AMOS

AMOS

¹ Hi bia hi Amos bia an si, amah cu Tekoa khuami, tuu zua pakhat a si ve i Israel kong ah langhnak a hmuhmi hna hi Judah siangpahrang Uzziah a bawi lio le Israel siangpahrang Jehoash fapa Jeroboam a bawi ve lio, li hninh hlan kum hnih ah khan a si. ² Amah nih cun, Bawipa cu Zion in a rung huk i Jerusalem in khuarit in a rung ri; Tuukhal hna ram hninghno cu an car i Karmel tlangpar cu a ro dih, tiah a ti. ³ Hihi Bawipa bia an si. Damaskas nih ṭhat lonak kha pakhat hnu pakhat a tuah lengmang caah, A cung i dantatnak ka tlunter ding kha ka let lai lo. Annih nih Gilead kha thir ha bunhmi facang cilnak thingtum in an cil. ⁴ Cucaah Hazael inn chungah cun mei ka thlah lai i Cu mei nih cun Benhadad inn ṭhaṭha vialte cu a kangh dih hna lai. ⁵ Damaskas mingan vialte cu ka den dih hna lai i Aven nelrawn i a ummi vialte le Beth-eden a uktu bawifung aa putmi cu ka hloh dih hna lai; Aram mi hna cu Kir ah sal ah hruai an si lai. Cucu Bawipa bia a si. ⁶ Hihi Bawipa bia an si: Gaza nih ṭhat lonak kha pakhat hnu pakhat a tuah lengmang caah, A cung i dantatnak ka tlunter ding kha ka let lai lo; Annih nih saltangmi kha an bu ning piin an kalpi hna i Edom ah khan an chiah hna. ⁷ Cucaah Gaza kulhnak vampang cungah khan mei ka thlah lai i Cu mei nih cun a ralhruang vialte kha a kangh dih hna lai. ⁸ Ashdod i a ummi vialte hna le Ashkelon a uktu bawifung aa putmi vialte kha ka hloh dih hna lai; Ekron kha ka kut ka merhnawh lai i Filistin mi a tangmi hna kha an rawk lai. Cucu Bawipa bia a si. ⁹ Hihi Bawipa bia an si: Tair nih ṭhat lonak kha pakhat hnu pakhat a tuah lengmang caah A cung i dantatnak ka tlunter ding kha ka let lai lo, Annih nih sahlawh rualchan sinak kha philh riangmang in, Saltang hna kha an bu ningpi in Edom ah an chiah hna. ¹⁰ Cucaah Tair kulhnak vampang cungah khan mei ka thlah lai i Cu mei nih cun a ralhruang vialte cu a kangh dih hna lai. ¹¹ Hihi Bawipa bia an si: Edom nih ṭhat lonak kha pakhat hnu pakhat a tuah lengmang caah, A cung i dantatnak ka tlunter ding kha ka let lai lo. Annih nih vainam kha i put riangmang in an phunhawi mi kha thah awkah an kawl hna i phun khat an sinak lungthin kha an thah. An thin cu dong loin a hung thluangthluan ko i An thinlinhnak cu zungzal in a alh. ¹² Cucaah Teman cungah mei ka thlah lai i Cu mei nih cun Bozrah ralhruang vialte kha a kangh dih hna lai. ¹³ Hihi Bawipa bia an si: Ammon mi hna nih ṭhat lonak pakhat hnu pakhat an tuah lengmang caah, An cung i dantatnak ka tlunter ding kha ka let lai lo. An ram kha kauhter an duh caah ¹⁴ Gilead ram nelrawn i fapawi nu hna cu an hlai dih hna Cucaah Rabbah kulhnak vampang cungah cun mei ka thlah lai i Cu mei nih cun an ralhruang vialte kha a kangh dih hna lai; Cu ni ah cun raltuknak hmun khan aunak a um lai i Thlichia le ṭotho an hrang lai. ¹⁵ Cun an siangpahrang cu a bawi hna he khan sal ah an kalpi hna lai. Cucu Bawipa bia a si.

¹ Hihi Bawipa bia an si: Moab nih ṭhat lonak pakhat hnu pakhat a tuah lengmang caah A cung i dantatnak ka tlunter ding kha ka let lai lo. Annih nih Edom siangpahrang ruh kha vutcam ah cang lakin an khangh. ² Cucaah Moab cungah mei ka thlah lai i An khua hna chung i Kerioth ralhruang kha, cu mei nih cun a kangh dih hna lai. Aukhuannak thawng lakah cun Moab cu a thi lai i A thihnak cu raltuknak aunak thawng le muko aw thawng lakah cun a si lai. ³ Cun a uktu hna bawi hna kha anmah lakah cun ka thah lai i An bawile vialte cu amah sinah cun ka thah chih dih hna lai. Cucu Bawipa bia a si. ⁴ Hihi Bawipa bia an si: Judah nih ṭhat lonak kha pakhat hnu pakhat in a tuah lengmang caah A cung i ka tlunter ding dantatnak kha ka let lai lo. Annih nih Bawipa phunglam kha zei ah an rel lo i A nawlbia kha an zul lo; An pupa hna nih an rak zulhmi pathian deu hna nih khan a pingah an hruai hna. ⁵ Cucaah Judah cungah mei ka thlah lai i Cu mei nih cun Jerusalem ralhruang vialte kha a kangh dih hna lai. ⁶ Mah hihi Bawipa bia an si: Israel nih ṭhat lonak kha pakhat hnu pakhat in a tuah lengmang caah A cung i ka tlunter dingmi dantatnak kha ka let lai lo. Annih nih a sual lomi kha ngun ah an zuarh hna i Sifakmi kha kedan tuah khat ah an thlen hna. ⁷ Annih nih sifakmi kha an lu vawlei ah an lamh chih hna i Mi nauta pawl kha lam thlang ah an en hna. Pa le fa nih nu pakhat kha an pahnih in an fuh i Cuticun ka min kha an thurhhnawmhter. ⁸ Biahrennak ca i an lakmi puan cungah khan biakṭheng pawng kip ah an it i An Pathian inn chungah khan dantatnak in an lakmi zureu kha an din. ⁹ Asinain, an hmaiah Amor mi kha a hrawktu hna cu keimah ka si, Amor mi cu sidar thing bantukin an sang i kuhthing bantukin an ṭhawng nain, Keimah nih cunglei i an thei le tanglei i an hram cu ka hrawh hna. ¹⁰ Amor mi hna ram co awkah Izipt ram in an chuahpitu hna kha keimah ka si i Ram car chungah kum sawm li an hruaitu hna kha keimah ka si. ¹¹ Nan fapa hna lakin profet ka chuahter hna i Nan tlangval hna lakin Nazir mi ka chuahter hna. Nannih Israel mi hna, cuticun a si taktak ko lo maw? tiah Bawipa nih a ti. ¹² Sihmanhsehlaw nannih nih Nazir mi kha zu nan dinter hna i Profet hna cu bia chim hlah u, nan ti hna. ¹³ Ngai hmanh u, leng cu thil khat tein chonh tikah a awnh cuahmah bantukin Kei zong, nan ka neh tuk caah ka hrum ve. ¹⁴ A khul a rangmi zong kha a zam hmanh ah a him hlei lai lo, A ṭhawngmi zong kha a ṭhawnnak cu san a tlai hlei lai lo; Ralkap zong nih khan amah le amah aa khamh kho hlei lai lo. ¹⁵ Thal kah thiammi kha fek tein a dir kho hlei lai lo, Khulrang in a le khomi zong kha a luat hlei lai lo. Rangcung ralkap zong kha amah le amah aa khamh kho hlei lai lo. ¹⁶ Khi ni ah cun ralkap ralṭha bik hmanh kha a hriamnam chuh a si lai i a zam lai. Hihi Bawipa bia hrimhrim a si.

¹ Nannih Israel mi hna, Bawipa, nih nan sinah a chimmi bia hi ngai tuah u, Izipt ram in a chuahpimi nan phun ningpi in nan sinah a chimmi bia hi ngai tuah u: ² Vawleicung miphun vialte lakah hin Nanmah lawnglawng hi kan theihhngalhmi hna nan si, Cucaah nan ṭhat lonak vialte ruangah hin dan kan tat hna lai. ³ Mi pahnih nih hnatlaknak ngeih hmasa loin khual an tlawng ṭi bal maw? ⁴ Chiandeih cu sa sehmi a ngeih lo ahcun tupi chungah a awn bal maw? Chiandeih tum no cu sehmi zeihmanh a ngeih lo ahcun a kua chungah a ngur bal maw? ⁵ Coktarh a um lo ahcun vawlei i chiahmi rap ah khan va cu aa foih bal maw? Rap cu zeihmanh foih loin a pelh bal maw? ⁶ Khua chungah muko cu tum a si tikah mi cu lau loin an um bal maw? Khua chungah vanchiatnak a tlun tikah cucu Bawipa tuahmi a si lo maw? ⁷ Bawipa Pathian nih aa tinhmi kha, a sal profet hna theihter hmasa loin zeihmanh a tuah bal lo. ⁸ Chiandeih a huk, ahodah ningṭi loin a um kho? Bawipa Pathian nih bia a chim: ahodah chim loin a um kho? ⁹ Ashdod khua chung i siangpahrang inn hna le Izipt ram chung i siangpahrang inn hna ah cun va dir law, "Samaria tlang ah cun i pum tuah u law, Khika i tuainak a ummi kha le a mi hna lakah pakhat le pakhat i hremnak a ummi kha va zoh tuah u," ti hna. ¹⁰ An ralhruang chungah zaang-ennak le firnak in thil tampi a khong luaimaimi hna nih hin, dinnak kha zei a si tiah an hngal lo, tiah Bawipa hrimhrim nih a ti. ¹¹ Cucaah Bawipa nih hitihin a ti: Ral nih ram cu an kulh lai i nan ralhau hna cu an bauh dih hna lai, Cun nan inn ṭhaṭha hna cu an hrawh dih hna lai. ¹² Hihi Bawipa bia an si: Tuukhal nih chiandeih kaa chungin, a ke pahnih khat maw a hna pelpawi ceo maw, a chuh ṭhan khawh tawn bantukin, Samaria ram chung i ihkhun dawhdawh le ṭhutdan nuamnuam cung i a ṭhumi Israel mi hna lak khan a pelpawite ceo khamh an si lai. ¹³ Ngai u law Jakob tefa hna kha theihter hna u. Mah hihi Bawipa Pathian Ralkapbu Pathian bia hrimhrim a si. ¹⁴ Israel mi cu an sualnak ruangah dan ka tat hna ni ah Bethel i a ummi biakṭheng cu dan ka tat hrimhrim lai: Biakṭheng ki cu tan an si lai i vawlei ah an tla lai. ¹⁵ Khualum caan ca inn le khuasik caan ca inn kha ka hrawh veve hna lai; Vuiho inn kha an rawk lai i inn ngan pipi kha an cim dih lai. tiah Bawipa nih a ti.

¹ Nannih Samaria tlangcung i a tlongmi Bashan caw, sifak kha a hrem i retheimi kha a rial chih i vale kha, zu rak pu u, a ti lengmangmi hna, hihi ngai tuah u: ² Bawipa Pathian nih a thiannak chalh in chiat a ser i, "Nannih cu nan dihlak in sio in an in hruai hna caan kha a ra lio. ³ Khua kulhnak vampang a pemnak awng khan an in chuahpi hna lai i, Harmon tlang ah an in hlonh hna lai." tiah Bawipa nih a ti. ⁴ "Bethel ah ra u law ra sual u; Gilgal ah ra u law sual chinchin u! Zing fate in nan raithawinak kha rak pu u, Nan cheu hra cheu khat kha ni thum dan lengmang ah rak chuahpi hna u. ⁵ Thilnu cawhmi lawmhnak changreu kha rak pu hna u; Mah lungtho tein pekchanhmi thawhlawm cu pechan u, tiah zapi thanh hna u. Zeicahtiah nannih Israel mi nih nan tuah duhmi tham cu, thil a ningcangte i tuah ceo kha pei a si ko cu! Hihi Bawipa bia hrimhrim a si. ⁶ Nan khua chungah mangṭam a tluntertu le Nan inn chungah rawl ei awk ngei loin an tuahtu hna cu keimah ka si; Sihmanhsehlaw keimah sinah nan kir duh hlei lo. Hihi Bawipa bia hrimhrim a si. ⁷ Rawl ṭuannak caan tiangah thla thum a duh rih lioah, Nan cungah ruah sur loin a khamtu cu keimah ka si; Khua pakhat cungah cun ruah cu ka surter ko lai i Khua dang pakhat cungah cun sur loin ka umter ko lai; Lo pakhat cu ruah nih a surh ko lai i Sihmanhsehlaw lo dang pakhat cu a surh lo caah a car ko lai. ⁸ Cucaah khua pahnih pathum hna cu khua dang pakhat ah khan ti din awkah sawn lengmang in an kal lai nain an tihal cu a riam kho hlei lai lo. Hitihin a si nain keimah sinah nan kir duh hlei lo, tiah Bawipa hrimhrim nih a ti. ⁹ A kangh in a kangmi thli le bangbuar in kan hrem hna; Nan dum le nan mitsur lo hna cu ka hrawh hna; Nan theipi kung hna le nan oliv kung hna cu khaubawk nih an ei dih hna; Sihmanhsehlaw ka sinah nan kir hlei lo. Hihi Bawipa bia hrimhrim a si. ¹⁰ Izipt cung i ka tluntermi rai bantuk kha kan thlahhnawh hna, Nan tlangval hna le nan rangtum run hna cu vainam in ka thah hna. Nan riahhmun hna cu a thut in ka thutter hna, Sihmanhsehlaw ka sinah nan kir hlei lo. Hihi Bawipa bia hrimhrim a si. ¹¹ Pathian nih Sodom le Gomorrah a hrawh bantuk khan nan cungah rawhralnak ka tlunter; Nannih cu mei alh chungin chuahmi mei thingthu bantuk nan si, Sihmanhsehlaw ka sinah nan kir hlei lo. Hihi Bawipa bia hrimhrim a si. ¹² Cucaah Israel, hihi na cung i ka tuah ding cu a si: Cun hihi na cung i ka tuah ding cu a si caah maw Israel, na Pathian ton awkah i tim tuah. ¹³ Khuari le thlitu a sertu, Vawlei cungah ruah tampi a surtertu, Zinglei khuaceu kha minmei chah piin a hup i Vawlei cung a sannak hmun i aa chawkmi cu amah kha a si — A min cu Bawipa, Ralkapbu Pathian a si.

¹ Maw Israel, ṭah hla kan lawhmi hi ngai tuah: ² Ngaknu thiang Israel cu tho ṭhan ti lo dingin a tlu cang, Amah a ram ah cun a bawk i ahohmanh amah a thotu ding an um lo. ³ Hihi Bawipa bia an si: Ral doh awkah minung thong khat he aa thawhmi khuapi cu, Za khat he lawng nganh a si lai i Za khat he aa thawhmi cu pahra he lawng nganh a si lai. ⁴ Mah hihi Bawipa nih Israel mi sinah a chimmi bia a si: ⁵ Nun nan duh ahcun keimah sinah ra u, Bethel ah kal hlah u, Gilgal ah kal hlah u; Zeicahtiah Gilgal cu kalpi a si lai i Bethel cu siasal inn ah a cang lai. ⁶ Nun nan duh ahcun Bawipa sinah ra u, Cu ti a si lo ahcun Josef kha mei bantukin a kangh lai, Bethel kha ahohmanh a hmihpiaktu um loin a kangh lai. ⁷ Biading kha a bingtalet in a thlai i, Dinnak kha vawlei ah a hril i, ⁸ Amah cu Likuk-canthum le Fizang kha a ser i, Muihnak kha zinglei ah a cantertu a si; Rili chung ti kha a auh hna i vawlei chungah a thlet hna; ⁹ Amah cu Firuk kha Fitlaw hnuah a chuahter i Mitsur thei a lotu timi arfi a chuah hnuah, Firuk kha a tlaktertu cu amah kha a si. Hi thil a tuahtu hi a min ah Bawipa a si. ¹⁰ Ṭhat lonak tuahtu zung i a chuahpitu a hua i Biatak a chimmi a fihmi hna: ¹¹ Nannih nih sifakmi kha nan lamhchih hna i Rawl kha hramhram in nan chuh hna caah Nannih nih lung remhmi inn cu i sak hna hmanh u law an chungah nan um lai lo; Nannih nih mitsur dum ṭhaṭha i ser hmanh u law, an hang kha nan ding lai lo. ¹² Zeicahtiah nan ṭhat lonak kha zeitluk in dah a tam i Nan sualnak kha zeitluk in dah a tam ti cu ka hngalh ko. Nannih nih a sual lomi kha nan hrem hna i Tlanhnak man caah mi kha nan hren hna; Zeihmanh a ngei lomi cu biaceihnak zung khan nan ṭhawl hna. ¹³ Cucaah khi caan ah cun khuaruat thiammi cu dai tein an um ziar ko lai, Zeicahtiah khi caan cu caan chia a si lai. ¹⁴ Nan nun nakhnga, chiatnak si loin ṭhatnak tu kha kawl u, Cu ti a si ahcun, kanmah leiah a um nan ti bangin Bawipa, Ralkapbu Pathian cu nan sinah fek tein a um lai. ¹⁵ Ṭhat lonak kha hua u law ṭhatnak kha duh u; Biading kha biaceihnak zung ah bawiṭhutdan cungah ṭhutter u; Cuticun Bawipa, Ralkapbu Pathian cu Josef tefa a tangmi hna cungah khan zaangfahnak a hei ngei phum ko hnga. ¹⁶ Cucaah hihi Bawipa, Ralkapbu Pathian bia cu an si: Lam kip ah khan ṭahnak a um lai i Khuachung tlonlennak bualrawn paohpaoh ah khan aihramnak a um lai. Lothlo kha ṭap tiah an ti hna i Ṭahhla lawh thiammi hna cu, ṭap u tiah an kawh hna lai. ¹⁷ Mitsur dum chung kip ah khan ṭahnak a um lai; Zeicahtiah nan lakah kaa chawk lai, tiah Bawipa nih a ti. ¹⁸ Bawipa ni aa hngahhlangmi nannih mihrut hna, Bawipa ni cu nan caah a sullam zeidah a si lai? Muihnak a si lai, ceunak a si lai lo. ¹⁹ Minung nih chiandeih a zamtak i vom he an i ton ni bantuk, Inn chungah a luh i vampang a vun dah i rul nih a rak cuk ni bantuk a si lai. ²⁰ Bawipa ni cu khuaci muih ni taktak a si ko lai, Ceunnak ni a si lai lo; Ceunak um loin a mui dupmi ni a si ko lai. ²¹ Nan puai hna cu ka huat hna i zei ah ka rel hna lo, Nan sunhsakmi nan pumhnak hna cu ka duh hna lo. ²² Nannih nih nan raithawinak hna le nan thawhlawm hna kha nan ka pek tikah ka cohlang hna lai lo, Raithawinak ca i nan hmanmi saṭil hna zong kha ka cohlang duh hna lai lo. ²³ Nan hla aw kha ka theihter ti sawh hna hlah u; Nan thonglawi aw kha ka celh ti hna lo. ²⁴ Sihmanhsehlaw biading kha ti bantukin luanter u law Dinnak kha a cat lomi tiva bantukin luanter camcin ko u. ²⁵ Nannih Israel mi hna, kum sawm li chung ramcar chung i nan um lioah khan, Raithawinak le laksawng nan ka pe bal hme maw? ²⁶ Pe hlah, nan rak ka pe bal lo, sihmanhsehlaw atu cu nan caah nan i sermi nan siangpahrang Sakkuth le nan siasal Kai-uan, nan arfi pathian hna cu nan i phorh hna lai i, ²⁷ Damaskas pinah sal i va taan awkah kan ṭhawl hna lai. Cuticun Bawipa nih a ti; a min cu Ralkapbu Pathian a si.

¹ Zion ah nuam ngaiin a ummi hna le Samaria tlang cungah harnak tong loin a ummi hna, Nan cungah ningzahnak a tlung lai. Miphun hna lak i a ngan bikbik hna sinah khin va kal u law Annih cu va tlawng tuah hna u, Israel mi hna. ² Kalneh ah cun va kal u law va zoh tuah u, Hamath Ngan ah cun hei lan u law Filistin mi hna khua Gath ah cun vung kal tuah u. Hi ram hna nak hin nan ṭhawng deuh maw? Nan ram tah an ram nakin a ngan deuh maw? ³ Harnak ni cu hmailei ah kan thawn khawh lai tiah nan ruah, Sihmanhsehlaw zaang-ennak tu kha khulrang in nan ratter chin. ⁴ Nannih cu vuiho in ṭamhmi nan ihkhun ah khan nan it i Nan ṭhutdan nem cungah khan nan zau, Saṭil run chung i a thaumi tuufa hna le cawfa hna kha nan ei; ⁵ Tingtang kha nan i tum i David bantukin hlasaknak thilri kha nan i ser hna; ⁶ A kheng ning pipi in mitsur hang kha nan din i Chiti ṭha bikbik khan nan i cenh; Sihmanhsehlaw Josef nih rawhralnak a in ni ah khan nan ngaih a chia lo. ⁷ Cucaah saltangmi hna lakah khan hmaisuang ah nannih cu nan kal lai i Cucu nan i nuamhsaihnak a donghnak cu a si lai. ⁸ Bawipa Pathian hrimhrim nih chiatser in hi bangin a ti: Jakob a ruamkainak cu ka fih, a ralhruang hna cu ka fih hna; Khuapi cu a chung i a ummi vialte hna he ral kut chungah ka chanh lai. ⁹ Inn pakhat chungah mi pahra an taan ahcun an dihlak in an thi lai. ¹⁰ A thimipa cu, a ruakvuinak a sersiamtu a rualchan nih khan, a ruak cu innchung khan a chuahpi lai. Innchung a ken bik i a ummi kha, "Khaka ah khan aho an um ti maw?" tiah a hei auh tikah, "An um ti lo," tiah a rak leh lai i, cun aa thawh lai i, "Hna chet hlah, Bawipa min cu chim awk a si lai lo," tiah a ti lai. ¹¹ Zeicahtiah Bawipa nih nawlbia a chuah lai i Cu nawlbia a chuahmi thawng cun inn ngan cu a cim dih lai i inn hme cu a pelpawi ah an i chuah lai. ¹² Rang cu lungpang cungah a tli kho maw? Rili cu cawtum in lei bantukin thuan khawh a si maw? A si kho lo, asinain nannih nih cun biading kha sivai ah nan ser i Dinnak ziaza a man cu a khaami thil ah nan canter. ¹³ Lodebar nan lak khawh caah khan nan i thangṭhat i "Karnaim cu kanmah thazang tein kan la lo maw?" nan ti. ¹⁴ Maw Israel, nangmah doh awkah miphun pakhat ka chuahter lio i Annih nih nan ram cu Lebo-hamath in Arabah horkuang tiang an hrawh dih lai. Hihi Bawipa, Ralkapbu Pathian bia hrimhrim a si.

¹ Bawipa Pathian nih a rak ka hmuhsakmi cu hihi a si: Siangpahrang nih khuachiah caah a lak tawnmi rawl vui hmasa bik hna zultu i rawl biapi bik kha khoh hram aa thawk kate ah khin khaubawk bu nganpi pakhat cu a rak keuh ve. ² Ram chung i ram hring kha an ei dih dengmang tikah khin kaa thawh i, "Maw Bawipa Pathian, ngaithiam ko hna. Hi hnuah hin zeitindah Jakob cu a nun khawh ti lai? Zeihmanh a tuah khomi a si fawn lo," tiah ka ti. ³ Cun Bawipa nih cun a bia cu a let i, "Hihi cu a tlung ṭhan kun lai lo," tiah a ti. ⁴ Bawipa Pathian nih a ka hmuhsak ṭhanmi cu mah hihi a si: Bawipa Pathian nih a thukmi rili le sermi thil vialte kha khangh dih awkah mei kha a auh. ⁵ Cun kei nih kaa thawh i, "Maw Bawipa Pathian, Ngol ko tuah, tiah kan nawl; Hi hnuah hin Jakob nih zeidah a tuah kun lai? Amah cu a hme tuk hringhran fawn," tiah ka ti. ⁶ Bawipa nih cun a bia cu a let i, "Hi zong hi a tlung ṭhan kun lai lo," tiah a ti. ⁷ Cun hihi Bawipa nih a ka hmuhtermi cu a si ṭhan hoi: Mipa pakhat cu tahnak hri aa put i vampang pawngah khan a dir. ⁸ Cun Bawipa nih a ka thawh i, "Amos, zeidah na hmuh," a ka ti. Kei nih, "Tahnak hri," tiah ka leh i, "Ka mi hna cu tahnak hri in ka tah hna lai i ka ngaithiam ṭhan bal ti hna lai lo. ⁹ Isak khuahrumbo hna cu an rawk lai i Israel hmunthiang hna cu pakpalawng ah an cang lai; vainam i put in ka tho lai i Jeroboam innchungkhar cu ka tuk hna lai," tiah a ti. ¹⁰ Khi tikah Bethel khua i tlangbawi Amaziah nih khan Israel siangpahrang Jeroboam cu thawng a thanh i, "Israel miphun lakah nangmah doh awkah Amos nih khua a khan lengmang ko i a chimmi bia hi kan ram nih a ing kho ti lo. ¹¹ Amah nih cun aa thawh i, ’Jeroboam cu vainam in a thi lai i Israel mi hna cu an ram in lamhlapi ah sal ah kalpi an si lai,’ a ti," tiah a ti. ¹² Cun Amos hrimhrim cu Amaziah nih cun a thawh i, "Hmuh thiampa, kal cang! Judah ram ah cun vung kal ko. Khika ah cun vung kal law na pawcawmnak zong na hmuh khawh deuh lai. ¹³ Sihmanhsehlaw Bethel ah cun zeitikhmanh ah bia chim ṭhan ti hlah, zeicahtiah Bethel cu siangpahrang hmunthiang, siangpahrang inn pei a si cu," tiah a ti. ¹⁴ Cun Amos nih cun Amaziah cu a leh i, "Kei cu profet ka si lo, profet fa zong ka si lo; saṭil khal le saikamor thing thei a cingmi ka si. ¹⁵ Sihmanhsehlaw saṭil ka khalh lio hna ah khan Bawipa nih a ka lak riangmang i, "Va kal law ka mi Israel mi kha va chim hna," tiah a ka ti. ¹⁶ Cucaah cun atu cu Bawipa bia hi ngai tuah u: "Israel mi cu bia chim hna hlah, Isak tefa hna cu na hruh bia cu nawnnokpi lengmang hna hlah, nan ka ti. ¹⁷ Cucaah Bawipa bia cu hihi a si: Na nupi cu khuapi chung hlawhhlangnu ah a cang lai i Na fapale hna le na fanule hna cu vainam in an thi lai. Na vawlei cu tahnak hri in an tah hna lai i mi an phawt hna lai; Nangmah cu lawkihmi ram ah na thi lai; Cun Israel cu anmah an ram khan lamhlapi ah an kalpi hna lai i sal ah an tang lai," tiah a ti.

¹ Bawipa Pathian nih a ka hmuhtermi cu hihi a si: Ṭhal caan thei bawm pakhat a um i, ² "Zeidah na hmuh, Amos?" tiah a ka ti. Cun kei nih ka thawh i, "Ṭhal caan thingthei a hminmi ti le dongh bawm pakhat," tiah ka ti. Cun Bawipa nih cun a ka thawh i, "Ka mi Israel mi hna caah caan cu a hmin cang. Zeitikhmanh ah ka ngaithiam ṭhan ti hna lai lo. ³ Khi ni ah cun siangpahrang inn i hla a sa tawnmi nu hna kha a ai in an ai lai i, ’A kenkip ah miruak tam tuk an hlonh liangluang ko hna. Hnachet loin um u," an ti lai," tiah a ti. ⁴ "Sifakmi kha a rialchih i retheimi kha a ramhmi hna, hihi ngai tuah u; ⁵ nannih nih nan i thawh i, ’Zeitik ah dah thla thar puai cu a dih lai i kan rawl cu kan zuar lai? Zeitik ah dah sabbath cu a dih lai i kan changvut kha zuar awkah kan chuah lai,’ nan ti. Cun ephah kha hmetter deuh u sih law shekel kha nganter deuh u sih; cun cuailung kha zanter deuh u sih; ⁶ cun sifakmi kha ngun in caw hna u sih law retheimi kha kedan tuah khat caah tlai hna u sih, nan ti fawn. Cucaah hihi ngai tuah u: ⁷ Bawipa nih Jakob lianhngannak in chiat a ser cang: An tuahmi kha ka philh bal lai lo, a ti. ⁸ Hi ruangah hin vawlei hi i hnin loin a um kho hnga maw? A cung i a ummi vialte hna cu ngaihchia loin an um kho hnga maw? Ram cu a pumpi in Nail tiva lian bantukin a tho lai i Izipt Tivapi bantukin a hlonh in aa hlonh lai. ⁹ Bawipa nih hi bangin a ti: Khi ni ah cun ni kha chun ah ka tlakter lai i Vawlei kha chun lingpi ah ka muihter dup lai. ¹⁰ Nan puai cu ṭahnak ah ka ser hna lai i Nan hla hna cu mithi ngaihnak hla ah ka canter hna lai. Nannih cu nan dihlak in buri kha kan kaihter hna lai i nan lu kha kan kawngh dih hna lai. Fapa ngeih chunte a thih i an ṭah bantuk ah khin nan puai cu ka ser lai, A donghnak cu a khaat in a khami ni a si lai. ¹¹ Cun Bawipa nih hi bangin a ti: Ram chungah mangṭam, Rawl ca i mangṭam si loin le ti ca i tihal si loin, Bawipa bia theih duh ca i mangṭam cu ka tlunter lai ni a ra lio. ¹² Mi cu Bawipa bia kawl ah rili in rili tiang an kal lai i Chaklei in nichuahlei tiang an kal lai, Sihmanhsehlaw an hmu lai lo. ¹³ Khi ni ah cun ngaknu dawhdawh hna le tlangval hna cu tihal in an baa lai; ¹⁴ Cun Samaria pathiannu Ashimah in chiat a ser i, ’Maw Dan, na pathian nunnak in chiat ka ser,’ a ti i ’Beersheba lei lam tiangin chiat ka ser,’ a timi vialte cu Tho ti lo dingin an tlu lai.

¹ Bawipa cu biakṭheng pawng i a dir kha ka hmuh i hi bangin a ti: "Innleng kha aa hninh dih nakhnga tung par kha tu tuah hna, Cun cuka i a ummi hna cu an lu ah a tlak hna nakhnga kuai cikcek in deng hna. An dih cikcek tiangin vainam in ka thah hna lai. Ahohmanh a luatmi an um lai lo, A tangmi him tein a ummi zong an um lai lo; ² Sheol i an vung kal hmanh ah, Khika hmanh cun ka kut nih a vun hnuh hna lai; Vancung i an kai zongah, Khika hmanh cun ka va ṭhumh hna lai. ³ Karmel tlangpar zongah i thup hna hmanh seh law Khika zongah cun ka kawl hna lai i ka char hna lai; Rili a thuhnak hmun ka mit hmuh lonak zongah i thup hna hmanh seh law Khika zongah cun rili chung rulpi kha seh hna tiah ka fial lai. ⁴ An ral hna nih sal ah a bubu in an hruai hna zongah, Khika zongah cun vainam kha that hna ka ti ṭhiamṭhiam lai; An ṭhatnak ding caah si loin a chiatnak ding caah An cungah ka mit kha ka chiah peng ko lai. ⁵ Bawipa ralkapbu Pathian nih vawlei kha a tawngh i a ti dih, A cung i a ummi vialte cu an ro dih; Nail tiva lian bantukin vawlei cu a tho i Izipt Tivapi bantukin a ṭum ṭhan. ⁶ Pathian nih a hlei cu van tawng in a ser hna i Van cu vawlei cungah siling bantukin a khuh; Pathian nih cun rili ti cu a kawh hna i vawlei cungah a thlet hna. Amah a min cu Bawipa a si. ⁷ Israel mi hna, nannih cu ka caah Kush mi bantuk nan si lo maw? Israel mi cu Izipt ram in, Filistin mi cu Kaftor ram in, Aramean mi hna cu Kir ram in ka hunpi hna lo maw? ⁸ Zohhmanh, Bawipa Pathian nih hi a sualmi pennak cungah hin ka mit ka chiah i, Vawlei cung hin ka hloh lai," tiah a ti. Asinain Jakob tefa hna cu an ci an ruang in ka hlo hna lai lo, tiah Bawipa nih a ti. ⁹ Keimah nih nawlbia kha ka chuah lai i Miphun vialte hna lakah khan Israel mi cu ka vamh hna lai, Mi nih fingrilh an rilh i cu fingrilh chungin lungtekem pakhat hmanh vawlei ah a tlak lo bantukin Israel mi cu ka rilh hna lai. ¹⁰ Ka mi hna lak i misual, ’Vanchiatnak cu kan pawng na phakter lai lo i a ton zong na kan tonter lai lo,’ a timi hna cu vainam in an thi lai. ¹¹ Khi ni ah cun a tlu cangmi David thlam cu ka tun ṭhan lai; A vampang a awnnak hna cu ka phih hna lai i A rawhnak hna cu ka remh ṭhan hna lai; Hlanlio i a rak siningte ah khan ka ser ṭhan lai i ¹² Edom ram a tangmi le ka min in auh a rak simi miphun vialte kha an co hna lai. Mah hihi Bawipa bia hrimhrim a si i amah nih cun a tuah lai. ¹³ Hi bangin Bawipa nih a ti: "Lei thuangtu nih rawl ṭuantu a zulh colh le Mitsur hang a nengtu nih a ci a tuhtu a zulh colh caan kha a ra lio. Tlang cung khan mitsur hang thar an luang thluahmah lai i Tlang kip cu rawl kung in an i hnin dulmal lai. ¹⁴ Ka mi Israel mi hna cu an vanṭhatnak kha ka pek ṭhan hna lai; Chuahtak ciami khua kha an ser ṭhan hna lai i an umhnawh ṭhan hna lai, Mitsur dum kha an ser hna lai i mitsur hang kha an din hna lai, Dum kha an ser hna lai i an theitlai kha an ei hna lai. ¹⁵ Anmah cu anmahle an vawlei te ah khan ka phun ṭhan hna lai i Ka pekmi hna vawlei khan zeitikhmanh ah phawi an si ṭhan bal ti lai lo, tiah Bawipa nan Pathian nih a chim."