LAMKALTU

LAMKALTU

¹ Ka dawtmi Theofilas: Ka cauk hmasa u ah khan Jesuh nih rianṭuan hram aa thawk ri in vancung i lak a si ni tiang ² a tuahmi thil vialte le a cawnpiaknak vialte kha ka ṭial. Vancung i a kal hlanah khan a lamkaltu caah a thimmi hna kha Thiang Thlarau thawngin a cawnpiak hna. ³ A thih hnuah ni sawm li chung an sinah voi tampi a lang i a nung ṭhan hrimhrim ti kha zumh lo awk zeihmanh um loin lam tam piin a langhter: annih nih amah cu an hmuh i anih nih Pathian Pennak kong kha a ruah hna. ⁴ Cun an sin i a um lioah khan hi nawlbia hi a pek hna i, "Jerusalem khua hi chuahtak hlah u, ka Pa nih a rak in kamhmi hna laksawng ka rak in chimhmi hna tu kha hngak ko u. ⁵ Johan nih cun ti in tipilnak a pek hna, sihmanhsehlaw kan hmailei ni tlawmte chungah hin Thiang Thlarau in tipilpek nan si lai," tiah a ti. ⁶ Jesuh le a lamkaltu hna cu hmunkhat i an um tikah khan, a lamkaltu hna nih cun an thawh i, "Bawipa, atu caan ah hin maw Israel mi cu uknak kha na pek ṭhan hna lai?" tiah an hal. ⁷ Jesuh nih cun a thawh hna i, "Ka Pa nih amah nawlngeihnak chungah a chiahmi caan le nithla kong cu nannih hngalh awk a herh lo. ⁸ Asinain Thiang Thlarau nan cung i a tlun tikah cun, ṭhawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai," tiah a ti hna. ⁹ Hi bia a chim dih in an hmuh hngan te ah cun vancung ah a kai; cun minmei nih a hun phenh i an hmu kho ti lo. ¹⁰ Annih nih a liam riahmah kha an cuanh ko lioah cun, puan rang aih in minung pahnih an pawngah cun chikkhatte ah khin an rung dir i, ¹¹ "Galilee mi hna, zeicahdah van lei zoh in nan dir ko? Nan sinin van ah a kaimi Jesuh hi, van ah a kai nan hmuh bantukte hin a ra kir ṭhan lai," tiah an ti hna. ¹² Cun lamkaltu hna cu Oliv Tlang khan Jerusalem khua ah khan an kir; cucu Jerusalem khua in meng cheu tluk a si. ¹³ Jerusalem khua chungah khan an lut i an rak umnak khaan chungah khan an va kal: Peter, Johan, Jeim le Andru, Filip le Thomas, Bartholomew le Matthai, Alfeas fapa Jeim, Phunṭanh Simon le Jeim fapa Judas an si. ¹⁴ Thlacam awkah atu le atu a bu tein an i pum i an sinah cun nu hna le Jesuh nu Mary le Jesuh naule kha an um ve. ¹⁵ Cu hnu ni tlawmpal ah khan Jesuh a zummi hna kha an i pum i an dihlak ah za khat le kul tluk an si; cu pumhnak ah cun Peter cu a tho i, ¹⁶ "Ka u le ka nau hna, Jesuh a tlaitu hna lam hruaitu Judas kong ah, Thiang Thlarau nih David ka in a chimchungmi bia, Cathiang chung i aa ṭialmi kha a tlin awk a herh. ¹⁷ Judas cu kan rian ah hin i tel ve awkah thim a rak si caah khan kan bu chungah hin a rak i tel ve," tiah a ti. ¹⁸ (Judas nih khan thil ṭhalo a tuahmi man ah tangka a hmuhmi khan lo pakhat a cawk i cuka ah cun thi lakin a tlu i a kek dih i a chungril vialte a chuak dih. ¹⁹ Jerusalem khua i a ummi vialte nih cucu an theih i cu lo cu a min ah anmah holh in Akeldama an sak i, a sullam cu Thisen Chuahnak Lo ti a si). Peter nih cun, "Salm cauk chungah khan, ²⁰ ’A inn cu lawng seh law a chungah ahohmanh um hna hlah seh,’ tiin le ’A rianṭuannak hmun zong kha pakhatkhat nih rawlh hna seh,’ tiin aa ṭial i ²¹ cucaah Bawipa Jesuh a thawh-ṭhannak a hngaltu tehte si ve awk caah pakhatkhat nih cun a kan chap a hau. ²² Amah cu Bawipa Jesuh nih kanmah he khual a tlawn lengmang lio i kan sin i aa tel lengmang vemi, Johan nih tipil innak kong a chim ri in Jesuh nih van ah a kan kaitak tiang kan sinah aa tel lengmang vemi a si awk a si," tiah a ti. ²³ Cucaah mi pahnih min kha an chuahpi: cu hna cu Josef, Barsabbas an timi, (Justas ti zongah an ti fawnmi) le Matthias kha an si. ²⁴ Cun thla an cam i, "Bawipa, nangmah nih minung lungthin vialte cu na hngalh dih. ²⁵ Cucaah Judas nih amah hmun a simi i kal awkah a chuahtakmi rian, lamkaltu hna rian rawlh awkah, hi pahnih hna lakah hin aho deuh hi dah na thimmi an si, kan hmuhsak tuah," tiah an ti. ²⁶ Cun cu hna pahnih lakah aho deuh cu dah kan thim lai tinak caah camcawhfung an zuh i an thimmi cu Matthias kha a si; cun amah cu lamkaltu pahleikhat hna bu chungah khan a lut.

¹ Pentekos ni kha a phak tikah zumtu vialte cu hmunkhat ah an i pum. ² Chikkhatte ah khin van in aw pakhat a rung i a thawng cu thlitu fak piin a hrangmi thawng bantuk a si i an ṭhutnak inn kha a khat dih. ³ Cun meizik he aa lomi leiṭe an hung chuah kha an hmuh hna i cuka i a ummi hna an dihlak cungah khan lei cu pakhat cio ah an i fu. ⁴ Annih cu Thiang Thlarau in an khat i Thlarau nih chim khawhnak a pek hna bantuk cio khan, holh dang in an holh. ⁵ Cun Jerusalem khua chungah vawleicung khuazakip in a rami Judah mi an um liote kha a si; cu hna cu biaknak lei i aa zuam ngaingaimi pawl kha an si. ⁶ Cu thawng cu an theih tikah mi tampi an i pum. A zummi hna an holh tikah khan midang aa pum vemi hna nih khan kanmah holh in an holh, tiin an rak theih cio tikah khan an khuaruah a har ngaingai. ⁷ An lung a suk ngaingai hna i, "Hiti in bia a chimmi hna hi Galilee mi an si ko ṭung! ⁸ Zeitindah kan i chuahkehpimi holh cio holh in kan dihlak in kan theih kun hna? ⁹ Kannih cu Parthia ram hna, Media ram hna, Elam ram hna, Mesopotamia ram hna, Judea ram hna, Kappadosia ram hna, Pontas ram hna, Asia ram hna, ¹⁰ Frizia ram hna, Pamfilia ram hna, Izipt ram hna le Libia ram chung i a ummi Sairin khua pawng ram hna in a rami kan si; cun a cheu cu Rom khua in a rami kan si, ¹¹ Judah mi kan si ah, Judah phun aa hrawmmi Jentail mi kan si ah, cun a cheu cu Krit tikulh le Arabia ram in a rami kan si fawn — asinain Pathian nih thil lianngan a tuahmi hna kha an chim tikah an chimmi cu kan holh in an chim tiin kan theih cio hna," tiah an ti. ¹² Khuaruahhar le lung-ar in, "Mah hihi a sullam zeidah a si hnga?" tiah pakhat le pakhat an i hal lengmang. ¹³ Sihmanhsehlaw midang nih cun an nihsawh hna i, "Hi hna hi zu an ri," tiah an ti hna. ¹⁴ Khi tikah Peter cu lamkaltu hleikhat hna he khan a hung dir i, aw thang ngaiin a thawh hna i, "Ka phun hawi Judah mi hna le Jerusalem khua ah a ummi vialte hna, hiti in thil a hung ummi sullam hi zeidah a si tiah kan chimhmi hna hi ṭha tein ngai tuah u. ¹⁵ Hi mi hna hi nannih nih nan ruahnak ah zu an ri, nan ti; cucu a si lo, zu an ri lo; atu cu zinglei suimilam pakua lawng pei a si ko rih hi. ¹⁶ Zeidah a si deuh ti ahcun, Pathian nih profet Joel kaa in a rak chimmi kong kha a si. Zeitindah a ti tiah: ¹⁷ ’Ni hmanung bik ah cun mi vialte kha ka Thlarau ka toih hna lai. Nan fapa hna le nan fanu hna nih bia an chim lai; Nan tlangval hna nih langhnak an hmuh lai i Nan tar hna nih mang an manh lai. ¹⁸ Asi, ka salnu hna le ka salpa hna cung hmanh ah khan cu ni ah cun ka Thlarau kha ka bungh lai i bia an chim lai. ¹⁹ Cunglei van ah khin khuaruahharmi thil ka tuah hna lai i Tanglei vawlei ah hin hmelchunhnak ka umter hna lai — thisen le mei le a chahmi meikhu an si lai. ²⁰ Bawipa Ni, a sunglawimi ni le a liannganmi ni a phak hlanah khan Ni cu a mui lai i thlapa cu thisen bantukin a sen lai. ²¹ Cu tikah Bawipa min a aumi paoh cu khamhnak an hmu lai,’ a ti. ²² "Israel mi hna, hi ka bia hi ngai tuah u. Nazareth khuami Jesuh cu Pathian nih rian a fialmi a si ti kha, Pathian nih amah thawngin a tuahmi khuaruahharnak tehna, hmelchunhnak tehna le thil lianngan hna nih khan an langhter ko; hi ka chimmi hi nanmah hrimhrim nih nan hngalhmi an si, zeicahtiah nanmah lak hrimhrim ah a rak tuahmi thil an si. ²³ Pathian nih Jesuh cu nan sin i pek awkah khan a rak ruah ciami le a rak khiah ciami a si bangin nannih nih amah cu nan thah, misual mi hna kha amah cu vailamtahnak thing cungah thir in nan khenhter hna. ²⁴ Sihmanhsehlaw Pathian nih amah cu mithi hna sin khan a thawhter ṭhan, thihnak nih amah cu a tlaih peng khawhnak ding zeihmanh a um lo. ²⁵ David nih amah kong hi hi bantukin a rak chim i, ’Bawipa cu ka hmaiah ka hmuh zungzal ko; Ka orhlei kam i a um caah khan ka awlok a chong lai lo, ²⁶ Hi ruangah hin ka lung cu aa lawm i ka bia cu thanuamnak in a khat; Kei cu a thi ko dingmi minung si hmanh ning law ²⁷ Mithikhua ah khan ka thlarau cu na kaltak lai lo caah Ruahchannak ngei in hnangam tein ka um ko lai. Nangmah an tlaihchanmi na sal cu ṭhutnak kha na hmuhter lai lo. ²⁸ Nunnak lei kalpitu lam kha na ka hmuhsak i Nangmah cu ka sinah na um caah lawmhnak in ka khat,’ a rak ti. ²⁹ "U le nau hna, kan pu David kong kha fiang tein in chim tuah hna ning. Anih cu a thi i an vui i nihin ni tiang hin a thlan zong kan sinah a um ko rih. ³⁰ Amah cu profet a rak si i Pathian nih a sinah biakamnak a tuahmi kha a hngalh. Pathian nih bia a rak kammi cu, David tefa pakhat khat cu amah David bantuk khan siangpahrang ah a canter te lai, ti hi a si. ³¹ David nih cun Pathian nih zeidah a tuah lai ti kha a rak hmuh i cu caah, ’Amah cu mithikhua ah a kaltak lo, a titsa cu thutnak a hmu lo,’ tiah a rak ti tikah hin, Messiah a thawh ṭhan lainak kong kha a chimmi cu a si. ³² Pathian nih hi Jesuh hrimhrim hi mithi hna sin cun a thawhter i hi thil tehte a khangtu cu kanmah hi kan si. ³³ Pathian orhlei kamah khan ṭhutter a si i a Pa nih bia a kam bantuk khan Thiang Thlarau cu a Pa sin khan a hmuh; cun atu i nan hmuhmi le nan theihmi hi kannih a kan toihmi a laksawng kha a si. ³⁴ Zeicah kan ti ahcun amah David cu vancung ah a kai ṭung lo, aa thawh i pei: ’Bawipa nih ka Bawipa cu, "Ka orhlei kamah hin ṭhu tuah, ³⁵ Na ke tangah na ral hna cu na kelamh ah ka chiah hna hlan tiangin," a ti cu,’ tiah a ti kha. ³⁶ "Israel mi vialte hna, nannih nih vailam tahnak thing cungah nan khenh chihmi Jesuh hrimhrim hi Pathian nih Bawipa ah le Messiah ah a ser cang, ti kha fiang tein hngal u," tiah a ti. ³⁷ Hi kong kha an theih tikah an lungthin a hriah ngaingai hna i Peter le lamkaltu dang kha an thawh hna i, "U le nau hna, zeidah kan tuah kun lai?" an ti. ³⁸ Peter nih annih cu a thawh hna i, "Nan dihlak in, pakhat hmanh bau loin, nan sualnak khan i mer tuah u, nan sualnak kha, ngaihthiam nan si nakhnga nan sualnak khan i mer u law Jesuh Khrih min in tipilnak ing tuah u; cun Pathian laksawng Thiang Thlarau kha nan hmuh lai. ³⁹ Zeicahtiah Pathian nih bia a kamhmi hna cu nanmah hi le nan fale hna hi le lam hlat pipi i a ummi hna zong nan si — Bawipa kan Pathian nih an kawhmi hna paoh caah hin a si," tiah a ti. ⁴⁰ Peter nih cun bia dang zong tampi a chimh hna i, "Hi chan ṭhalo cungah a tlung dingmi dantatnak hin luat i zuam ko u," tiah a forh hna. ⁴¹ Mi tampi nih a bia cu an zumh i tipil kha an in; cu ni ah cun an bu ah mi thong thum tluk an i chap. ⁴² Lamkaltu hna cawnpiaknak ngaih awkah khan atu le atu an i pum i hawikomhnak ah khan an i tel i hawikomhnak rawl an dum ṭi i thla an cam ṭi lengmang. ⁴³ Lamkaltu hna kha Pathian nih khuaruahharnak le hmelchunhnak tampi a tuahter hna i cu nih cun mizapi kha ṭihnak in a khahter hna. ⁴⁴ A zummi vialte hna cu i kom ṭhipṭhep tein khua an sa i an thil kha pakhat le pakhat an i hrawm. ⁴⁵ An thil le an ngeihmi kha an zuar hna i tangka an hmuhmi kha a dihlak in an herhning cio paoh in an i phaw. ⁴⁶ Ni fate in a bute in biakinn chungah khan an i pum i an inn ah khan rawl an i hrawng cio hna i lunglawmhnak lungthin le toidornak lungthin he rawl cu an ei. ⁴⁷ Pathian kha an thangṭhat i mi vialte nih an hmaizah hna. Cun khamh a si liomi hna cu Bawipa nih ni fate in an bu chungah khan a luhter lengmang hna.

¹ Ni khat cu, zanlei suimilam pathum, thlacam caan ah khin, Peter le Johan cu biaknak inn ah khan an hung kal. ² Khika ah, Kutka Dawh timi ah khan a chuah kate in a ke a beimi pakhat kha a rak um. Biakinn i a kalmi hna kha tangka a hal khawh hna nakhnga amah cu ni fate in cu kutka ah cun a puak in an hei puak tawn. ³ Peter le Johan cu an luh kha a hmuh hna tikah, thil ṭhenh a hal hna. ⁴ Amah cu dengteo in an vun zoh i Peter nih a vun thawh i, "Hun kan zoh," tiah a ti. ⁵ Cucaah zeimaw an ka pek rua lai ti kha a hun i ruahchan i ṭhep loin a hun zoh hna. ⁶ Cun Peter nih a thawh i, "Sui le ngun zeihmanh ka ngei lo, sihmanhsehlaw ka ngeihmi cu kan pek lai: Nazareth khuami Jesuh Khrih min in, tho law kal, kan ti," tiah a ti. ⁷ Cun a orhlei kut khan a vun thawh i a dirter. Chikkhatte ah khin mipa cu a ke le a fengbeo hna cu an hung ṭhawng i ⁸ a tho duak i a dir i aa chawk. Cun an sinah cun biakinn chungah khan a lut i aa chawk i a per a choi i Pathian kha a thangṭhat. ⁹ Mizapi nih khan aa chawh i Pathian a thangṭhat kha an hmuh; ¹⁰ cun amah cu Kutka Dawh i a ṭhu tawnmi awkhlawhpa a si kha an hngalh tikah a cung i a tlungmi kongah khan an khuaruah a har i an lung zong a ar dih. ¹¹ Mipa cu Peter le Johan sin lawngah khan aa hel caah mizapi cu an khuaruah a har i Solomon Innleng timi ah khan an sinah cun an va le i, ¹² Peter nih a rak hmuh hna tikah khan a rak thawh hna i, "Ka phun hawi Israel mi hna, zeicahdah hi thil kongah nan khuaruah a har i kanmah lehlam cu ngang koin nan kan zoh? Hi pa kan kalter khawh hi kanmah ṭhawnnak in le Pathian hmai i kan ṭhatnak thawngin maw a si tiah nan ruah? ¹³ Abraham, Isak le Jakob Pathian, kan pupa hna Pathian nih khan a sal Jesuh cu Pathian sunparnak kha a pek cang. Amah cu nawl ngeitu hna sinah khan nan chanh i Pilat nih ka luatter ko lai a ti hmanh ah khan, Pilat hmai hrimhrim ah, nan hlawt ṭhiamṭhiam. ¹⁴ Amah cu mithiang le miṭha a si nain nannih nih cun nan duh lo i Pilat cu lainawng lehlam kha kan thlahpiak ko, nan ti. ¹⁵ Cucaah nunnak lam ah mi a hruaitu cu nan thah. Sihmanhsehlaw amah cu Pathian nih mithi hna sinin a thawhter i cu a thawhternak tehte cu kanmah hi kan si. ¹⁶ Hi kebeipa thazang a petu hi amah min ṭhawnnak cu a si i atu i nan hmuhmi le nan hngalhmi hi amah min zumhnak thawngin tuahmi a si; hi bantukin nan hmaika ah a damtertu hi Jesuh min zumh hi a si. ¹⁷ "Ka u le ka nau hna, Jesuh cung i nanmah le nan haotu hna nih nan rak tuahmi kha zei a si ti awk nan rak hngalh lo ruangah a si ti kha fiang tein ka hngalh. ¹⁸ Pathian nih hlan lio pi in a profet vialte hna sin khan, ka Messiah nih cun fahnak a in lai, ti kha a rak thanh chung cang i cu a bia cu hiti ning hin a tlinter. ¹⁹ Cucaah nan sualnak cu an hnawhpiak hna nakhnga, i ngaihchih u law Pathian leiah khan i mer tuah u. ²⁰ Cun Bawipa nih thlarau thazang thar hmuhnak caan ṭha an pek hna lai i amah nih nan caah a thim cangmi Messiah, Jesuh kha nan sinah a run thlah lai. ²¹ Pathian nih a thiangmi a profet hna sinin hlan liopi ah a rak thanh cang bantukin, zei zong vialte a thar in ser caan a phak hlantiang vancung ah cun a um ko lai. ²² Moses nih zeitindah a rak ti tiah, ’Bawipa Pathian nih keimah a ka thlah bantuk hin, nan mi a simi profet pakhat kha aan thlah hna lai. Amah nih an chimhmi hna kha a dihlak in nan ngaih lai. ²³ Cu profet nih a chimmi bia a ngai lomi paoh cu Pathian mi hna sinin ṭhen a si lai i hrawh a si lai,’ a ti. ²⁴ Cun Samuel thawk in a hnu i a ummi profet vialte hna nih, hi atu caan kong hi an dihlak in an bia i khat tein an rak chimchung cio. ²⁵ Pathian nih a profet hna sinin biakamnak a sermi cu nanmah caah a si i nan pupa hna sinah Pathian nih biakamnak a sermi chung i aa telmi cu nan si. Kha biakamnak a ser tikah khan Abraham sinah cun a thawh i, ’Nangmah na tefa hna thawngin vawleicung mi vialte cu thluachuahnak ka pek hna lai,’ tiah a rak ti. ²⁶ Cucaah Pathian nih a Sal cu a thim i nan sinah a hmasa bik ah a rak thlah, cuti in a rak thlahnak cu, nan ziaza ṭhalo kha nan mertak hna i thluachuahnak an pek hna nakhnga caah a si," tiah a ti.

¹ Peter le Johan cu mizapi kha bia an chimh lengmang hna lioah khan, tlangbawi hna le biakinn cawngtu pawl bawi le Sadusi mi hna kha an sinah cun an rak phan, ² Lamkaltu pahnih hna nih khan mizapi cu, mithi mi kha thihnak in an tho ṭhan lai, zeicahtiah Jesuh kha thihnak in a tho ṭhan cang i cu nih cun mithi mi kha nunnak ah an tho ṭhan lai ti kha a fianter tiin an cawnpiak hna caah, an cungah khan an thin a hung ngaingai. ³ Cucaah an tlaih hna i cu ni cu a tlai nawn cang caah a thaizing tiang thong ah an thlak hna. ⁴ Sihmanhsehlaw an chimmi a theimi mi tampi nih khan an zumh i an dihlak ah thong nga hrawng an hung si. ⁵ A thaizing ah cun Judah mi hruitu hna le upa hna le Phungbia cawnpiaktu saya hna kha Jerusalem ah khan an i pum. ⁶ Cuka ah cun Tlangbawi Ngan Annas le Kaiafas le Johan le Alekzandar le Tlangbawi Ngan innchungkhar chungmi mi dangdang zong kha an i tel. ⁷ Lamkaltu hna kha an hmaiah an dirter hna i, "Mah hihi zeitindah nan tuah? Zei ṭhawnnak dah nan ngeih? Aho min dah nan hman?" tiah an hal hna. ⁸ Cun Thiang Thlarau in a khatmi Peter nih cun a leh hna i, "Mizapi hruitu hna le upa hna: ⁹ A beimipa cungah thil ṭha tuah a sinak kong le zeitindah damter a sinak kha nihin ah hin nan kan hal duhmi cu a si ahcun, ¹⁰ nannih nan dihlak le Israel mi vialte dihlak nih nan hngalh awk cu, hi pa dam hirhiar tein nan hmaiah a dir khawhnak cu Nazareth khuami Jesuh Khrih, nannih nih nan thah i Pathian nih thihnak in a thawhter ṭhanmi a min ṭhawnnak thawngin a si. ¹¹ Cathiang nih, ’Inn satu hna nih zei ah nan rel lomi lung cu, Lung santlai bik ah a cang,’ tiah a timi kha Jesuh hi a si. ¹² Amah thawng lawnglawng in khamhnak hi hmuh khawh a si. Zeicahtiah vawlei cung dihlak ah hin a kan khamh khotu ding min dang zeihmanh a um lo," tiah a ti. ¹³ Biaceihtu hna nih Peter le Johan cu an ralṭhatning kha an hmuh i fimthiamnak zeihmanh a ngei lomi, mi sawhsawh an si ko ti kha an hngalh tikah an khuaruah a har. Khi tikah annih cu Jesuh hawikom an rak si ti kha an hun hngalh. ¹⁴ Peter le Johan nih an damtermipa kha an sinah cun a dir kha an hmuh ko caah, annih nih zeihmanh an chim kho lo. ¹⁵ Cucaah, biaceihnak hmun khan chuak u, an ti hna i anmah lawngin an run i ceih. ¹⁶ "Zeitindah hi mi hna hi kan tuah hna lai? Jerusalem khua chung i a ummi vialte nih, hi thil theihtlei khuaruahhar hi, hi mi hna nih hin an tuah ti cu an hngalh dihmi a si ko i kannih nih, a si lo, kan ti kho fawn ṭung lo. ¹⁷ Sihmanhsehlaw hi thil hi mizapi sinah a karh chin lengmang nakhnga lo, hi mi hna hi Jesuh min in aho sin hmanh ah bia chim ti hlah u, tiah kan thlauh hna lai," tiah an ti. ¹⁸ Cucaah inn chungah khan an kawh ṭhan hna i, thil umtuning zei bantuk a si hmanh ah, Jesuh min in ahohmanh nan cawnpiak hrimhrim hna lai lo i aho sin hmanh ah bia zong nan chim hrimhrim lai lo, tiah an ti hna. ¹⁹ Sihmanhsehlaw Peter le Johan nih khan an leh hna i, "Pathian mithmuh ah nanmah bia ngaih cu maw a ṭha deuh Pathian bia ngaih dah a ṭha deuh, ti cu nanmah nih ruat ko u. ²⁰ Zei ti si hmanh ah kannih nih cun kanmah hrimhrim nih kan hmuh komi le kan theih komi cu chim lo cun kan um kho bal lai lo," an ti hna. ²¹ Biaceihtu hna nih cun fak chinchin in an hro hna i an thlah hna. Mizapi nih thil a hung ummi kongah khan Pathian cu an thangṭhat lulhmalh caah dantat khawhnak lam kha an hmu kho lo. ²² Hi damnak khuaruahhar an tuahpiakmipa hi kum sawm li lengmi a si. ²³ An thlah cangka hna in Peter le Johan cu an bu sinah khan an va kir i tlangbawi upa pawl le upa hna nih an chimmi kha an va chimh hna. ²⁴ Annih nih an theih tikah hmunkhatte ah Pathian sinah thla an cam i, "Bawipa, van le vawlei le rili le an chung i a ummi thil vialte a Sertu, ²⁵ na Thiang Thlarau in kan pu David na sal sinah bia na rak chim i, ’Zeicahdah Jentail mi hna cu an thin a hun i miphun dang hna nih cun pakpalawng khua an khan? ²⁶ Bawipa le a Messiah cu doh awkah vawleicung siangpahrang hna cu an i tim i uktu hna cu an i pum,’ na rak ti. ²⁷ Cuticun Herod le Pontius Pilat cu hi khua chungah hin Jentail mi hna le Israel mi hna he khan, a thiangmi na sal Jesuh, Messiah i na sermi cu doh awkah an i pum taktak. ²⁸ Nangmah nih a hung um te lai ding na rak ruah ciami le na rak khah ciami vialte kha tlinter awkah an i pum. ²⁹ Cucaah atu cu Bawipa, an kan hronak hi kan hngalhpiak law kannih na sal rual nih hin na bia cu ralṭha chinchin in kan chim nakhnga a nawl kan pe ko. ³⁰ Mi nih damnak an hmuh nakhnga na kut cu samh law a thiangmi na Sal Jesuh min in khuaruahharnak le hmelchunhnak cu umter ko hna," tiah an ti. ³¹ Annih nih thla an cam dih tikah an i pumhnak hmun cu aa hnin. Thiang Thlarau in an khat i Pathian bia cu ralṭha ngaiin an chim. ³² Cun zumtu hna cu an bu ningte in an ruahnak le an lungthin aa khat dih. Ahohmanh nih an thil kha, keimah ta, an ti lo i an ngeihmi paoh kha an i hrawm dih. ³³ Lamkaltu hna nih khan Bawipa Jesuh thihnak in a thawhṭhannak kong kha fak piin an chim i Pathian nih an dihlak in thluachuahnak tampi a pek hna. ³⁴ An lakah herh baunak a ngeimi ahohmanh an um lo. Lo a ngeimi nih si hna seh, inn a ngeimi nih si hna seh, an thilri cu an zuarh hna tikah a man tangka an hmuhmi cu ³⁵ lamkaltu hna sinah khan an rak put hna i tangka cu a herhmi paoh kha an herh baunak ning cio ah an phawt hna. ³⁶ Cu bantuk cun Saipras tikulh i a chuakmi Levi mi Josef nih ³⁷ a lo kha a zuarh i tangka kha a rak put i lamkaltu hna kha a pek hna; Josef cu lamkaltu hna nih khan Barnabas tiah an kawh, a sullam cu Thazang Petu tinak a si.

¹ Sihmanhsehlaw midang pakhat a um ve i a min cu Ananias a si, a nupi min cu Safira a si. An thil ngeihmi pakhat kha an zuarh i ² a nupi theih tein a man tangka a cheu cu an i chiah i a cheu cu lamkaltu hna sinah khan an rak put. ³ Peter nih anih cu a rak thawh i, "Ananias, zeicahdah Satan cu na lung kha na ukter i na lo man ah na hmuhmi tangka a cheu kha naa chiah i Thiang Thlarau sinah lih na chim? ⁴ Na thil cu na zuarh hlanah khan nangmah ta a si, cun na zuarh hnu zongah khan a man cu nangmah ta a si ṭhiamṭhiam ko. A si kun ahcun, zeicahdah cu bantuk thil tuah awkah cun na lung chungin na rak ruah? Minung sinah lih na chim a si ṭung lo, Pathian sinah pei lih na chim a si cu," tiah a ti. ⁵ Cu bia cu Ananias nih a theih tikah aa teng bak ko i cu thawng a theimi paoh cu ṭihnak in an khat dih. ⁶ Tlangval kha an rung lut i a ruak kha an zual i an chuahpi i an vui. ⁷ Cu hnu suimilam pathum tluk ah khin a nupi kha a rung lut ve, thil umtuning kha zeihmanh a hngal lo. ⁸ Peter nih amah cu a thawh i, "Hi zat taktak hi maw nan lo man ah khan an in pek hna?" tiah a ti i anih nih, "Asi, hi zat hi a si ko," tiah a leh. Cun Peter nih cun a thawh i, ⁹ "Zeicahdah na va he nan pahnih in Bawipa Thlarau cu hneksak del awkah khua nan rak khan? Na va a va vuitu hna kha innka hram ah an um ko rih khih, nangmah zong an in kalpi ve lai," tiah a ti. ¹⁰ Chikkhatte ah a kehram ah khan a tlu i a thi. Tlangval hna cu an rung lut i a thih ve kha an hmuh i an chuahpi i a va kiangah khan an va vui. ¹¹ Khrihfabu le cu thawng a theimi paoh cungah khan ṭihnak nganpi a tlung. ¹² Khuaruahharnak tampi le hmelchunhnak tampi kha lamkaltu hna nih cun mizapi lakah khan an tuah. ¹³ Zumtu hna cu Solomon Innleng timi ah khan an i pum tawn, an bu a lengmi cu ahohmanh an i tel ngam lo nain mi zapi tu nih cun an thangṭhat ko hna. ¹⁴ Cuhleiah mi kha an bu ah cun an i chap chin lengmang i Bawipa a zummi hna cu nu he pa he bu nganpi ah an i cang. ¹⁵ Lamkaltu hna rianṭuannak thawng cun, mizaw hna cu khuachung lam ah khan an chuahpi hna i Peter aa chawh tikah khan pakhat pahnih tal kha a thla nih tawng hna seh tiin ihkhun cung le pher cungah khan an chiah hna. ¹⁶ Cun Jerusalem khua pawngkam khua hna khan mi cu an ra ciammam i an mizaw hna le khuachia nih a tuahmi hna kha an ratpi hna; cun annih cu an dihlak in an dam dih. ¹⁷ Cun Tlangbawi Ngan le a hawile hna, cuka hmun i a ummi Sadusi pawl chungmi a simi hna nih khan lamkaltu pawl cu an nahchuah ngaingai hna i cucaah an cungah rian kan ṭuan cang lai, tiah an ti. ¹⁸ Lamkaltu kha an tlaih hna i zapi thong ah an thlak hna. ¹⁹ Sihmanhsehlaw cu zan ah cun Bawipa vancungmi nih thonginn kutka kha a hun hna i lamkaltu kha a chuahpi hna i, ²⁰ "Va kal u law biakinn chungah khan va dir tuah u, cun mizapi kha hi nunnak thar kong kha va chim hna u," tiah a ti hna. ²¹ A bia cu lamkaltu hna nih khan an ngaih i khua a dei cangka tein biakinn chungah khan an lut i mizapi cu an cawnpiak hna. Tlangbawi Ngan le a hawile hna kha an ra i Sanhedrin khawngsil pumhnak kha an tuah, cucu Israel miphun khawngsil a ningpi in i pumhnak kha a si; cun lamkaltu hna kha kan hmaiah rak chuahpi hna u, tiin thonginn ah khan mi an hei thlah hna. ²² Sihmanhsehlaw an hei thlahmi hna kha an va phak tikah, thong chungah cun lamkaltu pawl kha an hmu hna lo i cucaah cun khawngsil pawl sinah khan an ra kir i an chimh hna, ²³ "Thonginn kan va phak ah cun ṭha tein a rak i hrenh ko i a cawngtu hna kha kutka ah cun an um dih ko; sihmanhsehlaw kutka cu kan vun hun hna tikah a chungah ahohmanh kan hmu hna lo," an ti. ²⁴ Cu thawng cu biakinn cawngtu bawi le tlangbawi upa hna nih khan an theih tikah, lamkaltu hna cungah cun zei ko dah a tlung hnga, tiah an khuaruah a har. ²⁵ Cun mipa pakhat a rung lut i, "Ngai hmanh u, thong i nan thlakmi hna kha biakinn chungah an dir ko i mi an cawnpiak len ko hna," tiah a ti. ²⁶ Cucaah biakinn cawngtu hna bawi cu a mi hna he khan an va kal i lamkaltu cu an ratpi ṭhan hna. Annih nih mizapi nih lung in an kan cheh sual lai ti kha an phan caah thazang cu an hmang ngam lo. ²⁷ Lamkaltu hna kha an run luhpi hna i khawngsil hmaiah khan an dirter hna i Tlangbawi Ngan nih khan kherhlai hram a thawk hna. ²⁸ A thawh hna i, "Hi pa min hin cawnpiak hna hlah u tiah fek tein nawl kan in pek hna, sihmanhsehlaw nan tuahmi hi zohhmanh u! Jerusalem khua hi nan cawnpiaknak in nan khahter i hi pa thihnak hi kanmah tuahmi siter nan duh," tiah a ti. ²⁹ Peter le lamkaltu dang hna nih cun an leh i, "Minung nakin Pathian nawl kan ngaih deuh awk a si. ³⁰ Nannih nih Jesuh cu vailamtahnak i nan thah hnuah kan pupa hna Pathian nih thihnak in a thawhter ṭhan. ³¹ Israel mi kha i ngaihchihnak caan ṭha le sual ngaihthiamnak pek awkah amah cu Pathian nih a orhlei kamah khan Hruaitu le Khamhtu in a ṭhutter cang. ³² Hi thil vialte hna tehte hi kanmah hi kan si — kanmah lawng si loin Pathian nih amah nawl a ngaimi hna sinah a pekmi Thiang Thlarau zong hi tehte cu a si ve," an ti. ³³ Khawngsil pawl nih hi bia kha an theih tikah an thin a hung tuk hringhran i lamkaltu kha thah an duh ko hna. ³⁴ Sihmanhsehlaw an lak i mi pakhat, Farasi a simi a min Gamaliel, Phungbia cawnpiaktu saya, mi vialte nih an hmaizahmi kha khawngsil pawl aa pummi hna lakah cun a hung dir i, lamkaltu hna kha chuahpi hna u, tiah a ti hna. ³⁵ Cun khawngsil pawl cu a thawh hna i, "Israel mi hna, hi mi hna cung i nan tuah duhmi thil kong ah hin i ralring ngaingai u. ³⁶ Kan hnu lei caan tlawmpal ah khan Theudas an timi kha a hung chuak i pa pakhat ka si ve tiah a hun i ti i minung za li tluk nih an zulh. Sihmanhsehlaw amah cu an thah i a zultu hna cu an i ṭhek dih i a rianṭuanmi cu a thi ko. ³⁷ Cun cu pa hnuah cun Galilee mi Judas kha milurel caan ah khan a hung chuak ve; amah zong nih zultu kha a hun ngei tungmang ve, sihmanhsehlaw amah an thah khan a zultu hna cu an i ṭhek dih ṭhan ve ko. ³⁸ Cucaah atu thil zongah hin, nannih nih hi mi hna hi zeihmanh ti hna hlah u. Anmah um in umter ko hna u, zeicahtiah hi khuakhannak le rianṭuannak hi minung sermi men a si ahcun a lo dai ko lai, ³⁹ sihmanhsehlaw Pathian sinin a rami a si ahcun, nan tei kho hlei lai lo. Pathian dotu lehlam ah nan cang sual lai," tiah a ti hna. Khawngsil pawl nih cun Gamaliel ruah-nak cheuhmi kha an zulh. ⁴⁰ Lamkaltu kha an auh hna i fung in an tuk hna i Jesuh min in bia chim hrimhrim ti hlah u, tiah an ti hna i an thlah hna. ⁴¹ Khawngsil pumhnak cun lamkaltu pawl cu an chuak i Jesuh min ruangah Pathian nih ningzah in awk nan i tlak tiah a ruah hna caah an i lawm ngaingai. ⁴² Cun nifate in biakinn chung le mi inn kip ah Messiah a simi Jesuh kong Thawngṭha kha an cawnpiak hna i an chimh lengmang hna.

¹ Cu hnu tlawmpal ah cun, zumtu kha an karh chin lengmang tikah, Grik holh a hmangmi Judah mi hna le Judah holh a hmangmi Judah mi hna karlak ah khan siknak a um. Grik holh a hmangmi Judah mi hna nih khan kannih kan nuhmei hna cu ni fate thil i phawtnak ah hrelh deuh an si tiah an zai. ² Cucaah lamkaltu pahleihnih hna nih khan zultu dihlak kha an ningpi in an kawh hna i, "Kannih nih Pathian bia chim kha thlahdorh riangmang i tangka i phawtnak kong lawng kha kan tuah ahcun ahmaan hnga lo. ³ Cucaah u le nau hna, nan lakah Thiang Thlarau le fimnak in a khat tiah nan hngalhmi pasarih in thim hna u law, cu hna cu hi thil a tawlreltu ah kan thiah hna lai. ⁴ Kannih tu cu thlacam le Pathian Bia chimnak ah khan kan caan cu a dihlak in kan hmang ko lai," tiah an ti. ⁵ Lamkaltu hna nih an chimmi cu an dihlak in an lung a si i cucaah zumhnak le Thiang Thlarau in a khatmi Steven, Filip, Prokhoras, Nikanor, Timon, Parmenas le Antiok khuami Jentail mi Nikolas, Judah phung a zulmi kha an thim hna. ⁶ Cu hna cu lamkaltu hna sinah khan an hei chuahpi hna i thla an campiak hna i an lu cungah an kut an chuan. ⁷ Cuticun Pathian bia cu a karh chin lengmang. Jerusalem khua chungah khan a zummi cu an tam chin lengmang i tlangbawi tampi zong nih cu zumhnak cu an pom ve. ⁸ Pathian nih thluachuahnak tampi a pekmi le ṭhawnnak in a khatmi Steven nih khan mizapi lakah khan a liannganmi khuaruahharnak le hmelchunhnak kha a ser hna. ⁹ Sihmanhsehlaw mi cheukhat nih amah cu an al; cu hna cu Sal Luat hna pumhnak inn tiah timi i aa pum tawnmi kha an si i cu hna lakah cun Sairin le Alekzandria in a rami Judah mi kha an i tel. Cu hna le Silisia le Asia in a rami Judah mi hna nih khan Steven cu bia an hun al. ¹⁰ Sihmanhsehlaw Thlarau nih Steven cu fimnak kha a pek caah bia a chim tikah an tei kho lo. ¹¹ Cucaah mi a cheu kha, "Moses le Pathian a thangchiat hna," tiah ti dingin biaruk an nawh hna. ¹² Cuticun mizapi le upa hna le Phungbia cawnpiaktu saya hna kha an tuai hna. Steven cu an fuh i an tlaih i khawngsil hmaiah an chuahpi. ¹³ Cun amah kong i lih a ṭawntu dingah mi kha an luhpi hna. Cu hna nih cun an i thawh i, "Hi pa nih hin a thiangmi kan biakinn le Moses phung kha a thangchiat zungzal hna. ¹⁴ Cun hi Nazareth khuami Jesuh nih hin biakinn hi a ṭheh dih lai i Moses nih a kan pekmi kan phunglam vialte hi a thlen dih lai, a ti kha kan theih," tiah an ti. ¹⁵ Khawngsil chung i a ṭhumi vialte hna nih khan Steven cu dengteo in an zoh i a hmai cu vancungmi hmai bantuk a si kha an hmuh.

¹ Tlangbawi Ngan nih Steven cu a thawh i, "Hihi a si taktak maw?" tiah a hal. ² Steven nih cun a leh i, "U le nau le pale hna, ka bia hi ngai tuah u! Kan pu Abraham cu Haran khua i va um awkah a rak i thawh hlan, Mesopotamia ram i a rak um lioah khan sunparnak Pathian cu a sinah a rak lang i, ³ ’Na innchungkhar le na ram kha chuahtak hna law kan hmuhsak laimi ram ah kal tuah,’ tiah a rak ti. ⁴ Cucaah Khaldia ram khan a chuak i Haran khua ah khan a um. Cun Abraham cu a pa a thih hnuah atu i nan umnak ram ah hin Pathian nih a rak thawnter. ⁵ Cu lioah cun hi ram hi a pelpawite hmanh Abraham cu a rak pe lo, pe khat taktak hmanh a rak pe lo; sihmanhsehlaw Pathian nih bia a kam i hi ram hi nangmah kan pek lai i nangmah le na hnu i a rung um ding na tefa hna ta a si lai, tiah a ti. Cu biakamnak Pathian nih a rak pek lioah hin Abraham cu fa zeihmanh a ngei lo. ⁶ Pathian nih a rak chimhmi cu, ’Na tefa hna cu miphun dang ram ah an um lai i khika ah sal an si lai i kum za li chung hremnak an ing lai. ⁷ Sihmanhsehlaw an rianhmi hna miphun cu bia ka ceih hna lai,’ ti hi a si i, ’Cun a hnuah cu ram cun an chuak lai i hi hmun ah hin an ka biak lai,’ ti zongah Pathian nih cun a ti fawn. ⁸ Cun Pathian nih Abraham cu cuarpartannak phunglam kha biakamnak hmelchunhnak caah a pek i cucaah Abraham nih cun Isak kha a chuah hnu zarh khat ah a cuarpar kha a tan. Isak nih Jakob kha a tan ve i Jakob nih kan pupa hleihnih hna kha a vun tan ve hna. ⁹ "Kan pupa hna nih cun Josef kha an nahchuah i Izipt ram i sal vung si awkah an zuarh. Sihmanhsehlaw Pathian nih a umpi i ¹⁰ harnak a inmi dihlak chungin him tein a chuahter. Josef cu Izipt siangpahrang Faro hmaiah a chuah tikah khan nuncan dawh le fimnak kha a pek. Faro nih cun Josef cu ram uktu bawi le siangpahrang innchungkhar uktu bawi ah a ser. ¹¹ Cun Izipt ram chung a dihlak le Kanaan ram ah khan mangṭam a tlung i harnak tampi a um. Kan pupa hna nih rawl kha an hmu kho ti lo. ¹² Cucaah Jakob nih Izipt ram ah rawl a um ti kha a theih tikah, a kan hringsortu kan pupa a fapa hna kha a vun thlah hna i cucu an vung kal hmasa bik kha a si. ¹³ An vung tlawn a voi hnihnak ah Josef nih cun a unau hna sinah khan a rak i hngalhter i Faro nih cun Josef innchungkhar kong cu a hun hngalh. ¹⁴ Cucaah Josef nih a pa Jakob cu bia a hun cah i amah le a innchungkhar vialte cu Izipt ram ah ra dih u, tiah a ti hna; an dihlak in minung sawm sarih le panga an si. ¹⁵ Cun Jakob cu Izipt ram ah cun a vung kal i khika ah khan amah le kan pupa a kan hringsortu hna cu an thi. ¹⁶ An ruh cu Shekhem ah khan an kalpi hna i khika ah Abraham nih Hamor miphun sinin tangka in a cawkmi thlan ah khan an vui hna. ¹⁷ "Pathian nih Abraham sinah bia-kamnak a sermi a tlin caan kha a nai tikah Izipt ram i a ummi kan mi hna cu fak piin an karh. ¹⁸ A hnu a hnuah cun siangpahrang dang, Josef a hngal lomi nih Izipt ram cu a hun uk. ¹⁹ Kan miphun kha a rak hlen hna i a kan hringsortu hna kha a rak hrem hna, an fale kha an thih nakhnga an inn chungin lengah a rak chiahter hna. ²⁰ Hi caan lioah hin Moses kha a rak chuak i fa dawh ngai a si. Inn ah thla thum an zohkhenh i ²¹ inn cun an chuah tikah Faro fanu nih khan a fa ah a rak i ser i a fapa bantukin a zohkhenh. ²² Moses cu Izipt fimnak vialte kha an cawnter i bia ah siseh, thil tinak ah siseh, mingan ngaingai ah a hung cang. ²³ "Moses cu kum sawm li a ti tikah a phunhawi Israel mi kha a va leng hna. ²⁴ Pakhat pa cu Izipt mipa nih a rak hrem lio kha a hmuh i cucaah a phunhawi a simipa cu a bawmh i Izipt mipa cu teirul cham in a thah. ²⁵ (Pathian nih keimah cu anmah luattertu dingah a ka hman lai ti kha an hngalh lai tiah a ruah, sihmanhsehlaw an hngal lo). ²⁶ A thaizing ah Israel mi pahnih an i velh kha a hmuh hna i an karlak i remnak ser kha aa zuam. A thawh hna i, "Ka duale hna, ka bia hi ngai tuah u, nannih cu u le nau pei nan si cu, zeicahdah pakhat le pakhat nan i velh?" tiah a ti hna. ²⁷ Sihmanhsehlaw a sual deuhpa nih khan Moses cu a nam i, "Aho nih dah nangmah cu kan cung i uktu bawi ah an in ser? ²⁸ Nizan i Izipt mipa na thah bantuk khan maw keimah zong thah na ka duh?" tiah a ti. ²⁹ Hi bia kha Moses nih a theih tikah Izipt ram khan a zam i Midian ram ah a va um. Khika ah fapa pahnih a ngeih hna. ³⁰ "Cun kum sawm li a dih hnuah, Moses sinah cun vancungmi kha Sinai Tlang pawng thetse ram i burbuk a kangmi meizik in a lang. ³¹ Moses cu a hmuhmi kha a khuaruah a har i cucaah naih tein va zoh awkah burbuk pawngah cun a va kal. Sihmanhsehlaw Bawipa aw tu kha a theih i, ³² ’Keimah cu nan pupa hna Pathian, Abraham le Isak le Jakob Pathian kha ka si,’ tiah a rak ti. Moses cu a ṭih tuk ah a ther in a ther i a zoh hmanh a zoh ngam lo. ³³ Bawipa nih cun a thawh i, ’Na kedan kha i phawih, zeicahtiah na dirnak hmun kha hmun thiang a si. ³⁴ Izipt ram chungah ka mi hna nih an inmi le an tuarmi kha ka zoh i ka hmuh. An aihramnak kha ka theih i anmah khamh awkah ka rung ṭum. Ra tuah, Izipt ram ah kan thlah lai,’ tiah a ti. ³⁵ "Moses kha Israel mi nih an rak hlawtmipa a si. ’Kan cung i uktu bawi le biaceihtu ah aho nih dah aan chiah?’ tiah an rak ti, sihmanhsehlaw amah cu a alh hluahmahmi burbuk chungin a sinah a hung langmi vancungmi bawmhnak thawngin, Pathian nih uktu si ding le khamhtu si dingah a rak thlah mipa a si. ³⁶ A miphun kha Izipt ram in a chuahpi hna i Izipt ram le Rili Sen le thetse ram ah khan kum sawm li chung khuaruahhar le hmelchunhnak thil kha a tuah hna. ³⁷ Israel mi sinah, ’Pathian nih keimah a ka thlah bantukte hin profet pakhat an thlahhnawh te hna lai i amah cu nanmah chungmi a si lai,’ a ti, tiah a rak titu kha Moses cu a si. ³⁸ Amah cu thetse ram i a rak i pummi Israel mi hna sin i a ummi kha a si, amah cu a kan hringsortu hna sin i khua a rak sami le Sinai Tlang ah a sin i bia a rak chimtu vancungmi sin i a ummi kha a si; amah cu Pathian bia zungzal in a nungmi kan sin i phakter awkah a rak latu kha a si. ³⁹ "Sihmanhsehlaw kan pu le kan pa hna nih khan an hlawt i Izipt ram i vung kir ṭhan tu kha an duh deuh. ⁴⁰ Cucaah Aaron kha an thawh i, ’Kan hmai i a kal hnga ding pathian kan serpiak tuah hna. Izipt ram in a kan chuahpitu Moses kha zeitin a um kan hngal ti lo,’ an ti. ⁴¹ Khi tikah khan pei cawfa mui in siasal pakhat an ser i raithawinak an pek i anmah lila nih an sermi conglawmhnak ca i puai an ser kha a si cu. ⁴² Sihmanhsehlaw annih cu Pathian nih a mertak hna i profet hna cauk chungah aa ṭial bang khan vancung arfi kha a biakter hna. Cu cauk chungah cun: ’Israel mi hna, thetse ram chungah kum sawm li sa nan thah i raithawinak nan tuahmi kha keimah biaknak caah a si lo. ⁴³ Nannih nih nan i phorhmi thlam cu Molok pathian thlam kha a si i Nan i kalpimi milem cu nan pathian Refan arfi siasal kha a si; Annih cu nanmah nih biak awk caah nan ser chommi siasal an si. Cucaah nannih cu Babilon pinah kan kalter hna lai,’ tiin aa ṭial. ⁴⁴ "Kan pupa hna nih khan, Pathian kan sinah a um ti hngalhnak thlam kha thetse ram ah khan an rak i ngeih ko. Pathian nih Moses a chimh bantuk khan sermi a si i Moses nih a hmuhmi pungsan ning khan tuah a si. ⁴⁵ Cun a hnu deuh ah a kan hringsortu hna nih kan thlam cu an pupa hna sin khan an lak i Joshua sin i an kal ah khan an i kalpi; an hmai in Pathian nih a dawimi hna ram kha an va lak tikah, thlam kha an i kalpi lengmang i cuka ah cun David chan tiang kha a um. ⁴⁶ David nih cun Pathian duhdawtnak kha a hmuh i Jakob Pathian caah inn pakhat sak awkah Pathian kha a hal. ⁴⁷ Sihmanhsehlaw inn a vun sakpiaktu taktak cu Solomon a si. ⁴⁸ "Sihmanhsehlaw Cung Nung Bik Pathian cu, profet nih, ⁴⁹ ’Vancung hi ka ṭhutnak a si i vawlei hi ka kelamh a si. Zei bantuk inn dah na ka sakpiak lai? Khuazei ah dah kaa dinhnak ding hmun cu a si? ⁵⁰ Hi thil vialte hna a sertu hi keimah ka si lo maw? tiah Bawipa nih a ti,’ a rak ti bangin, minung nih an sakmi inn ah cun a um lo. ⁵¹ "Zeitluk lung hakmi dah nan si rih? Zeitluk in dah lungchung in cuarpar aa tan lomi le Pathian bia theihnak leiah a hna aa chehmi nan si rih! Nannih cu nan pupa hna hlikhlekte kha nan si ko, nannih zong nih Thiang Thlarau kha nan donh zungzal ko! ⁵² Nan pupa hna nih an rak hrem lomi profet an um maw? Pathian Sal a rat lainak hlanpi in a rak chim chungtu Pathian lamkaltu hna kha an rak thah hna. Cun atu cu nannih nih amah kha nan rawi i nan nawn. ⁵³ Vancungmi nih an in pekmi hna Pathian phungbia a rak latu cu nanmah nan si i asinain cu phungbia a zul lotu cu nanmah ṭhiamṭhiam nan si," tiah a ti. ⁵⁴ Steven bia kha khawngsil pawl nih cun an theih tikah a henh in a henh hna i an hacang lawng kha an rial ko. ⁵⁵ Sihmanhsehlaw Thiang Thlarau in a khatmi Steven nih khan van lei khi a hun zoh i Pathian sunparnak kha a hmuh i Jesuh cu Pathian orhlei kamah a dir kha a hmuh. ⁵⁶ Aa thawh i, "Zohhmanh u, vancung aa hun i Pathian orhlei kamah Mi Fapa a dir kha ka hmuh," tiah a ti. ⁵⁷ Cu bia an theih tikah fak piin an au i an kut in an hna kha an i phih i an hei zuanhnawh i ⁵⁸ khua chung khan lengah an hnuh i lung in an va cheh. Cuti in lung in a cheptu hna nih cun an puan kha, tlangval pakhat a min Saul a simi kehram ah khan an i chiah. ⁵⁹ Lung in an cheh chih lengmang lioah cun Steven nih, "Bawipa Jesuh, ka thlarau cu nangmah nih cohlang ko," tiin a au. ⁶⁰ A khuk aa bil i fak piin a au i "Bawipa, hi sualnak hi an cungah khing hlah," tiah a ti i a thi colh. Cun Steven an nawn kha Saul zong cu a hna a tla ve.

¹ Cu ni hrimhrim cun Jerusalem khua khrihfabu nih hremnak in hram aa thawk. Lamkaltu pawl kha dah ti lo cu, a zummi vialte kha Judea ram le Samaria ram ah an i ṭhek dih. ² Steven kha biaknak lei i aa biatakmi a cheu nih an vui i fak piin an ṭah. ³ Sihmanhsehlaw Saul nih khan khrihfabu cu hrawh aa zuam; inn khat hnu inn khat in a kal i a zummi hna kha nu thlulo pa thlulo in a hnuh hna i thong ah a thlak hna. ⁴ Zumtu aa ṭhekmi kha a kenkiplo ah an kal i an kalnak paoh ah thawngṭha kha an chim. ⁵ Filip cu Samaria ram khua ah khan a va kal i Messiah kong kha a va chimh hna. ⁶ Filip nih a chimmi kha mizapi nih ṭha tein an ngaih. A chimmi kha an ngaih i khuaruahharnak a tuahmi kha an hmuh. ⁷ Mi tampi chungin khuachia kha aupah in an chuak i a zengmi le a beimi mi tampi kha damnak an hmu. ⁸ Cucaah Samaria ah cun lawmhnak nganpi a um. ⁹ Cuka ah cun Simon timi kha a um i amah cu Samaria mi hna, a camh thiamnak in sau nawn an khuaruah a hartertu kha a si. Mingan pakhat ka si aa ti i ¹⁰ cu khua chungmi vialte hna nih cun, a hme bik in a ngan bik tiang, amah bia cu an ngaih. Amah cu Pathian ṭhawnnak "Ṭhawnnak Ngan" timi kha a si, an ti. ¹¹ A camh thiamnak in saupi an khuaruah a rak harter hna caah amah cu an zulh. ¹² Sihmanhsehlaw Filip chimmi Thawngṭha, Pathian Pennak kong le Jesuh Khrih min kong kha an zumh tikah nu he pa he tipilnak kha an ing. ¹³ Simon hrimhrim zong nih cun a zumh ve i tipilnak a in dih hnuah Filip sinah cun aa helhum lengmang ve; a nganmi hmelchunhnak hna le khuaruahharnak hna kha a hmuh hna tikah a khuaruah a har ngaingai. ¹⁴ Samaria mi nih Pathian bia kha an hmuh ve ti kha Jerusalem khua i a ummi lamkaltu pawl nih khan an theih tikah an sinah cun Peter le Johan kha an hei thlah hna. ¹⁵ An va phak tikah zumtu hna nih khan Thiang Thlarau an hmuh nakhnga thla an campiak hna. ¹⁶ Zeicahtiah Thiang Thlarau cu annih lakah khan aho cung hmanh ah a tlung rih lo; Bawipa Jesuh min in tipil lawng an rak ing rih. ¹⁷ Cun Peter le Johan nih an cungah an kut an chuan i Thiang Thlarau kha an hmuh. ¹⁸ Lamkaltu hna nih an cungah an kut an chuan tikah Thiang Thlarau an hmu ti kha Simon nih a hmuh tikah Peter le Johan kha a thawh hna i, ¹⁹ "Ka kut ka chuanpiakmi hna paoh nih Thiang Thlarau kha an hmuh ve nakhnga hi ṭhawnnak hi ka pe ve u," tiin phaisa kha pek a zalh hna. ²⁰ Sihmanhsehlaw Peter nih cun a leh i, "Pathian laksawng cu phaisa in ka cawk khawh lai tiah na ruah ruangah hin nangmah le na phaisa cu hell ah va tla ko u! ²¹ Pathian mithmuh ah na lung kha ahmaan lo caah kan rian ṭuannak ah hin zeihmanh naa tel venak a um lo. ²² Cucaah cun hi thil ṭhalo na ruahmi hi i ngaihchih law hi bantuk thil ṭhalo na ruahmi hi an ngaihthiam khawh nakhnga Bawipa sinah thla cam. ²³ Zeicahtiah fiang tein ka hmuhmi cu nahchuahnak in na khat i sual thongtla na si," tiah a ti. ²⁴ Simon nih Peter cu a thawh i, "Na chimmi vialte hi pakhat hmanh ka cungah a tlun nakhnga lo Bawipa sinah thla ka campiak tuah," tiah a ti. ²⁵ An hmuhmi le an theihmi kong an chim dih hnu le Bawipa bia kha an chim dih hnuah Peter le Johan cu Jerusalem khua ah an tlung ṭhan. Lampi ah Thawngṭha kha Samaria ram khua tampi ah an chimpah. ²⁶ Bawipa vancungmi pakhat nih Filip cu a thawh i, "I tim law thlanglei ah vung kal law Jerusalem in Gaza ah a kalmi lam ah khan vung kal tuah," a ti (Cu lam cu an hmang ti lo). ²⁷ - ²⁸ Cucaah Filip cu aa tim i a kal. Cu lioah cun Ethiopia mi tilditmi pakhat an khua lei i a tlungmi a rak um. Cu pa cu bawi upa pakhat a si i Kandeis ti zongah ti a simi Ethiopia Siangpahrangnu tangka bawi kha a si. Amah cu Pathian biak awkah khan Jerusalem khua ah a va kal i a rangleng in a tlun lei a si. Rangleng aa citpah cun Isaiah cauk kha a rel. ²⁹ Thiang Thlarau nih Filip cu a thawh i, "Va kal law khi rangleng khi va naih tuah," tiah a ti. ³⁰ Filip cu a va tli i a relmi cu Isaiah cauk chung bia a si kha a theih i, "Na relmi cu a sullam na hngal maw?" tiah a hal. ³¹ Cu bawi nih cun a thawh i, "Aho tal nih a sullam chimh lo cun zeitindah ka hngalh khawh hnga," tiah a ti. Cun Filip kha rangleng cungah hin hung kai law ka sinah ṭhu tuah, tiah a sawm. ³² A rak rel lengmangmi caang cu hihi a si: "Amah cu thah awkah hruaimi tuu bantuk a si, amah cu a hmul an meh tikah a awn-au lomi tuufa bantuk a si; bia kaa khat hmanh chim lo tein a um ko. ³³ Ningzahnak kha a in, chanhtu ahohmanh a ngei lo. Hi vawlei cung a nunnak cu a dongh cang caah a tefa hna kong kha ahohmanh nih an chim kho lai lo." ³⁴ Kha bawi nih khan Filip cu a thawh i, "Profet nih hin aho kong dah a chim, ka chim tuah; amah kong maw aa chim, midang kong dah a chim?" tiah a ti. ³⁵ Filip nih cun a vun i thawh i, hi Baibal cang hin i thawk in Jesuh kong Thawngṭha kha a chimh. ³⁶ An vung zuan lengmang lioah khin ti tlawmpal a rak umnak hmun pakhat kha an phan i cu tikah cu bawi nih cun aa thawh i, "Hika ah hin pei ti a um hi, zei nih dah tipil in a ka donh lai?" tiah a ti. ( ³⁷ Filip nih aa thawh i, "Na lung dihlak in na zumh ahcun tipilnak cu na in ko lai," tiah a ti. "Ka zumh, Jesuh Khrih cu Pathian Fapa a si ti kha ka zumh ko," tiah a ti.) ³⁸ Cu bawi nih cun rangleng cu a dirter i an pahnih cun ti chungah khan an vung kal i Filip nih tipilnak cu a pek. ³⁹ Ti chungin an hung chuah tikah Bawipa Thlarau nih Filip cu lo diam in a lak. Kha bawi nih khan a hmu ṭhan ti lo, sihmanhsehlaw lunglawm ngaiin a kal. ⁴⁰ Filip cu Ashdod ah khan a hung chuak i Sisaria khua tiang khua kip ah aa chawk i Thawngṭha kha a chimh hna.

¹ Cu lio hrawngah cun Bawipa zultu pawl kha Saul nih thah awkin a tlerh cuahmah lengmang ko hna. Tlangbawi Ngan sinah a hung kal i ² Damaskas khua Judah pumhnak inn haotu pawl sin i theihhngalhnak ca kha a hung hal. A duhnak cu khi khua ah khan Bawipa Lam a zulmi ka hmuh hna ahcun nu thlulo pa thlulo in ka tlaih hna lai i Jerusalem ah ka kalpi hna lai, ti a si. ³ Damaskas khua a hei fuh lio, khua pawng a phak ah khin, chikkhatte ah van in ceu pakhat nih a velchum in a run ceuh. ⁴ Vawlei ah a tlu i aw pakhat nih, "Saul, Saul, zeicahdah na ka hrem?" tiah a ti thawng kha a theih. ⁵ "Ahodah na si, Bawipa?" tiah a leh. Aw nih cun, "Keimah cu na hremmi Jesuh ka si. ⁶ Tho law khua chungah khan va lut tuah, khika ah na tuah awk hnga kha an rak in chimh lai," tiah a ti. ⁷ Saul he a kal ṭimi hna cu cipkhap ti loin an dir ko; aw cu an theih, sihmanhsehlaw ahohmanh an hmu hna lo. ⁸ Saul cu vawlei cun a hung tho i a mit a hun au, sihmanhsehlaw zeihmanh a hmu kho lo. Cucaah a kut in an hruai i Damaskas khua chungah cun an luhpi. ⁹ Ni thum chung khua hmu kho loin a um, cu chung vialte cu rawl zong a ei lo, ti zong a ding lo. ¹⁰ Damaskas khua ah cun zultu pakhat Ananias an timi a rak um. Cu pa nih cun langhnak a hmuh i cu langhnak a hmuhmi ah cun Bawipa nih, "Ananias," tiah a ti i anih nih, "Hika ah ka um, Bawipa," tiah a leh. ¹¹ Bawipa nih cun a thawh i, "I tim law Lam Ding timi ah khan va kal law Judas inn ah khan Tarsas khuami pakhat Saul an timi cu a um maw um lo tiah va hal hna. Amah cu thla a cam lio a si i ¹² langhnak in mipa pakhat Ananias timi a rung luh i khua a hmuh ṭhan nakhnga a cung i a kut a chuan kha a hmuh," tiah a ti. ¹³ Ananias nih cun a leh i, "Bawipa, mi tampi nih hi pa kong hi an ka chimh; Jerusalem khua i na mi hna cungah thil ṭhalo a tuahmi vialte kha ka theih. ¹⁴ Cun Damaskas khua i a rat zongah hin na min an komi hna paoh kha tlaih awkah tlangbawi upa hna sin in nawlngeihnak ca a run i phorh fawn," tiah a ti. ¹⁵ Sihmanhsehlaw Bawipa nih cun a leh i, "Va kal ko, zeicahtiah amah cu keimah rian ṭuantu dingah, Jentail mi hna le siangpahrang hna le Israel mi hna sinah ka min hngalhter awkah ka thim cang. ¹⁶ Cun keimah hrimhrim nih keimah ruangah a in lai dingmi thil vialte kha ka hmuhsak lai," tiah a ti. ¹⁷ Cucaah Ananias cu a va kal i inn ah khan a va lut i Saul cungah cun a kut a va chuan. "Ka nau Saul, hika lei i na rat lio i na sinah a langmi Bawipa — Jesuh hrimhrim — nih khan keimah cu a ka fial. A ka fialnak cu nangmah nih khua na hmuh ṭhan i Thiang Thlarau in na khah nakhnga caah a si," tiah a ti. ¹⁸ Chikkhatte ah khin Saul mit cun nga phokphawher bantuk khi a tla i khua a hmu kho ṭhan. A dir i tipilnak kha a in; ¹⁹ cun rawl a ei dih hnuah a thazang kha a tlung ṭhan. Saul cu Damaskas khua i a ummi zultu hna sinah khan ni tlawmpal a cam. ²⁰ Pumhnak inn ah khan i cungcang loin a va kal i, "Jesuh cu Pathian Fapa a si," tiah a chimh hna. ²¹ A bia a theimi paoh cu an khuaruah a har i, "Hi pa hi Jerusalem khua i Bawi Jesuh min a komi paoh a that i hika zongah hin cu bantuk ṭhiamṭhiam in annih kha tlaih i tlangbawi upa hna sinah kalpi awkah a ramipa kha a si lo maw?" an ti. ²² Sihmanhsehlaw Saul phungchimmi cu a ṭhawng chin lengmang i Jesuh cu Messiah a si tiah a chim khawhnak kha mi lung a fianter tuk caah Damaskas khua i a ummi Judah mi hna nih khan an let kho lo. ²³ Ni tam nawn hnuah khin Judah mi cu an i pum i Saul thahnak dingah khua an khang; ²⁴ sihmanhsehlaw tuah an i timhmi kha a chimtu an rak um. Amah kha thah an duh caah cun chunzan in khua kutka kha an cawngh hna. ²⁵ Sihmanhsehlaw zan khat cu Saul kha a hawile nih khua kulhnak vampang a pemnak awng in lengah bawm in an thlak. ²⁶ Saul cu Jerusalem khua ah khan a hung kal i zultu pawl kha komh a hung timh hna. Sihmanhsehlaw annih nih zultu a si ve cang ti kha an rak zum lo i cucaah amah cu an ṭih ngaingai. ²⁷ Khi tikah Barnabas nih khan amah cu a bawmh i lamkaltu pawl sinah khan a kalpi. Zeitindah Saul nih lampi ah Bawipa a hmuhnak kong le Bawipa nih a sinah bia a chimnak kong tehna kha a chimh hna. Damaskas khua i Saul nih ralṭha ngaiin Jesuh min in phung a chimnak zong kha a chimh hna. ²⁸ Cucaah Saul cu an sinah khan a um i Jerusalem khua kha a cul dih i Bawipa min in ralṭha ngaiin phung a chimh hna. ²⁹ Grik holh in a holhmi Judah mi hna he zong khan bia an i ruah i a al zong an i al len, sihmanhsehlaw annih nih cun thah kha an timh. ³⁰ Hi kong kha zultu unau rual hna nih khan an theih tikah Saul kha Sisaria khua ah an kalpi i Tarsas khua ah khan an kalter. ³¹ Cuticun Judea ram le Galilee ram le Samaria ram i a ummi khrihfabu vialte nih khan daihnak caan an hmu. Bawipa kha ṭihzah ngaiin an um i Thiang Thlarau bawmhnak thawngin an ṭhang i an karh. ³² Peter cu khuazakip ah khan a kal i voi khat cu Lidda khua i a ummi Pathian mi hna kha a va tlawng hna. ³³ Khika ah mipa pakhat Ainias an timi kha a va hmuh i cu pa cu mizeng a si i a ihkhun in kum riat chung a tho ti lo. ³⁴ Peter nih cun a thawh i, "Ainias, Jesuh Khrih nih an damter cang. Tho law na ihphah kha zual," tiah a ti. Chikkhatte ah khin Ainias cu a tho. ³⁵ Amah cu Lidda le Sharon i a ummi vialte nih khan an hmuh i Bawipa leiah an i mer. ³⁶ Cun Joppa khua ah hin Jesuh zummi nu pakhat a min Tabitha a simi a um, (amah cu Grik holh cun Dorkas ti a si i a sullam cu sazuk tinak a si.) ṭhatnak tuah le sifak bawmh ah khan a caan vialte cu a hman dih tawn. ³⁷ Cu caan ah cun a rak zaw i a thi. A ruak cu an ṭawl i cunglei dot ah khan an suan. ³⁸ Joppa khua cu Lidda khua khan a hla tuk lo i zultu pawl nih khan Peter cu Lidda ah a um ti an theih tikah mi pahnih an hei thlah hna i, "Khulrang in kan sinah ra ta tuah," tiah bia an cah. ³⁹ Cucaah Peter cu aa tim i an sinah cun a kal. A va phak tikah cungdot ah khan an kaipi. Nuhmei vialte nih khan a zual in an zual i an ṭahpah khan, Dorkas nih a nun lioah a rak serpiakmi hna angki hna le puan hna kha an hmuhsak. ⁴⁰ Peter nih an dihlak in a chuahter hna i a khuk aa bil i thla a cam; cun miruak leiah khan a hei i mer i, "Tabitha, tho tuah," tiah a ti. A mit kha a hun au i Peter kha a hmuh tikah a hung ṭhu. ⁴¹ Peter nih a kut a hei chanh i a thawh. Cun a zummi hna le nuhmei hna kha a auh hna i a nung in an sinah cun a pek hna. ⁴² Hi thawng nih cun Joppa khua kha a cul dih i mi tampi nih Bawipa kha an zumh. ⁴³ Peter cu Joppa khua ah khan saphaw sertu Simon sinah saupi a cam.

¹ Sisaria khua ah hin mipa pakhat a rak um i a min cu Kornelias a si; amah cu Rom ralkapbu pakhat, "Itali Ralkap Bu" timi a haotu kha a si. ² Amah cu biaknak leiah aa zuam ngaingaimipa a si i amah le a innchungkhar nih khan an dihlak in Pathian kha an biak. Amah nih khan Judah mi hna lak i misifak hna kha siang ngaiin a bawmh hna i Pathian sinah thla zong a cam zungzal. ³ Ni khat cu zanlei suimilam pathum tluk ah khin langhnak a hmu i cu langhnak a hmuhmi ah cun Pathian vancungmi pakhat a rung luh i, "Kornelias," tiah a rung chawnh kha fiang tein a hmuh. ⁴ Vancungmi kha thinphang ngaiin dengteo in a zoh i, "Zeidah, bawipa?" tiah a ti. Vancungmi nih cun a hun leh i, "Pathian nih na thlacamnak le misifak na bawmh hnanak kha an cohlanpiak i nangmah cu an philh lo. ⁵ Cucaah atu ah Joppa khua ah mi hei thlah hna law a min Simon Peter a simi pa kha va auhter hna. ⁶ Amah cu rilikam i a ummi saphaw sertu Simon inn ah a tlung," tiah a ti. ⁷ Cun amah sinah bia a chimtu vancungmi kha a kal i Kornelias nih cun a inn chung i a sinum pahnih hna le ralkap pakhat kha a auh hna; ralkappa cu biaknak lei i lungthin a ngei ngaingaimi a si i amah Kornelias a zohkhenhtu hna lak i aa tel vemi pakhat kha a si. ⁸ Thil umtuning vialte kha a chimh hna i Joppa khua ah cun a thlah hna. ⁹ A thaizing chun hrawng Joppa khua an hei phak deng ah khan, Peter cu thlacam awkah inn cungah a kai. ¹⁰ A rawl a ṭam i rawl ei kha a duh; cun rawl an ser lioah khan langhnak a hmu. ¹¹ Van kha aa hung i puan he aa lomi thil a ki ki li in vawlei i an run thlakmi kha a hmuh. ¹² A chungah cun saram a phunphun le a lawn in a lawnmi thilnung a phunphun le ramlak va a phunphun kha an um. ¹³ Aw pakhat nih a hun thawh i, "Tho tuah, Peter, that hna law ei tuah hna," tiah a ti. ¹⁴ Sihmanhsehlaw Peter nih a thawh i, "Ka ei lai lo, Bawipa. Thurhhnawmhmi thil le a thiang lomi thil cu zeihmanh ka ei bal lo," tiah a ti. ¹⁵ Cun aw nih cun a vun chawnh ṭhan i, "Pathian nih a thiang a timi cu zeihmanh nang nih a thianglo ah ruat hlah," a ti. ¹⁶ Cu thil cu cuticun voi thum tiang a um i cu hnuah van leiah lak ṭhan a si. ¹⁷ Peter cu a hmuhmi langhnak kha a sullam zeidah a si hnga tiah khuaruahhar in a ruah lengmang lioah khan Kornelias nih a thlahmi hna cu Simon inn kha an phan i a kutka hmaiah khan an rak dir cang. ¹⁸ An hei auh hna i, "Hika ah hin Simon Peter timi khualpa a um maw?" tiah an hei hal hna. ¹⁹ Peter cu langhnak a hmuhmi a sullam kha zeidah a si hnga tiah hngalh aa zuam lengmang lioah khin Thlarau nih a vun thawh i, "Ngaihmanh, minung pathum nih an in kawl len ko. ²⁰ Cucaah i tim law vung ṭum law annih cu keimah nih ka thlahmi hna an si caah an sin i kal kha i thuahthah hlah," tiah a ti. ²¹ Cucaah Peter cu a vung ṭum i mi cu a thawh hna i, "Nan kawl lengmangmi cu keimah hi ka si. Zei herh ah dah nan rat?" tiah a ti hna. ²² Annih nih cun an leh i, "Kepṭen Kornelias nih a kan thlahmi kan si. Amah cu miṭha le Pathian a biami a si i Judah mi vialte nih an hmaizah ngaingaimi a si. Amah nih cun na bia kha a theih ve nakhnga Pathian vancungmi pakhat nih nangmah cu a inn rat va sawm awkah amah cu a chimh," tiah an ti. ²³ Peter nih cun mi hna cu, inn chungah rung lut u, tiah a ti hna i cu zan cu khika ah cun an riak. A thaizing cu aa tim i an sinah khan a kal i Joppa khua i unau cheukhat zong kha an kal ve. ²⁴ A kiptuh ah cun Sisaria cu an va phan i cuka ah cun Kornelias le a sahlawh a rualchan hna le a hawikom a rak sawmmi hna nih khan an rak hngah ko. ²⁵ Peter cu a vung luh hnik ah khin Kornelias nih cun a rak don i a hmaiah a rak bawk. ²⁶ Peter nih cun a vun thawh i, "Dir tuah, keimah zong minung pei ka si ve ko cu," tiah a ti. ²⁷ Inn chung an luhpah cun Peter nih khan Kornelias cu bia a ruah lengmang i cuka ah cun mi tampi an rak i pumh kha a hmuh hna. ²⁸ Annih cu a thawh hna i, "Judah mi cu Jentail mi he i len i kai awk le i komh i hawi awk kha an biaknak phung nih a onh hna lo ti cu nannih nih fiang tein nan hngalh. Sihmanhsehlaw mi zeihmanh kha a thur le a thianglo i ka ruah hna nakhnga lo Pathian nih a ka hmuhsak cang. ²⁹ Cucaah nan ka auh tikah zeihmanh alnak um lo tein ka ra ko. Cucaah zeicahdah nan ka auh ka chim tuah u," tiah a ti hna. ³⁰ Kornelias nih aa thawh i, "Tihni hmasa hmasa chin ah khan atu tikah hin ka inn ah zanlei suimilam pathum ah thla ka cam. Chikkhatte ah khin puan vaar aa aihmi pakhat ka hmaiah khin a hung dir i ³¹ a ka thawh i, ’Kornelias, Pathian nih na thlacamnak kha a theih i sifak na bawmhnak hna kha a philh lo. ³² Joppa khua ah mi hei thlah hna law a min Simon Peter a simi kha va kawhter hna. Amah cu rili kam i a ummi saphaw sertu Simon inn ah a tlung khah,’ tiah a ka ti. ³³ Cucaah nangmah cu khulrang in kan kawh i na ra. Atu cu kan dihlak in hika ah hin Pathian hmaika ah kan um i Pathian nih chim awkah an fialmi paoh cu kan chim tuah," tiah a ti. ³⁴ Peter nih cun aa thawh i, "Atu cu Pathian nih mi vialte kha aa ruang tein a zoh hna ti kha ka hngalh. ³⁵ Mi zei miphun chungmi hmanh a si ah, amah a ṭihmi paoh le dinnak a tuahmi paoh cu a cohlan hna. ³⁶ Mi vialte Bawipa a simi Jesuh Khrih thawngin Pathian nih remnak Thawngṭha Israel mi a pek hna cu nan hngalh. ³⁷ Johan nih tipilnak kong a chim hnuah khan, Galilee in i thawk in Israel ram dihlak ah thil lianngan a hung ummi kong kha nan hngalh fawn. ³⁸ Cu thil lianngan cu, zeitindah Pathian nih Nazareth khuami Jesuh kha Thiang Thlarau le ṭhawnnak a toih i Pathian nih a umpi caah zeitindah khuazakip ah aa chawh i khuachia ṭhawnnak tangah a ummi vialte a damter hna kha a si. ³⁹ Judah mi hna ram chung le Jerusalem khua i a tuahmi vialte a hngaltu tehte cu kanmah kha kan si. Vailamtahnak ah thir an khenh chih i an thah. ⁴⁰ Sihmanhsehlaw ni thumnak ni ah Pathian nih thihnak in a thawhter i mi kip sinah si loin, ⁴¹ Pathian nih tehte caah a kan thimmi kanmah sin lawngah khan Pathian nih cun a langhter. Thihnak in a thawh hnuah amah he cun kan ei ṭi kan ding ṭi. ⁴² Cun mi sinah Thawngṭha chim awk le amah cu Pathian nih a nungmi he a thimi he an biaceihtu ah a ser cang ti tehte khaangtu ah a kan fial. ⁴³ Profet vialte nih amah kong cu an rak chim i amah a zummi paoh cu a min ṭhawnnak thawngin an sualnak kha ngaihthiam an si lai, tiah an ti," tiah a ti. ⁴⁴ Peter nih bia a chim lengmang lioah cun a bia a ngaimi hna cungah khan Thiang Thlarau a ṭum. ⁴⁵ Judah mi lakah zumtu, Joppa khua in Peter a run zul vemi hna nih khan Jentail mi cung zongah Pathian nih a Thiang Thlarau laksawng kha a toih ve ko ti an hmuh tikah an khuaruah a har. ⁴⁶ Zeicah ti ahcun, holhtheihlo in an holh le Pathian lianhngannak an thangṭhat kha an theih hna caah a si. Cun Peter nih cun, ⁴⁷ "Hi mi hna nih hin Thiang Thlarau cu kanmah nih kan rak hmuh bantukte khan an hmuh ve. Cucaah ti in tipilnak in awkah aho nih an dawn kho hna hnga maw?" tiah a ti. ⁴⁸ Cucaah Jesuh Khrih min in tipil in awk kha a fial hna. Cun kan sinah tlawmpal in cam ko rih, tiah an nawl.

¹ Judah peng chung i a ummi lamkaltu hna le unaule hna nih khan Jentail mi zong nih Pathian bia kha an cohlan ve ti kha an theih. ² Cun Peter cu Jerusalem khua i a hung kal ah khan, Jentail mi hna cu an cuarpar i tan hna seh, ti a duhmi hna nih khan an rak soi i, ³ "Cuarpar tan lomi Jentail mi hna inn ah na tlung i rawl zong na ei," tiah an rak ti. ⁴ Cucaah Peter nih cun thil umtuning vialte kha tling tein a hramthawk tein a chimh hna. ⁵ Aa thawh i, "Joppa khua ah khan thla ka cam i langhnak kha ka hmuh. Puan nganpi pakhat, a ki pali in van in an run thlakmi he aa lomi thil khi ka hmuh i ka pawngah khan a rung dir. ⁶ A chung kha ṭha tein ka vun zoh i inn zuat saṭil le ramsa le a lawn in a lawnmi thilnung hna le va kha ka hmuh hna. ⁷ Cun aw pakhat kha ka theih i, ’Peter, tho law that hna law ei hna,’ tiah a ti. ⁸ Sihmanhsehlaw kei nih khan kaa thawh i, ’Sihlah, Bawipa. Thurhhnawmhmi rawl siseh, a thiang lomi rawl siseh, ka kaa chungah a lut bal lo,’ tiah ka ti. ⁹ Cun aw nih cun vancung cun a run ka chawnh ṭhan i, ’Pathian nih a thiang a timi thil paohpaoh cu a thianglo ah rel hna hlah,’ tiah a ti. ¹⁰ Hi thil hi voi thum tiang a um i a donghnak ah cun a ningpi in vancung ah khan an run hnuh ṭhan. ¹¹ Cu lio caan thengte ah cun Sisaria khua in ka sinah an rak thlahmi mi pathum hna kha ka tlunnak inn cu an ra phan. ¹² Thlarau nih i thuahthah loin an sin i kal awk kha a ka fial. Hi kan unau paruk hna, Joppa khuami hna zong hi ka sinah cun Sisaria khua ah khan an kal ve i kan dihlak in Kornelias inn ah khan kan i ṭhum. ¹³ Amah nih cun a inn chungah vancungmi pakhat a rung dir i, ’Joppa khua ah mi hei thlah hna law a min tling Simon Peter a simi mipa pakhat kha va au hna seh. ¹⁴ Amah nih cun bia an chimh hna lai i cu bia thawng cun khamhnak nan hmuh lai,’ tiah a chimtu a hmuhnak kha a kan chimh. ¹⁵ Cun an sinah bia ka chim tikah khan, a hramthawk i kan cungah a rak tlun bantukte khan, an cungah cun Thiang Thlarau kha a tlung ve. ¹⁶ Khi tikah kan Bawipa nih, ’Johan nih cun ti in tipilnak a pek hna, sihmanhsehlaw nannih cu Thlarau in tipilnak pek nan si lai,’ tiah a rak timi kha ka lung ah a hung pem. ¹⁷ Kannih nih Bawipa Jesuh Khrih kan zumh tikah Pathian nih laksawng a kan pekmi bantukte kha Jentail mi hna zong Pathian nih cun a pek ve hna ti kha a fiang ko; cucaah, a hi kei nih hin maw, Pathian cu ka donh hnga?" tiah a ti. ¹⁸ Cu bia cu an theih tikah an soinak cu an ngol i Pathian kha an thangṭhat i, "Pathian nih Jentail mi hna zong, i ngaihchih i nun awkah caan ṭha kha a pek ve hna," tiah an ti. ¹⁹ Steven an thah hnu i hremnak a hung chuakmi nih khan zumtu hna cu a kenkiplo ah a ṭhek dih hna. A cheu cu Foinisia le Saipras le Antiok tiang khan an kal i bia cu Judah mi lawng kha an chimh hna. ²⁰ Sihmanhsehlaw zumtu a cheu, Saipras rammi le Sairin mi hna cu Antiok khua ah khan an kal i Jentail mi zong kha thawng cu an thanh hna i Bawipa Jesuh kong Thawngṭha kha an chimh hna. ²¹ Bawipa ṭhawnnak kha an sinah a um i mi tampi nih an zumh i Bawipa leiah khan an i mer. ²² Cu thawng cu Jerusalem khua i a ummi Khrihfabu sinah a hung phan i cucaah Barnabas cu Antiok khua ah khan an hei thlah. ²³ A va phak i zeitluk in dah Pathian nih annih kha thluachuahnak a pek hna ti kha a hmuh tikah a lung aa lawm i annih cu an dihlak tein Bawipa cu an lungthin a dihumnak in i tlaih awk le a sinah zumhawktlak tein um awk kha a forh hna. ²⁴ Barnabas cu miṭha a si, Thiang Thlarau le zumhnak in a khatmi a si. Cun mi tampi nih Bawipa cu an zumh. ²⁵ Cun Barnabas cu Tarsas khua ah khan a va kal i Saul kha a va kawl. ²⁶ A hmuh tikah Antiok khua ah khan a ratpi i kum khat chung kha Khrihfabu chungmi hna he khan an i pum i mi tampi kha an cawnpiak hna. Antiok khua ah hin pei Jesuh zultu hna kha, "Khrihfa," tiah an rak ti hmasa bik hna cu. ²⁷ Cu lio hrawngah cun Jerusalem in Antiok ah khan profet tlawmpal an va kal i ²⁸ an lak i pakhat a min Agabas an timi kha a dir i vawleicung dihlak ah mangṭam a fak ngaimi a tlung lai, tiah Thlarau ṭhawnnak thawngin, a rak chimchung. (Cu mangṭam cu Klaudias siangpahrang a si lioah khan a tlung). ²⁹ Zultu pawl nih khan anmah le an ti khawh tawk cio ah Judah ram i a ummi unau pawl bawmhnak pek awkah khan an i ceih. ³⁰ Cuticun an tuah i tangka cu khrihfa upa hna sinah khan Barnabas le Saul kut in an kuat.

¹ Hi caan lio hrawngah hin Siangpahrang Herod nih khrihfabu chungmi cheukhat kha a hrem hna. ² Johan unau Jeim kha vainam in a thahter hna i ³ hi nih hin Judah mi kha an lung a lawmhter hna ti kha a hmuh tikah Peter zong kha a tlaihter fawn hna. (Mah hihi Thilnu Phulh Lo Changreu Puai lioah khan a si). ⁴ Peter cu an tlaih hnuah thong ah khan an thlak i ralkapbu bu li nih an cawngh; bu khat ah cun ralkap pali lengmang an um. Herod nih aa timhning ah cun Lanhtak Puai dih in zapi hmaiah bia ka ceih te lai, ti a si. ⁵ Cucaah Peter cu thong chungah khan an chiah ko, asinain khrihfabu chungmi hna nih cun a caah khan thla fak piin an cam. ⁶ Herod nih zapi hmaiah ka chuahpi cang lai tiah a timi caan a phak lai zan ah khan, Peter cu ralvengtu ralkap pahnih hna karlak ah khan a it. Thirhri pahnih in an hren i thonginn kutka cu ralvengtu nih an cawngh. ⁷ Chikkhatte ah khin Bawipa vancungmi pakhat kha khika ah cun a hung dir i thonginn chung cu a ceu. Vancungmi nih cun Peter cu a liang in a hninh i a ṭhangh, "Khulrang in tho tuah!" tiah a ti. Hmakhatte ah Peter kut cun thirhri cu an tla. ⁸ Cun vancungmi nih cun a thawh i, "Na taisawm i sawmh law na kedan i danh tuah," tiah a ti. Peter nih cu bantuk cun a tuah i vancungmi nih cun, "Na puan kha i aih law hung ka zul," tiah a ti i, ⁹ Peter nih cun thonginn lengah khan a hei zulh. Asinain vancungmi nih a tuahmi cu a taktak a si rua ti awk a hngal lo, langhnak ka hmu rua tiah a ruah. ¹⁰ Ralvengtu hna umnak hmasa bik le a pahnihnak kha an hei lonh i khua chung vung lanhnak thir kutka kha an phan. Kutka cu amah tein a rak i hung i annih cu an chuak. Lam kha an vun zul i vancungmi nih khan Peter cu, duak tiah a kaltak. ¹¹ Khi tikah Peter cu a lung a hung fim i, "Atu cu hihi ahmaan tiah ka hngalh cang! Bawipa nih a vancungmi kha a run thlah i Herod kut chung le Judah mi nih ka cungah an i ruahchihmi vialte chungin a ka khamh," tiah a ti. ¹² Thil umtuning kha a hung fian tikah Johan Marka nu Mary inn ah khan a va kal. Khika ah cun mi tampi kha an rak i pum i thla an rak cam. ¹³ Peter nih innleng lei innka kha a vun kingh i an sinumnu Roda an timi nih hun awkah a va kal. ¹⁴ Peter aw a si ti kha a hngalh tikah a lung aa lawm tuk i innka cu hung loin a kir i, Peter kha lengah a dir ko, tiah a chimh hna. ¹⁵ "Na molh," tiah an rak ti, sihmanhsehlaw a si hrimhrim ko, tiah a ti peng hna tikah khan, "A vancungmi a si lai," an ti. ¹⁶ Cu lioah cun Peter nih cun innka cu a kingh lengmang ko. Annih nih an va hun i amah cu an hmuh tikah an khuaruah a har. ¹⁷ "Dai tein um u," tiah a kut in a hmuhsak hna i Bawipa nih zeitindah thonginn chungin a chuahnak kha a chimh hna. "Mah hihi Jeim le kan unau dang hna kha va chim hna u," tiah a ti hna i kaa dang ah a kaltak hna. ¹⁸ Cun zinglei a hung si tikah khan Peter hi zei nih dah a ti hnga tiin ralvengtu hna cu awlokchong in an i tuai. ¹⁹ Herod nih, kawl u, tiah a ti hna, sihmanhsehlaw an hmu kho lo. Cucaah ralvengtu pawl cu bia nan hal hna lai i nan thah hna lai, tiah a ti. Cu hnuah cun Herod cu Judea ram khan a vung kal i Sisaria khua ah khan caan tlawmpal a vung um. ²⁰ Herod cu Tair le Sidon mi hna cungah khan a thin a hun ngaingai caah, cu hna nih cun a bu in amah cu ton awkah a sinah khan an va kal. A hmasa bik ah siangpahrang inn uktu Blastas kha anmah lei ṭang dingin an i sawm. Cun Herod sinah cun an va kal i i rem ko u sih, tiah an va nawl. Zeicahdah tiah an rawl laknak cu Herod siangpahrang ram hin a si. ²¹ An ni tinh ni ah Herod cu a siangpahrang thuam khan aa thuam i a bawiṭhutdan cungah khan a ṭhu i mizapi sinah cun bia a chim. ²² "Bia a chimtu hi minung a si lo, pathian a si," tiah an au. ²³ Herod nih Pathian kha upatnak a pek lo caah Bawipa vancungmi nih chikkhatte ah a vun tuk. Amah cu tholung nih an ei i a thi. ²⁴ Pathian bia cu a karh i a ṭhang chin lengmang. ²⁵ Barnabas le Saul nih khan an rian cu an lim i Jerusalem in an ra kir i Marka kha an i ratpi.

¹ Antiok khua khrihfabu chungah khan profet hna le cawnpiaktu saya hna tlawmpal an um, cu hna cu Barnabas, Simeon (Simeon cu Pa Nak ti zongah an ti), Sairin mi Lusias, Mangki bawi Herod khukṭhi Manaen le Saul kha an si. ² Annih nih Bawipa kha an biak i rawl an ulh lioah khan, Thiang Thlarau nih a thawh hna i, "Barnabas le Saul hi, ka thiahmi hna rian kha an ṭuan nakhnga, a dang tein ka chiahpiak hna u," tiah a ti. ³ Rawl an ulh i thla an cam dih in an cungah an kut an chuan i an thlah hna. ⁴ Barnabas le Saul cu Thiang Thlarau nih a fial hna bang khan Seleusia khua ah khan an vung kal i cuka cun Saipras tikulh ah tilawng in an kal. ⁵ Salamis khua an phak tikah khika ah Judah mi hna pumhnak inn ah khan Pathian bia kha an chim. An rian a bawmtu hna caah Johan Marka kha an i kalpi. ⁶ Cu tikulh cu Pafos khua tiangin an hei ṭol i khika ah khan camhthiam a min Bar-Jesuh a simi kha an va ton, amah cu Judah mi a si i profet ka si tiah aa timi a si. ⁷ Amah cu cu tikulh a uktu bawi Sergius Paulus an timi, mifim ngaingaimipa i a hawikom a si. Uktu bawi nih cun Pathian bia kha theih a duh caah Barnabas le Saul kha a auh hna. ⁸ Sihmanhsehlaw annih cu camhthiam Elimas (cucu a Grik min a si) nih khan a rak al hna i uktu bawi kha Pathian cu zum hlah seh tiah kham aa zuam. ⁹ Khi tikah Paul ti zongah ti a simi Saul, Thiang Thlarau in a khatmi nih khan camhthiampa cu dengteo in a zoh i, ¹⁰ "Khuachia fa! Nangmah hi a ṭhami thil paohpaoh dohtu na si; nangmah hi hlennak ṭhalo a phunphun in na khat, Bawipa biatak hi lih i canter naa zuam zungzal. ¹¹ Bawipa kut cu atu ah na cungah a tlung lai, na mit a caw lai i caan tlawmpal chung cu chun ceu na hmu lai lo," tiah a ti. Chikkhatte ah khin Elimas mit cu minmei nak nih a zelh i a kut in a hruaitu dingmi kawl ah i dap lengmang in aa chawk. ¹² Thil a hung ummi kha a hmuh tikah uktu bawi cu a zummi ah a cang i Bawipa kong an cawnpiakmi nih khan a lung a sukhai ngaingai. ¹³ Paul le a hawile hna cu Pafos khua khan tilawng in an kal i Pamfilia ram Perga khua kha an phan; khika khan Johan Marka nih a kirtak hna i Jerusalem khua ah a tluntak hna. ¹⁴ Perga cun an hei kal i Pisidia ram Antiok khua kha an phan; cun Sabbath ni ah pumhnak inn ah khan an kal i an ṭhu. ¹⁵ Cuka mi hna nih Moses Nawlbia Cauk chungin le profet hna caṭialmi chungin an rel hnuah pumhnak inn uktu hna nih cun an i thawh i, "U le nau hna, mizapi caah forhnak bia chim awk nan ngeih ahcun chim tuah hna u," tiah an ti hna, ¹⁶ Paul cu a dir i a kut in dai u tiah a hmuhsak hna i biachim hram aa thawk: "Ka phunhawi Israel mi hna le Pathian a biami Jentail mi hna, ka bia hi ngai tuah u. ¹⁷ Hi Israel miphun Pathian nih hin, kan pupa hna kha a rak thim hna i Izipt ram chung i ramdangmi bantukin khua an vung sak lioah khan miphun nganpi ah a ser hna. Pathian nih a liannganmi a ṭhawnnak in Izipt ram in a chuahter hna i ¹⁸ kum sawm li chung thetse ram ah khan a in hna. ¹⁹ Kanaan ram chungah miphun phun sarih kha a hrawh hna i a mi hna cu ram ngeitu ah khan a ser hna. ²⁰ cucu kum za li le kum sawm nga lio hrawngah khan a rak si. "Cun cu hnuah cun profet Samuel chan tiang khan biaceihtu kha a pek hna. ²¹ Cun annih nih siangpahrang kan pe tiah an hal tikah Pathian nih Saul, Benjamin phun chungmi Kish fapa kha, kum sawm li chung an siangpahrang si awkah a pek hna. ²² Amah cu a phuah hnuah Pathian nih cun David kha an siangpahrang ah a ser. Amah kongah Pathian nih a chimmi cu, ’Jesse fapa David hi ka duhmi phun a si, amah hi tuah tiah ka fialmi a tuah duh dingmi a si,’ ti hi a rak si. ²³ Hi pa tefa chung hin, Pathian nih bia a rak kam cang hna bangin, Israel mi cu khamhtu Jesuh kha a pek hna. ²⁴ A rat lainak kha Johan nih a rak timhtuah chung i a timhtuahnak ah cun Israel mi vialte kha nan sualnak i ngaihchih u law tipilnak ing u, a ti hna. ²⁵ Cun Johan nih a rian cu a lim dengmang tikah mizapi cu a thawh hna i, ’Aho a si ti ah dah nan ka ruah? Keimah cu nan hngahmi hi ka si lo. Sihmanhsehlaw zohhmanh u, amah cu ka hnu in a ra lio i kei cu a kedan phoihtu hmanh ah kaa tlak lo,’ tiah a ti hna. ²⁶ "Ka u le ka nau hna, Abraham tefa hna le hika i a ummi Jentail mi vialte, Pathian a biami hna: hi khamhnak bia hi kanmah hi pei pek kan si cu. ²⁷ Zeicahtiah Jerusalem i a ummi hna le an hruaitu hna nih khan amah cu Khamhtu a si kha an hngal lo i cuhleiah Sabbath fate an rel lengmangmi profet bia hna zong kha a sullam an hngal hna lo. Sihmanhsehlaw Jesuh an thahnak thawng khan profet bia kha an tlinter hna. ²⁸ Annih nih thah awkah aa tlak tinak caah bia an hmu kho lo nain Pilat kha kan thahpiak ko tiah an nawl. ²⁹ Amah kongah Cathiang nih a chimmi vialte an tuah dih hnuah vailam cung khan an ṭhumh i thlan ah an vui. ³⁰ Sihmanhsehlaw Pathian nih mithi hna sin khan a thawhter i ³¹ amah sin i Galilee in Jerusalem tiang khual a tlawng tawnmi hna sinah khan voi tampi a lang. Annih cu Israel mi sin i a tehte an si. ³² - ³³ Cun atu hi, hi Thawngṭha hi nannih sin phakpi awkah hika i kan ratnak cu a si. Kan pupa hna sinah, ka tuah lai, tiah Pathian nih bia a rak kammi kha, kannih an tefa hna sinah hin atu cu a tuah cang, cucu Jesuh a nunter ṭhan hi a si. Cucu Salm fung hnihnak chung i ’Nangmah cu ka Fapa na si, nihin ah na Pa ka si cang,’ tiah aa ṭial bantuk khan a si. ³⁴ "Cun mithi hna sinin a thawhnak kong, thutnak i zeitikhmanh ah a kir ṭhan ti lai lonak kong ah Pathian nih a chimmi cu, ’A thiangmi le zumh awk a tlakmi thluachuahnak, David ka rak kamhmi kha, nangmah kan pek lai,’ ti hi a si. ³⁵ "Cun hmun dang ah, ’Nangmah an tlaihchanmi na sal cu thutnak na inter lai lo,’ tiah a chim bantuk khan a si taktak fawn. ³⁶ David nih khan amah a caan ah khan Pathian rian cu a rak ṭuan; cun a thi i a hringsortu hna sinah khan vui a si i thutnak kha a in. ³⁷ Sihmanhsehlaw mithi hna sinin Pathian nih a thawhtermi cu thutnak kha a ing lo. ³⁸ - ³⁹ Ka u le ka nau hna, nan dihlak in nan hngalh awk cu, Jesuh thawng hin pei sual ngaihthiamnak bia nan sin i chim hi a si cu; Moses Nawlbia nih an luatter khawh lomi hna sualnak khan pei amah a zummi paohpaoh cu a luatter hna cu. ⁴⁰ Cucaah i ralring u law profet nih, ⁴¹ ’Nannih mi nihsawh hmangmi hna, Zohhmanh u, nan khuaruahhar u law thi ko u. Zeicahtiah nanmah nan chan hrimhrim ah ka tuahmi rian hi Nannih nih nan zumh lai lomi thil, midang nih a sullam an in chimh hna hmanh ah nan zumh duh lai lomi a si,’ tiah an chimmi bia hi nan cungah tlunter hlah u," tiah a ti hna. ⁴² Paul le Barnabas cu pumhnak inn in an ṭin pah ah khan, hmai Sabbath ni ah ra ṭhan u law hi thil kong hi tam deuh in kan chim ṭhan rih u, tiah an sawm hna. ⁴³ Zapi cu pumhnak khan an ṭian hnuah Judah mi a tampi le Judah phung a zulmi Jentail mi mi tampi hna nih khan an zulh hna. Lamkaltu hna nih khan annih cu an chimh hna i Pathian vel chung i um camcin awk kha an forh hna. ⁴⁴ A hmai Sabbath ni ah cun khua chung i a ummi kha an dihlak dengmang in Bawipa kong bia theih awkah cun an ra chuak. ⁴⁵ Judah mi nih mizapi kha an hmuh hna tikah nahchuahnak in an khat; Paul nih a chimmi kha an al i amah kha an nihsawh. ⁴⁶ Sihmanhsehlaw Paul le Barnabas nih khan ralṭha chinchin in an chimh hna i, "Nannih sin i Pathian bia chim hmasa hi a herh taktakmi a si. Sihmanhsehlaw nannih nih nan duh lo ca le zungzal nunnak hmu dingah aa tlak in nan i ruah lo caah, nannih cu kan in kaltak hna lai i Jentail mi sinah kan kal cang lai. ⁴⁷ Zeicahtiah Bawipa nih a kan pekmi nawlbia cu: ’Nannih cu Jentail mi ca i ceunak si awk le Vawlei cung dihlak ca i khamhnak lam si awkah kan chiah hna,’ ti hi a si," tiah a ti. ⁴⁸ Jentail mi hna nih cu bia cu an theih tikah an i lawm i Bawipa cu, cu bia ruangah cun an thangṭhat; cun zungzal nunnak hmu dingah thim a simi hna nih khan an zumh i ⁴⁹ khika hrawngah khan Bawipa bia cu a kenkip ah aa ṭhek. ⁵⁰ Sihmanhsehlaw Judah mi hna nih khan, cu khua chung i hruaitu deuhdeuh a simi hna le Pathian a biaminu, upat hmaizah awk deuh a simi kha an forh hna i Paul le Barnabas cu hrem hram an thawk hna; cun cuka ram cun an dawi hna. ⁵¹ Lamkaltu hna nih khan an kebeh cu an khawnhnawhtak hna i Ikonium ah an kal. ⁵² Antiok khua i a ummi zultu hna cu lunglawmhnak le Thiang Thlarau in an khat.

¹ Cu bantuk ṭhiamṭhiam cun Ikonium khua zongah a si: Paul le Barnabas cu Judah mi pumhnak inn ah khan an va kal i bia kha an chimh hna i Judah mi le Jentail mi mi tampi kha zumtu ah an i cang. ² Sihmanhsehlaw a zum duh lomi Judah mi hna nih khan Jentail mi kha an forh hna i unau pawl kha an huatter hna. ³ Khika ah lamkaltu hna kha saupi an cam. Bawipa kong kha ralṭha ngaingai in an chim i a velngeihnak kong an chimmi kha ahmaan ti hmuhsaknak caah khuaruahharnak tuah khawhnak kha a pek hna. ⁴ Khuachungmi cu an i cheu: a cheu nih Judah mi kha an ṭanh hna i a cheu nih lamkaltu kha an ṭanh hna. ⁵ Cun Jentail mi hna le Judah mi hna nih khan, an hruaitu hna he, lamkaltu hna kha nihsawh le lung in cheh awk kha an i tim. ⁶ Cu kong cu lamkaltu hna nih an theih tikah Likaonia ram i a ummi Listra le Derbe khua le cu khua hna pawngkam ram ah khan an zam. ⁷ Cuka ah cun Thawngṭha kha an va chim. ⁸ Listra khua ah cun kebeimipa pakhat a rak um; amah cu a chuah kate in a beimi a si i a kal kho bal lo. ⁹ Khika ah cun a ṭhu ve i Paul bia kha a ngai ve. Paul nih cun, hi pa nih hin ka chimmi hi a zumh i damh khawh a si lai, ti kha a hmuh caah amah cu dengteo in a vun zoh i ¹⁰ aw thangpi in, "Na ke in ding tein dir tuah," tiah a ti. Mipa cu a hun i hlawk i aa chawk kho ai. ¹¹ Paul nih a tuahmi kha mibupi nih cun an hmuh tikah an Likaonian holh in an au i, "Minung bantuk ah pathian cu an i cang i kan sinah an rung ṭum," tiah an ti. ¹² Barnabas kha Zeus pathian tiah an ti i Paul kha a holh lengmangtu a si caah Hermes tiah an ti. ¹³ Khua lengte ah biakinn a ummi Zeus pathian tlangbawi nih khan cawtum hna le pangpar ṭhirual hna kha kutka ah khan a rak put hna. Amah le mizapi hna nih cun lamkaltu hna kha raithawinak pekchanh an timh hna. ¹⁴ Barnabas le Paul nih tuah an i zalhmi kha an theih tikah an puan kha an thleh i mibupi chungah cun an zuang cutmat i ¹⁵ "Zeicahdah mah hihi nan tuah? Kannih zong minung sawhsawhte kan si ve ko, nanmah bantuk minung kan si ve ko. Hika i kan ratnak cu nannih kha hi santlailo thil hna hi hlawt i van le vawlei le rili le a chung i a ummi thil vialte a sertu Pathian lei i mer awkah Thawngṭha ra chim kha a si. ¹⁶ Hlanah cun mi vialte kha anmah duhning cio lam zulh kha a onh ko hna. ¹⁷ Sihmanhsehlaw amah a um kha thil ṭha a tuahmi in a langhter zungzal ko: van in ruah an pek hna i a caan hmaan te ah thlaiti an pek hna; rawl kha an pek hna i lunglawmhnak in an khahter hna," tiah a ti. ¹⁸ Lamkaltu hna nih hiti in bia an chim na hmanh hin, mibupi cu har le fe in an sin i raithawinak pekchanh kha an kham khawh hna. ¹⁹ Pisidia ram Antiok khua le Ikonium khua in Judah mi tlawmpal kha an ra i mizapi cu anmah leiah an ṭanter khawh hna, Paul kha lung in an cheh i a thi cang rua tiah an ruah caah khua lengah khan an hnuh. ²⁰ Sihmanhsehlaw zumtu hna nih khan an hun pumhhnawh tikah a tho i khua chungah khan a lut ṭhan. A thaizing ah Barnabas he Derbe khua ah an kal. ²¹ Paul le Barnabas nih Derbe khua ah cun Thawngṭha kha an chim i zultu tampi an hmuh hna. Cun Listra ah khan an kir i cuka cun Ikonium le Pisidia ram Antiok khua ah khan an kal. ²² Zumtu hna kha thazang an pek hna i nan zumhnak ah khan fek tein hmun ko u, tiah an forh hna. "Pathian Pennak chung luh awkah hin harnak tampi kan ton a hau," tiah an cawnpiak hna. ²³ Khrihfabu kip ah khan khrihfa upa an chiah hna i thlacamnak le rawl ulhnak he, an i bochanmi Bawipa kut chungah khan, an chiah hna. ²⁴ Pisidia ram kha an ṭol dih in Pamfilia ram kha an phan. ²⁵ Perga khua ah khan bia cu an chim i Attalia ah khan an vung kal, ²⁶ cuka cun Antiok khua ah khan lawng in an kir ṭhan; Antiok khua cu, atu ah an limmi an rianṭuan awk caah Pathian velngeihnak chung i an rak sanh hnanak hmun kha a si. ²⁷ Antiok khua an phak tikah khrihfabu kha an pumh hna i Pathian nih anmah thawngin a tuahmi thil vialte kha an chimh hna i Jentail mi zong nih an zumh ve nakhnga an caah lam a hun ti kha an theihter hna. ²⁸ Cuka ah cun zumtu hna sinah khan caan saupi an um.

¹ Judea ram in mi cheukhat kha Antiok khua ah khan an ra i, "Moses Nawlbia nih a kan cawnpiak bangin, nan cuarpar nan i tan lo ahcun khamhnak nan hmu kho lai lo," tiah unau pawl kha an cawnpiak hna. ² Paul le Barnabas nih khan cu kong cu fak piin an al hna; cucaah Paul le Barnabas le Antiok khuami cheukhat kha Jerusalem khua ah hung kal hna seh law hi kongah lamkaltu pawl le upa hna kha hung tong hna seh, tiah bia an khiah. ³ Khrihfabu nih khan an hei thlah hna i Foinisia le Samaria an hei tanpah ah khan zeitluk in dah Jentail mi hna nih Pathian leiah an i mer tinak kong kha an chimh hna; cu thawng nih cun unau vialte kha a lawmhter ngaingai hna. ⁴ Jerusalem khua an va phak tikah khrihfabu le lamkaltu hna le upa hna nih khan an rak conglawmh hna i anmah thawngin Pathian nih a tuahmi vialte kha an chimh hna. ⁵ Sihmanhsehlaw zumtu hna lakah khan, Farasi bu chung i a simi an rak um i cu hna nih cun an i thawh i, "Annih cu, cuarpar nan i tan lai i Moses Nawlbia kha nan zulh lai, tiah ti awk an si," tiah an ti. ⁶ Hi bia ruah ṭi awkah hin lamkaltu hna le upa hna kha an i pum. ⁷ Saupi an ceih hnuah Peter a dir i, "Ka u le ka nau hna, nannih nih nan hngalh bantukin, Jentail mi hna nih Thawng Ṭha kha an theih i an zumh khawh ve nakhnga, an sin i cu Thawng cu va chim awkah hlan deuhpi ah khan Pathian nih keimah cu nanmah lakin a rak ka thim. ⁸ Cun minung lungthin a hngaltu Pathian nih Jentail mi a cohlan hnanak cu, kanmah a rak kan pekmi bantuk tein Thiang Thlarau a pek ve hnanak ah hin a lang. ⁹ Kannih le annih karlak ah zeihmanh thleidannak a tuah lo; annih nih an zumh caah an lungthin kha a thianter ve ko hna. ¹⁰ Cucaah zeicahdah kan pupa nih si hna seh, kannih nih si u sih, kan phorh khawh lomi thilrit cu an liang cung i chonh nan timhnak thawng hin Pathian cu hneksak del nan duh? ¹¹ Asilo, kannih zong kha kan zumh i pei Bawipa Jesuh vel thawng cun khamhnak kan hmuh kha, annih zong cu cu bantukte cun pei an si ve ko cu," tiah a ti. ¹² Barnabas le Paul nih, Pathian nih Jentail mi hna lakah a hman hna i anmah thawngin khuaruahharnak a tuahmi vialte kha an chim tikah, annih cu an ningpi in dai tein an um. ¹³ Bia an chim dih tikah khan Jeim nih khan aa thawh i, "U le nau hna, ka bia hi ngai tuah u. ¹⁴ Simon nih, zeitluk in dah Pathian nih Jentail mi kha an zawn a ruah hna ti cu a kan chimh cang i cu a langhnak cu anmah lakin amah min putu dingah mi aa thimmi hna hi a si. ¹⁵ Profet nih an rak chimmi bia cu hi bia he hin aa kheng ngaingai. Cathiang chungah zeitindah a um tiah: ¹⁶ ’Hi hnuah hin ka ra kir ṭhan lai i David inn a tlumi kha ka tun ṭhan lai. A rawhnak kha ka remh lai i ka sak ṭhan lai. ¹⁷ Cucaah miphun dang vialte, ka mi si awk ca i ka auhmi Jentail mi vialte hna nih khan Bawipa cu an ka kawl lai. ¹⁸ Cuticun Bawipa, hlanlio piin thil a rak chimtu nih cun a ti.’ ¹⁹ "Cucaah kei ka ruahnak ah cun Pathian leiah a hun i mermi Jentail mi hna hi harnak kan pek hna awk a si lo. ²⁰ Cu nakin kan tuah awk deuh a si tiah ka ruahmi cu, ca kan kuat hna lai i siasal sinah pekchanh ciami sa cu thurhnawmh cangmi sa a si caah ei nan i sum lai, nu le pa sualnak khan an i sum lai, hngawngdih sa ei nan i sum lai, zei thi hmanh ei nan i sum lai, tiah kan ti hna lai. ²¹ Zeitintiah Moses Nawlbia kha Sabbath ni fate pumhnak inn kip ah caan saupi rel lengmang a si ko cang i khua kip ah a bia kha chim a si ko cang," tiah a ti. ²² Cun lamkaltu hna le upa hna nih khan khrihfabu an dihlak he, an bu chungin mi i thim i Paul le Barnabas sinah Antiok khua i thlah kha an hna a tla. Barsabbas ti zongah timi Judas le Silas kha an thim hna; annih cu an pahnih in unau pawl hna nih khan an upat ngaingaimi an si. ²³ A tanglei ca hi an kut cun an kuat hna: "Kannih, lamkaltu hna le upa hna, nan unau hna nih, Antiok, Siria le Silisia i a ummi unau vialte, chuahkehnak lei in Jentail mi a simi nan kut kan in tlaih hna. ²⁴ Kannih kan bu chungin mi a cheukhat nih nan sinah an ra i an chimmi nih nan lung an tuai hna i hna an hnawh hna ti kha kan theih; sihmanhsehlaw hi hna hi, hi bantukin va tuah u, tiah kannih nih kan ti hna lo. ²⁵ Cucaah kannih cu kan i pum i nan sin i thlah ding lamkaltu hna thim awkah khan kan hna a tla. Annih cu kan dawtmi kan unau hna Barnabas le Paul, ²⁶ kan Bawipa Jesuh Khrih rian ca i thih ngamh in a cawlmi hna sinah hin an ra lai. ²⁷ Cucaah ca in kan in kuatmi hna an pum in nannih sinah a hung chimtu dingah Judas le Silas hi nan sinah kan rak thlah hna. ²⁸ Hi a herhmi nawlbia hlei in a dang zeihmanh nan cungah khin lo ding kha Thiang Thlarau le kannih kan hnatlaknak a si: ²⁹ siasal pekchanhmi rawl kha ei i sum u, thi ei kha i sum u, hngawngdih sa ei i sum u, cun nu le pa sualnak kha i sum u. Hi thil hna tuah hi nan i sum ahcun nan caah a ṭha lai. Dam tein," tiah an ti. ³⁰ Lamkaltu hna cu an thlah hna i Antiok khua ah cun an va kal; khika ah zumtu vialte kha an pumh hna i ca kha an pek hna. ³¹ Ca kha an rel tikah thazang peknak bia nih khan an lung a lawmhter ngaingai hna. ³² Profet a simi Judas le Silas nih khan unau pawl cu saupi bia an chimh hna i ralṭhatnak le thazang an pek hna. ³³ Cuka ah cun sau nawn an um hnuah daihnak in unau pawl nih cun an kalter ṭhan hna i a thlahtu hna sinah khan an kir ṭhan. ( ³⁴ Asinain Silas cu khika um ding khan aa khiak.) ³⁵ Paul le Barnabas cu Antiok ah khan sau nawn an cam. A dang mi tampi hna he, Bawipa bia kha an cawnpiak hna i an chimh hna. ³⁶ Cu hnu caan tlawmpal ah khin Paul nih Barnabas cu a thawh i, "Va kal ṭhan u si law Bawipa kong kan chimnak khua paoh ah khan kan unau hna kha va tlawng ṭhan hna u si law zeitindah an um ti kha va zoh hna u sih," tiah a ti. ³⁷ Barnabas nih khan Johan Marka kha i kalpi ṭhan a duh; ³⁸ sihmanhsehlaw an khual tlawnnak a dongh tiang a rak zulh hna lo i Pamfilia in a rak kirtak hna caah khan Paul nih i kalpi awk cu a ṭha tiah a ruat lo. ³⁹ Fak piin an i al i pakhat le pakhat an i ṭhen. Barnabas nih Marka kha aa lak i Saipras tikulh leiah lawng in an kal; ⁴⁰ cun Paul nih Silas kha aa thim i unau pawl nih khan Bawipa velngeihnak chungah an sanh hna hnuah an kal. ⁴¹ Siria le Silisia ram kha an ṭol hna i khrihfabu kha an thazang an fehter hna.

¹ Paul cu Derbe khua le Listra khua ah khan a lan chin. Khika ah Khrihfa pakhat a min Timote a simi kha a rak um; a nu zong cu zumtu a si ve i Judah mi a si, sihmanhsehlaw a pa cu Grik mi a si. ² Listra le Ikonium i a ummi unau pawl vialte nih Timote cu an thangṭhatmi a si. ³ Paul nih cun Timote kha i ṭhit a duh caah a cuarpar kha a tan. Cu bantukin a tuah cu khika hrawng i a ummi Judah mi vialte nih Timote a pa cu Grik mi a si ti kha an hngalh caah a si. ⁴ Khua khat hnu khua khat an tlawng i an tlawnpah cun zumtu hna cu Jerusalem khua i a ummi lamkaltu hna le upa hna nih an khiahmi phung kha an chimh hna i cu phung cu nan zulh lai tiah an ti hna. ⁵ Cucaah khrihfabu cu zumhnak ah an ṭhawng chinchin i ni fate in an karh chin lengmang. ⁶ Asia ram chungah Thiang Thlarau nih Thawngṭha kha chim awkah a onh hna lo caah Frizia le Galatia ram chungah khan khual cu an tlawng. ⁷ Misia ramri an va phak ah khan Bithinia ram chungah luh an i zal i sihmanhsehlaw Jesuh Thlarau nih khan a onh hna lo, ⁸ cucaah Misia ram kha an tan i Troas khua ah khan an vung kal. ⁹ Cu zan ah cun Paul nih langhnak pakhat a hmuh i cu ah cun mipa pakhat, Masidonia mi a simi kha a dir i, "Masidonia leiah hin ra law ra kan bawm," tiah a ti lengmangmi kha a hmuh. ¹⁰ Paul nih hi langhnak a hmuh cangkate in Masidonia lei kal awkah khan kan i tim, zeicahtiah cuka i a ummi hna sin i Thawngṭha chim awkah khan Pathian nih a kan auh tiah kan ruah. ¹¹ Troas in tilawng in kan chuak i ding tein Samothrasia ah khan kan kal i a thaizing ah Neapolis kan phan. ¹² Cuka cun ram chungah khan kan lut i Filipi khua kan phan, Filipi khua cu Masidonia ram chung i a um vemi peng peng khat a khualipi a si; cun Rom mi hna ram thar zong a si fawn. Cu khua ah cun ni thum li kan cam. ¹³ Sabbath ni ah khua chung cun kan chuak i tiva kamah kan kal, cuka ah cun Judah mi hna thlacamnak hmun a um lai tiah kan ruah. Kan ṭhu i aa pummi nu kha bia kan ruah hna. ¹⁴ Cu hna lak i kan bia a theimi pakhat cu Lidia a si, amah cu Thiatira khuami a si i maimaw puan a zuarmi a si. Amah cu Pathian a biami nu a si i Paul nih a chimmi bia ngaih awk caah khan Pathian nih a lungthin kha a hunpiak. ¹⁵ Amah le a innchung i a ummi hna nih khan tipilnak an in. Cun a kan thawh i, "Keimah cu Bawipa zumtu taktak ah nan ka ruah a si ahcun, ra u law ka inn ah ra ka tlung u," tiah a kan sawm. ¹⁶ Ni khat cu thlacamnak hmun i kan va kal ṭhan tikah khan lim khuavang a ngeimi sal ngaknu pakhat nih a kan ton i cu a lim khuavang nih cun hmailei thil um ding kha a chimter khawh. Cu bantukin hmailei thil kong a chimnak cun a bawile kha tangka tampi a hmuhter hna. ¹⁷ Amah nih cun Paul le kannih kha a kan zulh i, "Hi hna hi Cung Nung Bik Pathian sal an si i anmah nih hin zeitindah khamh nan si khawh lainak kha an in thanh hna," tiah a au. ¹⁸ Cuticun ni tampi a au lengmang hnuah Paul cu a ing a puanh i a hnulei ah aa mer i khuavang cu, "Jesuh Khrih min in amah chung khan chuak kan ti," tiah a ti. Cu cangka cun khuachia cu a chung khan a chuak. ¹⁹ A bawile nih kan tangka hmuhnak caan ṭha a dih cang ti kha an hmuh tikah Paul le Silas kha an tlaih hna i zapi pumhnak ah bawi hmaiah an chuahpi hna. ²⁰ Rom mi a simi biaceih bawi hna hmaiah khan an chuahpi hna i, "Hi mi hna hi Judah mi an si i kan khua chungah hnahnawhnak an tuah. ²¹ Kan upadi he aa ralchanhmi phung kha mi an cawnpiak hna; kannih cu Rom mi kan si i cu phung hna cu a co zong kan cohlang kho hna lai lo i a zulh zong kan zul kho hna lai lo," an ti. ²² Cu bantukin velh an zalh hnanak ah khan mizapi kha an i ṭom ve i bawi hna nih khan Paul le Silas cu an puan kha an phoih hna i tu hna u tiah ralkap kha an fial hna. ²³ Fak piin an tuk hna hnuah thong ah an thlak hna i thonginn bawi cu fek tein na hrenh hna lai tiah nawl an pek. ²⁴ Cu bantukin thonginn bawi nih nawl a hmuh caah thonginn chung chungchin ah khan a chiah hna i an ke ah khan a ritmi hreng a khenh hna. ²⁵ Zanṭim hrawngah khin Paul le Silas cu thla an cam i Pathian sinah thangṭhatnak hla an sa i thongtla dang nih khan an ngaih hna. ²⁶ Chikkhatte ah khin li a hun i hnin i thonginn cu a hram tiangin a hninh dih. Hmakhatte ah innka vialte kha an i hung dih i thongtla pawl thir cikcin vialte kha an i phoih dih. ²⁷ Thonginn bawi kha a hun i hlau i thong innka an i hun kha a hmuh tikah thongtla vialte kha an chuak dih cang tiah a ruah caah a nam kha aa zuh i amahle amah kha thah aa zal. ²⁸ Sihmanhsehlaw Paul cu fak piin a au i, "Nangmah le nangmah fahnak i pe hlah, kan dihlak in kan um ko," tiah a ti. ²⁹ Thonginn bawi nih khan mei rak pu u tiah a ti hna i khulrang in a lut i Paul le Silas kehram ah cun ther lengmang in a bawk. ³⁰ Cun annih cu a thawh hna i, "Ka bawipale hna, khamhnak hmuhnak dingah zeidah ka tuah lai?" tiah a ti. ³¹ "Bawipa Jesuh kha zum law, nangmah he na innchungkhar he khamh nan si lai," tiah an ti. ³² Cun Bawipa bia cu amah le a innchung i a ummi vialte kha an chimh hna. ³³ Cun cu zan ṭhiamṭhiam ah cun thonginn bawi nih khan a kalpi hna i an hma kha a ṭawlpiak hna; chikkhatte ah amah le a innchungkhar dihlak in tipilnak an ing colh. ³⁴ Paul le Silas cu a inn ah a hun kalpi hna i rawl a pek hna. Amah nih Pathian kha a zumh caah amah le a innchungkhar cu lunglawmhnak in an khat. ³⁵ A thaizing ah Rom nawlngeitu bawi hna nih khan palik bawi an hei thlah hna i, "Kha hna kha rak thlah hna seh," an ti. ³⁶ Cucaah thonginn bawi nih khan Paul cu a chimh i, "Bawi pawl nih nawl an rak ka pek i nangmah le Silas kha rak thlah hna, an ka ti. Cucaah chuak u law dai tein nan khual tlawnnak dingah khan va kal u," tiah a ti hna. ³⁷ Sihmanhsehlaw Paul nih palik bawi pawl kha a thawh hna i, "Kannih cu kan sualnak zeihmanh an kan hmu lo, asinain zapi hmaiah fung in an kan tuk — Rom mi kan si ve ṭung! Cun thong chungah an kan thlak. Cun atu cu a thli tein kalter an kan duh. A si kho lai lo. Rom bawi pawl cu anmah hrimhrim ra hna seh law ra kan chuah hna seh," tiah a ti. ³⁸ Cu bia cu palik bawi pawl nih khan Rom bawi pawl cu an va chimh hna; cun annih nih Paul le Silas kha Rom mi an si ti an theih tikah an thin a phang. ³⁹ Cucaah an va kal i ngaihthiam an va hal hna; thong chung cun an chuah hna i kan khua hin kaa dang ah kal u, tiah an nawl hna. ⁴⁰ Paul le Silas cu thonginn khan Lidia inn ah khan an kal. Khika ah unau pawl kha an ton hna i lungṭhawnnak bia an chimh hna hnuah an kal.

¹ Amfipolis khua le Apollonia khua kha an hei palpah hna i Thesalonika khua kha an phan; khika ah Judah mi pumhnak inn pakhat a rak um. ² Paul nih a tuah tawn bantukin pumhnak inn ah khan a va kal. Khika ah Sabbath ni ni thum chung, mi hna he khan Cathiang chung bia kha an i al i ³ Messiah cu thihnak a in awk le a thawh ṭhan awk a sinak kong kha Cathiang cun a langhter i a fianter. Paul nih cun a thawh hna i, "Hi kan chimhmi hna Jesuh hi Messiah cu a si," tiah a ti hna. ⁴ A cheu cu an lung a pem i Paul le Silas sinah khan an i fon; cun Pathian a biami Grik mi mi tampi hna le nu upa tampi hna zong kha an i fon ve. ⁵ Sihmanhsehlaw Judah mi kha an nah a chuak i khualak i a vak sawhsawhmi zeiruaramlo minung pawl kha an pumh hna i cu hna cu an au an khuang i khua kha a ning piin hnahnawhnak an tuah. Jason inn kha an va nam i an i ruahnak ah cun khika ah khan Paul le Silas kha an rak um lai i mizapi hmaiah kan chuahpi hna lai an ti. ⁶ Sihmanhsehlaw annih kha an va hmuh hna lo tikah Jason le unau pawl a cheukhat kha khua uktu bawi hna sinah an hnuh hna i, "Khua kip ah hnahnawhnak a chuahtertu hna kha atu cu kan khua zong an ra phan ve cang i ⁷ Jason nih hin a inn ah a tlunter hna. Siangpahrang dang a min Jesuh a simi a um an tinak thawng hin Sizar Siangpahrang nawl a buarmi an dihlak hin an si," tiah an au. ⁸ Cuti an au caah cun mibu hna le khua uktu bawi hna cu awlokchong ngaiin an tuah hna. ⁹ Uktu bawi pawl nih cun Jason le a hawi dang hna cu aamahkhannak tangka an pekter hna hnuah an thlah hna. ¹⁰ Zan a si cangka tein unau pawl nih khan Paul le Silas cu Berea khua ah an kalter hna. Khika an va phak tikah Judah mi pumhnak inn ah khan an kal. ¹¹ Khika mi hna cu Thesalonika khuami nakkhan an lung a kau deuh. An chimmi kha lungtho ngaiin an ngaih i Paul nih a chimmi kha a si taktak maw si taktak lo ti hngalhnak caah nifate in Cathiang chung kha an kawl. ¹² Annih lak i mi tampi nih khan an zumh; cun Grik mi nu tampi mirum le upa a simi hna le Grik mi pa tampi zong nih khan an zumh ve. ¹³ Sihmanhsehlaw Thesalonika khua i a ummi Judah mi hna nih khan Paul nih Berea khua zongah Pathian bia a chim hoi ti an theih tikah an ra i mi cu an hung forh hna i an hung tuai hna. ¹⁴ Khulrang in unau pawl nih khan Paul cu rilikam leiah an kalter; sihmanhsehlaw Silas le Timote kha cu Berea khua ah khan an rung cam. ¹⁵ Paul a kalpitu hna kha a sinah cun Athens khua tiangin an va kal. Cun Berea khua ah cun an kir ṭhan i Paul nih khan Silas le Timote cu a ran khawh chungin ka sinah ra hna seh, tiah bia a cah hna. ¹⁶ Paul cu Athens khua i Silas le Timote a rak hngah lio hna ah khan cu khua cu siasal in a khah kha a hmuh i a awlok a chong. ¹⁷ Cucaah pumhnak inn ah khan Pathian a biami Judah mi hna le Grik mi hna he khan bia an i al lengmang i zapi tonnak hmun zongah khan khika i a rami paoh he ni fate an i al lengmang. ¹⁸ Epikurian cawnpiaktu saya a cheukhat le Stoik cawnpiaktu saya a cheukhat he zong an i al. A cheu nih an thawh i, "Hi mihrutpa, langh a duh ngai ṭungmi hi zeidah a chim len ko hnga?" an ti. A cheu nih, "Ramdangmi hna pathian kong chim dawh a si," an ti. Hitihin zeicah dah an ti ti ahcun, Paul nih khan Jesuh kong le thawhṭhannak kong a chim caah khan a si. ¹⁹ Cucaah Paul cu Areopagas an timi pumhnak hmun ah khan an sawm i an chuahpi. An i thawh i, "Na chim lengmangmi cawnpiaknak thar kong hi hngalh kan duh. ²⁰ Na chimmi kan theihmi a cheukhat hi kan caah khuaruahhar a si i an sullam zeidah a si ti kha kan hngalhter law kan duh hnga," an ti. ²¹ (Athens khuami hna le khika i a ummi ramdangmi vialte hna cu thil thar bik kong paoh, i chimh i ruah le va ngaihnak ah an caan vialte a hmang dihmi an si). ²² Areopagas i aa pummi hna hmaiah cun Paul cu a dir i, "Athens khuami hna! Nannih cu biaknak lei thil paohpaoh ah zuamnak lungthin a ngei ngaingaimi nan si kha ka hmuh. ²³ Zeicahtiah nan khua chung i kaa chawh i nan biaknak hmun kha ka zoh hna tikah biakṭheng pakhat cu a cungah "Hngalh lomi Pathian Caah" tiin aa ṭial kha ka hmuh. Cu nan biakmi cu, a hngalh cu hngal hmanh hlah u law, nan sin i kan thanhmi hna hi a si. ²⁴ Vawlei le a cung i a ummi thil vialte a sertu Pathian hi vancung le vawlei Bawi a si i minung sermi biakinn chungah a ummi a si lo. ²⁵ Cuhleiah Pathian cu minung kha nunnak le thaw le zeizong vialte a petu a si caah minung nih an tuahpiak khawhmi kha a herhmi pakhat hmanh a um lo. ²⁶ Minung pakhat chungin miphun vialte kha a ser hna i vawlei cungah hin khua a sakter hna. A hlankan in an caan le an umnak hmun kha a khiahpiak hna. ²⁷ Hihi zeicahdah a tuah ti ahcun, amah kha an kawl i an dah lengmang tikah khan a hmuh tal an hmu phum hnga maw ti caah a si. Asinain Pathian cu aho kan sin hmanh hin aa hlat lo; ²⁸ mi a cheukhat nih, "Amah chungah kan nung, kan cawl kan cang i khua kan sa,’ an ti bantuk le, nan hla phuahtu hna nih, ’Kanmah zong a tefa kan si ve,’ an ti bantuk khan a si. ²⁹ Kannih cu Pathian fa kan si caah, minung nih an fimnak le an thiamnak in an sermi sui milem maw, ngun milem maw, lung milem maw ah khan, Pathian cu kan ruah awk a si lo. ³⁰ Pathian nih hin, minung nih an rak hngalh lo lio caan kha cu hmu duh loin a rak umpiak ko hna, sihmanhsehlaw atu cu khuazeika i a ummi minung hmanh, nan nuncan ṭhalo kha mertak cang hna u, tiah a ti hna. ³¹ Zeicahtiah a thimmipa thawngin vawlei cung dihlak hi dinnak in biaceih awkah ni a khiah cang. Cucu a si ṭheo lai ti kha mi vialte sin i langhternak caah cu mipa cu thihnak in a thawhter," tiah a ti. ³² Paul nih thihnak in thawhternak kong a chimmi kha an hun theih tikah a cheu nih an nihsawh i a cheu nih, "Hi kong hi theih ṭhan kan duh," an ti. ³³ Cuticun pumhnak khan Paul cu a chuak. ³⁴ Asinain mi cheu cu amah sinah khan an i fon i a chimmi kha an zumh; cu hna cu Areopagas i biaceih bawi a simi Dionisias tehna, nu pakhat a min Damaris a simi tehna, mi dang tlawmpal kha an si.

¹ Cu hnuah cun Paul kha Athens khua khan a chuak i Korinth khua ah a kal. ² Khika ah khan Pontas ram i a chuakmi Akuila kha a va ton, amah cu a nupi Prisilla he khan cu laite ah cun Rom khua in an rak zaam, zeicahtiah Siangpahrang Klaudias nih khan Judah mi vialte kha Rom khua in chuak dih u tiah a ṭhawl hna. Paul nih cun a va leng hna i ³ an sinah cun a um i an sinah cun rian a ṭuan; amah zong cu anmah bantuk khan saphaw thlam ser in a paw aa cawmmi a si ve. ⁴ Sabbath fate pumhnak inn ah khan Judah mi he Grik mi he, an lung pemter awkah bia a chimh lengmang hna. ⁵ Silas le Timote kha Masidonia ram in an rak phanh tikah Paul nih a caan kha a dihlak in phungchimnak ah khan a hman i Jesuh cu Messiah kha a si ti kha Judah mi kha a chimh lengmang hna. ⁶ Annih nih amah cu an doh i a thang an chiat tikah a puan i leidip kha a thinhnawh hna i, "Nan loh ahcun nanmah mawhchiat awk nan si ko cang lai. Kei cu mawhchiat awk ka si ti lai lo. Atu thawk hin cun Jentail mi sinah ka kal cang lai," tiah a ti hna. ⁷ Cucaah annih cu a chuahtak hna i Jentail mi a min Titius Justas a simi inn ah khan a um; amah cu Pathian a biami a si i a inn cu pumhnak inn pawngah khan a si. ⁸ Pumhnak inn i haotu a simi Krispas le a chungkhar dihlak nih khan an zumh; cun Korinth khua chung i mi tampi hna nih khan bia cu an theih i an zumh i tipilnak an in. ⁹ Zan khat cu Paul nih cun langhnak a hmuh i cu ah cun Bawipa nih a thawh i, "Na thinphang hlah; chim lengmang ko, ngol lai cih, ¹⁰ zeicahtiah keimah nih kan umpi ko. Hi khua chung i a ummi hna lakah hin mi tampi ka minung an si caah ahohmanh nih harnak an in pe kho lai lo," tiah a ti. ¹¹ Cucaah Paul cu cuka ah cun kum khat le a cheu a um i Pathian bia kha a cawnpiak hna. ¹² Sihmanhsehlaw Gallio cu Rom cozah nih Grik ram uktu bawi ah an ser tikah Judah mi kha an i pum i Paul kha an tlaih i biaceihnak zung ah an chuahpi. ¹³ An i thawh i, "Hi pa nih hin phung ning in si loin Pathian biak awkah khan mi a lem lengmang hna," an ti. ¹⁴ Paul nih bia chim a hun i zalh hnek lioah khin Gallio nih cun Judah mi cu a thawh hna i, "Judah mi hna, hi thil hi ṭhat lonak le sualnak tuahnak kongah a si ahcun, nan cungah hin lungsaunak ka ngeih awk cu aa dawhmi zong a si ko hnga. ¹⁵ Sihmanhsehlaw hi thil cu bia le min le nanmah phung nan i almi kong a si caah nanmahte nih vaa ceih ko u. Cu bantuk thil kong men biaceihtu si cu ka duh lo!" tiah a ti i ¹⁶ zung chung khan a ṭhawl hna. ¹⁷ An dihlak cun pumhnak inn haotu a simi Sosthenes kha an tlaih i zung hmaiah cun an velh. Sihmanhsehlaw Gallio nih khan zeihmanh ah a relpiak hna lo. ¹⁸ Paul cu Korinth khua ah khan ni tam nawn a um hnuah a kaltak hna i Prisilla le Akuila he khan Siria leiah lawng in an kal. Lawng i an kal hlanah cun Kenkhria khua ah biakamnak a tuah i a lu kha aa met. ¹⁹ Efesa khua kha an phan i khika ah Paul nih khan Prisilla le Akuila kha a kaltak hna. Pumhnak inn chungah khan a lut i Judah mi kha bia a chimh hna. ²⁰ Annih nih sau piin kan umpi ko an ti nain a si thiam lai lo, tiah a al hna. ²¹ Efesa khua in a chuahpah ah cun a thawh hna i, "Pathian hnatla a si ahcun, nan sinah ka ra kir ṭhan lai," tiah a ti hna. ²² Sisaria a phak tikah Jerusalem ah khan a hung kal i khrihfabu kha a hung chawnhbiak hna i cu dih cun Antiok khua ah khan a lan. ²³ Cuka ah caan tlawmpal a um hnuah aa thawh ṭhan i Galatia le Frizia ram kha a tlawng hna i zumtu vialte kha thazang a pek hna. ²⁴ Alekzandria khuami Judah mi pakhat a min Apollo a simi kha Efesa khua ah a ra. Amah cu biachim a thiam ngaingaimi a si i Cathiang kha ṭha tein a hngalmi a si. ²⁵ Bawipa Lam kong kha hngal cikcek tein cawnpiakmi a si i Jesuh kong kha lungtho ngaiin a chim i hmaan tein mi kha a cawnpiak hna. Sihmanhsehlaw Johan tipilnak lawnglawng kha a hngalh. ²⁶ Pumhnak inn ah khan ralṭha ngaiin a cawnpiak hna. Cun amah cu Prisilla le Akuila nih khan an theih tikah an inn ah an kalpi i Pathian Lam kong kha hmaan deuh chin in an cawnpiak. ²⁷ Apollo nih cun Grik ram kal kha aa tim, cucaah Efesa khua chung i a ummi a zummi hna nih khan Grik ram i a ummi an unau hna cu ca an kuat hna i amah cu rak conglawmh u tiah an forh hna. Khika ah a phak tikah Pathian velngeihnak thawngin zumtu a simi hna caah khan bawmtu ngaingai a si. ²⁸ Zeicahtiah bia al lei i a ṭhawn caah khan Judah mi cu zapi hmai i bia i al tikah a tei lengmang hna i Cathiang chung khan Jesuh cu Messiah kha a si, ti kha a langhter.

¹ Apollo kha Korinth khua i a um lioah Paul cu kha peng chungah khan khual a tlawng i Efesa khua kha a phan. Khika ah zultu tlawmpal kha a va hmuh hna i ² annih cu a thawh hna i, "Nan zumh ah khan Thiang Thlarau nan rak hmu maw?" tiah a hal hna. Annih nih, "Thiang Thlarau cu a um le um lo hmanh kan hngalh ṭung lo," tiah an leh. ³ "A si kun ahcun, zei bantuk tipilnak dah nan in kun?" tiah Paul nih cun a hal hna. Annih nih, "Johan tipilnak," tiah an leh. ⁴ Cun Paul nih cun a thawh hna i, "Johan tipilnak cu lungthlen hmelchunhnak caah a si, asinain Johan nih khan, ’Ka hnu in a ra liomi hi nan zumh awk cu a si,’ tiah a ti zungzal hna i cu a hnu in a rami cu Jesuh hi a si," tiah a ti hna. ⁵ Cucu an theih tikah annih cu Bawipa Jesuh min in tipilnak kha an ing. ⁶ Paul nih an cungah a kut a chuan i Thiang Thlarau kha an cungah a tlung; holh theih loin an holh i Pathian bia zong kha an chim. ⁷ Annih cu an dihlak in pa pahleihnih tluk an si. ⁸ Paul cu pumhnak inn chungah khan a lut i thla thum chung mizapi kha ralṭha ngaiin a chimh hna, annih kha heh tiah a al hna i Pathian Pennak kong i an lung a pem nakhnga aa zuam. ⁹ Sihmanhsehlaw annih lak i a cheukhat cu an lung a khong i an zum duh lo; Bawipa Lam kong kha zapi hmaiah a ṭhalo tiah an ti. Cucaah Paul nih khan a chuahtak hna i zultu pawl kha aa kalpi hna; ni fate in Tirannas biachimnak inn timi ah khan mi kha a cawnpiak hna. ¹⁰ Cuticun kum hnih chung a tuah i Asia ram chung i a ummi vialte nih, Judah mi si hna seh, Grik mi si hna seh, Bawipa bia kha an theih. ¹¹ Pathian nih voi dang i a um tawn lomi khuaruahharnak kha Paul kut in a tuah. ¹² A pavuah le a hngawngngerh hna hmanh kha mizaw sin i an hei kalpi hna tikah an zawtnak kha a dam i an chungin khuachia kha an chuak. ¹³ Judah mi a cheu khuachia ṭhawl i aa chawk lengmangmi hna nih khan cu khuachia ṭhawlnak ah cun Bawipa Jesuh min kha an hman ve. Khuachia cu an thawh hna i, "Paul nih a chimmi Jesuh min in chuak kaan ti," an ti hna. ¹⁴ Cu bantukin a tuahmi cu, Judah mi Tlangbawi Ngan Skeva fapa pasarih an si. ¹⁵ Sihmanhsehlaw khuachia nih cun a thawh hna i, "Jesuh cu ka hngalh i Paul zong cu ka hngalh, sihmanhsehlaw nannih cu ahodah nan si?" tiah a ti hna. ¹⁶ Khuachia a ngeimipa nih cun a ṭhuat ciammam hna i a tei hna i hmapu le an puan tlek dihlak in a inn cun an zaam. ¹⁷ Efesa khua i a ummi Judah mi le Grik mi vialte hna nih cu kong cu an theih i an thin a phang i Bawipa Jesuh min cu an upat chinchin. ¹⁸ A zummi lak i mi tampi kha an ra i zapi hmaiah an tuahmi vialte kha an phuan. ¹⁹ Camh a rak hmang tawnmi hna nih khan an cauk kha hmunkhat ah an pumh hna i zapi hmaiah khan an khangh hna. Cauk man cu an tuak tikah tangka thong sawm nga tluk a si. ²⁰ Cuticun Bawipa bia cu a karh chin lengmang i a ṭhang i a ṭhawng chin lengmang. ²¹ Hi bantukin thil a um hnuah Paul nih Masidonia ram le Grik ram kha ka tlawng lai i Jerusalem ah ka lan colh te lai, tiah a ruah. "Cun cuka ka phak hnuah Rom zong hmuh hrimhrim kaa zuam lai," tiah a ti. ²² Cucaah amah a bawmtu pahnih Timote le Erastas kha Masidonia leiah a thlah hna i amah tu cu Asia ram chungah khan caan tam deuh a run hmang. ²³ Hi caan lioah hin Bawipa Lam kong ah Efesa khua chungah hnahnawhnak a um. ²⁴ Ngun sosertu pakhat, a min Demetrius a simi nih khan Artemis khuazingnu biakinn lem tete kha ngun in a ser hna i cu rian nih cun a rianṭuantu pawl kha tampi miaknak a pek hna. ²⁵ Cucaah annih cu hmunkhat ah a auh dih hna i, anmah rian bantuk an rian a si vemi zong kha a auh chih hna i, "Ka duale hna, nannih nih nan hngalh bantukin kan chaw hmuhnak cu hi rian hi a si. ²⁶ Cun hipa Paul nih hin zeidah a tuah ti cu nanmahte nih nan i hmuh khawh i nan i theih khawh fawn ko. Aa thawh i, ’Mi sermi pathian cu pathian an si lo,’ a ti i Efesa khua ah hin siseh, cun Asia ram chung zongah hin a dihlak dengmang in, mi tampi kha an lung a pemter hna. ²⁷ Cucaah cun hi kan rian hi a min a chia cang lai tiah thinphan awk a si ko. Cu lawng hmanh cu si loin, a liannganmi khuazingnu Artemis, Asia ram chung le vawleicung dihlak ah mi kip nih an biakmi hi a lianhngannak hi a lo lai i a biakinn zong hi sullam ngei lo a si lai ti phan awk a si fawn," tiah a ti hna. ²⁸ Aa pummi hna nih cun cu bia cu an theih tikah an thin a hung ciammam i an au i, "Efesa i a ummi Artemis cu a lianngan ko," an ti. ²⁹ Cuti i an i tuainak cu khuachung kha a khat dih. Mibu nih cun Paul sin i khual a tlawng vemi Masidonia mi pahnih, Gaius le Aristarkas kha an tlaih hna i bual ah khan an tlikpi hna. ³⁰ Paul nih amah pum in mizapi hmai i va kal kha a duh, sihmanhsehlaw zumtu hna nih khan an thlauh. ³¹ Cun ram uktu bawi a cheukhat, a hawikom a simi hna zong nih khan, bual ah cun rak chuak hlah seh tiin bia an cah. ³² Cun an i pumhnak cu a ningpi in hnahnawk luri ngaiin a um: mi a cheu an aumi cu thil pakhat a si i a dang an rak aumi cu thil dang a si ve; a tam deuh nih cun zeicahdah kan i pumh ti hmanh kha an hngal lo. ³³ Judah mi nih Alekzandar kha hmailei ah an hei chuahter caah khan, hi thil a chuahtertu hi Alekzandar cu a si rua tiah an ruah. Alekzandar nih cun mizapi cu, dai u, tiah a kut a hun zaoh hna i an hmaiah cun aa runvennak bia kha chim hram a hun thawk. ³⁴ Sihmanhsehlaw Judah mi a si kha an hngalh tikah an dihlak cun an au bon khan suimilam pahnih chung an au i, "Efesa khua i a ummi Artemis cu a lianngan ko," an ti. ³⁵ A donghnak ah khua cazi nih khan mizapi cu a daihter khawh hna. A thawh hna i, "Efesa khuami hna, Efesa khua hi a liannganmi Artemis biakinn a umnak le vancung in a rung tlami lung thiang a umnak a si ti kha ahodah a hngal lomi a um? ³⁶ Ahohmanh nih, hihi a si lo tiah an ti kho lai lo. Cucaah cun nannih cu nan daih awk a si; ruat setsai loin zeihmanh nan tuah awk a si lo. ³⁷ Hi mi hna nih hin biaknak inn thil kha zeihmanh an fir lo i kan khuazingnu kha zeihmanh a thang an chiat lo nain, hika ah hin nan chuahpi hna. ³⁸ Demetrius le a rianṭuantu hna nih taza an cuai duhmi an um ahcun biaceihnak zung chuah ni a um ko i biaceihtu zong an um fawn ko; cuka ah cun pakhat le pakhat taza i cuai khawh a si ko. ³⁹ Cun cu nak biapi deuh kha nan duh a si ahcun khuami zapi pumhnak ah khiah awk a si fawn ko. ⁴⁰ Nihin i hi thil a ummi ruangah hin kannih cu hnahnawhnak nan chuahter tiin mawhchiatnak pek kan fawite. Hi hnahnawhnak kongah hin i sonhtarh awk zeihmanh a um lo i hihi zeicahdah hi bantukin a si ti hi ṭha tein chim awk bia kan ngei fawn lo," tiah a ti. ⁴¹ Cu bia a chim dih in pumhnak khan a ṭianter hna.

¹ Hnahnawhnak kha a daih tikah Paul nih khan a zummi kha a kawh hna i thazang peknak bia a chimh hna hnuah, dam tein rung um u, tiah a ti hna i Masidonia ram leiah khan a kal. ² Cuka ram chung khua kha a ṭolpah duahmah hna i thazang peknak bia kha a chimh hna. Cun Grik ram kha a phan i ³ cuka ah cun thla thum a um. Siria i kal dingah a tlam a tlin nawnpah tikah khan Judah mi nih rawi an ka zalh ti kha a hngalh i cucaah Masidonia lei tu khan kal aa tim ṭhan. ⁴ Berea khuami Pirhas fapa Sopater le Thesalonika khuami Aristarkas le Sekandas le Derbe khuami Gaius le Asia ram mi Timote, Tikhikas le Trofimas kha a sinah cun an kal. ⁵ An rak kal chung i Troas khua khan an rak kan hngah. ⁶ Thilnu Phulh Lo Changreu Puai dih in Filipi khua in lawng in kan chuak i ni nga hnuah Troas khua ah kan phak hna; khika ah zarh khat kan cam. ⁷ Zarh chung hmasa bik ni ah hawikomhnak rawl dum ṭi awkah kan i pum. Paul cu a thaizing a kal ding a si cang caah, mi kha bia a chimh lengmang hna i zanṭim tiang a chimh hna. ⁸ Kan i pumhnak khaan, cungdot khaan ah cun meiinn tampi an van. ⁹ Tlangval pakhat a min Zutikhas an timi kha thlalangawng ah khan a ṭhu i Paul nih ngol loin a chim lengmang caah cun a ngu chin lengmang ve i a donghnak ah cun hngilh taktak tein aa hngilh i inncung dot thumnak cun vawlei ah a tla. An vung char i a thi ko. ¹⁰ Sihmanhsehlaw Paul cu a vung ṭum i a bawhhnawh i a ṭang ah aa behchih. "Nan thinphang hlah u, a nung ko rih!" tiah a ti. ¹¹ Cun inncung ah khan a hung kai ṭhan i changreu kha a cheu i an ei. Annih cu saupi, khuadei tiang, a chimh hna hnuah aa thawh. ¹² Tlangvalpa cu inn ah an kalpi i an hna a ngam. ¹³ Lawng ah khan kan rak kal chung i Assos lei kha kan panh; cuka ah cun Paul cu kan lawng ah khan a hun i cit ve ding a si. Anih cu tlanglam in a kal caah cuticun nan tuah lai tiah a kan ti tak. ¹⁴ Assos i kan sin i a ra phak tikah lawng ah cun aa cit ve i Mitilene ah kan kal. ¹⁵ Cuka cun kan chuak i a thaizing ah Khios tikulh zawn kha kan phan. Cun a thaizing nolh ah cun Samos kha kan phan i a kiptuh ah Miletas kha kan phan. ¹⁶ Asia ram chungah kan rauh nakhnga lo lawng in Paul nih Efesa khua kha lanhtak aa zal. Jerusalem khua kha khulrang in phak a duh i a si khawh ahcun Pentekos ni tanh manh kha a duh. ¹⁷ Paul nih Miletas khua khan mi a thlah hna i Efesa khua khrihfa upa kha rak ka tong hna seh tiah bia a cah hna. ¹⁸ Annih cu an ra phanh tikah a thawh hna i, "Nan sin i ka um chung vialte, Asia ram chung i ka ra phakka tein zeitindah nan sinah ka umtuning a si kha nan hngalh. ¹⁹ Toidorte le mitthli he Bawipa sal ka si bangin, Judah mi nih an ka rawiphiar ruangah harnak ing lengmang in ka rian kha ka ṭuan. ²⁰ Nannih kha zapi lakah siseh, nan inn cio ah siseh, phung kan chimh hna i kan cawnpiak hna tikah nan ca i a ṭha dingmi kha zeihmanh ka nganhtakmi a um lo ti kha nan hngalh. ²¹ Judah mi nan si ah, Jentail mi nan si ah, Pathian hmaiah nan sualnak kha i ngaihchih i kan Bawipa Jesuh zumh ding kha, nan dihlak in kan forh hna. ²² Atu cu Thiang Thlarau hruainak zulh in Jerusalem khua ah ka kal lai, khika ah ka cungah zeidah a tlung lai ti ka hngal lo. ²³ Ka hngalhmi cu Thiang Thlarau nih a ka chimh bantukin, khua kip ah thongtlaknak le harnak nih an ka orh ko ti hi a si. ²⁴ Sihmanhsehlaw Bawi Jesuh nih a ka fialmi rian, Pathian velngeihnak Thawngṭha chim hi ka lim khawh paoh ahcun ka nunnak hi cu zeihmanh ah ka rel lo. ²⁵ "Nan dihlak in kan vahhnawh hna i Pathian Pennak kong kha kan chimh hna. Cun atu cu ahohmanh nih nan ka hmu ṭhan ti lai lo ti kha ka hngalh. ²⁶ Cucaah nihin ah fel tein kan chimh duhmi hna cu, nannih lakah hin pakhatkhat nan tlau ahcun, keimah cu mawhchiat awk ka si hnga lo, ti hi a si. ²⁷ Zeicahtiah Pathian nih aa tinhmi kha a dihumnak in kan chimh dih cikcek hna i ka nganhmi zeihmanh a um lo. ²⁸ Nanmah lila kha i veng u law nan zohkhenh awkah Thiang Thlarau nih an pekmi hna tuurun kha ṭha tein va zohkhenh hna u. Pathian nih amah Fapa thihnak thawngin amah ta ah aa sermi khrihfabu tuukhal kha si ko u. ²⁹ Ka kal hnuah ṭih a nungmi cenghngia kha an ra lai i tuurun kha an ngan hna lai lo ti kha ka hngalh. ³⁰ Cun nanmah bu chung lila zong hin mi a cheu nih a zummi hna kha anmah lei i hruai awkah lih an chim lai caan kha a phan lai. ³¹ Cucaah ralring tein um ko u, mitthli he chun zan in kum thum chung nan dihlak in kan cawnpiak hna kha philh hlah u. ³² "Atu cu Pathian velngeihnak chung le zohkhenhnak chungah nannih kha kan sanh hna. Amah nih cun an ṭhanter khawh hna i a mi vialte caah a chiahmi thluachuahnak kha an pek khawh hna. ³³ Ahohmanh an ngun zong ka hngar hna lo, an sui zong ka hngar hna lo, an hnipuan zong ka mit an thi bal lo. ³⁴ Hi ka kutte hin rian ka ṭuan i keimah le ka hawile nih kan herhmi vialte kha keimahte nih ka chuahpi ti cu nanmah hrimhrim nih nan hngalh ko. ³⁵ Zeizong vialte ah hi bantukin fak piin rianṭuannak thawngin a dermi kha kan bawmh hna awk a si ti cu kan hmuhsak cang hna i Bawipa Jesuh zong nih khan zeitindah a rak ti ti ahcun, ’Pek leiah hin hmuh lei nakin lunglawmhnak a um deuh,’ a rak ti; cucu kan philh lo awk a si," tiah a ti. ³⁶ Paul nih bia a chim dih in an dihlak in an khuk an i bil i thla a cam. ³⁷ An ṭahpah in an kuh an hnamh i, dam tein vaa kal ko cang kun, an ti. ³⁸ Nan ka hmu ṭhan ti lai lo, tiah a ti hna caah khan an ngaih a chiat khunnak cu a si. Cun lawng tiang khan an hei thlah.

¹ Dam tein rung um u, tiah kannih zong nih kan ti hna i kan kal. Ding tein lawng cun kan kal i Kos tikulh kha kan phan; a thaizing ah Rods tikulh kha kan phan i cuka cun Patara ah kan lan. ² Khika ah khan Foinisia i a kal dingmi lawng kha kan hmuh i kan i cit i cu lawng cun kan kal. ³ Saipras tikulh a langhnak tiang kan va phan i cuka cun thlanglei ah kan vung kal i Siria ah kan lan. Tair khua ah tikam ah kan ṭum i cuka ah cun lawng nih a thil phorhmi kha a ṭhumh. ⁴ Cuka ah cun a zummi tlawmte kan va hmuh hna i an sinah zarh khat kan cam. Thlarau nih a chimh hna bangin, Paul cu Jerusalem khua ah khan kal hlah tiah an thlauh. ⁵ Sihmanhsehlaw anmah sin kan camnak caan cu a dongh tikah kan i thawh i kan kal ṭhan. An dihlak in, an nupile le an fale hna he khua leng tiang an kan thlah. Rilikam ah cun kan dihlak in kan khuk kan i bil i thla kan cam. ⁶ Cun pakhat le pakhat kha, dam tein, kan i ti hna i kannih cu lawng cungah khan kan kai i annih cu inn leiah an tlung. ⁷ Tair cun kan kal lengmang i Ptolemai kan phan, khika ah unau pawl kha kan hun biakchawnh pah hna i an sinah ni khat kan cam. ⁸ A thaizing ah kan i thawh ṭhan i Sisaria kan phan, khika ah Thawngṭha chimtu Filip inn ah khan kan tlung. Amah cu Jerusalem khua i mi pasarih an thimmi hna lak i pakhat kha a si. ⁹ Amah nih cun va a ngei lomi fanu pali a ngeih hna i annih nih cun Pathian bia kha an chim. ¹⁰ Cuka i sau nawn kan cam hnuah Judea ram in profet pakhat a min Agabas a simi a ra phan. ¹¹ Kan sinah cun a ra i Paul taisawm kha aa lak i a kut le a ke kha taisawm cun aa tem i, "Hihi Thiang Thlarau chimmi a si: Hi taisawm a ngeitupa hi hi bantukin Jerusalem khua ah Judah mi nih an ṭem lai i Jentail mi hna kut ah an chanh lai," tiah a ti. ¹² Hi bia cu kan theih tikah khika i a ummi hna le kanmah pawl nih cun Paul cu Jerusalem khua i kal lo awkah kan nawl. ¹³ Sihmanhsehlaw a kan thawh i, "Zeidah nan tuah? Hi bantukin nan ṭah ahcun ka lung nan ka hnoter. Jerusalem ah hin Bawi Jesuh caah ṭemnak huah lawng hi kaa tinhmi a si ṭung lo, thihnak tiang hmanh ka in lai tiah pei kaa timh cu," tiah a kan ti. ¹⁴ Kannih nih a lung kha kan ṭhial khawh lo caah, "Pathian nawl si ko kun seh," ti tu ah kan ti. ¹⁵ Cuka ah caan tlawmpal kan cam hnuah kan thil cu kan i tim i Jerusalem leiah khan kan kal. ¹⁶ Sisaria khua i a ummi zultu cheukhat zong kan sinah an kal ve i kan tlunnak dingmi pa inn ah khan an kan hruai — cu pa cu Saipras mi Mnason a si i amah cu hlan lio tein a zummi a rak si. ¹⁷ Jerusalem kan phak tikah cun unau pawl nih khan an rak kan conglawmh ngaingai. ¹⁸ A thaizing ah Jeim kha va ton awkah Paul le ti cun kan kal i khrihfa upa vialte zong kha an rak tling. ¹⁹ Paul nih khan a biakchawnh dih hna in Jentail mi hna sinah Pathian nih amah rianṭuannak thawngin a tuahmi vialte kha tling tein a chimh hna. ²⁰ A chimmi cu an theih tikah Pathian kha an thangṭhat. Cun Paul cu an thawh i, "Unaupa, zeitindah thil umtuning a si cu na hngalh ko. Judah mi lakah hin thong tampi a zumtu an um cang i cu hna cu Phung a ṭanh ngaingaimi an si. ²¹ Jentail mi ram chung i a ummi Judah mi vialte kha Moses Nawlbia kha hlaw u law nan fale kha an cuarpar tan hna hlah u law Judah phung kha zul hlah u, a ti hna, tiah nangmah kongah khan bia an theih. ²² Annih nih hika na phak kha an hngalh ding ṭheo a si. Cucaah cun zeidah tuah awk a si lai? ²³ Kan in chimhmi hi tuah ko. Hika ah hin biakamnak a tuahmi mi pali an um. ²⁴ Anmah he cun va kal u law thianhnak phungphai an tuahmi kha va tuah ve law liam awk kha va liampiak hna; cun an lu kha an i met kho lai. Cuticun aho paoh nih na kong an rak chimhmi hna kha biatak aa tel lo tiah an hngalh lai i Moses Nawlbia ning tein khua a sami na si tu kha an hngalh lai. ²⁵ Jentail mi zumtu i a simi hna kong tu ah cun, kannih nih ca kan kuat cang hna i siasal sinah pekchanh ciami rawl nan ei lai lo, thi nan ei lai lo, hngawngdih sa paohpaoh nan ei lai lo, pumsa sualnak kha nan tuah lai lo tiah kan biakhiahnak a si tiin kan ti cang hna," tiah an ti. ²⁶ Cucaah Paul nih khan mi kha a kalpi hna i a thaizing ah i thianhnak phungphai kha a tuahpi hna. Cun biakinn chungah khan a va lut i an i thianhnak caan a dongh tiangah ni zeizat dah a si lai i cu a dongh tikah an caah raithawinak tuah a herh cio lainak kong kha tlangbawi cu a va chimh. ²⁷ Ni sarih kha a dongh deng nawn tikah khin Asia ram in a rami Judah mi tlawmpal hna nih Paul kha biakinn chungah cun an hmuh. Mizapi kha an tuai ciammam hna i Paul kha an tlaih. ²⁸ "Israel mi hna, kan bawm tuah u. Hi pa hi pei a kenkiplo ah a kal i Israel mi ralchanh le Moses Phungbia ralchanh le hi biakinn ralchanh in mi a cawnpiak lengmangtu hna cu a si cu. Cun atu hi hi biakinn chungah hin Jentail mi hna hmanh kha a luhpi hna i a thurhhnawmhter cang," tiah an au. ²⁹ (Hiti an ti cu, Efesa khuami Trofimas kha Paul he khua chungah an hmuh hna i Paul nih biakinn chungah a luhpi, tiah an ruah caah a si). ³⁰ I tuainak cu khuapi chungah cun a khat i mi vialte kha an tli an le i Paul kha an tlaih i biakinn chung khan an chuah. Khulrang in innka kha an hrenh. ³¹ Mibupi nih khan Paul cu thah an timh lioah khin Jerusalem khua cu a ningpi in a buai cang tiin Rom ralkap a haotu hna bawi kha thawng an thanh. ³² Chikkhatte ah cu haotupa nih cun ralbawi tlawmpal le ralkap kha aa kalpi hna i zapi leiah cun an va le. Ralkap he an rat kha an rak hmuh hna tikah Paul an tuk kha an ngol. ³³ Ralkap haotu nih cun Paul cu a tlaih i thir cikcin a thuah in nan khih lai tiah a ti. Cun aa thawh i, "Hi pa hi ahodah a si? Zeidah a tuahmi a si?" tiah a hal hna. ³⁴ Zapi lak cun a cheu nih thil pakhat in an rak au, a cheu nih a dang in an rak au. An i tuai tuk caah cun ralkap haotu nih cun thil a rak ummi kha zei set dah a si ti kha a hngal kho lo i cucaah a mi hna kha Paul cu ralhruang chungah hun luhpi u tiah a fial hna. ³⁵ Hleihlak kha an hei phakpi i mibu kha an puarhran tuk caah ralkap nih cun a zawnh in an zawnh. ³⁶ An hnu cun an dawi lulhmalh hna i, "That u," tiah an au. ³⁷ Ralhruang chungah khan Paul cu an hei luhpi dengmang tikah khin Paul nih ralkapbu haotu kha a chawnh i, "Bia tlawm tein kan chim kho hnga maw?" tiah a ti. "Grik holh na thiam tih?" tiah ralkapbu haotu nih cun a ti i, ³⁸ "A si ahcun, kan hnulei deuh i ralthawhnak a thawk i mi thong li hriam he nam he ramlak i a kalpitu hna Izipt mipa kha cu na si lo ti law?" tiah a ti. ³⁹ Paul nih cun, "Kei cu Judah mi, Silisia ram Tarsas khua i a chuakmi ka si; khuapi minthang fapa pei ka si ve tiah. Zaangfahnak tein mizapi sinah hin bia ka chimter ko," tiah a leh. ⁴⁰ Ralkapbu haotu nih cun a nawl a pek i hleihlak ah cun Paul cu a dir i mizapi kha a kut a zaoh hna. Dai tein an hung um tikah Paul nih cun Hebru holh in bia kha a chimh hna.

¹ Paul nih cun a thawh hna i, "U le nau hna le pale hna, nan hmai i kaa humhaknak bia ka chim tikah hin ka bia hi ka ngaihpiak tuah u," tiah a ti. ² Annih nih Hebru holh in a chim kha an theih tikah an dai chinchin i cun Paul nih cun a bia cu a vun peh i, ³ "Kei cu Judah mi, Silisia ram Tarsas khua i a chuakmi ka si, sihmanhsehlaw ka ca cawnnak cu hika Jerusalem khua ah hin Gamaliel kut tangah khan a si. Kan pupa hna Phungbia kha fel tein cawnpiak ka rak si i nihin i nanmah vialte tlukte hin Pathian leiah aa pumpemi ka rak si. ⁴ Hi Lam a zulmi hna hi ka rak hrem hna i ka rak thah hna. Nu he pa he ka rak tlaih hna i thong ah ka rak thlak hna. ⁵ Tlangbawi Ngan le khawngsil upa hna nih khan ka chimmi hi biatak a si kha tehte an khaan khawh. Anmah sin cun Damaskas khua i a ummi Judah mi hna pek awk ca kha kaa lak i cuticun hi mi hna hi tlaih i thir cikcin in khih i Jerusalem khua i hunpi i dantat awkah khan ka kal," tiah a ti. ⁶ "Damaskas khua leiah cun kan kal i kan hei phak deng ah khin, chun hrawng a si lai, ka velchum ah ceunak pakhat a hung ceu zuk ko. ⁷ Vawlei ah ka tlu i aw pakhat nih a ka chawnh kha ka theih i, ’Saul, Saul, zeicahdah na ka hrem?’ tiah a ti. ⁸ Kei nih ka thawh i, ’Ahodah na si, Bawipa?’ tiah ka ti i, ’Keimah cu na hremmi Nazareth khuami Jesuh ka si,’ tiah a ka ti. ⁹ Ka sin i a ummi hna nih khan ceu cu an hmuh, sihmanhsehlaw bia a ka chimtu aw kha cu an thei lo. ¹⁰ ’Zeidah ka tuah lai, Bawipa?’ tiah ka hal i Bawipa nih cun ’Tho law Damaskas khua chungah va lut tuah; khika ah Pathian nih na tuah awkah a ruahmi vialte cu an rak in chimh lai,’ tiah a ka ti. ¹¹ Ceunak cu a ceu tuk caah cun ka mit a caw i cucaah ka hawile nih khan ka kut in an ka hruai i Damaskas khua chungah cun an ka luhpi. ¹² "Cuka ah cun mipa pakhat a min Ananias a simi kha a rak um, amah cu biaknak lei i lungthin a ngeimi le kan Phunglam a zulmi le Damaskas khua i a ummi Judah mi vialte nih an hmaizahmi a si. ¹³ Ka sinah khan a ra i ka pawngin a dir i, ’Ka nau Saul, hmu ṭhan tuah,’ tiah a ka ti. Cu cangkate cun ka vun hmuh colh i amah cu ka hun zoh. ¹⁴ Aa thawh i, ’Kan pupa hna Pathian nih nangmah cu a duhnak kha hngalhter awk le a dingmi a Sal kha hmuh awkah, amah aw hrim in a chimmi bia kha theih awkah an thim. ¹⁵ Zeicahtiah na hmuhmi le na theihmi kha mi vialte a chimtu amah tehte na si lai. ¹⁶ Cucaah zeicahdah sau deuh ngan a herh? Tho law tipilnak ing ko, amah min na auhnak thawngin na sualnak vialte kha i thianh ko,’ tiah a ka ti. ¹⁷ "Jerusalem ah ka kir ṭhan i biakinn chung i thla ka cam lioah langhnak ka hmuh. ¹⁸ Cu langhnak ah cun Bawipa kha ka hmuh i a ka thawh i, ’Khulrang tein Jerusalem khua hi chuahtak tuah, zeicahtiah hika i a ummi hna nih hin keimah kong i na chimmi bia hi an cohlang lai lo,’ a ka ti. ¹⁹ Cun kei nih, ’Bawipa, pumhnak inn kip ah ka kal i nangmah an zummi kha ka tlaih hna i ka tuk hna cu ṭha tein an hngalh ko. ²⁰ Cun na tehte a simi Steven kha an thah tikah keimah hrimhrim zong kaa tel ve i amah thah kha ka hnatlakpi ve hna i a thattu hna an puan a rak fimhlawmtu kha ka rak si,’ ka ti. ²¹ Sihmanhsehlaw Bawipa nih cun a ka thawh i, ’Kal ko, zeicahtiah ram hlapi i a ummi Jentail mi hna sinah kan thlah lai,’ a ka ti," tiah a ti. ²² Hi tiang a chim ah hin cun mizapi nih khan Paul kha an ngaih ko; sihmanhsehlaw an aw reng chuak khan an au ṭhan i, "Kha pa kha hlo ko u. That ko u. A nung ding tlak a si lo," an ti. ²³ An ai an kiao, an puan kha an hlorh i vuidip kha van ah an vorh. ²⁴ Rom ralkapbu haotu nih cun a mi hna kha Paul cu ralhruang chungah kalpi u law zeicahdah Judah mi nih hi ti hin an auhnawh hnga ti hngalh khawhnak ding caah fungfek in va tu u, tiah nawl a pek hna. ²⁵ Sihmanhsehlaw tuk ding i an hun hren ah khin Paul nih cuka i a dirmi bawi cu a thawh i, "Rom mi a simi, zeidah a sual ti hmanh ceih rih lomi tuk hi, na caah upadi ning a si lai maw?" tiah a ti. ²⁶ Cu bawi nih cucu a theih tikah ralkapbu haotu sinah cun a va kal i, "Na tuahmi hi zeidah a si ti awk na hngal maw? Hi pa hi Rom mi fawh a si hi!" tiah a ti. ²⁷ Cucaah ralkapbu haotu bawipa cu Paul sinah khan a va kal i, "Rom mi na si maw, ka chim tuah," tiah a va ti. Paul nih, "Ka si ko," tiah a leh. ²⁸ Ralkapbu haotu nih cun, "Tangka tampi pek in kei cu ka si," tiah a ti. Paul nih, "Kei cu a chuah in aa chuahpimi ka si," tiah a leh. ²⁹ Paul cu bia kan hal lai tiah a timi hna kha hmakhatte ah an i let ṭhan i ralkapbu haotu cu Paul kha Rom mi a si ti a hun hngalh tikah, thir cikcin in a rak khih kha a thin a phang. ³⁰ Ralkapbu haotu nih cun Judah mi nih Paul hi zei sette dah an puh ti kha hngalh a duh caah a thaizing ah cun Paul cu a thir cikcin kha a phoih i tlangbawi upa hna le khawngsil pawl kha i pum u tiah nawl a pek hna. Cun Paul cu a kalpi i an hmaiah khan a dirter.

¹ Khawngsil pawl cu Paul nih dengteo in a zoh hna i, "Ka u le ka nau hna, nihin ni hrimhrim tiangin Pathian hmaika i ka nunning ah ka chiaṭha thleidannak lungthin a thiang," tiah a ti. ² Paul pawng i a dirmi hna kha Paul cu a ka ah vun beng u, tiah Tlangbawi Ngan Ananias nih khan a ti hna. ³ Amah cu Paul nih a thawh i, "Si rang thuhmi vampang, nangmah cu Pathian nih an bengh lai. Zeitindah keimah cu Phung ningin ka bia ceih awkah khaka ah khan na ṭhut i Phung he aa ralchanh in, hei beng u, na ti fawn ṭung hna?" tiah a ti. ⁴ Paul pawng i a dirmi hna nih cun, "Pathian Tlangbawi Ngan na serhsat," an ti. ⁵ Paul nih a leh hna i, "Ka u le ka nau hna, amah cu Tlangbawi Ngan a si kha ka hngalh lo caah a si. Cathiang chungah, ’Na mi a uktu hna cu na thangchiat lai lo,’ ti bia a um," tiah a ti. ⁶ Paul nih cuka bu chungmi cu a cheu Sadusi mi an si i a cheu Farasi mi an si kha a hmuh hna tikah khawngsil chungah cun a au i, "Ka u le ka nau hna, kei cu Farasi mi, Farasi mi hna fa ka si. Hika i biaceih i ka um hi a thimi kha nunnak ah an tho ṭhan lai ti ruahchannak ka ngeih ruangah a si," tiah a ti. ⁷ Cu bia a chim cangka in Farasi mi hna le Sadusi mi hna cu an i si i an kuai. ⁸ (Zeicahtiah Sadusi mi nih cun mi hi thihnak in an tho ṭhan lai lo, vancungmi an um lo, thlarau zong a um lo, an ti; sihmanhsehlaw Farasi mi nih cun a pathum te hin an zumh dih). ⁹ An aukhuan cu a thang deuh lengmang i Phungbia cawnpiaktu saya cheukhat, Farasi mi pawl a simi kha an dir i fak piin an al hna i, "Hi pa hi a palhnak zeihmanh kan hmu kho lo. Thlarau nih maw vancungmi nih dik a chawnh taktak ko lai," an ti. ¹⁰ An i alnak cu a fak tuk hringhran i ralkapbu haotu nih khan Paul cu an thleh an baoh dih sual lai ti kha a phan caah a ralkap hna kha, mibu chungah cun vung kal u law Paul kha vung la u law ralhruang chungah khan hun luhpi u, tiah a fial hna. ¹¹ Cu zan ah Bawipa cu Paul pawngah khan a dir i, "Na lung ṭhul hlah. Jerusalem khua ah keimah tehte na sinak kha na chim cang, cu bantuk ṭhiamṭhiam in Rom khua zongah na tuah hrimhrim lai," tiah a ti. ¹² A thaizing ah Judah mi a cheukhat kha hmunkhat ah an i tong i khua an khang. Paul kan thah hlanah cun rawl zong kan ei lai lo, ti zong kan ding lai lo, tiah biakamnak an tuah. ¹³ Cu bantukin khua a khang ṭimi hna cu sawm linak tam an si. ¹⁴ Cun tlangbawi upa hna le upa dang hna sinah khan an va kal i, "Paul kan thah hlan paohpaoh zeihmanh kan ei lai lo tiin biakamnak kan tuah cang. ¹⁵ Cucaah nanmah le khawngsil pawl nih khan Rom ralkap haotu kha bia hei cah u law, Paul kongah bia fiang deuh in theih a duh bantukin i umter u law, Paul kha kan sinah run thlah tuah tiah ti u law, kannih nih hika a phak hlanah rak that dingin timhcia tein kan rak um lai," an ti. ¹⁶ Sihmanhsehlaw cu an khuakhanmi cu Paul far fapa nih a theih i cucaah ralhruang chungah khan a va lut i Paul kha a chimh. ¹⁷ Cun Paul nih ralbawi pakhat kha a kawh i, "Ralkapbu haotu sinah hi tlangvalpa hi hei kalpi tuah, zeilo chimh awk a ngei," tiah a ti. ¹⁸ Ralbawipa nih cun a kalpi i ralkapbu haotu sinah cun a hei chuahpi i, "Thongtla Paul nih a ka auh i hi tlangvalpa hi zeilo chim awk a ngeih caah nangmah sinah ratpi awk a ka fial," tiah a ti. ¹⁹ Ralkapbu haotu nih cun a kut in a hruai i amah lawngin aa kalpi i, "Zeidah chimh awk na ka ngeih?" tiah a hal. ²⁰ Tlangvalpa nih cun a thawh i, "Judah mi lak i nawl ngeitu hna nih khan, Paul kongah bia fiang deuh in hngalh a duh bantukin kan i umter lai i nangmah kha biaceihnak khawngsil ah Paul cu thaizing ah hun chuahpi tuah tiah kan nawl lai tiah hnatlaknak an tuah cang. ²¹ Sihmanhsehlaw an bia cu ngai hna hlah, zeicahtiah minung sawm li a thli tein amah a bawhmi kha an um. Kan thah hlanah cun rawl zong kan ei lai lo, ti zong kan ding lai lo, tiah chiat an i serh. Cu tuah dingah cun atu ah hin timhcia tein an um ko i nangmah biakhiahnak kha an in hngak ko," tiah a ti. ²² Ralkapbu haotu nih cun a thawh i, "Hi kong na ka chimh hi ahohmanh va chim hna hlah," tiah a ti i tlangvalpa cu a kalter. ²³ Cun ralkapbu haotu nih khan ralbawi pahnih kha a auh hna i, "Sisaria i kal awkah ralkap za hnih in va tim hna u; cun rangcung ralkap sawm sarih le feipu za hnih zong va timhter chih hna u law tuzan suimilam pakua ah i thawh dingin i tim u. ²⁴ Paul caah khan cit awk rang tim ve hna u law him tein Mangki bawi Feliks sinah phakpi u," tiah a ti. ²⁵ Cun ralkapbu haotu nih cun ca a ṭial i hi bantuk hi a ṭialmi cu a si: ²⁶ "Klaudias Lisias nih Mangki Bawipa Feliks sinah ca kan kuat. Na cungah daihnak um ko seh. ²⁷ Judah mi nih hi pa hi an tlaih i an thah dengmang. Amah cu Rom mi a si ti kha ka hngalh i cucaah ka ralkap hna he kan hung kal i kan hung khamh. ²⁸ Sual an puhmi hi zeidah a si hnga ti hngalh ka duh caah khawngsil pawl sinah khan ka vun kalpi. ²⁹ A tuahmi ah thah awk tlak a simi siseh, thong thlak awk tlak a simi siseh, zeihmanh ka hmu lo; sual an puhmi cu anmah phung kong men kha a si ko. ³⁰ Cun Judah mi a cheukhat nih amah thah khawhnak ding khua an khang ti kha ka theih tikah nangmah sinah ka rak kuat ahcun a ṭha lai tiah ka ruah. Cun sual a phawtu hna cu ka thawh hna i amah cu nangmah hmaika ah taza va cuai u, tiah ka ti hna," tiah a ti. ³¹ Ralkap pawl nih cun a fial hna ning khan an tuah. Paul cu an va lak i cu zan ah cun Antipatris tiang an kalpi. ³² A thaizing ah ke ralkap pawl cu ralhruang ah khan an kir i rangcung ralkap pawl nih khan an lanhpi. ³³ Sisaria tiang kha an kalpi. Mangki bawi kha ca cu an pek i Paul cu amah kut chungah khan an chiah. ³⁴ Mangki bawi nih cun ca kha a rel i Paul cu khuazei peng mi dah na si, tiah a hal. Silisia peng mi a si kha a hngalh tikah, ³⁵ "Taza an cuaitu hna an rat tikah na bia cu kan ceihpiak te lai," tiah a ti. Cun Paul cu Herod Siangpahrang inn ah khan va cawng u, tiah ralkap kha a fial hna.

¹ Ni nga hnuah Tlangbawi Ngan Ananias cu upa tlawmpal le sihni Tertullas he Sisaria ah khan an kal. Mangki bawi Feliks hmaiah khan an chuak i Paul sual an phawtnak bia cu an chim. ² Tertullas cu bia cu chim tuah ti a si i Paul cu hitihin sual cu a phawt: "Bawipa, nangmah nih fimnak in na kan hruainak thawngin daihnak caan saupi kan hmu i kan ram ṭhatnak caah a herhmi remhnak tampi kha tuah a si. ³ Hi kong ah hin kan lung aa lawm ngaingai ko, bawipa. ⁴ Na caan kha sau tuk lakpiak kan duh lo, cucaah kan chimmi a tawite cu zaangfahnak tein na kan ngaihpiak nakhnga kan in nawl. ⁵ Hi pa hi hnahnawhnak a tuah lengmangtu, mi ṭihnung a si tiah kan hmuh; vawleicung khuazakip ah Judah mi hna lakah khan hnahnawhnak a thawhter lengmang i amah hi mibu bu khat Nazareth khuami mibu timi a hruitu hna a si. ⁶ Biakinn zong kha thurhnawmh a zalh i sihmanhsehlaw kan tlaih manh. (Kanmah nih kan phung ningin biaceih kan timh, ⁷ sihmanhsehlaw ralkapbu haotu Lisias kha a ra i hramhram in a kan chuh. ⁸ Cun Lisias nih cun nawlbia a chuah i tazacuai a duhmi nih nangmah hmaiah hin va cuai u, a ti.) Hi pa hi bia na hal tikah sual kan phawtmi vialte hi ahmaanmi lawngte an si ti kha na hngalh ko lai," tiah a ti. ⁹ Judah mi hna cu, cu bantukin sual a phawtnak ah cun an hun i ṭom ve i a chimmi cu ahmaan dih tiah an hun ti. ¹⁰ Mangki bawipa nih khan Paul cu bia chim ve tuah tiah a kut a hei zaoh i Paul nih cun, "Nangmah cu hi miphun hna cungah kum tampi biaceihtu na si cang ti kha ka hngalh i cucaah nangmah hmai i humhaknak bia chim hi ka saduhthah ngaingaimi a si. ¹¹ Nangmah nih na hngalh khawh ko bantukin, Jerusalem khua i Pathian biak awkah ka hung kal cu ni hleihnih nakin a tam rih lo. ¹² Judah mi hna nih hin biakinn chungah aho he bia kan i al an ka hmu lo, pumhnak inn ah siseh, khuachung khuazeihmanh ah siseh, mizapi kha hnahnawhnak tuah awkah ka forh hna zong kha an ka hmu lo. ¹³ Cu pinah sual an ka phawtmi zong hi ahmaan tiah an ti khawhnak zeihmanh a um lo. ¹⁴ Hi bel hi ka tuah tiah nangmah hmaiah ka ti khawh: Kei cu Lam thar a zulmi ka si (annih nih cun bu thar tiah an ti) i cu ti ning cun kan pupa hna Pathian cu ka biak; zeicahtiah Moses Phungbia chung i aa ṭialmi vialte le profet hna cauk chung i aa ṭialmi vialte kha ka zumh i Pathian i bochan in ¹⁵ hi sual a ka phawtu hna zong nih an i ruahchan vemi, minung hi mi ṭha he mi ṭhalo he thihnak in kan tho ṭhan dih lai, ti hi kaa ruahchanmi a si ve. ¹⁶ Cucaah Pathian hmai le minung hmaiah chiaṭha thleidannak thiang ka ngeih khawh nakhnga kaa zuam khawh chungin kaa zuam. ¹⁷ "Jerusalem khua in kum tam nawn ka chuah hnuah, ka mi hna cu tangka tlawmpal va pek awk le raithawinak va tuah awkah cuka ah cun ka hung kal. ¹⁸ Cu thil Ka tuah lioah cun biaknak inn chung i an ka hmuh hi a si i cu ah cun kan biaknak lei in i thianhnak phung kha ka tuah dih cang. Cu lioah cun ka sinah mibu zeihmanh an um lo i hnahnawhnak zeihmanh a um fawn lo. ¹⁹ Sihmanhsehlaw cuka ah cun Asia ram in a rami Judah mi tlawmpal bel an um; annih nih sualphawt awk an ka ngeih a si ahcun bia chimtu dingah anmah cu pei zung ah hin ra chuah awk an si cu. ²⁰ Asiloah hika i a ummi hna nih hin biaceihnak khawngsil hmai i ka dir lioah khan zeital sualnak ka tuah maw chim tuah hna seh, ²¹ an hmai i ka dir lio i ka chimmi cu hi bel hi a si: Mithi hna cu nunnak ah an tho ṭhan lai, ti ka zumh ruangah nannih nih nihin ah hin taza nan ka cuai hih, ka ti hna," tiah a ti. ²² Cu Lam kong fiang tein a hngalmi Feliks nih cun an bia cu a donghter i, "Nan bia cu ralkapbu haotu Lisias a rat tikah ka khiah te lai," tiah a ti hna. ²³ Paul a cawngtu ralbawipa cu Paul kha luat deuh in na umter lai i a hawile nih a duh herhmi tuahpiak ding kha na thlauh hna lai lo, tiah a ti. ²⁴ Ni tlawmpal hnuah khin Feliks cu a nupi Drusilla he an ra; a nupi cu Judah mi a si. Paul cu ra seh tiah an hei cah i Paul nih Khrih Jesuh zumhnak kong a chimmi kha a ngaih. ²⁵ Sihmanhsehlaw Paul nih ṭhatnak kong tehna, mah le mah i sumnak kong tehna, a ra lai dingmi Biaceihnak Ni kong tehna a vun chim tikah Feliks cu a thin a phang i, "Atu cu va kal ko rih; caan ka ngeih tikah kan auh ṭhan te lai," tiah a ti. ²⁶ Cu hleiah Paul sinin tangka ka hmu lai ti zong kha aa ruahchih pah i cucaah atu le atu a auh lengmang i bia a ruah lengmangnak cu a si. ²⁷ Kum hnih a luan tikah Feliks cu Porsias Festas nih a hun thlen. Feliks nih Judah mi nih ka duh hna seh ti kha a duh caah Paul kha thong chungah khan a chiahtak.

¹ Cu peng chungah Festas cu a ra phak hnu ni thum ah Sisaria in Jerusalem khua ah a kal. ² Cuka ah cun tlangbawi upa pawl hna le Judah mi hruitu hna nih khan Paul sual an phawtnak cu an rak chimh. ³ Paul cu lam ṭim i rak thah awk kha khua an khan caah Festas cu zaangfahnak tein Paul cu Jerusalem ah ratter ko tiah an nawl. ⁴ Cun Festas nih cun a leh hna i, "Paul cu Sisaria ah thong chungah a um ko i keimah zong khika ah tuan ah ka kir lai. ⁵ Mipa nih hin palhnak a tuah a si ahcun, nan haotu hna kha ka sinah kal hna seh law taza cuai hna seh," tiah a ti. ⁶ Festas cu an sinah ni riat, ni hra tluk a cam i cun Sisaria khua ah khan a kal. A thaizing ah biaceihnak zung ah khan a ṭhu i Paul cu rak chuahpi u tiah nawl a pek hna. ⁷ Paul cu a hung phanh tikah Jerusalem in a rami Judah mi hna kha a velchum cun an dir i hi pa nih hin sual fak tampi a tuah tiin sualphawt hram kha an thawk, sihmanhsehlaw an puhmi kha ahmaan tiah an ti khawhmi a um lo. ⁸ Cun Paul nih khan aa thawh i, "Judah mi Phung kongah siseh, biaknak inn kongah siseh, Rom siangpahrang kongah siseh, zeihmanh sualnak ka tuah lo," tiah a ti. ⁹ Festas nih khan Judah mi nih hung ka daw hna seh ti a duh caah Paul cu a thawh i, "Hi sual an in puhmi ruangah hin Jerusalem khua ah kal i ka hmaiah biaceih na duh maw?" tiah a hal. ¹⁰ Paul nih aa thawh i, "Siangpahrang biaceihnak zung hrimhrim ah ka chuak lai, khika ah bia cu ka ceih hna seh. Nangmah nih fiang tein na hngalh bantukin Judah mi cungah zeihmanh ṭhat lonak ka tuah lo. ¹¹ Nawlbia kha buar i thihnak tlak thil ka tuah a si ahcun, cu chungin luatternak cu kan hal lo. Sihmanhsehlaw an ka puhmi ah hin biatak zeihmanh a um ṭung lo ahcun ahohmanh nih an kut chungah nan ka chan kho lai lo. Siangpahrang sinah azu ka khan," tiah a ti. ¹² Cun Festas nih cun, fimchimtu aa chiahmi pawl kha ruahnak a hal hna hnuah, "Siangpahrang sinah azu na khan caah siangpahrang sinah na kal lai," tiah a leh. ¹³ Cu hnu tlawmpal ah cun Agrippa Siangpahrang le Bernis cu Festas kha hung chawnh ta awkah Sisaria khua ah khan an ra. ¹⁴ Ni hnih ni thum an cam hnuah khin, Festas nih Paul umtuning kong kha Siangpahrang cu a chimh i, "Hika ah hin mipa pakhat, Feliks nih thong i a rak thlakmi a um ko; ¹⁵ cun Jerusalem i ka hung kal tikah Judah mi tlangbawi upa hna le an upa hna nih khan taza an rak cuai i sual na phawt lai, tiah an ka ti. ¹⁶ Sihmanhsehlaw Rom mi nih cun ahohmanh an si ah taza a cuaitu hna kha hmaitonh tein an ton hna i sual an puhmi kha i chim khawh venak dingah a caan pek lo cun sual an puhmi kha an sinah pek phung a si lo, tiah ka ti hna. ¹⁷ Hika i an rat tikah a caan zeihmanh rauhter loin a thaizing hrimhrim ah biaceihnak zung ah ka ṭhu i mipa cu rak chuahpi u tiah nawl ka pek hna. ¹⁸ Sihmanhsehlaw sual a phawtu hna cu an hung dir i an chim tikah an puh rua lai timi sualnak kha pakhat hmanh an puh lo. ¹⁹ Annih nih an puhmi cu anmah biaknak kong i an i alnak le mipa pakhat a thi cangmi a min Jesuh an timi, Paul nih a nung ṭhan pei tiah a timi kong a rak si. ²⁰ Hi kong ah hin zeitindah fiang deuh in hngalhnak ka hmuh khawh lai ti kha a ruah awk ka hngal lo i cucaah cun Paul cu Jerusalem khua i hung kal i sual an in puhmi hi khika ah ceihpiak na duh maw tiah ka hal. ²¹ Sihmanhsehlaw Paul nih khan azu a khaan; thong chungah ka chia ko law Siangpahrang nih ka bia cu chat te ko seh, a ti. Cucaah Siangpahrang sin i ka kuat khawh hlantiang, amah cu thong chung i um dingin nawlbia ka chuah," tiah a ti. ²² Agrippa nih Festas cu a thawh i, "Hi pa hi keimah hrim nih theih ka duh ve," tiah a ti. Cun Festas nih cun, "Thaizing ah na theih lai," tiah a leh. ²³ A thaizing ah Agrippa le Bernis cu sunparnak le rumra ngei ngaiin an ra i ralbawi upapa hna le khuachung mi lak i upa deuhdeuh hna he khan pumhnak ah khan khaan chungah cun an ra lut. Festas nih khan nawl a hei pek hna i Paul kha an run luhpi ve. ²⁴ Cun Festas nih cun aa thawh i, "Agrippa Siangpahrang le hika i a ummi vialte hna: Nannih nih hi pa hi nan hmuh. Amah hi Judah mi vialte nih, Jerusalem i a ummi he hika i a ummi he, ka sin i taza an cuaimi cu a si. Amah hi nun awkah aa tlak ti lo tiah an au. ²⁵ Sihmanhsehlaw thah awk tlak sinak caah zeihmanh thil ṭhalo a tuahmi ka hmu kho fawn ṭung lo. Cucaah cun amah zong nih Siangpahrang sin i azu a khan caah kei zong nih Siangpahrang sin i kuat dingah cun ka ruah cang. ²⁶ Sihmanhsehlaw a kong ah hin Siangpahrang sin i ṭial awk set ka ngei lo. Cucaah anih cu nan hmaiah kan hun chuahpi — Agrippa Siangpahrang, nangmah hmai thengtheng ah ka hun chuahpi — zeicahtiah a bia cu kan dothlat hnuah ṭial awk ka ngei deuh lai tiah ka ruah. ²⁷ Keimah ca zongah thongtla pakhat, sualnak an puhmi fiang tein ṭial khawh ṭung loin hei kuat cu aa dawhcah deuh fawn lo," tiah a ti.

¹ Agrippa nih cun Paul cu a thawh i, "Na kong kha nangmah nih i chim tuah," tiah a ti. Paul nih cun a kut kha a hun zao i a sual lonak kong kha hitihin a chim: ² "Agrippa Siangpahrang, nihin i nangmah hmaiah Judah mi nih an ka puhmi vialte lehnak ka hmuh hi vanṭhat ngai ah kaa rel. ³ Cun hi bantukin kaa rel khunnak cu nangmah cu Judah phung le lam vialte le kan i almi kong ṭha tein a hngalmi na si caah a si. Cucaah lungsau thinfual in na ka ngaihpiak nakhnga kan nawl. ⁴ "Judah mi vialte hna nih hin, ka ngakchiat tein zeitindah ka nuncanning a si kha an hngalh dih. A hramthawk tein kei cu ka ram chung le Jerusalem khua chung i khua a sami ka si kha an hngalh. ⁵ Cun annih nih hin an chim duh ahcun an hngalh zungzalmi a si ko, a hramthawk tein kan biaknak chung i a fel bikmi Farasi mi phu i aa tel zungzalmi ka rak si. ⁶ Cun hika i biaceih awk i ka dir zong hi Pathian nih kan pupa hna sinah biakamnak a rak tuahmi chung i ruahchannak ka ngeih ve ruangah hin a si — ⁷ cu ka ruahchanmi cu kan miphun phu hleihnih hna nih Pathian kha chun he zan he an rak biak tikah kan hmuh te lai tiin an rak i ruahchanmi ṭhiamṭhiam kha a si ko. Cu ruahchannak ruangah cun, Bawipa, Judah mi nih sual an ka puh hi a si. ⁸ Zeicahdah nannih Judah mi nih Pathian nih mithi a thawhter hna, ti cu nan zumh khawh lo? ⁹ "Nazareth khuami Jesuh min dohnak caah hin ka tuah khawh chungin ka tuah lai tiah keimah hrimhrim nih hin ka rak ruah i ¹⁰ cucu Jerusalem i ka rak tuahmi kha a si. Tlangbawi upa hna sin khan nawl peknak ca ka lak i Pathian mi tampi kha thong ah ka thlak hna; cun annih kha thah awk tlak an si tiah bia khiah a si tikah kei zong nih ka hna a rak tlakpi ve hna. ¹¹ Pumhnak inn kip ah khan voi tampi hremnak ka inter hna i an zumhnak kha hlawtter kaa zuam hna. An cungah khan ka thin a hun tuk caah anmah hrem awkah cun ramdang khua hmanh ah ka fuh hna. ¹² "Cu bantukin annih hrem awkah cun tlangbawi upa hna sinin nawl peknak ca kha kaa lak i Damaskas khua i ka kal kha a si. ¹³ Lam i kan kal lioah cun, chunlai ah khin, maw Bawipa, vancung in keimah le keimah he a kal ṭimi hna velchum i ni nakin a ceu deuhmi ceu a rung ceu cu ka hmuh. ¹⁴ Kan dihlak in vawlei ah kan tlu i Hebru holh in aw pakhat nih a ka chawnh kha ka theih i, ’Saul, Saul, zeicahdah na ka hrem? Fungzum chuih hi nangmah caah dah kaw a fah ko,’ tiah a ka ti. ¹⁵ Cun kei nih, ’Ahodah na si, Bawipa?’ tiah ka ti i, ’Keimah cu na hremmi Jesuh ka si. ¹⁶ Sihmanhsehlaw tho law na ke in dir tuah. Nangmah cu ka sal i ser kan duh caah na sin i ka langh hi a si; nihin i keimah kong na hmuhmi le hmailei i kan hmuhsak dingmi thil kha, nangmah nih midang kha na chimh hna lai. ¹⁷ Nangmah cu kan thlah lainak miphun Israel mi hna le Jentail mi hna sinin kan khamh lai. ¹⁸ Nangmah nih an mit kha na deiter hna lai i muihnak in ceunak ah, Satan pennak in Pathian pennak chungah na nunter hna lai; cun keimah an ka zumhnak thawngin an sual ngaihthiamnak kha an hmuh lai i Pathian thimmi hna lakah an i tel ve lai, tiah Bawipa nih cun a ti," tiah a ti. ¹⁹ "Cucaah Agrippa Siangpahrang, vancung in ka hmuhmi langhnak cu al ka duh lo. ²⁰ A hmasa bik ah Damaskas khua le Jerusalem khua ah, cun Judah mi hna umnak ram dihlak ah, cun Jentail mi hna sinah, ’Nannih nih nan sualnak kha i ngaichih u law Pathian leiah khan i mer u law nan i ngaihchihnak a langhtertu thil kha tuah hna u,’ tiah ka ti. ²¹ Hi ruangah hin pei Judah mi nih biakinn chung ka um lio i an ka tlaih i thah an ka zalh kha a si ko cu. ²² Sihmanhsehlaw nihin ni tiangah hin Pathian nih a ka bawmh i cucaah cun hika zongah hin a hme sin he a ngan sin he ka hngalhnak bia ka chim khawhnak hi a si. Ka chimmi hi profet hna le Moses nih a si te lai tiah an rak chimmi hrimhrim kha a si: ²³ cucu zeidah a si tiah, Judah mi hna le Jentail mi hna sinah khamhnak ceunak thanh awk caah, Messiah nih cun fahnak kha a in a hau lai i thihnak in a tho ṭhan hmasa bikmi a si lai, ti hi a si ko," tiah a ti. ²⁴ Cu bantukin Paul nih a sual lonak kong a chim lioah khan Festas nih cun a hei auh chih i, "Paul, na hrut cang! Na cawn sannak nih an hruhter cang," tiah a hei ti. ²⁵ Paul nih cun a hun leh ve i, "Ka hrut lo, Bawipa. Ka chimmi bia hi bia hmaan le fimhrin biate an si ko. ²⁶ Siangpahrang Agrippa, na sinah hi bantukin ralṭha ngaiin bia ka chim khawhnak cu, hi thil cu na hngalh dihmi an si caah a si. Hi thil hi a thlithup in a kenne ah tuahmi an si lo caah hngal loin na um lai tiah ka zum lo. ²⁷ Agrippa Siangpahrang, profet cu na zum hna maw? Na zumh hna tiah ka hngalh," a ti. ²⁸ Agrippa nih Paul cu a thawh i, "Fawi tuk in hen pei Khrihfa ah canter na ka zalh cu," tiah a ti. ²⁹ Paul nih cun, "A fawi ah siseh, a har ah siseh, Pathian sinah ka thlacamnak cu nangmah le nihin i ka bia a theimi vialte hi keimah bantuk si ve u law ti hi a si — hi thir cincik bel chim lo hin," tiah a ti. ³⁰ Cun Siangpahrang cu le Mangki bawi le Bernis cu an tho i a dang vialte zong kha an tho ve; ³¹ an i ṭhial hnuah khin pakhat le pakhat cu, "Hi pa hi thah awk tlak thil siseh, thong thlak awk tlak thil siseh, zeihmanh a tuahmi a um lo," tiah an ti. ³² Cun Agrippa nih khan Festas cu, "Siangpahrang sinah azu rak khang hlah seh law cu, thlah awk a si ko hnga," tiah a ti.

¹ Itali ram ah tilawng in nan kal lai tiah bia an kan khiahpiak tikah, Paul le a dang thongtla tlawmpal hna kha Rom ralkap chung i "Siangpahrang Ralkapbu" timi haotu Julias sinah khan an pek hna. ² Asia ram tilawng dinhnak khua hna pal aa timmi tilawng pakhat, Adramittium khua tilawng kha, kan i cit i kan kal. Masidonia ram Thesalonika khuami Aristarkas kha kan sinah cun a kal ve. ³ A thaizing ah cun Sidon khua kha kan phan. Julias cu Paul cungah khan a ṭha ngaingai i va kal i a hawikom hna va hmuhtak kha a onh i a herhmi rak pekchanh zong kha a onh hna. ⁴ Cuka cun kan chuak i thli kha kanmah lei hoih in a hran caah Saipras tikulh thlidaihnak lei phen khan kan kal. ⁵ Rili cu Silisia le Pamfilia zawn khan kan tan i Lisia peng i Mira khua kha kan phan. ⁶ Cuka ah cun ralbawipa nih khan Alekzandria khua in Itali ram ah a kal dingmi lawng pakhat a hmuh i cu lawng ah cun a kan citter. ⁷ Ni tam nawn khulnuar ngaiin kan kal i har lengmang in Nidas khua pawng kha kan phan kho. Thli nih khan cuka lei kal cu a kan donh cang i cucaah Krit tikulh thli daihnak lei phen khan kan vung kal i Salmon vawlei fonghlei pawng khan kan lan. ⁸ Rilikam naih te khan kan kal thliahmah i har ngaiin Lawng Dinhnak Hnangam timi kha kan phan i cu lawng dinhnak cu Lasia khua in a hla lo. ⁹ Cuka ah cun saupi kan cam i Tlanhnak Ni zong kha a luan cang caah hmailei i kal ding cu ṭihnung a si cang. Cucaah Paul nih cun ruahnak a pek hna i, ¹⁰ "U le nau hna, hika in hmailei kan kalnak ding hi ṭihnung ngaimi a si lai tiah ka hngalh; nan thil phorhmi le lawng zong nih hin rawhralnak an hmu sual lai i nunnak hlohnak zong a um ko lai," tiah a ti hna. ¹¹ Sihmanhsehlaw ralbawipa kha lawng cawngtu bawile a ngeitu hna nih an chimmi bia tu kha a lung ah a lut deuh i Paul chimmi bia kha cu a lut kho lo. ¹² Cuka lawngdinhnak cu khuasik chung umnak ah a ṭha lo i cucaah tam deuh nih kal i a si khawh ahcun Finiks phak kha an duh. Cu hmun cu Krit tikulh i lawng dinhnak nitlak-thlanglei le nitlak-chaklei a hoihmi kha a si i cuka ah cun khuasik chung kan um lai tiah an ruah. ¹³ Thlanglei in thlizil kha a hung hrang siahmah i kan khuakhannak cu kan tlinter khawh lai, tiah an ruah; cucaah thir cangai kha an hnuh i Krit tikulh kam cun titlang hnur thluahmah in kan kal. ¹⁴ Sihmanhsehlaw a rauh hlanah khin thli ṭhawng ngai, "Nichuah-chaklei Thli" timi cu tikulh lei cun a rung hrang. ¹⁵ Lawng cu a run den ciammam i lawng cu thlichia lei cu hoihter khawh a si ti lo caah cu ti i hoihter kan i zuamnak cu kan ngol i thlitu nih cun a duhnak paoh ah a kalpi thluahmah ko. ¹⁶ Kauda tikulh fate a thlanglei i kan kal lioah khan thlitu cu tlawmpal a kan phenh. Khika ah khan har lengmang in lawng i a ummi vokkuang lawng kha hnangam deuh in kan sersiam khawh. ¹⁷ Lawng cungah khan an hun khin i lawng cu a velchum in hri in fek tein an ṭem. Libia rilikam lei i rili tang thetse tlang ah khan kan i su sual lai ti an phang i cucaah puanzar kha an ṭhumh i lawng cu thlitu kha an choihter. ¹⁸ Thlichia cu a hrang lengmang ko i cucaah a thaizing ah cun lawng chung thil phorhmi kha an hlonh hna i ¹⁹ a kiptuh ah cun an kut in lawng thilri kha an hlonh hna. ²⁰ Ni tampi, ni siseh, arfi si hna seh, hmu kho loin kan um i thlitu cu fak piin a hrang lengmang ko. A donghnak ah cun nun lai hmanh kha kan i ruah ngam ti lo. ²¹ Cuticun mi cu rawl loin saupi an um tikah Paul cu an hmaiah a dir i, "U le nau hna, ka bia rak ka ngaiin Krit tikulh khan chuak loin rak um u si law, hi harnak le sunghnak vialte hi kan tong hnga lo. ²² Sihmanhsehlaw atu cu nan lungdong hlah u, tiah kan nawl hna. Pakhat hmanh kan thi lai lo, lawng bel hi a rawk lai. ²³ Zeicahtiah ka biak i a ta ka simi Pathian vancungmi kha zahan ah ka sinah a ra i, ²⁴ ’Paul, na thinphang hlah. Siangpahrang hmaika ah cun na dir ṭhiamṭhiam ko lai; cun Pathian nih amah ṭhatnak thawngin nangmah sinah a kalmi vialte an nunnak hi nangmah kha an pek,’ a ka ti. ²⁵ Cucaah u le nau hna, nan lungdong hlah u. Zeicahtiah a ka chimh bantukte cun a si ko lai tiah Pathian kha ka zumh. ²⁶ Tikulh pakhatkhat ah titlang ah a kan cheh te ko lai," tiah a ti. ²⁷ A zan hleinganak a si cang i Mediterranean rili ah cun thlichia nih cun a kan choih cuahmah ko. Zanṭim hrawngah khin lawngcawng pawl nih cun tlang kan naih rua tiin an lung a hring nawn. ²⁸ Cucaah hri ah lung an thlaih i an vun thlak i ti cu pe za khat le pe kul a si; tlawmte hnu deuh ah khin an vun tah ṭhan i pe sawm kua a si. ²⁹ Kan lawng cu lung ah aa su sual lai ti an phan caah a hnulei in thir cangai pali kha ti chungah an thlak hna i khuadei lainak caah thla lawng kan cam ko. ³⁰ Lawngcawng pawl nih khan vokkuanglawng kha ti ah khan an vun thlak i hmailei kamah thir cangai kan thla lai ti bantuk khin an i umter i zam an i tim. ³¹ Sihmanhsehlaw ralbawipa le ralkap hna cu Paul nih khan, "Hi lawngcawng pawl hi lawng cung i an um peng lo ahcun nan nung lai lo," tiah a ti hna. ³² Cucaah ralkap pawl nih khan lawng a tlaitu hri kha an pheh hna i lawng cu an thlah. ³³ Khua a hung dei dengmang i Paul nih an dihlak in rawl ei u tiah a nawl hna. "Ni hleili chung awlokchong in nan um i hi chung vialte rawl zeihmanh nan ei lo. ³⁴ Cucaah nan nunnak ding caah hin nan herh caah rawl ei u tiah kan nawl hna. Nan lu cung samfa fa khat hmanh a lo lai lo," tiah a ti. ³⁵ Hi bia a chim dih in Paul nih cun rawl kha aa lak i an hmaika ah cun Pathian sinah thla a cam hnuah a ei. ³⁶ Midang zong kha an lung a hung ṭhawng i an dihlak in tlawmpal cio an ei. ³⁷ Lawng cung i a ummi cu kan dihlak in za hnih sawm sarih le paruk kan si. ³⁸ An dihlak in khim tein an ei dih hnuah lawng kha zaang deuh seh tiah changvut kha rili ah an thlak. ³⁹ Khua a hung dei tikah lawngcawng hna nih khan titlang cu khuazei a si kha an hngal kho lo, sihmanhsehlaw ti fonghlei pakhat kha an hei hmuh i a si khawh ahcun khika ah khan lawng cu kan dinhter lai an ti. ⁴⁰ Cucaah thircangai kha a hri an chah hna i rili chungah an thlak hna, cun lawng zahnak fung ṭemnak hri kha an phoih hna. Cun lawng kha thli nih hmailei ah kalpi seh tiah a hmailei ah khan puanzar kha an zar i tikam lei cu kan panh. ⁴¹ Sihmanhsehlaw lawng cu thetse tlang ah aa su khut i a tap ai. Lawng cu a hmailei kha thetse chungah cun aa bunh i cawlcang kho ti loin a taan lioah khan a hnulei tu cu tilet nih khan kuai cuahmah in a den ṭualmal ko. ⁴² Ralkap nih khan thongtla vialte hi kan thah dih hna lai, pakhat hmanh i leuh in luat hna hlah seh, an ti. ⁴³ Sihmanhsehlaw ralbawipa nih khan Paul kha khamh a duh caah a thlauh hna. Cucaah aa leuh khomi paoh tikam leiah i leuh u, tiah nawl a pek hna; ⁴⁴ cun a taangmi pawl nih cun thingpheng zeilo ṭukṭak le lawng kuaimi pelpawi kha an i tlaih cio i an zulh hna. Cuticun kan dihlak in him tein titlang ah kan chuak.

¹ Titlang i him tein kan chuah dih tikah cu tikulh cu Malta tikulh a si ti kha kan hngalh. ² Cuka rammi hna cu kan cungah an ṭha ngaingai. Ruahpi a sur i khua a sik, cucaah meiphu an kan tihpiak i hung to u tiah an kan ti. ³ Paul cu thinghreu kha a khawmh i mei ah khan a tih hna. Mei nih cun a hun linh caah thing chung cun rul a hung chuak i Paul cu a kut ah a cuk i aa thlai ko. ⁴ Cuka rammi hna nih rul kha Paul kut i aa thlai ko cu an hmuh tikah pakhat le pakhat kha, "Hi pa hi lainawng a si ṭheo lai, rili in luat hmanh seh law khuazing nih nunter a duh lo i a si ko," an ti. ⁵ Sihmanhsehlaw Paul nih khan rul cu mei chungah khan a vun thin i amah cu zei ti hmanh in a um lo. ⁶ Zeitik ah dah a hung phin unman lai, asilole zeitik ah dah a tluk lai i a thih lai ti lawng kha an rak zoh ko. Sihmanhsehlaw caan saupi an ngan hnu i zeiti hmanh in a um lo tikah an lung an i let i, "Hi pa hi pathian a si ko lai," an ti. ⁷ Cuka hmun in lamnai nawn ah khin cuka tikulh a uktu bawi Publius lo kha an um. Ṭha tein a kan tlunter i ni thum chung cu a khual kan si. ⁸ Publius pa cu raifanh le thisen chungtlik in a zaw i a ril ko; Paul nih khan a khaan chungah khan a vung luhhnawh i thla a campiak i a cungah a kut a chuan i a damter. ⁹ Hi thil thawng hin cuka tikulh i a ummi mizaw vialte kha an ra i damnak kha an hmuh. ¹⁰ Laksawng tampi an kan ṭhenh i kan kal tik zongah kan herh ding kha tilawng chungah cun an kan chiahpiak. ¹¹ Thla thum hnuah Alekzandria khua in a rami tilawng a min "Pathian Faphir" timi, cuka tikulh i khuasik chung a rak ummi khan kan kal. ¹² Sirakus an timi khua kan phan i cu khua ah cun ni thum kan cam. ¹³ Cuka cun kan kal i Rekium khua kha kan phan. A thaizing ah thlanglei in thli a hung hrang i ni hnih ah Puteoli khua kha kan phan. ¹⁴ Cuka ah cun zumtu tlawmte an rak um i zarh khat chung cu kan umpi ko u, tiah an kan nawl. Cun cuka cun Rom khua kha kan phan. ¹⁵ Rom khua i a ummi unau pawl nih kan thawng kha an rak theih i Appius Chawdawrnak Hmun timi hmun le Khual Buk Pathum tiang khan an rak kan don. Paul nih a hmuh hna tikah Pathian kha a lawmh i a thazang a tlung. ¹⁶ Rom khua kan phak tikah Paul kha amah tein um i ralkap pakhat i cawngh kha a nawl an pek. ¹⁷ Ni thum hnuah cuka i a ummi Judah mi hruaitu hna kha Paul nih cun pumh a sawm hna. An i pumh tikah a thawh hna i, "Ka u le ka nau hna, kan miphun cungah siseh, kan pupa hna sinin kan hmuhmi kan phunglam cungah siseh ṭhat lonak zeihmanh ka tuah lo nain Jerusalem ah thong ah an ka thlak i Rom mi hna kut chungah an ka chanh. ¹⁸ Bia an ka hal tikah, thihnak tlak ṭhat lonak zeihmanh ka tuah lo kha an hmuh caah thlah an ka duh. ¹⁹ Sihmanhsehlaw cucu Judah mi nih an duh lo tikah khan, ka mi hna cungah zeihmanh sual phawtnak ka ngei lo nain, Siangpahrang sinah khan azu ka khaan a hau. ²⁰ Cucaah cun nannih hmuh le biaruah kan duhnak hna cu a si; hi thir cikcin in an ka khihnak hi Israel mi nih an rak i ruahchan zungzalmi pa ruangah a si," tiah a ti hna. ²¹ Annih nih an thawh i, "Nangmah kongah Judea ram in ca zeihmanh kan hmu lo; cun cuka hmun in thawngpang a hun phormi kan unau ahohmanh an um fawn lo; nangmah kong cu a chia lei in an chimmi zong zeihmanh a um fawn lo. ²² Sihmanhsehlaw na ruahnak cu theih kan duh ko, zeicahtiah hi nan phu hi khuazakip ah mi nih an thangchiat lengmangmi a si," an ti. ²³ Cucaah ni an i tuk i cu ni ah cun Paul umnak ah khan tampi an ra. Zinglei in zan tiang Pathian Pennak kong kha a chimh hna i a fianter hna. Jesuh kong ah an lung a pem khawh nakhnga Moses Phungbia chungin le profet hna ṭialmi chungin bia kha a lak hna. ²⁴ A cheu cu an lung a pem, sihmanhsehlaw a cheu nih cun an zum lo. ²⁵ Paul nih hi thil pakhat hi a chim hnuah anmah lakah khan lung i rual lo ngaiin an ṭian. Cu a chimmi cu hihi a si: "Thiang Thlarau nih profet Isaiah thawngin nan pupa hna sinah a chimmi bia cu a va hmaan thiam dah. ²⁶ A chimmi cu: Va kal law hi mi hi va chim hna, A ngaih cu nan i ngaih sek ko lai, sihmanhsehlaw nan hngal lai lo; A zoh cu nan i zoh sek ko lai, sihmanhsehlaw nan hmu lai lo. ²⁷ Zeicahtiah hi mi hna lung cu a pit i an hna cu a chet i an mit cu a caw. Cuticun si hna hlah seh law cu an mit nih khan khua a hmuh hnga i an hna nih khan a theih hnga i an lung nih khan a hngalh hnga i Ka sinah khan an ra kir hnga i ka damter hna hnga, tiah Pathian nih a ti, ti hi a si," tiah a ti. ²⁸ Cun Paul nih cun a donghnak ah, "A si ahcun Pathian khamhnak bia cu Jentail mi hna sinah thlah a si cang. Annih nih cun an ngaih lai," tiah a ti hna. ( ²⁹ Paul nih hi bia a chim dih hnuah Judah mi hna cu anmah le anmah fak piin i alpah lengmang in an chuak.) ³⁰ Kum hnih chung Paul cu khika ah inn aa hlan i a um; amah chawnhbiak awkah a rami vialte kha a rak lawmh hna. ³¹ Pathian Pennak kong kha a chimh hna i Bawipa Jesuh Khrih kong kha a cawnpiak hna i ralṭha ngai le zeihmanh dawntu um loin a chimh hna.