tete he an si lai. ³⁵ A nge khuah thum hna tang cio ah cun kuhkulul pakhat cio an um lai. ³⁶ Kuhkulul le nge hna cu mei vannak tungpi he cun i seng cikcek tein an um lai, an dihlak in denmi sui hlum khat an si lai. ³⁷ Mei vannak tung caah cun meiinn pasarih na ser hna lai i na chiahning hna cu hmailei ceuh hna seh tiin a si lai. ³⁸ A cengceh le a vutcam ruhnak hna cu sui thiang in na ser hna lai. ³⁹ Mei vannak tung le a thilthuam sernak caah hin sui thiang pawng za khat na hman lai. ⁴⁰ Tlang cung i kan hmuhsakmi pungsan ningte khan ser naa zuam lai.

¹ "Puan biakinn kha, khumlahrual a hmang a ṭhiami le tuuhmul a mui a dum, maimaw le a sen a simi in tahmi puan zun hra in na ser lai. Cun hi puan cungah cun cherubim kha dawh tein nan suai hna lai. ² Puan cu dong kul le dong riat cio an sau lai i dong li cio an kau lai, an dihlak in an i ngaw dih lai. ³ Zun nga kha hmunkhat ah ṭhit an si lai i a dang zun nga kha hmunkhat ah ṭhit an si ve lai. ⁴ An bu a lenglei veve ah khan puan dum in bing nan sih hna lai. ⁵ Bu khatnak a hriang bik puan ah khan bing sawm nga nan sih lai, cun cu hna a hun tlaitu dingah a bu hnihnak a hriang bik puan ah khin bing sawm nga nan sih fawn lai. ⁶ Cun sio sawm nga sui in nan ser lai i cu sio cun an bu hnih khan nan komh hna lai i inn khat ah an cang lai. ⁷ "Puan biakinn cung i a thlam caah meheh hmul in tahmi puan zun hleikhat nan ser lai. ⁸ A sau dong sawm thum, a kauh dong li cio an si lai i an dihlak in an i ngaw dih lai. ⁹ Zun nga kha bu khat ah na ṭhit hna lai i a dang zun ruk kha bu dang ah na ṭhit hna lai. A zun ruknak kha biakinn hmailei ah a bil in aa zar ding a si lai. ¹⁰ Bu khatnak a donghnak puan a tlang ah khan a bing sawm nga in na sih lai i bu dang zong kha a donghnak puan tlang ah khan a bing sawm nga in na sih ve lai. ¹¹ Dar sio sawm nga na ser hna lai i a bing le a bing cu sio cun na sih hna lai i an bu hnih khan thlam pakhat ah an cang lai. ¹² Thlam cung i aa thlaimi puan zun cheu a hleimi nih khan puan biakinn hnulei kha a khuh lai. ¹³ Thlam khuhnak puan a kap kip in dong hnih a hlei ciomi nih khan puan biakinn kha kap kip in huh dingah an i thlai lai. ¹⁴ Thlam khuh caah si sen in buhmi tu phaw le meheh phaw na ser hna lai. ¹⁵ "Cun puan biakinn caah cun anri thing in a tung in a dirmi vampang na ser hna lai. ¹⁶ Tlap khat cu a sau dong hleinga, a kauh dong khat le a cheu cio an si lai. ¹⁷ Tlap khat chungah cun a dang tlap he pehnak ah fung pahnih na ser hna lai i puan biakinn ca vampang vialte cu cu bang cun na ser dih hna lai. ¹⁸ Vampang cu na ser hna tikah thlanglei kam caah pakul an si lai, ¹⁹ cun tung danh ngun in sermi sawm li, tlap khat caah pahnih lengmang in na ser fawn hna lai i cu tung danh cu an i pehnak fung dirnak caah khan an si lai. ²⁰ Cun chaklei kam ca zongah khan vampang kul an ser hna lai i ²¹ tlap khat caah tung danh pahnih lengmang in sawm li na ser hna lai. ²² Puan biakinn hnulei ca, nitlaklei kam caah khan tlap ruk na ser lai i ²³ puan biakinn hnulei kil pahnih caah khan tlap hnih na ser hna lai. ²⁴ Hi inn kil vampang pahnih hna hi an taw in an lu tiang an i peh lai, a kual pakhatnak tiang kha an i peh lai. Inn kil pahnih vampang kha hi bantukin ser an si lai. ²⁵ Cuticun vampang cu pariat an si lai i an kedanh cu hleiruk an si lai, ngun in sermi an si lai, pakhat caah pahnih lengmang an si lai. ²⁶ "Cun anri thing in vampang tlang na ser hna lai, puan biakinn khattelei hrap caah thluan nga, ²⁷ khattelei hrap caah thluan nga, a hnulei nitlaklei kap caah thluan nga an si lai. ²⁸ A lai thluan, vampang an laifang i a kalmi cu khattelei dongh in khattelei dongh tiang a thluan ningin a si lai. ²⁹ Vampang cu sui in na hut hna lai i a tlang hrolhnak ding caah khan sui kual na thlaih hna lai; vampang tlang zong cu sui hutmi an si lai. ³⁰ Cuticun tlang cungah na hmuhmi pungsan ning khan puan biakinn cu na sak lai. ³¹ "Tuuhmul a dum, a sen, senduk le khum la hrual hmang ṭhia in puanzar na tah hna lai. Ṭha tein na ṭamh hna lai i vancungmi mui na cuanter hna lai. ³² Ngun in sermi kedanh pali chungah bunhmi tung pali, bahnak a ngeimi hna cung ah khan na zar hna lai. ³³ Thlam inncung thil bahnak tangah khan puanzar cu na chiah lai i biakamnak hngalhter ṭhantu lungtlap chiahnak kuang kha puanzar hnulei ah cun na chiah lai. Puanzar nih khan hmunthiang le hmunthiang bik kha a dan hna lai. ³⁴ Hmunthiang bik chung i a ummi biakamnak kuang kha a chin na chinh lai. ³⁵ Cabuai kha puanzar lengah na chiah lai; mei vannak tung kha puan biakinn thlanglei kamah na chiah lai i chaklei kam i na chiahmi cabuai he khan hmaitonh in an um lai. ³⁶ Thlam luhnak innka ca zongah tuuhmul a sen, a dum, senduk le khumla hrual hmang ṭhia in innka zar na ser hna lai i ṭha tein na ṭamh hna lai. ³⁷ Hi puanzar caah hin anri thing in tung panga na ser hna lai; sui in na hut hna lai i thil bahnak sui in sermi an ngei cio lai; cun hi tung panga caah hin dar in kedanh panga na ser hna lai.

¹ "Biakṭheng cu anri thing in na ser lai. Tungvangpalh a si lai, a tung pe sarih le a cheu, a vang pe sarih le a cheu a si lai i a san cu pe li le a cheu a si lai. ² A kil pali ah khan a fong na ser hna lai. Biakṭheng he khan an i peh dih lai i an ningpi cun dar in na tuam hna lai. ³ Biakṭheng caah cun hihi na ser hna lai: sathau nih a tlakhnawhmi vutcam ruhnak le laknak ah um le cawhlek le kheng le thirzum le meiṭil ruhnak kheng an si lai. Biakṭheng ca thilthuam vialte cu dar in na ser hna lai. ⁴ Biakṭheng caah cun dar kharvar pakhat in na ser lai. Cu kharvar putnak ah cun a kil cio ah khan dar kual pali na thlaih hna lai i ⁵ cu na thlaihmi cu biakṭheng tlang tangah khan an si lai i biakṭheng a laifang ah khan an um lai. ⁶ Biakṭheng caah cun zawnhnak fung anri thing in na ser hna lai i dar in na tuam hna lai. ⁷ Biakṭheng kha zawnh a si tikah dar kual chungah khan nan hrolh hna lai. ⁸ Biakṭheng cu a chung a kua in na ser lai, thing in na ser lai. Tlang cungah hmuhsak na simi pungsan ning khan na ser lai. ⁹ "Puan biakinn caah tual na ser lai. Thlanglei kam ca puanzar kha khumla hrual hmang ṭhia in sermi a si lai i pe za le sawm nga a sau lai, kam khat ca a si lai. ¹⁰ Cu puanzar cu dar tung pakul ah bah a si lai i cu dar tung pakul cu dar kedanh pakhat cio an ngei lai. Cun tung ah cun bahnak pakhat cio an um lai i ngun in sermi fung pakhat cio an ngei lai. ¹¹ Cu bantuk ṭhiamṭhiam in chaklei kam zongah puanzar pe za le sawm nga a saumi a um lai i cu puanzar cu dar tung pakul cungah bah a si lai i dar tung pakul cu dar kedanh pakul chungah bunh an si lai. Tung ah cun bahnak an um cio lai i ngun in sermi fung zong an um lai. ¹² Nitlaklei tual kulhnak a vang caah khan puanzar pe sawm sarih le pe nga a saumi a um lai i tung pahra le kedanh pahra zong an um lai. ¹³ Nichuahlei ah cun a tual cu pe sawm sarih le panga a kau lai. ¹⁴ Luhnak kutka kam khat ca puanzar cu pe kul le pe khat le a cheu a si lai i tung pathum le kedanh pathum a ngei lai; ¹⁵ khattelei kam ca zongah cun puanzar cu pe kul le pe khat le a cheu a si ṭhiamṭhiam lai i tung pathum le kedanh pathum a ngei ve ṭhiamṭhiam lai. ¹⁶ Luhnak kutka ca puanzar cu pe sawm thum a si lai i tuuhmul a dummi le a senmi le a sendungmi le khumla hmangṭhia a hrual in tahmi a si lai i thawi in ṭamhmi a si lai. Tung danh pali chungah a dirmi tung pali cungah zar a si lai. ¹⁷ Tual velchum i a ummi tung vialte hna cu sui fung in pehtlaihter dih an si lai i an i pehtlaihnak sio cu ngun in sermi an si lai. An dirnak kedanh cu dar in sermi an si lai. ¹⁸ A tual cu pe za le sawm nga a sau lai i pe sawm sarih le pe nga a kau lai i pe sarih le a cheu a sang lai. Puanzar cu khumla hrual hmangṭhia in tahmi an si lai i tung dirnak kedanh cu dar in sermi an si lai. ¹⁹ Puan biakinn chungah hmanmi thilri vialte cu, zei ca i hmanmi an si zongah, dar in sermi an si lai; cun puan biakinn hrennak ca fung vialte le tual ca fung vialte zong cu dar in sermi an si dih lai. ²⁰ "Meiinn caah oliv chiti a ṭha bik phun kha nan rak put lai, tiah Israel mi cu nawl na pek hna lai i meiinn cu nan van thluangthluan lai. ²¹ Aaron le a fapa hna nih khan hi meiinn cu Pathian nih a mi hna a ton hnanak thlam chungah khan an chiah lai, cucu puanzar leng, biakamnak hngalhter ṭhantu lungtlap hna chiahnak biakamnak kuang hmaiah khan a si lai. Cuka ah cun, Pathian hmaika ah khan zanlei in zinglei tiang a alh zungzal lai. Hi nawlbia hi Israel mi le an tefa hna nih an zulh zungzal awk a si lai.

¹ "Na u Aaron le a fapa hna kha Israel mi chungin ka sinah ratpi hna, Aaron le a fapa Nadab, Abihu, Eleazar le Ithamar cu ka tlangbawi rian a ṭuantu ding an si. ² Rumra le dawhnak a ngeih nakhnga na u Aaron caah cun thuam thiang na ser lai. ³ Keimah nih thiamnak ka pekmi hna zungthiam vialte kha Aaron thuam cu serter hna law Aaron nih cun ka tlangbawi rian cu ṭuan seh. ⁴ An ser hngami thuam cu hihi an si lai: ṭangbenh pakhat, angki thiang pakhat, puan pakhat, angki chung nawh ṭamhmi pakhat, lupawng pakhat le taisawm pakhat an si lai. Na u Aaron le a fapa hna nih khan ka tlangbawi rian cu an ṭuan khawh nakhnga thuam cu an serpiak hna lai. ⁵ Zungthiam pawl nih cun cu thilthuam sernak ah cun sui le tuuhmul a senmi, sendung a simi le a dummi le khumla hmangṭhia kha an hman hna lai. ⁶ "Tlangbawi angki cu sui le tuuhmul a dum, sendung le a senmi le khumla hrual thawi in ṭamhmi in an ser lai. ⁷ A kap veve ah khan a hnam pakhat veve an um lai. ⁸ Cu angki he aa pehmi taisawm, dawh tein sermi cu, cu bantukin sermi a si ve lai, sui le tuuhmul a dum, sendung le a sen le khumla hrual hmangṭhia in sermi a si lai. ⁹ Karnelian lungvar pahnih kha na lak hna lai i cu lungvar cungah cun Israel fapa hna an min kha na ṭial hna lai; ¹⁰ lung khat ah min ruk, a dang lung khat ah min ruk na ṭial hna lai i cu na ṭialmi hna cu an chuahning cio khan a si lai, a chuak hmasami kha hmasa deuh ah na ṭial hna lai. ¹¹ Sui sertu hna thiamnak le minkhenhnak sertu hna thiamnak in, lungvar pahnih hna cungah cun Israel fapa hna min cu na ṭial hna lai i lungvar cu sui tlangkawm chungah na ṭhutter lai. ¹² Israel fapale hna kha philh lonak dingah, cu lungvar pahnih cu angki liang i bahnak a hnam ah khan na ṭhit chih hna lai. Cuticun Aaron nih khan an min cu a liang cungah aa chonh zungzal hna lai i Pathian nih a hngalh zungzal hna lai. ¹³ Cun sui tlangkawm pahnih zong na ser hna lai i ¹⁴ hri bantukin hrualmi sui hri pahnih zong na ser fawn hna lai; cu sui hrihrual cu a tlangkawm ah khan na ngerh hna lai. ¹⁵ "Cun biakhiahnak ṭangbenh timi na ser lai; tlangbawi angki bantuk khan ṭha tein ṭamhmi a si lai. Sui le tuuhmul a dummi le sendung a simi le a senmi le khumla a hrual hmang ṭhia in na ser lai. ¹⁶ Tungvangpalh a si lai i a bil in bil awk a si lai, lehhmah pakua a sau lai i lehhmah pakua a kau lai. ¹⁷ A cungah cun lungvar tlar li in na benh hna lai; tlar hmasa bik ah cun rubi le topaz le karnet an si lai; ¹⁸ tlar hnihnak ah emeral, safaiar le daimon an si lai; ¹⁹ tlar thumnak ah jasin, agate le amethist an si lai, ²⁰ tlar linak ah beril, oniks le jasper an si lai. ²¹ Lungvar cu hleihnih an si lai i an cungah khan Israel fapale min kha an i ṭial lai. Lungvar cu Israel fapa hna zat kha an si lai i lung khat cungah khan Israel fapa hna lak i pakhat min paoh kha aa ṭial lai, min khenhnak cung min ṭial bantuk khin ṭial an si lai. ²² Cun ṭangbenh caah cun hri bantukin hrualmi sui ṭhi na ser lai; ²³ cun sui in sermi a kual pahnih na ser hna lai i cu sui kual hna cu ṭang benh cunglei tlang ki veve ah khan na thlaih hna lai. ²⁴ Sui hrihrual pahnih hna cu sui kual pahnih ah khan na khih hna lai. ²⁵ Cun sui hri hrual khattelei par pahnih hna cu sui tlangkawm ah khan na khih hna lai i cuticun tlangbawi angki liangbahnak hnam ah khan a hmailei in na hren lai. ²⁶ Cun sui kual pahnih na ser lai i, ṭangbenh i a tanglei tlang a chunglei kil veve tlangbawi angki chungah khan na thlaih hna lai. ²⁷ Cun sui kual pahnih na ser hna lai i tlangbawi angki liang i bahnak hnam a hmailei tanglei tlang ah khan na thlaih hna lai, a tlang pawngte ah khan na thlaihnak cu a si lai i cucu ṭha tein le dawh tein tahmi taisawm cung deuhte ah khan a si lai. ²⁸ Ṭangbenh kual kha angki kual ah khan la dum in ṭem chih an si lai i cuticun ṭangbenh cu taisawm cungte ah khan fek tein a um lai i a poih lai lo. ²⁹ Aaron kha hmunthiang chung i a luh tikah a ṭang cung i a ummi biakhiahnak ṭangbenh cungah khan Israel fapa hna min kha an um lai i cuticun Bawipa nih annih cu a hngalh zungzal hna lai. ³⁰ Biakhiahnak ṭangbenh chungah cun camcawhnak Urim le Thummim kha na chiah hna lai i Aaron cu Bawipa umnak chung i a vung luh tikah annih cu a ṭang cungah khan an um lai. Bawipa hmaika i a um tikah Aaron nih khan a ṭang cung in, Israel mi hna ca i biakhiahnak thilri kha aa phorh zungzal lai. ³¹ "Cun tlangbawi angki a khuhtu puanfual cu a dihlak in tuuhmul a dummi in na ser lai. ³² A laifang ah khan lu chuahnak ding caah awng pakhat in na ser lai. Cu awng cu tlek hlah seh tiah a tlang na kawm lai, saphaw angki hngawng bantukin a tlang na kawm lai. ³³ Tanglei a tlang ah khan a velchum in tuuhmul a dum le sendung le a senmi in taleti na ser hna lai i an karlak ah sui khi-ing na chiah hna lai; ³⁴ cuticun a velchum in a tanglei tlang ah cun sui khi-ing le taleti kha an um lai. ³⁵ Cu puanfual cu Aaron nih tlangbawi rian a ṭuan tikah khan aa aih lai. Hmunthiang chungah a luh tik le Bawipa umnak chung i a vung kal tik le cuka in a hung chuah tikah khan khi-ing cu an awn lai i cuticun amah cu thihnak a ing lai lo. ³⁶ "Cun sui thiang in ṭamhnak pakhat na ser lai i a cungah, "Bawipa sin pekmi" tiah na ṭial lai. ³⁷ Cucu la dum in lupawng hmailei ah khan na ṭem chih lai. ³⁸ Aaron nih khan cucu a cal ah a chiah lai i Israel mi nih Bawipa an pekchanhmi thawinak ah khan ṭhat lonak a um sual ahcun, cuticun cu ṭhat lonak cu ngaihthiam a si lai. Cucu Aaron nih khan a cal ah aa ponh zungzal awk a si lai, zeicahtiah cu ti a tuahnak thawng cun Bawipa nih an pekchanhmi kha a cohlanpiak hna lai. ³⁹ "Khumla hmangṭhia in angki na tah lai i khumla hmangṭhia in lupawng le taisawm na ser hna lai i dawh tein na ṭamh hna lai. ⁴⁰ "Aaron fapa hna cu rumra ngei hna seh, cun i dawh fawn hna seh tiah angki le luchin le taisawm na serpiak hna lai. ⁴¹ Hi thuam hi na u Aaron le a fapa hna cu na hrukter hna lai. Cun chiti na toih hna lai, na thleidan hna lai i na thianter hna lai, cun ka tlangbawi rian kha an ṭuan lai. ⁴² Cun tawhrolh tawi, an tai in an phei tiang a phanmi kha na serpiak hna lai, lang sual hna hlah seh ti caah a si. ⁴³ Aaron le a fapa hna nih khan pumhnak thlam chung i an luh fate le hmunthiang chung i tlangbawi rian ṭuan awkah biakṭheng an fuh fate, cu tawhrolhtawi cu an i hruk hrimhrim lai, zeicahtiah lang sual hna hlah seh law thah si hna hlah seh ti caah a si. Hihi Aaron le a fapa hna caah a hmunmi phunglam a si.

¹ "Aaron le a fapa hna cu ka tlangbawi rian ṭuan awk i nan thleidan hna tikah hitihin nan tuah lai. Cawtum no pakhat le tuukawng pahnih, do a tlami kha nan lak hna lai i ² thilnu phulh lo changreu le chiti he sermi thilnu cawh lo changhlum le chiti thuhmi thilnu cawh lo changper zong kha nan lak hna lai. Hi chang hi changvut dip in sermi an si lai. ³ Bawm chungah nan khumh hna lai i cawtum le tuukawng kha nan thawi hna tikah a bawm ningin nan ka pek lai. ⁴ "Aaron le a fapa hna kha pumhnak thlam innka ah khan nan ratpi hna lai i khika ah an i kholh lai. ⁵ Cun Aaron cu a puan kha na phoih lai i angki kha na hruk lai, cun tlangbawi angki khuhtu puanfual kha na aihter lai i tlangbawi angki kha na hrukter lai, cun ṭangbenh kha aa benh lai i taisawm kha aa somh lai. ⁶ Lupawng kha na ponh lai i Pathian sin pekmi a si hngalhnak hmelchunhnak thiang kha a lupawng ah cun na ṭem chih lai. ⁷ Cun thuh awk chiti kha na lak lai i a lu ah khan na toih lai i amah cu na thuh lai. ⁸ "A fapale kha na ratpi hna lai, angki kha na aih hna lai i ⁹ taisawm kha na somh hna lai; cun an lu ah luchin kha na chinh hna lai. Zungzal a hmunmi ka nawlbia ningin annih cu tlangbawi an si lai. Aaron le a fapa hna na thianter hna ning cu hi bangin a si lai. ¹⁰ "Cawtum kha pumhnak thlam hmaiah khan na ratpi lai i Aaron le a fapa hna nih khan a lu cungah an kut an chuan lai. ¹¹ Bawipa hmaika ah cun pumhnak thlam innka ah khan cawtum cu na thah lai. ¹² Cawtum thi cu tlawmpal in na kutdong in na tawh lai i biakṭheng ki ah khan na neh hna lai. Cun a taangmi a thi kha cu biakṭheng hram ah khan na thlet lai. ¹³ Cun a chungthin a tuamtu thau kha na lak hna lai, a thin a tuamtu a thau tlang le a kal pahnih cu a tuamtu hna thau he khan na lak hna lai i biakṭheng cungah khan raithawinak caah na khangh hna lai. ¹⁴ Asinain a sa le a phaw le a chungthin cu riahhmun lengah khan na khangh hna lai. Hi thawinak hi sual ngaihthiamnak thawinak a si. ¹⁵ "Tuukawng pakhat kha na lak lai i Aaron le a fapa hna nih khan a lu cungah an kut an chuan lai. ¹⁶ Nan thah lai i a thi cu biakṭheng velchum ah khan na thlet lai. ¹⁷ Tuukawng cu na can dih lai, a chungthin le a ke kha tiin na ṭawl hna lai i cucu a sa dang na canmi hna he a lu cungah khan na chiah hna lai. ¹⁸ Tuukawng cu a ning piin raithawinak caah biakṭheng cungah khan na khangh lai. Hi thawinak hi Bawipa ca i khanghmi thawinak a si; mei in khanghmi thawinak, Bawipa duhmi rimhmui thawinak a si. ¹⁹ "Cun tuukawng a dang pakhat kha na lak lai i Aaron le a fapa hna nih khan a lu cungah an kut an chuan lai. ²⁰ Na thah lai i a thi tlawmpal in na lak lai i Aaron le a fapa hna an orhlei hna cungah khan na neh hna lai, cun an orhlei kutpi le an orhlei kepi zongah khan na neh fawn hna lai. A taangmi thi cu biakṭheng velchum ah khan na thlet lai. ²¹ Biakṭheng cung i a ummi thi le thuhnak chiti kha naa lak hna lai i Aaron le a thilpuan kha na theh hna lai, Aaron fapa hna le an thilpuan zong kha na theh fawn hna lai. Aaron le a fapa hna le an thilthuam hna cu, cuticun thianh an si lai. ²² "Cun tuukawng kha a thau le a thaumi a mei le a chungthin tuamtu thau le a thin tuamtu thau tlang le a kal pahnih a tuamtu hna thau le a orhlei phei kha na lak hna lai, zeicahtiah hi tuukawng hi thleidannak ca i hmanmi tuukawng a si. ²³ Bawipa hmaika i hunmi changreu bawm chung khan changreu hlum khat le chiti cawhmi changreu hlum khat le changper tlap khat in na lak hna lai. ²⁴ Hi rawl vialte hi Aaron le a fapa hna kut chungah khan na chiah hna lai i Bawipa sinah an pekchanh hna lai; an pekchanh hna tikah an kut in an hler hna lai. ²⁵ Cun rawl cu an kut chung khan na lak hna lai i khangh thawinak cungah khan biakṭheng cungah na khangh hna lai. Cu ti na tuah cu Bawipa duhmi rim thaw um seh ti caah a si; cu thawinak cu Bawipa sinah pekmi thawinak mei in khanghmi thawinak a si. ²⁶ "Aaron thleidannak caah hmanmi tuukawng a i kha na lak lai i Bawipa sin pekchanhmi thawinak ah na kut in na hler lai. Cucu na covo a si lai. ²⁷ Aaron le a fapa hna thleidannak caah hmanmi tuukawng chung khan, a i cu thawinak caah na pekchanh lai i tlangbawi hna caah chiahmi a phei zong kha na pekchanh lai. Na pekchanh tikah na kut in na hler hna lai. ²⁸ Zungzal a hmunmi ka nawlbia in hi sakhua hi Aaron le a fapa hna nih Israel mi hna sinin an hmuhmi a si lai. Israel mi nih hawikomhnak thawinak timi chungin an pekmi, tlangbawi hna sakhua i chiahpiakmi cu hihi a si; cu an pekchanhmi cu Bawipa sin i an pekmi an laksawng a si. ²⁹ "Aaron thilthuam thiang hna cu a fapale kha, a thih tikah pek chin an si lai i cu thuam thiang cun a fapale cu chiti toih le thleidan an si lai. ³⁰ Aaron cu tlangbawi a sinak a rian a hun changtu a fapa nih khan, pumhnak thlam chung hmunthiang i rian ṭuan awkah a luh tikah, cu thilthuam cu ni sarih chung aa hruk hna lai. ³¹ "Thleidannak caah hmanmi tuukawng kha na lak lai i a sa cu hmun thiang ah khan na chuan lai. ³² Pumhnak thlam innka ah khan Aaron le a fapa hna nih cun tuukawng sa le bawm chung changreu kha an ei hna lai. ³³ Thleidan an si lio le thianter an si lio caan i sual ngaihthiamnak caah hmanmi thil kha anmah nih cun an ei lai. Cu rawl cu rawl thiang a si caah tlangbawi lawnglawng nih khan an ei lai. ³⁴ Sa a cheu maw changreu a cheu maw zinglei tiang ei dih lomi a um ahcun, cucu khangh an si lai. A thiangmi thil an si caah ei an si lai lo. ³⁵ "Aaron le a fapa hna caah hin kan chimhning bantukte in na tuah lai. An caah thleidannak na tuahmi hi ni sarih chung a si lai. ³⁶ Ni fate in sual thawinak caah cawtum pakhat lengmang na thawi lai, cucu sual ngaihthiamnak caah a si lai. Cu bantukin sual ngaihthiamnak ca thawinak na tuahmi nih cun biakṭheng cung khan sualnak cu a kalpi. Cun biakṭheng cu chiti na thuh lai i na thianter lai. ³⁷ Ni sarih chung kha biakṭheng caah cun sual ngaihthiamnak caah raithawinak na ser lengmang lai i biakṭheng cu na thianter lai. Cun biakṭheng cu a zarh ngaingaimi thil ah a cang lai i a tawngtu paoh kha thil zarh ah an cang ve lai." ³⁸ "Biakṭheng cungah nan thawi awk thil cu hihi an si lai: nifate in, a zungzal in kum khat a timi tuufa pahnih kha nan thawi hna lai. ³⁹ Tuufa pakhat cu zinglei ah nan thawi lai i tuufa pakhat cu zanlei ah nan thawi lai. ⁴⁰ Tuufa pakhatnak sinah cun changvut dip pawng hra, chiti pawng li he cawhmi kha nan thawi chih lai. Cun dinmi thawinak caah mitsur zu pawng li zong nan thawi chih fawn lai. ⁴¹ Tuufa pahnihnak cu zanlei ah nan thawi lai i zinglei i nan thawimi bantuk khan ei awk thawimi le din awk thawinak kha nan pekchanh chih hna lai. Cun cu rim thaw, Bawipa sinah mei in khanghmi thawinak kha a si. ⁴² Hi khangh thawinak hi a zungzal in, nan tefa hna chan vialte tiangin pumhnak thlam innka ah, Bawipa ka hmaika ah, nan tuah zungzal awk a si lai. Hika hmun hi ka mi ka ton hnanak hmun le nan sinah bia ka chimnak hmun a si lai. ⁴³ Hika hmun ah hin ka mi Israel mi cu ka ton hna lai i cuka hmun cu ka sunparnak nih khan hmun zarh ah a canter lai. ⁴⁴ Pumhnak thlam le biakṭheng kha thil zarh ah ka ser hna lai i Aaron le a fapa hna cu ka tlangbawi rian ṭuan awkah ka thianter hna lai. ⁴⁵ Israel mi hna lakah khan khua ka sa lai i keimah cu an Pathian ka si lai. ⁴⁶ Keimah cu Bawipa an Pathian, an sin um awkah Izipt ram in a chuahpitu hna ka si kha an hngalh lai. Keimah cu Bawipa an Pathian ka si.

¹ "Zihmui khanghnak caah biakṭheng pakhat in na ser lai: anri thing in na ser lai. ² Tungvangpalh a si lai i pe khat le a cheu a sau lai i pe khat le a cheu a kau lai i pe thum a sang lai. A ki fong kha a pum he cun an i tlai dih lai. ³ A cunglei le a vampang pali le a ki hna cu sui thiang in na hut hna lai. Cun a velchum in sui hri na menh lai. ⁴ A putnak ding caah sui kual pahnih na ser hna lai i a kap veve a cunglei tlang tangah khan na chiah hna lai, a putnak lang hrolhnak kha an si lai. ⁵ Hi lang cu anri thing in na ser hna lai i sui na hut hna lai. ⁶ Biakamnak kuang a chin he a ummi hmai i aa zarmi puanzar hmaiah khan hi biakṭheng cu na chiah lai. Hika hmun hi kan ton hnanak hmun a si lai. ⁷ Aaron nih meiinn kha a zohkhenh hna tikah hi biakṭheng cungah hin zingfate in zihmui kha a khangh lai. ⁸ Cun zanlei i meiinn a van hna zongah khan a khangh fawn lai. Hi zihmui khangh thawinak hi nan tefa chan vialte tiangin ngol loin nan tuah zungzal lai. ⁹ Hi biakṭheng cungah hin khammi zihmui zeihmanh nan khang lai lo, saram khangh thawinak zeihmanh nan khang lai lo i ei awk thawinak zong zeihmanh nan pechan lai lo. Cun din awk thawinak zong zeihmanh a cungah hin nan thle lai lo. ¹⁰ Kum khat ah voi khat in Aaron nih sual ngaihthiamnak thawinak kha a ki cungah hin a tuah lai. Sualnak ca le sual ngaihthiamnak ca i thawimi saram thisen khan Aaron nih hi biakṭheng caah hin ngaihthiamnak a hmuhpiak lai. Hmailei i a ra ding chan zongah hihi tuah hrimhrim awk a si lai. Hi biakṭheng cu a zarh hringhranmi biakṭheng a si, Bawipa sin i pekchanhmi biakṭheng a si." ¹¹ Bawipa nih Moses cu a thawh i, ¹² "Israel mi kha na rel hna tikah, mi pakhat nih anmahle an nun man cio kha Bawipa an pek awk a si lai, zeicahtiah milu rel lioah an cungah harnak a tlun sual nakhnga lo, cuticun an pek awk a si lai. ¹³ Milu relnak ah aa telmi paoh nih cun, pek awk a simi zat kha an pek hrimhrim awk a si lai i biakinn i hmanmi cuaithlainak in pekmi cu thlai an si lai. Cu an pekmi cu Bawipa sin pekmi laksawng a si lai. ¹⁴ Milu relnak i relmi, cucu kum kul le kum kul in a cunglei a simi paohpaoh nih khan pek awk timi zat, shekel cheu cu Bawipa sinah khan an pek hrimhrim lai. ¹⁵ Nan nunnak man ca Bawipa sinah nan pek tikah, a rummi nih tam deuh in nan pe hlei lai lo; cun sifakmi nih tlawm deuh in nan pe hlei fawn lai lo. ¹⁶ Hi tangka cu Israel mi sin khan na lak lai i pumhnak thlam chung rianṭuannak caah khan na hman lai. Cu tangka nih cun Bawipa kha Israel mi cu a hngalhter ṭhan hna lai i cu tangka cu nan nunnak ca i nan pekmi kha a si," a ti. ¹⁷ Bawipa nih Moses cu a thawh i, ¹⁸ "Kut ṭawlnak caah dar hmaihum pakhat na ser lai i a hunnak zong dar in na ser lai. Pumhnak thlam le biakṭheng karlak ah khan na chiah lai i a chungah ti na chiah lai. ¹⁹ Aaron le a fapa hna nih khan cu ti cu an kut le an ke ṭawlnak ah an hman lai. ²⁰ Mei in khanghmi thawinak kha Bawipa sin i pekchanh awkah pumhnak thlam chung i an luh ah siseh, tlangbawi rian ṭuan in biakṭheng cu an hei fuh ah siseh, tiin an i ṭawl hmasa ahcun thihnak an huat lai lo. ²¹ An thih sual nakhnga lo an kut le an ke kha an i ṭawl awk a si lai. Hi phung hi anmah le an tefa hna nih zungzal in an zulh awk hnga phung a si," a ti. ²² Bawipa nih Moses cu a thawh i, ²³ "Zihmui phun ṭha bik kha la hna: mura zihmui a ti pawng kul, a rim a hmui in a hmuimi nakzik pawng hra, a rim a hmuimi fu pawng hra, ²⁴ kassia zihmui pawng kul, (hi vialte hi biakinn i hmanmi cuaithlainak in tah an si lai), cun oliv chiti pawng hleihnih. ²⁵ Hi vialte hi na cawh hna lai i thuh awkah hmanmi chiti ah na ser hna lai; zihmui sertu nih a sermi zihmui bantuk a si lai i thuhnak ah hmanmi chiti thiang a si lai. ²⁶ Cu chiti cun pumhnak thlam le biakamnak kuang le ²⁷ cabuai le a cung thilri vialte le mei vannak tung le a thilri vialte le, zihmui khanghnak caah hmanmi biakṭheng le ²⁸ khangh thawinak caah hmanmi biakṭheng le a thilri vialte le kut ṭawlnak hmaihum le a hunnak kha, na thuh dih hna lai. ²⁹ Cuticun hi thil hi na thianh hna lai i a zarh ngaingaimi thil ah an cang lai; cucaah a tawngmi hna paoh cu thil zarh ah an cang ve lai. ³⁰ Cun Aaron le a fapa hna kha chiti cu na thuh hna lai i ka tlangbawi rian ṭuan awkah thianh an si lai. ³¹ Israel mi cu na thawh hna lai i, ’Hi chiti thiang, thuhnak ca i hmanmi hi nan caah hmailei chanpi tiangin a thiangmi a si lai. ³² Mi sawhsawh kha nan toih hrimhrim hna lai lo i hi chiti he aa lomi chiti dang ser awkah hi bantuk cawhmi zong nan hmang fawn lai lo. Chiti thiang a si i cucaah cun a thiang in nan ruah awk a si lai. ³³ Hi bantuk chiti a sermi siseh, tlangbawi a si lomi thuhnak ca i hi chiti a hmangmi siseh, cu bantuk mi cu a phunhawi sinin thlei an si lai,’ tiah na chimh hna lai," a ti. ³⁴ Bawipa nih Moses cu, "A tanglei zihmui, stakte, onikha, galbunum le frankinsen thiang kha aa zat cio ah la hna law ³⁵ zihmui sertu nih a ser bangin zihmui ser tuah. Cite na thlah lai, a thiangmi le a zarhmi zihmui a si lai. ³⁶ A cheu cu dip tein na rial lai, cun a cheu cu pumhnak thlam chung ummi biakamnak kuang hmaiah khan na chiah lai, cuka hmun cu nangmah kan ton lainak hmun a si lai. Hi zihmui cu a zarh hringhranmi zihmui ah na ruah lai. ³⁷ Nangmah hman awk caah hi zihmui he aa lomi zihmui kha na ser lai lo. Hi zihmui cu Pathian sinah pekchanhmi zihmui thiang ah na ruah lai. ³⁸ Ahohmanh hi bantuk zihmui mah hman awkah aa sermi cu a phunhawi sinin thlei a si lai," a ti.

¹ Bawipa nih Moses cu a thawh i, ² "Judah phun chung mi Hur fapa Uri i fapa Bazalel kha ka thim cang. ³ Thil dawh tein ser khawhnak dingah thiamnak le thil ti khawhnak le hngalhnak a ngeih nakhnga Pathian thlarau in ka khahter cang. ⁴ Cun a thiamnak cu hihi a si lai: pungsan dawh ngaiin ser khawh le sui le ngun le dar in ṭamh khawh le ⁵ lungvar in ṭamh khawh le thing kha dawh tein suai thiam le aa dawhmi thil phun dangdang ser khawh kha an si. ⁶ Cun amah sin i a ṭuan ve dingah cun Dan phun chung mi Ahisamak fapa Oholiab kha ka thim cang fawn. Cun zungthiam dang vialte kha thiamnak phunphun ka pek hna i cucaah ser awk tiah kan chimhmi vialte kha an ser khawh hna lai. ⁷ Cu ser awk tiah kan chimhmi cu, pumhnak thlam, biakamnak kuang, cu kuang a cung chin, pumhnak thlam chung thilri hman awk vialte, ⁸ cabuai le a thilri vialte, sui thiang in sermi mei vannak tung le a thilri vialte, zihmui khanghnak biakṭheng, ⁹ khangh thawinak khanghnak biakṭheng le a thilri vialte, kut ṭawlnak hmaihum le a thilri vialte, ¹⁰ rumra a kai ngaimi thilthuam thiang, Aaron le a fapa han nih tlangbawi rian an ṭuan caan ah an hmanmi, ¹¹ thuhnak chiti le hmunthiang ca zihmui, hi an si. Hi thil vialte hi keimah nih kan chimhningte khan an tuah dih awk a si lai," a ti. ¹² Bawipa nih Moses kha a thawh i, ¹³ "Israel mi cu, ’Kaa dinh ni hi nan ulh hrimhrim lai, zeicahtiah hi ni cu nanmah le keimah, cun nan tefa le keimah karlak ah hmelchunhnak a si i cu hmelchunhnak nih a langhtermi cu Bawipa keimah nih nannih cu ka mi ca hrimhrim i kan sermi hna nan si hi a si. ¹⁴ Cucaah cun dinhnak ni cu nan ca i ni zarh ah ser a si cang caah, nan ulh hrimhrim awk a si. A ul lomi cu thah a si hrimhrim lai. Dinh ni i rian a ṭuanmi paoh cu a phun hawi sinin thlei a si hrimhrim lai. ¹⁵ Ni ruk chung rian nan ṭuan lai, sihmanhsehlaw ni sarih ni cu dinhnak ni, Bawipa ni zarh a si. Hi ni ah rian a ṭuanmi paoh cu thah a si lai. ¹⁶ Israel mi nih dinh ni cu zungzal a hmunmi biakamnak caah nan techin nan fapar tiangin nan ulh lai. ¹⁷ Hi ni cu Israel mi le keimah karlak i zungzal hmunmi hmelchunhnak a si, zeicahtiah Bawipa keimah nih van le vawlei cu ni ruk chungah ka ser hna i ni sarih ni ah cun ka rian cu ka ngol i kaa din,’ a ti, tiah na chimh hna lai," a ti. ¹⁸ Sinai Tlang cungah Bawipa nih Moses cu bia a chimh dih tikah, biakamnak lungtlap pahnih, Pathian hrimhrim nih a kutdong in a nawlbia a ṭialnak lungtlap kha Moses cu a pek.

¹ Moses cu tlang cungah khan saupi a um i a rung ṭum ti lo tikah khan, Israel mi nih cun Aaron kha an pumhhnawh i, "Izipt ram in a kan chuahpitu Moses kha zei a can kan hngal ti lo, cucaah cun a kan hruaitu dingah pathian kan serpiak tuah," an ti. ² Annih cu Aaron nih khan, "Nan nupile le nan fapale hna le nan fanule hna nih an i tonhmi sui tumbul kha va phoih hna u law rak pu hna u," a ti hna. ³ Cucaah mi nih khan an dihlak in an sui tumbul cu an i phoih i Aaron sinah khan an rak put. ⁴ Tumbul cu a lak hna i a tit hna i a thlet i cawfa pakhat ah a ser. "Maw Israel mi hna hihi nan pathian cu a si, Izipt ram in an chuahtertu hna nan pathian cu a si," a ti. ⁵ Cun Aaron cu a thin a phang i sui cawfa hmaiah cun biakṭheng pakhat a ser i mi zapi cu, "Thaizing ah Bawipa upatnak caah puai a um lai," tiah a thanh hna. ⁶ A thaizing zingkate ah cun khangh thawinak sa kha an thawi hna i hawikomhnak thawinak caah saṭil kha an rak put hna. Mi zapi cu ei awk le din awkah an ṭhu i i nuam ngaiin an um. ⁷ Bawipa nih Moses kha a thawh i, "Khulrang in vung ṭum tuah, zeicahtiah Izipt ram in na chuahpimi na mi hna nih khan an cungah ningzahnak an i tlunter cang. ⁸ Nan zulh lai tiah ka timi hna lam cu khulrang in an kaltak i sui cawfa kha an i ser i cucu an biak i raithawinak kha an pek. Annih nih, ’Israel, Izipt ram in a chuahtertu na pathian cu hihi a si,’ an ti," tiah a ti. ⁹ Bawipa nih Moses cu a thawh i, "Hi mi cu ka hngalhmi hna an si, milungṭhawng an si. ¹⁰ Atu cu na ka onh ahcun, ka thinhunnak a alh in a alhmi in ka hrawh dih hna lai. Cun nangmah le na tefa cu miphun ngan ah kan ser hna lai," a ti. ¹¹ Sihmanhsehlaw Moses nih Bawipa a Pathian cu a nawl i, "Maw Bawipa, zeicahdah Izipt ram in na ṭhawnnak le na lianhngannak he na chuahpimi na mi hna cu na thinhunnak in na khangh hna lai? ¹² Zeicahdah Izipt mi nih khan, ’A chuahpi hna kha tinhmi ṭhalo ngei in pei a si hrim kha, tlang cung i va thah hna awk le an dihlak in hloh cikcek duh ah pei a chuahpi ko hna cu,’ ti khawhnak an ngeih lai? A alh in a alhmi na thinhunnak cu i sum ko law na lung cu thleng law hi rawhnak cu na mi hna cungah cun tlunter sawh hlah. ¹³ Na sal Abraham le Isak le Israel kha philh hna hlah law, an sinah na min chalh in chiatser in bia naa kam i, ’Van i a ummi arfi zat khin tefa kan pek hna lai. Kan kamhmi hna ram hi a dihlak in nan tefa kha ka pek hna lai i anmah ta zungzal in a si lai,’ na timi zong kha philh sawh hlah," a ti. ¹⁴ Cucaah Bawipa cu a lung aa thleng i ka tlunter lai a timi thil ṭhalo kha Israel mi cungah cun a tlunter ṭhan lo. ¹⁵ Moses cu aa mer i tlang cung cun a vung ṭum, a kut in biakamnak lungtlap pahnih kha aa put hna i cu lungtlap cu a kap hnih in an i ṭial. ¹⁶ Pathian sermi an si i an cung i aa ṭialmi cu Pathian ṭialmi an si. ¹⁷ Joshua nih mi an au len thawng kha a theih i Moses cu, "Riahhmun ah raldohnak thawng ka theih," tiah a chimh. ¹⁸ Moses nih, "Cu thawng cu teinak hlasak thawng zong a si lo i sungh ruang i ngaihchia in ṭahnak thawng zong a si lo; ka theihmi hi hlasak thawng a si," tiah a ti. ¹⁹ Moses cu riahhmun pawng kha a phak i cawfa le minung a lam len komi a hmuh hna tikah a thin a hung ngaingai. Aa putmi lungtlap kha a hlonh hna i tlang hram ah khan a den hna. ²⁰ An sermi cawfa kha a lak i mei ah a rawh i dip tein a rial i a dip cu ti cungah khan a hlonh i Israel mi cu kha ti kha a dinter hna. ²¹ Aaron cu a thawh i, "Hi mi hna hi na cung i zei an tuah ruangah dah hi bantuk sualnak ṭihnung hi na tuahter hna?" a ti. ²² Aaron nih cun, "Ka cungah na thinhung hlah, bawipa; hi mi hna cu sualnak kan tuah lai an ti cang ahcun zeitluk in dah an lung a ṭhawn cu na hngalh. ²³ An ka thawh i, ’Izipt ram in a kan chuahpitu Moses kha zeitin a um kan hngalh ti lo caah, a kan hruaitu dingah pathian pakhat in kan serpiak,’ an ka ti. ²⁴ Kei nih ka thawh hna i, ’Ahodah sui a ngei?’ ka ti hna i sui hlawn a ngeimi nih khan an hlawn cu an i phuah i an ka pek i kei nih mei chungah ka paih hna i hi cawfa hi a hung chuak ko," tiah a leh. ²⁵ An pawngkam ah ral ṭihnung an um ko nain, Aaron nih khan siasal biaknak leiah a thlahdorh hna caah Israel mi cu an duhduh in an um cio ko ti kha Moses nih a hmuh. ²⁶ Cucaah Moses cu riahhmun kutka ah khan a dir i, "Ahodah Bawipa lei ṭang nan si? Bawipa lei i a ṭangmi cu hika ah hin ra u," tiah a au. Levi mi vialte kha a sinah cun an i pum i ²⁷ annih cu a thawh hna i, "Bawipa Israel Pathian nih, ’Annih nih an vainam kha i lak hna seh law hi kutka hin khi kutka tiang riahhmun chungah hin i chawk hna seh, cun an unau si hna seh, an hawikom si hna seh an innpa si hna seh, that hna seh,’ a ti," tiah a ti. ²⁸ Moses nih a fial hna bang khan Levi mi nih cun an tuah i cu ni ah cun mi thong thum tluk an thah hna. ²⁹ Moses nih Levi mi cu a thawh hna i, "Nihin ah hin Bawipa tlangbawi rian ṭuan awkah nan i thleidang cang; cu nan i thleidannak cu nan fale hna le nan unau hna nan thah hna thawng hin a si; cucaah nannih cu Bawipa nih nihin ah a thluachuahnak an pek hna," a ti. ³⁰ A thaizing ah Moses nih mizapi cu a thawh hna i, "Ṭih a nung ngaingaimi sualnak nan tuah cang. Asinain Bawipa sinah tlang cungah ka hung kal lai i nan sual ngaihthiamnak ding kha ka hung hal lai, nan sualnak ngaihthiamnak cu a hmuh zong maw ka hei hmuh khawh phum," a ti. ³¹ Moses cu Bawipa sinah khan a hung kal ṭhan i, "Hi mi hna nih hin a ṭhalo hringhranmi sualnak an tuah ko cang! An caah sui pathian an i ser. ³² Asinain an sualnak cu ngaithiam ko sawh hna. Cun na ngaihthiam khawh hna lo a si le nangmah nih na ṭialmi cauk chung khan keimah ka min tu kha hlo ko," a ti. ³³ Bawipa nih Moses cu a thawh i, "Ka cauk chungin a min ka hloh ding cu ka cung i a sualmi kha a si ko lai. ³⁴ Atu cu va kal law kan chimhmi hmun leiah khan mi cu va kalpi ko hna. Ka vancungmi nih lam an hruai hna lai kha va philh hlah, asinain an cung i rian ṭuan awkah ka rat tikah cun, an sual ruangah dan ka tat hna lai," a ti. ³⁵ Aaron kha cawfa ser an hnek caah Bawipa nih mi zapi cungah cun rai a tlunter.

¹ Bawipa nih Moses kha a thawh i, "Hi hmun hin Izipt ram i na chuahpimi hna he khan chuak u law, Abraham le Isak le Jakob sinah, ’Hi ram hi nan tefa ka pek hna lai,’ tiah bia ka kammi ram ah khan kal u. ² Nan hmaiah vancungmi pakhat ka thlah lai i Kanaan mi hna le Amor mi hna le Hit mi hna le Periz mi hna le Hiv mi hna le Jebus mi hna kha ka ṭhawl hna lai. ³ A ram a rum i a vawlei a ṭhami ram ah nan kal lai. Asinain keimah nih cun kan kalpi hna lai lo, zeicahtiah milungṭhawng nan si i lampi ah kan thah dih sual hna hnga," a ti. ⁴ Hi thawng chia cu mizapi nih khan an theih tikah an ṭap i ahohmanh nih hlawn an i hruk lo. ⁵ Bawipa nih Moses cu, "Israel mi cu, ’Nannih cu milungṭhawng nan si. Nan sinah tlawmte hmanh ka kal ahcun kan hrawh dih sual hna lai. Cucaah nan hlawn kha i phoih u law cu tikah nan cung i ka tuah khawhmi kha zeidah a si ti kha ka hngalh lai,’ a ti tiah chim hna," a ti. ⁶ Cucaah Horeb tlang ri khan Israel mi nih an hlawn kha an i hruk ti hna lo. ⁷ Moses nih khan thlam cu aa kalpi tawn i riahhmun lengah khan lamhla nawn ah khin a chiah tawn. A min ah "Tonnak Thlam" a ti. Bawipa chawnh a duhmi paoh kha tonnak thlam ah cun an va kal tawn. ⁸ Moses kha cu thlam i a va kal fate mi vialte kha an tho i an thlam kaa cio ah khan an dir i Moses cu thlam chung i a luh hlantiang amah kha an zoh. ⁹ Moses a vung luh tikah khan, minmei tom kha a rung ṭum i thlam kaa ah cun a um i Bawipa nih Moses cu minmei chung cun a chawnh. ¹⁰ Thlam kaa ah mi vialte nih minmei tom cu an hmuh tikah an dir i an thlam kaa cio khan an kun. ¹¹ Minung nih a minung hawi bia a ruah bantukte khin Bawipa nih Moses cu hmaitonh tein bia a ruah. Cu hnuah cun Moses cu riahhmun ah khan a kir tawn. Asinain a sal Joshua, Nun fapa kha cu thlam kha a kaltak lo. ¹² Moses nih Bawipa cu a thawh i, "Hi mi hna hi kha ram ah khan kalpi hna tiah na ka ti taktak, asinain ahodah ka sinah na kalter lai ti kha na ka chim lo. Asinain, ’Nangmah cu fiang tein kan hngalh i na cungah ka lung a tling,’ na ka ti ṭhiamṭhiam fawn. ¹³ Cucaah ka cung i na lung a tlin a si ahcun, naa tinhmi kha ka hngalh khawh nakhnga le na lung kan tlinter khawh nakhnga, naa tinhmi cu ka chim tuah. Cun hi miphun hi nangmah miphun an si zong kha philh fawn hlah," tiah a ti. ¹⁴ Bawipa nih cun a thawh i, "Na sinah keimah ka kal lai i teinak kan pek lai," a ti. ¹⁵ Moses nih cun, "Kan sin i na kal lo dingah cun, hi hmun hin kan thawhter hlah. ¹⁶ A ngaingai ti ahcun, kan sin i na kal lo ahcun, na mi hna le keimah cungah Bawipa cu na lung a si ti kha mi nih zeiti hlei in dah an hngalh khawh lai? Nangmah nih na kan kalpi a si ahcun, na mi hna le keimah cu vawleicung midang vialte nakin na kan dawt khun a si lai," a ti. ¹⁷ Bawipa nih Moses cu, "Na cungah ka lung a tling i nangmah cu ṭha tein kan hngalh caah, na chim bantuk tein ka tuah lai," a ti. ¹⁸ Moses nih cun, "Na sunparnak ka hmuhter tuah," tiah a hal. ¹⁹ Bawipa nih cun, "Kaa dawhnak vialte kha na hmai in ka lanhter duahmah hna lai i na theih hngan hrimhrim ah ka min cu Bawipa a si ti kha ka chim lai. Zaangfah ka duhmi kha ka zaangfah hna lai i vel ngeih ka duhmi kha vel ka ngeih ko hna lai," a ti. ²⁰ Cun Bawipa nih cun aa thawh ṭhan i, "Ka hmai cu na hmu kho lai lo, zeicahtiah ka hmai a hmumi cu ahohmanh an nung kho lo. ²¹ Zohhmanh, ka pawng i a ummi lungpi cungah hin na dir kho lai. ²² Ka sunparnak kha a lanh tikah lungpi chung i a kua pakhat ah kan chiah lai i keimah ka lanh dih tiang ka kut in kan huh lai. ²³ Cun ka kut kha ka lak lai i ka keng kha na hmuh lai, ka hmai cu na hmu kho lai lo," a ti.

¹ Bawipa nih Moses cu a thawh i, "Lungtlap pahnih, hmasa i bantuk, na khuaimi bantuk kha ser ṭhan hna. An cungah cun hmasa lungtlap cung i a ummi bia kha ka ṭial ṭhan hna lai. ² Thaizing ah i tim law Sinai Tlang cungah khan hung kai law a par ah khan hung ka tong tuah. ³ Ahohmanh na sinah ra hna hlah seh; tlang cung khuazeika hmanh ah khan ahohmanh um hna hlah seh; tlang hmaiah cun tuu zong caw zong tlong hna hlah seh," a ti. ⁴ Cucaah Moses nih cun hmasa i bantuk kha lungtlap pahnih cu a ser ṭhan hna i a thaizing zingkate ah Bawipa nih a fial bangin Sinai Tlang cungah cun a kai i lungtlap pahnih cu aa put hna. ⁵ Bawipa cu khuadawm in a rung ṭum i a sinah cun a rung dir i ka min cu Bawipa a si, tiah a ti. ⁶ Bawipa cu a hmaika cun a lan i, "Bawipa cu zaangfahnak le vel ngeihnak in a khatmi Pathian a si, amah cu fawi tein a thin hunter khawh lomi, a fekmi dawtnak tampi mi cungah a langhter i mi cungah zumhawktlak ngaingai a simi Pathian cu a si. ⁷ A biakamnak kha mi thong tampi cungah a hmunhter i palhnak le ṭhat lonak le sualnak kha a ngaihthiam hna; asinain an pale sualnak ruangah an fale le an tule kha a chan thum a chan linak tiang dantat a tlolh lomi a si," tiah a au. ⁸ Moses cu khulrang in a kun i a biak. ⁹ Aa thawh i, "Ka cungah na lung a tlin taktak a si ahcun, kan kalpi ko, tiah kan nawl Bawipa. Hi mi hna hi milungṭhawng an si taktak ko, sihmanhsehlaw kan ṭhat lonak le kan sualnak cu kan ngaithiam law nangmah ta ah kan cohlang ko," a ti. ¹⁰ Bawipa nih cun aa thawh i, "Nanmah he biakamnak ka ser lai. Nan mi hna dihlak hmaiah, vawleicung khuazeihmanh ah le miphun aho lak hmanh ah tuah bal lomi khuaruahharnak kha ka tuah hna lai. Na sin i a ummi vialte nih khan Bawipa nih zeidah ka tuah khawh ti kha an hmuh lai, zeicahtiah nangmah caah thil lianngan ka tuah hna lai. ¹¹ Nihin ah kan pek hna laimi nawlbia hi zul hna u. Nan hmai in Amor mi le Kanaan mi le Hit mi le Periz mi le Hiv mi le Jebus mi kha ka ṭhawl hna lai. ¹² Nan va luh lainak ram chung i a ummi miphun hna he khan biakamnak zeihmanh tuah hlah u, zeicahtiah cu bantukin nan tuah ahcun nan tuahmi biakamnak nih cun rawhnak an phakter hna lai. ¹³ An biakṭheng le an lung zarh le an thing zarh kha nan hrawh, nan khuai, nan hau dih hna lai. ¹⁴ "Nannih nih pathian dang zeihmanh nan bia hna lai lo, zeicahtiah Bawipa cu ka min ah "Nahchuak" ka si i Pathian nahchuak ka si. ¹⁵ Ram chungmi hna he khan hnatlaknak zeihmanh nan tuah lai lo, zeicahtiah an pathian an biak hnanak ah khan hlawhhlangnu bantukin an um i an pathian hna sinah raithawinak an tuah tikah an in sawm hna lai i an raithawinak sa kha nan va ei sual lai. ¹⁶ An fanule kha nan fapale nupi ah nan ṭhit sual hna lai i hi ramdang mi nu hna nih hin an pathian an biak hna tikah hlawhhlangnu bantukin um hna lai fawh kaw nan fapale kha keimah cungah zumhawktlak loin an umter hna lai i an pathian tu kha an biakter sual hna lai. ¹⁷ "Nanmah caah thletmi pathian nan ser lai lo. ¹⁸ "Thilnu Phulh Lo Changreu Puai kha nan tuah lai; Abib thla chungah khan nan tuah lai, kan fial hna bantukin thilnu telh lo changreu kha ni sarih chung nan ei lai; zeicahtiah Abib thla kha Izipt ram in nan chuah thla a si. ¹⁹ "Hrin hmasa bikmi fapa hna le saṭil zong nih an hrin hmasa bikmi hna cu keimah ta an si: fapa hrin hmasa bikmi hna paohpaoh le nan caw le nan saṭil run nih an hrin hmasa bikmi hna paohpaoh cu keimah ta an si. ²⁰ Asinain hrin hmasa bik laa paohpaoh cu tuu in nan tlanh hna lai; nan tlanh hna lo ahcun an hngawng nan khiah hna lai. Hrin hmasa bik fapa paohpaoh kha nan tlanh hna lai. Ka hmaiah ahohmanh pekchanhmi thil um loin nan chuak lai lo. ²¹ "Ni ruk chung rian nan ṭuan lai, sihmanhsehlaw ni sarih ni ah cun nan ṭuan lai lo, leithuan caan le rawl ṭuan caan hmanh ah ni sarih ni ah cun rian nan ṭuan lai lo. ²² "Cun Zarh Puai le Thingthei Lawh Puai kha kum dongh ah nan tuah lai. ²³ "Nan lak i pa vialte cu kum khat ah voi thum lengmang Bawipa Pathian Israel Pathian ka hmaiah nan chuak lai. ²⁴ Nan hmai in miphun dang kha ka ṭhawl hna i nan ram kha ka kauhter hnuah cun, Bawipa nan Pathian ka hmai i chuah awkah kum khat ah voi thum lengmang nan rat tikah hin, hi caan ah hin nan ram cu ahohmanh nih tei an i zuam lai lo. ²⁵ "Raithawinak caah saram nan ka pek tikah thilnu phulhmi changreu nan hmang lai lo. Lanhtak Puai i nan thahmi sa kha a thaizing tiang zeihmanh nan i chiah lai lo. ²⁶ "Nan lo chungin a chuakmi theitlai hmasa bik lak i a ṭha bik kha Bawipa inn ah nan rak put lai. "Tuufa cu a nu hnuk in nan chuang lai lo," a ti. ²⁷ Bawipa nih Moses cu, "Hi bia hi nangmah le Israel mi hna he biakamnak ka sernak bia an si caah ṭial hna," a ti. ²⁸ Moses cu Bawipa sinah khan ni sawm li le zan sawm li a um i zeihmanh a ding lo i a ei lo. Lungtlap cungah khan biakamnak bia cu a ṭial hna — nawlbia pahra cu. ²⁹ Moses cu Sinai Tlang cungin biakamnak lungtlap pahnih he a rung ṭum ah khan, Bawipa he kan i chawnh caah ka hmai cu a ceu ti kha a hngal lo. ³⁰ Aaron le mi vialte nih khan Moses cu an rak zoh i a hmai a ceu kha an hmuh tikah an naih ngam lo. ³¹ Sihmanhsehlaw Moses nih khan a auh hna i Aaron le mi zapi hruaitu vialte kha a sinah cun an va kal i Moses nih cun bia a rak ruah hna. ³² Cu hnuah cun Israel mi vialte cu a pawngah khan an ra i Bawipa nih Sinai Tlang cungah a chimhmi nawlbia vialte kha a pek hna. ³³ Moses nih an sin i bia a chimmi cu a dongh tikah a hmai cu puan in aa khuh. ³⁴ Moses cu thlam chungah khan Bawipa he i chawnh awkah Bawipa hmai i a vung luh fate a hmai khuh kha, a chuah ṭhan hlantiang a hun tawn. A hung chuah tikah, na chimh hna lai tiah Bawipa nih a fialmi vialte cu Israel mi kha a chimh hna, ³⁵ a hmai a ceu cu annih nih khan an hmuh. Cun Bawipa he bia i ruah awk i a kal ṭhan hlantiang a hmai cu aa khuh ṭhan tawn.

¹ Moses nih Israel mi vialte cu a pumh hna i, "Hihi Bawipa nih tuah awkah an fialmi hna cu a si: ² ’Ni ruk chung nan rian kha nan ṭuan lai, sihmanhsehlaw ni sarih ni cu nan caah ni zarh a si lai, Bawipa sinah pekmi dinh ni a si. Cu ni i rian a ṭuanmi paoh cu thah a si lai. ³ Dinh ni ah cun nan inn chungah mei hmanh nan kau lai lo,’ a ti," tiah a ti. ⁴ Moses nih Israel mi vialte cu a thawh hna i, "Hihi Bawipa nih tuah hna seh tiah an fialmi hna cu a si: ⁵ Bawipa sinah thawhlawm nan pek lai. Cu bantukin tuah a duhmi nih cun hi thawhlawm hi nan pek lai: sui, ngun, dar, ⁶ tuuhmul a dum, a sendung, a sen; khumla a hmang a ṭhiami, meheh hmul in tahmi puan, ⁷ tuukawng phaw si sen in buhmi, saphaw ṭha, anri thing, ⁸ meiinn ca chiti, thuhnak chiti ca zihmui, a rim a thawmi zihmui, ⁹ karnelian lungvar tlangbawi angki le ṭangbenh i benh awk lungvar," a ti. ¹⁰ "Nan lak i zungthiam paohpaoh kha nan ra lai i Bawipa fialmi vialte kha nan ser hna lai. Cu nan ser ding cu hi hna hi an si: ¹¹ puan biakinn le a cung khuh, a pehnak sio hna le tung hna, a hrenhnak thingthluan hna, a pulan le an dirnak kedanh hna, ¹² thingkuang le a putnak lang hna, thingkuang chin, a phentu puanzar, ¹³ cabuai, a zawnhnak lang le a thilri vialte, Pathian hmai hunmi changreu, ¹⁴ mei vannak ding meiinn tung le a thilri, a meiinn hna le a meiinn hna chiti, ¹⁵ zihmui khanghnak biakṭheng le a zawnhnak lang, thuhnak chiti, a rim a thawmi zihmui, Pathian umnak thlam chung luhnak innka ca puanzar, ¹⁶ khanghthawinak ca biakṭheng, a dar sur le a lang le a thilri hna he, kut ṭawlnak hmaihum le a tohnak, ¹⁷ tual kulhnak ca puanzar le a tung le a kedanh hna, tual luhnak kutka ca puanzar, ¹⁸ Pathian umnak thlam le a tual ca fungkhenh le hri, ¹⁹ tlangbawi nih hmunthiang i rian a ṭuan tikah a hman awk thilpuan, rumra a keng ngaimi; cu thilpuan cu Aaron le a fapa hna nih tlangbawi rian an ṭuan tikah an i aihmi thilpuan thiang kha an si," a ti. ²⁰ Israel mi vialte nih khan Moses cu an kaltak. ²¹ Cu bantukin tuah a duhmi paoh nih khan pumhnak thlam caah Bawipa sinah thawhlawm an rak put, rianṭuannak caah a herhmi thil vialte le puan thiang sernak caah a herhmi thil vialte kha an rak put hna. ²² Nu he pa he an ra; rak put a duhmi paoh nih khan ṭamhnak ṭhim hna le hnatonh hna le kutdonghrolh hna le ṭhi hna le sui hlawn a phunphun kha an rak put hna. Bawipa sin pekmi thawhlawm caah tiin an pekchanhmi sui hlawn kha an rak put cio hna. ²³ Aho paoh nih an ngeihmi cio kha an rak put hna: tuuhmul a dum, a sendung, a sen, khumla hmangṭhia, meheh hmul in tahmi puan, si sen in buhmi tuukawng phaw le saphaw phun ṭha phun kha an rak put cio hna. ²⁴ Ngun le dar a tho khomi nih khan ngun le dar cu Bawipa sinah khan an rak put i innsaknak ca hman awkah anri thing a ngeimi nih khan anri thing cu an rak put hna. ²⁵ Cun nu zungthiam vialte nih khan la dum, la sendung, tuuhmul sen, khumla hmangṭhia, kha an ser hna i an rak put hna. ²⁶ Nu zungthiam paohpaoh nih khan meheh hmul in la an ser. ²⁷ Cun hruaitu pawl nih khan karnelian lungvar, tlangbawi angki le ṭangbenh i benh ding lungvar, ²⁸ meiinn ca zihmui le chiti, thuhnak chiti, le rim thawmi zihmui kha an rak put hna. ²⁹ Bawipa nih Moses sinin nan tuah awk rian a si tiah a chimhmi hna rian ah thawhlawm pek a duhmi Israel mi chung i nu le pa vialte nih cun an thawhlawm cu Bawipa sinah khan an rak put. ³⁰ Moses nih Israel mi cu a thawh hna i, "Bawipa nih Judah phun chung mi Hur fapa Uri fapa Bezalel kha a thim cang. ³¹ Amah cu Bawipa nih Pathian Thlarau in a khahter caah thil dawh a phunphun ser khawhnak thiamnak le thil ti khawhnak le hngalhnak kha a ngei i ³² dawh tein pungsan suai khawhnak le sui le ngun le dar in dawh tein ṭamh thiamnak le ³³ ṭamhnak lungvar at thiamnak le thing dawh tein suai thiamnak le thil dawh a phunphun ser thiamnak kha a ngei. ³⁴ Bezalel le Dan phun chungmi Ahisamak fapa Oholiab cu Bawipa nih an thiamnak kha midang cawnpiak thiamnak a pek hna. ³⁵ Lung ṭialtu hna le pungsan suai thiammi hna le tuuhmul a dum, a sendung, a sen le khumla hmang ṭhia tah a thiammi hna le puantah thiammi hna zungthiamnak kha, thil a phunphun an tuah khawh nakhnga a pek hna. Thil a phunphun kha an tuah khawh i pungsan suai thiam ngaingaimi an si.

¹ "Bazalel le Oholiab le Bawipa nih thiamnak le hngalhnak a pekmi zungthiammi vialte hna, biakinn saknak caah a herhmi thil paohpaoh tuah a thiammi hna nih khan, zeizong vialte cu Bawipa nih a chimning tein an ser awk a si lai," a ti hna. ² Moses nih Bezalel le Oholiab le Bawipa nih thiamnak a pekmi zungthiam pawl vialte, rianṭuan awk caah timhcia in a ummi vialte hna kha a auh hna i rian cu thawk cang u tiah a ti hna. ³ Israel mi nih biakinn saknak caah an thawhmi thawhlawm vialte cu Moses nih khan a pek hna. Israel mi nih khan an thawhlawm cu zingfate in Moses sinah khan an rak put lengmang. ⁴ Biakinn a satu zungthiam pawl nih khan an rian cio cu an kaltak zau i Moses sinah cun an ra i ⁵ "Bawipa nih a kan fialmi rianṭuannak caah mi zapi nih an rak putmi cu a za leng a si cang," an ti. ⁶ Cucaah riahhmun chungah cun Moses nih bia a thanh i, "Biakinn saknak ca thawhlawm kholhmi ah ahohmanh nih, nu nan si ah pa nan si ah, rak tho ti hlah u," a ti. Cuticun mi nih khan thil rak put cu an ngol. ⁷ An rak put cia kha rian a dihlak limnak ding caah a za leng a si cang. ⁸ Rian a ṭuanmi hna lak i zungthiam bikbik pawl nih khan Pathian umnak thlam cu an ser. Puan zun hra in cu biakinn cu an ser i cu puan cu khumlahrual hmangṭhia le tuuhmul dum, sendung le a sen in tahmi an si i an cungah cherubim kha dawh tein an suai hna. ⁹ Puan cu an i ngaw dih i a sau pe sawm li le pe hnih, a kauh pe ruk cio an si. ¹⁰ Puan zun nga cu hmunkhat ah an ṭhit hna i a dang zun nga zong cu hmunkhat ah an ṭhit ve hna. ¹¹ An bu a lenglei bik i a ummi puan tlang ah khan puan dum in hnam an sih hna. ¹² Bu khatnak puan hmasa bik ah khan hnam sawm nga an sih hna i bu hnihnak puan a hmanung bik ah khan, bu khatnak he i rup dingin hnam sawm nga ṭhiamṭhiam an sih fawn hna. ¹³ Sui sio sawm nga an ser hna i cu sui sio cun an bu hnih cun hmunkhat ah an peh hna. Cuticun Pathian umnak thlam cu inn pakhat ah a cang. ¹⁴ Cun meheh hmul in puan zun hleikhat an ser hna i cucu Pathian umnak thlam cung i a ummi thlam kha a si. ¹⁵ Zun khat cu pe sawm li le pe nga cio an sau i pe ruk cio an kau, an dihlak in an i ngaw cio. ¹⁶ Zun nga kha bu khat ah an ṭhit hna i a dang zun ruk kha bu khat ve ah an ṭhit hna. ¹⁷ Bu khatnak puan hmanung bik ah khan a hnam sawm nga an sih hna i a dang bu zongah khan cu bantuk ṭhiamṭhiam cun sawm nga an sih ve hna. ¹⁸ Cu bu hnih pehnak ah cun dar sio sawm nga an ser hna i cuticun thlam khat ah a cang. ¹⁹ Thlam khuhnak cu tuukawng phaw si sen in buhmi in an ser i cu khuhnak a khuh chintu cu saphaw ṭha ngaiin an ser. ²⁰ Pathian umnak thlam caah cun anri thing in vampang an ser hna. ²¹ Vampang cu pe hleinga sau le lehhmah kul le pasarih kau cio an si i ²² pakhat le pakhat pehnak dingah aa rupmi a fong pahnih cio an ngeihter hna. ²³ Thlanglei kam caah vampang kul an ser hna i ²⁴ an kedanh caah ngun in sermi kedanh sawm li an ser hna, tlap khat nih danh hnih cio an co i a fong an ngeihmi cio ah khan an danh hna. ²⁵ Cun thlam chaklei kam caah khan tlap kul an ser hna, ²⁶ tlap khat caah danh hnih lengmang in ngun kedanh sawm li an ser hna. ²⁷ Thlam hnulei, nitlaklei caah khan tlap ruk an ser hna, ²⁸ cun thlam hnulei a kil veve caah khan tlap hnih an ser hna. ²⁹ Hi a kil tlap hna hi a hram in an i peh i a par tiang an i tlai, a kual hmasa bik tiang khan an i tlai. A kil vampang pahnih hna cu, cuticun ser an si. ³⁰ Cucaah vampang pariat le ngun kedanh hleiruk, tlap khat caah pahnih lengmang an si. ³¹ Cun anri thing in thingthluan an ser hna, khattelei kap vampang caah thluan nga, ³² khattelei kam vampang caah thluan nga, nitlaklei kam, a hnulei vampang caah thluan nga an ser hna. ³³ Cun a laifang thingthluan cu khattelei deng in khattelei deng tiang vampang laifang in an khan. ³⁴ Vampang cu sui an hut hna i thingthluan hrolhnak dingah khan sui kual an thlaih hna, sui kual zong cu sui in an hut ve hna. ³⁵ Puanzar cu tuuhmul a dum, sendung le a senmi le khumla hrual hmangṭhia in an ser hna i a cungah cherubim hmanthlak kha dawh tein an suai hna. ³⁶ Puanzar dohnak caah cun anri tung pali an ser hna i sui in an hut hna i sui sio an thlaih hna. Tung an dirnak caah cun ngun kedanh pali an ser hna. ³⁷ Thlam chung luhnak innka caah tuuhmul a dum, sendung le a sen le khumla hrual hmangṭhia in puanzar an ser i dawh tein an ṭamh. ³⁸ Tung panga an ser hna i sio an thlaih cio hna, an lu lei kha le an fung kha sui an hut hna. Tung caah cun dar kedanh panga an ser hna.

¹ Bezalel nih khan biakamnak kuang cu anri thing in a ser; a tung dong hnih le a cheu, a vang dong khat le a cheu a si i a san dong khat le a cheu a si. ² Sui thiang in a chung he a leng he a hut i a velchum in sui in a tlang a kawm. ³ Cun a putnak ding caah sui kual pali a ser hna i a ke pali ah khan a thlaih hna, kam khat ah kual hnih lengmang a thlaih hna. ⁴ Anri thing in lang a ser hna i sui in a hut hna. ⁵ Kuang kap i a ummi kual ah khan a hrolh hna. ⁶ Cun a chin sui thiang in a ser, lehhmah sawm li le panga a sau i lehhmah kul le pasarih a kau. ⁷ A chin a donghnak veve caah cun denmi sui in cherubim pahnih a ser hna, ⁸ kam khat ah pakhat veve in a chiah hna. A chin he cun i pehtlai dih in a ser hna. ⁹ Cherubim vancungmi nih cun an thla kha an cunglei ah an zam i cuticun a chin kha an huh; pakhat le pakhat hmaitonh in an um i kuang chin kha an zoh veve. ¹⁰ Cabuai cu anri thing in a ser, pe thum a sau, pe khat le a cheu a kau i pe hnih le lehmah pathum a sang. ¹¹ Sui thiang in a tuam i a velchum in sui taisawm a somh. ¹² A tlang kha lehhmah pali kau in a ser i a tlang ah cun sui taisawm a somh. ¹³ A zawnhnak dingah sui kual pali a ser hna i a kil pali, a ke umnak ah khan a thlaih hna. ¹⁴ A zawnhnak lang hrolhnak kual cu a tlang pawngah khan a chiah hna. ¹⁵ A lang cu anri thing in a ser hna i sui a hut hna. ¹⁶ Cabuai ca kheng cu sui thiang in a ser hna: din awk thawinak ca hmanmi kheng hna le hrai hna le awi-um hna le khengkuar hna cu sui in a ser hna. ¹⁷ Meiinn tung cu sui thiang in a ser. A hram le a tung cu denmi sui in a ser hna; cun a thuamhnak pangpar a kuhkulul tete hna le a par a sarhmi hna cu a tung he cun i pehtlai dih in a ser hna. ¹⁸ Kam khat in nge pathum veve an tho i an dihlak ah paruk an si. ¹⁹ Cu nge paruk hna nih cun ṭamhnak pangpar pathum cio an ngei i cu pangpar hna cu almon par bantukin sermi an si, a kuhkulul tete le a par a sarhmi an ngei cio. ²⁰ Meiinn tung nih cun ṭamhnak pangpar pali a ngei i cu pangpar hna cu almon par bantukin sermi an si i a kuhkulul tete le a par a samhmi an ngei cio. ²¹ A nge tuah thum hna tang cio ah khan a kuhkulul pakhat cio an um. ²² A kuhkulul hna le a nge hna cu meiinn tung he khan an i peh dih; denmi sui in sa khat ah ser an si dih ko. ²³ Cun meiinn tung caah cun meiinn pasarih a ser hna; cun a cengceh le a vutcam ruhnak cu sui thiang in a ser hna. ²⁴ Meiinn tung le a thilri vialte sernak ah sui thiang pawng za khat a hman. ²⁵ Zihmui khanghnak biakṭheng kha anri thing in a ser. Tungvangpalh a si i pe khat le a cheu a sau i pe khat le a cheu a kau, cun pe thum a sang. A ki cu a pum he cun an i peh dih. ²⁶ A cung, a kap kap li le a ki cu sui in a hut hna i a velchum in sui taisawm a somh. ²⁷ A zawnhnak dingah sui kual pahnih a ser hna i a kap veve ah a tlang tangah khan a putnak ding lang hrolhnak dingah khan a thlaih hna. ²⁸ A lang cu anri thing in a ser hna i sui a hut hna. ²⁹ Thuhnak chiti thiang le zihmui thiang rim thawmi cu zihmui sertu nih a sermi bantukin a ser hna.

¹ Khanghthawinak ca biakṭheng cu anri thing in a ser. Tungvangpalh a si, pe sarih le a cheu a sau i pe sarih le a cheu a kau, cun pe li le a cheu a sang. ² A kil pali ah khan ki pali a bunh hna i cu ki pali hna cu a pum he khan an i peh dih. A dihlak in dar in a tuam. ³ Biakṭheng ca thilri, um, cawhlek, khengkuar, sio le mei zawhnak pakan kha a ser hna. A thilri vialte cu an dihlak in dar in a ser hna. ⁴ Biakṭheng caah cun fingrilh pakhat a ser i cu fingrilh cu dar fingrilh a si. Cu fingrilh cu a tlang tangah khan a chiah i biakṭheng canceo cu a hun phak. ⁵ Cun a zawnhnak kual pali a ser hna i dar fingrilh kil pali ah cun lang hrolhnak ding caah khan a thlaih hna. ⁶ Lang cu anri thing in a ser hna i dar in a tuam hna. ⁷ Cun biakṭheng kap i aa thlaihmi kual ah khan a hrolh hna. Biakṭheng cu thing phel in a ser i a chung cu a kua. ⁸ Kut ṭawlnak dar kheng le a hunnak dar tawdanh cu nu pawl bihnak thlalang in a ser hna, cu nu pawl cu pumhnak thlam luhnak i rian a ṭuanmi kha an si. ⁹ Tual kha a ser. Thlanglei kam ca puanzar cu khumlahrual hmangṭhia in tahmi a si i pe za le sawm nga a sau. ¹⁰ Tung pakul hna le an dirnak kedanh pakul hna cu dar in sermi an si. Cu tung sio hna zong cu dar in sermi an si; cun cu tung nih cun ngun fung an ngei cio. ¹¹ Chaklei kamah puanzar cu pe za le sawm nga a sau i tung pakul nih an doh, cu tung pakul hna cu dar kedanh pakul chungah khan an dir i sio an ngei cio i ngun fung zong an ngei cio. ¹² Nitlaklei kamah puanzar cu pe sawm sarih le pe nga a sau i tung pahra nih an doh, cu tung pahra hna cu dar kedanh pahra chungah khan an dir i sio an ngei cio i ngun fung zong an ngei cio. ¹³ A nichuahlei kam cu pe sawm sarih le pe nga a kau. ¹⁴ A chung i vung luhnak khattelei kamah khan puanzar an um i pe kul le pe hnih le a cheu an kau i tung pathum kedanh chung i a dirmi nih khan an doh hna. ¹⁵ Khattelei kap zongah cun cu bantuk ṭhiamṭhiam cun a um; cucaah tual i vung luhnak kutka ah khan a kap hnih in puanzar pe kul le pe hnih le a cheu a kau i kedanh pathum chungah a dirmi tung pathum nih an dohmi kha an um veve. ¹⁶ Tual velchum i an hmanmi puanzar cu khumla hrual hmang ṭhia in tahmi an si. ¹⁷ Tung kedanh cu dar in an ser hna i tung ca i sio hna le an fung hna le an par khuhnak cu ngun in sermi an si. Tual kulhnak tung vialte cu ngun fung in peh dih an si. ¹⁸ Tual luhnak kutka ca puanzar cu dawh tein ṭamhmi a si i tuuhmul a dum, a sendung le a sen le khumlahrual hmang ṭhia in tahmi an si. Pe sawm thum a sau i pe sarih le a cheu a sang i tual kulhnak puanzar bantuk kha a si. ¹⁹ Dar kedanh pali chungah a dirmi tung pali nih an doh hna. An sio le an par tuamnak le an fung cu ngun in sermi an si. ²⁰ Pathian umnak thlam le a velchum i a ummi a tual khenhnak fung cu dar in sermi an si. ²¹ Biakamnak lungtlap an chiahnak Pathian umnak thlam chung hmanmi thilri cu hihi a si: Cu thilri hna cu Moses nih a fial hna ningin tuahmi an si i tlangbawi Aaron fapa Ithamar kuttang i a ṭuanmi Levi mi hna nih an sermi an si. ²² Bawipa nih Moses a fialmi vialte kha Judah phun chungmi Hur fapa Uri fapa Bezalel nih khan a tuah dih hna. ²³ Amah a bawmtu Dan phun chung mi Ahisamak fapa Oholiab kha lung ṭial thiam, pungsan suai thiam le tuuhmul a dum, sendung, a sen le khumla hmangṭhia tah thiam a si. ²⁴ Biakinn chung hmanmi sui cu a dihlak in pawng thong hnih za le sawm kua panga a si. Bawipa sinah pekchanhmi biakinn cuaithlainak in thlaimi an si. ²⁵ An milu relning in thawhmi ngun cu pawng thong sarih, za nga sawm nga a si, cu zong cu biakinn cuaithlainak in thlaimi ṭhiamṭhiam an si. ²⁶ Milu relnak ah relmi nih an thawh awk hnga a simi ning cio ah an thawhmi cu hi zat hi a si i biakinn cuaithlainak in thlaimi an si. Milu relnak ah cun, pa kum kul ri in a cunglei cu thong za ruk le thong thum, za nga le sawm nga an si. ²⁷ Ngun chungin pawng thong sarih le za nga cu biakinn tungdanh le puanzar kedanh hna sernak ah khan hman an si: kedanh za khat an si i kedanh pakhat ah pawng sawm sarih panga cio a si. ²⁸ A taang rihmi ngun pawng sawm nga cu tung, sio hna le an par khuhnak hna le an fung hna kha sernak ah khan Bezalel nih a hman. ²⁹ Bawipa sin pekmi dar cu pawng sing thum le pahra a phan. ³⁰ Cu dar cun pumhnak thlam luhnak innka tungdanh hna le dar biakṭheng le a dar fingrilh le biakṭheng ca thilri vialte le ³¹ a velchum i a ummi tual kulhnak tungdanh hna le tual luhnak kutka tung danh hna le Pathian umnak thlam le a velchum tual ca fungkhenh vialte kha a ser hna.

¹ Tuuhmul a dum, a sendung le a senmi khan tlangbawi nih biakinn chung rian ṭuannak ca i a hman ding puan kha an ser hna. Bawipa nih Moses a chimhning khan Aaron ca puan thiang cu an ser hna. ² Angki thiang cu sui le tuuhmul a dum, a sendung le a sen a simi le khumla hrual hmang ṭhia khan a ser. ³ Sui tlap kha pan tein an den i an riam hnuah tuuhmul a dum, sendung le a senmi le khumla hrual hmang ṭhia in tahmi puan ah khan an tah chih hna i thawi in dawh tein an ṭamh. ⁴ Angki cu hnam a kap veve ah an sih i liang ah bah khawh a si. ⁵ Dawh tein tahmi taisawm cu angki he cun peh chih a si i cu taisawm cu angki ser bantuk khan ser a si ve, Bawipa nih Moses a fial bantuk te khan ser a si ve, Bawipa nih Moses a fial bantuk khan sui le tuuhmul a dum, sendung le a senmi le khumlahrual hmang ṭhia khan ser a si. ⁶ Karnelian lungvar kha an remh hna i sui tlangkawm chungah khan an benh hna, min khenhnak bantukin an ṭial hna i an cungah cun Israel fapa hna an min kha an ṭial. ⁷ Tlangbawi angki liang bahnak hnam ah cun an benh hna. Cu lungvar cu Israel fapa hna caah khan lung pemtertu lungvar an si i Bawipa nih Moses a chimh bantukte khan tuah a si. ⁸ Ṭangbenh cu, angki bantuk khan, dawh tein a ser. Sui le tuuhmul a dum, sendung le a senmi le khumla hrual hmang ṭhia in an ser. ⁹ Tungvangpalh bil khawh dingin an ser; bil tikah a tung lehhmah pakua a si i a vang lehhmah pakua a si. ¹⁰ A cungah khan lungvar tlar li in an benh hna: a tlar hmasa bik ah cun rubi le topaz le karnet an si; ¹¹ a tlar hnihnak ah cun emeral, safaiar le daimon an si; ¹² a tlar thumnak ah jasin le agate le amethist an si, ¹³ a tlar linak ah beril le oniks le jasper an si. Sui tlangkawm chungah ṭhutter an si. ¹⁴ Lungvar cu hleihnih an si i an cungah Israel fapa hna min kha an i ṭial. Min khenhnak bantukin ser an si. Israel phun hleihnih hna chung min pakhat cio kha an cungah cun aa ṭial cio. ¹⁵ Hri bantukin hrualmi sui thiang in sermi cikcin kha ṭangbenh caah cun an ser. ¹⁶ Sui tlangkawm pahnih le sui kual pahnih kha an ser hna i cu sui kual pahnih hna cu ṭangbenh a cunglei tlang kil pahnih ah khan an thlaih hna. ¹⁷ Sui hri pahnih cu sui kual ah khan an ṭem hna i ¹⁸ sui hri khattelei an donghnak cu sui tlangkawm ah khan an hren veve hna i cuticun tlangbawi angki liang bahnak hnam pahnih hna hmailei ah khan an ṭem chih hna. ¹⁹ Sui kual pahnih an ser hna i ṭangbenh a tanglei tlang ki, angki a hun changtu a chunglei kamah khan an thlaih hna. ²⁰ Sui kual pahnih an ser ṭhan i angki liang bahnak hnam pahnih hna an hmailei tanglei ah khan an thlaih hna; cucu a tlang pawngte ah khan a si i angki ca taisawm ṭha tein tahmi cungte ah khan a si. ²¹ Ṭangbenh sui kual cu angki sui kual ah khan la dum in an ṭem chih hna i cuticun ṭangbenh cu taisawm cungah khan a um i a poih lo; cu ti an tuahmi cu Bawipa nih Moses a chimh bantuk te khan a si. ²² Angki a khuhtu puan cu tuuhmul a dummi lawnglawng in an tahmi a si. ²³ Puan laifang i a ummi awng cu saphaw angki chung i a ummi awng bantuk kha a si. A awng cu tlek zau hlah seh tiah a tlang an kawm. ²⁴ Puan a tanglei tlang ah cun tuuhmul a dum le sendung le a sen le khumla hrual hmangṭhia in taleti kha an ser hna. ²⁵ Sui thiang khi-ing kha an ser hna i puan a tanglei tlang a velchum ah cun taleti le taleti karlak ah khan an chiah diahmah hna. ²⁶ Bawipa nih Moses a fial bantuk te khan, tlangbawi rian caah hmanmi puan cu a tanglei tlang duahmah ah khan khi-ing tete le taleti kha an thlaih diahmah hna. ²⁷ Aaron le a fapa hna caah khan angki cu khumla hmangṭhia in an ser hna, ²⁸ lupawng cu khumla hmangṭhia in, lukhuh cu khumla hmangṭhia in, tawhrolh tawi cu khumla hrual hmangṭhia in, ²⁹ taisawm cu khumla hrual hmangṭhia le tuuhmul a dum, sendung le a senmi in an ser hna i dawh tein an ṭamh hna; Bawipa nih Moses a chimh bantuk te khan an ser hna. ³⁰ Cun Pathian sin pekmi ti hngalhnak hmelchunhnak cu sui thiang in an ser i min khenhnak cung ṭial bang khin " Bawipa sin pekmi," tiah an ṭial. ³¹ Bawipa nih Moses a chimh bantuk te khan hri dum in lupawng par ah khan an ṭem chih. ³² Cuticun pumhnak thlam rian vialte cu lim an si. Bawipa nih Moses a chimh bantukte khan Israel mi nih cun an tuah. ³³ Cun Moses sinah khan Pathian umnak puan biakinn, a cungkhuh thlam, a thilri vialte, a sio, a vampang, a thingthluan, a tung, an kedanh, ³⁴ tuukawng phaw si sen in buhmi in sermi a khuh, saphaw ṭha phun in sermi a khuh, phentu puanzar, ³⁵ biakamnak hngalhter ṭhantu lungtlap chiahnak kuang, a zawnhnak lang le a chin, ³⁶ cabuai le a thuamthil vialte, Pathian hmai hunmi changreu, ³⁷ sui thiang in sermi meiinn tung, a meiinn hna, a tlar in chiahmi meiinn hna, an thilthuam vialte, meiinn ca chiti, ³⁸ sui biakṭheng, thuhnak chiti, rimhmui zihmui, thlam luhnak kutka ca puanzar, ³⁹ dar biakṭheng le a dar fingrilh, a tung le a thilthuam vialte, kut ṭawlnak hmaihum le a hunnak, ⁴⁰ tual ca puanzar, tung, an kedanh, tual luhnak kutka ca puanzar, a hri le a thlam khenhnak fung, Pathian umnak thlam pumhnak thlam chung i rian ṭuannak ca i a herhmi thil vialte, ⁴¹ biakinn chung tlangbawi rian ṭuannak ca thuam thiang, Aaron le a fapa hna nih tlangbawi rian an ṭuan caan i an i hruk awk thuam thiang, hi vialte hi an si. ⁴² Bawipa nih Moses a chimh bantuk te khan Israel mi nih cun rian vialte kha an tuah dih. ⁴³ An tuahmi vialte kha Moses nih ṭha tein a zoh i Bawipa nih a chimhning tein an tuah ti kha a hmuh. Cucaah Moses nih thluachuah a pek hna.

¹ Bawipa nih Moses cu a thawh i, ² "Thla khatnak thla ni khatnak ni ah Pathian umnak thlam pumhnak thlam cu na dirter lai. ³ Biakamnak hngalhter ṭhantu lungtlap hna umnak kuang kha a chungah na chiah lai i puanzar na khuh lai. ⁴ Cabuai kha a chungah na chiah lai i a cungah a thilri vialte kha na chiah hna lai. Meiinn tung zong kha na luhpi lai i a cungah a meiinn kha na chiah hna lai. ⁵ Zihmui khanghnak sui biakṭheng kha, biakamnak lungtlap hna umnak kuang hmaiah khan na chiah lai i pumhnak thlam luhnak innka ah khan puanzar kha na zar lai. ⁶ Pumhnak thlam hmaiah khan khangh thawinak biakṭheng kha na chiah lai. ⁷ Kut ṭawlnak hmaihum kha pumhnak thlam le biakṭheng karlak ah khan na chiah lai i a chungah ti na chiah lai. ⁸ A kulhtu tual kulhnak puanzar kha na zar hna lai i tual luhnak kutka puanzar kha na zar hna lai. ⁹ "Cun thuhnak chiti kha naa lak lai i Pathian umnak thlam le a chung i a ummi thil vialte kha na thuh hna lai. Cu thlam cu le a thilri vialte kha Pathian sinah na pek hna lai i cuticun thil zarh ah a cang lai. ¹⁰ Cun khanghthawinak biakṭheng le a thilri vialte kha chiti na thuh hna lai. Cuticun Pathian sinah na chanh hna lai i a zarh ngaingaimi thil ah an cang lai. ¹¹ Kut ṭawlnak hmaihum le a danh zong kha chiti na thuh hna lai i Pathian sinah na pek hna lai. ¹² "Aaron le a fapa hna kha pumhnak thlam innka ah na ratpi hna lai i ti in na kholhter hna lai. ¹³ Aaron kha puan thiang cu na aihter lai i chiti na thuh lai i cuticun na thianter lai i ka tlangbawi rian kha a ṭuan lai. ¹⁴ A pawngah khan a fapale kha na ratpi hna lai i angki kha na aih hna lai. ¹⁵ Cun an pa chiti na thuh bantuk khan chiti na thuh ve hna lai i ka tlangbawi rian kha an ṭuan lai. Chiti na thuhmi hna nih khan dong loin tlangbawi a siter hna lai," tiah a ti. ¹⁶ Bawipa nih a fial bantuk tein zeizong vialte kha Moses nih a tuah dih. ¹⁷ Cucaah Izipt ram in an chuah hnu a kum hnihnak, thla khatnak thla ni khatnak ni ah khan Pathian umnak thlam cu an dirter. ¹⁸ Moses nih khan a dirter. A danh vialte kha a chiah hna, a vampang kha a dirter hna, a thingthluan kha a hrolh hna, a tung kha a dirter hna. ¹⁹ Bawipa nih a fial bantuk te khan Pathian umnak thlam chungah cun thlam kha a samh i thlam cu a khuh kha a khuh. ²⁰ Cun biakamnak lungtlap kha a lak hna i kuang chungah khan a chiah hna. Kuang i thlaihmi sui kual ah khan lang kha a hrolh hna i a chin kha a chinh. ²¹ Cun kuang cu Pathian umnak thlam chungah khan a chiah i a phentu puanzar kha a zar hna. Cuticun Bawipa nih a chimh bantuk te khan biakamnak lungtlap umnak kuang kha him tein a umter. ²² Cun cabuai kha pumhnak thlam chungah khan a chiah, cucu Pathian umnak thlam chaklei kamah khan a si i puanzar lengah khan a si i ²³ a cungah khan Pathian hmai hunmi changreu kha a hun hna, cucu Bawipa nih a chimhningte khan a si. ²⁴ Meiinn tung kha pumhnak thlam chungah cun cabuai he hmaitonh in a chiah, cucu thlam thlanglei kamah khan a si. ²⁵ Bawipa hmaiah meiinn tung cungah cun meiinn kha a chiah hna i cucu Bawipa nih a chimhning te khan a si. ²⁶ Sui biakṭheng kha pumhnak thlam chungah khan, puanzar he hmaitonh in a chiah. ²⁷ Bawipa nih a fial bantuk khan a cungah khan a rim a thawmi zihmui kha a khangh. ²⁸ Thlam luhnak innka puanzar kha a zar hna. ²⁹ Pumhnak thlam innka ah khan khangh thawinak biakṭheng kha a chiah. Bawipa nih a chimh bantukin cu cungah cun khangh thawinak kha a thawi i ei awk thawinak kha a khangh hna. ³⁰ Thlam le biakṭheng karah cun kut ṭawlnak hmaihum kha a hun i kut ṭawlnak dingah ti kha a chungah cun a chiah. ³¹ Moses le Aaron le Aaron fapa hna nih khan an kut le an ke kha an i ṭawl. ³² Bawipa nih Moses a chimh bantuk te khan pumhnak thlam i an luh le biakṭheng lei i an kal ah, an i ṭawl lengmang. ³³ Thlam le biakṭheng kulhtu tual kulhnak puanzar kha a zar hna. Cuticun Moses nih rian vialte kha a lim. ³⁴ Pumhnak thlam cu minmei nih a huh i Bawipa sunparnak kha a chung cu a khat. ³⁵ Pumhnak thlam cungah cun minmei kha a um i Bawipa sunparnak cu a chung kha a khah caah Moses cu a lut kho lo. ³⁶ Israel mi kha riahhmun pakhat in riahhmun pakhat ah an i ṭhial tikah Pathian umnak thlam cung i minmei kha aa ṭhial lawnglawng ah an i ṭhial tawn. ³⁷ Minmei kha aa ṭhial lo ahcun annih zong riahhmun dang ah khan an i ṭhial ve lo, minmei aa ṭhial ni tiang kha an ngan tawn. ³⁸ Pathian an sin i a um hmelchunhnak minmei cu, chun ah Pathian umnak thlam cungah khan a um i zan ah minmei chungah khan mei alh a um; cucu Israel mi nih riahhmun pakhat in pakhat ah an i thawn lengmang ah khan an hmuh zungzal.