DEUTERONOMI

DEUTERONOMI

¹ Paran le Tofel, Laban, Hazeroth le Dizahab karlak, Suf zawn Arabah chung, Jordan tiva ral ramlak ah khan, Moses nih Israel mi vialte hna sinah mah bia hi a chimmi cu an si. ² Horeb in Kadesh-barnea cu Seir Tlang lei in ni hleikhat lam kal a si. ³ Kum sawm linak kum, thla hleikhat thla ni khatnak ni ah cun, Bawipa nih anmah chimh awkah nawlbia a pekmi vialte cu Moses nih Israel mi cu a chimh hna; ⁴ Amor mi Siangpahrang Sihon, Heshbon ah a ummi, le Bashan Siangpahrang Og, Ashtaroth le Edrei ah a ummi, a tei hna hnuah khan a si. ⁵ Jordan tiva ral, Moab ram chungah khan, Moses nih hi phungbia hi a sullam chimh a thawk hna i, ⁶ "Bawipa kan Pathian nih Horeb ah a kan chawnh i, ’Hi tlang ah hin sau nawn nan um ko cang; ⁷ i mer u law, i thawh u law, Amor mi hna umnak tlangram le an pawngkam ram hna Arabah ah siseh, tlangram ah le ramniam ah siseh, Negeb le rilikam ram ah siseh, Kanaan mi hna ram ah siseh, Lebanon ah siseh, tiva ngan Zufrates tiva tiang va kal u. ⁸ Zohhmanh, ram cu nan hmaiah ka chiah cang; nan pupa Abraham, Isak, le Jakob sinah Bawipa nih anmah le an hnu i an tefa hna sinah pek awkin chiat a sermi ram ah cun va lut u law, va co u,’ tiah a ti. ⁹ "Khi caan ah keimah nih nannih cu, ’Keimah lawng nih cun kan ti kho ti hna lo; ¹⁰ Bawipa nan Pathian nih an karhter cang hna i zohhmanh, nihin cu nan tam ning ah van arfi zat khi nan si cang. ¹¹ Bawipa, nan pupa hna Pathian nih cun, atu nakin a let thong khat in in karhter hna seh law, thluachuah in pe hna seh, bia an kam hna bang khan! ¹² Zeitindah keimah lawng nih nan hnahnawhnak le nan thilrit le nan phunzainak cu ka phorh khawh lai? ¹³ Mifim le hngalh thiamnak a ngeimi le ningcang hngalmi kha nan phun ning cio in thim hna u law, nan lu ah ka ser hna lai,’ tiah ka rak in ti hna. ¹⁴ Cun nannih nih, "Na chimmi cu kan caah a ṭha ko," tiah nan ka leh. ¹⁵ Cucaah nan phun cio i lu hna cu, mifim le ningcang hngalmi hna cu, ka lak hna i nannih cungah lu ah ka chiah hna, a thongthong haotu hna le, a zaza haotu hna le sawm nga pawl haotu hna le pahra pawl haotu hna le nan phun hna chung i biaceihtu hna cu an si. ¹⁶ Cun khi caan ah nan biaceihtu hna cu, ’Nan unau hna an karlak i bia cu ngaihpiak hna u law, mipa le a unau karah siseh, ramdangmi amah he a ummi he karlak ah siseh, ding tein bia nan ceih lai. ¹⁷ Biaceih tikah duhdanh nan ngei lai lo; mi hme siseh, mi ngan siseh, aa tluk in nan ngaihpiak hna lai; minung hmai kha nan ṭih lai lo, zeitintiah biakhiahnak cu Pathian ta a si; cun nan ca i a har tukmi bia cu ka sinah nan ratpi lai keimah nih ka ngaih lai,’ tiah nawl ka pek hna. ¹⁸ Cun khi caan ah nan tuah awk hnga thil vialte kongah nawl kan pek hna," a ti. ¹⁹ "Bawipa kan Pathian nih nawl a kan pek bang khan Horeb in kan tho i, Amor mi hna tlangram i hung kalnak lam i nan hmuhmi a kau le ṭih a nungmi ramlak kha kan tan i, Kadesh-Barnea kha kan phan. ²⁰ Cun nannih cu, ’Amor mi hna tlangram, Bawipa kan Pathian nih a kan pekmi cu nan phan cang. ²¹ Zohhmanh, Bawipa nan Pathian nih ram cu nan hmaiah a chiah cang; hung kal u law, hung co u, Bawipa nan pupa hna Pathian nih an chimh hna bang khan; ṭih hlah u, nan lung zong dong hlah u,’ tiah kan ti hna. ²² Cun nan dihlak in ka pawngah nan ra i, ’Kan hmaiah mi thlah hna u si law, ram cu hung kan zohpiak hna seh law, kannih kan kalnak hnga lam le kan phak hnga dingmi khua hna kong cu kan chim ṭhan hna seh,’ tiah nan ti. ²³ Mah cucu a ṭha tiah ka ruah i nannih lakin mi hleihnih, phun khat in pakhat cio, ka lak hna i ²⁴ annih nih an i thawh i tlangram ah cun an hung kal i Eshkol Nelrawn cu an phan i an ngiat thlai. ²⁵ Cu ram theitlai cu tlawmpal in an kut in an lak i kannih sinah an runpi i bia an kan phorh ṭhan i, ’Ram ṭha a si, Bawipa kan Pathian nih a kan pekmi ram cu,’ tiah an ti. ²⁶ "Sihmanhsehlaw hung kal cu nan duh lo i Bawipa nan Pathian nawlbia kha nan ngai lo. ²⁷ Nan thlam chungah nan phunzai i, ’Bawipa nih a kan huat caah kannih kha hrawh awkah, Amor mi hna kut chungah pek awkah Izipt ram in a kan chuahpi. ²⁸ Khuazeika ah cun dah kan hung kal lai? Kan unau hna nih, "Cu mi hna cu kanmah nakin an ngan deuh i an sang deuh; khua hna cu an ngan i an kulhnak hau hna cu van an tawng; cuhleiah Anak tefa hna zong kha khika ah cun kan hmuh fawn hna," tiin kan lung kha an kan zorter,’ tiah nan ti. ²⁹ Cun kei nih kan thawh hna i, ’Therphang in um hlah u, annih kha ṭih hna hlah u. ³⁰ - ³¹ Izipt ram i nan mithmuh ah an tuahpiak hna bantuk le mipa nih a fa a puak bantuk i Bawipa nan Pathian nih ramlak i nan kalnak lam vialte ah, hi hmun nan phak hlantiang, an puak hna nan hmuh bantuk khan nan hmai i a kalmi Bawipa nan Pathian hrimhrim nih an dohpiak hna lai,’ tiah ka ti. ³² - ³³ Sihmanhsehlaw nan thlam tung bunhnak hmun kawlpiak awkah, nan hmaiah lam ah nan kalnak hmuhsak awkah, zan ah mei in, chun ah minmei in, a kalmi Bawipa nan Pathian cu hi thil a tuah nain, nan zum lo. ³⁴ "Cun Bawipa nih nan bia cu a theih i a thin a hung i, ³⁵ ’Hi chan ṭhalo chung mi hna lak hin, nan pupa hna sinah pek awkin chiat ka sermi ram ṭha cu pakhat hmanh nih an hmu lai lo. ³⁶ Sihmanhsehlaw Jefunneh fapa Kaleb nih cun a hmuh lai i lungtling tein Bawipa kha a rak zulh caah, amah le a tefa hna sinah a lamhmi ram cu ka pek lai,’ tiah chiat a ser. ³⁷ Nanmah ruangah Bawipa cu keimah cung zongah a thin a hung i, ’Nangmah zong khika ah na lut ve lai lo; ³⁸ nangmah an bultawltu Nun fapa Joshua cu a lut lai; amah kha thazang pe tuah, zeitintiah amah nih Israel cu, cu ram cu a coter lai. ³⁹ Cuhleiah nan ngakchia, hranchaw ah an cang lai nan timi hna le, atu ah chia le ṭha a hngal lomi nan fale hna cu, khika ah an lut lai i annih cu ka pek hna lai i annih nih an co lai. ⁴⁰ Sihmanhsehlaw nannih tu cu, i mer u law, Rili Sen lei hoih in ramlak ah khan kal tuah u,’ tiah a ti. ⁴¹ "Cun nannih nih nan ka leh i, ’Bawipa cungah kan sual cang; Bawipa kan Pathian nih nawl a kan pek bantuk khan kan hung kal lai i kan doh lai,’ tiah nan ti. Cun nan dihlak in nan ral hriamnam cio in nan i thuam i tlangram i hung luh awk cu a fawi ah nan ruah. ⁴² Cun Bawipa nih a ka chawnh i, ’Annih cu va chim hna, hung kal hlah u, do hlah u, zeitintiah nan lakah ka um lo caah nan ral nih an in tei sual hna lai,’ tiah a ti. ⁴³ Cucaah kan chimh hna i sihmanhsehlaw nan ngai duh lo; Bawipa nawlbia kha nan doh i tlangram ah cun nan hung kal. ⁴⁴ Cun khi tlangram i a ummi Amor mi hna nih cun an in chuahhnawh hna i khuai nih mi an dawi bantukin an in dawi hna i Seir in Hormah tiang an in den chih len hna. ⁴⁵ Cun nan ra kir ṭhan i Bawipa hmaiah nan ṭap, sihmanhsehlaw Bawipa nih nan aw kha a ngai lo i a hna zong an chit hna lo. ⁴⁶ Cucaah Kadesh ah ni tampi nan um, nan cam chung cu caan saupi a si.

¹ "Cun kan i mer i Bawipa nih a ka chimh bangin Rili Sen lei hoih in ramlak ah cun kan kal i Seir Tlang cu ni tampi kan hel. ² Cun Bawipa nih a ka chawnh i, ³ "Hi tlangram hi sau nawn nan hel cang; chaklei hoih in kal tuah u. ⁴ Cun mi cu nawl pe hna law: Seir i a ummi nan unau hna, Esau fapa hna, an ram cu nan tan dengmang cang i nannih cu an in ṭih hna lai. Cucaah ṭha tein i ralring tuah u, ⁵ annih cu va doh sual hna hlah u, zeitintiah an ram cu zeihmanh kan pe hna lai lo, keza kauh hmanh kan pe hna lai lo, zeicahtiah Seir Tlang cu Esau kha a covo ah ka pek cang. ⁶ Nan eimi rawl cu an sinin tangka in nan cawkmi a si lai i nan dinmi ti zong cu an sinin tangka in nan cawkmi a si lai. ⁷ Zeitintiah Bawipa nan Pathian nih nan kut rianṭuannak vialte ah thluachuah an pek hna; hi ramlak kaupi chung i nan kalnak hi a hngalh ko; hi kum sawm li chung hi Bawipa nan Pathian cu nan sinah a um i zeihmanh nan bau lo,’ tiah a ka ti. ⁸ Cucaah Seir i a ummi Esau fapale kan unau hna cu kaltak in, Arabah lam kaltak in, Elath le Ezion-geber kaltak in hmailei ah kan kal. "Cun kan i mer i Moab ramlak lei hoih in kan kal. ⁹ Cun Bawipa nih a ka chawnh i, ’Moab cu awlokchonh hna hlah u, a tuk zong tu hna hlah u, zeitintiah annih ram cu co awkah zeihmanh kan pe hna lai lo, zeicahtiah Lot fapa hna cu Ar kha an co awkah ka pek cang hna.’ ¹⁰ (Hlan lioah cun khika ah Emim mi an rak um; Anak mi hna bantukin mingan pipi, mi tam le misang pipi an rak si. ¹¹ Anak mi hna bantukin annih zong cu Refaim mi tiah ti an rak si ve, sihmanhsehlaw Moab mi hna nih cun Emim mi tiah an ti hna. ¹² Hormi zong hlan ah cun Seir ah an rak um, sihmanhsehlaw Esau fapa hna nih an pawnchuah hna i an hrawh hna i an umnak kha an rawlh hna, Israel mi nih Bawipa nih a cotermi hna ram cung i an tuah bantuk khan.) ¹³ ’Cucaah tho u law, Zered varek cu hei tan tuah u,’ tiah a ti. Cu caah Zered varek cu kan tan. ¹⁴ Cun Kadesh-barnea in kan i thawh i Zered varek kan tan tiang Bawipa nih annih sinah chiat a ser bangin, cu chan cu a ningpi in, cucu ralkap hna cu, riahhmun in an loh dih tiang, kum sawm thum le kum riat a si. ¹⁵ Zeicaahtiah, an loh dih tiang, mibu chungin hrawh awkah Bawipa kut cu an cungah a um taktak ko. ¹⁶ "Cucaah ralkap vialte kha an loh i mibu chungin an thih tikah, ¹⁷ Bawipa nih a ka chawnh i, ¹⁸ Nihin cu Moab ramri kha Ar ah nan tan lai; ¹⁹ Ammon fapa hna ramri nan va naih tikah, annih cu awlokchonh hna hlah u, a tuk zong tu hna hlah u, zeicahtiah co awkah Ammon fapa hna ram cu kan pe hna lai lo, Lot fapa hna kha ka coter cang hna a ti. ²⁰ (Mah zong cu Refaim mi hna ram tiah ti a si ve. Hlan lioah cun khika ah khan Refaim mi an rak um, sihmanhsehlaw Ammon mi hna nih cun Zamzummim an ti hna. ²¹ Cu hna cu Anak mi hna bantukin mi ngan, mi tam, le mi sang pipi an si. Sihmanhsehlaw Bawipa nih annih hmaiah a hrawh hna i an pawnchuah hna i an umnak kha an rawlh hna; ²² Seir tlang i a ummi Esau fapa hna caah a tuah bang khan — annih hmaiah Hormi kha a hrawh tik hna ah annih nih an pawnchuah hna i nihin tiangin an umnak kha an rawlh hna. ²³ Gaza tiangin khuate i a ummi Avvim hna cu, Kaftor in a rami Kaftor mi hna nih an hrawh hna i an umnak kha an rawlh hna.) ²⁴ ’Tho u law, i thawh tuah u, Arnon nelrawn cu hei tan tuah u; zohhmanh, Heshbon siangpahrang Amor mi Sihon le a ram cu nan kut chungah kan pek cang hna; lak i thawk u law, raldohnak ah amah he cun i do u. ²⁵ Nihin ni hin, vanrang toi i a ummi vialte cungah nanmah ṭihnak le phannak chiah cu ka thawk lai i, annih nih nan thawngpang kha an theih lai i an ther lai i nanmah ruangah lungrethei in an um lai,’ tiah a ti. ²⁶ "Cucaah Kedemoth ramlak in Heshbon siangpahrang Sihon sinah cun daihnak bia he lamkal ka hei thlah hna i, ²⁷ ’Na ram chungin ka lanhter tuah; lam lawnglawng kha ka zulh lai, orhlei ah siseh, kehlei ah siseh kaa mer lai lo. ²⁸ Ka ei awkah rawl cu tangka ah na ka zuarh lai i ka din awkah ti cu tangka ah na ka zuarh lai; ²⁹ Jordan ka tan i Bawipa kan Pathian nih a kan pekmi ram chungah ka luh hlantiang Seir ah a ummi Esau fapa hna le Ar ah a ummi Moab mi hna nih ka cungah an tuah bangin, ka ke in hei ka lanhter men ko,’ tiah ka ti. ³⁰ Sihmanhsehlaw Heshbon siangpahrang Sihon nih cun a ram chung cun a kan lanhter duh lo; nihin ni i a si bang hin amah cu nan kut chungah an pek hna nakhnga, Bawipa nan Pathian nih a thlarau kha a hahter i a lung kha a khonter caah a si. ³¹ Cun Bawipa nih a ka chawnh i, ’Zohhmanh, Sihon le a ram cu nannih sinah pek hram ka thawk cang; a ram cu nan umnak nakhnga, lak hram thawk tuah u,’ tiah a ti. ³² Cun Jahaz ah Sihon le a mi vialte hna nih doh awkah an kan chuahhnawh. ³³ Bawipa kan Pathian nih amah cu a kan pek i, amah le a fapa hna le a mi vialte hna cu kan tei dih hna. ³⁴ Khi caan ah a khua vialte cu kan lak dih i khua vialte cu kan hrawh cikcek hna, pa si hna seh, nu si hna seh, ngakchia si hna seh; pakhat hmanh kan taanter hna lo; ³⁵ caw le kan lakmi khua hna thil lawng kanmah ca i hranchaw ah kan i lak hna. ³⁶ Arnon nelrawn kam i a ummi Aroer in le nelrawn chung i a ummi khua in Gilead tiang, kan ca i a sang tukmi khua pakhat hmanh an um lo; Bawipa kan Pathian nih kan kut chungah an dihlak in a kan pek. ³⁷ Ammon fapa hna ram, mah cucu, Jabbok tiva kam vialte le tlangram khua hna, mah hna bel cu le, Bawipa kan Pathian nih a kan thlauhmi hmun paohpaoh kha, kan naih hna lo.

¹ "Cun kan i mer i Bashan lam ah cun kan hung kal; Bashan siangpahrang Og cu amah le a mi vialte hna he kannih kha Edrei ah doh awkah a ra chuak. ² Sihmanhsehlaw Bawipa nih a ka chawnh i, ’Amah cu ṭih hlah, zeitintiah amah le a mi vialte hna le a ram cu na kut chungah kan pek cang i Amor miphun siangpahrang Sihon, Heshbon i a ummi cung i na tuah bantuk khan, amah cungah na tuah ve lai,’ tiah a ti. ³ Cucaah Bawipa kan Pathian nih Bashan siangpahrang Og zong cu le a mi vialte hna cu kan kut chungah a kan pek i amah caah a tangmi pakhat hmanh an um lo tiangin amah cu kan tuk. ⁴ Cun khi caan ah a khua vialte cu kan lak dih hna — annih sinin kan lak lomi khua pakhat hmanh a um lo — khua sawm ruk, mah cucu Argob ram a dihlak, Bashan ram i Og pennak cu a si. ⁵ Mah khua vialte hna hi, hau a ngei lomi khuate tampi hna hleiah hau sang pipi in kulhmi le kutka le hrenhnak a ngeimi an si. ⁶ Heshbon siangpahrang Sihon cung i kan tuah bang khan kan hrawh cikcek hna; khua kip cu kan hrawh hna i pa, nu, le ngakchia cu kan thah hna. ⁷ Sihmanhsehlaw saṭil vialte le khuachung thil hna cu hranchaw ah kan i lak hna. ⁸ Cucaah khi caan ah Jordan tiva ral ah a ummi Amor mi hna siangpahrang pahnih hna kut chungin ram cu kan lak, Arnon nelrawn in Hermon Tlang tiang ⁹ (Sidon mi hna nih Hermon cu Sirion tiah an ti i Amor mi hna nih cun Senir tiah an ti), ¹⁰ tlangrawn ram i khua vialte le Gilead a dihlak le Bashan a dihlak cu Salekah le Edrei tiang, Bashan i Og pennak chung i khua hna cu kan lak hna. ¹¹ (Refaim mi a taangmi hna chungin Bashan siangpahrang Og lawnglawng kha a taang; zohhmanh, a ihkhun cu thir ihkhun a si; Ammon mi hna khua Rabbah ah a um, a si lo mei? Minung dong in, a sau dong kua, a vang dong li a si.) ¹² "Cun mah ram hi kan rak lak tan ah khan Reuben mi hna le Gad mi hna cu Arnon nelrawn kamah a ummi Aroer in aa thawkmi ram le Gilead tlangram a cheu, a khua hna he, ka pek hna; ¹³ Gilead ram a taang rihmi le Og pennak Bashan ram a dihlak cu, mah cucu Argobram a ningpi in, Manasseh phun cheu kha ka pek. (Khi Bashan cu a ningpi in Refaim mi hna ram tiah ti a si. ¹⁴ Manasseh phunmi Jair nih Argob ram vialte cu a lak dih, mah cucu Bashan kha a si, Geshur mi hna le Maakath mi hna ramri tiang khan; cun khuate hna cu amah min a sak hna i tu chan tiangin Havvoth-jair tiah ti a si.) ¹⁵ Makhir cu Gilead kha ka pek i, ¹⁶ Reuben mi hna le Gad mi hna cu Gilead in Arnon nelrawn tiang ram kha ka pek hna, cu nelrawn laifang cun an ramri cu a si, Jabbok tiva Ammon mi hna ramri tiangin; ¹⁷ Arabah zong ka pek hna; a ramri cu Jordan tiva Khinnereth in nichuahlei i a ummi Pisgah tlangpang toi i a ummi Arabah rili, mah cucu Cite Rili, tiang kha a si. ¹⁸ "Cun khi caan ah khan nawl kan pek hna i, ’Bawipa nan Pathian nih hi ram cu co awkah an pek cang hna; nannih nan unau Israel mi hna hmaiah nan mi ralṭha vialte hna cu hriamnam put in an lan hmasa lai. ¹⁹ Sihmanhsehlaw nan innchung hna le nan ngakchia hna le nan saṭil hna cu (saṭil tampi nan ngeih kha ka hngalh) kan pek cangmi hna khua hna chungah ²⁰ Bawipa nih nanmah bantukin nan unau hna cu dinhnak a pek hna i Bawipa nan Pathian nih Jordan tiva ral ah ram a pekmi hna an co hlantiang, an taang lai; khi tikah nan dihlak in kan pekmi hna nan covo cio ah khan nan kir lai,’ tiah ka ti. ²¹ Cun khi tikah Joshua kha nawl ka pek i, ’Hi siangpahrang pahnih hna cungah Bawipa nan Pathian nih a tuahmi vialte cu na mit nih a hmuh cang; cu bantukin nan va phak laimi ram vialte cungah Bawipa nih a tuah lai. ²² Nan ṭih hna lai lo, zeitintiah Bawipa nan Pathian cu an dohpiaktu hna a si,’ tiah ka ti. ²³ "Cun khi caan ah Bawipa cu ka nawl i, ²⁴ ’Maw Bawipa Pathian, nangmah na salpa hi na lianhngannak le a ṭhawngmi na kut hmuhsak kha a thawk lawng na thawk rih, zeitintiah nangmah tuahmi thil bantuk le khuaruahhar na sermi bantuk a tuah khotu pathian, van ah siseh, lei ah siseh, ahodah a um? ²⁵ Ka lanhter ko, tiah kan nawl, Jordan ral i ram ṭha khi ka hmuhter ko, khi tlangram dawh le Lebanon khi,’ tiah ka ti. ²⁶ Sihmanhsehlaw nanmah ruang ah Bawipa cu ka cungah a thin a hung i a ka ngai duh lo i Bawipa nih cun, ’Mah hi na caah i za ko seh, hi kong cu ka chim ti hlah. ²⁷ Pisgah tlangpar ah hung kai law, nitlaklei le chaklei le thlanglei nichuahlei kha hei zoh hna law, na mit in cuan tuah hna, zeicahtiah hi Jordan ral ah cun na kai lai lo. ²⁸ Asinain Joshua cu nawl pe tuah, amah cu forh law, thazang pe tuah, zeitintiah hi mi hna lu ah hin a kal lai i na hmuh laimi ram cu a coter hna lai,’ a ka ti. ²⁹ Cucaah Bethpeor ral i nelrawn ah khan kan cam.

¹ "Cun atu cu, maw Israel, kan cawnpiakmi hna phunglam hna le nawlbia hna cu ngai u law, tuah hna u, nan nun i nan kal i Bawipa nan pupa Pathian nih an pekmi hna ram cu nan co nakhnga. ² Bawipa nan Pathian nawlbia kan pekmi hna cu nan ulh nakhnga, nawlbia kan pekmi hna hi nan chap lai lo, nan zuk fawn lai lo. ³ Bawipa nih Baal-peor ah a tuahmi kha nan mit nih a hmuh cang, zeitintiah Bawipa nan Pathian nih Peor i Baal a zulmi vialte kha nannih lakin a hrawh hna; ⁴ sihmanhsehlaw nannih Bawipa nan Pathian fek tein aa tlaihmi vialte cu nihin tiang nan nung rih. ⁵ Zohhmanh, nannih nih co awk i nan luhhnawhmi ram ah nan tuah hna nakhnga, Bawipa ka Pathian nih nawl a ka pek bangin nawlbia le phunglam hna cu kan cawnpiak cang hna. ⁶ Ul hna u law, tuah hna u, zeitintiah miphun hna hmuh ah mah cucu nan fimnak le nan hngalhnak a si lai; hi nawlbia vialte an theih tikah, ’Hi a nganmi miphun hi a fim le a hngalhthiammi an si hrimhrim ko,’ an ti lai. ⁷ Kannih nih Bawipa kan Pathian kha kan kawh fate Bawipa kan Pathian nih cun a kan naih tlukin naihtu pathian a ngeimi miphun ngan ahodah a um? ⁸ Nihin ah nan hmai i ka chiahmi phungbia vialte, hi tlukin a ding hringhranmi hna bantuk, nawlbia le phunglam hna a ngeimi miphun ngan ahodah a um ve? ⁹ "Ṭha tein i ralring u law, i zohkhenh u, nan mit nih a hmuhmi thil cu nan philh sual hna nakhnga lo le nan nunchung ah nan lung chungin an tlau sual nakhnga lo; nan fale le nan tule hna kha hngalhter hna u — ¹⁰ Bawipa nan Pathian hmaiah Horeb ah nan dir ni ah khan Bawipa nih a ka chawnh i, ’Mi cu ka sinah pum tuah hna, ka bia kha an theih i vawlei cung i an nunchung vialte keimah ṭih kha an hngalh i cu bantukin an fale zong an cawnpiak hna nakhnga,’ tiah a ka ti mi kha kan hngalhter hna. ¹¹ Cun nannih nih nan va naih i tlang hramah khan nan va dir, tlang cu meizik in van tiang aa hlio i, muihnak le khuadawm nih a zual i, a pih in a pit. ¹² Khi tikah Bawipa nih mei chung khan an chawnh hna; bia thawng cu nan theih, sihmanhsehlaw mui cu nan hmu lo; aw lawnglawng a si ko. ¹³ Cun tuah awkah nawl an pekmi hna a biakamnak kha nannih sinah a thanh, mah cucu nawlbia pahra kha an si; lung tlap hnih cungah a ṭial hna. ¹⁴ Cun khi caan ah khan Bawipa nih nannih cu nawlbia le phunglam hna kha cawnpiak awkah nawl a ka pek, nannih nih co awkah nan va kalhnawhmi ram chung i nan va tuah awk a simi hna cu. ¹⁵ "Cucaah ṭha tein i ralring tuah u. Bawipa nih Horeb ah mei chungin an chawnh hna ni ah khan a mui zeihmanh nan hmuh lo caah, ¹⁶ nanmah caah suaimi mui, zei bantuk mui hmanh a ken a si zongah, mipa bantuk maw minu bantuk maw, ¹⁷ vawlei cung i a ummi zei bantuk saram paoh a lomi maw, van i a zuangmi thla ngei va a lomi maw, ¹⁸ vawlei i a vakmi thil a lomi maw, vawlei tang ti chung i a ummi nga a lomi maw, hi bantuk tuahnak hin nan i thurhhnawmh sual nakhnga lo i ralring tuah u. ¹⁹ Cun van khi nan hun zoh i nika le thlapa le arfi hna, van i a ummi thil vialte cu, nan hmuh tik hna ah, annih biak awk le an hmai i kun awkah hnuh nan si sual nakhnga lo i ralring tuah u. Mah hna hi cu Bawipa nan Pathian nih vanrang toi miphun dang vialte tu kha a pek hna, ²⁰ sihmanhsehlaw nannih cu Bawipa nih thir titnak meiphu, Izipt ram cun, amah miphun hrimhrim si awkah, atu i nan si bang hin, an chuahpi hna. ²¹ Cuhleiah nanmah ruangah Bawipa cu ka cungah a thin a hung i Jordan cu ka tan nakhnga lo le Bawipa nan Pathian nih co awkah an pekmi hna ram ṭha cu ka luh nakhnga lo, chiat a ser. ²² Hi ram ah hin ka thi ko lai, Jordan cu tan awk ka si lai lo; sihmanhsehlaw nannih nih cun nan tan lai i ram ṭha cu nan co lai. ²³ Bawipa nan Pathian biakamnak nannih he a sermi cu nan philh sual i Bawipa nan Pathian nih an thlauhmi hna suaimi mui, zei mui a kengmi hmanh cu, nan ser sual nakhnga lo, i ralring tuah u. ²⁴ Zeitintiah Bawipa nan Pathian cu tlumral lak kangh hmang mei, nahchuak Pathian a si. ²⁵ "Cun tu le fa nan ngeih tik le ram chungah nan tar tikah, zei mui a lomi hmanh si ai kun, suaimi siasal sernak in le Bawipa nan Pathian hmai i thil ṭhalo tuahnak in nan i thurhnawmhter i a thin nan hunter ahcun, ²⁶ Jordan tan in nan va co laimi ram chung cun nan rawk cikcek zau lai, tiah nihin ni ah hin nanmah hngaltu ah van le vawlei ka kawh hna; a chungah saupi nan nung lai lo, nan lo dih cikcek ko lai. ²⁷ Cun Bawipa nih miphun hna lakah an ṭhek hna lai i Bawipa nih an dawi hna naklai miphun hna lakah tlawmte lawng nan taang lai. ²⁸ Cun khika ah thing le lung in sermi pathian, minung kut sermi, hmuh zong a hmu kho lomi, theih zong a thei kho lomi, ei zong a ei kho lomi, rim zong a hnim kho lomi cu nan biak hna lai. ²⁹ Sihmanhsehlaw khika ah Bawipa nan Pathian cu nan kawl lai i, nan lung vialte le nan ruahnak vialte in amah kha nan kawl ahcun nan hmuh lai. ³⁰ Harnak chungah nan um tik le hi thil vialte cu nan cungah ni hmanung bik ni ah a tlun tikah, Bawipa nan Pathian sinah cun nan kir ṭhan lai i a bia kha nan ngaih lai, ³¹ zeitintiah Bawipa nan Pathian cu zaangfah thiammi Pathian a si; an deuh hna lai lo, an hrawk hna lai lo, nan pupa hna sin i chiatser in biakamnak a tuahmi zong cu a philh fawn lai lo. ³² "Zeitintiah nannih hlan i a rak ummi hlanlio ni hna kha hal tuah hna u, Pathian nih vawlei cung i minung a rak ser ni ri khan, cun vanhramdeng khattelei in khattelei tiang zong hal tuah u, mah bantuk thil lianngan hi a rak um bal maw um bal lo, an rak thei bal maw thei bal lo dik? ³³ Miphun aho tal nih, nannih nih nan rak theih bang khan, pathian aw cu mei lakin an thei in an nung bal dik maw? ³⁴ Asiloah, pathian zei tal nih miphun dang pakhat chungin miphun pakhat cu amah ca i va kal i vaa lak awkah, hneksaknak le hmelchunhnak le khuaruahharnak le ral dohnak le a ṭhawngmi kut le samhmi ban le thil ṭihnung in, Bawipa nan Pathian nih Izipt ram ah nan mit hmuh ah an tuahpiakmi hna vialte bang khan tuah a zal bal maw? ³⁵ Bawipa cu Pathian a si kha nan hngalh nakhnga, nannih cu hmuhsak nan si; amah hleiah a dang ahohmanh an um lo. ³⁶ Amah nih an chimhhrin hna nakhnga, vancung in a aw cu an theihter hna; cun vawlei ah a mei lianngan cu an hmuhter hna i mei chung cun nannih nih a aw kha nan theih. ³⁷ Cun amah nih nan pupa kha a dawt hna i anmah hnu i an tefa hna cu a thim hna i nannih cu amah hmai hrimhrim in le a liannganmi a ṭhawnnak in Izipt ram in an chuahpi hna i, ³⁸ miphun dangdang nanmah nakin a ngan deuh le a ṭhawng deuh cu, nihin ah a si bang hin, nannih kha luhter awkah le an ram cu ro ca i in pek hna awkah nan hmai in a dawi hna, ³⁹ cucaah, Bawipa cu vancung ah khin le vawlei cungah hin Pathian a si; a dang ahohmanh an um lo, ti kha nihin cu hngal u law, nan lungchung ah i cinken tuah u. ⁴⁰ Cucaah nihin ah kan pekmi hna a nawlbia le a phungbia hna cu ul tuah hna u, nanmah le nan hnu i nan tefa hna caah aa remrel i Bawipa nih zungzal ca in an pekmi hna ram ah hin nan chan cu nan sauter nakhnga," tiah a ti. ⁴¹ Cun Jordan tiva ral nichuahlei ah Moses nih khua pathum a dang tein a chiah hna, ⁴² mithat mi nih a innpa kha hlan ah rak i huatnak um loin le timhnak um loin a thah sual ahcun khika ah a zam lai, cun cuka khua pakhatkhat i a va zamnak thawngin a nunnak cu aa khamh lai: ⁴³ Reuben mi hna caah tlangrawn ramlak i a ummi Bezer le, Gad mi hna caah Gilead i a ummi Ramoth le, Manasseh mi hna caah Bashan i a ummi Golan cu an si. ⁴⁴ Mah hihi Moses nih Israel fale hna hmaiah a chiahmi phungbia cu a si; ⁴⁵ Izipt ram in Israel fale hna nih an chuah tikah mah hna hi Moses nih a chimhmi hna hngalhternak bia hna le nawlbia hna le phunglam hna cu an si; ⁴⁶ Moses le Israel fale hna nih Izipt in an chuah tikah an teimi Amor mi siangpahrang, Heshbon ah a ummi Sihon i a ram chung, Jordan tiva ral Beth-peor zawn nelrawn chungah khan a chimh hna. ⁴⁷ Cun amah ram le Bashan siangpahrang Og ram cu an lak hna, Amor mi hna siangpahrang Jordan tiva ral nichuahlei ah a ummi pahnih; ⁴⁸ Arnon nelrawn kamah a ummi Aroer in Sirion Tlang tiang (mah cucu Hermon a si), ⁴⁹ Jordan nichuahlei ah a ummi Arabah cu a dihlak in, Pisgah tlangpang tangah a ummi Arabah Rili tiangin, an lak hna.

¹ Cun Moses nih Israel mi vialte cu a kawh hna i, "Maw Israel, nihin ah nanmah theih ah ka chimmi nawlbia le phunglam hna hi thei tuah u law, cawng hna u law, ṭha tein ul hna u. ² Bawipa kan Pathian nih Horeb ah kanmah he biakamnak a ser. ³ Hi biakamnak cu Bawipa nih kan pupa hna he a ser a si lo, sihmanhsehlaw nihin ah hika i a nung rihmi kannih kan dihlak he hin a ser a si. ⁴ Bawipa nih hmaitonh tein tlang ah khan mei chungin an chawnh hna, ⁵ Bawipa bia kha nannih sin i thanh awkah Bawipa le nannih karlak i ka dir lioah khan; zeitintiah mei ruangah khan nan thin a phang i tlang cungah khan nan hung kal lo. Amah nih hitin a ti: ⁶ " ’Keimah cu Bawipa na Pathian, Izipt ram, sal sinak inn chungin an chuahpitu ka si. ⁷ " ’Keimah hleiah a dang pathian zeihmanh na ngei hna lai lo. ⁸ " ’Nangmah caah serchommi siasal, cunglei van i a ummi thil a lomi siseh, tanglei vawlei i a ummi thil a lomi siseh, vawlei toi i a ummi ti chung i a ummi thil a lomi siseh, na ser lai lo; ⁹ an hmaiah na kun in na bia hna lai lo; zeitintiah kei Bawipa na Pathian cu nahchuakmi Pathian, a ka huami pale sualnak ruang i fale chan thum chan li tiang dan a tat tawntu, ¹⁰ sihmanhsehlaw a ka dawmi le ka nawlbia a zulmi thong tampi cung i a fekmi dawtnak a langhtertu ka si. ¹¹ " ’Bawipa na Pathian min cu sawhsawh in va hmang hlah, zeitintiah a min a hmang sualmi cu Bawipa nih sual lo ah a ruat hna lai lo. ¹² " ’Bawipa na Pathian nih nawl an pek bangin sabbath ni cu thianter awkah va ul ko. ¹³ Ni ruk rian na ṭuan lai i na rian vialte na ṭuan lai; ¹⁴ sihmanhsehlaw ni sarih ni cu Bawipa na Pathian caah sabbath a si; cu ni ah cun nangmah nih siseh, na fapa nih siseh, na fanu nih siseh, na salpa nih siseh, na salnu nih siseh, na cawtum nih siseh, na laa nih siseh, na saṭil zeipaoh nih siseh, na kutka chung i a ummi khual nih siseh, rian zeihmanh nan ṭuan lai lo, zeitintiah na salpa le na salnu hna zong nangmah bangin an i din ve lai. ¹⁵ Izipt ram ah sal na rak si le Bawipa na Pathian nih khika khan a ṭhawngmi kut le samhmi ban in an chuahpi kha na cinken lai; cu caah Bawipa na Pathian nih sabbath ni kha ulh awkah nawl a rak in pek. ¹⁶ " ’Bawipa na Pathian nawl an pek bangin na nu le na pa kha va upat hna, Bawipa na Pathian nih an pekmi ram chungah na chan a sau lai i nangmah caah a remrel lai. ¹⁷ " ’Lai na nawng lai lo. ¹⁸ " ’Va cung pa duh, nupi cung nu duhnak na tuah lai lo. ¹⁹ " ’Na fir lai lo. ²⁰ " ’Na innpa cungah a ding lo biahngaltu sinak na tuah lai lo. ²¹ " ’Na innpa nupi na mit a thi lai lo; na innpa inn siseh, a lo siseh, a salpa siseh, a salnu siseh, a cawtum siseh, a laa siseh, na innpa ta a simi paohpaoh cu na mit a thi lai lo.’ ²² "Mah bia hna hi Bawipa nih nan bu ning in tlang ah khan mei chung le a chahmi khuadawm chungin aw fakpi in an chimh hna i a chap ti lo. Lung tlap pahnih cungah a ṭial hna i keimah kha a ka pek hna. ²³ Muihnak chungin aw kha nan theih tikah, tlang cu mei in a kangh lioah khan, ka pawngah nan ra, nan phun hna lu vialte le nan upa hna kha; ²⁴ cun nannih nih, ’Zohhmanh, Bawipa kan Pathian nih a sunparnak le lianngannak kha a kan hmuhsak cang i a aw cu mei chungin kan theih cang; nihin ni ah hin Pathian nih minung he bia aa ruah nain minung nih a nun ko kha kan hmuh. ²⁵ Cu a si caah zeicaahdah kannih nih kan thih lai? Zeitintiah hi mei nganpi nih hin a kan kangh dih lai; Bawipa kan Pathian aw kha kan theih rih ahcun kan thi lai. ²⁶ Zeitintiah mei chungin bia a chimmi, a nungmi Pathian aw cu kannih bangin a thei nain a nung komi ahodah titsa lakah a rak um? ²⁷ Va naih law, Bawipa kan Pathian nih a chim laimi vialte cu va ngai law, Bawipa kan Pathian nih an chimh laimi vialte cu kan chim ve law, kan theih lai, kan tuah lai,’ nan ti. ²⁸ "Cun Bawipa nih, ka sin i nan chim tikah nan bia kha a theih i Bawipa nih ka sinah, ’Hi mi hna nih an in chimhmi bia cu ka theih cang; an chimmi vialte cu a dik tein an chim ko. ²⁹ Keimah ṭih le ka nawlbia hna ulh lungthin atu i an ngeih bang hin a zungzal ngei hna seh law ka hei duh dah, anmah le an fale caah a zungzal in aa remrel hnga! ³⁰ Va kal law, annih cu, "Nan thlam ah kir tuah u," va ti hna. ³¹ Sihmanhsehlaw nang cu, hika ah ka pawngah dir law, nawlbia vialte le phungbia le phunglam na cawnpiak laimi hna cu kan chimh lai, co awkah ka pekmi hna ram chungah an tuah hna lai, tiah a ti. ³² Cucaah Bawipa nan Pathian nih nawl an pek hna bangin ṭha tein nan tuah lai; orhlei ah siseh; kehlei ah siseh nan i mer lai lo. ³³ Nan co laimi ram chungah saupi nan nun i remrel i nan nun nakhnga, Bawipa nan Pathian nih nawl an pekmi hna lam kha nan zulh lengmang lai.

¹ "Nannih nih co awkah nan kalhnawhmi ram chungah cun nan tuah hna nakhnga, nangmah le na fapa le na fapa fapa nih nan nunchung vialte, nawl kan pekmi hna amah nawlbia vialte le a phungbia vialte hna ulhnak thawngin ² Bawipa na Pathian cu na ṭih nakhnga le na chan cu a sau nakhnga, Bawipa nan Pathian nih nannih kha cawnpiak awkah nawl a ka pekmi nawlbia hna le phunglam hna le phungbia hna cu mah hihi an si. ³ Cucaah, maw Israel, Bawipa na pupa Pathian nih bia an kam bangin, cawhnuk le khuaihliti in a luangmi ram chungah cun, nan i remrel i tam piin nan karh nakhnga, thei tuah law, ṭha tein zul tuah hna u. ⁴ "Thei hmanh, maw Israel: Bawipa hi kan Pathian a si, Bawipa lawnglawng hi; ⁵ Bawipa na Pathian cu na lungthin dihlak le na ruahnak dihlak le na ṭhawnnak dihlak in na dawt lai. ⁶ Cun nihin ah kan pekmi bia hi na lung chungah na riahter lai i ⁷ na fale kha fel tein na cawnpiak hna lai i, na inn chung i na ṭhut ah siseh, lam i na kal ah siseh, na ih ah siseh, na thawh ah siseh, na chim lengmang hna lai. ⁸ Cun na kut ah chingchiahnak caah na ṭem chih hna lai i na mit le na mit karah hmelchunhnak caah an si lai. ⁹ Cun na inn i innka tung hna le na kutka hna cungah na ṭial hna lai. ¹⁰ "Cun na pupa hna Abraham, Isak le Jakob sinah Bawipa na Pathian nih pek awkah chiat a sermi ram cu — nangmah nih na sakmi a si lomi khua nganngan le khua ṭhaṭha hna le, ¹¹ nangmah nih na rawnmi a si lomi thil ṭhaṭha in a khatmi inn hna le, nangmah nih na huahmi a si lomi tikhor hna le, nangmah cinmi a si lomi mitsur dum hna le oliv thing hna, chungah an luhpi i na ei i na khim tikah, ¹² khi tikah Izipt ram, sal cannak inn a simi chung khan, an chuahpitu Bawipa kha na philh sual nakhnga lo, i ralring tuah. ¹³ Bawipa na Pathian cu na ṭih lai; na biak lai i a min lawngin chiat na ser lai. ¹⁴ Nan kiangkap ah a ummi hna an pathian, pathian dang hna cu, nan zul hna lai lo, ¹⁵ zeitintiah nannih lakah a ummi Bawipa nan Pathian cu Pathian nahchuak a si i Bawipa nan Pathian thinhunnak cu a alh i vawlei cungin nannih cu an hrawh sual hna nakhnga lo, nan zul hna lai lo. ¹⁶ "Massah ah nan rak hneksak bang khan, Bawipa nan Pathian cu hneksak nan del lai lo. ¹⁷ Bawipa nan Pathian nawlbia le biahngalhternak hna le a phunglam hna, an pekmi hna cu, fel tein nan ulh lai. ¹⁸ - ¹⁹ Bawipa nih nan pupa hna sinah pek awkin chiat a ser i nan hmaiah nan ral vialte a dawi dih hnanak ram ṭha cu, Bawipa nih bia a kam bangin, nan luh i nan co nakhnga le nanmah caah aa remrel nakhnga, Bawipa hmai i a dik le a ṭha cu tuah tuah u. ²⁰ "Hmailei caan ah na fapa nih, ’Hngalhternak bia hna le nawlbia hna le phunglam hna, Bawipa kan Pathian nih an pekmi hi a sullam zeidah a si?’ tiah an hal tikah, ²¹ khi tikah na fapa sinah cun, ’Kannih cu Izipt ram ah Faro sal kan rak si i Bawipa nih Izipt ram chung cun a ṭhawngmi kut in a kan chuahpi; ²² Bawipa nih cun a ngan le ṭih a nungmi hmelchunhnak le khuaruahharnak hna cu Izipt le Faro le a innchungkhar vialte cungah kan mithmuh ah a langhter hna i, ²³ kan pupa hna sinah pek awkin chiat a sermi ram chungah cun a kan luhpi i a kan pek colh nakhnga, khika in a kan chuahpi. ²⁴ Cun kannih cu, nihin i a si bang hin, nungdam in a kan zuah nakhnga, Bawipa nih hi nawlbia vialte cu tuah awkah, Bawipa kan Pathian cu ṭih awkah nawl a kan pek, kan ca ṭhatnak caah a si zungzal. ²⁵ Nawl a kan pek bangin Bawipa kan Pathian hmaiah hi nawlbia vialte cu ṭha tein kan tuah ahcun kannih caah dinnak a si lai,’ tiah na ti lai.

¹ "Bawipa na Pathian nih, co awkah na va luhnak ram chungah an luhpi tik le nangmah hmai in miphun tampi, Hit mi le Girgash mi le Amor mi le Kanaan mi le Periz mi le Hiv mi le Jebus mi, nanmah nakin a ṭhawng deuh le a ngan deuhmi miphun phun sarih hna cu a ṭhawl hna i, ² Bawipa na Pathian nih annih cu nangmah kha an pek i na tei hna tikah, khi tikah annih cu na hrawh cikcek hna lai; annih he biakamnak na ser lai lo i an cungah zaangfahnak na ngei lai lo. ³ Annih he nan i ṭhi-um lai lo, an fapa hna kha nan fanu hna cu nan pe hna lai lo, an fanule zong nan fapa hna caah nan la fawn hna lai lo. ⁴ Zeitintiah nan fapale hi pathian dang biak awkah keimah zulhnak hin an pialter sual hna lai; cu tikah Bawipa thinhunnak cu nan cungah a alh lai i khulrang in an hrawh ko hna lai. ⁵ Sihmanhsehlaw hi bangin annih cungah nan tuah lai: an biakṭheng kha nan khuai lai i an lungphun kha nan den dih hna lai i, an Asherim kha nan hau hna lai i suaimi an siasal kha mei in nan khangh hna lai. ⁶ "Zeitintiah nannih cu Bawipa nan Pathian caah miphun thiang nan si; Bawipa nan Pathian nih vawlei cung i a ummi miphun vialte chungin nannih cu amah ro caah an thim cang hna. ⁷ Nannih cu midang nakin nan tam deuh caah Bawipa nih a dawtnak cu nan cungah a chiah i an thim hna a si lo, zeicahtiah nannih cu miphun vialte lakah a tlawm bik nan si ko. ⁸ Sihmanhsehlaw Bawipa nih an dawt hna i nan pupa hna sinah chiat a sermi biakamnak cu a tlinter caah, Bawipa nih a ṭhawngmi kut in an chuahpi hna i sal cannak inn chung khan an tlanh hna, Izipt siangpahrang Faro kut chung khan, an chuah hna. ⁹ Cucaah Bawipa nan Pathian cu Pathian a si kha hngal tuah u; amah cu zumhawktlak Pathian, amah a daw i a nawlbia a zulmi hna sinah chan thong khat tiangin bia a kam i a fekmi dawtnak a ngei i, ¹⁰ amah a huami hna tu cu hrawh awkah anmah cung lila ah tei rul a chammi a si; amah a huami cu a dinhdorh lai lo, chikkhatte ah a lehrulh ko lai. ¹¹ Cucaah nihin ah kan pekmi hna nawlbia le phungbia le phunglam hna cu ṭha tein nan tuah hna lai. ¹² "Cun hi phunglam kha nan ngaih hna i nan tuah hna caah Bawipa nan Pathian nih nan pupa hna sinah zulh awk i chiat a sermi biakamnak le a fekmi dawtnak cu nannih sinah a hmunhter lai; ¹³ an dawt hna lai, thluachuah an pek hna lai i an karhter hna lai; nan pupa hna sinah nannih kha pek awkin chiat a sermi ram chungah hin nan pum theitlai le nan vawlei theitlai, nan rawl le nan mitsur hang le nan chiti, nan cawfa hna le nan tuufa hna zong, thluachuah a pek hna lai. ¹⁴ Miphun vialte hna nakin nannih cu thluachuah nan hmu deuh lai; nannih lakah nu siseh, pa siseh, a cingmi nan um lai lo, nan saṭil lak zongah, an um lai lo. ¹⁵ Cun Bawipa nih nannih sinin zawtnak vialte kha a lak lai i Izipt hrirai ṭhalo vialte nan hngalhmi kha nan cungah a tlunter lai lo, sihmanhsehlaw nannih an huami hna vialte cungah cun a tlunter lai. ¹⁶ Cun Bawipa nan Pathian nih an pek laimi hna miphun vialte cu nan hrawh hna lai, nan mit nih zaangfah hna hlah seh; an pathian zong nan bia hna lai lo, zeitintiah mah cucu nan caah rap a si lai. ¹⁷ "Nannih nih nan lung chungin, ’Hi miphun hna hi kanmah nakin an ngan deuh, zeitintiah kan pawnchuah khawh hna lai?’ nan ti ahcun, ¹⁸ annih cu nan ṭih awk a si lo, sihmanhsehlaw Bawipa nan Pathian nih Faro le Izipt vialte cungah a tuahmi le ¹⁹ nan mi nih a hmuhmi hneksaknak ngan le hmelchunhnak le khuaruahharnak le a ṭhawngmi kut le samhmi ban in Bawipa nan Pathian nih an chuahpi hnanak kha hngal camcin ko u; cu bangin Bawipa nan Pathian nih nan ṭihmi miphun vialte hna cungah a tuah lai. ²⁰ Cuhleiah nannih sinin aa thupmi hna le a taangmi hna kha an rawh dih hlantiang, Bawipa nan Pathian nih annih lakah khuaingal a thlah hna lai. ²¹ Annih kha nan ṭih awk a si lai lo, zeitintiah Bawipa nan Pathian, a lianngan i ṭih a nungmi Pathian cu, nannih lakah a um. ²² Bawipa nan Pathian nih hi miphun hna cu nan hmaiah duhsah duhsah in a ṭhawl hna lai; ramsa kha nannih caah an tam tuk sual nakhnga lo, hmakhatte ah nan ṭhawl dih hna lai lo. ²³ Sihmanhsehlaw an rawh dih hlantiang Bawipa nan Pathian nih annih cu nanmah kha an pek hna lai i fak piin a tuaiter hna lai. ²⁴ An siangpahrang hna cu nan kut chungah an pek hna lai i vanrang toiah an min cu nan hloh lai; nan hrawh hna hlantiang pakhat hmanh nih an in dawn kho hna lai lo. ²⁵ Suaimi an siasal pathian cu mei in nan khangh hna lai; an hutnak ngun siseh sui siseh nan mit a thi lai lo, nanmah ca zongah nan i lak lai lo, an foih sual hna hnga; zeitintiah mah cucu Bawipa nan Pathian caah fihnung a si. ²⁶ Cun nan inn chungah thil fihnung nan luhpi lai lo; nan luhpi ahcun chiatserhmi nan si ve sual lai; nan fih hrimhrim lai i nan huat lai, zeitintiah mah cucu chiatserhmi thil a si.

¹ "Nan nundam i nan karh i Bawipa nih nan pupa hna sinah pek awkin chiat a sermi ram cu nan co nakhnga, nihin ah kan pekmi hna nawlbia vialte cu ṭha tein nan tuah lai. ² A nawlbia cu nan ngai lai maw ngai lo dah tinak caah, nan lung chung i a ummi kha hngalh awkah nannih cu harnak in an hneksak hna nakhnga, Bawipa nan Pathian nih hi kum sawm li chung ramlak ah an vahternak hna kha, i cinken ko u. ³ Minung hi rawl lawnglawng in a nung lo, sihmanhsehlaw Bawipa kaa in a chuakmi thil kip in a nung ti kha an hngalhter hna nakhnga, rawlṭam fahnak kha an inter hna i manna in an cawm hna, mah cucu nanmah nih siseh nan pupa hna nih siseh nan rak hngal lo. ⁴ Hi kum sawm li chung hi nan thilpuan nih an ṭehtak hna lo i nan ke a phing lo. ⁵ Cucaah mipa nih a fapa a chimhhrin bantukin Bawipa nan Pathian nih an chimhhrin hna kha nan lung chungin hngal ko u. ⁶ Cucaah Bawipa nan Pathian nawlbia cu zul tuah u; amah lam kha zul u law, amah kha ṭihzah tuah u. ⁷ Zeitintiah Bawipa nan Pathian nih ram ṭha chungah an luhpi hna lai. Mah ram cu tiva tete hna le, tlang le nelrawn ah a luangmi tikhor le cerhti hna le, ⁸ changvut le barli le mitsur ruang le theipi kung le taleti le oliv thing le khuaihliti a tamnak ram a si; ⁹ khi ram ah rawl kha cham bau loin nan ei lai i zeihmanh nan bau lai lo; a lung hna cu thir an si i a tlang hna ah cun tawngca nan cawh khawh lai. ¹⁰ Cun nan ei lai i nan khim lai i Bawipa nan Pathian cu, ram ṭha an pekmi hna caah cun, nan lawmh lai. ¹¹ "Nihin ah kan pekmi hna a phungbia hna le a phunglam hna le a nawlbia hna hi nan zulh lonak thawngin Bawipa nan Pathian cu nan philh sual nakhnga lo, i ralring tuah u; ¹² nan ei i nan khim tikah le inn ṭhaṭha nan sak hna i a chungah nan um i, ¹³ nan saṭil run hna le nan tuurun hna an karh i nan sui le nan ngun an karh i nan ngeihmi vialte a karh tikah, ¹⁴ nan lung a puam i Izipt ram chungin sal cannak innchung khan an chuahpitu hna Bawipa nan Pathian cu nan philh sual nakhnga lo, i ralring tuah u. ¹⁵ Amah cu a kau i ṭih a nungmi ramlak, mei alh bantuk a simi rul hna le tlangngaikuang hna an umnak le ti um lomi ramcar chungin an hruaitu hna a si; amah nih ṭeklung lungpi chungin ti an pek hna i ¹⁶ ramlak chungah khan nan pupa hna nih an hngalh lomi manna in an cawm hna, a donghnak ah nannih cu ṭhatnak tuahpiak awkah an hneksak hna i thluachuahpek awkah an ṭhumh hna. ¹⁷ Nan lung chungin, ’Keimah ṭhawnnak le ka kut thazang nih hi chawva hi an ka pek,’ tiah nan ti sual nakhnga lo, i ralring tuah u. ¹⁸ Nan pupa hna sinah chiatser in a tuahmi biakamnak, atu ah a fek rihmi kha, tlinter awkah, chawva hmuh khawhnak ṭhawnnak an petu hna cu Bawipa nan Pathian kha a si tiah i cinken ko u. ¹⁹ Cun Bawipa nan Pathian nan philh i pathian dang kha nan zulh hna i an rian nan ṭuan i nan biak hna ahcun, nan rawk hrimhrim lai, tiah nihin ah hin ralrin kan pek hna. ²⁰ Nan hmaiah Bawipa nih miphun a rawkter hna bangin Bawipa nan Pathian aw cu nan ngaih duh lo ahcun, cu bangin nan rawk ve lai.

¹ "Ngaihmanh, maw Israel, nangmah nakin a lianngan deuh le a ṭhawng deuhmi miphun hna, van tawng in kulhmi khua lianngan pipi a ngeimi hna, ² a ngan le a sangmi hna miphun Anak tefa hna, ’Anak fapa hna hmaiah ahodah a dir kho lai,’ an ti na theih i na hngalhmi hna cu pawnchuah awkah nihin ah hin Jordan tiva cu na tan cang lai. ³ Nangmah hmaiah kanghtu mei bangin a kalmi cu Bawipa na Pathian a si kha nihin ah hin hngal tuah; amah nih na hmaiah a hrawh hna lai i a tei hna lai; cucaah Bawipa nih bia an kam bangin na ṭhawl hna lai i khulrang tein na hrawh hna lai. ⁴ "Bawipa na Pathian nih na hmaiah annih cu a dawi hna hnuah, ’ Bawipa nih hi ram co awkah a ka luhpi hi, keimah dinnak thawngin pei a si,’ tiah na lung chungin va ti hlah; Bawipa nih na hmai in annih kha a dawi hna cu hi miphun hna ṭhat lonak ruangah a si deuh. ⁵ Na dinnak le na lung dinnak thawngin annih ram kha co awkah na luh cu a si lai lo; sihmanhsehlaw Bawipa na Pathian nih annih kha na hmai in a dawi hna lai cu hi miphun hna an ṭhat lonak ruangah le, Bawipa nih na pupa hna Abraham, Isak, le Jakob sinah chiat a sermi bia cu fehnak caah a si lai. Bawipa An Doh ⁶ "Cucaah Bawipa na Pathian nih hi ram ṭha cu co awkah na dinnak thawng in an pek a si lo kha hngal tuah, zeitintiah nangmah cu mikhong na si. ⁷ Ramlak ah Bawipa na Pathian zeitluk in dah a thin na phawh kha hngal camcin tuah law, philh hlah; Izipt ram in na chuah ni ri in hika hmun na phak tiang, Bawipa cu na ralchanh lengmang ko. ⁸ Horeb hmanh ah Bawipa kha a thin na phawh i, na cungah Bawipa cu a thin a hun tuk hringhran caah nangmah kha hrawh awk deng tiang aa tim. ⁹ Lungtlap hna, Bawipa nih nannih he biakamnak a sernak lungtlap hna, lak awkah tlang cungah ka hung kai tikah khan, tlang cungah khan ni sawm li le zan sawm li ka hung um; rawl zong ka ei lo, ti zong ka ding lo. ¹⁰ Cun Pathian kutdong in ṭialmi lungtlap pahnih hna cu Bawipa nih a ka pek; cun cu hna cungah cun, pumhnak ni ah mei chungin Bawipa nih tlang cung i nannih sinah a chimmi bia vialte kha an um. ¹¹ Cun ni sawm li le zan sawm li a dihnak ah Bawipa nih lungtlap pahnih kha a ka pek hna, biakamnak lungtlap hna cu. ¹² Khi tikah Bawipa nih ka sinah, ’Tho law, hika hin khulrang tein vung kal tuah, zeitintiah Izipt ram in na chuahpimi na mi hna nih thurhnawm ngaiin an i tuah cang; zulh awkah nawl ka pekmi hna lam khan khulrang tein an pial cang; annih caah thletmi siasal an i ser,’ tiah a ti. ¹³ "Cuhleiah Bawipa nih ka sinah, ’Hi mi hna hi zei an si kha ka hmuh cang; zohhmanh, mikhong an si; ¹⁴ ka dawn hlah, annih cu hrawk hna ning law, an min cu vanrang tang dihlak in hlo ko hna ning; cun annih nakin a ṭhawng deuh le a ngan deuhmi miphun ah nangmah cu in ser ko ning,’ tiah a ti. ¹⁵ Cucaah kaa mer i tlang in ka rung ṭum i tlang cu mei in a kang; cun biakamnak lungtlap pahnih hna cu ka kut pahnih chungah an um. ¹⁶ Khua ka zoh i zohhmanh, Bawipa nan Pathian cungah nan sual cang; thletmi cawfa kha nan i ser cang; Bawipa nih zulh awkah nawl an pekmi hna lam khan khulrang tein nan pial cang. ¹⁷ Cucaah lung tlap pahnih kha ka lak hna i ka kut pahnih hna chung cun ka hlonh hna i nan mit hmuh ah ka khuai hna. ¹⁸ Cun Bawipa hmaiah a hlan bang khan ni sawm li le zan sawm li ka bawk; Bawipa kha a thin phawh awkah amah mithmuh ah ṭhat lo nan tuahnak thawngin sual nan tuahmi vialte ruangah rawl ei lo le ti ding loin ka um. ¹⁹ Zeitintiah nanmah kha hrawh awk tiangin Bawipa nih aa timhnak thinhunnak le lungsi lonak kha ka ṭih. Sihmanhsehlaw Bawipa nih khi tan zongah khan ka bia a ka ngaihpiak. ²⁰ Cun Bawipa nih Aaron cungah a thin a hun tuk caah amah cu hrawh awkah aa tim; cun khi caan ah Aaron ca zongah thla ka cam colh. ²¹ Cun hi nan thil sual, nan sermi cawfa cu, ka lak i mei in ka khangh i ka den, leidip bantukin a dip tiang dip tein ka rial; cun cu leidip cu tlang cungin a rung luangmi tivate ah cun ka paih. ²² "Taberah zongah, cun Massah le Kibroth-hattaavah ah Bawipa thin kha nan phawh fawn. ²³ Cun Bawipa nih Kadesh-barnea in an thlah hna i, ’Hung kal u law, kan pekmi hna ram cu hung umhnawh tuah u,’ tiah an ti hna tikah khan, nannih nih Bawipa nan Pathian nawlbia cu nan ralchanh i amah kha nan zum lo, a aw zong nan ngai lo. ²⁴ Kan hngalh hna ni ri in nannih cu Bawipa kha a ralchanhmi nan si ko. ²⁵ "Bawipa nih nannih cu ka hrawh hna lai tiah a ti caah, cucaah Bawipa hmaiah hi ni sawm li le zan sawm li cu ka bawk. ²⁶ Cun Bawipa sinah hi bangin thla ka cam, ’Maw Bawipa Pathian, nangmah nih na lianhngannak thawngin na tlanh i Izipt ram in a ṭhawngmi kut he na chuahpimi na mi le na ro cu hrawk hlah, ²⁷ Na sal Abraham, Isak le Jakob kha cingkeng hna law; hi mi hna an lung khonnak siseh, an ṭhat lonak siseh, an sualnak siseh zei ah rel sawh hlah; ²⁸ cu ti a si lo ahcun na kan chuahpinak ram nih khan, " Bawipa nih a kamhmi hna ram ah a luhpi khawh hna lo ca le a huat hna caah, ramlak i thah hna awkah a chuahpi hna," tiah a ti sual hnga. ²⁹ Zeitintiah annih cu nangmah mi le ro, a liannganmi na ṭhawnnak le samhmi na ban in na chuahpimi hna an si,’ a ti.

¹ "Khi caan ah Bawipa nih ka sinah, ’Hmasa i bantuk a simi lung tlap pahnih in ser hna law, tlang cungah ka sinah ra kai tuah, cun thingkuang zong ser tuah. ² Cun hmasa lungtlap na khuaimi hna cung i a ummi bia kha, lungtlap hna cungah cun ka ṭial hna lai i kuang chungah cun na khumh hna lai,’ tiah a ti. ³ Cucaah anri thing in kuang pakhat ka ser i hmasa bantuk a simi lungtlap pahnih ka ser hna i cu lungtlap pahnih hna cu ka kut chungah i put in tlang ah cun ka hung kai. ⁴ Cun lung tlap hna cungah cun, tlang cungah mei chungin pumh ni i Bawipa nih nan sinah a chimmi nawlbia pahra cu hmasa i a ṭial bang khan, a ṭial hna i Bawipa nih a ka pek hna. ⁵ Cun kaa mer i tlang cungin ka rung ṭum i ka sermi kuang chungah cun lung tlap cu ka chiah hna; Bawipa nih nawl a ka pek bangin khika ah an um. ⁶ (Israel mi hna cu Beeroth Bene-jaakan in Moserah ah an kal. Khika ah Aaron cu a thi i khika ah an vui. A fapa Eleazar nih amah can ah tlangbawi rian a ṭuan. ⁷ Khika in Gudgodah ah an kal i Gudgodah in tiva tete umnak ram Jotbathah ah an kal. ⁸ Khi caan ah, Bawipa biakamnak kuang put awk le amah min in thluachuah pek le amah ca rianṭuan awk i Bawipa hmai i dir awkah, Bawipa nih Levi phun cu nihin tiang aa thleidan hna. ⁹ Cucaah Levi cu a unau hna lakah covo siseh ro siseh a ngei lo; Bawipa nan Pathian nih amah sinah a chim bang khan, Bawipa cu a ro a si.) ¹⁰ "Hmasa bantuk ṭhiamṭhiam khan, tlang cungah cun ni sawm li le zan sawm li ka um i khi tan zongah khan Bawipa nih ka bia a ka ngaihpiak; Bawipa nih hrawh an duh hna lo. ¹¹ Cun Bawipa nih ka sinah, ’Tho law, an pupa hna sinah pek awkin chiat ka sermi ram kha an luhhnawh i an co nakhnga, mi hna cu hmaisak tuah hna,’ tiah a ti. ¹² "Kha! Israel, Bawipa na Pathian nih an fialmi cu zeidang si loin, Bawipa na Pathian ṭih le, a lam vialte kha zulh le, amah kha dawt le, Bawipa na Pathian cu na lung dihlak le na ruahnak dihlak in a rian ṭuan le, ¹³ nihin ah nangmah ṭhatnak ding caah nawl kan pekmi hna Bawipa phungbia le nawlbia hna ulh hi, a si lo maw? ¹⁴ Zohhmanh, a sang bik van hna le, vawlei le a chungah a ummi thil vialte hi, Bawipa na Pathian ta an si dih; ¹⁵ sihmanhsehlaw Bawipa nih dawtnak in na pupa hna cungah a lung a chiah i annih hnu i an tefa, nannih cu, midang vialte hlan in an thim hna, nihin ah nan si bang hin. ¹⁶ Cucaah nan lung cuarpar cu tan u law, lungkhong si ti hlah u. ¹⁷ Zeitintiah Bawipa nan Pathian cu pathian hna Pathian le bawi hna Bawi, a lianngan i a ṭhawng i ṭih a nungmi Pathian, duhdanh a ngei lo i ziknawh a la lomi a si. ¹⁸ Pangeilo le nuhmei cu ding tein bia a ceihpiak hna i, mipem kha a dawt i rawl le hnipuan a pek. ¹⁹ Cucaah mipem kha daw u, zeitintiah nannih kha Izipt ram ah mipem nan rak si. ²⁰ Bawipa na Pathian cu na ṭih lai; a rian na ṭuan lai i amah ah naa bek lai i amah min chalh in chiat na ser lai. ²¹ Amah cu na thangṭhat awk cu a si; amah cu na Pathian, hi thil lianngan le thil ṭihnung hna, na mit nih an hmuhmi, a tuahtu hi a si. ²² Na pupa hna nih Izipt ram ah an vung kal tikah sawm sarih an si; atu ah cun Bawipa na Pathian nih van arfi zat in nan tam leiah an ser cang hna.

¹ "Cucaah Bawipa na Pathian cu na dawt lai i a bia le a nawlbia hna le a phunglam hna le a phungbia hna cu na zulh zungzal lai. ² Cun nihin ah ruat tuah u (a hngalh zong a hngal lo i a hmuh zong a hmu lomi nan tefa hna sinah mah hihi ka chim lo), Bawipa nan Pathian chimhhrinnak le a lianhngannak, a ṭhawngmi a kut le aa samhmi a ban, ³ Izipt ram chungah Izipt siangpahrang Faro le a ram vialte cungah a tuahmi a hmelchunhnak le khuaruahharnak; ⁴ cun Izipt ralkapbu cungah, an rang hna le an rangleng hna cungah, nannih an in dawi tik hna ah a tuahmi, zeitindah Rili Sen ti kha a fenhter hna le zeitindah Bawipa nih nihin tiangin a hrawh hna, ti le; ⁵ cun hika hmun nan phak tiangin ramlak ah nan cungah zeidah a tuah, ⁶ cun Reuben fapa Eliab i fapa hna Dathan le Abiram cungah a tuahmi zeitindah vawlei nih a kaa a an i annih kha an innchungkhar hna le an thlam hna le an thilnung vialte hna he Israel mi vialte laifang ah a dolh hna kha, ruat tuah u; ⁷ zeitintiah nan mit nih Bawipa nih rian ngan a tuahmi vialte kha an hmuh cang. ⁸ "Cucaah nihin kan pekmi hna nawlbia cu a dihlak in nan zulh lai, nannih nih nan ṭhawn i va co awkah nan kalhnawhmi ram cu nan luhhnawh i nan co nakhnga le, ⁹ Bawipa nih nan pupa hna sinah anmah le an tefa hna sinah pek awkin chiat a sermi ram, cawhnuk le khuaihliti in a luangmi ram ah cun, saupi nan um nakhnga. ¹⁰ Zeitintiah nannih nih co awkah nan va luhhnawh laimi ram cu nan hung chuahnak Izipt ram, a chung i thlaici nan tuh tik i anhring dum bangin nan ke in ti nan toihmi ram bantuk kha a si lo; ¹¹ sihmanhsehlaw co awkah nan kalhnawh laimi ram cu tlang le nelrawn an umnak hmun, van ruah ti a dingmi, ¹² Bawipa nan Pathian nih a zohkhenhmi ram a si; kum thawknak in kum donghnak tiang Bawipa nan Pathian mit cu a cungah aa fu zungzal. ¹³ "Cun nihin ah nawl kan pekmi hna ka nawlbia, Bawipa nan Pathian dawt le, a rian nan lung dihlak le nan ruahnak dihlak in ṭuan cu, nan zulh hna ahcun, ¹⁴ nannih nih nan rawl le nan mitsur hang le nan chiti kha nan pumhkhawmh khawh hna nakhnga, nan ram caah ruah cu anmah caan te cio ah, tuan deuh ruah le tlai deuh ruah hna cu, an pek hna lai. ¹⁵ Cun amah nih nan saṭil hna caah nan lo ah ram hno an pek hna lai i, nan ei lai i nan khim lai. ¹⁶ I ralring tuah u. Cu ti a si lo ahcun nan lung cu dehhlen a si lai i, nan pial lai i, pathian dang hna rian kha nan ṭuan lai i nan biak sual ko hna lai; ¹⁷ cu ti nan tuah ahcun Bawipa thinhunnak cu nan cungah a alh lai i, van khi a khar hna lai i, ruah a sur lai lo i, vawlei nih a theitlai a chuahter lai lo i, Bawipa nih an pekmi hna ram ṭha hin khulrang tein nan lo sual ko lai. ¹⁸ "Cucaah hi ka bia hna cu nan lung chung le nan ruahnak chungah nan khumh hna lai i, nan kut ah chingchiahnak caah nan khih hna lai i, nan mit le nan mit kar i hmelchunhnak caah an si lai. ¹⁹ Cun mah hna cu nan fale kha nan cawnpiak hna lai i, nan inn chung i nan ṭhut le lam i nan i chawh le nan ih le nan thawh tikah nan chim lengmang hna lai. ²⁰ Cun nan innka tung hna le nan kutka hna cungah nan ṭial hna lai, ²¹ zeitintiah van hna cu vawlei cung i an um chung paohpaoh cu, Bawipa nih nan pupa hna sinah pek awkin chiat a sermi ram chungah nan nunchung ni hna le nan tefa hna nunchung ni hna cu karhter an si lai. ²² Zeitintiah tuah awk i nawl kan pekmi hna nawlbia hi a dihlak in, Bawipa nan Pathian dawt le amah lam vialte zulh le amah leiah i bek cu ṭha tein nan tuah ahcun, ²³ nan hmaiah a ummi miphun vialte hna hi, Bawipa nih a dawi hna lai i, nanmah nakin a ngan deuh le a ṭhawng deuh miphun hna hi nan pawnchuah hna lai. ²⁴ Nan keza nih a lamhmi hmun paoh cu nan ta a si lai; nan ram cu ramlak in Lebanon tiang, cun tiva in, Zufrates tiva in nitlaklei rili tiang a si lai. ²⁵ Ahohmanh nih an in celh hna lai lo; Bawipa nan Pathian nih bia an kam cang hna bang khan, nan va lamh ding ram vialte cungah khan nanmah ṭihnak le phannak kha a chiah lai. ²⁶ "Zohhmanh, nihin ah hin nan hmaiah thluachuahnak le chiatserhnak ka chiah: ²⁷ nihin i nawl kan pekmi hna Bawipa nawlbia hna cu nan zulh ahcun, thluachuahnak a si lai, ²⁸ cun Bawipa nan Pathian nawlbia cu nan zulh lo i nan hngalh bal lomi pathian dang hna biak awkah nihin i nawl kan pekmi hna lam nan pial tak ahcun, chiatserhnak a si lai. ²⁹ Cun co awkah nan va luhhnawh laimi ram chungah Bawipa nan Pathian nih an luhpi hna tikah, thluachuahnak cu Gerizim Tlang ah nan chiah lai i chiatserhnak cu Ebal Tlang ah nan chiah lai. ³⁰ Jordan tiva ral, nitlaknak lei lam hnulei, Arabah i a ummi Kanaan mi hna ram chung, Gilgal ral, Moreh kuhthing hna pawngah an um, a si lo mei? ³¹ Zeitintiah Bawipa nan Pathian nih an pekmi hna ram cu a chungah va luh i va co awkah nannih nih Jordan cu nan tan lai; cun nannih nih nan co i a chungah nan um tikah, ³² nihin ah nan hmai i ka chiahmi nawlbia le phunglam vialte kha ralring tein nan tuah lai.

¹ "Bawipa, nan pupa hna Pathian nih co awkah an pekmi hna ram chungah, vawlei cung i nan nunchung vialte ralring tein nan tuah awk ding nawlbia le phunglam cu mah hna hi an si. ² Nan va pawnchuah laimi miphun hna nih a sangmi tlang hna cung le mual hna cung le thingkung hring kip toi i an pathian hna an biaknak hmun vialte cu nan hrawh dih hrimhrim hna lai; ³ an biakṭheng kha nan ṭheh dih hna lai i an lungphun kha nan den dih cikcek hna lai i, an Asherim cu mei in nan khangh hna lai; an pathian mui serchommi hna cu nan hau hna lai i cuka hmun i an min cu nan hrawh lai. ⁴ Bawipa nan Pathian cungah cun cu bantuk cun nan tuah lai lo. ⁵ Sihmanhsehlaw Bawipa nan Pathian nih a min chiahnak le a umnak i ser awkah nanmah phun chungin a thim laimi hmun cu nan kawl lai; ⁶ khika ah nan kal lai i khika ah nan khangh thawinak hna le nan raithawinak hna le nan cheu hra cheu khat hna le nan pekchanhmi pekchanhnak hna le, nan biakamnak pekchanhnak hna le nan mah lungthote pekchanhnak hna le nan saṭil run chung le nan tuurun chung i fater hna cu nan rak put hna lai; ⁷ cun khika ah Bawipa nan Pathian hmaiah nan ei lai i nan tuahmi kip i Bawipa nan Pathian nih thluachuah an pekmi hna ah cun nanmah le nan chungkhar hna he nan i lawm lai. ⁸ Mi kip nih mah le hmuhning cio ah a ṭha ti i nihin i hika i kan tuah bang hin nan tuah lai lo, ⁹ zeitintiah Bawipa nan Pathian nih an pekmi hna dinhnak le ro cu nan phan rih lo. ¹⁰ Sihmanhsehlaw Jordan tiva nan tan tik i Bawipa nan Pathian nih co awkah an pekmi hna ram chungah nan um tikah le, him tein nan um nakhnga, nan pawngkam i nan ral vialte hna sinin dinhnak an pek hna tikah, ¹¹ khi tikah Bawipa nan Pathian nih a min umnak dingah a thim laimi hmun ah nawl kan pekmi hna vialte cu nan rak put hna lai: nan khangh thawinak hna le raithawinak hna, nan cheu hra cheu khat le nan pekchanhmi pekchanhnak, cun Bawipa sinah bia nan i kammi biakamnak pekchanhnak vialte na rak put lai. ¹² Cun Bawipa nan Pathian hmaiah nan i lawm lai, nanmah le nan fapa hna le nan fanu hna, nan salpa hna le nan salnu hna le nannih lak i a ummi Levi mi he tiah, zeicahtiah anih cu nannih sinah covo siseh ro siseh a ngei lo. ¹³ Nan hmuhmi hmun men paoh ah nan khangh thawinak pekchanh lo awkah i ralring tuah u; ¹⁴ sihmanhsehlaw nanmah phun chung pakhatkhat ah Bawipa nih a thim laimi hmun ah, khika ah nan khangh thawinak cu nan pekchanh hna lai i khika ah nawl kan pekmi vialte hna cu nan tuah lai. ¹⁵ "Sihmanhsehlaw Bawipa nan Pa-thian nih thluachuah vanluhnak an pek hna ningin, nan khua khua zeipaoh ah, nan duh tawk in, sa cu nan thah lai i nan ei lai; sazuk le sakhi hna cu a thianglo zong a thiang zong nih an ei hna bangin, nan ei lai. ¹⁶ A thi bel kha nan ei lai lo; vawlei cungah ti bangin nan thlet lai. ¹⁷ Nan rawl, nan mitsur hang le nan chiti chungin cheu hra cheu khat siseh, nan saṭil run chung le nan tuurun chung i fater si hna seh, bia nan i kammi nan biakamnak pekchanhnak si hna seh, mah lungthote nan pekchanhnak si hna seh, nan pekchanhmi pekchanhnak si hna seh, nanmah nan khua chungah nan ei hna lai lo; ¹⁸ sihmanhsehlaw Bawipa nan Pathian nih a thim laimi hmun ah, nanmah le nan fapa le nan fanu le nan salpa le nan salnu le nan khuachung i a ummi Levi mi nih Bawipa hmaiah nan ei hna lai. Cun zei thil nan tuahnak paoh ah Bawipa nan Pathian hmaiah nan i lawm lai. ¹⁹ Nan ram chungah nan um chung paoh cu Levi mi kha hlawt lo awkah i ralring tuah u. ²⁰ "Bawipa nan Pathian nih, bia an kam hna bangin, nan ram kha a kauhter tik le sa nan hawt caah, ’Sa ka ei lai,’ nan ti tikah nan duh zat in sa cu nan ei lai. ²¹ Bawipa nan Pathian nih a min chiahnak ah a thim laimi hmun cu nanmah sinin aa hlat tuk ahcun, khi tikah Bawipa nih an pekmi nan saṭil run chung i siseh, nan tuurun chung i siseh, nawl kan pek hna bang khan nan thah hna lai i nanmah nan khua chungah nan duh zat in nan ei hna lai. ²² Sazuk sa siseh sakhi sa siseh nan ei hna bangin nan ei hna lai; a thianglo zong nih, a thiang zong nih an ei hna lai. ²³ A thi bel kha ei hrimhrim hlah u; zeitintiah thi cu nunnak a si i nunnak cu sa he nan ei lai lo. ²⁴ Nan ei lai lo; vawlei cungah ti bantukin nan thlet lai. ²⁵ Nan ei lai lo; zeitintiah Bawipa mithmuh i a dikmi nan tuah tikah, nanmah le nan hnu i nan tefa hna caah ṭhatnak a si lai. ²⁶ Sihmanhsehlaw nan pekchanh awk a simi nan thil thianghlim hna le nan biakam pekchanhnak hna cu nan lak hna lai i Bawipa nih a thim laimi hmun ah cun nan kal lai, ²⁷ cun nan khangh thawinak hna, sa le thi cu, Bawipa nan Pathian biakṭheng cungah nan pekchanh hna lai; Bawipa nan Pathian biakṭheng cungah nan raithawinak hna thi cu nan thlet lai, sihmanhsehlaw a sa cu nan ei lai. ²⁸ Bawipa nan Pathian mithmuh ah a dik le a ṭha kha nan tuah tikah, nanmah caah a ṭhat nakhnga, hi nawl kan pekmi hna bia vialte hi ṭha tein ruat tuah u. ²⁹ "Pawnchuah awkah nan luhhnawhmi hna miphun hna cu nan hmaika in Bawipa nan Pathian nih a sam dih hna i nan pawnchuah hna i an ram chungah nan um tikah, ³⁰ nan hmaika in hrawh an sinak ah khan nan i foih nakhnga lo, i ralring tuah u; cun, ’Hi miphun hna nih hin zeitindah an pathian kha an biak hna? Kei zong nih an tuah bantukin ka tuah ve lai,’ tiin an pathian hna kong zong kha hlat len hlah u. ³¹ Cu bantuk cun Bawipa nan Pathian cungah nan tuah lai lo; zeitintiah Bawipa nih a huatmi thil fihnung vialte cu an pathian hna cungah khan an tuah; zeitintiah an fapale hna le an fanule hna hmanh kha an pathian hna biaknak caah mei chungah an khangh hna. ³² "Nawl kan pekmi hna thil vialte kha ralring tein nan tuah hna lai; nan chap lai lo, nan zuk fawn lai lo.

¹ "Nan lakah profet siseh mang mantu siseh an hung chuah i hmelchunhnak siseh khuaruahharnak siseh an in hmuhsak hna i, ² an in chimhmi hna hmelchunhnak cu siseh khuaruahharnak cu siseh a hung tlin i, nan hngalh lomi pathian hna cu, ’Kannih nih hi pathian dang hi zul hna u sih law, bia hna u sih,’ tiah an chim ahcun, ³ cu profet cu siseh mang mantu cu siseh, ahohmanh an bia nan ngai hna lai lo; zeicahtiah Bawipa nan Pathian cu nan lungthin dihlak le nan ruahnak dihlak in nan daw maw ti hngalh awkah Bawipa nan Pathian nih hneksak an del hna a si. ⁴ Bawipa nan Pathian cu nan zulh lai i nan ṭih lai, a nawlbia kha nan zulh hna lai i a aw kha nan ngaih lai, amah kha nan biak lai i amah sinah khan nan i bek lai. ⁵ Sihmanhsehlaw cu profet cu siseh mang mantu cu siseh thah an si lai, zeicahtiah Bawipa nan Pathian nih zulh awkah nawl an pekmi hna lam kha hlawt awkah, Izipt ram chungin an chuahtertu hna, hremnak inn chungin an tlantu hna Bawipa nan Pathian kha ralchanh awkah an cawnpiak hna. Cu bantukin ṭhat lonak cu nan lakin nan thianh awk a si. ⁶ "Na unaupa, na nu fapa siseh, na fapa siseh, na fanu siseh, na pom liomi na nupi siseh, na nunnak tluk a simi na hawi siseh, ahohmanh nih a thli tein an lem i, ’Kal u sih law, pathian dang kha bia hna u sih,’ an ti ahcun nangmah nih siseh na pupa hna nih siseh, nan hngalh lomi pathian hna, ⁷ nan velchum i a ummi, vawlei khattelei deng in khattelei deng tiang, nanmah naih i a ummi si hna seh, nanmah he lamhlat i a ummi si hna seh, cu miphun hna i an pathian hna cu — ⁸ amah cu na hnatlakpi awk a si lo i a bia zong na ngai fawn lai lo, cun na mit zongin na zaangfah lai lo, a zuah zong na zuah lai lo, a thuh zong na thup lai lo; ⁹ sihmanhsehlaw na thah lai, amah thahnak caah na kut cu a hmasa bik a si lai i cu hnuah cun mi vialte kut cu a si lai. ¹⁰ Amah nih nangmah cu, Izipt ram chungin, sal taannak inn chung cun an chuahtertu Bawipa na Pathian sinin pialter awk kha a kawl caah lung in thi lakin na cheh lai. ¹¹ Cun Israel mi vialte nih an theih lai i an ṭih lai i nan lakah cu bantuk ṭhat lonak cu an tuah ṭhan bal ti lai lo. ¹² "Bawipa nan Pathian nih umnak ah an pekmi hna nan khua pakhatkhat ah, ¹³ mi zeirualo a cheukhat nih nannih lakah an kal i cu khua chung i a ummi hna cu an pialter hna i, nan hngalh lomi pathian hna cu, ’Kal u sih law, pathian dang kha bia hna u sih,’ tiah an ti nan theih ahcun, ¹⁴ nan dothlat lai i nan kawl lai i fel tein nan hal lai; cun zohhmanh, cu bantuk thil fihnung cu nan lakah tuah a si kha a dik le a si hrimhrimmi a si ahcun, ¹⁵ cu khuami hna cu vainam in nan thah hrimhrim hna lai, a khua le a chungah a ummi vialte le a saṭil cu vainam in nan hrawh cikcek hna lai. ¹⁶ Cun a hranchaw vialte cu khualai tual laifang ah nan pumh hna lai i, a khua le a hranchaw vialte cu Bawipa nan Pathian sin i pum khangh thawinak caah mei in nan khangh lai; vawlei bo men a si zungzal cang lai, sak ṭhan a si ti lai lo. ¹⁷ A zarhmi thil vialte cu pakhat hmanh nan kut in nan tawng lai lo; zeitintiah Bawipa nan Pathian aw cu nan ngaih i nihin ah kan pekmi hna a nawlbia vialte nan zulh i Bawipa nan Pathian mithmuh ah a dikmi kha nan tuah ahcun, ¹⁸ a thinhunnak ṭihnung khan aa mer lai i zaangfahnak kha an pek hna lai i nan pupa hna sinah chiat a ser bang khan a vel kha a karhter lai.

¹ "Nannih cu Bawipa nan Pathian i fapa nan si; mithi caah nan i at lai lo i nan mittlang hmul zong nan i met lai lo. ² Zeitintiah nannih cu Bawipa nan Pathian ca i a thiangmi miphun nan si i Bawipa nih nannih cu amah ta hrimhrim si awkah, vawlei cung i a ummi miphun vialte hna lakin an thim hna. ³ "Fihnung a simi thil zeihmanh nan ei lai lo. ⁴ Mah hi hna hi nan ei awk saram cu an si lai: cawtum, tuu, meheh, ⁵ sakhi, sazuk, saza, sathar, ramlak sia, ramlak caw, tlangcung tuu. ⁶ Zei saram paoh a tin a ṭe i a tin cheu hnih ah aa cheu i rawlret a khaimi cu, saram hna lakah nan ei awk an si lai. ⁷ Sihmanhsehlaw rawlret a khaimi lakah siseh, tinṭe lakah siseh, mah hi nan ei hna lai lo: kalauk, saveh, le sakuh, zeicahtiah rawlret cu an khai nain an tin a ṭe lo, cucaah nan caah an thiang lo. ⁸ Cun vok, zeicahtiah a tin cu a ṭe nain rawlret a khai lo, cu caah nan caah a thianglo. An sa nan ei lai lo, an ruak zong nan tawng lai lo. ⁹ "Ti chung i a ummi thil vialte lakah mah hna hi nan ei lai: ṭeh le phokphawher a ngeimi paoh nan ei hna lai. ¹⁰ Ṭeh le phokphawher a ngei lo paoh cu nan ei hna lai lo, nan caah thianglo a si. ¹¹ "A thiangmi va vialte cu nan ei hna lai. ¹² Sihmanhsehlaw mah hna hi nan ei lo awk cu an si lai: muvanlai, langta, mu-ar-cawi, ¹³ ngawihuk, kaite phun paohpaoh, ¹⁴ langak phun paohpaoh, ¹⁵ ostrik, thlanghnap, rili va, mupi phun paohpaoh, ¹⁶ chimbu ngan le chimbu hme, ti-ar, ¹⁷ pelikan, saruak eimi langta, tingala, ¹⁸ tivakok, le ram varang phun paohpaoh, chuangtuar le palak. ¹⁹ Cun thla a ngeimi buṭit-khaubawk paohpaoh cu nan caah thianglo an si; nan ei hna lai lo. ²⁰ Thla ngei a thiangmi thil vialte nan ei hna lai. ²¹ "Zeihmanh amah thih in a thimi cu nan ei lai lo; ramdangmi nan khua chung i a ummi hna kha nan pek hna lai, an duh ahcun an ei hna lai, asiloah phun dangmi sinah nan zuar khawh lai; zeitintiah nannih cu Bawipa nan Pathian caah a thiangmi miphun nan si. "Meheh fa cu a pi hnuk in nan chuang lai lo. ²² "Kum fate in lo in a chuakmi nan thlaici theipar vialte cu cheu hra ah cheu khat nan pekchanh lai. ²³ Bawipa nan Pathian kha ṭih awk nan hngalh zungzal nakhnga, nan rawl chungin siseh, nan mitsur hang chungin siseh, nan chiti chungin siseh cheu hra cheu khat le nan saṭil run chung le nan tuurun chung i fater hna cu, Bawipa nan Pathian hmaiah, a min umnak ding i a thim hngami hmun ah cun nan ei lai. ²⁴ Bawipa nan Pathian nih thluachuah an pek tik hna ah, Bawipa nan Pathian nih a min umnak dingah a thim laimi hmun cu a hlat tuk caah nan caah khuallam a sau tuk caah, cheu hra cheu khat cu nan i phorh khawh lo ahcun, ²⁵ tangka ah nan canter lai i nan i ken lai i, Bawipa nan Pathian nih a thimmi hmun ah cun nan kal lai i, ²⁶ nan duhmi paoh ah nan i hloh lai, cawtum hna maw, tuu hna maw, mitsur hang maw, zu maw, nan hawtmi paoh ah nan hman lai; cun cuka ah cun Bawipa nan Pathian hmaiah nan ei hna lai i nan i lawm lai, nanmah he nan chungkhar hna he. ²⁷ Cun nan khua chungah a ummi Levi mi kha nan hlaw lai lo, zeitintiah anih cu nanmah sinah covo siseh, ro siseh a ngei lo. ²⁸ "Cun kum thum donghnak lengmang ah cu kum i nan voimi cheu hra cheu khat vialte cu nan chuahpi lai i nan khua chungah nan chiah hna lai; ²⁹ cun, Bawipa nan Pathian nih nan kut rian nan tuahmi vialte ah thluachuahnak an pek hna nakhnga, nan khua chungah a ummi Levi mi hna, annih cu nannih sinah covo le ro an ngeih lo caah, le mipem le pangeilo le nuhmei hna nih cun an rat i an ei i an khim nakhnga nan chiah hna lai.

¹ "Kum sarih donghnak lengmang ah leiba ngaihthiamnak nan tuah lai ² Ngaihthiamnak ning cu hi bangin a si lai: cawihtu paohpaoh nih a innpa sinin a hmuh awk hnga kha a ngaihthiam lai. Bawipa ngaihthiamnak cu thanh a si cang ruangah, ahohmanh nih a innpa, a unau cu, a cawh chih len lai lo. ³ Ramdangmi cu nan cawh sawk hna lai, sihmanhsehlaw nan unau sinin nan hmuh awk hnga paoh kha cu nan ngaihthiam awk a si. ⁴ Nannih lakah mipam nan um lai lo (zeitintiah Bawipa nan Pathian nih ro ca i co awkah an pekmi hna ram chungah thluachuahnak an pek hna lai), ⁵ Bawipa nan Pathian aw kha nan ngaih i nihin ah kan pekmi hna nawlbia vialte hi ralring tein nan tuah paohpaoh ahcun Bawipa nih thluachuah an pek hrimhrim hna lai. ⁶ Zeitintiah bia an kam hna bangin Bawipa nan Pathian nih thluachuahnak an pek hna lai i miphun tampi kha nan cawih hna lai; sihmanhsehlaw nan cawi hna lai lo; miphun tampi kha nan uk hna lai, sihmanhsehlaw annih nih cun an in uk hna lai lo. ⁷ "Bawipa nan Pathian nih an pekmi hna nan ram chung i nan khua chungah nan lakah nan unau pakhatkhat mipam a um ahcun, cu nan unau mipampa cungah cun nan lung nan hahter lai lo i nan kut zong nan humkanh lai lo, ⁸ nan kut cu a samhtu nan samhpiak lai i zeipaoh a si ah, a herhnak aa zatnak in nan cawih lai. ⁹ ’Kum sarihnak kum, ngaihthiamnak kum cu a nai cang,’ tiin nan ti i nan unau a si a fakmi kha hmuh nan duh lo i zeihmanh pe duh loin nan lung chungah ruahnak ṭhalo a um sual nakhnga lo, i ralring tuah u, nanmah kongah Pathian a auh ahcun nan caah sual a si ko lai. ¹⁰ Lungtho tein nan pek lai i nan pek tik zongah nan lung chungin nan uam lai lo, zeicahtiah hi caah hin pei Bawipa nan Pathian nih nan rian vialte le nan tuahmi vialte ah thluachuahnak an pek hna lai cu. ¹¹ Zeitintiah sifakmi hna cu nan ram chungah an dong bal lai lo; cu caah hi nawlbia cu kan pek hna, ram chung i a ummi nan unau, sifak le retheimi hna cu nan kut kaupi in nan samhpiak hna lai. ¹² "Nan unau, Hebru minu maw Hebru mipa cu nan sinah zuarh a si ahcun, kum ruk chung an rianh hna lai, cun kum sarihnak kum ah cun nanmah sinin nan luatter lai. ¹³ Cun nanmah sinin nan luatter tikah kutro in nan kalter lai lo; ¹⁴ nan tuurun chungin siseh, nan phuhri chungin siseh, nan mitsur hang nennak khor in siseh, siang ngaiin nan pek lai; Bawipa nan Pathian nih thluachuah an pek hna ningin anih zong kha nan pek lai. ¹⁵ Nannih nih Izipt ram i sal nan rak si le Bawipa nan Pathian nih an tlanh hna kha nan hngalh camcin lai; cucaah cun mah nawl hi nihin ah kan pek hna. ¹⁶ Sihmanhsehlaw amah nih nanmah le nan chungkhar cu an dawt hna i nan sin i a um ah a lung aa lawmh i, ’Nan sinin chuah ka duh lo,’ a ti ahcun, ¹⁷ thir fung zum pakhat nan i lak lai i innka danh in a hna cu nan vih lai i amah cu nan sal a si zungzal lai. Cun nan salnu cungah cu bantuk ṭhiamṭhiam in nan tuah lai. ¹⁸ Nanmah sinin nan chuahter tikah nan caah a har lem lai lo; zeicahtiah hlanmi rianṭuantu nih a hmuhmi a cheu lawng khan in kum ruk chung an rianh hna. Cucaah Bawipa nan Pathian nih zeizong nan tuahmi kip ah thluachuahnak an pek hna lai. ¹⁹ "Nan cawrun chung le nan tuurun chung i fater a pa vialte hna cu Bawipa nan Pathian sinah nan pekchanh hna lai; nan cawrun chung i fater a pa hna cu rian ṭuannak ah nan hmang hna lai lo, nan tuurun chung i fater hna zong an hmul nan met hna lai lo. ²⁰ Bawipa nih a thim laimi hmun ah cun kumfate in Bawipa nan Pathian hmaiah nanmah le nan chungkhar nih cun nan ei lai. ²¹ Sihmanhsehlaw do a tlak lo ahcun, a bei ah siseh, a mit a cawt ah siseh, a fakmi dotlak lonak zeipaoh a ngeih ahcun Bawipa nan Pathian sinah nan thawi lai lo. ²² Nanmah le nan khua chung cio ah nan ei lai; a thianglo nih siseh, a thiang nih siseh, sakhi le sazuk nan ei bangin, aa khat in an ei lai. ²³ A thi bel nan ei lai lo; vawlei ah ti bantukin nan thlet lai.

¹ "Abib thla cu nan ulh lai i Bawipa nan Pathian lanhtak puai cu nan ulh lai; zeitintiah Bawipa nan Pathian nih Izipt ram chungin zan ah Abib thla ah an chuahpi hna. ² A min umnak ah Bawipa nih a thim laimi hmun ah nan tuurun chungin siseh, nan cawrun chungin siseh, Bawipa nan Pathian sinah lanhtak puai thawinak cu nan pekchanh lai. ³ Thilnu cawhmi changreu nan ei chih lai lo; thilnu cawh lo changreu, temhinnak changreu he cun ni sarih chung nan ei lai. Izipt ram chungin nan chuah ni kha nan nunchung vialte nan hngalh camcin nakhnga — Izipt ram chung i namhnaw ngaiin nan rak zam kha. ⁴ Nan ram chung dihlak ah ni sarih chung nan sinah thilnu nan umter lai lo; a ni khatnak ni zanlei i nan thawimi sa zong zan khuadei a thaizing tiang zeihmanh nan taanter lai lo. ⁵ Bawipa nan Pathian nih an pekmi hna nan khua chungah lanhtak thawinak cu nan pechan lai lo; ⁶ sihmanhsehlaw Bawipa nan Pathian nih a min umnak caah a thim laimi hmun ah, khika ah, zanleisang i ni a tlak cuahmah lio, Izipt ram in nan chuah caan ah khan, lanhtak thawinak cu nan pekchanh lai. ⁷ Cun Bawipa nan Pathian nih a thim laimi hmun ah cun nan chuan lai i nan ei lai; zinglei ah nan kir lai i nan thlam ah nan kal hna lai. ⁸ Ni ruk chung thilnu cawh lo changreu kha nan ei lai; ni sarihnak ni ah Bawipa nan Pathian caah a liannganmi pumhnak a um lai; cu ni ah cun rian nan ṭuan lai lo. ⁹ "Zarh sarih nan rel lai; nan rawl ṭuan domh ni in zarh sarih nan rel lai. ¹⁰ Bawipa nan Pathian nih thluachuah an pek hna ningin nan kut chung chuakmi chungin mah lungtho te pekchanhnak he cun Bawipa nan Pathian caah zarh hna puai cu nan tuah lai; ¹¹ cun Bawipa nan Pathian nih a min umnak dingah a thim laimi hmun ah cun nanmah le nan fapa le nan fanu le nan salpa le nan salnu le nan khua chung i a ummi Levi mi le nan lak i khua a sami khual le pangeilo le nuhmei hna he cun Bawipa nan Pathian hmaiah nan i lawm lai. ¹² Izipt ram ah sal nan rak si kha nan hngalh camcin lai i, hi nawlbia hna hi ralring tein zulh awk nan i zuam lai. ¹³ "Deu puai cu ni sarih chung nan tuah lai, nan phuhri le nan mitsur hang nennak khor in nan pumhkhawmh tikah; ¹⁴ nanmah le nan fapa le nan fanu le nan salpa le nan salnu le nan khua chung i a ummi Levi mi, mipem, pangeilo le nuhmei nih nan puai ah cun nan i lawm lai. ¹⁵ Nan dihlak in nan i lawmh nakhnga, Bawipa nan Pathian nih nan chuahpimi thil vialte le nan kut rian vialte ah thluachuahnak an pek hna lai, Bawipa nih a thim laimi hmun ah Bawipa nan Pathian caah ni sarih chung puai nan ngei lai. ¹⁶ "Kum khat ah nan lak i pa vialte nih Bawipa hmaiah a thim laimi hmun ah voi thum an chuak lai: thilnu telh lo changreu puai le zarh hna puai le deu puai ah an si lai. Bawipa hmaiah kutro in an chuak lai lo; ¹⁷ Bawipa nan Pathian nih thluachuahnak an pek hna ning cio ah mi kip nih nan ti khawh tawk cio ah nan pek lai. ¹⁸ "Bawipa nan Pathian nih an pekmi hna nan khua dihlak chungah, nan phun ning cio ah, biaceihtu hna le bawi hna kha nan chiah hna lai i mi kha dinnak biaceihnak in bia an ceih hna lai. ¹⁹ Dinglo piin bia kha nan ceih lai lo, duhdanh nan ngei lai lo, nawhthuh nan la lai lo, zeitintiah nawhthuh nih mifim mi mit kha a cawtter i miding mi bia kha a lehtalam tawn. ²⁰ Biading, biading lawnglawng cu nan zulh lai, nan nun i Bawipa nan Pathian nih an pekmi hna ram cu nan co nakhnga. ²¹ "Bawipa nan Pathian biakṭheng nan ser laimi pawngah cun zei thing hmanh Asherah si awkah nan phun lai lo, ²² lung zong nan phun lai lo, zeitintiah mah hna cu Bawipa nan Pathian nih a huat hna.

¹ "Bawipa nan Pathian sinah cawtum siseh tuu siseh dotla lo le tlin lonak zeihmanh a ngeimi paoh cu raithawinak ah nan hmang lai lo, zeitintiah mah cucu Bawipa nan Pathian caah fihnung a si. ² "Nanmah lakah, Bawipa nih an pekmi hna nan khua hna chungah, a biakamnak buarnak in Bawipa mithmuh ah thil ṭhalo kha a tuah i ³ pathian dang kha a zulh hna i an rian a ṭuan i a biak hna i, ni siseh, thla siseh, van i a ummi arfi zeihmanh siseh kan thlauhmi hna kha a biak hna i ⁴ an in chimh hna i nan theih ahcun, fel tein nan hlat lai; cu bantuk thil fihnung cu Israel mi lakah tuah a si taktak le a fian ahcun, ⁵ cu thil ṭhalo a tuahtu cu nu a si ah pa a si ah, nan hauka hna ah cun nan chuahpi hna lai i cu pa cu siseh, cu nu cu siseh, lung in thi lakin nan cheh hna lai. ⁶ Thih awk hnga a simi cu biahngaltu pahnih maw pathum hna chimnak in thah a si lai; biahngaltu pakhat chimnak in cun ahohmanh thah an si lai lo. ⁷ Thah ding hnga cung i kut a thla hmasa biktu cu biahngaltu kha an si lai i, cu hnuah cun mi vialte kut kha an si lai. Cuticun nan lakin ṭhat lonak cu nan thianh lai. ⁸ "Mi i thahnak kong bia siseh, thilri kong bia siseh, i vuak i dennak kong bia siseh, nan khua chungah nan ca i a har tukmi tazacuainak zeipaoh a chuah ahcun, nan tho lai i Bawipa nan Pathian nih a thim laimi hmun ah cun nan kal lai i, ⁹ Levi mi tlangbawi hna le cu caan i biaceihtu a simi sinah cun nan va kal lai i nan hal hna lai i biakhiahnak cu an in thanh hna lai. ¹⁰ Bawipa nih a thim laimi hmun in an in thanhmi hna ningin nannih nih nan tuah lai; cun an in fial hna ning tein ralring tein nan tuah lai; ¹¹ cawnpiaknak an in pek hna ning le biakhiahnak an in thanhmi hna ning tein nan tuah lai; annih nih an in thanhmi hna biakhiahnak khan orhlei ah siseh kehlei ah siseh nan pial lai lo. ¹² Bawipa nan Pathian hmai i rianṭuan awkah a dirmi tlangbawi siseh, biaceihtu siseh, an bia ngaih loin hramhram in a tuahtu cu a thih awk a si lai; cuticun Israel chungin ṭhat lonak cu nan thianh lai. ¹³ Mi vialte nih an theih lai i an ṭih lai i hramhram in an tuah ṭhan ti lai lo. ¹⁴ "Bawipa nan Pathian nih an pekmi hna ram kha nan phak i nan co i a chung i nan um i, ’Kan pawngkam ah a ummi miphun vialte bantukin kan cungah siangpahrang kan chiah ve lai,’ nan ti tikah, ¹⁵ Bawipa nan Pathian nih a thim laimi cu nan cung i siangpahrang si awkah cun nan chiah lai. Nanmah nan unau hna chungin siangpahrang ah cun pakhat nan i chia lai; nan unau a si lomi, ramdangmi cu nan cungah nan chia lai lo. ¹⁶ Amah belte amah caah rang kha a tamter chin hna lai lo, a rang tamter awkah mi kha Izipt ram ah a kirter fawn hna lai lo, zeicahtiah Bawipa nih nannih sinah, ’Khi leiah nan kir hrimhrim ti lai lo,’ tiah a chim cang. ¹⁷ Cun amah caah nupi zong a tamter hna lai lo, a lung a pial sual hnga; ngun le sui zong amah caah a tamter chin luaimai hna lai lo. ¹⁸ "Cun a pennak siangpahrang ṭhutdan ah a ṭhut tikah, Levi mi tlangbawi hna nih an zohkhenhmi hi phungbia hi, cauk pakhat ah aa tlen lai, ¹⁹ - ²⁰ hi phungbia chung bia vialte hna le hi nawlbia hna ulhnak le tuahnak hin Bawipa a Pathian ṭih cu a thiam nakhnga le, a unau hna cungah a lung aa hlorh i nawlbia in kehlei ah siseh, orhlei ah siseh, a pial nakhnga lo le, Israel chungah amah le a fale hna nih amah a ram chungah hin saupi an uk nakhnga, amah sinah a chiah lai i a nun chung vialte a rel lai.

¹ "Levi mi tlangbawi hna, cucu Levi phun a ningpi in, cu hna nih cun Israel mi lakah covo siseh ro siseh an ngei lai lo; Bawipa sinah mei in pekchanhmi thil hna le anmah nih an hmuh awk a simi thil hna cu an ei lai. ² An unau hna lakah ro an ngei lai lo; bia a kam hna bangin Bawipa cu an ro a si. ³ Cun mah hihi raithawinak a pechanmi hna sinin tlangbawi nih an hmuh awk hnga cu a si lai, cawtum siseh, tuu siseh: tlangbawi cu a liang le a bel pahnih le a pawpi an pek lai. ⁴ Nan rawl in siseh, nan mitsur hang in siseh, nan chiti in siseh, theitlai hmasa bik hna le nan tuuhmul meh hmasa bik hna cu nan pek lai. ⁵ Zeitintiah Bawipa nan Pathian nih Bawipa min in dir i rianṭuan zungzal awkah amah le a fapa hna cu nannih nan phun vialte chungin a thim hna. ⁶ "Cun Levi mi pakhatkhat cu Israel ram chung i a umnak nan khua pakhatkhat in a chuah i Bawipa nih a thim laimi hmun ah a kal ahcun — a duh tik paoh ah a kal kho lai — ⁷ cu ka i Bawipa hmaiah rian ṭuan awkah a dirmi a unau Levi mi hna bantukin, Bawipa a Pathian min in rian a ṭuan ve lai. ⁸ A pa sinin a comi ro lengah, annih nih ei awk cu aa zat cio ah an co lai. ⁹ "Bawipa nan Pathian nih an pekmi hna ram nan phak tikah, cuka miphun hna nih an tuahmi fihnung cu zulh ve awkah nan cawng lai lo. ¹⁰ Nannih lakah ahohmanh pekchanhnak caah a fapa siseh a fanu siseh a khaangmi nan um lai lo, litinthiam, bong zummi, mang ihthiam, eihthiam, ¹¹ camhthiam, khuavang ngei, hnam ngei, thi tlawnthiam, ahohmanh nan um lai lo. ¹² Zeicahtiah hi thil a tuahmi hna cu Bawipa caah fihnung an si i, hi fihnung tuahnak ruangah hin Bawipa nan Pathian nih nan hmai in a dawi dih hna lai. ¹³ Bawipa nan Pathian hmaiah soi awk um lo nan si awk a si. ¹⁴ Zeitintiah nan pawnchuah laimi miphun hna nih hin khuavang le litin thiam kha an rak lun hna, sihmanhsehlaw nannih cu Bawipa nan Pathian nih cu bantuk tuah cu an sianh hna lo. ¹⁵ "Nannih lakin, nan unau hna chungin, Bawipa nan Pathian nih nan caah profet pakhat keimah bantuk a chuahter lai i amah cu a bia nan ngaih lai, ¹⁶ ’Bawipa ka Pathian aw cu ka theihter ti hlah, hi mei ngan zong hi ka hmuhter ti hlah, ka thi sual ai hnga,’ tiin Horeb tlang i pumh ni i Bawipa nan Pathian nan rak halmi kha a si. ¹⁷ Cun Bawipa nih a ka chawnh i, ’An chimmi vialte cu ding tein an chim. ¹⁸ An unau hna chungin nangmah bantuk profet pakhat an caah ka chuahter lai i a kaa chungah ka bia ka chiah hna lai i, nawl ka pekmi vialte kha a chimh hna lai. ¹⁹ Cun ka min in a chim laimi ka bia zei ah a rel lomi paoh cu, keimah hrimhrim nih zeicaahdah a tuah lonak kong kha ka hal lai. ²⁰ Sihmanhsehlaw chim awkah keimah nih ka pek lomi bia ka min in a chim hramtu profet siseh, pathian dang hna min in a chimtu siseh cu profet hrimhrim cu a thi lai,’ tiah a ti. ²¹ Cun nannih nih, ’Zeitindah Bawipa nih a chim lomi bia cu kan hngalh khawh lai?’ nan ti ahcun — ²² profet pakhatkhat nih Bawipa min in bia a chim tikah cu bia cu a tlin lo le a dik lo ahcun, cu bia cu Bawipa nih a chim lomi bia cu a si; profet nih amah duh in a chimmi a si, amah cu nan ṭih awk a si lo.

¹ "Bawipa nan Pathian nih an pekmi hna ram a ngeitu miphun hna cu Bawipa nan Pathian nih a hloh hna i nannih nih nan pawnchuah hna i an khua chung le an inn chungah nan um tikah, ² Bawipa nan Pathian nih co awkah an pekmi hna ram chungah cun nan caah khua pathum a dang tein nan i chiah lai. ³ Lam kha nan sial hna lai i co awkah Bawipa nan Pathian nih an pekmi hna ram cu hmun thum ah nan cheu lai, khika cu mithattu hna an zaam khawhnak hmun a si lai. ⁴ "Cun mithattu nih cuka ah a zaam i a nunnak khamh a si khawh nakhnga, hi bantuk hin a si lai. Mipa pakhatkhat nih a innpa, hlanah i huatnak um loin, a thah sual, — ⁵ tahchunhnak ah, mipa pakhat cu a innpa he ramlak ah thinghlam awkah a kal, thing cu hau awkah a kut in hreitlung cu a vun i thlir i a fang cu a haa in a tlong i a innpa pa cu a khen i a thi — cu bantuk mi cu hi bantuk khua pakhatkhat ah a zaam i a nunnak a khamh awk a simi cu a si lai; ⁶ cu ti a si lo ahcun, thisen phuhlamtu nih khan thinlinh in a dawi lai i lam kha a hlat caah a phak lai i a thah sual lai; asinain cu pa cu thih awk tlak a si ṭung lomi a si, zeicahtiah a innpa he khan hlanah zeihmanh huatnak an rak ngei lo. ⁷ Cucaah nawl kan pek hna, khua pathum in a dang tein nan chiah lai. ⁸ Cun Bawipa nan Pathian nih nan pupa hna sinah chiat a ser bangin, nan ramri kha a kauhter i nan pupa hna sinah pek awkin bia a kammi ram vialte kha an pek hna tikah, — ⁹ Bawipa nan Pathian kha nan dawt i a lam kha a zungzal in nan zulhnak thawngin, nihin i kan pekmi hna nawlbia vialte hi ṭha tein nan ulh hna ahcun a si kho lai — khi tikah hi khua pathum ah hin a dang khua pathum nan chap hna lai, ¹⁰ zeitintiah Bawipa nan Pathian nih ro caah an pekmi hna ram chungah hin a sual lomi thi thlet a si sual nakhnga lo le, cu thi thlet mawhnak cu nan cungah a tlak nakhnga lo. ¹¹ "Sihmanhsehlaw mipa pakhatkhat nih a innpa kha a huat i a bawh i a tuk i fak piin a hliam i a thih i hi khua pakhatkhat ah a zam ahcun, ¹² khi tikah a khua upa hna nih khan mi an hei thlah hna lai i cuka cun an va lak lai i a thih nakhnga thisen phuhlamtu sinah khan an chanh lai. ¹³ Nan mit nih a zaangfah lai lo, sihmanhsehlaw nan caah a ṭhat nakhnga, Israel chungin a sual lomi thisen mawhnak cu nan thianh lai. ¹⁴ "Bawipa nan Pathian nih co awkah an pekmi hna ram chung i nan co laimi ram chungah a ummi, hlanmi nih an rak chiahmi nan innpa ramri kha nan ṭhial lai lo. ¹⁵ "Mi pakhatkhat cu tuahnak ṭhalo kongah siseh, nawl buarnak a tuahmi he aa tlaimi sualnak kongah siseh, biahngaltu pakhat lawng cu a za lai lo; biahngaltu pahnih maw pathum hna nih an chimnak lawngin sualpuhnak cu fehter a si lai. ¹⁶ Huatnak lungthin a pawimi biahngaltu pakhatkhat nih mi pakhatkhat cu ṭhat lo tuah a puh ahcun, ¹⁷ taza aa cuaimi cu an phu hnih in Bawipa hmaiah an chuak lai, khi caan i rian a ṭuanmi tlangbawi hna le biaceihtu hna hmaiah cun; ¹⁸ biaceihtu hna nih cun fel tein an hlat lai i biahngaltu cu biahngaltu dinglo a si i a unau kha dinglo piin a puh a si ahcun, ¹⁹ a unau cung i tuah a rak i tinhmi bantuk khan a cungah nan tuah lai; cuticun nan lakin ṭhat lonak cu nan thianh lai. ²⁰ Cun a taangmi nih an theih lai i an ṭih lai i nannih lakah cu bantuk ṭhat lonak cu zeitikhmanh ah an tuah ti lai lo. ²¹ Nan mit nih a zaangfah awk a si lai lo; nunnak caah nunnak, mit caah mit, ha caah ha, kut caah kut, ke caah ke, a si ko lai.

¹ "Nannih nih nan ral hna doh awkah nan kal i, rang hna le rangleng hna le nanmah i nakin a ngan deuhmi ralkapbu nan hmuh tikah, nan ṭih hna lai lo; zeitintiah Izipt ram in an chuahpitu hna Bawipa nan Pathian kha nan sinah a um. ² Cun raltuknak hmun kha nan phak dengmang tikah tlangbawi kha hmaiah a ra chuak lai i ³ mizapi sinah cun, ’Maw Israel, thei tuah u, nihin cu nan ral doh awkah raltuknak hmun cu nan phan dengmang cang; nan lung der hlah seh, ṭih hlah u, a ther zong ther hlah u, anmah kha ṭih hna hlah u; ⁴ zeitintiah teinak cu in pek hna awk le nan ral cu in dohpiak hna awkah nannih sinah a kalmi cu Bawipa nan Pathian cu a si,’ tiah a ti lai. ⁵ Cun bawi hna nih cun mizapi sinah cun, ’Inn thar a sa i a pechan rih lomi nan um maw? Cu pa cu a inn ah kir ṭhan seh, raltuknak hmun ah a thih sual ahcun midang nih an pekchanh sual lai. ⁶ Mitsur dum a ser i a theitlai aa nuamhpi rih lomi nan um maw? Cu pa cu a inn ah kir ṭhan seh, raltuknak hmun ah a thih sual ahcun midang nih an i nuamhpi sual lai. ⁷ Nupi a ham i a ṭhi rih lomi nan um maw? Cu pa cu a inn ah kir ṭhan seh, raltuknak hmun ah a thih sual ahcun midang nih an ṭhit sual lai,’ tiah an chim lai. ⁸ Cun cu hleiah bawi hna nih cun mizapi sinah cun, ’Thinphang le lungder nan um maw? Cu pa cu a inn ah kir ṭhan seh, a hawile lung zong kha amah lung bantukin a zor sual lai,’ tiah an chim lai. ⁹ Cun bawi hna nih cun mizapi sin bia chim cu an ngol tikah, mizapi hna lu ah cun haotu chiah an si lai. ¹⁰ "Doh awkah khua nan hei naih tikah remnak kha nan pek hmasa hna lai. ¹¹ An lehnak hna cu remnak a si i nan sinah aa hun ahcun, cu chung i a ummi mi vialte cu nan caah hnekmi rian a ṭuantu an si lai i an in rianh hna lai. ¹² Sihmanhsehlaw nannih he remnak kha a ser lo i an doh hna ahcun, nannih nih nan kulh lai; ¹³ cun Bawipa nan Pathian nih nan kut chungah an pek hna tikah, khuachung pa vialte cu nam in nan sam dih hna lai, ¹⁴ sihmanhsehlaw nu le ngakchia le saṭil le khua chung i a ummi thil dang zeipaoh, cun a hranchaw vialte zong cu nan ca i hranchaw ah nan i lak hna lai; cun Bawipa nan Pathian nih an pekmi hna nan ral hna hranchaw cun nan i cenh lai. ¹⁵ Hika i a ummi miphun hna khua a si lomi, nan umnak in lam hlapi ah a ummi khua vialte hna cu, cu bang cun nan tuah hna lai. ¹⁶ Sihmanhsehlaw Bawipa nan Pathian nih ro caah an pekmi hna, hi miphun hna khua chung tu ah hin cun, thaw a chuahmi zeihmanh a nung in nan zuah lai lo, ¹⁷ sihmanhsehlaw Hit mi hna le Amor mi hna le Kanaan mi hna le Periz mi hna le Hiv mi hna le Jebus mi hna cu, Bawipa nan Pathian nih nawl an pek hna bangin nan hrawh cikcek hna lai; ¹⁸ zeicahtiah, annih nih an pathian hna biaknak ah an tuah tawnmi thil fihnung hna cu an in cawnpiak sual hna hnga i Bawipa nan Pathian cungah nan sual sual hnga. ¹⁹ "Khua pakhatkhat cu caan saupi nan kulh i lak awkah nan doh tikah, a thingkung hna cu hreitlung i haunak in nan hrawk hna lai lo; an thei cu nan ei hna lai, sihmanhsehlaw nan hau hna lai lo. Lo chung i thingkung hna cu minung maw an si i nannih nih nan kulh hna lai cu? ²⁰ Rawl caah a si lomi thingkung a si ti nan hngalhmi thingkung bel kha nan hrawh hna lai i nan hau hna lai i, nannih he aa domi khua kha a tluk hlantiang a kulhnak ah nan hman hna lai.

¹ "Bawipa nan Pathian nih co awkah an pekmi hna ram chungah, ramlak sawhsawh ah mi, thah a si mi kha, a rilh ko i aho nih dah a thah ti kha hngalh a si lo ahcun, ² nan upa hna le nan biaceihtu hna kha an chuak lai i thah a simi pawngkam ah a ummi khua kha zei can hlat dah an si tiah an tah hna lai; ³ cun thahmi mipa a naih bik khua upa hna nih khan, cawla pakhat rian a ṭuan bal rih lo i hngawng kual zong banh a si bal rih lomi cu an lak lai. ⁴ Cun cu khua upa hna nih cun cawla cu, ti a um zungzalnak, leh bal lomi le thlaici cin bal lonak nelrawn ah an kalpi lai i cuka nelrawn chungah cun cawla cu a hngawng an khiah lai. ⁵ Cun Levi fapa hna, tlangbawi hna kha hmaiah an ra chuak lai, zeitintiah Bawipa nih amah rian ṭuan awkah le Bawipa min in thluachuah pek awk caah a thim cang hna i, an bia in tazacuainak vialte le i tukdennak vialte cu biachah a si lai. ⁶ Cun thahmipa a naih bik khua upa vialte nih, nelrawn ah a hngawng khiah a simi cawla cungah khan an kut an i ṭawl lai i, ⁷ ’Hi thi hi kannih kan kut nih a chuah lo i, a chuah kha kan mit zong nih a hmu lo. ⁸ Maw Bawipa, na tlanhmi na mi Israel cu ngaithiam ko law, sualnak a tuah lo thisen mawhnak cu na mi Israel lakah chia sawh hlah; thisen chuah mawhnak cu ngaihthiam ko hna,’ tiin hngaltu sinak bia an chim lai. ⁹ Cu bantukin Bawipa hmaiah a dikmi kha nan tuah tikah sualnak a tuah lo thisen chuah mawhnak cu nan lakin nan thianh lai. ¹⁰ "Nan ral hna kha doh awkah nan kal i Bawipa nan Pathian nih nan kut chungah an pek hna i sal ah nan tlaih hna tikah, ¹¹ cu hna lakah cun aa dawhmi nu na hmuh i na duh i na nupi caah lak awk i na duh ahcun, ¹² na inn ah na tlunpi lai i a lu aa meh lai i a tin aa riam lai. ¹³ Cun saltang a sinak puan kha a hlawt lai i na inn chungah a um lai i thla khat pumte a nu le a pa kha a ngaih hna lai; cu hnuah cun na ihpi lai i a va na si lai i na nupi a si lai. ¹⁴ Khi tikah a cungah na lung a hmui lo ahcun, a duhduhnak ah na kalter lai; sihmanhsehlaw phaisa ah na zuar lai lo, sal bantukin na tuah lai lo, a min na chiatter cang caah. ¹⁵ "Mipa pakhatkhat nih nupi pahnih a ngeih i pakhat cu a dawt i pakhat cu a dawt lo i, dawtmi he dawt lomi he fa an hrinpiak veve i fapa hrin hmasa bik cu dawt lomi i fapa a si ahcun, ¹⁶ a ro cu a fapa hna kha ro caah a phawt hna ni ah, a dawtmi nupi fapa kha, a dawt lomi nupi fapa, fater a simi nakkhan, upa ah a ser lai lo; ¹⁷ sihmanhsehlaw, a dawt lomi nupi fapa kha fater a sinak kha a hngalhpi ko lai i a ngeihmi vialte chung khan vo hnih a pek ko lai; zeitintiah amah cu a thazang theitlai hmasa bik a si; fater sinak cu amah ta a si ko. ¹⁸ "Mipa pakhatkhat nih lung a khawng i ralchanh a hmangmi fapa a ngeih i, a pa bia siseh a nu bia siseh a ngaih duh lo i, an chimhring nain zel ah a rel hna lo ahcun, ¹⁹ a nu le a pa nih an tlaih lai i a khuachung upa hna sinah, a umnak khua hauka ah cun an chuahpi lai, ²⁰ cun a khua upa hna sinah cun, ’Hi kan fapa hi a lung a khawng i ralchanh hmangmi a si, amah nih kan bia ngaih a duh lo, mihrokhrawl le zurit hmang a si,’ an ti lai. ²¹ Khi tikah khuachung pa vialte nih lung in thi lakin an cheh lai; cuticun ṭhat lonak cu nan lakin nan thianh lai i Israel mi vialte nih an theih lai i an ṭih lai. ²² "Cun mi pakhatkhat nih thihnak tlak sualnak a tuah i nan thah i thingkung cungah nan thlai ahcun, ²³ a ruak cu thingkung cungah cun zan khuadei in a um lai lo, sihmanhsehlaw cu ni lila ah cun nan phum lai, zeitintiah thlaimi cu Pathian chiatserhmi a si; ro caah Bawipa nan Pathian nih an pekmi hna nan ram cu nan thurhhnawmh lai lo.

¹ "Nan unau i a cawtum maw a tuu maw a tlaumi nan hmuh ahcun, bawm loin nan um lai lo; nan unau inn ah cun nan rak hruaih ṭhan hna lai. ² Cun amah cu nan pawngah a um lomi a si ah siseh, nan hngalhmi a si lo ah siseh, nan inn ah nan kalpi lai i nan unau nih a ra kawl tiang nan sinah a um lai; khi tikah nan rak pek ṭhan lai. ³ Cu bantuk cun a laa zong nan tuah lai; cu bantuk cun a puan zong nan tuah lai; cu bantuk cun nan unau nih a thlaumi thil nan hmuhmi paoh cu nan tuah lai; bawm loin nan um lai lo. ⁴ Nan unau i a laa siseh a cawtum siseh lam pawng i a tlak nan hmuh tikah bawm loin nan um hna lai lo; a chuah kha nan bawmh lai. ⁵ "Nu nih pa thilthuam aa ti awk a si lo, pa zong nih nu thilthuam aa ti awk a si lo; zeitintiah cu bantukin a tuahmi paoh cu Bawipa nan Pathian caah fihnung a si. ⁶ "Thingkung ah siseh, vawlei ah siseh, va bu pakhatkhat nan hmuh i a chungah a fa siseh a ti siseh a um i, a pi nih a fa cu si hna seh, a ti cu si hna seh, a tlumh hna ahcun, a pi cu a fa he nan hlawm chih lai lo; ⁷ a pi cu nan thlah lai, sihmanhsehlaw a fa tu cu nan i hlawm ko lai; nan caah a ṭhat i saupi nan nun nakhnga. ⁸ "Inn thar nan sak tikah nan inncung cu tlakdawn in nan kulh lai, cuka cun mi an tlak sual i nan inn cungah thisen chuah mawhnak cu nan tlunter sual nakhnga lo. ⁹ "Nan mitsur dum chungah thlaici phun hnih nan tuh lai lo, nan tuhmi thlaici theitlai le mitsur dum chungin a chuakmi cu an dihlak in thil zarh an si sual hnga. ¹⁰ Cawtum le laa hmunkhat ah lei nan leh ṭiter hna lai lo. ¹¹ Sahmul le laa cawhmi thil nan i fenhaih lai lo. ¹² "Nan i khuhnak puan cu a tlang pali ah a hmum nan thlaih hna lai. ¹³ "Mipa pakhatkhat nih nupi a ṭhit i a ihpi i a huat ṭhan i, ¹⁴ ’Hi minu hi ka ṭhit i ka ihpi tikah a cungah ngaknu thiang a sinak ka hmu lo,’ tiin a mualphoh i a cungah thangchiatnak a tlunter ahcun, ¹⁵ khi tikah ngaknu a nu le a pa nih ngaknu thiang a si hmelchunhnak cu, cu khua upa hna hmaiah, hauka ah cun, an chuahpi lai; ¹⁶ cun ngaknu pa nih cun upa hna sinah cun, ’Hi pa hi ka fanu cu nupi caah ka pek i a huat ṭhan; ¹⁷ cun zohhmanh u, a mual a phoh i, "Na fanu cungah ngaknu thiang sinak ka hmu lo," tiah a ti. Sihmanhsehlaw mah hihi ka fanu ngaknu thiang a sinak hmelchunhnak hna cu an si ṭung,’ a ti lai. Cun puan cu khua upa hna hmaika ah cun an phah lai. ¹⁸ Khi tikah cu khua upa hna nih cun mipa cu an lak lai i an tuk lai; ¹⁹ cun Israel mi fanu thiang pakhat cungah thangchiatnak a tuah caah ngun shekel za khat dan ah an tat lai i, a pa kha an pek lai; cun amah cu a nupi a si lai, a nun chung vialte a ma lai lo. ²⁰ Sihmanhsehlaw cu thil cu biatak a si i ngaknu cungah cun ngaknu thiang a sinak cu a um lo ahcun, ²¹ ngaknu cu a pa innka ah an kalpi lai i cu khua chung pa hna nih cun thi lakin lung in an cheh lai, a pa inn chungah hlawhhlangnu aa celhnak in Israel mi lakah hruhnak a tuah caah; cuticun nan lakin ṭhat lonak cu nan thianh lai. ²² "Mipa pakhatkhat nih midang nupi a ihpi kha hmuh a si ahcun, an pahnih in, minu a ihpitu cu le minu cu, an thi lai; cuticun Israel chungin ṭhat lonak cu nan thianh lai. ²³ "Hammi ngaknu pakhat cu mipa pakhat nih a khua chungah a ton i a ihpi ahcun, ²⁴ khi khua hauka ah an pahnih in nan chuahpi hna lai i lung in thi lakin nan cheh hna lai, nu cu, khua chungah a um nain bawmhnak hmuh awkah a au lo caah; pa cu, a innpa nupi kha a sual caah; cuticun ṭhat lonak cu nan lakin nan thianh lai. ²⁵ "Sihmanhsehlaw, ramlak ah mipa pakhat nih hammi ngaknu pakhat cu a ton i mipa nih cun a tlaih i a ihpi ahcun, a ihpitu mipa lawng kha a thi lai. ²⁶ Ngaknu cungah cun zeihmanh nan tuah lai lo; ngaknu cungah cun thihnak in dantat awk tlak sualnak a um lo, zeitintiah hi kong cu mipa pakhat nih a innpa kha a tuk i a nawn bantuk a si; ²⁷ zeicahtiah ramlak ah a va pauh caah hammi ngaknu nih bawmhnak duh ah a au nain a chanhtu ahohmanh an um lo. ²⁸ "Mipa pakhatkhat nih ham lomi ngaknu thiang pakhatkhat kha a ton i a tlaih i a ihpi i mi nih an hmuh hna ahcun, ²⁹ a ihpitu pa nih cun ngaknu pa cu ngun shekel sawm nga a pek lai i ngaknu cu mipa nih cun a sual caah a nupi a si lai; a nun chung vialte a ma lai lo. ³⁰ "Ahohmanh nih a pa nupi kha a la lai lo, a pa hni kha a hlimpiak lai lo.

¹ "A tilmu a kekmi siseh, a chiaṭha tan a simi siseh, ahohmanh Bawipa mi hna aa pummi chungah cun an lut lai lo. ² "Lakfa cu Bawipa mi hna aa pummi chungah a lut lai lo; chan hra tiang hmanh in a tefa hna nih Bawipa mi hna aa pummi chungah cun an lut lai lo. ³ "Ammon mi siseh, Moab mi siseh, ahohmanh Bawipa mi hna aa pummi chungah cun an lut lai lo; chan hra tiang hmanh in cu miphun a simi hna cu Bawipa mi hna aa pummi chungah cun zungzal in an lut lai lo; ⁴ zeicahtiah Izipt ram in nan chuah tikah lampi ah changreu le tiin an in dong hna lo i, Mesopotamia ram Pethor in Beor fapa Balaam kha nannih chiatserh awk caah an ruaih. ⁵ Asinain Bawipa nan Pathian nih Balaam cu a bia a ngai lo; Bawipa nan Pathian nih Balaam chiatserhnak cu nan ca i thluachuahnak ah a canter, cucu Bawipa nan Pathian nih an dawt hna caah a si. ⁶ Nan nunchung vialte anmah he i remnak le an rumnak kha zeitikhmanh ah nan kawlpiak hna lai lo. ⁷ "Edom mi cu nan hua hna lai lo, zeitintiah annih cu nan unau an si; Izipt mi cu nan hua hna lai lo, zeitintiah an ram ah mipem nan rak si. ⁸ An tefa hna cu chan thum ri in Bawipa mi hna aa pummi chungah cun an lut kho lai. ⁹ "Nan ral hna kha doh awkah nan kal i nan riah tikah, thil ṭhalo vialte kha nan ulh dih lai. ¹⁰ Nan lakah ahohmanh zan i amah chungin thil a chuakmi ruangah thurhnawm in a um ahcun, riahhmun lengah a chuak lai, riahhmun chungah a rung lut lai lo, ¹¹ sihmanhsehlaw zanlei a rung si tikah ti in aa kholh lai i ni a tlak tikah riahhmun chungah a lut lai. ¹² "Riahhmun lengah hmun pakhat nan ngei lai i cu ka ah cun nan kal tawn lai; ¹³ cun nan thilri sinah fung zum nan ngei lai i, leng i nan ṭhut tikah cu fung cun khor nan cawh lai i nan i mer lai i nan ek cu nan chilh lai. ¹⁴ Bawipa nan Pathian cu nanmah kha khamh awk le nan ral hna kha nan kut chungah pek awkah nan riahhmun chungah aa chawh caah, nan lakah a thurhnawmmi thil zeihmanh a hmuh i an mertak hna nakhnga lo, nan riahhmun cu a thianhlim awk a si. ¹⁵ "A bawipa sinin nan sinah a zammi sal cu a bawipa sinah nan pe ṭhan lai lo; ¹⁶ nan lakah, nan khua pakhatkhat chung i a duh bikmi hmun aa thimmi ahcun, nanmah sinah a um lai; nan hrem lai lo. ¹⁷ "Israel mi fanu hna lakah biaknak hlawhhlang an um awk a si lo; Israel mi fapa hna lak zongah biaknak hlawhhlang an um awk a si lo. ¹⁸ Biakamnak man peknak caah hlawhhlan man siseh, uico si man siseh, Bawipa nan Pathian inn chungah nan ratpi lai lo, zeitintiah hi hna pahnih cu Bawipa caah fihnung a si. ¹⁹ "A miak in nan unau sinah, tangka miak siseh, rawl miak siseh, a miak um dingmi thil cawihmi paohpaoh cu, nan coih lai lo. ²⁰ Ramdangmi tu cu a miak in nan cawih khawh hna lai; co awkah nan va luhhnawhmi ram chung i nan thil tuahmi kip ah Bawipa nan Pathian nih thluachuah an pek hna nakhnga, nan unau hna cu miak um in nan cawih hna lai lo. ²¹ "Bawipa nan Pathian sinah biakamnak nan tuah tikah rau loin nan pek lai, zeitintiah Bawipa nan Pathian nih an hal hrimhrim hna lai i nan caah sualnak a si sual lai. ²² Sihmanhsehlaw biakamnak tuah kha nan i sum ahcun, nan caah sualnak a si lai lo. ²³ Nan kaa in a chuak cangmi cu nan tuah hrimhrim lai, zeitintiah nan kaa in nan i kammi cu Bawipa nan Pathian sinah nanmah lungtho tein nan kammi a si. ²⁴ "Nan innpa mitsur dum chungah nan kal tikah nan duh tawk in mitsur tlai cu nan ei lai, sihmanhsehlaw nan sei chungah cun zeihmanh nan khumh lai lo. ²⁵ Nan innpa rawl dir lio lak i nan kal tikah a vui cu nan sih khawh lai, sihmanhsehlaw a dir liomi rawl nan innpa ta cu faah in nan hlep lai lo.

¹ "Mi nih nupi a lak i a ṭhit tikah, a chungah thil dawh lo zeimaw a hmuh caah a mit a tlin lo i maknak ca a ṭialpiak i, a kut chungah a chiah i, a inn chungin a kalter i a inn chungin a chuah ahcun, ² cun a kal i midang nupi a can i, ³ a va hmannung deuh nih cun a duh lo i, maknak ca a ṭialpiak i a kut chungah a chiah i a inn in a kalter ah siseh, nupi caah a latu a va hmanung deuh kha a thih ah siseh, ⁴ khi tikah a rak kaltertu a va hmasa nih khan, thurhhnawmh a si hnuah, a nupi si awk caah a la ṭhan ti lai lo; zeitintiah mah cucu Bawipa hmaiah fihnung a si i, ro caah Bawipa nan Pathian nih an pekmi hna ram cungah mawhnak nan tlunter lai lo. ⁵ "Nupi a ṭhi kate mi cu ralkapbu he kalter awk a si lai lo, cu rian he aa pehmi zong fial awk a si lai lo. A ṭhitmi a nupi he lunglawm tein um awkah, inn ah kum khat chung a duhduh in nan umter lai. ⁶ "Ahohmanh nih rawlrialnak siseh rawlrialnak a cunglei lung siseh nan i hrenpiak lai lo, zeitintiah mah cucu minung nunnak hrenpiak a si ko. ⁷ "Ahohmanh nih Israel mi chungin a unau pakhatkhat kha a fir i sal bantukin a tuah i a zuar i hngalh a si ahcun, mifirtu cu thah a si lai; cu bangin ṭhat lonak cu nan lakin nan thianh lai. ⁸ "Thinghmui zawtnak kong ah i ralring tuah u, Levi tlangbawi hna nih an in chimhmi hna bangin ṭha tein tuah u; nawl kan pek hna bangin nannih nih ralring tein nan tuah lai. ⁹ Izipt ram in nan chuah tikah khan Bawipa nan Pathian nih lampi ah Miriam cungah zeidah a tuah kha hngal camcin tuah u. ¹⁰ "Na innpa kha zeipaoh na coih tikah biahrennak lak awkah a inn chungah na lut lai lo. ¹¹ A lengah na dir lai i thil na coihmi pa nih khan na sinah biahrennak cu a rak put lai. ¹² Cun misifak a si ahcun a biahrennak thil chungah cun na it lai lo; ¹³ ni a tlak tikah biahrennak thil cu na khirh ṭhan lai, a puan chungah a ih i thluachuahnak an pek nakhnga; mah cucu Bawipa na Pathian hmaiah na caah dinnak a si lai. ¹⁴ "Rianṭuan na fialmi misifak le mirethei cu, na unau chungmi a si ah, na khuachung i a ummi mipem a si ah, na hrem hna lai lo; ¹⁵ ni a tlak hlanah, a ṭuan ni ah cun, a rianṭuan man cu na pek lai (zeitintiah sifak a si i a herh ngaingai ko); cu ti a si lo ahcun Bawipa kha nangmah kongah a auh lai i na cungah sualnak a si sual lai. ¹⁶ "Fale ruangah pale thah an si lai lo i pale ruangah fale zong thah an si lai lo; mah le sual ruang cio ah thah cu an si lai. ¹⁷ "Mipem siseh, pangeilo siseh, a hmuh awk hnga biading cu nan merhpiak lai lo, nuhmei puan zong biahrennak ah nan la lai lo; ¹⁸ sihmanhsehlaw Izipt ram ah sal nan rak si i khika in Bawipa nan Pathian nih an tlanh hna kha nan hngalh camcin lai; cucaah mah hihi tuah awkah nawl kan pek hna. ¹⁹ "Nan lo chung i rawl nan ṭuan tikah, lo chungah cun faphal pakhat nan philh ahcun lak ṭhan awkah va kal hlah u; mipem le pangeilo le nuhmei caah a si lai, nan kut rianṭuanmi kip ah Bawipa nan Pathian nih thluachuahnak an pek hna lai. ²⁰ Nan oliv kung nan huai tik hna ah, a nge kha nan tu ṭhan hna lai lo; mipem le pangeilo le nuhmei caah a si lai. ²¹ Nan mitsur dum chung i mitsur tlai kha nan lawh tikah, a mua nan sua ṭhan lai lo; mipem le pangeilo le nuhmei caah a si lai. ²² Izipt ram ah sal nan rak si kha nan hngalh camcin lai; cucaah mah hihi tuah awkah nawl kan pek hna.

¹ "Mi an i sik i zung ah an chuah i biaceihtu nih an ceih hna i a sual lomi kha an luatter i a sualmi kha sual an pek ahcun, ² cun a sualmipa cu tuk awk tlak a si ahcun, biaceihtu nih cun a bawhter lai i a hmaika ah tuk a si lai, voi zeizat tuk awk ti cu a sualnak rup in a si lai. ³ Voi sawm li tiang tuk khawh a si lai, sihmanhsehlaw cu nak tam cu a si lai lo; hi nak tam deuh in tuk lengmang a si ahcun, nan unau cu nanmah mithmuh ah zohhnawmh tuk a si sual lai. ⁴ "Cawtum cu rawl a cil lioah a hmur nan ṭem lai lo. ⁵ "Unau hna nih hmunkhat ah an um i pakhatkhat cu a thih i fapa a ngeih lo ahcun, a thi mipa nupi cu an chungkhar leng midang he ṭhit umter awk a si lai lo; a va unau nih cun a ihpi lai i a nupi ah a lak lai i vale unau rian a simi kha amah cungah cun a tuah lai. ⁶ Cun a hrinmi fapa hmasa bik cu a thimi a unau min rawlhtu a si lai, a min cu Israel chungin hloh a si nakhnga lo. ⁷ Cun mipa nih cun a unau nupi kha lak a duh lo ahcun, a unau nupi nih khan hauka ah upa hna sinah a hung kal lai i, ’Ka va unau nih amah unau pa min Israel chungah nunter kha a duh lo; vale unau rian kha ka cungah tuah a duh lo,’ tiah a ti lai. ⁸ Cun a khuachung upa hna nih khan an kawh lai i an chimh lai. Asinain, ’Amah cu lak ka duh lo,’ a ti ṭhiamṭhiam ko ahcun, ⁹ a unau nupi nih khan upa hna hmaiah cun a hun kalhnawh lai i, a ke i a kedan kha a phawih lai i a hmaiah a cil a chak lai, cun nu nih cun, ’A unau inn a sa duh lomipa cungah cun hi bantukin si seh,’ tiin a chim lai. ¹⁰ Amah a inn min cu Israel chungah, ’Kedan phawihpiakmi inn,’ tiah ti a si lai. ¹¹ "Cun mi pakhat le pakhat an i vel i pakhatpa nupi nih a va cu a veltu kut chungin chanh awkah a rat i, mipa cu a chiaṭha in a tlaih ahcun, ¹² a kut cu nan tan lai; nan mit nih a zaangfah lai lo. ¹³ "Nan zal chungah khingthlainak phun hnih, a ngan le a hme, nan ngei lai lo. ¹⁴ Nan inn chungah tahnak phun hnih, a ngan le a hme, nan ngei lai lo. ¹⁵ A tling le a dikmi khingthlainak nan ngei lai i, a tling le a dikmi tahnak nan ngei lai, Bawipa nan Pathian nih an pekmi hna ram chungah nan mi hna cu an nun sauter an si nakhnga. ¹⁶ Zeitintiah cu bantuk thil a tuahmi, hlennak a tuahmi vialte hna cu, Bawipa nan Pathian caah fihnung an si. ¹⁷ "Izipt ram in nan chuah tik i lam ah Amalek nih nan cungah a tuahmi kha hngal camcin ko u, ¹⁸ zeitindah, nan tha a bat nan re a theih tikah, lam ah Pathian ṭih loin an tuk hna i nan hnuah aa thlaimi a thah dih hna kha va philh hlah u. ¹⁹ Cucaah nan velchum i a ummi nan ral hna lakin Bawipa nan Pathian nih ro ca i co awkah an pekmi hna ram chungah, Bawipa nan Pathian nih dinhnak an pek hna tikah, vanrang toi in Amalek hngalh camcinnak cu nan hloh awk a si lai; va philh hlah u.

¹ "Bawipa nan Pathian nih ro caah an pekmi hna ram chungah nan luh i nan co i a chungah nan um tikah, ² Bawipa nan Pathian nih an pekmi hna nan ram chungin vawlei theitlai nan hmuh hmasa bikmi rawl chungin tlawmpal nan lak lai i, bawm ah nan rawn lai i, Bawipa nan Pathian nih a min umnak ah a thim laimi hmun ah cun nan kal lai. ³ Cu caan lio i rian a ṭuantu tlangbawi sinah cun nan kal lai i amah sinah, ’Bawipa nih kan pupa hna sinah pek awkin chiat a sermi ram chungah kan lut cang, tiah Bawipa na Pathian sinah nihin ah nangmah cu kan thanh,’ tiah nan ti lai. ⁴ Cun tlangbawi nih cun bawm cu nan kut in a lak lai i Bawipa nan Pathian biakṭheng hmaiah a hun lai. ⁵ "Cun Bawipa nan Pathian hmaiah hi bangin nan chim lai, ’Kan pa cu a vakvaimi Aram mi a rak si. Izipt ah a vung kal i a vung pem, tlawmte lawng an si. Cun khika ah miphun pakhat, a ngan le a ṭhawng le a tammi ah a cang. ⁶ Izipt mi nih an kan hrem, an kan tuk i, rian hrang an kan chonh. ⁷ Khi tikah kannih nih Bawipa kan pupa hna i Pathian kha kan auh i Bawipa nih cun kan aw a theih i kan temhnak le kan rian hrang le an kan hremnak kha a hmuh. ⁸ Cun Bawipa nih a ṭhawngmi kut le samhmi ban in, ṭihnung pipi le hmelchunhnak le khuaruahharnak hna he Izipt ram chungin a kan chuahpi. ⁹ Cun hi hmun ah hin a kan luhpi i hi ram, cawhnuk le khuaihliti in a luangmi hi, a kan pek. ¹⁰ Cun zohhmanh, maw Bawipa, nangmah nih na kan pekmi vawlei theitlai hmasa bik cio kan rak put,’ tiin nan ti lai. Cun Bawipa nan Pathian hmaiah nan hun lai i Bawipa nan Pathian hmaiah nan kun lai i, ¹¹ Bawipa nan Pathian nih nanmah le nan innchungkhar hna cungah a tluntermi ṭhatnak vialte caah, nanmah le Levi mi hna le nan lakah a ummi mipem hna cu nan i lawmh awk a si lai. ¹² "Cun kum thumnak kum, cheu hra cheu khat pek kum a simi kum i nan hmuhmi thil vialte chungin cheu hra cheu khat nan pek dih i, Levi mi hna le mipem hna le pangeilo hna le nuhmei hna nih nan khua chungah an ei i an khim nakhnga, annih kha nan pek hna tikah, ¹³ khi tikah Bawipa nan Pathian hmaiah hi bangin nan chim cio lai, ’Nangmah nih nawl na ka pekmi na nawlbia vialte ningin, ka inn chungin a thiangmi rawl kha ka chuah cang, cuhleiah Levi mi hna le mipem le pangeilo le nuhmei hna kha ka pek cang hna; na nawlbia zeihmanh ka buar in ka philh hna lo; ¹⁴ mithi ka ngaih lioah cheu hra cheu khat kha zeihmanh ka ei lo i, ka thianlo lioah a zeihmanh kha ka ṭhial lo i, mithi sinah a zeihmanh kha ka pechan lo; Bawipa ka Pathian aw kha ka ngaih i nangmah nih nawl na ka pekmi vialte ningin ka tuah cang. ¹⁵ Na umnak hmun thiang vancung khin run zoh law, kan pupa hna sinah chiat na ser bangin, na mi Israel le na kan pekmi ram, cawhnuk le khuaihliti in a luangmi ram hi, thluachuahnak pe ko,’ tiin nan ti lai. ¹⁶ "Nihin ah hin Bawipa nan Pathian nih hi nawlbia hna le phunglam hna hi tuah awkah nawl an pek hna; cu caah nan lungthin vialte le nan ruahnak vialte in ṭha tein nan tuah hna lai. ¹⁷ Bawipa kongah nihin ah amah cu kan Pathian a si i, amah lam kha kan zulh i, a phungbia le a nawlbia le a phunglam hna kha kan ulh lai i, a aw kha kan ngaih lai, tiah nan ti cang. ¹⁸ Cun Bawipa nih nihin ah nannih kongah hi bangin a thanh cang: ’Bia kan kam cang hna bantukin nannih cu keimah ca hrimhrim i miphun nan si, cun ka nawlbia vialte kha nan ulh awk a si, ¹⁹ cun ka sermi miphun vialte hna cungah thangṭhatnak le minthannak le upatnak ah kan chiah hna lai i, ka chim cang bangin nannih cu Bawipa nan Pathian caah a thiangmi miphun nan si lai,’ a ti," tiah a ti.

¹ Cun Moses le Israel upa hna nih cun mizapi cu nawl an pek hna i, "Nihin ah kan pekmi hna nawlbia hi a ningpi in nan ulh lai. ² Cun Bawipa nih an pekmi hna ram i va luh awkah Jordan tiva nan tan ni ah, lung ngan pipi kha nan phun hna lai i lung senghnak nan nalh hna lai; ³ cun Bawipa nan pupa hna Pathian nih an kam hna bangin, Bawipa nan Pathian nih an pekmi hna ram, cawhnuk le khuaihliti in a luangmi ram i luh awkah nannih nih nan tan tikah, an cungah hi phungbia vialte kha nan ṭial hna lai. ⁴ Cun Jordan nan tan dih tikah nihin ah an kong i nawl kan pekmi hna lung hna cu Ebal Tlang ah nan phun hna lai i lung senghnak in nan nalh hna lai. ⁵ Cun khika ah Bawipa nan Pathian caah biakṭheng, lung biakṭheng pakhat nan ser lai; thir hriamnam zeihmanh nan hmang lai lo. ⁶ Bawipa nan Pathian caah remh lomi lung in biakṭheng pakhat nan ser lai i a cungah Bawipa nan Pathian sinah khangh thawinak nan pekchanh lai; ⁷ daihnak thawinak cu nan pekchanh lai i khika ah nan ei lai; cun Bawipa nan Pathian hmaiah nan i lawm lai. ⁸ Cun cu lung hna cungah cun hi nawlbia cu tliang tein nan ṭial lai," tiah an ti. ⁹ Cun Moses le Levi tlangbawi hna nih khan Israel mi vialte sinah cun, "Maw Israel, dai tein um law, ngai tuah: nihin ni ah hin Bawipa nan Pathian mi nan si cang. ¹⁰ Cucaah Bawipa nan Pathian aw cu nan ngaih lai i nihin ah kan pekmi hna a phungbia hna le a nawlbia hna cu nan ulh hna lai," tiah an ti. ¹¹ Cun khi ni ah Moses nih mi hna cu nawl a pek hna i hi bangin a ti, ¹² "Jordan tiva nan tan dih tikah, mi kha thluachuah pek hna awkah hi hna hi Gerizim Tlang ah an dir lai: Simeon, Levi, Judah, Issakhar, Josef, le Benjamin. ¹³ Cun chiatserhnak caah hi hna hi Ebal Tlang ah an dir lai: Reuben, Gad, Asher, Zebulun, Dan le Naftali. ¹⁴ Cun Levi mi hna nih Israel mi pa vialte sinah aw thang piin: ¹⁵ " ’Zungthiammi kut in sermi thil, Bawipa caah fihnung a simi suaimi siasal siseh, thletmi siasal siseh, a ser i a thli tein aa chiahmi cu chiat seh,’ tiah an thanh lai. Cun mi vialte nih ’Amen’ tiin an leh hna lai. ¹⁶ " ’A pa siseh a nu siseh a upat lomi cu chiat seh,’ tiah an thanh lai. Cun mi vialte nih, ’Amen’ an ti lai. ¹⁷ " ’A innpa ramri a ṭhialmi cu chiat seh,’ tiah an thanh lai. Cun mi vialte nih, ’Amen’ an ti lai. ¹⁸ " ’Mitcaw kha a lam a palhter hrammi cu chiat seh,’ tiah an thanh lai. Cun mi vialte nih, ’Amen’ an ti lai. ¹⁹ " ’Mipem le pangeilo le nuhmei nih an hmuh awk hnga a simi biading a merhtu cu chiat seh,’ tiah an thanh lai. Cun mi vialte nih, ’Amen’ an ti lai. ²⁰ " ’A pa nupi kha a ihpimi cu chiat seh, zeitintiah a pa hni a hlim a si,’ tiah an thanh lai. Cun mi vialte nih, ’Amen’ an ti lai. ²¹ " ’Saram zei bantuk hmanh a ihpimi cu chiat seh,’ tiah an thanh lai. Cun mi vialte nih, ’Amen’ an ti lai. ²² " ’A far, a pa fanu siseh a nu fanu siseh, a ihpimi cu chiat seh,’ tiah an thanh lai. Cun mi vialte nih, ’Amen’ an ti lai. ²³ " ’A nupi nu a ihpimi cu chiat seh,’ tiah an thanh lai. Cun mi vialte nih ’Amen’ an ti lai. ²⁴ " ’A innpa a thli tein a thatmi cu chiat seh,’ tiah an thanh lai. Cun mi vialte nih, ’Amen’ an ti lai. ²⁵ " ’A sual lomi thah awkah ziknawh a lami cu chiat seh,’ tiah an thanh lai. Cun mi vialte nih, ’Amen’ an ti lai. ²⁶ " ’Hi phungbia a dirpi lo i a zul lomi cu chiat seh,’ tiah an thanh lai. Cun mi vialte nih, ’Amen’ an ti lai.

¹ "Bawipa nan Pathian aw kha nan ngaih i nihin ah kan pekmi hna nawlbia vialte cu ṭha tein nan tuah ahcun, vawleicung miphun vialte hna cungpi ah khin Bawipa nan Pathian nih an chiah hna lai. ² Cun Bawipa nan Pathian aw kha nan ngaih ahcun hi thluachuahnak vialte hi nan cung a phan lai i an zulh hna lai. ³ Khua chungah thluachuah nan hmu lai i lo chungah thluachuah nan hmu lai. ⁴ Nan pum theitlai le nan vawlei theitlai, nan saṭil theitlai, nan caw karhnak le nan tuu punzamnak cu thluachuah pek a si lai. ⁵ Nan bawm le nan changreu nennak kheng hna cu thluachuah pek an si lai. ⁶ Nan luh leiah thluachuah nan hmu lai, nan chuah leiah thluachuah nan hmu lai. ⁷ "Nanmah an dotu hna nan ral hna cu Bawipa nih nan hmaiah a sunghter hna lai; nanmah doh awkah lam pakhat in an ra lai i nan hmaiah lam pasarih in an zam lai. ⁸ Nan buk nan han le rian nan ṭuanmi kip ah Bawipa nih thluachuahnak kha nan caah nawl a pek lai i, Bawipa nan Pathian nih an pekmi hna ram chungah cun thluachuahnak an pek hna lai. ⁹ Bawipa nan Pathian nawlbia hna kha nan ulh i a lam ah nan kal ahcun, nan sinah chiat a ser cang bangin, Bawipa nih nannih cu amah ca i miphun thiang ah an fehter hna lai. ¹⁰ Cun vawleicung mi vialte nih Bawipa min in kawh nan si kha an hngalh lai i, an in ṭih hna lai. ¹¹ Bawipa nih nanmah pek awkah nan pupa hna sinah chiat a rak sermi ram chungah khan Bawipa nih nan pum theitlai le nan saṭil theitlai le nan vawlei theitlai ah tam piin an rumter hna lai. ¹² Nan ram ruah cu amah caan te ah surter awk le nan kut rianṭuanmi cu thluachuah pek awkah, Bawipa nih a ro khonnak hmun ṭha, van hna cu, an hunpiak hna lai. Miphun tampi cu nan coih hna lai, sihmanhsehlaw ahohmanh nan cawi hna lai lo. ¹³ - ¹⁴ Khuazing dang biak awkah orhlei ah siseh, kehlei ah siseh nihin ah kan pekmi hna nawlbia in nan pial lo ahcun, Bawipa nih nannih cu mei ah si loin, lu ah an ser hna lai; a zik ah nan um zungzal lai i a hram ah nan um bal lai lo, — nihin ah kan pekmi hna Bawipa nan Pathian nawlbia kha nan ngaih i fel tein nan ulh ni ahcun, cuticun nan si lai. ¹⁵ "Sihmanhsehlaw nihin ah kan pekmi hna phungbia le nawlbia vialte kha fel tein ulh awkah Bawipa nan Pathian bia cu zeirello in nan um ahcun hi chiatnak vialte hi nan cungah a tlung lai i an zulh hna lai. ¹⁶ Khua chungah chiat nan tong lai, lo chungah chiat nan tong lai. ¹⁷ Nan bawm le nan chang nennak kheng hna cu chiat an tong lai. ¹⁸ Nan pum theitlai le nan vawlei theitlai le nan saṭil karhnak le nan tuurun fano hna cu chiat an tong lai. ¹⁹ Nan luh leiah chiat nan tong lai, nan chuah leiah chiat nan tong lai. ²⁰ "Nan ka hlawt caah, cu ṭhat lonak nan tuahmi ruangah, nan rawk i khulrang in nan loh hlantiang, zeizong nan tuahmi kip ah khan Bawipa nih nan cungah chiatnak le hnahnawhnak le hnabeidonghnak a tlunter lai. ²¹ Co awkah nan luhhnawhmi ram in an thianh hna hlantiang, Bawipa nih rai kha nannih sinah a behter lai. ²² Bawipa nih ngornak, taklinhnak, phinnak le niritnak, rocarnak, thutnak le buarnak in an hrem hna lai; nan rawk hlantiang an in dawi hna lai. ²³ Cun nan lu cung van hna khi dar an si lai i, nan tanglei vawlei hi thir a si lai. ²⁴ Nan loh dih hlantiang Bawipa nih nan ram ruah cu leidip ah a canter lai i van in nan cungah thetse a sur lai. ²⁵ "Bawipa nih nannih cu nan ral hna hmaiah khan an sunghter hna lai; annih doh awkah lam pakhat in nan kal lai i an hmai in lam pasarih in nan zam lai; vawleicung pennak vialte hna mithmuh ah tuksapur nan si lai. ²⁶ Cun nan ruak hna cu van i a zuangmi va vialte le vawlei i a ummi saram hna caah rawl an si lai i, a ṭhawltu ahohmanh an um lai lo. ²⁷ Bawipa nih Izipt ram khuaihli le tawlhmat le cuarhmat le thakpherh in an hrem hna lai i damh khawh nan si lai lo. ²⁸ Bawipa nih hruhnak le mitcawtnak le molhnak in an hrem hna lai i, ²⁹ mitcaw nih mui lakah aa dah lengmang bantukin chun lai ah nan i dap lai i, nan lam ah khua awng nan pem lai lo. Hrem le ramh lawnglawng nan si thluangthluan ko lai i an bawmtu hna ahohmanh an um lai lo. ³⁰ Nupi nan ham lai i midang nih an ihpi lai; inn nan sak lai i nan umnak lai lo; mitsur dum nan ser lai i a theitlai cu nan ei lai lo. ³¹ Nan cawtum cu nan mithmuh ah an thah lai i a sa cu nan ei lai lo; nan hmaika ah nan laa cu hramhram in an lak lai i an in khirh ṭhan ti hna lai lo; nan tuu hna cu nan ral kha pek an si lai i, ahohmanh an bawmtu hna an um lai lo. ³² Nan fapa hna le nan fanu hna cu miphun dang kha pek an si lai; chun nitlak in anmah ngaih ah nan mit hram fak in khua nan cuan lai, sihmanhsehlaw zeihmanh nan tuah kho ṭung lai lo. ³³ Nan hngalh lomi miphun nih nan vawlei le nan rianṭuanmi theitlai cu an ei dih lai i, nannih cu hrem le lamhchih lawng nan si lai; ³⁴ cucaah nan mit nih a hmuhmi thil nih cun an molhter phah hna lai. ³⁵ Bawipa nih nan khuk le nan ke ah a fakmi khuaihli an tlunhter hna lai i damh khawh nan si lai lo, nan kechik in nan luthlung tiang an tuah hna lai. ³⁶ "Nanmah nih siseh nan pupa hna nih siseh nan hngalh bal lomi miphun sinah, nanmah le nan cungah nan chiahmi nan siangpahrang cu Bawipa nih ah kalpi hna lai i, khika ah thing le lung in sermi khuazing dang kha nan biak hna lai. ³⁷ Cun Bawipa nih an hruai hna lainak mi hna lakah cun nannih cu tuksapur le phungthlukbia le nihchuak capo men ah nan cang lai. ³⁸ Khaubawk nih an ei dih lai caah, lo chungah thlaici tampi nan hei i phorh lai nain tlawmte lawng nan zun lai. ³⁹ Mitsur dum nan ser lai i nan zohkhenh hna lai, sihmanhsehlaw a mitsur hang kha nan ding lai lo i a thei zong nan lo lai lo, zeitintiah rungrul nih a ei dih hna lai. ⁴⁰ Nan ram chung dihlak ah oliv kung nan ngei lai, sihmanhsehlaw nan oliv thei cu an ṭilh lai caah oliv chiti nan i thuh lai lo. ⁴¹ Fapa hna le fanu hna cu nan hrin hna lai, sihmanhsehlaw nanmah ta an si lai lo, zeitintiah sal ah an hruai hna lai. ⁴² Thingkung vialte le nan vawlei theitlai cu khaubawk ta an si lai. ⁴³ Nan lak i a ummi mipem nih an in sankanh chinchin hna lai i nannih cu nan niam chin lengmang lai. ⁴⁴ An in coih hna lai i nannih tu nih cun nan coih hna lai lo; lu an si lai i nannih cu mei nan si lai. ⁴⁵ A phungbia hna le a nawlbia hna an pekmi hna kha ulh awkah Bawipa nan Pathian aw cu nan ngaih lo caah, nan rawk dih hlantiang hi chiatnak vialte cu nan cungah an tlung lai i, an in zulh hna lai i an in phanh hna lai. ⁴⁶ Nanmah le nan tefa hna cungah zungzal in hmelchunhnak le khuaruahharnak caah an um lai. ⁴⁷ "Zeizong vialte nan ngeih tengtung zong i Bawipa nan Pathian cu lunglawmhnak le thanuamhnak he a rian nan ṭuan lo caah, ⁴⁸ cucaah Bawipa nih an thlahhnawhmi hna nan ral hna cu rawlṭam tihal, puan lo le zeizong vialte herhbau cukmak in nan rianh hna lai i, an hrawh hna hlantiang thir hngawngkual nan hngawng ah an banh hna lai. ⁴⁹ Bawipa nih lamhlat piin, vanhramdeng in, mupi a zuan bantuk i a khul a rangmi, an holh nan theih lomi, ⁵⁰ tar zei ah a rel lo i no zong a duh hlei lomi, zaangfahnak ngei lomi miphun cu nan cungah a tlunter lai. ⁵¹ Nan rawk dih hlantiang nan saṭil tefa le nan vawlei theitlai cu an ei lai; an in hloh dih hna hlantiang in, rawl siseh, mitsur hang siseh, chiti siseh, nan saṭil karhnak siseh, nan tuurun fano hna siseh an in nganh hna lai lo. ⁵² Nan ram chung dihlak i nan i bochanmi a sang le a fekmi ralhau an chimh dih tiangin, nan khua kip ah an in hren hna lai; Bawipa nan Pathian nih an pekmi hna nan ram chung dihlak ah nan khua kip ah an in hren hna lai. ⁵³ Nan ral hna nih vansang au in an in hren hna lai caah, Bawipa nan Pathian nih an pekmi hna nanmah pum chung chuakmi hrimhrim, nan fanu hna le nan fapa hna sa cu nan ei lai. ⁵⁴ Nanmah lak i mi nunnem bik le mitluangtlam bik zong nih a unau kha siseh, a dawtmi a nupi siseh, a tang rihmi a fale hna si hna seh, rawl kha a sianh hna lai lo; ⁵⁵ nan ral hna nih nan khua kip ah vansang au in an in hren hna lai caah, a ei liomi a fale sa kha ahohmanh kha a pe hna lai lo, zeicahtiah a caah zeihmanh a taangmi a um ti lo. ⁵⁶ Nan lak i a no bik le a nem bik, a no tuk ca le a nem tuk ca i a keza vawlei a tawng bal lomi nu, hmanh nih a pommi a va le a fapa le a fanu hna kha, rawl a sianh hna lai lo. ⁵⁷ Ral nih an khua kha an hren tikah ei awk zeihmanh a um lai lo caah a hrintharmi a fano le a phei le a phei kar in a chuakmi a hlam hmanh kha a thli tein a ei hna lai. ⁵⁸ "Hi a lianngan i ṭihnung a simi min, Bawipanan Pathian, hi nan ṭih nakhnga ca i hi cauk chungah ṭial a simi phungbia vialte hi ṭha tein nan zulh ṭung lo ahcun, ⁵⁹ Bawipa nih nanmah le nan tefa hna cungah khuaruahhar a simi temhinnak, a fakmi le saupi a ummi temhinnak le a fakmi le saupi a ummi zawtnak hna cu nan cungah a tlunter lai. ⁶⁰ Cun nan rak ṭihmi Izipt ram zawtnak vialte kha nan cungah a tlunter ṭhan lai i nanmah ah an i beh lai. ⁶¹ Nan rawk dih hlantiang, hi phungbia cauk chungah aa ṭial lomi zawtnak phun kip le temhinnak phun kip zong Bawipa nih nan cungah a tlunter hna lai. ⁶² Bawipa nan Pathian aw kha nan ngaih lo caah, van i arfi zat a rak si tawnmi kha tlawmte lawng nan tang lai. ⁶³ Cun Bawipa nih nan ca i ṭhatnak tuah le nanmah karhter kha a rak duh tawn bangin, nanmah cung i rawknak tlunter le nanmah hrawh ah Bawipa cu aa lawm lai i; co awkah nan va luhhnawhmi ram chungin phawi nan si lai. ⁶⁴ Cun khattelei vanhramdeng in khattelei vanhramdeng tiang Bawipa nih miphun kip sinah an ṭhek hna lai i, nanmah nih siseh nan pupa hna nih siseh nan hngalh lomi pathian, thing le lung in an sermi hna kha, khika ah nan biak hna lai. ⁶⁵ Cun hi miphun hna lakah hin daihnak nan hmu lai lo, nan keza ca zongah dinh ti a um lai lo, sihmanhsehlaw khika ah Bawipa nih lung retheihnak le mit hram dernak le hnabei donghnak an pek hna lai. ⁶⁶ Thih nun hril loin nan um lai; chunzan in therphang in nan um lai i, nan nunnak caah hnangam ti a um lai lo. ⁶⁷ Nan lung nih a ṭih laimi ṭihnung le nan mit nih a hmuh laimi thil hna ruangah cun zinglei ah, ’Zanlei hei si seh law dah!’ nan ti lai i zanlei ah, ’Zinglei hei si seh law dah!’ nan ti lai. ⁶⁸ Nan kal bal ti lai lo tiah bia kan kam cangmi hna lam ah khan Bawipa nih Izipt ah lawng in an kalpi ṭhan hna lai i khika ah nan ral hna sinah salpa le salnu caah nan i zuar lai, sihmanhsehlaw ahohmanh nih an in caw hna lai lo,’ tiah a ti hna.

¹ Horeb tlang i annih he biakamnak a rak tuahmi hleiah khan, Moab ram chungah Bawipa nih Israel mi hna sinah Moses cu biakamnak a sertermi chung i bia hna cu mah hi an si. ² Cun Moses nih Israel mi vialte cu a kawh hna i annih cu, "Izipt ram chungah, nan hmaika ah Faro cung le a sal hna cung le a ram dihlak cungah Bawipa nih a tuahmi thil vialte kha nan hmuh cang; ³ cu hna cu nan mit nih an hmuhmi hneksaknak ngan pipi hna le hmelchunhnak hna le khuaruahhar ngan pipi hna an si. ⁴ Sihmanhsehlaw nihin ni tiangin hngalhthiamnak lungthin siseh, hmuhnak mit siseh, theihnak hna siseh Bawipa nih an pe hna lo. ⁵ Ramlak ah kum sawm li chung kan hruai hna i, nan keng cung puan siseh nan ke cung kedan siseh an ṭet lo, ⁶ keimah cu Bawipa nan Pathian ka si kha nan ka hngalh naklai changreu kha nan ei lo i mitsur hang le mitsur zu zong nan ding lo. ⁷ Cun hika hmun nan phak tikah Heshbon siangpahrang Sihon le Bashan siangpahrang Og nih doh awkah an kan chuahhnawh, sihmanhsehlaw kan tei hna. ⁸ An ram kha kan lak i ro caah Reuben phun le Gad phun le Manasseh phun cheu kha kan pek hna. ⁹ Cucaah nan tuahmi kip ah khuaawng nan pemh nakhnga, hi biakamnak bia hna hi ṭha tein tuah hna u. ¹⁰ Nihin ah nannih cu nan dihlak in, nan phun lu cio hna le nan upa hna le nan bawi hna le Israel mi pa vialte hna le ¹¹ nan ngakchia hna le nan nupi hna le nan riahbuk chungah a ummi mipem hna nan thinghlamtu hna le nan tithantu hna tiangin, Bawipa nan Pathian hmaiah an dir. ¹² Cu nan dir cu, Bawipa nan Pathian nih, nihin ah chiatser i a tuahmi biakamnak Bawipa nan Pathian biakamnak chungah nan luh nakhnga caah a si. ¹³ Cun nan pupa Abraham le Isak le Jakob sinah bia a rak kam bangin, nihin ah nannih cu amah mi ah fehter i amah cu nan Pathian si awkah a hmai i an pumhter hna cu a si. ¹⁴ Hi chiatser in biakamnak ka tuahmi cu, kanmah he nihin ah Bawipa kan Pathian hmaiah a dirmi hna he lawng hin ka ser a si lo, ¹⁵ Nihin ah kan sin i a um lomi hna he zong ka ser a si. ¹⁶ "Izipt ram ah zeitindah kan rak um le, zeitindah miphun dangdang kan tan pah hna kha nan hngalh; ¹⁷ cun an thil fihnung a simi, thing le lung le sui le ngun in sermi an siasal hna anmah lak i a ummi cu nan hmuh cang hna. ¹⁸ Nannih lakah mipa siseh, minu siseh, innchungkhar siseh, miphun siseh, Bawipa kan Pathian sinin nihin ah a lung a mer i khi miphun hna pathian hna biak awkah a kal i nannih lakah sivai ngei le a khami thei a tlaimi hram nan um sual nakhnga lo, i ralring tuah u. ¹⁹ Cu bantuk a simi pa nih hi chiatser biakamnak bia kha a theih tikah a lung chungin, ’Ka lung khonnak hi zul ko hmanh ning law ka him ko lai,’ tiin amah le amah cu thluachuah aa pechom ko hnga. Mah cu nih cun a cin a hnawng le a ro a car an dihlak in rawknak a phakter hna lai. ²⁰ Bawipa nih a ngaithiam lai lo, sihmanhsehlaw Bawipa thinhunnak le nahchuahnak nih cu pa cu a khut lai i hi cauk chungah aa ṭialmi chiat vialte hi a cungah an tla lai i, Bawipa nih a min cu vanrang toi in a hloh lai. ²¹ Cun hi phungbia cauk chung i aa ṭialmi biakam chiatsernak vialte ningin Bawipa nih amah cu Israel miphun vialte chungin chiatnak pek awkah a vun thur lai. ²² Cun a ra dingmi chan, nan hnuah a chuak laimi nan fale le ram hla piin a ra laimi ramdang mi hna nih, hi ram hremnak le Bawipa nih a pekmi zawtnak kha an hmuh tikah — ²³ cu hremnak cu, ram cu a dihlak in kat le cite, thi lakin khanghmi, zeihmanh tuh lo, zeihmanh corh lo, ram zeihmanh khoh khawh lonak a si, a thinhunnak le a thinlinhnak in Bawipa nih a hrawhmi Sodom le Gomorrah le Admah le Zeboiim rawknak bantuk a si — ²⁴ miphun vialte nih, ’Zeicaahdah Bawipa nih hi ram cungah hi bangin a tuah? Hi thinhunnak a linhnak hi zei sullam dah a si?’ an ti lai. ²⁵ Khi tikah mi nih, ’Bawipa an pupa hna Pathian i biakamnak, Izipt ram chungin a chuahpi hna tikah anmah he a sermi cu an hlawt i ²⁶ an hngalh lomi le a pek hna lomi pathian kha an rian an ṭuan hna i an biak hna caah a si. ²⁷ Cucaah hi ram cungah Bawipa thinhunnak cu a alh i hi cauk chung i aa ṭialmi chiat vialte cu an cungah a tlung. ²⁸ Cun Bawipa nih a thinhunnak, a thinphawhnak le a thinlinhnak in an ram in a phawi hna i nihin ah a si bang hin ram dang ah a hlonh hna,’ an ti lai. ²⁹ "Aa thupmi thil hna cu Bawipa kan Pathian ta an si; sihmanhsehlaw hi phungbia vialte hi kan tuah khawh nakhnga, phuanmi thil hna cu kanmah le kan fale hna ta zungzal in an si.

¹ "Cun mah thil vialte, thluachuahnak le chiatnak hna, nan hmaiah ka chiahmi hna hi nan cungah a tlun i, Bawipa nan Pathian nih an dawi hnanak miphun vialte hna lakah cucu nan hun hngalh ṭhan hna i, ² Bawipa nan Pathian sinah nanmah he nan fale hna he nan kir ṭhan i nihin ah kan pekmi hna vialte chungah nan lung dihlak le nan ruahnak dihlak in a aw nan ngaih tikah, ³ khi tikah Bawipa nan Pathian nih khan nan van kha an pek ṭhan hna lai i nan cungah zaangfahnak a ngei lai i Bawipa nan Pathian nih an ṭheknak hna mi vialte sin khan an pumh ṭhan hna lai. ⁴ Nan lakin chuahmi hna kha vanhramdeng bik i an um hmanh ah, khika khin Bawipa nan Pathian nih an pumh hna lai i khika khin an ratpi hna lai. ⁵ Nannih nih nan co nakhnga, Bawipa nan Pathian nih nan pupa hna i an rak comi ram chungah khan an luhpi hna lai i nan pupa hna nakin rum deuh le tam deuh ah an ser hna lai. ⁶ Bawipa nan Pathian cu nan lung dihlak le nan ruahnak dihlak in nan dawt i nan nun nakhnga, Bawipa nan Pathian nih nanmah lung le nan tefa hna lung cuarpar cu an tan hna lai. ⁷ Cun Bawipa nan Pathian nih hi chiatnak vialte cu nanmah an hremtu hna nanmah dohtu hna le nan ral hna cungah a tlunter lai. ⁸ Cun Bawipa aw kha nan ngaih ṭhan lai i nihin ah kan pekmi hna a nawlbia vialte cu nan ulh hna lai. ⁹ Bawipa nih nan pupa hna kha a rak lawmh hna bangin, nannih rumter awk kha a duh ṭhan lai caah, Bawipa nan Pathian nih nan kut rian vialte le, nan pum theitlai le, nan saṭil karhnak le nan vawlei theitlai ah tam piin an rumter hna lai; ¹⁰ hi nawlbia cauk chungah aa ṭialmi a phungbia le a nawlbia hna kha ulh awkah nannih nih Bawipa nan Pathian aw kha nan ngaih i Bawipa nan Pathian lei ah nan lung dihlak le nan ruahnak dihlak in nan i mer paohpaoh ahcun, an rumter hna lai. ¹¹ "Zeitintiah nihin ah kan pekmi hna nawlbia hi nan caah a har tukmi le nan phak leng a si lo. ¹² ’Kannih nih kan theih i kan tuah khawh nakhnga, ahodah kan caah van ah khin a hung kai lai i kan sinah a run ṭumpi lai,’ tiah nan ti awkin van ah khin a um lo. ¹³ ’Kannih nih kan theih i kan tuah khawh nakhnga, ahodah kan caah rili lengah a kal in kan sinah a ratpi lai,’ tiah nan ti awkin rili lengah khin a um fawn lo. ¹⁴ Sihmanhsehlaw bia cu nan pawngte ah a um ko; nan kaa chung le nan lung chungah a um, cucaah nan tuah khawh ko. ¹⁵ "Zohhmanh, nihin ah nannih hmaiah nunnak le ṭhatnak, thihnak le vanchiatnak kha ka chiah. ¹⁶ Nihin ah kan pekmi hna Bawipa nan Pathian i a nawlbia cu, Bawipa nan Pathian kha dawtnak in le a lam zulhnak in le a nawlbia le a phungbia le a phunglam hna kha zulhnak in nan ngaih ahcun, nan nung lai i nan karh lai, cun co awkah nan luhhnawhmi ram ah nan luh tikah Bawipa nan Pathian nih cu ram ah cun thluachuahnak an pek hna lai. ¹⁷ Sihmanhsehlaw nan lung aa mer i nan theih duh lo i pathian dang hna kha biak awk le an rianṭuan awkah an in hruai khawh hna ahcun, ¹⁸ nannih cu nan rawk lai; luhhnawh awk le co awk caah Jordan tiva nan tanhnawhmi ram chungah sau nan nung lai lo, tiah nihin ah kan thanh hna. ¹⁹ Nannih hmaiah nunnak le thihnak, thluachuahnak le chiatserhnak ka chiah kha a hngaltu ah nihin ah van le vawlei kha ka kawh hna. Cucaah nunnak kha i thim tuah u, nanmah le nan tefa hna nih nan nun nakhnga — ²⁰ Bawipa nan Pathian kha daw u law, a aw kha ngai u law, amah leiah i bek tuah u, zeitintiah mah cucu nannih caah nunnak le nunsau a si, Bawipa nih nan pupa Abraham, Isak le Jakob sinah pek awkin chiat a sermi ram chungah khan nan um nakhnga, nunnak kha i thim deuh u," tiah a ti.

¹ Cucaah hi bia cu Moses nih Israel mi vialte kha a va chimh hna. ² Cun amah nih annih sinah, "Atu cu kum za le kum kul ka si cang; ka chuak kho in ka lut kho ti lo. Bawipa nih ka sinah, ’Hi Jordan tiva hi na tan lai lo,’ tiah a ka ti cang. ³ Bawipa nan Pathian cu amah hrimhrim nan hmaiah a kal lai; hi miphun hna cu nan hmaiah a hrawh hna lai, cucaah nan pawnchuah hna lai; Joshua nih hmai an sak hna lai, Bawipa nih a chim bang khan. ⁴ Cun Bawipa nih Amor mi siangpahrang Sihon le Og a hrawh hna tikah an ram cungah a tuah bang khan an cungah a tuah ve lai. ⁵ Bawipa nih annih cu an pek hna lai i, kan pekmi hna nawlbia vialte bantuk khan an cungah nan tuah lai. ⁶ Ṭhawng u law, nan ral ṭha ko u, ṭih hlah u, an hmaiah therphang hlah u; zeicahtiah nanmah he a kalmi cu Bawipa nan Pathian a si; an deuh hna lai lo i an hlaw fawn hna lai lo," a ti. ⁷ Cun Moses nih Joshua cu a kawh i Israel mi vialte hna hmaiah a sinah, "Ṭhawng law, ralṭha in um tuah, zeitintiah Bawipa nih annih kha pek awkin an pupa hna sinah chiat a rak sermi ram chungah khan, hi mi hna he hin na kal lai i, annih cu na coter hna lai. ⁸ Na hmaiah a kalmi cu Bawipa a si; na sinah a um lai i an deuh lai lo i an hlaw fawn lai lo; ṭih hlah, na lung zong dong hlah," tiah a ti. ⁹ Cun Moses nih hi phungbia cu a ṭial i Bawipa biakamnak kuang a putu Levi fapa tlangbawi hna sin le Israel mi upa vialte hna sinah a pek. ¹⁰ Cun Moses nih annih cu, "Kum sarih kum, ngaihthiamnak kum kip chung i caan chiahmi, deu puai ah, ¹¹ Bawipa nan Pathian nih a thim laimi hmun ah Israel mi vialte nih a hmai i chuah awkah an rat tikah, hi phungbia cu Israel mi vialte hmaiah an theih ah nan rel lai. ¹² Mizapi cu, pa, nu, ngakchia le nan khua chung khual hna cu, annih nih an theih i Bawipa nan Pathian ṭih kha an thiam i hi phungbia chung bia vialte kha ṭha tein an tuah nakhnga le, ¹³ hi a hngal rih lomi nan fale zong nih, va co awkah Jordan tiva nan tanhnawhmi ram chungah nan um chung paohpaoh, Bawipa nan Pathian ṭih kha an thiam nakhnga, pum hna u," tiah nawl a pek hna. ¹⁴ Cun Bawipa nih Moses sinah, "Zohhmanh, na thihnak caan a nai cang; Joshua kha ko law tonnak thlam chungah ratpi tuah, amah cu rian ka pek nakhnga," tiah a ti. Cun Moses le Joshua cu an kal i tonnak thlam chungah cun an va lut. ¹⁵ Cun thlam chungah cun Bawipa cu minmei tung in a lang i minmei tung cu thlam ka ah cun a dir. ¹⁶ Cun Bawipa nih Moses sinah, "Zohhmanh, na pupa hna sinah na it dengmang cang; khi tikah hi mi hna hi an tho lai i, an va umnak dingmi hna lakah cun cu ram pathian hna sinah cun hlawh an hlang lai i, an ka hlawt lai i, anmah he ka biakamnak ka sermi kha an buar lai. ¹⁷ Cun ka thinhunnak cu khi ni ah an cungah a alh lai i ka hlawt hna lai i ka hmai ka thuhkanh hna lai i, an lotlau dih lai i; ṭhat lonak le harnak tampi nih a tlunh hna lai i cucaah annih nih khi ni ah, ’Hi ṭhat lonak kan cungah an tlun hi, kan Pathian kan sinah a um lo caah a si lo maw?’ tiah an ti lai. ¹⁸ Ṭhat lonak an tuahmi vialte ruangah, pathian dang hna leiah an i mer caah, khi ni ah ka hmai cu ka thuh hrimhrim lai. ¹⁹ Cucaah hi hla hi ṭial law, Israel mi kha cawnpiak hna; hi hla cu Israel mi hna kongah keimah ka biahngaltu a si nakhnga, an kaa chungah chia tuah. ²⁰ Zeitintiah an pupa hna sinah pek awkin chiat ka sermi ram, cawhnuk le khuaihliti in a luangmi chungah ka luhpi hna i, khika ah annih nih an ei i an khim i an thau tikah, pathian dang leiah an i mer lai i an biak hna lai i an ka sersat lai i ka biakamnak kha an buar lai. ²¹ Cun ṭhat lonak le harnak tampi an cungah a tlun tikah, hi hla nih hin hmaitonh in a chimtu hna biahngaltu a si lai zeitintiah an tefa hna kaa chungah khan philh lo awkin a nung lai. Pek awkah chiat ka sermi ram chungah ka luhpi hna hlan hmanh ah khan, an tumtahmi cu zeidah a si lai ti kha ka hngalh cang," tiah a ti. ²² Cucaah hi hla cu Moses nih cu ni ah cun a phuah i Israel mi kha a cawnpiak hna. ²³ Cun Bawipa nih Nun fapa Joshua kha rian a pek i, "Ṭhawng law, na ral ṭha tuah; zeitintiah Israel fale hna cu annih pek awkah chiat ka sermi ram chungah na luhpi hna lai; nangmah sinah ka um lai," tiah a ti. ²⁴ Cun Moses nih hi nawlbia chung bia vialte cu tling cikcek in cauk chungah a ṭial dih hnuah, ²⁵ Moses nih Bawipa biakamnak kuang a zawntu Levi mi hna kha nawl a pek hna i. ²⁶ "Hi phungbia cauk hi la u law, Bawipa nan Pathian biakamnak kuang pawngah khan va chia tuah u, nanmah kong ah biahngaltu a si nakhnga. ²⁷ Zeitintiah zeitluk in dah ralchanh hmang le milungkhong nan si kha ka hngalh. Zohhmanh u, nannih sin i ka nun lio hmanh ah nihin ah Bawipa cu nan ralchanh; zeitluk in dik ka thih hnuah nan hei ralchanh chinchin lai! ²⁸ Nan phun upa vialte hna le nan bawi hna cu, an hna chungah hi bia hi ka chimh hna i annih kong biahngaltu ah van le vawlei kha ka kawh hna nakhnga, ka sinah pum tuah hna u. ²⁹ Zeitintiah ka thih hnuah cun thil ṭhalo kha nan tuah hrimhrim lai i nawl kan pekmi hna lam khan nan pial lai tiah ka hngalh ko; cun Bawipa mithmuh ah ṭhat lonak nan tuah i nan kut rianṭuannak in a thin nan hunter caah, hmailei ah ṭhat lonak nih an tlunhnawh hna lai," tiah a ti. ³⁰ Cun Moses nih Israel mi aa pummi vialte hna cu an hna chungah hi hla bia hi a dongh tiangin a chimh hna:

¹ "Maw van hna, nan hna rak chi tuah u, ka chim lai; Ka kaa in a chuakmi bia kha vawlei nih thei seh. ² Ruah bantukin keimah cawnpiaknak cu sur seh law, Ka bia cu dap bangin tla seh, Ram no cung i chum a sur siahmah bantuk le Chawl borh cung i ruahti a tlami bantuk siseh. ³ Zeitintiah Bawipa min kha ka thanh lai. Lianngannak cu kan Pathian pe ko u! ⁴ "Lungpi bantukin an hupphengtu a si, A lam vialte cu a dik i a hmaan. Zumhawktlak le hlen hmang lo Pathian a si, Amah cu a ding i a dik. ⁵ Annih nih a cungah ṭhat lonak an tuah, An dotlak lonak thawngin a fale an si ti lo; Milolak le mizer chan an si. ⁶ Nannih mihrut le minga hna, Bawipa cu hi bantukin nan rulh lai maw? Amah cu na pa, nangmah an ser, an siam i An fehtertu a si lo maw? ⁷ Hlan lio ni kha hngal ṭhan hna law, Chan tampi kum kha ruat tuah hna. Na pa kha hal law, an hmuhsak lai, Na upa hna zong hal hna law, an in chimh lai. ⁸ Cung Nung Bik nih miphun hna kha an ro a pek hna i Minung fapa hna kha a ṭhen hna tikah, Pathian fapa an tlawm an tam ningin minung an ramri kha a fehter. ⁹ Zeitintiah Bawipa vo cu a mi kha an si, Jakob cu amah ro hrimhrim kha a si. ¹⁰ "Amah nih thetse ram ah khan a char, Thetse ram thlitu a awn vungmangmi ah khan a char. A kulh, a zohkhenh, a mit falai bantukin a ven. ¹¹ Mupi nih a bu kha a hninh i A fano kha a vun zuanhnawh hna i A thla a vun i samh i, a thla cungah a futter i A zuanpi hna bantukin, Bawipa nih khan a hruai hna; ¹² Bawipa lawnglawng an hruaitu a si i ram dang pathian zeihmanh an i tel lo. ¹³ Vawlei hmunsang cungah a citter i Lo in a chuakmi thil kha a eiter hna; Lungpi chungin khuaihliti le Ṭeklung chungin chiti kha a dawpter hna. ¹⁴ Cawrun chung hnuk khal, Tuurun chung tuuhnuk, Tuufa hna thau le tuukawng hna thau, Bashan ram cawrun le meheh hna cu, Changvut lak i a ṭha bik he na ei hna i Mitsur hang thisen cu na din. ¹⁵ "Jakob nih khim tein a ei, Jeshurun cu a thau i a ke a chaih; Na thau, na thial a chah, na miltlor; Khi tikah a sertu Pathian kha a hlawt i A khamhnak Lungpi kha zei ah a rel lo. ¹⁶ Ram dang pathian hna in a nah an chuahter Fihnung an tuahnak in a thin an hunter. ¹⁷ Nan pupa hna nih an ṭih bal lomi, Tunaite ah a chuakmi pathian hna, An hngalh bal lomi pathian hna, Pathian a si lomi khuachia hna sinah cun rai an thawi. ¹⁸ An hringtu Lungpi kha na ruat lo i An sortu Pathian kha na philh. ¹⁹ "Bawipa nih a hmuh i a hlawt hna, A fapa hna le a fanu hna nih a thin an phawh caah, ²⁰ Amah nih, ’An sinin ka hmai ka thuh lai, An donghnak kha zeidah a si lai ka zoh lai, Zeitintiah annih cu milotlau chan; Zumhawktlak lo fa an si. ²¹ Pathian a si lomi thil in ka nahchuahnak an tuah i An siasal in ka thin an ka phawh, Cu bantukin miphun a si lomi in an nahchuahnak ka tuah ve lai i, A hrutmi miphun in an thin ka phawh ve hna lai. ²² Zeitintiah ka thinhunnak nih mei a kau i Sheol tawne tiang a kangh, Vawlei le a chungchuak a liah hna i Tlang hram kha a kangh hna. ²³ " ’Cun an cungah ṭhat lonak ka pon hna lai i An cungah ka thal kha ka hman dih hna lai; ²⁴ Rawlṭam in an lotlau lai i A kangh in a kangmi linhnak le sivai ṭha rai nih an ei hna lai; Sahrang ha hna cu, leidip ah a lawnmi thil sivai hna he, An cungah ka tlunter lai. ²⁵ Tlangval he ngaknu he, Hnuktlai lio he ṭuakpar he, Lengah vainam nih a thah hna lai i Inn chungah tuksapur thil a um lai. ²⁶ - ²⁷ An ral nihsawh lai kha le An ral hna nih cun, "Kanmah kut nih a tei hna, Hi chungah hin pakhat hmanh Bawipa i a tuahmi a um lo," Tiin an ti i an ruah sual lai kha ṭih hlah ning law cu, "Ka hei ṭhek dih cang ko hna hnga i Minung lakin anmah theihhngalhnak cu ka hloh dih ko lai," Ka hei ti ko hnga,’ a ti. ²⁸ "Zeitintiah fimnak a ngei lomi miphun an si i Hngalhthiamnak zong an bau. ²⁹ Fim hna seh law cu, mah hi an hngalhthiam hnga, An hmailei donghnak kha an hmuh hnga! ³⁰ An Lungpi nih a rak zuarh hna i Bawipa nih a rak hlawt cang hna dah ti lo ahcun, Zeitindah pakhat nih thong khat kha a dawi hna lai i, Pahnih nih thong hra cu an zamter hna lai? ³¹ An lungpi cu kan Lungpi bantuk a si lo, Kan ral hna cu mihrut an si. ³² Zeitintiah an mitsur ruang cu Sodom mitsur ruang le Gomorrah lo chungin a rami a si; An mitsur tlai cu sivai ngeimi an si, A bor hna cu an kha; ³³ An mitsur hang cu rul sivai le Rawchok sivai ṭhawng ngai a si. ³⁴ "Mah hihi keimah nih ka khon i Ka ro kuang chungah ka hrenh chihmi a si lo maw? ³⁵ An ke a nal tik caan caah phuhlamnak le teirul chamnak cu keimah ta an si, Zeitintiah an harnak ni cu a nai i An rawknak cu khulrang in a ra. ³⁶ Zeitintiah, an ṭhawnnak kha a loh cang i Khihmi siseh, a luatmi siseh, Pakhat hmanh an tang ti lo ti kha Bawipa nih a hmuh tikah, A mi cu thiam a coter hna lai i A sal hna cungah zaangfahnak a ngei lai. ³⁷ Cu tikah, ’An pathian hna, an i dornak lungpi cu, Khuazei ah dah an si kun, ³⁸ An raithawinak thau a ei i An thlet pekchanhnak mitsur hang a dingtu hna cu khuazei ah dah an si kun? Tho tuah hna seh law, in bawm tuah hna ngat seh, Na himnak si tuah hna ngat seh! ³⁹ " ’Atu cu hngal tuah u, Keimah, keimah hi, amah cu ka si i Keimah hleiah pathian dang zeihmanh an um lo; Keimah nih ka thah, keimah nih ka nunter ṭhan, Keimah nih hma ka banh, keimah nih ka damter i Ka kut chungin a ka chut khotu ahohmanh an um lo. ⁴⁰ Zeitintiah van ah ka kut ka hler i Hi bangin chiat ka ser: Zungzal in ka nun bangin, ⁴¹ Ka nam tleu ka tat i Biaceihnak kha ka kut nih a tlaih ahcun, Ka ral hna kha phu ka hlam hna lai i A ka huatu kha ka rulh hna lai. ⁴² Sam saumi ral hna lu in le Thahmi hna le tlaihmi hna thi in, Ka thal hna cu thi ka ritter hna lai i Ka nam nih sa a ei lai — ⁴³ "Maw miphun hna, a mi kha thangṭhat hna u, Zeitintiah a sal hna thisen phu kha a hlam i A ral hna kha phu a hlam hna i A mi hna ram caah sual thianhnak a tuah lai," tiin au u. ⁴⁴ Moses nih a ra i hi hla chung i a ummi bia vialte kha mizapi theih ah a va chim, amah le Nun fapa Hoshea nih an va chim. ⁴⁵ Cun Moses nih hi bia vialte kha Israel mi vialte sinah a chim dih tikah, ⁴⁶ annih sinah, "Nihin ah ralrinnak bia kan pekmi hna vialte hi nan lung chungah i chiah tuah u. Hi phungbia chung bia vialte cu, ṭha tein an tuah nakhnga, nan fale kha nawl pe hna u. ⁴⁷ Zeitintiah mah hihi nannih caah thil tetuai a si lo, sihmanhsehlaw nan nunnak a si i, cu thawng cun co awkah Jordan tiva nan tanhnawhmi ram chungah saupi nan nung lai," tiah a ti. ⁴⁸ Khi ni hrimhrim ah Bawipa nih Moses cu a chawnh i, ⁴⁹ "Jeriko zawn, Moab ram chung Abarim tlang thluan i a ummi Nebo Tlang ah va kai tuah law, ro caah Israel mi ka pekmi hna Kanaan ram cu va cuan tuah. ⁵⁰ Cun na u Aaron nih Hor Tlang ah a thih i a mi hna sinah pumh a si bantukin, na hung kainak tlang ah khin na thi lai i na mi hna sinah pumh na si lai, ⁵¹ zeicahtiah Zin ramlak i Meribah-kadesh ti ah khan, Israel mi hna lakah khan, zumhawktlak loin nan ka umhnawh i, Israel mi hna lakah khan a thiangmi bantukin nan ka hmaizah lo. ⁵² Na hmai i ram cu na hmuh lai; sihmanhsehlaw khika ah, Israel mi ka pekmi hna ram chungah cun na lut lai lo," tiah a ti.

¹ Hi thluachuahnak hi Pathian mi Moses nih a thih hlanah Israel fale thluachuah a pek hnanak cu a si. ² Amah nih, "Sinai in Bawipa cu a ra, Seir in kan cungah a rung tlang, Paran Tlang in a rung ceu, Mithiang thong hra hna sinin a ra, A orhlei kut in a alhmi mei aa put i a ra. ³ A si, a mi kha a dawt hna; Amah sinah thiantermi vialte cu a kut chungah an um; Cucaah na keneh kha an zulh, Nangmah sinin lam hmuhsaknak kha an hmuh, ⁴ Moses nih Jakob mibu ca i ro caah phungbia a kan pek tikah. ⁵ Cun, mi hna lu cu an i pumh tikah, Israel phun vialte hna cu hmunkhat ah, Bawipa cu Jeshurun chungah siangpahrang ah a cang. ⁶ "Reuben cu a mi an tlawm nain, nung seh law, thi hlah seh," tiah a ti. ⁷ Cun Judah kongah mah hihi a chim: "Maw Bawipa, Judah aw cu ngai tuah law, A mi hna sinah luhpi tuah. Na kut in amah cu chanh law, A ral hna doh a bawmtu si ko," a ti. ⁸ Cun Levi kong ah: Bawipa, nangmah nih nan duhnak cu, "Thummim le Urim in phuang ko; Zumhawktlak nan sal hna, Levi mi hna thawngin langhter ko. Massah ah na hneksak i Meribah tiput ah zumhawktlak an sinak kha na langhter. ⁹ A nu le a pa hna le An unau hna le A fale hna nakin Nangmah kha an in ṭanh deuh, Zeitintiah na nawlbia kha an ngaih i na biakamnak kha an zulh. ¹⁰ Jakob kha na phunglam, Israel kha na phungbia an cawnpiak lai; Nangmah hmaiah zihmui le Na biakṭheng cungah pum khangh thawinak an chiah lai. ¹¹ Maw Bawipa, a chawva kha thluachuah pe law, A kut rianṭuanmi kha cohlanpiak ko; A ral hna tawkawng cu khiak tuah, A huatu hna tawkawng cu, an thawh ṭhan ti nakhnga lo, khiak tuah," tiah a ti. ¹² Benjamin kongah, "Amah cu Bawipa dawtmi a si, Amah pawngah him tein a um; Amah nih chun nitlak a kulh i A liang le a liang karlak ah a umter," a ti. ¹³ Cun Josef kongah, "A ram cu Bawipa nih thluachuah a pekmi si ko seh, Cunglei van in le tanglei tithuk hna in laksawng ṭha bik le ¹⁴ Ni chungin a chuakmi theitlai ṭha bik hna le, Thla kip nih an chuahter ciomi thil sung hna le, ¹⁵ Hlan liopi in a ummi tlang hna nih an vuimi thil ṭha bik hna le, Zungzal in a hmunmi tlang hna i theitlai tampi hna le, ¹⁶ Vawlei le a cungah a ummi thil vialte hna an laksawng ṭha bik le, Burbuk chungah a ummi duhdawtnak cu, Hi thluachuahnak hna cu Josef lu cungah rung ṭum hna seh, A unau hna lak i bawi a simi luthlung cungah cun, rung tum hna seh. ¹⁷ A hrin hmasa bik cawtum cu lianhngannak a ngei i A ki hna cu fung ki an si; Cu ki cun mi kha, an dihlak in, vanhramdeng tiang a suk hna lai; Cu hna cu Efraim mi, sang tampi hna cu an si, Hi hna hi Manasseh mi, thong tampi hna cu an si," tiah a ti. ¹⁸ Cun Zebulun kongah, "Maw Zebulun, na khualtlawnnak ah i lawm tuah. Cun Issakhar, na thlam chungah i lawm tuah. ¹⁹ An tlang cungah mi kha an kawh hna lai i Khika ah a dikmi raithawinak hna kha an pekchanh; Zeitintiah rilipi rumnak le thetse chung i aa thupmi ro cu an dawp," tiah a ti. ²⁰ Cun Gad kongah, "Gad a kauhtertu cu thangṭhat si ko seh! Gad cu chiandeih bantukin a bawk, Ban le lukheng kha a thleh a bauh hna, ²¹ Ram chungah a ṭhatnak bik cu aa thim, Zeitintiah khika ah hruitu covo cu amah caah chiahpiak a si; Israel mi ca i Bawipa nawlbia hna le biakhiahnak hna cu tlinter awkah Mi hmaisuang ah cun a um," tiah a ti. ²² Cun Dan kongah, "Dan cu chiandeih fano, Bashan in a hung petmi a si," tiah a ti. ²³ Cun Naftali kongah, "Maw Naftali, Bawipa duhdawtnak le thluachuahnak in a khimmi, Galilee rili le thlanglei kha co tuah hna," tiah a ti. ²⁴ Cun Asher kongah, "Fapa dang hna nakin Asher cu thluachuah hmu deuhmi si seh. A unau hna nih an duhdawtmi si seh law, A ke cu chiti chungah hnim seh. ²⁵ Na kothrolh hna cu thir le dar an si lai; Na nunchung vialte na thazang nih in nguh ko seh," tiah a ti. ²⁶ "Maw Jeshurun, nangmah bawmh awkah van aa cit, Lianngannak in van aa citmi Pathian bantuk ahohmanh an um lo. ²⁷ Zungzal hmunmi Pathian cu na umnak hmun a si i Na tangah zungzal hmunmi ban kha an um. Cun ral kha na hmaiah a dawi i ’Hrawk tuah,’ tiah a ti. ²⁸ Cucaah rawl le mitsur hang a tamnak ram ah cun Israel cu him tein a um, Jakob cerhti cu amah tein a um, Asi, a van hna zongin dap an tla. ²⁹ Maw, Israel, na van a ṭha ko! Nangmah bantuk ahodah a um? Bawipa nih a khamhmi na si, Amah cu an hupphengtu phaw le teinak vainam a si! Na ral hna cu na hmaiah bawk in an ra lai i An khuahrum bo hna cu na lamh hna lai," tiah a ti.

¹ Cun Moses cu Moab nelrawn in Jeriko zawn i a ummi Nebo tlang, Pisgah tlangpar ah cun, a hung kai. Cun Bawipa nih ram vialte cu a hmuhsak, Gilead ram cu Dan tiangin, ² Naftali a dihlak, Efraim le Manasseh ram, Judah ram vialte Nitlaklei Rili tiangin, ³ Negeb ram, cun Nelrawn — ungkung khua Jeriko nelrawn timi cu — Zoar tiangin. ⁴ Cun Bawipa nih a chawnh i, "Mah hi ram hi Abraham, Isak le Jakob sinah, ’Nan tefa hna sinah ka pek lai,’ tiin chiat ka sermi ram a si. Na mit cun kan hmuhter, sihmanhsehlaw khika ah cun na kal lai lo," tiah a ti. ⁵ Cu bangin Bawipa sal Moses cu Bawipa bia ningin Moab ram chungah a thi i, ⁶ Bethpeor ral, Moab ram chung nelrawn ah Bawipa nih a vui; sihmanhsehlaw a vuinak hmun cu nihin ni tiang ahohmanh nih an hngal lo. ⁷ Moses cu a thih ah, kum za le kum kul a si; a mit a mui lo i a thazang zong a ṭum lo. ⁸ Cun Israel mi nih Moses cu Moab nelrawn ah ni sawm thum an ṭah; cun Moses an ṭahnak ni hna cu a dong. ⁹ Cun Nun fapa Joshua cu, Moses nih a cungah a kut a chuan caah, fimnak thlarau in a khat; cucaah Israel mi nih a bia an ngaih i Bawipa nih Moses nawl a pek bang khan an tuah. ¹⁰ Cun cu thawk in Israel mi chungah Bawipa nih hmaitonh in a hngalhmi profet Moses bantuk an chuak ti lo. ¹¹ Izipt ram chung i Faro le a sal vialte hna le a ram dihlak cungah, hmelchunhnak le khuaruahharnak, Bawipa nih Moses a tuahtermi bantuk le ¹² a ṭhawngmi lianngannak le a ngan i ṭih a nungmi thil Moses nih Israel mi hna hmaiah, a tuahmi bantuk a tuah khotu kha midang ahohmanh an um ti lo.