2 TIMOTE

2 TIMOTE

¹ Khrih Jesuh he kan i pehtlaihnak thawngin Pathian nih a kan kamhmi nunnak kan hmuhmi kong chim awkah thlahmi keimah Paul, Pathian duhning in Khrih Jesuh lamkaltu a simi nih, ² ka dawtmi ka fa Timote, ca kan kuat. Pathian kan Pa le kan Bawipa Khrih Jesuh nih vel le zaangfahnak le daihnak in pe ko seh. ³ Kan pupa hna nih an rak biak bantukin kei zong nih lungthiang tein ka biakmi Pathian cu, chun he zan he ka thlacamnak i nangmah kan theih fate, ka lawmh zungzal. ⁴ Na mitthli kha ka philh lo i lunglawmhnak in ka khah nakhnga nangmah hmuh cu ka duh hringhran. ⁵ Na pi Lois le na nu Zunis nih an ngeihmi zumhnak bantuk, zumhnak taktak na ngeih kha ka hngalh i atu zongah hin na ngei ko tiah ka zumh. ⁶ Cucaah na cung i ka kut ka rak chuan tik i Pathian nih an pekmi laksawng kha na nunter peng nakhnga chimh ṭhan kan duh. ⁷ Pathian nih a kan pekmi Thlarau nih cun mi ralchia ah a kan ser lo, ṭhawnnak le dawtnak le mah le mah i uk khawhnak tu khan a kan khahter. ⁸ Cucaah kan Bawipa kong chim cu na ningzak hlah, a ca i thongtlapa keimah zong hi ka zahpi hlah. Pathian nih thazang an pekning in Thawngṭha ca i temhnak in kha ngamh lehlam ko. ⁹ Pathian nih cun amah mi hrimhrim si awkah a kan khamh i a kan auh; cucu kanmah tuahmi ruangah si loin amah nih aa tinhmi le vel a kan ngeih ca ruang tu ah khan a si. Hi a vel cu caan hramthawk hlan in Jesuh Khrih in a kan pek cang, ¹⁰ sihmanhsehlaw atu ceo ah hin kan Khamhtu Khrih Jesuh a ratnak thawngin cucu kan sinah phuan a si. Thihnak ṭhawnnak kha a donghter cang i thih thiam ti lo nunnak cu Thawngṭha in kan sinah a phuan cang. ¹¹ Cu Thawngṭha thanhtu dingah Pathian nih lamkaltu le cawnpiaktu ah a ka ser i ¹² hi bantukin sifahnak ka inmi vialte hna hi, hi ruangah hin a si. Asinain ka lung a dong naisai lo, zeicahtiah kaa bochanmi cu ahodah a si kha ka hngalh i ka kut chungah a ka pekmi thil kha khi Ni tiang him tein a ken khawh ti kha fiang tein ka zumh. ¹³ Kan cawnpiakmi biatak kha fek tein i tlaih hna law na zulh awkah i chiah hna, cun Khrih Jesuh he kan i pehtlaihnak thawngin kan ta a simi zumhnak le dawtnak chungah khan um peng ko. ¹⁴ Kan chungah a ummi Thiang Thlarau ṭhawnnak thawngin na kut chungah chiahmi thil ṭha kha him tein keng hna. ¹⁵ Asia ram chung i a ummi nih an dihlak in an ka zamtak ti kha na hngalh, cu hna lakah cun Figelas le Hermogenes zong an i tel. ¹⁶ Onesiforas nih voi tampi ka lung a ka lawmhter caah Pathian nih a innchungkhar cu zaangfahnak pe ko hna seh. Thong ka tlak kha a ka zahpi lo, ¹⁷ Rom khua a phak cangka, a ka hmuh hlan lo a ka kawl. ¹⁸ Khi Ni ah Bawipa sin in zaangfahnak a hmuh nakhnga a caah thla ka cam. Cun ka caah zeitluk in dah Efesa khua ah rian a ṭuan ti kha na hngalh.

¹ Ka fapa, Khrih Jesuh he kan i pehtlaihnak thawngin kan hmuhmi Pathian vel nih ṭhawnnak in pek ko seh. ² Tehte tampi hna theih ah ka chimmi bia kha i lak law, midang a cawnpiak kho ve dingmi, na zumhmi hna kha va kenter hna. ³ Khrih Jesuh ralkap zumh awk tlak bantukin sifah innak ah khan ing ve ko. ⁴ Ralkap a ṭuan liomi nih cun a cung bawi lungton kha a duh caah ralkap a si lomi hna rian ah khan aa sawhkalh len lo. ⁵ Tlik zuamnak ah a tlimipa nih tlik zuamnak phung kha a zulh lo ahcun laksawng kha a hmu kho lo. ⁶ Rian a hran a thattu lothlopa nih khan, rawl cu ṭuan a cut tikah, a hmuh awk a simi cu a hmuh hmasa bik awk a si. ⁷ Bawipa nih zeizong vialte hngalh khawhnak an pek lai caah ka chimmi hi ruat hna hmanh. ⁸ Thawngṭha ka chimmi chungah a um bang khan, thihnak in thawhtermi Jesuh Khrih, David tefa a simi kha, philh hlah. ⁹ Thawngṭha ka chim ruangah temhinnak ka huah i misual bantukin thir cikcin in an ka khih. Sihmanhsehlaw Pathian bia cu thir cikcin in hren khawh a si lo. ¹⁰ Cun hi vialte ka innak hi Pathian nih a thimmi hna zawn ka ruah caah a si i Khrih Jesuh thawngin hmuhmi a sunglawimi le zungzal in a hmunmi khamhnak kha hmu hna seh ti ka duh caah a si. ¹¹ Hi a tanglei bia hi ahmaanmi bia a si: "Amah he kan thih ṭi ahcun, amah he a nun zong kan nung ṭi lai. ¹² Kan in khawh peng ahcun, a uk zong amah he kan uk ṭi lai. Kan hlawt ahcun, amah zong nih a kan hlawt ve lai. ¹³ Zumh awk tlak loin kan um hmanh ah, anih cu zumh awk tlak a si ko. Zeicahtiah amah le amah cu aa hleng kho lo." ¹⁴ Biafang i al lengmang kha ngol u, tiah Pathian hmaiah ralrinnak pe hna law, na mi pawl kha, cucu chim ṭhan lengmang hna. Cu nih cun ṭhatnak zeihmanh a chuahpi lo, a ngaitu kha a hrawh lam a hrawh men hna. ¹⁵ A rian a zahpi lomi, Pathian biatak hmaan tein mi a cawnpiaktu saya bantukin Pathian hnatlaknak kha na hmuh khawh nakhnga fak piin i zuam. ¹⁶ Pakpalawng a simi le hruhnak men a simi, i al lengmangnak kha hrial i zuam. Cu nih cun Pathian he lam a hlatter chinchin hna. ¹⁷ Annih cawnpiaknak cu hma a porter chintu men bantuk a si. Hi cawnpiaktu hna lak i pahnih cu Hymenaias le Felitas an si. ¹⁸ Biatak lam khan an pial i, "Thawhṭhannak cu atu ah hin a si diam cang," tiin Khrihfa mi a cheu kha an lung an tuai hna. ¹⁹ Sihmanhsehlaw Pathian nih a bunhmi hram fek cu hninh khawh a si lo, cu hram cungah cun "Bawipa nih amah ta a simi cu a hngalh ko hna," ti le, "Bawipa ta ka si a timi paoh nih cun palhnak a tuahmi kha a ngol awk a si," ti kha an i ṭial. ²⁰ Inn nganpi chungah hin umkheng a phunphun an um tawn, a cheu cu ngun in sermi an si, a cheu cu thing in sermi an si i a cheu cu tlak in sermi an si; cun a cheu cu caan sung khun i hman awk caah an si i a cheu cu a menmen i hman awk caah an si. ²¹ Ahohmanh a man a sungmi le a thiangmi thil lak i aa tel kho ve ding, inn Bawi nih a hman awkah aa tlakmi si ve dingah cun, cawnpiaktu ṭhalo vialte kha a kal tak hna awk a si; cun hmaizah awk tlak a simi rian zei rian paoh caah khan aa tlakmi a si lai. ²² Tlanval lio pumsa duhnak kha zamtak i zuam hna law, kan bawm ko tiah Bawipa sinah thla a cam lengmangmi hna he dinnak le zumhnak le dawtnak le daihnak kha kawl i zuam u. ²³ Bia i al lengmangnak, hruhnak men le zeihmanh hngalh set ṭung loin i al lengmangnak hi hrial i zuam, zeicahtiah hi bantuk bia i al lengmangnak cu i siknak ah a dong ti kha na hngalh. ²⁴ Bawipa sal cu, aa si lengmangmi a si awk a si lo. Mi vialte cungah zaangfahnak a ngeimi, lung a saumi cawnpiaktu ṭha, ²⁵ amah a dohtu hna a chimhhrin tik hna i nem tein a chimhringmi a si awk a si. Annih cu Pathian nih an lung a thlen khawh ko hna i biatak kha a hngalhter ṭhan khawh ko hna. ²⁶ Cun an lung a hung fim lai i amah duhnak tuah awkah a foih i sal ah a hrengtu hna Khuachia rap khan an luat lai.

¹ Ni hmanung bik kha an phak tikah harnak caan a si lai ti kha philh hlah. ² Mi cu anmah zawn lawng aa ruatmi, a hak a kaumi, aa porhlawmi le lung a puammi an si lai; an nu le an pa kha an zawmhtaih hna lai i an nawl an ngai duh hna lai lo; lawmh a hngal lomi le biaknak zeihmanh i a rel lomi an si lai; ³ zaangfahnak an ngei lai lo, mi zawnruahnak an ngei lai lo, mi thangchiat duhmi an si lai, ruru-hranghrang in khua a sami an si lai i ṭih a nungmi an si lai; ṭhatnak kha an huat lai; ⁴ hawi rawi a hmangmi an si lai, duhpaoh khuasa an si lai i porhlawtnak in an khat lai; Pathian nakin nuamhnak kha an duh deuh lai; ⁵ kan biaknak phung hi a lenglei in an i tlaih lai, sihmanhsehlaw a chung i a ummi ṭhawnnak taktak kha cu an duh lai lo, cu hna cu hrial i zuam hna. ⁶ Hi hna pawl a cheukhat cu mi inn chungah khan an va lut i nu derthawm pawl, an sual thilrit nih a rak nenhmi hna le an duhnak nih a kenkip i a rak vahpi lengmangmi hna kha an va lak khawh hna, ⁷ hi nu hna hi cawn le hngalh a duh zungzal ve ṭung, biatak a hngal kho bal ṭung lomi an si. ⁸ Jannes le Jambres nih Moses an rak doh bantuk khan hi mi hna hi biatak a dotu an si; annih cu an ruahnak ṭha tein rian a ṭuan ti lomi, zumhnak lei i zeihmanh a si ti lomi an si. ⁹ Sihmanhsehlaw an hlawhtlin chung cu tawite lawng a si ko lai. Moses a rak dohtu hna Jannes le Jambres an hruh a langh zau bantuk khan, an hruhnak cu mi nih an hmuh zau ko lai. ¹⁰ Sihmanhsehlaw nang nih cun kaan cawnpiaknak le ka ziaza le ka nunnak i kaa tinhmi kha na zulh hna; zumhnak ka ngeihmi le ka lungsaunak le ka dawtnak ngeihmi le ka in khawhnak ngeihmi le ¹¹ hremnak ka huahmi le fahnak ka inmi kha na hmuh hna. Antiok, Ikonium le Listra i hremnak fakpi ka inmi vialte kha na hngalh dih hna. Sihmanhsehlaw Bawipa nih cu vialte chung cun a ka chanh. ¹² Khrih Jesuh he i pehtlai i Pathian nunning in nun a duhmi paoh cu hremnak an ing ko lai; ¹³ sihmanhsehlaw miṭhalo le chungthu lengnal pawl cu a ṭhalo chin lengmang khan an um lai i midang kha an hlen lengmang hna lai i anmah le anmah zong kha an i hleng lengmang lai. ¹⁴ Sihmanhsehlaw nang cu biatak kan cawnpiakmi ah khan dir law fek tein zum peng ko. Nangmah cawnpiaktu saya cu ahodah kan si kha na kan hngalh i ¹⁵ na ngakchiat lio tein Cathiang kha a hngalmi na si; na hngalh bangin cu Cathiang hna nih cun Khrih Jesuh zumhnak thawngin hmuhmi khamhnak i an kalpi khotu fimnak kha an pek. ¹⁶ Cathiang hi a dihlak in Pathian thaw chuahhnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a ṭhahnemmi a si. ¹⁷ Cucaah cun Pathian rianṭuantu a simi cu zeizong zeizong ah tlamtlingmi a si awk le thil ṭha phun zakip tuah khawh awkah thilthuam tling tein a ngeimi a si awk a si.

¹ Pathian hmai le, mi vialte a nungmi he a thimi he, bia a ceihtu ding Khrih Jesuh hmaiah, fak piin kan nawl; cun a rat lainak le a pennak in kan nawl fawn; ² phung kha chim hna, a caan a rem zongah a rem lo zongah chim hna; al a herh ahcun al hna, chimhhrin a herh ahcun chimhring hna, a nawl in nawl a herh ahcun nawl hna law lungsau thinfual in cawnpiak hna. ³ Cawnpiaknak a hmaanmi kha mi nih an ngaih duh lo i anmah duhnak tu kha an zulh i anmah theih duhmi chimtu dingah cawnpiaktu an lak hna lai caan kha a phan lai. ⁴ Biatak kha an kaltak lai i minung tuanbia tu kha ngaih an duh deuh lai. ⁵ Sihmanhsehlaw nang cu zeitik caan paoh ah daite le khualu khuataw khak tein um ko; harnak kha in i zuam, Thawngṭha karhter kha fak piin i zuam, Pathian nih an kawh chan rian vialte kha ṭuan. ⁶ Kei tu cu raithawinak biakṭheng cung i an ka chiah caan a phan cang; hi vawlei cung nunnak hi ka chuahtak lai caan a phan cang. ⁷ Tlik zuamnak ah khan ka tha a dihumnak in ka chuah cang, a dongh tiang khitkhet in ka tli cang, zumhnak kha fek tein kaa tlaih zungzal. ⁸ Atu cu teinak laksawng nih khan a ka hngah ko cang, cu laksawng cu ka Bawipa, dinnak Bawi nih, cu Ni i a ka pek laimi dinnak suiluchin cu a si — keimah lawng cu a ka pekmi ka si lai lo, amah a langh lainak dawtnak in a hngaktu vialte zong kha a pek ve hna lai. ⁹ Khulrang in ka sinah ra law ka duh. ¹⁰ Demas cu tu chan vawlei he an i duh i a ka zamtak ai; Thesalonika khua ah a kal cang. Kresen cu Galati ram ah a kal i Titas cu Dalmatia ram ah a kal. ¹¹ Luka lawng ka sinah a um. Marka kha rak i ratpi, zeicahtiah ka rianṭuannak ah misantlai ngai a si. ¹² Taikhikas kha Efesa khua ah ka kalter. ¹³ Cun na rat tikah Troas khua i Karpas inn i ka chiahtakmi ka angkileng kha rak phor te, cun cauk zong kha rak phor hna law saphaw cauk ko kha rak philh sual hna hlah. ¹⁴ Dar soser Alekzandar nih khan ka cungah harnak nganpi a tuah. Bawipa nih a rianṭuanning in a cham ve te ko lai. ¹⁵ Cun nangmah zong amah cu i ralring, zeicahtiah kan bia kha fak piin a do zungzalmi a si. ¹⁶ Biaceihnak i ka chuah hmasa bik ah cun ahohmanh nih an ka dirpi lo; an dihlak in an ka zamtak. Pathian nih sual ah relpiak sawh hna hlah seh. ¹⁷ Sihmanhsehlaw Bawipa nih a ka umpi i Jentail mi vialte nih an theih khawh nakhnga Thawngṭha cu tling cikcek tein chim khawhnak thazang a ka pek; cun chiandeih kaa chung khan a ka chanh. ¹⁸ Cun Bawipa nih ṭhat lonak vialte chungin a ka chuah lai i him tein a vancung Pennak ah cun a ka luhpi lai. Amah cu zungzal in zungzal tiang thangṭhat si ko seh. Amen. ¹⁹ Prisilla le Akuila le Onesiforas innchungkhar kha an kut ka tlaih hna. ²⁰ Erastas cu Korin khua ah a um i Trofimas cu a zawt caah Miletas ah ka kaltak. ²¹ Khuasik tlak hlanah rat rak i zuam. Zubulas, Pudens, Linas le Klaudia nih an in biakchawnhnak na kut an in tlaih i a dang kan unau pawl zong nih an in tlaih ve. ²² Bawipa cu na thlarau sinah um ko seh. Nan dihlak sinah Pathian vel cu um ko seh.