DANIEL

DANIEL

¹ Judah siangpahrang Jehoiakim a bawi kum thumnak ah Babilon siangpahrang Nebukhadnezzar cu Jerusalem ah a ra i a kulh. ² Bawipa nih Nebukhadnezzar cu Judah siangpahrang Jehoiakim kha a tlaihter i biakinn chung thil zong kha tlawmpal a lakter. Thongtla hna cu Babilon ram i a pathian inn ah khan a kalpi hna i thilri hna cu chawhlawn chiahnak inn ah khan a chiah hna. ³ Khi tikah siangpahrang nih cun tilditmi bawi bik Ashpenaz kha a thawh i, "Israel mi saltangmi hna lak i bawi phun le tuavon hna chung khan tlangval tlawmpal in na thim hna lai. ⁴ Annih cu aa dawhmi, an pum cungah tlin lonak zeihmanh a ngei lomi, a fimmi, a thiammi, an si lai i siangpahrang inn i rianṭuan dingah aa tlakmi an si lai. Cun Khaldi mi ca le holh kha na cawnpiak hna lai," tiah a ti. ⁵ Siangpahrang nih nifate in an ei awk hnga rawl le zu cu siangpahrang cabuai i a ummi kha nan pek hna lai, tiah a ti. An cawn chung cu kum thum a si lai i cu caan a dongh tikah siangpahrang rian ah cun an luh awk a si lai. ⁶ Cu hna lakah cun Judah phun chungmi Daniel, Hananiah, Mishael le Azariah kha an i tel. ⁷ Sihmanhsehlaw tilditmi bawi bik nih khan min thar a sak hna i Daniel cu Belteshazzar a ti, Hananiah cu Shadrak a ti, Mishael cu Meshak a ti i Azariah cu Abednego a ti. ⁸ Daniel nih cun siangpahrang nih a ka pekmi rawl le zu hin kaa thurhhnawmh hrimhrim lai lo a ti i tilditmi bawi bik cu, cu bantuk cu ka tuahter hlah, tiah a nawl. ⁹ Pathian nih a bawipa cu Daniel cungah khan zaangfahnak le lungthin ṭhatnak a ngeihter i cucaah cun a thawh i, ¹⁰ "Ka bawipa siangpahrang kha ka ṭih: amah nih na rawl ei awk le na din awk kha an tuahpiak, cucaah der fiamfuam in, na ṭhirual tlangval dang he i lo loin an hmuh ahcun, ka lu na ka hloh ko lai pei," tiah a ti. ¹¹ Cucaah Daniel cu, Hananiah le Mishael le Azariah le amah zohkhenhtu dingah tilditmi bawi bik nih a chiahmi micawngtu sinah khan a va kal i, ¹² "Ni hra chung kan hneksak tuah. Ei awkah tisik anhnah lawnglawng le din awkah ti lawnglawng kan pe; ¹³ cun siangpahrang nih a phawtmi hna rawl in a nungmi tlangval dang hna he kan muisam cu kan zohkhek, cun na kan hmuhning in kan cungah ṭuan," tiah a ti. ¹⁴ A cawngtu hna nih cun an chimmi cu a ngaih i ni hra chung cu a hneksak hna. ¹⁵ Ni hra donghnak ah cun siangpahrang nih a pekmi hna rawl in aa cenhmi tlangval vialte hna nakkhan an titsa cu a ṭha deuh i an tlornal deuh. ¹⁶ Cucaah a cawngtu hna nih khan an ei awk rawl le an din awk zu an pekmi hna cu a lak i tisik anhnah lawnglawng kha a pek hna. ¹⁷ Hi tlangval pali hna hi an dihlak tein Pathian nih ca lei fimnak le hngalhnak le thiamnak phun kip kha a pek hna i Daniel cu langhnak le mang sullam hngalh khawhnak pahrang kha a ngei. ¹⁸ Siangpahrang inn ah chuahpi an si lai, tiah a rak timi caan kha a hung phan i tilditmi bawi bik Ashpenaz nih khan Nebukhadnezzar hmaika ah cun a chuahpi hna. ¹⁹ Siangpahrang nih cun bia a ruah hna i Daniel le Hananiah le Mishael le Azariah a tluktu kha ahohmanh an um lo, cucaah siangpahrang rian ah khan an lut. ²⁰ Siangpahrang nih zei bantuk bia hmanh ah siseh, zei bantuk thil har a chuakmi hmanh ah siseh, an ruahnak a hal hna fate, a ram chung dihlak i mitlehthiam hna le kutṭial zohthiam hna le camhthiam hna nakkhan a let hra in an hngal deuh ti kha a hmuh. ²¹ Daniel cu khika ah khan Sairas cu Babilon siangpahrang i a hung can tiang khan a um.

¹ Nebukhadnezzar cu a bawi kum hnihnak ah khan mang pakhat a ngei i a lung a suk tuk caah aa hngilh kho lo. ² Khi tikah siangpahrang nih cun mitlehthiam hna le camhthiam hna le khuachia ṭhawlthiam hna le eihthiam hna kha a kawh hna i ka mang cu a sullam ka chim u, tiah a ti hna. Annih nih an rat i siangpahrang hmaiah an dir tikah khan a thawh hna i, ³ "Mang pakhat ka manh i cu nih cun ka lungre a ka theih ngaingai. Cu mang a sullam cu hngalh ka duh," tiah a ti hna. ⁴ Khaldi mi hna nih cun Aramaik holh in an leh i, "Siangpahrang cu saupi nung ko seh! Na manhmi cu kan chim law a sullam cu kan in chimh lai," an ti. ⁵ Siangpahrang nih cun a leh hna i, "Ka mang le a sullam kha nan ka chimh khawh lo ahcun nan liang vang in kan thleh dih hna lai i nan inn cu tlaih an si dih lai. ⁶ Sihmanhsehlaw nannih nih ka mang cu a sullam he nan ka chimh khawh ahcun laksawng tampi le upatnak kha kan pek hna lai. Cucaah ka mang le a sullam cu ka chim tuah u," tiah a ti hna. ⁷ Cun annih nih, "Siangpahrang nih na mang cu kan chim law a sullam cu kan in chimh lai," tiah an leh ṭhan. ⁸ Siangpahrang nih cun aa thawh i, "Nan chimmi hi ka rak ruahning tein a si. Kaa tinhmi ka thanhmi kha a donghnak a si cang ti kha nan hngalh caah, caan rauhter deuh men kha nan i zuam ti kha ka hngalh. ⁹ Mang cu nan ka chimh lo ahcun dantatnak cu nan dihlak in aa khat in pek nan si lai. Cuhleiah, a caan ningin a lung cu aa thleng te lai lo maw tiin keimah cu lih kha chimh awkah lungthin khat in nan um. Cucaah ka mang cu ka chim u, cu cun pei a sullam zong cu nan ka chimh khawh lai ti kha ka hngalh fam lai cu," tiah a leh hna. ¹⁰ Siangpahrang cu Khaldi mi hna nih cun an thawh i, "Siangpahrang nih hngalh na duhmi hi vawlei cung khuazeihmanh ah a chim khomi an um lai lo. Siangpahrang ahohmanh nih, a ngan bik le a ṭhawng bik hna hmanh nih, hi bantuk ngelcel in mitlehthiam hna le khuachia ṭhawlthiam hna le Khaldi mi hna kha an ti bal hna lo. ¹¹ Bawipa nih nan tuah lai, tiah na kan timi hi a har tuk, a thi khomi minung hna sin i a um lomi pathian hna dah ti lo nih cun, ahohmanh nih an tuah kho lai lo, an ti. ¹² Hi bia a theih tikah siangpahrang cu a thin aa sum kho ti lo i Babilon ram chung i mifim vialte kha that dih hna u, tiah a ti. ¹³ Mifim vialte cu thah dih awk an si lai tiah nawlbia cu chuah a si i cucaah Daniel le a hawile hna zong kha thah awk i va lak awkah mi an thlah hna. ¹⁴ Siangpahrang pum ralvengtu bawi Ariok cu, Babilon mifim pawl kha thah awkah aa thawh tikah khan, Daniel nih ralring te le fim tein a va nawl i, ¹⁵ "Bawipa, nangmah cu siangpahrang aiawhtu na si, zeicahdah hi bantukin siangpahrang nih a donghnak rumro in nawlbia a chuah?" tiah a ti. Ariok nih khan zeizong vialte kha fiang tein a sullam a chimh dih. ¹⁶ Cucaah Daniel cu siangpahrang hmaiah cun a vung lut i siangpahrang cu a mang sullam kha a chimh khawh nakhnga a caan ka pe rih tuah, tiah a vung nawl. ¹⁷ Cun Daniel cu inn ah a ṭin i thil umtuning vialte cu a hawile, Hananiah, Mashael le Azariah kha a chimh hna. ¹⁸ Amah Daniel le annih le Babilon mifim hna kha thah an si nakhnga lo, vancung Pathian kha a zaangfahnak kan nawl awk a si, tiah a ti. ¹⁹ Cun langhnak in zan ah cu biathli sullam cu Daniel sinah phuan a si i vancung Pathian cu hitihin a thangṭhat: ²⁰ Fimnak le ṭhawnnak vialte cu a ta a si caah Pathian min cu chan khat hnu chan khat thangṭhat si ko seh. ²¹ Khuacaan siseh, caan kha siseh, a thlen lengmang hna, Siangpahrang kha a ṭhumh hna i a kaiter hna; Mifim kha fimnak a pek hna i a hngalmi kha hngalhnak vialte cu a pek hna; ²² A thukmi biathuk kha a phuan; mui lakah zeidah aa thup ti kha a hngalh i ceunak nih amah cu a kulh. ²³ Ka pupa hna Pathian, nangmah cu kaan lawmh i kaan thangṭhat, Zeicahtiah nangmah nih fimnak le ṭhawnnak kha na ka pek; Ka thlacamnak kha na ka leh i Siangpahrang nih hngalh a duhmi kha na kan chimh. ²⁴ Cucaah siangpahrang nih Babilon mifim pawl cu thah awkah nawl a pekmipa Ariok sinah khan a va kal i, "Babilon mifim hna cu that rih hna hlah. Siangpahrang hmaiah ka chuahpi law atu cu a mang sullam kha ka chimh lai," tiah a ti. ²⁵ Ariok nih cun therphang lengmang in Daniel cu siangpahrang hmaiah cun a hei chuahpi i, "Judah mi saltangmi hna lakah hin na mang a sullam an chim khotu ding pakhat ka hmuh cang," tiah a ti. ²⁶ Khi tikah siangpahrang nih Daniel cu a thawh i, "Ka mang i ka hmuhmi kha zeidah a si le a sullam cu na ka chim kho lai maw?" tiah a ti. (Daniel cu Belteshazzar ti zongah ti a si). ²⁷ Daniel nih cun siangpahrang cu a leh i, "Siangpahrang nih hngalh a duhmi biathli cu mifim ahohmanh nih si hna seh, khuachia ṭhawl thiam ahohmanh nih si hna seh, mang ihthiam ahohmanh nih si hna seh, na sinah an phuang kho lai lo. ²⁸ Sihmanhsehlaw vancung ah khin biathli a phuang khotu Pathian pakhat a um i amah nih cun Siangpahrang Nebukhadnezzar cu hmailei ah zei thil dah a um lai, ti kha an chimh cang. Mah hihi na mang, naa hngilh lioah langhnak na hmuhmi cu a si: ²⁹ Maw siangpahrang, na ihkhun cung i na ih lioah hmailei thil kong kha na manh i biathli a phuang khotu Pathian nih zeidah a um dingmi thil cu an si kha an hmuhsak. ³⁰ Hi biathli keimah sinah phuan a sinak cu, keimah cu minung vialte lakah ka fim bik caah a si lo, sihmanhsehlaw siangpahrang nih na lung chungah a lutmi ruahnak cu na hngalh khawh nakhnga le a sullam na fian khawh nakhnga caah a si. ³¹ "Khua na cuanh lioah, maw siangpahrang, milem nganpi pakhat na hmuh. Hi milempi cu a ngan ngaingaimi a si i cer dekduk piin a um i na hmaiah cun a dir zengzung ko i zoh ah khin ṭihnungpi a si. ³² Cu milem lu cu sui thiang a si, a ṭang le a ban cu ngun an si, a paw le a phei cu dar an si, a ke cu thir an si, a kepha cu a cheu thir, a cheu tlak an si. ³³ Na zoh ko lioah cun, minung kut i cawhmi a si lomi lung pakhat tlang cungin a rung ril i milempi cu thir le tlak aa cawhmi a ke ah khan a den ciammam i a kuai dih. ³⁵ Khi tikah thir le vawlei le dar le ngun le sui cu an i cheu an i hmal dih cikcek i ṭhal caan i phuhri i favai cu thli nih a choih hna bantuk khin an choi dih i an lohnak zawn hmanh hngalh an si lo. Sihmanhsehlaw milem a dengtu lungpi cu tlang nganpi ah a cang i vawlei vialte kha a khat dih. ³⁶ "Cucu na mang cu a si. Atu cu siangpahrang kha na mang sullam kha kan chimh lai. ³⁷ Maw siangpahrang, nangmah cu siangpahrang hna siangpahrang na si i vancung Pathian nih siangpahrang ah cun an canter i ṭhawnnak le nawlngeihnak le sunparnak an pek cang; ³⁸ nangmah na kut chungah minung siseh, saram siseh, van i a zuangmi va si hna seh, a chiah hna i khuazei ka i an um hmanh ah an dihlak cung i nawl ngeih khawhnak ding cu nangmah cu an pek — cu sui lu cu nangmah na si. ³⁹ Nangmah hnuah hin pennak pakhat a hung chuak lai i cucu nangmah pennak nakin a nauta deuhmi a si lai, cun pennak pathumnak a hung chuak rih lai i cu pennak cu dar pennak cu a si lai i cu nih cun vawlei cung dihlak a uk lai. ⁴⁰ Cun pennak palinak a um lai i thir bantukin a ṭhawng lai; thir nih zeizong vialte a den a hrawh dih bantukin cu nih cun hmasa pennak vialte kha a khuai a den dih hna lai. ⁴¹ Cun a kepha hna le a kedong hna cu a cheu umsertu tlak, a cheu thir an si zong kha na hmuh fawn. Cu a sullam cu cu pennak cu aa ṭhenmi pennak a si lai. Thir cu tlak he aa cawh caah khan ṭhir ṭhawnnak a tlawmpal cu a ngei lai. ⁴² A kedong cu a cheu thir, a cheu tlak an si bantuk khan, cu pennak cu a ṭhawng lai nain fawi tein den khawh a si lai. ⁴³ Thir cu tlak he aa cawh zong kha na hmuh fawn. Cu bantuk cun ram uktu hna nih cun i ṭhitumhnak in pakhat le pakhat i fonh kha an i zuam lai, sihmanhsehlaw thir cu tlak he aa fonh khawh lo bantukin an i fonh kho ve lai lo. ⁴⁴ Cu siangpahrang hna chan ah cun vancung Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai. ⁴⁵ Ahohmanh tawngh loin zeitindah lungpi cu lungpang cungin a rung rilh i thir le dar le tlak le ngun le sui in sermi milempi cu a den ti kha na hmuh. A liannganmi Pathian nih siangpahrang Bawipa cu hmailei ah zeidah a tlung lai ti kha an chimhnak a si. Na manhmi hrimhrim cu kan chimhmi hi a si i a sullam taktak kha kan pek cang," tiah a ti ⁴⁶ Khi tikah Siangpahrang Nebukhadnezzar cu a bawk i Daniel kha a biak i amah cu raithawinak le rimhmui khanghnak kha nan pekchanh lai, tiah nawl a pek hna. ⁴⁷ Cun aa thawh i, "Nan pathian hi pathian hna Pathian le siangpahrang hna cung i Siangpahrang a si taktak, amah cu biathli a phuangtu a si i cucaah nangmah nih hi biathli cu na phuan khawh," tiah a ti. ⁴⁸ Siangpahrang nih cun Daniel cu rian kainak a pek i laksawng man sungsung tampi a ṭhenh i Babilon ram vialte uktu le Babilon mifim vialte hna haotu bik ah a ser. ⁴⁹ Cuhleiah Daniel nih a nawl bantukin siangpahrang nih cun Shadrak, Meshak le Abednego cu Babilon ram uktu ah a ser hna. Sihmanhsehlaw Daniel tu cu siangpahrang inn ah khan a um.

¹ Siangpahrang Nebukhadnezzar nih sui milem pakhat, a san pe sawm kua, a ngan pe kua a simi kha a ser i Babilon ram Dura nelrawn ah cun a dirter. ² Cun mangki, zipeng, vuanthok, upadi thiammi, tangka kengtu, biaceihtu, ram zohkhenhtu bawi le ram ukbawi vialte hna kha, a phunmi milem conglawmhnak i tel awkah cun a cah hna. ³ Cuticun mangki vialte, zipeng vialte, vuanthok vialte, upadi thiammi vialte, tangka kengtu bawi vialte, biaceih bawi vialte, ram zohkhenhtu bawi vialte le ram uktu bawi vialte hna cu Siangpahrang Nebukhadnezzar nih a phunmi milem sunlawih awk caah cun an i pum; annih cu Nebukhadnezzar nih a phunmi milem hmaiah cun an dir. ⁴ Khi tikah tlangautu nih khan fak piin a au i, ⁵ "Maw miphun zakip le holh phun zakip hna, nannih nih muko thawng le tingtang thawng le thonglawi thawng le darkhing thawng le tummi phun kip thawng le hlasak thawng kha nan theih tikah nan bawk lai i Siangpahrang Nebukhadnezzar nih a phunmi sui milem cu nan biak lai, tiah nawl pek nan si. ⁶ A bawk lo i a bia lomi paoh cu a alh hluahmahmi meiphu chungah paih nan si lai," tiah a ti. ⁷ Cu bantukte cun, miphun zakip le holh phun zakip hna nih khan muko le tingtang tummi a phunphun thawng le hlasak thawng kha an theih cangka tein an bawk i Nebukhadnezzar nih a phunmi milem cu an biak. ⁸ Khi tikah Khaldi mi mi cheukhat cu an ra i Judah mi kha sual an phawt hna. ⁹ Nebukhadnezzar Siangpahrang cu an chimh i, "Siangpahrang cu saupi nung ko seh! ¹⁰ Siangpahrang nih nawlbia na chuah i muko thawng le tingtang thawng le tummi a phunphun thawng le hlasak thawng a theimi paoh nih nan bawk lai sui milem kha nan biak lai, na ti. ¹¹ Cu bantukin a tuah lomi paoh cu a alh hluahmahmi meiphu chungah paih an si lai, na ti fawn. ¹² Sihmanhsehlaw Babilon ram uknak zohkhenhtu ah na chiahmi Judah mi Shadrak, Meshak, le Abednego hna nih cun bawipa na nawlbia kha zei ah an rel duh lo i na phunmi sui milem kha an bia duh lo," tiah an ti. ¹³ Cu tikah Nebukhadnezzar nih cun a thinhun le a thinlinh in Shadrak le Meshak le Abednego cu va ko hna u, a ti i annih cu siangpahrang hmaika ah an hun chuahpi hna. ¹⁴ Nebukhadnezzar nih cun a thawh hna i, "Shadrak, Meshak le Abednego, nannih nih ka pathian cu a rian ṭuanpiak nan duh lo i ka phunmi sui milem cu biak nan duh lo, an ti cu biatak a si maw? ¹⁵ Nannih nih muko thawng le tingtang thawng le tummi a phunphun le hlasak thawng kha nan theih tikah, kan bawk lai i na phunmi milem cu kan biak lai, nan ti ahcun a ṭha ko lai. Sihmanhsehlaw nan biak lo ahcun, a alh hluahmahmi meiphu chungah nannih cu paih nan si colh ko lai; ka ṭhawnnak chungin an chuah khotu hna zei pathian tal a um lai, tiah nan ruat maw?" tiah a ti. ¹⁶ Shadrak, Meshak le Abednego nih cun Nebukhadnezzar Siangpahrang cu an leh i, ¹⁷ "Maw siangpahrang, hi kong ah hin kan in leh awk a herhmi a um ti awk zeihmanh kan hngal lo; a alh hluahmahmi meiphu chungin le na kut chungin kan biakmi Pathian nih a kan khamh khawh ahcun, kan khamh ko seh; ¹⁸ a kan khamh lo hmanh ah na pathian cu kan bia hlei lai lo i na phunmi milem hmai zongah cun kan kun hlei lai lo, ti kha bawipa nangmah nih hngal ko," tiah an ti. ¹⁹ Khi tikah Nebukhadnezzar cu Shadrak le Meshak le Abednego cungah cun a thin a hung tuk hringhran i a thin a hun tuk caah a hmai zong aa simsawi dih. ²⁰ Meiphu cu voi dang nak a let sarih in nan linhter lai tiah nawl a pek hna i a ralkapbu chung i ralkap ṭhawng bikbik hna kha Shadrak le Meshak le Abednego cu nan ṭem hna lai i a alh hluahmahmi meiphu chungah cun nan paih hna lai, tiah a fial hna. ²¹ Cun an tawhrolh le an angki le an luchin he an thilpuan tling tein i hruk in a ummi hna cu an ṭem hna i meiphu alh chungah cun an paih hna. ²² Siangpahrang nawl pekmi cu khulrang tuk in a si caah le meiphu cu a linh tuk hringhran caah Shadrak, Meshak le Abednego a cawitu hna cu a hung chuak sualmi meizik nih khan a thah hna; ²³ cun kha minung pathum, Shadrak, Meshak le Abednego hna cu ṭem buin meiphu alh chungah cun an thlak hna. ²⁴ Khi tikah Siangpahrang Nebukhadnezzar cu a khuaruah a har i therphang ngaiin a hung dir. A tlangpi pawl cu a thawh hna i, "Meiphu chung i ṭem buin kan paihmi hna kha pathum an si lo maw?" tiah a ti. Annih nih siangpahrang cu an leh i, "A si hrim hrim ko," tiah an ti. ²⁵ Cun anih nih, "A si kun ahcun zeicahdah meiphu chungah zeihmanh poi loin aa chawkmi mi pali ka hmuh kun hna; cun a palinak cu pathian a lo fawn," tiah a leh ve hna. ²⁶ Nebukhadnezzar nih cun a alh hluahmahmi meiphu a kaa cu a hei naih i mi cu a hei auh hna i, "Shadrak, Meshak le Abednego, Cung Nung Bik Pathian sal hna, hung chuak u law hika ah hin ra tuah u," tiah a ti hna. Cun Shadrak, Meshak le Abednego cu mei chung cun an hung chuak. ²⁷ Khi tikah mangki le zipeng le vuanthok le siangpahrang tlangpi hna cu an i pum i hi mi hna an pum cungah khan ṭhat lonak zeihmanh mei nih a tuah lo ti kha an hmuh; an lu cung samfa fa khat hmanh a kang lo i an thilthuam kha zeihmanh a kangh lo hlei ah mei rim hmanh an nam lo. ²⁸ Khi tikah Nebukhadnezzar nih cun aa thawh i, "Shadrak, Meshak le Abednego Pathian cu thangṭhat si ko seh. Amah an i bochan ca i siangpahrang nawlbia hmanh zul duh loin a um i an Pathian hleiah pathian dang biak nakcun mei chung i paih hmanh a duh deuhmi a salle hna cu, khamh awkah Amah nih a vancungmi kha a run thlah. ²⁹ Cucaah ahohmanh, mi zei miphun chung mi hmanh si ko uh, cun nan holh zong zei holh hmanh si ai kun, hi hna Shadrak le Meshak le Abednego hna Pathian a serhsatmi paohpaoh cu thlehbaoh dih nan si lai i nan inn kha chuh nan si lai, tiah keimah nih nawlbia ka chuah; zeicahtiah hi bantukin mi a khamh khotu pathian dang zeihmanh an um lo," tiah a ti. ³⁰ Cun siangpahrang nih Babilon ram chungah Shadrak le Meshak le Abednego cu rian ngan deuh ah a kaiter hna.

¹ Siangpahrang Nebukhadnezzar nih, vawlei cung i a ummi miphun vialte hna le holh phun vialte hna sinah thawng kan thanh hna: ² Thluachuahnak vialte cu nan ta si ko seh. Cung Nung Bik Pathian nih ka caah a tuahmi hmelchunhnak hna le khuaruahharnak hna cu chim ṭhan ka duh hna: ³ Hmelchunhnak a tuahmi hna cu zeitluk in dah an ngan i Khuaruahhar a tuahmi hna cu zeitluk in dah an ṭhawn, A pennak cu zungzal hmunmi pennak a si i Bawi a sinak cu chan vialte tiangin a hmun, a ti. ⁴ Keimah Nebukhadnezzar cu ka inn ah hnangam tein le ka siangpahrang inn ah cun nuam ngaiin ka um i ⁵ ka ihnak i ka ih lioah mang pakhat ka manh i cu nih cun ka thin a ka phanter. ⁶ Cun mang ka manhmi le langhnak ka hmuhmi hna nih cun ka khuaruah an ka harter. Cucaah nawlbia pakhat ka chuah i Babilon mifim vialte hna kha ka mang sullam leh awkah cun ka hmaiah ka auh dih hna. ⁷ Mitlehthiam hna le khuachia thawl thiam hna le Khaldi mi hna le mang ih thiam hna kha an ra i an hmaiah cun ka mang cu ka chim. ⁸ Sihmanhsehlaw annih nih an let kho lo. Asinain a dang pakhat ka hmaiah cun a ra chuak i amah cu Daniel a si, ka pathian min zulh in Belteshazzar ti zongah ti a si; amah cu pathian thiang hna thlarau nih an umhnawhmi a si. ⁹ Amah zong cu ka mang cu ka chimh i, "Mitleh thiam hna lak i a thiam bik, keimah hrimhrim nih pathian thiang hna thlarau nih an umpimi a si ti ka hngalhmi le biathli zeihmanh a hngal kho dihtu a si tiah ka hngalhmi Belteshazzar, ka mang i ka hmuhmi langhnak cu ka ngaihpiak law a sullam cu ka chim tuah," tiah ka ti. ¹⁰ Ka ihkhun cung i ka ih lioah ka lu chungah a rung lutmi langhnak cu mah hihi a si: Khua ka hei cuanh lioah khin, Vawlei laifang ah thingkung pakhat a sang ngaingaimi a dir kha ka hmuh: ¹¹ Thingkung cu a hung ṭhang chin lengmang i a par nih van a tawngh i vanhramdeng hmanh in hmuh khawh a si. ¹² A hnah cu an i dawh ngaingai i a thei cu an tam ngaingai caah zeizong vialte kha a cawm khawh hna. A toiah cun ram sa kha an i dor i a nge ah cun vate nih bu an ser; Thilnung vialte nih amah sin cun rawl an hmuh. ¹³ Cun langhnak a dang pakhat ka ihkhun i ka ih lio i ka hmuh rihmi cu hihi a si: Cu ti i ka zoh ko lioah cun, Vancung in Vengtu Thiang pakhat, a rung ṭum kha ka hmuh. ¹⁴ Cu nih cun fak piin a au i, "Thingkung kha hau u, a nge kha thlam hna u, a hnah kha zun hna u law a thei kha ṭhek dih hna u. A toi i aa dormi ram sa hna kha zam hna seh law a nge i aa fumi va hna kha zuang hna seh; ¹⁵ Sihmanhsehlaw a hmui kha cu vawlei ah khan kaltak ko u, thir cikcin le dar cikcin in khimh u. Lo lakah khan kaltak ko u law rambur lakah khan um ko seh. Vandap nih cin cikcek in tlak seh law ram hno lak i a tlongmi saram hna bantuk kha si ve seh; ¹⁶ A lungthin cu minung lungthin si ti hlah seh law, saram lungthin tu kum sarih chung keng seh. ¹⁷ Hi kong cu cawngtu vancungmi hna nih an ruah ciami a si. Cucaah khuazeika ram i a ummi minung paohpaoh hna nih, Cung Nung Bik Pathian nih cun minung pennak cungah nawl a ngei ti kha hngal hna seh. A duhmi paoh kha siangpahrang ah a ser khawh ko hna, santlailo bik hmanh kha a ser khawh ko hna, ti kha hngal hna seh," a ti. ¹⁸ "Hihi keimah Siangpahrang Nebukhadnezzar nih ka manhmi ka mang cu a si; atu cu Belteshazzar, nangmah nih a sullam cu ka chim tuah; ka pennak chung i a ummi mifim vialte nih a sullam kha an ka chim kho lo nain, nang nih cun na chungah a thiangmi pathian hna thlarau kha a um caah na ka chimh khawh lai," tiah a ti. ¹⁹ Daniel, Belteshazzar ti zongah ti a simi cu, tlawmpal cu ar ṭhup in a hung um i zeihmanh a chim kho lo. Sihmanhsehlaw siangpahrang nih cun aa thawh i, "Ka mang le a sullam nih cun na khuaruah in harter hlah seh," tiah a ti. Belteshazzar nih cun a leh i, "Ka bawipa, hi mang le a sullam hi nangmah an huatu hna le na ral hna ca tu ah hei si seh law ka hei duh hnga dah! ²⁰ Nangmah nih na hmuhmi thingkung, a ṭhang i a ṭhawng i a par van a tawng i vanhramdeng in hmuh khawh a si i ²¹ a hnah aa dawh i a thei a tam i zeizong vialte ca i a tlai rawl a si i a toi i ram sa an tlon i a nge i vate an riahnak cu, cu thingkungpi cu, maw siangpahrang, nangmah na si. ²² Nangmah cu na ṭhang i na ṭhawng. Na lianhngannak cu a thang i van a tawng; na bawi sinak cu vanhramdeng a phan. ²³ Cun maw siangpahrang, nangmah nih na zoh ko lioah cun, Cawngtu pakhat kha van in a rung ṭum i cu nih cun, "Thingkung kha hau u law hrawk u, sihmanhsehlaw a hmui kha cu vawlei chung i a hram hna he khan ngan u. Thir cikcin le dar cikcin khan khit u law lo ah khan rambur lakah khan kaltak u, vandap nih cin cikcek in tlak seh law kum sarih chung saram bantukin um seh," a ti. ²⁴ "Maw siangpahrang, a sullam cu hihi a si: Siangpahrang ka bawipa cung i a tlung ding a chimtu hi Cung Nung Bik Pathian a si. ²⁵ Minung bu sinin nang cu ṭhawl na si lai i ram sa sinah na um lai; cawtum bantukin ram kha na ei lai i vandap nih cin cikcek in kum sarih chung an tlak lai. Khi tikah nangmah nih Cung Nung Bik cu minung pennak cungah khan bawi a si i cu pennak cu pek a duhmi hna sinah khan a pek ko, ti na vun hngalh ruangmang te lai. ²⁶ Thinghmui cu vawlei chung i a hram hna he khan nganhta si hna seh, tiah vancungmi nih khan an ti: Cu a sullam cu hihi a si, Pathian nih vawlei cung hi a dihlak in a uk dah ee ti na vun hngalh tikah nangmah cu siangpahrang na si ṭhan te lai. ²⁷ Cucaah lungthin kan cheuhmi hi ngai tuah, maw siangpahrang: mi sinah siannak tuahnak thawngin na sualnak kha i tlan law retheimi hna cung i ṭhatnak tuahnak khan na ṭhat lonak cu i tlan tuah, cuticun lungdaihnak saupi na hmuh lai," tiah a ti. ²⁸ Hi vialte nih hin Siangpahrang Nebukhadnezzar kha a tlunhnawh. Thla hleihnih a dihnak ah siangpahrang cu Babilon i a siangpahrang inn cungah khan aa chawk i, ³⁰ "Mah hihi a liannganmi Babilon, keimah nih siangpahrang umnak caah keimah ṭhawnnak a nganmi le keimah upatnak langhternak caah ka sermi a si lo maw?" tiah a au. ³¹ Cuticun a chim lioah cun vancung in aw pakhat a rung i, "Maw Siangpahrang Nebukhadnezzar, ka bia hi ngai tuah: Na pennak cu chuh na si cang. ³² Minung bu sinin ṭhawl na si cang i ram sa sinah na um cang lai; cawtum bantukin ram kha kum sarih chung na ei lai. Cu tikah Cung Nung Bik nih hin minung hna pennak chungah hin uktu bawi a si i pek a duhmi hna sinah a pek ko dah ee, ti kha na hngalh lai," tiah a ti. ³³ Cu caan hrimhrim ah cun hi biaceihnak cu Nebukhadnezzar cungah cun a tlung. Minung bu chung khan ṭhawl a si i cawtum bantuk khan ram kha a ei; a pum cu van dap nih cin cikcek in a tlak i a sam cu meheh hmul bantukin a sau i a tin cu mupi tin bantukin an zum. ³⁴ Caan tinhmi cu a tlin dih tikah keimah Nebukhadnezzar nih van lei khi ka hun zoh i ka lungthin kel ah khan ka kir ṭhan. Cung Nung Bik cu ka conglawmh i Zungzal Hmunmi Pathian cu ka hlorh i ka thangṭhat: Bawi a sinak cu a dong bal lo i a uknak cu chan vialte tiangin a hmun; ³⁵ Vawlei cung i a ummi vialte hna cu zeihmanh ah rel awk tlak an si lo i Van ralkapbu hna cu a duhduh in a tuah hna; Amah cu ahohmanh nih an tlai kho lo i a tuahmi kha zeidah a si tiah ahohmanh nih an hal kho lo. ³⁶ Ka lungthin kel i ka hung kir ṭhan tikah khan ka bawinak le ka sunparnak le ka pennak lianhngannak kha pek ṭhan ka hung si. Ka tlangpi hna le ka bawi hna nih khan ka bia kha an duh. Ka pennak kha fehter a si i ka ṭhawnnak cu tam piin a karh. ³⁷ Atu cu keimah Nebukhadnezzar nih vancung Siangpahrang cu ka thangṭhat, ka hlorh i ka conglawmh, zeicahtiah a tuahmi vialte cu ahmaan dih i a lam vialte cu a ding dih, aa porhlawmi paoh cu tangah a ṭhumh tawn hna.

¹ Siangpahrang Belshazzar nih a bawi thong khat hna caah khan rawldanghnak a ser i thong khat hna he cun zu an ding. ² A hung ri nawn i cu tikah a pa Nebukhadnezzar nih Jerusalem biakinn in a rak lakmi sui hrai hna le ngun hrai hna kha va la hna u law cu hrai hna cun ka bawi hna le ka nupi hna le ka sinum hna he zu kan ding lai, tiah nawl a pek hna. ³ Cucaah Jerusalem biakinn sui hrai hna le ngun hrai hna kha an va lak hna i siangpahrang le a bawi hna, a nupi hna le a hlasatu nu hna nih cun zu dinnak ah an hman hna. ⁴ Zu cu an ding i sui pathian le ngun pathian le dar pathian le thir pathian le thing pathian le lung pathian kha an thangṭhat hna. ⁵ Cu tikah ruah lopi ah khin siangpahrang inn vampang si thuhmi, mei nih fiang bik in a ceuhmi hmun ah khin, minung kut bor pakhat a hung chuak i ca a hun ṭial zuaimai ko. Cu kutbor cu ca a hun ṭial lioah khan siangpahrang nih cun kutbor a kenglei kha a hmuh. ⁶ Siangpahrang cu a lau tuk i a daang dih; a kut le a ke vialte kha an ther dih i a khuk kha aa hnin. ⁷ Khuachia ṭhawlthiam hna le camhthiam hna le mang ihthiam hna kha, runpi hna u, tiah fak piin a au i Babilon mifim hna cu. "Hi ca ṭialmi hi a rel kho i a sullam a ka chim khotu paoh cu puan sen aih an si lai i a hngawng ah sui ṭhi rual oih an si lai i ka pennak chungah bawi ngan pathumnak an si lai," tiah a ti. ⁸ Siangpahrang mifim vialte cu an rung lut, sihmanhsehlaw caṭialmi cu a rel zong an rel kho lo i a sullam zong siangpahrang cu an chim kho lo. ⁹ Siangpahrang Belshazzar cu hmai daang le zei chim awk hngal loin a ṭhu ko i a bawi hna cu khuaruahhar in an um. ¹⁰ Siangpahrang le a bawi hna cu bia an i ruah lengmang lioah khin siangpahrang bawinu cu rawl danghnak khaan chungah cun a rung lut i, "Siangpahrang cu saupi nung ko seh! Zeicahdah na khuaruah a har i daang dihlak in na um. ¹¹ Na ram chungah hin mipa pakhat, a chung i pathian thiang hna thlarau a ngei i na pa chan ah hngalhnak a ngei ti hngalhnak a fiangmi le pathian fimnak bantuk fimnak a ngei ti hngalhmi a um. Na pa Nebukhadnezzar siangpahrang nih khan mitleh thiam hna le khuachia ṭhawlthiam hna le Khaldi mi hna le mang ihthiam hna haotu bik ah khan a chiah. ¹² Hi Daniel, siangpahrang nih Belteshazzar tiah min a sakmi hi hawi hlei in thil ti khawhnak a ngei tiah hngalh a si i hngalhnak le fimnak le mang leh khawhnak le biahar fianter khawhnak le dawi leh khawhnak a ngei; amah cu atu ah auh si seh law a sullam a chim khawh ko lai," tiah a ti. ¹³ Cun Daniel cu siangpahrang hmaiah cun an run luhpi i siangpahrang nih cun a thawh i, "Nangmah hi maw Daniel cu na si? Siangpahrang ka pa nih Judah ram in saltangmi si awkah a ratpimi hna lak i aa tel vemi cu maw na si? ¹⁴ Nangmah cu pathian thiang hna thlarau kha a ngei i fiang tein hngalh khawhnak a ngei i hawi hlei in fimnak a ngeimi na si tiah ka theih. ¹⁵ Mifim hna le khuachia ṭhawlthiam hna cu hi caṭial hi rel i a sullam chim awkah ka hmaiah an ratpi hna, sihmanhsehlaw an let kho lo. ¹⁶ Sihmanhsehlaw nang cu mang sullam kha a chim khawh i dawi leh zong kha a thiam tiah kaan theih. Cucaah caṭial cu na rel khawh hna i a sullam na chim khawh hna ahcun maimaw puan kha aih na si lai i na hngawng ah sui ṭhi rual oih na si lai," tiah a ti. ¹⁷ Cun Daniel nih siangpahrang hmaiah cun aa thawh i, "Na laksawng cu nangmah caah i chiah ko hna, a si lo le midang pe hna. Asinain caṭialmi cu siangpahrang kha kan relpiak lai i a sullam cu kan chimh lai. ¹⁸ Siangpahrang ka bawipa, Cung Nung Bik Pathian nih na pa Nebukhadnezzar cu pennak le ṭhawnnak le sunparnak le lianhngannak kha a pek; ¹⁹ cu ṭhawnnak a pekmi thawng cun mi vialte le holh phun dangdang a hmangmi vialte hna nih a hmaiah a ther in an ther i amah cu an ṭih dih. Thah a duhmi kha a thah ko hna i nunh a duhmi kha a nunh ko hna, santer a duhmi kha a santer ko hna i ṭhumh a duhmi kha a ṭhumh ko hna. ²⁰ Sihmanhsehlaw a hun i porhlawt i mah lung lawng rinh in khua a hung sak i a ruam a hung kai tikah a bawiṭhutdan cung khan amah cu ṭhumh a si i a sunparnak cu chuh a si. ²¹ Amah cu minung hna sin khan ṭhawl a si i a lungthin cu saram lungthin bantuk ah khan a cang, ramlak laa hna sinah khan khua a sa i cawtum bantukin ram kha a ei i a pum cu van dap nih cin cikcek in a tlak, cuticun Cung Nung Bik Pathian cu minung pennak cungah hin bawi a si i cu pennak a pengtu dingah cun a duhmi paoh kha a chiah hna ti a hngalh hlantiang, cuticun a um. ²² Sihmanhsehlaw a fapa, Belshazzar, nangmah nih hi vialte cu na hngal ko nain, toidornak lungthin na ngei duh lo. Vancung Pathian cu a doh in na doh. ²³ A biakinn umkheng hna cu na cabuai ah na rak putter hna i nangmah le na bawi hna le na nupi hna le na hlasatu nu hna nih cu hrai cu zu dinnak ah nan hman hna. Ngun pathian le thing pathian, zeihmanh a hmu kho lomi, a theih zong a thei kho lomi a hngalh zong a hngal kho lomi cu nan thangṭhat hna i, asinain nan nunnak a uk i nan tuahmi vialte a uk dihtu Pathian tu cu sunparnak nan pe lo. ²⁴ Cu ruangah cun Pathian nih khi kut khi hi bia ṭial awkah hin a run thlah. ²⁵ Cun a ṭialmi ca biafang cu hihi an si: Mene mene tekel u-pharsin. ²⁶ Cun a lehnak cu hihi a si: Mene ti cu Pathian nih na pennak ni cu a rel cang hna i a donghnak a phakter cang hna, ti a si; ²⁷ - ²⁸ tekel ti cu cuai thlainak ah thlai na si cang i na tling lo ti kha hmuh a si cang, tinak a si; u-pharsin ti cu, na pennak cu cheu a si cang, tinak a si i Media mi le Persia mi kha pek an si cang, ti a si," tiah a ti. ²⁹ Cun Belshazzar nih nawl a pek hna i Daniel cu puan sen kha an aih i a pennak chungah bawi ngan bik pathumnak a si tiah thawngthanhnak an tuah. ³⁰ - ³¹ Cu zan hrimhrim ah cun Khaldi mi hna siangpahrang Belshazzar cu thah a si i Media mi Darius nih pennak kha a lak, Darius cu kum sawm ruk le kum hnih a si.

¹ Ram uktu dingah khan Darius nih mangki bawi za khat le pakul a chiah hna i ² an cungah cun vuanzi pathum a chiah hna; siangpahrang duhnak kha a tlin khawh nakhnga mangki bawi hna nih cun cu vuanzi pathum hna sinah cun thawngthanhnak an tuah lengmang awk a si i cu pathum hna lak i pakhat cu Daniel kha a si ve. ³ An rianṭuannak ah cun Daniel nih vuanzi dang hna le mangki dang hna cu a thil ti khawhnak in a iap hna i cucaah siangpahrang nih ram vialte uktu ding i chiah awkah a lung chungin a ruah. ⁴ Khi tikah vuanzi pawl le mangki bawi hna nih khan Daniel nih ram a ukning sual kawl khawhnak ding caah lam an kawl, sihmanhsehlaw thil ṭhalo a tuahmi kha pakhat hmanh an hmu kho lo; zeicahtiah siangpahrang nih a fialmi kha fel tein a tuah. ⁵ A rian a tlolhnak siseh, thil ṭhalo a tuahmi siseh, zeihmanh an hmuh khawh lo caah an i thawh i, "Hi Daniel hi sual puh khawh awk zeihmanh a um lo, a biaknak lei dah i kan kawl khawh lo ahcun," tiah an ti. ⁶ Cucaah hi vuanzi hna le mangki bawi hna nih hin siangpahrang ton khawhnak ding caan ṭha kha an bawh. Siangpahrang cu an thawh i, ⁷ "Siangpahrang Darius cu saupi nung ko seh! Hi ram chung vuanzi vialte le kuzale vialte le mangki vialte le vuanthok vialte le tlangpi vialte nih kan i ceih i siangpahrang nih hin nawlbia pakhat in chuah seh law phunglam pakhat in fehter seh law, ahohmanh an si ah, kan hmai ni sawm thum chung i siangpahrang nangmah sinah si loin pathian dang sinah siseh, midang sinah siseh, thla a cammi paoh cu, chiandeih thong ah thlak si hna seh, tiah kan hna a tla. ⁸ Cucaah maw siangpahrang, nangmah nih nawlbia pakhat in chuah law a ṭial in ṭial si seh, Media mi hna le Persia mi hna nawlbia cu let khawh an si lo bantukin hi nawlbia zong cu thlen khawh a si ve nakhnga lo, na min thu law fehter tuah," an ti. ⁹ Cu tining cun Siangpahrang Darius nih cun nawlbia cu caṭial in a chuah. ¹⁰ Daniel nih cu nawlbia cu chuah a si cang ti a theih tikah a inn ah a lawi. A inn khaan cung dot ah khan Jerusalem lei hoih in thlalangawng pathum an um. Khika ah khan a tuah tawn phung a si zungzal bantukin a khuk aa bil i ni khat ah voi thum lengmang thla a cam i a Pathian kha a thangṭhat. ¹¹ A ral hna nih khan Daniel cu an tlaih khawh nakhnga caan rem cu an bawh i thla a cam i Pathian sinah nawlnak a tuah lio cu an hmuh. ¹² Cun siangpahrang sinah cun an ra i siangpahrang cu nawlbia a chuahmi kha an hung hngalhter than. "Bawipa, nangmah nih, kan hmai ni sawm thum chungah, ahohmanh nih nangmah sinah si loin pathian dang sinah siseh, minung sinah siseh, thla a cammi an um ahcun, cu hna cu chiandeih thong ah thlak an si lai, tiah na ti lo mei?" tiah an ti. Siangpahrang nih, "Asi ko, Media mi hna le Persia mi hna nawlbia cu zungzal in a hmunmi an si," tiah a leh hna. ¹³ Cucaah siangpahrang hmaika ah cun an i thawh i, "Judah mi saltangmi hna lak i aa tel vemi Daniel nih siangpahrang nawlbia cu zei ah a rel lo i a pathian sinah ni khat ah voi thum lengmang thla a cam," an ti. ¹⁴ Siangpahrang nih cun a theih tikah a lungre a thei ngaingai. Daniel khamhnak ding kha ruah aa zuam i nitlak tiangin heh tiah aa zuam lengmang; ¹⁵ khi tikah kha hna ṭhiamṭhiam nih khan siangpahrang va fuhnak ding caan rem cu an bawh ṭhan i, "Bawipa nih na hngalh awk cu, Media mi hna le Persia mi hna phung in siangpahrang nih nawlbia siseh, phung siseh a chuah cangmi cu thlen khawh a si ti lo, ti hi a si," tiah an va ti. ¹⁶ Cucaah siangpahrang nih cun nawlbia a chuah i Daniel cu an ratpi i chiandeih thong ah cun an thlak; sihmanhsehlaw Daniel cu a thawh i, "A rian na ṭuan zungzalmi na Pathian nih khan an khamh ko lai," tiah a ti. ¹⁷ Lungpi pakhat kha an rak put i thong inn ka ah cun an chiah, ahohmanh nih Daniel cu khamh awkah a karlak ah rian an ṭuan khawh nakhnga lo siangpahrang nih cun a ca khenhnak in le a bawi hna ca khenhnak in a khenh. ¹⁸ Siangpahrang cu a inn ah a kal i cu zan cu rawl a ul; nu ahohmanh a sinah ratter a duh hna lo i i hngilh kho loin a um. ¹⁹ Khua a hung dei tikah, a ceu cangkate khin, a tho i ther le phang lengmang in thonginn ah cun a va kal. ²⁰ Siangpahrang cu cuka cu a va phak tikah Daniel cu lau lengmang in a vun auh i, "Daniel, a nungmi Pathian salpa, a rian na ṭuan zungzalmi na Pathian nih cun chiandeih hna sin khan an khamh kho maw?" tiah a ti. ²¹ Cun Daniel nih cun a hun leh i, "Siangpahrang cu saupi nung ko seh! ²² Ka Pathian nih chiandeih hna cu an kaa phih awkah a vancungmi kha a run thlah hna i cucaah ka cungah zeihmanh ṭhat lonak an tuah lo, zeicahtiah amah nih a ka hmuh ning ah kei cu a sual lomi ka si i cuhleiah maw siangpahrang, nangmah cungah ṭhat lonak zeihmanh ka tuah lo," tiah a ti. ²³ Siangpahrang cu aa lawm tuk hringhran i Daniel cu khor chung in a lengah cawi u, tiah nawl a pek hna. Cucaah Daniel cu lengah an cawi i amah nih a Pathian kha aa bochan caah a cungah hmarung zeihmanh a um lo. ²⁴ Siangpahrang nawlbia in Daniel sual phawtu vialte hna an nupile le an fale he chiandeih thong chungah cun an vun thlak hna i a ṭuang hmanh an phak manh hlanah khin an rak zuanhnawh hna i an ruh he an zeizong tein an khai dih hna. ²⁵ Cun Dairus Siangpahrang nih vawlei cung dihlak i miphun vialte le holh phun vialte sinah cun ca a kuat hna i, "Nan thluachuahnak cu karh chin ko hna seh! ²⁶ Ka peng chung dihlak ah mi vialte nih Daniel i a Pathian cu nan ṭih lai i nan upat lai: Zeicahtiah amah cu Pathian nung, zungzal in a hmunmi, A ṭhawnnak a dong lo i a bawi sinak a dong lomi a si — ²⁷ Amah cu khamhtu, chuahtertu, hmelchunhnak le khuaruahharnak van le vawlei cungah a sertu a si, Amah nih Daniel cu chiandeih hna ṭhawnnak chungin a khamh cang," a ti. ²⁸ Cuticun Daniel cu Darius uk chung le Persia mi Sairas uk chungah thluachuak in a um.

¹ Babilon siangpahrang Belshazzar a bawi kum khatnak ah, Daniel nih a ihkhun i a ih lioah khan mang le langhnak kha a lu chungah an hung lut. Cun a mang cu a ṭial i a ṭialmi cu hitihin aa thawk: ² "Zan i langhnak ka hmuhmi ah keimah Daniel cu khua ka cuan i rili nganpi pakhat, van thli pali hna nih a tilet an thawhtermi kha ka hmuh, ³ cun sahrang ngan pipi pali rili chung cun an hung chuak i pakhat le pakhat kha an i dang dih. ⁴ A hmasa bik cu chiandeih bantuk a si nain mupi thla bantuk a ngei. Ka hei zoh i cu ah cun a thla cu an phawi hna i vawlei cun an vun cawi i minung bantukin a ke pahnih in an dirter; cun amah cu minung lungthin zong kha an pek. ⁵ Cun a dang pakhat, a pahnihnak cu ka hmuh ṭhan i vom bantuk a si. Ui ṭhut in a ṭhu i a kaa ah hnak ruh pathum aa seh. Amah cu nawl pek a si i, "Tho tuah, na duh tawk in sa cu ei tuah," ti a si. ⁶ Hi hnuah hin ka hei zoh ṭhan i a dang pakhat ka hmuh ṭhan, pawlai he aa lomi sahrang a si i a keng ah va thla pali a ngei, hi sahrang hi lu pali a ngei i siangpahrang nawl ngeihnak kha pek a si. ⁷ Cun zan i langhnak ka hmuhmi hna chungah cun, sahrang palinak kha ka hmuh, ṭihnung ngai le tuksapur ngai a si i a ṭhawng hringhranmi a si, a ha cu thir an si i a tin cu dar an si. Zeizong vialte kha a khai hna i a ei hna i a tangmi paoh cu a lamh hna. Amah hlan i a ummi sahrang hna pakhat he hmanh khan an i lo lo, zeicahtiah amah cu ki pahra a ngei. ⁸ A ki kha ka zoh lio hna ah cun ki dang pakhat, ki hmete an lak i a hung chuah kha ka hmuh i cu ki hmete nih cun umnak a hmuh khawh nakhnga a um ciami hna lak i ki pathum kha a thlongh hna. Cun cu ki nih cun minung mit le minung kaa a ngei i aa porhlaw i tluang a khawng. ⁹ Ka zoh ko lioah khan bawi ṭhutdan hna cu an hun hun hna i zungzal in a nungmi cu ṭhutdan cungah khan a hung ṭhu. A puan cu hawhra bantukin a rang i a sam cu tuuhmul thiang bik bantukin a thiang. A bawiṭhutdan cu meizik lengkekual cungah hun a si i meizik kha an chuak i a ṭhutdan cu meialh nih a tuam. ¹⁰ A rianṭuantu dingah mi a thongthong in an um i a hmaiah cun a nuainuai in an dir. Biaceihnak cu hun timh a si i cauk cu an hun kau hna. ¹¹ Ka zoh peng ko lioah cun ki hmete aa porhlawtnak le a tluangkhawnnak cu ka hei theih lengmang ko. Cun ka zoh peng ko i sahrang palinak cu an thah i a ruak cu mei chungah an paih i an hrawh. ¹² A dang sahrang hna kha an bawinak cu chuh an si nain caan khat le khuacaan pakhat cu nun onh an si rih. ¹³ Zan i langhnak ka hmuhmi ah cun minung a lomi pakhat cu van khuadawm he a rat kha ka hmuh; zungzal in a nungmi kha a hei naih i a hmaiah cun a va dir. ¹⁴ Bawinak le sunparnak le siangpahrang ṭhawnnak kha amah cu pek an si i cucaah miphun zakip le holh phun zakip nih a rian kha an ṭuan. Bawi a sinak cu zungzal in a hmunmi bawi sinak, zeitikhmanh ah a dong lo ding a si i siangpahrang ṭhawnnak a ngeihmi cu zeitikhmanh i hrawh khawh lomi ṭhawnnak a si. ¹⁵ Langhnak ka hmuhmi hna nih cun ka khuaruah an ka harter i ka lungre a thei ngaingai. ¹⁶ Keimah Daniel nih khika i a dirmi pakhat kha ka hei fuh i hi thil vialte hna hi an sullam zeidah a si tiah ka hal. Cun amah nih cun a sullam cu a ka chimh. ¹⁷ "Hi sahrang ngan pipi pali hna hi, vawlei cungah a hung um dingmi pennak pali an si. ¹⁸ Sihmanhsehlaw Cung Nung Bik mithiang hna nih cun siangpahrang ṭhawnnak kha an hmuh lai i zungzal in an i ngeih lan lai," tiah a ti. ¹⁹ Cun sahrang palinak sullam zong kha hngalh ka duh fawn. Kha sahrang kha hawi dang he an i lo lo i a thir ha le a dar tin he khan ṭih a nung hringhranmi a si ko. Zeizong vialte kha a khai dih hna i a ei dih hna i a tangmi vialte cu a lamh dih hna. ²⁰ Cun a lu cung i ki pahra hna le a hnu deuh i ki dang pakhat a hung chuak i a hung chuah cangkate i a dang ki pathum a thlongh hna kong zong kha hngalh ka duh. Cu ki nih cun mit le kaa a ngeih i porhlawtnak bia le tluangkhawnnak bia kha a chim ṭualmal hna. A dang hna nakkhan ṭih a nung deuh. ²¹ Ka zoh ko lioah cun cu ki cu mithiang mi hna he khan ral an i do i annih cu a tei hna. ²² Cun zungzal in a nungmi nih cun biakhiahnak kha Cung Nung Bik mithiang hna ca i a ṭha lei in a tuah i mithiang mi hna nih cun siangpahrang ṭhawnnak an hun hmuh caan kha a hung phan. ²³ Cun hihi a sullam an ka pekmi cu a si: "Sahrang palinak nih hin vawlei cungah pennak a hung chuak ding kha a hmuhsak. Pennak dang he khan an i dang lai i vawlei kha a ei dih lai i a lamh lai i a den lai. ²⁴ Ki pahra nih khan hi pennak chungah siangpahrang pahra an chuah lainak kha an hmuhsak, cun a hnuah khan siangpahrang a dang pakhat a hung chuak lai i amah hlan i a ummi hna he khan an i lo lai lo i siangpahrang pathum hna kha a tei hna lai. ²⁵ Cung Nung Bik kha zeihmanh ah a rel lai lo i Cung Nung Bik mithiang hna kha a hrem hna lai. An biaknak phung a si tawnmi caan le phung hna kha thlen a timh hna lai i mithiang hna cu a kut chungah kum thum le a cheu an um lai. ²⁶ Cun biaceihnak kha a hung um lai i amah cu a bawinak kha chuh a si lai i a donghnak ah cun hrawh a si lai i hloh a si lai. ²⁷ Siangpahrang sinak siseh, bawi sinak siseh, vanrang tang i a ummi pennak hna lianngannak vialte cu siangpahrang ṭhawnnak an ngeihmi cu zungzal hmunmi ṭhawnnak a si lai i peng kip le ram kip nih an rian an ṭuanpiak hna lai i an nawl an ngaih hna lai," a ti. ²⁸ Hika ah hin hi kong cu a dong. Kei Daniel tu cu ka khuaruahnak nih van a ka sanh i a dangh zongin ka daang dih; hi thil hna tu cu ka lungchung in kaa cinken hna.

¹ Siangpahrang Belshazzar a bawi kum thum kum ah, Elam ram khuapi Susa khua i ka um lioah langhnak pakhat keimah Daniel sinah a ra lang i hmasa i langhnak ka rak hmuhmi bantuk kha a si. ² Hi langhnak ka hmuhmi ah hin Ulai tiva kam kha ka hei cuan. ³ Khua ka hei zoh i cu ah cun tuukawng pakhat ki pahnih a ngeimi keimah le tiva kam i a dir ko kha ka hmuh. Cu a ki cu an pahnih in an sau i a hnu deuh i a hung khomi cu a dang pakhat nakkhan a sau deuh. ⁴ Tuukawng nih cun nitlaklei le chaklei le thlanglei a nam len hna kha ka hmuh. A hmaiah sahrang zeihmanh an dir kho lo i a ṭhawnnak chungin chanh khotu ahohmanh an um fawn lo. Tuah a duhmi paoh kha a tuah ko i a ruam a hung kai ngaingai. ⁵ Mah hihi ka ruah lioah, chikkhatte ah khin nitlaklei in mehehtum pakhat a hung chuak i khulrang tuk in a kal caah a ke nih vawlei a tawng manh lo; a mit pahnih hna karlak ah ki fongpi pakhat a ngei. ⁶ Tiva le keimah karlak i a dirmi tuukawng ki pahnih a ngeimi ka hmuhmi kha a hei fuh i a thazang a dihumnak in a hei nam. ⁷ Tuukawng cu a hei naan i a thinhun cu a hei chuahhnawh i tuukawng cu a suk i a ki pahnih kha a khiah hna; tuukawng nih cun rak leh venak thazang a ngei lo. Mehehtum nih cun vawlei ah a hrilh i a lamh i tuukawng cu a chanhtu ahohmanh an um lo. ⁸ Cun mehehtum cu aa porhlaw chin lengmang i a ṭhawn salingte ah cun a ki ngan cu a kiak buk ko. Cun a hmun ah cun ki pali an hung chuak i kaa dang lei cio kha an sawh. ⁹ Cu hna lak i pakhat chung cun ki hmete pakhat a hung chuak i thlanglei le nichuahlei le ram vialte lak i ram ṭha cem cu a thazang kha khuaruahhar in a langhhnawh hna. ¹⁰ Vancung ralkapbu tluk i lianhngan khi a duh i cu bu hna chung i tlawmpal le arfi tlawmpal cu vawlei ah a thlak hna i a lamh hna. ¹¹ Vancung siangpahrang hmanh kha zeirello in a um i raithawinak an pek zungzal tawnmi kha a hrawh i hmunthiang chung biaknak zong kha a hrawh. ¹² Vancung ralkapbu hna zong cu a tei hna i pekchanh zungzal tawnmi raithawinak cu a thurhhnawmh i biaknak taktak cu vawlei ah a hlonh; a tuahmi thil vialte ah hin a hlawhtling dih. ¹³ Cun vancungmi pakhat nih a dang vancungmi pakhat bia a hal kha ka theih i, "Hi langhnak caan hi zei can dah a sau lai? Pekchanh zungzal tawnmi raithawinak hi zei can dah ngol a si lai? Zei can dah vancung ralkapbu hna le biakinn hi vawlei ah lamhchih an si lai?" a ti. ¹⁴ Cun lehnak bia cu a hung chuak i, "Zinglei raithawinak thong hnih le za thum, zanlei raithawinak thong hnih le za thum an tlin tiang a si lai; cun Biakinn cu remh ṭhan a hung si lai," tiah a ti. ¹⁵ Langhnak ka hmuhmi hi a sullam zeidah a si hnga tiah keimah Daniel nih hngalh kaa zuam. Ruah lopi ah ka hmaiah minung he aa lomi a hung dir khi ka hmuh. ¹⁶ Cun Ulai tiva lei khan aw pakhat ka theih i, "Gabriel, mipa kha langhnak a sullam kha chim tuah," tiah a ti. ¹⁷ Gabriel cu a ra i ka pawngah khan a dir i ka ṭih tuk caah vawlei ah ka tlu. Sihmanhsehlaw a ka chawnh i, "Maw mipa, langhnak na hmuhmi hi vawlei donghnak kong a si," tiah a ti. ¹⁸ Bia a ka chimh tikah khan mangcanghlan in ka um i vawlei ah ka tlu; sihmanhsehlaw a ka tlaih i ka umnak hmun ah khan a ka dirter. ¹⁹ Cun a ka thawh i, "Pathian thinhunnak nih zeidah a chuahter lai ti kha kan hmuhsak lai; langhnak na hmuhmi nih hin a sawhmi cu donghnak caan kha a si. ²⁰ Ki pahnih a ngeimi tuukawng na hmuhmi kha Media le Persia hmuhsaknak a si, ²¹ mehehtum kha Grik pennak a si i a mit pahnih karlak i a nganmi a ki kha a siangpahrang hmasa bik a si. ²² Ki hmasa bik a kiah i ki dang pali nih a hun rolhtu ki dang pali hna an sullam cu hihi a si: cu pennak chung cun pennak pali an chuak lai, sihmanhsehlaw an ṭhawnnak nih pennak hmasa ṭhawnnak kha a tluk lai lo, tinak a si. ²³ Cu pennak hna an donghnak caan a nai tik le An ṭhat lo tuk hringhran i dantat awk an si tikah, Siangpahrang pakhat, a lung a ṭhawng ngaimi le a sual ngaimi le hlen thiam ngaimi a hung um lai. ²⁴ A ṭhawnnak cu a ngan ngaingai lai, Sihmanhsehlaw a ṭhawnnak cu amah thazang thawngin a si lai lo. Rawknak tampi kha a tuah lai i thil a tuahmi paoh ah a hlawhtling lai. Miphun nganngan hna le miphun thiang kha a hrawh hna lai. ²⁵ Amah cu a zer caah zernak in khua a khanmi ah khan a hlawh a tling lengmang lai; Thil ngan pipi kha a lung chungin a ruah a khan hna lai i Bawi vialte Bawipa hmanh kha a zuam lai i amah cu tei a si lai nain minung kut in a si lai lo. ²⁶ Zanlei raithawinak hna kong le zinglei raithawinak hna kong i phuannak na hmuhmi an sullam hi biatak a simi an si; Sihmanhsehlaw langhnak na hmuhmi hi na thuh rih hna lai, Zeicahtiah hi langhnak a vung tlin tik khi cu hmaileipi ah khin a si te lai," tiah a ti. ²⁷ Cun keimah Daniel cu ka tha a dih i ni tam nawn cu ka zaw i ka it. Cun ka tho i siangpahrang nih a ka fialmi rian cu ka ṭuan ṭhan. Sihmanhsehlaw phuannak ka hmuhmi nih cun ka khuaruah a ka harter i ahohmanh nih a sullam an ka chim kho fawn lo.

¹ Ahasuerus fapa Darius (a chuahkehnak lei in ti ahcun amah cu Media mi a si i amah cu Khaldi mi hna ram chung bawi i sermi a si) a bawi kum khatnak ah, ² keimah Daniel cu cathiang kha ka rel i Bawipa nih profet Jeremiah sinah a chimmi bia ningin Jerusalem khua cu kum sawm sarih chung a rawk lai timi kong kha ka ruat. ³ Cun Bawipa Pathian sinah cun nawlnak in le rawl ulhnak in le buri puan i aih in le vutcam i phulh in thla ka cam i hi bangin sualphuannak kha ka tuah: ⁴ "Bawipa, nang cu a lian a ngan i ṭih a nungmi Pathian na si, nangmah an dawtu hna le na nawlbia a zulmi hna sinah cun na biakamnak kha zumhawktlak tein na zulh; ⁵ kannih cu kan sual cang, palhnak le thil ṭhalo kha kan tuah cang; kannih nih nangmah cu kan in doh i na nawlbia le na phunglam hna kha hnulei kan chit hna. ⁶ Kan siangpahrang hna le kan bawi hna le kan pupa hna le hi ram chung mi vialte hna sinah nangmah min in bia a rak chimtu na sal na profet hna cu an bia kan rak ngai hna lo. ⁷ Maw Bawipa nangmah cu na ding zungzal ko i kannih cu kan dihlak in kan tuahmi cu ningzak a si zungzal ko — Judea ram chungah a ummi le Jerusalem khua chungah a ummi si u sih, ram hla ah siseh, ram nai ah siseh, na kan ṭhekmi si u sih, nangmah sinah zumhawktlak loin khua a sami kan si ko. ⁸ Maw Bawipa, kan siangpahrang hna le kan bawi hna le kan pupa hna cung i ningzahnak a tlun bantuk khan kan cung zongah a tlung ve ko; nangmah cungah kan dihlak in kan sual ko. ⁹ Bawipa kan Pathian cu kan in do nain nangmah nih cun na kan zaangfah i na kan ngaihthiam. ¹⁰ Bawipa kan Pathian cu na bia kan in ngai lo, na sal profet hna thawngin kan caah na chiahmi na phunglam cu kan zul hna lo. ¹¹ Israel mi vialte nih na phunglam kha kan buar i nangmah kha na bia kan in ngai lo, cucaah chiatser thaltanh in na sal Moses sinah na pekmi phungbia chung i a ummi chiatserhnak cu kan cungah ruah sur in a sur; zeicahtiah nangmah cungah cun kan rak sual cang. ¹² Kanmah kong ah siseh, a kan uktu hna kong ah siseh, na chimmi vialte kha na tlinter i kan cungah le Jerusalem khua cungah vawlei cung dihlak i a tlung tawnmi harnak vialte hna nakin a ngan deuhmi harnak kha na tlunter; ¹³ asinain Bawipa kan Pathian, na thin damternak caah zeihmanh kan tuah lo; ahmaan lo thil kan tuahmi kha kan i ngaichih lo i na biatak kha kan zul fawn lo. ¹⁴ Bawipa kan Pathian, nangmah nih na tuahmi thil vialte cu a hmaanmi a si i kannih cu nangmah bia a ngai lomi kan si caah nangmah nih kannih dantat awk kha naa tim i dan cu na kan tat taktak. ¹⁵ "Maw Bawipa kan Pathian, nangmah nih na mi hna Izipt ram in na chuahpi hnanak ah khan na ṭhawnnak cu na langhter i na ṭhawnnak cu atu tiangin hngalh camcin a si ko. Kannih cu kan sual cang, kannih cu kan palh cang. ¹⁶ Maw Bawipa, nang cu na ding ko, cucaah Jerusalem khua cungah na thin hung ti hlah. Jerusalem cu nangmah khua a si, na tlang thiang a si. Kan sualnak le kan pupa hna nih an rak tuahmi ṭhat lonak ruangah kan pawngkammi hna nih na mi le Jerusalem cu an kan zohchuk cang. ¹⁷ Cucaah atu cu na sal ka thlacamnak le kan nawlnak cu ka ngaihpiak ko sawh maw Bawipa nangmah thawng lawnglawng in na hmai cu a ṭhingmi na Biakinn cungah tlanter ko. ¹⁸ Maw Pathian, na hna chi law kan theihpiak law kan zohpiak law kan ṭiaonak le na min a pumi khua cu kan hmuhpiak ko sawh; kannih nih dinnak kan tuahmi thawngin si hin loin nangmah na vel thawng lawngin kan thlacamnak na hmai i kan rak chuahpinak cu a si. ¹⁹ Maw Bawipa thei ko, maw Bawipa kan ngaithiam ko, maw Bawipa ngai law tuah ko; Mi vialte nih nangmah cu Pathian na si kha an hngalh naklai, rau sawh hlah. Hi khua le hi mi hna cu nangmah ta an si," tiah ka ti. ²⁰ Cuticun bia ka chim i thla ka cam i keimah ka sualnak le ka mi hna an sualnak cu ka phuan i Bawipa ka Pathian hmaika ah cun a tlang thiang caah cun nawlnak kha ka tuah. ²¹ Thla ka cam lioah cun langhnak i ka rak hmuh cang mipa, Gabriel kha zanlei raithawi caan ah khin khulrang ngaiin ka pawngah a ra zuang. ²² Fiang tein ka chimh i, ²³ "Daniel, na hngalhnak kha fianter awkah ka ra. Na thlacamnak kha na thawk tikah Pathian nih an leh. Pathian nih an dawt caah an lehnak chimh awkah atu hi ka ra. A sullam ka chim lioah bia cu ṭha tein ruat tuah: ²⁴ Na mi hna le nan khua thiang caah zarh sawm sarih kha chiah a si; khi hnuah raldohnak kha a dong lai; sualnak kha a dih lai; ṭhat lonak kha ngaihthiam a si lai i zungzal dinnak kha run tlunter a si lai, langhnak le profet bia chimhnak kha a tling lai i Hmun Thiang Bik cu chiti thuh a si lai. ²⁵ Cucaah mah hihi thei law hngal tuah: Jerusalem cu hmasa a sining ah khan a siter ṭhan lai i sak a si ṭhan lai ti bia a chuah ri in Pathian chiti thuhmi bawi a chuah tiangah, zarh sarih a rau lai; cun zarh sawm ruk le zarh hnih chung cu hmasa a sining ah khan siter ṭhan a si lai i a khua chung lam hna le tilaknak kahcham hna cu remh ṭhan an si lai. ²⁶ Zarh sawm ruk le zarh hnih a dongh tikah cun chiti thuhmi kha ahohmanh a hmun rolhtu um loin thah a si lai. A hun namtu bawi i a ralkapbu hna nih cun khuapi le Biakinn cu an hrawh hna lai. Donghnak cu tilian bantukin a ra lai i ahohmanh luat khawh lomi raldohnak rawhralnak a si lai. ²⁷ Cu a ṭhawngmipa nih cun mi tampi he zarh khat chung a fekmi biakamnak a tuah lai i raithawinak le pekchanhnak kha zarh cheu chung a ngolter hna lai. Biakinn a sannak bik hmun ah khan ṭhiotu fihnung caah donghnak caan Pathian nih a timhmi a phak hlantiang cuka ah cun ṭiaonak chuahtertu thil fihnung cu a um lai.

¹ Persia siangpahrang Sairas a bawi kum thum kum ah Belteshazzar ti zongah a min sak a simi Daniel sinah bia pakhat kha phuan a si. Hi bia cu biangai a si nain a sullam hngalh awk a har ngaingaimi bia a si. Langhnak a hmuhmi thawng khan a sullam a hun hngalh khawh. ² Khi caan ah cun kei Daniel cu zarh thum kheng zun ngaiin ka um. Rawl thaw paohpaoh kha ei kaa sum, sa zong ka ei lo, zu zong ka ding lo, cun zarh thum a dih hlan cu sathau zong kaa thuh lo. ⁴ Thla hmasa bik thla, a ni kul le ni linak ni ah cun tiva nganpi Tigris kamah cun ka dir, ⁵ cunglei ka hun zoh i mipa pakhat lahmangṭhia puan aa aih i a tai ah ofir sui taisawm aa sawmhmi kha ka hmuh. ⁶ A pum cu topaz lungvar bantukin a tleu i a hmai cu nimtlau bantukin a ceu; a mit cu mei ceu bantukin a ceu i a ban le a ke hna cu dar kheng bantukin an cer; cun bia a chim tikah a aw cu mibupi aw thawng bantuk a si. ⁷ Keimah Daniel lawnglawng nih cu langhnak cu ka hmuh, ka pawng i a ummi hna nih cun an hmu lo, sihmanhsehlaw ṭihnak nganpi nih khan a tlunhnawh hna i an i zukphiak dih i keimah lawng kha ka tang i hi langhnak nganpi cu ka zoh ko. ⁸ Ka thazang cu a um ti lo i ka hmai cu aa dan tuk hringhran caah ahohmanh nih an ka hngal kho hnga lo. ⁹ A bia thawng cu ka theih tikah vawlei ah ka tlu i mangcanghlan in ka um i ka bawk. ¹⁰ Chikkhatte ah khin kut pakhat nih a run ka tlaih i ka kut le ka khuk in a ka thawh. ¹¹ A ka thawh i, "Daniel, nangmah cu Pathian dawtmi na si. Dir law kan chimh laimi bia hi ngai tuah, zeicahtiah keimah cu nangmah sinah thlah ka si," tiah a ti. A ka chawnh ah cun ther lengmang in ka hung dir i ¹² "Daniel, na thin phang hlah, zeicahtiah hngalh awkah na lung na bunh ni khan le na Pathian hmaiah na pum sifah naa pek ni khan, na thlacamnak cu Pathian nih a theih cang i cu na thlacamnak lehnak ah cun ka ratnak hi a si. ¹³ Sihmanhsehlaw Persia pennak a zohkhenhtu vancungmi nih khan ni kul le ni khat a ka kham. Cun Persia ram ah khan keimah lawngin kaltak ka si caah vancungmi bawi bik pakhat nih khan a ra ka bawmh. ¹⁴ Cun ka ratnak cu, hmailei ah na mi hna cungah zeidah a tlung lai ti chimh awkah a si i hi langhnak hi hmailei kong langhnak thar a si," tiah a ti. ¹⁵ Hi bia hi ka sinah a chim lioah ka lu ka khun i biachim awk zeihmanh ka hngal lo. ¹⁶ Cun chikkhatte ah khin mi bantuk a simi nih ka hmur kha a ka tawngh. Cun ka kaa kha ka hun an i ka hmai i a dir lioah cun ka chawnh i, "Bawipa, hi langhnak nih hin ka thazang a ka lak tuk i ther loin ka um kho lo. ¹⁷ Kei cu a bawipa hmai i a dirmi sal bantuk ka si. Zeitindah nangmah sinah bia ka chim khawh lai? Ka thazang a um ti lo, ka thaw zong a um ti fawn lo," tiah ka ti. ¹⁸ Cun mipa bantuk a simi nih cun a ka tawngh ṭhan i ka tha cu a hung tlung ṭhan. ¹⁹ A ka thawh i, "Pathian nih an dawt, cucaah na thinphang hlah, na caah zeizong vialte a ṭha dih ko lai. Na lung ṭhawng ko," tiah a ti. Bia a ka chimh dih tikah ka thazang cu a hung tlung ṭhan i, "Ka chawn ko, bawipa, zeicahtiah thazang na ka pek cang," tiah ka ti. ²⁰ - ²¹ Cun a ka thawh i, "Zeicahdah na sinah ka rat na hngal maw? Biatak Cauk chung i ṭialmi kha na sin i phuan awkah a si. Atu cu ka va kal lai i Persia ram zohkhenhtu vancungmi kha ka va tuk lai. Cun cu hnuah Grik ram zohkhenhtu vancungmi kha a hung chuak lai.

¹ Hi bawi hna pahnih hna dohnak ah, Israel mi zohkhenhtu vancungmi Mikhael dah ti lo cu, ahohmanh a ka bawmtu an um lo. ² Cun atu i kan chimh dingmi bia hi biatak a si," a ti. Persia ram ah hin siangpahrang a dang pathum an hung chuak rih lai i a palinak nih cun a dang vialte kha rumnak ah tam piin a thlau hna lai; cun a ṭhawnnak kha a chawva in a vun karhter tikah Grik pennak doh awkah vawlei pumpi kha a ṭhanghter lai. ³ Khi tikah ralkap a simi siangpahrang kha a chuak lai. Pennak kaupi kha a uk lai i a duhmi thil paoh kha a tuah ko lai. ⁴ Sihmanhsehlaw a si lingte ah khin a pennak cu a kuai lai i chaklei, thlanglei, nichuah, nitlak tiin aa cheu lai. A pennak cu a tefa hna sinah khan a lan lai lo, midang tu nih an co lai i sihmanhsehlaw amah tlukin an ṭhawng lai lo. ⁵ Cun thlanglei siangpahrang, Izipt siangpahrang cu a hung ṭhawng lai, sihmanhsehlaw a ralbawi hna lak i pakhat kha a ṭhawng deuh chinchin lai i ram kau deuh chinchin kha a uk lai. ⁶ Cun kum tam nawn hnuah khin Izipt siangpahrang nih a fanu cu Siria siangpahrang kha a vatter lai i ṭanṭinak an tuah lai. Sihmanhsehlaw cu ṭanṭinak an tuahmi cu sau a hmun lai lo i amah cu le a sin i a kalmi a sinum hna le a fale a va cu an dihlak in thah an si lai. ⁷ Cun a rualchan pakhat nih khan Siria siangpahrang ralkap cu a tuk hna lai i ralhau chungah khan a luhhnawh hna lai i a tei hna lai. ⁸ An pathian milem cu a lak hna lai i a sungmi an thil, sui le ngun hna he khan Izipt ram ah a kalpi hna lai. ⁹ Cun daihnak caan kum tlawmpal hnuah khin Siria siangpahrang nih Izipt ram cu a tuk lai, sihmanhsehlaw an rak khirh khawh lai. ¹⁰ A fapale nih khan Siria siangpahrang cu ralkapbu nganpi kan pumh hna lai, tiah an hnek lai. An lak i pakhat cu dawnh khawh lomi tilian bantukin a lan thluahmah ko lai i an ral hna ralhruang a phanh tiang a nam chih lengmang ko hna lai. ¹¹ Thlanglei siangpahrang cu a thin a phawh lai i chaklei siangpahrang he i tuk awkah a kal lai, chaklei siangpahrang nih ralkapbu nganpi a pumhmi kha a kut chungah chanh a si lai. ¹² Cuticun ral a teinak cu aa porhlaw lai i ralkap tampi a thahmi hna ruangah cun tluang a khawng lai, sihmanhsehlaw teitu a si zungzal ve lai lo. ¹³ Khi tikah chaklei siangpahrang nih khan hmasa nak hmanh in a ngan deuhmi ralkapbu he cun a ra ṭhan lai. ¹⁴ Hi caan ah hin mi tampi nih thlanglei siangpahrang kha an doh lai, cun Daniel, na miphun chung mipuar hna zong nih an hmuhmi langhnak ruangah an doh ve lai, sihmanhsehlaw an sung lai. ¹⁵ Khi tikah chaklei siangpahrang kha a ra lai i raltuknak chuntlung kha a ser hna lai i kulhmi khua pakhat kha a lak lai; thlanglei ralkap hna nih khan an celh hna lai lo; an ralkap ṭhawng bikbik hna hmanh nih khan an um hmun kha an i tlaih kho lai lo. ¹⁶ Cucaah a rung hranhtu ral nih khan a duhduh in a ṭuan ko lai i ahohmanh nih an dawn kho lai lo. Ram vialte lak i ram dawh bik chungah cun aa hmung lai i cu ram cu a ning piin a kut toiah a um lai. ¹⁷ Thlanglei siangpahrang pennak vialte cu a kut tang i chiah awkah aa tim lai, cun a ral kha tei awkah a fanu pakhat kha rak ṭhit awkah a hei thlahhnawh lai, sihmanhsehlaw cu ngaknu cu sau a um lai lo i aa tinhmi zong kha a tlinh kho fawn lai lo. ¹⁸ Khi hnuah rili kamlei le tikulh hnalei ah khan aa mer lai i mi tampi cu sal ah a tlaih hna lai, sihmanhsehlaw ramdang ralbawi pakhat nih ṭhat lonak a tuahmi cu a ngolter lai i ṭhat lonak a tuahmi kha amah cung lila ah a kirter lai. ¹⁹ Amah ralhau chung lila ah khan a kir ṭhan lai i khika ah sunghnak kha a tong lai i cucu a donghnak a si lai. ²⁰ Amah cu pakhat nih a hun chaan lai i cu pa nih cun hramhram in siangpahrang ngunkhuai cu kholh awkah bawi pakhat a thlah lai, sihmanhsehlaw hi siangpahrang zong cu tlawmpal ah khin a donghnak a phan lai i asinain mah cucu lenglang in siseh, raltuknak hmun ah siseh, a si lai lo. ²¹ Siria siangpahrang a hun chaangtu cu miṭhalo a si lai, amah cu siangpahrang si awkah aa tlak lomi a si lai i asinain daihnak caan lioah pennak chungah cun a holh nalnak thawngin aa sawh lai i hlennak in uknak cu a lak lai. ²² Amah a dohtu ralkapbu kha a tei thluahmah hna lai i Pathian tlangbawi hmanh kha a hloh lai. ²³ Hrokhrawl in ramdang he ṭanṭinak kha a ser duahmah lai i amah a zultu mi kha tlawmte hna hmanh seh law amah cu nawlngeihnak kha a hun ngei lai i daihnak caan lioah khan fek ṭhup in aa hmung lai. ²⁴ Ram chung i a rum bikbik hmun kha a tei hna lai i a pa le a pu hna nih an rak tuah khawh lomi kha a tuah lai, a zultu hna kha hranchaw le thilri kha a phawt hna lai. Ralhruang kha nam awkah khua a khan lai sihmanhsehlaw caan tawite ca lawngah a si lai. ²⁵ A ṭhawnnak dihlak le a ralṭhatnak dihlak in aa thawh lai i thlanglei siangpahrang doh awkah khan ralkapbu nganpi a hruai hna lai, sihmanhsehlaw thlanglei siangpahrang nih khan ralkap tampi le bu nganpi he a rak doh ve lai; asinain thlanglei siangpahrang cu a hmun lai lo zeicahtiah mirawitu hna nih khan khuakhannak an tuah lai. ²⁶ Amah he rawl a ei ṭimi kha amah ṭhat lonak tuahtu an si lai, a ralkapbu cu hloh an si lai i raltuknak hmun ah mi tampi an thi lai. ²⁷ Cu siangpahrang pahnih hna cu pakhat cung i ṭhat lonak tuah kha an i tim peng lai i cabuai pakhat ah an ṭhu ko lai nain pakhat le pakhat cu lih in bia an i hleng lai i caan rem a phak rih lo caah aho an ca hmanh ah ṭhathnemnak zeihmanh a um lai lo. ²⁸ Siria siangpahrang cu hranchaw a lakmi vialte he khan inn lei i kir awkah aa thawh lai i Pathian mi hna an biaknak phung kha hrawh hrimhrim aa tinh lai. A tuah duhmi paoh kha a tuah ko lai i a ram ah a kir lai. ²⁹ Hnu deuh ah thlanglei ram kha voi khat cu a vung hranh ṭhan lai, sihmanhsehlaw hmasa bantuk khan cun a hlawhtling ti lai lo. ³⁰ Rom mi nih khan tilawng in an rathnawh lai i aa chol lai. Aa mer lai i a thinlinhnak kha biakamnak thiang cungah a bungh lai; a kir leiah an biaknak a rak hlawtu hna lungthin cheuhning khan a ṭuan lai. ³¹ Amah nih a thlahmi ralkap hna nih khan hmunthiang le a kulhnak kha an thurhhnawmh lai i pekchanh tawnmi raithawinak kha an hloh lai. Cun khika hmun ah khan, "Ṭhiotu Fihnung" kha an chiah lai. ³² Biakamnak a rak hlawtmi hna cu lih in a lem khawh hna lai i annih cu amah leiah khan a mer khawh hna lai, sihmanhsehlaw an Pathian leiah zumhawktlak tein a ummi hna cu fek tein an dir lai i annih nih cun an rak doh ve lai. ³³ Hi miphun a hruaitu hna mifim hna nih khan zapi cu lam an hruai hna lai, sihmanhsehlaw caan tlawmte chung cu mei le vainam in hremmi ah an tla lai i saltannak le ramhnak kha an in lai. ³⁴ Cu bantukin an hrem hna lioah, anmah a fonhtu a tampi hna kha mah zawn lawng ruatmi an si nain, bawmhnak tlawmte cu an hmuh ko lai. ³⁵ Hi hruaitu hna lakah hin a cheu cu thah an si lai i annih cu hneksak cikcek le thianh an si lai i a vaar in an vaar lai. Asinain caan khiahmi cu a donghnak a phan ṭhiamṭhiam ve lai. ³⁶ Siria siangpahrang nih cun a duhmi paoh cu a tuah ko lai, aa hlorh lai i aa porh lai i pathian dang vialte cungah khan aa chia lai i pathian vialte hna Pathian kha ṭhalo in a vawlhpamh lai. Pathian nih dan a tat hlantiang cu a hlawhtling lengmang ko lai, zeicahtiah Pathian nih tuah awkah a ruah cangmi cu a tuah ko lai. ³⁷ A pupa hna nih an rak biakmi pathian le nu hna nih an dawtmi pathian kha zeihmanh ah a rel hna lai lo; pathian zei bantuk hmanh kha zei ah a rel hna lai lo, amah tu kha an cungah aa hlorh lai. ³⁸ Cu hna nakcun ralhau pathian, a pupa hna nih an rak hngalh bal lomi kha sui le ngun le lungvar le a man a sungmi laksawng in a upat deuh hna lai. ³⁹ A ralhruang a fek bikbik hna cu ramdang pathian a biami kha a venter hna lai. Amah cu uktu ah a rak cohlangmi hna kha rian nganngan a pek hna lai i laksawng ah vawlei kha a ṭhenh hna lai. ⁴⁰ Cun Siria siangpahrang cu a caan a dih dengmang tikah Izipt siangpahrang nih khan a tuk lai i a ṭhawnnak vialte khan a rak doh ve lai — a rangleng hna le a rangtum hna le a tilawng kha a hman hna lai. Izipt ram cu tilian bantukin a luhhnawh lai. ⁴¹ Ram vialte lak i ram dawh cem zong cu a luhhnawh lai i minung thong tampi a thah hna lai. Edom ram le Moab ram le Ammon ram a tangmi tu kha cu an luat lai. ⁴² Ram khat hnu ram khat a tuk duahmah hna lai i Izipt ram hmanh a luat hlei lai lo. ⁴³ Izipt nih aa thuhmi a sui vialte hna le a ngun vialte hna le a ro vialte hna cu aa kalpi hna lai i Libia ram le Ethiopia ram zong kha a tei hna lai. ⁴⁴ Khi tikah nichuahlei le chaklei in thawngpang a hung thangmi nih amah cu an lauter lai i mi tampi kha thah awk le hloh awkah thinhung ngaiin a chuak lai. ⁴⁵ A bawi puan inn cu rili le tlang thiang, tlang vialte lak i aa dawh bikmi karlak ah cun a phun lai, sihmanhsehlaw ahohmanh bawmtu ngei loin a donghnak kha a phan lai.

¹ Khi caan ah a nganmi vancungmi, na miphun a zohkhenhtu hna, Mikhael kha a hung chuak lai, Cun hi miphun nih miphun an si hramthawk in an tonmi harnak, harnak ṭhalo bik kha a tlung lai. Sihmanhsehlaw khi caan ah cun Pathian cauk chungah an min khumh a simi na mi hna cu an luat lai. ² Leidip chungah a itmi hna lakin tampi cu an hun i ṭhang lai, a cheu cu zungzal nunnak chungah an hun i hlau lai i a cheu cu zungzal huatnak le ningzahnak chungah an hun i hlau lai. ³ Hruaitu fim hna cu van i arfi ceu bantukin an ceu lai i Lamding ah mizapi a hruaitu hna cu zungzal in zungzal tiang arfi bantuk an si lai. ⁴ Sihmanhsehlaw Daniel, hi bia cu bia thli ah chia hna law donghnak caan a phak hlantiang cauk cu phit ko. Mi tampi cu lungdong in an um lai i dantatnak cu a rit ngaingai lai," tiah a ti. ⁵ Cun keimah Daniel nih khua ka hei zoh i midang pahnih an dir ko kha ka hmuh hna, pakhat cu tiva hitilei kam ah a dir i a dang pakhat cu tiva khattelei kamah a dir. ⁶ Cun pakhat nih cun puan hmangṭhia aa aih i tiva a hnalei deuh ah a ummipa cu a hei chawnh i, "Hi hmelchunhnak hna hi an dongh tiangah zei can dah a rauh rih lai," tiah a hal. ⁷ Puan hmangṭhia aa aihmi nih cun a kehlei kut le a orhlei kut kha van leiah a hler hna i, "Caan khat, caan hnih le caan cheu chung a si lai; mithiang mi hna a hremtu hna kha a donghnak caan a phak ve tikah hi thil vialte cu an donghnak an phan ve lai," tiah zungzal a nungmi Pathian min chalh in chiat a ser kha ka theih. ⁸ A chimmi cu ka theih, sihmanhsehlaw a sullam cu ka hngal lo, cucaah ka thawh i, "Bawipa, hi thil vialte hna hi zeitindah an dongh lai," tiah ka ti. ⁹ Cun a ka leh i, "Daniel va kal ko, zeicahtiah hi bia hna cu donghnak caan a phak hlantiang biathli le biathup ah chiah awk an si. ¹⁰ Mi tampi cu an i thianh lai i an thiang lai, vaar virver in an um lai, sihmanhsehlaw miṭhalo hna nih cun an hngal lai lo i ṭhat lonak kha an tuah lengmang ko lai, hruaitu fim hna lawng nih khan an hngalh lai. ¹¹ Nifate in pekchanh tawnmi raithawinak kha an ngol i cucu Ṭhiotu Fihnung kha an bunh thawk in ni thong khat za hnih le sawm kua a rau lai. ¹² Ni thong khat za thum le sawm thum panga a dih tiang zumhawktlak tein a ummi hna cu thluachuakmi an si. ¹³ Nang cu a donghnak tiangin zumhawktlak tein um ko. Cun na thi lai i chan donghnak caan ah na hmuh awk hnga kha co awkah nang cu na tho te lai," tiah a ti.