ESTHER

ESTHER

¹ Ahasuerus chan, India ram in Ethiopia ram tiang, ram za khat le ram kul le ram sarih a uktu Ahasuerus chan ah khan, ² Siangpahrang Ahasuerus cu a khuapi bik Susa khua i a bawiṭhutdan cungah khan a ṭhu i, ³ a bawinak kum thum kum ah khan a bawi vialte hna le a sinum hna caah puai a tuah i Persia le Media ralbawi hna le ram uktu bawi hna le tuavon hna kha a hmaiah cun an um i ⁴ a siangpahrang sunparnak chawhlawn le a lianhngannak sunlawinak le upatnak kha ni saupi, ni za khat le ni sawm riat chung a hmuhsak hna. ⁵ Cun hi ni hna an dih tikah Susa khuapi chung i a ummi mi vialte hna caah, a ngan he a hme he, rawl danghnak pakhat, ni sarih chung, siangpahrang inn dum chung tual ah cun a serpiak hna. ⁶ Laa in tahmi puanzar a rangmi le puanzar aa thlaimi a dummi hna cu la hmangṭhia in le a senduk in a senmi la in lungrang tung i ngunkual ah khan an ṭem chih hna; cun lung hak le lung rang le lungvar le lung mansung in a mui an sermi ṭuang ah cun sui ṭhutdan le ngun ṭhutdan kha an chiah hna. ⁷ Cun zu cu sui hrai a phunphun khan an ser hna i siangpahrang nih a ngeihmi a tam rup khan an pek huahmah hna. ⁸ Cun zu din cu a phung ning tein a si, ahohmanh hnek a um lo; zeicahtiah siangpahrang nih cun a siangpahrang inn bawi pawl kha nawl a pek hna i mi nih anmah duhning cio ah nan tuah lai, tiah a ti hna. ⁹ Siangpahrangnu Vashti zong nih khan Siangpahrang Ahasuerus ta a simi siangpahrang inn chungah khan nu caah rawl danghnak a tuah ve. ¹⁰ A ni sarihnak ni, siangpahrang cu zu nih a lung a lawmhter ni ah cun, inn zohkhenhtu a simi hna tildit pasarih Mehuman, Biztha, Harbona, Bigtha le Abagtha, Zethar le Karkas hna cu nawl a pek hna i ¹¹ Siangpahrangnu Vashti cu midawh ngai a si caah aa dawhnak cu mizapi hna le bawi hna kha hmuhsak awkah a bawi luchin he siangpahrang hmaiah cun ra chuak seh, tiah a ti hna. ¹² Sihmanhsehlaw tildit pawl nih siangpahrang nawlbia an hei lanhpimi cu Siangpahrangnu Vashti nih khan a rak al i a chuak duh lo. Hi ruangah hin siangpahrang cu a thin a hung a thinhunnak cu a chungah a kangh in a kang. ¹³ Cun siangpahrang nih khan caan a hngalthiammi mifim kha a thawh hna i, cu hna cu ¹⁴ amah a hun changtu Persia le Media mi hna i an bawi pasarih, siangpahrang hmai a hmu tawnmi le a pennak chungah bawi bikbik a simi Karshena, Shethar, Admatha, Tarshish, Meres, Marsena le Memukan an si, cu hna cu phungbia le biaceihnak ah a thiam ngaingaimi hna a ti tawn hna ning khan a thawh hna i, ¹⁵ "Siangpahrangnu Vashti nih Siangpahrang Ahasuerus nawlbia, tildit pawl nih an chimhmi cu a tuah duh lo caah, a phung bantukin a cungah zeidah tuah a si lai?" tiah a ti hna. ¹⁶ Cun Siangpahrang le bawi pawl hmaiah cun Memukan nih a thawh i, "Siangpahrangnu Vashti nih hin Siangpahrang cung lawngah palhnak a tuah a si lo, Siangpahrang Ahasuerus ram chung i a ummi bawi vialte hna le mi vialte hna cung zongah khan a tuah a si. ¹⁷ Zeicahtiah siangpahrangnu nih a tuahmi hi nu vialte nih an hngalh ve lai i, ’Siangpahrang Ahasuerus nih Siangpahrangnu Vashti cu a hmai i chuah awkah nawl a pek i a chuak duh lo,’ an ti lai caah an vale kha an serhsat hna lai. ¹⁸ Nihin hrimhrim ah hin, siangpahrangnu umtuning a theimi Persia le Media ram minu hna nih cu kong cu siangpahrang bawi pawl kha an chimh cang hna lai i serhsatnak le thinhunnak tampi a um ko cang lai. ¹⁹ Siangpahrang nih na duhnak a si ahcun, Vashti hi siangpahrang hmaiah chuak ti hlah seh, tiin, nangmah sinin siangpahrang nawlbia pakhat chuahter law, thlen ṭhan a si nakhnga lo Persia le Media nawlbia hna chungah ṭial si ve seh; cun siangpahrangnu sinak cu amah nakin a ṭha deuhmi sinah siangpahrang nih pe ko seh, ²⁰ cun siangpahrang nih na sermi nawl cu a kau ngaingaimi na ram chungah hin thanh a si tikah nu vialte nih an vale hna cu a sang he a niam he upatnak an pek hna lai," tiah a ti. ²¹ Hi ruahnak cheuhmi nih hin siangpahrang le a bawi hna cu an lung a ton hna i Memukan nih a chim bantuk cun siangpahrang nih a tuah. ²² Siangpahrang ram chung vialte ah khan, ram kip ah khan anmahle an holh cio le miphun kip sinah khan anmah le an ca cio in, pa paohpaoh cu amahle a innchung ah cun bawi a si lai i a miphun holh khan holh a si lai, tiin ca a kuat hna.

¹ Hi thil hna hnuah hin, Siangpahrang Ahasuerus cu a thin a dam tikah, Vashti le a tuahmi kong i nawlbia chuah a simi kha a hun hngalh ṭhan. ² Cun siangpahrang sinum hna amah a bultawltu hna nih khan an thawh i, "Siangpahrang caah hin ngaknu dawh in kawlpiak u sih. ³ Cun ngaknu dawh no tete hna cu Susa khuapi chung, nu umnak khaan chung i a pumtu dingah, siangpahrang nih a ram chung i a peng dihlak ah khan bawi chia hna seh, cu nu khaan cu siangpahrang tilditmi Hegai kut tangah a um i amah cu nu a zohkhenhtu hna cu a si; cun zihmui kha pek si hna seh. ⁴ Cun siangpahrang lung a tongmi ngaknu kha Vashti hmun ah khan siangpahrangnu ah cang seh," an ti. Cu nih cun siangpahrang cu a lung a ton i cu bantuk cun a tuah. ⁵ Susa khuapi chungah cun Judah mi pakhat, a min Mordekai a simi a um; amah cu Jair fapa a si, Jair cu Shimei fapa a si, Shimei cu Benjamin phun Kish fapa a si; ⁶ Mordekai cu Babilon siangpahrang Nebukhadnezzar nih Judah siangpahrang Jekoniah he a kalpimi saltang hna sinah khan Jerusalem khua in kalpi a si ve. ⁷ Amah nih cun a pa unau fanu Hadassah cu nu siseh pa siseh a ngeih hna lo caah a cawm, Hadassah cu Esther cu a si; cu ngaknute cu aa dawh ngaingai i duh a nung ngaingai, a nu le a pa nih an thihtak tikah khan Mordekai nih amah fanu hrimhrim ah khan aa ser. ⁸ Cucaah siangpahrang nawlbia le biakhiahnak cu thanh a si i ngaknu tampi cu Susa khuapi ah khan Hegai zohkhenhnak tangah pumh an si tikah, Esther zong cu siangpahrang inn ah cun an luhpi ve i nu zohkhenhtu Hegai kut tangah khan an chiah. ⁹ Cun ngaknu nih cun a lung a ton i a hmaiah mithmai ṭha a hmu. Cun Hegai nih khan zihmui le a co awk hnga rawl kha siangpahrang inn in thimmi nu pasarih hna he khan khulrang in a pek hna i amah le a sinum hna cu nu khaan chung i hmun ṭha bik ah khan a kalter hna. ¹⁰ Esther nih khan zei miphun dah a si i a rualchan kha ahodah an si ti kha a langhter lo; zeicahtiah Mordekai nih langhter lo awkin a fial. ¹¹ Cun Esther nih khan zeidah a tuah i zeitindah a um ti hngalh awkah Mordekai cu nu khaan tual hmaiah khan nifate in aa chawk. ¹² Cun ṭamhnak nu ca i phung tuahmi thla hleihnih a dih tikah, cucu an i ṭamh caan cu va si kaw, thla ruk chung cu mura zihmui in, thla ruk chung cu nu ca i zihmui le sathau in hmeh an si; cun ngaknu hna caah Siangpahrang Ahasuerus sin i vung luhnak caan a phanh cio tik i ¹³ ngaknu hna cu siangpahrang sinah an vung luh tikah khan, nu khaan chungin siangpahrang inn ah cun, an duhmi cio paoh kha hei i put awk pek an si. ¹⁴ Zanlei ah an va kal i zinglei ah, siangpahrang tilditmi Shaashgaz nih a zohkhenhmi nu khaan pahnihnak ah khan an ra kir, amah cu nuchun pawl zohkhenhtu a si; siangpahrang nih khan a rak duhmi an si i an min in a kawh ṭhan hna lo ahcun siangpahrang sinah khan an lut ṭhan ti lo. ¹⁵ Cun a fanu bantuk taktak ah aa serhtu Mordekai i a pa unau Abihail i a fanu Esther caah siangpahrang sin i va luh caan cu a phak tikah, siangpahrang tilditmi, nu a zohkhenhtu hna Hegai nih ruahnak a cheuhmi thil kha dah ti lo cu, zeihmanh Esther nih cun a hal lo. Cun Esther cu a hmumi paoh an mit a tling dih. ¹⁶ Cun Esther cu Ahasuerus Siangpahrang sinah, thla hranak thla, Tebeth thla, siangpahrang a si kum sarihnak ah, a siangpahrang inn chungah khan an vun luhpi tikah ¹⁷ siangpahrang nih cun Esther cu nu dang vialte nakkhan a duh deuh i ngaknu dang vialte nakkhan velngeihnak le mithmai ṭha a hmu deuh; cucaah a lu ah siangpahrang luchin kha a chinh i Vashti hmun ah khan siangpahrangnu ah a ser. ¹⁸ Cun siangpahrang nih a bawi pawl le a sinum pawl vialte hna caah khan rawl danghnak nganpi a ser, cucu Esther rawldanghnak a si. Cun a pengmi hna kha ngunkhuai ngaihthiamnak a pek hna i siangpahrang nunsiannak he aa tlakning in laksawng a ṭhenh hna. ¹⁹ Cun ngaknu hna cu a voi hnihnak an i pumh tikah Mordekai cu siangpahrang kutka ah khan a ṭhu. ²⁰ Mordekai nih a fial bangin Esther nih zei miphun le ahodah a rualchan an si kha a langhter lo; zeicahtiah Esther nih Mordekai cu, a rak cawm lio bantuk te khan a nawl a ngaih. ²¹ Cun cu caan ah cun, Mordekai cu siangpahrang kutka i a ṭhut lioah khan, siangpahrang a tildit pahnih innka a cawngtu Bigthana le Teresh cu an thin a hung i Siangpahrang Ahasuerus cu tlaih awk kha an timh. ²² Cun mah cucu Mordekai nih a hngalh tikah Siangpahrangnu Esther cu a chimh i Esther nih siangpahrang cu Mordekai min in a chimh. ²³ Cun cu thil cu an hlat i a si taktak ti kha an hmuh tikah, cu mi hna cu an pahnih tein mi thahnak thing ah an thlai hna. Cun mah cucu Chanrelnak Cauk chungah siangpahrang hmaika ah khan an ṭial.

¹ Cun hi thil hna ah hin Siangpahrang Ahasuerus nih Agag mi Hamedatha fapa Haman cu a rian a kaiter i hawi hmaiah khan a chiah i amah sinah a ummi bawi vialte hna cungah khan a ṭhutter. ² Cun siangpahrang kutka ah a ummi siangpahrang sinum vialte hna nih khan Haman cu an kunpiak i upatnak an pek; zeicahtiah cuticun nan tuah lai tiah siangpahrang nih khan nawl a pek hna. Sihmanhsehlaw Mordekai nih cun a kunpiak lo i upatnak zong a tuahpiak lo. ³ Khi tikah kutka i a ummi siangpahrang sinum hna nih cun Mordekai cu an thawh i, "Zeicahdah siangpahrang nawlbia cu na al?" tiah an ti. ⁴ Cun ni khat hnu ni khat an chimh lengmang i an bia kha ngaih a duh hna lo tikah, Mordekai bia cu a hua hnga maw hua lo ti hngalhnak caah Haman cu an chimh; Mordekai nih cun annih cu, kannih cu Judah mi kan si, tiah a ti hna. ⁵ Cun Haman nih Mordekai nih a ka kunpiak duh lo i upatnak a ka pe duh lo ti kha a hmuh tikah a cekne tiangin a runh. ⁶ Sihmanhsehlaw Mordekai lawng tlaih kha cu aa nautat. Cun annih nih khan Mordekai cu zei miphun dah a si ti kha an rak chimh cang i cucaah cun Ahasuerus ram chung dihlak i a ummi Mordekai miphun Judah mi vialte hna cu hrawh awkah aa tim. ⁷ Thla khatnak thla, cucu Nisan thla a si, Siangpahrang Ahasuerus a bawi kum hleihnihnak ah Haman hmaiah khan camcawh fung Pur timi kha an zuk; cun thla khat hnu thla khat in a thla hleihnihnak Adar thla tiang camcawhfung cu an zuk lengmang. ⁸ Cun Haman nih Siangpahrang Ahasuerus cu a thawh i, "Na ram chung i peng dihlak ah hin, a kenkip le mi kip sinah aa ṭhekmi miphun pakhat an um; an phunglam cu midang hna phunglam he khan an i dang i annih nih siangpahrang nawlbia kha ngaih an duh lo caah annih cu hi bantukin in ko ahcun siangpahrang caah miaknak zeihmanh a um lai lo. ⁹ Siangpahrang na hna a tlak ahcun annih kha hrawh awkah nawlbia chuah siseh, cun kei nih siangpahrang rian a uktu hna sinah khan, siangpahrang chawkhonnak chung i chiah awkah, ngun talen thong hra ka pek lai," tiah a ti. ¹⁰ Cucaah cun siangpahrang nih a kutdong cung i min khenhnak kutdong hrolh kha a lak i Hammedatha fapa Agag mi Haman, Judah mi hna ralpa kha a pek. ¹¹ Cun siangpahrang nih Haman cu a thawh i, "Nangmah nih a ṭha tiah na hmuhning paoh in tuah awkah tangka cu nangmah sinah pek a si, mi hna zong cu," tiah a ti. ¹² Cun siangpahrang ca ṭialtu hna kha thla khatnak thla, a ni hleithum ni ah an auh hna i Haman nih a nawlngeihnak vialte kha hmang in, siangpahrang kut tang bawi hna le peng vialte a uktu bawi hna le mi vialte a uktu bawi hna sinah khan, an peng chung i an hmanmi ca cio in le an miphun nih an hmanmi holh cio in nawlbia pakhat an ṭial; Siangpahrang Ahasuerus min in ṭial a si i siangpahrang kutdong hrolh in khenh chih a si. ¹³ Judah mi vialte cu a no a tar in, nu he ngakchia he, ni khat ni te i an ci hmih awk le thah awk le hloh awkah le an thil kha ramh dih awkah, thla hleihnihnak thla, Adar thla, a ni hleithumnak ni ah, siangpahrang ram chung peng dihlak ah caphortu nih ca cu an kalpi. ¹⁴ Cu ni ca i i timhtuahnak caah, cu ca ṭial chinmi cu ram chung dihlak ah khan mi vialte sinah nawlbia ah thanh awk a si cang. ¹⁵ Siangpahrang nawl in ca phortu hna cu khulrang in an kal i nawlbia cu Susa khuapi ah khan an chuah. Cun Siangpahrang le Haman cu zu din awkah an ṭhu; sihmanhsehlaw Susa khuapi cu i tuai ur in a um.

¹ An tuahmi vialte cu Mordekai nih a hngalh tikah a puan kha a thleh hna i buri kha a aih i vutcam kha aa phulh, cun khualai ah khan aa chawk i fakpi le lunghno ngaiin a ṭap. ² Ahohmanh siangpahrang kutka ah khan buri aih in luh phung a si lo caah siangpahrang kutka luhnak tiang lawng kha a hung kal. ³ Cun siangpahrang nawlbia le biakhiahnak a phaknak peng paohpaoh ah khan Judah mi caah ṭahnak a um i rawl an ul i an ṭap i an ngaih a chia i a tam deuh cu buri an i aih i vutcam an i phulh. ⁴ Cun cu kong cu a sinum nu hna le a cawngtu tildit pawl nih khan Esther cu an ra chimh tikah a lungre a thei ngaingai; Mordekai cu a buri kha i phoih i puan kha i aih awkah hnipuan a hei chanh, sihmanhsehlaw aa lak duh lo. ⁵ Khi tikah amah a tuammuaitu caah chiahmi siangpahrang tilditmi pakhat Hathak kha Esther nih cun a kawh i Mordekai sinah khan va kal i hi thil hi zeidah a sullam a si i zeicahdah a si ti kha va hngalh awkah nawl a pek ⁶ Cun khua chung tual, siangpahrang kutka hmai zawn ah khan Hathak cu Mordekai sinah khan a va kal i ⁷ a cungah thil a tlungmi vialte le Judah mi hrawh awkah zeizat sette dah siangpahrang chawkhonnak chungah Haman nih tangka ka chiah lai tiah a timi kha Mordekai nih cun a rak chimh. ⁸ Mordekai nih cun, annih hrawhnak ding caah Susa khua chung i nawlbia an chuahmi ṭial chinmi pakhat kha a pek i, Esther kha na va hmuhsak lai i a sullam na va chimh lai i siangpahrang sinah a va kal lai i amah cu a miphun hna caah a va nawl nakhnga na fial lai, tiah a ti. ⁹ Cun Mordekai nih a chimmi cu Hathak nih a va kal i Esther kha a chimh. ¹⁰ Cun Esther nih khan Hathak cu a chawnh i ¹¹ "Siangpahrang sinum vialte hna le siangpahrang peng chung mi vialte hna nih nu siseh, pa siseh, ahohmanh kawh loin siangpahrang sinah chungchin tual chungah an luh ahcun, phung pakhat lawnglawng a um ti kha hngalh dih a si: cu phung cu siangpahrang nih a nun nakhnga a bawi fung kha a hlerpiak lo ahcun ahohmanh aa khatrep in thah awk an si ko. Cun atu hi ni sawm thum chung va luh awkah kawh ka si ti lo," tiin Mordekai cu bia a cah. ¹² Cun Esther chimmi cu Mordekai kha an chimh. ¹³ Cun Mordekai nih annih cu hi bantuk Esther cu va chimh awkah bia lehnak a pek hna: "Judah mi a dang vialte hna nakin kei cu siangpahrang inn chungah hin ka um caah ka luat deuh nga tiah i ruat hlah. ¹⁴ Zeicahtiah hi bantuk caan i dai tein na um ko ahcun, Judah mi hna caah hin himnak le luatnak cu hmun dang le ka dang in a chuak ṭhiamṭhiam ko lai, sihmanhsehlaw nangmah le na pa innchungkhar hna tu hi nan thi lai. Hi bantuk caan caah hin dahkaw pennak chung i na phak hi a hei si ko hnga, aho nih dah a hngalh?" tiah a ti. ¹⁵ Cun Mordekai cu hitihin va leh awkah Esther nih a ti hna: ¹⁶ "Va kal law Susa khua chung i a ummi Judah mi vialte kha va pum hna, cun keimah caah rawl ulhnak pakhat ni thum chung rak ser u; chun ah siseh zan ah siseh zeihmanh ei in ding hlah u. Cun nannih nih nan tuah bantukin kei le ka sinum hna zong nih rawl ulhnak cu kan rak tuah ve lai. Cun phung he aa ralchanhmi a si nain siangpahrang sinah cun ka va kal lai, ka thih ah thih si ko seh," tiah a ti hna. ¹⁷ Cun Mordekai cu a kal i Esther nih nawl a pek bang khan a tuah dih.

¹ Ni thumnak ni ah Esther cu a bawi thuam khan aa thuam i siangpahrang inn chung chungchin tual, siangpahrang khaan kaupi hmai zawn i a ummi ah khan a dir. Siangpahrang cu siangpahrang inn chungah khan, siangpahrang inn luhnak zawn i a ummi a bawi ṭhutdan cungah khan a ṭhu; ² cun siangpahrang nih Siangpahrangnu Esther cu tual i a dir kha a hei hmuh tikah, Esther cu mithmai ṭha a pek i a kut in aa putmi sui bawifung kha amah leiah cun a hlerpiak. Cun Esther nih khan a hei naih i bawifung parte cu a va tongh. ³ Cun amah cu siangpahrang nih cun a thawh i, "Zeidah a si? Siangpahrang bawinu Esther? Zeidah na ka hal duhmi a si? Nangmah cu pek na si lai, ka ram hnarcheu tiang hmanh in," tiah a ti. ⁴ Cun Esther nih a thawh i, "Siangpahrang na duhnak a si ahcun, siangpahrang ca i nihin ah ka timhmi zanriah ei awkah siangpahrang le Haman cu nan rat khawh nakhnga kan nawl hna," tiah a ti. ⁵ Cun siangpahrang nih cun, "Esther nih a duhnak bantukin ka tuah nakhnga, Haman kha khulrang in ratpi u," tiah a ti. Cucaah siangpahrang le Haman cu Esther nih a timhmi zanriah ei awkah khan an kal. ⁶ Cun annih nih zu kha an din lioah siangpahrang nih Esther cu a thawh i, "Zeidah hal na ka duhmi a si? Kan pek lai. Zeidah nawl na ka duhmi a si? Ka ram hnarcheu tiang a si hmanh ah tlinter a si lai," tiah ti. ⁷ Sihmanhsehlaw Esther nih a thawh i, "Kan nawl duhmi le kan hal duhmi cu hihi a si: ⁸ Siangpahrang hmaiah mithmai ṭha ka hmuh a si i kan nawlnak kha siangpahrang nih pek le kan halmi kha tlinter awk na duhnak a si ahcun, thaizing ah zanriah kan timhpiak ṭhan hna lai i siangpahrang le Haman cu ra ṭhan u law thaizing ah cun siangpahrang nih a chim bantukin ka duhmi cu kan chimh lai," tiah a ti. ⁹ Cun cu ni cu Haman cu lunglawm le thanuam in a ṭin. Sihmanhsehlaw Haman nih Mordekai cu siangpahrang kutka i a hmuh tikah a hmaiah cun a dir zong a dir lo i a ther zong a ther lo caah khan Mordekai cungah cun a thin a hung ngaingai. ¹⁰ Asinain Haman cu aa sum i inn ah a ṭin; cun a hawikom hna le a nupi Zeresh kha a kawhter hna. ¹¹ Cun annih cu Haman nih a rumnak sunparnak le a fapa zeizat an si le siangpahrang nih rian kainak le upatnak a pekmi vialte le siangpahrang bawi hna le sinum vialte hna cung i a chiahnak kha a relh ṭhan hna. ¹² Cun Haman nih cun, "Siangpahrangnu Esther hmanh nih amah hrimhrim nih a timhmi rawl danghnak ah keimah dah ti lo cu ahohmanh siangpahrang sinah a ratter hna lo. Cun thaizing zongah hin siangpahrang sinah keimah cu a ka sawm chih rih. ¹³ Sihmanhsehlaw siangpahrang kutka i Judah mi Mordekai a ṭhut ka hmuh chung cu hi vialte zong nih hin zeihmanh an ka ṭhathnem hlei lo," tiah a ti fawn. ¹⁴ Cun a nupi Zeresh le a hawikom vialte nih cun an thawh i, "Mi thlainak dong sawm nga a sangmi ser si seh law, cun cuka ah cun Mordekai kha thlai si seh, tiah zingka ah siangpahrang cu chim; cun siangpahrang he cun lunglawm ngaiin rawl danghnak ah cun kal te u," tiah an ti. Hi ruahnak cheuhmi nih Haman cu a lung a ton ngaingai i mi thlainak cu a serter hna.

¹ Cu zan cu siangpahrang cu aa hngilh kho lo; cun hngalh camcin awk a tlakmi thil ṭialnak cauk, chanrelnak hna kha rak pu u, tiah nawl a pek hna i siangpahrang hmaiah cun an rel. ² Cun Bigthana le Teresh, siangpahrang tilditmi pahnih, innka cawngtu hna nih Siangpahrang Ahasuerus tlaih an timh i zeitindah Mordekai nih an konglam a chimnak aa ṭialmi kha an hmuh. ³ Cun siangpahrang nih, "Hi kongah hin Mordekai cu upatnak siseh, thangṭhatnak siseh, zeital pek a si maw?" tiah a ti. Siangpahrang a tuammuaitu hna nih khan, "A caah zeihmanh tuahmi a um lo," tiah an ti. ⁴ Cun siangpahrang nih, "Ahodah tual chungah a um?" tiah a ti. Cu lioah cun Haman cu Mordekai thlainak ding ca i a timhmi thlainak i Mordekai cu thlai awkah siangpahrang cu ra chimh awkah siangpahrang inn lenglei tual i a luh kate khi a si. ⁵ Cucaah siangpahrang sinum hna nih cun, "Haman cu khika ah, tual ah a dir ko," tiah an chimh. Cun siangpahrang nih cun, "Run luhter u," tiah a ti. ⁶ Cucaah Haman cu a rung lut i siangpahrang nih cun a rak thawh i, "Siangpahrang nih upatnak pek a duhmipa cu zeidah tuahpiak awk a si hnga?" tiah a ti. Cun Haman nih amah le amah cu, "Keimah nakin ahodah siangpahrang nih cun upatnak cu pek a duh deuh rua hna hnga," tiin a lung chungin a ti. ⁷ Cun Haman nih siangpahrang cu a thawh i, "Siangpahrang nih upatnak pek a duhmipa cu, ⁸ siangpahrang nih aa aih tawnmi thilpuan le siangpahrang nih aa cit tawnmi rangtum le siangpahrang nih aa chinh tawnmi bawi luchin kha rak chuahpi hna seh law, ⁹ thilpuan le rangtum cu siangpahrang bawi hna lak i tuavon bik kha pek si hna seh law, amah nih cun siangpahrang nih upatnak pek a duhmipa cu thuamh seh, cun mipa cu khua chung tual ah khan chawhpi seh law, a hmaiah, ’Siangpahrang nih upatnak pek a duhmipa cungah cun hi bantukin tuah a si lai,’ tiin au seh," tiah a ti. ¹⁰ Cun siangpahrang nih Haman cu a thawh i, "Khulrang in na chim bangin thilpuan le rangtum cu va la hna law siangpahrang kutka ah a ṭhumi Judah mi Mordekai cungah khan va tuah tuah. Na chimmi cu pakhatte hmanh tlolh hlah," tiah a ti. ¹¹ Cucaah Haman nih Siangpahrang thuam le rangtum cu a lak hna i Mordekai cu a thuamh. Khuapi chung tual ah cun Mordekai cu rang kha aa cit i Haman nih cun a chawhpi i, "Siangpahrang nih upatnak pek a duhmipa cu hi bantukin tuah a si lai," tiah Haman a au. ¹² Cun Mordekai cu siangpahrang kutka ah khan a kir ṭhan. Sihmanhsehlaw Haman cu a ṭah bu le a lu i khuh in a inn ah khulrang in a ṭin. ¹³ Cun Haman nih a nupi Zeresh le a hawikom vialte kha a cung i a tlungmi thil vialte cu a chimh hna. Cun a nupi Zeresh le a mifim hna nih cun an thawh i, "A hmaiah tluk hram naa thawkmi Mordekai cu Judah mi a si ahcun amah cu na tei lai lo, sihmanhsehlaw nangmah tu kha a hmaiah cun na tlu hrimhrim lai," tiah an ti. ¹⁴ Cun amah sin i bia an chim lengmang lioah cun, siangpahrang tilditmi hna kha an ra i Esther nih a timhmi rawl danghnak ah khan Haman cu khulrang in an kalpi.

¹ Cuticun siangpahrang le Haman cu Siangpahrangnu Esther rawl danghnak chung i i tel awkah cun an lut. ² Cun a ni hnihnak ni, zu an din lioah khin, siangpahrang nih Esther cu a thawh ṭhan i, "Na ka hal duhmi cu zeidah a si, Esther Siangpahrang Bawinu? Pek na si ko lai. Ka ram hnarcheu tiang a si hmanh ah tlinter a si ko lai," tiah a ti. ³ Khi tikah Esther Siangpahrangnu nih cun a leh i, "Na hmaiah mithmai ṭha ka hmuh a si ahcun, maw siangpahrang, cun siangpahrang na duhnak a si ahcun, kan nawlnak ah hin ka nunnak hi ka pe ṭhan law kan halnak ah hin ka miphun hi ka pe ṭhan tuah. ⁴ Zeicahtiah kannih cu, keimah he ka miphun hna he, hrawh awk le thah awk le kan ci hmih awkah zuarh kan si cang. Kannih cu nu he pa he, sal si awk men ah khan zuar kan si ahcun, dai tein kan um diam ko hnga, zeicahtiah kannih temhinnak ding cu siangpahrang sunghnak ding he khan tahṭhimh awk tlak a si lo," tiah a ti. ⁵ Khi tikah Siangpahrang Ahasuerus nih Siangpahrangnu Esther cu a thawh i, "Hi thil tuah awkah a rak ruattu hi ahodah a si i khoika ah dah a um?" tiah a ti. ⁶ Cun Esther nih cun aa thawh i, "Dotu le ral a simi cu hi miṭhalopa Haman hi a si!" tiah a ti. Cu tikah Haman cu siangpahrang le siangpahrangnu hmaiah cun a thin a phang ngaingai i a ther in a ther. ⁷ Cun siangpahrang cu a thinhun in rawldanghnak cun a tho i siangpahrang inn dum ah khan a kal; sihmanhsehlaw Haman cu a nunnak ca i Siangpahrangnu Esther kha zaangfah nawl awkah hnuah a rung tang, zeicahtiah a cungah khan siangpahrang nih ṭhat lonak a ruah cang ti kha a hmuh. ⁸ Cun siangpahrang cu siangpahrang inn dum chung khan puai tuahnak hmun ah khan a ra kir ṭhan i Haman cu Esther ṭhutnak ṭhutdan cungah khan a rak bawh ko kha a hmuh. Siangpahrang nih cun, "Keimah ka inn cia cungah, ka um hngan hrimhrim ah siangpahrang bawinu hmanh a tihram dah mu!" tiah a ti. Bia cu siangpahrang kaa chung khan an chuah cangka, Haman cu a hmai kha an khuh colh. ⁹ Cun siangpahrang a tuammuaitu tilditmi pakhat Harbona nih khan, "Hi lengah hin pei, a bia in siangpahrang a khamhtu Mordekai thlainak ding caah Haman nih hin thahnak tung dong sawm nga sang a inn ah a phun cu," a ti. ¹⁰ Cun siangpahrang nih, "Cuka ah cun amah kha va thlai u," a ti. Cucaah Mordekai ca i a phunmi thahnak tung ah khan amah Haman cu an thlai. Khi tikah siangpahrang thinhunnak cu a dam.

¹ Khi ni ah khan Siangpahrang Ahasuerus nih Siangpahrangnu Esther cu Judah mi ral a simi Haman inn kha a pek. Cun Esther nih Mordekai cu a zeidah a si kha a rak chimh caah siangpahrang hmaiah khan a ra chuak; ² cun siangpahrang nih cun Haman a pekmi a min khenhnak kutdonghrolh kha aa phoih i Mordekai kha a pek. Cun Esther nih Mordekai cu Haman inn zohkhenhtu ah khan a chiah. ³ Cun Esther nih siangpahrang sinah cun bia a chim ṭhan; a ke hram ah khan a bawk i Agag mi Haman nih Judah mi cungah a ṭha lomi khuakhannak a ruahmi le rawinak a timhmi let ṭhan awkah khan mitthli he a nawl. ⁴ Cun siangpahrang nih sui bawifung kha Esther leiah cun a hei hler; ⁵ cun Esther cu a tho i siangpahrang hmaiah cun a dir. Cun aa thawh i, "Siangpahrang na duhnak a si i na hmaiah mithmai ṭha ka hmuh i siangpahrang na hmaiah hi thil hi ahmaanmi a si i na mit ka tlin a si ahcun, siangpahrang ram chung peng dihlak i a ummi Judah mi hna hrawhnak ding ca i Agag mi Haman, Hammedatha fapa nih a rak ṭialmi ca letnak caah khan nawlbia pakhat in ṭial si seh. ⁶ Zeicahtiah, zeitindah ka miphun cung i a tlung ding harnak hmuh cu ka in khawh lai? Zeitindah ka rualchan hna hrawh dih an si hmuh cu ka in khawh lai?" tiah a ti. ⁷ Cun Siangpahrang Ahasuerus nih Siangpahrang Esther le Judah mi Mordekai cu a thawh hna i, "Zohhmanh u, Haman inn cu Esther kha ka pek cang i Judah mi kha thah a duh hna caah amah cu thlainak ah an thlai cang. ⁸ Cun Judah mi kong ah cun siangpahrang min in nan duh bantukin ca nan ṭial lai i siangpahrang kutdong hrolh in nan khenhchih lai; zeicahtiah siangpahrang min in ṭial i siangpahrang kutdong hrolh in khenh chihmi nawlbia cu let khawh a si ti lo," tiah a ti. ⁹ Thla thumnak thla, Sivan thla, a ni kul le ni thum ni ah, khi caan ah siangpahrang caṭialtu kha an auh i Mordekai nawl peknak ning paoh khan, India ram in Ethiopia ram tiang siangpahrang kut tang bawi hna le ram uktu hna le bawi dangdang hna sinah khan, Judah mi kong cu ca in an kuat hna, peng za khat le peng kul le peng sarih an si, peng kip ah anmah le an ca cio in le miphun kip sinah anmahle an holh cio in an kuat hna, cun Judah mi hna zong cu anmahle an ca le an holh in an kuat ve hna. ¹⁰ An ṭialmi cu Siangpahrang Ahasuerus min in a si i siangpahrang kutdong hrolh in an khenh chih; cun ca hna cu siangpahrang rang an zuatnak hmun in a chuakmi, siangpahrang rian caah hmanmi rang lek mu kha aa citmi caphortu hna nih khan an kalpi hna. ¹¹ Cun cu ca cun siangpahrang nih khan khua kip i a ummi Judah mi hna kha i pumh i an nunnak i runven i mi zei miphun hmanh an si ah, zei peng hmanh an si ah, anmah a dohtu hna paoh cu an ngakchia hna le an nu hna he rak tuk ve rak thah ve i an ci rak hmih ve i an chawva rak ramh ve ding kha nawl a onh hna; ¹² mah cucu ni khat nite ah Siangpahrang Ahasuerus ram chung dihlak ah, thla hleihnihnak thla, Adar thla, a ni hleithum ni ah tuah ding a si. ¹³ An ṭialmi ca ṭial chinmi cu peng kip ah khan nawlbia caah mi kip sinah thanh awkin pek a si lai i an ral hna cung i phuhlamnak tuahnak ding caah khan Judah mi hna cu cu ni ah cun i timh awk an si lai. ¹⁴ Cucaah siangpahrang rian ca i hman tawnmi rang lek mu hna cu i cit in caphortu hna cu khulrang in, siangpahrang nawlbia nih a fial hna bangin an chuak; cun nawlbia kha Susa khuapi chungah khan an thanh. ¹⁵ Susa khuapi cu lunglawmhnak in a au len lioah khan Mordekai cu, siangpahrang puan a dum le a rang kha aa aih i sui luchin kha aa chinh i la hmangṭhia le sendung puan kha i aih in siangpahrang hmai cun a hung chuak. ¹⁶ Judah mi hna nih cun ceunak le lawmhnak le thanuamnak kha an hmuh. ¹⁷ Cun peng kip le khua kip ah khan, siangpahrang nawlbia le biakhiahnak a phaknak paoh ah Judah mi hna caah cun lawmhnak le thanuamnak a um i rawldanghnak an tuah i i dinh ni kha an ser. Cun Judah mi ṭihnak kha an cungah a tlun caah cuka ram mi miphun hna chung cun mi tampi nih Judah mi ka si tiah an i ti.

¹ Cun thla hleihnihnak thla, Adar thla, a ni hleithum ni, siangpahrang nawl pekmi le biakhiahmi tuah awk a simi, Judah mi hna cu an ral pawl nih kan uk hna lai ti i an i ruahchan ni, sihmanhsehlaw Judah mi tu nih anmah a dohtu hna kha an uk hna ni i aa thleng ṭhanmi ni ah cun, ² Judah mi hna cu Siangpahrang Ahasuerus peng dihlak chung i an khua cio ah khan, anmah harnak pek a timtu hna kha tlaih awkah an i pum. Ahohmanh nih an derh kho hna lo, zeicahtiah mi hna cungah khan anmah ṭihnak cu a tlung. ³ Peng uktu bawi hna le siangpahrang kut tang bawi hna le ram uktu bawi hna le siangpahrang rianṭuantu bawi hna zong nih khan Judah mi cu an bawmh hna, zeicahtiah Mordekai kha an ṭih. ⁴ Mordekai cu siangpahrang inn chungah khan mingan a si i peng dihlak ah khan a min cu a thang chin lengmang i Mordekai cu nawl a ngei chin lengmang. ⁵ Cucaah Judah mi nih an ral hna cu vainam in an tuk, an thah, an hrawh hna i anmah a huatu hna kha an duhduh in an tuah hna. ⁶ Susa khuapi chung hrimhrim ah khan Judah mi nih za nga an thah hna i an hrawh hna, ⁷ cun Parsandatha le Dalfon le Aspatha le ⁸ Poratha le Adalia le Aridatha le ⁹ Parmashta le Arisai le Aridai le Vaizatha zong kha an thah hna, ¹⁰ annih cu Hammedatha fapa Haman, Judah mi hna ral i a fapa pahra kha an si; sihmanhsehlaw a ramh cu ahohmanh an ramh hna lo. ¹¹ Susa khuapi chungah cun zeizat dah an thah hna ti kha cu ni hrimhrim ah cun siangpahrang sinah khan an thanh. ¹² Cun siangpahrang nih Siangpahrangnu Esther cu a thawh i, "Susa khuapi chungah Judah mi nih mi za nga an thah hna i Haman fapa pahra zong kha an i tel. A si ahcun, siangpahrang i a peng a dang hna ah khan zeitindik an hei tuah hnga. Atu cu zeidah na ka nawlmi a si rih? Pek na si lai. Zeidah hal na ka duhmi a si rih? Tlinter a si lai," tiah a ti. ¹³ Cun Esther nih a thawh i, "Siangpahrang na duhnak a si ahcun, Susa khua chung i a ummi Judah mi hna hi nihin nawl pekmi bantuk hin thaizing zong tuah onh si rih hna seh. Cun Haman fapa pahra hna hi thlainak ah thlai si hna seh," tiah a ti. ¹⁴ Cucaah mah cucu tuah awkah siangpahrang nih nawlbia a ser i Susa khua chungah cun biakhiahnak a chuah i Haman fapa pahra hna cu an thlai hna. ¹⁵ Susa khua i a ummi Judah mi hna cu Adar thla a ni hleili ni zongah khan an i pum i Susa khua chungah khan mi za thum an thah hna; sihmanhsehlaw a ramh cu an ramh hna lo. ¹⁶ Siangpahrang peng chung i a ummi Judah mi a dang hna zong kha an nunnak i runven awkah an i pum i an ral hna sin khan himnak an hmu i anmah a huatu hna kha sang sarih le thong nga an thah hna; sihmanhsehlaw a ramh cu ahohmanh an ramh hna lo. ¹⁷ Mah cucu Adar thla ni hleithum ni ah khan a si i a ni hleili ni ah cun an i din i cu ni cu puai ni le lunglawmhnak ni ah an ser. ¹⁸ Sihmanhsehlaw Susa khua chung i a ummi Judah mi hna cu ni hleithum ni le ni hleili ni ah an i pum i ni hleinga ni ah an i din, cu ni cu puai ni le lunglawmhnak ni ah an ser. ¹⁹ Cucaah khuate i a ummi, kulhnak a ngei lomi khua i a ummi Judah mi hna nih cun Adar thla ni hleili ni cu lunglawmhnak le puai le dinh ni ah an ser i cu ni cu pakhat le pakhat kha laksawng a ṭhaṭha i kuatnak ah an hman. ²⁰ Cun hi thil hi Mordekai nih ca chungah a khumh hna i Ahasuerus Siangpahrang peng chung dihlak i a ummi Judah mi kha, a hlat i a ummi he a nai i a ummi he, ca a kuat hna i ²¹ kum khat hnu kum khat Adar thla ni hleili ni le ni hleinga ni kha nan ulh hna lai, ²² zeicahtiah hi ni hna ah hin Judah mi nih an ral hna sinin himnak an hmuh i hi thla hi an caah ngaihchiatnak in lunglawmhnak ah, ṭahnak in dinhnak ni ah aa thlen thla a si; cun nannih nih hi ni hna cu puai tuahnak le lunglawmhnak ni le laksawng ṭhaṭha i kuatnak le sifakmi hna laksawng peknak ni ah nan hman lai tiin nawl a pek hna. ²³ Cucaah Judah mi hna nih cun an rak thawk bantuk le Mordekai nih ca a kuat hna bantuk khan an tuah. ²⁴ Zeicahtiah Agag mi Haman, Hammedatha fapa, Judah mi ral nih khan Judah mi hna cu hrawh awkah khua a khan i annih kha hloh le hrawh awkah Pur kha a rak khiah cang, Pur cu camcawhfung a si; ²⁵ sihmanhsehlaw Esther cu siangpahrang hmaiah a rat tikah, Judah mi hna cung i ṭhat lonak khua a khan mi kha amah lu cungah tla in amah le a fapa hna cu thlainak ah thlai an si nakhnga, caṭial in nawlbia kha a chuah. ²⁶ Cucaah hi ni hna cu Pur ti bia zulh in Purim tiah an ti hna. Cucaah cu ca chung i aa ṭialmi vialte le hi kong ah annih nih an tonmi vialte le an cung i a tlungmi thil vialte ruangah, ²⁷ Judah mi hna nih cun an fehter i anmah le an tefa hna le anmah a fonhtu vialte hna keng cungah khan an i chonh i hi ni hnih hi pel lo tein, hi ca ṭialning te le a caan khiah ni ah hin kumfate in kan ulh lai, an ti; ²⁸ Cun hi ni hnih hna cu, kan tefa hna nih an chan kip ah le kan innchungkhar hna nih an dihlak in, peng kip le khua kip i an umnak ah, hngal camcin hna seh law, hi Purim ni hna hi Judah mi nih hman loin an um hrimhrim nakhnga lo, kan tefa hna lakah hi ni hna hngalh camcinnak cu dong hlah seh, an ti. ²⁹ Khi tikah Abihail fanu Siangpahrangnu Esther le Judah mi Mordekai nih khan ca ṭial nawl ngeihnak in Purim kong i ca pahnih cu an fehter. ³⁰ Ahasuerus ram chung i peng za le peng kul le peng sarih ah khan, Judah mi vialte sinah daihnak bia le biatak in ca an kuat hna i, ³¹ hi Purim ni hna hi an caan khiahpiakmi caan ah, Judah mi Mordekai le Siangpahrangnu Esther nih Judah mi hna cu an fial hna bantuk le anmah le an tefa hna caah an rawl ulhnak kong le an ṭahnak kong i phung an sermi bantukin ulh si hna seh, an ti. ³² Siangpahrangnu Esther nawlbia nih Purim tuahnak ningcang cu a fehter i mah cucu ca in ṭial a si.

¹ Siangpahrang Ahasuerus nih a ram le rili kam ram hna cu ngunkhuai a thawhter hna. ² Cun a lianhngannak in a tuahmi vialte le a ṭhawnnak le Mordekai cu upatnak a sangmi ah siangpahrang nih a chiahnak kong vialte cu Media le Persia siangpahrang hna Chanrelnak Cauk chungah an i ṭial lo mei? ³ Judah mi Mordekai cu Siangpahrang Ahasuerus changtu a si i a miphun hna ṭhathnemnak kha a kawl i a mi vialte hna sinah khan daihnak bia a chim caah Judah mi lakah khan mingan a si i a unau hna mi tampi lakah khan zapi duhmi a si.