PHUNGCHIMTU

PHUNGCHIMTU

¹ David fapa, Jerusalem i a ummi siangpahrang Phungchimtu bia: ² Pakpalawng lawngte, pakpalawng lawngte! Zeizong vialte hi pakpalawng an si ko,tiah Phungchimtu nih a ti. ³ Minung nih hin nilin lak le khuasa lak i a ṭuanmi rian hin zeidah a miak a hmuh? ⁴ Chan khat cu a liam, a dang chan khat a hung chuak ve, sihmanhsehlaw vawlei cu a sining ṭhiamṭhiam khan a hmun zungzal ko. ⁵ Ni cu a chuah kel in a chuak ṭhiamṭhiam ko, a tlakning in a tla ṭhiamṭhiam ko; A chuahnak hmun ah khan a hram in i thawk ṭhan awkah a kir ṭhan lengmang ko. ⁶ Thli cu thlanglei ah a vung hrang, cun chaklei ah a hun i let ṭhan; aa kual lengmang i aa thawknak ah khan a kir ṭhan. ⁷ Tiva vialte cu rili chungah an vung luang, sihmanhsehlaw rili cu a khat hlei lo; ti cu tiva an i thawknak ah khan a kir ṭhan i a hram in aa thawk ṭhan ko. ⁸ Zeizong vialte hi thadi le zaangbang an si dih, holh in chim khawh hmanh an si lo; mi nih hin hmuh hi cim ti a ngei lo i hna nih hin theih hi khim ti a ngei ve lo. ⁹ A rak si cangmi kha a si ṭhan ko lai, tuah lengmangmi hi tuah lai dingmi cu a si fawn ko lai; vawlei cungah hin zeihmanh a thar a um lo. ¹⁰ "Zohhmanh, mah hihi a thar a si," an ti; sihmanhsehlaw cucu hlanpi ah, kan chuah hlanpi ah a rak um diam cangmi a si. ¹¹ Hlanlio thil kha ahohmanh nih an hngal camcin hna lo, cun hmailei ah atu le cu caan karlak i thil a um dingmi zong hi ahohmanh nih an hngal camcin hna lai lo. ¹² Phungchimtu keimah hi Jerusalem khua ah Israel mi hna siangpahrang ka rak si. ¹³ Vanrang toiah mi nih an tuahmi thil vialte hi ka hneksak hna lai i a sullam hngalh kaa zuam hna lai. Pathian nih minung kan cungah thil a kan khinhmi hi a nuam lo ngaimi a si ko. ¹⁴ Vawlei cung i an tuahmi thil vialte hi ka hmuh dih, an dihlak in pakpalawng men a si ko, thlitu dawi bantuk men khi an si ko. ¹⁵ A kawimi cu na dinter kho lai lo, a um lomi cu rel khawh a si lo. ¹⁶ Keimah le keimah cu, "Mingan ka si cang, keimah hlan i Jerusalem a rak uktu hna nakkhan a let tam piin ka fim deuh. Fimnak le hngalhnak hi zeidah an si, ti kha ka hngalh hna," ka ti. ¹⁷ Cun fimnak le hruhnak, thil hngalhthiam khawh lonak le hngalh thiam khawhnak an i dannak hi hngalh kaa zuam hrimhrim lai, ka ti. Sihmanhsehlaw cucu ka caah thlitu dawi tluk ceo kha a rak si ko ti cu ka hngalh ṭhan. ¹⁸ Zeicahtiah fimnak cu a tam deuh paoh ah lungretheihnak tam deuh ngeih a si ve ko, Cun thil tam deuh hngalh paoh ah tam deuh temhinnak hmuh a si ve fawn ko.

¹ Kaa nuam tuah lai, lunglawmh timi hi a sullam zeidah a si ka kawl tuah lai, ka ti. Sihmanhsehlaw hi zong hi pakpalawng men a si ko. ² Nih hi hruh a si, i nuamhnak nih hin zeihmanh ṭhatnak a kan pe kho lo ti kha ka hngalh. ³ Ka pum cu zu in ka lawmhter lai i ka lungthin in fimnak cu ka kawl lai ka ti. Cucu minung nih vawlei cung i caan tawite a nun chungah hin a tuah khawhmi thil ṭha bik a si rua lai, tiah ka ruah. ⁴ Rian ngan pipi cu ka lim hna, inn ka sak hna i mitsur dum kaa ser hna; ⁵ dum le tlonlennak hmun kha kaa ser hna i an chungah thingthei kung a phunphun ka cin hna. ⁶ Ti toihnak ding caah tili ka ser hna. ⁷ Salnu hna he salpa hna he kaa cawk hna i ka inn chung i a chuakmi sal zong ka ngei hna; keimah hlanah Jerusalem i a rak ummi nih a ngeihmi nak tam deuh in cawrun hna le tuurun hna kha tampi ka ngeih hna. ⁸ Cun ka ukmi hna ram siangpahrang hna rothil chung khan sui le ngun kaa pumh hna; hlasatu nu he pa he kaa chiah hna i ka duh zat in nu kha kaa ngeih hna. ⁹ Ka ngan taktak ko, Jerusalem khua i a rak ummi aho nak hmanh khan ka ngan deuh ko i ka fim ngaingai fawn. ¹⁰ Ka duhmi paoh kha ka hmuh khawh, nuamhnak kha zeihmanh ka tlolhmi a um lo. Thil ka tuahmi paoh nih khan thangṭhatnak an ka pek i cucu ka laksawng a si. ¹¹ Khi tikah ka tuahmi vialte kha ka zoh hna i ka tuahnak hna ah khan zeitluk in dah ka re a theih ti kha ka ruah tikah, zeihmanh an rak si lo ti kha ka vun hngalh. Thlitu dawi bantuk ceo kha a rak si ko i zeihmanh ṭhathnemnak a um lo. ¹² A ngaingai ti ahcun, siangpahrang nih a tuah khawhmi hi amah hlan i a rak ummi siangpahrang hna nih an tuahmi kha an si ko ee. Cucaah fim ti le ralrin lo ti le hruh ti hna hi an sullam zeidah an si ti kha ka ruat ṭhan. ¹³ Fimnak cu hruhnak nakin a ṭha deuh ti cu ka hngalh, ceunak cu muihnak nakin a ṭhat deuh bantukin. ¹⁴ Mifim nih cun khuazei ah dah kan kal ti kha an hmuh khawh, mihrut nih cun an hmu kho lo. Sihmanhsehlaw kan donghnak cu aa khat ṭhiamṭhiam ko lai ti kha ka hngalh ṭhan. ¹⁵ Mihrut cung i a tlungmi thil kha keimah cung zongah a tlung ve ko lai. Cucaah ka fim hi zei ṭhathnemnak a um hlah i? ka ti. Zeihmanh ṭhathnemnak a um lo, a um hrimhrim lo. ¹⁶ Ahohmanh nih mifim kha an hngal camcin hna lo, ahohmanh nih mihrut kha an hngal camcin ve hna lo. Hmailei ah cun kan dihlak in philh kan si ko lai. Kan dihlak in kan thi lai — a fim he a hrut he kan thi dih ko lai. 1 ¹⁷ Cucaah nunnak hi ka caah sullam zeihmanh a ngei lo. Zeicahtiah harnak dah ti lo cu zeihmanh a ka pekmi a um lo. Pakpalawng men a rak si ko. Thlitu men ka rak dawi ko. ¹⁸ Ni toi i rethei ngaiin ka ṭuanmi ka rian vialte le ka hmuhmi thil vialte hi ka caah sullam zeihmanh an ngei lo; ka hnu i a rung um ding hna ca i ka chiahtak ding men an si kha ka hngalh; ¹⁹ cun mah pa cu mifim a si lai le mihrut a si lai kha aho nih dah a hngalh? A zei a si hmanh ah rethei ngaiin ka ṭuanmi le ni toiah ka fimnak ka hmanmi thil vialte cungah amah cu bawi a si ko lai. Mah zong hi pakpalawng a si ko. ²⁰ Cucaah ka rak ṭuanmi rian vialte kha kaa ngaihchih hna. ²¹ Na fimnak vialte le na hngalhnak vialte le na thiamnak vialte kha hmang in thil pakhatkhat na tuah i cucu zeihmanh a tuah ṭung lo mipa caah khan na kaltak ko. Cucu pakpalawng a si i ahmaan zong ahmaan lo. ²² Rethei le zaangbang in ni toiah na ṭuanmi vialte chung hin zeidah na ngeih? ²³ Na nun chung paohpaoh ah cun na tuahmi thil paoh nih hin lungfahnak le lung retheihnak dah ti lo cu zeihmanh an pekmi a um lai lo. Zan hmanh ah na ruahnak kha na dinhter kho lo. Mah zong hi pakpalawng a si ko. ²⁴ Minung nih hin a ṭha bik a tuah khawhmi cu zeidah a si ti ahcun, ei i din i a hmuhmi paoh kha i nuamhpi hi a si ko. Asinain mah zong hi Pathian kut in a rami a si kha ka hngalh; ²⁵ zeicahtiah amah tel loin aho nih dah ei awk an hmuh khawh i aho nih dah nuamhnak an hmuh khawh? ²⁶ Pathian nih a lung a tongtu hna kha cu, fimnak le hngalhnak le lawmhnak a pek hna; sihmanhsehlaw misual hna kha cu, rian a ṭuanter hna, an ṭuan man cu a hmuhter hna i a khonter hna, sihmanhsehlaw cucu a lung a tong deuhtu kha a pek hna. Mah zong hi pakpalawng le thlitu dawi men a si ko.

¹ Zeizong vialte caah hin caan a um cio i vanrang tang i a ummi thil vialte nih hin caan an ngei dih: ² Hrin caan a um, thih caan a um; cin caan a um, phawi caan a um; ³ Thah caan a um, damter caan a um; ṭheh caan a um, sak caan a um; ⁴ Ṭah caan a um, nih caan a um; ngaihchiat caan a um, lam caan a um; ⁵ Nu le pa si caan a um, si lo caan a um; i pom caan a um, i pom lo caan a um; ⁶ Kawl caan a um, thlau caan a um; chiah caan a um, hlonh caan a um; ⁷ Thleh caan a um, belh caan a um; dai tein um caan a um, chim caan a um; ⁸ Huat caan a um, dawt caan a um; i doh caan a um, i rem caan a um; ⁹ Rianṭuantu nih rethei ngaiin a ṭuanmi chung hin zeidah a miak a hmuh? ¹⁰ Pathian nih kan cung i a kan khinhmi rian cu ka hngalh cang. ¹¹ Zeizong vialte hi anmahle an caan te a serpiak cio hna; cun hmailei thil hngalh duhnak kha minung kan lungthin chungah a chiah i asinain Pathian nih a tuahmi kha tling tein hngalh khawhnak kha cu a kan pe lo. ¹² Cucaah minung nih a ṭha bik a tuah khawhmi cu a nun rih lioah i lawmh le a ṭha bik a timi kha a tuah khawh chungin tuah kha a si ko. ¹³ Kan dihlak in ei u sih law ding u sih law kan ṭuan man kha i nuamhpi u sih. Cucu Pathian laksawng a si ko. ¹⁴ Pathian nih a tuahmi paoh cu zungzal in a hmun ti kha ka hngalh; zeihmanh chap khawh an si lo i zeihmanh zuh khawh zong an si lo; minung nih a hmaiah ṭihnak a ngeih nakhnga Pathian nih cu bantuk cun a tuah. ¹⁵ A um liomi hi a um cangmi an si dih ko; a um dingmi hi hlanah a rak um diam ding cangmi kha an si; Pathian nih a um ciami thil kha a um ṭhanter lengmang hna. ¹⁶ Cuhleiah vanrang tangah hin ṭhat lonak nih dinnak le a hmaanmi thil kha an hmun a rolh lengmang hna ti kha ka hmuh. ¹⁷ Ka lung chungin Pathian nih miding le miṭhalo cu aa khat rep in bia a ceih ko hna lai, zeicahtiah kan hmailei vawlei zong hmanh ah khin zeizong vialte hi anmahle an caan te cio ah an tling cio ko lai, ka ti. ¹⁸ Minung hi saram nakin zeihmanh kan si hlei lo ti hngalhnak caah Pathian nih minung hi a hneksak hna ti kha ka hngalh. ¹⁹ A ngaingai ti ahcun, minung le saram hi kan donghnak aa khat ko. Saram cu minung bantukin a thi i minung zong cu saram bantukin a thi ve ko. An pahnih in nunnak thaw a ngeimi an si. Nunnak hi minung caah siseh, saram caah siseh, sullam a ngeih lo caah minung hi saram nakin zeihmanh a si hlei lo. ²⁰ An pahnih tein an fuhmi hmun cu aa khat ko — leidip kha a si ko. An pahnih in cuka cun an chuak i an pahnih in cuka ah cun an kir ṭhan lai. ²¹ Minung thlarau cu cunglei ah a kai i saram thlarau cu tanglei ah vawlei ah a lut tiah aho nih dah fiang tein an hngalh khawh lai? ²² Cucaah minung nih a ṭha bik a tuah khawhmi cu a ṭuan man a hmuhmi i nuamhpi hi a si ti kha ka hngalh. Cu pinah a tuah khawhmi dang zeihmanh a um lo. A thih hnuah zeidah a hung um te lai ti a hngalh khawhnak lam zeihmanh a um lo.

¹ Cun hi vawlei cung i a um lengmangmi dinlonak hi ka zoh ṭhan. Hremmi hna cu an ṭap lengmang, sihmanhsehlaw ahohmanh nih an bawm hna lo. Anmah a hremtu hna kha thil ti khawhnak a ngeimi cu an si caah ahohmanh nih an bawm duh hna lo. ² A thi i a lomi kha ka hngar deuh hna; a nung rihmi nakin an caah a ṭha deuh. ³ Sihmanhsehlaw cu hna pahnih nakin a ṭha deuh chinchinmi cu a nun in a nung bal lomi kha an si, hi vawlei cung i a um lengmangmi dinlonak a hmuh in a hmu bal lomi kha an si. ⁴ Zeicahdah minung nih hin tlamtlinnak ding caah fak piin rian a ṭuan ti zong kha ka hngalh cang: hawi nakin tam deuh ngeih an duh caah a si. Cucu pakpalawng a si ko, thlitu dawi men kha a si ko. ⁵ Kut i sih i rawlṭam in thih ko cu hruh a si, an ti. ⁶ A si zong a si men ko lai, sihmanhsehlaw tlawmte lawng hmanh ngeih ko i lung dai tein um hi kut a pahnih hnih in rian ṭuan zungzal ko i thlitu tlaih i zuamnak nakcun a ṭha deuh. ⁷ Kan nunnak ah hin pakpalawng a simi thil pakhat ka hmuh ṭhan hoi: ⁸ Mipa pakhat cu amah lawng tein khua a sa. Fapa a ngei lo, unau zong a ngei lo, sihmanhsehlaw rian a ṭuan zungzal i a hmuhmi chawva kha zeitikhmanh ah kaa za cang ti a ngei kho lo. Aho ca ko ah hen cu ti lawmmam cun a ṭuan i a nuamh hmanh i nuam ngam lote in a um? Mah hihi pakpalawng a si fawn ko, aa nuam lo ngaimi minung a si ko. ⁹ Pahnih cu pakhat nakin an ṭhahnem deuh, zeicahtiah an ṭuanmi rian khan tam deuh an hmuh khawh. ¹⁰ Pakhat kha a tluk sual ahcun pakhat nih khan a bawmh khawh. Sihmanhsehlaw mi pakhatkhat cu amah lawng a si i a tluk sual ahcun a poi ngaingai ko amah a bawmtu ahohmanh an um ti lo. ¹¹ Khua a sih tikah pahnih in hmunkhat ah nan ih ahcun nanmah le nanmah kha nan i lumh kho, sihmanhsehlaw nangmah lawng cun zeitindah naa lumh khawh lai? ¹² Pakhat lawng a teitu ral kha pahnih nih cun an rak doh khawh lai. Thumthlak hrihrual cu chah a harmi a si. ¹³ - ¹⁴ Mi pakhatkhat cu sifak te a si nain a ṭhang lengmang i an ram siangpahrang ah a cang, asiloah thonginn in siangpahrang ṭhutdan ah a kai, sihmanhsehlaw cu pa nih cun a tar tikah ruahnak cheuhmi kha a duh lo ahcun, a si a fak nain a fimmi tlangval kha cu pa nakcun a ṭha deuh. ¹⁵ Vawlei cung i a ummi minung vialte hna kong hi ka ruat i an lak ah hin siangpahrang hmun a co kho dingmi an um ti kha ka hngalh. ¹⁶ Siangpahrang nih a ukmi hna hi rel cawk lo an si ko lai, sihmanhsehlaw a thih tikah cun a rak tuahmi thil ruangah khan a cung i a lawmmi ahohmanh an um hlei lo. Hihi pakpalawng a si fawn ko, thlitu dawi men cu a si ko.

¹ Biaknak inn na kal ah hin i ralring. Cu ka i na va kal tikah zeidah kaa cawn khawh lai ti kha ruat deuh, cucu ahmaanmi thil le ahmaan lo mithil a thleidang kho lomi mihrut hna nih an pekchanhmi raithawinak nakin a ṭha deuh. ² Bia na chim hlanah i ruat hmasa, cun Pathian sinah hnawnam in biakamnak ser hlah. Pathian cu vancung ah a um i nang cu vawlei ah na um, cucaah a herhmi hlei in zeihmanh va chim hlah. ³ Na lungre a theih deuh paoh ah mang chia na manh deuh ko lai, cu bantukin tam deuh bia na chim paoh ah hruhnak bia kha tam deuh na chim sual ko lai. ⁴ Cucaah Pathian sin i bia kamnak na tuah tikah khulrang in cucu zul ko. Pathian nih mihrut cu zeihmanh ah a herh hna lo. Ka tuah lai tiah naa kammi kha va tuah ko. ⁵ Bia i kam ṭung i tuah lo nakcun rak i kam lo lawlaw kha a ṭha deuh. ⁶ Nangmah bia lila kha sualnak chung i an luhpitu siter hlah, Pathian tlangbawi cu, khakha ka ti duhmi a si lo, tiah chimh awk herh in um hlah, zeicah Pathian cu na cungah a thin na hunter lai? Zeicahdah na rak tuahmi cu na hrawhter lai? ⁷ Mang cu manh len ko, cun na tuahmi rian zong cu pakpalawng si koin na chimmi bia cu tam ko hna hmanh seh law Pathian cu na ṭih ṭhiamṭhiam awk a si. ⁸ Acozah pakhatkhat nih misifak kha an hrem hna i dinnak le an hmuh awk a simi kha an pe hna lo, ti na hmuh tikah na khuaruahhar hlah; bawi paohpaoh cu an cung i a ummi bawi cio nih khan an huhphenh hna i cu hna zong cu anmah nakin a sang chin deuhmi bawi nih khan an huhphenh chin ve hna. ⁹ Ram pakhatkhat nih a herh tawnmi cu lo thlawhnak lei i lungthin a ngeimi siangpahrang a si. ¹⁰ Tangka duhmi na si ahcun, zeitikhmanh ah kaa za cang na ti kho bal lai lo; rum a duhmi na si ahcun, na duhmi vialte kha cu na hmu kho bal lai lo. Pakpalawng a si ko. ¹¹ Na rum deuh paoh ah na cawm awk kha an tam chin lengmang ko lai i naa miakmi cu ka rum ti naa hngalh lawng kha a si ko lai. ¹² Rian hrang a ṭuanmi cu ei awk a zaa a ngeih caan a um lai, a ngeih lo caan zong a um lai, sihmanhsehlaw zan tal ah ṭha tein aa hngilh; sihmanhsehlaw mirum cu tampi a ngei ko nain a lungretheihnak nih khan hngilh lo in a umter. ¹³ Mah hihi thil ṭhalo ngai a si, sihmanhsehlaw vawlei cungah hin ka hmuh cangmi a si: mi nih hin an tangka hi an herh caan caah an khon tawn, ¹⁴ cun zei maw tiin rian pakhatkhat ah an hloh dih sual i an fale roh awk kha zeihmanh a tang lo. ¹⁵ Hi vawlei hi kan hung luh bantukte khan kan chuahtak ṭhan lai — zeihmanh lo tein. Zeicahtiah kan tuahmi vialte hi pakhat hmanh kan i kalpi khawh ding a um lo. ¹⁶ Mah hihi thil ṭhalo ngai a si ko, kan ratning te khan kan kal ṭhan ko. Rian heh tiah kan ṭuan, thlitu tlaih kha kan i zuam, sihmanhsehlaw zeidah kan hmuh? ¹⁷ Muihnak chung le ngaihchiatnak chungah hin lungrethei le thinhung le ngandam loin kan nun a herh ko. ¹⁸ Hihi ka va hmuhmi thil a si. Mi nih hin a ṭha bik a tuah khawhmi cu ei i din i Pathian nih nunnak tawite a pekmi chung i a rianṭuanmi chungin a hmuhmi kha i nuamhpi hi a si ko; cucu minung kan covo cu a si ko. ¹⁹ Pathian nih mi pakhat khat cu rumnak le thilri a pek i cucu a nuamhpiter hna ahcun, Pathian sinah aa lawmh awk a si ko i a ṭuanmi cu aa nuamhpi awk a si ko. Cucu Pathian laksawng pei a si cu. ²⁰ Pathian nih lunglawm tein umnak nawl kha a pek caah a nunnak zeitluk in dah a tawi kha cu, a lungre aa theihpi lai lo.

¹ Vawlei cungah hin dinlonak nganpi minung cungah tuah a si ti kha ka hmuh. ² Pathian nih mi pakhatkhat cu rumnak, upatnak le thilri kha a pek, a duhmi paohpaoh kha a pek ko. Sihmanhsehlaw cu hna cu i lawmhpi awk kha a sianh fawn ṭung lo. Midang pakhat khat tu nih khan a hun i lawmhpi ko hna. Cucu pakpalawng a si i a din zong a ding lomi thil a si. ³ Mi pakhatkhat nih fa za khat a ngeih ko hnga i kum saupi a nung ko hnga, sihmanhsehlaw zei caan a nun hmanh ah lunglawmhnak kha a ngeih lo i hmaizahnak tein vuinak kha a hmuh lo ahcun, cu pa nakcun a thi cia i a chuakmi ngakchia kha a ṭha deuh. ⁴ Ngakchia caah chuah kha zeihmanh ṭhathnemnak a um lo; muihnak chungah khan a lo i cuka ah cun philh a si ko. ⁵ Chun ceu kha a hmu bal lo, nunnak zong hi zeidah a lawh ti kha a hngal lo, sihmanhsehlaw anih cu dinhnak tal kha a hmu — ⁶ mi pakhatkhat cu kum thong hnih hmanh a nung ko hnga i a nun chungah nuamhnak hmu ṭung lomi a si ahcun, cu pa nakcun ngakchia kha dinhnak kha a hmu deuh. A donghnak ah cun an pahnih in hmun khat ah pei an va kal ko lai cu. ⁷ Mi nih heh tiah rian a ṭuan cu ei awk hmuhnak ding caah a si ko, sihmanhsehlaw kaa za cang ti cu a um kho hlei lo. ⁸ Zeitindah mifim mi cu mihrutpa nakin ṭhathnemnak a hmuh hlei? Zeitindah kan nun awk a si ti hngalh nih hin misifak cu zeidah a ṭhathnem? ⁹ Pakpalawng a si ko, thlitu dawi bantuk ṭhiamṭhiam a si ko. Ngeihmi cungah lungawi tein um hi ngeih chin lengmang duhnak nakin a ṭha deuh. ¹⁰ Thil a hung ummi paoh hi hlan piin ruah cia dih an si cang i mi nih amah nakin a ṭhawng deuhmi he bia i al cu a si kho lo ti kha kan hngalh cio. ¹¹ Sau deuh nan i al paoh ah pakpalawng a si chin lengmang i na caah zeihmanh ṭhathnemnak a um hlei lo. ¹² Zeitindah, ahohmanh nih a nun chung caan tawite, pakpalawng ngai a simi chungah hin zeidah ka caah a ṭha bik ti cu an hngalh khawh lai? A nunnak tham cu thladem bangin a lo zaumi pei a si ko cu. Aho nih dah a thih hnuah hin vawlei cungah zeidah a hung um lai ti kha a hngalh khawh lai?

¹ Min ṭha hi a sungmi zihmui nakin a ṭha deuh; thih ni hi hrin ni nakin a ṭha deuh. ² Mithi ṭahnak inn i va kal khi rawl danghnak inn i va kal nakin a ṭha deuh; zeicahtiah thihnak nih a kan hngah cio ko ti hi minung nih kan hngalh zungzal awk a si. ³ Ngaihchiat hi lunglawmh nakin a ṭha deuh, zeicahtiah ngaihchiatnak nih cun na hmai cu a ngaih a chiatter ko nain na hngalhnak kha a haarter lai. ⁴ Mifim mi lungthin cu ngaihchiatnak inn ah a um, sihmanhsehlaw mihrut mi hna lungthin cu puai tuahnak inn ah a um. ⁵ Mihrut mi nih na thangṭhatnak hlasak in an sak nakin, mifim mi nih an in sik kha a ṭha deuh. ⁶ Mihrut cu an nih ah khin, hlingkung mei chung i a puah ṭhukmak bantuk khi a si, sullam zeihmanh a ngei lo. ⁷ Mifim mi nih midang pakhatkhat a hlen hna ahcun, mihrut bantukin rian a ṭuan a si. Nawhthuh nih lungthin a ṭhutter. ⁸ Thil donghnak hi a hramthawknak nakin a ṭha deuh; lung a saumi hi aa porhlawmi nakin a ṭha deuh. ⁹ Na thin i sum khawh kha i zuam, lungchung in mi uam peng hi hruh a si. ¹⁰ "Zeicahdah hlan lioah khan atu nak hin thil kha a rak ṭhat deuh?" ti hlah, cucu fimnak biahalnak a si lo. ¹¹ Fimnak hi a sungmi ro a si, a nungmi hna caah laksawng ṭha a si; ¹² Zeicahtiah fimnak nih cun tangka tlukin lung hnangamnak a pek khawh i hngalhnak nih ṭhatnak a pek khawhmi cu hihi a si: hngalhnak a ngeimi nih cun fimnak a hmuh i fimnak nih cun him tein a umter. ¹³ Pathian rianṭuanmi hi va ruat tuah, a kawiter cangmi cu aho nih dah a dinter khawh lai? ¹⁴ Ṭhat ni ah i lawm law harnak na ton ni ah hihi va ruat tuah: Pathian nih lunglawmhnak zong cu a umter i harnak zong cu a umter, hmailei ah zeidah a um lai ti bel, ahohmanh nih an hngal lo. ¹⁵ Ka nun chung hi pakpalawng a si ko, sihmanhsehlaw hi chungah hin zeizong vialte ka hmuh dih; pakhat cu a ding ko nain a thi i pakhat tu cu a ṭhalo ko nain a chan a sau. ¹⁶ Cucaah a ṭhat zong ṭha tuk hlah, a fim zong fim tuk hlah, zeicahdah nangmah le nangmah cu naa thah lai? ¹⁷ Asinain ṭhat lo zong ṭha lo tuk fawn hlah, a hruh zong hrut tuk fawn hlah, zeicahdah na caan a tlin hlanah na thih lai? ¹⁸ Mah hihi naa tlaih ahcun a ṭha, cun mah cucu thlah ti hlah; Pathian a ṭihmi na si ahcun thlua na chuak kho lai. ¹⁹ Uktu pahra nih khua pakhat caah ṭhatnak an tuahmi nakin fimnak nih minung pakhat caah a tuahmi cu a tam deuh. ²⁰ Ṭhatnak a tuah zungzal i a sual bal lomi miding pakhat hmanh vawlei cungah hin an um hrimhrim lo. ²¹ Mi nih an chimmi paoh kha biapi in va la hlah, na sinum nih chiat an serh kha na theih sual lai, ²² nangmah hrim zong nih midang kha chiat voi tampi na serh hna cu na hngalh ko. ²³ Mah hi thil vialte hna hneksaknak caah hin ka fimnak kha ka hman. Fim hrimhrim kaa tim; sihmanhsehlaw cucu ka ti khawh leng a si. ²⁴ Zeitindah mi nih nunnak hi zeidah a si tiah an tuak khawh lai? Kan caah a thuk tuk, hngalhawk a har tuk. ²⁵ Sihmanhsehlaw hngalhnak le cawnnak ah khan ka pum kaa pe; fimnak kha hmuh awkah kaa zuam i ka biahalnak lehnak kha ka kawl; cun hruhnak a ṭhat loning le a hruhning kha hngalh awk kaa zuam. ²⁶ Thih nakin a kha deuhmi thil ka hmuhmi cu a lungthin rap le sur a si i a kut cu hreng a simi minu kha a si; Pathian duhnak a tuahmi cu amah sin cun an luat, sihmanhsehlaw misual cu a tlaih hna. ²⁷ Zohhmanh mah hihi ka hmuhmi cu a si, tiah Phungchimtu nih a ti, biahalnak lehnak ka kawlmi kha tlawmpal tete in ka hmuh lengmang. ²⁸ A dang lehnak zong kha ka kawl, sihmanhsehlaw ka hmu hna lo. Pa thong khat chungah hin a fimmi pakhat cu a um ko lai, sihmanhsehlaw nu fim ti hi cu a um bal lomi thil a si. ²⁹ Ka va hngalhmi cu mah vial hi a si ko: Pathian nih hin cun minung hi tliang tein a kan ser ko, sihmanhsehlaw kanmah le kanmah nih hin hnawk ngaiin kan i ser.

¹ Mifim mi lawng nih thil hi zeidah an si taktak ti kha an hngalh; Fimnak nih cun mi hmaiah nih thlam a lenter i an hmaichiatnak kha a lohter. ² Siangpahrang nih a chimmi kha tuah tuah, Pathian sinah hnawhnam in biakamnak ser hlah. ³ Siangpahrang nih cun a duhmi paoh kha a tuah khawh ko, cucaah a hmaika khan va chuak zau, cu bantuk ṭihnungmi hmun ah cun va um hlah. ⁴ Siangpahrang bia cu a sang bik a si i aho nih dah amah cu, "Zeidah na tuah?" an ti khawh lai? ⁵ A nawlbia na ngaih chung cu harnak na tong lai lo, mifim nih cun zeitik ah dah caan kha a ṭhat ti le zeitin tuah ah dah a ṭhat ti kha a hngalh. ⁶ Zei thil paoh hi zei caan ah dah tuah awk an si ti le zei lam in dah tuah awk an si, ti hi a um cio, sihmanhsehlaw kan hngalhmi hi a tlawm tuk hringhran. ⁷ Zeidah a hung um lai ti kha kan hngal lo i aho nih an kan chimh lai ti zong kha kan hngal lo. ⁸ Ahohmanh thi loin a um kho lai lo, a thih ni zong kha a thawn kho pek fawn lai lo. Raltuknak a tlun tikah cun luatnak a um lo, lihchim in kan luat kho lai lo. ⁹ Hi vawlei cung i thil umkalning ka zoh lengmang tikah hin hi vialte hi ka hmuhmi an si: hi vawlei hi mi a cheukhat nih ṭhawnnak an ngeihnak hmun a si i a cheukhat nih an ṭang i hremnak an innak hmun a si kha ka hngalh. ¹⁰ Miṭhalo hna an phum hna i an vui hna kha ka hmuh, sihmanhsehlaw thlan in kan kir leiah cun ṭhat lonak an tuahnak khua chung hrimhrim ah khan mi nih an thangṭhat len ko hna. Cucu pakpalawng a si. ¹¹ Zeicahdah mi nih ṭhat lonak kha an tuah lengmang? Ṭhat lonak an tuahmi caah khan khulrang in dantatnak an in lo caah a si. ¹² Misual mi nih sualnak kha voi za khat a tuah zongah a nung ṭhiamṭhiam ko. Asi, an chimmi cu ka hngalh, "Pathian na ṭih ahcun zeizong vialte a ṭha dih ko lai. ¹³ Sihmanhsehlaw miṭhalo mi hna caah cun a ṭha dih ko lai lo, an nunnak cu thladem bantukin a liam zau ding an si i Pathian an ṭih lo caah an no tein an thi lai," an ti. ¹⁴ Sihmanhsehlaw cucu pakpalawng a si. Vawlei cung i thil umtuning hi zoh ngat u, miding mi nih pei miṭhalo mi hna nih an hmuh awk a simi dantatnak kha an in i miṭhalo mi nih miding mi hna hmuh awk a simi laksawng kha an hmuh tawn ko hi. Mah hihi pakpalawng a si, ka ti. ¹⁵ Cucaah minung hi aa nuamh khawh chungin i nuam ko seh, ka ti. Zeicahtiah a nun chung i a hmuhmi nuamhnak cu ei le din le mah le mah i nuamh lawng hi a si ko i hi vawlei cung i Pathian nih nunnak a pekmi chung i rian a ṭuannak ah hin hi ceo cu pei a tuah khawhmi cu a si ko cu. ¹⁶ Fim kha kaa zuam i hi vawlei cung thil umtuning hngalh kha kaa zuam paoh ah hin, chun zan in hngilh loin ka um tawn, ¹⁷ sihmanhsehlaw Pathian nih a tuahmi thil cu hngalh khawh lo ṭhiamṭhiam a si peng ko, ti kha ka hngalh. Zei tluk hmanh in i zuam law na hngal bal lai lo. Mifim nih kan hngalh an ti hnga, sihmanhsehlaw an hngal lo.

¹ Pathian nih zeitindah mifim mi le miding mi hna an rianṭuannak kha a uk i dawtnak an ngeihmi le huatnak an ngeihmi hmanh a uk kha saupi le fak piin ka ruat. Ka hmaiah zeidah a um ti a hngal khomi ahohmanh an um lo. ² Zeihmanh aa dang hlei lo. Miding mi le miṭhalo mi cungah, miṭha mi le michia mi cungah, mithiang mi le mithianglo mi cungah, Pathian a biami hna le a bia lomi hna cungah, a tlungmi thil cu aa khat ṭhiamṭhiam ko. Miṭha kha misual mi nakin zeihmanh ṭhathnemnak an hmu hlei lo, chiat a ser lomi kha a sermi nakin zeihmanh ṭhathnemnak an hmu hlei lo. ³ Kan dihlak cungah thil pakhat a tlung ko i vawlei cung i a ummi thil vialte hna an hmaan lo tlukin ahmaan lomi thil a si ve. Mi cu an nun chung paoh ahcun an ruahnak cu ṭhat lonak le pakpalawng in a khat i hmakhatte ah an thi ko. ⁴ Sihmanhsehlaw vawlei cung i a nung rihmi minung hna caah cun ruahchannak tlawmpal a um; uico nung cu chiandeih thi nakin a ṭha deuh. ⁵ A nungmi nih cun kan thi lai ti kha an hngalh, sihmanhsehlaw a thimi nih cun zeihmanh an hngal lo. Annih cu laksawng hmuh ding zeihmanh an ngei ti lo, philh rumro in philh an si ko. ⁶ Dawtnak, huatnak, duhnak an ngeihmi vialte kha anmah sinah cun a thi ve. Hi vawlei cung i a ummi thil ah hin an i tel ve bal ti lai lo. ⁷ Va kal ko, na rawl cu va ei law vaa nuam ko, na zu cu va ding law na tha va nuam ko, na tuahmi paoh cu Pathian hnatla a si ko. ⁸ Lunglawm le thanuam in um zungzal ko. ⁹ Hi vawlei cungah Pathian nih nunnak an pekmi nunnak santlailo chung i na nun chung vialte hi na dawtmi nu he nuamhnak in hmang ko, pakpalawng a simi ni hna cu an dihlak in nuamhnak ah hmang ko hna, zeicahtiah cu vial cu pei harnak na inmi chungin na hmuhmi cu a si ko lai cu. ¹⁰ Na tuahmi cu a ṭhat khawh chungin tuah, zeicah tiah Sheol ah cun rian siseh, ruahnak siseh, hngalhnak siseh, fimnak siseh a um ti lo i cuka cu na kalnak ding hmun cu a si. ¹¹ Vanrang tangah hin thil pakhat ka hngalhmi a um ṭhan hoi: tlik zuamnak ah hin khul a rangmi nih teinak an hmu zungzal lem lo i ralṭhami hi tuknak ah teitu an si zungzal lem lo. Mifim mi hi duhdim in an um zungzal lem lo i mifim mi hi mirum an si bal theng lo. Vanchiatnak hi mi zei cung paoh ah a tlung ko. ¹² Zeitik ah dah na caan a rat ve lai kha na hngal lo. Kannih cu rap nih a foihmi va bantuk le sur ah aa awhmi nga bantuk kan si. Kan i ruah lopi ah khin caan ṭhalo chungah khan kan i foih tawn ko. ¹³ Thil ka hmuhmi a dang a um rih, cucu fimnak hi vawlei cungah hin zeitindah ruah a si, ti tahchunhnak ṭha ngai a si: ¹⁴ Khua hmete pakhat hi a rak um i a chungah mi tlawmte an rak um; siangpahrang pakhat nih a ra doh i a dum i raltuknak chuntlung ngan pipi kha a serhnawh. ¹⁵ Cu khua chungah cun misifak te a simi mifim pakhat hi a um i a fimnak in khua cu a luatter khotu ding a rak si. Sihmanhsehlaw ahohmanh nih cu misifakpa cu an ruat lo. ¹⁶ Kei nih cun fimnak cu ṭhawnnak nakin a ṭha deuh, ka ti, sihmanhsehlaw kha misifak pate kha ahohmanh nih a ruah in an ruat lo i a chimmi kha zei ah an rel lo. ¹⁷ Mihrut mi hna an i pumhnak hmun i uktupa a au len thawng ngaih nakin mifim mi nih dai tein an chimmi bia ngaih cu a ṭha deuh. ¹⁸ Ral hriamnam nakin fimnak nih tam deuh a tuah khawh, sihmanhsehlaw palhnak pakhat nih ṭhatnak tampi kha a hrawh khawh.

¹ Tho thi nih zihmui cu a thawl ning piin a thutter khawh, Cu bantukin hruhnak hmete nih fimnak ngan bik kha a hrawh khawh. ² Mifim nih a hmaanmi thil tuah kha a phung a si ko i mihrut nih a hmaan lomi thil tuah kha a phung a si ve ko. ³ Mihrut cu khual hmanh nih a hruhnak kha an hngalh i mihrut ka si ti kha a mi kip a hngalhter hna. ⁴ Uktu bawi kha na cungah a thin a hun ahcun na dir hmun kha va chuahtak hlah; Dai tein na um ko ahcun, palhnak a fakmi kha ngaihthiam khawh a si. ⁵ Vawlei cungah hin thil ṭhalo ka hmuhmi pakhat a um. Cucu uktu bawi hna nih an chuahtermi hi a si. ⁶ Mihrut mi hi hmunsang le nawlngeihnak kha an pek hna i mirum kha an thlei hna le ⁷ sal nih rang an i cit i bawi nih sal bantukin an ke in an kal hi a si. ⁸ Khor a comi cu a chungah amah a tla lai, Kulhnak vampang a pemmi cu rul nih a cuk lai. ⁹ Lung a khoihmi cu lung nih a hliam lai, Thing a cekmi cu thing nih harnak a pek lai. ¹⁰ Na hreitlung cu a hnawl i na tat lo ahcun Tha tam deuh chuah na hau lai. A hlankan in rak i timhtuah hi a ṭha deuh. ¹¹ Rul camh cu thiam hmanh law na camh ṭung lo ahcun zeihmanh a ṭhahnem lo, An cuk ṭhiamṭhiam ko lai. ¹² Mifim cu a kaa chungin a chuakmi bia nih upatnak a pek, Sihmanhsehlaw mihrut cu amah bia lila nih a hrawh. ¹³ Bia pakpalawng chim in aa thawk i a donghnak ahcun hruh taktak in a dong ko. ¹⁴ Mihrut cu dong loin bia a chim. Ahohmanh nih hmailei ah zei thil a um lai ti kha kan hngal lo, cun kan thih tikah zeitindah kan um lai ti kha ahohmanh nih an chim kho fawn lo. ¹⁵ A hruh tuk ruang i inn lam hmanh a hngal ti lomi lawng nih ba cikcek in rian a ṭuan lai. ¹⁶ A siangpahrang a lung fawi tein tei khawh a simi ram cu harnak a phan tawn, A bawile hna zan khuadei in puai ah aa nuammi ram cu harnak a phan ṭheo. ¹⁷ Sihmanhsehlaw mah lungthin tein ruahnak a thlekmi siangpahrang a ngei i A bawile hna cu a caan hmaante ah rawl a ei i anmah le anmah aa sum khomi a si i zu a ri lomi a simi hna ram cu ram vanṭha a si. ¹⁸ Thathut ruangah inncung a cim, Daithlan ruangah inn a zut. ¹⁹ Puai nih an lawmhter khawh, zu nih an nuamhter khawh, Sihmanhsehlaw tangka loin a zei paohpaoh hmanh cu na ngeih khawhmi an si lo. ²⁰ Siangpahrang cu a thlite hmanh in congoih hlah, Mirum cu nan ihnak khan chung hmanh ah congoih hlah, Zeicahtiah thli lak i a zuangmi va nih na aw cu an kalpi lai i na chimmi cu an va chimh sual ko hna lai.

¹ Na tangka cu chawlehnak ah hmang law ni khatkhat cu a miak na hmuh ko lai. ² Na tangka rianṭuannak cu hmun tampi ah chia hna, Zeitintiah vawlei cungah hin zei ṭhat lonak dah a tlung lai, na hngal lo. ³ Khuadawm cu ruahti in a khah tikah vawlei cungah a rung sur, Thingkung cu khuazeilei hoih paoh hmanh in tlu hmanh seh law a tluknak ah khan a ril ko. ⁴ Thlitu le nikhua an ṭhat tiang na ngan peng ko ahcun, thlaici zeihmanh na tuh bal lai lo i zeihmanh na zun bal pek fawn lai lo. ⁵ Nu nih fa an pawimi ruh chungah zeitindah thlarau kha a luh ti kha na hngalh lo bantukin zeizong vialte a sertu Pathian rian ṭuannak cu na hngal kho ve bal lai lo. ⁶ Zinglei ah thlaici tuh ko, zanlei zongah ngol hlah; zeicahtiah an dihlak in an ṭhat lai le an ṭhat lai lo kha na hngal lo i a zei kha dah a ṭha deuh lai ti zong kha na hngal lo. ⁷ Chun ceunak i nuamhpi khawh hi a ṭhami a si, ⁸ Na nun chungte hi cu na nun rihmi kum paoh caah khan i lawm ko, Zeicahtiah zei can na nun hmanh ah na nun chung nakin na thih hnu cu a sau deuh ṭheo lai ti kha hngal ko. Hmailei thil zeihmanh i ngaih awk a um lo. ⁹ Maw tlangval hna, nan tlanvalnak kha lawmhnak in hmang ko u, nan tlanval lioah hin nan lung nih lawmhnak hmu ko seh. Nan duhmi kha tuah ko u, nan lung a duh mi kha hmu ko u. (Sihmanhsehlaw nan tuahmi thil paoh ah khan Pathian nih bia a kan ceih lai, ti kha hngal ko u.) ¹⁰ Zeihmanh nan lungre i theihter hlah u, zeihmanh fahnak i pekter hlah u. Saupi na no ti lai lo.

¹ Cucaah nan tlanval lioah nanmah an sertu kha philh hlah u, ni ṭhalo hna an phak hlan le, "An chungah nuamhnak zeihmanh kan ngei lo," nan timi kum hna an nai hlanah hin. ² Cu caan cu ni le thlapa le arfi hna an ceunak a dulh i ruah minmei na caah a ṭian ti lo caan kha a si lai. ³ Khi tikah himnak an pe tawntu na ban kha an ther lai i atu i a ṭhawngmi na khuk cu an der lai. Na rawl khainak ding caah na ha cu an tlawm tuk lai i na mit cu an muih lai caah fiang tein khua na hmu kho lai lo. ⁴ Lam i thawngpang kha na hna a kut caah na thei kho lai lo. Rawl rialnak seh thawng kha a thei kho menmen na si lai i aw dawh zong an tum tikah a thei kho menmen na si lai. Sihmanhsehlaw vate onh thawng hmanh nih naa hngilhnak in an hlauh khawh lai. ⁵ Hmun sang kha na ṭih hna lai i chawh kha na caah ṭihnung a si lai. Na sam kha a par lai i nu le pa duhnak na ngeihmi kha a lo lai i zeihmanh nih a umter ṭhan kho ti lai lo. Kannih cu kan umnak ding zungzal kan inn ah khan kan kal lai i khua chung lampi ah ṭahnak a um lai. ⁶ Ngun cikcin kha a cat lai i sui meiinn kha a tlu lai i a kuai lai. Tikhor i hri kha a cat lai i ti thannak um kha a kuai dih lai. ⁷ Kan pum cu vawlei leidip ah a kir ṭhan lai i kan thaw cu a kan petu Pathian sinah a kir ṭhan lai. ⁸ Pakpalawng lawngte, pakpalawng lawngte, zeizong vialte hi pakpalawng lawngte an si dih, tiah Phungchimtu nih ka ti. ⁹ Phungchimtu cu a fim caah a hngalhmi kha mi cu a cawnpiak lengmang ko hna. Phungthluk bia kha a cawn hna i biatak an si maw si lo ti kha fel tein a hneksak hna. ¹⁰ Phungchimtu nih hnangamnak bia kha ka kawl hna, sihmanhsehlaw ka ṭialmi bia hi lihchim lo tein ka ṭial hna. ¹¹ Mifim mi hna bia cu tuukhal nih tuu khalhnak caah an hmanmi fung zum bantuk an si, kan dihlak in a kan zohkhenhtu Tuukhal a simi Pathian nih khan annih cu a pek hna. ¹² Ka fapa, naa ralrin awk thil a um rih. Ca uk ṭial luaimai hi dongh a thiam lo i cawn lengmang zong hi batnak men a si. ¹³ Hi thil vialte hna hnuah hin chim awk pakhat lawnglawng a um rih: Pathian cu ṭih law a nawlbia kha zul hna, zeicahtiah minung cu hi nawlbia hna tuah awk caah hin pei rak ser a si cu. ¹⁴ Pathian nih kan tuahmi thil paohpaoh hi, a thli tein kan tuahmi si hna seh, a ṭha kan tuahmi si hna seh, a chia kan tuahmi si hna seh, bia a ceih dih hna lai.